ANEBI EZIKƐL
BE KAWƆL
1Ezikɛl ka wu Enyɛnpetale Ebɔrɛ be kemaŋkura be asheŋ
1-3Ma ketre e la Ezikɛl nɛ n la bɔrɛmatapo nsaa la kanyɛn nɛ baa tre Buzi na pibinyɛn. B ka pɛ Juda be ewura nɛ baa tre Jehowachin nseŋ tintiŋ mo n yɔ Babilɔn be efuli so na be kafɛ nusopo to nɛ ma nɛ bumo nɛ b pɛ n ti mo so n yɔ na daa wɔ lɔr nɛ baa tre Kɛba na ase. Ma nfɛ adesa to be kufɔl nasopo to be kachɛ nusopo na nɛ Enyɛnpe Ebɔrɛ na be kubɔya ba ma kutɔ nɛ esoso bugi n shin nɛ ŋ ku bɔrɛdare ere. 4Ndoŋ nna nɛ ŋ keni esoso n wu bɔrɛ be afugboŋ ko ka shi kelargato be esoso be kaba so a ba. Bɔrɛ daa nyɛkpɛ kuwɔlpagboŋ ko to nna nɛ esoso kikɛ fulto. Edɛ daa lar kuwɔlpagboŋ na be nferinto a nyɛkpɛ fanɛ danyaŋ nɛ k la kachɔnɔnyifu nɛ b fifɛa kumo so na nna. 5Nɛ n wu asɔbɔya keniso ana ko nɛ b du fanɛ edimɛdi ashi edɛ na be nferinto. 6Bumo be ekama daa kɔ anishito ana nɛ mbuibi be aba ana ana nna. 7Bumo be aya daa maŋ kɔ echɛkpa amo alɛ nsaa kɔ alotobi fanɛ kenabi na. Alotobi na daa kpa edɛ nna fanɛ danyaŋ nɛ b fifɛa so nɛ k bee nyɛkpɛ so na. 8Asɔbɔya keniso na be ekama daa kɔ dimɛdi be enɔ nna ashi mbe aba ana na be kekama be kaseto. 9B daŋ pal kaman nna n sa abar nseŋ parga bumo be aba na be anyɔ anyɔ to nɛ amo be nnɔso pɛ abar. Kaplɛkama malɛ nɛ baa yɔ, b pɛ abar to loŋ nna a yɔ, b maa kilgi bumo be eyurana. 10Anishito ana nɛ ekama kɔ na malɛ daa kɔr abar to nna. Bumo be anishito be kaba so daa la dimɛdi be anishito nna, nɛ jisoso be kaba so la buluŋ be anishito, nɛ bena so la gbolu be anishito nɛ kaman malɛ peya na la kusore be anishito. 11Asɔbɔya keniso na daŋ parga bumo be aba na be anyɔ anyɔ to nna nɛ a beta bumo braana nɛ b wɔ bumo be jisoso nɛ bena so na peya, nseŋ parga anyɔ anyɔ nɛ a ka malɛ to m buu bumo be eyurana so. 12Bumo be ekama be anishito daa keni mba ana na kikɛ nna, amoso bumo kikɛ beeŋ tiŋ m pɛ abar to n yɔ kaba kama so nɛ b maŋ kilgi. 13Asɔbɔya keniso na daa du fanɛ mbulpi nɛ a bee suse nna a nite saŋkikɛ, nsaa nyɛrga a kpa edɛ fanɛ bɔrɛ ka bee nyɛkpɛ na. 14Bumo alɛ daa yɔ anishito nsaa bɛta kaman manaŋ manaŋ nna fanɛ bɔrɛ ka bee nyɛkpɛ na. 15Ŋ ka bee keni asɔbɔya keniso ana na nɛ n wu fanɛ bumo be ekama kɔ kusɔ kulkulso fanɛ cheche be keya nɛ k yil kasawule nna m mata mo. 16Aya kulkulso ana na kikɛ daŋ duli abar nna nsaa kpa edɛ fanɛ yawu kpakpaso be ajembu nyɛkpɛso na, nɛ amo be kekama malɛ kɔ keya kulkulso nyɔsopo nɛ k kilgi n larga to ashi kumo be nferinto, 17saŋɛ na so aya kulkulso na gba beeŋ tiŋ a yɔ anishito ŋko a bɛta kaman, ŋko a yɔ bena so ŋko jisoso nɛ a maŋ kilgi. 18Abɛlso kulkulso nɛ a wɔ asɔbɔya keniso na be aya kulkulso fanɛ cheche be aya na to na daa kɔ anishi ŋ kulti amo be kaplɛkama.
19Asɔbɔya keniso ana na baa yɔ kaplɛkama, aya kulkulso nɛ a mata bumo na gba bee yɔ ndoŋ nna, nɛ b baa firgi, aya na gba bee firgi nna. 20Kaplɛkama nɛ asɔbɔya keniso na daa sha keyɔ baa yɔ nna nɛ bumo be aya kulkulso na e tu bumo a yɔ, ŋkpal manɛ so, asɔbɔya keniso na e naa keta aya na a ashuŋ. 21Ŋkpal loŋ so, jemanɛ kikɛ nɛ asɔbɔya keniso na bee nite ŋko n yili ŋko a firgi gba nna, aya kulkulso na gba bee wora loŋ gbagba nna, ŋkpal manɛ so, asɔbɔya keniso na e naa keta amo a shuŋ.
22Kede be kaman nɛ n wu kusɔ ko nɛ k bee nyɛkpɛ fanɛ jɛrbi nsaa du le joŋgroŋ ka salga n sɔ awɔlto ashi asɔbɔya keniso ana na be amu so fanɛ kuwɔlpa na. 23Asɔbɔya keniso ana na daa yil kuwɔlpa na be kaseto nna nseŋ parga bumo be mbuibi be aba ana na to be anyɔ nyɔ to n ya pɛ bumo braana peya to; nseŋ ta anyɔ anyɔ nɛ a ka malɛ m parga to m buu bumo be eyurana so. 24Asɔbɔya keniso na ka koso m bri aba to a firgi, nɛ n nu egbri fanɛ teku so be kewawa na, ŋko benapo damta ka na aya so na ŋko Enyɛnpetale Ebɔrɛ be ebɔl na. B ka ya yili nɛ b bra bumo be mbuibi be aba na m buu bumo be eyurana so.
25Jemanɛ nɛ b maŋ naa firgi nseŋ bela bumo be aba m buu eyurana so a yil na, nɛ n nu egbri ko ka shi kuwɔlpa nɛ k wɔ asɔbɔya keniso ana na be amu so na be awɔlto m ba. 26Ndoŋ nna nɛ ŋ wu kusɔ ko fanɛ kuwurputi nɛ b ta yawu kpakpaso be kejembu lela nɛ baa tre ‘Saffai’ na n lɔŋɛ, nseŋ naŋ wu esa ko ka duli dimɛdi nɛ e tase kuwurputi na so. 27Nɛ yili mbe kashɛr ase a yɔ mbe kumu ase du fanɛ danyaŋ nɛ k wɔ edɛ be nferinto na nɛ mbe kashɛr ase a yɔ mbe aya ase malɛ du fanɛ edɛ be adondulombi. Kakpa kikɛ daŋ fulto parr nna ŋ kulti mo 28fanɛ kananɛ bɔrɛ bee mɔl nɛ kabɔrɛnyaŋgelambi bee lar kuwɔlpa so a fulto na.
Ndoŋ nna nɛ m pin fanɛ Enyɛnpe Ebɔrɛ na be kemaŋkura nɛ n wu na nseŋ ta enɔ m buu anishi so epul na to ŋ tɔr epun so. Kumo be kaman nɛ n nu ebɔl ko ka bee malga ma kutɔ.
2Enyɛnpe Ebɔrɛ ka tre Ezikɛl be asheŋ
1Ndoŋ nna nɛ ebɔl na kaŋɛ ma le: “Dimɛdi pibi, Ezikɛl, koso n yili. Mee sha kemalga fo kutɔ nna.” 2Ebɔl na ka bee malga na nɛ Ebɔrɛ be Kiyoyu ba ma so n shin nɛ ŋ koso n yili nɛ k kaŋɛ le: 3“Dimɛdi pibi, mee shuŋi fo Israɛl be basa kutɔ nna. Ŋkpal manɛ so, kananɛ bumo tutoana kikɛ daŋ pal kaman n sa ma nseŋ kini kenu n sa ma na nɛ bumo alɛ gba bee wora hale nɛ mbre na. 4Basa nɛ mee shuŋi fo bumo kutɔ ere la ŋgbene kpakpaso nɛ kusoe kpakpa be basa nɛ b maa sa ma bunyaŋ nna. Ya kaŋɛ bumo kusɔ nɛ ma, Enyɛnpetale Ebɔrɛ na kaŋɛ. 5B kaŋ nu n sa fo ŋko ŋ kini kenu n sa fo ŋkpal b ka la ŋgbene kpakpaso be basa so gba baaŋ pin fanɛ anebi ko ba bumo kutɔ m ba malga bre. 6Ama fo ere, dimɛdi pibi, sa maa ŋana bumo ŋko bumo be mmalga. Sa maa lɔ kufu ŋkpal b ka beeŋ kplaŋ fo so nseŋ wora fo yɛryɛrbi so. K beeŋ baa du fanɛ fo ka wɔ ewi to ŋko nna to nna. Ama sa maa ŋana basa nɛ b kini ma nseŋ pal kaman n sa ma na ŋko n shin nɛ b baa ta kufu a da fo. 7Ma mmalga a daga fanɛ fo malga n sa bumo. Baaŋ nu ŋko b maaŋ nu, fo ere e malga n sa bumo. Baa nyiŋi fanɛ b la basa nɛ b kini ma nseŋ pal kaman n sa ma nna. 8Ama fo ere, dimɛdi pibi, nu kusɔ nɛ mee kaŋɛ fo ere, nsaa maŋ kini ma m pal kaman n sa ma fanɛ bumo. Amoso bugi kɔnɔ n sɔ kusɔ nɛ mee sa fo ere n ji fanɛ ajibi.”
9Ndoŋ nna nɛ ŋ keni nseŋ wu enɔ nɛ kawɔl sibɛso ko bɔɔ to a wɔ enɔ na to nɛ k teŋi n shoŋi ma. 10Ndoŋ nna nɛ enɔ na bugi kawɔl sibɛso na to nɛ n wu fanɛ kushu nɛ kagbene jija be yiri kikɛ be asheŋ nɛ b sibɛ n deŋi kumo be mba anyɔ na kikɛ so.
31Ndoŋ nna nɛ Enyɛnpe Ebɔrɛ na naŋ kaŋɛ ma le: “Dimɛdi pibi, Ezikɛl, ta kawɔl sibɛso ere n ji fanɛ ajibi nseŋ yɔ n ya malga Israɛl be basa na kutɔ.” 2Nɛ m bugi kɔnɔ nɛ e ta kawɔl sibɛso na n sa ma fanɛ n ji.
3Kumo be kaman nɛ e kaŋɛ ma: “Dimɛdi pibi, ta kawɔl sibɛso nɛ n sa fo ere n ji fanɛ ajibi m moɛ.” Nɛ n ta kumo n ji. K daa du belbel ma kɔnɔ to nna fanɛ mushoŋ.
4Ndoŋ nna nɛ Enyɛnpe Ebɔrɛ na naŋ kaŋɛ ma: “Dimɛdi pibi, naniere yɔ Israɛl be basa na kutɔ n ya kaŋɛ bumo kusɔ kama nɛ meeŋ kaŋɛ fo. 5Mannɛ efuli pɔtɛ so be basa nɛ bumo ŋgbar kɔr nsaa du kpakpa n sa fo kutɔ nɛ mee shuŋi fo, ama Israɛl be basa kutɔ. 6N daŋ shuŋi fo efuligboŋ pɔtɛ be basa nɛ baa gbar ŋgbar nɛ a du kpakpa nɛ fo tiŋ m pin amo to gba, baaŋ nu n sa fo. 7Ama Israɛl be basa ere maŋ wora shiriya nɛ b nu n sa fo, ŋkpal manɛ so b maŋ wora shiriya nɛ b nu n sa ma so. Bumo kikɛ la kusoe kpakpaso nɛ kumu kpakpaso be basa nna. 8Ŋkpal loŋ so, meeŋ shin nɛ fo kusoe nɛ kagbene e baa du kpakpa fanɛ bumo peya. 9Ma alɛ beeŋ naŋ shin nɛ fo kumu e ki kpakpa fanɛ kejembu kpakpaso nɛ k du kpakpa a chɔ kewarbi. Amoso, sa maa ŋana bumo ŋko n shin nɛ bumo be asheŋ e baa da fo kufu, ŋkpal b ka la basa nɛ b kini ma nseŋ pal kaman n sa ma so.”
10Kede be kaman nɛ Enyɛnpe Ebɔrɛ na naŋ kaŋɛ: “Dimɛdi pibi, kaŋ kusoe n nu kusɔ nɛ mee kaŋɛ fo ere nɛnɛ nseŋ fɛ kumo be nfɛra. 11To, yɔ fo kurgepoana nɛ b pɛ menyi kikɛ n yɔ Babilɔn be efuli so na kutɔ n ya kaŋɛ bumo kusɔ nɛ ma, Enyɛnpetale Ebɔrɛ na kaŋɛ. Baaŋ nu ŋko b maaŋ nu, fo ere e ya kaŋɛ bumo.”
12Ndoŋ nna nɛ Ebɔrɛ be Kiyoyu maŋ ma so n yɔ esoso, nɛ n nu ebɔl ko ka bee ponte awɔrso fanɛ bɔrɛ ka ponte na ma kaman to a kaŋɛ le: “Enyɛnpe Ebɔrɛ na be kemaŋkura e baa nya bunyaŋ ashi ebɔrɛso!” 13Kumo be kaman nɛ n nu asɔbɔya keniso na be mbuibi be aba na ka bee fe abar nɛ asɔ kulkulso fanɛ cheche be aya nɛ a mata bumo na ka bee gbri fanɛ bɔrɛ ka bee ponte na. 14Ndoŋ nna nɛ Ebɔrɛ be Kiyoyu na naŋ ta ma, nɛ Enyɛnpe Ebɔrɛ na be eleŋ gbelge ma so ga nɛ ma kagbene kaa nɛ n nya agbo. 15Kumo be kaman nɛ m ba kakpa nɛ basa nɛ b pɛ anya n yɔ efuli pɔtɛ so na wɔ na ashi kebeebi nɛ baa tre ‘Tɛl Abib’ nɛ k dese m mata Lɔr nɛ baa tre Kɛba na ase na n ya tu bumo n chena nchɛ ashunu. Kusɔ nɛ n wu nseŋ nu ndoŋ na daŋ chinchiŋ ma nna.
Enyɛnpe Ebɔrɛ ka ta Ezikɛl ŋ ki ekenipo be asheŋ
16Nchɛ ashunu na be kaman, nɛ Enyɛnpe Ebɔrɛ na kaŋɛ ma le: 17“Dimɛdi pibi, n lara fo nna nɛ fo baa keni Israɛl be basa so. Amoso nu kamalga nɛ ŋ kɔ nɛ n sa bumo ere nseŋ fɛa bumo so. 18Nɛ m baŋ kaŋɛ kumu kpakpasowura fanɛ e beeŋ wu ŋkpal mbe be alubi so, nɛ fo maaŋ fɛa mo so ŋko ji mo asoe to nɛ e lar asheŋ lubi na to m mɔlga mbe kumu, e beeŋ wu ŋkpal mbe alubi so, ama mbe luwu na be turju beeŋ baa bɛ fo. 19Ama nɛ fo fɛa mo so nɛ e kini kelar mbe asheŋ lubi na to, e beeŋ wu ŋkpal mbe alubi so, ama fo ere beeŋ nya fo kumu.
20Kede be kaman, nɛ esa nɛ e bee wora alelasheŋ yige alelasheŋ be kewora nsaa wora alubi, nɛ n shin nɛ e luri kebaawɔtɔ kpakpaso ko to, nɛ fo maŋ fɛa mo so, e beeŋ wu ŋkpal mbe alubi so. M maaŋ nyiŋi mbe alelasheŋ nɛ e wora na be kukoŋwule gba. Ma alɛ beeŋ ta mbe luwu na m bɛ fo. 21Ama nɛ fo fɛa mo so nɛ e yige alubi be kewora bre, e beeŋ ji efute ŋkpal e ka nu n sa fo so, nɛ fo alɛ e nya fo kumu.”
Ezikɛl ka maŋ tiŋ m malga be asheŋ
22Kumo be kaman nɛ Enyɛnpe Ebɔrɛ na be eleŋgboŋ na ba ma so, nɛ e kaŋɛ ma: “Koso n yɔ ketaŋɛ to nɛ n ya kaŋɛ fo kusɔ ko ndoŋ.”
23Ndoŋ nna nɛ ŋ koso n yɔ ketaŋɛ na to nseŋ ya wu fanɛ Enyɛnpe Ebɔrɛ na be kemaŋkura sɔ kaplɛkama, fanɛ kumo nɛ n daŋ wu ashi Lɔr nɛ baa tre Kɛba ase na, nɛ n ta enɔ m buu anishi so nseŋ tɔr epun so. 24Nɛ Enyɛnpe Ebɔrɛ na be Kiyoyu ba pɛ ma to ŋ niŋi to n yili nseŋ kaŋɛ ma le: “Yɔ epe n ya ti fo kumu so n wɔtɔ fo ebu to. 25Basa beeŋ ta efɔl ŋ kre fo n nase nɛ fo maaŋ nya n lar kowu n yɔ basa to. 26Ma alɛ beeŋ shin nɛ fo ki neemu a maaŋ naŋ tiŋ m malga n fɛa basa nɛ b kini ma nseŋ pal kaman n sa ma ere so. 27Ama kachɛ nɛ meeŋ malga fo kutɔ na kaŋ fo, meeŋ bugi fo kɔnɔ nɛ fo malga bumo kutɔ saŋɛ na so feeŋ kaŋɛ bumo kusɔ nɛ ma, Enyɛnpetale Ebɔrɛ na kaŋɛ. Beko beeŋ nu nɛ beko malɛ e kini kenu, ŋkpal manɛ so, b la basa nɛ b kini ma nseŋ pal kaman n sa ma nna.”
4Ezikɛl ka wora epel n ŋini kusɔ nɛ k beeŋ wora Jerusalɛm be asheŋ
1Nɛ Ebɔrɛ kaŋɛ le: “Dimɛdi pibi Ezikɛl, ta ebɔ be kuboo paŋgelambi n nase fo anishito nseŋ wora kadegboŋ nɛ baa tre Jerusalɛm na be foto n deŋi kumo so. 2Kumo be kaman nɛ fo wora asɔ ŋ kulti kumo fanɛ b ka kre kena ŋ kulti kumo n wɔtɔ na. Gbare shishɛr n deŋi abar so m mata kumo be egbal nɛ k kulti kumo na fanɛ kananɛ benapo beeŋ wora n dii so n luri kade to na, nseŋ wora ndibi gbɛgbɛso nɛ baaŋ ta n da egbal na n futi na nseŋ wora benapo be keeyi to be efoto m mata ebɔ be kuboo paŋgelambi na. 3Ade kikɛ be kaman nɛ fo ta kebɛlso paŋgelambi ŋ kuŋ fo nɛ foto nɛ fo wora n deŋi kuboo na so na be nferinto fanɛ kebɛlso be egbal na, nseŋ kilgi fo anishito n shoŋi kebɛlso paŋgelambi na, nɛ k duli fanɛ fo kre kena nna ŋ kulti kade na n wɔtɔ. Kede beeŋ ba la tɔɔnɛ n sa Israɛl be basa na. 4-5Ade be kaman nɛ fo dese fo bena so nchɛ alfa asa nɛ adekpanu a ŋini fanɛ Israɛl be basa beeŋ luri kasogberge to nfɛ alfa asa nɛ adekpanu. Kachɛ koŋwule kama yili nna n sa bumo be kafɛ koŋwule be awurfoŋ nɛ baaŋ ji na. 6Kumo be kaman nɛ fo naŋ kilgi n dese fo jisoso malɛ nchɛ adena, a ŋini Juda be basa malɛ be kasogberge nɛ baaŋ nya. Kachɛ koŋwule kama yili n sa kafɛ koŋwule be awurfoŋ nɛ baaŋ ji nna.
7Ade be kaman nɛ fo kilgi fo anishi n shoŋi Jerusalɛm be foto nɛ fo wora na, nseŋ bɔɔ fo enɔ to a malga a teŋi a ŋini kumo a kaŋɛ kusɔ nɛ Ebɔrɛ kaŋɛ fanɛ k beeŋ wora kumo na. 8Ama meeŋ ta efɔl ŋ kre fo nɛ fo maaŋ tiŋ ŋ kilgi kikɛ hale n ya fo jemanɛ nɛ kena nɛ fo kre ŋ kulti kade na ka beeŋ ba ekar. 9Kumo be kaman nɛ Ebɔrɛ naŋ kaŋɛ: ‘Ta aboyu nɛ shiŋkafa nɛ chɛbɛ fuful nɛ a peper nɛ adurbi nɛ atuwe peper n wea abar to n wɔtɔ kusɔ koŋwule to, nsaa jɔ amo a wora fo ajibi. Amo e naaŋ baa la fo kusɔ jiso nchɛ alfa asa nɛ adekpanu nɛ feeŋ baa dese kekilso na. 10Feeŋ baa jɔ amo gbrɛgbrɛbi nna a wora ajibi kachɛ kama a ji, 11nsaa nuu nchu malɛ kawiebi nuunchu be ebɔlɔ anyɔ anyɔ kachɛ kama. 12Feeŋ baa ta dimɛdi be ebin wɔlso nna a puga edɛ a daŋɛ ajibi na kelɔnɛ so, kakpa nɛ esa kama beeŋ wu fo.’ ” 13Ade kikɛ be kaman nɛ Enyɛnpe Ebɔrɛ na naŋ kaŋɛ le: “Kede bee ŋini kananɛ Israɛl be basa beeŋ ji ajibi nɛ baa kishi jemanɛ nɛ meeŋ pesaŋ bumo to n yɔ efuli pɔtɛana so na nna.” 14Nɛ ma alɛ kaŋɛ Enyɛnpetale Ebɔrɛ le: “Loŋ maaŋ wora, ŋkpal manɛ so, m maŋ naŋ ji ma ekishi n jija ma kumu kikɛ. Yili ma kebia to kikɛ, m maŋ naŋ ji kusɔ wuso ŋko kusɔ nɛ kusɔbɔya pɛ n ji ŋ ka kikɛ. Ajibi nɛ a maŋ walɛ so maŋ naŋ luri ma kɔnɔ kikɛ.”
15Ndoŋ nna nɛ Enyɛnpe Ebɔrɛ na kaŋɛ ma: “K nyalɛ, meeŋ shin nɛ fo ta anabin wɔlso mannɛ dimɛdi be ebin m puga edɛ nna ŋ daŋɛ fo ajibi na.”
16Kumo be kaman nɛ e kaŋɛ ma: “Dimɛdi pibi, meeŋ shin nɛ akoŋ a tɔr Jerusalɛm be basa so nɛ ajibi be asheŋ a ki kpakpa ga n sa bumo nɛ b ta kafɔŋ nɛ kagbene jija a karga ajibi nɛ nchu nuuso a sa abar, 17ŋkpal manɛ so, ajibi nɛ nchu be asheŋ beeŋ ki kpakpa. Kusɔ nɛ k beeŋ wora na beeŋ chinchiŋ bumo hale nɛ b baa chicha. Ekama beeŋ foe eyur to hale n ya wu ŋkpal bumo be alubi so.”
5Jerusalɛm ka beeŋ Mur be asheŋ
1Asheŋ ere be kaman nɛ Enyɛnpe Ebɔrɛ na kaŋɛ: “Dimɛdi pibi, Ezikɛl, ta bɔrfɔ nɛ k bee ji n she fo kumu nɛ fo katɔl. Kumo be kaman nɛ fo ta kusɔ nɛ b kɔ a karga asɔ be egbɛ na m barga emin na to ntuŋ asa. 2Jemanɛ nɛ fo kre kena ŋ kulti Jerusalɛm be foto nɛ fo wora n deŋi kejembu paŋgelambi na so na kaŋ fo ekar, nɛ fo chɔɔ emin na be katuŋ koŋwule kade nɛ fo wora kumo be foto na to, nseŋ ta bɔrfɔ na ŋ kuya emin na be katuŋ nyɔsopo to ŋ kulti kade na. Kumo be kaman nɛ fo ta katuŋ sasopo na n lɛ esoso nɛ ŋ gbagba e ta ma tokobi ŋ kuya amo to. 3Ama pɔɛŋ nɛ fo wora loŋ fo lara emin na be gbrɛbi n da fo piŋi be kɔnɔ. 4Nseŋ lara amo be gbrɛbi n chɔɔ edɛ to a ŋini fanɛ edɛ beeŋ shi ndoŋ n suse m mur ekama Israɛl be efuli so.”
5Kumo be kaman nɛ Enyɛnpe Ebɔrɛ na naŋ kaŋɛ: “Jerusalɛm nɛ n ta n yili durnya kikɛ be nferinto nɛ efuliana kulti kumo ŋ wɔtɔ a keni kumo a yɛlga nna na. 6Ama Jerusalɛm to be basa lar ma kaman nseŋ kini kewora m bɛ ma mbraana nɛ ma atande so. B kplaŋ ma mbraana so nsaa wora alubi a chɔ efuliana nɛ a kulti bumo na gba.
7Amoso kusɔ nɛ Enyɛnpe Ebɔrɛ na bee kaŋɛ Jerusalɛm be basa e la fanɛ, men kini kenu m bɛ ma mbraana nɛ ma atande so nseŋ ya ka bɛ efuliana nɛ e kulti menyi na be mbraana so. Men be ŋgbene ki kpakpa a chɔ bumo gba! 8Amoso, ma Enyɛnpetale Ebɔrɛ na e kaŋɛ menyi na fanɛ ŋ ki menyi, Jerusalɛm to be basa, be edoŋ nna na. Meeŋ gberge menyi kusoe nɛ efuliana na kikɛ e wu kumo. 9Ŋkpal menyi be agbirana nɛ ŋ kishi ga ere kikɛ so, meeŋ wora menyi kusɔ nɛ m maŋ naŋ wora kikɛ, ma alɛ m maaŋ naŋ wora kumo kikɛ. 10Bekurgepo beeŋ kpal akoŋ so a mɔ bumo be mbia a we nɛ mbia e baa mɔ bumo bekurgepoana a we. Meeŋ gberge menyi kusoe hale nɛ bekama nɛ baaŋ ji efute gba na e pesaŋ to n yɔ mboŋ wɔfɔ. 11Ma, Enyɛnpetale Ebɔrɛ na, e naa bɔ ntaŋ a kaŋɛ fanɛ, ŋkpal men ka ta menyi be agbirana nɛ aworbi lubiana n shin nɛ ma bɔrɛlambu ki kakpa nɛ esa maaŋ naŋ tiŋ n shuŋ ma ndoŋ so, m maaŋ wu menyi kuwɔr ŋko n shu menyi so ŋko n shin nɛ men nya menyi be amu n ya ji kikɛ. 12Menyi to be ntuŋ asa to be katuŋ koŋwule beeŋ wu ŋkpal alɔ nɛ akoŋ so ashi Jerusalɛm to, nɛ katuŋ nyɔsopo e wu kena to. Katuŋ sasopo malɛ beeŋ pesaŋ to n sɔ kaplɛkama a shile nɛ n ta tokobi m bɛ bumo so a mɔ.
13Menyeeŋ ji awurfoŋ ga pɔɛŋ nɛ ma agbo e wushi. Ndoŋ nɛ menyeeŋ pin fanɛ kenishipereso nɛ ma, Enyɛnpe Ebɔrɛ na, daa malga menyi be asheŋ lubi be asheŋ na.
14Ma alɛ beeŋ shin nɛ Jerusalɛm e ki kelambure nɛ kemɔmɔshia be kade n sa efuliana nɛ a kulti kumo na nɛ bekama nɛ baaŋ bɔla ndoŋ a choŋ kikɛ. 15Menyeeŋ ki kemɔmɔshia nɛ katege be kusɔ nsaa la kefiɛso n sa efuliana nɛ a kulti menyi na nɛ menyi be asheŋ a chinchiŋ bumo. 16Ma alɛ beeŋ naŋ shin nɛ akoŋ e mɔ menyi fanɛ b ka to menyi atanyembi m mɔ na. Kashenteŋto, meeŋ mur menyi be adɔjibi nɛ akoŋgboŋ a tɔr menyi so. 17Akoŋ nɛ kupuŋ to be asɔbɔya beeŋ ba mur menyi be mbia nɛ men ki begbentepo. Meeŋ bɔla alɔ mɔso so nɛ men doŋana be kemɔ menyi so ŋ gberge menyi kusoe. Ma, Enyɛnpe Ebɔrɛ e kaŋɛ na.”
6Kemalga ŋ gbiti Israɛl be abee be asheŋ
1Nɛ Enyɛnpe Ebɔrɛ na kaŋɛ ma le: 2“Dimɛdi pibi, Ezikɛl, kilgi fo anishito n shoŋi Israɛl be abee nseŋ malga n sa amo 3ŋ kaŋɛ: ‘Israɛl be abee, men nu Enyɛnpetale Ebɔrɛ na be kubɔya.’ ” E yɛ: “Ŋ kɔ tokobi nna a ba abee nɛ agoŋgulombi nɛ amantaŋ nɛ ataŋɛ kikɛ so nɛ m ba mur mboŋ nɛ basa bee shuŋ agbirana na. 4Meeŋ bure agbirsure nɛ eduwusure na kikɛ nyam nseŋ mɔ basa nɛ b wɔ ndoŋ na kikɛ n nase bumo be agbirana be anishito. 5Meeŋ pesaŋ Israɛl be basa be bubuni to ashi bumo be agbirana be anishito nseŋ pesaŋ bumo be awibi to ŋ kulti agbirsure na. 6Israɛl be efuli so be nde kikɛ beeŋ mur nɛ bumo be agbirshuŋkpaana kikɛ e bure m bure. Kumo be kaman, nɛ bumo be kusɔ kama e ki fuloŋ. 7Menyi be basa beeŋ wu n dese kaplɛkama, nɛ menyi to be bumo nɛ baaŋ ji efute na e pin fanɛ ma, e la Enyɛnpe Ebɔrɛ na nseŋ shuŋ ma.
8Ama meeŋ shin nɛ beko e ji efute nseŋ pesaŋ to n yɔ efuli pɔtɛana so. 9Saŋɛ na so, bumo nɛ baaŋ ji efute na beeŋ fɛ ma asheŋ nseŋ nyiŋi kananɛ b lar ma kaman nsaa shuŋ agbirana nseŋ ta nyɔmɔ m pɛ ma na ashi efuliana nɛ baaŋ tintiŋ bumo n yɔ na so. Ndoŋ nɛ bumo gbagba be asheŋ beeŋ baa nu bumo gbagba agbo ŋkpal bumo asheŋ lubi lubi nɛ b wora so 10nɛ b pin fanɛ ma, e la Enyɛnpe Ebɔrɛ na, ma alɛ maa funti jiga nna a kaŋɛ fanɛ meeŋ mur bumo be asɔ.”
11Ade kikɛ be kaman, nɛ Enyɛnpetale Ebɔrɛ na naŋ kaŋɛ: “Ezikɛl, ta fo enɔana n deŋi kumu nsaa shu a bri aya ase a boŋ to kagbenejijaso. Ŋkpal Israɛl be basa be aworbi lubi nɛ ŋ kishi ga na so, kena nɛ akoŋ nɛ alɔ mɔso e naŋ mur bumo. 12Alɔ beeŋ mɔ bumo nɛ b wɔ kufɔ kufɔ nɛ bumo nɛ b taga to malɛ e wu kena to nɛ bumo nɛ baaŋ nya bumo be amu n ji efute malɛ e wu ŋkpal akoŋ so. Kananɛ ma agbogboŋ beeŋ gbelge bumo so nna na. 13Jemanɛ nɛ bumo be basa beeŋ wu n dese abeebi nɛ abeegboŋ be awɔlto nɛ ndibi gboŋ be yiri nɛ a la bumo be agbirana be eshuŋkpaana nɛ baa chɔɔ duwu a sa bumo be agbirana kikɛ be afito na nɛ baaŋ pin fanɛ ma e la Enyɛnpetale Ebɔrɛ na. 14Kashenteŋto, meeŋ yili Keshishɛrsawule nɛ k wɔ kelargato be kaseto na m ba choŋ kade nɛ baa tre Dibla nɛ k wɔ kelargato be esoso be kaba so na m mur efuli na kikɛ,. Meeŋ mur kaplɛkama nɛ Israɛl be basa tase. Ndoŋ nɛ baaŋ pin fanɛ ma e la Enyɛnpe Ebɔrɛ na.”
7Lalaloge be saŋɛ na ka taga to be asheŋ
1Nɛ Enyɛnpe Ebɔrɛ na kaŋɛ ma le: 2“Dimɛdi pibi, Ezikɛl, kusɔ nɛ ma, Enyɛnpetale Ebɔrɛ na bee kaŋɛ Israɛl be efuli so be basa e la fanɛ, lalaloge be jemanɛ na bee fo nɛ efuli na kikɛ nyam e mur. 3Israɛl be basa, lalaloge be kachɛ na fo menyi nna na. Meeŋ shin nɛ ma agbo e ba menyi so. Kanaŋkama, lalaloge be kachɛ na beeŋ ba nɛ n ji menyi demu nseŋ gberge menyi kusoe ŋkpal menyi be aworbi lubi nɛ ŋ kishi na so. 4M maaŋ wu menyi kuwɔr ŋko n yige menyi nɛ men ta men be amu n ya ji. Abaanaaworasheŋ meeŋ gberge menyi kusoe ŋkpal men be eda lubi nɛ aworbi lubi nɛ ŋ kishi so. Ndoŋ nɛ menyeeŋ pin fanɛ ma e la Enyɛnpe Ebɔrɛ na.” 5Le nɛ Enyɛnpetale Ebɔrɛ na bee kaŋɛ: “Aleblawu nɛ ekama maŋ naŋ nu kumo be asheŋ bee ba! 6Kemur be saŋɛ na fo! K fo n loge. K beeŋ shin nɛ men mur. 7Menyi nɛ men wɔ Israɛl be kasawule so na beeŋ mur. Saŋɛ na fo, demujiachɛ na taga to. Keyeŋiyeŋi beeŋ tɔr menyi so nɛ men maaŋ naŋ tiŋ n ji eyur kagbenefuliso ashi abee so be kakpa nɛ menyee shuŋ agbirana na. 8Meeŋ shin nɛ ma agbogboŋ e ba menyi so nɛ n ji menyi demu ŋkpal menyi be eda lubi so nseŋ gberge menyi kusoe ŋkpal menyi be aworbi lubi nɛ ŋ kishi na so. 9M maaŋ wu menyi kuwɔr, ma alɛ maaŋ yige menyi nɛ men ta menyi be amu n ya ji. Meeŋ gberge menyi kusoe ŋkpal menyi be eda nɛ aworbi lubi so. Ndoŋ nɛ menyeeŋ pin fanɛ ma Enyɛnpe Ebɔrɛ na e naa gberge menyi kusoe na.”
10To, kemur be kachɛ na taga to! K teŋ fo gba! Kebaa maa ji kashenteŋ nɛ mpuchi be kebaawɔtɔ sɔ kaplɛkama. 11Basa nɛ b ta akɔsɔ a kɔ a fin bumo be kepar tintinso na nya ekpa a wora bumo be kepar nseŋ shin nɛ kumu kpakpaso wora keshi n ti so. Ama bumo be ekama maaŋ ji efute; bumo be kedamaya nɛ b kɔ nsaa keni amo a bɔlɔ kenishi malɛ gba beeŋ mur. 12Saŋɛ na bee ba. Kachɛ na taga to. Amoso esa nɛ e bee tɔ asɔ e sa maŋ shin nɛ mbe kagbene e baa fuli mo, esa nɛ e bee fa malɛ gba be kagbene e sa maa jija mo, ŋkpal manɛ so ma agbo bee ba ekama so nna. 13Esa nɛ e fa mbe kasawule maaŋ naŋ tiŋ n sɔ kumo esa nɛ e tɔ kumo na kutɔ kikɛ, ŋkpal manɛ so kewuŋkaŋɛ nɛ k bee laŋɛ ekama b kaplɛa so na maaŋ naŋ chɛrga. Bumo be ekama maaŋ tiŋ m mɔlga mbe kumu ŋkpal bumo be alubi so. 14Hale nɛ b foŋ kabel fanɛ ekama e bela ase n yɔ kena to gba esa koŋwule gba maŋ lar n yɔ, ŋkpal manɛ so, ma kagbene kaa ekama so nna.
15Kena nɛ alɔ nɛ akoŋ beeŋ sɔ kaplɛkama! Kena e naŋ mɔ ndekarso be basa nɛ akoŋ nɛ alɔ mɔso malɛ e mɔ ndegboŋ to be basa. 16Bekama nɛ baaŋ ji efute na malɛ beeŋ shile n yɔ abee so fanɛ kufu ka pɛ elepɔ nɛ a firgi n shi ketaŋɛ to n yɔ kebee so na. Ndoŋ nɛ baaŋ ya shu ŋkpal bumo be alubi so. 17Ebruma beeŋ tɔr basa kikɛ so nɛ bumo be mbre maŋ naa kɔ eleŋ nɛ bumo be amuli malɛ e baa chicha. 18Baaŋ ta ebɔtɛ ŋ ki asɔbuuso m buu a ŋini fanɛ bumo be ŋgbene jija bumo nna, nɛ kufugboŋ e tɔr bumo so. Anishinyɔr beeŋ pɛ bumo nseŋ shin nɛ ekama e she mbe kumu nɛ k baa la ŋaba n sa mo. 19Baaŋ ta bumo be shuwa nɛ gbiti n lɛ agbembi so fanɛ asɔ jiga na, ŋkpal manɛ so, shuwa nɛ gbiti na maaŋ tiŋ m mɔlga bumo jemanɛ nɛ Enyɛnpe Ebɔrɛ na be agbo beeŋ ba bumo so na. B maaŋ naŋ tiŋ n ta amo n tɔ ajibi gba n ji. Ŋkpal manɛ so, shuwa nɛ gbiti na e shin nɛ b tɔr kulubi to. 20B daa puchi ŋkpal abitasɔ lela nɛ b kɔ so nna nseŋ ta amo ŋ wora agbirana nɛ amo be asheŋ bee nu agbo. Amoso meeŋ shin nɛ abitasɔ na e ki fuloŋ, nsaa maŋ naa kɔ tɔnɔ n sa bumo. 21Meeŋ shin nɛ befɔ e kɔ n suge bumo be asɔ tintiŋ so nɛ basa nɛ b kɔ kumu kpakpaso malɛ e ba jija bumo be asɔ nɛ a ka kikɛ. 22Jemanɛ nɛ basa lubi beeŋ ba bure n luri ma bɔrɛlambu nɛ mee sha ga na to a jija kumo na, meeŋ kpele ma anishi fanɛ ŋ ka maŋ wu bumo na. Beyu ba luri n ya kaa yuri kumo to be asɔ gba, m maaŋ tuge bumo.
23“Basa be kamɔ nɛ keta akɔsɔ a kɔ a fin kusɔ nɛ esa bee sha tintiŋ so sɔ efuli na be kaplɛkama nna. 24Ma alɛ beeŋ shin nɛ efuliana nɛ b lubi a chɔ bekama na e ba sɔ bumo be nwu kikɛ. Kumo be kaman, nɛ n shin nɛ benapo lempo nɛ baa puchi so na e pɔ aba, ŋkpal efuliana ka beeŋ jija bumo be kabɔrɛshuŋ be mboŋ so. 25Kufugboŋ kaŋ ba bumo so na nɛ baaŋ pere kenishi n fin kayurwushi, ama bumo alɛ maaŋ nya kumo. 26Aleblawu bee ba nɛ ebaru lubi be abɔya a sɔ kaplɛkama. Basa beeŋ baa kule anebiana fanɛ b nu Ebɔrɛ be ebɔl ŋ kaŋɛ bumo kusɔ ko, nɛ b maaŋ nya. B maaŋ naŋ nya mbraana nɛ bɔrɛmatapoana daa ŋini na nɛ kasotoji nɛ benimuana na daa sa bumo na kikɛ. 27Ewura beeŋ shu nɛ benimuana na e paŋ tama nɛ kufu e tɔr basa na kikɛ so nɛ b baa chicha. Bumo be aworbi so nɛ meeŋ gberge bumo kusoe nseŋ wora bumo kusɔ nɛ b ta n wora beko na. Ndoŋ nɛ baaŋ pin fanɛ ma, e la Enyɛnpe Ebɔrɛ na.”
8Kagbirshuŋ ashi bɔrɛlambu to be asheŋ
1B ka pɛ anyi n tintiŋ anyi n yɔ Babilɔn be efuli so na be kafɛ shesopo na to be kufɔl shesopo be kachɛ nusopo na, nɛ ma nɛ Juda be benimuana chena ma nɛ Enyɛnpetale Ebɔrɛ na be eleŋgboŋ gbelge ma so ndoŋ epul to. 2Ndoŋ nna nɛ ŋ keni nseŋ wu kusɔ ko ka du fanɛ dimɛdi be kaduli ka yil a kpa edɛ. Yili kumo be kashɛr ase m ba aya ase daa du fanɛ edɛ na, nɛ yili kumo be kashɛr ase n dii a yɔ kumo be kumu ase malɛ daa nyɛkpɛ fanɛ danyaŋ nɛ b fɛfa so na. 3Nɛ k teŋi kusɔ ko to fanɛ enɔ na m pɛ ma emin to. Ndoŋ nna nɛ Ebɔrɛ be Kiyoyu maŋ ma so awɔlto ashi bɔrɛdare to n ta ma n yɔ Jerusalɛm to n ya yili bɔrɛlambu na be epunto be kelɔnɛ na be kabuna nɛ k bee laŋɛ kelargato be esoso be kaba so be kakpa nɛ basa na ta kegbir nɛ k bee shin nɛ Ebɔrɛ be kagbene bee kaa ga na n yili na. 4Ndoŋ nɛ ŋ wu Israɛl be Ebɔrɛ na be kemaŋkura fanɛ kumo nɛ n daŋ wu jemanɛ nɛ n daa wɔ Lɔr nɛ baa tre Kɛba na ase na.
5Kumo be kaman nɛ Ebɔrɛ kaŋɛ ma le: “Dimɛdi pibi, Ezikɛl, to kenishi ŋ keni kelargato be esoso be kaba so na.” Nɛ n to kenishi ŋ keni nseŋ wu kegbir nɛ basa na ta n yili nɛ kumo be asheŋ bee nu Ebɔrɛ agbo ga na bɔrɛsure nɛ k wɔ bɔrɛlambu na be epunto be kelɔnɛ na be kabuna nɛ k wɔ a laŋɛ kelargato be esoso be kaba so na ase.
6Nɛ Ebɔrɛ kaŋɛ ma le: “Dimɛdi pibi, fo wu kusɔ nɛ k bee wora nna na. Keni ekishisheŋ nɛ Israɛl be basa ere bee wora nfe, baa ju ma a lar ma bɔrɛlambu to a yɔ kufɔ kufɔ nna na. Ama fo kraa beeŋ wu ekishisheŋ nɛ a chɔ ade gba.”
7Ndoŋ nna nɛ e bar ma bɔrɛlambu na be kowushina be kelɔnɛ na be kabuna to m ba ŋini ma kemaŋ ko egbal na to, 8nseŋ kaŋɛ ma: “Dimɛdi pibi kpalga kemaŋ na to.” Nɛ ŋ kpalga kumo nseŋ wu fanɛ ndoŋ la kabuna nna.
9Nɛ e kaŋɛ ma: “Luri to n ya keni ekishisheŋ nɛ baa wora ndoŋ.” 10Ndoŋ nna nɛ n luri to n ya keni, nseŋ wu b ka wora awɔ nɛ asɔbɔya nɛ a maŋ walɛ keji be efoto n deŋi egbalana na so nɛ agbirana nɛ Israɛl be basa bee shuŋ ndoŋ. 11Israɛl be basa na be benimuana na to be basa adushunu e daa yil ndoŋ. Shafan pibinyɛn, Jazaania gba daŋ ti bumo so. Bumo be ekama malɛ daa kɔ kusɔ nɛ b kɔ a chɔɔ duwu mbe enɔ nna nɛ edishi bee kaa kumo to.
12Ndoŋ nna nɛ Ebɔrɛ kaŋɛ ma le: “Dimɛdi pibi, fo wu kusɔ nɛ Israɛl be benimuana ere bee wora ashiri to nna na, ŋko? Bumo be ekama yil mbe kegbir ase nna na. B yɛ: ‘Enyɛnpe Ebɔrɛ na maa wu anyi. Mo alɛ naŋ lar efuli na kaman nna.’ ” 13Nɛ e naŋ lɔŋɛ ŋ kaŋɛ: “Feeŋ naaŋ wu bumo nɛ baa wora ekishisheŋ nɛ a chɔ ade.”
14Ndoŋ nna nɛ e bar ma Enyɛnpe Ebɔrɛ na be bɔrɛlambu na be kabuna nɛ k bee laŋɛ kelargato be esoso be kaba so na, nɛ n wu beche ko nɛ b chena ndoŋ a shu kegbir nɛ baa tre Tammuz na be keli. 15Nɛ e kaŋɛ ma: “Dimɛdi pibi, fo wu kusɔ nɛ beche ere bee wora ere a? Fo kraa beeŋ wu ekishisheŋ nɛ a chɔ ade.”
16Ndoŋ nna nɛ e naŋ bar ma Enyɛnpe Ebɔrɛ na be bɔrɛlambu na be epunto be kelɔnɛ na so, ashi bɔrɛlambu na be kabuna nɛ k wɔ bɔrɛsure na nɛ kedɛdɛ na be nferinto na ase, nɛ ŋ wu benyɛn beeŋ wora fanɛ basa adunyɔ nɛ anu. B daŋ pal bumo be mman nna n shoŋi Enyɛnpe Ebɔrɛ be bɔrɛlambu na nseŋ kilgi bumo be anishito n shoŋi epeŋilarkpa m murgi a bunyaŋ epeŋi nɛ k bee pete na.
17Nɛ Enyɛnpe Ebɔrɛ na kaŋɛ ma: “Dimɛdi pibi, fo wu kede a? Fo tama fanɛ k la kusɔ fɔmbi nna fanɛ Juda be basa ere kaa beeŋ baa wora asheŋ lubi lubi ere ashi nfe a? A daga fanɛ b baa ta akɔsɔ a kɔ a fin bumo be kepar tintiŋ so kaplɛkama a wora asheŋ nɛ a bee wɔtɔ ma agbo to jemanɛ kikɛ a? Keni kananɛ b ŋaba ma nsaa tege ma ekpa nɛ esa kikɛ maŋ naŋ ŋaba ŋko n tege ma loŋ. 18Ŋkpal loŋ so, meeŋ gberge bumo kusoe agbo so. M maaŋ wu bumo kuwɔr ŋko n yige bumo nɛ b ta bumo be amu n ya ji. Hale nɛ b shu n tre ma gba m maaŋ nu nseŋ chɛ bumo to.”
9B ka mɔ agbirshumpoana be asheŋ
1Ade be kaman nɛ n nu Ebɔrɛ ka ponte ŋ kaŋɛ: “Menyi nɛ b lara fanɛ men gberge kadegboŋ na to be basa kusoe na e ta menyi be akɔsɔ m bɔɔ enɔ m ba Jerusalɛm to.” 2Epul to nɛ benyɛn ashe ko shi bɔrɛlambu na be kabuna nɛ k wɔ kelargato be esoso be kaba so na m ba. Bumo be ekama daa bɔ kekɔsɔ enɔ to nna. Kanyɛn ko nɛ e daŋ buu piŋi lela nsaa kɔ kasibɛ be asɔ enɔ to gba daŋ ti bumo so nna. Bumo kikɛ ba luri bɔrɛlambu na to nna n ya yili danyaŋ be bɔrɛsure na ase.
