2 TIMOTI

KAWƆL NYƆSOPO NƐ PƆƆL SIBƐ N SA

TIMOTI

NA

¹Kawɔl ere shi ma Pɔɔl nɛ n la Kristo Yesu be eshuŋipo ŋkpal Ebɔrɛ be keparso nɛ ŋkpal kɔnɔ nɛ Ebɔrɛ nase ŋ kaŋɛ fanɛ e beeŋ sa basa nɛ b yirda Kristo Yesu ŋkpa na so kutɔ nna ²a yɔ fo, m pibi shaso Timoti kutɔ. Ebɔrɛ Etuto nɛ Kristo Yesu an Nyɛnpe na e sa fo kuwɔr be kakɛ nɛ kuwɔr nɛ kagbenewushi.

Kabɔrɛchɔrɔ nɛ keleŋ n wɔtɔ yirda na to be asheŋ

³Mee chɔrɔ Ebɔrɛ nɛ ŋ kɔ nfɛra lela a shuŋ fanɛ kananɛ n nananyɛnana shuŋ mo na. Saŋkama, kapa nɛ kanyɛ nɛ n nyiŋi fo asheŋ, mee di mo epaŋ nna. ⁴M baŋ nyiŋi fo anishichubi na be asheŋ, m baa sha kewu fo nna nɛ ma kagbene e fuli ma. ⁵Mee kaa nyiŋi kagbene koŋwuleso be yirda nɛ fo kɔ. Yirda koŋwule nɛ fo nanache Lowis nɛ fo nio Yunis daa kɔ na gbagba chap nɛ m baa nyi fanɛ fo alɛ gba kɔ na. ⁶Amoso nɛ mee nyiŋi fo fanɛ fo shin nɛ kakɛ nɛ Ebɔrɛ daŋ ta n wɔtɔ fo to saŋɛ nɛ n daŋ ta ma enɔana n deŋi fo so kabɔrɛkule to na e baa wora keshi a nyɛrga a ti so fanɛ edɛ na. ⁷Ŋkpal manɛ so, Kiyoyu nɛ Ebɔrɛ sa anyi na maŋ la kufu peya nna, k la eleŋ nɛ kasha nɛ kamootiŋ be kiyoyu nna.

⁸Amoso, sa maŋ shin nɛ keji an Nyɛnpe na be shɛda be asheŋ ŋko ma nɛ n wɔ kabuti to ŋkpal mo so ere be asheŋ e baa wora fo anishinyɔr kikɛ. Ama fo alɛ gba e baa bɔla eleŋ nɛ Ebɔrɛ sa fo na so a shuli a ji awurfoŋ ŋkpal baru lela na so. ⁹Ebɔrɛ mɔlga anyi nna nseŋ tre anyi fanɛ an ba ki mbe basa ŋkpal kusɔ nɛ mo gbagba yili nɛ mbe kuwɔr be kakɛ so, mannɛ kusɔ nɛ an wora so, Kristo Yesu so nɛ e bɔla n wu anyi kuwɔr pɔɛŋ nɛ kusɔ kikɛ fara dra dra na kikɛ. ¹⁰Ama naniere le be kesheŋ ere lar efuli ŋkpal anyi be Emɔlgapo Kristo Yesu be keba na so. Mo e bar luwu be eleŋ kikɛ ekar nseŋ bɔla baru lela na so ŋ ŋini anyi ŋkpa nɛ k maa loge na.

¹¹Ebɔrɛ lara ma nna fanɛ m baa la baru lela na be emalgapo nɛ eshuŋipo nɛ eŋinipo. ¹²Kumo alɛ so nɛ mee ji le be awurfoŋ ere na. Ama kumo alɛ maŋ kɔ ma anishinyɔr, ŋkpal manɛ so, n nyi esa nɛ n yirda, ma alɛ maa ji kumo emɔrɔ fanɛ e beeŋ tiŋ ŋ keni kusɔ kama nɛ e ta m bɔɔ ma enɔ so hale n ya fo kachɛ na. ¹³Baa kɔ kashenteŋ be mmalga nɛ ŋ ŋini fo na to kpakpa a bɛ amo so nɛ yirda nɛ kasha nɛ a wɔ Kristo Yesu to na. ¹⁴Baa kɔ asheŋ lela nɛ Kiyoyu Cheeŋ nɛ e wɔ anyi to na ta m bɔɔ fo enɔ na to kpakpa.

