MAIKA

ANEBI MAIKA

BE KAWƆL

¹Kamalga ere nɛ Enyɛnpe Ebɔrɛ daŋ ta n sa Maika nɛ e daŋ shi kade nɛ baa tre Moreshɛf na. E yɛ: “Jemanɛ nɛ Jotam nɛ Ahaz nɛ Hɛzekaya daŋ ji Juda be efuli so be kuwura na, nɛ Enyɛnpetale Ebɔrɛ daŋ lara loŋ be asheŋ ere ŋ ŋini Maika a laŋɛ ndegboŋ nɛ baa tre Samɛria nɛ Jerusalɛm na be kaplɛa so.

Maika ka bee shu a sa Jerusalɛm na be asheŋ

²Menyi basa nɛ men

wɔ durnya ere be efuliana kikɛ so e nu nfe!

Menyi basa kama nɛ men wɔ

kasawule ere kikɛ so gba e nu asheŋ ere!

Enyɛnpetale Ebɔrɛ nɛ e wɔ mbe bɔrɛlambu

cheembi to na, e naa shin nɛ e ji shɛda

ŋ gbiti menyi.

³Men keni nfe!

Enyɛnpe Ebɔrɛ na bee shi mbe kakpa cheembi

a gbelge to a ba nɛ e ba nite kasawule ere so be

abeegboŋ be awɔlto.

⁴Abeegboŋ na beeŋ ŋalga ashi mbe aya to

fanɛ ŋku bumbuŋ ka luri edɛ to ŋ ŋalga a shile

a yɔ abee na be afito fanɛ nchu

ka shi kebee so a chulgi a wurge kasawule so na.

⁵Asheŋ ere kikɛ beeŋ wora nna ŋkpal Israɛlebi na ka wora kulubi ŋ gbiti Ebɔrɛ so. To, wanɛ nɛ baaŋ ta Israɛlebi be kekini Ebɔrɛ nseŋ lar mo kaman ere be asheŋ n sulɔ? Samɛria nɛ k la efuli na be kadegboŋ na be basa nɛ baaŋ ta kumo n sulɔ a! Nɛ wanɛ malɛ e tɔr Judaebi be kagbirshuŋ ere be ntaŋ? Mannɛ Jerusalɛm gbagba a? ⁶Amoso nɛ Enyɛnpetale Ebɔrɛ na yɛ: Meeŋ shin nɛ Samɛria e ki alambure n deŋi abar so kululu. K beeŋ ki ndibi sɔrso be eduukpa. Meeŋ pesaŋ Samɛria be egbalana be ebirkesi to n lɛ ketaŋɛ to ŋ ka kumo be egbaltɔlaseana nawule n nase nɛ ekama e baa wu amo. ⁷Samɛria to be agbirana kikɛ beeŋ bure to ŋ ki le burburbi. Nɛ edɛ e chɔɔ asɔ kama nɛ agbirlambu to be esakale kɔ na kikɛ. Efuli pɔtɛana so ebi beeŋ sulɔ kumo be agbirana be shuwa nɛ gbiti n ya sa esakale pɔtɛana mboŋ ko.”

⁸“Ŋkpal ade kikɛ so, ma Maika beeŋ boŋto a shu nseŋ buu asɔfarbi a na aya fuloŋ. Meeŋ shu fanɛ kuntuŋ na nseŋ boŋto fanɛ tayetaye. ⁹Ŋkpal manɛ so, Samɛria jija e shin nɛ k mur cheche nɛ Juda malɛ gba luri loŋ be tɔrɔ na to. Loŋ be tɔrɔ na tiŋ n fo ma basa be mbuna to ashi Jerusalɛm to.”

