JONA

ANEBI JONA

BE KAWƆL

Jona ka shile Ebɔrɛ be asheŋ

¹Kachako nɛ Enyɛnpe Ebɔrɛ kaŋɛ Amitai pibinyɛn Jona le: ²“Yɔ kadegboŋ nɛ baa tre Ninɛve na to n ya fiɛ ndoŋebi so ŋ kaŋɛ bumo fanɛ n wu bumo be asheŋ lubi nɛ baa wora na kikɛ. Amoso asheŋ maaŋ nyalɛ n sa bumo kikɛ.”

³Nɛ Jona kini nseŋ shile Enyɛnpe Ebɔrɛ na. E daŋ yɔ kade ko nɛ baa tre Jɔpa nna n ya luri nchu so be kuloŋgboŋ ko nɛ k bee yɔ kadegboŋ ko nɛ baa tre Tashish ashi Speen be efuli so na to.

⁴Ndoŋ nna nɛ Enyɛnpe Ebɔrɛ shin nɛ afugboŋ ko koso teku na so. Nɛ bɔrɛchu nɛ afu wea abar to m ber kuloŋgboŋ nɛ Jona daa wɔ kumo to na so, nɛ k bee shin nɛ k baŋɛ to m mur nchu na to. ⁵Nɛ kufu pɛ kuloŋgboŋ na be befarpo na kikɛ ga nɛ b fara a shu a tre bumo be agbirana. Ndoŋ nna nɛ b lara kuloŋgboŋ na to be esulɔ n lɛ teku na to saŋɛ na so kumo be egbɛ beeŋ duga so ŋ ka ŋ kukwe.

Jemanɛ ere so kikɛ nɛ Jona bre wɔ kuloŋgboŋ na be kaseto be ebu ko to a di kenishipereso. ⁶Ndoŋ nna nɛ kuloŋgboŋ na be befarpo na be enimu yɔ Jona kutɔ n ya kaŋɛ mo le: “Fo ere dese a di nna a? Koso a shu a tre fo Ebɔrɛ. Ashere e beeŋ mɔlga anyi, nɛ an sa maŋ mur.”

⁷Kumo be kaman nɛ befarpo na kikɛ kaŋɛ a bar le: “Men shin nɛ an to beri n fin esa nɛ tɔrɔ ere shi mbe kumu so m ba anyi so ere.” B ka to beri na nɛ k tɔr Jona so.

⁸Nɛ b bishi mo le: “Kaŋɛ anyi, fo e shin nɛ le be tɔrɔ ere ba anyi so a? Manɛ be kushuŋ nɛ fee shuŋ? Nnɛ nɛ fo shi? Efuli mo so nɛ fo shi? Kanaŋ mo to be esa e la fo?”

⁹Ndoŋ nna nɛ Jona kaŋɛ le: “N la Hibruw be esa nna. Enyɛnpe Ebɔrɛ nɛ e wɔ ebɔrɛso nseŋ to teku nɛ kasawule kikɛ na nɛ mee shuŋ.”

¹⁰B ka nu loŋ nɛ kufu pɛ bumo ga, ŋkpal manɛ so, Jona teŋ kaŋɛ bumo fanɛ e bee shile Enyɛnpe Ebɔrɛ na nna.

¹¹Teku na so be afu na daŋ baa wora eleŋ nna a ti so. Ndoŋ nna nɛ b bishi Jona le: “Nuso nɛ anyeeŋ wora fo nɛ teku ere e wora shruum n sa anyi?”

¹²Nɛ Jona kaŋɛ: “Men ta ma n lɛ teku na to, aloŋ beeŋ shin nɛ k wora shruum. M baa nyi geeŋ fanɛ ŋ ka wora n jija so nɛ le be afugboŋ lubi ere tu anyi na.”

¹³Ama ŋkpal befarpo na ka daa maa sha kelara mo n lɛ teku na to so, b daŋ pere kenishi nna a far nɛ b ya gbuŋ kedeŋi so. Bumo alɛ daa maŋ tiŋ, ŋkpal manɛ so, afu na be eleŋ daŋ baa wora keshi nna a ti so. ¹⁴Ndoŋ nna nɛ b kule Enyɛnpe Ebɔrɛ na ŋ kaŋɛ le: “O, Enyɛnpe Ebɔrɛ, jande, sa maŋ shin nɛ an wu ŋkpal anyi ka bee shin nɛ an lara kanyɛn ere be ŋkpa so. Sa maŋ kaŋ ji anyi demu ŋkpal an ka mɔ esa nɛ e maŋ kɔ kulubi so. Ŋkpal manɛ so, fo Enyɛnpe Ebɔrɛ na e naa wora kusɔ kikɛ fo keparso.” ¹⁵Kumo be kaman nɛ b lara Jona n lɛ teku na to, nɛ k wora shruum epul na to. ¹⁶Le be kesheŋ ere daŋ shin nɛ befarpo na ŋana Enyɛnpe Ebɔrɛ na alegaiso nna. Kumo be kaman nɛ b lara sarga nseŋ nase nnɔ n sa Enyɛnpe Ebɔrɛ na.

