MOSIS BE KAWƆL NASOPO NƐ BAA TRE
NƆMBƐS
NA
1B ka fara ŋ karga Israɛlebi be asheŋ
1Israɛlebi na ka lar Ijipt be efuli so na be kafɛ nyɔsopo to be kufɔl nyɔsopo be kachɛ juŋkparso na, nɛ Enyɛnpe Ebɔrɛ malga Mosis kutɔ ashi Enyɛnpe be wajɛbu na to ashi Sainai be keshishɛrsawule na so ŋ kaŋɛ le: 2“Fo nɛ Ɛɛrɔn e karga Israɛlebi na kikɛ, mbuna mbuna nɛ kanaŋ kanaŋ so nseŋ sibɛ benyɛn na kikɛ be atre. 3Men sibɛ bekama nɛ b fo nfɛ adunyɔ ŋko m baŋ so nsaa beeŋ tiŋ ŋ kɔ kena na kikɛ be atre. 4Men shin nɛ yiri kikɛ to be enimu koŋwule e chɛ menyi to.” 5Eyiri na to be benimu nɛ b lara fanɛ b chɛ to n shuŋ loŋ be kushuŋ na nde: Shedur pibinyɛn Elizur shi Ruben be yiri to 6nɛ Zurishaddai pibinyɛn Shelumiɛl shi Simiɔn be yiri to 7nɛ Aminadab pibinyɛn Naashɔn shi Juda be yiri to 8nɛ Zuwa pibinyɛn Nataniɛl shi Isaaka be yiri to 9nɛ Hɛlɔn pibinyɛn Eliab shi Zebulun be yiri to 10nɛ Amihuud pibinyɛn Eliashama shi Efreim be yiri to nɛ Pɛdazur pibinyɛn Gamaliɛl shi Manase be yiri to 11nɛ Gidiɔni pibinyɛn Abidan shi Bɛnjamin be yiri to 12nɛ Amishadai pibinyɛn Ahieza shi Dan be yiri to 13nɛ Okran pibinyɛn Pagiɛl shi Ashɛr be yiri to 14nɛ Duwɛl pibinyɛn Elisaaf shi Gad be yiri to 15nɛ Enaan pibinyɛn Ahira shi Naftali be yiri to. 16Le be basa ere nɛ bumo gbagba be basa lara fanɛ bumo be eyiri to be benimu ashi Israɛl be efuli so.
17Kufɔl nyɔsopo na be kachɛ juŋkparso nɛ le be bejuŋkparpo kudu anyɔ ere chɛ Mosis nɛ Ɛɛrɔn to 18n tre Israɛlebi kikɛ n shɛr n shin nɛ b ŋini mbuna mbuna nɛ nnaŋ nɛ b shi to nɛ b sibɛ benyɛn nɛ b fo nfɛ adunyɔ ŋko m baŋ so na kikɛ be atre kukoko to. 19Kananɛ Enyɛnpe Ebɔrɛ kaŋɛ Mosis ashi Sainai be keshishɛrsawule so na gbagba chap nɛ Mosis daŋ wora. 20-46B daŋ sibɛ benyɛn nɛ b fo nfɛ adunyɔ ŋko m baŋ so nsaa beeŋ tiŋ ŋ kɔ fo kena na kikɛ be atre mbuna mbuna nɛ kanaŋ kanaŋ so nna. Jeekɔb pibinyɛn nimuso Ruben be yiri to nɛ b daŋ fara a karga: Ruben be yiri to ebi daa la basa ŋgboŋ adena nɛ ashe nɛ alfa anu nna. Nɛ Simiɔn be yiri to ebi daa la basa ŋgboŋ adunu nɛ akpanu nɛ alfa asa. Nɛ Gad be yiri to ebi daa la basa ŋgboŋ adena nɛ anu nɛ alfa ashe nɛ adunu. Nɛ Juda be yiri to ebi daa la basa ŋgboŋ adushunu nɛ ana nɛ alfa ashe. Nɛ Isaaka be yiri to ebi daa la basa ŋgboŋ adunu nɛ ana nɛ alfa ana. Nɛ Zebulun be yiri to ebi daa la basa ŋgboŋ adunu nɛ ashunu nɛ alfa ana. Nɛ Efreim be yiri to ebi daa la basa ŋgboŋ adena nɛ alfa anu. Nɛ Manase be yiri to ebi daa la basa ŋgboŋ adesa nɛ anyɔ nɛ alfa anyɔ. Nɛ Bɛnjamin be yiri to ebi daa la basa ŋgboŋ adesa nɛ anu nɛ alfa ana. Nɛ Dan be yiri to ebi daa la basa ŋgboŋ adeshe nɛ anyɔ nɛ alfa ashunu. Nɛ Ashɛr be yiri to ebi daa la basa ŋgboŋ adena nɛ kako nɛ alfa anu. Nɛ Naftali be yiri to ebi daa la basa ŋgboŋ adunu nɛ asa nɛ alfa ana. Benyɛn nɛ Mosis nɛ Ɛɛrɔn nɛ Israɛl be bejuŋkparpo kudu anyɔ na daŋ karga na kikɛ daa la basa ŋgboŋ alfa ashe nɛ asa nɛ alfa anu nɛ adunu nna.
47Ama b daa maŋ sibɛ Livaiebi na bre be atre, 48ŋkpal manɛ so, le nɛ Enyɛnpe Ebɔrɛ daŋ kaŋɛ Mosis: 49“Sa maŋ karga Livaiebi nɛ b fo kena be kekɔ na bre n ti Israɛlebi na so. 50Shin nɛ Livaiebi na e baa keni Enyɛnpe be wajɛbu na nɛ asɔ nɛ a wɔ kumo to kikɛ so. Bumo e naŋ baa sulɔ kumo nɛ asɔ nɛ a wɔ kumo to na kikɛ, nsaa keni kumo so, a yuu kumo nsaa yuu bumo be ewajɛbu a chena a kulti kumo saŋkama nɛ b wora keeyito popɔr. 51Saŋkama nɛ men baŋ chɛrga echenakpa, Livaiebi na e naaŋ baa bɔɔ Enyɛnpe be wajɛbu na. Bumo koŋwule na malɛ e naaŋ baa yuu kumo kaplɛkama nɛ men ya chena. Esa pɔtɛ kama malɛ nɛ e yili n taga Enyɛnpe be wajɛbu na to b mɔ mo. 52Israɛlebi nɛ b ka na malɛ e chena ntuŋ ntuŋ so n ta bumo gbagba be etuuta n dulgi bumo be echenakpa. 53Ama Livaiebi na bre beeŋ yuu bumo be ewajɛbuana n chena ŋ kulti Enyɛnpe be wajɛbu na a kuŋ kumo, saŋɛ na so, esa kama maaŋ taga kumo to n shin nɛ n nya agbo ga n wɔtɔ Israɛlebi kikɛ.” 54Israɛlebi na daŋ wora kusɔ kama nɛ Enyɛnpe Ebɔrɛ daŋ kaŋɛ Mosis na nna.
2Kananɛ Israɛlebi na chena yiri yiri so be asheŋ
1Le nɛ Enyɛnpe Ebɔrɛ daŋ kaŋɛ Mosis nɛ Ɛɛrɔn: 2“A daga Israɛlebi na ka feŋ n chena kanaŋ kanaŋ so ntuŋ so ŋ kulti nshɛr be wajɛbu na nɛ kanaŋ kikɛ e yuu bumo be tuta bumo be keeyi to.”
3-4Juda be kanaŋ to ebi nɛ bumo be ejuŋkparpo e la Aminadab pibinyɛn Naashɔn, nɛ e bee juŋkpar bumo be kanaŋ to be benapo ŋgboŋ adushunu nɛ ana nɛ alfa ashe na, beeŋ yuu bumo be tuta n chena Enyɛnpe be wajɛbu na be epeŋilarkpa be kaba so. 5-6Nɛ Isaaka be kanaŋ to ebi nɛ Zuwa pibinyɛn Nataniɛl bee juŋkpar bumo be kanaŋ to be benapo ŋgboŋ adunu nɛ ana nɛ alfa ana na, e chena m bɛ bumo so. 7-8Nɛ Zebulun be kanaŋ to ebi nɛ Hɛlɔn pibinyɛn Eliab bee juŋkpar bumo be benapo ŋgboŋ adunu nɛ ashunu nɛ alfa ana na, malɛ e chena m bɛ bumo so. 9Juda nɛ nnaŋ nɛ b chena epeŋilarkpa be kaba so nɛ bumo be benapo kikɛ wɔ ŋgboŋ kalfa nɛ aduburwa nɛ ashe nɛ alfa ana, e naaŋ baa juŋkpar bumo.
10-11Kumo be kaman nɛ Ruben be kanaŋ to ebi nɛ Shedur pibinyɛn Elizur bee juŋkpar bumo be benapo ŋgboŋ adena nɛ ashe nɛ alfa anu na, e yuu bumo be tuta n chena nshɛr be wajɛbu na be kelargato be kaseto be kaba so. 12-13Nɛ Simiɔn be kanaŋ to ebi nɛ Zurishaddai pibinyɛn Shelumiɛl bee juŋkpar bumo be benapo ŋgboŋ adunu nɛ akpanu nɛ alfa asa na, e chena m bɛ so. 14-15Nɛ Gad be kanaŋ to ebi nɛ Duwɛl pibinyɛn Eliazaf bee juŋkpar bumo be benapo ŋgboŋ adena nɛ anu nɛ alfa ashe nɛ adunu na, malɛ e chena m bɛ so. 16Ruben nɛ nnaŋ nɛ b chena kelargato be kaseto be kaba so nɛ bumo be benapo kikɛ wɔ ŋgboŋ kalfa nɛ adunu nɛ kako nɛ alfa ana nɛ adunu na, e naaŋ baa la katuŋ nyɔsopo m bɛ so.
17Kumo be kaman nɛ Livaiebi na malɛ e sulɔ nshɛr be wajɛbu na nseŋ keta bumo be tuta m bɛ nnaŋ nɛ Ruben bee juŋkpar na so fanɛ kananɛ b chena kebɛso kebɛso na.
18-19Nɛ Efreim be kanaŋ to ebi nɛ Amihuud pibinyɛn Elishama bee juŋkpar bumo be benapo ŋgboŋ adena nɛ alfa anu na, malɛ e yuu bumo be tuta n chena epeŋitɔrkpa be kaba so. 20-21Nɛ Manase be kanaŋ to ebi nɛ Pɛdazur pibinyɛn Gamaliɛl bee juŋkpar bumo be benapo ŋgboŋ adesa nɛ anyɔ nɛ alfa anyɔ na, malɛ e chena m bɛ so. 22-23Nɛ Bɛnjamin be kanaŋ to ebi nɛ Gidiɔni pibinyɛn Abidan bee juŋkpar bumo be benapo ŋgboŋ adesa nɛ anu nɛ alfa ana na malɛ gba e chena m bɛ so. 24Efreim nɛ nnaŋ nɛ b chena epeŋitɔrkpa be kaba so nɛ bumo be benapo kikɛ wɔ ŋgboŋ kalfa nɛ aburwa nɛ kalfa na e naaŋ baa la katuŋ sasopo m bɛ so.
25-26Nɛ Dan be kanaŋ to ebi nɛ Amishadai pibinyɛn, Ahieza bee juŋkpar bumo be benapo ŋgboŋ adeshe nɛ anyɔ nɛ alfa ashunu na e yuu bumo be tuta n chena kelargato be esoso be kaba so. 27-28Nɛ Ashɛr be kanaŋ to ebi nɛ Okran pibinyɛn Pagiɛl bee juŋkpar bumo be benapo ŋgboŋ adena nɛ kako nɛ alfa anu na, e chena m bɛ so. 29-30Nɛ Naftali be kanaŋ to ebi nɛ Enaan pibinyɛn Ahira bee juŋkpar bumo be benapo ŋgboŋ adunu nɛ asa nɛ alfa ana na, e chena m bɛ so. 31Dan nɛ nnaŋ nɛ b chena kelargato be esoso be kaba so nɛ bumo be benapo kikɛ wɔ ŋgboŋ kalfa nɛ adunu nɛ ashunu nɛ alfa ashe na, e naŋ baa la katuŋ lalalogesopo m bɛ so.
32Fo baŋ ta Israɛlebi be benyɛn nɛ b fo kena to be keyɔ na kikɛ m ber abar so mbuna mbuna nɛ kananɛ b chena ntuŋso ntuŋso na kikɛ, b daa wɔ basa ŋgboŋ alfa ashe nɛ asa nɛ alfa anu nɛ adunu. 33Livaiebi na nawule nɛ b daa maŋ karga n ti Israɛlebi na so ŋkpal kusɔ nɛ Enyɛnpe Ebɔrɛ kaŋɛ Mosis na so.
34Kusɔ nɛ Enyɛnpe Ebɔrɛ daŋ kaŋɛ Mosis na gbagba chap nɛ Israɛlebi na daŋ wora. Kabuna kama to ebi daŋ wora bumo be echenakpa nna n chena bumo be eyiri to be tuta ase. Bumo alɛ daa bɛ abar so mbuna mbuna nɛ nnaŋ so nna a nite.
3Ɛɛrɔn be mbinyɛnsobi be asheŋ
1Jemanɛ nɛ Enyɛnpe Ebɔrɛ daŋ malga Mosis kutɔ ashi kebeegboŋ nɛ baa tre Sainai na so na, 2Ɛɛrɔn daa kɔ mbinyɛnsobi ana nna. Nadab e daa la enimuso, n ta Abihu nɛ Eliaza nɛ Itama m bɛ so. 3Bumo be amu so nɛ b daŋ chulgi ŋku n wurgeso n lara bumo n yili fanɛ bɔrɛmatapoana nna. 4Ama Nadab nɛ Abihu bre daŋ wu, saŋɛ nɛ b daŋ ta edɛ nɛ a maŋ daga n chɔ sarga nɛ b lara n sa Enyɛnpe Ebɔrɛ ashi Sainai be keshishɛrsawule na so nna. Bumo alɛ daa maŋ kɔ mbinyɛnsobi. Amoso Eliaza nɛ Itama nawule e daa la bɔrɛmatapoana jemanɛ nɛ bumo tuto, Ɛɛrɔn daa wɔ ŋkpa to na kikɛ.
Livaiebi be kushuŋ be asheŋ
5Ndoŋ nna nɛ Enyɛnpe Ebɔrɛ na kaŋɛ Mosis le: 6“Lara Livai be yiri na nɛ b baa chɛ bɔrɛmatapo Ɛɛrɔn nɛ mbe mbia to a shuŋ kabɔrɛmata be kushuŋ. 7Bumo e naaŋ baa chɛ bɔrɛmatapoana na to a shuŋ Israɛlebi na ashi Enyɛnpe be wajɛbu na to. 8Livaiebi na e naaŋ baa keni Enyɛnpe be wajɛbu na nɛ asɔ nɛ a wɔ kumo to kikɛ so a sa Israɛlebi na kikɛ. 9Bumo koŋwule na malɛ e naaŋ baa chɛ Ɛɛrɔn nɛ mbe mbinyɛnsobi to a shuŋ nshɛr be wajɛbu na to. 10Lara Ɛɛrɔn nɛ mbe bibinyɛn nɛ b baa la bɔrɛmatapoana. Esa pɔtɛ kama nɛ e pɛl n shuŋ bɔrɛmatapo be kushuŋ b mɔ mo.”
11Kede be kaman nɛ Enyɛnpe Ebɔrɛ naŋ kaŋɛ Mosis le: 12-13“Ŋ ka daŋ mɔ Ijiptebi na be ewurkoŋnyɛn na, n daŋ yili kumo nna fanɛ Israɛlebi be ewurkoŋnyɛn kikɛ nɛ bumo be asɔbɔya be ewurkoŋnyɛn la meya nna. Ama naniere bre Livaiebi na nɛ n lara fanɛ b tal Israɛlebi na be ewurkoŋnyɛn to. Amoso b la meya nna. Ma e la Enyɛnpe Ebɔrɛ na.”
B ka karga Livaiebi na be asheŋ
14Le nɛ Enyɛnpe Ebɔrɛ naŋ kaŋɛ Mosis ashi Sainai be keshishɛrsawule na so: 15“Karga Livaiebi na be benyɛn kikɛ nɛ b fo kufɔl ŋko m baŋ so mbuna mbuna so nɛ kanaŋ kanaŋ so.” 16Nɛ Mosis wora loŋ. 17Livai daa kɔ mbinyɛnsobi asa nna. Bumo e daa la Gɛshɔn nɛ Kohaf nɛ Mɛrari. Bumo e daŋ ki bumo be mbuna be benimu. 18Gɛshɔn be mbinyɛnsobi e daa la Libni nɛ Shimei. 19Kohaf malɛ be mbinyɛnsobi e daa la Amram nɛ Izha nɛ Hibrɔn nɛ Uziɛl. 20Nɛ Mɛrari malɛ be mbinyɛnsobi daa la Maali nɛ Muushi. Bede e daa la Livai be mbinyɛnsobi nɛ mo nanabinyɛnsoana. Bumo alɛ e daŋ ba ki Livai be kaman to ebi.
21Libni nɛ Shimei be nnaŋ e la Gɛshɔn be kabuna ebi na. 22Benyɛn nɛ b fo kufɔl ŋko m baŋ so nɛ b daŋ karga ashi Gɛshɔn be kabuna kikɛ, daa wɔ ŋgboŋ ashunu nɛ alfa anu. 23Gɛshɔn be kabuna ebi na beeŋ wora bumo be echenakpa ashi nshɛr be wajɛbu na be epeŋitɔrkpa be kaba so na 24nɛ Laɛl pibinyɛn Eliazaf e baa la bumo be enimu. 25-26Bumo be kushuŋ e la kebaakeni Enyɛnpe be wajɛbu na gbagba so nɛ asɔ nɛ baa ta a yuu kumo nɛ amo nɛ baa ta a yuu a kulti kumo nɛ kumo be epatisa nɛ efɔlana nɛ asɔ kama nɛ a ti amo so na.
27Amramebi nɛ Izaaebi nɛ Hibrɔnebi nɛ Uziɛlebi e la Kohaf be kabuna ebi na. 28Benyɛn nɛ b fo kufɔl ŋko m baŋ so nɛ b daŋ karga ashi Kohaf be kabuna daa wɔ benyɛn ŋgboŋ aburwa nɛ alfa ashe. Kohafebi na e daa keni Enyɛnpe be wajɛbu na so. 29Kohaf be kabuna ebi na beeŋ wora bumo be echenakpa ashi wajɛbu na be kelargato be kaseto be kaba so. 30Uziɛl pibinyɛn Elizafan e daa la bumo be enimu. 31Bumo e naa keni ŋkre be deka nɛ k wɔ acheembiana to be kakpa cheembi na so, nɛ teebɔl na nɛ kefitilatɔl na nɛ ebɔrɛsureana na nɛ ntishaŋ nɛ bɔrɛmatapoana na bee ta a wora asheŋ ashi Enyɛnpe be wajɛbu na to nɛ patisa nɛ k wɔ acheembiana to be kakpa cheembi na be kabuna to na kikɛ so. Bumo e naa bela le be asɔ ere a yili mboŋ nseŋ naa bela amo ashi to.
32Bɔrɛmatapo nimuso Ɛɛrɔn pibinyɛn Eliaza e daa la Livaiebi na be enimu. Mo nɛ b daŋ lara fanɛ e baa la basa nɛ baa shuŋ Enyɛnpe be wajɛbu na to na be ejuŋkparpo.
33Maali nɛ Muushi la nnaŋ nɛ ashi Mɛrari be kabuna ebi nna. 34Bumo be benyɛn nɛ b fo kufɔl ŋko m baŋ so nɛ b daŋ karga daa wɔ ŋgboŋ ashe nɛ alfa anyɔ. 35Mɛrari be kabuna ebi na beeŋ wora bumo be echenakpa ashi wajɛbu na be kelargato be esoso be kaba so nɛ Abihail pibinyɛn Zuriɛl e baa la kabuna na be enimu. 36Bumo e naaŋ baa keni wajɛbu na be ndibi yuuso nɛ amo be adeŋiso nɛ amo be atɔl nɛ amo be asɔ nɛ a ti amo so na kikɛ so. Bumo e daa wora wajɛbu na be keyu be kushuŋ kikɛ. 37Bumo koŋwule na e daa keni Enyɛnpe be wajɛbu na be kelɔnɛ be ndibi yuuso nɛ amo be atɔl nɛ amo be ayir nɛ efɔlana kikɛ so.
38Mosis nɛ Ɛɛrɔn nɛ Ɛɛrɔn be mbia beeŋ wora bumo be echenakpa ashi wajɛbu na be anishito a laŋɛ epeŋilarkpa be kaba so. Bumo e naaŋ baa juŋkpar Israɛlebi na nɛ b baa bunyaŋ Enyɛnpe Ebɔrɛ. Esa pɔtɛ kama malɛ nɛ e pɛl n sɔ Mosis ŋko Ɛɛrɔn be kushuŋ a shuŋ, b mɔ mo. 39Benyɛn nɛ b fo kufɔl ŋko m baŋ so nɛ Enyɛnpe Ebɔrɛ daŋ kaŋɛ Mosis nɛ Ɛɛrɔn fanɛ b karga ashi Livai be kabuna na kikɛ daa wɔ basa ŋgboŋ adunyɔ nɛ anyɔ.
Livaiebi na ka yili ewurkoŋnyɛn be katelamu to be asheŋ
40Nɛ Enyɛnpe Ebɔrɛ naŋ kaŋɛ Mosis le: “Sibɛ Israɛlebi be ewurkoŋnyɛn nɛ b fo kufɔl ŋko m baŋ so be atre n wɔtɔ kawɔl to. 41Shin nɛ Livaiebi na e yili Israɛlebi na be ewurkoŋnyɛn be katelamu to n shin nɛ Livaiebi na be asɔbɔya e yili Israɛlebi na be asɔbɔya be ewurkoŋ be katelamu to n sa ma. Ŋkpal manɛ so, b la meya nna.” 42Ndoŋ nna nɛ Mosis wora Enyɛnpe Ebɔrɛ kasonu nseŋ karga ewurkoŋnyɛn na kikɛ n sibɛ bumo be atre n wɔtɔ kawɔl to. 43Ewurkoŋnyɛn nɛ b fo kufɔl ŋko m baŋ so nɛ b daŋ sibɛ bumo be atre na kikɛ daa wɔ ŋgboŋ adunyɔ nɛ anyɔ nɛ alfa anyɔ nɛ adushunu nɛ asa.
44Nɛ Enyɛnpe Ebɔrɛ naŋ kaŋɛ Mosis le: 45“Shin nɛ Livaiebi na e yili Israɛlebi be ewurkoŋnyɛn be katelamu to nɛ Livaiebi na be asɔbɔya malɛ e tal Israɛlebi na be asɔbɔya be ewurkoŋ to. 46Ŋkpal Israɛlebi be ewurkoŋnyɛn ka shi a chɔ Livaiebi kikɛ na so, a daga b ka tɔ ewurkoŋnyɛn alfa anyɔ nɛ adushunu nɛ asa nɛ b chɔ so na ashi ma kutɔ. 47Shin nɛ b tɔ bumo be ekama gbiti be ndarbi anu fanɛ kananɛ baa karga amansherbi wajɛbu na to na. 48A daga fanɛ b ta le be amansherbi ere n sa Ɛɛrɔn nɛ mbe mbinyɛnsobi.” 49Ndoŋ nna nɛ Mosis sɔ ewurkoŋnyɛn alfa anyɔ nɛ adushunu nɛ asa nɛ b chɔ so na be amansherbi. 50Amansherbi na kikɛ daa wɔ gbiti be ndarbi kagboŋ nɛ alfa asa nɛ adeshe nɛ anu. 51Mosis daŋ ta amo nna n sa Ɛɛrɔn nɛ mbe mbinyɛnsobi fanɛ kananɛ Enyɛnpe Ebɔrɛ kaŋɛ mo na.
4Kohaf be kabuna ebi nɛ b ti Livaiebi so be kushuŋ be asheŋ
1Enyɛnpe Ebɔrɛ daŋ kaŋɛ Mosis nɛ Ɛɛrɔn nna fanɛ 2b karga Livaiebi nɛ b shi Kohaf be kabuna na, kanaŋ kanaŋ so, 3nseŋ sibɛ benyɛn nɛ b fo yili nfɛ adesa n ya fo nfɛ adunu nsaa beeŋ tiŋ n shuŋ Enyɛnpe Ebɔrɛ be wajɛbu na to na be atre n wɔtɔ kawɔl to. 4Kohafebi na be kushuŋ e la kebaakeni asɔ cheembi nɛ a wɔ Enyɛnpe be wajɛbu na to so.
5Enyɛnpe Ebɔrɛ daŋ kaŋɛ Mosis nna fanɛ nɛ b kaa shin nɛ b kaa bumo be keeyi to, b shin nɛ Ɛɛrɔn nɛ mbe mbinyɛnsobi e luri n saŋɛ patisa nɛ k kuŋ ŋkre be deka nɛ k wɔ kakpa cheembi na nɛ wajɛbu to na nseŋ ta kumo m buu deka na so. 6Kumo be kaman nɛ b ta kusɔbɔya be kawɔl lela m parga m buu kumo so, nseŋ parga wajɛ nɛ k la buru gbagba n deŋi so n ti so pɔɛŋ nseŋ ta ndibi nɛ baa pɛ to a sulɔ kumo na n yisi n wɔtɔ amo be kakpa.
7Kede be kaman nɛ Ɛɛrɔn nɛ mbe mbinyɛnsobi na e naŋ ta wajɛ nɛ k la buru m parga m buu Enyɛnpe Ebɔrɛ be teebɔl nɛ baa ta bodobodo cheembi nɛ duwu be ntishaŋ, nɛ ntishaŋ nɛ baa ta sarga be asɔ a wɔtɔ na, nɛ ekɔlba nɛ baa ta sarga be yabra belbelso a wɔtɔ a bɛ so na so. A daga fanɛ bodobodo e baa wɔ loŋ be teebɔl na so saŋkikɛ. 8A daga b ka parga wajɛ peper m buu teebɔl na nɛ asɔ nɛ a wɔ kumo so na so nseŋ naŋ ta kusɔbɔya be kawɔl lela m parga m buu amo so n ti so pɔɛŋ nseŋ yisi ndibi nɛ baa pɛ to a maŋ kumo so na n wɔtɔ amo be kakpa.
9A daga fanɛ b ta wajɛ buru m buu kefitilatɔl na nɛ kumo be ayabi nɛ asɔ nɛ baa ta a lɔŋɛ kefitilatɔl na so nɛ epelɛlɛ, nɛ ɔlif be ŋku be ekɔlba na so. 10Kede be kaman nɛ b ta kusɔbɔya be kawɔl lela m buu amo kikɛ nyam so nseŋ ta kumo n deŋi kusɔ sulɔ asɔ so. 11Kumo alɛ be kaman nɛ b parga wajɛ buru n deŋi shuwa be bɔrɛsure na so nseŋ ta kusɔbɔya be kawɔl lela m parga m buu kumo so n ti so pɔɛŋ nseŋ ta ndibi nɛ baa ta a sulɔ kumo na n wɔtɔ amo be kakpa. 12Kumo be kaman nɛ b ta wajɛ buru m buu asɔjito nɛ b kɔ a shuŋ kakpa cheembi na to na so nseŋ ta kusɔbɔya be kawɔl lela m buu so n ti so pɔɛŋ n ta amo n deŋi kusɔ sulɔ asɔ na so. 13A daga fanɛ b muu nsunɔ na ashi danyaŋ be bɔrɛsure na so pɔɛŋ nseŋ ta wajɛ peper kunɔkunɔ m parga m buu kumo so. 14Ade kikɛ be kaman nɛ b ta asɔ nɛ b kɔ a chɔɔ edɛ na, nɛ anyembi chule eblaŋ na, nɛ shabɔl nɛ ntishaŋgboŋ nɛ b kɔ a shuŋ bɔrɛsure na ase na kikɛ n deŋi wajɛ peper na so, nseŋ ta kusɔbɔya be kawɔl lela m parga m buu amo so pɔɛŋ nseŋ ta ndibi nɛ baa ta a wɔtɔ kumo to a sulɔ na n wɔtɔ amo be kakpa. 15Saŋɛ baŋ fo fanɛ b kaa keeyi to, Kohafebi na e daga fanɛ b sulɔ asɔ cheembi na nɛ wajɛbu na be asɔ kikɛ. Ama Ɛɛrɔn nɛ mbe mbinyɛnsobi e daga fanɛ b ta asɔ m buu asɔ cheembi na so nɛnɛ pɔɛŋ nɛ b ta amo n sulɔ, saŋɛ na so b maaŋ beta amo nseŋ wu.
Amoso saŋkama nɛ b kaa keeyi to, wajɛbu na nɛ kumo to be asɔ kikɛ be kesulɔ be kushuŋ la Kohaf be kabuna ebi peya nna.
16Bɔrɛmatapo nimuso Ɛɛrɔn pibinyɛn, Eliaza e daga fanɛ e baa keni ŋku nɛ baa ta a wɔtɔ efitila na to nɛ eduwu nɛ esargajibi nɛ ŋku nɛfaso nɛ kusɔ kama nɛ k wɔ wajɛbu na to nsaa la Enyɛnpe Ebɔrɛ na peya na so.
17Nɛ Enyɛnpe Ebɔrɛ naŋ kaŋɛ Mosis nɛ Ɛɛrɔn le: 18“Men sa maŋ shin nɛ Kohafebi na 19e taga asɔ cheembi na to saŋɛ nɛ b maŋ naŋ buu amo so, mannɛ aloŋ, baaŋ wu. Amoso men shin nɛ Ɛɛrɔn nɛ mbe mbinyɛnsobi e tu Kohafebi na n luri wajɛbu na to ŋ ŋini bumo be ekama kusɔ nɛ e beeŋ sulɔ. 20Hale nɛ Kohafebi na luri wajɛbu na to n ya tu bɔrɛmatapoana na nɛ b kraa buu asɔ cheembi na gba, baaŋ wu.”
Gɛshɔn be kabuna ebi nɛ b ti Livaiebi na so be kushuŋ be asheŋ
21Nɛ Enyɛnpe Ebɔrɛ naŋ kaŋɛ Mosis fanɛ 22e karga Gɛshɔn be kabuna ebi nɛ b ti Livaiebi so na kanaŋ kanaŋ so, 23nseŋ sibɛ benyɛn nɛ b fo nfɛ adesa n ya fo nfɛ adunu nsaa beeŋ tiŋ n shuŋ Enyɛnpe Ebɔrɛ be wajɛbu na to na be atre n wɔtɔ kawɔl to. 24Gɛshɔn be kabuna ebi na be kushuŋ a naaŋ baa la kebaasulɔ 25wajɛbu na nɛ kumo be kabuna to be patisa na nɛ acheembiana to be kakpa cheembi na be kabuna to be patisa na nɛ kusɔbɔya be kawɔl lela nɛ baa yuu a kulti kumo na 26nɛ kelɔnɛ na be epatisa nɛ a chambɔ wajɛbu na, nɛ bɔrɛsure na nɛ kumo be efɔlana nɛ kelɔnɛ na be kabuna to be patisa na, nɛ asɔ kama nɛ baa ta a wora kumo be asheŋ na kikɛ. Gɛshɔn be kabuna ebi na e naaŋ baa shuŋ le be ashuŋ ere kikɛ. 27Ɛɛrɔn nɛ mbe mbia e naa baa keni bumo so nɛ b baa shuŋ kikɛ nsaa ŋini bumo kakpa nɛ baaŋ ba sulɔ asɔ na a yɔ. 28Bɔrɛmatapo nimuso Ɛɛrɔn pibinyɛn Itama e naaŋ baa keni Gɛshɔnebi na so nɛ b baa shuŋ le be ashuŋ ere ashi wajɛbu na to.
Mɛrari be kabuna ebi nɛ b ti Livaiebi na so be kushuŋ be asheŋ
29Enyɛnpe Ebɔrɛ daŋ kaŋɛ Mosis nna fanɛ e karga Mɛrariebi na kanaŋ kanaŋ so 30nseŋ sibɛ benyɛn kama nɛ b fo nfɛ adesa n ya fo nfɛ adunu nsaa beeŋ tiŋ n shuŋ Enyɛnpe Ebɔrɛ be wajɛbu na to be kushuŋ na be atre. 31Bumo e naaŋ baa sulɔ wajɛbu na be ndibi yuuso nɛ amo be atɔl nɛ adeŋiso nɛ alargato 32nɛ wajɛbu na be kelɔnɛ nɛ k kulti kumo na be ndibi yuuso nɛ amo be atɔl nɛ ayirbi nɛ efɔlana. Mɛrariebi na be ekama daga fanɛ e baa nyi kusɔ nɛ e bee sulɔ. 33Bɔrɛmatapo nimuso Ɛɛrɔn pibinyɛn, Itama e baa keni bumo so nɛ b baa shuŋ bumo be ashuŋ nɛnɛ.
