NFABEL

ANEBI JƐREMAYA BE

NFABEL

BE KAWƆL

Kebɔltofinfin ka tɔr Jerusalɛm be basa so be asheŋ

¹Jerusalɛm be kadegboŋ nɛ basa daŋ bɔlɔ kumo to na

e dese fuloŋ naniere na!

Kadegboŋ nɛ durnya kikɛ daa nyi kumo be asheŋ

nsaa sa kumo bunyaŋ ga na

e ki fanɛ ekulpoche na!

Kadegboŋ nɛ efuliana kikɛ daa shuŋ a sa na,

e ki somaŋji na!

²Kanyɛso kikɛ, kumo to be basa bee shu nna

nɛ anishichubi bee pɔ bumo be ŋgbuŋ.

Kumo beshapo kikɛ maŋ naa wɔtɔ

nɛ b lolo kumo n wushi kumo kagbene.

Kumo teriana kikɛ lar kumo kaman nseŋ debɔr kumo,

naniere b ki kumo be bedoŋ nna.

³Juda be efuli so be basa ki anya nna,

a ji awurfoŋ ashi efuli pɔtɛana so.

Efuli pɔtɛana so nɛ b wɔ a maa kɔ kakpa

nɛ baaŋ tre bumo gbagba pe.

Bedoŋ e kulti bumo n wɔtɔ,

nɛ ekpa maŋ wɔtɔ nɛ b bɔla so m mɔlga bumo be amu.

⁴Naniere esa kikɛ maŋ naa ba bɔrɛlambu

nɛ k yil Zayɔn be kebeegboŋ so na to

m ba kaa bunyaŋ Ebɔrɛ nchɛgboŋachɛ.

Beche fɔlbi nɛ baa boŋ nshɛ ndoŋ na bee ji awurfoŋ nna,

nɛ bɔrɛmatapoana na malɛ bee munto a shu.

Kadegboŋ na be mbunagboŋana na ase wora shruum

nɛ k wora fanɛ kebɔltofinfin ka pɛ Jerusalɛm na.

⁵Bedoŋ e naa ji kadegboŋ na so kuwura

nsaa wɔ kumo to a wora bumo be kepar.

Enyɛnpe Ebɔrɛ na e gberge Jerusalɛm be basa kusoe

ŋkpal asheŋ lubi damta nɛ b wora na so.

E shin nɛ bedoŋ pɛ bumo ŋ ki anya nna n yɔ efuli wɔfɔ so.

⁶Jerusalɛm be kemaŋkura kikɛ loge.

Kumo be bejuŋkparpoana ki fanɛ echibir nɛ akoŋ kɔ

nɛ b maŋ naa kɔ eleŋ nɛ b shile ŋ ŋana bekpampo so nna.

⁷Jerusalɛm be basa bee nyiŋi dra na

be kebaawɔtɔ lela nɛ b daa kɔ be asheŋ.

Jemanɛ nɛ bumo doŋana ba kɔ m pɔɔ bumo so na,

esa kikɛ daa maŋ chɛ bumo to.

Ŋkpal b ka kɔ n tɔr so, bumo doŋana

daŋ mushe nseŋ wora bumo eyur to nna.

⁸Jerusalɛm to be asheŋ lubi so,

k ki kadegboŋ nɛ ekama bee keni jiga nna.

Basa kama nɛ b daa sha kumo nsaa keni kumo a bɔlɔ kenishi,

kikɛ kishi kumo be asheŋ naniere nna.

Jerusalɛm be basa gbagba be asheŋ woraso

shin nɛ k wora eyurpi daŋkare be ekpa so nna.

⁹Kumo to be asheŋ lubi na daŋ dii efuli nna,

ama amo be asheŋ maŋ tir kumo be basa na.

Jerusalɛm be kebure n tɔr na daŋ lubi ga.

Esa kikɛ daa maŋ lolo kumo be basa na n ti bumo kagbene.

Bedoŋ daŋ pɔɔ basa na so nna nɛ baa shu a kaŋɛ

Enyɛnpe Ebɔrɛ na fanɛ e wu bumo kuwɔr.

¹⁰Bedoŋ na daŋ suge bumo be yawu kpakpaso be asɔ kikɛ nna.

Jerusalɛm be basa na daŋ wu befɔ na

ka luri bumo be bɔrɛlambu nɛ Enyɛnpe Ebɔrɛ daa

maŋ sa nnyamase ekpa fanɛ b luri kumo to na nna.

¹¹Jerusalɛm be basa na kikɛ daa fubel nna,

jemanɛ nɛ b daa fin kusɔ jiso nɛ b ji na.

B daa ta bumo be asɔ lela a chɛr ajibi

nɛ baaŋ ji nseŋ nya ŋkpa nna.

Le nɛ b daa kaŋɛ:

“Enyɛnpe Ebɔrɛ, keni awurfoŋ nɛ anyee ji.”

