JOSHUWA

JOSHUWA

BE KAWƆL

Ebɔrɛ ka ŋini Joshuwa kusɔ nɛ e beeŋ wora be asheŋ

¹Enyɛnpe Ebɔrɛ be kayɛrbi Mosis ka wu be kaman, nɛ Enyɛnpe Ebɔrɛ na kaŋɛ Nun pibi Joshuwa nɛ b daa bela mo ase nɛ e sɔ Mosis so na le: ²“Naniere ma kayɛrbi Mosis wu, amoso fo nɛ Israɛlebi ere kikɛ e koso n dii Jɔɔdan be lɔr na n yɔ kasawule nɛ ŋ kɔ a sa bumo na so. ³Kaplɛkama nɛ fo ta fo keya n chi, meeŋ shin nɛ k baa la feya, fanɛ kananɛ n nase kɔnɔ n sa Mosis na gbagba. ⁴Menyi be kasawule beeŋ fara kelargato be kaseto be keshishɛrsawule na ase n ya fo Lebanɔn be abee so ashi kelargato be esoso, nɛ lɔrgboŋ nɛ baa tre Yufreetes na ashi epeŋilarkpa nseŋ bɔla Hitebi be efuli so n ya fo teku nɛ baa tre Mɛditerenia na ashi epeŋitɔrkpa. ⁵Esa kama malɛ maaŋ tiŋ m pɔɔ fo so fo kebaawɔtɔ to kikɛ. Kananɛ n daa wɔ Mosis be kaman na, loŋ nɛ meeŋ baa wɔ fo alɛ gba be kaman. M maaŋ yige fo ŋko ŋ kplaŋ fo so kikɛ.

⁶Leŋ fo kumu to nsaa kɔ kagbene, ŋkpal manɛ so, fo e naaŋ juŋkpar basa ere n ya sɔ kasawule nɛ n nase kɔnɔ fanɛ meeŋ ta n sa bumo nananyɛnana na. ⁷Leŋ fo kumu to nsaa kɔ kagbene nɛ kenyɛn. Wora ania a bɛ mbra nɛ ma kayɛrbi Mosis sa fo na so. Sa maŋ kaŋ yige mbra na be kedosobi gba n lɛ. Nɛ fo wora loŋ bre kaplɛkama nɛ fo yɔ, asheŋ beeŋ baa nyalɛ, a sa fo. ⁸Sa maŋ yige kebaamalga mbra be kawɔl ere be asheŋ. Baa koya kumo kapa nɛ kanyɛ kikɛ. Fo alɛ nsaa de so a bɛ kusɔ nɛ mbra na bee ŋini na kikɛ so. Saŋɛ na so feeŋ nya nɛfa nɛ fo asheŋ malɛ e baa nyalɛ a sa fo. ⁹Nyiŋi fanɛ n teŋ kaŋɛ fo fanɛ fo baa leŋ fo kumu to nsaa kɔ kagbene. Sa maŋ shin nɛ kufu e pɛ fo nɛ fo pɔ aba, ŋkpal manɛ so, kaplɛkama nɛ fo wɔ, ma, Enyɛnpe fo Ebɔrɛ na wɔ fo kaman.”

Joshuwa ka malga n sa basa na be asheŋ

¹⁰Ndoŋ nna nɛ Joshuwa kaŋɛ Israɛlebi na be ekrachi nimusoana le: ¹¹“Men nite keeyi na to ŋ kaŋɛ men be basa kikɛ fanɛ b bela ase n ta bumo be ajibi nɛ nchu, ŋkpal manɛ so nchɛ asa be kefɛato menyeeŋ dii Jɔɔdan be lɔr na n ya sɔ kasawule nɛ Enyɛnpe menyi be Ebɔrɛ na kɔ a sa menyi na so.”

¹²Ama Ruben nɛ Gad be yiri to ebi nɛ Manase be yiri to ebi be bargato na bre, le nɛ Joshuwa daŋ kaŋɛ bumo: ¹³“Men nyiŋi kusɔ nɛ Mosis nɛ e la Enyɛnpe Ebɔrɛ be kayɛrbi na kaŋɛ menyi na. E yɛ Enyɛnpe menyi be Ebɔrɛ na ta kasawule nɛ k wɔ Jɔɔdan be lɔr na be epeŋilarkpa ere nna n sa menyi nɛ men baa wɔ kumo so kagbenewushiso. ¹⁴Menyi be beche nɛ mbia nɛ asɔbɔya e ba wɔ nfe nɛ bumo nɛ b la benapo nseŋ bela ase nɛ bumo be akɔsɔ kikɛ na e juŋkpar bumo niopibiana n ya chɛ bumo to ŋ kɔ ¹⁵n ya fo saŋkama nɛ Enyɛnpe na beeŋ sa bumo alɛ gba ewushi fanɛ kananɛ e sa menyi na. Kumo be kaman pɔɛŋ nɛ men bɛta n ya chena men be kasawule nɛ Enyɛnpe Ebɔrɛ be kayɛrbi Mosis ta n sa menyi ashi Jɔɔdan be lɔr na be epeŋilarkpa na.”

¹⁶Ndoŋ nna nɛ b shuli so ŋ kaŋɛ Joshuwa le: “Asɔ kama nɛ fo kaŋɛ anyi, anyeeŋ wora. Nɛ fo naŋ shuŋi anyi kaboŋ kama gba nna, anyeeŋ yɔ. ¹⁷Kananɛ an baŋ nu n sa Mosis na, loŋ nɛ anyeeŋ nu n sa fo alɛ gba. Enyɛnpe Ebɔrɛ na e ba wɔ fo kaman fanɛ kananɛ e daa wɔ Mosis be kaman na. ¹⁸Ekama nɛ e kini kebɛ fo mmalga nɛ kusɔ kama nɛ fo kaŋɛ so, daga luwu nna. Kusɔ nɛ k wɔtɔ e la fanɛ baa leŋ fo kumu to nsaa kɔ kagbene.”

Mbɔ nɛ b yɔ nɛ b ya dara Jɛriko na be asheŋ

¹Saŋɛ nɛ Israɛlebi na be keeyi to daa wɔ Shitim na nɛ Nun pibi Joshuwa shuŋi basa anyɔ fanɛ b dii Jɔɔdan be lɔr na be kaba ndoŋ n ya ŋana n dara Keenan be kasawule na, fɔnfɔŋ Jɛriko. Basa na ka fo Jɛriko be kade to nɛ b ya luri sakaleche ko nɛ baa tre Reehab be laŋ to. ²Nɛ Jɛriko be ewura nu fanɛ Israɛlebi ko ba ndoŋ nɛ b ba ŋana n dara bumo be kasawule. ³Ndoŋ nna nɛ ewura na shuŋi ŋ kaŋɛ Reehab fanɛ e lara basa nɛ b ba luri mbe laŋ to na m ba. E yɛ b ba nna nɛ b ba ŋana n dara bumo be kasawule.

⁴Nɛ Reehab nɛ e ta basa na ŋ ŋana na yɛ: “Kashenteŋto, basa ko ba ma kutɔ, ma alɛ maŋ nyi kakpa nɛ b shi. ⁵Kakpa ka bee biri to, saŋɛ nɛ k daga fanɛ b ti kade be kabunagboŋ na nɛ basa na lar n choŋ. Ma alɛ maŋ nyi kakpa nɛ b bɔla. Shile m bɛ bumo so manaŋ. Ashere feeŋ tu bumo.” ⁶Ama Reehab daŋ keta bumo nna n ya ŋana ebu be esoso be kakpa nɛ e bee yili mbe efɔl nɛ e kɔ e lue asɔ na. ⁷Ndoŋ nna nɛ ewura na be basa na lar kade na to n nite a fin befɔ na hale n ya fo kakpa nɛ baa dii Jɔɔdan be lɔr na. B ka baŋ lar na nɛ b ti kade na be kabunagboŋ na. ⁸Pɔɛŋ nɛ kanyɛ e biri nɛ befɔ na e dese na nɛ Reehab dii kuchoŋi na so ŋ kaŋɛ bumo le: ⁹“M baa nyi geeŋ fanɛ Enyɛnpe Ebɔrɛ na ta kasawule ere nna n sa menyi nɛ kumo be loŋ e shin nɛ kufu nɛ keyeŋiyeŋi e tɔr ekama nɛ e wɔ efuli ere so so. ¹⁰Ŋkpal manɛ so, an nu kananɛ Enyɛnpe Ebɔrɛ na shin nɛ teku peper na wɔlto saŋɛ nɛ men lar ljipt be efuli so a ba na, nɛ kananɛ men kɔ Sihɔn nɛ Ɔg nɛ b daa ji kuwura Amɔriebi be kasawule nɛ k wɔ Jɔɔdan be epeŋilarkpa na kena m mur bumo nɛ bumo be asɔ kikɛ na be asheŋ. ¹¹An ka nu loŋ nɛ anyi be ŋgbene jija anyi ga nɛ ekama malɛ gba be aba pɔ mo ŋkpal menyi so. Enyɛnpe menyi be Ebɔrɛ na e naa ji kuwura esoso nɛ kasawule so kikɛ. ¹²Amoso men jande, men nase kɔnɔ n sa ma nseŋ bɔ ntaŋ Enyɛnpe Ebɔrɛ na be ketre to fanɛ menyeeŋ wora ma nɛ ma kanaŋ kikɛ kelela, ŋkpal ŋ ka wora menyi kelela so. ¹³Men nase kɔnɔ fanɛ menyi maaŋ wora n tuto nɛ n nio nɛ n siponyɛnana nɛ n sipocheana nɛ bumo be basa kikɛ shɛŋ nsaa beeŋ mɔlga anyi ashi luwu to.”

¹⁴Nɛ basa na yɛ: “Nɛ an baŋ maŋ wora kusɔ nɛ anyee shin nɛ an kaŋɛ fo ere, Ebɔrɛ e mɔ anyi. An nase kɔnɔ fanɛ nɛ fo baŋ maŋ kaŋɛ basa kusɔ nɛ anyee wora ere bre, kumo ere nɛ Enyɛnpe Ebɔrɛ na baŋ ta kasawule ere n sa anyi bre, anyeeŋ wora menyi kelela.”

¹⁵Ndoŋ nna nɛ Reehab ta efɔl n chɛ n chulgi mbe tokuro to nɛ basa na bɔla kumo so ŋ gbelge to, ŋkpal manɛ so mbe ebu daa yil egbal nɛ b pɔr ŋ kulti kade na so nna. ¹⁶Kumo be kaman nɛ e kaŋɛ bumo le: “Men ya ŋana abee to, saŋɛ na so basa nɛ baa fin menyi na maaŋ wu menyi. Men ba wɔ abee na to n ya fo nchɛ nsa. B kaŋ fin menyi ŋ gben nseŋ bɛta m ba na pɔɛŋ nɛ men baa yɔ kakpa nɛ menyee yɔ.”

¹⁷Nɛ basa na kaŋɛ mo le: “Anyeeŋ bɛ kɔnɔ nɛ an nase n sa fo na so. ¹⁸Ama, an kaŋ bɛta m ba nɛ an ba kɔ menyi be efuli so ebi kena fo ta efɔl peper ere n cha fo tokuro nɛ anyeeŋ bɔla kumo to n lar na. Kumo be kaman nɛ fo bar fo tuto nɛ fo nio nɛ fo siponyɛnana nɛ fo kanaŋ kikɛ fo laŋ to. ¹⁹Ama men be ekama nɛ e kaŋ lar fo laŋ to nɛ b mɔ mo bre, k maaŋ baa la anyi be asheŋ. Ekama nɛ e ŋana fo laŋ to bre kaŋ baŋ, wu kumo ere mbe turju e baa bɛ anyi. ²⁰Nɛ fo kaŋ lara wulo ere kowu bre, kumo ere kɔnɔ nɛ an nase fanɛ anyeeŋ wora fo kelela ere maaŋ naŋ shuŋ.”

²¹Nɛ Reehab kaŋɛ: “Mm, n shuli. Kanaŋ kama nɛ men baŋ yili kumo, k ba du loŋ.” Ndoŋ nna nɛ e shin nɛ basa na yɔ nɛ e ta efɔl peper n chɛ mbe tokuro. ²²Nɛ basa nɛ b ba nɛ b ba ŋana n dara efuli na lar n ya ŋana abee na to nchɛ asa nɛ basa nɛ baa fin bumo na fin bumo ŋ gben nseŋ bɛta n yɔ Jɛriko. ²³Kumo be kaman nɛ basa anyɔ nɛ b ba nɛ b ba ŋana n dara efuli na malɛ lar abee na to n ya yuu Jɔɔdan be lɔr na to n dii n ya kaŋɛ Nun pibi Joshuwa kusɔ kama nɛ k wora. ²⁴Le nɛ b kaŋɛ Joshuwa: “Enyɛnpe Ebɔrɛ na ta bumo be kasawule na kikɛ m bɔɔ anyi enɔ. Kufu daŋ pɛ basa na ga nna ŋkpal anyi so.”

Israɛlebi ka dii Jɔɔdan be lɔr na be asheŋ

¹Kare ka chɛ kachipurdidi nɛ Israɛlebi na kikɛ lar Shitim be keeyi to n yɔ Jɔɔdan be lɔr na ase n ya wora bumo be keeyi to ndoŋ pɔɛŋ nseŋ dii lɔr na. ²Kumo be nchɛ asa be kaman nɛ bejuŋkparpoana na nite bumo be keeyi na to ŋ kaŋɛ basa na le: ³“Men baŋ wu bɔrɛmatapoana nɛ b shi Livai be kanaŋ to na ka sulɔ Enyɛnpe Ebɔrɛ be ŋkre be deka na, men lar men be keeyi to m bɛ kumo so. ⁴Loŋ nɛ menyeeŋ pin ekpa na m bɔla so nɛnɛ, ŋkpal manɛ so, menyi maŋ naŋ bɔla ekpa ere ŋ ku so kikɛ. Ama men sa maa nite a taga Enyɛnpe Ebɔrɛ be ŋkre be deka na to. Men barga kumo fanɛ ayadra ŋgboŋ asa.”

⁵Kede be kaman nɛ Joshuwa kaŋɛ basa na le: “Men lara kulubi kikɛ ashi men be ŋgbene to nsaa du cheembi saŋkama ŋkpal manɛ so Enyɛnpe Ebɔrɛ na beeŋ ba menyi kutɔ echefo m ba wora emamachisheŋ.”

⁶Le nɛ Joshuwa daŋ kaŋɛ bɔrɛmatapoana na malɛ: “Men ta Enyɛnpe Ebɔrɛ be ŋkre be deka na n juŋkpar basa na a yɔ.” Nɛ b ta kumo n juŋkpar bumo.

⁷Nɛ Enyɛnpe Ebɔrɛ na kaŋɛ Joshuwa le: “Kabre meeŋ maŋ fo so ashi Israɛlebi kikɛ be anishito, n shin nɛ b pin fanɛ kananɛ ma nɛ Mosis daa la na, loŋ nɛ ma nɛ fo alɛ gba beeŋ baa la. ⁸Kaŋɛ bɔrɛmatapoana nɛ b sulɔ ŋkre be deka na fanɛ b baŋ fo Jɔɔdan be lɔr na be ekarso, b yuu nchu na to n yɔ anishito n ya yili.”

⁹Nɛ Joshuwa kaŋɛ Israɛlebi na le: “Men shɛr n nu Enyɛnpe men be Ebɔrɛ na be kamalga. ¹⁰Kananɛ menyeeŋ pin fanɛ Enyɛnpe Ebɔrɛ nɛ e wɔ ŋkpa to na wɔ menyi kutɔ nde. E beeŋ ju Keenanebi nɛ Hitebi nɛ Hivebi nɛ Pɛrizebi nɛ Gɛgashebi nɛ Amɔriebi nɛ Jebusiebi nɛ b wɔ Jɔɔdan be lɔr be kaba ndoŋ na kikɛ. ¹¹Enyɛnpe nɛ e la durnya kikɛ be Ebɔrɛ na be ŋkre be deka na beeŋ juŋkpar menyi n yuu Jɔɔdan be lɔr na to. ¹²Amoso men lara Israɛl be nnaŋ kuduanyɔ na to be basa akoko. ¹³Saŋɛ na so bɔrɛmatapoana nɛ b sulɔ Enyɛnpe Ebɔrɛ nɛ e to durnya kikɛ na be ŋkre be deka na, be aya kaŋ baŋ yuu nchu na to, Jɔɔdan be lɔr na beeŋ ku to nɛ nchu nɛ a shil a ba e laŋɛ ŋ gbargbar n yili kaboŋ koŋwule fanɛ kebee na.”

¹⁴Basa na ka lar bumo be keeyi to nɛ b ya dii Jɔɔdan be lɔr na, nɛ bɔrɛmatapoana na sulɔ Enyɛnpe Ebɔrɛ be ŋkre be deka na n juŋkpar bumo. ¹⁵Kasɔteŋi be jemanɛ e daa la nɛ Jɔɔdan be lɔr na bɔlɔ n to chuful. Ama bɔrɛmatapoana nɛ b sulɔ ŋkre be deka na be aya ka baŋ chichi nchu na to, ¹⁶epul to nɛ lɔr na ku to nɛ nchu nɛ a shil a ba na bɛta kaman n ya fo kade nɛ baa tre Adam nɛ k wɔ Zaretan be efuli so na. Ndoŋ nna nɛ lɔr na be nchu nɛ a shil a yɔ na malɛ shile n ya luri Teku nɛ baa tre Araba na to, (kumo e la Nfɔl be Teku na). Kumo be kaman nɛ basa na dii lɔr na n yɔ kumo be kaba nɛ Jɛriko wɔ na. ¹⁷Bɔrɛmatapoana nɛ b sulɔ ŋkre be deka na daŋ yili kakpa wɔlso nna ashi Jɔɔdan be lɔr na be nferinto hale nɛ Israɛlebi na kikɛ nite kasawule wɔlso so n dii lɔr na n yɔ kumo be kaba ndoŋ.

Joshuwa ka yuu kanyiŋi be kejembu be asheŋ

¹Israɛlebi na ka dii Jɔɔdan be lɔr na n loge nɛ Enyɛnpe kaŋɛ Joshuwa le: ²“Shin nɛ basa akoko nɛ fo lara Israɛl be nnaŋ kuduanyɔ na to be ekama ³e ta kejembu ashi Jɔɔdan be lɔr na be nferinto be kakpa nɛ bɔrɛmatapoana na yil na, ŋ keta amo n ya fo kaplɛkama nɛ kanyɛ beeŋ biri nɛ men dese na, nseŋ ta amo n nase ndoŋ.”

⁴Ndoŋ nna nɛ Joshuwa tre Israɛl be basa kuduanyɔ nɛ b lara ashi kanaŋ kikɛ to na ⁵ŋ kaŋɛ bumo le: “Men be ekama e yɔ men Nyɛnpe Ebɔrɛ be ŋkre be deka na ase ashi Jɔɔdan be lɔr na be nferinto n ya ta kejembu n deŋi mbe kebatemu so n yili katelamu n sa mbe kanaŋ ashi Israɛl be nnaŋ kuduanyɔ na to. ⁶Kumo be loŋ beeŋ baa la tɔɔnɛ n sa menyi kachako so. Saŋɛ na so nɛ men nanabiana kaŋ bishi menyi kusɔ nɛ ajembu ere bee ŋini, ⁷nɛ men kaŋɛ bumo fanɛ Enyɛnpe be ŋkre be deka na ka daŋ bɔla Jɔɔdan be lɔr na to na nɛ k ku to anyɔ. Ajembu ere e la shɛda a nyiŋi anyi kusɔ nɛ k wora nfe ere mbaanaayɔ.”

⁸Ndoŋ nna nɛ basa na wora kusɔ nɛ Enyɛnpe Ebɔrɛ kaŋɛ Joshuwa na kikɛ nseŋ chala ajembu kuduanyɔ, nɛ a yili a sa Israɛl be nnaŋ kuduanyɔ na n nase bumo be keeyi to. ⁹Kumo be kaman nɛ Joshuwa shin nɛ basa ko malɛ tise ajembu kuduanyɔ n deŋi abar so kakpa nɛ bɔrɛmatapoana nɛ b sulɔ Enyɛnpe be ŋkre be deka na yil na. Loŋ be ajembu na kraa dese ndoŋ hale kabre.

¹⁰Bɔrɛmatapoana na sulɔ ŋkre be deka na nna a yil Jɔɔdan be lɔr na be nferinto hale nɛ basa na wora kusɔ kama nɛ Enyɛnpe Ebɔrɛ na kaŋɛ Joshuwa fanɛ b wora na. Loŋ nɛ Mosis gba daŋ kaŋɛ Joshuwa fanɛ e wora na. Basa na daŋ wora manaŋ nna n dii Jɔɔdan be lɔr na be kaba ndoŋ. ¹¹Basa na kikɛ ka dii lɔr na n loge na nɛ Bɔrɛmatapoana na malɛ ta Enyɛnpe Ebɔrɛ be ŋkre be deka na n dii a ba kakpa nɛ b wɔ na nɛ b yil a keni bumo. ¹²Ruben nɛ Gad be kaman to ebi be benyɛn nɛ Manase malɛ be kaman to ebi be benyɛn be bargato nɛ b daŋ bela ase nɛ b ya kɔ kena na e daŋ juŋkpar n dii lɔr na fanɛ kananɛ Mosis daŋ kaŋɛ bumo na. ¹³Basa ŋgboŋ adena e daŋ bela ase n dii lɔr na n yɔ kepla nɛ Jɛriko tase so na nɛ b ya kɔ kena ashi Enyɛnpe Ebɔrɛ na be anishito.

¹⁴Loŋ be kamɔnchɛ nɛ Enyɛnpe Ebɔrɛ maŋ Joshuwa so ashi Israɛlebi na kikɛ be anishito. Amoso yili loŋ be kachɛ na nɛ b fara a sa mo bunyaŋ fanɛ kananɛ b daa sa Mosis gba na.

¹⁵Enyɛnpe Ebɔrɛ na daŋ kaŋɛ Joshuwa le nna: ¹⁶“Kaŋɛ bɔrɛmatapoana nɛ b sulɔ Ebɔrɛ be ŋkre be deka na kenishipereso fanɛ b dii Jɔɔdan be lɔr na.”

¹⁷Ndoŋ nna nɛ Joshuwa kaŋɛ bɔrɛmatapoana na kenishipereso le: “Men lar lɔr na to n dii m ba nfe.”

¹⁸Bɔrɛmatapoana nɛ b sulɔ Enyɛnpe Ebɔrɛ be ŋkre be deka na be aya ka baŋ cha lɔr na be kegroŋgu so nɛ k naŋ fara a shile nseŋ bɔlɔ n to chuful epul na to.

