2 KƆRINTEBI

KAWƆL NYƆSOPO NƐ PƆƆL SIBƐ N SA

KƆRINTEBI

NA

¹Kawɔl ere shi ma Pɔɔl nɛ m bɔla Ebɔrɛ be keparso so a la Kristo Yesu be eshuŋipo na nɛ an kurgepo Timoti kutɔ nna a yɔ Ebɔrɛ be asɔriebi nɛ b wɔ Kɔrint be kade to nɛ Ebɔrɛ be basa nɛ b wɔ Griis be kasawule so kikɛ na kutɔ. ²An Tuto Ebɔrɛ nɛ Enyɛnpe Yesu Kristo e sa menyi kuwɔr be kakɛ nɛ kagbenewushi.

Pɔɔl ka bee di Ebɔrɛ epaŋ be asheŋ

³Men shin nɛ an baa chɔrɔ Ebɔrɛ, an Nyɛnpe Yesu Kristo mo Tuto na. Mo e la Etuto nɛ e kɔ kuwɔr nseŋ naa la esa nɛ keleŋto kikɛ bee shi mo kutɔ na. ⁴Mo e naa leŋ anyi to ashi anyi be etɔrɔ kikɛ to, saŋɛ na so anyi alɛ beeŋ tiŋ n ta keleŋto mo nɛ an gbagba nya ashi Ebɔrɛ kutɔ na n leŋ bekama malɛ nɛ b wɔ etɔrɔ be yiri kikɛ to. ⁵Ŋkpal manɛ so, kananɛ an baa tu Kristo a ji mbe awurfoŋ damta na, loŋ koŋwule na nɛ anyee bɔla Kristo so a nya keleŋto damta gba. ⁶Nɛ an baŋ ji awurfoŋ, menyi be keleŋto nɛ kumɔlga so so nɛ an ji loŋ be awurfoŋ na. Nɛ an baa nya keleŋto, kumo ere, menyi alɛ gba beeŋ nya loŋ be keleŋto nna na. Kumo alɛ e naa shin nɛ menyee nya eleŋ nɛ men tiŋ n nyiti awurfoŋ koŋwule nɛ anyee ji na. ⁷Tama mo nɛ anyi alɛ kɔ menyi so na maa gbuŋgbuŋ to, ŋkpal manɛ so, an nyi fanɛ kananɛ men baa tu anyi a ji an be awurfoŋ na, loŋ koŋwule na malɛ nɛ men naa tu anyi a nya anyi be keleŋto gba.

⁸Bekurgepoana, anyee sha fanɛ men pin kekɔrfɛ mo nɛ b kɔrfɛ anyi ashi Eeshia be kasawule so nna. Kashenteŋto, asheŋ nɛ b daŋ ta n tu anyi na daŋ wora anyi egbɛ ga n ya kaa pɔɔ anyi so, nɛ an daa fɛ fanɛ anyi be ŋkpaana loge durnya to. ⁹Kashenteŋto, an daa fɛ anyi be ŋgbene to nna fanɛ b ta luwu be mbra nna n ji m bri anyi. Ama le be kesheŋ ere daŋ ba loŋ nna nɛ an sa maŋ kaa yirda anyi gbagba be amu, ama anyeeŋ baa yirda Ebɔrɛ nɛ e bee tiŋi basa ashi luwu to na. ¹⁰Loŋ be kenishipere lubi be asheŋ na to nɛ e daŋ mɔlga anyi ashi to, mo alɛ beeŋ naŋ mɔlga anyi. An ta anyi be tama nna n deŋi mo so fanɛ e beeŋ naŋ lɔŋɛ m mɔlga anyi ¹¹nɛ menyi alɛ e baa ta men be kabɔrɛkule a kule a chɛ anyi to. Ebɔrɛ malɛ beeŋ nu men be kabɔrɛkule damta nɛ menyee kule a sa anyi na n nɛfa anyi nɛ k shin nɛ basa damta e bugi bumo be nnɔ n di Ebɔrɛ na epaŋ ŋkpal anyi so.

Pɔɔl ka chɛrga asheŋ nɛ e daa fɛ kewora be asheŋ

¹²Naniere le be kesheŋ ere so nɛ anyee puchi fanɛ: Anyi be ŋgbene bee kaŋɛ anyi fanɛ an tiŋ ŋ keta anyi be amu nɛnɛ ashi durnya ere to, fɔnfɔŋ anyi nɛ menyi be kebaawɔtɔ be kaplɛa so. Ŋgbene mo nɛ a shi Ebɔrɛ kutɔ a maŋ kɔ kulubi nseŋ niŋi na nɛ an ta n wora asheŋ. Amoso, mannɛ durnya ere be kanyiasheŋ so nɛ an ta n wora loŋ. Ebɔrɛ be kuwɔr be kakɛ so nɛ loŋ be asheŋ tiŋ n wora. ¹³Mannɛ asɔ nɛ menyi maaŋ tiŋ ŋ kraŋ ŋko m pin to nɛ anyee sibɛ a sa menyi. Amoso, mee tama fanɛ kananɛ men fara a pin asheŋ to ashi anyi kutɔ gbrɛgbrɛ ere, menyeeŋ ba pin amo to nɛnɛ. ¹⁴Kumo e la fanɛ menyeeŋ pin fanɛ menyeeŋ tiŋ ŋkpal anyi so n ji njɔŋ fanɛ kananɛ anyeeŋ kpal menyi so n ji njɔŋ Enyɛnpe Yesu be kachɛ na.

¹⁵Ŋkpal ŋ ka daŋ baa nyi kesheŋ ere geeŋ so, n daŋ yili kumo nna fanɛ meeŋ ba chɔrɔ menyi pɔɛŋ, saŋɛ na so menyeeŋ nu ebel ale anyɔ. ¹⁶Ŋkpal manɛ so, n daŋ yili kumo nna fanɛ ŋ kaa yɔ Masɛdonia, meeŋ bɔɔ menyi so. Ma alɛ naŋ ya shi Masɛdonia a bɛta a choŋ nɛ m ba shin nɛ men chɛ ma to nɛ n yɔ Judiya. ¹⁷To, kananɛ n daŋ fɛ kewora ere na daa la alefashaso be kusɔ nna a? Ŋko n fɛ asheŋ nɛ meeŋ wora nna fanɛ durnya ere to be esa a kaŋɛ fanɛ mm, mm, nseŋ naa yili epul na malɛ to a kaŋɛ m-m, m-m? ¹⁸Kananɛ Ebɔrɛ maa chɛrga kɔnɔ na, loŋ koŋwule na nɛ anyi alɛ gba be kamalga maŋ la mm nɛ m-m be kamalga. ¹⁹Ŋkpal manɛ so, Ebɔrɛ Pibinyɛn Yesu Kristo na nɛ ma nɛ Sailas nɛ Timoti bɔ mbe kubɔya n sa menyi na daa maa kaŋɛ mm nseŋ naŋ kilgi ŋ kaŋɛ m-m epul na to, saŋkikɛ mm e daa wɔ mo to. ²⁰Ŋkpal manɛ so, Ebɔrɛ be nnɔ naseso baa sha a baa shi kanaŋkamaso, amo kikɛ la mm be mmalga nna ashi Kristo to. Amoso, mo so nɛ anyee bɔla a shuli ‘Amɛn’ a ta kemaŋkura a sa Ebɔrɛ. ²¹Ebɔrɛ koŋwule na malɛ e naa shin nɛ anyi nɛ menyi kikɛ bee yili kpakpa ashi Kristo to. Mo e nɛfa anyi n yili ²²nseŋ ta mbe kenya be ndulgi n dulgi anyi nseŋ ta mbe Kiyoyu n wɔtɔ anyi be ŋgbene to a ŋini fanɛ mo e wɔ anyi.

²³Mo alɛ Ebɔrɛ koŋwule na nɛ mee tre fanɛ e baa la ma shɛdajipo n ji kashenteŋ fanɛ ŋ ka daa maa sha nɛ men be ŋgbene e jija so nɛ n daa maŋ naŋ bɛta m ba Kɔrint na. ²⁴Men baa nyi fanɛ mannɛ fanɛ anyee sha keŋini menyi kenimu nna ashi yirda na to, ama kusɔ nɛ anyee wora e la fanɛ anyee tu menyi nna a wora asheŋ ŋkpal men be kenya kagbenefuliso so. Yirda malɛ so nɛ men yil kpakpa na.

¹Amoso, n yili kumo ma kagbene to nna fanɛ m maaŋ naŋ ba bɔɔ menyi so n naŋ sa menyi kagbenejija. ²Ŋkpal manɛ so, nɛ m baŋ jija men be ŋgbene, wanɛ e naa wɔtɔ n naŋ ti menyi nɛ n jija men be ŋgbene na so nɛ e naŋ leŋ ma to? ³N daŋ sibɛ kawɔl na n sa menyi nna, saŋɛ na so, ŋ kaŋ ba, menyi basa nɛ baaŋ shin nɛ ma kagbene e fuli ma na maaŋ jija ma kagbene, ŋkpal manɛ so, m baa kɔ menyi kikɛ be yirda fanɛ ma kagbenefuli la menyi kikɛ be kagbenefuli nna. ⁴Tɔrɔgboŋ nɛ kagbenejija to nɛ n daa wɔ n ta anishichubi damta n sibɛ menyi kawɔl na nɛ n shin nɛ men pin kananɛ mee sha menyi kikɛ nɛnɛ, mannɛ fanɛ n jija menyi be ŋgbene.

