1 SAMUƐL

SAMUƐL

BE KAWƆL JUŊKPARSO NA

Ɛlkana nɛ mbe laŋ to ebi be asheŋ

¹Kanyɛn ko e daa wɔ Raama ashi Efrayim be efuli so be kakpa nɛ abee wɔ na nɛ baa tre mo Ɛlkana. Ɛlkana mo tuto e daa la Jeroham nɛ mo nananyɛn malɛ daa la Elihu nɛ Elihu malɛ mo tuto daa la Tohu nɛ Tohu malɛ mo tuto daa la Zuuf. ²Beche anyɔ nɛ Ɛlkana daa kɔ. Eko be ketre e daa la Haana nɛ eko malɛ be ketre daa la Pɛnina. Pɛnina daa kɔ mbia, ama Haana bre daa maŋ kɔ.

³Kafɛ kikɛ Ɛlkana daa shi Raama nna a yɔ Shilo n ya kaa bunyaŋ Enyɛnpetale na nsaa lara sarga a sa mo. Eli nɛ mbe mbinyɛnsobi anyɔ nɛ baa tre Hofni nɛ Finihas na e daa la bɔrɛmatapoana ashi ndoŋ. ⁴Saŋkama nɛ Ɛlkana baŋ lara sarga, e bee chige sarga be eblaŋ na nna n sa mbe eche Pɛnina nɛ mbe mbinyɛnsobi nɛ mbichesobi. ⁵Hale Enyɛnpe Ebɔrɛ ka shin nɛ Haana daa la egbentepo na kikɛ Elkana daa sa mo sarga na be eblaŋ lela nna a chɔ Pɛnina nɛ mbe mbia ŋkpal e ka bee sha Haana ga so. ⁶Haana mo chamana Pɛnina daa wora mo eyurto nɛ asheŋ besaso nna ŋkpal Enyɛnpe Ebɔrɛ ka shin nɛ e la egbentepo so. ⁷Kafɛ kikɛ nɛ b baŋ yɔ Enyɛnpe Ebɔrɛ be lambu to, Pɛnina bee wora Haana eyurto ga nna hale nɛ e baa shu nseŋ kini ajibi gba be keji. ⁸Nɛ mo kul Ɛlkana e bishi mo le: “Haana, manɛ nna nɛ fee shu nsaa maa ji? Manɛ nna nɛ fo kagbene jija fo loŋ? M maŋ chɔ fo ka kɔ mbinyɛnsobi kudu bre a?”

⁹Kachako b ka ji ajibi n loge nɛ Haana koso nɛ e ya kule Ebɔrɛ, nɛ Eli malɛ chena mbe kabɛ so m mata bɔrɛlambu na be kukuloŋ. ¹⁰Haana be kagbene daŋ jija mo nna ga nɛ kabɔltoduŋi pɛ mo, amoso e ka daa kule Ebɔrɛ na kikɛ nɛ e bee shu, ¹¹nseŋ nase kɔnɔ ŋ kaŋɛ le: “Enyɛnpetale, n la fo kebita nna! Ama kebaawɔtɔ ki ma jiga. Nɛ fo baa maŋ teŋ ma so nseŋ chɛ ma to nɛ n nya ebinyɛn, kumo ere ma alɛ beeŋ laŋɛ mo n sa fo nɛ e baa wɔ fo kutɔ hale n ya fo mbe luwuachɛ. Kusɔ nɛ k beeŋ ŋini fanɛ n ta kebia na ŋ kɛ fo e la fanɛ b maaŋ she mbe emin kikɛ.”

¹²Haana daŋ kule Ebɔrɛ n chɛr nɛ Eli bee keni mbe kɔnɔ. ¹³E daa kule Ebɔrɛ mbe kagbene to nna nɛ mbe kɔnɔ bee wora nyuminyumibi, ama kamalga daa maa lar. Ndoŋ nna nɛ Eli fɛ fanɛ e boo nsa nna, ¹⁴nseŋ kaŋɛ mo le: “Saŋɛ mo gba nɛ feeŋ yige fo kaboo ere? Lar fo kasanuu ere to.”

