JEEMS

KAWƆL NƐ

JEEMS

SIBƐ NA

¹Kawɔl ere shi ma Jeems nɛ n la Ebɔrɛ nɛ Enyɛnpe Yesu Kristo be kenya na kutɔ nna a yɔ menyi Israɛlebi be nnaŋ kuduanyɔ nɛ men pesaŋ to a wɔ durnya kikɛ to na kutɔ. Mee chɔrɔ menyi kikɛ.

Yirda nɛ kanyiasheŋ be asheŋ

²Ŋ kurgepoana, saŋkama nɛ men baŋ luri kechɔŋkeni be yiri kikɛ to, men shin nɛ men be ŋgbene e baa fuli menyi. ³Ŋkpal manɛ so, men nyi fanɛ nɛ men baŋ pɔɔ kechɔŋkeni na so a yirda Ebɔrɛ, menyeeŋ nya eleŋ n ti so a tiŋ a pɔɔ kechɔŋkeni be yiri kikɛ so. ⁴Men baa shin nɛ men be kechɔŋkeni be eleŋ e baa yɔ anishito a wora keshi saŋkama a ti so nɛ men be eda e ba kaa walɛ nɛnɛ a maa paŋ kelela kikɛ.

⁵Ama menyi to be ekama nɛ e maŋ kɔ kanyiasheŋ nsaa pin kusɔ nɛ e beeŋ wora a gben, amodoŋwura e kule Ebɔrɛ nɛ e chɛ mo to, ŋkpal manɛ so, Ebɔrɛ e naa bugi kagbene a sa basa asɔ nsaa maa bishi bumo nnɔ. Amoso, fo kama nɛ fo kule mo kanyiasheŋ, fo maaŋ paŋ kumo. ⁶Ama fo kama nɛ fo kule mo kusɔ kama, fo yirda fanɛ e beeŋ sa fo kumo nsaa maa wora shikashika, ŋkpal manɛ so, esa kama nɛ e bee kule Ebɔrɛ asɔ nsaa wora shikashika, du fanɛ afugboŋ ka bee kaa ketili nchu so a yɔ a ba na nna. ⁷Loŋ be esa e sa maa fɛ kenya shɛŋ Ebɔrɛ kutɔ, ⁸ŋkpal manɛ so, nfɛranyɔnyɔwura be asheŋ woraso kikɛ maa lar anishi.

Keshin nɛ fo kagbene e baa fuli fo be asheŋ

⁹Ekurgepo kama nɛ e maŋ la shɛŋ basa kutɔ e shin nɛ mbe kagbene e baa fuli mo fanɛ mbe ketre dii Ebɔrɛ be anishito. ¹⁰Ekurgepo kama malɛ nɛ e la damawura e baa shin nɛ mbe kagbene e baa fuli mo fanɛ Ebɔrɛ bar mo kaseto, ŋkpal manɛ so, e maaŋ chɛr nɛ mo nɛ mbe asɔ na e mur fanɛ kananɛ kusɔ duuso be atoto maa chɛr nsaa wɔl a buri to a tɔr na. ¹¹Epeŋi e naa kaa nyaŋɛ le nyaŋnyaŋ a chɔɔ keduuso nɛ k bee wɔl a jija kumo be atoto be kela nsaa gbete a tɔr. To, loŋ gbagba chap e naa wora damawura. E bee kaa wɔ mbe ashuŋ to nna nɛ luwu e ba tu mo.

Kewora esa ŋ keni be asheŋ

¹²Ekama nɛ e pɔɔ kechɔŋkeni so, kagbenefuli beeŋ baa wɔ mo to, ŋkpal manɛ so, Setani baŋ chɔ mo ŋ keni ŋ gben. Ebɔrɛ beeŋ sa mo mbe ŋkpa nɛ e nase kɔnɔ fanɛ e beeŋ sa bekama nɛ baa sha mo na. ¹³Ekama nɛ e luri kechɔŋkeni to e sa maŋ kaŋɛ le: “Ebɔrɛ e fule ma n wɔtɔ kulubi na to,” ŋkpal manɛ so, shɛŋ shɛŋ maaŋ tiŋ n shin nɛ Ebɔrɛ e wora kulubi, mo alɛ gbagba maa fule esa a wɔtɔ kulubi to. ¹⁴Kusɔ nɛ k bee fule esa a wɔtɔ kulubi to e la mo gbagba be kayɛlga lubi. Le be kayɛlga ere baŋ pɔɔ mo so, k bee gberge mo nna a luri kulubi to. ¹⁵Kulubi malɛ baŋ ba wora keshi, kumo be lalaloge e la luwu.

