NEHEMAYA
BE KAWƆL
11Ma e la Nehemaya Hakalia pibinyɛn. Asheŋ nɛ n wora nɛ amo nɛ m malga nɛ n sibɛ n wɔtɔ kawɔl ere to na.
Ewurgboŋ Atazɛzɛs ka ji kuwura Pɛshiya be efuli so be kafɛ adunyɔ to nɛ ma, Nehemaya daa wɔ kadegboŋ lempo nɛ baa tre Susa nɛ k la efuli na be kadegboŋ na to nna. Juwebi be kufɔl nɛ baa tre Kislɛv na to e daa la. 2N sipoana to be eko nɛ baa tre Hanani na daŋ keta benyɛn be katuŋ ko nna n shi Juda be efuli so m ba ndoŋ. Nɛ m bishi bumo Jerusalɛm be kade to nɛ ŋ kurgepoana Juwebi nɛ b shi Babilɔn nfe m bɛta n yɔ na be asheŋ. 3Nɛ b kaŋɛ ma fanɛ basa nɛ b bɛta n yɔ Jerusalɛm na wɔ tɔrɔ nɛ awurfoŋ to nna. B yɛ Jerusalɛm be egbal na bure n tɔr nɛ kumo be mbunagboŋana na malɛ gba ji edɛ. 4Ŋ ka nu loŋ nɛ n chena n shu nchɛ damta ŋkpal kumo so nseŋ kishi ŋ kule Ebɔrɛ ŋ kaŋɛ le: 5“O Enyɛnpe Ebɔrɛ nɛ fo wɔ ebɔrɛso, fo e kɔ eleŋ ga nɛ fo bunyaŋ shi m baŋ so. Fo alɛ e naa wora a bɛ fo nnɔ naseso so a sa bekama nɛ baa sha fo nsaa wora fo mmalga kasonu. 6Enyɛnpe Ebɔrɛ, keni ma so nseŋ nu ma kekule ŋkpal kananɛ mee kule fo kapa nɛ kanyɛ ere a sa fo nyɛrbi Israɛlebi na so. N shuli fanɛ anyi Israɛlebi nɛ an nanaana kikɛ wora alubi ŋ gbiti fo. 7Anyi alɛ maŋ naŋ wora fo mbra nɛ fo ta n sa an nananyɛn Mosis fanɛ e ta n sa anyi na gba kasonu. 8Jande nyiŋi kusɔ nɛ fo kaŋɛ fo kayɛrbi Mosis na, fanɛ nɛ anyi Israɛlebi maŋ ji kashenteŋ n sa fo, kumo ere feeŋ pesaŋ anyi to n yɔ efuli pɔtɛana ko so. 9Ama nɛ fanɛ an bɛta m ba fo kutɔ nseŋ wora kusɔ nɛ fo nase n sa anyi na bre, hale nɛ an pesaŋ to n sɔ durnya ere be efuli kikɛ so gba, feeŋ naŋ bɛta anyi m ba kakpa nɛ fo daŋ yili kumo fanɛ an baa shuŋ fo na. 10Enyɛnpe Ebɔrɛ, fo nyɛrbi nɛ fo gbagba be basa nna na. Ŋkpal manɛ so, fo gbagba be eleŋgboŋ nɛ fo ta m mɔlga bumo nɛ b baa la fo basa. 11O Enyɛnpe Ebɔrɛ, nu ma nɛ fo nyɛrbi nɛ b kɔ kasha n sa fo nsaa ŋana fo ketre na be kabɔrɛkule. Chɛ ma to nɛ n nya kusɔ nɛ mee tama kabre ere nseŋ shin nɛ ewura malɛ gba e wu ma kuwɔr.”
Loŋ be jemanɛ nɛ ma e daa duga ewurgboŋ Atazɛzɛs be yabra a sa mo nɛ e bee nuu.
2Nehemaya ka yɔ Jerusalɛm be asheŋ
1Juwebi be kufɔl nɛ baa tre Nisan na to nɛ ewurgboŋ Atazɛzɛs ka ji kuwura be kafɛ adunyɔ na to nɛ n ta yabra nɛ n ya sa mo. Mo alɛ daŋ maŋ naŋ wu ma anishiakpa ka chɛrga n duli esa nɛ mbe kagbenejija mo kikɛ. 2Ndoŋ nna nɛ e bishi ma: “Manɛ nna nɛ fo anishiakpa chɛrga fanɛ esa nɛ mbe kagbenejija mo loŋ? Fo alɛ maa lɔ. N tama fanɛ fo kagbene e maŋ fuli fo?.”
Kedaŋ shin nɛ kufu pɛ ma ga. 3Nɛ ŋ kaŋɛ mo le: “Yiramu, Ebɔrɛ e teŋi fo efute so! Ma kagbene maŋ fuli ma, ŋkpal manɛ so, kadegboŋ nɛ b puli n nanaana na bure a dese nɛ kumo be mbunagboŋana kikɛ ji edɛ.”
4Ndoŋ nna nɛ wura na naŋ bishi ma: “Manɛ nɛ fee sha fanɛ n wora n sa fo?”
Nɛ ŋ kule Ebɔrɛ ma kagbene to. 5Kumo be kaman nɛ ŋ kaŋɛ ewura na le: “Yiramu, jande, nɛ k maaŋ tɔrɔ fo, sa ma ekpa nɛ n yɔ Juda be kasawule so n ya lɔŋɛ kadegboŋ nɛ b puli an nanaana kumo to na m pɔr.”
6Ewura na nɛ mbe eche e daa tase, nɛ e bishi ma le: “Nchɛ afanɛ nɛ feeŋ ta n lɔŋɛ m pɔr kumo n loge nseŋ bɛta m ba?” Nɛ ŋ kaŋɛ mo jemanɛ nɛ meeŋ bɛta m ba. Nɛ kumo be loŋ par ewura na, nɛ e shuli nseŋ sa ma akpa.
7Kumo be kaman nɛ ŋ kaŋɛ mo le: “Yiramu, jande, wora ania n sibɛ nwɔl n sa ma nɛ n ta n ya sa efuliana nɛ a wɔ Lɔr nɛ baa tre Yufreetes na be epeŋitɔrkpa be kaba so na be egomena nɛ b wɔ fo kaseto na, saŋɛ na so, meeŋ nya ekpa n yɔ Juda be efuli so nɛ shɛŋ maaŋ wora ma. 8Ma alɛ daa beeŋ baa sha kawɔl nɛ meeŋ ta n ya sa kanyɛn nɛ baa tre Asaf nɛ e bee keni ewura be kupo so na, saŋɛ na so Asaf beeŋ sa ma ekpa nɛ ŋ ku ndibi be kupo na to n lɔŋɛ mbuna n wɔtɔ ebu lempo jeŋgreŋ nɛ a yil m mata bɔrɛlambu na nɛ kadegboŋ na gba to be egbalana na nɛ laŋ nɛ ŋ gbagba beeŋ ya kaa wɔtɔ to na. Ebɔrɛ ka daa wɔ ŋ kutɔ so, ewura na daŋ shuli nna n sa ma kusɔ kama nɛ n daŋ kule mo.
9Ewura na daŋ lara benapo nimuso nɛ benapo nɛ baa dii egbaŋɛ nɛ b baa kuŋ ma nna; nɛ b tu ma m bɔla Yufreetes be Lɔrgboŋ na be epeŋitɔrkpa be kaba so n ta nwɔl nɛ ewurgboŋ na sibɛ na n ya sa egomenaana nɛ b wɔ ekpa na so na. 10Ama kanyɛn nɛ baa tre Sanballat nɛ e shi kade nɛ baa tre Horɔn na nɛ Tobaya nɛ e la Ammɔn be efuli so be krachigboŋ ko na ka nu fanɛ m ba na, nɛ b nya agbo ga. Ŋkpal manɛ so, b maa sha fanɛ esa kikɛ e chɛ Israɛlebi to.”
Nehemaya ka ya keni ŋ keni Jerusalɛm be egbalana na be asheŋ
11An ka fo Jerusalɛm na be nchɛ asa be kaman, 12nɛ ma nɛ basa gbrɛbi ko koso kanyɛso a yɔ. Jemanɛ na so nɛ ma alɛ daŋ maŋ naŋ kaŋɛ esa kikɛ kusɔ nɛ Ebɔrɛ ta n deŋi ma kagbene so fanɛ n wora n sa Jerusalɛmebi. Kurma nɛ n daŋ dii na nawule e daa la kusɔbɔya nɛ an keta n yɔ. 13Kabuna nɛ k wɔ epeŋitɔrkpa nɛ baa tre kumo Ketaŋɛ be kabunagboŋ na to nɛ m bɔla to n lar n sɔ kelargato be kaseto be kaba so n ya bɔla kechubu nɛ baa tre Dragɔn na ase n ya fo kabunagboŋ nɛ baa tre Epi be kabuna na ase. Jemanɛ nɛ n dii kurma a choŋ na nɛ mee dara egbalana nɛ e bure n tɔr nɛ mbunagboŋana nɛ e daŋ chɔɔ na kikɛ. 14Ŋ ka fo Kadegboŋ na be epeŋilarkpa na nɛ ŋ kilgi n yɔ kechubu be kabunagboŋ na ase nɛ ewura be Kepa na ase. Ama ekpa na daa maŋ naaŋ kpalga to a shi n sa kurma nɛ n daa dii na. 15Amoso nɛ ŋ kilgi n sɔ ketaŋɛ nɛ baa tre Kidrɔn na be kaba so n ya bɔla ndoŋ a choŋ nsaa maŋ kumu so a keni kadegboŋ na be egbal na. Kumo be kaman nɛ m bɛta m bɔla Ketaŋɛ be kabunagboŋ na to n luri kadegboŋ na to pɔɛŋ nɛ kakpa bugi to. 16Kadegboŋ na to be ekrachigboŋana na be ekama daa maŋ nyi kakpa nɛ n yɔ ŋko kusɔ nɛ mee wora. Le be jemanɛ ere kikɛ nɛ m maŋ naŋ kaŋɛ m braana Juwebi na shɛŋ, hale Bɔrɛmatapoana nɛ bejuŋkparpoana na nɛ ekrachigboŋana na nɛ Juwebi nɛ bumo alɛ gba bee chɛ to a shuŋ kushuŋ na kikɛ maŋ nu shɛŋ ŋ kutɔ. 17Ama ŋ ka bɛta n yɔ na nɛ n ya kaŋɛ bumo le: “Menyi alɛ gba wu tɔrɔ nɛ an wɔ kumo to ŋkpal Jerusalɛm ka bure a dese nɛ kumo be mbunagboŋana kikɛ chɔɔ n tɔr nna na! Men wora ania n shin nɛ an pɔr kadegboŋ ere be egbalana nɛ a tɔr ere, saŋɛ na so anyi maaŋ naŋ ji anishinyɔr.”
18Ma alɛ daŋ naŋ kaŋɛ bumo kananɛ Ebɔrɛ wɔ ma kutɔ nseŋ chɛ ma to nɛ kusɔ nɛ ewurgboŋ na gba kaŋɛ ma.
Ndoŋ nna nɛ b kaŋɛ: “Men shin nɛ an fara kapɔr na naniere!” Ndoŋ nna nɛ b bela ase nɛ b fara kushuŋ na.
19Sanballat nɛ Tobaya nɛ kalɔrbunyɛn ko nɛ baa tre mo Gɛshem ka nu kusɔ nɛ an kre kewora na be asheŋ nɛ b mushe anyi ga nseŋ kaŋɛ: “Manɛ nɛ menyee fɛ fanɛ menyee wora ere? Menyee sha kelɔŋɛ kadegboŋ na be egbalana nna m pɔr nseŋ lar ewura kaman ŋ kɔ mo kena, ŋko?”
20Nɛ n shuli ŋ kaŋɛ le: “Ebɔrɛ nɛ e wɔ ebɔrɛso na beeŋ chɛ anyi to nɛ an pɔɔ so, ŋkpal manɛ so, an la mbe nyɛrbi nna. Mo e naŋ shin nɛ an tiŋ n shuŋ kushuŋ na n loge nɛ shɛŋ maŋ wora. Amoso anyeeŋ fara Jerusalɛm be egbalana na be kepɔr. Ama menyi ere maŋ kɔ ekpa nɛ men nya kapetɛsɔ kikɛ ashi Jerusalɛm be kadegboŋ na to, ŋkpal manɛ so, menyi maŋ ti kumo be edaŋkaresheŋ so.”
3Jerusalɛm be egbalana be kelɔŋɛ m pɔr be asheŋ
1Kananɛ b lɔŋɛ m pɔr Jerusalɛm be egbalana na nde. Bɔrɛmatapo nimuso Eliyashib nɛ mo braana bɔrɛmatapoana na e lɔŋɛ kakpa nɛ baa tre Mbolpɔ be Kabuna ekpa na m pɔr nseŋ wɔtɔ kumo akuloŋ. Kumo be kaman nɛ b yili ndoŋ n ta egbal na be mba nɛ baa tre Ebu jeŋgreŋ Kalfa nɛ Hanamɛl be Ebu jeŋgreŋ na kikɛ m bɔɔ Ebɔrɛ enɔ. 2Jɛriko be kadegboŋ na be basa malɛ e shi ndoŋ m ba lɔŋɛ m pɔr egbal na be kaba nɛ k bɛ so na. Zakuur nɛ e la Imri pibinyɛn e pɔr kaba nɛ kumo alɛ naŋ bɛ so na. 3Hassina be kaman to ebi e lɔŋɛ m pɔr kaba nɛ baa tre Kɔrɔtɔ be kabuna ekpa na. B daŋ ta mbunagboŋ na be ndibi nna n wɔtɔ nseŋ gbir akuloŋ na n wɔtɔ. Kumo be kaman nɛ b gbir abɛlso m mata akuloŋ na so nsaa ta ndibi gbɛgbɛso a kɔl amo to a ber so. 4Yuraya pibinyɛn, Mɛremɔf nɛ mo nananyɛn la Hakɔz na, e lɔŋɛ m pɔr egbal na be kaba nɛ k bɛ so na.
Bɛrekaya pibinyɛn, Mɛshulam nɛ mo nananyɛn daa la Mɛshezabel na malɛ e lɔŋɛ m pɔr egbal na be kaba nɛ k bɛ so na nɛ Baana pibinyɛn Zadɔk malɛ lɔŋɛ m pɔr kaba nɛ k wɔ kumo alɛ be kekel to na.