¹⁵Nɛ Haana kaŋɛ le: “N nyɛnpe, m maŋ boo nna! M maŋ la esa nɛ mee nuu nsa. Kagbenejija nɛ kabɔltoduŋi e tɔr ma so nɛ mee kaŋɛ Enyɛnpe Ebɔrɛ ma etɔrɔsheŋ. ¹⁶Sa maŋ kaŋ fɛ fanɛ eche jiga e la ma. Kebaawɔtɔ e ki ma cham nɛ mee kule le be kabɔrɛkule na.”

¹⁷Nɛ Eli kaŋɛ le: “Israɛl be Ebɔrɛ na e wora kusɔ kama nɛ fo kule mo ere n sa fo. Ebɔrɛ e yɛr fo nɛ alenfia.”

¹⁸Nɛ Haana chɔrɔ mo ŋkpal e ka sa mo ebɔl lela so. Ndoŋ nna nɛ mbe kagbene wushi mo nɛ e lar n ya ji ajibi.

B ka Kurge Samuɛl be asheŋ

¹⁹Kumo be ŋklade kachipurdidi nɛ Ɛlkana nɛ mbe kanaŋ wule ŋ koso n ya bunyaŋ Enyɛnpe Ebɔrɛ nseŋ bɛta n yɔ Raama, bumo be kade to. Elkana nɛ mbe eche Haana ka di keche nɛ kenyɛn nɛ Enyɛnpe Ebɔrɛ nu Haana be kabɔrɛkule. ²⁰Ndoŋ nna nɛ e di kedampo ŋ kurge ebinyɛn, nseŋ fɛ mbe kumu to le: “Ŋ kule Enyɛnpe Ebɔrɛ nna nɛ e sa ma mo.” Amoso e daŋ nase mbe ketre Samuɛl nna.

²¹Kafɛ kikɛ Ɛlkana nɛ mbe kanaŋ kikɛ daa yɔ n ya kaa lara sarga nna a sa Enyɛnpe Ebɔrɛ na nsaa ta kakɛ nɛ e nase kɔnɔ fanɛ e beeŋ ba sa Enyɛnpe Ebɔrɛ na a ti so a yɔ. ²²Ama kafɛ nɛ Haana kurge na mo ere daa maŋ yɔ. Le nɛ e daŋ kaŋɛ mo kul: “Ma nɛ Samuɛl bre maaŋ yɔ ama m baŋ ku mo kenyipo nna pɔɛŋ nseŋ ta mo n ya sa Enyɛnpe Ebɔrɛ ashi Shilo nɛ e baa wɔ ndoŋ hale n ya fo mbe luwu achɛ.”

²³Nɛ Ɛlkana kaŋɛ le: “K nyalɛ, wora kusɔ nɛ fee fɛ fanɛ k walɛ n sa fo, ama baa wɔ laŋ to n ya fo saŋkama nɛ feeŋ ku kebia na kenyipo. Enyɛnpe Ebɔrɛ e shin nɛ fo kɔnɔ nɛ fo nase na e bɔlɔ so.” Ndoŋ nna nɛ Haana chena laŋ to a nyipo kebia na n ya fo saŋɛ nɛ e ku mo kenyipo.

²⁴Haana ka ku kebia na kenyipo, nɛ e ta mo n yɔ Shilo. E daŋ ta nfɛnsa be gbolu nɛ nyifu kilo kudu nɛ nsa belbelso deŋkeŋ be bɔlɔ n ti kebia na so nna m ba Enyɛnpe Ebɔrɛ be lambu to ashi Shilo. ²⁵B ka mɔ gbolu na n loge nɛ b keta kebia na n yɔ Eli kutɔ. ²⁶Nɛ Haana kaŋɛ mo le: “N nyɛnpe fo pin ma a? Ma e la kache nɛ e daŋ ba yili nfe jemanɛ ko a kule Enyɛnpe Ebɔrɛ na. ²⁷Ŋ kule Enyɛnpe Ebɔrɛ kebia ere nna nɛ mo alɛ sa ma kusɔ nɛ ŋ kule na gbagba. ²⁸Amoso mee ta mo nna a sa Enyɛnpe Ebɔrɛ nɛ e ba la mo ere Enyɛnpe Ebɔrɛ be kayɛrbi mbe ŋkpa to kikɛ.”

