JOB

JOB

BE KAWƆL

Job nɛ mbe kanaŋ be asheŋ

¹Kanyɛn ko e daa wɔ Uz be kasawule so nɛ baa tre mo Job. Job daa la esa nɛ esa kikɛ maŋ tiŋ n wu mo kulubi nna. E daa la esa nɛ e bee bunyaŋ Ebɔrɛ nseŋ kishi kulubi be kewora nna. ²E daa kɔ bibinyɛn ashunu nɛ bibiche asa nna, ³nseŋ daa kɔ mbolpɔ ŋgboŋ ashunu nɛ enyɔma ŋgboŋ asa nɛ ana kagboŋ nɛ ekurma alfa anu nna. Mo alɛ daa naa kɔ beshumpo damta ga nseŋ daa la esa nɛ e dii dama a chɔ ekama ashi efuliana nɛ a wɔ epeŋilarkpa be kaba so na.

⁴Job be bibinyɛn ashunu na daa wora kejigboŋ bumo be elaŋana to kebɛso kebɛso nna nsaa tre bumo sipocheana besa na nɛ baa ba m ba kaa tu bumo a ji nsaa nuu. ⁵Mbia na baŋ ji kejigboŋ ŋklade kachipurso kikɛ, Job beeŋ shuŋi n tre bumo m ba lara esarga chɔɔso n sa Ebɔrɛ ŋ kule alubi be ketampaŋ n sa mbia na, a fɛ fanɛ ashere b kaa bee ji nsaa nuu na b wora kulubi ko n da Ebɔrɛ so nɛ b maŋ nyi.

Sososo be kewora ŋ keni nɛ k ba Job so be asheŋ

⁶Kachako nɛ Ebɔrɛ be emalaika ba shɛr Enyɛnpe Ebɔrɛ na kutɔ ashi ebɔrɛso nɛ Setani gba ba ti bumo so ndoŋ. ⁷Ndoŋ nna nɛ Enyɛnpe Ebɔrɛ bishi Setani le: “Nnɛ nɛ fo shi! Manɛ nɛ fo daa wora?”

Nɛ Setani kaŋɛ: “N na a kulti durnya kikɛ to nna.”

⁸Kumo be kaman nɛ Enyɛnpe Ebɔrɛ na naŋ bishi Setani le: “Manɛ nɛ fee fɛ a laŋɛ ma kayɛrbi Job be kaplɛa so? Durnya kikɛ to, esa kikɛ maŋ du fanɛ mo. Ŋkpal manɛ so, e la esa nɛ esa maaŋ tiŋ n wu mo kulubi nna. Mo alɛ bee bunyaŋ Ebɔrɛ nseŋ kishi kulubi be kewora nna.”

⁹Ndoŋ nna nɛ Setani malɛ kaŋɛ le: “Manɛ nna nɛ Job maaŋ baa ŋana Ebɔrɛ? ¹⁰Jemanɛ kikɛ fee kuŋ mo nɛ mbe kanaŋ nɛ kusɔ kama nɛ e kɔ nna nseŋ naa shin nɛ kusɔ kama nɛ e bee wora bee nyalɛ a sa mo, hale nɛ mbe mbolpɔ nɛ ana salga to n sɔ kaplɛkama. ¹¹To, fo ere e mur mbe kusɔ nɛ e kɔ kikɛ ŋ keni a, e maaŋ yili fo gbagba be anishito n shoduu fo?”

¹²Ndoŋ nna nɛ Enyɛnpe Ebɔrɛ na kaŋɛ Setani le: “Yoo, n ta kusɔ kama nɛ e kɔ m bɔɔ fo enɔ, ama sa maŋ kaŋ doro Job gbagba bre.”

Nɛ Setani lar Enyɛnpe Ebɔrɛ kutɔ n choŋ.

Job be kusɔ nɛ e kɔ kikɛ ka mur be asheŋ

¹³Kachako nɛ Job be bibinyɛn ashunu nɛ bumo sipocheana besa na yaŋ wora kejigboŋ a ji nsaa nuu ashi Job be wurkoŋ be laŋ to. ¹⁴Ndoŋ nɛ nna kabɔ ko ber to m ba Job kutɔ m ba kaŋɛ mo le: “An daa kɔ ana na nna a dɔ nɛ ekurma na malɛ wɔ kupuŋ to m mata anyi a ji. ¹⁵Epul na to nɛ Sabiaebi ko ba lar anyi so m mɔ beshumpo na nseŋ kpa ana nɛ ekurma na kikɛ n choŋ. N nawule e tiŋ n nya n shile m ba nɛ m ba kaŋɛ fo kusɔ nɛ k wora.”

¹⁶Kabɔ na kraa malga nna nɛ enyɔsopo shile m ba kaŋɛ le: “Bɔrɛ nyɛkpɛ nna m ponte mbolpɔ na nɛ mbolpɔkpapoana na m mɔ. N nawule e nya n shile m ba nɛ m ba kaŋɛ fo kusɔ nɛ k wora.”

¹⁷Mo alɛ gba kraa malga nna nɛ kabɔ sasopo ba kaŋɛ Job le: “Beyu nɛ b kɔ akɔsɔ be ntuŋ asa shi Babilɔn be efuli so nɛ k wɔ kelargato be esoso be epeŋilarkpa na nna m ba kɔ n suge fo enyɔma na nseŋ kpa amo kikɛ n choŋ. N nawule e nya n shile m ba nɛ m ba kaŋɛ fo kusɔ nɛ k wora.”

¹⁸Loŋ be kabɔ na gba kraa malga nna nɛ enasopo shile m ba kaŋɛ le: “Fo mbia daŋ wora kejigboŋ nna a ji nsaa nuu ashi fo wurkoŋ be laŋ to ¹⁹nɛ bɔrɛfugboŋ ko ber n shi keshishɛrsawule so epul to m ba da kowu na n lɛ fo mbia na kikɛ so m mɔ. N nawule e nya n shile m ba nɛ ba kaŋɛ fo kusɔ nɛ k wora.”

²⁰Job ka nu le be asheŋ ere kikɛ, nɛ e pɛ mbe asɔbuuso ŋ kpɛa to nseŋ she mbe kumu so be emin kikɛ ŋkpal kagbenejija damta nɛ k tɔr mo so na so. Kumo be kaman nɛ e gbir m bunyaŋ Ebɔrɛ ²¹nseŋ kaŋɛ le:

“B ka kurge ma m ba durnya to,

m maaŋ bar shɛŋ.

Ŋ ka naŋ wu a lar durnya to, m maaŋ ta shɛŋ n lar.

Enyɛnpe Ebɔrɛ na e sa, mo alɛ e sɔ;

Kemaŋkura e baa la Enyɛnpe Ebɔrɛ peya!”

²²Asheŋ nɛ e wora ere kikɛ to, Job daa maŋ wora kulubi m malga ŋ gbiti Ebɔrɛ.

Job be kewora ŋ keni nyɔsopo be asheŋ

¹Ebɔrɛ be emalaika ka naŋ ba shɛr Enyɛnpe Ebɔrɛ na be anishito ashi ebɔrɛso, nɛ Setani gba naŋ ba tu bumo n shɛr ndoŋ. ²Ndoŋ nna nɛ Enyɛnpe Ebɔrɛ na bishi Setani le: “Nnɛ nɛ fo shi! Manɛ nɛ fo daa wora?”

Nɛ Setani kaŋɛ: “N na a kulti durnya kikɛ to nna.”

³Ndoŋ nna nɛ Enyɛnpe Ebɔrɛ na naŋ bishi mo: “Manɛ nɛ fee fɛ a laŋɛ ma kayɛrbi Job be kaplɛa so? Durnya kikɛ to esa kama maŋ du fanɛ mo. E la esa nɛ esa maaŋ tiŋ n wu mo kulubi nna nɛ mo alɛ bee bunyaŋ Ebɔrɛ nseŋ kishi kulubi be kewora. Fo ka kule ma ekpa n ya mur mbe asɔ kikɛ, nɛ e maŋ wora shɛŋ gba na, e kraa maŋ chɛrga mbe kebaawɔtɔ to.”

⁴Nɛ Setani kaŋɛ Ebɔrɛ le: “Esa shuli e ka paŋ asɔ nɛ e kɔ kikɛ nsaa kɔ mbe ŋkpa a wɔtɔ. ⁵Fo ere e ta kayurnyaŋ n lɛ Job so ŋ keni, e beeŋ yili fo gbagba be anishito n shoduu fo.”

⁶Ndoŋ nna nɛ Enyɛnpe Ebɔrɛ malɛ naŋ kaŋɛ le: “To, n nu! Feeŋ tiŋ n shin nɛ kayurnyaŋ e tɔr Job so nɛ e ji awurfoŋ kananɛ fee sha, ama sa maŋ kaŋ mɔ mo bre!” ⁷Nɛ Setani lar Enyɛnpe Ebɔrɛ na be anishito nseŋ ya ta achuu besa so n lɛ Job so. Yili mbe kumu so m ba fo mbe ayadra so kikɛ daŋ wora achuu nna.

⁸Ndoŋ nna nɛ Job lar n ya chena kumuni so nseŋ ta kapɛlanfu a kuti mbe achuu na to. ⁹Nɛ mbe eche ba kaŋɛ mo: “Manɛ nna nɛ fo kraŋ yirda Ebɔrɛ ashi awurfoŋ nɛ fee ji ere kikɛ to? Shoduu mo nseŋ wu nɛ k loge!”

¹⁰Ndoŋ nna nɛ Job kaŋɛ mbe eche le: “Sa maa malga fanɛ ewulpo! Nɛ anyeeŋ sɔ Ebɔrɛ be nɛfa nɛ enɔgboŋ anyɔ, manɛ nna nɛ anyi maaŋ sɔ etɔrɔ bre mo kutɔ?” Asheŋ ere kikɛ to, Job maŋ malga ŋ gbiti Ebɔrɛ fanɛ e maŋ wora n nyalɛ.

Job mo teriana besa na be asheŋ

¹¹Job daa kɔ benekpana kpakpaso asa ko nna. Bumo e daa la Ɛlifaz nɛ e shi kadegboŋ nɛ baa tre Tɛman na nɛ Bildad nɛ e shi Shuuwa be kasawule so nɛ Zofa nɛ mo alɛ shi Naama be kasawule so na. B ka nu awurfoŋ nɛ Job bee ji na be asheŋ nɛ b kre keyɔ n ya leŋ mo to nseŋ wushi mo kagbene. ¹²B kraa wɔ kufɔ kufɔ nna nseŋ wu Job, ama b daa maŋ pin mo. B ka ba pin fanɛ Job nna nɛ b fara a shu a boŋ to awɔrso nseŋ kpɛa bumo be asɔbuuso to nsaa wora eshishɛr a wurge bumo be amu so a ŋini fanɛ bumo be ŋgbene jija bumo. ¹³Kumo be kaman nɛ b ya tu Job n chena kasawule nchɛ ashunu nɛ nnyɛ ashunu nɛ ekama maa bugi kɔnɔ a kaŋɛ shɛŋ, ŋkpal awurfoŋ gboŋgboŋi nɛ b wu e ka bee ji so.

Job ka fubel n sa Ebɔrɛ be asheŋ

¹Kumo be lalaloge nɛ Job fara

m malga n shoduu mbe kakurgeachɛ ŋ kaŋɛ Ebɔrɛ le:

^2-3O Ebɔrɛ, sho kachɛ nɛ b kurge ma na kɔnɔ,

nseŋ shoduu kanyɛ nɛ n nio sɔ ma kedampo na gba!

⁴Ebɔrɛ, shin nɛ loŋ be kachɛ na e ki tentembiri plɔ.

Sa maŋ naa nyiŋi kumo be asheŋ kikɛ kuraa,

fo alɛ e sa maŋ naŋ shin nɛ k fulto kikɛ.

⁵Shin nɛ k baa la kachɛ nɛ k biri to a la tentembiri plɔ;

nseŋ shin awɔlpa e buu kumo so nɛ epeŋi e sa maŋ nyaŋɛ.

⁶Lara loŋ be kanyɛ na ashi kafɛ be nchɛ to,

nsaa maŋ naŋ shin nɛ b karga kumo n ti nchɛ so.

⁷Sa maŋ naŋ shin nɛ b kurge ebi le be kachɛ fanɛ kede ere,

ŋko n naŋ shin nɛ kusɔ ko e wora nɛ basa e baa wora awɔr

kagbenefuli so loŋ be kanyɛ kikɛ mbaanaayɔ.

⁸Sa belejipo ekpa nɛ b shoduu loŋ be kachɛ na.

Bumo e naa tiŋ a shin nɛ teku to

be kusɔbɔya gbeyeso gboŋgboŋi na bee nyaŋɛ to.

⁹Shin nɛ kachɛ na be kachipurso be kechɛkpabi e biri to,

nsaa maŋ naŋ shin nɛ k baa tama karechɛ kikɛ.

¹⁰Sho kanyɛ nɛ b kurge ma na kɔnɔ

ŋkpal k ka shin nɛ b kurge n wɔtɔ durnya

nɛ etɔrɔ bɔlɔ kumo to ere so.

¹¹Manɛ nna nɛ n daa maŋ laŋɛ

kachɛ nɛ b kurge ma na bre?

¹²Manɛ nna nɛ n nio ta ma n deŋi mbe aya so,

nseŋ sa ma mbe kenyipo nɛ n nyipo?

¹³N daŋ wu n laŋɛ nna,

ndafanɛ n daa beeŋ ya tu

¹⁴bewura nɛ benimuana nɛ b wu

nseŋ ka bumo be ewurkpaana nɛ nwugboŋ

nɛ a bure a dese na.

¹⁵Ndoŋ nɛ meeŋ ya dese a di fanɛ bewura

nɛ b daŋ gbare eshuwa nɛ egbiti m bɔlɔ nwu,

¹⁶ŋko n ya dese nchaŋ to fanɛ kebia

nɛ b kurge nɛ e laŋɛ nsaa

maŋ wu kananɛ karechɛ du na.

¹⁷Basa lubi maŋ naa tiŋ a wora asheŋ lubi nchaŋ to,

basa nɛ b shuŋ ŋ gben malɛ bee nya a wushi ndoŋ nna.

¹⁸Basa nɛ b daŋ ti ebu gba bee nya kayurwushi nna,

b maŋ naa nu basa nɛ baa keni bumo so na be kaponte

ŋko a wu bumo be kamɛaŋ.

¹⁹Basa nɛ b kɔ atre nɛ bebɔlpo kikɛ wɔ ndoŋ nna.

Anya gba nya bumo be amu ndoŋ.

²⁰Manɛ nna nɛ Ebɔrɛ shin nɛ n wɔ ŋkpa to,

saŋɛ nɛ kebaawɔtɔ du kekekra le ere?

²¹Ma ere bee sha luwu ga

a chɔ keta kenishipere n fin

yawu kpakpaso be asɔ,

ama luwu malɛ maa ba.

²²Shɛŋ shɛŋ maaŋ tiŋ n fuli ma kagbene

a chɔ kewu n yɔ nchaŋ to.

²³Manɛ nna nɛ ŋ kraa wɔ ŋkpa to,

jemanɛ nɛ Ebɔrɛ nawule nyi kananɛ

ma kebaawɔtɔ beeŋ baa du echefoso?

²⁴Ma keji nɛ kenuu e ki

ebɔl to nɛ kagbene to be kushu na.

²⁵Asheŋ nɛ mee ŋana ga na

kikɛ e ki kashenteŋ na.

²⁶M maŋ kɔ kagbenewushi

ŋko ewushi kikɛ ma kebaawɔtɔ to,

she etɔrɔ nɛ kagbenekuu damta nawule.

Ɛlifaz ka juŋkpar m malga be asheŋ

(4:1—14:22)

Ɛlifaz

¹Job mo nekpa Ɛlifaz, nɛ e shi

Tɛman be kadegboŋ to na e juŋkpar ŋ kaŋɛ:

²“Job, jande nya kanyiti n sa ma

nseŋ nu kusɔ nɛ mee sha kekaŋɛ ere.

^3-4Nyiŋi kananɛ fo mmalga daŋ leŋ basa damta

nɛ asheŋ daŋ tir bumo na to,

a ŋini bumo kananɛ baaŋ baa wora asheŋ na.

⁵Ama naniere kufugboŋ tɔr fo so

nɛ fo gbagba bee kule a fin luwu

ŋkpal etɔrɔ ka ba fo so na so.

⁶Fo la esa nɛ e bee shuŋ Ebɔrɛ

a wɔ kebaawɔtɔ niŋiso to nna,

amoso nya kagbene nsaa maŋ paŋ tama!

⁷Fo daŋ nu fanɛ esa nɛ e niŋi kebaawɔtɔ to

daŋ ji awurfoŋ pɔɛŋ nseŋ wu a?

⁸Kusɔ nɛ ma ere nyi e la fanɛ

basa nɛ baa du kulubi

bumo be amu to nɛ k bee kɔr.

⁹Kananɛ bɔrɛfu bee jija asɔ na,

aloŋ nɛ Ebɔrɛ bee nya agbo a mur bumo.

¹⁰Kumu kpakpaso wuraana

bee kaa ponte to fanɛ ebuluŋ nna,

ama Ebɔrɛ e naa buri bumo be anyii

nɛ bumo be nnɔ bee lo.

¹¹Kananɛ ebuluŋ maa nya shɛŋ

a pɛ a ji nsaa wu na,

aloŋ nɛ bumo alɛ gba beeŋ wu

ŋ ka bumo be mbia nɛ b pesaŋ to.

¹²Esa ko daŋ kuli ŋ kaŋɛ ma ashiri ko;

e daa maŋ malga kumo awɔrso.

¹³N daa maŋ tiŋ n di kamɔnchɛ be kanyɛso;

ŋkpal edare bubɔrɔ nɛ n daa ku so.

¹⁴Kufu daŋ pɛ ma hale nɛ n daa chicha.

¹⁵Kebuniyoyu ko e daŋ lar ma so

nɛ kufu pɛ ma ga hale nɛ awo bibi dii ma.

¹⁶Ndoŋ nna nɛ kebuniyoyu na pɛ afu n yili diim, a maŋ naa gbegber to

nɛ m pɛshɛ kumo lee, ma alɛ maŋ pin kusɔ nɛ k la.

Kumo be kaman nɛ n nu ebɔl ko ka kaŋɛ le:

¹⁷‘Edimɛdi kikɛ maŋ niŋi Ebɔrɛ

nɛ e to bumo na be anishito.

¹⁸Ebɔrɛ maa yirda mbe emalaika

nɛ baa shuŋ mo ebɔrɛso na gba.

¹⁹Edimɛdi nɛ b maa chɛr nsaa wu fanɛ

kananɛ kapuya maa chɛr nsaa bure na nɛ e beeŋ tiŋ n yirda a?

²⁰Esa beeŋ tiŋ a wɔ ŋkpa to kachipurso,

ama ta a ba kaaseso nɛ e wu n choŋ

nɛ esa kama maŋ nyi gba.

²¹Dimɛdi be ŋkpa maa chɛr kelar mo to,

Ebɔrɛ baŋ lara efute na, epul to nɛ e wu,

nɛ k daa maŋ daga fanɛ e wu.’ ”

¹“Job, shu n fin kechɛto ŋ keni a,

malaika ko beeŋ ba chɛ fo to a?

²Kayurbesa nɛ kukɔrkɔ

e naŋ mɔ ewulpo nɛ e maŋ nyi asheŋ.

³N wu bewulpo ka yili to nɛnɛ kebaawɔtɔ to,

ama kɔnɔsho ka ba bumo nɛ bumo be

laŋ to ebi so nɛ asheŋ bri bumo.

⁴Bumo be mbia maŋ nya esa nɛ e beeŋ kuŋ bumo;

esa malɛ kikɛ maŋ yili bumo be kaman ashi demujikpa.

⁵Kumo be kaman nɛ kejimuni wuraana nɛ

basa nɛ akoŋ kɔ ba fuu bumo be adɔjibi

nseŋ gbare bumo be mpetɛsɔ ŋ ki bumo peya.

⁶Awurfoŋ nɛ anyee ji maa shi

anyi be adɔjibi ka maa wora to.

⁷Ayai! Edimɛdi gbagba e naa

fin asheŋ a sa bumo be amu;

fanɛ kananɛ ajanwulɛ bee pante edɛ na.

⁸Job, nɛ ma e daa la fo,

meeŋ ta ma asheŋ m bɔɔ Ebɔrɛ enɔ

nɛ e chɛ ma to.

⁹Anyi maaŋ tiŋ m pin asheŋ nɛ Ebɔrɛ bee wora to.

Mo alɛ be emamachisheŋ maŋ kɔ ekar.

¹⁰Mo e naa shin nɛ bɔrɛ bee ba

nɛ adɔsawule bee nya kayul.

¹¹Ebɔrɛ e naa maŋ bebɔlpo so,

nsaa sa basa nɛ baa shu nli kagbenewushi.

^12-13Mo e naa melgi basa nɛ b nyi asheŋ ga be ŋkre a buu,

nsaa bɔla benyiashempo be kanyiasheŋ so a pɛ bumo;

saŋɛ na so kusɔ kama nɛ baa wora maa nyalɛ a sa bumo.

¹⁴Hale kapiidi gba baa nite nna

a la a la a fin ekpa

fanɛ b ka na tentembiri to na.

¹⁵Ama Ebɔrɛ e naa mɔlga basa nɛ asheŋ tir na

ashi kumukpakpaso wuraana be nnɔ to be mmalga

nɛ belempo be eleŋ to

nɛ belempo be kɔrfɛ to.

¹⁶Mo e naa sa betirpo tama a shin nɛ

kemaa ji asheŋ nɛ amo be ekpa so bee ba ekar.

¹⁷Kagbenefuli la esa kama nɛ Enyɛnpetale Ebɔrɛ

bee niŋi ekpa na peya nna.

Amoso sa maŋ kaŋ keni mbe kefiɛso jiga.

¹⁸E beeŋ tiŋ m bar doro nɛ ebesa fo so,

ama mo alɛ beeŋ naŋ chɔɔ fo achuu

nɛ alɔbi na kikɛ n chɛ amo.

¹⁹Saŋɛ kikɛ Ebɔrɛ beeŋ baa lara fo ashi etɔrɔ damta

nɛ a bee bar fo kagbenejija ga ere kikɛ to.

²⁰Ebɔrɛ e naŋ kuŋ fo ashi luwu to jemanɛ kikɛ;

akoŋgboŋ nɛ kena be jemanɛ gba, fo maaŋ wu.

²¹Mo e naŋ kuŋ fo ashi basa nɛ baa jija fo kutɔ,

nseŋ mɔlga fo ashi kemur kama nɛ k bee ba fo so to.

²²Kemur nɛ akoŋgboŋ

be asheŋ maaŋ tir fo ere.

Fo alɛ maaŋ naa ŋana kupuŋ to be asɔbɔya lubi.

²³Fo kudɔsawule maaŋ baa kɔ ajembu nɛ afalta;

kupuŋ to be asɔbɔya lubi malɛ maaŋ pɛ fo.

²⁴Feeŋ chena fo laŋ to nɛ kagbenewushi,

nɛ shɛŋ maaŋ wora fo asɔ nɛ fo kɔ.

²⁵Fo kamanebi beeŋ baa shi

a chɔ afitiri nɛ e wɔ durnya kikɛ to.

²⁶Fo ŋkpa beeŋ teŋi so nɛ fo chɛr,

fo alɛ beeŋ baa kɔ eleŋ eyurto

hale n ya fo kachɛ nɛ feeŋ wu.

²⁷Job, an dara asheŋ ere nna nseŋ koya amo n chɛr.

A la kashenteŋ nna, amoso ta amo n shuŋ fo kebaawɔtɔ to.”

