ƐSTA

ƐSTA

BE KAWƆL

B ka gboŋi ewurche Vashti kuwurche to be asheŋ

^1-2Pɛshiya be efuli so be ewura nɛ baa tre Sɛgsis na daa wɔ mbe kadegboŋ nɛ baa tre Susa na nna a ji kuwura efuli na be abonfugboŋ kalfa nɛ adunyɔ nɛ ashunu nɛ a yili Indiya be efuli so ashi epeŋilarkpa n ya fo Etopiya be efuli so ashi epeŋitɔrkpa na so. ³E ka ji kuwura be kafɛ sasopo to nɛ e wora kejigboŋ n sa mbe benimuana nɛ ekrachiana. Pɛshiya be efuli so nɛ Midia be efuli so be esoji be benimu, n ta bewura nɛ b wɔ efuli na so nɛ bejuŋkparpoana kikɛ e daŋ ba kejigboŋ na to. ⁴Afɔl lela ashe kikɛ nɛ e bee ŋini basa nɛ b ba kejigboŋ na to na mbe kedamaya nɛ mbe kuwura be kemaŋkura nɛ asɔ nɛ a wɔ mbe efuli so kikɛ. ⁵Afɔl ashe na be kaman, nɛ ewura na naŋ wora kejigboŋ m bɛ abar so nchɛ ashunu n sa Susa be kade to ebi kikɛ. Damawuraana nɛ betirpo kikɛ daŋ yɔ kejigboŋ na to nna ashi ewura na be laŋ nɛ b pɔr egbal ŋ kulti na be kelɔnɛgboŋ na so. ⁶B daŋ ta ago be kechɛbi fuful parr nɛ kumo be kechɛbi nɛ k du fanɛ buru nna n wora patisa ŋ kulti kaboŋ na, nseŋ ta kechɛbi peper kunɔkunɔ m bɔla gbiti be mpinibi to n chɛ n chɛ patisa na m mata eshabɔrɛ nɛ b ta yawu kpakpaso be ajembu m pɔr na so. Shuwa nɛ gbiti be asɔ chenaso daa yil ndoŋ be mboŋ nɛ b ta yawu kpakpaso be ajembu nyɛkpɛso be yiri yiri n lɔŋɛ kasawule na so nna. ⁷Shuwa be asɔnuunchu nɛ amo kikɛ kɔr abar to nɛ b daa kɔ a chige nsa a sa basa nɛ b yɔ kejigboŋ na to na. Ewura na daŋ bugi kagbene nna n wora asheŋ. ⁸E daŋ sa ekpa nna fanɛ ekama beeŋ tiŋ n nuu nsa kanaŋkamaso nɛ k par mo. E daŋ kaŋɛ ewurkpa be nyɛrbi na nna fanɛ b sa ekama nsa kanaŋkamaso nɛ e beeŋ tiŋ n nuu. ⁹Jemanɛ nɛ benyɛn na nɛ ewura na bee ji na nɛ ewurche Vashti gba wora kejigboŋ n sa kade na to be beche kikɛ ashi ewura Sɛgsis be laŋ to. ¹⁰Kachɛ shunusopo na nɛ ewura na be kagbene fuli mo ga ŋkpal nsa nɛ e nuu na so, nɛ e tre mbe nyɛrbi ashunu nɛ b fɛl bumo nɛ b wɔ mo kutɔ saŋkikɛ a shuŋ mo na. Bumo e la Mehuman nɛ Bizta nɛ Harbona nɛ Bigta nɛ Abagta nɛ Zeta nɛ Kakas. ¹¹E daŋ shuŋi bumo fanɛ b ya shin nɛ ewurche Vashti e buu mbe kuwurwuro m ba mo kutɔ. Ewura na daa sha keta ewurche na nna n ji njɔŋ n ŋini ekrachiana na nɛ mbe befɔ nɛ b ba ndoŋ na kikɛ ŋkpal mbe kebita so. ¹²Ewura na be nyɛrbi na ka ya kaŋɛ ewurche Vashti kusɔ nɛ ewura na kaŋɛ na, nɛ e kini keba. Ndoŋ nna nɛ Ewura na nya agbo ga nseŋ tinto. ¹³Saŋkama malɛ, pɔɛŋ nɛ ewura na e wora kusɔ ko a laŋɛ bumo be daŋkare nɛ mbra be ekpa so, e bee tre mbe benyiashempo nna m bishi bumo kusɔ nɛ k daga kewora. Amoso e daŋ tre mbe basa nɛ baa ji mo asoeto nna m bishi bumo kusɔ nɛ k daga fanɛ e wora. ¹⁴Bumo e la Kashena nɛ Sheta nɛ Admata nɛ Tarshish nɛ Mɛrɛs nɛ Masena nɛ Memukan nɛ b la Pɛshiya nɛ Midia be efuli so be benimugboŋ ashunu nɛ e bee to jina saŋkikɛ na. ¹⁵Le nɛ e daŋ kaŋɛ bumo: “Ma ewura Sɛgsis e shuŋi n tre ewurche Vashti nɛ e kini keba! Naniere nuso nɛ anyi be mbra bee ŋini fanɛ an wora mo?” ¹⁶Ndoŋ nna nɛ Memukan kaŋɛ ewura na nɛ mbe benimuana na le: “Mannɛ ewura ere nawule nɛ ewurche Vashti keni jiga na, ama mbe benimuana nɛ mbe efuli so ebi kikɛ nɛ e keni jiga na. ¹⁷Efuli ere so be beche baŋ nu kusɔ nɛ ewurche Vashti wora ere baaŋ fara a keni bumo kulana jiga. Baaŋ baa kaŋɛ le: ‘Ewura Sɛgsis tre ewurche Vashti nɛ e kini.’ ¹⁸Pɛshiya nɛ Midia be benimuana be beche baŋ nu kusɔ nɛ ewurche ere wora, bumo alɛ gba beeŋ fara a wora bumo kulana loŋ kabre kikɛ. Kaplɛkama malɛ be beche beeŋ fara a fɛl bumo kulana, nɛ bumo kulana malɛ e baa nya agbo n wɔtɔ bumo. ¹⁹Yiramu, nɛ k par fo bre, fo nase mbra nɛ baaŋ sibɛ n wɔtɔ Pɛshiya nɛ Midia be efuli so be mbra be nwɔl to nɛ esa kikɛ maaŋ tiŋ n chɛrga kumo, fanɛ Vashti e sa maŋ naŋ ta keya n cha ewura pe kikɛ. Kumo be kaman nɛ fo ta mbe kuwurche na n sa eche nɛ e bɔ mo. ²⁰Fo baŋ nase le be mbra ere n sa fo efuli gboŋgboŋi ere kikɛ so ebi bre, beche nɛ b wɔ efuli ere so kikɛ beeŋ baa sa bumo kulana bunyaŋ hale nɛ b la damawuraana ŋko betirpo gba.” ²¹Le be nfɛra nɛ Memukan bar ere daŋ par ewura na nɛ mbe benimuana ga, nɛ ewura na wora kusɔ nɛ e kaŋɛ bumo na kikɛ. ²²Ewura na daŋ sibɛ nwɔl yiri kikɛ be ŋgbarto nna n sa mbe efuli so ebi kikɛ fanɛ, k daga kowurnyɛn kikɛ be kamalga ka kɔ eleŋ mbe laŋ to.

