KƆLƆSIEBI

KAWƆL NƐ PƆƆL SIBƐ N SA

KƆLƆSIEBI

NA

¹Kawɔl ere shi ma Pɔɔl nɛ n la Yesu Kristo be eshuŋipo ŋkpal Ebɔrɛ be keparso nɛ an kurgepo Timoti kutɔ nna ²a yɔ menyi nɛ men la Ebɔrɛ peya a wɔ Kɔlɔsi nseŋ naa la an kurgepoana nɛ basa nɛ b maŋ kɔ kɔnɔleŋi ashi Yesu Kristo to na kutɔ. An Tuto Ebɔrɛ e sa menyi mbe kuwɔr be kakɛ na nɛ kagbenewushi.

Kabɔrɛkule nɛ kechɔrɔ be asheŋ

³Saŋkama nɛ anyee kule Ebɔrɛ a sa menyi, anyee chɔrɔ Ebɔrɛ, an Nyɛnpe Yesu mo Tuto na nna, ⁴ŋkpal manɛ so, an nu kananɛ men kraa yirda Yesu Kristo nɛ kananɛ men kraa sha bumo nɛ b la Ebɔrɛ peya kikɛ ⁵ŋkpal men ka bee tama asɔ nɛ Ebɔrɛ bela n yili menyi ebɔrɛso so. ⁶Men chɛr n nu amo be asheŋ kashenteŋ be kubɔya na to, kumo e la baru lela nɛ Epafras bɔ n sa menyi na. Baru lela na e naa shin nɛ basa bee wora kelela durnya to kikɛ. Basa nɛ baa yirda baru na gba bee wora keshi nna fanɛ kananɛ k bee wora menyi to yili jemanɛ nɛ men nu baru lela na m pin nɛnɛ kananɛ Ebɔrɛ kɛ basa mbe kuwɔr be kakɛ kashenteŋto nna. ⁷Epafras, an barkasa kebɔrɛnya shaso ŋini menyi kananɛ Ebɔrɛ kɛ basa mbe kuwɔr be kakɛ na. Mo e la Yesu Kristo be eshumpo kagbene koŋwuleso a yil an be katelamu to nna. ⁸Mo e kaŋɛ anyi kananɛ menyee sha Ebɔrɛ be basa ashi Kiyoyu Cheeŋ na to.

⁹Kumo so nɛ saŋkama nɛ anyee kule Ebɔrɛ a sa menyi, yili jemanɛ nɛ an nu men be asheŋ na. Anyee kule mo nna fanɛ e shin nɛ men baa pin asɔ nɛ e bee sha nɛnɛ, kumo e la fanɛ nɛ men nya kashennyi m pin kusɔ nɛ e bee sha ashi Kiyoyu Cheeŋ na to. ¹⁰Loŋ nɛ menyeeŋ baa kɔ kebaawɔtɔ nɛ k daga Enyɛnpe na be basa ka kɔ nɛ men be asheŋ e baa par mo nɛnɛ nɛ men baa wora kelela be yiri kikɛ m baa pin Ebɔrɛ nɛnɛ a ti so. ¹¹An be kabɔrɛkule e la fanɛ Ebɔrɛ e sa menyi eleŋgboŋ ashi mbe eleŋgboŋ na to nɛ men baa nyiti awurfoŋ kikɛ kagbenefuliso a chɔrɔ Etuto na ga, ¹²ŋkpal manɛ so, mo e shin nɛ men daga kenya asɔ nɛ e kɔ a sa mbe basa na be ako ashi ebɔrɛso, kakpa nɛ kefulto wɔ na. ¹³An Tuto na sɔ anyi ashi Setani be tentembiri be kuwurji to n yige nseŋ ta anyi n wɔtɔ mo Pibinyɛn shaso na be kuwurji to. ¹⁴Ebɔrɛ shin nɛ mo Pibinyɛn sɔ anyi n yige, kumo e la fanɛ e ta an be asheŋ lubi m paŋ anyi.

