KAWƆL NYƆSOPO NƐ PƆƆL SIBƐ N SA
TƐSALƆNIKAEBI
NA
11Kawɔl ere shi ma Pɔɔl nɛ Sailas nɛ Timoti kutɔ nna a yɔ Tɛsalɔnika be asɔriebi nɛ b la Ebɔrɛ an Tuto nɛ Enyɛnpe Yesu Kristo peya na kutɔ. 2Ebɔrɛ Etuto na nɛ Enyɛnpe Yesu Kristo e sa menyi mo ere Ebɔrɛ na be kuwɔr be kakɛ nɛ kagbenewushi.
Kristo be keba be kachɛ be demu be keji be asheŋ
3Bekurgepoana, a daga an ka bee chɔrɔ Ebɔrɛ saŋkama ŋkpal menyi so. An kɔ ekpa nɛ an chɔrɔ mo ŋkpal kananɛ men be yirda bee wora keshi a ti so so. Kananɛ men be ekama bee sha mo braana na gba bee ti so. 4Amoso nɛ anyi gbagba wɔ Ebɔrɛ be asɔriana to a ji njɔŋ ŋkpal menyi so na. Men be yirda nɛ kanyiti nɛ men kɔ a wɔ awurfoŋ nɛ tɔrɔ damta ere to so nɛ anyee ji njɔŋ loŋ na.
5Kede ere e naaŋ ŋini Ebɔrɛ be demu be keji ka du cheembi, ŋkpal manɛ so, ade kikɛ e shin nɛ men daga mbe kuwura nɛ men kpal kumo so a ji awurfoŋ na. 6Ŋkpal manɛ so, Ebɔrɛ bee wora asɔ nɛ amo be ekpa so nna. Basa nɛ baa tɔrɔ menyi ere, e beeŋ shin nɛ tɔrɔ e ba bumo so. 7Mo e naaŋ sa anyi nɛ menyi nɛ menyee ji awurfoŋ ere ewushi kachɛ nɛ Enyɛnpe Yesu beeŋ lara mbe kumu ŋ ŋini durnya saŋɛ nɛ mo nɛ mbe emalaika lempo beeŋ shi ebɔrɛso m ba nɛ edɛ chɔɔso 8m ba gberge basa nɛ b maŋ nyi Ebɔrɛ nɛ bumo nɛ b maa bɛ an Nyɛnpe Yesu be baru lela na so kusoe. 9Baaŋ nya kemur be kasogberge mbaanaayɔ nɛ Ebɔrɛ e barga bumo ashi mo kutɔ nɛ mbe eleŋ be kemaŋkuragboŋ na to. 10Kachɛ nɛ e beeŋ ba nya kemaŋkura nɛ bunyaŋ ashi mbe basa nɛ b yirda mo na kutɔ na, menyi alɛ gba beeŋ ti loŋ be basa na so ŋkpal men ka yirda kubɔya nɛ an daŋ bɔ n sa menyi na so.
11Amoso nɛ anyee kule anyi be Ebɔrɛ saŋkama a sa menyi fanɛ e shin nɛ men be kebaawɔtɔ e baa du fanɛ kananɛ e tre menyi fanɛ men ba kaa kɔ na. Anyee kule mo fanɛ e ta mbe eleŋ na n shin nɛ men be kelela be kasha na e wora kashenteŋ n shin nɛ men be yirda be kushuŋ na e bɔlɔ so nyam. 12Loŋ nɛ an Nyɛnpe Yesu be ketre beeŋ nya kemaŋkura menyi kutɔ, nɛ menyi alɛ gba e bɔla an Nyɛnpe Yesu Kristo nɛ an be Ebɔrɛ be kuwɔr be kakɛ so n nya kemaŋkura ashi mo kutɔ.
