JOWƐL

ANEBI JOWƐL

BE KAWƆL

¹Enyɛnpe Ebɔrɛ be kamalga nɛ k shi mo kutɔ m ba ma Jowɛl, nɛ n la Petuel pibinyɛn na kutɔ nde.

Elotɔr be keba kasawule so be asheŋ

²Benimu, men nu nfe, menyi bekama nɛ men wɔ

kasawule ere so, e kaŋ kusoe n nu.

Men ka koso kikɛ le be kesheŋ ere daŋ wora

men be jemanɛ to,

ŋko men nananyɛnana be jemanɛ to a?

³Men kaŋɛ men be mbia kusɔ nɛ mee

shin nɛ ŋ kaŋɛ menyi ere,

nseŋ shin nɛ bumo alɛ e kaŋɛ bumo be mbia

nɛ loŋ be mbia na malɛ e kaŋɛ bumo alɛ be mbia.

⁴Elotɔr be ntuŋgboŋ nɛ ntuŋwurbi bɛ m bɛ abar so

m ba ji adɔjibi kikɛ nyam.

⁵Menyi besanuupo ere, men tiŋi edi to

nseŋ shu anishichubi!

Menyi to be bekama nɛ menyee nuu nsa na,

e boŋ to a shu.

Men boŋ to a shu ŋkpal men ka maaŋ naŋ nya

amo n nuu so.

⁶Efuli ko so ebi nɛ b shi ga, a du fanɛ elotɔr na

ba kɔ m pɔɔ ma efuli so

n sɔ kumo ŋ ki bumo peya.

Loŋ be basa na kɔ anyii nna fanɛ buluŋ na.

⁷B shin nɛ ma ndibi sɔrso ki asɔ fuloŋ,

a yil jiga, a maŋ naa kɔ tɔnɔ.

Loŋ be efuli na so ebi marga m marga

ndibi na be afɔfɔ n lɛ

ŋ ka amo nɛ a fuli a yil.

⁸Men baa shu ebesa so fanɛ kasuŋgurbia

nɛ mo jipo nɛ e bee shin nɛ e ta mo ka wu ŋ ka mo

nɛ e tase kagbenejijaso a shu keeli na.

⁹Kebɔltofinfin pɛ bɔrɛmatapoana nɛ b wɔ

Enyɛnpe Ebɔrɛ be bɔrɛlambu to a shuŋ na gba

ŋkpal kuyu baŋɛto nɛ kusɔ nuuso kikɛ ka maŋ naa wɔtɔ

nɛ b ta n lara sarga n sa Enyɛnpe Ebɔrɛ na so.

¹⁰Nfe be adɔsawule kikɛ nyam jija nsaa maŋ naa kɔ tɔnɔ.

Nsawule kikɛ wɔl nɛ asɔ duuso kikɛ mur.

Asɔrso popɔrbi kikɛ wɔl, nɛ ŋku loge.

¹¹Bedɔpo, men shin nɛ men be ŋgbene e jija menyi ga.

Menyi bumo nɛ menyee dɔ ndibi sɔrso na,

e boŋ to a shu.

Men shin nɛ men be ŋgbene e jija menyi ga,

ŋkpal men be asɔ duuso kikɛ ka mur so.

¹²Ndibi sɔrso be yiri yiri kikɛ bolo to

nseŋ wɔl n wu kuraa;

nɛ bomin kikɛ be kagbenefuli n loge kuraa.

Kelar alubi to be saŋɛ ka fo be asheŋ

¹³O, menyi bɔrɛmatapoana,

men ta kagbenejijaso be asɔbuuso n buu a shu.

Menyi bumo nɛ men wɔ bɔrɛsure na be anishito a shuŋ na,

e boŋ to a shu.

Menyi bumo nɛ menyee shuŋ Ebɔrɛ be anishito

ashi bɔrɛlambu to na

e buu kagbenejijaso be asɔbuuso ŋklade,

ŋkpal kuyu baŋɛ to nɛ kusɔ nuuso

nɛ menyeeŋ ta n lara sarga

ka maŋ naa wɔtɔ so so.

