NAHUM

ANEBI NAHUM

BE KAWƆL

¹Kubɔya ere la bɔrɛdare nɛ Enyɛnpe Ebɔrɛ na shin nɛ Nahum, nɛ e shi kade nɛ baa tre Ɛlkɔsh na, ku a laŋɛ kadegboŋ nɛ baa tre Ninɛve na be kaplɛa so nna.

Enyɛnpe Ebɔrɛ ka nya agbo n wɔtɔ Ninɛve be asheŋ

²Enyɛnpe Ebɔrɛ na kishi kechamana ga,

nsaa beeŋ gberge mo doŋana kusoe.

E beeŋ bishi bumo kuwule agbo so.

³Enyɛnpe Ebɔrɛ na kɔ eleŋ ga,

mo alɛ maa nya agbo manaŋ manaŋ,

ama mo alɛ maa yige bumo nɛ baa wora

a de so nɛ baa ta bumo be amu a ji.

Bɔrɛfugboŋ nɛ kawuliwuli so

nɛ e bee bɔla a wora asheŋ;

nɛ bɔrɛwɔlpa malɛ du

fanɛ mbe aya to be kalabɛr.

⁴Mo e naa ponte teku nɛ elɔr so

nɛ amo be nchu bee feeto nɛ a bee wɔlto.

Mo koŋwule na e naa ponte

nɛ Bashan be afitiri bumbuŋ bee bolo,

nɛ Kamɛl be kebeegboŋ so be ndibi bee pere kpaw

nɛ Lebanɔn be ndibi be atoto lela kikɛ bee terge.

⁵Abeegboŋ bee gbuŋgbuŋ to

Enyɛnpe Ebɔrɛ na be anishito nna,

nɛ abeebi bee ŋalga mbe anishito.

E baŋ lar a ba kasawule kikɛ bee gbuŋgbuŋ nna

nɛ durnya nɛ kumo be basa kikɛ e baa chicha.

⁶E baŋ nya agbo, esa kikɛ maaŋ pete.

Esa kikɛ maaŋ tiŋ ŋ gelge mbe agbogboŋ na.

Mbe agbo du fanɛ edɛ nna a pante afalta

nɛ a bee bure to a ki eshishɛr.

⁷Enyɛnpe Ebɔrɛ na walɛ;

mo e naa kuŋ mbe basa tɔrɔ to,

nsaa keni bekama nɛ b yirda mo so.

⁸Ama e bee mur mo doŋana bre nna

fanɛ nchugboŋ ka jija asɔ na.

Mo alɛ naa yɛr bumo nɛ baa

ji mo emɔrɔ na luwu to nna.

⁹Amoso sa maa kre Enyɛnpe Ebɔrɛ ŋkre kulubi!

E bee mur mo doŋana cheche nna

nɛ b maŋ naa nya ekpa a bɛta a ba.

¹⁰Baaŋ baa du fanɛ besanuupo

nɛ b nuu nsa ga nɛ a pɔɔ bumo so nna;

ŋko ajinjɛ nɛ atuweklaŋ nɛ a mel abar to

nɛ edɛ chɔɔ amo m mur na nna.

¹¹Esa ko nɛ e kɔ nfɛra lubi shi Ninɛve

be kadegboŋ to m ba kaa kre

Enyɛnpe Ebɔrɛ na ŋkre lubi.

¹²Ama kusɔ nɛ Enyɛnpe Ebɔrɛ na

bee kaŋɛ mbe basa Israɛlebi nde.

E yɛ: “Asiriyaebi be eleŋ nɛ bumo be keshi ere kikɛ

be kaman baaŋ mur nɛ esa maaŋ naŋ wu bumo.

N shin nɛ menyi, ma basa Israɛlebi, ji awurfoŋ,

ama ma alɛ maaŋ naŋ wora loŋ kikɛ.

¹³Meeŋ shin nɛ Asiriyaebi be eleŋ

nɛ baa ji menyi so na e ba ekar,

nɛ n tuge ŋgbɛlɛbi nɛ b ta ŋ kre menyi na to.”

¹⁴Ketande nɛ Enyɛnpe Ebɔrɛ na nase

a laŋɛ Asiriyaebi be kaplɛa so nde.

E yɛ: “B maaŋ nya kaman to ebi nɛ baaŋ sɔ

bumo so n shin nɛ basa e baa nyiŋi bumo

a ti bumo be atre.

Meeŋ mur bumo be agbirana nɛ a wɔ

bumo be agbirlambuana to na.

Ma alɛ beeŋ kur Asiriyaebi be nchaŋana

n nase, ŋkpal manɛ so, b maŋ walɛ kikɛ.”

¹⁵Judaebi, men keni, kabɔ ko kɔ baru lela

n shi kebeegboŋ na so a ba!

Kayurwushi be baru nɛ e kɔ a ba.

Amoso men ji menyi be nchɛgboŋ nseŋ wora

m bɔlɔ nnɔ nɛ men nase n sa Ebɔrɛ na so.