B ka karga Livaiebi na be asheŋ
34Ndoŋ nna nɛ Mosis nɛ Ɛɛrɔn nɛ Israɛl be benimuana na karga Kohafebi na mbuna mbuna nɛ kanaŋ kanaŋ so fanɛ kananɛ Enyɛnpe Ebɔrɛ kaŋɛ Mosis na. 35-37Bumo be benyɛn nɛ b fo nfɛ adesa n ya fo nfɛ adunu nsaa beeŋ tiŋ n shuŋ wajɛbu cheembi na to na daa wɔ basa ŋgboŋ anyɔ nɛ alfa ashunu nɛ adunu. 38-41Kumo be kaman nɛ b karga Gɛshɔnebi na mbuna mbuna nɛ kanaŋ kanaŋ so nɛ bumo be benyɛn nɛ b fo nfɛ adesa n ya fo nfɛ adunu nsaa beeŋ tiŋ n shuŋ wajɛbu na to na koso ŋgboŋ anyɔ nɛ alfa ashe nɛ adesa. 42-45Kumo alɛ be kaman nɛ b karga Mɛrariebi na mbuna mbuna nɛ kanaŋ kanaŋ so nɛ bumo be benyɛn nɛ b fo nfɛ adesa n ya fo nfɛ adunu nsaa beeŋ tiŋ n shuŋ wajɛbu na to na koso basa ŋgboŋ asa nɛ alfa anyɔ. 46-48Mosis nɛ Ɛɛrɔn nɛ Israɛl be benimuana na ka karga Israɛlebi na be benyɛn nɛ b fo nfɛ adesa n ya fo nfɛ adunu nsaa beeŋ tiŋ n shuŋ wajɛbu na to na kikɛ, b daa wɔ ŋgboŋ aburwa nɛ alfa anu nɛ aduburwa 49Kananɛ Enyɛnpe Ebɔrɛ baŋ kaŋɛ Mosis na gbagba chap nɛ e daŋ shin nɛ b karga basa na nseŋ shin nɛ b sa ekama malɛ mbe kushuŋ.
5Basa nɛ b kɔ eyurpi be asheŋ
1Nɛ Enyɛnpe Ebɔrɛ kaŋɛ Mosis le: 2“Kaŋɛ Israɛlebi na kenishipereso fanɛ b ju bekama nɛ b wora eyurpi daŋkare be ekpa so ŋkpal b ka bee lɔ keboti ŋko babaso ŋko m beta kusɔ wuso ashi bumo be keeyi to so. 3Men ju benyɛn nɛ beche kama nɛ b wora eyurpi daŋkare be ekpa so, saŋɛ na so b maaŋ jija keeyi mo nɛ ma nɛ menyi kikɛ wɔ kumo to na.” 4Ndoŋ nna nɛ Israɛlebi bɛ kusɔ nɛ Enyɛnpe Ebɔrɛ kaŋɛ Mosis na so nseŋ ju loŋ be basa kikɛ ashi keeyi na to.
Alubi be kasogberge be asheŋ
5Nɛ Enyɛnpe Ebɔrɛ naŋ kaŋɛ Mosis fanɛ 6e kaŋɛ Israɛlebi na fanɛ, esa kama nɛ e wora n da mo barkasa so wora n da mo Enyɛnpe Ebɔrɛ na gba so nna na. 7Amoso amodoŋwura daga fanɛ e bugi to ŋ kaŋɛ mbe kulubi nseŋ ka esa nɛ e wora n da so na be kusɔ kama nɛ e jija nɛ kumo kalfa to be adunyɔ so n ti so na n tal to. 8Ama nɛ esa nɛ b wora n da so na wu nna nsaa maa kɔ ekurgepo kama nɛ baaŋ ka kukɔ na n sa, kumo ere asɔ na ki Enyɛnpe Ebɔrɛ peya na nna na nseŋ daga fanɛ b ta kpakpa nɛ baaŋ ta n lara alubi be ketampaŋ be sarga n ti amo so ŋ ka n sa bɔrɛmatapo na pɔɛŋ nɛ esa na e nya alubi be ketampaŋ. 9Sarga cheembi kama nɛ Israɛlebi na bar Enyɛnpe Ebɔrɛ na la bɔrɛmatapoana na peya nna. 10Kakɛ kama malɛ nɛ b ta n sa bɔrɛmatapo kikɛ na la mo gbagba peya nna.
Beche nɛ bumo kulana maŋ yirda bumo be asheŋ
11Nɛ Enyɛnpe Ebɔrɛ naŋ kaŋɛ Mosis kenishipereso fanɛ 12-14e kaŋɛ Israɛlebi na fanɛ nɛ k ba fanɛ enyɛn maŋ wora mbe eche yirda ŋkpal e ka bee fɛ fanɛ eche na bee ji kubojua nna so, 15kumo ere, k daga enyɛn na ka keta eche na nseŋ ta aboyunyifu kurwa koŋwule n ti so n yɔ bɔrɛmatapo kutɔ n ya sulge eche na so. Ama a maŋ daga e ka ta ɔlif be ŋku ŋko duwu n ti amo so, ŋkpal manɛ so, kukɔrkɔ be kesulge be sarga nna.
16Bɔrɛmatapo na beeŋ shin nɛ eche na e ba yili bɔrɛsure na be anishito 17nseŋ chulgi nchu cheembi n wɔtɔ kaba to nseŋ jɔ wajɛbu na to be shishɛr n wɔtɔ nchu na to nɛ a ki kekra. 18Kumo be kaman nɛ eche na e deŋi mbe shata nseŋ ta sarga nɛ b kɔ aboyunyifu a lara na ŋ keta, nɛ bɔrɛmatapo na malɛ e keta kaba na nɛ nchu kekra nɛ a bee bar kɔnɔsho na. 19Kede be kaman nɛ bɔrɛmatapo na e kaŋɛ le: “Nɛ fo maŋ ji kubojua bre, nchu kekra ere maaŋ bar fo tɔrɔ. 20Ama nɛ fo ji kubojua nna bre, 21Enyɛnpe Ebɔrɛ beeŋ shin nɛ fo ki fanɛ esa nɛ b sho kɔnɔ fo basa to. E beeŋ shin nɛ fo ki egbentepo nɛ fo epun malɛ gba e tiŋ. 22Nchu ere e naŋ shin nɛ fo epun e tiŋ nɛ fo ki egbentepo malɛ gba n ti so.”
Ndoŋ nna nɛ eche na e shuli so ŋ kaŋɛ le: “Mm, ma alɛ gba shuli loŋ.”
23Kumo be kaman nɛ bɔrɛmatapo na e sibɛ kawɔl so nseŋ fɔr nsibɛ na n wɔtɔ nchu kekra na to, 24nseŋ shin nɛ eche na e nuu nchu na nɛ kɔnɔsho na e pɛ mo nɛ e ji ebesa ga. 25Nɛ bɔrɛmatapo e sɔ aboyunyifu be sarga na ashi kache na be enɔ to m maŋ amo so ŋ ŋini Ebɔrɛ nseŋ ta amo m bɛ bɔrɛsure na so. 26Kede be kaman nɛ e jɔ aboyunyifu na enɔ be bɔlɔ n deŋi bɔrɛsure na so n chɔɔ nseŋ shin nɛ eche na e nuu nchu na. 27Nɛ k la kashenteŋ nna fanɛ eche na lar mo kul be kaman n jija ebu, nchu nɛ e nuu na beeŋ shin nɛ mbe eyurto e baa besa mo ga, nɛ mbe epun e tiŋ nɛ e ki egbentepo ŋko nɛ mbe adampu e baa gboŋi nɛ e ki fanɛ esa nɛ b sho kɔnɔ ashi mbe basa to. 28Ama nɛ fanɛ eche na maŋ jija ebu bre, kumo ere shɛŋ shɛŋ maaŋ wora mo. Mo alɛ beeŋ kurge mbia.
29-30Mbra nɛ k dese n sa enyɛn kama nɛ e maŋ yirda mbe eche nsaa fɛ fanɛ eche na bee ji kubojua nna na. Bɔrɛmatapo na beeŋ shin nɛ eche na e ba yili bɔrɛsure na be anishito nɛ e wora le be daŋkaresheŋ ere. 31Nɛ enyɛn na wora loŋ, kumo be kulubi maŋ bɛ mo so, ama nɛ fanɛ eche na wora n da so nna e beeŋ nya kumo be kasogberge.
6Mbra nɛ a dese n sa esa nɛ e la Ebɔrɛ peya be asheŋ
1Enyɛnpe Ebɔrɛ daŋ kaŋɛ Mosis nna fanɛ 2e kaŋɛ Israɛl be basa le: “Benyɛn ŋko beche kama nɛ baa sha keta bumo be amu m bɔɔ Enyɛnpe Ebɔrɛ enɔ a wɔtɔ n sa Ebɔrɛ nawule ŋ ki ‘Nazarin’ na, 3maŋ daga fanɛ b nuu nsa kpakpaso be yiri kikɛ fanɛ amo nɛ b ta asɔrso nɛ baa tre greep n wora na. Bumo alɛ e sa maŋ kaŋ ji asɔrso nɛ baa tre greep na be awushiso ŋko amo be awɔlso gba. 4Bumo alɛ e sa maŋ kaŋ ji asɔrso na be kudebi ŋko kumo be kebi jemanɛ nɛ b wɔtɔ n sa Ebɔrɛ nawule na.
5Baŋ yili jemanɛ nɛ b nase nnɔ fanɛ baaŋ baa wɔtɔ n sa Enyɛnpe Ebɔrɛ nawule na n ya fo kumo be ekar, a maŋ daga fanɛ b she bumo be emin. B yige emin na nɛ a daŋ nteŋ. 6-7Bumo be emin tenteŋ na e naa ŋini b ka ta bumo be amu m bɔɔ Enyɛnpe Ebɔrɛ enɔ. A maŋ daga b baa luri bubuni so. Hale bumo tutoana ŋko bumo nioana ŋko bumo siponyɛnana ŋko besipocheana gba be kebuni. Saŋɛ na so b maaŋ ta bumo be amu n wɔtɔ eyurpi to. 8Ŋkpal manɛ so, jemanɛ nɛ b lara bumo be amu n yili fanɛ b wɔtɔ nna n sa Ebɔrɛ nawule na, b la Enyɛnpe Ebɔrɛ na peya nna.
9Nɛ fanɛ esa ko wu luwu purgiase bumo be eko be anishito gba nna, mbe emin tenteŋ nɛ a bee ŋini fanɛ b wɔtɔ nna n sa Enyɛnpe Ebɔrɛ nawule na e wora eyurpi daŋkare be ekpa so nseŋ daga fanɛ e she amo kumo be nchɛnshunu be kaman, saŋɛ na so e fɔr so n lar daŋkare be ekpa so. 10Kumo be kachɛ burwasopo na nɛ e ta elepɔ anyɔ ŋko ali anyɔ m ba sa bɔrɛmatapo na ashi Enyɛnpe Ebɔrɛ na be wajɛbu na be kabuna to. 11Ndoŋ nna nɛ bɔrɛmatapo na e ta mbuibi na be eko n lara kulubi be sarga nseŋ ta eko malɛ n lara sarga chɔɔso ŋ kule kulubi be ketampaŋ n sa bumo, ŋkpal esa ka wu mbe anishito so. Kumo be kamɔnchɛ kikɛ nɛ e naŋ ta mbe amu n yili cheembi n sa Ebɔrɛ, 12nseŋ naŋ ta mbe kumu n yili fanɛ esa nɛ e wɔtɔ n sa Ebɔrɛ nawule. Kumo be kaman nɛ e ta kpakpa nɛ k fo kafɛ m ba lara kejintɔr be sarga ŋkpal e ka daŋ barga mbe amu Enyɛnpe Ebɔrɛ na kutɔ jemanɛ ko so. 13Jemanɛ nɛ e nase nnɔ fanɛ e baa wɔtɔ n sa Enyɛnpe Ebɔrɛ nawule na baŋ fo ekar e beeŋ yɔ Enyɛnpe be wajɛbu na be kabuna to 14n ya ta asɔbɔya asa nɛ a maŋ kɔ ndulgi amo so n lara sarga n sa Enyɛnpe Ebɔrɛ. Baaŋ ta kpakpafɔlbi nɛ k fo kafɛ n lara sarga chɔɔso, n ta kubolpɔche nɛ k fo kafɛ n lara alubi be ketampaŋ be sarga nseŋ ta kpakpa nɛ k daŋ n yili n lara kɔnɔkoŋwule be sarga. 15A daga fanɛ b ta bodobodo nɛ a maŋ kɔ yiisi nɛ b ta nyifu nɛ ɔlif be ŋku n wora na kelantaŋɛ be bɔlɔ nɛ ekrakashi nɛ amo alɛ gba maŋ kɔ yisi na nɛ ayu nɛ asɔnuuso n ti asɔbɔya na so n lara sarga na.
16Bɔrɛmatapo na beeŋ ta kpakpafɔlbi na nɛ kebolpɔche na n lara alubi be ketampaŋ be sarga nɛ sarga chɔɔso n sa Enyɛnpe Ebɔrɛ. 17Kumo be kaman nɛ e ta kpakpa nɛ k daŋ n yili na nɛ bodobodo kelantaŋɛ na nɛ ayu na nɛ asɔnuuso na n lara kɔnɔkoŋwule be sarga n sa Enyɛnpe Ebɔrɛ. 18Ade kikɛ be kaman nɛ esa nɛ e ta mbe kumu n yili n sa Enyɛnpe Ebɔrɛ nawule na e she mbe kumu ashi Enyɛnpe be wajɛbu na be kabuna to nseŋ ta emin na n wɔtɔ kɔnɔkoŋwule be sarga be edɛ na to n chɔɔ.
19B baaŋ daŋɛ kpakpa na be keba nɛ k bel, nɛ bɔrɛmatapo na e ta kumo nseŋ lara bodobodo nɛ krakashi koŋwule ashi kelantaŋɛ na to m bɔɔ esa nɛ e ta mbe kumu n yili n sa Enyɛnpe Ebɔrɛ na enɔ. 20Kumo be kaman nɛ bɔrɛmatapo na e sɔ amo n ya sa Enyɛnpe Ebɔrɛ fanɛ kakɛ lela nɛ k ki sarga cheembi na, nseŋ ta amo n ti kpakpa na be kagbene nɛ kebɛaŋ nɛ a la bɔrɛmatapo peya mbra be ekpa so na so. Kede be kaman, e maaŋ naa la esa nɛ e ta mbe kumu n yili n sa Enyɛnpe Ebɔrɛ na nawule nsaa beeŋ tiŋ a nuu nsa.
21Mbra nɛ a dese n sa basa nɛ b ta bumo be amu n yili n sa Enyɛnpe Ebɔrɛ na nawule nɛ baa tre bumo ‘Nazarin’ na nna na. Ama esa nɛ e ta mbe kumu n yili n sa Enyɛnpe Ebɔrɛ na nawule na beeŋ tiŋ n lara sarga nɛ k chɔɔ ade, nɛ e beeŋ tiŋ nna na. Kɔnɔ pɔtɛ kama malɛ nɛ b nase n ti so, daga fanɛ b ka kumo m bɔlɔ so.”
22Nɛ Enyɛnpe Ebɔrɛ naŋ kaŋɛ Mosis 23fanɛ e kaŋɛ Ɛɛrɔn nɛ mbe mbinyɛnsobi fanɛ 24b baa kule le be kabɔrɛkule a sa Israɛlebi na: “Enyɛnpe Ebɔrɛ na e nɛfa menyi
nsaa kuŋ menyi.
25Enyɛnpe Ebɔrɛ na be kelela
nɛ mbe kuwɔr be kakɛ e baa wɔ menyi so.
26Enyɛnpe Ebɔrɛ na be kuwɔr
nɛ mbe kagbenewushi e baa wɔ menyi so.”
27“Ŋkpal manɛ so, b baŋ ta ma ketre ŋ kule nɛfa n sa Israɛlebi na, ma alɛ beeŋ nɛfa bumo.”
7Bejuŋkparpoana be kakɛ be asheŋ
1Mosis ka yuu Enyɛnpe Ebɔrɛ be wajɛbu na n loge, nɛ e duga ŋku n do kumo so nseŋ ta kumo nɛ kumo be asɔ nɛ b kɔ a yuu kumo na nɛ bɔrɛsure na nɛ kumo be asɔ kikɛ m bɔɔ Enyɛnpe Ebɔrɛ na enɔ. 2Ndoŋ nna nɛ Israɛl be yiri kuduanyɔ na be mbuna mbuna be bejuŋkparpoana nɛ b daŋ chɛ to ŋ karga basa na, 3bar eturko ashe nɛ egbolufɛlso kuduanyɔ. Bumo be ekama daŋ bar gbolu fɛlso nna nɛ bumo be benyɔ nyɔ malɛ chɛ abar m bar eturko koko nɛ a la bumo be kakɛ m ba sa Enyɛnpe Ebɔrɛ ashi Enyɛnpe be wajɛbu na ase. 4Nɛ Enyɛnpe Ebɔrɛ kaŋɛ Mosis le: 5“Sɔ ŋkɛ ere n yili kushuŋ nɛ baa shuŋ so m barga amo to n sa Livaiebi na nɛ b baa ta amo a sulɔ wajɛbu na nɛ asɔ cheembi nɛ a wɔ kumo to na.” 6Ndoŋ nna nɛ Mosis barga eturko na nɛ egbolufɛlso na to n sa Livaiebi na. 7Eturko anyɔ nɛ egbolufɛlso ana nɛ e daŋ ta n sa Gɛshɔnebi na 8nseŋ ta eturko ana nɛ egbolufɛlso aburwa malɛ n sa Mɛrariebi na. Ɛɛrɔn pibinyɛn, Itama e daa keni bumo kikɛ so. 9Ama Mosis daa maŋ sa Kohafebi na bre asɔ na be kekama, ŋkpal manɛ so, abatimu so e daga fanɛ bumo ere e baa sulɔ asɔ cheembi nɛ baa keni so na.
10Kachɛ nɛ baa ta bɔrɛsure na a bɔɔ Ebɔrɛ enɔ na, bejuŋkparpoana na daŋ bar bumo be ŋkɛ nna nɛ b wora kumo. 11Ŋkpal manɛ so, Enyɛnpe Ebɔrɛ daŋ kaŋɛ Mosis le nna: “K daga fanɛ karechɛ kama, bejuŋkparpo na be ekoŋwule ka ta mbe kakɛ nna m ba nɛ b ta n wora bɔrɛsure na be keta m bɔɔ Enyɛnpe Ebɔrɛ enɔ be kesheŋ wora.”
12-83Le nɛ bejuŋkparpoana na daŋ ta bumo be ŋkɛ m ba kebɛso kebɛso so: Aminadab pibinyɛn Naashɔn nɛ e shi Juda be yiri to na e daŋ bar mbe kakɛ kachɛ juŋkparso na. Nɛ Zuwa pibinyɛn Nataniɛl nɛ e shi Isaaka be yiri to na bar mo peya kachɛ nyɔsopo na. Nɛ Hɛlɔn pibinyɛn Eliab nɛ e shi Zebulun be yiri to na bar mo peya kachɛ sasopo na. Nɛ Shedur pibinyɛn Elizur nɛ e shi Ruben be yiri to na bar mo peya kachɛ nasopo na. Nɛ Zurishaddai pibinyɛn Shelumiɛl nɛ mo alɛ shi Simiɔn be yiri to na bar mo peya kachɛ nusopo na. Nɛ Duwɛl pibinyɛn Eliazaf nɛ e shi Gad be yiri to na bar mo peya kachɛ shesopo na. Nɛ Amihuud pibinyɛn Elishama nɛ e shi Efreim be yiri to na bar mo peya kachɛ shunusopo na. Nɛ Pɛdazur pibinyɛn Gamaliɛl nɛ e shi Manase be yiri to na bar mo peya kachɛ burwasopo na. Nɛ Gidiɔni pibinyɛn Abidan nɛ e shi Bɛnjamin be yiri to na bar mo peya kachɛ kpanusopo na. Nɛ Amishadai pibinyɛn Ahieza nɛ e shi Dan be yiri to na bar mo peya kachɛ kudusopo na. Nɛ Okran pibinyɛn Pagiɛl nɛ e shi Ashɛr be yiri to na bar mo peya kachɛ kudukakosopo na. Nɛ Eenan pibinyɛn Ahira nɛ mo alɛ shi Naftali be yiri to na bar mo peya kachɛ kudu anyɔsopo na.
Ŋkɛ nɛ bumo be ekama daŋ bar na daŋ duli abar nna. Amo be ako e la gbiti be katishaŋ nɛ kumo be egbɛ la kilo nɛ bargato nɛ gbiti be katishaŋgboŋ nɛ kumo alɛ be egbɛ sa fanɛ kilo koŋwule na, nseŋ karga nyifu n ta ŋku ŋ gbiti amo n wɔtɔ ntishaŋ anyɔ na to n lara ayu be sargajibi n ta shuwa be katishambi nɛ kumo be egbɛ maŋ fo kilo be bargato gba nɛ duwu bɔlɔ kumo nɛ gbolu fɔlbi nɛ kpakpa nɛ k daŋ n yili nɛ kpakpafɔlbi nɛ k fo kafɛ nseŋ ta amo kikɛ n lara sarga chɔɔso. Kumo be kaman nɛ b ta kaboe n lara alubi be sarga nseŋ ta egbolu anyɔ nɛ ekpakpa anu nɛ mboe anu nɛ ekpakpafɔlbi nɛ b fo nfɛ koko anu n lara kɔnɔkoŋwule be sarga.
84-88Ŋkɛ nɛ bejuŋkparpo kuduanyɔ na daŋ ta m ba nɛ b wora bɔrɛsure na be keta m bɔɔ Enyɛnpe Ebɔrɛ enɔ na be kasheŋwora na be kananɛ a sa nde: Gbiti be eprete kuduanyɔ nɛ gbiti be ntishaŋgboŋ kuduanyɔ nɛ amo kikɛ be egbɛ ya yili kilo adunyɔ nɛ ashunu nɛ gbrɛbi nɛ shuwa be ntishaŋbi kuduanyɔ nɛ amo be egbɛ sa fanɛ kilo nɛ bargato nɛ b ta duwu n wɔtɔ amo to. Nɛ egbolu kudu anyɔ nɛ ekpakpa kudu anyɔ nɛ ekpakpafɔlbi nɛ b fo nfɛ koko kudu anyɔ n ta ayu be sargajibi n ti so n lara sarga chɔɔso. Nseŋ ta mboelote kudu anyɔ n lara alubi be sarga. Nseŋ ta egbolu adunyɔ nɛ ana nɛ ekpakpa adeshe nɛ mboelote adeshe nɛ ekpakpafɔlbi nɛ b fo nfɛ koko adeshe n lara kɔnɔkoŋwule be sarga.
89Mosis ka yɔ wajɛbu na to nɛ mo nɛ Enyɛnpe Ebɔrɛ na e ya malga abar kutɔ, nɛ e nu Enyɛnpe Ebɔrɛ be ebɔl ka shi mpɔrduli nɛ baa tre Chɛrubim nɛ b pɔr n yili ŋkre be deka be buuso na so na be nferinto a malga mo kutɔ.
8Efitilatɔl na be eyilikpa be asheŋ
1Le nɛ Enyɛnpe Ebɔrɛ daŋ kaŋɛ Mosis, 2“Kaŋɛ Ɛɛrɔn fanɛ e kaŋ chɔɔ efitila ashunu na so, e ta amo n yili kefitilatɔl na so nɛ a baa fulto kumo be anishito.” 3Nɛ Ɛɛrɔn chɔɔ efitila na so n yili kefitilatɔl na so n shoŋi anishito fanɛ kananɛ Enyɛnpe Ebɔrɛ kaŋɛ na. 4Kananɛ Enyɛnpe Ebɔrɛ daŋ kaŋɛ Mosis na gbagba chap nɛ e ta shuwa m bɛl n lɔŋɛ kefitilatɔl na kikɛ.
Livaiebi na b keta m bɔɔ Ebɔrɛ enɔ be asheŋ
5Nɛ Enyɛnpe Ebɔrɛ naŋ kaŋɛ Mosis le: 6“K daga fo ka lara Livaiebi na ashi Israɛlebi na to ŋ kɔr nseŋ shin nɛ b fɔr bumo be amu so daŋkare be ekpa so. 7Ale nɛ feeŋ wora: Feeŋ ta alubi be kefɔrso n lar daŋkare be ekpa so be nchu na ŋ ŋmenyaŋ bumo so, kumo be kaman nɛ fo shin nɛ b she bumo be eyur so be afuibi kikɛ nseŋ fɔr bumo be epiŋi pɔɛŋ nseŋ nyalɛ so daŋkare be ekpa so. 8Kede be kaman nɛ fo shin nɛ b bar egbolu fɔlbi anyɔ nɛ ayu nyifu nɛ b ta ɔlif be ŋku m baga amo. 9Kumo be kaman nɛ fo tre Israɛlebi na kikɛ n shɛr nseŋ shin nɛ Livaiebi na e lar n yili ma Enyɛnpe be wajɛbu na be anishito, 10nɛ Israɛlebi na kikɛ e ta bumo be enɔana n deŋi n deŋi Livaiebi na be amu so.” 11Kumo be kaman nɛ Ɛɛrɔn e ta Livaiebi na fanɛ kakɛ lela m bɔɔ ma enɔ nɛ b baa shuŋ ma kushuŋ. 12Nɛ Livaiebi na e ta bumo be enɔana n deŋi deŋi egbolu anyɔ na so, kumo be kaman nɛ b ta kuko n lara alubi be ketampaŋ be sarga nseŋ ta kuko malɛ n lara sarga chɔɔso, saŋɛ na so Livaiebi na beeŋ fɔr so n lar daŋkare be ekpa so.
13“Shin nɛ Livaiebi na e yili Ɛɛrɔn nɛ mbe mbinyɛnsobi na be anishito nɛ b ta bumo m bɔɔ ma enɔ. 14Kumo be loŋ e naaŋ ŋini fanɛ Livaiebi la meya nna nsaa kɔr Israɛlebi nɛ b ka na to. 15Fo baŋ fɔr Livaiebi na so nseŋ ta bumo m bɔɔ ma enɔ n loge na pɔɛŋ, nɛ baaŋ tiŋ a shuŋ ashi wajɛbu na to. 16Bumo e naaŋ baa la ma peya, ŋkpal manɛ so, bumo e naaŋ yili Israɛlebi be ewurkoŋnyɛn na be katelamu to n sa ma. 17Ŋ ka daŋ mɔ Ijiptebi be ewurkoŋnyɛn na, nɛ n yili kumo fanɛ Israɛlebi na be ewurkoŋnyɛn nɛ bumo be asɔbɔya be ewurkoŋnyɛn kikɛ la ma peya nna. 18Ama naniere bre Livaiebi na nɛ n lara n yili Israɛl be ewurkoŋnyɛn na be katelamu. 19Ma alɛ lara Livaiebi nna fanɛ kakɛ ashi Israɛlebi na to n sa Ɛɛrɔn nɛ mbe mbinyɛnsobi na nɛ b yili Israɛlebi na be katelamu to a shuŋ Enyɛnpe be wajɛbu na to saŋɛ na so Israɛlebi na maaŋ ba kumo ase nɛ aleblawu e ba bumo so.” 20Ndoŋ nna nɛ Mosis nɛ Ɛɛrɔn nɛ Israɛlebi na kikɛ ta Livaiebi na n bɔɔ Enyɛnpe Ebɔrɛ enɔ fanɛ kananɛ Enyɛnpe Ebɔrɛ kaŋɛ Mosis na gbagba.
21Kumo be kaman nɛ Livaiebi na fɔrso n lar daŋkare be ekpa ŋ ki cheembi nseŋ fɔr bumo be asɔbuuso. Ndoŋ nna nɛ Ɛɛrɔn ta bumo m bɔɔ Enyɛnpe Ebɔrɛ na enɔ fanɛ kakɛ lela nɛ b nya alubi be ketampaŋ. 22Ade kikɛ be kaman nɛ basa na wora kusɔ kama nɛ Enyɛnpe Ebɔrɛ kaŋɛ Mosis fanɛ e kaŋɛ bumo kenishipereso a yɔ Livaiebi na be kaplɛa so na. Nɛ Livaiebi na fara a chɛ Ɛɛrɔn nɛ mbe mbinyɛnsobi to a shuŋ Enyɛnpe be wajɛbu na to.
23Nɛ Enyɛnpe Ebɔrɛ naŋ kaŋɛ Mosis le: 24“Livai be enyɛn kama nɛ e fo nfɛ adunyɔ nɛ anu ŋko m baŋ so e naaŋ tiŋ n shuŋ Enyɛnpe be wajɛbu na to. 25Ama nɛ e baŋ fo nfɛ adunu bre a daga e yige kushuŋ na nseŋ ya wushi. 26Kumo be kaman e beeŋ tiŋ a chɛ mo braana Livaiebi na to a shuŋ bumo be ashuŋ Enyɛnpe be wajɛbu na to, ama b sa maŋ naa chige ashuŋ a sa mo ere gbagba nɛ e baa shuŋ mbe kumu so. Kananɛ k daga fo ka bee barga ashuŋ to a sa Livaiebi na nna na.”
9Kebansonchoŋ be kejigboŋ nyɔsopo na be asheŋ
1Israɛlebi na ka lar Ijipt be efuli so na be kafɛ nyɔsopo be kufɔl juŋkparso to nɛ Enyɛnpe Ebɔrɛ malga Mosis kutɔ ashi Sainai be keshishɛrsawule so ŋ kaŋɛ mo le: 2-3“Kufɔl juŋkparso ere be kachɛ kuduanasopo na be kaaseso a daga Israɛlebi na ka nyiŋi kebansonchoŋ be kejigboŋ na be mbraana kikɛ nseŋ m bɛ amo so n ji kumo.” 4Ndoŋ nna nɛ Mosis kaŋɛ basa na fanɛ b nyiŋi kebansonchoŋ be kejigboŋ na nseŋ ji kumo. 5Amoso kananɛ Enyɛnpe Ebɔrɛ daŋ kaŋɛ Mosis na gbagba chap nɛ b daŋ ji kumo kufɔl juŋkparso na be kachɛ kuduanasopo na ashi Sainai be keshishɛrsawule na so.
6Basa na be beko daŋ wora eyurpi nna daŋkare be ekpa so ŋkpal b ka beta ebuni so. Amoso b daa maŋ tiŋ n ji kebansonchoŋ be kejigboŋ na loŋ be kachɛ na. Ndoŋ nna nɛ b yɔ Mosis nɛ Ɛɛrɔn kutɔ 7n ya kaŋɛ bumo le: “An wora eyurpi ŋkpal an ka beta ebuni so nna, ama manɛ nna nɛ anyi maaŋ tiŋ n ji kebansonchoŋ be kejigboŋ na nseŋ lara anyi be esarga m ba sa Enyɛnpe Ebɔrɛ loŋ be kachɛ na fanɛ kananɛ an braana Israɛlebi na wora na?”
8Ndoŋ nna nɛ Mosis kaŋɛ bumo le: “Men jo n ya fo saŋɛ nɛ meeŋ nu kusɔ nɛ Enyɛnpe Ebɔrɛ na kɔ nɛ e kaŋɛ a laŋɛ menyi be kaplɛa so.” 9Kumo be kaman nɛ Enyɛnpe Ebɔrɛ kaŋɛ Mosis 10fanɛ e kaŋɛ Israɛlebi na le: “Nɛ fanɛ menyi to be eko ŋko menyi be kaman to ebi ko wora eyurpi ŋkpal b ka beta ebuni so ŋko b wɔ ekpa wɔfɔ be enite to, bumo alɛ nsaa sha keji kebansonchoŋ be kejigboŋ na, 11kumo ere b ji kumo kufɔl nyɔsopo na to be kachɛ kuduanasopo na be kaaseso. Kumo alɛ daga b ka ta bodobodo nɛ a maŋ kɔ yiisi nɛ afantaŋ nɛ a du kekra n ti kebansonchoŋ be kpakpafɔlbi na so nna ji n kumo. 12Ajibi na maŋ daga keyili ŋklade. Bumo alɛ e sa maŋ kaŋ bure kpakpafɔlbi na be kuwibi kama to. K daga fanɛ b bɛ kebansonchoŋ be mbra na so. 13Ama nɛ fanɛ esa walɛ so daŋkare be ekpa so mo alɛ nsaa maa wɔ enite to nseŋ kini kebansonchoŋ be kejigboŋ na be keji, kumo ere m maŋ naa ber mo a ti ma basa so, ŋkpal e ka kini kelara sarga n sa ma saŋɛ nɛ k daga so. Mo alɛ beeŋ nya mbe kulubi be kasogberge 14Kadetobia ŋko efɔ kama nɛ e wɔ menyi to nsaa sha keji kebansonchoŋ be kejigboŋ na daga fanɛ e bɛ kumo be mbraana kikɛ so nɛnɛ nna n ji kumo.”
