KAŊINICHIŊGLIŊ

KAŊINICHIŊGELIŊ

BE KAWƆL

Kebaawɔtɔ kikɛ ka la fuloŋ be asheŋ

¹Ewura Deevid pibinyɛn nɛ e la eŋinipo nseŋ daa la ewura ashi Jerusalɛm to na be mmalga nde.

²Eŋinipo na yɛ, kusɔ kama na la fuloŋ nna kebaawɔtɔ ere to. Kebaawɔtɔ maŋ kɔ kifito kikɛ. ³Manɛ be tɔnɔ bre nɛ anyee nya kegben damta nɛ anyee gben ere to? ⁴Kenana ko beeŋ ba choŋ nɛ kenana ko malɛ e naŋ ba, ama durnya ere bre maaŋ chɛrga kikɛ. ⁵Epeŋi bee pete nna nsaa tɔr nseŋ naa chambɔ a yɔ kakpa nɛ k bee pete na. ⁶Afu bee ber a yɔ kelargato to be kaseto be kaba so nsaa ber a yɔ kelargato be esoso be kaba so, a chambɔ loŋ a kulti. ⁷Elɔrana bee shile e luri teku to, ama teku malɛ maa bɔlɔ kikɛ. Nchu na kraŋ naa bɛta nna a luri lɔr na be kakpa nɛ a fara na to nsaa shile a luri to a chambɔ a ba. ⁸Kebaawɔtɔ kikɛ baa la kabapɔ nna nɛ k maŋ walɛ k malga. Anyi be anishi ere maa wu asheŋ a moɛ nɛ asoe malɛ gba maa nu asheŋ a moɛ. ⁹Kusɔ kama nɛ k bee wora naniere daŋ chɛr n wora dra dra kikɛ nna. Shɛŋ shɛŋ maŋ la asheŋ popɔr ashi kasawule ere so. ¹⁰Men keni! Kusɔ ko wɔtɔ nɛ esa beeŋ tiŋ ŋ kaŋɛ fanɛ kumo alɛ naa la asheŋ popɔr a? M-m. Asheŋ ere kikɛ wora dra dra kikɛ nna pɔɛŋ nɛ b kurge anyi. ¹¹Esa kama maŋ wɔtɔ nseŋ naa nyiŋi kusɔ nɛ k wora n choŋ dra dra na. Esa kikɛ malɛ maaŋ naŋ nyiŋi kusɔ nɛ k beeŋ wora echefoso gba.

Eŋinipo na be kusɔ nɛ e luri to nsaa nyi be asheŋ

¹²Ma eŋinipo ere ka malga le be asheŋ ere kikɛ nɛ n daa la Israɛl be efuli so be ewura nna nsaa wɔ Jerusalɛm to. ¹³N wora ania fanɛ meeŋ koya nseŋ pin kusɔ kama nɛ k bee wora durnya ere to.

Ama Ebɔrɛ shin nɛ k ki kpakpa n sa anyi edimɛdi. ¹⁴Ŋ ka wu asheŋ nɛ a bee wora durnya ere to na, nɛ n yɛ; kusɔ kama maŋ kɔ tɔnɔ. K du nna fanɛ fo ka bee ju a bɛ afu so na. ¹⁵Kusɔ kɔnto maa tiŋ a niŋi; b maa karga shɛŋ a ti asɔ nɛ e maŋ wɔtɔ so.

¹⁶Nɛ ŋ kaŋɛ ma kumu le: “Naniere bre ŋ ki bunyaŋ be esagboŋ nna nsaa nyi asheŋ malɛ a chɔ esa kama nɛ e juŋkpar ma n ji kuwura ashi Jerusalɛm to. Amoso n nyi kusɔ nɛ baa tre kanyiasheŋ nɛ kenyi.” ¹⁷N daŋ pere kenishi nna a shin nɛ m pin kebaawora asheŋ kanyiasheŋ so, mannɛ kawuliso. Ama n wu fanɛ afu nɛ mee ju a buu so. ¹⁸Fo baa nya kanyiasheŋ ga, kumo be jemanɛ malɛ nɛ fo kagbene bee jija fo ga. Kenyi be ga la tɔrɔ nna.

¹N daŋ yili kumo nna fanɛ meeŋ ji ma kumu nseŋ fin kusɔ nɛ k la kagbenefuli, ama n wu fanɛ amo kikɛ maŋ la shɛŋ. ²N lege to n wu fanɛ emushe la kawulisheŋ nna, nɛ ebel be keji malɛ maa sa shɛŋ. ³Ŋ ka daa sha kanyiasheŋ ga so, n daŋ yili kumo nna fanɛ meeŋ ta nsa be kenuu n ji ma kumu. N daa fɛ fanɛ ekpa nɛ basa beeŋ bɔla so n ji ŋkpa shiimbi nɛ b kɔ kasawule ere so nna na.

⁴N wora asɔgboŋ damta. M pɔr nwu, nseŋ dɔ ndibisɔrso be adɔana. ⁵N daŋ wora kambɔl nna n duu ndibi nɛ e bee sa kayul nɛ basa e baa chena to a wushi ashi ma kelɔnɛ so nseŋ duu ndibisɔrso be yiri yiri n wɔtɔ kumo to. ⁶N daŋ kur atirbu nɛ baaŋ baa jɔ nchu amo to a wurge ndibi na so nna. ⁷N daŋ tɔ anyache nɛ benyɛn kikɛ nna nɛ bumo alɛ gba bee kurge a ti so ashi ma laŋ to. Ma e daa kɔ asɔbɔya a chɔ esa kama nɛ e juŋkpar ma ashi Jerusalɛm be kade to. ⁸N daŋ chala shuwa nɛ gbiti ashi nsawule pɔtɛ nɛ mee ji amo so kuwura na be bewura be ekpanjawu to nna. Bumo be benyɛn nɛ beche kikɛ daŋ boŋ nshɛ nna n deŋi ma anishi to nɛ n nya beche nɛ mee sha ndoŋ.

⁹Jerusalɛm ka jɔŋɛ kikɛ m ba fo ma jemanɛ so, esa kama daa maŋ wɔtɔ nɛ mbe eyilikpa fo meya so, ma alɛ daa kɔ kanyiasheŋ malɛ gba. ¹⁰Shɛŋ shɛŋ be kenya daa maŋ du ma so kpakpa. Kusɔ kama malɛ maŋ wɔtɔ nɛ k beeŋ tiŋ ŋ kuŋ ma ekpa nɛ m maaŋ wora kusɔ nɛ k beeŋ fuli ma kagbene. Kusɔ kama malɛ nɛ n daŋ wora na, daŋ bɔlɔ ma kenishi nna. Ma alɛ bee wu amo kikɛ fanɛ asɔ nɛ e la tɔnɔ n sa ma nna. ¹¹Ndoŋ nna nɛ n fɛ kusɔ nɛ n wora na be nfɛra nɛ kananɛ m pere kenishi n shuŋ ga be asheŋ, ama kumo be loŋ malɛ daŋ maŋ daga. Amo kikɛ daa du fanɛ k baa ju a bɛ afu so nna nɛ kumo alɛ be loŋ malɛ la fuloŋ. ¹²Kusɔ kama nɛ ewura kama nɛ e juŋkpar ma wora, ma alɛ gba tiŋ n wora kumo.