¹⁹Kafɛ to be kufɔl sososo be kachɛ kudusopo nɛ basa na daŋ dii Jɔɔdan be lɔr na n ya wora bumo keeyi ashi kade nɛ baa tre Gilgaal nɛ k wɔ Jɛriko be epeŋilarkpa be kaba so na. ²⁰Ndoŋ nna nɛ Joshuwa koli ajembu kuduanyɔ nɛ b tise ashi Jɔɔdan be lɔr na to na n deŋi abar so ashi Gilgaal, ²¹nseŋ kaŋɛ Israɛlebi na le: “Men nanabiana kaŋ koso kachako so m bishi menyi le be ajembu ere be kifito, ²²men kaŋɛ bumo kananɛ Jɔɔdan be lɔr daŋ ku to nɛ Israɛlebi nite kumo to n dii na. ²³Nseŋ naŋ kaŋɛ bumo fanɛ Enyɛnpe nɛ e la bumo be Ebɔrɛ na, daŋ shin nɛ loŋ wora nna fanɛ kananɛ e daŋ shin nɛ Teku peper na ku to nɛ an daŋ nite kumo to n dii na. ²⁴Ŋkpal le be kusɔ nɛ k wora ere so bomin kikɛ beeŋ pin eleŋ nɛ an Nyɛnpe Ebɔrɛ ere kɔ nɛ kumo be loŋ e shin nɛ menyi alɛ e baa bunyaŋ mo saŋkama.”

Katutuku ashi Gilgaal be asheŋ

¹Amɔriebi be bewura nɛ b wɔ Jɔɔdan be epeŋitɔrkpa na nɛ Keenan be bewura nɛ b chena m mata teku nɛ baa tre Mɛditerenia na kikɛ ka nu kananɛ Enyɛnpe Ebɔrɛ shin nɛ Jɔɔdan be lɔr na ku to nɛ Israɛlebi na nite kumo to n dii na nɛ bumo ŋgbene fara a ku nɛ baa ŋana ketu Israɛlebi na ŋ kɔ.

²Jemanɛ nɛ Israɛlebi na daa wɔ Gilgaal na nɛ Enyɛnpe Ebɔrɛ kaŋɛ Joshuwa le: “Shil ajembu pɛlpɛlbi ŋ ku Israɛlebi na atutu.” ³Ndoŋ nna nɛ Joshuwa bɛ kusɔ nɛ Enyɛnpe Ebɔrɛ kaŋɛ mo na so nseŋ ku Israɛlebi na be atutu ashi kakpa nɛ b nase kumo be ketre Gibiaf Haaralɔf.

⁴Kusɔ nɛ k ba nɛ e daŋ wora loŋ e la fanɛ saŋɛ so nɛ b daŋ lar Ijipt a ba na bekama nɛ b daŋ fo kena be kekɔ na kikɛ daŋ wu nna ashi keshishɛrsawule na so. ⁵Pɔɛŋ nɛ b lar Ijipt na b daŋ ku bumo be benyɛn kikɛ atutu nna ama bekama nɛ b daŋ kurge keshishɛrsawule na to bre daa maŋ kuu. ⁶Bumo be bekama nɛ b daŋ fo kena be kekɔ saŋɛ so nɛ Israɛlebi na daŋ lar Ijipt be kasawule so a na keshishɛrsawule na so nfɛ adena na bre kikɛ daŋ wu nna ŋkpal b ka maŋ wora Enyɛnpe Ebɔrɛ na kasonu so. Loŋ koŋwule na nɛ bumo nananyɛnana daŋ ta kusoe kpakpaso m paŋ kasawule lela nɛ Enyɛnpe Ebɔrɛ nase kɔnɔ fanɛ e beeŋ sa bumo na. ⁷Amoso bumo be mbia nɛ b koso na nɛ Joshuwa daŋ ku atutu. ⁸B ka ku bumo kikɛ be atutu n loge na, nɛ Israɛlebi na kikɛ shir a wɔ bumo keeyi to hale n ya fo jemanɛ nɛ bumo atutu be achuu na wu.

⁹Ndoŋ nna nɛ Enyɛnpe Ebɔrɛ kaŋɛ Joshuwa le: “Naniere bre n lara kenyaya be anishinyɔr nɛ k daa wɔ menyi so saŋɛ so nɛ men daa wɔ Ijipt be efuli so na.” Amoso nɛ baa tre kakpa nɛ b ku atutu na Gilgaal hale kabre na.

¹⁰Kafɛ na to be kufɔl sososo na be kachɛ kuduanasopo na be kaaseso nɛ Israɛlebi na ji kebansonchoŋ be kejigboŋ na ashi bumo be keeyi to ashi Gilgaal nɛ k mata Jɛriko na. ¹¹B ka ji kebansonchoŋ be kejigboŋ na be ŋklade nɛ b fara n ji ajibi popɔr fanɛ, aboyu tɔso nɛ bodobodo nɛ a maŋ kɔ yiisi amo to ashi Keenan be efuli so. ¹²B ka ji ajibi popɔr na be ŋklade nɛ ajibi nɛ a daa shi esoso a tɔr to nɛ baa tre amo manna na, maŋ naa tɔr to. Ndoŋ nna nɛ b fara a dɔ Keenan be efuli so a nya bumo be ajibi.

Israɛlebi ka kɔ m pɔɔ Jɛriko so be asheŋ

¹³Joshuwa ka bee taga to Jɛriko na, epul to nɛ e wu kanyɛn ko ka yili mbe anishito a kɔ tokobi to. Ndoŋ nna nɛ e ya bishi mo le: “Fo alɛ gba la anyi to be eko nna ŋko anyi doŋ e la fo?”

¹⁴Nɛ kanyɛn na kaŋɛ le: “M maŋ la amo be kekama. Enyɛnpe Ebɔrɛ be benapo be enimu e la ma, nɛ m ba.” Ndoŋ nna nɛ Joshuwa gbir m bunyaŋ mo nseŋ kaŋɛ le: “Fo kenya e la ma, manɛ nɛ fee sha fanɛ n wora?”

¹⁵Nɛ Enyɛnpe Ebɔrɛ be benapo be enimu na kaŋɛ mo le: “Lara fo asɛbta na ŋkpal manɛ so kasawule cheembi so nɛ fo yil na.” Nɛ Joshuwa wora kusɔ nɛ e kaŋɛ mo na gbagba.

¹Jɛrikoebi daŋ ti egbal nɛ b pɔr ŋ kulti kade na be mbunagboŋana na kikɛ nna ŋkpal Israɛlebi na so. Esa kama malɛ daa maŋ kɔ ekpa nɛ e lar ŋko n luri kade na to.

²Ndoŋ nna nɛ Enyɛnpe Ebɔrɛ kaŋɛ Joshuwa le: “N ta Jɛriko be efuli so nɛ kumo be bewura nɛ benapo lempoana na kikɛ a bɔɔ fo enɔ. ³Fo nɛ fo benapo na kikɛ e nite ŋ kulti Jɛriko be kade na kela koŋwule karechɛ kama m bɛ abar so loŋ be nchɛ ashe. ⁴Men ta ŋkre be deka na nseŋ shin nɛ bɔrɛmatapoana na be basa ashunu e ta kpakpa be alambɛ be mbel juŋkpar kumo saŋɛ nɛ menyee kulti kade na. Kachɛ shunusopo na nɛ men kikɛ e nite ŋ kulti kade na ale ashunu nɛ bɔrɛmatapoana na malɛ e baa foŋ bumo be mbel na. ⁵Men baŋ nu bɔrɛmatapoana na ka foŋ bumo be mbel na n chɛr nɛ menyi alɛ e fara a cha awɔr. Aloŋ, kade na be egbal na beeŋ tɔr, nɛ menyi be benapo kikɛ e luri kumo to.”

⁶Nɛ Nun pibi Joshuwa tre bɔrɛmatapoana na ŋ kaŋɛ bumo le: “Men ta Enyɛnpe Ebɔrɛ be ŋkre be deka na nɛ menyi to be beshunu malɛ e ta bumo be mbel n juŋkpar kumo.” ⁷Kumo be kaman nɛ e ponte ŋ kaŋɛ basa na malɛ fanɛ b fara a nite a kulti kade na be egbal na nseŋ shin nɛ benapo ko juŋkpar bɔrɛmatapoana nɛ b kɔ mbel to nɛ bumo nɛ b sulɔ Enyɛnpe Ebɔrɛ be ŋkre be deka na.

^8-9Joshuwa ka malga n sa basa na n loge nɛ benapo ko juŋkpar nɛ bɔrɛmatapoana nɛ baa foŋ mbel na bɛ so n ta bumo nɛ b sulɔ Enyɛnpe Ebɔrɛ be ŋkre be deka na malɛ bɛ so nɛ benapo ko malɛ naŋ bɛ bumo nɛ b sulɔ ŋkre be deka na so. Le be jemanɛ ere so kikɛ malɛ nɛ baa foŋ mbel na. ¹⁰Joshuwa daŋ kaŋɛ basa na fanɛ b sa maŋ kaŋ cha awɔr kikɛ ŋko ŋ kaŋɛ kusɔ ko ama mo e baŋ sa bumo ekpa fanɛ b wora loŋ. ¹¹Kede be kaman nɛ e shin nɛ basa na sulɔ Enyɛnpe Ebɔrɛ be ŋkre be deka na n nite ŋ kulti kade na kela koŋwule pɔɛŋ nseŋ bɛta n yɔ bumo be keeyi to n ya dese.

¹²Kare ka chɛ chipurdidi, nɛ Joshuwa wule ŋ koso n shin nɛ bɔrɛmatapoana na nɛ benapo na naŋ nite ŋ kulti kade na kela nyɔsopo. ¹³Le nɛ b daŋ bɛ abar so n nite ŋ kulti kade na. Benapo ko e daŋ juŋkpar, n ta bɔrɛmatapoana beshunu nɛ baa foŋ mbel na m bɛ so, n ta bɔrɛmatapoana nɛ b sulɔ Enyɛnpe Ebɔrɛ be ŋkre be deka na m bɛ so nseŋ naŋ ta benapo ko m bɛ so lalaloge. ¹⁴Kachɛ nyɔsopo na gba kela koŋwule nɛ b daŋ nite ŋ kulti kade na pɔɛŋ nseŋ bɛta n yɔ bumo keeyi to. Aloŋ nɛ b daa wora kachɛ kama m bɛ abar so hale ya fo nchɛ ashe.

¹⁵Kachɛ shunusopo na be chipurdidi nɛ b nite ŋ kulti kade na ale ashunu, fanɛ kananɛ b daŋ chɛr a wora na gbagba. Loŋ be kachɛ na nawule nɛ b daŋ nite ŋ kulti kade na ale ashunu. ¹⁶B ka bee kulti kela shunusopo na, nɛ bɔrɛmatapoana na foŋ bumo mbel na n chɛr nɛ Joshuwa ponte ŋ kaŋɛ basa na le: “Men cha awɔr, ŋkpal manɛ so Enyɛnpe Ebɔrɛ na ta kade ere nna m bɔɔ menyi enɔ. ¹⁷Men mur kade na nɛ kusɔ kama nɛ k wɔ kumo to kikɛ nɛ kumo be loŋ e baa la sarga n sa Enyɛnpe Ebɔrɛ na. Sakaleche Reehab nɛ basa nɛ b wɔ mbe laŋ to nawule e naaŋ ji efute ŋkpal e ka daŋ ta basa nɛ an shuŋi fanɛ b ya dara kasawule na ŋ ŋana so. ¹⁸Men sa maŋ kaŋ ta asɔ nɛ a daga fanɛ men mur na be kekama, ŋkpal manɛ so, nɛ men baŋ wora loŋ, Enyɛnpe Ebɔrɛ na beeŋ shin nɛ menyi nɛ Israɛlebi nɛ b wɔ keeyi to na kikɛ e mur. ¹⁹Gbiti nɛ shuwa nɛ ntishaŋ peper nɛ kusɔ kama nɛ b ta kebɛlso n wora kikɛ la Enyɛnpe Ebɔrɛ na peya nna. Men ta amo kikɛ n wɔtɔ Enyɛnpe Ebɔrɛ na be kpanjawu to.”

²⁰Ndoŋ nna nɛ bɔrɛmatapoana na foŋ bumo be mbel na nɛ basa nu nseŋ cha awɔr nɛ egbal na kikɛ tɔr. Epul na to nɛ benapo na luri kade na to n sɔ kumo to kikɛ, ²¹nseŋ ta bumo etokobi m mɔ benyɛn nɛ beche nɛ mbia nɛ benimu nɛ kusɔ kama nɛ k wɔ kade na to kikɛ. B daŋ mɔ ana nɛ mbolpɔ nɛ ekurma nɛ amo kikɛ ki sarga n sa Ebɔrɛ.

²²Ndoŋ nna nɛ Joshuwa kaŋɛ basa anyɔ nɛ b daŋ shuŋi fanɛ b ya dara kade na le: “Men luri sakaleche na be laŋ to n lara mo nɛ mbe laŋ to ebi kikɛ ŋkpal manɛ so, loŋ be kɔnɔ nɛ men nase n sa mo.” ²³Nɛ b ya lara Reehab nɛ mo tuto nɛ mo nio nɛ mo daana nɛ mo sipoana nɛ mbe basa nɛ b wɔ laŋ na to na kikɛ. B daŋ lara bumo kikɛ nna n yɔ kakpa nɛ k mata Israɛlebi be keeyi to nɛ baaŋ nya kumɔlga na.

²⁴Kumo be kaman nɛ b wɔtɔ kade na nɛ kusɔ kama nɛ k wɔ kumo to kikɛ edɛ nɛ kumo kikɛ chɔɔ m mur. Shuwa nɛ gbiti nɛ kusɔ kama nɛ b ta katishaŋ peper nɛ abɛlso n wora na nawule nɛ b daŋ ta n wɔtɔ Enyɛnpe Ebɔrɛ be kpanjawu to. ²⁵Joshuwa daŋ yige Reehab nɛ basa nɛ b wɔ mbe laŋ to kikɛ bre nna ŋkpal e ka daŋ ta basa anyɔ nɛ e shuŋi Jɛriko na ŋ ŋana so so. (Reehab be kaman to ebi kraa wɔ Israɛl be efuli so hale kabre).

²⁶Loŋ be jemanɛ na nɛ Joshuwa daŋ fiɛ basa na so ŋ kaŋɛ le: “Enyɛnpe Ebɔrɛ e sho ekama nɛ e beeŋ naŋ laŋɛ n ya pɔr Jɛriko be kade ere kɔnɔ. Ekama malɛ nɛ e beeŋ naŋ ya fara a pɔr kumo be gbaltɔlase beeŋ paŋ mbe wurkoŋnyɛn. Ekama malɛ nɛ e beeŋ lɔŋɛ kumo be mbunagboŋana na m pɔr beeŋ paŋ mbe kaluge.”

²⁷Ŋkpal Enyɛnpe Ebɔrɛ na ka daa wɔ Joshuwa kutɔ so mbe ketre daŋ dii nna ga ashi efuli na kikɛ so.

Eekan be kulubi be asheŋ

¹Israɛlebi daŋ kini kenu n sa kusɔ nɛ Enyɛnpe Ebɔrɛ daŋ kaŋɛ fanɛ b sa maŋ kaŋ ta kusɔ kama ashi Jɛriko n lar na nna. Kanyɛn ko nɛ b daa tre Eekan daŋ wora n da kusɔ nɛ Enyɛnpe kaŋɛ na so nna. Ŋkpal loŋ so nɛ Enyɛnpe Ebɔrɛ nya agbo ga n wɔtɔ Israɛlebi na. Eekan mo tuto e daa la Kaami nɛ mo nananyɛn malɛ la Zabdi nɛ mo alɛ mo tuto daa la Zɛra nɛ e shi Juda be kanaŋ to na.

²Kachako nɛ Joshuwa shuŋi basa ko ashi Jɛriko fanɛ b yɔ Ai nɛ k mata Bɛfavɛn ashi Bɛtɛl be epeŋilarkpa na n ya ŋana n dara kananɛ ndoŋ be kasawule na du.

³B ka wora loŋ na nɛ b bɛta n ya kaŋɛ Joshuwa le: “K maŋ daga fanɛ Israɛl be benapo na kikɛ ka ya kɔ Aiebi na. Shuŋi basa ŋgboŋ anyɔ ŋko ŋgboŋ asa nawule. Sa maŋ shin nɛ benapo na kikɛ e yɔ kena na to, ŋkpal manɛ so kade na maŋ la kadegboŋ, nɛ kumo to be basa malɛ gba maŋ shi.” ⁴Amoso Israɛlebi be benapo ŋgboŋ asa e daŋ ya kɔ kena na, nɛ Aiebi na daŋ pɔɔ bumo so ⁵nseŋ mɔ Israɛlebi na be basa adesa nɛ ashe kikɛ. Aiebi na daŋ yili kade na be kabunagboŋ na ase nna n ju Israɛlebi na hale n ya fo kakpa nɛ baa bure ajembu to a pɔr na. Ndoŋ nɛ Israɛlebi na be aba pɔ bumo nɛ kufu pɛ bumo ga.

⁶Nɛ Joshuwa nɛ Israɛlebi be benimu na kikɛ kpɛa bumo be asɔbuuso to kagbenejijaso nseŋ tɔr kasawule ashi Enyɛnpe Ebɔrɛ be ŋkre be deka na ase n dese ndoŋ hale n ya fo kaaseso. B daŋ muu shishɛr gba nna n wurge bumo be amu so a ŋini fanɛ bumo be ŋgbene jija bumo ga. ⁷Ndoŋ nna nɛ Joshuwa kaŋɛ le: “Enyɛnpetale Ebɔrɛ, manɛ e ba nɛ fo ta anyi n dii Jɔɔdan be lɔr ere nɛ Amɔriebi e baa mur anyi? Manɛ nna bre, nɛ fo maŋ shin nɛ an wɔ lɔr na be kaba ndoŋ? ⁸Enyɛnpe Ebɔrɛ! Naniere Israɛlebi ka kilgi a shile bumo doŋana ere, manɛ nɛ n naa kɔ nɛ ŋ kaŋɛ fo? ⁹Keenanebi nɛ bekama nɛ b wɔ efuli ere so kikɛ beeŋ nu kesheŋ ere nseŋ kulti anyi n wɔtɔ m mɔ anyi kikɛ! Nɛ loŋ malɛ wora, nnɛ nɛ fo bunyaŋ naa wɔ?”

¹⁰Nɛ Enyɛnpe Ebɔrɛ kaŋɛ Joshuwa le: “Koso! Manɛ nna nɛ fo dese kasawule loŋ? ¹¹Israɛlebi wora kulubi nna! B kini kebɛ mbra nɛ n yili n sa bumo na so, nseŋ ta asɔ nɛ ŋ kaŋɛ fanɛ b mur kikɛ na be ako. B yuri nseŋ ku efɛ nseŋ ta asɔ na n wea bumo gbagba be asɔ to. ¹²Amoso nɛ Israɛlebi na maŋ tiŋ n yili n tu bumo doŋana na. B shile nna ŋkpal bumo gbagba ka ki basa nɛ baaŋ mur so. M maaŋ naa wɔ menyi kutɔ, ama men baŋ mur asɔ nɛ men ta ŋ ŋana na kikɛ nna!

¹³Kaŋɛ fo basa na fanɛ b lara alubi ashi bumo be ŋgbene to ŋ ki cheembi, saŋɛ na so, ma nɛ bumo beeŋ tiŋ n shɛr echefo, ŋkpal manɛ so, ma, Enyɛnpe Israɛl be Ebɔrɛ na kɔ le nɛ ŋ kaŋɛ: ‘Menyi Israɛlebi ka kɔ asɔ nɛ a maŋ daga men ka ta ŋ ki menyi peya so na so nɛ men doŋana pɔɔ menyi so na. Men maaŋ tiŋ n tu men doŋana ŋ kɔ, ama men baŋ lara amo efuli nna m mur amo!’

¹⁴Echefo kachipurso shin nɛ fo basa na kikɛ e lar n yili yiri yiri so, nɛ yiri kama nɛ meeŋ lara na e yili mbuna mbuna so. Nɛ kabuna kama nɛ meeŋ lara na e yili kanaŋ kanaŋ so. Nɛ kanaŋ kama nɛ meeŋ lara na be basa e yili kukoko to. ¹⁵Esa kama nɛ b kaŋ wu asɔ nɛ a maŋ daga na mo kutɔ, baaŋ chɔɔ mo nɛ mbe kanaŋ nɛ mbe asɔ nɛ e kɔ kikɛ, ŋkpal e ka shin nɛ le be anishinyɔr lubi ere ba Israɛl so nseŋ naŋ wora n da Enyɛnpe Ebɔrɛ be ŋkre na so so!”

¹⁶Kumo be ŋklade kachipurdidi nɛ Joshuwa shin nɛ Israɛlebi na kikɛ lar n yili yiri yiri so. Ndoŋ nna nɛ Enyɛnpe Ebɔrɛ lara Juda be yiri to ebi fanɛ bumo e wora n da so. ¹⁷Nɛ Juda be yiri to ebi kikɛ lar n yili mbuna mbuna so, nɛ e lara Zɛra be kabuna ebi. Kumo be kaman nɛ Zɛra be kabuna ebi lar n yili kanaŋ kanaŋ so nɛ e lara Zabdi be kanaŋ to ebi. ¹⁸Nɛ Joshuwa shin nɛ Zabdi be kanaŋ to ebi lar n yili kukoko to nɛ b lara Kaami pibi Eekan nɛ e la Zabdi mo nanabi na.

¹⁹Ndoŋ nna nɛ Joshuwa kaŋɛ mo le: “M pibinyɛn, sa Enyɛnpe Israɛl be Ebɔrɛ na kemaŋkura nseŋ ji kashenteŋ m bugi to ŋ kaŋɛ ma kusɔ nɛ fo wora kikɛ. Sa maŋ ta shɛŋ ŋ ŋana ma so.” ²⁰Nɛ Eekan kaŋɛ: “Kashenteŋ nna. N wora kulubi n da Enyɛnpe Israɛl be Ebɔrɛ na so. Kusɔ nɛ ma alɛ wora e la fanɛ, ²¹n daŋ wu Babilɔnebi be piŋi lela ko, nɛ gbiti nɛ kumo be egbɛ sa fanɛ kilo anyɔ, nɛ shuwa fanɛ kilo be bargato ka wɔ asɔ nɛ an suge na to nna nɛ amo be asheŋ par ma alegaiso nɛ n ta amo n ya puli ma wajɛbu to. Gbiti na e wɔ kaseto.”

²²Ndoŋ nna nɛ Joshuwa shuŋi mbɔ nɛ b shile n ya keni nɛ kashenteŋ nɛ e ta asɔ na m puli mbe wajɛbu na to nɛ gbiti na wɔ amo be kaseto. ²³Nɛ b pulgi asɔ na ashi wajɛbu na to nseŋ ta amo n yɔ Joshuwa nɛ Israɛlebi na kutɔ n ya nase Enyɛnpe Ebɔrɛ na be anishito.