Kristo ka chɔ kusɔ kama be asheŋ

¹⁵Ebɔrɛ Pibi na du fanɛ Ebɔrɛ nɛ basa maaŋ tiŋ n wu kikɛ na nna. Mo e la kusɔtoso kikɛ be enimu, ¹⁶ŋkpal manɛ so, Ebɔrɛ shin nɛ mo Pibi to asɔ kikɛ, amo nɛ a wɔ ebɔrɛso nɛ amo nɛ a wɔ kasawule so, amo nɛ basa beeŋ tiŋ n wu nɛ amo nɛ basa maaŋ tiŋ n wu, kuwurjiana nɛ eleŋana, esoso be kenimujipoana nɛ bejuŋkparpoana. Ebi na e to amo kikɛ nɛ b baa bunyaŋ mo. ¹⁷Mo e daŋ asɔ kikɛ kebaawɔtɔ, mo e kɔ amo kikɛ to. Mo e wɔ asɔriebi fanɛ kananɛ esa wɔ mbe kumu na, mo e naa sa bumo ŋkpa, ¹⁸ŋkpal manɛ so, mo e la ejuŋkparpo nɛ e tiŋi luwu to ashi bumo nɛ b wu na kikɛ to. ¹⁹Amoso, mo e chɔ asɔ kikɛ, ŋkpal manɛ so, Etuto na be keparso nɛ Ebi na du fanɛ mo gbagba chap. ²⁰An Tuto na e shin nɛ mo Pibi bar asɔtoso kikɛ abar so nɛ Ebɔrɛ nɛ asɔtoso na naŋ wora kɔnɔkoŋwule, asɔtoso nɛ a wɔ kasawule so nɛ amo nɛ a wɔ ebɔrɛso kikɛ, kumo e la fanɛ, mo Pibi na bar kagbenewushi Ebɔrɛ nɛ asɔtoso kikɛ be nferinto ashi mbe ŋklaŋ nɛ a lar saŋɛ nɛ e wu kedibi largato na so na.

²¹Saŋɛ na menyi nɛ Ebɔrɛ daŋ barga abar nna nɛ men daa la mo doŋana, ŋkpal men be nfɛra nɛ asheŋ lubi so. ²²Ama naniere, Etuto na shin nɛ menyi nɛ mo naŋ nyalɛ ŋkpal Yesu be luwu nɛ e wu na so. Kumo e naaŋ shin nɛ men baa du cheembi nɛ esa kikɛ e sa maŋ tiŋ n wu menyi alubi ŋko n ji men be kebaawɔtɔ emɔrɔ jemanɛ nɛ Yesu Kristo beeŋ yɛr menyi Ebɔrɛ kutɔ na. ²³Kananɛ Yesu Kristo beeŋ yɛr menyi Ebɔrɛ kutɔ nna na, nɛ men baŋ yirda baru lela na a maa chɛrga men be ŋgbene nsaa tama asɔ nɛ men nu baru lela na to nna na. Baru lela na nɛ baa malga a sa basa kama nɛ ma Pɔɔl gba ki kumo be emalgapo na.

