ƐKSODƆS

MOSIS BE KAWƆL NYƆSOPO NƐ BAA TRE

ƐKSODƆS

NA

Kananɛ b tɔrɔ Israɛlebi ashi Ijipt be asheŋ

¹Jeekɔb be bibinyɛn nɛ bumo be ekama daŋ keta mbe kanaŋ n tu mo n yɔ Ijipt be efuli so na be atre nde: ²Ruben nɛ Simiɔn nɛ Livai nɛ Juda ³nɛ Isakar nɛ Zɛbyulɔn nɛ Bɛnjamin ⁴nɛ Dan nɛ Naftali, nɛ Gad nɛ Ashɛr. ⁵Saŋɛ nɛ b yɔ Ijipt na nɛ Jeekɔb be kanaŋ to ebi kikɛ daa wɔ basa adushunu. Kumo be saŋɛ so nɛ Josɛf bre tea wɔ Ijipt. ⁶B wɔtɔ loŋ nɛ Josɛf nɛ mo daana nɛ bumo be jemanɛ to ebi kikɛ wu n loge. ⁷Ama bumo be kaman to ebi, Israɛlebi na, daa kurge nna ga n wora keshi n sɔ kasawule na so kikɛ.

⁸Ndoŋ nna nɛ esa popɔr ko nɛ e daa maŋ nyi Josɛf ba ji Ijipt be efuli so be kuwura. ⁹Kachako nɛ e kaŋɛ mbe basa le: “Men keni, naniere Israɛlebi ere wora keshi ga nsaa kɔ eleŋ ga a chɔ anyi. ¹⁰Amoso men shin nɛ an bɔla kanyiasheŋ be ekpa so n wora kusɔ ko ŋ kuŋ anyi be amu. Mannɛ aloŋ, baaŋ baa kraa wora keshi a ti so, nɛ k ya ba fanɛ kena koso anyi nɛ basa ko so, baaŋ chɛ an doŋana na to ŋ kɔ anyi nseŋ shile anyi be efuli ere so kuraa.” ¹¹Ndoŋ nna nɛ Ijiptebi na lara basa fanɛ benyɛnpe nɛ baaŋ baa keni Israɛlebi na so fanɛ anya. Ndoŋ nna nɛ b ta kanyaŋ be kushuŋ a tɔrɔ Israɛlebi na nseŋ shin nɛ b pɔr nde nɛ baa tre Pitɔm nɛ Rameses na n sa ewura Fɛɛro nɛ e baa ta mbe asɔ a yili to ndoŋ. ¹²Ama kanaŋkama nɛ b daŋ baa tɔrɔ Israɛlebi na, bumo alɛ daŋ baŋ kraa wora keshi nna a ti so nseŋ sɔ kasawule na so kikɛ nɛ Ijiptebi na fara a ŋana Israɛlebi na alegaiso. ¹³Ŋkpal loŋ so b daŋ shin nna nɛ Israɛl be basa na bee shuŋ ashuŋ kpakpaso kananɛ k maŋ daga ¹⁴nɛ kebaawɔtɔ ki nyaŋnyaŋ n sa bumo ŋkpal loŋ so. B daa shin nɛ baa baga eshii a kuya ebirkesi a pɔr nwu nsaa shuŋ ndɔana to nna. Bumo alɛ daa maa wu Israɛlebi na kuwɔr kikɛ.

¹⁵Kachako nɛ Ijipt be ewura Fɛɛro na kaŋɛ Hibruw be beche nɛ baa tre Shifra nɛ Puwa nɛ b daa keta beche nɛ baa kurge na le: ¹⁶“Saŋkama nɛ men baŋ ya kaa keta Hibruwche kama kakurge nseŋ wu fanɛ ebinyɛn nɛ e kurge, men mɔ kebia na. Ama nɛ fanɛ kebia na la ebiche bre, men yige mo.” ¹⁷Ama beche nɛ b daa keta kakurge na daa kɔ kabɔrɛŋana nna, amoso b daŋ kini kewora kusɔ nɛ Ijipt be ewura na kaŋɛ bumo na nna, nseŋ daa yige mbinyɛnsobi na gba. ¹⁸Ndoŋ nna nɛ kachako nɛ Ijipt be ewura na shuŋi n tre beche nɛ b daa sɔ kakurge na m bishi bumo le: “Manɛ e ba nɛ menyee wora loŋ? Manɛ so nɛ menyee maa mɔ mbinyɛnsobi na nsaa yige bumo?” ¹⁹Ndoŋ nna nɛ beche na kaŋɛ ewura Fɛɛro le: “Hibruw be beche na bre maŋ du fanɛ Ijipt be beche. Bumo ere be kakurge maŋ du kpakpa, amoso pɔɛŋ nɛ anyi be ekama e fo ŋ keta bumo kakurge na gba nɛ b tiŋ ŋ kurge.” ²⁰Ŋkpal loŋ so Ebɔrɛ daŋ wora beche nɛ baa sɔ kakurge na kelela nna nɛ Israɛlebi na malɛ wora keshi n naŋ ti so gba kuraa. ²¹Beche nɛ baa sɔ kakurge na ka daa ŋana Ebɔrɛ so so e daŋ nɛfa bumo nna n sa bumo be ekama mo gbagba be mbia. ²²Ndoŋ nna nɛ ewura Fɛɛro sa mbe basa kikɛ ebɔl kenishipereso ŋ kaŋɛ le: “Hibruwebi na baŋ kurge ebinyɛn kikɛ, men ta mo n ya lɛ lɔr nɛ baa tre Nail na to, ama becheso na bre, men yige bumo kikɛ nɛ b baa wɔtɔ.”

B ka kurge Mosis be asheŋ

¹Loŋ be jemanɛ na malɛ nɛ kanyɛn ko nɛ e daŋ shi Livai be kanaŋ to daŋ ta livaiebi ko a kil ²nɛ kache na di kedampo ŋ kurge ebinyɛn. E ka wu kananɛ kebia na daa walɛ keyɛrbi na nɛ e ta mo ŋ ŋana afɔl asa. ³Ama saŋɛ nɛ e wu fanɛ e maaŋ naŋ tiŋ n ta kebia na ŋ ŋana na nɛ e ta kootal n laa kelantaŋɛ nɛ b ta agasa n lue nseŋ ta kebia na n wɔtɔ kumo to. Kumo be kaman nɛ e ta kelantaŋɛ na nɛ kebia na kikɛ n ya yili nchu to ashi lɔrkar be afitiri jeŋgreŋ ko nɛ a du fanɛ agasa na to. ⁴Nɛ kebia na mo dache malɛ ya feŋ n yili a keni kusɔ nɛ k beeŋ wora mo.

⁵K maŋ chɛr ko nɛ ewura Fɛɛro pibiche ba lɔr na to nɛ e ba bɛr nɛ mbe mbita malɛ na lɔr na be ekarso. Nɛ ewura Fɛɛro pibiche na wu kelantaŋɛ na ka yil nchu to ashi afitiri jeŋgreŋ na to nɛ e shuŋi mbe kenyache fanɛ e ya ta kumo m ba. ⁶Ndoŋ nna nɛ ewura Fɛɛro pibiche na bugi kelantaŋɛ na so n wu kebia nyɛnsobi kumo to nɛ e bee shu. Nɛ mbe asheŋ pɛ mo kuwɔr nɛ e kaŋɛ: “Hibruwebi be mbi popɔrbi ere be eko nde.” ⁷Epul na to nɛ kebi popɔrbi na mo dache na ba bishi ewura Fɛɛro pibiche na le: “N ya tre Hibruw be eche ko m ba nɛ e ba sɔ mo n ya kaa nyipo a sa fo a?” ⁸Nɛ ewura Fɛɛro pibiche na kaŋɛ mo: “Mm, yɔ.” Ndoŋ nna nɛ kebia na mo dache na ya bar kebia na mo nio gbagba. ⁹Kache na ka ba nɛ ewura Fɛɛro pibiche na kaŋɛ mo le: “Ta kebia ere n ya kaa keni so a sa ma nɛ ŋ ka fo kukɔ.” Ndoŋ nna nɛ keche na ta kebia na n ya kaa bela. ¹⁰Kebia na ka daŋ gbrɛbi nɛ kache na ta mo n ya sa ewura Fɛɛro pibiche na, nɛ e ta mo ŋ ki mo gbagba pibinyɛn nseŋ nase mo Mosis. Ŋkpal e ka nya mo ashi nchu to so.

Mosis ka shile n yɔ Midian be asheŋ

¹¹Mosis ka daŋ ŋ ki esa, kachako nɛ e yɔ nɛ e ya bɔɔ mbe basa gbagba so nseŋ wu kananɛ Ijiptebi daa nyaŋ bumo nɛ baa shuŋ ashuŋ kpakpaso. Ndoŋ nɛ e wu Ijipt be esa ko ka bee bri Hibruw be esa ko nɛ e daa la mo ere Mosis be esa gbagba. ¹²Mosis ka gbɛ ŋ keni nfe ŋ gbɛ ŋ keni nfe nsaa maŋ wu esa kikɛ ka da mo so nɛ e mɔ Ijipt be esa na nseŋ ta mo m puli eshishɛr to. ¹³Kumo be ŋklade Mosis ka naŋ lar nɛ e ya tu Hibruw be basa anyɔ ko nɛ baa bile. Ndoŋ nna nɛ e bishi emo nɛ e daŋ fara kolu na le: “Manɛ e ba nɛ fee ŋmɛa fo barkasa Hibruw be esa loŋ?”

¹⁴Nɛ emo nɛ e daŋ fara kolu na bishi Mosis le: “Wanɛ e ta fo ŋ ki anyi be enimu nɛ anyi be demujipo? Ŋko, fee sha kemɔ ma alɛ gba nna fanɛ kananɛ fo daŋ mɔ Ijipt be esa na a?” Ndoŋ nna nɛ kufu pɛ Mosis nɛ e kaŋɛ mbe kumu: “To, k baŋ di efuli nna na fanɛ basa pin kusɔ nɛ n wora na.” ¹⁵Ewura Fɛɛro ka nu kesheŋ na nɛ e bee fin kemɔ Mosis. Ndoŋ nna nɛ Mosis shile n yɔ Midian be kasawule so n ya chena ketirbu ko ase. ¹⁶Nɛ Jetro nɛ e daa la bɔrɛmatapo ashi Midian na be mbichebi ashunu ba nɛ b ba jɔ nchu ketirbu na to n wɔtɔ asɔbɔya be asɔnuunchu to n sa bumo tuto be mbolpɔ nɛ mboe. ¹⁷Ndoŋ nna nɛ asɔbɔyakpapoana ko ba kaa ju Jetro be mbichesobi na. Nɛ Mosis koso n ya mɔlga mbichesobi na nseŋ chɛ bumo to n jɔ nchu n sa bumo be asɔbɔya na.

¹⁸Mbichesobi na ka bɛta n yɔ bumo tuto Jetro kutɔ nɛ e bishi bumo: “Manɛ nna nɛ men bɛta m ba manaŋ kabre loŋ?”

¹⁹Nɛ b kaŋɛ mo: “Ijipt be kanyɛn ko e mɔlga anyi ashi asɔbɔyakpapoana na kutɔ nseŋ jɔ nchu n sa anyi be asɔbɔya gba.” ²⁰Ndoŋ nna nɛ mbichebi na bumo tuto bishi bumo le: “Nɛ nnɛ nɛ e wɔ? Manɛ nna nɛ men yige mo ndoŋ? Men ya tre mo nɛ e ba ji kusɔ ko.”

²¹Kumo be kaman nɛ Mosis shuli n chena Midian. Mosis nɛ bumo wɔtɔ loŋ nɛ Jetro ta mo pibiche Zipora n sa mo nɛ e ki mbe eche. ²²Zipora ka kurge ebinyɛn nɛ Mosis nase mo Gɛshɔn, ŋkpal e ka daa fɛ le so: “N la efɔ nna ashi efuli pɔtɛ ere so, kumo so, meeŋ nase ma kebia ere loŋ be ketre na.”

²³Kumo be nfɛ damta ka ba choŋ nɛ Ijipt be ewura na wu, ama amo nɛ amo kikɛ nɛ Israɛlebi na kraa wɔ kenyaya to nna a ji awurfoŋ nsaa shu a tre Ebɔrɛ fanɛ e chɛ bumo to. ²⁴Nɛ Ebɔrɛ nu bumo be nfubel na nseŋ nyiŋi mbe kɔnɔkoŋwule be ŋkre nɛ k wɔ mo nɛ bumo nananyɛnana Eebraham nɛ Aizek nɛ Jeekɔb be kefɛato na. ²⁵Israɛlebi na be asheŋ daŋ tir mo ga m pɛ mo kuwɔr ŋkpal kenyaya nɛ b daa wɔ to na so.

Ebɔrɛ ka tre Mosis be asheŋ

¹Mosis daa kpa mo shanyɛn Jetro nɛ e daa la Midian be bɔrɛmatapo na be mbolpɔ nna. Kachako nɛ e kpa bumo m bɔla kiyi to n ya fo Ebɔrɛ be kebeegboŋ nɛ baa tre Sainai na ase. ²Ndoŋ nɛ Enyɛnpe Ebɔrɛ be malaika lar mo so fanɛ edɛ be adondulombi na ashi kupumbi ko to. Mosis daŋ wu kupumbi na ka bee suse edɛ ama kumo alɛ daa maa chɔɔ a mur. ³Nɛ e fɛ mbe kumu to ŋ kaŋɛ: “Meeŋ yɔ kaboŋ ere n ya keni mamachi be kesheŋ ere, kumo e la fanɛ manɛ e ba nɛ kupumbi na bee suse edɛ ŋkaa maa chɔɔ a mur?”

⁴Enyɛnpe Ebɔrɛ ka wu fanɛ Mosis firgi n taga to nɛ e keni na nɛ e tre mo ashi kupumbi na to ŋ kaŋɛ: “Mosis, Mosis!” Nɛ Mosis shuli ŋ kaŋɛ le: “Ma nde.”

⁵Nɛ Ebɔrɛ kaŋɛ mo: “Sa maŋ kaŋ naŋ firgi m ba n ti so. Lara fo asɛbta na, ŋkpal manɛ so, kasawule cheembi so nɛ fo yil na. ⁶Ma e la fo tutoana, Eebraham nɛ Aizek nɛ Jeekɔb be Ebɔrɛ na.” Ndoŋ nna nɛ Mosis kurgi kumu n yuu to, ŋkpal e ka daa ŋana kekeni Ebɔrɛ na so.

⁷Ndoŋ nna nɛ Enyɛnpe Ebɔrɛ kaŋɛ mo le: “N wu tɔrɔ mo nɛ ma basa bee ji ashi Ijipt be efuli so, ma alɛ nseŋ naŋ nu b ka bee shu ŋkpal awurfoŋ nɛ baa ji ashi anyakenipoana be enɔ to na so. Bumo be asheŋ tir ma ga. ⁸Ŋkpal loŋ so, nɛ ŋ gbelge m ba nɛ m ba mɔlga bumo ashi Ijiptebi na be enɔ to nseŋ lara bumo ashi Ijipt be kasawule so n yɛr bumo kasawule lela nɛ k shi so. Kasawule mo nɛ k kɔ kanya alegaiso nsaa wora ajibi nɛnɛ. Loŋ be kasawule na so nɛ Keenanebi nɛ Hitebi nɛ Amɔriebi nɛ Pɛrizebi nɛ Hivebi nɛ Jebusiebi tase so na. ⁹N nu ma basa Israɛlebi be kushu kashenteŋto, ma alɛ nseŋ naŋ wu kananɛ Ijiptebi bee tɔrɔ bumo. ¹⁰Amoso mee shuŋi fo Ijipt be ewura Fɛɛro kutɔ nna naniere nɛ fo ya lara ma basa Israɛlebi ashi efuli na so.”

¹¹Ndoŋ nna nɛ Mosis kaŋɛ Ebɔrɛ le: “Ma alɛ e la wanɛ nɛ n tiŋ n yɔ Ijipt be ewura Fɛɛro be anishito, hale n ya lara Israɛlebi na ashi Ijipt be efuli so!” ¹²Nɛ Ebɔrɛ kaŋɛ mo le: “Meeŋ baa wɔ fo kutɔ. Fo kaŋ ya lara basa na ashi Ijipt be efuli so m ba kebee ere so nfe m ba bunyaŋ ma na nɛ feeŋ pin fanɛ ma e shin nɛ loŋ wora.”

¹³Ndoŋ nna nɛ Mosis naŋ kaŋɛ: “Nɛ ŋ kaŋ yɔ Israɛlebi na kutɔ n ya kaŋɛ bumo le: ‘Men nananyɛnana be Ebɔrɛ e shuŋi ma menyi kutɔ.’ Nɛ b kaŋ bishi ma fanɛ: ‘Mbe ketre e la nuso?’ Nuso nɛ meeŋ kaŋɛ bumo?”

¹⁴Nɛ Ebɔrɛ kaŋɛ Mosis le: “Kaŋɛ bumo fanɛ ma ketre e la: ‘Ma Nɛ N La Ma Na.’ Amoso kusɔ nɛ feeŋ ya kaŋɛ Israɛlebi na e la fanɛ: ‘Ma Nɛ N La Na’ e shuŋi ma menyi kutɔ.”

¹⁵Kede be kaman nɛ Ebɔrɛ naŋ kaŋɛ Mosis fanɛ e kaŋɛ Israɛlebi na le: “Enyɛnpe Ebɔrɛ nɛ e la men nananyɛnana Eebraham nɛ Aizek nɛ Jeekɔb be Ebɔrɛ na e shuŋi ma menyi kutɔ. Ketre ere malɛ e naaŋ baa la ma ketre hale mbaanaayɔ. Loŋ nɛ men be kaman to ebi kikɛ gba beeŋ ba kaa tre ma. ¹⁶Yɔ n ya tre Israɛlebi na be bejuŋkparpo kikɛ n shɛr ŋ kaŋɛ bumo fanɛ Enyɛnpe Ebɔrɛ nɛ e la men nananyɛnana, Eebraham nɛ Aizek nɛ Jeekɔb be Ebɔrɛ na e lar ma so ŋ kaŋɛ: ‘Ŋ keni n wu kusɔ nɛ baa wora menyi ashi Ijipt be efuli so nɛ menyi be asheŋ tir ma ga.’ ¹⁷Ma alɛ yili kumo fanɛ meeŋ lara menyi ashi tɔrɔ nɛ menyee ji ashi Ijipt be efuli so na to n yɔ Keenanebi nɛ Hitebi nɛ Amɔriebi nɛ Pɛrizebi nɛ Hivebi nɛ Jebusiebi be nsawuleana so. Loŋ be nsawule na e kɔ kanya alegaiso nsaa wora ajibi nɛnɛ.”

¹⁸“Nɛ fo wora loŋ, Israɛl be benimu na beeŋ nu n sa fo nɛ fo keta bumo n yɔ Ijipt be ewura Fɛɛro kutɔ n ya kaŋɛ mo le: ‘Enyɛnpe Ebɔrɛ nɛ e la Israɛlebi be Ebɔrɛ na e lara mbe kumu ŋ ŋini anyi, amoso jande, sa anyi ekpa naniere nɛ an ta nchɛ asa n nite n yɔ keshishɛrsawule na so n ya lara sarga n sa Enyɛnpe Ebɔrɛ nɛ anyi be Ebɔrɛ na.’ ¹⁹Ama n nyi Ijipt be ewura na ka maaŋ shin nɛ men yɔ, ama m baŋ ki mbe enɔ to nna pɔɛŋ nɛ e shuli. ²⁰Amoso meeŋ ŋini ma eleŋ nseŋ wora emamachisheŋ ŋ gberge Ijiptebi kusoe ndoŋ nɛ kufu e pɛ bumo ga. Kumo be kaman nɛ e shin nɛ men yɔ.

²¹Ma alɛ beeŋ shin nɛ Ijiptebi na e bugi ŋgbene n chɛ Israɛlebi na to saŋɛ na so men kaa lar ndoŋ men maaŋ ta enɔfuloŋ n lar. ²²Amoso Israɛl be eche kama beeŋ ya kule mbe bechenashapoana nɛ b la Ijipt be beche na asɔbuuso nɛ shuwa nɛ gbiti be abitasɔ lelaana. Nɛ menyi Israɛlebi na e ta loŋ be asɔana na n wɔtɔ men be mbinyɛnso nɛ men be mbicheso, saŋɛ na so, menyeeŋ nya Ijiptebi be asɔ n yɔ.”

Ebɔrɛ ka sa Mosis emamachisheŋ be kewora be eleŋ be asheŋ

¹Ndoŋ nna nɛ Mosis kaŋɛ Enyɛnpe Ebɔrɛ le: “To, nɛ b ka maŋ yirda ma ŋko n nu n sa kusɔ nɛ meeŋ kaŋɛ bumo na nseŋ kaŋɛ le: ‘Enyɛnpe maŋ lar fo so a?’ ”

²Nɛ Enyɛnpe Ebɔrɛ na bishi mo: “Manɛ e wɔ fo enɔ to ere?” Nɛ Mosis kaŋɛ mo: “Kekpabi nna.”

³Nɛ Enyɛnpe Ebɔrɛ na kaŋɛ mo: “Ta kumo n lɛ kasawule!” Mosis ka wora loŋ nɛ kekpabi na kilgi kuwɔ nɛ Mosis shile ashi kumo ase. ⁴Nɛ Enyɛnpe Ebɔrɛ kaŋɛ mo: “Murgi m pɛ kumo be kodu to n ta kumo.” Nɛ Mosis murgi m pɛ kuwɔ na be kodu to nɛ k naŋ kilgi kekpabi n wɔtɔ mbe enɔ to. ⁵Nɛ Enyɛnpe Ebɔrɛ kaŋɛ Mosis: “Fo baŋ wora loŋ, baaŋ yirda fanɛ Enyɛnpe Ebɔrɛ, bumo nananyɛnana Eebraham nɛ Aizek nɛ Jeekɔb be Ebɔrɛ na e lar fo so.”

⁶Kede be kaman nɛ Enyɛnpe Ebɔrɛ naŋ kaŋɛ mo: “Ta fo enɔ n wɔtɔ fo piŋi to.” Nɛ Mosis ta mbe enɔ n wɔtɔ mbe piŋi to. E ka lara kumo nɛ keboti pɛ kumo nɛ kumo kikɛ fuli parr fanɛ ateebi.

⁷Ndoŋ nna nɛ Enyɛnpe Ebɔrɛ naŋ kaŋɛ mo: “Naŋ ta fo enɔ n wɔtɔ fo piŋi to.” Nɛ Mosis naŋ ta mbe enɔ n wɔtɔ mbe piŋi na to. E ka naŋ lara kumo nɛ k naŋ nyalɛ so ŋ ki mbe kayurwule gbagba. ⁸Kede be kaman nɛ Enyɛnpe Ebɔrɛ naŋ kaŋɛ mo: “Hale nɛ b maŋ yirda ŋko n ta bumo be nfɛra n yuu fo kusɔ nɛ fo juŋkpar n wora na gba so, baaŋ yirda kenyɔsopo ere bre. ⁹Nɛ k ba fanɛ b maŋ yirda amo anyɔ na kikɛ ŋko nɛ b kini kenu n sa fo kamalga na fo jɔ lɔr nɛ baa tre Nail na be nchu n wurge kasawule. Loŋ be nchu na beeŋ kilgi ŋklaŋ kasawule na so.”

¹⁰Ndoŋ nna nɛ Mosis kaŋɛ le: “O, Enyɛnpe Ebɔrɛ, jande, sa maŋ shuŋi ma! Ŋkpal manɛ so m maŋ nyi kamalga to. Nɛ mannɛ fo ka bee malga ma fo kenya kutɔ nfe ere so, ma nɛ esa kikɛ maŋ naŋ malga le kikɛ. N la esa nɛ m maa tiŋ kamalga nna.”

¹¹Nɛ Enyɛnpe Ebɔrɛ bishi mo: “Wanɛ e wora dimɛdi be kɔnɔ? Wanɛ e naaŋ tiŋ n shin nɛ esa e ki kpawu ŋko neemu ŋko wanɛ e naa sa esa anishi ŋko a shin nɛ esa bee ki tanpo? Mannɛ ma, Enyɛnpe Ebɔrɛ a? ¹²Amoso baa yɔ! Meeŋ ya bugi fo kɔnɔ nseŋ ŋini fo kusɔ nɛ feeŋ kaŋɛ bumo.”

¹³Nɛ Mosis naŋ kaŋɛ: “O n Nyɛnpe Ebɔrɛ, jande shuŋi esa pɔtɛ.”

¹⁴Ndoŋ nna nɛ agbo pɛ Enyɛnpe Ebɔrɛ nɛ e bishi Mosis le: “Nɛ fo da Ɛɛrɔn nɛ e la Livainyɛn na malɛ? N nyi mo ere ka bee tiŋ a malga nɛnɛ ga. Mo alɛ tea wɔ ekpa to a ba nɛ e ba tu fo. E kaŋ ba wu fo mbe kagbene beeŋ fuli mo ga. ¹⁵E kaŋ ba, fo kaŋɛ mo kusɔ nɛ e beeŋ malga. Meeŋ chɛ menyi benyɔ kikɛ to ŋ ŋini menyi kusɔ nɛ menyeeŋ wora, saŋɛ na so, menyeeŋ tiŋ m malga. ¹⁶Ɛɛrɔn beeŋ ki dɔɔtɛ m malga n sa basa na n sa fo. Nɛ fo alɛ e baa kaŋɛ mo asɔ nɛ Ebɔrɛ kaŋɛ fo na. ¹⁷Ama ta kekpabi ere ŋ keta a yɔ ŋkpal manɛ so, kumo nɛ feeŋ ta a wora emamachisheŋ na.”

Mosis ka bɛta a yɔ Ijipt be asheŋ

¹⁸Ndoŋ nna nɛ Mosis bɛta n yɔ mo shanyɛn Jetro kutɔ n ya kaŋɛ mo le: “Jande, sa ma ekpa nɛ m bɛta n yɔ ma basa kutɔ ashi Ijipt n ya keni b kraa wɔ ŋkpa to a.” Nɛ Jetro kaŋɛ Mosis le: “Ebɔrɛ e yɛr fo nɛ alenfia.” ¹⁹Kede be kaman nɛ Enyɛnpe Ebɔrɛ naŋ kaŋɛ Mosis ashi Midian: “Bɛta n yɔ Ijipt be efuli so, ŋkpal manɛ so, basa nɛ b daa fin fo nɛ b mɔ na kikɛ kuraa wu.” ²⁰Ndoŋ nna nɛ Mosis keta mbe eche nɛ mbe mbinyɛnsobi n chena kurma so nseŋ ta kekpabi nɛ k kɔ Ebɔrɛ be eleŋ na ŋ keta m bɛta a yɔ Ijipt be kasawule so. ²¹Nɛ Enyɛnpe Ebɔrɛ naŋ kaŋɛ Mosis: “Fo kaŋ fo Ijipt, fo nyiŋi n wora emamachisheŋ nɛ n sa fo amo be eleŋ na kikɛ ashi ewura Fɛɛro be anishito. Ama meeŋ shin nɛ e wora mbe kagbene kpakpa ŋ kini fanɛ e maaŋ shin nɛ basa na e yɔ. ²²Kumo be kaman nɛ fo kaŋɛ ewura Fɛɛro fanɛ ma, Enyɛnpe Ebɔrɛ na e kaŋɛ le na: ‘Israɛlebi du fanɛ ma wurkoŋnyɛn nna. ²³Amoso nɛ n yɛ fo shin nɛ ma basa e yɔ n ya bunyaŋ ma na. Nɛ fo baŋ kini, kumo ere, meeŋ mɔ fo wurkoŋnyɛn.’ ”

²⁴B ka bee yɔ Ijipt nseŋ ya fo kakpa ko n dese ŋklade nɛ Enyɛnpe Ebɔrɛ lar Mosis so ndoŋ a shin nɛ e mɔ mo. ²⁵Ndoŋ nna nɛ mbe eche Zipora ta kefalta jiso ko ŋ ku mo pibinyɛn be kututu nseŋ ta kumo be kawɔl na m beta Mosis be ayadra ŋ kaŋɛ mo le: “Kashenteŋto naniere fo ki ŋ kul nna, amoso fo maaŋ naŋ wu.” ²⁶Ŋkpal ŋklaŋ mo nɛ a daŋ lar katutuku na to so nɛ Enyɛnpe Ebɔrɛ daŋ maŋ mɔ Mosis na.

²⁷Kede be kaman nɛ Enyɛnpe Ebɔrɛ kaŋɛ Ɛɛrɔn: “Yɔ keshishɛrsawule na ase n ya tu Mosis ndoŋ.” Ndoŋ nna nɛ Ɛɛrɔn yɔ n ya tu Mosis ashi Sainai be kebeegboŋ na so nseŋ ya ber mo to n chɔrɔ mo kashaso. ²⁸Ndoŋ nɛ Mosis malɛ kaŋɛ Ɛɛrɔn Enyɛnpe be mmalga nɛ e ta n shuŋi mo na kikɛ nseŋ naŋ kaŋɛ mo emamachisheŋ nɛ Ebɔrɛ ŋini mo fanɛ e ya wora na kikɛ be asheŋ. ²⁹Kumo be kaman nɛ Mosis nɛ Ɛɛrɔn yɔ Ijipt n ya shɛr Israɛlebi be benimu na kikɛ abar so. ³⁰Nɛ Ɛɛrɔn kaŋɛ bumo kusɔ nɛ Enyɛnpe Ebɔrɛ daŋ kaŋɛ Mosis na kikɛ nseŋ naŋ wora emamachisheŋ na basa na be anishito ³¹nɛ b yirda kusɔ nɛ e kaŋɛ na. Kumo be buushi, Israɛlebi na ka nu fanɛ Enyɛnpe Ebɔrɛ wu kananɛ baa tɔrɔ bumo na nsaa shin nɛ e chɛ bumo to nɛ b gbir m bunyaŋ mo.

Mosis nɛ Ɛɛrɔn ka yɔ Ijipt be ewura kutɔ be asheŋ

¹Ade kikɛ be kaman nɛ Mosis nɛ Ɛɛrɔn yɔ Ijipt be ewura Fɛɛro kutɔ n ya kaŋɛ mo le: “Enyɛnpe Ebɔrɛ nɛ e la Israɛlebi be Ebɔrɛ na yɛ: ‘Shin nɛ ma basa e yɔ n ya wora kejigboŋ m bunyaŋ ma ashi keshishɛrsawule na so.’ ”

²Ndoŋ nna nɛ ewura Fɛɛro bishi bumo le: “Wanɛ e la Enyɛnpe Ebɔrɛ ere nɛ k daga fanɛ n nu n sa mo n shin nɛ Israɛlebi e yɔ? Ma ere maŋ nyi Enyɛnpe Ebɔrɛ kama, ma alɛ maaŋ shin nɛ Israɛlebi na e yɔ.” ³Ndoŋ nna nɛ Mosis nɛ Ɛɛrɔn kaŋɛ: “Israɛlebi be Ebɔrɛ na e lara mbe kumu ŋ ŋini anyi. Amoso sa anyi ekpa nɛ an ta nchɛ asa n nite n yɔ keshishɛrsawule na so n ya lara sarga ndoŋ n sa Enyɛnpe Ebɔrɛ nɛ e la anyi be Ebɔrɛ na. Nɛ mannɛ aloŋ e beeŋ shin nɛ alɔ ŋko kena e ba mɔ anyi.”

⁴Nɛ ewura Fɛɛro kaŋɛ: “Mosis nɛ Ɛɛrɔn, manɛ nna nɛ menyee sha kelara basa na ashi bumo be kushuŋ to? Men yige anya na nɛ b baa shuŋ bumo be kushuŋ! ⁵Ŋkpal manɛ so, Israɛlebi na e shi ga a chɔ anyi, nɛ menyee sha kelara bumo ashi kushuŋ ere to na!”

⁶Kumo be kamɔnchɛ kikɛ nɛ ewura Fɛɛro kaŋɛ basa nɛ baa keni anya na so na nɛ kushuŋ na be bejuŋkparpoana na le: ⁷“Men sa maŋ naa fin afitiri nɛ baa ta a wɔtɔ eshii to a baga a kuya ebirkesi na a sa basa na. Men shin nɛ bumo gbagba e baa yɔ n ya kaa fin amo. ⁸Ama men shin nɛ b baa kraa kuya ebirkesi na nɛ a baa fo kananɛ b chɛr a kuya amo na. Men sa maŋ shin nɛ kukoŋwule gba e duga so. Ntɔl e kɔ bumo so so nɛ baa kaŋɛ le: ‘Shin nɛ an ya lara esarga n sa anyi be Ebɔrɛ.’ ⁹Men sa bumo kushuŋ kpakpaso n ti so nɛ b baa shuŋ, saŋɛ na so b maaŋ naa nya dama a nu efɛ be mmalga fuloŋ ere.”

¹⁰Ndoŋ nna nɛ basa nɛ baa keni anya na so na nɛ kushuŋ na be bejuŋkparpoana yɔ n ya kaŋɛ Israɛlebi na le: “Ewura Fɛɛro yɛ e maaŋ naŋ sa menyi afitiri nɛ baa ta a wɔtɔ eshii to a kuya ebirkesi na kikɛ. ¹¹E yɛ men gbagba e baa yɔ n ya kaa fin amo ashi kakpa nɛ menyeeŋ nya amo, ama menyi alɛ e ba kraa kuya ebirkesi na nɛ a ba fo kananɛ men chɛr a kuya amo na gbagba chap.” ¹²Ndoŋ nna nɛ Israɛlebi pesaŋ to n sɔ Ijipt be kasawule so kikɛ a keni a fin afitiri nɛ baa ta a wɔtɔ eshii to a kuya ebirkesi na. ¹³Nɛ Ijipt be basa nɛ baa keni anya na so na malɛ bɛ so a nyaŋ bumo fanɛ b kuya ebirkesi na nɛ a fo kananɛ a chɛr a fo saŋɛ nɛ b daa sa bumo afitiri na. ¹⁴Ade kikɛ be kaman nɛ Ijipt be basa nɛ baa keni anya na so na wɔtɔ a bri Israɛlebi na be bejuŋkparpo nɛ b daa juŋkpar bumo kushuŋ na to na nsaa bishi bumo le: “Manɛ so nɛ menyi maa kuya ebirkesi na nɛ a bee fo kananɛ men chɛr a kuya amo saŋkama na?”

¹⁵Ŋkpal loŋ so nɛ Israɛlebi na be bejuŋkparpoana na yɔ ewura Fɛɛro kutɔ n ya fubel ŋ ŋini mo ŋ kaŋɛ le: “Yiramu, mannɛ nna nɛ fo wora fo anya loŋ? ¹⁶B maŋ naa sa anyi afitiri nɛ anyee ta a wɔtɔ eshii to a kuya ebirkesi na, ama bumo alɛ kraa kaŋɛ fanɛ an baa kuya amo nɛ a baa fo kananɛ an chɛr a kuya amo na. Hale ŋkpal loŋ so a bri anyi. Mannɛ anyi alɛ e bar kuko, fo basa na gbagba e maŋ wora n nyalɛ.”

¹⁷Ndoŋ nna nɛ ewura Fɛɛro kaŋɛ bumo le: “Betɔlpo e la menyi kashenteŋto, amoso nɛ men ba kaa kaŋɛ ma fanɛ n shin nɛ men yɔ n ya lara sarga n sa men ‘Nyɛnpe Ebɔrɛ na.’ ¹⁸Men bɛta epul ere to n ya kaa shuŋ men be ashuŋ! B maaŋ sa menyi afitiri na kuraa. Menyi alɛ kraa beeŋ baa kuya ebirkesi na nɛ a baa fo kananɛ men chɛr a kuya amo na.” ¹⁹Ndoŋ nna nɛ Israɛlebi na be bejuŋkparpoana na pin fanɛ awurfoŋ tu bumo kashenteŋto ŋkpal b ka kaŋɛ bumo fanɛ karechɛ kama be ebirkesi nɛ baaŋ baa kuya na maaŋ duga so kikɛ na so.

²⁰B ka baŋ lar ewura Fɛɛro kutɔ nɛ b ba tu Mosis nɛ Ɛɛrɔn nɛ b yil a jo bumo. ²¹Ndoŋ nna nɛ b kaŋɛ bumo le: “Enyɛnpe Ebɔrɛ gbagba wu kusɔ nɛ men wora anyi nna na. Mo alɛ beeŋ gberge menyi kusoe, ŋkpal men ka shin nɛ ewura Fɛɛro nɛ mbe basa nya agbo n wora anyi nseŋ sa bumo ekpa fanɛ b mɔ anyi na so.” ²²Ndoŋ nna nɛ Mosis naŋ lɔŋɛ m bishi Enyɛnpe Ebɔrɛ le: “Enyɛnpe Ebɔrɛ, manɛ e ba nɛ fo ta tɔrɔ m ba fo basa ere so le? Ama le so nɛ fo shuŋi ma nfe a? ²³Yili saŋɛ nɛ fo shuŋi ma fanɛ m ba yili fo katelamu to m malga n sa ewura Fɛɛro na kikɛ nɛ e baa wɔtɔ a tɔrɔ Israɛlebi ere, ama fo alɛ maŋ wora shɛŋ n chɛ fo basa to kuraa.”

¹Ndoŋ nna nɛ Enyɛnpe Ebɔrɛ kaŋɛ Mosis le: “Naniere bre feeŋ wu kusɔ nɛ meeŋ wora ewura Fɛɛro. Ŋkpal ma eleŋ nɛ ŋ kɔ na so, e beeŋ shin nɛ ma basa e yɔ. Kashenteŋ nɛ mee kaŋɛ fo na fanɛ meeŋ tintiŋ mo hale nɛ e ju bumo nɛ b lar mbe kasawule ere so.”

Ebɔrɛ ka naŋ tre Mosis be asheŋ

²Ebɔrɛ ka kaŋɛ loŋ n loge na nɛ e naŋ kaŋɛ Mosis le: “Ma e la Enyɛnpe Ebɔrɛ na. ³N daŋ lar men nananyɛnana Eebraham nɛ Aizek nɛ Jeekɔb so fanɛ Ebɔrɛ Elempo nna, ama n daa maŋ shin nɛ b pin fanɛ ma e la Enyɛnpe Ebɔrɛ na. ⁴Ade kikɛ be kaman nɛ ma nɛ bumo wora kɔnɔkoŋwule be ŋkre nɛ n nase kɔnɔ n sa bumo fanɛ meeŋ ta Keenan be kasawule nɛ b daa wɔ kumo so fanɛ befɔ na n sa bumo. ⁵Kede malɛ be buushi naniere bre n nu Israɛl be basa nɛ Ijiptebi nyaŋ n wɔtɔ a tɔrɔ fanɛ anya na be kushu nseŋ nyiŋi ma kɔnɔkoŋwule be ŋkre be kɔnɔ naseso na. ⁶Ŋkpal loŋ so, kaŋɛ Israɛl be basa na fanɛ ŋ kaŋɛ fanɛ: ‘Ma e la Enyɛnpe Ebɔrɛ na, ma alɛ beeŋ lara menyi ashi kenyaya nɛ men wɔtɔ ashi Ijipt to na to. Meeŋ bɔla ma eleŋgboŋ na so ŋ gberge Ijiptebi kusoe nɛ b shin nɛ men nya men be amu. ⁷Menyeeŋ ba kraa la ŋ gbagba be basa nɛ ma alɛ e baa la menyi be Ebɔrɛ. Saŋɛ na so nɛ menyeeŋ pin fanɛ ma e la Enyɛnpe Ebɔrɛ nɛ e la menyi be Ebɔrɛ nɛ e lara menyi kenyaya to ashi Ijiptebi be enɔ to. ⁸Meeŋ yɛr menyi kasawule nɛ n nase kɔnɔ fanɛ meeŋ ta n sa Eebraham nɛ Aizek nɛ Jeekɔb na so. Ma, Enyɛnpe Ebɔrɛ na beeŋ ta kumo n sa menyi nɛ k baa la menyeya.’ ” ⁹Mosis daŋ malga le be asheŋ kikɛ n sa Israɛlebi na ama b daa maŋ nu n sa mo ŋkpal awurfoŋ nɛ b daa wɔtɔ na so nɛ bumo be aba daŋ pɔ bumo. ¹⁰Ndoŋ nna nɛ Enyɛnpe Ebɔrɛ kaŋɛ Mosis: ¹¹“Yɔ Ijipt be ewura Fɛɛro gbagba kutɔ n ya kaŋɛ mo fanɛ e shin nɛ Israɛlebi na e lar mbe kasawule so n yɔ.” ¹²Nɛ Mosis kaŋɛ Enyɛnpe Ebɔrɛ: “Keni, Israɛlebi na gba e kini kenu n sa ma na nɛ nuso nɛ ewura Fɛɛro bre beeŋ nu n sa ma nɛ m maŋ nyi kamalga ere?” ¹³Ndoŋ nna nɛ Enyɛnpe Ebɔrɛ kaŋɛ Mosis nɛ Ɛɛrɔn fanɛ b ya kaŋɛ Israɛlebi na nɛ Ijipt be ewura Fɛɛro, kenishipereso fanɛ e shin nɛ Israɛlebi na e lar ashi Ijipt be efuli so.

