HABAKUK

ANEBI HABAKUK

BE KAWƆL

¹Kubɔya nɛ Enyɛnpe Ebɔrɛ lara ŋ ŋini anebi Habakuk nde.

Habakuk ka fubel ŋ ŋini Enyɛnpe Ebɔrɛ be asheŋ

²O, Enyɛnpe Ebɔrɛ, ale afanɛ bre nɛ meeŋ kule fo pɔɛŋ nɛ fo nu nseŋ mɔlga ma ashi basa nɛ baa nyaŋɛto a wɔtɔ basa na be enɔ to? ³Manɛ nna nɛ fo shin nɛ n wu le be tɔrɔ ere? Nuso nɛ feeŋ tiŋ n nya kagbene a keni le be alubi ere? Kemur nɛ keŋkenshi be kebaawɔtɔ e kulti ma n wɔtɔ nɛ kebri nɛ katege malɛ sɔ kaplɛkama. ⁴Mbra na maŋ kɔ eleŋ nɛ tɔnɔ kikɛ. Ekama malɛ maa ji asheŋ nɛ amo be ekpa so. Basa lubi e naa ji a bri basa niŋiso a shin nɛ kashenteŋji maŋ naa wɔtɔ.

Enyɛnpe Ebɔrɛ ka tuge Habakuk to be asheŋ

⁵Ndoŋ nna nɛ Enyɛnpe Ebɔrɛ na kaŋɛ mbe basa le: “Men dara efuli pɔtɛana nɛ a kulti menyi na ŋ keni. Kusɔ nɛ menyeeŋ wu na beeŋ mɔ menyi kɔnɔ alegaiso. Meeŋ wora kusɔ ko menyi be jemanɛ to, nɛ men nu kumo gba menyi maaŋ yirda. ⁶Meeŋ shin nɛ Babilɔnebi nɛ b la ŋgbene kpakpasowuraana a maa ŋana shɛŋ nsaa maŋ kɔ kechena n wushi kikɛ na e ji eleŋ. Baa lar nna a ba nɛ b ba kɔ durnya be kasawule kama so be basa kena. ⁷Bekama bee ŋana bumo nna nɛ bumo be asheŋ malɛ bee keta kufu ga. Bumo gbagba be mbraana nɛ atande nɛ baa bɛ so.

⁸Bumo be egbaŋɛ bee shile a chɔ ekarmɛ nsaa keta kufu malɛ a chɔ ekuntuŋ nɛ akoŋ kɔ. Bumo be egbaŋɛdiipoana shi mboŋ wɔfɔ nna nɛ bumo be egbaŋɛ bee shile a pulgi kasawule a ba eleŋso fanɛ kusore ka firgi n yuu kusɔ jisoso na.

⁹Bumo be benapo nyaŋɛto nna a ba basa be kemur to nɛ kufugboŋ tɔr bekama nɛ baa kɔ na so. Basa nɛ baa kɔ a pɛ a ki anya na shi alegaiso nna fanɛ eshishɛr na. ¹⁰Baa keni bewuraana jiga nna nsaa mushe ekrachigboŋ. Egbal ŋko ebu lempo jeŋgreŋ kikɛ maaŋ tiŋ ŋ kuŋ bumo ekpa. Baa koli eshishɛr nna a deŋi abar so amo be mman a bɔla so a dii a luri ndeana to a kɔ amo to be basa kena. ¹¹Kumo be kaman nɛ b choŋ fanɛ afu na. Bumo be eleŋ du fanɛ kegbir be eleŋ nna n sa bumo nɛ baa bunyaŋ kumo.”

Habakuk ka fubel ŋ ŋini Enyɛnpe Ebɔrɛ be asheŋ

¹²O Enyɛnpe Ebɔrɛ, fo la Ebɔrɛ nna sososo na kikɛ. Fo e la ma Ebɔrɛ nɛ fo du cheembi nsaa wɔtɔ mbaanaayɔ. Enyɛnpe, ma Ebɔrɛ nɛ ma ekumpo, fo e lara Babilɔnebi na n shin nɛ b nya eleŋ saŋɛ na so baaŋ gberge anyi kusoe. ¹³Ama fo maaŋ tiŋ a keni nɛ kulubi e baa wora a yɔ. Fo anishi du cheembi ga nɛ a baa wu asheŋ lubi. Ama fo wora shruum a keni basa lubi nɛ b maŋ kɔ yirda ere nɛ baa mur basa nɛ b niŋi a chɔ bumo.

