KAWƆL NƐ PƆƆL JUŊKPAR N SIBƐ N SA
TIMOTI
NA
11Kawɔl ere shi ma Pɔɔl nɛ n la Kristo Yesu be eshuŋipo ŋkpal Ebɔrɛ an be Emɔlgapo be keparso nɛ Kristo Yesu nɛ an be tama wɔ mo so na kutɔ nna 2a yɔ fo Timoti nɛ fo la m pibi kashenteŋto ashi yirda na to na kutɔ. Ebɔrɛ Etuto na nɛ Kristo Yesu an Nyɛnpe e baa sa fo kuwɔr be kakɛ nɛ kuwɔr nɛ kagbenewushi.
Befɛpo ŋinipo be asheŋ
3Ŋ ka daa yɔ Masɛdonia, ŋ kaŋɛ fo fanɛ fo shir a wɔ Ɛfeses. Mee sha fanɛ fo baa kraa wɔ ndoŋ ŋkpal basa nɛ b wɔ ndoŋ a ŋini keŋini pɔtɛ nɛ a daga fo ka ju bumo loŋ to na so. 4Shin nɛ b lar ablɔmbi fuloŋ nɛ kakurge to be mmalga tenteŋana na to. Loŋ be mmalga bee bar emɔrɔ nna a maa ŋini kabɔrɛbɛso nɛ k bee shi yirda to na. 5Anyi ere be keŋini ere be kumu e la kasha nɛ k shi kagbene cheembi nɛ nfɛra lela nɛ yirda kpakpaso to na nna. 6Basa ko bre lar le be asheŋ ere to n foe a wɔ emɔrɔ fuloŋana to. 7Baa sha kebaala mbra na be beŋinipo nna, ama b maa pin bumo gbagba be mmalga na nɛ asɔ nɛ b kɔ a malga kenyiso na to.
8An nyi fanɛ mbra na la kusɔ lela nna nɛ esa baa bɛ kumo so nɛ kumo be ekpa so nna na. 9Anyi alɛ naa nyi fanɛ Ebɔrɛ maŋ bar mbra na nna ŋkpal basa lela so. E bar kumo nna ŋkpal basa nɛ baa wora a da ntaŋ na so ŋko bumo nɛ b maa nu a sa Ebɔrɛ ŋko a bunyaŋ mo na so so. Alubiworapoana nɛ bumo nɛ b maŋ du cheembi nɛ bɔrɛkinipoana nɛ bumo nɛ baa mɔ bumo tutoana nɛ bumo nioana nɛ basa pɔtɛ na so e shin nɛ Ebɔrɛ bar mbra na. 10Mo alɛ naŋ bar mbra na nna ŋkpal kesakaleawuraana nɛ benyɛn nɛ bumo gbagba kɔ abar a di na nɛ bumo nɛ baa yuri basa a fin kasɔji na nɛ befɛpo nɛ basa nɛ b maa yɛ asheŋ a wora na nɛ bumo nɛ baa wora asheŋ nɛ a maa bɛ kashenteŋ be keŋini na so kuraa na kikɛ so. 11Le nɛ nɛfa be Ebɔrɛ na be baru lela nɛ kemaŋkura wɔ kumo to nɛ b ta m bɔɔ ma enɔ na bee ŋini.
Pɔɔl ka bee chɔrɔ Ebɔrɛ be asheŋ
12Mee chɔrɔ Yesu Kristo an Nyɛnpe ŋkpal e ka sa ma le be kushuŋ ere be eleŋ nseŋ yirda ma n lara ma fanɛ n shuŋ mbe kushuŋ nsaa maŋ ta dra na be mmalga lubi nɛ n daŋ malga ŋ gbiti mo na nɛ kananɛ n tɔrɔ mbe basa nseŋ fɛl mo na n wɔtɔ mbe kagbene to so. 13Ama e wu ma kuwɔr, ŋkpal manɛ so, ŋ ka daa maŋ yirda na so e shin nɛ n wora kawulisheŋ na. 14An Nyɛnpe bugi kagbene n wu ma kuwɔr ga nseŋ sa ma yirda nɛ kasha ashi Kristo Yesu to. 15Le be kamalga ere la kashenteŋ nna, kumo alɛ maŋ kɔ emɔrɔ kikɛ fanɛ: Kristo Yesu ba durnya to nna nɛ e ba mɔlga basa ashi bumo be alubi to, ma alɛ be alubi e shi a chɔ ekama peya. 16Ama Ebɔrɛ wu ma, alubiworapoana be ejuŋkparpo na kuwɔr nɛ e ŋini durnyaebi kananɛ Kristo Yesu be kanyiti ka shi nɛ b yirda mo nseŋ nya ŋkpa nɛ k maŋ kɔ ekar na.