¹⁴Ruben nɛ e daa la Jeekɔb pibinyɛn wurkoŋ na be mbinyɛnsoana be atre e daa la Hanɔk nɛ Pallu nɛ Hesron nɛ Karmi. Bumo e ki Ruben be kanaŋ be mbunana na. ¹⁵Simiɔn malɛ be mbinyɛnsoana be atre e daa la Jemuwɛl nɛ Jamin nɛ Ohad nɛ Jakin nɛ Zohar nɛ Shaul nɛ e daa la Keenanche pibinyɛn na. Bumo alɛ e ki Simiɔn be kanaŋ be mbuna na. ¹⁶Livai be mbinyɛnsoana be atre e daa la Gɛshɔn nɛ Kohaf nɛ Merari. Livai daŋ ji nfɛ kalfa nɛ adesa nɛ ashunu nna pɔɛŋ nseŋ wu. ¹⁷Gɛshɔn be mbinyɛnsobi nde: Libni nɛ Shimei. ¹⁸Kohaf malɛ be mbinyɛnsobi be atre e daa la Amram nɛ Ishar nɛ Hebron nɛ Uziɛl. Kohaf daŋ ji nfɛ kalfa nɛ adesa nɛ asa nna pɔɛŋ nseŋ wu. ¹⁹Mɛrari be mbinyɛnsobi malɛ be atre e daa la Maali nɛ Mushi. Bumo alɛ e ki Livaiebi be kanaŋ to be mbuna na. ²⁰Nɛ Amram malɛ ta Jokabed nɛ e daa la mo tuto mo sipoche na ŋ ki mbe eche nɛ mo nɛ mo kurge Ɛɛrɔn nɛ Mosis. Amram daŋ ji nfɛ kalfa nɛ adesa nɛ ashunu nna pɔɛŋ nseŋ wu. ²¹Ishar be mbinyɛnsobi be atre e daa la Koora nɛ Nefeg nɛ Zikri. ²²Uziɛl malɛ be mbinyɛnsobi be atre e daa la Mishaal nɛ Elzafan nɛ Sitri. ²³Nɛ Ɛɛrɔn malɛ ta Elisheba nɛ e daa la Aminadab pibiche nsaa la Nashɔn malɛ mo sipoche na ŋ ki mbe eche nɛ mo nɛ mo kurge Nadab nɛ Abihu nɛ Eleazar nɛ Itama. ²⁴Koora be mbinyɛnsobi be atre e daa la Azir nɛ Elkana nɛ Abiasaf. To, Kooraebi be kanaŋ be mbuna e daa la na. ²⁵Ndoŋ nna nɛ Ɛɛrɔn pibinyɛn Eleazar malɛ ta Putiɛl pibiche ko ŋ ki mbe eche nɛ mo nɛ mo kurge Finihas. To, bumo e daa la Livai be kanaŋ to be mbuna be benimu. ²⁶To, loŋ be Ɛɛrɔn ere gbagba nɛ Mosis e daa la basa nɛ Enyɛnpe Ebɔrɛ daŋ kaŋɛ le na: “Men ya lara Israɛl be basa kanaŋ kanaŋ so ashi Ijipt be kasawule so.” ²⁷Mosis nɛ Ɛɛrɔn ere e daŋ malga n sa Ijipt be ewura Fɛɛro fanɛ e sa Israɛl be basa ekpa nɛ b lar ashi Ijipt na.

Enyɛnpe Ebɔrɛ ka sa Mosis nɛ Ɛɛrɔn kamalga be asheŋ

²⁸To, kachɛ nɛ Enyɛnpe Ebɔrɛ daŋ malga n sa Mosis ashi Ijipt be kasawule so na, ²⁹le nɛ e kaŋɛ: “Ma e la Enyɛnpe Ebɔrɛ na. Amoso, kaŋɛ Ijipt be ewura Fɛɛro asheŋ nɛ ŋ kaŋɛ fo ere kikɛ.” ³⁰Nɛ Mosis kaŋɛ mo le: “Enyɛnpe, fo nyi ŋ ka maa tiŋ kamalga nɛ nuso nɛ meeŋ wora m malga nɛ Fɛɛro e nu n sa ma?”

¹Ndoŋ nna nɛ Enyɛnpe Ebɔrɛ kaŋɛ Mosis le: “Keni meeŋ shin nɛ fo yili ma katelamu to n yɔ ewura Fɛɛro be anishito, nɛ fo da Ɛɛrɔn malɛ e malga n sa mo fanɛ anebi. ²Fo e naaŋ baa malga asheŋ nɛ ŋ kaŋɛ fo na kikɛ a sa Ɛɛrɔn nɛ mo alɛ e kaŋɛ Fɛɛro fanɛ e shin nɛ Israɛl be basa na e lar mbe kasawule so. ³Ama meeŋ shin nɛ Fɛɛro e wora mbe kagbene kpakpa. Hale nɛ n wora etɔɔnɛsheŋ nɛ emamachisheŋ damta m bɛ abar so ashi Ijipt be kasawule so gba, ⁴Fɛɛro kraa maaŋ nu n sa fo. Kumo be kaman meeŋ shin nɛ b wu ma eleŋ, nɛ m bar kasogberge kpakpaso damta Ijiptebi so pɔɛŋ nseŋ juŋkpar ma basa Israɛlebi be nnaŋana na n lar Ijipt be kasawule na so. ⁵Saŋɛ nɛ meeŋ bar kasogberge Ijiptebi so nseŋ lara Israɛl be basa ashi bumo to na pɔɛŋ nɛ baaŋ pin fanɛ ma e la Enyɛnpe Ebɔrɛ na.” ⁶Ndoŋ nna nɛ Mosis nɛ Ɛɛrɔn wora kananɛ Enyɛnpe baŋ ŋini bumo na gbagba chap. ⁷Saŋɛ nɛ Mosis nɛ Ɛɛrɔn daŋ malga n sa ewura Fɛɛro na nɛ Mosis daa la nfɛ aduburwa nna nɛ Ɛɛrɔn malɛ daa la nfɛ aduburwa nɛ asa.

Ɛɛrɔn be kekpabi na be asheŋ

⁸Le nɛ Enyɛnpe Ebɔrɛ daŋ kaŋɛ Mosis nɛ mo da Ɛɛrɔn: ⁹“Nɛ ewura Fɛɛro ka baŋ kaŋɛ menyi le: ‘Men wora kemamachisheŋ ko nɛ k ŋini fanɛ kusɔ nɛ men kaŋɛ ere la kashenteŋ nna.’ Fo kaŋɛ Ɛɛrɔn le: ‘Ta fo kekpabi na n lɛ Fɛɛro be anishito, k beeŋ kilgi kuwɔ.’ ” ¹⁰Ndoŋ nna nɛ Mosis nɛ Ɛɛrɔn yɔ ewura Fɛɛro kutɔ n ya wora kananɛ Enyɛnpe Ebɔrɛ ŋini bumo na. Ɛɛrɔn daŋ ta kekpabi na nna n lɛ Fɛɛro nɛ mbe benimu be anishito nɛ k kilgi kuwɔ. ¹¹Ndoŋ nna nɛ Fɛɛro malɛ tre mbe benyiashempo nɛ ŋkilgiwuraana nɛ bumo alɛ gba ba ta bumo be ŋkilgi n wora loŋ gbagba chap. ¹²Ijipt be ŋkilgiwuraana na gba be ekama daŋ ta mbe kekpabi n wora ademansheŋ nna nseŋ ta amo n lɛ kasawule nɛ a kilgi awɔ. Ndoŋ nna nɛ Ɛɛrɔn be kekpabi nɛ k kilgi kuwɔ na bela bumo peyaana na kikɛ m min. ¹³Ama ade kikɛ be kaman Fɛɛro kraŋ wora kagbene kpakpaso nna nseŋ kini kenu n sa Mosis nɛ Ɛɛrɔn fanɛ kananɛ Enyɛnpe Ebɔrɛ kaŋɛ na.

Nchuana ka kilgi ŋklaŋ be asheŋ

¹⁴Ndoŋ nna nɛ Enyɛnpe Ebɔrɛ naŋ kaŋɛ Mosis le: “Fɛɛro be kagbene du kpakpa ga, kumo so nɛ e kini fanɛ e maaŋ shin nɛ basa na e yɔ na. ¹⁵Amoso wule n yɔ Fɛɛro kutɔ kachipurso, saŋɛ nɛ e lar a yɔ Nail be lɔr to na. Ta kekpabi nɛ k daŋ kilgi kuwɔ na ŋ keta n ya kaa jo mo lɔrkar. ¹⁶E kaŋ ba nɛ fo kaŋɛ mo le: ‘Enyɛnpe Ebɔrɛ, Israɛlebi be Ebɔrɛ na e shuŋi ma fo kutɔ fanɛ ŋ kaŋɛ fo fanɛ fo shin nɛ mbe basa e yɔ keshishɛrsawule so n ya bunyaŋ mo’, ama hale mbre fo maŋ naŋ nu n sa ma. ¹⁷Amoso Enyɛnpe Ebɔrɛ na yɛ: ‘Kesheŋ nɛ mee sha kewora ere e naaŋ shin nɛ fo pin fanɛ ma e la Enyɛnpe Ebɔrɛ na.’ Keni, meeŋ ta kekpabi nɛ k wɔ ma enɔ to ere ŋ ŋmɛa Nail be nchu ere so nɛ a kilgi ŋklaŋ. ¹⁸Meeŋ wora loŋ nɛ lɔr na to be ekɔrɔtɔ kikɛ e wu m bɛ a dufɛ nɛ Ijiptebi e nuu kumo to be nchu ŋ gben.” ¹⁹Kede be kaman nɛ Enyɛnpe Ebɔrɛ kaŋɛ Mosis le: “Kaŋɛ Ɛɛrɔn le: ‘Teŋi fo kekpabi na n shoŋi Ijipt be nchuana fanɛ eboŋana nɛ nchu be abɔr kursoana nɛ apaana nɛ edampuana nɛ atirbuana kikɛ nɛ a ki ŋklaŋ.’ Ijiptebi be asɔ nɛ baa saŋ nchu a wɔtɔ kikɛ fanɛ mpuya nɛ eboketi nɛ echeenshigboŋ nɛ egarwa kikɛ to be nchu beeŋ ki ŋklaŋ.” ²⁰Ndoŋ nna nɛ Mosis nɛ Ɛɛrɔn wora kusɔ nɛ Enyɛnpe Ebɔrɛ ŋini bumo na. Ɛɛrɔn daŋ maŋ mbe kekpabi so ashi Fɛɛro nɛ mbe beyaasepoana na be anishito nna ŋ ŋmɛa Nail be nchu so nɛ nchu na kikɛ kilgi ŋklaŋ. ²¹Nɛ ekɔrɔtɔ nɛ a daa wɔ Nail be lɔr na to kikɛ wu nɛ nchu na fara a dufɛ puŋ puŋ puŋ nɛ Ijiptebi na nuu amo ŋ gben. Ŋklaŋ e daa la kaplɛkama ashi Ijipt to. ²²Ndoŋ nna nɛ Ijipt be ŋkilgiwuraana malɛ gba ta bumo be ademansheŋ be ŋkilgi n wora loŋ koŋwule na nɛ Fɛɛro be kagbene naŋ ki kpakpa n ti so nɛ e kini kenu n sa Mosis nɛ Ɛɛrɔn fanɛ kananɛ Enyɛnpe Ebɔrɛ kaŋɛ na. ²³Kede be kaman nɛ Fɛɛro kilgi n choŋ mbe laŋ to nɛ k maŋ tir mo gba kuraa. ²⁴Ndoŋ nna nɛ Ijiptebi na kikɛ fara a kur a kur Nail be lɔr na be ekarso kikɛ a fin nchu nuuso ŋkpal b ka daa maŋ naa tiŋ a nuu lɔr na to be nchu so so.

²⁵Enyɛnpe Ebɔrɛ ka jija nchu na be nchɛnshunu.

Epuloana ka sɔ Ijipt be efuli so na be asheŋ

¹Nɛ e kaŋɛ Mosis le: “Yɔ Fɛɛro kutɔ n ya kaŋɛ mo: ‘Kusɔ nɛ Enyɛnpe Ebɔrɛ kaŋɛ e la fanɛ fo shin nɛ mbe basa e yɔ, saŋɛ na so baaŋ ya bunyaŋ mo.’ ²Nɛ fo baŋ kini keshin nɛ b yɔ, meeŋ shin nɛ epulo e ba sɔ fo efuli ere kikɛ so. ³Nail be lɔr ere kikɛ beeŋ bɔlɔ epulo nɛ b lar m ba fo laŋ to m ba luri fo ebu deseto to n dii n sɔ fo gedo so. A beeŋ luri fo beyaasepoana nɛ fo basa kikɛ be elaŋana to. Epulo beeŋ ba kaa wɔ men be bodobodo be etɔkpaana nɛ men be asɔ nɛ menyee gbiti ebodobodo kikɛ to. ⁴Epulo na beeŋ ba kaa dii fo nɛ fo basa nɛ beyaasepo kikɛ so.” ⁵Ndoŋ nna nɛ Enyɛnpe Ebɔrɛ naŋ kaŋɛ Mosis le: “Kaŋɛ Ɛɛrɔn nɛ e teŋi mbe kekpabi na n shoŋi mbombi nɛ nchu be abɔr kurso nɛ apa kikɛ so n shin nɛ epulo e ba Ijipt be kasawule so kikɛ.” ⁶Ndoŋ nna nɛ Ɛɛrɔn teŋi mbe enɔ nɛ kekpabi na n shoŋi n shoŋi Ijipt be nchuana kikɛ so nɛ epulo na lar amo to m ba sɔ Ijipt be kasawule so kikɛ. ⁷Ndoŋ nna nɛ ŋkilgiwuraana na gba ta bumo be ŋkilgi n wora bumo be ewulosheŋ, nɛ epulo ba Ijipt be kasawule na so. ⁸Ama ade kikɛ be kaman nɛ Fɛɛro naŋ tre Mosis nɛ Ɛɛrɔn ŋ kaŋɛ bumo: “Men kule Enyɛnpe Ebɔrɛ nɛ e ta epulo ere ashi ma nɛ ma basa so nɛ n shin nɛ basa na e yɔ n ya lara esarga n sa Enyɛnpe Ebɔrɛ na.” ⁹Nɛ Mosis kaŋɛ Fɛɛro le: “Kaŋɛ ma saŋɛ nɛ fee sha fanɛ ŋ kule Enyɛnpe Ebɔrɛ n sa fo nɛ fo beyaasepo nɛ fo basa nɛ epulo na e lar menyi be elaŋana to n ya ka wɔ Nail be lɔr na to nawule?” ¹⁰Ndoŋ nna nɛ Fɛɛro kaŋɛ: “Kumo ere ba kule Ebɔrɛ n sa ma echefo.” Nɛ Mosis shuli so ŋ kaŋɛ mo: “To, kusɔ nɛ fo kaŋɛ ere beeŋ wora loŋ nɛ fo pin fanɛ esa kikɛ maŋ naa wɔtɔ a du fanɛ Enyɛnpe Ebɔrɛ nɛ e la anyi be Ebɔrɛ na. ¹¹To, epulo na beeŋ shile ashi fo nɛ fo beyaasepo nɛ fo basa be elaŋana kikɛ to. Nail be lɔr nawule to peya e naaŋ ka.” ¹²Mosis nɛ Ɛɛrɔn ka lar Fɛɛro kutɔ nɛ Mosis ya kule Enyɛnpe Ebɔrɛ a laŋɛ epulo nɛ mo ere Ebɔrɛ daŋ bar nɛ e ba gberge Fɛɛro kusoe na be kaplɛa so. ¹³Ndoŋ nna nɛ Enyɛnpe Ebɔrɛ wora kusɔ nɛ Mosis daŋ kule na nɛ epulo na kikɛ wu n wu ashi basa na be elaŋana to nɛ bumo be alɔnɛ so nɛ bumo be adɔana kikɛ to. ¹⁴Nɛ Ijiptebi na bela epulo wuso na n deŋi n deŋi abar so le kululu nɛ b bɛ a dufɛ puŋ puŋ puŋ kasawule na so kikɛ. ¹⁵Fɛɛro ka wu fanɛ epulo na be tɔrɔ na loge nɛ e naŋ wora mbe kagbene kpakpa nseŋ kini kenu n sa Mosis nɛ Ɛɛrɔn fanɛ kananɛ Enyɛnpe Ebɔrɛ kaŋɛ na.

Asɔ firgisobi duŋso ko be asheŋ

¹⁶Kede be kaman nɛ Enyɛnpe Ebɔrɛ naŋ kaŋɛ Mosis: “Kaŋɛ Ɛɛrɔn fanɛ e ta mbe kekpabi na ŋ ŋmɛa kasawule be shishɛr so nɛ a kilgi asɔ firgisobi duŋso ko n sɔ Ijipt be kasawule so kikɛ.” ¹⁷Nɛ loŋ wora. Ɛɛrɔn daŋ teŋi mbe kekpabi na nna ŋ ŋmɛa kasawule na be shishɛr so nɛ eshishɛr na kilgi asɔ firgiso duŋso ko m mel edimɛdi nɛ asɔbɔya kikɛ so. Ijipt be kasawule so be eshishɛr kikɛ daŋ kilgi asɔ firgiso duŋso na nna n sɔ Ijipt be kaplɛkama. ¹⁸Ndoŋ nna nɛ ŋkilgiwuraana na malɛ naŋ ta bumo be ŋkilgi n wora bumo be aworbi fanɛ baaŋ wora ania ŋ kilgi asɔ duŋso na be ako, ama bumo alɛ daa maŋ tiŋ n wora loŋ. Nɛ asɔ firgiso duŋso na baŋ mel edimɛdi nɛ asɔbɔya kikɛ nyam so. ¹⁹Ndoŋ nna nɛ ŋkilgiwuraana kaŋɛ Fɛɛro le: “Ebɔrɛ ko be eleŋ be aworbi nde.” Ama Fɛɛro daŋ kraŋ wora kagbene kpakpaso nna ŋ kini kewora kasonu fanɛ kananɛ Enyɛnpe Ebɔrɛ kaŋɛ na.

Ashushombi be tɔrɔ be asheŋ

²⁰Nɛ Enyɛnpe Ebɔrɛ naŋ kaŋɛ Mosis: “Wule ŋ koso echefo chipurso n ya tu Fɛɛro saŋɛ nɛ e bee yɔ lɔr ase na ŋ kaŋɛ mo fanɛ Enyɛnpe Ebɔrɛ yɛ: ‘Shin nɛ ma basa e yɔ n ya bunyaŋ ma. ²¹Nɛ fo baŋ maŋ shin nɛ ma basa yɔ, meeŋ shin nɛ ashushombi damta e buu fo nɛ fo beyaasepoana nɛ fo basa kikɛ so nseŋ luri m bɔlɔ menyi be ebuana gba to hale n ya lar elaŋ to kikɛ. ²²Kumo be kachɛ na ashushombi na maaŋ yɔ kakpa nɛ ma basa wɔ ashi Goshen be kaba so na bre. Kumo be loŋ nɛ feeŋ pin fanɛ ma e la Enyɛnpe Ebɔrɛ nɛ n wɔ kasawule ere to na. ²³Meeŋ barga ma basa ashi fo basa to. Echefo nɛ le be kemamachisheŋ ere malɛ beeŋ wora.’ ” ²⁴Ndoŋ nna nɛ Enyɛnpe Ebɔrɛ wora loŋ n shin nɛ ashushombi damta ba m ba bɔlɔ Fɛɛro be kowu kikɛ to nɛ beko malɛ yɔ mbe beyaasepoana be elaŋana to nɛ Ijipt be kasawule so kikɛ a sha kejija kasawule na kikɛ kuraa. ²⁵Kumo be kaman nɛ Fɛɛro shuŋi n tre Mosis nɛ Ɛɛrɔn ŋ kaŋɛ bumo le: “Men yɔ n ya lara sarga na n sa menyi be Ebɔrɛ ashi Ijipt be kasawule ere so nfe.” ²⁶Ndoŋ nna nɛ Mosis kaŋɛ: “Nɛ an wora loŋ, k maaŋ bɔla ekpa, ŋkpal manɛ so, asɔbɔya nɛ anyeeŋ ta n lara sarga n sa Enyɛnpe Ebɔrɛ, an be Ebɔrɛ na beeŋ baa la kusɔ nɛ Ijiptebi bee kishi na nna. Nɛ anyi alɛ ta asɔbɔya nɛ Ijiptebi bee kishi n lara sarga, b maaŋ kpa anyi ajembu m mɔ a? ²⁷K daga fanɛ an ta nchɛ asa n nite n yɔ keshishɛrsawule na so n ya lara sarga na n sa Enyɛnpe anyi be Ebɔrɛ na fanɛ kananɛ mo gbagba yili anyi na.” ²⁸Ade kikɛ be kaman nɛ Fɛɛro kaŋɛ: “To, n nu, meeŋ shin nɛ men yɔ keshishɛrsawule na so ya lara sarga n sa Enyɛnpe Ebɔrɛ nɛ e la men be Ebɔrɛ na, ama men sa maŋ yɔ kufɔ ga bre. Ama pɔɛŋ nɛ men yɔ men kule Ebɔrɛ nɛ ashushombi ere e yɔ ŋ ka anyi.” ²⁹Ndoŋ nna nɛ Mosis kaŋɛ mo le: “M baŋ lar fo kutɔ meeŋ ya kule Enyɛnpe Ebɔrɛ nɛ ashushombi na e lar fo nɛ fo beyaasepo nɛ fo basa so echefo kikɛ. Ama sa maŋ fule anyi nseŋ naŋ kini keshin nɛ basa na e yɔ.” ³⁰Kumo be kaman nɛ Mosis lar Fɛɛro kutɔ n ya kule Enyɛnpe Ebɔrɛ na. ³¹Nɛ Enyɛnpe Ebɔrɛ nu Mosis be kekule na nseŋ shin nɛ ashushombi na shile ewura Fɛɛro nɛ mbe beyaasepo nɛ mbe basa kikɛ so nɛ ekoŋwule gba maŋ naŋ ka kasawule na so. ³²Ama kumo alɛ gba be kaman, ewura Fɛɛro daŋ wora kagbene kpakpaso nna ŋ kini fanɛ e maŋ shin nɛ basa na e yɔ.

Asɔbɔya be luwu be asheŋ

¹Ade kikɛ be kaman nɛ Enyɛnpe Ebɔrɛ naŋ kaŋɛ Mosis: “Yɔ Fɛɛro kutɔ n ya kaŋɛ mo fanɛ Enyɛnpe Ebɔrɛ, Israɛlebi be Ebɔrɛ na yɛ: ‘Shin nɛ ma basa e yɔ, saŋɛ na so baaŋ ya bunyaŋ ma. ²Fo baŋ kini keshin nɛ b yɔ nseŋ kraa kɔ bumo to, ³meeŋ ta kulɔ lubi n lɛ men be asɔbɔya, fanɛ egbaŋɛ nɛ ekurma nɛ enyɔma nɛ ana nɛ mbolpɔ nɛ mboe kikɛ so. ⁴Ama ma, Enyɛnpe Ebɔrɛ na beeŋ barga Israɛlebi be asɔbɔya nɛ Ijiptebi be asɔbɔya to nseŋ shin nɛ Israɛl be basa bre be asɔbɔya e sa maŋ wu.’ ” ⁵Ade be kaman nɛ Enyɛnpe Ebɔrɛ kaŋɛ: “Echefo nɛ ma, Enyɛnpe Ebɔrɛ beeŋ wora le be kesheŋ ashi kasawule ere so.” ⁶Kumo be ŋklade nɛ Enyɛnpe Ebɔrɛ wora loŋ be kesheŋ na fanɛ kananɛ e kaŋɛ na nɛ Ijiptebi be asɔbɔya kikɛ kuraa wu, ama Israɛlebi na bre be kusɔbɔya koŋwule gba daa maŋ wu. ⁷Ndoŋ nna nɛ Fɛɛro shuŋi m bishi Israɛlebi na kusɔ nɛ k wora bumo to nɛ b kaŋɛ mo fanɛ Israɛlebi na bre be asɔbɔya be kukoŋwule gba maŋ wu. Ama amo nɛ amo kikɛ nɛ Fɛɛro kraŋ wora kagbene kpakpaso ŋ kini keshin nɛ basa na e yɔ.

Asɔ puŋiso be kasogberge be asheŋ

⁸Kede malɛ be kaman nɛ Enyɛnpe Ebɔrɛ naŋ kaŋɛ Mosis nɛ Ɛɛrɔn le: “Men jɔ nsunɔ ashi kakpa nɛ edɛ gboŋ chɔɔ m bɔlɔ menyi be enɔana, nseŋ shin nɛ Mosis e ta amo ŋ kpa awɔlto ashi ewura Fɛɛro be anishito. ⁹Saŋɛ na so nsunɔ na beeŋ ki shishɛr mushimushibi n sɔ Ijipt be kasawule so kikɛ nɛ alɔbi e pɛ edimɛdi nɛ asɔbɔya kikɛ nyam ashi kasawule na kikɛ nyam so.” ¹⁰Ndoŋ nna nɛ b jɔ nsunɔ na n ya yili ewura Fɛɛro be anishito nɛ Mosis ta amo ŋ kpa awɔlto nɛ a kilgi alɔbi m pɛ edimɛdi nɛ asɔbɔya kikɛ nyam. ¹¹Ŋkpal loŋ be alɔbi na ka daŋ pɛ ŋkilgiwuraana na gba so b daa maŋ naŋ tiŋ n yili Mosis be anishito. ¹²Ama ade kikɛ gba be kaman, Enyɛnpe Ebɔrɛ kraŋ shin nɛ ewura Fɛɛro wora kagbene kpakpaso nseŋ kini kenu n sa Mosis nɛ Ɛɛrɔn fanɛ kananɛ Enyɛnpe Ebɔrɛ baŋ kaŋɛ na. ¹³Kumo be kaman nɛ Enyɛnpe Ebɔrɛ naŋ kaŋɛ Mosis le: “Echefo kachipurdidi, fo wule ŋ koso n ya tu ewura Fɛɛro ŋ kaŋɛ mo fanɛ Enyɛnpe Ebɔrɛ Israɛlebi be Ebɔrɛ na yɛ: ‘Shin nɛ ma basa e yɔ, saŋɛ na so baaŋ ya bunyaŋ ma. ¹⁴Nɛ mannɛ aloŋ, meeŋ shin nɛ kulɔ lubi nɛ k chɔ etɔrɔana ere kikɛ e tu fo nɛ fo beyaasepo nɛ fo basa kikɛ nɛ fo pin fanɛ esa kikɛ maŋ naa wɔtɔ a du fanɛ ma ashi durnya ere to kikɛ. ¹⁵Kashenteŋto, nɛ n daa sha nna n dafanɛ n shin nɛ kulɔ lubi mo nɛ k daa beeŋ tiŋ m mur fo nɛ fo basa kikɛ ashi kasawule ere so ba menyi so n chɛr. ¹⁶Ama ŋkpal ŋ ka bee sha fanɛ ŋ ŋini fo ma eleŋ so nɛ n shin nɛ fo kraa wɔtɔ na, saŋɛ na so durnya ere be esa kama beeŋ pin esa nɛ e la ma. ¹⁷Ŋkeshin nɛ fo alɛ kraa wɔtɔ nna a ŋini ma basa fo eleŋ nsaa kini keshin nɛ b yɔ. ¹⁸Amoso echefo, saŋɛ ere so gbagba meeŋ shin nɛ abɔrɛjembubi gbɛgbɛso be bɔrɛ e tɔr kasawule ere so. Loŋ be abɔrɛjembubi na beeŋ baa la asɔ nɛ b maŋ naŋ wu amo be kaduli ashi Ijipt kikɛ yili kachɛ nɛ k jɔŋɛ m ba fo mbre. ¹⁹Amoso k daga fanɛ fo yili kumo fanɛ b pɛ asɔbɔya nɛ kusɔ kama nɛ men kɔ ashi ndɔ to kikɛ n wɔtɔ ebu to nɛ b nya kumɔlga. Nɛ mannɛ aloŋ, abɔrɛjembubi na beeŋ tɔr edimɛdi nɛ asɔbɔya nɛ b na a kilgi to kikɛ so nɛ b wu.’ ” ²⁰Ndoŋ nna nɛ Fɛɛro be beyaasepo nɛ b daŋ yirda Enyɛnpe Ebɔrɛ be kamalga na nya manaŋ n shin nɛ bumo be anya nɛ asɔbɔya kikɛ shile n luri ebu to. ²¹Ama bekama nɛ b daŋ kplaŋ Enyɛnpe Ebɔrɛ be kamalga na so na bre daŋ shin nna nɛ bumo be anya nɛ asɔbɔya na a kilgi to. ²²Ndoŋ nna nɛ Enyɛnpe Ebɔrɛ kaŋɛ Mosis le: “Teŋi fo enɔ ŋ ŋini awɔlto nɛ abɔrɛjembubi gbɛgbɛso na e tɔr edimɛdi nɛ asɔbɔya nɛ asɔ duuso nɛ a wɔ Ijipt be kasawule so na kikɛ so.” ²³Mosis ka teŋi mbe kekpabi na ŋ ŋini awɔlto nɛ Enyɛnpe Ebɔrɛ shin nɛ bɔrɛ ponte ŋ gbri gbuŋ gbuŋ gbuŋ n nyɛkpɛ palpal nɛ abɔrɛjembubi fara a wurge kasawule waawaa. Enyɛnpe Ebɔrɛ daŋ shin nɛ abɔrɛjembubi be bɔrɛ na ba Ijipt be kasawule so kikɛ nna. ²⁴Ijipt ka fara kikɛ loŋ be abɔrɛjembubi be bɔrɛ na be kaduli maŋ naŋ ba kumo be kasawule so kikɛ. ²⁵Abɔrɛjembubi be bɔrɛ na daŋ bri Ijipt be efuli so be asɔ kama nɛ a daa wɔ kowu, edimɛdi nɛ asɔbɔya, nɛ asɔ duuso nɛ b duu kikɛ nna m mata kasawule nɛ a wu, nseŋ gbaŋgbaŋ ndibi malɛ kikɛ be afantaŋ. ²⁶Kakpa nɛ Israɛlebi na daa wɔ nɛ baa tre ndoŋ Goshen na nawule nɛ abɔrɛjembubi be bɔrɛgboŋ na daa maŋ yɔ. ²⁷Ndoŋ nna nɛ Fɛɛro naŋ shuŋi n tre Mosis nɛ Ɛɛrɔn m ba kaŋɛ bumo le: “Kede bre to, m pin fanɛ n wora kulubi. Enyɛnpe Ebɔrɛ na e kɔ akpa. Ma nɛ ma basa kikɛ wora alubi. ²⁸Amoso kule Enyɛnpe Ebɔrɛ n sa anyi, ŋkpal manɛ so, bɔrɛ na be keponte nɛ abɔrɛjembubi na wora kebanso. Naniere bre n sa menyi ekpa fanɛ men baa yɔ. A maŋ naŋ daga fanɛ men baa kraa wɔ nfe.” ²⁹Nɛ Mosis malɛ kaŋɛ mo: “Ŋ kaŋ baŋ lar kade ere to na nɛ meeŋ maŋ ma enɔana so ŋ kule Enyɛnpe Ebɔrɛ nɛ e shin nɛ bɔrɛ na be keponte nɛ abɔrɛjembubi gbɛgbɛso na kikɛ e ku nɛ fo pin fanɛ durnya ere la Enyɛnpe Ebɔrɛ na peya nna. ³⁰Ama n nyi fo nɛ fo beyaasepo ka maa ŋana Enyɛnpe Ebɔrɛ na.” ³¹Bɔrɛ na tiŋ n jija aboyu nɛ ayu bre, ŋkpal amo ere ka bee wora manaŋ manaŋ so. ³²Ama enyaŋkpaŋ nɛ adurbi bre be kekama daa maŋ jija, ŋkpal amo ere ka maa wule a wora so. ³³Ade be kaman nɛ Mosis nɛ Ɛɛrɔn lar ewura Fɛɛro kutɔ nɛ kade na to nɛ Mosis maŋ mbe enɔana so ŋ kule Enyɛnpe Ebɔrɛ nɛ bɔrɛ na be keponte na nɛ abɔrɛjembubi gbɛgbɛso na kikɛ nɛ bɔrɛchu nɛ k daa chulgi kasawule na so na kikɛ ku kuraa. ³⁴Ama Fɛɛro ka wu fanɛ bɔrɛchu na nɛ abɔrɛjembubi gbɛgbɛso na nɛ bɔrɛ be keponte na kikɛ yige nɛ mo nɛ mbe beyaasepo naaŋ wora ŋgbene kpakpaso. ³⁵Ndoŋ nna nɛ ewura Fɛɛro naŋ kini keshin nɛ Israɛl be basa na e yɔ fanɛ kananɛ Enyɛnpe Ebɔrɛ daŋ kaŋɛ fanɛ e beeŋ shin nɛ e wora na.

Elotɔr be asheŋ

¹Kede be kaman nɛ Enyɛnpe Ebɔrɛ naŋ kaŋɛ Mosis le: “Naŋ yɔ ewura Fɛɛro kutɔ n ya shin nɛ mo nɛ mbe beyaasepo kikɛ be ŋgbene e ki kpakpa, saŋɛ na so meeŋ wora ma emamachisheŋ ere nɛ b wu amo. ²Kumo be loŋ beeŋ shin nɛ menyi alɛ gba e kaŋɛ men be mbia nɛ men nanabiana kananɛ n daŋ wora emamachisheŋ ashi Ijiptebi be anishito, saŋɛ na so menyi kikɛ beeŋ pin fanɛ ma e la Enyɛnpe Ebɔrɛ na.” ³Ndoŋ nna nɛ Mosis nɛ Ɛɛrɔn naŋ yɔ Fɛɛro kutɔ n ya kaŋɛ mo fanɛ Enyɛnpe Ebɔrɛ, Israɛlebi be Ebɔrɛ na yɛ: “Shin nɛ ma basa e yɔ, saŋɛ na so, baaŋ ya bunyaŋ ma. ⁴Nɛ fo baŋ kini keshin nɛ ma basa yɔ, meeŋ shin nɛ elotɔr e ba fo efuli ere so echefo. ⁵Baaŋ ba mel kasawule so kikɛ nna gbi nɛ esa kama maŋ naŋ tiŋ n wu kasawule gbagba kenishiso. Baaŋ ji kusɔ kama nɛ abɔrɛjembubi na jija ŋ ka na kikɛ nyam n ta kedibi kama nɛ k wɔ men be adɔana to n ti so. ⁶Baaŋ luri m bɔlɔ fo nɛ fo beyaasepo nɛ Ijiptebi kikɛ be elaŋana to. K beeŋ baa la kusɔ nɛ men tutoana na ŋko men nanaana gba maŋ naŋ wu ŋ ku so, yili saŋɛ nɛ b ba kasawule ere so kikɛ m ba fo nɛ mbre.” Kumo be kaman nɛ Mosis nɛ Ɛɛrɔn lar ewura Fɛɛro kutɔ. ⁷Ndoŋ nna nɛ ewura Fɛɛro be beyaasepo na kaŋɛ mo le: “Shin nɛ basa na e yɔ n ya bunyaŋ Enyɛnpe Ebɔrɛ, bumo be Ebɔrɛ na, ŋkpal manɛ so, fo maŋ nyi fanɛ Ijipt bee mur nna ere a?” ⁸Kumo be kaman nɛ b naŋ ya bar Mosis nɛ Ɛɛrɔn ewura Fɛɛro kutɔ nɛ e kaŋɛ bumo: “Menyeeŋ tiŋ n ya bunyaŋ Enyɛnpe Ebɔrɛ, men be Ebɔrɛ na. Ama menyi to be bumo bre nɛ fee sha fanɛ b yɔ ere?” ⁹Nɛ Mosis kaŋɛ mo: “Anyi nɛ anyi be mbia nɛ anyi be mbolpɔ kikɛ e naa yɔ, ŋkpal manɛ so, anyee sha keya wora kejigboŋ nna n sa Enyɛnpe Ebɔrɛ na.” ¹⁰Ndoŋ nna nɛ ewura Fɛɛro kaŋɛ bumo: “Enyɛnpe Ebɔrɛ na e nɛfa menyi, ama men sa maŋ keta men be beche nɛ mbia bre n yɔ! Kashenteŋto, nɛ men wora loŋ kumo ere, nfɛra lubi ko e wɔ menyi to na. ¹¹Amoso, shin nɛ menyi to be benyɛn na nawule e yɔ n ya bunyaŋ Enyɛnpe Ebɔrɛ na, ŋkpal manɛ so, aloŋ nɛ men chɛr a kule ma fanɛ n wora gba.” Kumo be kaman nɛ b ju Mosis nɛ Ɛɛrɔn ashi ewura Fɛɛro kutɔ. ¹²Ndoŋ nna nɛ Enyɛnpe Ebɔrɛ kaŋɛ Mosis: “Teŋi fo enɔ n shoŋi Ijipt be kasawule so nɛ elotɔr e ba ji asɔ kama nɛ abɔrɛjembubi na jija ŋ ka na nɛ a wɔ ndɔana to nɛ kasawule na kikɛ so na.” ¹³Ndoŋ nna nɛ Mosis teŋi mbe kekpabi na ŋ ŋini Ijipt be kasawule so nɛ Enyɛnpe Ebɔrɛ shin nɛ afugboŋ ko shi kebɔrɛfito m ba kasawule na so. Afu na daŋ yili kamɔnchɛ kachipurso nna m ber loŋ nɛ kanyɛ ya biri nɛ k naŋ ŋmɛa so loŋ nɛ kare naŋ ya chɛ. Kare ka ya kaa chɛ nɛ elotɔr ba. ¹⁴Ndoŋ nna nɛ elotɔr na ba sensaŋ Ijipt be kasawule kikɛ to nseŋ buu efuli na so kikɛ. Bumo be keshi nɛ kulubi be kaduli maŋ naŋ ba kasawule so kikɛ. Bumo alɛ maaŋ naŋ ba kasawule so loŋ kikɛ. ¹⁵B daŋ mel kasawule na kikɛ so nna m biri le gbitigbiti kaplɛkama, nɛ esa maaŋ naŋ tiŋ n wu kasawule gbagba ama bumo nawule. Elotɔr na malɛ daŋ ji asɔ kama nɛ abɔrɛjembubi na daŋ jija ŋ ka na kikɛ nna m mur. Kusɔ kama nɛ k daŋ kɔr a yil ndɔana to, nɛ ndibi sɔrso kikɛ be asɔrso daa maŋ naŋ ka Ijipt be kasawule na so. Kusɔ kama nɛ k daa la kedibi ŋko kusɔ duuso daa maŋ naa kɔ afantaŋ kumo so kuraa. ¹⁶Ndoŋ nna nɛ Fɛɛro shuŋi n tre Mosis nɛ Ɛɛrɔn manaŋ nseŋ kaŋɛ bumo le: “N wora kulubi ŋ gbiti Enyɛnpe, men be Ebɔrɛ na nseŋ wora ŋ gbiti menyi alɛ gba. ¹⁷Amoso men ta ma alubi nɛ n wora na m paŋ ma nseŋ kule Enyɛnpe, men be Ebɔrɛ na nɛ e lara le be aleblawu lubi ere ma so.” ¹⁸Ndoŋ nna nɛ Mosis lar Fɛɛro kutɔ n ya kule Enyɛnpe Ebɔrɛ na. ¹⁹Kede be kaman nɛ Enyɛnpe Ebɔrɛ shin nɛ epeŋitɔrkpa be afugboŋ ko malɛ kilgi m ber m ba eleŋso m ba gbare elotɔr na kikɛ nyam n ya wɔtɔ teku peper na to nɛ ekoŋwule gba daa maŋ naŋ ka ashi Ijipt be efuli na kikɛ so. ²⁰Ama ade kikɛ be kaman nɛ Enyɛnpe Ebɔrɛ naŋ shin nɛ Fɛɛro be kagbene naŋ ki kpakpa nɛ e naŋ kini keshin nɛ Israɛlebi na e yɔ.

Tentembiri be tɔrɔ be asheŋ

²¹Kumo be kaman nɛ Enyɛnpe Ebɔrɛ naŋ kaŋɛ Mosis le: “Teŋi fo enɔ ŋ ŋini awɔlto nɛ ketentembiri e ba buu Ijipt be kasawule so kikɛ, k beeŋ baa la ketentembirigboŋ nna nɛ k beeŋ ba du mina kashenteŋto.” ²²Ndoŋ nna nɛ Mosis maŋ mbe enɔ so ŋ ŋini awɔlto nɛ ketentembirigboŋ le plɔ ba Ijipt be efuli so kikɛ nchɛnsa. ²³Basa daa maŋ naa wu abar kumo be saŋɛ. Ekama malɛ daa maŋ yɔ kaplɛkama nchɛ asa na to. Ama amo be saŋɛ na kikɛ so nɛ kefulto wɔ kakpa nɛ Israɛlebi na bre daa wɔ na. ²⁴Ndoŋ nna nɛ Fɛɛro naŋ tre Mosis ŋ kaŋɛ mo: “Men baa yɔ n ya bunyaŋ Enyɛnpe Ebɔrɛ na. Men be beche nɛ mbia gba beeŋ tiŋ a yɔ, ama menyi be asɔbɔya bre beeŋ shir nfe.” ²⁵Nɛ Mosis kaŋɛ ewura Fɛɛro le: “K daga fanɛ an baa kɔ asɔbɔya nɛ anyeeŋ ya mɔ n chɔɔ n lara esarga n sa Enyɛnpe Ebɔrɛ, anyi be Ebɔrɛ na. ²⁶Amoso, k daga fanɛ anyi be asɔbɔya kikɛ gba ka yɔ. Amo be kekama maaŋ shir nfe. K daga fanɛ an ya ta asɔbɔya na be beko m bunyaŋ Enyɛnpe anyi be Ebɔrɛ na. Anyi alɛ baa maŋ fo ndoŋ, anyi maaŋ tiŋ m pin asɔbɔya nɛ anyeeŋ ya ta m bunyaŋ mo.” ²⁷Ama Enyɛnpe Ebɔrɛ daŋ shin nɛ Fɛɛro naŋ wora kagbene kpakpaso ŋ kini keshin nɛ b yɔ. ²⁸Ndoŋ nna nɛ ewura Fɛɛro kaŋɛ Mosis le: “Foe ma anishito nfe naniere. Fo alɛ e sa maŋ kaŋ naŋ shin nɛ n wu fo kenishiso kikɛ. Kachɛ kama so nɛ n naŋ wu fo ma anishito, feeŋ wu.” ²⁹Ndoŋ nna nɛ Mosis kaŋɛ mo: “To, k nyalɛ. Fo ka baŋ kaŋɛ le ere, m maaŋ naŋ ba fo anishito kikɛ.”

Ewurkoŋ be luwu be asheŋ

¹Ade kikɛ be kaman nɛ Enyɛnpe Ebɔrɛ kaŋɛ Mosis le: “Ŋ kraa beeŋ bar aleblawu koŋwule ewura Fɛɛro nɛ Ijiptebi so. Kumo ere be kaman e beeŋ shin nɛ men yɔ. E beeŋ ju menyi gba kuraa n lar mbe efuli so. ²Amoso naniere ya malga n sa Israɛl be beche nɛ benyɛn fanɛ b kule ŋ kule bumo be bechenashapoana shuwa nɛ gbiti be abitasɔ.” ³Ndoŋ nna nɛ Enyɛnpe Ebɔrɛ shin nɛ Ijiptebi na be ŋgbene pɛ Israɛlebi na ga nɛ ewura Fɛɛro be beyaasepo gba nɛ Ijipt be basa kikɛ fara a keni Mosis a bɔlɔ kenishi.