B ka ta Ɛsta ŋ ki ewurche be asheŋ

¹Ewura Sɛgsis be agbo ka wushi na kikɛ, nɛ e kraa fɛ kusɔ nɛ Vashti wora na nɛ mbra nɛ mo alɛ nase a yɔ mbe kaplɛa so na be asheŋ. ²Ndoŋ nna nɛ ewura na be besoetojipo nɛ e yirda ga na be beko kaŋɛ mo le: “Shin nɛ b luri to n fin besuŋgurbi nɛ b walɛ abita nsaa maŋ nyi benyɛn m ba sa ewura. ³Lara fo efuli ere be kaba kama so be ekrachi n shin nɛ b fin besuŋgurbi nɛ b walɛ abita m ba Susa m baa wɔtɔ ewura be laŋ to be kaboŋ nɛ baa wɔtɔ beche nawule na. Nseŋ ta bumo m bɔɔ Heegai nɛ b fɛl nɛ e bee keni beche so na enɔ, nɛ e ŋini bumo kananɛ baŋ baa lɔŋɛ bumo be amu nɛnɛ n lar kebita n ti so. ⁴Saŋɛ na so feeŋ lara bumo to be emo nɛ fee sha nɛ e ki ewurche n tal Vashti to.” Ewura na ka nu le be kasotoji ere nɛ e wu fanɛ k walɛ nseŋ bɛ kumo so. ⁵Jemanɛ ere so nɛ Juw be kanyɛn nɛ baa tre Mɔdikaya na wɔ Susa. Mo tuto e daa la Jaɛr nɛ mo nananyɛn Shimei malɛ la Kish nɛ e shi Bɛnjamin be kanaŋ to na pibinyɛn. ⁶Mɔdikaya daŋ ti basa nɛ ewura Nebukadneeza nɛ e la Babilɔn be ewura na daŋ pɛ fanɛ anya ashi Jerusalɛm nseŋ tintiŋ bumo n yɔ mbe efuli so, saŋɛ nɛ e daŋ pɛ Juda be ewura Jehowachin na so nna. ⁷Mɔdikaya mo wɔpa pibiche ko nɛ e daa walɛ kebita ga nsaa la kumunibi nɛ mbe Juw be ketre la Hadasa nɛ mbe ketre ko malɛ la Ɛsta na, daa wɔ Mɔdikaya kutɔ nna. Mɔdikaya daŋ ta mo nna fanɛ mo gbagba pibi ŋkpal mo nio nɛ mo tuto kikɛ ka wu ŋ ka mo so. ⁸Ewura na ka sa ebɔl nɛ b bar besuŋgurbi damta ewura be laŋ to be kakpa nɛ baa wɔtɔ beche nawule ashi Susa na, Ɛsta gba daŋ ti bumo so. B daŋ yɛr mo alɛ gba Heegai nɛ e bee keni ewurkpa be beche so na kutɔ nna. ⁹Ɛsta be asheŋ daŋ par Heegai ga. Ŋkpal loŋ so, e daa sa mo abitasɔ nɛ ajibi lela nna. Kaboŋ nɛ b wɔtɔ beche na be kakpa lela nɛ e daŋ shin nɛ b ta mo n wɔtɔ nseŋ lara ewurkpa be mbita ashunu nɛ baa shuŋ mo. ¹⁰Ŋkpal Mɔdikaya ka ji Ɛsta asoeto so e daa maŋ lara mbe kumu efuli ŋ ŋini bumo fanɛ e la Juw be esa nna. ¹¹Karechɛ kama malɛ Mɔdikaya daa nite nna a kulti ewurkpa be kakpa nɛ beche na kikɛ wɔ na be anishito a fin kepin kananɛ Ɛsta du nɛ kusɔ nɛ k bee wora mo. ¹²Kafɛ koŋwule nɛ b sa beche na fanɛ b ta n lɔŋɛ bumo be amu n nyalɛ kebita n ti so. Baaŋ ta ŋku nɛ baa tre mir na n lɔŋɛ bumo be eyur so afɔl ashe nseŋ ta etulale malɛ be ŋku n lɔŋɛ bumo be eyur afɔl ashe nɛ a ka na. Kumo be kaman nɛ b yɛr beche na be ekama ewura Sɛgsis be anishito kukoko to. ¹³Saŋkama nɛ beche na be ekama bee sha nɛ e yɔ ewura na be anishito, kusɔ kama nɛ k par eche na nɛ e bee buu a lar kakpa nɛ b wɔtɔ beche na a yɔ ewura na be anishito. ¹⁴Eche na beeŋ yɔ ewura na kutɔ kaaseso nseŋ ya bɛta m ba Shaashgaz nɛ b fɛl nɛ e bee keni ewura be beche so ashi kakpa nɛ beche nawule wɔ na kutɔ kachipurso. Mo alɛ maaŋ naŋ bɛta n yɔ ewura na kutɔ kikɛ ama mbe asheŋ baaŋ par Ewura na nna nɛ e ti mbe ketre n shuŋi n tre mo. ¹⁵Jemanɛ ka fo nɛ Mɔdikaya mo wɔpa nɛ baa tre Abihail na, pibiche Ɛsta nɛ e ta ŋ ki fanɛ mo gbagba pibiche na e yɔ ewura na kutɔ nɛ e buu nle nɛ Heegai nɛ e bee keni kakpa nɛ beche na wɔ so na kaŋɛ mo fanɛ e buu na. Ɛsta malɛ be asheŋ daa par ekama nna. ¹⁶Ewura Sɛgsis ka ji kuwura be kafɛ shunusopo be kufɔl kudusopo nɛ baa tre Tibez na nɛ b bar Ɛsta ewura na pe. ¹⁷Ɛsta be asheŋ daŋ par ewura na ga nseŋ bɔlɔ mo kenishi nɛ e sha mo a chɔ beche na be ekama. Ŋkpal loŋ so nɛ e ta kuwurche be kuwurwuro n buu mo nɛ e ki ewurche n tal ewurche Vashti to. ¹⁸Kumo be kaman nɛ ewura na shin nɛ b wora kejigboŋ n sa benimuana na nɛ ekrachiana na ŋkpal Ɛsta so. Nseŋ sa ebɔl fanɛ kumo be kachɛ e baa la kewushiachɛ n sa mbe efuli so be basa kikɛ. Ewura na daŋ sa basa ŋkɛ damta gba n ti so.

