HEEGAI

ANEBI HEEGAI

BE KAWƆL

Bɔrɛlambu na be kelɔŋɛ m pɔr be asheŋ

¹Ewurgboŋ Dariɔs ka ji Pɛshiya be efuli so be kuwura be kafɛ nyɔsopo to be kufɔl shesopo be kachɛ juŋkparso to, nɛ Enyɛnpe Ebɔrɛ bɔla anebi Heegai so m malga. Kubɔya na daa yɔ Juda be efuli so be gomena, Zerubabel nɛ e la Shealtiɛl pibinyɛn na nɛ bɔrɛmatapo nimuso Joshuwa, nɛ e la Jehozadak pibinyɛn na kutɔ nna.

²Kusɔ nɛ Enyɛnpetale Ebɔrɛ na yɛ nde: “Basa ere bee kaŋɛ fanɛ jemanɛ maŋ naŋ fo nɛ b lɔŋɛ bɔrɛlambu na m pɔr ashi Jerusalɛm to.” ³Ndoŋ nna nɛ Enyɛnpe Ebɔrɛ na ta kubɔya ere m bɔla anebi Heegai so n sa basa na. ⁴E yɛ: “Ma basa, manɛ nna nɛ menyi ere wɔ nwu lela to nɛ ma ere be bɔrɛlambu bure a dese? ⁵Menyi maŋ wu kusɔ nɛ k bee wora menyi na nna a? ⁶Men duu asɔ damta, ama asɔ gbrɛbi nɛ men teŋi. Menyee ji ga, ama menyi alɛ maa moɛ. Menyee nuu nchu ga, ama a maa tuge menyi achukoŋ. Menyee buu asɔbuuso, ama men kraa shu awo. Beshumpo bee shuŋ a nya kakɔka, ama k du fanɛ b kaa bee ta amo a wɔtɔ ekɔlgu nɛ a futi to nna.” ⁷Kusɔ nɛ Enyɛnpetale Ebɔrɛ na yɛ nde: “Menyi maŋ wu kusɔ nɛ k ba nɛ le wora a?” ⁸Men dii n yɔ abee so n ya ku ndibi m ba lɔŋɛ ma bɔrɛlambu m pɔr, nɛ ma kagbene e fuli ma nɛ basa e naa bunyaŋ ma kananɛ k daga fanɛ b baa bunyaŋ ma.

⁹Men daa tama keteŋi asɔ damta nna, ama asɔ gbrɛbi nɛ men nya n teŋi. Menyi alɛ ka naŋ bar asɔ nɛ men teŋi na epe, nɛ n shin nɛ afu ba ber amo n yɔ. Manɛ so nɛ n wora loŋ? Ŋkpal ma bɔrɛlambu ka bure a dese nɛ men pere kenishi a pɔr menyi be nwuana so. ¹⁰Amoso nɛ bɔrɛ maa ba nɛ shɛŋ maŋ tiŋ ŋ kɔr na. ¹¹Ma e shin nɛ ewule ba adɔsawule nɛ abee nɛ ndibi sɔrso be adɔ so nɛ kusɔ kama nɛ k bee shi kasawule to nɛ edimɛdi nɛ asɔbɔya kikɛ so, nɛ menyi be kegben kikɛ to jiga na.

B ka wora Ebɔrɛ be kamalga kasonu be asheŋ

¹²Ndoŋ nna nɛ Zerubabel nɛ Joshuwa nɛ basa nɛ b shi kenyaya to ashi Babilɔn be efuli so m bɛta m ba na kikɛ wora kubɔya nɛ Enyɛnpe bumo be Ebɔrɛ na ta m bɔla anebi Heegai so n sa bumo na kasonu ŋkpal b ka bee ŋana Enyɛnpe Ebɔrɛ na so. ¹³Kumo be kaman nɛ anebi Heegai kaŋɛ basa na le: “Enyɛnpe Ebɔrɛ na nase kɔnɔ ŋ kaŋɛ le: ‘Meeŋ baa wɔ menyi kutɔ.’ ”

¹⁴Enyɛnpetale Ebɔrɛ na daŋ ta kenishipere nna n wɔtɔ Zerubabel nɛ e daa la Juda be efuli so be gomena nɛ Joshuwa nɛ e daa la bɔrɛmatapo nimuso na nɛ basa b daŋ pɛ n yɔ efuli pɔtɛana so nɛ b bɛta m ba na to nna nɛ b fara Enyɛnpetale, bumo be Ebɔrɛ na be bɔrɛlambu na kapɔr. ¹⁵Ewurgboŋ Dariɔs ka ji Pɛshiya be efuli so be kuwura na be kafɛ nyɔsopo to be kufɔl shesopo to be kachɛ adunyɔ nɛ ana nɛ b fara kushuŋ na.

Bɔrɛlambu popɔr na be kela be asheŋ

^1-2Loŋ be kafɛ nyɔsopo na be kufɔl shunusopo be kachɛ adunyɔ nɛ kako na nɛ Enyɛnpe Ebɔrɛ na naŋ bɔla anebi Heegai so ŋ kaŋɛ Zerubabel nɛ e la Juda be efuli so be gomena nɛ Joshuwa nɛ e la bɔrɛmatapo nimuso na nɛ basa na kikɛ le: ³“Menyi to be eko beeŋ tiŋ n nyiŋi kananɛ bɔrɛlambu na be kela daa du a? Nuso nɛ k naa du n sa menyi naniere? K maŋ naa la shɛŋ n sa menyi, ŋko? ⁴Ama ekama e sa maŋ pɔ aba. Menyi ere e baa shuŋ kushuŋ na de, ŋkpal manɛ so, n wɔ menyi kutɔ. ⁵Kɔnɔ koŋwule be ŋkre nɛ ma nɛ men nanaana daŋ kre jemanɛ nɛ b daŋ lar Ijipt be efuli so na nɛ ŋ kraa bɛ so na. Ma alɛ be Kiyoyu kraa wɔ menyi to, amoso men sa maa lɔ kufu.