Kushuŋ nɛ Pɔɔl bee shuŋ a sa asɔri na be asheŋ

²⁴Naniere ma kagbene fuli ma ŋkpal awurfoŋ nɛ mee ji ŋkpal menyi so na so. Awurfoŋ nɛ Yesu Kristo kaŋɛ fanɛ meeŋ ji na be tɔrɔ nɛ mee ji a bɔlɔ mbe tɔrɔ na so na ŋkpal mbe asɔriebi, bumo nɛ baa tre Yesu Kristo be eyur na so. ²⁵M ba ki asɔriebi na be eshumpo nna, ŋkpal manɛ so, Ebɔrɛ e lara ma fanɛ n chɛ menyi to nseŋ bɔ Ebɔrɛ be kubɔya na n sa basa kikɛ. ²⁶Kubɔya na daa la wulo be kubɔya nna, kumo alɛ be saŋɛ na Ebɔrɛ daa maŋ bugi kumo to ŋ kaŋɛ basa, ama naniere e bugi kumo to ŋ kaŋɛ mbe basa. ²⁷Ŋkpal manɛ so, Ebɔrɛ daa sha keŋini bumo kananɛ e ŋini mbe wulo be eleŋgboŋ basa kikɛ to nna, kumo e la fanɛ, Yesu Kristo wɔ menyi to, kumo so nɛ men kɔ tama fanɛ menyeeŋ nu Ebɔrɛ be kemaŋkura na be ebel na. ²⁸Yesu Kristo be asheŋ nɛ anyee malga a sa basa kikɛ a fiɛ ekama so nsaa ŋini bumo kanyiashenso nɛ an shin nɛ ekama e pin Yesu Kristo nɛnɛ. ²⁹Kede so nɛ m baa mɔ ma kumu a ta eleŋ nɛ Yesu Kristo bee sa ma a shuŋ na.

¹Mee kaŋɛ menyi kesheŋ ere nna ŋkpal ŋ ka bee sha men ka pin kananɛ mee mɔ ma kumu a sa menyi nɛ bumo nɛ b wɔ Laodisiya nɛ bumo nɛ b maŋ naŋ wu ma kikɛ na, ²saŋɛ na so meeŋ leŋ menyi to nɛ men baa kɔ kasha a wɔ abar so nsaa kɔ kenyi kikɛ nyam. Kumo e la fanɛ nɛ men ba pin mbe wulo na kikɛ. ³Wulo na e la fanɛ Ebɔrɛ lara Yesu Kristo nɛ mo nawule shin nɛ an nya kanyiasheŋ kashenteŋto nseŋ shin nɛ an pin kashenteŋ na kikɛ.

⁴Mee kaŋɛ menyi ade kikɛ nna nɛ men sa maŋ shin nɛ esa kikɛ e tiŋ n ta efɛ be kamɔrɔji n shin nɛ men foe ekpa. ⁵M baa maa wɔ menyi kutɔ geeŋ, ama men be asheŋ wɔ ma kagbene to ga. Ma kagbene malɛ fuli ma ga ŋkpal ŋ ka nyi men ka kɔ men be amu nɛnɛ nsaa yirda Yesu Kristo na kagbene koŋwuleso.

Keshin nɛ Kristo e bɔlɔ fo to be asheŋ

⁶Amoso, men ka sɔ Yesu Kristo fanɛ men Nyɛnpe ere, men keta men be amu fanɛ basa nɛ bumo nɛ mo ki kukoŋwule a kɔ mo to kpakpa ⁷a yil fanɛ kananɛ nliŋi bee pɛ ndibi to a yil na ŋ kraa pin mbe asheŋ a ti so m baa yirda kashenteŋ na kikɛ nyam, fanɛ kananɛ b ŋini menyi na nɛ men baa wɔtɔ a chɔrɔ Ebɔrɛ.