Mɔdikaya ka mɔlga ewura na be ŋkpa be asheŋ

¹⁹Besuŋgurbi na ka naŋ ba gama abar so kela nyɔsopo na, nɛ ewura na teŋ ta Mɔdikaya ŋ ki ewurkpa be krachi. ²⁰Ŋkpal Mɔdikaya ka kaŋɛ Ɛsta fanɛ e sa maŋ kaŋɛ esa kama yiri nɛ k la mo so, Ɛsta daa maŋ kaŋɛ esa kikɛ yiri nɛ k la mo. Ɛsta daŋ wora loŋ nna ŋkpal e ka bee wora Mɔdikaya kasonu mbe kebia to kikɛ so.

²¹Jemanɛ nɛ Mɔdikaya daa la ewurkpa be krachi na, nɛ Bigtana nɛ Terɛsh nɛ b fɛl bumo nɛ baa keni ewura be ebu dese to so be kabuna so na, nya agbo n wɔtɔ ewura Sɛgsis nsaa kre mbe kemɔ ŋgbalanto. ²²Mɔdikaya ka pin kumo be loŋ, nɛ e nya manaŋ n ya kaŋɛ ewurche Ɛsta nɛ mo alɛ kaŋɛ ewura na kusɔ nɛ Mɔdikaya kaŋɛ mo. ²³B ka lara basa nɛ b lege kesheŋ na to n ya wu fanɛ k la kashenteŋ nna nɛ b chɛ basa anyɔ na efɔl n shiga ndibi so. Ndoŋ nna nɛ ewura na shin nɛ b yili mbe anishi to n sibɛ loŋ be kesheŋ na n wɔtɔ bumo be adrasheŋ be nwɔl to nɛ k baa la kanyiŋi.

Heman ka kre Juwebi be kemɔ be asheŋ

¹Asheŋ ere be kaman nɛ ewura Sɛgsis ta kenimu nɛ k bɛ ewura na so na n sa kanyɛn ko nɛ baa tre mo Heman nɛ e la Hammedaata pibinyɛn nseŋ shi Agag be kanaŋ to na. ²Ewura na daŋ tre mbe benimu nɛ baa shuŋ ewurkpa na kikɛ nna, ŋ kaŋɛ bumo fanɛ b baa bunyaŋ Heman nseŋ naa jɔŋɛ mo ase. Nɛ bumo kikɛ bɛ kusɔ nɛ e kaŋɛ na so ama Mɔdikaya nawule. ³Ndoŋ nna nɛ benimu nɛ baa shuŋ ewurkpa na bishi Mɔdikaya le: “Manɛ nna nɛ fo ere maa bɛ kusɔ nɛ ewura nase n sa anyi na so?” ⁴Saŋkama nɛ b baŋ kaŋɛ Mɔdikaya fanɛ e jɔŋɛ Heman ase, e bee kini nna nseŋ kaŋɛ fanɛ mo ere la Juw be esa nna, amoso e maaŋ jɔŋɛ Heman ase. Ndoŋ nna nɛ b kaŋɛ Heman kumo be asheŋ nsaa keni ŋko e beeŋ yige Mɔdikaya ŋkpal e ka la Juw so.

⁵Heman ka pin fanɛ Mɔdikaya kini kejɔŋɛ mo ase ŋko m bunyaŋ mo, nɛ e nya agbo ga. ⁶E ka pin fanɛ Mɔdikaya la Juw be esa nna nɛ e yili kumo fanɛ e maaŋ tɔrɔ Mɔdikaya nawule, nsaa kre nia fanɛ e beeŋ mɔ Juw kama nɛ e wɔ Ewura Sɛgsis be efuli so. ⁷Ewura Sɛgsis ka ji kuwura be kafɛ kuduanyɔsopo be kufɔl sososo nɛ baa tre Nisan na to, nɛ Heman shin nɛ b to beri a fin kachɛ nɛ k daga fanɛ e wora kusɔ nɛ e bee kre na. Nɛ beri na ya tɔr kufɔl kuduanyɔsopo nɛ baa tre Ada na be nchɛ kuduasa. ⁸Ndoŋ nna nɛ Heman kaŋɛ ewura Sɛgsis le: “Yiri ko ebi salga to m bɔlɔ fo efuli ere kikɛ so. Bumo alɛ be daŋkare kɔr basa kama peya to. B maa bɛ efuli ere be mbra gba so, amoso m baa nyi geeŋ fanɛ nɛ fo yige bumo, k maaŋ chɛ fo to. ⁹Nɛ k par fo, kumo ere, Yiramu, fo nase mbra fanɛ bumo kikɛ daga kemɔ. Nɛ fo shuli so n wora loŋ, ma alɛ beeŋ wora ania n fin amansherbi damta n wɔtɔ ewurkpa be amansherbi be kɔlgu na to nɛ ekrachi nɛ b wɔ ewurkpa na e ta amo n shuŋ.” ¹⁰Ndoŋ nna nɛ ewura na lara mbe kepinibi nɛ e kɔ a dulgi mbe nwɔl sibɛ so na n sa Hammedaata pibinyɛn Heman nɛ e la Juwebi bumo doŋ na ¹¹nseŋ kaŋɛ mo le: “Basa na nɛ bumo be amansherbi kikɛ la fo peya nna; amoso wora bumo kusɔ kama nɛ k par fo.” ¹²Amoso kufɔl sososo na to be kachɛ kuduasasopo na nɛ Heman tre ewura na be nwɔlsibɛpoana na ŋ kaŋɛ bumo fanɛ b kilgi mbe mbra nɛ e nase na n wɔtɔ bumo be efuli na so be ŋgbarana nɛ nsibɛ be yiriana to n chige to n sa bewurbi nɛ benimu nɛ ekrachiana nɛ b wɔ efuli na so na kikɛ. Ewura Sɛgsis be ketre so nɛ b daŋ bɔla n sibɛ nwɔl na nseŋ ta mbe kepinibi n dulgi amo. ¹³Mbɔ nɛ b kɔ eleŋ a shile ga na, nɛ b ta nwɔl na n shuŋi fanɛ b chige efuli na so kikɛ. Kusɔ nɛ kawɔl na bee kaŋɛ e la fanɛ b mɔ Juwebi na kikɛ kufɔl kuduanyɔsopo nɛ baa tre Ada na be kachɛ kuduasasopo na to. Kawɔl na bee ŋini fanɛ b mɔ mbia nɛ benimu nɛ beche nɛ mbiwurbi kikɛ kumo be kamɔnchɛ na nseŋ muu bumo be asɔ nɛ b kɔ kikɛ. ¹⁴A daga fanɛ b yili jimaŋ to ŋ kraŋ kusɔ nɛ k wɔ kawɔl na to n sa efuli na so be kaba kama so ebi kikɛ. Saŋɛ na so ekama beeŋ bela ase a jo kumo be kachɛ. ¹⁵Ewura Sɛgsis e daŋ shin nɛ b yili jimaŋ to n wora mbra na manaŋ manaŋ ashi Susa be kade to. Ewura na nɛ Heman daŋ chena nna a nuu nsa, nɛ Susa be kade to ebi malɛ be nfɛra bee baga bumo to ŋkpal mbra na so.