⁶K maaŋ chɛr, meeŋ naŋ gbuŋgbuŋ ebɔrɛso nɛ kasawule so nɛ teku nɛ kasawule wɔlso kikɛ. ⁷Meeŋ baga efuliana na kikɛ to n shin nɛ b bar asɔ lela nɛ baa sha ga na nfe, nɛ ma kemaŋkura e bɔlɔ bɔrɛlambu ere kikɛ to. ⁸Durnya to be shuwa nɛ gbiti kikɛ la meya nna. ⁹Bɔrɛlambu popɔr ere beeŋ lar kebita a chɔ kedra na, nɛ n shin nɛ ma basa e nya kayurwushi nɛ kedamaya nfe ashi.” Ma, Enyɛnpetale Ebɔrɛ na e malga na.

Dra na nɛ echefoso be asheŋ

¹⁰Ewurgboŋ Dariɔs ka ji kuwura ashi Pɛshiya be efuli so be kafɛ nyɔsopo to be kufɔl kpanusopo to be nchɛ adunyɔ nɛ ana na nɛ Enyɛnpetale Ebɔrɛ na naŋ kaŋɛ anebi Heegai le: ¹¹“Bishi bɔrɛmatapoana na atuwebi nɛ b kɔ a laŋɛ asheŋ bishiso nɛ mee sha kebishi ere be kaplɛa so: ¹²Nɛ fanɛ esa pɛ mbe piŋi tenteŋ be kɔnɔso m bɔɔ eblaŋ nɛ k du cheembi ŋkpal b ka ta kumo n lara sarga n sa Ebɔrɛ so, nɛ piŋi tenteŋ na beta bodobodo ŋko ajibi daŋɛso ŋko yabra ŋko ajibi pɔtɛ ko, loŋ beeŋ tiŋ n shin nɛ amo alɛ gba e ki cheembi a?”

Ndoŋ nna nɛ bɔrɛmatapoana na kaŋɛ: “Ayai, loŋ maaŋ tiŋ n wora.”

¹³Ndoŋ nna nɛ Heegai bishi bumo, “Nɛ fanɛ esa wora eyurpi ŋkpal e ka beta ebuni so nseŋ beta ajibi, loŋ be ajibi na gba wora eyurpi a?”

Nɛ bɔrɛmatapoana na kaŋɛ, “Mm, a wora eyurpi.”

¹⁴Ndoŋ nna nɛ Heegai kaŋɛ: “Enyɛnpe Ebɔrɛ na yɛ, aloŋ koŋwule na nɛ k du a laŋɛ basa ere nɛ efuli na kikɛ be kaplɛa so ŋ kutɔ. Kusɔ kama nɛ baa wora nɛ asɔ kama nɛ baa ta a lara esarga na kikɛ maŋ walɛ so.”

Enyɛnpe Ebɔrɛ ka nase nɛfa be kɔnɔ be asheŋ

¹⁵Ade be kaman nɛ Enyɛnpe Ebɔrɛ na naŋ kaŋɛ: “Menyi maŋ wu kusɔ nɛ k wora menyi na a? Pɔɛŋ nɛ men fara bɔrɛlambu na be kelɔŋɛ m pɔr ¹⁶ekama nɛ e daa yɔ aboyu nɛ e buri n nase ase daa tama kenya aboyu fanɛ ebɔtɛ anyɔ nna, ama e daa nya bɔtɛ koŋwule nna. Esa beeŋ yɔ yabra to a tama kenya ekɔlba kalfa be bɔlɔ bɔlɔ, ama e bee nya ekɔlba adena nna. ¹⁷Ma e daa shin nɛ bunyaŋ bee tɔr menyi be adɔjibi so nɛ e bee puu nsaa jija na, ama men kraŋ kini ketuba n lar menyi be alubi to. ¹⁸Kabre e la kufɔl kpanusopo na be nchɛ adunyɔ nɛ ana, kachɛ nɛ men tɔl bɔrɛlambu na be gbaltɔlase n loge. Yili kabre a yɔ, men baa dara kusɔ nɛ k beeŋ baa wora menyi to. ¹⁹Kashenteŋ nna fanɛ aboyu maŋ naa wɔtɔ nɛ ndibisɔrso na malɛ be kekama maŋ naŋ sɔr asɔrso kikɛ, ama yili kabre a yɔ meeŋ nɛfa menyi.”

Enyɛnpe na ka nase kɔnɔ n sa Zerubabel be asheŋ

²⁰Kamɔnchɛ na gbagba nɛ Enyɛnpe Ebɔrɛ na naŋ sa Heegai kubɔya nyɔsopo fanɛ, ²¹e kaŋɛ Zerubabel nɛ e la Juda be efuli so be gomena na le: “Mee sha kegbuŋgbuŋ ebɔrɛso nɛ kasawule so kikɛ nna. ²²Ma alɛ beeŋ gboŋi bewura nseŋ m mur bumo be kuwurjiana. Meeŋ melgi bumo be egbaŋɛturko m buu nseŋ shin nɛ bumo be egbaŋɛ e wu nɛ bediipo na malɛ e kilgi a mɔ abar. ²³Ama kaŋɛ ma kayɛrbi Zerubabel fanɛ ma, Enyɛnpetale Ebɔrɛ na e lara mo nɛ e ji kuwura ma ketre to.” Ma, Enyɛnpetale Ebɔrɛ na e malga na.