²⁴Nɛ Joshuwa nɛ Israɛlebi na kikɛ pɛ Eekan nseŋ ta gbiti na nɛ piŋi na nɛ shuwa na, nɛ Eekan be mbia kikɛ nɛ mbe ekurma nɛ mbolpɔ nɛ mbe ana nɛ mbe wajɛbu nɛ kusɔ kama nɛ e kɔ kikɛ n yɔ ketaŋɛ nɛ baa tre Akɔɔ na to. Akɔɔ be kifito e la ‘Tɔrɔ’ ²⁵Nɛ Joshuwa kaŋɛ le: “Eekan, fo wɔtɔ anyi tɔrɔ to bre, ama Enyɛnpe Ebɔrɛ beeŋ gberge fo alɛ gba kusoe kabre!” Ndoŋ nna nɛ Israɛlebi na kpa Eekan nɛ mbe kanaŋ ajembu m mɔ nseŋ chɔ bumo nɛ bumo be asɔ kikɛ. ²⁶B daŋ bela ajembu gboŋgboŋi damta nna n deŋi Eekan so kululu. Nɛ Enyɛnpe Ebɔrɛ be agbo nyaŋnyaŋso na wushi. Amoso nɛ b kra tre kaboŋ na Akɔɔ be ketaŋɛ to hale kabre na.

Israɛlebi ka pɔɔ Ai so m mur kumo be asheŋ

¹Asheŋ ere be kaman nɛ Enyɛnpe Ebɔrɛ kaŋɛ Joshuwa le: “Keta fo benapo na kikɛ n yɔ Ai. Fo alɛ e sa maa lɔ kufu ŋko a pɔ aba. Meeŋ shin nɛ men kɔ m pɔɔ Ai be ewura na so, nɛ mbe basa nɛ mbe kade nɛ kasawule na kikɛ e ki menyeya. ²Kananɛ men baŋ wora Jɛriko nɛ kumo be ewura na, loŋ gbagba nɛ mee sha men ka wora Ai nɛ kumo be ewura, ama menyeeŋ tiŋ n ta bumo ere be asɔ nɛ asɔbɔya ŋ ki menyeya naniere bre. Shin nɛ benapo na be beko e wora shiriya n ya ŋana kupuŋ to kade na be ekarso a jo nɛ b kɔ kade na to ebi kena.”

³Nɛ Joshuwa nɛ mbe benapo kikɛ bela ase, nɛ e lara bumo to be bumo nɛ b kɔ kenyɛn ga na be ŋgboŋ adesa, nɛ b tu mo n yɔ Ai kumo be kanyɛso kikɛ. ⁴Ndoŋ nna nɛ Joshuwa kaŋɛ benapo na le: “Men kaŋ kusoe n nu nɛnɛ. Men be beko e ya pugi kade na be ekarso, nseŋ wora shiriya a jo, ama men sa maŋ barga kumo ga. ⁵Ma alɛ nɛ bumo nɛ b ka na beeŋ ba yɔ kade na be kabunagboŋ na ase. Aiebi na kaŋ lar m ba nɛ b ba tu anyi ŋ kɔ, anyeeŋ kilgi a shile fanɛ kananɛ an daŋ wora na. ⁶Loŋ na, baaŋ ju a bɛ anyi so n lar kade na to, a fɛ fanɛ an yaa shile bumo nna fanɛ sososo na nna. ⁷Saŋɛ na so b kaŋ ju anyi m barga kade na n yɔ kufɔ nɛ menyi alɛ e lar kupuŋ na to ŋ kɔ m pɔɔ kade na so. Men Nyɛnpe Ebɔrɛ na beeŋ ta kumo m bɔɔ menyi enɔ. ⁸Men kaŋ pɔɔ kade na so n loge, men wɔtɔ kumo kikɛ edɛ fanɛ kananɛ Enyɛnpe Ebɔrɛ kaŋɛ menyi na gbagba. Ma kubɔya nɛ ŋ kɔ a sa menyi nna na.”

⁹Kede be kaman nɛ Joshuwa shin nɛ benapo na be beko lar n ya ŋana Ai be epeŋitɔrkpa be kaba so ashi kumo nɛ Bɛtɛl be kefɛato. Nɛ mo ere nɛ benapo nɛ b ka na dese keeyi na to ŋklade.

¹⁰Kare ka chɛ chipurdidi nɛ Joshuwa tre benapo nɛ b ka na kikɛ n shin nɛ mo nɛ Israɛl be bejuŋkparpo na juŋkpar bumo n yɔ Ai. ¹¹Benapo nɛ b wɔ mo kutɔ na kikɛ daŋ chala nna m bɔla kade na be kabunagboŋ na be kaba so n ya wora bumo be keeyi to ashi kade na be kelargato be esoso be kaba so nɛ ketaŋɛ wɔ bumo nɛ Ai be kefɛato. ¹²Joshuwa daŋ lara basa ŋgboŋ anu nna n shin nɛ b ya ŋana kade na b epeŋitɔrkpa be kaba so ashi Bɛtɛl nɛ Ai be kefɛato. ¹³Le nɛ b daŋ barga benapo na to n chena. Benapo na be beko daŋ wora bumo be keeyi to nna ashi kade na be kelargato be esoso be kaba so nɛ bumo nɛ b ka na malɛ ya ŋana Ai be epeŋitɔrkpa be kaba so. Ama Joshuwa bre daŋ dese ketaŋɛ na to nna ŋklade.

¹⁴Ai be Ewura ka wu Joshuwa be basa na, nɛ mo nɛ kade na to be benyɛn kikɛ nya manaŋ ŋ koso kachipurdidi m bɔla Jɔɔdan be ketaŋɛ na be kaba so nɛ b ya kɔ Israɛlebi na ashi kaboŋ nɛ bumo nɛ bumo daŋ kɔ na. E daa maŋ nyi fanɛ Israɛlebi na be beko ŋana kade na be ekarso nɛ b kɔ mo. ¹⁵Ndoŋ nna Joshuwa nɛ mbe basa na kilgi a shile a yɔ keshishɛrsawule na be kaba so fanɛ Ai be basa na ka pɔɔ bumo so na. ¹⁶Nɛ Ai be benyɛn kikɛ koso n ju a buu bumo so. B daŋ ju m bɛ Joshuwa so hale nɛ bumo nɛ mo kikɛ ya barga kade na n yɔ kufɔ cheche. ¹⁷Enyɛn kikɛ maŋ naŋ ka Ai ŋko Bɛtɛl nɛ e maŋ lar n ju a bɛ Israɛlebi na so. Amoso kade na daŋ yato a dese nna a maŋ naa kɔ esa kikɛ nɛ e kuŋ kumo.

¹⁸Ndoŋ nna nɛ Enyɛnpe Ebɔrɛ kaŋɛ Joshuwa le: “Teŋi fo kekpa ere ŋ ŋini Ai, ŋkpal manɛ so meeŋ ta kumo m bɔɔ fo enɔ.” Nɛ Joshuwa wora loŋ. ¹⁹Joshuwa ka baŋ maŋ mbe enɔ so, epul na to nɛ benapo nɛ b daa puu kade na be kaba ko na lar manaŋ n luri kade na to ŋ kɔ m pɔɔ kumo so, nseŋ wɔtɔ kumo kikɛ edɛ.

²⁰Ai be benyɛn na ka gbɛ ŋ keni nɛ bumo be kade kikɛ bee suse edɛ nɛ edishi bee dii a yɔ awɔlpa to. Nɛ b wora cham a maŋ naa nyi kakpa nɛ baaŋ naŋ bɔla ŋ ŋana, ŋkpal manɛ so saŋɛ na so nɛ Israɛlebi nɛ b daŋ ju a yɔ keshishɛrsawule so na malɛ kilgi nɛ b kɔ bumo. ²¹Joshuwa nɛ mbe benapo na ka wu fanɛ bumo braana na pɔɔ kade na so nseŋ wɔtɔ kumo edɛ nɛ bumo alɛ gba fara a kɔ Ai be benyɛn na nsaa mɔ bumo. ²²Ndoŋ nna nɛ Israɛlebi nɛ b wɔ kade na to na gba ba chɛ bumo braana na to a kɔ. Israɛlebi na daŋ kulti Ai be benyɛn na kikɛ nna n wɔtɔ n mɔ bumo kikɛ. Bumo be ekama daa maŋ nya kakpa n shile, ekama malɛ daa maŋ pete. ²³Ai be ewura na nawule nɛ b daŋ pɛ n ya sa Joshuwa.

²⁴Israɛlebi na daŋ mɔ Ai be basa kama nɛ b daŋ ju m buu bumo so n yɔ keshishɛrsawule na so na kikɛ nseŋ bɛta n yɔ Ai be kade na to n ya mɔ bekama nɛ b ka ndoŋ malɛ. ^25-26Joshuwa daŋ maŋ mbe kekpa so nna n shoŋi Ai be kade nsaa maŋ bar kumo kaseto kikɛ hale nɛ b mɔ Ai be basa kikɛ n loge. Ai be benyɛn nɛ beche nɛ b daŋ mɔ kumo be kamɔnchɛ daa wɔ basa ŋgboŋ kuduanyɔ. ²⁷Israɛlebi na daŋ ta bumo be asɔbɔya nɛ bumo be asɔ kikɛ nna, ŋkpal manɛ so, loŋ nɛ Enyɛnpe Ebɔrɛ kaŋɛ Joshuwa fanɛ b wora.

²⁸Amoso Joshuwa e daŋ chɔ Ai be kade na kikɛ m mur n shin nɛ k ki alambure hale kabre. ²⁹E daŋ chɛ Ai be ewura na efɔl nna n shiga kedibi so nseŋ yige mbe kebuni n ya fo kaaseso. Epeŋi ka tɔr nɛ Joshuwa kaŋɛ fanɛ b ya shiga kebuni na kedibi na so n ya lɛ kade na be kabunagboŋ na ase. Kumo be kaman nɛ b bela ajembu gboŋgboŋi damta n deŋi ewura na be kebuni na so. Loŋ be kakpa na kra dese hale kabre.

B ka kraŋ mbra be kawɔl ashi Ebal be kebee na ase be asheŋ

³⁰Kede be kaman nɛ Joshuwa pɔr bɔrɛsure n sa Enyɛnpe Israɛl be Ebɔrɛ na ashi kebeegboŋ nɛ baa tre Ebal na so. ³¹Kananɛ Enyɛnpe be kayɛrbi Mosis daŋ kaŋɛ Israɛlebi na gbagba chap nɛ mo alɛ gba daŋ bɛ so m pɔr kumo, fanɛ kananɛ Mosis be mbra kaŋɛ le na: “Bɔrɛsure mo nɛ b ta ajembu nɛ b maŋ ta kebɛlso n shɛl m pɔr so nɛ baaŋ lara sarga chɔɔso, nɛ kɔnɔkoŋwuleso be sarga n sa Enyɛnpe Ebɔrɛ.” ³²Israɛlebi na kikɛ be anishito nɛ Joshuwa laŋɛ n sibɛ Mosis be mbra nɛ e sibɛ na n deŋi ajembu na so. ³³Israɛlebi na kikɛ nɛ bumo be bejuŋkparpo nɛ benimuana nɛ demujipoana nɛ befɔ nɛ bumo nɛ bumo wɔtɔ na barga to nna n yili Enyɛnpe Ebɔrɛ be ŋkre be deka na be mba anyɔ so ashi bɔrɛmatapoana nɛ baa sulɔ kumo na be anishito. Basa na be bargato daŋ pal kaman nna n sa kebeegboŋ nɛ baa tre Gɛrizim na nɛ bargato malɛ pal kaman n sa kebeegboŋ nɛ baa tre Ebal na. Enyɛnpe Ebɔrɛ be kayɛrbi Mosis e daŋ kaŋɛ bumo fanɛ b baa wora loŋ saŋkama nɛ b ba nɛ b ba sɔ nɛfa.

³⁴Ndoŋ nna nɛ Joshuwa kraŋ mbra na kikɛ awɔrso. E daŋ kraŋ kumo be enɛfa nɛ kɔnɔsho kikɛ be asheŋ fanɛ kananɛ b sibɛ n nase mbra be kawɔl na to na gbagba chap nna ŋ ŋini bumo. ³⁵Mosis be mbra na be kedosobi gba maŋ ka nɛ Joshuwa maŋ kraŋ ŋ ŋini jimaŋ na. Beche nɛ mbia nɛ befɔ nɛ b wɔ bumo to na kikɛ daŋ ti so.

Gibiɔnebi ka fule Joshuwa Be asheŋ

¹Bewura nɛ b wɔ Jɔɔdan be lɔr na be epeŋitɔrkpa be efuli nɛ k wɔ abee be kaba so nseŋ kra Mɛditerenia be teku na be kepla n ya fo Lebanɔn na daŋ nu Israɛlebi be kekɔmpɔɔso na be asheŋ nna. B daa la Hitebi nɛ Amɔriebi nɛ Keenanebi nɛ Pɛrizebi, nɛ Hivebi nɛ Jebusiebi be bewura nna. ²B daŋ ba abar so kɔnɔkoŋwuleso nna nɛ b ba kɔ Joshuwa nɛ Israɛlebi na kikɛ kena. ³Ama Gibiɔnebi na ka nu kusɔ nɛ Joshuwa wora Jɛriko nɛ Ai na, ⁴nɛ b kre fanɛ baaŋ fule mo. Ndoŋ nna nɛ b ya fin ajibi n wɔtɔ ebɔtɛ kpɛatoso to ŋ kre n deŋi ekurma so nseŋ ta nsaturbi nɛ a bure nɛ b baa amo n ti so. ⁵B daŋ ta asɔbuuso kpɛatoso nna m buu nseŋ ta asɛbta wuso nɛ b tɛ amo n wɔtɔ. Bumo be bodobodo gba daŋ wɔlso nna nseŋ puu. ⁶Kumo be kaman nɛ b yɔ Israɛlebi na be keeyi to ashi Gilgaal n ya kaŋɛ Joshuwa le: “Kade wɔfɔ nɛ an shi, amoso anyee sha fanɛ anyi nɛ menyi e wora kɔnɔkoŋwule be ŋkre nna.”

⁷Ama le nɛ Israɛlebi na daŋ kaŋɛ: “Manɛ so nɛ anyi nɛ menyi bee wora kɔnɔkoŋwule be ŋkre? Ashere anyi nɛ menyi maŋ chena n feŋ abar ga gba.”

⁸Ndoŋ nna nɛ b kaŋɛ Joshuwa le: “An la fo nyɛrbi nna.” Nɛ Joshuwa malɛ bishi bumo: “Basa mo e la menyi? Nnɛ nɛ men shi?”

⁹Nɛ b kaŋɛ le: “An shi efuli wɔfɔ nna nseŋ nu Enyɛnpe, menyi be Ebɔrɛ na be asheŋ. An nu kusɔ kama nɛ e wora n sa menyi ashi Ijipt be kasawule so, ¹⁰nɛ kusɔ nɛ e wora Amɔriebi be bewura anyɔ na ashi Jɔɔdan be lɔr na be epeŋilarkpa be kaba so na be asheŋ. Bewura na e la ewura Sihɔn nɛ e chena Hishbɔn n ji kuwura na nɛ ewura Ɔg nɛ e la Bashan be ewura nseŋ chena Ashterɔf na. ¹¹Anyi be bejuŋkparpoana nɛ basa nɛ b wɔ anyi be kasawule so na kikɛ kaŋɛ anyi fanɛ an fin anyi be enite to be ajibi m ba menyi kutɔ m ba ta anyi be amu ŋ ki men be nyɛrbi. B yɛ: ‘Men shin nɛ anyi nɛ menyi e wora kɔnɔkoŋwule.’ ¹²Men keni anyi be bodobodo. An ka lar epe a ba menyi kutɔ na nɛ a kra walɛ nna ama naniere amo e wɔlso nseŋ puu na. ¹³Nsaturbi ere daa la apopɔr nna, ama naniere men keni kananɛ a ki adra. Anyi be asɔbuuso nɛ asɛbta gba kpɛa to nna ŋkpal an ka nite ekpa tenteŋ so.”

¹⁴Ndoŋ nna nɛ Israɛlebi na sɔ bumo be ajibi na be ako n ji ŋ keni, ama b daŋ maŋ bishi Enyɛnpe Ebɔrɛ kusɔ nɛ k daga fanɛ b wora pɔɛŋ. ¹⁵Nɛ Joshuwa nɛ Gibiɔn be basa na wora kagbenewushi be kɔnɔkoŋwule be ŋkre nseŋ nase nnɔ n sa abar fanɛ Israɛlebi maaŋ mɔ bumo. Nɛ Israɛlebi be bejuŋkparpoana na shuli so fanɛ baaŋ bɛ kɔnɔ naseso na so.

¹⁶B ka wora kɔnɔkoŋwule na be nchɛ asa nɛ Israɛlebi na pin fanɛ Gibiɔnebi na chena n taga bumo to nna. ¹⁷Kumo be kaman nɛ Israɛlebi na lar n ta nchɛ asa n ya fo basa na be nde to. Bumo be nde na e la: Gibiɔn nɛ Chefira nɛ Bɛɛrɔf nɛ Kiriaf Jearim. ¹⁸Ama Israɛlebi na daa maŋ kɔ bumo, ŋkpal manɛ so, bumo be bejuŋkparpoana na daŋ nase kɔnɔ kpakpaso nna n sa bumo ashi Enyɛnpe nɛ Israɛl be Ebɔrɛ na be anishito. Ndoŋ nna nɛ Israɛlebi na kikɛ fubel n sa bumo be bejuŋkparpoana na. ¹⁹Ama le nɛ bejuŋkparpoana kikɛ daŋ kaŋɛ: “An tiŋ n nase kɔnɔ kpakpaso n sa bumo ashi Enyɛnpe Israɛl be Ebɔrɛ na be ketre to, amoso anyi maaŋ tiŋ n wora bumo kulubi naniere. ²⁰Kusɔ nɛ anyeeŋ wora e la fanɛ, anyeeŋ shin nɛ b ji efute ŋkpal kɔnɔ nɛ an nase ere so, saŋɛ na so Ebɔrɛ be agbo maaŋ ba anyi so.” ²¹Kede be kaman nɛ bejuŋkparpoana na naŋ kaŋɛ le: “An sa maŋ mɔ bumo, ama an shin nɛ b baa ku ndibi nsaa saŋ nchu a sa anyi.”

²²Kumo be kaman nɛ Joshuwa shin nɛ b bar Gibiɔn be benimu na mo kutɔ, nɛ e bishi bumo le: “Manɛ nna nɛ men fule anyi fanɛ men shi kufɔ nna, nɛ menyi alɛ chena m mata anyi? ²³Ŋkpal men ka wora le so, Ebɔrɛ be kɔnɔsho pɛ menyi. Menyi be basa beeŋ ki anya a kuya ndibi nsaa saŋ nchu a yɔ an be Ebɔrɛ be lambu to saŋkama.”

²⁴Nɛ Gibiɔnebi na malɛ kaŋɛ Joshuwa le: “Fo nyɛrbi nu kananɛ Enyɛnpe, menyi be Ebɔrɛ na kaŋɛ mbe kayɛrbi Mosis fanɛ e ta kasawule na kikɛ n sa menyi nɛ men mɔ basa kama nɛ b tase kumo so na kikɛ. Kumo be kufu e daŋ pɛ anyi so nɛ an fule menyi na. ²⁵Naniere bre an wɔ menyi be enɔ to nna na, amoso menyeeŋ tiŋ n wora anyi kusɔ kama nɛ menyee fɛ fanɛ k walɛ n sa menyi.”

²⁶Amoso Joshuwa daŋ mɔlga bumo nna nsaa maŋ shin nɛ Israɛlebi na mɔ bumo. ²⁷Ama e daŋ ta Gibiɔnebi na ŋ ki anya nna nɛ baa kuya ndibi nsaa saŋ nchu a sa Israɛlebi na nɛ Enyɛnpe be bɔrɛsure na ekpa be beshumpo. Loŋ be kushuŋ nɛ b kraa wɔtɔ a shuŋ hale kabre ashi kaplɛkama nɛ Enyɛnpe Ebɔrɛ ŋini fanɛ b baa shuŋ mo na.

Epeŋi ka daŋ maŋ tɔr be asheŋ

¹Adonizɛdɛk nɛ e daa la Jerusalɛm be ewura na daŋ nu fanɛ Joshuwa pɔɔ Ai so m mur kumo kikɛ nseŋ mɔ bumo be ewura fanɛ kananɛ e daŋ wora Jɛriko nɛ kumo be ewura na, nseŋ naŋ nu gba fanɛ Gibiɔnebi na yɔ Israɛlebi kutɔ nɛ bumo nɛ bumo ya wora kagbenewushi be kɔnɔkoŋwule be ŋkre, hale nɛ b chena Israɛlebi na to. ²Nɛ kumo be loŋ shin nɛ kufu pɛ Jerusalɛmebi na ga, ŋkpal manɛ so, Gibiɔn gba daa la kadegboŋ nna fanɛ nde nɛ a kɔ bewura na. K daa shi a chɔ Ai nɛ kumo be basa malɛ daa la benapo lempo ga. ³Ndoŋ nna nɛ Adonizɛdɛk kaŋɛ Hohaam nɛ e la Hibrɔn be ewura na, nɛ Piiram nɛ mo alɛ la Jaamɔf be ewura, nɛ Jaafia nɛ e la Lakish be ewura, n ta Debir nɛ e la Iglɔn be ewura le: ⁴“Men ba chɛ ma to nɛ n ya kɔ Gibiɔn. Ŋkpal manɛ so kumo be basa nɛ Joshuwa nɛ Israɛlebi wora kagbenewushi be kɔnɔkoŋwule be ŋkre.”

⁵Amoso Amɔriebi be bewura anu nɛ b shi Jerusalɛm nɛ Hibrɔn nɛ Jaamɔf nɛ Lakish nɛ Iglɔn na be benapo daŋ ba abar so nna nɛ b ba kɔ Gibiɔnebi kena.

⁶Kubɔya nɛ Gibiɔnebi na daŋ shuŋi ŋ kaŋɛ Joshuwa ashi Gilgaal be keeyi to e daa la: “Men sa maŋ yige anyi n lɛ. Men ba mɔlga anyi manaŋ! Men ba naniere m ba chɛ anyi to, ŋkpal manɛ so, Amɔriebi be bewura nɛ b shi kebee so be efuli so na kikɛ chɛ abar nna a kɔ anyi kena.”

⁷Ndoŋ nna nɛ Joshuwa nɛ mbe benapo na kikɛ, n ta mbe benapo lempo n ti so, lar Gilgaal a yɔ. ⁸Nɛ Enyɛnpe Ebɔrɛ kaŋɛ Joshuwa le: “Sa maa ŋana bumo. N teŋ ta bumo m bɔɔ fo enɔ. Bumo be ekama maaŋ tiŋ n tu fo ŋ kɔ.”