3Ndoŋ nna nɛ Israɛl be Ebɔrɛ na be kemaŋkura na lar asɔbɔya keniso nɛ a kɔ mbuibi be aba nɛ baa tre ‘chɛrubim’ na be kumu ase n yɔ bɔrɛlambu na be kabuna to. Nɛ Enyɛnpe Ebɔrɛ na tre kanyɛn nɛ e buu piŋi lela na nsaa kɔ kasibɛ be asɔ enɔ to na 4ŋ kaŋɛ mo le: “Yɔ Jerusalɛm be kadegboŋ na to n ya dulgi bekama nɛ asheŋ bee besa nɛ bumo be ŋgbene jija bumo ŋkpal ekishisheŋ nɛ a bee wora kade na to so na be nsɔto.” Nɛ kanyɛn na lar n yɔ nɛ e ya dulgi bumo.
5Kumo be kaman nɛ n naŋ nu Ebɔrɛ ka kaŋɛ benyɛn nɛ b ka yil na le: “Men bɛ mo so n ya kaa mɔ basa, men sa maŋ kaŋ wu ekama kuwɔr ŋko n shu ekama so. 6Men ya mɔ benyɛnnimu nɛ mbrantiɛ nɛ besuŋgurbi nɛ bechekpar nɛ mbi wurbi kikɛ ama men sa maŋ beta ekama nɛ e kɔ ndulgi mbe kasɔto na. Men fara ma bɔrɛlambu to a mɔ a yɔ.” Nɛ b ta benimuana nɛ b daa wɔ bɔrɛlambu na be anishito na n fara.
7Ndoŋ nna nɛ Ebɔrɛ naŋ kaŋɛ bumo: “Men mɔ basa n lɛ bɔrɛlambu na be kelɔnɛ na so kikɛ n shin nɛ k jija. Men fara a mɔ!” Nɛ b lar n ya fara basa be kemɔ Jerusalɛm be kadegboŋ na kikɛ to. 8B ka fara kamɔ na a yɔ nɛ n nawule ka a yil, nseŋ kurgi kumu n yuu to m boŋ to ŋ kaŋɛ le: “Enyɛnpetale Ebɔrɛ, ŋkpal fo ka nya agbo ga n wora Jerusalɛm to be basa so, fee sha nna nɛ fo mɔ Israɛl be basa nɛ b ka ere kikɛ a?”
9Nɛ Ebɔrɛ kaŋɛ ma le: “Israɛl nɛ Juda be basa be kulubi na shi m baŋ so. Basa be kemɔ e sɔ kasawule na kikɛ so nɛ ekishisheŋ malɛ sɔ Jerusalɛm be kade to kikɛ. Baa kaŋɛ nna fanɛ, ma, Enyɛnpe Ebɔrɛ na kplaŋ efuli na so nna; ma alɛ maa wu asheŋ nɛ baa wora na. 10Amoso m maaŋ wu bumo kuwɔr ŋko n shu bumo so kikɛ. Kananɛ b wora beko na nɛ ma alɛ gba beeŋ wora bumo.”
11Ade kikɛ be kaman nɛ kanyɛn nɛ e daŋ buu piŋi lela na bɛta m ba kaŋɛ Enyɛnpe Ebɔrɛ na le: “N wora kusɔ nɛ fo kaŋɛ na n loge.”
10Enyɛnpe Ebɔrɛ be kemaŋkura ka lar bɔrɛlambu na to be asheŋ
1Asheŋ na be kaman nɛ ŋ keni kuwɔlpa nɛ k sha asɔbɔya keniso na be amu so, nseŋ wu kusɔ ko fanɛ kuwurputi nɛ b ta yawu kpakpaso be kejembu lela nɛ baa tre saffai na n lɔŋɛ. 2Nɛ Enyɛnpe Ebɔrɛ na kaŋɛ kanyɛn nɛ e buu piŋi lela na le: “Ya lara ajanwulɛ nɛ a kɔ edɛ ashi asɔ kulkulso nɛ a du fanɛ cheche be aya a wɔ asɔbɔya keniso na be akel to na n ya fari Jerusalɛm be kadegboŋ na kikɛ to.” Ndoŋ nna nɛ mee keni mo nɛ e bee yɔ.
3Jemanɛ nɛ kanyɛn na bee yɔ na nɛ asɔbɔya keniso na yil a laŋɛ bɔrɛlambu na be kelargato be kaseto na nna, nɛ kuwɔlpa buu bɔrɛlambu na be epunto be kelɔnɛ na kikɛ so. 4Ndoŋ nna nɛ Enyɛnpe Ebɔrɛ na be kemaŋkura shi asɔbɔya keniso na be amu so n yɔ bɔrɛlambu na be kabuna to nɛ kuwɔlpa na sɔ bɔrɛlambu na to kikɛ nɛ Enyɛnpe Ebɔrɛ na be kemaŋkura shin nɛ kelɔnɛ na kikɛ to fulto parr. 5Esa nɛ e daa wɔ bɔrɛlambu na be kowushina be kelɔnɛ na gba so daa nu asɔbɔya keniso na be mbuibi be aba be egbri, ŋkpal manɛ so, a daa gbri nna fanɛ Enyɛnpetale Ebɔrɛ be ebɔl na.
6Enyɛnpe Ebɔrɛ ka kaŋɛ kanyɛn nɛ e daŋ buu piŋi lela na fanɛ e ya lara ajanwulɛ ashi asɔ kulkulso nɛ a du fanɛ cheche be aya m mata asɔbɔya keniso na ase nɛ kanyɛn na ya yili m mata aya kulkulso na be kuko. 7Ndoŋ nna nɛ asɔbɔya keniso na be ekoŋwule teŋi enɔ n shoŋi edɛ nɛ a dese bumo be nferinto na nseŋ lara ako n wɔtɔ kanyɛn na be enɔ to nɛ mo alɛ ta n lar n choŋ.
8Kumo be kaman nɛ n naŋ wu fanɛ asɔbɔya keniso na be kekama daa kɔ kusɔ ko fanɛ dimɛdi be enɔ bumo be mbuibi be aba na be kekama be kaseto. 9Nɛ n naŋ keni n wu fanɛ aya kulkulso ana mata asɔbɔya keniso na nsaa nyɛkpɛ fanɛ yawu kpakpaso be ajembu nyɛkpɛso na. 10Aya kulkulso ana na kikɛ duli abar nna nɛ kekama malɛ kɔ keya nyɔsopo nɛ k larga kumo to, 11saŋɛ na so asɔbɔya keniso na baa yɔ kaplɛkama aya kulkulso na maŋ naa kilgi. Bumo be aya na kikɛ beeŋ tiŋ n yɔ kaplɛkama nɛ a maŋ kilgi. 12Anishi daa wɔ asɔbɔya keniso na be eyur so kikɛ nna. Bumo be mman nɛ mbre nɛ mbuibi be aba so nɛ aya kulkulso ana na gba kikɛ so daa kɔ anishi nna. 13Ndoŋ nna nɛ n nu ebɔl ko kaa bee kaŋɛ le: “Aya kulkulso nɛ a bee yili kapa koŋwule a kilgi to nde.” 14Asɔbɔya keniso na be ekama daa kɔ anishiakpa ana nna. Bumo be anishito daa la dimɛdi be anishiakpa nna nɛ bumo be jisoso daa la buluŋ be anishiakpa nɛ bumo be bena so la gbolu be anishiakpa nɛ bumo be kaman to daa la kusore be anishiakpa.
15Asɔbɔya keniso nɛ n daŋ wu Lɔr nɛ baa tre Kɛba ase na gbagba e daa la bumo. B ka koso n firgi n yɔ awɔlto, 16nɛ aya kulkulso na gba bɛ so. Jemanɛ kikɛ nɛ asɔbɔya keniso na baaŋ parga aba to a firgi, aya kulkulso na wɔ bumo be akel to nna. 17Nɛ asɔbɔya keniso na baaŋ yili aya na gba bee yili epul na to nna. Nɛ b baŋ naŋ koso malɛ amo alɛ gba bee koso nna, ŋkpal manɛ so, asɔbɔya keniso na e naa keta amo a wora asheŋ.
18Ndoŋ nna nɛ Enyɛnpe Ebɔrɛ na be kemaŋkura lar bɔrɛlambu na be kabuna ase n ya buu asɔbɔya keniso na be amu so. 19Ŋ ka keni nɛ n wu asɔbɔya keniso na ka parga bumo be aba to ŋ koso kasawule a firgi nɛ aya kulkulso na tu bumo a yɔ. B ka ya fo bɔrɛlambu na be kabuna nɛ k wɔ epeŋilarkpa be kaba so na nɛ b shir n yili gbrɛ, nɛ Israɛl be Ebɔrɛ na be kemaŋkura kraa buu bumo so.
20Ndoŋ nna nɛ m pin geeŋ fanɛ asɔbɔya keniso ere nɛ n daŋ wu Israɛl be Ebɔrɛ na be kaseto na ashi Kɛba be lɔr ase na. 21Bumo be ekama daa kɔ anishiakpa ana ana nɛ mbuibi be aba ana ana nna, nɛ bumo be aba na be kekama malɛ be kaseto daa kɔ kusɔ ko fanɛ dimɛdi be enɔ. 22Bumo alɛ be anishiakpa daa du fanɛ amo nɛ n wu Kɛba be lɔr ase na gbagba nna. Ekama malɛ baaŋ niŋi nna a yɔ a maŋ naa kilgi.
11Demuji ka ba Israɛlebi be benimu so be asheŋ
1Ade kikɛ be kaman, nɛ Ebɔrɛ be Kiyoyu ta ma m ba Enyɛnpe Ebɔrɛ na be bɔrɛlambu na be kabuna nɛ k shoŋi epeŋilarkpa be kaba so na ase nɛ n wu benyɛn adunyɔ nɛ anu ko nɛ efuli na be bejuŋkparpo anyɔ ti bumo so. Bumo e la kanyɛn nɛ baa tre Jaazania nɛ e la Azzu pibinyɛn na nɛ emo nɛ baa tre Pɛlatiya nɛ mo alɛ la Bɛnaya pibinyɛn na. 2Ndoŋ nna nɛ Enyɛnpe Ebɔrɛ na kaŋɛ ma le: “Dimɛdi pibi, Ezikɛl, basa ere bee kre kulubi nsaa sa Jerusalɛm to be basa kasotoji lubi nna na. 3Le nɛ kaa kaŋɛ: ‘K maaŋ chɛr nɛ an naa pɔr nwu. Kadegboŋ ere du fanɛ kapuliya nna a bɛ edɛ so nɛ anyi alɛ du fanɛ eblaŋ a wɔ kumo to, ama kanaŋkama nɛ asheŋ du k bee kuŋ anyi nɛ anyi maŋ wɔ edɛ to gbagba.’ 4Amoso, dimɛdi pibi, malga ŋ gbiti bumo.”
5Kumo be kaman nɛ Enyɛnpe Ebɔrɛ na be Kiyoyu kaŋɛ ma fanɛ Enyɛnpe Ebɔrɛ na yɛ: “Israɛl be basa, n nyi kusɔ nɛ menyee kaŋɛ nɛ asheŋ nɛ menyee kre menyi be nfɛra to kikɛ. 6Men mɔ basa damta Jerusalɛm to hale nɛ bubuni sɔ kumo be agbembi kikɛ so.”
7“Amoso kusɔ nɛ Enyɛnpetale Ebɔrɛ kaŋɛ e la fanɛ basa nɛ men mɔ n lɛ kaplɛkama na e ki eblaŋ nɛ kadegboŋ na malɛ ki kapuliya ama e beeŋ tintiŋ menyi n lar Jerusalɛm to. 8Ŋkpal menyi kaa bee ŋana tokobi so, kumo nɛ meeŋ shin nɛ basa e ta m ba menyi so. 9Meeŋ lara menyi kadegboŋ na to n ta menyi m bɔɔ befɔ enɔ nɛ b gberge menyi kusoe. 10Baaŋ kɔ menyi kena m mɔ menyi ashi menyi gbagba be efuli so. Ndoŋ nɛ ekama beeŋ pin fanɛ ma, e la Enyɛnpe Ebɔrɛ na. 11Kadegboŋ ere maaŋ kuŋ menyi bejuŋkparpo na fanɛ kananɛ kapuliya bee kuŋ eblaŋ nɛ a wɔ kumo to na. Meeŋ ji menyi demu kaplɛkama nɛ men wɔ ashi Israɛl be efuli so nɛ men ji n tɔr. 12Ndoŋ nɛ menyeeŋ pin fanɛ ma e la Enyɛnpe Ebɔrɛ nɛ men kini k bɛ ma mbraana so nseŋ ya kaa bɛ efuli pɔtɛana nɛ a kulti menyi na be mbraana so na.”
13Ŋ kraa malga nna nɛ Pɛlatiya tɔr n wu epul na to. Ndoŋ nna nɛ n ta enɔ m buu ma anishi so nseŋ kurgi kumu n yuu to m boŋ to n shu ŋ kaŋɛ: “O, Enyɛnpetale Ebɔrɛ! Fee sha kemɔ Israɛl be basa gbrɛbi nɛ b ka ere kikɛ nna a?”
14Nɛ Enyɛnpe Ebɔrɛ na kaŋɛ ma le: 15“Dimɛdi pibi, le nɛ basa nɛ b wɔ Jerusalɛm to ere bee kaŋɛ a laŋɛ fo nɛ Israɛl be basa nɛ b yɛr Babilɔn be efuli so na be kaplɛa so. B yɛ, menyi ere maŋ naŋ taga Enyɛnpe Ebɔrɛ to a bishi nɛ men tiŋ n shuŋ mo. Amoso, Israɛl be kasawule na ki bumo nawule peya nna.
16Ama kusɔ nɛ mee sha fanɛ fo, Ezikɛl, e kaŋɛ Israɛl be basa nɛ b wɔ Babilɔn be efuli so na e la fanɛ, ma e shin nɛ b yɔ efuli pɔtɛ so kufɔ kufɔ n ya pesaŋ to a wɔtɔ na. Ama naniere, ma nɛ menyi e naŋ baa la ashi efuliana nɛ men wɔ amo so na.
17Kumo be kaman nɛ fo kaŋɛ bumo fanɛ kusɔ nɛ ma Enyɛnpe Ebɔrɛ na kaŋɛ e la fanɛ meeŋ naŋ gama bumo abar so ashi efuli pɔtɛana na so nseŋ bɛta Israɛl be efuli na n naŋ sa bumo nɛ b chena so.
18B kaŋ bɛta m ba malɛ, baaŋ lara agbirana nɛ a la ekishisheŋ n sa ma na ashi mboŋ nɛ a wɔ na kikɛ. 19Meeŋ lara bumo be ŋgbene nɛ a du kpakpa fanɛ ajembu na bumo to nseŋ sa bumo ŋgbene nɛ nfɛra popɔr, nɛ b maaŋ naa sha keshuŋ agbirana. 20Ndoŋ nɛ baaŋ bɛ ma mbraana so nsaa wora asɔ nɛ mee ŋini bumo na. Baaŋ baa la ma basa nɛ ma alɛ e baa la bumo be Ebɔrɛ. 21Ama meeŋ gberge bekama nɛ bumo be ŋgbene kraa wɔ bumo be agbirana nɛ ŋ kishi nɛ a la ekishisheŋ n sa ma na kusoe ŋkpal bumo be asheŋ lubi so. Ma, Enyɛnpetale Ebɔrɛ e kaŋɛ na.”
Enyɛnpe Ebɔrɛ na be kemaŋkura ka lar Jerusalɛm to be asheŋ
22Kumo be kaman nɛ asɔbɔya keniso na fara a firgi, nɛ aya kulkulso na wɔ bumo be akel to, nɛ Israɛl be Ebɔrɛ na be kemaŋkura buu bumo so. 23Ndoŋ nna nɛ kefulto nɛ k bee ŋini Enyɛnpe Ebɔrɛ be kemaŋkura na lar Jerusalɛm to n ya buu kebee nɛ k wɔ kadegboŋ na be epeŋilarkpa be kaba so na so. 24Nɛ Ebɔrɛ be Kiyoyu ta ma m bɛta m ba basa nɛ ma nɛ bumo daa wɔ Babilɔn be efuli so na kutɔ ashi bɔrɛdare na to. Ndoŋ nna nɛ bɔrɛdare nɛ n daa ku na loge, 25nɛ ŋ kute kusɔ nɛ Enyɛnpe Ebɔrɛ na lara ŋ ŋini ma na kikɛ n sa bumo.
12B ka beeŋ pɛ Israɛlebi n yɔ efuli pɔtɛ so be tɔɔnɛ be asheŋ
1Ndoŋ nna nɛ Enyɛnpe Ebɔrɛ na naaŋ kaŋɛ ma: 2“Dimɛdi pibi, Ezikɛl, fo nɛ basa nɛ b pal kaman n sa ma e wɔtɔ. B kɔ anishi, bumo alɛ kini kewu asɔ nɛ mee ŋini bumo. B kɔ asoe, bumo alɛ kini kenu ma mmalga. Ŋkpal manɛ so b pal kaman nna n sa ma. 3Amoso, dimɛdi pibi, bela fo adiiku nseŋ wora fanɛ b ka nyaŋ fo a yɔ efuli pɔtɛ wɔfɔ so. Wora le pɔɛŋ nɛ epeŋi e tɔr. Kumo be kaman nɛ fo yɔ kakpa nɛ ekama beeŋ wu fo n ya kaa nite a yɔ a ba. B kaŋ wu fo kaa bee wora loŋ, ashere baaŋ pin fanɛ b la basa nɛ b pal kaman n sa ma nna. 4Fo kaŋ wora ade kikɛ n loge nɛ fo bɛta n yɔ fo laŋ to. Kaaseso kaŋ fo nɛ fo wora shiriya fanɛ feeŋ yɔ efuli pɔtɛ wɔfɔ. 5Futi fo kowu be egbal jemanɛ nɛ baa keni fo n ta fo adiiku m bɔla kumo to m bɔl. 6Shin nɛ b baa keni fo nɛ fo ta fo adiiku na n di keba nseŋ ta kusɔ m buu fo anishi so n lar n luri tentembiri to a yɔ, saŋɛ na so fo maaŋ wu m pin kakpa nɛ fee yɔ na. Kusɔ nɛ feeŋ wora na beeŋ baa la kusoe kpele n sa Israɛl be basa na.”
7Nɛ n wora kananɛ Enyɛnpe Ebɔrɛ kaŋɛ ma na. Epeŋi ka ya ka tɔr nɛ m bela ma adiiku nseŋ wora keyɔ efuli pɔtɛ so be shiriya. Kaase ka fo nɛ n ta enɔ ŋ kur n futi ma laŋ to be egbal nseŋ ta ma adiiku n di keba m bɔla ndoŋ n lar jemanɛ nɛ ekama bee keni ma na n choŋ.
8Kaarɛ ka chɛ kachipurso nɛ Enyɛnpe Ebɔrɛ na naŋ kaŋɛ ma: 9“Dimɛdi pibi, Israɛl be basa nɛ b pal kaman n sa ma na maŋ bishi fo kusɔ nɛ fo daa wora a? 10To, ya kaŋɛ bumo fanɛ kusɔ nɛ Enyɛnpetale Ebɔrɛ na kaŋɛ nde: ‘Kubɔya ere bee yɔ ejuŋkparpo nɛ e wɔ Jerusalɛm to na nɛ Israɛl be basa nɛ b wɔ ndoŋ na kikɛ nna. 11Kaŋɛ bumo fanɛ kusɔ nɛ fo wora n ŋini bumo na la tɔɔnɛ nna a ŋini kusɔ nɛ k beeŋ wora bumo echefoso.
Kusɔ nɛ n wora ere e naaŋ tu menyi echefoso. Baaŋ pɛ menyi n tintiŋ menyi n yɔ efuli pɔtɛana so.
12Jerusalɛm be ejuŋkparpo na gbagba beeŋ shin nɛ b futi egbal n sa mo kaaseso belebela nɛ e bɔla kumo to n m bɔl n ta mbe adiiku n di keba a yɔ. E beeŋ ta kusɔ m buu mbe anishi so saŋɛ na so e maaŋ wu kasawule nɛ e bee yige a shile na. 13Ma, Enyɛnpe Ebɔrɛ na beeŋ to kashewu m pɛ mo jemanɛ nɛ e bee lar Jerusalɛm to a shile na nseŋ yɛr mo kadegboŋ nɛ baa tre Babilɔn na to, ama e maaŋ wu kadegboŋ na kenishiso hale nɛ e ya wu ndoŋ. 14Ma alɛ beeŋ shin nɛ mbe benimuana nɛ mbe benapo nɛ b wɔ Jerusalɛm to na e pesaŋ to n sɔ kaplɛkama nɛ basa e bɛ so n fin bumo mɔ.
15Ŋ kaŋ shin nɛ bumo nɛ b ka na pesaŋ to n yɔ efuli pɔtɛ wɔfɔ so na nɛ baaŋ pin fanɛ ma, e la Enyɛnpe Ebɔrɛ na. 16Ama meeŋ shin nɛ bumo be gbrɛbi ko e ji efute ashi kena nɛ akoŋ nɛ alɔ na to, saŋɛ na so baaŋ pin kananɛ bumo be ekishisheŋ nɛ b wora na be asheŋ daŋ nu ma agbo ga, nseŋ naŋ pin fanɛ ma e la Enyɛnpe Ebɔrɛ na nseŋ shuŋ ma ashi efuli pɔtɛana na so.’ ”
17Ade be kaman nɛ Enyɛnpe Ebɔrɛ na naŋ kaŋɛ ma le: 18“Dimɛdi pibi, baa chicha jemanɛ nɛ fee ji ajibi nseŋ shin nɛ kufu e baa kɔ fo jemanɛ nɛ fee nuu nchu. 19Kaŋɛ Israɛl be basa na fanɛ kusɔ nɛ Enyɛnpetale Ebɔrɛ na bee kaŋɛ a sa Jerusalɛm to be basa nɛ b kra wɔ Israɛl be efuli so na e la fanɛ, baaŋ baa ji bumo be ajibi nɛ kafɔŋ nna nsaa nuu bumo nchu malɛ kufuso, ŋkpal manɛ so, bumo be efuli na nɛ kumo so be asɔ kikɛ beeŋ mur n dese fuloŋ ŋkpal bumo be amu kpakpaso nɛ asheŋ lubi so. 20Ndegboŋ nɛ basa bɔlɔ amo to naniere kikɛ beeŋ mur nɛ efuli na kikɛ e ki kasawule a dese loŋ nɛ esa kikɛ maŋ wɔ kumo so. Ndoŋ nɛ baaŋ pin fanɛ ma e la Enyɛnpe Ebɔrɛ na.”
21Nɛ Enyɛnpe Ebɔrɛ na naŋ kaŋɛ ma le: 22“Dimɛdi pibi, manɛ so nɛ Israɛl be basa bee kaa kaŋɛ keŋasa ere: ‘Nchɛ na bee choŋ, nɛ kewuŋkaŋɛ malɛ maa wora a bɔlɔ so!’ 23To, kaŋɛ bumo kusɔ nɛ ma, Enyɛnpetale Ebɔrɛ na kɔ a kaŋɛ a laŋɛ kumo be kaplɛa so. Meeŋ shin nɛ keŋasa na e ba ekar nɛ b maaŋ naa bɔ kumo ashi Israɛl be efuli so. K maŋ chɛr nɛ kusɔ kama nɛ ŋ kaŋɛ kikɛ e wora m bɔlɔ so. 24Ŋkpal manɛ so, efɛ be ebɔrɛdare ŋko kafule be kewuŋkaŋɛ maaŋ naa wɔ Israɛl be basa to kikɛ. 25Ma, Enyɛnpe Ebɔrɛ na e naŋ malga n sa bumo nɛ kusɔ nɛ meeŋ kaŋɛ na a wora. Menyi basa nɛ men pal kaman n sa ma ere bre be jemanɛ to, meeŋ wora kusɔ kama nɛ ŋ kpele menyi kumo be kusoe fanɛ meeŋ wora na. Ma, Enyɛnpetale Ebɔrɛ e kaŋɛ na.”
26Ndoŋ nna nɛ Enyɛnpe Ebɔrɛ na naŋ kaŋɛ ma le: 27“Dimɛdi pibi, Israɛl be basa na bee fɛ nna fanɛ, fo ebɔrɛdare na nɛ kewuŋkaŋɛ na la echefoso be asheŋ nna. 28Amoso kaŋɛ bumo kusɔ nɛ ma, Enyɛnpetale Ebɔrɛ na bee kaŋɛ. Ma mmalga ere be kekama maaŋ chɛr nseŋ wora m bɔlɔ so. Kusɔ kama nɛ ŋ kaŋɛ beeŋ wora m bɔlɔ so. Ma, Enyɛnpetale Ebɔrɛ e kaŋɛ na.”
13B ka malga ŋ gbiti anebi fɛpoana be atre be asheŋ
1Ndoŋ nna nɛ Enyɛnpe Ebɔrɛ na kaŋɛ ma: 2“Dimɛdi pibi, malga ŋ gbiti Israɛl to be anebiana nɛ baa ta bumo gbagba be mmalga fanɛ kewuŋkaŋɛ na nɛ ekama e pin. Kaŋɛ bumo fanɛ b baa kaŋ kusoe a nu Enyɛnpe Ebɔrɛ na be kubɔya.” 3Kusɔ nɛ Enyɛnpetale Ebɔrɛ na bee kaŋɛ nde: “Asheŋ maaŋ nyalɛ n sa anebi fɛpoana na. B maa ku ebɔrɛdare. Bumo gbagba be abɔya nɛ baa malga! 4Israɛl to be anebiana du fanɛ ejiŋkaamu nɛ e wɔ kadegboŋ nɛ k bure a dese to a fin kusɔ nɛ baaŋ ji nna. 5B maa kpele basa na kusoe a laŋɛ tɔrɔ nɛ k bee ba ŋko a kaŋɛ bumo kananɛ kewora n da ma so beeŋ tiŋ n shin nɛ b wu be asheŋ. 6Bumo be ebɔrɛdare nɛ baa ku na kikɛ maŋ la kashenteŋ. Bumo be asheŋ nɛ baa kaŋɛ fanɛ a beeŋ wora na kikɛ la efɛ nna. Baa kaŋɛ nna fanɛ ma kubɔya nɛ baa malga, ama ma alɛ maaŋ shuŋi bumo. Amo nɛ amo kikɛ, baa sha fanɛ bumo be mmalga e baa la kashenteŋ nna. 7Amoso nɛ ŋ kaŋɛ bumo na fanɛ, ebɔrɛdare nɛ baa ku na maaŋ la kashenteŋ na. Asheŋ nɛ baa kaŋɛ fanɛ a beeŋ wora na malɛ la efɛ nna. Baa kaŋɛ fanɛ ma mmalga nna, ama ma alɛ maaŋ malga bumo kutɔ.”
8To, kusɔ nɛ Enyɛnpetale Ebɔrɛ na kaŋɛ bumo nde: “Menyi be mmalga la kafule nna nɛ menyi be ebɔrɛdare malɛ la efɛ. Amoso m maaŋ yige menyi kikɛ. 9Meeŋ gberge menyi anebiana nɛ menyee ku efɛ be ebɔrɛdare nseŋ naa fule a kpal a malga asheŋ na kusoe. Menyi maŋ naŋ ti ma basa so, menyi alɛ be atre maŋ ti Israɛl be basa be atre so. Menyi maaŋ naŋ bɛta n yɔ menyi be kasawule so. Ndoŋ nɛ menyeeŋ pin fanɛ ma e la Enyɛnpetale Ebɔrɛ na.
10Anebiana na bee fule a kaŋɛ ma basa nna fanɛ kayurwushi bee ba, jemanɛ nɛ kayurwushi maŋ wɔtɔ. Ma basa pɔr egbal pɔso, nɛ anebiana na ta asɔ nyɔɔso fuful n nyɔɔ egbalana na. 11Kaŋɛ anebiana na fanɛ bumo be egbal na beeŋ tɔr. Abɔrɛjembubi beeŋ tɔr kumo so nɛ afugboŋ e ber kumo so 12nɛ k tɔr nɛ ekama e bishi menyi fanɛ asɔ fuful nɛ men ta n nyɔɔ egbal na be tɔnɔ e la manɛ?”
13To, egbal na e la Jerusalɛm be kadegboŋ na. Kusɔ nɛ ma, Enyɛnpetale Ebɔrɛ na kaŋɛ nde: “Meeŋ kaa agbo ga n shin nɛ afugboŋ nɛ bɔrɛgboŋ nɛ abɔrɛjembubi a bure egbal na. 14Mee kre kebure egbal nɛ men nyɔɔ n fuli na nɛ k bure cheche n tɔr nɛ kumo be gbaltɔlase nawule e ka a dese. Egbal na beeŋ tɔr menyi so m mɔ menyi kikɛ. Ndoŋ nɛ menyeeŋ pin fanɛ ma e la Enyɛnpe Ebɔrɛ na.
15Meeŋ shin nɛ ma agbogboŋ e gbelge egbal na nɛ basa nɛ b nyɔ kumo nɛ k fuli na kikɛ so. Saŋɛ na so nɛ ŋ kaŋɛ menyi fanɛ egbal na tɔr nɛ bumo nɛ b nyɔ kumo nɛ k fuli na kikɛ wu. 16Israɛl be anebiana nɛ b ku ebɔrɛdare nseŋ wu ŋ kaŋɛ fanɛ kayurwushi wɔ Jerusalɛm to jemanɛ nɛ kayurwushi maaŋ wɔ kumo to na nɛ n de na. Ma, Enyɛnpetale Ebɔrɛ na e kaŋɛ na.”
17Ade be kaman nɛ Enyɛnpe Ebɔrɛ na naŋ kaŋɛ ma: “Naniere, dimɛdi pibi, kilgi fo anishi n yuu Israɛl be beche nɛ baa bɔla bumo gbagba be aparsheŋ so a wu asheŋ a kaŋɛ na so. Malga ŋ gbiti bumo 18nseŋ kaŋɛ bumo kusɔ nɛ Enyɛnpetale Ebɔrɛ na bee kaŋɛ bumo.
Asheŋ maaŋ nyalɛ n sa menyi beche. Menyee bɔla ŋkilgi be ekpa so nna a wora adur a wɔtɔ ebaŋɛ nɛ echimu to a sa ekama nɛ baa ta a chɛ amu so ŋko a wɔtɔ enɔ to, saŋɛ na so menyeeŋ nya eleŋ basa be ŋkpa so. Menyee sha fanɛ menyi e baa kɔ ŋkpa nɛ luwu be eleŋ ma basa so nseŋ ta eleŋ na a wora asɔ nɛ menyee sha. 19Men keni ma jiga ma basa be anishito, ŋkpal shiŋkafa nɛ ajibi gbrɛbi nɛ menyeeŋ nya so. Ma basa kaa bee nu efɛ so, men bɔla efɛ so m mɔ basa nɛ b daŋ maŋ daga luwu nseŋ shin nɛ bumo nɛ b daga luwu bre ji efute.”
20Amoso kusɔ nɛ Enyɛnpetale Ebɔrɛ na kaŋɛ nde: “Ŋ kishi menyi be ŋkilgi be adur be ebaŋɛ nɛ menyee bɔla so a fule ma basa nɛ baa yirda menyi be efɛsheŋ na ga. Ma alɛ beeŋ gberge amo n tuge ashi menyi be mbre so nseŋ shin nɛ basa nɛ men fule m pɛ fanɛ mbuibi na e nya bumo be amu. 21Meeŋ kpɛa menyi be echimu na to nɛ ma basa e nya bumo be amu ashi menyi be eleŋ to. Ndoŋ nɛ menyeeŋ pin fanɛ ma, e la Enyɛnpe Ebɔrɛ na. 22Men bɔla efɛ so n shin nɛ basa lela nɛ m maŋ kre ketɔrɔ bumo pɔ aba nseŋ kuŋ basa lubi ekpa nɛ b maŋ lar bumo be asheŋ lubi to m mɔlga bumo be amu. 23Amoso menyi be efɛ be ebɔrɛdare nɛ kafule be ŋkpal na kikɛ fo ekar. Meeŋ mɔlga ma basa ashi men be eleŋ to nɛ men pin fanɛ ma e la Enyɛnpe Ebɔrɛ na.”
14Ebɔrɛ ka malga ŋ gbiti kagbirshuŋ be asheŋ
1Kachako nɛ Israɛl be benimuana na be beko ba chena ma anishi to a fin kubɔya nɛ k shi Enyɛnpe Ebɔrɛ na kutɔ. 2Ndoŋ nna nɛ Enyɛnpe Ebɔrɛ na kaŋɛ ma le: 3“Dimɛdi pibi, Ezikɛl, basa ere ta bumo be ŋgbene nna n wɔtɔ kagbirshuŋ to n shin nɛ k bee yɛr bumo kulubi to. A daga ŋ ka tuge bumo a? 4Amoso kaŋɛ bumo kusɔ nɛ ma Enyɛnpetale Ebɔrɛ na kaŋɛ. Kumo e la fanɛ Israɛl be esa kikɛ nɛ e ta mbe kagbene n wɔtɔ kagbirshuŋ to nseŋ shin nɛ k yɛr mo kulubi to, kumo be kaman nɛ e yɔ anebi kutɔ n ya kaa fin e nu ma kɔnɔ to be kamalga, ma Enyɛnpe Ebɔrɛ na beeŋ sa mo kubɔya nɛ k daga mo. 5Loŋ e naŋ shin nɛ Israɛl be basa nɛ b kini ma nseŋ ta bumo be ŋgbene n wɔtɔ kagbirshuŋ to na e kini agbirana na nseŋ bɛta m ba ma kutɔ.
6Amoso, Ezikɛl, kaŋɛ Israɛl be basa na kikɛ kusɔ nɛ ma Enyɛnpetale Ebɔrɛ na kaŋɛ. Kumo e la fanɛ b tuba nseŋ yige bumo be agbirana nɛ amo be asheŋ bee nu agbo nɛ menyi be ekishisheŋ na!
7Nɛ fanɛ Israɛl be esa ko ŋko efɔ ko nɛ e wɔ Israɛl be efuli so kini ma nseŋ ya kaa shuŋ agbir, kumo be kaman nɛ e yɔ anebi kutɔ n ya kaa fin ma kɔnɔ to be kamalga be kenu, ma Enyɛnpe Ebɔrɛ gbagba e naŋ tuge mo. 8M maaŋ sa mo kashuli. Ma alɛ beeŋ gberge mo kusoe nɛ k baa la kefiɛso n sa ekama nɛ e daa fɛ kewora kusɔ nɛ e wora na. Kumo be kaman nɛ n lara mo ashi ma basa to saŋɛ na so nɛ men pin fanɛ ma e la Enyɛnpe Ebɔrɛ na.”
Demuji nɛ k maŋ kɔ ŋgelge na be asheŋ
9“Nɛ fanɛ anebi ko sa efɛ be kubɔya, ma Enyɛnpe Ebɔrɛ na e sa anebi na ekpa nɛ e ku efɛ. Ama ma alɛ kraa beeŋ kini anebi na nseŋ lara mo ashi ma basa Israɛlebi to. 10Anebi na nɛ esa nɛ e yɔ mo kutɔ n ya bishi so na kikɛ beeŋ nya kasogberge koŋwule. 11Meeŋ wora loŋ, saŋɛ na so, Israɛl be basa na maaŋ kini ma nseŋ ta bumo be amu n ya wɔtɔ asheŋ lubiana to. Baaŋ baa la ma basa, nɛ ma alɛ e baa la bumo be Ebɔrɛ.” Ma, Enyɛnpetale Ebɔrɛ e kaŋɛ na.
Efuli lubi be demuji be asheŋ
12Ade be kaman, nɛ Enyɛnpe Ebɔrɛ na naŋ kaŋɛ ma le: 13“Dimɛdi pibi, nɛ efuli ko so be basa wora alubi n da ma so nsaa maŋ ji kashenteŋ n sa ma, nɛ n shin nɛ bumo be adɔjibi jija nɛ akoŋ tɔr m mɔ basa na nɛ bumo be asɔbɔya kikɛ, 14hale nɛ Nowa nɛ Danɛl nɛ Job, gba daŋ ti bumo so, bumo be alelasheŋ daa beeŋ tiŋ m mɔlga bumo gbagba nawule nna ama mannɛ basa na kikɛ.” Ma, Enyɛnpetale Ebɔrɛ e kaŋɛ na.
15“Ŋko nɛ n shin nɛ asɔbɔya lubi yɔ efuli na so n ya mɔ kumo so be basa nna nɛ kasawule na ki kakpa ŋana so n sa bekama nɛ baa bɔla ndoŋ a choŋ ŋkpal asɔbɔya lubi na so, 16kashenteŋ nɛ ma, Enyɛnpetale Ebɔrɛ bee kaŋɛ menyi na fanɛ nɛ basa asa ere, Nowa nɛ Danɛl nɛ Job, gba daa wɔ efuli na so, b daa maaŋ tiŋ m mɔlga bumo be mbia gba. Bumo gbagba nawule e daa beeŋ nya kumɔlga nɛ kasawule na e ki kakpa fuloŋ a dese.
17Ŋko nɛ fanɛ n shin nɛ bedoŋ kre kena n ya kɔ efuli nɛ kumo so be basa wora alubi nseŋ mɔ basa na nɛ bumo be asɔbɔya kikɛ gba, 18kashenteŋ nɛ ma, Enyɛnpetale Ebɔrɛ bee kaŋɛ menyi na fanɛ nɛ basa asa na daa wɔ efuli na so gba, b daa maaŋ tiŋ m mɔlga bumo be mbia gba, ama bumo gbagba nawule e daa beeŋ nya kumɔlga.
19Ŋko nɛ fanɛ n nya agbo nna nseŋ shin nɛ kulɔ mɔso tɔr efuli na so a mɔ basa nɛ asɔbɔya kikɛ, 20ma, Enyɛnpetale Ebɔrɛ na bee kaŋɛ kashenteŋto na fanɛ, nɛ Nowa nɛ Danɛl nɛ Job gba daa wɔ efuli na so, b daa maaŋ tiŋ m mɔlga bumo be mbia. Bumo gbagba nawule e daa beeŋ nya kumɔlga ŋkpal bumo be alelasheŋ so.”
21Ŋkpal ade kikɛ so, kusɔ nɛ ma Enyɛnpetale Ebɔrɛ na bee kaŋɛ e la fanɛ ekpa nɛ meeŋ bɔla kumo so ŋ gberge Jerusalɛm to be basa kusoe kenishipere so nde: “Meeŋ shin nɛ kena nɛ akoŋgboŋ nɛ asɔbɔya lubi nɛ kulɔ mɔso e ba mɔ basa nɛ asɔbɔya kikɛ. 22Nɛ esa ko kaŋ ji efute nseŋ mɔlga mbe mbia gba, baaŋ bar bumo Babilɔn be efuli so. Ezikɛl, nɛ fo wu kebaawɔtɔ lubi nɛ fo be basa kɔ na nɛ feeŋ pin kusɔ nɛ k ba nɛ m mur Jerusalɛm to be basa. 23Ndoŋ nɛ feeŋ pin geeŋ fanɛ ŋ kɔ ekpa nɛ n wora kusɔ nɛ n wora na.” Ma, Enyɛnpetale Ebɔrɛ na e kaŋɛ na.
15B ka ta Jerusalɛm m ber kefeelebi jiga be asheŋ
1Nɛ Enyɛnpe Ebɔrɛ na kaŋɛ ma le: 2“Dimɛdi pibi, Ezikɛl, nuso nɛ baa ta kefeelebi a ber kedibi? Kefeelebi be keyabi nɛ kupuŋ to be kedibi be keyabi be kumo e kɔ tɔnɔ? 3Esa beeŋ tiŋ ŋ ku kefeelebi be keyabi n wora kusɔ ko a? Esa beeŋ tiŋ ŋ ku kumo n shɛl keyir ŋ gbir a ta asɔ a shiga so a? 4K baa walɛ nna n sa kebaa puga edɛ. Nɛ kumo be mba anyɔ nɛ nferinto kikɛ ji edɛ, esa maaŋ naŋ tiŋ n ta kumo n wora shɛŋ. 5K ka daa maŋ chɔɔ gba k daa maa kɔ tɔnɔ. K ka chɔɔ bre nɛ k beeŋ baa kɔ tɔnɔ a?”
6“To, kusɔ nɛ Enyɛnpetale Ebɔrɛ na bee kaŋɛ e la fanɛ, kananɛ m baa ta kefeelebi be keyabi kupuŋ to a wɔtɔ edɛ to nɛ k bee chɔɔ na aloŋ nɛ meeŋ ta edɛ 7ŋ gberge basa nɛ b wɔ Jerusalɛm to kusoe. B tiŋ n luri edɛ ko to n lar, ama edɛ malɛ kraa beeŋ chɔɔ bumo m mur. Ŋ kaŋ gberge bumo kusoe na nɛ fo, Ezikɛl, beeŋ pin fanɛ ma e la Enyɛnpe Ebɔrɛ na. 8B ka maŋ ji kashenteŋ n sa ma so, meeŋ shin nɛ efuli na a ki kasawule fuloŋ a dese jiga. Ma, Enyɛnpetale Ebɔrɛ e kaŋɛ na.”
16Jerusalɛm ka maŋ ji kashenteŋ n sa Ebɔrɛ be asheŋ
1Nɛ Enyɛnpe Ebɔrɛ na kaŋɛ ma le: 2“Dimɛdi pibi, Ezikɛl, shin nɛ Jerusalɛm be basa e pin ekishisheŋ nɛ baa wora na be asheŋ, 3nseŋ kaŋɛ bumo kusɔ nɛ ma, Enyɛnpetale Ebɔrɛ na bee kaŋɛ a laŋɛ Jerusalɛm be kaplɛa so na fanɛ Keenan be kasawule so nɛ b kurge fo nɛ fo tuto la Amɔri be esa nɛ fo nio malɛ la Hiti be esa. 4Kachɛ nɛ b kurge fo, esa kikɛ maŋ ku fo enyaŋ, ŋko m bɛr fo nchu ŋko n wora nfɔl ŋ gbiti fo eyur so ŋko n ta wajɛ m buu fo so. 5Esa kikɛ daa maŋ wu fo kuwɔr gba a bishi nɛ e bee wora fo asheŋ ere be kekama. Kachɛ nɛ b kurge fo gbagba na esa kikɛ maŋ nya kasha n sa fo. B ta fo nna n lɛ kupuŋ to.
6Ndoŋ nna nɛ m bɔla ndoŋ a choŋ nseŋ wu fo nɛ fo dese fo gbagba be ŋklaŋ to a to aya to nɛ ŋ kaŋɛ fanɛ m maaŋ shin nɛ fo wu. 7Kumo be kaman nɛ n ta fo n ya bela fo fanɛ kusɔ duuso popɔrbi na. Ndoŋ nna nɛ fo daŋ nɛnɛ ŋ ki suŋguru n nyalɛ kebita. Nɛ fo anyipo koso n yili fo kagbene to nɛ fo emin daŋ m ba buu fo abatimu so, ama nɛ fo kraa maa dela shɛŋ.
8Ŋ ka naŋ ba wu fo nɛ m pin fanɛ naniere fo ki eche nna n loge na, nɛ n ta ŋ gbagba be kusɔbuuso m buu fo kayurkpaŋ so. Kumo be kaman nɛ n nase kɔnɔ n sa fo nseŋ bɔ ntaŋ fanɛ feeŋ baa la meya nɛ ma, Enyɛnpetale Ebɔrɛ na e baa keni fo so.
9Kumo be kaman nɛ m bɛr fo nchu n fɔr fo ŋklaŋ na kikɛ nseŋ gbiti fo ɔlif be ŋku. 10Kumo be kaman nɛ n ta kale nɛ b jɔɔ m buu fo nseŋ wɔtɔ fo asɔbɔya be kawɔl lela be asɛbta. Nseŋ naŋ sa fo chimu nɛ k bee nyɛkpɛso pɛlpɛl nɛ fo chɛ nɛ yawu kpakpaso be epiŋi. 11Ade kikɛ be kaman nɛ n sa fo enɔ to be mpinibi nɛ kubɔtoshembi 12nɛ kamuna to be kepinibi nɛ akonde nɛ kuwurwuro lela ga nɛ fo ta m buu fo kumu so. 13Shuwa nɛ gbiti be abitasɔ nɛ fo daa wɔtɔ nsaa buu epiŋi nɛ b jɔɔ nɛ yawu kpakpaso be asɔbuuso. Nyifu lela nɛ fo daa ta a wora bodobodo nseŋ daa ji mushoŋ nɛ ɔlif be ŋku. Ŋkpal loŋ so, nɛ fo kebita lar nɛnɛ nɛ fo ki ewurche. 14Ndoŋ nna nɛ fo asheŋ sɔ kaplɛkama nɛ ekama bee ji fo kebita be asheŋ ashi efuliana na kikɛ so, ŋkpal kananɛ ma, Enyɛnpetale Ebɔrɛ na shin nɛ fo kela lar nɛ ekama bee wu kumo so.
15Ama fo shin nɛ fo kela na luri fo kumu to nɛ fo ki sakaleche nsaa ta fo kumu a sa enyɛn kama nɛ e kra fo a choŋ. 16Fo alɛ lɔŋɛ agbirshuŋkpa nseŋ ta fo asɔbuuso na be ako n lɔŋɛ ndoŋ nsaa keta fo benyɛn a yɔ ndoŋ n ya kaa ji kesakalea. Le be asheŋ daa maŋ daga fanɛ a wora kikɛ. 17Fo ta shuwa nɛ gbiti be abitasɔ nɛ n sa fo na n lɔŋɛ agbir nyɛnsoana nsaa yɔ amo ase n ya kaa ji kesakalea. 18Fo alɛ ta epiŋi nɛ b jɔɔ nɛ n sa fo na a buu agbirana na nsaa ta ɔlif be ŋku nɛ duwu nɛ n sa fo na a lara sarga a sa amo. 19Fo ta nyifu lela nɛ ɔlif be ŋku nɛ mushoŋ nɛ n sa fo fanɛ fo baa ji na n lara sarga n sa agbirana na a fin fanɛ fo asheŋ e par amo. Ma, Enyɛnpetale Ebɔrɛ na gbagba e wu k ka bee wora.
20Ade kikɛ be kaman, nɛ fo ta fo mbia nɛ fo kurge n sa ma na n lara sarga n sa agbirana na. Fo kubojua na nawule maŋ kukwe a? 21Fo mɔ ma mbia n lara sarga n sa agbirana. 22Fo ka pere kenishi a wora ekishisheŋ ere nsaa ji fo kubojua ere kikɛ na, fo teŋ fo kebia to so; jemanɛ nɛ fo daŋ delge so a dese ŋklaŋ to a to aya to na.
23To, ma Enyɛnpetale Ebɔrɛ na e kaŋɛ fanɛ kumu lubi gboŋgboŋi bee ba fo so! Asheŋ maaŋ nyalɛ n sa fo kikɛ. Fo ekar fo nna na! Asheŋ lubi nɛ fee wora ere kikɛ be kaman, 24fo kraa pɔr agbirshuŋkpaana a yili alɔnɛ so nna. 25Kubɔrbi kikɛ ase fo pɔr kegbirshuŋkpa n yili ndoŋ n ya kaa jija fo kela nsaa tu enyɛn kikɛ nɛ e bɔla ndoŋ a choŋ a ŋaba fo kumu. 26Fo tu Ijipt be efuli so be basa nɛ b pere kenishi a fin kananɛ baaŋ nya n di fo na n ji kubojua nɛ ma kagbene kaa ŋkpal loŋ so. 27Amoso nɛ ŋ gberge fo kusoe nseŋ shin nɛ ma nɛfa lar fo so nɛ Filisti be basa nɛ b la fo doŋana nɛ fo asheŋ bee nu bumo agbo na ba ku fo kasawule so. 28Ŋkpal benyɛn nɛ fo kɔ na ka maa kukwe fo so fo kra naŋ ya tu Asiriya be basa malɛ gba nna n ji kesakalea. Bumo alɛ gba maŋ kukwe fo. 29Kumo be kaman nɛ fo naŋ yɔ Babilɔn, nɛ k la eyawujipo be efuli na, malɛ gba nɛ fo kubojuaji na wora keshi n ti so. Ama amo kikɛ be kaman, fo kraa maŋ nya fo kepar.