5Tekua be kade to ebi e daŋ daga fanɛ b lɔŋɛ m pɔr kaba nɛ k bɛ so na, ama bumo be bejuŋkparpoana na bre kini fanɛ b maaŋ shuŋ kushuŋ kpakpaso nɛ benimu nɛ baa keni beshumpo na so na sa bumo na. 6Pasea pibinyɛn Jowada nɛ Besodaya pibinyɛn Meshulam e lɔŋɛ m pɔr kabunagboŋ nɛ baa tre Jeshana be kabuna na. B daŋ ta mbuna be ndibi na nɛ amo be akuloŋ ana nna n wɔtɔ amo be kakpa nseŋ naŋ ta abersobi na malɛ gba n wɔtɔ akuloŋ ana na to nseŋ ta ndibi gbɛgbɛso ŋ kɔl amo to m ber so. 7Melataya nɛ e shi Gibiɔn be kade to nɛ Jadon nɛ e shi Mɛronɔt be kade to na, n ta basa nɛ b shi Gibiɔn nɛ Mizpa be ndeana to na e lɔŋɛ m pɔr egbal na be kaba nɛ k bɛ so na. B daŋ pɔr hale n fo Yufreetes be epeŋitɔrkpa be kebonfu na be gomena be kowu ekpa nna. 8Haahaya pibinyɛn Uziɛl nɛ e la shuwa be bɔyɛpo na e lɔŋɛ m pɔr egbal na be kaba nɛ k bɛ so na.
Hananaya nɛ e bee lɔŋɛ etulale na malɛ e lɔŋɛ m pɔr kaba nɛ k wɔ a yɔ egbal kpaŋgalaŋ na akpa.
9Hur pibinyɛn Refaya nɛ e daa keni Jerusalɛm be kebonfu be bargato na so na malɛ e lɔŋɛ m pɔr egbal na be kaba nɛ k bɛ so na.
10Egbal na be kaba nɛ k bɛ so na daŋ mata Harumat pibinyɛn Jadaya be laŋ nna nɛ e lɔŋɛ m pɔr ndoŋ be egbal na.
Hashabnaya pibinyɛn Hatush malɛ e lɔŋɛ m pɔr kaba nɛ k bɛ so na.
11Ndoŋ nna nɛ Harim pibinyɛn Malkija nɛ Pahaf Mowab pibinyɛn Hashuub malɛ lɔŋɛ m pɔr mba anyɔ nɛ a bɛ so na nɛ bodobodo be ebu Jeŋgreŋ na gba n ti so.
12Halohɛsh pibinyɛn Shalum, nɛ e daa keni Jerusalɛm be Kebonfu nyɔsopo na so na nɛ mbe mbichesobiana e lɔŋɛ m pɔr egbal na be kaba nɛ k bɛ so na.
13Hanuun nɛ basa nɛ b wɔ Zanua be kade to e lɔŋɛ m pɔr Ketaŋɛ be kabuna na akpa. B daŋ wɔtɔ akuloŋ mbunagboŋ na to nna nseŋ ta abersobi n wɔtɔ amo to nseŋ ta ndibi gbɛgbɛso ŋ kɔl amo to m ber so. B daŋ lɔŋɛ egbal na m pɔr n fo fanɛ ayadra alfa ana nɛ adena nna hale n ya fo Epi be kabuna na ase.
14Rekkab pibinyɛn Malchija nɛ e daa keni Bɛf Hakkerɛm be kebonfu so na e daŋ lɔŋɛ m pɔr Epi be Kabuna ekpa na be egbal. E daŋ ta mbuna na be akuloŋ ana kikɛ nna n wɔtɔ mbuna na to nseŋ ta abɛlso be abersobi malɛ gba m mata amo so nseŋ ta ndibi gbɛgbɛso ŋ kɔl amo to m ber so.
15Kolhoze pibinyɛn Shalum, nɛ e daa keni Mizpa be kebonfu so na e daŋ lɔŋɛ m pɔr Kuchubu be Kabuna ekpa na. E daŋ ta kusɔ nna n ti mbuna na. Kumo be kaman nɛ e wɔtɔ akuloŋ nɛ amo be abɛlso be abersobi nseŋ ta ndibi gbɛgbɛso m ber amo so. Mo koŋwule na e daŋ lɔŋɛ m pɔr egbal nɛ k wɔ kakpa nɛ baa tre Shɛla be Kepa na. K daŋ mata ewura be kambɔl na nna nseŋ ta hale n ya fo atemprembi nɛ e dii a yɔ ewura Deevid be kadegboŋ na to na.
16Azbuk pibinyɛn Nehemaya nɛ e daa keni Bet Zur be kebonfu na be bargato so na malɛ e lɔŋɛ m pɔr egbal nɛ k bɛ so na, hale n ya fo kakpa nɛ baa puli bewura nɛ baa tre ndoŋ ewura Deevid be nchaŋ ase nɛ kepa nɛ b kur na nɛ benapo be echenakpa na ase.
Livaiebi nɛ b shuŋ egbal na be kushuŋ na be asheŋ
17Livaiebi nɛ b lɔŋɛ m pɔr egbal na n chɔga so na e daa la Bani pibinyɛn Rehum nɛ Hashabia nɛ e daa keni Keyila be kebonfu be bargato so na. Mo ere daŋ yili mbe kebonfu be katelamu to n shuŋ kushuŋ na nna. 18Henadad pibinyɛn Bavai nɛ e daa keni Keyila be kebonfu be bargato nɛ k ka na so na malɛ e lɔŋɛ m pɔr egbal na be kaba nɛ k bɛ so na.
19Joshuwa pibinyɛn Eza nɛ e daa keni Mizpa be kade so na e daŋ lɔŋɛ m pɔr kaba nɛ k wɔ kakpa nɛ b daa yili benapo be akɔsɔ na be anishito hale n ya fo kakpa nɛ b gbɛ egbal na. 20Zabai pibinyɛn Baruk malɛ e pere kenishi n lɔŋɛ m pɔr egbal na be kaba nɛ k ka n ya fo bɔrɛmatapo nimuso Eliyashib be kowu ase na. 21Yuraya pibinyɛn Mɛremɔf nɛ mo nananyɛn daa la Hakkoz na e lɔŋɛ m pɔr egbal na be kaba nɛ k niŋi teteri n ya fo Eliyashib be kowu be ekar na.
Bɔrɛmatapoana nɛ b chɛ to m pɔr egbal na be asheŋ
22Bɔrɛmatapoana nɛ b chɛ to n lɔŋɛ m pɔr egbal na e daa la: Bɔrɛmatapoana nɛ b shi Kebonfu nɛ k kulti Jerusalɛm na e lɔŋɛ m pɔr egbal na be kaba nɛ k bɛ so na. 23Nɛ Bɛnjamin nɛ Hashuub malɛ lɔŋɛ m pɔr egbal na be mba nɛ a bɛ so nsaa wɔ bumo elaŋ be anishito na.
Maasaya pibinyɛn Azariya nɛ mo nananyɛn daa la Ananaya na malɛ e lɔŋɛ m pɔr egbal na be mba nɛ a bɛ so nsaa wɔ bumo be elaŋ be anishito na.
24Nɛ Henadad pibinyɛn Biniyu malɛ lɔŋɛ m pɔr egbal na be kaba nɛ k bɛ so nsaa wɔ yili Azariya be laŋ ase hale n ya fo kakpa nɛ b gbɛ egbal na. 25Uzaya pibinyɛn Palal e lɔŋɛ m pɔr egbal nɛ b gbɛ na n ya fo ewurkpa be ebu jeŋgreŋ nɛ k mata bekumpo be kelɔnɛ ase na.
Parosh pibinyɛn Pɛdaya malɛ e lɔŋɛ m pɔr kaba nɛ k bɛ so na. 26E daŋ pɔr nna m ba fo kakpa nɛ k mata Nchu be kabuna nɛ k wɔ a laŋɛ epeŋilarkpa be kaba so nɛ ebu jeŋgreŋ nɛ k mata bɔrɛlambu na ase na nna. K mata kadegboŋ na be kaba nɛ baa tre Ofɛl nɛ bɔrɛlambu na be beshumpo na daa wɔ ndoŋ na nna.
Bepɔrpoana na be beko be baru be asheŋ
27Kade nɛ baa tre Tekua na be benyɛn malɛ e daŋ lɔŋɛ m pɔr egbal na be kaba nɛ k bɛ so na. Kaba nyɔsopo nɛ b daŋ pɔr nna na. B daŋ yili kakpa nɛ k wɔ ebu jeŋgreŋ gboŋ nɛ k bee kuŋ bɔrɛlambu na be anishito hale n ya fo egbal nɛ k mata Ofɛl na nna.
28Bɔrɛmatapoana ko malɛ e lɔŋɛ m pɔr egbal na be kaba nɛ k bɛ so na. B daŋ fara kakpa nɛ baa tre Egbaŋɛ be Kabuna nɛ k wɔ a laŋɛ kelargato be esoso be kaba so na nna. Bumo be ekama malɛ daŋ lɔŋɛ m pɔr egbal na be kaba nɛ k bɛ so nsaa wɔ mo gbagba be laŋ to be anishito nna.
29Imma pibinyɛn Zadɔk malɛ gba e lɔŋɛ m pɔr egbal nɛ k bɛ so a wɔ mbe laŋ be anishito na.
Nɛ Shekanaya pibinyɛn Shemaya nɛ e daa keni Epeŋilarkpa be kabuna so na malɛ lɔŋɛ m pɔr kaba nɛ k naŋ bɛ so na.
30Shɛlemaya pibinyɛn Hananaya nɛ Hanun nɛ e la Zalaf pibi shesopo na malɛ e lɔŋɛ m pɔr egbal na be kaba nɛ k bɛ kumo so na. Kumo a ti so bumo be kakpa nyɔsopo nɛ b pɔr.
Bɛrekaya pibinyɛn Mɛshulam e lɔŋɛ m pɔr kaba nɛ k bɛ kumo so so nsaa wɔ mo gbagba be laŋ be anishito na.
31Malkija nɛ e la shuwa be bɔyɛpo na e lɔŋɛ m pɔr kaba nɛ kumo alɛ bɛ kumo so na hale n ya fo laŋ nɛ bɔrɛlambu na be beshumpo nɛ eyawujipoana daa wɔtɔ to na ase. Kakpa ere daa wɔ kabuna nɛ baa tre Gama abar be Kabuna nɛ k mata ebu nɛ k wɔ egbal na so ashi kelargato be esoso be epeŋilarkpa be kebonfu na be anishito nna.
32Shuwa be ebɔyɛpo nɛ eyawujipoana na malɛ e lɔŋɛ m pɔr egbal na be kakpa lalaloge. Kumo alɛ yili ebu nɛ k wɔ kebonfu to be ebu na nna hale n ya fo kaboŋ nɛ baa tre Mbolpɔ be Kabuna na ase nna.
4Kananɛ Nehemaya pɔɔ bedoŋ so be asheŋ
1Sanballat, nɛ e la Samɛria be efuli so be gomena na, ka nu fanɛ anyi Juwebi na fara a pɔr Jerusalɛm be egbalana na, nɛ e nya agbo nseŋ fara a wora anyi be basa eyurto. 2Le nɛ e kaŋɛ mo braana nɛ Samɛria be benapo be anishito: “Manɛ nɛ Juwebi, basa pɔso be katuŋ ere bee fɛ fanɛ baa wora ere? Baa sha keta kachɛ koŋwule nna n lɔŋɛ egbal na m pɔr nseŋ lara esarga loŋ be kachɛ koŋwule na gbagba a? Baa fɛ fanɛ baaŋ tiŋ n ta ajembu nɛ a chɔɔ m biti abar so ere n lɔŋɛ kusɔ ko a?”
3Jemanɛ na so nɛ Tobaya nɛ e shi Ammɔn be efuli so na yil mo kutɔ, nseŋ kaŋɛ le: “Nuso bre be egbal nɛ baa sha kepɔr ere? Jiŋkaamu gba beeŋ tiŋ ŋ ŋin kumo n lɛ!”
4Ama n daŋ kule Ebɔrɛ nna ŋ kaŋɛ: “O Ebɔrɛ, basa ere kishi anyi nna nsaa sha fanɛ asheŋ lubi e tu anyi. Jande nu anyi be kekule nseŋ shin nɛ bumo be katege na e laŋɛ bumo be amu so! Shin nɛ b baa la basa nɛ bumo doŋana beeŋ pɛ bumo kena to ŋ gberge bumo n yɔ kabuti to. 5Sa maŋ kaŋ ta bumo be alubi nɛ kekeni jiga nɛ b keni bepɔrpo na m paŋ bumo kikɛ.”
6Beshumpo na daŋ shuŋ ga nɛ an naŋ pɔr Jerusalɛm be egbal na n fo nferinto. 7Sanballat nɛ Tobaya nɛ Nlɔrbu na nɛ Ammɔnebi na nɛ basa nɛ b shi kadegboŋ nɛ baa tre Ashdɔd na daŋ wu fanɛ egbal na daa dii nna a shin nɛ k shɛrto. Amoso b daŋ nya agbo nna, 8nseŋ daŋ kre fanɛ baaŋ bar kebagato nseŋ kɔ Jerusalɛmebi na. 9Ama an kule anyi be Ebɔrɛ nseŋ lara benapo nɛ b baa keni so nsaa kuŋ egbal na kapa nɛ kanyɛ kikɛ.
10Loŋ be jemanɛ na nɛ Juda be basa na daa kɔ bumo be kashɛ ko a boŋ nɛ k bee keta kebɔltofinfin. B yɛ:
“An gben a chul to ŋkpal an ka sulɔ esulɔ gbɛgbɛso so.
Ajembu burtoso na shi ga n sa anyi nɛ an sulɔ n ya lɛ.
Nuso nɛ anyeeŋ wora n tiŋ m pɔr egbal na n loge kabre?”
11An doŋana malɛ daŋ naa kaŋɛ le nna: “Pɔɛŋ nɛ Jerusalɛm be basa ere e pin kusɔ nɛ k bee wora na, nɛ an ŋana n ya mɔ bumo kikɛ nɛ bumo be kushuŋ na e ba ekar.”
12Ama ale kudu kikɛ nɛ Jerusalɛm be basa nɛ b daŋ wea anyi doŋana to n chena na kpele anyi kusoe a laŋɛ kusɔ nɛ an doŋana na bee kre kewora anyi be kaplɛa so. 13Amoso nɛ n ta etokobi nɛ ekpa nɛ ata nɛ atanyembi n sa ma basa nseŋ gama bumo kakurge be ntuŋso a mata egbal na be kaba nɛ k maŋ naŋ pɔr n loge na nɛ b baa kuŋ. 14Kumo be kaman nɛ n wu fanɛ basa na be ŋgbene jija bumo, nɛ ŋ kaŋɛ bumo nɛ bumo be bejuŋkparpo nɛ ekrachi na le: “Men sa maa ŋana anyi doŋana ere. Men baa nyiŋi kananɛ Enyɛnpe na be eleŋ shi ga nɛ kananɛ mbe asheŋ bee keta kufu. Amoso men leŋ menyi be amu to nseŋ kɔ kenishipereso n sa menyi be basa nɛ mbia nɛ beche nɛ elantoebi!”