⁴Kumo be kaman nɛ Mosis kaŋɛ ewura Fɛɛro le: “Enyɛnpe Ebɔrɛ kaŋɛ fanɛ ta a ba kiidiso e beeŋ nite Ijipt kikɛ to. ⁵Kaplɛkama malɛ nɛ e yɔ be ewurkoŋ nyɛnso beeŋ wu. Yili ewura Fɛɛro n ya fo kenyache nɛ e bee kɔr ayu be ewurkoŋ nyɛnso beeŋ wu, nɛ asɔbɔya na gba peya e wu. ⁶Ijipt be kaba so kikɛ nyam, basa beeŋ baa boŋ to a shu. B maŋ naŋ shu loŋ be kushu ashi Ijipt be kasawule so kikɛ, bumo alɛ maaŋ naŋ shu loŋ be kushu kikɛ. ⁷Ama kakpa nɛ Israɛlebi na bre wɔ, basa maaŋ shu, hale jɔnɔ gba maaŋ gbu. Saŋɛ na so menyi, Ijiptebi beeŋ pin fanɛ Israɛlebi na kɔr menyi to ashi ma, Enyɛnpe Ebɔrɛ na kutɔ. ⁸Ade kikɛ be kaman fo beyaasepo ere kikɛ beeŋ ba ma kutɔ m ba gbir ma anishito ŋ kule ma ŋ kaŋɛ le: ‘Fo nɛ basa nɛ baa bɛ fo so na kikɛ, e baa yɔ.’ Kumo be kaman nɛ an lar.” Mosis ka malga le n loge nɛ e nya agbo ga nseŋ lar ewura Fɛɛro kutɔ. ⁹Ama Enyɛnpe Ebɔrɛ teŋ kaŋɛ Mosis fanɛ ewura Fɛɛro maaŋ nu n sa mo, saŋɛ na so, mo ere Ebɔrɛ be emamachisheŋ beeŋ wora keshi Ijipt to. ¹⁰Kashenteŋ nɛ Mosis nɛ Ɛɛrɔn daŋ wora emamachisheŋ damta ere kikɛ ewura Fɛɛro be anishito, ama Enyɛnpe Ebɔrɛ daŋ shin nna nɛ Fɛɛro wora kagbene kpakpaso ŋ kini keshin nɛ Israɛl be basa na e lar mbe efuli so.

Kebansonchoŋ be asheŋ

¹Ade kikɛ be kaman nɛ Enyɛnpe Ebɔrɛ kaŋɛ Mosis nɛ Ɛɛrɔn le ashi Ijipt be efuli so: ²“Yili kabre a yɔ kufɔl ere e naaŋ baa la kafɛ to be kufɔl juŋkparso n sa menyi Israɛlebi. ³Amoso kaŋɛ Israɛl be basa na kikɛ le be kesheŋ ere fanɛ kufɔl ere be kachɛ kudusopo, kowurnyɛn kama e lara kpakpafɔlbi ŋko kaboelotebi n sa mbe kanaŋ nɛ b mɔ n ji. A daga fanɛ laŋ kama to ebi e nya kusɔbɔya koŋwule. ⁴Laŋ kama to ebi nɛ b maŋ shi nɛ b tiŋ n we kusɔbɔya lelemu n loge, e shin nɛ laŋ nɛ k mata bumo na to ebi e ti bumo so n we bumo be kusɔbɔya na. Ama a daga fanɛ b pin kananɛ laŋ na to ebi sa nɛ kananɛ ekama beeŋ tiŋ n we pɔɛŋ nseŋ wora loŋ. ⁵Laŋ kama to be kusɔbɔya e baa la kusɔbɔyanyɛnso nɛ k ji kafɛ koŋwule nsaa maa kɔ ndulgi kikɛ. Baaŋ tiŋ n lara kumo ashi mbolpɔ to ŋko mboe to. ⁶Men lara loŋ be asɔbɔya na n yili hale n ya fo kufɔl ere be kachɛ kuduanasopo na be kaaseso. Saŋɛ nɛ kaboŋ bee biri to na nɛ men mɔ amo. ⁷Kumo be kaman nɛ men ta amo be ŋklaŋ na be ako ŋ gbiti ŋ gbiti men be ebuana nɛ menyeeŋ chena to n we n we eblaŋ na be akuloŋ be mbuna be akel to nɛ amo be awɔlto. ⁸K daga fanɛ b tɔ eblaŋ na edɛ to nna nseŋ ta amo nɛ bodobodo nɛ a maŋ kɔ yiisi nɛ epofantaŋ kekra n wea abar to n we. ⁹Men saŋ maŋ kaŋ we eblaŋ na abumbuŋ ŋko n ta nchu n daŋɛ amo. Men tɔ amo nɛ amo be amu nɛ ayawɔrta nɛ apuntosɔ kikɛ edɛ to. ¹⁰Men sa maŋ kaŋ shin nɛ kare e chɛ eblaŋ na be kekama so. Men chɔɔ ekama nɛ meeŋ we ŋ ka. ¹¹Kusɔ nɛ menyeeŋ wora nde: Men ta men be asɔbuusoana m buu nseŋ kre to kpakpa n ta men be asɛbtaana n wɔtɔ, nseŋ ta men be akpabi malɛ ŋ keta. Men we eblaŋ na malɛ manaŋ manaŋ, ŋkpal manɛ so, k la kebansonchoŋ be kejigboŋ nɛ k bee maŋkura ma, Enyɛnpe Ebɔrɛ na nna. ¹²Kumo be kanyɛ na meeŋ ba Ijipt be efuli so m ba mɔ ewurkoŋnyɛn kikɛ, meeŋ mɔ edimɛdi nɛ asɔbɔya kikɛ peya. Ma alɛ beeŋ gberge Ijipt be efuli so be agbirana kikɛ kusoe. Ma e la Enyɛnpe Ebɔrɛ na. ¹³Ŋklaŋ nɛ menyeeŋ ta ŋ gbiti men be nwu nɛ men wɔtɔ ere be mbuna na beeŋ baa la ndulgi nna n sa menyi ere. Saŋɛ na so nɛ m baŋ ta luwu be aleblawu lubi a ba Ijiptebi so saŋ wu ŋklaŋ na, meeŋ baŋ menyi so n choŋ nɛ shɛŋ maaŋ wora menyi.”

Bodobodo nɛ k maŋ kɔ yiisi na be kejigboŋ be asheŋ

¹⁴“A daga fanɛ menyi nɛ men be kaman to ebi kikɛ e baa wora kejigboŋ kafɛ kikɛ a nyiŋi kusɔ nɛ ma, Enyɛnpe Ebɔrɛ wora n sa menyi ere. Men shin nɛ k ki mbra n sa menyi mbaanaayɔ. ¹⁵Yili loŋ be kachɛ na n ya fo bɔkwe men be ekama e sa maŋ kaŋ ji bodobodo nɛ b ta yiisi n wora. Bɔkwe na to be kachɛ sososo na ekama e lara yiisi kikɛ ashi mbe laŋ to. Esa kama nɛ e baŋ ji bodobodo nɛ b ta yiisi n wora nchɛnshunu na to, meeŋ lara mo ashi ma basa to. ¹⁶Men ta kachɛ sososo na nɛ kachɛ shunusopo na n shɛr n shuŋ Ebɔrɛ. Loŋ be nchɛ na, ekama e sa maŋ kaŋ shuŋ kushuŋ kikɛ, ama menyeeŋ tiŋ n daŋɛ ajibi bre kanaŋkamaso nɛ ekama beeŋ tiŋ n ji. ¹⁷Men baa wora bodobodo nɛ a maŋ kɔ yiisi na be kejigboŋ saŋkikɛ, ŋkpal manɛ so, kumo be kachɛ na nɛ n lara menyi be kanaŋ ashi Ijipt be kasawule so. Amoso, a daga fanɛ menyi be kaman to ebi kikɛ e baa nyiŋi loŋ be kachɛ ere nɛ k baa la fanɛ mbra n sa bumo mbaanaayɔ. ¹⁸Kufɔl juŋkparso na be kachɛ kuduanasopo be kaaseso nɛ menyeeŋ fara a ji bodobodo nɛ k maŋ kɔ yiisi na hale n ya fo kumo be nchɛ adunyɔ nɛ kakosopo be kaaseso. ¹⁹Ŋkpal loŋ so kumo be nchɛnshunu na bre to k maŋ daga menyi be ekama kaa kɔ yiisi ashi mbe laŋ to kikɛ. Ekama, kadetobia ŋko efɔ, nɛ e baŋ ji ajibi kama nɛ a kɔ yiisi, meeŋ lara mo ashi Israɛl be basa to. ²⁰Amoso men be ekama e sa maŋ kaŋ ji kusɔ kama nɛ k kɔ yiisi nchɛnshunu na to.”

Kebansonchoŋ be asheŋ

²¹Mmalga ere kikɛ be kaman nɛ Mosis tre Israɛlebi na be bejuŋkparpo kikɛ m ba shɛr ŋ kaŋɛ bumo le: “Menyi be ekama e yɔ epul ere to n lara kubolpɔ ŋko kaboe fɔlbi nɛ mo nɛ mbe kanaŋ beeŋ mɔ n wora kebansonchoŋ be kejigboŋ na. ²²Men ta echeenshi n suse n suse ŋklaŋ na nseŋ ta keche n nyɔ amo to ŋ gbiti ŋ gbiti menyi be mbuna be akel to nɛ esoso kikɛ. Kumo be kaman ekama e sa maŋ kaŋ naŋ lar kowu kikɛ hale nɛ kare e ya chɛ kachipurso. ²³Saŋɛ na so Enyɛnpe Ebɔrɛ na baŋ luri Ijipt to nɛ e mɔ ewurkoŋnyɛn nseŋ wu ŋklaŋ ka gbiti menyi be akuloŋ be esoso nɛ akel to, e beeŋ baŋ amo so n choŋ nɛ emɔpo na maaŋ luri menyi be elaŋ to m mɔ menyi be ewurkoŋnyɛn. ²⁴Men ta le be kesheŋ ere ŋ ki mbra n sa menyi be amu nɛ menyi be kaman to ebi kikɛ mbaanaayɔ. ²⁵Men kaŋ yɔ kasawule mo nɛ Enyɛnpe Ebɔrɛ nase kɔnɔ fanɛ e beeŋ sa menyi na gba so, men baa kraa nyiŋi a wora le be kesheŋ ere. ²⁶Nɛ men be mbia kaŋ bishi menyi fanɛ: ‘Le be kesheŋ ere be kifito bre e la nuso?’ ²⁷Men kaŋɛ bumo fanɛ: ‘K la Enyɛnpe Ebɔrɛ be kebansonchoŋ be sarga nna. E daŋ baŋ anyi Israɛlebi be nwu so nna ashi Ijipt be efuli so nseŋ ya mɔ Ijiptebi be ewurkoŋnyɛnana, ama shɛŋ daa maŋ wora anyi ere be basa.’ ” Ndoŋ nna nɛ Israɛlebi gbir m bunyaŋ Enyɛnpe Ebɔrɛ na. ²⁸Kumo be kaman nɛ Israɛlebi na yɔ n ya wora asɔ nɛ Enyɛnpe Ebɔrɛ daŋ kaŋɛ Mosis nɛ Ɛɛrɔn na kikɛ chap.

Ewurkoŋ be luwu be asheŋ

²⁹Kumo be kamɔnchɛ kiidiso nɛ Enyɛnpe Ebɔrɛ luri Ijipt to m mɔ ewurkoŋnyɛn kikɛ ashi Ijipt be kasawule so. Yili Fɛɛro n ya fo esa nɛ e wɔ kabuti to be wurkoŋ nyɛnso nɛ asɔbɔya kikɛ peya nɛ e daŋ mɔ. ³⁰Kumo be kanyɛ na nɛ ewura Fɛɛro nɛ mbe beyaasepo nɛ Ijipt be basa kikɛ koso a boŋ to a shu awɔrso kaplɛkama, ŋkpal manɛ so, laŋ kama daa maŋ wɔ Ijipt to nɛ esa maŋ wu kumo to.

Israɛlebi ka lar Ijipt to be asheŋ

³¹Epul na to nɛ Fɛɛro shuŋi n tre Mosis nɛ Ɛɛrɔn kanyɛso na kikɛ nseŋ kaŋɛ bumo: “Men bela n lar ma efuli so, menyi nɛ Israɛlebi nɛ b wɔ nfe na kikɛ. Men baa yɔ n ya bunyaŋ Enyɛnpe Ebɔrɛ na fanɛ kananɛ men kule ma na. ³²Men ta men be mbolpɔ nɛ mboe nɛ ana kikɛ a yɔ fanɛ kananɛ men kule na, ama men kaŋ yɔ, men kule Ebɔrɛ be nɛfa n sa ma ere gba!” ³³Kede be kaman Ijiptebi na daŋ fuge Israɛlebi na be aya ase kenishipereso nna fanɛ b lar bumo be kasawule so manaŋ. B yɛ: “Nɛ mannɛ aloŋ, anyi Ijiptebi kikɛ beeŋ wu n loge.” ³⁴Ndoŋ nna nɛ Israɛlebi na ta bodobodo nɛ a maŋ kɔ yiisi na be kubuu nɛ b gbiti m bɔlɔ bumo be ntishaŋana nɛ b kɔ a wora bodobodo na nseŋ ta ewajɛ ŋ kre amo so n ta amo n deŋi bumo be abatimuana so m pɛ ekpa. ³⁵Kusɔ kama nɛ Mosis daŋ kaŋɛ Israɛlebi na, bumo alɛ wora. B daŋ kule ŋ kule Ijiptebi na shuwa nɛ gbiti be abitasɔ nɛ asɔbuuso nna. ³⁶Enyɛnpe Ebɔrɛ daŋ shin nɛ Israɛlebi na be asheŋ bɔlɔ Ijiptebi na kenishi nna nɛ b sa bumo kusɔ kama nɛ b daŋ kule bumo kikɛ. Loŋ be ekpa na so nɛ Israɛlebi na daŋ bɔla n sulɔ Ijiptebi na be asɔ damta n yɔ. ³⁷Israɛlebi na daŋ ta ayaso nna n yili Rameses n ya fo Sukɔf. B daa sa fanɛ benyɛn ŋgboŋ alfa ashe nna. B daa maŋ karga beche nɛ mbia bre n ti so. ³⁸Basa pɔtɛ damta gba daŋ ti bumo so n yɔ. B daŋ keta asɔbɔya fanɛ mbolpɔ nɛ mboe nɛ ana kikɛ n ti so n yɔ. ³⁹Ndoŋ nna nɛ b ta bodobodo nɛ a maŋ kɔ yiisi be kubuu nɛ b gbiti n shi Ijipt na n wora bodobodo. Ŋkpal b ka daŋ ju bumo fanɛ b lar Ijipt to manaŋ na so, b daa maŋ naŋ nya saŋɛ nɛ b wɔtɔ amo yiisi ŋko n naŋ wora ajibi kama n ti so. ⁴⁰Nfɛ alfa ana nɛ adesa nɛ Israɛlebi na daŋ ji ashi Ijipt to. ⁴¹Nfɛ alfa ana nɛ adesa na be kachɛ lalalogesopo gbagba nɛ Enyɛnpe Ebɔrɛ be basa kikɛ lar Ijipt be kasawule so. ⁴²Loŋ be kanyɛ na Enyɛnpe Ebɔrɛ be anishi daŋ baa yuu Israɛlebi na so nna nɛ b lar Ijipt to. Amoso kafɛ kama nɛ loŋ be kanyɛ baŋ fo, Israɛlebi nɛ bumo be kaman to ebi kikɛ bee gal edi nna a chena kanyiŋiso a bunyaŋ Enyɛnpe Ebɔrɛ na a klade.

Kebansonchoŋ be kejigboŋ be mbraana be asheŋ

⁴³Kamalga ere be kaman nɛ Enyɛnpe Ebɔrɛ kaŋɛ Mosis nɛ Ɛɛrɔn le: “Kebansonchoŋ be kejigboŋ na be mbraana nde: K maŋ daga efɔ kikɛ ka ji kumo. ⁴⁴Ama kenya kikɛ nɛ men tɔ nseŋ ku mo kututu bre beeŋ tiŋ n ji kumo. ⁴⁵Esa kama malɛ gba nɛ e ba kaa wɔ menyi to nɛ e wora nchɛnnyɔ ŋko men be paawura kikɛ maŋ daga e ka ji kumo be kejibi na. ⁴⁶Kumo alɛ daga fanɛ men baa shɛr laŋ kama to nɛ b wora ajibi na nna a ji amo. K maŋ daga fanɛ esa kama e ta ajibi na n lar laŋ na to. Menyi alɛ e sa maŋ kaŋ bure asɔbɔya nɛ men ta n wora kebansonchoŋ be ajibi na be awibi to. ⁴⁷Israɛlebi kikɛ daga fanɛ b baa ji le be kejigboŋ ere nna. ⁴⁸Efɔ kama nɛ e ba tu menyi n chena nsaa sha fanɛ e ti menyi so n ji kumo m maŋkura Enyɛnpe na, k daga fanɛ mbe laŋ to be benyɛn kikɛ e ku atutu. Kumo be kaman pɔɛŋ nɛ loŋ be efɔ na e tiŋ n tu menyi n wora kejigboŋ na be aworbi fanɛ Israɛl be kadetobia, a daga fanɛ e ku kututu. ⁴⁹Le be mbra ere malɛ beeŋ baa la mbra koŋwule nna n yili n sa bekama nɛ b la Israɛl be ndetobia nɛ bumo nɛ b la befɔ nseŋ ba chena menyi to kikɛ.” ⁵⁰Ndoŋ nna nɛ Israɛlebi na kikɛ wora kasonu nseŋ wora asɔ nɛ Enyɛnpe Ebɔrɛ yili n sa Mosis nɛ Ɛɛrɔn na kikɛ. ⁵¹Kumo be kamɔnchɛ malɛ kikɛ nɛ Enyɛnpe Ebɔrɛ lara Israɛl be basa kanaŋ kanaŋ so nɛ mbuna mbuna so ashi Ijipt to.

Ewurkoŋnyɛn be kebaata a bɔɔ Ebɔrɛ enɔ be asheŋ

¹Ade kikɛ be kaman nɛ Enyɛnpe Ebɔrɛ kaŋɛ Mosis le: ²“Lara wurkoŋnyɛn kikɛ ashi Israɛlebi ere to nɛ e baa du cheembi a la meya. Dimɛdi ŋko kusɔbɔya be wurkoŋnyɛn, la meya nna.” ³Nɛ Mosis kaŋɛ basa na le: “Men baa nyiŋi kachɛ nɛ men lar Ijipt to ere. Ndoŋ nɛ men daa wɔ kenyaya to nɛ Enyɛnpe Ebɔrɛ ŋini eleŋ nseŋ lara menyi ashi ndoŋ na. Menyi alɛ e sa maŋ kaŋ ji kusɔ kama nɛ k kɔ yiisi loŋ be kachɛ na malɛ. ⁴Kabre ‘Abib’ be kufɔl to nɛ menyee lar nfe na. ⁵Enyɛnpe Ebɔrɛ kaŋ baŋ yɛr menyi basa nɛ baa tre Keenanebi nɛ Hitebi nɛ Amɔriebi nɛ Hivebi nɛ Jebusiebi be kasawule nɛ e nase kumo be kɔnɔ n sa men nananyɛnana fanɛ e beeŋ ta n sa menyi na so, men baa kraa wora le be kesheŋ ere kufɔl ere to. ⁶Menyeeŋ ji bodobodo nɛ a maŋ kɔ yiisi bɔkwe na nseŋ wora kejigboŋ kumo be kachɛ shunusopo na n nyiŋi kananɛ Enyɛnpe Ebɔrɛ na lara menyi ashi Ijipt be efuli so. ⁷Men ji bodobodo nɛ a maŋ kɔ yiisi na nchɛnshunu. K maŋ daga b ka wu yiisi ŋko ajibi kama nɛ a kɔ yiisi gba menyi be elaŋ to. ⁸Kachɛ shunusopo na nɛ ekama e kaŋɛ mbe mbia fanɛ e bee wora le be kesheŋ ere nna a nyiŋi kusɔ nɛ Enyɛnpe Ebɔrɛ wora n sa mo, saŋɛ nɛ e lar Ijipt to na. ⁹Kesheŋ ere beeŋ baa la kanyiŋi nna nsaa du fanɛ b ka kre mbra na m mata menyi be enɔana so ŋko menyi be nsɔto nɛ men baa ŋini beko kumo be asheŋ. Saŋɛ na so, k beeŋ baa nyiŋi menyi kananɛ Enyɛnpe Ebɔrɛ be mbra na bɔlɔ menyi to kpal manɛ so, Enyɛnpe Ebɔrɛ ta mbe eleŋgboŋ nna n lara menyi ashi Ijipt be kasawule so. ¹⁰Kumo so, kafɛ kikɛ saŋɛ ere so, men baa nyiŋi a wora le be kejigboŋ ere.

Ewurkoŋnyɛn be asheŋ

¹¹Ama saŋkama nɛ Enyɛnpe Ebɔrɛ kaŋ yɛr menyi Keenanebi be kasawule na so fanɛ kananɛ e nase kɔnɔ n sa menyi nɛ men tutoana fanɛ e beeŋ ta kumo n sa menyi na, ¹²men ta men be ewurkoŋnyɛn nɛ men be asɔbɔya be bibinyɛn nɛ baaŋ fara ŋ kurge ashi ndoŋ na kikɛ n sa ma, Enyɛnpe Ebɔrɛ na. ¹³Ama men ta kubolpɔ fɔlbi n chɛr kurma bre pibinyɛn juŋkparso. Nɛ fanɛ men maaŋ ta kubolpɔ n chɛr kumo malɛ, kumo ere men bu kumo be kubɔ. Men shin nɛ menyi be ewurkoŋnyɛn na bre e baa du cheembi a la Enyɛnpe na peya. ¹⁴Ama saŋko nɛ menyi be mbia kaŋ bishi menyi kejigboŋ ere be kifito, men kaŋɛ bumo le: ‘Enyɛnpe Ebɔrɛ daŋ ta mbe eleŋgboŋ nna n lara anyi kenyaya to ashi Ijipt be kasawule so. ¹⁵Ama saŋɛ nɛ Fɛɛro daŋ wora kagbene kpakpaso ŋ kini keshin nɛ an yɔ na, Enyɛnpe Ebɔrɛ daŋ mɔ Ijipt be kasawule so be ewurkoŋnyɛn kikɛ nna, edimɛdi nɛ asɔbɔya kikɛ peya. Ŋkpal loŋ so nɛ an ta asɔbɔya be bibinyɛn juŋkparso kikɛ a lara sarga a sa Enyɛnpe Ebɔrɛ na nsaa shin nɛ anyi be ewurkoŋnyɛn malɛ kikɛ bee ki cheembi a wɔtɔ a sa mo na. ¹⁶Le be kejigboŋ ere malɛ beeŋ baa du fanɛ tɔɔnɛ be asɔ nɛ anyee kre a mata enɔ so ŋko nsɔto nna a nyiŋi anyi kananɛ Enyɛnpe ŋini eleŋ n lara anyi ashi Ijipt be efuli so.’ ”

Kananɛ Enyɛnpe juŋkpar mbe basa be asheŋ

¹⁷Saŋɛ nɛ ewura Fɛɛro daŋ sa Israɛl be basa ekpa fanɛ b yɔ na, Ebɔrɛ daa maŋ juŋkpar bumo m bɔla ekpa shiimbi ashi Filistiebi be kasawule so, ŋkpal manɛ so, le nɛ Ebɔrɛ daŋ fɛ: “Nɛ Filistiebi kaŋ ya kre kena n tu bumo, baaŋ chɛrga bumo be nfɛra m bɛta n yɔ Ijipt.” ¹⁸Amoso Ebɔrɛ daŋ juŋkpar bumo nna ŋ gelge m bɔla teku peper na be kaba so ashi keshishɛrsawule ko so. Israɛlebi na daŋ wora kena be shiriya nna pɔɛŋ nseŋ lar Ijipt.

¹⁹B ka daa lar Ijipt be kasawule so na Mosis muu Josɛf be awibi nna, ŋkpal Josɛf ka daŋ shin nɛ Jeekɔb be mbia nase kɔnɔ n sa mo pɔɛŋ nɛ e wu so. Le nɛ e daŋ kaŋɛ bumo: “Abaanaaworasheŋ Ebɔrɛ beeŋ ba mɔlga menyi kachako. Nɛ mo alɛ kaŋ mɔlga menyi, men ta ma kebuni be awibi n ti menyi be amu so n lar Ijipt.” ²⁰Israɛlebi ka lar Sukɔf nɛ b yɔ Etam ashi keshishɛrsawule na be ekarso n ya yuu ewajɛbu n wora bumo be keeyi to ndoŋ. ²¹Karechɛ kikɛ Enyɛnpe Ebɔrɛ daa shin nɛ kuwɔlpa bee juŋkpar mbe basa kapaso nna nsaa shin nɛ edɛ be kabulpi malɛ bee juŋkpar bumo kanyɛso. ²²Karechɛ kikɛ kuwɔlpa nɛ k bee juŋkpar bumo na maa barga bumo kikɛ. Loŋ nɛ edɛ be kabulpi na malɛ gba maa barga bumo kanyɛso kikɛ.

Teku peper na be kebir ŋ ku to n choŋ be asheŋ

¹Ndoŋ nna nɛ Enyɛnpe Ebɔrɛ naŋ kaŋɛ Mosis le: ²“Kaŋɛ Israɛlebi na fanɛ b bɛta kaman n ya yuu bumo be ewajɛbu Migdɔl nɛ teku na be kefɛato m mata Pihahirɔf ashi Baal Zefon be kaba ndoŋ dede. ³Saŋɛ na so ewura Fɛɛro beeŋ fɛ mbe kumu to ŋ kaŋɛ: ‘Men keni Israɛlebi na e ya shir a wɔ keshishɛrsawule na so a kulti a maŋ nyi kakpa nɛ baaŋ bɔla n lar na.’ ⁴Kumo be kaman nɛ n naŋ shin nɛ Fɛɛro be kagbene e ki kpakpa nɛ e ju m buu menyi so, saŋɛ na so meeŋ mur Fɛɛro nɛ mbe beyaasepo kikɛ nɛ Ijiptebi e pin fanɛ ma e la Enyɛnpe Ebɔrɛ nɛ kemaŋkura bɔlɔ ma to na.” Ndoŋ nna nɛ Israɛlebi na wora kusɔ nɛ Mosis kaŋɛ bumo na. ⁵Amoso b ka daŋ ya kaŋɛ Ijipt be ewura fanɛ Israɛl be basa na shile n choŋ nɛ mo nɛ mbe basa kikɛ chɛrga bumo be nfɛra nseŋ bishi bumo be amu le: “Manɛ so bre nɛ an wora le be kesheŋ ere? Manɛ nna nɛ an shin nɛ Israɛlebi na yɔ nsaa maaŋ naa shuŋ anyi ere?” ⁶Ndoŋ nna nɛ ewura Fɛɛro shin nɛ b wora mo gbagba be gbaŋɛturko shiriya nseŋ shin nɛ mbe benapo bela ase. ⁷Kumo be kaman nɛ e ta mbe egbaŋɛturko kikɛ nseŋ shin nɛ mbe benapo be benimu luri amo be alfa ashe nɛ a kɔ eleŋ ga na to. ⁸Nɛ Enyɛnpe Ebɔrɛ naŋ shin nɛ Ijipt be ewura Fɛɛro be kagbene naŋ ki kpakpa nɛ e ju m buu Israɛl be basa na so, ŋkpal kananɛ b daŋ lar Ijipt a fɛ fanɛ shɛŋ shɛŋ maaŋ naŋ tiŋ n wora bumo na so so. ⁹Fɛɛro nɛ mbe benapo kikɛ daŋ ju nna m buu Israɛlebi na so, hale n ya kaa taga bumo to ashi kakpa nɛ b yuu bumo be ewajɛbu m mata teku na ashi Pihahirɔf nɛ k wɔ Baal Zefon be kaba ndoŋ na. ¹⁰Ewura Fɛɛro nɛ mbe benapo ka ya kaa taga bumo to na nɛ Israɛlebi na maŋ bumo be amu so n wu fanɛ Ijiptebi na ju a buu bumo so a ba nɛ kufu pɛ bumo ga nɛ b shu n tre Enyɛnpe Ebɔrɛ. ¹¹Kumo be kaman nɛ b kilgi m bishi Mosis le: “Nchaŋana ka maŋ wɔ Ijipt to bre so nɛ fo keta anyi m ba keshishɛrsawule ere so fanɛ an baa wu ere a? Manɛ so nɛ fo wora anyi loŋ n lara anyi ashi Ijipt to ere? ¹²Mannɛ kusɔ nɛ an teŋ kaŋɛ fo Ijipt na nde a? An yɛ fo yige anyi boeŋ nɛ an baa wɔ Ijipt a shuŋ bumo. Nɛ an daa wɔ Ijipt a shuŋ bumo, k daa beeŋ baa bɔ an ka wu keshishɛrsawule ere so.” ¹³Ndoŋ nna nɛ Mosis kaŋɛ basa na: “Men sa maa lɔ kufu, men leŋ men be amu to. Menyeeŋ wu kumɔlga nɛ Enyɛnpe Ebɔrɛ beeŋ bar menyi kabre. Ijiptebi mo nɛ men wu kabre ere, men maaŋ naŋ wu bumo kikɛ. ¹⁴Enyɛnpe Ebɔrɛ na beeŋ kɔ bumo kena n sa menyi. Menyi ere e yige a keni mo de.” ¹⁵Ade kikɛ be kaman nɛ Enyɛnpe Ebɔrɛ na kaŋɛ Mosis le: “Manɛ e ba nɛ fee shu a tre ma? Meeŋ mɔlga menyi, amoso kaŋɛ Israɛlebi na fanɛ b baa yɔ anishito. ¹⁶Teŋi fo kekpabi na n shoŋi teku na nɛ k ku to nɛ Israɛlebi na e nite kasawule wɔlso so m bɔla kumo to n choŋ. ¹⁷Meeŋ naŋ shin nɛ Ijiptebi na be ŋgbene e ki kpakpa nɛ b yuu teku na to m bɛ bumo so, saŋɛ na so nɛ n nya kemaŋkura ŋkpal kusɔ nɛ meeŋ wora ewura Fɛɛro nɛ mbe benapo so so. ¹⁸Saŋɛ nɛ n nya kemaŋkura ashi Fɛɛro nɛ mbe benapo so na nɛ Ijiptebi beeŋ pin fanɛ ma e la Enyɛnpe Ebɔrɛ na.” ¹⁹Ade kikɛ be kaman nɛ Ebɔrɛ be malaika mo nɛ e daa wɔ kuwɔlpa to a juŋkpar Israɛlebi na bɛta n ya kaa bɛ bumo be kaman. ²⁰Malaika na daa wɔ Ijipt be benapo na nɛ Israɛlebi na be nferinto nna. Kuwɔlpa na daŋ shin nna nɛ ketentembiri buu Ijipt be benapo na so nseŋ sa Israɛlebi na bre kefulto. Amoso kanyɛ na kikɛ Ijiptebi be benapo na daa maŋ tiŋ n tu Israɛlebi be benapo be katuŋ na. ²¹Le be asheŋ ere kikɛ ka wora n choŋ nɛ Mosis teŋi mbe kekpabi na n shoŋi teku na so. Ndoŋ nna nɛ Enyɛnpe Ebɔrɛ shin nɛ kebɔrɛfito be afu lempo ko chala kanyɛ na kikɛ n shin nɛ teku na ku to anyɔ. ²²Nɛ Israɛl be basa na bɔla kumo be nferinto n nite kasawule wɔlso na so n choŋ, nɛ nchuana na ki fanɛ egbalana ashi bumo be jisa so nɛ bumo be bena so kikɛ. ²³Israɛlebi na ka bɔla teku na to n choŋ na be kaman nɛ ewura Fɛɛro nɛ mbe benapo malɛ ta bumo be egbaŋɛ nɛ egbaŋɛturkoana m buu bumo so m bɔla teku na to. ²⁴Kaboŋ ka ba kaa kpaŋɛ to nɛ Enyɛnpe Ebɔrɛ yili edɛ be kabulpi nɛ kuwɔlpa na to n wu Ijipt be benapo na nseŋ ta kebagato n lɛ bumo so. ²⁵E daŋ shin nna nɛ bumo be egbaŋɛturkoana na be aya gbaŋ n lar n lar nɛ eturko na be kefar ki bumo so kpakpa. Ndoŋ nna nɛ Ijipt be benapo na kaŋɛ abar le: “Men shin nɛ an bɛta nfe, ŋkpal manɛ so Enyɛnpe Ebɔrɛ bee kɔ anyi kena a chɛ Israɛlebi to nna na.” ²⁶Nɛ Enyɛnpe Ebɔrɛ kaŋɛ Mosis le: “Teŋi fo kekpabi n shoŋi teku na nɛ nchu na e bɛta m ba buu Ijipt be benapo na nɛ bumo be egbaŋɛturkoana kikɛ so.” ²⁷Kare ka bee chɛ na nɛ Mosis teŋi mbe kekpabi n shoŋi teku na nɛ k naŋ bɔlɔ fanɛ kananɛ k daa du na. Nɛ Ijipt be benapo na wora ania fanɛ baaŋ shile n lar nchu na to nɛ Enyɛnpe Ebɔrɛ shin nɛ nchu na ji bumo kikɛ. ²⁸Nchu na daŋ bɔlɔ m bɛta kaman nna n ya muni Fɛɛro be benapo nɛ b daŋ ta egbaŋɛturkoana nɛ mbe egbaŋɛdiipoana m bɔla kasawule wɔlso so ashi teku na be nferinto n ju a buu Israɛlebi na so nɛ bumo kikɛ nyam mur. ²⁹Ama Israɛlebi na bre daŋ nite kasawule wɔlso so nna m bɔla teku nɛ k ki fanɛ egbalana a wɔ bumo be jisa so nɛ bena so n dii pɔɛŋ nɛ nchu na ji Ijipt be benapo na. ³⁰Kumo be kamɔnchɛ nɛ Enyɛnpe Ebɔrɛ mɔlga Israɛlebi na ashi Ijiptebi na be enɔ to nɛ b wu Ijiptebi na ka wu a deŋ a deŋ teku na be ekarso. ³¹Israɛlebi na ka wu eleŋgboŋ nɛ Enyɛnpe Ebɔrɛ ŋini ŋ kɔ m pɔɔ Ijiptebi na so na nɛ b bunyaŋ Enyɛnpe Ebɔrɛ na nseŋ yirda mo nɛ mbe kayɛrbi Mosis.

Mosis be kashɛ be asheŋ

¹Ade kikɛ be kaman nɛ Mosis nɛ Israɛlebi na kikɛ boŋ le be kashɛ ere n sa Enyɛnpe Ebɔrɛ a kaŋɛ: “Meeŋ boŋ kashɛ n sa Enyɛnpe Ebɔrɛ na, ŋkpal manɛ so e kɔ m pɔɔ so kemaŋkuragboŋ so. Mo e shin nɛ egbaŋɛ nɛ bumo be bediipoana mur ashi teku to na. ²Enyɛnpe Ebɔrɛ na e la ma elempo nɛ ma emɔlgapo. Meeŋ boŋ kashɛ ŋ dele mo. Mo e la ma Ebɔrɛ, amoso meeŋ di mo epaŋ. N tuto be Ebɔrɛ e la mo, amoso meeŋ fur mo. ³Mbe ketre e la Enyɛnpe Ebɔrɛ na. Mo e la enakɔpo na. ⁴Mo e shin nɛ Fɛɛro be egbaŋɛturkoana nɛ mbe benapo kikɛ mur ashi teku to na. E shin nɛ Fɛɛro be benapo be benimu nɛ e yirda ga na kikɛ mur ashi Teku Peper na to. ⁵Teku na ka bee baga to a buu so a ba na nɛ k muni bumo so nɛ b chul n yɔ kumo be kaseto fanɛ kejembu na. ⁶O, Enyɛnpe Ebɔrɛ, fo enɔ jisa so nɛ kumo be eleŋ kɔ kufu ga na nɛ fo ta m buri fo doŋana to cheche. ⁷Fo kemaŋkura nɛ eleŋgboŋ wɔ kumo to na nɛ fo ta m pɔɔ bumo nɛ b kishi fo na so. Fo agbogboŋ nɛ k bee ji fanɛ edɛ be kuwuloŋ na a chɔɔ bumo burburbi fanɛ atuweklaŋ na m mur. ⁸Fo kamuna to be efutegboŋ nawule e shin nɛ nchu nɛ a daŋ ber abar so na kikɛ barga to n niŋi to n yili fanɛ egbal na, nɛ teku na be kechimbi to ki kasawule wɔlso. ⁹Edompo na daŋ ji njɔŋ nna ŋ kaŋɛ: ‘Meeŋ ju m buu bumo so n ya pɛ bumo nseŋ barga bumo be asɔ to n ta amo nɛ mee sha kikɛ. Meeŋ pee ma tokobi m mɔ bumo.’ ¹⁰Ama Enyɛnpe Ebɔrɛ, fo efute nawule e shin nɛ teku na ba buu bumo kikɛ nyam so nɛ b chul n yɔ nchu damta na be kaseto fanɛ epal na. ¹¹O Enyɛnpe Ebɔrɛ, wanɛ e du fanɛ fo ashi ebɔrɛana kikɛ to? Fo kecheembiya bee mɔ kɔnɔ nna nɛ fo kemaŋkura shi. Wanɛ e du fanɛ fo? Wanɛ e naaŋ tiŋ n wora emamachisheŋ nɛ ashuŋgboŋ nɛ a baa du fanɛ feya ere? ¹²Fo e teŋi fo enɔ jisa nɛ kasawule ta fo doŋana kikɛ m min na. ¹³Feeŋ bɔla fo kasha nɛ k maa chɛrga na so n juŋkpar basa mo nɛ fo sɔ n yige na, nsaa ta fo eleŋ na a juŋkpar ŋ ŋini bumo ekpa nɛ b ya fo kakpa cheembi nɛ fo wɔ na. ¹⁴Efuli pɔtɛana so ebi gba kaŋ nu kesheŋ ere, kufu beeŋ pɛ bumo nɛ Filistiebi gba e fara a chicha kufuso ga. ¹⁵Kufu beeŋ pɛ Edɔm be bewuraana nɛ Mowab be bejuŋkparpoana ga ŋkpal loŋ so. Keenan be basa kikɛ beeŋ pɔ aba, ¹⁶nɛ kufu nɛ kechichachicha e tɔr bumo so. Ŋkpal eleŋ nɛ k beeŋ lar fo enɔ to na so, baaŋ wora shruum fanɛ kejembu na n ya fo saŋɛ nɛ fo basa nɛ fo lara ashi kenyaya to na choŋ na pɔɛŋ. ¹⁷Fo e naaŋ yɛr fo basa n ya chena fo gbagba be kebee so, kaboŋ nɛ fo, Enyɛnpe lara fanɛ k baa la fo pe nsaa la ebu cheembi nɛ fo gbagba pɔr na. ¹⁸Fo Enyɛnpe Ebɔrɛ e naaŋ baa ji kuwura hale mbaanaayɔ.”

Miriam be kashɛ be asheŋ

¹⁹Israɛlebi na daŋ bɔla teku na to nna n nite kasawule wɔlso so n choŋ. Ama Fɛɛro be egbaŋɛturkoana nɛ egbaŋɛdiipoana na bre ka bɔla teku na to nɛ b choŋ nɛ Enyɛnpe Ebɔrɛ shin nɛ nchu na bɛta m ba mur bumo kikɛ. ²⁰Ndoŋ nna nɛ anebi cheso Miriam, nɛ e la Ɛɛrɔn mo da cheso na, ta mbe chakachaka, nɛ beche nɛ b ka na malɛ ta echakachaka m bɛ mo so nɛ baa laŋ nsaa cha. ²¹Nɛ Miriam bee boŋ kashɛ a wɔtɔ bumo to a kaŋɛ: “Men boŋ kashɛ n sa Enyɛnpe Ebɔrɛ na, ŋkpal mbe kekɔmpɔɔso be eleŋ nɛ kemaŋkura ka shi ga so. Mo e shin nɛ egbaŋɛturko nɛ amo be bediipo mur teku to na.”

Nchu kekra na be asheŋ

²²Ade kikɛ be kaman nɛ Mosis juŋkpar Israɛlebi na ŋ koso teku peper na ase n nite n ya luri Shur be keshishɛrsawule so. B daŋ nite keshishɛrsawule na so nchɛ asa nɛ b maŋ nya nchu nɛ b nuu. ²³B ka ya fo kaboŋ ko nɛ baa tre Mara, b daa maŋ tiŋ nɛ b nuu ndoŋ be nchu na, ŋkpal a ka daa du kekra so, amoso nɛ b daŋ nase ndoŋ Mara nna. ²⁴Nɛ basa na naŋ fara a fubel a kaŋɛ Mosis le: “To, nnɛ nɛ anyeeŋ nya nchu n nuu?” ²⁵Ndoŋ nna nɛ Mosis shu n tre Enyɛnpe Ebɔrɛ nɛ Enyɛnpe Ebɔrɛ na ŋini mo kedibi ko nɛ e ta kumo n lɛ nchu na to, nɛ a kilgi nchu belbelso. Enyɛnpe Ebɔrɛ ka wora bumo ŋ keni na nɛ e sa bumo mbra ²⁶nseŋ ŋini bumo ŋ kaŋɛ le: “Men baŋ bugi asoe nɛnɛ n nu ma, men Nyɛnpe Ebɔrɛ na be ebɔl nseŋ wora kusɔ nɛ k niŋi ashi ma anishito, nseŋ bɛ ma mbraana so bre, menyeeŋ baa kɔ eleŋ. Ma alɛ maaŋ ta alɔ wurbi be aleblawu nɛ n daŋ ta n lɛ ljiptebi so na n lɛ menyi so.” ²⁷Kumo be ŋklade nɛ b ba Elim. Ndoŋ nɛ abuye kudu anyɔ nɛ ŋkubadibi adushunu daa wɔ na, m ba yuu bumo be ewajɛbu nchu na ase.