¹⁶Ŋ kurgepo shasoana, men sa maŋ fule men be amu.

¹⁷Kelela be yiri kikɛ nɛ kakɛ lela kikɛ bee shi ebɔrɛso nna a ba. Ebɔrɛ nɛ e to kefulto na kutɔ nɛ asɔ na kikɛ bee shi a ba. Ebɔrɛso be kefulto bee kaa chɛrga a bar tentembiri, ama Ebɔrɛ bre maa chɛrga kikɛ. ¹⁸Mo gbagba e yili kumo fanɛ e bɔla mbe kashenteŋ be kamalga na to n shin nɛ an ki mbe kepɔrso kikɛ be basa juŋkparso.

Kebaanu nsaa wora be asheŋ

¹⁹Ŋ kurgepo shasoana, men ta kesheŋ ere n wɔtɔ ŋgbene to a nyi fanɛ ekama e baa nya manaŋ a nu asheŋ, ama e sa maa nya manaŋ a malga asheŋ ŋko a nya agbo manaŋ manaŋ, ²⁰ŋkpal manɛ so, mannɛ kanya agbo so nɛ esa bee bɔla a wora alelasheŋ nɛ a bee par Ebɔrɛ. ²¹Amoso, men lara kulubi be yiri kikɛ menyi to nsaa gelge asheŋ lubi nɛ a kulti menyi na kikɛ. Men sɔ Ebɔrɛ be kamalga nɛ e ta n wɔtɔ men be ŋgbene to na a du boeŋ, ŋkpal manɛ so, kamalga na e naa tiŋ a mɔlga men be ayoyu ashi luwu to. ²²Ama men baa la benupo nɛ baa nu a wora nsaa maa nu kamalga na jiga a fule men be amu. ²³Nɛ men baa nu kamalga na nsaa maa wora asɔ nɛ k bee ŋini na, men du fanɛ esa nɛ e keni digi to n wu mbe kumu ²⁴nseŋ ta digi na n nase nseŋ teŋ kananɛ mbe anishiakpa du epul na to na nna. ²⁵Ama nɛ esa baa ta mbe nfɛra kikɛ a wɔtɔ Ebɔrɛ be mbraana nɛ a maŋ kɔ kulubi amo to kikɛ nsaa tiŋ a lara basa alubi to na to a maa teŋ asɔ nɛ e koya na so nsaa kɔ amo to kpakpa a wora asɔ nɛ a bee ŋini na, Ebɔrɛ beeŋ nɛfa amodoŋwura.

²⁶Esa kama nɛ e yɛ e bee bɛ Ebɔrɛ so nsaa maa de mmalga nɛ a bee lar mbe kɔnɔ to so bee fule mbe kumu nna, nɛ mbe kebɛso na malɛ la kebɛso fuloŋ. ²⁷Kashenteŋ nɛ kagbene koŋwuleso be kebɛso nɛ Ebɔrɛ Etuto na bee sha fanɛ basa e baa kɔ e la kebaachɛ amunibi nɛ bekulpocheana nɛ b wɔ awurfoŋ to to nsaa de mo gbagba be kumu so nɛ durnya to ebi be alubi e sa maŋ jija mo.