17Bunyaŋ nɛ epaŋ be kedi e baa wɔ Ewurgboŋ nɛ e wɔ ŋkpa to saŋkikɛ na nɛ mo koŋwule nɛ e la kashenteŋ be Ebɔrɛ nɛ esa kikɛ maaŋ tiŋ n ta kenishi fuful n wu mo kikɛ na so mbaanaayɔ. Amɛn.
18M pibi Timoti, mee ta asheŋ nɛ ŋ ŋini fo ere nna a bɔla mmalga nɛ anebiana na daŋ wu ŋ kaŋɛ fo asheŋ na so a bɔɔ fo enɔ. Baa ta amo a wɔtɔ fo kagbene to nsaa kɔ yirda nɛ nfɛra lela a ki fo akɔsɔ a kɔ yirda be kena lela na. 19Basa ko bre kplaŋ le be akɔsɔ ere so nseŋ foe yirda be ekpa na so cheche. 20Loŋ be basa na be beko e la Haimɛneeyes nɛ Alɛkzaanda nɛ n ta m bɔɔ Setani enɔ nɛ b pin fanɛ k daga b ka lar kebaamalga a gbiti Ebɔrɛ to.
2Asɔri to be kabɔrɛshuŋ be asheŋ
1To, kusɔ nɛ mee sha kejuŋkpar ŋ kaŋɛ e la fanɛ a daga fanɛ bebɛsopo e baa kule Ebɔrɛ a sa basa kikɛ. B baa kaŋɛ Ebɔrɛ basa be asheŋ tirso be asheŋ nsaa kule mo asɔ a sa bumo nseŋ naa chɔrɔ mo a sa bumo a ti so. 2B baa wora asheŋ ere a sa basa kikɛ, fɔnfɔŋ bewura nɛ basa nɛ b wɔ kenimu be yiri kikɛ to na. Loŋ e naaŋ shin nɛ an baa wɔ abɔrɛsheŋ be kebaawɔtɔ to boeŋ nɛ bunyaŋ nsaa kɔ kagbenewushi. 3Le be asɔ la asɔ lela nna 4nsaa par Ebɔrɛ nɛ e mɔlga anyi nsaa sha fanɛ basa kikɛ e nya kumɔlga nseŋ pin kashenteŋ be keŋini na. 5Ŋkpal manɛ so, Ebɔrɛ koŋwule nɛ enyiŋgbasa nɛ Ebɔrɛ be nferinto be ematapo koŋwule nɛ baa tre Kristo Yesu Nyiŋgbasa na nawule e wɔtɔ. 6Mo e ta mbe kumu n sɔ basa kikɛ n yige. Kumo e naa ŋini kumo be jemanɛ na gbagba chap fanɛ Ebɔrɛ bee sha basa kikɛ ka nya kumɔlga. 7Amoso nɛ Ebɔrɛ lara ma fanɛ m baa la eshuŋipo nɛ nnyamase be eŋinipo a bɔ yirda nɛ kashenteŋ be kubɔya na. M maa fule nna, kashenteŋ nɛ mee ji.
8Mee sha nna fanɛ kaplɛkama benyɛn nɛ b maa ta bumo be enɔana a shuŋ alubi e baa maŋ amo so kabɔrɛkule to nsaa maa keta kanya agbo ŋko a kini keyirda fanɛ Ebɔrɛ bee nu kabɔrɛkule.
