ƐZRA

ANEBI

ƐZRA

BE KAWƆL

Ewura Sairus ka shin nɛ Juwebi bɛta n yɔ Jerusalɛm be asheŋ

¹Sairus ka ji Pɛshiya be kuwura be kafɛ juŋkparso to nɛ Enyɛnpe Ebɔrɛ na shin nɛ mbe kamalga nɛ e bɔla anebi Jɛremaya so m malga n nase na bɔlɔ so. E daŋ shin nna nɛ Pɛshiya be ewura Sairus sa ebɔl fanɛ b sibɛ n sa efuli na so ebi kikɛ ŋ kaŋɛ bumo fanɛ ²kusɔ nɛ Pɛshiya be ewura, Sairus, kaŋɛ nde: “Enyɛnpe Ebɔrɛ nɛ e wɔ ebɔrɛso na e ta efuliana nɛ e wɔ durnya ere kikɛ to be kuwura m buu ma, nseŋ kaŋɛ ma fanɛ n ya pɔr bɔrɛlambu n sa mo ashi Jerusalɛm nɛ k wɔ Juda be efuli so na. ³Bekama nɛ b la Enyɛnpe Ebɔrɛ na be basa beeŋ tiŋ n yɔ n ya lɔŋɛ Israɛl be Ebɔrɛ nɛ e wɔ Jerusalɛm to na be bɔrɛlambu na m pɔr. ⁴Bekama nɛ bumo nɛ Enyɛnpe Ebɔrɛ na be basa chena n sha abar e ta shuwa nɛ gbiti nɛ asɔ lela be yiri kikɛ nɛ asɔbɔya nɛ baaŋ ta n ya lara sarga ashi Ebɔrɛ be lambu nɛ k wɔ Jerusalɛm to na n chɛ bumo to.”

⁵Ndoŋ nna nɛ Juda nɛ Bɛnjamin be nnaŋ to be benimuana nɛ bɔrɛmatapoana nɛ Livaiebi nɛ bekama nɛ bumo be ŋgbene daa wɔ kebɛta n yɔ Jerusalɛm to na bela ase nɛ b yɔ Jerusalɛm n ya pɔr Enyɛnpe Ebɔrɛ na be lambu na. ⁶Basa nɛ b tu bumo n chena na kikɛ daŋ ta shuwa nɛ gbiti nɛ asɔ lela be yiri kikɛ nɛ asɔbɔya be yiri kikɛ nna n chɛ bumo enɔ so. Yawu kpakpaso be asɔ nɛ asɔ nɛ baaŋ ta n ya lara sarga ashi bɔrɛlambu na to nɛ b daŋ sa bumo. ⁷Ade kikɛ be kaman, nɛ ewura Sairus bɛta echeenshi nɛ ekurwa nuunchu nɛ ewura Nebukadneeza daŋ ta bɔrɛlambu na to ashi Jerusalɛm n ya wɔtɔ mbe agbir be ebu to na n sa bumo. ⁸Mitrɛdat nɛ e daa la basa nɛ baa keta ewura be amansherbi be enimu na nɛ e shin nɛ e karga amo m bɔɔ Shɛshbaza nɛ e daa la Juda be efuli so be gomena na enɔ. ^9-10Kananɛ asɔ na daa sa nde: Shuwa be echeenshi daa wɔ adesa nɛ gbiti be echeenshi daa wɔ kagboŋ koŋwule nɛ gbiti be echeenshigboŋ daa wɔ adunyɔ nɛ akpanu, nɛ shuwa be echeenshiwurbi daa wɔ adesa, nɛ gbiti be echeenshiwurbi daa wɔ alfa ana nɛ kudu, nɛ asɔ pɔtɛ malɛ daa wɔ kagboŋ koŋwule.

¹¹Shuwa nɛ gbiti nɛ asɔ pɔtɛ nɛ a ti so na kikɛ daa wɔ ŋgboŋ anu nɛ alfa ana. Nɛ Shɛshbaza nɛ mo braana nɛ b yɔ kenyaya to na bɛta amo n shi Babilɔn m ba Jerusalɛm.

Basa nɛ b shi Babilɔn be efuli so m ba na be asheŋ

¹Basa nɛ ewura Nebukadneeza daŋ pɛ n yɔ kenyaya to ashi Babilɔn be efuli so nɛ bumo be galeŋga daŋ naŋ bɛta m ba bumo ndeana to ashi Juda be efuli so na e daa la. ²Bumo e la: Zerubabel nɛ Joshuwa nɛ Nehemaya nɛ Seraya nɛ Reelaya nɛ Mɔdikaya nɛ Bilshan nɛ Mispa nɛ Bigvai nɛ Rehum nɛ Baana.

Israɛl be mbuna ebi nɛ kananɛ b sa nseŋ bɛta m ba bumo be efuli so e daa la ³Parush be kaman to ebi daa la basa ŋgboŋ anyɔ nɛ kalfa nɛ adushunu nɛ anyɔ. ⁴Shɛfatiya be kaman to ebi daa la basa alfa asa nɛ adushunu nɛ anyɔ. ⁵Ara be kaman to ebi daa la basa alfa ashunu nɛ adushunu nɛ anu. ⁶Pahaf Mowab be kaman to ebi nɛ b shi Joshuwa nɛ Jɔab be mbuna na malɛ daa la basa ŋgboŋ anyɔ nɛ alfa aburwa nɛ kudu anyɔ. ⁷Elam be kaman to ebi daa la basa kagboŋ nɛ alfa anyɔ nɛ adunu nɛ ana. ⁸Zatu be kaman to ebi daa la basa alfa akpanu nɛ adena nɛ anu. ⁹Zakayi be kaman to ebi daa la basa alfa ashunu nɛ adeshe. ¹⁰Bani be kaman to ebi daa la basa alfa ashe nɛ adena nɛ asa. ¹¹Bebaye be kaman to ebi daa la basa alfa ashe nɛ adunyɔ nɛ asa. ¹²Azgad be kaman to ebi daa la basa kagboŋ nɛ alfa anyɔ nɛ adunyɔ nɛ anyɔ. ¹³Adonikam be kaman to ebi daa la basa alfa ashe nɛ adeshe nɛ ashe. ¹⁴Bigvai be kaman to ebi daa la basa ŋgboŋ anyɔ nɛ adunu nɛ ashe. ¹⁵Adin be kaman to ebi daa la basa alfa ana nɛ adunu nɛ ana. ¹⁶Atɛɛ, nɛ mo koŋwule na la Hɛzekaya na, be kaman to ebi daa la basa adekpanu nɛ aburwa. ¹⁷Bezayi be kaman to ebi daa la basa alfa asa nɛ adunu nɛ asa. ¹⁸Jora be kaman to ebi daa la basa kalfa nɛ kudu anyɔ. ¹⁹Hashum be kaman to ebi daa la basa alfa anyɔ nɛ adunyɔ nɛ asa. ²⁰Giba be kaman to ebi daa la basa adekpanu nɛ anu. ²¹Nde nɛ amo to be basa bɛta m ba malɛ e daa la: Bɛtlɛhɛm ebi daa la basa kalfa nɛ adunyɔ nɛ asa. ²²Netofa ebi daa la basa adunu nɛ ashe. ²³Anatɔf ebi daa la basa kalfa nɛ adunyɔ nɛ aburwa. ²⁴Azmavɛf ebi daa la basa adena nɛ anyɔ. ²⁵Kiriaf Jeerim nɛ Kɛfira nɛ Beerɔt ebi daa la basa alfa ashunu nɛ adena nɛ asa. ²⁶Rama nɛ Geba ebi daa la basa alfa ashe nɛ adunyɔ nɛ kako. ²⁷Mikmash ebi daa la basa kalfa nɛ adunyɔ nɛ anyɔ. ²⁸Bɛtɛl nɛ Ai ebi daa la basa alfa anyɔ nɛ adunyɔ nɛ asa. ²⁹Nebo ebi daa la basa adunu nɛ anyɔ. ³⁰Magbish ebi daa la basa kalfa nɛ adunu nɛ ashe. ³¹Elam nyɔsopo na ebi malɛ daa la basa kagboŋ nɛ alfa anyɔ nɛ adunu nɛ ana. ³²Hiram ebi daa la basa alfa asa nɛ adunyɔ. ³³Lɔd nɛ Hadid nɛ Ono ebi daa la basa alfa ashunu nɛ adunyɔ nɛ anu. ³⁴Jɛriko ebi daa la basa alfa asa nɛ adena nɛ anu. ³⁵Sɛnaa ebi daa la basa ŋgboŋ asa nɛ alfa ashe nɛ adesa. ³⁶Basa nɛ b daŋ shi bɔrɛmatapoana be kanaŋ to m ba malɛ nde: Jedaya nɛ e shi Joshuwa be kanaŋ to be kaman to ebi daa la basa alfa akpanu nɛ adushunu nɛ asa. ³⁷Imma be kaman to ebi daa la basa kagboŋ nɛ adunu nɛ anyɔ. ³⁸Pashɔ be kaman to ebi daa la basa kagboŋ nɛ alfa anyɔ nɛ adena nɛ ashunu. ³⁹Hiram be kaman to ebi daa la basa kagboŋ nɛ kudu ashunu. ⁴⁰Livai be kabuna ebi nɛ b bɛta m ba nde: Joshuwa nɛ Kadmiɛl nɛ b shi Hodaviya be kanaŋ to be kaman to ebi daa la basa adushunu nɛ ana. ⁴¹Beshɛbompo nɛ b shi Asaf be kanaŋ to m bɛta m ba daa la basa kalfa nɛ adunyɔ nɛ aburwa. ⁴²Basa nɛ b daa keni bɔrɛlambu na be mbuna so nseŋ shi Shalum nɛ Atɛ nɛ Talmɔn nɛ Akuub nɛ Hatita Shobayi be nnaŋ to na daa la basa kalfa nɛ adesa nɛ akpanu. ⁴³Bɔrɛlambu na to be beshumpo nɛ bumo be mbuna ebi bɛta m ba na nde: Ziha nɛ Hasufa nɛ Tabaof, ⁴⁴nɛ Kɛros nɛ Siaha nɛ Padon, ⁴⁵nɛ Lebana nɛ Hegaba nɛ Akuub, ⁴⁶nɛ Hegab nɛ Shalmayi nɛ Hanan, ⁴⁷nɛ Gidɛl nɛ Gaha nɛ Rɛaya, ⁴⁸nɛ Rezin nɛ Nekoda nɛ Gazam, ⁴⁹nɛ Yuza nɛ Pasea nɛ Besaya, ⁵⁰nɛ Asna nɛ Mɛyunim nɛ Neefusim, ⁵¹nɛ Bakbuk nɛ Hakufa nɛ Haahɔɔ, ⁵²nɛ Bazlɔt nɛ Mehida nɛ Haasha, ⁵³nɛ Baakɔs nɛ Sisɛra nɛ Tɛma, ⁵⁴nɛ Nezia nɛ Hatifa. ⁵⁵Sɔlɔmɔn be nyɛrbi be kaman to ebi nɛ b bɛta m ba e daa la Sotayi be kaman to ebi nɛ Hasofɛrɛt be kaman to ebi nɛ Pɛruda be kaman to ebi ⁵⁶nɛ Jaala be kaman to ebi nɛ Dakɔn be kaman to ebi nɛ Gidɛl be kaman to ebi nɛ ⁵⁷Shefatiya be kaman to ebi nɛ Hatil be kaman to ebi nɛ Pokerɛf Hazabeem nɛ Ami be kaman to ebi.