Ketampaŋ alubiworapo be asheŋ

⁵Nɛ esa baŋ bar kagbenejija anyi to, mannɛ ma kagbene nɛ amodoŋwura jija, ama nɛ fo keni to, menyi kikɛ be ŋgbene nɛ e jija. M maa sha fanɛ n ta kenishipere ga n tu amodoŋwura na. ⁶Ŋkpal manɛ so, kasogberge nɛ amodoŋwura na teŋ nya ashi basa galeŋga kutɔ kukwe. ⁷Naniere kusɔ nɛ k daga fanɛ men baa wora e la fanɛ men ta m paŋ mo nseŋ leŋ mo to, saŋɛ na so mbe kagbenejija damta na maaŋ pɔɔ mo so. ⁸Amoso, men jande, men ŋini mo fanɛ menyee sha mo kashenteŋto. ⁹Amoso nɛ n daŋ sibɛ menyi kawɔl na nɛ n wora menyi ŋ keni ŋko men kɔ kasonu ashi kusɔ kama to a. ¹⁰Nɛ esa baŋ wora kulubi nɛ men ta m paŋ mo, ma alɛ gba ta m paŋ amodoŋwura na. Nɛ kusɔ nɛ ma alɛ baŋ ta m paŋ, nɛ ketampaŋ be kesheŋ ko malɛ baa wɔtɔ nna na, n ta nna m paŋ ashi Kristo be anishito ŋkpal menyi so. ¹¹Saŋɛ na so, Setani maaŋ nya anyi, ŋkpal manɛ so, an nyi mbe nfɛra.

Pɔɔl be kagbene ka kaa Trowas be kade to be asheŋ

¹²Ŋ ka daŋ ba Trowas be kade to nɛ m ba bɔ Kristo be baru lela na, n wu fanɛ kashenteŋto Enyɛnpe bugi kushuŋ na be ekpa. ¹³Ama ma kagbene daa maŋ dese ma kuraa ŋkpal ŋ ka daa maŋ tu an kurgepo Taites na so. Amoso, n daŋ kela ndoŋebi na nna nseŋ yɔ Masɛdonia.

Kebɔla Kristo to a kɔ eleŋ be asheŋ

¹⁴Ama anyee chɔrɔ Ebɔrɛ ga, ŋkpal manɛ so, mo e naa shin nɛ anyee tu Kristo a nite kekɔmpɔɔso be ekpa so nseŋ naa bɔla anyi so a shin nɛ Kristo be kenyi bee sɔ kaplɛkama fanɛ efɛa belbelso na. ¹⁵Ŋkpal manɛ so, an du fanɛ Kristo be efɛa belbelso nna a sa Ebɔrɛ a wɔ basa nɛ baa nya kumɔlga nɛ bumo nɛ baa mur bumo be alubi to to. ¹⁶Bumo nɛ baa mur na, k la fanɛ kɔrtɔ lubi nna a mɔ, ama bumo nɛ baa nya kumɔlga na bre, k la fanɛ efɛa belbelso nna a bar ŋkpa. To, nɛ wanɛ e naaŋ tiŋ n wora le be kesheŋ ere? ¹⁷Anyi alɛ maŋ du fanɛ basa damta nɛ b kɔ Ebɔrɛ be kawɔl to na a fin kenya tɔnɔ ko n ji na nna. Anyi ere, Ebɔrɛ e shuŋi anyi, amoso, nfɛra niŋiso nɛ an kɔ a malga asheŋ Kristo be ketre to ashi Ebɔrɛ be anishito.

Kɔnɔkoŋwule be ŋkre popɔr na be anya be asheŋ

¹To, kede bee ŋini fanɛ an naŋ fara nna a kpaŋ anyi be amu nna ŋko? Ŋko a daga fanɛ anyi alɛ gba ka naŋ nya eleŋ be nwɔl nna nɛ an ta n yɔ men kutɔ fanɛ kananɛ beko bee wora na a? ²Menyi gbagba e la anyi be kawɔl nɛ b sibɛ n deŋi an be ŋgbeneana so nɛ basa kikɛ e baa wu nsaa kraŋ amo. ³Menyi alɛ gba bee ŋini fanɛ men la kawɔl nna n shi Kristo kutɔ a la anyi be kushuŋ ere be tɔnɔ. Mannɛ kleembi nɛ b ta n sibɛ amo, bumo alɛ maŋ sibɛ amo n deŋi ajembu so, ama Ebɔrɛ nɛ e wɔ ŋkpa to be Kiyoyu nɛ b ta n sibɛ amo dimɛdi be ŋgbene so.

⁴Le be tama ere nɛ an bɔla Kristo so a kɔ ashi Ebɔrɛ be anishito. ⁵Ama mannɛ fanɛ an gbagba ka kɔ eleŋ ko fanɛ an gbagba e wora kushuŋ na, Ebɔrɛ kutɔ nɛ anyi be eleŋ na bee shi. ⁶Mo e shin nɛ an ki kɔnɔkoŋwule be ŋkre popɔr be beshumpo, k la kiyoyu to be kesheŋ nna, mannɛ mbra to be kasibɛ be kesheŋ, ŋkpal manɛ so, mbra to be kasibɛ na bee bar luwu nna nɛ Kiyoyu na malɛ bee sa ŋkpa.

Kɔnɔkoŋwule be ŋkre popɔr na be kemaŋkura na be asheŋ

⁷B daŋ sibɛ mbra na n deŋi ajembu so nna. Saŋɛ nɛ anebi Mosis daŋ ta amo n sa Israɛlebi na nɛ Ebɔrɛ be kemaŋkura lar efuli hale n shin nɛ Mosis be anishiakpa daa kpa edɛ nɛ Israɛlebi daa maŋ tiŋ ŋ keni mo. Nɛ kumo be kekpa edɛ na malɛ ka daa beeŋ ba loge gba nde! ⁸To, nɛ mbra ere be kushuŋ nɛ k bee bar luwu na ka kɔ le be kemaŋkura ere, Kiyoyu na be kushuŋ maaŋ baa kɔ kemaŋkura a chɔ loŋ a? ⁹Nɛ fanɛ kushuŋ nɛ k bee ji a bri basa baa kɔ kemaŋkura kumo to, kumo ere, kushuŋ nɛ k bee ji a mɔlga basa na beeŋ baa kɔ kemaŋkura a chɔ loŋ. ¹⁰Ŋkpal manɛ so, nɛ an ta le be kemaŋkura ere m ber sososo peya na, sososo peya na maaŋ baa la shɛŋ. ¹¹Ŋkpal manɛ so, nɛ kusɔ nɛ k maaŋ chɛr ŋkeŋ loge daa kɔ kemaŋkura kumo to, kumo ere kusɔ nɛ k maaŋ loge bre be kemaŋkura beeŋ baa chɔ loŋ ga.

¹²Ŋkpal an ka kɔ le be tama ere so, an kɔ kenyɛn nɛ an baa wora asheŋ. ¹³Anyi maŋ du fanɛ Mosis nɛ e daŋ ta kusɔ kuŋso ŋ kuŋ mbe anishiakpa nɛ Israɛlebi e sa maŋ wu kananɛ mbe anishiakpa be kekpa edɛ daa chɛrga nsaa loge na. ¹⁴Ama kashenteŋto bumo be ŋgbeneana daŋ ti nna a du kpakpa, hale kabre b baŋ kraŋ kɔnɔkoŋwule be ŋkre dra na, kusɔ kuŋso na kraa wɔtɔ nna, ŋkpal manɛ so, Kristo nawule so nɛ kusɔ kuŋso na bee lar ashi to. ¹⁵Kashenteŋto, b baŋ kraŋ Mosis be mbraana na hale mbre, kusɔ kuŋso kraŋ buu bumo be ŋgbeneana so nna a shin nɛ baa pin amo to a gben. ¹⁶Ama nɛ esa baŋ kilgi n ta mbe kumu n sa Enyɛnpe bre, kusɔ kuŋso na bee lar nna ashi to. ¹⁷Enyɛnpe e la Kiyoyu na, kaplɛkama malɛ nɛ Enyɛnpe be Kiyoyu malɛ wɔ, ndoŋ nɛ kamooji wɔ. ¹⁸Ama anyi ere kikɛ ka maŋ kɔ kusɔ kuŋso nɛ k buu anyi be anishiakpaana so nsaa nyaŋɛ Enyɛnpe be kemaŋkura be kefulto na a ŋini basa na bee chɛrga nna a duli mo a ti so a nya kemaŋkura nɛ k bee wora keshi a ti so. Kesheŋ ere shi Enyɛnpe nɛ e la Kiyoyu na kutɔ nna.

Abɔrɛsheŋ be kanya be asheŋ

¹To, ŋkpal Ebɔrɛ ka wu anyi kuwɔr n sa anyi le be kushuŋ ere so, anyi maa pɔ aba. ²Naniere, an yige wulo to be asheŋ nɛ anishinyɔr be ekpaana. Anyi maa ta kafule a wora asheŋ, anyi alɛ maa chɛrga Ebɔrɛ be kamalga na. Ama kashenteŋ nɛ an lara n dii efuli. Loŋ malɛ, ekama be nfɛra fɛso beeŋ ŋini mo fanɛ an walɛ nna ashi Ebɔrɛ be anishito. ³Hale nɛ kusɔ kuŋso buu anyi be baru lela nɛ anyi bɔ ere so gba, k wora loŋ nna n sa basa nɛ baa mur bumo be alubi to na. ⁴Bumo alɛ maŋ yirda nna, ŋkpal manɛ so, durnya ere to be ebɔrɛ na e tan bumo be anishiana, saŋɛ na so b maaŋ baa wu Kristo nɛ e la Ebɔrɛ be kaduli gbagba na be kemaŋkura be baru lela na be kefulto na. ⁵Ŋkpal manɛ so, mannɛ anyi gbagba be asheŋ be baru nɛ anyee bɔ, Yesu Kristo be baru nɛ anyee bɔ a kaŋɛ fanɛ mo e la Enyɛnpe na nɛ anyi alɛ la men be beshumpo ŋkpal Yesu so. ⁶Ebɔrɛ mo nɛ e kaŋɛ fanɛ: “Men shin nɛ kefulto e shi tentembiri to n lar n nyaŋɛ,” koŋwule na e naa shin nɛ mbe kefulto bee nyaŋɛ anyi be ŋgbeneana to a bar anyi Ebɔrɛ be kemaŋkura be kanyiasheŋ be kefulto nɛ k bee nyaŋɛ Kristo be anishito na.