9Mee sha nna fanɛ beche malɛ e baa nyi asheŋ nsaa buu asɔ nɛ a bee kukwe a yulge bumo so nɛnɛ. B sa maa kre bumo be amu kenyishaso ŋko a buu yawu kpakpaso be asɔbuuso ŋko a wɔtɔ shuwa nɛ yawu kpakpaso be abitasɔ nsaa wu bumo be amu kamoowuso. 10Asɔ nɛ a daga b ka wora nɛ basa e wu e la alelasheŋ nɛ a daga beche nɛ b yɛ baa bunyaŋ Ebɔrɛ. 11A daga fanɛ beche e baa yɔɔ bumo be amu a lo to boeŋ a nu keŋini. 12Ma alɛ maŋ sa ekpa fanɛ eche kama e baa ŋini benyɛn abɔrɛsheŋ ŋko e baa kɔ eleŋ benyɛn so. Ama a daga fanɛ e baa lo mbe kɔnɔ boeŋ. 13Ŋkpal manɛ so, Adam nɛ Ebɔrɛ daŋ pɔr pɔɛŋ nseŋ pɔr Hawa. 14Mannɛ Adam malɛ nɛ Setani daŋ juŋkpar n fule, eche na nɛ Setani daŋ fule nɛ e tɔr alubi to. 15Ama nɛ eche baa wɔtɔ a kurge nsaa yirda Ebɔrɛ nseŋ naa sha basa a kɔ kanyiasheŋ a wɔ kebaawɔtɔ cheembi to nsaa du boeŋ a wɔtɔ, e beeŋ nya kumɔlga.
3Basa nɛ b daga kenimu asɔri to be asheŋ
1Le be kamalga ere maŋ kɔ emɔrɔ fanɛ esa kama nɛ e yili kumo mbe kagbene to fanɛ e beeŋ ki asɔri to be ejuŋkparpo lara ashuŋ kikɛ to be kelela. 2Amoso, a daga fanɛ asɔri to be ejuŋkparpo e baa la esa nɛ e maŋ kɔ amoso. A daga fanɛ e baa la eche koŋwule wura a nyi asheŋ a maa nya agbo jigajiga, ama e baa fɛ nfɛra dede a la esa nɛ basa bee sa bunyaŋ. A daga fanɛ e baa la esa a sha basa nsaa tiŋ a ŋini basa abɔrɛsheŋ na nɛnɛ. 3E sa maa nuu nsa ga ŋko a la esa brembreŋ, ama a daga fanɛ e baa du boeŋ nsaa maa la elushapo ŋko a ta mbe kagbene a wɔtɔ amansherbi to. 4Ama a daga fanɛ e baa tiŋ a keni mbe eche nɛ mbia so nsaa tiŋ a shin nɛ mbe mbia e baa nu a sa mo bunyanso. 5Ŋkpal manɛ so, esa nɛ e maŋ nyi kananɛ e beeŋ keni mo gbagba be kowu to ebi so, nuso nɛ e beeŋ wora ŋ keni Ebɔrɛ be asɔri to ebi so? 6Esa nɛ e la asɔri to be ejuŋkparpo na daga e ka chɛr kebɛso na to nna, nɛ mannɛ aloŋ, e beeŋ luri kamoowu to nɛ Ebɔrɛ e ji mo kumo be demu fanɛ kananɛ Setani daŋ wora nɛ Ebɔrɛ gberge mo kusoe na. 7A daga fanɛ loŋ be enimu e baa kɔ ketre basa pɔtɛ nɛ b maŋ wɔ asɔri to na to, nɛ mannɛ aloŋ, e beeŋ nya ketre lubi nseŋ tɔr Setani be kejigbelɛ to n wora alubi.