Edɔm ka firgi n taga Jerusalɛm to be asheŋ

¹⁰Men sa maŋ kaŋ malga kusɔ nɛ k bee wora menyi ere be asheŋ n sa Gafebi na kikɛ. Men sa maŋ shin nɛ b wu men ka bee shu. Menyi Bɛf Leafra be basa malɛ e ya dese eshishɛrpumpuŋ to a melti a ŋini kagbenejija nɛ k tɔr menyi so. ¹¹Menyi Shafir nɛ Zaanan be nde to ebi e delgeso nseŋ ta anishinyɔr n shile n yɔ efuli pɔtɛ so. Basa nɛ b wɔ kadegboŋ nɛ baa tre Zaanan na maaŋ shuli n lar bumo be kade na to. Betezel be kade to ebi bee shu nna ŋkpal kusɔ nɛ k bee kuŋ kumo na ka maŋ naa wɔtɔ so. ¹²Marofebi pesaŋ to a keni e fin esa nɛ e beeŋ mɔlga bumo ŋkpal Enyɛnpe Ebɔrɛ ka shin nɛ Jerusalɛmebi ji jɛrbi damta so. ¹³Menyi nɛ men wɔ Lakish na e bela men be egbaŋɛ nɛ kena to be egbaŋɛturko ase. Men kute Israɛlebi to n wora alubi nseŋ ŋin Jerusalɛmebi gba n wɔtɔ alubi to. ¹⁴Amoso menyi Judaebi e kela Moreshɛf Gaaf be kade to ebi na fanɛ menyee yɔ. Ŋkpal manɛ so Israɛl be bewura maaŋ naŋ nya kechɛto ashi Akzib be kade to.

¹⁵Enyɛnpe Ebɔrɛ na beeŋ ta menyi nɛ men shi kade nɛ baa tre Mareshɛf na m bɔɔ bedoŋ enɔ nɛ b kɔ n sɔ menyi be kade nɛ Israɛl be benimuana kikɛ e shile n ya ŋana kebeelaŋ nɛ k wɔ Adulam na to. ¹⁶Judaebi, men she men be amu ŋkpal kagbenejija nɛ k beeŋ tu menyi ŋkpal men be mbia shasoana so. Men she men be amu kɔlikɔli fanɛ ejita be amu na ŋkpal manɛ so, baaŋ pɛ men be mbia shaso ŋ ki anya n yɔ efuli pɔtɛ wɔfɔ so.

Asɔ nɛ a beeŋ nya basa nɛ baa tɔrɔ bebɔlpo na be asheŋ

¹Asheŋ maaŋ nyalɛ n sa bekama nɛ baa dese bumo be edesekpa a kre asheŋ lubi be kewora be ŋkre na. Kanyɛso nɛ baa kaa kre loŋ be asheŋ na, nɛ kare e chɛ nɛ b wora amo ŋkpal b ka kɔ eleŋ so. ²B baa sha nsawule ŋko nwu kama, baa suge amo eleŋso nna. Baa puni nna a suge basa be nwu ŋko mpetɛsɔ.

³Amoso kusɔ nɛ Enyɛnpe Ebɔrɛ na kaŋɛ nde: “Mee kre keshin nɛ tɔrɔgboŋgboŋi e ba menyi so nna. Menyi alɛ maaŋ tiŋ ŋ gelge kumo n nya menyi be kumu n ji kikɛ. Menyeeŋ luri etɔrɔ to, saŋɛ na so menyi maaŋ naa nite a wu menyi be amu. ⁴Kachɛ na kaŋ fo basa beeŋ baa boŋ nshɛ a wora menyi eyurto a kaŋɛ le:

‘Anyi ere mur cheche nna na!

Enyɛnpe Ebɔrɛ na suge anyi be kasawule

n sa bedebɔrpo.’

⁵Amoso menyi maaŋ naa kɔ kachige ashi Enyɛnpe Ebɔrɛ na be basa to ŋkpal manɛ so, esa kikɛ maaŋ baa wɔtɔ nɛ e yili menyi be katelamu to n sɔ kachige na.”

⁶Basa wɔtɔ nna a malga a gbiti ma a kaŋɛ le: “Sa maa bɔ le be abɔrɛsheŋ be kubɔya a sa anyi ere. Sa maa malga a laŋɛ amo be kaplɛa so gba kuraa. Anyi maaŋ ŋaba kikɛ. ⁷Menyi Israɛlebi nɛ men la Jeekɔb be kaman to ebi na kɔ ekpa nɛ men baa kaŋɛ fanɛ Enyɛnpe Ebɔrɛ na nya agbo nna n wora kusɔ nɛ e wora ere? Enyɛnpe Ebɔrɛ maa kaa nɛfa bekama nɛ baa wora asheŋ niŋiso nna a?”