⁹Joshuwa nɛ mbe benapo na daŋ gal edi nna n shi Gilgaal n nite kanyɛ na kikɛ n yɔ Gibiɔn n ya kɔ Amɔriebi na kena purgiso. ¹⁰Amɔriebi na ka wu Israɛl be benapo na nɛ Enyɛnpe Ebɔrɛ shin nɛ keyeŋiyeŋi tɔr bumo so, nɛ Israɛlebi na mɔ bumo ga ashi Gibiɔn, nseŋ ju m buu bumo so m bɔla kebee ase ashi Bɛf Hɔrɔn a mɔ bumo hale n ya fo kelargato be kaseto be kaba so ashi Azeka nɛ Makɛda kikɛ. ¹¹Amɔriebi na ka bɔla kebee na ase ashi Bɛf Hɔrɔn a shile a mɔlga bumo be amu Israɛl be benapo kutɔ na nɛ Enyɛnpe Ebɔrɛ shin nɛ abɔrɛjembu gboŋgboŋi shi awɔlpa to a tɔr bumo so a mɔ hale n ya fo Azeka. Bumo nɛ abɔrɛjembu na daŋ mɔ na daa chɔ bumo nɛ Israɛlebi na gbagba daŋ mɔ. ¹²Kachɛ nɛ Enyɛnpe Ebɔrɛ ta Amɔriebi na m bɔɔ Israɛlebi enɔ na, nɛ Joshuwa yili Israɛlebi na be anishito ŋ kule Enyɛnpe Ebɔrɛ ŋ kaŋɛ le: “Epeŋi, yili Gibiɔn be kade ere be kumu so! Kufɔl, fo alɛ e yili Aijalɔn be ketaŋɛ be kumu so!” ¹³Ndoŋ nna nɛ epeŋi na yili dindiŋ, nɛ kufɔl malɛ kini ketɔr n ya fanɛ Israɛlebi ka pɔɔ bumo doŋana so na. Kumo be loŋ nɛ b sibɛ Jaasha be kawɔl to na fanɛ: “Epeŋi daŋ yili kumu to sirr nna a maŋ tɔr kachɛ lelemu.” ¹⁴Pɔɛŋ nɛ loŋ wora na, nɛ loŋ ka wora na be kaman m ba fo kabre, Enyɛnpe Ebɔrɛ maŋ naŋ wora loŋ n sa dimɛdi kikɛ. Kashenteŋto, Enyɛnpe Ebɔrɛ na e daa kɔ a sa Israɛlebi na! ¹⁵Kede be kaman nɛ Joshuwa nɛ Israɛlebi na bɛta n yɔ Gilgaal be keeyi na to.

Joshuwa ka mɔ Amɔriebi be bewura anu na be asheŋ

¹⁶Saŋɛ nɛ b daa kɔ kena na, Amɔriebi be bewura anu na bre daŋ shile nna n ya ŋana Makɛda be kebeelaŋ to. ¹⁷Esa ko e daŋ wu bumo nseŋ kaŋɛ Joshuwa kakpa nɛ b ŋana na, ¹⁸nɛ Joshuwa kaŋɛ: Men gbelti ajembu gboŋgboŋi n ti kebeelaŋ na be kɔnɔ so n shin nɛ basa ko e baa keni kumo so, ¹⁹ama menyi ere e sa maŋ shir a wɔ ndoŋ. Men bɛ men doŋana na so a kɔ bumo, nɛ b sa maŋ nya ekpa m bɛta n yɔ bumo be nde nɛ b pɔr egbal ŋ kulti na to. Ŋkpal manɛ so Enyɛnpe menyi be Ebɔrɛ na shin nɛ men teŋ kɔ m pɔɔ so. ²⁰Ndoŋ nna nɛ Joshuwa nɛ Israɛlebi na mɔ basa na ga, ama bumo be beko bre daŋ shile nna n ya luri bumo be kade nɛ b pɔr egbal ŋ kulti na to nɛ b maŋ nya bumo m mɔ. ²¹Israɛl be benapo na bre daŋ bɛta nɛ alenfia nna m ba Joshuwa kutɔ ashi Makɛda be keeyi to. Basa nɛ b wɔ efuli na so na malɛ be ekama daa ŋana kenaŋ m malga kamalga lubi ŋ gbiti Israɛlebi na nna. ²²Kede be kaman nɛ Joshuwa kaŋɛ le: “Men ya bugi kebeelaŋ na n lara bewura anu na m bar ma.” ²³Ndoŋ nna nɛ b ya bugi kebeelaŋ na n lara Jerusalɛm nɛ Hibrɔn nɛ Jaamɔf nɛ Lakish nɛ Iglɔn be bewura na ²⁴n yɛr bumo Joshuwa be anishito. Nɛ e shin nɛ b dese kasawule, nɛ e tre Israɛlebi na kikɛ m ba mo kutɔ nseŋ kaŋɛ benapo be benimu nɛ mo nɛ bumo daŋ yɔ kena na to na fanɛ b chichi bewura na be abɔ so. Nɛ b wora loŋ. ²⁵Kumo be kaman nɛ Joshuwa kaŋɛ benapo be benimuana na le: “Men sa maa lɔ kufu ŋko a pɔ aba. Men leŋ men be amu to nsaa kɔ kagbene, ŋkpal manɛ so le nɛ Enyɛnpe Ebɔrɛ na beeŋ wora men doŋana kikɛ.” ²⁶Nɛ Joshuwa mɔ bewura na nseŋ shin nɛ b chɛ bumo kikɛ n shiga ndibi anu so. Ekama nɛ kedibi nɛ b chɛ mo n shiga so, hale n ya fo kaaseso. Ekama nɛ kedibi nɛ b chɛ mo n shiga so. ²⁷Epeŋi ka bee tɔr nɛ Joshuwa ponte ŋ kaŋɛ fanɛ b shiga bubuni na ndibi na so n ta bumo n ya lɛ kebeelaŋ nɛ b daŋ ŋana to na to, nseŋ gbelti ajembu gboŋgboŋi n ti kumo so. Loŋ be ajembu na kra wɔtɔ hale kabre.

Joshuwa ka kɔ m pɔɔ Ammɔn be efuliana so be asheŋ

²⁸Kumo be kachɛ na nɛ Joshuwa kɔ m pɔɔ Makɛda be kade na nɛ kumo be ewura so. E daŋ mɔ kade na to be basa kikɛ nna. Esa kama daa maŋ ji efute kumo be kachɛ na. Kananɛ e daŋ wora Jɛriko be ewura na, loŋ koŋwule na nɛ e wora Makɛda be ewura na gba. ²⁹Ade kikɛ be kaman nɛ Joshuwa nɛ mbe benapo shi Makɛda n yɔ Libna n ya kɔ kumo kena. ³⁰Nɛ Enyɛnpe Ebɔrɛ shin nɛ Israɛlebi naŋ kɔ m pɔɔ kumo malɛ nɛ kumo be ewura so. B daŋ mɔ ekama nna. Esa kikɛ daŋ maŋ ji efute. Kananɛ b daŋ wora Jɛriko be ewura na gbagba chap nɛ b wora ndoŋ be ewura na gba. ³¹Kumo be kaman nɛ Joshuwa nɛ mbe benapo na lar Libna n yɔ Lakish n ya kulti kumo n wɔtɔ ŋ kɔ bumo kena. ³²Kena na be kachɛ nyɔsopo na nɛ Enyɛnpe Ebɔrɛ shin nɛ Israɛlebi na kɔ m pɔɔ Lakish so. Kananɛ b baŋ wora Libna na gbagba nɛ b wora ndoŋebi gba. Esa kama daa maŋ lar kade na to. B daŋ mɔ bumo kikɛ nna. ³³Gɛza be ewura nɛ baa tre Horam na daŋ ba chɛ Lakishebi to nna ama Joshuwa daŋ pɔɔ mo nɛ mbe benapo so nna nseŋ mɔ bumo kikɛ. ³⁴Kede be kaman nɛ Joshuwa nɛ mbe benapo yili Lakish n yɔ Iglɔn n ya kulti kumo ale gba ŋ kɔ kumo kena. ³⁵Kumo be kamɔnchɛ gbagba nɛ b kɔ m pɔɔ kade na so nseŋ mɔ basa nɛ b wɔ kumo to kikɛ fanɛ kananɛ b daŋ wora Lakish na gbagba chap. ³⁶Ade kikɛ be kaman nɛ Joshuwa nɛ mbe benapo naŋ yili Iglɔn m bɔla abee ase n yɔ Hibrɔn n ya kɔ kumo kena ³⁷m pɔɔ kumo so nseŋ mɔ kumo be ewura nɛ basa nɛ b wɔ kade na to nɛ ndewurbi nɛ a mata kumo na be basa kikɛ. Joshuwa daŋ mur kade na kikɛ nna fanɛ kananɛ e daŋ wora Iglɔn na. Esa kama daa maŋ ji efute kumo to. ³⁸Kumo be kaman nɛ Joshuwa nɛ mbe benapo kilgi n ya kɔ Debir ³⁹m pɔɔ kumo nɛ kumo be ewura nɛ ndewurbi nɛ a kulti kumo na kikɛ so nseŋ mɔ basa nɛ b wɔ ndoŋ na kikɛ. Kananɛ Joshuwa daŋ wora Libna nɛ Hibrɔn nɛ amo be bewura na koŋwule nɛ e wora Debir gba nɛ kumo be ewura. ⁴⁰Joshuwa daŋ kɔ m pɔɔ efuli na kikɛ so nna. E daŋ pɔɔ bewura nɛ b wɔ abee be efuli nɛ k wɔ nferinto na so, nɛ bumo nɛ b wɔ epeŋilarkpa be kaba so na, nɛ bumo nɛ b wɔ abee nɛ a wɔ epeŋitɔrkpa be kaba so na, nɛ bumo nɛ b chena kelargato be kaseto be keshishɛrsawule so na kikɛ so nna. Ndoŋ be esa kama daa maŋ pete. Kupɔrso kikɛ daa maŋ ji efute, ŋkpal manɛ so, loŋ nɛ Enyɛnpe Israɛl be Ebɔrɛ na daŋ kaŋɛ bumo fanɛ b wora. ⁴¹Joshuwa daŋ kɔ m pɔɔ efuliana nɛ a yili Kadɛsh Bania nɛ k wɔ kelargato be kaseto be kaba so n ya fo Gaaza nɛ k wɔ teku be kɔnɔ ase, n ta Goshen be efuli kikɛ n ti so hale n ya fo Gibiɔn nɛ k wɔ kelargato be esoso be kaba so na so nna. ⁴²Joshuwa daŋ kɔ bewura na kukoko to nna m pɔɔ bumo be efuliana kikɛ so, ŋkpal Enyɛnpe, Israɛl be Ebɔrɛ, na ka bee kɔ a sa Israɛlebi so so. ⁴³Ade kikɛ be kaman nɛ Joshuwa nɛ mbe benapo na kikɛ bɛta n yɔ bumo keeyi to ashi Gilgaal.

Joshuwa ka kɔ m pɔɔ Jabin nɛ mbe bechɛtopo so be asheŋ

¹Haazɔ be ewura nɛ baa tre Jabin na ka nu fanɛ Israɛlebi na kɔ m pɔɔ so, nɛ e shuŋi ŋ kaŋɛ Madɔn be ewura nɛ baa tre Joobab na nɛ Shimrɔn nɛ Akshaf be bewura; ²nɛ bewura nɛ b chena kelargato be esoso be kaba so be abee ase na nɛ bumo nɛ b wɔ Jɔɔdan be ketaŋɛ nɛ k wɔ Galili be Tekugboŋ na be kelargato be kaseto na, nɛ bumo nɛ b wɔ apreŋ so nɛ bumo nɛ b wɔ teku be ekarso ashi Dɔɔ na. ³E daŋ sa Keenanebi nɛ b chena Jɔɔdan be lɔr na be mba anyɔ so na nɛ Amɔriebi nɛ Hitebi, nɛ Pɛrizebi nɛ Jebusiebi nɛ b wɔ abee be efuli so na, nɛ Hivebi nɛ b chena kebeegboŋ nɛ baa tre Hɛɛmɔn na be kaseto ashi Mispa be kasawule so na gba ebɔl. ⁴Nɛ bumo nɛ bumo be benapo nɛ b shi fanɛ teku ase be leele na nɛ bumo be egbaŋɛ nɛ egbaŋɛturko damta ba. ⁵Le be bewura ere kikɛ daŋ wora kɔnɔkoŋwule nna n ya wora bumo keeyi to ashi Meerɔm be kepa ase ŋ kre kena nɛ b ya kɔ Israɛlebi. ⁶Nɛ Enyɛnpe Ebɔrɛ kaŋɛ Joshuwa le: “Men sa maa ŋana bumo ŋkpal manɛ so, echefo saŋɛ ere so, meeŋ ta bumo m bɔɔ menyi Israɛlebi enɔ nɛ men mɔ bumo kikɛ. Men wora m buri bumo be egbaŋɛ na be aya nseŋ chɔ bumo be egbaŋɛturko na.” ⁷Ndoŋ nna nɛ Joshuwa nɛ benapo na kikɛ ba Meerɔm be kepa na ase m ba kɔ bumo kena purgiso. ⁸Nɛ Enyɛnpe Ebɔrɛ ta bumo m bɔɔ Israɛlebi na enɔ nseŋ shin nɛ b pɔɔ bumo so n ju m buu bumo so ŋ kɔ bumo n ya fo Misrefɔf Mayim nɛ Sidɔn ashi kelargato be esoso be kaba so, n ta loŋ n ya fo Mispa be ketaŋɛ nɛ k wɔ epeŋilarkpa na, m mɔ bumo kikɛ. ⁹Kananɛ Enyɛnpe Ebɔrɛ baŋ ŋini Joshuwa na gbagba chap nɛ e daŋ wora. E daŋ buri bumo be egbaŋɛ na be aya nna nseŋ naŋ chɔ bumo be egbaŋɛturko gba. ¹⁰Kumo be kaman nɛ Joshuwa kilgi n yɔ Hazɔɔ n ya kɔ m pɔɔ bumo be Ewura na so m mɔ mo. Hazɔɔ e daa la efuli na kikɛ so be kade lempo. ¹¹B daŋ mɔ basa kama nɛ b wɔ kade na to kikɛ nna nseŋ chɔ kumo. Esa kama daa maŋ ji efute. ¹²Joshuwa daŋ kɔ m pɔɔ nde na kikɛ nɛ amo be bewura so nna nseŋ mɔ basa nɛ b wɔ amo to kikɛ fanɛ kananɛ Enyɛnpe Ebɔrɛ be kayɛrbi Mosis daŋ kaŋɛ mo fanɛ e wora na. ¹³Nde nɛ e daa wɔ atarkpaŋ so na bre Israɛlebi na daa maŋ chɔ amo be kekama, ama Hazɔɔ nawule nɛ Joshuwa daŋ chɔ. ¹⁴Israɛlebi na daŋ ta basa na be asɔ lela nɛ bumo be asɔbɔya kikɛ nna. Ama b daŋ mɔ basa kama nɛ b daa wɔ nde na to bre kikɛ. Esa koŋwule gba daa maŋ ji efute. ¹⁵Kusɔ nɛ Enyɛnpe Ebɔrɛ daŋ kaŋɛ mbe kayɛrbi Mosis na gbagba chap nɛ mo alɛ kaŋɛ Joshuwa, nɛ Joshuwa malɛ bɛ kumo gbagba so chap. E daŋ wora kusɔ kama nɛ Enyɛnpe Ebɔrɛ daŋ kaŋɛ Mosis na kikɛ.

Efuli nɛ Joshuwa sɔ na be asheŋ

¹⁶Joshuwa daŋ kɔ n sɔ efuli nɛ a wɔ abee nɛ a wɔ kelargato be esoso nɛ kaseto na kikɛ, nɛ Goshen be kasawule kikɛ, nɛ keshishɛrsawule nɛ k wɔ Goshen be kelargato be kaseto be kaba so na, n ta n ya fo Jɔɔdan be ketaŋɛ na kikɛ nna. ^17-18Kasawule na dese hale n ya fo Halak be kebeegboŋ nɛ k wɔ kelargato be kaseto be kaba so a mata Edɔm be efuli so na, n ta n ya fo Baal Gad nɛ k wɔ kelargato be esoso be kaba so ashi Lebanɔn be ketaŋɛ nɛ k wɔ Hɛɛmɔn be kebeegboŋ na be kelargato be kaseto be kaba so na. Joshuwa nɛ le be bewura ere daŋ kɔ abar kena n chɛr ga, ama e daŋ pɔɔ bumo so m mɔ bumo kikɛ. ¹⁹Basa nɛ bumo nɛ Israɛlebi daŋ wora kagbenewushi be kɔnɔkoŋwule e daa la Hivebi nɛ b wɔ Gibiɔn na. Bumo nɛ b ka na bre kikɛ, Israɛlebi daŋ pɔɔ bumo so kena na to nna. ²⁰Enyɛnpe Ebɔrɛ na gbagba e daŋ shin nɛ b yili bumo be ŋgbene kukoŋwule fanɛ baaŋ kɔ Israɛlebi na kena, saŋɛ na so Israɛlebi na maaŋ shu bumo ekama so, nseŋ mɔ bumo kikɛ m mur bumo fanɛ kananɛ Enyɛnpe Ebɔrɛ kaŋɛ Mosis na. ²¹Loŋ be jemanɛ na so nɛ Joshuwa ya kɔ nseŋ mur basa tenteŋ gboŋgboŋi nɛ baa tre Anakebi nɛ b wɔ abee so ashi Hibrɔn nɛ Debir nɛ Anaab nɛ Juda be abee be fuliso kikɛ ashi Israɛl be kasawule so. Joshuwa daŋ kɔ mur bumo nɛ bumo be nde kikɛ nna. ²²Anakebi na be ekama daa maŋ naa wɔ Israɛl be efuli so. Gaaza nɛ Gaaf nɛ Ashdɔd nawule nɛ beko daa wɔ. ²³Joshuwa daŋ sɔ kasawule na kikɛ nna fanɛ kananɛ Enyɛnpe Ebɔrɛ daŋ kaŋɛ Mosis na, nseŋ barga kumo to n sa Israɛlebi na yiri yiri so nɛ k ki bumo be kapetɛ. Yili kumo be saŋɛ na so nɛ b wushi gbrɛbi ashi kena be kekɔ to.

Bewura nɛ Mosis daŋ kɔ m pɔɔ so na be asheŋ

¹Bewura nɛ Israɛlebi na daŋ kɔ m pɔɔ so nseŋ sɔ bumo be nsawule nɛ a wɔ Jɔɔdan be lɔr na be epeŋilarkpa, nseŋ yili Aanɔn be ketaŋɛ to ashi kelargato be kaseto n ya fo kebeegboŋ nɛ baa tre Hɛɛmɔn na ashi kelargato be esoso na nde. ²Amɔriebi be ewura nɛ baa tre Sihɔn nɛ e daa ji Hishbɔn be kuwura na be efuli daŋ yili Giliad be kasawule be bargato ashi Arowa, nɛ k wɔ Aanɔn be ketaŋɛ na be ekarso na, nɛ kade nɛ k wɔ ketaŋɛ na be nferinto na, n ya fo Jabɔk be Lɔr ashi Ammɔn be kasawule be ekar. ³Mo koŋwule be kasawule e daa la Jɔɔdan be ketaŋɛ nɛ k yili Galili be Teku na ashi kelargato be kaseto n ya fo Bɛf Jeshimɔf ashi Nfɔl be Teku na be epeŋilarkpa, n ta n ya fo kebeegboŋ nɛ baa tre Pisga na be kifito.

⁴N ta Ɔg nɛ e daa la Bashan be ewura na. Mo e daa la basa tenteŋ gboŋgboŋi nɛ baa tre Refaebi na be esa lalalogesopo nɛ e ji Ashterɔf nɛ Edrei be kuwura. ⁵Mbe efuli daŋ yili kebeegboŋ nɛ baa tre Hɛɛmɔn na, nɛ Saleka, nɛ Bashan be kasawule kikɛ nna n ya fo Gɛshur nɛ Maaka be nde be ekar, n ta Giliad be bargato hale n ya fo Hishbɔn be ewura Sihɔn be efuli so. ⁶Mosis nɛ Israɛlebi na daŋ kɔ nna m pɔɔ le be bewura anyɔ ere so, nɛ Enyɛnpe Ebɔrɛ be kayɛrbi Mosis barga bumo kasawule to n sa Ruben nɛ Gad be eyiri na nɛ Manase be yiri be bargato fanɛ k ki bumo be kapetɛ.

Bewura nɛ Joshuwa kɔ m pɔɔ so na be asheŋ

⁷Joshuwa nɛ Israɛlebi na daŋ kɔ m pɔɔ bewura nɛ b daa wɔ Jɔɔdan be lɔr na be epeŋitɔrkpa be kaba so be efuli so na kikɛ so nna. Efuli na daŋ yili Baal Gad nɛ k wɔ Lebanɔn be ketaŋɛ to nna n ya fo kebeegboŋ nɛ baa tre Halak nɛ k wɔ kelargato be kaseto be kaba so a mata Edɔm be kasawule so na. Joshuwa daŋ barga kasawule na to nna n sa Israɛl be eyiri ana nna nɛ k ki bumo be kapetɛ mbaanaayɔ. ⁸Loŋ be kasawule na e daa la abee be efuli so, nɛ epeŋitɔrkpa be abee so, nɛ Jɔɔdan be ketaŋɛ nɛ kumo be abee so, nɛ abee be agbelge nɛ a wɔ epeŋilarkpa na, nɛ keshishɛrsawule nɛ k wɔ kelargato be kaseto be kaba so na. A daa la Hitebi nɛ Amɔriebi nɛ Keenanebi nɛ Pɛrizebi nɛ Jebusiebi nɛ Hivebi be nsawule nna. ⁹Le be nde ere be bewura nɛ Israɛlebi na daŋ kɔ m pɔɔ so: Jɛriko be ewura nɛ Ai nɛ k mata Bɛtɛl na be ewura. ¹⁰Jerusalɛm be ewura, nɛ Hibrɔn be ewura. ¹¹Jaamɔf be ewura, nɛ Lakish be ewura. ¹²Eglɔn be ewura nɛ Gɛza be ewura. ¹³Debir be ewura nɛ Gɛdɛr be ewura. ¹⁴Hooma be ewura nɛ Arad be ewura. ¹⁵Libna be ewura nɛ Adulam be ewura. ¹⁶Makɛda be ewura nɛ Bɛtɛl be ewura. ¹⁷Tapua be ewura nɛ Hɛfa be ewura. ¹⁸Afɛk be ewura, nɛ Lashirɔn be ewura. ¹⁹Madɔn be ewura nɛ Hazɔɔ be ewura. ²⁰Shimrɔn Merɔn be ewura nɛ Akshaf be ewura. ²¹Tanaak be ewura nɛ Majido be ewura. ²²Kadɛsh be ewura nɛ Jokniam nɛ k wɔ Kamɛl na be ewura. ²³Dɔɔ, nɛ k wɔ Nafɔɔf Dɔɔ na be ewura nɛ Goyiim nɛ k wɔ Gilgaal na be ewura. ²⁴Tiiza be ewura. Bumo kikɛ daa wɔ bewura adesa nɛ kako.