15-16Kachɛ nɛ b yuu Enyɛnpe be wajɛbu na, awɔlpa daŋ ba buu kumo kikɛ so nna a wɔ ndoŋ. Kanyɛ baŋ biri kuwɔlpa na bee kilgi nna n duli fanɛ edɛ na. 17Saŋkama nɛ kuwɔlpa na baŋ tia, Israɛlebi na malɛ bee kaa nna a bɛ kumo so n ya wora bumo be keeyi to kaplɛkama nɛ kuwɔlpa na beeŋ yili. 18Amoso Enyɛnpe Ebɔrɛ na e naa kaŋɛ Israɛlebi na saŋɛ nɛ baa kaa nɛ saŋɛ nɛ baa wora bumo be keeyi to. Bumo alɛ bee kaa wɔ keeyi na to nna hale n ya fo kachɛ nɛ kuwɔlpa na beeŋ tia. 19Nchɛ kama nɛ kuwɔlpa na beeŋ yili Enyɛnpe be wajɛbu na be esoso n ya fo, Israɛlebi na malɛ bee wora Enyɛnpe Ebɔrɛ kasonu nna n chena ndoŋ. 20Saŋko kuwɔlpa na beeŋ tiŋ a wɔ wajɛbu na so n nchɛ gbrɛbi ko. Saŋkama nɛ k baa wɔ ndoŋ, basa na gba wɔ keeyi na to nna. K ba naŋ tia malɛ, bumo alɛ gba bee kaa keeyi na to nna. Kanaŋ kama nɛ Enyɛnpe Ebɔrɛ na baŋ kaŋɛ, aloŋ nɛ baa wora. 21Saŋko malɛ kuwɔlpa na bee yili kanyɛso nna n ya fo kachipurso nawule. Saŋkama malɛ nɛ k baŋ tia, bumo alɛ gba bee kaa keeyi na to nna m bɛ kumo so a yɔ. 22Hale nchɛ anyɔ ŋko kufɔl ŋko kafɛ gba nɛ kuwɔlpa na buu wajɛbu na so, bumo alɛ gba baa wɔ keeyi na to nna. Ama k baŋ tia, bumo alɛ gba bee kaa nna m bɛ kumo so. 23Kaplɛkama malɛ nɛ Enyɛnpe Ebɔrɛ baŋ ŋini Mosis fanɛ b yɔ, ndoŋ nɛ baa yɔ.
10Gbiti be mbel be asheŋ
1Nɛ Enyɛnpe Ebɔrɛ kaŋɛ Mosis le: 2“Ta gbiti m bɛl mbel anyɔ nɛ baaŋ baa foŋ a tre basa na a shɛr abar so ŋko a shin nɛ b baa kaa keeyi to. 3B baŋ foŋ mbel anyɔ na, basa na kikɛ daga fanɛ b shɛr fo anishito ashi Enyɛnpe be wajɛbu na be kabuna to nna. 4Ama nɛ b foŋ kabel koŋwule bre, kumo ere Israɛl be eyiri kuduanyɔ na be bejuŋkparpoana e daga fanɛ b shɛr fo anishito. 5B baŋ foŋ mbel na gbrɛbi nseŋ yige, kumo ere eyiri nɛ b chena epeŋilarkpa be kaba so na e daga fanɛ b juŋkpar ŋ kaa keeyi to. 6B baŋ naŋ foŋ mbel na gbrɛbi kela nyɔsopo nseŋ yige, eyiri nɛ bumo alɛ chena kelargato be kaseto be kaba so na e naaŋ kaa m bɛ so. Amoso, mbel na be kefoŋ gbrɛbi nseŋ yige, bee ŋini nna fanɛ b kaa keeyi to na. 7Ama nɛ fee sha basa na kikɛ ka shɛr abar so malɛ nna, kumo ere k daga fanɛ b foŋ mbel anyɔ na n chɛr. 8Ɛɛrɔn be kanaŋ to ebi be mbinyɛnsobiana nɛ b la bɔrɛmatapoana e daga fanɛ b baa foŋ mbel na.
Loŋ malɛ nɛ k beeŋ ba la hale mbaanaayɔ. 9Nɛ men doŋana kaŋ baa kaa kɔ menyi kena men gbagba be kasawule so nɛ men foŋ mbel na, ma Enyɛnpe Ebɔrɛ na beeŋ nu nseŋ ba mɔlga menyi. 10Nɛ men baa ji menyi be kufɔl popɔr be kejigboŋ nɛ kabɔrɛshuŋ be kejigboŋana ko, k daga men baa foŋ mbel na saŋɛ nɛ menyee lara sarga chɔɔso nɛ kɔnɔkoŋwuleso be esarga na nɛ ma nɛ n la men Nyɛnpe nɛ men be Ebɔrɛ na e chɛ menyi to.”
11Israɛlebi na ka lar Ijipt be kasawule so be kafɛ nyɔsopo to be kufɔl nyɔsopo to be kachɛ adunyɔsopo na nɛ kuwɔlpa nɛ k buu Enyɛnpe Ebɔrɛ be wajɛbu na so na tia a yɔ, 12nɛ Israɛlebi na malɛ gba lar Sainai be keshishɛrsawule na so nseŋ pɛ ekpa m bɛ kuwɔlpa na so hale nɛ k ya yili Paran be keshishɛrsawule so.
13Kede e la Israɛlebi na be enite juŋkparso nɛ Enyɛnpe Ebɔrɛ bɔla Mosis so ŋ kaŋɛ bumo fanɛ b koso a yɔ. 14Juda be yiri nɛ eyiri nɛ b chena m mata bumo na e daŋ ta bumo be etuuta n juŋkpar n lar. Aminadab pibinyɛn Naashɔn e daa la bumo be benapo be ejuŋkparpo. 15Zuwa pibinyɛn Nataniɛl e daa la Isaaka be yiri to be benapo be ejuŋkparpo 16nɛ Hɛlɔn pibinyɛn Eliab malɛ daa juŋkpar Zebulun be yiri to be benapo.
17B ka bee kaa na nɛ b gboŋi wajɛbu na to nɛ Gɛshɔn nɛ Mɛrari be mbunaebi nɛ b la Livaiebi nɛ bumo be kushuŋ la wajɛbu na be kesulɔ na ta kumo n sulɔ a yɔ.
18Nɛ Ruben be yiri nɛ eyiri nɛ b chena m mata bumo na, ta bumo be etuuta m bɛ so a la katuŋ nyɔsopo a yɔ. Shedur pibinyɛn Elizur e daa la bumo be benapo be ejuŋkparpo. 19Zurishaddai malɛ pibinyɛn Shelumiɛl e daa la Simiɔn be yiri to be benapo be ejuŋkparpo, 20nɛ Duwɛl pibinyɛn Eliazaf malɛ daa la Gad be yiri to be benapo be ejuŋkparpo.
21Kohaf be kabuna ebi nɛ b la Livaiebi na be kushuŋ e daa la asɔ cheembi nɛ baa ta a wora asheŋ wajɛbu na to be kebaasulɔ. Ama a daga b ka yuu wajɛbu na keeyi popɔr na to nna pɔɛŋ nɛ bumo kikɛ e fo ndoŋ.
22Efreim be yiri nɛ eyiri nɛ b chena m mata bumo na malɛ e naaŋ baa la katuŋ sasopo ŋ keta bumo be etuuta m bɛ so. Amihuud pibinyɛn Elishama e daa la Efreim be yiri na to be benapo be ejuŋkparpo. 23Pɛdazur pibinyɛn Gamaliɛl e daa la Manase be yiri to be benapo be ejuŋkparpo, 24nɛ Gidiɔni Pibinyɛn Abidan malɛ la Bɛnjamin be yiri to be benapo be ejuŋkparpo.
25Dan be yiri nɛ eyiri nɛ a chena m mata bumo na e naaŋ baa la katuŋ lalalogesopo n ta bumo be etuuta a wɔ kaman a kuŋ. Amishadai pibinyɛn Ahieza e daa la Dan be yiri to be benapo be ejuŋkparpo. 26Okran pibinyɛn Pagiɛl malɛ e daa la Ashɛr be yiri to be benapo be ejuŋkparpo, 27nɛ Eenan malɛ pibinyɛn Ahira daa la Naftali be yiri to be benapo be ejuŋkparpo. 28Israɛlebi na baa kaa bumo be keeyi to, kananɛ baa nite kebɛso kebɛso so nna na.
29B ka bee bela ase nɛ b kaa na, nɛ Mosis kaŋɛ Jetro pibinyɛn Hobab nɛ e la mo ere Mosis mo churo na le: “Anyee bela ase nna nɛ an yɔ kakpa nɛ Enyɛnpe Ebɔrɛ nase kɔnɔ fanɛ e beeŋ sa anyi na. Mo e kaŋɛ fanɛ e beeŋ nɛfa Israɛl, amoso bɛ anyi so, asheŋ beeŋ ya nyalɛ n sa anyi kikɛ.” 30Nɛ Hobab kaŋɛ le: “M-m ma ere bee bɛta nna a yɔ ma efuli so, amoso m maaŋ yɔ.”
31Nɛ Mosis malɛ kaŋɛ mo le: “Jande, sa maŋ yige anyi, ŋkpal manɛ so, fo e nyi mboŋ nɛ a daga an baa wora anyi be keeyi to a yili saŋkama, amoso fo e naaŋ baa juŋkpar a ŋini anyi akpa. 32Nɛ fo baŋ tu anyi n yɔ, nɛfa kama nɛ Enyɛnpe Ebɔrɛ beeŋ ta n nɛfa anyi na, fo alɛ gba beeŋ nya ako.”
Basa na ka lar a yɔ be asheŋ
33Basa na ka lar kebeegboŋ cheembi nɛ baa tre Sainai na ase, nchɛ asa nɛ b wɔ enite to. Livaiebi na e daa sulɔ ŋkre be deka na a juŋkpar a fin kaboŋ nɛ k daga b wora bumo be keeyi to. 34Saŋkama nɛ b baŋ kaa keeyi to a yɔ malɛ, Enyɛnpe Ebɔrɛ be kuwɔlpa na daa parga nna a buu bumo so kapaso.
35Saŋkama nɛ Livaiebi na baŋ ta ŋkre be deka na n lar a yɔ, le nɛ Mosis daa kaŋɛ: “Enyɛnpe Ebɔrɛ, koso ŋ kɔ fo doŋana n shin nɛ b pesaŋ to n shile.” 36Saŋkama malɛ nɛ b baŋ yili, e bee kaŋɛ le nna: “Enyɛnpe Ebɔrɛ, naŋ bɛta n shin nɛ Israɛl be basa kikɛ e pin fanɛ fo wɔ anyi kutɔ.”
11Kade nɛ baa tre Tabera na be asheŋ
1Israɛlebi na fara nna a fubel a bile asheŋ ŋkpal awurfoŋ nɛ b daa ji so. Enyɛnpe Ebɔrɛ ka nu bumo be nfubel na nɛ e nya agbo nseŋ shin nɛ edɛ ba bumo to m ba chɔɔ bumo be keeyi na to be ekarso. 2Ndoŋ nna nɛ basa na shu ŋ ŋini Mosis fanɛ e chɛ bumo to, nɛ e kule Enyɛnpe Ebɔrɛ nɛ edɛ na duŋ. 3Amoso b daŋ nase kakpa na be ketre Tabera nna, ŋkpal Enyɛnpe Ebɔrɛ be edɛ ka daŋ chɔɔ bumo be keeyi to ndoŋ so.
Mosis ka lara bejuŋkparpo adushunu be asheŋ
4Kachako nɛ befɔ nɛ b daŋ tu Israɛlebi na a yɔ na fara a yɛlga ajibi ko kenishipereso, ndoŋ nna nɛ Israɛlebi na gba fara a fubel a bile asheŋ a kaŋɛ le: “Anyi maŋ nya eblaŋ kikɛ nɛ an we! 5Ama an ka daa wɔ Ijipt na bre, an daa nya ekɔrɔtɔ kananɛ anyee sha nna a we jiga. Eŋampo nɛ asɔrso nɛ baa tre watamelɔŋ nɛ albasa be eyiri yiri kikɛ wɔ ndoŋ nna nɛ an daa ji anyi be kepar. 6Ama naniere bre, akoŋ gbagba e naa mɔ anyi. Ajibi nɛ baa tre manna na nawule a baa wɔtɔ karechɛ kikɛ!”
7Manna na daa du fanɛ asɔrso wurwurbi ko nna nsaa la kachɔnɔnyifu n fuli n weato. 8-9Kanyɛso nɛ a daa tɔr fanɛ bunyaŋ na nɛ b muu amo kachipurso nseŋ wuse amo nɛ a ki nyifu nɛ b daŋɛ amo ŋko n ta amo n wora ekrakashi. Amo alɛ wɔ ebel nna fanɛ bodobodo nɛ b ta ɔlif be ŋku n wora na.
10Mosis ka nu basa na kikɛ ka yil ntuŋ so bumo be ewajɛbu na be mbuna ase a fubel a bile asheŋ na nɛ mbe kagbene jija mo ga ŋkpal b ka daŋ shin nɛ Enyɛnpe Ebɔrɛ nya agbo na so. 11Kumo be kaman nɛ Mosis kule Enyɛnpe Ebɔrɛ ŋ kaŋɛ le: “Manɛ nna nɛ fo shin nɛ le be asheŋ ere tu ma? Manɛ nna nɛ fo nya agbo n wɔtɔ ma loŋ? Manɛ nna nɛ fo ta basa ere be esulɔ kikɛ n sulɔ ma? 12Mannɛ ma e di bumo be kedampo ŋko ŋ kurge bumo! Nɛ mannɛ nna nɛ fee sha fanɛ ŋ keta bumo enɔ to fanɛ mbi popɔrbi n yɔ kasawule nɛ fo bɔ ntaŋ n nase kɔnɔ fanɛ feeŋ sa bumo nananyɛnana na so? 13Nnɛ nɛ meeŋ nya eblaŋ n sa basa damta nɛ baa ponte a cha awɔr fanɛ n sa bumo eblaŋ ere kikɛ? 14Kushuŋ ere bre du kpakpa ga n sa ma, m maaŋ tiŋ n sɔ basa ere kikɛ be esulɔ n sulɔ! 15Nɛ le bre nɛ fee sha kewora ma, kumo ere wu ma kuwɔr nseŋ mɔ ma nɛ n wushi.”
16Nɛ Enyɛnpe Ebɔrɛ kaŋɛ Mosis le: “Lara Israɛl be bejuŋkparpo adushunu nɛ basa na bee sa bunyaŋ nɛ b nyi bumo be ashuŋ nɛnɛ, nɛ fo nɛ bumo kikɛ e ba yili Enyɛnpe be wajɛbu na be kabuna. 17Meeŋ gbelge m ba ndoŋ m ba malga menyi kutɔ, nseŋ sa bumo eleŋ nɛ n sa fo na, saŋɛ na so baaŋ baa chɛ fo to a keni ma basa so nɛ esulɔ na maaŋ naa la fo nawule peya. 18Nɛ fo kaŋɛ basa na malɛ fanɛ b lara kulubi ashi bumo be ŋgbene to nseŋ ki cheembi m ba echefo m ba sɔ eblaŋ. Ŋkpal manɛ so, n nu b ka bee fubel a bile asheŋ fanɛ b maŋ nya eblaŋ nɛ b we, bumo alɛ ka daa wɔ Ijipt be efuli so na bɔ nfe. Naniere ma Enyɛnpe Ebɔrɛ na beeŋ sa menyi eblaŋ nɛ men we amo. 19Mannɛ kachɛ koŋwule ŋko nchɛnnyɔ ŋko nchɛnnu ŋko nchɛ kudu ŋko nchɛ adunyɔ nɛ menyeeŋ we eblaŋ na, 20ama kufɔl lelemu nɛ menyee we amo hale nɛ a fi menyi. Ŋkpal men ka kini ma nsaa fubel a bile asheŋ a kaŋɛ fanɛ men daa nyi gba nna, menyi maŋ lar Ijipt be efuli so so.”
21Nɛ Mosis malɛ kaŋɛ Enyɛnpe Ebɔrɛ le: “Basa ŋgboŋ alfa ashe nɛ mee juŋkpar na nɛ fo kaŋɛ fanɛ feeŋ sa bumo eblaŋ nɛ b we kufɔl lelemu! 22Hale nɛ an mɔ anyi be mbolpɔ nɛ ana kikɛ ŋko m pɛ teku to be ekɔrɔtɔ kikɛ gba, a kra maaŋ fo bumo.”
23Nɛ Enyɛnpe Ebɔrɛ kaŋɛ le: “Kusɔ ko du ma Enyɛnpe na so kpakpa a? K maaŋ chɛr, menyeeŋ wu kusɔ nɛ ŋ kaŋɛ ere ka wora.”
24Ndoŋ nna nɛ Mosis ya kaŋɛ basa na kusɔ nɛ Enyɛnpe Ebɔrɛ kaŋɛ na, nseŋ shin nɛ bejuŋkparpo adushunu nɛ e daŋ lara na, ba yili ŋ kulti Enyɛnpe be wajɛbu na. 25Nɛ kuwɔlpa na gbelge m ba nɛ Enyɛnpe Ebɔrɛ malga Mosis kutɔ nseŋ sa bejuŋkparpo adushunu na gba eleŋ nɛ e sa Mosis na. B ka nya eleŋ na nɛ b fara a malga a cha awɔr fanɛ anebiana na. Ama b daa maŋ malga loŋ n chɛr.
26Bejuŋkparpo adushunu na be benyɔ nɛ b da maŋ lar keeyi na to n yɔ wajɛbu na ase e daa la Eldad nɛ Mɛdad. Ama eleŋ na daŋ ba bumo alɛ gba so nna ashi keeyi na to nɛ b fara a malga a cha awɔr fanɛ anebiana na. 27Ndoŋ nna nɛ kabrantiɛbia ko shile n ya kaŋɛ Mosis kusɔ nɛ Eldad nɛ Mɛdad bee wora ashi keeyi na to.
28Nɛ Nun pibinyɛn Joshuwa nɛ e la kabrantiɛbia a chɛ Mosis to na kaŋɛ mo le: “Jande n nyɛnpe, kaŋɛ Eldad nɛ Mɛdad nɛ b yige!”
29Nɛ Mosis malɛ kaŋɛ le: “Fee kɔ kukɔrkɔ nna a sa ma a? K daa beeŋ par ma ga fanɛ Enyɛnpe Ebɔrɛ ka beeŋ sa mbe basa kikɛ eleŋ nɛ b baa malga fanɛ anebiana!” 30Ndoŋ nna nɛ Mosis nɛ Israɛl be bejuŋkparpo na bɛta n yɔ keeyi to.
Enyɛnpe Ebɔrɛ ka shuŋi mbuibi nɛ baa tre kweels na be asheŋ
31K maŋ chɛr ko nɛ Enyɛnpe Ebɔrɛ shin nɛ afu ber mbuibi ko nɛ baa tre kweels na ashi teku ase nɛ b ba kaa lɛa lɛa kasawule nseŋ tɔr n deŋi abar so n yɔ emayɛl damta ŋ kulti Israɛlebi be keeyi na to. 32Amoso nchɛ lelemu anyɔ nɛ basa na wɔtɔ a pɛ mbuibi na. Mbuibi nɛ ekama daŋ pɛ mbe kumu so be egbɛ kikɛ daa sa fanɛ kilo kagboŋ nna. B daŋ ta bumo nna n fata ŋ kulti keeyi na to kikɛ. 33Ama pɔɛŋ nɛ b we eblaŋ na, Enyɛnpe Ebɔrɛ daŋ nya agbo n wɔtɔ bumo nna nseŋ shin nɛ kulɔ be aleblawu tɔr bumo so. 34Ndoŋ nna nɛ b nase kakpa nɛ b puli basa nɛ kulɔ be aleblawu na mɔ na Kibrɔf Hataava. Kumo be kifito e la bejibishapo be nchaŋana.
35Kumo be kaman nɛ Israɛlebi na koso ndoŋ n ya wora bumo be keeyi to kakpa nɛ baa tre Hazerɔf na.
12Miriam ka nya kasogberge be asheŋ
1Miriam nɛ Ɛɛrɔn daŋ malga nna ŋ gbiti Mosis ŋkpal e ka ta Kush be efuli so be eche so. 2Le nɛ b daŋ kaŋɛ: “Mosis nawule so nɛ Enyɛnpe Ebɔrɛ bee bɔla a malga a? E maŋ bɔla anyi alɛ so m malga a?” B ka malga loŋ na nɛ Enyɛnpe Ebɔrɛ nu kusɔ nɛ b kaŋɛ na. 3Mosis daa kɔ kamubrase nna ga, e daa kɔ kamubrase a chɔ esa kikɛ durnya to.
4Epul na to nɛ Enyɛnpe Ebɔrɛ kaŋɛ Mosis nɛ Ɛɛrɔn nɛ Miriam le: “Menyi besa kikɛ e ba Enyɛnpe be wajɛbu na ase.” Nɛ b lar n yɔ ndoŋ, 5nɛ Enyɛnpe Ebɔrɛ na bɔla kuwɔlpa to m ba yili wajɛbu na be kabuna to nseŋ tre Ɛɛrɔn nɛ Miriam awɔrso, nɛ bumo benyɔ na lar n yɔ anishito. 6Ndoŋ nna nɛ Enyɛnpe Ebɔrɛ kaŋɛ bumo le: “Men kaŋ kusoe n nu ma mmalga ere: Ma e naa bɔla kewuŋkaŋɛ so a lara ma kumu a ŋini anebiana nsaa bɔla edare so a malga bumo kutɔ. 7Ama kananɛ mee malga ma kayɛrbi Mosis bre kutɔ kɔr. Mo nɛ n ta ŋ ki ma basa Israɛlebi be ejuŋkparpo. 8Ma nɛ mo ere bee wu abar nna nsaa malga abar kutɔ. Mannɛ aŋasa to nɛ mee malga mo kutɔ. E nyi kananɛ ma kapɔr du kikɛ! Amoso men maŋ kɔ ekpa nɛ men malga ŋ gbiti ma kayɛrbi Mosis!”
9Amoso Enyɛnpe Ebɔrɛ daŋ nya agbo nna n wɔtɔ Ɛɛrɔn nɛ Miriam, nseŋ lar ndoŋ n yɔ, 10nɛ kuwɔlpa na gba lar kakpa nɛ wajɛbu na wɔ na. Ndoŋ nna nɛ keboti pɛ Miriam nɛ mbe kayurwule ki n fuli parr fanɛ ateebi. Ɛɛrɔn ka wu fanɛ keboti pɛ Miriam na, 11nɛ e kaŋɛ Mosis le: “Jande n nyɛnpe, sa maŋ gberge anyi kusoe ŋkpal kulubi nɛ an wora kawuliso ere so. 12Sa maŋ shin nɛ Miriam be kayurwule e ba du fanɛ kebia nɛ e wu mo nio be epun to pɔɛŋ nɛ b kurge mo be kayurwule.”
13Ndoŋ nna nɛ Mosis boŋ to awɔrso ŋ kaŋɛ le: “Enyɛnpe Ebɔrɛ, jande, chɛ Miriam!”
14Ndoŋ nna nɛ Enyɛnpe Ebɔrɛ kaŋɛ Mosis le: “Nɛ fanɛ mo tuto e daŋ n tuu echɔl n fɛa mbe anishito, nchɛ ashunu nɛ kumo be anishinyɔr maŋ kraa kɔ mo a? Amoso, ju mo ashi keeyi na to n ya fo nchɛ ashunu pɔɛŋ nɛ e naŋ bɛta m ba ndoŋ.” 15Amoso b daŋ lara Miriam keeyi na to nchɛ ashunu nna nɛ e nya alenfia m bɛta m ba pɔɛŋ nɛ Israɛlebi kaa ndoŋ n yɔ 16Hazerɔf, n ya wora bumo be keeyi to ashi Paran be keshishɛrsawule so.
13Bedarapo na be asheŋ
1Le nɛ Enyɛnpe Ebɔrɛ kaŋɛ Mosis: 2“Lara Israɛl be yiri kuduanyɔ na to be kekama be ejuŋkparpo n shuŋi bumo nɛ b ya dara Keenan be kasawule nɛ mee ta a sa Israɛlebi na.” 3Ndoŋ nna nɛ Mosis nu kusɔ nɛ Enyɛnpe Ebɔrɛ kaŋɛ mo ashi Paran be keshishɛrsawule so na nseŋ shuŋi le be bejuŋkparpo ere: 4Zakuur pibinyɛn Shamua e daŋ shi Ruben be yiri to nɛ 5Hoori pibinyɛn Shafat shi Simiɔn be yiri to nɛ 6Jefune pibinyɛn Kalɛb shi Juda be yiri to nɛ 7Josɛf pibinyɛn Igaal shi Isaaka be yiri to nɛ 8Nun pibinyɛn Hoshiya shi Efreim be yiri to nɛ 9Rafu pibinyɛn Paalti shi Bɛnjamin be yiri to nɛ 10Soodi pibinyɛn Gadiɛl shi Zebulun be yiri to nɛ 11Suusi pibinyɛn Gaadi shi Manase be yiri to nɛ 12Gemalli pibinyɛn Ammiɛl shi Dan be yiri to nɛ 13Maikel pibinyɛn Sɛtuur shi Ashɛr be yiri to nɛ 14Vopsi pibinyɛn Nabii shi Naftali be yiri to nɛ 15Maaki pibinyɛn Geuɛl shi Gad be yiri to.
16Bumo nɛ Mosis daŋ shuŋi fanɛ b ya dara kasawule na ŋ keni. E daŋ chɛrga Nun pibinyɛn Hoshiya be ketre nna ŋ ki Joshuwa.
17Pɔɛŋ nɛ Mosis shuŋi bumo Keenan be kasawule so na, le nɛ e daŋ kaŋɛ bumo: “Men yili nfe m bɔla Keenan be keshishɛrsawule na be kelargato be kaseto be kaba so n sɔ to kelargato be esoso be kaba so n ya luri kebee be efuli na so. 18Men dara nɛnɛ ŋ keni kananɛ efuli na du nɛ kananɛ kumo be basa be keshi sa nɛ kananɛ bumo be eleŋ nɛ kapɔshi sa. 19Men keni, kasawule na walɛ ŋko k maŋ walɛ. Nseŋ naŋ keni, b pɔr egbal ŋ kulti bumo be ndeana ŋko b maŋ pɔr. 20Men keni, kasawule na walɛ kudɔ ŋko k maŋ walɛ? K kɔ ndibi ŋko k maŋ kɔ? Men wora ania n chuge ndoŋ be asɔrso jiso a ba.” Asɔrso nɛ baa tre greep na be kesɔr be saŋɛ e daa la.
21Ndoŋ nna nɛ basa na ya yili Zin be keshishɛrsawule nɛ k wɔ kelargato be kaseto be kaba so na n dara kasawule na n ya fo kade nɛ baa tre Rehɔb nɛ k wɔ Lɛbo Hamaf be kepla so na. 22B ka bɔla kelargato be kaseto be kaba so a yɔ na nɛ b ya tu kade ko nɛ baa tre Hibrɔn. Ndoŋ nɛ b tu Ahiman nɛ Shishai nɛ Talmai nɛ b shi basa tenteŋ gboŋgboŋi nɛ baa tre Anakebi be kanaŋ to na. Hibrɔn daŋ chena nfɛ ashunu nna pɔɛŋ nɛ Zowan nɛ k wɔ Ijipt be efuli so na chena. 23Basa nɛ b shuŋi na ka fo ketaŋɛ nɛ baa tre Eshkɔl na to, nɛ b ku kesɔrso nɛ baa tre greep na be asɔrso be keyabi. Ŋkpal k ka daa shibi ga nsaa wɔ egbɛ so b daŋ ta kumo nna n deŋi kedibi so nɛ basa anyɔ cha abar n sulɔ kumo bumo be abatimu so a nite. B daŋ ta kedibi nɛ baa tre pomegranates na be asɔrso nɛ figidibi be asɔrso gba nna n ti kumo so. 24B daŋ nase kaboŋ na Eshkɔl be ketaŋɛ nna ŋkpal Israɛlebi na ka daŋ ku greep be asɔrso nɛ a chɛ gbi gbi ndoŋ so.
25Bedarapo na ka dara kasawule na nchɛ adena n loge nɛ b bɛta 26n yɔ Mosis nɛ Ɛɛrɔn nɛ Israɛlebi na kikɛ kutɔ ashi Kadɛsh nɛ k wɔ keshishɛrsawule nɛ baa tre Paran na n ya kaŋɛ bumo kusɔ nɛ b ya wu ndoŋ nseŋ ta ndoŋ be asɔrso na ŋ ŋini bumo. 27Le nɛ b daŋ kaŋɛ Mosis: “An ya keni kasawule na nseŋ wu fanɛ k la kasawule lela nna. Kumo be asɔrso gba be ako nde. 28Ama basa nɛ b wɔ ndoŋ na kɔ eleŋ ga nseŋ pɔr egbal ŋ kulti ndegboŋ nɛ a wɔ ndoŋ na kikɛ nɛnɛ. An wu Anak be kanaŋ to be basa tenteŋ gboŋgboŋi lempoana gba ndoŋ. 29Amalɛkebi e chena kasawule na be kelargato be kaseto be kaba so, nɛ Hitebi nɛ Jebusiebi nɛ Amɔriebi malɛ chena kebee be efuli na be kaba so; nɛ Keenanebi malɛ chena m mata Teku nɛ baa tre Mɛditerenia na nɛ Jɔɔdan be lɔr na be ekarso.”
30Ndoŋ nna nɛ Kalɛb kaŋɛ jimaŋ nɛ baa fubel a bile asheŋ a malga a gbiti Mosis na fanɛ b wushi eyur, nseŋ kaŋɛ bumo le: “Men shin nɛ an ya kɔ n sɔ kasawule na. Anyeeŋ tiŋ m pɔɔ bumo so.”
31Ama le nɛ basa nɛ bumo nɛ Kalɛb yɔ na daŋ kaŋɛ: “Anyi maaŋ tiŋ n tu basa na ŋ kɔ kena, ŋkpal manɛ so, b kɔ eleŋ a chɔ anyi.” 32Nseŋ fara a sa Israɛlebi na efɛ be baru a yɔ kasawule na be kaplɛa so a kaŋɛ le: “Kasawule na gba maŋ la kudɔsawule lela nɛ esa beeŋ tiŋ n dɔ kumo so n nya adɔjibi nɛnɛ m bela basa nɛ b wɔ ndoŋ na. Basa nɛ an wu ndoŋ na malɛ kikɛ la basa tenteŋ gboŋgboŋi nna. 33An ka wu basa tenteŋ gboŋgboŋi nɛ b shi Anak be kanaŋ to na, an ki fanɛ alonte nna ashi bumo be anishito.”
14Israɛlebi be nfubel be asheŋ
1Israɛlebi na ka nu baru nɛ basa nɛ b ya dara Keenan be kasawule na bar na, nɛ b shu kagbenejijaso ga loŋ be kanyɛ na kikɛ 2nseŋ fubel m bile asheŋ m malga ŋ gbiti Mosis nɛ Ɛɛrɔn ŋ kaŋɛ le: “An daŋ wu Ijipt be kasawule so ŋko keshishɛrsawule ere so be kakpa ko gba, k daa beeŋ par anyi! 3Manɛ nna nɛ Enyɛnpe Ebɔrɛ keta anyi a ba Keenan nɛ b mɔ anyi nseŋ pɛ anyi be beche nɛ mbia ŋ ki anya? An daa wɔ Ijipt be kasawule so gba, k daa ba bɔ.” 4Kede be kaman nɛ b kaŋɛ abar le: “Men shin nɛ an lara an gbagba be ejuŋkparpo nɛ e beeŋ keta anyi m bɛta n yɔ Ijipt be kasawule so.”
5Ndoŋ nna nɛ Mosis nɛ Ɛɛrɔn kurgi amu n yuu to ŋ kule Ebɔrɛ ashi Israɛlebi na be anishito. 6Nɛ Nun pibinyɛn Joshuwa nɛ Jefune pibinyɛn Kalɛb nɛ b ti basa nɛ b ya dara kasawule na so na kpɛa bumo be asɔbuuso to kagbenejijaso 7nseŋ kaŋɛ basa na le: “Anyi alɛ gba wu kasawule na. K walɛ alegaiso. 8Nɛ an wora Enyɛnpe Ebɔrɛ na kasonu, e beeŋ yɛra anyi kasawule nɛ k walɛ nsaa wora adɔjibi nɛnɛ ere so n ya ta kumo n sa anyi. 9Amoso men sa maŋ shin nɛ an kini kenu n sa Enyɛnpe Ebɔrɛ na. K maŋ daga an ka bee ŋana basa nɛ b wɔ ndoŋ na, ŋkpal manɛ so, Enyɛnpe Ebɔrɛ na wɔ anyi kutɔ, amoso b maaŋ tiŋ ŋ kɔ m pɔɔ anyi so.”
10Ŋkpal kusɔ nɛ Joshuwa nɛ Kalɛb kaŋɛ na so Israɛlebi na daa sha kekpa bumo ajembu nna m mɔ, ama epul na to nɛ Enyɛnpe Ebɔrɛ be kemaŋkura lar Israɛlebi na so nseŋ buu Enyɛnpe be wajɛbu cheembi na so.
Mosis ka kule Ebɔrɛ n sa basa na be asheŋ
11Ndoŋ nna nɛ Enyɛnpe Ebɔrɛ kaŋɛ Mosis le: “Emamachisheŋ damta nɛ n wora n sa basa ere kikɛ ere, b kraŋ kini keyirda ma nsaa keni ma jiga a? 12Meeŋ shin nɛ aleblawu e ba mur bumo, ama meeŋ shin nɛ fo ere be kaman to ebi e ki efuligboŋ nɛ k kɔ eleŋ a chɔ bumo be efuli ere.”