Men sa maa kɔ ŋkpɛato be asheŋ

¹Ŋ kurgepoana, ŋkpal men ka yirda an Nyɛnpe Yesu Kristo nɛ kemaŋkuragboŋ wɔ mo so na so, men sa maa kɔ ŋkpɛato. ²An ta fanɛ basa anyɔ ko e ba men be nshɛr to nɛ eko la damawura m buu asɔ lela nseŋ wɔtɔ eshuwa be mpinibi ashilbi to, nɛ emo na malɛ la etirpo nseŋ buu asɔ farbi, ³nɛ men sa damawura na bunyaŋ ga nseŋ kaŋɛ mo le: “Ba chena kabɛ lela ere so nfe,” kumo be kaman nɛ men kilgi ŋ kaŋɛ etirpo na malɛ le: “Choŋ n yili ndoŋ ere,” ŋko “Ya chena ekarso ndoŋ ere.” ⁴Le be mmalga ere maŋ walɛ, ŋkpal manɛ so, nfɛra lubi so nɛ men yil a kpɛa to na.

⁵Ŋ kurgepo shasoana, men baa nyi fanɛ basa nɛ b maŋ kɔ shɛŋ basa be anishito na nɛ Ebɔrɛ lara fanɛ b yirda Yesu Kristo nseŋ ki damawuraana ashi Ebɔrɛ be anishito nseŋ nya n luri mbe kuwura mo nɛ e nase kɔnɔ fanɛ e beeŋ sa basa nɛ baa sha mo na to. ⁶Ama le be basa ere nɛ menyi ere bee fɛl ŋkeshin nɛ mannɛ damawuraana e naa kaa tɔrɔ menyi nsaa nyaŋ menyi a yɔ edemujikpaana na a? ⁷Bumo damawuraana koŋwule na chap e naa kaa malga a gbiti Yesu Kristo be ketre lela nɛ basa ta a tre menyi na. ⁸Le nɛ abɔrɛsibɛ na bee kaŋɛ: “Baa sha fo barkasa fanɛ kananɛ fee sha fo kumu.” Le be mbra ere shi Ebɔrɛ be kuwura na to nna m ba, nɛ fo kama nɛ fo bɛ kumo so, fo wora nɛnɛ. ⁹Ama nɛ fo kpal kananɛ basa du so a bunyaŋ bumo nsaa fɛl beko, kulubi nɛ fee wora na, Ebɔrɛ malɛ kutɔ fo tɔr ntaŋ. ¹⁰Nɛ esa kaŋɛ fanɛ e bee bɛ Ebɔrɛ be mbraana na kikɛ so nseŋ wora n da amo to be kukoŋwule gba so, amodoŋwura tɔr Ebɔrɛ be ntaŋana kikɛ. ¹¹Ŋkpal manɛ so, Ebɔrɛ koŋwule nɛ e kaŋɛ fanɛ: “Men sa maa kɔ kesakalea” na koŋwule na e kaŋɛ le: “Men sa maa mɔ abar.” Amoso, nɛ esa maŋ tɔr kesakalea be ntaŋ gba nseŋ mɔ esa, e tɔr Ebɔrɛ be ntaŋana na kikɛ. ¹²Amoso, men be mmalga nɛ men be asheŋ woraso kikɛ to, men baa nyiŋi fanɛ kachako Ebɔrɛ beeŋ bɔla mbe mbraana nɛ a bee lara basa alubi to na so ŋ keni ekama be kebaawɔtɔ to n ji mo demu. ¹³Esa nɛ e maa wu mo braana kuwɔr, kachɛ nɛ Ebɔrɛ bee ji amodoŋwura demu e maaŋ wu mo alɛ gba kuwɔr. Ama esa nɛ e bee wu basa kuwɔr, Ebɔrɛ beeŋ wu amodoŋwura kuwɔr a chɔ loŋ.

Yirda nɛ asheŋ woraso be asheŋ

¹⁴Ŋ kurgepoana, esa baŋ kaŋɛ fanɛ e yirda Ebɔrɛ nsaa maa wora yirda be ashuŋ shunso, manɛ be kifi e wɔ mbe yirda na to? Ebɔrɛ beeŋ kpal le be yirda so m mɔlga mo a? ¹⁵An ta fanɛ fo barkasa ebɛsopo kɔ asɔ farbi nna a buu, mo alɛ maŋ naa kɔ kusɔ jiso nɛ e ji, ¹⁶nɛ fo wu mo nseŋ kaŋɛ mo le: “Ebɔrɛ e chɛ fo to nseŋ sa fo asɔbuuso lela nɛ ajibi,” fo alɛ maŋ chɛ mo to n sa mo asɔ nɛ a daga, mannɛ asheŋ fuloŋ nɛ fo wora ere a? ¹⁷To, loŋ gbagba chap nɛ keyirda Ebɔrɛ du fanɛ nɛ esa baŋ kaŋɛ fanɛ e yirda Ebɔrɛ nsaa maa kɔ yirda be ashuŋ shunso, amodoŋwura be yirda na la yirda wuso nna.