Ndoŋ nna nɛ b bunyaŋ Enyɛnpe Ebɔrɛ na.

Haana be kabɔrɛkule nɛ k du fanɛ kashɛ na be asheŋ

¹Ndoŋ nna nɛ Haana boŋ kashɛ ŋ kaŋɛ le:

“Enyɛnpe Ebɔrɛ shin nɛ ma kagbene fuli ma.

Ma kagbene fuli ma ga ŋkpal Ebɔrɛ ka mɔlga ma nseŋ sa ma eleŋ so.

Ŋkpal kusɔ nɛ Ebɔrɛ wora n sa ma ere so meeŋ mushe ma doŋana.

²Ebɔrɛ kikɛ maŋ wɔtɔ a du cheembi fanɛ fo Enyɛnpe na;

Esa kama maŋ du fanɛ fo.

Fo an be Ebɔrɛ du fanɛ kebee nna a kuŋ anyi.

³Menyi kamoowuwuraana;

men yige men be nfɛlso be mmalga na.

Shɛŋ shɛŋ maa ŋana fo Enyɛnpe Ebɔrɛ so.

Fo alɛ e naaŋ ji ekama be aworbi demu.

⁴Fo Enyɛnpe e naa buri benapo lempo be ata kikɛ to

nsaa sa bepɔshipo eleŋ.

⁵Basa nɛ b daa nya a ji yɛlyɛla so na

bee ji paa nna a fin bumo be kusɔ jiso naniere,

ama bekama nɛ akoŋ daa mɔ na bre maŋ naa shu akoŋ.

Fo e shin nɛ egbentepo kurge mbia ashunu,

nɛ bibi damta bumo nio malɛ paŋ mbe mbia kikɛ.

⁶Fo Enyɛnpe Ebɔrɛ na e naa sa basa ŋkpa, nseŋ naa tiŋ a sɔ kumo;

fo e naa shin nɛ basa bee yɔ nchaŋ to

nseŋ naa tiŋ a bɛta bumo a ba ŋkpa to.

⁷Fo Enyɛnpe Ebɔrɛ e to ketir nɛ kedamaya.

Fo e naa ta basa ko a ki bebɔlpo ŋ kaa ta beko malɛ a ki basa gboŋ.

⁸Fo e naa pulgi betirpo ashi shishɛr to

nsaa lara betentaŋasepo ashi bumo be awurfoŋ to;

Nsaa ta bumo a yili bewurbi be eyilikpa,

ashi ewura be laŋ to be bunyaŋ be kakpa na.

Fo Enyɛnpe e wora durnya ere be gbaltɔlase,

nseŋ pɔr durnya n yili kumo so.

⁹Fo e naa kuŋ fo basa nɛ baa bɛ fo so kashenteŋto na,

ama belubiworapoana bre, tentembiri to nɛ baaŋ wu n dese.

Anyi gbagba be eleŋ maaŋ tiŋ n shin nɛ an kɔ m pɔɔ so.

¹⁰Bekama nɛ baa kɔ fo Enyɛnpe Ebɔrɛ na beeŋ mur cheche.

Feeŋ shin nɛ bɔrɛ e shi esoso m ponte ŋ kɔ bumo.

Fo Enyɛnpe Ebɔrɛ na beeŋ ji durnya ere kikɛ demu,

nseŋ ta eleŋ nɛ yuku n sa fo ewura lara so.”