30Amoso nɛ ma nɛ Enyɛnpetale Ebɔrɛ kaŋɛ fanɛ fo to fo kumu pasaa! Fo wora asheŋ ere kikɛ fanɛ sakaleche nɛ e paŋ anishinyɔr pasaa! 31Fo daŋ pɔr mboŋ nɛ feeŋ baa shuŋ agbirana nsaa ji kubojua n yili kubɔrbi kikɛ ase nna. Ama mannɛ amansherbi so nɛ fo daa wora loŋ, ŋkpal manɛ so fo daa maa sɔ amansherbi. 32Fo du fanɛ eche nɛ e bee sha kebaatu befɔ nna a ji kubojua a chɔ kebaa sha mo kul nawule. 33Sakaleche kikɛ bee sɔ amansherbi nna, ama fo ere e naa sa fo jipoana asɔ, a lɔlɔ bumo nɛ b baa shi kaplɛkama a ba m ba kaa di fo. 34Fo ere be kubojuaji na baa kɔr bekama peya to nna. Benyɛn maa kɔ a fin fo, ama fo ere e naa fin bumo nsaa ka bumo kukɔ gba kuraa.”
Ebɔrɛ ka ji Jerusalɛm demu be asheŋ
35Amoso Jerusalɛm, nu kusɔ Enyɛnpe Ebɔrɛ na bee kaŋɛ fo, sakaleche ere! 36Fo ka delge fo kumu so fanɛ sakaleche nseŋ ta fo kumu n sa fo jipoana nseŋ mɔ fo mbia n lara esarga n sa agbirana nɛ ŋ kishi amo be asheŋ ga na so, 37meeŋ gama fo jipoana nɛ fee sha nɛ bumo nɛ fo kishi kikɛ abar so. Nseŋ shin nɛ b yili ŋ kulti fo nɛ n delge fo so bumo kikɛ be anishito nɛ b wu fo kayurkpaŋ. 38Kejimbri be kasogberge beeŋ ba fo so ŋkpal kubojuaji nɛ basa be kemɔ so. Meeŋ nya agbo ga nseŋ ta luwu ŋ gberge fo kusoe. 39Kumo be kaman, meeŋ shin nɛ fo jipoana e bure m bure mboŋ nɛ fee ji kesakalea na nsaa shuŋ agbirana na kikɛ. Baaŋ suge fo asɔbuuso nɛ abitasɔ na kikɛ ŋ ka fo kayurkpaŋ nɛ enɔfuloŋ.
40“Bumo alɛ beeŋ naŋ we n wɔtɔ jimaŋ nɛ b kpa fo ajembu m mɔ. Kumo be kaman nɛ b ta etokobi ŋ ŋele fo to fanɛ mblaŋkul nseŋ chɔɔ fo nwu. 41Meeŋ wora loŋ ashi beche damta be anishito nɛ fo kubojuaji e fo ekar nɛ fo jipoana maaŋ naaŋ nya ŋkɛ ashi fo kutɔ. 42Aloŋ nɛ ma agbo beeŋ wushi nɛ ma kagbene e dese ma nɛ m maaŋ naŋ nya agbo ŋko ŋ kɔ kukɔrkɔ. 43Fo teŋ so kananɛ ŋ keta fo jemanɛ nɛ fo daa la kebia fɔlbi na nna nseŋ wora ekishisheŋ nɛ agbo pɛ ma ga. Fo daŋ wora amo nɛ a chɔ loŋ gba nseŋ ki sakaleche gba kuraa. Fo daga kasogberge!” Ma, Enyɛnpe Ebɔrɛ e kaŋɛ na.
Ebiche ka du fanɛ kananɛ mo nio du be asheŋ
44Ade kikɛ be kaman, nɛ Enyɛnpe Ebɔrɛ na naŋ kaŋɛ: “Basa beeŋ baa bɔ keŋasa ere a laŋɛ fo, Jerusalɛm be kaplɛa fanɛ kananɛ enio be da baa du, aloŋ nɛ mo pibiche gba be da du. 45Fo baa du fanɛ fo nio gbagba nna. Mo e kishi mo kul nɛ mbe mbia na. Fo alɛ baa naa du fanɛ fo kurgepo chesoana nna. Bumo alɛ gba kishi bumo kulana nɛ mbia na. Fo nio daa la Hiti be esa nna nɛ fo tuto malɛ daa la Amɔri be esa. 46Fo dacheso e la kadegboŋ nɛ baa tre Samɛria na, nɛ kumo nɛ kumo be ndekarso wɔ a laŋɛ fo kelargato be esoso na. Nɛ fo sipocheso malɛ la kadegboŋ nɛ baa tre Sodɔm na, nɛ kumo alɛ nɛ kumo be ndekarso wɔ a laŋɛ fo kelargato be kaseto na. 47Fo baa maŋ kute bumo be kebaawɔtɔ to nna n wora ekishisheŋ nɛ b wora na nawule, ama fo wora amo nɛ a chɔ bumo peya na gba kuraa.”
48Kede be kaman nɛ Enyɛnpetale Ebɔrɛ na naŋ kaŋɛ: “Kashenteŋ nɛ mee kaŋɛ fo, Jerusalɛm na, fanɛ fo sipocheso Sodɔm nɛ kumo be nde kreso to be basa kikɛ maŋ wora asheŋ lubi n fo amo nɛ fo nɛ fo ndekarso to be basa wora so. 49Sodɔm nɛ kumo be ndekarso to be basa daa wu bumo be amu nna ŋkpal b kaa kɔ ajibi damta a ji nseŋ naa wɔ kayurwushi to so. B daa maa keni betirpo nɛ basa nɛ asheŋ maa nyalɛ a sa na so. 50B daŋ kpeŋ nna nsaa wu bumo be amu nseŋ daŋ naa wora ma ekishisheŋ. Amoso nɛ n daŋ mur bumo fanɛ kananɛ fo nyi geeŋ na.
51Samɛria to be basa bre daŋ maŋ wora asheŋ lubi nɛ fo basa wora ere be barga to gba. Fo basa wora asheŋ keshiso a chɔ bumo be basa, n shin nɛ k wora fanɛ fo kurgepoana na be basa la basa lela a chɔ fo basa. 52To, naniere e daga fanɛ fo nya fo ŋaba. Ŋkpal fo basa be asheŋ lubi ka shi a chɔ fo kurgepoana be basa peya so, kewora fanɛ b la basa lela a chɔ fo basa.”
53Kumo be kaman nɛ Enyɛnpe Ebɔrɛ naŋ kaŋɛ Jerusalɛm to be basa le: “Meeŋ naŋ nɛfa Sodɔm nɛ Samɛria nɛ amo be nde kresoana kikɛ to be basa. Ma alɛ beeŋ nɛfa fo alɛ gba be basa ashi Jerusalɛm to, 54saŋɛ na so nyɔmɔ beeŋ pɛ fo basa ŋkpal bumo be asheŋ wora so ka shin nɛ Sodɔm nɛ Samɛria kikɛ to be basa duli basa lela a chɔ bumo so. 55Kachɛ na kaŋ fo, asheŋ beeŋ naŋ nyalɛ n sa fo basa nɛ Sodɔm nɛ Samɛria kikɛ be basa nɛ ndekarsoana na kikɛ to be basa nɛ ekama e bɛta n yɔ kakpa nɛ e daa wɔ dra na. 56Fo, Jerusalɛm, daa wora Sodɔm eyur to nna jemanɛ nɛ fo daa wu fo kumu na, 57kumo be pɔɛŋ nɛ ekama wu fo da lubi na. Naniere fo ki kemɔmɔshia be kusɔ nna n sa Edɔmebi nɛ Filistiebi nɛ efuliana nɛ a kulti fo na kikɛ nɛ baa keni fo jiga. 58Ma, Enyɛnpe Ebɔrɛ e kaŋɛ na, fanɛ, feeŋ ji awurfoŋ ŋkpal asheŋ jiga nɛ asheŋ lubi nɛ fo wora na kikɛ so.”
59Nɛ Enyɛnpe Ebɔrɛ naŋ kaŋɛ: “Meeŋ gberge fo, Jerusalɛm, kusoe ŋkpal fo ka kplaŋ ntaŋ nɛ fo bɔ na so nseŋ jija ma nɛ fo kɔnɔkoŋwule be ŋkre na so. 60Ama ma ere beeŋ wora m bɔlɔ kɔnɔkoŋwule be ŋkre nɛ ma nɛ fo kre fo kebia to kikɛ na so nseŋ naŋ shin nɛ ma nɛ fo e wora kɔnɔkoŋwule be ŋkre nɛ k beeŋ baa wɔtɔ mbaanaayɔ. 61Aloŋ nɛ feeŋ nyiŋi asheŋ lubi nɛ fo wora na nɛ nyɔmɔ e pɛ fo jemanɛ nɛ meeŋ shin nɛ fo kurgepoana, Sodɔm nɛ Samɛria, e naŋ bɛta m ba ki fo mbia na, ama mannɛ a loŋ e daa la ma nɛ fo be kɔnɔkoŋwule be ŋkre na. 62To, ma nɛ fo beeŋ naŋ wora kɔnɔkoŋwule be ŋkre nɛ fo pin fanɛ ma e la Enyɛnpe na. 63Meeŋ ta fo alubi m paŋ fo, ama feeŋ baa nyiŋi amo nɛ nyɔmɔ e pɛ fo nɛ fo maaŋ naŋ tiŋ m bugi kɔnɔ. Ma, Enyɛnpetale Ebɔrɛ e kaŋɛ na.”
17Ŋjɔnɔkoso anyɔ be keŋasa be asheŋ
1Nɛ Enyɛnpe Ebɔrɛ na kaŋɛ ma le: 2“Dimɛdi pibi, Ezikɛl, bɔ Israɛl be basa na keŋasa 3n shin nɛ b pin fanɛ kusɔ nɛ ma, Enyɛnpetale Ebɔrɛ, bee kaŋɛ bumo e la fanɛ kajɔnɔkoso gboŋ ko nɛ e daa kɔ aba lempo nɛ atɛ lela ga e daŋ firgi n yɔ Lebanɔn be abee so n ya bu kedibi nɛ baa tre sida na be awɔlto be keyabi. 4Nseŋ ta keyabi na n yɔ eyawujipo be kasawule so n ya fɛa bumo kadegboŋ to.
5Kumo be kaman nɛ kajɔnɔkoso na ta Israɛl be efuli so be keduuso n ya duu kasawule lela nɛ k mata kabombi so, kakpa nɛ k beeŋ baa nya nchu jemanɛ kikɛ nseŋ tiŋ n daŋ nɛnɛ na. 6Ndoŋ nna nɛ keduuso na kɔr n daŋ ŋ ki kefeelebi a sɔr asɔrso nɛ baa tre greep na. Nɛ kumo be ayabi daŋ esoso a shoŋi kajɔnɔkoso na, nɛ kumo be nliŋi yɔ nchiŋ kasawule to. Nɛ kefeelebi na wora ayabi damta nseŋ purge afantaŋ.
7Kajɔnɔkoso nyɔsopo ko malɛ gba daa wɔtɔ a kɔ aba lempo nɛ atɛ damta. Nɛ kefeelebi na be ayabi nɛ nliŋi salga to a yɔ kajɔnɔkoso nyɔsopo na kutɔ, a tama fanɛ k beeŋ nya nchu kumo kutɔ a chɔ kudɔbi nɛ k daa wɔ kumo to na. 8Ama kasawule lela nɛ k kɔ nchu nɛnɛ so nɛ b daŋ duu kumo nɛ k tiŋ n daŋ nɛnɛ ŋ ki kefeelebi lela nseŋ tiŋ n sɔr nɛnɛ.
9Naniere, Ezikɛl, kaŋɛ ma, fo tama fanɛ kefeelebi ere beeŋ pete a? Kajɔnɔkoso juŋkparso na maaŋ nya agbo n tia kumo nseŋ kuya kumo be ayabi to n lɛ nɛ a wɔl a? Kajɔnɔkoso na beeŋ tiŋ n tia kefeelebi na nɛ k maŋ fin benapo lempo damta be kechɛto gba. 10Kefeelebi na kɔ eleŋ nɛ alenfia nɛnɛ, ama nɛ fanɛ epeŋilarkpa be afu ber kumo so, k maaŋ chɛr nɛ k bolo.”
Enyɛnpe Ebɔrɛ na ka bugi keŋasa na to be asheŋ
11Kumo be kaman, nɛ Enyɛnpe Ebɔrɛ kaŋɛ ma le: 12“Bishi Israɛl be basa nɛ b pal kaman n sa ma ere fanɛ b pin keŋasa ere be kefito a? Kaŋɛ bumo fanɛ Babilɔn be efuli so be ewurgboŋ e ba Jerusalɛm to m ba pɛ Juda be ewura nɛ mbe benimuana m bɛta n yɔ Babilɔn be efuli so. 13Babilɔn be ewurgboŋ na daŋ ta Juda be ewura be kanaŋ to be esa ko nna n shin nɛ e bɔ ntaŋ fanɛ e beeŋ baa nu a sa mo, nseŋ shin nɛ mo nɛ mo wora kɔnɔkoŋwule be ŋkre. Kumo be kaman nɛ e pɛ kade na be basa gboŋ n ti so n yɔ, 14saŋɛ na so Juda be efuli so be basa nɛ b ka na beeŋ baa wɔ mbe kaseto a nu a sa mo nawule nsaa maaŋ naŋ tiŋ n nya eleŋ bumo gbagba be efuli na so kikɛ. 15Ama ewura popɔr nɛ Babilɔn be ewurgboŋ lara na pal kaman n sa mo nseŋ shuŋi mbɔ Ijipt be efuli so a fin egbaŋɛ nɛ benapo damta. Fo tama fanɛ ewura ere beeŋ ji n lar kusɔ nɛ e bee wora ere to a? E maaŋ tiŋ n lar kɔnɔkoŋwule be ŋkre na kaman nsaa maŋ nya kumo be kasogberge!”
16Kumo be kaman nɛ Enyɛnpetale Ebɔrɛ kaŋɛ le: “Ŋ ka baa la Enyɛnpetale Ebɔrɛ nɛ e bee sa ŋkpa ere bre, Juda be ewura ere beeŋ wu ashi Babilɔn be efuli so, ŋkpal e ka lar kɔnɔkoŋwule be ŋkre nɛ mo nɛ Babilɔn be ewurgboŋ kre na kaman so nseŋ wora n da mo gbagba be ntaŋ nɛ e bɔ na so so. 17Fɛɛro nɛ e la Ijipt be ewurgboŋ na nɛ mbe benapo lempo kikɛ maaŋ tiŋ n chɛ Juda be basa to ŋ kɔ jemanɛ nɛ Babilɔn be basa beeŋ ba gbare eshishɛr n deŋi abar so m mata Jerusalɛm be egbal na a fin keluri kade na to ŋ kɔ m mɔ basa na. 18Juda be ewura gbagba e wora n da mbe ntaŋ so nseŋ lar kɔnɔkoŋwule be ŋkre nɛ mo nɛ Babilɔn be ewurgboŋ kre na kaman, ŋkpal loŋ so, e beeŋ nya kasogberge.
19Amoso kusɔ nɛ ma Enyɛnpetale Ebɔrɛ nɛ mee sa ŋkpa na kaŋɛ e la fanɛ meeŋ gberge Juda be ewura kusoe ŋkpal e ka wora n da mo gbagba be ntaŋ nɛ e bɔ so nseŋ lar kɔnɔkoŋwule be ŋkre na kaman so so. 20Kewora fanɛ kashewu nɛ n ta m pɛ mo nseŋ yɛr mo Babilɔn be efuli so n ya ji mo demu ndoŋ ŋkpal e ka maŋ ji kashenteŋ n sa ma so. 21Mbe benapo kpakpaso kama nɛ baaŋ shile na beeŋ wu kena to nɛ bumo nɛ baaŋ ji efute na malɛ e pesaŋ to n sɔ kaplɛkama. Ndoŋ nɛ menyeeŋ pin fanɛ ma, Enyɛnpe Ebɔrɛ na e kaŋɛ na.”
Ebɔrɛ ka nase tama be kɔnɔ n sa Israɛl be asheŋ
22Kusɔ nɛ Enyɛnpetale Ebɔrɛ na kaŋɛ nde:
“Ŋ gbagba beeŋ ku kedibi nɛ baa tre sida na
be keyabi n fɛa;
keyabi popɔrbi nɛ meeŋ ku ashi kumo be awɔlto
n ya fɛa kebee jeŋgreŋ so.
23Israɛl be kebee nɛ k du jeŋgreŋ ga na be awɔlto nɛ meeŋ fɛa kumo.
Nɛ k daŋ n wora ayabi nseŋ sɔr asɔrso
nseŋ ki sida be kedibi lela.
Nɛ mbuibi be yiri kikɛ e ba tɔ asha kumo so;
nseŋ nya edikpa kumo be ayabi so.
24Ndoŋ nɛ ndibi nɛ a wɔ kasawule na so beeŋ pin
fanɛ ma, Enyɛnpe Ebɔrɛ na
e naa ku ndibi tenteŋ a lɛ
nsaa shin nɛ ndibi shiimbi bee daŋ nteŋ.
Mee naa shin nɛ ndibi bumbuŋ bee wɔl
nsaa shin nɛ ndibi wɔlso bee purge.
Ma, Enyɛnpe Ebɔrɛ e malga na; ma alɛ beeŋ wora kusɔ nɛ ŋ kaŋɛ na kikɛ.”
18Esa nɛ e wora kulubi e naaŋ wu
1Nɛ Enyɛnpe Ebɔrɛ na kaŋɛ ma: 2“Ezikɛl, mee kaa nu Israɛl be basa ka bee bɔ keŋasa ere e kaŋɛ fanɛ;
bekurgepo e ji anyinyembi
nɛ a bee nyiri bumo be mbia be anyi.
3Naniere kaŋɛ bumo fanɛ ma, Enyɛnpetale Ebɔrɛ nɛ e bee sa ŋkpa na e kaŋɛ na fanɛ b maaŋ naa bɔ loŋ be keŋasa na Israɛl be efuli so. 4Dimɛdi kikɛ be ŋkpa bɔɔ ma enɔ nna, bekurgepo nɛ bumo be mbia kikɛ. Amoso, esa nɛ e wora kulubi e naaŋ wu kumo be luwu.
5Nɛ fanɛ esa lela koso a ji kashenteŋ nsaa wora kusɔ nɛ k daga jemanɛ kikɛ. 6E maa ji agbirjibi ŋko a shuŋ Israɛl be basa be agbirana na. Mo alɛ maa sha mo barkasa be eche ŋko a di eche jemanɛ nɛ e bee lar ntamaŋ. 7Amodoŋwura malɛ maa puni ŋko a suge esa, mo alɛ maa sɔ tarma pɔɛŋ nseŋ sa esa mpaŋ. Ade be kaman mo alɛ naa chɛ betirpo to a sa bumo ajibi nɛ asɔbuuso. 8Loŋ be esa na maa wɔtɔ amansherbi nɛ e ta m paŋ esa nchu, mo alɛ maa wora kulubi nseŋ naa ji asheŋ nɛ amo be ekpa so a sa ekama. 9Ade kikɛ be kaman, mo alɛ de so nna nɛ e maaŋ wora n da ma mbra nɛ ma keŋini so. Le be esa la esa lela nna nsaa beeŋ ji efute n chɛr.” Ma, Enyɛnpetale Ebɔrɛ e kaŋɛ na.
10Ama nɛ fanɛ esa lela ere kurge ebi nɛ e bee suge nsaa mɔ basa, nsaa wora 11asheŋ nɛ mo tuto bre maaŋ wora na. Ebi na bee ji agbirjibi nsaa di mo braana be beche. 12E bee puni betirpo nsaa suge basa. Nɛ esa ta kusɔ ko m ba yili tarma gba e maaŋ naŋ laŋɛ kumo n sa kumo wura. Mo alɛ bee shuŋ agbirana nsaa wora ekishisheŋ. 13Ade kikɛ be kaman, e bee wɔtɔ mpaŋ kama nɛ e sa esa nchu ga nna. Esa kikɛ nɛ e la esa lubi fanɛ mo maa ba nɛ e ji efute n chɛr. Mo gbagba e wora le be ekishisheŋ ere, amoso mo e daga amo be luwu. Mo luwu na be turju beeŋ baa bɛ mo gbagba nna.
14Ama nɛ fanɛ esa lubi ere pibi wu asheŋ nɛ mo tuto bee wora na nseŋ kini kewora asheŋ fanɛ mo tuto, 15nsaa maa ji agbirjibi ŋko a shuŋ Israɛl be agbirana, mo alɛ maaŋ di mo barkasa be eche. 16E maaŋ suge ŋko m puni esa kikɛ, mo alɛ maaŋ sɔ tarma pɔɛŋ nseŋ sa esa mpaŋ. Mo alɛ bee sa betirpo ajibi nɛ asɔbuuso nna 17nsaa kini asheŋ lubi be kewora. Kusɔ nɛ e bee wora e la fanɛ e bee nu nna nsaa bɛ ma mbraana nɛ ma keŋini so. Le be esa beeŋ ji efute n chɛr. Mo tuto e wora alubi, nɛ le be esa lela ere maaŋ wu ŋkpal mo tuto be asheŋ lubi so. 18Mo tuto gbagba e naŋ wu ŋkpal mbe kapuni nɛ kasuge nɛ asheŋ lubi so.
19Ashere menyeeŋ bishi fanɛ nɛ mannɛ e baa nɛ ebi maaŋ nya mo tuto be asheŋ lubi be kakɔka? Kusɔ nɛ k ba e la fanɛ ebi na wora kusɔ nɛ k daga nseŋ wora ma mbraana kasonu nna. 20Basa nɛ b wora alubi e naa wu alubi be luwu. Mbia maaŋ ji awurfoŋ ŋkpal bumo tutoana be alubi so nɛ bekurgepo gba maaŋ ji awurfoŋ ŋkpal bumo be mbia be alubi so. Basa lela beeŋ nya bumo be alelasheŋ be kakɔka nɛ basa lubi malɛ e nya kasogberge ŋkpal bumo be alubi so.
21Nɛ fanɛ basa lubi yige asheŋ lubi be kewora nseŋ fara a wora ma mbraana kasonu nseŋ naa wora asheŋ nɛ a daga, b maaŋ wu manaŋ. 22Baaŋ nya bumo be alubi kikɛ be ketampaŋ, ŋkpal b ka wora asheŋ nɛ a daga so. 23Basa lubi be luwu maa par ma Enyɛnpe Ebɔrɛ na kikɛ. Kusɔ nɛ mee sha e la fanɛ b ka beeŋ tuba n lar bumo be alubi to nseŋ ji efute n chɛr.
24Ama nɛ fanɛ basa lela yige alela be kewora nseŋ fara a wora ekishisheŋ nɛ basa lubi bee wora na, a daga fanɛ b ji efute n chɛr a? Ayai! B maaŋ nyiŋi bumo alelasheŋ dra na. Baaŋ wu ŋkpal bumo be asheŋ lubi na so.
25Menyi Israɛl be basa bee kaa kaŋɛ fanɛ, kusɔ nɛ Enyɛnpe bee wora na maŋ walɛ. Ama men nu nfe, mannɛ ma e naa wora asɔ nɛ a maŋ walɛ. Menyi e naa wora asɔ nɛ a maŋ walɛ! 26Nɛ fanɛ basa lela fara asheŋ lubi be kewora, a daga fanɛ b wu ŋkpal bumo be alubi so. 27Nɛ fanɛ basa lubi malɛ yige asheŋ lubi be kewora nsaa wora asheŋ lela, baaŋ mɔlga bumo be amu ashi kasogberge to. 28Ŋkpal b ka fɛ bumo be asheŋ wora so na be asheŋ nseŋ yige asheŋ lubi na be kewora so nɛ baaŋ ji efute. 29Ama men kraa kaŋɛ fanɛ asɔ nɛ mee wora na maŋ walɛ. Menyi e wora n jija nsaa wora asɔ nɛ a maŋ walɛ.
30“Ma, Enyɛnpetale Ebɔrɛ na e naa kaŋɛ menyi Israɛl be basa fanɛ meeŋ ji menyi be ekama demu ŋkpal kusɔ nɛ e wora so. Amoso, men tuba ashi menyi be asheŋ woraso lubi to. Nɛ mannɛ aloŋ, a beeŋ yɛr menyi kemur to. 31Men lar men be asheŋ lubi na to nseŋ fara a fɛ asheŋ lela be kewora be asheŋ menyi be ŋgbene to. Menyi alɛ e baa ji kashenteŋ a sa ma. Men sa maŋ shin nɛ menyi be alubi e mɔ menyi. 32Ma, Enyɛnpe Ebɔrɛ na maa sha fanɛ men be ekama e wu. Amoso men tuba nseŋ ji efute n chɛr!”
19Kagbenejija be kashɛ
1Ndoŋ nna nɛ Enyɛnpe Ebɔrɛ kaŋɛ ma fanɛ m boŋ kagbenejija be kashɛ n sa Israɛl be benimu anyɔ ko ŋ kaŋɛ le:
2“Men nio daa la fanɛ buluŋ cheso nɛ e daa kɔ kenyɛn nna
nseŋ bela mbe bibi ashi ebuluŋ nyɛnso lempo to!
3E bela mbe ebi ko nseŋ ŋini kumo kepɛ n ji,
nɛ k koya edimɛdi be kepɛ n ji.
4Efuliana na ka nu mbe asheŋ,
nɛ b fe mo kekpaala m pɛ mo,
nseŋ ta edariwa
ŋ gberge mo n yɔ Ijipt be efuli so.
5Kumo nio ka jo nseŋ wu fanɛ tama loge na,
nɛ k naŋ ta kumo be bibi na be eko
m bela kumo nɛ k ki buluŋ lempo.
6K ka daŋ n yili
nɛ k tu kumo braana ebuluŋ e ji kekpaŋ.
Nseŋ koya edimɛdi be kepɛ n ji.
7K daa bure basa be ebu lempoana nna,
nsaa jija bumo be ndeana.
K baaŋ ponte jemanɛ kikɛ, kufugboŋ bee tɔr
ekama so efuli na so nna nɛ b baa chicha.
8Ndoŋ nna nɛ efuliana na kre kumo be kemɔ be nia,
nɛ basa shi kaplɛkama m ba.
Nɛ b sho kashewu
m pɛ kumo
9Kumo be kaman nɛ b ta kumo n wɔtɔ katurgegboŋ to
nseŋ ta kumo n yɔ Babilɔn be ewura kutɔ.
N ya ta mo n ti ebu
nɛ ekama maŋ naŋ nu mbe kaponte
ashi Israɛl be abee so kikɛ.
10Fo nio daa du fanɛ kedibi sɔrso nna
nɛ k yil m mata kabombi;
K daa sɔr nɛnɛ nna nsaa kɔ ayabi damta
ŋkpal k ka daa nya nchu nɛnɛ so.
11Kumo be ayabi daa kɔ eleŋ nna,
nseŋ daa walɛ keku n wora kuwurkpabi.
K daŋ daŋ n yɔ awɔlto
a chɔ ndibi nɛ a ka na kikɛ nna.
Ekama daŋ wu kumo be nteŋ nɛ ayabi damta.
12Ama agbo so nɛ n tia kumo
n lɛ kasawule.
Afu nɛ a shi epeŋilarkpa daŋ shin nɛ k bolo
nɛ kumo be asɔrso gbaŋgbaŋ n tɔr;
nɛ kumo be ayabi lempo na wɔl
nɛ edɛ ji amo.
13Naniere keshishɛrsawule so nɛ n duu kumo,
kasawule wɔlso nɛ nchu maŋ wɔ kumo so.
14Ndoŋ nna nɛ kumo be keyabi gboŋgboŋi ko pɛ edɛ;
nɛ edɛ na bɛ kumo so n chɔɔ kumo be ayabi nɛ asɔrso kikɛ.
Keyabi lempo kikɛ daŋ maŋ naŋ ka kumo so
nɛ b ku n wora kuwurkpabi.
Kashɛ ere la kagbenejija be kashɛ nna n daga kebaaboŋ kagbenejijaso.”
20Israɛl ka wora kagbene kpakpaso be asheŋ
1B ka pɛ ewura Jehowachin nɛ anyi be beko n yɔ Babilɔn be efuli so na be kafɛ shunusopo to be kufɔl nusopo to be kachɛ kudusopo na nɛ Israɛl be benimuana ko ba chena ma anishi to a fin kenu kusɔ nɛ Enyɛnpe Ebɔrɛ na kɔ nɛ e kaŋɛ bumo.
2Ndoŋ nna nɛ Enyɛnpe Ebɔrɛ na kaŋɛ ma 3fanɛ ŋ kaŋɛ Israɛl be benimuana na fanɛ kusɔ nɛ Enyɛnpetale Ebɔrɛ na kaŋɛ nde: “Men ba nna nɛ men ba pin kusɔ nɛ mee sha fanɛ men wora a? Ŋ ka baa la Enyɛnpetale Ebɔrɛ nɛ e bee sa ŋkpa ere, m maaŋ shin nɛ men pin kusɔ nɛ mee sha fanɛ men wora.
4Dimɛdi pibi, fo wora shiriya nɛ fo kpele bumo kusoe a? Kumo ere nyiŋi bumo ekishisheŋ nɛ bumo tutoana daŋ wora na be asheŋ, 5nseŋ naŋ kaŋɛ bumo fanɛ kusɔ nɛ Enyɛnpetale Ebɔrɛ na bee kaŋɛ e la fanɛ kachɛ nɛ e lara menyi nɛ men baa la mbe basa na, e daŋ bɔ ntaŋ nna n nase kɔnɔ n sa Jeekɔb nɛ men tutoana nseŋ lara mbe kumu ŋ ŋini bumo ashi Ijipt be efuli so ŋ kaŋɛ fanɛ e beeŋ baa la menyi nɛ men be kaman to ebi be Ebɔrɛ. 6Loŋ be kachɛ na nɛ e nase kɔnɔ fanɛ e beeŋ lara bumo Ijipt be efuli so n yɔ kasawule nɛ k kɔ kanya alegaiso nsaa wora adɔjibi ga nseŋ naa la kasawule nɛ k walɛ a chɔ nsawule kikɛ nɛ mo gbagba fin n yili bumo na so. 7Kumo be kaman, nɛ e naŋ kaŋɛ bumo fanɛ bumo be ekama e yige agbirana nɛ men ta menyi be anishi n yuu so, nɛ amo be asheŋ bee nu ma agbo nɛ ŋ kishi amo ga na be kebaashuŋ; saŋɛ na so, menyi maaŋ ta Ijipt be efuli so be agbirana n jija menyi be kebaawɔtɔ. Ŋkpal manɛ so, ma e la Enyɛnpe menyi be Ebɔrɛ na.”
8Ama b pal kaman n sa ma nseŋ kini kenu n sa ma. B daŋ maŋ lara asɔ nɛ b ta ŋ ki agbirana ashuŋ nseŋ ta bumo be anishi n yuu amo so na ashi bumo to. Bumo alɛ daa maŋ naŋ kini Ijipt be efuli so be agbirana na gba. Amoso nɛ n daŋ kaŋɛ fanɛ meeŋ shin nɛ ma agbo a ba bumo so nɛ ŋ gberge bumo kusoe ashi Ijipt ndoŋ na. 9Ama n daa maŋ wora loŋ, ŋkpal ŋ ka daa maa sha fanɛ ma ketre e jija efuliana nɛ baaŋ wu kananɛ meeŋ lara ma kumu ŋ ŋini Israɛl be basa nseŋ juŋkpar bumo n lar Ijipt be efuli so na be anishito so. 10Amoso nɛ n daŋ juŋkpar bumo n lar Ijipt be efuli so n yɔ keshishɛrsawule so na. 11Ndoŋ nɛ n sa bumo ma mbraana nɛ ma keŋini, nɛ b wora amo kasonu nseŋ pin kananɛ baŋ baa keta bumo be amu. 12Kumo be kaman, nɛ n yili ma Kewushiachɛ n sa bumo nɛ k baa la ashi tɔɔnɛ ma nɛ bumo be kefɛato, saŋɛ na so baaŋ pin fanɛ ma, Enyɛnpe Ebɔrɛ na e shin nɛ b ki basa cheembi.
13Ama Israɛl be basa na lar ma kaman keshishɛrsawule na so ndoŋ, nseŋ kini kebɛ ma mbraana nɛ keŋini nɛ a bee shin nɛ esa bee bii kebaawɔtɔ lela na so. Bumo alɛ nseŋ keni ma Kewushiachɛ na jiga. Amoso nɛ n daŋ kaŋɛ fanɛ meeŋ shin nɛ ma agbo e ba bumo so nɛ m mur bumo ashi keshishɛrsawule na so na. 14Ama n daa maŋ wora loŋ, ŋkpal ŋ ka daa maa sha fanɛ ma ketre e jija ashi efuliana nɛ b wu kananɛ n lara bumo ashi Ijipt be efuli so na be anishito so. 15Amoso nɛ ma alɛ daŋ bɔ ntaŋ ŋ kaŋɛ bumo keshishɛrsawule na so fanɛ m maaŋ naŋ yɛr bumo kasawule lela nɛ k bee wora adɔjibi ga nɛ n daŋ sa bumo na so. 16Ŋkpal manɛ so, b kini kebɛ ma mbraana nɛ ma keŋini so nseŋ keni ma Kewushiachɛ na jiga, nɛ bumo be ŋgbene kikɛ malɛ daa wɔ bumo be agbirana na so a chɔ ma. 17Ade kikɛ be kaman, n daŋ wu bumo kuwɔr nna a maŋ mur bumo ŋko n shin nɛ b shir keshishɛrsawule na so ndoŋ. 18Kusɔ nɛ n daŋ wora e la fanɛ, n daŋ fɛa bumo be mbifɔlbi nɛ b daa wɔ bumo to na so nna, fanɛ b sa maŋ kaŋ kute bumo tutoana to m bɔla agbirana so n jija bumo be amu. 19Ma e la Enyɛnpe, menyi be Ebɔrɛ na; men be ma mbraana nɛ ma keŋini so. 20Men ta ma Kewushiachɛ naŋ ki kachɛ cheembi, saŋɛ na so k beeŋ baa la tɔɔnɛ a ŋini fanɛ men la ma basa nna nɛ ma alɛ la Enyɛnpe menyi be Ebɔrɛ na.
21Ama ashi keshishɛrsawule na so ndoŋ, mbia na gba lar ma kaman nseŋ kini kebɛ ma mbraana nɛ ma keŋini so. Bumo alɛ gba naŋ keni ma Kewushiachɛ na jiga nna. Amoso nɛn daŋ kaŋɛ fanɛ meeŋ shin nɛ ma agbo e ba bumo so ashi kiyi na to ndoŋ. 22Ama n daa maŋ wora loŋ, ŋkpal ŋ ka daa maa sha fanɛ ma ketre e jija ashi efuliana nɛ b wu kananɛ n juŋkpar bumo n lar Ijipt be efuli so na be anishito so. 23Amoso nɛ n daŋ naŋ bɔ ntaŋ ŋ kaŋɛ bumo kiyi na to fanɛ meeŋ shin nɛ b pesaŋ to n sɔ efuliana pɔtɛana so na. 24Ŋkpal manɛ so, b daŋ kini kebɛ ma mbraana nɛ atande so nsaa maŋ ta ma Kewushiachɛ na n tre sheŋ nna. Bumo tutoana be agbirana e daŋ bɔlɔ bumo kenishi ga nɛ b daa shuŋ amo. 25Nɛ n daŋ kpal loŋ so n sa bumo mbraana nɛ ŋ gbagba nyi fanɛ b daa maaŋ tiŋ m bɛ amo so n nya ŋkpa. 26B daŋ naŋ bɔla bumo gbagba be esarga so n jija bumo be kebaawɔtɔ nna. B daa ta bumo be ewurkoŋ nna a lara esarga. N daŋ shin nɛ loŋ wora nna nɛ kufu e pɛ bumo nɛ b pin fanɛ ma e la Enyɛnpe na.
27Amoso, dimɛdi pibi, Ezikɛl, kaŋɛ Israɛlebi na fanɛ, kusɔ nɛ Enyɛnpetale Ebɔrɛ na kaŋɛ e la fanɛ kananɛ bumo tutoana daŋ kini ma nseŋ tege ma nna na. 28Jemanɛ nɛ m bar men tutoana kasawule nɛ n nase kɔnɔ fanɛ meeŋ sa bumo na so n loge na, nɛ b baa wu agoŋgulombi nɛ ndibigboŋ nɛ a kɔ afantaŋ nseŋ ta amo ŋ ki bumo be agbirshuŋkpaana nsaa wɔtɔ a lara esarga amo ase a sa bumo be agbirana. B daa chɔɔ eduwu nna nsaa duga nsa a wurge agbirana na nɛ kumo be loŋ daa nu ma agbo nsaa kaa ma kagbene. 29Ndoŋ nna nɛ m bishi bumo fanɛ nuso be mboŋ nɛ menyee kaa yɔ na? Nɛ b kaŋɛ, ‘Agbir ase’ nɛ anyee yɔ. Hale nɛ mbre agbirshuŋkpa nɛ baa tre agbir ase.
30Amoso kaŋɛ Israɛl be basa na fanɛ kusɔ nɛ Enyɛnpetale Ebɔrɛ bee bishi e la fanɛ, manɛ e baa nɛ menyeeŋ jija menyi be amu nɛ kebaawɔtɔ fanɛ kananɛ men tutoana daŋ wora na nsaa shuŋ bumo be agbirana nɛ amo be asheŋ bee nu agbo na? 31Jemanɛ nɛ menyee ta menyi be mbia a lara esarga a sa agbirana na hale nɛ mbre na, menyee jija menyi be amu nɛ menyi be kebaawɔtɔ nna na. O Israɛlebi, a daga ŋ ka naŋ sa menyi ekpa nɛ men bishi ma kusɔ ko a? Ma, Enyɛnpetale Ebɔrɛ e naa kaŋɛ menyi kashenteŋto na fanɛ m maaŋ sa menyi ekpa nɛ men bishi ma shɛŋ.
32Menyee kaa kaŋɛ le nna: “Anyee sha fanɛ an baa du fanɛ efuliana nɛ amo be basa bee shuŋ ndibi nɛ ajembu na nna.” Ama kusɔ nɛ menyee fɛ na maaŋ tiŋ n wora kikɛ. 33Ma Enyɛnpetale Ebɔrɛ na e naa kaŋɛ menyi kashenteŋto na fanɛ meeŋ ta eleŋ n ji kuwura menyi so nɛ men pin kananɛ ma agbogboŋ du. 34Eleŋ nɛ tintiŋ nɛ agbogboŋ nɛ meeŋ ta n lara menyi ashi efuliana nɛ men pesaŋ to n yɔ na, m ba gama abar so. 35Nseŋ bar menyi keshishɛrsawule nɛ efuliana na kulti kumo na so, nɛ ma nɛ menyi e tu abar ndoŋ nɛ n ji menyi demu nɛ men ji n tɔr. 36Kananɛ n ji men tutoana demu Ijipt be efuli so be kiyi to nɛ b ji n tɔr nɛ ŋ gberge bumo kusoe na nɛ meeŋ ji menyi alɛ gba demu. Ma, Enyɛnpetale Ebɔrɛ e kaŋɛ na. 37“Meeŋ ta tintiŋ n shin nɛ men be ekama e wora kusɔ nɛ kɔnɔkoŋwule be ŋkre na bee ŋini. 38Meeŋ lara ŋgbene kpakpaso wuraana nɛ baa lar ma kaman na ashi menyi to. Hale nɛ n lara bumo ashi efuliana nɛ b pesaŋ to n yɔ na gba m ba, b maaŋ nya m bɛta n yɔ Israɛl be kasawule so. Ndoŋ nɛ menyeeŋ pin fanɛ ma e la Enyɛnpe Ebɔrɛ na.
39Kusɔ nɛ Enyɛnpetale Ebɔrɛ bee kaŋɛ menyi nde: Menyi Israɛlebi, be ekama nɛ e bee sha e ya kaa shuŋ mbe agbirana, ŋkpal manɛ so, ade kikɛ be kaman menyeeŋ ba nu n sa ma nseŋ yige kebaa lara esarga a sa menyi be agbirana a jija ma ketre. 40Ŋkpal manɛ so, kachɛ na kaŋ fo ekama ashi Israɛl be efuli so beeŋ shuŋ ma ashi kebee cheembi nɛ baa tre Zayɔn ashi Jerusalɛm to na so, nɛ ma alɛ e sɔ bumo esarga nɛ baaŋ lara n sa ma ndoŋ na. Menyi be asheŋ beeŋ baa par ma nɛ ma alɛ e baa keni menyi be esarga lela nɛ ŋkɛ cheembi na akpa. 41Jemanɛ nɛ meeŋ naŋ lara menyi efuliana nɛ men pesaŋ to n yɔ to m bɛta m ba gama abar so na, ma kagbene beeŋ naŋ fuli menyi so nɛ n sɔ menyi be esarga fanɛ duwu nɛ a bee dufɛ viim na. Ndoŋ nɛ efuliana na kikɛ beeŋ wu fanɛ n du cheembi nna. 42Jemanɛ nɛ meeŋ bɛta menyi m ba Israɛl be efuli so, kasawule nɛ n nase kɔnɔ fanɛ meeŋ ta n sa men tutoana na, nɛ menyeeŋ pin fanɛ ma e la Enyɛnpe na. 43Ndoŋ nɛ menyeeŋ nyiŋi menyi be asheŋ wora so nɛ a shin nɛ men jija menyi be kebaawɔtɔ na, nɛ a shin nɛ menyi be asheŋ e baa nu menyi gbagba agbo ŋkpal asheŋ lubi nɛ men wora so. 44Jemanɛ nɛ meeŋ wora menyi, Israɛlebi, asheŋ nɛ a beeŋ bar ma ketre kemaŋkura nɛ mannɛ men be asheŋ lubi nɛ aworbi jiga so na nɛ menyeeŋ pin fanɛ ma e la Enyɛnpetale Ebɔrɛ na.”
45Kede be kaman nɛ Enyɛnpe Ebɔrɛ na be kubɔya naŋ ba ma kutɔ. 46E yɛ: “Dimɛdi pibi, kilgi a keni kelargato be kaseto nseŋ malga ŋ gbiti kupo nɛ k wɔ ndoŋ na. 47Kaŋɛ kupo na fanɛ k kaŋ kusoe n nu Enyɛnpe na be kubɔya. E yɛ: ‘Mee sha kenya edɛ n wɔtɔ fo to nɛ a chɔɔ fo ndibi bumbuŋ nɛ awɔlso kikɛ m mur nna na. Sheŋ maaŋ tiŋ n duŋ edɛ na saŋɛ nɛ a beeŋ yili kelargato be kaseto n chɔɔ a yɔ kelargato be esoso na. Kusɔkama malɛ nɛ edɛ na beeŋ tu amo be kebɔr so beeŋ ji edɛ m mur. 48Ekama beeŋ pin fanɛ ma Enyɛnpe na e nya edɛ na n wɔtɔ kupo na to nɛ ekama malɛ maaŋ tiŋ n duŋ amo.’ ”
49Ndoŋ nna nɛ n fubel ŋ kaŋɛ: “Enyɛnpetale Ebɔrɛ, sa maŋ shin nɛ n wora loŋ! Ekama bee malga a kaŋɛ fanɛ aŋasa nɛ mee bɔ nɛ a bee wul bumo to.”
21Babilɔn ka la Ebɔrɛ be tokobi be asheŋ
1Ndoŋ nna nɛ Enyɛnpe Ebɔrɛ na kaŋɛ ma le: 2“Dimɛdi pibi, Ezikɛl, kilgi fo anishi n shoŋi Jerusalɛm m malga ŋ gbiti kakpa nɛ basa na bee shuŋ be Ebɔrɛ na. Kpele Israɛl be basa kikɛ kusoe 3nseŋ kaŋɛ bumo fanɛ ma, Enyɛnpe Ebɔrɛ na bee kaŋɛ fanɛ b ki ndoŋana nna. Amoso meeŋ pee ma tokobi kumo be efar to m mɔ bumo to be basa lela nɛ belubi kikɛ. 4Ma tokobi na beeŋ yili kelargato be kaseto be kaba so m ba choŋ kelargato be esoso na kikɛ m mɔ basa kama nɛ b wɔ ndoŋ 5Nɛ ekama e pin fanɛ ma, Enyɛnpe Ebɔrɛ na maaŋ naŋ bɛta ma tokobi nɛ n pee na n wɔtɔ kumo be efar to kikɛ.
6Amoso, dimɛdi pibi, shin nɛ fo kagbene e jija fo nɛ fo baa shu ashi kakpa nɛ ekama beeŋ wu fo. 7B kaŋ bishi fo kusɔ nɛ k ba nɛ fee shu fo kaŋɛ bumo le: ‘Baru nɛ k bee ba na so nɛ mee shu.’ Kumo jemanɛ kaŋ fo ekama be kagbene beeŋ jija mo nɛ kufu e tɔr ekama so nɛ bumo be aba e pɔ bumo nɛ b baa chicha a maaŋ naŋ tiŋ n wora shɛŋ. Kachɛ na bee ba! K maaŋ naŋ chɛr nseŋ ba. Ma, Enyɛnpetale Ebɔrɛ na e kaŋɛ na.”
8Kumo be kaman nɛ Enyɛnpe na naŋ kaŋɛ ma le: 9“Dimɛdi pibi, kaŋɛ Jerusalɛm be basa na fanɛ;
N wora ma tokobi shiriya n loge,
n yee kumo nɛ k bee kpa edɛ.
10N yee kumo nɛ n mɔ;
n fifɛa kumo so nɛ k bee kpa edɛ fanɛ bɔrɛ ka nyɛkpɛ na!
Kayurji maŋ naa wɔtɔ,
ŋkpal manɛ so, ma basa
kplaŋ ma kasokpele nɛ kasogberge kikɛ so nna.
11Mee yee ma tokobi nna,
a wora kumo shiriya a jo,
esa nɛ e beeŋ ta kumo m mɔ na.
12Dimɛdi pibi, boŋ to awɔrso,
ŋkpal manɛ so tokobi na bee ba ma basa
nɛ Israɛl be benimuana so nna.
Bumo kikɛ beeŋ wu,
bumo nɛ basa nɛ b ka na kikɛ.
Amoso, ta enɔ n deŋi kumu a shu!”
13Kede be kaman nɛ Enyɛnpetale Ebɔrɛ na naŋ kaŋɛ le: “Mee wora ma basa a keni nna na,
nɛ b kaŋ kini ketuba,
kumo ere asheŋ ere kikɛ beeŋ ba bumo so.”
14“Amoso, dimɛdi pibi,
kpele bumo kusoe,
nseŋ ber enɔbelaŋ ŋkpal ŋ ka kɔ m pɔɔ so so.
Tokobi na beeŋ baa mɔ bena nɛ jiso kikɛ,
nseŋ ta kufu m pɛ basa na.
Kamɔ be tokobi e la kumo
k la kamɔ damta be tokobi nna,
bena nɛ jiso nɛ k bee mɔ.
15Saŋɛ na so kufu beeŋ pɛ basa;
nɛ galeŋga e chicha n fiti n tɔr.
N wora ma tokobi shiriya nɛ k mɔ
ashi bumo be mbunaana kikɛ ase.
N tiŋ n yee kumo nna nɛ k bee kpa edɛ fanɛ bɔrɛ ka bee nyɛkpɛ na,
nseŋ pɛ kumo to nɛ m mɔ.
16K beeŋ baa ŋe bena nɛ jiso;
kaplɛkama nɛ kumo be jisoso
kilgi n shoŋi nɛ k beeŋ ŋe.
17Ma alɛ gba beeŋ ber enɔbelaŋ,
nɛ ma agbo e yɔɔso.
Ma, Enyɛnpe e kaŋɛ na.”