⁵⁸Bɔrɛlambu na to be beshumpoana be kaman to ebi nɛ Sɔlɔmɔn be nyɛrbi be kaman to ebi kikɛ daa la basa alfa asa nɛ adekpanu nɛ anyɔ nna.

⁵⁹Basa nɛ b daa maŋ tiŋ ŋ ŋini Israɛl be kanaŋ nɛ b shi kumo to kikɛ ama nseŋ shi Tɛl Mɛla nɛ Tɛl Hasha nɛ Kerub nɛ Adɔn nɛ Imma be nde to m ba na e daa la.

⁶⁰Delaya be kaman to ebi nɛ Tobaya be kaman to ebi nɛ Nekoda be kaman to ebi. Bumo kikɛ daa la basa alfa ashe nɛ adunu nɛ anyɔ.

⁶¹Bumo nɛ b shi bɔrɛmatapoana be kabuna ama bumo alɛ be asheŋ daa maŋ wɔ nwɔl to a ŋini fanɛ b shi bɔrɛmatapoana be kanaŋ to na malɛ e daa la Hobaya be kaman to ebi nɛ Hakkoz be kaman to ebi nɛ Baazilaya be kaman to ebi. B daa tre mo Baazilaya nna ŋkpal e ka daŋ ta Giliad be efuli so be eche nɛ e shi Baazilaya be kanaŋ to so.

⁶²Ŋkpal bumo be asheŋ ka maŋ wɔ nwɔl to fanɛ b shi bɔrɛmatapoana be kabuna so, b daŋ maŋ sɔ bumo fanɛ bɔrɛmatapoana. Amoso b daa maŋ sa bumo ekpa fanɛ b shuŋ bɔrɛmatapoana be kushuŋ. ⁶³Ndoŋ nna Juwebi be gomena yili fanɛ b maŋ kɔ ekpa nɛ b ji ajibi nɛ b ta n lara sarga n sa Ebɔrɛ na n ya fo fanɛ bɔrɛmatapoana ka beeŋ ba bishi Ebɔrɛ m pin fanɛ b la bɔrɛmatapoana nna ŋko b maŋ la.

⁶⁴Basa nɛ b daŋ shi Babilɔn m ba na daŋ fo basa ŋgboŋ adena nɛ anyɔ nɛ alfa asa nɛ adeshe nna. ⁶⁵Nɛ bumo be nyɛrbi nɛ mbita malɛ daa la basa ŋgboŋ ashunu nɛ alfa asa nɛ adesa nɛ ashunu. Beshɛbompo malɛ daa la basa alfa anyɔ. ⁶⁶Bumo be egbaŋɛ daa la alfa ashunu nɛ adesa nɛ ashe nɛ asɔbɔya nɛ kurma nɛ gbaŋɛ gama ŋ kurge na malɛ daa la alfa anyɔ nɛ adena nɛ anu. ⁶⁷Enyɔma daa la alfa ana nɛ adesa nɛ anu, nɛ ekurma malɛ daa la ŋgboŋ ashunu nɛ alfa ashunu nɛ adunyɔ.

⁶⁸Basa na ka fo kakpa nɛ Enyɛnpe Ebɔrɛ be bɔrɛlambu na daa yil ashi Jerusalɛm to na nɛ nnaŋ be benimuana na bugi ŋgbene n lara keparso be esarga n sa fanɛ b ta n lɔŋɛ bɔrɛlambu na m pɔr n yili kumo be epul dra na to. ⁶⁹Kananɛ ekama daa beeŋ tiŋ nɛ e daŋ sa nɛ amo kikɛ koso shuwa be ndarbi alfa anu nɛ gbiti be ndarbi ŋgboŋ anyɔ nɛ alfa aburwa, nɛ bɔrɛmatapoana be epiŋi malɛ kalfa. ⁷⁰Kumo be kaman, nɛ bɔrɛmatapoana na nɛ Livaiebi na nɛ beshɛbompo na nɛ basa nɛ baa keni bɔrɛlambu na be mbuna so na nɛ bɔrɛlambu na to be beshumpoana na nɛ basa na to be beko gba kikɛ yɔ n ya chena bumo be ndeana to. Nɛ Israɛlebi nɛ b ka na malɛ gba yɔ bumo be ndeana to n ya chena.

Bɔrɛsure na be kelɔŋɛ m pɔr be asheŋ

¹Israɛlebi na daŋ ta afɔl ashunu nna n chena bumo be ndeana to n loge. Kumo be kaman nɛ bumo kikɛ ba shɛr Jerusalɛm to. ²Ndoŋ nna nɛ Jozadak pibinyɛn Joshuwa nɛ mo braana bɔrɛmatapoana na nɛ Shɛɛltiɛl pibinyɛn, Zerubabel, nɛ mo kurgepoana fara nɛ b pɔr Israɛl be Ebɔrɛ na be bɔrɛsure, saŋɛ na so baŋ tiŋ a lara esarga kumo so fanɛ kananɛ Mosis be mbra bee ŋini na. ³Kufu nɛ k daa wɔ bumo to ŋkpal basa nɛ b kulti bumo na kikɛ be kaman, b daŋ pɔr bɔrɛsure na n yili kumo be gbaltɔlase dra na so nna. Kapa nɛ kanyɛ kikɛ b daa lara esarga bɔrɛsure na so nna a sa Ebɔrɛ. ⁴B daŋ ji Abuu to be kachɛgboŋ na nna fanɛ kananɛ mbra na bee ŋini na gbagba chap. Esarga nɛ a daga b lara karechɛ kama be kachipurso nɛ kaaseso kikɛ na nɛ b daŋ lara. ⁵Kumo be kaman nɛ b lara sarga chɔɔso nɛ k daga na malɛ gba. Bumo alɛ daŋ naŋ lara kufɔl popɔr be esarga nɛ esarga kama nɛ a daga fanɛ b baa lara nchɛgboŋ nɛ Enyɛnpe Ebɔrɛ na yili n sa bumo na kikɛ. ⁶Kufɔl shunusopo na be kachɛ juŋkparso na nɛ b fara sarga chɔɔso be kelara n sa Enyɛnpe Ebɔrɛ na, ama loŋ be jemanɛ na nɛ b maŋ naŋ tɔl Enyɛnpe Ebɔrɛ na be bɔrɛlambu na be gbaltɔlase gba.

Bɔrɛlambu na be kelɔŋɛ m pɔr be asheŋ

⁷Ade kikɛ be kaman, nɛ basa na sa bepɔrpo nɛ ekapɛnta amansherbi nseŋ ta ajibi nɛ asɔnuuso nɛ ɔlif be ŋku n shuŋi n ya sa Sidɔnebi nɛ Tayɛebi fanɛ b ku sida be ndibi n yili Lebanɔn n ta amo m bɔla teku so m bar bumo ashi Jɔpa fanɛ kananɛ Pɛshiya be ewura, Sairus, kaŋɛ na.

⁸Kafɛ nɛ Israɛlebi na ba Enyɛnpe Ebɔrɛ na be lambu na ase ashi Jerusalɛm to na be kufɔl nyɔsopo to nɛ Shɛɛltiɛl pibinyɛn, Zerubabel nɛ Jozadak pibinyɛn, Joshuwa nɛ bumo kurgepoana, nɛ b la bɔrɛmatapoana nɛ Livaiebi nɛ bekama nɛ b bɛta m ba Jerusalɛm to na, fara bɔrɛlambu na be kepɔr. B daŋ lara Livaiebi nɛ b fo nfɛ adunyɔ m baŋ so na nna fanɛ b baa keni kushuŋ na so. ⁹Joshuwa nɛ mo bibinyɛn nɛ mo kurgepoana nɛ Kadmiɛl nɛ mo bibinyɛn, nɛ b la Hodaviya be kaman to ebi na, n ta Hɛnadad nɛ mo bibinyɛn nɛ mo kurgepoana nɛ bumo kikɛ shi Livai be kabuna na e daŋ ber abar so a keni basa nɛ baa pɔr Ebɔrɛ be lambu na so.