¹⁷Ndoŋ nna nɛ Enyɛnpe Ebɔrɛ shin nɛ kɔrɔtɔgboŋ ko ba ta Jona m min, nɛ e ji nchɛ asa nɛ nnyɛ asa ashi kɔrɔtɔgboŋ na be epunto.

Jona be kabɔrɛkule be asheŋ

¹Jona wɔ kɔrɔtɔ na be epunto nna nseŋ kule mbe Ebɔrɛ nɛ e la Enyɛnpe Ebɔrɛ na le: ²“Ma tɔrɔ to nɛ n shu n tre fo, Enyɛnpe Ebɔrɛ na, nɛ e nu ma kekule. N wɔ nchaŋ chiŋgeliŋ to nna nseŋ kule fo fanɛ fo chɛ ma to, nɛ fo alɛ nu ma kekule.

³Fo kpa ma nna n lɛ Teku be kechimbi be kaseto, nɛ nchu muni ma kikɛ so nsaa kaa atili ma kumu so.

⁴Nɛ n fɛ fanɛ fo ju ma fo anishito nna, nɛ m maaŋ naŋ wu fo bɔrɛlambu cheembi na kenishiso kikɛ.

⁵Nchu na daŋ muni ma nna a sha kemur ma nɛ teku to be afitiri kre ma kumu kikɛ.

⁶Ŋ ka daŋ muni n yɔ kasawule be kechimbi to na, n daŋ fɛ fanɛ ma ŋkpa be ekar fo nna na. Ama fo, Enyɛnpe Ebɔrɛ, nɛ fo la ma Ebɔrɛ na lara ma kemaŋ chiŋgeliŋ na to m bar ma ŋkpa to.

⁷Ma ŋkpa kaa bee fo ekar na nɛ n nyiŋi fo, Enyɛnpe Ebɔrɛ na, nseŋ kule fo nɛ fo nu ma kekule ashi fo bɔrɛlambu cheembi na to.

⁸Basa nɛ baa shuŋ agbir paŋ Ebɔrɛ be kuwɔrwu.

⁹Ama ma ere beeŋ boŋ nshɛ n di fo, Enyɛnpe Ebɔrɛ na, epaŋ nseŋ lara sarga n sa fo. Meeŋ wora m bɔlɔ ma kɔnɔ naseso so, ŋkpal manɛ so, fo e kɔ eleŋ a tiŋ a mɔlga.”

¹⁰Ade be kaman nɛ Enyɛnpe Ebɔrɛ shin nɛ kɔrɔtɔ na ya gbu Jona n nase kedeŋi so ashi teku na be ekarso.

Jona ka yɔ Ninɛve be asheŋ

¹Ndoŋ nna nɛ Enyɛnpe Ebɔrɛ naŋ kaŋɛ Jona kela nyɔsopo le: ²“Yɔ kadegboŋ nɛ baa tre Ninɛve na to n ya bɔ kubɔya nɛ n sa fo na n sa ndoŋebi.”

³Ndoŋ nna nɛ Jona nu Enyɛnpe Ebɔrɛ be kamalga na nseŋ yɔ Ninɛve. Ninɛve daa la kadegboŋ nɛ esa beeŋ ta nchɛ asa nna n nite kumo be kaba ko n ya fo kaba ko. ⁴Jona ka luri kade na to na nɛ e nite kachɛ koŋwule m bɔ le be kubɔya. E yɛ: “Yili kabre n ya fo nchɛ adena be kefɛato, Ninɛve beeŋ mur.” ⁵Ninɛveebi na ka nu kubɔya na nɛ b yirda Ebɔrɛ nseŋ yili kumo fanɛ ekama e kishi. Ndoŋ nna nɛ benimu nɛ mbia kikɛ ta kagbenejijaso be asɔbuuso m buu a ŋini fanɛ bumo be ŋgbene jija bumo.