¹⁸Nɛ menyi to be ekama kaŋɛ ma fanɛ esa ko wɔtɔ a kɔ yirda nɛ eko malɛ wɔtɔ a kɔ yirda be ashuŋ shunso, meeŋ kaŋɛ amodoŋwura fanɛ e ŋini ma kananɛ esa beeŋ wora ŋ kini yirda be ashuŋ shunso be kewora nsaa bɛ Ebɔrɛ so nɛ kashenteŋ. Kumo be kaman nɛ ma alɛ e bɔla ma ashuŋ shunso so ŋ ŋini mo kananɛ kashenteŋ be yirda du. ¹⁹Fo yirda fanɛ Ebɔrɛ koŋwule e wɔtɔ. To, fo wora nɛnɛ, ama baa nyi fanɛ mbuibi lubi gba bee shuli fanɛ Ebɔrɛ koŋwule e wɔtɔ nɛ kumo alɛ bee keta bumo kufu nɛ baa chicha. ²⁰Ewulpo e la fo nɛ fo maŋ nyi fanɛ esa baŋ kaŋɛ fanɛ e yirda Ebɔrɛ nsaa maa wora yirda be ashuŋ shunso, mbe yirda na la yirda fuloŋ nna a! ²¹An ta fanɛ an nananyɛn Eebraham ŋ keni kusɔ nɛ k ba nɛ Ebɔrɛ daŋ yili kumo fanɛ mo ere Eebraham maŋ kɔ kulubi mo to na. E ka daŋ shuli n ta mo pibi Aizek nɛ e ya lara sarga n sa Ebɔrɛ na so so nɛ Ebɔrɛ daŋ yili kumo fanɛ e maŋ kɔ kulubi mo to na. ²²To, kede e naa ŋini fanɛ Eebraham be kebaawɔtɔ to yirda nɛ kumo be ashuŋ shunso e naa yɔ. E daŋ yirda Ebɔrɛ nseŋ daŋ naa wora alelasheŋ. Le malɛ be kebaawɔtɔ ere e naa ŋini e ka daŋ yirda Ebɔrɛ kashenteŋto. ²³Loŋ malɛ e naa shin nɛ abɔrɛsibɛ na be kɔnɔ bee bɔlɔ fanɛ Eebraham yirda Ebɔrɛ nɛ Ebɔrɛ yili kumo fanɛ e maŋ kɔ kulubi mo to na. Amoso nɛ Ebɔrɛ daŋ tre mo mo teri na. ²⁴To, le e naa ŋini fanɛ esa be ashuŋ shunso so nɛ Ebɔrɛ bee yili kumo fanɛ esa na maŋ kɔ kulubi mo to, mannɛ amodoŋwura be yirda nawule so.

²⁵An naŋ ta sakaleche Reehab, mannɛ kelela nɛ e daŋ wora Israɛlebi be mbɔ ŋ keta bumo kufɔ nseŋ ŋini bumo ekpa nɛ b bɔla ŋ gelge bumo doŋana n yɔ na so e shin nɛ Ebɔrɛ daŋ yili kumo fanɛ e maŋ kɔ kulubi mo to na a?

²⁶To, ade kikɛ e naa ŋini fanɛ yirda nɛ k maŋ kɔ ashuŋ shunso du jiga nna fanɛ esa be kiyoyu ka lar mo to nɛ e ki ebuni a dese na nna.