¹⁰Bepɔrpo na ka baŋ tɔl Enyɛnpe Ebɔrɛ be lambu na be gbaltɔlase na n loge, nɛ bɔrɛmatapoana ta bumo be epiŋi m buu nseŋ ta mbel nɛ Asaf be mbinyɛnso nɛ b la Livaiebi na malɛ ta edawuro, nɛ bekama yili bumo be eyilikpa nseŋ fara a boŋ nshɛ a kpaŋ Ebɔrɛ. Ŋkpal manɛ so, ketande nɛ ewura Deevid nase n sa bumo nna na. ¹¹Le be kapandi be kashɛ nɛ b daa boŋ a fur Enyɛnpe Ebɔrɛ na:

“Enyɛnpe Ebɔrɛ na walɛ;

Kasha nɛ e kɔ n sa Israɛl na maŋ kɔ ekar.”

Ndoŋ nna nɛ basa na kikɛ fara a kpaŋ Enyɛnpe Ebɔrɛ na awɔrso, ŋkpal b ka tɔl mbe lambu na be gbaltɔlase so. ¹²Basa kpar nɛ b daa la bɔrɛmatapoana nɛ Livaiebi nɛ nnaŋ be benimuana na be galeŋga ka daa nyi kananɛ lambu dra na daa du so, b ka wu kepopɔr ere be gbaltɔlase na nɛ b shu awɔrso; ama beko bre daa wora awɔr kagbenefuliso nna. ¹³K daa du kpakpa nɛ kepin awɔr nɛ b daa wora na be kumo nɛ k daa la kagbenefuli peya nɛ kumo nɛ k daa la kushu peya. Ŋkpal manɛ so, basa na kikɛ daa wora awɔr na nna ga nɛ k daa yɔ kufɔ kufɔ.

Beko ka maŋ shuli fanɛ b pɔr bɔrɛlambu na be asheŋ

¹Juda nɛ Bɛnjamin ebi be bedoŋ ka nu fanɛ Israɛlebi na bɛta m ba nɛ b ba lɔŋɛ Enyɛnpe, Israɛl be Ebɔrɛ na be lambu m pɔr, ²nɛ b yɔ Zerubabel nɛ mbuna mbuna be benimuana na kutɔ n ya kaŋɛ le: “Men shin nɛ an chɛ menyi to n pɔr. Ŋkpal manɛ so, anyi nɛ menyi kikɛ bee shuŋ Ebɔrɛ koŋwule nna. Yili jemanɛ nɛ Asiriya be ewura, Esahadɔn, bar anyi kasawule ere so hale m ba fo kabre; menyi be Ebɔrɛ ere nɛ anyi alɛ gba bee shuŋ nsaa lara sarga a sa.”

³Nɛ Zerubabel nɛ Joshuwa nɛ Israɛl be mbunaana na be benimuana na malɛ kaŋɛ bumo: “Anyi maa sha menyi be kechɛto ashi bɔrɛlambu na be kepɔr n sa Enyɛnpe anyi be Ebɔrɛ na to. Anyi nawule beeŋ tiŋ m pɔr kumo fanɛ kananɛ Pɛshiya be ewura, Sairus yili na.”

⁴Ndoŋ nna nɛ Judaebi be bechenashapoana na fara a funti bumo a fin kananɛ baaŋ wora m pɔ Judaebi na aba nseŋ shin nɛ kufu a pɛ bumo nɛ b yige lambu na be kelɔŋɛ m pɔr. ⁵Nɛ b ya ber Pɛshiya be gomena be benimu ko paa fanɛ b ba funti Judaebi na n lara bumo lambu na be kapɔr to. Ewura Sairus be jemanɛ so nɛ b keta kumo loŋ hale m ba fo ewura Dariɔs be jemanɛ so.

Beko ka maŋ shuli fanɛ b lɔŋɛ Jerusalɛm m pɔr be asheŋ

⁶Kafɛ nɛ ewurgboŋ Zɛɛzɛs ji kuwura na nɛ basa nɛ b daa wɔ Juda nɛ Jerusalɛm to na be bedoŋ sibɛ kawɔl ŋ ku bumo kɔnɔ.

⁷Pɛshiya be ewurgboŋ Atazɛzɛs be jemanɛ to gba, Bishlam nɛ Mitrɛdat nɛ Tabil nɛ bumo braana sibɛ kawɔl nna n sa ewurgboŋ Atazɛzɛs. Aramaik be ŋgbar to nɛ b daŋ sibɛ kumo.

⁸Rehum nɛ e daa la gomena na nɛ Shimshayi nɛ mo alɛ daa la efuli na be esibɛpo na e sibɛ kawɔl na n sa ewurgboŋ Atazɛzɛs a malga Jerusalɛm be asheŋ a kaŋɛ le:

⁹“Rehum nɛ e la gomena na nɛ Shimshayi nɛ e la efuli na be esibɛpo na nɛ bumo braana demujipoana nɛ benimuana nɛ baa keni basa nɛ b shi Tripolis nɛ Pɛshiya nɛ Erɛk nɛ Babilɔn be efuliana so na, n ta Elam ebi nɛ b shi Susa na nɛ ¹⁰basa nɛ bunyaŋwura Ashubanipal daŋ shin nɛ b ba chena Samɛria be kadegboŋ to na nɛ nde nɛ a wɔ Yufreetes be epeŋitɔrkpa be kasawule so na kikɛ e naa sibɛ kawɔl ere na.

¹¹Ewurgboŋ Atazɛzɛs, fo nyɛrbi nɛ fo basa nɛ b chena lɔrgboŋ nɛ baa tre Yufreetes na be epeŋitɔrkpa be kasawule so na e naa sibɛ fo kawɔl ere:

¹²‘Yiramu, anyee sha fo pin fanɛ Juwebi nɛ b shi fo kutɔ m ba anyi kutɔ nfe na yɔ Jerusalɛm nna n ya kaa lɔŋɛ kade lubi nɛ k maŋ kɔ kasonu na a pɔr. B tiŋ n fara a pɔr kumo be egbalana nsaa lɔŋɛ kumo be gbaltɔlaseana gba. K maaŋ chɛr baaŋ pɔr kumo n loge.

¹³Yiramu, nɛ basa ere baŋ lɔŋɛ kade ere m pɔr nɛ kumo be egbalana kikɛ yili, kumo ere b maaŋ naŋ ka lampo ŋko toto kikɛ n sa ewura. Loŋ malɛ beeŋ shin nɛ ewura be kpanjawu to be amansherbi a duga so. ¹⁴Ŋkpal fo ka wɔ anyi a keni so nɛ anyi alɛ maa sha ewura ka ji nyɔmɔ so nɛ anyee sibɛ fo kawɔl ere na ¹⁵nɛ fo shin nɛ b keni fo nananyɛnana nɛ fo tutoana be nwɔl nɛ a dese na to. Feeŋ wu fanɛ le be kade ere la kade lubi nna nɛ k bee bar etɔrɔ bewura so. Kusɔ nɛ k bar kumo be kemur nna na. ¹⁶Yiramu, anyee sha fo baa nyi fanɛ nɛ b baŋ lɔŋɛ kade ere m pɔr, kumo ere shɛŋ maaŋ naa shi Yufreetes be epeŋitɔrkpa a ba fo kutɔ.’ ”

¹⁷Ndoŋ nna nɛ ewura na malɛ ta ebɔl ere n shoŋi bumo. E yɛ: “Ebɔl ere shi ma, ewurgboŋ Atazɛzɛs, kutɔ nna a yɔ Rehum, nɛ e la gomena nɛ Shimshayi, nɛ mo alɛ la efuli na so be esibɛpo na nɛ bumo braana nɛ b wɔ Samɛria nɛ Yufreetes be epeŋitɔrkpa be kasawule so na kikɛ kutɔ.

Ma kechɔrɔ nde!”

¹⁸B daŋ kraŋ nseŋ kilgi kawɔl nɛ men sibɛ n shoŋi na n sa ma. ¹⁹Nɛ n shin nɛ b keni asheŋ na to nseŋ wu fanɛ kashenteŋ nɛ kade na la kade lubi dra dra kikɛ. B daa maa sa bewura kashuli. Bumo alɛ daa kɔ keŋkenshi nɛ kagbene kpakpaso ga. ²⁰Bewura nɛ b daŋ ji eleŋ ga daŋ chena Jerusalɛm to nseŋ daŋ ji kuwura basa nɛ b daa tase Yufreetes be epeŋitɔrkpa be kasawule so, bumo alɛ daa tu bumo a sɔ elampo nɛ atoto nna. ²¹Men sa basa na ebɔl fanɛ b yige kade na be kelɔŋɛ m pɔr na n ya fo fanɛ ŋ ka beeŋ naŋ sa bumo ekpa. ²²Men baa de so nsaa maaŋ ta kesheŋ ere m pɛl n shin nɛ ewura e paŋ mbe kepar.

²³B ka kraŋ ewurgboŋ Atazɛzɛs be kawɔl na n sa Rehum nɛ Shimshayi nɛ bumo braana na nɛ b wora manaŋ n ya tintiŋ Juwebi nɛ b wɔ Jerusalɛm to na fanɛ b yige kade na be kelɔŋɛ m pɔr.

²⁴Ndoŋ nna nɛ bɔrɛlambu na be kapɔr na shir n yili loŋ hale n ya fo Pɛshiya be ewurgboŋ Dariɔs be kuwurji be kafɛ nyɔsopo to.

¹Heegai nɛ Iddo pibinyɛn, Zakareya, nɛ b daa la anebiana na daŋ bɔla Israɛl be Ebɔrɛ nɛ e bee keni bumo so na be ketre so nna m malga n sa Juwebi nɛ b daa wɔ Juda be efuli so nɛ Jerusalɛm to na. ²Kumo be kaman nɛ Shɛɛltiɛl pibinyɛn, Zerubabel, nɛ Jozadak pibinyɛn, Joshuwa, naŋ fara Ebɔrɛ be lambu na be kelɔŋɛ m pɔr ashi Jerusalɛm to, nɛ anebiana na daa chɛ bumo to.