¹²Esa kama nɛ e bɔla ndoŋ a choŋ baaŋ kaŋɛ mo le:

“Keni, chɛ anyi to! Esa kikɛ maŋ naŋ ji awurfoŋ

nɛ k fo awurfoŋ nɛ anyee ji ere so.

Enyɛnpe Ebɔrɛ na e nya agbo

n shin k ba anyi so.

¹³Enyɛnpe Ebɔrɛ na e shin nɛ ebesa shi esoso

m ba luri anyi be eyurana to a chɔɔ fanɛ edɛ na.

K du fanɛ e ka sho kejigbelɛ m pɛ anyi nɛ an tɔr kasawule nna.

Kumo be kaman nɛ e yige anyi n wɔtɔ ebesa nɛ k maa yige to.

¹⁴Kewora fanɛ Enyɛnpe Ebɔrɛ na gama anyi be alubi kikɛ

n chɛ n shiga anyi be abɔ so nna nɛ amo be egbɛ

shin nɛ anyi be eleŋ kikɛ lar anyi to.

E ta anyi m bɔɔ an doŋana nɛ b chɔ anyi eleŋ ga enɔ nna,

nɛ anyi maŋ kɔ shɛŋ nɛ an wora bumo be anishito.

¹⁵Enyɛnpe Ebɔrɛ na wora anyi eyur to nna m mushe

anyi be benapo lempoana.

E shin nɛ benapo ba nna m ba mur anyi be mbrantiɛfɔlbi,

nseŋ chichi anyi be basa so fanɛ

kananɛ baa chichi greep be asɔrso so a wora yabra na.

¹⁶Amoso nɛ anyee shu anishichubi ga na.

Esa kikɛ maaŋ tiŋ n lolo anyi n ti anyi kagbene,

esa kikɛ malɛ maaŋ tiŋ n leŋ anyi to nɛ an naŋ nya kenyɛn.

Ŋkpal manɛ so, an doŋana pɔɔ anyi so

nɛ anyi maŋ naa kɔ shɛŋ kebaawɔtɔ to.

¹⁷An teŋi anyi be enɔana to nna a fin kechɛto,

ama esa kikɛ maŋ chɛ anyi to.

Enyɛnpe Ebɔrɛ na tre efuliana nɛ a kulti anyi na nna

nɛ b ba kɔ anyi kena kaba kama so.

Baa keni anyi nna fanɛ basa jiga.

¹⁸Enyɛnpe Ebɔrɛ na kɔ ekpa nɛ e wora loŋ,

ŋkpal manɛ so, anyi maŋ wora mo kasonu nna.

Kaplɛkama be basa, men nu nfe.

Men keni ebesa nɛ anyee ji.

An doŋana pɛ anyi be mbifɔlbi nna

n yɔ kenyaya to ashi efuli wɔfɔ so.

¹⁹An kela n tre basa nɛ anyi nɛ bumo kre

fanɛ anyeeŋ baa chɛ abar to kena be jemanɛ,

ama b kini keba chɛ anyi to.

Bɔrɛmatapoana na nɛ bejuŋkparpoana na daŋ fin ajibi nɛ

b ji kadegboŋ na to ŋ gben nseŋ wu n dese agbembi so.

²⁰O Enyɛnpe Ebɔrɛ, keni awurfoŋ nɛ ebesa damta

nɛ anyee ji ere!

Anyi be ŋgbene jija anyi nna ga ŋkpal anyi be alubi so.

Basa be kamɔ e sɔ agbembi so, nɛ anyi be elaŋana gba to.

²¹Ekama nu anyi ka bee munto a shu,

ama esa kikɛ maŋ wɔtɔ nɛ e lolo anyi.

An doŋana nyi etɔrɔ nɛ fo, Enyɛnpe Ebɔrɛ na, bar anyi so,

nɛ bumo be ŋgbene fuli bumo ŋkpal loŋ so.

Jande, nya manaŋ ŋ gberge bumo kusoe,

fanɛ kananɛ fo nase kɔnɔ na.

²²Sa maŋ kplaŋ bumo be asheŋ lubi so

n shin nɛ b nya bumo be amu n ji.

Kananɛ fo baŋ gberge anyi kusoe ŋkpal anyi be alubi so na,

gberge bumo alɛ gba kusoe ŋkpal bumo be alubi so.

Anyee munto a shu kagbenejijaso nna.

Anyi be tama kikɛ loge.”

Enyɛnpe Ebɔrɛ na ka gberge Jerusalɛmebi kusoe be asheŋ

¹Enyɛnpe Ebɔrɛ na daŋ nya agbo nna n shin nɛ

Zayɔn be kebee nɛ k wɔ Jerusalɛm to na

paŋ kumo be kemaŋkuragboŋ kikɛ.

Kumo e daa la kakpa nɛ Israɛlebi daa puchi so

nseŋ naa la kakpa nɛ mo gbagba be bɔrɛlambu wɔ.

Ama kachɛ nɛ e nya agbo na,

e daŋ bure kumo nna n lɛ kasawule.