Manna nɛ mbuibi nɛ baa tre kweels na be asheŋ

¹B ka lar ljipt be kasawule so na be kufɔl nyɔsopo be kachɛ kuduanusopo na nɛ b lar Elim m pɛ kebee nɛ baa tre Sainai na be ekpa m ba fo Sin be keshishɛrsawule na so. ²Ndoŋ nna nɛ Israɛlebi na kikɛ naŋ fara a fubel a malga a gbiti Mosis nɛ Ɛɛrɔn ³a kaŋɛ le: “Enyɛnpe Ebɔrɛ daŋ shin nɛ an wu ashi ljipt be kasawule so gba, k daa bɔ, ŋkpal manɛ so, an ka daa wɔ ndoŋ, an daa nya eblaŋ nɛ ajibi kanaŋkamaso nɛ anyee sha a ji. Ama kumo nɛ men bar anyi keshishɛrsawule ere so m ba ka shin nɛ men ta akoŋ m mɔ anyi kikɛ na.” ⁴Ndoŋ nna nɛ Enyɛnpe Ebɔrɛ kaŋɛ Mosis: “Keni meeŋ shin nɛ ajibi e shi esoso n wurge fanɛ bɔrɛ na n sa menyi nɛ basa na e baa lar n ya kaa muu amo kananɛ baaŋ tiŋ n ji karechɛ kama. Loŋ nɛ meeŋ wora bumo ŋ keni baa bɛ ma keŋini so a? ⁵Ama kachɛ shesopo na bre, b muu nchɛnnyɔ be ajibi n daŋɛ amo m barga amo to ntuŋ anyɔ ŋkpal b ka maaŋ muu amo kachɛ shunusopo na so.” ⁶Ndoŋ nna nɛ Mosis nɛ Ɛɛrɔn kaŋɛ Israɛlebi na kikɛ le: “Ta a ba kaaseso menyeeŋ pin fanɛ Enyɛnpe Ebɔrɛ na gbagba e lara menyi ashi ljipt be kasawule so. ⁷Echefo chipurso menyeeŋ wu Enyɛnpe Ebɔrɛ na be kemaŋkura, ŋkpal manɛ so, e nu menyi be mmalga nɛ menyee malga a gbiti mo na kikɛ. Mo nɛ men daa malga ŋ gbiti na, mannɛ anyi.” ⁸Ade kikɛ be kaman nɛ Mosis naŋ kaŋɛ bumo le: “Enyɛnpe Ebɔrɛ na e la esa mo nɛ e beeŋ baa sa menyi eblaŋ kaaseso nɛ men baa we, nseŋ naa sa menyi ajibi malɛ chipurso kanaŋkamaso nɛ k daga. Ŋkpal manɛ so, Enyɛnpe Ebɔrɛ na nu menyi be nfubel, manɛ e la anyi nɛ menyee malga gbiti anyi? Enyɛnpe Ebɔrɛ nɛ menyee malga a gbiti, mannɛ anyi.” ⁹Kumo be kaman nɛ Mosis kaŋɛ Ɛɛrɔn: “Kaŋɛ Israɛlebi na kikɛ fanɛ b ba Enyɛnpe Ebɔrɛ na be anishito, ŋkpal manɛ so, e nu bumo be nfubel.” ¹⁰Ɛɛrɔn ka bee malga a sa Israɛlebi na nɛ b keni keshishɛrsawule na be kaba so n wu Enyɛnpe be kemaŋkura ka bee nyaŋɛ kuwɔlpa to epul na to. ¹¹Nɛ Enyɛnpe Ebɔrɛ kaŋɛ Mosis: ¹²“N nu nfubel damta ashi Israɛlebi na kutɔ, amoso kaŋɛ bumo le: ‘Ta a ba kaaseso saŋɛ nɛ kaboŋ bee jija to na menyeeŋ we eblaŋ. Kachipurso malɛ nɛ men nya ajibi n ji kananɛ menyee sha nseŋ pin fanɛ ma e la Enyɛnpe, menyi be Ebɔrɛ na.’ ” ¹³Kaase ka fo nɛ mbuibi nɛ baa tre kweels na baŋ ba chase bumo be echenakpa na kikɛ. Kachipurso malɛ nɛ bunyaŋ tɔr ŋ kulti bumo be echenakpa na kikɛ. ¹⁴Bunyaŋ na ka yɔ nɛ asɔ fufulbi patapatabi ko malɛ ba keshishɛrsawule kikɛ nyam so. ¹⁵Israɛlebi na ka wu amo nɛ b bishi abar: “Manɛ nna?” Ŋkpal manɛ so, b daa maŋ nyi kusɔ nɛ k daa la asɔ na. Ndoŋ nna nɛ Mosis kaŋɛ bumo le: “Ajibi nɛ Enyɛnpe Ebɔrɛ sa menyi fanɛ men baa ji nna na. ¹⁶Ama mbra nɛ Enyɛnpe Ebɔrɛ sa e la fanɛ ekama e muu kanaŋkamaso nɛ e beeŋ tiŋ n ji nseŋ muu kurwa kurwa n sa esa kama nɛ e wɔ mbe wajɛbu to.” ¹⁷Ndoŋ nna nɛ Israɛlebi na wora kusɔ nɛ Mosis kaŋɛ bumo na, beko daŋ muu ga ga nna nɛ beko malɛ muu gbrɛgbrɛ. ¹⁸Ama b ka daŋ ber amo, bumo nɛ b daŋ muu ga ga na nɛ bumo nɛ b muu gbrɛgbrɛbi na kikɛ daŋ nya nna ŋ kukwe. ¹⁹Kumo be kaman nɛ Mosis naŋ kaŋɛ bumo: “Ekama e sa maŋ kaŋ shin nɛ amo be ako e yili mo kutɔ ŋklade.” ²⁰Ama bumo be beko daa maŋ wora kasonu n sa Mosis nseŋ ta amo be ako n yili ŋklade. Kare ka chɛ nɛ a bɛ a dufɛ nɛ ashushombi bɔlɔ amo to nɛ Mosis nya agbo n wora Israɛlebi na. ²¹Kare baŋ naŋ chɛ kachipurso esa kama bee muu kananɛ e beeŋ tiŋ n ji nna. Epeŋi baŋ bel na nɛ amo nɛ a ka kasawule so na kikɛ e ŋalga. ²²Kachɛ shesopo na bre ekama daa muu kananɛ e bee muu karechɛ kikɛ be ntuŋnyɔso nna. Kumo be kaman nɛ Israɛlebi na be bejuŋkparpo kikɛ e yɔ Mosis kutɔ n ya kaa kaŋɛ mo amo be asheŋ. ²³Nɛ Mosis kaŋɛ bumo: “Enyɛnpe Ebɔrɛ nase mbra nna fanɛ echefo la mo gbagba be kachɛ cheembi nɛ e lara nɛ k baa la ewushi be kachɛ nna. Amoso, men tɔ amo nɛ menyee sha ketɔ edɛ to n ji nseŋ daŋɛ amo nɛ menyee sha kedaŋɛ n ji malɛ nseŋ ta amo nɛ a ka na n yili echefo.” ²⁴Ndoŋ nna nɛ b ta amo nɛ a ka na n yili ŋklade fanɛ kananɛ Mosis kaŋɛ bumo na. Amo alɛ daa maŋ bure ashushombi ŋko m bɛ a dufɛ. ²⁵Nɛ Mosis kaŋɛ bumo: “Men ji ade kabre, ŋkpal kabre ka la Enyɛnpe Ebɔrɛ be kewushiachɛ so, men maaŋ nya ako m muu kasawule. ²⁶Nchɛnshe she nɛ menyeeŋ baa muu amo, ama kachɛ shunusopo nɛ k la kewushiachɛ na bre men maaŋ nya amo m muu.” ²⁷Amo nɛ amo kikɛ basa na be beko daŋ naŋ yɔ nna nɛ b ya muu amo kachɛ shunusopo na, bumo alɛ maŋ wu amo. ²⁸Ndoŋ nna nɛ Enyɛnpe Ebɔrɛ bishi Mosis: “Manɛ nna nɛ men wɔtɔ a kini kebɛ ma mbraana so? ²⁹Keni! Men nyiŋi fanɛ ma, Enyɛnpe Ebɔrɛ na e sa menyi kewushiachɛ na, amoso nɛ kachɛ shesopo na mee sa menyi be ekama nchɛnnyɔ be ajibi na. Kachɛ shunusopo na, ekama e shir a wɔ mbe laŋ to. Esa kama e sa maŋ lar kowu kikɛ.” ³⁰Amoso basa na daa wushi kachɛ shunusopo na nna. ³¹Israɛl be basa daa tre loŋ be ajibi na ‘manna’ nna. Amo alɛ daa du wurwurbi n fuli fanɛ ateebi nsaa du belbel fanɛ mushoŋ nna. ³²Ndoŋ nna nɛ Mosis kaŋɛ bumo le: “To, kusɔ nɛ Enyɛnpe Ebɔrɛ ta n sa anyi a yɔ ajibi na be kaplɛa so nde. E yɛ: ‘Men ta manna na fanɛ kurwa n yili menyi be kaman to ebi, saŋɛ na so baaŋ ba wu ajibi nɛ ma, Enyɛnpe Ebɔrɛ na daa sa menyi keshishɛrsawule so, saŋɛ nɛ n lara menyi ashi ljipt be kasawule so na.’ ” ³³Kumo be kaman nɛ Mosis kaŋɛ Ɛɛrɔn le: “Jɔ manna na be kurwa be bɔlɔ n wɔtɔ kɔlba to n yili kakpa nɛ menyee bunyaŋ Enyɛnpe Ebɔrɛ na nɛ a baa yil anyi be kaman to ebi kikɛ.” ³⁴Enyɛnpe Ebɔrɛ ka baŋ kaŋɛ Mosis na, nɛ e shin nɛ Ɛɛrɔn ta amo n yili kɔnɔkoŋwule be ŋkre be deka na be anishito, nɛ a baa yil ndoŋ. ³⁵Israɛlebi na daŋ ji manna na nfɛ adena nna. B ji amo hale n ya fo Keenan be kasawule so nseŋ chena ndoŋ. ³⁶Bumo be kusɔ karga asɔ nɛ b daa tre omɛr na daa sa fanɛ kurwa nna.

Nchu nɛ a shi kefalta to na be asheŋ

(Nɔmbɛs 20:1-13)

¹Israɛlebi na kikɛ daŋ naŋ koso Sin be keshishɛrsawule na so nna a na a bɛ kananɛ Enyɛnpe Ebɔrɛ daŋ ŋini bumo na so n ya yuu bumo be ewajɛbu ashi Refidim. Ndoŋ malɛ daa maŋ kɔ nchu nɛ b nuu. ²Ndoŋ nna nɛ baa fubel a kaŋɛ Mosis le: “Sa anyi nchu nɛ an nuu.” Ndoŋ nna nɛ Mosis bishi bumo: “Manɛ nna nɛ menyee fubel loŋ? Manɛ nna nɛ menyee wora Enyɛnpe Ebɔrɛ na a keni?” ³Ama ŋkpal achukoŋ ka daa kɔ basa na ga so b baa bile asheŋ nna nsaa malga a gbiti Mosis a bishi mo: “Manɛ nna bre nɛ fo lara anyi ashi Ijipt m ba kaa shin nɛ fo ta achukoŋ m mɔ anyi nɛ an be mbia nɛ asɔbɔya kikɛ ere?” ⁴Asheŋ na ka daŋ ki loŋ na nɛ Mosis shu n tre Enyɛnpe Ebɔrɛ m bishi mo: “Nuso nɛ meeŋ wora basa ere? A ka gbrɛbi nɛ b kpa ma ajembu m mɔ nna na.” ⁵Ndoŋ nna nɛ Enyɛnpe Ebɔrɛ kaŋɛ Mosis le: “Ta fo kekpabi nɛ fo daŋ ta ŋ ŋmɛa Nail be lɔr na so na nseŋ keta Israɛlebi be benimu na be beko n ti fo kumu so n choŋ basa na so n yɔ anishito. ⁶Meeŋ ya kaa yil Sainai be kebee na be kefalta na ase nɛ fo ta kekpabi na ŋ ŋmɛa kefalta na nɛ nchu e lar kumo to nɛ basa na e nuu.” Ndoŋ nna nɛ Mosis wora loŋ ashi Israɛlebi be benimu na be anishito. ⁷Nɛ Mosis nase kaboŋ na be ketre Masa nɛ Meriba, ŋkpal Israɛlebi na ka daŋ malga ŋ gbiti Enyɛnpe Ebɔrɛ nseŋ wora mo ŋ keni saŋɛ nɛ b bishi fanɛ Enyɛnpe Ebɔrɛ na wɔ anyi kutɔ nna ere ŋko e maŋ wɔtɔ na so so.

Israɛlebi nɛ Amalɛkebi ka kɔ kena be asheŋ

⁸Israɛlebi na ka wɔ Refidim na nɛ Amalɛkebi na ba nɛ b ba kɔ bumo kena. ⁹Ndoŋ nna nɛ Mosis kaŋɛ Joshuwa le: “Lara anyi be benyɛn ko nɛ men ya kɔ Amalɛkebi na kena. Echefo ma alɛ beeŋ baa yil kebee ere be esoso a kɔ kekpabi nɛ Ebɔrɛ ta n sa ma na to.” ¹⁰Nɛ Joshuwa wora kananɛ Mosis kaŋɛ mo na nseŋ keta benyɛn na n ya kaa kɔ Amalɛkebi na kena. Nɛ Mosis nɛ Ɛɛrɔn nɛ Hur malɛ dii n yɔ kebee na be esoso n ya yili. ¹¹Saŋkama nɛ Mosis baŋ maŋ mbe enɔana so, Israɛlebi na bee kɔ nna a pɔɔ so, ama saŋkama nɛ e baŋ bar mbe enɔana kaseto Amalɛkebi na e naa kɔ a pɔɔ so. ¹²Ŋkpal loŋ so Mosis be enɔana kikɛ daŋ gben nna nɛ Ɛɛrɔn nɛ Hur ta kejembu m bar mo nɛ e chena so nɛ b pɛ mbe enɔana to m maŋ amo so awɔlto. Eko daa yil mbe jisa so nɛ eko malɛ yil mbe bena so. B daŋ baa kɔ mbe enɔana na to nna kpakpa hale nɛ epeŋi ya tɔr. ¹³Ŋkpal loŋ so, Joshuwa daŋ kɔ m pɔɔ Amalɛkebi na so nna. ¹⁴Kumo be kaman nɛ Enyɛnpe Ebɔrɛ kaŋɛ Mosis le: “Sibɛ kekɔmpɔɔso ere be asheŋ kikɛ n nase kawɔl to, saŋɛ na so k beeŋ baa la kanyiŋi nɛ fo kraŋ kumo ŋ ŋini Joshuwa. Ŋkpal manɛ so meeŋ mur Amalɛkebi nɛ b ka na kikɛ cheche ashi kasawule so nɛ esa kikɛ maaŋ naŋ nu bumo be asheŋ.” ¹⁵Ade kikɛ be kaman nɛ Mosis pɔr bɔrɛsure nseŋ nase kumo: ‘Enyɛnpe Ebɔrɛ na e la ma Kekɔmpɔɔso be tuuta.’ ¹⁶E yɛ: “Ŋkpal ma tama ka daa yil Enyɛnpe Ebɔrɛ na so so nɛ n nase kumo le be ketre na. Enyɛnpe Ebɔrɛ na malɛ beeŋ yili kenana ko ŋ kɔ Amalɛkebi ere kena n ya fo kenana ko.”

Jetro ka yɔ Mosis kutɔ be asheŋ

¹Ade kikɛ be kaman nɛ Mosis mo shanyɛn Jetro nɛ e daa la Midian be bɔrɛmatapo na daŋ nu asɔ nɛ Ebɔrɛ wora n sa Mosis nɛ Israɛlebi na nɛ kananɛ Enyɛnpe Ebɔrɛ lara mbe basa Israɛlebi na ashi Ijipt be asheŋ. ²Jemanɛ ko nɛ Mosis daŋ shin nɛ mbe eche Zipora nɛ mbe mbinyɛnsobi anyɔ ya chena Jetro kutɔ nchɛnnyɔ. ³Mbe mbinyɛnso na be eko be ketre e daa la Gɛshɔn, ŋkpal manɛ so, Mosis yɛ: “N nase mo loŋ nna ŋkpal ŋ ka la efɔ ashi kasawule pɔtɛ so so.” Emo nɛ e ka na malɛ be ketre e daa la Eliaza, ⁴ŋkpal manɛ so, Mosis yɛ: “N tuto be Ebɔrɛ e la ma Echɛtopo nɛ e mɔlga ma ashi Fɛɛro be enɔ to.” ⁵Jetro daŋ keta Mosis be eche nɛ mbe mbinyɛnsobi anyɔ na nna nɛ b yɔ Mosis kutɔ keshishɛrsawule na so, kakpa nɛ Mosis daŋ yuu mbe ewajɛbu m mata Ebɔrɛ be kebeegboŋ nɛ baa tre Sainai na. ⁶Ama pɔɛŋ nɛ Jetro yɛr mbia na le nɛ e daŋ kela ŋ kaŋɛ Mosis, “Fo shanyɛn kɔ fo eche nɛ mbia a ba.” ⁷Ndoŋ nna nɛ Mosis lar n ya shɛr mo shanyɛn Jetro to nseŋ jɔŋɛ mo ase bunyanso. B ka chɔrɔ abar n loge nɛ b keta abar n luri Mosis be wajɛbu to. ⁸Nɛ Mosis kaŋɛ mo shanyɛn asheŋ nɛ Enyɛnpe Ebɔrɛ wora Fɛɛro nɛ Ijipt be basa kikɛ ŋkpal Israɛlebi be kenya kumɔlga so. Kumo be kaman nɛ e naŋ kaŋɛ mo etɔrɔ nɛ a tu bumo ashi ekpa to na kikɛ nɛ kananɛ Enyɛnpe Ebɔrɛ chɛ bumo to ashi amo kikɛ to. ⁹Jetro ka nu asɔ lela damta nɛ Enyɛnpe Ebɔrɛ wora n sa Israɛlebi saŋɛ nɛ e daŋ sɔ bumo ashi Ijiptebi na be enɔ to na be asheŋ ere nɛ mbe kagbene fuli mo ga. ¹⁰Nɛ Jetro kaŋɛ le: “Kemaŋkura e baa la Enyɛnpe Ebɔrɛ mo nɛ e mɔlga fo nɛ basa na kikɛ ashi Ijipt be ewura Fɛɛro nɛ mbe basa Ijiptebi na be kenyaya to na peya. ¹¹Ijiptebi na fɛl menyi Israɛlebi n chɛr. Naniere nɛ m pin fanɛ Enyɛnpe Ebɔrɛ kɔ eleŋ a chɔ agbirana kikɛ, ŋkpal kusɔ nɛ e wora basa na so.” ¹²Ndoŋ nna nɛ Jetro lara sarga chɔɔso nɛ esarga pɔtɛana ko n sa Ebɔrɛ. Ɛɛrɔn nɛ Israɛlebi be bejuŋkparpo na kikɛ daŋ ya tu Mosis mo shanyɛn Jetro nna n ji kejigboŋ Ebɔrɛ be anishito.

Demujipoana be kelara be asheŋ

(Ditɛronɔmi 1:9-18)

¹³Kumo be ŋklade nɛ Mosis nawule chena a ji basa na kikɛ demu nɛ basa na yil mo so kachipurso loŋ hale n ya fo kaaseso. ¹⁴Jetro ka wu kusɔ nɛ Mosis bee wora na nɛ kananɛ basa na shi mo so na nɛ e bishi mo le: “Manɛ nɛ fo wɔtɔ a wora basa na loŋ? Manɛ nna nɛ fo nawule baŋ chena a ji basa na demu nɛ b yil a yil ŋ kulti fo kachipurso kikɛ m ba fo kaaseso ere?” ¹⁵Nɛ Mosis kaŋɛ mo le: “Basa na bee kaa ba ma kutɔ nna m ba kaa bishi kananɛ baaŋ wora Ebɔrɛ be aparsheŋ. ¹⁶Nɛ fanɛ bumo be benyɔ malɛ baŋ wora n da abar so baa ba ma kutɔ nna nɛ n yili Ebɔrɛ be mmalga naseso nɛ mbe mbraana so n ji bumo demu m pin emo nɛ e kɔ kashenteŋ.” ¹⁷Ndoŋ nna nɛ Jetro kaŋɛ Mosis le: “Kusɔ nɛ fee wora ere maŋ walɛ. ¹⁸K beeŋ tɔrɔ fo nɛ basa nɛ b wɔ fo kutɔ ere kikɛ nɛ fo gben ga, ŋkpal manɛ so, kushuŋ na shi ga n sa fo. Fo nawule maaŋ tiŋ n wora kumo. ¹⁹To, naniere nu ma kamalga ere. Fo nu kumo, Ebɔrɛ beeŋ chɛ fo to nɛ fo baa yili basa na kikɛ be katelamu to a ta bumo be edemu a ba Ebɔrɛ be anishito. ²⁰Baa ŋini bumo Ebɔrɛ be mmalga nasesoana na nɛ mbe mbraana na nseŋ shin nɛ b pin kebaawɔtɔ nɛ Ebɔrɛ bee sha fanɛ b baa kɔ. ²¹Ama a daga fanɛ fo lara benyɛn nɛ b kɔ kabɔrɛŋana nsaa la basa nɛ esa beeŋ tiŋ n yirda nɛ baaŋ tiŋ n shuŋ fo kushuŋ ere ashi basa na to. Shin nɛ b ki bejuŋkparpo a keni basa kagboŋ kagboŋ so nɛ basa kalfa kalfa so nɛ basa adununu so nɛ basa kudu kudu so. ²²Shin nɛ loŋ be bejuŋkparpo na e baa ji basa na be edemu a sa bumo saŋkikɛ. Ama baaŋ tiŋ n ta demugboŋ bre m ba fo kutɔ. Saŋɛ na so, baaŋ chɛ fo to n sulɔ esulɔ na be ako nɛ asheŋ e ki pɔtɔ pɔtɔ n sa fo. ²³Kananɛ Ebɔrɛ bee sha fanɛ asheŋ e baa du nna na. Saŋɛ na so fo maaŋ naa gben ga nɛ basa ere malɛ e baa ta ŋgbenefuli a yɔ epe.” ²⁴Ndoŋ nna nɛ Mosis shuli m bɛ mo shanyɛn Jetro be kamalga na so nseŋ wora asɔ nɛ e kaŋɛ mo na kikɛ. ²⁵Kumo be kaman nɛ Mosis lara benyɛn nɛ baaŋ tiŋ n shuŋ kushuŋ na ashi Israɛlebi na kikɛ to nseŋ shin nɛ b ki basa kagboŋ kagboŋ nɛ basa kalfa kalfa nɛ basa adununu nɛ basa kudu kudu be bekenipoana. ²⁶Ndoŋ nna nɛ loŋ be basa na fara a ji Israɛlebi na be edemu saŋkikɛ. Ama demu kama nɛ k daa la demugboŋ bre, b daa ta kumo nna a yɔ Mosis kutɔ, amo nɛ a daa maŋ la demugboŋ na bre, bumo gbagba e daa ji amo. ²⁷Ade kikɛ be kaman nɛ Mosis shuŋi mo shanyɛn Jetro ekpa nɛ e bɛta n yɔ mbe efuli so.

Israɛlebi na ka fo Sainai be kebee so be asheŋ

¹Ndoŋ nna nɛ Israɛlebi na lar Refidim. B ka daŋ lar Ijipt be kasawule so na be afɔl anyɔ nɛ b fo Sainai be keshishɛrsawule na so ²nseŋ yuu bumo be ewajɛbu ndoŋ ashi Sainai be kebee na be kaseto. ³Kumo be kaman nɛ Mosis dii kebeegboŋ na so n yɔ nɛ e ya tu Ebɔrɛ. Ndoŋ nna nɛ Enyɛnpe Ebɔrɛ tre mo ashi kebee na so ŋ kaŋɛ mo: “Kaŋɛ Israɛlebi nɛ b la Jeekɔb be kaman to ebi na le: ⁴‘Men wu kusɔ nɛ n daŋ wora Ijiptebi na nɛ kananɛ n daŋ ta menyi fanɛ kusore ka ta mo pibi a firgi na, m bar menyi ma kutɔ nfe. ⁵Amoso naniere nɛ men baŋ wora kasonu cheche n sa ma nseŋ bɛ ma kɔnɔkoŋwule be ŋkre na so bre, menyeeŋ baa kraa la ma basa gbagba nɛ mee sha ga ashi basa kikɛ to na. Kasawule ere kikɛ la meya nna. ⁶Menyi alɛ beeŋ baa la kanaŋ cheembi to ebi nɛ bɔrɛmatapoana nɛ b shi kuwurji be kanaŋ cheembi to.’ Kusɔ nɛ mee sha fanɛ fo kaŋɛ Israɛlebi nna na.” ⁷Ndoŋ nna nɛ Mosis naŋ bɛta n tre basa na be bejuŋkparpoana na, nseŋ ta mmalga nɛ Enyɛnpe Ebɔrɛ kaŋɛ mo fanɛ e malga na kikɛ n sa bumo. ⁸Nɛ basa na kikɛ chɛ abar n shuli so ŋ kaŋɛ: “Anyeeŋ wora asheŋ nɛ Ebɔrɛ kaŋɛ na kikɛ.” Kumo be kaman nɛ Mosis ya kaŋɛ Enyɛnpe Ebɔrɛ kusɔ nɛ basa na malɛ kaŋɛ na. ⁹Nɛ Enyɛnpe Ebɔrɛ kaŋɛ Mosis: “Keni, meeŋ bɔla kuwɔlpagboŋ ko to a malga fo kutɔ, saŋɛ na so basa na beeŋ nu ŋ ka bee malga fo kutɔ nsaa yirda fo saŋkama.” Ndoŋ nna nɛ Mosis naŋ kaŋɛ Enyɛnpe Ebɔrɛ asheŋ nɛ bejuŋkparpoana na malɛ malga kikɛ. ¹⁰Nɛ Enyɛnpe Ebɔrɛ kaŋɛ Mosis: “Bɛta n yɔ basa na kutɔ n ya kaŋɛ bumo nɛ b ta kabre nɛ echefo n lara alubi ashi bumo be ŋgbene to nseŋ ki cheembi. K daga fanɛ b fɔr bumo be asɔbuuso gba ¹¹nseŋ wora shiriya a jo ma eklade. Kumo be kachɛ ma, Enyɛnpe Ebɔrɛ na beeŋ gbelge m ba Sainai be kebeegboŋ na so ashi basa na kikɛ be anishito. ¹²Chaŋ egbaŋ ŋ kulti kebee na nɛ basa na e yili ŋ kulti egbaŋ na nɛ fo kaŋɛ bumo le: ‘Men baa da so fanɛ men maaŋ temba egbaŋ ere n dii kebee ere so. Men sa maŋ kaŋ beta kumo gba. Esa kama nɛ e baŋ chɛ keya kebee na so, baaŋ mɔ mo. ¹³Esa kikɛ nɛ e kaŋ ta keshilbi gba m beta kumo, ajembu nɛ baaŋ kpa mo ŋko n to mo ata m mɔ. Nɛ dimɛdi ŋko kusɔbɔya e dii kumo so, e beeŋ paŋ mbe ŋkpa.’ Pɔɛŋ nɛ b dii m ba kebee na be awɔlto ama b baŋ nu kabel ka shu awɔrso nna.” ¹⁴Ndoŋ nna nɛ Mosis gbelge m ba basa na kutɔ ashi kebeegboŋ na be kaseto m ba shin nɛ b lara alubi ashi bumo be ŋgbene to ŋ ki cheembi nseŋ fɔr bumo be asɔbuuso. ¹⁵Kumo be kaman nɛ Mosis kaŋɛ bumo: “Men wora shiriya a jo eklade. Men sa maŋ kaŋ di keche nɛ kenyɛn hale n ya fo kumo be kachɛ na.” ¹⁶Kumo be kachɛ na be kachipurdidi nɛ bɔrɛ nyɛkpɛ nseŋ ponte nɛ kuwɔlpagboŋ ko ba kebeegboŋ na be awɔlto nɛ kabel ponte awɔrso nɛ basa mo nɛ b daa wɔ kaboŋ na chicha kufuso. ¹⁷Kumo be kaman nɛ Mosis lara basa na kikɛ ashi keeyi nɛ b daa wɔ na to n juŋkpar bumo a yɔ nɛ b ya tu Ebɔrɛ. Nɛ basa na ba yili kebeegboŋ na be kaseto. ¹⁸Kumo be kachɛ na, Sainai be kebeegboŋ na so kikɛ daŋ baa la edishi nna, ŋkpal manɛ so, Enyɛnpe Ebɔrɛ daŋ bɔla edɛ to nna m ba kumo so. Nɛ kumo be edishi na daŋ yɔ awɔlto fanɛ edishi nɛ a shi edɛ nɛ baa chɔɔ nɛ a shi ga na nɛ kebeegboŋ na kikɛ gbuŋgbuŋ to eleŋso. ¹⁹Saŋɛ nɛ kabel na kraŋ baa ponte to awɔrso na nɛ Mosis malga Ebɔrɛ kutɔ nɛ Ebɔrɛ bɔla bɔrɛ be keponte na to m malga Mosis kutɔ. ²⁰Kumo be kaman nɛ Enyɛnpe Ebɔrɛ na gbelge m ba Sainai be kebeegboŋ na be awɔlto nɛ Mosis dii n ya tu mo ndoŋ. ²¹Nɛ Enyɛnpe Ebɔrɛ kaŋɛ mo le: “Yɔ n ya kpele basa na kusoe fanɛ b sa maŋ kaŋ temba egbaŋ na a fin kewu ma kenishiso. B kaŋ baŋ wora loŋ, bumo be bedamta beeŋ wu. ²²Hale bɔrɛmatapoana nɛ baaŋ tiŋ n taga Ebɔrɛ to ashi kebee na ase na gba daga fanɛ b lar bumo be alubi to a du cheembi. Nɛ mannɛ aloŋ, ma, Enyɛnpe Ebɔrɛ na beeŋ gberge bumo kusoe.” ²³Ndoŋ nna nɛ Mosis kaŋɛ Enyɛnpe Ebɔrɛ le: “Basa na maaŋ tiŋ n dii kebee na so, ŋkpal manɛ so, fo gbagba teŋ kaŋɛ anyi kenishipereso fanɛ an chaŋ egbaŋ ŋ kulti kumo nɛ k baa la kaboŋ cheembi.” ²⁴Nɛ Enyɛnpe Ebɔrɛ kaŋɛ Mosis: “Gbelge n yɔ kaseto nɛ fo nɛ Ɛɛrɔn kikɛ e ya bɛta m ba. Ama bɔrɛmatapoana na nɛ basa na bre be ekama e sa maŋ kaŋ temba egbaŋ na ashi kebeegboŋ na be kaseto n dii m ba ma kutɔ. Nɛ b wora loŋ, meeŋ gberge bumo kusoe.” ²⁵Ndoŋ nna nɛ Mosis gbelge to n yɔ kaseto n ya kaŋɛ basa na asheŋ nɛ Enyɛnpe Ebɔrɛ kaŋɛ na kikɛ.

Mbra kudu na be asheŋ

(Ditɛronɔmi 5:1-21)

¹Ade kikɛ be kaman nɛ Ebɔrɛ malga le be mmalga ere kikɛ ŋ kaŋɛ: ²“Ma e la Enyɛnpe Ebɔrɛ, men be Ebɔrɛ mo nɛ e lara menyi ashi Ijipt be kasawule so, kakpa nɛ men daa wɔ kenyaya to na. ³Men sa maŋ kaŋ bunyaŋ kegbir n naŋ ti ma so. ⁴Men sa maŋ kaŋ lɔŋɛ kusɔ kama nɛ k wɔ ebɔrɛso ŋko kasawule so ŋko nchu to ashi kasawule be kaseto be kaduli ⁵nsaa jɔŋɛ amo ase ŋko a shuŋ amo, ŋkpal manɛ so, ma e la Enyɛnpe Ebɔrɛ men be Ebɔrɛ na. Ma alɛ maa sha kechamana. Ma e naa kpal betuto nɛ benio be alubi so e gberge bumo be mbia kusoe hale n ya fo bumo be kenanafofo nɛ kenana gbiramuli na. ⁶Ama mee ŋini basa nɛ baa sha ma nsaa bɛ ma mmalga nasesoana so na ma kasha nɛ k maa chɛrga na nna. ⁷Men sa maa ta Enyɛnpe Ebɔrɛ be ketre a wora asheŋ lubi. Men sa maa bɔ Enyɛnpe Ebɔrɛ be ketre na chilchil, ŋkpal manɛ so, Enyɛnpe Ebɔrɛ maaŋ yige m paŋ esa kama nɛ e kɔ mbe ketre a wora a wora asheŋ lubi kikɛ. ⁸Men baa ta kewushiachɛ na fanɛ ma, Enyɛnpe Ebɔrɛ be kachɛ nɛ k du cheembi. ⁹Nchɛnshe e daga men ka ta n shuŋ men be ashuŋ kikɛ. ¹⁰Kachɛ shunusopo na bre la ewushi be kachɛ nna n sa Enyɛnpe Ebɔrɛ men be Ebɔrɛ na. Kumo be kachɛ na bre menyi nɛ men be bibinyɛn nɛ bibiche nɛ anya nyɛnso nɛ becheso nɛ asɔbɔya dɔso nɛ befɔ nɛ b wɔ men be nde to kikɛ, maŋ daga fanɛ b shuŋ kushuŋ kikɛ. ¹¹Ŋkpal manɛ so, nchɛ ashe nɛ ma, Enyɛnpe Ebɔrɛ na ta n to esoso nɛ kasawule nɛ teku nɛ asɔ nɛ a wɔ amo to kikɛ nseŋ wushi kachɛ shunusopo na, amoso ma, Enyɛnpe Ebɔrɛ na nɛfa kewushiachɛ na nna nseŋ ta kumo ŋ ki kachɛ cheembi. ¹²Men baa bunyaŋ men nioana nɛ men tutoana, saŋɛ na so men be ŋkpa beeŋ teŋi so ashi kasawule nɛ mee ta a sa menyi na so. ¹³Men sa maŋ kaŋ mɔ. ¹⁴Men sa maa ji kesakalea ŋko a di men braana be beche ŋko bumo kulana. ¹⁵Men sa maa yuri. ¹⁶Men sa maa ji efɛ be shɛda a gbiti men braana. ¹⁷Men sa maa yɛlga men baraana be nwu ŋko bumo be beche ŋko bumo be anya ŋko bumo be ana ŋko ekurma ŋko kusɔ kama nɛ k la men braana peya.”

Kufu ka daŋ pɛ basa na be asheŋ

(Ditɛronɔmi 5:22-33)

¹⁸Basa na ka daŋ wu bɔrɛ ka nyɛkpɛ m ponte nɛ kabel ponte awɔrso nɛ b wu edishi ka sɔ kebeegboŋ na kikɛ so na nɛ kufu pɛ bumo nɛ b chicha kufuso nseŋ bɛta n yɔ kufɔ n ya yili. ¹⁹Kumo be kaman nɛ b kaŋɛ Mosis le: “Nɛ fo ere gbagba malga anyi kutɔ, anyeeŋ nu, ama Ebɔrɛ bre malga anyi kutɔ, anyeeŋ wu.” ²⁰Ndoŋ nna nɛ Mosis kaŋɛ basa na: “Men sa maa lɔ kufu. Ebɔrɛ ba nna nɛ e ba wora menyi ŋ keni nseŋ shin nɛ men baa wora mo kasonu nsaa maa wora alubi.” ²¹Basa na kikɛ daŋ ya kaa yil kufɔ kufɔ nna nɛ Mosis bre firgi n taga ketentembirigboŋ na to ashi kakpa nɛ Ebɔrɛ daa wɔ na.

Bɔrɛsure be mbraana be asheŋ

²²Ndoŋ nna nɛ Enyɛnpe Ebɔrɛ kaŋɛ Mosis fanɛ e kaŋɛ Israɛlebi na le: “Menyi gbagba wu nseŋ nu kananɛ ma, Enyɛnpe Ebɔrɛ na malga n sa menyi ashi ebɔrɛso nna na. ²³Men sa maŋ kaŋ ta shuwa ŋko gbiti n lɔŋɛ agbir kikɛ a shuŋ amo n ti ma so. ²⁴Ama men baga eshishɛr m pɔr bɔrɛsure n sa ma nsaa lara men be esarga chɔɔso nɛ men be kɔnɔkoŋwule be esarga kumo so. Amo nɛ menyee ta mbolpɔ nɛ mboe nɛ ana a lara na. Kaplɛkama nɛ n ya kaa sha fanɛ men baa bunyaŋ ma ndoŋ, meeŋ ba menyi kutɔ m ba nɛfa menyi ndoŋ. ²⁵Ama nɛ men baŋ ta ajembu nɛ men pɔr bɔrɛsure n sa ma, men sa maŋ kaŋ ta kanase n shɛl amo m pɔr kumo, ŋkpal manɛ so, nɛ men baŋ ta kanase n shɛl amo, kumo ere men maaŋ naŋ tiŋ n lara sarga kumo so n sa ma. ²⁶Kede be kaman, men sa maŋ kaŋ pɔr bɔrɛsure nɛ menyeeŋ baa ta kasakpar a dii so. Ŋkpal manɛ so, men baa dii kasakpar na baaŋ baa wu men be mboŋ gela.”

Anya be mbra be asheŋ

(Ditɛronɔmi 15:12-18)

¹Ndoŋ nna nɛ Ebɔrɛ naŋ kaŋɛ Mosis le: “Naŋ ta le be mbraana ere n sa Israɛlebi na. ²Fo baŋ tɔ kenya nɛ e la Israɛl be esa, nfɛnshe e daga e ka shuŋ fo, ama kafɛ shunusopo bre to, k daga fanɛ fo shin nɛ e nya mbe kumu nsaa maŋ ka shɛŋ. ³Nɛ k la fanɛ kenya na nawule e ba mo nyɛnpe na be enɔ to, k daga fanɛ mo nawule e baa yɔ. Ama nɛ mo nɛ mbe eche e ba bre, kumo ere k daga fanɛ mo nɛ mbe eche na kikɛ e baa yɔ. ⁴Nɛ fanɛ mo nyɛnpe e sa mo eche nɛ mo nɛ eche na kurge mbinyɛnso ŋko mbicheso, kumo ere k daga fanɛ eche na nɛ mbe mbia kikɛ ka ki mo nyɛnpe na peya nɛ mo nawule e nya mbe kumu a yɔ. ⁵Ama nɛ fanɛ kenya na bugi to ŋ kaŋɛ le: ‘Mee sha n nyɛnpe nɛ ma eche nɛ ma mbia ga, amoso m maaŋ sɔ ma kumu’, ⁶kumo ere a daga fanɛ mo nyɛnpe na ka keta mo n yɔ kakpa nɛ baa shuŋ Ebɔrɛ na n ya shin nɛ e yili m mata kukuloŋ ŋko kabuna to nɛ e futi mbe kusoe, a ŋini fanɛ e beeŋ baa la mo nyɛnpe be kenya hale nɛ e ya wu. ⁷Nɛ enyɛn kama baŋ fa mo pibiche fanɛ kenya, mo ere maaŋ tiŋ n nya mbe kumu fanɛ anya nyɛnso na. ⁸Ama nɛ b fa mo n sa enyɛn nɛ e ta mo ŋ ki mbe eche nseŋ naŋ kini mo, kumo ere e naŋ bɛta n fa mo n sa mbe basa, ŋkpal manɛ so esa nɛ e kini mo na maŋ kɔ ekpa nɛ e fa mo n sa esa pɔtɛ kama ŋkpal kananɛ e ŋaba mo na so so. ⁹Nɛ esa tɔ kenyache n sa mo pibinyɛn fanɛ e ta a kil, a daga fanɛ e keni mo so fanɛ mo gbagba pibiche. ¹⁰Enyɛn kama malɛ nɛ e ta eche n ti mbe kenyache so, k daga nna fanɛ e baa kraa sa mbe eche juŋkparso na ajibi nɛ asɔbuuso nɛ keche nɛ kenyɛn be kedi be kasha nɛ k daga mo ashi mbe kakil to. ¹¹Nɛ enyɛn na baa maŋ wora le be asɔ asa ere m bɔlɔ so, kumo ere eche na kɔ ekpa nɛ e lar mbe enɔ to nsaa maŋ ka shɛŋ.