⁸Kumo be kaman nɛ Enyɛnpe Ebɔrɛ na kaŋɛ: “Menyi kaa kɔ ma basa kena fanɛ b ka la bedoŋ nna. B baŋ shi kena to a ba epe a fɛ fanɛ epe nɛ kagbenewushi wɔ, menyi kaa ŋana ekpa to nna a jo nɛ b ba nɛ men yuri bumo be asɔbuuso. ⁹Menyi alɛ bee kaa ju ma basa be beche a lar bumo be elaŋ nɛ baa sha ga na to nna nsaa suge bumo be mbia be enɛfa nɛ n sa bumo fanɛ a baa la bumo peya mbaanaayɔ na. ¹⁰Men koso a yɔ! Nfe maŋ la kakpa nɛ menyeeŋ chena n wushi. Ŋkpal manɛ so, menyi be alubi shin nɛ k wora eyurpi nseŋ ki kakpa nɛ k beeŋ mur.

¹¹Basa ere bee sha anebi nɛ e beeŋ ba kaa ku efɛ a kaŋɛ bumo le na nna: ‘Men baa nuu nsa a boo.’

¹²Ma, Enyɛnpe Ebɔrɛ na e naa nase kɔnɔ, fanɛ meeŋ naŋ bar ma basa Israɛlebi, nɛ baaŋ ji efute na abar so. Meeŋ gama bumo abar so fanɛ mbolpɔ ka wɔ kuluu to, saŋɛ na so basa beeŋ wora keshi n sɔ kasawule na so kikɛ.

¹³Meeŋ bugi ekpa n sa ma basa nseŋ juŋkpar bumo n lar kenyaya nɛ b wɔtɔ ashi efuli pɔtɛana so m ba ki bumo be ewura.”

Maika ka lar Israɛl be bejuŋkparpoana kaman be asheŋ

¹Ndoŋ nna nɛ Maika kaŋɛ le: “Israɛlebi be bejuŋkparpo, men nu nfe! Men nyi kelela nɛ kulubi be mbarga, ²ama men kishi alela be kebaa wora nna nsaa sha alubi be kebaa wora. Men wɔtɔ nna a debɔr ma basa nsaa jija bumo be atre fanɛ kananɛ baa luu kusɔbɔya be kawɔl nsaa marga kumo be eblaŋ ashi awibi so na. ³K du fanɛ menyee luu ma basa be nwɔl nna, nsaa kpele bumo be eblaŋ nɛ awibi to a wɔtɔ mpuliya to a daŋɛ a we. ⁴Kachako menyeeŋ shu ŋ kule Enyɛnpe Ebɔrɛ na, ama e maaŋ nu menyi be kekule. Ŋkpal menyi be alubi so, e beeŋ kpele mbe anishi nsaa maaŋ tuge menyi gba kuraa.

⁵Kusɔ nɛ Enyɛnpe Ebɔrɛ na bee kaŋɛ nde: ‘Anebiana ko wɔtɔ nna a fule a nase kayurwushi be kɔnɔ a sa basa nɛ baa sa bumo kusɔ jiso nsaa ta kena a funti bekama nɛ b maa wora loŋ na. Enyɛnpe Ebɔrɛ na bee kaŋɛ loŋ be anebiana na nna fanɛ ⁶k beeŋ wora bumo kachako fanɛ kanyɛ ka biri nɛ b maŋ naa wu na. B maaŋ naaŋ tiŋ ŋ ku bɔrɛdare n fule ma basa kikɛ. ⁷Bumo be bekama nɛ baa wu echefoso be asheŋ a kaŋɛ na beeŋ ŋaba, ŋkpal manɛ so kusɔ nɛ baaŋ kaŋɛ na maaŋ wora m bɔlɔ so. Baaŋ ji nyɔmɔ, ŋkpal manɛ so Ebɔrɛ maaŋ naaŋ tuge bumo.’ ”

⁸Ama Enyɛnpe Ebɔrɛ na ta mbe Kiyoyu nɛ mbe eleŋ na nna n wɔtɔ ma ere to, nseŋ shin nɛ n nya kenyɛn a ji asheŋ nɛ amo be ekpa so nsaa tiŋ a kaŋɛ Israɛl be basa bumo be alubi. ⁹Men nu nfe, menyi Israɛl be bejuŋkparpo, nɛ men kishi kebaaji asheŋ nɛ amo be ekpa so nsaa ta kulubi a tre kelela. ¹⁰Kumukpakpaso nɛ kamɔ nɛ men ta ŋ ki menyi be karechɛ kikɛ be kebaawɔtɔ ashi Ebɔrɛ be kadegboŋ nɛ baa tre Jerusalɛm na to. ¹¹Kadegboŋ na be bejuŋkparpoana bee sɔ asɔ basa kutɔ nna pɔɛŋ nsaa ji bumo be asheŋ a sa bumo. Bɔrɛmatapoana nɛ anebiana na malɛ bee sɔ amansherbi nna pɔɛŋ nsaa ŋini mbraana na ŋko a wu abɔrɛsheŋ a kaŋɛ basa. Kumo be kaman nɛ b kilgi ŋ kaŋɛ le: “Enyɛnpe Ebɔrɛ na wɔ anyi kutɔ, amoso shɛŋ maaŋ tiŋ n wora anyi.”