¹⁴Naniere, a daga fanɛ men tre abar n shɛr

ŋ kishi ekishi cheembi.

Men tre bejuŋkparpoana na,

nɛ bekama nɛ b wɔ kasawule ere so na

n shɛr men Nyɛnpe be bɔrɛlambu to

n shu n tre mo.

¹⁵Enyɛnpe Ebɔrɛ be kachɛ na taga to.

Kachɛ nɛ e beeŋ bar kemur na.

Kashenteŋto,

kachɛ na maaŋ baa walɛ kuraa!

¹⁶To, naniere gba an kɔ anishi nna a keni anyi be adɔ

nɛ amo be ajibi bee jija.

Kagbenefuli malɛ maŋ naa wɔ bɔrɛlambu to kuraa.

¹⁷Asɔduuso malɛ wɔ shishɛr wɔlso to a wu.

Asɔduuso kama malɛ maŋ naa wɔtɔ

nɛ an ta n yili echefoso.

Amoso mpuroana kikɛ yil a jija.

¹⁸Ana wɔtɔ nna a shile yireŋ yireŋ;

a shu a muni to kagbenejijaso,

ŋkpal a ka maŋ nya afitiri nɛ b we so.

Mbolpɔ kikɛ gba bee ji awurfoŋ nna.

¹⁹Enyɛnpe Ebɔrɛ, fo nɛ mee shu a tre na,

ŋkpal manɛ so, asɔbɔya be afitiri jiso kikɛ wɔl

n chɔɔ n fige to nyam.

²⁰Ŋkpal kusɔ nɛ fo wora so,

mbombi kikɛ wɔlto nɛ kupuŋ to be asɔbɔya

maŋ naŋ nya nchu nɛ b nuu nsaa fute yeŋayeŋa.

Elotɔr na be keba be asheŋ

¹Men foŋ kabel nseŋ ber kenishipereso be dewuro ashi Zayɔn,

nɛ k la Ebɔrɛ be kebee cheembi na so.

Judaebi, men baa chicha, ŋkpal manɛ so,

Enyɛnpe Ebɔrɛ be kachɛ na be saŋɛ fo n loge.

²Loŋ be kachɛ na beeŋ biri to le tuum

nseŋ bar kagbenejija damta.

Kamɔnchɛ beeŋ ba kaa la kachɛ

nɛ kusɔ kama beeŋ biri to nna

nɛ bɔrɛwɔlpa e biri n sɔ kaplɛkama.

Benapo lempo be katuŋgboŋ na beeŋ salga to n sɔ abee na so.

Le be kesheŋ ere maŋ naŋ wora ŋ ku so kikɛ,

kumo alɛ maaŋ naŋ wora kikɛ mbaanaayɔ.

³Baaŋ jija kusɔ kama nyam

fanɛ kananɛ edɛ bee ji asɔ na.

Kasawule kama nɛ k wɔ bumo be anishito

du fanɛ kudɔbi nɛ baa tre Iden na nna.

Ama kumo nɛ k wɔ amo be kaman to bre du

fanɛ keshishɛrsawule,

nɛ shɛŋ maŋ wɔ kumo so na nna.

Shɛŋ shɛŋ malɛ maaŋ tiŋ ŋ gelge bumo.

⁴Kashenteŋto b du fanɛ egbaŋɛ nna

nsaa shile manaŋ manaŋ fanɛ esoji ka dii

egbaŋɛ a yɔ kena to na.

⁵B baa wɔ abee so a tɛ,

bumo be egbri du fanɛ egbaŋɛturko be egbri nna,

a shin nɛ kaplɛkama bee gbri waa fanɛ kananɛ

edɛ bee chɔɔ afitiri wɔlso nɛ a bee gbri na.

Baa pɛ abar a yɔ kena to nna.

⁶Bumo alɛ baa ba,

kufu bee pɛ ekama nna nyam

nɛ ekama e baa chicha kufuso.

^7-8Baa ba nna m ba kɔ kusɔ kama

fanɛ benapo na, nsaa dii egbalana

fanɛ kananɛ benapo bee dii egbal na.