Eleŋ be keŋini be mbra be asheŋ

¹²Esa kama nɛ e ŋmɛa mo barkasa m mɔ, k daga fanɛ b mɔ amodoŋwura gba. ¹³Ama nɛ k ba fanɛ e maŋ kute nna n wora loŋ, kumo ere Ebɔrɛ be kushuŋ nna, amoso e beeŋ tiŋ n shile n yɔ kakpa nɛ meeŋ ŋini menyi na n ya nya mbe kumu. ¹⁴Ama nɛ esa baŋ kute m mɔ mo barkasa bre, hale nɛ e shile n yɔ ma bɔrɛsure na ase gba, k daga fanɛ b mɔ mo. ¹⁵Esa kama malɛ nɛ e ŋmɛa mo tuto ŋko mo nio, k daga fanɛ b mɔ mo. ¹⁶Esa kama nɛ e yuri dimɛdi n fa ŋko n ta mo a kɔ fanɛ kenya, amodoŋwura gba daga luwu. ¹⁷Esa kama malɛ nɛ e sho mo tuto ŋko mo nio kɔnɔ daga luwu. ¹⁸Basa anyɔ malɛ baa bile nɛ eko ŋmɛa mo barkasa kejembu ŋko m bɔ kuluŋguntuŋ ŋ ŋmɛa mo nɛ e maŋ wu, nseŋ nu ebesa a dese ebu to ŋkpal keŋmɛa na so, ¹⁹kachɛ nɛ e baŋ niŋi to n ta kekpabi n lar kowu, k daga fanɛ esa nɛ e ŋmɛa mo na ka ka nchɛ nɛ esa na dese na kikɛ be kukɔ. Kumo be kaman k daga e ka keni elɔpo na so nɛ e nya alenfia. ²⁰Esa kama baŋ ŋmɛa mbe kenyache ŋko kenyanyɛn kekpabi nɛ kenya na wu epul na to, k daga fanɛ b gberge mo nyɛnpe na kusoe. ²¹Ama nɛ kenya na ji kachɛ koŋwule ŋko nchɛnnyɔ pɔɛŋ nseŋ wu bre, kumo ere mo nyɛnpe maŋ daga kasogberge, ŋkpal manɛ so, e paŋ mbe kapetɛ nna na. ²²Nɛ basa anyɔ malɛ bee bile nseŋ nu edampoche ko ebesa nɛ mbe kedampo na gbeŋi, nɛ shɛŋ maŋ naŋ wora mo, k daga esa nɛ e nu mo ebesa na ka ka amansherbi kanaŋkamaso nɛ edampoche na mo kul beeŋ ku n sa mo. Kumo alɛ daga fanɛ k bɛ kananɛ ndoŋ be demujipoana bee yili asheŋ so. ²³Ama kedampo na be kegbeŋi be kaman nɛ k ba fanɛ eche na nu ebesa ga, kumo ere k daga b ka ta ŋkpa nna n tal ŋkpa to. ²⁴Nɛ k ba fanɛ kenishi e bure, b bure kenishi n tal to, nɛ fanɛ kinyi e gbaŋ, b gbaŋ kinyi n tal to, nɛ k la enɔ, b ta enɔ n tal to, nɛ k la keya, b ta keya n tal to, ²⁵nɛ k la kechɔɔ nna, b chɔɔ n tal to, nɛ k la doro nna, b doro n tal to, nɛ k la kemargaso nna, b marga so n tal to. ²⁶Nɛ esa baŋ ŋmɛa mbe kenyache ŋko mbe kenyanyɛn be kenishi m bure, k daga fanɛ e shin nɛ kenya na e baa yɔ nsaa maŋ ka shɛŋ ŋkpal kenishi na so. ²⁷Nɛ k la fanɛ e ŋmɛa mbe kenyache ŋko mbe kenyanyɛn be kinyi nna nɛ k tia, k daga fanɛ e shin nɛ kenya na e baa yɔ nsaa maŋ ka shɛŋ ŋkpal kinyi na so.

Kusɔ nɛ k daga asɔwuraana ka wora be asheŋ

²⁸Esa kama nɛ mbe gbolu pur enyɛn ŋko eche, nɛ e wu, b kpa gbolu na ajembu m mɔ, ama b sa maŋ kaŋ we gbolu na be eblaŋ. Kumo be kaman k maŋ daga fanɛ b naŋ gberge gboluwura na kusoe. ²⁹Ama nɛ k la fanɛ gbolu na chɛr a tɔrɔ basa nna nɛ b kpele mo nawura kusoe nɛ e yige nɛ k ya chute esa m mɔ, kumo ere k daga fanɛ b kpa gbolu na ajembu m mɔ nseŋ mɔ mo nawura na gba. ³⁰Ama nɛ gboluwura na shuli fanɛ e beeŋ ka kukɔ n sɔ mbe ŋkpa n yige, kumo ere k daga e ka kanaŋkamaso nɛ baaŋ ku kukɔ na n sa mo. ³¹Nɛ fanɛ gbolu na pur esa ko pibinyɛn ŋko ebiche nna, loŋ koŋwule na e daga fanɛ b yili kumo. ³²Nɛ gbolu pur esa ko be kenyache ŋko kenyanyɛn m mɔ, k daga fanɛ gboluwura e ka gbiti be ndarbi adesa n sa kenya na wura, kumo be kaman nɛ b kpa gbolu na ajembu m mɔ. ³³Nɛ esa baaŋ bugi kemaŋ so ŋkoŋ kur kumo mo gbagba nsaa maŋ buu kumo so nɛ esa ko be kena ŋko kurma tɔr kumo to, ³⁴k daga fanɛ kemaŋ na wura ka ka kusɔbɔya na be kukɔ nseŋ ta kusɔbɔya wuso na. ³⁵Nɛ fanɛ esa ko be gbolu mɔ mo barkasa be gbolu malɛ nna, k daga fanɛ b fa gbolu keniso na nseŋ barga kumo be amansherbi to n sa abar. ³⁶Ama nɛ fanɛ gbolu na chɛr a pur nna nɛ mo nawura nyi nsaa maŋ chɛ kumo m muni, kumo ere k daga fanɛ e ta gbolu keniso n tal mo barkasa na to nseŋ ta gbolu wuso na.”

Kakɔka be mbra be asheŋ

¹Esa baŋ yuri kena m mɔ ŋko n fa, k daga fanɛ e ka ana anu, nɛ kubolpɔ malɛ nna, a daga e ka mbolpɔ ana n tal to. ^2-4K daga fanɛ esa e ka kusɔ kama nɛ e yuri be kukɔ. Nɛ e maŋ kɔ nɛ e ka malɛ, b fa mo fanɛ kenya ŋ ka kusɔ nɛ e yuri na be kukɔ. Nɛ esa yuri kena ŋko kurma ŋko kubolpɔ nɛ b ya wu kumo amodoŋwura kutɔ nɛ k kraa keni, k daga fanɛ e ka loŋ be asɔbɔya anyɔ n sa kusɔbɔyawura.

Nɛ esa bee kɔ a fin keluri esa be laŋ to n yuri kanyɛso, nɛ b ŋmɛa mo m mɔ, esa nɛ e mɔ mo na maŋ wora kulubi, ama nɛ k la kapaso bre, esa nɛ e mɔ mo na wora kulubi ŋkpal e ka mɔ mo na so. ⁵Nɛ fanɛ esa baŋ yige mbe asɔbɔya nɛ b luri mo barkasa be ndɔ to n ji mbe asɔ, k daga fanɛ asɔbɔyawura na e lara mbe adɔjibi nɛ a walɛ ga na n ya tal mo barkasa na to. ⁶Nɛ esa puga edɛ nɛ a chɔɔ m bɔla afitiriwurbi so n ya luri mo barkasa be ndɔ to n chɔɔ mbe adɔjibi, esa nɛ e puga edɛ na daga fanɛ e ka mo barkasa na be adɔjibi nɛ a chɔɔ na be kukɔ. ⁷Nɛ esa ta amansherbi ŋko asɔ n sa mo barkasa nɛ e yili nɛ eyu ya yuri amo ashi mbe ebu to nɛ b pɛ eyu na nna, k daga fanɛ eyu na e ka loŋ be asɔ be ale anyɔ. ⁸Ama nɛ fanɛ b maŋ pɛ eyu na bre, a daga fanɛ b bar esa nɛ e yili asɔ na Ebɔrɛ be anishito nɛ demujipoana e mige mo to ŋ keni mo e ta amo ŋko mannɛ mo e ta. ⁹Nɛ basa anyɔ bee kɔ a mɔlga kusɔ foeso fanɛ kusɔbɔya ŋko kusɔbuuso, nɛ k ki bumo emɔrɔ, k daga fanɛ b ta demu na n yɔ Ebɔrɛ be anishito demujipoana kutɔ nɛ b mige to. Kumo be kaman nɛ b shin nɛ emo nɛ e bee puni kumo na e ka kusɔ nɛ e bee puni na be ntuŋ anyɔ n sa mo barkasa na. ¹⁰Nɛ esa ta mbe kusɔbɔya n sa mo barkasa fanɛ e baa keni so nɛ kusɔbɔya na wu ŋko n nya doro ŋko n foe nɛ esa kama maŋ wu kumo, ¹¹k daga fanɛ esa nɛ e bee keni kusɔbɔya na so na e yɔ Ebɔrɛ be anishito n ya bɔ ntaŋ fanɛ e maŋ wora kusɔbɔya na shɛŋ. Kede be kaman a daga fanɛ kusɔbɔya na wura e shuli fanɛ k la kashenteŋ nna, nɛ mo barkasa na e sa maŋ ka shɛŋ n sa mo. ¹²Ama nɛ fanɛ b yuri kusɔbɔya na nna ashi esa nɛ e bee keni kumo so kutɔ, k daga fanɛ e ka kumo be kukɔ n tal to. ¹³Nɛ k ba fanɛ kupuŋ to be kusɔbɔya e mɔ kumo n ji, k daga fanɛ esa nɛ e bee keni kusɔbɔya na so ka ta kusɔbɔya jiŋka na m ba ŋini shɛdaso, saŋɛ na so, e maaŋ ka kumo be kukɔ n tal to. ¹⁴Nɛ esa malɛ kule mo barkasa be kusɔbɔya nɛ k ya nya doro ŋko n wu, saŋɛ nɛ kusɔbɔya na wura maŋ wɔtɔ, k daga fanɛ e ka kusɔbɔya na be kukɔ. ¹⁵Ama nɛ fanɛ kusɔbɔya na wu saŋɛ nɛ kumowura wɔtɔ bre, k maŋ daga esa na ka ka kukɔ kikɛ. Nɛ e haya kusɔbɔya na nna bre, kumo ere haya na be kukɔ nɛ e beeŋ ka.

Kachɛ kama be kebaawɔtɔ be mbra be asheŋ

¹⁶Esa kama nɛ e fule kasuŋgurbia nɛ e maŋ nyi enyɛn nɛ b maa chɔlta ŋ kil mo tumba, k daga fanɛ enyɛn na e ka keshaji be kukɔ n sa kasuŋgurbia na nseŋ ta mo ŋ ki mbe eche. ¹⁷Hale nɛ eche na mo tuto kini kasha na gba, k daga fanɛ enyɛn na e ka kasuŋgurbia na be tumba be kukɔ. ¹⁸Eche kikɛ nɛ e kɔ kegba be ŋkilgisheŋ, b mɔ mo. ¹⁹Enyɛn kama nɛ e tu kusɔbɔya n di keche nɛ kenyɛn, k daga fanɛ b mɔ mo. ²⁰Esa kama nɛ e lara sarga n sa kegbir kama m baŋ ma, Enyɛnpe Ebɔrɛ so, b mɔ mo. ²¹Ade kikɛ be kaman, k maŋ daga fanɛ men be ekama e wora efɔ kulubi ŋko m mɛaŋ mo, ŋkpal manɛ so, menyi alɛ gba daa la befɔ nna ashi Ijipt be kasawule so. ²²Men saa maa mɛaŋ bekulpoche ŋko amunibi, ²³nɛ mannɛ aloŋ nɛ b shu n tre ma, Enyɛnpetale na, ma nɛ n nu bumo kushu na kashenteŋto ²⁴nɛ ma agbo e koso nɛ n shin nɛ b ta tokobi m mɔ menyi nɛ menyi alɛ gba be beche e ki bekulpoche nɛ men be mbia e ki amunibi. ²⁵Ma basa to be etirpo baŋ paŋ ekama amansherbi, e sa maŋ wɔtɔ mo nchu. ²⁶Ekama nɛ e sɔ mo barkasa be wajɛ buuso n nase tarma, k daga fanɛ e bɛta kumo n sa mo pɔɛŋ nɛ epeŋi e tɔr, ²⁷ŋkpal manɛ so, kumo nawule e la mbe kusɔbuuso nɛ e bee buu a dese. Nɛ fo maŋ bɛta kumo n sa mo, manɛ nɛ e beeŋ buu n dese? Mannɛ aloŋ, nɛ kumodoŋwura baŋ shu n tre ma, meeŋ nu mbe kushu, ŋkpal ŋ ka la ewɔrwupo so. ²⁸Ekama e sa maŋ kaŋ malga ŋ gbiti Ebɔrɛ ŋko n shoduu menyi to be ejuŋkparpo. ²⁹Men sa maŋ kaŋ kini kesa ma men be adɔjibi nɛ asɔrso be asɔnuuso. Men ta men be ewurkoŋ nyɛnso ³⁰nɛ men be ana nɛ mbolpɔ gba peya m bɔɔ ma enɔ. Asɔbɔya na bre daga fanɛ b baa wɔ bumo nioana kutɔ nchɛnshunu nna, kachɛ burwasopo na nɛ b ta amo m bɔɔ ma enɔ. ³¹Men la ma basa cheembi nna, amoso men sa maa ji eblaŋ nɛ kupuŋ to be asɔbɔya jiŋka. Men baa ta amo a lɛ njɔnɔ.

Kebaaji asheŋ nɛ amo be ekpa so be asheŋ

¹Men sa maa bɔ efɛ be baru, ŋko a ji efɛ be shɛda a chɛ belubiworapo to. ²Men sa maa bɛ jimaŋ so a wora alubi ŋko a ji efɛ be shɛda ashi demujikpa. ³Men sa maa ji a chɛ esa to ŋkpal e ka la etirpo so. ⁴Nɛ fo doŋ be kena ŋko kurma saŋɛ n shile n luri to a yɔ, k daga fanɛ fo kuŋ mo m bɛta m ba sa mo. ⁵Nɛ fo ya tu fo doŋ nɛ mbe kurma tɔr nɛ esulɔ deŋ mo so, k daga fanɛ fo chɛ mo to n niŋi kurma na to, sa maŋ kaŋ baŋ mo so n choŋ. ⁶Men sa maa mɔn betirpo kashenteŋ ashi demujikpa ŋkpal b ka la betirpo so. ⁷Men sa maa ku efɛ a deŋi basa so, ŋko a ji demu a kaŋɛ fanɛ basa nɛ b maŋ wora n jija daga luwu. Esa kama nɛ e wora loŋ maaŋ ji n lar ma anishito kikɛ. ⁸Men sa maa sɔ brɔbu, ŋkpal manɛ so, brɔbu bee tan esa nna nɛ e maa wu kashenteŋ a ji. ⁹Men sa maa mɛaŋ befɔ, ŋkpal manɛ so men nyi kananɛ kebaala efɔ du. Menyi alɛ gba daa la befɔ nna ashi Ijipt be kasawule so.

Kewushiachɛ be mbra be asheŋ

¹⁰“Men dɔ kudɔsawule kama so nfɛnshe ¹¹nseŋ yige kumo nɛ k wushi kafɛ shunusopo na bre to. Menyi alɛ e sa maŋ teŋi kumo so be akɔrbua kafɛ shunusopo na to, saŋɛ na so betirpo nɛ kupuŋ to be asɔbɔya gba beeŋ shishi amo nɛ a ka na n ji. Loŋ koŋwule na e daga fanɛ men wora men be afeelebi sɔrso nɛ ɔlif be ndibi be adɔ gba. ¹²Men ta nchɛ ashe n shuŋ, nseŋ wushi kachɛ shunusopo na, saŋɛ na so men be ana dɔso nɛ ekurma gba beeŋ wushi. Nɛ men be elaŋ to be anya nɛ befɔ gba e wushi. ¹³Men wora kasonu n sa kusɔ kama nɛ ma, Enyɛnpe Ebɔrɛ kaŋɛ menyi ere kikɛ. Menyi alɛ e sa maŋ kaŋ shuŋ kegbir kama ŋko a ti kegbir kama be ketre.”

Nchɛgboŋ asa na be asheŋ

(Ɛksodɔs 34:18-26; Ditɛronɔmi 16:1-17)

¹⁴Kafɛ kikɛ to men baa wora kejigboŋ be yiri yiri asa a bunyaŋ ma. ¹⁵Men baa wora bodobodo nɛ a maŋ kɔ yiisi na be kejigboŋ nchɛ ashunu kananɛ ŋ ŋini menyi na, Abib be kufɔl nɛ men daŋ lar kumo to ashi Ijipt be kasawule so na to. Loŋ be nchɛnshunu na to ekama e sa maŋ kaŋ ji bodobodo nɛ b ta yiisi n wora. Ekama malɛ e sa maŋ kaŋ ta enɔfuloŋ m ba ma anishito, ama e bar kusɔ ko m ba lara sarga n sa ma. ¹⁶Kasɔteŋi be jemanɛ baa fo, men wora Kasɔteŋi be Kejigboŋ. Kafɛ na ya kaa loge be saŋɛ nɛ menyee chala men be adɔjibi abar so na, men wora Kechala Abarso be Kejigboŋ na. ¹⁷Kafɛ kikɛ to, a daga fanɛ menyi to be benyɛn kikɛ ka shɛr Enyɛnpetale Ebɔrɛ na be anishito ale asa. ¹⁸Men sa maŋ shin nɛ asɔbɔya nɛ men ta n lara sarga n sa ma na be ŋklaŋ nɛ kusɔ kama nɛ k kɔ yiisi e wea abar to. Menyi alɛ e sa maŋ shin nɛ kare e chɛ asɔbɔya nɛ men ta n lara sarga n sa ma kejigboŋana na to na be nfɔ so. ¹⁹Kafɛ kikɛ men baa ta men be adɔjibi juŋkparso lelaana a bar ma, Enyɛnpe Ebɔrɛ, ashi kakpa nɛ menyee bunyaŋ ma na. Men sa maŋ kaŋ daŋɛ kaboe fɔlbi kumo nio be kenyipochu to.

Nnɔ naseso be asheŋ

²⁰Ade kikɛ be kaman nɛ Ebɔrɛ kaŋɛ bumo le: “Meeŋ shin nɛ malaika ko e baa juŋkpar menyi ŋ kuŋ menyi ekpa to loŋ n ya fo kaboŋ nɛ n lɔŋɛ n yili menyi na. ²¹Men baa kaŋ kusoe a nu mbe ebɔl nsaa wora mo kasonu. Men sa maŋ kaŋ wora kulubi kikɛ ŋ gbiti mo. Nɛ men baŋ wora kulubi ŋ gbiti mo, e maaŋ yige m paŋ menyi, ŋkpal manɛ so, ma eleŋ wɔ mo so nna. ²²Ama nɛ men baŋ wora mo kasonu kashenteŋto nseŋ wora kusɔ kama nɛ ŋ kaŋɛ menyi na, kumo ere, men doŋana beeŋ ki ma doŋana nɛ n kɔ bekama nɛ baa kɔ menyi. ²³Nɛ ma malaika na e juŋkpar menyi n yɔ Amɔriebi nɛ Hitebi nɛ Pɛrizebi nɛ Keenanebi nɛ Hivebi nɛ Jebusiebi be nsawule so nɛ m mur bumo kikɛ. ²⁴Men sa maŋ kaŋ bunyaŋ bumo be agbir na ŋko n shuŋ amo ŋko m bɛ bumo be edaŋkaresheŋ so. Men jija bumo agbirana na cheche nseŋ bure bumo be agbirjembu na to burburbi. ²⁵Nɛ men baa shuŋ ma, Enyɛnpe Ebɔrɛ, men be Ebɔrɛ na, ma alɛ beeŋ nɛfa men be ajibi nɛ men be nchu nseŋ lara alɔana kikɛ ashi menyi to. ²⁶Eche kikɛ be kedampo maaŋ gboŋi, ekama malɛ maaŋ ki egbentepo ashi men be kasawule so. Ma alɛ beeŋ sa menyi ŋkpa tenteŋ. ²⁷Meeŋ shin nɛ kufu nɛ keyeŋiyeŋi e tɔr basa nɛ menyee tu na so. Meeŋ shin nɛ men doŋana e kilgi n shile menyi. ²⁸Meeŋ shin nɛ edundumbɔfo e juŋkpar n ya ju Hivebi nɛ Keenanebi nɛ Hitebi. ²⁹Ama m maaŋ ju bumo kafɛ koŋwule to, ŋkpal manɛ so, nɛ n wora loŋ, kasawule na beeŋ ki kiyitokpaŋ nɛ asɔbɔya lubi e wora keshi n sɔ kumo be kaplɛkama. ³⁰Amoso, gbrɛgbrɛ nɛ meeŋ baa ju bumo loŋ n ya fo saŋɛ nɛ menyeeŋ wora keshi nseŋ tiŋ n suge kasawule na kikɛ na. ³¹Meeŋ shin nɛ men be ekar e yili teku peper na n ya fo Filistiebi be teku na nseŋ naŋ yili keshishɛrsawule na so n ya fo Yufreetes be lɔr na to. Meeŋ ta nsawule na so ebi m bɔɔ menyi enɔ nɛ men ju bumo ashi to. ³²Men sa maŋ kaŋ shin nɛ menyi nɛ bumo nɛ bumo be agbirana e wora kɔnɔkoŋwule kikɛ. ³³Men sa maŋ kaŋ shin nɛ b chena men be kasawule so, nɛ mannɛ aloŋ, baaŋ shin nɛ men wora kulubi ŋ gbiti ma, ŋkpal manɛ so menyeeŋ baa shuŋ bumo be agbirana na, nɛ k ki fanɛ kejigbelɛ n sa menyi.”

Ebɔrɛ nɛ Israɛlebi be kɔnɔkoŋwule be ŋkre be asheŋ

¹Kachako nɛ Enyɛnpe Ebɔrɛ kaŋɛ Mosis le: “Fo nɛ Ɛɛrɔn nɛ Nadab nɛ Abihu nɛ Israɛlebi be bejuŋkparpo adushunu e ba ma kutɔ ashi kebee ere ase nfe. Ama pɔɛŋ nɛ men fo kumo men feŋ n yili m bunyaŋ ma. ²Fo Mosis nawule e firgi n taga ma, Enyɛnpe Ebɔrɛ na to. Bumo nɛ b ka na bre e sa maŋ kaŋ firgi n taga to, ŋko m bɛ mo so n dii kebee na m ba.” ³Mosis ka shi kebee na so m ba nɛ e ba kaŋɛ basa na mmalga nɛ Enyɛnpe Ebɔrɛ malga kikɛ nɛ mbraana nɛ e nase kikɛ. Nɛ basa na kikɛ kpaŋɛ ŋ kaŋɛ le: “Mmalga nɛ Enyɛnpe Ebɔrɛ malga na kikɛ, anyeeŋ bɛ amo so.” ⁴Ndoŋ nna nɛ Mosis sibɛ Enyɛnpe Ebɔrɛ be mmalga na kikɛ n nase. Kare ka chɛ kachipurdidi nɛ e wule ŋ koso n ya yuu bɔrɛsure ashi kebee na be kaseto nseŋ ta ajembu tenteŋ kuduanyɔ n yuu nɛ a yili n sa Israɛlebi be eyiri kuduanyɔ na. ⁵Kumo be kaman nɛ Mosis lara Israɛl be basa na to be mbrantiɛbia nɛ b ya lara sarga chɔɔso nseŋ ta ana n lara kɔnɔkoŋwuleso be esarga n sa Enyɛnpe Ebɔrɛ na. ⁶Nɛ Mosis ta loŋ be asɔbɔya na be ŋklaŋ be bargato n wɔtɔ ntishaŋ to nseŋ ta bargato nɛ a ka na malɛ ŋ ŋmenyaŋ bɔrɛsure na so. ⁷Kede be kaman nɛ e ta kɔnɔkoŋwule be ŋkre be kawɔl na ŋ kraŋ kumo awɔrso nɛ basa na nu nseŋ kaŋɛ le: “Mmalga nɛ Enyɛnpe Ebɔrɛ na malga na kikɛ, anyeeŋ bɛ amo so nseŋ wora kasonu n sa amo.” ⁸Ndoŋ nna nɛ Mosis ta ŋklaŋ na be amo nɛ a wɔ ntishaŋ to na malɛ ŋ ŋmenyaŋ basa na so nseŋ kaŋɛ le: “Men keni kɔnɔkoŋwule be ŋkre nɛ menyi nɛ Enyɛnpe Ebɔrɛ bɔla mmalga ere kikɛ so n nase na be ŋklaŋ nna na.” ⁹Asheŋ ere kikɛ be kaman nɛ Mosis nɛ Ɛɛrɔn nɛ Nadab nɛ Abihu nɛ Israɛlebi na be bejuŋkparpo adushunu dii kebee na be esoso. ¹⁰Ndoŋ nɛ b wu Israɛl be Ebɔrɛ na, nɛ kaboŋ dɛdɛso nɛ k du fanɛ yawukpakpaso be kejembu nɛ baa tre safiri na nseŋ fulto parr fanɛ awɔlpa na, ka wɔ mbe aya be kaseto. ¹¹Ama Ebɔrɛ daa maŋ teŋi mbe enɔ m bar tɔrɔ Israɛl be bejuŋkparpo na be ekama so. B daŋ wu mo kenishiso nseŋ kraa wɔtɔ a ji a nuu.

Mosis ka dii n yɔ Sainai be kebee na so be asheŋ

¹²Nɛ Ebɔrɛ kaŋɛ Mosis: “Dii m ba kaa jo ma kebee ere be esoso nɛ n sa fo ajembu pantraŋ pantrambi nɛ n sibɛ mbra nɛ ma mmalga n deŋi so nɛ a baa ŋini Israɛlebi kananɛ baaŋ ba wora asheŋ.” ¹³Ndoŋ nna nɛ Mosis nɛ mbe kayɛrbi Joshuwa wora shiriya nɛ Mosis dii n yɔ Ebɔrɛ be kebee na so. ¹⁴Ama le nɛ Mosis daŋ kaŋɛ Israɛlebi be bejuŋkparpo na: “Men baa wɔ keeyi ere to a jo anyi hale nɛ an ya bɛta m ba. Ama Ɛɛrɔn nɛ Hur bre beeŋ baa wɔ menyi kutɔ nfe, amoso nɛ men be ekama nya demu e beeŋ tiŋ n ta kumo n yɔ bumo kutɔ nɛ b keni kumo to n sa mo.” ¹⁵Kede be kaman nɛ Mosis yɔ kebee na so nɛ kuwɔlpa buu kebee na kikɛ so. ¹⁶Nɛ Enyɛnpe Ebɔrɛ be kemaŋkura gbelge m ba Sainai be kebee na so nɛ kuwɔlpa na buu kumo so hale n ya fo nchɛnshe. Kachɛ shunusopo na nɛ Enyɛnpe Ebɔrɛ shi kuwɔlpa na be nferinto n tre Mosis. ¹⁷Israɛlebi na bre kutɔ, Enyɛnpe Ebɔrɛ be kemaŋkura nɛ k daŋ nyaŋɛ n yuu kebee na so daa du fanɛ edɛgboŋ ko ka bee chɔɔ na. ¹⁸Ndoŋ nna nɛ Mosis luri kuwɔlpa na to n yɔ kebee na be esoso n ya ji kebee na so nchɛ adena nɛ nnyɛ adena.

Wajɛbu cheembi na be asheŋ

(Ɛksodɔs 35:4-9)

¹Nɛ Enyɛnpe kaŋɛ Mosis: ²“Kaŋɛ Israɛlebi na fanɛ b bar ma ŋkɛ ashi bumo be kagbene to nɛ fo sɔ amo n sa ma. ³Ŋkɛ nɛ a daga fanɛ fo sɔ bumo kutɔ e la shuwa nɛ gbiti nɛ danyaŋ ⁴nɛ ago lela nɛ afuibi nɛ b nyɔɔ buru ŋko kepeper kpaw nɛ wajɛchɛbi fuful nɛ wajɛ nɛ b ta kaboe be afuibi n lue ⁵nɛ kpakpa be kawɔl nɛ b nyɔɔ kepeper nɛ churu be kawɔl nɛ b gbiti nɛnɛ nɛ kedibi nɛ baa tre akasia na ⁶nɛ ɔlif be ŋku nɛ baaŋ baa ta a wɔtɔ efitila to nɛ efɛa belbelso be asɔ nɛ b kɔ a wɔtɔ ŋku nɛfaso to nɛ asɔ nɛ baa ta a wora duwu nɛ amo be efɛa wɔ ebel na ⁷nɛ yawu kpakpaso be awarabi nyɛkpɛso nɛ baa tre ɔniks na nɛ yawu kpakpaso be ajembu nyɛkpɛso fanɛ amaŋkanibi nɛ baa ta a mata bɔrɛmatapo nimuso be piŋi tenteŋ nɛ baa tre ɛfɔd na so na nɛ ajembu nɛ baa ta a mata demuji be kɔlgu na so. ⁸Ade be kaman nɛ fo shin nɛ basa na e yuu wajɛbu cheembi n sa ma, saŋɛ na so, meeŋ ba kaa wɔ bumo to. ⁹A daga fanɛ men yuu kumo nseŋ lɔŋɛ kumo kananɛ meeŋ ŋini fo na gbagba chap.”

Kɔnɔkoŋwule be ŋkre be deka na be asheŋ

(Ɛksodɔs 37:1-9)

¹⁰Kede be kaman nɛ fo shin nɛ b ta akasiadibi n lɔŋɛ deka, nɛ kumo be nteŋ to e baa la ayadra ana nɛ bargato nɛ kumo be mparto e baa la ayadra anyɔ nɛ kumo be jeŋgreŋ malɛ e baa la ayadra anyɔ. ¹¹Kumo be kaman nɛ b ŋalga shuwa gbagba m mata deka na be epunto nɛ kaman kikɛ nseŋ lɔŋɛ shuwa be kekrande m mata ŋ kulti kumo ¹²nseŋ naŋ bɛl shuwa be mpinibi ana n wɔtɔ kumo be aya ana na to nɛ anyɔ e baa wɔ kaba ko so nɛ anyɔ malɛ e baa wɔ kaba ko so. ¹³B kaŋ wora loŋ n loge na nɛ b shɛl akasiadibi tenteŋ anyɔ nseŋ ŋalga shuwa m mata amo kikɛ so. ¹⁴Kumo be kaman nɛ b ta ndibi nɛ b shɛl na n yishi n wɔtɔ mpinibi nɛ a wɔ deka na be akel to na to a pɛ amo a maŋ kumo so. ¹⁵A daga fanɛ loŋ be ndibi tenteŋ na e baa wɔ mpinibi na to saŋkikɛ. ¹⁶B kaŋ lɔŋɛ deka na n loge nɛ fo ta ajembu pantraŋ pantrambi nɛ ma mbraana deŋi so nɛ meeŋ ta n sa fo ere n wɔtɔ kumo to. ¹⁷Kumo be kaman nɛ b ta shuwa nɛ a maŋ kɔ eyurpi amo to n lɔŋɛ deka na be buuso nɛ kumo be nteŋ to e baa la ayadra ana nɛ kumo be mparto malɛ e baa la ayadra anyɔ. Buuso na be ketre e la ‘kuwɔr be kakpa’. ¹⁸Shin nɛ b ta shuwa m bɛl asɔ anyɔ ko nɛ a du fanɛ emalaika nɛ baa tre chɛrubim na n yuu deka na be buuso na so. ¹⁹B ta chɛrubim na be kuko n yili buuso na be ekarso be kaba ko nseŋ ta kenyɔsopo na malɛ n yili kaba nɛ k ka na. B lɔŋɛ buuso na nɛ chɛrubim na n chɔga abar so nɛ a baa la kukoŋwule, ²⁰nɛ chɛrubim na e parga bumo be atɛ to m buu deka na be buuso na so nseŋ kilgi anishito n shoŋi abar ŋ keni kuwɔr be kakpa. ²¹Ade kikɛ be kaman nɛ b ta ajembu pantraŋ pantrambi anyɔ nɛ ma mbraana deŋi so na n wɔtɔ deka na to nseŋ ta buuso nɛ baa tre kuwɔr be kakpa na m buu so. ²²Ndoŋ nɛ ma nɛ menyi beeŋ baa shɛr nɛ m baa bɔla chɛrubim anyɔ na be nferinto ashi buuso na so a ta ma mbra nɛ ma mmalga a sa fo nɛ fo alɛ e baa ta amo a sa Israɛlebi na.

Sarga be bodobodo be teebɔl be asheŋ

(Ɛksodɔs 37:10-16)

²³“Kumo be kaman nɛ fo shin nɛ b ta akasia be etaabodibi n lɔŋɛ teebɔl nɛ kumo be nteŋ to e baa la ayadra asa nɛ mparto e baa la keyadra koŋwule nɛ bargato, nɛ kumo be jeŋgreŋ malɛ e baa la ayadra anyɔ. ²⁴Men ŋalga shuwa n wurge kumo kikɛ so, ²⁵nseŋ ta shuwa n wora kekrande nɛ kumo be mpar sa fanɛ enɔ be mparto ŋ kulti kumo be ekarso kikɛ. ^26-27Kumo be kaman nɛ men wora shuwa be mpinibi ana n chɔga teebɔl na be abonfu ana be aya na kikɛ so, saŋɛ na so baaŋ baa ta ndibi nɛ b shɛl na a wɔtɔ amo to a maŋ teebɔl na so. ²⁸Men ta akasiadibi n shɛl ndibi nɛ baaŋ pɛ to a maŋ teebɔl na so a keta na nseŋ ŋalga shuwa n wurge amo kikɛ so. ²⁹Men ta shuwa gbagba n lɔŋɛ teebɔl na so be eprete nɛ mba nɛ echeenshi nɛ kapugboŋ nɛ baa ta sarga be asɔnuuso a wɔtɔ na. ³⁰Kumo be kaman nɛ men ta teebɔl na n yili kɔnɔkoŋwule be ŋkre be deka na be anishito nsaa ta bodobodo nɛ b kɔ a lara sarga a sa ma na a deŋi kumo so saŋkikɛ.”

Kefitilatɔl na be asheŋ

(Ɛksodɔs 37:17-24)

³¹“Shin nɛ b ta shuwa gbagba m bɛl kefitilatɔl, nɛ kumo be ayabi nɛ a kɔ asɔ ko fanɛ atoto be alambu na nɛ amo kikɛ e baa la kukoŋwule. ³²Men wora kefitilatɔl na be ayabi na ashe nɛ amo be asa e baa yuu kekel ko so nɛ asa malɛ e baa yuu kekel nɛ k ka na so. ³³Ayabi ashe na be kekama daga fanɛ k baa kɔ asɔ ko nɛ a du fanɛ atoto be alambu na be asa. ³⁴Kefitilatɔl na be nteto na malɛ gbagba daga kebaakɔ asɔ nɛ a du fanɛ atoto be alambu na be ana. ³⁵Ade be kaman nɛ ayabi asa na a bee barga to anyɔnyɔ na be kekama be kaseto gba e baa kɔ atoto be kelambu na be kukoŋwule. ³⁶B ŋalga shuwa gbagba n lɔŋɛ kefitilatɔl na nɛ kumo be ayabi na, nɛ amo kikɛ e baa la kukoŋwule. ³⁷Men ta shuwa gbagba n lɔŋɛ efitila wurbi ashunu nɛ baaŋ baa chɔɔ a yili kefitilatɔl na so nɛ k baa fulto anishito na kikɛ. ³⁸Men ta shuwa m bɛl asɔ nɛ b kɔ a lɔŋɛ efitila na be achɛbi so nɛ eprete nɛ b kɔ a suse amo be nsunɔ na gba. ³⁹Shuwa nɛ menyeeŋ ta n lɔŋɛ kefitilatɔl na nɛ kumo be kusɔ kama nyam be egbɛ e baa sa fanɛ kilo adesa nɛ anu. ⁴⁰Shin nɛ b wora amo kananɛ ŋ ŋini fo ashi kebee na so na gbagba chap.”

Ebɔrɛ be wajɛbu be asheŋ

(Ɛksodɔs 36:8-38)

¹“Le e daga fanɛ men lɔŋɛ Ebɔrɛ be wajɛbu na, men ta ago be ejese lela mɔlmɔlbi nɛ ejese nɛ a la buru nɛ kepeper kpaw n lue epatisa kudu nseŋ shin nɛ esa nɛ e nyi kajɔ e ta kebasibi nɛ jese n jɔ chɛrubim be kaduli n deŋi n deŋi epatisa na so. ²Men shin nɛ epatisa na kikɛ e baa sasa nɛ amo be kekama be nteŋ to e baa la ayadra be nteŋ kuduana nɛ anyɔ nɛ amo be kekama be mparto malɛ e baa la keyadra be nteŋ ashe. ³Kumo be kaman nɛ men baa epatisa na be anu n chɛ abar so nɛ a ki fanɛ patisagboŋ koŋwule nseŋ naŋ baa anu nɛ a ka na malɛ n chɛ abar so nɛ amo alɛ gba e ki fanɛ patisagboŋ koŋwule. ⁴Men ta wajɛchɛbi nɛ k la buru m baa asɔ kulkulso fanɛ afirgi m mata m mata epatisagboŋ anyɔ na be kekama be kekilso. ⁵Men baa wajɛ buru be afirgi na be adunu m mata patisagboŋ ko be kekilso nseŋ baa adunu malɛ m mata kenyɔsopo na be kekelso nɛ afirgi na e karga abar so nseŋ shoŋi abar. ⁶Kumo be kaman nɛ men ta shuwa m bɛl akɔltobi adunu, ŋ kɔl epatisagboŋ anyɔ na be afirgi adununu na to, nɛ epatisagboŋ anyɔ na e ki wajɛbu koŋwule. ⁷Kumo be kaman nɛ men ta mboe be afuibi n lue ewajɛ kudukako nɛ a ki Ebɔrɛ be wajɛbu na be buuso. ⁸Men shin nɛ amo kikɛ e baa sasa nɛ amo be kekama be nteŋ e baa la ayadra adena nɛ anu nɛ amo be mpar malɛ e baa la ayadra ashe. ⁹Nɛ men baa ewajɛ na be anu n chɛ abar so nɛ a ki patisagboŋ koŋwule nseŋ baa ashe nɛ a ka na malɛ nɛ a ki patisagboŋ koŋwule nɛ men bɔɔ kenyɔsopo na be wajɛ shesopo na to nɛ kumo be kaba e chulgi Ebɔrɛ be wajɛbu na be anishito. ¹⁰Men baa asɔ kulkulbi fanɛ afirgi adununu m mata m mata epatisagboŋ anyɔ na be akel so. ¹¹Kede be kaman nɛ men ta danyaŋ m bɛl akɔltobi adunu, nseŋ ta amo ŋ kɔl afirgi adununu na to, nɛ epatisagboŋ anyɔ na e ki wajɛbu koŋwule. ¹²Men shin nɛ patisa na be kaba nɛ k ka na malɛ e chulgi wajɛbu na be kaman to. ¹³Men shin nɛ epatisa na be kananɛ a chul na e baa sa fanɛ keyadra koŋwule nɛ bargato ashi kaba kama so. Saŋɛ na so Ebɔrɛ be wajɛbu na beeŋ pɛ abar ŋ keta nɛnɛ. ¹⁴Ade be kaman nɛ men ta ekpakpa be nwɔl nɛ b nyɔɔ m pere n naŋ lɔŋɛ wajɛbu na be buuso nyɔsopo, nseŋ ta echuru be nwɔl nɛ b gbiti nɛnɛ ŋ ki lalaloge be buuso. ¹⁵Kede malɛ be kaman, men ta akasiadibi niŋiso ŋ ki Ebɔrɛ be wajɛbu na be ndibi yuuso. ¹⁶Ndibi yuuso na be kekama be nteŋ e baa la ayadra kuduanu nɛ bumburuŋ malɛ e baa la ayadra anyɔ. ¹⁷Nɛ men gbir ayir anyɔnyɔ ndibi yuuso na be kekama ase nɛ ayir na e bɛ abar so. A daga fanɛ men yuu Ebɔrɛ be wajɛbu na be ndibi yuuso na kikɛ loŋ. ¹⁸Men yuu ndibi yuuso be adunyɔ Ebɔrɛ be wajɛbu na be kelargato be kaseto be kaba so. ¹⁹Kumo be kaman nɛ men ta gbiti n lɔŋɛ ndibi yuuso na be atɔl adena, nɛ atɔl anyɔ e baa wɔ kedibi yuuso kama be kaseto. ²⁰Kede be kaman nɛ men yuu ndibi yuuso adunyɔ Ebɔrɛ be wajɛbu na be kelargato be esoso be kaba so ²¹nseŋ naŋ ta gbiti n lɔŋɛ amo be atɔl adena n shin nɛ atɔl anyɔ e baa wɔ kedibi yuuso kama be kaseto. ²²Kede be kaman nɛ men wora Ebɔrɛ be wajɛbu na be epeŋitɔrkpa be kaba so malɛ be ndibi yuuso ashe ²³nɛ kumo be abonfu to be ndibi yuuso anyɔ. ²⁴Men wora amo be kekama anyɔnyɔ n shin nɛ ndibi anyɔ kama e fara kaseto m mata abar n ya fo esoso nseŋ ta kepinibi n wɔtɔ amo to be esoso ²⁵nɛ ndibi yuuso na e wora aburwa nɛ amo be gbiti be atɔl malɛ e wora kuduashe. ²⁶Ade kikɛ be kaman nɛ men ta akasiadibi blɔmbi tentembi kuduanu ŋ ki ndibi deŋiso nseŋ ta amo be anunu n deŋi Ebɔrɛ be wajɛbu na be kelargato be esoso nɛ kaseto be ndibi yuuso na so ²⁷nseŋ ta anu malɛ ŋ deŋi kumo be epeŋitɔrkpa be kaba so be ndibi yuuso so. ²⁸K daga fanɛ kedibi deŋiso nɛ k wɔ ndibi blɔmbi deŋiso anu na be nferinto na ka fara kebonfu ko n ya fo kuko. ²⁹Kumo be kaman nɛ men ta shuwa m mata ndibi yuuso na kikɛ so nseŋ ta shuwa n lɔŋɛ amo be mpinibi nɛ a bee pɛ ndibi blɔmbi deŋiso na to a keta na nseŋ ta shuwa m mata ndibi blɔmbi deŋiso na gba so. ³⁰Men lɔŋɛ Ebɔrɛ be wajɛbu nɛ k baa kɔ ebu anyɔ fanɛ kananɛ ŋ ŋini fo ashi kebee na so na gbagba chap. ³¹Men ta ejese nɛ a la buru nɛ apeper kpaw nɛ ago nɛ ago be ejese lela mɔlmɔlbi n lue patisa ko nseŋ shin nɛ esa nɛ e nyi kajɔ e ta kebasibi nɛ jese n jɔ chɛrubim be nduli ŋ deŋi n deŋi epatisa na so. ³²Men ta epatisa nɛ b jɔ na n shiga akasiadibi yuuso ana nɛ b ta shuwa m mata amo so nɛ a yil gbiti be atɔl ana so nsaa kɔ shuwa be akɔltobi na so. ³³Kumo be kaman nɛ men ta patisa na ŋ kuŋ to nɛ k barga acheembiana to be kakpa cheembi na ashi kakpa cheembi na to nseŋ ta kɔnɔkoŋwule be ŋkre be deka na n yili patisa na be kaman ³⁴n ta buuso nɛ baa tre kuwɔr be kakpa na m buu deka na so ashi acheembiana to be kakpa cheembi na to. ³⁵Kumo be kaman nɛ men ta sarga be bodobodo be teebɔl na n yili kakpa cheembi na to ashi Ebɔrɛ be wajɛbu na be kelargato be esoso be kaba so, nseŋ ta kefitilatɔl na malɛ n yili a laŋɛ kumo be kelargato be kaseto be kaba so. ³⁶Men shin nɛ esa nɛ e nyi kajɔ e ta ejese buru nɛ apeper kpaw nɛ ago nɛ ago be ejese lela mɔlmɔlbi n lue Ebɔrɛ be wajɛbu na be kabuna be epatisa. ³⁷Kumo be kaman nɛ men ta patisa na n shiga akasiadibi yuuso anu nɛ b ta shuwa m mata amo nɛ a kɔ shuwa be akɔltobi nɛ danyaŋ be atɔl anu na so.