¹²Ŋkpal bumo so, baaŋ pulgi Jerusalɛm to fanɛ kudɔsawule, nɛ k ki kade bureso m biti abar so a dese; nɛ Zayɔn be kebee nɛ bɔrɛlambu na yil so na malɛ e ki kupo.

Enyɛnpetale na be kagbenewushi ka beeŋ ba kaplɛkama be asheŋ

¹Lalaloge be nchɛ na to kebee nɛ

Enyɛnpe Ebɔrɛ be bɔrɛlambu na yil so na

e naŋ ba ki abee kikɛ to be kejeŋgreŋ ga.

K beeŋ baa du jeŋgreŋ a chɔ abee kikɛ nyam,

nɛ efuliana na kikɛ be basa e shile m ba kumo ase

²m ba kaŋɛ le:

“Men shin nɛ an dii

n yɔ Enyɛnpe Ebɔrɛ na be kebee na so,

n ya luri Israɛl be Ebɔrɛ na be bɔrɛlambu na to.

E beeŋ ŋini anyi kusɔ nɛ e bee sha fanɛ an wora;

nɛ an baa wora mbe aparsheŋ saŋkama.

Ŋkpal manɛ so, Enyɛnpe Ebɔrɛ na

be keŋini bee shi Jerusalɛm nna;

nɛ mo alɛ bee shi Zayɔn be kebee so

a malga a sa mbe basa.”

³E beeŋ naŋ lɔŋɛ efuliana nɛ a wɔ kufɔ nɛ tatato kikɛ,

nɛ kelaŋtokɔ wɔ bumo be kefɛato na

nɛ b naŋ nyalɛ abar so.

Saŋɛ na so nɛ b ta bumo be etokobi m bel ntekpa

nseŋ ta bumo akpa malɛ m bel eloji.

Efuliana na maaŋ naa ŋini bumo basa

kena be kekɔ kikɛ ŋko n naŋ kɔ abar kena gba kuraa.

⁴Loŋ be jemanɛ na, ekama na beeŋ chena

mbe ndibi sɔrso be kudɔ to nɛ kayurwushi

nɛ esa kikɛ maaŋ naa funti mo.

Ŋkpal manɛ so, Enyɛnpetale Ebɔrɛ na

be kɔnɔ naseso nna na.

⁵Efuli kama so ebi bee bunyaŋ nsaa wora bumo be kegbir kasonu nna, ama anyi ere beeŋ baa bunyaŋ nsaa wora Enyɛnpe anyi be Ebɔrɛ na kasonu nna mbaanaayɔ.

Israɛlebi ka beeŋ shi kenyaya to m bɛta m ba be asheŋ

⁶Kede be kaman nɛ Enyɛnpe Ebɔrɛ na kaŋɛ, “Jemanɛ ko bee ba nɛ ŋ gama basa nɛ ŋ gberge kusoe n shin nɛ b yɔ kenyaya to ashi efuli wɔfɔana so n ya ji awurfoŋ na abar so. ⁷Meeŋ shin nɛ ma basa nɛ b shir kaman kasawule na so nsaa du fanɛ ebobi na e naŋ ki efuli lempo so ebi. Ma alɛ beeŋ baa wɔ Zayɔn be kebee na so nna a ji kuwura bumo so hale mbaanaayɔ.”