¹⁴Fo shin nɛ edimɛdi ki fanɛ ekɔrɔtɔ ŋko nchu to be asɔ keniso nɛ a maŋ kɔ bejuŋkparpo na. ¹⁵Babilɔnebi na bee pɛ edimɛdi nna fanɛ b ka ta edariwa ŋko ashewu m pɛ ekɔrɔtɔ n dii kedeŋi so nsaa cha awɔr kagbenefuliso na. ¹⁶Baa bunyaŋ bumo be ashewu nna nsaa lara esarga a sa amo, ŋkpal b ka bee bɔla ashewu na so a dii kedama nsaa nya ajibi lela a ji so.

¹⁷Ama b baa kraa mɔ basa fanɛ b ka bee to bumo ashewu na nsaa mur efuliana na a maa wu basa kuwɔr a?

Enyɛnpe Ebɔrɛ ka tuge Habakuk be kamalga to be asheŋ

¹Meeŋ dii n yili egbal lempo jeŋgreŋ nɛ b pɔr ŋ kulti kadegboŋ na so a jo kusɔ nɛ Enyɛnpe Ebɔrɛ na beeŋ tuge pɔɛŋ nɛ m bugi to ŋ kaŋɛ kusɔ nɛ k ba nɛ mee fubel.

²Ndoŋ nna nɛ Enyɛnpe Ebɔrɛ na kaŋɛ ma le: “Sibɛ kusɔ kama nɛ meeŋ lara ŋ ŋini fo n deŋi ajembu peŋgeleŋ peŋgelembi so nɛnɛ, saŋɛ na so basa beeŋ baa wu amo a kraŋ manaŋ manaŋ. ³Ŋkpal manɛ so, kelaraŋŋini ere bee jo kumo be jemanɛ nna. Kusɔ nɛ k beeŋ wora lalaloge be nchɛ to na be asheŋ nɛ k bee ji. Kumo alɛ maaŋ baa la efɛsheŋ kikɛ. Kewora fanɛ k bee chɛr nna, ama baa kraa jo. Kanaŋ kama nɛ asheŋ du k beeŋ wora m bɔlɔ so.

⁴Kubɔya na nde: ‘Bekama nɛ baa wora asheŋ lubi maaŋ ji efute, ama bekama nɛ bumo be kebaawɔtɔ niŋi na beeŋ baa wɔ ŋkpa to ŋkpal b ka bee ji kashenteŋ a sa Ebɔrɛ so.’ ”

Asheŋ ka maaŋ nyalɛ n sa basa lubi be asheŋ

⁵Kedamaya bre bee fule esa nna. Kejimuniwuraana bee wu bumo be amu nna ga, bumo alɛ maa wushi kikɛ. B du fanɛ luwu nɛ k maa mɔ a moɛ nna. Amoso b baŋ kɔ m pɔɔ efuli ko so n sɔ kumo, b naa yɔ kenyɔsopo so nna. ⁶Basa nɛ b kɔ n tɔr na bee melgi belempo nɛ b pɔɔ bumo so na nna a kaŋɛ le: “Asɔ nɛ e maŋ la menyi peya nɛ menyee suge. Asheŋ maaŋ nyalɛ n sa menyi kikɛ! Menyi maaŋ tiŋ n tintiŋ menyi be akɔjipoana n sɔ akɔ nɛ b ji menyi n dii kedama!”

⁷Ama pɔɛŋ nɛ menyi nɛ menyee kɔ a pɔɔ beko so na e pin nɛ men ji akɔ m muni kubɔ nɛ b tintiŋ menyi nɛ men ka amo nɛ nchu m bɔlɔ so. Saŋɛ na so nɛ menyi alɛ gba e ki beko be akɔjipoana nɛ b baa suge menyi be asɔ. ⁸Men ta eleŋsheŋ n suge efuli damtaana be basa be asɔ nseŋ m mɔ bumo be basa. Ama naniere bumo be basa nɛ b ji efute gba beeŋ ta eleŋsheŋ n suge menyi be asɔ ŋkpal basa damta nɛ men mɔ nɛ nsawule nɛ ndegboŋana nɛ men mur durnya ere to so.