¹⁵Fo nyi fanɛ Eeshia be efuli so ebi kikɛ hale Figɛles nɛ Hɛmɔjines gba yige ma n to ŋko? ¹⁶Enyɛnpe e baa wu Onɛsifɔres be kowu to ebi kuwɔr, ŋkpal manɛ so, e leŋ ma to ale damta. E daa maŋ wora ma kabuti ere be anishinyɔr kikɛ, ¹⁷mo alɛ ka baŋ ba Rom nɛ e kɔ n fin ma loŋ hale n ya wu ma. ¹⁸Enyɛnpe e shin nɛ e nya kuwɔr ashi mo kutɔ kachɛ na. Fo alɛ gba nyi asɔ damta nɛ e wora n sa ma ashi Ɛfeses.

Yesu be ekɔpo be asheŋ

¹Amoso, fo ere m pibi, baa wɔ eleŋ nɛ k bee shi Yesu Kristo kutɔ a ba ŋkpal mbe kuwɔr be kakɛ na so to ²nseŋ ta mmalga nɛ fo nu ŋ ka bugi to m malga basa damta be anishito na m bɔɔ basa nɛ fo yirda fanɛ bumo alɛ beeŋ tiŋ ŋ ŋini beko enɔ.

³Fo alɛ gba e baa kɔ kagbene a shuli a tu anyi a ji awurfoŋ fanɛ Yesu Kristo be soja lela. ⁴Soja kama nɛ e wɔ mbe kushuŋ to maa ta mbe nfɛra a wɔtɔ asheŋ pɔtɛ to a shin nɛ a baa tir mo, nɛ mannɛ aloŋ, mbe asheŋ maaŋ par mbe enimu nɛ e bee keni mo so na. ⁵Eshilepo kama malɛ nɛ e maa bɛ eshile na be mbraana so maaŋ tiŋ n ji shɛŋ eshile na to. ⁶Baa kraa nyiŋi fanɛ edɔpo nɛ e bee shuŋ kushuŋ na ga na gbagba nawule e kɔ ekpa nɛ e tiŋ n fara a ji mbe adɔjibi popɔr. ⁷Baa fɛ le be asheŋ nɛ ŋ kaŋɛ fo ere be asheŋ nɛ Enyɛnpe e chɛ fo to nɛ fo pin kusɔ kama to.

⁸Baa nyiŋi baru lela nɛ ŋ kɔ a malga fanɛ Kristo Yesu nɛ e shi Ewura Deevid be kanaŋ to wu n tiŋi na. ⁹Baru lela na malɛ so nɛ mee ji awurfoŋ ere hale a wɔ ŋgbuliŋ to fanɛ esa nɛ e wora kulubi ko na. Ama esa malɛ kikɛ maaŋ tiŋ n wɔtɔ Ebɔrɛ be kamalga bre kegbuleŋ. ¹⁰Amoso nɛ mee ji awurfoŋ ere be kanyiti ŋkpal Ebɔrɛ be basa laraso na so nɛ bumo alɛ gba e tiŋ m bɔla Kristo Yesu so n nya kumɔlga nɛ kemaŋkura nɛ k maŋ kɔ ekar na.

¹¹Le be kamalga ere la kashenteŋ nna fanɛ,

nɛ kashenteŋ nna fanɛ anyi nɛ mo e daŋ wu,

kumo ere anyi nɛ mo malɛ e naaŋ baa wɔ ŋkpa to.

¹²Nɛ anyi maŋ pɔ aba nseŋ kraa ji kanyiti,

anyi nɛ mo e naaŋ ji kuwura basa so.

Ama nɛ an kini mo,

mo alɛ gba beeŋ kini anyi.

¹³Nɛ anyi ere kɔ nnɔkilgi gba,

mo ere maŋ kɔ kɔnɔkilgi, ŋkpal manɛ so,

e maaŋ tiŋ n wora asheŋ n da mbe da so.