⁷Ama anyi, bumo nɛ an kɔ le be kanya ere du fanɛ mba nna a ŋini fanɛ eleŋ nɛ k chɔ kekama na la Ebɔrɛ peya nna, mannɛ anyeya. ⁸Saŋɛ damta baa nyaŋ anyi nna, ama anyi alɛ maa bɛa to. Saŋko anyee wulto to, ama anyi alɛ maa wulto to cheche. ⁹Baa tɔrɔ anyi, ama Ebɔrɛ maa kini anyi. Baa ŋmɛa anyi a lɛ, ama anyi alɛ maa mur. ¹⁰Saŋkikɛ an kɔ Yesu be luwu nna an be eyurana to a na, saŋɛ na so Yesu na be ŋkpa gba beeŋ baa lar anyi be eyurana to a ŋini basa. ¹¹Ŋkpal manɛ so, saŋkikɛ, anyi nɛ an wɔ ŋkpa to ere nɛ luwu maŋ wɔ kufɔ ŋkpal Yesu so, saŋɛ na so basa beeŋ wu mbe ŋkpa malɛ gba ashi anyi be eyurana nɛ luwu bee pɔɔ amo so ere to. ¹²Amoso, luwu wɔ anyi to nna a shuŋ nɛ ŋkpa malɛ gba wɔ menyi to a shuŋ. ¹³Abɔrɛsibɛ na bee kaŋɛ fanɛ Ewura Deevid kaŋɛ: “N yirda nna so nɛ m malga.” To, loŋ be yirda be kiyoyu koŋwule na nɛ anyi alɛ gba kɔ a yirda nsaa malga na. ¹⁴Ŋkpal manɛ so, an nyi fanɛ esa nɛ e tiŋi Enyɛnpe Yesu luwu to na beeŋ tiŋi anyi alɛ gba nɛ Yesu na nseŋ ta anyi nɛ menyi kikɛ n yɔ mo gbagba be anishito. ¹⁵Menyi alɛ be kechɛto so nɛ ade malɛ kikɛ du loŋ na, saŋɛ na so Ebɔrɛ malɛ be kuwɔr be kakɛ beeŋ baa salga to a tu basa damta a ti so nɛ b baa kɔ kechɔrɔ be kabɔrɛkule damta a ti so a sa Ebɔrɛ nɛ e nya kemaŋkura.

¹⁶Amoso, an maa pɔ aba. Anyi be eyur so bre bee nya kapɔshi nna a ti so, anyi be ayoyu bre to bee wora eleŋ nna kapa nɛ kanyɛ a ti so. ¹⁷Kabre nawule be etɔrɔbi ere beeŋ kaŋ bar anyi kemaŋkuragboŋ nɛ k maŋ kɔ ekar nsaa bɔ etɔrɔ ere ga. ¹⁸Ŋkpal manɛ so, anyi be nfɛra yuu asɔ nɛ esa maaŋ tiŋ n wu kenishiso na nna, mannɛ asɔ nɛ basa bee wu kenishiso. Kusɔ nɛ anishi malɛ bee wu maa chɛr ko, ama kusɔ nɛ basa maaŋ tiŋ n wu kenishiso bre wɔtɔ nna mbaanaayɔ.

Anyi be ebɔrɛso be kowu be asheŋ

¹Ŋkpal manɛ so, an baa nyi fanɛ eyur mo nɛ k du fanɛ wajɛbu nɛ an wɔ kumo to durnya ere to ere baŋ jija, an kɔ kowu ashi Ebɔrɛ kutɔ, ebu nɛ b maŋ ta enɔ m pɔr kumo nɛ k wɔ ebɔrɛso mbaanaayɔ. ²Naniere bre an wɔtɔ nna a shu to nsaa jo anyi be ebɔrɛso be kowu nɛ baaŋ ta m buu anyi fanɛ kusɔbuuso na kenishipereso. ³Ŋkpal manɛ so, nɛ an baŋ buu kusɔbuuso na, an maaŋ naŋ delge so a wɔtɔ. ⁴Ŋkpal manɛ so, an ka kraa wɔ eyur mo nɛ k du fanɛ wajɛbu ere to bre, anyee shu to nna nsaa wɔ kafɔŋ to, ŋkpal manɛ so, an maa sha fanɛ an delge so. Anyee sha fanɛ an buu anyi be ebɔrɛso be kusɔbuuso nna, saŋɛ na so ŋkpa beeŋ mur kusɔ nɛ k beeŋ wu na kikɛ nyam. ⁵Ebɔrɛ e bela anyi ase n yili le be kesheŋ ere nseŋ ta mbe Kiyoyu n sa anyi nɛ e baa la asɔ nɛ e kɔ a sa anyi kikɛ be tɔɔnɛ.

⁶Amoso, saŋkikɛ anyi maa pɔ aba, ŋkpal manɛ so, an nyi fanɛ an ka baa wɔ epe ashi anyi be eyur ere to ere, anyi nɛ Enyɛnpe na wɔ kufɔ. ⁷Ŋkpal manɛ so, yirda nɛ an kɔ a na, mannɛ anishi fuful. ⁸Anyi maa pɔ aba kikɛ nsaa sha ga fanɛ nɛ an daŋ nya nna an daa beeŋ lar anyi be eyur ere nɛ k la anyi pe ere to nseŋ daŋ ya kaa wɔ epe ashi an Nyɛnpe na kutɔ. ⁹Ama kusɔ nɛ an baŋ yili e la fanɛ anyeeŋ baa wora mbe aparsheŋ. K maŋ tir ŋko an wɔ epe nfe ashi anyi be eyur ere to ŋko an wɔ kufɔ nna. ¹⁰Ŋkpal manɛ so, kachako an kikɛ beeŋ yili Kristo be anishito nɛ e ji anyi demu. Ekama beeŋ nya kusɔ nɛ k daga mo ŋkpal kusɔ nɛ amodoŋwura wora ashi mbe eyur ere to so, kelela ŋko kulubi.

Kenamba abar so be kubɔya be asheŋ

¹¹Ŋkpal anyi alɛ ka nyi kusɔ nɛ baa tre Ebɔrɛ be kaŋana na so, anyee wora ania nna ga a chɛ basa to nɛ b pin kusɔ nɛ k wɔtɔ. Ebɔrɛ e nyi kananɛ an du nɛnɛ nɛ ma alɛ bee tama fanɛ loŋ nɛ menyi alɛ gba nyi anyi ashi men be ŋgbene to. ¹²To, kede bee ŋini fanɛ an naa sha kekpaŋ anyi be amu nna n sa menyi ŋko? Ayai, kusɔ nɛ anyee wora e la fanɛ anyee sa menyi ekpa nna nɛ men kpal anyi so n ji njɔŋ. Saŋɛ na so, menyeeŋ tiŋ n nya kusɔ ko ŋ kaŋɛ basa nɛ baa keni dimɛdi be eyilikpa nawule so a ji njɔŋ nsaa maa keni kusɔ nɛ k wɔ kagbene to na. ¹³Ŋkpal manɛ so, nɛ an baa maa kɔ nfɛra, keshuŋ Ebɔrɛ so nɛ anyi maŋ kɔ nfɛra, nɛ anyi alɛ naa kɔ anyi be nfɛra kleembi, menyi so nɛ an kɔ amo. ¹⁴Ŋkpal manɛ so, Kristo be kasha e kɔ anyi a wora asheŋ ŋkpal an ka baa nyi geeŋ fanɛ esa koŋwule e yili ekama be katelamu to n wu so so. Kumo e la fanɛ ekama malɛ e wu. ¹⁵Mo alɛ wu nna n sa ekama, saŋɛ na so, bumo nɛ b wɔ ŋkpa to na maaŋ naa wɔtɔ ŋkpal bumo gbagba be amuana so, ama baaŋ baa wɔtɔ nna ŋkpal esa nɛ e kpal bumo so n wu nɛ Ebɔrɛ tiŋi mo luwu na to na so.

¹⁶Amoso, naniere mannɛ dimɛdi be kaplɛa so nɛ an naa bɔla so a keni kananɛ esa du. Saŋko bre, loŋ nɛ an daa keni Kristo na, ama naniere bre anyi maŋ naa keni mo loŋ. ¹⁷Amoso, nɛ esa kama baa wɔ Kristo na to, kepɔrso popɔr e la mo, asheŋ dra na kikɛ choŋ nɛ asheŋ popɔr ba. ¹⁸Le be asheŋ ere malɛ kikɛ shi Ebɔrɛ nɛ e bɔla Kristo so n shin nɛ anyi nɛ mo ere Ebɔrɛ naŋ nyalɛ nseŋ ta mo nɛ basa be kenyalɛ be kushuŋ m bɔɔ anyi enɔ na kutɔ nna. ¹⁹Kumo e la fanɛ Kristo so nɛ Ebɔrɛ daŋ bɔla ŋ kplaŋ durnya be alubi so nseŋ shin nɛ mo nɛ basa naŋ nyalɛ. Ama kananɛ e bee shin nɛ mo nɛ basa bee nyalɛ be kubɔya nɛ e ta m bɔɔ anyi enɔ.

²⁰Amoso, anyi e la Ebɔrɛ be katelamushuŋipoana a du fanɛ basa nɛ Ebɔrɛ bee bɔla bumo so a kule menyi nsaa fiɛ menyi so. Amoso, anyee ta Kristo be ketre nna a kule menyi ga fanɛ: Men shin nɛ menyi nɛ Ebɔrɛ e naaŋ nyalɛ. ²¹Anyi so nɛ Ebɔrɛ shin nɛ mo ere, esa nɛ e maŋ nyi kulubi na ki kulubi, saŋɛ na so mo so nɛ anyeeŋ ki Ebɔrɛ be anishito be belelapo.