15An doŋana daŋ mige to m pin fanɛ an nyi ŋkre lubi nɛ baa kre a laŋɛ anyi be kaplɛa so na kikɛ. Ebɔrɛ malɛ daŋ jija bumo be ŋkre na nna. Amoso anyi kikɛ naŋ bɛta n yɔ egbal na be kelɔŋɛ m pɔr to nna. 16Yili loŋ be jemanɛ na mbrantiɛbia na be bargato bee shuŋ nna nɛ bargato malɛ e buu anyɛn kale gbɛgbɛso nseŋ keta ekpa nɛ abɛlso be asɔ kuŋ eyur so nɛ ata nɛ atanyembi a yil a kuŋ. Anyi be benapo be benimuana na malɛ daa yili bepɔrpo na be kaman nna. 17Basa nɛ b daa sulɔ kapɔr be asɔ na be ekama daŋ keta kekɔsɔ enɔ koŋwule to nna nseŋ ta enɔ koŋwule malɛ m pɛ asɔ na to. 18Bepɔrpo na malɛ ta etokobi nna n wɔtɔ efar to n chɛ bumo be nshɛr to. Esa nɛ e beeŋ foŋ kabel n juge anyi na bre daa wɔ ma kutɔ nna.
19Kumo be kaman nɛ ŋ kaŋɛ basa na nɛ bumo be ekrachi nɛ bejuŋkparpoana na le: “Ŋkpal anyi be kushuŋ na ka barga to a wɔ mboŋ damta so, an barga abar nna ga. 20Men baŋ nu kabel na be kushu, men wora manaŋ m ba shɛr ŋ kulti ma. Anyi be Ebɔrɛ na beeŋ chɛ anyi to ŋ kɔ.”
21Amoso anyi bee wule a koso kachipurdidi nna a shuŋ egbal na be kushuŋ hale nɛ kanyɛ e ya biri. Basa na be bargato bee shuŋ nna nɛ bargato malɛ e keta bumo be ekpa a yil a kuŋ. 22Loŋ be jemanɛ nɛ ŋ kaŋɛ basa nɛ baa keni beshumpo na so na nɛ bumo be beshumpo kikɛ fanɛ baa b wɔ Jerusalɛm be kadegboŋ na to kanyɛso kikɛ nsaa keni so a kuŋ kade na. Amoso b daa shuŋ kapaso nna nsaa keni kade na so a kuŋ kumo kanyɛso malɛ. 23Ma nɛ m braana nɛ beshumpo na nɛ bekumpo na kikɛ maa lara anyi be asɔbuuso kanyɛso nsaa dese. Anyi alɛ kikɛ maa shin nɛ anyi be akɔsɔ bee barga anyi kikɛ.
5Kananɛ betirpo bee wu tɔrɔ be asheŋ
1Jemanɛ ko ka fo nɛ benyɛn nɛ beche na be beko fara a fubel a bile asheŋ a malga a gbiti bumo braana. 2Le nɛ beko daa kaŋɛ: “Nnaŋgboŋ nɛ anyi be beko kɔ a bela. Ayu damta nɛ e daga fanɛ an nya a ji nseŋ tiŋ a wɔ ŋkpa to.” 3Nɛ beko malɛ kaŋɛ le: “Akoŋ be jemanɛ na, anyi be adɔsawule nɛ ndibi sɔrso be adɔ nɛ nwu nɛ an daŋ ta n yili tarma nseŋ nya ayu n ji.”
4Kumo be kaman nɛ beko malɛ kaŋɛ le: “An paŋ amansherbi nna pɔɛŋ nseŋ tiŋ ŋ ka anyi be adɔsawule nɛ ndibi sɔrso be akɔ n sa ewura. 5Anyi alɛ gba la Juwebi nna, nɛ anyi be mbia nɛ bumo be mbia kikɛ la kukoŋwule. Ama anyi ere bee fa anyi be mbia nna nɛ baa ki anya. Naniere anyi maŋ naa kɔ kechɛto kikɛ be tama ŋkpal an ka ta anyi be adɔsawule nɛ ndibi sɔrso be adɔana ŋ n chɛr ayu so.” 6Ŋ ka nu b kaa bee fubel a bile asheŋ na nɛ agbo pɛ ma ga. 7Ndoŋ nna nɛ n fɛ kumo be asheŋ nseŋ kaŋɛ bejuŋkparpoana na nɛ ekrachiana na le: “Manɛ nna nɛ menyee paŋ menyi be basa gbagba amansherbi nsaa wɔtɔ bumo nchu?
Kumo be kaman nɛ n tre ekama n shɛr nseŋ malga ŋ gbiti bejuŋkparpoana na ŋ kaŋɛ bumo le, 8An wora ania n tɔ anyi be basa nɛ b pɛ anya n yɔ efuli pɔtɛana so na m bɛta m ba. Ama naniere menyi e naa fa bumo be bedamta na, nɛ an naŋ ya tɔ bumo!” Ekrachi na nɛ bejuŋkparpoana na daa maŋ kaŋɛ shɛŋ, ŋkpal b ka nyi k kaa la kashenteŋ so.
9Ndoŋ nna nɛ n naŋ kaŋɛ le: “Kusɔ nɛ men wora na maŋ daga kuraa! A daga fanɛ anyi be kebaawɔtɔ e baa sa Ebɔrɛ bunyaŋ, saŋɛ na so nnyamase na maaŋ wu kulubi anyi to. 10Naniere n shin nɛ basa na paŋ amansherbi nɛ aboyu ma kutɔ nna. Nteriana nɛ basa nɛ baa shuŋ a sa ma na gba ti so. Naniere men shin nɛ an kikɛ e ta asɔ nɛ b paŋ anyi na ŋ kɛ bumo. 11Men yige menyi be akɔ kama nɛ b ji na ŋ kɛ bumo, hale nɛ a la amansherbi ŋko aboyu ŋko asɔnuuso ŋko ɔlif be ŋku gba. Men bɛta bumo be nsawule nɛ ndibisɔrso be adɔana nɛ ɔlif be ndibi be mboŋana nɛ bumo be elaŋana n sa bumo manaŋ.” 12Nɛ bejuŋkparpo na kaŋɛ le: “Kusɔ kama nɛ fo kaŋɛ, anyeeŋ wora loŋ. Anyi beeŋ ta bumo be mpetɛ n sa bumo, anyi alɛ maŋ naŋ bishi bumo anyi be akɔ nɛ b ji na gba.” Ndoŋ nna nɛ n tre bɔrɛmatapoana na nseŋ shin nɛ bejuŋkparpoana na nase kɔnɔ bumo be anishito saŋɛ na so baaŋ bɛ bumo be nnɔ nɛ b nase na so. 13Kumo be kaman nɛ n saŋɛ kreso nɛ n ta n chɛ ma kashɛr to na nseŋ gbaŋgbaŋ kumo to a ŋini fanɛ loŋ nɛ Ebɔrɛ beeŋ gbaŋgbaŋ bekama nɛ b maa bɛ bumo be nnɔ nase so so na. Kumo alɛ be kaman nɛ ŋ kaŋɛ le: “Ebɔrɛ beeŋ sɔ men be ebuana nɛ kusɔ kama nɛ men kɔ, saŋɛ na so, men maa naa kɔ shɛŋ.” Ndoŋ nna nɛ bekama nɛ b daa wɔ ndoŋ na shuli so ŋ kaŋɛ: “Amɛn!” Kumo be kaman nɛ b di Enyɛnpe Ebɔrɛ na epaŋ. Ade kikɛ be kaman nɛ bejuŋkparpoana na bɛ bumo be nnɔ naseso so.
Nehemaya ka maa fɛ mo nawule be asheŋ
14Atazɛzɛs ka ji kuwura be nfɛ adunyɔ n ya fo nfɛ adesa nɛ anyɔsopo to nɛ ma e la Juda be efuli so be gomena. Nfɛ kuduanyɔ nɛ n la gomena na kikɛ, ma ŋko ŋkurgepoana maŋ sɔ ajibi nɛ a daga ma fanɛ gomena na. 15Egomena kama nɛ b juŋkpar na daa tɔrɔ basa na nna ga. B daa sɔ gbiti be ndarbi adena nna a tɔ ajibi nɛ asɔnuuso karechɛ kikɛ nna. Bumo be nyɛrbi gba daa tɔrɔ basa na nna, ama ŋkpal ma ere ka bee ŋana Ebɔrɛ na so nɛ ma kebaawɔtɔ daa kɔr bumo to na. 16Ma ere ta ma eleŋ kikɛ nna n wɔtɔ egbal na be kepɔr to nsaa maa fin shɛŋ kumo to. Ma alɛ maŋ tɔ nsawule ŋko nwu n sa ma kumu. Bekama nɛ bumo alɛ bee shuŋ a sa ma na kikɛ chɛ to nna m pɔr egbal na. 17Basa nɛ b shi efuli pɔtɛana so m baa kaa chɔrɔ ma na be kaman, Jerusalɛm to be basa kalfa nɛ adunu nɛ bumo be bejuŋkparpo nɛ n daa sa ajibi. 18Karechɛ kama mee sa kena koŋwule nɛ mbolpɔ lela ashe nɛ ŋkoshi damta nɛ ajibi nna, nsaa chige asɔnuuso popɔr nchɛ kudu kikɛ. Ama ade kikɛ be kaman n nyi asheŋ kpakpaso nɛ a beeŋ ba basa na so, amoso n daa maa sɔ gomena be kakɔka.
19O Ebɔrɛ, mee kule fo nna nɛ fo nyiŋi kusɔ nɛ n wora n sa basa ere nseŋ nɛfa ma.
6Kananɛ baa kre Nehemaya nia lubi be asheŋ
1Sanballat nɛ Tobaya, nɛ Geshɛm nɛ an doŋana nɛ b ka na be beko nu fanɛ an pɔr egbal na n loge. Kusɔ nɛ an daa maŋ wora e la akuloŋ na be keta n wɔtɔ mbunaana na to. 2Ŋkpal Sanballat nɛ Geshɛm ka bee sha fanɛ b tɔrɔ ma so, b ta kubɔya nna n shoŋi ma fanɛ m ba nɛ ma nɛ bumo e wu abar ashi ndebiana nɛ e wɔ kakpa nɛ baa tre Ono be Ketaŋɛ na be kuko to. 3Nɛ ma alɛ shuŋi mbɔ ŋ kaŋɛ bumo le: “Ŋ kɔ kushuŋ kpakpaso nna a wora, amoso m maaŋ tiŋ n yɔ ndoŋ. M maaŋ tiŋ ŋkpal ma nɛ menyi be kewu abar so n yige kushuŋ ere.” 4Ale ana nɛ b kela n tre ma, ama saŋkama kamalga koŋwule na nɛ ma alɛ bee kaŋɛ bumo. 5Ndoŋ nna nɛ Sanballat naŋ shuŋi krachi ko fanɛ e ta kawɔl m ba sa ma. 6Le nɛ kawɔl na bee kaŋɛ: “Geshɛm kaŋɛ ma fanɛ basa bee kuli a malga asheŋ ko a kaŋɛ fanɛ fo nɛ fo basa bee kre anyi nia nna nɛ men lar Pɛshiya be efuli so be ewurgboŋ na kaman. Aloŋ malɛ so nɛ fee lɔŋɛ a pɔr egbal na. Mo alɛ naa kaŋɛ gba fanɛ fee sha keta fo kumu nna ŋ ki Jerusalɛm be ewura. 7E naŋ kaŋɛ gba fanɛ fo nɛ anebiana ko wora kɔnɔkoŋwule nna fanɛ b baa malga a sa Jerusalɛm be kade to ebi fanɛ fo e la Juda be ewura. Kesheŋ ere la kusɔ nɛ Pɛshiya be ewurkpa ebi na tiŋ n nu nna, kumo so nɛ mee bar nfɛra fanɛ k daga fanɛ ma nɛ fo e chena m malga nɛnɛ a laŋɛ kumo be kaplɛa so na.” 8Kumo be kaman nɛ ma alɛ sa mo ebɔl nseŋ kaŋɛ mo le: “Kashenteŋ maŋ wɔ kusɔ nɛ fee kaŋɛ ere to kikɛ. Fo gbagba be keblɔmbi nɛ fo wora na.” 9B daa sha fanɛ b funti anyi nna nɛ an sa maŋ tiŋ n loge kushuŋ na. Nɛ ŋ kule Ebɔrɛ ŋ kaŋɛ le: “Ebɔrɛ sa ma eleŋ naniere!” 10Kachako nɛ n yɔ nɛ n ya bɔɔ Delai pibinyɛn Shemaya nɛ e la Mehetabel mo nanabi nyɛnso nɛ e daŋ shir a wɔ mbe laŋ to na so nɛ e kaŋɛ ma le: “A daga fanɛ ma nɛ fo ka ŋana bɔrɛlambu na be kakpa cheembi na nseŋ ti akuloŋ, ŋkpal fo doŋana kaa bee sha fanɛ b mɔ fo na so. Baŋ yili kanyɛ ere a yɔ baŋ ba mɔ fo.” 11Ndoŋ nna nɛ ŋ kaŋɛ: “Ma ere maŋ la basa nɛ baa shile a ŋana na be ako nna. Fee fɛ nna fanɛ meeŋ shile ŋ ŋana bɔrɛlambu ere to nna ŋkpal ma kumɔlga so a? M maaŋ wora loŋ kikɛ.” 12Ŋ ka lɔŋɛ n fɛ kesheŋ ere be nfɛra nɛnɛ na nɛ n pin fanɛ Ebɔrɛ maŋ malga Shemaya kutɔ, ama Tobaya nɛ Sanballat e daŋ sa mo brɔbu nseŋ kaŋɛ mo fanɛ e kpele ma kusoe. 13B daŋ ber mo paa nna fanɛ e funti ma nɛ n wora kulubi, saŋɛ na so ma ketre beeŋ jija nɛ anishinyɔr e pɛ ma. 14Ndoŋ nna nɛ ŋ kule Ebɔrɛ le: “Ebɔrɛ nyiŋi kusɔ nɛ Tobaya nɛ Sanballat wora nɛ anebiche nɛ baa tre Nodaya nɛ anebiana nɛ b ka na be kananɛ b fin ekpa nɛ b funti ma. Jande gberge bumo kikɛ kusoe n sa ma.”
Kushuŋ na be lalaloge be asheŋ
15Nchɛ adunu nɛ anyɔ nɛ an ta m pɔr Jerusalɛm be egbalana na n loge. Juwebi be kufɔl nɛ baa tre Elul na be kachɛ adunyɔ nɛ anusopo na nɛ egbal na be kushuŋ loge. 16Anyi doŋana nɛ b wɔ efuli pɔtɛ so na ka nu loŋ nɛ kufu pɛ bumo, ŋkpal ekama na ka pin fanɛ Ebɔrɛ be kechɛto so nɛ kushuŋ na tiŋ n loge. 17Loŋ be jemanɛ na so Juda be bejuŋkparpoana na nɛ Tobaya e daa sibɛ nwɔl a shoŋi abar. 18Basa damta daa yil Tobaya be kaman nna ŋkpal Ara pibinyɛn, Shekanaya ka la mo shanyɛn so. Kusɔ nɛ k naŋ ti so e la fanɛ mo pibinyɛn Jehohanan e ta Berekia pibinyɛn, Mɛshulam pibiche a kil. 19Basa bee kaŋɛ ma ashuŋ lela nɛ Tobaya bee wora kikɛ nna saŋɛ na so baaŋ nu ma kɔnɔ to be kamalga n ya kaŋɛ mo. Saŋkama mo alɛ bee sibɛ nwɔl nna a funti ma.