Kumukpakpaso wuraana maaŋ naaŋ kɔ

n sɔ menyi be kasawule kikɛ, ŋkpal manɛ so,

b mur cheche kuraa.

Ninɛve ka kɔ n tɔr be asheŋ

¹Ninɛveebi, kena bee ba menyi so!

Eleŋ nɛ k beeŋ pesaŋ menyi to na teŋ fo m ba.

Men baa kuŋ menyi be mboŋ lempoana na,

nsaa de menyi be agbembi so nɛnɛ.

Men bela ase nɛnɛ a jo kena be kekɔ!

²Enyɛnpe Ebɔrɛ naa sha kelaŋɛ Israɛlebi

be kemaŋkura nɛ b daa kɔ pɔɛŋ nɛ bumo

doŋana ba kɔ n suge bumo be asɔ na

n sa bumo.

³Ninɛveebi, bedoŋ be benapo keta

abɛlso be asɔkuŋso peper nna,

nseŋ buu asɔbuuso peper.

Baa bela ase nɛ b ba kɔ kena nna!

Bumo be egbaŋɛturko bee nyɛkpɛ fanɛ edɛ,

ŋko fanɛ bɔrɛ ka nyɛkpɛ na nna,

amo alɛ nsaa shile kenishipereso a yɔ a ba

ashi kadegboŋ na be alɔnɛ so!

⁴Bumo be egbaŋɛturko bee nyɛkpɛ so nna

fanɛ edɛ be adondulombi na.

Nsaa ji ŋjɔŋ agbembi so,

a shile a yɔ a ba ashi kadegboŋ na be alɔnɛ so.

A bee nyɛkpɛ so nna fanɛ mbulpi ŋko

bɔrɛ ka nyɛkpɛ na.

⁵Benapo nimuso na ponte n tre benapo na;

nɛ b shil a fiti a ba.

Benapo na daa shil a yɔ egbal na ase nna

nɛ b ya pɔr kusɔ nɛ k beeŋ baa kuŋ ajembu gbɛgbɛso

nɛ bedoŋ beeŋ shi awɔlto ŋ gbelti n lɛ bumo so na.

⁶Ewurkpa na be mbunagboŋ nɛ e mata lɔr na

bugi nɛ nchu luri m bɔlɔ kumo kikɛ to nɛ k bure n tɔr.

⁷B pɛ ewurche na kenya n yɔ efuli pɔtɛ so,

nɛ mbe mbita bee shu fanɛ ali

nsaa ber ŋgbene so kagbenejijaso.

⁸Kadegboŋ nɛ baa tre Ninɛve na bure nna

nɛ kumo to be basa bee shile fanɛ kepa ka bɔlɔ m bu

nɛ kumo to be nchu bee shile na.

Beko bee ponte a kaŋɛ: “Yili! Yili!”

Ama ekama maŋ yili nseŋ bɛta a ba.

⁹Nɛ bedoŋ be benapo na bee ponte a kaŋɛ:

“Men baa muu eshuwa nɛ egbiti na!

Ŋkpal manɛ so, kadegboŋ na to kɔ asɔ lela ga!”

¹⁰Ninɛve bure nɛ kumo to be basa shile n lar kumo to;

nɛ ki kade bureso a dese fuloŋ,

nɛ shɛŋ maŋ naa wɔ kumo to!

Nɛ kufugboŋ tɔr basa so nɛ baa chicha.

Bumo be eleŋ kikɛ loge;

nɛ bumo be anishiakpa ki foleebi.

¹¹Naniere nnɛ nɛ Ninɛve nɛ k daa du

fanɛ ebuluŋ be kelaŋ na naa wɔ?

K daa du fanɛ kakpa nɛ ebuluŋ nyɛnso nɛ becheso kikɛ

beeŋ lar ŋ ka bumo be bibi nɛ shɛŋ maaŋ wora bumo nna.

¹²Buluŋ na bee pɛ kusɔbɔya nɛ e nya nna,

nseŋ gbeye kumo n ya sa mo barkasa

nɛ bibi nɛ b ji m moɛ.

¹³Nɛ Enyɛnpetale Ebɔrɛ na kaŋɛ:

“Ninɛveebi, men ki ma doŋana nna na,

meeŋ chɔɔ menyi be egbaŋɛturko

nseŋ shin nɛ b mɔ menyi be benapo kena to.

Ma alɛ beeŋ naŋ shin nɛ b sɔ asɔ nɛ men suge beko kutɔ na,

ekama malɛ maaŋ tuge menyi be mbɔ kikɛ.”

¹Asheŋ maaŋ nyalɛ n sa kadegboŋ

nɛ bemɔpo nɛ befɛpo nɛ kapuni

bɔlɔ kumo to na.

²Kusɔ nɛ k beeŋ ba kumo so nde:

Achuchɔ beeŋ gbelge kumo basa so,

nɛ ekama e nu egbaŋɛ nɛ egbaŋɛturko be eshile

be egbri nɛ a beeŋ sɔ kumo kikɛ to na.