Pɔɔl be kebaawɔtɔ kpakpasoana be asheŋ

¹Naniere anyi nɛ Ebɔrɛ ka bee shuŋ ere, anyee kule nsaa fiɛ menyi so nna fanɛ men sa maa sɔ Ebɔrɛ be kuwɔr be kakɛ na kenyanyaŋɛso. ²Ŋkpal manɛ so, Ebɔrɛ bee kaŋɛ fanɛ:

“Ma kepar be kachɛ nɛ n nu men be ebɔl,

nseŋ naŋ chɛ menyi to kumɔlgaachɛ na.”

To, ma alɛ e naa kaŋɛ menyi na fanɛ naniere e la Ebɔrɛ be kepar be kachɛ, kabre e la kumɔlga be kachɛ na.

³An maa sha esa kama ka wu anyi be kushuŋ ere kulubi, amoso, anyi maa sha keta shɛŋ shɛŋ ŋ kagle esa kama ekpa. ⁴Ama kusɔ kama nɛ anyee wora, anyee ta kanyitigboŋ nna a nyiti etɔrɔ nɛ kebaawɔtɔ kpakpaso nɛ kekɔrfɛ ŋkpal an ka la Ebɔrɛ be beshumpo na so. ⁵B daŋ kebri anyi n ti anyi ebu n shɛr agboso ŋ kulti anyi, an shuŋ m baŋ anyi be amu so ŋ gal edi nseŋ di akoŋ malɛ gba. ⁶An bɔla an be kebaawɔtɔ nɛ k maŋ kɔ eyurpi so nɛ anyi be kanyiasheŋ so nɛ anyi be kanyitiso nɛ anyi be kebaala basa so ŋ ŋini fanɛ an la Ebɔrɛ be beshumpo nna ashi Kiyoyu Cheeŋ nɛ kashenteŋ be kasha to. ⁷Amo alɛ nseŋ naŋ shi kashenteŋ be kamalga nɛ Ebɔrɛ be eleŋ to. An kɔ Ebɔrɛ be anishito be alelasheŋ nna fanɛ akɔsɔ a ta bena nɛ jiso a kɔ. ⁸Basa bee bunyaŋ anyi nsaa ŋaba anyi, baa tege anyi nsaa chɔrɔ anyi, baa tre anyi befɛpo nɛ anyi alɛ bee ji kashenteŋ. ⁹B yɛ basa maŋ nyi anyi nɛ basa damta malɛ nyi anyi nɛnɛ, b yɛ anyee wu nna, ama anyi alɛ baa wɔ ŋkpa to nna a yɔ, baa gberge anyi kusoe, ama anyi alɛ maa wu. ¹⁰An wɔ kagbenejija to, ama an be ŋgbene malɛ baa fuli anyi nna saŋkikɛ. Betirpo e la anyi, ama saŋkikɛ anyi alɛ bee wɔtɔ basa dama to nna. Anyi maŋ kɔ shɛŋ, anyi alɛ nsaa kɔ asɔ kikɛ.

¹¹Kɔrintebi, an bugi to nna m malga asheŋ ere n sa menyi na nɛ anyi alɛ be ŋgbene malɛ baŋ bugi n sa menyi. ¹²Anyi maa ta anyi be kasha a ŋana menyi so, menyi ere e naa ta menyeya a ŋana anyi so. ¹³Naniere mee malga nna a sa menyi fanɛ ma mbia gbagba fanɛ men baa kɔ kasha koŋwule mo nɛ an kɔ a sa menyi na a sa anyi alɛ gba. Men bugi men be ŋgbene kikɛ to.

Kananɛ k maŋ daga fanɛ b baa wea nnyamase be asheŋ to be asheŋ

¹⁴Men sa maŋ shin nɛ menyi nɛ bumo nɛ b maŋ la bebɛsopo e baa gama a wora asheŋ fanɛ men kurgepoana, ŋkpal manɛ so, manɛ e wɔ kelela nɛ kulubi be nferinto? Ŋko nuso nɛ kefulto nɛ tentembiri bee wora asheŋ abar so? ¹⁵Nuso nɛ Kristo nɛ alubipo Beelial na bee wora a kɔ kɔnɔkoŋwule a wɔtɔ? Manɛ e wɔ ebɛsopo nɛ emo nɛ e maŋ la ebɛsopo be nferinto? ¹⁶Manɛ be ŋkre e wɔ Ebɔrɛ be lambu nɛ agbirana be nferinto? Ŋkpal manɛ so, anyi e la Ebɔrɛ nɛ e wɔ ŋkpa to na be lambu. Kumo be asheŋ nɛ Ebɔrɛ malɛ gba kaŋɛ na fanɛ:

“Meeŋ baa wɔ bumo to nsaa na bumo to

a la bumo be Ebɔrɛ nɛ bumo alɛ e baa la ma basa.

¹⁷Amoso ma, Enyɛnpe na e naa yɛ menyi

na fanɛ men lara men be amu ashi bumo to a kɔr to.

Men sa maŋ kaa beta kusɔ kama

nɛ k kɔ eyurpi nɛ n sɔ menyi.

¹⁸Ma, Enyɛnpetale e naa yɛ menyi na fanɛ meeŋ baa la men tuto

nɛ menyi alɛ e baa la ma mbinyɛnsoana nɛ mbichesoana.”

¹N teri shasoana, ŋkpal an ka kɔ le be nnɔ nasesoana ere kikɛ so, men shin nɛ an fɔr kusɔ kama nɛ k bee sa dimɛdi be eyur nɛ mbe kiyoyu eyurpi n lɛ ŋkeŋ shin nɛ an baa pere kenishi a sha kebaaki cheembi nɛnɛ a wɔ Ebɔrɛ be kaŋana be kebaawɔtɔ to.

Pɔɔl be kagbenefuli be asheŋ

²Men shin nɛ an be asheŋ e baa wɔ men be ŋgbene to. Anyi maŋ wora esa kikɛ kulubi, anyi maŋ jija esa kama, anyi alɛ maŋ naŋ ta esa kama n nyalɛ. ³M maŋ malga kesheŋ nɛ m malga ere nna nɛ n wu menyi kulubi, ŋkpal manɛ so, n teŋ kaŋɛ menyi fanɛ men be asheŋ wɔ anyi be ŋgbene to ga, amoso, anyeeŋ tiŋ a wɔtɔ ŋko n wu n sa menyi. ⁴Ma yirda shi menyi so ga nɛ mee ji njɔŋ ga ŋkpal menyi so. Ma kagbene kikɛ baa dese ma nna, hale anyi be kekɔrfɛ ere kikɛ to, ma kagbene baŋ fuli ma nna parr.

⁵Hale an ka ba Masɛdonia, anyi be eyurana ere maŋ nya ewushi kikɛ. Anyi nɛ kekɔrfɛ e daa la kaplɛkama, anyi nɛ basa be nlu malɛ e daa la nɛ kufu malɛ daŋ bɔlɔ anyi be ŋgbene to. ⁶Ama Ebɔrɛ nɛ e bee wushi kagbenejijawuraana na, wushi anyi be ŋgbene ŋkpal Taites ka ba so. ⁷Ama mannɛ mbe keba nawule so, mbe kubɔya nɛ e bar m ba kaŋɛ kananɛ men leŋ mo to na gba wushi anyi be ŋgbene n ti so. E kaŋɛ anyi kananɛ men baa sha kewu ma be asheŋ, kananɛ men be ŋgbene jija menyi ga be asheŋ nɛ kananɛ men yili ma kaman ŋ kɔ n sa ma be asheŋ. Ade kikɛ so ma kagbene baŋ naŋ fuli ma nna n ti so.

⁸Hale nɛ kawɔl nɛ n sibɛ na daŋ jija men be ŋgbene gba, m maa kaŋɛ fanɛ n daa nyi m maŋ sibɛ kumo. Saŋko bre k daŋ wora ma kanaŋ ko, ŋkpal manɛ so, n wu fanɛ kawɔl na daŋ jija men be ŋgbene, kumo alɛ saŋɛ gbrɛbi ko nɛ k daŋ ta menyi. ⁹Ama naniere ma kagbene fuli ma nna, mannɛ men be ŋgbene ka daŋ jija na so, ama ma kagbene fuli ma nna ŋkpal men be kagbenejija na ka shin nɛ men lar men be alubi to so. Amoso, men be kagbenejija na daa la kusɔ nɛ Ebɔrɛ yili nna, amoso, menyi maŋ paŋ shɛŋ ashi ekpa kama so ŋkpal anyi so. ¹⁰Ŋkpal manɛ so, kagbenejija mo nɛ k bee par Ebɔrɛ bee bar kagbenechɛrga nna a yɛr esa kumɔlga to, k maa bar ‘n daa nyi’. Ama durnya ere to be kagbenejija bre bee bar luwu nna. ¹¹Men keni kusɔ nɛ le be kagbenejija nɛ k bee par Ebɔrɛ ere bar menyi, kananɛ k ta menyi ŋ ki kenishiperewuraana. Men keni kananɛ k bar menyi men be amu be kekɔnsɔ be eleŋ loŋ nseŋ keni kananɛ k shin nɛ men be ŋgbene kaa nɛ kananɛ k bar menyi kufu nɛ kasha nɛ ŋgbene mo nɛ a maa lar esa kaman. Men naŋ keni kananɛ k shin nɛ menyee sha kewu asheŋ nɛ amo be kashenteŋ be ekpa so loŋ. Kashenteŋto, men ŋini fanɛ ekpa kama so, men maŋ wora n da so ashi le be asheŋ ere to. ¹²Amoso, kashenteŋ nna nɛ n sibɛ menyi kawɔl na, ama mannɛ esa nɛ e wora n da so na so ŋko esa nɛ b wora n da mo so na so nɛ n daŋ sibɛ kumo, n daŋ sibɛ kumo nna nɛ men pin ashi Ebɔrɛ be anishito fanɛ kananɛ men be ŋgbene wɔ anyi so.