⁸Men baa da so nɛ ekama e sa maŋ kaŋ ta efɛ nɛ kanyiasheŋ fuloŋ n fule menyi m bɛ mbe kumu so, kumo e la fanɛ nyiŋgbasa be edaŋkaresheŋ nɛ a maŋ kɔ shɛŋ nsaa la sososo be asɔ ŋiniso na nɛ a maŋ shi Yesu Kristo na kutɔ na, ⁹ŋkpal manɛ so, Yesu Kristo na to nɛ Ebɔrɛ nɛ mbe kusɔ kama wɔ. ¹⁰Ŋkpal menyi nɛ Yesu Kristo nɛ e la eleŋ be yiri kikɛ be enimu na ka ki kukoŋwule so, men kɔ ŋkpa kikɛ. ¹¹Ŋkpal menyi nɛ Yesu Kristo ka la kukoŋwule na so, e ku menyi be kebaawɔtɔ lubi ashi menyi so, ama mannɛ enɔ be kushuŋ nna fanɛ kananɛ baa ta enɔ a ku kututu ŋkpal eyurpi so na. ¹²B ka daŋ bɛr menyi kabɔrɛbɛr na, k du fanɛ b ka puli menyi nɛ Yesu Kristo nna. Menyi nɛ mo malɛ e naŋ tiŋi nɛ menyi nɛ mo naŋ tiŋ n nya Ebɔrɛ be ŋkpa ŋkpal men ka yirda Ebɔrɛ nɛ e tiŋi Yesu Kristo luwu to na be eleŋ to so. ¹³Men ka daŋ wu ŋkpal men be alubi nɛ men be kebaawɔtɔ lubi na so, jemanɛ nɛ men daa maŋ nyi Ebɔrɛ na, Ebɔrɛ tiŋi menyi nɛ Yesu Kristo na luwu to n sa menyi ŋkpa n ta anyi be alubi m paŋ anyi. ¹⁴An kini kewora kusɔ nɛ Ebɔrɛ sibɛ mbe mbra na to na, ama e kplaŋ loŋ be kulubi na so ŋ kpra anyi be kemur nɛ Ebɔrɛ be mbra na kaŋɛ anyi fanɛ anyeeŋ mur na, kumo e la fanɛ Ebɔrɛ ta an be alubi nna n lɛ ŋkpal b ka gbir Yesu Kristo m mata kedibi largato na so so. ¹⁵E ka wu kedibi largato na so na, e sɔ esoso be eleŋana nɛ kenimujipoana na kikɛ be eleŋ m pɔɔ bumo so ŋ ŋaba bumo ŋ ŋini durnya. ¹⁶Amoso, men sa maŋ shin nɛ ekama e wu menyi kulubi ŋkpal kusɔ jiso ŋko kusɔnuuso so ŋko ŋkpal men ka maa bunyaŋ nchɛgboŋ ŋko kufɔl popɔr ŋko kewushiachɛ so. ¹⁷Ŋkpal manɛ so, ade ere bre kikɛ daŋ ŋini nna fanɛ kusɔ nɛ k bɔ ade kikɛ ka beeŋ ba, ama kusɔ nɛ k la kashenteŋ na malɛ shi Yesu Kristo to nna. ¹⁸Men sa maŋ shin nɛ esa kikɛ e kute n wu menyi kulubi a kaŋɛ fanɛ men baa koya bunyaŋ a bunyaŋ emalaika a ta kamoowu fuloŋ ŋkpal asɔ nɛ a lar mo so nɛ e wu amo na so. Mbe nfɛra lubi na so nɛ e kɔ loŋ be kamoowu fuloŋ na. ¹⁹Mo alɛ nɛ Yesu Kristo nɛ e la an be enimu na maŋ la kukoŋwule. Yesu Kristo na e la an be enimu a shin nɛ Ebɔrɛ be basa bee nya Ebɔrɛ be kenyi a ti so a du kananɛ Ebɔrɛ bee sha a wɔ abar so fanɛ kananɛ awibichɛkpa nɛ achin bee pɛ esa be eyur a kukwe abar so na.

²⁰Ŋkpal menyi nɛ Yesu Kristo ka wu nɛ men maŋ naa tuge durnya ere to be edaŋkaresheŋ be keŋini na so, men sa maŋ naa tuge basa be amu to be mbraana fanɛ men ka kraa wɔ men be kebaawɔtɔ dra na to na. ²¹Mbraana na e la fanɛ: Men sa maa ji le nɛ le be asɔ ere, men sa maa da le nɛ le be asɔ ere a keni, men sa maa bɛta le nɛ le be asɔ ere gba kuraa. ²²Kusɔ jiso kikɛ nɛ esa ji kumo, kumo be asheŋ baŋ loge nna na. Loŋ nɛ nyiŋgbasa be mbraana nɛ amo be keŋini gba du. ²³Mbraana ere du fanɛ a ka kɔ kanyiasheŋ nna, baa nase bumo gbagba be kabɔrɛshuŋ ko a kaŋɛ fanɛ basa e baa koya le nɛ le be ebunyaŋsheŋ ŋko b baa tɔrɔ bumo be eyur, ama kanyiasheŋ kikɛ maŋ wɔ le be asheŋ ŋiniso na to, ŋkpal manɛ so, amo be kekama maaŋ tiŋ n shin nɛ nyiŋgbasa e yige kulubi be kebaawora.