Ebɔrɛ be eshumpo lela be asheŋ

¹⁴Baa ŋini fo basa asheŋ ere nseŋ fiɛ bumo so kpakpa Ebɔrɛ be anishito fanɛ b lar mmalga koko be emɔrɔana be nlu to, ŋkpal manɛ so, loŋ be nlu maŋ kɔ kechɛto kikɛ amo to, a bee mur basa nɛ baa nu amo nna. ¹⁵Wora ania ga n ta fo kumu m bɔɔ Ebɔrɛ enɔ a shuŋ mo nɛnɛ. Baa la esa nɛ e bee ŋini kashenteŋ be mmalga na kumo be ekpa so. Loŋ na fo maaŋ luri kushuŋ na be anishinyɔr to. ¹⁶Baa gelge mmalga nɛ a maa bunyaŋ Ebɔrɛ, ŋkpal manɛ so, a bee lara basa abɔrɛsheŋ be nfɛra to nna a shin nɛ baa luri alubi damta to a ti so. ¹⁷Keŋini nɛ basa wɔtɔ a ŋini na du fanɛ ketamɛ lubi nna a nyɛrga a sɔ esa be eyur kikɛ so. Le be beŋinipoana ere be beko e la Haimɛneeyes nɛ Failites. ¹⁸B foe kashenteŋ be ekpa na so ŋkpal b ka wɔtɔ a ŋini fanɛ basa be ketiŋi luwu to be jemanɛ na choŋ na so so. Baa wul basa ko to ashi bumo be yirda na to nna na. ¹⁹Ama kusɔ nɛ Ebɔrɛ tɔl n yili maŋ kɔ kegbuŋgbuŋ kikɛ. Kasibɛ nɛ a deŋ kumo so malɛ nde: “Enyɛnpe na nyi basa nɛ b la mo peya.” Kusɔ nɛ k naŋ ti so e la: “Esa kama nɛ e kaŋɛ fanɛ e la Enyɛnpe peya, e lar alubi be kewora to.”

²⁰Damawura be kowugboŋ to asɔ jito be yiri kikɛ e naa kaa wɔ ndoŋ. Gbiti nɛ b ta n lɔŋɛ ako nseŋ ta shuwa n lɔŋɛ ako. Ako malɛ, ndibi nɛ b ta n shɛl amo nseŋ ta ebɔ m pɔr ako malɛ. Nchɛgboŋ peya e la amo be ako nɛ ako malɛ la kachɛ kama be kejito peya. ²¹To, esa kama malɛ nɛ e lara mbe kumu ashi asheŋ jiga to, kumo ere e beeŋ baa la esa nɛ Enyɛnpe na bee lara nna nɛ e shuŋ kenishipereso be ashuŋ. Amodoŋwura mo Nyɛnpe beeŋ baa fute a yige mo so nseŋ ta kushuŋ lela kikɛ m bɔɔ mo enɔ. ²²Amoso, baa gelge kebrantiɛ to be ayɛlgasɔ nsaa ta fo nfɛra a wɔtɔ alelasheŋ nɛ yirda nɛ kasha nɛ kagbenewushi to nɛ fo nɛ bumo nɛ b kɔ kagbene koŋwule cheembi a kule Ebɔrɛ na e baa wɔ loŋ be kebaawɔtɔ to. ²³Baa gelge kawuliso nɛ chilchil be emɔrɔ fuloŋ, ŋkpal manɛ so, fo nyi a ka bee bar nlu. ²⁴A maŋ daga Enyɛnpe malɛ be kenya ka bee kɔ nlu. A daga fanɛ e baa la esa basa kikɛ kutɔ nseŋ naa la eŋinipo lela nɛ e kɔ kanyiti ²⁵a wɔtɔ a yɔɔ mbe kumu nsaa ŋini basa nɛ baa ji mo emɔrɔ asheŋ amo be ekpa so. Nɛ e bee wora loŋ, shere Ebɔrɛ beeŋ bugi ekpa n sa bumo nɛ b tuba m bɛ kashenteŋ be ekpa na so ²⁶nseŋ nya nfɛra n lar Setani be kejigbelɛ nɛ e ta m pɛ bumo n shin nɛ baa nu a sa mo na to.