Job ka tuge Ɛlifaz be kamalga to be asheŋ

Job

¹Ndoŋ nna nɛ Job tuge Ɛlifaz

be kamalga na to nseŋ kaŋɛ le:

²“K beeŋ baa du kpakpa ga nɛ esa e tiŋ m

pin awurfoŋ nɛ keboltofinfiŋ damta

nɛ a tu ma ere to.

³A shi a chɔ teku ase be shishɛr;

amoso nɛ n daa maŋ fɛ nfɛra pɔɛŋ nseŋ malga na.

⁴K du fanɛ Enyɛnpetale Ebɔrɛ na ka to

atanyembi nna nɛ amo be kebɔr luri ma eyur to.

Ebɔrɛ ta kufugboŋ nna n lɛ ma so.

⁵Kurma baŋ nya afitiri a ji,

kumo be kenishi bee bɔlɔ nna.

Kena malɛ gba baŋ nya afitiri wɔlso a we,

k maŋ naa shu.

⁶Esa bee tiŋ n ji ajibi tataso nɛ nfɔl maŋ wɔ amo to a?

Ŋko ebel mo e wɔ kefule be kefuful na to?

⁷Kananɛ ma ajibi du nna, e maŋ wɔ ebel.

A maa yɛlga ma gba kuraa.

^8-9Ebɔrɛ daŋ nu ma kabɔrɛkule

nseŋ mɔ ma nɛ n wushi

kedaa beeŋ par ma.

¹⁰Nɛ e daa beeŋ wora loŋ nna,

ebesa nɛ mee ji ere kikɛ be kaman

n daa beeŋ baa tɛto kagbenefuliso

N nyi fanɛ Ebɔrɛ du cheembi nna;

ma alɛ maŋ naŋ wora mo kusoe kpakpaso kikɛ.

¹¹Nuso be eleŋ e kraa wɔ ma to,

nɛ a daga fanɛ m baa kraa kɔ tama?

Manɛ bre nɛ men naŋ nya echefoso,

nɛ a daga fanɛ m baa kraa wora kanyiti?

¹²M maŋ kɔ eleŋ fanɛ kejembu ŋko danyaŋ peper.

¹³M maŋ naa kɔ eleŋ kikɛ nɛ m mɔlga ma kumu;

kaplɛkama maŋ wɔtɔ nɛ n yɔ n ya nya kechɛto.

¹⁴Esa kama nɛ e wɔ le be awurfoŋ to,

hale nɛ e maŋ naa kɔ kabɔrɛŋana

n sa Enyɛnpetale Ebɔrɛ gba;

a daga mo nekpaana ka yili

mbe kaman nna a leŋ mo to.

¹⁵Ama menyi nɛ men la n nekpaana ere

bee fule ma nna nsaa du fanɛ mbombi nɛ bɔrɛ

baŋ yili gbrɛbi kikɛ nɛ e wɔlto na.

M maaŋ tiŋ n ta ma egbɛ n lɛ menyi so.

¹⁶Eshishɛr bee ti loŋ be mbombi na nna

nɛ amo be nchu maa shibi,

¹⁷ketar baŋ wurge nɛ a maaŋ naa kɔ nchu a shile,

nɛ epeŋi malɛ baŋ ber amo so nɛ nchu na feeto.

¹⁸Eyawujipo nɛ baa dii enyɔma

baaŋ ta tama n bɛ mbombi ere so,

a fin nchu nɛ b nuu baa foe nna

n ya wu n tɔr keshishɛrsawule so m mur.

¹⁹Tɛma be kadegboŋ nɛ Sheba be efuliana so

be eyawujipo nɛ b dii enyɔma

bee kaa bɛ amo so nna a fin nchu nɛ b nuu,

²⁰ama mbombi wɔlso nɛ baa tu,

nɛ bumo be tama a loge nɛ aba e pɔ bumo.

²¹Menyi alɛ gba du fanɛ

loŋ be mbombi na nna na.

Men ka ba wu awurfoŋ nɛ mee ji na,

nɛ kufu pɛ menyi nɛ menyee fɛ keyige ma n lɛ.

²²M maŋ daŋ kule menyi be ekama

fanɛ e sa ma kakɛ kikɛ

²³ŋko ŋ kaŋɛ mo fanɛ e ka amansherbi

n sa bedoŋ nɛ b ta ma n lɛ.

²⁴To, men ŋini ma kulubi nɛ n wora.

Meeŋ lo ma kɔnɔ to nseŋ nu menyi kutɔ.

²⁵Kashenteŋ bee besa jemanɛ kikɛ nna,

ama kusɔ nɛ menyee kaŋɛ ere maa ŋini shɛŋ.

²⁶Naniere ma kenishi pere nna na,

ama menyee ta ma mmalga fanɛ afu fuloŋ nna.

²⁷Menyi ere beeŋ tiŋ m barga amunibi to n sa abar

ŋko n fa men nekpaana gba n nya amansherbi!

²⁸Men keni ma anishito nɛnɛ,

m maaŋ fule ŋko ŋ ku efɛ n sa menyi.

²⁹Men yige kebaakuu ma kɔnɔ,

nɛ manɛ aloŋ, ma ketre beeŋ jija.

³⁰N nyi kulubi nɛ kelela be mbarga,

m maa ku efɛ nna.”

Manɛ so nɛ kebaawɔtɔ du kpakpa loŋ

¹Manɛ nna nɛ kebaawɔtɔ du kpakpa loŋ?

Manɛ nna nɛ anyee ji awurfoŋ loŋ?

²An du fanɛ anya nɛ baa fin kiyoyul

nɛ b chena to n wushi nna;

An la beshumpo nɛ anyee jo

anyi be kakɔka kenishipereso nna.

³Ebɔrɛ shin nɛ ma nchɛ maŋ naa kɔ tɔnɔ n sa ma

nɛ kanyɛso bar ma keboltofinfiŋ damta.

⁴M baŋ dese kanyɛso kikɛ, mee

kilgi kelaŋ so nna a kule Ebɔrɛ

fanɛ kare e chɛ manaŋ,

ama kumo alɛ maa chɛ manaŋ.

⁵Achuu nɛ e bee lar nchu nɛ ashushombi

e sɔ ma eyur kikɛ so,

abibi sɔ ma eyur kikɛ nna.

⁶Ma nchɛ bee duga so manaŋ manaŋ

a chɔ kɔrɛ be kekpaltobi be jese.

⁷Ebɔrɛ, mee kule fo nna;

sa maŋ teŋ ma so!

Ma ŋkpa baa du fanɛ afu nna,

ma kagbenefuli teŋ fo ekar.

⁸Anishi nɛ a bee wu ma kabre ere

maaŋ naŋ wu ma kikɛ;

Menyeeŋ keni n fin ma,

ama m maaŋ naa wɔtɔ.

⁹Kananɛ abɔrɛwɔlpa bee deŋi nsaa choŋ na,

a loŋ nɛ basa bee wu nsaa maŋ naa bɛta a ba.

¹⁰Ma alɛ gba maaŋ naŋ bɛta m ba epe,

k maaŋ chɛr basa beeŋ teŋ ma so.

¹¹Amoso m maaŋ tiŋ n lo ma kɔnɔ.

Kagbenejija nɛ ebesa damta to

nɛ mee fubel a bile asheŋ na.

¹²M maŋ la teku ŋko kusɔ gbeyeso gboŋ

nɛ k wɔ teku chiŋgeliŋ to

nɛ fo ti ma n wɔtɔ a kuŋ ma.

¹³M baŋ yɔ kelaŋ so,

nsaa tama fanɛ ma ebesa beeŋ ku

¹⁴fee ta edare lubi nna a tɔrɔ ma

nɛ kufu bee pɛ ma ga

¹⁵hale nɛ mee yɛlga fanɛ

b nyaŋ ma ebɔl to m mɔ gba k bɔ ma so

a chɔ ŋ ka wɔ ŋkpa to.

¹⁶Ma ere maŋ naŋ ta ma ŋkpa n tre shɛŋ.

Kebaawɔtɔ fi ma! Yige ma asheŋ!

Ma kebaawɔtɔ maŋ naa kɔ tɔnɔ n sa ma.

¹⁷Enyɛnpe Ebɔrɛ, manɛ nna nɛ dimɛdi be asheŋ tir fo ga

nɛ fo lakal baa wɔ mbe asheŋ woraso so ere?

¹⁸Manɛ nna nɛ fee keni dimɛdi

be asheŋ to saŋkikɛ nsaa wora mo a keni

kachipurso nɛ kapaso nɛ kanyɛso ere bre?

¹⁹Ama fo maaŋ naŋ kpele fo anishi ma so

nɛ n nya m min echɔl gba a?

²⁰Hale nɛ n wora kulubi gba,

kumo be nnɛ e nya fo?

Manɛ nna nɛ fo lara kenishi n yuu ma loŋ?

Ma asheŋ bee tɔrɔ fo nna a?

²¹Manɛ nna nɛ fo maŋ tiŋ n ta ma lubi m paŋ ma?

M maaŋ naŋ chɛr nseŋ yɔ eshishɛr to n ya dese.

Fo alɛ beeŋ keni n fin ma, nɛ fo maaŋ wu ma.

Job mo nekpa Bildad be sososo be kamalga be asheŋ

Bildad

¹Ndoŋ nna nɛ Job mo nekpa Bildad nɛ e shi Shuuwa be efuli so na kaŋɛ:

²“Jemanɛ mo nɛ feeŋ yige fo mmalga fuloŋ

nɛ e maŋ kɔ kifi to ere be kebaamalga?

³Enyɛnpetale Ebɔrɛ na maa ji esa durmu,

mo alɛ maa wora kusɔ nɛ k maŋ daga.

⁴Ashere fo mbia na wora n da Ebɔrɛ so nna,

amoso nɛ e gberge bumo kusoe nɛ k daga bumo na.

⁵Ama nɛ fanɛ fo bɛta n yɔ Ebɔrɛ kutɔ,

nseŋ ya kule Enyɛnpetale Ebɔrɛ na;

⁶ŋko nɛ fanɛ fo la esa nɛ fo niŋi

nɛ kulubi kikɛ maŋ wɔ fo so nna,

kumo ere Ebɔrɛ beeŋ naŋ chɛ fo to

nseŋ shin nɛ fo naŋ nya asɔ nɛ fo paŋ na kikɛ.

⁷E beeŋ shin nɛ fo echefoso be kebaawɔtɔ

e baa bɔ fo kebaawɔtɔ dra na ga.

⁸An nanaana daa nyi asheŋ ga,

amoso koya asheŋ bumo kutɔ.

⁹Anyi maŋ chɛr durnya to, anyi alɛ maŋ nyi shɛŋ.

Anyi maa chɛr kasawule ere so nsaa choŋ fanɛ afu.

¹⁰Ama an nanaana na bre beeŋ ŋini fo kasheŋwora,

nɛ fo pin amo to nɛnɛ.

¹¹Agasa maa daŋ a yili kakpa nɛ nchu maŋ wɔ;

amo alɛ maa kɔr kpakpa nɛ k maa petɛ nchu.

¹²Nɛ fanɛ nchu na malɛ baŋ feeto ndoŋ,

agasa na e naa daŋ afitiri kikɛ kewu.

¹³Basa nɛ b maŋ nyi Ebɔrɛ du fanɛ agasa nna,

jemanɛ nɛ b maŋ nyi mo na nɛ bumo be tama bee loge.

¹⁴Loŋ be basa bee ta bumo be tama a deŋi

kusɔ nɛ k maŋ kɔ eleŋ fanɛ nansa be ketata so nna.

¹⁵Nɛ b baŋ ta bumo be egbɛ n lɛ ketata so malɛ,

k maaŋ tiŋ n sɔ bumo to.

¹⁶Basa lubi du fanɛ afitiri nɛ a bee nya epeŋi

nɛ bɔrɛchu nɛnɛ nna;

a bee daŋ nɛnɛ nna nɛ amo be nliŋi bee yɔ kufɔ

n sɔ kudɔbi na kikɛ to.

¹⁷Loŋ be afitiri na be nliŋi bee luri ajembu to nna

a nya a mur achin a yili nɛnɛ.

¹⁸Ama nɛ esa baŋ gberge afitiri na n tia,

b maaŋ naŋ pin fanɛ afitiri daŋ yili ndoŋ ŋ ku so gba.

¹⁹Kashenteŋto, kebaawɔtɔ nɛ basa lubi kɔ kikɛ e baa la na.

B maa chɛr nɛ basa ko ba sɔ bumo be kakpa a wɔtɔ.

²⁰An nyi fanɛ Ebɔrɛ maa kini

esa nɛ basa maa wu kulubi mo so a lɛ,

mo alɛ maa chɛ alubiworapo to.

²¹Amoso, e beeŋ naŋ shin nɛ fo kagbene e fuli

nɛ fo mushe awɔrso nɛ basa e nu fo asheŋ.

²²Ama e beeŋ shin nɛ fo doŋana bre e ji anishinyɔr

nseŋ mur gba kuraa nɛ esa maaŋ naŋ wu bumo kikɛ

hale mbaanaayɔ.”

Job ka tuge Bildad be kamalga to be asheŋ

Job

¹Ndoŋ nna nɛ Job kaŋɛ:

²“Kashenteŋ nɛ fo ji.

Dimɛdi kikɛ maaŋ tiŋ n ji n lar

Ebɔrɛ be anishito.

³Nɛ anyi nɛ Ebɔrɛ yɔ demujikpa ale kagboŋ gba,

anyi maaŋ tiŋ n ya ji m bri mo.

⁴Ebɔrɛ nyi asheŋ nsaa kɔ eleŋ ga,

esa kikɛ maaŋ tiŋ n tu mo n ji emɔrɔ m pɔɔ so.

⁵Nɛ Ebɔrɛ baŋ nya agbo,

e beeŋ tiŋ m pulgi abee nseŋ melgi amo m buu,

nɛ k purgi basa.

⁶Ebɔrɛ beeŋ tiŋ n shin nɛ kasawule

nɛ kumo be gbaltɔlase kikɛ a gbuŋgbuŋ to.

⁷E beeŋ naŋ tiŋ n shin nɛ epeŋi nɛ achɛkpabi

e biri to nɛ kakpa e fuli to ŋ gben.

⁸Ebɔrɛ nawule e to kuwɔlpa m parga kumo to n sɔ kaplɛkama,

mo alɛ e naa ji teku nɛ kumo to be asɔ kikɛ so eleŋ.

⁹Ebɔrɛ koŋwule na e to achɛkpabi be yiri yiri awɔlpa to,

Mo e to achɛkpabi nɛ baa tre Shishirigboŋ na nɛ koshi nɛ mbe bibi

nɛ achɛkpabi nɛ a wɔ awɔlpa to be kelargato be kaseto na kikɛ.

¹⁰Anyi maaŋ tiŋ m pin Ebɔrɛ be emamachisheŋ

nɛ e bee wora na be kukoŋwule gba to kikɛ.

¹¹Ebɔrɛ baŋ bɔla ma ase a choŋ gba,

m maaŋ wu mo ŋko m pin mbe asheŋ.

¹²E baŋ ta kusɔ, esa maaŋ tiŋ ŋ kuŋ mo akpa.

Esa malɛ maaŋ tiŋ m bishi mo fanɛ manɛ nɛ fee wora ere?

¹³Ebɔrɛ be kagbene baŋ kaa,

e bee mur mo doŋana nɛ baa chɛ

kusɔkpaŋ gboŋgboŋi lubi nɛ k wɔ teku to

nɛ baa tre Reehab na to na nna.

¹⁴Nɛ nuso nɛ ma alɛ le beeŋ tiŋ

n ji Ebɔrɛ emɔrɔ ashi ma demu ere to?

¹⁵Kashenteŋ nna fanɛ m maŋ wora shɛŋ,

ama kusɔ nɛ meeŋ tiŋ n wora kikɛ e la

kekule Ebɔrɛ nɛ e la ma demujipo na,

nɛ e wu ma kuwɔr.

¹⁶Hale nɛ e sa ma ekpa nɛ m malga gba a,

m maŋ yirda fanɛ e beeŋ nu n sa ma.

¹⁷E beeŋ shin nɛ bɔrɛfugboŋ e doro ma n ti so,

nɛ m maŋ wora shɛŋ.

¹⁸Pɔɛŋ nɛ meeŋ nya n fute n wushi gba na,

e beeŋ shin nɛ ma awurfoŋ e ti so.

¹⁹Nɛ kela fanɛ eleŋ nna, Ebɔrɛ kɔ eleŋ a chɔ ma!

Nɛ kela asheŋ be keji malɛ gba nna,

wanɛ e naŋ tiŋ n tre Ebɔrɛ demujikpa?

²⁰Nɛ fanɛ m maŋ wora n da so gba,

ma kɔnɔ to be mmalga beeŋ ji m biri ma.

²¹Hale esa kikɛ maŋ wu kulubi ma so gba,

ama kusɔ kama nɛ k beeŋ wora ma

be asheŋ maŋ naa tir ma.

²²Ŋkpal manɛ so, Ebɔrɛ bee mur basa nɛ b wora n da so

nɛ bumo nɛ b maŋ wora n da so kikɛ nna.

²³Nɛ esa lela baŋ wu luwu purgiase gba,

Ebɔrɛ bee chena nna a mushe.

²⁴Ebɔrɛ e sa basa lubi ekpa,

nɛ b sɔ durnya m pugi so;

nseŋ tan demujipoana malɛ.

Nɛ mannɛ Ebɔrɛ e wora loŋ, wanɛ e wora loŋ?

²⁵K du fanɛ ma nchɛ bee choŋ manaŋ manaŋ nna,

nɛ m maŋ naa tama kagbenefuli kikɛ kuraa.

²⁶Ma ŋkpa bee choŋ manaŋ manaŋ nna fanɛ afu na,

k bee yɔ manaŋ manaŋ a chɔ

kusore ka gbelge to n fuu kusɔ gba.

²⁷Jemanɛ ko mee wora ania

fanɛ meeŋ baa leŋ ma kumu to

nseŋ yige kebaamuni to a fubel nna,

²⁸ama ma awurfoŋana na bee da ma kufu nna.

Ŋkpal manɛ so, n nyi Ebɔrɛ ka kraa wu ma fanɛ

esa nɛ e wora n da so nna.

²⁹Nɛ e kraa wu ma fanɛ esa nɛ e wora n da so bre,

manɛ nna nɛ n naa tɔrɔ ma kumu a fin keji n lar?

³⁰Kɔya be yiri kikɛ maŋ wɔtɔ

nɛ n tiŋ n ta n fɔr so n nyalɛ so.

³¹Ebɔrɛ ta ma n lɛ kemaŋ dufɛso to nna,

hale ma asheŋ bee keta

ma asɔbuuso gba nyɔmɔ.

³²Ebɔrɛ maŋ la dimɛdi bomin fanɛ ma.

M maaŋ tiŋ n tre mo nɛ e ba demujikpa

nɛ an ji asheŋ.

³³Esa kikɛ maŋ wɔtɔ nɛ e tiŋ n ji ma nɛ Ebɔrɛ

be kefɛato be asheŋ ere.

³⁴Esa ko maŋ wɔtɔ nɛ e tiŋ n sɔ kedibi

nɛ Ebɔrɛ kɔ a funti ma ere mbe enɔ.

³⁵Esa daa wɔtɔ nɛ e wora loŋ nna,

n daa beeŋ malga n wushi ashi Ebɔrɛ be anishito

nɛ kufu maŋ kɔ ma.

Ama kananɛ asheŋ du naniere,

m maaŋ tiŋ m malga n wushi.”

Job ka fubel ŋ ŋini Ebɔrɛ be asheŋ

¹Kebaawɔtɔ lar ma ebɔl!

O Ebɔrɛ, nya asoe n nu ma

kenishipere be nfubel ere.

²O Ebɔrɛ, sa maŋ kaŋ ji m bri ma loŋ!

Manɛ be demu nɛ ma nɛ fo kɔ

nɛ an ji ashi demujikpa?

³Manɛ nna nɛ fo kekini ma n lɛ par fo,

nɛ fo maa wora shɛŋ a laŋɛ basa

lubi be ŋkre bre be kaplɛa so?

⁴Kananɛ anyi edimɛdi bee keni nsaa wora asheŋ na

nɛ fo, Ebɔrɛ gba bee keni nsaa wora asheŋ a?

⁵Fo alɛ gba be ŋkpa maŋ wɔ nteŋ

fanɛ anyeya nna a?

⁶Ama amoso nɛ fee nya manaŋ

a mige to a fin kewu ma kulubi ere a?

⁷Fo nyi ŋ ka maŋ wora n jija,

ama wanɛ e naaŋ tiŋ m malga

ŋ kuŋ ma fo kutɔ?

⁸Fo gbagba be enɔana nɛ fo ta m pɔr ma.

Ama naniere feeŋ shuli m mur ma a?

⁹Baa nyiŋi fanɛ fo e pɔr ma

fanɛ kananɛ baa ta ebɔ a pɔr asɔ na.

Amoso sa maŋ naŋ kilgi ma eshishɛr a!

¹⁰Fo e wɔtɔ n tuto eleŋ nɛ e tiŋ n di n nio kedampo,

nseŋ shin nɛ n tiŋ n daŋ n nio be epun to.

¹¹Fo e bela ma awibi n chuge abar so

nseŋ wora eblaŋ nɛ kawɔl m buu awibi na so.

¹²Fo e sa ma ŋkpa nseŋ ŋini

ma fo kasha nɛ k maa loge na.

Fo e naa keni ma so

nɛ n wɔ ŋkpa to na.

¹³Ama kusɔ nɛ fo ta ŋ ŋana fo kagbene to nde,

ma alɛ nyi k kaa wɔ fo nfɛra to.

¹⁴Kumo e la fanɛ, fee keni nna a fin ma kulubi,

saŋɛ na so nɛ fo gberge ma kusoe ŋkpal kumo so.

¹⁵M baŋ wora kulubi, mee nya asheŋ fo kutɔ nna,

ama nɛ m baŋ wora kelela bre, m maa nya mbo.

Naniere ma kagbene jija ma ga nɛ anishinyɔr pɛ ma.

¹⁶Kanaŋ kama nɛ m pere kenishi n wora asheŋ gba,

fo kraa pete ma nna fanɛ kananɛ ekpampo bee pete buluŋ na,

saŋɛ na so feeŋ ŋini ma fo mamachi be yuku na.

¹⁷Jemanɛ kikɛ fee wu ma kulubi nna.

Fo agbo bee wora keshi ma so nna a ti so

nɛ jemanɛ kikɛ fo alɛ bee fin ekpa popɔr

nɛ feeŋ bɔla so ŋ kɔ ma.

¹⁸Ebɔrɛ, manɛ nna nɛ fo shin nɛ b kurge ma bre?

A daŋ daga ŋ ka laŋɛ kachɛ nɛ b kurge ma na nna.

¹⁹Keshi n nio be epun to n yɔ nchaŋ to

daa beeŋ baa bɔ ma so a chɔ ŋ kaa wɔ ŋkpa to ere.

²⁰Ma nchɛ maŋ naa shi durnya to.

Yige ma nɛ n ji ma kumu gbrɛbi.

^21-22K maaŋ chɛr ko nɛ n wu n yɔ

nsaa maŋ naŋ bɛta m ba.

Mee yɔ kakpa nɛ tentembiri plɔ wɔ nna,

kakpa nɛ tama kikɛ maŋ naa wɔtɔ n esa na.

Ndoŋ be kefulto e du fanɛ tentembiri na.

Zofa be sososo be kamalga be asheŋ

Zofa

¹Ndoŋ nna nɛ Job mo nekpa Zofa

nɛ e shi Neeman be efuli so na kaŋɛ le:

²“Esa maaŋ tiŋ ŋ kplaŋ le be kawuli

be mmalga damta ere so

nɛ e maŋ nya kusɔ ko ŋ kaŋɛ.