Amoso n daŋ fara nna a fɛ kusɔ nɛ k la kanyiasheŋ nɛ kebalto nɛ kawulisheŋ. ¹³Ade kikɛ be kaman nɛ m pin fanɛ “Kanyiasheŋ walɛ a chɔ kawulisheŋ fanɛ kananɛ kefulto walɛ a chɔ tentembiri na. ¹⁴Enyiashempo bre nyi kakpa nɛ e bee yɔ, ama ewulpo bre maŋ nyi kakpa nɛ e bee yɔ.” Kumo be lalaloge, enyiashempo nɛ ewulpo kikɛ sasa nna. ¹⁵Kede be kaman nɛ n fɛ fanɛ ketre jija nɛ bewulpo bee nya na, beeŋ ba ma alɛ gba so. Amoso ma kebaa la enyiashempo bre be kifito e la manɛ? Nɛ n yɛ “K maŋ la shɛŋ.” ¹⁶Esa kama maa nyiŋi benyiashempo nɛ bewulpo be asheŋ. K maaŋ chɛr nɛ b teŋ an kikɛ so. Bewulpo nɛ benyiashempo kikɛ beeŋ wu kachako. ¹⁷Ŋkpal loŋ so kebaawɔtɔ nɛ n wɔtɔ ere daa maŋ naa la shɛŋ ŋ kutɔ ŋkpal manɛ so k maŋ bar ma tɔnɔ kikɛ ama asheŋ nawule. Kebaadu fanɛ kebaa ju a buu afu so nna.

¹⁸Asɔ kama nɛ n daŋ pere kenishi n fin durnya ere to na kikɛ daa maŋ la shɛŋ ŋ kutɔ ŋkpal ŋ ka beeŋ yige amo n sa esa nɛ e beeŋ ba ma kaman na so. ¹⁹Feeŋ tiŋ m pin fanɛ enyiashempo ŋko ewulpo e naaŋ baa la loŋ be esa a? Ama loŋ be esa e naaŋ ba ji kusɔ kama nɛ fo gben n nya na be tɔnɔ. Kusɔ kama nɛ n ta ma kanyiasheŋ n fin n nya durnya ere to kikɛ baa la fuloŋ nna. ²⁰Amoso ma kushuŋ damta nɛ n daŋ shuŋ na kikɛ daŋ ki kagbene jija nna n sa ma. ²¹Ŋkpal manɛ so, fo ka beeŋ ta fo nfɛra nɛ kanyiasheŋ nɛ fo enɔ to be ku shuŋ be kenyi kikɛ n shuŋ n sa esa nɛ e maŋ gben bee ŋini asheŋ fuloŋ nna nɛ kumo alɛ be loŋ maŋ walɛ. ²²Mannɛ bre be tɔnɔ nɛ an baa nya kegben damta nɛ anyee gben ere to? ²³Fo ka baa wɔ ŋkpa to ere bre kusɔ kama nɛ fee wora baa la fuloŋ nna. Kusɔ nɛ fee nya kumo to e baa la kagbene jija nɛ ebesa; hale kanyɛso gba fo maaŋ nya n di.

²⁴Kusɔ nɛ ekama baa wora e la kebaa ta mbe kanya a ji a nuu nsaa ji mbe kumu. Ama ade kikɛ be nfɛra nɛ n fɛ nseŋ wu fanɛ amo kikɛ bee shi Ebɔrɛ kutɔ nna. ²⁵Nuso bre nɛ esa beeŋ tiŋ a wɔtɔ a ji mbe kepar nsaa ji mbe kumu a ti so? ²⁶Ebɔrɛ bee ta kanyiasheŋ nɛ kenyi nɛ kagbenefuli nna a sa bekama nɛ baa wora mbe aparsheŋ. Ama belubiworapo bre, e bee shin nna nɛ baa shuŋ a nya asɔ a yili, nɛ bekama nɛ baa wora Ebɔrɛ be aparsheŋ na e ba ji amo be kapetɛ. Ade kikɛ la asheŋ fuloŋ nna. A du nna fanɛ kebaa ju a bɛ afu so.

Kusɔ kama kɔ kumo be saŋɛ nna

¹Kusɔ kama nɛ k bee wora durnya to kikɛ kɔ kumo be saŋɛ nɛ Ebɔrɛ yili nna.

²Mo e yili kakurge nɛ luwu be saŋɛ.

Mo koŋwule na e yili kasɔdu nɛ kasɔteŋi be saŋɛ.

³Mo e yili luwu nɛ eyur be alenfia be saŋɛ,

nseŋ yili keda n lɛ nɛ kepɔr be saŋɛ.

⁴Mo e yili kagbenejija nɛ kagbenefuli be saŋɛ,

nseŋ yili kushu keli nɛ keji eyur be saŋɛ.

⁵Mo koŋwule na e yili ajembu be kechala ŋ deŋi abar so be saŋɛ nɛ amo be kegbeŋi to be saŋɛ,

mo e yili kebir abar to n chɔrɔ abar kasha so

be saŋɛ nɛ kebarga abar be saŋɛ.

⁶Mo e naa yili saŋɛ nɛ k daga dimɛdi ka fin nɛ saŋɛ nɛ k daga dimɛdi ka yige kafin,

Mo e naa yili saŋɛ nɛ k daga keta asɔ n yili

nɛ saŋɛ nɛ k daga keta asɔ n lɛ,

⁷mo e naa yili saŋɛ nɛ k daga kekpɛa to nɛ saŋɛ nɛ k daga kebaa m mata abar so,

mo e naa yili saŋɛ nɛ k daga kekaŋ kusoe n nu,

nɛ saŋɛ nɛ k daga kemalga.

⁸Mo e naa yili kasha nɛ kekishi be saŋɛ,

nsaa yili kena nɛ kayurwushi malɛ gba be saŋɛ.

⁹Manɛ be tɔnɔ bre nɛ anyee nya kegben damta nɛ anyee gben ere to? ¹⁰N nyi esulɔ nɛ Ebɔrɛ ta n deŋi dimɛdi so. ¹¹Mo e yili jemanɛ nɛ k daga n sa kusɔ kikɛ. Mo e sa anyi nfɛra nɛ anyee pin kusɔ nɛ k beeŋ wora echefoso. Amo nɛ amo kikɛ an kra maa pin mbe nfɛra chiŋgeliŋ na to a loge. ¹²Kusɔ nɛ m pɛshɛ m pin fanɛ k walɛ n sa dimɛdi e la fanɛ esa ka kɔ kagbenefuli nsaa wora kelela. ¹³Ŋkpal manɛ so ajibi nɛ anyee nya a ji nɛ nchu nɛ anyee nuu nɛ tɔnɔ kama nɛ anyee nya ashi anyi be ashuŋ to ere kikɛ la Ebɔrɛ be kakɛ nna.

¹⁴M baa nyi geeŋ fanɛ kusɔ kama nɛ Ebɔrɛ wora beeŋ baa wɔtɔ mbaanaayɔ. Fo maaŋ tiŋ n ta shɛŋ n ti kumo so, fo alɛ maaŋ naaŋ tiŋ n lara shɛŋ ashi kumo to. Ebɔrɛ wora loŋ nna saŋɛ na so anyeeŋ baa bunyaŋ mo. ¹⁵Kusɔ kama nɛ k teŋ n wora kabre nɛ kumo nɛ k beeŋ wora echefoso kikɛ teŋ wora nna ŋ ku so. Ebɔrɛ shin nna nɛ loŋ be asheŋ koŋwule na kra wora hale kabre.