³Ndoŋ nna nɛ lɔrgboŋ nɛ baa tre Yufreetes na be epeŋitɔrkpa be kasawule so be gomena, Tatɛnayi, nɛ Shɛta Bozenayi nɛ bumo braana yɔ bumo kutɔ n ya bishi bumo le: “Wanɛ e sa menyi ekpa fanɛ men lɔŋɛ bɔrɛlambu ere m pɔr?” ⁴Kumo be kaman nɛ b bishi basa nɛ baa pɔr lambu na be atre. ⁵Ama ŋkpal Ebɔrɛ ka daa keni Israɛl be benimuana na so so, Pɛshiya be benimuana na daŋ maŋ tiŋ n ju bumo kapɔr na be kushuŋ to. B daa sha kesibɛ kawɔl nna n sa ewurgboŋ Dariɔs nseŋ nu kusɔ nɛ e beeŋ kaŋɛ pɔɛŋ.

⁶Kawɔl nɛ Yufreetes be epeŋitɔrkpa be efuli so be gomena, Tatɛnayi, nɛ Shɛta Bozenayi nɛ bumo braana nɛ benimu nɛ b wɔ Yufreetes be epeŋitɔrkpa be efuli so na sibɛ n chise ewurgboŋ Dariɔs nde: ⁷“Yiramu, anyi be bunyaŋ be kechɔrɔ nde!

⁸Yiramu, anyee sha nna nɛ fo pin fanɛ an yɔ Juda be efuli so n ya wu fanɛ basa na bee lɔŋɛ a pɔr Ebɔrɛ Ewurgboŋ na be bɔrɛlambu na. Ajembu gbɛgbɛso nɛ ndibi gbɛgbɛso nɛ b kɔ a pɔr kumo. Kenishipereso nɛ baa pɔr kumo, amoso kushuŋ na bee yɔ manaŋ manaŋ nna a sa bumo.

⁹Ndoŋ nna nɛ an bishi benimuana na fanɛ wanɛ e sa bumo ekpa fanɛ b lɔŋɛ bɔrɛlambu na m pɔr? ¹⁰Anyi alɛ naŋ bishi m pin bumo be bejuŋkparpo be atre, saŋɛ na so anyeeŋ sibɛ amo n chise fo.

¹¹Ama kusɔ nɛ b kaŋɛ nde:

‘Anyi ere la Ebɔrɛ nɛ esoso nɛ kasawule kikɛ la mo peya na be anya nna. Bɔrɛlambu nɛ Israɛl be ewurgboŋ ko daŋ pɔr nfɛ damta nɛ a choŋ na nɛ anyee lɔŋɛ a pɔr. ¹²Ŋkpal an tutoana ka daŋ wora n da Ebɔrɛ nɛ e wɔ esoso na so so, e daŋ nya agbo nna nseŋ shin nɛ Babilɔn be Ewurgboŋ, Nebukadneeza, nɛ e shi Chaldian, ba kɔ m pɔɔ bumo so. Kumo be kaman nɛ Nebukadneeza pɛ bumo anya n yɔ Babilɔn be efuli so.

¹³Ama kafɛ nɛ ewurgboŋ Sairus ji Babilɔn be kuwura na, nɛ e sa kɔnɔ fanɛ a daga b naŋ lɔŋɛ m pɔr Ebɔrɛ be lambu na. ¹⁴Mo alɛ daŋ naŋ bɛta Ebɔrɛ be lambu to be shuwa nɛ gbiti be asɔ nɛ ewurgboŋ Nebukadneeza daŋ ta ashi Jerusalɛm n ya wɔtɔ mbe agbir be ebu to ashi Babilɔn na n sa Shɛɛshbaza, nɛ e daa la Juda be gomena na nna. ¹⁵E ka ta amo n sa Shɛɛshbaza na nɛ e kaŋɛ fanɛ e ta asɔ ere n ya wɔtɔ bɔrɛlambu nɛ k wɔ Jerusalɛm na to; nseŋ lɔŋɛ Ebɔrɛ be lambu na m pɔr n yili kumo be epul dra na gbagba to. ¹⁶Nɛ Shɛɛshbaza ba tɔl bɔrɛlambu na be gbaltɔlase. Yili loŋ be jemanɛ na m ba fo kabre, kapɔr na bee pɔr gbrɛgbrɛbi nna. K maŋ naŋ loge bre. ¹⁷Yiramu, nɛ fee sha, fo shin nɛ b keni Babilɔn be bewura be adrasheŋ be nwɔl to, feeŋ wu fanɛ kashenteŋ nɛ ewurgboŋ Sairus daŋ sa ekpa fanɛ b lɔŋɛ Ebɔrɛ be lambu na m pɔr ashi Jerusalɛm to. Kumo be kaman nɛ ewura e shin nɛ an nu kusɔ nɛ e bee sha demu ere to.’ ”

Kusɔ nɛ Ewurgboŋ Dariɔs yili be asheŋ

¹Nɛ Ewurgboŋ Dariɔs kaŋɛ fanɛ b keni Babilɔn be bewura be adrasheŋ be nwɔl to, nɛ b wora loŋ. ²Ndoŋ nna nɛ b wu kawɔl ko ashi Midia be efuli so be kadegboŋ nɛ baa tre Ɛkbatana na. Kubɔya nɛ k daa wɔ kawɔl na to nde:

³Kafɛ nɛ ewurgboŋ Sairus ji kuwura na nɛ e sa kɔnɔ a yɔ Ebɔrɛ be lambu nɛ k wɔ Jerusalɛm to na be kaplɛa so le:

“Bɔrɛlambu nɛ k daa wɔ Jerusalɛm to na daga kelɔŋɛ m pɔr nseŋ shin nɛ k baa la kakpa nɛ basa beeŋ baa lara esarga. Kumo be gbaltɔlase gba daga ketɔl. A daga kumo be jeŋgreŋ e baa la ayadra adekpanu nɛ kumo be mparto malɛ gba e baa la ayadra adekpanu. ⁴Nɛ b baa pɔr kumo be egbalana, a daga b ka ta ndibi kpakpaso m bɛ ajembu be egbal asa kama nɛ baaŋ pɔr m bɛ abar so so. Kumo be pɔr be kukɔ na beeŋ shi ewura be amansherbi be lɔkɔ to nna. ⁵Kumo be kaman nɛ b bɛta shuwa nɛ gbiti be asɔ nɛ ewura Nebukadneeza sulɔ n shi bɔrɛlambu nɛ k wɔ Jerusalɛm to n yɔ Babilɔn be efuli so na kikɛ n yɔ amo be mboŋ ashi bɔrɛlambu na to.”

Ewura Dariɔs ka sa kɔnɔ fanɛ kushuŋ na e naŋ fara be asheŋ

⁶Kede be kaman nɛ ewurgboŋ Dariɔs sibɛ kawɔl n shoŋi Yufreetes be epeŋitɔrkpa be kasawule so be gomena, Tatɛnayi, nɛ Shɛta Bɔzanayi nɛ bumo braana nɛ b daa la efuli na be benimu na kikɛ ŋ kaŋɛ bumo fanɛ b sa maŋ naŋ yɔ bɔrɛlambu na ase kikɛ. ⁷E yɛ: “Men sa maŋ naŋ ta menyi be asheŋ n wea bɔrɛlambu na be kepɔr na be asheŋ to. Men shin nɛ Juwebi be gomena nɛ bumo be benimuana na e lɔŋɛ bɔrɛlambu na m pɔr n yili kumo be eyilikpa dra na.

⁸Ma alɛ naa yili kumo nna a sa menyi fanɛ men chɛ bumo to m pɔr bɔrɛlambu na. Kukɔ kama nɛ k ba kapɔr na be kaplɛa so, men lara amansherbi ashi amansherbi nɛ menyee sɔ Yufreetes be epeŋitɔrkpa be efuli so na to ŋ ka, nɛ kushuŋ na e sa maaŋ shir n yili. ⁹Karechɛ kikɛ, men baa sa bɔrɛmatapoana nɛ b wɔ Jerusalɛm to na asɔ fanɛ egbolu nɛ ekpakpa nɛ ekpakpafɔlbi nɛ ayu nɛ nfɔl nɛ yabra belbelso nɛ ɔlif be ŋku nɛ b kaŋɛ fanɛ baa sha nɛ b ta n lara sarga n sa Ebɔrɛ nɛ e wɔ ebɔrɛso na kikɛ. ¹⁰Loŋ e naŋ shin nɛ b lara esarga nɛ a beeŋ par Ebɔrɛ nɛ mo alɛ e nɛfa ma nɛ ma kaman to ebi kikɛ.

¹¹Ma, ewura, bee yili kumo nna fanɛ esa kama nɛ e chɛrga ma kamalga ere, meeŋ shin nɛ b pee mbe ebu be keyɔri nseŋ shɛl kumo n da mo n futi m bɔl. Kumo be kaman nɛ b bure mbe kowu na kikɛ nɛ k ki kelambure. ¹²Ebɔrɛ nɛ mbe ketre deŋ Jerusalɛm be bɔrɛlambu na so na malɛ e mur ewura kama ŋko basa kama nɛ baaŋ chɛrga kusɔ nɛ n yili ere ŋko n fin bɔrɛlambu ere be kejija.

Kusɔ nɛ ma, ewura Dariɔs yili nna na. Ekama daga fanɛ e nuu nseŋ bɛ kumo so.”

¹³Ndoŋ nna nɛ Tatɛnayi, nɛ e la gomena na nɛ Shɛta Bɔzanayi nɛ bumo braana nɛ benimuana na wora m bɛ kusɔ nɛ ewura na kaŋɛ na so. ¹⁴Juwebi be bejuŋkparpo na daŋ wora asɔ ga ashi bɔrɛlambu na be kepɔr na to. Bumo alɛ daŋ naa nya keleŋto ashi anebi Heegai nɛ Zakareya, nɛ e shi Iddo be kanaŋ to na be keŋini to. Kananɛ Israɛl be Ebɔrɛ bɔla Pɛshiya be bewura fanɛ Sairus nɛ Dariɔs nɛ Atazɛzɛs so ŋ ŋini bumo kananɛ e bee sha bɔrɛlambu na gbagba chap nɛ b daŋ pɔr kumo. ¹⁵Ewurgboŋ Dariɔs ka ji kuwura be kafɛ shesopo be kufɔl nɛ Juwebi bee tre Ada na be nchɛ asa to nɛ b pɔr bɔrɛlambu na n loge. Ada la Hibruwebi be kafɛ to be kufɔl kuduanyɔsopo nna.