Mɔdikaya ka bee fin kechɛto ashi Ɛsta kutɔ be asheŋ

¹Mɔdikaya ka nu kusɔ nɛ ewura na wora na, nɛ e kpɛa mbe asɔbuuso to kagbenejijaso, nseŋ ta kagbenejijaso be kusɔbuuso m buu n wora nsunɔ n wurge mbe kumu so nsaa shu awɔrso ebesa so a na a kulti kade na to, ²hale m ba fo ewura na be lambu be kabuna ase. Mo alɛ daa maŋ nya ekpa n luri lambu na to ŋkpal manɛ so esa kama nɛ e buu kagbenejijaso be kusɔbuuso maŋ kɔ ekpa nɛ e luri ndoŋ. ³Efuli na so be kaplɛkama malɛ nɛ b kraŋ kawɔl na jimaŋ to, Juwebi nɛ b wɔ ndoŋ bee teŋi keeli nna a boŋto a shu. B daŋ kishi nna nseŋ shu ga nɛ bumo be bedamta ta kagbenejijaso be asɔbuuso m buu nseŋ dese nsunɔ to. ⁴Ɛsta be mbita nɛ benyɛn nɛ b fɛl nɛ baa shuŋ mo na ka kaŋɛ mo Mɔdikaya be asheŋ, nɛ mbe kagbenejija mo ga, nɛ e ta asɔbuuso lela n sa fanɛ b ya sa Mɔdikaya, saŋɛ na so e beeŋ lara kagbenejijaso be asɔbuuso na, nɛ Mɔdikaya kini. ⁵Ndoŋ nna nɛ Ɛsta shin nɛ ewura na be benyɛn nɛ b fɛl e la Ɛsta be kayɛrbi, nɛ baa tre mo Hataak na, ya bishi Mɔdikaya kusɔ nɛ k kɔ mo. ⁶Nɛ Hataak yɔ Mɔdikaya kutɔ ashi ewurkpa be kelɔnɛ so. ⁷Ndoŋ nna nɛ Mɔdikaya kaŋɛ mo kusɔ nɛ k wora kikɛ nɛ kananɛ Heman nase kɔnɔ fanɛ e beeŋ ta amansherbi damta n wɔtɔ ewurkpa be kɔlgu to, nɛ b mɔ Juwebi kikɛ. ⁸Kumo be kaman nɛ e ta kawɔl nɛ b sibɛ ashi Susa nɛ k bee kaŋɛ fanɛ a daga b ka mɔ Juwebi kikɛ na be kuko n sa Hataak fanɛ e ta n ya ŋini Ɛsta nseŋ bugi to ŋ kaŋɛ mo kusɔ nɛ k wɔtɔ, saŋɛ na so e beeŋ kule ewura na nɛ e wu mbe basa kuwɔr. ⁹Nɛ Hataak wora loŋ. ¹⁰Ndoŋ nna nɛ Ɛsta sa ebɔl fanɛ e bɛta n ya kaŋɛ Mɔdikaya le: ¹¹“Ewurkpa be mbra bee ŋini fanɛ esa kama nɛ e luri ewura kutɔ nɛ e maŋ tre mo, daga luwu. Ewura na be asoetojipoana nɛ mbe kasawule so be kaba kikɛ so ebi gba nyi kumo be loŋ. Ama ewura na baaŋ teŋi mbe shuwa be kuwurkpabi na nna ŋ shoŋi esa na. Loŋ bre, b maaŋ mɔ mo. Amoso k beeŋ baa du kpakpa n sa ma nɛ n wu ewura na ŋkpal manɛ so kufɔl lelemu nna na e ka maŋ shuŋi n tre ma.” ¹²Mɔdikaya ka nu Ɛsta be kubɔya na ¹³nɛ mo alɛ ta le be kubɔya ere n shoŋi mo: “Sa maŋ kaa fɛ fanɛ nɛ baa mɔ Juwebi kikɛ, fo ere beeŋ nya fo kumu ŋkpal fo ka wɔ ewura pe so. ¹⁴Nɛ fo baŋ maŋ wora shɛŋ le be jemanɛ ere, ashere, echɛtopo ko beeŋ shi kakpa ko m ba mɔlga anyi. Ama fo ere nɛ fo tuto be kanaŋ to ebi kikɛ beeŋ mur. Wanɛ e nyi fanɛ le bre so nɛ fo ki ewurche le be jemanɛ ere?” ¹⁵Ndoŋ nna nɛ Ɛsta shuŋi ŋ kaŋɛ Mɔdikaya le: ¹⁶“Shin nɛ Juwebi nɛ b wɔ Susa na kikɛ e ba abar so m ba kishi nchɛ asa nɛ nnyɛ asa ŋ kule Ebɔrɛ n sa ma. Ma alɛ gba nɛ ma mbita beeŋ luri loŋ be ekishi na to. Kumo be kaman, nɛ n yɔ ewura na kutɔ. Hale nɛ mbra maŋ sa ma ekpa gba, meeŋ wora loŋ. Nɛ k la luwu nɛ n wu.” ¹⁷Ndoŋ nna nɛ Mɔdikaya ya wora kusɔ kama nɛ Ɛsta kaŋɛ mo na kikɛ.

Ɛsta ka tre ewura na nɛ Heman kejigboŋ to be asheŋ

¹Ekishi na be kachɛ sasopo nɛ Ɛsta ta mbe kuwurche be kale m buu nseŋ ya yili ewura na be lambubi na be kabuna to. Ewura na malɛ daa tase mbe kuwurputi so nna lambu na to a keni kabuna to. ²Ewura na ka wu ewurche Ɛsta ka yil kabuna to na, nɛ mbe asheŋ par mo ga, nɛ e teŋi mbe shuwa be kuwurkpabi na ŋ shoŋi mo. Nɛ Ɛsta ya pɛ kuwurkpabi na be kɔnɔso. ³Ndoŋ nna nɛ ewura na bishi le: “Ewurche Ɛsta, manɛ e kɔ fo? Manɛ nɛ fee sha? Kaŋɛ ma kusɔ kama nɛ k tir fo. Hale ma efuli ere be bargato gba nɛ fee sha, meeŋ ta n sa fo.” ⁴Nɛ Ɛsta kaŋɛ le: “Yiramu! Nɛ k par fo, kumo ere fo nɛ Heman e ba tu ma n ji kejigboŋ kabre kaaseso.” ⁵Nɛ ewura na shuŋi fanɛ b ya tre Heman manaŋ m ba nɛ b yɔ Ɛsta kutɔ. Nɛ Heman ba, nɛ mo nɛ ewura na yɔ Ɛsta be kejigboŋ na to. ⁶B ka bee nuu nsa nɛ ewura na kaŋɛ Ɛsta le: “Kaŋɛ kusɔ kama nɛ fee sha nɛ n sa fo kumo. Manɛ bre e tir fo? Hale ma efuli ere be bargato gba nɛ fee sha, meeŋ sa fo kumo.” ⁷Nɛ Ɛsta kaŋɛ: ⁸“Nɛ k par fo Yiramu, fo nɛ Heman e naŋ ba tu ma n ji kejigboŋ nfe echefo, saŋɛ na so, meeŋ kaŋɛ fo kusɔ nɛ mee sha.”