¹¹Kede be kaman nɛ Ɛlkana nɛ Haana bɛta n yɔ bumo be kade to Raama, ama kebinyɛnsobi Samuɛl bre daŋ shir bɔrɛmatapo Eli kutɔ nna ashi Shilo a shuŋ Enyɛnpe Ebɔrɛ na.

Eli be mbinyɛnsobi be asheŋ

¹²Eli be mbinyɛnsobi na daa la basa lubi nna nsaa maa nu a sa Ebɔrɛ, ¹³ŋko a bɛ bɔrɛmatapoana be mbra so. Amoso basa na daŋ baa daŋɛ bumo be sarga be eblaŋ, bɔrɛmatapoana na bee shuŋi kayɛrbi nna nɛ e ta katoe chɛgato ¹⁴m ba yuu kapuliya nɛ baa daŋɛ eblaŋ kumo to na n jɔ eblaŋ kama n lara kumo n ya sa bɔrɛmatapoana na. Kananɛ b daa wora Israɛlebi nɛ b daa ba Shilo m ba ka lara sarga na nna na. ¹⁵Kumo be kaman, pɔɛŋ nɛ b ta eblaŋ na be nfɔ n ya chɔ gba, nɛ bɔrɛmatapo na be kayɛrbi ba esa nɛ e bee lara sarga na kutɔ m ba kaŋɛ mo le: “Sa ma eblaŋ na be ako nɛ n ya sa bɔrɛmatapo na nɛ e tɔ n we, ŋkpal manɛ so, e maaŋ baa sha eblaŋ daŋɛso ama eblaŋ bumbuŋ.”

¹⁶Esa nɛ e bee lara sarga na baŋ kaŋɛ mo fanɛ e shin nɛ e chɔɔ eblaŋ na be nfɔ pɔɛŋ nɛ e ta kekama nɛ k par mo a yɔ, kayɛrbi na bee kilgi nna ŋ kaŋɛ le: “M-m, ta eblaŋ na n sa ma! Nɛ mannɛ loŋ, meeŋ sɔ amo eleŋso!”

¹⁷Eli be mbinyɛnsobi na be kulubi daa shi ga ashi Enyɛnpe Ebɔrɛ be anishito ŋkpal b ka daa maa keni esarga nɛ baa lara a sa Enyɛnpe Ebɔrɛ na a bɔlɔ kenishi so.

Samuɛl ka wɔ Shilo be asheŋ

¹⁸Le be saŋɛ so kikɛ nɛ kebinyɛnsobi Samuɛl bee shuŋ Enyɛnpe Ebɔrɛ na nna, nsaa buu kabɔrɛmata be piŋi nɛ baa tre ɛfɔd na. ¹⁹Kafɛ kikɛ malɛ mo nio bee ba piŋi nna a yili, saŋɛ na so mo kul baa yɔ Shilo nɛ e ya lara mbe kafɛ kafɛ be sarga na, nɛ e tu mo n ta kumo n ya sa Samuɛl. ²⁰Nɛ Eli e nɛfa Ɛlkana nɛ mbe eche Haana nseŋ kaŋɛ le: “Enyɛnpe Ebɔrɛ e kraŋ bɔla kache ere so n shin nɛ fo kurge mbia n ti so, saŋɛ na so baaŋ tal emo nɛ fo ta n sa mo ere to.”

Kumo be kaman nɛ b bɛta n yɔ epe.

²¹Nɛ Enyɛnpe Ebɔrɛ nɛfa Haana nɛ e naŋ kurge mbinyɛnsobi asa nɛ mbichesobi anyɔ. Le be saŋɛ ere kikɛ nɛ Samuɛl bee daŋ nsaa shuŋ Enyɛnpe Ebɔrɛ na be kushuŋ.