Lalaloge be nchɛ be asheŋ

¹Baa nyi fanɛ lalaloge be nchɛ na to, tɔrɔ damta beeŋ tɔr basa so. ²Kumo be jemanɛ na so, basa beeŋ baa sha bumo nawule be amu nɛ amansherbi nsaa kɔ mpuchi damta nɛ kamoowu. Baaŋ baa kɔ nfɛl nsaa kini kenu n sa bumo tutoana nɛ bumo nioana nsaa la ebutuli a wɔtɔ a kplaŋ abɔrɛsheŋ so. ³Basa maaŋ ba kaa kɔ kasha nseŋ lar kuwɔr to nsaa kɔ efɛ be eshɛda. Baaŋ ba kaa wɔtɔ a diewu, bumo alɛ nsaa la basa ŋana so nseŋ ba kaa kishi kelela be yiri kikɛ. ⁴Baaŋ ba kaa la bedebɔrpoana nɛ basa brembreŋ nseŋ ta kamoowu m bɔlɔ bumo to nsaa sha durnya ere to be ebel a chɔ Ebɔrɛ. ⁵Baaŋ ba kaa kɔ abɔrɛsheŋ na ketreso nsaa kini amo be eleŋ. Baa gelge loŋ be basa! ⁶Bumo to be beko e naa ŋana a luri basa peana a pɔɔ beche nɛ b maa tiŋ a keta bumo be amu so na. Loŋ be beche, alubi e nyaŋ bumo ŋ keta nɛ ayɛlgasɔ be yiri kikɛ kɔ bumo to a wora kusɔ kama. ⁷Loŋ be beche beeŋ nu kusɔ kikɛ nɛ esa kikɛ bee kaŋɛ bumo, ama bumo alɛ maa tiŋ a nya kusɔ kama be ekpa be kanyiasheŋ. ⁸Kananɛ Janes nɛ Jambres daa maŋ nu n sa Mosis na gbagba chap nɛ le be benyɛn ere gba maa nu a sa kashenteŋ na. Bumo be nfɛra maŋ walɛ nɛ bumo be yirda malɛ la yirda fuloŋ. ⁹Bumo alɛ nɛ bumo be eda na maaŋ fo koshipe, ŋkpal manɛ so, bumo be alubi na beeŋ lar efuli nɛ ekama e wu amo fanɛ kananɛ Janes nɛ Jambres be asheŋ daŋ ki na.

Asheŋ nɛ Pɔɔl ta a bɔɔ Timoti enɔ be asheŋ

¹⁰Ama fo ere nyi ma keŋini na kikɛ nɛ ma da nɛ ma kebaawɔtɔ be kifi to. Fo alɛ naŋ wu ma yirda nɛ ma kanyiti nɛ ma kasha nɛ kananɛ ŋ kɔ tɔrɔ be kanyiti. ¹¹Fo alɛ kraa naa nyi etɔrɔ nɛ awurfoŋ nɛ n nya ashi Antiɔk nɛ Ikoniam nɛ Listra be asheŋ. N nyiti amo nɛ Enyɛnpe malɛ lara ma amo kikɛ to. ¹²Kashenteŋto, esa kama nɛ e bugi kagbene a sha kebɛ Kristo Yesu so, baaŋ tɔrɔ amodoŋwura. ¹³Ama basa lubi nɛ kebirkɔnshiwuraana bre, baa wɔtɔ nna a wora alubi a ti so nsaa fule beko nɛ Setani bee fule bumo alɛ gbagba.

¹⁴Ama fo ere, baa kɔ asɔ nɛ fo koya nseŋ yirda na to kpakpa nsaa nyiŋi esa nɛ fo koya amo mo kutɔ na. ¹⁵Baa nyiŋi kananɛ fo kebiato kikɛ nɛ fo pin abɔrɛsibɛ cheembi nɛ a beeŋ tiŋ n sa fo kanyiasheŋ nɛ k beeŋ tiŋ n shin nɛ fo bɔla keyirda Kristo Yesu so n nya kumɔlga na. ¹⁶Ebɔrɛ e wɔ abɔrɛsibɛ ere kikɛ be kaman nɛ amo alɛ walɛ keta ŋ ŋini kashenteŋ na nɛ keta n fiɛ bumo nɛ baa wora a jija so nɛ keta n lara esa kewora n foe to nɛ keta ŋ ŋini esa kebaawɔtɔ lela. ¹⁷Ade kikɛ e naaŋ shin nɛ Ebɔrɛ be esa e tiŋ m bela ase ŋ kre to nɛnɛ n shuŋ kushuŋ lela kikɛ.