Heman ka kre kemɔ Mɔdikaya be asheŋ

⁹Nɛ Heman ta kagbenefuli nɛ kagbenewushi n lar Ɛsta kutɔ. E ka bee yɔ na nɛ e wu Mɔdikaya ewurkpa be kabuna na ase. Ama e ka wu fanɛ Mɔdikaya maŋ koso n yili n sa mo bunyaŋ nɛ e nya agbo ga. ¹⁰Ama e daŋ ji kanyiti nna n yɔ epe n ya tre mo teriana nɛ mbe eche Zɛrɛsh n shɛr, ¹¹n ji njɔŋ ŋ ŋini bumo kananɛ e dii kedama nɛ kananɛ e kɔ mbinyɛnsobi damta nɛ kananɛ ewura maŋ mo so nseŋ sa mo kenimu a chɔ ekrachiana nɛ benimuana na be ekama. ¹²Kede be kaman nɛ Heman naŋ kaŋɛ: “Asɔ damta gba kraŋ ti so, ma nɛ ewura nawule nɛ ewurche Ɛsta tre mbe kejigboŋ to, e maŋ tre esa kikɛ n ti anyi so. E yɛ echefo gba an naaŋ ba tu mo n ji. ¹³Ama ade kikɛ kraa maa bɔlɔ ma kenishi ŋkpal Juwnyɛn na, Mɔdikaya, ka kraa chena ewurkpa be kabuna to na so.” ¹⁴Ndoŋ nna nɛ mo teriana nɛ mbe eche Zɛrɛsh kaŋɛ mo le: “Manɛ nna nɛ fo maaŋ ku kadebi nɛ kumo be nteŋ sa fanɛ ayadra adushunu nɛ anu n yuu nseŋ kule ewura ekpa echefo kachipurso n ya chɛ Mɔdikaya efɔl n shiga kumo so. Kumo be kaman nɛ fo ta kagbenefuli n tu ewura na n yɔ kejigboŋ na to.” Heman be kagbene daŋ fuli mo ga ŋkpal le be nfɛra nɛ b sa mo ere so. Ndoŋ nna nɛ e shin nɛ b yuu kedibi na.

Ewura na ka sa Mɔdikaya bunyaŋ be asheŋ

¹Kanyɛ ka biri nɛ ewura na di ŋ gben, nseŋ shin nɛ b bar mbe efuli na so be asheŋ nɛ a wora mbe kuwurji be jemanɛ so nɛ b sibɛ amo n wɔtɔ nwɔl to na kikɛ, m baa kaa kraŋ a ŋini mo. ²B ka bee kraŋ na, nɛ b ya lar kananɛ Mɔdikaya daŋ pin Bigtana nɛ Tɛrɛsh nɛ b daŋ fɛl nɛ baa yili a kuŋ ewura be ebu be kabuna to na, ka daa kre ewura be kemɔ ŋgblaŋto be asheŋ nseŋ kaŋɛ ewura na. ³Nɛ ewura na bishi bumo le: “Mɔdikaya ka wora le ere bre, manɛ be kakɔka nɛ kemaŋkura bre nɛ an sa mo n tal to?” Nɛ mbe nyɛrbi na yɛ: “B maŋ wora shɛŋ n sa mo.” ⁴Loŋ be jemanɛ so nɛ Heman baŋ ba luri ewurkpa nɛ e ba kule ewura ekpa n ya shin nɛ b chɛ Mɔdikaya efɔl n shiga kedibi nɛ e yuu na so. Nɛ ewura bishi le: “Wanɛ e wɔ lambu to ere?” ⁵Ndoŋ nna nɛ mbe nyɛrbi na kaŋɛ: “Heman nna.” Nɛ ewura na kaŋɛ: “Men shin nɛ e baa luri.” ⁶Heman ka luri nɛ ewura na bishi mo le: “Manɛ e daga ŋ ka wora n sa esa nɛ mee sha keta n yili bunyaŋ be eyilikpa?” Nɛ Heman fɛ le: “M baa nyi geeŋ fanɛ ma nɛ ewura bee sha kewora le be kusɔ ere n sa na.” ⁷Ndoŋ nna nɛ e kaŋɛ ewura na le: ⁸“Shin nɛ b ta fo piŋi tenteŋ nɛ fo buu ere be kuko m buu esa kama nɛ e daga le be bunyaŋ ere nseŋ shin nɛ b mɛa fo gbagba be egbaŋɛ ere be eko to, ⁹nseŋ shin nɛ fo benimuana na be eko e ta esa na n chena gbaŋɛ na so ŋ keta mo ŋ kulti kade ere be abɔrbi kikɛ so a kaŋɛ awɔrso le: ‘Men keni, kananɛ ewura bee ta esa a yili bunyaŋ be eyilikpa nna!.’ ” ¹⁰Ndoŋ nna nɛ ewura na kaŋɛ Heman le: “Kumo ere wora manaŋ n ya fin piŋi na nɛ gbaŋɛ na m ba wora kusɔ nɛ fo kaŋɛ ere gbagba n sa Mɔdikaya nɛ e la Juw na. Mo e naa chena ewurkpa be kabunagboŋ na ase na. Nyiŋi n wora kusɔ kama nɛ fo kaŋɛ ere n sa mo nsaa maaŋ teŋ shɛŋ so.” ¹¹Ndoŋ nna nɛ Heman ta ewura be piŋi m buu Mɔdikaya nseŋ shin nɛ e chena gbaŋɛ nɛ b mɛa to fanɛ ewura peya na so nɛ e juŋkpar a nite a gberge Mɔdikaya nɛ gbaŋɛ na a kulti kade na to a kaŋɛ awɔrso le: “Men keni kananɛ ewura bee ta esa a yili bunyaŋ be eyilikpa!” ¹²B ka kilgi to n loge, nɛ Mɔdikaya bɛta n ya chena ewurkpa be kabunagboŋ na ase, nɛ Heman malɛ ta anishinyɔr gboŋgboŋi n jɔto n yɔ epe, ¹³n ya kaŋɛ mbe eche nɛ mo teriana kusɔ nɛ k nya mo kikɛ. Ndoŋ nna nɛ mbe eche nɛ mo teriana na kaŋɛ mo le: “Mɔdikaya ka la Juw be esa ere bre fo maaŋ tiŋ m pɔɔ mo so kikɛ. Baa nyi fanɛ fo eleŋ baa fo ekar nna na. Feeŋ ki esa fuloŋ.” ¹⁴B kraa malga nna nɛ ewura be nyɛrbi ba shin nɛ Heman wora manaŋ nɛ b yɔ Ɛsta be kejigboŋ nɛ e wora n yili na to.