Kasawule nɛ k ka nɛ b sɔ na be asheŋ

¹Joshuwa ka bel na nɛ Enyɛnpe Ebɔrɛ kaŋɛ mo le: “Naniere bre fo bel ga, ama kasawule damta kraa wɔtɔ nɛ men sɔ. ²Kumo e la Filisti nɛ Geshur be efuli so kikɛ, ³nɛ Avvim be efuli ashi kelargato be kaseto be kaba so. Kumo e yili Shihɔr be kabombi nɛ k wɔ Ijipt be ekar n ya fo Ekrɔn be ekar ashi kelargato be esoso nɛ baa tre kumo Keenanebi be kasawule na. Ndoŋ be nde e la Gaaza nɛ Ashdɔd nɛ Ashkɛlɔn nɛ Gaaf nɛ Ekrɔn nɛ Filistiebi be bewura daa wɔ na. ⁴Keenanebi be efuli kikɛ nɛ Meara nɛ k la Sidɔnebi be efuli na hale n ya fo Afɛk ashi Amɔriebi be kasawule be ekar gba kraa wɔtɔ. ⁵N ta Gebalebi be efuli nɛ Lebanɔn kikɛ ashi epeŋilarkpa, n yili Baal Gad nɛ k wɔ kebeegboŋ nɛ baa tre Hɛɛmɔn na be kelargato be kaseto hale n ya fo Hamaf. ⁶Sidɔnebi nɛ b wɔ abee be efuli so ashi Lebanɔn be abeegboŋ nɛ Misrefɔf Mayim be kefɛato na gba be efuli ti so. Meeŋ ju le be basa ere kikɛ ashi efuli na so, nɛ fo barga bumo be kasawule na to n sa Israɛlebi na, fanɛ kananɛ ŋ ŋini fo na gbagba chap. ⁷Barga kumo to n sa Israɛl be eyiri akpanu nɛ a ka na nɛ Manase be yiri to be basa be bargato nɛ b ka na.”

Kananɛ b barga kasawule nɛ k wɔ Jɔɔdan be epeŋilarkpa na to be asheŋ

⁸Enyɛnpe Ebɔrɛ be kayɛrbi Mosis teŋ sa Ruben nɛ Gad be eyiri nɛ Manase be yiri to be basa ko bre kasawule nɛ k wɔ Jɔɔdan be lɔr na be epeŋilarkpa na. ⁹Bumo be kasawule na dese n ya fo Arowa nɛ k wɔ Aanɔn be ketaŋɛ be kɔnɔ na, nɛ kade nɛ k wɔ ketaŋɛ na be nferinto na hale n ya fo kedeŋiso be kasawule nɛ k dese Mɛdiba n ya fo Dibɔn na. ¹⁰K dese hale n ya fo Ammɔn nɛ kumo be nde nɛ Ammɔn be ewura Sihɔn nɛ e ji kuwura ashi Hishbɔn daa keni so na kikɛ. ¹¹N ta Giliad nɛ Gɛshur nɛ Maaka nɛ kebeegboŋ nɛ baa tre Hɛɛmɔn na nɛ Bashan hale n ya fo Saleka kikɛ. ¹²Ɔg nɛ e daa la basa tenteŋ gboŋgboŋi nɛ baa tre Refaebi na be esa lalalogesopo nɛ e daŋ ji Ashterɔf nɛ Edrei be kuwura na be efuli gba daŋ ti so. Mosis e daŋ pɔɔ le be basa ere so nseŋ ju bumo ashi kasawule na so. ¹³Israɛlebi na daa maŋ ju Gɛshur nɛ Maaka be basa bre. B kraa wɔ Israɛl be efuli so hale kabre. ¹⁴Mosis daa maŋ yige kasawule kikɛ n sa Livai be yiri na bre, ŋkpal manɛ so, Enyɛnpe Ebɔrɛ na daŋ kaŋɛ Mosis nna fanɛ bɔrɛsure so be sarga chɔɔso nɛ baa lara a sa Enyɛnpe nɛ e la Israɛl be Ebɔrɛ na e la bumo be kapetɛ.

Kasawule nɛ b daŋ ta n sa Ruben be yiri to ebi be asheŋ

¹⁵Mosis daŋ barga kasawule na be kaba nna n sa Ruben be yiri to ebi fanɛ k ba la bumo be kapetɛ. ¹⁶Bumo be kasawule na dese n ya fo Arowa nɛ k wɔ Aanɔn be ketaŋɛ be kɔnɔ na, nɛ kade nɛ k wɔ ketaŋɛ na be kefɛato na hale n ya fo kedeŋiso be kasawule nɛ k dese Mɛdiba na, ¹⁷n ta Hishbɔn nɛ nde nɛ a wɔ kepreŋ so nɛ baa tre amo Dibɔn nɛ Bamɔf Baal nɛ Bɛf Baalmiɔn, ¹⁸nɛ Jehaaz, nɛ Kedemɔf, nɛ Mɛfaaf, ¹⁹nɛ Kiryatayim, nɛ Sibma, nɛ Zerɛf Shaha nɛ k wɔ kebee nɛ k wɔ ketaŋɛ to na. ²⁰Nɛ Bɛfpuwa nɛ kebeegboŋ nɛ baa tre Pisga na be kegbelge nɛ Bɛf Jeshimɔf. ²¹N ta kepreŋ so be nde na kikɛ, nɛ Sihɔn nɛ e la Amɔriebi be ewura ashi Hishbɔn na gba be efuli kikɛ n ti so. Mosis daŋ kɔ m pɔɔ mo nɛ Midian be bewura ana kikɛ so nna. Bumo e la Evi, nɛ Rekɛm, nɛ Zur, nɛ Hur, nɛ Reba. Bumo kikɛ e daa la ewura Sihɔn be efuli so be bewurbi. ²²Basa nɛ Israɛlebi na daŋ mɔ na be eko e daa la lejipo nɛ baa tre Balaam nɛ e daa la Beyɔ pibinyɛn na. ²³Kasawule na be ndegboŋ nɛ awurbi kikɛ nɛ b daŋ ta n sa Ruben be yiri to ebi na fanɛ k ki bumo be kapetɛ. Kumo be epeŋitɔrkpa be kaba so be ekar e daa la Jɔɔdan be lɔr na.

Kasawule nɛ b ta n sa Gad be yiri to ebi be asheŋ

²⁴Mosis daŋ barga kasawule na be kaba n sa Gad be yiri to ebi gba fanɛ k ki bumo be kapetɛ. ²⁵Bumo alɛ be kasawule daŋ yili Jaza nɛ Giliad be kasawule so be ndegboŋ na kikɛ nɛ Ammɔn be kasawule be bargato n ya fo Arowa nɛ k wɔ Raaba be epeŋilarkpa be kaba so na nna. ²⁶Nseŋ naŋ yili Hishbɔn gba n ta n yɔ Ramaf Mispa nɛ Bɛtonim kikɛ, nseŋ naŋ yili Mahanaim gba hale n ya fo Lodiba be kasawule be ekar kikɛ, ²⁷n ta Bɛf Haraam, nɛ Bɛfnimra, nɛ Sukɔf nɛ Zafɔn nɛ a wɔ Jɔɔdan be ketaŋɛ na to na, nɛ ewura Sihɔn ashi Hishbɔn be efuli be kaba nɛ k ka na. Bumo be epeŋitɔrkpa be kaba so be kasawule be ekar daŋ yili Jɔɔdan be lɔr na nna n ya fo kelargato be esoso ashi Galili be teku na. ²⁸Le be ndegboŋ nɛ awurbi kikɛ nɛ b daŋ chige n sa Gad be yiri to ebi na fanɛ a ki bumo be kapetɛ.

Kasawule nɛ b ta n sa Manase be yiri to be basa be bargato be asheŋ

²⁹Mosis daŋ ta kasawule na be kaba nna n sa Manase be yiri to be basa be bargato fanɛ k ba la bumo be kapetɛ. ³⁰Bumo e daa wɔ Mahanaim nɛ Bashan kikɛ be kasawule. Bashan be ewura nɛ baa tre Ɔg na be efuli kikɛ, nɛ Jair be nde adeshe nɛ a wɔ Bashan na kikɛ daŋ ti bumo be kasawule na so nna. ³¹Giliad be kasawule na be bargato nɛ Ashterɔf nɛ Edrei nɛ a la Ɔg be efuli so be ndegboŋ ashi Bashan na kikɛ gba daŋ ti bumo be kasawule so nna. B daŋ ta amo kikɛ nna n sa Makiir nɛ e la Manase pibinyɛn na be yiri to be basa be bargato nɛ a ba la bumo be kapetɛ. ³²Kananɛ Mosis daŋ barga kasawule nɛ k wɔ Jɛriko be epeŋilarkpa nɛ Jɔɔdan be ketaŋɛ na to saŋɛ nɛ e daa wɔ Mowab be kasawule so na nna na. ³³Ama Livai be yiri na bre, Mosis daa maŋ sa bumo kasawule. Esarga nɛ baa lara a sa Enyɛnpe Israɛl be Ebɔrɛ na e daa la bumo be kapetɛ.

B ka barga kasawule nɛ k wɔ Jɔɔdan be epeŋitɔrkpa be kaba so na to be asheŋ

¹Kananɛ b daŋ barga Keenan be kasawule nɛ k wɔ Jɔɔdan be epeŋitɔrkpa na n sa Israɛlebi na nde: Bɔrɛmatapowura Eliaza nɛ Nun pibi Joshuwa, nɛ Israɛl be kanaŋ na to be eyiriana be benimu e daŋ barga kumo to n sa basa na kikɛ. ²B daŋ to beri nna m barga kasawule nɛ k dese Jɔɔdan be lɔr na be epeŋitɔrkpa be kaba so na n sa Israɛl be eyiri akpanu nɛ yiri na be kuko be basa be bargato fanɛ kananɛ Enyɛnpe Ebɔrɛ kaŋɛ Mosis na. ^3-4Mosis teŋ barga kasawule nɛ k wɔ Jɔɔdan be lɔr na be epeŋilarkpa be kaba so na to nna n sa Israɛl be eyiri anyɔ nɛ yiri na be kuko be basa be bargato. (Josɛf be kaman to ebi bre daŋ barga to ntuŋ anyɔ nna ŋ ki Manase nɛ Efrayim be eyiri.) Mosis daa maŋ sa Livaiebi na bre kasawule kikɛ. Nde nɛ a kɔ asɔbɔya be ejikpa be nsawule m mata amo nawule nɛ e sa bumo nɛ b chena. ⁵Israɛlebi na daŋ barga kasawule na to nna fanɛ kananɛ Enyɛnpe Ebɔrɛ kaŋɛ Mosis na gbagba chap.

B ka ta Hibrɔn n sa Kalɛb be asheŋ

⁶Kachako nɛ basa ko nɛ b shi Juda be yiri to ba Joshuwa kutɔ ashi Gilgaal. Nɛ Jefune nɛ e la Keniz be esa na pibinyɛn Kalɛb kaŋɛ mo le: “Fo nyi kusɔ nɛ Enyɛnpe Ebɔrɛ kaŋɛ Mosis nɛ e la kebɔrɛnya na, a laŋɛ ma nɛ fo be kaplɛa so ashi Kadɛsh Bania. ⁷Saŋɛ so nɛ Enyɛnpe Ebɔrɛ be kenya Mosis yili Kadɛsh Bania n shuŋi ma fanɛ n ba dara kasawule ere na nɛ n la nfɛ adena nna. Ma alɛ daŋ ba kaŋɛ mo kusɔ nɛ n ya wu kashenteŋto. ⁸Basa nɛ ma nɛ bumo daŋ yɔ na daŋ ta kufu damta nna n wɔtɔ anyi be basa to. Ama ma ere daŋ wora Enyɛnpe Ebɔrɛ na kasonu nna kashenteŋto. ⁹Ŋkpal ŋ ka wora Enyɛnpe Ebɔrɛ kasonu so nɛ Mosis nase kɔnɔ kamɔnchɛ n sa ma nɛ ma mbia fanɛ, kasawule nɛ n nite so na beeŋ ki anyi be kapetɛ. ¹⁰Enyɛnpe Ebɔrɛ ka kaŋɛ Mosis loŋ, kumo be nfɛ adena nɛ anu nna na. Saŋɛ so nɛ Israɛlebi kraa wɔ keshishɛrsawule na so na nɛ Enyɛnpe Ebɔrɛ kaŋɛ mo loŋ. Enyɛnpe Ebɔrɛ na malɛ keni ma so hale m ba fo kabre. Keni, naniere n nya nfɛ aduburwa nɛ anu. ¹¹Eleŋ nɛ n daa kɔ saŋɛ nɛ Mosis shuŋi ma na nɛ ŋ kra kɔ kabre gba. Ŋ kra kɔ eleŋ nɛ meeŋ tiŋ n yɔ kena to n ya kɔ. ¹²Naniere ta kebeeso be efuli nɛ Enyɛnpe Ebɔrɛ nase kɔnɔ kamɔnchɛ afanɛ e beeŋ sa ma na n sa ma. An teŋ kaŋɛ fo fanɛ basa tenteŋ gboŋgboŋi nɛ baa tre Anakebi na e wɔ ndegboŋ nɛ b pɔr egbal ŋ kulti na to ashi efuli na kikɛ so. Ashere Enyɛnpe Ebɔrɛ beeŋ yili ma kaman nɛ n ju bumo n lar fanɛ kananɛ Enyɛnpe Ebɔrɛ kaŋɛ na gbagba chap.” ¹³Ndoŋ nna nɛ Joshuwa nɛfa Jefune pibi Kalɛb nseŋ ta Hibrɔn be kade na n sa mo fanɛ mbe kapetɛ. ¹⁴Amoso Hibrɔn kraa la Kalɛb be kaman to ebi peya nna, ŋkpal e ka nu n sa Enyɛnpe nɛ e la Israɛl be Ebɔrɛ na kagbene koŋwule so so. ¹⁵Hibrɔn nɛ b daa tre Aba be kade. (Aba e daa la Anakebi na kikɛ be esa nɛ e wora asheŋgboŋ a chɔ ekama.)

Ndoŋ nna nɛ kagbenewushi ba efuli na so.

Kasawule nɛ b ta n sa Juda na be asheŋ

¹Juda gba be yiri to ebi na daŋ nya kasawule na be kaba ko nɛ k dese kelargato be kaseto be kaba so a yɔ Zin be keshishɛrsawule so ashi Edɔm be kasawule be ekar na nna. ²Nfɔl be Teku na be kelargato be kaseto be kaba so be ekar e daa la kakpa nɛ Juda be yiri to ebi be kasawule be kelargato be kaseto be kaba so be ekar fara, ³nseŋ yili Akrabim be ekpa to m bɔla kelargato be kaseto be kaba so n ya fo keshishɛrsawule nɛ baa tre Zin na, n ta m bɔla Kadɛsh Bania be kelargato be kaseto be kaba so n ya bɔla Hezrɔn n ya fo Ada n ta m ba Karka, ⁴n naŋ bɔla Azmɔn n ya bɛ kabombi nɛ k dese Ijipt be kasawule be ekar na so n ya tar teku nɛ baa tre Mɛditerenia na. Ndoŋ e daa la Juda be kelargato be kaseto be kaba so be kasawule be ekar.

⁵Bumo be epeŋilarkpa be kaba so be kasawule be ekar daŋ fara Nfɔl be Teku na nna n ya fo kumo be kakpa nɛ Jɔɔdan be lɔr na bee luri kumo to na. Bumo be kelargato be esoso be kaba so be kasawule malɛ fara kakpa nɛ Jɔɔdan be lɔr na bee luri Nfɔl be Teku na to na nna. ⁶K dese n yɔ Bɛf Hogla, nseŋ naŋ ta n ya bɔla Bɛf Araba be kelargato be esoso be kaba so n ya fo Bohan be kejembu na. (Ruben pibinyɛn e daa la Bohan.) ⁷K yili ketaŋɛ nɛ baa tre Ankɔ, nɛ baa tre kumo koŋwule na Tɔrɔ be ketaŋɛ na, n yɔ Dɛbia nseŋ naŋ kilgi n sɔ kelargato be esoso be kaba so a yɔ Gilgaal nɛ k wɔ Adummim be anishito ashi ketaŋɛ na be kelargato be kaseto be kaba so na. Ndoŋ nɛ k yili m bɛ Enshɛmɛsh be mbombi na so hale n ya paŋ m bɔl Enrogɛl, ⁸nseŋ naŋ bɔla Bɛn Hinnɔm be ketaŋɛ nɛ k dese kebee nɛ Jebusiebi be kade nɛ baa tre Jerusalɛm na tase so na be kelargato be kaseto be kaba so. Ndoŋ nɛ k yili n dii kebee nɛ k wɔ Hinnɔm be ketaŋɛ na be epeŋitɔrkpa be kaba so na be esoso ashi Refaebi be ketaŋɛ na be kelargato be esoso be kaba so, ⁹nseŋ naŋ yili ndoŋ m bɔla Nɛftowa be mbombi na to n ya lar ndegboŋ nɛ a mata Efrɔn be kebeegboŋ na, nseŋ yili ndoŋ ŋ kilgi n sɔ Baala nɛ baa tre Kiriaf Jearim na. ¹⁰Baala nɛ k yili ŋ kilgi n sɔ Edɔm be abee so be efuli so ashi epeŋitɔrkpa be kaba so n ta n ya fo kebeegboŋ nɛ baa tre Jearim nɛ kade baa tre Chisalɔn na wɔ na be kelargato be esoso be kaba so nseŋ bɔla Bɛf Shimish n ya fo Timna. ¹¹Kasawule na be ekar daŋ yili ndoŋ nna n yɔ Ekrɔn be kelargato be esoso be kaba so be kebee na so, n ta m bɔla Shikrɔn n ya choŋ kebeegboŋ nɛ baa tre Baala na so n ya fo Jaabnɛl. Teku nɛ baa tre Mɛditerenia na ¹²e daa la kasawule na be epeŋitɔrkpa be ekar.

Le be kasawule ere so nɛ Juda be yiri to ebi na daa wɔ.

Kalɛb ka kɔ m pɔɔ Hibrɔn nɛ Debir so be asheŋ

¹³Joshuwa daŋ bɛ kusɔ nɛ Enyɛnpe Ebɔrɛ kaŋɛ mo na so nna nseŋ ta Juda be kasawule na be kaba n sa Jefune pibi Kalɛb. E daŋ nya Hibrɔn nɛ k la Aba be kade na nna. (Aba be kaman to ebi e daa la basa tenteŋ gboŋgboŋi nɛ baa tre Anakebi na) ¹⁴Ndoŋ nna nɛ Kalɛb ju Anak be kaman to ebi na ashi Hibrɔn be kade to. Bumo e daa la Shishai nɛ Ahiman nɛ Talmai be mbuna na. ¹⁵Ndoŋ nɛ e yili n ya kɔ Debir be basa. (Debir nɛ b daa tre Kiriaf Sɛfa.) ¹⁶Loŋ be saŋɛ na nɛ Kalɛb kaŋɛ le: “Esa kama nɛ e ya kɔ m pɔɔ Kiriaf Sɛfa so, ma alɛ beeŋ ta ma pibiche Aksa n sa mo nɛ e kil.” ¹⁷Otniɛl nɛ e daa la Kalɛb mo sipo Kenaaz pibinyɛn na e daŋ wora loŋ, nɛ Kalɛb ta mo pibiche Aksa n sa mo nɛ e kil. ¹⁸Bumo be kejafɔ to nɛ Aksa kaŋɛ Otniɛl fanɛ e kaŋɛ mo tuto Kalɛb nɛ e sa bumo kasawule. Aksa ka yɔ nɛ e ya wu mo tuto nseŋ gbelge mbe kurma so nɛ Kalɛb bishi mo le: “Manɛ nɛ fee sha ŋ ka wora n sa fo.” ¹⁹Ndoŋ nna nɛ Aksa kaŋɛ mo le: “Mee sha kakpa nɛ nchu wɔ nna, ama kakpa nɛ fo sa ma ere la keshishɛrsawule nna.” Ndoŋ nna nɛ Kalɛb ta abuye anyɔ n sa mo. Kuko daa wɔ kepreŋ so nna nɛ kuko malɛ wɔ ketaŋɛ to.

Juda be nde be asheŋ

²⁰Kananɛ b daŋ barga kasawule na to n sa Juda be yiri to ebi na fanɛ bumo be kapetɛ nde. ²¹Bumo be nde nɛ a daa wɔ kelargato be kaseto be kaba so be keshishɛrsawule so a mata Edɔm be kasawule be ekar na e daa la Kabziil nɛ Eda nɛ Jaguur ²²nɛ Kiina nɛ Dimoona nɛ Adada, ²³nɛ Kedɛsh nɛ Haazɔ nɛ Itnaan ²⁴nɛ Ziif nɛ Tɛlɛm nɛ Bialɔf ²⁵nɛ Haazɔ Hadaata nɛ Kiriɔf Hezrɔn nɛ baa tre kumo koŋwule na Haazɔ na, ²⁶nɛ Amaam nɛ Shema nɛ Molaada, ²⁷nɛ Haaza Gada nɛ Hɛshmɔn nɛ Bɛf Pɛlɛt, ²⁸nɛ Haaza Shuwal nɛ Bɛshiba nɛ Biziotaya, ²⁹nɛ Baala nɛ Iim nɛ Ezɛm, ³⁰nɛ Eltolaad nɛ Kesiil nɛ Hooma, ³¹nɛ Ziklag nɛ Madmaana nɛ Sansaana nɛ, ³²Lebaɔf nɛ Shilhim nɛ Ain nɛ Rimɔna. Amo kikɛ daa la ndegboŋ adunyɔ nɛ akpanu, n ta amo be ndewurbiana n ti so. ³³Ndegboŋ nɛ a daa wɔ epeŋitɔrkpa be kaba so be apreŋ so na e daa la: Eshtaol nɛ Zora nɛ Ashna nɛ ³⁴Zanua nɛ Engannim nɛ Tapua nɛ Eenan nɛ ³⁵Jaamɔf nɛ Adulam nɛ Soko nɛ Azeka nɛ ³⁶Sharaim nɛ Aditaim nɛ Gɛdera (ŋko Gɛdɛrotaim). Amo alɛ daa la ndegboŋ kudu ana, n ta amo be ndewurbi n ti so. ³⁷Ndegboŋ nɛ a naŋ ti so e daa la Zena nɛ Hadasha nɛ Migdal Gad nɛ ³⁸Dilɛan nɛ Mizpa nɛ Jokteel nɛ ³⁹Lakish nɛ Bozkaaf nɛ Eglɔn nɛ ⁴⁰Kabɔn nɛ Lamas nɛ Kitlish nɛ ⁴¹Gɛdɛrɔf nɛ Bɛf Dagɔn nɛ Naama nɛ Makɛda. Amo alɛ daa la ndegboŋ kuduashe, n ta amo be ndewurbi n ti so. ⁴²Ndegboŋ nɛ a naŋ ti so e daa la Libna nɛ Eta nɛ Ashan nɛ ⁴³Ipta nɛ Ashna nɛ Nezib nɛ ⁴⁴Keila nɛ Akzib nɛ Marɛsha. Amo alɛ daa la ndegboŋ akpanu. N ta amo be ndewurbi n ti so. ⁴⁵N ta Ekrɔn nɛ kumo be ndegboŋ nɛ awurbi. ⁴⁶Nɛ ndegboŋi nɛ awurbi nɛ a mata Ashdɔd na kikɛ. K baŋ yili Ekrɔn nna hale n ya fo teku nɛ baa tre Mɛditerenia na, ⁴⁷n ta Ashdɔd nɛ Gaaza nɛ amo be ndegboŋ nɛ awurbi hale n ya fo kabombi nɛ k wɔ Ijipt be kasawule be ekar na, n ta nde nɛ a wɔ Mɛditerenia be Teku ase na kikɛ n ti so. ⁴⁸Nde nɛ a daa wɔ abee be efuli so na malɛ e daa la Shamir nɛ Jatiir nɛ Soko nɛ ⁴⁹Danna nɛ Kiriaf Sanna nɛ kumo la Dɛbi na, ⁵⁰nɛ Anaab nɛ Estimo nɛ Anɛm nɛ ⁵¹Goshen nɛ Holon nɛ Gilo. Amo alɛ daa la ndegboŋ kudukako nɛ amo be ndewurbi. ⁵²Nseŋ naŋ ta Arab nɛ Duma nɛ Eshan ⁵³nɛ Janim nɛ Bɛf Tapua nɛ Afeka nɛ ⁵⁴Humta nɛ Hibrɔn nɛ Ziɔr. Amo alɛ wɔ ndegboŋ akpanu nɛ amo be ndewurbi. ⁵⁵Nseŋ ta Mayɔn nɛ Kamɛl nɛ Zif nɛ Juta ⁵⁶nɛ Jezreel nɛ Jokdiim nɛ Zanua ⁵⁷nɛ Keen nɛ Gibia nɛ Timna. Amo alɛ wɔ ndegboŋ kudu nɛ amo be ndewurbi. ⁵⁸N ta Halhul nɛ Bɛf Zur nɛ Gɛdɔ ⁵⁹nɛ Maraaf nɛ Bɛf Anɔf nɛ Eltekɔn. Amo alɛ wɔ ndegboŋ ashe nɛ amo be ndewurbi. ⁶⁰N ta Kiriaf Baal nɛ baa tre Kiriaf Jearim na nɛ Raaba. Amo alɛ la nde anyɔ nɛ amo ndewurbi. ⁶¹Amo nɛ a wɔ keshishɛrsawule so na malɛ e daa la Bɛf Araba nɛ, Miidin nɛ Sekaka nɛ ⁶²Nibshan nɛ k la nfɔl be kade na nɛ Engedi. Amo alɛ la ndegboŋ ashe nɛ amo be ndewurbi. ⁶³Judaebi na daŋ maŋ tiŋ n ju Jebusiebi nɛ b wɔ Jerusalɛm na bre. Ŋkpal loŋ so Jebusiebi nɛ Judaebi na e kraa tase hale kabre.