71Naniere b loge egbal na be kelɔŋɛ m pɔr nseŋ ta mbuna na be akuloŋ na n wɔtɔ amo to. Kumo be kaman nɛ b sa bɔrɛlambu to be bekumpo na nɛ beshɛbompo na nɛ Livaiebi nɛ b ka na kikɛ bumo be ashuŋ. 2Basa anyɔ nɛ n daŋ lara fanɛ b baa la benimu nsaa keni Jerusalɛm be kadegboŋ na so. Bumo e la n sipo Hanani nɛ Hananiya nɛ e la enapo nimuso nɛ e bee keni kakpa lempo na so na. Ŋkpal manɛ so, Hananiya la esa nɛ feeŋ tiŋ n yirda nna, mo alɛ nseŋ naa kɔ kabɔrɛŋana a chɔ basa damta. 3Kumo be kaman nɛ ŋ kaŋɛ bekumpo fanɛ b sa maa wule a bugi Jerusalɛm be mbuna na, ama epeŋi daŋ nna pɔɛŋ. A daga fanɛ b baa ti amo a ber amo so kaaseso pɔɛŋ nsaa koso kushuŋ to. Ma alɛ naŋ kaŋɛ bumo nna fanɛ b lara bumo gbagba to be basa nɛ b shi Jerusalɛm to nɛ b baa yili egbal na be mboŋ ko a kuŋ kumo nɛ beko malɛ e baa kuŋ bumo be nwuana.
Basa nɛ b shi kenyaya to m ba na be atre be asheŋ
4Jerusalɛm daa la kade gboŋgboŋi nna, ama basa gbrɛbi ko e daa wɔ kumo to. Bumo alɛ daa maŋ naŋ lɔŋɛ m pɔr bumo be nwu ndoŋ. 5Amoso Ebɔrɛ daŋ sa ma nfɛra nna fanɛ ŋ gama basa na nɛ bumo be bejuŋkparpo nɛ ekrachi na ŋ keni basa nɛ ewurgboŋ Nebukadneeza pɛ n yɔ Babilɔn be efuli so nɛ b bɛta m ba na be nnaŋ be atre be nwɔl to ŋ karga bumo. Kusɔ nɛ n wu nwɔl na to nde.
6Basa nɛ b pɛ n yɔ Babilɔn be efuli so na be galeŋga bɛta m ba Jerusalɛm nɛ Juda be efuli so nna. Ekama daŋ yɔ mbe kade to nna. Jemanɛ nɛ ewurgboŋ Nebukadneeza daŋ pɛ bumo fanɛ anya n yɔ na, bumo be nnaŋ to be basa daa wɔ kadegboŋ nɛ baa tre Babilɔn na nna. 7Bumo be bejuŋkparpo e daa la Zerubabel nɛ Joshuwa nɛ Nehemaya nɛ Azariya nɛ Ramaya nɛ Nahamani nɛ Mɔdikaya nɛ Bilshan nɛ Misperɛf nɛ Bigvai nɛ Nehum nɛ Baana.
8-25Israɛl be basa nɛ b bɛta m ba na be kananɛ b sa mbuna mbuna so nde:
Parosh be kabuna ebi daa la basa ŋgboŋ anyɔ nɛ kalfa nɛ adushunu nɛ anyɔ nna.
Shefataya be kabuna ebi daa la basa alfa asa nɛ adushunu nɛ anyɔ nna.
Ara be kabuna ebi daa la basa alfa ashe nɛ adunu nɛ anyɔ nna.
Pahaf Mowab be kabuna ebi, fɔŋfɔŋ Joshuwa nɛ Jɔab be kaman to ebi daa la basa ŋgboŋ anyɔ nɛ alfa aburwa nɛ kuduaburwa nna.
Elam be kabuna ebi daa la basa kagboŋ nɛ alfa anyɔ nɛ adunu nɛ ana nna.
Zaatu be kabuna ebi daa la basa alfa aburwa nɛ adena nɛ anu nna.
Zakai be kabuna ebi daa la basa alfa ashunu nɛ adeshe nna.
Biniyu be kabuna ebi daa la basa alfa ashe nɛ adena nɛ aburwa nna.
Bebaye be kabuna ebi daa la basa alfa ashe nɛ adunyɔ nɛ aburwa nna.
Azgad be kabuna ebi daa la basa ŋgboŋ anyɔ nɛ alfa asa nɛ adunyɔ nɛ anyɔ nna.
Adonikam be kabuna ebi daa la basa alfa ashe nɛ adeshe nɛ ashunu nna.
Bigvai be kabuna ebi daa la basa ŋgboŋ anyɔ nɛ adeshe nɛ ashunu nna.
Adin be kabuna ebi daa la basa alfa ashe nɛ adunu nɛ anu nna.
Atɛr nɛ mbe ketre ko la Hɛzekaya na be kabuna ebi daa la basa adekpanu nɛ aburwa nna.
Hashum be kabuna ebi daa la basa alfa asa nɛ adunyɔ nɛ aburwa nna.
Bɛzai be kabuna ebi daa la basa alfa asa nɛ adunyɔ nɛ ana nna.
Harif be kabuna ebi daa la basa kalfa nɛ kudu anyɔ nna.
Gibiɔn be kabuna ebi daa la basa adekpanu nɛ anu nna.
26-38Benyɛn nɛ b daŋ shi nde ere to m bɛta m ba nde.
Bɛtlɛhɛm nɛ Netofa be benyɛn daa la basa kalfa nɛ aduburwa nɛ aburwa nna.
Anatɔf be benyɛn daa la basa kalfa nɛ adunyɔ nɛ aburwa nna.
Bɛt Azmavɛf be benyɛn daa la basa adena nɛ anyɔ nna.
Kiriaf Jearim nɛ Kefira nɛ Berof be benyɛn daa la basa alfa ashunu nɛ adena nɛ asa nna.
Rama nɛ Gɛba be benyɛn daa la basa alfa ashe nɛ adunyɔ nɛ kako nna.
Mikmas be benyɛn daa la basa kalfa nɛ adunyɔ nɛ anyɔ nna.
Bɛtɛl nɛ Ai be benyɛn daa la basa kalfa nɛ adunyɔ nɛ asa nna.
Nibo be benyɛn daa la basa adunu nɛ anyɔ nna.
Elaam ko na be benyɛn daa la basa kagboŋ nɛ alfa anyɔ nɛ adunu nɛ ana nna.
Harim be benyɛn daa la basa alfa asa nɛ adunyɔ nna.
Jɛriko be benyɛn daa la basa alfa asa nɛ adena nɛ anu nna.
Lɔd nɛ Hadid nɛ Ono be benyɛn daa la basa alfa ashunu nɛ adunyɔ nɛ kako nna.
Senaa be benyɛn daa la basa ŋgboŋ asa nɛ alfa akpanu nɛ adesa nna.
39-42Bɔrɛmatapoana na be mbunaebi nɛ b bɛta m ba na nde.
Jedaya be kabuna ebi, fɔŋfɔŋ Joshuwa be kaman to ebi, daa la basa alfa akpanu nɛ adushunu nɛ asa nna.
Ima be kabuna ebi daa la basa kagboŋ nɛ adunu nɛ anyɔ nna.
Pashɔr be kabuna ebi daa la basa kagboŋ nɛ alfa anyɔ nɛ adena nɛ ashunu nna.
Harim be kabuna ebi daa la basa kagboŋ nɛ kudu ashunu nna.
43-45Livaiebi be mbunaebi nɛ bumo alɛ gba bɛta m ba nde.
Joshuwa nɛ Kadmiɛl nɛ b la Hodeva be kaman to ebi be mbunaebi daa la basa adushunu nɛ ana nna.
Bɔrɛlambu to be Nshɛbompoana nɛ b la Asaf be kaman to ebi daa la basa kalfa nɛ adena nɛ aburwa nna.
Bɔrɛlambu to be bekumpo nɛ b la Shalum nɛ Atɛ nɛ Talmɔn nɛ Akuub nɛ Hatita nɛ Shobayi be kamanebi na be kabuna ebi daa la basa kalfa nɛ adesa nɛ aburwa nna.
46-56Bɔrɛlambu to be beshumpo be mbunaebi nɛ bumo alɛ gba daŋ bɛta m ba nde.
Ziha nɛ Hasufa nɛ Tabaof be kabuna ebi nɛ
Keros Sia nɛ Paadɔn be kabuna ebi, nɛ
Lebana nɛ Hegaba nɛ Shalmai be kabuna ebi
nɛ Hanan nɛ Gidɛl nɛ Gaha be kabuna ebi
Ria nɛ Rezin nɛ Nekoda be kabuna ebi
nɛ Gazam nɛ Uza nɛ Pasea be kabuna ebi
nɛ Bɛsai nɛ Mewunim nɛ Nefushesim be kabuna ebi
nɛ Bakbuk nɛ Hakufa nɛ Hahɔr be kabuna ebi
nɛ Bazlif nɛ Mehida nɛ Hasha be kabuna ebi
nɛ Bakos nɛ Sisɛra nɛ Tema be kabuna ebi
nɛ Nezia nɛ Hatifa be kabuna ebi
57-59Ewura Sɔlɔmɔn be nyɛrbi be mbuna ebi nɛ bumo alɛ gba bɛta m ba nde.
Sotai nɛ Sofɛrɛ nɛ Pɛrida be kabuna ebi
nɛ Jaala nɛ Daakɔn nɛ Gidɛl be kabuna ebi
nɛ Shefatiya nɛ Hatil nɛ Pokerɛf Hazebem nɛ Ammɔn be kabuna ebi.
60Bɔrɛlambu to be beshumpo na nɛ Sɔlɔmɔn be nyɛrbi na be mbunaebi nɛ b bɛta na kikɛ daŋ koso basa alfa asa nɛ adekpanu nɛ anyɔ nna.
61-62Basa alfa ashe nɛ adena nɛ anyɔ e daŋ shi Delaya nɛ Tobaya nɛ Nekoda be mbuna m bɛta m ba, ama bumo alɛ daa maŋ tiŋ ŋ ŋini fanɛ b la Israɛl be basa gbagba nna. Nde nɛ b daŋ chena to e daa la Tɛl Mela nɛ Tɛl Hasha nɛ Cherub nɛ Adɔn nɛ Ima.
63-64Bɔrɛmatapoana nɛ b daa maŋ tiŋ n nya kawɔl nɛ k bee ŋini kananɛ bumo be nnaŋ lar e la Hobia nɛ Hakɔz nɛ Bazilai. Bazilai nɛ e shi bɔrɛmatapoana be kabuna ere mo nananyɛn daŋ ta Giliad be kasawule so be Bazilai be kabuna be eche nna nseŋ ta mo shanyɛn be ketre n nase mbe kabuna na. Ŋkpal b k daa maŋ tiŋ ŋ ŋini kananɛ bumo kekurge to lar so, b daa maŋ sa bumo ekpa nɛ b ki bɔrɛmatapoana. 65Gomena na daŋ kaŋɛ bumo ere nna fanɛ b maaŋ tiŋ n ji ajibi nɛ b ta n lara sarga n sa Ebɔrɛ na ama bɔrɛmatapo ko baaŋ ta asɔ nɛ baa tre Urim nɛ Thummim na n to beri ŋ ŋini fanɛ b la bɔrɛmatapoana kashenteŋto nna pɔɛŋ nɛ b tiŋ n ji esargajibi na.
66-69Basa nɛ b daŋ bɛta m ba na kikɛ daŋ koso basa ŋgboŋ adena nɛ anyɔ nɛ alfa asa nɛ adeshe nna.
Bumo be nyɛrbi nɛ mbita malɛ daa la basa ŋgboŋ ashunu nɛ alfa asa nɛ adesa nɛ ashunu nna.
Bumo be beshɛbompo nyɛnso nɛ becheso kikɛ daa la basa alfa anyɔ nɛ adena nɛ anu nna.
Bumo be egbaŋɛ malɛ daa la alfa ashunu nɛ adesa nɛ ashe nna.
Bumo be ekurma nɛ a duli egbaŋɛ na malɛ daa la alfa anyɔ nɛ adena nɛ anu nna.
Bumo be enyɔma daa la alfa ana nɛ adesa nɛ anu nna.
Nɛ bumo be ekurma gbagba malɛ daa la ŋgboŋ ashe nɛ alfa ashunu nɛ adunyɔ.
70-72Basa damta daŋ sa asɔ nna n chɛ bɔrɛlambu na be kelɔŋɛ m pɔr be kushuŋ to. Gomena na gbagba daŋ sa shuwa nɛ amo be egbɛ fo fanɛ kilo aburwa nɛ ntishaŋ peper adunu nɛ bɔrɛmatapoana be epiŋi alfa anu nɛ adesa. Mbuna be benimuana na malɛ daŋ sa shuwa nɛ amo be egbɛ fo fanɛ kilo kalfa nɛ adunu nɛ asa nɛ gbiti nɛ amo alɛ be egbɛ daŋ fo fanɛ kilo kagboŋ nɛ alfa ana nɛ adunu nɛ aburwa. Kusɔ nɛ basa nɛ b ka na malɛ sa e la shuwa nɛ amo be egbɛ daŋ fo fanɛ kilo kalfa nɛ adunu nɛ asa nɛ gbiti malɛ fanɛ kilo kagboŋ nɛ alfa asa nɛ adunyɔ nɛ anu nɛ bɔrɛmatapoana be epiŋi adeshe nɛ ashunu.
73Ndoŋ nna nɛ bɔrɛmatapoana na nɛ Livaiebi na nɛ bɔrɛlambu to be bekumpo na nɛ beshɛbompoana na nɛ basa na be beko nɛ bɔrɛlambu to be beshumpo na nɛ Israɛlebi na kikɛ chena bumo be ndeana to ashi Juda be efuli so kikɛ.