18Kumo be kaman nɛ Enyɛnpe na be kubɔya ba ma kutɔ: 19E yɛ: “Dimɛdi pibi, ŋini ekpa anyɔ nɛ Babilɔn be efuli so be ewura beeŋ ta mbe tokobi na m bɔla so m ba. Ekpa anyɔ na daga fanɛ a fara efuli koŋwule so nna. Dulgi kakpa nɛ ekpa na barga to anyɔ na, 20a ŋini ekpa nɛ k bee yɔ Ammɔnebi be kadegboŋ nɛ baa tre Raba na, nɛ kumo nɛ kumo alɛ bee yɔ Juda be kadegboŋ nɛ baa tre Jerusalɛm nɛ b pɔr egbal ŋ kulti kumo na; nɛ Babilɔn be ewura na e bɔla so n yɛr mbe tokobi na. 21Babilɔn be ewura kaŋ baa fo ekpa anyɔ na be ŋkpancheri na, e beeŋ bɔla mbe atanyembi so nɛ mbe agbirana so nɛ kusɔbɔya nɛ b mɔ n lara sarga be kegbirche so m bishi so m pin kusɔ nɛ e beeŋ wora. 22Nɛ e baaŋ ta enɔjiso m pee ketanyembi nɛ b sibɛ ‘Jerusalɛm’ n deŋi kumo so a ŋini fanɛ b kɔ kumo kena, e beeŋ shin nɛ b foŋ kabel n sa benapo ekpa nɛ b ya kulti kadegboŋ na n wɔtɔ, nseŋ koli eshishɛr n deŋi abar so ŋ gbuŋ egbal nɛ k kulti kade na, saŋɛ na so baaŋ bɔla amo so n dii n luri kade na to ŋ kɔ basa na kena. Bumo alɛ beeŋ naaŋ ta ndibi gbɛgbɛso n da kade na be mbunagboŋ na m bugi n n luri to. 23Ekama nɛ e wɔ Jerusalɛm beeŋ baa fɛ fanɛ efɛ be kubɔya e la kumo, ŋkpal manɛ so, bumo nɛ Babilɔn be ewura nase nnɔ nna n sa abar. Ama e beeŋ nyiŋi bumo asheŋ lubi nɛ b wora na nseŋ yili amo so pɛ bumo ŋ ki anya.
24Amoso kusɔ nɛ Enyɛnpetale Ebɔrɛ na kaŋɛ e la fanɛ, ŋkpal menyi, Jerusalɛm be basa, nɛ menyi be ewura be alubi ka dii efuli ashi kusɔ kama nɛ menyee wora to so, meeŋ shin nɛ b pɛ menyi ŋ ki anya.
25Fo, Israɛl be ewura lubi nɛ kumu kpakpaso wura ere, fo kasogberge be kachɛ maaŋ naŋ chɛr nseŋ fo. 26Ma, Enyɛnpe Ebɔrɛ na e naa kaŋɛ fo na fanɛ fo shɛŋi fo kumu so be neemu na nseŋ lara kuwurwuro na. Ŋkpal manɛ so, asheŋ maaŋ naa du kananɛ a daa du na. Esa nɛ e daa maŋ kɔ eyilikpa beeŋ nya eyilikpa nɛ emo nɛ e daa kɔ eyilikpa e paŋ mbe eyilikpa. 27Meeŋ shin nɛ kadegboŋ na e mur! Kumo alɛ maaŋ naŋ ki kade kikɛ n ya fo fanɛ esa nɛ k la mo peya na ka beeŋ ba, nɛ n ta kumo n sa mo.
28Ama fo, dimɛdi pibi, kaŋɛ fanɛ kusɔ nɛ Enyɛnpetale Ebɔrɛ na bee kaŋɛ a laŋɛ Ammɔn be basa nɛ baa tege Israɛl na be kaplɛa so e la fanɛ
b gberge tokobi m pe,
n wora shiriya nɛ b mɔ;
b fifɛa kumo so nna m bela ase nɛ b ta kumo m mɔ.
K bee kpa edɛ fanɛ bɔrɛ ka nyɛkpɛ nna!
29Ebɔrɛdare nɛ menyee ku na la efɛ nna,
nɛ asheŋ nɛ men kpal n wu na kikɛ la kafulesheŋ.
Menyi amu kpakpasowuraana nɛ basa lubi ere,
menyi be kasogberge be kachɛ bee ba;
tokobi na beeŋ gbelge menyi be abɔ so.
30Amoso men bɛta menyi be tokobi
n wɔtɔ kumo be efar to.
Ŋkpal manɛ so jemanɛ nɛ menyee gberge basa kusoe fo ekar.
Meeŋ ji menyi demu
kakpa nɛ b kurge menyi,
ashi men nanaana be kasawule so na.
31Meeŋ shin nɛ ma agbo e ba menyi so
fanɛ edɛ na n chɔɔ menyi.
Meeŋ ta menyi m bɔɔ basa nyaŋnyaŋso enɔ,
basa nɛ b nyi kamɔ to.
32Menyeeŋ ki fanɛ ndibi puga edɛ,
menyi be ŋklaŋ beeŋ wurge menyi be kasawule so
nɛ esa kikɛ maaŋ naŋ nyiŋi menyi kikɛ;
ŋkpal manɛ so, ma Enyɛnpe Ebɔrɛ na e malga na.”
22Jerusalɛm be alubi be asheŋ
1Ndoŋ nna nɛ Enyɛnpe Ebɔrɛ na kaŋɛ ma: 2“Dimɛdi pibi, Ezikɛl, fo wora shiriya nɛ fo kaŋɛ Jerusalɛm nɛ k la kadegboŋ nɛ basa nɛ baa mɔ basa bɔlɔ kumo to na fanɛ k maŋ wora n nyalɛ a? Kumo ere shin nɛ basa na e pin bumo be ekishisheŋ nɛ b wora na be asheŋ. 3Kumo be kaman nɛ fo kaŋɛ bumo kusɔ nɛ, ma, Enyɛnpetale Ebɔrɛ na bee kaŋɛ na fanɛ ŋkpal fo basa ka mɔ fo gbagba to be basa damta nseŋ naŋ ta kagbirshuŋ n jija fo so, fo kasogberge be saŋɛ bee ba. 4Basa be kemɔ na shin nɛ fo basa wora n jija nɛ agbirana nɛ b lɔŋɛ a shuŋ na malɛ shin nɛ b jija bumo be amu. Basa be kasogberge be kachɛ taga to nna na. Amoso nɛ n shin nɛ efuli pɔtɛana be basa bee wora fo basa eyurto nsaa malga mmalga jiga a gbiti bumo na. 5Efuli nɛ a taga to nɛ amo nɛ a wɔ kufɔ kikɛ to be basa beeŋ wora fo basa eyurto, ŋkpal b ka maa bɛ mbraana so so.
6Israɛl be bejuŋkparpoana na be ekama ta eleŋ nɛ e kɔ nna a mɔ basa. 7Menyi basa nɛ men wɔ kadegboŋ na to na maa sa men tutoana nɛ men nioana bunyaŋ. Menyee puni befɔ nna nsaa kɔrfɛ amunibi nɛ bekulpoche. 8Menyi maa sa mboŋ cheembi na bunyaŋ. Menyi alɛ maa bɛ ma kewushiachɛ na so. 9Fo basa na be beko bee ku efɛ nna a deŋi beko a fin bumo be kamɔ. Beko malɛ bee ji agbirjibi nna nɛ beko malɛ wɔtɔ a wora kusɔjiya be asheŋ. 10Basa na be beko wɔtɔ nna a di bumo tutoana be beche nɛ beko malɛ bee tintiŋ a di beche nɛ baa lar ntamaŋ. 11Basa ko wɔtɔ nna a ji kubojua nɛ beko bee di bumo be bibinyɛn be beche. Bede malɛ wɔtɔ a di bumo sipocheana nɛ bumo nɛ bumo la kututo ŋko kenio koŋwule. 12Ade kikɛ be kaman, basa na be beko wɔtɔ nna a sɔ amansherbi nsaa mɔ basa, nɛ beko malɛ bee wɔtɔ amansherbi nɛ b ta m paŋ bumo braana Israɛl be basa nchu ga a dii kedama nɛ kumo be loŋ maŋ daga. B teŋ ma, Enyɛnpetale Ebɔrɛ na so nna.
13Ŋkpal ade kikɛ ere so ma agbo beeŋ basa nɛ baa suge nɛ bumo nɛ baa mɔ ere kikɛ so. 14Ma agbo kaŋ ba fo basa ere so, b maŋ naa kɔ kenyɛn nseŋ nya eleŋ m maŋ enɔ so gba. Ma Enyɛnpetale Ebɔrɛ na e kaŋɛ, ma alɛ beeŋ wora kumo. 15Ma alɛ beeŋ naŋ shin nɛ b pesaŋ to n yɔ efuli pɔtɛana so nɛ bumo be asheŋ lubi na kikɛ e ba ekar. 16Efuli pɔtɛana so be basa beeŋ keni bumo jiga, nɛ fo basa e pin fanɛ ma, e la Enyɛnpe Ebɔrɛ na.”
17Kede be kaman nɛ Enyɛnpe Ebɔrɛ na naŋ kaŋɛ ma le: 18“Dimɛdi pibi, Israɛl be basa na maŋ naa kɔ tɔnɔ n sa ma. B ki fanɛ danyaŋ ŋko kebɛlso ŋko epal ŋko gbiti nɛ b ŋalga n lɔŋɛ so be ebin nna. 19Amoso meeŋ gama bumo kikɛ abar so ashi Jerusalɛm to 20-21fanɛ kananɛ baa chala gbiti ŋko danyaŋ ŋko abɛlso ŋko epal a wɔtɔ edɛ to a lɔŋɛ amo so nna. Ma agbo gboŋ beeŋ ba bumo so ashi Jerusalɛm to, fanɛ edɛ nɛ k bee ŋalga abɛlso be yiri yiri na. 22Kananɛ gbiti bee ŋalga edɛ to na nɛ bumo alɛ gba beeŋ ji awurfoŋ Jerusalɛm to. Aloŋ nɛ baaŋ pin fanɛ ma, Enyɛnpe Ebɔrɛ na e nya agbo a gberge bumo kusoe na.”
Israɛl be bejuŋkparpoana be alubi be asheŋ
23Ade kikɛ be kaman nɛ Enyɛnpe Ebɔrɛ na naŋ kaŋɛ ma le: 24“Dimɛdi pibi, kaŋɛ Israɛl be basa na fanɛ bumo be kasawule na maŋ du cheembi. Alubi e bɔlɔ kumo to, amoso nɛ n nya agbo a gberge kumo be basa kusoe na. 25Bumo be bejuŋkparpoana ŋko anebiana du fanɛ ebuluŋ nɛ a pɛ kusɔbɔya a kpɛa to a we nsaa munto nna. Baa mɔ basa na nna nseŋ suge amansherbi nɛ mpetɛsɔ kikɛ nɛ baaŋ tiŋ n nya n sɔ. Bumo alɛ bee mɔ bekulana nna nɛ beche damta e ki bekulpoche. 26Israɛl be bɔrɛmatapoana bee gal ma mbraana nna a nase nsaa keni ma asɔ cheembi jiga. B maa barga asɔ nɛ a du cheembi nɛ amo nɛ a maŋ du cheembi to. Bumo alɛ maa ŋini basa kananɛ asɔ nɛ a walɛ so nɛ amo nɛ a maŋ walɛ so kɔr abar to. Ade kikɛ be kaman, b maa bɛ ma kewushiachɛ na so. Israɛl be basa maa sa ma bunyaŋ. 27Israɛl be benimuana na gba du fanɛ ekuntuŋ nɛ baa pɛ asɔbɔya a kpɛa to a we nna. Baa mɔ basa nna nsaa bɔla ekpa nɛ k maŋ daga so a dii dama. 28Nɛ bumo be anebiana malɛ bee bɔla efɛ be ebɔrɛdare nɛ kafule be kewuŋkaŋɛ so a da a buu le be asheŋ lubi ere so fanɛ b ka ta asɔ fuful n nyɔɔ egbal na. Ma, Enyɛnpe Ebɔrɛ na maŋ malga bumo kutɔ, ama baa ku efɛ a kaŋɛ fanɛ b nya kubɔya ashi ŋ kutɔ nna. 29Basa na baa wɔ kapuni nɛ kasuge be kebaawɔtɔ to nna. B wɔtɔ nna a kɔrfɛ betirpo nsaa puni befɔ, a mɔn bumo kashenteŋ ashi demuji to. 30Ade kikɛ so nɛ n fin esa nɛ e beeŋ kɔ n sa kadegboŋ na nseŋ kuŋ kumo, nɛ ma agbo maaŋ ba kumo so nɛ k mur. Ama m maŋ nya esa kikɛ. 31Amoso ma agbogboŋ beeŋ mur Israɛl be basa ŋkpal kusɔ nɛ b wora so. Ma, Enyɛnpetale Ebɔrɛ e kaŋɛ na.”
23Ebojuache anyɔ be asheŋ
1Nɛ Enyɛnpe Ebɔrɛ naŋ kaŋɛ ma le: 2“Dimɛdi pibi, Ezikɛl, beche anyɔ ko nɛ b daa la eche koŋwule be mbia e daa wɔtɔ. 3Bumo be kebia to kikɛ nɛ b ki esakaleche ashi Ijipt be efuli so. Ndoŋ nɛ benyɛn daŋ ta bumo ŋ ki beche. 4Enimu so na e daa la Ohola nɛ e yili n sa kadegboŋ nɛ baa tre Samɛria na nɛ ekekarso na malɛ daa la Oholiba, nɛ mo alɛ yili n sa Jerusalɛm. B daa la ma beche nna nseŋ daŋ kurge mbia n sa ma.
5Ohola daŋ kra la ma eche nna nsaa ji kesakalea nsaa kɔ kayɛlga lubi n sa mo jipoana nɛ b shi Asiriya be efuli so na. 6Mo jipoana na daa la benapo nɛ baa buu epiŋi nɛ a nyɔ buru nɛ gomena be benimuana nɛ benapo nimuso nɛ benapo nɛ baa dii egbaŋɛ nɛ bumo kikɛ daa la mbrantiɛ nɛ b walɛ ayɛrbi nna. 7Asiriya be efuli so be benimu nɛ e daa tu a ji kesakalea nɛ mbe kayɛlga lubi na shin nɛ e tu bumo a shuŋ bumo be agbirana nseŋ jija mbe kumu. 8Jemanɛ nɛ benyɛn jija mo nseŋ ta mo ŋ ki eche ashi Ijipt be efuli so mbe kebia to kikɛ hale nɛ mbre e maŋ naŋ yige mbe kesakalea na.
9Amoso nɛ n kini mo n sa mo jipoana nɛ e daa sha ga ashi Asiriya be efuli so na. 10Ndoŋ nna nɛ bumo alɛ delge mo so kesaria nseŋ pɛ mbe mbia n yɔ. Kumo be kaman nɛ b mɔ mo gbagba nɛ kaplɛkama be beche bee kuli Ohola ŋkpal kusɔ nɛ k nya mo so.
11Mo sipo Oholiba gba daŋ wu kusɔ nɛ k wora, ama mbe kesakalea daa chɔɔ mo da, Ohola peya. 12Mo alɛ gba daa kɔ kayɛlga lubi nna n sa Asiriya be efuli so be benimuana nɛ b walɛ ayɛrbi nɛ benapo nɛ baa kre to nɛnɛ nɛ benapo nɛ baa dii egbaŋɛ nsaa la mbrantiɛ nɛ b walɛ ayɛrbi na. 13Ndoŋ nna nɛ n wu fanɛ kusɔ jigaya be kebaawɔtɔ nɛ mo da daa kɔ na nɛ mo alɛ gba kɔ.
14Ama Oholiba bre be kebaawɔtɔ daŋ naŋ lubi a chɔ mo da Ohola peya. E daŋ wu b ka wora Babilɔn be efuli so be benyɛn be efoto n deŋi egbal so nseŋ nyɔɔ amo apeper. 15Benyɛn nɛ b daŋ wora n deŋi egbalana na so na daŋ mɛa to nna ŋ kre ekreso kashɛr to nseŋ mɛa eneemugboŋ malɛ bumo be amu so, nɛ kumo be loŋ shin nɛ mbe nfɛra laŋɛ Babilɔn be efuli so be benapo nimuso nɛ baa dii egbaŋɛturko na so. 16E ka baŋ wu efoto na nɛ kayɛlga lubi luri mo to nɛ e shuŋi mbɔ Babilɔn be efuli so be benapo be benimuana na kutɔ. 17Ndoŋ nna nɛ b ba tu mo n di n jija mo. B daŋ di mo hale nɛ bumo be asheŋ ya kilgi a nu mo agbo. 18Oholiba shin nɛ ekama wu mbe kesaria nseŋ pin fanɛ sakaleche e daa la mo. Mbe asheŋ daŋ ba kaa nu ma agbo nna ga nɛ m pal kaman n sa mo fanɛ kananɛ n daŋ wora mo da, Ohola na. 19Ama amo nɛ amo kikɛ, e kraa ji kesakalea na nna a ti so, nseŋ daa wora asheŋ fanɛ kananɛ e daa wora amo jemanɛ nɛ e daa la kasuŋgurbia ashi Ijipt be efuli so na gbagba. 20E daa kɔ kayɛlga lubi be kasha nna n sa Ijipt be efuli so be benyɛn nɛ b daa di beche fanɛ ekurma nɛ egbaŋɛ na nna.” 21Amoso e kraa yɛlga mbe kebia to be kusɔ jigaya be kebaawɔtɔ nɛ e daa kɔ ashi Ijipt be efuli so na nna. Ndoŋ nɛ benyɛn daŋ fɔnɔ mbe anyipo nseŋ jija mbe tumba na.
22Amoso kusɔ nɛ ma, Enyɛnpetale Ebɔrɛ na bee kaŋɛ Oholiba nɛ fo yili n sa Jerusalɛm na e la fanɛ meeŋ shin nɛ fo jipoana nɛ bumo be asheŋ fi fo ere e nya agbo n wɔtɔ fo nseŋ ba kulti fo n wɔtɔ fanɛ bedoŋ na. 23Meeŋ gama benapo nimuso nɛ benapo nɛ baa far egbaŋɛturko be benimuana nɛ basa gboŋ nɛ baa dii egbaŋɛ na kikɛ nɛ b shi Babilɔn be efuli so nɛ Asiriya be efuli so nɛ Chaldian be yiri to be basa nɛ b shi nde nɛ baa tre Pɛkɔd nɛ Showa nɛ Kowa na m ba abar so. 24Kumo be kaman nɛ b ta egbaŋɛturko wurbi nɛ agboŋi kikɛ n sulɔ akɔsɔ nɛ benapo damta n shi kelargato be esoso m ba kulti fo n wɔtɔ ŋ kɔ fo kena. Baaŋ keta abɛlso be asɔ kuŋamuso wurbi nɛ agboŋi kikɛ nseŋ buu abɛlso be akpaŋwuro bumo be amu so nna m ba. Ma alɛ beeŋ ta fo m bɔɔ bumo enɔ nɛ b gberge fo kusoe kananɛ bumo be mbraana bee ŋini. 25Ŋkpal ŋ ka nya agbo n wɔtɔ fo so, meeŋ shin nɛ benapo na e kaa kagbene n tɔrɔ fo ga. Benapo na beeŋ ku fo kamuna nɛ asoe nseŋ mɔ fo mbia. Kashenteŋto, baaŋ suge fo mbia n yɔ n ya chɔɔ bumo m mɔ. 26Kumo be kaman, benapo na beeŋ suge fo asɔbuuso nɛ yawu kpakpaso be abitasɔ kikɛ. 27Saŋɛ na so nɛ n shin nɛ fo yige fo kayɛlga lubi nɛ kusɔ jigaya be kebaawɔtɔ nɛ kesakalea nɛ fo fara a ji ashi Ijipt be efuli so na. Fo maaŋ naa nyiŋi asheŋ ere nsaa yɛlga amo ŋko a nyiŋi Ijipt be efuli so gba kuraa.
28Ade be kaman, nɛ Enyɛnpetale Ebɔrɛ na naŋ kaŋɛ fanɛ meeŋ ta fo m bɔɔ basa nɛ fo kishi nsaa maa sha kewu bumo kikɛ na enɔ. 29Ŋkpal b ka kishi fo so, baaŋ suge asɔ kama nɛ fo gben n nya kikɛ n yɔ ŋ ka fo kesaria. Saŋɛ na so nɛ ekama e wu fanɛ sakaleche e la fo kashenteŋto. Fo gbagba be kayɛlga lubi nɛ kesakalea 30e bar le be asheŋ ere fo so na. Fo daa la sakaleche nna n sa efuli pɔtɛ so be basa nseŋ daa shuŋ bumo be agbirana n jija fo kumu. 31Fo daŋ bɔla ekpa nɛ fo da, Ohola nɛ e yili n sa kade nɛ baa tre Samɛria na, bɔla so na nna, amoso kasogberge nɛ e nya na nɛ fo alɛ gba beeŋ nya.
32Ade kikɛ be kaman, nɛ Enyɛnpetale Ebɔrɛ na kaŋɛ fanɛ
“Kurwa nɛ fo da nuu to na nɛ fo alɛ gba beeŋ nuu to,
k la kurwa nɛ k shi nsaa du chuŋguluŋ nna.
Ekama beeŋ keni fo jiga nseŋ wora fo eyur to,
ŋkpal manɛ so, ma agbogboŋ e bɔlɔ kurwa na to.
33Feeŋ nuu kurwa na to m boo nɛ kagbenejija e tɔr fo so,
ŋkpal kemur nɛ kufusheŋ ka bɔlɔ kurwa na to so.
K la fo da Samɛria be kurwa nna.
34Feeŋ nuu kumo to be asɔ nseŋ dente kumo kikɛ to;
kumo be kaman nɛ fo bure kumo
nseŋ ta kumo be abureso na ŋ ku ŋ ku fo anyipo.
Ma Enyɛnpetale Ebɔrɛ na e kaŋɛ na.
35Amoso kusɔ nɛ Enyɛnpetale Ebɔrɛ na bee kaŋɛ fanɛ, Ŋkpal fo ka teŋ ma so nseŋ pal kaman n sa ma so, feeŋ ji awurfoŋ ŋkpal fo kayɛlga lubi be kusɔ jigaya nɛ kesakalea be kebaawɔtɔ na so.”
Ebɔrɛ ka ji eche nɛ mo sipocheso demu be asheŋ
36Ndoŋ nna nɛ Enyɛnpe Ebɔrɛ na naŋ kaŋɛ ma le: “Dimɛdi pibi, fo wora shiriya nɛ fo kaŋɛ Ohola nɛ Oholiba fanɛ b wora n jija a? Kumo ere shin nɛ b pin bumo be ekishisheŋ nɛ b wora na be asheŋ. 37B bɔla kagbirshuŋ so n ji kubojua, kumo e la fanɛ b maŋ ji kashenteŋ n sa ma nseŋ ta ma mbia n m mɔ n lara esarga n sa agbirana. 38B daŋ naŋ keni ma bɔrɛlambu na nɛ ma kewushiachɛ nɛ n yili na jiga nna a maŋ sa amo bunyaŋ. 39Kachɛ nɛ b mɔ ma mbia n lara esarga n sa agbirana na nɛ b ba ma bɔrɛlambu na to nɛ kumo be loŋ shin nɛ k ki kakpa nɛ k maŋ naŋ daga fanɛ b shuŋ ma ndoŋ.
40Ade malɛ kikɛ be kaman nɛ b shuŋi mbɔ n tre benyɛn nɛ b shi kufɔ kufɔ m ba. Nɛ benyɛn na ka ba, nɛ beche anyɔ ere bɛr nchu nseŋ ŋ ŋe ekele nseŋ ta abitasɔ m mɛa to. 41Kumo be kaman nɛ b chena mbɛ lela so nseŋ bela asɔ lela fanɛ eduwu nɛ ɔlif be ŋku nɛ n sa bumo na m bɛ teebɔl so ashi bumo be anishito.
42Kaaseso kikɛ bumo be ebu daŋ baa bɔlɔ keshishɛrsawule so be benyɛn damta nɛ baa cha awɔr nsaa ji bumo be amu nna. Benyɛn na daa sa beche na enɔ to be mpini nɛ awurwuro lela nna. 43Ndoŋ nna nɛ n wu fanɛ benyɛn na kraŋ pere kenishi nna a sha kedi beche na, ama beche na malɛ teŋ ji kesakalea ga. 44Kananɛ benyɛn baa di esakaleche ale anyɔ nyɔ na nɛ b daa di Ohola nɛ Oholiba, nɛ b la beche jiga na. 45Ama kachako benyɛn lela na beeŋ ji beche anyɔ ere demu ŋ kaŋɛ fanɛ b wora n jija nseŋ daga kubojuaji nɛ basa be kemɔ be kasogberge, ŋkpal manɛ so, b ji kubojua nɛ ŋklaŋ malɛ gbiti bumo be enɔana.”
46“Amoso kusɔ nɛ Enyɛnpetale Ebɔrɛ na bee kaŋɛ e la fanɛ, meeŋ shin nɛ jimaŋ nɛ b nya agbo e ba tɔrɔ bumo nɛ kufugboŋ e pɛ bumo nɛ b suge bumo be asɔ n ti so. 47Kumo be kaman nɛ jimaŋ na e kpa bumo ajembu nseŋ ta etokobi ŋ kɔ bumo, m mɔ bumo be mbia nseŋ chɔɔ bumo be nwu n lɛ. 48Meeŋ lara kusɔjigaya be kebaawɔtɔ kasawule na kikɛ so nɛ k baa la kusoe kpele n sa eche kikɛ nɛ b sa maaŋ naŋ ji kubojua nɛ kesakalea fanɛ kananɛ Ohola nɛ Oholiba wora na. 49Ama meeŋ gberge menyi beche anyɔ nɛ men la kenio pibi ere kusoe kenishipereso, ŋkpal menyi be kusɔ jigaya be kebaawɔtɔ nɛ kagbirshuŋ be kulubi so. Aloŋ nɛ menyeeŋ pin fanɛ ma, e la Enyɛnpetale Ebɔrɛ na.”
24Kapuliya daŋɛso na be asheŋ
1B ka daŋ pɛ anyi be galeŋga nɛ ewura Jehowachin kenya n yɔ Babilɔn be efuli so na be kafɛ kpanusopo na to be kufɔl kudusopo na be kachɛ kudusopo na, nɛ Enyɛnpe Ebɔrɛ na kaŋɛ ma le: 2“Dimɛdi pibi, Ezikɛl, sibɛ kabre be kachɛ ere n nase, ŋkpal manɛ so, k la kachɛ nɛ Babilɔn be ewura kre kena m ba kulti Jerusalɛm n wɔtɔ a kɔ nna. 3Amoso bɔ keŋasa ere ŋ kaŋɛ ma basa nɛ b pal kaman n sa ma na. Kaŋɛ bumo fanɛ kusɔ nɛ Enyɛnpetale Ebɔrɛ na bee kaŋɛ e la fanɛ
Wɔtɔ nchu kadaŋɛ na to,
n ta kumo m bɛ edɛ so.
4Nseŋ ta eblaŋ na be alela fanɛ ebɛaŋ nɛ aba n wɔtɔ to.
Bela awibi lela na gba n wɔtɔ nɛ k bɔlɔ.
5Kubɔlpo lela ga be eblaŋ nɛ awibi e daga fanɛ fo ta n wɔtɔ kadaŋɛ na to.
Nseŋ gbar ndibi n wɔtɔ edɛ na to,
saŋɛ na so a beeŋ falte
nɛ eblaŋ na nɛ awibi na e bel.
6Kusɔ nɛ Enyɛnpetale Ebɔrɛ na bee kaŋɛ e la fanɛ asheŋ maaŋ nyalɛ n sa Jerusalɛm be kadegboŋ nɛ kumo to be basa bee mɔ basa ere! K du fanɛ kadaŋɛ kreŋ so nɛ b maŋ naŋ fɔr kumo na nna. Baa lara eblaŋ na kukoko to nna nɛ esa kikɛ be shɛŋ maŋ wɔ kusɔ nɛ k bee wora na to. 7Jerusalɛm to be basa mɔ basa nɛ b maŋ wora shɛŋ ashi kadegboŋ na to, ama b maŋ wora ania nɛ b wora eshishɛr m buu bumo be ŋklaŋ nɛ a wurge kefalta so gba. 8Ndoŋ nna nɛ ma alɛ gba yige ŋklaŋ na kefalta na so, kakpa nɛ a maaŋ tiŋ ŋ ŋana. Nɛ amo alɛ bee fin fanɛ ŋ kɔ n sa amo.”
9Ade be kaman kusɔ nɛ Enyɛnpetale Ebɔrɛ na bee kaŋɛ e la fanɛ; “Asheŋ maaŋ nyalɛ n sa kadegboŋ nɛ baa mɔ basa kumo to na. Ŋ gbagba e naŋ ber ndibi damta n wɔtɔ edɛ na to. 10Amoso kil ndibi damta m ba nseŋ foŋ edɛ na to n wɔtɔ! Daŋɛ eblaŋ na nɛnɛ nseŋ shin nɛ amo be epochu na a feeto nɛ awibi na a chɔɔ! 11Kumo be kaman nɛ fo ta danyaŋ be kadaŋɛ fuloŋ na m bɛ ajanwulɛ so hale nɛ k ya bel m pere, saŋɛ na so kumo be kananɛ k kreŋ so na beeŋ chɔɔ m mur nɛ k naŋ nyalɛ so. 12Ama edɛ wuloŋ wuloŋ na gba kra maaŋ tiŋ n shin nɛ kumo be kekreŋso na kikɛ e lar kumo so. 13Naniere fo, Jerusalɛm, be kusɔ jigaya be kebaawɔtɔ e shin nɛ fo wora eyurpi. Ŋkpal ŋ ka wora ania nɛ n fɔr fo so nɛ fo nyalɛ so nɛ fo kraa kini nsaa wɔ fo eyurpi to so, fo maaŋ naŋ nyalɛ so kikɛ n ya fo fanɛ ma agbo gboŋ ka beeŋ ba fo so. 14Ma, Enyɛnpetale Ebɔrɛ na e kaŋɛ na fanɛ saŋɛ fo nɛ n wora kusɔ nɛ ŋ kaŋɛ fanɛ meeŋ wora na. M maaŋ kplaŋ fo lubi so ŋko n wu fo kuwɔr ŋko n chɛrga ma nfɛra. Meeŋ gberge fo kusoe ŋkpal kusɔ nɛ fo wora so.”
Ezikɛl be eche be luwu be asheŋ
15Ade kikɛ be kaman, nɛ Enyɛnpe Ebɔrɛ na kaŋɛ ma le: 16“Dimɛdi pibi, Ezikɛl, kachɛ koŋwule meeŋ sɔ esa nɛ fee sha ga na be ŋkpa. Ama fo alɛ e sa maŋ kaŋ fubel m bile asheŋ ŋko n shu ŋko n shin nɛ anishichubi a lar fo anishito gba kuraa. 17Fo alɛ e sa maŋ shin nɛ esa e nu fo ka bee shuto gba. Sa maŋ kaŋ shɛŋi fo neemu fo kumu so ŋko n lara fo asɛbta nsaa na aya fuloŋ a ŋini fanɛ fee shu keeli nna. Fo alɛ e sa maŋ buu fo anishiakpa so ŋko n ji daŋkare be ajibi nɛ basa nɛ baa shu nli bee ji na.”
18Kachipurso be jemanɛ nɛ n yaŋ ya ka malga basa na kutɔ fanɛ kananɛ n chɛr a wora na. Kumo be kaaseso nɛ ma eche wu. Kumo be ŋklade nɛ n wora kananɛ Enyɛnpe Ebɔrɛ kaŋɛ ma na. 19Basa na ka wu ma nɛ b bishi ma le: “Manɛ nna nɛ fo maa shu fo eche be keeli?”
20Ndoŋ nna nɛ ŋ kaŋɛ bumo le: “Enyɛnpe Ebɔrɛ na e kaŋɛ ma fanɛ 21ŋ kaŋɛ menyi, Israɛl be basa kubɔya ere fanɛ menyee puchi bɔrɛlambu na be eleŋ so na nna. Menyi alɛ nseŋ naa sha kebaa wu kumo nsaa yɔ kumo to, ama Enyɛnpe Ebɔrɛ na bee shin nɛ e jija kumo nna nɛ k maaŋ naaŋ daga keshuŋ Ebɔrɛ kumo to. Menyi be mbia nɛ b wɔ Jerusalɛm to naniere na malɛ beeŋ wu kena to. 22Saŋɛ na so nɛ menyi alɛ gba e wora kananɛ n wora ere. Menyi maaŋ ta asɔ m buu menyi be anishiakpaana so ŋko n ji daŋkare jibi nɛ basa nɛ baa shu nli bee ji na. 23Menyi alɛ maaŋ shɛŋi menyi be eneemu ashi menyi be amu so ŋko n lara asɛbta menyi be aya to nsaa nite aya fuloŋ. Ade kikɛ be kaman, menyi maaŋ wora kuwɔrsheŋ ŋko n shu nɛ anishichubi e lar, ama menyi be asheŋ lubi so menyeeŋ foe eyur to nsaa nite a kulti a shu epun to. 24Saŋɛ na so nɛ ma, Ezikɛl e baa la tɔɔnɛ n sa menyi. Nɛ menyi alɛ gba e wora asheŋ nɛ n wora na kikɛ. Ndoŋ nɛ menyeeŋ pin fanɛ Enyɛnpe Ebɔrɛ na e shin nɛ asheŋ ere kikɛ wora.”
25Ade kikɛ be kaman, nɛ Enyɛnpe Ebɔrɛ na naŋ kaŋɛ le: “Dimɛdi pibi, Ezikɛl, meeŋ mur bɔrɛlambu nɛ basa na be ŋgbene bee fuli so nɛ baa puchi kumo so nsaa sha kumo to be kebaayɔ ga na. Ma alɛ beeŋ lara bumo be mbia ashi bumo to. 26Kachɛ nɛ loŋ beeŋ wora na kaŋ fo, esa nɛ e beeŋ nya n shile kadegboŋ na to e naŋ ba kaŋɛ fo kusɔ nɛ k wora. 27Loŋ be kachɛ na gbagba nɛ fo kɔnɔ beeŋ bugi nɛ fo nɛ esa nɛ e bar kubɔya na e malga abar kutɔ. Amoso feeŋ baa la tɔɔnɛ n sa basa na, nɛ b pin fanɛ ma e la Enyɛnpe Ebɔrɛ na.”
25Kewuŋkaŋɛ a laŋɛ Ammɔn be kaplɛa so be asheŋ
1Ndoŋ nna nɛ Enyɛnpe Ebɔrɛ naŋ kaŋɛ ma le: 2“Dimɛdi pibi, Ezikɛl, kilgi a keni Ammɔn be efuli so be basa ŋ kaŋɛ bumo fanɛ b maŋ wora n nyalɛ. 3Kaŋɛ bumo fanɛ b kaŋ asoe n nu kusɔ nɛ ma, Enyɛnpetale Ebɔrɛ na bee kaŋɛ: E yɛ menyi be ŋgbene daŋ fuli menyi nna jemanɛ nɛ men daŋ wu ma bɔrɛlambu ka jija kuraa nɛ Israɛl be efuli mur nɛ b pɛ Juda be basa n yɔ efuli wɔfɔ so na nna. 4Meeŋ shin nɛ eyiriana nɛ b wɔ keshishɛrsawule nɛ k wɔ epeŋilarkpa be kaba so na e ba kɔ m pɔɔ menyi so. Baaŋ ba yuu bumo be ewajɛbu n chena menyi be efuli so n ji kumo be asɔrso nseŋ nuu kumo be kenyipo nɛ a daga menyi na. 5Ade be kaman, meeŋ naŋ shin nɛ menyi be kadegboŋ nɛ baa tre Rabba na a ki enyɔma be ejikpa nɛ Ammɔn be efuli so kikɛ malɛ a ki kakpa nɛ baŋ baa bela mbolpɔ. Loŋ nɛ menyeeŋ pin fanɛ ma e la Enyɛnpe Ebɔrɛ na.
6Kusɔ nɛ ma, Enyɛnpetale Ebɔrɛ na bee kaŋɛ e la fanɛ men daŋ kpla enɔ nseŋ daŋ tɛto kagbenefuliso a ŋini kekishi nɛ men kɔ n sa Israɛl be basa nna. 7Amoso meeŋ ta menyi m bɔɔ efuli pɔtɛana be basa enɔ nɛ b suge menyi be asɔ nseŋ sesaŋ menyi to. Ma alɛ beeŋ mur menyi kuraa nɛ men maaŋ naa la efuli a kɔ menyi gbagba be kasawule a wɔtɔ. Ndoŋ nɛ menyeeŋ pin fanɛ ma, e la Enyɛnpe Ebɔrɛ na.”
Mowab be kaplɛa so be kewuŋkaŋɛ be asheŋ
8Kesheŋ ere be kaman nɛ Enyɛnpetale Ebɔrɛ na naŋ kaŋɛ le: “Mowab be efuli so be basa nɛ Edɔm be efuli so be basa daŋ kaŋɛ fanɛ Juda be efuli so gba baa du fanɛ efuli kama nna. 9Amoso meeŋ shin nɛ kena e ba ndegboŋ nɛ a bee kuŋ Mowab be efuli be egbaŋ na nɛ ndegboŋ lela fanɛ Bɛf Jeshimɔf nɛ Baal Mɛɔn nɛ Kiriyateem gba na so. 10Kumo be kaman nɛ n shin nɛ eyiriana nɛ b shi epeŋilarkpa be kaba so be keshishɛrsawule so na e ba kɔ m pɔɔ Mowab be efuli so be basa nɛ Ammɔn be efuli so be basa kikɛ so. Kananɛ ŋ gberge Ammɔn be basa kusoe ashi efuliana na so nɛ esa maaŋ naŋ nyiŋi bumo be asheŋ na 11aloŋ nɛ meeŋ gberge Mowab be basa gba kusoe, nɛ b pin fanɛ ma, e la Enyɛnpe Ebɔrɛ na.”
Edɔm be Kaplɛa so be kewuŋkaŋɛ be asheŋ
12Ade be kaman, nɛ Enyɛnpetale Ebɔrɛ na naŋ kaŋɛ le: “Edɔm be efuli so be basa wora n jija ŋkpal b ka daŋ wora n tal Juda be basa to so. 13Amoso meeŋ gberge Edɔm be basa kusoe nseŋ mɔ bumo be basa nɛ asɔbɔya kikɛ kena to nɛ kasawule nɛ k yili kadegboŋ nɛ baa tre Tɛman n dese n ya fo kumo nɛ baa tre Dedan na e dese jiga. 14Kumo be kaman nɛ n shin nɛ ma basa Israɛlebi na e wora n tal Edɔm be basa to, nɛ b pin kananɛ kanya agbo gboŋ du. Ŋ kaŋ gberge Edɔm be basa kusoe na, nɛ baaŋ pin fanɛ ma, e la Enyɛnpe Ebɔrɛ na.”
Filistiebi be Kaplɛa so be kewuŋkaŋɛ be asheŋ
15Ade kikɛ be kaman, nɛ Enyɛnpetale Ebɔrɛ na kaŋɛ le: “Filisti be efuli so be basa nyaŋnyaŋso na daŋ wora n tal bumo be dra dra be bedoŋana to nna a fin kemur bumo yurkishi so. 16Amoso meeŋ gberge Filisti be basa na kusoe m mɔ bumo. Ma alɛ beeŋ mur bumo be bekama nɛ b ka a wɔ teku ase be nde to na. 17Meeŋ gberge bumo kusoe kenishipereso nseŋ wora n tal bumo to nɛ b pin kananɛ ma agbo gboŋ du nɛ b pin fanɛ ma, e la Enyɛnpe Ebɔrɛ na.”
26Tayɛ be kaplɛa so be kewuŋkaŋɛ be asheŋ
1B ka pɛ ewura Jehowachin nɛ anyi be galeŋga kenya n yɔ Babilɔn be efuli so na be kafɛ kudukakosopo na to be kufɔl na be kachɛ juŋkparso na nɛ Enyɛnpe Ebɔrɛ na kaŋɛ ma le: 2“Dimɛdi pibi, Ezikɛl, kadegboŋ nɛ baa tre Tayɛ na be basa daŋ ji eyur nna nseŋ boŋ kashɛ ere ŋkpal Jerusalɛm ka daŋ kɔ n tɔr so:
‘Jerusalɛm bure n tɔr!
Nɛ kumo be yawu be keji be eleŋ loge!
Amoso k maaŋ naa kɔ anyi kukɔrkɔ
ŋkpal yawu be keji so!’
3Kusɔ nɛ ma, Enyɛnpetale Ebɔrɛ na bee kaŋɛ e la fanɛ menyi Tayɛ be basa ki n doŋana nna na, nɛ meeŋ shin nɛ efuli damtaana e kre kena m ba kɔ menyi fanɛ kananɛ teku so bee ku atili a ba kaa gbuŋ teku be kɔnɔ na. 4Baaŋ bure egbalana nɛ men pɔr ŋ kulti menyi be kadegboŋ na nɛ menyi be ebu jeŋgreŋana nɛ menyee yili so a wu kufɔ na. Kumo be kaman nɛ ŋ gbare kumo be shishɛr na n lɛ nseŋ ka kefalta fuloŋ n nase. 5Ekɔrɔtɔ pɛpo beeŋ ta ndoŋ a fata bumo be ashewu ashi teku ase. Ma, Enyɛnpetale Ebɔrɛ na e nase kɔnɔ na fanɛ efuliana na beeŋ ba kɔ n suge Tayɛ be basa be asɔ, 6nseŋ mɔ basa kama nɛ chena nde nɛ a wɔ teku ase na kikɛ. Ndoŋ nɛ Tayɛ be basa beeŋ pin fanɛ ma, e la Enyɛnpe Ebɔrɛ na.”
7Kumo be kaman, nɛ Enyɛnpetale Ebɔrɛ na naŋ kaŋɛ: “Meeŋ shin nɛ Babilɔn be ewura Nebukadneeza, nɛ e la bewura to be ewura na, e shi kelargato be esoso be kaba so m ba kɔ Tayɛ be basa. E beeŋ keta benapo damta nɛ b kɔ egbaŋɛ nɛ egbaŋɛturko nɛ egbaŋɛ diipoana nna m ba. 8E beeŋ juŋkpar ŋ kɔ basa nɛ b chena teku ase na m mɔ bumo. Kumo be kaman nɛ e gbare eshishɛr n deŋi abar so nɛ a fo menyi be ndeana na be egbalana be esoso nɛ mbe benapo e keta bumo be abɛlso be asɔ kuŋamuso m bɛ abar so ŋ kulti menyi n wɔtɔ fanɛ egbal lempo na. 9Ade be kaman nɛ mbe benapo na e ta ndibi gbɛgbɛso n da egbalana na n lɛ nseŋ ta akɔsɔ m bure m bure menyi be ebu jeŋgreŋana nɛ menyee yili so a keni a wu kufɔ na. 10Mbe egbaŋɛ be keshi ga so amo be kalabɛr beeŋ buu menyi so fanɛ kunyɔlɔ na. Benapo na kaa luri menyi be ndeana to, bumo be egbaŋɛ nɛ egbaŋɛturko wurbi nɛ agboŋi kikɛ be egbri beeŋ shin nɛ menyi be ebuana be egbalana a gbuŋgbuŋ fɔŋfɔŋ saŋɛ nɛ b wɔ men be nde nɛ b bure na to na. 11Mbe benapo beeŋ dii bumo be egbaŋɛ n sɔ menyi be agbembi kikɛ so n ta etokobi a mɔ menyi be basa bena nɛ jiso, nɛ menyi be eshabɔrɛ lempo kikɛ a bure n tɔr kasawule. 12Ade kikɛ be kaman, baaŋ suge menyi be kedama nɛ menyi be asɔ faso. Bumo alɛ beeŋ bure menyi be egbalana nɛ menyi be nwu lela kikɛ nseŋ gbare ajembu na nɛ ndibi na nɛ eshishɛr na n ya lɛ teku to. 13Nɛ n shin nɛ nshɛ nɛ menyee boŋ a cha awɔr na e ku nɛ esa maaŋ naŋ nu menyi be ejaŋjilaŋ be kushu kikɛ. 14Ma alɛ beeŋ shin nɛ menyi be kasawule na a dese fanɛ kefalta fuloŋ nɛ ekɔrɔtɔ pɛpo e baa fata bumo be ashewu kumo so. Menyi maaŋ naŋ tiŋ n lɔŋɛ m pɔr menyi be kadegboŋ na kikɛ. Ma, Enyɛnpetale Ebɔrɛ na e kaŋɛ na.”
15Kusɔ nɛ Enyɛnpetale Ebɔrɛ na naŋ kaŋɛ Tayɛ be basa e la fanɛ basa nɛ b chena teku ase na kaŋ nu menyi be basa nɛ baa mɔ na be kushu kufu beeŋ pɛ bumo nɛ b baa chicha. 16Saŋɛ na so nɛ bekama nɛ baa ji kuwura efuliana nɛ a chena m mata teku ase na e gbelge bumo be nwurputi so. Kumo be kaman nɛ b gbaŋ bumo be bewura be epiŋiana nɛ bumo be asɔbuuso nɛ b jɔɔ amo na kikɛ nseŋ chena kasawule a chicha. Ŋkpal kusɔ nɛ k beeŋ tu menyi na so, kufu beeŋ pɛ bumo ga hale nɛ b maŋ tiŋ n yige kebaachicha. 17Saŋɛ na so nɛ b boŋ keeli be kashɛ ere n laŋɛ menyi kaplɛa so.
Kadegboŋ nɛ k nya ketre ga na mur!
Kumo be nchu so be ekuloŋgboŋ kikɛ mur teku so.
Kumo to be basa e daa ji eteku so kuwura
nseŋ daa ta kufu a wɔtɔ basa nɛ b chena teku ase na. 18Kachɛ nɛ k tɔr na ka fo,
basa nɛ b chena teku ase na bee chicha nna.
Nɛ kumo be kemur na chinchiŋ bumo ga.
19Ndoŋ nna nɛ Enyɛnpetale Ebɔrɛ na naŋ kaŋɛ le: “Meeŋ shin nɛ menyi be ndegboŋ e bure a dese nɛ esa kikɛ maŋ naa wɔ amo to. Meeŋ shin nɛ teku be nchugboŋ e buu menyi so. 20Ade kikɛ be kaman, nɛ n shin nɛ men wu n yɔ bubuni to n ya tu bumo nɛ b juŋkpar n yɔ ndoŋ na nɛ nde nɛ a daŋ mur dra dra na kikɛ na. Menyeeŋ ya kaa wɔ bubuni to nɛ esa maaŋ naŋ sɔ menyi so n chena menyi be ndegboŋana to. 21Meeŋ shin nɛ men be kebaa maaŋ naa wɔtɔ na e baa la tɔɔnɛ nɛ k bee ta kufu a pɛ basa. Basa beeŋ fin menyi, ama b maŋ naŋ wu menyi.” Ma, Enyɛnpetale Ebɔrɛ na e kaŋɛ na.
27Keli be kashɛ a laŋɛ Tayɛ be kaplɛa so be asheŋ
1Nɛ Enyɛnpe Ebɔrɛ na kaŋɛ ma le: 2“Dimɛdi pibi, Ezikɛl, boŋ keeli be kashɛ ere a laŋɛ Tayɛ nɛ k la 3kadegboŋ nɛ k chena m mata teku ase nsaa tu basa nɛ b chena teku ase nɛ mboŋ damta a ji yawu na be kaplɛa so. Kusɔ nɛ Enyɛnpetale Ebɔrɛ na bee kaŋɛ a laŋɛ Tayɛ be kaplɛa so e la fanɛ
Tayɛ, fee puchi ŋkpal kananɛ fo walɛ kebita ga so nna.
4Teku kulti fo echenakpa nna n wɔtɔ.