⁹Asheŋ maaŋ nyalɛ n sa menyi ŋkpal men ka ta eleŋsheŋ n suge asɔ n shin nɛ menyi be nnaŋ to ebi dii dama nɛ tɔrɔ kikɛ maa ba menyi be elaŋ to ebi so so! ¹⁰Ama ŋkpal kusɔ nɛ men wora beko na so, menyeeŋ bar ŋaba menyi be nnaŋ to ebi so nseŋ shin nɛ kemur e ba menyi gbagba so. ¹¹Menyi be nwu be egbalana be ebirkesi nɛ eyɔri gba bee shu a gbiti menyi nna.

¹²Asheŋ maaŋ nyalɛ n sa menyi, ŋkpal men ka ta kulubi n tɔl menyi be kadegboŋ nseŋ ta basa be kamɔ m pɔr kumo n ya loge so. ¹³Efuliana nɛ men daŋ kɔ m pɔɔ so na be basa daŋ shuŋ ŋ gben jiga hale a bɛlɛ nna. Asɔ nɛ b gben m pɔr na kikɛ ji edɛ. Enyɛnpe Ebɔrɛ e shin nɛ loŋ wora na. ¹⁴Ama kananɛ teku baŋ bɔlɔ nchu n sɔ kaplɛkama a dese na, aloŋ nɛ basa be kebaanyi Enyɛnpe Ebɔrɛ na be kemaŋkura be asheŋ beeŋ ba sɔ kasawule ere kikɛ so.

¹⁵Asheŋ maaŋ nyalɛ n sa menyi nɛ menyee kaa sa menyi braana nsa nɛ baa nuu a boo a baŋ so nsaa ŋaba bumo be amu nɛ menyee keni bumo be kesaria na. ¹⁶Aloŋ nɛ menyi alɛ gba be kemaŋkura beeŋ ki ŋaba n sa menyi. Men gbagba beeŋ nuu nsa m boo m baŋ so a nite a jante. Enyɛnpe Ebɔrɛ na e naŋ shin nɛ men ki basa booso a delgeso a nite basa to nɛ menyi be bunyaŋ e ki anishinyɔr. ¹⁷Men ku Lebanɔn be kupo to be ndibi n lɛ, naniere baaŋ ku menyi alɛ gba n lɛ. Men mɔ kumo to be asɔbɔya kikɛ nɛ naniere asɔbɔya bee funti menyi. Ŋkpal basa damta nɛ men mɔ nɛ nsawule nɛ ndegboŋana nɛ men mur durnya ere to so nɛ asheŋ ere beeŋ ba menyi so.

¹⁸Kegbir maŋ kɔ tɔnɔ kikɛ. Dimɛdi e pɔr ŋko n shɛl kumo. Efɛsheŋ nawule nɛ k bee ŋini. Nɛ manɛ so nɛ menyee yirda kusɔ nɛ b ta kebɛlso ŋko kedibi n lɔŋɛ nɛ k maa malga? ¹⁹Asheŋ maaŋ nyalɛ n sa menyi nɛ menyee kaŋɛ kedibi ŋko kejembu fanɛ k koso n sɔ nchu n nuu na. Kegbir beeŋ tiŋ n lara kesheŋ ko ŋ ŋini fo a? Baaŋ tiŋ n ta shuwa ŋko gbiti ŋ gbiti kumo, ama k kraa maŋ kɔ ŋkpa.

²⁰Enyɛnpe Ebɔrɛ na bre wɔ mbe bɔrɛlambu cheembi to nna, amoso ekama e wora shruum mbe anishito ashi kasawule ere so.

Habakuk be kabɔrɛkule be asheŋ

¹Kabɔrɛkule nɛ anebi Habakuk kule nde.

²O Enyɛnpe Ebɔrɛ, n nu kusɔ nɛ fo wora,

nɛ k mɔ ma kɔnɔ nsaa keta ma kufu.

Naniere naŋ wora asheŋgboŋ nɛ fo daŋ wora

n sa an nanaana na,

anyi alɛ gba be jemanɛ ere to.

Hale nɛ fo nya agbo gba,

fo baa nyiŋi fo kuwɔrwu na.

³Fo e la Ebɔrɛ cheembi nɛ fo shi kadegboŋ

nɛ baa tre Tɛman ashi Edɔm be keshishɛrsawule so

nɛ kebee nɛ baa tre Paran na so a ba na.

Fo kela nɛ kemaŋkura parga to m buu esoso kikɛ so nna,

nɛ fo kapandi malɛ sɔ kasawule so be kaplɛkama.