Asɔri to be bechɛtopo be asheŋ
8A daga fanɛ asɔri to be bechɛtopo gba e baa kɔ da lela nsaa maa la besheŋjipo ŋko nsanuupoana ŋko a kɔ kejimuni. 9A daga fanɛ b baa kɔ kashenteŋ be wulo nɛ Ebɔrɛ bugi to ŋ ŋini na to kpakpa nɛ nfɛra lela. 10Pɔɛŋ nɛ b ki bechɛtopo asɔri to, a daga basa ka keni bumo be kebaawɔtɔana to nɛnɛ ŋ keni ŋko loŋ be kenimu daga bumo a. 11Bumo be beche gba e baa kɔ da lela nsaa maa ji bumo braana be asheŋ. A daga fanɛ b baa fɛ nfɛra dede a la beshenteŋjipo. 12A daga fanɛ asɔri to be bechɛtopo e baa la beche koko wuraana nsaa tiŋ a shin nɛ bumo be beche nɛ mbia e baa nu a sa bumo nɛnɛ. 13Nɛ bechɛtopo baa shuŋ bumo be ashuŋ nɛnɛ, basa bee sa bumo bunyaŋ nna nɛ b baa tiŋ a kaŋɛ basa kenyɛnso fanɛ b yirda Kristo Yesu kashenteŋ.
Wulogboŋ na be asheŋ
14K maaŋ naŋ chɛr ko nɛ m ba wu fo, ama mee sibɛ asɔ ere nna a sa fo, 15saŋɛ na so ŋ kaŋ maŋ naŋ tiŋ m ba manaŋ, kawɔl ere beeŋ ŋini fo kebaawɔtɔ nɛ k daga fanɛ anyi nɛ an la Ebɔrɛ be kanaŋ to ebi nɛ baa tre ŋkpa to be Ebɔrɛ be asɔri na ka wora. Asɔri na e kɔ kashenteŋ be keŋini na to nsaa keni kumo so. 16Kashenteŋto,
esa kikɛ maaŋ tiŋ ŋ kaŋɛ
anyi be keŋini ere nɛ Ebɔrɛ lara ŋ ŋini ere
maŋ la keŋinigboŋ,
ŋkpal manɛ so,
k bee ŋini esa nɛ e ta nyiŋgbasa be eyur nna
n shi ebɔrɛso m ba durnya to be asheŋ.
Mo nɛ Kiyoyu Cheeŋ na daŋ kaŋɛ anyi fanɛ e maŋ kɔ kulubi na,
emalaika daŋ wu mo
nɛ basa bɔ mbe kubɔya nnyamase to
nɛ durnya to be basa yirda mo.
Mo koŋwule na nɛ Ebɔrɛ daŋ shin
nɛ e luri to n yɔ kemaŋkura be ŋkpa na to.
4Befɛpo be keŋini be asheŋ
1Kiyoyu Cheeŋ na baŋ kaŋɛ geeŋ fanɛ lalaloge be nchɛ ere to basa ko beeŋ lar kashenteŋ be keŋini ere to nsaa nu a sa efɛ be mbuibi lubi a wɔtɔ a koya amo be keŋini. 2Le be keŋini ere shi kebirkɔnshi be befɛpo nɛ nfɛra lubi deŋ bumo na kutɔ nna. 3Asɔ nɛ basa na bee ŋini na e la fanɛ a maŋ daga beche nɛ benyɛn e baa kil abar, kumo alɛ maŋ naŋ daga basa ka ji ajibi ko. Le be ajibi ere malɛ, Ebɔrɛ to amo nna n sa basa, nɛ basa nɛ b yirda Yesu Kristo a nyi kashenteŋ na e chɔrɔ Ebɔrɛ n sɔ amo nɛ enɔ anyɔ. 4Ŋkpal manɛ so, kusɔ kama nɛ Ebɔrɛ to walɛ nna, amoso, a maŋ daga basa ka kini kumo. A daga fanɛ basa ka sɔ kumo kabɔrɛkule so nɛ enɔ anyɔ. 5Ŋkpal manɛ so, Ebɔrɛ be kamalga na nɛ kabɔrɛkule na nɛfa kumo nɛ k ki kusɔ lela Ebɔrɛ be anishito.