13Nɛ Mosis kaŋɛ Enyɛnpe Ebɔrɛ le: “Fo eleŋ nɛ fo ta n lara fo basa ashi Ijipt be kasawule so, amoso nɛ Ijiptebi na nu kusɔ nɛ fo naŋ wora bumo, 14baaŋ kaŋɛ basa nɛ b wɔ kasawule ere so kikɛ kumo be asheŋ. Bumo alɛ teŋ nu fanɛ fo Enyɛnpe Ebɔrɛ na wɔ anyi kutɔ nɛ anyi nɛ fo bee malga abar kutɔ, nɛ fo kuwɔlpa buu anyi so nsaa juŋkpar anyi kapaso nɛ fo edɛ be kabulpi malɛ bee juŋkpar anyi kanyɛso. 15Naniere nɛ fo baŋ mɔ basa ere, efuliana nɛ b nu fo ketre lela be asheŋ na beeŋ kaŋɛ le: 16‘Fo, Enyɛnpe Ebɔrɛ mɔ fo basa ashi keshishɛrsawule na so nna ŋkpal fo ka maŋ tiŋ ŋ keta bumo n luri kasawule nɛ fo bɔ ntaŋ n nase kɔnɔ fanɛ feeŋ sa bumo na to so.’
17Amoso Enyɛnpe Ebɔrɛ, mee kule fo nna nɛ fo ŋini fo eleŋ nseŋ wora kusɔ nɛ fo nase kɔnɔ fanɛ feeŋ wora na. Ŋkpal manɛ so fo e kaŋɛ le: 18‘Ma, Enyɛnpe Ebɔrɛ na maa nya agbo manaŋ manaŋ, ma alɛ kɔ kashenteŋ be kasha nsaa ta bekama nɛ baa kini kenu n sa ma nsaa wora alubi na be alubi a paŋ bumo. Ama ma alɛ maaŋ yige kegberge bekama nɛ b wora alubi kusoe hale n ya fo bumo be kenanafofo nɛ kenana gbiramuli.’ 19Amoso Enyɛnpe Ebɔrɛ, keni fo kashenteŋ be kasha nɛ fo kɔ na so nseŋ ta basa ere be alubi m paŋ bumo fanɛ kananɛ fo ta m paŋ bumo, yili saŋɛ nɛ b lar Ijipt be efuli so kikɛ m ba fo kabre na.”
20Ndoŋ nna nɛ Enyɛnpe Ebɔrɛ kaŋɛ Mosis le: “Ŋkpal fo ka kule ma so, n ta bumo be alubi m paŋ bumo. 21Ama ŋkpal ŋ ka wɔ ŋkpa to nɛ ma kemaŋkura bɔlɔ durnya ere to kikɛ so, 22basa ere b ekama maaŋ yɔ kasawule nɛ n nase kɔnɔ n sa bumo na so. Ŋkpal manɛ so b wu ma kemaŋkura nɛ emamachisheŋ nɛ n wora ashi Ijipt be kasawule so nɛ keshishɛrsawule na so, ama b kini kenu n sa ma nseŋ wora ma ŋ keni alɛ damta. 23Bumo be keya maaŋ cha kasawule nɛ n nase kɔnɔ fanɛ meeŋ sa bumo nananyɛnana na so kikɛ. Bekama nɛ b kini ma na be ekama be keya maaŋ cha ndoŋ. 24Ama ŋkpal ma kayɛrbi Kalɛb bre ka maŋ du fanɛ bumo nɛ b ka na nseŋ ji kashenteŋ a sa ma so, meeŋ yɛra mo kasawule nɛ e ya dara na so nseŋ ta kumo n sa mbe kaman to ebi nɛ k ki bumo be kapetɛ. 25Ŋkpal Amalɛkebi nɛ Keenanebi na ka tase ataŋɛ nɛ a wɔ men be anishito na so, echefo men kilgi n sɔ keshishɛrsawule na so m bɔla teku peper na be kaba so.”
26Kede be kaman nɛ Enyɛnpe Ebɔrɛ naŋ kaŋɛ Mosis nɛ Ɛɛrɔn le: 27“Saŋɛ mo gba nɛ basa lubi ere beeŋ yige kebaa fubel a bile asheŋ a malga a gbiti ma? Bumo be nfubel na wora kebaŋso! 28Kaŋɛ bumo fanɛ meeŋ wora bumo kusɔ nɛ b kaŋɛ gbagba. Ma Enyɛnpe Ebɔrɛ na e malga na. 29Menyeeŋ wu n dese n dese keshishɛrsawule ere so ŋkpal men ka malga ŋ gbiti ma so. Menyi be ekama nɛ e fo nfɛ adunyɔ m baŋ so 30maaŋ yɔ kasawule nɛ m bɔ ntaŋ n nase kɔnɔ fanɛ meeŋ sa menyi na so. Jefune pibinyɛn Kalɛb nɛ Nun pibinyɛn Joshuwa nawule e naaŋ yɔ ndoŋ. 31Menyi be mbia nɛ men yɛ baaŋ pɛ ŋ ki anya na nɛ meeŋ yɛra kasawule nɛ men kini na so nɛ k ki bumo peya. 32Menyi ere beeŋ wu n dese keshishɛrsawule ere so. 33Ŋkpal men ka maŋ kɔ yirda so, menyi be mbia beeŋ baa wɔ keshishɛrsawule ere so a kilgi to a ji awurfoŋ nfɛ adena hale nɛ menyi be esa lalalogesopo e wu. 34Ŋkpal men ka ta nchɛ adena n dara efuli na so, menyeeŋ nite a kilgi to keshishɛrsawule ere so nfɛ adena. Kafɛ koŋwule kikɛ bee yili nna a sa kachɛ koŋwule. Ndoŋ nɛ menyeeŋ pin kananɛ ma kekilgi ŋ kɔ esa du. 35Menyi basa lubi nɛ men chala a fubel a bile asheŋ a malga a gbiti ma ere kikɛ beeŋ wu n dese keshishɛrsawule ere so. Ma Enyɛnpe Ebɔrɛ na e malga na.” 36Basa nɛ Mosis daŋ shuŋi fanɛ b ya dara kasawule na ŋ keni na be kudu nɛ b bar baru lubi na, e daŋ shin nɛ Israɛlebi na daŋ fubel m bile asheŋ m malga ŋ gbiti Enyɛnpe Ebɔrɛ. 37Amoso e daŋ shin nna nɛ aleblawu be kulɔ mɔ loŋ be basa na kikɛ. 38Joshuwa nɛ Kalɛb nawule e maŋ wu bumo to.
39Mosis ka kaŋɛ Israɛlebi na kusɔ nɛ Enyɛnpe Ebɔrɛ kaŋɛ na nɛ b shu kagbenejijaso ga. 40Kumo be ŋklade nɛ b fara a yɔ kebee be efuli na so nseŋ kaŋɛ le: “K daa maŋ daga fanɛ an fubel m bile asheŋ m malga ŋ gbiti Enyɛnpe Ebɔrɛ na. Amoso an wora alubi. Men shin nɛ an yɔ Keenan be kasawule nɛ Enyɛnpe Ebɔrɛ ŋini anyi fanɛ an yɔ na so.”
41Nɛ Mosis kaŋɛ bumo le: “Manɛ nna nɛ menyi maŋ kɔ kasonu n sa Enyɛnpe Ebɔrɛ na? Men baa nyi fanɛ men be ŋkre ere maaŋ tiŋ n shuŋ! 42Enyɛnpe Ebɔrɛ na maŋ naa wɔ menyi kutɔ, amoso men sa maŋ yɔ nɛ men doŋana e ya pɔɔ menyi so. 43Menyi nɛ Amalɛkebi nɛ Keenanebi na baŋ ya ka kɔ, Enyɛnpe Ebɔrɛ na beeŋ lar menyi kaman nɛ b pɔɔ menyi so m mɔ menyi ŋkpal men ka maŋ wora mo kasonu so.”
44Ama amo nɛ amo kikɛ Israɛlebi na kplaŋ so nseŋ pɛ kebee so be efuli na so be ekpa a yɔ saŋɛ nɛ Enyɛnpe Ebɔrɛ be ŋkre be deka na nɛ Mosis kikɛ maŋ naŋ lar keeyi na to. 45Ndoŋ nna nɛ Amalɛkebi nɛ Keenanebi nɛ b wɔ kebee so be efuli na so na kɔ m pɔɔ bumo so nseŋ ju bumo hale n ya fo kade nɛ baa tre Hɔɔma na.
15Esarga be mbraana be asheŋ
1Enyɛnpe Ebɔrɛ daŋ kaŋɛ Mosis nna fanɛ 2e ta le be esarga be kelara be mbraana n sa Israɛlebi na nɛ b baa bɛ amo so ashi kasawule nɛ baa yɔ nɛ b ya chena so na so.
3B baa ta gbolu ŋko kpakpa ŋko kubolpɔche ŋko kaboe n lara sarga chɔɔso ŋko kɔnɔ be ketia be sarga ŋko keparso be sarga ŋko kabɔrɛshuŋ be nchɛgboŋ be sarga. Le be esarga ere be efɛa bee wora ma Enyɛnpe Ebɔrɛ na ebel nna.
4-5Ekama nɛ e ta kusɔbɔya nɛ e ba lara ayu be sargajibi n sa Enyɛnpe Ebɔrɛ na, e ta ɔlif be ŋku kɔlba be bɔlɔ m baga nyifu kurwa koŋwule n ta yabra belbelso kɔlba koŋwule n ti so n lara sarga na.
6Nɛ fanɛ kpakpa nɛ b kɔ a lara sarga na kumo ere b ta ɔlif be ŋku kɔlba koŋwule nɛ bargato m baga nyifu kurwa anyɔ n lara ayu be sargajibi na 7nseŋ ta yabra belbelso kɔlba nɛ bargato malɛ n lara asɔnuuso be sarga. Le be esarga ere be efɛa bee par Enyɛnpe Ebɔrɛ nna. 8Nɛ b baŋ ta gbolu a lara sarga chɔɔso ŋko kɔnɔ be ketia be sarga ŋko kɔnɔkoŋwuleso be sarga, 9kumo ere b ta ɔlif be ŋku kɔlba koŋwule m baga nyifu kurwa asa n lara ayu be sargajibi na, 10nseŋ ta yabra belbelso kɔlba anyɔ n ti so m ba lara asɔnuuso malɛ be sarga. Le be esarga ere be efɛa bee wora Enyɛnpe Ebɔrɛ ebel nna. 11Saŋkama nɛ men ta gbolu ŋko kpakpa ŋko kubolpɔche ŋko kaboe nɛ men ya lara sarga, men baa bɛ le be mbra ere so. 12Kusɔbɔya kama nɛ ekama bar nɛ e ba lara sarga daga le be asɔ ere ka ti kumo so. 13Israɛl be kadetobia kikɛ nɛ e bee lara sarga chɔɔso daga fanɛ e lara ayu nɛ yabra belbelso be sarga n ti so, ŋkpal manɛ so amo kikɛ be efɛa bee wora Enyɛnpe Ebɔrɛ na ebel nna. 14Nɛ fanɛ befɔ nɛ b wɔ menyi to na gba bee sha kelara sarga n sa Enyɛnpe Ebɔrɛ na, a daga fanɛ bumo alɛ gba e bɛ le be mbra ere so. 15Mbra ere dese nna n sa menyi Israɛlebi nɛ men la ndetobia na nɛ befɔ nɛ b chena menyi to na kikɛ hale mbaanaayɔ. Sarga be kelara bre be kaplɛa so, menyi nɛ bumo kikɛ la kukoŋwule nna ashi Enyɛnpe Ebɔrɛ na be anishito, 16nɛ le be mbra ere malɛ la menyi nɛ bumo kikɛ peya.
17Enyɛnpe Ebɔrɛ e daŋ ta le be mbra ere n sa Mosis 18fanɛ e sa Israɛlebi na nɛ b baa bɛ amo so ashi kasawule nɛ e kɔ bumo a yɔ nɛ b ya chena so na so. 19“Nɛ men ba ya ka ji ndoŋ be kasawule so be ajibi, men baa lara ako fanɛ sarga a sa Enyɛnpe Ebɔrɛ na. 20Men baŋ wora bodobodo, men ta amo nɛ men juŋkpar n wora na n lara sarga n sa Enyɛnpe Ebɔrɛ fanɛ kananɛ menyeeŋ ta ayu nɛ men juŋkpar m biri n lara sarga na. 21A daga fanɛ menyi be kaman to ebi gba ka bɛ le be mbra ere so a ta bodobodo nɛ b juŋkpar n wora a lara sarga a sa Enyɛnpe Ebɔrɛ na.
22Ama nɛ fanɛ men maŋ kute n wora n da mbra nɛ Enyɛnpe Ebɔrɛ ta n sa Mosis na be kekama so, 23ŋko nɛ echefoso Israɛlebi na wora n da amo so 24ŋkpal b ka maŋ nyi so, kumo ere a daga fanɛ kade na to ebi ka fin gbolu n lara sarga chɔɔso nɛ kumo be efɛa bee wora Enyɛnpe Ebɔrɛ na ebel nseŋ ta ayu nɛ yabra belbelso nɛ kaboelote n ti amo so n lara alubi be ketampaŋ be sarga. 25Nɛ bɔrɛmatapo na e kule alubi be ketampaŋ n sa kade na to ebi kikɛ nɛ n ta m paŋ bumo ŋkpal b ka maŋ kute n wora kulubi na nseŋ lara alubi be sarga n sa ma Enyɛnpe Ebɔrɛ na so. 26Loŋ na, Israɛlebi na nɛ befɔ nɛ b chena bumo to na kikɛ beeŋ nya alubi be ketampaŋ ŋkpal bumo kikɛ ka maŋ kute n wora kulubi na so.
27Ama nɛ fanɛ esa koŋwule e maŋ kute n wora kulubi, kumo ere amodoŋwura e lara kaboeche nɛ k fo kafɛ koŋwule m ba lara alubi be ketampaŋ be sarga. 28Nɛ bɔrɛmatapo na e kule alubi be ketampaŋ n sa esa nɛ e maŋ kute n wora kulubi na nɛ n ta m paŋ mo. 29Mbra koŋwule ere e dese n sa ndetobia nɛ befɔ nɛ b maŋ kute n wora kulubi na kikɛ.
30Ama kadetobia ŋko efɔ nɛ e kute n wora kulubi bre, bee fɛl Enyɛnpe Ebɔrɛ na nna nsaa maŋ daga e ka wɔ basa na to. 31Ŋkpal amodoŋwura ka kini kenu n sa Enyɛnpe Ebɔrɛ na nseŋ kute n wora n da mbe mbra na so so, men ju mo nɛ e maŋ naa wɔ mbe basa to. Mo alɛ be kulubi beeŋ bɛ mo gbagba be kumu so.”
Kewora n da kewushiachɛ be mbra so be asheŋ
32Jemanɛ nɛ Israɛlebi na daa wɔ keshishɛrsawule na so na, nɛ b wu kanyɛn ko ka bee kil ndibi kewushiachɛ na kachako. 33Nɛ b keta mo m ba Mosis nɛ Ɛɛrɔn nɛ Israɛlebi kikɛ be anishito. 34Kumo be kaman nɛ b ti mo so n wɔtɔ mbe wajɛbu to, ŋkpal manɛ so b daŋ maŋ nyi kusɔ nɛ k daga fanɛ b wora mo. 35Ndoŋ nna nɛ Enyɛnpe Ebɔrɛ kaŋɛ Mosis le: “Shin nɛ b keta kanyɛn na n lar keeyi na to nɛ basa na kikɛ e ya kpla mo ajembu m mɔ.” 36Nɛ b keta kanyɛn na n lar keeyi na to n ya kpla mo ajembu m mɔ fanɛ kananɛ Enyɛnpe Ebɔrɛ kaŋɛ Mosis na.
37Kumo be kaman nɛ Enyɛnpe Ebɔrɛ naŋ kaŋɛ Mosis 38fanɛ e kaŋɛ Israɛlebi na fanɛ bumo nɛ bumo be kaman to ebi e baa ba ajolobi nɛ a kɔ ejese buru a chɔga bumo be epiŋi be nnɔkarya. 39Saŋkama nɛ men wu ajolobi na, a beeŋ ba nyiŋi menyi Enyɛnpe Ebɔrɛ be mbraana na, nɛ men ba bɛ amo so nsaa maaŋ ya ka ji kubojua a bɛ men be anishi be awuso nɛ men be ŋgbene be aparsheŋ lubi so. 40Aloŋ nɛ menyeeŋ nyiŋi ma mbraana nsaa bɛ amo so nseŋ lara alubi menyi be ŋgbene to a shuŋ ma nɛnɛ. 41Ma e la men Nyɛnpe nɛ men be Ebɔrɛ nɛ e lara menyi ashi Ijipt be efuli so na.
16Koora nɛ Deetan nɛ Abiram be kekini kenu n sa Mosis be asheŋ
1-2Kachako nɛ Iza pibinyɛn Koora nɛ e shi Livai be yiri to nsaa shi Kohaf be kabuna na tre Eliab be mbinyɛnsobi Deetan nɛ Abiram nɛ Pɛlɛf pibinyɛn Ɔɔn, nɛ mo nɛ bumo kre fanɛ b maaŋ naa nu a sa Mosis fanɛ ejuŋkparpo. Bumo nɛ Israɛl be basa alfa anyɔ nɛ adunu nɛ b la bejuŋkparpo nɛ basa bee sa bumo bunyaŋ ga na e daŋ wora kɔnɔ. 3Bumo kikɛ daŋ shɛr Mosis nɛ Ɛɛrɔn kutɔ nna ŋ kaŋɛ bumo le: “Manɛ nna nɛ menyee fɛ fanɛ men bɔ esa kikɛ ere? An kikɛ la Enyɛnpe Ebɔrɛ be basa cheembi nna.”
4Mosis ka nu loŋ, nɛ e gbir ŋ kurgi kumu n yuu to ŋ kule Ebɔrɛ. 5Kumo be kaman nɛ e kaŋɛ Koora nɛ mo braana na le: “Echefo kachipurso Enyɛnpe Ebɔrɛ beeŋ ŋini anyi esa nɛ mo gbagba lara fanɛ e ki bɔrɛmatapo. Amodoŋwura malɛ beeŋ shuŋ mo kashenteŋto. 6-7Koora, echefo kachipurso, fo nɛ fo braana na e muu ajanwulɛ n wɔtɔ edɛtɔl to n ta duwu n deŋi amo so n yɔ bɔrɛsure na ase. Ndoŋ nɛ anyeeŋ pin anyi to be emo nɛ Enyɛnpe Ebɔrɛ lara fanɛ bɔrɛmatapo. Menyi Livaiebi e naa fɛ fanɛ men bɔ basa.”
8Kede be kaman nɛ Mosis naŋ kaŋɛ Koora le: “Nu nfe! 9K maŋ bɔlɔ menyi Livaiebi, kenishi fanɛ Israɛl be Ebɔrɛ na ka lara menyi ashi Israɛlebi na kikɛ to fanɛ men ba kaa shuŋ mbe wajɛbu na to nsaa juŋkpar mbe basa nɛ b baa shuŋ mo a? 10E ta bunyaŋ be kushuŋ tumase ere n sa fo nɛ Livaiebi na kikɛ, ama amo nɛ amo kikɛ nɛ fo kraa kɔ a fin kabɔrɛmata be kushuŋ gba a! 11Fo baa malga a gbiti Ɛɛrɔn, kumo ere Enyɛnpe Ebɔrɛ na nɛ fo braana bee kini kenu n sa na.”
12Kumo be kaman nɛ Mosis shuŋi n tre Deetan nɛ Abiram. Ama le nɛ b daŋ kaŋɛ: “Anyi maaŋ ba! 13Men ka lara anyi ashi Ijipt be kasawule nɛ ajibi damta nɛ kedamaya wɔ na m ba lɛ keshishɛrsawule ere so nɛ men mɔ ere bre maŋ kukwe a? Nɛ men naa sha nɛ men ta anyi ŋ ki menyi be nyɛrbi a tɔrɔ a? 14Men nase kɔnɔ fanɛ menyeeŋ yɛra anyi kudɔsawule lela nɛ k bee wora adɔjibi nɛnɛ nɛ anyeeŋ tiŋ n dɔ asɔrso nɛ baa tre greeps kumo so na so nɛ k ki anyeya. Ama naniere nnɛ nɛ a wɔ? Menyee fule anyi nna. Amoso anyi maaŋ ba!”
15Ndoŋ nna nɛ Mosis nya agbo ga nseŋ kaŋɛ Enyɛnpe Ebɔrɛ le: “Sa maŋ kaŋ sɔ sarga nɛ basa ere kɔ a bar fo ere. M maŋ wora bumo be ekama kulubi. Ma alɛ maŋ sɔ esa kama be kurma.”
16Kede be kaman nɛ Mosis kaŋɛ Koora malɛ le: “Echefo, fo nɛ fo braana na kikɛ nɛ Ɛɛrɔn e ba Enyɛnpe Ebɔrɛ be wajɛbu na ase. 17Men be ekama e chulgi duwu n wɔtɔ mbe edɛtɔl to m ba chɔɔ n lara sarga n sa Enyɛnpe Ebɔrɛ na.” 18Kumo be ŋklade nɛ b muu ajanwulɛ n wɔtɔ bumo be edɛtɔl to nseŋ chulgi duwu n wɔtɔ edɛ na to nɛ bumo nɛ Mosis nɛ Ɛɛrɔn kikɛ ya yili Enyɛnpe be wajɛbu na be kabuna. 19Nɛ Koora shin nɛ Israɛlebi na kikɛ gbargbar abar m ba yili Mosis nɛ Ɛɛrɔn be anishito ashi wajɛbu na be kabuna. Epul na to nɛ Enyɛnpe Ebɔrɛ be kemaŋkura lar basa na kikɛ so, 20nɛ e kaŋɛ Mosis nɛ Ɛɛrɔn le: 21“Men barga men be amu ashi basa na kutɔ saŋɛ na so, meeŋ mɔ bumo epul ere to.”
22Ama Mosis nɛ Ɛɛrɔn bre daŋ gbir nna ŋ kurgi amu n yuu to nseŋ kaŋɛ le: “O Ebɔrɛ, fo e naa sa anyi ŋkpa. Feeŋ shuli n nya agbo n wɔtɔ basa ere kikɛ ŋkpal esa koŋwule be kulubi so a?”
23Nɛ Enyɛnpe Ebɔrɛ kaŋɛ Mosis le: 24“Kaŋɛ basa na fanɛ b loŋi Koora nɛ Deetan nɛ Abiram be ewajɛbu na ase.”
25Ndoŋ nna nɛ Mosis kpa n niŋi to nɛ Israɛl be bejuŋkparpoana na bɛ mo so n yɔ Deetan nɛ Abiram kutɔ. 26Nɛ Mosis kpele basa na kusoe ŋ kaŋɛ le: “Men loŋi basa lubi ere be ewajɛbu ase. Men sa maŋ beta bumo be kusɔ kama, nɛ manɛ aloŋ menyi nɛ bumo kikɛ beeŋ wu ŋkpal bumo be alubi so.” 27Amoso basa na kikɛ daŋ shile Koora nɛ Deetan nɛ Abiram be ewajɛbu na ase nna ŋ ka bumo nɛ bumo be beche nɛ mbia nawule n yili bumo be ewajɛbu na be mbuna.
28Nɛ Mosis kaŋɛ basa na le: “Kede e naaŋ shin nɛ men pin fanɛ Enyɛnpe Ebɔrɛ na e shuŋi ma fanɛ n wora asɔ ere kikɛ, mannɛ fanɛ ŋ gbagba be keparso nɛ mee wora amo. 29Nɛ Ebɔrɛ baŋ maŋ gberge basa ere kusoe n shin nɛ b wu, kumo ere mannɛ Enyɛnpe Ebɔrɛ na e lara ma fanɛ ŋ ki men be ejuŋkparpo. 30Ama nɛ fanɛ Enyɛnpe Ebɔrɛ na wora kusɔ nɛ k maŋ naŋ wora kikɛ nseŋ shin nɛ kasawule baŋɛ to n ta basa ere nɛ bumo be beche nɛ mbia nɛ kusɔ kama nɛ b kɔ kikɛ m min, loŋ nɛ menyeeŋ pin fanɛ basa ere kini Enyɛnpe Ebɔrɛ na kashenteŋto.”
31Mosis ka baŋ malga n loge, nɛ kasawule baŋɛ to epul to 32n ta Deetan nɛ Abiram nɛ Koora nɛ bumo be kanaŋ kikɛ nɛ bumo be mpetɛ kikɛ m min. 33Kasawule na daŋ baŋɛ to nna nɛ bumo nɛ bumo be mpetɛ kikɛ tɔr to nɛ k daŋ buu bumo so nɛ b kra keni nɛ basa na maŋ naŋ wu bumo. 34Israɛlebi nɛ b daa wɔ ndoŋ na ka nu bumo be kushu, nɛ b shile nsaa cha awɔr e kaŋɛ le: “Men baa shile! Nɛ manɛ aloŋ, kasawule na beeŋ ta anyi alɛ gba m min!”
35Kede be kaman nɛ Enyɛnpe Ebɔrɛ na shin nɛ edɛ wuloŋ wuloŋ ko ba chɔɔ benyɛn alfa anyɔ nɛ adunu nɛ b ta eduwu n ya ka lara sarga na m mɔ.
Edɛtɔl be asheŋ
36Ade kikɛ be kaman nɛ Enyɛnpe Ebɔrɛ na kaŋɛ Mosis le: 37“Kaŋɛ bɔrɛmatapo Ɛɛrɔn pibinyɛn Eliaza fanɛ e lara danyaŋ be edɛtɔl na ashi kedɛmurmur na to nseŋ gbeŋi ajanwulɛ nɛ a wɔ amo to na n lɛ. Edɛtɔlana na ki asɔ cheembi nna, 38ŋkpal b ka ta amo m ba Enyɛnpe Ebɔrɛ na be bɔrɛsure na ase so. Ta basa nɛ edɛ chɔ m mɔ ŋkpal bumo be alubi so ere be edɛtɔl m bɛl ebuuso a buu bɔrɛsure na so nɛ kumo be loŋ e baa la kefiɛso n sa Israɛlebi.” 39Amoso bɔrɛmatapo Eliaza e daŋ ta edɛtɔl na n sa nɛ b bɛl ebuuso a buu bɔrɛsure na so, 40nɛ k baa la kanyiŋi n sa Israɛlebi na fanɛ esa kama nɛ e maŋ shi Ɛɛrɔn be kanaŋ to, maŋ daga e ka chɔɔ duwu n lara sarga bɔrɛsure na so n sa Enyɛnpe Ebɔrɛ na. Esa kama nɛ e wora loŋ beeŋ wu fanɛ kananɛ Koora nɛ mbe basa wu na.
Ɛɛrɔn ka mɔlga Israɛlebi na be asheŋ
41Kumo be ŋklade nɛ Israɛlebi kikɛ naŋ fubel m bile asheŋ m malga ŋ gbiti Mosis nɛ Ɛɛrɔn ŋ kaŋɛ le: “Men mɔ Enyɛnpe Ebɔrɛ be basa, ŋko!” 42B ka ba abar so nɛ b ba malga ŋ gbiti Mosis nɛ Ɛɛrɔn na, nɛ b keni wajɛbu na be kaba so, nseŋ wu Enyɛnpe Ebɔrɛ be kemaŋkura ka bɔla kuwɔlpa to m ba buu kumo so. 43Ndoŋ nna nɛ Mosis nɛ Ɛɛrɔn ya yili wajɛbu na be anishito, 44nɛ Enyɛnpe Ebɔrɛ kaŋɛ Mosis le: 45“Men shile basa ere kutɔ nɛ m ba mɔ bumo epul ere to!”
Epul na to nɛ Mosis nɛ Ɛɛrɔn gbir ŋ kurgi amu n yuu to ŋ kule Ebɔrɛ, 46nɛ Mosis kaŋɛ Ɛɛrɔn le: “Ya chɔɔ bɔrɛsure na so be edɛ n wɔtɔ fo kedɛtɔl to nseŋ ta duwu n wɔtɔ amo to n wora manaŋ n yɔ basa na kutɔ n ya lara alubi be ketampaŋ be sarga n sa bumo. Ŋkpal manɛ so Enyɛnpe Ebɔrɛ na nya agbo nɛ aleblawu fara.” 47Ndoŋ nna nɛ Ɛɛrɔn nu kusɔ nɛ Mosis kaŋɛ na nseŋ ta mbe kedɛtɔl n shile n yɔ jimaŋ na be nferinto. E ka wu fanɛ aleblawu na teŋ fara, nɛ e ta duwu n wɔtɔ edɛ na to n chɔɔ n lara alubi be ketampaŋ be sarga n sa basa na. 48E kraa yil basa nɛ aleblawu mɔ na nɛ bumo nɛ b maŋ naŋ wu na be nferinto nna nɛ aleblawu na ku. 49Basa ŋgboŋ kuduana nɛ alfa ashunu nɛ aleblawu na daŋ mɔ. B daa maŋ karga Koora nɛ mo braana bre n ti so. 50Aleblawu na ka ku nɛ Ɛɛrɔn yɔ Mosis kutɔ ashi wajɛbu na be kabuna to.
17Ɛɛrɔn be kekpabi be asheŋ
1Le nɛ Enyɛnpe Ebɔrɛ daŋ kaŋɛ Mosis: 2“Kaŋɛ Israɛlebi fanɛ bumo be nnaŋ kuduanyɔ na be kekama e wora bumo be ejuŋkparpo be kekpabi. Nɛ fo sibɛ ejuŋkparpo kama be ketre n deŋi mbe kekpabi so. 3Sibɛ Ɛɛrɔn be ketre n deŋi Livai be kanaŋ be kekpabi so, ŋkpal manɛ so, kanaŋ kama be ejuŋkparpo daga kekpabi koŋwule nna. 4Nɛ fo ta akpabi na n ya yili ŋkre be deka na be anishito, ashi Enyɛnpe be wajɛbu na be kakpa nɛ mee kaa tu fo na. 5Ekama nɛ n lara fanɛ bɔrɛmatapo na be kekpabi beeŋ gbu kenishi. Loŋ e naaŋ shin nɛ Israɛlebi ere e yige kebaa fubel a bile asheŋ a malga a gbiti fo.”
6Ndoŋ nna nɛ Mosis kaŋɛ Israɛlebi na kusɔ nɛ Enyɛnpe Ebɔrɛ kaŋɛ na, nɛ bumo be nnaŋ kuduanyɔ na be kekama sa mo bumo be ejuŋkparpo be kekpabi n ta Ɛɛrɔn peya n ti so. 7Nɛ Mosis ta akpabi na kikɛ n nase Enyɛnpe Ebɔrɛ be ŋkre be deka na be anishito ashi wajɛbu na to.
8Kumo be ŋklade, Mosis ka yɔ wajɛbu na to, nɛ Ɛɛrɔn be kekpabi nɛ k yili n sa Livai be kanaŋ to ebi na gbu kenishi nseŋ purge n futi n wora atoto n sɔr asɔrso nɛ baa tre amɔnd na. 9Ndoŋ nna nɛ Mosis lara akpabi na kikɛ wajɛbu na to n m ba ŋini Israɛlebi na. B ka wu kusɔ nɛ k wora na, nɛ bejuŋkparpoana na be ekama ta mbe kekpabi. 10Nɛ Enyɛnpe Ebɔrɛ kaŋɛ Mosis le: “Bɛta Ɛɛrɔn bre be kekpabi na n ya nase ŋkre be deka na be anishito, nɛ k baa la kefiɛso n sa Israɛlebi nɛ baa fubel a bile asheŋ a malga a gbiti ma na. B baa maŋ yige bumo be nfubel na, bumo kikɛ beeŋ wu.” 11Nɛ Mosis wora kusɔ nɛ Enyɛnpe Ebɔrɛ kaŋɛ mo na kikɛ chap.
12Ndoŋ nna nɛ Israɛlebi na kaŋɛ Mosis le: “Kumo ere, an wu nna na! 13Nɛ ekama nɛ e ba wajɛbu na ase beeŋ wu bre, kumo ere anyi kikɛ maŋ naa wɔtɔ nna na!”
18Bɔrɛmatapoana nɛ Livaiebi be kushuŋ be asheŋ
1Le nɛ Enyɛnpe Ebɔrɛ kaŋɛ Ɛɛrɔn a laŋɛ bɔrɛmatapoana be kushuŋ be kaplɛa so: “Fo nɛ fo mbinyɛnsobi nɛ Livaiebi na kikɛ e naaŋ nya kulubi kama nɛ k wora Enyɛnpe be wajɛbu na be kushuŋ be kaplɛa so be kasogberge ama fo nɛ fo mbinyɛnsobi nawule e naaŋ nya kulubi kama nɛ k wora ashi bɔrɛmatapoana bre be kushuŋ be kaplɛa so bre be kasogberge. 2Fo kurgepoana Livaiebi na e naaŋ baa chɛ fo nɛ fo mbinyɛnsobi to a shuŋ wajɛbu na to. 3Shin nɛ b baa shuŋ kushuŋ kama nɛ feeŋ sa bumo ashi wajɛbu na to, ama b sa maŋ kaŋ beta asɔ cheembi nɛ a wɔ Enyɛnpe be wajɛbu na to na nɛ bɔrɛsure na bre, nɛ mannɛ aloŋ, fo nɛ bumo kikɛ beeŋ wu. 4Bumo nawule e naaŋ baa tu menyi a shuŋ wajɛbu na to. A maŋ daga esa pɔtɛ ka wora loŋ. 5Fo nɛ fo mbinyɛnsobi nawule e daga kebaashuŋ Enyɛnpe be wajɛbu na to nɛ bɔrɛsure na so, loŋ nɛ ma agbo maaŋ naŋ ba Israɛlebi na so. 6Ŋ gbagba e lara fo kurgepoana Livaiebi na ashi Israɛlebi to fanɛ kakɛ nɛ b ta m bɔɔ ma enɔ n sa menyi, nɛ b baa chɛ to a shuŋ wajɛbu na to. 7Fo nɛ fo mbinyɛnsobi nawule e naaŋ baa shuŋ kabɔrɛmata be kushuŋ na ashi bɔrɛsure na so nɛ acheembiana to be kakpa cheembi na to. Ŋkpal manɛ so ma e ta kabɔrɛmata be kushuŋ ere n sa menyi. Amoso esa kama nɛ e ta kpramɛ n shuŋ kumo, daga b ka mɔ mo.”