Kebaa maa ji asheŋ nɛ amo be ekpa so be asheŋ

¹⁶Ŋ ka naŋ pɛshɛ asheŋ, nɛ n naŋ wu fanɛ, keji asheŋ nɛ amo be ekpa so maŋ naa shuŋ. Alubi nawule e naa ji eleŋ. ¹⁷Amoso kusɔ nɛ n fɛ ma kagbene to e la fanɛ: “Ebɔrɛ beeŋ ji basa niŋiso nɛ basa lubi kikɛ demu ŋkpal manɛ so kusɔ kama kɔ kumo be saŋɛ nna. ¹⁸Asheŋ ere kikɛ be lalaloge nɛ n wu fanɛ Ebɔrɛ bee wora anyi nna a keni nɛ e ŋini anyi fanɛ anyi maŋ bɔ asɔbɔya. ¹⁹Ŋkpal manɛ so asɔbɔya nɛ edimɛdi kikɛ la asɔ futeso nna. Bumo kikɛ la asɔ nɛ baa fute nna nseŋ naa la asɔ nɛ baa wu. Amoso dimɛdi maŋ bɔ kusɔbɔya ŋkpal manɛ so ŋkpa nɛ an kɔ ere maŋ kɔ kifito. ²⁰Asɔ futeso kikɛ bee yɔ kakpa koŋwule nna. Shishɛr to nɛ an shi, shishɛr malɛ to nɛ anyeeŋ naaŋ bɛta n yɔ. ²¹Wanɛ e nyi fanɛ anyi be ayoyu bee yɔ esoso nna nɛ asɔbɔya malɛ peya bee shir kasawule to? ²²Amoso kusɔ nɛ n naaŋ pɛshɛ m pin e la fanɛ a daga an ka bee ji anyi be kegben be tɔnɔ ŋkpal manɛ so anyi maaŋ tiŋ m pin echefoso be asheŋ.”

¹Ade kikɛ be kaman nɛ n naŋ keni n wu fanɛ keji asheŋ nɛ amo be ekpa so maŋ naa wɔ durnya to. Basa nɛ b wɔ kamɛaŋ to na bee shu anishichubi nɛ esa kama maa chɛ bumo to, ŋkpal basa nɛ baa mɛaŋ bumo na ka kɔ eleŋ a chɔ bumo so. ²Ndoŋ nna nɛ n fɛ basa nɛ b teŋ wu n choŋ na be asheŋ, nseŋ wu fanɛ b bɔ anyi bumo nɛ an kra wɔ ŋkpa to ere. ³Basa nɛ b maŋ naŋ kurge bumo na gba bɔ anyi, ŋkpal manɛ so, bumo be kenishi maŋ naŋ wu kananɛ kebaa maa ji asheŋ nɛ amo be ekpa so durnya ere to du.

⁴Kumo be kaman nɛ n naaŋ pɛshɛ m pin kusɔ nɛ k ba nɛ basa bee pere kenishi a shuŋ ga nɛ b dii dama. Amo kikɛ to nɛ n wu fanɛ an ka bee besa abar eyur so nɛ k du loŋ. Ama amo kikɛ la fuloŋ nna. K du fanɛ fo ka ju a bɛ afu so nna. ⁵Ewulpo nawule e naa far mbe mbre a chena a maa sha kushuŋ nɛ akoŋ bee mɔ mo. ⁶Ama fo ka nya gbrɛ n ji kayurwushiso bɔ fo ka nya ga nsaa maa ji a moɛ. K du nna fanɛ fo ka bee ju a pɛ afu na.

⁷Ade kikɛ be kaman nɛ n naŋ wu asheŋ ko nɛ a maŋ kɔ kifito ashi kasawule ere so. ⁸Kanyɛn ko e daa wɔtɔ; a maŋ kɔ ebi, mo alɛ daa maŋ kɔ ekurgepo kikɛ. E daŋ baa wɔ kushuŋ to nna saŋkama, ama mo alɛ be kenishi daa maa bɔlɔ kusɔ nɛ e bee nya so. Nɛ e yɛ: “Wanɛ bre so nɛ mee gben le saŋkama, nsaa maaŋ tiŋ n ta ma kegben n ji ma kumu gba ere?” Le be kesheŋ ere gba maŋ kɔ kifito, kumo alɛ nseŋ naa la kagbenejija ga be asheŋ! ⁹Fo baa kɔ eteri, bɔ fo nawule ka wɔtɔ, ŋkpal manɛ so basa anyɔ e naŋ tiŋ n shuŋ nɛnɛ. ¹⁰Ekoŋwule baŋ tɔr, eko beeŋ niŋi mo to, ama fo nawule bre baa la nseŋ tɔr, k maaŋ ba walɛ kikɛ ŋkpal manɛ so esa maaŋ niŋi fo to. ¹¹Awo to, basa nyɔ beeŋ tiŋ n dese m mata abar nsaa bel edɛ a pɛ abar, ama nuso nɛ esa koŋwule beeŋ tiŋ n wora loŋ? ¹²Kolu nɛ esa koŋwule beeŋ kɔ n tɔr na, basa nyɔ bre beeŋ kɔ kumo m pɔɔ so. K beeŋ ba du kpakpa ga nɛ fo tiŋ n tuge kemamprɔŋ nɛ b ta efɔl asa m mɛa abar n wora to.

^13-14Esa beeŋ tiŋ a la etirpo nseŋ ba ki mbe efuli so be ewura ŋko e beeŋ tiŋ n shi kabuti to gba m ba chena kuwura so, ama nɛ e ki enimu nna pɔɛŋ nseŋ ba ki ewura, mo alɛ nsaa maŋ kɔ kanyiasheŋ ŋko a sɔ kasotoji, kumo ere kabrantiɛfɔlbi nɛ e la etirpo nsaa kɔ kanyiasheŋ bɔ mo. ¹⁵Ŋ ka fɛ basa nɛ b wɔ durnya ere to kikɛ be asheŋ, nɛ m pin fanɛ kabrantiɛfɔlbi beeŋ shi bumo to m ba ji kuwura jemanɛ nɛ ewura na maŋ naa wɔtɔ. ¹⁶Ashere basa nɛ ewura bee juŋkpar na shibi ga n baŋ so ama kachɛ nɛ e kaŋ wu, ekama maaŋ baa wɔtɔ nɛ e lar ŋ kpaŋ mo. Ade kikɛ la asheŋ fuloŋ nna. A du nna fanɛ esa ka ju a bɛ afu so na.