Yesu Kristo be kenya be asheŋ
6Nɛ fo ŋini bekurgepoana na asheŋ ere, feeŋ baa la Kristo Yesu be kenya lela a kɔ yirda be mmalga nɛ keŋini lela nɛ fo bɛ so na be eleŋ. 7Baa gelge chilchil be mmalga nɛ edaŋkare be mmalga nɛ a maa bunyaŋ Ebɔrɛ nseŋ ŋini fo kumu abɔrɛsheŋ be kebaawɔtɔ. 8Ŋkpal manɛ so, esa be kebaakeni mbe eyur so la kusɔ lela nna, ama esa baa ŋini mbe kumu abɔrɛsheŋ be kebaawɔtɔ, loŋ e bɔ, ŋkpal manɛ so, k beeŋ tiŋ n chɛ mo to durnya ere to nfe nseŋ naŋ chɛ mo to saŋɛ nɛ e beeŋ yɔ ebɔrɛso na. 9Le be kamalga ere la kashenteŋ nna, kumo alɛ maŋ kɔ emɔrɔ kikɛ kumo to. 10Anyee shuŋ ga a maŋ kɔ kachena ŋkpal an ka ta anyi be yirda n wɔtɔ Ebɔrɛ nɛ e kɔ ŋkpa nsaa la basa kikɛ be Emɔlgapo, fɔnfɔŋ bumo nɛ b yirda mo na to so.
11Ŋini basa asɔ ere nseŋ kaŋɛ bumo kenishipereso fanɛ b baa bɛ amo so. 12Sa maŋ shin nɛ esa kama e fɛl fo ŋkpal fo ka la kabrantiɛbia so, ama shin nɛ beyirdapo na e keni fo kebaawɔtɔ to ŋ koya asɔ ashi fo mmalga nɛ fo da to nɛ fo kasha nɛ fo yirda nɛ kananɛ fo maŋ kɔ kusɔ jigaya be nfɛra to. 13Pɔɛŋ nɛ m ba, baa kraŋ abɔrɛsibɛ na a sa asɔri to ebi a leŋ bumo to nsaa ŋini bumo abɔrɛsheŋ na. 14Loŋ na fo maaŋ gal kusɔ nɛ Ebɔrɛ ta m bɔɔ fo enɔ fanɛ fo wora saŋɛ nɛ basa wu fo asheŋ ŋ kaŋɛ nɛ benimu daŋ ta enɔana n deŋi fo so ŋ kule Ebɔrɛ n sa fo na n lɛ. 15Baa wora asɔ ere nseŋ ta fo kagbene kikɛ n wɔtɔ amo to nɛ basa kikɛ e wu kananɛ fo abɔrɛsheŋ be kenyi bee wora keshi a ti so. 16Baa de so a keni fo kumu nɛ fo abɔrɛsheŋ be keŋini na so nɛnɛ. Baa wora asɔ ere, ŋkpal manɛ so, loŋ e naaŋ mɔlga fo nɛ bumo nɛ baa nu fo mmalga na.
5Kebaakeni bebɛsopo kikɛ so be asheŋ
1Sa maŋ kaa ponte enyɛnnimu so, ama baa malga mo kutɔ a leŋ mo to fanɛ kananɛ feeŋ wora fo tuto kurgeso. Baa leŋ mbrantiɛbia to fanɛ kananɛ feeŋ wora fo sipoana gbagba. 2Baa leŋ bechenimu to fanɛ kananɛ feeŋ wora fo nio kurgeso. Baa leŋ besuŋgurbi to fanɛ kananɛ feeŋ wora fo sipocheana gbagba nsaa maa kɔ kusɔ jigaya be nfɛra.