Eli ka fiɛ mbe mbinyɛnsobi so be asheŋ

²²Eli daŋ bel ga, mo alɛ nsaa nu kusɔ nɛ mbe mbinyɛnsobi na kɔ a ŋini Israɛlebi na hale n nu fanɛ mbia na bee tu beche nɛ baa shuŋ Enyɛnpe Ebɔrɛ be Nshɛr be wajɛbu na be kabuna to na nna a di keche nɛ kenyɛn. ²³Ndoŋ nna nɛ Eli kaŋɛ mbe mbinyɛnsobi na le: “Manɛ nna nɛ menyee wora le be asheŋ lubi ere? Esa kama bee malga menyi be kulubi ere be asheŋ a kaŋɛ ma. ²⁴Mbia, men yige loŋ be asheŋ na. Enyɛnpe Ebɔrɛ na be basa bee malga asheŋ lubi nɛ menyee wora ere kikɛ be asheŋ a kaŋɛ ma. ²⁵Nɛ fanɛ esa ko baŋ wora n da mo barkasa so, Ebɔrɛ beeŋ tiŋ n lɔŋɛ bumo be kefɛato, ama nɛ fanɛ esa wora n da Ebɔrɛ so wanɛ malɛ e naaŋ tiŋ n lɔŋɛ bumo be kefɛato?”

Ama ŋkpal Enyɛnpe Ebɔrɛ na ka daŋ yili kumo fanɛ e beeŋ mɔ bumo so, mbinyɛnsobi na daŋ maŋ nu n sa kusɔ nɛ bumo tuto daŋ kaŋɛ bumo na.

²⁶Saŋkama malɛ Samuɛl daŋ baa daŋ eyurto nna a ti so nsaa nya kasha ashi Enyɛnpe Ebɔrɛ nɛ basa kikɛ kutɔ.

Anebi ka malga ŋ gbiti Eli be laŋ to ebi be asheŋ

²⁷Kachako nɛ anebi ko ba Eli kutɔ m ba kaŋɛ mo fanɛ Enyɛnpe Ebɔrɛ na kaŋɛ le: “Saŋɛ so nɛ fo nananyɛn Ɛɛrɔn nɛ mbe kanaŋ daa la Ijipt be efuli so be ewura be anya na nɛ n lara ma kumu ŋ ŋini bumo. ²⁸Mo nɛ n lara Israɛl be eyiri na kikɛ to, fanɛ e baa la bɔrɛmatapo nsaa chɔɔ duwu ashi bɔrɛsure na so a sa ma nsaa buu kabɔrɛmata be piŋi nɛ baa tre ɛfɔd na saŋkama nɛ e bee ba ma anishito, nseŋ sa mbe kaman to ebi ekpa fanɛ b baa ta sarga nɛ baa chɔɔ bɔrɛsure na so na be ako. ²⁹Ama fo maa keni ma esarga na a bɔlɔ kenishi. Manɛ nna nɛ fee bunyaŋ fo mbinyɛnsobi na a chɔ ma nseŋ shin nɛ baa ji esarga na be mboŋ lela kikɛ? ³⁰Ma, Enyɛnpe, Israɛl be Ebɔrɛ na e daŋ nase kɔnɔ fanɛ fo kanaŋ e naaŋ baa la bɔrɛmatapoana mbaanaayɔ, ama mee kaŋɛ fo nna fanɛ loŋ maaŋ naŋ wora kikɛ. Basa kama nɛ baa bunyaŋ ma na nɛ mee sa bunyaŋ nsaa sho bekama nɛ b kishi ma na kɔnɔ. ³¹Saŋko bee ba nɛ m mɔ fo nɛ basa kama nɛ b wɔ fo kanaŋ to na kikɛ. Menyi be kanaŋ to malɛ maaŋ ba kɔ esa nɛ e beeŋ ji ŋkpa n ya fo mbe mbel be saŋkikɛ. ³²Fo kanaŋ beeŋ luri etɔrɔ damta to. Ma alɛ beeŋ nɛfa Israɛlebi nɛ b ka na, ama fo ere be kanaŋ bre, esa kama maaŋ ji ŋkpa n ya fo mbe mbel be saŋɛ. ³³Nɛ n shin nɛ fo kanaŋ to be esa ko ba ki bɔrɛmatapo gba kagbene jija beeŋ tɔr mo so nɛ e shu m puŋi anishi. Nɛ mbe kanaŋ to ebi kikɛ malɛ e wu luwu nyaŋnyaŋso. ³⁴Saŋɛ nɛ fo mbinyɛnsobi Hofni nɛ Finihas kikɛ beeŋ wu kachɛ koŋwule na nɛ feeŋ pin fanɛ kusɔ kama nɛ ŋ kaŋɛ na beeŋ bɔlɔ so kashenteŋto. ³⁵Meeŋ lara bɔrɛmatapo mo nɛ e beeŋ baa ji kashenteŋ nsaa nu a sa ma. Meeŋ shin nɛ mbe kanaŋ to ebi e ki bɔrɛmatapoana a shuŋ ma ewura laraso na. ³⁶Fo kanaŋ to be esa kama nɛ e kraa wɔ ŋkpa to malɛ beeŋ yɔ bɔrɛmatapo na kutɔ n ya jɔŋɛ ŋ kule mo amansherbi nɛ ajibi, mo alɛ nseŋ naŋ kule fanɛ b sa mo alɛ gba bɔrɛmatapo be kushuŋ ko nɛ e chɛ to n shuŋ nseŋ nya kusɔ jiso.”