Sa maa wule a nase kɔnɔ Ebɔrɛ be anishito

¹Baa da asheŋ nɛ fee wora ashi Ebɔrɛ be lambu to so. Fee yɔ ndoŋ nna nɛ fo ya nu kusɔ nɛ beŋinipo bee ŋini, mannɛ keya lara kawuliso be sarga fanɛ bewulpo nɛ b maŋ nyi alubi nɛ alela be mbarga na. ²Baa fɛ nfɛra pɔɛŋ nsaa malga, sa maa nya manaŋ a nase nnɔ Ebɔrɛ be anishito. Ebɔrɛ wɔ ebɔrɛso nna nɛ fo alɛ wɔ kasawule ere so, amoso sa maa malga ga. ³Kananɛ kafɔŋ damta beeŋ tiŋ n shin nɛ esa e dese ŋ ku edare lubi na, loŋ koŋwule na nɛ esa nɛ e bee malga ga beeŋ tiŋ m malga kawulisheŋ be mmalga. ⁴Amoso nɛ fo baŋ nase kɔnɔ Ebɔrɛ be anishito, a daga fanɛ fo tia kumo manaŋ. Ŋkpal manɛ so, Ebɔrɛ be shɛŋ maa ji bewulpo to. Amoso baa wora a bɔlɔ fo nnɔ naseso so. ⁵Fo ka maŋ nase kɔnɔ kraa bɔ fo ka nase kɔnɔ e maŋ tiŋ n tia kumo. ⁶Sa maŋ shin nɛ fo kɔnɔ to be mmalga e shin nɛ fo wora kulubi, saŋɛ na so fo maaŋ yɔ Ebɔrɛ be bɔrɛmatapo kutɔ n ya kaŋɛ mo fanɛ fo daa pɛl nna. Manɛ nna nɛ fee wɔtɔ Ebɔrɛ agbo to? Manɛ nna nɛ fo shin nɛ Ebɔrɛ jija kusɔ nɛ fo gben n nya na ŋkpal fo kamalga so? ⁷Edare damta be kebaakuu nɛ mmalga damta be kebaa malga maŋ kɔ kifito. Amoso baa ŋana Ebɔrɛ nsaa sa mo bunyaŋ.

⁸Fo baŋ wu abane be ekrachi ka bee tɔrɔ mbe efuli so be betirpo nsaa ji bumo durmu, sa maŋ shin nɛ k baa chinchiŋ fo, ŋkpal manɛ so ekrachi wurbi na bee wora a bɛ bumo be benimu be nnɔ so nna.

⁹Ŋkpal ewura ka la enimu ekama so so, mo e naa nya kasawule na so be elampo nɛ baa sɔ na kikɛ be galeŋga.

¹⁰Esa kama nɛ e bee sha amansherbi nɛ kedamaya ga, maa nya amansherbi a moɛ kikɛ. Asheŋ fuloŋ e la amo kikɛ. ¹¹Saŋɛ so nɛ fo dii dama na, loŋ be jemanɛ na so nɛ basa damta malɛ bee fin kechɛto fo kutɔ. Asheŋ nɛ damawura bee chena a fɛ saŋkama e la mbe kedamaya be asheŋ. ¹²Etirpo bre ji nɛ e maŋ ji gba, e bee dese kanyɛso a di nɛnɛ nna. Ama amansherbi wura bre, maa di a mata, ŋkpal mbe kedamaya so.

¹³Kusɔ lubi ko malɛ nɛ n naŋ wu k ka bee wora durnya ere to. Basa pere kenishi nna a fin amansherbi a deŋi abar so, nɛ kumo be loŋ bee bar bumo asheŋ. ¹⁴Ŋkpal manɛ so amansherbi na kikɛ beeŋ loge ŋkpal b ka maŋ ta amo n shuŋ kushuŋ lela so. Bumo be mbia malɛ maaŋ nya kapetɛ kikɛ. ¹⁵An ka ba durnya ere to anyi maŋ bar shɛŋ, anyi alɛ naa lar kumo to anyi maaŋ ta shɛŋ n yɔ. ¹⁶K daŋ maŋ daga fanɛ loŋ e wora kuraa! Kananɛ an ba loŋ nɛ anyeeŋ naŋ yɔ. Anyee shuŋ ga nna fanɛ an ka beeŋ tiŋ n ju afu m pɛ na, ama amo nɛ amo kikɛ manɛ b tɔnɔ nɛ anyee nya? ¹⁷Naniere bre tentembiri nɛ kebɔltofinfin nɛ kagbenejija nɛ agbo nɛ kulɔ be kebaawɔtɔ to nɛ an wɔ.

¹⁸Kusɔ nɛ n wu e la fanɛ, kusɔ lela mo nɛ dimɛdi daga kewora an be ŋkpa shiimbi nɛ Ebɔrɛ ta n sa anyi durnya ere to e la fanɛ an baa ta kusɔ kama nɛ an gben n nya a ji eyur. Kusɔ nɛ k baŋ daga dimɛdi kikɛ nna na. ¹⁹Nɛ Ebɔrɛ baŋ shin nɛ fo dii dama nseŋ nya asɔ nseŋ naŋ sa fo ekpa fanɛ fo ji amo be ebel, kumo ere a daga fanɛ fo baa ji a chɔrɔ mo ŋkpal tɔnɔ nɛ fo shuŋ n nya so. K la Ebɔrɛ be kakɛ nna. ²⁰Ŋkpal Ebɔrɛ ka sa fo kagbenefuliso, fo maŋ naa fɔŋ ŋkpa shiimbi nɛ anyee ji durnya ere to be asheŋ so.

¹N dara m pin fanɛ keji asheŋ nɛ amo be ekpa so maŋ wɔ durnya ere to kikɛ kuraa. ²Ebɔrɛ beeŋ tiŋ n sa esa ko kedamaya nɛ kemaŋkura nɛ asɔ nseŋ naŋ sa mo kusɔ kama gba nɛ e bee sha n ti so, ama mo alɛ maaŋ ji amo be ebel. Efɔ ko e naŋ ba ji amo be ebel. Kumo alɛ be loŋ la asheŋ fuloŋ nna a maŋ walɛ. ³Esa beeŋ tiŋ a kɔ mbia kalfa nseŋ chɛr kasawule ere so ga, ama k maŋ tir nfɛ afanɛ nɛ e ji durnya ere to, e baa maŋ nya kagbenefuli ŋko kupuli lela mbe kaluwuachɛ kumo ere kebia nɛ b kurge nɛ e laŋɛ gba bɔ mo. ⁴Kebia nɛ b kurge nɛ e laŋɛ maŋ kɔ tɔnɔ kikɛ; e bee shir tentembiri to nna, nɛ b teŋ mo so epul to. ⁵E maŋ wu epeŋi be kefulto ŋko a nyi kusɔ nɛ baa tre ŋkpa gba, ama mo alɛ nya ewushi ⁶a chɔ esa nɛ e ji nfɛ ŋgboŋ anyɔ nsaa maŋ ji durnya ere to be ebel. Kashenteŋ nna fanɛ bumo kikɛ bee yɔ kakpa koŋwule bre nna.

⁷Kegben nɛ anyee gben ere kikɛ, kusɔ nɛ anyeeŋ ji so nɛ anyee wora. Amo nɛ amo kikɛ anyi alɛ kra maa ji a moɛ. ⁸Hale fo kɔ kanyiasheŋ gba, fo maŋ bɔ ewulpo. Nɛ an la betirpo gba, kumo be loŋ maa ŋini nna fanɛ anyi maaŋ tiŋ n wora kusɔ nɛ k daga. ⁹Shin nɛ kusɔ nɛ fo kɔ e baa bɔlɔ fo kenishi a chɔ fo ka beeŋ baa kɔ a fin kananɛ feeŋ ba nya ga saŋkama. K la asheŋ fuloŋ nna nɛ kumo alɛ be loŋ du fanɛ fo ka bee ju a bɛ afu so na.