3Baa bunyaŋ bekulpoche nɛ b maŋ kɔ bechɛtopo na. 4Ama ekulpoche kama nɛ e kɔ mbia ŋko benanabi, a daga fanɛ mbe mbia na nɛ mo nanabiana na ka pin fanɛ bumo e daga b ka nu n sa Ebɔrɛ ŋ keni bumo gbagba be kanaŋ to be esa so. Loŋ na kelela nɛ baa wora a tal bumo nioana nɛ bumo tutoana nɛ bumo nanaana na to na, kumo alɛ be loŋ e naa par Ebɔrɛ. 5Ekulpoche gbagba nɛ e maŋ kɔ esa kikɛ nɛ e bee keni mo so be tama wɔ Ebɔrɛ so nna fanɛ e baa chɛ mo to. Mo alɛ baa wɔtɔ nna a kule Ebɔrɛ kapa nɛ kanyɛ fanɛ Ebɔrɛ e chɛ mo to. 6Ama ekulpoche nɛ e ta mbe nfɛra n wɔtɔ ebel be keji to wu nna nsaa wɔ basa to na. 7Ta le be mmalga ere n fiɛ asɔri to ebi na so nɛ b bɛ amo so nɛ esa kikɛ e sa maŋ wu kulubi bumo so. 8Ama eche kama nɛ e maa keni mo kurgepoana so, fɔnfɔŋ basa nɛ b mata mo na, yige kebaakɔ anyi be yirda na to nna na. Esa nɛ e maŋ yirda Yesu Kristo na malɛ gba bɔ loŋ be esa.
9Ekulpoche nɛ e chɔ nfɛ adeshe, mo alɛ nseŋ naa la eche nɛ e kil kela koŋwule ŋ ku so, nɛ esa nɛ ekama nyi e ka la alelashenworapo 10nɛ emo nɛ e tiŋ ŋ keni mbe mbia so nɛnɛ nɛ b daŋ, nɛ emo nɛ e la esa, nɛ emo nɛ e bar mbe kumu kaseto n sa Ebɔrɛ be bebɛsopo ŋko n chɛ awurfoŋ ŋko tɔrɔ be mbia to nseŋ wora kelela be yiri kikɛ, ber mo n wɔtɔ bekulpoche nɛ b daga kechɛto na to.
11Sa maŋ kaŋ ber bekulpoche nɛ b maŋ la beche kpar n wɔtɔ bumo nɛ b daga kechɛto na to, ŋkpal manɛ so, nɛ benyɛn be kayɛlga baŋ ba pɛ bumo nɛ b naa sha kekil, baa lar Yesu Kristo be kebɛso na to nna, 12saŋɛ na so n tɔr kɔnɔ nɛ b juŋkpar n nase fanɛ baaŋ bɛ Yesu Kristo na so na be ntaŋ. 13Kumo be kaman b wɔtɔ nna a jija bumo be saŋɛ a na basa pe, kumo alɛ be buushi nɛ b fara a ji asheŋ nsaa luri basa be asheŋ to a wɔtɔ a malga mmalga nɛ a maŋ nya bumo. 14Amoso, ma ere kutɔ, a daga fanɛ bekulpoche nɛ b maŋ la beche kpar ka kil ŋ kurge mbia nseŋ keni bumo be nwu so nsaa maa wora asheŋ kama nɛ a beeŋ shin nɛ edompo kama e nya ekpa n wu bumo kulubi. 15Mee malga asheŋ ere nna, ŋkpal manɛ so, bekulpoche ko nɛ b maŋ la beche kpar teŋ foe kashenteŋ be ekpa na so nsaa bɛ Setani so. 16A daga fanɛ ebɛsopo kama nɛ e kɔ bekulpoche mbe kanaŋ to ka bee keni bumo so nsaa maŋ baŋ yige bumo n sa asɔri to ebi. Nɛ le be bekulpoche bee nya kechɛto bumo kurgepoana kutɔ, asɔri na to ebi beeŋ tiŋ ŋ keni bekulpoche gbagba so.