2Alubipo na be asheŋ
1To, bekurgepoana, an Nyɛnpe Yesu Kristo be kebɛta m ba na nɛ anyi be kechala a wɔ mo kutɔ na malɛ be asheŋ nde: 2Anyee kule menyi nna fanɛ men sa maŋ kaŋ shin nɛ men be nfɛra e wul menyi to ŋko n shin nɛ kananɛ basa ko bee kaŋɛ fanɛ Enyɛnpe be kachɛ na teŋ ba na e baa jija men be ŋgbene. Shere esa ko e kaŋɛ fanɛ e wu kumo loŋ nna ŋko esa ko e malga abɔrɛsheŋ ŋ kaŋɛ loŋ ŋko basa e naa kaŋɛ fanɛ anyi e sibɛ kumo anyi be kawɔl to. 3Men sa maŋ kaŋ shin nɛ esa kama e bɔla ekpa kikɛ so n fule menyi, ŋkpal manɛ so, Enyɛnpe be kachɛ na maaŋ ba ama kenyaŋɛto m buu Ebɔrɛ na ba na nɛ alubipo nɛ mbe kelamba la edɛ to be keluri na lar na pɔɛŋ. 4Kusɔ kama nɛ enyiŋgbasa bee bɛ so a kaŋɛ fanɛ k shi Ebɔrɛ kutɔ nna ŋko a tre kumo kabɔrɛshuŋ, alubipo na beeŋ ji kumo emɔrɔ ŋ ki kumo doŋ. E beeŋ wu mbe kumu hale n ya luri n chena bɔrɛlambu na to a tre mbe kumu Ebɔrɛ.
5Men maŋ nyiŋi fanɛ ŋ ka daa wɔ menyi kutɔ ŋ kaŋɛ menyi asheŋ ere kikɛ a? 6Naniere menyi alɛ gba nyi kusɔ nɛ k bee shin nɛ alubipo na maaŋ tiŋ m ba, ama mbe jemanɛ na ya fo nna nɛ e lar efuli. 7Daŋga be asheŋ lubi be kewora na bre teŋ fara, ama asɔ nɛ a beeŋ wora na be eleŋ gbagba maŋ naŋ lar efuli she emo nɛ e bee kuŋ amo ekpa na lar ashi to nna. 8Kachɛ na kaŋ fo, alubipo na beeŋ ba lara mbe kumu efuli nɛ Enyɛnpe Yesu e fute mbe kɔnɔ to be afu m mɔ mo n shin nɛ mo ere Yesu be kemaŋkura be keba na e mur alubipo na. 9Alubipo na beeŋ bɔla Setani be eleŋ to n wora efɛ be edaŋga nɛ emamachisheŋ damta. 10E beeŋ bar efɛ be edalubisheŋ damta m ba fule bumo nɛ baaŋ mur na. Baaŋ wu kasogberge be luwu na ŋkpal b ka kini kashenteŋ nɛ baaŋ bɔla kumo so n nya kumɔlga na so. 11Amoso nɛ Ebɔrɛ bee shin nɛ kefoe ekpa be eleŋ ba bumo to na. Loŋ e naaŋ shin nɛ b yirda kusɔ nɛ k la efɛ. 12Bekama malɛ nɛ b maŋ yirda kashenteŋ na nseŋ ta alubi ŋ ki bumo be aparsheŋ na kikɛ beeŋ mur.
Kananɛ Ebɔrɛ lara Tɛsalɔnikaebi nɛ b nya kumɔlga be asheŋ
13Bekurgepoana, a daga an ka chɔrɔ Ebɔrɛ saŋkama ŋkpal menyi nɛ Enyɛnpe bee sha na so. Ŋkpal manɛ so, Ebɔrɛ fara nna n lara menyi nɛ men nya kumɔlga ashi Kiyoyu Cheeŋ na to nseŋ ki Ebɔrɛ be basa cheembi a wɔ keyirda kashenteŋ na to. 14Baru lela nɛ an malga n sa menyi na to nɛ Ebɔrɛ bɔla n tre menyi. E tre menyi nna nɛ menyi alɛ e ba nya an Nyɛnpe Yesu Kristo be kemaŋkura na. 15Amoso, bekurgepoana, men baa kɔ men be amu to kpakpa a kɔ kashenteŋ nɛ an ta abɔrɛsheŋ be kemalga nɛ kawɔl be kesibɛ ŋ ŋini menyi na to kpakpa.