¹⁰Kusɔ kama nɛ k bee wora kabre ere daŋ chɛr wora dra dra kikɛ nna. Anyi edimɛdi nyi kusɔ nɛ k la anyi. Anyi alɛ maaŋ tiŋ n ji Ebɔrɛ emɔrɔ ŋkpal manɛ so e kɔ eleŋ a chɔ anyi ga. ¹¹Esa baa malga ga, mbe mmalga maŋ naa kɔ kifito, amo alɛ maŋ kɔ kechɛto n sa esa kikɛ. ¹²Nuso nɛ esa beeŋ tiŋ n wora m pin kusɔ nɛ k walɛ n sa anyi ashi ŋkpa shiimbi nɛ anyee ji durnya ere to, nɛ k bee choŋ fanɛ afu ere? Wanɛ e naŋ tiŋ ŋ kaŋɛ kusɔ nɛ k beeŋ wora mo echefoso saŋɛ so nɛ e lar durnya ere to? An kaŋ wu, nuso nɛ anyeeŋ wora m pin kusɔ nɛ k beeŋ wora anyi durnya mo nɛ anyeeŋ naŋ yɔ na to?

Kanyiasheŋ be asheŋ

¹Ketre lela bɔ tulale dufɛso; nɛ kaluwuachɛ malɛ bɔ kakurgeachɛ.

²Fo ka yɔ keelibuna bɔ fo ka yɔ kejigboŋ to; ŋkpal manɛ so, k yɔ keeli to bee nyiŋi anyi nna fanɛ ekama beeŋ wu kachako.

³Kagbenejija bɔ emushe, k bee jija anishiakpa ama kumo alɛ be loŋ bee shin nɛ esa bee fɛ nfɛra.

⁴Esa kama nɛ e bee chena a fɛ kagbenefuli nawule be asheŋ la ewulpo nna. Ama enyiashempo bre bee kaa chena nna a fɛ luwu be asheŋ.

⁵Eyiashempo baa kpele fo kusoe, k bɔ ewulpo ka bee boŋ nshɛ a kpaŋ fo.

⁶Ewulpo be emushe du nna fanɛ ewi ka wɔ edɛ to a chɔɔ. K maŋ kɔ kifito kikɛ.

⁷Fo baa kɔ kanyiasheŋ nsaa puni basa, kumo ere fee wora nna fanɛ ewulpo na. Fo baa sɔ brɔbu malɛ, fo da nɛ fee jija na.

⁸Kusɔ kama be lalaloge bɔ kumo be sososo.

Kanyiti ka bɔ kamoowu be asheŋ

⁹Bewulpo e naa nya agbo manaŋ manaŋ nsaa ta asheŋ a wɔtɔ kagbene to.

¹⁰K maŋ daga fanɛ fo baa kaŋɛ le: “Manɛ nna nɛ dra na bɔ kabre?” K maŋ la kanyiasheŋ be kamalga.

¹¹Kanyiasheŋ du nna fanɛ kapetɛ, nsaa kɔ tɔnɔ n sa bekama nɛ b kɔ kumo. ¹²Kanyiasheŋ du fanɛ kusɔ kuŋso nna fanɛ kananɛ amansherbi gba du fanɛ kusɔ kuŋso na. Kanyiasheŋ be tɔnɔ kikɛ e la kananɛ k bee kuŋ esa nɛ e kɔ kumo na.

¹³Fɛ kusɔ nɛ Ebɔrɛ wora ere be asheŋ. Nɛ Ebɔrɛ baa maŋ niŋi kusɔ, wanɛ bre e naŋ tiŋ n niŋi kumo? ¹⁴Nɛ asheŋ baa nite nɛnɛ, shin nɛ fo kagbene e baa fuli fo, nɛ asheŋ maŋ naa nite nɛnɛ malɛ, ba nyi fanɛ Ebɔrɛ e naa sa ekpa nɛ asheŋ lela nɛ asheŋ lubi bee tu esa. Amoso ekama maŋ nyi kusɔ nɛ k beeŋ wora echefoso.

¹⁵Kebaawɔtɔ jiga nɛ n wɔtɔ ere to, nɛ n wu fanɛ basa lela ko bee wu bumo be alelasheŋ to nna nɛ basa lubi malɛ kɔ ŋkpa nsaa wɔ bumo be asheŋ lubi to. ¹⁶Amoso sa maŋ shin nɛ kanyiasheŋ nɛ kenishibugi nɛ fo kɔ na e mur fo. ¹⁷Sa maa kɔ kumu kpakpaso ŋko e la ewulpo saŋɛ na so fo maaŋ wu nɛ fo kachɛ maŋ naŋ fo. ¹⁸Baa nite teteri a yɔ. Fo baa kɔ bunyaŋ a sa Ebɔrɛ asheŋ beeŋ nyalɛ n sa fo.

¹⁹Kusɔ nɛ esa nɛ e kɔ kanyiasheŋ beeŋ tiŋ n wora, bejuŋkparpo kudu maaŋ tiŋ n wora kumo n sa bumo be kade.

²⁰Esa kama maŋ wɔ durnya ere to nɛ e niŋi n ya loge nsaa maa wora a foe.

²¹Sa maa kaŋ kusoe a nu kusɔ kama nɛ basa bee malga, nɛ manɛ aloŋ, feeŋ nu fo kayɛrbi ka bee tege fo, ²²ŋkpal manɛ so fo alɛ gba bee kaa tege beko.

²³Ŋ gbagba be kanyiasheŋ nɛ n ta m pin ade kikɛ ama amo alɛ kra chɔ ma so. ²⁴Nuso nɛ esa beeŋ tiŋ m pin kebaawɔtɔ ere be asheŋ to? Kumo be kepinto du kpakpa ga nsaa du chiŋgeliŋ. ²⁵Amoso n daŋ yili kumo nna fanɛ meeŋ ta ma kanyiasheŋ n fin asheŋ kpakpaso ere kikɛ be edesekpa, saŋɛ na so meeŋ koya kananɛ kulubi nɛ kawulisheŋ du.

²⁶Ade kikɛ be kaman nɛ n naŋ wu fanɛ eche dalubiwura, lubi a chɔ luwu. E du nna fanɛ b ka so kejigbelɛ na. Mbe kasha nɛ e beeŋ sha fo na bee pɛ nna fanɛ kashewu; Nɛ mbe enɔ nɛ e beeŋ ta n deŋi fo so na malɛ du fanɛ ŋgbɛlɛbi. E maaŋ tiŋ n nya esa nɛ e bee wora Ebɔrɛ be aparsheŋ ama alubiworapo bre e bee pɛ mo nna manaŋ. ²⁷Eŋinipo na yɛ: “Mee lege asheŋ ere to nna gbrɛgbrɛ a fin amo be edesekpa.” ²⁸N daŋ naa keni nna a fin atuwebi ko nɛ n sa ama ma alɛ maŋ nya. Meeŋ tiŋ n nya esa lela koŋwule benyɛn kagboŋ to, ama beche bre to maaŋ nya loŋ be esa. ²⁹Asheŋ nɛ ŋ koya kikɛ nna na. Ebɔrɛ to anyi nɛnɛ nna nɛ anyi alɛ jija anyi be amu.