³Job, fee fɛ fanɛ anyi maaŋ tiŋ

n tuge fo mmalga ere to nna a?

Esa wɔtɔ nɛ e fɛa fo so ŋkpal fo

mmalga jiga ere so!

⁴Fee ta fo kumu fanɛ fo maŋ wora kulubi kikɛ

nsaa ji emɔrɔ a kaŋɛ fanɛ fo ere be

asheŋ woraso kikɛ bee par Ebɔrɛ nna.

⁵Aloko Ebɔrɛ daa beeŋ tuge fo nna!

⁶E daa beeŋ shin nɛ fo pin

kakpa nɛ kanyiasheŋ shi.

Asheŋ ko du chiŋgeliŋ nna n sa dimɛdi

nɛ e tiŋ m pin amo to.

Fo alɛ daa beeŋ naŋ pin fanɛ

kasogberge nɛ Ebɔrɛ sa fo na

maŋ fo kumo nɛ k daga fo na so.

⁷Feeŋ tiŋ m pin Enyɛnpetale Ebɔrɛ

be keshi nɛ mbe eleŋgboŋ to a?

⁸Mbe keshi nɛ mbe eleŋgboŋ awɔlpa so,

nɛ fo maaŋ tiŋ n fo amo.

Amo alɛ naa du chiŋgeliŋ a chɔ nchaŋ

Mo alɛ naa nyi kusɔ nɛ k bee wora bubuni to

nɛ fo maŋ nyi kumo kikɛ kuraa.

⁹Mbe keshi nɛ eleŋgboŋ wɔ mpar a chɔ

kasawule nɛ etekuana kikɛ.

¹⁰Nɛ fanɛ Ebɔrɛ ti fo ebu

ŋko n yɛr fo demujikpa,

manɛ nɛ feeŋ tiŋ n wora mo?

¹¹Ebɔrɛ nyi basa nɛ b du jiga,

mo alɛ nsaa wu bumo be asheŋ lubi kikɛ.

¹²Keshin nɛ ewulpo e pin asheŋ du kpakpa a chɔ

keshin nɛ kurma kpeŋso e nu n sa esa.

¹³Job, yili fo kagbene kukoŋwule n sa Ebɔrɛ,

nseŋ bɛta n yɔ mo kutɔ kabɔrɛkule to.

¹⁴Tuba n lara kulubi ashi fo laŋ to,

hale amo nɛ fo wora ashiri to na gba.

¹⁵Nɛ fo wora loŋ, fo maŋ naŋ ji anishinyɔr

fo alɛ beeŋ nya kenyɛn a maaŋ naa wɔ

kufu be kebaawɔtɔ to.

¹⁶Kumo be kaman nɛ fo etɔrɔbi ere

kikɛ be asheŋ e lar fo nfɛra to

fanɛ nchu ka bɔla kuturko to n choŋ na.

¹⁷Kebaawɔtɔ beeŋ fulto parr a chɔ kapiidi

nɛ tentembiri malɛ e ki fanɛ kachipurso n sa fo.

¹⁸Sheŋ maa naa tɔrɔ fo ashi fo kebaawɔtɔ to,

Ebɔrɛ beeŋ sa fo tama nɛ fo maŋ naa wɔ kafɔŋ to.

¹⁹Fo maaŋ naa ŋana fo doŋana.

Basa damta malɛ beeŋ baa fin kechɛto fo kutɔ.

²⁰Ama basa lubi bre beeŋ paŋ tama nseŋ fo akpa.

Bumo be tama kikɛ beeŋ baa la luwu nna.”

Job ka tuge Zofa be kamalga to be asheŋ

Job

^1-2Ndoŋ nna nɛ Job kaŋɛ mo nekpaana na le:

“Menyee fɛ fanɛ men la basa kre anishi ko nna

ashi menyi be atuwebi nɛ men sa ma na to.

³Ama kusɔ nɛ men nyi na nɛ ma alɛ gba nyi,

kumo koŋwule na nɛ ekama gba nyi.

⁴Jemanɛ kikɛ kebaawɔtɔ niŋiso to nɛ n daa wɔ,

nɛ Ebɔrɛ malɛ daa nu ma kabɔrɛkule.

Ama naniere n nekpaana e naa wora ma eyur to na.

⁵Nɛ esa baa maŋ wɔ etɔrɔ kikɛ to,

k maŋ du kpakpa n sa mo nɛ kemalga ŋ gbiti

esa nɛ e bee ji awurfoŋ.

⁶Beyu nɛ basa nɛ b maa ŋana Ebɔrɛ

wɔ kayurwushi to nna,

ama kusɔ koŋwule nɛ b yirda

e la eleŋ nɛ b kɔ na.

⁷Menyi beeŋ tiŋ ŋ koya asɔ damta

ashi mbuibi nɛ asɔbɔya kutɔ.

⁸Menyi alɛ beeŋ naŋ tiŋ ŋ kule kanyiasheŋ ashi

kasawule so nɛ nchu to be asɔ keniso kutɔ.

⁹Amo be kekama beeŋ tiŋ ŋ kaŋɛ menyi

kusɔ nɛ Enyɛnpe Ebɔrɛ na wora.

¹⁰Kusɔ futeso kikɛ be ŋkpa bɔɔ Ebɔrɛ enɔ nna.

¹¹Men nyi fanɛ asoe nɛ an kɔ a nu mmalga

nsaa kɔ adonduloŋ malɛ a nu ajibi be ebel.

^12-13Basakpar kutɔ nɛ anyee koya kanyiasheŋ.

Ama Ebɔrɛ bre kɔ kanyiasheŋ nɛ yuku kikɛ nna.

Basakpar beeŋ tiŋ m pin asheŋ to

ama Ebɔrɛ bre bee pin asheŋ to

nseŋ naa kɔ yuku nɛ e wora amo.

¹⁴Esa kikɛ maaŋ tiŋ n lɔŋɛ kusɔ nɛ Ebɔrɛ jija,

ŋko n lara basa nɛ e ti ebu ashi kabuti na to.

¹⁵Ebɔrɛ e naa pɛ bɔrɛ nɛ ewule bee yili,

mo alɛ naŋ shin nɛ bɔrɛ ba ga,

nchu bee sɔ kaplɛkama nna n jija kasawule.

¹⁶Jemanɛ kikɛ Ebɔrɛ kɔ eleŋ a tiŋ a kɔ a pɔɔ so nna.

Befɛpo nɛ basa nɛ baa fule kikɛ wɔ mbe eleŋ be kaseto to nna.

¹⁷Mo e naa suge bewura be kanyiasheŋ,

nsaa shin nɛ bejuŋkparpo bee wora asheŋ fanɛ bewulpo.

¹⁸Mo e naa gboŋi bewura kuwura to

nsaa shin nɛ baa nya efɔl a wɔtɔ bumo be nshɛr to

a gberge bumo a yɔ fanɛ anya na.

¹⁹Ebɔrɛ e naa lara bɔrɛmatapoana nɛ basa

nɛ b ji eleŋ ga n chɛr na ashi bumo be eyilikpa.

²⁰Mo e naa shin nɛ basa nɛ ekama yirda

be nnɔ bee mɔ bumo,

nsaa suge basakpar be kanyiasheŋ.

²¹Mo e naa shin nɛ bewurgboŋ bee ji anishinyɔr,

nsaa shin nɛ bumo be yuku bee ba ekar.

²²Ebɔrɛ e naa shin nɛ tentembiri bee ki kefulto.

²³Mo e naa shin nɛ efuli bee ki efuligboŋ nsaa nya eleŋ,

kumo be kaman nɛ e naŋ pɔ amo so m mur amo na.

²⁴Mo e naa shin nɛ efuliana na bewuraana bee ki bewulpo,

nsaa mel to a nite keshishɛrsawule nɛ akpaana maŋ wɔ so na.

²⁵Bewuraana na bee la tentembiri to nna

a nite a jante fanɛ b ka nuu nsa m boo na.”

¹“N nyi asheŋ nɛ menyee malga ere kikɛ,

ma alɛ pin amo be kekama to.

²Menyi be ekama maŋ kɔ kenyi a chɔ ma.

Menyi alɛ maŋ nyi kusɔ ko nɛ m maŋ nyi kumo.

³Ama Enyɛnpetale Ebɔrɛ na

nɛ mee sha nɛ n tu n ji kusɔ nɛ k tu ma ere,

mannɛ menyi.

⁴Efɛ nawule nɛ menyi ere bee ku a deŋi ma.

Men du fanɛ bechɛpo nɛ b maŋ nyi shɛŋ nna.

⁵Kanyiasheŋ be kusɔ nɛ menyeeŋ tiŋ n wora kikɛ

e la kelo menyi be nnɔ to n chena.

⁶Men lo to a keni ma nɛ ŋ gbagba a ji ma asheŋ.

⁷Mmalga nɛ menyee ta a wɔtɔ Ebɔrɛ be kɔnɔ to

⁸jemanɛ nɛ men sɔ mo so a malga,

nsaa maa ji kashenteŋ na.

⁹Nɛ Ebɔrɛ mige menyi to ŋ keni

asheŋ beeŋ nyalɛ n sa menyi a?

Menyee tama fanɛ menyeeŋ tiŋ n fule Ebɔrɛ

fanɛ kananɛ menyee fule basa na a?

¹⁰Nɛ menyi maŋ ji kashenteŋ ashiri to gba,

e beeŋ fɛa menyi so n niŋi menyi asheŋ,

¹¹nɛ mbe eleŋgboŋ na e shin nɛ kufugboŋ

e tɔr menyi so nɛ men baa chicha.

¹²Menyi be aŋasa nɛ menyee bɔ

nɛ emɔrɔ nɛ menyee ji na kikɛ

du fanɛ kalabɛr nɛ afu bee ber a yɔ nna.

¹³Men lo menyi be nnɔ nseŋ sa ma ekpa nɛ m malga,

kumo be kaman pɔɛŋ nɛ menyi alɛ e malga.

¹⁴Kusɔ kama nɛ k nya ma

shi ŋ gbagba be kumu to nna.

¹⁵Hale nɛ Ebɔrɛ bee sha kemɔ ma gba,

ŋ kraa beeŋ yirda mo.

¹⁶Kusɔ nɛ k beeŋ mɔlga ma nna na,

ŋkpal manɛ so, esa nɛ e wora n jija kikɛ

maaŋ shuli m ba Ebɔrɛ be anishito nɛ e ji mo demu.

¹⁷Men kaŋ asoe n nu ma mmalga nɛnɛ!

¹⁸M bela ma demu na ase nɛnɛ nna,

ma alɛ baa nyi geeŋ fanɛ meeŋ ji n lar kumo to.

¹⁹Nɛ fo, Ebɔrɛ beeŋ tiŋ ŋ kaŋɛ fanɛ n wora n jija,

kumo ere meeŋ lo ma kɔnɔ nseŋ wu nɛ k loge.

²⁰Ma Ebɔrɛ, asɔ anyɔ nɛ mee kule fo,

amo be kaman, m maaŋ naaŋ shile ŋ ŋana fo so.

²¹Amo e la fanɛ yige kebaagberge ma kusoe

nɛ kebaa funti ma nɛ m baa chicha.

²²Kumo be kaman nɛ fo semaŋ ma,

nɛ m ba malga n chɛ ma kɔnɔ.

Ŋko fo shin nɛ m malga,

nɛ fo ere e sa ma atuwebi.

²³Jande, ŋini ma alubi nɛ n wora,

nɛ m pin amo kikɛ.

²⁴Manɛ nna nɛ fee ŋana ma so

nsaa ta ma fanɛ fo doŋ?

²⁵Kashenteŋto, kebaa funti esa nɛ e maŋ wɔ egbɛ

fanɛ kefantaŋ nɛ afu kɔ a yɔ na e naa par fo a?

²⁶Asheŋ lubi nɛ e maaŋ daga kuraa na,

hale amo nɛ n wora ma kebia to kikɛ

nɛ fo ta a deŋi ma so.

²⁷Fo lara kenishi n yuu ma,

a keni kusɔ kama nɛ mee wora;

hale a karga aya nɛ mee tia kikɛ.

K du nna fanɛ fo ka ta ŋgbɛlɛbi n chɛ ma aya nna.

²⁸Ma eyur baa bɛlge nna ayiyanto

fanɛ kechɛbi nɛ e kaŋkaŋ muu na.”

¹“Dimɛdi be nchɛ maŋ shi durnya to,

amo alɛ nɛ etɔrɔ damta nna.

²Dimɛdi du fanɛ ketoto ŋko kenyɔlɔ nna,

k maa chɛr nɛ k bolo ŋko n wɔl n choŋ.

³Amoso nɛ mee bishi fo, Ebɔrɛ,

fanɛ manɛ nna nɛ fo lara kenishi n yuu ma loŋ

a fin keji ma demu?

⁴Dimɛdi kikɛ maŋ wɔtɔ nɛ kulubi

maŋ wɔ mo to.

⁵Anyi edimɛdi be saŋɛ maŋ shi durnya to,

Fo, Ebɔrɛ na, tea nyi nchɛ nɛ esa beeŋ ji durnya to.

⁶Manɛ nna nɛ fo maaŋ yige anyi

nɛ an gbagba e fin kagbenefuli n sa anyi be amu,

jemanɛ nɛ an wɔ kegben damta to ere?

⁷Kedibi nɛ b ku n lɛ gba kraa kɔ tama

fanɛ k beeŋ naŋ purge kachako.

⁸Kedibi beeŋ tiŋ n wu a yil,

⁹ama k baŋ nya nchu nɛ k naŋ purge afantaŋ popɔr kaseto.

¹⁰Ama anyi edimɛdi kɔr ndibi to,

an baŋ wu asheŋ loge.

¹¹An du fanɛ mbombi nɛ apaana nna,

amo to be nchu baaŋ feeto a bee wɔlto nna.

¹²Anyi edimɛdi malɛ baaŋ wu,

anyi maaŋ naŋ koso kikɛ,

hale nɛ durnya e fo ekar.

¹³Jande, Ebɔrɛ, ta ma ŋ ŋana

kasawule be kechimbi to.

Fo agbo kaŋ wushi

nɛ fo nyiŋi n sɔ ma n yige.

¹⁴Nɛ esa baŋ wu, e maaŋ naŋ tiŋ m ba ŋkpa to.

Amoso awurfoŋ nɛ mee ji ere kikɛ mee jo ma saŋɛ nna.

¹⁵Feeŋ tre ma, nɛ n shuli,

nɛ ma asheŋ a par fo, ma etopo.

¹⁶Kumo be kaman nɛ fo baa keni aya nɛ meeŋ baa tia,

ama fo maaŋ baa karga ma alubi a nase.

¹⁷Feeŋ ta ma alubi m paŋ ma nseŋ kplaŋ amo so.

Fo alɛ beeŋ kpra ma asheŋ lubi kikɛ n lɛ.

¹⁸Kananɛ abee bee buri so a tɔr

nɛ afalta bee bure to

¹⁹nɛ nchu bee fɔr ajembu so nsaa sulɔ eshishɛr a yɔ na,

aloŋ nɛ fee shin nɛ edimɛdi be tama bee mur!

²⁰Fo, e naa shin nɛ anyee bel a chɛrga anishiakpa;

kumo be kaman nɛ an wu n choŋ

nsaa maaŋ naa wɔtɔ hale mbaanaayɔ.

²¹Anyi maa chena a chɛr a wu anyi be mbia

ka nya kemaŋkura ŋko ka ji anishinyɔr ashi kebaawɔtɔ to.

²²Anyi maŋ naa nu ebesa kikɛ

n naŋ ti an gbagba peya so;

anyi alɛ maa shu esa kikɛ be keeli,

ama an gbagba peya.”

Kusɔ nɛ Ɛlifaz kaŋɛ be asheŋ

Ɛlifaz

¹Ndoŋ nna nɛ Job mo nekpa Ɛlifaz

nɛ e shi kade nɛ baa tre Teman na kaŋɛ le:

^2-3“Job, nɛ fo daa nyi asheŋ nna,

fo daa beeŋ yige mmalga fuloŋ

nɛ fee malga ere.

⁴Fo mmalga ere beeŋ tiŋ n shin nɛ

basa pɔtɛ e lar Ebɔrɛ kaman

nsaa maŋ naŋ yirda mo.

⁵Fo kɔnɔ to be mmalga e naa ŋini fo asheŋ lubi.

Kamalganyi nɛ fee ta a kuŋ fo kumu bre de.

⁶M maŋ wɔ nfe nna nɛ n ji fo demu;

fo gbagba be mmalga e naa ji a bri fo.

⁷Mannɛ fo e la dimɛdi juŋkparso durnya to.

Fo alɛ maŋ chɛr a chɔ abee nɛ Ebɔrɛ to na.

⁸Ebɔrɛ ka daa wora mbe ŋkre sososo na,

fo daa wɔ ndoŋ a?

Fo nawule e kɔ kanyiasheŋ a?

⁹Kusɔ ko wɔtɔ nɛ fo nyi kumo

nɛ anyi ere maŋ nyi kumo a?

¹⁰Basa nɛ b bel a chɔ fo tuto gba

kutɔ nɛ anyi ere koya kanyiasheŋ.

¹¹Ebɔrɛ gbagba e naa lolo fo na.

Kumo be loŋ maŋ kukwe fo a?

Anyi alɛ gba chɛ mo to m malga

kagbenewushi be mmalga n sa fo.

¹²Fo kagbene koso m baŋ so ga,

n shin nɛ fo ki esa ŋana so.

¹³Amoso nɛ fo nya agbo n wɔtɔ Ebɔrɛ

nsaa malga a gbiti mo na.

¹⁴Dimɛdi kikɛ maŋ wɔtɔ nɛ e maŋ wora kulubi

nsaa la esa niŋiso Ebɔrɛ be anishito.

¹⁵Nɛ Ebɔrɛ maaŋ tiŋ n yirda emalaika

nɛ baa shuŋ mo ebɔrɛso na gba,

¹⁶edimɛdi bre nɛ e beeŋ tiŋ n yirda a?

Alubi la fanɛ nchu nna n sa anyi edimɛdi

nɛ anyee nuu kapa nɛ kanyɛ.

¹⁷Job, kaŋ kusoe n nu kusɔ nɛ n nyi,

nseŋ koya kusɔ ko kumo to.

¹⁸Benyiashempo e ŋini ma kashenteŋ

nɛ b koya bumo nanaana kutɔ.

Bumo alɛ maŋ ta ashiri kikɛ ŋ ŋana.

¹⁹Bekama nɛ b nya le be kanyiasheŋ ere

malɛ gba e nya kasawule n chena so.

Efuli pɔtɛ so be basa ka bɔla kasawule na so a choŋ ndoŋ,

b maŋ tiŋ n lara bumo be nfɛra ashi Ebɔrɛ so.

²⁰Ama awurfoŋ wɔtɔ karechɛ kikɛ nna

n sa basa nɛ b wɔ alubi be kebaawɔtɔ to.

²¹Asheŋ nɛ e bee keta kufugboŋ na nawule

be asheŋ nɛ baa nu saŋkikɛ.

Jemanɛ nɛ asheŋ bee nite nɛnɛ a sa bumo na

nɛ beyu nɛ baa suge basa be asɔ na

bee baa kaa suge bumo be asɔ.

²²Bumo be kelamba kikɛ e la

tentembiri nɛ kepaŋ tama nɛ luwu.

²³Baaŋ baa kulti a fin ajibi fanɛ ejita,

bumo alɛ nsaa nyi fanɛ tentembiri

be kachɛ na taga to.

²⁴Kemurgboŋ, e du fanɛ ewura lempo ka bee shin nɛ e kɔ bumo kena,

a jo nɛ k mur bumo cheche.

^25-26Kusɔ nɛ k beeŋ ba basa nɛ b kini Ebɔrɛ

nseŋ lar Enyɛnpetale Ebɔrɛ kaman

n ta akɔsɔ a kɔ Ebɔrɛ nna na.

²⁷Loŋ be basa na beeŋ tiŋ a la

damawuraana nɛ b ji n daŋ,

²⁸ama baaŋ baa ka wɔ nde bureso

nɛ ekama shile ŋ ka to nna.

²⁹Bumo be mpetɛsɔ nɛ kedamaya kikɛ

beeŋ duga so loŋ hale m ba loge

ŋ ka bumo gba kuraa.

³⁰B maaŋ tiŋ ŋ gelge tentembiri kikɛ.

Ebɔrɛ be agbo nɛ k bee suse wuloŋwuloŋ

fanɛ edɛ na beeŋ mur bumo cheche.

³¹Nɛ b paŋ nfɛra nseŋ ta bumo

be yirda n wɔtɔ asheŋ lubi to bre,

kumo ere asheŋ lubi be kakɔka nɛ baaŋ nya.

³²Pɔɛŋ nɛ bumo be kakɔka be saŋɛ na a fo,

bumo be kebaawɔtɔ beeŋ ki fanɛ

kedibi nɛ k bolo a shin nɛ kewu nna.

³³Bumo alɛ beeŋ naŋ ki fanɛ kedibi be ayabi

nɛ amo be asɔrso maŋ bel nseŋ chuge n tɔr,

ŋko kedibi sɔrso nɛ kumo be atoto gbaŋgbaŋ n wurge.

³⁴Kashenteŋto, edɛ e naŋ ji bɔrɛkinipoana

nɛ kejimuniwuraana be nwu nɛ bumo be kaman to ebi m mur.

³⁵Ŋkpal manɛ so, b la basa nɛ baa kre asheŋ lubi

nsaa wora amo nna.

Efɛ nɛ kafule malɛ e bɔlɔ bumo be ŋgbene to.”

Job ka tuge Ɛlifaz be kamalga na to be asheŋ

Job

¹Ndoŋ nna nɛ Job tuge Ɛlifaz to ŋ kaŋɛ le:

²“N daŋ kenu le be mmalga ere ŋ ku so,

amo alɛ maa wushi ma kagbene kikɛ.

³Amoso lo fo kɔnɔ nsaa maŋ naŋ kaŋɛ shɛŋ.

Manɛ e kɔ fo nɛ fee sha kamɔrɔji loŋ bre?

⁴Nɛ fanɛ fo e daa wɔ kebaawɔtɔ nɛ n wɔ kumo to ere,

nɛ ma alɛ wɔ kumo nɛ fo wɔtɔ to ere,

ma alɛ gba daa beeŋ tiŋ a malga kananɛ fee malga ere.

N daa beeŋ tiŋ n nya kusɔ ko m malga ŋ gbiti fo

nseŋ keni fo n fifi kumu fanɛ kananɛ fee wora ere.

⁵Ama ma ere daa beeŋ malga nna n leŋ fo to

nseŋ lolo fo n wushi fo kagbene.

⁶Nɛ fanɛ m malga ŋko m maŋ malga gba,

awurfoŋ to nɛ ŋ kraa wɔ a ji ebesa na.

⁷O Ebɔrɛ, fo bar ma kaseto

nseŋ mur ma laŋ to ebi kikɛ kuraa.

⁸Fo shin nɛ n nyɔr ŋ ki fanɛ awibi nawule,

nɛ basa bee wu ma nsaa kaŋɛ fanɛ

ma alubi so nɛ ŋ ki loŋ.

⁹Ebɔrɛ nya agbo nna a kɔrfɛ ma kenishipereso,

nseŋ ta anishi n yuu ma so a we anyii to yurkishi so.

¹⁰Basa bee gbɛlɛ ma nna nsaa mɛr nnɔ a ŋini ma.

Baa gama nna a kpa ma anishito

etaŋ nsaa wora ma eyurto.

¹¹Ebɔrɛ malɛ e ta ma m bɔɔ basa lubi enɔ,

nɛ jimaŋ nɛ k maa wu kuwɔr ere nya ma e wora loŋ.

¹²Kusɔ kama daa nite nɛnɛ ma kebaawɔtɔ to nna

pɔɛŋ nɛ Ebɔrɛ to m pɛ ma ebɔl to m buri ma to n lɛ.