¹Ŋkpal menyi nɛ Kristo ka tiŋi luwu to na so, men shin nɛ men be ŋgbene e baa wɔ ebɔrɛso be asɔ so. Ndoŋ nɛ Yesu Kristo chena, Ebɔrɛ be jisoso, ebunyampo be kakpa na. ²Men shin nɛ men be nfɛra e baa wɔ ebɔrɛso be asɔ so, men sa maŋ shin nɛ durnya ere to be asheŋ wurbi e baa wɔ men be nfɛra to. ³Ŋkpal manɛ so, naniere men du fanɛ basa nɛ b wu nna nɛ bumo be shɛŋ maŋ naa wɔ asheŋ jiga to nɛ Yesu Kristo nɛ mo nɛ Ebɔrɛ la kukoŋwule na e wɔ men be ŋkpa popɔr a keni so. ⁴Amoso, saŋɛ nɛ Yesu Kristo nɛ e la an be ŋkpa na kaŋ lara mbe kumu ŋ ŋini durnya na, menyi alɛ gba beeŋ lar n nya mbe kemaŋkura.

Kebaawɔtɔ popɔr na be asheŋ

⁵Amoso, men yige men be kebaawɔtɔ dra nɛ kumo be asheŋ lubi na, men yige kacheji kpalakpala nɛ kubojuaji nɛ asheŋ jiga nɛ kayɛlga fuloŋ, men sa maa yɛlga alubi, men yige kejimuni. Kejimuni du fanɛ kagbirshuŋ nna. ⁶Ebɔrɛ malɛ beeŋ gberge bumo nɛ b maa nu mbe kɔnɔ nsaa wɔtɔ a wora le be asheŋ na kusoe. ⁷Menyi alɛ gba nɛ bumo e daa wora asheŋ na, jemanɛ nɛ men daa wɔ asheŋ lubi to na.

⁸Ama naniere, men yige asheŋ lubi be kebaawora n yige kebaakɔ agbo, kebaanya agbo kenyɛnso, kebaala basa lubi, basa be kebaakuli nɛ kusɔ jigaya be kamalga. ⁹Men sa maa fule abar, ŋkpal manɛ so, men lar men be kebaawɔtɔ dra nɛ k daa shin nɛ menyee wora alubi na to ¹⁰n nya kebaawɔtɔ popɔr lela nɛ Ebɔrɛ to nsaa wɔtɔ a lɔŋɛ kumo nɛ k ba kaa du fanɛ mo gbagba peya na nɛ men baa pin mo nɛnɛ. ¹¹Loŋ na bumo nɛ b kɔ kebaawɔtɔ popɔr na maaŋ naa kɔ ŋkpɛato a kaŋɛ fanɛ eko la kanyamase nɛ eko malɛ la Juwebi be esa, ŋko ede ku, ede bre maŋ ku kututu, ede la efɔ, ede la edɔtopo, ŋko ede la kenya nɛ ede wɔ mbe kumu. Yesu Kristo na nawule e la bumo be kusɔ kama.