Bɔrɛmatapoana be kachige be asheŋ
8Kede be kaman nɛ Enyɛnpe Ebɔrɛ naŋ kaŋɛ Ɛɛrɔn le: “Baa nyiŋi fanɛ sarga nɛ b maaŋ chɔɔ a sa ma na la fo nɛ fo kaman to ebi peya nna mbaanaayɔ. 9Sarga cheembi kama nɛ b maa chɔɔ bɔrɛsure na so bre la menyeya nna, amo e la ayu be sargajibi nɛ kulubi be sarga nɛ abar be kelɔŋɛ be sarga. Kusɔ cheembi kama nɛ b ta m ba lara sarga n sa ma la fo nɛ fo mbinyɛnsobi peya nna. 10Le be asɔ ere la asɔ cheembi nna, amoso benyɛn nawule e chena kakpa cheembi n ji amo.
11Sarga pɔtɛ kama nɛ k naŋ ti ade so bre la menyeya nna mbaanaayɔ, nɛ fo nɛ fo mbinyɛnsobi nɛ becheso nɛ fo laŋ to ebi nɛ b walɛ so daŋkare be ekpa so, beeŋ tiŋ n ji amo.
12N ta ɔlif be ŋku nɛ yabra belbelso nɛ ayu nɛ a la sososo be ajibi nɛ Israɛlebi bee lara kafɛ kafɛ kikɛ a sa ma na nna n sa menyi. 13Amo kikɛ la menyeya nna nɛ men be laŋ to be esa kama nɛ e walɛ so daŋkare be ekpa so beeŋ tiŋ n ji amo.
14Kusɔ kama nɛ b lara n yili n sa ma ashi Israɛl be efuli so, la menyeya nna.
15Dimɛdi ŋko kusɔbɔya be wurkoŋ kama nɛ Israɛlebi na baaŋ ta n sa ma, la menyeya nna. Ama a daga men ka shuli nɛ b ka wurkoŋ kama nɛ kusɔbɔya be wurkoŋ kama nɛ k maŋ walɛ so daŋkare be ekpa so be kukɔ. 16Enyɛnpe be wajɛbu to be kananɛ baa karga amansherbi na be gbiti be ndarbi anu e daga fanɛ b ka n tɔ mbia nɛ b ji afɔl koko. 17Ama a maŋ daga men ka tɔ ana nɛ mbolpɔ nɛ mboe bre be ewurkoŋ. Amo ere daga keta n lara sarga n sa ma ŋkpal manɛ so a la meya nna. Men mɔ amo n chulgi amo be ŋklaŋ n wurge bɔrɛsure na so nseŋ chɔɔ amo be nfɔ saŋɛ na so amo be edishi beeŋ dii m ba ŋ kutɔ ŋkpal manɛ so amo be efɛa bee wora ma ebel nna. 18Amo be eblaŋ na bre kikɛ la menyeya nna fanɛ kananɛ sarga nɛ baa maŋ so a ŋini Ebɔrɛ na be ŋgbene na nɛ jiso be ebɛaŋana la menyeya na.
19Baŋ yili kabre a yɔ, sarga cheembi kama nɛ Israɛlebi na lara n sa ma ki fo nɛ fo mbinyɛnsobi nɛ mbichesobi peya mbaanaayɔ. Kɔnɔ nɛ n sa fo nɛ fo kaman to ebi nna na, kumo alɛ maaŋ chɛrga kikɛ.”
20Nɛ Enyɛnpe Ebɔrɛ naŋ kaŋɛ Ɛɛrɔn le: “Fo maaŋ nya kasawule be kachige nɛ k beeŋ baa la fo kapetɛ ashi Israɛl be kasawule so. Ma Enyɛnpe Ebɔrɛ na e naŋ baa la fo kapetɛ.”
Livaiebi na be kushuŋ be asheŋ
21Nɛ Enyɛnpe Ebɔrɛ naŋ kaŋɛ le: “N ta Israɛlebi na be kudukudusopo kikɛ nɛ baa bar ma nna a sa Livaiebi na. Amo e la Enyɛnpe be wajɛbu na to na be kushuŋ nɛ baa shuŋ be kakɔka. 22Baŋ yili kabre a yɔ, Israɛlebi nɛ b ka na e sa maŋ taga Enyɛnpe be wajɛbu na to, manɛ aloŋ baaŋ wu nɛ k baa la bumo be alubi be kasogberge. 23Livaiebi na nawule e naa ba shuŋ wajɛbu na to nɛ kumo be kewora n da so be turju e ba bɛ bumo. Le be mbra ere dese nna n sa menyi nɛ men be kaman to ebi kikɛ mbaanaayɔ. Bumo alɛ maaŋ nya kapetɛ kikɛ ashi Israɛlebi na to, 24ŋkpal manɛ so, mee ta kudukudusopo nɛ Israɛlebi na bee ta a lara sarga a sa ma na nna a sa Livaiebi na fanɛ bumo be kapetɛ ashi Israɛl be kasawule so.”
Livaiebi na be kudukudusopo be asheŋ
25Ade kikɛ be kaman nɛ Enyɛnpe Ebɔrɛ kaŋɛ Mosis fanɛ 26e kaŋɛ Livaiebi na le: “Men baŋ sɔ Israɛlebi be kudukudusopo nɛ mee ta a sa menyi fanɛ men be kapetɛ na, menyi alɛ gba e lara amo be kudukudusopo n sa Enyɛnpe Ebɔrɛ, 27fanɛ kananɛ Israɛlebi na bee lara bumo be kudukudusopo na. 28Le be ekpa so nɛ menyee baa bɔla a lara men be kudukudusopo. Bɔrɛmatapowura Ɛɛrɔn nɛ menyeeŋ ba ta amo a sa. 29Amo to be alela e daga fanɛ men ka lara n ya sa Enyɛnpe Ebɔrɛ na. 30Men baŋ lara amo to be alela n sa Enyɛnpe Ebɔrɛ na, menyeeŋ tiŋ n ta amo nɛ a ka na fanɛ kananɛ edɔpo bee lara mbe adɔjibi be kudukudusopo nsaa ta amo nɛ a ka na. 31Menyi nɛ menyi be kanaŋ kikɛ beeŋ tiŋ n ji amo, ŋkpal manɛ so menyi be wajɛbu to be kushuŋ be kakɔka nna na. 32Nɛ men baŋ lara amo to be alela n sa Enyɛnpe Ebɔrɛ na pɔɛŋ nseŋ ji amo nɛ a ka na, kumo ere men maŋ wora n da so. Menyi alɛ maŋ jija Israɛlebi na be esarga cheembi na. Menyi alɛ maaŋ wu.”
19Kena peper na be nsunɔ be asheŋ
1Kumo be kaman nɛ Enyɛnpe Ebɔrɛ naŋ kaŋɛ Mosis nɛ Ɛɛrɔn 2fanɛ b ta mbra ere n sa Israɛlebi na fanɛ b bar kena peper nɛ b maŋ naŋ ta kumo n shuŋ kikɛ nɛ k maŋ kɔ ndulgi kumo so m ba sa Mosis nɛ Ɛɛrɔn, 3nɛ b ta kumo n sa bɔrɛmatapo Eliaza nseŋ keta kumo n lar keeyi na to n ya mɔ mbe anishito. 4Nɛ Eliaza e suse kumo be ŋklaŋ na be ako n ta keshilbi n nyɔ amo to ŋ ŋmenyaŋ wajɛbu na be kaba so ale ashunu. 5Kumo be kaman nɛ b chɔɔ kena na kikɛ nɛ kumo be kawɔl nɛ eblaŋ nɛ ŋklaŋ nɛ apuntosɔ bɔrɛmatapo na be anishito. 6Nɛ bɔrɛmatapo na e ta kedibi nɛ baa tre sida na nɛ kumo nɛ baa tre hisɔp na nɛ jese peper n lɛ edɛ na to. 7Kumo be kaman nɛ bɔrɛmatapo na e ya fɔr mbe epiŋi nseŋ bɛr pɔɛŋ m bɛta m ba keeyi na to. Ama e maaŋ baa walɛ so daŋkare be ekpa so hale n ya fo kaaseso. 8Esa nɛ e chɔɔ kena na gba daga kefɔr mbe epiŋi nseŋ bɛr. Mo alɛ gba maaŋ baa walɛ so hale n ya fo kaaseso. 9Kumo be kaman nɛ esa nɛ e walɛ so daŋkare be ekpa so e muu kena nɛ b chɔɔ na be nsunɔ n ya yili keeyi na to be ekarso be kakpa nɛ k walɛ daŋkare be ekpa so. Nɛ Israɛlebi na e baa ta nsunɔ na a wea nchu nɛ baa ta a fɔr basa be alubi a lɛ daŋkare be ekpa so na to. 10Esa nɛ e muu nsunɔ na gba daga e fɔr mbe epiŋi. Mo alɛ maaŋ baa walɛ so hale n ya fo kaaseso. Le be mbra ere dese nna mbaanaayɔ n sa Israɛlebi na nɛ befɔ nɛ b chena bumo to na kikɛ.
Kebeta ebuni be asheŋ
11Esa kama nɛ e beta ebuni maaŋ baa walɛ so daŋkare be ekpa so nchɛnshunu. 12Ama e baaŋ ta nchu nɛ b ta kena peper na be nsunɔ n wea to na nna n fɔr mbe kumu so daŋkare be ekpa so kachɛ sasopo nɛ kachɛ shunusopo na. Nɛ e baa maŋ wora loŋ, e maaŋ ba walɛ so daŋkare be ekpa so. 13Esa kama nɛ e beta ebuni nseŋ kini kefɔr mbe kumu so daŋkare be ekpa so, wora eyurpi n jija Enyɛnpe be wajɛbu na nna nsaa maaŋ naŋ ti Ebɔrɛ be basa so.
14Nɛ fanɛ esa ko malɛ wu wajɛbu to, bekama nɛ b wɔ kumo to nɛ e wu na nɛ bekama nɛ e wu pɔɛŋ nɛ b luri kumo to na kikɛ wora eyurpi daŋkare be ekpa so nchɛnshunu. 15Kusɔ kama malɛ nɛ k yil wajɛbu na to a maŋ buuso ki eyurpi be kusɔ nna na. 16Ekama nɛ e beta esa nɛ b mɔ kowushina ŋko esa nɛ e wu kowushina be kebuni, ŋko dimɛdi be kuwibi ŋko nchaŋ gba wora eyurpi daŋkare be ekpa so nchɛnshunu.
17Pɔɛŋ nɛ esa na e nyalɛ so daŋkare be ekpa so, a daga fanɛ b ta kena peper nɛ b chɔɔ n lara alubi be kefɔrso be sarga na be nsunɔ n wɔtɔ kapuya nɛ nchu to. 18Nɛ esa nɛ e walɛ so daŋkare be ekpa so, e ta kedibi nɛ baa tre hisɔp be keyabi n nyɔ nchu na to ŋ ŋmenyaŋ ŋ ŋmenyaŋ wajɛbu na nɛ kusɔ kama nɛ k wɔ kumo to na, nɛ basa nɛ b daa wɔ ndoŋ na kikɛ so. Loŋ koŋwule nɛ baaŋ wora esa kama nɛ e beta dimɛdi be kuwibi ŋko kebuni ŋko nchaŋ. 19Esa nɛ e walɛ so daŋkare be ekpa so na e naaŋ ta nchu na ŋ ŋmenyaŋ basa nɛ b wora eyurpi daŋkare be ekpa so na so kachɛ sasopo nɛ kushunusopo na. Loŋ be kachɛ shunusopo na, nɛ esa nɛ e maŋ walɛ so na e fɔr mbe epiŋi nseŋ bɛr pɔɛŋ n nyalɛ so kaaseso.
20Esa kama nɛ e wora eyurpi daŋkare be ekpa so nseŋ kini kefɔr mbe kumu so daŋkare be ekpa so wora eyurpi n jija Enyɛnpe be wajɛbu na nna nsaa maaŋ naŋ ti Ebɔrɛ be basa so. 21Mbra ere maaŋ chɛrga kikɛ. Ekama nɛ e bee ŋmenyaŋ nchu na a fɔr basa so daŋkare be ekpa so gba, daga e fɔr mbe epiŋi. Ekama nɛ e beta nchu na malɛ beeŋ wora eyurpi daŋkare be ekpa so n ya fo kaaseso. 22Kusɔ kama nɛ esa nɛ e wora eyurpi daŋkare be ekpa so beta gba wora eyurpi. Esa kama nɛ mo alɛ beta kumo beeŋ wora eyurpi n ya fo kaaseso.
20Kusɔ nɛ k wora Kadɛsh be asheŋ
1Kafɛ to be kufɔl juŋkparso to nɛ Israɛlebi na fo keshishɛrsawule nɛ baa tre Zin na nseŋ wora bumo be keeyi to ashi Kadɛsh. Ndoŋ nɛ Miriam wu nɛ b ta mo m puli.
2Nchu daa maŋ wɔ kakpa nɛ b wora bumo be keeyi to na, amoso basa na daŋ ba kulti Mosis nɛ Ɛɛrɔn nna n wɔtɔ 3nseŋ fubel m bile asheŋ m malga ŋ gbiti Mosis ŋ kaŋɛ le: “Anyi nɛ an braana Israɛlebi ere kikɛ daŋ wu Enyɛnpe Ebɔrɛ be wajɛbu ere ase gba, k daa bɔ. 4Manɛ nna nɛ fo bar anyi nɛ an be asɔbɔya keshishɛrsawule ere so nɛ fo ba mɔ? 5Manɛ nna nɛ fo lara anyi Ijipt be kasawule so m ba lɛ kakpa lubi nɛ ajibi kikɛ maa wora ere? Aboyu nɛ figi be ndibi nɛ afeelebi nɛ a bee sɔr asɔrso nɛ baa tre greep na nɛ ndibi nɛ baa tre Pomegranates na kikɛ maŋ wɔ nfe. Nchu gba jalama anyi maŋ nya nɛ an nuu!” 6Ndoŋ nna nɛ Mosis nɛ Ɛɛrɔn lar basa na kutɔ n ya gbir wajɛbu na be kabuna a kule Ebɔrɛ nɛ Enyɛnpe Ebɔrɛ be kemaŋkura lar bumo so.
7Nɛ Enyɛnpe Ebɔrɛ kaŋɛ Mosis le: 8“Ta kekpabi nɛ k wɔ ŋkre be deka na be anishito na, nɛ fo nɛ Ɛɛrɔn e tre basa na kikɛ n shɛr, nɛ fo yili bumo be anishito m malga n sa kefalta na nɛ nchu e shi kumo to n lar eleŋso nɛ basa na nɛ bumo be asɔbɔya kikɛ e nya nchu n nu.” 9Ndoŋ nna nɛ Mosis bɛ kusɔ nɛ Enyɛnpe Ebɔrɛ kaŋɛ na so nseŋ ta mbe kekpabi na.
10Nɛ mo nɛ Ɛɛrɔn shin nɛ basa na kikɛ shɛr kefalta na be anishito nɛ Mosis kaŋɛ bumo le: “Menyi basa nɛ men maa nu a sa kusɔ nɛ baa kaŋɛ menyi ere, men nu nfe! Menyee sha an ka shin nɛ nchu e lar kefalta ere to nna n sa menyi a?” 11Kumo be kaman nɛ Mosis maŋ mbe kekpabi so ŋ ŋmɛa kefalta na ale anyɔ. Epul to nɛ nchu lar kefalta na to eleŋso a wurge nɛ basa na nɛ bumo be asɔbɔya kikɛ nuu.
12Ama le nɛ Enyɛnpe Ebɔrɛ daŋ kaŋɛ Mosis nɛ Ɛɛrɔn: “Ŋkpal men ka maŋ yirda ma nseŋ kini keshin nɛ Israɛlebi na pin ma eleŋ so, men maaŋ juŋkpar bumo n yɔ kasawule nɛ n nase kɔnɔ fanɛ meeŋ sa bumo na so.”
13Israɛlebi na daŋ fubel m bile asheŋ nna m malga ŋ gbiti Enyɛnpe Ebɔrɛ na, nɛ e ŋini bumo mbe kecheembiya be eleŋ nseŋ sa bumo nchu nɛ b nuu nseŋ nase kakpa na be ketre Mɛriba. Mɛriba be kifito e la kefubel m bile asheŋ.
14Nɛ Mosis yili Kadɛsh n shuŋi mbɔ fanɛ b ya kaŋɛ Edɔm be ewura le: “Fo kurgepoana Israɛlebi e la anyi. Fo gbagba nyi awurfoŋ nɛ anyee ji 15nɛ kananɛ an nananyɛnana daŋ yɔ Ijipt be kasawule so nɛ kananɛ an chena ndoŋ n chɛr nɛ Ijiptebi na daŋ tɔrɔ anyi ga. 16Nɛ an shu ŋ ŋini Enyɛnpe Ebɔrɛ nɛ e nu anyi be kushu nseŋ shuŋi malaika nɛ e ba lara anyi ashi Ijipt be kasawule so. Naniere an fo kade nɛ baa tre Kadɛsh nɛ k wɔ fo kasawule be egbaŋ be ekar na. 17Amoso jande, sa anyi ekpa nɛ an bɔla fo kasawule so n choŋ. Anyi maaŋ bɔla men be ndɔana ŋko men be asɔrso nɛ baa tre greep na be adɔ to. Anyi alɛ maaŋ nuu menyi be atirbu to be nchu. Anyeeŋ baŋ bɔla kegbembi so nna n nite a yɔ hale n ya baŋ menyi be kasawule so.”
18Ndoŋ nna nɛ Edɔm be ewura na kaŋɛ le: “M maaŋ shin nɛ men bɔla ma efuli so n choŋ! Men baŋ bɔla ndoŋ anyeeŋ lar ŋ kɔ menyi kena.”
19Nɛ Israɛlebi na kaŋɛ le: “Anyeeŋ baa nite kegbembi so a yɔ. Nɛ anyi be ekama ŋko kusɔbɔya kaŋ nuu menyi be nchu, anyeeŋ ka kumo be kukɔ. An baa sha nɛ an bɔla ndoŋ nna n choŋ nawule.”
20Nɛ Edɔmebi na malɛ naŋ kaŋɛ le: “Anyi maaŋ shuli!” Kede be kaman nɛ b keta bumo be benapo lempo n lar nɛ b ya kɔ Israɛlebi na kena. 21Ŋkpal Edɔmebi na ka maŋ shuli fanɛ Israɛlebi na e bɔla bumo be efuli so n choŋ na so, Israɛlebi na daŋ kilgi nna m bɔla ekpa pɔtɛ.
Ɛɛrɔn be luwu be asheŋ
22Nɛ Israɛlebi na kikɛ lar Kadɛsh n ya fo kebeegboŋ nɛ baa tre Hɔɔr 23nɛ k wɔ Edɔm be kasawule be ekarso na, nɛ Enyɛnpe Ebɔrɛ kaŋɛ Mosis nɛ Ɛɛrɔn le: 24“Ɛɛrɔn be keya maaŋ cha kasawule nɛ n nase kɔnɔ fanɛ meeŋ ta n sa Israɛlebi na so. Ŋkpal menyi benyɔ ka kini kenu n sa ma ashi Mɛriba na so, meeŋ shin nɛ e wu. 25Amoso keta Ɛɛrɔn nɛ mo pibinyɛn Eliaza n yɔ kebeegboŋ nɛ baa tre Hɔɔr na so 26n ya lara Ɛɛrɔn be kabɔrɛmata be epiŋi na m buu mo pibinyɛn Eliaza, ŋkpal manɛ so, Ɛɛrɔn beeŋ wu ndoŋ.” 27Nɛ Mosis wora kusɔ nɛ Enyɛnpe Ebɔrɛ kaŋɛ mo na, nseŋ shin nɛ b dii kebeegboŋ nɛ baa tre Hɔɔr na so nɛ basa na kikɛ bee keni bumo. 28Ndoŋ nna nɛ Mosis lara Ɛɛrɔn be kabɔrɛmata be piŋi na m buu Eliaza. Nɛ Ɛɛrɔn wu kebee na be esoso ndoŋ nɛ Mosis nɛ Eliaza gbelge to m ba. 29Basa na kikɛ ka nu fanɛ Ɛɛrɔn wu, nɛ b shu mbe keeli nchɛ adesa.
21Israɛlebi ka kɔ m pɔɔ so Keenanebi be asheŋ
1Keenan be ewura nɛ e daa wɔ Keenan be kelargato be kaseto be kaba so a ji kuwura ashi Arad na ka nu fanɛ Israɛlebi na bɔla Atarim be kaba so a ba, nɛ e ya kɔ bumo kena nseŋ pɛ bumo be beko. 2Ndoŋ nna nɛ Israɛlebi na kule Enyɛnpe Ebɔrɛ nseŋ nase kɔnɔ le: “Nɛ feeŋ chɛ anyi to nɛ an kɔ m pɔɔ basa ere so bre, kumo ere anyi alɛ beeŋ mur bumo nɛ bumo be nde nɛ kusɔ kama nɛ b kɔ kikɛ.” 3Nɛ Enyɛnpe Ebɔrɛ nu Israɛlebi na be kekule nseŋ chɛ bumo to nɛ b kɔ m pɔɔ Aradebi na so nseŋ mur bumo nɛ bumo be nde kikɛ.
Danyaŋ be kuwɔ na be asheŋ
4Israɛlebi na ka lar kebeegboŋ nɛ baa tre Hɔɔr na ase n sɔ Teku peper na be kaba so a kra Edɔm be efuli a yɔ nɛ b nyiti ŋ gben, 5nseŋ malga ŋ gbiti Ebɔrɛ nɛ Mosis ŋ kaŋɛ le: “Manɛ nna nɛ men lara anyi Ijipt be kasawule so m bar anyi nfe nɛ an ba wu keshishɛrsawule nɛ ajibi nɛ nchu gba maŋ wɔ ere so? Nfe be ajibi ere fi anyi.” 6Ndoŋ nna nɛ Enyɛnpe Ebɔrɛ shin nɛ awɔ lubi luri bumo to n duŋ Israɛlebi na be bedamta nɛ b wu. 7Nɛ basa na ba Mosis kutɔ m ba kaŋɛ le: “Ŋkpal an ka malga ŋ gbiti fo nɛ Enyɛnpe Ebɔrɛ so, an wora kulubi, amoso kule Ebɔrɛ nɛ e ju awɔ ere nfe naniere.” Ndoŋ nna nɛ Mosis kule Ebɔrɛ n sa bumo. 8Ndoŋ nna nɛ Enyɛnpe Ebɔrɛ kaŋɛ Mosis fanɛ e ta danyaŋ n lɔŋɛ kuwɔ n shiga kedibi tenteŋ so, saŋɛ na so, ekama nɛ kuwɔ naŋ duŋ nɛ e maŋ kumu so ŋ keni kumo, maaŋ wu. 9Ndoŋ nna nɛ Mosis ta danyaŋ n lɔŋɛ kuwɔ n shiga kedibi tenteŋ so. Ekama malɛ nɛ kuwɔ baŋ duŋ nɛ e maŋ kumu so ŋ keni kumo, bee nya alenfia nna.
Israɛlebi be keyɔ Mowab be asheŋ
10Kede be kaman nɛ Israɛlebi na koso ndoŋ n ya wora bumo be keeyi to ashi Oboof. 11B ka lar Oboof nɛ b ya wora bumo be keeyi to ashi Abarim be alambure to ashi Mowab be efuli so be epeŋilarkpa be kaba so. 12Kumo alɛ be kaman nɛ b ya wora bumo be keeyi to ashi Zɛrɛd be kebeemase. 13B ka naŋ koso ndoŋ, nɛ b ya dii Aanɔn be lɔr na n wora bumo be keeyi to ashi kumo be ekarso. Aanɔn be lɔr na e daa la Mowabebi nɛ Amɔriebi be egbaŋ to. 14Amoso nɛ nwɔl nɛ a bee malga Enyɛnpe Ebɔrɛ be kena be asheŋ na bee kaŋɛ le na: “Wahɛb be kade nɛ k wɔ Sufa be kebonfu ko to na nɛ kumo be ataŋɛ, nɛ Aanɔn be Lɔr na, 15nɛ kumo be ketaŋɛ nɛ k gbelge to a yɔ Ar be kade to be kaba so a laŋɛ Mowab be kasawule be egbaŋ to na be asheŋ na.”
16B ka koso ndoŋ nɛ b yɔ ketirbu nɛ k mata kade nɛ baa tre Bia na ase nɛ Enyɛnpe Ebɔrɛ kaŋɛ Mosis le: “Gbargbar basa na kikɛ abar so nfe nɛ n sa bumo nchu nɛ b nuu.” 17Ndoŋ nna nɛ Israɛl be basa boŋ le be kasha ere:
“Ketirbu, bul nchu.
Nɛ an boŋ kasha n chɔrɔ.
18An be bewurbi nɛ bejuŋkparpo e kur ketirbu na.
Bumo be awurakpabi nɛ
akpabi nɛ b ta n ŋini kakpa
nɛ b kur kumo.”
Kumo be kaman nɛ Israɛlebi na lar keshishɛrsawule na so n yɔ Mataana, 19nseŋ yili ndoŋ n yɔ Nahaliɛl, n ya yili Nahaliɛl malɛ n yɔ Bamɔf, 20nseŋ yili Bamɔf n yɔ Mowabebi be efuli so be kepla nɛ k gbelge to a yɔ kebeegboŋ nɛ baa tre Pisga nɛ k shoŋi keshishɛrsawule na.
Israɛlebi ka kɔ m pɔɔ Ewura Sihɔn nɛ Ewura Ɔg so be asheŋ
21Kede be kaman nɛ Israɛlebi shuŋi mbɔ Sihɔn nɛ e la Amɔriebi be ewura na kutɔ fanɛ b ya kaŋɛ mo le: 22“Men shin nɛ an bɔla men be kasawule ere so n choŋ. Anyi nɛ an be ana maaŋ yige ekpa n ya luri men be ndɔana nɛ men be asɔrso nɛ baa tre greep na be ndibi be adɔana to. Anyi alɛ maaŋ nuu menyi be atirbuana be nchu. Anyeeŋ baŋ bɔla kegbembi nna a yɔ hale nɛ an ya baŋ menyi be kasawule so.” 23Ama Sihɔn daa maŋ shuli fanɛ Israɛlebi na e bɔla mbe kasawule so n choŋ. E daŋ chala mbe benapo kikɛ nna n yɔ kade nɛ baa tre Jahaaz nɛ k wɔ keshishɛrsawule so na n ya kɔ Israɛlebi na kena. 24Israɛlebi na daŋ mɔ bumo doŋana na kena na to ga nseŋ sɔ bumo be kasawule nɛ k wɔ yili Aanɔn be Lɔr nɛ k wɔ kelargato be kaseto be kaba so na n ya fo Jabɔk be lɔr nɛ k wɔ kelargato be esoso. Jabɔk be lɔr na e daa la Amɔriebi nɛ Ammɔnebi na be nsawule be egbaŋ to. Ammɔnebi na bre daŋ pɔr egbal ŋ kulti bumo be nde nna. 25Israɛlebi na daŋ sɔ Amɔriebi na be nde kikɛ nna n ta bumo be kadegboŋ nɛ baa tre Hishbɔn nɛ ndewurbi nɛ a kulti kumo na n ti so. 26Hishbɔn daa la Amɔriebi be ewura Sihɔn be kadegboŋ nna. E daŋ kɔ Mowab be ewura ko kena nna n sɔ mbe kasawule n ya fo Aanɔn be lɔr na be kelargato be esoso be ekarso, 27Amoso nɛ beshɛbompo bee boŋ kashɛ fanɛ:
“Men ba Hishbɔn nɛ k la Sihɔn be kadegboŋ na to!
Anyee sha kelɔnɛ m pɔr kumo nna n yili nɛnɛ.
28Sihɔn be benapo daa kɔ kena nna fanɛ edɛ ka bee chɔɔ a ba na. B daŋ mur Mowab be kade nɛ baa tre Ar na nna nseŋ jija bumo be abee ase be nsawule nɛ a wɔ Aanɔn be lɔrkar na kikɛ cheche. 29Asheŋ maaŋ nyalɛ n sa menyi Mowabebi!
Chemɔsh be kegbir nɛ menyee shuŋ na mur cheche!
Men be kegbir na
shin nɛ men be benyɛn shile kena
n yɔ efuli pɔtɛ so.
Nɛ beche na malɛ ki basa nɛ Amɔriebi be bewura pɛ kena to.
30An pɔɔ Mowabebi kikɛ so. An yili Hishbɔn m mur bumo be nde kikɛ n ya fo Dibɔn nseŋ yili Nashim m mur amo n ya fo Noofa nɛ k mata Mɛdiba na.”
31Israɛlebi na ka sɔ Amɔriebi be kasawule n chena so na, 32nɛ Mosis shuŋi benyɛn ko fanɛ b ya keni kananɛ baaŋ wora ŋ kɔ kade nɛ baa tre Jeeza na kena. Kumo be kaman nɛ Israɛlebi na ya kɔ kade na kena n sɔ kumo nɛ ndewurbi nɛ a kulti kumo na, nseŋ ju Amɔriebi nɛ b wɔ ndoŋ na.
33Kumo be kaman nɛ Israɛlebi na naŋ kilgi n sɔ Bashan be kaba so, nɛ Bashan be ewura Ɔg keta mbe benapo nɛ e ya kɔ bumo kena ashi Edrei. 34Nɛ Enyɛnpe Ebɔrɛ kaŋɛ Mosis le: “Sa maa ŋana Ɔg nɛ mbe benapo. Meeŋ sa fo eleŋ nɛ fo kɔ m pɔɔ so bumo so fanɛ kananɛ fo wora Hishbɔn be ewura Sihɔn na. Ewura Ɔg be kasawule beeŋ ki menyeya.” 35Ndoŋ nna nɛ Israɛlebi na mɔ ewura Ɔg nɛ mbe mbinyɛnsobi nɛ mbe basa kikɛ nseŋ sɔ mbe kasawule na n chena so. Mbe esa kikɛ daa maŋ ji efute.
22Mowab be ewura ka shuŋi n tre Balaam be asheŋ
1Kumo be kaman nɛ Israɛlebi naŋ ya wora bumo be keeyi to Mowab be keplasawule so ashi Jɔɔdan be lɔr na be epeŋilarkpa be kaba so, nɛ Jɛriko be kadegboŋ na wɔ kumo be kaba ndoŋ.
2Zippɔ pibinyɛn Ewura Balak nɛ e daa la Mowabebi be ewura na, ka nu kusɔ nɛ Israɛlebi na wora Amɔriebi nɛ kananɛ Israɛlebi na shibi alegaiso na, 3nɛ kufu pɛ mo nɛ mbe basa kikɛ ga. 4Nɛ Mowabebi na kaŋɛ Midianebi be bejuŋkparpo na le: “Jimaŋ ere beeŋ ba mur anyi be kusɔ kama fanɛ kananɛ gbolu bee we afitiri adɛdɛ so ashi kupuŋ to na.” Amoso Ewura Balak 5daŋ kpal loŋ so nna, n shuŋi mbɔ fanɛ b ta le be kubɔya n ya sa Biyɔɔ pibinyɛn Balaam nɛ e wɔ Pɛɛtɔ nɛ k mata lɔrgboŋ nɛ baa tre Yufreetes nɛ k wɔ Amawu be kasawule so na. “Mee sha nɛ fo pin fanɛ efuli lelemu be basa shi Ijipt be efuli so m ba. Bumo alɛ bee salga to nna a sɔ kaplɛkama nsaa sha kesɔ anyi be kasawule kikɛ. 6B kɔ eleŋ a chɔ anyi ga, amoso jande, ba sho bumo kɔnɔ n sa ma. Ashere loŋ e naaŋ shin nɛ an tiŋ m pɔɔ bumo so nseŋ ju bumo ashi anyi be kasawule ere so. M baa nyi geeŋ fanɛ fo baŋ nɛfa basa, baa nya nɛfa nna, fo naŋ sho basa kɔnɔ, kɔnɔsho bee pɛ bumo nna.”
7Ndoŋ nna nɛ Mowabebi nɛ Midianebi be bejuŋkparpoana na ta amansherbi nɛ Ewura Balak be kubɔya na n yɔ nɛ b ya sa Balaam nɛ e ba shuŋ n sa bumo. 8Nɛ Balaam kaŋɛ bumo le: “Men dese nɛ kare e chɛ nɛ ŋ kaŋɛ menyi kusɔ nɛ Enyɛnpe Ebɔrɛ na kaŋɛ ma.” Amoso bejuŋkparpoana na daŋ dese Balaam kutɔ nna ŋklade.