¹Enyiashempo nawule e kɔ nfɛra a pin asheŋ be afito to. Kanyiasheŋ e naa sa mo kagbenefuli nsaa shin nɛ e bee mushe.

Kebaanu a sa ewura be asheŋ

²Fo baŋ nase kɔnɔ Ebɔrɛ be anishito fanɛ feeŋ baa nu a sa ewura, kumo ere a daga fanɛ fo baa wora loŋ. ³Sa maa kuse a lar ewura be anishito ŋko a ji mo emɔrɔ ŋkpal manɛ so e beeŋ tiŋ n wora kusɔ kama nɛ e bee sha. ⁴Ewura be kamalga du fanɛ b ka nase mbra nna, amoso esa kama maaŋ tiŋ n ji mbe kamalga emɔrɔ. ⁵Fo baa nu a sa ewura, asheŋ maa pɔɔ fo so. Enyiashempo malɛ kikɛ nyi kananɛ daga fanɛ e nu n sa ewura nɛ saŋɛ nɛ k daga e ka wora loŋ. ⁶Kebaawɔtɔ du kpakpa, ama kusɔ kama kɔ kumo be saŋɛ nɛ kakpa nɛ k daga k ka wora. ⁷Ŋkpal manɛ so, esa kikɛ maaŋ tiŋ m pin kusɔ nɛ k beeŋ wora echefoso. Esa kama malɛ maŋ wɔtɔ nɛ e kaŋɛ mo. ⁸Esa kama maŋ kɔ eleŋ luwu so ŋko nɛ e tiŋ n chɛrga mbe kaluwuachɛ. Luwu la kena nɛ esa kama maaŋ tiŋ n shile kumo nna, loŋ koŋwule na e la esa nɛ e bee wora alubi. Mbe alubi beeŋ ba dii efuli kachɛ ko.

Kumukpakpasowura nɛ esa nɛ e niŋi be asheŋ

⁹N wu kananɛ asheŋ bee nite durnya ere to kikɛ, beko bee tɔrɔ bumo braana nna ŋkpal b ka kɔ eleŋ a chɔ bumo so. ¹⁰N wu amukpakpaso wuraana ka wu nɛ b puli bumo bunyaŋ so, ama Ebɔrɛ bre be basa ka lar kade cheembi na to, epul to nɛ b teŋ bumo so. Kanyiasheŋ maŋ wɔ ade be kekama to. ¹¹Kulubi be kasogberge baa maa ba manaŋ manaŋ, k bee shin nɛ basa be ŋgbene bee laŋɛ kulubi be kewora so nna. ¹²Kumukpakpasowura beeŋ tiŋ n wora alubi kalfa nseŋ kraŋ ji efute n chɛr, ama n nyi fanɛ asheŋ beeŋ nite nɛnɛ n sa esa nɛ e bee ŋana Ebɔrɛ nsaa wora mo kasonu na. ¹³Ama ŋkpal kumukpakpasowuraana ka maa ŋana Ebɔrɛ nsaa maa wora mo kasonu so, asheŋ maaŋ nite nɛnɛ n sa bumo; bumo alɛ be nchɛ maaŋ teŋi so fanɛ kiyoyul nɛ k maa yili kakpa koŋwule a chɛr na.

¹⁴Kusɔ ko nɛ kumo be kepin to du kpakpa kraa wora kasawule so. Kumo e la fanɛ basa niŋiso ka bee nya kasogberge nɛ k daga kumukpakpasowuraana, nɛ kumukpakpasowuraana bee nya kemaŋkura nɛ k daga basa niŋiso. Ma ere kutɔ kede gba maŋ kɔ kifito. ¹⁵Ma ere so an baa ji anyi be amu, ŋkpal manɛ so, anyi be kebaawɔtɔ to be kagbenefuli kikɛ baa wɔ kebaaji a nuu nsaa ji eyur to nna. Kusɔ nɛ anyeeŋ tiŋ n wora kikɛ ashi kegben kama nɛ anyee gben kebaawɔtɔ nɛ Ebɔrɛ sa anyi durnya ere to e baa la na.

¹⁶Kapa nɛ kanyɛ mee gal edi nna a wora ania nɛ m pin kusɔ nɛ k bee wora durnya ere to. ¹⁷Ndoŋ nna nɛ n wu kusɔ kama nɛ Ebɔrɛ wora nseŋ pin to fanɛ esa kikɛ maaŋ tiŋ m pin asheŋ nɛ a bee wora ere to. Dimɛdi wora ania kanaŋkama, e maaŋ tiŋ m pin amo be afito. Hale enyiashempo kaŋɛ fanɛ e nyi asheŋ kanaŋkama gba, e maaŋ tiŋ m pin amo to.

Kelamba koŋwule ka dese n sa ekama be asheŋ

¹Kede be kaman nɛ n fɛ asheŋ ere kikɛ be asheŋ nseŋ wu fanɛ basa niŋiso nɛ benyiashempo kikɛ be asheŋ nɛ baa wora kasha so nɛ amo nɛ baa wora yurkishi so kikɛ bɔɔ Ebɔrɛ enɔ nna. Ekama maŋ nyi kusɔ nɛ k dese a jo mo. ²Kelamba koŋwule e dese n sa basa niŋiso nɛ kumukpakpasowuraana; basa lela nɛ basa lubi kikɛ. Kusɔ koŋwule e naaŋ wora basa nɛ baa ŋana Ebɔrɛ nsaa sa mo bunyaŋ nɛ bumo nɛ b maa ŋana mo kikɛ. Kusɔ nɛ k beeŋ wora basa nɛ baa lara esarga a sa Ebɔrɛ na, kumo e naŋ wora bumo nɛ b maa bɛ bumo be nnɔ naseso so na gba.

³Kulubi nɛ k wɔ asheŋ kama nɛ e bee wora durnya to na e la fanɛ, kelamba koŋwule e dese n sa ekama. Asheŋ lubi nɛ ebonsheŋ e baŋ bɔlɔ edimɛdi be ŋgbene nɛ nfɛra to; amo alɛ kikɛ be kaman baa wu a yɔ bubuni to nna. ⁴Ekama nɛ e kraa wɔ ŋkpa to kraa kɔ tama, fanɛ kananɛ jɔnɔ keniso kɔ tɔnɔ a chɔ buluŋ wuso na. ⁵Kashenteŋto, basa nɛ b wɔ ŋkpa to nyi b ka beeŋ wu, ama basa nɛ b wu bre maŋ naa nyi shɛŋ. Kusɔ lela kikɛ maŋ naa wɔtɔ n sa bumo; bumo ere choŋ nna na, nɛ b teŋ bumo so. ⁶Kasha nɛ yurkishi nɛ kukɔrkɔ kama nɛ b daa kɔ kikɛ choŋ nna na. B maaŋ naŋ tiŋ n ti basa so n wora asheŋ kasawule ere so kikɛ.