⁸Kumo be kaman nɛ Jerusalɛm nɛ k la kakpa nɛ Ebɔrɛ wɔ nsaa keni mbe basa so fanɛ mbolpɔkpapo na e naŋ ki efuli na so be kadegboŋ. ⁹Jerusalɛmebi, manɛ so nɛ menyee shu awɔrso ŋko a ji awurfoŋ fanɛ eche nɛ kakurge ta mo? Menyi ka maŋ kɔ ewura ŋko menyi be asoetojipoana ka wu so nɛ menyee shu a? ¹⁰Men baa shu nsaa kii nnɔ to fanɛ eche nɛ kakurge ta na, ŋkpal manɛ so, k maaŋ chɛr nɛ men lar kadegboŋ na to n yaa kaa wɔ kupuŋ to. Baaŋ pɛ menyi n yɔ kufɔ kufɔ Babilɔn be efuli so, ama ma, Enyɛnpe Ebɔrɛ na, beeŋ mɔlga menyi ashi men doŋana be enɔ to ndoŋ. ¹¹Efuli damtaana gama abar so nna nɛ b kɔ menyi kena. B yɛ: “A daga fanɛ Jerusalɛm ka mur! Anyi be kenishi pere nna a fin kewu kumo be ŋaba.” ¹²Ama efuliana ere maŋ nyi kusɔ nɛ k wɔ Enyɛnpe Ebɔrɛ na be nfɛra to. B maŋ nyi fanɛ b gama abar so nna nɛ kasogberge e ba bumo so fanɛ kananɛ baa bri ayu na.

¹³Kumo be kaman nɛ Enyɛnpe Ebɔrɛ na naŋ kaŋɛ le: “Jerusalɛm to ebi, men ya gberge men doŋana kusoe. Meeŋ shin nɛ men baa kɔ eleŋ fanɛ egbolu nɛ amo be alambɛ du fanɛ abɛlso nɛ amo be alotobi malɛ du fanɛ danyaŋ na. Menyeeŋ pɔ efuli damtaana so nseŋ sɔ asɔ nɛ b daŋ ta eleŋsheŋ n nya na m ba sa ma, nɛ n la durnya kikɛ be Enyɛnpe Ebɔrɛ na.”

¹Jerusalɛmebi, men gama men be benapo abar so n wora shiriya, ŋkpal manɛ so, bedoŋ kulti anyi nna n wɔtɔ! Baa fin kekɔ Israɛlebi be ewura kena ŋ ŋe mbe ketaya kedibi nna.

Ejuŋkparpo ka beeŋ shi Bɛtlɛhɛm n lar be asheŋ

²Ama Enyɛnpe Ebɔrɛ na yɛ: “Bɛtlɛhɛm Efrata, fo la Juda be efuli so be ndewurbiana na be kuko nna, ama fo to nɛ meeŋ lara esa nɛ e beeŋ ba ji Israɛl be efuli so be kuwura. Dra dra na kikɛ nɛ mbe kanaŋ jɔŋɛ.”

³Amoso Enyɛnpe Ebɔrɛ na beeŋ kplaŋ mbe basa so nɛ b baa kraa wɔ bumo doŋana be enɔ to n ya fo jemanɛ nɛ eche nɛ e beeŋ kurge loŋ be ewura na beeŋ kurge ebinyɛn. Saŋɛ na so nɛ Israɛl be basa nɛ b wɔ kenyaya to ashi efuli pɔtɛana so na e bɛta m ba ti bumo peebiana so a wɔtɔ. ⁴Ewura na kaŋ ba e beeŋ ta Enyɛnpe Ebɔrɛ na be eleŋ nɛ Ebɔrɛ na be ketre be kemaŋkura n ji kuwura mbe basa so. Mbe basa beeŋ nya kekuŋ gboŋgboŋi, ŋkpal manɛ so, mbe ketre beeŋ dii n yɔ durnya be efuli kama so ⁵nɛ e bar kayurwushi m ba sa bumo. Asiriya be efuli so be basa kaŋ ba kɔ m bure n luri anyi be mboŋ lempoana to, anyeeŋ shuŋi anyi be bejuŋkparpo lempoana nɛ b ya kɔ bumo. ⁶Anyi be bejuŋkparpo lempoana ere beeŋ keta benapo nɛ b kɔ eleŋ ga n ya kɔ m mɔlga anyi ashi Asiriyaebi nɛ baa shuŋ kegbir nɛ baa tre Nimrɔd na be enɔ to jemanɛ nɛ baaŋ ba bure n luri anyi be kasawule to na.

⁷Israɛl be basa nɛ baaŋ ji efute na beeŋ baa du fanɛ bunyaŋ ŋko bɔrɛchu nɛ k bee sa kayul nseŋ shi Enyɛnpe Ebɔrɛ na kutɔ a ba efuli damtaana so nna. ⁸Ama bekama nɛ b shir a wɔ efuli pɔtɛana so na bre beeŋ ki fanɛ buluŋ nɛ e bee kɔ a fin kusɔ jiso ashi kiyi to na nna. E baŋ nya n luri mbolpɔ to e beeŋ baa tɛ nna a yuu bumo so nsaa kpɛa bumo to a we nɛ esa kikɛ malɛ maaŋ tiŋ n sɔ bumo n yige. ⁹Israɛlebi na beeŋ kɔ m pɔɔ bumo doŋana so nseŋ mur bumo cheche.