Kasawule nɛ b ta n sa Efrayim nɛ Manase na be asheŋ

¹Kasawule nɛ b sa Josɛf be kaman to ebi na be kelargato be kaseto be kaba so be ekar fara Jɔɔdan be lɔr na nna a mata Jɛriko be mbombi na be epeŋilarkpa be kaba so n ta n ya bɔla keshishɛrsawule na so n ya fo Bɛtɛl ashi abee so be efuli so, ²nseŋ yili Bɛtɛl n yɔ Luuz n ta n yɔ Atarɔf ashi Aakebi be kasawule so ³nseŋ kilgi n sɔ epeŋitɔrkpa n yɔ Jaflɛtebi be kaba so hale n ya fo Bɛf Bɔrɔn nseŋ naŋ yili ndoŋ n yɔ Gɛzɛr n ta n ya fo Mɛditerenia be Teku na kikɛ. ⁴Josɛf be kaman to ebi nɛ b la Efrayim nɛ Manase be yiri to ebi e nya kasawule ere fanɛ bumo kapetɛ.

⁵Le be kasawule ere e daa la Efrayim be kanaŋ to ebi peya. Bumo be kasawule be ekar fara Atarɔf Ada ashi epeŋilarkpa be kaba so n ya fo Bɛf Hɔrɔn ⁶n ta n ya fo Mɛditerenia be teku na nseŋ naŋ yili Mikmɛta ashi kelargato be esoso be kaba so ŋ kilgi m bɔla epeŋilarkpa be kaba so n ya bɔla Taana Shilo n yɔ Janua ⁷nseŋ yili Janua n yɔ Atarɔf nɛ Naara n ta n ya fo Jɛriko ŋ keta loŋ n ya fo Jɔɔdan be lɔr na. ⁸K daŋ naŋ yili Tapua nna n sɔ epeŋitɔrkpa n ya fo Kaana be kabombi na nseŋ ta loŋ n ya fo Mɛditerenia be Teku na. Kasawule nɛ b daŋ ta n sa Efrayim be kanaŋ to ebi fanɛ bumo kapetɛ nna na. ⁹B daŋ nya ndegboŋ nɛ ndewurbi ko gba nɛ a wɔ Manase be kasawule so n ti so. ¹⁰Ama b daa maŋ ju Keenanebi nɛ b daa wɔ Gɛza na. B daŋ yige bumo nna nɛ b chena Efrayim be kasawule so a shuŋ fanɛ anya a sa bumo.

Manase be epeŋitɔrkpa be kaba so be kasawule na be asheŋ

¹B daŋ ta kasawule nɛ k wɔ Jɔɔdan be epeŋitɔrkpa na nna n sa Josɛf pibinyɛn nimuso nɛ baa tre Manase na be kanaŋ to ebi nna. Giliad mo tuto Makiir nɛ e daa la enapo lempo na e daa la Manase pibinyɛn nimuso. Ŋkpal loŋ so b daŋ ta Giliad nɛ Bashan nɛ a wɔ Jɔɔdan be lɔr na be epeŋilarkpa na nna n sa mo. ²B daŋ ta Jɔɔdan be epeŋitɔrkpa be kasawule na nna n sa Manase be kanaŋ nɛ k ka na. Bumo e la Abieza nɛ Helɛk nɛ Asriɛl nɛ Shɛchem nɛ Heefa nɛ Shamida. Josɛf pibi Manase be kanaŋ to ebi. ³Zelofehad, nɛ e la Heefa pibi nɛ Heefa malɛ la Giliad pibi nɛ Giliad malɛ la Makiir pibi nɛ Makiir malɛ la Manase pibi na, daa maŋ kɔ mbinyɛnso ama mbicheso nawule. Mbe mbicheso na be atre e daa la Maala nɛ Nowa nɛ Hogla nɛ Milka nɛ Tiiza. ⁴Bumo e daŋ yɔ bɔrɛmatapo Eliaza nɛ Nun pibi Joshuwa nɛ benimuana na kutɔ n ya kaŋɛ bumo le: “Enyɛnpe Ebɔrɛ daŋ kaŋɛ Mosis nna fanɛ e sa anyi nɛ an siponyɛnana kasawule na be kaba nɛ k ba la anyeya.” Amoso Joshuwa daŋ sa bumo nɛ bumo siponyɛnana kasawule nna fanɛ kananɛ Enyɛnpe Ebɔrɛ baŋ ŋini na gbagba chap. ⁵Manase daŋ nya kasawule na be mba kudu nna, n ta Giliad, nɛ Bashan nɛ a wɔ Jɔɔdan be lɔr be epeŋilarkpa be kaba so na gba n ti so. ⁶B daŋ sa Manase be kaman to ebi be benyɛn nɛ beche kikɛ kasawule na be kachige nna. B daŋ ta Giliad be kasawule na nna n sa Manase be kanaŋ nɛ k ka na. ⁷Manase be kasawule daŋ yili Ashɛr nna n ya fo Mikmetaf nɛ k wɔ Shɛkɛm be epeŋilarkpa na. K daŋ yili ndoŋ nna n dese n ya fo kelargato be kaseto be kaba so be kakpa nɛ Entapuwa be basa wɔ na. ⁸Kasawule nɛ k kulti Tapua na la Manase peya nna ama Tapua be kade gbagba nɛ k wɔ Manase be kasawule be ekar na bre la Efrayim be kaman to ebi peya nna. ⁹Kasawule na be ekar dese loŋ n ya fo Kaana be kabombi na. Ama nde nɛ a wɔ kabombi na be kelargato be kaseto na bre daa la Efrayim peya nna nsaa wɔ Manase be kasawule so. Manase be kasawule be ekar bɔla kabombi na be kelargato be esoso be kaba so nna n ya fo Mɛditerenia be Teku na. ¹⁰Efrayim e wɔ kelargato be kaseto be kaba so nɛ Manase malɛ wɔ kelargato be esoso be kaba so. Mɛditerenia be Teku na e daa la bumo kasawule be epeŋitɔrkpa be ekar. Ashɛr e daa wɔ Manase be kelargato be esoso a yɔ epeŋitɔrkpa be kaba so nɛ Isakar malɛ wɔ kumo be kelargato be esoso be epeŋilarkpa na be kaba so. ¹¹Bɛf Shan nɛ Iblim nɛ amo be nde nɛ a kulti amo na kikɛ, n ta Dɔɔ nɛ k wɔ teku ase na nɛ Endɔ nɛ Tanaak nɛ Meggiddo nɛ ndewurbi nɛ a kulti amo na kikɛ da wɔ Isakar nɛ Ashɛr be nsawule so nna nsaa la Manase peya. ¹²Ama Manase be yiri to ebi daŋ maŋ tiŋ ŋ ju basa nɛ b wɔ nde na to amoso Keenanebi na daŋ maŋ lar ndoŋ. ¹³Israɛlebi na ka sɔ eleŋ a ji gba, b daa maŋ ju Keenanebi na, ama b daa tintiŋ bumo nna nɛ b baa shuŋ a sa bumo.

Efrayim nɛ Manase be epeŋitɔrkpa be kaba so ebi na ka bee fin kasawule damta be asheŋ

¹⁴Josɛf be kaman to ebi na daŋ kaŋɛ Joshuwa na le: “Mannɛ nna nɛ fo ta kasawule na be kaba koŋwule nawule n sa anyi fanɛ anyi be kapetɛ? Enyɛnpe Ebɔrɛ nɛfa anyi nna nɛ an shi.” ¹⁵Nɛ Joshuwa kaŋɛ le: “Nɛ Efrayim be kebee so be kasawule na du fimbi n sa menyi ŋkpal men ka shi so, kumo ere men ya lɔŋɛ kupo nɛ k wɔ Pɛrizebi nɛ Refaebi be kasawule so na n chena.” ¹⁶Ndoŋ nna nɛ b kaŋɛ: “Abee so be kasawule na maŋ shibi n sa anyi, Keenanebi nɛ b wɔ keplasawuleso na malɛ kɔ anyembi be egbaŋɛturko nna. Bumo be bumo nɛ b wɔ Bɛf Shan nɛ ndewurbi nɛ a mata kumo na nɛ bumo nɛ b wɔ Jizreel be ketaŋɛ to na kikɛ kɔ amo nna.” ¹⁷Nɛ Joshuwa kaŋɛ Efrayim nɛ Manase be yiri to ebi na le: “Ŋkpal men ka shibi nsaa kɔ eleŋ so, menyi be kasawule be kachige beeŋ ba shibi. ¹⁸Abee so be kasawule na be kaba so beeŋ baa la menyeya. K la kupo nna bre ama men ya lɔŋɛ ndoŋ n chena. Kashenteŋ nna fanɛ Keenanebi na kɔ anyembi be egbaŋɛturko nsaa kɔ eleŋ, ama menyeeŋ tiŋ n ju bumo kasawule na so.”

Kananɛ b barga kasawule nɛ k ka na to be asheŋ

¹Israɛlebi na ka kɔ n sɔ kasawule na n loge, nɛ bumo kikɛ ya gama abar so ashi Shilo nseŋ yuu Enyɛnpe Ebɔrɛ be nshɛr be wajɛbu ndoŋ. ²Israɛlebi be eyiri ashunu e daŋ ka nsaa maŋ nya bumo be kasawule be kachige. ³Ndoŋ nna nɛ Joshuwa kaŋɛ Israɛlebi na le: “Nchɛ afanɛ nɛ menyeeŋ sha nɛ men jo pɔɛŋ nseŋ ya sɔ kasawule nɛ Enyɛnpe nɛ e la men nananyɛnana be Ebɔrɛ na sa menyi na? ⁴Men lara yiri kama to be benyɛn asa asa n sa ma nɛ n shuŋi bumo nɛ b ya dara kasawule na kikɛ nɛnɛ nseŋ wora kumo be kakpa nɛ baaŋ baa sha fanɛ k ki bumo be kapetɛ na be ndulgi be nwɔl. Kumo be kaman nɛ b bɛta m ba ŋ kutɔ. ⁵Saŋɛ na so, baaŋ barga kasawule na to mba ashunu, nɛ kelargato be kaseto be kaba so be kasawule na e baa la Juda be yiri to ebi peya nɛ Josɛf be yiri to ebi malɛ peya e baa la kelargato be esoso be kaba so na. ⁶Kumo be kaman nɛ men wora kasawule na be mba ashunu na kikɛ be nwɔl m bar ma. Saŋɛ na so meeŋ to beri m bishi kusɔ nɛ Enyɛnpe Ebɔrɛ kɔ n sa menyi. ⁷Men sa maŋ kaŋ sa Livaiebi na bre men be kasawule na be kachige kikɛ, ŋkpal manɛ so, Enyɛnpe Ebɔrɛ be kabɔrɛmata be kushuŋ na e la bumo be kachige. Gad nɛ Ruben nɛ Manase be yiri na be bargato bre tiŋ n nya bumo be nsawule ashi Jɔɔdan be lɔr na be epeŋilarkpa na be kaba so. Enyɛnpe Ebɔrɛ be kayɛrbi Mosis e daŋ ta kumo n sa bumo.” ⁸Pɔɛŋ nɛ basa na lar nɛ b ya wora kasawule na be ndulgi be nwɔl na, le nɛ Joshuwa daŋ kaŋɛ bumo: “Men ya keni kasawule na kikɛ nɛ kananɛ k dese nseŋ wora kumo be ndulgi be nwɔl pɔɛŋ nseŋ bɛta m ba ŋ kutɔ, nɛ n to beri ashi Shilo nfe m bishi Enyɛnpe Ebɔrɛ kusɔ nɛ k wɔtɔ n sa menyi.” ⁹Ndoŋ nna nɛ benyɛn na ya nite kasawule na so kikɛ nseŋ wora kananɛ b barga kumo to mba ashunu na nɛ nde nɛ a wɔ kumo so kikɛ n wɔtɔ kawɔl to. B ka loge nɛ b bɛta n yɔ Joshuwa kutɔ ashi bumo be keeyi to ashi Shilo. ¹⁰Nɛ Joshuwa to beri m bishi Enyɛnpe Ebɔrɛ kusɔ nɛ k wɔtɔ nseŋ chige kasawule na to n sa Israɛl be eyiri nɛ a ka na.

Bɛnjamin be kasawule be asheŋ

¹¹Bɛnjamin be yiri to ebi nɛ b daŋ juŋkpar n chige kasawule na n sa. Bumo be kasawule dese Juda nɛ Josɛf be yiri to ebi be kefɛato nna. ¹²Bumo be kasawule na be kelargato be esoso be kaba so be ekar fara Jɔɔdan be lɔr na to nna m gbelge to n yɔ Jɛriko be kelargato be esoso be kaba so nseŋ ya sɔ to epeŋitɔrkpa be kaba so m bɔla abee be efuli so hale n ya fo Bɛf Avɛn be keshishɛrsawule na, ¹³nseŋ yili ndoŋ ŋ gbelge to m bɔla Bɛtɛl nɛ baa tre Luz na hale n ya fo Atarɔf Ada ashi kebeegboŋ nɛ k wɔ Lowa Bɛf Hɔrɔn be kelargato be kaseto be kaba so na. ¹⁴K ka fo kebeegboŋ na nɛ k yili kumo be epeŋitɔrkpa ŋ kilgi m bɔla kebee na be kelargato be kaseto be kaba so a yɔ Kiriaf Baal ŋko Kiriaf Jearim nɛ k la Juda be yiri to ebi peya na. ¹⁵Kasawule na be kelargato be kaseto be kaba so be ekar fara Kiriaf Jearim be ekarso nna n ta n sɔ epeŋitɔrkpa hale n ya fo Nɛftowa be abuye na, ¹⁶nseŋ naŋ yili ndoŋ n yɔ kebee nɛ k shoŋi Bɛn Hinnɔm be ketaŋɛ, nsaa wɔ Refaebi be ketaŋɛ na malɛ be kelargato be esoso be ekarso na be kifito, nseŋ kilgi n sɔ kelargato be kaseto be kaba so m bɔla Hinnɔm be ketaŋɛ na to ashi Jebusiebi be kebee so a laŋɛ En Rogɛl be kaba so, ¹⁷nseŋ yili ndoŋ malɛ m bɔla Enshɛmɛsh ashi kelargato be esoso be kaba so n yɔ Gelilɔf nɛ k wɔ Adummim be kebee be anishito na, nseŋ bɔla ndoŋ n yɔ Bohan be kejembu na. Ruben pibi e daa la Bohan. ¹⁸Kejembu na ase nɛ k yili ŋ kilgi m bɔla kebee nɛ k shoŋi Jɔɔdan be ketaŋɛ na be kelargato be esoso n ta m bɔla ketaŋɛ na to ¹⁹n sɔ Bɛf Hogla be kelargato be esoso be kaba so hale n ya fo nfɔl be teku na be kakpa nɛ Jɔɔdan be lɔr na bee luri kumo to na. Ndoŋ e daa la kasawule na be kelargato be kaseto be kaba so be ekar. ²⁰Jɔɔdan be lɔr na malɛ e daa la kumo epeŋilarkpa be kaba so be ekar. Kananɛ Bɛnjamin be yiri to ebi be kasawule nɛ b sa bumo fanɛ kapetɛ na dese nde: ²¹Nde nɛ a la Bɛnjamin be yiri to ebi peya na e la Jɛriko nɛ Bɛf Hogla nɛ Emɛk Keziz nɛ ²²Bɛf Araba nɛ Zemaraim nɛ Bɛtɛl nɛ ²³Avvim nɛ Para nɛ Ofra nɛ ²⁴Chefarammoni nɛ Ofni nɛ Gɛba. Amo nɛ amo ndewurbi kikɛ la nde kuduanyɔ nna. ²⁵Gibiɔn nɛ Rama nɛ Biirɔf nɛ ²⁶Mizpa nɛ Kefira nɛ Moza nɛ ²⁷Rekɛm nɛ Irpɛl nɛ Tarala nɛ ²⁸Zela nɛ Helɛf nɛ Jerusalɛm nɛ k la Jebusiebi be kadegboŋ na, nɛ Gibia nɛ Kiriaf Jearim. Amo alɛ nɛ amo be ndewurbi daa la nde kuduana. Kasawule nɛ Bɛnjamin be yiri to ebi daŋ nya fanɛ bumo be kapetɛ nna na.

Kasawule nɛ b ta n sa Simiɔn be yiri to ebi na be asheŋ

¹Simiɔn be yiri to ebi nɛ b la yiri nyɔsopo nɛ b chige kasawule n sa na be kasawule be kananɛ k dese nde. Bumo be kasawule na dese n ya luri Juda be yiri to ebi be kasawule to nna. ²Bumo e daa wɔ Bɛshiba nɛ Sheba nɛ Molaada nɛ ³Haaza Shuwal nɛ Baala nɛ Ezɛm nɛ ⁴Eltolaad nɛ Betuwɛl nɛ Hɔɔma nɛ ⁵Ziklag nɛ Bɛf Maakabof nɛ Haza Susa ⁶nɛ Bɛf Lebaɔf nɛ Sharuhɛm. A daa wɔ ndegboŋ kuduashe, n ta amo be ndewurbi n ti so.

⁷N ta Ain nɛ Rimmɔn nɛ Etta nɛ Ashaan. Amo alɛ daa wɔ ndegboŋ ana n ta amo be ndewurbi n ti so. ⁸N ta nde kama nɛ a mata ndegboŋana na hale n ya fo Baalaf Beer nɛ baa tre Rama nɛ k wɔ keshishɛrsawule so ashi kelargato be kaseto be kaba so na n ti so. Le be kasawule ere nɛ Simiɔn be yiri to ebi daŋ nya fanɛ bumo be kapetɛ na. ⁹Ŋkpal Juda be kasawule ka daa shi ga a chɔ kumo be basa so so, b daŋ ku kumo be kaba nna n sa Simiɔn be yiri to ebi.

Kasawule nɛ b ta n sa Zɛbyulɔn be yiri to ebi na be asheŋ

¹⁰Zɛbyulɔn be yiri to ebi e la yiri sasopo nɛ b chige kasawule na n sa. Bumo be kasawule dese hale n ya fo Sarid kikɛ. ¹¹Ndoŋ nɛ kasawule na be ekar yili n ta n sɔ epeŋitɔrkpa be kaba so n yɔ Maril hale n ta n ya fo Dabbashɛf nɛ mbombi nɛ a wɔ Jokniam be epeŋilarkpa be kaba so na. ¹²Nseŋ yili Sarid be kaba nyɔsopo na n ta n sɔ to epeŋilarkpa be kaba so n ya fo Chislof Tabor be kasawule be ekar nseŋ keta loŋ n ya fo Daberaf nɛ Jafaya kikɛ. ¹³Kumo be kaman nɛ b ta n chɔga so n sɔ to epeŋilarkpa be kaba so na n ya fo Gaf Heefa nɛ Eth Kazin, nseŋ kilgi n sɔ to Neah be kaba so a yɔ Rimmɔn. ¹⁴Nseŋ yili kelargato be esoso be kaba so ŋ kilgi n sɔ Hannatɔn be kaba so n ta n ya fo Ifta El be ketaŋɛ na, ¹⁵n ta Kattaf nɛ Nahalal nɛ Shimrɔn nɛ Idalah nɛ Bɛtlɛhɛm n ti so. B daa kɔ ndegboŋ kuduanyɔ nɛ amo be ndewurbi. ¹⁶Le be ndegboŋ nɛ awurbi ere daa wɔ kasawule nɛ Zɛbyulɔn be yiri to ebi nya fanɛ bumo be kapetɛ na so nna.

Kasawule nɛ b ta n sa Isakar be yiri to ebi na be asheŋ

¹⁷Isakar be yiri to ebi e daa la yiri nasopo nɛ b chige kasawule na n sa. ¹⁸Nde nɛ a daa wɔ bumo kasawule na so e la: Jizreel nɛ Kesullɔf nɛ Shunɛm nɛ ¹⁹Hafaraim nɛ Shiɔn nɛ Anaharaf nɛ ²⁰Rabiif nɛ Kishiɔn nɛ Ebez nɛ ²¹Remef nɛ En Gannim nɛ En Haddah nɛ Bɛf Pazzez. ²²Bumo be kasawule na be ekar daŋ fo Tabɔɔ nɛ Shahazumah nɛ Bɛf Shimɛsh nɛ Jɔɔdan be lɔr na. Ndegboŋ kuduashe nɛ amo be ndewurbi e daa wɔ kasawule na so. ²³Le be nde ere e daa wɔ kasawule nɛ Isakar be yiri to ebi nya fanɛ bumo be kapetɛ na.