Ebɔrɛ lara ma n yili fanɛ kusɔ nɛ e beeŋ

¹³ta mbe atanyembi n yuu so n to nna.

Mo alɛ maŋ wu ma kuwɔr nseŋ futi ma epun

n lara ma apuntosɔ n lɛ kasawule.

¹⁴E baa doro ma ale anyɔ nyɔ nna.

E ba ma so fanɛ enapo nɛ

e nya agbo yurkishi so nna.

¹⁵Amoso nɛ n ta bɔtɛ m ba piŋi m buu

nseŋ chena eshishɛrpumpuŋ to a shu

fanɛ ŋ ka bee shu keeli na.

¹⁶N shu nna nɛ ma anishi m pere,

hale puŋi m buu so

nɛ m maŋ naa wu nɛnɛ.

¹⁷Ama ma alɛ maŋ diewu n wora kulubi ko.

Kebɔrkɔnshi kikɛ maŋ wɔ ma kabɔrɛkule to.

¹⁸Nɛ fanɛ n wu gba, mee kule kasawule nna

fanɛ k sa maŋ shin nɛ kushu nɛ mee shu

a fin kashenteŋ ere e ŋana basa so kikɛ.

¹⁹Naniere gba, Ebɔrɛ nɛ e wɔ ebɔrɛso na

e la ma shɛdajipo nɛ ma ekumpo.

²⁰N nekpaana bre kini ma nna n lɛ,

ama Ebɔrɛ nɛ mee shu a ŋini.

²¹Kananɛ esa bee kule Ebɔrɛ a sa mo nekpa na

nɛ mee fin esa nɛ e beeŋ kule Ebɔrɛ n sa ma.

²²Ŋkpal manɛ so, m maaŋ naŋ ji nfɛ damta

nseŋ wu n yɔ a maaŋ naŋ bɛta m ba.”

Job ka fubel ŋ ŋini Ebɔrɛ be asheŋ

¹Ma tama loge nɛ ma jemanɛ malɛ fo n loge,

nɛ ma nchaŋ malɛ kur a dese a jo ma.

²Kusɔ nɛ mee wu kikɛ e la jimaŋ nɛ b diewu

a wora ma eyurto kenishipereso.

³Nɛ fo, Enyɛnpe Ebɔrɛ na maŋ chɛ ma to,

wanɛ e naŋ ka kukɔ na n sɔ ma n yige?

⁴Ŋkpal fo so, n nekpaana kini kenu

kusɔ nɛ mee kaŋɛ na.

Amoso a daga fo shin nɛ b pin

fanɛ b maŋ wora n nyalɛ.

⁵B ji m bri ma nna ŋkpal kusɔ nɛ baaŋ nya so,

amoso shin nɛ bumo be mbia be anishi e biri bumo.

⁶Fo, Ebɔrɛ na so nɛ basa nya ma a tege

nsaa tu echɔl a wɔtɔ ma anishito na.

⁷A ka gbrɛ nɛ n tan,

ŋkpal kushu nɛ kagbenejija damta so.

Ma eyur ere malɛ maŋ naa du

kananɛ k daa du na.

⁸Basa nɛ b la basa lela kashenteŋto baŋ wu ma

bumo be nnɔ bee mɔ bumo nna

nɛ baa nya agbo a wɔtɔ n nekpaana

nɛ b maa sa Ebɔrɛ bunyaŋ ere.

⁹Basa niŋiso beeŋ baa wora kusɔ nɛ k daga,

ŋkpal loŋ so baaŋ baa nya eleŋ a ti so.

¹⁰Ama n nekpaana ere to be ekama

maŋ kɔ kanyiasheŋ kikɛ mo to.

¹¹Ma nchɛ bee ba ekar nna na,

ma ŋkre kikɛ jija.

Ma alɛ be tama kikɛ loge.

¹²Ama kusɔ nɛ n nekpaana na beeŋ tiŋ n wora

e la kebaasa ma tama fuloŋ; b maa ji kashenteŋ.

¹³Ma tama kikɛ e la keyɔ bubuni to,

kakpa nɛ meeŋ ya dese tentembiri to.

¹⁴Kumo be kaman nɛ n ta nchaŋ n tre n tuto,

nseŋ ta ashushombi nɛ e beeŋ ji ma na

n tre n nio nɛ n sipocheana.

¹⁵Nɛ loŋ nna, ma tama wɔ nnɛ?

Wanɛ e naŋ tiŋ n wu kumo?

¹⁶Tama maaŋ tu ma n yɔ luwu to,

kumo alɛ maaŋ tu ma n yɔ bubuni to.

Bildad be kamalga nyɔsopo be asheŋ

Bildad

¹Ndoŋ nna nɛ Job mo nekpa Bildad nɛ e shi

Shuuwa be kasawule so na naŋ kaŋɛ le:

²“Job, saŋɛ mo nɛ feeŋ yige fo mmalga ere bre?

Baa kɔ nfɛra nseŋ shin nɛ anyi ere e malga.

³Fee fɛ nna fanɛ asɔbɔya nɛ a maŋ kɔ nfɛra

e la anyi, ŋko nuso?

⁴Fo nya agbo nna a doro fo kumu kenyanyaŋɛso na.

Fo kanya agbo na maaŋ tiŋ ŋ gbuŋgbuŋ durnya.

Ebɔrɛ malɛ maaŋ kpal fo so m pulgi abee.

^5-6Basa lubi be efitila maa chɛr nsaa duŋ

a ka bumo tentembiri to ashi bumo

be elaŋana to.

⁷Bumo be aya daa kɔ eleŋ nna ga,

ama naniere e ki aya pɔso.

Bumo gbagba be asheŋ woraso

e shin nɛ b fiti n tɔr.

⁸Baa nite nna n ya kaa luri ashewu to

nɛ e bee pɛ bumo be aya.

⁹Bumo alɛ naa nite nna n ya kaa chichi ajigbelɛ so

nɛ e bee pɛ bumo be anakuŋ to kpakpa.

¹⁰Ajigbelɛ bee ŋana a dese kasawule to nna,

nɛ ajigbelɛ pul bumo be ekpaana to a jo bumo.

¹¹Kenishipere nɛ k bee keta kufu

bɛ bumo so kaba kama so nna.

¹²B daŋ dii kedama nna,

ama naniere akoŋ e naa mɔ bumo.

Jɛrbi yil nna a jo bumo kaba kama so.

¹³Kumo be kaman nɛ luwu gbagba

e ba ji bumo m mur kuraa.

¹⁴Baa gberge basa lubi na nna a lar

bumo be elaŋana to nɛ b ya

wu eluwu bumbuŋ nɛ e bee keta kufu.

¹⁵Kumo be kaman nɛ bumo be elaŋana

nɛ asɔ kikɛ e chɔɔ m mur ŋ ki nsunɔ.

¹⁶Kumo be kaman nɛ b ki fanɛ ndibi

nɛ amo be nliŋi nɛ ayabi kikɛ wu.

¹⁷Bumo ere choŋ nɛ ekama teŋ bumo so nna na.

¹⁸B lar basa keniso be kasawule so nna na,

nɛ k wora fanɛ b ka lar kefulto to

n ya luri tentembiri to na.

¹⁹Bumo ere maaŋ naa kɔ mbia ŋko kaman to ebi

nɛ esa beeŋ keni bumo so n nyiŋi bumo.

²⁰Yili epeŋilarkpa n ya fo epeŋitɔrkpa

esa kama nɛ e nu bumo be asheŋ,

kufugboŋ beeŋ tɔr amodoŋwura so

nɛ e baa chicha.

²¹Kelamba nɛ k jo basa lubi

nɛ bumo be nnaŋ to ebi

nɛ b maŋ nyi Ebɔrɛ nna na.”

Job ka tuge Bildad be kamalga na to be asheŋ

Job

¹Ndoŋ nna nɛ Job kaŋɛ mo nekpa Bildad le:

²“Manɛ nna nɛ fee kɔrfɛ ma nɛ fo mmalga ere bre?

³Ale kudu nna na fo kaa bee malga a gbiti ma.

Nyɔmɔ maŋ kɔ fo a?

⁴Hale nɛ n wora kulubi gba,

k nya fo nnɛ?

⁵Fo alelasheŋ so nɛ fee puchi,

a fɛ fanɛ n wora n jija na so

nɛ mee ji awurfoŋ.

⁶Ama Ebɔrɛ e maŋ wora n nyalɛ

ŋkpal e kaa bee wu ma kulubi so.

⁷Ŋ ka shu ŋ kaŋɛ fanɛ e wora n da ma so,

m maŋ nya esa nɛ e tuge ma.

Ŋ ka shu n fin kechɛto,

esa kikɛ maŋ ji ma asheŋ n sa ma.

⁸Ebɔrɛ kuŋ ekpa nna nɛ m maaŋ tiŋ n choŋ,

mo alɛ shin nɛ ma ekpa ki tentembiri n sa ma nna.

⁹E shin nɛ m paŋ ma mpetɛsɔ

nɛ bunyaŋ nɛ ketre lela kikɛ.

¹⁰Ebɔrɛ baŋ mur ma kikɛ nna

nɛ m maŋ naa kɔ tama kikɛ kuraa.

¹¹Mbe agbo koso ma so alegaiso nna,

nɛ e bee wora ma fanɛ mo doŋ gbagba na.

¹²K wora fanɛ e ka shuŋi mbe

benapo kikɛ fanɛ b ba kɔ ma nna,

nɛ b kre m ba kulti ma laŋ n wɔtɔ.

¹³Ebɔrɛ shin nɛ ŋ gbagba be kanaŋ kini ma n lɛ.

Ŋ ki efɔ basa nɛ b nyi ma kutɔ nna.

¹⁴Ŋ kurgepoana shile ŋ ka ma,

nɛ n nekpaana teŋ ma so.

¹⁵Basa nɛ n daŋ keta kefɔ ma laŋ to teŋ ma so,

nɛ ma laŋ to be beshumpo kikɛ bee wora ma fanɛ efɔ na.

¹⁶M baŋ tre ma nyɛrbi gba,

baa kini keba nna.

¹⁷M baŋ fute m buu ma eche gba

e bee shile a ka ma nna.

N niopibi nyɛnsoana gbagba maa

sha kebaamata ma.

¹⁸Mbiwurbi gba maa sha kebaamata ma,

nɛ m baŋ taga bumo to baa mushe ma nna

nsaa shile.

¹⁹M baa dufɛ nteri kpakpasoana be mmuna so nna,

nɛ basa nɛ mee sha ga malɛ kilgi a kɔ ma.

²⁰N foe eyur to nna ŋ ki fanɛ awibi nawule.

Gbrɛ a ka nɛ n wu.

²¹N teriana, men baa shu ma so.

Ŋkpal manɛ so, Ebɔrɛ e ber ma n nase na.

²²Manɛ e baa nɛ menyi alɛ gba naa kɔrfɛ ma

fanɛ kananɛ Ebɔrɛ bee kɔrfɛ ma na?

Awurfoŋ nɛ mee ji ere maŋ kukwe loŋ a?

²³B daŋ sibɛ ma mmalga ere n nase kawɔl to

k daa beeŋ par ma ga.

²⁴B daŋ chaŋ amo n deŋi kefalta so nna,

a beeŋ baa dese mbaanaayɔ.

²⁵N nyi ma emɔlgapo Ebɔrɛ na ka wɔ ebɔrɛso,

nɛ asheŋ ere kikɛ be lalaloge

e beeŋ gbelge m ba durnya to m ba mɔlga ma.

²⁶Hale pɔɛŋ nɛ ma eyur ere e mur gba,

ŋ gbagba beeŋ wu Ebɔrɛ kenishiso.

²⁷Kashenteŋto, ŋ gbagba e naŋ wu mo,

ma alɛ bee keni loŋ be kachɛ na ekpa nna.

²⁸N teriana, menyi ere bee fɛ ekpa

nɛ menyeeŋ bɔla so n wu ma kulubi nseŋ mɛaŋ ma nna,

a kaŋɛ fanɛ ma e ta ma kumu n wɔtɔ asheŋ to.

²⁹Ama men baa de demuji nɛ k bee ba menyi so

jemanɛ nɛ Ebɔrɛ beeŋ gberge menyi kusoe na so.”

Zofa ka naŋ malga be asheŋ

Zofa

¹Ndoŋ nna nɛ Job mo nekpa Zofa nɛ e shi

Naama be kasawule so na kaŋɛ le:

²“Job, fo mmalga bee chɔ ma kagbene to pasaa;

a daga ŋ ka nya kusɔ ko ŋ kaŋɛ fo naniere.

³Kusɔ nɛ fo malga na la katege nna,

ama ma alɛ gba nyi kusɔ nɛ meeŋ kaŋɛ fo.

⁴Kashenteŋto fo alɛ gba baa nyi fanɛ dra na kikɛ,

yili jemanɛ nɛ Ebɔrɛ to dimɛdi n wɔtɔ durnya to na

⁵basa lubi be kagbenefuli maa chɛr.

⁶Baaŋ tiŋ n nya eyilikpagboŋ n ji eleŋ ga,

nɛ k wora fanɛ b kaa bee chute awɔlpa na,

⁷ama bumo alɛ beeŋ choŋ fanɛ afu ka ta kalabɛr na;

nɛ basa nɛ b daa nyi bumo na e baa bishi abar fanɛ,

nnɛ nɛ b yɔ?

⁸Basa beeŋ teŋ bumo so fanɛ

kananɛ baa teŋ edareana so na.

⁹Basa lubi beeŋ foe basa be anishi so ashi mboŋ

nɛ b daa wɔ na nɛ bumo be basa gbagba

a fin bumo ŋ gben.

¹⁰Bumo be mbia e naŋ ba ka

asɔ nɛ bumo kurgepoana suge

betirpo kutɔ na be akɔ n sa bumo.

¹¹Basa lubi bee wu a yɔ nchaŋ to nna

nɛ b kraa la mbifɔlbi.

^12-13Alubi bee wora basa lubi ebel nna ga

nɛ baa ji amo a nu

amo be ebel fanɛ ajibi na.

¹⁴Ama alubi nɛ b min fanɛ ajibi na

beeŋ ki kekera bumo be nnɔ to nɛ kɔrtɔ bumo be epunana to.

¹⁵Ndoŋ nna nɛ Ebɔrɛ e shin nɛ b paŋ

asɔ nɛ b suge beko kutɔ na kikɛ.

¹⁶Baaŋ wu nɛ k wora fanɛ

awɔ lubi ka duŋ bumo m mɔ na.

¹⁷B maaŋ naŋ nya ekpa n ji asɔ lela nɛ e beeŋ chase;

fanɛ ɔlif be ŋku nɛ kenyipochu nɛ mushoŋchu nɛ

a sɔ kaplɛkama a shile fanɛ lɔr na.

^18-19Ŋkpal b ka puni betirpo n suge bumo be nwu so,

bumo be kegben beeŋ to jiga nɛ b maaŋ ji amo be tɔnɔ.

²⁰Kejimuni so, b maa nya asɔ, nɛ a bee kukwe bumo.

²¹Jemanɛ nɛ shɛŋ maaŋ naa wɔtɔ

nɛ b gbare n sa bumo be amu na,

nɛ bumo be kanyɛ kikɛ beeŋ mur.

²²Saŋɛ nɛ b nya kusɔ kikɛ nɛ eyur wushi bumo na

nɛ baaŋ paŋ kusɔ kikɛ nɛ kayurnyaŋ

nɛ awurfoŋ gboŋgboŋi e ba bumo so.

²³Jemanɛ nɛ b ji m bɔlɔ epunana na,

nɛ Ebɔrɛ beeŋ shin nɛ mbe agbo

nɛ k bee suse fanɛ edɛ na e ba bumo so.

²⁴Jemanɛ nɛ baaŋ baa shile abɛlso akpa na,

nɛ danyaŋ be atanyembi beeŋ da bumo m mɔ.

²⁵B baŋ gberge atanyembi na m pee,

amo be nnɔso beeŋ baa chise ŋklaŋ a do

nɛ kufugboŋ e luri m bɔlɔ bumo be ŋgbene to.

²⁶Asɔ kama nɛ b gbare n yili na beeŋ mur.

Ebɔrɛ beeŋ shin nɛ edɛ wuloŋ wuloŋ

e ba chɔɔ bumo nɛ bumo be asɔ kikɛ m mur

ashi bumo be elaŋ to.

²⁷Esoso nɛ kasawule kikɛ beeŋ ji shɛda

ŋ gbiti bumo be asheŋ lubi nɛ b wora na.

²⁸Ebɔrɛ be agbo beeŋ ki fanɛ nchugboŋ

m ba sulɔ bumo be asɔ kikɛ n yɔ.

²⁹Kusɔ nɛ Ebɔrɛ kre n yili n sa

kumukpakpaso wuraana nna na.”

Job ka tuge Zofa be kamalga to be asheŋ

Job

¹Ndoŋ nna nɛ Job kaŋɛ:

²“Nɛ fanɛ fee sha kemalga n wushi ma kagbene nna,

kumo ere nu ma kamalga ere.

³Ŋ kaŋ malga n loge,

feeŋ naŋ tiŋ n fara a wora

ma eyur to.

⁴M maa bile asheŋ a gbiti dimɛdi ko nna,

Ebɔrɛ nɛ mee bile asheŋ a gbiti.

Amoso nɛ maa wora kanyiti na.

⁵Keni kananɛ ŋ ki.

Ma asheŋ maa chinchiŋ fo

nsaa mɔ fo kɔnɔ a?

⁶Nɛ ŋ gbagba baa fɛ kusɔ nɛ k tu ma ere be nfɛra,

k bee ta kufu nna a pɛ ma nɛ m baa chicha.

⁷Manɛ nna nɛ Ebɔrɛ bee sa basa lubi ekpa

nɛ baa chena chɛr ga nɛ asheŋ

bee nite nɛnɛ a sa bumo?

⁸Manɛ nna nɛ bumo be mbia nɛ bumo nanabiana

bee daŋ a tu bumo nɛ b kraa wɔ ŋkpa to?

⁹Shɛŋ maŋ tir bumo ashi bumo be elaŋana to,

Ebɔrɛ malɛ maa kaa gberge bumo kusoe.

¹⁰Bumo be ana bee kurge nna ga,

anabi na malɛ be ekoŋwule gba maa wu.

¹¹Bumo be mbia bee pɛl nna nɛ esa maa keni bumo so,

shɛŋ malɛ maa wora bumo.

¹²Baa ta echakachaka nɛ ejaŋjilaŋ

nɛ nlopi a boŋ nshɛ a ji eyur nna.

¹³Kebaawɔtɔ malɛ bee nite nɛnɛ nna a sa bumo,

shɛŋ maa tɔrɔ bumo be nfɛra hale n ya fo

kachɛ nɛ baaŋ wu.

¹⁴Ama le nɛ basa lubi na bee kaŋɛ

Enyɛnpetale Ebɔrɛ na: ‘Yige anyi!

Anyi maa sha kepin fo aparsheŋ.

¹⁵Anyi maa nya tɔnɔ kikɛ ashi

kebaakule nɛ kebaabunyaŋ fo to.

¹⁶Anyi gbagba be eleŋ so

nɛ asheŋ bee nite nɛnɛ a sa anyi.’

Amoso nɛ ma, Job bre lara ma kumu ashi

loŋ be basa, nɛ bumo be ŋkre lubiana to na.

¹⁷Ale afanɛ nɛ Ebɔrɛ daŋ nya agbo

ŋ gberge alubiworapoana kusoe

n shin nɛ b ji jɛrbi?

¹⁸Ale afanɛ nɛ e daŋ farnyaŋ bumo to

fanɛ kananɛ afugboŋ bee kpeta amimi a lɛ na?

¹⁹Menyi kaa kaŋɛ le: ‘Ebɔrɛ beeŋ gberge

alubiworapoana be mbia kusoe ŋkpal

bumo kurgepoana be asheŋ lubi so.’

Ama le nɛ ma ere kaŋɛ: ‘Ebɔrɛ e gberge

alubiworapoana na gbagba kusoe nɛ b pin

fanɛ bumo gbagba be alubi so nɛ e wora loŋ.’

²⁰Shin nɛ Enyɛnpetale Ebɔrɛ na be agbogboŋ na

e ba alubiworapoana gbagba so nɛ b mur cheche.

²¹Ŋkpal manɛ so, bumo be luwu be kaman

kusɔ kama nɛ k beeŋ wora bumo be mbia

be asheŋ maaŋ naa tir bumo.

²²Wanɛ e naŋ tiŋ ŋ kaŋɛ Ebɔrɛ

kusɔ nɛ e beeŋ wora?

Mo e naa ji basa nɛ b yil eyilikpagboŋ demu.

^23-24Anyi be beko bee dii kedama nna

nsaa wɔ alenfia to pɔɛŋ nsaa wu.

²⁵Beko bre ketir nɛ ebesa to nɛ baa wu.

²⁶Ama luwu koŋwule nɛ an kikɛ bee wu

nɛ baa puli anyi nɛ ashushombi bee ji anyi.

²⁷N nekpaana, n nyi fanɛ menyee

kre ma ŋkre lubi nna.

²⁸Menyee bishi fanɛ: ‘Basa gboŋ nɛ baa

wora alubi na be elaŋana nɛ b daa wɔ

amo to na naa wɔ nnɛ naniere?’

²⁹Basa kama nɛ b taga to

ŋko nɛ b wɔ kufɔ kikɛ shuli so

³⁰fanɛ Ebɔrɛ baŋ nya agbo,

basa nɛ baa wora asheŋ lubi

maa ji jɛrbi.

³¹Esa kikɛ maa kaŋɛ bumo alubi nɛ b wora,

ŋko a gberge bumo kusoe ŋkpal amo so.

³²Kumo be kaman, baa kpaŋ bumo

ashi bumo be nlibuna nna.

³³Kasawule gba bee sɔ bumo nɛnɛ nna,

nɛ basa damta damta bee shu bumo be nli.

³⁴Ama mmalga fuloŋ nɛ a maŋ kɔ kifi to

nɛ men kɔ a lolo ma ere na.

Kusɔ kama nɛ menyee kaŋɛ na la efɛ nna.”

Ɛlifaz be kamalga sasopo be asheŋ

Ɛlifaz

¹Ndoŋ nna nɛ Job mo nekpa Ɛlifaz nɛ e shi

Tɛman be kade to na naŋ kaŋɛ:

²“Manɛ be tɔnɔ nɛ edimɛdi kɔ n sa Ebɔrɛ?

Hale edimɛdi to be benyiashempo gba

maŋ kɔ tɔnɔ n sa mo.

³Nɛ fanɛ fo, Job, maŋ naŋ wora

kulubi ŋ ku so gba,

kumo be loŋ kraa maŋ kɔ tɔnɔ

n sa Enyɛnpetale Ebɔrɛ na bre.

⁴Mannɛ fo ka bee ŋana Ebɔrɛ nsaa shuŋ mo so

nɛ e bee kpele fo kusoe a ŋini fo ekpa na.

⁵Ayai! Mannɛ a loŋ so nna.

Fo asheŋ lubi so nɛ e bee wora loŋ.

⁶Fo shin nɛ fo niopibi ka fo kekɔ nɛ e ji fo,

mbe asɔbuuso nɛ fo sɔ nɛ e maŋ naa kɔ shɛŋ a buu.

⁷Fo alɛ kini kesa basa nɛ akoŋ nɛ achukoŋ kɔ

ajibi nɛ nchu nɛ b ji nseŋ nuu.

⁸Fo yuku nɛ eyilikpa nɛ fo ta

n sɔ kasawule ere kikɛ m pugi so.

⁹Fo kini kechɛ bekulpoche to,

nseŋ kɔrfɛ amunibi n suge bumo be asɔ n ti so.