²Enyɛnpe Ebɔrɛ na daŋ maŋ wu ndekarso nɛ a wɔ

Juda be efuli so na kikɛ kuwɔr nseŋ shin nɛ a mur.

E daŋ shin nɛ mboŋ lempoana nɛ a daa

kuŋ kasawule na kikɛ bure n tɔr nna,

nseŋ shin nɛ efuli na nɛ bejuŋkparpoana kikɛ ji anishinyɔr.

³Enyɛnpe Ebɔrɛ na daŋ nya agbo nna ga,

nseŋ daŋ shin nɛ Israɛl be basa paŋ bumo be eleŋ kikɛ.

An doŋana ka ba anyi so, e daŋ kini kechɛ anyi to nna.

Mbe agbo daŋ koso anyi so fanɛ edɛ nna a mur kusɔ kikɛ.

⁴E daa to anyi mbe atanyembi nna fanɛ edoŋ na.

Nseŋ daŋ mɔ basa kama nɛ b daa bar anyi

kagbenewushi nɛ kagbenefuli na.

E daŋ shin nɛ mbe agbo ba fanɛ edɛ nna m ba chɔɔ

anyi be nwu nɛ a wɔ Jerusalɛm to na n lɛ kasawule.

⁵Enyɛnpe Ebɔrɛ na daŋ mur Israɛl nna fanɛ edoŋ na,

nseŋ daŋ shin nɛ kumo be mboŋ lempoana nɛ

ewurkpaana ki alambure a dese.

N naŋ shin nɛ kebɔltofinfin nɛ kushu

naŋ wora keshi n ti so n sa Juda be efuli so be basa.

⁶E daŋ shin nɛ mbe bɔrɛlambu nɛ anyee shuŋ mo kumo to na

daŋ bure n tɔr nna fanɛ kudɔtobuu na.

Nseŋ shin nɛ nchɛgboŋ nɛ kewushiachɛ na be keji ba ekar.

Mbe agbogboŋ na so, e daŋ kini ewura na

nɛ bɔrɛmatapo na gba nna n lɛ.

⁷Enyɛnpe Ebɔrɛ na daŋ kini mbe bɔrɛsure nna n lɛ

nseŋ daŋ lar mbe bɔrɛlambu cheembi to ŋ ka kumo.

E daŋ sa bedoŋ ekpa nna nɛ b da Jerusalɛm be egbalana n lɛ,

nseŋ daa wora awɔr a ŋini fanɛ b kɔ m pɔɔ kakpa nɛ

an daa shuŋ Ebɔrɛ kagbenefuliso na so.

⁸Enyɛnpe Ebɔrɛ na gbagba daŋ yili kumo mbe kagbene to fanɛ

a daga egbalana nɛ a kulti Jerusalɛm na ka bure n tɔr.

E ka fara kumo be kebure e maŋ naŋ yige kikɛ,

a ŋini fanɛ e bee sha kumo be kemur cheche nna.

Naniere kumo be mboŋ lempoana

nɛ egbalana kikɛ bure a dese.

⁹Jerusalɛm be mbunagboŋana tɔr a pul eshishɛr to

nɛ ndibi nɛ baa ta a ber amo so na kikɛ buri to burburbi a dese.

Ewura nɛ bewurbi nɛ b daa wɔ ndoŋ na

kikɛ ki anya efuli wɔfɔ so nna.

Bɔrɛmatapoana na maŋ naa ŋini mbraana na,

anebiana na malɛ maŋ naa nu kubɔya kikɛ

ashi Enyɛnpe Ebɔrɛ kutɔ.

¹⁰Jerusalɛm be benimuana na daŋ buu nli be asɔbuuso a tase

kasawule a maŋ naa kɔ shɛŋ nɛ b kaŋɛ abar,

nseŋ wora eshishɛr ŋ gbiti bumo be amu to

a ŋini bumo be kagbenejija nna.

Nɛ bechefɔlbi na malɛ chena

ŋ kurgi amu n yuu to a keni kasawule.

¹¹M baŋ shu nna m pere anishi hale nɛ ma epun to bee besa.

Ma basa ka mur na shin nɛ ma kagbene jija ma hale nɛ m bɛlɛ.

Mbi wurbi nɛ mbi popɔrbi kikɛ kreŋ a dese agbembi so

ŋkpal esa kikɛ ka maŋ wɔtɔ nɛ e keni bumo so

ashi kadegboŋ na to so.

¹²Akoŋ nɛ achukoŋ so, mbia bee shu nna

a fin ajibi nɛ nchu bumo nioana kutɔ, bumo alɛ maa nya.

Amoso baa kreŋ a tɔr nna fanɛ enapo ka doro kena to n tɔr na;

nseŋ wu bumo nioana be enɔana to.

¹³O Jerusalɛmebi, manɛ nɛ ŋ kɔ nɛ ŋ kaŋɛ?

Nuso bre nɛ meeŋ tiŋ n lɔlɔ menyi? Ŋkpal manɛ so,

esa kikɛ maŋ naŋ ji awurfoŋ fanɛ kananɛ men ji ere.