(Ɛksodɔs 38:1-7)

¹Kede be kaman nɛ men naŋ ta akasiadibi n lɔŋɛ bɔrɛsure n shin nɛ kumo be nteŋ to nɛ kumo be mparto kikɛ e baa sasa nsaa la ayadra ashunu nɛ bargato, nɛ kumo be jeŋgreŋ malɛ e baa la ayadra ana nɛ bargato. ²Men wora kumo be esoso be abonfu ana na nɛ a baa du fanɛ alambɛ n shin nɛ bɔrɛsure na nɛ alambɛ na kikɛ e chɔga abar so a la kukoŋwule. Kumo be kaman nɛ men ta danyaŋ m mata bɔrɛsure na kikɛ so. ³Kumo be kaman nɛ men ta danyaŋ n lɔŋɛ asɔ nɛ b kɔ a shuŋ kumo so fanɛ nsunɔ be mpuliya nɛ eshabɔl nɛ ntishaŋgboŋ, nɛ kusɔ nɛ baa ta a chule eblaŋ nɛ kusɔ chɔ edɛ. ⁴Kede be kaman nɛ men ta danyaŋ n lɔŋɛ kusɔ ŋeseasɔ nseŋ lɔŋɛ danyaŋ be mpinibi ana m mata kumo be abonfu ana na kikɛ so. ⁵Kumo be kaman nɛ men ta kusɔ ŋeseasɔ na n wɔtɔ bɔrɛsure na be nferinto. ⁶Men ta akasiadibi n shɛl ndibi tenteŋ nɛ baaŋ baa ta a sulɔ bɔrɛsure na nseŋ ta danyaŋ n mata amo so. ⁷Kumo be kaman nɛ men ta amo n yisi n wɔtɔ bɔrɛsure na be akel to be mpinibi anyɔ na to a pɛ amo to a ta kumo. ⁸Men ta ndibi peŋgeleŋ peŋgeleŋ n lɔŋɛ bɔrɛsure na nɛ k baa kɔ kelaŋ kumo to fanɛ kananɛ ŋ ŋini menyi ashi kebee na so na gbagba chap.

Wajɛbu na be kelɔnɛ be asheŋ

(Ɛksodɔs 38:9-20)

⁹Men lɔŋɛ Ebɔrɛ be wajɛbu na be kelɔnɛ gba nɛ kumo be kelargato be kaseto be kaba so be nteŋ to e fo fanɛ ayadra kalfa nɛ adunu, nseŋ ta ago lueso lela be patisa ŋ kulti kumo. ^10-11Men shin nɛ kumo be kelargato be esoso be kaba so be nteŋ to e baa la ayadra kalfa nɛ adunu nɛ mba anyɔ na kikɛ e nya ndibi yuuso adunyɔnyɔ nɛ amo be danyaŋ be atɔl adunyɔnyɔ. Men ta gbiti n lɔŋɛ ndibi yuuso be anyembi nɛ akɔltobi nɛ a kɔl patisa na to na. ¹²Kelɔnɛ na be mparto nɛ a laŋɛ epeŋitɔrkpa be kaba so na be nteŋ to e baa la ayadra adushunu nɛ anu nɛ amo be ndibi yuuso nɛ atɔl e baa la kudu kudu. ¹³Bɔrɛsure na be anishito a yɔ epeŋilarkpa be kaba so na malɛ be mparto e baa la ayadra adushunu nɛ anu. ¹⁴Men shin nɛ kumo be kabuna to be kaba ko be patisa be nteŋ to e baa la ayadra adunyɔ nɛ anyɔ nɛ bargato nsaa kɔ ndibi yuuso asa nɛ atɔl asa. ¹⁵Kaba nɛ k ka na malɛ gba be patisa be nteŋ to e baa la ayadra adunyɔ nɛ anyɔ nɛ bargato nsaa kɔ ndibi yuuso asa nɛ atɔl asa. ¹⁶Kumo be kaman, men shin nɛ esa nɛ e nyi kajɔ e ta ejese nɛ a la buru nɛ apeper kpaw nɛ ago be ejese lela mɔlmɔlbi n lue Ebɔrɛ be wajɛbu na be kelɔnɛ so be kabuna to gbagba be patisa nɛ kumo be nteŋ to e baa la ayadra adesa, nsaa kɔ ndibi yuuso ana nɛ amo be atɔl ana. ¹⁷Men ta gbiti m mata ndibi yuuso nɛ a kulti kelɔnɛ na kikɛ nseŋ ta gbiti n lɔŋɛ amo be akɔltobi, nseŋ ta danyaŋ malɛ n lɔŋɛ amo be atɔl. ¹⁸Men shin nɛ kelɔnɛ na be nteŋ to e baa la ayadra kalfa nɛ adunu nɛ kumo be mparto e baa la ayadra adushunu nɛ anu nɛ kumo be ago be patisa be nteŋ malɛ e baa la ayadra ashunu nɛ bargato. A daga fanɛ b ta danyaŋ n lɔŋɛ atɔl na kikɛ ¹⁹nɛ asɔ nɛ b kɔ a shuŋ Ebɔrɛ be wajɛbu na to nɛ kelɔnɛ na so nɛ ayir nɛ b yuu ŋ kulti kumo na kikɛ nyam.

Kefitilatɔl na be kekeniso be asheŋ

(Levitikɔs 24:1-4)

²⁰Ade kikɛ be kaman kaŋɛ Israɛlebi na kenishipereso fanɛ b baa bar fo ɔlif be ŋku nɛ a maŋ kɔ eyurpi nɛ fo baa ta a chɔɔ efitiliana na so a yili saŋkikɛ. ²¹Ɛɛrɔn nɛ mbe mbinyɛnso e daga fanɛ b baa chɔɔ efitila na so a yili patisa nɛ k kuŋ kɔnɔkoŋwule be ŋkre be deka na be anishito na. B baa chɔɔ efitila na so kaaseso kikɛ nɛ a baa fuli to ma, Enyɛnpe Ebɔrɛ be wajɛbu na to a klade. A daga fanɛ Israɛlebi nɛ bumo be kaman to ebi kikɛ e baa bɛ mbra ere so mbaanaayɔ.

Bɔrɛmatapoana be asɔbuuso be asheŋ

(Ɛksodɔs 39:1-7)

¹Naniere shin nɛ fo da Ɛɛrɔn nɛ mbe mbinyɛnso Nadab nɛ Abihu nɛ Eliazaa nɛ Itama e lar Israɛlebi na to m ba fo kutɔ, saŋɛ na so baaŋ ba kaa la bɔrɛmatapoana a shuŋ ma. ²Nɛ fo baa epiŋi cheembi lela n sa fo da Ɛɛrɔn nɛ a shin nɛ e baa kɔ bunyaŋ nsaa walɛ keyɛrbi. ³Shin nɛ basa nɛ ma ere Ebɔrɛ sa bumo enɔ to be kushuŋ be kenyi na, e lɔŋɛ Ɛɛrɔn be epiŋi na. Kumo be kaman nɛ b ta Ɛɛrɔn m bɔɔ ma Ebɔrɛ enɔ nɛ e shuŋ ma fanɛ bɔrɛmatapo. ⁴Shin nɛ b lɔŋɛ kusɔ kuŋ kagbeneso fanɛ kɔlgu, nɛ kale nɛ k maŋ kɔ mbre nɛ baa tre ɛfɔd na nɛ piŋi tenteŋ nɛ k bee fo aya so nɛ danshiki nɛ b ta jese n lue nɛnɛ nɛ neemu nɛ kreso peŋgeleŋ. Loŋ be asɔbuuso na e daga fanɛ b lɔŋɛ n sa fo da Ɛɛrɔn nɛ mbe mbinyɛnso, a ŋini fanɛ b la bɔrɛmatapoana nna a shuŋ ma. ⁵Shin nɛ enyipo e chaŋɛ shuwa fanɛ ejese n wea ejese buru nɛ apeper kpaw nɛ apeper kunɔkunɔ nɛ ago be ejese lela mɔlmɔlbi to n lue m baa asɔbuuso na. ^6-8Shin nɛ benyipo e ta le be ejese m baa nseŋ jɔɔ kale nɛ baa tre ɛfɔd na nɛ kumo be abatimu so be efɔl anyɔ nɛ a pɛ ɛfɔd na be anishito nɛ kamanto a mata abar na, nɛ kashɛr to be kreso na gba. Loŋ na amo kikɛ beeŋ baa la kukoŋwule. ⁹Kumo be kaman nɛ men shin nɛ enyipo e chaŋ Jeekɔb be mbinyɛnso kuduanyɔ na be atre n deŋi yawu kpakpaso be ajembu nyɛkpɛso nɛ baa tre ɔniks na be anyɔ so. ¹⁰E chaŋ mbinyɛnso juŋkparso ashe be atre m bɛ abar so kenimuso kenimuso kejembu koŋwule so nseŋ chaŋ ashe nɛ a ka na gba kenimuso kenimuso kejembu nyɔsopo na so. ^11-13Kumo be kaman nɛ enyipo na e nyisi ajembu na n wɔtɔ shuwa be mpinibi to m ba m mata kabɔrɛmata be piŋi be abatimu anyɔ na so. Saŋɛ na so saŋkama nɛ Ɛɛrɔn yɔ Enyɛnpe Ebɔrɛ na be anishito e beeŋ sulɔ Israɛlebi be atre mbe abatimu anyɔ so nɛ Enyɛnpe Ebɔrɛ e nyiŋi bumo be asheŋ. ¹⁴Shin nɛ b naŋ ta shuwa n lɔŋɛ ŋgbɛlɛbi wurbi lela anyɔ ŋ kɔl shuwa be mpinibi anyɔ na to.

Demuji be kɔlgu be asheŋ

(Ɛksodɔs 39:8-21)

¹⁵Men lɔŋɛ kagbeneso be kɔlgu n sa bɔrɛmatapo nimuso na nɛ k baa la kusɔ nɛ e beeŋ baa ta a pin Ebɔrɛ be aparsheŋ. Men ta ejese be yiri ana nɛ men daŋ ta n lɔŋɛ ɛfɔd na n lue wajɛ nseŋ jɔ kumo. ¹⁶Men bɔɔ wajɛ na to nɛ k ki kɔlgu nɛ kumo be nteŋ to nɛ mparto kikɛ e baa la enɔ be mpar koŋwule nɛ bargato. ¹⁷Ade malɛ kikɛ be kaman nɛ men ta yawu kpakpaso be ajembu nyɛkpɛso n yuu n yuu kumo so nɛ a bɛ m bɛ abar so a la egbaŋ ana. Gbaŋ nɛ k juŋkpar na be ajembu e baa la amo nɛ baa tre rubi nɛ topas nɛ gaanet na. ¹⁸Gbaŋ nyɔsopo na malɛ be ajembu e baa la ɛmeraldi nɛ safaya nɛ daimɔnd na. ¹⁹Gbaŋ sasopo malɛ be ajembu e baa la amo nɛ baa tre turkoyis nɛ agate nɛ ametiste na. ²⁰Nɛ gbaŋ nasopo malɛ be ajembu e baa la amo nɛ baa tre berɛl nɛ kameliya nɛ jaspa na. Kumo be kaman nɛ men ta shuwa n lɔŋɛ mpinibi nseŋ nyisi n nyisi ajembu na n wɔtɔ amo to. ²¹A daga fanɛ b chaŋ n chaŋ Israɛlebi be nnaŋ kuduanyɔ na be ketre kama n deŋi ajembu kuduanyɔ na be kekama so. ²²Amo be kaman nɛ men naŋ ta shuwa n lɔŋɛ ŋgbɛlɛbi lela n chulgi kɔlgu na so ²³nseŋ naŋ ta shuwa n lɔŋɛ kɔlgu na be mpinibi anyɔ n chɔga kumo be esoso be nnɔkar anyɔ na so. ²⁴Kede be kaman nɛ men ta shuwa be ŋgbɛlɛbi anyɔ be nnɔso anyɔ n wɔtɔ shuwa be mpinibi anyɔ na nɛ a wɔ kɔlgu na be esoso be nnɔkar anyɔ na to, ²⁵nseŋ ta nnɔso anyɔ nɛ a ka na malɛ n wɔtɔ piŋi na be mpinibi anyɔ na to. ²⁶Amo be kaman nɛ men naŋ ta shuwa n lɔŋɛ mpinibi anyɔ n wɔtɔ kɔlgu na be kaseto be nnɔkar anyɔ na be kamanto. ²⁷Kumo be kaman nɛ men naŋ lɔŋɛ shuwa be mpinibi anyɔ n wɔtɔ piŋi na be abatimu so be efɔl anyɔ na be nnɔso. ²⁸Ade be kaman nɛ men ta efɔl farso nɛ k la buru ŋ kɔl kɔlgu na be mpinibi na nɛ piŋi na be mpinibi na to, n chɛ m mata abar nɛ kɔlgu na e sa maa filito.

²⁹Saŋɛ na so, saŋkikɛ nɛ Ɛɛrɔn buu demuji be kɔlgu nɛ Israɛlebi be nnaŋ kuduanyɔ na be atre deŋ so n luri wajɛbu cheembi na to, kumo ere e bee bar bumo Enyɛnpe Ebɔrɛ be anishito kanyiŋiso nna na. ³⁰Saŋkama nɛ Ɛɛrɔn bee yɔ Enyɛnpe Ebɔrɛ na be anishito, a daga fanɛ e di demuji be kɔlgu nɛ Urim nɛ Tumim wɔ kumo to na nɛ a baa chɛ mo to nɛ e baa pin Enyɛnpe Ebɔrɛ na be nfɛra.

Bɔrɛmatapoana be epiŋi nɛ a ka na be asheŋ

(Ɛksodɔs 39:22-31)

³¹Ale e daga fanɛ men lɔŋɛ bɔrɛmatapo nimuso be piŋi tenteŋ nɛ ɛfɔd deŋ kumo so na. Men ta jese nɛ a la buru n lue wajɛ m ba kumo, ³²nɛ k baa kɔ kubɔ. Men ta kechɛbi lueso m muya kubɔ na ŋ kulti nɛ k baa kɔ eleŋ ga. ³³Men ta ejese nɛ a la buru nɛ ago nɛ apeper kpaw nɛ apeper kunɔkunɔ n lɔŋɛ asɔ kulkulbi nɛ a du fanɛ asɔrso nɛ baa tre pomegranates na m ba n chulgi n chulgi piŋi na be kaseto be ekarso. Kumo be kaman nɛ men ba shuwa be adulombi n chulgi pomegranates anyɔ kama be nfɛato. ³⁴Men shin nɛ a bɛ abar so ŋ kulti piŋi na kikɛ n chambɔ. ³⁵A daga fanɛ Ɛɛrɔn e baa buu piŋi na saŋkama nɛ e bee yɔ Enyɛnpe Ebɔrɛ na be anishito ashi acheembiana to be kakpa cheembi na to, saŋɛ na so adulombi na beeŋ baa shu a ŋini fanɛ e maŋ wu. ³⁶Men ta shuwa lela n lɔŋɛ kusɔ paŋgelambi nseŋ chaŋ le be nsibɛ n deŋ kumo so: ‘Cheembi n sa Enyɛnpe Ebɔrɛ na’ ³⁷nseŋ ta jese nɛ k la buru m baa kumo m mata neemu na be anishito. ³⁸A daga fanɛ Ɛɛrɔn e baa chɛ neemu na nɛ kasibɛ na e baa wɔ mbe kasɔto so saŋkama a ŋini fanɛ e ta Israɛlebi be alubi nɛ b wora saŋɛ nɛ baa lara sarga a sa ma na n deŋi mbe kumu so nɛ ma, Enyɛnpe Ebɔrɛ na e baa sɔ bumo be esarga na. ³⁹Kumo be kaman nɛ men ta ago be ejese lela mɔlmɔlbi n lue Ɛɛrɔn be danshiki nɛ neemu nseŋ shin nɛ enyipo e jɔ mbe kreso. ⁴⁰Men baa nle nɛ ekreso nɛ eneemu n sa Ɛɛrɔn be bibinyɛn na malɛ nɛ a shin nɛ b baa kɔ bunyaŋ nsaa walɛ ayɛrbi. ⁴¹Ade kikɛ be kaman nɛ men ta le be asɔbuuso ere m buu fo da Ɛɛrɔn nɛ mbe bibinyɛn na nseŋ ta ŋku ŋ gbiti bumo n ta bumo m bɔɔ Ebɔrɛ enɔ, saŋɛ na so baaŋ ki bɔrɛmatapoana cheembi a shuŋ ma. ⁴²Men ta ago be wajɛ m ba ewondoŋshiimbi n sa bumo nɛ b baa dela a buu bumo be wulo so. Men shin nɛ amo be nteŋ to e yili kashɛr to m ba fo amuli to. ⁴³A daga fanɛ Ɛɛrɔn nɛ mbe mbinyɛnso na e baa wɔtɔ loŋ be ewondoŋshiimbi ere saŋkama nɛ baa luri Enyɛnpe be wajɛbu na to ŋko saŋkama nɛ baa ba bɔrɛsure na ase nɛ b ba shuŋ ma ashi kakpa cheembi na to, saŋɛ na so b maaŋ wu ŋkpal b ka na kayurkpaŋ so. Le be mbra ere beeŋ baa dese n sa Ɛɛrɔn nɛ mbe kaman to ebi hale mbaanaayɔ.

Ɛɛrɔn nɛ mbe mbinyɛnso be keta m bɔɔ Ebɔrɛ enɔ be asheŋ

(Levitikɔs 8:1-36)

¹Men kaa shin nɛ men ta Ɛɛrɔn nɛ mbe bibinyɛn na m bɔɔ ma enɔ fanɛ bɔrɛmatapoana, men ta gbolu fɔlbi koŋwule nɛ ekpakpa anyɔ nɛ a maŋ kɔ ndulgi kikɛ. ²Men ta ayunyifu nɛ a pe nɛnɛ n wora bodobodo nɛ a maŋ kɔ yiisi. Men ta ɔlif be ŋku n wora bodobodo na be ako nseŋ wora ako malɛ loŋ, nseŋ ta nyifu na be ako malɛ n wora ekrakashi n ta ɔlif be ŋku n wurge amo so. ³Kumo be kaman nɛ men ta amo n wɔtɔ kelantaŋɛ n ti gbolu fɔlbi na nɛ ekpakpa anyɔ na so m ba lara sarga n sa ma. ⁴Kede be kaman nɛ men shin nɛ Ɛɛrɔn nɛ mbe bibinyɛn na e ba Enyɛnpe Ebɔrɛ be wajɛbu na be kabuna to m ba bɛr daŋkare be ekpa so. ⁵Kumo be kaman nɛ men ta bɔrɛmatapo nimuso be asɔbuuso nɛ a la danshiki nɛ piŋi tenteŋ na nɛ kale nɛ k maŋ kɔ mbre nɛ baa tre ɛfɔd na nɛ demuji be kɔlgu na m buu Ɛɛrɔn. Kumo be kaman nɛ men ta ɛfɔd be kreso nɛ enyipo ta ejese n lue nɛnɛ na ŋ kre mo so. ⁶Amo be kaman nɛ men ta neemu na m mɛa mbe kumu so nseŋ naŋ ta kusɔ paŋgelambi nɛ b sibɛ so na m mata neemu na so. ⁷Asɔ buuso na be kaman, nɛ men ta ŋku nɛfaso na n do Ɛɛrɔn be kumu so nɛ e ki Ebɔrɛ be esa laraso. ⁸Kumo be kaman nɛ men ta edanshiki m buu Ɛɛrɔn be bibinyɛn na malɛ ⁹nseŋ buu bumo nwuro n ta ekreso ŋ kre bumo so. Nɛ men wora loŋ Ɛɛrɔn nɛ mbe bibinyɛn nɛ bumo be kaman to ebi kikɛ beeŋ ki bɔrɛmatapoana a shuŋ ma hale mbaanaayɔ. ¹⁰Men baŋ mɛa bumo to n loge, a daga fanɛ men ta gbolu na m ba Enyɛnpe be wajɛbu na be kabuna to m ba shin nɛ Ɛɛrɔn nɛ mbe bibinyɛn na e ta bumo be enɔana n deŋi kumo be kumu so. ¹¹Kumo be kaman nɛ men mɔ gbolu na ma, Enyɛnpe Ebɔrɛ na be anishito ndoŋ ¹²nɛ fo ta keshilbi n nyɔ gbolu fɔlbi na be ŋklaŋ na to n do n do bɔrɛsure na be alambɛ na so nseŋ chulgi ŋklaŋ na be amo nɛ a ka na malɛ kikɛ n wurge bɔrɛsure na be kaseto. ¹³Kede be kaman nɛ men lara apuntosɔ be nfɔ na kikɛ ŋ ku kegberche na be kaseto be kaba nseŋ lara achɛbi anyɔ na nɛ amo be nfɔ kikɛ n chɔɔ bɔrɛsure na so n lara sarga n sa ma. ¹⁴Ama men yɛr gbolu na be eblaŋ nɛ kawɔl nɛ apumbi bre keeyi na be ekarso n ya chɔɔ. Loŋ be sarga na e naa bar bɔrɛmatapoana be alubi be ketampaŋ na. ¹⁵Kumo be kaman nɛ men shin nɛ Ɛɛrɔn nɛ mbe bibinyɛn na e ta bumo be enɔana n deŋi kpakpa nɛ baaŋ mɔ na be kumu so ¹⁶nɛ men mɔ kumo nseŋ suse ŋklaŋ na ŋ ŋmenyaŋ ŋ ŋmenyaŋ bɔrɛsure na be mba ana na kikɛ so. ¹⁷Kumo be kaman nɛ men kuya kpakpa na to wurwurbi nseŋ fɔr kumo be apuntosɔ nɛ ayawɔrta so nseŋ ta amo n deŋi kumu na nɛ eblaŋ kuyatoso na so ¹⁸n chɔɔ bɔrɛsure na so n lara sarga n sa ma. Loŋ be sarga chɔɔso na be efɛa bee par ma, Enyɛnpe Ebɔrɛ na nna. ¹⁹Kede be kaman nɛ men shin nɛ Ɛɛrɔn nɛ mbe bibinyɛn e naŋ ta bumo enɔana n deŋi kpakpa nɛ k ka na be kumu so ²⁰nɛ men mɔ kumo nseŋ suse ŋklaŋ na be ako n do n do Ɛɛrɔn nɛ mbe bibinyɛnana na be jisa so be asoe be nseto nɛ bumo be enɔjisaana be ashilbinio so nɛ bumo be ayajiso be anashibinio so nseŋ ta ŋklaŋ nɛ a ka na malɛ kikɛ ŋ ŋmenyaŋ ŋ ŋmenyaŋ bɔrɛsure na be mba ana na kikɛ so. ²¹Kede malɛ be kaman nɛ men nyia bɔrɛsure na so be ŋklaŋ na be ako n wea ŋku nɛfaso na be ako to ŋ ŋmenyaŋ Ɛɛrɔn nɛ bibinyɛn na nɛ bumo be asɔbuusoana kikɛ so. Saŋɛ na so Ɛɛrɔn nɛ mbe bibinyɛnana na beeŋ ki ma, Ebɔrɛ be basa laraso nɛ bumo be asɔbuuso e ki asɔ cheembi ashi ma anishito. ²²Ŋkpal kpakpa ere ka la keta m bɔɔ Ebɔrɛ enɔ be kewora be kusɔbɔya na so, men lara kumo be kpandu nɛ k kɔ nfɔ nɛ apuntosɔ be nfɔ nɛ kegberche na be kaseto be kaba nɛ achɛbi anyɔ na nɛ amo be nfɔ nɛ kumo be jisa be kebɛaŋ ²³n ti bodobodo nɛ a maŋ kɔ yiisi na nɛ bodobodo nɛ a kɔ ɔlif be ŋku nɛ amo nɛ a maŋ kɔ nɛ krakashi na so n lara sarga n sa ma. ²⁴Men shin nɛ Ɛɛrɔn nɛ mbe bibinyɛn na e maŋ amo so ma, Enyɛnpe Ebɔrɛ na be anishito fanɛ kakɛ cheembi be sarga. ²⁵Kumo be kaman nɛ men sɔ amo bumo kutɔ n chɔɔ bɔrɛsure na so ashi kakpa nɛ baa chɔɔ sarga chɔɔso na. Loŋ be sarga be efɛa bee par ma, Enyɛnpe Ebɔrɛ na nna. ²⁶Kumo alɛ be kaman nɛ fo maŋ kpakpa nɛ b ta n lara Ɛɛrɔn be keta m bɔɔ Ebɔrɛ enɔ be sarga na be kagbene so ashi ma, Enyɛnpe Ebɔrɛ na be anishito. Kusɔbɔya na be kagbene na la fo kachige nna. ²⁷Kpakpa na be kagbene be kaba nɛ jisa be kebɛaŋ nɛ b maŋ so ma, Enyɛnpe Ebɔrɛ be anishito na malɛ la Ɛɛrɔn nɛ mbe bibinyɛn na peya nna. ²⁸Saŋkama nɛ menyi, ma basa Israɛlebi baŋ mɔ kusɔbɔya n lara kɔnɔkoŋwule be sarga, kusɔbɔya na be kagbene nɛ kebɛaŋ la Ɛɛrɔn nɛ mbe bibinyɛn peya nna. Loŋ be eblaŋ na la meya nna, ama bɔrɛmatapoana e naaŋ baa ji amo hale mbaanaayɔ. ²⁹Nɛ Ɛɛrɔn baŋ wu, mbe mbinyɛnbi na be eko e naŋ ta mbe kabɔrɛmata be piŋi na. ³⁰Emo nɛ e sɔ mo so ŋ ki bɔrɛmatapo nimuso a luri Enyɛnpe be wajɛbu na to be kakpa cheembi na, daga fanɛ e buu kabɔrɛmata be piŋi na saŋkama nɛ e bee luri ndoŋ hale n ya fo nchɛnshunu. ³¹Men daŋɛ kpakpa nɛ men ta n lara Ɛɛrɔn nɛ mbe bibinyɛnana be keta m bɔɔ Ebɔrɛ enɔ be sarga na be eblaŋ wajɛbu na be kelɔnɛ so ³²nɛ Ɛɛrɔn nɛ mbe bibinyɛn na e yili nshɛr be wajɛbu na be kabuna to n we eblaŋ na nɛ bodobodo nɛ a ka a wɔ kelantaŋɛ na to na. ³³Bumo e daga b ka ji asɔ nɛ b ta n lara alubi be ketampaŋ be sarga na saŋɛ nɛ b ta bumo m bɔɔ Ebɔrɛ enɔ nɛ b ki bɔrɛmatapoana na. A maŋ daga esa pɔtɛ kama ka ji loŋ be asɔ na, ŋkpal manɛ so a la asɔ cheembi nna. ³⁴Ama nɛ fanɛ amo be ako ka nseŋ di ŋklade, men chɔɔ amo nɛ esa kama e sa maŋ kaŋ ji amo, ŋkpal manɛ so, a la asɔ cheembi nna. ³⁵Ta nchɛnshunu dede n wora Ɛɛrɔn nɛ mbe bibinyɛn be keta m bɔɔ Ebɔrɛ enɔ be kasheŋwora na fanɛ kananɛ ŋ kaŋɛ fo na gbagba chap. ³⁶Nchɛnshunu na be karechɛ kama malɛ, men ta gbolu n lara alubi be ketampaŋ nɛ bɔrɛsure na be kefɔrso be sarga. Kumo be kaman nɛ men ta ɔlif be ŋku ŋ gbiti bɔrɛsure na so nɛ k ki cheembi. ³⁷Nchɛnshunu na be karechɛ kama men lara alubi be ketampaŋ be sarga bɔrɛsure na so, saŋɛ na so, bɔrɛsure na beeŋ baa du cheembi nɛ kusɔ kama nɛ k beta kumo gba e baa du cheembi.

Karechɛ kikɛ be sarga be asheŋ

(Nɔmbɛs 28:1-8)

³⁸Karechɛ kikɛ men baa ta nfɛ koko be ekpakpafɔlbi anyɔ anyɔ a lara sarga bɔrɛsure na so. ³⁹Men ta kukoŋwule n lara sarga na kachipurso nseŋ ta kumo nɛ k ka malɛ n lara sarga kaaseso. ⁴⁰Men ta ɔlif be ŋku lela fanɛ lita koŋwule m baga bodobodo be nyifu lela fanɛ kilo koŋwule nseŋ ta wain fanɛ lita koŋwule nɛ a baa la asɔnuuso be sarga n ti sososo be kpakpafɔlbi na so n lara sarga na. ⁴¹Kumo be kaman nɛ men naŋ ta kpakpafɔlbi nyɔsopo na nɛ asɔ nɛ men daŋ ta n ti chipurso peya na so na gbagba chap n ti so n chɔɔ n lara sarga kaaseso n sa ma. Loŋ be sarga chɔɔso na be efɛa bee wora ma, Enyɛnpe Ebɔrɛ na ebel ga. ⁴²Le be sarga chɔɔso ere beeŋ baa la sarga nɛ menyi nɛ men be kaman to ebi kikɛ beeŋ baa lara saŋkama mbaanaayɔ ashi Enyɛnpe be wajɛbu na be kabuna to ma, Enyɛnpe Ebɔrɛ na be anishito. Ndoŋ nɛ meeŋ baa tu menyi nsaa malga fo kutɔ. ⁴³Ndoŋ nɛ ma nɛ Israɛl be basa beeŋ baa shɛr nɛ ma kemaŋkura e shin nɛ ndoŋ e ki ma kakpa cheembi. ⁴⁴Ma alɛ beeŋ shin nɛ Enyɛnpe be wajɛbu na nɛ bɔrɛsure na e ki ma asɔ cheembi. Nseŋ naŋ shin nɛ Ɛɛrɔn nɛ mbe bibinyɛn na malɛ gba e ki basa laraso cheembi a shuŋ ma fanɛ bɔrɛmatapoana. ⁴⁵Saŋɛ na so, nɛ ŋ gbelge m baa kaa wɔ Israɛlebi na to a la bumo be Ebɔrɛ. ⁴⁶Aloŋ nɛ baaŋ ba pin fanɛ ma e la Enyɛnpe bumo be Ebɔrɛ nɛ n lara bumo ashi Ijipt nsaa wɔ bumo to na. Ma e la Enyɛnpe bumo be Ebɔrɛ na.”

Duwu be bɔrɛsure na be asheŋ

(Ɛksodɔs 37:25-28)

¹“Men ta akasiadibi n lɔŋɛ bɔrɛsure nɛ menyeeŋ baa chɔɔ duwu kumo so ²nɛ kumo be nteŋ nɛ mparto kikɛ e baa sasa fanɛ keyadra koŋwule nɛ bargato nɛ kumo be jeŋgreŋ malɛ e baa la ayadra asa. Men wora esoso be abonfu ana na nɛ a baa du fanɛ alambɛ nɛ amo nɛ kumo kikɛ e baa chɔ abar so a la kukoŋwule. ³Men ta shuwa lela m mata kumo be awɔlto nɛ akel to nɛ alambɛ na kikɛ so ŋ kulti, nseŋ ŋalga shuwa ŋ kulti kumo be nnɔkar kikɛ nɛ a baa du gbuntelin. ⁴Kumo be kaman nɛ men ta shuwa n lɔŋɛ mpinibi anyɔ n chɔga kumo be akel to, shuwa gbuntelin na be kaseto nsaa yisi ndibi tentembi a wɔtɔ amo to a maŋ kumo so. ⁵Men ta akasiadibi n wora loŋ be ndibi tentembi na nseŋ ta shuwa m mata amo kikɛ so. ⁶Kede be kaman nɛ men ta bɔrɛsure na n yili kakpa nɛ ma nɛ fo beeŋ baa shɛr na be patisa nɛ k kuŋ kɔnɔkoŋwule be ŋkre be deka na nɛ kumo be buuso nɛ baa tre kuwɔr be kakpa na be anishito na. ⁷Ɛɛrɔn baŋ ba nɛ e ba lɔŋɛ efitila na so, kachipurso kikɛ a daga fanɛ e chɔɔ duwu nɛ amo be efɛa wɔ ebel na bɔrɛsure na so. ⁸Nɛ Ɛɛrɔn naŋ ba kaaseso malɛ nɛ e ba chɔɔ efitila na so, a daga fanɛ e naaŋ wora loŋ koŋwule na. Menyi nɛ men be kaman to ebi kikɛ beeŋ baa lara duwu be sarga ere a sa Enyɛnpe Ebɔrɛ kachɛ kama hale mbaanaayɔ. ⁹Men sa maŋ kaŋ chɔɔ duwu kama nɛ a maŋ daga ashi loŋ be bɔrɛsure na so, ŋko n lara kusɔbɔya ŋko ayu ŋko asɔnuuso nɛ a maŋ daga be sarga kikɛ kumo so. ¹⁰Kafɛ kikɛ malɛ a daga fanɛ Ɛɛrɔn e ta asɔbɔya nɛ b ta n lara kulubi be sarga na be ŋklaŋ n do bɔrɛsure na so kela koŋwule nɛ k ki cheembi. Le be kesheŋ ere la kusɔ nɛ menyi nɛ menyi be kaman to ebi beeŋ baa wora nna hale mbaanaayɔ. Bɔrɛsure ere la kusɔ cheembi nna n sa ma, Eyɛnpe Ebɔrɛ na.”

Enyɛnpe be wajɛbu be toto be asheŋ

¹¹Ade kikɛ be kaman nɛ Enyɛnpe Ebɔrɛ na kaŋɛ Mosis le: ¹²“Fo kaa karga Israɛl be basa nɛ fo pin bumo be kɔnɔ, fo shin nɛ bumo be ekama e ka kusɔ ko ŋkpal mbe ŋkpa so, saŋɛ na so kulubi kama maaŋ tu mo kekarga na to. ¹³Ekama nɛ e ti basa nɛ baa karga na so daga fanɛ e ka amansherbi fanɛ kananɛ baa ka lampo ashi Enyɛnpe Ebɔrɛ be wajɛbu na to na. ¹⁴Esa kama nɛ b karga nɛ e ji fanɛ nfɛ adunyɔ a yɔ, daga fanɛ e ka loŋ be amansherbi na n sa ma, Enyɛnpe Ebɔrɛ na fanɛ sarga. ¹⁵Loŋ be toto na to, a daga fanɛ damawura nɛ etirpo kikɛ e ka a sasa, ŋkpal manɛ so ekama bee ka nna ŋkpal mbe ŋkpa so. ¹⁶Sɔ le be amansherbi ere ashi Israɛlebi na kutɔ nɛ a baa la alubi be ketampaŋ be sarga nɛ b ta amo a shuŋ Enyɛnpe be wajɛbu na to be kushuŋ.”

Danyaŋ be katishaŋgboŋ be asheŋ

¹⁷Ade kikɛ be kaman nɛ Enyɛnpe Ebɔrɛ naŋ kaŋɛ Mosis le: ¹⁸“Men lɔŋɛ danyaŋ be katishaŋgboŋ nɛ kumo be ketɔl n jɔ nchu n wɔtɔ n yili Enyɛnpe be wajɛbu na nɛ bɔrɛsure na be kefɛato. ¹⁹Loŋ be nchu na nɛ Ɛɛrɔn nɛ mbe bibinyɛn na beeŋ baa kɔ a fɔr bumo be enɔ nɛ aya so. ^20-21K daga fanɛ b baa fɔr bumo be enɔana nɛ aya pɔɛŋ nsaa luri Enyɛnpe be wajɛbu na to n ya kaa lara sarga chɔɔso bɔrɛsure so, saŋɛ na so b maaŋ wu. Le be kesheŋ ere beeŋ baa la mbra nna a dese n sa bumo nɛ bumo be kaman to ebi kikɛ.”

Ŋku nɛfaso na be asheŋ

²²Nɛ Enyɛnpe Ebɔrɛ naŋ kaŋɛ Mosis le: ^23-25“Men ta efɛa belbelso be asɔ n wora ŋku nɛfaso cheembi. Men karga asɔ na fanɛ kananɛ baa karga asɔ ashi Ebɔrɛ be wajɛbu na to na. Men ta asɔ nɛ baa tre mir na fanɛ kilo ashe nɛ asɔ nɛ baa tre sinamɔn na kilo asa nɛ asɔ nɛ baa tre keen na kilo asa nɛ amo nɛ baa tre kashia na kilo ashe, n wea ɔlif be ŋku lita ana to n wora amo fanɛ kananɛ esa nɛ e nyi tulale be kewora bee wora na, nɛ a ki ŋku nɛfaso cheembi nɛ amo be efɛa wɔ ebel. ²⁶Men wora loŋ be ŋku na ŋ gbiti n nɛfa Enyɛnpe be wajɛbu nɛ kɔnɔkoŋwule be ŋkre be deka na ²⁷nɛ teebɔl na nɛ kumo be asɔwurbi kikɛ nɛ kefitilatɔl na nɛ kumo alɛ gba be asɔwurbi nɛ bɔrɛsure nɛ baa chɔɔ duwu kumo so na ²⁸nɛ bɔrɛsure nɛ baa chɔɔ sarga be asɔ kumo so na nɛ kumo be asɔwurbi kikɛ nɛ katishaŋgboŋ nɛ baa jɔ nchu kumo to a fɔr enɔ nɛ aya na nɛ kumo be ketɔl. ²⁹Men ta asɔ na kikɛ m bɔɔ ma enɔ nɛ amo kikɛ e ki cheembi nɛ kusɔ kama malɛ gba nɛ k beta amo e ki cheembi. ³⁰Ade kikɛ be kaman nɛ men ta ŋku na n do n do Ɛɛrɔn nɛ mbe bibinyɛn na gba so n ta bumo m bɔɔ ma enɔ nɛ b ki bɔrɛmatapoana a shuŋ ma. ³¹Nɛ fo, Mosis e kaŋɛ Israɛlebi na le: ‘Ŋku ere e naaŋ baa la ma ŋku nɛfaso cheembi n sa menyi nɛ menyi be kaman to ebi kikɛ. ³²Men sa maŋ kaŋ ta amo m gbiti esa pɔtɛ be eyur, menyi alɛ be ekama e sa maŋ kaŋ wora amo be kaduli kikɛ, ŋkpal manɛ so, a la ŋku cheembi nna, amoso men baa ta amo fanɛ asɔ cheembi. ³³Esa kama nɛ e pel n wora amo be kaduli ŋko n ta amo ŋ gbiti esa pɔtɛ nɛ e maŋ la bɔrɛmatapo, a daga fanɛ b lara mo ashi mbe basa to.’ ”

Duwu be kewora be asheŋ

³⁴Nɛ Enyɛnpe Ebɔrɛ naŋ kaŋɛ Mosis le: “Men ta duwu be asɔ nɛ amo be efɛa wɔ ebel nɛ amo kikɛ be keshi e baa sasa. Amo a la, stakte nɛ onika nɛ galbanum nɛ fraŋkinsensi nɛ a maŋ kɔ eyurpi amo to na. ³⁵Shin nɛ esa nɛ e nyi tulale be kewora e ta amo n wea abar to n wora duwu nɛ a baa dufɛ fanɛ tulale. Kumo be kaman nɛ men ta nfɔl n wea amo to n lara amo be eyurpi nɛ a baa du cheembi. ³⁶Shin nɛ b kɔr ako nɛ a pe fanɛ nyifu na n ta amo ŋ ŋmenyaŋ kɔnɔkoŋwule be ŋkre be deka na be anishito ashi Enyɛnpe be wajɛbu na to be kakpa nɛ ma nɛ fo beeŋ baa tu abar na. A daga fanɛ men baa ta duwu na fanɛ asɔ cheembi. ³⁷Duwu ere la asɔ cheembi nna nsaa la Enyɛnpe Ebɔrɛ peya. Men sa maŋ kaŋ bɔla ekpa nɛ baa bɔla so a wora duwu cheembi so n wora duwu kama n sa men gbagba be amu. ³⁸Esa kama nɛ e kpal amo be efɛa belbelso so n wora amo be kaduli, daga fanɛ b lara mo ashi mbe basa to.”

Basa nɛ baaŋ wora Enyɛnpe be wajɛbu na be kushuŋ be asheŋ

¹Le be asheŋ ere kikɛ be kaman nɛ Enyɛnpe Ebɔrɛ kaŋɛ Mosis, ²“Keni, n lara Besalɛl nɛ e la Yuri pibinyɛn nsaa la Hur mo nanabi ashi Juda be kanaŋ to na ³nɛ n ta ma kiyoyu n wɔtɔ mo to nseŋ sa mo kasɔwora kikɛ be kenyi nɛ ketiŋ n wora be eleŋ nɛ kasɔlɔŋɛ be kepinto kikɛ nyam be nfɛra na. ⁴Saŋɛ na so e beeŋ baa tiŋ a ta nfɛra a chaŋ asɔ nsaa ta shuwa nɛ gbiti nɛ danyaŋ nɛ yawu kpakpaso be ajembu nyɛkpɛso ⁵nɛ ndibi a lɔŋɛ asɔ. ⁶Ma alɛ naŋ lara Oholiab nɛ e la Ahisamak malɛ pibinyɛn ashi Dan be kanaŋ to nna fanɛ e baa chɛ Besalɛl to a shuŋ. Bekama malɛ gba nɛ b ti so a kɔ enɔ to be kushuŋ be kenyi na, n sa bumo kikɛ kenyi damta, saŋɛ na so, baaŋ tiŋ n wora asɔ kama nyam nɛ ŋ kaŋɛ fo fanɛ b wora na. ⁷Loŋ be asɔ na e la Enyɛnpe be wajɛbu na, kɔnɔkoŋwule be ŋkre be deka na nɛ kumo be buuso nɛ baa tre kuwɔr be kakpa na ⁸nɛ shuwa lela be kefitilatɔl na nɛ kumo be asɔwurbi kikɛ nɛ bɔrɛsure nɛ baa chɔɔ duwu kumo so ⁹nɛ bɔrɛsure nɛ baa lara esarga chɔɔso kumo so na nɛ kumo be asɔwurbi kikɛ nɛ katishaŋgboŋ nɛ kumo be ketɔl na ¹⁰nɛ bɔrɛmatapo nimuso Ɛɛrɔn nɛ mbe bibinyɛn be asɔbuuso cheembi nɛ baa buu saŋkama a shuŋ kabɔrɛmata be kushuŋ na ¹¹nɛ ŋku nɛfaso cheembi nɛ duwu nɛ amo be efɛa wɔ ebel nɛ baa chɔ wajɛbu cheembi na to na. A daga fanɛ b wora asɔ kama nyam kananɛ ŋ kaŋɛ fo fanɛ b wora na.”