8Ɛzra ka kraŋ mbra na n sa basa na be asheŋ
1Afɔl ashunu nɛ Israɛlebi na daŋ ta n chena bumo be ndeana to n loge. Kufɔl shunusopo na to be kachɛ sososo na nɛ bumo kikɛ gama abar so ashi Jerusalɛm be kadegboŋ na to be kelɔnɛ nɛ k dese kabuna nɛ baa tre Nchu be Kabuna na ase. Kumo be kaman nɛ b kaŋɛ bɔrɛmatapo Ɛzra, nɛ e daa ŋini mbra nɛ Ebɔrɛ daŋ bɔla an nananyɛn Mosis so n ta n sa Israɛlebi na, fanɛ e ya ta mbra be kawɔl na m ba. 2Ndoŋ nna nɛ Ɛzra ya ta mbra be kawɔl na m ba. Benyɛn nɛ beche nɛ mbia nɛ baa pin asheŋ to na kikɛ e daŋ shɛr ndoŋ. 3Yili kachipurdidi n ya fo kapiidi nɛ e yili kelɔnɛ nɛ k mata kabuna so a kraŋ mbra be kawɔl na a sa basa na nɛ baa nu kumo nɛnɛ. 4B daŋ ta ndibi n yuu kejaŋ nna nɛ Ɛzra yili kumo so loŋ be kachɛ nna. Basa nɛ b daa yil mbe jisoso a la Mattitia nɛ Shema nɛ Anaya nɛ Yuriya nɛ Hilkiya nɛ Maseya. Bumo nɛ bumo alɛ daa yil mbe bena so malɛ e daa la Pedaya nɛ Mishaal nɛ Malkiya nɛ Hashum nɛ Hash Badaana nɛ Zakareya nɛ Mɛshulam.
5Ɛzra daŋ yili kejaŋ jeŋgreŋ na so nna a keni basa na kaseto nɛ bumo alɛ gba be anishi yuu mo so. E ka bugi kawɔl na to a kraŋ na kikɛ nɛ basa na kikɛ yil nna. 6Ɛzra ka kraŋ kawɔl na n loge nɛ e kaŋɛ: “Kemaŋkura e baa la Enyɛnpe Ebɔrɛ nɛ e shi ga na peya!” Nɛ basa na kikɛ maŋ bumo be enɔana esoso nseŋ shuli so ŋ kaŋɛ: “Amɛn! Amɛn!” Kumo be kaman nɛ b gbir ŋ kurgi bumo be amu n yuu to m bunyaŋ Enyɛnpe Ebɔrɛ na.
7-8B ka wora loŋ n loge nɛ b koso n yili nɛ Joshuwa nɛ Bani nɛ Sherebia nɛ Jamin nɛ Akkub nɛ Shebataya nɛ Hodia nɛ Maaseia nɛ Kɛlita nɛ Azariya nɛ Jozabad nɛ Hanan nɛ Pɛleeyaa nɛ b la Livaiebi na luri basa na to n ya kaa kute mbra nɛ Ɛzra kraŋ na be afito a ŋini bumo.
9Basa na ka nu kusɔ nɛ mbra na bee kaŋɛ na nɛ k luri bumo to ga nɛ b fara a shu. Amoso Nehemaya nɛ e daa la gomena na nɛ bɔrɛmatapo Ɛzra nɛ e la mbra na be eŋinipo na nɛ Livaiebi nɛ baa kute mbra na be afito a sa basa na kaŋɛ: “Kabre la kachɛ cheembi nna n sa Enyɛnpe menyi be Ebɔrɛ na. Amoso k maŋ daga fanɛ men baa shu a wora kuwɔr be asheŋ.” 10Kumo be kaman nɛ Nehemaya kaŋɛ basa na: “Naniere men yɔ epe n ya wora kejigboŋ n ji menyi be nnɔ nseŋ ku ajibi na be ako n sa bumo nɛ b maŋ kɔ shɛŋ nɛ b ji na. Kabre la kachɛ cheembi nna n sa Enyɛnpe anyi be Ebɔrɛ na. Amoso men sa maŋ shin nɛ men be ŋgbene a baa jija menyi. Enyɛnpe Ebɔrɛ beeŋ sa menyi kagbenefuli nɛ k beeŋ sa menyi eleŋ.”
11Ndoŋ nna nɛ Livaiebi na bee nite a kulti a leŋ basa na to fanɛ b yige kushu n saa maŋ shin nɛ bumo be ŋgbene e baa jija bumo kachɛ cheembi ere. 12Kumo be kaman nɛ basa na kikɛ lar n yɔ bumo peana n ya ji nseŋ nuu kagbenefuliso Bumo alɛ daŋ chige ajibi nɛ asɔnuuso nna n sa beko, ŋkpal manɛ so, b pin kusɔ nɛ mbra nɛ b kraŋ n sa bumo na bee ŋini.
Kebaawɔ Abuu to be Kachɛgboŋ na be asheŋ
13Kumo be ŋklade nɛ nnaŋ to be benimuana na kikɛ, nɛ bɔrɛmatopoana na nɛ Livaiebi na yɔ Ɛzra kutɔ nɛ e ya ŋini bumo mbra na. 14B ba pin fanɛ mbra nɛ Ebɔrɛ bɔla bumo nananyɛn Mosis so n sa bumo na bee ŋini fanɛ jemanɛ kama nɛ baa ji Abuu to be Kachɛgboŋ na kufɔl shunusopo na to na, a daga fanɛ b baa yuu abuu nɛ a maa chɛr nsaa wɔ amo to hale nɛ kachɛgboŋ na e fo ekar. 15Bumo alɛ daŋ naŋ koya fanɛ a daga fanɛ b ber kebomboŋ efuli na kikɛ so fanɛ b yɔ kupuŋ to n ya ku ndibi nɛ amo be afantaŋ maa gbaŋgbaŋ fanɛ ɔlifdibi nɛ ŋkubadibi be ayabi m ba yuu abuu na.
16Ndoŋ nna nɛ basa na ya ku ndibi nɛ amo be afantaŋ maa gbaŋgbaŋ na be ayabi m ba yuu abuu bumo be achoŋiana so nɛ bumo be elaŋ to be alɔnɛ so nɛ bɔrɛlambu na be kelɔnɛ so nɛ alɔnɛ nɛ a dese m mata mbuna nɛ baa tre Nchu be Kabuna nɛ Efrayim be Kabuna ase na so. 17Bekama nɛ b shi Babilɔn be kadegboŋ na to m bɛta m ba daŋ yuu abuu nna a wɔ amo to a ji Abuu to be Kachɛgboŋ na kagbenefuliso nna. Ŋkpal manɛ so, yili Nun pibinyɛn Joshuwa, nɛ e fara n juŋkpar Israɛlebi na ŋ kɔ n sɔ kasawule na be jemanɛ na kikɛ b maŋ daŋ naŋ ji kachɛgboŋ na kikɛ ama loŋ be kachɛ na. 18Baŋ yili kachɛ nɛ b fara kachɛgboŋ na be keji n ya fo kumo be kachɛ shunusopo na, Ɛzra daa kraŋ mbra be kawɔl na nna a sa basa na karechɛ kikɛ. Kachɛ burwasopo na nɛ ekama gama abar so nɛ b bunyaŋ Ebɔrɛ, fanɛ kananɛ mbra na ŋini na.
9Basa na ka bugi to ŋ kaŋɛ bumo be alubi be asheŋ
1Kufɔl shunusopo na be kachɛ adunyɔ nɛ ana na nɛ Israɛlebi na shɛr ŋ kishi nseŋ buu nli be nle nseŋ wora eshishɛr ŋ gbiti bumo be amu to a ŋini bumo be ŋgbene ka jija bumo ŋkpal bumo be alubi so so. 2B daŋ barga bumo amu ashi befɔ na kutɔ nna nseŋ ya yili m bugi to ŋ kaŋɛ bumo nɛ bumo nanaana be alubi nɛ b wora. 3Awa asa nɛ b yil a nu b ka bee kraŋ Enyɛnpe bumo be Ebɔrɛ na be mbra be kawɔl na. Kumo be kaman nɛ b naŋ ta awa asa malɛ ŋ kule Ebɔrɛ ŋ kaŋɛ bumo be alubi nseŋ bunyaŋ Enyɛnpe Ebɔrɛ na.
4Ndoŋ nna nɛ Joshuwa nɛ Kadmiɛl nɛ Bani nɛ Shebania nɛ Bunni nɛ Sherebia nɛ Bani nɛ Chenani dii n yili kejaŋ nɛ k yuu n sa Livaiebi na so ŋ kule Enyɛnpe bumo be Ebɔrɛ na awɔrso. 5Ndoŋ nna nɛ Joshuwa nɛ Kadmiɛl nɛ Bani nɛ Hashabnaya nɛ Sherebia nɛ Hodia nɛ Shebania nɛ Petahiya nɛ b shi Livai be yiri to na kaŋɛ basa le:
“Men koso n yili nseŋ boŋ to m maŋkura
Enyɛnpe menyi be Ebɔrɛ
nɛ e wɔ ŋkpa to mbaanaayɔ na.
Men maŋkura mbe mamachi be Ketre na,
E shi ga nɛ kɔnɔ to be mmalga
maaŋ tiŋ n ji mbe asheŋ.”
Basa na ka kule Ebɔrɛ be asheŋ
6Ndoŋ nna nɛ basa na kule Ebɔrɛ ŋ kaŋɛ:
“Fo nawule e la Enyɛnpe anyi be Ebɔrɛ na.
Fo e to ebɔrɛso nɛ achɛkpabi kikɛ,
Fo e to kasawule nɛ asɔ nɛ e wɔ kumo so kikɛ.
Fo e to teku nɛ kumo to be asɔ keniso kikɛ
Ŋkpa kikɛ shi fo kutɔ nna,
nɛ achɛkpabi nɛ a wɔ awɔlpa to kikɛ
bee fur fo a kpaŋ fo.
7Fo e la Enyɛnpe anyi be Ebɔrɛ
Fo e lara an nananyɛn Eebram dra dra na
ashi kade nɛ baa tre Ur nɛ k wɔ Babilɔn be efuli so
nseŋ chɛrga mbe ketre ŋ ki Eebraham na.
8Ŋkpal e ka daa ji kashenteŋ a sa fo so
fo nɛ mo daŋ wora kɔnɔkoŋwule be ŋkre nna
fanɛ feeŋ ta Keenanebi nɛ Hitebi
nɛ Amɔriebi nɛ Pɛrizebi nɛ
Jebusiebi nɛ Giigaebi
be nsawule n sa mbe kaman to ebi.
Naniere fo wora fo kɔnɔ naseso na m bɔlɔ so
fanɛ kananɛ fee wora saŋkikɛ na.
9An nanaana ka daa wɔ Ijipt be efuli so na,
fo daŋ wu awurfoŋ nɛ b daa ji.
B ka ya fo Teku Peper na ase
nɛ b shu a fin fo kechɛto,
nɛ fo alɛ nu bumo be kushu
nseŋ chɛ bumo to.
10Fo daa nyi kananɛ Ijipt be ewurgboŋ Fɛɛro
nɛ mbe ekrachiana nɛ efuli na kikɛ be basa
daŋ kɔrfɛ fo basa.
Amoso fo daŋ wora emamachisheŋ
nɛ e bee keta kufu nna
ŋ gbiti Ijipt be efuli so be ewura Fɛɛro nɛ mbe basa
nseŋ nya ketre lela nɛ
k wɔtɔ hale nɛ mbre.
11Fo e daŋ shin nɛ Teku chiŋgeliŋ na ku to
nɛ fo basa nite kasawule wɔlso so
m bɔla kumo to n dii n choŋ.
Ama fo daŋ shin nna nɛ bumo doŋana
bre mur nchu na to nna
fanɛ kananɛ kejembu bee tɔr nchu to na.
12B ka dii teku na be kaman,
karechɛ kikɛ fo daa bɔla
awɔlpa to nna a juŋkpar fo basa kapaso,
nsaa bɔla edɛ be kabɔlpi so
a juŋkpar a ŋini bumo ekpa kanyɛso.
13Fo daŋ shi ebɔrɛso nna ŋ gbelge m ba
Sainai be kebee na so m ba sa fo basa
mbra nɛ keŋini nɛ a walɛ ga n sa bumo.
14Fo yili kumo n sa bumo fanɛ b baa
ta fo kewushiachɛ na fanɛ kachɛ cheembi.
Fo daŋ kaŋɛ fo kayɛrbi Mosis nna
fanɛ e ŋini bumo fo mbraana na.
15Akoŋ ka daŋ pɛ bumo
fo sa bumo ajibi nɛ a shi ebɔrɛso nna.
Achukoŋ ka daa kɔ bumo,
fo daŋ shin nɛ nchu lar kefalta to nna
nɛ b nuu.
Kumo be kaman nɛ fo kaŋɛ bumo
fanɛ b kɔ n suge kasawule nɛ
fo nase kumo be kɔnɔ na nna.
16-17Ama an nanaana nɛ b la
ŋgbene kpakpasowuraana na
daa maŋ wora fo kasonu.
B daŋ teŋ emamachisheŋ
nɛ fo daŋ wora n sa bumo na so nna,
nseŋ daŋ yili kumo fanɛ baaŋ bɛta
n yɔ Ijipt be efuli so n naŋ ya ki anya ndoŋ.
Ama fo, anyi be Ebɔrɛ na bee wu kuwɔr,
nsaa ta alubi a paŋ manaŋ manaŋ nna.
Fo la alelaworpo nna nsaa kɔ kasha nɛ kanyiti.
Jemanɛ nɛ b lɔŋɛ kenabi be kapɔrduli
a bunyaŋ kumo na,
18fo daa maŋ lar bumo kaman.”
B daa tege fo nna a kaŋɛ:
“Kegbir nɛ k kɔ n suge anyi
ashi Ijipt be efuli so nna na.”
19“Ŋkpal fo kuwɔrwu ka shi ga so
fo daa ŋini bumo ekpa nna saŋkikɛ,
fo alɛ daa maŋ yige bumo n lɛ keshishɛrsawule so.
Fo daa bɔla kuwɔlpa so nna a ŋini bumo
ekpa kapaso nsaa bɔla
edɛ be kabɔlpi so a juŋkpar bumo kanyɛso.
20Fo Kiyoyu lela e ŋini bumo kusɔ nɛ k daga
nseŋ sa bumo ajibi nɛ baa tre manna na nɛ b ji.
Kumo be kaman nɛ fo sa bumo nchu nɛ b nuu.
21Fo daŋ keni bumo so nɛnɛ,
Nfɛ adena nɛ shɛŋ maŋ tir bumo.
Bumo be asɔbuuso daa maŋ wu.
Bumo be asɛbta daa maŋ ji,
nɛ bumo be aya malɛ daa maŋ puŋi.
22Fo daŋ chɛ bumo to nɛ b pɔɔ bewura so
n suge bumo be nsawule.
Hɛshbɔn be efuli so be ewura Sihɔn,
nɛ Baashan be efuli so be ewura Ɔg
gba daŋ ti bewura nɛ b daŋ pɔɔ so na so nna.
23Fo daŋ bar bumo kasawule
nɛ fo nase kumo be kɔnɔ
n sa bumo nanaana na so nna.
Kumo be kaman nɛ fo nɛfa bumo
nɛ k wora fanɛ bumo be efuli so be basa
ka daa shi a chɔ achɛkpabi nɛ e wɔ awɔlpa to na.
24Ade kikɛ be kaman nɛ bumo nanaana
kɔ n suge Keenanebi be kasawule.
Fo e daŋ chɛ bumo to nɛ b kɔ m pɔɔ
bewuraana nɛ efuli pɔtɛana so.
Fo e shin nɛ b tiŋ n wora bumo doŋana
kusɔ kama nɛ baa sha kikɛ.