⁷Baa ji a nuu kagbenefuliso! Kusɔ nɛ Ebɔrɛ yili dra kikɛ fanɛ fo baa wora nna na. ⁸Baa buu asɔ fuful jemanɛ kikɛ nsaa saŋɛ kenishito a wora asheŋ kagbenefuliso ⁹Durnya to be kebaawɔtɔ maŋ kɔ tɔnɔ, amoso jemanɛ nɛ men wɔ ŋkpa nɛ Ebɔrɛ sa menyi to ere, fo nɛ fo eche nɛ fee sha na e baa ji menyi be amu nɛnɛ. Ŋkpal manɛ so, kusɔ nɛ k wɔtɔ n sa menyi ashi menyi be kegben kikɛ to nna na. ¹⁰Kushuŋ kama nɛ fo nya, baa shuŋ kumo nɛ fo eleŋ kikɛ, ŋkpal manɛ so, k maaŋ chɛr feeŋ yɔ bubuni to, kakpa nɛ kushuŋ nɛ kefɛ nfɛra nɛ kekre asheŋ nɛ kanyiasheŋ maŋ wɔ.

¹¹N daŋ naŋ wu kusɔ ko malɛ gba durnya to n ti so. Kumo e la fanɛ, mannɛ basa nɛ baa shile ga e naa tiŋ a ji kɔŋkɔŋ ŋko belempo e naa tiŋ a kɔ a pɔɔ so jemanɛ kikɛ. Mannɛ kanyiasheŋ ŋko kenyi be ga e naa bar ajibi ŋko kedamaya ŋko ketregboŋ. Kumu lubi malɛ wɔtɔ nna n sa ekama.

¹²Fo maaŋ tiŋ m pin jemanɛ nɛ fo peya bee ba. Kananɛ abulbi bee pɛ mbuibi ŋko ewule bee pɛ ekɔrɔtɔ epul to na, aloŋ nɛ asheŋ lubi bee ba edimɛdi gba so.

Kanyiasheŋ ka bɔ kawulisheŋ be asheŋ

¹³N daŋ naŋ wu kananɛ basa bee fɛ kanyiasheŋ be asheŋ nɛ k bɔlɔ ma kenishi ga. ¹⁴Kadebi ko nɛ kumo to be basa daa maŋ shibi e daa wɔtɔ. Nɛ ewura lempo ko nɛ mbe benapo daŋ ba kulti kumo n wɔtɔ a shin nɛ b bure kumo be egbal n luri to ŋ kɔ kumo kena. ¹⁵Etirpo ko daa wɔ kadebi na to a nyi asheŋ ga, nseŋ daŋ bɔla mbe kanyiasheŋ so m mɔlga kumo. Ama ekama daa maŋ naa nyiŋi mbe asheŋ. ¹⁶Amoso nɛ ma ere kaŋɛ fanɛ kanyiasheŋ bɔ eleŋ na. Ama esa kikɛ maa fɛ fanɛ etirpo nyi asheŋ ŋko a ta mbe kamalga a shuŋ. ¹⁷Kewora enyiashempo be kamalga nɛ e beeŋ malga boeŋ na kasonu bɔ awɔr nɛ bewulpo be ewura bee chɛ na. ¹⁸Kanyiasheŋ kɔ kechɛto a chɔ kena to be akɔsɔ, ama kulubi koŋwule bee jija alela damta nna.

¹Kananɛ ashushombi bee wu a wɔtɔ tulale to nɛ amo be efɛa bee chɛrga na, aloŋ nɛ kawuli fimbi kikɛ bee jija esa be kanyiasheŋ nɛ kemaŋkura.

²Enyiashempo be kagbene bee laŋɛ kusɔ nɛ k daga be kewora so nna, ama ewulpo bre be kagbene bee laŋɛ asheŋ nɛ a gbɛto so nna. ³Ewulpo baa bɔ ekpa a nite gba, ekama bee pin fanɛ e maŋ kɔ nfɛra nɛ kanyiasheŋ kikɛ maŋ wɔ mo to.

⁴Hale ewurjipo nya agbo n wɔtɔ fo gba, sa maŋ kaŋ kini kushuŋ nɛ fee shuŋ a sa mo na. Fo kewushi kagbene m bar fo kumu kaseto beeŋ tiŋ n shin nɛ e ta fo kewora n jija na m paŋ fo.

⁵N wu kulubi ko ashi durnya to, kumo e la bewurjipo ka maa ji asheŋ nɛ amo be ekpa so. ⁶Baa ta bewulpo nna a yili eyilikpagboŋ a sa bumo bunyaŋ nsaa keni damawuraana jiga. ⁷Ma ere wu anya ka chena egbaŋɛ so nɛ bewurbi bee nite aya so fanɛ anya.

⁸Esa kama nɛ e kur kemaŋ n nase nsaa maŋ de so mo gbagba e naŋ tɔr kumo to. Esa kama malɛ nɛ e bure egbal dra n lɛ nsaa maa de so kana e naaŋ duŋ mo. ⁹Esa kama nɛ e bee bure afalta ŋko a baŋɛ ndishaŋ to beeŋ tiŋ n doro mbe kumu. ¹⁰Nɛ fo kekpanfu baa maa ji nɛ fo alɛ maŋ yee kumo, kumo ere eleŋ fuful nɛ feeŋ baa kɔ a ku kusɔ. Kenyi bre bee shin nɛ asheŋ bee nite nɛnɛ nsaa loge to nɛnɛ nna. ¹¹Kuwɔ be keduŋ esa m mɔ pɔɛŋ nɛ edurpo e ba wora kudur m mɔ kuwɔ na maŋ kɔ kechɛto kikɛ. ¹²Enyiashempo be mmalga bee bar mo kemaŋkura nna, ama ewulpo bre be kɔnɔ to be mmalga e naa mur mo. ¹³Ewulpo bee fara kawulisheŋ be mmalga nna, kumo be lalaloge nɛ a ya bar kebagato. ¹⁴Mbe mmalga malɛ maa loge kikɛ, e baa bela amo a biti abar so nna.

Esa kikɛ maŋ nyi kusɔ nɛ k beeŋ naŋ wora. Esa kikɛ malɛ maaŋ tiŋ ŋ kaŋɛ anyi kusɔ nɛ k beeŋ wora luwu be kaman.

¹⁵Ewulpo e naa shuŋ a gben a chul to nsaa maŋ naa nyi kananɛ e beeŋ naaŋ wora n yɔ epe.

¹⁶Asheŋ maaŋ nyalɛ n sa efuli kama nɛ kumo be ewura la kebia nɛ kumo be bejuŋkparpoana malɛ wɔtɔ a ji kejigboŋ karechɛ kikɛ. ¹⁷Ama efuli kama nɛ kumo be ewura bee ta mo gbagba be nfɛra a wora asheŋ nɛ kumo be bejuŋkparpo malɛ bee ji jemanɛ k daga nsaa tiŋ a keta bumo be amu a maa boo nsa bre wora kumulela.

¹⁸Etɔlpo be ebu be larbeŋ e naa bu a tɔr to nɛ ebu na bee dul mo so, kumo be lalaloge nɛ kowu na e tɔr kuraa.

¹⁹Kebaa ji nsaa nuu bee shin nɛ esa be kagbene bee fuli mo nna, ama amansherbi nɛ e beeŋ nya pɔɛŋ tiŋ n wora amo kikɛ.

²⁰Sa maŋ kaŋ malga ŋ gbiti ewura ŋko n shoduu damawura, hale fo nfɛra to ŋko ashi fo ebu deseso to gba. Ŋkpal manɛ so, kabuibi ko beeŋ tiŋ n nu nseŋ ya kaŋɛ bumo kusɔ nɛ fo malga na kikɛ.