Kewushiachɛ na be asheŋ

¹²Ade kikɛ be kaman nɛ Enyɛnpe Ebɔrɛ naŋ kaŋɛ Mosis le: ¹³“Kaŋɛ Israɛlebi fanɛ b baa bɛ ma kewushiachɛ be daŋkare so nsaa ta kumo fanɛ kachɛ cheembi, ŋkpal manɛ so, kewushiachɛ na la ma nɛ menyi nɛ menyi be kaman to ebi kikɛ be kanyiŋi be kachɛ nna a ŋini fanɛ ma, Enyɛnpe Ebɔrɛ na e lara menyi fanɛ ma basa. ¹⁴Men baa bɛ loŋ be kewushiachɛ na be daŋkare so nsaa ta kumo fanɛ kachɛ cheembi. A daga b ka mɔ esa kama nɛ e kini kebɛ kumo so nseŋ shuŋ kumo be kamɔnchɛ. ¹⁵Nchɛnshe e daga fanɛ men ta n shuŋ menyi be ashuŋ. Kachɛ shunusopo na bre la kachɛ cheembi n sa ma, Enyɛnpe Ebɔrɛ nna nɛ esa kama daga e ka wushi kamɔnchɛ. Esa kama nɛ e shuŋ kushuŋ kikɛ kumo be kamɔnchɛ daga b ka mɔ mo. ¹⁶Amoso a daga fanɛ Israɛlebi nɛ bumo nɛ bumo be kaman to ebi kikɛ ka bɛ ma kewushiachɛ be daŋkare na so nsaa ji kumo fanɛ ma nɛ bumo be kɔnɔkoŋwule be ŋkre be kanyiŋi be kachɛ. ¹⁷K beeŋ baa la ma nɛ menyi Israɛlebi be kanyiŋi be kachɛ nna hale mbaanaayɔ, ŋkpal manɛ so, ma, Enyɛnpe Ebɔrɛ na ta nchɛ ashe nna n to esoso nɛ kasawule nseŋ wushi kachɛ shunusopo na.” ¹⁸Ebɔrɛ ka malga Mosis kutɔ n loge ashi Sainai be kebee na so nɛ e ta ajembu pantraŋ pantrambi anyɔ nɛ mo ere Ebɔrɛ gbagba sibɛ mbe mbra n deŋi so na n sa Mosis.

Shuwa be kenabi be asheŋ

(Ditɛronɔmi 9:6-25)

¹Mosis ka daŋ chɛr kebee na so nsaa maŋ ba manaŋ na nɛ basa na ba shɛr ŋ kulti Ɛɛrɔn nseŋ kaŋɛ mo: “Koso n lɔŋɛ ebɔrɛ ko n sa anyi nɛ e baa juŋkpar anyi. Ŋkpal manɛ so, anyi maŋ nyi kusɔ nɛ k wora Mosis, nɛ e juŋkpar anyi n lar Ijipt be kasawule so na.” ²Ndoŋ nna nɛ Ɛɛrɔn kaŋɛ bumo: “Men lara n lara shuwa be abitasɔ nɛ men be beche nɛ mbia kikɛ wɔtɔ na m bar ma.” ³Epul na to nɛ basa na kikɛ lara shuwa be akonde nɛ a wɔ bumo be asoe to na n sa Ɛɛrɔn ⁴nɛ Ɛɛrɔn sɔ amo kikɛ ŋ ŋalga n lɔŋɛ kegbir nɛ k du fanɛ kenabi. Ndoŋ nna nɛ basa na kaŋɛ le: “O Israɛlebi, menyi be ebɔrɛ nɛ e lara menyi ashi Ijipt be kasawule so na nde.” ⁵Ɛɛrɔn ka wu kusɔ nɛ k wora na nɛ e yuu bɔrɛsure n yili shuwa be kenabi na be anishito nseŋ kaŋɛ: “Echefo anyeeŋ wora bunyanso be kanyiŋi be kejigboŋ n sa Enyɛnpe Ebɔrɛ.” ⁶Kumo be ŋklade, chipurdidi nɛ basa na lara esarga chɔɔso nɛ kɔnɔkoŋwuleso be esarga. Kumo be kaman nɛ b chena n ji nseŋ nuu nsa mboo ŋ koso a wora kusɔjigaya be asheŋ. ⁷Ndoŋ nna nɛ Enyɛnpe Ebɔrɛ kaŋɛ Mosis: “Gbelge to manaŋ n yɔ, ŋkpal manɛ so, fo basa nɛ fo keta n lar Ijipt be kasawule so na wora kulubi m pal kaman n sa ma. ⁸B teŋ kini kebɛ mbra nɛ n sa bumo na so nseŋ ŋalga shuwa n lɔŋɛ kenabi a shuŋ nsaa lara esarga a sa kumo a kaŋɛ fanɛ bumo be ebɔrɛ mo nɛ a lara bumo ashi Ijipt be kasawule so na nna na.” ⁹Kumo be kaman nɛ Enyɛnpe Ebɔrɛ naŋ kaŋɛ Mosis: “N nyi kananɛ basa ere kɔ kusoe kpakpaso. ¹⁰Amoso sa maŋ kaŋ kuŋ ma ekpa a laŋɛ kusɔ nɛ mee shin nɛ n wora bumo ere be kaplɛa so. Ŋkpal b ka shin nɛ ma kagbene kaa ga so, meeŋ mur bumo nseŋ shin nɛ fo nɛ fo kaman to ebi e ki kanaŋgboŋ.” ¹¹Ama Mosis daŋ kule mo Nyɛnpe nɛ mbe Ebɔrɛ na nna ga, nseŋ kaŋɛ: N Nyɛnpe, manɛ e ba nɛ fo shin nɛ fo kagbene kaa ŋkpal fo basa mo nɛ fo ta fo eleŋgboŋ nɛ fo enɔ lempo na n lara ashi Ijipt be kasawule so so? ¹²Nuso nɛ Ijiptebi na beeŋ kaŋɛ a yɔ fo kaplɛa so? B maaŋ kaŋɛ fanɛ fo lara bumo nna ashi Ijipt be kasawule so nna m ba abee to nɛ fo ba mur a? Amoso shin nɛ fo kagbene e dese nɛ fo chɛrga fo nfɛra nsaa maŋ shin nɛ le be tɔrɔ ere e ba fo basa so. ¹³Nyiŋi le be kɔnɔ nɛ fo nase n sa fo nyɛrbi Eebraham nɛ Aizek nɛ Jeekɔb: “Meeŋ shin nɛ menyi be kaman to ebi e wora keshi fanɛ achɛkpabi nɛ a wɔ awɔlpa to na ta kasawule ere kikɛ n sa bumo nɛ k ki bumo be kapetɛ mbaanaayɔ na.” ¹⁴Ndoŋ nna nɛ Enyɛnpe Ebɔrɛ chɛrga mbe nfɛra nsaa maŋ naŋ bar tɔrɔ na bumo so. ¹⁵Ade kikɛ be kaman nɛ Mosis ta ajembu pantraŋ pantrambi anyɔ nɛ Ebɔrɛ daŋ sibɛ mbra na n deŋi amo be kekama be mba anyɔ so na n shi kebee na so ŋ gbelge to m ba. ¹⁶Ebɔrɛ gbagba e daŋ lɔŋɛ ajembu pantraŋ pantrambi na nseŋ sibɛ kasibɛ na n deŋi amo so. ¹⁷Ndoŋ nna nɛ Joshuwa nu basa ka bee cha awɔr nɛ e kaŋɛ Mosis: “N nu kena be awɔr ka bee cha keeyi to.” ¹⁸Nɛ Mosis malɛ kaŋɛ Joshuwa: “Awɔr ere maŋ la kekɔmpɔɔso be awɔr ŋko kekɔntɔr be awɔr. Kashɛ be awɔr nɛ ma ere bee nu.” ¹⁹Mosis ka ba kaa fo keeyi na to nseŋ wu kenabi ka yil nɛ kacha yilso nɛ agbo pɛ mo ga nɛ e yige ajembu na to n lɛ kebee na be kaseto nɛ a buri to. ²⁰Kumo be kaman nɛ e ta kenabi nɛ basa na lɔŋɛ na malɛ n wɔtɔ edɛ to nɛ k ŋalga nɛ e kɔr kumo to fanɛ nyifu na nseŋ ta kumo n wɔtɔ nchu to n shin nɛ Israɛlebi na nuu amo. ²¹Kumo be loŋ be kaman nɛ Mosis bishi Ɛɛrɔn: “Manɛ nɛ basa ere wora fo nɛ fo shin nɛ le be kulubi gboŋgboŋi ere ba bumo so?” ²²Nɛ Ɛɛrɔn kaŋɛ mo le: “Sa maŋ kaŋ shin nɛ fo agbo e koso. Fo nyi kananɛ basa ere be nfɛra baa yuu kulubi so. ²³Amoso kusɔ nɛ b daŋ kaŋɛ ma nde: ‘Lɔŋɛ ebɔrɛ ko n sa anyi nɛ e baa juŋkpar anyi, ŋkpal manɛ so anyi maŋ naa nyi kusɔ nɛ k wora Mosis nɛ e juŋkpar anyi n lar Ijipt be kasawule so na.’ ²⁴Ndoŋ nna nɛ ma alɛ kaŋɛ bumo: ‘Ekama nɛ e kɔ shuwa be abitasɔ e lara amo m ba.’ Nɛ b lara n lara amo m ba sa ma nɛ n ta amo n wɔtɔ edɛ to nɛ a ŋalga. To, kananɛ kenabi na wora m ba nna na.” ²⁵Ndoŋ nna nɛ Mosis wu fanɛ Ɛɛrɔn e shin nɛ basa na nya bumo be aparsheŋ nseŋ ta bumo be amu n wora jenfembi ashi bumo doŋana be anishito. ²⁶Nɛ e yili keeyi na be kakpa nɛ baa bɔla a luri kumo to nseŋ kaŋɛ awɔrso: “Ekama nɛ e wɔ Enyɛnpe Ebɔrɛ na be kaba so, e ba ma kutɔ nfe!” Ndoŋ nna nɛ Livaiebi na kikɛ lar m ba shɛr ŋ kulti mo. ²⁷Nɛ e kaŋɛ bumo: “Enyɛnpe Israɛl be Ebɔrɛ na yɛ: ‘Men be ekama e kre to n ta mbe tokobi m bɛta n luri keeyi na to a kulti a mɔ esa kama nɛ e tu, hale nɛ amodoŋwura la mo da ŋko mo sipo ŋko mo teri ŋko mbe bechenashapo gba nna.’ ” ²⁸Ndoŋ nna nɛ Livaiebi nu Mosis be kɔnɔ nseŋ wora kusɔ nɛ e kaŋɛ fanɛ b wora na, nɛ basa beeŋ wora fanɛ ŋgboŋ asa kikɛ wu. ²⁹Kumo be kaman nɛ Mosis kaŋɛ Livaiebi na: “Kabre men lara men be amu n sa Enyɛnpe Ebɔrɛ na nna. Ŋkpal men ka tiŋ m mɔ men be mbinyɛnbi nɛ men daana nɛ men sipoana so, Enyɛnpe Ebɔrɛ na nɛfa menyi kabre.” ³⁰Kumo be ŋklade kachipurso nɛ Mosis kaŋɛ basa na le: “Men wora kulubi gboŋgboŋi ga, ama meeŋ naŋ bɛta n dii kebee na so n ya kule Enyɛnpe Ebɔrɛ na ŋ keni ashere e beeŋ ta men be alubi m paŋ menyi.” ³¹Ndoŋ nna nɛ Mosis bɛta n yɔ Enyɛnpe Ebɔrɛ kutɔ n ya kaŋɛ mo: “Kashenteŋto, basa na wora kulubi gboŋgboŋi, ŋkpal manɛ so b ta shuwa n lɔŋɛ bumo gbagba be ebɔrɛ nsaa shuŋ kumo. ³²Jande ta bumo be alubi m paŋ bumo, nɛ loŋ maaŋ tiŋ n wora, kumo ere fo lara ma ketre ashi kawɔl nɛ fo sibɛ fo basa be atre n wɔtɔ na to.” ³³Nɛ Enyɛnpe Ebɔrɛ kaŋɛ Mosis: “Bekama nɛ b wora alubi ŋ gbiti ma na be atre nɛ mee lara ashi kawɔl na to. ³⁴Amoso, bɛta n ya juŋkpar basa na n yɔ kakpa nɛ ŋ ŋini fo na nsaa nyi fanɛ meeŋ shin nɛ ma malaika e baa juŋkpar menyi, ama meeŋ gberge basa na kusoe kachako, ŋkpal bumo be kulubi na so.” ³⁵Kumo be kaman nɛ Enyɛnpe Ebɔrɛ bar kulɔ lubi ko m ba lɛ basa na so, ŋkpal b ka daŋ nyaŋ Ɛɛrɔn nɛ e lɔŋɛ shuwa be kenabi na so.

Israɛlebi ka lar Sainai be kebee na ase be asheŋ

¹Kachako nɛ Enyɛnpe Ebɔrɛ kaŋɛ Mosis: “Fo nɛ basa nɛ fo juŋkpar n lar Ijipt be kasawule so na e koso nfe n yɔ efuli nɛ n nase kɔnɔ fanɛ meeŋ ta n sa Eebraham nɛ Aizek nɛ Jeekɔb nɛ bumo be kaman to ebi kikɛ na so. ²Loŋ be kasawule na e kɔ kanya alegaiso nsaa wora ajibi nɛnɛ na. Meeŋ shin nɛ ma malaika e juŋkpar menyi nɛ men ju Keenanebi nɛ Amɔriebi nɛ Hitebi nɛ Pɛrizebi nɛ Hivebi nɛ Jebusiebi na kikɛ ashi loŋ be kasawule na so. ³Ama ma ere gbagba bre maaŋ naŋ tu menyi n yɔ, nɛ mannɛ aloŋ meeŋ mur menyi ekpa to n loge, ŋkpal men be amukpakpaso so.” ⁴Basa na ka nu loŋ be baru lubi na nɛ b fara a shu keeli nsaa lara bumo be shuwa be abitasɔ nɛ b daŋ wɔtɔ na a lɛ. ⁵B daŋ wora ade kikɛ nna ŋkpal Enyɛnpe Ebɔrɛ na ka daŋ kaŋɛ Mosis le so: “Men la amukpakpasowuraana nna. M baŋ tu menyi n yɔ anishito gbrɛ kama gba, meeŋ mur menyi kuraa, amoso ekama e lara mbe abitasɔ mo so pɔɛŋ nɛ n yili kusɔ nɛ meeŋ wora menyi na.” ⁶Amoso b ka baŋ lar Sainai be kebee na ase n yɔ anishito, Israɛlebi na maŋ naŋ wɔtɔ shuwa ŋko gbiti be abitasɔ.

Enyɛnpe Ebɔrɛ be wajɛbu na be asheŋ

⁷Saŋkama nɛ Israɛlebi na baŋ ya yuu bumo be keeyi, Mosis daa ta wajɛbu ko nna n lar ekarso m barga n yuu ŋ kɔr nsaa tre kumo, ‘nshɛr be wajɛbu.’ Ekama nɛ e daa sha kekule Ebɔrɛ daa yɔ nshɛr be wajɛbu na ase nna n ya kule. ⁸Saŋkama malɛ nɛ Mosis lar a yɔ nshɛr be wajɛbu na ase, basa na kikɛ bee lar nna n yili bumo be ewajɛbuana be mbuna to a keni mo loŋ hale nɛ e ya luri kumo to. ⁹Mosis malɛ baŋ luri nshɛr be wajɛbu na to, kuwɔlpa nɛ k niŋi serr fanɛ shabɔrɛ na bee ba nna m ba yili wajɛbu na be kabuna to nɛ Enyɛnpe Ebɔrɛ e bɔla kuwɔlpa na to nɛ mo nɛ Mosis e malga. ¹⁰Saŋkama nɛ basa na baŋ wu kuwɔlpa na ka yili nshɛr be wajɛbu na be kabuna to, bumo kikɛ bee gbir bumo be wajɛbu be kabuna to nna a bunyaŋ. ¹¹Enyɛnpe Ebɔrɛ na nɛ Mosis daa malga abar kutɔ nna fanɛ esa nɛ mo teri na. Kumo be kaman nɛ Mosis e bɛta m ba keeyi to. Mbe kayɛrbi, nɛ baa tre Joshuwa nɛ e la Nun pibinyɛn na bre daa shir a wɔ nshɛr be wajɛbu na to nna.

Enyɛnpe Ebɔrɛ ka nase kɔnɔ fanɛ e beeŋ baa wɔ mbe basa kutɔ be asheŋ

¹²Ade kikɛ be kaman nɛ Mosis kaŋɛ Enyɛnpe Ebɔrɛ le: “Kashenteŋ nna fanɛ fo e kaŋɛ ma fanɛ n ya keta basa ere n yɔ kɔnɔ naseso be kasawule na so, ama fo alɛ maŋ ŋini ma esa nɛ e beeŋ ba chɛ ma to. Fo baŋ kaŋɛ ma nna fanɛ: ‘N nyi fo nɛnɛ nɛ fo asheŋ bee par ma.’ ¹³To, nɛ ma shɛŋ bee par fo bre, ŋini ma fo ekpaana nɛ m pin fo nfɛra, nsaa shuŋ fo a wora fo aparsheŋ. Baa nyiŋi fanɛ fo gbagba e lara basa ere nɛ b la feya.” ¹⁴Ndoŋ nna nɛ Enyɛnpe Ebɔrɛ kaŋɛ: “Meeŋ tu fo n yɔ, nɛ fo kagbene e wushi.” ¹⁵Nɛ Mosis malɛ kaŋɛ mo: “Nɛ fo baa maaŋ tu anyi n yɔ, kumo ere, fo sa maŋ kaŋ shin nɛ an lar nfe. ¹⁶Nɛ fo maŋ tu anyi n yɔ, nuso nɛ esa beeŋ wora m pin ma nɛ fo basa be asheŋ ka bee par fo? Fo kebaawɔ anyi kutɔ e naaŋ shin nɛ an baa kɔr bomin kikɛ to ashi durnya ere to.” ¹⁷Ndoŋ nna nɛ Enyɛnpe Ebɔrɛ kaŋɛ Mosis: “Ŋkpal ŋ ka nyi fo nɛnɛ nɛ fo asheŋ malɛ bee par ma so, meeŋ wora kusɔ nɛ fo kaŋɛ na gbagba chap.” ¹⁸Kede be kaman nɛ Mosis kaŋɛ: “Kumo ere, jande, shin nɛ n wu fo kemaŋkura.” ¹⁹Nɛ e kaŋɛ Mosis: “Meeŋ shin nɛ ma kemankura kikɛ e bɔla fo anishito n choŋ nɛ n ti ma ketre ŋ ŋini fo. Ma e la Enyɛnpe Ebɔrɛ nɛ mee wu kuwɔr nsaa lara ma kasha a ŋini bekama nɛ n lara na. ²⁰Ama m maaŋ shin nɛ fo wu ma anishito bre, ŋkpal manɛ so, esa kama maaŋ tiŋ n wu ma anishito nseŋ ji efute. ²¹Amoso yili kefalta ere ase, ²²saŋɛ na so nɛ ma kemaŋkura na ba kaa choŋ, meeŋ ta fo n wɔtɔ kefalta laŋ to n ta ma enɔ m buu fo so pɔɛŋ nseŋ choŋ. ²³Kumo be kaman nɛ m bugi ma enɔ ashi fo so nɛ fo wu ma kaman, ama fo maaŋ wu ma anishito bre.”

Ajembu pantraŋ pantrambi popɔr na be asheŋ

(Ditɛronɔmi 10:1-5)

¹Asheŋ nɛ a wora na be kaman nɛ Enyɛnpe Ebɔrɛ kaŋɛ Mosis: “Naŋ ku ajembu pantraŋ pantrambi anyɔ nɛ a baa du fanɛ sososo peya na nɛ n naŋ sibɛ mmalga koŋwule nɛ n daŋ sibɛ adra nɛ fo bure na so na n deŋi amo so. ²Wora shiriya echefo kachipurso m ba tu ma Sainai be kebee na be esoso. ³Esa kama e sa maŋ kaŋ tu fo m ba kebee na be esoso ŋko n shin nɛ n wu mo ashi kebee na ekpa kikɛ. Sa maŋ shin nɛ mbolpɔ ŋko mboe ŋko ana gba e ji m mata kebee na.” ⁴Ndoŋ nna nɛ Mosis shɛl ajembu anyɔ na fanɛ sososo peya na gbagba chap. Kumo be ŋklade kachipurso nɛ e wule ŋ koso n ta amo n yɔ Sainai be kebee na so, kananɛ Enyɛnpe Ebɔrɛ baŋ kaŋɛ mo na gbagba chap. ⁵Ndoŋ nna nɛ Enyɛnpe Ebɔrɛ bɔla kuwɔlpa to m ba yili Mosis kutɔ ndoŋ nseŋ ti mbe ketre cheembi na: ‘Enyɛnpetale Ebɔrɛ.’ ⁶nseŋ choŋ Mosis be anishito ŋ kaŋɛ awɔrso: “Ma e la Enyɛnpetale Ebɔrɛ. Ebɔrɛ nɛ kuwɔrwu bɔlɔ ma to nɛ m maa nya agbo manaŋ manaŋ nɛ ma kasha shi ga nɛ mee yɛ nsaa wora na. ⁷Ma e naa ŋini benananyɛn ŋgboŋto ŋgboŋto kasha nsaa ta basa be edalubi nɛ kumukpakpaso nɛ alubi a paŋ bumo na. Ama ma alɛ maa kplaŋ alubiworapoana be kewora n jija so a maa gberge bumo kusoe. Ma e naa kpal betuto nɛ benio be alubi so e gberge bumo be mbia kusoe hale n ya fo bumo be kenanafofo nɛ kenana gbiramuli na.” ⁸Epul na to nɛ Mosis gbir m bunyaŋ Ebɔrɛ na ⁹nseŋ kaŋɛ: “O, n Nyɛnpe Ebɔrɛ, nɛ ma asheŋ bee par fo, kumo ere mee kule fo nna nɛ fo tu anyi n yɔ. N nyi basa ere ka kɔ amu kpakpaso, ama ta anyi be ashuŋ lubi nɛ alubi kikɛ m paŋ anyi nseŋ ta anyi ŋ ki fo gbagba be basa.”

Kɔnɔkoŋwule be ŋkre popɔr na be asheŋ

(Ɛksodɔs 23:14-19; Ditɛronɔmi 7:1-5; 16:1-17)

¹⁰Ndoŋ nna nɛ Enyɛnpe Ebɔrɛ kaŋɛ Mosis: “Naniere ma nɛ Israɛlebi wora kɔnɔkoŋwule be ŋkre, ma alɛ beeŋ wora asheŋgboŋ nɛ a maŋ naŋ wora basa kama to ashi durnya to kikɛ bumo be anishito. Efuliana nɛ a kulti menyi na be basa beeŋ wu asheŋ tumase nɛ a bee keta kufu nɛ ma, Enyɛnpe Ebɔrɛ na beeŋ wora n sa menyi. ¹¹Amoso, nɛ men bɛ ma mmalga nɛ mee ta a sa menyi kabre ere so, meeŋ ju Amɔriebi nɛ Keenanebi nɛ Hitebi nɛ Pɛrizebi nɛ Hivebi nɛ Jebusiebi ashi kasawule ere so. ¹²Ama men baa da so nɛ menyi nɛ kasawule na so be basa e sa maŋ kaŋ wora kɔnɔkoŋwule be ŋkre kikɛ. Ŋkpal manɛ so, nɛ men wora loŋ, k beeŋ ki katiyɛ lubi m pɛ menyi. ¹³Ama men bure m bure bumo be agbirana nɛ amo be elambuana nseŋ ku kegbirche Ashira be ndulgi be ndibiana na n lɛ. ¹⁴Men sa maŋ kaŋ shuŋ kegbir kama, ŋkpal manɛ so, ma e la Enyɛnpe Ebɔrɛ, nɛ ma nɛ shɛŋ shɛŋ maa ji kechamana na. ¹⁵Men sa maŋ kaŋ shin nɛ menyi nɛ kasawule na so be basa e wora kɔnɔkoŋwule be ŋkre kikɛ, nɛ mannɛ aloŋ, b baa lɔŋɛ bumo be agbirana, baaŋ tre menyi n fule menyi nɛ men ji agbirjibi na be ako. ¹⁶Men baŋ ta kasawule na so be mbichesobi n sa men be mbinyɛnsobi loŋ be mbichebi nɛ baa bɛ agbir so na beeŋ shin nɛ men be mbinyɛnsobi na gba e shuŋ bumo be agbir na. ¹⁷Men sa maŋ kaŋ ta kebɛlso n lɔŋɛ kegbir a bunyaŋ kumo. ¹⁸Men baa bɛ bodobodo nɛ k maŋ kɔ yiisi be daŋkare be kejigboŋ na so fanɛ kananɛ n nase n sa menyi na. Kufɔl nɛ baa tre Abib na baŋ fo, men we bodobodo nɛ a maŋ kɔ yiisi bɔkwe lelemu, ŋkpal manɛ so, loŋ be kufɔl na to nɛ men daŋ lar Ijipt be kasawule so. ¹⁹Menyi alɛ e baa nyi fanɛ men be wurkoŋnyɛn kikɛ, n ta men be asɔbɔya fanɛ mbolpɔ nɛ mboe nɛ ana gba peya n ti so, la meya nna. ²⁰Ama men ta kubolpɔbi n tal kurma bre peya to nɛ mannɛ aloŋ men bu kumo be kubɔ. Ama men be wurkoŋ nyɛnso bre, menyee tɔ bumo nna n yige.

Men be ekama malɛ e sa maŋ kaŋ ta enɔfuloŋ m ba ma anishito m ba bunyaŋ ma. ²¹Nchɛnshe e daga fanɛ men ta n shuŋ menyi be ashuŋ nseŋ wushi kachɛ shunusopo na. Hale k la kudɔ ŋko kasɔteŋi be saŋɛ gba, a daga fanɛ men wushi kumo be kamɔnchɛ. ²²Men baŋ ba kaa teŋi men be ayu juŋkparsoana na, men wora Kasɔteŋi be daŋkare be Kejigboŋ na. Kafɛ na malɛ naŋ ya kaa fo ekar nɛ menyee chala men be adɔjibi na, men wora Abuu to be daŋkare be Kejigboŋ na malɛ. ²³Ade kikɛ be buushi, kafɛ kikɛ to ale asa nɛ men be benyɛn beeŋ ba bunyaŋ ma Enyɛnpetale Israɛl be Ebɔrɛ na. ²⁴Meeŋ ju efuli pɔtɛana be basa kikɛ nseŋ kpalga men be kasawule to. Esa kama malɛ beeŋ baa ŋana keta men be nsawule jemanɛ nɛ men yɔ nɛ men ya bunyaŋ ma, men Nyɛnpe Ebɔrɛ na ale asa kafɛ kikɛ to na. ²⁵Men sa maŋ kaŋ ta kusɔ kama nɛ k kɔ yiisi n ti kusɔbɔya so n lara sarga n sa ma. Menyi alɛ e sa maŋ kaŋ shin nɛ Kebansonchoŋ be Kejigboŋ be kusɔbɔya be eblaŋ kama e yili ŋklade. ²⁶Kafɛ kikɛ men baa ta men be adɔjibi nɛ menyee juŋkpar n teŋi a ba ma, Enyɛnpe men be Ebɔrɛ na be kowu to. Men sa maŋ kaŋ ta kusɔbɔya kikɛ be kenyipochu n daŋɛ kumo pibi.” ²⁷Ade kikɛ be kaman nɛ Enyɛnpe Ebɔrɛ na naŋ kaŋɛ Mosis le: “Sibɛ mmalga nɛ ma nɛ fo nɛ Israɛlebi na yili so n wora kɔnɔkoŋwule be ŋkre na n nase.” ²⁸Nchɛ adena nɛ nnyɛ adena nɛ Mosis daŋ ta a wɔ Enyɛnpetale Ebɔrɛ na kutɔ nsaa maa ji ŋko a nuu. Loŋ be saŋɛ nɛ Enyɛnpe Ebɔrɛ daŋ sibɛ kɔnɔkoŋwule be ŋkre be mmalga na n deŋi ajembu pantraŋ pantrambi anyɔ na so. Amo e la mbra kudu na.

Mosis ka shi kebee na so m ba be asheŋ

²⁹Mosis ka daŋ shi Sainai be kebee na so ŋ keta Mbra Kudu na m ba na, mbe anishiakpa daa kpa edɛ nna ŋkpal e ka yɔ Enyɛnpe Ebɔrɛ be anishito nɛ mo nɛ mo malga na so, ama mo alɛ daa maŋ nyi mbe anishiakpa ka du loŋ. ³⁰Ɛɛrɔn nɛ Israɛlebi nɛ b ka na kikɛ ka wu kananɛ mbe anishiakpa bee kpa edɛ na, nɛ kufu pɛ bumo nɛ b maŋ tiŋ nɛ b yɔ mo kutɔ. ³¹Ndoŋ nna nɛ Mosis tre bumo nɛ Ɛɛrɔn nɛ basa na be bejuŋkparpoana na kikɛ ba mo kutɔ nɛ mo nɛ bumo malga. ³²Kumo be kaman nɛ Israɛlebi na kikɛ ba shɛr ŋ kulti mo nɛ e ta mbra nɛ Enyɛnpe Ebɔrɛ daŋ sa mo Sainai be kebee na so na kikɛ n sa bumo. ³³Mosis ka malga bumo kutɔ n loge nɛ e ta shata m buu mbe anishi so. ³⁴Ama saŋkama nɛ Mosis bee yɔ Enyɛnpe Ebɔrɛ be anishito ashi nshɛr be wajɛbu na to nɛ mo nɛ mo e ya malga, e bee bugi shata na nna. Kumo be kaman nɛ e baŋ lar m ba nɛ e ba kaŋɛ Israɛlebi kusɔ nɛ Enyɛnpe Ebɔrɛ kaŋɛ na, ³⁵baa wu mbe anishiakpa ka bee kpa edɛ nna. Kumo be kaman nɛ Mosis naŋ ta shata na m buu hale n ya fo saŋɛ nɛ e beeŋ naŋ yɔ n ya malga Enyɛnpe Ebɔrɛ na kutɔ.

Kewushiachɛ na be asheŋ

¹Ade kikɛ be kaman nɛ Mosis tre Israɛlebi na kikɛ m ba shɛr ŋ kaŋɛ bumo: “Asɔ nɛ Enyɛnpe Ebɔrɛ yili fanɛ men baa wora nde: ²Nchɛnshe e daga fanɛ men shuŋ menyi be ashuŋ. Kachɛ shunusopo na bre la Enyɛnpe Ebɔrɛ be Kewushiachɛ cheembi nna. Esa kama nɛ e shuŋ kushuŋ kama kamɔnchɛ, daga fanɛ b mɔ mo. ³Men sa maŋ kaŋ puga edɛ gba menyi be elaŋana to loŋ be kachɛ na.”

Asɔ nɛ baaŋ ta n lɔŋɛ Enyɛnpe be wajɛbu na be asheŋ

(Ɛksodɔs 25:1-9)

⁴Kede be kaman nɛ Mosis naŋ kaŋɛ Israɛlebi na kikɛ le: “Kusɔ nɛ Enyɛnpe Ebɔrɛ naŋ kaŋɛ nde: ⁵‘Men lara kusɔ kama be kakɛ m bar Enyɛnpe Ebɔrɛ na. Esa kama nɛ e yili kumo mbe kagbene to fanɛ e beeŋ bar Enyɛnpe Ebɔrɛ kakɛ, e bar shuwa ŋko gbiti ŋko danyaŋ ⁶ŋko ago be jese lela ŋko buru be jese ŋko jese peper kpaw ŋko ejese peper kunɔkunɔ ŋko ago be wajɛchɛbi mɔlmɔlbi ŋko wajɛ nɛ b ta kaboe be afuibi n wora ⁷ŋko kpakpa be kawɔl nɛ b nyɔɔ kepeper ŋko churu be kawɔl nɛ b gbiti nɛnɛ ŋko akasiadibi ⁸ŋko ɔlif be ŋku nɛ baaŋ baa ta a chɔɔ efitila so ŋko asɔ nɛ baa ta a wora ŋku nɛfaso ŋko efɛa belbelso be duwu ⁹ŋko yawu kpakpaso be ajembu nyɛkpɛso nɛ amo nɛ baa tre ɔniks na ŋko amaŋkanibi nɛ baa ta a mata bɔrɛmatapo nimuso be piŋi nɛ baa tre ɛfɔd na nɛ demuji be kɔlgu na so na.’ ”

Enyɛnpe be wajɛbu na to be asɔ be asheŋ

(Ɛksodɔs 39:3-43)

¹⁰“Amoso, menyi to be bekama nɛ b nyi ashuŋwurbi be kushuŋ na e ba m ba wora asɔ kama nɛ Enyɛnpe Ebɔrɛ kaŋɛ ere: ¹¹Loŋ be asɔ na e la Enyɛnpe be wajɛbu na nɛ kumo be buuso nɛ kumo be akɔltobi nɛ kumo be eshabɔrɛ nɛ elarbeŋ nɛ eyɔri nɛ ndibi yuuso nɛ amo be atɔl, ¹²nɛ kɔnɔkoŋwule be ŋkre be deka na nɛ kumo be ndibi nɛ b kɔ a ta kumo na nɛ kumo be buuso nɛ baa tre kuwɔr be kakpa na nɛ patisa kuŋso na ¹³nɛ teebɔl na nɛ kumo be ndibi nɛ b kɔ a ta kumo na nɛ kumo be asɔwurbi kikɛ nɛ bodobodo nɛ b kɔ a lara sarga a sa Ebɔrɛ na, ¹⁴nɛ kefitilatɔl nɛ efitila na nɛ amo be ŋku nɛ asɔwurbi ¹⁵nɛ duwu be bɔrɛsure na nɛ kumo be ndibi nɛ b kɔ a ta kumo nɛ ŋku nɛfaso nɛ efɛa belbelso be duwu nɛ wajɛbu na be kabuna to be patisa na ¹⁶nɛ sarga chɔɔso be bɔrɛsure nɛ kumo be danyaŋ be kenyembi ŋeseasɔ nɛ kumo be ndibi nɛ b kɔ a ta kumo na nɛ kumo be asɔwurbi kikɛ nɛ danyaŋ be katishaŋgboŋ nɛ kumo be ketɔl ¹⁷nɛ kelɔnɛ na be epatisa nɛ kumo be ndibi yuuso nɛ amo be atɔl nɛ kumo be kabuna to be patisa ¹⁸nɛ wajɛbu na nɛ kelɔnɛ na be ayirbi nɛ amo be efɔlana ¹⁹nɛ epiŋi lueso lela cheembi nɛ bɔrɛmatapo nimuso Ɛɛrɔn nɛ mbe bibinyɛn beeŋ baa buu saŋɛ nɛ baa shuŋ wajɛbu cheembi na to na.”

Basa na ka bar bumo be ŋkɛ be asheŋ

²⁰Le be mmalga ere be kaman nɛ Israɛlebi na kikɛ lar Mosis kutɔ. ²¹Ekama nɛ e daa sha kesa kusɔ ko, daŋ bar mbe kakɛ nna fanɛ b ta n wora Enyɛnpe be wajɛbu na nɛ asɔbuuso cheembi na. ²²Beche nɛ benyɛn kikɛ, daŋ bar shuwa be akonde nɛ mpinibi nɛ abɔtoshembi nɛ abitasɔ be yiri yiri kikɛ nna m ba sa Enyɛnpe Ebɔrɛ na. ²³Bumo to be ekama nɛ e daa kɔ ago be jese lela nɛ buru be jese nɛ jese peper kpaw nɛ ejese peper kunɔkunɔ nɛ ago be wajɛchɛbi mɔlmɔlbi nɛ kaboe be afuibi be wajɛ nɛ kpakpa be kawɔl nɛ b nyɔɔ kepeper nɛ churu be kawɔl daŋ bar kumo nna. ²⁴Bekama malɛ nɛ b daa beeŋ tiŋ n nya gbiti ŋko danyaŋ daŋ bar amo m ba sa Enyɛnpe Ebɔrɛ fanɛ bumo be kakɛ, ekama malɛ nɛ e daa kɔ akasiadibi nɛ k beeŋ tiŋ n shuŋ kushuŋ na gba daŋ bar kumo. ²⁵Bumo to be beche nyiashempo nɛ b nyi kafɛaŋ na kikɛ daŋ bar ago be ejese lela nɛ ejese nɛ a la buru nɛ ejese peper kpaw nɛ ejese peper kunɔkunɔ nɛ ago be wajɛchɛbi mɔlmɔlbi nɛ kusɔbɔya be afuibi peper nna. ²⁶Beche na to be bekama nɛ b daa sha kechɛto n shuŋ nsaa kɔ kafɛaŋ be kenyi daŋ ta mboe be afuibi nna n wora ejese. ²⁷Bejuŋkparpoana na malɛ daŋ bar yawukpakpaso be ajembu be yiriyiri nɛ baa ta amo a mata bɔrɛmatapo nimuso be ɛfɔd nɛ mbe demuji be kɔlgu na so nna. ²⁸B daŋ bar efɛa belbelso be asɔ warabi nɛ b ta n wea ɔlif be ŋku to a wɔtɔ efitila na nɛ ŋku nɛfaso na to. ²⁹Israɛlebi na be benyɛn nɛ beche nɛ b daa sha nɛ b chɛ kushuŋ na to na, daa bar bumo be ŋkɛ nna fanɛ b ta n shuŋ Enyɛnpe Ebɔrɛ na be kushuŋ nɛ e ta n sa Mosis na.

Basa nɛ baaŋ wora Enyɛnpe be wajɛbu na be kushuŋ be asheŋ

(Ɛksodɔs 31:1-11)

³⁰Ade be kaman nɛ Mosis kaŋɛ Israɛlebi na le: “Men nu nfe, Enyɛnpe Ebɔrɛ lara Besalɛl nɛ e la Yuri pibinyɛn nsaa la Hur mo nanabi na nna ashi Juda be kanaŋ to na ³¹n ta mbe kiyoyu n wɔtɔ mo to nseŋ sa mo kasɔwora kikɛ be kenyi nɛ ketiŋ n wora be eleŋ nɛ kasɔlɔŋɛ be kepinto kikɛ nyam be nfɛra. ³²Saŋɛ na so e beeŋ baa tiŋ a ta nfɛra a chaŋ asɔ nsaa ta shuwa nɛ gbiti nɛ danyaŋ a lɔŋɛ asɔ na ³³nsaa tiŋ a shɛl yawu kpakpaso be ajembu nyɛkpɛso a nyisi a wɔtɔ amo be mpinibi to nseŋ naa tiŋ a ta ndibi a shɛl asɔ. ³⁴Enyɛnpe Ebɔrɛ na sa mo ere Besalɛl nɛ Oholiab nɛ e la Ahisamak pibinyɛn ashi Dan be kanaŋ to na kenyi nna nɛ b tiŋ n ta bumo be kasɔwora be kenyi na ŋ ŋini basa pɔtɛ. ³⁵E sa bumo kasɔwora be kenyi nna nɛ b baa tiŋ a ta ago be jese lela nɛ buru be jese nɛ jese peper kpaw nɛ ejese peper kunɔkunɔ a jɔ asɔ ŋko a lue ewajɛ be yiriyiri. Bumo alɛ bee tiŋ a wora ashuŋ be yiriyiri kikɛ nyam nsaa tiŋ a ji asɔ kebita kenyiso.”

¹Besalɛl nɛ Oholiab nɛ bekama nɛ mo ere Enyɛnpe Ebɔrɛ na sa kenyi nɛ kepinto nɛ b nyi kusɔ kama nɛ k daga fanɛ b wora a laŋɛ wajɛbu cheembi na be kaplɛa so na beeŋ wora asheŋ kananɛ Enyɛnpe Ebɔrɛ na kaŋɛ gbagba chap.

Israɛlebi na ka bar bumo be ŋkɛana be asheŋ

²Kumo be kaman nɛ Mosis tre Besalɛl nɛ Oholiab nɛ benyiashempo kama nɛ Enyɛnpe Ebɔrɛ sa kasɔwora be kenyi nɛ basa nɛ baa sha kechɛto n shuŋ na kikɛ ŋ kaŋɛ bumo fanɛ b fara kushuŋ na. ³Ndoŋ nna nɛ Mosis ta ŋkɛ nɛ Israɛlebi na bugi ŋgbene n lara m ba fanɛ b ta n shuŋ wajɛbu cheembi na be kushuŋ na kikɛ m bɔɔ bumo enɔ. Ama karechɛ kikɛ, Israɛlebi na daŋ baa bar ŋkɛ nna m ba kaa sa Enyɛnpe Ebɔrɛ. ⁴Kumo be kaman nɛ benyiashempo nɛ b daa wora wajɛbu cheembi na be kushuŋ na yɔ Mosis kutɔ ⁵n ya kaŋɛ mo le: “Keni, basa na kraŋ baa bar ŋkɛ nna, hale naniere gba asɔ na naŋ baŋ so kananɛ Enyɛnpe Ebɔrɛ kaŋɛ fanɛ an ta n wora kushuŋ na.” ⁶Ndoŋ nna nɛ Mosis sa ebɔl keeyi na to fanɛ ekama e sa maŋ naŋ bar kusɔ kama a yɔ wajɛbu cheembi na be kewora be kaplɛa so. Kumo be kaman pɔɛŋ nɛ basa na yige kenaabar asɔ, ⁷ŋkpal manɛ so, asɔ nɛ b daŋ bar na gba daa beeŋ tiŋ n shuŋ kushuŋ na kanaŋkamaso.