B pɔr fo, fanɛ nchu so be kuloŋ lela nna;
5Ndibi nɛ baa tre fir nɛ a shi kebee nɛ baa tre Hɛɛmɔn so na nɛ b ta n lɔŋɛ fo;
Nseŋ ta ndibi nɛ baa tre sida
nɛ a shi Lebanɔn be efuli so na
n wora ndibi tenteŋ nɛ baa chɛ ewajɛ a kre amo
nɛ a bee pɛ afu a keta kuloŋ a nite na n sa fo.
6Kedibi gboŋgboŋi nɛ b ku ashi Bashan be efuli so n shɛl ebaŋɛ;
Ndibi kpakpaso fanɛ chɛchɛdibi
nɛ b ku ashi Saiprus be efuli so n wora fo kaseto
Nseŋ baŋɛ ejebotenyi n fɛga n fɛga amo to nɛ a baa walɛ.
7Wajɛchɛbi lela nɛ b lue
nɛ k shi Ijipt be efuli so
nɛ b ta n chɛ nɛ afu bee ber kumo a keta fo a nite.
Esa wɔ kufɔ nseŋ wu kumo gba e beeŋ pin fanɛ k la feya nna.
Kechɛbi gbɛgbɛso nɛ k walɛ ga
nɛ b ta n chɛ m buu fo so a kuŋ epeŋi,
Kechɛbi buru nɛ kepeper kunɔkunɔ
nɛ k shi Saiprus be keplasawule so e la kumo.
8Basa nɛ baa far fo na shi Sidɔn nɛ Aavad be ndegboŋ to nna.
Fo basa nɛ b nyi nchu to e la bumo be benimu.
9Basa nɛ b lɔŋɛ nchu so be ekuloŋgboŋ na
la basa nɛ b koya kushuŋ na nɛnɛ nna
nseŋ shi kadegboŋ nɛ baa tre Biblɔs na.
Basa nɛ baa shuŋ nchu so kikɛ
bee ba kaa tu fo ashi Tayɛ nna a ji yawu.
10Pɛshiya nɛ Lidiya nɛ Libiya be efuliana so be benapo gba ti fo benapo so.
Kakpa nɛ fo benapo daŋ chena na
nɛ b daa ta bumo be abɛlso be asɔ kuŋamuso
nɛ abɛlso be akpaŋwuro a shiga.
Benapo na e daa kɔ a sa fo nɛ fo bɔla bumo so n nya ketre.
11Benapo nɛ b shi Aavad e daa kuŋ fo egbalana
nɛ bumo nɛ b shi Gamad malɛ daa kuŋ fo ebu jeŋgreŋana na
nsaa ta bumo be abɛlso be asɔ kuŋamuso a shiga egbalana so
nɛ k shin nɛ fo nyalɛ kebita.
12Fo nɛ Speen be efuli so be basa daŋ ji yawu nna nɛ b ta gbiti nɛ abɛlso nɛ anyembi nɛ epal kikɛ ŋ ka fo asɔ damtaana be kukɔ.
13Fo daŋ naŋ tu Griis nɛ Tubal nɛ Mɛshɛk be efuliana so ebi n ji yawu
nɛ bumo alɛ ta anya nɛ danyaŋ be asɔ ko ŋ ka fo kukɔ.
14Fo alɛ daŋ fa fo asɔ n sa Bɛf Togaama be efuli so ebi n sɔ egbaŋɛshuŋso nɛ egbaŋɛ nɛ baa ta a yɔ kena to nɛ ekurma.
15Roodis be efuli so be basa gba daŋ tu fo n ji yawu nɛ basa nɛ b chena teku be ekarso be efuli damtaana ta ejebotenyi nɛ ndibi lembir lela ga n chɛr fo asɔ. 16Siriya be basa daŋ tɔ fo asɔ faso damta nseŋ ta yawu kpakpaso be kejembu nɛ k la kefitiribumbuŋ nɛ baa tre ‘ɛmeraldi’ na nɛ ewajɛ peper kunɔkunɔ nɛ ewajɛ nɛ jɔɔ nɛ ewajɛchɛbi lela nɛ nchu to be kefalta jembu nɛ baa tre ‘koral’ na nɛ yawu kpakpaso be ajembu peper nɛ baa tre ‘rubi’ na ŋ ka amo be kukɔ. 17Juda nɛ Israɛl be basa gba daŋ ta ayu nɛ mushoŋ nɛ ɔlif be ŋku nɛ eposɔ ŋ ka fo asɔ faso be kukɔ. 18Damaskɔs be basa daŋ wu asɔ damta be yiri yiri nɛ fee fa na, nɛ b shi Hɛlbɔn m bar yabra belbelso nseŋ naŋ shi Zaha m bar mbolpɔ be afuibi m ba tɔ amo. 19Nɛ Griik be basa nɛ b shi Uzal be efuli so na malɛ gba ta asɔ nɛ b ta abɛlso n wora nɛ eposɔ m ba tɔ fo asɔ faso. 20Dedan be basa gba daŋ ta ata nɛ baa ta a wora egaare na n tɔ fo asɔ. 21Nɛ Areebia be efuli so be basa nɛ Kɛda be efuli so be bewura gba ta mbolpɔfɔlbi nɛ mbolpɔ nɛ mboe m ba tɔ fo asɔ faso. 22Nɛ Shiba nɛ Raama be eyawujipo gba ta yawu kpakpaso be ajembu nɛ baa ta a wora abitasɔ nɛ shuwa nɛ asɔ dufɛso lela ga m ba tu fo n ji yawu. 23Ndegboŋ fanɛ Haran nɛ Kanne nɛ Iden nɛ Asshɔ nɛ Chilmad nɛ Shiba be efuli so be eyawujipo kikɛ daŋ ba tu fo n ji yawu. 24Yawu kpakpaso be ewajɛ nɛ ewajɛ peper kunɔkunɔ nɛ ewajɛ nɛ b ta jese lela ŋ jɔɔ amo be ekarso nɛ achɛbi nɛ b nyɔɔ amo kenyɔɔ be yiri yiri nɛ ejese nɛ a kɔ eleŋ nɛ b daa bar m ba ka fa fo kebɛ to. 25Nchu so be ekuloŋgboŋ gboŋi e daa sulɔ fo asɔ faso a bɛ abar so a yɔ mboŋ nɛ b daa sha a ka yɔ.
Fo daa du fanɛ nchu so be ekuloŋ nɛ k deŋ teku so,
nɛ asɔ gbɛgbɛso bɔlɔ kumo to nna.
26Jemanɛ nɛ fo befarpo far fo n lar teku so na,
nɛ afugboŋ shi epeŋilarkpa m ba mur fo.
27Ndoŋ nna nɛ fo asɔ faso lela na kikɛ,
nɛ basa nɛ baa shuŋ ekuloŋ na to na,
ekapɛnta nɛ eyawujipoana na kikɛ,
nɛ benapo nɛ b wɔ ekuloŋ na to na
kikɛ nyam mur teku na so.
Jemanɛ nɛ fo nchu so be ekuloŋ na mur na;
28nɛ basa nɛ baa ji nchu na boŋ to
nɛ basa nɛ b wɔ kedeŋi so nu kumo.
29Naniere bekama beeŋ shile ŋ ka ekuloŋ nawule,
Nɛ efarpo kama e dii kedeŋi so.
30Bumo kikɛ beeŋ shu kagbenejijaso ŋkpal fo so,
Baaŋ wora eshishɛr n wurge bumo be amu so
nseŋ dese nsunɔ to a melti.
31Bumo alɛ beeŋ she bumo be amu ŋkpal fo so,
nseŋ buu kagbenejijaso be asɔbuuso
a ŋini bumo be kagbenejija.
Baaŋ ta kagbenejija damta n shu ga ŋkpal fo so
32Baaŋ boŋ awɔba n shu ŋ kaŋɛ le:
‘Wanɛ nɛ anyeeŋ ta ŋ keshɛr Tayɛ so,
Tayɛ nɛ e dese teku to shruum le ere?
33Jemanɛ kama nɛ fo yɛr fo asɔ faso efuli pɔtɛ so,
Efuli kama so ebi bee nya bumo be kepar nna.
Bewura bɔla fo asɔ lela so
N dii kedama.
34Ama naniere fo e mur a dese teku to na;
Fo ji nchu n ya dese nchugboŋ be kechimbi to.
Fo asɔ faso nɛ bekama nɛ baa shuŋ a sa fo na kikɛ;
e tu fo n ji nchu teku to n chul na.’
35Kusɔ nɛ k wora fo na be asheŋ mɔ ekama nɛ e chena teku ase na kɔnɔ.
Hale kufu pɛ bumo be bewura gba nɛ baa chicha
36Durnya to be eyawujipo maŋ tiŋ nɛ b yirda kusɔ nɛ k wora fo ere. Fo luwu na bee keta kufu gboŋgboŋi nna, ŋkpal manɛ so, fo baŋ choŋ nna na nɛ esa maaŋ naŋ wu fo kikɛ.”
28Tayɛ be ewura be kaplɛa so be kewuŋkaŋɛ be asheŋ
1Nɛ Enyɛnpe Ebɔrɛ na kaŋɛ ma le: 2Dimɛdi pibi, Ezikɛl, kaŋɛ Tayɛ be ewura kusɔ nɛ ma, Enyɛnpetale Ebɔrɛ na bee kaŋɛ mo. Kamoowu shin nɛ fee fɛ fanɛ fo la kegbir nna nsaa kaŋɛ fanɛ fo ka la kegbir so nɛ fo chena kuwurputi so nɛ eteku kulti fo n wɔtɔ. Feeŋ tiŋ n ta fo kumu fanɛ kegbir e la fo, ama dimɛdi e la fo, mannɛ kegbir. 3Fo alɛ naa fɛ fanɛ fo nyi asheŋ nna a chɔ Danɛl nɛ Babilɔn be ewura daŋ ta n wɔtɔ ebuluŋ to na, ŋko ashiri kikɛ maŋ ŋana fo so. 4Fo yɛ fo kanyiasheŋ nɛ kashennyi e shin nɛ fo dii kedama nseŋ nya shuwa nɛ gbiti m bɔlɔ ebu na. 5Fo yɛ fo yawu be keji be kenyigboŋ na so nɛ fo ji yawu n nya tɔnɔ na. Fo kedama na shin nɛ kamoowu luri m bɔlɔ fo to nɛ fee puchi.
6“To, naniere kusɔ nɛ ma, Enyɛnpetale Ebɔrɛ na bee kaŋɛ nde. Ŋkpal fo ka bee fɛ fanɛ fo nyi asheŋ fanɛ kegbir so, 7meeŋ shin nɛ bedoŋ nɛ b maŋ kɔ kushuso e ba kɔ fo. Baaŋ mur asɔ lela nɛ fo bɔla kanyiasheŋ nɛ kashennyi so n nya na kikɛ kuraa. 8Bumo alɛ beeŋ mɔ fo nseŋ ta fo n lɛ teku to nɛ k ki fo nchaŋ. 9Jemanɛ nɛ baaŋ ba mɔ fo na, fo kraa beeŋ baa fɛ fanɛ kegbir e la fo a? Jemanɛ nɛ feeŋ yili fo bemɔpo be anishito na, dimɛdi e naaŋ baa la fo mannɛ kegbir. 10Befɔ beeŋ mɔ fo, nɛ fo wu fanɛ bumo nɛ b maa shuŋ ma na. Ma, Enyɛnpetale Ebɔrɛ na e kaŋɛ na.”
Kananɛ Tayɛ be ewura loge to be asheŋ
11Kumo be kaman, nɛ Enyɛnpe Ebɔrɛ na naŋ kaŋɛ ma le: 12“Dimɛdi pibi, boŋ awɔba n sa Tayɛ be ewura, nseŋ kaŋɛ mo kusɔ nɛ ma, Enyɛnpetale Ebɔrɛ na bee kaŋɛ na fanɛ,
jemanɛ ko fo kusɔ kama daa bɛ abar so dede nna nsaa la tɔɔnɛ.
Fo alɛ daa nyi asheŋ ga nseŋ daa walɛ keyɛrbi nna.
13K daa du fanɛ Ebɔrɛ be kudɔbi
nɛ baa tre Iden na to nɛ fo daa wɔ.
Yawu kpakpaso be asɔ lela nyɛkpɛso be yiri yiri
fanɛ shuwa be abitasɔ nɛ fo daa ta a mɛa to.
Kachɛ nɛ b kurge fo na nɛ b bela amo kikɛ ase n sa fo.
14Ndoŋ nna nɛ n shin nɛ malaika bee kuŋ fo kowu
jemanɛ nɛ fo daa na ajembu nyɛkpɛso to
ashi ma kebee cheembi na so na.
15Yili kachɛ nɛ b kurge fo kikɛ,
fo kasheŋwora daa walɛ nna ga
n ya fo saŋɛ nɛ fo fara a asheŋ lubi be kewora.
16Fo daŋ pere kenishi nna n wɔtɔ yawu be keji to
nɛ k shin nɛ fo luri keŋkenshi nɛ alubi be kebaawɔtɔ to.
Amoso nɛ n tintiŋ fo nɛ fo lar ma kebee cheembi na so
nɛ malaika nɛ e daa kuŋ fo na
ju fo ashi ajembu nyɛkpɛso na so na.
17Fo ka daa walɛ keyɛrbi so, fo daa wu fo kumu nna.
Fo ketre ka dii so fo daa wora asheŋ nna fanɛ ewulpo.
Amoso nɛ n lara fo n lɛ kasawule so
nɛ bewura pɔtɛ e wu kusɔ nɛ n wora fo na
nɛ k baa la kusoe kpele n sa bumo.
18Fo alɛ daŋ wora alubi nna ga ashi fo yawu be keji to
hale nɛ fo kabɔrɛshuŋakpa ki asheŋ lubi be mboŋ.
Amoso nɛ n shin nɛ edɛ chɔɔ fo kadegboŋ na m mur na.
Naniere nsunɔ nawule nɛ ekama bee wu
kakpa nɛ fo kadegboŋ na daa wɔ na.
19Fo ere choŋ nna na,
nɛ kusɔ nɛ k wora fo ere
shin nɛ kufugboŋ tɔr efuliana
nɛ b nyi fo na so.
Ŋkpal manɛ so, baa fɛ nna fanɛ
kusɔ nɛ k nya fo na beeŋ tiŋ n nya bumo alɛ gba.”
Sidɔn be kaplɛa so be kewuŋkaŋɛ be asheŋ
20Kumo be kaman, nɛ Enyɛnpe Ebɔrɛ na naŋ kaŋɛ ma le: 21“Dimɛdi pibi, kaŋɛ kadegboŋ nɛ baa tre Sidɔn na fanɛ k maŋ wora n nyalɛ. 22Kaŋɛ basa nɛ b wɔ ndoŋ na fanɛ kusɔ nɛ ma, Enyɛnpetale Ebɔrɛ na kaŋɛ a laŋɛ bumo be kaplɛa so e la fanɛ, Sidɔn be basa, ŋ ki menyi doŋ nna na. Basa malɛ beeŋ maŋkura ma ŋkpal kusɔ nɛ meeŋ wora menyi so. Ŋ kaŋ gberge menyi kusoe ŋ ŋini ma kecheembiya na nɛ basa beeŋ pin fanɛ ma, e la Enyɛnpe Ebɔrɛ na. 23Meeŋ shin nɛ alɔ mɔso e ba menyi so nseŋ shin nɛ bedoŋ e ba kɔ menyi kaba kama so m mɔ menyi be basa. Ndoŋ nɛ menyeeŋ pin fanɛ ma e la Enyɛnpe Ebɔrɛ na.”
Israɛl ka beeŋ nya nɛfa be asheŋ
24Kumo be kaman, nɛ Enyɛnpe Ebɔrɛ na naŋ kaŋɛ le: “Efuliana nɛ a kulti Israɛl be basa n wɔtɔ a keni bumo jiga nsaa tege bumo na be kekama maaŋ naa la fanɛ ewi ŋko gɔŋnyaŋɛ a tɔrɔ Israɛl be basa. Ndoŋ nɛ baaŋ pin fanɛ ma, e la Enyɛnpetale Ebɔrɛ na.”
25Ade kikɛ be kaman nɛ Enyɛnpe Ebɔrɛ na naŋ kaŋɛ le: “Meeŋ bɛta Israɛl be basa na n shi efuliana nɛ n daŋ pesaŋ bumo to n yɔ na m ba nɛ efuliana na kikɛ e pin fanɛ n du cheembi nna. Israɛl be basa na beeŋ naŋ ba chena bumo gbagba be kasawule so, kumo nɛ n ta n sa ma kayɛrbi Jeekɔb dra dra na. 26Baaŋ chena ndoŋ kayurwushi so m pɔr nwu nseŋ naŋ nase ndibisɔrso be adɔ. Ma alɛ beeŋ gberge bumo be bechenashapoana nɛ b keni bumo jiga na kusoe nɛ Israɛl be basa na e nya bumo be amu a wɔtɔ. Ndoŋ nɛ baaŋ pin fanɛ ma e la Enyɛnpe bumo be Ebɔrɛ na.”
29Ijipt be kaplɛa so be kewuŋkaŋɛ be asheŋ
1B ka pɛ anyi be beko nɛ ewura Jehowachin n yɔ kenyaya to ashi Babilɔn be efuli so na be kafɛ kudusopo na to be kufɔl kudusopo na be kachɛ kudu anyɔsopo na nɛ Enyɛnpe Ebɔrɛ na kaŋɛ ma le. 2“Dimɛdi pibi, Ezikɛl, malga ŋ gbiti Ijipt be ewura, Fɛɛro, ŋ kaŋɛ mo kananɛ mo nɛ Ijipt be kasawule so be basa kikɛ beeŋ nya kasogberge be asheŋ. 3Kaŋɛ Ijipt be ewura fanɛ Enyɛnpetale Ebɔrɛ na bee kaŋɛ fanɛ, fo ki n doŋ nna ŋkpal fo ka ta fo kumu fanɛ laŋchaŋ nɛ e kɔ eleŋ a wɔ lɔr to na so. Fo alɛ naŋ kaŋɛ fanɛ feeto lɔrgboŋ nɛ baa tre Nail na a ki feya. 4Amoso meeŋ shin nɛ dariwa e kɔl fo ŋgbuŋ to nɛ ekɔrɔtɔ nɛ a wɔ lɔr na to e mata fo so nɛ ŋ gberge fo n lar Nail be lɔr na to. 5Kumo be kaman nɛ n ta fo nɛ ekɔrɔtɔ nɛ a mata fo so na kikɛ n lɛ keshishɛrsawule so nɛ fo ya dese ndoŋ a maaŋ nya kepuli. Meeŋ shin nɛ mbuibi nɛ asɔbɔya e ji fo. 6Saŋɛ na so nɛ Ijipt be efuli so be basa kikɛ e pin fanɛ ma e la Enyɛnpe Ebɔrɛ na.”
Nɛ Enyɛnpe Ebɔrɛ na naŋ kaŋɛ le: “Israɛlebi na daŋ ta bumo be amu n to menyi Ijiptebi so nna fanɛ men chɛ bumo to, ama men daa du fanɛ kedibi wuso nɛ k maŋ kɔ eleŋ nna n sa bumo. 7B ka yirgi menyi so nɛ men bu n da bumo be aba to m bɔl n shin nɛ bumo be ketetowibi shege ŋko ŋ kpekpel. 8Amoso, ma Enyɛnpetale Ebɔrɛ na e naa kaŋɛ menyi naniere na fanɛ meeŋ shin nɛ benapo e ba kɔ menyi kena nseŋ mɔ menyi be basa nɛ asɔbɔya kikɛ. 9Nɛ Ijipt be efuli na a ki kasawule jiga nɛ shɛŋ maŋ naa wɔ kumo so a dese. Ndoŋ nɛ menyeeŋ pin fanɛ ma e la Enyɛnpe Ebɔrɛ na.
Ŋkpal fo ka kaŋɛ fanɛ feeto Nail be lɔr na a ki feya so, 10fo nɛ Nail kikɛ ki n doŋ nna na. Amoso meeŋ shin nɛ Ijipt be efuli na a ki kasawule jiga nɛ shɛŋ maaŋ naa wɔ kumo so, yili kadegboŋ nɛ baa tre Migdɔl nɛ k wɔ kelargato be esoso na n ya fo kumo nɛ baa tre Aswan ashi kelargato be kaseto na, hale ŋ keta m ba choŋ menyi nɛ Kush be efuli so be egbaŋ to. 11Dimɛdi ŋko kusɔbɔya kikɛ maaŋ naŋ bɔla kasawule na so n choŋ kikɛ. Nfɛ adena nɛ shɛŋ maŋ naa wɔ kumo so. 12Meeŋ shin nɛ Ijipt e ki efuli nɛ shɛŋ shɛŋ maaŋ naa wɔ kumo so ashi durnya ere kikɛ to. Nfɛ adena nɛ Ijipt be efuli so be ndegboŋ dese alambure. A beeŋ dese n chɛr a chɔ nde nɛ a bure a dese kikɛ. Kumo be kaman nɛ n shin nɛ Ijiptebi na e pesaŋ to n yɔ efuli pɔtɛana so; ŋkpal manɛ so baaŋ shile n yɔ efuli kama so n ya kaa wɔ ndoŋ be basa to.”
13Ade be kaman, nɛ Enyɛnpe Ebɔrɛ na naŋ kaŋɛ le: “Nfɛ adena be kaman, meeŋ naŋ shin nɛ Ijiptebi na e naŋ bɛta n shi efuliana nɛ m pesaŋ bumo to n yɔ na so m ba 14chena Ijipt be kasawule so be kelargato be kaseto, nɛ k la bumo be echenakpa gbagba na. Ama bumo alɛ beeŋ baa la basa pɔso ndoŋ nna. 15Kumo e la fanɛ baaŋ baa la basa nɛ b maaŋ naa kɔ eleŋ nseŋ naŋ tiŋ n ji efuliana ko so kuwura. Meeŋ shin nɛ b ki efuli jiga nɛ k maaŋ naŋ tiŋ n tintiŋ efuli ko nɛ efuli na e wora kumo be aparsheŋ. 16Israɛl be basa malɛ maaŋ naŋ ta bumo be amu n to Ijiptebi so a fin kechɛto. Kusɔ nɛ k beeŋ tu Ijipt be basa na beeŋ shin nɛ Israɛlebi na e nyiŋi fanɛ kedaa maŋ daga fanɛ b ta bumo be amu n to Ijipt so nseŋ pin fanɛ ma e la Enyɛnpetale Ebɔrɛ na.”
Ewurgboŋ Nebukadneeza ka beeŋ pɔɔ Ijipt so be asheŋ
17B ka pɛ ewura Jehowachin nɛ anyi be beko n yɔ Babilɔn be efuli so kenyaya to na be kafɛ adunyɔ nɛ ashunusopo na to be kufɔl sososo na be kachɛ sososo na nɛ Enyɛnpe Ebɔrɛ na naŋ kaŋɛ ma le: 18“Dimɛdi pibi, Babilɔn be ewurgboŋ Nebukadneeza daŋ kre n ya kɔ Tayɛ be basa kena. Mo alɛ daŋ sulɔ mbe benapo esulɔ gbɛgbɛso nna hale nɛ bumo be amu kpra nɛ bumo be abatimu pɛge, ama ewura na nɛ mbe benapo kikɛ maŋ nya bumo be kegben be tɔnɔ ashi kena na to. 19Amoso kusɔ nɛ ma Enyɛnpetale Ebɔrɛ na bee kaŋɛ nde e la fanɛ: Meeŋ ta Ijipt be kasawule n sa ewurgboŋ Nebukadneeza nɛ e kɔ n suge bumo be asɔ nseŋ sulɔ Ijipt be efuli so be mpetɛsɔ lela n yɔ nɛ a ki mbe benapo be kakɔka. 20Ŋkpal manɛ so, ewura na nɛ mbe benapo kikɛ daa shuŋ nna a sa ma, Enyɛnpetale Ebɔrɛ na.
21Nɛ kumo be loŋ kaŋ wora, meeŋ shin nɛ Israɛl be basa e nya eleŋ, nɛ fo, Ezikɛl, e yili kakpa nɛ ekama beeŋ nu fo ebɔl nseŋ malga, saŋɛ na so baaŋ pin fanɛ ma e la Enyɛnpe Ebɔrɛ na.”
30Enyɛnpe Ebɔrɛ ka beeŋ gberge Ijipt kusoe be asheŋ
1Ade kikɛ be kaman, nɛ Enyɛnpe Ebɔrɛ na naŋ kaŋɛ ma le: 2“Dimɛdi pibi, Ezikɛl, kaŋɛ kusɔ nɛ ma Enyɛnpetale Ebɔrɛ na bee malga ere. A daga fanɛ fo kaŋɛ amo awɔrso fanɛ
Kachɛ lubi lubi bee ba!
3Kachɛ na taga to, kachɛ nɛ Enyɛnpe Ebɔrɛ na beeŋ gberge fo kusoe na fo nna na,
K la kemur nɛ etɔrɔ be kachɛ nna n sa efuliana na.
4Kena beeŋ ku Ijipt be efuli so;
Nɛ kagbenejija damta e tɔr Itiopia be basa so.
Basa damta beeŋ wu ashi Ijipt to;
Nɛ b suge efuli na so be asɔ kikɛ
Nseŋ ka kumo kelambure n nase.
5Benapo nɛ b ya haya ashi Itiopia nɛ Libiya nɛ Lidiya n Areebia nɛ Kub be efuliana so na nɛ ma basa gbagba to be basa damta beeŋ wu kena na to.”
6Kede be kaman nɛ Enyɛnpe Ebɔrɛ na naŋ kaŋɛ le: “Bekama nɛ baa kɔ a sa Ijipt na beeŋ yili kade nɛ baa tre Migdɔl nɛ k wɔ kelargato be esoso na m ba choŋ kumo nɛ baa tre Aswan nɛ k wɔ kelargato be kaseto na n wu kena to nɛ benapo nɛ baa puchi so na kikɛ e mur. Ma Enyɛnpetale Ebɔrɛ na e kaŋɛ. 7Ijipt be efuli na beeŋ ki kakpa fuloŋ nɛ ekama kini ashi durnya kikɛ to nɛ kumo be ndegboŋ a ki nde bureso a dese. 8Ŋ kaŋ shin nɛ edɛ ji Ijipt be efuli nɛ kumo be basa nɛ baa kɔ a kuŋ kumo na nɛ baaŋ pin fanɛ ma e la Enyɛnpe Ebɔrɛ na.
9Kachɛ nɛ Ijipt beeŋ mur na, meeŋ shuŋi mbɔ nɛ b ta nchu so be ekuloŋgboŋ m ba bɔ Itiopia be basa nɛ b maa fɛ shɛŋ be asheŋ na kubɔya a laŋɛ kemur nɛ k bee ba bumo alɛ gba so be kaplɛa so nɛ kufu e pɛ bumo. Loŋ be kachɛ na malɛ bee ba!”
10Ade be kaman nɛ Enyɛnpetale Ebɔrɛ na naŋ kaŋɛ le: “Meeŋ bɔla Babilɔn be ewurgboŋ, Nebukadneeza so m mur Ijipt be efuli so be benapo damta kikɛ. 11Ewurgboŋ Nebukadneeza nɛ mbe benapo nɛ b maa wu kuwɔr beeŋ ba kɔ Ijipt be basa kena m mɔ basa m biti abar so kasawule na so be kaplɛkama. 12Kumo be kaman nɛ n shin nɛ lɔrgboŋ nɛ baa tre Nail na e wɔlto nseŋ naŋ shin nɛ basa lubi e ba ji Ijipt be efuli so eleŋ. Befɔ beeŋ ba jija kasawule na nɛ k maaŋ naa kɔ tɔnɔ. Ma Enyɛnpe Ebɔrɛ na e kaŋɛ.”
13Ade be kaman nɛ Enyɛnpetale Ebɔrɛ na naŋ kaŋɛ le: “Meeŋ mur agbirana nɛ mpɔrduliana nɛ Ijiptebi bee shuŋ ashi kadegboŋ nɛ baa tre Mɛmfis na. Esa kikɛ maaŋ naa wɔtɔ nɛ e ji Ijipt be efuli so kuwura, nɛ kufu a pɛ basa kikɛ efuli na so. 14Meeŋ shin nɛ Ijipt be efuli na be kelargato be kaseto na be kasawule e dese fuloŋ. Meeŋ nya edɛ n wɔtɔ kadegboŋ nɛ baa tre Zowan nɛ k wɔ kelargato be esoso na n chɔɔ kumo m mur. Ma alɛ beeŋ gberge basa nɛ b wɔ Ijipt be efuli so be kadegboŋ nɛ baa tre Tɛɛbis na kusoe. 15Kumo be kaman nɛ n shin nɛ Ijipt be kade nɛ b pɔr egbal ŋ kuŋ kumo nɛ baa tre kumo Pɛlusium na to be basa e pin kananɛ ma agbo du. Ma alɛ beeŋ naŋ mur Tɛɛbis be benapo damta. 16Meeŋ shin nɛ edɛ e ji Ijipt nɛ kagbenejija e tɔr basa nɛ b wɔ Pɛlusium na so. Egbal nɛ b pɔr ŋ kulti Tɛɛbis n wɔtɔ na beeŋ bure n tɔr nɛ nchu e ji kadegboŋ na; nɛ kufu a tɔr basa nɛ b wɔ Mɛmfis na so. 17Mbrantiɛfɔlbi nɛ b wɔ ndegboŋ nɛ baa tre Hiliopolis nɛ Bubastis na kikɛ beeŋ wu kena to nɛ b pɛ basa nɛ b ka na ŋ ki anya. 18Jemanɛ nɛ meeŋ jija Ijipt be eleŋ nɛ baa puchi so nseŋ shin nɛ k ba ekar na, tentembiri beeŋ tɔr kadegboŋ nɛ baa tre Taapanes na so. Kuwɔlpa beeŋ buu Ijipt be efuli na so nɛ b pɛ kumo be ndegboŋ to be basa ŋ ki anya. 19Ŋ kaŋ gberge Ijiptebi le be kusoe ere n loge nɛ baaŋ pin fanɛ ma e la Enyɛnpe Ebɔrɛ na.”
Ijipt be ewura be eleŋ ka yɔɔ be asheŋ
20B ka pɛ ewura Jehowachin nɛ anyi be beko n yɔ kenyaya to ashi Babilɔn be efuli so na be kafɛ kudukakosopo na to be sososo be kufɔl na to be kachɛ shunusopo na nɛ Enyɛnpe Ebɔrɛ na kaŋɛ ma le: 21“Dimɛdi pibi, m pɔɔ Ijipt be ewura so nna nɛ esa kikɛ maŋ tiŋ m ba chɛ mo to. 22Amoso, kusɔ nɛ ma, Enyɛnpetale Ebɔrɛ na kaŋɛ nde e la fanɛ: Ijipt be ewura la n doŋ nna nɛ mee sha kemur mo kuraa, saŋɛ na so, e maaŋ naŋ nya eleŋ ŋ koso n wora shɛŋ. 23Kumo be kaman, meeŋ shin nɛ Ijiptebi na e pesaŋ to n yɔ durnya kikɛ to. 24Ade kikɛ be kaman, nɛ n wɔtɔ Babilɔn be ewura eleŋ to nseŋ ta tokobi m bɔɔ mo enɔ. Meeŋ shin nɛ Ijipt be ewura e kɔ n tɔr n wu mo doŋ be anishito. 25Kashenteŋto, meeŋ shin nɛ Ijipt be ewura, Fɛɛro, e ki esa pɔso nseŋ shin nɛ Babilɔn be ewura e nya eleŋ. Saŋɛ na so nɛ ŋ kaŋ ta ma tokobi m bɔɔ mo enɔ nɛ e ta kumo n shoŋi Ijipt, ekama beeŋ pin fanɛ ma e la Enyɛnpe Ebɔrɛ na. 26Meeŋ shin nɛ Ijiptebi na e pesaŋ to n yɔ durnya kikɛ to. Saŋɛ na so nɛ b pin fanɛ ma e la Enyɛnpe Ebɔrɛ na.”
31B ka ta Ijipt m ber kedibi nɛ baa tre Sida na be asheŋ
1B ka daŋ pɛ ewura Jehowachin nɛ anyi be galeŋga anya n yɔ Babilɔn be efuli so na be kafɛ kudukakosopo to be kufɔl sasopo na to be kachɛ sososo na nɛ Enyɛnpe Ebɔrɛ na kaŋɛ le: 2“Dimɛdi pibi, kaŋɛ Ijipt be ewura, Fɛɛro nɛ mbe basa fanɛ Ebɔrɛ kaŋɛ fanɛ;
Fo kɔ eleŋ ga a chɔ ekama durnya to!
Wanɛ nɛ meeŋ ta ŋ keshɛr fo?
3Fo du fanɛ Lebanɔn be efuli so be kedibi nɛ baa tre sida;
Nɛ k kɔ ayabi lela nɛ kiyoyul ga,
nsaa wɔ nteŋ a sha kechute awɔlpa na nna.
4Nchu e sa kumo kayul.
Achubu nɛ a wɔ nchiŋ e shin nɛ k daŋ nteŋ;
Nɛ eboŋana daa shile a kulti kumo be kaseto
n shin nɛ kakpa nɛ k yil na bee wushi
a sa kupuŋ to be ndibi kikɛ.
5Ŋkpal k ka daa nya kayul nɛnɛ so,
nɛ k daŋ nteŋ a chɔ ndibi nɛ a ka na.
Kumo be ayabi daŋ nɛnɛ nsaa wɔ nteŋ nna.
6Ndoŋ nna nɛ mbuibi be yiri kikɛ tɔl asha kumo be ayabi so;
Nɛ kupuŋ to be asɔbɔya bee kurge amo be bibi kumo be kifito;
Nɛ efuliana nɛ a wɔ durnya to
be basa bee chena kumo be kiyoyul to a wushi.
7Kedibi na daa walɛ ga.
Kumo be ayabi daa wɔ nteŋ ga.
Kumo be nliŋi daa fo kasawule to be nchu nna.
8Ebɔrɛ be kudɔbi na to be ndibi nɛ baa tre sida na be kekama maŋ walɛ n fo kumo so.
Ndibi kpakpaso nɛ baa tre fir na
be kekama be ayabi maŋ fo kumo be ayabi so.
Kedibi kikɛ be ayabi be nteŋ maŋ fo kumo peya so.
Ebɔrɛ be kudɔbi na to malɛ be kedibi kikɛ
be kela maŋ fo kumo peya so.
9Mee to kumo nɛ k walɛ nsaa kɔ ayabi damta.
Kedibi kama nɛ k wɔ Ebɔrɛ be kudɔbi
nɛ baa tre Iden na to na
daa sha kebaadu fanɛ kumo nna,
ŋkpal loŋ so nsaa besa kumo eyur.
10Amoso, naniere, kusɔ nɛ ma Enyɛnpetale Ebɔrɛ na bee kaŋɛ fanɛ k beeŋ wora kedibi nɛ k daŋ nteŋ hale n ya fo awɔlpa to na nde. K kaa daŋ nteŋ ga so nɛ k fara a wu kumo be kumu; 11ŋkpal loŋ so, ŋ kini kumo nna nsaa beeŋ shin nɛ efuli pɔtɛ ko be ewura e sɔ kumo nseŋ gberge kumo kusoe ŋkpal kumo be kumu kpakpaso so. 12Befɔ nɛ b maa wu kuwɔr beeŋ ku kumo nseŋ yige kumo n nase kakpa nɛ k beeŋ tɔr na. Kumo gbagba nɛ kumo be ayabi beeŋ tɔr kebee kama nɛ ketaŋɛ kama nɛ a wɔ efuli na so so. Saŋɛ na so efuliana nɛ a daa chena kumo be kiyoyul to na beeŋ yɔ mboŋ ko. 13Kumo be kaman nɛ mbuibi e ba kaa jɔŋɛ kedibi nɛ k tɔr a dese na so nɛ kupuŋ to be asɔbɔya malɛ e baa chichi kumo be ayabi so. 14Amoso yili le be jemanɛ a yɔ, kanaŋkamaso nɛ kedibi kikɛ nya nchu, k maaŋ tiŋ n daŋ nteŋ fanɛ kumo. Amo be kekama beeŋ wu fanɛ kananɛ edimɛdi bee wu a gbelge kasawule to a yɔ bubuni to na.”
15To, kusɔ nɛ Enyɛnpe Ebɔrɛ na kaŋɛ nde: “Kachɛ nɛ kedibi na beeŋ wu n yɔ bubuni to na, meeŋ shin nɛ elɔr nɛ mbombiana e bɔlɔ m buu kumo so a ŋini fanɛ a bee shu kumo be keeli nna. Meeŋ shin nɛ elɔr nɛ mbombiana kikɛ e sa maŋ naŋ shile. Kumo be kaman nɛ tentembiri e buu Lebanɔn be efuli so be abee so nɛ kiyi to be ndibi kikɛ e gbaŋgbaŋ amo be afantaŋ. 16Jemanɛ nɛ meeŋ shin nɛ kedibi na e wu n yɔ bubuni to na, kumo be asheŋ beeŋ shin nɛ kufu e pɛ efuliana nɛ b baa chicha. Iden to be ndibi nɛ Lebanɔn be efuli so be ndibi nɛ a bee nya nchu nɛnɛ nɛ amo be nliŋi luri kasawule to kikɛ be ŋgbene beeŋ fuli amo ŋkpal k ka wu n tɔr so. 17Bekama nɛ b daa chena kumo be kiyoyul to na gba beeŋ tu kumo ŋ gbelge to n yɔ bubuni to kakpa nɛ bumo nɛ b daŋ kewu na yɔ na.
18Kedibi na e la fo Ijipt be ewura nɛ mbe basa. Iden be kudɔbi na to be ndibi gba be kela daa maŋ fo feya so. Ama naniere, kananɛ Iden be ndibi wu ŋ gbelge to n yɔ bubuni to na nɛ fo alɛ gba beeŋ wu n ya tu basa nɛ b maa ŋana Ebɔrɛ nɛ bumo nɛ b wu kena to na. Ma Enyɛnpe Ebɔrɛ na e malga na.”
32B ka ta Ijipt be ewura m ber laŋchaŋ be asheŋ
1B ka pɛ ewura Jehowachin nɛ anyi be galeŋga anya n yɔ Babilɔn be efuli so na be kafɛ kudu anyɔsopo na be kufɔl kudu anyɔsopo na to be kachɛ sososo na, nɛ Enyɛnpe Ebɔrɛ na kaŋɛ ma le: 2“Dimɛdi pibi, Ezikɛl, kaŋɛ Ijipt be ewura, Fɛɛro, kenishipere be kasokpele be kubɔya ere fanɛ n yɛ: ‘Fee wora fanɛ buluŋ nna ashi efuliana na to, ama fo alɛ baa la fanɛ lɔr to be laŋchaŋ nɛ fee bri nchu to nna a jija amo. 3Efuli damtaana be basa kaŋ shɛr abar so, meeŋ to fo kashewu nseŋ shin nɛ b gberge fo nɛ kashewu na n dii kedeŋi so.’ 4Kumo be kaman, nɛ n lara fo n lɛ kasawule nseŋ bar durnya to be mbuibi nɛ asɔbɔya kikɛ nɛ a baa ji fo. 5Ma alɛ beeŋ shin nɛ fo eblaŋ bɛso e dese abee so nɛ ataŋɛ to kikɛ, 6nɛ n chulgi fo ŋklaŋ m pɔ abee kikɛ hale nɛ a bɔlɔ eboŋana. 7Jemanɛ nɛ meeŋ mur fo na kaŋ fo, meeŋ shin nɛ kakpa e buu so nɛ epeŋi nɛ kufɔl nɛ achɛkpabi kikɛ e fulto ŋ gben. 8Ma alɛ beeŋ shin nɛ esoso be kefulto kikɛ e ki tentembiri m buu fo efuli na kikɛ so. Ma Enyɛnpetale Ebɔrɛ e kaŋɛ na.
9Jemanɛ nɛ meeŋ shin nɛ fo kemur be asheŋ be baru e sɔ efuliana na so na, efuli damta so be basa nɛ fo maŋ naŋ nu bumo be asheŋ be ŋgbene beeŋ jija bumo ga. 10Kusɔ nɛ meeŋ wora fo na beeŋ chinchiŋ basa damta. Kachɛ nɛ meeŋ pee ma tokobi m mɔ fo na, kufu beeŋ tɔr bewura so nɛ b baa chicha ŋkpal bumo gbagba be ŋkpa so.”
11Ade be kaman nɛ Enyɛnpetale Ebɔrɛ na kaŋɛ Ijipt be ewura le: “Babilɔn be ewura beeŋ ba kɔ fo kena. 12Ma alɛ beeŋ shin nɛ efuliana nɛ amo be basa maa wu kuwɔr e ba mɔ fo basa kikɛ nseŋ mur asɔ kama nɛ fee puchi so na kikɛ. 13Kumo be kaman nɛ m mɔ menyi be ana nɛ b wɔ nchu ase kikɛ, saŋɛ na so edimɛdi ŋko ana maaŋ naa wɔtɔ a jija nchu na. 14Saŋɛ na so nɛ n shin nɛ menyi be nchuana e tɔr so a du keleŋkelembi nɛ menyi be eboŋana e baa shile boeŋ boeŋ. Ma Enyɛnpetale Ebɔrɛ e kaŋɛ na.
15Ŋ kaŋ mur bekama nɛ b wɔ Ijipt be efuli so kikɛ nseŋ shin nɛ kasawule na dese fuloŋ na nɛ baaŋ pin fanɛ ma e la Enyɛnpe Ebɔrɛ na. 16Kasokpele ere beeŋ baa la awɔba nɛ efuli pɔtɛana so be beche e boŋ kumo n shu Ijipt nɛ kumo be basa kikɛ be keeli. Ma, Enyɛnpetale Ebɔrɛ e kaŋɛ na.”
17B ka pɛ anyi be beko nɛ ewura Jehowachin n yɔ kenyaya to na be kafɛ kudu anyɔsopo na to be kufɔl juŋkparso na be kachɛ kuduanusopo na nɛ Enyɛnpe Ebɔrɛ na kaŋɛ ma le. 18E yɛ: “Dimɛdi pibi, baa shu ŋkpal Ijipt be basa damta so nseŋ shin nɛ b pin fanɛ bubuni to e daga bumo. Ndoŋ e la kakpa nɛ baaŋ ta bumo nɛ efuli pɔtɛana nɛ a kɔ eleŋ ga na be basa n ya puli.” 19Kaŋɛ bumo le:
“Menyee tama fanɛ men walɛ nna ga a chɔ ekama a?
Menyeeŋ yɔ bubuni to n ya tu basa
nɛ b maa ŋana Ebɔrɛ na n dese ndoŋ.
20Menyi, Ijipt be basa, nɛ bumo nɛ b mɔ kena to na kikɛ e naŋ wu luwu koŋwule. Ŋkpal manɛ so, tokobi na teŋ wora shiriya nɛ k mɔ menyi kikɛ. 21Saŋɛ na so nɛ benapo lempoana nɛ b daŋ kɔ n sa Ijiptebi nɛ b mɔ bumo na e wora menyi Ijiptebi na maraba ashi bubuni to. Baaŋ boŋ to ŋ kaŋɛ le: ‘Basa nɛ b maa ŋana Ebɔrɛ nseŋ wu kena to na e ba bubuni to nfe m ba ka dese na!’
22Asiriya nɛ kumo be benapo be nchaŋana kulti kumo na gba wɔ ndoŋ. Kena to nɛ b daŋ mɔ bumo kikɛ. 23Bumo be nchaŋana dese efuli na kikɛ so nna. Ama bumo alɛ e daa funti basa jemanɛ ko na.
24Elam nɛ kumo be benapo be nchaŋana kulti kumo na gba wɔ ndoŋ. Kena to nɛ b daŋ mɔ basa nɛ b maa ŋana Ebɔrɛ na kikɛ nɛ b yɔ bubuni to. Bumo e daa funti basa nɛ b wɔ ŋkpa to na, ama naniere bumo e ji anishinyɔr a dese bubuni to na. 25Elam e dese kakpa nɛ basa nɛ b mɔ kena to dese na nɛ kumo be benapo be nchaŋana kulti efuli na kikɛ so na. Bumo koŋwule na e daa funti basa na, ama naniere bumo e ji anishinyɔr n wu n tu basa nɛ b mɔ kena to a dese na.
26Meshɛk nɛ Tubal nɛ amo be benapo be nchaŋana kulti amo na gba wɔ ndoŋ. B la basa nɛ b maa ŋana Ebɔrɛ nna nɛ b mɔ bumo kikɛ kena to. Bumo e daa funti basa nɛ b wɔ ŋkpa to na. 27B daa maŋ puli bumo bunyaŋ so fanɛ kananɛ b daa puli dra na be basa nɛ b ji eleŋ ga nɛ b daa ta bumo nɛ bumo be akɔsɔ kikɛ a puli na. Jemanɛ ko le be benapo nɛ b ji eleŋ ga ere daa funti basa nɛ b wɔ ŋkpa to nna.
28Kananɛ Ijiptebi gba beeŋ wu m mur nseŋ dese basa nɛ b maa ŋana Ebɔrɛ nseŋ wu kena to na nna na.
29Edɔm nɛ mbe bewura nɛ bejuŋkparpo kikɛ gba wɔ ndoŋ. B daa la benapo lempo nna, ama naniere bumo nɛ basa nɛ b maa ŋana Ebɔrɛ nseŋ wu kena to na kikɛ e dese bubuni to na.
30Benimuana nɛ b shi kelargato be esoso na nɛ basa nɛ b daŋ shi Sidɔn be kadegboŋ to m ba na kikɛ gba wɔ ndoŋ. Bumo be eleŋ gboŋ daa funti basa nna, ama naniere bumo alɛ gba ta anishinyɔr nna n tu basa nɛ b wu kena to n yɔ bubuni to. Bumo kikɛ ji nyɔmɔ ashi bubuni to nna na.”
31Ade kikɛ be kaman, nɛ Enyɛnpetale Ebɔrɛ na kaŋɛ le: “Ijipt be ewura nɛ mbe benapo kaŋ wu, bekama nɛ baa wu kena to na bumo be ŋgbene beeŋ wushi. 32Ŋkpal manɛ so, ma e shin nɛ Ijipt be ewura daa funti basa nɛ b wɔ ŋkpa to, ama baaŋ mɔ mo nɛ mbe benapo kikɛ nseŋ puli bumo kakpa nɛ b puli basa nɛ b maa ŋana ma nseŋ wu kena to na. Ma, Enyɛnpetale Ebɔrɛ e kaŋɛ na.”
33Ebɔrɛ ka lara Ezikɛl fanɛ kade be ekenipo be asheŋ
1Nɛ Enyɛnpe Ebɔrɛ na kaŋɛ ma le. 2“Dimɛdi pibi, Ezikɛl, kaŋɛ fo basa fanɛ jemanɛ kama nɛ mee bar kena efuli so, loŋ be efuli na so be basa bee lara bumo to be eko nna nɛ e chena a keni ekpa to. 3Nɛ e baŋ wu edoŋ ka bee ba nɛ e foŋ kabel nɛ ekama e pin. 4Ekama nɛ e beeŋ nu kabel na nseŋ kplaŋ so nɛ edoŋ na ba mɔ mo be luwu be turju bɛ mo gbagba nna. 5Amodoŋwura gbagba e bar mbe luwu, ŋkpal manɛ so, e kplaŋ kefiɛso be kabel na be kushu so nna. Ashere nɛ e daŋ maŋ kplaŋ kumo so nna, e daŋ beeŋ gelge luwu na. 6Ama nɛ fanɛ esa nɛ e chena a keni na wu edoŋ ka bee ba nsaa maŋ foŋ kabel na, edoŋ na beeŋ ba mɔ belubiworapoana na, ama meeŋ ta bumo be luwu na be turju m bɛ esa nɛ e chena a keni ekpa to na.
7Dimɛdi pibi, naniere mee lara fo nna nɛ fo baa la esa nɛ e beeŋ baa wu asheŋ nsaa kaŋɛ Israɛl be basa. A daga fanɛ fo shin nɛ b nu kefiɛso be kubɔya kama nɛ meeŋ sa fo fanɛ fo ta n sa bumo na. 8Nɛ ŋ kaŋɛ fanɛ esa lubi ko beeŋ wu, nɛ fo maŋ fɛa mo so nɛ e chɛrga ashi mbe asheŋ na lubi to nseŋ mɔlga mbe kumu, kumo ere e beeŋ wu ashi mbe alubi na to ama mbe luwu be turju beeŋ baa bɛ fo. 9Ama nɛ fanɛ fo fɛa esa lubi na so nɛ e maŋ yige alubi be kewora, nseŋ wu mbe alubi to, mannɛ fo e bar kumo.”