B ka Mɔ Heman be asheŋ

¹Kede be kaman nɛ ewura na nɛ Heman yɔ Ɛsta kutɔ nɛ b ya ji. ²B kaa tase a nuu nsa kejigboŋ nyɔsopo na to na, nɛ ewura na naŋ bishi Ɛsta le: “Manɛ bre e tir fo? Kusɔ kama nɛ k tir fo, fo kaŋɛ ma nɛ n sa fo kumo. Hale ma efuli ere be bargato gba nɛ fee sha, feeŋ nya kumo.” ³Ndoŋ nna nɛ ewurche Ɛsta kaŋɛ: “Yiramu, nɛ k par fo bre, kumo ere fo wora le be kusɔ ere n sa ma. Mɔlga ma ŋkpa nseŋ sɔ ma basa n yige n sa ma. ⁴B fa ma nɛ ma basa kikɛ fanɛ b mɔ anyi nna. K daa la fanɛ baa fa anyi nna fanɛ anya gba, ndafanɛ maaŋ bugi kɔnɔ ŋ kaŋɛ fo shɛŋ, ama baa kre kemɔ anyi kikɛ nna!” ⁵Nɛ ewura Sɛgsis bishi Ewurche Ɛsta le: “Wanɛ malɛ e nya kagbene a sha kewora le be kesheŋ ere? Nnɛ nɛ loŋ be esa na wɔ?” ⁶Nɛ Ɛsta yɛ: “Mo e la Heman ere. E la esa lubi nɛ edoŋ nɛ emɔpo nna.” Ndoŋ nna nɛ kufu pɛ Heman ga ashi ewura na nɛ ewurche na be anishito.

⁷Nɛ ewura na nya agbo ga ŋ koso n yige nsa na nseŋ yɔ ewurkpa be kelɔnɛ na so. Heman ka pin fanɛ ewura na beeŋ gberge mo kusoe nɛ e shir kaman a kule ewurche Ɛsta fanɛ e mɔlga mbe ŋkpa. ⁸Ewura na ka shi kelɔnɛ na so m bɛta a ba ebu na to nɛ e wu Heman ka jɔŋɛ ŋ gbasa Ɛsta be kuwurputi a kule mo kenishipereso fanɛ e chɛ mo to. Ewura na ka wu loŋ nɛ e ponte ŋ kaŋɛ le: “Kanyɛn ere bee sha kepur ma eche ere ma anishito nna ashi ewurkpa nfe a?” Ewura na maŋ naŋ malga n loge gba nɛ mbe nyɛrbi ba nyaŋ Heman ŋ gberge mo ashi ewurche na kutɔ. ⁹Nɛ nyɛrbi na be emo nɛ baa tre Harbona na kaŋɛ le: “Yiramu, Heman koŋwule ere yuu kedibi nna mbe laŋ to fanɛ b chɛ Mɔdikaya nɛ e mɔlga fo ŋkpa na efɔl n shiga so. Kedibi na be nteŋ la ayadra adushunu nɛ anu nna!” Nɛ ewura na kaŋɛ: “Men chɛ Heman efɔl n shiga loŋ be kedibi na so!” ¹⁰Nɛ b ya chɛ Heman efɔl n shiga kedibi nɛ e yuu fanɛ b chɛ Mɔdikaya n shiga so na so. Nɛ ewura na be kagbene wushi mo.