25Kumo be kaman nɛ b suge
ndegboŋ nɛ egbalana kulti na
nɛ adɔsawule nɛ e walɛ.
B daŋ suge nwu nɛ basa daa wɔ amo to
nɛ atirbu nɛ b kur n laa to a saŋ nchu,
nɛ ndibi sɔrso be adɔana,
nɛ ɔlifs be ndibi be adɔana
nɛ ndibi sɔrso damtaana nna.
B daa ji nna a moɛ
nseŋ daa ji eyur ŋkpal fo enɛfa damta so.
26Ade kikɛ be kaman b kraŋ lar fo kaman
nseŋ kini kewora fo mbra kasonu.
B daŋ mɔ fo anebiana
nɛ b daŋ kpele bumo kusoe
fanɛ b bɛta m ba fo kutɔ na nna.
Kumo be kaman nɛ b shoduu fo ketre.
27Amoso fo ta bumo nna
m bɔɔ bumo doŋana enɔ,
nɛ b kɔrfɛ bumo ga.
Ama bumo be awurfoŋ na to,
b daŋ kule fo fanɛ fo chɛ bumo to nna.
Ebɔrɛso nɛ fo wɔ nseŋ nu bumo be kekule,
ŋkpal fo kuwɔrwu ka shi ga so,
fo daŋ shuŋi bejuŋkparpo nna
nɛ b ba kɔ n suge bumo ashi bedoŋ be enɔ to.
28Ama b baŋ nya kayurwushi,
baa kilgi nna a wora alubi a da fo so,
nɛ fo naŋ ta bumo m bɔɔ
bumo doŋana enɔ.
Kumo be kaman nɛ b naŋ kule n fin fo kechɛto,
ŋkpal fo kuwɔrwu ka shi ga so,
fo naŋ laŋɛ m mɔlga bumo.
29Fo kpele bumo kusoe fanɛ b bɛ fo keŋini so
ama ŋkpal bumo be kamoowuso,
b kini kebɛ fo mbra na so
amo nɛ esa beeŋ bɛ so nseŋ nya kebaawɔtɔ lela,
ama ŋkpal bumo be ŋgbene kpakpaso so
b kini kewora fo kasonu.
30Nfɛ damta nɛ fo kpele bumo kusoe kanyitiso,
fo Kiyoyu malɛ bɔla anebiana so m malga
kenishipereso n sa bumo, ama b kini kenu n sa fo.
Amoso nɛ fo ta bumo bɔɔ bumo doŋana enɔ na.
31Ŋkpal fo kuwɔrwu kaa shi ga so,
fo maŋ pal kaman n sa bumo ŋko m mur bumo na,
ŋkpal manɛ so, fo la kuwɔrwu be Ebɔrɛ nna.
32O, anyi be Ebɔrɛ mo nɛ eleŋ kikɛ bɔɔ fo enɔ,
nɛ fo asheŋ kɔ kufu;
fo maa lar fo kamalga kaman kikɛ,
kasha malɛ bɔlɔ fo to kiŋkiŋ.
Nyiŋi awurfoŋ nɛ k ba anyi nɛ anyi be bewura nɛ
bejuŋkparpo nɛ bɔrɛmatapoana nɛ anebiana nɛ an nanaana
nɛ anyi be basa kikɛ so,
yili Asiriya be ewura be jemanɛ kikɛ so m ba fo kabre.
33Fo kɔ ekpa nɛ fo tɔrɔ anyi ŋkpal fo kashenteŋ so,
ama fo yige alubi nɛ an wora ere kikɛ m paŋ anyi.
34Anyi be bewura nɛ bejuŋkparpo nɛ bɔrɛmatapoana
nɛ an nanaana maŋ bɛ fo mbra nɛ mmalga
kpakpaso mo nɛ fo ŋini bumo fanɛ b bɛ so na so.
35Ŋkpal fo nɛfa nɛ fo daŋ ta n sa fo basa so
bewura e daa juŋkpar bumo.
Loŋ be saŋɛ na, nɛ b daa wɔ kasawule
nɛ fo ta n sa bumo na so,
ama b kini nsaa wɔ kulubi to.
36Kabre an ki anya ashi kasawule lela nɛ fo ta n sa
an nanaana fanɛ b baa ji kumo be tɔnɔ na;
an ki anya kashenteŋto.
37Kasawule na malɛ be asɔrso lela kikɛ ki
bewura nɛ fo lara fanɛ b baa ji kuwura anyi so
ŋkpal anyi be alubi so na peya nna;
bumo alɛ naa ji eleŋ anyi nɛ anyi be asɔbɔya so,
ŋkpal loŋ so an wɔ kagbenejija to nna.”
38Ŋkpal le so an sibɛ ŋkre kpakpaso n nase,
nɛ anyi be bejuŋkparpo nɛ Livaiebi
nɛ bɔrɛmatapoana shuli so nɛ ŋkre na yili.
101Basa nɛ b daŋ yisi enɔ nɛ ŋkre na yili e la Hakalia pibinyɛn Nehemaya nɛ e la gomena na nɛ Zɛdikaya nɛ bɔrɛmatapoana 2-8Seria nɛ Azariya nɛ Jɛremaya,
nɛ Paasha nɛ Amariya nɛ Malkija
nɛ Haatush nɛ Shebania nɛ Maluk
nɛ Harim nɛ Meremɔf nɛ Obadaya
nɛ Danɛl nɛ Ginetɔn nɛ Baruk
nɛ Mɛshulam nɛ Abija nɛ Mijamin
nɛ Mazia nɛ Bilgai nɛ Shemaya.
9Livaiebi nɛ bumo alɛ gba yisi enɔ e la,
Azariya pibinyɛn Joshuwa
nɛ Binui nɛ e shi Henadad Kadmiɛl be kabuna,
10nɛ mo kurgepoana la Shebania
nɛ Hodia nɛ Kalita nɛ Pelaya nɛ Hanan
11nɛ Maika nɛ Rehɔb nɛ Hashabia
12nɛ Zakɔɔ nɛ Sherebia nɛ Shebania
13nɛ Hodia nɛ Bani nɛ Beninu na.
14Bejuŋkparpo na malɛ e daa la Parosh nɛ Pahaf Mowab nɛ Elaa nɛ Zaatu nɛ Bani,
15nɛ Buuni nɛ Azgad nɛ Bebai,
16nɛ Adonija nɛ Bigvai nɛ Adin,
17nɛ Atɛr nɛ Hɛzekaya nɛ Azzu,
18nɛ Hodia nɛ Haashum nɛ Bɛzai,
19nɛ Harif nɛ Anatɔf nɛ Nebai,
20nɛ Magpiash nɛ Mɛshulam nɛ Heza,
21nɛ Meshezabe nɛ Zadɔk nɛ Jadua,
22nɛ Pelatia nɛ Hanan nɛ Anaya,
23nɛ Hoshia nɛ Hananiya nɛ Hashuub,
24nɛ Halohɛsh nɛ Pilha nɛ Shobek,
25nɛ Rehum nɛ Hashabna nɛ Maaseia,
26nɛ Ahia nɛ Hanan nɛ Anan,
27nɛ Maluk nɛ Harim nɛ Baana.
Kɔnɔkoŋwule be ŋkre be asheŋ
28-29Anyi Israɛlebi na kikɛ, ta bɔrɛmatapoana nɛ Livaiebi nɛ bɔrɛlambu to be bekumpo na nɛ beshɛbompoana na nɛ bɔrɛlambu to be beshumpo na nɛ bejuŋkparpoana na n ta anyi be beche nɛ mbia nɛ b daŋ kikɛ n ti so, barga anyi be amu ashi befɔ nɛ b wɔ kasawule ere so to nna. Naniere an wora kɔnɔkoŋwule nna fanɛ anyeeŋ pin kusɔ nɛ anyee wora to nɛnɛ. Amoso nɛ an baŋ maŋ naŋ wora Enyɛnpe anyi be Ebɔrɛ na be mbra nɛ keŋini nɛ e ta m bɔla mbe kayɛrbi Mosis so n sa anyi na kasonu, kumo ere Ebɔrɛ be kɔnɔsho e ba anyi so.
30Anyi maaŋ shin nɛ anyi be mbicheso e kil befɔ.
31Anyi alɛ maaŋ tɔ asɔ, hale ajibi jiso gba esa kikɛ kutɔ Kewushiachɛ na ŋko kachɛ cheembi kikɛ.
Kafɛ shunusopo kikɛ, anyeeŋ shin nɛ anyi be adɔsawule e dese n wushi. Anyi alɛ beeŋ ta basa be akɔ nɛ b ji anyi ŋ kɛ bumo loŋ be jemanɛ na.
32An yili kumo nna fanɛ kafɛ kikɛ anyeeŋ sa gbiti be ndarbi gbrɛbi n chɛ Ebɔrɛ be lambu to be kushuŋ to.
33Amansherbi na beeŋ chɛ to ŋ ka ebodobodo cheembi na nɛ karechɛ kikɛ be esarga chɔɔso nɛ ayu be esarga na nɛ esargagboŋ nɛ baa lara Kewushiachɛ nɛ Kufɔl Popɔr be Kachɛgboŋ nɛ nchɛgboŋ nɛ a ka na kikɛ be kukɔ. Amo alɛ beeŋ naŋ ka anyi be alubi be ketampaŋ be esarga nɛ kabɔrɛshuŋ be kukɔ kikɛ ashi bɔrɛlambu na to.
34Anyi alɛ naŋ yili kumo fanɛ kafɛ kikɛ bɔrɛmatapoana na nɛ Livaiebi nɛ basa na to be bebɔlpo na be nnaŋ to be basa beeŋ baa bar ndibi puga edɛ bɔrɛlambu na to nna, saŋɛ na so baaŋ tiŋ a lara esarga bɔrɛsure na so, fanɛ kananɛ Enyɛnpe Ebɔrɛ na yili kumo na. 35Kafɛ kikɛ anyeeŋ baa bar anyi be ayu nɛ asɔrso nɛ an juŋkpar n teŋi ŋko n chuge, bɔrɛlambu na to.
36Anyi alɛ beeŋ naŋ bar an gbagba be ewurkoŋ nyɛnso nɛ anyi be ana nɛ mbolpɔ nɛ mboe be ewurkoŋ nyɛnso bɔrɛlambu na to m ba sa bɔrɛmatapoana nɛ baa shuŋ ndoŋ na nɛ b ta m bɔɔ Ebɔrɛ enɔ. Ŋkpal manɛ so, kusɔ nɛ k sibɛ a dese Ebɔrɛ be mbra to nna na.
37Anyi alɛ beeŋ naŋ bar aboyu nyifu nɛ an fara ŋ kɔr m ba sa bɔrɛmatapoana na ashi bɔrɛlambu na to. Amo nɛ asɔrso nɛ a walɛ ga na nɛ yabra popɔr nɛ ɔlif be ŋku.
Anyeeŋ bar anyi be ayu teŋiso be kudu kudusopo m ba sa Livaiebi nɛ baa nite a sɔ asɔ ashi ndeana na to na. 38A daga bɔrɛmatapo nɛ e shi Ɛɛrɔn be kanaŋ to ka wɔtɔ jemanɛ nɛ Livaiebi na beeŋ sɔ kudukudusopo na ashi nde nɛ baa shuŋ to na kikɛ. Kumo be kaman nɛ Livaiebi na gba e lara bumo be kudukudusopo m ba sa Ebɔrɛ ashi mbe bɔrɛlambu nɛ kumo be ebu nɛ baa yili bumo be ajibi nɛ asɔwurbi na to. 39Israɛl be basa nɛ Livaiebi na daga fanɛ b bar bumo be nyifu nɛ asɔnuuso, nɛ ɔlif be ŋku kakpa nɛ baa yili bɔrɛlambu na to be asɔ nɛ b kɔ a daŋɛ nɛ asɔ jito na. Bɔrɛlambu na be kakpa nɛ bekenipo nɛ beshɛbompoana nɛ bɔrɛmatapoana na wɔ na.
Anyi maaŋ kplaŋ anyi be Ebɔrɛ na be bɔrɛlambu so kikɛ.
11Basa nɛ b naaŋ ba chena Jerusalɛm to na be asheŋ
1Basa na be bejuŋkparpoana na daa wɔ Jerusalɛm to nna nɛ bumo nɛ b ka na malɛ to beri n lara basa kudu kikɛ to be esa koŋwule nɛ e ya chena Jerusalɛm nɛ k la kade cheembi na to nɛ bekpanu nɛ b ka na malɛ a ya chena nde mo nɛ a ka na to. Ŋkpal manɛ so nwu daa maŋ shi Jerusalɛm to. 2Ndoŋ nna nɛ basa na nɛfa bekama nɛ b shuli fanɛ bumo ere beeŋ yɔ Jerusalɛm n ya chena na. 3Bekama nɛ b wɔ nde nɛ a wɔ Juda be efuli so na daŋ chena bumo gbagba be nsawule so nna ashi bumo be nde to nsaa ji bumo be amu so. Bumo e daa la Israɛlebi na be beko nɛ bɔrɛmatapoana na nɛ Livaiebi na nɛ bɔrɛlambu na to be beshumpo na nɛ ewura Sɔlɔmɔn be nyɛrbi be kaman to ebi. 4Juda mo nanabiana nɛ Bɛnjamin mo nanabiana ko daa wɔ Jerusalɛm to nna. Juda be kanaŋ to ebi nɛ b daŋ chena Jerusalɛm to na e daa la Ataya nɛ mo tuto la Uzaya nɛ mo alɛ mo tuto la Zakareya nɛ mo alɛ mo tuto la Amariya nɛ mo alɛ mo tuto la Shefatiya nɛ mo alɛ mo tuto la Mahalalɛl nɛ e la Pɛrez be kanaŋ to be esa na; 5nɛ Maaseia nɛ mo tuto la Baruk nɛ mo alɛ mo tuto la Kolhoze nɛ mo alɛ mo tuto la Hazaya nɛ mo alɛ mo tuto la Adaya nɛ mo alɛ mo tuto la Joarib, nɛ mo alɛ mo tuto la Zakareya nɛ e la Shela be kanaŋ to be esa na. 6Pɛrez mo nanabiana nɛ b daŋ chena Jerusalɛm daa la basa lempo alfa ana nɛ adeshe nɛ aburwa nna. 7Bɛnjamin malɛ be kanaŋ to ebi e daa la Saalu nɛ e la Mɛshulam pibinyɛn nɛ mo nanabi malɛ la Joɛd na. Mbe kanaŋ to be basa ko malɛ e daa la Pɛdaya nɛ Kolaya nɛ Maaseia nɛ Itiɛl nɛ Jeshaya. 8Gabai nɛ Salai malɛ la basa nɛ bumo nɛ Sallu be kukurge mata abar nna nɛnɛ. Bumo be kanaŋ to ebi kikɛ la basa alfa akpanu nɛ adunyɔ aburwa nna. 9Zikri pibinyɛn Jowɛl e daa la bumo be ejuŋkparpo nɛ Hassenua pibinyɛn Juda malɛ la bumo be krachigboŋ nyɔsopo mo nɛ e bee keni bumo be kadegboŋ na so. 10Bɔrɛmatapoana bena e chena Jerusalɛm to. Emo nɛ e juŋkpar e la Jedaya nɛ mo tuto la Joarib nɛ mo tutokar la Jakin na.