¹Ebɔrɛ nɛ Kristo Yesu nɛ e beeŋ ji bumo nɛ baaŋ baa wɔ ŋkpa to nɛ bumo nɛ b wu na demu be anishito nɛ n yil nsaa kpal mbe kenamba na nɛ mbe kuwura na so a kaŋɛ fo fanɛ ²fo baa bɔ kubɔya na a sa basa. Kelela ŋko kulubi to kikɛ baa sha kebaabɔ kubɔya na a sa basa a shin nɛ b baa wu kananɛ kashenteŋ na baa dese geeŋ. Baa ta kubɔya na a fiɛ basa so ŋko a leŋ bumo to nsaa kɔ kanyiti a ŋini bumo abɔrɛsheŋ na. ³Saŋko beeŋ fo nɛ basa maaŋ naŋ nu kashenteŋ be keŋini na nsaa wɔtɔ a bɛ bumo gbagba be ayɛlgasɔ so. Baaŋ baa chala beŋinipo damta nɛ b baa ŋini bumo asɔ nɛ baa sha kebaanu. ⁴Baaŋ ti bumo be asoe n sa kashenteŋ na nseŋ bugi amo a nu edaŋkaresheŋ be ablɔmbi nɛ a maŋ kɔ kifi. ⁵Fo ere, baa kɔ fo kumu to nɛnɛ kusɔ kama to. Baa ji tɔrɔ be kanyiti nsaa wora kushuŋ nɛ k daga fanɛ baru lela be emalgapo kaa bee wora. Baa shuŋ kushuŋ nɛ Ebɔrɛ ta m bɔɔ fo enɔ na kikɛ nyam.

⁶Ma ere, jemanɛ nɛ baaŋ ta ma n lara sarga na fo nɛ jemanɛ nɛ meeŋ lar durnya ere to na fo n loge. ⁷Ŋ kɔ kolu lela na n loge nseŋ shile eshile na n loge, ma alɛ nseŋ naŋ keta yirda na m ba fo ekar. ⁸Naniere bre ma kejinlar be kakɛ e ka a jo ma nɛ n sɔ. Kumo be kamɔnchɛ Enyɛnpe nɛ e maa ji demu a puni na beeŋ ta kumo ŋ kɛ ma. Mannɛ n nawule, ama e beeŋ ta kumo ŋ kɛ bekama nɛ b kɔ kasha a jo mbe kelar m ba na gba n ti so.

Pɔɔl gbagba be mmalga nɛ e kɔ a sa Timoti be asheŋ

⁹Timoti, wora ania m ba ŋ kutɔ. ¹⁰Diimas bre luri durnya to be ayɛlgasɔ to nseŋ shile ma n yɔ Tɛsalɔnika. Krɛsent yɔ Galeesha nɛ Taites malɛ yɔ Dalmeesha. ¹¹Luuk nawule e wɔ ŋ kutɔ. Fo kaa ba, fo shin nɛ fo nɛ Maak e ba, ŋkpal manɛ so, e kɔ kechɛto ga ma kushuŋ na to.

¹²N shuŋi Tikikes Ɛfeses. ¹³Fo kaa ba, ta ma piŋi nɛ n yige Kaapes kutɔ ashi Trowas na. Ta ebuku na, fɔnfɔŋ amo nɛ b ta kusɔbɔya be kawɔl n lɔŋɛ na.

¹⁴Alɛkzaanda bɔyɛpo shuŋ ma ashuŋ lubi damta ga. Enyɛnpe bee ka mo mbe ashuŋ na be kukɔ. ¹⁵Fo alɛ gba e baa de mo so, ŋkpal manɛ so, e daa maŋ sa anyi be kubɔya na kashuli hale gbrɛ kikɛ.

¹⁶Kachɛ nɛ n fara m malga nɛ m mɔlga ma kumu na, ekama shile ma nna. Ebɔrɛ e ta m paŋ bumo. ¹⁷Ama Enyɛnpe bre maŋ shile ma, e sa ma eleŋ nna nɛ n tiŋ m bɔ kubɔya na kikɛ nyam n sa nnyamase na kikɛ nseŋ nya ŋ gelge ebuluŋ be nnɔ to be keluri. ¹⁸Enyɛnpe malɛ beeŋ lara ma ashi kulubi kikɛ to nseŋ yɛr ma mbe ebɔrɛso be kuwura to. Kemaŋkura e baa wɔ mo so hale mbaanaayɔ. Amɛn.

Lalaloge be kechɔrɔ be asheŋ

¹⁹Chɔrɔ Priska nɛ Akwila nɛ Onɛsifɔres be kowu to ebi n sa ma.

²⁰Irastes shir a wɔ Kɔrint nɛ n yige Trɔfimes malɛ Mailites, ŋkpal manɛ so, e daa lɔ nna.

²¹Wora ania m ba pɔɛŋ nɛ kechali e fo. Yubeles nɛ Pudɛns nɛ Laines nɛ Klawdia nɛ bekurgepoana nɛ b ka na kikɛ bee chɔrɔ fo.

²²Enyɛnpe e baa kɔ fo kiyoyu to.

Ebɔrɛ be kuwɔr be kakɛ e baa wɔ menyi so.