Bumo kikɛ bee kaa pɛ abar to kelargato nna

a ji kenyɛn a yɔ anishito tinini

ŋkaa maa gbɛ a yɔ kakpa ko,

ŋko a kagle abar to.

Baa tiŋ a luri bekumpo lempo to a lar

nɛ shɛŋ shɛŋ maa kuŋ bumo ekpa.

⁹Baa yarase nna a buu kadegboŋ na

nsaa shile a tɛmbaŋ kumo be egbalana.

Baa tiŋ a bɔla etokuro to a luri ebuana to

fanɛ beyu na.

Basa be kelar bumo be alubi to be saŋɛ ka fo be asheŋ

¹⁰B baa ba, kasawule bee gbuŋgbuŋ nna

nɛ awɔlpa bee wora fanɛ a ka bee chicha na,

nɛ epeŋi nɛ kufɔl kikɛ malɛ e biri to tuum

nɛ achɛkpabi e fuli to ŋ gben.

¹¹Enyɛnpe Ebɔrɛ na bee kaa ponte to nna

a juŋkpar mbe benapo,

nɛ b kɔ eleŋ nsaa shi

nɛ esa maaŋ tiŋ ŋ karga bumo na,

nɛ baa nu a sa mo.

Yee, Enyɛnpe Ebɔrɛ be kachɛ na beeŋ lubi pasaa!

Wanɛ e naaŋ nya ŋkpa

loŋ be kachɛ na bre?

¹²Ama naniere Enyɛnpe Ebɔrɛ na yɛ:

“Men lar men be alubi to

m bugi men be ŋgbene n sa ma kashenteŋto

nseŋ ta ekishi nɛ anishichubi

nɛ ŋgbenejija be kushu

m bɛta m ba ma kutɔ.

¹³Men shin nɛ men be kagbenejija na e di efuli

ŋ ŋini fanɛ kashenteŋto

men be ŋgbene maŋ dese menyi.

Men be asɔbuuso be kekpɛa to ere bre maŋ la shɛŋ.

Men bɛta m ba Enyɛnpe,

men be Ebɔrɛ na kutɔ.

E la enyitipo nna,

nsaa bɛ mbe nnɔ naseso so.

Saŋkikɛ e wora shiriya nna nɛ e ta men be alubi m paŋ menyi

nsaa maaŋ gberge menyi kusoe

¹⁴Nɛ men lar men be alubi to

ashere Enyɛnpe, men be Ebɔrɛ na beeŋ chɛrga mbe nfɛra

nseŋ nɛfa menyi nɛ men be adɔjibi e wora nɛnɛ ga.

Loŋ nɛ menyeeŋ tiŋ n nya adɔjibi nɛ asɔ nuuso

n lara sarga n sa mo.

¹⁵Men yili Zayɔn be kebee so

n foŋ kabel n tre ekama m ba shɛr

nseŋ yili kumo fanɛ ekama e kishi!

¹⁶Men gbargbar abar m ba shɛr

kecheembiya be ekpa so.

Men shin nɛ basa nɛ b bel kikɛ e ba

loŋ be nshɛr na to.

Men shin nɛ mbiwurbi nɛ mbi popɔrbi gba e ba.

Bumo nɛ b ta abar kepopɔr to gba

daga fanɛ b lar bumo be ebuana to m ba.

¹⁷Men shin nɛ bɔrɛmatapoana

nɛ baa shuŋ Enyɛnpe Ebɔrɛ na

e shɛr bɔrɛlambu na to be bɔrɛsure na be kabuna to

n shu ŋ kule Ebɔrɛ ŋ kaŋɛ le:

‘Enyɛnpe Ebɔrɛ, wu fo basa kuwɔr.

Sa maŋ shin nɛ efuli pɔtɛana so ebi e wora anyi eyurto,

nseŋ bishi anyi fanɛ, men be Ebɔrɛ na wɔ nnɛ naniere?’ ”

Ebɔrɛ ka beeŋ shin nɛ nɛfa e naŋ ba kasawule na so be asheŋ

¹⁸Enyɛnpe Ebɔrɛ be kasawule be asheŋ tir mo ga nna,

nɛ e wu mbe basa kuwɔr nseŋ nu bumo be kabɔrɛkule

¹⁹ŋ kaŋɛ bumo le:

“Naniere bre meeŋ sa menyi adɔjibi nɛ asɔ nuuso

nɛ ɔlif be asɔrso be ŋku nɛ men ji m moɛ.