¹⁰Enyɛnpe Ebɔrɛ na yɛ: “Jemanɛ na kaŋ fo, meeŋ suge menyi be egbaŋɛ nseŋ mur menyi be egbaŋɛturko. ¹¹Ma alɛ beeŋ mur ndegboŋana nɛ a wɔ menyi be kasawule so nseŋ bure menyi be mboŋ lempoana nɛ a bee kuŋ menyi na kikɛ. ¹²Meeŋ naŋ jija kegba be adur nɛ men kɔ na nɛ men maaŋ naa tiŋ a to abar akprambi ashi menyi be kasawule so. ¹³Ma alɛ beeŋ naŋ mur asɔ nɛ menyee ta a lɔŋɛ agbir a shuŋ na kikɛ, nɛ menyi maaŋ naŋ nya amo a shuŋ. ¹⁴Meeŋ bure kegbirche nɛ baa tre Ashira na be mpɔrduli kikɛ ashi men be kasawule so nseŋ mur menyi be ndegboŋana gba. ¹⁵Meeŋ nya agbo ga m bishi efuliana nɛ amo be basa kini kewora ma kasonu na kuwule.”

Asheŋ nɛ Enyɛnpe Ebɔrɛ na kɔ a gbiti Israɛlebi be asheŋ

¹Nu kusɔ nɛ Enyɛnpe Ebɔrɛ na yɛ e kɔ a gbiti Israɛlebi na. E yɛ: “Men niŋi to n ta men be asheŋ n nase abeegboŋana be anishito nseŋ shin nɛ abeebi e nu kusɔ nɛ men kɔ nɛ men kaŋɛ. ²O abeegboŋ nɛ durnya be nsawule be egbaltɔlase nɛ a wɔtɔ mbaanaayɔ, men nu asheŋ nɛ Enyɛnpe Ebɔrɛ na kɔ a semaŋ mbe basa Israɛlebi na.”

³E yɛ “Ma basa, manɛ nɛ n wora menyi? Men kaŋɛ ma, n la esulɔ nna n sa menyi a? ⁴Ma e lara menyi nseŋ mɔlga menyi ashi kenyaya to ashi Ijipt be efuli so. Mosis nɛ Ɛɛrɔn nɛ Miriam nɛ n daŋ shuŋi fanɛ b ya juŋkpar menyi n lar ndoŋ. ⁵Ma basa, men baa nyiŋi kusɔ nɛ Mowab be ewura Balak daŋ kre kewora menyi nɛ kusɔ nɛ Biyɔɔ pibinyɛn Balaam daŋ kaŋɛ mo a laŋɛ menyi be kaplɛa so na. Men naŋ nyiŋi asheŋ nɛ e wora saŋɛ nɛ men lar Shitim a yɔ Gilgaal na nseŋ nyiŋi kananɛ ma, Enyɛnpe Ebɔrɛ na mɔlga menyi ale damta.”

Kashenteŋto be kasonu be asheŋ

⁶Manɛ bre nɛ meeŋ ta m ba Enyɛnpetale Ebɔrɛ nɛ e wɔ ebɔrɛso na kutɔ m ba bunyaŋ mo? N ta egbolu lela ga nɛ a ji nfɛ koko m ba lara sarga chɔɔso n sa mo a? ⁷N ta mbolpɔ ŋgboŋto ŋgboŋto ŋko ɔlif be ŋku nɛ e du fanɛ lɔr be bɔlɔ m ba mo kutɔ, k beeŋ par mo a? N ta ma wurkoŋnyɛn n lara sarga n sa mo ŋkpal ma alubi so a? ⁸Ayai, Enyɛnpe Ebɔrɛ na teŋ kaŋɛ anyi kusɔ nɛ k walɛ. Kusɔ nɛ e bee fin anyi kutɔ e la, kebaawora asheŋ nɛ amo be ekpa so nɛ kebaa ŋini kasha nsaa kɔ kamubrase a nu a sa mo.