¹⁰Amoso nɛ kufugboŋ ki fanɛ

ajigbelɛ ŋ kulti fo n wɔtɔ

¹¹nɛ k wora fanɛ kaplɛkama ka biri to nɛ fo maa wu,

nɛ nchu bɔlɔ ŋ kulti fo n wɔtɔ na.

¹²Ebɔrɛ wɔ ebɔrɛso nɛ k wɔ awɔlto

a chɔ achɛkpabi nɛ a wɔ esoso ga nna,

nsaa wu kusɔ kama.

¹³Fo tama fanɛ tentembiri plɔ beeŋ tiŋ

n ta fo ŋ ŋana Ebɔrɛ so a?

¹⁴Awɔlpa nɛ a biri to maaŋ tiŋ m buu

mbe anishi so nɛ e sa maa wu,

saŋɛ nɛ e bee nite a kulti awɔlto ndoŋ na.

^15-16Men yige adrasheŋ fuloŋ nɛ alubiworapoana

daŋ yirda nɛ nchu daŋ bɔlɔ m ba sulɔ bumo

n choŋ nɛ b maŋ nyi na be kebɛso.

¹⁷Alubiworapo na daŋ kini

Enyɛnpetale Ebɔrɛ na nna,

a fɛ fanɛ e maŋ tiŋ n wora bumo shɛŋ.

¹⁸Ama Ebɔrɛ malɛ daŋ shin nɛ

bumo be nnaŋ to ebi dii kedama nna.

Ma ere maa pin alubiworapoana ere

be kusɔ nɛ baa fɛ bumo be nfɛra to.

¹⁹Ebɔrɛ be basa be ŋgbene bee fuli

basa nɛ b kini Ebɔrɛ be kasogberge so nna

nɛ baa ji eyur kagbenefuliso a kaŋɛ le,

²⁰‘An doŋana maŋ naa wɔtɔ,

edɛ malɛ mur bumo be asɔ kikɛ.’

²¹To, Job, shin nɛ fo nɛ Ebɔrɛ e naŋ nyalɛ abar so

nɛ fo sa maŋ naa ta mo fanɛ fo doŋ.

Nɛ fo wora loŋ, e beeŋ nɛfa fo.

²²Sɔ keŋini kama nɛ e bee sa fo na,

nseŋ ta mbe mmalga n wɔtɔ fo kagbene to.

²³Nɛ fo baŋ bɛta m ba Ebɔrɛ kutɔ nseŋ lar alubi to,

asheŋ beeŋ nite nɛnɛ n sa fo.

²⁴Amoso lara fo shuwa lela na kikɛ n lɛ

eboŋ nɛ a wɔlto be ataŋɛ to

nseŋ wu amo fanɛ eshishɛr nɛ a maŋ kɔ tɔnɔ.

²⁵Kumo be kaman nɛ Enyɛnpetale Ebɔrɛ na

e ki fanɛ shuwa nɛ gbiti lela ga n sa fo.

²⁶Aloŋ nɛ feeŋ nya kagbenefuli

ashi kebaabunyaŋ mo to.

²⁷Ebɔrɛ beeŋ nu fo kabɔrɛkule,

nɛ fo alɛ e wora m bɔlɔ nnɔ naseso

nɛ fo nase n sa mo na so.

²⁸E beeŋ wora kusɔ kama nɛ fo kule mo,

nseŋ shin nɛ kefulto e ba fo ekpa so,

nɛ fo baa wora mbe aparsheŋ.

²⁹Nɛ beko tɔr kebaawɔtɔ to gba,

nɛ fo kule Ebɔrɛ n sa bumo

e beeŋ nu fo kekule nseŋ maŋ bumo so.

³⁰Hale basa nɛ b wora n jija gba

beeŋ nya ketampaŋ,

ŋkpal fo ka bee wora Ebɔrɛ kasonu so.”

Job ka tuge Ɛlifaz be kamalga na to be asheŋ

Job

¹Ndoŋ nna nɛ Job kaŋɛ mo nekpa Ɛlifaz le:

²“Hale nɛ kabre, ŋ kraa bile asheŋ kenishipereso nna,

ŋkpal Ebɔrɛ ka tɔrɔ ma ga

nseŋ shin nɛ n ji awurfoŋ so.

³Nɛ fanɛ n daa nyi kakpa nɛ Ebɔrɛ wɔ

nɛ kananɛ meeŋ wora n yɔ ndoŋ nna,

n daa beeŋ yɔ mo kutɔ

⁴n ya tu mo n ji asheŋ,

nseŋ ji mo emɔrɔ kenishipereso.

⁵Aloŋ nɛ meeŋ pin kusɔ

nɛ e kɔ nɛ e kaŋɛ ma.

⁶Ebɔrɛ maaŋ kpal mbe eleŋgboŋ so

ŋ kini kenu ma kamalga.

⁷Ŋkpal manɛ so, m maŋ wora kulubi kikɛ,

mo alɛ beeŋ kaŋɛ fanɛ,

kulubi kikɛ maŋ bɛ ma,

nɛ n nya ma kumu n ji.

⁸Ama ŋ keni epeŋilarkpa,

nɛ Ebɔrɛ maŋ wɔ ndoŋ.

Nɛ n naŋ keni epeŋitɔrkpa,

ŋ kraa maŋ wu mo ndoŋ gba.

⁹Ebɔrɛ bee shuŋ kelargato be esoso nɛ kaseto kikɛ,

ama ŋ kraa maa wu mo ndoŋana gba.

¹⁰Ama Ebɔrɛ bre nyi kusɔ kama nɛ mee wora,

mo alɛ baŋ wora ma ŋ keni, e beeŋ wu ma

fanɛ shuwa nɛ eyurpi maŋ wɔ kumo to.

¹¹M maŋ naŋ kini kebɛ mbe mbra kikɛ so,

ma alɛ maa lar mbe ekpaana so kikɛ.

¹²Kusɔ kama nɛ Ebɔrɛ yili, mee wora kumo nna.

Mbe aparsheŋ nɛ mee bɛ so, mannɛ meya.

¹³Ebɔrɛ maa chɛrga, esa kikɛ malɛ maaŋ tiŋ ŋ kɔ mo

ŋko ŋ kuŋ mo ekpa nɛ e sa maŋ wora mbe kepar.

¹⁴Kusɔ nɛ e kre a laŋɛ ma kaplɛa so

ashi mbe ŋkre damtaana to,

kumo nɛ e beeŋ wora ma.

¹⁵Amoso nɛ mbe asheŋ bee keta ma kufu ga na.

M baŋ fɛ ade kikɛ be asheŋ,

kufugboŋ bee pɛ ma nna nɛ m baa chicha.

¹⁶Ebɔrɛ shin nɛ ma kenyɛn lar ma to,

Enyɛnpetale Ebɔrɛ shin nɛ kufugboŋ pɛ ma.

¹⁷Ama ŋ kraa maaŋ lo ma kɔnɔ ŋkpal

tentembiri plɔ nɛ k buu ma anishi so ere so.”

¹Manɛ nna nɛ Ebɔrɛ maŋ yili demuji be kachɛ?

Manɛ nna nɛ basa nɛ b nyi mo maŋ nyi loŋ be kachɛ na?

²Alubiworapoana tia bumo nɛ bumo braana be nsawule

be egbaŋto be ajembu dulgiso nseŋ nya nsawule damta.

Bumo alɛ naŋ yuri beko be mbolpɔ n ti bumo peya so.

³Baa suge amunibi be ekurma

nsaa sɔ bekulpoche be ana a yili tarma nna.

⁴Baa kuŋ betirpo ekpa nna

nɛ b sa maa nya asɔ nɛ a la bumo peya.

Bumo alɛ naa nyaŋ bumo nna nɛ baa shile a ŋana.

⁵Ŋkpal loŋ so, betirpo bee nite keshishɛrsawule so

fanɛ kupuŋ to be ekurma nna a fin kusɔ jiso.

Kaplɛkama maŋ naa wɔtɔ nɛ b nya ajibi n sa bumo be mbia.

⁶Betirpo na bee yɔ adɔana nɛ e maŋ la

bumo peya to nna n ya kaa fin ayu nɛ baaŋ ji,

nsaa yɔ alubiworapoana be ndibi sɔrso be adɔana to

n ya kaa shishi asɔrso jiso a ji.

⁷Kanyɛso baa dese awo to nna nɛ b maŋ buu shɛŋ,

ŋkpal b ka maŋ nya ewajɛbuuso so.

⁸Bɔrɛgboŋ baa ba, abeelaŋ to nɛ baa shile

n ya kaa ŋana nɛ bɔrɛ na e sa maŋ bri bumo.

⁹Basa lubi bee suge mbia nɛ bumo tutoana wu nna

ashi bumo nioana kutɔ a ta bumo a ki anya

ŋkpal b ka maŋ tiŋ ŋ ka bumo be akɔ so.

¹⁰Kumo be kaman nɛ b nyaŋ mbia na nɛ b ta akoŋ a shuŋ

ayu be adɔana to nɛ b maŋ buu asɔ nɛ e beeŋ baa kuŋ bumo.

Ŋkpal manɛ so, b maŋ kɔ loŋ be asɔbuuso na nɛ b buu.

¹¹Mbia na e naŋ kɔr ɔlif be bibi to n wora ŋku

nseŋ nyaŋ greep be asɔrso malɛ to n wora yabra,

ama achukoŋ e naa mɔ bumo.

¹²Basa nɛ b doro nɛ bumo nɛ baa wu

ashi ndegboŋana be agbembiana so na

bee shu a fin kechɛto, ama Ebɔrɛ maa wora shɛŋ.

¹³Basa lubi ko kini Enyɛnpe Ebɔrɛ

nɛ e la Kefulto na nna.

B maa pin mo to ŋko a wɔ mbe ekpa to.

¹⁴Kakpa baŋ biri to, bemɔpo na bee koso nna

n ya kaa mɔ betirpo nɛ betentaŋasepo.

Kanyɛso saŋko malɛ nɛ b ya kaa yuri.

¹⁵Bumo nɛ baa ji kubojua na malɛ

bee jo kaboŋ e biri to nna nɛ b bela asɔ

m buu bumo be amu so saŋɛ na so ekama maaŋ pin bumo.

¹⁶Kanyɛso nɛ beyu bee bure a luri basa be elaŋ to,

ama kare baŋ chɛ nɛ b shile ŋ ŋana,

ŋkpal manɛ so, b maa sha kefulto be asheŋ.

¹⁷Kanyɛso nɛ baa sha a chɔ kapaso,

ŋkpal manɛ so, bumo nɛ kanyɛso be asɔ

nɛ e bee keta kufu na ji abar keteri nna.

¹⁸Alubiworapo na du fanɛ kepɔpɔ nɛ e deŋ

nchu so nɛ nchu na sulɔ amo a yɔ nna.

Amoso Ebɔrɛ be shoduu beeŋ ba bumo be adɔjibi

nɛ ndibi sɔrso be adɔana so nɛ a maŋ tiŋ n wora.

¹⁹Kananɛ kenyɔlɔ maa chɛr epeŋi so na,

aloŋ nɛ alubiworapoana gba maaŋ chɛr nseŋ wu n choŋ

nɛ b maaŋ naŋ wu bumo.

²⁰Bumo nioana gba maaŋ naŋ nyiŋi bumo,

ashushombi beeŋ ji bumo m mur fanɛ

kedibi ka bu n tɔr nɛ kaŋkaŋ muu kumo na.

²¹Ade kikɛ bee wora bumo nna ŋkpal b ka bee ji eleŋ

bekulpoche so nsaa maa wora begbentepo kelela so.

²²Ebɔrɛ be yuku na e naa mur basagboŋ na.

Hale nɛ k wora fanɛ asheŋ bee nite nɛnɛ a sa bumo gba,

asheŋ kraa beeŋ bri bumo nɛ b wora asheŋ ŋ gben.

²³Ebɔrɛ beeŋ tiŋ n shin nɛ b baa wɔtɔ

fanɛ shɛŋ ka maaŋ tiŋ n wora bumo na,

ama mo alɛ be anishi wɔ bumo so jemanɛ kikɛ nna.

²⁴Alubiworapoana beeŋ tiŋ n nyalɛ kabre,

ama k maaŋ chɛr ko nɛ bumo be asɔ na e mur cheche.

Baaŋ ba kaseto fanɛ b ka buse afitiri n lɛ na.

²⁵Esa ko beeŋ tiŋ ŋ kaŋɛ fanɛ

kusɔ nɛ ŋ kaŋɛ ere maaŋ la kashenteŋ a,

nseŋ fɛ fanɛ k maŋ kɔ kifi to a?

Bildad be kamalga sasopo be asheŋ

Bildad

¹Ndoŋ nna nɛ Job mo nekpa Bildad

nɛ e shi Shuuwa na naŋ kaŋɛ le:

²“Ebɔrɛ shi ga nseŋ daga keŋana,

ŋkpal manɛ so, mo e naa ji kuwura

ebɔrɛso, nɛ kusɔ kama bee nite nɛnɛ ndoŋ.

³Wanɛ e naŋ tiŋ ŋ karga emalaika

nɛ bekama nɛ baa shuŋ mo ebɔrɛso na?

Ebɔrɛ be kefulto bee nyaŋɛ kaplɛkama nna.

⁴Esa kikɛ maaŋ tiŋ ŋ kaŋɛ fanɛ mo ere

maŋ wora n jija Ebɔrɛ be anishito.

⁵Kufɔl nɛ achɛkpabi gba maa fulto parr

Ebɔrɛ bre be anishito.

⁶Nɛ nuso nɛ dimɛdi bomin,

nɛ e du fanɛ kushushombi,

bre du ga ashi Ebɔrɛ be anishito?”

Job ka tuge Bildad be kamalga na to be asheŋ

Job

¹Ndoŋ nna nɛ Job malɛ kaŋɛ mo nekpa Bildad le:

²“Fo la echɛtopo nna n sa ma,

etirpo nɛ esa pɔso fanɛ ma le!

³Keni kasotojigboŋ nɛ fo ta n sa

esa nɛ asheŋ tir ga fanɛ ma le!

⁴Wanɛ e chɛ fo to nɛ fo tiŋ m malga nɛnɛ le ere?

Bildad

⁵Basa nɛ b wu be ayoyu wɔ bubuni to

tekugboŋ be kaseto nna a chicha kenishipereso.

⁶Kusɔ kama nɛ k wɔ bubuni to ŋko nɛ k mur

maŋ ŋana Ebɔrɛ bre so.

⁷Ebɔrɛ e parga awɔlpa nɛ k wɔ kelargato be esoso na to,

nseŋ shin nɛ durnya shaso nɛ shɛŋ maŋ kɔ kumo to.

⁸Mo e shin nɛ nchu wɔ bɔrɛwɔlpa to,

ama amo malɛ maa tɔr to ŋkpal amo be egbɛ so.

⁹Mo koŋwule na e naa shin nɛ bɔrɛwɔlpa

bee buu kufɔl lelemu so nɛ esa maa wu kumo na.

¹⁰Ebɔrɛ e chaŋ kefulto nɛ tentembiri

be gbaŋfɔl n deŋi teku so.

¹¹Mo e naa ponte to nɛ awɔlpa

be eshabɔrɛ bee gbuŋgbuŋ to na.

¹²Ebɔrɛ be eleŋgboŋ nɛ e ta m pulgi teku to,

nseŋ bɔla mbe kanyiasheŋ so ŋ ku teku to be

kusɔbɔya lubi gboŋgboŋi nɛ baa tre Reehab na to.

¹³Mo e fute n shin nɛ esoso fulto,

nɛ e ta mbe enɔana m mɔ

kusɔkpaŋ nɛ k bee gbeye na.

¹⁴Ade bre la Ebɔrɛ be eleŋgboŋ na be ashuŋ wurbi nna na.

To, wanɛ e naŋ tiŋ m pin kananɛ Ebɔrɛ be keshi gbagba du?”

Job

¹Kede be kaman nɛ Job kraŋ naŋ kaŋɛ:

²“Ma kenishi pere nna ŋkpal

Enyɛnpetale Ebɔrɛ ka kini

kewora kusɔ nɛ k daga nseŋ shin nɛ

kebaawɔtɔ ki kekera n sa ma so.

³Ŋ ka baa wɔ ŋkpa to nseŋ kraa

kɔ efute nɛ Ebɔrɛ sa ma ere,

⁴ma kɔnɔ maaŋ tuge kamalga lubi kikɛ.

Ma kudonduloŋ malɛ maaŋ ku efɛ kikɛ.

⁵M maaŋ shuli fanɛ kusɔ nɛ men kaŋɛ na bɔla ekpa

hale n ya fo kachɛ nɛ meeŋ wu.

⁶Ŋkpal manɛ so, karechɛ kikɛ ma nfɛra

bee wora ma nna fanɛ m maŋ wora kulubi.

⁷Mee kule Ebɔrɛ nna nɛ n doŋana

e ji awurfoŋ ga fanɛ kumu kpakpasowuraana!

⁸Jemanɛ nɛ Ebɔrɛ beeŋ sɔ basa

nɛ b kini mo na be ŋkpa na,

tama kikɛ maaŋ naa wɔtɔ n sa bumo.

⁹Tɔrɔ be jemanɛ baŋ ba,

Ebɔrɛ maaŋ nu bumo be kekule.

¹⁰Kusɔ nɛ Ebɔrɛ beeŋ wora bumo nna.

Ŋkpal manɛ so, b maa sha Ebɔrɛ ŋko kabɔrɛkule.

¹¹Meeŋ ŋini menyi kananɛ Ebɔrɛ be yuku shi,

nseŋ bugi to ŋ kaŋɛ menyi kusɔ nɛ

Enyɛnpetale Ebɔrɛ na kre.

¹²Menyi gbagba wu asheŋ ere kenishiso,

nɛ manɛ nna nɛ men naa malga asheŋ

nɛ e maŋ kɔ kifi to?

Zofa

¹³Kusɔ nɛ Enyɛnpetale Ebɔrɛ bee wora

amukpakpaso wuraana nɛ b maa shu basa so nde.

¹⁴Baaŋ tiŋ ŋ kurge mbia damta ga,

ama akoŋ ŋko kena e naŋ mɔ bumo be galeŋga.

¹⁵Bumo be mbia nɛ baaŋ ji efute malɛ beeŋ lɔ nna n wu.

Bumo be bekulpoche maaŋ nya n shu mbia na be nli gba.

¹⁶Amukpakpaso wuraana beeŋ tiŋ

a kɔ amansherbi nɛ asɔbuuso

damta ga fanɛ b ka koli

eshishɛr m biti abar so na.

¹⁷Ama Ebɔrɛ be basa e naŋ sɔ asɔbuuso na m buu,

nseŋ chige bumo be amansherbi

damta na to n sa abar.

¹⁸Nwu nɛ amukpakpaso wuraana

pɔr na maŋ chɛr kikɛ.

A du fanɛ enansatata

ŋko ndɔtobuuana nna.

¹⁹Alubiworapo beeŋ tiŋ n dii

kedama nseŋ ya dese kanyɛso,

ŋklade kachipurso ŋ koso ŋ ki betirpo.

²⁰Kufugboŋ beeŋ pɛ bumo kanyɛso

fanɛ nchu ka bɔlɔ n sɔ kaplɛkama na,

ŋko bɔrɛfugboŋ ka bee ber bumo na.

²¹Kumo be kaman nɛ epeŋilarkpa be afu tushiso

e ber m ba sulɔ bumo n lar bumo be elaŋana to.

²²Jemanɛ nɛ baaŋ wora ania fanɛ

baaŋ shile m mɔlga bumo be amu na,

afu na maaŋ wu bumo kuwɔr kikɛ.

²³Kumo be lalaloge nɛ k wora fanɛ afu na

ka bee mushe nsaa wora bumo eyur to

ŋkpal b ka maŋ naa wɔtɔ so na.”

¹Mboŋ nɛ baa kur kasawule a lara

shuwa nɛ gbiti wɔtɔ nna,

nɛ kakpa nɛ baa ŋalga amo to

a lɔŋɛ amo so malɛ gba wɔtɔ.

²Kasawule to nɛ baa kur a lara ajembugboŋ,

nsaa bure ajembugboŋ na to a lara

anyembi kpakpaso nɛ danyaŋ peper.

³Basa bee sulɔ efitila nna

a luri kasawule chiŋgeliŋ to tentembiri to

n ya kaa fin abɛlso ere.

⁴Baa lar kakpa nɛ basa wɔ nna a yɔ kufɔ

n ya kur amaŋ fanɛ abɔrbi na,

nseŋ pɛ efɔl to ŋ gbelge amo to.

⁵Adɔsawule be kaseto chilili

nɛ baa ta edɛ a bure afalta

⁶nɛ yawu kpakpaso be ajembu

nɛ baa tre safai na ŋko shuwa nɛ a wɔ amo to na.

⁷Basa nɛ baa kur kasawule a fin abɛlso bee yɔ

mboŋ nɛ kusore maŋ tiŋ n wu ŋko

ejita maŋ naŋ firgi m bɔla ndoŋ n choŋ nna.

⁸Mboŋ nɛ ebuluŋ ŋko kusɔbɔya lubi be yiri kikɛ

maŋ naŋ bɔla ŋ kuso na nɛ basa na bee nite.

⁹Enɔana nɛ dimɛdi kɔ a bure afalta kasawule to

nsaa shin nɛ abee be epul to bee dii efuli.

¹⁰Baa bure afalta na nna a fin

yawu kpakpaso be ajembu nɛ abɛlso lela.

¹¹Baa kuŋ kakpa nɛ elɔr bee shi a shile na to nna,

nsaa nya a lara asɔ nɛ a ŋana to.

¹²Ama nnɛ nɛ esa beeŋ wu kanyiasheŋ?

Nnɛ nɛ anyi beeŋ tiŋ ŋ koya asheŋ be kepinto?

¹³Esa maaŋ tiŋ n wu kanyiasheŋ edimɛdi to.

Esa kama malɛ maŋ nyi tɔnɔ nɛ k kɔ.

¹⁴Kanyiasheŋ maŋ wɔ teku

be kechimbi to gba.

¹⁵Esa maaŋ tiŋ n ta shuwa ŋko gbiti

nɛ k maŋ kɔ eyurpi n tɔ kumo.

¹⁶Kanyiasheŋ be yawu du kpakpa a chɔ

ajembu lela ŋko shuwa nɛ e maŋ kɔ eyurpi be yawu.

¹⁷Kumo be yawu du kpakpa a chɔ

shuwa ŋko asɔ nɛ b ta digi lela n lɔŋɛ be yawu.

¹⁸Kanyiasheŋ kɔ yawu a chɔ ajembu lela nɛ baa tre kɔral

nɛ kefitiri bumbuŋ be ajembu lela nɛ baa tre jaspa na,

ŋko ajembu lela peper nɛ baa tre rubi na gba.

¹⁹Itiopia be efuli so be ajembu lela nɛ baa tre topas na

nɛ shuwa nɛ e maŋ kɔ eyurpi na kikɛ

be yawu maŋ fo kanyiasheŋ be yawu so.

²⁰To, nnɛ bre nɛ kanyiasheŋ wɔ?

Nnɛ nɛ asheŋ be kepin to wɔ?

²¹Dimɛdi kikɛ be kenishi maaŋ tiŋ n wu kumo,

mbuibi nɛ a bee firgi ere gba maaŋ tiŋ n wu kumo.

²²Luwu nɛ kemur gba nu kumo be asheŋ,

a maŋ nyi kakpa nɛ k wɔ.

²³Ebɔrɛ nawule e nyi ekpa nɛ k bee yɔ kanyiasheŋ akpa.

Mo nawule e nyi kakpa nɛ k wɔ.

²⁴Ŋkpal manɛ so, mo e naa wu kusɔ kama

nɛ k wɔ kasawule so.