Loŋ na efuli pɔtɛana so ebi maaŋ naŋ fɛl menyi

nseŋ wora menyi eyurto.

²⁰Meeŋ ju benapo be katuŋgboŋ,

nɛ b shi kelarga to be esoso m ba fanɛ elotɔr na,

ashi menyi to n ya lɛ keshishɛrsawule so kiyi to chil.

Meeŋ ju bumo be bejuŋkparpoana n yɔ Teku Wuso na to

nseŋ shin nɛ bumo be bemantopo na malɛ

e yɔ Mɛditerenia be teku to,

n ya wu mbɛ a dufɛ.”

²¹Ŋkpal Enyɛnpe Ebɔrɛ ka wora asɔgboŋ n sa menyi so

menyi be ndɔana gba nya nɛfa

nɛ amo be ŋgbene fuli amo

nɛ a bee ji eyur.

²²Kupuŋ to be asɔbɔya,

e sa maŋ naa lɔ kufu naniere

ŋkpal kusɔ nɛ menyeeŋ ji so.

Afitiri nɛ afantaŋ kikɛ purge nna jiliim

n sɔ kaplɛkama.

Naniere ndibi bee sɔr asɔrso nna

nɛ figi nɛ greep be asɔrso kikɛ chase.

²³Zayɔnebi,

men shin nɛ men be ŋgbene e fuli menyi

ŋkpal kusɔ nɛ Enyɛnpe, men be Ebɔrɛ na

wora n sa menyi na so.

E sa menyi dɔchubɔrɛso be bɔrɛ

nɛ bɔrɛchu lela

nɛ a shin nɛ men be adɔjibi wora nɛnɛ

fanɛ kananɛ a chɛr a wora na.

²⁴Naniere mboŋ kama

nɛ baa biri ayu na kikɛ beeŋ bɔlɔ

nɛ mboŋ kama nɛ baaŋ nyaŋ asɔrso

a wora greep be nsa

ŋko ɔlif be ŋku na kikɛ

e bɔlɔ a wurge.

²⁵Meeŋ bɛta asɔ kama

nɛ benapo nɛ b du fanɛ

elotɔr damta na daŋ jija na kikɛ

n sa menyi.

Ma Enyɛnpe Ebɔrɛ na e daŋ shuŋi elotɔr na.

²⁶Naniere, menyeeŋ nya ajibi damta n ji m moɛ,

nseŋ fara a di men Nyɛnpetale Ebɔrɛ

nɛ e wora emamachisheŋ n sa menyi na epaŋ.

Kashenteŋto esa kama maaŋ naŋ fɛl ma basa.

²⁷Saŋɛ na so, menyi Israɛlebi beeŋ pin fanɛ ma,

Enyɛnpe Ebɔrɛ na e la men be Ebɔrɛ

nsaa wɔ menyi kutɔ.

Esa kama malɛ maaŋ naŋ tiŋ n fɛl ma basa.

Enyɛnpe Ebɔrɛ be kachɛ na be asheŋ

²⁸Nɛ Ebɔrɛ naŋ kaŋɛ le:

“Ade kikɛ be kaman,

meeŋ shin nɛ ma kiyoyu e ba ekama so

nɛ men be mbinyɛnsobi nɛ mbichesobi

e fara a bɔ ma kubɔya na

nɛ men be benyɛnnimubiana e ba ku edare

nɛ men be mbrantiɛbi e baa ku bɔrɛdare.

²⁹Loŋ be saŋɛ kaŋ fo,

meeŋ shin nɛ ma kiyoyu e ba ma nyɛrbi

nɛ mbita kikɛ so.

³⁰Kumo be kamɔnchɛ,

meeŋ sa menyi kefiɛso be etɔɔnɛsheŋ

nɛ e shi awɔlpa to nɛ kasawule so.

Kumo be jemanɛ so,

basa ko be ŋklaŋ beeŋ lar

edɛ beeŋ suse n shin nɛ edishi

e sɔ awɔlpa to kikɛ.