Ebɔrɛ be wajɛbu be keyu be asheŋ

(Ɛksodɔs 26:1-37)

⁸Ade kikɛ be kaman nɛ basa nɛ b daa shuŋ kushuŋ na be bumo nɛ b daa kɔ kenyi na, lɔŋɛ Ebɔrɛ be wajɛbu na. B daŋ ta ago be ejese lela mɔlmɔlbi nɛ ejese nɛ a la buru nɛ apeper kpaw nɛ apeper kunɔkunɔ nna n lue epatisa kudu nseŋ shin nɛ esa nɛ e nyi kajɔ ta kebasibi nɛ jese n jɔ n jɔ chɛrubim n deŋi n deŋi epatisa na so. ⁹Epatisa na kikɛ daa sasa nna. Amo be kekama be nteŋ to daa la fanɛ ayadra adena nɛ anyɔ nɛ amo be mparto malɛ daa la ayadra ashe nna. ¹⁰B daŋ baa epatisa na be anunu nna n chɛ abar so. ¹¹Kumo be kaman nɛ b ta wajɛchɛbi buru m baa asɔ kulkulbi fanɛ afirgi na m mata m mata epatisagboŋ anyɔ na be akel to. ¹²B baa wajɛ buru be afirgi adunu m mata patisagboŋ ko be kekilso nseŋ baa adunu malɛ m mata kenyɔsopo na be kekilso nɛ afirgi na karga abar so nseŋ shoŋi abar. ¹³Ade malɛ be kaman nɛ b ta shuwa m bel akɔltobi adunu, ŋ kɔl epatisagboŋ anyɔ na be afirgi adununu na to, nɛ epatisagboŋ anyɔ na ki wajɛbu koŋwule. ¹⁴Kumo alɛ be kaman nɛ b ta mboe be afuibi n lue ewajɛ kudukako nɛ a ki Ebɔrɛ be wajɛbu na be buuso. ¹⁵B daŋ shin nɛ amo kikɛ sasa nna nɛ amo be kekama be nteŋ la ayadra adena nɛ anyɔ nɛ mpar malɛ la ayadra ashe, ¹⁶nɛ b baa ewajɛ na be anu n chɛ abar so nɛ a ki patisagboŋ koŋwule nseŋ baa ashe nɛ a ka na malɛ nɛ a ki patisagboŋ koŋwule ¹⁷nseŋ baa asɔ kulkulbi fanɛ afirgi na be adununu n chɛ m mata m mata epatisagboŋ anyɔ na be akel so. ¹⁸Amo be kaman nɛ b ta danyaŋ m bɛl akɔltobi adunu, nseŋ ta amo ŋ kɔl afirgi adununu na to, nɛ epatisagboŋ anyɔ na ki koŋwule. ¹⁹Ade be kaman nɛ b naŋ ta ekpakpa be nwɔl nɛ b nyɔɔ m pere n lɔŋɛ wajɛbu na be buuso nyɔsopo, nseŋ ta echuru be nwɔl nɛ b gbiti nɛnɛ ŋ ki kumo be lalaloge be buuso. ²⁰Kumo alɛ be kaman nɛ b ta akasiadibi niŋiso ŋ ki Ebɔrɛ be wajɛbu na be ndibi yuuso. ²¹Ndibi yuuso na be kekama be nteŋ to daa la ayadra kuduanu nna nɛ amo be bumburuŋ malɛ daa la ayadra anyɔ. ²²Nɛ b gbir ayir anyɔnyɔ ndibi yuuso na be kekama ase nɛ ayir na bɛ abar so. Loŋ nɛ b daŋ yuu Ebɔrɛ be wajɛbu na be ndibi yuuso na kikɛ. ²³B daŋ yuu ndibi yuuso na be adunyɔ Ebɔrɛ be wajɛbu na be kelargato be kaseto be kaba so nna. ²⁴B daŋ ta gbiti nna n lɔŋɛ ndibi yuuso na be atɔl adena, nɛ atɔl anyɔ wɔ kedibi yuuso kama be kaseto. ²⁵Kede be kaman nɛ b yuu ndibi yuuso adunyɔ Enyɛnpe Ebɔrɛ be wajɛbu na be kelargato be esoso be kaba so, ²⁶nseŋ lɔŋɛ gbiti be atɔl adena nɛ atɔl anyɔ wɔ kedibi yuuso kama be kaseto. ²⁷Kumo be kaman nɛ b lɔŋɛ Ebɔrɛ be wajɛbu na be epeŋitɔrkpa be kaba so malɛ be ndibi yuuso ashe, ²⁸nɛ kumo be abonfu to be ndibi yuuso anyɔnyɔ ²⁹nseŋ shin nɛ a fara kaseto m mata abar hale n ya fo esoso nɛ b ta kepinibi n wɔtɔ amo to esoso. ³⁰Amo so ndibi yuuso na daŋ wora aburwa nna na nɛ amo be gbiti be atɔl malɛ wora kuduashe. Atɔl na be anyɔnyɔ e wɔ ndibi yuuso na be kekama be kaseto. ³¹Ade kikɛ be kaman nɛ b ta akasiadibi blɔmbi tentembi kuduanu ŋ ki ndibi deŋiso, nseŋ ta amo be anunu n deŋi Enyɛnpe be wajɛbu na be kelargato be esoso nɛ kaseto be ndibi yuuso na so ³²nseŋ ta anu malɛ n deŋi kumo be epeŋitɔrkpa be kaba so be ndibi yuuso na so. ³³B daŋ shin nɛ kedibi deŋiso nɛ k wɔ ndibi blɔmbi deŋiso anu na be nferinto na fara kebonfu ko nna n ya fo kuko. ³⁴Kumo be kaman nɛ b ta shuwa m mata ndibi yuuso na kikɛ so nseŋ ta shuwa n lɔŋɛ amo be mpinibi nɛ a bee pɛ ndibi blɔmbi deŋiso na to a keta na, nseŋ ta shuwa m mata ndibi blɔmbi deŋiso na gba so. ³⁵Ade kikɛ be kaman nɛ b ta ejese nɛ a la buru nɛ apeper kpaw nɛ apeper kunɔkunɔ nɛ ago be ejese lela mɔlmɔlbi n lue patisa nseŋ shin nɛ esa nɛ e nyi kajɔ ta kebasibi nɛ jese n jɔ n jɔ chɛrubim na n deŋi n deŋi epatisa na so. ³⁶Nseŋ ta akasiadibi n lɔŋɛ ndibi yuuso ana n ta shuwa m mata amo so. Kumo be kaman nɛ b ta shuwa n lɔŋɛ amo be akɔltobi nseŋ ta gbiti n lɔŋɛ amo be atɔl ana. ³⁷B daŋ shin nna nɛ esa nɛ e nyi kalue ta ejese buru nɛ apeper kpaw nɛ apeper kunɔkunɔ nɛ ago be ejese lela mɔlmɔlbi n lue Ebɔrɛ be wajɛbu na be kabuna be patisa na nseŋ jɔɔ kumo. ³⁸Kumo be kaman nɛ b ta patisa na n shiga akasiadibi yuuso anu nɛ b ta shuwa m mata amo so nɛ a kɔ shuwa be akɔltobi nɛ danyaŋ be atɔl anu na so.

Kɔnɔkoŋwule be ŋkre be deka be asheŋ

¹Besalɛl daŋ ta akasiadibi n lɔŋɛ deka nɛ kumo be nteŋ to la ayadra ana nɛ bargato nɛ mparto malɛ la ayadra anyɔ nɛ jeŋgreŋ la ayadra anyɔ. ²Kumo be kaman nɛ e ta shuwa gbagba m mata m mata deka na be epunto nɛ kaman kikɛ nseŋ lɔŋɛ shuwa be kekrande m mata kumo ŋ kulti ³nseŋ bɛl shuwa be mpinibi ana n wɔtɔ kumo be aya ana na to. ⁴E ka wora loŋ n loge na nɛ e naŋ shɛl akasiadibi tenteŋ anyɔ nseŋ ta shuwa m mata m mata amo so. ⁵Kumo be kaman nɛ e yisi ndibi na n wɔtɔ mpinibi nɛ a wɔ deka na be akel to na to nɛ b baa pɛ to a maŋ kumo so. ⁶Kede be kaman nɛ e ta shuwa gbagba n lɔŋɛ deka na be buuso nɛ baa tre kuwɔr be kakpa na nɛ kumo be nteŋ to la ayadra ana nɛ mparto malɛ la ayadra anyɔ. ⁷Kumo alɛ be kaman nɛ e bɛa shuwa to n lɔŋɛ chɛrubim anyɔ n yuu kuwɔr be kakpa na be nteŋ to be ekarso na. ⁸E lɔŋɛ chɛrubim anyɔ na nna nɛ amo nɛ buuso na kikɛ la kukoŋwule. ⁹Chɛrubim na daŋ kilgi anishito nna n shoŋi abar nseŋ parga atɛ to m buu deka na be buuso na so.

Teebɔl na be asheŋ

¹⁰Kumo be kaman nɛ b ta akasiadibi n lɔŋɛ teebɔl nɛ kumo be nteŋ to la ayadra asa nɛ mparto la keyadra koŋwule nɛ bargato, nɛ jeŋgreŋ malɛ la ayadra anyɔ, ¹¹nseŋ ŋalga shuwa n wurge kumo kikɛ so ¹²nseŋ naŋ ta shuwa n lɔŋɛ kekrande nɛ kumo be mpar sa fanɛ enɔ be mparto ŋ kulti kumo be ekarso kikɛ. ^13-14Kumo be kaman nɛ b wora shuwa be mpinibi ana n chɔga teebɔl na be abonfu ana be aya na kikɛ so, saŋɛ na so baaŋ baa ta ndibi nɛ b shɛl na a wɔtɔ amo to a maŋ teebɔl na so. ¹⁵B ta akasiadibi nna n shɛl ndibi nɛ baaŋ pɛ to a maŋ teebɔl na so a keta na nseŋ ŋalga shuwa n wurge amo kikɛ so. ¹⁶Nɛ b ta shuwa gbagba n lɔŋɛ teebɔl na so be eprete nɛ mba nɛ echeenshi nɛ kapugboŋ nɛ baa ta sarga be asɔnuuso a wɔtɔ na.

Kefitilatɔl na be asheŋ

¹⁷B ta shuwa gbagba nna m bɛl kefitilatɔl na nɛ kumo be ayabi nɛ a kɔ asɔ ko fanɛ atoto be alambu na nɛ amo kikɛ la kukoŋwule. ¹⁸B daŋ wora kefitilatɔl na be ayabi na ashe nna nɛ amo be asa daa yuu kekel ko so nɛ asa malɛ yuu kekel nɛ k ka na so. ¹⁹Ayabi ashe na be kekama daa kɔ asɔ ko nɛ a du fanɛ atoto be alambu na be asa nna. ²⁰Kefitilatɔl na be nteto na malɛ gbagba daa kɔ asɔ nɛ a du fanɛ atoto be alambu na be ana nna. ²¹Nɛ ayabi asa nɛ a bee barga to a ki anyɔnyɔ na be kekama be kaseto gba daa kɔ atoto be kelambu na be kukoŋwule. ²²B daŋ ŋalga shuwa gbagba nna n lɔŋɛ kefitilatɔl na nɛ kumo be ayabi na, nɛ amo kikɛ la kukoŋwule. ²³B ta shuwa gbagba n lɔŋɛ efitila wurbi ashunu nɛ asɔ nɛ baa ta a lɔŋɛ efitila na be achɛbi so nɛ eprete nɛ b kɔ a suse amo be nsunɔ na. ²⁴Shuwa gbagba nɛ amo be egbɛ sa fanɛ kilo adesa nɛ anu nɛ b ta n lɔŋɛ kefitilatɔl na nɛ kumo be kusɔ kama nyam.

Duwu be bɔrɛsure be asheŋ

²⁵B daŋ ta akasiadibi nna n lɔŋɛ bɔrɛsure nɛ baaŋ ba chɔɔ duwu kumo so. Kumo be nteŋ to nɛ mparto kikɛ daa sasa fanɛ keyadra koŋwule nɛ bargato nna nɛ kumo be jeŋgreŋ malɛ daa la ayadra asa. B daŋ wora kumo be esoso be abonfu ana na nna fanɛ alambɛ n shin nɛ amo nɛ kumo kikɛ chɔ abar so a la kukoŋwule. ²⁶B daŋ ta shuwa gbagba nna m mata kumo be awɔlto nɛ akel to nɛ alambɛ na kikɛ so ŋ kulti, nseŋ ŋalga shuwa ŋ kulti kumo be nnɔkar kikɛ nɛ a du gbuntelin. ²⁷Kumo be kaman nɛ b ta shuwa n lɔŋɛ mpinibi anyɔ n chɔga kumo be akel to, shuwa gbuntelin na be kaseto, a yisi ndibi tentembi na a wɔtɔ amo to a maŋ kumo so. ²⁸Akasiadibi nɛ b daŋ ta n shɛl ndibi tentembi na nseŋ ta shuwa m mata amo kikɛ so. ²⁹Ade be kaman nɛ basa nɛ b nyi tulale be kewora wora ŋku nɛfaso nɛ efɛa belbelso be duwu.

Sarga chɔɔso be bɔrɛsure be asheŋ

¹Kede be kaman b daŋ naŋ ta akasiadibi nna n lɔŋɛ bɔrɛsure n shin nɛ kumo be nteŋ to nɛ mparto kikɛ sasa nsaa la ayadra ashunu nɛ bargato, nɛ kumo be jeŋgreŋ malɛ la ayadra ana nɛ bargato. ²B daŋ wora kumo be esoso be abonfu ana na nɛ a du fanɛ alambɛ nna nseŋ shin nɛ bɔrɛsure na nɛ alambɛ na kikɛ chɔga abar so a la kukoŋwule. Kumo be kaman nɛ b ta danyaŋ m mata bɔrɛsure na kikɛ so. ³Kumo be kaman nɛ b naŋ ta danyaŋ n lɔŋɛ asɔ nɛ b kɔ a shuŋ kumo so fanɛ nsunɔ be mpuliya nɛ eshabɔl nɛ ntishaŋgboŋ, nɛ kusɔ nɛ baa ta a chule eblaŋ nɛ kusɔ chɔɔ edɛ. ^4-5Amo be kaman nɛ b naŋ ta danyaŋ n lɔŋɛ kusɔ ŋeseasɔ nseŋ lɔŋɛ danyaŋ be mpinibi ana m mata kumo be abonfu ana na kikɛ so. Kumo be kaman nɛ b ta kusɔ ŋeseasɔ na n wɔtɔ bɔrɛsure na be nferinto. ⁶Kumo be kaman nɛ b ta akasiadibi n shɛl ndibi tenteŋ nɛ baaŋ baa ta a sulɔ bɔrɛsure na nseŋ ta danyaŋ n mata amo so. ⁷B daa ta amo nna a yisi n wɔtɔ bɔrɛsure na be akel to be mpinibi anyɔ na to a ta kumo. B daŋ ta ndibi peŋgeleŋ peŋgeleŋ nna n lɔŋɛ bɔrɛsure na nɛ k kɔ kelaŋ kumo to.

Eyurso be kefɔr be katishaŋgboŋ

⁸B daŋ ŋalga beche nɛ baa shuŋ Enyɛnpe be wajɛbu na be kabuna to be danyaŋ be edigi nna n lɔŋɛ katishaŋgboŋ na nɛ kumo be ketɔl.

Wajɛbu cheembi na be kelɔnɛ be asheŋ

^9-10Kumo be kaman nɛ b lɔŋɛ Ebɔrɛ be wajɛbu na be kelɔnɛ na gba. Kumo be kelargato be kaseto be kaba so be nteŋ to daa la ayadra kalfa nɛ adunu nna nɛ b ta ago lueso lela be epatisa ŋ kulti kumo be ndibi yuuso adunyɔ nɛ a kɔ danyaŋ be atɔl adunyɔ nɛ gbiti be ayir nɛ akɔltobi nɛ a bee kɔl patisa na to. ¹¹Nɛ kumo be kelargato be esoso be kaba so be nteŋ to malɛ gba daa la ayadra kalfa nɛ adunu nɛ b ta ago lueso lela be epatisa ŋ kulti kumo be ndibi yuuso adunyɔ nɛ a kɔ danyaŋ be atɔl adunyɔ nɛ gbiti be ayir nɛ akɔltobi nɛ a kɔl patisa na to na. ¹²Kelɔnɛ na be epeŋitɔrkpa be kaba so be mparto daa la ayadra adushunu nɛ anu nna, nɛ b ta ago lueso lela be epatisa ŋ kulti kumo be ndibi yuuso kudu nɛ a kɔ danyaŋ be atɔl kudu nɛ gbiti be ayir nɛ akɔltobi nɛ a kɔl patisa na to na. ¹³Kelɔnɛ na be epeŋilarkpa be kaba so be mparto malɛ daa la ayadra adushunu nɛ anu nna. ¹⁴Kumo be kabuna to be kaba ko so be patisa daa la ayadra adunyɔ nɛ anyɔ nɛ bargato nna nsaa kɔ ndibi yuuso asa nɛ atɔl asa. ¹⁵Kaba nɛ k ka na malɛ gba be patisa daa la ayadra adunyɔ nɛ anyɔ nɛ bargato nna nsaa kɔ ndibi yuuso asa nɛ atɔl asa. ¹⁶B daŋ ta ago be ejese lela mɔlmɔlbi nna n lue epatisa nɛ a kulti kelɔnɛ na kikɛ ¹⁷nseŋ daŋ ta danyaŋ n lɔŋɛ ndibi yuuso be atɔl n ta gbiti n lɔŋɛ amo be ayir nɛ akɔltobi nseŋ ta gbiti m mata ndibi yuuso na gbagba so. Amoso, kelɔnɛ na be ndibi yuuso na kikɛ daa kɔ gbiti be ayir nna. ¹⁸Esa nɛ e nyi kajɔ e daŋ ta ejese nɛ a la buru nɛ apeper kpaw nɛ apeper kunɔkunɔ nɛ ago be ejese lela mɔlmɔlbi n lue Ebɔrɛ be wajɛbu na be kelɔnɛ so be kabuna to gbagba be patisa nɛ kumo be nteŋ to la ayadra adesa, nsaa kɔ ndibi yuuso ana nɛ amo be atɔl ana na. ¹⁹Ndibi yuuso ana na daa kɔ danyaŋ be atɔl ana nɛ gbiti be akɔltobi nɛ ayir nna, nɛ b ta gbiti m mata ndibi yuuso na be esoso. ²⁰Danyaŋ nɛ b daŋ ta n lɔŋɛ Ebɔrɛ be wajɛbu na nɛ kelɔnɛ na kikɛ be ayir.

Asɔ nɛ b ta n lɔŋɛ Ebɔrɛ be wajɛbu be asheŋ

^21-23Besalɛl nɛ e la Uri pibinyɛn nseŋ naa la Hur nɛ e shi Juda be kanaŋ to na mo nanabi na e wora kusɔ kama nɛ Enyɛnpe Ebɔrɛ kaŋɛ Mosis na kikɛ. Esa nɛ e daŋ chɛ mo to e daa la Oholiab nɛ e la Ahisamak nɛ e shi Dan be kanaŋ to na pibinyɛn nɛ e kɔ enɔ to be kushuŋ be kenyi a tiŋ a ta ago be ejese lela nɛ ejese buru nɛ apeper kpaw nɛ apeper kunɔkunɔ a lue ŋko a jɔ. Asɔ nɛ b daŋ ta n lɔŋɛ Ebɔrɛ be wajɛbu nɛ kɔnɔkoŋwule be ŋkre be deka na nɛ asɔ nɛ a daa wɔ kumo to na be kananɛ a sa nde. Mosis e daŋ bɔla Itama nɛ e la bɔrɛmatapo Ɛɛrɔn pibinyɛn na so n shin nɛ Livaiebi sibɛ amo be egbɛ nɛ kananɛ a sa. ²⁴Shuwa nɛ basa daŋ sa fanɛ b shuŋ Ebɔrɛ be wajɛbu na be kushuŋ na be egbɛ daa la kilo kagboŋ nna. ²⁵Gbiti nɛ b daŋ sɔ jemanɛ nɛ b daa karga basa na sa fanɛ kilo ŋgboŋ asa nɛ alfa ana nɛ adesa nna. ²⁶Esa kama nɛ b daŋ karga kikɛ daŋ ka kukɔ nɛ b ku na nna. Bumo alɛ daa sa fanɛ basa ŋgboŋ alfa ashe nɛ asa nɛ alfa anu nɛ adunu nseŋ ji nfɛ adunyɔ ŋko m baŋ so nna. ²⁷Gbiti nɛ amo be egbɛ sa fanɛ kilo adesa nɛ ana nɛ b daŋ ta n wora wajɛbu na nɛ patisa na be atɔl kalfa na. ²⁸Gbiti nɛ b daŋ ta n lɔŋɛ ndibi yuuso na be akɔltobi nɛ ayir nɛ amo nɛ b ta m mata ndibi na be esoso malɛ be egbɛ daa sa fanɛ kilo adunyɔ nna. ²⁹Danyaŋ nɛ b daŋ sa kikɛ be egbɛ daa sa fanɛ kilo ŋgboŋ anyɔ nɛ alfa ana nɛ adunyɔ nɛ anu. ³⁰B daŋ ta danyaŋ na be ako nna n lɔŋɛ Enyɛnpe be wajɛbu na be kabuna to be atɔl, nɛ danyaŋ be bɔrɛsure nɛ kumo be kusɔ ŋeseasɔ nɛ asɔwurbi kikɛ. ³¹Amo be ako nɛ b daŋ ta n lɔŋɛ ndibi yuuso na be atɔl nɛ ayir kikɛ.

Bɔrɛmatapoana be asɔbuuso be asheŋ

¹Ejese buru nɛ apeper kpaw nɛ apeper kunɔkunɔ nɛ b lue m baa bɔrɛmatapoana be asɔbuuso n sa Ɛɛrɔn nɛ e baa buu a luri Ebɔrɛ be wajɛbu na to a shuŋ fanɛ kananɛ Enyɛnpe Ebɔrɛ daŋ kaŋɛ Mosis na.

Ɛfɔd be asheŋ

²B daŋ chaŋɛ shuwa fanɛ ejese nna n wea ejese buru nɛ apeper kunɔkunɔ nɛ kepeper kpaw nɛ ago be ejese lela mɔlmɔlbi to n lue m baa kale nɛ baa tre ɛfɔd na. ³B daŋ bɛa shuwa gbagba to nna ŋ kuya amo milimilibi fanɛ ejese n wea ejese buru nɛ apeper kpaw nɛ apeper kunɔkunɔ nɛ ago be ejese lela mɔlmɔlbi n lue m baa kumo. ⁴B daŋ lɔŋɛ kumo nɛ abatimu so be efɔl anyɔ m pɛ m pɛ ɛfɔd na be anishito nɛ kamanto m mata abar na. ⁵B daŋ ta shuwa be ejese nɛ ejese buru nɛ apeper kpaw nɛ apeper kunɔkunɔ nɛ ago be ejese lela mɔlmɔlbi nna n lue ɛfɔd be kashɛr to be kreso, nɛ kumo nɛ ɛfɔd na la kukoŋwule fanɛ kananɛ Enyɛnpe Ebɔrɛ daŋ kaŋɛ Mosis na. ⁶Kumo be kaman nɛ b chaŋ Jeekɔb be mbinyɛnso kuduanyɔ na be atre n deŋi yawu kpakpaso be ajembu nyɛkpɛso nɛ baa tre ɔniks na be anyɔ so, nseŋ yisi amo n wɔtɔ shuwa be mpinibi na to ⁷nseŋ baa amo m mata ɛfɔd na be abatimu anyɔ na so, saŋɛ na so Enyɛnpe Ebɔrɛ na beeŋ ba wu amo nsaa nyiŋi Israɛlebi na be asheŋ fanɛ kananɛ e kaŋɛ Mosis na.

Demuji be kɔlgu be asheŋ

⁸Asɔ nɛ b ta m baa ɛfɔd na be ako nɛ b ta n wora kagbeneso be kɔlgu na gba nseŋ jɔ kumo fanɛ kananɛ b jɔ ɛfɔd na. ⁹B daŋ bɛ kechɛbi na to nna nɛ k ki kɔlgu nɛ kumo be nteŋ to nɛ mparto kikɛ daa la enɔ be mpar koŋwule nɛ bargato. ¹⁰Ade malɛ kikɛ be kaman nɛ b ta yawu kpakpaso be ajembu nyɛkpɛso n yuu n yuu kumo so nɛ a bɛ m bɛ abar so a la egbaŋ ana. Gbaŋ nɛ k juŋkpar na be ajembu nyɛkpɛso daa la amo nɛ baa tre rubi nɛ topas nɛ berɛl nna. ¹¹Gbaŋ nyɔsopo na malɛ be ajembu daa la ajembu nyɛkpɛso nɛ baa tre turkoyis nɛ safaya nɛ ɛmeraldi nna. ¹²Gbaŋ sasopo malɛ be ajembu daa la amo nɛ baa tre jasinɛf nɛ agate nɛ ametiste nna. ¹³Nɛ gbaŋ nasopo malɛ be ajembu daa la krisolit nɛ ɔniks nɛ jaspa na. B daŋ ta shuwa nna n lɔŋɛ mpinibi kuduanyɔ nseŋ yisi n yisi ajembu na n wɔtɔ amo to. ¹⁴Ajembu nyɛkpɛso kuduanyɔ so nɛ b chaŋ n chaŋ Israɛlebi be nnaŋ kuduanyɔ na be atre n deŋi so. ¹⁵Amo be kaman nɛ b ta shuwa gbagba n lɔŋɛ ŋgbɛlɛbi lela n chulgi kɔlgu na so ¹⁶nseŋ naŋ ta shuwa n lɔŋɛ kɔlgu na be mpinibi anyɔ n chɔga kumo be esoso be nnɔkar anyɔ na so, ¹⁷nseŋ ta shuwa be ŋgbɛlɛbi anyɔ na be nnɔso anyɔ n wɔtɔ shuwa be mpinibi anyɔ nɛ a wɔ kɔlgu na be esoso be nnɔkar anyɔ na to, ¹⁸nseŋ naŋ ta nnɔso anyɔ nɛ a ka na malɛ n wɔtɔ piŋi na be mpinibi anyɔ na to. ¹⁹Amo be kaman nɛ b naŋ ta shuwa n lɔŋɛ mpinibi anyɔ n wɔtɔ kɔlgu na be kaseto be nnɔkar anyɔ nɛ a mata ɛfɔd na so. ²⁰Kumo be kaman nɛ b naŋ lɔŋɛ shuwa be mpinibi anyɔ n wɔtɔ piŋi na be abatimu so be efɔl anyɔ na be nnɔso. ²¹Ade be kaman nɛ b ta efɔl farso nɛ k la buru na ŋ kɔl kɔlgu na be mpinibi na nɛ piŋi na be mpinibi na to n chɛ amo m mata abar, nɛ kɔlgu na e sa maa filito fanɛ kananɛ Enyɛnpe Ebɔrɛ na kaŋɛ Mosis na.

Bɔrɛmatapoana be epiŋi nɛ a ka na be asheŋ

²²Jese buru nawule nɛ b daŋ ta n lue wajɛ m ba bɔrɛmatapo nimuso be piŋi tenteŋ nɛ ɛfɔd na bee deŋi kumo so na. ²³Kechɛbi lueso gbɛgbɛso nɛ b daŋ ta m muya piŋi na be kubɔ ŋ kulti nɛ k baa kɔ eleŋ. ²⁴B daŋ ta ejeseana buru nɛ ago nɛ apeper kpaw nɛ apeper kunɔkunɔ nna n lɔŋɛ asɔ kulkulbi nɛ a du fanɛ asɔrso nɛ baa tre pomegranates m baa n chulgi n chulgi piŋi na be kaseto be ekarso ŋ kulti. ²⁵Shuwa gbagba nɛ b daŋ ta n lɔŋɛ adulombi n chɛ n chulgi n chulgi piŋi na be ekarso, pomegranates anyɔ kama be nferinto. ²⁶A daŋ bɛ abar so nna ŋ kulti piŋi nɛ bɔrɛmatapo nimuso bee buu a shuŋ kabɔrɛmata be kushuŋ na kikɛ n chambɔ fanɛ kananɛ Enyɛnpe Ebɔrɛ daŋ kaŋɛ Mosis na. ²⁷Kumo be kaman nɛ b naŋ shin nɛ esa nɛ e nyi kelue nɛnɛ ta ago be jese lela mɔlmɔlbi n lue m baa Ɛɛrɔn nɛ mbe bibinyɛn be edanshiki ²⁸nɛ Ɛɛrɔn be neemu nɛ mbe bibinyɛn be nwuro nɛ bumo be ewondoŋ. ²⁹Kede be kaman nɛ enyipo naŋ ta ejese buru nɛ ago nɛ kepeper kpaw nɛ apeper kunɔkunɔ nna m muya asɔbuuso na be kreso fanɛ kananɛ Enyɛnpe Ebɔrɛ daŋ kaŋɛ Mosis na.

³⁰Ade kikɛ be kaman nɛ b naŋ ta shuwa gbagba n lɔŋɛ kusɔ peŋgelembi nseŋ chaŋ le be nsibɛ n deŋi kumo so: ‘Cheembi n sa Enyɛnpe Ebɔrɛ.’ ³¹nseŋ ta efɔl buru ŋ kre kusɔ peŋgelembi na m mata neemu na be anishito fanɛ kananɛ Enyɛnpe Ebɔrɛ daŋ kaŋɛ Mosis na.

B ka lɔŋɛ Ebɔrɛ be wajɛbu na be asheŋ

³²Israɛlebi na daŋ lɔŋɛ Enyɛnpe Ebɔrɛ be wajɛbu na n loge fanɛ kumo nɛ e daŋ kaŋɛ Mosis na ³³nseŋ ta kumo nɛ kumo be asɔ wurbi kikɛ fanɛ akɔltobi nɛ ndibi yuuso nɛ amo be atɔl nɛ ndibi blɔmbi deŋiso, ³⁴nɛ kpakpa be kawɔl nɛ b nyɔɔ kepeper nɛ churu be kawɔl nɛ baa ta a buu kumo so na nɛ patisa kuŋso nɛ k bee barga acheembiana to be kakpa cheembi na ³⁵nɛ kɔnɔkoŋwule be ŋkre be deka na nɛ kumo be ndibi nɛ b kɔ a ta kumo na nɛ kumo be buuso nɛ baa tre kuwɔr be kakpa na ³⁶nɛ teebɔl na nɛ kumo be asɔwurbi kikɛ nɛ bodobodo nɛ b kɔ a lara sarga a sa Ebɔrɛ na ³⁷nɛ shuwa gbagba be kefitilatɔl nɛ kumo be efitila nɛ kumo be asɔwurbi na kikɛ nɛ ŋku nɛ baaŋ baa kɔ a chɔɔ efitila na so ³⁸nɛ shuwa gbagba be bɔrɛsure na nɛ ŋku nɛfaso nɛ duwu nɛ amo be efɛa wɔ ebel na nɛ wajɛbu na be kabuna to be patisa na ³⁹nɛ danyaŋ be bɔrɛsure nɛ kumo be danyaŋ be kenyembi ŋeseasɔ nɛ kumo be ndibi nɛ baa ta a maŋ kumo so na nɛ kumo be asɔwurbi kikɛ nɛ danyaŋ be katishaŋgboŋ nɛ kumo be ketɔl ⁴⁰nɛ kelɔnɛ na be epatisa nɛ kumo be ndibi yuuso nɛ amo be atɔl nɛ kelɔnɛ be kabunato be patisa nɛ wajɛbu nɛ kelɔnɛ na be ayir nɛ amo be afɔlana. ⁴¹B daŋ ta asɔbuuso lueso nɛ bɔrɛmatapoana bee buu a shuŋ Ebɔrɛ be wajɛbu na to na n ti so.

⁴²Kananɛ Enyɛnpe Ebɔrɛ daŋ kaŋɛ Mosis na nɛ Israɛlebi wora kushuŋ na kikɛ. ⁴³Mosis ka keni asɔ nɛ basa na lɔŋɛ na kikɛ n loge na nɛ e wu fanɛ b wora kushuŋ na kananɛ Enyɛnpe Ebɔrɛ daŋ kaŋɛ na gbagba chap. Ndoŋ nna nɛ Mosis nɛfa bumo.

Wajɛbu na be kananɛ k daga k ka yili be asheŋ

¹Ndoŋ nna nɛ Enyɛnpe Ebɔrɛ kaŋɛ Mosis le: ²“Yuu Enyɛnpe Ebɔrɛ be wajɛbu na kufɔl juŋkparso be kachɛ sososo ³nseŋ ta kɔnɔkoŋwule be ŋkre be deka nɛ mbra kudu na wɔtɔ na n yili kumo to n ta patisa kuŋso na ŋ kuŋ kumo so. ⁴Kumo be kaman nɛ fo ta teebɔl na n yili wajɛbu na to nseŋ ta asɔ nɛ a daga a baa wɔ kumo so na n deŋi kumo so. Kede be kaman nɛ fo ta kefitilatɔl na n yili kumo to m bela efitila na m bɛ m bɛ kumo so. ⁵Kumo be kaman nɛ fo ta shuwa be bɔrɛsure nɛ baa chɔɔ duwu kumo so na m ba yili kɔnɔkoŋwule be ŋkre be deka na be anishito nseŋ ta patisa ŋ kuŋ Ebɔrɛ be wajɛbu na be kabuna. ⁶Kumo alɛ be kaman nɛ fo ta bɔrɛsure nɛ baa chɔɔ sarga kumo so na n yili Enyɛnpe Ebɔrɛ be wajɛbu na be kabuna to be anishito. ⁷Kede be kaman nɛ fo ta katishaŋgboŋ na n yili wajɛbu na nɛ bɔrɛsure na be kefɛato nseŋ wɔtɔ kumo nchu. ⁸Kumo alɛ be kaman nɛ fo yuu kelɔnɛ na be ndibi yuuso na nseŋ kre epatisa na ŋ kulti kumo, nseŋ chɛ kumo be kabuna to be patisa na n shiga. ⁹Kede be kaman nɛ fo ta ŋku nɛfaso na ŋ ŋmenyaŋ Ebɔrɛ be wajɛbu na nɛ kusɔ kama nɛ k wɔ kumo to so n ta amo m bɔɔ ma, Ebɔrɛ enɔ nɛ a ki asɔ cheembi. ¹⁰Kumo be kaman nɛ fo ta ŋku nɛfaso na ŋ ŋmenyaŋ bɔrɛsure nɛ baa chɔɔ sarga kumo so na nɛ kumo be asɔwurbi kikɛ nyam so n ta kumo m bɔɔ ma Ebɔrɛ enɔ nɛ k ki kusɔ cheembi. ¹¹Kede malɛ be kaman nɛ fo ta ŋku nɛfaso na ŋ ŋmenyaŋ katishaŋgboŋ na nɛ kumo be ketɔl gba so n ta amo m bɔɔ ma, Ebɔrɛ enɔ.

¹²Shin nɛ Ɛɛrɔn nɛ mbe bibinyɛn e ba Enyɛnpe be wajɛbu na be kabuna m ba fɔr bumo amu so daŋkare be ekpa so. ¹³Kumo be kaman nɛ fo ta asɔbuuso cheembi na m buu Ɛɛrɔn n ta ŋku na n do mo so n ta mo m bɔɔ ma, Ebɔrɛ enɔ nɛ e baa shuŋ ma fanɛ bɔrɛmatapo. ¹⁴Shin nɛ mbe bibinyɛn na gba e ba nɛ fo buu bumo kabɔrɛmata be asɔbuuso ¹⁵nseŋ ta ŋku nɛfaso na n do bumo so fanɛ kananɛ fo wora bumo tuto na, saŋɛ na so bumo nɛ bumo be kaman to ebi beeŋ baa shuŋ ma fanɛ bɔrɛmatapoana mbaanaayɔ. ¹⁶Nɛ Mosis wora kusɔ kama nɛ Enyɛnpe Ebɔrɛ kaŋɛ mo na kikɛ.”

¹⁷B ka lar Ijipt be kasawule so na be kafɛ nyɔsopo na to be kufɔl juŋkparso be kachɛ sososo na nɛ b daŋ yuu Ebɔrɛ be wajɛbu na. ¹⁸Mosis daŋ shin nna nɛ b ta wajɛbu na be atɔl na n wɔtɔ amo be mboŋ nseŋ ta ndibi yuuso na n yuu amo to, nseŋ ta ndibi blɔmbi deŋiso na n deŋi ndibi yuuso na so nɛ a pɛ amo to n yili. ¹⁹Kede be kaman nɛ e shin nɛ b ta patisagboŋ na m parga m buu Ebɔrɛ be wajɛbu na so nseŋ naŋ ta asɔbɔya be nwɔl nɛ b gbiti nɛnɛ na malɛ n deŋi patisagboŋ na so fanɛ kananɛ Enyɛnpe Ebɔrɛ daŋ kaŋɛ mo na. ²⁰Ade be kaman nɛ e ta mbra be ajembu anyɔ na n wɔtɔ kɔnɔkoŋwule be ŋkre be deka na to nseŋ ta buuso nɛ baa tre kuwɔr be kakpa na m buu kumo so nseŋ shin nɛ b nyisi ndibi nɛ baa pɛ to a maŋ kumo so na n wɔtɔ amo be mpinibi na be amaŋ to. ²¹Kumo be kaman nɛ e shin nɛ b ta kɔnɔkoŋwule be ŋkre be deka na m ba yili Ebɔrɛ be wajɛbu na to n shin nɛ b chɛ patisa kuŋso na ŋ kuŋ kumo so fanɛ kananɛ Enyɛnpe Ebɔrɛ kaŋɛ mo na. ²²Kede malɛ be kaman nɛ Mosis shin nɛ b ta teebɔl nɛ baa ta sarga be bodobodo a deŋi so na n ya yili patisa kuŋso na be anishito ashi, Ebɔrɛ be wajɛbu na be kabunato be patisa be kaman a laŋɛ kelargato be esoso be kaba so. ²³Kumo alɛ be kaman nɛ b ta bodobodo na m ba deŋi teebɔl na so n lara sarga n sa Enyɛnpe Ebɔrɛ na fanɛ kananɛ e kaŋɛ Mosis na. ²⁴Kede be kaman nɛ e ta kefitiliatɔl nɛ efitila na n yili Ebɔrɛ be wajɛbu na be kelargato be kaseto be kaba so ashi teebɔl na be anishito ²⁵nseŋ chɔɔ efitila na so fanɛ kananɛ Enyɛnpe Ebɔrɛ kaŋɛ mo na gbagba. ²⁶Mosis daŋ shin nna nɛ b ta shuwa be bɔrɛsure na n yili patisa kuŋso na be anishito ashi Enyɛnpe be wajɛbu na to ²⁷nseŋ chɔɔ efɛa belbelso be duwu kumo so fanɛ kananɛ Enyɛnpe Ebɔrɛ kaŋɛ mo na. ²⁸Kumo be kaman nɛ e ta Ebɔrɛ be wajɛbu na be kabunato be patisa na n chɛ ŋ kuŋ kabuna to. ²⁹E daŋ ta bɔrɛsure nɛ baa chɔɔ sarga kumo so na nna n yili Enyɛnpe Ebɔrɛ be wajɛbu na be kabuna to be anishito to nseŋ lara esarga chɔɔso nɛ ajibi be esarga kumo so fanɛ kananɛ Enyɛnpe Ebɔrɛ kaŋɛ mo na. ³⁰E daŋ ta katishaŋgboŋ na nna n yili Enyɛnpe be wajɛbu na nɛ bɔrɛsure na be kefɛato nseŋ ta nchu n wɔtɔ kumo to ³¹nɛ mo nɛ Ɛɛrɔn nɛ Ɛɛrɔn be bibinyɛn e ta amo a fɔr bumo be enɔ nɛ aya so. ³²Saŋkama nɛ baa luri Enyɛnpe be wajɛbu na to ŋko a yɔ bɔrɛsure na ase, baa fɔr bumo be aya nɛ enɔana so nna fanɛ kananɛ Enyɛnpe Ebɔrɛ kaŋɛ Mosis na. ³³Ade kikɛ be kaman nɛ Mosis shin nɛ b yuu kelɔnɛ ŋ kulti Ebɔrɛ be wajɛbu na nɛ bɔrɛsure na nseŋ chɛ kelɔnɛ na be kabunato be patisa na n shiga. Ndoŋ nna nɛ Mosis be kushuŋ loge.

Enyɛnpe Ebɔrɛ be kemaŋkura be asheŋ

³⁴Nɛ kuwɔlpa ba buu Enyɛnpe be wajɛbu na so nɛ Enyɛnpe Ebɔrɛ be kemaŋkura ba bɔlɔ kumo to. ³⁵Mosis daa maŋ tiŋ n luri Enyɛnpe be wajɛbu na to, ŋkpal kuwɔlpa na ka daŋ buu kumo so nɛ Enyɛnpe Ebɔrɛ be kemaŋkura bɔlɔ kumo to so.

³⁶Israɛlebi na ka wɔ enite to na, saŋkama nɛ kuwɔlpa na baŋ tia ashi Ebɔrɛ be wajɛbu na so, bumo alɛ bee kaa nna. ³⁷Nɛ kuwɔlpa na baa maŋ tia bre, b maa kaa. ³⁸Amoso saŋɛ nɛ Israɛlebi na daa wɔ bumo be enite to na, Ebɔrɛ be kuwɔlpa na daa buu Ebɔrɛ be wajɛbu na so kapaso kikɛ nna nsaa fulto edɛ kanyɛso malɛ kikɛ.