9Loŋ be kanyɛ na nɛ Ebɔrɛ ba bishi Balaam le: “Basa mo malɛ e wɔ fo kutɔ ere?”
10Nɛ e kaŋɛ le: “Mowab be Ewura Balak e shuŋi bumo fanɛ b ba kaŋɛ ma 11fanɛ basa ko e shi Ijipt be kasawule so m ba sɔ bumo be kasawule so kikɛ n chena. Amoso e bee sha nna fanɛ m ba sho bumo kɔnɔ n sa mo nɛ e tiŋ ŋ kɔ m pɔɔ so bumo so n ju bumo n lar mbe kasawule so.”
12Nɛ Enyɛnpe Ebɔrɛ kaŋɛ Balaam le: “Sa maŋ kaŋ tu basa ere n yɔ, fo alɛ maŋ kraa sho Israɛlebi na kɔnɔ, ŋkpal manɛ so ma nɛfa wɔ bumo so nna.”
13Kare ka chɛ kachipurso, nɛ Balaam koso n ya kaŋɛ Ewura Balak be mbɔ le: “Men bɛta n yɔ epe, ŋkpal manɛ so, Enyɛnpe Ebɔrɛ maŋ sa ma ekpa fanɛ n tu menyi n yɔ.” 14Ndoŋ nna nɛ mbɔ na bɛta n ya kaŋɛ Ewura Balak fanɛ Balaam kini kebɛ bumo so m ba.
15Nɛ Ewura Balak naŋ shuŋi benimu nɛ b shi nsaa kɔ bunyaŋ a chɔ sososo be bumo nɛ e shuŋi na. 16Nɛ bumo alɛ ta Ewura Balak be kubɔya n ya kaŋɛ Balaam le: “Ewura Balak yɛ fo sa maŋ shin nɛ kusɔ kama e kuŋ fo keba anyi kutɔ akpa! 17E yɛ e beeŋ ka fo kukɔ nseŋ naŋ sa fo kusɔ kama nɛ fee sha n ti so. Amoso jande, ba sho basa na kɔnɔ.”
18Ama le nɛ Balaam daŋ kaŋɛ bumo: “Hale Ewura Balak ta ewurkpa be shuwa nɛ gbiti kikɛ gba n sa ma, maaŋ kini kenu n sa Enyɛnpe ma Ebɔrɛ na ekpa kama so. 19Menyi alɛ gba beeŋ tiŋ n dese nfe kanyɛ ere fanɛ kananɛ bumo na wora na, nɛ ŋ keni ŋko Enyɛnpe Ebɔrɛ kɔ kusɔ pɔtɛ ko nɛ e kaŋɛ a yɔ kumo be kaplɛa so a!”
20Kumo be kanyɛso nɛ Ebɔrɛ kaŋɛ Balaam le: “Meeŋ shin nɛ fo tu Ewura Balak be mbɔ na n yɔ Mowab, ama ya wora kusɔ kama nɛ meeŋ kaŋɛ fo.” 21Kumo be ŋklade kachipurso, nɛ Balaam ta gaare n deŋi mbe kurma so nɛ mo nɛ benimuana na yɔ.
Balaam be kurma be asheŋ
22Balaam daŋ dii mbe kurma nna nɛ mbe nyɛrbi anyɔ ko tu mo a yɔ Mowab, nɛ Ebɔrɛ nya agbo ŋkpal Balaam ka daŋ tu basa na a yɔ so nseŋ shin nɛ mbe malaika ya kuŋ mo akpa. 23Balaam be kurma na ka wu malaika ka keta tokobi a yil ekpa na to, nɛ k gbɛ n luri adɔ to. Nɛ Balaam bri kumo nɛ k bɛta m ba ekpa to. 24Ndoŋ nna nɛ malaika na naaŋ ya yili ekpa mɔebi, nɛ k dese asɔrso nɛ baa tre greep na be adɔana anyɔ nɛ b pɔr ajembu be egbal ŋ kulti na be nferinto. 25Kurma na ka wu malaika na, nɛ k gbɛ n ya mata egbal na nɛ Balaam be keyadra nyɛa egbal na. Ndoŋ nna nɛ Balaam naŋ bri kumo. 26Nɛ malaika na naŋ firgi n yɔ anishito n ya yili ekpa na be kakpa mɔebi nɛ kurma na maaŋ nya kakpa ŋ gbɛ n choŋ. 27Kurma na ka naŋ wu malaika na nɛ k kilgi n dese. Nɛ agbo pɛ Balaam ga nɛ e ta mbe kekpabi a bri kumo. 28Ndoŋ nna nɛ Enyɛnpe Ebɔrɛ shin nɛ kurma na malga Balaam kutɔ ŋ kaŋɛ le: “Manɛ nɛ n wora fo nɛ fo bri ma ale asa kikɛ?”
29Nɛ Balaam kaŋɛ: “Ŋkpal fo ka shin nɛ ŋ ki ewulpo na so, n daa kɔ tokobi gba nna, dafanɛ meeŋ mɔ fo.”
30Ndoŋ nna nɛ kurma na kaŋɛ mo le: “Manɛ ma nɛ fee dii nfɛ damta ere kikɛ na a? Fo daŋ wu ŋ ka wora fo le kikɛ a?”
Nɛ Balaam kaŋɛ: “M-m.”
31Nɛ Enyɛnpe Ebɔrɛ bugi Balaam be anishi nɛ e wu malaika na ka keta tokobi a yil ekpa na to. Ndoŋ nna nɛ Balaam kurgi kumu n yuu kasawule. 32Nɛ malaika na kaŋɛ Balaam le: “Manɛ nna nɛ fo bri fo kurma ale asa kikɛ? M ba nna nɛ m ba kuŋ fo ekpa nɛ fo maaŋ yɔ fo enite ere to. 33Fo kurma na wu ma nna nseŋ gbɛ ma ale asa kikɛ. Kurma na daa maŋ gbɛ ma nna, dafanɛ m mɔ fo n yige kumo ere.”
34Nɛ Balaam kaŋɛ le: “N wora kulubi. N daa maŋ nyi fanɛ fo yil ekpa na to nna a kuŋ ma akpa, ama nɛ fo wu fanɛ k maŋ daga ŋ ka yɔ ndoŋ bre, meeŋ bɛta n yɔ epe.”
35Nɛ malaika na kaŋɛ: “Fo nɛ Ewura Balak be benimuana ere e baa yɔ, ama ya malga kusɔ nɛ meeŋ kaŋɛ fo na nawule.” Ndoŋ nna nɛ Balaam tu bumo n yɔ.
Ewura Balak ka wora Balaam ansaŋ nɛ keba be asheŋ
36Ewura Balak ka nu fanɛ Balaam bee ba, nɛ e yɔ nɛ e ya shɛr mo to ashi kade nɛ baa tre Ar nɛ k wɔ Aanɔn be lɔr be ekarso ashi Mowab be kasawule be ekarso na. 37Nseŋ kaŋɛ mo le: “Manɛ nna nɛ n shuŋi n tre fo sososo na nɛ fo kini keba? Ŋko fee fɛ fanɛ maaŋ tiŋ ŋ ka fo nɛnɛ nna a?”
38Nɛ Balaam kaŋɛ le: “To m ba nna na! Ama maŋ kɔ eleŋ nɛ ŋ kaŋɛ kusɔ nɛ mee sha. Kusɔ nɛ Ebɔrɛ baŋ kaŋɛ nɛ mee malga.” 39Ndoŋ nna nɛ Balaam nɛ Ewura Balak kikɛ yɔ Kiriaf Huzɔɔf. 40Nɛ Ewura Balak ya mɔ ana nɛ mbolpɔ nseŋ ta amo be eblaŋ na be ako n sa Balaam nɛ benimu nɛ b wɔ mo kutɔ na.
Balaam be sososo be kewuŋkaŋɛ be asheŋ
41Ŋklade kachipurso nɛ Ewura Balak keta Balaam n dii n yɔ Bamɔf Baal, kakpa nɛ Balaam beeŋ tiŋ n wu Israɛlebi na be beko.
231Kumo be kaman nɛ Balaam kaŋɛ Ewura Balak le: “Shin nɛ b pɔr ebɔrɛsure ashunu nfe n sa ma nseŋ bar ma egbolu ashunu nɛ ekpakpa ashunu.”
2Nɛ Ewura Balak shin nɛ b wora loŋ nɛ mo nɛ Balaam ta gbolu koŋwule nɛ kpakpa koŋwule n lara sarga bɔrɛsure na be kekama so. 3Ndoŋ nna nɛ Balaam kaŋɛ Ewura Balak le: “Baa yil fo sarga ere ase nɛ n yɔ anishito n ya keni, Enyɛnpe Ebɔrɛ beeŋ ba ma kutɔ a? Saŋɛ na so meeŋ kaŋɛ fo kusɔ kama nɛ e lara ŋ ŋini ma, nseŋ dii n yɔ kebee na be kakpa nɛ ndibi nɛ afitiri maŋ wɔ na.” 4Ndoŋ nɛ Ebɔrɛ ba tu mo, nɛ Balaam kaŋɛ: “Enyɛnpe Ebɔrɛ, m pɔr ebɔrɛsure ashunu nseŋ ta gbolu nɛ kpakpa n lara sarga amo be kekama so.”
5Nɛ Enyɛnpe Ebɔrɛ na ta kubɔya n sa Balaam fanɛ e ya sa Ewura Balak. 6Nɛ Balaam bɛta n ya tu Ewura Balak nɛ mo nɛ Mowab be benimu yil mbe esarga na ase.
7Ndoŋ nna nɛ Balaam kaŋɛ:
“Mowab be ewura Balak e bar ma
ashi Siriya nɛ k wɔ abee be efuli so na
fanɛ m ba sho Israɛlebi kɔnɔ
n shin nɛ b mur.
8Ama nuso nɛ meeŋ tiŋ n sho basa nɛ Ebɔrɛ nɛfa kɔnɔ,
ŋko n shin nɛ basa nɛ Ebɔrɛ maŋ kaŋɛ fanɛ b mur, e mur?
9N yili kebee be esoso n wu bumo.
N wɔ kebee so a keni bumo.
B la basa nɛ b kɔr bekama to nna.
Basa nɛ Ebɔrɛ nɛfa.
10Wanɛ e naŋ tiŋ ŋ karga Israɛlebi nɛ
b shi m baŋ so ere?
Shin nɛ ma lalaloge be nchɛ e baa du fanɛ Ebɔrɛ be basa peya.
Shin nɛ n wu fanɛ esa niŋiso.”
11Nɛ Ewura Balak kaŋɛ Balaam le: “Manɛ nɛ fee wora loŋ? M bar fo nna nɛ fo ba sho n doŋana kɔnɔ, nɛ fo ba kilgi a nɛfa bumo a!”
12Nɛ Balaam kaŋɛ: “Kusɔ nɛ Enyɛnpe Ebɔrɛ kaŋɛ fanɛ ŋ kaŋɛ nɛ meeŋ kaŋɛ.”
Balaam be kubɔya nyɔsopo be asheŋ
13Nɛ Ewura Balak kaŋɛ mo: “Shin nɛ an yɔ kaboŋ pɔtɛ nɛ fo ya wu Israɛlebi na be gbrɛbi nɛ b maŋ fo bumo nɛ fo wu na so, saŋɛ na so feeŋ sho bumo kɔnɔ n sa ma.” 14Ndoŋ nna nɛ e keta Balaam n yɔ Zɔfim be ndɔ to be kebeegboŋ nɛ baa tre Pisga na be esoso n ya pɔr ebɔrɛsure ashunu ndoŋ gba, nseŋ mɔ gbolu nɛ kpakpa amo be kekama so n lara sarga.
15Ndoŋ nna nɛ Balaam kaŋɛ Ewura Balak le: “Baa yil fo sarga ere be kakpa nɛ n yɔ Enyɛnpe Ebɔrɛ na kutɔ m ba.”
16Nɛ Enyɛnpe Ebɔrɛ lar Balaam so ŋ kaŋɛ mo kusɔ nɛ e beeŋ ya kaŋɛ Ewura Balak nseŋ shin nɛ e bɛta n yɔ. 17Nɛ Balaam bɛta n ya tu Ewura Balak nɛ mo nɛ Mowab be benimu kraa yil esarga na ase. Nɛ Ewura Balak bishi Balaam kusɔ nɛ Enyɛnpe Ebɔrɛ kaŋɛ. 18Nɛ Balaam kaŋɛ:
“Ewura Balak kaŋ kusoe n nu nfe!
Zippɔ pibi Ewura Balak nu nfe.
19Ebɔrɛ maŋ la dimɛdi nna a ku efɛ
ŋko nyiŋgbasa a chɛrga mbe nfɛra,
kusɔ kama nɛ e nase kɔnɔ fanɛ e beeŋ wora, mo alɛ beeŋ wora kumo.
E bee malga nna nɛ k bee wora.
20Ebɔrɛ kaŋɛ ma nna fanɛ m baa nɛfa.
M maaŋ tiŋ n chɛrga kusɔ nɛ Ebɔrɛ nɛfa.
21Mee keni a wu fanɛ Israɛl be echefoso be kebaawɔtɔ
maaŋ ba kɔ kumulubi nɛ tɔrɔ.
Ŋkpal manɛ so Enyɛnpe, bumo be Ebɔrɛ na, wɔ bumo kutɔ nna.
B yɛ, mo e la bumo be ewura.
22Ebɔrɛ e lara bumo ashi Ijipt be kasawule so.
Mo e naa kɔ a sa bumo fanɛ kupuntona na.
23Kudur ŋko kegbaya be eleŋ kikɛ
maŋ wɔtɔ nɛ k beeŋ tiŋ ŋ kɔ m pɔɔ Israɛl be efuli ere so,
Basa beeŋ ji Israɛl be asheŋ be shɛda ŋ kaŋɛ le:
‘Men keni kusɔ nɛ Ebɔrɛ wora n sa mbe basa!’
24Israɛlebi du fanɛ buluŋ lempo nna.
K maa wushi kikɛ,
ama k baŋ mɔ kumo be kusɔ jiso nna n ji,
nseŋ dente kumo be ŋklaŋ.”
25Ndoŋ nna nɛ Ewura Balak kaŋɛ Balaam le: “Fo ka kini kesho Israɛlebi kɔnɔ ere, kumo ere sa maŋ kaŋ nɛfa bumo gba!”
26Nɛ Balaam kaŋɛ le: “M maŋ kaŋɛ fo fanɛ kusɔ nɛ Enyɛnpe Ebɔrɛ na kaŋɛ nɛ mee wora a?”
Balaam be kewuŋkaŋɛ sasopo be asheŋ
27Nɛ Ewura Balak kaŋɛ le: “Ba, nɛ n naŋ keta fo n yɔ kaboŋ ko. Ashere ndoŋ bre beeŋ bɔlɔ Ebɔrɛ kenishi nɛ e shin nɛ fo sho bumo kɔnɔ n sa ma.” 28Ndoŋ nna nɛ Ewura Balak keta Balaam n yɔ kebeegboŋ nɛ baa tre Piyɔɔ na be esoso be kakpa nɛ feeŋ yili n wu keshishɛrsawule na so kikɛ na. 29Nɛ Balaam kaŋɛ Ewura Balak le: “Shin nɛ b pɔr ebɔrɛsure ashunu n yili nfe nseŋ pɛ egbolu ashunu nɛ ekpakpa ashunu m bar ma.” 30Nɛ Ewura Balak wora kusɔ nɛ Balaam kaŋɛ na nseŋ mɔ gbolu nɛ kpakpa n lara sarga ebɔrɛsure na be kekama so.
241Ŋkpal Balaam ka tea nyi fanɛ Enyɛnpe Ebɔrɛ bee sha fanɛ e nɛfa Israɛlebi na so, e daa maŋ wora ŋkilgisheŋ kikɛ fanɛ kananɛ e chɛr a wora saŋko saŋko na. E daŋ kilgi mbe anishi nna n shoŋi keshishɛrsawule na be kaba so 2nseŋ wu Israɛlebi na ka wora bumo be nyi to n chena eyiri yiri be ntuŋ so. Ndoŋ nna nɛ Enyɛnpe Ebɔrɛ be kiyoyu gbelge mo so, 3nɛ e kaŋɛ le:
“Biyɔɔ pibinyɛn Balaam be kubɔya nde:
Emo nɛ e bee wu nɛnɛ,
4nsaa nu kusɔ nɛ Ebɔrɛ bee kaŋɛ na.
Ma anishi yil nna nɛ k wora ma lemm fanɛ edare na
nɛ n nya bɔrɛdare ashi Enyɛnpe Ebɔrɛ kutɔ.
5Israɛlebi, men be ewajɛbu na walɛ pasaa!
6A du nna fanɛ abii be ndibi ka yili m bɛ abar so le siir,
ŋko kudɔbi nɛ k mata lɔrkar.
A du nna fanɛ asɔrso be ndibi nɛ Enyɛnpe Ebɔrɛ na gbagba du,
ŋko ndibi nɛ baa tre sida na ka wɔ eboŋkar.
7Baaŋ nya mbɔrɛchu damta
nseŋ duu bumo be adɔjibi kasawule nɛ k kɔ kayul nɛnɛ so.
Bumo be ewura be kuwurji beeŋ baa chɔ Amalɛk be ewura Agag peya.
Mbe kuwura beeŋ ji eleŋ ga nɛ mbe ketre e dii.
8Ebɔrɛ e lara bumo ashi Ijipt be kasawule so.
B kɔ eleŋ nna fanɛ kupuntona na,
nsaa kɔ a pɔɔ bumo doŋana so.
Baaŋ to bumo doŋana ata nɛ bumo be awibi kikɛ e buri to.
9Bumo be efuli du nna fanɛ buluŋ lempo na.
K baa di, wanɛ e naaŋ tiŋ n ya tiŋi kumo.
Esa kama nɛ e nɛfa Israɛl, gba bee nya nɛfa nna;
Esa kama malɛ nɛ e sho Israɛl kɔnɔ, bee nya kɔnɔsho nna.”
10Ndoŋ nna nɛ Ewura Balak nya agbo alegaiso n wɔtɔ Balaam nseŋ a chicha ŋ kaŋɛ le: “N tre fo nna fanɛ fo ba sho n doŋana kɔnɔ, nɛ fo kini nseŋ nɛfa bumo ale asa kikɛ. 11Lar nfe naniere kikɛ n yɔ epe! N daŋ nase kɔnɔ nna fanɛ meeŋ ka fo kukɔ nɛnɛ ama Enyɛnpe Ebɔrɛ na kuŋ kumo be loŋ be ekpa na.”
12Nɛ Balaam malɛ kaŋɛ Ewura Balak le: “Kusɔ nɛ ŋ kaŋɛ mbɔ nɛ fo shuŋi na e la fanɛ, 13hale nɛ fo ta fo ewurkpa be shuwa nɛ gbiti kikɛ gba ŋ kɛ ma, m maaŋ kini kenu n sa Enyɛnpe Ebɔrɛ kikɛ. Kusɔ nɛ Enyɛnpe Ebɔrɛ kaŋɛ, nɛ meeŋ wora.”
Balaam be lalaloge be kewuŋkaŋɛ be asheŋ
14Kumo be kaman nɛ Balaam kaŋɛ Ewura Balak le: “Naniere bre mee bɛta a yɔ epe nna na, ama kefiɛso nɛ ŋ kɔ a sa fo a laŋɛ kusɔ nɛ Israɛlebi beeŋ wora menyi kachako so nde.” 15Ndoŋ nna nɛ e kaŋɛ le:
“Biyɔɔ pibinyɛn Balaam be kubɔya nde,
emo nɛ e bee wu nɛnɛ na be mmalga nde.
16Mo e naa nu Ebɔrɛ be mmalga nsaa pin amo to;
Mo e kɔ nfɛra nɛ k shi Enyɛnpetale Ebɔrɛ na kutɔ,
nsaa nya kewuŋkaŋɛ Enyɛnpetale Ebɔrɛ na kutɔ,
nsaa tɔr kasawule a bunyaŋ mo na.
17N wu fanɛ kachako so,
Ewura ko beeŋ lar Israɛl be efuli so
a du fanɛ kechɛkpabi nɛ k fulto parr na.
E beeŋ lar fanɛ kuwurkpabi ashi Israɛl.
E beeŋ mur Mowabebi kikɛ,
nseŋ mur Sɛt be kaman to ebi cheche.
18E beeŋ kɔ m pɔɔ so mo doŋana Edɔmebi so
nseŋ ta bumo be kasawule ŋ ki mbe kapetɛ.
Israɛl beeŋ baa kɔ a pɔɔ so saŋkama.
19Ejuŋkparpo ko beeŋ ba lar Israɛl kachako
m mur basa nɛ b ka kade na to kikɛ.”
20Balaam ka ku bɔrɛdare n wu Amalɛkebi na, nɛ e kaŋɛ le:
“Amalɛk e daa la efuliana ere be kelempo,
ama saŋko k beeŋ mur cheche.”
21Kusɔ nɛ e wu ŋ kaŋɛ a laŋɛ Kenebi be kaplɛa so mbe bɔrɛdare na to nde:
“Menyee fɛ fanɛ men nya kekuŋ nna,
fanɛ kananɛ kabuibi bee tɔl kasha kebee be esoso na.
22Ama Asiriyaebi kaŋ pɛ menyi,
menyeeŋ mur cheche.”
23Nɛ Balaam naŋ wu ŋ kaŋɛ le:
“Nɛ Ebɔrɛ shuli n wora le, wanɛ bre e naaŋ lar?
24Basa beeŋ ta nchu so be ekuloŋgboŋana n shi Saiprus m ba
kɔ m pɔɔ Asiriya nɛ Heba so.
Ama kumo be kaman Saiprus gba beeŋ mur cheche.” 25Balaam ka malga n loge nɛ e bɛta n yɔ epe nɛ Ewura Balak malɛ gba bɛta mbe ayamu so.
25Israɛlebi nɛ b wɔ Piyɔɔ na be asheŋ
1Saŋɛ nɛ Israɛlebi na daŋ wora bumo be keeyi to ashi kepla nɛ baa tre Akasia na, nɛ bumo be benyɛn ko fara a di Mowab be beche nɛ b wɔ ndoŋ na. 2Le be beche ere daa tre Israɛlebi na nna a yɔ Mowab be kegbir na be esarga be kejigboŋ to. Israɛlebi na daa tu bumo a ji agbirjibi na nna nsaa bunyaŋ 3kegbir nɛ baa tre Baal Piyɔɔ na. Amoso Enyɛnpe Ebɔrɛ daŋ nya agbo alegaiso nna n wɔtɔ bumo 4nseŋ kaŋɛ Mosis le: “Keta Israɛl be bejuŋkparpo kama nɛ baa yɔ kegbir na to na m ba mɔ bumo kapiidi ma anishito, saŋɛ na so, ma agbo maaŋ ba Israɛlebi na kikɛ so.” 5Nɛ Mosis kaŋɛ Israɛl be benimuana na le: “Menyi be ekama e mɔ menyi be yiri to be esa kama nɛ e bee bunyaŋ kegbir nɛ baa tre Baal Piyɔɔ na.”
6Mosis nɛ Israɛlebi na kikɛ ka shɛr Enyɛnpe Ebɔrɛ be wajɛbu na ase a shu na, nɛ Israɛlebi na be eko keta Midian be eche m bɔla bumo be anishito n yɔ mbe wajɛbu to. 7Eliaza pibinyɛn Finihas nɛ e la bɔrɛmatapo Ɛɛrɔn mo nanabi na ka wu bumo, nɛ e lar nshɛr na to n ya ta mbe kekpa, 8m bɛ Israɛl be kanyɛn na nɛ eche na so n yɔ mbe wajɛbu to n ya da mo nɛ eche na kikɛ m mata abar. Ndoŋ nna nɛ Enyɛnpe Ebɔrɛ shin nɛ aleblawu nɛ k bee tɔrɔ Israɛlebi na kikɛ kuu. 9Ama basa nɛ aleblawu na daŋ mɔ daa la ŋgboŋ adunyɔ nɛ ana nna.
10Kede be kaman nɛ Enyɛnpe Ebɔrɛ kaŋɛ Mosis le: 11“Ŋkpal kusɔ nɛ Finihas wora ere so, ma agbo maŋ naa wɔ Israɛlebi so. E maŋ shuli fanɛ esa kikɛ e shuŋ kegbir n ti ma Enyɛnpe Ebɔrɛ na so. Kumo so nɛ m maŋ kaa agbo m mur Israɛlebi kikɛ na. 12Amoso kaŋɛ mo fanɛ mee kre ma nɛ mo be kefɛato be kagbenewushi be ŋkre nɛ k beeŋ baa wɔtɔ mbaanaayɔ. 13Mo nɛ mbe kaman to ebi beeŋ baa la bɔrɛmatapoana hale mbaanaayɔ ŋkpal e ka bee kɔ kukɔrkɔ a sa ma nseŋ shin nɛ Israɛlebi na nya alubi be ketampaŋ so.”
14Israɛl b esa nɛ b daŋ mɔ mo nɛ Midianche na be ketre e daa la Zimri nɛ mo tuto la Saalu nɛ e daa la Simiɔn be yiri na to be enimu na. 15Midianche na be ketre e daa la Kuuzbi. Mo tuto e daa la Zur nɛ e daa la Midian be mbuna na be kuko be enimu na.
16Ndoŋ nna nɛ Enyɛnpe Ebɔrɛ kaŋɛ Mosis le: 17“Ya kɔ Midianebi na kena m mur bumo kikɛ, 18ŋkpal b ka ku efɛ n wora kulubi ŋ gbiti fo ashi Piyɔɔ nɛ ŋkpal b ka mɔ Kuuzbi aleblawu be saŋɛ ashi Piyɔɔ na so.”
26B ka karga Israɛlebi kela nyɔsopo be asheŋ
1Aleblawu na be kaman nɛ Enyɛnpe Ebɔrɛ kaŋɛ Mosis nɛ Ɛɛrɔn pibinyɛn Eliaza le: 2“Men karga Israɛlebi nɛ b fo nfɛ adunyɔ ŋko m baŋ so na kanaŋ kanaŋ so saŋɛ na so menyeeŋ pin bumo nɛ b fo kena to be keyɔ.” 3-4Ndoŋ nna nɛ Mosis nɛ Eliaza bɛ kusɔ nɛ Enyɛnpe Ebɔrɛ kaŋɛ na so nseŋ tre basa nɛ b fo nfɛ adunyɔ ŋko m baŋ so na kikɛ n shɛr Mowab be kepla nɛ k mata Jɔɔdan be lɔr nɛ Jɛriko wɔ kumo be kaba ndoŋ na so.
Israɛlebi nɛ b daŋ shi Ijipt m ba na nde.
5Ruben nɛ e daa la Jeekɔb be wurkoŋnyɛn na be yiri to ebi be mbuna e daa la Hanɔk nɛ Palu, 6nɛ Hezrɔn nɛ Kaami. 7Benyɛn nɛ b daŋ shi Ruben be kabuna na daa la ŋgboŋ adena nɛ asa nɛ alfa ashunu nɛ adesa nna. 8Palu pibi e daa la Eliab 9nɛ Eliab malɛ b mbia daa la Nemuɛl nɛ Deetan nɛ Abiram. Le be Deetan nɛ Abiram ere nɛ b daŋ lara fanɛ bejuŋkparpo, nɛ b daŋ kini kenu n sa Mosis nɛ Ɛɛrɔn nɛ Enyɛnpe Ebɔrɛ kikɛ nseŋ ya bɛ Koora so na. 10Bumo nɛ Koora nɛ kasawule daŋ baŋɛ to n ta m min, nɛ edɛ chɔɔ benyɛn alfa anyɔ nɛ adunu nɛ b daa bɛ Koora so loŋ be jemanɛ na, nɛ k la kefiɛso n sa Israɛlebi nɛ b ka na. 11Ama Koora be kabuna bre daa maŋ mur.
12Le be mbuna mbuna ere e daŋ shi Simiɔn be yiri to. Bumo e la, Nemuɛl nɛ Jamin nɛ Jakin 13nɛ Zɛra nɛ Shaaul. 14Benyɛn nɛ b daŋ shi Simiɔn be yiri na to daa wɔ ŋgboŋ adunyɔ nɛ anyɔ nɛ alfa anyɔ nna.
15Gad be yiri to be mbuna e daa la Zifɔn nɛ Hagi nɛ Shuni 16nɛ Ozni nɛ Eri 17nɛ Arɔd nɛ Areli. 18Le be mbuna ere kikɛ be benyɛn daa la basa ŋgboŋ adena nɛ alfa anu nna.
19-21Juda be yiri to be mbuna e daa la Shɛla nɛ Pɛrɛs nɛ Zɛra nɛ Hɛzrɔn nɛ Hamuul. Juda be mbinyɛnsobi nɛ baa tre Err nɛ Onan na bre daŋ wu Keenan be kasawule so nna. 22Le be mbuna ere be benyɛn kikɛ daa wɔ ŋgboŋ adushunu nɛ ashe nɛ alfa anu nna.
23Isaaka be yiri to be mbuna e daa la Tola nɛ Puwa 24nɛ Jashub nɛ Shimrɔn. 25Le be mbuna ere kikɛ be benyɛn daa wɔ ŋgboŋ adeshe nɛ ana nɛ alfa asa nna.
26Zebulun be yiri to be mbuna e daa la Sɛrɛd nɛ Elɔn nɛ Jaleel. 27Le be mbuna ere kikɛ be benyɛn daa wɔ ŋgboŋ adeshe nɛ alfa anu nna.
28Josɛf be mbia Manase nɛ Efreim be mbuna nde.
29Manase pibinyɛn e daa la Makiir, nɛ Makiir malɛ pibinyɛn la Giliad. 30Giliad be kanaŋ to be mbuna e daa la Ieza nɛ Helɛk 31nɛ Asriɛl nɛ Shɛchem 32nɛ Shamida nɛ Heefa. 33Heefa pibinyɛn Zelofehad daa maŋ kɔ mbinyɛnsobi, mbichesobi nawule nɛ e daa kɔ. Bumo be atre e daa la Maala nɛ Nowa nɛ Hogla nɛ Milka nɛ Tirza. 34Manase be mbuna ere kikɛ be benyɛn daa wɔ ŋgboŋ adunu nɛ anyɔ nɛ alfa ashunu nna.
35Efreim be yiri to be mbuna e daa la Shutɛla nɛ Becha nɛ Tahan nɛ 36Eran nɛ mbe kabuna shi Shutɛla be kabuna na. 37Le be kabuna ere be benyɛn daa wɔ ŋgboŋ adesa nɛ anyɔ nɛ alfa anu nna.
Josɛf be mbia be mbuna nna na.
38Bɛnjamin be yiri to be mbuna e daa la Bɛlla nɛ Ashbel nɛ Ahiram, 39nɛ Shefufam nɛ Hufam, 40nɛ Arrd nɛ Neeman be mbuna nɛ a shi Bɛlla be kabuna na. 41Le be mbuna ere be benyɛn daa wɔ ŋgboŋ adena nɛ anu nɛ alfa ashe nna.
42Dan malɛ be yiri to be kabuna e daa la Shuhamebi. 43B daa wɔ benyɛn ŋgboŋ adeshe nɛ ana nɛ alfa ana nna.
44Ashɛr be yiri to be mbuna e daa la, Imna nɛ Ishvi nɛ Beriya nɛ 45Heeba nɛ Malkiɛl be mbuna n ɛ a shi Beriya be kabuna na. 46Ashɛr daa kɔ mo pibiche ko nɛ baa tre Sɛɛra. 47Bumo be mbuna na be benyɛn daa wɔ ŋgboŋ adunu nɛ asa nɛ alfa ana nna.
48Naftali be yiri to be mbuna e daa la Jaziɛl nɛ Guni 49nɛ Jeeza nɛ Shilɛm. 50Le be mbuna ere be benyɛn wɔ ŋgboŋ adena nɛ anu nɛ alfa ana nna.
51Israɛl be benyɛn kikɛ daa wɔ ŋgboŋ alfa ashe nɛ kako nɛ alfa ashunu nɛ adesa nna.
52Ndoŋ nna nɛ Enyɛnpe Ebɔrɛ kaŋɛ Mosis le: 53“Yili kananɛ eyiri na be keshi sa so m barga kasawule na to n sa bumo. 54-56To beri m barga kasawule na to, nseŋ ta agboŋgboŋi n sa eyiri nɛ amo be basa shishi na, n ta awurbi n sa eyiri nɛ amo be basa maŋ shishi na.”
57Livai be kabuna be basa e daa la Gɛshɔn nɛ Kohaf nɛ Mɛrari. 58Bumo be kaman to ebi be mbuna mbuna e daa la Libni nɛ Hibrɔn nɛ Maali nɛ Muushi nɛ Koora. Amram mo tuto e daa la Kohaf, 59Amram e daŋ ta Livai pibiche Jokabed nɛ b daŋ kurge Ijipt be efuli so na. Mo nɛ mo e kurge Ɛɛrɔn nɛ Mosis nɛ Miriam. 60Ɛɛrɔn be mbinyɛnsobi e daa la Nadab nɛ Abihu nɛ Eliaza nɛ Itama. 61Nadab nɛ Abihu e daŋ wu ŋkpal b ka chɔɔ sarga be edɛ nɛ k maŋ daga so n sa Enyɛnpe Ebɔrɛ na. 62Livai be yiri to be benyɛn nɛ b fo kufɔl ŋko m baŋ so nɛ b daa maŋ karga n ti Israɛlebi nɛ b ka na so ŋkpal bumo ere ka maŋ nya kasawule na be kachige so kikɛ daa wɔ ŋgboŋ adunyɔ nɛ asa.