10Kumo be kaman, nɛ Enyɛnpe Ebɔrɛ na naŋ kaŋɛ ma le: “Dimɛdi pibi, Israɛl be basa na bee bile asheŋ a fubel a kaŋɛ fanɛ bumo be alubi be kasogberge na chɔ bumo so. B maŋ naa kɔ tama kikɛ fanɛ baaŋ ji efute nseŋ kpal loŋ so a malga a gbiti ma. 11Kaŋɛ bumo fanɛ, ŋ ka la Enyɛnpetale Ebɔrɛ nɛ e bee sa ŋkpa so, ma kagbene maa fuli alubiworapoana be luwu so. B ka yige bumo be alubi be kewora nseŋ ji efute e naa fuli ma kagbene. Amoso nɛ Israɛl be basa na bee sha keji efute, kumo ere b yige bumo be asheŋ lubi na nseŋ bɛta m ba ma kutɔ.
12Dimɛdi pibi, kaŋɛ Israɛl be basa na fanɛ nɛ esa lela wora kulubi, kelela dra nɛ e wora na maaŋ tiŋ m mɔlga mo alubi na be kasogberge to. Nɛ fanɛ esa lubi yige alubi be kewora, e maaŋ naŋ nya kasogberge. Esa lela malɛ nɛ e yige alela be kewora nsaa wora asheŋ lubi maaŋ ji efute a wɔtɔ. 13Nɛ fanɛ n nase kɔnɔ n sa esa lela fanɛ e beeŋ ji efute, ama kumo be kaman nɛ e fara a fɛ fanɛ alelasheŋ nɛ e daŋ wora na so e beeŋ nya kumɔlga nseŋ fara a wora asheŋ lubi, m maaŋ naŋ nyiŋi alelasheŋ nɛ e daŋ wora na. E beeŋ wu ŋkpal mbe alubi na so. 14Ama nɛ fanɛ ŋ fɛa esa lubi so fanɛ e beeŋ wu ŋkpal mbe alubi so, nɛ e yige asheŋ lubi be kewora nsaa wora asheŋ lela nɛ a daga 15fanɛ, e ka bɛta kusɔ nɛ e daŋ sɔ n yili tarma pɔɛŋ nseŋ sa esa ko mpaŋ na ŋko m bɛta kusɔ nɛ e yuri n ya sa kusɔwura na, kumo ere e maaŋ wu ama e beeŋ ji efute. 16Meeŋ ta mbe alubi na m paŋ mo nɛ e ji efute, ŋkpal e ka wora asheŋ lela nɛ a daga na so.
17Ade kikɛ be kaman, fo basa bee kaŋɛ fanɛ kusɔ nɛ mee wora na maŋ walɛ. Ama bumo ere be asheŋ nɛ baa wora na e maŋ niŋi. 18Nɛ esa lela yige asheŋ lela be kewora nseŋ fara a wora asheŋ lubi, e beeŋ wu ŋkpal mbe alubi so. 19Ama nɛ esa lubi yige asheŋ lubi be kewora nsaa wora asheŋ lela nɛ a daga, e mɔlga mbe kumu nna na. 20Ama menyi Israɛl be basa bee kaŋɛ fanɛ m maa wora asheŋ nɛ amo be ekpa so. Kusɔ nɛ menyee wora nɛ meeŋ yili so n ji menyi demu.
Jerusalɛm ka bure n tɔr be baru be asheŋ
21Kafɛ nɛ b pɛ ewura Jehowachin nɛ anyi be galeŋga anya n yɔ Babilɔn be efuli so na be kafɛ kudu anyɔsopo na to be kufɔl kudusopo na be kachɛ nusopo na nɛ esa ko nya ekpa n shile Jerusalɛm to m ba kaŋɛ ma fanɛ Jerusalɛm bure n tɔr. 22Pɔɛŋ nɛ esa na ba ma kutɔ na be kaaseso, Enyɛnpe Ebɔrɛ na be eleŋgboŋ daŋ gbelge ma so nna nɛ e shin nɛ ma kɔnɔ bugi nɛ n tiŋ m malga pɔɛŋ nɛ kanyɛn na ba ma kutɔ kumo be ŋklade kachipurso na.
Basa nɛ b ka Israɛl na be alubi be asheŋ
23Ade kikɛ be kaman, nɛ Enyɛnpe Ebɔrɛ na naŋ kaŋɛ ma le. 24Dimɛdi pibi, basa nɛ b kra wɔ Israɛl be efuli so be nde nɛ a bure na to na bee kaŋɛ nna fanɛ: ‘Eebraham daa la esa koŋwule nna nɛ Enyɛnpe Ebɔrɛ na ta kasawule na kikɛ n sa mo. Naniere an ka la basa damta ere, kasawule na ki anyeya nna a.’
25To, kaŋɛ bumo kusɔ nɛ ma, Enyɛnpetale Ebɔrɛ na bee kaŋɛ. Menyee we eblaŋ nɛ ŋklaŋ kra wɔ amo to. Menyee shuŋ agbirana nsaa mɔ basa. Nɛ mannɛ so nɛ menyee fɛ fanɛ kasawule na ki menyeya nna? 26Ade be kaman, men wɔtɔ nna a kɔ etokobi a mɔ abar nsaa wora ekishisheŋ. Ekama wɔtɔ nna a ji kubojua. Nɛ mannɛ so nɛ menyee fɛ fanɛ kasawule na ki menyeya nna?
27Kaŋɛ bumo fanɛ ŋ ka la Enyɛnpetale Ebɔrɛ nɛ e bee sa ŋkpa so, mee fɛa basa nɛ b kraa wɔ nde bureso na to na so nna nsaa kaŋɛ bumo fanɛ baaŋ wu kena to. Kumo be kaman nɛ kupuŋ to be asɔbɔya lubi e pɛ bumo nɛ b wɔ ndekarso na n we, nɛ kulɔ e mɔ bumo nɛ bumo alɛ ŋana a wɔ abee so nɛ abeelaŋ to na. 28Meeŋ shin nɛ kasawule na e ki kasawule fuloŋ a dese, nɛ basa nɛ b daa kɔ eleŋgboŋ nsaa wu bumo amu kumo so na e ba ekar. Israɛl be abee beeŋ ki mboŋ lubi nɛ esa kama maaŋ naŋ tiŋ m bɔla amo ase n choŋ. 29Jemanɛ nɛ meeŋ gberge basa na kusoe ŋkpal bumo be alubi so nseŋ shin nɛ kasawule na e dese fuloŋ na, nɛ baaŋ pin fanɛ ma e la Enyɛnpe Ebɔrɛ na.”
Kusɔ nɛ k wora Anebi Ezikɛl be kubɔya na be kaman be asheŋ
30Ndoŋ nna nɛ Enyɛnpe Ebɔrɛ na naŋ kaŋɛ le: “Dimɛdi pibi, basa nɛ fo nɛ bumo wɔ Babilɔn be efuli so nfe na baŋ shɛr kadegboŋ na be egbalana ase ŋko n chena bumo be ebuana be mbuna, fo asheŋ nɛ baa malga. Le nɛ baa kaŋɛ abar, ‘Men shin nɛ an ya bishi Ezikɛl n nu kubɔya nɛ k yaŋ shi Enyɛnpe Ebɔrɛ na kutɔ m ba kabre.’ 31Amoso ma basa bee chala nna m ba nu kusɔ nɛ fo kɔ a kaŋɛ, ama bumo alɛ maaŋ wora kusɔ nɛ fo kaŋɛ fanɛ b wora na. Kashaso nɛ baa malga a sa abar, ama kejimuni nɛ kapuni e bɔlɔ bumo be ŋgbene to. 32Kashenteŋto, bumo ere kutɔ fo la esa nɛ e kɔ ebɔl belbel so nna a laŋ jaŋjilaŋ nsaa boŋ kasha be nshɛ a deŋi bumo anishito. Baa nu asheŋ nɛ fee malga na kikɛ ama bumo alɛ maaŋ wora amo to be kukoŋwule gba. 33K maaŋ chɛr baaŋ nya kasogberge, fanɛ kananɛ fo kpele bumo kusoe na. Ndoŋ nɛ baaŋ pin fanɛ anebi ko ba bumo to.”
34Israɛl be benimu nɛ b la mbolpɔkpapo na be asheŋ
1Nɛ Enyɛnpe Ebɔrɛ na kaŋɛ ma le: 2“Dimɛdi pibi, Ezikɛl, Israɛl be bejuŋkparpoana na du fanɛ mbolpɔkpapo nɛ baa keni ma basa nɛ b du fanɛ mbolpɔ so nna. Ama mee sha fanɛ fo kaŋɛ Israɛl be bejuŋkparpo na fanɛ b maŋ wora n nyalɛ nɛ ekama e nu. Kaŋɛ bumo kusɔ nɛ ma Enyɛnpetale Ebɔrɛ na kaŋɛ fanɛ: Asheŋ maaŋ nyalɛ n sa menyi, Israɛl be mbolpɔkpapo ere! Menyi be amu nɛ menyee keni so nseŋ kplaŋ ma mbolpɔ so. 3Menyee nuu bumo be kenyipochu nna nsaa ta bumo be afuibi a lue asɔbuuso nseŋ naa mɔ bumo be belelabi a we, ama menyi alɛ maa keni bumo so nɛnɛ. 4Menyee maa keni bumo be bumo nɛ b maŋ kɔ eleŋ na so, ŋko a chɛ bumo nɛ baa lɔ na ŋko a wɔtɔ bumo nɛ b doro na be achuu to adur a kre amo ŋko a kuŋ bumo nɛ baa lar a yɔ mboŋ ko na a ba ŋko a fin bumo nɛ foe na. Men du nyaŋnyaŋ nna a tɔrɔ bumo. 5Ŋkpal mbolpɔ na ka maŋ kɔ ekpapo so, b pesaŋ to nna nɛ kupuŋ to be asɔbɔya lubi bee pɛ bumo a ji. 6Ma mbolpɔ ya kaa na abeegboŋ nɛ abeebi so nna. B daŋ pesaŋ to nna a wɔ durnya be kaplɛkama nɛ esa kikɛ malɛ daa maŋ keni n fin bumo.
7Amoso, menyi mbolpɔkpapoana na e nu kusɔ nɛ ma, Enyɛnpe Ebɔrɛ na bee kaŋɛ menyi. 8Nɛ men nu n sa ma, asheŋ beeŋ baa bɔ menyi so ŋkpal manɛ so ma e la Enyɛnpetale Ebɔrɛ nɛ e bee sa ŋkpa na. Kupuŋ to be asɔbɔya lubi pɛ ma mbolpɔ m mɔ n we ŋkpal esa kikɛ ka maa keni bumo so so. Ma mbolpɔkpapoana maŋ wora ania fanɛ baŋ fin mbolpɔ na. Bumo gbagba be amu so nɛ baa keni so, mannɛ ma mbolpɔ. 9Amoso, menyi mbolpɔkpapoana na e nu nfe. 10Ma, Enyɛnpetale Ebɔrɛ na yɛ ma nɛ menyi maŋ naa kɔ shɛŋ. Ma alɛ beeŋ suge ma mbolpɔ menyi be enɔ to nɛ menyi maaŋ naa la bumo be ekpapo a nya bumo a mɔ a we.
Mbolpɔkpapo lela na be asheŋ
11Ma, Enyɛnpetale Ebɔrɛ na e naa kaŋɛ menyi na fanɛ ŋ gbagba e naŋ fin ma mbolpɔ nsaa keni bumo so 12fanɛ kananɛ mbolpɔkpapoana bee keni bumo be mbolpɔ nɛ b daŋ pesaŋ to nɛ b naŋ ya bar bumo abar so na. Ma alɛ beeŋ bɛta bumo n shi mboŋ nɛ b pesaŋ to n yɔ kachɛ nɛ asheŋ daŋ maŋ nite nɛnɛ n sa bumo na kikɛ m ba. 13Meeŋ lara bumo efuli pɔtɛana so m ba gama bumo abar so nseŋ shin nɛ b bɛta m ba bumo gbagba be kasawule so. Ma alɛ beeŋ baa la bumo be ekpapo nseŋ shin nɛ b nya n ji nɛnɛ ashi Israɛl be abee nɛ eboŋana ase. 14Ade be kaman, meeŋ shin nɛ b nya n ji kayurwushi so ashi abeemase nɛ ataŋɛ to nɛ mboŋ kama nɛ ajibi lela wɔ ashi Israɛl be kasawule so kikɛ. 15Ŋ gbagba e naaŋ baa keni ma mbolpɔ so nseŋ fin ewushi be kakpa n sa bumo. Ma, Enyɛnpetale Ebɔrɛ e kaŋɛ na.
16Ma alɛ beeŋ fin bumo be bumo nɛ foe na nseŋ bɛta bumo nɛ yeŋ na m ba. Kumo be kaman nɛ ŋ kre bumo nɛ b doro na be achuu nseŋ chɛ bumo nɛ baa lɔ na. Ama bekama nɛ b ji n daŋ nsaa kɔ eleŋ na bre, meeŋ mur bumo, ŋkpal manɛ so, n la mbolpɔkpapo nɛ e bee wora kusɔ nɛ k daga nna.
17Naniere ma Enyɛnpetale Ebɔrɛ na bee kaŋɛ menyi nɛ men la ma mbolpɔ na nna fanɛ meeŋ keni menyi to m barga belela na ashi belubi na to nɛ mbolpɔ ashi mboe to. 18Menyi be beko ji ajibi lela nna ŋkukwe; nsaa chichi amo nɛ menyi maŋ ji so a wea shishɛr to! Menyeeŋ nuu nchu lela nna nseŋ gbar nchu nɛ menyi maaŋ nuu na to! 19Saŋɛ na so nɛ ma mbolpɔ nɛ b ka na e ji ajibi nɛ men chichi so na nseŋ nuu nchu nɛ men gbar to na.
20Amoso, naniere ma Enyɛnpetale Ebɔrɛ na bee kaŋɛ menyi nna fanɛ, meeŋ keni so m barga mbolpɔ nɛ b kɔ eleŋ na ashi bumo nɛ b maŋ kɔ eleŋ na to. 21Ŋkpal manɛ so, menyi bumo nɛ men kɔ eleŋ na bee ŋin bumo nɛ b maŋ kɔ eleŋ na nna a lar ekarso nsaa ta menyi be alambɛ a pur bumo a lar ma mbolpɔ to. 22Ama ma alɛ beeŋ mɔlga ma mbolpɔ nɛ menyi maaŋ naa kɔrfɛ bumo. Meeŋ keni bumo so nseŋ barga belela na ashi belubi na to. 23Ade kikɛ be kaman nɛ n sa bumo ewura nɛ e beeŋ baa du fanɛ ma kayɛrbi ewura Deevid nɛ e baa kpa bumo nsaa keni bumo so nɛnɛ. 24Saŋɛ na so nɛ ma Enyɛnpe Ebɔrɛ na e baa la bumo be Ebɔrɛ, nɛ ewura nɛ e du fanɛ ma kayɛrbi ewura Deevid na e baa la bumo be ejuŋkparpo. Ma, Enyɛnpe Ebɔrɛ e kaŋɛ na 25Ma nɛ bumo beeŋ wora kɔnɔkoŋwule be ŋkre nɛ k beeŋ bar bumo kayurwushi. Ma alɛ beeŋ ju kupuŋ to be asɔbɔya lubi na kikɛ kasawule na so, saŋɛ na so ma mbolpɔ maaŋ naa ŋana kufu.
26Ade be kaman, meeŋ nɛfa bumo nseŋ shin nɛ b baa wɔ ma kebee cheembi na ase nɛ n sa bumo bɔrɛchu lela jemanɛ nɛ k daga nsaa la nɛfa na. 27Saŋɛ na so nɛ ndibi na e sɔr nɛnɛ nɛ nsawule na kikɛ malɛ e wora adɔjibi. Kumo be kaman nɛ ekama e chena mo gbagba be kasawule so nɛ kayurwushi. Ŋ kaŋ tuge ŋgbɛlɛbi nɛ a kre ma basa na, nseŋ shin nɛ b nya bumo be amu ashi basa nɛ b pɛ bumo anya na be enɔ na nɛ baaŋ pin fanɛ ma e la Enyɛnpe Ebɔrɛ na. 28Loŋ be jemanɛ so, efuli pɔtɛana maaŋ naŋ tiŋ m ba kɔ n suge bumo be asɔbɔya, nɛ kupuŋ to be asɔ lubi gba maaŋ naŋ pɛ bumo n ji. Baaŋ chena kayurwushi so nna nɛ esa kama maa naa funti bumo. 29Ade kikɛ be kaman, meeŋ sa bumo kasawule lela nɛ akoŋ maaŋ naa wɔ kumo so. Efuli pɔtɛana be basa maaŋ naaŋ mushe bumo kikɛ. 30Aloŋ nɛ ekama beeŋ pin fanɛ ma e naa kuŋ Israɛl be basa nɛ b la ma basa na. Ma, Enyɛnpetale Ebɔrɛ e kaŋɛ na.”
31Kumo be kaman nɛ Enyɛnpetale Ebɔrɛ na kaŋɛ le: “Menyi, ma mbolpɔ, nɛ mee bela na, la ma basa nna nɛ ma alɛ la menyi be Ebɔrɛ.”
35Edɔm be kaplɛa so be kewuŋkaŋɛ be asheŋ
1Nɛ Enyɛnpe Ebɔrɛ na kaŋɛ ma le: 2“Dimɛdi pibi, Ezikɛl, malga ŋ gbiti Edɔm be kebee nɛ k yili n sa kumo be basa na. 3Kaŋɛ Edɔmebi kusɔ nɛ ma Enyɛnpetale Ebɔrɛ na bee kaŋɛ.
N yɛ ma nɛ menyi Edɔm be basa, maŋ naa kɔ shɛŋ!
Meeŋ shin nɛ menyi be efuli e ki kasawule fuloŋ a dese,
nɛ esa kikɛ maaŋ naa wɔ kumo so.
4Ma alɛ beeŋ naŋ shin nɛ menyi be ndegboŋ e ki alambure a dese.
Nɛ menyi be kasawule e ki kakpa nɛ ekama kini n lɛ.
Aloŋ nɛ menyeeŋ pin fanɛ ma e la Enyɛnpe Ebɔrɛ na.
5Ŋkpal manɛ so, dra dra kikɛ nɛ menyi Edɔm be basa ta Israɛl be basa ŋ ki men doŋana nseŋ kpal loŋ so n shin nɛ b wu ga jemanɛ nɛ b nya bumo be alubi be kasogberge na. 6Ŋ ka la Enyɛnpetale Ebɔrɛ nɛ e bee sa ŋkpa so luwu nɛ men maaŋ tiŋ ŋ gbelge e naaŋ ba menyi so. Men wora n jija ŋkpal basa be kamɔ so, amoso menyi alɛ gba beeŋ wu. 7Meeŋ shin nɛ Edɔm be kepreŋsawule e dese fuloŋ a maŋ kɔ tɔnɔ nseŋ shin nɛ esa kama nɛ e beeŋ bɔla kumo so n choŋ e wu. 8Ma alɛ beeŋ shin nɛ basa nɛ b wu kena to na e dese n sɔ kaplɛkama ashi abee so nɛ ataŋɛ to kikɛ. 9Saŋɛ na so nɛ menyi be efuli na e dese fuloŋ mbaanaayɔ, nɛ esa kikɛ maaŋ naa wɔ menyi be ndegboŋana to. Aloŋ e naaŋ shin nɛ men pin fanɛ ma e la Enyɛnpe Ebɔrɛ na.
10Hale ma Enyɛnpe Ebɔrɛ na ka daa la Juda nɛ Israɛl be Ebɔrɛ na gba, men daŋ kaŋɛ nna fanɛ bumo be efuliana be nsawule kikɛ la menyeya nna nseŋ daa sha keta amo ŋ ki menyeya. 11Amoso ma Enyɛnpetale Ebɔrɛ ka baa wɔ ŋkpa to ere bre, meeŋ ka menyi kukɔ ŋkpal agbo nɛ kukɔrkɔ nɛ yurkishi nɛ men kɔ a laŋɛ ma basa be kaplɛa so so, saŋɛ na so baŋ pin fanɛ kusɔ nɛ men wora bumo na so nɛ mee gberge menyi kusoe na. 12Kumo be kaman, nɛ men pin fanɛ ma Enyɛnpe Ebɔrɛ na daŋ nu men ka daa malga mmalga jiga a gbiti Israɛl be basa nsaa kaŋɛ fanɛ kasawule na dese jiga nna n sa menyi nɛ men ta ŋ ki menyeya. 13Ma alɛ naŋ nu mpuchi be mmalga nɛ men malga ŋ gbiti ma na gba.”
14Ade kikɛ be kaman, nɛ Enyɛnpe Ebɔrɛ na kaŋɛ: “Meeŋ shin nɛ men mur cheche a maaŋ naa la shɛŋ nɛ durnya kikɛ e ji eyur ŋkpal loŋ so, 15fanɛ kananɛ men ji eyur jemanɛ nɛ ma basa Israɛlebi na daŋ mur na. Edɔm be efuli nɛ kumo be nsawule kikɛ beeŋ mur cheche, a maaŋ naa la shɛŋ. Kumo be kaman nɛ ekama e pin fanɛ ma e la Enyɛnpe Ebɔrɛ na.”
36Ebɔrɛ be nɛfa ka ba Israɛl so be asheŋ
1Ndoŋ nna nɛ Enyɛnpe Ebɔrɛ na naŋ kaŋɛ le: “Dimɛdi pibi, Ezikɛl, kaŋɛ abee nɛ a wɔ Israɛl be efuli so na fanɛ a nu kubɔya nɛ ma, 2Enyɛnpetale Ebɔrɛ na kɔ n sa amo. Israɛl mo doŋana daŋ malga mmalga jiga ŋ kaŋɛ fanɛ, Naniere abee dra na ki bumo peya nna!
3Amoso bɔ kubɔya nɛ ma Enyɛnpetale Ebɔrɛ na bee kaŋɛ ere. Jemanɛ nɛ efuli nɛ a chena ŋ kulti Israɛl na kɔ n suge Israɛl be abee na, ekama na daŋ wora Israɛl eyurto nna. 4Amoso naniere kusɔ nɛ ma Enyɛnpetale Ebɔrɛ na bee kaŋɛ menyi abeegboŋ nɛ abeebi nɛ eboŋana nɛ ataŋɛ nɛ mboŋ nɛ a bure a dese nɛ ndegboŋ nɛ basa shile amo to nɛ efuliana nɛ a kulti menyi na ba muu amo to be asɔ n yɔ nseŋ wora menyi eyurto na kikɛ nde. 5Ma, Enyɛnpetale Ebɔrɛ na malga agbogboŋ so nna ŋ gbiti efuliana nɛ a kulti fo Israɛl be efuli na kikɛ, fɔŋfɔŋ Edɔm be efuli na. Ŋkpal manɛ so, bumo e daŋ ji eyur ga nseŋ daŋ sɔ ma kasawule nɛ kumo be asɔbɔya be ejikpa ŋ ki bumo peya.
6Amoso malga ŋ kaŋɛ Israɛl be efuli so be abeegboŋ nɛ abeebi nɛ eboŋana nɛ ataŋɛ kusɔ nɛ ma, Enyɛnpetale Ebɔrɛ na bee kaŋɛ kukɔrkɔ nɛ agbo so ŋkpal kananɛ efuliana na tege nseŋ wora bumo yeryerbi so. 7Ma, Enyɛnpetale Ebɔrɛ na bɔ ntaŋ fanɛ efuliana na beeŋ ji anishinyɔr. 8Ama ndibi nɛ a yil abee so ashi ma basa, Israɛlebi, be efuli so na beeŋ naŋ purge nseŋ sɔr asɔrso n sa bumo. K maaŋ chɛr baaŋ bɛta m ba epe. 9N nyi menyi Israɛlebi be asheŋ nɛ men be asheŋ tir n sa ma. Ma alɛ beeŋ shin nɛ men naaŋ dɔ menyi be adɔsawule so n duu adɔjibi. 10Kumo be kaman nɛ n shin nɛ Israɛl be basa e naŋ wora keshi n chena menyi be nsawule so nɛ basa e naŋ chena ndeana to nseŋ lɔŋɛ alambure na m pɔr. 11Ma alɛ beeŋ naŋ shin menyi be asɔbɔya kikɛ e salga n wora keshi nɛ men naaŋ chena kasawule na so fanɛ kananɛ men daŋ chena kumo so dra na. Menyeeŋ dii kedama ga a chɔ kananɛ men daa du na, saŋɛ na so nɛ menyeeŋ pin fanɛ ma e la Enyɛnpe Ebɔrɛ na. 12Ade kikɛ be kaman nɛ n shin nɛ ma basa Israɛlebi na e naŋ bɛta m ba chena bumo be nsawule so. Nsawule na beeŋ baa la bumo gbagba peya nɛ akoŋ malɛ maaŋ naŋ mɔ bumo be mbia.
13Ma, Enyɛnpetale Ebɔrɛ na yɛ: Kashenteŋ nɛ basa bee kaŋɛ fanɛ kasawule na maa wora ajibi nɛnɛ nsaa shin nɛ akoŋ bee mɔ kumo be basa. 14Ama yili jemanɛ ere a yɔ, k beeŋ baa wora ajibi nɛnɛ nɛ menyi maaŋ naŋ paŋ menyi be mbia. Ma Enyɛnpetale Ebɔrɛ na e kaŋɛ na. 15Kumo be kaman, menyi maaŋ naŋ bugi asoe a nu mmalga jiga nɛ efuliana na bee malga a gbiti menyi. Meni alɛ maaŋ naŋ keni n wu basa ka bee wora menyi eyurto. Kasawule na maaŋ naŋ shin nɛ men paŋ menyi be mbia. Ma, Enyɛnpetale Ebɔrɛ na, e kaŋɛ na.”
Israɛl be basa be ŋkpa popɔr be asheŋ
16Ndoŋ nna nɛ Enyɛnpe Ebɔrɛ na naŋ kaŋɛ ma le: 17“Dimɛdi pibi, Israɛlebi na ka daa wɔ bumo be kasawule so na, b daŋ bɔla bumo be kebaawɔtɔ nɛ asheŋ woraso so nna n jija kumo. Kananɛ eche nɛ e bee lar ntamaŋ maŋ walɛ so daŋkare be ekpa so na, nɛ bumo be kebaawɔtɔ na daa du n sa ma. 18Ndoŋ nna nɛ n nya agbo n wɔtɔ bumo ŋkpal kabasamɔ nɛ kagbirshuŋ nɛ b ta n jija kasawule na so, 19nseŋ pesaŋ bumo to n yɔ efuli pɔtɛana so. Bumo be kebaawɔtɔ nɛ asheŋ woraso so nɛ n daŋ ji bumo demu. 20Kaplɛkama malɛ nɛ b yɔ, b daa ŋaba ma ketre cheembi na nna; ŋkpal manɛ so, le nɛ efuli pɔtɛana be basa daa kaŋɛ: ‘Enyɛnpe Ebɔrɛ na be basa nna na. E tintiŋ bumo nna n lar bumo gbagba be kasawule so.’ 21Ndoŋ nna nɛ kusɔ nɛ efuli pɔtɛana be basa bee fɛ a laŋɛ ma kaplɛa so na tɔrɔ ma ga.
22Amoso kaŋɛ Israɛlebi na kubɔya nɛ ma, Enyɛnpetale Ebɔrɛ na kɔ nɛ sa bumo: Mannɛ menyi Israɛlebi so nɛ meeŋ wora kusɔ nɛ mee sha kewora ere, ama ma ketre cheembi nɛ men ŋaba efuli pɔtɛ kama nɛ men yɔ kumo so na so. 23Ŋ kaŋ lara kecheembiya nɛ k wɔ ma ketregboŋ nɛ men ŋaba ashi efuliana na so na ŋ ŋini bumo na nɛ baaŋ pin fanɛ ma e la Enyɛnpe Ebɔrɛ na. Ma, Enyɛnpetale Ebɔrɛ na e kaŋɛ, fanɛ men bɔla menyi so ŋ ŋini efuli pɔtɛana na fanɛ n du cheembi nna. 24Meeŋ lara menyi ashi efuli pɔtɛana kama to m ba epe menyi gbagba be kasawule so. 25Nɛ kebaadu fanɛ ŋ ka wora nchu lela ŋ ŋmenyaŋ menyi so nɛ men nyalɛ so ashi kagbirshuŋ nɛ kusɔ kama nɛ k shin nɛ men wora eyurpi na to. 26Ade be kaman, nɛ n lara menyi be ŋgbene kpakpaso fanɛ kejembu na nseŋ sa menyi ŋgbene popɔr nɛ a beeŋ shin nɛ men baa wora ma kasonu. 27Ma alɛ beeŋ ta ma kiyoyu n wɔtɔ menyi to nseŋ shin nɛ men bɛ ma mbraana nɛ keŋini kikɛ so kenishipereso. 28Saŋɛ na so nɛ men chena kasawule nɛ n ta n sa men nananyɛnana na so nsaa la ma basa nɛ ma alɛ e baa la menyi be Ebɔrɛ. 29Meeŋ kuŋ menyi ashi kusɔ kama nɛ k bee shin nɛ menyee wora eyurpi na to nseŋ shin nɛ menyi be ayu e wora nɛnɛ, saŋɛ na so akoŋ maaŋ naa wɔtɔ. 30Ma alɛ beeŋ naŋ shin nɛ menyi be ndibi sɔrso nɛ adɔjibi e foo, saŋɛ na so menyi maaŋ naŋ ji anishinyɔr ashi efuliana na so ŋkpal akoŋ so. 31Ade kikɛ be kaman, menyeeŋ nyiŋi menyi be asheŋ woraso lubi nɛ a shin nɛ men gbagba e kishi menyi be amu ŋkpal kusɔ nɛ men wora so. 32Kede be kaman nɛ Enyɛnpetale Ebɔrɛ na kaŋɛ le: Israɛlebi, mee sha nɛ men pin fanɛ mannɛ menyi so nɛ mee wora asheŋ ere, ama mee sha nna nɛ anishinyɔr nɛ nyɔmɔ e pɛ menyi ŋkpal asheŋ nɛ men wora na so.”
33Nɛ Enyɛnpetale Ebɔrɛ na naŋ kaŋɛ le: “Kachɛ nɛ meeŋ kpra menyi be alubi ashi menyi so na nɛ meeŋ naŋ shin nɛ men chena menyi be ndegboŋana to nseŋ lɔŋɛ alambure na m pɔr. 34Ekama nɛ e daŋ bɔla menyi be adɔana ase a choŋ daa wu fanɛ e ki kupuŋ nna a dese, ama meeŋ naŋ shin nɛ men lɔŋɛ amo so n dɔ. 35Nɛ ekama na e naŋ kaŋɛ fanɛ kasawule nɛ k daa la kudɔpuŋ a dese jiga na a kilgi a walɛ fanɛ Iden be Kudɔbi na. Kumo be kaman nɛ wu kananɛ ndeana nɛ a daŋ ki alambure a dese nɛ shɛŋ daa maŋ naa wɔ amo to na naŋ nya basa nɛ b pɔr egbalana ŋ kulti amo nsaa wɔ amo to na. 36Ndoŋ nna nɛ basa nɛ b wɔ efuliana nɛ a mata menyi nseŋ kraa wɔtɔ na e pin fanɛ ma Enyɛnpe Ebɔrɛ na e naa lɔŋɛ menyi be nde bureso a pɔr nsaa dɔ menyi be adɔpuŋ a du. Ma Enyɛnpe Ebɔrɛ na e nase kumo be kɔnɔ, ma alɛ beeŋ wora loŋ gbagba chap.”
37Ade kikɛ be kaman, nɛ Enyɛnpetale Ebɔrɛ na naŋ kaŋɛ le: “Meeŋ naŋ shin nɛ Israɛlebi na e kule ma kechɛto nɛ n shin nɛ b wora keshi n ti so fanɛ mbolpɔ na. 38Nɛ nde nɛ a bure a dese ere e naŋ bɔlɔ basa fanɛ kananɛ mbolpɔ daŋ bɔlɔ Jerusalɛm to nɛ b daa ta amo a lara esarga nchɛgboŋachɛ na. Ndoŋ nɛ baaŋ pin fanɛ ma e la Enyɛnpe Ebɔrɛ na.”
37Ketaŋɛ nɛ awibi wɔlso dese to na be asheŋ
1Saŋko ka fo nɛ Enyɛnpe Ebɔrɛ na be eleŋgboŋ na gbelge ma so nɛ mbe Kiyoyu ta ma ŋ gbelge to n yɔ ketaŋɛ ko to nɛ awibi sɔ kaplɛkama a dese. 2Ndoŋ nna nɛ Enyɛnpe Ebɔrɛ na keta ma n nite ketaŋɛ na to nɛ n wu fanɛ awibi na daa shi nseŋ daŋ wɔl n fuli a dese. 3Nɛ e bishi ma: “Dimɛdi pibi, Ezikɛl, awibi ere beeŋ naŋ tiŋ m ba ŋkpa to a?”
Nɛ ma alɛ kaŋɛ: “Enyɛnpetale Ebɔrɛ, fo nawule e naŋ tiŋ m pin kumo be loŋ!”
4Ndoŋ nna nɛ e kaŋɛ: “Malga n sa awibi nɛ a wɔl n fuli na nseŋ kaŋɛ amo nɛ e nu Enyɛnpe Ebɔrɛ na be kamalga. 5Kaŋɛ amo fanɛ le nɛ ma Enyɛnpetale Ebɔrɛ na kaŋɛ: Meeŋ shin nɛ efute e ba menyi to nɛ men naŋ nya ŋkpa. 6Ma alɛ beeŋ sa menyi achin nɛ eblaŋ, nseŋ shin nɛ kawɔl e ba buu menyi so. Kumo be kaman nɛ n sa menyi efute nɛ men nya ŋkpa. Ndoŋ nɛ menyeeŋ pin fanɛ ma e la Enyɛnpe Ebɔrɛ na.”
7Ndoŋ nna nɛ m malga n sa awibi na fanɛ kananɛ Enyɛnpe Ebɔrɛ kaŋɛ na. Ŋ kraa malga nna nseŋ nu egbri ko fanɛ basa ka bee kpla enɔ na nɛ awibi kɔŋkɔŋ na fara a chɛ abar so. 8Ŋ kraa yil a keni amo nna nɛ achin nɛ eblaŋ nɛ kawɔl ba buu amo so. Ama ŋkpa daa maŋ wɔ amo to.
9Ndoŋ nna nɛ Ebɔrɛ naŋ kaŋɛ ma: “Dimɛdi pibi, malga n sa afu. Kaŋɛ afu na fanɛ Enyɛnpetale Ebɔrɛ na yɛ k shi kaba kama so m ba luri eyurana nɛ a la bubuni a dese ere to nɛ e nya ŋkpa.”
10Ŋ ka baŋ kaŋɛ loŋ, nɛ afu ber m ba luri eyurana na to nɛ a nya ŋkpa ŋ koso n yili. B daa la benapo be katuŋ gboŋgboŋi ko nna.
11Ade kikɛ be kaman, nɛ Enyɛnpe Ebɔrɛ na naŋ kaŋɛ ma: “Dimɛdi pibi, Israɛl be basa du fanɛ awibi kɔŋkɔŋ ere nna. Baa fubel nna a kaŋɛ fanɛ b wɔlso nna nsaa maa kɔ echefoso be tama kikɛ kebaawɔtɔ to. 12Amoso kaŋɛ bumo fanɛ ma, Enyɛnpetale Ebɔrɛ na bee sha kebugi bumo be nchaŋana nna nɛ b lar m bɛta m ba Israɛl be kasawule so. 13Ŋ kaŋ wora loŋ, baaŋ pin fanɛ ma e la Enyɛnpe Ebɔrɛ na. 14Ma kiyoyu beeŋ sa bumo efute nɛ b nya ŋkpa m ba kaa wɔ bumo gbagba be kasawule so. Ndoŋ nɛ baaŋ pin fanɛ ma e la Enyɛnpe Ebɔrɛ nɛ n nase kɔnɔ fanɛ meeŋ wora loŋ na. Ma, Enyɛnpe Ebɔrɛ na e kaŋɛ na.”
Juda nɛ Israɛl ka naŋ ki kuwurji koŋwule be asheŋ
15Ade kikɛ be kaman, nɛ Enyɛnpe Ebɔrɛ na naŋ kaŋɛ ma. 16E yɛ: “Dimɛdi pibi, fin kedibi nseŋ sibɛ le kumo so, ‘Juda be kuwurji be asheŋ.’ Kumo be kaman nɛ fo fin kedibi nyɔsopo nseŋ sibɛ le kumo alɛ gba so, ‘Israɛl be kuwurji be asheŋ.’ 17Kede be kaman, nɛ fo ta ndibi anyɔ na be nnɔso n chɔga abar so ŋ keta enɔ to nɛ k wora fanɛ a ka la kedibi koŋwule na. 18Fo basa kaŋ bishi fo kusɔ nɛ k bee ŋini, 19feeŋ tiŋ ŋ kaŋɛ bumo fanɛ ma, Enyɛnpetale Ebɔrɛ na bee sha keta kedibi nɛ k yili n sa Israɛl nna n chuge kumo nɛ k yili n sa Juda na so nna, saŋɛ na so amo anyɔ na beeŋ ki kedibi koŋwule a wɔ ma enɔ to.
20To, feeŋ keta ndibi anyɔ na fo enɔ to nɛ basa na e wu amo. 21Ndoŋ nna nɛ fo kaŋɛ bumo fanɛ ma, Enyɛnpetale Ebɔrɛ na bee sha kelara ma basa kikɛ ashi efuliana nɛ b pesaŋ to n yɔ to na n shin nɛ b ba abar so ashi bumo gbagba be kasawule so. 22Ma alɛ beeŋ shin nɛ b baa la basa koŋwule ashi Israɛl be efuli so. Baaŋ baa kɔ ewura koŋwule nɛ e beeŋ baa ji bumo so kuwura a maaŋ naŋ barga to a wɔtɔ. 23Bumo alɛ maaŋ naŋ bɔla kagbirshuŋ so n jija bumo be amu ŋko n wora alubi ŋ gbiti bumo be amu. Ma alɛ beeŋ sɔ bumo n yige ashi ekpa kama so nɛ baa bɔla so a wora alubi a debɔr ma na, nseŋ fɔr bumo so, nɛ b baa la ma basa, nɛ ma alɛ e baa la bumo be Ebɔrɛ. 24Ewura nɛ e du fanɛ ma kayɛrbi Deevid e naaŋ baa la bumo be ewura nɛ bumo kikɛ e wora kɔnɔkoŋwule a wɔ mbe kaseto nseŋ ta kashenteŋji a bɛ ma mbraana so. 25Kasawule nɛ n ta n sa ma kayɛrbi Jeekɔb na so nɛ baaŋ chena, kakpa nɛ bumo nanaana daŋ chena na. Bumo nɛ bumo be mbia nɛ kaman to ebi kikɛ beeŋ chena kumo so hale mbaanaayɔ, nɛ ewura nɛ e du fanɛ ma kayɛrbi Deevid na e baa ji bumo so kuwura. 26Ade kikɛ be kaman, ma nɛ bumo beeŋ luri kɔnɔkoŋwule be ŋkre to a ŋini kayurwushi nɛ baaŋ baa wɔtɔ to hale mbaanaayɔ. Ma alɛ beeŋ shin nɛ b baa wɔtɔ nseŋ wora keshi n ti so nɛ ma bɔrɛlambu na e baa wɔ bumo to mbaanaayɔ. 27Ma nɛ bumo e naa baa wɔ ndoŋ, nɛ m baa la bumo be Ebɔrɛ nɛ bumo alɛ e baa la ma basa. 28Jemanɛ nɛ meeŋ yili ma bɔrɛlambu bumo to mbaanaayɔ na, nɛ efuliana na beeŋ pin fanɛ ma Enyɛnpe Ebɔrɛ na e lara Israɛlebi na ŋ ki ma basa.”
38Gɔg be kaplɛa so be kewuŋkaŋɛ be asheŋ
1Nɛ Enyɛnpe Ebɔrɛ na naŋ kaŋɛ ma le: 2“Dimɛdi pibi, Ezikɛl, malga ŋ gbiti Gɔg nɛ e la Meshɛk nɛ Tubal be efuliana so be ewurgboŋ ashi Magɔg be kasawule so na. Malga ŋ gbiti mo 3nseŋ kaŋɛ mo fanɛ ma, Enyɛnpetale Ebɔrɛ na nɛ mo maŋ naa kɔ shɛŋ. 4Ma alɛ beeŋ shin nɛ e maaŋ naa kɔ eleŋ, nseŋ ta edariwa ŋ kɔl mbe ŋgbuŋ to ŋ gberge mo nɛ mbe benapo damta nɛ baa dii egbaŋɛ nsaa kɔ akɔsɔ damta, nɛ bumo be ekama malɛ kɔ kebɛlso be kusɔ kuŋkumuso nɛ tokobi enɔana to na kikɛ n yɔ. 5Pɛshiya nɛ Kush nɛ Libiya be efuliana so be benapo ti fo benapo na so nɛ bumo kikɛ malɛ kɔ abɛlso be asɔ kuŋamuso nɛ abɛlso be akpaŋwuro. 6Gɔma nɛ Bɛf Togaama be nsawule so ebi ashi kelargato be esoso na nɛ bumo be benapo kikɛ gba ti bumo so. Efuli damtaana be basa gba ti bumo so. 7To, kaŋɛ mo fanɛ mo nɛ mbe benapo e bela ase n wora shiriya n ya kɔ kena, 8ŋkpal manɛ so, nfɛ damta be kaman meeŋ kaŋɛ mo nɛ e ya kɔ m pɔɔ efuli ko nɛ kumo be basa daŋ gama abar n shi efuli pɔtɛ damtaana so m ba chena a maa ŋana kena na. E beeŋ pɔ Israɛl be basa nɛ b chena kayurwushi so ashi abee nɛ b daŋ shile ŋ ka amo n chɛr na so. 9Gɔg nɛ mbe benapo nɛ efuli damtaana nɛ b ti so na beeŋ kre m ba Israɛlebi na so fanɛ bɔrɛfu m ba buu bumo so fanɛ kuwɔlpa.”
10Kusɔ nɛ Enyɛnpetale Ebɔrɛ na bee kaŋɛ Gɔg nde: “Jemanɛ na kaŋ fo, feeŋ fara a fɛ ŋkre lubi. 11Fo alɛ beeŋ baa sha kekɔ m pɔɔ efuli nɛ kumo be basa chena kayurwushi so ashi nde nɛ b maŋ pɔr egbalana a kuŋ amo na so. 12Kumo be kaman, nɛ fo kɔ n suge basa nɛ b wɔ ndegboŋana nɛ a daŋ bure a dese na be asɔ. B la basa nɛ b shi efuli pɔtɛana so nna m ba abar nsaa kɔ asɔbɔya nɛ asɔ nsaa wɔ durnya be kakpa k bee bɔlɔ kenishi ga na naniere. 13Saŋɛ na so nɛ Sheba nɛ Dedan be efuliana so be basa nɛ Speen be efuli so be ndeana to be eyawujipo e bishi fo fanɛ fo gama fo benapo abar so nna nɛ fo kɔ n suge asɔ fanɛ shuwa nɛ gbiti nɛ asɔbɔya kikɛ n yɔ a?
14Amoso nɛ Enyɛnpetale Ebɔrɛ na shuŋi ma fanɛ n ya kaŋɛ Gɔg fanɛ nɛ e wu mbe basa Israɛlebi ka wɔ kayurwushi to, e beeŋ koso 15kakpa nɛ e wɔ ashi kelargato be esoso wɔfɔ wɔfɔ na n juŋkpar benapo lempo damta nɛ bumo kikɛ dii egbaŋɛ 16ŋ kre m ba buu bumo so fanɛ bɔrɛfugboŋ ka ba kasawule na so na. Jemanɛ na kaŋ fo, meeŋ shin nɛ men kɔ m pɔɔ ma kasawule so nɛ efuliana na e pin esa nɛ e la ma ashi kusɔ nɛ meeŋ bɔla menyi so n wora a ŋini ma kecheembiya na.”
17Nɛ Enyɛnpetale Ebɔrɛ na naŋ kaŋɛ le: “Fo asheŋ nɛ n daa malga dra dra jemanɛ nɛ n daŋ bɔla ma nyɛrbi, Israɛl be anebiana na so na, fanɛ kachako bee ba nɛ n shin nɛ esa ko e ba kɔ Israɛlebi kena na. 18Kusɔ nɛ k beeŋ wora kachɛ nɛ Gɔg beeŋ ba kɔ Israɛlebi kena na beeŋ shin nɛ ma kagbene e kaa ga, 19nɛ n nya agbo n shin nɛ kasawule e gbuŋgbuŋ eleŋ so ashi Israɛl be efuli so. 20Saŋɛ na so nɛ kufu e pɛ ekɔrɔtɔ nɛ mbuibi, nɛ asɔbɔya wurbi nɛ agboŋi kikɛ nɛ dimɛdi kama nɛ a wɔ durnya to so nɛ b baa chicha. Abeegboŋ nɛ abeebi kikɛ beeŋ bu n tɔr nɛ egbal kama e bure n tɔr kasawule. 21Ma alɛ beeŋ shin nɛ etɔrɔ be yiri yiri e ta kufu n lɛ Gɔg nɛ mbe benapo so nɛ b kilgi a mɔ abar. Ma, Enyɛnpetale Ebɔrɛ na e kaŋɛ na. 22Kumo be kaman nɛ n ta alɔ nɛ luwu ŋ gberge mo kusoe, nseŋ shin nɛ bɔrɛfu nɛ abɔrɛjembubi nɛ edɛ nɛ a bee suse fanɛ kejembu nɛ baa tre jɛrbi na e chulgi n wurge mo nɛ mbe benapo nɛ efuli damtaana nɛ b ti mo so na so. 23Kananɛ meeŋ ŋini efuliana na kikɛ ma keshi nɛ kecheembiya nna na. Aloŋ nɛ baaŋ pin fanɛ ma e la Enyɛnpe Ebɔrɛ na.”
39Gɔg ka kɔ n tɔr be asheŋ
1Ade kikɛ be kaman, nɛ Enyɛnpetale Ebɔrɛ na naŋ kaŋɛ le: “Dimɛdi pibi, Ezikɛl, malga ŋ gbiti Gɔg nɛ e la Meshɛk nɛ Tubal be efuliana be ewurgboŋ na nseŋ kaŋɛ mo fanɛ ma nɛ mo maŋ naa kɔ shɛŋ. 2Ma alɛ beeŋ shin nɛ e kilgi anishito n shoŋi kakpa pɔtɛ nɛ n juŋkpar mo n shi kelargato be esoso wɔfɔ wɔfɔ hale nɛ e ba fo Israɛl be abee so. 3Saŋɛ na so nɛ ŋ ŋmɛa mbe keta nɛ atanyembi ashi mbe enɔjiso nɛ bena to n lɛ. 4Kumo be kaman nɛ Gɔg nɛ mbe benapo nɛ mbe bechɛtopo kikɛ e tɔr n wu ashi Israɛl be abee so nɛ n shin nɛ b ki kusɔ jiso n sa mbuibi nɛ kupuŋ to be asɔbɔya. 5Bumo be beko malɛ gba beeŋ wu n dese kupuŋ to. Ma, Enyɛnpetale Ebɔrɛ na e kaŋɛ na. 6Ade be kaman, nɛ n shin nɛ edɛ e chɔɔ Magɔg be kasawule nɛ teku ase be nsawule nɛ basa chena amo so kayurwushi so na, nɛ ekama e pin fanɛ ma e la Enyɛnpe Ebɔrɛ na. 7Ma alɛ beeŋ shin nɛ ma basa Israɛlebi e pin ma ketre cheembi na, a maaŋ naa keni kumo jiga kikɛ. Ndoŋ nɛ efuliana na beeŋ pin fanɛ ma, Enyɛnpe Ebɔrɛ na e la Israɛl be Ebɔrɛ cheembi na.”