Kudonduloŋ be asheŋ

¹Ŋ kurgepoana, men be bedamta e sa maa kɔ a fin fanɛ men ki beŋinipoana, ŋkpal manɛ so, asheŋ nɛ Ebɔrɛ beeŋ yili so n ji anyi beŋinipo demu shi a chɔ basa pɔtɛ peya. ²An kikɛ bee kaa wora a foe ekpa. Amoso, esa nɛ mo ere maa malga a foe ekpa, kumo ere kulubi kikɛ maŋ wɔ mo to nɛ mo alɛ bee tiŋ a pɔɔ kulubi be yiri kikɛ so ashi mbe kebaawɔtɔ to. ³An ta fanɛ gbaŋɛ. Nɛ esa baa sha fanɛ gbaŋɛ e nu n sa mo, e bee ta kebarga nna n wɔtɔ kumo be kɔnɔ to nɛ e tiŋ n shin nɛ k yɔ kaplɛkama nɛ e bee sha. ⁴An naŋ ta fanɛ ekuloŋgboŋ nɛ afugboŋ bee kaa kɔ a na nchu so na. Kebaŋɛ nɛ katɛrɛ bee kaa ta a niŋi kumo a yɔ kaplɛkama nɛ e bee sha. ⁵To, loŋ gbagba chap nɛ esa be kudonduloŋ du. K maŋ shi, ama kumo alɛ bee ji asɔgboŋ be njɔŋ ga.

Ekama nyi kananɛ edɛ be kudondulombi ka bee tiŋ a chɔɔ kupuŋgboŋ ŋko? ⁶To, nyiŋgbasa be kudonduloŋ malɛ gba du fanɛ edɛ nna. K la kusɔbi nna a wɔ esa be kɔnɔ to, ama kumo alɛ kulubi be yiri kikɛ e bɔla kumo to a shin nɛ alubi na bee sɔ mbe eyur kikɛ to a jija mbe kebaawɔtɔ kikɛ nyam. K du fanɛ kudonduloŋ na ka kɔ edɛ nna nɛ edɛ na malɛ shi Setani gbagba kutɔ a chɔɔ basa. ⁷Basa bee tiŋ a bela nseŋ tiŋ m bela kupuŋ to be asɔbɔya nɛ mbuibi nɛ asɔ gbeyeso nɛ nchu to be asɔ keniso kikɛ, ⁸ama esa kama maaŋ tiŋ m pɔɔ kudonduloŋ bre so. K bee juge asheŋ to ga nsaa kɔ kɔrtɔ lubi nɛ k bee bar luwu. ⁹Anyi be adonduloŋ na nɛ anyee kaa ta a di an Nyɛnpe Etuto na epaŋ nseŋ naa ta amo a tege an braana nɛ Ebɔrɛ pɔr nɛ b du fanɛ mo gbagba na. ¹⁰Kɔnɔ koŋwule na to nɛ epaŋ be kedi be mmalga nɛ katege be mmalga kikɛ bee shi. Ŋ kurgepoana, loŋ maŋ daga kikɛ. ¹¹Kebuye koŋwule maa pete nchu lela kleŋklembi nɛ nchu bɛso. ¹²Ŋ kurgepoana, menyi alɛ gba baa nyi mangodibi ka maaŋ tiŋ n sɔr apɔl nseŋ naa nyi kapibidibi ka maaŋ tiŋ n sɔr emaŋgo ŋko? Loŋ koŋwule na nɛ esa maaŋ tiŋ n nya nchu belbelso ashi nchu kerkra to.