Kasawule nɛ b ta n sa Ashɛr be yiri to ebi na be asheŋ

²⁴Ashɛr be yiri to ebi e daa la yiri nusopo nɛ b chige kasawule na n sa. ²⁵Nde nɛ a daa wɔ bumo be kasawule na so nde: Hɛlkaf nɛ Hali nɛ Bɛtɛn nɛ Akshaf nɛ ²⁶Alamelɛk nɛ Amad nɛ Mishaal. Bumo be epeŋitɔrkpa be kaba so be kasawule daŋ dese nna n ya fo Kamɛl nɛ Shihɔ Libnaf, ²⁷nseŋ yili ndoŋ ŋ kilgi n sɔ epeŋilarkpa be kaba so n ya fo Bɛfdagɔn, n ta loŋ n yɔ Zɛbyulɔn nɛ ketaŋɛ nɛ baa tre Iftahɛl na, nseŋ naŋ dese n yɔ Bɛtemɛk nɛ Neyɛl ashi kelargato be esoso be kaba so, n ta loŋ n ya fo Kabuul nɛ ²⁸Ebrɔn nɛ Rehɔb nɛ Hamɔn nɛ Kaana hale n ya fo Sidɔn. ²⁹Ndoŋ nɛ k yili ŋ kilgi n sɔ Rama n ta n ya fo kadegboŋ nɛ b pɔr egbal ŋ kulti nɛ baa tre Tai na n naŋ yili ndoŋ m bɔla Hosa n ya fo Mɛditerenia be Teku na nɛ Mahalab nɛ Akzib ³⁰nɛ Umah nɛ Afɛk nɛ Rehɔb. Ndegboŋ adunyɔ nɛ anyɔ nɛ amo be ndewurbi e daa wɔ kasawule na so. ³¹Le be ndegboŋ nɛ awurbi ere kikɛ e daa wɔ kasawule nɛ Ashɛr be yiri to ebi nya fanɛ bumo be kapetɛ na so.

Kasawule nɛ b ta n sa Naftali be yiri to ebi na be asheŋ

³²Naftali be yiri to ebi e daa la yiri shesopo nɛ b chige kasawule na n sa. ³³Bumo be kasawule be ekar daŋ yili Helɛf n yɔ Zaananim be kedibigboŋ na, n ya bɔla Adaminekɛb nɛ Jamnia n ta loŋ n ya fo Lakuum hale n ya fo Jɔɔdan be lɔr na. ³⁴Ndoŋ nɛ k yili ŋ kilgi n sɔ epeŋitɔrkpa be kaba so n yɔ Aznɔf Tabɔɔ n ta n ya bɔla Hukɔk n yɔ Zɛbyulɔn ashi kelargato be kaseto be kaba so nɛ Ashɛr ashi epeŋitɔrkpa be kaba so nɛ Jɔɔdan be lɔr na ashi epeŋilarkpa be kaba so. ³⁵Ndegboŋ nɛ b daŋ pɔr egbal ŋ kulti amo e daa la Ziddim nɛ Zer nɛ Hamaf nɛ Rakkah nɛ Chinnerɛf nɛ ³⁶Adamah nɛ Rama nɛ Hazɔɔ nɛ ³⁷Kedɛsh nɛ Edrei nɛ, Enhazɔɔ nɛ ³⁸Yirɔn nɛ Migdalel nɛ Horɛm nɛ, Bɛfanaf nɛ Bɛf Shimɛsh. A daa wɔ ndegboŋ kuduakpanu n ta amo be ndewurbi n ti so. ³⁹Le be ndegboŋ nɛ awurbi ere kikɛ e daa wɔ kasawule nɛ Naftali be yiri to ebi nya fanɛ bumo be kapetɛ na so.

Kasawule nɛ b ta n sa Dan be yiri to ebi na be asheŋ

⁴⁰Dan be yiri to ebi e daa la yiri shunusopo nɛ b chige kasawule na n sa. ⁴¹Le be nde ere e daa wɔ bumo be kasawule na so: Zora nɛ Eshtaol nɛ Irshemɛsh nɛ ⁴²Shaalbim nɛ Aijalɔn nɛ Ithlah nɛ ⁴³Elɔn nɛ Timna nɛ Ekrɔn nɛ ⁴⁴Eltekeh nɛ Gibbetɔn nɛ Baalaf nɛ ⁴⁵Jehud nɛ Beneberak nɛ Gafrimmɔn ⁴⁶nɛ Mejarkɔn nɛ Rakkɔn nɛ Jɔpa be kasawule so kikɛ. ⁴⁷Dan be yiri to ebi na ka paŋ bumo be kasawule nɛ b yɔ Leshɛm n ya kɔ kumo kena m pɔɔ kumo so m mɔ kumo be basa kikɛ nseŋ sɔ kasawule na ŋ ki bumo peya. Ndoŋ nɛ b daŋ chena nseŋ chɛrga kade na be ketre Leshɛm na ŋ ki Dan. Bumo nananyɛn be ketre e daa la Dan. ⁴⁸Le be ndegboŋ nɛ awurbi kikɛ e daa wɔ kasawule nɛ Dan be yiri to ebi nya fanɛ bumo be kapetɛ na so.

Kasawule nɛ b ta n sa Joshuwa na be asheŋ

⁴⁹Israɛlebi na ka barga kasawule na to n sa abar n loge nɛ b sa Nun pibi Joshuwa gba kasawule na be kaba fanɛ k ba la mo alɛ be kapetɛ. ⁵⁰Kananɛ Enyɛnpe Ebɔrɛ daŋ kaŋɛ na gbagba nɛ b daŋ bɛ so nseŋ ta kade nɛ e kaŋɛ fanɛ e bee sha na n sa mo. Kumo e la: Timnaf Sɛrah nɛ k wɔ Efrayim be abee be efuli so na. Nɛ e lɔŋɛ kade na m pɔr nseŋ chena ndoŋ. ⁵¹Bɔrɛmatapowura Eliaza nɛ Nun pibi Joshuwa, nɛ Israɛl be kanaŋ na to be eyiriana be benimu e daŋ to beri Enyɛnpe Ebɔrɛ be nshɛr be wajɛbu na be kabunato Enyɛnpe na be anishito ashi Shilo m barga kasawule na to n sa basa na kikɛ. Loŋ nɛ b wora m barga kasawule na to.

Kesɔnyige be nde

(Nɔmbɛs 35:9-34; Ditɛronɔmi 19:1-13)

¹Ndoŋ nna nɛ Enyɛnpe Ebɔrɛ kaŋɛ Joshuwa ²fanɛ e kaŋɛ Israɛlebi na le: “Men lara kesɔnyige be nde nɛ ŋ kaŋɛ Mosis fanɛ e kaŋɛ menyi amo be asheŋ na. ³Saŋɛ na so esa kama nɛ e maŋ kute m mɔ esa, beeŋ tiŋ n shile n yɔ ndoŋ n ya ŋana esa nɛ e mɔ na mo niopibi nɛ e bee fin mo nɛ e mɔ n tal to so. ⁴Loŋ be esa na beeŋ tiŋ n shile n yɔ kesɔnyige be nde na be kuko to n ya luri kumo be kabunagboŋ na be kakpa nɛ baa shɛr a ji demu na m bugi to ŋ kaŋɛ bejuŋkparpoana na kusɔ nɛ k wora. Saŋɛ na so, baaŋ shin nɛ e luri kade na to nɛ b sa mo kakpa nɛ e beeŋ baa wɔ nɛ e tu bumo n chena. ⁵Nɛ esa nɛ e bee fin kemɔ loŋ be esa n tal to na kaŋ bɛ emɔpo na so n yɔ ndoŋ, benimuana na e sa maŋ kaŋ yige emɔpo na n sa mo. K daga fanɛ b kuŋ emɔpo na nɛnɛ, ŋkpal manɛ so, e maŋ kute nna m mɔ esa na agbo so. ⁶K daga fanɛ e chena kade na to n ya fo saŋɛ nɛ baaŋ ji mo demu jimaŋ be anishito ŋko saŋɛ nɛ esa nɛ e la bɔrɛmatapo nimuso loŋ be saŋɛ na beeŋ wu. Kumo kaman pɔɛŋ nɛ e beeŋ tiŋ m bɛta n yɔ kade nɛ e daŋ shile kumo to na.” ⁷Amoso nde nɛ b lara ashi Jɔɔdan be lɔr na be epeŋitɔrkpa e daa la Kadɛsh nɛ k wɔ Galili ashi Naftali be abee be efuli so na nɛ Shɛkɛm nɛ kumo alɛ wɔ Efrayim be abee be efuli so na, nɛ Hibrɔn nɛ k wɔ Juda be abee be efuli so na. ⁸Jɔɔdan be lɔr na be epeŋilarkpa be kaba so ashi keshishɛrsawule na so na malɛ b daŋ lara Beza nɛ k wɔ Ruben be kasawule so na nɛ Ramɔf nɛ k wɔ Giliad ashi Gad be kasawule so na nɛ Golan nɛ k wɔ Bashan ashi Manase be kasawule so na. ⁹Le be nde ere e daa la kesɔnyige be nde nɛ b lara n sa Israɛlebi kikɛ nɛ befɔ nɛ b chena bumo to na. Esa kama nɛ e maŋ kute m mɔ esa beeŋ tiŋ n shile n yɔ nde ere to n ya nya kekuŋ ashi esa nɛ e bee fin kemɔ mo m bishi kuwule nɛ b maŋ naŋ ji mo demu ashi jimaŋ be anishito na kutɔ.

Livaiebi be nde be asheŋ

¹Livaiebi be yiri to ebi be benimuana yɔ bɔrɛmatapo Eliaza nɛ Nun pibi Joshuwa nɛ Israɛl be yiri yiriana be benimuana kutɔ, ²ashi Shilo nɛ k wɔ Keenan be kasawule so na n ya kaŋɛ bumo le: “Enyɛnpe Ebɔrɛ e bɔla Mosis so ŋ kaŋɛ fanɛ b sa anyi nde nɛ anyeeŋ baa wɔtɔ nɛ nsawule nɛ anyi be asɔbɔya beeŋ baa ji.” ³Amoso kananɛ Enyɛnpe Ebɔrɛ kaŋɛ na gbagba nɛ Israɛlebi na ta bumo be nde ko nɛ asɔbɔya be ejikpa be nsawule ashi bumo mpetɛ to n sa Livaiebi na. ⁴Kohaf be kabuna be yiri to ebi ashi Livai be kanaŋ to e daŋ juŋkpar n nya nde. Basa nɛ b shi bɔrɛmatapo Ɛɛrɔn be yiri to daŋ nya nde kuduasa nna ashi Juda nɛ Simiɔn nɛ Bɛnjamin be kasawule so. ⁵Kohaf be kabuna nɛ b ka na malɛ daŋ nya nde kudu nna ashi Efrayim nɛ Dan be yiri to ebi nɛ Manase be yiri to ebi be bargato nɛ b wɔ epeŋitɔrkpa be kaba so na be nsawule so nna.

⁶Nde kuduasa nɛ Gɛshɔn be kabuna malɛ daŋ nya ashi Isakar nɛ Ashɛr nɛ Naftali nɛ Manase be yiri to ebi be bargato nɛ b wɔ epeŋilarkpa be kaba so na be nsawule so.

⁷Mɛrari be kabuna ebi malɛ daŋ nya nde kuduanyɔ nna ashi Ruben nɛ Gad nɛ Zɛbyulɔn be nsawule so. ⁸Israɛlebi daŋ to beri nna pɔɛŋ nseŋ chige le be nde ere nɛ amo be asɔbɔya be ejikpa be nsawule n sa Livaiebi na fanɛ kananɛ Enyɛnpe Ebɔrɛ kaŋɛ Mosis fanɛ e wora na. ⁹Nde ere e daa wɔ Juda nɛ Simiɔn be nsawule so nɛ b ta n sa ¹⁰Ɛɛrɔn mo nanabiana nɛ b shi Kohaf be kanaŋ to nsaa la Livai be yiri to ebi na. Bumo e daŋ fara n nya kachige na. ¹¹B daŋ ta Kiriaf Aba nɛ baa tre Hibrɔn nɛ k wɔ Juda be abee be efuli so na nɛ kumo be asɔbɔya be ejikpa be kasawule na nna n sa bumo (Anak mo nananyɛn e daa la Arba.) ¹²Kadegboŋ na be adɔsawule nɛ kumo be ndewurbi nɛ a kulti kumo na bre, b daŋ ta amo nna n sa Jefune pibi Kalɛb fanɛ a ba la mbe kapetɛ. ¹³Nde nɛ b daŋ ta n sa bɔrɛmatapo Ɛɛrɔn mo nanabiana malɛ e la Hibrɔn nɛ k la kesɔnyige be nde na be kuko na, nɛ Libna ¹⁴nɛ Jatiir nɛ Eshtemɔa nɛ ¹⁵Holon nɛ Debir nɛ ¹⁶Ain nɛ Juta nɛ Bɛf Shimɛsh, n ta amo be asɔbɔya be ejikpa be nsawule n ti so. Ndegboŋ akpanu e daŋ shi Juda nɛ Simiɔn be yiri to ebi be kasawule so. ¹⁷Bɛnjamin be yiri to ebi be nde nɛ b daŋ ta n sa Livaiebi na e daa la Gibiɔn nɛ Gɛba nɛ ¹⁸Anatɔf nɛ Almɔn n ta amo be asɔbɔya be ejikpa be nsawule n ti so. A daa la nde ana nna. ¹⁹Nde kuduasa nɛ amo be asɔbɔya be ejikpa be nsawule nɛ b daŋ ta n sa bɔrɛmatapoana nɛ b la Ɛɛrɔn be kaman to ebi na. ²⁰B daŋ ta ndegboŋ ko nɛ a wɔ Efrayim be kasawule so nna n sa Kohafebi nɛ b ka nsaa shi Livai be yiri to na. ²¹Nde ana nɛ b daŋ ta n sa bumo na e daa la Shɛkɛm nɛ k wɔ Efrayim be abee be efuli so nsaa la kesɔnyige be nde na be kuko, nɛ Gɛza nɛ ²²Kibzaim nɛ Bɛf Hɔrɔn, n ta amo be asɔbɔya be ejikpa be nsawule n ti so. ²³Ndegboŋ ana nɛ b daŋ sa bumo ashi Dan be kasawule so malɛ e daa la: Eltekeh nɛ Gibbetɔn nɛ ²⁴Aijalɔn nɛ Gatrimmɔn, n ta amo be asɔbɔya be ejikpa be nsawule n ti so. ²⁵Manase be yiri to ebi be bargato nɛ b wɔ epeŋitɔrkpa be kaba so na be ndegboŋ anyɔ nɛ b daŋ ta n sa bumo e daa la: Tanaak nɛ Gatrimmɔn, n ta amo be asɔbɔya be ejikpa be nsawule n ti so. ²⁶Ndegboŋ nɛ a kɔ asɔbɔya be ejikpa be nsawule nɛ b daŋ ta n sa Kohaf be kabuna ebi na daa wɔ kudu. ²⁷Manase be yiri to ebi be bargato nɛ b wɔ epeŋilarkpa be kaba so na be ndegboŋ anyɔ nɛ b daŋ ta n sa Gɛshɔn be kabuna ebi nɛ b shi Livai be yiri to e la Golan nɛ k la kesɔnyige be nde na be kuko ashi Bashan na, nɛ Bɛshtera nɛ amo be asɔbɔya be ejikpa be nsawule. ²⁸Isakar be yiri to be kasawule so malɛ be ndegboŋ ana nɛ b daŋ nya e la: Kishɔn nɛ Daberaf, ²⁹nɛ Jamaf nɛ Engannim, n ta amo be asɔbɔya be ejikpa be nsawule n ti so. ³⁰Ashɛr be yiri to be kasawule so malɛ be ndegboŋ ana nɛ b daŋ nya e la: Mishaal nɛ Abdɔn nɛ ³¹Hilkaf nɛ Rehɔb, n ta amo be asɔbɔya be ejikpa be nsawule n ti so. ³²Naftali be yiri to be kasawule so malɛ be ndegboŋ asa nɛ b daŋ nya e la: Kedɛsh nɛ k la kesɔnyige be nde na be kuko ashi Galili na nɛ Hammɔf Dɔr nɛ Kartan, n ta amo be asɔbɔya be ejikpa be nsawule n ti so. ³³Gɛshɔn be kabuna ebi kikɛ be nde daa la nde kuduasa nna, n ta amo be asɔbɔya be ejikpa be nsawule n ti so.

³⁴Livai be yiri to ebi nɛ b shi Mɛrari be kabuna na daŋ nya ndegboŋ ana nna ashi Zɛbyulɔn be yiri to ebi be kasawule so. Amo e la Jokniam nɛ Kartan nɛ ³⁵Dimnah nɛ Nahalal n ta amo be asɔbɔya be ejikpa be nsawule n ti so. ³⁶Ruben be yiri to ebi be kasawule so malɛ be ndegboŋ ana nɛ b daŋ nya e daa la: Beza nɛ Jehaz nɛ ³⁷Kedemɔf nɛ Mefaaf, n ta amo be asɔbɔya be ejikpa be nsawule n ti so. ³⁸Nde nɛ b daŋ nya ashi Gad be yiri to ebi be kasawule so malɛ daa la nde ana nna. Amo e la Ramɔf nɛ k la kesɔnyige be nde na be kuko ashi Giliad na nɛ Mahanaim ³⁹nɛ Heshbɔn nɛ Jaza, n ta amo be asɔbɔya be ejikpa be nsawule n ti so. ⁴⁰Amoso nde nɛ Mɛrari be kabuna ebi daŋ nya kikɛ daa la ndegboŋ kudu anyɔ nna. ^41-42Nde adena nɛ aburwa nɛ amo be asɔbɔya be ejikpa be nsawule nɛ b sa Livaiebi na ashi Israɛlebi be nsawule so.

Israɛlebi ka chena kasawule na so be asheŋ

⁴³Enyɛnpe Ebɔrɛ na daŋ ta kasawule nɛ e nase kɔnɔ kpakpaso fanɛ e beeŋ sa bumo nananyɛnana na nna n sa Israɛlebi na. B ka kɔ n sɔ kasawule na nɛ b chena kumo so. ⁴⁴Enyɛnpe Ebɔrɛ daŋ sa bumo kagbenewushi nna ashi efuli na kikɛ so, fanɛ kananɛ e nase kɔnɔ n sa bumo nananyɛnana na. Bumo doŋana be ekama daa maŋ tiŋ m pɔɔ bumo so, ŋkpal manɛ so, Enyɛnpe Ebɔrɛ daŋ sa Israɛlebi na eleŋ nna nɛ b kɔ m pɔɔ bumo doŋana kikɛ so. ⁴⁵Enyɛnpe Ebɔrɛ be nnɔ nɛ e daŋ nase n sa Israɛlebi na kikɛ daŋ bɔlɔ so nna.

Epeŋilarkpa be kaba so be yiri na bɛta n yɔ epe be asheŋ

¹Joshuwa daŋ tre Ruben nɛ Gad nɛ Manase be epeŋilarkpa be yiri to ebi nna ²ŋ kaŋɛ bumo le: “Menyi wora kusɔ kama nɛ Enyɛnpe Ebɔrɛ be kayɛrbi Mosis kaŋɛ menyi fanɛ men wora na nseŋ bɛ kusɔ kama nɛ ma alɛ gba kaŋɛ menyi kenishipereso na kikɛ so. ³Men maŋ kini kechɛ men niopibiana Israɛlebi to. Kusɔ kama malɛ nɛ Enyɛnpe menyi be Ebɔrɛ na kaŋɛ menyi, menyi bɛ kumo kikɛ so. ⁴Naniere Enyɛnpe menyi be Ebɔrɛ na ka sa men niopibiana Israɛlebi kagbenewushi fanɛ kananɛ e nase kɔnɔ na ere, men bɛta n yɔ menyi be kasawule nɛ k wɔ Jɔɔdan be lɔr na be epeŋilarkpa be kaba so nɛ Enyɛnpe Ebɔrɛ be kayɛrbi Mosis ta n sa menyi na so. ⁵Ama men baa da so nsaa bɛ mbra nɛ Mosis sa menyi, fanɛ: ‘Men baa sha men Nyɛnpe Ebɔrɛ na, nsaa wora mbe aparsheŋ. Men baa bɛ mbe mbra so, a ji kashenteŋ a sa mo, nsaa shuŋ mo nɛ men be ŋgbene nɛ ayoyu kikɛ.’ ” ^6-8Kumo be kaman nɛ Joshuwa nɛfa bumo nseŋ ta le kubɔya n sa bumo fanɛ b yɔ epe: “Menyee bɛta a yɔ epe nɛ kedamaya nɛ asɔbɔya nɛ gbiti nɛ shuwa nɛ ntishaŋ peper nɛ abɛlso nɛ asɔbuuso damta. Men ya sa men braana asɔ nɛ men sɔ men doŋana kutɔ na be ako.” Nɛ b lar n yɔ.

Mosis e daŋ sa Manase be yiri to ebi be bargato kasawule ashi Jɔɔdan be lɔr na be epeŋilarkpa nɛ Joshuwa malɛ sa yiri na be bargato nɛ k ka na nɛ eyiri nɛ a ti so na kasawule ashi Jɔɔdan be lɔr na be epeŋitɔrkpa be kaba so.