Juwebi ka kɔ n sɔ bumo be amu be asheŋ

¹Kumo be kaman nɛ ewura Sɛgsis ta Heman nɛ e la Juwebi bumo doŋ na be kapetɛ kikɛ n sa ewurche Ɛsta kumo kamɔnchɛ kikɛ. Ndoŋ nna nɛ Ɛsta kaŋɛ ewura na kananɛ mo nɛ Mɔdikaya be kekurgeto lar kikɛ. Kumo be kamɔnchɛ nɛ ewura ta Mɔdikaya ŋ ki mbe ekrachi nimuso na be eko. ²Kumo be kaman nɛ ewura na ta mbe kepinibi nɛ k daa wɔ Heman kutɔ nɛ b kɔ a dulgi ewura be nwɔl sibɛso na n sa Mɔdikaya. Nɛ Ɛsta malɛ shin nɛ Mɔdikaya bee keni Heman be asɔ na so. ³Nɛ Ɛsta naŋ laŋɛ n yɔ Ewura na kutɔ n ya gbir mbe anishito n shu ŋ kule mo fanɛ e wora ania n laŋɛ Heman nɛ e la Agag be kaman to ebi be ŋkre lubi nɛ e daŋ kre Juwebi na. ⁴Ndoŋ nna nɛ ewura na teŋi mbe shuwa be kuwurkpabi na ŋ shoŋi Ɛsta nɛ e niŋi to n yili nseŋ kaŋɛ le: ⁵“Yiramu, nɛ k par fo nsaa walɛ n sa fo, nɛ fee fɛ ma asheŋ bre, kumo ere fo sibɛ nwɔl ŋ kaŋɛ fanɛ kananɛ Heman kre fanɛ b mɔ anyi Juwebi kikɛ ashi fo kasawule so na e sa maŋ naŋ wora. ⁶M maaŋ tiŋ n chena a keni nɛ ma basa e mur.” ⁷Nɛ ewura Sɛgsis kaŋɛ ewurche Ɛsta nɛ Mɔdikaya nɛ e la Juw be esa na le: “Ŋkpal Heman ka bee fin kewora Juwebi na kulubi so nɛ n shin nɛ b chɛ mo n shiga kedibi so, nseŋ ta mbe kapetɛ gba n sa Ɛsta na. ⁸Ŋkpal esa ka maaŋ naŋ tiŋ n chɛrga kawɔl kikɛ nɛ b sibɛ ashi ewura be ketre to nseŋ ta mbe kepinibi n dulgi so, n sa fo ekpa fanɛ fo ere gba e sibɛ kawɔl kananɛ k par fo nsaa beeŋ tiŋ m mɔlga Juwebi na nseŋ ta ewura be kepinibi nɛ b kɔ a dulgi mbe nwɔl sibɛso na n dulgi kumo.” ⁹Kufɔl sasopo nɛ baa tre Sivan na be nchɛ adunyɔ nɛ asa nɛ b shɛr ewurkpa be nwɔlsibɛpoana na epul to, nɛ Mɔdikaya malga nɛ b sibɛ nwɔl n sa Juwebi na nɛ bejuŋkparpo nɛ ekrachiana nɛ benimuana nɛ b wɔ efuli na be abonfu kalfa nɛ adunyɔ nɛ ashunu nɛ a yili Indiya be efuli so ashi epeŋilarkpa n ya fo Etopiya be efuli so ashi epeŋitɔrkpa na. Efuli kama so ebi be ŋgbar to nɛ Juwebi be ŋgbar to nɛ b daŋ sibɛ nwɔl na n sa bumo. ¹⁰Ewura Sɛgsis be ketre to nɛ Mɔdikaya daŋ shin nɛ b sibɛ nwɔl na kikɛ nseŋ ta ewura na be kepinibi nɛ b kɔ a dulgi nwɔl na n dulgi amo kikɛ. Kumo be kaman nɛ b ta amo n sa ewura be egbaŋɛ nɛ baa shile ga na be bediipo fanɛ b chige. ¹¹Kusɔ nɛ nwɔl na kaŋɛ e la fanɛ ewura sa Juwebi ekpa fanɛ b kreto nɛnɛ ŋ kɔ m mɔlga bumo amu. E yɛ nɛ benapo ko koso nɛ b ba kɔ Juwebi be benyɛn ŋko beche ŋko mbia, Juwebi na kɔ ekpa nɛ b tu loŋ be bedoŋ na ŋ kɔ m mɔ bumo be kikɛ nseŋ ta bumo asɔ kikɛ ŋ ki bumo peya. ¹²Kufɔl kuduanyɔsopo nɛ baa tre Adar na be nchɛ kuduasa, nɛ b daŋ yili fanɛ baaŋ mɔ Juwebi kikɛ ashi ewura Sɛgsis be efuli so na nɛ mbra nɛ Mɔdikaya sa na gba daga fanɛ k shuŋ. ¹³A daga fanɛ efuli na so ebi kikɛ ka nu mbra na, saŋɛ na so Juwebi na beeŋ wora shiriya ŋ kɔ bumo doŋana na loŋ be kamɔnchɛ. ¹⁴Ndoŋ nna nɛ ewura sa ekpa nɛ egbaŋɛdiipoana na ta ewurkpa be egbaŋɛ na n lar n shile eleŋso n ya chige nwɔl na efuli na kikɛ so. Nɛ mbra na sɔ Susa gba be kade to kikɛ. ¹⁵Kumo be kaman nɛ Mɔdikaya ta kuwurpiŋi lela ko nɛ k la buru nɛ kefuful be weato m buu nseŋ ta ago be piŋi peper kunɔkunɔ m buu n deŋi kumo so, n ta shuwa be kuwurwuro nyɛkpɛso m buu nseŋ lar ewurkpa n yɔ. Nɛ Susa be kade to ebi be ŋgbene fuli bumo nɛ baa cha awɔr nsaa ponte to kagbenefuliso ¹⁶K daa la kagbenefuli nɛ kumu saŋɛ nna n sa Juwebi na kikɛ nɛ b nya tama fanɛ baaŋ kɔ m pɔɔ so. ¹⁷Efuli kama nɛ kade kama to nɛ ewura na be mbra na yɔ, Juwebi nɛ b wɔ ndoŋ be ŋgbene bee fuli bumo nna ga nɛ baa ji eyur nsaa wora kejigboŋ. Ŋkpal loŋ so basa damta daŋ ta bumo be amu nna ŋ ki Juwebi ŋkpal b ka bee ŋana Juwebi na so so.

Juwebi na ka kɔ m pɔɔ bumo doŋana so be asheŋ

¹Kufɔl kuduanyɔsopo nɛ baa tre Adar na be nchɛ kuduasa nɛ sososo be mbra na daŋ daga fanɛ k shuŋ. Loŋ be kachɛ na nɛ Juwebi bumo doŋana na daŋ fɛ fanɛ baaŋ pɔɔ bumo so nseŋ wora bumo, bumo be kepar ama Juwebi na e daŋ kilgi m pɔɔ bedoŋana na so. ²Juwebi na daŋ chala abar so nna kade kama to nɛ b wɔ ashi efuli na so kikɛ, saŋɛ na so baaŋ kɔ basa kama nɛ baa sha ketɔrɔ bumo na. Basa nɛ b wɔ efuli na so na malɛ be bekama daŋ maŋ tiŋ n tu Juwebi na ŋ kɔ ŋkpal manɛ so b daa ŋana bumo nna. ³Abane b ekrachiana nɛ efuli na so be benimuana nɛ bejuŋkparpoana na kikɛ daa yil Juwebi na be kaman nna ŋkpal bumo kikɛ ka daa ŋana Mɔdikaya so. ⁴Mɔdikaya daŋ ki esagboŋ nna ashi ewurkpa na nɛ mbe ketre dii ashi efuli na so kikɛ nɛ mbe eleŋ malɛ bee ti so saŋkama. ⁵Ŋkpal loŋ so Juwebi na daŋ wora bumo doŋana na kusɔ k par bumo nna nseŋ ta etokobi m mɔ bumo kikɛ. ⁶Juwebi na daŋ mɔ basa alfa anu nna ashi Susa be kade to gbagba, ama b daa maŋ ta bumo be asɔ bre. ^7-10Heman nɛ e daa la Juwebi bumo doŋ na daa kɔ mbia kudu nna. Bumo alɛ gba daŋ ti basa nɛ b mɔ na so. Mbe mbia na e daa la Pashandaata nɛ Dalfɔn nɛ Aspaata nɛ Poraata nɛ Adalia nɛ Aridaata nɛ Pamashta nɛ Arisai nɛ Aridai nɛ Vaizaata. ¹¹Kumo be kamɔnchɛ gbagba nɛ b kaŋɛ ewura basa nɛ b mɔ ashi Susa be kade to. ¹²Ndoŋ nna nɛ ewura na kaŋɛ ewurche Ɛsta le: “Basa alfa anu nɛ Juwebi na mɔ ashi Susa be kade to gbagba. Heman be mbinyɛnbi kudu kikɛ daŋ ti bumo so. Kusɔ nɛ b naŋ wora ma efuli na be mba nɛ a ka na bre m maŋ nyi. Manɛ nɛ fo naa sha ŋ ka naŋ wora n sa fo? Kaŋɛ ma! Meeŋ wora kusɔ kama nɛ fee sha n sa fo.” ¹³Nɛ Ɛsta kaŋɛ mo le: “Yiramu, nɛ k par fo bre, fo naŋ shin nɛ Juwebi na e wora kusɔ nɛ b wora kabre ashi Susa ere echefo gba, nseŋ shin nɛ b chɛ Heman be mbinyɛnsobi kudu na be kebuni efɔl n shiga ndibi nɛ b yuu na so.” ¹⁴Nɛ Ewura na sa ekpa ashi Susa be kade to fanɛ b chɛ Heman be mbia na be kebuni efɔl n shiga nɛ esa kama e wu bumo. Ndoŋ nna nɛ b chɛ mbe mbinyɛnsobi kudu na kikɛ be kebuni efɔl n shiga. ¹⁵Kufɔl nɛ baa tre Adar na be nchɛ kuduana nɛ Juwebi nɛ b wɔ Susa be kade to na naŋ chala abar m mɔ basa alfa asa kade na to, ama b maŋ ta bumo be kusɔ kama bre. ¹⁶Juwebi nɛ b wɔ ewura na be efuli na so be abonfu nɛ a ka na gba daŋ chala abar nna ŋ kɔ n sɔ bumo be amu ashi bumo doŋana kutɔ. Bumo alɛ daŋ mɔ basa ŋgboŋ adushunu nɛ anu ama, b daa maŋ ta bumo be kusɔ kama. ¹⁷Kufɔl nɛ baa tre Adar na be nchɛ kuduasa na nɛ loŋ daŋ wora. Kachɛ kuduanasopo na bre, b daa maŋ mɔ basa. B daŋ ta loŋ be kachɛ na nna ŋ ki kagbenefuli nɛ kejigboŋ be kachɛ. ¹⁸Juwebi nɛ b wɔ Susa na bre daŋ ta kufɔl na be nchɛ kuduanu na nna ŋ ki kagbenefuli nɛ kejigboŋ nɛ kewushiachɛ ŋkpal manɛ so bumo ere daŋ mɔ bumo doŋana nchɛ kuduasa nɛ kuduana na nna. ¹⁹Amoso nɛ Juwebi nɛ b wɔ ndekarso na yili kufɔl nɛ baa tre Adar na be nchɛ kuduana na fanɛ kagbenefuli nɛ kejigboŋ be kewushiachɛ nɛ kachɛ nɛ baa chige abar ajibi na. ²⁰Mɔdikaya daŋ sibɛ kusɔ kama nɛ k wora na kikɛ n wɔtɔ kawɔl to, nseŋ sa Juwebi nɛ b wɔ ewura Sɛgsis be efuli so na kikɛ nwɔl na, ²¹fanɛ kufɔl nɛ baa tre Adar na be nchɛ kuduana nɛ kuduanu na e baa la nchɛgboŋ kafɛ kikɛ to n sa bumo. ²²Le be nchɛ ere nɛ Juwebi na daŋ pɔɔ bumo doŋana so nɛ bumo kagbenejija ki kagbenefuli na. E daŋ kaŋɛ bumo nna fanɛ b ta loŋ be nchɛ na nna ŋ ki kejigboŋ nɛ ajibi be kedaŋɛ n chige abar nɛ betirpo. ²³Ndoŋ nna nɛ Juwebi na shuli n sɔ kusɔ kama nɛ Mɔdikaya sibɛ n sa bumo na, nseŋ ta loŋ be nchɛ na ŋ ki nchɛgboŋ kafɛ kikɛ to.