¹²Amoso, men baa wora le be kelela ŋkpal Ebɔrɛ ka lara menyi ŋ kɔr a sha menyi a shin nɛ men baa du cheeŋ na so. Men baa wu kuwɔr, men baa la basa, men baa kɔ bunyaŋ, men baa kɔ kushuso, men baa kɔ kanyiti. ¹³Men baa kɔ kanyiti a kɔ abar to a ta abar be asheŋ a paŋ abar. Kananɛ Enyɛnpe na ta m paŋ menyi na, menyi alɛ gba e baa ta a paŋ abar. ¹⁴Ade kikɛ be buushi men ta kasha n wɔtɔ men be ŋgbene to, kasha e naa sa anyi kikɛ kɔnɔkoŋwule. ¹⁵Men shin nɛ kagbenewushi nɛ Yesu Kristo bee sa na e baa wɔ menyi to, ŋkpal manɛ so, Ebɔrɛ lara menyi nna nɛ men baa kɔ kagbenewushi abar so, ŋkpal men ka la kukoŋwule na so. Men baa chɔrɔ Ebɔrɛ. ¹⁶Men bɛ kubɔya nɛ Yesu Kristo sa anyi na so saŋkama, men baa kɔ kanyiasheŋ a ŋini abar a leŋ abar to a boŋ Ebɔrɛ be kawɔl to be nshɛ nɛ Ebɔrɛ be basa be kapandi be nshɛ nɛ Kiyoyu Cheeŋ na bee ŋini na a di Ebɔrɛ epaŋ men be ŋgbene to. ¹⁷Kusɔ kama nɛ k shi men be nnɔ to ŋko nɛ menyee wora, men shin nɛ amo kikɛ e daga esa nɛ e yil Yesu Kristo be katelamu to be kushuŋ nɛ men baa chɔrɔ Ebɔrɛ Etuto na ŋkpal Yesu Kristo so.

Bebɛsopo be kowu to be kebaawɔtɔ be asheŋ

¹⁸Beche kilpo, men baa ta men be amu a sa men kulana kananɛ k daga ŋkpal men ka la Enyɛnpe na peya so.

¹⁹Bekulana, men baa sha men be beche, men sa maa nyaŋ bumo.

²⁰Mbia, men baa bunyaŋ men nioana nɛ men tutoana kusɔ kama to ŋkpal men ka la Enyɛnpe na peya so, aloŋ e naa par Enyɛnpe na.

²¹Betuto nɛ benio, men sa maa ŋmenyaŋ men be mbia ga nɛ bumo be aba e baa pɔ bumo.

²²Anya, men baa bunyaŋ men nyɛnpeana kusɔ kama to, mannɛ fanɛ men ya kaa shuŋ nɛ baa keni menyi so nawule ŋkpal men ka baa sha men be asheŋ e baa par bumo so, ama men baa kɔ kagbene koŋwule a shuŋ ŋkpal men ka bee bunyaŋ Enyɛnpe Yesu Kristo na so. ²³Kusɔ kama nɛ menyee wora, men baa wora kumo nɛ kagbene koŋwule a nyi fanɛ Enyɛnpe na nɛ menyee shuŋ a sa, mannɛ nyiŋgbasa nawule ²⁴a nyi fanɛ Enyɛnpe na beeŋ ka menyi n sa menyi kusɔ kama nɛ e kaŋɛ fanɛ e beeŋ sa menyi ebɔrɛso na. ²⁵Enyɛnpe Yesu Kristo na nɛ menyee shuŋ, ŋkpal manɛ so, ekama nɛ e wora alubi, Ebɔrɛ beeŋ ka mo amo be kukɔ a maa kɔ ŋkpɛato.

¹Benyɛnpeana, men baa kɔ men be anya to kpakpa a keni bumo so nɛnɛ nsaa nyi fanɛ menyi alɛ gba kɔ Enyɛnpe ebɔrɛso.

Asheŋ ŋiniso nɛ a naŋ ti so be asheŋ

²Men baa wɔ kabɔrɛkule kpakpaso to a de so nsaa chɔrɔ Ebɔrɛ men be kabɔrɛkule na to. Men baa kule a sa anyi alɛ gba nɛ Ebɔrɛ e sa anyi ekpa nɛ an kaŋɛ Yesu Kristo be asheŋ, kede e la wulo nɛ Ebɔrɛ daa maŋ naŋ bugi to ŋ ŋini basa na. ³Kubɔya na so nɛ n wɔ kabuti to na. ⁴Men baa kule Ebɔrɛ a sa ma nɛ n tiŋ m bugi wulo na be kubɔya na to nɛnɛ fanɛ kananɛ k daga ŋ ka malga.