¹³To, kusɔ nɛ k baŋ leŋ anyi to ga nna na. Ama kusɔ nɛ k ti anyi be keleŋto ere so e la fanɛ anyi be ŋgbene fuli anyi ga ŋkpal Taites be kagbenefuliso Mbe kagbene baŋ fuli mo nna ŋkpal men kikɛ ka daŋ wushi mo kagbene so. ¹⁴N daŋ ji men be njɔŋ n sa mo, kashenteŋto malɛ, men maŋ ta anishinyɔr m mɔ ma. Men nyi fanɛ saŋkikɛ kashenteŋ nɛ anyee malga a sa menyi. Kumo koŋwule na nɛ njɔŋ mo nɛ n ji n sa Taites na bɔla ekpa na. ¹⁵Mo gbagba malɛ be kasha nɛ e kɔ a sa menyi baa ti so nna ŋkpal kananɛ e bee nyiŋi menyi kikɛ be kasonu so nɛ kananɛ men daŋ ta kufu nɛ kechicha chicha n sɔ mo na so. ¹⁶K par ma ga fanɛ meeŋ tiŋ n yirda menyi ashi ekpa kama so.

Kusɔ nɛ k ba nɛ a daga fanɛ ebɛsopo e baa la esa be asheŋ

¹To, an kurgepoana, naniere anyee sha fanɛ men pin kuwɔr be kakɛ mo nɛ Ebɔrɛ sa Masɛdonia be asɔriana na be asheŋ nna. ²B luri etɔrɔ damta kpakpasoana to n lar nɛ ketir pɛ bumo, ama bumo alɛ be ŋgbene daŋ fuli bumo ga. Kumo alɛ nɛ ketir gboŋgboŋi na shin nɛ b bugi enɔ ŋ kɛ nɛnɛ. ³Ma alɛ e kaŋɛ menyi kashenteŋto na fanɛ b sa kananɛ b tiŋ hale n ya baŋ kananɛ bumo be eleŋ sa gba so. ⁴Bumo gbagba be kasha so nɛ b kule anyi ga fanɛ baa sha fanɛ bumo alɛ gba e nya ekpa nna n tiŋ n chɛ Ebɔrɛ be basa to. ⁵B wora m baŋ kusɔ nɛ an daa tama so, ŋkpal manɛ so, kusɔ nɛ k juŋkpar e la fanɛ b ta bumo be amu n sa Enyɛnpe na nseŋ naŋ bɔla Ebɔrɛ be eleŋ so n ta bumo be amu m bɔɔ anyi alɛ gba enɔ. ⁶Amoso, an kule Taites mo nɛ e teŋ fara le be kushuŋ ere na ga nna fanɛ e baa kraa wɔ kumo to loŋ a chɛ menyi to n ya loge men be le be kasha be kushuŋgboŋ ere. ⁷Men juŋkpar ekama nna ashi kusɔ kama to, ashi yirda to nɛ mmalga to nɛ kanyiasheŋ to nɛ kagbene koŋwule be kebaawɔtɔ to nɛ kasha mo nɛ men kɔ a sha anyi na so. Amoso, anyee sha fanɛ men baa kɔ kakɛ be kagbene ashi le be kasha be kushuŋ ere to.

⁸Mannɛ fanɛ mee nase kamalga ko nna a sa menyi, ama mee wora menyi nna a keni nsaa ta men be kasha a ber basa ko be kagbene koŋwule be kebaawɔtɔ so nɛ m pin fanɛ men be kasha na la kashenteŋ peya nna a. ⁹Ŋkpal manɛ so, men nyi Kristo, Enyɛnpe Yesu be kuwɔr be kakɛ na be asheŋ, fanɛ e ka la damawura, ama menyi so nɛ e ki etirpo, saŋɛ na so menyeeŋ bɔla mbe ketir so ŋ ki damawuraana. ¹⁰Kusɔ nɛ ma nfɛra bee sa ma ashi kesheŋ ere to nde fanɛ: Kusɔ nɛ k walɛ fanɛ men wora e la fanɛ men loge kusɔ nɛ men fara kewora kafɛnde na. Menyi e baa la bumo nɛ b baa maŋ juŋkpar n wora kusɔ na nawule, ama bumo nɛ b juŋkpar n sha kewora kumo gba. ¹¹To, naniere mee sha fanɛ men baa kɔ to nna n ya loge kumo. Kananɛ men baŋ bugi kagbene n yili kumo fanɛ menyeeŋ wora kesheŋ na, men naŋ ta loŋ be kagbene n loge kumo. Kusɔ kama malɛ nɛ men kɔ, men ta n wora kumo. ¹²Ŋkpal manɛ so, nɛ esa baŋ bugi kagbene n yili kumo fanɛ e beeŋ sa, kumo ere kusɔ nɛ amodoŋwura kɔ so nɛ Ebɔrɛ beeŋ yili n sɔ loŋ be kakɛ na, mannɛ kusɔ nɛ e maŋ kɔ so. ¹³Men baa nyi fanɛ mannɛ fanɛ anyee sha ketɔrɔ menyi nna n shin nɛ beko bre e nu ebel. Ayai, kusɔ nɛ anyee sha e la fanɛ menyi kikɛ e baa sasa. ¹⁴Naniere bre menyi e kɔ ga nɛ men tiŋ n chɛ bumo nɛ b maŋ kɔ to, ama saŋko nɛ a tir menyi, bumo alɛ gba beeŋ lara bumo be kanya damta to n chɛ menyi to, saŋɛ na so men kikɛ sasa nna na. ¹⁵Fanɛ kananɛ abɔrɛsibɛ na bee kaŋɛ na fanɛ: “Ekama nɛ e chala ga na maŋ nya m baŋ mbe kumu so, nɛ ekama malɛ nɛ e chala gbrɛbi nya nɛ a kukwe mo.”

Keshuŋi Taites Kɔrint be asheŋ

¹⁶Mee chɔrɔ Ebɔrɛ ga ŋkpal e ka ta kagbene koŋwule be kasha mo nɛ an kɔ a sa menyi na n wɔtɔ Taites be kagbene to so. ¹⁷Ŋkpal manɛ so, mannɛ fanɛ e baŋ sɔ kusɔ nɛ an kaŋɛ na nawule nna, ama mo gbagba be keparso nɛ e yili kumo kagbene koŋwuleso fanɛ e beeŋ yɔ menyi kutɔ. ¹⁸Esa nɛ anyee shuŋi n ti mo so e la ekurgepo mo nɛ e kɔ ketre ashi asɔriana na kikɛ to ŋkpal mbe baru lela na be kebɔ so. ¹⁹Ade malɛ be kaman mo nɛ asɔriana na kikɛ lara fanɛ e tu anyi n nite anyi be kasha be kushuŋ be enite nɛ anyee nite ere to nɛ an maŋkura Enyɛnpe gbagba na nseŋ naŋ ŋini ekama kananɛ an bugi kagbene a chɛ basa to. ²⁰Anyee wora ania nna nɛ esa kama e sa maŋ kaŋ wu anyi kulubi ashi kakɛ gboŋgboŋi ere be kushuŋ to. ²¹Ŋkpal manɛ so, mannɛ kusɔ nɛ k kɔ kemaŋkura ashi Ebɔrɛ be anishito nawule nɛ anyi be anishi yuu so, kusɔ nɛ k kɔ kemaŋkura dimɛdi be anishito gba nɛ anyee fin. ²²Esa nɛ an naŋ shuŋi n ti bumo so e la an kurgepo mo nɛ an wora ale damta ŋ keni n wu fanɛ e kɔ kagbene koŋwule be kasha ashi asheŋ damta to nna. Mo alɛ be loŋ be kagbene koŋwule be kebaawɔtɔ na naŋ wora keshi nna n ti so ŋkpal mbe yirdagboŋ nɛ k wɔ menyi so na so. ²³Taites bre, m barkasa nna nɛ ma nɛ mo bee shuŋ nɛ an chɛ menyi to. Ama bekurgepo mo nɛ b tu mo a yɔ na bre, asɔriana na be katelamu to nɛ b yil a yɔ menyi kutɔ na a sa Kristo na kemaŋkura. ²⁴Amoso, men ŋini bumo kasha, saŋɛ na so asɔriana na kikɛ beeŋ wu kumo geeŋ nseŋ pin fanɛ mannɛ jiga nna nɛ anyee puchi menyi so.

Kechɛ abarana bebɛsopo to be asheŋ

¹Kashenteŋto, naniere a maŋ naŋ daga ŋ ka naŋ sibɛ menyi ŋ kaŋɛ kechɛ Ebɔrɛ be basa to be kushuŋ ere be asheŋ. ²Ŋkpal manɛ so, n nyi kananɛ men bugi kagbene a sha kechɛto, ma alɛ bee ji men be loŋ be njɔŋ a sa Masɛdoniaebi a kaŋɛ bumo fanɛ kafɛnde kikɛ nɛ menyi nɛ men wɔ Akaya ere fara n wora shiriya. Loŋ be kagbene koŋwule be kushuŋ malɛ sa galeŋga nfɛra nɛ b fara a wora kusɔ ko. ³To, mee shuŋi bekurgepo ere men kutɔ nna, saŋɛ na so anyi be njɔŋ mo nɛ anyee ji men be asheŋ kesheŋ ere to na maaŋ baa la mmalga fuloŋ nɛ men wora shiriya fanɛ kananɛ ŋ kaŋɛ fanɛ menyeeŋ wora na. ⁴Ŋkpal manɛ so, nɛ mannɛ aloŋ nna nɛ Masɛdoniaebi ko tu anyi m ba men kutɔ m ba wu fanɛ men maŋ wora shiriya, anishinyɔr beeŋ pɛ anyi ga ŋkpal an ka ji men be njɔŋ ga le so, esa malɛ maŋ naa ji menyi gbagba be anishinyɔr be asheŋ. ⁵Amoso nɛ n wu fanɛ a daga fanɛ n shin nɛ bekurgepoana ere e juŋkpar ma n yɔ men kutɔ n ya shin nɛ men bela men be kakɛ gboŋgboŋi nɛ men nase kɔnɔ fanɛ menyeeŋ sa na n yili. Saŋɛ na so, kakɛ na beeŋ baa yil fanɛ kashaso be kakɛ, mannɛ fanɛ kanyaŋso be kakɛ.