16An Nyɛnpe Yesu Kristo gbagba nɛ Ebɔrɛ an Tuto nɛ e sha anyi nseŋ bɔla mbe kuwɔr be kakɛ so a leŋ anyi to mbaanaayɔ nsaa sa anyi tama lela na 17e baa leŋ menyi to nɛnɛ nsaa sa menyi eleŋ nɛ men baa wora asheŋ lela kikɛ nsaa malga mmalga lela.
3Kebaakule Ebɔrɛ a sa beshuŋipo be asheŋ
1Ade kikɛ be buushi, bekurgepoana, men baa kule Ebɔrɛ a sa anyi nɛ Enyɛnpe be kubɔya na e nya manaŋ n sɔ kakpa kikɛ n nya kemaŋkura fanɛ kananɛ k daŋ wora menyi kutɔ na. 2Men baa kule Ebɔrɛ a sa anyi nɛ e baa pete anyi basa lubi be yiri kikɛ to. Ŋkpal manɛ so, mannɛ basa kikɛ e kɔ yirda.
3Ama Enyɛnpe bre maa chɛrga mbe asheŋ to kikɛ. E beeŋ sa menyi eleŋ nseŋ pete menyi ashi kulubi to. 4Enyɛnpe na so an yirda menyi a nyi men ka bee wora ŋ kraa beeŋ wora asɔ nɛ anyee kaŋɛ menyi.
5Enyɛnpe na e ŋini menyi be ŋgbene Ebɔrɛ be kasha nɛ Kristo be kanyiti na.
Betɔlpo be asheŋ
6Bekurgepoana, naniere anyee fiɛ menyi so Enyɛnpe Yesu Kristo be ketre to fanɛ men baa gelge ekurgepo kikɛ nɛ e wɔ ntɔl be kebaawɔtɔ to a maa bɛ keŋini nɛ an sa menyi na so. 7Menyi gbagba e baa nyi a ka daga men ka bee kute anyi to. An ka daa wɔ menyi kutɔ, an daa maŋ kɔ ntɔl. 8An daa maŋ ji ekama be kejibi a maŋ ka mo, ama kapa nɛ kanyɛ an daa mɔ an be amu nna a shuŋ nɛ an sa maŋ bɔ ekama kukɔ. 9Mannɛ fanɛ an daa maa kɔ kumo be ekpa nna, ama an daa maŋ wora loŋ nna nɛ men wu anyi be kebaawɔtɔ na ŋ kute anyi to. 10Anyi nɛ menyi ka daa wɔtɔ na gba, an chɛr ŋ kaŋɛ menyi fanɛ: “Ekama nɛ e maŋ shuŋ, men sa maŋ shin nɛ e ji.”
11Ŋkpal manɛ so, an nu fanɛ men be beko wɔ ntɔl be kebaawɔtɔ to nna a maa shuŋ shɛŋ nsaa wɔtɔ a kilgi to fanɛ menyi ka bee shuŋ na. 12Anyee kaŋɛ nsaa fiɛ le be basa so Enyɛnpe Yesu Kristo be ketre to fanɛ b ta bumo be amu boeŋ a wora bumo be ashuŋ a bela bumo gbagba be amu.
13Bekurgepoana, men sa maŋ shin nɛ kelela be kewora e baa gben menyi. 14Nɛ ekama nɛ e kini kewora kusɔ nɛ anyee kaŋɛ menyi kawɔl ere to ere, men baa de amodoŋwura so a gelge mo nɛ anishinyɔr e pɛ mo. 15Men sa maŋ ta mo ŋ ki men doŋ, ama men fiɛ mo so fanɛ ekurgepo.
Lalaloge be mmalga be asheŋ
16To, kagbenewushi be Enyɛnpe na gbagba e sa menyi kagbenewushi saŋkama ashi kusɔ kama to. Enyɛnpe na e baa wɔ menyi kikɛ to.
17Ma Pɔɔl gbagba be enɔ to be kechɔrɔ be kasibɛ nde. Kananɛ mee dulgi ma nwɔl kikɛ nna na. Loŋ nɛ mee sibɛ.
18An Nyɛnpe Yesu Kristo be kuwɔr be kakɛ na e baa wɔ menyi kikɛ so.