Jɛrbi nɛ men ji ere maŋ kɔ ekar fanɛ teku;

tama be yiri kikɛ maŋ naa wɔtɔ n sa menyi.

¹⁴Menyi be anebiana maŋ naa kɔ shɛŋ nɛ b kaŋɛ menyi

nɛ mannɛ efɛ be kebaakuu a sa menyi.

Abɔrɛsheŋ nɛ b malga n sa menyi na

maŋ tiŋ n shin nɛ men wu menyi be alubi.

B shin nna nɛ menyee fɛ fanɛ

a maŋ daga men tuba n lar alubi to.

¹⁵Basa nɛ b bɔla kadegboŋ na ase a choŋ bee fɛl menyi nna.

Baa keni Jerusalɛm be alambure na nna

nsaa fifi amu a mushe.

Kumo be kaman nɛ b bishi le: “Kadegboŋ lela na nde a?

Kadegboŋ nɛ durnya kikɛ daa puchi so na nde a?”

¹⁶Menyi doŋana kikɛ bee mushe nna a wora menyi eyurto,

nsaa gbɛlɛ menyi yurkishi so.

Baa mɛr nnɔ nna nsaa kaŋɛ le: “An mur kumo!

Kachɛ nɛ an baa jo na nna na!”

¹⁷Kusɔ nɛ Enyɛnpe Ebɔrɛ na kre

nseŋ kaŋɛ fanɛ e beeŋ wora na nɛ e wora na.

Dra na kikɛ nɛ e kpele anyi kusoe fanɛ e maaŋ wu anyi kuwɔr;

e yɛ e beeŋ mur anyi, mo alɛ mur anyi kashenteŋto.

E shin nɛ an doŋana pɔɔ anyi so nɛ bumo be ŋgbene fuli,

ŋkpal an ka kɔ n tɔr so so.

¹⁸Jerusalɛmebi, men shu ŋgbene to ŋ ŋini Enyɛnpe Ebɔrɛ na.

Kapa nɛ kanyɛ, men shin nɛ men be anishichubi

e baa shile fanɛ lɔr na.

Men shu hale nɛ men be ebɔl e ya fɛa!

¹⁹Men koso n shu kanyɛ lelemu kikɛ ŋ ŋini Enyɛnpe Ebɔrɛ na

nseŋ bugi ŋgbene ŋ kule mo nɛ e wu menyi be mbia

nɛ akoŋ bee mɔ agbembi so be akɔlɔbi to kikɛ na kuwɔr!

²⁰O Enyɛnpe Ebɔrɛ, keni anyi a!

Manɛ nna nɛ fee gberge anyi kusoe loŋ?

A maŋ daga fanɛ bibinioana e baa daŋɛ

bumo be mbi shaso a we!

Ŋko nɛ basa e baa mɔ bɔrɛmatapoana nɛ anebiana na

fo bɔrɛlambu gbagba to loŋ!

²¹Mbifɔlbi nɛ basakpar kikɛ e wu a dese agbembi so na,

bedoŋ malɛ ta etokobi m mɔ mbrantiɛ nɛ besuŋgurbi.

Kachɛ nɛ fo nya agbo na nɛ fo shin nɛ bedoŋ mɔ bumo

nsaa maŋ wu bumo kuwɔr kikɛ.

²²Enyɛnpe Ebɔrɛ, fo kanya agbo so,

fo kela n tre n doŋana nna fanɛ basa nɛ fo tre kejigboŋ to na.

Esa kikɛ daa maŋ ji efute loŋ be kachɛ na.

Bedoŋ na daŋ mɔ ma mbia nɛ m bela a sha bumo ga na nna.

Kasogberge nɛ tuba nɛ tama be asheŋ

¹N la esa nɛ n ji awurfoŋ ga nna

ŋkpal Ebɔrɛ ka daŋ nya agbo n wɔtɔ ma so.

²E daŋ ju ma n lɛ tentembiri plɔ to,

kakpa nɛ kefulto kikɛ maŋ wɔ nna.

³Kashenteŋto, n nawule nɛ e gberge kusoe ale damta

nsaa maŋ wu ma kuwɔr kikɛ.

⁴Ebɔrɛ daŋ shin nɛ ma eyur so kikɛ wora achuu

nɛ ma eyur be eblaŋ kikɛ bɛlge,

nɛ ma awibi buri to nna.

⁵E daŋ shin nɛ kagbenejija damta nɛ kushu nɛ etɔrɔbi

ki fanɛ ebu nna ŋ kulti ma n wɔtɔ.

⁶E daŋ tintiŋ ma n chena tentembiri to

fanɛ esa nɛ e wu dra dra kikɛ nna.

⁷Ebɔrɛ daŋ yuu kunji nɛ m maaŋ tiŋ n dii nna

ŋ kulti ma n wɔtɔ,

nseŋ naŋ chɛ ma ŋgbɛlɛbi n nase.

⁸Ŋ ka shu awɔrso ŋ kule mo fanɛ e chɛ ma to,

e kini kenu ma kekule nna.