²⁵Jemanɛ nɛ Ebɔrɛ daŋ sa afu kumo be eleŋ

nseŋ ku kananɛ teku beeŋ baa sa n sa kumo na

²⁶nseŋ naŋ yili kakpa nɛ bɔrɛ beeŋ baa ba

nɛ ekpa nɛ bɔrɛ beeŋ baa bɔla so a nyɛkpɛ na

²⁷nɛ e wu kanyiasheŋ nseŋ wora kumo

be tɔnɔ nɛ k kɔ ŋ keni nseŋ kaŋɛ fanɛ k walɛ.

²⁸Kumo be kaman nɛ e kaŋɛ edimɛdi le:

“Kanyiasheŋ e la keta bunyaŋ gboŋ

n sa ma, Enyɛnpe Ebɔrɛ na.

Nɛ kelar alubi to malɛ la asheŋ be kepin to.”

Job be lalaloge be kamalga

Job

¹Nɛ Job naŋ kaŋɛ:

²“Mee yɛlga fanɛ ma kebaawɔtɔ e baa du

fanɛ kumo nɛ n daa kɔ jemanɛ nɛ

Ebɔrɛ daa keni ma so na.

³Ebɔrɛ daa wɔ ma kutɔ nna jemanɛ kikɛ,

nseŋ daa shin nɛ kakpa bee fulto a sa ma

nɛ mee tiŋ a nite tentembiri to.

⁴Jemanɛ nɛ asheŋ daa nite nɛnɛ a sa ma na,

Ebɔrɛ nɛ e la n teri kpakpaso na, e daa nɛfa

ma laŋ to ebi kikɛ.

⁵Enyɛnpetale Ebɔrɛ na daa wɔ ŋ kutɔ nna jemanɛ na so,

nɛ ma mbia kikɛ malɛ daŋ kulti ma n wɔtɔ kaplɛkama.

⁶N daa nya kenyipochu damta ga nna ashi ma ana nɛ mboe to,

nseŋ daa nya ŋku ga ashi ma ɔlif be ndibi be asɔrso to.

⁷Jemanɛ kikɛ nɛ kadegboŋ na be benimu shɛr

kadegboŋ na be kabuna nɛ ma alɛ gba ya tu bumo n chena,

⁸mbifɔlbi bee lɔŋɛ a yili ekarso nna,

nɛ basa kpar malɛ e baa koso a yili a bunyaŋ ma.

⁹Benimuana na bee yige kamalga nna

nsaa ta bumo be enɔana a buu nnɔ so.

¹⁰Basagboŋ nɛ basa bee sa bunyaŋ gba bee lo bumo be nnɔ nna.

¹¹Kusɔ kama nɛ n wora ŋko ŋ kaŋɛ

daa par ekama nna nsaa fuli bumo be ŋgbene.

¹²Jemanɛ kikɛ nɛ betirpo ŋko amunibi bee sha kechɛto,

mee chɛ bumo to nna.

¹³Bekama nɛ asheŋ pɔɔ so nɛ n chɛ bumo to na nɛfa ma,

ma alɛ daŋ chɛ bekulpoche to nɛ bumo be ŋgbene fuli bumo.

¹⁴Jemanɛ kikɛ n daa wora kusɔ nɛ k daga nna,

nsaa maa kpɛa esa kikɛ to.

¹⁵N daa wora etanpo nɛ ebobi kelela nna.

¹⁶N daa la fanɛ etuto nna n sa betirpo,

nseŋ daa ji asheŋ a chɛ befɔ to ashi demujikpa.

¹⁷Nɛ basa lubi ya nyaŋ basa n wɔtɔ a tɔrɔ bumo,

mee kɔ a suge bumo nna nseŋ ju basa lubi na n lɛ.

¹⁸N daa fɛ fanɛ meeŋ chɛr fanɛ jita

nseŋ dese ŋ gbagba be ebu to

n wu nɛ kayurwushi nna.

¹⁹N daa kɔ eleŋ a yil to nna fanɛ kedibi

nɛ k mur achin n yili m mata nchu nɛ bunyaŋ

bee shi kumo be afantaŋ nɛ ayabi so a wurge kanyɛso nna.

²⁰Ekama daa kpaŋ ma nna jemanɛ kikɛ,

nɛ ma eleŋ malɛ daa maa duga so.

²¹M baa ji basa asoe to,

baa lo to a nu kusɔ nɛ mee kaŋɛ na nna.

²²Ma alɛ baŋ malga n loge,

b maŋ naa kaŋɛ shɛŋ a ti so.

Ma mmalga daa luri bumo to nna

fanɛ bɔrɛchu ka bee luri kasawule to na.

²³B daa suse ma mmalga to nna

fanɛ kananɛ bedɔpo bee suse dɔchubɔrɛ so be nchu na.

²⁴M baŋ mushe n wɔtɔ bumo

jemanɛ nɛ asheŋ maŋ bɔ n sa bumo,

k bee leŋ bumo to nna nsaa sa bumo tama.

²⁵N daa wɔ bumo to nna fanɛ ewura

nseŋ daa malga nɛ baa nu a sa ma

fanɛ ewura ka bee juŋkpar mbe benapo

ŋko fanɛ esa nɛ e bee malga a lulo

basa nɛ b wɔ kagbenejija nɛ kushu to.”

¹Naniere mbifɔlbi bee tege ma nna,

ama bumo tutoana daa maŋ la basa nɛ

meeŋ shin nɛ b ti ma njɔnɔ so a keni ma mbolpɔ so gba.

²Bumo alɛ daa la basa nɛ b kɔ eleŋ nna

nɛ n daa maaŋ shuli n ta bumo kushuŋ gba.

³B daa nite a kulti keshishɛrsawule so kanyɛso nna a fin kusɔ nɛ baaŋ ji,

ŋkpal b ka la betirpo jalɛ so.

⁴Baa nite a shishi afantaŋ nɛ e maŋ wɔ ebel

nɛ ndibi be nliŋi nna a ji.

⁵Ekama malɛ ju bumo n lar kade na to nna

nsaa ponte bumo so fanɛ b ka la beyu na.

⁶Abee laŋ nɛ amaŋ nɛ basa kur m mata abee

nɛ mbombi nɛ a wɔlto e ki bumo

peana nɛ b wɔ amo to.

⁷Ndoŋ nɛ b wɔ a wora awɔr fanɛ ekurma,

bumo alɛ nsaa biti abar so a dese ndibi be afito.

⁸B ki fanɛ basa fuloŋ nɛ b maŋ kɔ tɔnɔ

nɛ b ju bumo n lar kasawule na so nna.

⁹Naniere le be basa fuloŋ ere wora nshɛ nna

a boŋ a wora ma eyur to.

¹⁰B ta ma fanɛ kejijɛ be esa nna,

a fɛ fanɛ b walɛ so nna a chɔ ma.

Baa kaa yili ma anishito a tu echɔl gba nna.

¹¹Ŋkpal Ebɔrɛ ka shin nɛ awurfoŋ nɛ tɔrɔ ba ma so so,

kusɔ kama nɛ baa sha, kumo nɛ baa wora ma.

¹²Ŋ ka maaŋ tiŋ ŋ kɔ n sa ma kumu ere gba,

b kraa maa yige kebaakɔ ma.

K du fanɛ b ka sho ajigbelɛ a fin ma kepɛ nna.

¹³Ŋkpal b ka nyi ŋ ka maŋ kɔ echɛtopo so,

baa wora asheŋ ko nna a shin nɛ ma

awurfoŋ bee wora keshi a ti so.

¹⁴Baa shi kaba kama so nna m ba kaa mel ma so,

nsaa biti ma so jemanɛ nɛ n tɔr a dese na.

¹⁵Kufugboŋ gboŋi tɔr ma so;

m paŋ ma bunyaŋ nɛ kedamaya kikɛ nna

fanɛ kusɔ ka pante nɛ afu lar na.

¹⁶Naniere mee shin nɛ n wu nna na.

Shɛŋ maa sɔ ma ashi ma awurfoŋ to.

¹⁷Ma awibi to bee we ma to nna kanyɛso kikɛ,

ebesa nɛ mee nu ma eyur to na maa yige kikɛ.

¹⁸Ebɔrɛ be enɔ lempo e pɛ ma kale to,

ma piŋi be kubɔ to nɛ e nyaŋ ŋ keta.

¹⁹E ta ma n lɛ edepɔ to nna,

nɛ ŋ kikɛ ki fanɛ depɔ.

²⁰Ŋ kule Ebɔrɛ fanɛ e chɛ ma to,

nɛ e kini, e maŋ tuge ma gba.

Nɛ ŋ koso n yili, ama e baa keni ma nna de.

²¹Ebɔrɛ maŋ shu ma so kuraa n wu ma kuwɔr.

Mbe eleŋgboŋ nɛ e ta ŋ kɔrfɛ ma.

²²E shin nɛ bɔrɛfugboŋ ba fuu ma nna n lɛ,

nɛ n tɔr a gbelti.

²³K maaŋ chɛr e beeŋ shin nɛ n wu n yɔ bubuni to,

kakpa nɛ ekama beeŋ yɔ kachako na.

²⁴Esa kikɛ maaŋ kini kechɛ basa nɛ b ji jɛrbi

nsaa kule a fin kechɛto to.

²⁵N daŋ tu basa nɛ baa shu n shu,

nseŋ naŋ tu bumo nɛ baa ji awurfoŋ n ji awurfoŋ.

²⁶Ama naniere ma ere ka bee fin kesɔnyige nɛ kefulto,

jɛrbi nɛ tentembiri nɛ n nya.

²⁷Kafɔŋ nɛ ebesa shin nɛ ma apumbi to bee kii to,

karechɛ kama malɛ, awurfoŋ to nɛ n wɔ.

²⁸Awurfoŋ shin nɛ ma kayurwule kilgi m biri, mannɛ epeŋi.

Nɛ ŋ koso n yili basa to a shu a fin kechɛto.

²⁹N daa shu kuwɔr so fanɛ ejiŋkaamu

ŋko egbuŋgbula nna.

³⁰Ma eyur so kikɛ chɔɔ nna a fɔlge so

nɛ ma eyur to bel edɛ a tushi fanɛ edɛ gbagba na.

³¹Mboŋ nɛ n daa nu kagbenefuli be nshɛ na,

kushu nɛ kagbenejija be awɔr nɛ mee nu ndoŋ.

Job ka kraa malga be asheŋ

¹Ma, Job bɔ ntaŋ n nase kɔnɔ fanɛ

m maa ba nɛ ŋ keni eche kayɛlga so kikɛ.

²Ŋkpal manɛ so, Enyɛnpetale Ebɔrɛ bee gberge

benyɛn kama nɛ baa wora loŋ kusoe nna.

³Kashenteŋto, Ebɔrɛ bee shin nɛ

bekama nɛ baa wora alubi bee ji jɛrbi nna.

⁴Mo alɛ nyi kusɔ kama nɛ mee wora,

nsaa wu keya kama nɛ mee tia.

⁵Nɛ fanɛ n daŋ ku efɛ n sa esa,

ŋko n fule esa ko ma kebaawɔtɔ to,

⁶Ebɔrɛ e wora ma ŋ keni,

e beeŋ wu fanɛ kulubi maŋ wɔ ma to.

⁷Nɛ fanɛ n daŋ foe ekpa wora kusɔ ko nɛ k maŋ niŋi,

ŋko n ta ma kumu n wɔtɔ kulubi ko to,

ŋko n ta ma enɔana n wora kulubi ko nna,

⁸kumo ere basa pɔtɛ e ji ma adɔjibi

ŋko ma adɔjibi e mur kuraa.

⁹Nɛ fanɛ n daŋ yɛlga esa ko be eche

nseŋ ya ŋana n sha mo,

¹⁰Ebɔrɛ e shin nɛ enyɛn pɔtɛ

e suge ma eche ŋ kutɔ.

¹¹Nɛ n daŋ ta esa ko be eche nna,

k daa beeŋ baa la mbushu lubi lubi,

¹²nɛ k beeŋ mur ma

nseŋ shin nɛ ma adɔjibi e ji edɛ.

¹³Nɛ fanɛ n daa maŋ wora kusɔ nɛ k daga

n sa ma nyɛrbi nɛ mbita jemanɛ nɛ asheŋ ko

daŋ ba ma nɛ bumo be kefɛato na,

¹⁴n daa maaŋ tiŋ n ya yili Ebɔrɛ

be anishito nɛ e ji ma demu nɛ n ji n lar.

¹⁵Ŋkpal manɛ so, Ebɔrɛ koŋwule na

e to ma nɛ ma nyɛrbi nɛ mbita na kikɛ.

¹⁶M maŋ naŋ kini kechɛ betirpo to kikɛ,

ma alɛ maŋ naŋ mɔn bekulpoche kusɔ nɛ baa sha kikɛ.

¹⁷Ma alɛ maŋ naŋ ji m mɔɛ

nɛ amunibi bre dese akoŋ kikɛ.

¹⁸Ma kebrantiɛ to kikɛ nɛ mee bela amunibi

nsaa chɛ bekulpoche to.

¹⁹M baŋ wu esa nɛ e maŋ kɔ asɔbuuso,

²⁰mee sa mo asɔbuuso nɛ b ta ŋ gbagba

be mbolpɔ be afuibi n lue nna.

Kumo be kaman nɛ amodoŋwura e di ma epaŋ ga.

²¹Nɛ fanɛ n daŋ puni kumunibi ko,

ŋkpal ŋ ka nyi fanɛ

meeŋ tiŋ n ji m bri mo demujikpa so,

²²Ebɔrɛ e shin nɛ ma mbre

e yili ma abatimu so ŋ ku so n tɔr.

²³Ŋkpal ŋ kaa bee ŋana Ebɔrɛ be kasogberge so,

m maaŋ shuli n wora le be asheŋ ere.

²⁴Ma ere maŋ naŋ ta ma yirda

n deŋi kedamaya so kikɛ,

²⁵ŋko a puchi ŋkpal asɔ damta nɛ ŋ kɔ so.

²⁶Ma alɛ maŋ naŋ lar efuli ŋko ŋ ŋana

n shuŋ epeŋi ŋko kufɔl kikɛ ashi ma kebaawɔtɔ to.

²⁷Ebɔrɛ be kaman, m maŋ bunyaŋ kusɔ kikɛ,

ŋko n ta kusɔ ko ma enɔ to n lara sarga n sa kusɔ ko kikɛ.

²⁸Le be alubi ere daa beeŋ tiŋ m bar ma kasogberge,

ŋkpal manɛ so nɛ n daŋ wora amo kumo ere m maŋ ji kashenteŋ

n sa Enyɛnpetale Ebɔrɛ na nna na.

²⁹Ma kagbene maŋ naŋ fuli

ŋkpal n doŋana be awurfoŋ so,

ŋko jemanɛ nɛ b ji jɛrbi so.

³⁰Ma alɛ maŋ naŋ kule Ebɔrɛ n fin bumo be luwu

nɛ kebaala kulubi n sa ma kikɛ.

³¹Esa kikɛ maŋ naŋ di akoŋ ma laŋ to kikɛ.

Ma beshumpo gba nyi ŋ ka bee sɔ befɔ nɛnɛ.

³²M maa shin nɛ befɔ nɛ b maŋ kɔ kakpa a luri

bee dese kowushina, ŋkpal manɛ so,

ma laŋ be mbuna bugi nna n sa bumo.

³³Basa ko bee ta bumo be alubi a ŋana nna,

ama nɛ ma ere wora kulubi

m maaŋ ta kumo ŋ ŋana kikɛ.

³⁴M maa ŋana kusɔ nɛ basa beeŋ kaŋɛ a laŋɛ ma kaplɛa so,

Ma alɛ maŋ naŋ lo ma kɔnɔ ŋko n ta ma kumu ŋ ŋana ma laŋ to

ŋkpal ŋ ka bee ŋana kufu fanɛ basa beeŋ keni ma jiga so.

³⁵Esa ko maaŋ nu kusɔ nɛ mee kaŋɛ ere

nseŋ ji n chɛ ma to a?

Nɛ fanɛ Ebɔrɛ wu kusɔ ko ma so gba nna,

e malga ŋko n sibɛ kumo n sa ma.

³⁶Saŋɛ na so meeŋ ta kusɔ nɛ e wu ma so na

m mata ma asɔbuuso nɛ ma kasɔto

nɛ ekama e wu kumo.

³⁷Kumo be kaman, meeŋ kaŋɛ Ebɔrɛ

kusɔ nɛ n wora kikɛ nseŋ nya kagbene

n yili mbe anishito.

³⁸Nɛ fanɛ n yuri kasawule nɛ mee dɔ so na nna,

ŋko n suge kumo basa nɛ b wɔ kumo kutɔ nna,

³⁹ŋko nɛ fanɛ n ji adɔjibi nɛ e wora

kasawule na so na kikɛ nna

nsaa maŋ sa beshumpo nɛ b dɔ amo na,

⁴⁰kumo ere Ebɔrɛ e shin nɛ afitiri nɛ ewi

a kɔr n sɔ kasawule na kikɛ so,

mannɛ ayu ŋko aboyu.

Job be kamalga be ekar nna na.

Elihu ka nya agbo n wɔtɔ Job mo nekpaana be asheŋ

¹Ŋkpal Job ka wu mbe kumu fanɛ e maŋ wora kulubi so, mo nekpaana besa na yige mbe asheŋ nna n sa mo nsaa maŋ naa ji mo emɔrɔ.

²Ama kanyɛn ko nɛ baa tre Elihu na daa yil a nu kusɔ nɛ k bee wora na kikɛ nseŋ daŋ nya agbo n wɔtɔ Job ŋkpal Job ka daa maŋ wu mbe kumu fanɛ e wora kulubi nseŋ daa bile Ebɔrɛ so. E daa la kanyɛn nɛ baa tre Barakɛl nɛ e shi Buz be kasawule so nseŋ shi Ram be kabuna na pibinyɛn nna. ³Mo alɛ daŋ naŋ nya agbo n wɔtɔ Job mo nekpaana besa na gba nna, ŋkpal b ka daa maŋ tiŋ n shin nɛ Job pin kulubi nɛ e wora so, nɛ k ba fanɛ Ebɔrɛ bre e wora n jija na so. ⁴Elihu daŋ yige basa asa na nna nɛ b malga n sa Job ŋkpal e ka daa la kebibi bumo to so.

⁵Ama e ka daŋ wu fanɛ basa asa na

daa maŋ naa kɔ shɛŋ nɛ b kaŋɛ Job na nɛ e nya agbo

⁶nseŋ kaŋɛ bumo le:

“N la kebifɔlbi nna nɛ menyi alɛ la basakpar,

amoso nɛ n sa menyi bunyaŋ

nsaa maŋ kaŋɛ menyi kusɔ nɛ mee fɛ na.

⁷Ma ere daa fɛ nna fanɛ

basakpar e kɔ kanyiasheŋ.

⁸Ama n wu fanɛ Enyɛnpetale Ebɔrɛ be Kiyoyu

e naa luri dimɛdi to a sa mo kanyiasheŋ.

⁹Mannɛ kechɛr nfɛ to

e naa shin nɛ esa bee nya kanyiasheŋ,

ŋko a chɛ mo to nɛ e bee pin asheŋ to.

¹⁰Amoso, men nu kusɔ nɛ ma alɛ kɔ nɛ ŋ kaŋɛ.

¹¹N wora ania n nu

kusɔ nɛ menyi be ekama malga,

ama menyi be ekama maŋ tiŋ n shin nɛ

Job pin fanɛ e maŋ wora n nyalɛ.

¹²Ŋ kaŋ kusoe n nu menyi be mmalga nɛnɛ,

ama menyi to be ekoŋwule gba maŋ tiŋ n sa

Job kamalga nɛ k shin nɛ e pin e ka wora n foe.

¹³Men sa maŋ kaŋɛ le:

‘Anyi ere nyi kusɔ nɛ k daga!

Ebɔrɛ e naŋ gberge mo kusoe.’

¹⁴Job daa malga a sa menyi nna, mannɛ ma,

ama ma ere daa maaŋ malga

kananɛ men malga ere n sa mo.

¹⁵Job, fo mmalga na mɔ bumo kɔnɔ,

b maŋ naa nyi kusɔ nɛ baŋ naŋ kaŋɛ fo.

¹⁶Ama a daga fanɛ ma alɛ gba e lo ma kɔnɔ

ŋkpal b ka maŋ naa kɔ shɛŋ nɛ b kaŋɛ fo so a?

¹⁷Ayai! Meeŋ kaŋɛ fo kusɔ nɛ mee fɛ.

¹⁸Ŋkpal manɛ so, asɔ damta nɛ ŋ kɔ nɛ ŋ kaŋɛ,

amoso m maaŋ tiŋ n lo ma kɔnɔ.

¹⁹Nɛ m maŋ nya ekpa m malga,

meeŋ pante fanɛ kasapuya nɛ k bɔlɔ nsa m pante na.

²⁰M maŋ nya m malga, maaŋ nya ma kumu,

a daga ŋ ka malga.

²¹M maaŋ malga ŋ kpɛa ekama to,

ma alɛ maaŋ ku efɛ n fur esa ko.

²²Ma ere maŋ nyi kananɛ baa ku efɛ a fur basa.

N wora loŋ, Ebɔrɛ nɛ e to ma na

beeŋ gberge ma kusoe epul to.”

Elihu be kamalga be asheŋ

¹Job, jande nu nfe nɛnɛ!

²Kusɔ nɛ k wɔ ma nfɛra to

nɛ mee shin nɛ ŋ kaŋɛ na.

³Kagbenefuful nɛ ŋ kɔ a malga na,

kashenteŋ nɛ ma alɛ bee ji.

⁴Enyɛnpetale Ebɔrɛ na be Kiyoyu e to ma,

nseŋ sa ma efute nɛ ŋkpa.

⁵To, nɛ feeŋ tiŋ, fo kaŋɛ ma kusɔ nɛ fo kɔ nɛ fo kaŋɛ,

nseŋ bela ase nɛ ma nɛ fo e ji amo.

⁶Ebɔ nɛ Ebɔrɛ ta m pɔr ma nɛ fo kikɛ.

Ashi mbe anishito, anyi maŋ kɔr abar to.

⁷Amoso, sa maa ŋana ma

ŋko kusɔ nɛ meeŋ wora fo.

⁸Kusɔ nɛ n nu fo ka kaŋɛ nde:

⁹“Ma ere maŋ wora n jija.

Kulubi kikɛ maŋ bɛ ma.

¹⁰Ama Ebɔrɛ bre e naa wu ma kulubi

nsaa ta ma fanɛ mo doŋ.

¹¹Mo e ta ŋgbɛlɛbi ŋ kre ma aya,

nsaa dara aya kama nɛ mee tia.”

¹²Ama mee kaŋɛ fo, Job, nna fanɛ fo wora n foe.

Ebɔrɛ e chɔ dimɛdi kikɛ.

¹³Nɛ nuso nɛ fee ji mo emɔrɔ a kaŋɛ fanɛ

e maa sa dimɛdi be asheŋ bishi so be atuwebi?

¹⁴Ekpa damta so nɛ Ebɔrɛ bee bɔla a malga,

ama anyi e maa kaa nu kusɔ nɛ e bee kaŋɛ.

¹⁵Saŋko nɛ edimɛdi dese a di kanyɛso,

Ebɔrɛ bee bɔla edare so nna a malga a sa bumo.

¹⁶E bee kaa shin nɛ baa nu kusɔ nɛ e bee kaŋɛ nna

nɛ mbe kasokpele malɛ bee ta kufu a pɛ bumo.

¹⁷Ebɔrɛ bee malga nna a sa bumo edare to

nɛ k shin nɛ b lar alubi nɛ kamoowu to.

¹⁸E maaŋ shin nɛ b mur.

E bee mɔlga bumo luwu to nna.

¹⁹Jemanɛ ko Ebɔrɛ bee bɔla kulɔ

nɛ eyur to be ebesa so nna

a ŋini edimɛdi kusɔ nɛ k daga kebaawɔtɔ to.