⁶Kubɔya na ka tu Ninɛve be ewura gba, nɛ e koso mbe kuwurputi so m bugi mbe kuwurpiŋi n nase, nseŋ ta kagbenejijaso be asɔbuuso m buu n ya chena nsunɔ to. ⁷Kumo be kaman nɛ e sa Ninɛveebi kubɔya. Kubɔya na e daa la fanɛ ewura nɛ mbe benimuana yɛ: “Esa kama e sa maŋ ji shɛŋ. Dimɛdi ŋko kusɔbɔya e sa maŋ ta ajibi ŋko nchu n yɔ kɔnɔ. ⁸Edimɛdi kikɛ e buu kagbenejijaso be asɔbuuso nseŋ shu n tre Ebɔrɛ kenishipreso. Ekama e yige asheŋ lubi be kewora nɛ kebaawɔ kebaawɔtɔ lubi to. ⁹Ashere Ebɔrɛ be nfɛra beeŋ chɛrga nɛ mbe agbo e wushi nɛ e wu anyi kuwɔr nsaa maŋ shin nɛ an mur.”

¹⁰Ebɔrɛ ka wu kusɔ nɛ b wora na nɛ kananɛ b yige bumo be asheŋ lubi nɛ kebaawɔtɔ lubi na, nɛ e wu bumo kuwɔr nsaa maŋ naŋ shin nɛ b mur fanɛ kananɛ e daŋ yili na.

Jona be kanya agbo nɛ Ebɔrɛ be kuwɔrwu be asheŋ

¹Ama kumo be loŋ daŋ tɔrɔ Jona ga nɛ e kpal loŋ so n nya agbo. ²Nseŋ kule Enyɛnpe Ebɔrɛ na ŋ kaŋɛ le: “O Enyɛnpe Ebɔrɛ, mannɛ le nɛ n daŋ kaŋɛ saŋɛ nɛ n kra wɔ epe na a? Loŋ so nɛ n nya manaŋ n shile n yɔ Tarshish na. N nyi fo ka la kasha nɛ kuwɔrwu be Ebɔrɛ, nsaa maa nya agbo manaŋ manaŋ. Fee wora kelela nna saŋkama nseŋ wora shiriya nɛ fo ta alubi m paŋ. Fo alɛ maa kuse a bar kasogberge basa so. ³Enyɛnpe Ebɔrɛ, shin nɛ n wu. Ŋ ka wu bɔ, ŋ ka kraa wɔ ŋkpa to.”

⁴Nɛ Enyɛnpe Ebɔrɛ kaŋɛ: “Nuso be ekpa nɛ fo kɔ nɛ fo nya agbo?”

⁵Kumo be kaman nɛ Jona lar n ya chena kade na be ekarso ashi epeŋilarkpa be kaba so. E daŋ yuu kubuubi ko nna n chena kumo be kiyoyul to a jo nsaa keni kusɔ nɛ k beeŋ wora kade na to ebi. ⁶Nɛ Enyɛnpe Ebɔrɛ shin nɛ kefeelebi ko kɔr ndoŋ m purge a wora kiyoyul m buu Jona so, saŋɛ na so, epeŋi maa naa ŋmɛa mo ga. Kefeelebi na be kiyoyul na daŋ shin nna nɛ Jona be kagbene fuli mo ga. ⁷Ama kumo be ŋklade kachipurdidi nɛ Ebɔrɛ shin nɛ kushushombi gboŋgboŋi ko ba ji kefeelebi na nɛ k bolo to. ⁸Epeŋi ka lar nɛ Ebɔrɛ shin nɛ afu tushiso be kebembeŋ shi epeŋilarkpa m ber m ba Jona so nɛ e bɛlɛ. Ndoŋ nna nɛ e kaŋɛ le: “Ŋ ka wu bɔ ŋ ka kraa wɔ ŋkpa to.”

⁹Nɛ Ebɔrɛ bishi mo le: “Manɛ so nɛ fo kpal kefeelebi na so a nya agbo?” Nɛ Jona kaŋɛ: “Ŋ kpal kumo so n nya agbo, hale a sha fanɛ n wu gba nna na.”

¹⁰Nɛ Enyɛnpe Ebɔrɛ kaŋɛ le: “Kefeelebi nɛ fo maŋ duu ŋko ŋ keni so nɛ k daŋ be asheŋ e tir fo na. Kachɛ koŋwule nɛ kumo gbagba ta ŋ kɔr n daŋ m purge nseŋ naŋ wu kachɛ koŋwule to gba. ¹¹Basa nɛ b chɔ ŋgboŋ kalfa nɛ adunyɔ nɛ b maŋ nyi bumo be bena nɛ jiso, n ta asɔbɔya damta gba n ti so e wɔ Ninɛve be kadegboŋ na to. A maŋ daga bumo be asheŋ ka tir ma a?”