Enyɛnpe ka lara mbe kumu ŋ ŋini Samuɛl be asheŋ

¹Jemanɛ nɛ kebinyɛnsobi Samuɛl daa wɔ Eli kutɔ a shuŋ Enyɛnpe Ebɔrɛ na, be saŋko saŋko, Enyɛnpe Ebɔrɛ na daa malga a sa basa nna, amoso e daa maa lara mbe kumu a ŋini basa saŋɛ damta. ²Loŋ be saŋɛ na nɛ Eli maŋ naa wu nɛnɛ. Kachako kanyɛso nɛ Eli dese mbe ebu to, ³nɛ Samuɛl malɛ dese Ebɔrɛ be lambu to be kakpa nɛ Ebɔrɛ be ŋkre be deka na wɔ na. Saŋɛ so nɛ Ebɔrɛ be lambu to be fitila na maŋ naŋ duŋ na ⁴nɛ Enyɛnpe Ebɔrɛ tre Samuɛl nɛ e shuli so ŋ kaŋɛ: “Ma nde,” ⁵Nseŋ shile n yɔ Eli kutɔ n ya kaŋɛ mo le: “Fo ka tre ma na, ma nde.”

Ama le nɛ Eli daŋ kaŋɛ: “Ma ere maŋ tre fo; bɛta n ya dese.” Ndoŋ nna nɛ Samuɛl bɛta n ya dese.

⁶Ndoŋ Enyɛnpe Ebɔrɛ na tre Samuɛl kela nyɔsopo, nɛ Samuɛl koso n yɔ Eli kutɔ n ya kaŋɛ mo le: “Fo ka tre ma na, ma nde.” Nɛ Eli ka mo le: “M pibi maŋ tre fo, bɛta n ya dese.” ⁷Samuɛl daa maŋ nyi fanɛ Enyɛnpe Ebɔrɛ na e naa malga mo kutɔ, ŋkpal manɛ so Enyɛnpe Ebɔrɛ na daa maŋ naŋ lara mbe kumu ŋ ŋini mo.

⁸Nɛ Enyɛnpe Ebɔrɛ naŋ tre Samuɛl kela sasopo nɛ e koso n yɔ Eli kutɔ n ya kaŋɛ mo le: “Fo ka tre ma na, ma nde.”

Ndoŋ nna nɛ Eli pin fanɛ Enyɛnpe Ebɔrɛ na e naa tre Samuɛl, ⁹nseŋ kaŋɛ mo le: Bɛta n ya dese, e ka baŋ naŋ tre fo, fo kaŋɛ: “Enyɛnpe Ebɔrɛ, baa malga, fo kayɛrbi bee nu.” Ndoŋ nna nɛ Samuɛl bɛta n ya dese.