³¹Jemanɛ na ya kaa taga to

epeŋi beeŋ kilgi m biri to le tuum

nɛ kufɔl malɛ e pre to le kpaw

fanɛ ŋklaŋ na.

Asheŋ ere kikɛ beeŋ wora nna pɔɛŋ

nɛ Enyɛnpe Ebɔrɛ be kachɛ

nɛ e beeŋ ba na e fo.

Kachɛ na kaŋ fo, kufu beeŋ pɛ basa ga.

³²Ama Ebɔrɛ beeŋ mɔlga bekama

nɛ b kule mo kechɛto

fanɛ kananɛ e kaŋɛ na!

E yɛ: ‘Basa nɛ b wɔ Zayɔn be kebee so

nɛ Jerusalɛm to na bre

beeŋ gelge loŋ be etɔrɔ na.

Bekama nɛ n lara na bre

beeŋ ji efute.’ ”

Ebɔrɛ ka beeŋ ji efuli pɔtɛana so ebi demu be asheŋ

¹Enyɛnpe Ebɔrɛ na yɛ:

“Loŋ be jemanɛ na,

meeŋ nɛfa Jerusalɛmebi ashi Juda be efuli so kikɛ,

n shin nɛ asheŋ e naŋ nyalɛ n sa bumo.

²Meeŋ gbargbar efuli pɔtɛana kikɛ so ebi

m ba shɛr ketaŋɛ nɛ baa tre Jehoshafat na to

n ji bumo demu ŋkpal asɔ lubi kama

nɛ b wora ma basa na so.

B pesaŋ Israɛlebi na to n wɔtɔ efuli pɔtɛana to

nseŋ ta ma kasawule m barga to n sa abar.

³B daŋ to beri nna n fin bumo nɛ

baaŋ ta Israɛlebi be basa nɛ b pɛ kena to na ŋ ki anya.

B daŋ fa n fa bumo be mbinyɛnsobi nɛ mbichesobi

fanɛ anya nseŋ ta loŋ be amansherbi na

a sha esakaleche ŋko a nuu nsa.

⁴Tayaebi nɛ Sidɔnebi, nɛ menyi kama nɛ men wɔ Filisti be nsawule so na kikɛ; manɛ nɛ menyee sha kewora ma ere? Menyee sha kewora ma n tal to nna ŋko? To, nɛ k la loŋ bre, meeŋ juŋkpar n wora menyi pɔɛŋ nɛ men nya ekpa n wora ma n tal to. ⁵Men yuri ma shuwa nɛ gbiti nɛ ma yawu kpakpaso be asɔ n ya wɔtɔ men be agbirlambu to. ⁶Men ta Juda be efuli so ebi nɛ Jerusalɛmebi n lar bumo gbagba be efuli so n yɔ kufɔ kufɔ n ya fa n sa Griik be efuli so ebi. ⁷Ama naniere, meeŋ lara bumo ashi mboŋ kama nɛ men daŋ yɛr bumo na. Kumo be kaman nɛ n wora menyi asheŋ kama nɛ men daŋ ta n wora bumo na gbagba chap. ⁸Meeŋ shin nɛ b fa menyi alɛ gba be mbinyɛnsobi nɛ mbichesobi n sa Juda be efuli so ebi. Baaŋ fa bumo n sa Sabiaebi nɛ b wɔ kufɔ kufɔ na. Ma, Enyɛnpetale Ebɔrɛ na e kaŋɛ na.”

⁹Nɛ Anebi Jowɛl kaŋɛ:

“Men ta le be kubɔya ere n sa efuli pɔtɛana so ebi kikɛ

fanɛ b bela ase ŋ kɔ kena.

Ekama e tre mbe benapo ŋ gbargbar

n shin nɛ b lar m wora shiriya.

¹⁰Men ta men be asɔbɔya be ntekpa m bel etokobi

nseŋ ta men be nsaŋɛgboŋ m bel akpa.

Men kikɛ nyam e bela ase ŋ kɔ kena.

Menyi to be bepɔshipo gba beeŋ kɔ.