⁹Ebɔrɛ daŋ ta afalta gboŋgboŋi

n nase ma ekpa to nna,

nɛ n daa nite a lente.

¹⁰E daa du fanɛ kutuŋ ŋko buluŋ

nɛ e daŋ ŋana m pugi a jo ma

nɛ m ba nɛ e tɛ n yuu ma so nna.

¹¹Ŋ ka fo mo nɛ e tɛ n yuu ma so,

ŋ gberge ma n lar ekpa so

n ya kpɛa ma to wurwurbi n lɛ nseŋ choŋ.

¹²Ebɔrɛ daŋ ta mbe keta

n yuu ma so nɛ e to ma nna.

¹³E ka to ketanyembi na nɛ k ba

da ma kagbene to n ya pɛ ma kukuumu.

¹⁴Ŋ ki fanɛ kemɔmɔshia be kusɔ nna n sa ekama,

saŋkikɛ basa bee mushe ma nsaa wora ma eyurto nna.

¹⁵Ebɔrɛ shin nɛ kebaawɔtɔ ki kekera n sa ma.

¹⁶E ta ma anishi to ŋ gbiti kasawule,

nɛ ajembu buri ma anyii.

¹⁷M maaŋ naŋ tiŋ n nyiŋi asɔ nɛ e la

alenfia nɛ kayurwushi nɛ kagbenefuli gba.

¹⁸Amoso kusɔ nɛ ŋ kaŋɛ e la: “Asheŋ loge n sa ma!

M maaŋ naŋ tiŋ n ta ma tama n to Enyɛnpe Ebɔrɛ na so

nɛ e wora kusɔ ko n sa ma kikɛ.”

¹⁹M baa fɛ etɔrɔ damta nɛ e bee tu ma

nɛ ma kenawule be kebaanite cham cham a choŋ na be asheŋ,

k bee sa ma kagbenejija damta ga nna.

²⁰Amo be asheŋ be kebaafɛ jemanɛ kikɛ na

bee mɔ ma kiyoyu nna nsaa pɔ ma aba.

²¹Ama nɛ m baŋ nyiŋi kusɔ koŋwule ko bre,

k naa sa ma tama nna.

²²Kumo e la fanɛ, Enyɛnpe Ebɔrɛ na be alelasheŋ maa loge!

E daa maa wu kuwɔr nna, n dafanɛ anyi kikɛ mur.

²³Esa beeŋ tiŋ n yirda Enyɛnpe Ebɔrɛ na jemanɛ kikɛ

nɛ e baa wu mo kuwɔr kachipurso kikɛ.

²⁴Kusɔ nɛ mee kaŋɛ ma kagbene to e la:

“Enyɛnpe Ebɔrɛ na e baa la ma;

mo nɛ meeŋ tiŋ n ta ma tama n to so!”

²⁵Enyɛnpe Ebɔrɛ na la esa nna n sa

ekama nɛ e ta mbe yirda n wɔtɔ mo to

nsaa wora mo kasonu.

²⁶Amoso, a daga fanɛ anyi e baa wora kanyiti a jo

Enyɛnpe Ebɔrɛ na nɛ e mɔlga anyi.

²⁷Jemanɛ nɛ an la mbifɔlbi na

e daga fanɛ an koya le be kanyiti ere.

²⁸Nɛ Enyɛnpe Ebɔrɛ na tea sha fanɛ an ji awurfoŋ,

kumo ere an nya kanyiti n chena shruum a jo mo.

²⁹Kebar anyi be amu kaseto awurfoŋ be jemanɛ

beeŋ shin nɛ an koya kusɔ ko;

ŋkpal manɛ so, tama kraa wɔtɔ n sa anyi.

³⁰Hale nɛ b bri anyi nseŋ tege anyi gba, an sɔ kumo loŋ.

³¹Enyɛnpe Ebɔrɛ na la ewɔrwupo nna,

e maaŋ kini anyi n lɛ hale mbaanaayɔ.

³²Hale nɛ e shin nɛ awurfoŋ ba anyi so gba,

e kraa kɔ kushuso n sa anyi

ŋkpal mbe kasha ka shi ga so.

³³Anyi be kagbenejija nɛ keji ebesa

maa par Enyɛnpe Ebɔrɛ na.

³⁴Kekeni basa nɛ b wɔ kabuti to jiga,

nseŋ ta bumo fanɛ achɛbi a chichi so,

³⁵ŋko kepuni esa be kusɔ maa par mo.

Enyɛnpetale Ebɔrɛ na bee wu kusɔ kama,

³⁶mo alɛ nsaa nyi jemanɛ nɛ baa ji esa

durmu ashi demuji to.

³⁷Enyɛnpe Ebɔrɛ na maŋ sa kusɔ akpa

k maaŋ tiŋ n wora kikɛ.

³⁸Kulubi nɛ kelela be ketiŋ wora kikɛ

yil kusɔ nɛ Enyɛnpetale Ebɔrɛ na yili so nna.