63Mosis nɛ Eliaza e daŋ karga basa na saŋɛ nɛ Israɛlebi na daa wɔ Mowab be kepla nɛ k mata Jɔɔdan be lɔr nɛ Jɛriko wɔ kumo be kaba ndoŋ na. 64Basa nɛ Mosis nɛ Ɛɛrɔn daŋ karga saŋɛ nɛ b karga Israɛlebi na sososo ashi Sainai be keshishɛrsawule na so na be ekoŋwule gba daŋ maŋ naa wɔtɔ, 65ama Jefune pibinyɛn Kalɛb nɛ Nun pibinyɛn Joshuwa nawule. Enyɛnpe Ebɔrɛ yɛ bumo be buushi basa na kikɛ beeŋ wu keshishɛrsawule na so.
27Zelofehad be mbicheso be asheŋ
1Heefa pibinyɛn Zelofehad be mbichesobi e daa la Maala nɛ Nowa nɛ Hogla nɛ Milka nɛ Tirza. Heefa malɛ mo tuto e daa la Giliad nɛ Giliad malɛ mo tuto daa la Makiir nɛ Makiir malɛ mo tuto daa la Manase nɛ Manase malɛ mo tuto daa la Josɛf. 2Kachako nɛ mbe mbichesobi na ya yili Mosis nɛ bɔrɛmatapo Eliaza nɛ bejuŋkparpoana na nɛ kade na to ebi kikɛ be anishito ashi Enyɛnpe Ebɔrɛ be wajɛbu na be kabuna to ŋ kaŋɛ le: 3“An tuto daŋ wu keshishɛrsawule na so nna. Mo alɛ daŋ maŋ wu nna ŋkpal e ka bɛ Koora so nseŋ kini kebɛ Enyɛnpe Ebɔrɛ so so. Mo gbagba be kulubi e daŋ mɔ mo. Mo alɛ daŋ maŋ kurge mbinyɛnsobi. 4K daga fanɛ an tuto be ketre ka mur Israɛl to ŋkpal e ka maŋ kurge mbinyɛnsobi so a? Men sa anyi alɛ gba kapetɛ nɛ k la an tuto be kabuna peya na.”
5Ndoŋ nna nɛ Mosis ta bumo be asheŋ na n yɔ Enyɛnpe Ebɔrɛ kutɔ, 6nɛ Enyɛnpe Ebɔrɛ kaŋɛ mo le: 7“Zelofehad be mbichesobi na kɔ kashenteŋ. Ta kapetɛ nɛ bumo tuto daa beeŋ nya ashi mbe kanaŋ to na n sa bumo. 8Kaŋɛ Israɛlebi na fanɛ a daga fanɛ esa kama nɛ e maŋ kurge ebinyɛn nseŋ wu, mo pibiche ka ji mbe kapetɛ. 9Nɛ fanɛ e maŋ kɔ ebiche malɛ, fo ta mbe kapetɛ n sa mo sipo ŋko mo da nyɛnsoana. 10Nɛ fanɛ e maŋ kɔ besipo ŋko beda nyɛnsoana malɛ, kumo ere mo tuto mo siponyɛnsoana e naŋ ji kapetɛ na. 11Nɛ fanɛ mo tuto maŋ kɔ besiponyɛnso ŋko bewɔpa, kumo ere b ta kapetɛ na n sa kanaŋ na to be ekurgepo nɛ e mata mo ga. Ma mbra nna na nɛ k daga Israɛlebi kikɛ ka bee bɛ kumo so.”
B ka lara Joshuwa fanɛ e sɔ Mosis so be asheŋ
12Kachako nɛ Enyɛnpe Ebɔrɛ kaŋɛ Mosis le: “Dii abeegboŋ nɛ baa tre Abarim na be esoso ŋ keni kasawule nɛ n ta n sa Israɛlebi na. 13Fo baŋ keni kasawule na n loge fo alɛ gba beeŋ wu fanɛ kananɛ fo da Ɛɛrɔn wu na. 14Ŋkpal manɛ so, Israɛlebi na ka fubel m bile asheŋ m malga ŋ gbiti ma ashi Mɛriba nɛ k mata Kadɛsh ashi Zin be keshishɛrsawule so na, kakpa nɛ n shin nɛ nchu lar kefalta to na, menyi basa anyɔ na daŋ maŋ yirda ma nseŋ kini keshin nɛ Israɛlebi na pin ma eleŋ.”
15Nɛ Mosis kule Ebɔrɛ ŋ kaŋɛ le: 16“Enyɛnpe Ebɔrɛ nɛ kusɔ kikɛ be ŋkpa wɔ fo enɔ to, jande lara esa nɛ e beeŋ tiŋ n juŋkpar basa ere 17nsaa beeŋ tiŋ ŋ ŋini bumo kena be kekɔ saŋɛ na so fo basa maaŋ baa du fanɛ mbolpɔ nɛ b maŋ kɔ ekpapo na.”
18Ndoŋ nna nɛ Enyɛnpe Ebɔrɛ kaŋɛ Mosis le: “Lara Nun pibinyɛn Joshuwa nɛ kiyoyu na bɔlɔ mo to na nseŋ ta fo enɔana n deŋi mbe kumu so. 19Shin nɛ e yili bɔrɛmatapo Eliaza nɛ jimaŋ na kikɛ be anishito fanɛ esa nɛ e beeŋ sɔ fo so. 20Ta fo kenimu be eleŋ n sa mo, saŋɛ na so Israɛl be basa kikɛ beeŋ baa nu n sa mo. 21Bɔrɛmatapowura Eliaza beeŋ baa ŋini mo kusɔ nɛ ma, Enyɛnpe Ebɔrɛ bee sha e ka bee wora. Loŋ e naŋ shin nɛ e baa tiŋ a juŋkpar Israɛlebi na a yɔ a ba.” 22Nɛ Mosis wora kusɔ nɛ Enyɛnpe Ebɔrɛ bee sha e ka wora na kikɛ nseŋ keta Joshuwa n ya yili bɔrɛmatapo Eliaza nɛ jimaŋ na kikɛ be anishito. 23Mosis daŋ ta mbe enɔana nna n deŋi Joshuwa so n ta mo n ŋini Israɛl ebi fanɛ mo e ki bumo be ejuŋkparpo, fanɛ kananɛ Enyɛnpe Ebɔrɛ kaŋɛ na.
28Karechɛ kama be esarga be asheŋ
1Nɛ Enyɛnpe Ebɔrɛ kaŋɛ Mosis 2fanɛ e kaŋɛ Israɛlebi na kenishipereso nɛ b baa ta bumo be ajibi be esarga nɛ amo be efɛa bee wora Enyɛnpe Ebɔrɛ ebel ga na m ba ka sa Ebɔrɛ saŋɛ nɛ k daga.
3B ta nfɛ koko be ekpakpa anyɔ nɛ a maŋ kɔ ndulgi kikɛ n lara karechɛ kikɛ be ajibi be sarga chɔɔso. 4B ta kukoŋwule n lara sarga kachipurso nseŋ ta kenyɔsopo na malɛ n lara sarga kaaseso saŋɛ nɛ kakpa bee pɛ anishi na. 5B ta ɔlif be ŋku kɔlba koŋwule m baga ayunyifu kurwa koŋwule n ti mbolpɔ na be kekama so. 6Kebeegboŋ nɛ baa tre Sainai na so nɛ b daŋ lara sososo be karechɛ kama be sarga chɔɔso nɛ amo be efɛa bee wora Enyɛnpe Ebɔrɛ ebel ga ere. 7B ta yabra belbelso kɔlba koŋwule n chulgi n wurge bɔrɛsure na so n ti ekpakpafɔlbi na be kekama so n lara sarga n sa Enyɛnpe Ebɔrɛ. 8Men ta kpakpafɔlbi nyɔsopo na nɛ yabra nɛ ayunyifu n lara kaaseso be sarga na fanɛ kananɛ men wora kachipurso na. Le be sarga be edishi be efɛa bee wora Enyɛnpe Ebɔrɛ na ebel nna.
Kewushiachɛ be sarga be asheŋ
9B ta nfɛ koko be ekpakpa anyɔ nɛ a maŋ kɔ ndulgi kikɛ nseŋ ta ɔlif be ŋku m baga nyifu kurwa anyɔ n ti yabra belbelso n lara sarga Kewushiachɛ. 10B baa lara le be sarga chɔɔ so ere Kewushiachɛ kikɛ n ti karechɛ kama be ayu nɛ yabra be esarga na so.
Kufɔl kikɛ to be kachɛ juŋkparso be sarga be asheŋ
11Kufɔl kikɛ be kachɛ juŋkparso men lara egbolu fɔlbi anyɔ nɛ b maŋ kɔ ndulgi, nɛ kpakpa koŋwule nɛ k maŋ kɔ ndulgi, nɛ nfɛ koko be ekpakpa ashunu nɛ a maŋ kɔ ndulgi m ba sa Enyɛnpe Ebɔrɛ. 12B ta nyifu kurwa asa nɛ b ta ɔlif be ŋku m baga n ti gbolu kama so, nɛ nyifu kurwa anyɔ n ti kpakpa kama so, 13nɛ nyifu kurwa koŋwule n ti nfɛ koko be ekpakpa na be kekama malɛ so n lara esarga nɛ amo be efɛa bee wora Enyɛnpe Ebɔrɛ na ebel. 14B ta yabra kɔlba anyɔ n ti gbolu kama so, n ta yabra kɔlba koŋwule nɛ bargato n ti kpakpa kama so nseŋ ta yabra kɔlba koŋwule malɛ n ti nfɛ koko be ekpakpa na be kekama so n lara yabra be sarga. Kafɛ kikɛ be kufɔl kikɛ be kachɛ juŋkparso be sarga be mbra nna na. 15B ta kaboelote n ti karechɛ kama be sarga chɔɔso na nɛ yabra be sarga na so n lara alubi be sarga.
Bodobodo nɛ a maŋ kɔ yiisi na be sarga be asheŋ
16Kufɔl juŋkparso na be kachɛ kuduanasopo kikɛ b baa ji kebansonchoŋ be kejigboŋ na a maŋkura Enyɛnpe Ebɔrɛ na. 17Nseŋ yili kufɔl na be kachɛ kuduanusopo n ji kachɛgboŋ na m bɛ abar so nchɛ ashunu nsaa ji bodobodo nɛ a maŋ kɔ yiisi loŋ be nchɛ na. 18Kachɛ juŋkparso nɛ baa ji kachɛgboŋ na, b sa maŋ shuŋ kushuŋ kikɛ ama b ba abar so m ba bunyaŋ Ebɔrɛ. 19B ta egbolu fɔlbi anyɔ nɛ a maŋ kɔ ndulgi nɛ kpakpa koŋwule nɛ k maŋ kɔ ndulgi nɛ nfɛ koko be ekpakpa ashunu nɛ b maŋ kɔ ndulgi m ba lara sarga chɔɔso n sa Enyɛnpe Ebɔrɛ. 20B ta nyifu kurwa asa nɛ b ta ɔlif be ŋku m baga n ti gbolu kama so, n ta nyifu kurwa anyɔ n ti kpakpa kama malɛ so, 21nseŋ ta nyifu kurwa koŋwule n ti nfɛ koko be kpakpa kama malɛ so n lara esarga. 22B ta kaboelote n ti so n lara alubi be sarga daŋkare be ekpa so n sa basa na. 23B lara amo n ti karechɛ kama be sarga nɛ baa lara kachipurso kikɛ na so. 24Loŋ koŋwule na e daga fanɛ b lara ajibi nɛ amo be efɛa wɔ ebel be sarga n sa Enyɛnpe Ebɔrɛ nchɛ ashunu nɛ a bɛ abar so na gba. 25Men shɛr abar so kachɛ shunusopo na m bunyaŋ Enyɛnpe Ebɔrɛ. Menyi alɛ e sa maŋ kaŋ shuŋ kushuŋ kikɛ kumo be kamɔnchɛ.
Kasɔteŋi be kejigboŋ be sarga be asheŋ
26A daga fanɛ men be ekama ka wushi ashi mbe ashuŋ to kasɔteŋi be kachɛgboŋ na be kachɛ juŋkparso, nseŋ ta mbe ayu popɔr be sarga m ba sa Enyɛnpe Ebɔrɛ na, nseŋ shɛr abar so m bunyaŋ mo. 27Men ta egbolu fɔlbi anyɔ nɛ a maŋ kɔ ndulgi nɛ kpakpa koŋwule nɛ k maŋ kɔ ndulgi nɛ nfɛ koko be ekpakpa ashunu nɛ a maŋ kɔ ndulgi m ba lara sarga chɔɔso nɛ amo be efɛa bee wora Enyɛnpe Ebɔrɛ ebel na n sa mo. 28Men ta ayunyifu kurwa asa nɛ b ta ɔlif be ŋku m baga n ti gbolu kama so, n ta ayunyifu kurwa anyɔ n ti kpakpa kama so, 29nseŋ ta ayunyifu kurwa koŋwule n ti nfɛ koko be ekpakpa na be kekama so n lara sarga na. 30Men ta kaboelote n ti so n lara alubi be sarga. 31Men ta asɔbɔya na nɛ yabra n ti asɔ nɛ b kɔ a lara karechɛ kama be sarga chɔɔso nɛ ayu be sarga na so n lara sarga. Men baa da so nɛ asɔbɔya na be kekama maaŋ ba kɔ ndulgi.
29Kafɛ popɔr be kachɛgboŋ be esarga be asheŋ
1“Kufɔl shunusopo to be kachɛ juŋkparso na, ekama e sa maŋ shuŋ kushuŋ kikɛ. Men shɛr n foŋ mbel m bunyaŋ Enyɛnpe Ebɔrɛ kumo be kamɔnchɛ. 2Men ta gbolu fɔlbi nɛ k maŋ kɔ ndulgi nɛ kpakpa nɛ k maŋ kɔ ndulgi nɛ nfɛ koko be ekpakpafɔlbi ashunu nɛ a maŋ kɔ ndulgi kikɛ m ba lara sarga nɛ kumo be efɛa wɔ ebel n sa Enyɛnpe Ebɔrɛ. 3Men ta nyifu lela kurwa asa nɛ b ta ɔlif be ŋku m baga amo n ti gbolu na so, n ta nyifu kurwa anyɔ n ti kpakpa na so, 4nseŋ ta nyifu kurwa koŋwule n ti nfɛ koko be ekpakpa na be kekama so n lara sarga. 5Men ta kaboelote n ti amo so n lara alubi be sarga. 6Men lara amo n ti sarga chɔɔso nɛ menyee lara kufɔl kikɛ be kachɛ juŋkparso na nɛ karechɛ kama be esarga chɔɔso na nɛ amo be nyifu nɛ yabra be esarga nɛ amo be efɛa bee wora Enyɛnpe Ebɔrɛ ebel na so.
Alubi be ketampaŋ be esarga be asheŋ
7Men sa maŋ kaŋ shuŋ kushuŋ kikɛ ŋko n ji ajibi kufɔl shunusopo na be kachɛ kudusopo na. Men ba abar so m ba bunyaŋ Enyɛnpe Ebɔrɛ kumo be kamɔnchɛ. 8Men ta gbolu fɔlbi nɛ k maŋ kɔ ndulgi nɛ kpakpa nɛ k maŋ kɔ ndulgi nɛ nfɛ koko be ekpakpafɔlbi ashunu nɛ a maŋ kɔ ndulgi kikɛ m ba lara sarga nɛ kumo be efɛa wɔ ebel n sa Enyɛnpe Ebɔrɛ. 9Men ta nyifu lela kurwa asa nɛ b ta ɔlif be ŋku m baga amo n ti gbolu na so, n ta nyifu kurwa anyɔ n ti kpakpa na so, 10nseŋ ta nyifu kurwa koŋwule n ti ekpakpafɔlbi na be kekama so n lara sarga. 11Men ta kaboelote n ti amo so n lara alubi be ketampaŋ be sarga. Men lara amo n ti kachɛ kama be esarga chɔɔso na so.
Nwu be esarga be asheŋ
12Men shɛr kufɔl shunusopo na be kachɛ kuduanusopo na n ji kachɛgboŋ m bɛ abar so nchɛnshunu m maŋkura Enyɛnpe Ebɔrɛ. Men sa maŋ shuŋ kushuŋ kikɛ loŋ be kachɛ na. 13Kumo be kachɛ juŋkparso na men ta egbolu fɔlbi kuduasa nɛ a maŋ kɔ ndulgi nɛ ekpakpa anyɔ nɛ a maŋ kɔ ndulgi nɛ nfɛ koko be ekpakpafɔlbi kuduana nɛ a maŋ kɔ ndulgi n lara ajibi be sarga nɛ amo be efɛa wɔ ebel n sa Enyɛnpe Ebɔrɛ. 14Men ta nyifu lela kurwa asa nɛ b ta ɔlif be ŋku m baga n ti gbolu na be kekama so, n ta nyifu kurwa anyɔ n ti kpakpa na be kekama so, 15nseŋ ta nyifu kurwa koŋwule n ti ekpakpafɔlbi na be kekama so n lara sarga. 16Men ta kaboelote n lara alubi be sarga n ti amo nɛ kachɛ kama be esarga chɔɔso nɛ amo be yabra nɛ nyifu be esarga so.
17Kachɛ nyɔsopo na, men ta egbolu fɔlbi nɛ a maŋ kɔ ndulgi kuduanyɔ nɛ ekpakpa nɛ a maŋ kɔ ndulgi anyɔ nɛ nfɛ koko be ekpakpafɔlbi nɛ a maŋ kɔ ndulgi kuduana n lara sarga. 18-19Men ta nyifu nɛ yabra kananɛ k daga fanɛ b ta n ti kusɔbɔya kama so, nɛ kaboelote n ti asɔbɔya na so n lara sarga.
20Kachɛ sasopo na men ta egbolu fɔlbi kudukako nɛ ekpakpa anyɔ nɛ nfɛ koko be ekpakpafɔlbi kuduana n lara sarga. 21-22Men ta nyifu nɛ yabra kananɛ k daga fanɛ b ta n ti kusɔbɔya kama so, nɛ kaboelote n ti asɔbɔya na so n lara sarga na.
23Kachɛ nasopo na, men ta egbolu fɔlbi kudu nɛ ekpakpa anyɔ nɛ nfɛ koko be ekpakpafɔlbi nɛ amo kikɛ maŋ kɔ ndulgi n lara sarga. 24-25Men ta nyifu nɛ yabra kananɛ k daga fanɛ b ta n ti kusɔbɔya kama so, nɛ kaboelote n ti asɔbɔya na so n lara sarga na.
26Kachɛ nusopo na, men ta egbolu fɔlbi akpanu nɛ ekpakpa anyɔ nɛ nfɛ koko be ekpakpafɔlbi kuduana nɛ amo kikɛ maŋ kɔ ndulgi n lara sarga. 27-28Men ta nyifu nɛ yabra fanɛ kananɛ men daŋ wora kachɛ juŋkparso na n ti asɔbɔya na so n lara sarga.
29Kachɛ shesopo na, men ta egbolu fɔlbi aburwa nɛ ekpakpa anyɔ nɛ nfɛ koko be ekpakpafɔlbi kuduana nɛ amo kikɛ maŋ kɔ ndulgi n lara sarga. 30-31Men ta nyifu nɛ yabra kananɛ k daga fanɛ b ta n ti kusɔbɔya kama so, nɛ kaboelote n ti asɔbɔya na so n lara sarga na.
32Kachɛ shunusopo na, men ta egbolu ashunu nɛ ekpakpa anyɔ nɛ nfɛ koko be ekpakpafɔlbi kuduana nɛ amo kikɛ maŋ kɔ ndulgi n lara sarga. 33-34Men ta nyifu nɛ yabra kananɛ k daga fanɛ b ta n ti kusɔbɔya kama so, nɛ kaboelote n ti asɔbɔya na so n lara sarga na.
35Kachɛ burwasopo na nɛ men shɛr abar so m bunyaŋ Ebɔrɛ. Menyi alɛ e sa maŋ kaŋ shuŋ loŋ be kachɛ. 36Men ta gbolu koŋwule nɛ kpakpa koŋwule nɛ nfɛ koko be ekpakpafɔlbi ashunu nɛ amo kikɛ maŋ kɔ ndulgi n lara sarga chɔɔso nɛ kumo be efɛa bee wora Enyɛnpe Ebɔrɛ na ebel n sa mo. 37-38Men ta nyifu nɛ yabra nɛ asɔ nɛ a daga kikɛ fanɛ kananɛ men daŋ wora kachɛ juŋkparso na n ti asɔbɔya na so n lara sarga na.
39Men baa lara le be esarga ere kachɛgboŋ achɛ kikɛ n ti keparso ŋko kɔnɔ be ketia be esarga so.”
40Ndoŋ nna nɛ Mosis kaŋɛ Israɛlebi na kusɔ nɛ Enyɛnpe Ebɔrɛ kaŋɛ mo na.
30Nnɔ naseso be mbra be asheŋ
1Le be keŋini ere nɛ Mosis daŋ ta n sa Israɛl be eyiri na be bejuŋkparpoana. 2Esa kama baŋ nase kɔnɔ n sa Enyɛnpe Ebɔrɛ na, ŋko m bɔ ntaŋ fanɛ e maaŋ wora kusɔ ko, k daga e ka bɛ kɔnɔ naseso na so n wora kusɔ kama nɛ e kaŋɛ fanɛ e beeŋ wora na.
3Nɛ kasuŋgurbia nɛ e kraa wɔ mo tuto be laŋ to baŋ nase kɔnɔ n sa Enyɛnpe Ebɔrɛ na, ŋko n nase kɔnɔ fanɛ e beeŋ yige kusɔ ko be kewora, 4kumo ere a daga fanɛ e ka wora kusɔ kama nɛ e kaŋɛ na m bɔlɔ so, ama mo tuto baŋ nu kumo nna nseŋ wule ŋ kini kumo. 5Nɛ mo tuto ju mo fanɛ e sa maŋ wora m bɔlɔ mbe kɔnɔ naseso na so bre, kumo ere k maŋ daga fanɛ e wora m bɔlɔ kumo so. Enyɛnpe Ebɔrɛ malɛ beeŋ ta m paŋ mo ŋkpal mo tuto ka maŋ shuli fanɛ e wora m bɔlɔ kumo so so.
6Nɛ fanɛ kebichebi nase kɔnɔ nna ŋko m malga kesariaso n nase kɔnɔ fanɛ e beeŋ yige kusɔ ko be kewora pɔɛŋ nseŋ ya kil, 7kumo ere a daga e ka wora m bɔlɔ kusɔ kama nɛ e nase kɔnɔ fanɛ e beeŋ wora na so, ama mo kul baŋ nu kumo nna nseŋ kini kumo. 8Nɛ mo kul ju mo fanɛ e sa maŋ wora m bɔlɔ kɔnɔ naseso na so bre, kumo ere k maŋ naŋ daga fanɛ e wora m bɔlɔ kumo so. Enyɛnpe Ebɔrɛ malɛ beeŋ ta m paŋ mo.
9Ekulpoche ŋko eche nɛ e kini mo kul, daga e ka wora m bɔlɔ kɔnɔ naseso kama nɛ e nase ŋko kusɔ kama nɛ e kaŋɛ fanɛ e beeŋ yige kewora na so.
10Nɛ fanɛ eche kilpo baŋ nase kɔnɔ ŋko ŋ kaŋɛ fanɛ e beeŋ yige kusɔ ko be kebaawora, 11kumo ere a daga e ka wora m bɔlɔ mbe kɔnɔ naseso na ŋko kusɔ nɛ e kaŋɛ na so, ama mo kul baŋ nu kumo nna nseŋ kaŋɛ fanɛ e maŋ shuli kumo. 12Nɛ mo kul nu kumo nseŋ ju mo fanɛ e sa maŋ wora m bɔlɔ kɔnɔ naseso na so bre, kumo ere k maŋ daga e ka wora m bɔlɔ kumo so. Enyɛnpe Ebɔrɛ malɛ beeŋ ta m paŋ mo ŋkpal mo kul ka ju mo na so. 13Mo kul kɔ ekpa nɛ e shuli ŋko ŋ kini kɔnɔ naseso kama nɛ e nase ŋko kusɔ kama nɛ e kaŋɛ fanɛ e beeŋ wora. 14Ama nɛ mo kul nu kɔnɔ naseso na be asheŋ nsaa maŋ kaŋɛ shɛŋ hale nɛ epeŋi ya tɔr, kumo ere a daga e ka wora m bɔlɔ kusɔ kama nɛ e kaŋɛ na so ŋkpal manɛ so mo kul be kelato na bee ŋini fanɛ e shuli kumo nna na. 15Ama nɛ fanɛ mo kul na jo nchɛnnyɔ pɔɛŋ nseŋ kaŋɛ fanɛ e maŋ shuli eche na be kɔnɔ naseso na bre kumo ere mo kul na e naŋ nya kumo be kasogberge.
16Mbra nɛ Enyɛnpe Ebɔrɛ daŋ ta n sa Mosis a yɔ egbawuche nɛ b wɔ bumo tutoana be elaŋ to nɛ bechekilpoana nna na.
31Israɛlebi ka kɔ Midianebi kena be asheŋ
1Le nɛ Enyɛnpe Ebɔrɛ daŋ kaŋɛ Mosis: 2“Pɔɛŋ nɛ fo wu na, a daga fo ka gberge Midianebi na kusoe nɛnɛ ŋkpal kusɔ nɛ b wora Israɛlebi na so.”
3Ndoŋ nna nɛ Mosis kaŋɛ basa na le: “Men bela ase n ya kɔ Midianebi na kena ŋ gberge bumo kusoe ŋkpal kusɔ nɛ b wora Enyɛnpe Ebɔrɛ na so. 4Men lara benapo kagboŋ ashi Israɛl be eyiri na be kekama to nɛ b yɔ kena na to.”
5Amoso benapo kagboŋ nɛ b daŋ lara eyiri na be kekama to nɛ bumo kikɛ ya yili benapo ŋgboŋ kuduanyɔ. 6Nɛ Mosis shin nɛ Eliaza pibinyɛn Finihas ta Enyɛnpe be wajɛbu na to be asɔ cheembi nɛ mbel nɛ baaŋ ba ta a tre abar n tu bumo n yɔ kena na to. 7Kananɛ Enyɛnpe Ebɔrɛ baŋ kaŋɛ Mosis na gbagba nɛ b bɛ so n ya kɔ Midianebi na kena m mɔ bumo be benyɛn kikɛ 8n ta Evi nɛ Rekɛm nɛ Zur nɛ Hur nɛ Reeba nɛ b daa la Midianebi be bewura na n ti so. B daŋ mɔ Biyɔɔ pibinyɛn Balaam gba kena na to nna.
9Israɛlebi na daŋ pɛ Midianebi na be beche nɛ mbia nna n ta bumo be ana nɛ mbolpɔ nɛ bumo be asɔ kikɛ, 10nseŋ chɔɔ bumo be ndeana nɛ bumo be nyi to kikɛ. 11B daŋ ta asɔ na nɛ basa nɛ b pɛ na nɛ asɔbɔya na kikɛ nna 12n yɔ Mowab be kepla nɛ k mata Jɔɔdan be lɔr nɛ Jɛriko wɔ kumo be kaba ndoŋ na. 13Ndoŋ nɛ Mosis nɛ bɔrɛmatapo Eliaza nɛ bejuŋkparpoana na kikɛ ya shɛr benapo na to. 14Mosis daŋ nya agbo nna n wɔtɔ benapo na be benimuana nɛ b daŋ shi kena to m ba na, 15nseŋ bishi bumo le: “Manɛ nna nɛ men maŋ mɔ beche na bre? 16Bumo e daŋ bɛ Balaam be keŋini so n fule Israɛlebi na nɛ b kini Enyɛnpe Ebɔrɛ n ya ka shuŋ kegbir nɛ baa tre Baal ashi Piyɔɔ, nɛ Enyɛnpe Ebɔrɛ shin nɛ aleblawu ba mbe basa so na. 17Naniere, men mɔ mbinyɛnsobi nɛ beche kama nɛ b nyi benyɛn na, 18ama men sa maŋ mɔ mbichesobi nɛ b maŋ nyi benyɛn na bre. Men ta bumo ŋ ki menyi be beche. 19Menyi be ekama malɛ nɛ e mɔ esa ŋko m beta ebuni, e lar keeyi na to n yɔ kakpa ko nchɛ ashunu. Bumo nɛ basa nɛ b pɛ kena to na e fɔr bumo be eyur so daŋkare be ekpa so kachɛ sasopo nɛ kushunusopo na. 20A daga fanɛ b fɔr bumo be epiŋi nɛ kusɔ kama nɛ b ta kawɔl ŋko kaboe be afuibi ŋko kedibi n lɔŋɛ kikɛ so daŋkare be ekpa so.”
21Ndoŋ nna nɛ bɔrɛmatapo Eliaza kaŋɛ benapo nɛ b shi kena to m ba na le: “Le be keŋini ere nɛ Enyɛnpe Ebɔrɛ ta n sa Mosis. 22-23E yɛ: ‘Nɛ men baa sha kefɔr kusɔ nɛ k maa chɔɔ fanɛ shuwa ŋko gbiti ŋko danyaŋ ŋko kebɛlso ŋko epal so, daŋkare be ekpa so, kumo ere men ta kumo n wɔtɔ edɛ to. Kusɔ kama nɛ k bee chɔɔ bre men ta nchu n fɔr kumo so daŋkare be ekpa so. 24Men baŋ fɔr men be epiŋi kachɛ shunusopo na, menyeeŋ nyalɛ so daŋkare be ekpa so nseŋ nya ekpa m bɛta n yɔ keeyi to.’ ”
B ka barga asɔ nɛ b muu kena to na be asheŋ
25Nɛ Enyɛnpe Ebɔrɛ kaŋɛ Mosis le: 26“Fo nɛ bɔrɛmatapo Eliaza nɛ Israɛl be bejuŋkparpoana na e karga basa kama nɛ asɔbɔya kama nɛ b pɛ kena na to na 27nseŋ barga amo to ntuŋ anyɔ dede, n ta katuŋ koŋwule n sa benapo na nseŋ ta kukoŋwule malɛ n sa Israɛlebi nɛ b ka na. 28Asɔ nɛ benapo na nya na, dimɛdi ŋko kusɔbɔya, be kekama be alfa anu to be kukoŋwule la Ebɔrɛ be kachige nna. 29Men ta amo n sa bɔrɛmatapo Eliaza fanɛ Enyɛnpe Ebɔrɛ be kachige. 30Israɛlebi malɛ be asɔ nɛ b nya na, dimɛdi ŋko kusɔbɔya, be kekama be adunu kikɛ to be kukoŋwule la Livaiebi nɛ baa keni Enyɛnpe Ebɔrɛ be wajɛbu na so na be kachige nna.” 31Ndoŋ nna nɛ Mosis nɛ Eliaza wora kusɔ nɛ Enyɛnpe Ebɔrɛ kaŋɛ na kikɛ.
32-35Asɔ nɛ benapo na daŋ ya nya kena na to nde: Mbɔlpo nɛ mboe daa la ŋgboŋ alfa ashe nɛ adushunu nɛ anu, nɛ ana daa la ŋgboŋ adushunu nɛ anyɔ, nɛ ekurma daa la ŋgboŋ adeshe nɛ kako, nɛ besuŋgurbi nɛ b maŋ nyi benyɛn daa la ŋgboŋ adesa nɛ anyɔ. 36-40Benapo na be kachige daa la mbolpɔ nɛ mboe ŋgboŋ alfa asa nɛ adesa nɛ ashunu nɛ alfa anu nɛ amo be alfa ashe nɛ adushunu nɛ anu daa la Enyɛnpe Ebɔrɛ peya. Ana ŋgboŋ adesa nɛ ashe e daa la benapo na peya nɛ amo be adushunu nɛ anyɔ la Enyɛnpe Ebɔrɛ peya. Ekurma ŋgboŋ adesa nɛ alfa anu e daa la benapo na peya nɛ amo to be adeshe nɛ kako daa la Enyɛnpe Ebɔrɛ peya. Beche nɛ b daa maŋ nyi benyɛn nsaa la benapo na peya daa la ŋgboŋ kuduashe nna nɛ bumo be adesa nɛ anyɔ la Enyɛnpe Ebɔrɛ peya. 41Ndoŋ nna nɛ Mosis bɛ kusɔ nɛ Enyɛnpe Ebɔrɛ ŋini mo na gbagba so n ta asɔ nɛ a la Enyɛnpe Ebɔrɛ peya na n sa Eliaza.
42-46Israɛlebi nɛ b ka na be kachige nɛ benapo na kikɛ be kachige daa sasa nna. Amo nde: Mbɔlpo nɛ mboe daa la ŋgboŋ alfa asa nɛ adesa nɛ ashunu nɛ alfa anu, nɛ ana daa la ŋgboŋ adesa nɛ ashe, nɛ ekurma daa la ŋgboŋ adesa nɛ alfa anu nɛ besuŋgurbi nɛ b maŋ nyi benyɛn malɛ daa la ŋgboŋ kuduashe. 47Bumo be kachige na to, Mosis daŋ lara edimɛdi nɛ asɔbɔya na to be adunu kikɛ to be kukoŋwule nna n sa Livaiebi nɛ baa keni Enyɛnpe Ebɔrɛ be wajɛbu na so na fanɛ kananɛ Enyɛnpe Ebɔrɛ kaŋɛ mo na gbagba chap.