²⁰Ajibi maa kaa yɛlga belɔpo,

hale ajibi nɛ baa sha ga gba

bee dufɛ bumo be mmuna so nna.

²¹Bumo alɛ bee kaa foe eyur to nna

hale nɛ bumo be awibi bee lar.

²²Nɛ loŋ baŋ wora, baa taga to luwu nna na.

²³Ashere Ebɔrɛ be emalaika

ŋgboŋ to ŋgboŋ to nɛ baa nyiŋi

edimɛdi kusɔ nɛ k daga na be eko e naaŋ ba

chɛ bumo to.

²⁴Malaika na beeŋ wu bumo kuwɔr ŋ kaŋɛ

luwu fanɛ e yige bumo, ŋkpal manɛ so,

b teŋ ka alubi na be kukɔ.

²⁵Kumo be kaman nɛ b naŋ nya alenfia,

nseŋ naŋ nya eleŋ ŋ ki fanɛ mbifɔlbi na.

²⁶Kumo be kaman nɛ b kule Ebɔrɛ nɛ e nu,

nɛ b ta kagbenewushi m bunyaŋ Ebɔrɛ,

nɛ e naŋ shin nɛ asheŋ e nyalɛ n sa bumo.

²⁷Loŋ malɛ kaŋ wora, baaŋ kaŋɛ ekama le:

“An daŋ wora alubi nseŋ foe Ebɔrɛ be ekpa so,

ama Ebɔrɛ ta m paŋ anyi

²⁸nseŋ sɔ anyi n yige ashi luwu to

nɛ an kraa wɔ ŋkpa to.”

²⁹Ebɔrɛ bee bugi ekpa nna

a sa anyi be ekama

³⁰nɛ an nya kumɔlga ashi luwu to.

E bee bar anyi mbe kefulto nɛ k bee sa ŋkpa na to nna.

³¹Amoso, Job, sa maŋ ku ma kamalga na to.

Lo fo kɔnɔ n shin nɛ m malga.

³²Nɛ fo kɔ kusɔ ko nɛ fo kaŋɛ,

meeŋ shuli kagbenefuliso fanɛ fo kɔ ekpa.

³³Nɛ mannɛ aloŋ,

lo fo kɔnɔ nɛ ŋ ŋini fo kanyiasheŋ.

¹Ndoŋ nna nɛ Elihu naŋ kaŋɛ:

²“Menyi edimɛdi bee fɛ fanɛ men nyi asheŋ nna,

ama men nu ŋ kutɔ!

³Men baŋ da ajibi nɛ e wɔ ebel ŋ keni,

menyee pin amo nna,

ama nɛ men nu kanyiasheŋ be mmalga bre,

menyi maa pin amo ere.

⁴K ka anyi kutɔ nna nɛ an keni demu na to

nseŋ ji kumo nɛnɛ nɛ k yili kananɛ k daga.

⁵Job bee ŋini fanɛ e maŋ wora kulubi,

Ebɔrɛ bre e naa kini keji asheŋ

nɛ amo be ekpa so n sa mo.

⁶Job malɛ naa kaŋɛ fanɛ Ebɔrɛ

bee tre mo efɛpo nna.

Mo alɛ maŋ wora kulubi kikɛ

nsaa ji awurfoŋ damta na.

⁷Men daŋ wu esa nɛ e du fanɛ Job a?

E maa sa Ebɔrɛ bunyaŋ kikɛ!

⁸Mo nɛ alubiworapoana

e naa tu abar a wora asheŋ.

⁹Ŋkpal manɛ so, e yɛ, esa baa wora

Ebɔrɛ be aparsheŋ e maa nya tɔnɔ kikɛ.

¹⁰Men nu nfe, menyi nɛ menyee pin asheŋ to ere!

Enyɛnpetale Ebɔrɛ beeŋ shuli n wora kusɔ nɛ k maŋ daga a?

¹¹Ekama be kusɔ nɛ e wora nɛ Ebɔrɛ bee keni so,

nsaa ka amodoŋwura kukɔ.

¹²Ekpa kikɛ maŋ wɔtɔ nɛ Enyɛnpetale Ebɔrɛ na

e tiŋ m bɔla so n wora kulubi.

E bee ji asheŋ nɛ amo be ekpa so nna a sa ekama.

¹³Sososo na kikɛ nɛ Ebɔrɛ kɔ yuku

durnya kikɛ so nsaa keni kumo so.

¹⁴Nɛ Ebɔrɛ baŋ sɔ efute nɛ k sa anyi ŋkpa ere

¹⁵anyi edimɛdi beeŋ wu nseŋ bɛta n yɔ eshishɛr to.

¹⁶Amoso nɛ men nyi asheŋ,

men nu kusɔ nɛ mee kaŋɛ ere!

¹⁷Menyee ji a bri Ebɔrɛ nɛ e niŋi na nna,

ŋkpal menyi ka bee fɛ fanɛ e kishi kebaaji asheŋ

nɛ amo be ekpa so so.

¹⁸Kashenteŋto, Ebɔrɛ e naa ji a bri

bewura nɛ b maŋ kɔ tɔnɔ

nsaa la kumukpakpaso wuraana.

¹⁹Ebɔrɛ e to anyi kikɛ kuraa.

Mo alɛ maa keni eko a bɔlɔ kenishi a chɔ eko.

Damawura ŋko etirpo, ewura ŋko ebɔlpo,

kikɛ la kukoŋwule nna ashi mbe anishito.

²⁰Bewura nɛ b ji eleŋ ga gba bee wu kanyɛso,

tentembiri to, jemanɛ nɛ b maa fɛ fanɛ loŋ beeŋ wora,

fanɛ anyi be ekama nna.

²¹Ebɔrɛ bee wu kusɔ kama nɛ anyee wora.

²²Tentembiri plɔ gba maaŋ tiŋ n ta

alubiworapo ŋ ŋana Ebɔrɛ so.

²³Amoso Ebɔrɛ maŋ lara kachɛ

nɛ e beeŋ ji demu n yili.

²⁴E maa kule esa ko ekpa nsaa lara bejuŋkparpogboŋ

ashi kejuŋkpar to nseŋ naa ta beko e tal bumo to.

²⁵Ŋkpal manɛ so, mo e nyi kusɔ nɛ baa wora,

mo alɛ e naa lara bumo kiidiso nɛ baa tɔr kuraa.

²⁶E bee gberge bumo kusoe

kakpa nɛ basa beeŋ wu bumo nna

²⁷ŋkpal b ka yige kebaabɛ mo so

nseŋ kplaŋ mbe mbra kikɛ so so.

²⁸Betirpo nɛ b daŋ shu ŋ ŋini Ebɔrɛ

nɛ mo alɛ nu bumo be kushu nseŋ chɛ bumo to.

²⁹Nɛ Ebɔrɛ baŋ maŋ wora shɛŋ gba,

esa ko ŋko efuli ko beeŋ tiŋ n wu mo kulubi a?

³⁰Ama e kraa gberge bewura

nɛ baa kɔrfɛ bumo be basa kusoe.

³¹Job, a daga fo kaŋɛ Ebɔrɛ fanɛ fo wora n jija,

nseŋ nase kɔnɔ fanɛ fo maaŋ naŋ wora kulubi kikɛ.

³²Kumo be kaman nɛ fo kule mo

nɛ e shin nɛ fo pin kulubi nɛ fo wora,

saŋɛ na so, fo maaŋ naŋ wora kumo kikɛ.

³³Fo ka kini kewora kusɔ nɛ Ebɔrɛ bee sha ere,

fee sha fanɛ mo ere e wora kusɔ nɛ fee sha n sa fo a?

Fo e daga fanɛ fo yili kusɔ ko n sa fo kumu, mannɛ ma.

Naniere, kaŋɛ anyi kusɔ nɛ fee fɛ!

³⁴Job, esa kama nɛ e kɔ nfɛra lela beeŋ tiŋ m pin

³⁵fanɛ kawuli be mmalga nɛ fee malga na,

a maŋ kɔ kanyiasheŋ kikɛ.

³⁶Amoso mee kule Ebɔrɛ nna fanɛ fo ji awurfoŋ ga,

ŋkpal fo ka malga fanɛ alubiworapo so.

³⁷Fo lar Ebɔrɛ kaman nna n ti alubi

nɛ fo wora n da mo so na so.

Anyi kikɛ be anishito nɛ fo keni

Ebɔrɛ jiga n wora mo eyur to.”

¹Ade kikɛ be kaman nɛ Elihu naŋ kaŋɛ:

²“Job, fo tama fanɛ fo maŋ wora kulubi kikɛ

ashi Ebɔrɛ be anishito kashenteŋto a?

³Fo maŋ yirda kashenteŋto fanɛ

kewora Ebɔrɛ kasonu kɔ tɔnɔ ga a?

⁴Meeŋ sa asheŋ nɛ fo nɛ fo

nekpaana bishi na be atuwebi.

⁵Men keni kananɛ bɔrɛwɔlpa wɔ esoso kufɔ loŋ!

⁶Nɛ fo wora alubi, k beeŋ tiŋ n tɔrɔ Ebɔrɛ a?

Fo alɛ naŋ wora n da so ale damta gba,

e maaŋ tiŋ n wora mo shɛŋ.

⁷Nɛ fo la esa niŋiso, manɛ nɛ fee sa mo,

ŋko manɛ nɛ Ebɔrɛ bee fin fo kutɔ?

⁸Kulubi ŋko kelela kama nɛ fee wora na,

fo braana edimɛdi nɛ fee wora amo.

⁹Etɔrɔ be jemanɛ ekama bee kule

Ebɔrɛ gboŋgboŋi na nna nɛ e wu

mo kuwɔr nseŋ mɔlga mo.

¹⁰Ama Ebɔrɛ nɛ e to bumo na

baŋ chɛ bumo to jemanɛ nɛ asheŋ

ki kpakpa na be kaman baa teŋ mo so nna.

¹¹B maŋ naa bɛta a yɔ Ebɔrɛ nɛ e shin nɛ

an nyi asheŋ a chɔ asɔbɔya nɛ mbuibi na kutɔ.

¹²Ebɔrɛ maa nu kamoowu wuraana

nɛ alubiworapoana be kabɔrɛkule.

¹³Nɛ Enyɛnpetale Ebɔrɛ na bee kini kenu

kabɔrɛkule fuloŋ nɛ baa kule na bre,

¹⁴kumo ere e beeŋ kini kenu fo alɛ gba

be kekule nɛ fo maŋ nya kanyiti nsaa fin

fo nɛ mo be keyili demujikpa na.

¹⁵Job, fo maŋ wora n nyalɛ ŋkpal fo ka kaŋɛ

fanɛ Ebɔrɛ maa gberge basa nɛ baa wora alubi kusoe so.

¹⁶Asheŋ kama nɛ fo malga na kikɛ

bee ŋini fanɛ fo maŋ nyi kusɔ nɛ fee kaŋɛ nna.”

¹Elihu daŋ ta mbe kamalga na

nna n chuge so ŋ kaŋɛ:

²“Nya kanyiti gbrɛbi n sa ma.

Ŋ kraa kɔ kusɔ ko nɛ ŋ kaŋɛ

a laŋɛ Ebɔrɛ be kaplɛa so.

³Kusɔ kama nɛ Ebɔrɛ wora niŋi nna.

Ebɔrɛ gbagba kutɔ nɛ n nya le be kenyi ere.

⁴Baa nyi geeŋ fanɛ kusɔ kama

nɛ mee kaŋɛ ere la kashenteŋ nna.

⁵Ebɔrɛ shi ga nsaa kɔ eleŋ ga,

ekama be asheŋ tir n sa mo nna.

Shɛŋ malɛ maŋ wɔtɔ nɛ e maa pin kumo to.

⁶E maa sa alubiworapoana ekpa fanɛ b baa wɔtɔ mbaanaayɔ,

e bee ji asheŋ nɛ amo be ekpa so a sa

basa nɛ beko bee tɔrɔ bumo na.

⁷Ebɔrɛ e naa keni basa niŋiso so nsaa kuŋ bumo,

mo alɛ nsaa shin nɛ baa wora asheŋ fanɛ bewura,

nseŋ naa shin nɛ basa bee sa bumo bunyaŋ mbaanaayɔ.

⁸Ama nɛ fanɛ basa wɔ kabuti to

a ji awurfoŋ ŋkpal kusɔ nɛ b wora so,

^9-10Ebɔrɛ bee shin nɛ baa pin bumo be alubi

nɛ kamoowu be kebaawɔtɔ na nna

nseŋ kpele bumo kusoe fanɛ b bɛta m ba mo kutɔ.

¹¹Nɛ b wora Ebɔrɛ kasonu nsaa shuŋ mo,

asheŋ naa nite nɛnɛ nna a sa bumo

nɛ b naŋ nya kayurwushi bumo be kebaawɔtɔ to.

¹²Ama nɛ b wora kawulisheŋ

nseŋ kini kenu n sa mo bre,

baaŋ wu luwu besaso n yɔ bubuni to.

¹³Basa nɛ b maa ŋana Ebɔrɛ ashi bumo be ŋgbene to,

kanya agbo e bɔlɔ bumo to.

Nɛ Ebɔrɛ baŋ gberge bumo kusoe gba

b maa kule mo fanɛ e chɛ bumo to.

¹⁴Ŋkpal loŋ so baa wu anishinyɔr be luwu nna

jemanɛ nɛ b kraa la mbifɔlbi.

¹⁵Awurfoŋ nɛ etɔrɔbi nɛ Ebɔrɛ bee bɔla so

a bugi basa be anishi nsaa ŋini bumo asheŋ.

¹⁶Le be jemanɛ ere Ebɔrɛ be kenishi pere nna

nɛ e lara fo ashi tɔrɔ to

nseŋ sa fo kusɔ kama nɛ fee sha yɛlyɛla so.

¹⁷Ama naniere fo kaa bee nya fo alubi be kakɔka ere,

¹⁸baa da so nɛ esa kikɛ maaŋ ta asɔ n fule fo

ŋko kakɛ ko n lɔlɔ fo n wɔtɔ kulubi to.

¹⁹Fo eyilikpa nɛ kedamaya maaŋ tiŋ

ŋ kuŋ fo ashi awurfoŋ damta to.

²⁰Fo alɛ e sa maa kule a fin luwu nɛ k du fanɛ tentembiri

a gberge basa a lara bumo be elaŋana to na gba.

²¹Baa de so nɛ fo maaŋ kilgi n yɔ alubi

nɛ fee fɛ fanɛ amo a bɔ awurfoŋ nɛ fee ji na to.

²²Ebɔrɛ be eleŋgboŋ maŋ kɔ ekar.

Eŋinipo kikɛ maŋ naa wɔtɔ fanɛ mo.

²³Esa kikɛ maa ŋini Ebɔrɛ kusɔ nɛ e beeŋ wora.

Esa kikɛ malɛ maaŋ tiŋ n wu mo kulubi kikɛ.

²⁴Beko kpaŋ Ebɔrɛ ŋkpal kusɔ nɛ e wora so,

a daga fanɛ fo alɛ gba e kpaŋ mo.

²⁵Edimɛdi kikɛ wu kusɔ nɛ e wora,

ama kewora fanɛ kufɔ nɛ b yili n wu amo.

²⁶Anyi maaŋ tiŋ m pin Ebɔrɛ be keshi to,

ŋko n tiŋ ŋ karga mbe nfɛ nɛ e ji.

²⁷Ebɔrɛ e naa shin nɛ bunyaŋ

bee gama a ki bɔrɛwɔlpa.

²⁸Mo e naa shin nɛ bɔrɛwɔlpa bee ba

bɔrɛchu damta a sa edimɛdi kikɛ.

²⁹Esa kikɛ maaŋ tiŋ m pin kananɛ Ebɔrɛ

bee shin nɛ bɔrɛwɔlpa bee salga to a sɔ kaplɛkama,

ŋko kananɛ e wɔ kakpa nɛ e wɔ

nsaa ponte to saŋɛ nɛ bɔrɛ bee ba.

³⁰Mo e naa shin nɛ bɔrɛ bee nyɛkpɛ

a fulto kaplɛkama, hale teku be kaseto gba.

³¹Ekpa nɛ e bee bɔla so a keni durnya

be efuliana na so nna na.

Bɔrɛchu nɛ e bee sa na e naa wora ajibi a sa anyi.

³²Mo e kɔ bɔrɛ be kenyɛkpɛ mbe enɔana to,

nsaa kaŋɛ kumo kakpa nɛ k beeŋ ya yuu

nɛ k ya yu so ndoŋ.

³³Bɔrɛ nɛ k bee ponte na

bee ŋini bɔrɛfugboŋ nɛ k bee ba be asheŋ nna,

fanɛ kananɛ kena bee shu a ŋini k ka bee ba na.”

^1-3M baŋ nu Ebɔrɛ be ebɔl kaa bee muni to

fanɛ bɔrɛ ka ponte, nseŋ wu bɔrɛ ka nyɛkpɛ

ŋ ku awɔlpa to a choŋ, ma kagbene bee ku nna

nɛ kufu e pɛ ma nɛ ma eyur kikɛ e baa chicha.

⁴Kumo be kaman nɛ ekama e nu mbe ebɔlgboŋ na,

kumo e naa gbri fanɛ bɔrɛ ka ponte na.

Mbe ebɔlgboŋ na baŋ gbri,

shɛŋ maŋ naa ka.

⁵Ebɔrɛ baŋ ponte ŋ kaŋɛ kesheŋ,

emamachisheŋ nɛ e bee mɔ kɔnɔ

e naa wora.

⁶Mo e naa shin nɛ kenyɔlɔ bee tɔr kasawule so,

nsaa shin nɛ bɔrɛgboŋ bee ba nɛ mboŋ bee pete.

⁷Saŋɛ na so basa nɛ e to beeŋ pin mbe kasheŋwora,

nɛ ekama nyam e yige kushuŋ ŋkpal mbe eleŋ so.

⁸Ndoŋ nna nɛ asɔbɔya e shile n ya ŋana

bumo be edikpaana to.

⁹Bɔrɛfugboŋ beeŋ shi kelargato be kaseto m ba,

nɛ gbaŋgbaŋ be awo e shi kelargato be esoso m ba.

¹⁰Ebɔrɛ baŋ fute, mbe efute bee shin nɛ mbombi

nɛ elɔr kikɛ be nchuana bee wushi a ki fanɛ

abɔrɛjembubi nna.

^11-12Ebɔrɛ e naa ponte bɔrɛwɔlpa nɛ e bee shin nɛ

bɔrɛ bee nyɛkpɛ so nɛ e bee sɔ awɔlto

m salga to m buu durnya kikɛ so.

¹³Mo e naa shin nɛ bɔrɛ bee ba kasawule so nɛ kakpa bee wushi.

E beeŋ tiŋ n shin nɛ k ba ŋ gberge basa kusoe,

mo alɛ beeŋ naŋ tiŋ n shin nɛ k ba a ŋini mbe kasha.

¹⁴Job, fɛ Ebɔrɛ be emamachisheŋ damta

nɛ e bee wora na be asheŋ nɛnɛ ŋ keni.

¹⁵Feeŋ tiŋ m bugi to ŋ kaŋɛ kusɔ nɛ k ba

nɛ bɔrɛ be kenyɛkpɛ bee nu Ebɔrɛ

nɛ e nyi kusɔ kikɛ na be kɔnɔ a?

¹⁶Fo nyi kusɔ nɛ k kɔ bɔrɛwɔlpa to awɔlto a?

Ebɔrɛ nɛ e nyi kusɔ kikɛ na be emamachisheŋ nna.

¹⁷Jemanɛ nɛ keshishɛrsawule so be afu daŋ ber kasawule na so na,

kaboŋ na kikɛ daŋ bel edɛ nna nɛ kaplɛkama wora shruum.

¹⁸Ebɔrɛ bre beeŋ tiŋ n shin nɛ bɔrɛwɔlpa e parga to

m buu so nɛ kakpa e wushi,

ama fo alɛ beeŋ tiŋ n wora loŋ a?

¹⁹To, kaŋɛ anyi kusɔ nɛ anyeeŋ kaŋɛ Ebɔrɛ,

anyi ere be nfɛra wea to nna na.

Anyi maŋ kɔ shɛŋ nɛ an naŋ kaŋɛ.

²⁰A daga ŋ kaŋɛ Ebɔrɛ fanɛ mee

sha kemalga mo kutɔ nɛ e mur ma a?

²¹Esa kikɛ maaŋ tiŋ n ta anishi fuloŋ

ŋ keni epeŋi jemanɛ nɛ

bɔrɛwɔlpa maŋ buu kumo so.

²²Ama Enyɛnpetale Ebɔrɛ na be kemaŋkura

fulto a nyɛkpɛ a chɔ epeŋi ga.

²³Ebɔrɛ be eleŋgboŋ na shi ga,

anyi alɛ maaŋ tiŋ n wu mo kenishiso.

Ama mo alɛ niŋi nna nsaa maa kpɛa edimɛdi to.

²⁴Amoso edimɛdi bee ŋana mo nsaa bunyaŋ mo nna,

ŋkpal manɛ so, e maa keni kamoowu wuraana

nɛ baa fɛ fanɛ b nyi asheŋ ga na a bɔlɔ kenishi.

Enyɛnpe Ebɔrɛ na ka tuge Job to be asheŋ

¹Ndoŋ nna nɛ Enyɛnpe Ebɔrɛ bɔla

bɔrɛfu so ŋ kaŋɛ Job le:

²Manɛ nna nɛ fee malga ga loŋ,

saŋɛ nɛ fo mmalga maŋ kɔ shɛŋ amo to?

³To, naniere wora shiriya nɛ ma nɛ fo e ji asheŋ!

Meeŋ bishi fo asheŋ, nɛ fo sa ma amo be atuwebi.

⁴Ŋ ka daa nase durnya be gbaltɔlase na,

nɛ fo daa wɔtɔ a?

⁵Wanɛ e chaŋ kumo be mparto nɛ nteŋ to?

M maŋ tama fo ka nyi.

⁶Manɛ nɛ kumo be kifi yil so?

Wanɛ e pɔr eshabɔrɛ nɛ a kɔ kumo to na?

⁷Loŋ be kachɛ na be kachipurdidi,

achɛkpabi daa boŋ nshɛ nna,

nɛ ebɔrɛso be emalaika kikɛ daa ji eyur.

⁸Jemanɛ nɛ n to teku na,

wanɛ e chaŋ kumo be egbaŋ ŋ kuŋ kumo?

⁹Ma, Ebɔrɛ na, e daŋ ta awɔlpa m buu kumo so fanɛ ketaa,

n shin nɛ tentembiri plɔ buu kumo so.

¹⁰Ndoŋ nna nɛ k wora fanɛ ŋ ka

pɔr egbal ŋ kulti teku na n wɔtɔ,

nseŋ shin nɛ k wɔ kumo to fanɛ

ŋ ka ber mbuna so ŋ gba kumo so na.

¹¹Kumo be kaman nɛ ŋ kaŋɛ kumo le:

“Kakpa nɛ feeŋ tiŋ m ba fo nna na

sa maŋ kaŋ choŋ so ndoŋ.

Kakpa nɛ fo atili lempo na daga e fo nna na.”

¹²Job, fo daŋ kaŋɛ epeŋi fanɛ k pete kachipurdidi,

nɛ k nu n sa fo a?

¹³Fo daŋ kaŋɛ karechɛso fanɛ k ba

nɛ kakpa fuli to n lara kumu kpakpaso wuraana

efuli ashi bumo be eŋanakpa a?

¹⁴Karechɛ bee shin nɛ abee nɛ ataŋɛ bee lar efuli nna

nɛ baa wu amo fanɛ kananɛ kabaa bee shin nɛ

kusɔbuuso be kananɛ b baa kumo na bee dese nɛnɛ na,

ŋko b ka ta kusɔ n yisi ebɔ wushi so nɛ kumo be nduli

deŋi ebɔ wushiso na so na nna.