³⁹Manɛ nna nɛ esa nɛ e kraa kɔ ŋkpa

bee fubel a bele asheŋ

jemanɛ nɛ e wɔ mbe alubi be kasogberge to?

⁴⁰Men shin nɛ an keni anyi be asheŋ woraso to nɛnɛ

nseŋ naŋ bɛta m ba Enyɛnpe Ebɔrɛ na kutɔ.

⁴¹Men shin nɛ an bugi anyi be ŋgbene n sa

Ebɔrɛ nɛ e wɔ ebɔrɛso na nseŋ kaŋɛ mo le:

⁴²An lar fo kaman n wora alubi!

⁴³Fo ka nya agbo so, fo maŋ wu anyi kuwɔr

nseŋ ju m buu anyi so n ya mɔ anyi.

⁴⁴K du fanɛ fo ka wɔ awɔlpa be egbal be kaman nna

nɛ kabɔrɛkule maaŋ tiŋ m bɔl kumo to n fo fo kutɔ.

⁴⁵Fo shin nɛ an ki fanɛ epi nɛ basa jiga n sa

durnya to be efuliana nna.

⁴⁶An doŋana bee tege anyi nsaa wora anyi eyur to.

⁴⁷An luri jɛrbi nɛ kemur damta to n lar,

naniere kufugboŋgboŋi be kebaawɔtɔ to nɛ an wɔ.

⁴⁸Mee shu anishichubi damta nna,

ŋkpal ma basa ka mur so.

⁴⁹M maa ba nɛ n yige kebaa shu anishichubi

⁵⁰n ya fo fanɛ Enyɛnpe Ebɔrɛ na ka beeŋ shi ebɔrɛso

n to kenishi ŋ keni n wu anyi nseŋ chɛ anyi to.

⁵¹Nɛ m baŋ wu kusɔ nɛ bedoŋ wora anyi be kadegboŋ to

be beche kikɛ na, ma kagbene bee jija ma ga nna.

⁵²N doŋana nɛ b kishi ma nɛ m maŋ wora shɛŋ na

daŋ fe abulbi nna m pɛ ma fanɛ kabuibi na.

⁵³Kumo be kaman nɛ b ta ma n wɔtɔ ketirbu to,

nseŋ bela ajembu a kpa ma ketirbu na to a fin kemɔ ma.

⁵⁴Ndoŋ nna nɛ nchu dii m muni ma kumu so,

nɛ n fɛ fanɛ naniere n wu nna na.

⁵⁵Ketirbu na be kaseto ndoŋ nɛ n wɔ

nseŋ shu n tre fo, Enyɛnpe Ebɔrɛ na.

⁵⁶Ŋ ka kule fo nɛ fo nu ma kabɔrɛkule.

⁵⁷Nseŋ kaŋɛ ma fanɛ n sa maa lɔ kufu.

⁵⁸Kumo be keman nɛ fo ba sɔ ma n yige

nseŋ mɔlga ma efute nɛ n ji ŋkpa.

⁵⁹Enyɛnpe Ebɔrɛ, fo nyi kulubi nɛ b wora ma;

amoso ji asheŋ na n chɛ ma to.

⁶⁰Fo nyi kananɛ n doŋana kishi ma,

nseŋ naa nyi kananɛ b kre kulubi a laŋɛ ma kaplɛa so.

⁶¹“O Enyɛnpe Ebɔrɛ, fo nu katege nɛ baa tege ma;

fo alɛ naa nyi bumo be ŋkre lubi kikɛ.

⁶²Karechɛ kikɛ baa kuli ma nna a ji ma asheŋ

nsaa kre ma nia lubi.

⁶³Kusɔ kama nɛ baa wora,

baa boŋ nshɛ nna a wora ma eyurto.

⁶⁴O Enyɛnpe Ebɔrɛ, gberge bumo kusoe

ŋkpal kusɔ nɛ b wora so.

⁶⁵Shoduu bumo nseŋ shin nɛ b ji awurfoŋ!

⁶⁶Nyagbo n ju m buu bumo so m mur bumo kuraa

nɛ b sa maŋ naa wɔ durnya to!”

Jerusalɛm ka bure n tɔr be kaman be asheŋ

¹Anyi be shuwa nɛ k bee nyɛkpɛ ga na kreŋ so

nɛ ajembu nɛ b ta m pɔr bɔrɛlambu na

pesaŋ to a dese agbembi so.

²Jerusalɛm be mbrantiɛfɔlbi daa du fanɛ shuwa

n sa anyi nna;

ama naniere bumo e ki fanɛ ebɔ be mpuliya

nɛ ekama bee keni jiga na.

³Ejiŋkamu gba bee nyipo bumo be bibi wurbi,

ama ma basa bre ki fanɛ keshishɛrsawule so

be mbuibi nɛ baa shile a ka bumo be bibi

a wora bumo be mbiwurbi na kumu kpakpaso nna.