⁹Nu nfe! Enyɛnpe Ebɔrɛ na bee kela a shoŋi Jerusalɛm be kadegboŋ na to ebi. E yɛ: “Men baa de kuwurkpabi na, nɛ esa nɛ e kɔ kumo to a ba na so. ¹⁰Kayu be asɔ nɛ men ta m bɔlɔ ebuana n yili nseŋ ta kapuni be ekurwa nɛ ŋ kishi amo be asheŋ ga na a ber asɔ. ¹¹Nuso nɛ meeŋ tiŋ n ta m paŋ bumo nɛ baa ta kapuni be ekurwa a ber asɔ a sa basa? ¹²Damawuraana na bee puni betirpo nna nɛ ekama malɛ bee ku efɛ. ¹³Amoso n teŋ fara nɛ m mur menyi nna ŋkpal menyi be asheŋ lubi so. ¹⁴Menyeeŋ ji ajibi, ama menyi alɛ maaŋ moɛ. Menyeeŋ chala asɔ n yili, ama menyi alɛ maaŋ baa kɔ mpetɛ nɛ a yil. Ma, Enyɛnpe Ebɔrɛ na beeŋ shin nɛ bedoŋ e ba kɔ n suge amo kikɛ. ¹⁵Menyi beeŋ dɔ n duu, ama menyi maaŋ nya shɛŋ n teŋi. Menyeeŋ ta ɔlif be bibi n wora ŋku, ama menyi alɛ maaŋ nya ŋku na n wora shɛŋ. Menyeeŋ ku eyabra ŋko n daŋɛ nsa, ama menyi maaŋ nya yabra ŋko nsa n nuu. ¹⁶Le be asheŋ ere beeŋ ba menyi so nna ŋkpal men ka bɛ ewura Omri nɛ mo pibinyɛn, ewura Ehab be asheŋ lubi so so. Bumo be edaŋkare to nɛ men bee kute to. Amoso meeŋ shin nɛ men mur cheche nɛ ekama e baa tege nsaa mushe menyi fanɛ asɔ jiga na.”

Israɛlebi be kebaawɔtɔ lubi be asheŋ

¹Asheŋ malɛ tu ma bre! N du fanɛ esa nɛ akoŋ kɔ nɛ mo alɛ maŋ nya kusɔrso kama kedibisɔrso ŋko kefeelebi so nɛ e chuge n ji nna. B chuge afeelebi be asɔrso nɛ baa tre greeps na nɛ figidibi be asɔrso na kikɛ nyam. ²Esa kikɛ ma ŋ naa ji kashenteŋ kasawule ere so. Ekama maŋ niŋi Ebɔrɛ be anishito. Ekama bee fin ekpa nɛ e beeŋ bɔla so m mɔ mo barkasa nna. Edimɛdi kikɛ bee tɛ bumo niopibiana nna a fin bumo nɛ b mɔ. ³Alubi be kewora deŋ ekama nna. Ekrachi nɛ demujipoana bee tu basa nna a sɔ asɔ pɔɛŋ nsaa shuŋ bumo be ashuŋ a sa bumo. Ekama nɛ e kɔ eyilikpa basa to bee bɔla mbe eyilikpa so nna a fin asɔ a sa mbe kumu nna. Ekama wora kɔnɔ nna a shin nɛ loŋ be asheŋ bee wora. ⁴Bumo to be basa nɛ bumo be kebaawɔtɔ niŋi nɛ baa ji kashenteŋ gba maŋ bɔ. B du fanɛ ewidibi nna.

To, kachɛ fo nɛ Ebɔrɛ e gberge edimɛdi kusoe, fanɛ kananɛ e bɔla anebiana na so ŋ kpele bumo kusoe na. Naniere bumo be nfɛra wulto nna. ⁵Sa maŋ kaŋ yirda fo echenashapo ŋko fo teri kikɛ. Baa de kusɔ nɛ fee kaŋɛ fo eche gba so. ⁶Jemanɛ mo nɛ an wɔ to ere, bibinyɛn bee keni bumo tutoana nna fanɛ bewulpo. Bibiche malɛ maa sa bumo nioana kashuli nɛ bechekilpo malɛ bee tu bumo shacheana a bile. Naniere esa gbagba be kanaŋ to ebi e la mo doŋana.

⁷Ama ma ere bee keni Enyɛnpe Ebɔrɛ na be anishito nna nseŋ ta tama a jo mo nɛ e mɔlga ma. Ma Ebɔrɛ na malɛ beeŋ nu ma kekule.