⁵Men baa kɔ kanyiasheŋ be kebaawɔtɔ a ŋini bumo nɛ b maŋ nyi Yesu Kristo bumo be ŋgbene to na. Men sa maa gal kumo be loŋ be kelela be kewora a lɛ. ⁶Men shin nɛ men be kelejima e baa wɔ ebel saŋkama a kɔ kanyiasheŋ kumo to nɛ men pin kananɛ a daga men ka bee tuge basa be mmalga.

Lalaloge be kechɔrɔ be asheŋ

⁷An kurgepo shaso Tikikes nɛ e la m barkasa kebɔrɛnya a shuŋ Ebɔrɛ kagbene koŋwuleso na beeŋ sa menyi ma baru. ⁸Amoso nɛ mee shuŋi mo menyi kutɔ nɛ e ya shin nɛ men pin anyi be kebaawɔtɔ be asheŋ nɛ men be ŋgbene e wushi menyi na. ⁹Mo nɛ Onisimɔs nɛ e la menyi be eko nsaa la ekurgepo shaso kagbene koŋwuleso na nɛ an shuŋi. Baaŋ kaŋɛ menyi kusɔ kama nɛ k bee wora nfe.

¹⁰Aristaakes nɛ ma nɛ mo kikɛ wɔ kabuti to nfe ere bee chɔrɔ menyi. Maak, Baanabas mo kurgepo na gba bee chɔrɔ menyi. N daŋ ŋini menyi kananɛ menyeeŋ wora mo. E kaŋ ba ndoŋ, men keni mo so nɛnɛ. ¹¹Jizes nɛ baa tre Jɛstes na gba bee chɔrɔ menyi. Bumo basa asa na nawule e la Juwebi be basa nɛ b nyi Yesu Kristo bumo be ŋgbene to nɛ ma nɛ bumo bee shuŋ nfe a malga Ebɔrɛ be kuwura na to be asheŋ. B shin nɛ ma kagbene wushi ma ga.

¹²Epafras nɛ e la Yesu Kristo be eshumpo nsaa la menyi yiri koŋwule na bee chɔrɔ menyi. Saŋkama e bee bugi mbe kagbene to nna a kule Ebɔrɛ a sa menyi nɛ men baa kɔ men be yirda na to kpakpa nɛ men be abɔrɛsheŋ be kenyi e baa wora keshi a ti so nsaa nyi kusɔ kama nɛ Ebɔrɛ bee sha a maa kɔ yalayala. ¹³Mee malga Epafras be asheŋ nna, ŋkpal manɛ so, mee sha keji shɛda nna fanɛ e ka bee mɔ mbe kumu a shuŋ menyi Laodisiyaebi nɛ Hiɛrapɔlisebi. ¹⁴Luuk nɛ e la dɔkta nɛ anyee sha mo na bee chɔrɔ menyi. Diimas gba bee chɔrɔ menyi.

¹⁵Men chɔrɔ bekurgepoana nɛ b wɔ Laodisiya be kade to na. Men chɔrɔ Nimfa nɛ asɔriebi nɛ baa shɛr mbe laŋ to na gba. ¹⁶Men kaŋ kraŋ kawɔl ere n sa abar n loge, men shin nɛ esa ko e kraŋ kumo n sa Laodisiya be asɔriebi na gba. Ma kawɔl nɛ n sibɛ n sa Laodisiyaebi na, menyi Kɔlɔsiebi gba e ya sɔ kumo m ba kraŋ. ¹⁷Men kaŋɛ Akipes le: “Baa de kushuŋ nɛ fo sɔ ŋkpal fo ka la Enyɛnpe peya na so na so a wora kumo.”

¹⁸Ma Pɔɔl gbagba e naa sibɛ kechɔrɔ ere na. Men baa nyiŋi ma men be kabɔrɛkule to ŋkpal ŋ ka wɔ kabuti to so.

Ebɔrɛ e baa kɛ menyi mbe kuwɔr be kakɛ na. Amɛn.