⁴Baa shin nɛ akoŋ nɛ achukoŋ

bee mɔ bumo be mbi popɔrbi nna;

mbia na bee ta enɔ to a kule ajibi nna,

esa kikɛ malɛ maaŋ sa bumo ajibi nɛ b ji.

⁵Basa nɛ b daa ji ajibi lela nɛ amo be yawu du kpakpa ga na

nɛ akoŋ bee mɔ a lɛ agbembi so na.

Bumo nɛ b daa ji kedamaya na,

e naa amuni so a fin ajibi jiso na.

⁶Ma basa be kasogberge chɔ basa

nɛ b daa wɔ kadegboŋ nɛ baa tre Sodɔm,

nɛ Ebɔrɛ daŋ mur kumo epul to dra dra na peya.

⁷Anyi be benimuana be ŋgbene daŋ fuli nna parr fanɛ ateebi;

b daŋ maŋ kɔ saŋgre kikɛ bumo to.

Bumo alɛ daa kɔ eyur be alenfia, a walɛ eyurto nɛnɛ

nsaa kɔ kuwibi to be eleŋ ga, a walɛ eyur so nna.

⁸Ama naniere bumo e chɔɔ m biri fanɛ

adundumbi a dese agbembi so,

nɛ esa maaŋ naŋ tiŋ m pin bumo na.

B daŋ nyɔr nna ŋ ki awibi nawule fanɛ ndibi wɔlso na.

⁹Bumo nɛ b daŋ wu kena to na bɔ bumo nɛ akoŋ mɔ na.

Ŋkpal b ka maŋ nya ajibi nɛ b ji so,

akoŋ shin nɛ b ji awurfoŋ nna hale n ya wu.

¹⁰Kemurgboŋ nɛ k daŋ ba ma basa so na

daŋ shin nɛ beche nɛ baa sha bumo be mbia ga gbagba

daŋɛ bumo be mbia nɛ b wu nna n we ŋkpal akoŋ so.

¹¹Enyɛnpe Ebɔrɛ ka daŋ nya agbo ga so,

e daŋ shin nɛ Jerusalɛm be kadegboŋ na

ji edɛ nna m mur cheche.

¹²Ekama nɛ e wɔ kaplɛkama;

hale efuli pɔtɛana so be bewuraana gba

daa maŋ yirda fanɛ bedoŋ beeŋ tiŋ m bure

Jerusalɛm be mbunagboŋana n luri kumo to ŋ kɔ.

¹³Ama loŋ daŋ wora nna ŋkpal Jerusalɛm to be anebiana

nɛ bɔrɛmatapoana na ka daŋ wora alubi

nseŋ shin nɛ b mɔ basa nɛ b maŋ wora shɛŋ na so.

¹⁴Kashenteŋto, anebiana na nɛ bɔrɛmatapoana na

daa nite kadegboŋ na be agbembi so

cham cham fanɛ etanpo nna.

Ŋkpal basa nɛ b wu na be luwu be turju ka bɛ bumo so so,

esa kikɛ daa maa sha kefirgi n tege bumo to gba kuraa.

¹⁵Kusɔ nɛ basa bee kaŋɛ bumo nde: “Men shile anyi so!

Men wora eyurpi nna. Men sa maŋ beta anyi ere!”

Ŋkpal loŋ so efuli kama so nɛ b yɔ,

ndoŋebi gba bee kini bumo nna.

¹⁶Bumo be asheŋ daa maŋ naŋ tir Enyɛnpe Ebɔrɛ na,

amoso mo gbagba e daŋ shin nɛ b pesaŋ to n sɔ kaplɛkama.

E daa maŋ naa sa anyi be anebiana nɛ bɔrɛmatapoana na

bunyaŋ ŋko a wu bumo kuwɔr gba.

¹⁷Ade kikɛ be kaman, an daa keni a fin kechɛto

ashi efuli pɔtɛ ko kutɔ, ama anyi be tama ki fuloŋ;

ŋkpal manɛ so, efuli na maŋ tiŋ n chɛ to m mɔlga anyi.

¹⁸Bedoŋ daa fin anyi nɛ b mɔ ashi kegbembi kama so nna.

Amoso an daa maŋ naa tiŋ a nite agbembi so.

Anyi be kemur be jemanɛ fo,

anyi be nchɛ fo ekar nna na.

¹⁹An doŋana na daa du fanɛ kusore

ka bee fuu kusɔ na nna.

B daa ju a buu anyi so kaplɛkama nna

a fin anyi nɛ b pɛ.

Abee so nɛ b daa kuŋ anyi a pɛ,

ŋko pugi keshishɛrsawule so

a jo anyi nɛ an ba purgi bumo nɛ b pɛ.

²⁰B daŋ pɛ ewura nɛ Enyɛnpe Ebɔrɛ

gbagba lara n sa anyi nɛ an daa fute a yige mo so na nna.

Mo e la ewura nɛ an daŋ yirda fanɛ e beeŋ baa kuŋ anyi

ashi edoŋ kama nɛ e beeŋ ba kɔ anyi kena kutɔ.