¹⁶Kumo be kaman nɛ Israɛlebi na, bɔrɛmatapoana nɛ Livaiebi nɛ bekama nɛ b bɛta m ba na kikɛ, be ŋgbene fuli bumo ga nɛ b ta bɔrɛlambu na m bɔɔ Ebɔrɛ enɔ. ¹⁷Kachɛ nɛ b ta bɔrɛlambu na m bɔɔ Ebɔrɛ enɔ na, egbolu kalfa nɛ ekpakpa alfa anyɔ nɛ mbolpɔ alfa ana nɛ b ta n lara sarga n sa Ebɔrɛ. B daŋ mɔ mboe kudu anyɔ nna n lara sarga ŋ kule alubi be ketampaŋ n sa Israɛl be nnaŋ kudu anyɔ na kikɛ. ¹⁸B daŋ ŋini bɔrɛmatapoana na nɛ Livaiebi na ashuŋ nɛ baŋ baa shuŋ bɔrɛlambu na to ashi Jerusalɛm to fanɛ kananɛ anebi Mosis be mbra bee ŋini na nna.

Kebansonchoŋ be kejigboŋ na be asheŋ

¹⁹Juwebi be kebɛta m ba na be kufɔl juŋkparso na to be nchɛ kudu ana na nɛ b ji kebansonchoŋ be kejigboŋ na. ²⁰Bɔrɛmatapoana na nɛ Livaiebi na daŋ fɔr bumo be amu so daŋkare be ekpa so nna, nɛ kulubi kikɛ daŋ maŋ naŋ gbiti bumo. Nɛ Livaiebi na mɔ kebansonchoŋ be asɔbɔya na n sa bumo kurgepoana nɛ bɔrɛmatapoana nɛ bumo gbagba. ²¹Basa nɛ b chena m mata Israɛlebi na nseŋ lara bumo be amu ashi nnyamase nɛ bumo be agbirsheŋ to nseŋ ta bumo be amu n sa Israɛl be Ebɔrɛ na e tu Israɛlebi na n ji kejigboŋ na. ²²Nchɛ ashunu nɛ baa ji bodobodo nɛ k maŋ kɔ yiisi na be kejigboŋ na kagbenefuliso Bumo be ŋgbene daŋ fuli bumo nna ŋkpal Enyɛnpe Ebɔrɛ na ka chɛrga Asiriya be ewura be kagbene nseŋ shin nɛ e chɛ bumo to nɛ b lɔŋɛ Israɛl be Ebɔrɛ be bɔrɛlambu na m pɔr so.

Anebi Ɛzra ka ba Jerusalɛm to be asheŋ

¹Asheŋ ere kikɛ be kaman nɛ anebi Ɛzra shi Babilɔn be efuli so m bɛta m ba Jerusalɛm Pɛshiya be ewurgboŋ Atazɛzɛs be jemanɛ to. Kananɛ anebi Ɛzra be kanaŋ to lar nde: Ɛzra mo tuto e daa la Seraya, nɛ Seraya malɛ mo tuto daa laa Azariya nɛ mo alɛ daa la Hilkiya pibinyɛn. ²Hilkiya mo tuto e daa la Shalum nɛ mo alɛ mo tuto daa la Zadɔk. Zadɔk mo tuto e daa la Ahitub. ³Ahitub malɛ mo tuto e daa la Amariya nɛ mo alɛ mo tuto daa la Mɛrerɔf. ⁴Mɛrerɔf mo tuto e daa la Zerahiya nɛ mo alɛ mo tuto daa la Uzzi nɛ e daa la Bukki pibinyɛn na. ⁵Bukki mo tuto e daa la Abishuwa nɛ mo alɛ mo tuto daa la Finihas. Finihas mo tuto e daa la Eliaza nɛ e daa la bɔrɛmatapo nimuso Ɛɛrɔn pibinyɛn. ⁶Ɛzra daŋ shi Babilɔn be efuli so nna m ba Jerusalɛm. E daa la eŋinipo nɛ e daa nyi Israɛl be Ebɔrɛ na be mbra nɛ e ta m bɔla Mosis so n sa mbe basa na ga nna. Ewura na daŋ sa Ɛzra kusɔ kama nɛ e daŋ kule mo na nna ŋkpal Ebɔrɛ be nɛfa ka daa wɔ mo so so. ⁷Ewurgboŋ Atazɛzɛs ka ji kuwura be kafɛ shunusopo to nɛ Israɛlebi na nɛ bɔrɛmatapoana na nɛ Livaiebi na nɛ nshɛbompoana na nɛ mbunagboŋ kenipoana na nɛ bɔrɛlambu to be beshumpo na kikɛ shi Babilɔn be efuli so m bɛta m ba Jerusalɛm to.

⁸Loŋ be kafɛ shunusopo na be kufɔl nusopo na to nɛ Ɛzra bɛta m ba Jerusalɛm. ⁹Kufɔl juŋkparso na be kachɛ juŋkparso na nɛ e daŋ koso Babilɔn be efuli so nseŋ ba fo Jerusalɛm kufɔl nusopo na be kachɛ juŋkparso. Ŋkpal manɛ so, Ebɔrɛ be kuwɔr wu be nɛfa daa wɔ anebi Ɛzra so nna. ¹⁰Ɛzra bre daŋ ta Ebɔrɛ be mbra na be kekoya nɛ amo be kenu nseŋ wora, nɛ mbra na be atande be keta ŋ ŋini Israɛl be efuli so kenishipereso nna.

Kawɔl nɛ ewurgboŋ Atazɛzɛs sibɛ n sa Ɛzra na be asheŋ

¹¹Kawɔl nɛ ewurgboŋ Atazɛzɛs sibɛ n ta m bɔɔ Ɛzra nɛ e daa la bɔrɛmatapo nɛ eŋinipo nsaa nyi Enyɛnpe Ebɔrɛ na be atande nɛ e ta n sa Israɛlebi na nde: ¹²“Ma, ewurgboŋ Atazɛzɛs, e naa sibɛ kawɔl ere a sa fo, Ɛzra, nɛ fo la bɔrɛmatapo nɛ Ebɔrɛ nɛ e wɔ ebɔrɛso na be mbra ŋinipo na. Fo kechɔrɔ nde! ¹³Mee sa kɔnɔ fanɛ Israɛlebi be esa kama, n ta bɔrɛmatapoana nɛ Livaiebi kikɛ n ti so, nɛ e bee sha ketu fo n yɔ Jerusalɛm be efuli so beeŋ tiŋ m bɛ fo so n yɔ. ¹⁴Ma, ewura nɛ ma ejinatopo ashunu, e naa shuŋi fo fanɛ fo ya keni Judiya nɛ Jerusalɛm be efuli so be asheŋ to a laŋɛ fo Ebɔrɛ be mbra nɛ e ta m bɔɔ fo enɔ na be kaplɛa so. ¹⁵Fo alɛ kaŋ yɔ fo ta shuwa nɛ egbiti nɛ ma nɛ ma ejinatopoana ta n sa Israɛl be Ebɔrɛ nɛ mbe lambu wɔ Jerusalɛm to na a yɔ. ¹⁶Ta shuwa nɛ egbiti nɛ baaŋ sa fo ashi Babilɔn be efuli so na nɛ esarga nɛ basa na nɛ bɔrɛmatapoana na beeŋ lara a laŋɛ bɔrɛlambu na be kaplɛa so na gba n ti so. ¹⁷Ya ta amansherbi na be ako n tɔ egbolu nɛ ekpakpa nɛ mbolpɔ nseŋ ta ako malɛ n tɔ ajibi nɛ asɔnuuso n lara sarga bɔrɛsure nɛ k wɔ Ebɔrɛ be lambu nɛ k wɔ Jerusalɛm na so. ¹⁸Amansherbi nɛ a beeŋ ka na malɛ, fo nɛ fo kurgepoana Juwebi na beeŋ ta amo n wora kusɔ kama nɛ k daga nsaa par men be Ebɔrɛ na. ¹⁹Asɔ kama nɛ b ta n sa fo fanɛ fo ta n ya shuŋ Ebɔrɛ ashi bɔrɛlambu na to na, daga fanɛ fo ta amo n ya wora loŋ. ²⁰Kusɔ kama nɛ k daga fanɛ fo nya a laŋɛ Ebɔrɛ be bɔrɛlambu na be kepɔr be kaplɛa so, feeŋ tiŋ ŋ keni ewura be kpanjawu to n fin kumo. ²¹Ma, ewurgboŋ Atazɛzɛs, e naa sa bekama nɛ baa keni Yufreetes be epeŋitɔrkpa be efuli so be amansherbi so na ebɔl fanɛ kusɔ kama nɛ Ɛzra, nɛ e la bɔrɛmatapo nɛ Ebɔrɛ be mbra na be eŋinipo na bee sha, b sa mo. ²²Hale nɛ e bee sha gbiti nɛ amo be egbɛ fo fanɛ kilo ŋgboŋ asa nɛ alfa ana ŋko ayu nɛ amo be egbɛ fo fanɛ kilo ŋgboŋ kudu ŋko yabra belbelso be egalɔn alfa ashe ŋko nfɔl kanaŋkamaso gba, a daga fanɛ b sa mo amo. ²³Kusɔ kama nɛ Ebɔrɛ nɛ e wɔ ebɔrɛso na baŋ kaŋɛ fanɛ e bee sha, a daga fanɛ b wora kumo kananɛ e bee sha na manaŋ manaŋ n sa mo. Men sa maŋ shin e nya agbo n wɔtɔ ma ŋko bekama nɛ baaŋ ba ma kaman na. ²⁴A maŋ daga fanɛ b tu bɔrɛmatapoana na nɛ Livaiebi na nɛ beshɛbompo na nɛ mbunagboŋ kenipoana na nɛ bekama nɛ baa shuŋ bɔrɛlambu na to na kikɛ n sɔ toto be yiri kikɛ. ²⁵Ɛzra, ta kanyiasheŋ nɛ Ebɔrɛ sa fo na ŋ keni to n lara sheriajipoana nɛ demujipoana nɛ b baa keni to a ji asheŋ ashi Yufreetes be epeŋitɔrkpa be efuli so ndoŋ. A daga fanɛ b baa la basa nɛ b nyi fo Ebɔrɛ na be mbra na. Fo alɛ e naaŋ baa ŋini bekama nɛ b maŋ nyi amo na. ²⁶Esa kama nɛ e kini kewora m bɛ fo Ebɔrɛ na be mbra so ŋko ewura be mbra so daga luwu ŋko keju n lar efuli na so ŋko kesuge mbe kapetɛ kikɛ ŋko n ti amodoŋwura ebu be kasogberge nna.” ²⁷Ndoŋ nna nɛ Ɛzra kaŋɛ le: “Kemaŋkura e baa la an nananyɛnana be Ebɔrɛ na peya. Mo e sa ewura na le be nfɛra nɛ e ta bunyaŋ n sa Enyɛnpe Ebɔrɛ be lambu nɛ k wɔ Jerusalɛm na. ²⁸Mo, Ebɔrɛ koŋwule, na be katiŋ to so nɛ ewura nɛ mbe benimu nɛ basa gboŋana na kikɛ wu ma kuwɔr nseŋ shin nɛ n nya le be ekpa ere na. N nyɛnpe nɛ ma Ebɔrɛ na so nɛ n nya kagbene n ta kenyɛn m malga n sa Israɛl be benimu kpakpaso nɛ b nu nseŋ bɛ ma so n yɔ Jerusalɛm na.”