Ebɔrɛso be kanyiasheŋ be asheŋ

¹³Menyi to be emo e kɔ kanyiasheŋ nsaa nyi ashuŋ to? Amodoŋwura e ta mbe kebaawɔtɔ lela a du boeŋ nsaa wora asheŋ nɛ a daga. ¹⁴Ama fo kama nɛ fo la kumukpakpasowura nsaa kɔ yurkishi a fɛ fo nawule be asheŋ so, kumo ere fo sa maa ji njɔŋ a ku efɛ a kaŋɛ fanɛ fo kɔ kanyiasheŋ. ¹⁵Mannɛ ebɔrɛso nɛ loŋ be kanyiasheŋ shi, durnya ere to nɛ k shi a la basa be nfɛra lubiana be asheŋ nɛ a shi ayoyu lubi kutɔ. ¹⁶Kaplɛkama nɛ yurkishi wɔ nɛ basa bee fɛ bumo nawule be asheŋ so, kɔnɔkoŋwule maŋ wɔ ndoŋ she kulubi be yiri kikɛ. ¹⁷Kanyiasheŋ nɛ k shi ebɔrɛso na bre maŋ kɔ kulubi kikɛ kumo to. Kumo e naa bar kagbenewushi nsaa shin nɛ basa du boeŋ nsaa shuli a nu asheŋ nɛ basa pɔtɛ bee kaŋɛ. Kuwɔr nɛ alelasheŋ e bɔlɔ kumo to. Esa nɛ e kɔ loŋ be kanyiasheŋ maŋ la nfɛranyɔnyɔwura, mo alɛ maŋ kɔ kebirkɔnshi. ¹⁸Bumo nɛ b kɔ kagbenewushi e naa bar kagbenewushi basa to nɛ kumo alɛ be lalaloge la alelasheŋ be kewora.

Durnya be kasha be asheŋ

¹Manɛ e naa bar ana? Manɛ e naa bar nlu nɛ a wɔ menyi to na malɛ? Kusɔ nɛ k bee bar amo nde: Men be nyɛlga lubi e naa kaa kɔ menyi to a leŋ menyi a wɔtɔ nlu na to. ²Kumo e la fanɛ asɔ ko nɛ menyee kaa kɔ a fin kenishipereso a gben nsaa kpal loŋ so a sha kemɔ men braana. Menyee kaa yɛlga men braana gba be asɔ ŋkaa maa nya nsaa kpal loŋ so a kɔ nlu nɛ ana. Men ka maa kule Ebɔrɛ so e shin nɛ men maŋ kɔ asɔ nɛ menyee sha na. ³Menyee kaa kule Ebɔrɛ asɔ saŋko malɛ ŋkaa maa nya amo, ŋkpal manɛ so, nfɛra lubi nɛ men kɔ a kule amo a sha fanɛ men ta amo n wora men gbagba be kejimuni be aparsheŋ. ⁴Basa nɛ esa maaŋ tiŋ n yirda ere! Men maŋ nyi fanɛ nɛ esa baa la Ebɔrɛ mo teri, amodoŋwura malɛ nɛ durnya ere to be asɔ maa ji a kra abar ŋko? To, esa kama nɛ e bee ta mbe kasha a wɔtɔ durnya ere be asɔ to, bee ta mbe kumu nna a ki Ebɔrɛ mo doŋ na. ⁵Ŋko menyee tama fanɛ abɔrɛsibɛ na ka bee kaŋɛ fanɛ: “Ebɔrɛ be kenishi pere kiyoyu nɛ e ta n wɔtɔ anyi to na so ga na,” maŋ kɔ kifi nna a? ⁶K kɔ kifi, ama Ebɔrɛ be kuwɔr e shi ga. Abɔrɛsibɛ na malɛ e naa kaŋɛ loŋ fanɛ: “Ebɔrɛ maa shuli a sa kamoowuwuraana, basa nɛ b maŋ kɔ kamoowu nɛ e bee wu kuwɔr.”

⁷Amoso, men baa ta men be amu a bɔɔ Ebɔrɛ enɔ. Men sa maa sa Setani kashuli kikɛ. Loŋ e naaŋ shin nɛ e baa shile menyi. ⁸Men firgi n taga to Ebɔrɛ nɛ e firgi n taga to menyi. Alubiworapoana nɛ nfɛraanyɔnyɔwuraana ere, men lara men be enɔana nɛ ŋgbene ashi alubi be kewora to. ⁹Men shin nɛ men be ŋgbene e baa jija menyi nɛ men baa boŋ to a shu ŋkpal men be alubi na so. Men shin nɛ men be emushe nɛ men be ŋgbenefuli e ki kushu nɛ kenawule be ŋgbenejija. ¹⁰Men baa yɔɔ men be amu Ebɔrɛ be anishito nɛ e maŋ menyi so.