⁶Men baa nyiŋi fanɛ esa kama nɛ e bee duu asɔ miiriso, beeŋ teŋi miiriso be asɔ nna nɛ esa kama malɛ nɛ e bee duu asɔ damaso beeŋ teŋi asɔ damaso nna. ⁷Kanaŋkama nɛ ekama fɛ mbe kagbene to fanɛ e beeŋ sa, e sa nsaa maa shin nɛ k naa besa mo ŋko a wora fanɛ b kaa bee tintiŋ mo na, ŋkpal manɛ so, esa nɛ e bee sa kagbenefuliso nɛ Ebɔrɛ bee sha. ⁸Ebɔrɛ e naaŋ tiŋ n sa menyi asɔ a chɔ kananɛ menyee sha, saŋɛ na so saŋkikɛ menyeeŋ baa kɔ kusɔ kama nɛ menyee sha ekpa kama so nseŋ naa kɔ amo yɛlyɛla so a yɔ kushuŋ lela kama be ekpa so. ⁹Loŋ malɛ nɛ abɔrɛsibɛ na bee kaŋɛ na fanɛ:

“Mo e naa bugi kagbene a sa betirpo asɔ,

mbe kelela malɛ maŋ kɔ ekar.”

¹⁰Ebɔrɛ nɛ e bee sa bedɔpo asɔ duuso nɛ baa duu nseŋ naa sa menyi kusɔ jiso koŋwule na e naaŋ sa menyi asɔ duuso kikɛ n shin nɛ a wora keshi n ti so nseŋ shin nɛ men nya kasɔteŋi damta ashi men be kelela to. ¹¹Ekpa kama so, e beeŋ shin nɛ men baa la damawuraana a sha kebaakɛ basa asɔ saŋkikɛ, saŋɛ na so basa damta beeŋ baa chɔrɔ Ebɔrɛ ŋkpal men be kakɛ mo nɛ baa nya ashi anyi be enɔ to so so. ¹²Ŋkpal manɛ so, kushuŋ nɛ menyee wora ere maa sa Ebɔrɛ be basa asɔ nɛ a daga bumo nawule nna, ama ekpa damtaana so gba nɛ k bee shin nɛ basa bee bɔla a chɔrɔ Ebɔrɛ. ¹³Ŋkpal menyi alɛ be kushuŋ lela nɛ men shuŋ ŋ ŋini basa nɛ men la ere so, basa beeŋ chɔrɔ Ebɔrɛ ŋkpal men ka ta kasonu n ti men be shɛda mo nɛ menyee ji a kaŋɛ Kristo be baru lela na be asheŋ na so nɛ kananɛ menyee sha kebaakɛ bumo nɛ basa kama men be kanya to be asɔ na so. ¹⁴Amoso, b baa kule Ebɔrɛ a sa menyi, bumo be nfɛra wɔ menyi so nna ŋkpal Ebɔrɛ be kuwɔr be kakɛgboŋ damta nɛ Ebɔrɛ ta n sa menyi na so. ¹⁵Anyee chɔrɔ Ebɔrɛ ga ŋkpal mbe kakɛ gboŋgboŋi nɛ esa maaŋ tiŋ n ji kumo be asheŋ ere so.

Pɔɔl ka bee malga a sɔ mbe kushuŋ na a yige be asheŋ

¹Ma, Pɔɔl gbagba nɛ b yɛ: “E baa wɔ men kutɔ e la bawala nna, ama nɛ e baa wɔ kufɔ e bee ŋini mbe kenyɛn nna”, mee kule menyi nna ŋkpal Kristo be kebaala esa nɛ bawala so fanɛ: ²Men jande, men sa maŋ shin nɛ ŋ kaŋ ba nɛ m ba ŋini menyi ma kenyɛn fanɛ kananɛ m baa nyi geeŋ fanɛ meeŋ ŋini basa nɛ baa fɛ fanɛ durnya ere to be ekpaana so nɛ an kɔ a wora asheŋ na.

³Kashenteŋ nna fanɛ durnya ere to nɛ an wɔ, ama mannɛ durnya ere to be kena nɛ anyee kɔ. ⁴Asɔ nɛ an kɔ a kɔ na maŋ la durnya ere to be akɔsɔ. A la Ebɔrɛ be akɔsɔ lempoana nɛ b kɔ a jija asɔ lempoana na nna. ⁵Amo nɛ an kɔ a jija emɔrɔana nɛ kamoowu be kusɔ kama nɛ k bee kuŋ esa kepin Ebɔrɛ be ekpa nseŋ naa kɔ amo a pɔɔ nfɛra fɛso lubiana so a shin nɛ a bee nu a sa Kristo. ⁶Nɛ men baa maa tɔr kasonu be kaplɛa so, anyi alɛ gba wora shiriya fanɛ anyeeŋ gberge kasomaanuwuraana kama kusoe.

⁷Asheŋ be kaman nɛ menyi ere bee keni, ama esa kama nɛ e baa nyi geeŋ fanɛ e la Kristo peya nna, amodoŋwura na e baa nyi fanɛ kananɛ e baa la Kristo peya na, loŋ nɛ anyi alɛ gba la mo peya. ⁸Hale nɛ m puchi eleŋ nɛ Enyɛnpe sa anyi fanɛ an ta a chɛ menyi to nɛ men baa yɔ anishito, mannɛ fanɛ an ta n jija menyi na so n ti so gba, k maaŋ pɛ ma anishinyɔr kikɛ. ⁹M maa sha fanɛ k baa du fanɛ ŋ kɔ ma nwɔl nna a funti menyi. ¹⁰Ŋkpal manɛ so, loŋ nɛ beko bee kaŋɛ fanɛ: “Mbe mmalga nɛ a wɔ mbe nwɔl to wɔ egbɛ nsaa kɔ eleŋ, ama fo wu mo gbagba kenishiso, e maŋ la elempo, mbe kɔnɔ to be mmalga malɛ maŋ kɔ shɛŋ.” ¹¹Men shin nɛ loŋ be basa na e baa nyi fanɛ asheŋ nɛ an baa malga nwɔl to saŋɛ nɛ an maŋ wɔtɔ na koŋwule na nɛ anyeeŋ wora saŋɛ nɛ an wɔtɔ gba.

¹²Mannɛ fanɛ anyee nya kagbene nna a kaŋɛ fanɛ anyi nɛ bumo nɛ baa maŋ bumo be amu so gba na e sa. Anyi alɛ maa ta anyi be amu nna a ber bumo. Kananɛ b kɔ abar a keni kananɛ b sasaana ere nsaa kɔ abar a ber abar le ere e naa ŋini fanɛ b maŋ nyi asheŋ. ¹³Ama anyi ere maaŋ ji njɔŋ m baŋ kananɛ k daga so. Kakpa nɛ Ebɔrɛ sa anyi eleŋ n ya fo nɛ anyee tar nɛ an tiŋ n fo menyi. ¹⁴Nɛ an daa maŋ fo menyi, an be keji njɔŋ daa maaŋ baa kɔ ekpa. Ama anyi alɛ ta Kristo be baru lela na n fo menyi. ¹⁵Anyi alɛ maa kpal kushuŋ mo nɛ basa pɔtɛ shuŋ so nna a puchi a baŋ anyi be amu so. Anyi be tama kikɛ e baa la fanɛ nɛ men be yirda baa wora keshi a yɔ anishito, kakpa nɛ an wɔ menyi to a shuŋ na malɛ beeŋ baa wora keshi a ti so. ¹⁶Saŋɛ na so, anyeeŋ tiŋ m bɔ kubɔya na nsawule mo nɛ a wɔ men be anishitoana na so. Ŋkpal manɛ so, anyi maa sha kepuchi kushuŋ kama nɛ b teŋ wora esa ko be kakpa so.

¹⁷Kumo alɛ nɛ abɔrɛsibɛ na bee kaŋɛ na fanɛ: “Esa kama nɛ e bee puchi, e puchi Enyɛnpe nawule so.” ¹⁸Ŋkpal manɛ so, mannɛ esa nɛ e bee chɔrɔ mbe kumu e kɔ ekpa, ama esa nɛ Enyɛnpe bee chɔrɔ e kɔ ekpa.

Pɔɔl nɛ beshuŋipo fɛpoana be asheŋ

¹Men jande, men ji ma kanyiti ashi ma kawulishembi ere to. Ama n nyi men ka tea wora loŋ bre. ²Kashenteŋto, kasha be kayurbesa nɛ k du fanɛ Ebɔrɛ peya na nɛ ŋ kɔ a keni menyi so, ŋkpal manɛ so, men du fanɛ kasuŋgurbia nna nɛ n ta menyi n sa enyɛn mo nɛ e la Kristo na nɛ kachako nɛ n ta menyi cheembi m bɔɔ ekul koŋwule na enɔ. ³Ama men be asheŋ bee keta ma kufu fanɛ nɛ men maŋ de so, kananɛ kusɔkpaŋ na daŋ ta mbe nambara n fule Hawa na, loŋ koŋwule na nɛ e beeŋ lara men be nfɛra ashi kagbene koŋwule be Kristo be kasha cheembi to. ⁴Ŋkpal manɛ so, esa baŋ ba men kutɔ m ba malga Yesu pɔtɛ ko nɛ e maŋ la Yesu mo nɛ an malga mbe asheŋ na malɛ be asheŋ ŋko nɛ men baŋ nya kiyoyu pɔtɛ ko nɛ e maŋ la emo nɛ men daŋ nya na nna ŋko baru lela pɔtɛ ko nna nɛ k maŋ la kumo nɛ men daŋ sɔ na, menyee sɔ kumo nna manaŋ manaŋ. ⁵Ma alɛ bee tama fanɛ men be beshuŋipo mo nɛ baa tre beshuŋipogboŋana ere maŋ chɔ ma gbrɛ kama gba. ⁶Hale nɛ m maŋ la esa nɛ e nyi kamalga to gba, kanyiasheŋ bre, ŋ kɔ kumo, anyi alɛ bɔla ekpa kama so n lara le be kanyiasheŋ ere ŋ ŋini menyi ashi kusɔ kama to.