⁹Ndoŋ nna nɛ basa nɛ b shi Ruben nɛ Gad be yiri to na nɛ Manase be yiri nɛ k wɔ epeŋilarkpa be kaba so na bɛta n yɔ bumo pe ana. B daŋ yige Israɛlebi be basa nɛ b ka na nna ashi Shilo nɛ k wɔ Keenan na nseŋ bɛta n yɔ bumo gbagba be kasawule so ashi Giliad nɛ b kɔ n sɔ fanɛ kananɛ Enyɛnpe Ebɔrɛ bɔla Mosis so ŋ kaŋɛ bumo kenishipereso na. ¹⁰Ruben nɛ Gad be eyiri nɛ Manase be epeŋilarkpa be kaba so be yiri na ka ba Gelilɔf ashi Jɔɔdan be lɔr na be epeŋitɔrkpa be kaba so na nɛ b pɔr bɔrɛsure gboŋgboŋi ko Jɔɔdan be lɔr na ase. ¹¹Israɛlebi nɛ b ka na ka nu fanɛ b pɔr bɔrɛsure gboŋgboŋi ko Keenan be kasawule so ashi Gelilɔf nɛ k wɔ Jɔɔdan be lɔr be kaba ndoŋ na, ¹²nɛ bumo kikɛ shɛr ashi Shilo nɛ b bela ase n ya kɔ epeŋilarkpa be kaba so be eyiri ana na kena, ¹³nseŋ shuŋi bɔrɛmatapo Eliaza pibinyɛn Finihas, Ruben nɛ Gad be eyiri nɛ Manase be epeŋilarkpa be yiri na kutɔ ashi Giliad be kasawule so. ¹⁴Bejuŋkparpo kudu nɛ b la Israɛlebi nɛ b wɔ Jɔɔdan be lɔr na be epeŋitɔrkpa be kaba so be eyiri yiri to na be basa koko e daŋ tu Finihas n yɔ. ¹⁵B ka yɔ Giliad be kasawule so n ya tu Ruben nɛ Gad nɛ Manase be epeŋilarkpa be kaba so be basa na nɛ ¹⁶b yili Enyɛnpe Ebɔrɛ be basa na kikɛ be katelamu to ŋ kaŋɛ le: “Manɛ nna nɛ men wora le be kulubi ere ŋ gbiti Israɛl be Ebɔrɛ? Men ka kini kenu n sa Enyɛnpe Ebɔrɛ na so nɛ men pɔr bɔrɛsure ere n sa menyi gbagba be amu na! Men maŋ naa bɛ mo so nna na. ¹⁷Men nyiŋi aleblawu nɛ Enyɛnpe Ebɔrɛ daŋ shin nɛ k ba mbe basa so ashi Piɔr ŋkpal alubi so na. An kraa ji awurfoŋ nna ŋkpal kumo so hale kabre. Loŋ be kulubi na nawule maŋ kukwe anyi a? ¹⁸Ŋko menyee sha nna nɛ men pal kaman n sa Enyɛnpe Ebɔrɛ? Men baŋ kini kenu n sa Enyɛnpe Ebɔrɛ kabre, echefoso, mo alɛ beeŋ nya agbo n wɔtɔ Israɛlebi kikɛ. ¹⁹Nɛ kasawule nɛ men nya na maaŋ naa walɛ nɛ men baa bunyaŋ Enyɛnpe Ebɔrɛ na kumo so gba, men ba kasawule nɛ Enyɛnpe be wajɛbu wɔ kumo so na m ba sɔ kasawule ashi anyi kutɔ ŋ ki menyeya. Ama, men sa maŋ kini kenu n sa Enyɛnpe Ebɔrɛ nseŋ pɔr bɔrɛsure popɔr n ti mo peya na so. ²⁰Men nyiŋi kananɛ Zɛra pibinyɛn Eekan kini kenu n sa Enyɛnpe Ebɔrɛ nseŋ ta asɔ nɛ Enyɛnpe Ebɔrɛ kaŋɛ fanɛ b mur na, nɛ Israɛlebi kikɛ luri kasogberge to ŋkpal loŋ so. Mannɛ Eekan nawule e daŋ wu ŋkpal mbe kulubi nɛ e wora na so.” ²¹Ndoŋ nna nɛ Ruben nɛ Gad nɛ Manase be epeŋilarkpa be kaba so be yiriana na to be basa na be bejuŋkparpo kaŋɛ Israɛlebi be mbuna mbuna be benimu na le: ²²“Enyɛnpetale na nawule e la Ebɔrɛ! Mo nawule e la Enyɛnpe Ebɔrɛ. Mo nawule e nyi kusɔ nɛ k ba nɛ an pɔr bɔrɛsure ere. Anyi alɛ bee sha fanɛ menyi alɛ gba e pin kumo be loŋ nna. Nɛ fanɛ an kini kenu n sa Enyɛnpe Ebɔrɛ na nna ŋko n wora kusoe kpakpaso bre, kumo ere men sa maŋ shin nɛ an ji efute ²³Nɛ fanɛ an wora Enyɛnpe Ebɔrɛ na kusoe kpakpaso nna nseŋ pɔr anyi gbagba be bɔrɛsure nɛ an baa chɔɔ esarga kumo so ŋko a lara ajibi be esarga ŋko a lara kɔnɔkoŋwule be esarga kumo so bre, Enyɛnpe Ebɔrɛ na e gberge anyi kusoe. ²⁴Ayai! An wora loŋ nna ŋkpal an ka bee lɔ kufu fanɛ kachako men nanabiana ka beeŋ ba koso ŋ kaŋɛ an nanabiana fanɛ: ‘Manɛ nɛ menyi nɛ Enyɛnpe Israɛl be Ebɔrɛ na kɔ? ²⁵E daŋ shin nna nɛ Jɔɔdan be lɔr na ki anyi Israɛlebi nɛ menyi be egbaŋ to. Enyɛnpe Ebɔrɛ na la Israɛlebi nawule be Ebɔrɛ nna.’ Nɛ kumo be loŋ e shin nɛ an nanabiana e yige kebaabunyaŋ Enyɛnpe na. ²⁶Amoso nɛ an pɔr bɔrɛsure nɛ an maaŋ baa chɔɔ asɔbɔya ŋko a lara sarga kumo so na. ²⁷Ama an wora loŋ nna nɛ k baa la shɛda n sa anyi nɛ menyi be basa nɛ an be kenana fanɛ anyee lara sarga chɔɔso nɛ ajibi be sarga nɛ kɔnɔkoŋwule be sarga a shuŋ Enyɛnpe Ebɔrɛ ashi Enyɛnpe be wajɛbu na be anishito ashi Jerusalɛm. Le e naaŋ shin nɛ men nanabiana e sa maŋ tiŋ ŋ kaŋɛ an nanabiana fanɛ Enyɛnpe na la Israɛlebi nawule be Ebɔrɛ nna. ²⁸Anyi alɛ be nfɛra e la fanɛ, nɛ loŋ kaŋ wora, an nanabiana beeŋ tiŋ ŋ kaŋɛ le: ‘An nananyɛnana daŋ pɔr bɔrɛsure fanɛ kumo nɛ k wɔ Enyɛnpe Ebɔrɛ be wajɛbu na be anishito ashi Jerusalɛm na nna. K daa maŋ la esarga chɔɔso nɛ sarga be kelara be bɔrɛsure nna, ama k daa la shɛda nna n sa anyi be basa nɛ menyi be basa.’ ²⁹Anyi maaŋ kini kenu n sa Enyɛnpe Ebɔrɛ ŋko ŋ kini kebɛ mo so nseŋ pɔr bɔrɛsure a chɔɔ sarga kumo so ŋko a lara ajibi be sarga ŋko sarga kama kumo so. Anyi maaŋ pɔr bɔrɛsure kikɛ n naŋ ti Enyɛnpe nɛ e la anyi be Ebɔrɛ be bɔrɛsure nɛ k yil Enyɛnpe Ebɔrɛ be wajɛbu na be anishito na so.” ³⁰Bɔrɛmatapowura Finihas nɛ benimu kudu nɛ b daŋ ti mo so nsaa la epeŋitɔrkpa be eyiri yiri be mbuna mbuna be bejuŋkparpoana na ka nu kusɔ nɛ Ruben nɛ Gad nɛ Manase be epeŋilarkpa be kaba so be bejuŋkparpo na kaŋɛ na, nɛ b wu fanɛ b kɔ akpa. ³¹Ndoŋ nna nɛ bɔrɛmatapo Eliaza pibinyɛn Finihas kaŋɛ bumo le: “Naniere bre an pin fanɛ Enyɛnpe Ebɔrɛ na e chɛ anyi to nɛ an lɔŋɛ abar na. Ŋkpal manɛ so menyi maŋ kini kenu n sa mo, amoso nɛ men mɔlga Israɛlebi ashi Enyɛnpe na be kasogberge to na.”

³²Kede be kaman nɛ Finihas nɛ bejuŋkparpoana na yige bumo ashi Giliad be kasawule so nseŋ bɛta n yɔ Keenan n ya bɔ baru na n sa Israɛlebi na. ³³Israɛlebi ka nu baru na, nɛ k wora bumo ebel nɛ b di Ebɔrɛ epaŋ. Bumo alɛ maŋ naŋ malga keyaa kɔ kena n jija kasawule nɛ Rubenebi nɛ Gadebi nɛ Manase be epeŋilarkpa be basa tase so na be asheŋ kikɛ.

³⁴Nɛ Israɛlebi nɛ b wɔ Jɔɔdan be lɔr na be epeŋilarkpa be kaba so na kaŋɛ: “Bɔrɛsure ere la shɛda nna a nyiŋi anyi fanɛ Enyɛnpe na la anyi kikɛ be Ebɔrɛ nna.” Ndoŋ nna nɛ b nase kumo “Shɛd.”

Joshuwa ka kela bejuŋkparpo na be asheŋ

¹Enyɛnpe Ebɔrɛ na daŋ sa Israɛlebi na ewushi nfɛ damta nna ashi bumo doŋana kutɔ. Joshuwa malɛ daŋ bel ga nna. ²Kachako nɛ e tre Israɛlebi be bejuŋkparpo kikɛ, benimu nɛ demujipoana nɛ bumo be ekrachi m ba kaŋɛ bumo le: “Naniere bre m bel. ³Menyi kikɛ wu kusɔ nɛ Enyɛnpe menyi be Ebɔrɛ na wora efuliana na ŋkpal menyi so. Enyɛnpe Ebɔrɛ na e kɔ n sa menyi. ⁴Men baa nyiŋi kananɛ n ta basa nɛ b ka na be nsawule nɛ efuli nɛ ŋ kɔ m pɔɔ so nɛ k yili Jɔɔdan be lɔr na ashi epeŋilarkpa n ya fo teku nɛ baa tre Mɛditerenia na ashi epeŋitɔrkpa na be nsawule n sa menyi be yiri yiri to ebi fanɛ bumo be kapetɛ. ⁵Enyɛnpe menyi be Ebɔrɛ na gbagba beeŋ shin nɛ b bɛta n shile nɛ e ju bumo saŋɛ nɛ menyee ba na. Menyeeŋ sɔ bumo be kasawule na ŋ ki menyi be kapetɛ fanɛ kananɛ Enyɛnpe Ebɔrɛ na nase kɔnɔ n sa menyi na. ⁶Amoso men baa da so nsaa bɛ kusɔ kama nɛ b sibɛ n nase Mosis be mbra be kawɔl na to na a maa gal mbra na be kekama a lɛ. ⁷Men sa maa ji a tir kasawule na so be basa nɛ b ka a wɔ menyi to na. Men sa maa nase nnɔ bumo be agbir to ŋko a bɔ amo. Men sa maa shuŋ agbir na ŋko a bunyaŋ amo. ⁸Ama men ba ji kashenteŋ a sa Enyɛnpe Ebɔrɛ na fanɛ kananɛ men chɛr a wora na. ⁹Enyɛnpe Ebɔrɛ na ju basagboŋ lempoana saŋɛ nɛ menyee ba na nna, nɛ bumo be ekama maŋ naŋ tiŋ n tu menyi ŋ kɔ. ¹⁰Menyi be ekama beeŋ tiŋ ŋ kɔ basa kagboŋ m pɔɔ bumo so ŋkpal men Nyɛnpe Ebɔrɛ ka bee kɔ a sa menyi fanɛ kananɛ e nase kɔnɔ fanɛ e beeŋ wora na so. ¹¹Amoso, men baa sha men Nyɛnpe Ebɔrɛ na ga nsaa da so nɛ men maaŋ wora n da mo so. ¹²Men baŋ pal kaman n sa mo nseŋ tu basa nɛ b ka a wɔ menyi to na a wora asheŋ nsaa ta abar be beche bre, ¹³kumo ere men baa nyi fanɛ Enyɛnpe Ebɔrɛ na maaŋ naŋ ju basa ere saŋɛ nɛ menyee ba ere. Kumo be loŋ malɛ beeŋ shin nɛ b lubi ŋ ki fanɛ kejigbelɛ ŋko kejamaŋ nsaa besa fanɛ kramɔsha ka duŋ esa be kaman ŋko ewi ka da esa be kenishito na. Loŋ malɛ beeŋ baa wora nna hale nɛ men kikɛ e ya mur kasawule lela nɛ Enyɛnpe Ebɔrɛ na sa menyi ere so. ¹⁴Naniere bre ma luwu fo. Menyi alɛ be ekama nyi mbe kagbene to fanɛ asɔ lela kama nɛ Enyɛnpe Ebɔrɛ nase kɔnɔ fanɛ e beeŋ sa na, men nya amo. Kusɔ kama nɛ e nase kɔnɔ fanɛ e beeŋ wora na kikɛ bɔlɔ so nyam. ¹⁵Kananɛ e baaŋ bɛ kɔnɔ naseso kama nɛ e nase n sa menyi so na, loŋ koŋwule na nɛ e beeŋ tiŋ m bar kasogberge gba menyi so. ¹⁶Nɛ men baŋ maŋ bɛ kɔnɔ naseso be ŋkre nɛ Enyɛnpe Ebɔrɛ sa menyi na so nsaa wɔtɔ a shuŋ nsaa bunyaŋ agbir bre, kumo ere e beeŋ gberge menyi kusoe agbo so nɛ men paŋ kasawule lela nɛ e ta n sa menyi ere gba.”

Joshuwa ka malga n sa basa na ashi Shɛchem be asheŋ

¹Ndoŋ nna nɛ Joshuwa tre Israɛl be eyiriana na kikɛ m ba Shɛchem. Bumo be benimuana nɛ bejuŋkparpo nɛ demujipoana nɛ ekrachiana nɛ e daŋ tre m ba Ebɔrɛ be anishito ²m ba kaŋɛ bumo kikɛ le: “Enyɛnpe Israɛl be Ebɔrɛ na yɛ: ‘Dra dra na men nananyɛnana daa wɔ lɔr nɛ baa tre Yufreetes na be kaba ndoŋ nna, a shuŋ agbir. Bumo be eko e daa la Tɛɛra nɛ e la Eebraham nɛ Nahɔɔ bumo tuto na. ³Ndoŋ nna nɛ n lara men nananyɛn Eebraham ashi Yufreetes be kaba ndoŋ n ya ta mo n nite Keenan be kasawule so kikɛ. N daŋ sa mo ebinyɛn nɛ baa tre mo Aizek nɛ e ki kanaŋ damtawura. ⁴N sa Aizek malɛ mbinyɛnbi anyɔ nɛ baa tre Jeekɔb nɛ Isɔɔ na. Edɔm be abee be kasawule na be kaba so nɛ n ta n sa Isɔɔ fanɛ mbe kapetɛ, ama Jeekɔb bre nɛ mbe mbia daŋ yɔ Ijipt nna. ⁵Kumo be kaman nɛ n shuŋi Mosis nɛ Ɛɛrɔn Ijipt nseŋ bar tɔrɔ damta Ijiptebi na so pɔɛŋ nseŋ lara men nananyɛnana kasawule na so. ⁶Ŋ ka lara bumo Ijipt be efuli so na, Ijiptebi na daŋ dii egbaŋɛturko nɛ egbaŋɛ nna n ju m buu bumo so. Ama men nananyɛnana ka fo Teku Peper na ase nɛ ⁷b shu ŋ ŋini ma fanɛ n chɛ bumo to. Nɛ n ta tentembiri n wɔtɔ bumo nɛ Ijiptebi na be kefɛato nseŋ shin nɛ teku na ba mur Ijiptebi na kikɛ. Menyi gbagba ere wu kusɔ nɛ n wora Ijiptebi na. Kumo be kaman nɛ men daŋ chena keshishɛrsawule so n chɛr ga. ⁸Ndoŋ nna nɛ n lara menyi m ba Amɔriebi nɛ b wɔ Jɔɔdan be lɔr na be epeŋilarkpa na be kasawule so. B daŋ kɔ menyi kena nna ama n chɛ menyi to nɛ men pɔɔ bumo so. N daŋ mur bumo saŋɛ nɛ menyee ba na nna nɛ men sɔ bumo be nsawule. ⁹Zippɔ pibinyɛn Balak nɛ e la Mowab be efuli so be ewura na ka daŋ wora shiriya nɛ e ya kɔ Israɛl kena, e daŋ shuŋi Biyɔɔ pibinyɛn Balaam nna fanɛ e ya sho menyi kɔnɔ. ¹⁰Ama ma alɛ maŋ nu n sa Balaam nseŋ shin nɛ e kilgi n nɛfa menyi nɛ m mɔlga menyi ashi Balak be enɔ to. ¹¹Men ka dii Jɔɔdan be lɔr na m ba Jɛriko, nɛ Jɛriko be basa na kɔ menyi kena. Loŋ gbagba nɛ Amɔriebi nɛ Pɛrizebi nɛ Keenanebi nɛ Hitebi nɛ Gɛgashebi nɛ Hivebi nɛ Jebusiebi daŋ kɔ menyi. Ama n shin nɛ men kɔ m pɔɔ bumo kikɛ so. ¹²Mannɛ menyi be etokobi nɛ ata nɛ men daŋ ta m pɔɔ bumo so. Kufu nɛ n daŋ ta n wɔtɔ bumo to fanɛ kananɛ n daŋ wora Amɔriebi be bewura anyɔ nɛ b wɔ Jɔɔdan be lɔr na be epeŋilarkpa na. ¹³N sa menyi kasawule nɛ menyi maŋ dɔ, nɛ nde nɛ menyi maŋ pɔr. Naniere men wɔ ndoŋ a ji asɔrso nɛ baa tre greeps nɛ men maŋ du, nsaa chuge asɔrso nɛ baa tre ɔlifs ashi ndibi nɛ men maŋ du so.’ ” ¹⁴Kumo be kaman nɛ Joshuwa naŋ kaŋɛ: “Amoso, men baa ŋana Enyɛnpe Ebɔrɛ na nsaa shuŋ mo nɛnɛ kashenteŋto. Men ta men nananyɛnana be agbir nɛ b daa shuŋ saŋɛ nɛ b daa wɔ Yufreetes be lɔr be kaba ndoŋ nɛ Ijipt be kasawule so na kikɛ n lɛ nsaa shuŋ Enyɛnpe Ebɔrɛ na nawule. ¹⁵Ama nɛ kushuŋ Enyɛnpe Ebɔrɛ na maa par menyi bre, kumo ere men lara esa nɛ menyeeŋ baa shuŋ kabre. Nɛ menyeeŋ baa shuŋ agbir nɛ men nananyɛnana daŋ shuŋ Yufreetes be lɔr na be kaba ndoŋ ŋko Amɔriebi nɛ men wɔ bumo be kasawule so ere be agbir nɛ menyeeŋ baa shuŋ, men baa shuŋ! Ma ere nɛ ma laŋ to ebi bre beeŋ shuŋ Enyɛnpe Ebɔrɛ na.” ¹⁶Ndoŋ nna nɛ basa na kaŋɛ: “Anyi maaŋ yige keshuŋ Enyɛnpe Ebɔrɛ na nseŋ ya kaa shuŋ agbir. ¹⁷Enyɛnpe Ebɔrɛ na ka lara anyi nɛ an tutoana kenyaya to ashi Ijipt be kasawule so na, an wu emamachisheŋ nɛ e daŋ wora. Mo e daŋ kuŋ anyi ashi anyi be enite kikɛ to ashi efuli kama so nɛ an bɔla n choŋ. ¹⁸An ka bee ba kasawule ere so na nɛ Enyɛnpe Ebɔrɛ na ju Amɔriebi nɛ b wɔ kumo so na kikɛ. Amoso anyi alɛ gba beeŋ shuŋ Enyɛnpe na. Mo e la an be Ebɔrɛ.” ¹⁹Ndoŋ nna nɛ Joshuwa kaŋɛ basa na le: “Ashere menyi maaŋ tiŋ n shuŋ Enyɛnpe Ebɔrɛ na. E la Ebɔrɛ cheembi nna. Mo alɛ maaŋ ta menyi be alubi m paŋ menyi, ŋkpal manɛ so, e maa sha kechamana be asheŋ. ²⁰Men baŋ yige Enyɛnpe na nsaa shuŋ nnyamase na be agbir na bre, e beeŋ kilgi ŋ gberge menyi kusoe. Kashenteŋ nna fanɛ e daa wɔ menyi kutɔ ama e beeŋ mur menyi cheche.” ²¹Ama le nɛ basa na daŋ kaŋɛ Joshuwa: “Anyi maaŋ shuŋ agbir! Enyɛnpe Ebɔrɛ na nɛ anyeeŋ shuŋ.” ²²Ndoŋ nna nɛ Joshuwa malɛ kaŋɛ bumo le: “Menyi gbagba e naa ji kumo shɛda fanɛ Enyɛnpe Ebɔrɛ na nɛ menyeeŋ shuŋ na.” Nɛ b kaŋɛ le: “Kashenteŋto nɛ an ji kumo be shɛda.” ²³Ndoŋ nna nɛ Joshuwa kaŋɛ: “Men ta efuli pɔtɛana so be agbir nɛ a wɔ menyi kutɔ na n lɛ nseŋ ta menyi be ŋgbene kikɛ n sa Enyɛnpe, Israɛl be Ebɔrɛ na nawule.” ²⁴Nɛ basa na malɛ kaŋɛ Joshuwa le: “Anyeeŋ shuŋ Enyɛnpe an be Ebɔrɛ na nseŋ wora mo kasonu.” ²⁵Loŋ be kachɛ na nɛ Joshuwa nase kɔnɔ n sa basa na nseŋ yili Shɛkɛm n sa bumo mbra nɛ baaŋ baa bɛ so. ²⁶Ndoŋ nna nɛ Joshuwa sibɛ mbra na n wɔtɔ Ebɔrɛ be mbra be kawɔl na to, nseŋ ta kejembu gboŋgboŋi ko n ya yuu Enyɛnpe Ebɔrɛ be kaboŋ cheembi na ashi kedibi gboŋgboŋi ko be kifito, ²⁷nseŋ kaŋɛ basa na le: “Le be kejembu ere e naaŋ baa la anyi be shɛda. Kumo alɛ gba nu mmalga nɛ Enyɛnpe Ebɔrɛ malga n sa anyi ere kikɛ. Nɛ men baa maa ji kashenteŋ a sa Ebɔrɛ, k beeŋ ji loŋ be shɛda.” ²⁸Kumo be kaman nɛ Joshuwa shin nɛ basa na kikɛ bɛta n yɔ bumo be nsawule so.

Joshuwa nɛ Eliaza be luwu be asheŋ

²⁹Enyɛnpe Ebɔrɛ be kayɛrbi Joshuwa nɛ e la Nun pibinyɛn na daŋ ji nfɛ kalfa nɛ kudu nna nseŋ wu. ³⁰Nɛ b ta mo n ya puli mo gbagba be kasawule so ashi Timnaf Sera nɛ k wɔ Efrayim be abee be efuli so ashi kebeegboŋ nɛ baa tre Gaash na be kelargato be esoso be kaba so. ³¹Joshuwa ka daa wɔ ŋkpa to na, Israɛlebi na daa shuŋ Enyɛnpe Ebɔrɛ nna. E ka naŋ wu malɛ gba b daŋ kraa shuŋ mo nna saŋɛ nɛ benimu nɛ b wu kusɔ nɛ Enyɛnpe Ebɔrɛ wora n sa bumo na kraa wɔ ŋkpa to na. ³²Kasawule nɛ Jeekɔb daŋ tɔ Shɛchem pibi Hamɔn be mbia kutɔ gbiti be ndarbi kalfa na so nɛ Israɛlebi na daŋ ta Josɛf be awibi ashi Ijipt m ba puli. Josɛf be kanaŋ to ebi e naa ji kasawule na be kapetɛ. ³³Nɛ Ɛɛrɔn pibinyɛn Eliaza wu nɛ b ta mo n ya puli Gibia nɛ k wɔ Efrayim be abee be efuli so na. Ndoŋ nɛ b daŋ ta n sa mo pibinyɛn Finihas na.