¹¹Ŋ kurgepoana, men sa maa ji abar be asheŋ a wu abar kulubi. Ekama nɛ e ji mo barkasa be asheŋ n wu mo kulubi e bee ji mbra na be asheŋ a wu kumo kulubi nna na. Fo kama malɛ nɛ fo wu mbra na kulubi, kumo ere fo maŋ naa nu a sa mbra na nna na, ama fo ki esa nɛ e bee ji kumo demu. ¹²Ebɔrɛ nawule e la esa nɛ e bee nase mbra na, mo alɛ nawule e la kumo be Demujipo. Mo nawule e naaŋ tiŋ m mɔ nseŋ naaŋ tiŋ n sa ŋkpa. Nɛ fo alɛ nyiŋgbasa e la wanɛ nɛ fo tiŋ n ji fo barkasa demu?

Kebaaji njɔŋ be asheŋ

¹³Menyi nɛ menyee kaa kaŋɛ le: “Kabre ŋko echefo anyeeŋ yɔ le nɛ le be kade to n ya chena ndoŋ kafɛ n ji yawu n dii dama na” e nu nfe. ¹⁴Men maŋ nyi kusɔ nɛ k beeŋ wora echefo gba. Manɛ e la men be ŋkpaana ere? Men be ŋkpaana ere du fanɛ kenyɔlɔ nna, a maa chɛr nseŋ naa yɔ epul na to. ¹⁵Kusɔ nɛ k daga fanɛ men baa kaŋɛ e la: “Nɛ Ebɔrɛ shuli nɛ ŋkpa kraa wɔtɔ, anyeeŋ wora le nɛ le.” ¹⁶Ama menyi ka maa kaŋɛ loŋ ere, menyee wu men be amu nna na nsaa ji njɔŋ. Loŋ malɛ maŋ walɛ.

¹⁷Fo kama malɛ nɛ fo nyi kusɔ nɛ k daga nsaa maŋ wora kumo, fo wora kulubi nna na.

Damawura lubiana be asheŋ

¹To, damawuraana, men nu nfe. Men baa boŋ to a shu ŋkpal alemaŋkar be tɔrɔ nɛ k bee ba menyi so na so. ²Men be ekpanjawu to be asɔ teŋ fara a jija nɛ elala fara a ji men be asɔbuuso. ³Men be eshuwa nɛ egbiti gba kreŋ so a jija. Amo be kananɛ a du na e naa ŋini fanɛ men maŋ wora n nyalɛ nɛ kumo alɛ naa ji a luri men be eyurana to fanɛ edɛ na. Lalaloge be nchɛ to nɛ an wɔ na, ama men keni kananɛ men bela asɔ damta m miiri so n yili loŋ. ⁴Basa nɛ men shin nɛ b dɔ menyi, men kini keka bumo nɛ baa shu a ŋini basa kikɛ, bumo nɛ men ber paa nɛ b teŋi men be asɔ na gba be eyur nyaŋ bumo nɛ baa shu, bumo be kushu na malɛ luri Ebɔrɛ be asoe to. ⁵Asɔ lela nɛ ebel be keji to nɛ men baa wɔ durnya ere to. Men daŋ nna a du fanɛ ana nɛ b bela nɛ a daŋ nɛ b kɔ a yɔ nɛ b ya mɔ na nna. ⁶Men wu basa cheembi kulubi nseŋ mɔ bumo. Bumo alɛ maŋ nya kɔnɔ m bugi.

Tama be asheŋ

⁷Ŋ kurgepoana, ŋkpal le so, men baa ji kanyiti a jo saŋɛ nɛ an Nyɛnpe beeŋ naŋ bɛta m ba na. An ta fanɛ edɔpo ŋ keni kananɛ e bee kaa ji kanyiti. E bee kaa jo nna le nɛ bɔrɛ e ba nɛ mbe asɔ e kɔr n daŋ n wora nɛ e teŋi amo be alela na. ⁸To, menyi alɛ gba e baa kɔ kanyiti loŋ a yil to nɛnɛ, ŋkpal manɛ so, an Nyɛnpe be kenaŋ bɛta mba be saŋɛ na bee taga to.