11Enyɔsopo e daa la Seria nɛ mo tuto la Hilkiya nɛ mo alɛ mo tuto la Mɛshulam nɛ mo alɛ mo tuto la Zadɔk nɛ mo alɛ mo tuto la Meriɔf nɛ mo tuto la Ahitub nɛ e daa la bɔrɛmatapo nimuso na. 12Bɔrɛlambu na to be beshumpo kikɛ daa la basa alfa aburwa nɛ adunyɔ nɛ anyɔ nna.
Esasopo e daa la Jeroham pibinyɛn, Adaya nɛ mo nanaana la Pɛlaliya, nɛ Amzi nɛ Zakareya nɛ Pasha nɛ Malkija. 13Bumo nɛ b la kanaŋ na to be benimu kikɛ la basa alfa anyɔ nɛ adena nɛ anyɔ nna.
Bɔrɛmatapo nasopo e la Azarɛl pibinyɛn Amaslisa. Mo nanaana e daa la la Azai nɛ Meshlemɔf nɛ Imma. 14Bumo be kabuna ebi kikɛ daa la basa kalfa nɛ adunyɔ nɛ aburwa nɛ esa beeŋ tiŋ n yirda bumo kashenteŋto. Bumo ejuŋkparpo e daa la Zabdiɛl, Hegalion pibinyɛn.
15Livaiebi damta e daŋ chena Jerusalɛm to. Emo nɛ ejuŋkparso e la Hashub pibinyɛn, Shemaya nɛ mo nananyɛnana la Azrikam nɛ Hashabia nɛ Buuni. 16Bumo nɛ b bɛ so e la Shabbeta nɛ Jozabad nɛ b daa la Livaiebi na be benimu nsaa keni bɔrɛlambu na be kowushina be ashuŋ so na. 17Mika pibinyɛn Mataniya malɛ gba daŋ ti Livaiebi na so. Mo nananyɛnana e daa la Zaabdi nɛ Asaf. Mataniya e daa juŋkpar bɔrɛlambu na to be beshɛbompo be katuŋ nɛ baa bunyaŋ Ebɔrɛ na. Esa nɛ e daa sɔ Mataniya so e la Bakbukia.
Shamua malɛ pibinyɛn Abda nɛ e la Galal mo nanabiana gba daa la Livaiebi nɛ b chena Jerusalɛm to na be eko nna. Le be Galal ere shi Jedutum be kanaŋ to nna.
18Livaiebi nɛ b daa wɔ Jerusalɛm to na kikɛ daa la basa alfa anyɔ nɛ aduburwa nɛ ana nna.
19Basa nɛ b daa keni mbunaana na so na malɛ e daa la Akuub nɛ Taalmɔn nɛ mo kurgepoana. B daa la basa kalfa nɛ adushunu nɛ anyɔ nna. 20Israɛlebi be basa nɛ b ka na nɛ bɔrɛmatapoana nɛ Livaiebi na kikɛ da chena bumo be amu so nna ashi Juda be efuli so be nde to. 21Jerusalɛm to be kaba nɛ baa tre Ofɛl na, nɛ bɔrɛlambu na to be beshumpo kikɛ na daa wɔ. Ziha nɛ Gishpa malɛ e daa la bumo be bejuŋkparpo. 22Bani pibinyɛn mo nɛ baa tre Uzzi nɛ e la Hashabia mo nanabi na e daa keni bumo so ashi Jerusalɛm. Mo nananyɛnana e la Mataniya nɛ Mika nɛ b shi Asaf be kanaŋ to nsaa la bɔrɛlambu na to be beshɛbompo be enimu. 23Ewura daŋ nase mbra nna n sa bumo a ŋini kananɛ baaŋ baa juŋkpar nshɛ kebɛso kebɛso ashi bɔrɛlambu na to karechɛ kama. 24Mɛshezabel pibinyɛn Pethalia nɛ e shi Zeera be kanaŋ to nsaa la Juda be yiri to be esa na e daa yili Israɛlebi be katelamu to ashi Pɛshiya be efuli so be ewurgboŋ be lambu to.
Basa nɛ b wɔ nde pɔtɛ to be asheŋ
25Basa na be beko daa wɔ ndegboŋ nɛ a mata bumo be ndɔana to na nna. Juda be yiri to ebi daa wɔ Kiriaf Aba nɛ Dibɔn nɛ Jekabzeel nɛ 26Joshuwa nɛ Molada nɛ Befpɛlɛt 27nɛ Hazashuwal nɛ Bɛshiba nɛ 28nɛ Ziklag nɛ Mɛkona 29nɛ Envimɔn nɛ Zora nɛ Jamaf 30nɛ Zanua nɛ Adulam nɛ Lakish nɛ Azika. Ndeana ere kikɛ daa dese Bɛshiba nɛ k wɔ kelargato be kaseto be kaba so nna hale n ya lar Hinnɔm be ketaŋɛ nɛ k wɔ kelargato be esoso ashi Jerusalɛm be kekel to na. 31Nde nɛ Bɛnjamin be yiri to ebi malɛ daa wɔ e la Geeba nɛ Mikmash nɛ Ai nɛ Bɛtɛl nɛ kumo be ndewurbi nɛ 32Anatɔf nɛ Nɔb nɛ Anani 33nɛ Hazɔɔ nɛ Rama nɛ Gitaɛm, 34nɛ Hadid nɛ Zebotim nɛ Nebalaat 35nɛ Lɔd nɛ Ono, nɛ ketaŋɛ nɛ baa tre Enɔto be beshumpo be Ketaŋɛ na. 36B daŋ yɛr Livaiebi nɛ b daa wɔ Juda be kebonfu to na be galeŋga nna nɛ b ya tu Bɛnjamin be basa na n chena.
12Bɔrɛmatapoana nɛ Livaiebi be asheŋ
1Bɔrɛmatapoana nɛ Livaiebi nɛ Shealtiɛl pibinyɛn, Zerubabel nɛ Joshuwa daŋ juŋkpar ŋ keta bumo n shi Babilɔn be efuli so kenyaya to m bɛta m ba na be atre nde. 2-7Bɔrɛmatapoana na e daa la
Seria nɛ Jɛremaya nɛ Ɛzra,
nɛ Amariya nɛ Maluk nɛ Hatush,
nɛ Shekanaya nɛ Rehum nɛ Meremɔf,
nɛ Iddo nɛ Ginetɔi nɛ Abija,
nɛ Mijamin nɛ Maadiya nɛ Bilga,
nɛ Shemaya nɛ Joirib nɛ Jedaya,
nɛ Sallu nɛ Amɔk nɛ Hilkiyah nɛ Jedaya.
Joshuwa be jemanɛ na, le be basa ere e daa la bejuŋkparpo ashi bumo braana bɔrɛmatapoana kikɛ to.
8Livaiebi nɛ bumo alɛ gba bɛta m ba e la Joshuwa nɛ Binui nɛ Kadmiɛl nɛ Sherebia nɛ Juda nɛ Mataniya. Bumo nɛ bumo be bechɛtopo e daa juŋkpar a boŋ kapandi be nshɛ. 9Bakbukia nɛ Uno nɛ bumo be bechɛtopo malɛ e daa shuli nshɛ nɛ b daa boŋ na so a sa bumo.
Bɔrɛmatapo Nimuso Joshuwa be kaman to ebi be asheŋ
10Joshuwa e daa la Joikim mo tuto, nɛ Joikim malɛ daa la Eliashib mo tuto; nɛ Eliashib malɛ daa la Joida mo tuto 11nɛ Joida malɛ daa la Jonatan mo tuto; nɛ Jonatan malɛ daa la Jadua mo tuto.
Bɔrɛmatapoana be mbuna be benimu be asheŋ
12Saŋɛ so nɛ Joikim daa la bɔrɛmatapo nimuso na bɔrɛmatapoana ere e daa la bumo be mbuna be benimuana: Meeria e daa la Seiria be kabuna be benimu. Hanani malɛ e daa la Jɛremaya be kabuna be enimu. 13Ɛzra be kabuna be enimu e la Mɛshulam nɛ Amariya be kabuna be enimu la Jehohanan. 14Maluk be kabuna be enimu e la Jonatan nɛ Shebania be kabuna be enimu la Josɛf. 15Harim be kabuna be enimu e la Adna nɛ Meraɔf be kabuna be enimu la Helkia. 16Iddo be kabuna be enimu e la Zakareya nɛ Ginetɔn be kabuna be enimu la Mɛshulam. 17Abija be kabuna be enimu e la Zikri nɛ Miniamin nɛ Moadia be kabuna be enimu la Piltia. 18Bilga be kabuna be enimu e la Shamua nɛ Shemaya be kabuna be enimu la Jehonatan. 19Joirib be kabuna be enimu e la Mattenia nɛ Jedaya be kabuna be enimu e la Uzzi. 20Salai malɛ be kabuna be enimu e la Kallai nɛ Amɔk malɛ be kabuna be enimu la Eber. 21Hilkiya be kabuna be enimu e la Hashabia nɛ Jedaya malɛ be kabuna be enimu la Netanɛl.
Bɔrɛmatapoana nɛ Livaiebi be nnaŋ be asheŋ
22Jemanɛ nɛ Eliashib nɛ Joida nɛ Johanan nɛ Jadua daŋ ki bɔrɛmatapo nimusoana kebɛso kebɛso nɛ ewurgboŋ Dariɔs daa ji Pɛshiya be efuli so be kuwura na, b daŋ sibɛ Livaiebi nɛ bɔrɛmatapoana be benimuana be atre n wɔtɔ kawɔl to n nase nna. 23Ama Johanan be luwu be kaman, b maŋ naŋ sibɛ Livaiebi be benimuana na be atre n wɔtɔ kawɔl to n nase.
24Hashabia nɛ Sherebia nɛ Kadmɛl pibinyɛn Joshuwa nɛ Binui nɛ basa nɛ baa sɔ bumo so a boŋ nshɛ na e daŋ juŋkpar Livaiebi na be ntuŋ anyɔ m boŋ kapandi be nshɛ m maŋkura Ebɔrɛ fanɛ kananɛ Ebɔrɛ be kayɛrbi ewura Deevid daŋ yili kumo na.
25Mataniya nɛ Bakbukia nɛ Obadaya nɛ Mɛshulam nɛ Talmɔn nɛ Akuub e daa la basa nɛ b daa keni ebuana nɛ baa yili asɔ amo to ashi bɔrɛlambu na be mbuna ase na so.
26Joshuwa pibinyɛn, ewura Jowakim nɛ mo nananyɛn daa la ewura Jozadak na be jemanɛ to kikɛ nɛ basa ere wɔtɔ. Loŋ be jemanɛ na ma e daa la gomena nɛ Ɛzra nɛ e daa ŋini Mosis be mbra na malɛ daa la bɔrɛmatapo.
Nehemaya ka ta Jerusalɛm be egbal na m bɔɔ Ebɔrɛ enɔ be asheŋ
27Jemanɛ nɛ b daa ta Jerusalɛm be egbal nɛ b lɔŋɛ m pɔr na a bɔɔ Ebɔrɛ enɔ na, b daŋ kela n tre Livaiebi nɛ b wɔ Juda be efuli kikɛ so nna nɛ b ba ta alaŋsɔ be yiri yiri m boŋ kapandi be nshɛ m maŋkura Ebɔrɛ. 28-29Livaiebi nɛ b la beshɛbompo na daa wɔ ndewurbi nɛ a kulti Jerusalɛm na nna. Amoso bumo be ndeana to nɛ ndewurbi nɛ a kulti Netofa nɛ Bɛf Gilgaal nɛ Gɛba nɛ Azmavɛf na nɛ b daŋ shi m ba kesheŋ wora na to. 30Bɔrɛmatapoana na nɛ Livaiebi na daŋ fɔrso daŋkare be ekpa so nna ŋ ki cheembi. Kumo be kaman nɛ b wora loŋ n sa basa nɛ b ka na nɛ mbunaana na nɛ kadegboŋ na be egbalana, nɛ amo alɛ gba ki cheembi.
31N daŋ shin nɛ Juda be bejuŋkparpoana na dii kadegboŋ na be egbal na so nna nɛ n ta beshɛbompo be ntuŋ anyɔ nɛ b bɛ abar so a nite egbal na so a boŋ nshɛ a di Ebɔrɛ epaŋ na be kekeni so m bɔɔ bumo enɔ. Katuŋ ko daŋ bɛ abar so a nite a yɔ Epi be Kabuna na be kaba so be jisoso nna. 32Hoshiya malɛ nɛ bejuŋkparpoana na be bargato daŋ bɛ beshɛbompo na so a yɔ. 33Kumo be kaman nɛ Azariya nɛ Ɛzra nɛ Mɛshulam nɛ b la bɔrɛmatapoana na 34nɛ Juda nɛ Bɛnjamin nɛ Shemaya nɛ Jɛremaya malɛ gba bee foŋ mbel a bɛ bumo so. 35Ndoŋ nna nɛ Zakareya nɛ mo tuto la Jonatan nɛ mo alɛ mo tuto la Shemaya nɛ mo alɛ mo tuto la Mattania nɛ mo alɛ mo tuto la Mikaya nɛ mo alɛ mo tuto la Zakku nɛ mo alɛ mo tuto la Asaf na 36nɛ Shamaya nɛ Azarɛl nɛ Mikalai nɛ Gilalai nɛ Maai nɛ Netanɛl nɛ Juda nɛ Hanani kikɛ keta alaŋsɔ a laŋ a bɛ Ɛzra nɛ e la mbra ŋinipo na so. Alaŋsɔ na barkasa nɛ Ebɔrɛ be kenya ewura Deevid daŋ laŋ dra dra na. 37B ka ta n ya fo Kechubu be Kabuna na ase nɛ b dii atemprembi nɛ baa diiso a yɔ ewura Deevid be Kadegboŋ na to na n ya baŋ mbe Lambu na so m bɛta n yɔ egbal nɛ k wɔ Nchu be Kabuna nɛ k wɔ kadegboŋ na be epeŋilarkpa be kaba so ase na.
38Beshɛbompoana na be katuŋ nyɔsopo na malɛ bɛ abar so n sɔ bena so a nite egbal na so nna nɛ ma alɛ bɛ bumo so. Bumo nɛ Juda be bejuŋkparpoana na be bargato nɛ b ka na e daa nite a yɔ. An daŋ nite n ya baŋ Asure be Ebu jeŋgreŋ na so n ya fo Egbal Gboŋ na ase nna. 39An shi ndoŋ nna n ya baŋ Efrayim be Kabuna na nɛ Jeshana be Kabuna na nɛ Kɔrɔtɔ be Kabuna na nɛ Hananɛl be Ebu jeŋgreŋ na nɛ Kalfa be Ebu jeŋgreŋ na nɛ Mbolpɔ be Kabuna na so. Bekumpo be Kabuna nɛ k wɔ bɔrɛlambu na ase na nɛ an ya tar.