²⁴Hammedaata nɛ e shi Agag be kanaŋ to na pibinyɛn Heman nɛ e la Juwebi bumo doŋ na e daŋ to beri m fin kachɛ nɛ k daga b ka mɔ Juwebi na kikɛ. ²⁵Nɛ Ɛsta yɔ ewura kutɔ nɛ ewura na shin nɛ b sibɛ mbra nɛ k shin nɛ kusɔ nɛ Heman kre fanɛ e beeŋ wora Juwebi na laŋɛ n ji mo. Nɛ b chɛ mo nɛ mbe mbinyɛnsobi kikɛ efɔl n shiga ndibi nɛ b yuu na so. ²⁶Ŋkpal kawɔl nɛ Mɔdikaya sibɛ na so, nɛ ŋkpal kusɔ nɛ k wora Juwebi na so, b daa tre nchɛgboŋ na Purim nna. Kumo be kifito e la keto beri. ²⁷Juwebi na yili kumo nna fanɛ bumo nɛ bumo nanabiana kikɛ nɛ esa kama nɛ e beeŋ ba ki Juw be esa kachako so, beeŋ baa ji loŋ be nchɛgboŋ anyɔ na fanɛ kananɛ Mɔdikaya kaŋɛ bumo na gbagba. ²⁸Amoso, baŋ yili loŋ be saŋɛ na a yɔ k ki mbra nna fanɛ Juwebi na nɛ bumo be kanaŋ kikɛ, nɛ bumo nɛ baaŋ koso kachako so kikɛ daga b ka bee nyiŋi nchɛgboŋ anyɔ nɛ baa tre Purim na nsaa ji amo kafɛ kikɛ. ²⁹Ndoŋ nna nɛ ewurche Ɛsta nɛ e la Abihail pibiche na nɛ Mɔdikaya cha abar n sibɛ kawɔl kpakpaso ko nɛ k kɔ ewurche na be eleŋ na ti kawɔl nɛ Mɔdikaya teŋ sibɛ a laŋɛ nchɛgboŋ nɛ baa tre Purim na so. ³⁰Kumo be kaman nɛ Mɔdikaya chige nwɔl na to n sa Juwebi nɛ b wɔ ewura Sɛgsis be efuli kalfa nɛ adunyɔ nɛ ashunu na so kikɛ. Kagbenewushi nɛ keleŋto gba be asheŋ daa wɔ kawɔl na to, ³¹nsaa nyiŋi Juwebi na nɛ bumo nanabiana fanɛ b baa nyiŋi a ji nchɛgboŋ nɛ baa tre Purim na fanɛ kananɛ baa ji ekishi nɛ nli be nchɛgboŋ na. Mɔdikaya nɛ ewurche Ɛsta e daŋ yili le be kesheŋ ere n sa bumo. ³²Ewurche Ɛsta be eleŋ so nɛ b wora nchɛgboŋ nɛ baa tre Purim na be mbra n nase kanyiŋi be nwɔl to.

Mɔdikaya ka ki esagboŋ be asheŋ

¹Ewura Sɛgsis yili lampo nna n sa basa nɛ b tase teku ase nɛ bumo nɛ b maŋ tase teku ase ashi mbe efuli so kikɛ. ²B sibɛ kananɛ e ji eleŋ mbe kuwura to nɛ kananɛ e maŋ Mɔdikaya so n yili eyilikpagboŋ kikɛ n wɔtɔ Pɛshiya nɛ Midia be efuliana so be bewura be adrasheŋ be nwɔl kikɛ to nna. ³Mɔdikaya e daa la enimu m bɛ ewura Sɛgsis so. E daa la esagboŋ nna Juwebi na kutɔ nɛ b daa sha mbe asheŋ ga ŋkpal e ka daŋ chɛ bumo to nsaa malga a sɔ bumo a yige so.