Kusɔ nɛ Enyiashempo bee wora be asheŋ

¹Baa ta fo asɔ a kɛ yilayilaso, kachako so feeŋ ji amo be tɔnɔ. ²Baa chige fo asɔ to a sa basa be yiri yiri damta, ŋkpal manɛ so, fo maaŋ tiŋ m pin jemanɛ nɛ kumu lubi beeŋ tu fo. ³Bɔrɛwɔlpa baŋ moɛ nchu, k bee bar bɔrɛchu nna; kaplɛkama nɛ kedibi malɛ baŋ tɔr n shoŋi, ndoŋ nɛ k dese, k maaŋ naŋ tiŋ n chɛrga kumo be edesekpa. ⁴Esa kama nɛ e bee sha fanɛ afu e baa nite nɛnɛ nɛ kakpa e kpeta to nɛnɛ pɔɛŋ nɛ e dɔ, maaŋ tiŋ n dɔ n duu n teŋi shɛŋ.

⁵Kananɛ fo maaŋ tiŋ m pin ekpa nɛ afu bee bɔla so a ba, ŋko kananɛ kebia bee wora a daŋ mo nio be epun to na, a loŋ nɛ fo maaŋ tiŋ m pin Ebɔrɛ nɛ e to kusɔ kikɛ na be kasheŋwora to.

⁶Baa wule a koso kachipurdidi n ya kaa duu fo asɔduu nsaa pere kenishi a shuŋ a tɔr epeŋi. Ŋkpal manɛ so fo maaŋ tiŋ m pin fanɛ kachipurso peya na ŋko kaaseso peya na e naaŋ wora n lar tɔnɔ n sa fo.

Kenyiŋi fo etopo fo kebifɔlbi to be asheŋ

⁷Shɛŋ maŋ walɛ kenishiso a chɔ kachipurso be epeŋi. ⁸Nfɛ kama nɛ esa beeŋ ji durnya ere to, e shin nɛ mbe kagbene e fuli amo be kekama so. Ama e baa nyiŋi fanɛ nfɛ nɛ e beeŋ ji luwu be kaman chɔ amo nɛ e beeŋ ji durnya to. Shɛŋ maŋ wɔtɔ nɛ esa beeŋ tiŋ n ta mbe yirda n to kumo so.

⁹Kebifɔlbi, baa ji fo kumu kagbenefuliso, ŋkpal fo kebifɔlbi so. Baa wora fo kagbene be aparsheŋ kanaŋkama nɛ fee sha. Ama baa nyiŋi fanɛ Ebɔrɛ beeŋ yili kusɔ kama nɛ fo wora so n ji fo demu.

¹⁰Sa maŋ shin kusɔ kama e baa fɔŋ fo ŋko a tɔrɔ fo ashi fo kagbene to, ŋkpal manɛ so, kebifɔlbiya nɛ kumo be asheŋ woraso maa chɛr nsaa choŋ.

¹Amoso baa nyiŋi fo etopo jemanɛ nɛ fo kraa la kebifɔlbi ere, pɔɛŋ nɛ asheŋ e baa wora fo so keshi ashi nfɛ nɛ a wɔ fo anishito ere to nɛ fo kaŋɛ le: “Kebaawɔtɔ maŋ naa wora ma ebel.” ²Loŋ be jemanɛ na, epeŋi nɛ kufɔl nɛ achɛkpabi maaŋ naa fuli to nɛnɛ a sa fo, ŋkpal fo anishi ka maa naa wu nɛnɛ so. Nɛ kewora fanɛ bɔrɛwɔlpa ka buu fo so jemanɛ kikɛ na. ³Ndoŋ nna nɛ fo mbre nɛ e bee kuŋ fo na e fara a chicha nɛ fo aya nɛ e kɔ eleŋ kabre ere e paŋ amo be eleŋ. Fo anyii damta na beeŋ gbaŋ n tɔr nseŋ ka gbrɛbi nɛ fo maaŋ naŋ tiŋ ŋ we ajibi to nɛnɛ nɛ fo anishi malɛ maaŋ naa wu nɛnɛ. ⁴Loŋ be jemanɛ na fo asoe maa naa nu awɔr nɛ a bee chɛ kelɔnɛ so ŋko nshɛ nɛ beche beeŋ baa kɔr asɔ abo so nsaa boŋ na nɛnɛ. Mbuibi be kushu gba beeŋ gal fo edi. ⁵Feeŋ baa ŋana kedii kakpa jeŋgreŋ ŋko a nite ekpaana to be mboŋ nɛ e bee keta kufu. Fo emin beeŋ kilgi n fuli nɛ enite gba e baa nu fo; shɛŋ malɛ maaŋ naa yɛlga fo.

Loŋ be jemanɛ na bee ŋini fanɛ anyi be ekama bee yɔ epe nɛ k wɔtɔ mbaanaayɔ na nna, nɛ basa e sɔ abɔrbi so a shu nli. ⁶Amoso baa nyiŋi fo etopo na pɔɛŋ nɛ fo efute nɛ k du fanɛ kajesebi na e tuge to ŋko a du fanɛ kapuya na e bure kuraa. ⁷Anyi be eyurana ere beeŋ bɛta n yɔ shishɛr nɛ a shi to na to, nɛ Kiyoyu nɛ e bee sa anyi ŋkpa nɛ efute na malɛ e bɛta n yɔ Ebɔrɛ nɛ e ta mo n wɔtɔ anyi to na kutɔ.

⁸Eŋinipo na yɛ: “Shɛŋ shɛŋ maŋ kɔ kifi to! Shɛŋ maŋ kɔ tɔnɔ! Amo kikɛ la fuloŋ nna.”

Kesa Ebɔrɛ bunyaŋ nseŋ wora mo kasonu be asheŋ

⁹Ama ŋkpal eŋinipo na ka la enyiashempo so, e kraa ŋini basa asɔ nɛ mo ere nyi nna. E koya aŋasa nna nseŋ mige amo to nɛnɛ m pin amo be kashenteŋ kikɛ. ¹⁰E wora ania fanɛ e beeŋ keni to n fin mmalgabi nɛ e bee wushi kagbene. Kusɔ nɛ e sibɛ na malɛ niŋi nna nsaa la kashenteŋ.

¹¹Enyiashempo na be mmalga na du fanɛ mbolpɔkpapo be kekpabi nɛ e kɔ a kpa mbe mbolpɔ nna nɛ aŋasa na malɛ du fanɛ ayir nɛ e gbir nɛnɛ nna. Mmalga na shi Ebɔrɛ nɛ e la anyi kikɛ be ekpapo na kutɔ nna. ¹²M pibi, baa da so nɛ fo maaŋ naŋ ta shɛŋ n ti mmalga ere so.

Nwɔl be kasibɛ maaŋ kɔ ekar kikɛ, nɛ kekoya be alegai malɛ bee shin nɛ esa bee gben a bɛlɛ.

¹³Ade kikɛ be kaman, kusɔ koŋwule e ka nɛ ŋ kaŋɛ. Baa ŋana Ebɔrɛ nsaa bɛ mbe mbraana so. Ŋkpal manɛ so, loŋ so nɛ Ebɔrɛ to dimɛdi bomin. ¹⁴Ebɔrɛ beeŋ yili kusɔ kama nɛ an wora so n ji anyi demu, hale asheŋ lubi ŋko asheŋ lela nɛ an wora ashiri to gba.