⁹Ŋ kurgepoana, men sa maa bile asheŋ a sa abar nɛ Ebɔrɛ e kaŋɛ fanɛ men wora kulubi. Men keni, a ka gbrɛbi nɛ an kikɛ be Demujipo na e tu anyi. ¹⁰Ŋ kurgepoana an ta fanɛ anebiana nɛ b daŋ bɔla Ebɔrɛ be ketre so m malga asheŋ na ŋ keni kananɛ b daŋ ji kanyiti. B daŋ luri tɔrɔ to, ama b daŋ ji kanyiti ga. Menyi alɛ gba e bɛ bumo be aya so n wora loŋ. ¹¹Basa nɛ b daŋ ji loŋ be kanyiti a yil to na nɛ anyee kaŋɛ fanɛ b wɔ nɛfa to. Job le, men nu kananɛ e daŋ ji kanyiti tɔrɔ to, nɛ amo be kaman kananɛ Ebɔrɛ daŋ shin nɛ e nu ebel na ŋko? Kashenteŋto, an Nyɛnpe bee shu anyi so ga nsaa wu anyi kuwɔr.

¹²Ŋ kurgepoana, men baa nyiŋi le be kenishipere be kamalga ere fanɛ saŋkama nɛ men baŋ kaŋɛ fanɛ menyee wora kesheŋ, men sa maa bɔ a ti so. Men sa maa ta ebɔrɛso ŋko kasawule so be ketre ŋko kusɔ kikɛ be ketre a bɔ. Men shin nɛ men be mm e baa la mm nɛ men be m-m e baa la m-m. Nɛ menyee wora loŋ, men maaŋ wora n da so nɛ Ebɔrɛ e ji menyi demu.

Kabɔrɛkule be asheŋ

¹³Nɛ tɔrɔ kɔ menyi to be ekama, e kule Ebɔrɛ nɛ e chɛ mo to. Nɛ ekama malɛ nɛ kagbenefuli wɔ mo to, e boŋ nshɛ n di Ebɔrɛ epaŋ. ¹⁴Nɛ menyi to be ekama malɛ bee lɔ, e shuŋi n tre asɔri to be benimu nɛ b ba bɔla an Nyɛnpe be ketre so n duga ŋku n do mo so nseŋ kule Ebɔrɛ n sa amodoŋwura. ¹⁵Nɛ b baŋ kule Ebɔrɛ yirdaso, elɔpo na beeŋ nya eleŋ. Enyɛnpe beeŋ chɛ mo nɛ e niŋi to nɛ alubi kama malɛ nɛ e wora, Ebɔrɛ beeŋ ta m paŋ mo. ¹⁶Amoso, men baa bugi men be alubiana to a kaŋɛ abar nsaa kule Ebɔrɛ a sa abar nɛ Ebɔrɛ e baa chɛ menyi be alɔana. Kashenteŋto, kabɔrɛkule kama nɛ k shi esa nɛ kulubi maŋ wɔ mo to, bee tiŋ a wora asheŋgboŋ ga ŋkpal eleŋ nɛ Ebɔrɛ ta n wɔtɔ kumo to so. ¹⁷An ta fanɛ Elaija. E daa la nyiŋgbasa nna fanɛ anyi nseŋ daŋ ta kenishipere ŋ kule Ebɔrɛ fanɛ bɔrɛ e sa maŋ ba nɛ bɔrɛ maŋ ba kasawule na so nfɛ asa nɛ bargato. ¹⁸Nfɛ nsa nɛ bargato na be kaman nɛ e naŋ kule Ebɔrɛ nɛ bɔrɛ bugi n shin nɛ asɔ kɔr n daŋ. To, Elaija ka kule Ebɔrɛ kusɔ nɛ k wora nna na.

Kechɛ bumo nɛ b foe ekpa to be asheŋ

¹⁹Ŋ kurgepoana nɛ menyi to be ekama baŋ foe kashenteŋ be kebɛso be ekpa na so nɛ eko chɛ amodoŋwura to n naŋ ŋini mo ekpa na ²⁰esa nɛ e chɛ mo to na e baa nyi fanɛ esa kama nɛ e chɛ alubiworapo to nɛ e lar mbe alubi na to mɔlga amodoŋwura be kiyoyu ashi luwu to nseŋ shin nɛ Ebɔrɛ kpra alubi damta n lɛ.