³Egbaŋɛdiipo beeŋ nyaŋɛto a fili etokobi

nɛ akpa to nɛ a baa nyɛkpɛ kaplɛkama.

Basa damta beeŋ wu m biti abar so

nɛ esa maaŋ tiŋ ŋ karga basa wuso na.

Basa beeŋ baa fiti bubuni na a tɔr!

⁴Kasogberge nɛ k beeŋ ba Ninɛve so,

ŋkpal kesakalea damta nɛ k bɔlɔ kumo to,

nɛ kegbaya nɛ b ta m pɛ efuli damtaana so

be basa ŋ ki bumo be anya na so.

⁵Ade be kaman nɛ Enyɛnpetale Ebɔrɛ na kaŋɛ:

“Ŋ ki fo, Ninɛve, mo doŋ nna na.

Meeŋ delge fo so nɛ efuli pɔtɛana na

e wu fo kesaria nɛ nyɔmɔ e pɛ fo.

⁶Meeŋ shin nɛ fo ki kusɔ jiga

nɛ kusɔyurpi;

nɛ kumo be loŋ e chinchiŋ basa,

nseŋ pɛ bumo kufu.

⁷Bekama nɛ baaŋ wu fo

beeŋ shile fo nseŋ kaŋɛ le:

‘Ninɛve e bure a dese na,

wanɛ e naŋ shu n sa mo?

Nnɛ nɛ meeŋ nya esa nɛ e lolo mo?’ ”

⁸To, Ninɛve, fo maŋ bɔ Ijipt

be efuli so be kadegboŋ

nɛ baa tre Tebes, nɛ Nail be Lɔr na

daa kuŋ kumo fanɛ egbal na.

⁹Itiopia nɛ Ijipt be efuliana

be eleŋ nɛ kade na

daa fute a yige so.

Libiya nɛ kasawule nɛ baa tre

Put na e daa la kumo teriana

nɛ a chɛ kumo to.

¹⁰Ama bedoŋ daŋ ba kɔ Tebes nseŋ pɛ kumo

be basa n yɔ efuli pɔtɛ so.

B daŋ mɔ bumo be mbia nna n nase agbembi so

be kukɔlɔ kama so.

B daŋ to beri nna m barga bumo be benimugboŋ

nɛ b ta ŋgbɛlɛbi ŋ kre na to n sa abar.

¹¹Ninɛve, fo alɛ gba beeŋ nuu nsa m boo m baŋ so nseŋ shile fo doŋana so n ya ŋana m mɔlga fo kumu. ¹²Fo mboŋ lempo nɛ a bee kuŋ fo kikɛ beeŋ ki fanɛ figi be ndibi nɛ a kɔ asɔrso nɛ a bel m pere. B baŋ gbaŋgbaŋ ndibi na asɔrso na bee tɔr kɔnɔ kama nɛ k bugi a yil to nna. ¹³Fo benapo du fanɛ beche nna nɛ shɛŋ malɛ maa kuŋ fo kasawule na ashi fo doŋana be enɔ to. Edɛ beeŋ chɔɔ ndibi nɛ baa ta a ber fo mbunagboŋ so na. ¹⁴Men saŋ nchu n yili menyi be enɔ so, ŋkpal manɛ so benapo beeŋ ba kulti menyi n wɔtɔ a sha kekɔ menyi kena. Amoso men baga eshii n lɔŋɛ menyi be mboŋ lempoana na m pɔr. ¹⁵Kanaŋkama nɛ men wora, edɛ e naŋ chɔɔ menyi m mɔ ŋko kena to nɛ menyeeŋ wu. Baaŋ mur menyi fanɛ kananɛ elotɔr bee ji asɔduu a mur na. Men salga fanɛ alonte ŋko elotɔr nna! ¹⁶Menyi be eyawujipo wora keshi a chɔ achɛkpabi nɛ a wɔ awɔlto ere, ama bumo kikɛ beeŋ mur n choŋ fanɛ kananɛ elotɔr bee ji asɔ a mur nsaa firgi a yɔ na nna. ¹⁷Menyi be bekumpo nɛ ekrachi kikɛ du fanɛ elotɔr nɛ a mel abar so egbal so awo be kachɛ nna. Ama epeŋi baŋ lar, nɛ b firgi n choŋ. Esa kikɛ malɛ maa pin kakpa nɛ e bee firgi a yɔ.

¹⁸Asiriya be Ewurgboŋ, fo gomena be benimuana kikɛ wu, nɛ fo ekrachigboŋ dese a di nsaa maaŋ naaŋ tiŋi kikɛ! Fo basa pesaŋ to a wɔ abeegboŋ so. Esa kikɛ malɛ maŋ wɔtɔ nɛ e naŋ shin nɛ b bɛta m ba epe. ¹⁹Kudur kikɛ maŋ wɔtɔ nɛ k tiŋ n chɛ ebesa nɛ doro nɛ a wɔ fo to ere. Ekama nɛ e nu fo kemur be kubɔya ere, bee kpla enɔ kagbenefuliso nna ŋkpal ebesa nɛ b ji ŋkpal fo kumukpakpaso so.