Fo nɛ benimu be asheŋ
17Asɔri to be benimu nɛ baa juŋkpar bumo be basa nɛnɛ daga b ka bunyaŋ bumo ga, fɔnfɔŋ bumo nɛ baa bɔ kubɔya na nɛ bumo nɛ baa ŋini abɔrɛsibɛ na. 18Ŋkpal manɛ so, abɔrɛsibɛ na bee kaŋɛ: “A maŋ daga esa ka kre kena nɛ e bee shuŋ ajibi akpa be kɔnɔ,” nɛ “A daga eshumpo ka nya mbe kakɔka.” 19Esa koŋwule baŋ ba kaŋɛ fo enimu ko be kulubi be asheŋ, sa maŋ nu n sa mo epul na to she eshɛdajipoana wora benyɔ ŋko besa nna. 20Benimu nɛ b wɔ alubi to na, fiɛ bumo so asɔri to ebi na kikɛ be anishito nɛ kufu e pɛ bumo nɛ b ka na. 21Ebɔrɛ nɛ Kristo Yesu nɛ emalaika nɛ b lara n yili na be anishito nɛ n yil a kaŋɛ fanɛ fo nu n sa le be keŋiniana ere nsaa maŋ kpal fo ka nyi esa ko be kebaawɔtɔ so a ji mo ŋkpɛatoso be demu. 22Sa maa nya manaŋ a ta fo enɔ a deŋi esa kikɛ so a ta mo a bɔɔ Ebɔrɛ enɔ kabɔrɛkule to. Fo alɛ e sa maŋ kaŋ luri basa pɔtɛ be alubi to ŋko kusɔ jigaya be kebaawɔtɔ to.
23Sa maŋ naa nuu nchu nawule, baa nuu waindibi be nsa gba gbrɛgbrɛ nɛ a baa chɛ fo epun to be alɔ.
24Basa ko be alubi baŋ fuli nna geeŋ a juŋkpar bumo a yɔ kasogberge to. Beko malɛ be alubi bee ŋana nna loŋ pɔɛŋ n ya lar efuli kacha ko. 25Loŋ koŋwule na nɛ basa bee wu alelasheŋ gba ka fuli a dese geeŋ, hale amo nɛ a ŋana naniere gba beeŋ lar efuli so kacha ko.
6Anya be asheŋ
1A daga fanɛ anya kikɛ e baa sa bumo nyɛnpeana bunyaŋ kikɛ nɛ k daga nɛ basa pɔtɛ e sa maŋ nya ekpa m malga kulubi kikɛ ŋ gbiti Ebɔrɛ be ketre ŋko anyi be keŋini na. 2Anya nɛ bumo nyɛnpeana la beyirdapo e sa maŋ kpal b ka la bumo to ebi so a fɛl bumo. Bumo e daga fanɛ b bugi kagbene n shuŋ gba nɛnɛ, ŋkpal manɛ so, beyirdapo nɛ beshapo e naa ji bumo be kushuŋ be tɔnɔ. Ŋini basa asheŋ ere kikɛ nseŋ leŋ bumo to nɛ b bɛ amo so.
Befɛpo nɛ kashenteŋ be dama be asheŋ
3Esa kama nɛ e kɔ keŋini pɔtɛ a ŋini nsaa maa nu a sa Enyɛnpe Yesu Kristo be kashenteŋ be mmalga na nɛ kashenteŋ be abɔrɛsheŋ be kebaawɔtɔ nɛ k daga fanɛ an baa wɔtɔ na la esa nɛ kamoowu tan nna nɛ e maŋ nyi shɛŋ. 4Loŋ be esa bee kaa ta mbe kasha kikɛ nna a wɔtɔ emɔrɔ be keji to nsaa kpal mmalga so a bile. Asheŋ ere kikɛ malɛ e naa bar yurkishi nɛ kolu nɛ basa be kebaatege abar nɛ kebirkɔnshi be kebaawora abar basa to 5nɛ basa be kebaaji abar emɔrɔ fanɛ bumo nɛ b maŋ kɔ nfɛra a maŋ naa nyi kashenteŋ be ekpa na ŋkpal b ka bee tama fanɛ abɔrɛsheŋ to nɛ baaŋ bɔla n nya amansherbi so.
6Ama esa nɛ e wɔ abɔrɛsheŋ na be kebaawɔtɔ to nsaa shin nɛ asɔ nɛ e kɔ bee bɔlɔ mbe kenishi a kukwe mo na nawule e la damawura. 7An ka bee ba durnya ere to an maŋ bar shɛŋ, anyi alɛ naa lar kumo to, anyi maaŋ tiŋ n ta shɛŋ n lar. 8Amoso, nɛ an baa kɔ ajibi nɛ asɔbuuso, a kukwe anyi. 9Ama basa nɛ baa sha kedii dama bee luri kechɔŋkeni to nna n tɔr kawulisheŋ nɛ ayɛlgasɔ damta be kejigbelɛ to nɛ a doro bumo m mur bumo. 10Ŋkpal manɛ so, amansherbi be kasha ga to nɛ kulubi be yiri kikɛ bee shi. Ŋkpal amansherbi be kasha ga so basa ko foe yirda be ekpa na so n luri kagbenejija damta to.