¹¹Menyi efuli pɔtɛana so ebi nɛ men kulti nfe ere kikɛ,

e wora manaŋ ŋ gbargbar abar.”

Kede be kaman nɛ anebi Jowɛl kaŋɛ Ebɔrɛ le:

“O Enyɛnpe Ebɔrɛ, shuŋi fo benapo nɛ b kɔ basa ere kena.”

¹²Nɛ Ebɔrɛ kaŋɛ:

“A daga fanɛ efuli pɔtɛana so ebi kikɛ

e bela ase m ba Jehoshafat be ketaŋɛ to naniere.

Ndoŋ nɛ ma Enyɛnpe Ebɔrɛ na beeŋ chena

n ji bumo kikɛ demu.

¹³B kɔ amu kpakpaso ga

nseŋ wora alubi a maa shu basa so.

Amoso meeŋ ŋele bumo n lɛ

fanɛ aboyu na nseŋ kɔr bumo to

fanɛ kananɛ baa kɔr greep be asɔrso to

a wora nsa a wɔtɔ kusɔ to

nɛ a bee bɔlɔ a wurge na.”

¹⁴Nɛ Anebi Jowɛl kaŋɛ:

“Basa ŋgboŋto ŋgboŋto beeŋ ba wɔ ketaŋɛ na to

nɛ Enyɛnpe Ebɔrɛ na e ji bumo demu.

Enyɛnpe Ebɔrɛ na be kachɛ na

be saŋɛ na maaŋ naŋ chɛr nseŋ ba.

¹⁵Loŋ be kachɛ na,

epeŋi nɛ kufɔl beeŋ nyɔ m biri to ŋ ki le tuum,

nɛ achɛkpabi e fuli to ŋ gben.

Ebɔrɛ ka beeŋ nɛfa mbe basa be asheŋ

¹⁶Ebɔrɛ shi Zayɔn be kebeegboŋ na so m ponte to

fanɛ buluŋ na nɛ mbe ebɔl shi Jerusalɛm to

ŋ gbri m ba fanɛ bɔrɛ ka ponte na

nɛ kasawule nɛ awɔlpa kikɛ gbuŋgbuŋ to.

Ebɔrɛ beeŋ baa du fanɛ kebeegboŋ

a kuŋ mbe basa Israɛlebi na bre.”

¹⁷Kede be kaman nɛ Enyɛnpe Ebɔrɛ yɛ:

“Kumo be jemanɛ na so

nɛ menyi Israɛlebi beeŋ pin fanɛ

ma e la Enyɛnpe men be Ebɔrɛ na.

Ma e wɔ ma kebee cheembi Zayɔn so na.

Jerusalɛm beeŋ naŋ ki kadegboŋ cheembi

nɛ efuli pɔtɛana so ebi

maaŋ naŋ tiŋ ŋ kɔ m pɔɔ kumo so.

¹⁸Loŋ be kachɛ na ndibi nɛ b kɔ amo

be asɔrso a wora nsa na

beeŋ wora keshi nɛ asɔbɔya e chase abee so.

Juda be efuli so be mbombi malɛ maaŋ naŋ wɔlto kikɛ.

Nchu beeŋ shi bɔrɛlambu na to

n shile n ya kaa luri ndibi nɛ baa tre akasia

nɛ a yil ketaŋɛ to na to.

¹⁹Ijipt be kasawule beeŋ ki kiyi to chil,

kakpa nɛ basa maaŋ baa wɔ,

nɛ Edɔm be kasawule malɛ kikɛ e jija

ŋ ki keshishɛrsawule ŋkpal b ka kɔ Juda be efuli so ebi kena

nseŋ mɔ basa nɛ b maŋ wora alubi na so.

^20-21Meeŋ bishi bumo be bekama nɛ b mɔ na kikɛ be kuwule.

M maaŋ kplaŋ bekama malɛ nɛ b wora alubi na so.

Ama basa beeŋ baa wɔ Juda nɛ Jerusalɛm bre to

saŋkikɛ mbaanaayɔ,

nɛ ma, Enyɛnpe Ebɔrɛ na e baa wɔ

Zayɔn be kebeegboŋ na so.”