40Ntuŋ anyɔ nɛ b daa nite a boŋ nshɛ a di Ebɔrɛ epaŋ na kikɛ daŋ ba shɛr abar so bɔrɛlambu na ase nna. Ndoŋ nna nɛ ntuŋ na be kekama be basa ya yili bumo be eyilikpa ashi bɔrɛlambu na to nɛ ma alɛ nɛ bejuŋkparpoana na be bargato malɛ yɔ anyi be kakpa. 41Bɔrɛmatapoana nɛ b daŋ ti anyi be katuŋ na so a foŋ mbel na e daa la Eliakim nɛ Maaseia nɛ Miniamin nɛ Mikaya nɛ Elionai nɛ Zakareya nɛ Hananiya. 42Bumo nɛ b daa yil ndoŋ saŋɛ nɛ Jezrahiya daa juŋkpar beshɛbompo nɛ b daa boŋ nshɛ awɔrso na e la Maaseia nɛ Shemaya nɛ Eleazar nɛ Uzzi nɛ Jehohanan nɛ Malkija nɛ Elaam nɛ Ezar. 43Ebɔrɛ daŋ shin nɛ basa na be ŋgbene fuli bumo nna ga, amoso b daŋ ji bumo be amu nna nseŋ lara esarga damta n sa Ebɔrɛ. Beche nɛ mbia kikɛ daŋ ti kayurji na so nna. Esa daa wɔ kufɔ nɛ Jerusalɛm be kadegboŋ na gba e daa beeŋ nu awɔr nɛ basa na daa wora kagbene fuli so na.
44Loŋ be kamɔnchɛ na b daŋ lara basa ko nna fanɛ b baa keni ebuana nɛ baa yili ajibi nɛ asɔ wurbi ashi bɔrɛlambu na to na so nna. Bumo alɛ e naaŋ baa sɔ adɔjibi nɛ b juŋkpar n teŋi na nɛ adɔjibi nɛ asɔbɔya be kudu kudusopo nɛ b lara m ba sa Ebɔrɛ na. Bumo koŋwule na e naaŋ baa sɔ adɔjibi nɛ Mosis be mbra bee ŋini fanɛ b baa bar m ba kaa sa bɔrɛmatapoana nɛ Livaiebi na gba.
45Bɔrɛmatapoana na nɛ Livaiebi na be kushuŋ daŋ bɔlɔ ekama kenishi jemanɛ nɛ b daŋ wora edaŋkaresheŋ nɛ a shin nɛ basa na nyalɛ so nseŋ tiŋ n nya m bunyaŋ Ebɔrɛ na nna. Beshɛbompoana na nɛ bɔrɛlambu na to be bekumpo na daŋ shuŋ bumo be ashuŋ nɛnɛ nna fanɛ kananɛ ewura Deevid nɛ mo pibinyɛn ewura Sɔlɔmɔn daŋ yili kumo n sa bumo na. 46Dra na kikɛ ashi ewura Deevid nɛ Asaf be jemanɛ to, beshɛbompo na e naa juŋkparpo basa na a boŋ nshɛ a di Ebɔrɛ epaŋ. 47Jemanɛ nɛ Zerubabel daa la bɔrɛmatapo nimuso nɛ ma, Nehemaya, malɛ daa la gomena ashi Juda be efuli so na, ekama ashi Israɛl be efuli so daa sa kusɔ nɛ k daga fanɛ e sa nɛ beshɛbompo na nɛ bɔrɛlambu na to be bekumpo nɛ b shi Livaiebi be yiri to na e baa nya bumo be karechɛ kikɛ be kusɔ jiso nna. Basa na daa lara ŋkɛ cheembi nna a sa Livaiebi na nɛ bumo alɛ bee lara amo to be amo nɛ a daga na a sa bɔrɛmatapoana nɛ b la Ɛɛrɔn be kaman to ebi na.
13Israɛlebi ka barga bumo be amu ashi befɔ to be asheŋ
1Kachɛ nɛ b kraŋ Mosis be mbra na awɔrso n sa ekama na nɛ kelar efuli fanɛ Ammɔnebi nɛ Mowabebi maŋ daga fanɛ b ti Ebɔrɛ be basa so. 2Ŋkpal manɛ so b daŋ kini kesa Israɛl be basa ajibi nɛ nchu nna nseŋ naŋ ber Balaam paa fanɛ e shoduu bumo jemanɛ nɛ Ebɔrɛ daŋ lara bumo n shi Ijipt be efuli so a yɔ Keenan be kasawule so nɛ b ya kɔ n sɔ kasawule na. Ama anyi be Ebɔrɛ na daŋ kilgi Balaam be shoduu na nna ŋ ki nɛfa n sa anyi. 3B ka kraŋ Mosis be mbra na nɛ Israɛlebi na nu so, b daŋ fara a ju basa kama nɛ bumo nanaana daa la befɔ ashi bumo to na nna.
Nehemaya ka naŋ gama mbe basa abar so be asheŋ
4Bɔrɛmatapo Eliashib daa la Tobaya mo kurgepo nna nɛ e daŋ shin nɛ e daa keni bɔrɛlambu na to be ebuana nɛ baa yili asɔ amo to na so. 5E daŋ shin nna nɛ Tobaya daa wɔ ebuana na be kegboŋgboŋi nɛ baa yili asɔ be yiri yiri fanɛ esarga be aboyu nɛ duwu nɛ bɔrɛlambu na to be asɔ daŋɛso nɛ ashuŋsɔ nɛ ayu nɛ yabra nɛ ɔlif be ŋku be kudu kudusopo nɛ b bar m ba sa Livaiebi nɛ beshɛbompo na nɛ bɔrɛlambu na to be bekumpo na nɛ ŋkɛ nɛ b bar m ba sa bɔrɛmatapoana na kikɛ na to.
6Ewurgboŋ Atazɛzɛs ka bee ji Babilɔn be efuli so be kuwura be kafɛ adesa nɛ anyɔ to nɛ le be kesheŋ ere daŋ wora. N daa maŋ wɔ Jerusalɛm to loŋ be jemanɛ na ŋkpal ŋ ka daŋ yɔ nɛ n ya bɔ ewura Atazɛzɛs kubɔya a laŋɛ kananɛ asheŋ nite ashi Juda be efuli so na so. Kumo be kaman nɛ ŋ kule ewurgboŋ na ekpa m bɛta n yɔ Jerusalɛm. 7Ŋ ka bɛta n yɔ na pɔɛŋ nɛ m pin kusɔ lubi nɛ Eliashib wora ŋkpal e ka shin nɛ Tobaya wɔ bɔrɛlambu na be ebu na to so. 8Kedaŋ nu ma agbo ga nna nɛ m bela Tobaya be asɔ kikɛ n lɛ kowu. 9Kumo be kaman nɛ ŋ kaŋɛ fanɛ b fɔr ebu na daŋkare be ekpa so nɛ k ki cheembi n sa Enyɛnpe Ebɔrɛ na pɔɛŋ nseŋ bɛta bɔrɛlambu na be asɔ daŋɛso na kikɛ nɛ esarga be ayu na nɛ duwu na n ya wɔtɔ kumo to.
10Ma alɛ naŋ nu fanɛ bɔrɛlambu na to be beshɛbompo nɛ Livaiebi na be galeŋga lar Jerusalɛm to nna m bɛta n yɔ bumo be adɔana to, ŋkpal manɛ so, basa na daa maŋ naa sa bumo ajibi nɛ a bee fo bumo. 11Ndoŋ nna nɛ n tre bejuŋkparpoana na nseŋ malga agbo so m bishi bumo: “Manɛ nna nɛ men kplaŋ bɔrɛlambu na so?” Kumo be kaman nɛ ŋ kaŋɛ bumo fanɛ b fara a shuŋ bumo be ashuŋ. 12Kede be kaman nɛ ekama ashi Juda be efuli so bar ayu nɛ yabra nɛ ɔlif be ŋku be kudu kudusopo m ba wɔtɔ bɔrɛlambu na be ebuana nɛ baa yili ajibi amo to na to. 13B ka bar amo n loge nɛ n lara basa asa nɛ bumo be kebaawɔtɔ walɛ nɛ esa beeŋ tiŋ n yirda bumo nseŋ shin nɛ baa keni asɔ nɛ basa na bar na so nsaa chige amo to a sa basa. Basa nɛ n lara na e la Shelemaya nɛ e la bɔrɛmatapo na, nɛ Zadɔk nɛ e la mbra ŋinipo na, nɛ Pedaya nɛ e la Livai be esa na. Esa nɛ e daa chɛ bumo to e la Zakku pibinyɛn Hanan nɛ mo nananyɛn daa la Mataniya na.
14Ma, Nehemaya bee kule Ebɔrɛ nna fanɛ e nyiŋi ma ŋkpal asɔ lela nɛ mee wora a sa bɔrɛlambu ere nɛ basa nɛ baa bunyaŋ mo kumo to na so.
15Ma alɛ daŋ naŋ dara m pin kusɔ nɛ Juda be basa na bee wora Kewushiachɛ na. Mannɛ kebaachichi asɔrso nɛ baa tre greep na so a wora yabra nawule nɛ b daa wora ama b daa teŋi ayu, nsaa chuge egreep nɛ figi be asɔrso nɛ adɔjibi pɔtɛana kikɛ n ti so nna Kewushiachɛ na. Bumo alɛ daa naa ta ekurma a sulɔ amo nna a yɔ Jerusalɛm n ya ka fa. Amoso n daŋ kpele bumo kusoe nna fanɛ b sa maŋ naa fa ajibi Kewushiachɛ. 16Basa nɛ b daŋ shi kadegboŋ nɛ baa tre Tayɛ nɛ b daa wɔ Jerusalɛm to na daa bar ekɔrɔtɔ nɛ asɔ pɔtɛana ko nna m ba ka fa ndoŋ Kewushiachɛ na. 17Ndoŋ nna nɛ n nya agbo n fɛa Juda be bejuŋkparpoana so ŋ kaŋɛ: “Kulubi nɛ menyee wora ere, Kewushiachɛ na nɛ menyee keni jiga na! 18Ebɔrɛ daa maŋ gberge anyi nɛ Jerusalɛm be kadegboŋ be basa ere kusoe nna ŋkpal an nanaana ka daŋ wora asheŋ nɛ anyee wora ere so a? To menyee sha keŋaba Kewushiachɛ na nɛ Ebɔrɛ be agbo e koso, ŋko?”
19N daŋ yili kumo nna fanɛ pɔɛŋ nɛ Kewushiachɛ na e fara kaaseso na, b ti Jerusalɛm be mbuna na kikɛ nsaa maŋ bugi amo hale nɛ Kewushiachɛ na e ji n choŋ pɔɛŋ. Kumo be kaman nɛ n ta mbuna na be kekeni so be kushuŋ m bɔɔ ŋ gbagba be benyɛn nɛ n lara fanɛ b sa maŋ shin nɛ sheŋ e luri kadegboŋ na to Kewushiachɛ na enɔ. 20Beeŋ wora fanɛ kela koŋwule ŋko ale anyɔ nɛ eyawujipo ko nɛ bumo be asɔ faso dese Jerusalɛm be kadegboŋ na be kowushina ŋklade. 21Ama n daŋ fɛa bumo so nna ŋ kaŋɛ le: “Nɛ men naŋ wora loŋ, meeŋ shin nɛ b pɛ menyi n ti ebu. Yili loŋ be kachɛ na a yɔ, b maŋ naŋ ba Jerusalɛm to Kewushiachɛ kikɛ. 22Kumo be kaman nɛ ŋ kaŋɛ Livaiebi na fanɛ b baa wora bumo be amu cheembi nsaa kuŋ Jerusalɛm be kadegboŋ na be mbuna na Kewushiachɛ kikɛ, saŋɛ na so basa beeŋ ta kumo ŋ ki kachɛ cheembi nsaa sa kumo bunyaŋ.
Ebɔrɛ la ewɔrwupo nna, mee kule mo fanɛ e wu ma kuwɔr nseŋ nɛfa ma ŋkpal kusɔ nɛ mee wora ere so.
23Ma alɛ daŋ naŋ wu fanɛ Juwebi na be benyɛn ko daŋ ta beche ashi Ashdɔd be kadegboŋ to nɛ Ammɔn nɛ Mowab be efuliana so nna. 24Bumo be mbia be bargato daa maa tiŋ a malga Hibruw be ŋgbar. Ashdɔd be ŋgbar nɛ ŋgbar pɔtɛana ko nɛ b daa gbar. 25Amoso n daŋ shoduu loŋ be benyɛn agbo so nna nseŋ naŋ shin nɛ b bri beko nseŋ gberge bumo be emin gba n tia. Kumo be kaman nɛ n shin nɛ b nase kɔnɔ ŋ kaŋɛ: ‘An bɔ ntaŋ a nase kɔnɔ Ebɔrɛ be ketre to fanɛ anyi maaŋ shin nɛ anyi be mbinyɛnso ŋko mbicheso e ta ŋko ŋ kil befɔ.’ 26Ebɔrɛ daŋ sha Israɛl be ewura Sɔlɔmɔn ga nseŋ daŋ shin nɛ durnya to kikɛ be ewura kikɛ maŋ fo mo so, ama beche pɔtɛ nɛ e ta na daŋ shin nɛ e shuŋ agbir nseŋ tɔr kulubi to nna. 27Amoso anyeeŋ nu n sa fo nsaa maaŋ kil befɔ n lar anyi be Ebɔrɛ kaman n wora kulubi ŋ gbiti mo.”
28Joida nɛ mo tuto la bɔrɛmatapo nimuso Eliashib na pibinyɛn ko daŋ ta Sanballat nɛ e shi Bɛf Hɔrɔn na pibiche nna nɛ n ju mo pibinyɛn na n lar Jerusalɛm to.
29Mee kule Ebɔrɛ nna fanɛ e gberge bumo kusoe ŋkpal b ka wora n da bumo be kabɔrɛmata be atande so nseŋ ŋaba Livai be yiri na so.
30Kumo be kaman nɛ n wora ania fanɛ befɔ maaŋ naŋ nya ekpa a leŋ basa na to a wɔtɔ asheŋ lubi to nseŋ naŋ sa bɔrɛmatapoana na nɛ Livaiebi na ashuŋ nɛ baaŋ baa shuŋ jemanɛ kikɛ. 31Ma alɛ daŋ naŋ yili kumo nna fanɛ basa na beeŋ baa bar ndibi puga edɛ bɔrɛsure na ase karechɛ kikɛ nseŋ naa bar bumo be adɔjibi nɛ baaŋ teŋi sososo na bɔrɛlambu na to.
Mee kule Ebɔrɛ nna fanɛ e nɛfa ma ŋkpal asɔ lela nɛ mee wora ere so.