Enyɛnpe Ebɔrɛ na ka beeŋ bar kumɔlga be asheŋ

⁸N doŋana, men sa maŋ shin nɛ menyi be ŋgbene e fuli nɛ men baa ji njɔŋ ma so. Hale nɛ n tɔr gba, ŋ kraa beeŋ koso. Nɛ n chena tentembiri to gba, Enyɛnpe Ebɔrɛ na e la ma kefulto. ⁹N wora alubi n da Enyɛnpe Ebɔrɛ na so, amoso meeŋ wora kanyiti n ji mbe agbo be tɔrɔ n ya fo saŋɛ nɛ e beeŋ ba kɔ n sa ma. M baa nyi geeŋ fanɛ e beeŋ naŋ shin nɛ asheŋ a nyalɛ nɛ e juŋkpar ma m ba kefulto to. ¹⁰Saŋɛ na so nɛ ma doŋana nɛ b kaŋɛ le: “Nnɛ nɛ Enyɛnpe fo Ebɔrɛ na wɔ?” An wu kusɔ nɛ e wora na nɛ nyɔmɔ e pɛ bumo. Ma anishi ere nɛ meeŋ ta n wu asheŋ ka beeŋ bri bumo. Hale naniere gba n wu fanɛ b ki fanɛ kebɔrbi so be depɔ nna nɛ basa bee chichi so.

¹¹O Jerusalɛmebi, saŋɛ fo nɛ b lɔŋɛ kadegboŋ na be egbalana m pɔr. Jemanɛ na kaŋ fo menyi be kasawule be egbaŋ beeŋ kpalga to n ti so. ¹²Basa beeŋ shi Asiriya be efuli nɛ k wɔ epeŋilarkpa be kaba so na nɛ Ijipt be efuli so be ndegboŋana to nɛ abonfu nɛ a wɔ Yufreetes be lɔr na nɛ nde wɔfɔ ashi etekuana nɛ abeegboŋana na so m ba menyi kutɔ. ¹³Ama efuli pɔtɛana bre be nsawule beeŋ ki keshishɛrsawule ŋkpal bumo be basa be amukpakpaso so.

Enyɛnpe Ebɔrɛ be kashagboŋ nɛ e kɔ n sa Israɛl be asheŋ

¹⁴O Enyɛnpe Ebɔrɛ, baa la fanɛ mbolpɔkpapo n sa fo basa laraso. Kashenteŋ nna fanɛ b pesaŋ to nna a wɔ kiyi to, ama kudɔsawule lela kulti bumo nna n wɔtɔ. Amoso shin nɛ b ya chena Bashan nɛ Giliad be nsawule lela so a nya a ji fanɛ kananɛ b daa nya a ji dra na.

¹⁵Enyɛnpe Ebɔrɛ, yaŋ wora emamachisheŋ n sa anyi fanɛ kananɛ fo daŋ wora saŋɛ nɛ fo daŋ lara anyi ashi Ijipt be efuli so na. ¹⁶Efuli pɔtɛana nɛ baa puchi bumo be eleŋ so beeŋ wu asheŋ ere nɛ aba e pɔ bumo nɛ b lo bumo be nnɔ nseŋ ti bumo be asoe kagbenejijaso. ¹⁷Kumo be kaman nɛ b dese kasawule a gbeye fanɛ awɔ nsaa chicha kufuso a lar mboŋ lempoana nɛ b daa wɔtɔ to na. Bumo alɛ beeŋ kilgi kufuso m bɛta m ba Enyɛnpe Ebɔrɛ na kutɔ.

¹⁸O Enyɛnpetale Ebɔrɛ, Ebɔrɛ kikɛ maŋ naa wɔtɔ a du fanɛ fo. Fo e naa ta fo basa be alubi a paŋ bumo. Fo alɛ be agbo maa wɔtɔ a yɔ. Kuwɔrwu e naa fuli fo kagbene. ¹⁹Fo e naa wu anyi kuwɔr fanɛ kananɛ fo daa wora na. Fee chichi anyi be alubi so nna a ta amo a lɛ teku be kechimbi to. ²⁰Feeŋ lara fo kashenteŋji nɛ kasha nɛ k maa loge na ŋ ŋini fo basa nɛ b la an nananyɛnana Eebraham nɛ Jeekɔb be kaman to ebi na, fanɛ kananɛ fo chɛr n nase kumo be kɔnɔ n sa bumo na.