⁴Fo kemaŋkura bee nyɛkpɛ nna fanɛ epeŋi,

nɛ kumo be kefulto bee shi fo enɔana to,

kakpa nɛ fo eleŋgboŋ ŋana a wɔ na.

⁵Fo e naa shuŋi kulɔ nɛ e bee juŋkpar,

nsaa ponte luwu so nɛ k bee bɛ kumo so na.

⁶Fo baŋ shir n yili, kasawule bee gbuŋgbuŋ nna,

fo alɛ baŋ gbɛ ŋ keni malɛ efuliana na bee chicha nna.

Dradra be abeegboŋ nɛ abeebi kikɛ bure to n tɔr.

Ama fo ere wɔtɔ nna mbaanaayɔ!

⁷N wu kufu ka pɛ Kushan be yiri to ebi,

nɛ Midia be yiri to be basa malɛ bee chicha.

⁸O Enyɛnpe Ebɔrɛ, elɔrana e daŋ shin nɛ fo nya agbo a?

Teku e daŋ shin nɛ fo kagbene kaa alegaiso a?

Abɔrɛwɔlpa nɛ a bee bar bɔrɛfugboŋ na so nɛ fo chena

fanɛ gbaŋɛturko na m bar kekɔmpɔɔso m ba sa fo basa.

⁹Fo daŋ bela fo keta ase nna

nseŋ wora shiriya nɛ fo to fo atanyembi.

Fo ta elɔr nɛ mbombi

m baŋɛ kasawule to.

¹⁰Abeegboŋana na ka wu fo nɛ a gbuŋgbuŋ to;

nɛ bɔrɛchu shi awɔlpa so n wurge to.

Ndoŋ nna nɛ echɛtabo baga to,

nɛ amo to be nchu bɔlɔ n dii kepla.

¹¹Jemanɛ nɛ fo atanyembi nɛ akpaana

bee kpa edɛ a firgi a choŋ na,

nɛ epeŋi nɛ kufɔl malɛ daa yil diim awɔlto.

¹²Fo daŋ nya agbo nna a nite a kulti kasawule so,

nseŋ daŋ kaa kagbene alegaiso a chichi efuliana na so.

¹³Fo lar m ba nna nɛ fo ba mɔlga fo basa,

nɛ fo ewura laraso.

Fo ŋmɛa amukpakpasowuraana be ejuŋkparpo n lɛ,

nseŋ mur basa nɛ b bɛ mo so na cheche.

¹⁴Mbe benapo daŋ yarase fanɛ bɔrɛfugboŋ nna m ba,

a tama fanɛ baaŋ pesaŋ anyi to nseŋ mur anyi

nɛ bumo be ŋgbene e fuli bumo.

Bumo ere kutɔ an la basa jiga

nɛ baa shile a ŋana bumo so nna.

Ama bumo gbagba be akɔsɔ nɛ fo ta

m bure bumo be amu to.

¹⁵Fo gbagba be egbaŋɛ nɛ fo ta

n fɔnɔ teku be nchuana to nɛ e kaa kupɔpɔ.

¹⁶Ŋ ka nu ade kikɛ be asheŋ nɛ kufu pɛ ma;

hale nɛ ma kɔnɔ bee chicha.

Ma eyur daŋ yuri ma nna nɛ awo dii ma

nɛ n fara a fiti a fiti jijiga.

Ama meeŋ ji kanyiti n jo

kachɛ nɛ Ebɔrɛ beeŋ gberge efuli

nɛ k bee kɔ anyi kena na kusoe.

¹⁷Hale nɛ figi be ndibi maŋ sɔr gba,

nɛ afeelebi nɛ baa tre greeps na maŋ kɔ asɔrso;

hale nɛ ɔlif be ndibi maŋ sɔr shɛŋ,

nɛ adɔsawule maŋ wora ajibi gba;

hale nɛ kubolpɔ koŋwule gba maŋ naa wɔtɔ,

nɛ kena koŋwule maŋ naa wɔ kenalu to gba,

¹⁸ŋ kraa beeŋ shin nɛ ma kagbene e fuli ma,

ŋkpal Enyɛnpe Ebɔrɛ na ka la ma emɔlgapo so.

¹⁹Enyɛnpetale Ebɔrɛ na e naa sa ma eleŋ,

nsaa shin nɛ mee mur aya fanɛ shantaŋ,

a tiŋ a nite abee to.