48Ndoŋ nna nɛ benapo na be benimuana na yɔ Mosis kutɔ 49n ya kaŋɛ le: “Fo nyɛrbi ya karga benapo nɛ baa keni so na nseŋ wu fanɛ bumo be ekoŋwule gba maŋ foe. 50Amoso an kɔ shuwa be abitasɔ nɛ enɔ to be mpinibi nɛ enɔ to be ashembi nɛ mpinibi nɛ akonde nɛ abɔtoshembi a ba nɛ an ba sa Enyɛnpe Ebɔrɛ ŋkpal e ka kuŋ anyi ashi kena na to so.” 51Nɛ Mosis nɛ Eliaza kikɛ sɔ shuwa be abitasɔ na ashi benapo na be benimu na kutɔ. 52Benapo be benimuana na be ŋkɛ nɛ b bar na kikɛ be egbɛ daa la kilo alfa anyɔ nna. 53Benapo nɛ b daa maŋ la benimu na bre daŋ maŋ ta shuwa be abitasɔ nɛ b nya na n sa. 54Mosis nɛ Eliaza daŋ ta shuwa na nna n yɔ wajɛbu na to, saŋɛ na so, Enyɛnpe Ebɔrɛ beeŋ ba kraa kuŋ Israɛlebi na.
32Jɔɔdan be epeŋilarkpa be kaba so be eyiriana be asheŋ
1Ruben nɛ Gad be eyiriana nɛ b kɔ asɔbɔya ga na ka wu fanɛ Jeeza nɛ Giliad be kasawule na kɔ ana nɛ mbolpɔ nɛ mboe be ejikpa lela, 2nɛ b yɔ Mosis nɛ bɔrɛmatapo Eliaza nɛ Israɛlebi be bejuŋkparpoana na kutɔ n ya kaŋɛ bumo le: 3-4“Enyɛnpe Ebɔrɛ chɛ anyi to nɛ an sɔ Atarɔf nɛ Dibɔn nɛ Jeeza nɛ Nimra nɛ Hishbɔn nɛ Eliale nɛ Sibma nɛ Neebo nɛ Bɛɔn be ndeana be nsawule nɛ a walɛ n sa asɔbɔya be kebela. Anyi alɛ kɔ asɔbɔya ga. 5Amoso jande ta kasawule ere n sa anyi nɛ k ki anyi be kapetɛ, saŋɛ na so, anyi ere maaŋ naŋ dii n yɔ Jɔɔdan be lɔr na be kaba ndoŋ n ya chena.”
6Ndoŋ nna nɛ Mosis kaŋɛ le: “Menyee sha kebaawɔ nfe nna nɛ men braana Israɛlebi nɛ b ka na bre e baa yɔ kena to a? 7Men wora loŋ, menyeeŋ shin nɛ Israɛlebi na be aba e pɔ nɛ b kini kedii Jɔɔdan be lɔr na n yɔ kasawule nɛ Enyɛnpe Ebɔrɛ ta n sa bumo na so. 8Loŋ nɛ men nananyɛnana gba daŋ wora saŋɛ so nɛ n daŋ yili Kadɛsh Bania n shuŋi bumo fanɛ b ya dara kasawule na. 9B daŋ yɔ nna n ya fo Eshkɔl be ketaŋɛ na nseŋ yili ndoŋ ŋ keni kasawule na nseŋ bɛta m ba kaŋɛ Israɛlebi na fanɛ b maaŋ tiŋ n yɔ kasawule nɛ Enyɛnpe Ebɔrɛ ta n sa bumo na so. 10Kumo be kamɔnchɛ nɛ Enyɛnpe Ebɔrɛ nya agbo nseŋ nase le be kɔnɔ: 11‘Ma e naa kaŋɛ na fanɛ, ŋkpal b ka maŋ ji kashenteŋ n sa ma na so, bumo be bekama nɛ b shi Ijipt be kasawule so m ba nseŋ fo nfɛ adunyɔ ŋko m baŋ so na be ekama maaŋ yɔ kasawule nɛ n nase kɔnɔ fanɛ meeŋ sa Eebraham nɛ Aizek nɛ Jeekɔb na so.’ 12Jefune nɛ e la Keniz be esa na pibinyɛn Kalɛb nɛ Nun pibinyɛn Joshuwa nawule e daŋ ji kashenteŋ n sa Enyɛnpe Ebɔrɛ na. 13Enyɛnpe Ebɔrɛ daŋ nya agbo nna n wɔtɔ Israɛlebi na nseŋ shin nɛ b nite keshishɛrsawule na so a kilgi to a kulti nfɛ adena, nɛ bumo to be bumo nɛ b daa maŋ wora Enyɛnpe Ebɔrɛ be aparsheŋ na kikɛ wu. 14Kusɔ nɛ men nananyɛnana daŋ wora na nɛ menyi Rubenebi nɛ Gadebi gba bee wora naniere a shin nɛ Enyɛnpe Ebɔrɛ be agbo bee kaa Israɛlebi so. 15Men baŋ kini kebɛ Enyɛnpe Ebɔrɛ so, e beeŋ naŋ kplaŋ mbe basa so ashi keshishɛrsawule ere so nɛ bumo be alubi e baa bɛ menyi.”
16Ndoŋ nna nɛ Rubenebi na nɛ Gadebi kaŋɛ Mosis le: “Shin nɛ an pɔr anyi be asɔbɔya be aluu nseŋ pɔr egbal ŋ kulti nde n sa anyi be beche nɛ mbia pɔɛŋ, 17nseŋ wora shiriya n juŋkpar an braana Israɛlebi n ya kɔ kena n shin nɛ b ya chena kasawule nɛ k beeŋ ba la bumoya na so. Saŋɛ na so, basa nɛ b wɔ kasawule ere so ere maaŋ nya ekpa n tɔrɔ anyi be beche nɛ mbia. 18Anyi maaŋ bɛta n yɔ epe ama Israɛlebi na kikɛ baaŋ sɔ kasawule nɛ b ta n sa bumo na nna n chena so pɔɛŋ. 19Anyi alɛ maaŋ tu bumo m barga kasawule nɛ k wɔ Jɔɔdan be lɔr na be kaba ndoŋ na to ŋkpal manɛ so, anyi ere tiŋ n nya anyi be kachige ashi Jɔɔdan be lɔr na be epeŋilarkpa be kaba so nfe.”
20Ndoŋ nna nɛ Mosis kaŋɛ le: “Nɛ menyeeŋ wora kusɔ nɛ men kaŋɛ ere bre, kumo ere men wora shiriya Enyɛnpe Ebɔrɛ na be anishito nfe n yɔ kena to. 21Men be benapo kikɛ e dii Jɔɔdan be lɔr na be kaba ndoŋ nɛ Enyɛnpe Ebɔrɛ e juŋkpar menyi n ju an doŋana kasawule na so n sɔ kumo. 22Kumo be kaman nɛ men bɛta n yɔ epe nɛ Enyɛnpe Ebɔrɛ e shin nɛ kasawule nɛ k wɔ Jɔɔdan be epeŋilarkpa be kaba so na e ki menyeya. 23Ama nɛ men baa maŋ bɛ men be kɔnɔ naseso ere so bre, menyeeŋ wora alubi ŋ gbiti Enyɛnpe Ebɔrɛ na nsaa beeŋ nya kumo be kasogberge. 24Amoso men pɔr egbalana ŋ kulti men be nde nseŋ wora men be asɔbɔya be aluu ama men wora kusɔ nɛ men nase kɔnɔ fanɛ menyeeŋ wora na.”
25Ndoŋ nna nɛ Gad nɛ Ruben be benyɛn na kikɛ kaŋɛ le: “Anyeeŋ wora kusɔ kama nɛ an nyɛnpe kaŋɛ anyi. 26Anyi be beche nɛ mbia nɛ anyi be ana nɛ mbolpɔ bre beeŋ baa wɔ Giliad be nde to nfe. 27Ama anyi alɛ kikɛ wora shiriya nɛ an bɛ kusɔ nɛ Enyɛnpe Ebɔrɛ kaŋɛ na so nseŋ dii Jɔɔdan be lɔr na be kaba ndoŋ n ya kɔ fanɛ kananɛ fo kaŋɛ na.”
28Ndoŋ nna nɛ Mosis kaŋɛ Eliaza nɛ Joshuwa nɛ Israɛl be bejuŋkparpoana na le: 29“Nɛ Gad nɛ Ruben be benyɛn tu menyi n dii Jɔɔdan be lɔr na be kaba ndoŋ nɛ men ya kɔ n sɔ kasawule na, kumo ere men ta Giliad be kasawule na n sa bumo fanɛ bumo be kapetɛ. 30Ama nɛ b maŋ dii Jɔɔdan be lɔr na n ya chɛ menyi to ŋ kɔ bre, kumo ere baaŋ nya bumo be kasawule be kachige ashi Keenan be kasawule so nna fanɛ menyi.”
31Ndoŋ nna nɛ Gad nɛ Ruben be benyɛn na kaŋɛ le: “Anyeeŋ wora kusɔ nɛ Enyɛnpe Ebɔrɛ kaŋɛ anyi ere. 32Anyeeŋ bɛ mbe kamalga so nseŋ dii n yɔ Keenan be kasawule so n ya kɔ n sa Enyɛnpe Ebɔrɛ, ama kasawule nɛ k wɔ Jɔɔdan be lɔr na be epeŋilarkpa be kaba so na e naaŋ baa la anyi be kapetɛ.”
33Ndoŋ nna nɛ Mosis ta ewura Sihɔn nɛ e la Amɔriebi be ewura na, nɛ ewura Ɔg nɛ e la Bashan be ewura na be nsawule nɛ efuli na so be nde nɛ a kulti ndoŋ na kikɛ n sa Manase be yiri be bargato nɛ Gad nɛ Ruben be eyiriana. 34Gad be yiri na daŋ lɔŋɛ nna m pɔr Dibɔn nɛ Atarɔf nɛ Arowa nɛ 35Atrɔf Shofan nɛ Jeeza nɛ Jogbeha 36nɛ Bɛf Nimra nɛ Bɛf Haran be nde nseŋ pɔr egbal ŋ kulti amo kikɛ. 37Nɛ Ruben be yiri na malɛ lɔŋɛ m pɔr Hishbɔn Eliale nɛ Kiryatayim 38nɛ Sibma nɛ nde nɛ b daa tre Nebo nɛ Baal Miɔn na. B daŋ nase nde nɛ b pɔr egbal ŋ kulti na atre popɔr nna.
39Manase pibinyɛn Makiir e daŋ kɔ n sɔ Giliad be kasawule nseŋ ju Amɔriebi nɛ b wɔ ndoŋ na n sɔ kumo n chena so. 40Amoso Mosis daŋ ta Giliad be kasawule na nna n sa Makiir be kabuna ebi nɛ b chena ndoŋ. 41Jair nɛ e shi Manase be yiri to na e daŋ ya kɔ n sɔ ndewurbi ko nseŋ nase amo Jair be ndewurbi. 42Nooba e daŋ kɔ n sɔ Kenaaf nɛ ndewurbi nɛ a kulti kumo na nseŋ ta mbe ketre Nooba n nase amo.
33Israɛlebi ka shi Ijipt be efuli so n yɔ Mowab be kasawule so be asheŋ
1Mosis nɛ Ɛɛrɔn ka daŋ juŋkpar Israɛlebi na n lar Ijipt be efuli so a yɔ na, 2nɛ Enyɛnpe Ebɔrɛ kaŋɛ Mosis kenishipereso fanɛ saŋkama nɛ b wora keeyi to, e sibɛ keeyi na to be ketre n nase.
3Kafɛ to be kufɔl juŋkparso be kachɛ kuduanusopo, kachɛ nɛ b juŋkpar n ji kebansonchoŋ be kejigboŋ na be ŋklade, nɛ Israɛlebi na daŋ lar Ijipt be efuli so. Enyɛnpe Ebɔrɛ daŋ kuŋ bumo nna nɛ b lar Rameses be kade to nɛ Ijiptebi na bee keni bumo nɛ baa yɔ. 4Ijiptebi na daa puli bumo be ewurkoŋnyɛn nɛ Enyɛnpe Ebɔrɛ daŋ mɔ na nna nsaa keni Israɛlebi na nɛ baa yɔ. Kede e naa ŋini fanɛ Enyɛnpe Ebɔrɛ kɔ eleŋ a chɔ Ijiptebi na be agbirana.
5Israɛlebi na ka lar Rameses nɛ b ya wora bumo be keeyi to ashi Sukɔf. 6B ka lar Sukɔf nɛ b naŋ ya wora bumo be keeyi to ashi Etam nɛ k wɔ keshishɛrsawule na be ekarso na. 7B ka lar Etam nɛ b kilgi n yɔ Pii Hahirɔf ashi Baal Zifɔn be epeŋilarkpa be kaba so n ya wora bumo be keeyi to a mata Migdɔl. 8B ka koso Pii Hahirɔf nɛ b dii Teku Peper na n ya luri Shur be keshishɛrsawule na to n nite nchɛ asa pɔɛŋ nseŋ naŋ ya wora bumo be keeyi to ashi Mara. 9B ka koso ndoŋ nɛ b yɔ Elim nɛ k kɔ abuye kuduanyɔ nɛ ŋkuba be ndibi adushunu na n ya wora bumo be keeyi to ndoŋ.
10B ka lar Elim, Teku peper na ase nɛ b naŋ ya wora bumo be keeyi to. 11B ka naŋ koso ndoŋ malɛ Sin be keshishɛrsawule na ase nɛ b naŋ ya wora bumo be keeyi to. 12B ka koso Sin be keshishɛrsawule na so nɛ b naŋ yɔ Dofka malɛ. 13Kumo be kaman nɛ b ya wora bumo be keeyi to ashi Aluush. 14B ka lar Aluush, Refidim nɛ b daŋ naŋ ya wora bumo be keeyi to. Ndoŋ nɛ b daa maŋ nya nchu nɛ b nuu na.
15-37B ka yili Refidim a yɔ kebeegboŋ nɛ baa tre Hɔɔr na, mboŋ ere nɛ b daŋ wora bumo be nyi to: Sainai be keshishɛrsawule na so nɛ Kibrɔf Hataava nɛ Hazerɔf nɛ Ritma nɛ Rimɔn Pɛrɛs nɛ Libna nɛ Riisa nɛ Kehelata nɛ kebeegboŋ nɛ baa tre Sheefa na nɛ Haraada nɛ Makelɔf nɛ Tahaaf nɛ Tɛɛra nɛ Mitka nɛ Hashmona nɛ Mozerɔf nɛ Bɛni Jaakan nɛ Hɔɔr Hagigaad nɛ Jɔtbaata nɛ Abrona nɛ Eziɔngeeba nɛ Kadɛsh nɛ k wɔ Zin be keshishɛrsawule so na nɛ kebeegboŋ nɛ baa tre Hɔɔr nɛ k wɔ Edɔm be kasawule be ekarso na.
38-39Enyɛnpe Ebɔrɛ daŋ shin nna nɛ bɔrɛmatapo Ɛɛrɔn dii n yɔ kebeegboŋ nɛ baa tre Hɔɔr na be esoso. Israɛlebi ka koso Ijipt be kasawule so be kafɛ adenasopo to be kufɔl nusopo to be kachɛ juŋkparso nɛ e daŋ wu ashi kebeegboŋ na be esoso. E daŋ ji nfɛ kalfa nɛ adunyɔ nɛ asa pɔɛŋ nseŋ wu. 40Ndoŋ nɛ Arad be ewura nɛ e wɔ Keenan be efuli so be kelargato be kaseto be kaba so na nu fanɛ Israɛlebi na bee ba.
41-49Yili kebeegboŋ nɛ baa tre Hɔɔrɔ na n ya fo Mowab be kepla, le be mboŋ ere nɛ Israɛlebi na daŋ wora bumo be nyi to: Zalmɔn nɛ Punɔn nɛ Oboof nɛ Abarim nɛ k wɔ Mowab be efuli so be ekarso na nɛ Dibɔn Gad nɛ Almɔn Diblateem nɛ abeegboŋ nɛ a wɔ Abarim m mata kebeegboŋ nɛ baa tre Neebo na nɛ Mowab be kepla nɛ k mata Jɔɔdan be lɔrkar nɛ Jɛriko wɔ kumo be kaba ndoŋ na nɛ Bɛf Jeshimɔf nɛ Akasia be ketaŋɛ na be nferinto.
Jɔɔdan be lɔr na be kedii be mbra be asheŋ
50Mowab be kepla nɛ k mata Jɔɔdan be lɔr nɛ Jɛriko wɔ kumo be kaba ndoŋ na so nɛ Enyɛnpe Ebɔrɛ kaŋɛ Mosis 51fanɛ e kaŋɛ Israɛlebi na le: “Men baŋ dii Jɔɔdan be lɔr na n yɔ Keenan be kasawule so, 52men ju basa nɛ b wɔ kasawule na so na kikɛ, nseŋ jija bumo be agbir nɛ b ta abɛlso nɛ ajembu n wora na nɛ mboŋ nɛ baa shuŋ amo na kikɛ. 53Men sɔ kasawule na kikɛ n chena so, ŋkpal manɛ so, ma e naa ta kumo a sa menyi. 54Men to beri n chige kasawule na to n sa eyiriana na be mbuna mbunaana na. Men ta kasawule nɛ k shibi ga n sa kabuna kama nɛ kumo be basa shibi nseŋ ta kasawule nɛ k maŋ shibi malɛ n sa kabuna kama nɛ kumo be basa maŋ shibi. 55Ama nɛ men baa maŋ ju basa nɛ b wɔ kasawule na so bre, baaŋ ki fanɛ ndubi a chute men be anishito ŋko ewi men be nle to a jɔ menyi. Baaŋ sa menyi tɔrɔ damta kasawule na so. 56Men baa maŋ ju bumo, meeŋ mur menyi fanɛ kananɛ ŋ kre fanɛ meeŋ mur bumo na.”
34Israɛl be kasawule be egbaŋto be asheŋ
1Enyɛnpe Ebɔrɛ daŋ ta le be mmalga ere nna n sa Mosis 2fanɛ e sa Israɛlebi na: “Nɛ men baŋ luri Keenan be kasawule nɛ ŋ kɔ a sa menyi na to, kananɛ men be kasawule be egbaŋto egbaŋto beeŋ baa du nde: 3Kumo be kelargato be kaseto be kaba so beeŋ yili Zin be keshishɛrsawule na nɛ Edɔm be kasawule be kelargato be esoso be epeŋitɔrkpa be kaba so. Kumo be ekar beeŋ fara Nfɔl be Teku na be kelargato be kaseto be kaba so be epeŋilarkpa be kaba so, 4nseŋ kilgi m bɔla kelargato be kaseto be kaba so a yɔ Akrabim be kepla be kaba so n ta m bɔla Zin n ya luri Kadɛsh Bania ashi kelargato be kaseto be kaba so. Nseŋ naŋ yili ndoŋ ŋ kilgi m bɔla kelargato be esoso be epeŋitɔrkpa be kaba so n yɔ Heeza Adar hale n ya fo Azmɔn. 5Nseŋ naŋ yili ndoŋ ŋ kilgi m bɔla ketaŋɛ nɛ k dese Ijipt be kasawule be ekar n ta n ya fo Mɛditerenia be Teku na.
6Kumo be epeŋitɔrkpa be ekar e naŋ baa la Mɛditerenia be Teku na.
7Kumo be kelargato be esoso be kaba so beeŋ bɛ Mɛditerenia be Teku na so n ya fo kebeegboŋ nɛ baa tre Hɔɔr na, 8nseŋ yili ndoŋ n yɔ Hamaf be kepla na ŋ keta n ya fo Zedad 9nɛ Zifrɔn n ta n ya tar Heeza Enaan.
10Men be epeŋilarkpa be kaba so be kasawule be ekar bre beeŋ fara Heeza Enaan nna n ya fo Shefam, 11nseŋ naŋ bɔla kelargato be kaseto be kaba so n ya fo Habeɛl nɛ k wɔ Ain be epeŋilarkpa be kaba so na, n ta n ya fo Tekugboŋ nɛ baa tre Galili na be epeŋilarkpa be kaba so, 12nseŋ ta m bɛ Jɔɔdan be lɔr na so n ya tar Nfɔl be Teku na.
Kananɛ kasawule na be abonfuana na be ekar beeŋ ba du nna na.”
13Ndoŋ nna nɛ Mosis kaŋɛ Israɛlebi na le: “Enyɛnpe Ebɔrɛ ta kasawule ere nna n sa eyiri akpanu nɛ bargato na. Men to beri m barga amo to n sa abar. 14Ruben nɛ Gad be eyiri nɛ Manase be yiri be bargato na bre tiŋ n nya bumo be kasawule 15ashi Jɔɔdan be lɔr nɛ Jɛriko wɔ kumo be kaba ndoŋ na be epeŋilarkpa na be kaba so.”
Bejuŋkparpo nɛ baaŋ yilito nɛ b barga kasawule na to be asheŋ
16Kumo be kaman nɛ Enyɛnpe Ebɔrɛ kaŋɛ Mosis le: 17“Bɔrɛmatapowura Eliaza nɛ Nun pibinyɛn Joshuwa e naŋ barga kasawule na to n sa basa na. 18Ejuŋkparpo koŋwule ashi yiri kama to beeŋ chɛ bumo to m barga kumo to.”
19Bejuŋkparpo na nde. Jefune pibinyɛn Kalɛb e daa la Juda be yiri to be ejuŋkparpo. 20Amihuud pibinyɛn Shelumiɛl e daa la Simiɔn be yiri to be ejuŋkparpo. 21Chislɔn pibinyɛn Elidad e daa la Bɛnjamin be yiri to be ejuŋkparpo. 22Jogli pibinyɛn Buuki e daa la Dan be yiri to be ejuŋkparpo. 23Efod pibinyɛn Haniɛl e daa la Manase be yiri to be ejuŋkparpo. 24Shiftan pibinyɛn Kemuɛl e daa la Efreim be yiri to be ejuŋkparpo. 25Panaak pibinyɛn Elizafan e daa la Zebulun be yiri to be ejuŋkparpo. 26Azan pibinyɛn Paltiɛl e daa la Isaaka be yiri to be ejuŋkparpo. 27Shelomi pibinyɛn Ahihuud e daa la Asha be yiri to be ejuŋkparpo. 28Amihuud pibinyɛn Padahɛl e daa la Naftali be yiri to be ejuŋkparpo.
29Le be basa ere nɛ Enyɛnpe Ebɔrɛ daŋ shin nɛ b chɛ Eliaza nɛ Joshuwa to m barga kasawule na to n sa Israɛlebi na ashi Keenan be efuli so.
35Livaiebi be nde be asheŋ
1Saŋɛ so nɛ Israɛlebi na wora bumo be nyi to ashi Mowab be kepla nɛ k mata Jɔɔdan be lɔr nɛ Jɛriko wɔ kumo be kaba ndoŋ na, nɛ Enyɛnpe Ebɔrɛ kaŋɛ Mosis le: 2“Kaŋɛ Israɛlebi na fanɛ b lara bumo be mpetɛ nɛ baaŋ nya na to be nde ko n sa Livaiebi na nseŋ sa bumo mboŋ nɛ bumo be asɔbɔya e baa ji m mata nde na. 3Aloŋ na Livaiebi na beeŋ nya nde nɛ baaŋ baa wɔtɔ nseŋ naŋ nya bumo be ana nɛ asɔbɔya malɛ gba be mboŋ jiso. 4A daga bumo be asɔbɔya be ejikpa na ka feŋ kade na be egbal nɛ b pɔr ŋ kulti na be kaba kama so fanɛ ayadra alfa kagboŋ nɛ alfa anu, 5nseŋ shin nɛ ejikpa na be mparto nɛ kumo be nteŋ to kikɛ e ba la fanɛ ayadra ŋgboŋ asa, nɛ kade na e baa wɔ asɔbɔya be ejikpaana na be nferinto. 6Nde nɛ menyeeŋ sa Livaiebi na be ashe beeŋ baa la kesɔnyige be nde. Esa kama nɛ e maŋ kute m mɔ esa beeŋ tiŋ n shile n ya ŋana amo to. Amo be kaman nɛ men naŋ ta nde adena nɛ anyɔ 7nɛ amo be asɔbɔya be ejikpa n ti bumo so, saŋɛ na so Livaiebi na be nde nɛ amo be asɔbɔya be ejikpa kikɛ beeŋ ki adena nɛ aburwa. 8Israɛlebi be eyiriana na be kekama bee yili kananɛ bumo be kasawule sa so nna a sa Livaiebi na nde. Eyiri nɛ bumo be nsawule shishi na e naaŋ sa nde damta a chɔ bumo nɛ bumo be nsawule maŋ shishi na.”
Kesɔnyige be nde be asheŋ
(Ditɛronɔmi 19:1-13; Joshuwa 20:1-9)
9Nɛ Enyɛnpe Ebɔrɛ kaŋɛ Mosis 10fanɛ e kaŋɛ Israɛlebi na le: “Men baŋ dii Jɔɔdan be lɔr na n yɔ Keenan be kasawule so, 11men lara kesɔnyige be nde ko n yili, saŋɛ na so, esa kama nɛ e maŋ kute m mɔ esa, beeŋ tiŋ n shile n ya ŋana ndoŋ. 12Loŋ na e naaŋ shin nɛ e nya mbe kumu ashi esa nɛ e mɔ na mo niopibi nɛ e bee fin mo nɛ e mɔ n tal to na kutɔ. Ŋkpal manɛ so, a maŋ daga b ka mɔ esa kama nɛ e mɔ esa nɛ b maŋ naŋ ji mo demu. 13Nde ashe nɛ a beeŋ baa la kesɔnyige be nde ere be 14asa e baa wɔ Jɔɔdan be lɔr na be epeŋilarkpa be kaba so nɛ asa malɛ e baa wɔ Keenan be kasawule so. 15Le be nde ere e naaŋ baa la kesɔnyige be nde n sa Israɛlebi na nɛ befɔ nɛ bekama nɛ b chena menyi to na. Ekama nɛ e maŋ kute n mɔ esa beeŋ tiŋ n shile n ya ŋana ndoŋ.
16-18Nɛ fanɛ esa ta kebɛlso ŋko kejembu ŋko kedibi m mɔ esa, kumo ere e ki emɔpo nna na nɛ a daga fanɛ b mɔ mo alɛ gba. 19Esa nɛ b mɔ na mo kurgepo nɛ e mata mo, e kɔ ekpa nɛ e mɔ esa nɛ e mɔ mo kurgepo na. Kaplɛkama nɛ e tu mo, a daga e ka mɔ mo.
20Nɛ fanɛ esa ko kishi mo barkasa nna, nseŋ da mo n lɛ nɛ e wu ŋko n ta kusɔ ko ŋ kpa mo nɛ k ŋmɛa mo m mɔ 21ŋko ŋ ŋmɛa mo kuluŋguntuŋ m mɔ, kumo ere mo alɛ gba ki emɔpo nna na nɛ a daga fanɛ b mɔ mo alɛ gba. Esa nɛ b mɔ na malɛ mo kurgepo nɛ e mata mo, e kɔ ekpa nɛ e mɔ esa nɛ e mɔ mo kurgepo na. Kaplɛkama nɛ e tu mo a daga e ka mɔ mo.
22Ama nɛ fanɛ esa maŋ kishi esa nsaa maŋ kute n da mo n lɛ ŋko ŋ kpa mo kusɔ ko, 23ŋko n da kejembu n lɛ mo so nɛ e wu, 24kumo ere k daga kade na to ebi ka ji emɔpo na nɛ esa nɛ e bee fin mo nɛ e mɔ n tal to to na be asheŋ le be ekpa so. 25K daga b ka kuŋ emɔpo na ashi esa nɛ e bee fin mo nɛ e mɔ n tal to na kutɔ n yɛr mo kesɔnyige be kade to nɛ e ya ka wɔ ndoŋ hale nɛ bɔrɛmatapo nimuso na e ya wu. 26Ama nɛ fanɛ emɔpo na lar kesɔnyige be kade na to nna 27nɛ k ba fanɛ esa nɛ e mɔ na mo kurgepoana wu mo nseŋ mɔ mo, kumo ere b maŋ wora kulubi. 28Emɔpo na daga fanɛ e baa wɔ kade na to n ya fo saŋkama nɛ bɔrɛmatapo nimuso na wu pɔɛŋ nɛ e bɛta n yɔ epe. 29Le be mbra ere beeŋ baa wɔtɔ n sa menyi nɛ men be kaman to ebi kikɛ mbaanaayɔ.
30Basa anyɔ baŋ ji shɛda fanɛ esa mɔ esa, kumo ere a daga b ka mɔ amodoŋwura gba. Esa koŋwule be shɛda bre maaŋ tiŋ n shin nɛ b mɔ esa nɛ e mɔ esa. 31Emɔpo kikɛ daga fanɛ b mɔ mo alɛ gba. A maŋ daga fanɛ b ka amansherbi n sɔ mo. 32Esa kama nɛ e shile n yɔ kesɔnyige be kade kama nɛ b ji mbe demu nseŋ wu fanɛ e maŋ la emɔpo, maŋ daga e ka amansherbi nseŋ nya ekpa m bɛta n yɔ epe pɔɛŋ nɛ bɔrɛmatapo nimuso na e wu. 33Nɛ men baŋ wora loŋ, kumo ere menyeeŋ jija kasawule nɛ men chena so ere. Ŋkpal manɛ so ŋklaŋ be kewurge bee jija kasawule nna. Esa nɛ e shin nɛ ŋklaŋ wurge malɛ be ŋklaŋ e naaŋ tiŋ n shin nɛ kasawule nɛ kejija e naŋ nyalɛ. 34Men sa maŋ kaŋ jija kasawule nɛ men wɔ so ere, ŋkpal manɛ so, ma e la Enyɛnpe Ebɔrɛ na. Ma alɛ wɔ menyi to nna.”
36Beche kilpo be mpetɛ be asheŋ
1Kachako nɛ Makiir pibinyɛn Giliad nɛ e la Manase mo nanabi na nɛ mbe kabuna be benimuana ba Mosis nɛ Israɛl be eyiri be bejuŋkparpoana na kutɔ 2m ba kaŋɛ le: “Enyɛnpe Ebɔrɛ ka kaŋɛ fo fanɛ fo shin nɛ Israɛlebi na e to beri m barga kasawule na to na, e daŋ kaŋɛ nna fanɛ fo ta an kurgepo Zelofehad peya n sa mbe mbichesobi. 3Ama ba nyiŋi fanɛ b baŋ ya kil eyiri pɔtɛ bre, bumo be mpetɛ na beeŋ ki loŋ be yiri na peya, saŋɛ na so nɛ anyi be kachige nɛ an kɔ na e duga so. 4Nfɛ adunu kikɛ be saŋɛ nɛ basa bee bɛta bumo braana be mpetɛ nɛ a wɔ bumo kutɔ a sa bumo na, baaŋ ta Zelofehad be mbichebi be mpetɛ na n ti eyiri nɛ b ya kil na peya so nɛ bumo be mpetɛ maaŋ naŋ ti anyi be yiri peya so kikɛ.” 5Ndoŋ nna nɛ Mosis kaŋɛ Israɛlebi na kusɔ nɛ Enyɛnpe Ebɔrɛ kaŋɛ mo na kikɛ. Le nɛ e daŋ kaŋɛ bumo: “Kusɔ nɛ Manase be yiri na kaŋɛ na la kashenteŋ nna, 6fanɛ Zelofehad be mbichesobi kɔ ekpa nɛ b kil esa kama nɛ baa sha nɛ esa na shi bumo be yiri to nna na. 7Israɛl be esa kikɛ be kapetɛ bee shir a wɔ mbe yiri nɛ e shi to nna. 8Israɛl be eche kama nɛ e ji mbe yiri to be kasawule be kapetɛ, daga e ka kil esa nɛ e shi mbe yiri na to nna. Loŋ e naaŋ shin nɛ Israɛlebi kikɛ e baa ji bumo nananyɛnana be kasawule be mpetɛ. 9Loŋ e naaŋ shin nɛ yiri ko maaŋ tɛmbaŋ n ya kaa ji yiri ko be kapetɛ. Yiri kama to ebi daga nna fanɛ b baa ji bumo gbagba be yiri to ebi be mpetɛ.” 10-11Amoso Zelofehad be mbichesobi Maala nɛ Tirza nɛ Hogla nɛ Milka nɛ Nowa daŋ wora kusɔ nɛ Enyɛnpe Ebɔrɛ daŋ kaŋɛ Mosis gbagba nna nseŋ kil bumo tuto be kaba so be basa. 12Manase be kabuna be basa nɛ b daŋ kil, amoso bumo be mpetɛ daŋ shir bumo tuto be kabuna nna.
13Le be mbra ere nɛ Enyɛnpe Ebɔrɛ daŋ ta n sa Mosis fanɛ e sa Israɛlebi saŋɛ so nɛ b daŋ wora bumo be nyi to Mowab be keplasawule nɛ k mata Jɔɔdan be lɔr nɛ Jɛriko wɔ kumo be kaba ndoŋ na.