Asɔ nɛ Pɔɔl ta m bɔɔ Timoti enɔ be asheŋ
11Ama fo ere ka la Ebɔrɛ be esa ere, baa gelge le be asɔ ere kikɛ nsaa kɔ a fin alelasheŋ nɛ abɔrɛsheŋ be kebaawɔtɔ nɛ yirda nɛ kasha nɛ awurfoŋ to be kanyiti nsaa du boeŋ. 12Pere kenishi a kɔ yirda to be kolu lela na. Baa kɔ ŋkpa nɛ k maŋ kɔ ekar nɛ b tre fo n wɔtɔ kumo to saŋɛ nɛ fo yili basa damta to n ji fo shɛda na to. 13Ebɔrɛ nɛ e bee sa kusɔ kikɛ ŋkpa nɛ Yesu Kristo nɛ e yili Gomena Pɔnshes Pailat be anishito n ji shɛda lela na be anishito nɛ n yil a kaŋɛ fo fanɛ fo baa nu a sa asɔ nɛ ŋ ŋini fo na kikɛ 14nsaa maŋ shin nɛ kulubi be yiri kikɛ e gbiti amo n chɛrga amo hale nɛ an Nyɛnpe Yesu Kristo e naaŋ ya lar m ba. 15Ebɔrɛ, bewura to be Ewura nɛ benyɛnpe to be Enyɛnpe nɛ durnya kikɛ be Ekenipo koŋwule nɛ e kɔ nɛfa na malɛ e naaŋ shin nɛ Yesu Kristo be kenamba na e fo jemanɛ na gbagba. 16Mo nawule kpeŋ e maa wu kikɛ nsaa wɔ kefulto parrbi nɛ esa kikɛ maaŋ tiŋ ŋ keni kumo kikɛ na to. Esa kama malɛ maŋ naŋ wu mo ŋ ku so, ekama malɛ maaŋ tiŋ n wu mo kikɛ. Bunyaŋ nɛ kuwurji nɛ k maŋ kɔ ekar e baa wɔ mo so. Amɛn.
Damawura be asheŋ
17Ŋini bumo nɛ b kɔ dama durnya ere to na fanɛ b sa maa wu bumo be amu ŋko a ta bumo be yirda a deŋi bumo be asɔ so, ŋkpal manɛ so, esa kikɛ maaŋ tiŋ m pin kananɛ mbe asɔ beeŋ chɛr a wɔ mo kutɔ. Kusɔ nɛ k daga damawuraana ka wora e la b ka yirda Ebɔrɛ, ŋkpal manɛ so, mo e naa bugi kagbene a kɛ anyi asɔ yɛlyɛla so nɛ an baa ta a wushi an be ŋgbene. 18Ŋini bumo fanɛ b baa wora kelela nsaa la basa a bugi ŋgbene a sa basa bumo be asɔ na be ako. 19Le be asheŋ ere e naaŋ shin nɛ b nya asɔ nɛ baaŋ fute n yige so kachako so. Nɛ baa wora loŋ, baaŋ nya ŋkpa gbagba na.
20Timoti, baa de kusɔ nɛ Ebɔrɛ ta m bɔɔ fo enɔ na so nɛnɛ nsaa gelge chilchil be emɔrɔ be mmalga nɛ a maa par Ebɔrɛ nɛ efɛ be keŋini nɛ baa tre kashennyi be keŋini na. 21Ŋkpal manɛ so, basa ko ka kaŋɛ fanɛ b kɔ le be kashennyi na maŋ naa wɔ yirda na to.
Ebɔrɛ e sa menyi kikɛ mbe kuwɔr be kakɛ na.