Nnaŋ to be benimu nɛ b tu Ɛzra n yɔ na be asheŋ

¹Israɛl be nnaŋ nɛ b daa wɔ kenyaya to ashi Babilɔn be efuli so nseŋ bɛ Ɛzra so m bɛta m ba Jerusalɛm na be benimu e daa la: ²Gɛɛshɔm nɛ e shi Finihas be kabuna na, nɛ Danɛl nɛ mo alɛ shi Itama be kabuna na, ³nɛ Shekanaya pibinyɛn, Hatush, nɛ mo alɛ gba shi Deevid be kabuna na; nɛ Zakareya nɛ e shi Parosh be kabuna na nɛ basa kalfa nɛ adunu e daŋ ba nɛ bumo kikɛ be atre daa dese nwɔl to; ⁴Zɛrahiya pibinyɛn, Eliɛhɔnayi, nɛ e shi Pahaf Mowab be kabuna nɛ basa alfa anyɔ ko e daŋ ba; ⁵Jahaziɛl pibinyɛn, Shekanaya, nɛ e shi Zaatu be kabuna nɛ basa alfa asa ko e daŋ ba; ⁶Jonatan pibinyɛn, Ebed, nɛ e shi Adin be kabuna nɛ basa adunu e daŋ ba; ⁷Atalia pibinyɛn, Jeshaya, nɛ e shi Elam be kabuna nɛ basa adushunu e daŋ ba; ⁸Maikel pibinyɛn, Zebadiya, nɛ e shi Shɛfatiya be kabuna nɛ basa aduburwa e daŋ ba; ⁹Jehiɛl pibinyɛn, Obadaya, nɛ e shi Jɔab be kabuna nɛ basa alfa anyɔ nɛ kuduaburwa e daŋ ba; ¹⁰Josifɛya pibinyɛn, Shɛlomit, nɛ e shi Bani be kabuna nɛ basa kalfa nɛ adeshe e daŋ ba; ¹¹Bebaye pibinyɛn, Zakareya, nɛ e shi Bebaye be kabuna nɛ basa adunyɔ nɛ aburwa e daŋ ba; ¹²Hakatan pibinyɛn, Johanan, nɛ e shi Azgad be kabuna nɛ basa kalfa nɛ kudu e daŋ ba; ¹³Ɛlifɛlɛt nɛ Jeɛl nɛ Shemaya nɛ b shi Adonikam be kabuna, nseŋ ti bumo nɛ b shir kaman m ba na so na, nɛ basa adeshe k e daŋ ba; ¹⁴Utai nɛ Zakɔɔ nɛ b shi Bigvai be kabuna na nɛ basa adushunu malɛ e daŋ ba.

Ɛzra ka fin Livaiebi nɛ baaŋ baa shuŋ bɔrɛlambu na to be asheŋ

¹⁵Ndoŋ nna nɛ n shɛr basa na kikɛ kabombi nɛ k bee shile a yɔ kade nɛ baa tre Ahava na nɛ an daŋ ji nchɛ asa ndoŋ na ase. Ŋ ka keni basa na nɛ bɔrɛmatapoana na to n daa maŋ wu Livaiebi bumo to. ¹⁶Ndoŋ nna nɛ n shuŋi n tre Eliaza nɛ Ariɛl nɛ Shemaya nɛ Ɛlnatan nɛ Jarib nɛ Ɛlnatan nɛ Netan nɛ Zakareya nɛ Mɛshulam nɛ b daa la bejuŋkparpo na. Ma alɛ daŋ naŋ tre Jowarib nɛ Ɛlnatan nɛ b daa la basa nɛ b koya nsaa kɔ kenyi ga na nna. ¹⁷Kumo be kaman nɛ n shuŋi bumo Kasifiya be efuli so be enimu nɛ baa tre Iddo nɛ mo braana, nɛ b la bɔrɛlambu na to be beshumpo na, kutɔ fanɛ b sa anyi basa nɛ baaŋ baa shuŋ Ebɔrɛ be kushuŋ ashi bɔrɛlambu na to. ¹⁸Ŋkpal Ebɔrɛ be kuwɔrwu ka daa wɔ anyi so so, Livainyɛn ko nɛ e shi Maali be kabuna nɛ baa tre mo Shɛribiya na nɛ b daŋ lara n sa anyi. E daa shuŋ ga. Mo nɛ mbe mbinyɛnsobi nɛ mo siponyɛnsoana kuduaburwa e daŋ ba. ¹⁹Bumo alɛ daŋ naŋ shin nɛ Hashabia nɛ Jeshaya nɛ b shi Mɛrari be kabuna malɛ nɛ bumo kurgepoana adunyɔ gba ba. ²⁰Kumo be kaman, b daŋ naŋ shin nɛ basa nɛ ewura Deevid nɛ mbe benimu daŋ yili kumo fanɛ b baa chɛ Livaiebi na to na to be basa alfa anyɔ nɛ adunyɔ ba nɛ b baa ka chɛ to a shuŋ bɔrɛlambu na to.

²¹Ahava be kabombi na ase nɛ ŋ kaŋɛ fanɛ a daga an kikɛ ka kishi nseŋ bar anyi be amu kaseto ashi Ebɔrɛ be anishito nseŋ kule mo nɛ e juŋkpar anyi nseŋ keni anyi nɛ anyi be mbia nɛ anyi be asɔ kikɛ so ashi anyi be enite to. ²²K daa beeŋ baa la nyɔmɔ nna n sa ma, fanɛ an ka beeŋ kaŋɛ ewura fanɛ e sa anyi esoji nɛ b baa kuŋ anyi ashi an doŋana kutɔ ashi anyi be enite ere to. Ŋkpal manɛ so, n daŋ kaŋɛ mo fanɛ an be Ebɔrɛ na bee nɛfa esa kama nɛ e ta mo yirda ŋ wɔtɔ mo to nna. Ebɔrɛ malɛ be kagbene maa fuli esa kama nɛ e kplaŋ mo so so. E bee gberge loŋ be esa kusoe nna. ²³Ndoŋ nna nɛ an kishi ŋ kule Ebɔrɛ fanɛ e kuŋ anyi nɛ mo alɛ nu anyi be kekule.

²⁴Nɛ ŋ keni bɔrɛmatapoana na to n lara Shɛribiya nɛ Hashabia nɛ bumo kurgepoana kudu ko n ti bumo so. ²⁵Kumo be kaman nɛ ŋ karga gbiti nɛ shuwa nɛ asɔ nɛ ewura nɛ mbe benimu na nɛ Israɛlebi na kikɛ daŋ ta n chɛ anyi enɔ so fanɛ an ta n ya lara sarga ashi bɔrɛlambu na to na n sa bumo. ²⁶Gbiti be ndarbi alfa ashe nɛ adunu nɛ gbiti be echeenshi kalfa nɛ shuwa be ndarbi kalfa; ²⁷nɛ shuwa be echeenshi adunyɔ, nɛ amo be yawu beeŋ fo fanɛ pɔŋ kagboŋ, nseŋ ta danyaŋ be echeenshi anyɔ, nɛ amo nɛ shuwa be echeenshi be yawu sasa na, n ti so n sa bumo. ²⁸Kumo be kaman nɛ ŋ kaŋɛ bumo le: “Menyi nɛ asɔ ere kikɛ ki asɔ cheembi nna n sa Enyɛnpe men nanaana be Ebɔrɛ na. Shuwa nɛ gbiti na kikɛ la kagbene koŋwule so be sarga nna nɛ an lara n sa Enyɛnpe men tutoana be Ebɔrɛ na. ²⁹Men baa de amo so nɛnɛ hale nɛ men ya fo Jerusalɛm nseŋ karga amo m bɔɔ bɔrɛmatapoana na enɔ ashi bɔrɛmatapo nimuso na nɛ Livaiebi nɛ Israɛlebi be nnaŋ be benimu na kikɛ be anishito ashi bɔrɛlambu na to.” ³⁰Ndoŋ nna nɛ bɔrɛmatapoana na nɛ Livaiebi na sɔ gbiti nɛ shuwa be asɔ n ta n yɔ bɔrɛlambu na to ashi Jerusalɛm.