⁷Ŋ ka daŋ bɔ Ebɔrɛ be baru lela n sa menyi na, n daa maŋ sɔ menyi shɛŋ. Ŋ ka daŋ bar ma kumu kaseto loŋ nɛ menyi ere e dii na, kulubi ko nɛ n daŋ wora a? ⁸Asɔriana ko nɛ n daŋ suge a wɔtɔ a shuŋ menyi, ŋkpal manɛ so, n daa nya kechɛto nna ashi bumo kutɔ. ⁹Saŋɛ nɛ n daa wɔ menyi kutɔ na nɛ k ba fanɛ n daa sha kusɔ ko, m maŋ dese menyi so, ŋkpal manɛ so, bekurgepo mo nɛ b daŋ shi Masɛdonia na e daa sa ma kumo. N daa maa sha fanɛ n dese menyi so ekpa kama so, ma alɛ maaŋ dese menyi so kikɛ. ¹⁰Kananɛ Kristo be kashenteŋ baa wɔ ma to ere bre, esa kama maŋ wɔ Akaya be kasawule so kikɛ nɛ e lo ma kɔnɔ fanɛ n sa maŋ ji njɔŋ mo nɛ mee ji ere. ¹¹Manɛ e ba nɛ ŋ kaŋɛ loŋ ere? Ŋ ka maa sha menyi so a? Ayai, Ebɔrɛ gba nyi ŋ ka bee sha menyi!

¹²Ma alɛ beeŋ baa kraa wɔtɔ a wora asɔ nɛ mee wora ere, saŋɛ na so, meeŋ kuŋ bumo nɛ baa fin ekpa nɛ b puchi ŋ kaŋɛ fanɛ anyi nɛ bumo bee shuŋ nna a sasa na ekpa. ¹³Ŋkpal manɛ so, loŋ be basa na la beshuŋipo fɛpoana nna nseŋ naa la beshumpo nɛ baa fule basa nɛ b wɔtɔ a ta bumo be amu fanɛ Kristo be beshuŋipoana na. ¹⁴Kumo alɛ maŋ la mamachi be kesheŋ ko nna, ŋkpal manɛ so, Setani gba bee kaa wora mbe kumu fanɛ kefultoso be malaika. ¹⁵Amoso, nɛ mbe anya gba bee wora bumo be amu fanɛ Ebɔrɛ be anishito be alelasheŋ be anya, k maŋ la ashenfɔ. Bumo be lalaloge be tɔnɔ beeŋ ba shi bumo be aworbi to nna.

Pɔɔl ka bee puchi mbe etɔrɔ be asheŋ

¹⁶Men shin nɛ n naŋ lɔŋɛ ŋ kaŋɛ menyi fanɛ ekama e sa maŋ kaŋ tre ma ewulpo kikɛ. Nɛ ekama nɛ e tre ma loŋ gba, amodoŋwura e baa kɔ ma to loŋ, saŋɛ na so meeŋ nya ekpa gbrɛ m puchi. ¹⁷Men baa nyi fanɛ kusɔ nɛ mee kaŋɛ naniere maŋ la kusɔ nɛ Enyɛnpe na bee kaŋɛ fanɛ ŋ kaŋɛ, ŋkpal manɛ so, mee puchi nna a malga fanɛ ewulpo. ¹⁸Ŋkpal manɛ so, kananɛ basa damta baa kɔ durnya be asɔ a puchi na, loŋ koŋwule na nɛ ma alɛ gba beeŋ puchi. ¹⁹Menyi ere ka la benyiashempoana na so, menyee tiŋ a nyiti bewulpo. ²⁰Kashenteŋto, menyee tiŋ a nyiti ekama nɛ e bee ta menyi fanɛ anya ŋko ekama nɛ e bee ji menyi so ŋko emo nɛ e bee dese kasawule a nya menyi ŋko emo nɛ e bee keni menyi a bɔl ŋko emo nɛ e bee kpa menyi etaŋ. ²¹Kashenteŋto, n shuli kejija fanɛ anyi ere ka daa maŋ tiŋ n nya kagbene n wora loŋ. Ama kusɔ kama nɛ esa kama beeŋ tiŋ n nya kagbene m puchi kumo so, mee malga fanɛ ewulpo nna na, ma alɛ gba beeŋ tiŋ n nya kagbene m puchi loŋ! ²²Mannɛ Hibruwebi e la bumo a? To, eko e la ma alɛ gba. Mannɛ Israɛlebi e la bumo a? To, eko e la ma alɛ gba. Mannɛ Eebraham mo nanabiana e la bumo a? To, eko e la ma alɛ gba. ²³Mannɛ Kristo be anya e la bumo a? Keni ŋ kaa bee malga fanɛ ebompo loŋ, ama ma loŋ be kenyaya chɔ bumo peya. N shuŋ ga a chɔ bumo be ekama nɛ b ti ma ebu a chɔ bumo be ekama, b kuya ma so a chɔ bumo be ekama, saŋɛ damta ma alɛ bee taga luwu to a chɔ bumo be ekama. ²⁴Ela anu nɛ Juwebi sa ma ale adesa nɛ akpanu be kekuyaso na. ²⁵Ela asa nɛ b ta bulala ŋ kuya ma so ŋ kpa ma ajembu kela koŋwule, ale asa nɛ n daa shin nɛ n ji nchu ekuloŋ to, kela koŋwule nɛ n ji kachɛ lelemu nɛ kanyɛ lelemu teku so. ²⁶Saŋkikɛ enite to nɛ m baa wɔ a luri kachuji be kenishipere to a luri beyu to a luri kenishipere to ashi m braana Juwebi nɛ nnyamase to a luri kenishipere to ashi ndegboŋana to, a luri kenishipere to kiyi to a luri kenishipere to etekuana so nsaa luri kenishipere to bekurgepo fɛpoana to. ²⁷Saŋkikɛ ma nɛ kegben nɛ kebaawɔtɔ kpakpaso e wɔtɔ. Saŋɛ damta ma nɛ kadigal nna, akoŋ mɔ ma nɛ achukoŋ pɛ ma. Saŋɛ damta m maŋ kɔ ajibi nɛ n ji saŋko nɛ n dese awo to saŋko m maaŋ ba kɔ asɔbuuso. ²⁸Nɛ m maŋ naŋ ti asɔ ko gba n ti so, kachɛ kama be kafɔŋ nɛ ŋ kɔ a sa asɔriana kikɛ na shi ma so ga. ²⁹Wanɛ e la epɔsopo nɛ m maaŋ tu amodoŋwura n luri mbe kapɔshi na to ŋko wanɛ e naaŋ tɔr alubi to nɛ ma kagbene maaŋ jija na?

³⁰Nɛ k ba fanɛ m puchi, asɔ nɛ a bee ŋini ma kapɔshi so nɛ mee puchi. ³¹Enyɛnpe Yesu na be Ebɔrɛ nɛ mo Tuto nɛ e daga epaŋ be kedi saŋkikɛ na nyi fanɛ m maa fule nna. ³²Ŋ ka daa wɔ Damaskɔs na, gomena mo nɛ e daa wɔ Ewura Aritas be kaseto na daŋ shin nɛ bekumpo ya kuŋ kade na be mbunaakpa nna fanɛ b pɛ ma. ³³Ama basa ko daŋ ta efɔlana nna n chɛ kelantaŋɛ nseŋ ta ma n wɔtɔ kelantaŋɛ na to n ta ma m bɔla tokuro to ŋ gbelge to nɛ m bɔl n shile mbe enɔ to n choŋ.

Pɔɔl be ebɔrɛdare nɛ mbe kewuŋkaŋɛ be asheŋ

¹A daga fanɛ m baa puchi hale nɛ k maŋ kɔ tɔnɔ gba. Ama naniere bre meeŋ malga ebɔrɛdareana nɛ kewuŋkaŋɛana nɛ Enyɛnpe sa na be asheŋ. ²N nyi Kristo be kanyɛn ko ka daa wɔ Kristo to nɛ b maŋ mo so n yɔ ebɔrɛso be kakpa sasopo na. Kumo be nfɛ kuduana kabre. Ma alɛ maŋ nyi ŋko e daa wɔ eyur ere to nna nɛ loŋ wora ŋko e daŋ lar eyur ere to nna pɔɛŋ nɛ loŋ wora, Ebɔrɛ nawule e nyi. ³M baa nyi b ka pɛ amo be kanyɛn n yɔ Paradisi nna, ama kumo nɛ n teŋ kaŋɛ na fanɛ m maŋ nyi ŋko e daa wɔ eyur to nna nɛ loŋ wora ŋko e daŋ lar eyur ere to nna pɔɛŋ nɛ loŋ wora, Ebɔrɛ nawule e nyi. ⁴Ndoŋ nɛ e ya nu asheŋ nɛ a maŋ daga dimɛdi ka malga, asheŋ nɛ dimɛdi maaŋ tiŋ n ji amo be asheŋ. ⁵Meeŋ puchi ŋkpal le be esa so, ama m maaŋ puchi ŋkpal ma ere gbagba so she ma kapɔshi nawule be asheŋ so. ⁶Hale nɛ n daa sha kepuchi gba n daa maaŋ baa la ewulpo, ŋkpal manɛ so, kashenteŋ nɛ n daa beeŋ baa ji. Ŋkeshin nɛ ma alɛ maaŋ wora loŋ, ŋkpal manɛ so, m maa sha fanɛ esa kama e baa fɛ nfɛragboŋ ko a sa ma a chɔ kananɛ e beeŋ bɔla ma aworbi nɛ ma mmalga to so n fɛ ma asheŋ. ⁷Ŋkpal kananɛ k beeŋ wora nɛ n sa maŋ kpal kewuŋkaŋɛ damta gboŋana mo nɛ n nya na so ŋ kpaŋ ma kumu so so, Ebɔrɛ sa ma ebesa ko nna, k la Setani be kabɔ nna nɛ e bee tɔrɔ ma. Saŋɛ na so, m maaŋ baa nya ekpa a maŋ ma kumu so m baŋ so. ⁸Ela asa nɛ ŋ kule Enyɛnpe fanɛ e lara loŋ be ebesa na ashi ma to. ⁹Ama e maŋ lara kumo nseŋ kaŋɛ ma le: “Ma kuwɔr be kakɛ kukwe fo, ŋkpal manɛ so, fo kapɔshi to nɛ ma eleŋ bee dii efuli nɛnɛ.” Amoso, meeŋ baa kɔ ma kapɔshi ere a ji njɔŋ kagbenefuliso a ti so, saŋɛ na so, Kristo be eleŋ beeŋ baa wɔ ma so. ¹⁰Amoso, ŋkpal Kristo so ma kagbene bee fuli ma kapɔshi to nna nɛ kategeana to nɛ kebaawɔtɔ kpakpasoana to nɛ etɔrɔana to nɛ ŋgbenejijaana to. Ŋkpal manɛ so, kapɔshi baa wɔ ma to, kumo ere ŋ kɔ eleŋ nna na.