8Ndoŋ nna nɛ Enyɛnpetale Ebɔrɛ na naŋ kaŋɛ le: “Kachɛ nɛ m malga kumo be asheŋ ere beeŋ ba, fanɛ kananɛ n nase kumo be kɔnɔ na; 9Nɛ basa nɛ b wɔ Israɛl be ndegboŋ to na e lar n ya tise n tise bumo doŋana be akɔsɔ nɛ baaŋ yige n lɛ na m ba wɔtɔ edɛ. Baaŋ ta abɛlso be asɔ kuŋamuso nɛ ata nɛ atanyembi nɛ akpa nɛ mprɛ m wɔtɔ edɛ to. Nfɛ ashunu nɛ baa chɔɔ amo. 10B maaŋ naŋ yɔ kupuŋ to n ya fin ndibi puga edɛ ŋko ŋ ku ndibi kiyi to kikɛ, ŋkpal manɛ so akɔsɔ nɛ b shile ŋ ka na ba ako beeŋ ndibi puga edɛ n sa bumo. Bumo alɛ beeŋ suge basa nɛ b daŋ suge bumo be asɔ na be asɔ.” Ma, Enyɛnpetale Ebɔrɛ na e kaŋɛ na.
Gɔg be kepuli be asheŋ
11Ade kikɛ be kaman nɛ Enyɛnpe Ebɔrɛ na naŋ kaŋɛ le: “Jemanɛ nɛ asheŋ ere kikɛ beeŋ wora na, meeŋ shin nɛ b puli Gɔg ashi Israɛl be kakpa nɛ baa tre Benitepo be Ketaŋɛ to nɛ k dese Teku Wuso na be epeŋilarkpa be kaba so na. Ndoŋ nɛ baaŋ puli Gɔg nɛ mbe benapo kikɛ, saŋɛ na so baaŋ baa tre ketaŋɛ na Gɔg be benapo be Ketaŋɛ. 12Afɔl ashunu nɛ Israɛlebi na beeŋ ta m puli bubuni na kikɛ pɔɛŋ nɛ kasawule na e naŋ nyalɛ so. 13Ekama nɛ e wɔ kasawule na so beeŋ chɛ to m puli bumo, nɛ kumo be loŋ e shin nɛ b nya kemaŋkura kachɛ nɛ meeŋ kɔ m pɔɔ so na. Ma, Enyɛnpetale Ebɔrɛ na e kaŋɛ na. 14Afɔl ashunu na be kaman nɛ, b lara benyɛn ko nɛ b nite efuli na kikɛ so n ya keni n fin bubuni kama nɛ baaŋ ka a dese mboŋ ko na m puli, saŋɛ na so kasawule na beeŋ naŋ nyalɛ so. 15Kaplɛkama nɛ benyɛn na beeŋ wu dimɛdi be kuwibi ka dese baaŋ dulgi ndoŋ, saŋɛ na so bechaŋkurpoana na beeŋ ba ta kumo n ya puli ashi Gɔg be benapo be Ketaŋɛ na to 16m mata kade nɛ baa tre Gɔg be Benapo na. Kumo be kaman, nɛ kasawule na e naŋ nyalɛ so.”
17Ndoŋ nna nɛ Enyɛnpetale Ebɔrɛ na naŋ kaŋɛ ma le: “Dimɛdi pibi, tre mbuibi nɛ kupuŋ to be asɔbɔya kikɛ nɛ b shi kaplɛkama m ba ji sarga nɛ mee wora a sa bumo na. K beeŋ baa la kejigboŋ nna ashi Israɛl be abee so, nɛ b we eblaŋ nseŋ nuu ŋklaŋ ndoŋ. 18Benapo be eblaŋ nɛ baaŋ we nseŋ nuu durnya to be bewurjipo be ŋklaŋ. Kananɛ baa mɔ ekpakpa ŋko mbolpɔ fɔlbi ŋko mboe ŋko egbolu danso na nɛ baaŋ mɔ benapo na nɛ bewurjipo na. 19Jemanɛ nɛ meeŋ mɔ basa ere fanɛ sarga be asɔbɔya na, mbuibi nɛ asɔbɔya beeŋ ji nfɔ kanaŋkama nɛ baaŋ tiŋ nseŋ nuu ŋklaŋ hale nɛ a boo bumo. 20Ndoŋ beeŋ ki fanɛ ma ejikpa nɛ b we egbaŋɛ nɛ bumo be bediipo nɛ basa gboŋ nɛ benapo be yiri yiri be eblaŋ m mɔɛ m baŋ bumo be amu so.”
Israɛl be efuli ka naaŋ laŋɛ n yili be asheŋ
21Amo kikɛ be kaman, nɛ Enyɛnpe Ebɔrɛ na naŋ kaŋɛ le: “Meeŋ shin nɛ efuliana na e wu ma kemaŋkura nɛ ŋ ŋini bumo kananɛ mee wora asheŋ nɛ ŋ ŋkre ma eleŋ to na. 22Yili loŋ be kachɛ na a yɔ Israɛlebi na beeŋ pin fanɛ ma, Enyɛnpe Ebɔrɛ na e la bumo be Ebɔrɛ. 23Kumo be kaman, nɛ efuliana na e pin fanɛ Israɛlebi na daŋ yɔ kenyaya to nna ŋkpal bumo be alubi nɛ b wora n da ma so na so. N daŋ lar bumo kaman nseŋ shin nɛ bumo doŋana kɔ bumo kena m mɔ bumo. 24Kusɔ nɛ k daga bumo nɛ n shin nɛ b nya na. Bumo be asheŋ lubi nɛ amu kpakpaso so nɛ n daŋ pal kaman n sa bumo na.”
25Ade ere malɛ kikɛ be kaman, nɛ Enyɛnpetale Ebɔrɛ na naŋ kaŋɛ le: “Ama naniere bre meeŋ wu Jeekɔb be kaman to ebi nɛ b la Israɛl be basa na kuwɔr nseŋ shin nɛ b naŋ dii dama. Ma alɛ beeŋ kuŋ ma ketre cheembi na. 26B kaŋ ba chena bumo gbagba be kasawule so kayurwushi so nɛ esa kikɛ maŋ naa funti bumo na, baaŋ teŋ bumo be anishinyɔr nɛ b daŋ ji ŋkpal b ka daŋ debɔr ma na so. 27Efuli damtaana beeŋ wu kananɛ meeŋ lara ma basa, Israɛlebi na ashi mboŋ nɛ bumo doŋana yɛr bumo na m ba nseŋ wu fanɛ n du cheembi nna. 28Saŋɛ na so nɛ ma basa e pin fanɛ ma, Enyɛnpe Ebɔrɛ na e la bumo be Ebɔrɛ, ŋkpal manɛ so, n daŋ yɛr bumo kenyaya to nna nseŋ naŋ gama bumo abar so m ba bumo gbagba be kasawule so, hale bumo be ekoŋwule gba maŋ shir ndoŋ. 29Ma alɛ maaŋ naaŋ lar Israɛl be basa na kaman kikɛ, ŋkpal manɛ so, meeŋ ta ma kiyoyu n wɔtɔ bumo to. Ma, Enyɛnpetale Ebɔrɛ na e kaŋɛ na.”
40B ka ta Ezikɛl n yɔ Jerusalɛm be asheŋ
1B ka pɛ anyi be beko nɛ ewura Jehowachin kenya n tintiŋ anyi n yɔ Babilɔn be efuli so na be kafɛ adunyɔ nɛ anu nɛ Babilɔnebi ka kɔ n suge Jerusalɛm na be kafɛ kuduanasopo to be kufɔl juŋkparso na be kachɛ kudusopo na nɛ Enyɛnpe Ebɔrɛ na be eleŋgboŋ gbelge ma so nɛ e keta ma n yɔ Jerusalɛm. 2Ndoŋ nna nɛ ŋ ku bɔrɛdare n wu fanɛ Ebɔrɛ ka keta ma n yɔ Israɛl be kasawule so n ya yili kebee jeŋgreŋ ko so nɛ ŋ keni kelargato be kaseto be kaba so n wu nwu damta ko nɛ a duli fanɛ kadegboŋ na. 3Nɛ Enyɛnpe Ebɔrɛ na firgi ma n taga amo to nɛ wu esa ko nɛ e bee nyɛkpɛ fanɛ b ka fifɛa danyaŋ so na, nɛ e kɔ wajɛchɛbi be kusɔ nɛ baa ta a karga asɔ be nteŋ nɛ kekpabi nɛ b kɔ a karga asɔ na mbe enɔ to nsaa yil kabunagboŋ ase ashi bɔrɛdare na to.
4Kumo be kaman nɛ kanyɛn na kaŋɛ ma le: “Dimɛdi pibi, bugi anishi nɛ asoe ŋ keni nseŋ nu kusɔ nɛ mee sha keŋini fo ere nɛnɛ, ŋkpal manɛ so, loŋ so nɛ m bar fo nfe. Feeŋ kaŋɛ Israɛl be basa na kusɔ kama nɛ fo wu.”
Epeŋilarkpa be kabunagboŋ na be asheŋ
5Kusɔ nɛ n daŋ wu e la bɔrɛlambu na, nɛ egbal kulti kumo n wɔtɔ. Ndoŋ nna nɛ kanyɛn na ta mbe kekpabi nɛ b kɔ a karga asɔ nɛ kumo be nteŋ sa fanɛ ayadra kudu na ŋ karga egbal na. Egbal na be jeŋgreŋ nɛ ndanto kikɛ daa sa fanɛ ayadra kudu nna. 6Kumo be kaman, nɛ e yɔ kabunagboŋ nɛ k bee shoŋi epeŋilarkpa na nseŋ ya dii ketemprembi na n yɔ kumo be awɔlto n ya karga kabuna na, nɛ kumo be jeŋgreŋ sa fanɛ ayadra kudu. 7Kedɛdɛ ko daa wɔ kabunagboŋ na be anishito nɛ kumo be kaba kama so daa kɔ ebu asa nɛ baa tre amo bekumpo be ebuana. Ebuana na be mba ana na be kekama daa sa fanɛ ayadra kudu nna nɛ kedɛdɛ na malɛ daŋ dese n ya fo kabuna to be ebu ko nɛ k kilgi n shoŋi bɔrɛlambu na. 8-9Ndoŋ nna nɛ kanyɛn na karga ebu nɛ k kilgi n shoŋi bɔrɛlambu ere nseŋ wu fanɛ yili kumo be kabuna to n ya fo epunto be egbal na sa fanɛ ayadra kuduana nna. Naŋ yili kabuna na to n ya fo kumo be akel to be egbalana na malɛ be kekama sa fanɛ ayadra ana nna. 10Bekumpo be ebuana nɛ a wɔ kedɛdɛ na be mba anyɔ na kikɛ daa sasa nna, nɛ egbalana nɛ a daa barga amo to na malɛ gba be ndanto daa sasa.
11Kumo be kaman, nɛ kanyɛn na naŋ karga kedɛdɛ na be mparto nɛ kumo kikɛ koso ayadra adunyɔ nɛ anyɔ, ama yili kabuna ko n ya fo kenyɔsopo daa sa fanɛ ayadra kuduashe nna. 12Egbal shiimbi nɛ kumo be jeŋgreŋ nɛ pentren kikɛ ka gbrɛ nɛ e fo ayadra anyɔ daa wɔ bekumpo be ebuana na be kekama be anishito nna. Bekumpo be ebuana na be kekama be nteŋ to nɛ mparto kikɛ daa la ayadra kudu nna. 13Ndoŋ nna nɛ kanyɛn na yili ebu ko be kaman to be egbal ŋ karga m bɔla kedɛdɛ na to m ba choŋ ebu nyɔsopo be kaman to be egbal nɛ k koso fanɛ ayadra adena nɛ anyɔ. 14Kumo be kaman nɛ e naŋ karga ebu nɛ k wɔ kedɛdɛ na be lalaloge to, nɛ baa bɔla kumo to a lar kelɔnɛ so na nseŋ wu fanɛ kumo be mparto daa sa fanɛ ayadra adesa nɛ ana nna. 15To, yili kedɛdɛ na be kabuna to be egbal be kaman to n ya fo ebu nɛ k wɔ kedɛdɛ na be lalaloge to na be nteŋ to kikɛ daa sa fanɛ ayadra aduburwa nɛ ana nna. 16Etokuro wurbi daa wɔ egbal asa nɛ a wɔ bekumpo be ebuana to na nna. Amo alɛ baa du fanɛ amo nɛ a wɔ kabuna to be ebu na to na nna. B daŋ wora abii be ndibi be nduli nna n deŋi kedɛdɛ na be epunto be egbalana so.
Kowushina be kelɔnɛ na be asheŋ
17Ade kikɛ be kaman, nɛ kanyɛn na naŋ keta ma m bɔla kedɛdɛ na to n yɔ bɔrɛlambu na be kowushina be kelɔnɛ na so. Ebu adesa e wɔ kowushina be egbal na to nɛ b ta ajembu n yuu n dulgi kakpa nɛ baa nite na 18n chambɔ kelɔnɛ na kikɛ. Kowushina be kelɔnɛ ere daa wɔ kaseto a chɔ epunto be kelɔnɛ na nna.
19Ndoŋ nna nɛ kanyɛn na yili kowushina be kelɔnɛ na be kabuna to ŋ karga n ya fo epunto be kelɔnɛ na be kabuna to nɛ k koso fanɛ ayadra kalfa nɛ adeshe nɛ aburwa.
Kelargato be esoso be kabunagboŋ na be asheŋ
20Kumo be kaman nɛ kanyɛn na naŋ karga kelargato be esoso be kabunagboŋ nɛ k bee bugi a lar kowushina be kelɔnɛ so na. 21Kabunagboŋ ere gba be kedɛdɛ daa kɔ bekumpo be ebu asa kumo be kaba kama so nna. Kanyɛn na ka karga ebuana ere nɛ egbalana nɛ a barga amo to na nɛ kabuna to be ebu na, amo nɛ amo nɛ a wɔ epeŋilarkpa be kabunagboŋ ase na kikɛ daa sasa nna. 22Kelargato be esoso be kabuna to be ebu na nɛ etokuro na nɛ abii be ndibi be nduli nɛ b wora n deŋi egbalana so na kikɛ daa du fanɛ amo nɛ a wɔ epeŋilarkpa be kabunagboŋ ase na nna. Kabuna to be ebu na bee shoŋi bɔrɛlambu na be kelɔnɛ na nna nɛ baa dii atemprembi ashunu a yɔ kumo to. 23Kabuna ko daa wɔ kelɔnɛ na be kelargato be esoso be kaba so nɛ baa bɔla kumo to a yɔ epunto be kelɔnɛ na so, fanɛ kananɛ kuko daa wɔ epeŋilarkpa be kaba so na. Nɛ kanyɛn na yili kowushina be kabuna na ŋ karga n ya fo epunto be kabuna na ase nɛ kekoso fanɛ ayadra kalfa nɛ adeshe nɛ aburwa.
Kelargato be kaseto be kabunagboŋ na be asheŋ
24Ade be kaman, nɛ kanyɛn na naŋ ta ma n yɔ kelargato be kaseto na, nɛ n ya wu kabunagboŋ ko gba ndoŋ. Ndoŋ nna nɛ e karga kumo be epunto be egbalana na, nɛ kabuna to be ebu na, nɛ amo nɛ amo nɛ a wɔ mbunagboŋ anyɔ na ase na kikɛ sasa. 25Kananɛ ebuana nɛ a wɔ mbunagboŋ anyɔ na ase na kɔ etokuro na nɛ ade gba kɔ. Kabunagboŋ ere be nteŋ to daa sa fanɛ ayadra aduburwa nɛ ana nna nɛ kumo be mparto malɛ daa sa fanɛ ayadra adena nɛ anyɔ. 26Atemprembi ashunu nɛ baa dii a yɔ kabunagboŋ ere ase. Ebu nɛ k wɔ kumo be kabuna to ashi kumo be lalaloge to na malɛ kilgi anishito n shoŋi bɔrɛlambu na be kelɔnɛ so nna. B daŋ wora abii be ndibi be nduli n deŋi kedɛdɛ na be epunto be egbalana na so nna. 27Nfe gba daa kɔ kabuna a laŋɛ kelargato be kaseto be kaba so nna nɛ k bee bugi a yɔ epunto be kelɔnɛ na so. Ndoŋ nna nɛ kanyɛn na yili kowushina be kabuna na ŋ karga n ya fo epunto be kabuna na ase, nɛ k sa fanɛ ayadra kalfa nɛ adeshe nɛ aburwa.
Epun to be kelɔnɛ na be mbunagboŋ na be asheŋ
28Ade kikɛ be kaman, nɛ kanyɛn na naŋ keta ma m bɔla kelargato be kaseto be kabunagboŋ na to n luri epunto be kelɔnɛ na to nseŋ ya karga kabunagboŋ na. Kumo nɛ kowushina be kabunagboŋ na kikɛ sasa nna. 29-30Kumo be bekumpo be ebuana nɛ kabuna to be ebu na nɛ egbalana nɛ a bee barga ebuana na to na kikɛ daa du fanɛ amo nɛ a wɔ mbunagboŋ nɛ a ka ase na nna. Ebuana na gba daa kɔ etokuro nna. Kabunagboŋ ere gba be nteŋ daa la fanɛ ayadra aduburwa nɛ ana nna nɛ kumo be mparto malɛ daa la fanɛ ayadra adena nɛ anyɔ. 31Ebu nɛ k wɔ kumo be kabuna to na daŋ kilgi anishito n shoŋi kowushina be kelɔnɛ na nna. Atemprembi aburwa nɛ baa dii a yɔ kabunagboŋ ere ase.
Epeŋilarkpa be Kabunagboŋ na be asheŋ
32Ndoŋ nna nɛ kanyɛn na naŋ ta ma m bɔla epeŋilarkpa be kabunagboŋ na to n yɔ epunto be kelɔnɛ na so nseŋ ya karga kabuna to na. Kumo nɛ amo nɛ a ka na kikɛ sasa nna. 33Kumo alɛ be bekumpo be ebuana, nɛ kabuna to be ebu na, nɛ egbalana nɛ a barga ebuana na to na, nɛ amo braana nɛ a wɔ mbunagboŋ nɛ a ka na ase na kikɛ la kukoŋwule nna. Kumo alɛ gba be bekumpo be ebuana na nɛ kabuna to be ebu na daa kɔ etokuro nna n chambɔ. Kumo be nteŋ to kikɛ koso ayadra aduburwa nɛ ana nɛ mparto kikɛ koso ayadra adena nɛ anyɔ nna. 34Ebu nɛ k wɔ kumo be kabuna to na daŋ kilgi n shoŋi kowushina be kelɔnɛ na nna nɛ b wora abii be ndibi be nduli n deŋi kedɛdɛ na be egbalana so. Atempreŋ aburwa nɛ baa dii so a yɔ kabunagboŋ ere ase.
Kelargato be esoso be kabunagboŋ na be asheŋ
35Kede be kaman, nɛ kanyɛn na naŋ keta ma n yɔ kelargato be esoso be kaba so be kabunagboŋ na ase nseŋ ya karga kumo. Kumo nɛ amo nɛ a ka na kikɛ daa sasa nna. 36Kumo alɛ gba daa kɔ bekumpo be ebuana nɛ egbalana nɛ b wora abii be ndibi be nduli n deŋi amo so nɛ kabuna to be ebu nɛ etokuro n chambɔ kumo fanɛ kelargato be kaseto be kabunagboŋ na gbagba nna chap. Kumo be nteŋ to daa la fanɛ ayadra aduburwa nɛ ana nɛ kumo be mparto malɛ daa la fanɛ ayadra adena nɛ anyɔ. 37Ebu nɛ k wɔ kumo be kabuna to na daŋ kilgi n shoŋi kowushina be kelɔnɛ na nna, nɛ b wora abii be ndibi be nduli n deŋi kedɛdɛ na be egbalana na so. Atemprembi aburwa nɛ baa dii so a yɔ kabunagboŋ ere ase.
Sarga be asɔbɔya be ebuana be asheŋ
38Ebubiana ko daŋ mata kedɛdɛ nɛ k wɔ epunto be mbunagboŋ na be kekama na ase nna nɛ baa fɔr sarga chɔɔso be asɔbɔya so amo to. 39Eteebɔl ana e daa wɔ ebubi ere to. Amo be anyɔ daa yil kaba ko so nna nɛ anyɔ nɛ a ka malɛ daa yil kaba nyɔsopo so nɛ b daa mɔ esarga chɔɔso ŋko kulubi be sarga ŋko kewora n jija be sarga be asɔbɔya amo so. 40Eteebɔl ana ko gba daa wɔ kowushina be kelɔnɛ na to. Amo be anyɔ daa yil atemprembi nɛ a dese a yɔ kabunagboŋ nɛ k wɔ kelargato be esoso na be kaba ko so nna nɛ anyɔ malɛ yil kaba nyɔsopo so. 41Eteebɔl aburwa e daa wɔtɔ nɛ b daa mɔ asɔbɔya nɛ baa ta a lara esarga na amo so. Amo be ana daa yil ebubi na to nna nɛ ana nɛ a ka malɛ daa yil kowu ashi kelɔnɛ na so. 42Ajembu nɛ b daŋ shɛl n lɔŋɛ eteebɔl ana nɛ a daa yil ebubi na to, nsaa ta asɔbɔya nɛ baa ta a lara esarga chɔɔso na a deŋi amo so a bɛ. Amo be jeŋgreŋ daŋ fo fanɛ keyadra koŋwule nɛ bargato nɛ amo be esoso be mparto malɛ be mba ana na be kekama daa la ayadra anyɔ nɛ bargato. Nsaŋɛ nɛ asɔ kama nɛ b kɔ a mɔ nsaa bɛ esarga be asɔbɔya na kikɛ daa deŋ eteebɔl ere so nna. 43B daŋ gbir ayir nɛ amo be nteŋ fo fanɛ enɔ be mparto egbalana na so nna ŋ kulti ebuana na to. Eteebɔl na malɛ so nɛ b daa ta esargablaŋ na a deŋi so.
Bɔrɛmatapoana na be ebuana be asheŋ
44Ndoŋ nna nɛ kanyɛn na naŋ keta ma n luri epunto be kelɔnɛ na to nɛ n ya wu ebu anyɔ ko nɛ amo be mbuna daa bugi a yɔ epunto be kelɔnɛ na so. Kuko daa wɔ kabunagboŋ nɛ k wɔ kelargato be esoso be kaba so na ase nseŋ kilgi n shoŋi kelargato be kaseto be kaba so nna, nɛ kenyɔsopo malɛ wɔ kabunagboŋ nɛ k wɔ kelargato be kaseto be kaba so na ase nseŋ kilgi n shoŋi kelargato be esoso be kaba so. 45Nɛ kanyɛn na kaŋɛ ma fanɛ ebu nɛ kumo be anishito bee shoŋi kelargato be kaseto be kaba so na la bɔrɛmatapoana nɛ baa shuŋ bɔrɛlambu na to na peya nna, 46nɛ kumo nɛ kumo alɛ be anishito be shoŋi kelargato be esoso be kaba so na malɛ la bɔrɛmatapoana nɛ baa shuŋ bɔrɛsure na ase na peya. Zadɔk be kabuna ebi nɛ b shi Livai be yiri to na nawule e kɔ ekpa nɛ b shuŋ bɔrɛmatapoana be kushuŋ n sa Enyɛnpe Ebɔrɛ na.
Epunto be kelɔnɛ na nɛ bɔrɛlambu na be asheŋ
47Ndoŋ nna nɛ kanyɛn na naŋ karga epunto be kelɔnɛ na. Kumo be mba ana na be kekama daa la ayadra kalfa nɛ adeshe nɛ aburwa nna. Bɔrɛsure na daa wɔ bɔrɛlambu nɛ k daa wɔ kelɔnɛ na be epeŋitɔrkpa na be anishito nna. 48Kumo be kaman nɛ e naŋ keta ma n luri bɔrɛlambu na be kedɛdɛ na to nseŋ ya karga kumo be kabuna to na. Kumo be jeŋgreŋ daa sa fanɛ ayadra akpanu nna nɛ kumo be mparto malɛ daa sa fanɛ ayadra adunyɔ nɛ ana. 49Atemprembi nɛ b daa bɔla so a dii a yɔ kedɛdɛ na so. Kedɛdɛ na be mparto daa sa fanɛ ayadra adesa nɛ ana nna nɛ kumo be jeŋgreŋ malɛ daa sa fanɛ ayadra adunyɔ nna. Eshabɔrɛ malɛ daŋ bɛ abar so kedɛdɛ na be mba anyɔ na kikɛ so nna n ya fo kumo be ekar.
411Ade kikɛ be kaman, nɛ kanyɛn na naŋ keta ma n luri bɔrɛlambu na be ebu nɛ baa tre kakpa cheembi to. Nseŋ karga kumo be kedɛdɛ na, nɛ kumo be mparto daa sa fanɛ ayadra kudu, 2nɛ kumo be nteŋ to malɛ daa sa fanɛ ayadra kuduaburwa. Yili kumo be kabuna to n yɔ egbalana nɛ a wɔ kumo be mba anyɔ na be kekama ase daa sa fanɛ ayadra kudu anyɔ nna. Kumo be kaman, nɛ e karga ebu na gbagba, nɛ kumo be nteŋ daa sa fanɛ ayadra adushunu, nɛ kumo be mparto malɛ daa sa fanɛ ayadra adesa nɛ aburwa. 3Kanyɛn na ka karga ndoŋ n loge, nɛ mo nawule yɔ bɔrɛlambu na be ŋkpar to be ebu na to. E daŋ juŋkpar nna ŋ karga kedɛdɛ nɛ baa bɔla to a yɔ kumo to na, nɛ kumo be mparto daa sa fanɛ ayadra asa nɛ egbalana nɛ a wɔ kumo be akel to na be kekama be nteŋ to daa sa fanɛ ayadra kudu anyɔ. 4E ka loge, nɛ e karga ŋkpar to be ebu na gbagba; nɛ kumo be kaba kama so daa sa fanɛ ayadra adesa nɛ ana. Ebu ere daa wɔ nferinto be ebu na be anishito nna. Kumo be kaman nɛ e kaŋɛ ma: “Acheembiana to be kakpa cheembi nna na.”
Ebuana nɛ baa ta asɔ a yili to na be asheŋ
5Ndoŋ nna nɛ kanyɛn na naŋ karga bɔrɛlambu na be egbal na be pentren nɛ k daa sa fanɛ ayadra kudu. B daŋ pɔr asɔ be ebuana nna nɛ amo be kekama be mparto daa sa fanɛ ayadra ashunu, m mata bɔrɛlambu na be egbal na ŋ kulti. 6Ebuana ere daa wɔ ntuŋ asa nna nseŋ bɛ abar so asa asa n yɔ awɔlto, nɛ katuŋ kama daa kɔ ebu adesa nsaa yil egbal nɛ k kulti bɔrɛlambu na so. Bɔrɛlambu na be esoso be ebuana na be egbalana daa maŋ danto n fo kaseto be ebuana peya so, saŋɛ na so ebuana na beeŋ tiŋ n yili egbalana na so nɛ shɛŋ maŋ suse amo to. 7Egbalana nɛ a kulti bɔrɛlambu na daa du pentren kaseto a chɔ esoso nna, a ŋini fanɛ esoso be ebuana na be epunto daŋ kpalga to a chɔ kaseto peya na. B daŋ pɔr atemprembi nna a dii so a yɔ nferinto nɛ awɔlto be asɔ be ebuana na to. 8Bɔrɛlambu na daa yil kejembu nɛ kumo be jeŋgreŋ daa sa fanɛ ayadra kudu nna. Kumo koŋwule na so nɛ ebuana na gba daa yil. 9Ebuana na be kaman to be egbalana na be pentren daŋ fo fanɛ ayadra aburwa. Efuli nɛ k daŋ dese egbalana ere 10nɛ bɔrɛmatapoana na be ebuana be kefɛato be mparto daŋ fo fanɛ ayadra adesa nɛ ana. 11Kabuna koŋwule daa bugi nna a yɔ asɔ be ebuana nɛ a wɔ a laŋɛ kelargato be esoso be kaba so nna nɛ kuko malɛ daa bugi a yɔ amo nɛ a wɔ a laŋɛ kelargato be kaseto be kaba so na. Kejembu nɛ bɔrɛlambu na daa yil so na daŋ dese nna m baŋ ebuana na be kaman to be egbalana na so n fo fanɛ ayadra aburwa be mparto ŋ kulti bɔrɛlambu na.
Epeŋitɔrkpa be kowu na be asheŋ
12Kede be kaman, nɛ n naŋ wu kowu ko. K daŋ kilgi nna n shoŋi bɔrɛlambu na be epeŋitɔrkpa be kaba so nɛ kumo be nteŋ to daŋ fo fanɛ ayadra kalfa nɛ adunu nɛ kumo be mparto malɛ daŋ fo fanɛ ayadra kalfa nɛ kuduashe. Kumo be egbal malɛ be pentren daŋ fo fanɛ ayadra akpanu.
Kananɛ bɔrɛlambu na kikɛ sa be asheŋ
13Ndoŋ nna nɛ kanyɛn na karga bɔrɛlambu na be nteŋ to nɛ k fo fanɛ ayadra kalfa nɛ adeshe nɛ aburwa. Kumo be kaman nɛ e naŋ yili kumo be kaman to be egbal na ase ŋ karga m bɔla kumo be kaman to be kelɔnɛ na so m ba choŋ ebu nɛ k wɔ epeŋitɔrkpa na be kaman to be egbal na, nɛ kumo alɛ gba fo fanɛ ayadra kalfa nɛ adeshe nɛ aburwa. 14E ka karga bɔrɛlambu na be anishito nɛ alɔnɛ nɛ a dese kumo be mba anyɔ na ase kikɛ nɛ kumo alɛ gba fo fanɛ ayadra kalfa nɛ adeshe nɛ aburwa. 15Kumo be lalaloge nɛ e karga kowu nɛ k wɔ epeŋitɔrkpa be kaba so na nɛ adɛdɛ nɛ a wɔ kumo be mba anyɔ na kikɛ be nteŋ to nɛ a fo fanɛ ayadra kalfa nɛ adeshe nɛ aburwa.
Kananɛ bɔrɛlambu na be epunto du be asheŋ
B daŋ yili kasawule nna ŋ gbir ndibi m mata abar ashi kedɛdɛ nɛ k wɔ bɔrɛlambu na be kabuna to na nɛ Kakpa cheembi na nɛ acheembiana to be kakpa cheembi na 16kikɛ be epunto be egbalana na so hale n ya fo etokuro na. Ndibi na daa beeŋ tiŋ m buu etokuro na so gba kuraa. 17Bumo alɛ daŋ naŋ shɛl asɔ be nduli nna m mata m mata bɔrɛlambu na be epunto kikɛ, hale kumo be akuloŋ be awɔlto kikɛ. 18Abii be ndibi nɛ asɔbɔya nɛ a kɔ aba fanɛ mbuibi be nduli nɛ b daŋ shɛl n deŋi egbalana na so. B baŋ shɛl abii be kedibi be nduli koŋwule n deŋi egbal so, b naa shɛl kusɔbɔya nɛ k kɔ aba fanɛ kabuibi na be nduli nna m bɛ so. Asɔbɔya be nduli na malɛ be kekama kɔ anishito anyɔ nna. 19-20B daa kɔ dimɛdi be anishito nna nɛ k bee keni abii be kedibi be nduli ko kaba ko so nseŋ naa kɔ buluŋ be anishito nɛ kumo alɛ bee keni abii be kedibi be nduli ko kaba pɔtɛ so. Aloŋ nɛ b daŋ yili kasawule n wora amo n ya fo akuloŋ na be awɔlto n deŋi egbalana na so ŋ kulti. 21Kakpa cheembi be kukuloŋ na be jeŋgreŋ nɛ mparto kikɛ daa sasa nna.
Ndibi be bɔrɛsure be asheŋ
Kusɔ ko daa yil acheembiana to be kakpa cheembi na be kabuna to n duli 22bɔrɛsure nɛ b ta ndibi wora nna. Kumo be jeŋgreŋ daŋ fo fanɛ ayadra anu nɛ kumo be mparto malɛ daŋ fo fanɛ ayadra ana. Ndibi nɛ b ta n lɔŋɛ kumo be kaplɛkama. Ndoŋ nna nɛ kanyɛn na kaŋɛ ma le “Kede la kanyiŋi nna fanɛ Enyɛnpe Ebɔrɛ na bee keni mbe bɔrɛlambu so jemanɛ kikɛ nna.”
Bɔrɛlambu na be mbuna be asheŋ
23Kabuna ko daa wɔ kakpa nɛ baa bɔla a yɔ kakpa cheembi to nna nɛ kuko malɛ gba daa wɔ kakpa nɛ baa bɔla a yɔ acheembiana to be kakpa cheembi na to. 24Kabuna kama malɛ daa kɔ akuloŋ anyɔ nna. 25B daŋ shɛl abii be ndibi nɛ asɔbɔya nɛ a kɔ aba fanɛ mbuibi na be nduli nna n deŋi kakpa cheembi be mbunaana na so fanɛ kananɛ b wora n deŋi egbalana na so na. Kumo be kaman nɛ b ta ndibi n ti kedɛdɛ na be kabuna ashi kowushina. 26Kedɛdɛ na be akel to be egbalana na daa kɔ etokuro wurbi nna, nɛ b naŋ shɛl abii be ndibi be nduli n deŋi kumo alɛ gba be egbalana na so.
42Bɔrɛmatapoana be ebuana be asheŋ
1Ade kikɛ be kaman, nɛ kanyɛn na ta ma n luri kowushina be kelɔnɛ na to nseŋ juŋkpar nɛ m bɛ mo so nɛ an yɔ kowu ko nɛ k wɔ a laŋɛ bɔrɛlambu na be kelargato be esoso be kaba so ase. Kumo nɛ kowu nɛ k wɔ bɔrɛlambu na be epeŋitɔrkpa na daa maŋ barga abar ga. 2Kowu ere be nteŋ to daa sa fanɛ ayadra kalfa nɛ adeshe nɛ aburwa nna nɛ kumo be mparto malɛ daa sa fanɛ ayadra aduburwa nɛ ana. 3Kowu na be kaba ko daŋ kilgi n shoŋi efuli ko nɛ k dese bɔrɛlambu na ase nɛ kumo be mparto daa sa fanɛ ayadra adesa nɛ ana, nɛ kaba ko malɛ bee shoŋi ekpabi nɛ k chambɔ kowushina be kelɔnɛ na. B daŋ pɔr ebuana na nna m bɛ abar so esoso, nɛ kekama nɛ k bɛ kumo barkasa so na laŋɛ kaman a chɔ kumo nɛ k wɔ kaseto na. 4Kedɛdɛ daa wɔ a laŋɛ kowu ere be kelargato be esoso be kaba so nna nɛ kumo be mparto daa sa fanɛ ayadra kuduashe, nɛ kumo be nteŋ to malɛ daa sa fanɛ ayadra kalfa nɛ adeshe nɛ aburwa. Kumo be mbuna daa bugi a yɔ kelargato be esoso be kaba so nna. 5Ebuana nɛ a wɔ kowu ere be awɔlto gbagba na daa maŋ wɔ mpar n fo nferinto peya na so. Nferinto peya na malɛ daa maŋ naa wɔ mpar n fo kaseto peya na so. 6Kowu na be ebuana nɛ a wɔ kaseto na e daa kɔ amo nɛ a wɔ esoso na to a yil, amoso esoso peya na daa maa kɔ eshabɔrɛ fanɛ nwu nɛ a ka a wɔ kelɔnɛ na so na. 7-8Kowu na be kaseto na be bargato daa la egbal nawule nna nɛ egbal na be nteŋ to daa sa fanɛ ayadra aduburwa nɛ ana, nɛ kumo be bargato nɛ k ka na malɛ daa la ebuana. Kumo be awɔlto na bre kikɛ daa la ebuana nna n ya fo kumo be ekar. 9-10Ebu anyɔ nɛ a wɔ kowu na be epeŋilarkpa be kaba so na be kaseto daa kɔ kabuna nɛ k bee bugi a lar kowushina be kelɔnɛ na so nna.
Kowu ko nɛ k duli kowu ere daa yil bɔrɛlambu na be kelargato be kaseto be kaba so nna nɛ kumo nɛ kowu nɛ k yil bɔrɛlambu na be epeŋitɔrkpa be kaba so na maŋ barga abar ga. 11Nwuana ere be ebuana nɛ amo nɛ a yil kelargato be esoso be kaba so na maŋ kɔr abar to. Amo be nteŋ to nɛ mparto nɛ kananɛ b pɔr amo nɛ amo be mbuna kikɛ daŋ duli abar nna. Kedɛdɛ ko malɛ daa wɔ amo alɛ gba be anishito nna. 12Amo be akuloŋ daa shoŋi egbal nɛ k yil amo be anishito na be epeŋilarkpa be kaba so nna.
13Ndoŋ nna nɛ kanyɛn na kaŋɛ ma le: “Nwu anyɔ ere kikɛ la mboŋ cheembi nna. Amo to nɛ bɔrɛmatapoana nɛ baa luri a yɔ Enyɛnpe Ebɔrɛ na be anishito na beeŋ baa chena a ji esargajibi cheembi na. Ebuana na ka du cheembi so, ndoŋ nɛ bɔrɛmatapoana na beeŋ baa ta ayu be esarga nɛ alubi be esarga nɛ kewora n jija be esarga cheembiana na a wɔtɔ. 14Bɔrɛmatapoana na baa sha kelar bɔrɛlambu na to n yɔ kowushina be kelɔnɛ na so, a daga fanɛ b bɔla ebuana na ere to n lara bumo be asɔbuuso nɛ b buu n yɔ Enyɛnpe Ebɔrɛ na be anishito na n nase ndoŋ pɔɛŋ nseŋ ta asɔbuuso pɔtɛ m buu n lar.”
B ka karga bɔrɛlambu na be kowushina be asheŋ
15Kanyɛn na ka karga bɔrɛlambu na be epunto kikɛ n loge, nɛ e keta ma m bɔla kabunagboŋ nɛ k wɔ epeŋilarkpa be kaba so na to n lar nseŋ ya karga kumo be kowushina na kikɛ ŋ kulti. 16E daŋ ta kekpabi karga asɔ na nna ŋ karga bɔrɛlambu na be epeŋilarkpa be kaba so na. Kumo be nteŋ to daa sa fanɛ ayadra alfa aburwa nɛ adena nna. 17-19Ndoŋ nna nɛ e naŋ karga kumo be kelargato be esoso nɛ kaseto nɛ epeŋitɔrkpa be mbaana na kebɛso kebɛso. Kekama be nteŋ to daa sa fanɛ ayadra alfa aburwa nɛ ana nna, 20a ŋini fanɛ bɔrɛlambu na be kakpa nɛ egbal na kulti na be kaba kama so daa sa fanɛ ayadra alfa aburwa nɛ adena nna. Egbal na daa barga mboŋ cheembi na nɛ amo nɛ a maŋ du cheembi na to nna.
43Enyɛnpe Ebɔrɛ be kemaŋkura ka bɛta m ba bɔrɛlambu na to be asheŋ
1Ade kikɛ be kaman nɛ kanyɛn na keta ma n yɔ bɔrɛlambu na be kabunagboŋ nɛ k shoŋi epeŋilarkpa na ase. 2Ndoŋ nɛ n wu Israɛl be Ebɔrɛ na be kemaŋkura ka bee nyɛkpɛ pɛlpɛl n shi epeŋilarkpa a ba, nɛ Ebɔrɛ be ebɔl gbir fanɛ teku ka bee baga to na. Kusɔ kama nɛ k daa wɔ ndoŋ gba daŋ fulto nna a nyɛkpɛ. 3Bɔrɛdare nɛ n wu ere daa du fanɛ amo nɛ n daŋ wu jemanɛ nɛ Ebɔrɛ daŋ ba nɛ e ba mur kadegboŋ nɛ baa tre Jerusalɛm na nna nɛ jemanɛ nɛ n daa wɔ lɔr nɛ baa tre Kɛba na ase na nna. Ndoŋ nna nɛ n ta enɔ m buu anishi so nseŋ kurgi kumu n yuu to epul na to. 4Ndoŋ nna nɛ kefulto nɛ k bee ŋini Enyɛnpe Ebɔrɛ be kemaŋkura na bɔla kabunagboŋ nɛ k wɔ epeŋilarkpa be kaba so na to n luri bɔrɛlambu na to.
5Kumo be kaman, nɛ Enyɛnpe Ebɔrɛ na be Kiyoyu keta ma n luri bɔrɛlambu na be laŋ be epunto be kelɔnɛ so nɛ n ya wu fanɛ Enyɛnpe Ebɔrɛ na be kemaŋkura sɔ bɔrɛlambu na to kikɛ. 6Ma nɛ kanyɛn na yil nna nɛ n nu Enyɛnpe Ebɔrɛ ka shi bɔrɛlambu na to ŋ kaŋɛ ma le: 7“Dimɛdi pibi, Ezikɛl, ma kuwurputi be kakpa nna na. Meeŋ baa wɔ Israɛl be basa nɛ b la ma basa ere to a ji kuwura bumo so hale mbaanaayɔ. Israɛl be basa ŋko bumo be bewuraana maaŋ naŋ shuŋ agbirana ŋko n wora kanyiŋi be asɔ nɛ a bee ŋaba ma ketre cheembi na n yili nfe n sa bumo be bewura nɛ b wu na. 8Israɛl be bewura daŋ pɔr bumo be ewurkpaana nna m mata ma bɔrɛlambu cheembi na ga. Egbal e daa wɔ ma nɛ bumo be nferinto. B daa wora asheŋ jiga nna a ŋaba ma ketre cheembi na, amoso nɛ n daŋ nya agbo m mur bumo na. 9Naniere a daga fanɛ b yige kagbirshuŋ nseŋ lara bumo be bewuraana nɛ b wu na be kanyiŋi be asɔ nɛ b pɔr n yili na. Nɛ b wora loŋ, meeŋ ba ka wɔ bumo to mbaanaayɔ.”
10Ndoŋ nna nɛ Enyɛnpe Ebɔrɛ na naŋ kaŋɛ le: “Dimɛdi pibi, kute bɔrɛlambu na be asheŋ n sa Israɛl be basa na nɛ nyɔmɔ e pɛ bumo ŋkpal bumo be asheŋ lubi so. Kumo be kaman nɛ fo shin nɛ b fɛ kumo be kananɛ k du be asheŋ. 11Nɛ fanɛ bumo be asheŋ woraso kaŋ pɛ bumo nyɔmɔ nɛ bumo be ŋgbene jija bumo, fo bugi kananɛ bɔrɛlambu na du na be asheŋ to n sa bumo. Kute kumo be mbuna nɛ kananɛ k dese nɛ kumo to be asɔ be asheŋ nɛ mbraana nɛ a wɔtɔ a laŋɛ kumo be kaplɛa so be asheŋ n sa bumo. Fo alɛ e sibɛ ade kikɛ n nase n sa bumo saŋɛ na so baaŋ wu kananɛ kusɔ kama dese nseŋ tiŋ n wora m bɛ mbraana na so. 12Mbra nɛ k dese a laŋɛ bɔrɛlambu na be kaplɛa so e la fanɛ, kaboŋ nɛ k kulti kumo ashi kebee na be awɔlto na kikɛ la kakpa cheembi gbagba nna.”
Bɔrɛsure na be asheŋ
13Kananɛ ekama nyi b kaa bee karga asɔ ashi bɔrɛlambu to na nɛ b yili so ŋ karga bɔrɛsure na. Le nɛ k daa sa. Kemaŋ ko nɛ kumo be nchiŋ daa sa fanɛ keyadra koŋwule nɛ bargato nɛ kumo be mparto gba daa sa fanɛ keyadra koŋwule nɛ bargato e daŋ kulti kumo. Kumo be ekarso be kananɛ k du kulkulbi na malɛ daŋ ka gbrɛ nɛ k fo keyadra koŋwule nna. 14Bɔrɛsure na be gbaltɔlase na be jeŋgreŋ daŋ fo fanɛ ayadra ana nna. Nɛ kumo be kaba nɛ k bɛ gbaltɔlase na so na be jeŋgreŋ malɛ daŋ fo fanɛ ayadra ashunu. B daŋ yili gbaltɔlase na be ekarso nna n firgi n yɔ anishito fanɛ keyadra koŋwule nɛ barga pɔɛŋ nseŋ pɔr bɔrɛsure m bɛ kumo so. Kumo be kaman, nɛ b naŋ firgi n yɔ anishito fanɛ keyadra koŋwule nɛ bargato ashi kumo alɛ gba so ŋ kulti pɔɛŋ nseŋ pɔr bɔrɛsure be kaba nyɔsopo m bɛ so. 15Bɔrɛsure nɛ k bɛ so esoso na so nɛ b daa ta esarga na a deŋi so a chɔɔ. Kumo alɛ daŋ fo fanɛ ayadra ashunu. Kumo be akel to be nnɔso ana na daŋ dii a chɔ kumo be esoso na kikɛ nseŋ daŋ duli gbolu be alambɛ. 16Bɔrɛsure na be esoso na be mba ana na kikɛ daa sasa nna. Kaba kama so be nteŋ to daŋ fo fanɛ ayadra adunyɔ nna. 17Kumo be nferinto na gba be mba ana na kikɛ daa sasa nna. Kaba kama daŋ fo fanɛ ayadra adunyɔ nɛ ana nna, nɛ kumo be ekarso ŋ kulti malɛ be jeŋgreŋ daŋ ka gbrɛ nɛ k fo keyadra koŋwule. Atemprembi nɛ baa dii so a yɔ bɔrɛsure na be esoso na daa wɔ a laŋɛ epeŋilarkpa be kaba so nna.
B ka ta bɔrɛsure na m bɔɔ Ebɔrɛ enɔ be asheŋ
18Ndoŋ nna nɛ Enyɛnpetale Ebɔrɛ na naŋ kaŋɛ ma le: “Dimɛdi pibi, nu kusɔ nɛ mee kaŋɛ fo ere. B kaŋ pɔr bɔrɛsure na n loge, menyeeŋ mɔ asɔbɔya n lara esarga kumo so, nseŋ ta ŋklaŋ na ŋ ŋmenyaŋ kumo so a ŋini fanɛ men ta kumo m bɔɔ Ebɔrɛ enɔ nna na. 19Bɔrɛmatapoana nɛ b shi Livai be yiri to nsaa la kanyɛn nɛ baa tre Zadɔk na be kanaŋ to be basa nawule e naŋ tiŋ m ba ma anishi to m ba shuŋ ma. Ma, Enyɛnpetale Ebɔrɛ na be mbra nna na. Menyeeŋ sa bumo gbolu fɔlbi nɛ b ta n lara kulubi be sarga. 20Kumo be kaman, nɛ b suse kusɔbɔya na be ŋklaŋ ŋ gbiti bɔrɛsure na be akel to be nnɔso ana na so nɛ kumo be nferinto gba peya so nɛ kumo be ekarso kikɛ ŋ kulti. Kananɛ menyeeŋ wora nɛ k nyalɛ so nsaa la kusɔ nɛ menyeeŋ tiŋ a lara esarga kumo so a sa ma nna na. 21Kede be kaman, nɛ men ta gbolu nɛ b ta n lara kulubi be sarga na n lar ekarso n ya chɔɔ ashi kakpa nɛ k maŋ mata bɔrɛlambu na ase, nɛ b lara ndoŋ n yili a chɔɔ kulubi be esarga. 22Kumo be ŋklade nɛ men ta kaboenyɛnso nɛ doro kikɛ maŋ wɔ kumo so n lara kulubi be sarga. Menyeeŋ ta kumo be ŋklaŋ n lɔŋɛ bɔrɛsure na so fanɛ kananɛ men ta gbolu na be ŋklaŋ n wora na. 23Men kaŋ wora loŋ n loge, nɛ men ta gbolu fɔlbi nɛ kpakpafɔlbi nɛ amo be kekama maŋ kɔ doro kikɛ kumo so 24m ba sa ma. Bɔrɛmatapoana na beeŋ mɔ amo nseŋ wora nfɔl n fur amo so n chɔɔ amo n lara sarga n sa ma. 25Karechɛ kama menyeeŋ baa ta kaboe nɛ gbolu nɛ kpakpa nɛ amo be kekama maŋ kɔ doro kikɛ amo so na a lara kulubi be sarga hale nɛ nchɛ ashunu e ya fo. 26Nchɛ ashunu nɛ bɔrɛmatapoana na beeŋ ta n lɔŋɛ bɔrɛsure na so nɛ k nyalɛ so n sa ma. 27Nchɛ ashunu na kaŋ choŋ, bɔrɛmatapoana na beeŋ fara a lara esarga chɔɔso nɛ kɔnɔkoŋwule be esarga bɔrɛsure na so. Saŋɛ na so nɛ ma kagbene e fuli Israɛl be basa so. Kusɔ nɛ ma, Enyɛnpetale Ebɔrɛ na kaŋɛ nna na.”