¹⁵Karechɛ be kefulto bee lara kumukpakpasowuraana

be ashuŋ lubi efuli nna nɛ b maa nya a wora amo.

¹⁶Job, fo daŋ yɔ teku be kaseto ŋ ku so a?

Ŋko n nite kumo be kaseto be kasawule so ŋ ku so a?

¹⁷Fo daŋ wu kakpa nɛ bubuni wɔ na

be kabuna kenishiso ŋ ku so a?

¹⁸Fo nyi kananɛ durnya be mparto sa a?

Kaŋɛ ma, nɛ fo nyi nna na!

¹⁹Fo nyi kakpa nɛ kefulto nɛ

tentembiri kikɛ bee shi a ba a?

²⁰Feeŋ tiŋ n juŋkpar amo n yɔ kakpa nɛ e wɔ a?

Fo nyi ekpa nɛ k bee yɔ ndoŋ bre a?

²¹N nyi geeŋ fanɛ feeŋ tiŋ n wora loŋ,

ŋkpal manɛ so, b kurge fo nna pɔɛŋ

nɛ n to kusɔ kama.

²²Fo daŋ yɔ mboŋ nɛ mee yili

abɔrɛjembubi nɛ kunyɔlɔ a?

²³N yili amo nna a jo kebagato be jemanɛ

nɛ jemanɛ nɛ meeŋ gberge efuliana na kusoe.

²⁴Nnɛ nɛ bɔrɛ be kenyɛkpɛ bee shi a lar,

ŋko nnɛ nɛ epeŋilarkpa be afu bee shi a ba?

²⁵Wanɛ e chaŋ kubɔr n sa bɔrɛchugboŋ

nseŋ bugi ekpa n sa bɔrɛfugboŋ?

²⁶Wanɛ e naa shin nɛ bɔrɛ bee ba

keshishɛrsawule nɛ ekama maŋ wɔ so na?

²⁷Wanɛ e naa wurge kasawule wɔlso so nchu

nɛ afitiri bumbuŋ bee kɔr kumo so?

²⁸Wanɛ e la bunyaŋ nɛ bɔrɛ, amo tuto?

^29-30Wanɛ e kurge abɔrɛjembubi be yiri kikɛ,

nɛ a bee shin nɛ nchu bee ki fanɛ ajembu

nɛ mbombi nɛ apa be nchu bee wushi a ki abɔrɛjembubi?

³¹Feeŋ tiŋ n shin nɛ achɛkpabi e ba abar so

fanɛ amo nɛ baa tre koshi nɛ mbe bibi nna a?

³²Feeŋ tiŋ ŋ ŋini achɛkpabi kusɔ nɛ a beeŋ baa wora,

ŋko n ta achɛkpabi nɛ baa tre Shishirigboŋ nɛ

Shishiribi n yili amo be eyilikpa a?

³³Fo nyi mbra nɛ e wɔtɔ n sa awɔlpa to be asɔ a?

Fo alɛ beeŋ tiŋ n shin nɛ mbra na

e shuŋ kasawule so a?

³⁴Feeŋ tiŋ ŋ kaŋɛ awɔlpa nɛ a shin nɛ bɔrɛgboŋ e ba a?

³⁵Fo e naa kaŋɛ bɔrɛ nɛ k bee nyɛkpɛ a?

Nɛ fo e naa kaŋɛ kumo, k bee nu a sa fo a?

³⁶Fo e naa ŋini ebɔnbɔŋɛ kechali

nɛ ketar be jemanɛ nɛ a bee ba nsaa yɔ a?

^37-38Feeŋ tiŋ ŋ karga awɔlpa ŋko n shin nɛ nchu nɛ a wɔ

amo to na e ba bɔrɛ kasawule wɔlso so a?

³⁹Nɛ akoŋ kɔ ebuluŋ, fo e naa chɛ

amo to nɛ a bee nya asɔbɔya a pɛ a ji a?

⁴⁰Fo e naa kaŋɛ ebuluŋ nɛ a bee

yɔ amo be edikpa a?

⁴¹Wanɛ e naa sa ejɔnɔkoso

nɛ amo be bibi ajibi

jemanɛ nɛ akoŋ kɔ amo nɛ

a bee shu a tre ma a fin ajibi na?

Enyɛnpe Ebɔrɛ ka kraa malga be asheŋ

¹Fo nyi jemanɛ nɛ kebee so be mboe nɛ echibir bee kurge a?

Fo daŋ yili ŋ keni a kaa bee kurge amo be bibi a?

^2-3Afɔl afanɛ nɛ a bee dii adampo nsaa kurge?

Fo nyi saŋɛ nɛ a bee kurge a?

⁴Amo be bibi maa chɛr nsaa nya eleŋ

nsaa yige amo nioana be kebɛ so n ya ka ji amo be amu so

nsaa maŋ naa bɛta a ba amo nioana kutɔ ashi kupuŋ to.

⁵Wanɛ e naa tuge kupuŋ to be ekurma afɔl so

nɛ a bee nya amo be amu a nite a kulti?

⁶Ma, Enyɛnpe Ebɔrɛ na nawule e naa chɛ emo to

nɛ a bee tiŋ a wɔ keshishɛrsawule nɛ nfɔl wɔ kumo be shishɛr to na.

⁷Kupuŋ to be ekurma ere barga ndegboŋ nna

a wɔ kupuŋ to wɔfɔ ŋkpal a ka maa sha awɔr so.

Amo alɛ maaŋ shuli nɛ esa e pɛ amo n ta amo n shuŋ.

⁸Ama a bee nite a kulti abee so nna

a fin afitiri bumbuŋ a ji.

⁹Kupuŋ to be kena beeŋ shuli

m ba kaa wɔ fo kenalu to nsaa shuŋ a sa fo a?

¹⁰Feeŋ tiŋ n ta kubɔ to be kebarga

n wɔtɔ kumo n shin nɛ k dɔ a?

Ŋko n shin nɛ k gberge katekpa

m pumpuŋ kudɔ to a?

¹¹Feeŋ shuli n to eyur n lɛ kumo so nɛ k ta eleŋgboŋ

nɛ k kɔ na n shuŋ ashuŋ kpakpaso n sa fo a?

¹²Feeŋ shuli n yirda kumo nɛ k sulɔ fo

ayu teŋiso m bar fo nɛ fo wɔtɔ mpuro to a?

¹³Nyiŋgbeŋ bee ber atɛ to manaŋ manaŋ ga,

ama kumo alɛ maaŋ tiŋ n firgi n fo tɔkɔrkɔ so.

¹⁴Nyiŋgbeŋ bee yige kumo be afule nna

a nase kasawule nɛ kasawule na e bel amo edɛ.

¹⁵K maŋ nyi fanɛ esa ŋko kusɔbɔya ko

beeŋ tiŋ n chichi amoso m bure.

¹⁶K bee wora nna fanɛ

afule na ka maŋ la kumo peya na.

Kumo alɛ be kegben jiga be asheŋ

maŋ tir kumo.

¹⁷Ŋkpal manɛ so, mee to kumo

kusɔbɔya wulpo nɛ k maŋ nyi shɛŋ.

¹⁸Ama nɛ k baŋ fara a shile,

k bee choŋ egbaŋɛdiipo so nna nsaa mushe bumo.

¹⁹Fo, Job e sa egbaŋɛ eleŋ

ŋko amo be kubɔ so be afuibi na a?

²⁰Fo e shin nɛ a bee tiŋ a tɛ fanɛ abamber a,

ŋko a fute eleŋso a funti basa na a?

²¹B baaŋ dii egbaŋɛ a yɔ kena to,

a bee mur aya kasawule nna ŋ kpa eshishɛr,

n shile eleŋso n luri kena na to.

²²A maŋ nyi kusɔ nɛ baa tre kufu,

amo alɛ maa wu tokobi nsaa shile kumo.

²³Amo be bediipo be akɔsɔ bee kpla

abar nna nsaa nyɛkpɛ epeŋi so.

²⁴Egbaŋɛ bre maaŋ tiŋ n yili boeŋ.

Kena to be mbel baŋ shu,

a bee yarase a yɔ kena to nna.

²⁵Kabel baŋ shu, baa fute eleŋso nna.

Baa nu kena be asheŋ kufɔ nna,

nsaa nu amo be bediipoana be mmalga.

²⁶Jemanɛ nɛ kɔl bee firgi a yɔ kelargato be kaseto

ketarso na, fo e ŋini kumo nɛ k keparga atɛ n firgi a?

²⁷Fo e naa kaŋɛ kusore nɛ k bee firgi esoso

nsaa tɔ kumo be kesha abee be awɔlto a?

²⁸K bee ta kebee be awɔlto nna a ki kumo pe,

nɛ kebee na be afalta na e baa kuŋ kumo.

²⁹Ndoŋ nɛ k bee shi a keni kufɔ nɛ tatato,

nsaa wu kusɔ nɛ k beeŋ nya m pɛ n ji.

³⁰Ejɔnɔkoso bee bar asɔ nɛ e bee pɛ nna

nɛ emo be bibi e baa chala a mel amo so a ji.

Enyɛnpe Ebɔrɛ ka kraa malga asheŋ

¹Ndoŋ nna nɛ Enyɛnpe Ebɔrɛ na naŋ kaŋɛ Job le:

²“Ma e la Enyɛnpetale Ebɔrɛ na,

ama fo, Job malga ŋ kasar ma ŋ kaŋɛ fanɛ

m maŋ wora n nyalɛ.

To, sa ma mmalga nɛ m bishi fo na be atuwebi naniere.”

Job ka tuge Ebɔrɛ be kamalga to be asheŋ

³Ndoŋ nna nɛ Job kaŋɛ Enyɛnpe Ebɔrɛ le:

⁴“Ma alɛ e la wanɛ nɛ n tiŋ n tuge fo mmalga?

Mee wora ma kɔnɔ kare nɛ m malga ŋ kasar fo.

⁵N daŋ malga kela koŋwule ŋko ale anyɔ ko nna,

ama m maaŋ naŋ malga kikɛ.”

⁶Kede be kaman nɛ bɔrɛfugboŋ ko ber m ba

nɛ Enyɛnpe Ebɔrɛ na bɔla kumo to

ŋ kaŋɛ Job le:

⁷“Kilgi fo anishito n shoŋi ma nseŋ sa ma

asheŋ bishiso ere be atuwebi!

⁸Fee sha nɛ fo ŋini fanɛ m maa ji asheŋ nɛ amo be ekpa so.

Ma e maŋ wora n nyalɛ, fo ere e wora n nyalɛ, ŋko?

⁹Fo eleŋ fo ma eleŋ so a?

Fo ebɔl beeŋ tiŋ m ponte to fanɛ meya a?

¹⁰Kumo ere shin nɛ ekama e wu kemaŋkura

nɛ yukugboŋ nɛ fo kɔ na.

¹¹Keni basa nɛ baa maŋ bumo be amu so,

nseŋ shin nɛ fo kanya agbogboŋ e bar

bumo kaseto nɛ ŋ keni!

¹²To, bar bumo nɛ kumukpakpaso wuraana

kaseto nseŋ chichi bumo so kakpa nɛ b wɔ na!

¹³Ta kesaŋɛ ŋ ŋmea bumo be ekama nseŋ gama bumo

n ya puli nchaŋ to!

¹⁴Nɛ fo tiŋ n wora ade kikɛ, ŋ gbagba beeŋ shuli so

fanɛ fo e kɔ kashenteŋ.

¹⁵Keni churu le.

Ma e to kumo nɛ fo kikɛ.

Ama afitiri nawule nɛ k bee ji fanɛ kena.

¹⁶Keni kananɛ k pɔl eyur to

nsaa kɔ eleŋ aya ase loŋ.

¹⁷Kumo be kodu yil nna fanɛ

kakubadibi,

nɛ kumo be ebɛaŋ malɛ pɔlto nɛnɛ.

¹⁸Kumo be awibi be eleŋ du fanɛ

danyaŋ peper ŋko kebɛlso nna.

¹⁹Ma e to kumo nɛ k kɔ eleŋ a chɔ

ma asɔ toso kikɛ,

ama ŋ kraa chɔ kumo eleŋ.

²⁰Abee to nɛ k bee nya afitiri a ji

nɛ asɔbɔya nɛ a ka na malɛ e baa wɔ ndoŋ a pel.

^21-22Ndibi nɛ a yil lɔrkar be kiyoyul to

nɛ k bee dese a wushi nsaa ŋana

agasa nɛ a yil kakpa nɛ k bee pete nchu na to.

²³Jɔɔdan be Lɔr na bee da nchu a buu kumo gba,

k bee dese boeŋ nna a maa lɔ kufu.

²⁴Wanɛ e naŋ tiŋ m buu kumo be anishi so m pɛ kumo?

Ŋko n ta kusɔ ŋ kɔl kumo be kamuna to m pɛ kumo?”

Enyɛnpe Ebɔrɛ ka kraa malga asheŋ

¹Feeŋ tiŋ n ta kɔrɔtɔ be dariwa m pɛ

kusɔbɔya gboŋ lubi nɛ k wɔ teku to nna a?

Ŋko ŋ kre kumo be kɔnɔ afɔl n nase a?

²Feeŋ tiŋ n futi kumo be kamuna n wɔtɔ kumo efɔl a?

Ŋko n ta dariwa n da kumo be ketaya m bɔl a?

³K beeŋ shuli ŋ kule fo fanɛ fo wu kumo kuwɔr a?

Ŋko m malga boeŋ boeŋ n sa fo a?

⁴K beeŋ shuli fanɛ k beeŋ baa la

fo kenya mbaanaayɔ a?

⁵Feeŋ tiŋ n chɛ kumo afɔl fanɛ kabuibi

n sa fo mbia nɛ b keta a pɛl a?

⁶Eyawujipo beeŋ shuli n ji kumo be kebɛ a?

Baaŋ shuli ŋ kuya kumo to n fa a?

⁷Esa beeŋ tiŋ n da kumo kekpa

ŋko n to kumo malfa m mɔ a?

⁸Fo baŋ tu kumo ŋ kɔ kela koŋwule,

fo maaŋ naŋ shuli n tu kumo ŋ kɔ kikɛ.

⁹Esa kama nɛ e wu kusɔkpaŋ lubi gboŋgboŋi na

kenishiso bee paŋ mbe kenyɛn nna nseŋ tɔr kasawule.

¹⁰Nɛ esa kikɛ maŋ kɔ eleŋ nɛnɛ nɛ e tiŋ

n tu kumo ŋ kɔ,

kumo ere wanɛ e naŋ tiŋ n tu ma ŋ kɔ?

¹¹Ma e naa yili asheŋ a sa durnya kikɛ,

ma alɛ maŋ ji esa kikɛ be kukɔ.

¹²Shin nɛ ŋ kaŋɛ fo kusɔ ko a laŋɛ kusɔkpaŋ lubi

gboŋgboŋi ere be aya be kaplɛa so

nseŋ bugi kumo be keshi nɛ eleŋ be asheŋ to ŋ kaŋɛ fo.

¹³Esa kikɛ maaŋ tiŋ n luu kumo be kawɔl,

ŋko n ta kebarga n wɔtɔ kumo be kɔnɔ to.

¹⁴Esa kikɛ maŋ shuli m bugi kumo be kɔnɔ,

ŋkpal manɛ so,

kumo be kɔnɔ to be anyi bee keta kufu nna.

¹⁵Abɛlso be asɔ kuŋkumuso e buu

kumo be kaman kikɛ so.

Amo alɛ pɛ abar nna a kɔ eleŋ fanɛ kejembu.

¹⁶Kekama pɛ kumo barkasa to be kpakpa nna,

afu gba maaŋ tiŋ n luri amo be kefɛato.

¹⁷Amo alɛ naŋ pɛ abar nna ga

nɛ shɛŋ maaŋ tiŋ m marga amo ashi abar so.

¹⁸Kusɔkpaŋ lubi gboŋgboŋi ere

baŋ kpa kamuna to, edɛ e naa lar.

Kumo be anishi malɛ bee kpa edɛ nna

fanɛ epeŋi ka pete na.

¹⁹Edɛ wuloŋ wuloŋ e naa lar kumo be kɔnɔ to,

a shin nɛ edɛ be adondulombi bee parga to a sɔ kaplɛkama.

²⁰Edishi malɛ bee lar kumo be kamuna to nna,

fanɛ kapuliya fuloŋ ka bɛ asure so nɛ edishi bee kaa kumo to na.

²¹K baŋ fute, kakpa bee suse edɛ nna,

ŋkpal edɛ be adondulombi kaa bee lar

kumo be kɔnɔ to so.

²²Kumo be kubɔ kɔ eleŋ ga,

nɛ ekama nɛ e tu kumo,

kufu bee pɛ mo nna nɛ e baa chicha.

²³Kumo be kawɔl be kaplɛkama maŋ du pɔtɔ pɔtɔ,

kumo kikɛ baa du kpakpa nna fanɛ kebɛlso na.

²⁴Kumo be kagbene so du kpakpa ga nna

fanɛ kuboo.

²⁵Kusɔkpaŋ lubi gboŋgboŋi ere

baŋ lara kumo be kumu efuli

kufu bee pɛ belempo gba nna

nɛ b baa shile.

²⁶Tokobi ŋko kekpa kikɛ maaŋ tiŋ

n doro kumo kikɛ.

²⁷Danyaŋ ŋko abɛlso be akɔsɔ

du fanɛ agasa ŋko ndibi wuso

nna n sa kumo.

A maaŋ tiŋ n wora kumo shɛŋ.

²⁸Atanyembi maa shin nɛ k bee shile,

ŋkpal manɛ so, k maa ŋana amo.

Ketababu be kejembu malɛ du

fanɛ kuyu be kewabi nna n sa kumo.

²⁹Kaprɛ bre du fanɛ kegasa nna n sa kumo,

basa baa kpa kumo akpa, k bee mushe bumo nna.

³⁰K baa gbeye depɔ to, kumo be epun so

be afɔfɔ nɛ a du fanɛ mpɛlanfu na

bee kori depɔ nna nsaa nase kubɔr.

³¹Nɛ k baŋ muni nchu be kechimbi to malɛ

nchu na bee fɔnɔto nna nɛ teku na to e baga to

fanɛ ŋku ka bɛ edɛ so a falte na.

³²Nɛ kumo be kubɔr e baa nyɛkpɛ a bɛ kumo so

nɛ teku be nchu na e ka kupɔpɔ.

³³Kupɔrso kikɛ maŋ wɔtɔ durnya to

nɛ k kɔ kenyɛn n fo kumo so.

K maa ŋana kufu kikɛ.

³⁴Kumo e la ewura asɔbɔya ŋana so kikɛ to.

Amoso k bee keni amo kikɛ jiga nna.

Job ka tuge Enyɛnpe Ebɔrɛ be kamalga na to be asheŋ

Job

¹Ndoŋ nna nɛ Job malɛ kaŋɛ Enyɛnpe Ebɔrɛ le:

²“Enyɛnpe Ebɔrɛ, n nyi fanɛ fo e la Enyɛnpetale Ebɔrɛ na.

Ma alɛ nyi fanɛ feeŋ tiŋ n wora kusɔ kama nɛ fee sha.

³Fee bishi kusɔ nɛ k ba nɛ mee malga ga,

jemanɛ nɛ ma mmalga maŋ kɔ shɛŋ amo to.

Kashenteŋto, asɔ nɛ a baŋ ma kepinto so ga

be asheŋ nɛ m malga.

⁴Fo kaŋɛ ma fanɛ n lo to n nu fo kutɔ

nseŋ sa asheŋ bishiso nɛ feeŋ bishi ma na

be atuwebi.

⁵Beko kutɔ nɛ n daŋ nu fo asheŋ,

ama naniere bre ŋ gbagba wu fo kenishiso.

⁶Amoso nɛ ŋ gbagba be asheŋ bee nu ma agbo

nɛ n tuba nseŋ chena nsunɔ to,

a ŋini kebɔltofinfin nɛ k kɔ ma.”

Enyɛnpe Ebɔrɛ ka naŋ nɛfa Job be asheŋ

⁷Job ka malga n loge nɛ Enyɛnpe Ebɔrɛ kaŋɛ Job mo nekpa, Ɛlifaz nɛ e shi Teman be kadegboŋ to na le: “Kusɔ nɛ ma kayɛrbi Job kaŋɛ a laŋɛ ma kaplɛa so na la kashenteŋ nna, ama n nya agbo nna n wora fo nɛ fo nekpaana benyɔ na, ŋkpal men ka kini keji kashenteŋ na so. ⁸Amoso mee sha fanɛ men ta egbolu ashunu nɛ ekpakpa ashunu n ya sa Job nɛ e ta amo n yili men be katelamu to n lara sarga chɔɔso nɛ k beeŋ par ma. Kumo be kaman nɛ ma kayɛrbi Job e kule Ebɔrɛ n sa menyi nɛ n sɔ mbe kekule na nsaa maaŋ naŋ wora menyi kusɔ nɛ k daga menyi ŋkpal menyi be kawuli so. Menyi maŋ malga kusɔ nɛ k daga a laŋɛ ma kaplɛa so fanɛ kananɛ ma kayɛrbi Job bre wora na.”

⁹Ndoŋ nna nɛ Job mo nekpaana besa na, Ɛlifaz nɛ Bildad nɛ Zofa, wora kusɔ nɛ Enyɛnpe Ebɔrɛ na kaŋɛ bumo na, nɛ Ebɔrɛ sɔ Job be kekule nɛ e kule n sa bumo na.

Asheŋ ka nyalɛ n sa Job be asheŋ

¹⁰Job ka kule Ebɔrɛ n sa mo nekpaana na be kaman, nɛ Enyɛnpe Ebɔrɛ na naŋ shin nɛ e naŋ nya asɔ nɛ e daa kɔ nseŋ paŋ amo na be kekama be ntuŋ anyɔso nseŋ naŋ dii kedama ga n ti so. ¹¹Kumo be kaman nɛ Job wora kejigboŋ n sa mo niopibiana kikɛ nɛ mo teri draana kikɛ ashi mbe laŋ to. B daŋ ba wushi mo kagbene nseŋ lolo mo nna a laŋɛ etɔrɔ nɛ Enyɛnpe Ebɔrɛ na daŋ sa ekpa nɛ a ba mo so na kikɛ be kaplɛa so nna. Bumo be ekama daŋ sa mo amansherbi nɛ shuwa be kepinibi nna.

¹²Ade kikɛ be kaman, nɛ Enyɛnpe Ebɔrɛ na naŋ nɛfa Job a chɔ kananɛ e daŋ nɛfa mo dra na. E daŋ naŋ sa mo mbolpɔ ŋgboŋ kuduana nɛ enyɔma ŋgboŋ ashe nɛ egbolu dɔso be benyɔ nyɔ be ntuŋ kagboŋ nɛ ekurma kagboŋ nna.

¹³E daŋ naŋ sa Job bibinyɛn ashunu nɛ bibiche asa nna. ¹⁴Nɛ Job nase mo pibiche sososo na Jimaima nseŋ nase enyɔsopo na Keziya nɛ esasopo na malɛ Kɛren Happuk. ¹⁵Eche kikɛ daa maŋ wɔ kasawule na so nɛ e walɛ kebita n fo Job be bibiche asa na so. Bumo tuto malɛ daŋ yige kapetɛ nna n sa bumo nɛ bumo danyɛnsoana na.

¹⁶Ade kikɛ be kaman, Job daŋ ji nfɛ kalfa nɛ adena nna pɔɛŋ nseŋ wu. E daŋ nya benanabiana nna hale n ya fo bumo nɛ b bɛ so benasopo gba. ¹⁷E daŋ bel nɛnɛ nna pɔɛŋ nseŋ wu.