²¹Menyi Edɔm be efuli so, nɛ Uz be kasawule so be basa,

menyi be ŋgbene fuli menyi nna nɛ menyee mushe.

Menyeeŋ ji jɛrbi nseŋ ji awurfoŋ ga.

Menyeeŋ nite kesaria a jante fanɛ men ka boo nsa na.

²²Zayɔn be kadegboŋ na to be basa bre

teŋ ka bumo be alubi be kukɔ nna na.

Enyɛnpe Ebɔrɛ na maaŋ naŋ shin nɛ an baa wɔ

kenyaya to ashi efuli pɔtɛ wɔfɔ so.

E beeŋ shin nɛ an bɛta m ba epe.

Ama menyi Edɔm be efuli so be basa bre,

e beeŋ gberge menyi kusoe nseŋ shin nɛ menyi

be asheŋ lubi e dii efuli nɛ ekama e pin amo.

Kekule Ebɔrɛ n fin mbe kuwɔrwu be asheŋ

¹Ndoŋ nna nɛ Jerusalɛm to be basa kule Ebɔrɛ ŋ kaŋɛ:

“O Enyɛnpe Ebɔrɛ, nyiŋi kusɔ nɛ k wora anyi ere.

To kenishi ŋ keni ŋaba nɛ an wɔ kumo to.

²Anyi be kasawule laŋɛ basa pɔtɛ be enɔ to;

nɛ befɔ sɔ anyi be nwu n chena to.

³An doŋana shin nɛ an ki amunibi,

nɛ an nioana malɛ ki bekulpoche.

⁴Naniere anyee ka nchu nɛ anyee nuu be kukɔ nna;

nsaa tɔ ndibi puga edɛ yawu kpakpaso.

⁵Basa nɛ baa ju anyi na baa ji anyi ayabi nna,

an gben ama anyi alɛ maaŋ tiŋ n yili n wushi.

⁶Ijipt nɛ Asiriya be efuliana so nɛ an ya kaa kule

ajibi nɛ anyeeŋ ji nseŋ nya ŋkpa a wɔtɔ.

⁷An nananyɛnana e daŋ wora alubi,

bumo alɛ maŋ naa wɔtɔ naniere.

Anyi e wɔtɔ a ji bumo be alubi na be awurfoŋ.

⁸Basa nɛ anya bɔ bumo e naa ji anyi so kuwura.

Esa kikɛ malɛ maŋ wɔtɔ nɛ e mɔlga anyi bumo be enɔ to.

⁹Anyee ta anyi be ŋkpa a kpa kelera nna pɔɛŋ nsaa nya ajibi jiso;

ŋkpal basa nɛ baa mɔ basa ka sɔ efuli na be kaplɛkama so.

¹⁰Akoŋ shin nɛ anyee lɔ hale a chicha,

nɛ anyi be eyurana bel edɛ fanɛ asure to.

¹¹B pur anyi be beche nɛ anyi be mbichesobi

Zayɔn be kebee so ashi Jerusalɛm

nɛ Juda be efuli so be ndeana to.

¹²B pɛ anyi be bewuraana n ya chɛ efɔl;

esa malɛ maa sa anyi be benimuana bunyaŋ.

¹³B nyaŋ anyi be mbrantiɛfɔlbi

nɛ baa kɔr ayu abo so fanɛ anya,

nɛ anyi be mbinyɛnsobi malɛ bee sulɔ

ndibi gbɛgbɛso a jante.

¹⁴Basakpar maŋ naa chena kadegboŋ na

be mbunagboŋana na ase a ji asheŋ.

Mbifɔlbi malɛ gba maŋ naa boŋ nshɛ.

¹⁵Kagbenefuli maŋ naa wɔ anyi to kikɛ;

anyi be epelana ki fanɛ nli nna nɛ anyee shu.

¹⁶Asɔ nɛ an daa puchi so na be kekama maŋ naa wɔtɔ.

Ŋkpal anyi ka wora alubi so, asheŋ maa nyalɛ a sa anyi.

¹⁷Anyi be eyur be kaplɛkama bee besa nna;

anyi maŋ naa wu nɛnɛ ŋkpal anishichubi so.

¹⁸Ekama shile Zayɔn be kebee na so nɛ k dese fuloŋ,

nɛ ejiŋkaamu sɔ kumo so a wora bumo be kepar.

¹⁹Ama fo, Enyɛnpe Ebɔrɛ na e la ewura mbaanaayɔ.

Fo e naa ji kuwura hale n ya fo jemanɛ be lalaloge.

²⁰Nɛ manɛ nna nɛ fo teŋ anyi so n chɛr loŋ?

Manɛ nna nɛ fo kplaŋ anyi so loŋ?

²¹O Enyɛnpe Ebɔrɛ, naŋ bɛta anyi m ba fo kutɔ!

Nseŋ naŋ shin nɛ an nya anyi be kebaawɔtɔ lela dra na!

²²Ŋko fo kini anyi nna n lɛ mbaanaayɔ?

Ama fo agbo maŋ kɔ ekar a?”