44Epeŋilarkpa be kabunagboŋ na be asheŋ
1Ndoŋ nna nɛ kanyɛn na naŋ keta ma n yɔ kowushina be kelɔnɛ na so a mata bɔrɛlambu na be kabunagboŋ nɛ k wɔ epeŋilarkpa be kaba so na. Nɛ n wu fanɛ kumo be akuloŋ na daŋ ti nna. 2Nɛ Enyɛnpe Ebɔrɛ na kaŋɛ ma le: “Kabuna ere nɛ ma Enyɛnpe, Israɛl be Ebɔrɛ na bɔla to n luri bɔrɛlambu na to, amoso, a daga fanɛ k baŋ ti loŋ mbaanaayɔ! Esa kama e sa maŋ naŋ bɔla kumo to n luri kikɛ. 3Israɛl be ewura beeŋ tiŋ m ba nfe m ba ji ajibi nɛ b ta n lara sarga n sa ma, ama a daga fanɛ e bɔla kabunagboŋ ere be kedɛdɛ na to nna n luri ŋko n lar.”
Basa nɛ b maŋ daga keluri bɔrɛlambu na to be asheŋ
4Ndoŋ nna nɛ kanyɛn na keta ma m bɔla kelargato be esoso be kabuna na to n yɔ bɔrɛlambu na be anishito nɛ n to kenishi ŋ keni nseŋ wu fanɛ Enyɛnpe Ebɔrɛ be kemaŋkura bɔlɔ bɔrɛlambu na to. Ndoŋ nna nɛ n ta ma enɔana m buu ma anishi so nseŋ kurgi kumu n yuu to.
5Nɛ Enyɛnpe Ebɔrɛ na kaŋɛ ma le: “Dimɛdi pibi, Ezikɛl, shin nɛ fo lakal e baa wɔ kusɔ kama nɛ feeŋ wu nsaa nu ashi nfe so. Mbraana nɛ a wɔ bɔrɛlambu na to nɛ mee sha kekaŋɛ fo na. Baa de so nɛnɛ a nyi basa nɛ baaŋ tiŋ n luri nɛ bumo nɛ b maaŋ tiŋ n luri bɔrɛlambu na to. 6Kaŋɛ Israɛl be basa nɛ b kini ma nseŋ lar ma kaman na fanɛ ma, Enyɛnpetale Ebɔrɛ na maŋ naa ba nɛ n sɔ ekishisheŋ nɛ baa wora na kikɛ. 7B wora eyurpisheŋ n jija ma bɔrɛlambu ŋkpal b ka shin nɛ befɔ nɛ b maa ŋana Ebɔrɛ luri kumo to jemanɛ nɛ baa lara esarga a sa ma na so. Amoso, ma basa wora kulubi nseŋ da ma nɛ bumo be kɔnɔkoŋwule be ŋkre na so. 8Bumo gbagba ka beeŋ baa wora asɔ nɛ a daga a laŋɛ esarga cheembi na kaplɛa so ashi bɔrɛlambu na to so na, befɔ nɛ b ta loŋ be kushuŋ nna n sa.
9Amoso kusɔ nɛ ma, Enyɛnpetale Ebɔrɛ na, bee kaŋɛ e la fanɛ efɔ kama nɛ e maa ŋana Ebɔrɛ nsaa maa nu a sa ma maŋ daga keluri ma bɔrɛlambu to, hale efɔ nɛ e chena Israɛl be basa na to gba maŋ daga keluri kumo to.”
Livaiebi ko kaa nya kasogberge be asheŋ
10Kede be kaman nɛ Enyɛnpe Ebɔrɛ na naŋ kaŋɛ ma le: “Mee sha kegberge Livaiebi nɛ b tu Israɛl be basa na ŋ kini ma nseŋ ya shuŋ agbirana na kusoe nna na. 11B kraa beeŋ tiŋ a shuŋ bɔrɛlambu na to fanɛ basa nɛ baa keni mbunaana na so nseŋ naŋ tiŋ n chɛ basa na to m mɔ asɔbɔya nɛ b ta a lara esarga na. 12Ama ŋkpal Livaiebi ere ka chɛ Israɛl be basa na to jemanɛ nɛ b daa shuŋ agbirana na so, ma, Enyɛnpetale Ebɔrɛ na bee nase kɔnɔ nna fanɛ Livaiebi na beeŋ nya kasogberge. 13B maaŋ naŋ tiŋ n shuŋ ma fanɛ bɔrɛmatapoana ŋko n yɔ ma kusɔ cheembi kama ase ŋko n luri bɔrɛlambu na to be acheembiana to be kakpa cheembi na to. Ekishisheŋ nɛ b wora na be kasogberge nna na. 14Ashuŋ kpakpaso nawule nɛ mee sa bumo ekpa fanɛ b baa shuŋ ashi bɔrɛlambu na to.”
Mbraana nɛ a wɔtɔ n sa bɔrɛmatapoana be asheŋ
15Kumo be kaman, nɛ Enyɛnpetale Ebɔrɛ na kaŋɛ le: “Livai be yiri to be bɔrɛmatapoana nɛ b shi kanyɛn nɛ baa tre Zadɔk na be kabuna na bre daŋ maŋ kini ma kushuŋ bɔrɛlambu na to nseŋ ya shuŋ agbirana jemanɛ nɛ Israɛl be basa na daŋ kini ma na. Amoso bumo e naŋ tiŋ m ba ma anishi to m ba shuŋ ma fanɛ bɔrɛmatapoana nseŋ ta asɔbɔya be nfɔ nɛ ŋklaŋ n lara esarga. 16Zadɔk be kabuna ebi na nawule e naŋ tiŋ n luri bɔrɛlambu na to n shuŋ bɔrɛsure na ase nseŋ naŋ tiŋ n juŋkpar basa nɛ baa shuŋ ma na. 17A daga fanɛ b buu bɔrɛmatapoana be epiŋi lela na nna n luri bɔrɛlambu na be epun to be kelɔnɛ na so. A maŋ daga fanɛ b baa buu asɔbuuso nɛ b ta ateebi n lue jemanɛ nɛ b wɔ kushuŋ to ashi epun to be kelɔnɛ na so ŋko bɔrɛlambu na gbagba to. 18A daga fanɛ b baa buu ago be kechɛbi be asɔbuuso nna nsaa chɛ ago be achɛbi be eneemu, saŋɛ na so b maaŋ baa pa kebleŋ jemanɛ nɛ baa shuŋ bumo be kabɔrɛmata be kushuŋ na. 19Pɔɛŋ nɛ b lar n yɔ kowushina be kelɔnɛ na so ashi kakpa nɛ basa wɔ na, a daga fanɛ b lara epiŋi nɛ b buu a shuŋ bɔrɛlambu na to na n nase ebu cheembiana na to nna. Kumo be kaman nɛ b ta asɔbuuso pɔtɛ m buu n lar, saŋɛ na so bumo be asɔbuuso cheembi na maaŋ bar tɔrɔ basa so.
20Bɔrɛmatapoana maŋ daga fanɛ b she bumo be emin ŋko n shin nɛ e daŋ tenteŋ. A daga fanɛ b baa digi amo so nna. 21Bɔrɛmatapoana maŋ daga fanɛ b nuu yabra pɔɛŋ nseŋ luri bɔrɛlambu na be epunto be kelɔnɛ na to. 22Bɔrɛmatapowura kikɛ maŋ daga fanɛ e ta eche nɛ mo kul kini mo. A daga fanɛ e ta Israɛl to be eche nɛ e maŋ nyi enyɛn ŋko eche nɛ mo kul daa la bɔrɛmatapo nseŋ wu ŋ ka nawule nna.
23Bɔrɛmatapoana na e daga fanɛ b baa ŋini ma basa kusɔ nɛ k du cheembi nɛ kusɔ nɛ k maŋ du cheembi nseŋ naŋ ŋini bumo kusɔ nɛ k walɛ so daŋkare be ekpa so nɛ kusɔ nɛ k maŋ walɛ so daŋkare be ekpa so nɛ b pin amo be mbarga. 24Nɛ kesheŋ ko koso nɛ a daga fanɛ b ji kumo mbra be ekpa so, bɔrɛmatapoana na beeŋ keni ma mbraana so nna n ji kumo. Kananɛ ma mbraana nɛ atande bee ŋini na nɛ baaŋ baa yili so a ji bumo be kabɔrɛshuŋ be nchɛgboŋana, nseŋ shin nɛ Kewushiachɛ na e baa la kachɛ cheembi n sa bumo.
25Bɔrɛmatapowura maŋ daga fanɛ e beta kebuni kikɛ nseŋ wora eyurpi daŋkare be ekpa so, ama k baa la mo tuto ŋko mo nio ŋko mo pibi ŋko mo niopibi nyɛnso ŋko mo niopibi cheso nɛ e maa kil be kebuni nna. 26Kumo be kaman nɛ e ka naŋ nyalɛ so daŋkare be ekpa so, a daga fanɛ e jo nchɛ ashunu pɔɛŋ 27nseŋ yɔ bɔrɛlambu na be epunto be kelɔnɛ na to n ya lara sarga nɛ k beeŋ shin nɛ e nyalɛ so, saŋɛ na so e beeŋ naŋ tiŋ a shuŋ bɔrɛlambu na to. Ma, Enyɛnpetale Ebɔrɛ na, e kaŋɛ na.
28Kebɔrɛmata be kushuŋ na e la bɔrɛmatapoana be kapetɛ nɛ baaŋ tiŋ n yige n sa bumo be kenana. B maŋ daga fanɛ b baa kɔ kapetɛsɔ kikɛ Israɛl to. Ma e la bumo be kapetɛ. 29Ayu be esarga nɛ kulubi be esarga nɛ kewora n jija be esarga kikɛ beeŋ baa la bɔrɛmatapoana be asɔ jiso nna. Kumo be kaman, kusɔ kama nɛ b kɛ ma ashi Israɛl to kikɛ gba la bumo peya nna. 30Adɔjibi kama nɛ b juŋkpar n teŋi nɛ kusɔ kama nɛ b ta n sa ma beeŋ baa la bɔrɛmatapoana na peya nna. Jemanɛ kikɛ nɛ basa na wora ebodobodo, a daga fanɛ b ta bodobodo nɛ b juŋkpar n wora na n sa bɔrɛmatapoana fanɛ kakɛ nɛ k bee yɔ Ebɔrɛ kutɔ, saŋɛ na so ma nɛfa beeŋ baa wɔ bumo be elaŋana so. 31Bɔrɛmatapoana maŋ daga fanɛ b ji kusɔbɔya ŋko kabuibi nɛ k wu kpi ŋko kumo nɛ kusɔbɔya pɔtɛ mɔ n ji ŋ ka be eblaŋ.”
45Israɛl be kasawule na be kebarga to be asheŋ
1Nɛ menyi bee barga Israɛl be kasawule na to a sa eyiriana na, men ku kaba n nase n sa Enyɛnpe Ebɔrɛ na. Kumo be nteŋ to e baa la emayɛl ashunu nɛ mparto malɛ e baa la emayɛl ashe. Loŋ be kakpa na kikɛ beeŋ baa la kakpa cheembi nna. 2Men ku kaboŋ nɛ kumo be nteŋ to nɛ mparto kikɛ sa fanɛ ayadra alfa aburwa nɛ adena nɛ m pɔr bɔrɛlambu na n yili kumo so. A daga fanɛ kasawule nɛ kumo be mparto sa fanɛ ayadra aduburwa nɛ ana ka dese ŋ kulti kaboŋ na kikɛ. 3Men ku kakpa cheembi na be bargato, nɛ kumo be nteŋ to fo emayɛl ashunu nɛ kumo be mparto malɛ fo emayɛl asa m pɔr bɔrɛlambu na n yili so. Ndoŋ beeŋ baa la kakpa cheembi na kikɛ be acheembiakpa. 4Ndoŋ beeŋ baa la efuli na kikɛ be kakpa cheembi nɛ k dese n sa bɔrɛmatapoana nɛ baa shuŋ Enyɛnpe Ebɔrɛ ashi bɔrɛlambu na to na. Bumo be nwu beeŋ baa wɔ kumo be kaba nɛ bɔrɛlambu na malɛ e baa wɔ kumo be kaba. 5Saŋɛ na so nɛ Enyɛnpe Ebɔrɛ na be kasawule na be kaba nɛ k ka na e baa dese n sa Livaiebi nɛ baa shuŋ ashi bɔrɛlambu na to na nɛ b pɔr bumo be ndeana n chena so.
6Kede be kaman nɛ men naŋ ku kasawule nɛ kumo be nteŋ to fo emayɛl ashunu nɛ kumo be mparto malɛ fo mayɛl koŋwule nɛ bargato m bɛ kakpa cheembi na so nɛ b pɔr kadegboŋ nɛ Israɛl be esa kama beeŋ tiŋ n chena kumo to ashi kasawule na so.
Ewura be kasawule be asheŋ
7A daga fanɛ men ku kasawule n nase n sa Israɛl be ewura nɛ k yili kakpa cheembi na be epeŋitɔrkpa be kaba so m ba choŋ Teku nɛ baa tre Mɛditerenia na be epeŋitɔrkpa be kaba so na; nseŋ naŋ yili kakpa cheembi na be epeŋilarkpa be kaba so m ba choŋ efuli na be gbaŋ nɛ k wɔ epeŋilarkpa be kaba so na, nɛ kumo be nteŋ to e fo fanɛ mboŋ nɛ menyeeŋ ku n sa Israɛl be eyiriana na be kekama na. 8Kakpa nɛ esa nɛ e bee ji kuwura na beeŋ baa kɔ ashi Israɛl be kasawule so nna na, saŋɛ na so e maaŋ baa nyaŋ basa na, nseŋ shin nɛ efuli na be kasawule nɛ k ka na e baa la Israɛl be eyiriana na peya.
Mbraana nɛ a wɔtɔ n sa ewura na be asheŋ
9Ade be kaman nɛ Enyɛnpetale Ebɔrɛ na naŋ kaŋɛ le: “Fo nɛ fee ji Israɛl so kuwura na wora alubi n chɛr pasaa! Yige fo kebagato nɛ kanyaŋ be asheŋ na nsaa wora kusɔ nɛ k daga nseŋ bɔla ekpa. A maŋ daga fanɛ fo naŋ ju ma basa n lar bumo be kasawule so kikɛ. Ma, Enyɛnpetale Ebɔrɛ na e naa kaŋɛ fo le na.
10A maŋ daga fanɛ men baa ta kapuni be asɔ karga asɔ fanɛ ekurwa nɛ b wuse amo be afito nɛ ebɔtɛ wurbi a karga asɔ wɔlso nɛ ekɔlba wurbi nɛ egalɔn wurbi a karga asɔ nɛ a la fanɛ ŋku nɛ nchu a sa basa.
11Ekurwa nɛ ebɔtɛ nɛ ekɔlba nɛ egalɔn nɛ men kɔ a karga asɔ a fa na kikɛ maŋ daga fanɛ a baa la kapuni b kasɔkarga be asɔ. Amo kikɛ daga fanɛ a baa la asɔ nɛ ekama yirda fanɛ amo e la kashenteŋ be asɔ nɛ b kɔ a karga asɔ a fa nna.
12Kusɔ nɛ menyeeŋ baa ta asɔ be egbɛ a ber e la kadɛrbi. Kadɛrbi koŋwule malɛ la fanɛ kilo be bargato malɛ be bargato malɛ be bargato nna.
13A daga fanɛ men barga men be ayu nɛ menyeeŋ teŋi to ntunshe nna nseŋ ta katuŋ koŋwule m ba sa ma fanɛ kakɛ lela. 14Menyeeŋ barga men be ɔlifs be ŋku to ntuŋ kalfa, nseŋ ta katuŋ koŋwule m ba sa ma. Menyeeŋ baa karga amo ekɔlba nɛ egalɔn to nna. Galɔn koŋwule malɛ la ekɔlba ashunu nna. 15Ade be kaman, a daga fanɛ men keni men be mbolpɔ alfa anyɔ kikɛ to n lara ekoŋwule n sa ma.
Menyeeŋ ta ŋkɛana ere n lara ayu be esarga nɛ esarga chɔɔso nɛ kɔnɔkoŋwule be esarga n sa ma saŋɛ na so ma, Enyɛnpe Ebɔrɛ na be kagbene beeŋ fuli amo so nɛ n ta ma basa be alubi m paŋ bumo.
16Basa nɛ b wɔ kasawule na so na kikɛ beeŋ lara esarga ere m ba sa Israɛl be ewura na. 17Mo e daga fanɛ e yili Israɛl be efuli na kikɛ be katelamu n lara asɔbɔya nɛ baaŋ ta n lara esarga chɔɔso nɛ baaŋ ta n lara ayu be esarga nɛ yabra belbelso be esarga na kikɛ jemanɛ nɛ baa ji Kufɔl Popɔr be Kachɛgboŋ nɛ Kewushiachɛ na nɛ nchɛgboŋ nɛ a ka na kikɛ na. Mo koŋwule na e daga fanɛ e lara asɔbɔya nɛ b ta n lara alubi nɛ ayu nɛ sarga chɔɔso nɛ kɔnɔkoŋwule be esarga nɛ e kpra Israɛl be basa be alubi.”
Nchɛgboŋana na be asheŋ
18Ade kikɛ be kaman, nɛ Enyɛnpetale Ebɔrɛ na naŋ kaŋɛ le: “Menyeeŋ ta gbolu nɛ doro kikɛ maŋ wɔ kumo so n lara sarga n lɔŋɛ bɔrɛlambu na so kufɔl juŋkparso na be kachɛ sososo na. 19Bɔrɛmatapowura na beeŋ suse kulubi be sarga be kusɔbɔya na be ŋklaŋ na be ako ŋ gbiti bɔrɛlambu na be akuloŋ be ndibi na nɛ bɔrɛsure na be mba ana na nɛ epunto be kelɔnɛ be akuloŋ be ndibi na. 20Kumo be kaman nɛ men naŋ wora loŋ gbagba kufɔl na be kachɛ shunusopo na, saŋɛ na so nɛ esa ko nɛ e maŋ kute ŋko e maŋ nyi nseŋ wora kulubi beeŋ nya mbe alubi be ketampaŋ. Kananɛ menyeeŋ wora nɛ ma bɔrɛlambu e baa du cheembi nna na.
21Kufɔl juŋkparso na be kachɛ kuduanasopo na nɛ menyeeŋ fara Kebansonchoŋ be Kejigboŋ na be kesheŋ wora. Nchɛnshunu nɛ ekama beeŋ ta n ji bodobodo nɛ a maŋ kɔ yisi. 22Ewura na beeŋ mɔ gbolu n lara mo gbagba nɛ basa na kikɛ be alubi be sarga kejigboŋ na be kachɛ sososo na. 23Karechɛ kama, ewura na beeŋ baa mɔ egbolu ashunu nɛ ekpakpa ashunu nɛ e maŋ kɔ doro kikɛ a lara sarga chɔɔso n ya fo nchɛ kachɛ shunusopo nɛ baaŋ ji kejigboŋ na n loge na. Mo alɛ beeŋ naa mɔ kaboenyɛn a lara alubi be sarga karechɛ kikɛ. 24E beeŋ ta ayu cheenshigboŋ be bargato nɛ ɔlifs be ŋku galɔn koŋwule n ti gbolu kama nɛ kpakpa kama nɛ e beeŋ mɔ n lara sarga na so n lara sarga.
25Abuu to be kebaawɔ be Kejigboŋ na bee fara kufɔl shunusopo na be kachɛ kuduanusopo na nseŋ keta loŋ n ya fo nchɛnshunu. Kananɛ ewura na baaŋ lara asɔbɔya nɛ ayu nɛ ɔlifs be ŋku karechɛ kikɛ jemanɛ nɛ b daa ji Kebansonchoŋ be Kejigboŋ na, aloŋ nɛ e beeŋ naŋ lara amo kede gba to.”
46Ewura na nɛ nchɛgboŋ be asheŋ
1Ndoŋ nna nɛ Enyɛnpetale Ebɔrɛ na kaŋɛ le: “A daga fanɛ bɔrɛlambu na be epunto be kelɔnɛ na be kabuna nɛ k wɔ epeŋilarkpa be kaba so na ka ti so nna a yil nchɛnshe nɛ menyee shuŋ na kikɛ, ama men bugi kumo n yili Kewushiachɛ na nɛ Kufɔl popɔr be kachɛ juŋkparso na bre. 2Jemanɛ nɛ bɔrɛmatapo na malɛ bee lara ewura be sarga chɔɔso nɛ kɔnɔkoŋwule be esarga na Israɛl be ewura na beeŋ shi kowushina be kelɔnɛ na so m bɔla kabuna to be ebu na to n luri m ba yili m mata kabunagboŋ na be ndibi na; ŋ gbir m bunyaŋ ma nseŋ bɛta m bɔla kabunagboŋ na to n lar. Kabuna na beeŋ bugi n yili loŋ hale n ya fo kaaseso. 3Kewushiachɛ nɛ Kufɔl popɔr be kachɛ juŋkparso kikɛ, basa na kikɛ daga fanɛ b ba gbir m bunyaŋ ma ashi kabunagboŋ na ase. 4Ewura na beeŋ bar mbolpɔ fɔlbi ashe nɛ kpakpa nɛ e maŋ kɔ doro kikɛ m ba lara sarga chɔɔso kewushiachɛ na. 5E beeŋ ta ayu cheenshigboŋ be bargato n ti kpakpa kama so nseŋ ta kusɔ kama nɛ e bee sha n ti mbolpɔ fɔlbi na be kekama so nna m ba. Mo alɛ beeŋ naŋ ta ɔlifs be ŋku galɔn koŋwule n ti ayu cheenshigboŋ be bargato na so nna m ba. 6Kufɔl popɔr be kachɛgboŋachɛ na bre, ewura na beeŋ lara gbolu fɔlbi nɛ mbolpɔ fɔlbi ashe nɛ kpakpa nɛ e maŋ kɔ doro kikɛ nna. 7Ewura na beeŋ ta ayu cheenshigboŋ be bargato n ti gbolu nɛ kpakpa kama nɛ e lara na so nseŋ ta kusɔ kama nɛ e bee sha n ti mbolpɔ fɔlbi na be kekama malɛ so m ba. A daga fanɛ e ta ɔlifs be ŋku galɔn koŋwule n ti ayu cheenshigboŋ be bargato kama nɛ e beeŋ bar na so nna m ba. 8Ekpa nɛ ewura na beeŋ bɔla n luri kabuna to be ebu nɛ k wɔ epeŋilarkpa be kabunagboŋ ase na to na so nɛ e beeŋ bɔla so n lar kumo to.
9Ama jemanɛ kama nɛ basa na ba nɛ b ba bunyaŋ Enyɛnpe Ebɔrɛ na nchɛgboŋana na be kekama to, bekama nɛ baaŋ bɔla kelargato be esoso be kaba so be kabunagboŋ na to n luri na daga fanɛ b bɔla kelargato be kaseto be kaba so be kabunagboŋ na to nna n lar. Ekama e sa maŋ kaŋ naŋ bɔla kabuna nɛ e bɔla to n luri na to n lar, ama kabuna nɛ k wɔ kumo nɛ e bɔla to n luri na be kaba ndoŋ na. 10Jemanɛ nɛ basa na bee luri na a daga fanɛ ewura na gba e luri nseŋ na ŋ lar jemanɛ nɛ basa na naa lar na. 11Kejigboŋachɛ nɛ nchɛgboŋachɛ kikɛ, ayu cheenshigboŋ be bargato nɛ esa bee ta a ti gbolu ŋko kpakpa kikɛ so a lara sarga, nsaa ta kusɔ kama nɛ e bee sha a ti mbolpɔ fɔlbi na be kekama malɛ so a lara sarga. Amo be kaman nɛ e ta ɔlifs be ŋku galɔn koŋwule n ti ayu cheenshigboŋ be bargato na so m ba.
12Kede be kaman nɛ ewura na bee sha kelara mo gbagba be keparso be sarga chɔɔso ŋko kɔnɔkoŋwule be sarga n sa Enyɛnpe Ebɔrɛ na baŋ bugi bɔrɛlambu na be epunto be kelɔnɛ na be kabunagboŋ nɛ k wɔ epeŋilarkpa be kaba so na n sa mo nɛ e luri. Kananɛ e baa lara Kewushiachɛ be esarga na nɛ e beeŋ lara kede gba. E kaŋ wora n loge nseŋ lar na nɛ b ti kabunagboŋ na.”
Karechɛ kikɛ be esarga be asheŋ
13Ade be kaman nɛ Enyɛnpe Ebɔrɛ na naŋ kaŋɛ le: “Kachipurso kikɛ a daga fanɛ men bar kubɔlpo fɔlbi nɛ k ji kafɛ koŋwule nɛ doro kikɛ maŋ wɔ kumo so m ba lara sarga chɔɔso n sa Enyɛnpe Ebɔrɛ na. 14Menyi alɛ kraa beeŋ bar nyifu lela fanɛ kurwa anu nɛ ɔlifs be ŋku kɔlba nɛ barga kachipurso kikɛ m ba lara ajibi be sarga. Kebaa lara le be esarga ere a sa Enyɛnpe Ebɔrɛ na be mbraana ere baa wɔtɔ nna a yɔ, a maa chɛrga kikɛ. 15A daga fanɛ men baa ta mbolpɔ fɔlbi nɛ nyifu lela nɛ ɔlifs be ŋku a lara esarga a sa Enyɛnpe Ebɔrɛ na kachipurso kikɛ nna hale mbaanaayɔ.”
Ewura na nɛ kasawule na be asheŋ
16Ndoŋ nna nɛ Enyɛnpetale Ebɔrɛ na naŋ kaŋɛ le kenishipereso: “Nɛ fanɛ ewura na ku kasawule nɛ e kɔ na be kaba ŋ kɛ mbe mbia to be eko, k beeŋ baa la kebia na peya fanɛ mbe kanaŋ to be kapetɛsɔ. 17Ama nɛ fanɛ ewura na ku mbe kasawule ŋ kɛ esa kama nɛ e bee shuŋ mo, kumo ere k beeŋ naŋ bɛta ŋ ki ewura na peya kafɛ nɛ baa bɛta basa be mpetɛsɔ a sa bumo na to. Kasawule na la mbe kapetɛ nna. Mo nɛ mbe mbia nawule e naaŋ tiŋ a wɔ kumo mbaanaayɔ. 18Ewura na maŋ daga fanɛ e sɔ basa na to be ekama be kapetɛsɔ ashi mo kutɔ. Kasawule kama nɛ e beeŋ ta n sa mbe kebia daga fanɛ k baa la mo gbagba peya nna, saŋɛ na so e maaŋ baa nyaŋ ma basa a sɔ bumo be nsawule a mbe mbia.”
Bɔrɛlambu na to be edaŋɛkpaana be asheŋ
19Ade kikɛ be kaman nɛ kanyɛn nɛ e daŋ keta ma a ŋini bɔrɛlambu na, naŋ keta ma n yɔ ebuana nɛ a bee shoŋi kelargato be esoso be kaba so a mata kabunagboŋ nɛ k wɔ bɔrɛlambu na be epunto be kelɔnɛ na be kelargato be kaseto be kaba so na. Ebuana na daa la ebu cheembiana n sa bɔrɛmatapoana na nna. Ndoŋ nna nɛ e teŋi enɔ n ŋini kaboŋ ko ashi ebuana na be epeŋitɔrkpa be kaba so 20nseŋ kaŋɛ le: “Kakpa nɛ bɔrɛmatapoana na beeŋ baa daŋɛ eblaŋ nɛ b ta n lara kulubi ŋko kewora n jija be esarga nseŋ naa ta nyifu nɛ b ta n lara esarga naa wora ebodobodo gba nna na. Saŋɛ na so b maaŋ sulɔ asɔ cheembi na be kekama n lar n yɔ bɔrɛlambu na be kowushina be kelɔnɛ so be kakpa nɛ esa ko beeŋ tiŋ n foe m bɛta amo nɛ k baa la tɔrɔ n sa mo.”
21-22Kumo be kaman nɛ e naŋ juŋkpar ŋ keta ma m bɔla kowushina be kelɔnɛ na be akɔlɔbi ana na kikɛ to n choŋ nɛ n wu fanɛ amo be kekama kɔ kelɔnɛbi nɛ kumo be nteŋ to fo fanɛ ayadra adeshe nɛ aburwa nɛ mparto malɛ fo fanɛ ayadra adena nɛ aburwa nna. 23B daŋ ta ajembu m pɔr egbal ŋ kulti amo be kekama nna nseŋ yuu asure m mata egbal na. 24Ndoŋ nna nɛ kanyɛn na naŋ kaŋɛ ma le: “Edaŋɛkpaana nɛ bɔrɛlambu na to be beshumpo bee daŋɛ esarga nɛ basa na bee lara na nna na.”
47Kabombi nɛ k shi bɔrɛlambu na to a shile na be asheŋ
1Ade kikɛ be kaman nɛ kanyɛn na bɛta ma n yɔ bɔrɛlambu na to, ndoŋ nɛ n wu kabombi ko ka bee shile kabuna na be kaseto a yɔ epeŋitɔrkpa be kaba so. K fara bɔrɛlambu na be kelargato be esoso na nna a shile m ba bɔla bɔrɛsure na ase m baŋɛ kelɔnɛ na to a yɔ epeŋilarkpa be kaba so. 2Ndoŋ nna nɛ kanyɛn na naŋ keta ma m bɔla kelargato be esoso be kabunagboŋ na to n lar bɔrɛlambu na to nseŋ juŋkpar ma ŋ kulti n ya fo kabunagboŋ nɛ k bee shoŋi epeŋilarkpa na. Ndoŋ nɛ n wu kabombi ko ka bee shile kabunagboŋ na be kelargato be kaseto be kaba so na. 3Nɛ kanyɛn na ta mbe efɔl karga asɔ ŋ karga ateŋgreŋ alfa anu nɛ adeshe m bɛ kabombi na so ŋ gbelge to a yɔ epeŋilarkpa be kaba so nseŋ kaŋɛ ma fanɛ n luri nchu na to a nite to ndoŋ. Nchu na daa fo ma anaŋgbeltobi to nna. 4Ndoŋ nna nɛ e naŋ yili ndoŋ ŋ karga ateŋgreŋ alfa anu nɛ adeshe m bɛ kabombi na so a gbelge to nɛ nchu na dii m ba ma amuli to. Nɛ e naŋ yili ndoŋ ŋ karga ateŋgreŋ alfa anu nɛ adeshe n chuge so, nɛ nchu na naŋ dii n fo ma kashɛr to. 5Kumo be kaman, nɛ e naŋ yili ndoŋ ŋ karga ateŋgreŋ alfa anu nɛ adeshe n yɔ anishito. Ndoŋ bre be nchu na daa wɔ nchiŋ nna amoso, n daa maŋ tiŋ n nite amo to. Ŋkpal ndoŋ ka daa wɔ nchiŋ so esa daa maaŋ tiŋ n nite amo n dii ama e la nna. 6Ndoŋ nna nɛ kanyɛn na kaŋɛ ma le: “Dimɛdi pibi, Ezikɛl, baa de asheŋ ere kikɛ so nɛnɛ.”
Kumo be kaman nɛ e keta ma n laŋɛ n yɔ kabombi na be ekarso, 7nɛ n ya wu fanɛ ndibi damta daa yil kabombi na be mba anyɔ na kikɛ so nna. 8Ndoŋ nna nɛ e kaŋɛ ma le: “Nchu ere bɔla kasawule ere so nna n sɔ epeŋilarkpa be kaba so ŋ gbelge to m bɔla Jɔɔdan be ketaŋɛ to a yɔ Teku Wuso na to nna na. Kumo be nchu na baŋ luri Teku Wuso na to, Teku Wuso na be nchu nɛ a kɔ nfɔl na beeŋ kilgi nchu nɛ e walɛ kenuu. 9Kaplɛkama nɛ nchu na beeŋ shile m bɔla, asɔbɔya nɛ ekɔrɔtɔ be yiri yiri beeŋ ba ndoŋ, ŋkpal manɛ so kabombi na beeŋ bar ŋkpa nɛ nchu nɛ e walɛ kenuu m ba wɔtɔ Teku Wuso na to. 10Yili achubu nɛ baa tre Ɛngɛdi na hale n ya fo achubu nɛ baa tre Ɛneglem na, basa beeŋ baa pɛ ekɔrɔtɔ teku na to nsaa fata bumo be ashewu kumo be ekarso. Teku Wuso na beeŋ nya ekɔrɔtɔ be yiri yiri fanɛ kananɛ Mɛditerenia be Teku kɔ amo na. 11Ama apa nɛ a dese m mata teku na bre be nchu nɛ a kɔ nfɔl na bre be nfɔl maaŋ lar amo to, saŋɛ na so basa beeŋ baa nya nfɔl amo to a wora asheŋ. 12Ndibi be yiri yiri beeŋ kɔr a yil kabombi na be kaba kama so a sa kusɔ jiso. Amo be afantaŋ maa ba nɛ aba bolo, amo alɛ maaŋ yige kebaasɔr kikɛ. Kufɔl kikɛ a beeŋ baa kɔ asɔrso popɔr, ŋkpal manɛ so a bee nya nchu nɛ a bee shi bɔrɛlambu na to nna. Ndibi na be asɔrso beeŋ baa la ajibi nɛ amo be afantaŋ malɛ e baa chɛ basa alɔ.”
Kasawule na be Egbaŋ ana be asheŋ
13Ade kikɛ be kaman, nɛ Enyɛnpetale Ebɔrɛ na naŋ kaŋɛ Israɛl be basa na le: “Kananɛ kasawule nɛ menyeeŋ chige to n sa Israɛl be eyiri kudu anyɔ na be egbaŋ daga fanɛ a baa du nde. Josɛf be eyiri anyɔ nɛ baa tre Manase nɛ Efrayim na beeŋ nya mboŋ anyɔ. 14N daŋ bɔ ntaŋ n nase kɔnɔ n sa menyi nananyɛnana fanɛ meeŋ sa bumo kasawule ere nɛ k baa la bumo peya; amoso men barga kumo to dede n sa abar.
15Kumo be kelargato be esoso be ekar beeŋ fara Mɛditerenia be Teku na ase ŋ keta n ya bɔla epeŋilarkpa be kaba so be ndegboŋ nɛ baa tre Hiflɔn nɛ Lɛbo Hamaf na n ya fo kadegboŋ nɛ baa tre Zedad na. 16Kumo alɛ beeŋ naŋ keta loŋ n ya fo ndegboŋ nɛ baa tre Bɛrota nɛ Sibreem nɛ a dese nwursawule anyɔ nɛ baa tre Damaskɔs nɛ Hamaf be nferinto na, hale n ya fo kadegboŋ nɛ baa tre Tikɔn nɛ k dese kebonfu nɛ baa tre Hawuran na be gbaŋ ase na. 17Amoso kasawule na be kelargato be esoso be ekar yili Mɛditerenia be Teku na ase ŋ keta n sɔ epeŋilarkpa be kaba so n ya fo kadegboŋ nɛ baa tre Enɔn na nna, nɛ kumo nɛ Damaskɔs nɛ Hamaf be abonfu wora gbaŋ a laŋɛ kelargato be esoso be kaba so.
18Epeŋilarkpa be gbaŋ na malɛ fara Damaskɔs nɛ Hawuran be abonfu anyɔ be nferinto nna ŋ keta n sɔ kelargato be kaseto, nɛ Jɔɔdan be Lɔr ki Israɛl be basa be kasawule ashi epeŋitɔrkpa be kaba so nɛ Giliad be kasawule ashi epeŋilarkpa be egbaŋ to, nseŋ keta loŋ n ya lar kade nɛ baa tre Tama nɛ k mata Teku Wuso na.
19Kasawule na be kelargato be kaseto be ekar beeŋ fara Tama be kade na nna ŋ keta n ya fo Kadɛsh Mɛriba be achubu na ashi kelargato be kaseto be epeŋilarkpa be kaba so nseŋ naŋ ta n sɔ kelargato be epeŋitɔrkpa be kaba so a shi Ijipt be gbaŋ to n ta ya fo Mɛditerenia be Teku ase.
20Kumo be epeŋilarkpa be ekar malɛ beeŋ fara Mɛditerenia be Teku ase ŋ keta n sɔ kelargato be esoso n ya fo Lɛbo Hamaf be epeŋitɔrkpa be kaba so.
21Kasawule nɛ menyeeŋ barga to n sa Israɛl be eyiriana na nna na. 22K beeŋ baa la menyi be kapetɛ hale mbaanaayɔ. Nɛ menyi bee chige kasawule na to, befɔ kama nɛ menyi nɛ bumo wɔtɔ nɛ b kurge mbia nfe na gba daga fanɛ b nya bumo be kachige. A daga fanɛ men baa wora bumo fanɛ Israɛl be ndetobia nseŋ shin nɛ bumo alɛ gba e baa tu Israɛl be eyiriana na a to beri a nya kasawule na be kachige. 23Yiri kama to nɛ efɔ chena, daga fanɛ b chige bumo kasawule na nɛ efɔ na gba e nya mbe kachige. Ma, Enyɛnpetale Ebɔrɛ na e kaŋɛ.”
48Kasawule na be kebarga to n sa eyiriana na be asheŋ
1-7Eyiriana na be kekama beeŋ nya kasawule na be kaba nɛ k beeŋ yili Israɛl be epeŋilarkpa be kaba so be gbaŋ nɛ k dese epeŋitɔrkpa be kaba so na n ya fo Mɛditerenia be Teku ase nna na. Israɛl be kelargato be esoso be kaba so be gbaŋ na beeŋ bɔla Hiflɔn nɛ Lɛbo Hamaf be ndeana to n ya fo kakpa nɛ baa tre Haza Ɛnɔn nɛ k dese m mata Damaskɔs nɛ Hamaf be egbaŋ to na. Kananɛ eyiriana na beeŋ nya bumo be nsawule be kachige nde. Dan be yiri e naŋ juŋkpar n nya nɛ Asha be yiri e bɛ so nɛ Naftali be yiri e bɛ so nɛ Manase be yiri e bɛ so nɛ Efrayim be yiri e bɛ so nɛ Ruben be yiri e bɛ so nseŋ ta Juda be yiri m bɛ so lalaloge.
Kasawule na be nferinto be asheŋ
8Kakpa nɛ menyeeŋ ku m bɛ Juda be yiri so a laŋɛ kelargato be kaseto na beeŋ baa la kasawule nɛ k beeŋ baa kɔr to nna. Kumo be mparto beeŋ yili kelargato be esoso m ba choŋ kelargato be kaseto nsaa la emayɛl ashunu nɛ kumo be nteŋ to malɛ nɛ kananɛ menyeeŋ ku n sa Israɛl be eyiriana na be nteŋ to e baa sasa. Kasawule ere so nɛ ma bɔrɛlambu beeŋ yili.
9Kakpa ere be nferinto be kasawule na beeŋ baa la ma Enyɛnpe Ebɔrɛ na peya. Kumo be nteŋ to beeŋ baa la emayɛl ashunu nɛ mparto malɛ e baa la emayɛl ashe. 10Ma, Enyɛnpe Ebɔrɛ na beeŋ ku ma kasawule cheembi na n sa bɔrɛmatapoana na. Kakpa nɛ meeŋ ku n sa bumo na be nteŋ beeŋ yili epeŋilarkpa n ya fo epeŋitɔrkpa nsaa la emayɛl ashunu, nɛ kumo be mpar malɛ e yili kelargato be esoso n ya fo kelargato be kaseto, nsaa la emayɛl asa. Saŋɛ na so baaŋ pɔr Enyɛnpe Ebɔrɛ na be bɔrɛlambu n yili kumo be nferinto. 11Kakpa cheembi ere beeŋ baa la bɔrɛmatapoana nɛ b shi Zadɔk be kabuna na peya nna. Ŋkpal manɛ so, bumo e ta kashenteŋji a shuŋ ma nsaa maŋ tu Livaiebi nɛ Israɛl be basa nɛ b ka na a wora alubi. 12Amoso bumo e naŋ nya kakpa nɛ k daga m bɛ kasawule nɛ k la Livaiebi peya na so. Kumo alɛ e naŋ baa la nsawule na kikɛ to be kakpa cheembi ga. 13Livaiebi na gba daga kakpa nɛ k daga. Kumo alɛ beeŋ dese a laŋɛ bɔrɛmatapoana be kakpa na be kelargato be kaseto be kaba so nna. Kumo be nteŋ to beeŋ yili epeŋilarkpa n ya fo epeŋitɔrkpa nsaa la emayɛl ashunu nɛ kumo be mparto e yili kelargato be esoso n ya fo kelargato be kaseto nsaa la emayɛl asa. 14Kasawule na be kakpa nɛ k la Enyɛnpe Ebɔrɛ peya na e naŋ baa la kasawule na kikɛ be kakpa lela ga nɛ a maŋ daga fanɛ b ku kumo be kaba kama n fa ŋko n chɛr kusɔ ko ŋko n sa esa kikɛ. Ŋkpal manɛ so, k la kakpa cheembi nna nsaa la Enyɛnpe Ebɔrɛ na peya.
15Ma kakpa cheembi na be kaba nɛ k beeŋ ka n dese kelargato be kaseto nɛ kumo be nteŋ to la emayɛl ashunu nɛ mparto la emayɛl asa na maŋ naa du cheembi, ama k beeŋ baa la Israɛl be basa na kikɛ peya nna nɛ b tiŋ m pɔr nwu n chena so nsaa bela asɔbɔya. Baaŋ pɔr kadegboŋ nɛ baa tre Jerusalɛm na kumo be nferinto, 16nɛ kumo be nteŋ to nɛ mparto kikɛ e baa la ateŋgreŋ ŋgboŋ anyɔ nɛ alfa anu nɛ adunyɔ. 17Ndoŋ nna nɛ b yige kefulbi nɛ k fo fanɛ ateŋgreŋ kalfa nɛ adena n nase ŋ kulti Jerusalɛm be kadegboŋ na n wɔtɔ nɛ asɔbɔya e baa ji kumo so. 18B kaŋ pɔr kadegboŋ na n loge, kasawule nɛ k beeŋ ka a dese a laŋɛ kaboŋ cheembi na be kelargato be kaseto be kaba so na beeŋ baa la kudɔsawule n sa basa nɛ b wɔ Jerusalɛm to na. Kumo be nteŋ to beeŋ baa la emayɛl asa nɛ mparto e baa la emayɛl anyɔ ashi epeŋilarkpa be kaba so nseŋ naa la emayɛl asa nteŋ to nɛ emayɛl anyɔ mparto ashi epeŋitɔrkpa be kaba so. 19Yiri kama to be esa kama nɛ e chena kadegboŋ na to beeŋ tiŋ n dɔ kasawule na so n ji.
20Ŋkpal loŋ so, kasawule nɛ menyeeŋ ku n nase nferinto n sa Ebɔrɛ na, n ta kaboŋ nɛ kadegboŋ na yil so na gba n ti so, kikɛ be kaba kama so beeŋ baa la emayɛl ashunu nna.
21-22Abonfu nɛ a dese kasawule nɛ kumo be mba ana na kikɛ sasa na be epeŋilarkpa nɛ epeŋitɔrkpa kikɛ beeŋ baa la Israɛl be ewura peya. Mbe kapetɛsawule beeŋ fara Jɔɔdan be Lɔrgboŋ na ashi epeŋilarkpa be kaba so ŋ keta m ba choŋ Mɛditerenia be Teku na ase ashi epeŋitɔrkpa be kaba so nna. Ma kasawule cheembi na nɛ bɔrɛlambu na nɛ Livaiebi be kaboŋ na nɛ Jerusalɛm kikɛ beeŋ baa wɔ ewura na be kasawule na be nferinto nna. Ewura na be kasawule na nɛ Juda be yiri to be kasawule e naŋ wora egbaŋ ashi kelargato be esoso be kaba so nɛ kumo nɛ Bɛnjamin be yiri to be kasawule e wora egbaŋ ashi kelargato be kaseto be kaba so.
Kebarga kasawule na to n sa eyiriana nɛ a ka na be asheŋ
23-27Kasawule nɛ k dese kumo nɛ b ku n nase ŋ kɔr na be kelargato be kaseto be kaba so na ka Israɛl be eyiriana nɛ a ka na peya nna. Eyiriana na be kekama beeŋ nya kasawule na be kaba nɛ k yili Israɛl be epeŋilarkpa be kaba so be gbaŋ nɛ k dese epeŋitɔrkpa be kaba so na n ya fo Mɛditerenia be Teku na ase nna. Kananɛ eyiriana na beeŋ nya bumo be nsawule be kachige nde na. Bɛnjamin be yiri e naŋ juŋkpar n nya nɛ Simiɔn be yiri e bɛ so nɛ Issaka be yiri e bɛ so nɛ Zɛbyulɔn be yiri e bɛ so nɛ Gad be yiri e bɛ so.
28Kaba nɛ baaŋ ku n sa Gad be yiri na be kelargato be kaseto be kaba so be ekar beeŋ fara Tama be kade nɛ k wɔ kelargato be kaseto be epeŋitɔrkpa na nna n ya fo Kadɛsh be achubu ase nna nseŋ naŋ keta m bɔla Ijipt be gbaŋ to loŋ n ya fo Mɛditerenia be Teku na ase.
29Ade kikɛ be kaman nɛ Enyɛnpetale Ebɔrɛ na naŋ kaŋɛ le: “Kananɛ a daga fanɛ b barga kasawule na to mba mba n sa Israɛl be eyiriana na nɛ bekama e baa kɔ bumo peya nna na.”
Jerusalɛm be mbunagboŋ na be asheŋ
30-34Jerusalɛm be kadegboŋ na beeŋ baa kɔ mbunagboŋ kudu anyɔ nna. Egbalana nɛ a kulti kumo be mba ana na be kekama beeŋ baa kɔ mbunagboŋ asa nɛ b ta eyiriana na be atre n nase amo. Egbalana na be kekama beeŋ baa sa fanɛ ateŋgreŋ ŋgboŋ anyɔ nɛ alfa anu nɛ adunyɔ nna. Mbunagboŋ nɛ a beeŋ baa wɔ egbal nɛ k bee laŋɛ kelargato be esoso be kaba so na be atre e naŋ baa la Ruben nɛ Juda nɛ Livai. Amo nɛ a wɔ epeŋilarkpa be kaba so na malɛ e malɛ e la Josɛf nɛ Bɛnjamin nɛ Dan. Mbunagboŋ nɛ a wɔ kelargato be kaseto be kaba so na malɛ e la Simiɔn nɛ Issaka nɛ Zɛbyulɔn nɛ amo nɛ a wɔ epeŋitɔrkpa na malɛ la Gad nɛ Ashɛr nɛ Naftali. 35Egbal nɛ k kulti kadegboŋ na n wɔtɔ na be nteŋ kikɛ n chambɔ beeŋ baa la fanɛ emayɛl adunyɔ nɛ ashe nna. Yili kabre a yɔ, kadegboŋ na be ketre e naŋ baa la “Enyɛnpe Ebɔrɛ na Wɔ Nfe!”