Kebɛta n yɔ Jerusalɛm be asheŋ

³¹Kufɔl juŋkparso na be kachɛ kudu anyɔsopo na nɛ an fara n shi Ahava be kabombi na ase a yɔ Jerusalɛm. Anyi nɛ anyi be Ebɔrɛ e daa la nɛ e daa kuŋ anyi nɛ an doŋana maaŋ kuŋ anyi ekpa n tu anyi ŋ kɔ ŋko beyu e kuŋ anyi ekpa n suge anyi be asɔ. ³²An ka ya fo Jerusalɛm nɛ an wushi nchɛ nsa. ³³Kachɛ nasopo na nɛ an yɔ bɔrɛlambu na to n ya karga gbiti nɛ shuwa nɛ echeenshi na kikɛ m bɔɔ Uriya pibinyɛn, Mɛremɔf, nɛ e daa la bɔrɛmatapo na enɔ. Mo nɛ Finihas pibinyɛn, Eliaza, nɛ Joshuwa pibinyɛn, Jozabad, nɛ Binuyi pibinyɛn, Nowadiya nɛ b la Livaiebi na e daa la. ³⁴An daŋ karga nseŋ ber kusɔ kama na nna nseŋ sibɛ amo be kananɛ a sa kikɛ n wɔtɔ nwɔl to loŋ be kamɔnchɛ na. ³⁵Basa nɛ b daŋ bɛta m ba na kikɛ daŋ bar esarga nna m ba chɔɔ n sa Israɛl be Ebɔrɛ na. B daŋ yili Israɛlebi kikɛ be katelamu to nna n ta egbolu kudu anyɔ nɛ ekpakpa adekpanu nɛ ashe nɛ ekpakpafɔlbi adushunu nɛ ashunu n lara sarga. Kumo be kaman nɛ b ta mboe kudu anyɔ n lara sarga ŋ kule alubi be ketampaŋ. B daŋ chɔɔ le be asɔbɔya ere kikɛ nna n lara sarga n sa Enyɛnpe Ebɔrɛ na. ³⁶Bumo alɛ daŋ naŋ ta kawɔl nɛ ewura na sibɛ n sa fanɛ b ta m ba sa Yufreetes be epeŋitɔrkpa be efuli so be gomena nɛ ndoŋ be benimu na nna n ya sa bumo. Nɛ bumo alɛ gba chɛ Israɛlebi na nɛ bɔrɛlambu na be kushuŋ to ga.

Anebi Ɛzra ka pin Juwebi nɛ basa pɔtɛ be kakil be asheŋ

¹Asheŋ ere kikɛ ka wora n loge be kaman, nɛ Israɛlebi be bejuŋkparpo na ba kaŋɛ ma fanɛ basa na nɛ bɔrɛmatapoana na nɛ Livaiebi na kra maŋ lara bumo be amu ashi basa nɛ b chena ŋ kulti bumo na be asheŋ woraso lubi to. B ta bumo be amu n wɔtɔ Keenanebi nɛ Hitebi nɛ Pɛrizebi nɛ Jebusiebi nɛ Ammɔnebi nɛ Mowabebi nɛ Ijiptebi nɛ Amɔriebi be mbushusheŋ nɛ b daa wora to nna. ²Juwebi be benyɛn nɛ bumo be bibinyɛnsobiana daa ta eyiri pɔtɛana be mbichesobi nna a kil nɛ loŋ nɛ Ebɔrɛ be basa maŋ naa du cheembi. Israɛlebi be benimuana na e daŋ sɔ kumo be kejuŋkpar. ³Ŋ ka nu loŋ be kubɔya na nɛ kpɛa ma piŋi to nseŋ gberge ma kumu so nɛ katɔl be emin n tia nseŋ chena kagbenejija to. ⁴Kagbenejija na to nɛ n chena loŋ hale n ya fo jemanɛ nɛ baa lara kaaseso be sarga na. Ndoŋ nna nɛ basa nɛ kufu kɔ bumo ŋkpal kusɔ nɛ Israɛl be Ebɔrɛ kaŋɛ a laŋɛ alubi be kaplɛa so na ba shɛr ŋ kulti ma. ⁵Kaaseso be sarga be kelara be jemanɛ ka fo, nɛ n ta kagbenejija nɛ ma asɔ kpɛatoso na loŋ ŋ koso n ya gbir nseŋ maŋ ma enɔana so kabɔrɛkule to ŋ ŋini Enyɛnpe ma Ebɔrɛ na ⁶nseŋ kule Ebɔrɛ ŋ kaŋɛ: “O ma Ebɔrɛ, k kɔ ma nyɔmɔ nɛ anishinyɔr nna fanɛ ŋ ka beeŋ maŋ ma enɔ so fo anishito, ŋkpal manɛ so, anyi be alubi shi m baŋ anyi so hale n dii n ya fo ebɔrɛso gba kuraa. ⁷Baŋ yili an nananyɛnana be jemanɛ so m ba fo kabre, anyi be alubi baa shi ga nna. Ŋkpal alubi na so, anyi nɛ anyi be bewura nɛ anyi be bɔrɛmatapoana kikɛ ki anya nna n sa efuli pɔtɛ so ebi nɛ baa mɔ anyi nsaa suge anyi be asɔ nseŋ naa pɛ anyi a yɔ kenyaya to. K shin nɛ an ji anishinyɔr ga nseŋ kra ji kumo kabre. ⁸Ama, O Enyɛnpe anyi be Ebɔrɛ, jemanɛ gbrɛbi nɛ k choŋ ere fo wu anyi kuwɔr nseŋ shin nɛ anyi be beko kra wɔ ŋkpa to ashi fo kakpa cheembi ere. Fo lara anyi kenyaya to nseŋ sa anyi ŋkpa popɔr. ⁹An daa la anya nna, ama fo maŋ yige anyi kenyaya na to. Fo shin nɛ Pɛshiya be bewura wu anyi kuwɔr nseŋ shin nɛ an kraa wɔ ŋkpa to hale nɛ m ba nya ekpa nɛ an ba lɔŋɛ m pɔr fo bɔrɛlambu nɛ k daŋ ki kelambure a dese na. Kumo be kaman, an naŋ nya anyi be amu a wɔ Juda be efuli so nɛ Jerusalɛm be kade to. ¹⁰O Ebɔrɛ, asheŋ nɛ a wora ere kikɛ be kaman, manɛ nɛ anyeeŋ naŋ kaŋɛ? Ŋkpal manɛ so, anyi maŋ wora m bɛ fo ¹¹mbra nɛ fo bɔla anebiana nɛ b daa la fo mbɔ na so n nase n sa anyi na so. B daŋ kaŋɛ anyi fanɛ kasawule nɛ an daa yɔ nɛ an ya chena so na la kakpa nɛ eyurpisheŋ daa shi nna. Ŋkpal manɛ so, basa nɛ b daa wɔ kumo so na daa wɔ mbushusheŋ nɛ eyurpisheŋ be kebaawɔtɔ to nna. ¹²Anebiana na daŋ kaŋɛ anyi fanɛ nɛ anyee sha kenu kasawule na be ebel nseŋ ji kumo ŋ ka n yili anyi be kaman to ebi bre, an sa maŋ ta bumo be beche, ŋko ŋ kil bumo be benyɛn. B yɛ anyi alɛ e sa maŋ kaŋ ji bumo keteri, ŋko n shin nɛ b ji eleŋ anyi so. ¹³Kusogberge nɛ k ba anyi so ŋkpal anyi be alubi so ere kikɛ be kaman, an wu fanɛ fo, anyi be Ebɔrɛ na, kraŋ shu anyi so nna. Ŋkpal manɛ so, mannɛ kasogberge nɛ k daga anyi nɛ fo sa anyi na. Fo kraŋ shin nɛ anyi to be beko kraa wɔ ŋkpa to. ¹⁴Nɛ manɛ so, nɛ anyeeŋ naŋ kini kebɛ fo mbra na so nseŋ ya ta ŋko ŋ kil le be basa nɛ b wɔ eyurpisheŋ to ere? Nɛ an wora loŋ feeŋ nya agbo n wora anyi nseŋ mur anyi gba kuraa. Fo alɛ maaŋ naŋ shin nɛ anyi to be ekoŋwule gba e baa wɔ ŋkpa to. ¹⁵Enyɛnpe Israɛl be Ebɔrɛ, kashenteŋ jipo e la fo. Fo maŋ shin nɛ an mur, ama fo shin nɛ an ji ŋkpa. Anyee shuli kewora n jija fo anishito nsaa nyi fanɛ an daa maŋ kɔ ekpa nɛ an ba fo anishito gba kuraa.”

Israɛlebi ka kre keyige eyiri pɔtɛana be kakil be asheŋ

¹Anebi Ɛzra ka wɔ nɛ alubi be ketampaŋ be kabɔrɛkule to nsaa shu ŋkpal bumo be alubi damta nɛ b wora na so na, nɛ Israɛlebi be benyɛn nɛ beche nɛ mbia damta ko ba yili ŋ kulti mo ŋ wɔtɔ a shu kenishipereso. ²Ndoŋ nna nɛ Jehiɛl pibinyɛn, Shekanaya, nɛ e shi Elam be kabuna kaŋɛ anebi Ɛzra: “Anyi maŋ ji kashenteŋ n sa Ebɔrɛ ŋkpal befɔche nɛ an ta a kil ere so. Ama tama kra wɔtɔ n sa Israɛlebi. ³To, men shin nɛ an nase kɔnɔ fanɛ anyeeŋ yige loŋ be beche na nseŋ lara bumo nɛ bumo be mbia be asheŋ ashi anyi be asheŋ to nseŋ wora asheŋ fanɛ kananɛ fo nɛ bekama nɛ baa ŋana Ebɔrɛ bee kaa ji anyi asoe to a kaŋɛ na, saŋɛ na so anyeeŋ wora asheŋ m bɛ Ebɔrɛ be mbra na so. ⁴Kusɔ kama bɔɔ fo enɔ nna na, amoso, koso to nɛ an pɛ fo kashɛr to. Baa kɔ kenyɛn nɛ kusɔ kama e nyalɛ.”