Kananɛ Kɔrintebi na be asheŋ wɔ Pɔɔl be kagbene to be asheŋ

¹¹Mee wora asheŋ fanɛ ewulpo nna, ama menyi e shin nɛ ŋ ki loŋ. Menyi e daŋ daga fanɛ men baa chɔrɔ ma. Ŋkpal manɛ so, nɛ m maŋ la shɛŋ gba, beshuŋipo nɛ menyee tre beshuŋipogboŋ ere maŋ bɔ ma. ¹²Asɔ nɛ a bee ŋini fanɛ esa la eshuŋipo nɛ n daŋ ta kanyiti kikɛ n wora menyi to na. Asɔ na e la etɔɔnɛshuŋ nɛ emamachisheŋ nɛ asheŋ purgiase. ¹³To, nɛ manɛ be kechɛto nɛ asɔriebi pɔtɛana nɛ b ka na daŋ nya nɛ menyi ere maŋ nya? Kusɔ nɛ k baa wɔtɔ e la fanɛ ma ere gbagba daa maŋ dese menyi so. Kumo alɛ be kulubi nɛ mee kule menyi fanɛ men ta m paŋ ma.

¹⁴Ma keba mo nɛ n wora shiriya nɛ m ba bɔɔ menyi so ere e naa ti ma kela sasopo so, ma alɛ maa ba nna nɛ m ba kaa dese menyi so. Ŋkpal manɛ so, mannɛ menyi be asɔ nɛ mee sha, menyi gbagba nɛ mee sha, ŋkpal manɛ so, mannɛ mbia e naa ji a ka a yili bumo nawuraana, ama bumo nawuraana bre e naa ji a ka a yili bumo. ¹⁵Amoso, meeŋ baa sha kemɔ ma kumu n wora kusɔ kama n sa menyi nseŋ tiŋ n shin nɛ b mɔ ma n sa menyi. Nɛ kananɛ m baa sha menyi ga le ere, a daga fanɛ men be kasha nɛ men kɔ a sa ma e baa duga so a? ¹⁶Shere menyeeŋ shuli fanɛ n daa maŋ dese menyi so, ama eko beeŋ tiŋ ŋ kaŋɛ fanɛ n daŋ bɔla kanyiasheŋ be ekpa ko so nna n ta efɛ m pɛ menyi. ¹⁷N daŋ bɔla basa nɛ n shuŋi menyi kutɔ na be ekama so n ji menyi so a? ¹⁸Taites nɛ n daŋ kule fanɛ e yɔ menyi kutɔ nseŋ shuŋi ekurgepo mo na fanɛ e shuŋi mo n yɔ. To, menyee fɛ fanɛ Taites e daŋ ji menyi so nna ŋko nuso? Ma nɛ Taites kikɛ maŋ kɔ nfɛra koŋwule nɛ kebaawɔtɔ koŋwule nna a?

¹⁹Shere men baa wɔtɔ nna a fɛ fanɛ anyee malga nna a sa menyi a kuŋ anyi be amu. Ayai, mannɛ aloŋ nna. Kananɛ Kristo bee sha fanɛ an malga nɛ anyee malga ashi Ebɔrɛ be anishito. Kusɔ kama malɛ nɛ anyee wora, men be keyɔ anishito so nɛ anyee wora kumo. ²⁰K bee wora ma nna fanɛ ŋ kaŋ ba men kutɔ meeŋ ba wu fanɛ mannɛ kananɛ mee sha fanɛ men baa du na nɛ men du, nɛ menyi alɛ gba e wu fanɛ mannɛ kananɛ menyee sha fanɛ m baa du na nɛ n du n sa menyi. Mee lɔ kufu nna fanɛ shere meeŋ ba wu nlu nɛ kayurbesaana nɛ agboana ka bee kaa nɛ kejimuniana nɛ kategeana nɛ ŋkuli nɛ kamoowu nɛ kebarga to menyi to. ²¹Mee lɔ kufu nna fanɛ ŋ kaŋ ba, ma Ebɔrɛ beeŋ shin nɛ m bar ma kumu kaseto men be anishito nɛ ma kagbene e jija ma ŋkpal basa damta nɛ b wora alubi dra dra na kikɛ nsaa maŋ lar bumo be loŋ be kesakalea be asheŋ na to nɛ kusɔ jigaya be kulubi na to nɛ bumo be eyurpishuŋ nɛ b daŋ wora na kikɛ to so.

Lalaloge be kefiɛso nɛ kechɔrɔ be asheŋ

¹Ŋ ka bee ba nɛ m ba bɔɔ menyi so ere e ti so kela sasopo. Abɔrɛsibɛ na malɛ e naa kaŋɛ loŋ fanɛ a daga fanɛ kesheŋ kama, basa anyɔ ŋko besa e ji kumo be shɛda pɔɛŋ nɛ k nya edesekpa. ²Naniere mee sha kenaŋ n fiɛ menyi nɛ men daŋ kewora alubi na so nna nɛ bekama malɛ nɛ b ka na so. Ma kebɔɔ menyi so nyɔsopo to nɛ n daŋ wora loŋ men be anishito, ama naniere m maŋ wɔ menyi to, ma alɛ nseŋ kraa sa menyi kumo. Kumo e la fanɛ, nɛ ŋ kaŋ ba kede to, m maaŋ yige ekama. ³Ŋkpal manɛ so, men yɛ menyee sha kepin fanɛ Kristo e naa malga ma to. E maŋ la epɔsopo a shuŋ menyi to, e la elempo nna. ⁴Kashenteŋto, kapɔshi to nɛ b daŋ gbir mo kedibi largato so, ama Ebɔrɛ be eleŋ nɛ e kɔ a wɔ ŋkpa to naniere. Loŋ nɛ anyi alɛ gba la bepɔshipo mo to, ama ŋkpal Ebɔrɛ be eleŋ so, an tu Kristo na nna a wɔ ŋkpa to nɛ an shuŋ menyi.

⁵Men keni men be ŋgbene to ŋ keni ŋko men maŋ wɔ yirda na to a? Men wora men be amu ŋ keni. Men maŋ nyi Yesu Kristo ka wɔ menyi to a? Nɛ mannɛ aloŋ, men tɔr nna na. ⁶Mee tama fanɛ menyeeŋ pin fanɛ anyi ere maŋ tɔr. ⁷Anyee kule Ebɔrɛ nna fanɛ men sa maŋ kaŋ wora n da so kikɛ. Mannɛ ŋkpal basa ka beeŋ wu fanɛ anyee ji kɔŋkɔŋ so, ama fanɛ menyi e wora kusɔ nɛ k bɔla ekpa, hale nɛ k ba kaa du fanɛ an tɔr gba. ⁸Ŋkpal manɛ so, anyi maaŋ tiŋ n wora shɛŋ nɛ kumo nɛ kashenteŋ na maŋ la kukoŋwule. Kusɔ kama nɛ anyee wora, kashenteŋ na nɛ anyee wora a sa. ⁹Nɛ anyi maŋ kɔ eleŋ nɛ menyi ere kɔ eleŋ, anyi be ŋgbene bee fuli anyi nna. Anyi alɛ bee kule Ebɔrɛ fanɛ e shin nɛ men ba ki basa cheembi.

¹⁰Amoso nɛ m maŋ wɔ menyi kutɔ nsaa sibɛ menyi na, saŋɛ na so, ŋ kaŋ ba, m maaŋ ta ma eleŋ nɛ Enyɛnpe ta n sa ma fanɛ n ta a chɛ menyi to nɛ men baa yɔ anishito na, mannɛ fanɛ n ta kumo n jija menyi a ŋmenyaŋ menyi na.

¹¹To, bekurgepoana, Ebɔrɛ e chɛ menyi to. Men baa kɔ a fin kebaawɔtɔ niŋiso. Men baa du fanɛ kananɛ ŋ kule menyi na nsaa kɔ kɔnɔkoŋwule a wɔtɔ nseŋ naa wɔ kagbenewushi to, nɛ kasha nɛ kagbenewushi be Ebɔrɛ na e baa wɔ menyi to.

¹²Men ta kegbumpipe cheembi be kechɔrɔ a chɔrɔ abar. ¹³Ebɔrɛ be basa larasoana na kikɛ bee chɔrɔ menyi. ¹⁴Enyɛnpe Yesu Kristo be kuwɔr be kakɛ na nɛ Ebɔrɛ be kasha na nɛ Kiyoyu Cheeŋ na be kɔnɔkoŋwule be kebaawɔtɔ na e baa wɔ menyi kikɛ so.