⁵Ndoŋ nna nɛ anebi Ɛzra koso n shin nɛ bɔrɛmatapoana be bejuŋkparpo nɛ Livaiebi be bejuŋkparpo kikɛ nase nnɔ fanɛ baaŋ wora kusɔ nɛ Shekanaya kaŋɛ na. ⁶Kumo be kaman nɛ e lar bɔrɛlambu na to n yɔ Eliyashib pibinyɛn, Jehohanan, be ebu to n ya ka wɔ ekishi to. Ajibi nɛ nchu daa maŋ beta mbe kɔnɔ, ŋkpal basa na ka maŋ ji kashenteŋ n sa Ebɔrɛ na so.

⁷Ndoŋ nna nɛ bejuŋkparpo na nɛ benimu na sa ebɔl Juda be efuli so nɛ Jerusalɛm to fanɛ bekama nɛ b bɛta m ba na kikɛ e shɛr Jerusalɛm to. ⁸Nseŋ kaŋɛ fanɛ esa kama nɛ e kini keba nshɛr na to nchɛ asa be kefɛato, beeŋ paŋ mbe asɔ kikɛ. Kumo ba kaman nɛ an lara mo ashi anyi to nɛ e maaŋ naa la anyi to be eko. ⁹Nchɛ nsa na ka fo, kumo e la fanɛ, kufɔl kpanusopo na be kachɛ kudu anyɔsopo na nɛ Juda nɛ Bɛnjamin be efuliana so ebi kikɛ ba shɛr bɔrɛlambu na ase. Ŋkpal nshɛr na ka la kenishipere n sa bumo so b daŋ kplaŋ bɔrɛ so nna nɛ gboŋgboŋi ko bri bumo hale nɛ baa gbugbo. ¹⁰Ndoŋ nna nɛ Ɛzra, nɛ e la bɔrɛmatapo na, koso n yili nseŋ kaŋɛ bumo: “Men maŋ ji kashenteŋ n sa Ebɔrɛ, ŋkpal manɛ so men ta befɔche a kil n shin nɛ Israɛl be alubi naŋ wora keshi n ti so. ¹¹Amoso, men tuba n lar men be alubi to ashi men nananyɛnana be Ebɔrɛ na be anishito nseŋ fara a wora mbe aparsheŋ. Men lar basa pɔtɛ nɛ b wea men to ere be asheŋ to nseŋ yige befɔche nɛ men ta a kil na.”

¹²Ndoŋ nna nɛ basa na kikɛ boŋ to awɔrso ŋ kaŋɛ: “Kashenteŋ nɛ fo ji! Anyeeŋ wora kusɔ nɛ fo kaŋɛ na. ¹³Ama basa nɛ b shɛr nfe ere shi ga nɛ bɔrɛ malɛ naa ba ŋkpal loŋ so anyi maaŋ tiŋ a yil kowushina loŋ. Kumo be kaman, kesheŋ na maaŋ la kachɛ koŋwule ŋko nchɛ nyɔ be kesheŋ nna. Ŋkpal manɛ so, basa nɛ b wora alubi na shi ga. ¹⁴Men shin nɛ anyi be bejuŋkparpo a shir Jerusalɛm ŋ keni demu na to n sa anyi. Kumo be kaman, nɛ an yili kachɛ nɛ bekama nɛ b kɔ befɔche a kil na nɛ bejuŋkparpo na nɛ demujipoana na kikɛ e shɛr Jerusalɛm to nfe. Loŋ e naŋ shin nɛ Ebɔrɛ be agbo e wushi nseŋ lar anyi so ŋkpal demu ere so.” ¹⁵Asahɛl pibinyɛn, Jonatan, nɛ Tikva pibinyɛn, Jeezia nawule e daa maŋ shuli m bɛ kamalga na so; nɛ Mɛshulam nɛ Shabetayi, nɛ e shi Livai be kabuna na, malɛ daa yil bumo be kaman. ¹⁶Ŋkpal galeŋga ka daŋ shuli n sa kamalga na so, Ɛzra, bɔrɛmatapo na, daŋ lara bejuŋkparpo na be beko nna n shin nɛ b sibɛ bumo be atre n nase. Kufɔl kudusopo na be kachɛ juŋkparso na nɛ b fara a keni asheŋ na to. ¹⁷Afɔl asa nɛ b ta ŋ keni bumo nɛ b daŋ ta befɔche a kil na be asheŋ to.

Benyɛn nɛ b kɔ eyiri pɔtɛ be beche a kil be asheŋ

¹⁸Benyɛn nɛ b shi bɔrɛmatapoana be kabuna nsaa kɔ eyiri pɔtɛ be beche a kil na e daa la Maaseia nɛ Eliaza nɛ Jarib nɛ Gɛdaliya nɛ b la Jehozadak be bibinyɛn nseŋ shi Joshuwa nɛ sipoana be kabuna na. ¹⁹Bumo kikɛ daŋ nase nnɔ nna fanɛ baaŋ yige eyiri pɔtɛ nɛ b kɔ a kil na. Kumo be kaman nɛ bumo be ekama na ta kpakpa n lara sarga ŋ kule alubi be ketampaŋ. ²⁰Benyɛn nɛ b shi Imma be kabuna nseŋ daa kɔ eyiri pɔtɛ a kil na malɛ e daa la Hanani nɛ Zɛbadiya. ²¹Bumo nɛ bumo alɛ shi Harim be kabuna nseŋ daa kɔ eyiri pɔtɛ a kil na e daa la Maaseia nɛ Elaija nɛ Shɛmaaya nɛ Jehiɛl nɛ Uziya. ²²Basa nɛ bumo alɛ shi Paashɛ be kabuna nseŋ ta eyiri pɔtɛ a kil na e daa la Ɛliyonayi nɛ Maaseia nɛ Ishmaɛl nɛ Netanɛl nɛ Jozabad nɛ Elasa. ²³Basa nɛ b shi Livai be kabuna nseŋ ta eyiri pɔtɛ a kil na e daa la Jozabad nɛ Shimɛya nɛ Kɛlaiya, nɛ baa tre mo Kelita na, nɛ Pɛtahiya nɛ Juda nɛ Eliaza. ²⁴Ɛliyashib nɛ e shi beshɛbompo be kabuna na gba daa kɔ yiri pɔtɛ nna a kil. Basa nɛ b daa yili bɔrɛlambu na be mbunagboŋ ase a kuŋ nseŋ ta eyiri pɔtɛ a kil e daa la Shalum nɛ Tɛlɛm nɛ Yuri. ²⁵Basa nɛ b shi Israɛl be mbuna nɛ a ka na nseŋ daa kɔ eyiri pɔtɛ a kil na malɛ e daa la Ramiya nɛ Iziya nɛ Malkija nɛ Mijamin nɛ Eleyaza nɛ Malkija nɛ Bɛnaya nɛ b shi Parosh be kabuna. ²⁶Bumo nɛ b shi Elam be kabuna malɛ e daa la Mataniya nɛ Zakareya nɛ Jehiɛl nɛ Abdi nɛ Jerɛmɔf nɛ Elaija. ²⁷Bumo nɛ b shi Zaatu be kabuna e daa la Ɛliyonayi nɛ Ɛliyashib nɛ Mataniya nɛ Jerɛmɔf nɛ Zabad nɛ Aziza. ²⁸Bumo nɛ b shi Bebaye be kabuna e daa la Jehohanan nɛ Hananiya nɛ Zabai nɛ Atlai. ²⁹Bumo nɛ b shi Bani be kabuna e daa la Meshulam nɛ Maluk nɛ Adaya nɛ Jashub nɛ Shɛal nɛ Jerɛmɔf. ³⁰Bumo nɛ b shi Pahaf Mowab be kabuna e daa la Adena nɛ Kɛlal nɛ Bɛnaya nɛ Maaseia nɛ Mataniya nɛ Bɛzalɛl nɛ Binuyi nɛ Manase. ³¹Bumo nɛ b shi Harim be kabuna e daa la Eliaza nɛ Ishija nɛ Malkija nɛ Shemaya nɛ Shimiyɔn ³²nɛ Bɛnjamin nɛ Maluk nɛ Shemariya. ³³Bumo nɛ b shi Hashum be kabuna e daa la Matɛnayi nɛ Matata nɛ Zabad nɛ Ɛlifɛlɛt nɛ Jerɛmayi nɛ Manase nɛ Shimeyi. ³⁴Bumo nɛ b shi Bani be kabuna e daa la Maadai nɛ Amram nɛ Yuwɛl ³⁵nɛ Benayi nɛ Bedaye nɛ Keluhi ³⁶nɛ Vaniya nɛ Meremɔf nɛ Ɛliyashib ³⁷nɛ Mataniya nɛ Matɛnayi nɛ Jaasu. ³⁸Bumo nɛ b shi Binuyi be kabuna e daa la Shimɛyi ³⁹nɛ Shelemaya nɛ Netan nɛ Adaya ⁴⁰nɛ Maknadebayi nɛ Shashayi nɛ Sɛɛrai ⁴¹nɛ Azarɛl nɛ Shelemaya nɛ Shemariya ⁴²nɛ Shalum nɛ Amariya nɛ Josɛf. ⁴³Bumo nɛ b shi Nebo be kabuna e daa la Jeyɛl nɛ Matitiya nɛ Zabad nɛ Zebina nɛ Jadayi nɛ Jowɛl nɛ Benaya. ⁴⁴Basa ere kikɛ e daa kɔ befɔche a kil hale nɛ bumo beko daŋ ta bumo ŋ kurge mbia, ama b daŋ ba yige beche na nɛ mbia na kikɛ nna.