¹⁰Ndoŋ nna nɛ Enyɛnpe Ebɔrɛ ba yili Samuɛl kutɔ n tre mo kananɛ e daŋ tre mo na: “Samuɛl! Samuɛl!”

Ndoŋ nna nɛ Samuɛl shuli so ŋ kaŋɛ le: “Baa malga, fo kayɛrbi bee nu.”

¹¹Nɛ Enyɛnpe Ebɔrɛ kaŋɛ mo le: “Samuɛl, Meeŋ wora kusɔ ko Israɛl be efuli so kachako nɛ kɔnɔ e mɔ ekama nɛ e nu kumo be asheŋ. ¹²Loŋ be kachɛ na ma kasogberge nɛ ŋ kaŋɛ fanɛ meeŋ sa Eli nɛ mbe laŋ to ebi kikɛ na beeŋ bɔlɔ so le chap. ¹³N teŋ kaŋɛ mo fanɛ meeŋ gberge mbe laŋ to ebi kusoe mbaanaayɔ ŋkpal mbe mbinyɛnsobi ka maŋ ta bunyaŋ n sa ma nsaa wora alubi a gbiti ma nɛ mo alɛ kini keshin nɛ b yige kebaawora loŋ so. ¹⁴Amoso nɛ n fiɛ Eli be laŋ to ebi so ŋ kaŋɛ fanɛ sarga ŋko toto be kelara maaŋ tiŋ n lara le be alubi be kasogberge ere ashi bumo so na.”

¹⁵Samuɛl ka dese nɛ karechɛ, nɛ e koso n ya bugi Enyɛnpe Ebɔrɛ be bɔrɛlambu na be akuloŋ. E daa ŋana kekaŋɛ Eli kusɔ nɛ Enyɛnpe Ebɔrɛ kaŋɛ mo na nna. ¹⁶Ama Eli daŋ tre mo nna ŋ kaŋɛ le: “Ma kebia Samuɛl!”

Nɛ Samuɛl shuli so ŋ kaŋɛ: “Ma nde n nyɛnpe!”

¹⁷Nɛ Eli bishi mo le: “Manɛ nɛ Enyɛnpe Ebɔrɛ kaŋɛ fo? Sa maŋ ta shɛŋ ŋ ŋana ma so. Nɛ fo baa maŋ kaŋɛ ma kusɔ kama nɛ Enyɛnpe Ebɔrɛ na kaŋɛ fo, e beeŋ bar kasogberge gboŋgboŋi fo so,” ¹⁸Ndoŋ nna nɛ Samuɛl kaŋɛ mo kusɔ kama. E maŋ ta shɛŋ shɛŋ ŋ ŋana mo so. Nɛ Eli kaŋɛ le: “Mo e la Enyɛnpe Ebɔrɛ na, kusɔ kama nɛ k par mo e wora.”

¹⁹Samuɛl ka bee daŋ na kikɛ nɛ Enyɛnpe Ebɔrɛ daa wɔ mo kutɔ nseŋ shin nɛ asɔ nɛ e kaŋɛ na malɛ be kekama bɔlɔ so. ²⁰Amoso baŋ yili Dan be kade to be kelargato be esoso n ya fo Bɛshiba be kade to be kelargato be kaseto kikɛ Israɛl be basa daŋ pin fanɛ Samuɛl la Enyɛnpe Ebɔrɛ na be anebi nna. ²¹Enyɛnpe Ebɔrɛ daa lara mbe kumu nna a ŋini Samuɛl ashi Shilo nsaa ŋini mo kusɔ nɛ e beeŋ baa kaŋɛ. Samuɛl malɛ baŋ malga, Israɛlebi na kikɛ daa kaŋ kusoe nna a nu.

Filistiebi ka kɔ n sɔ ŋkre be deka na be asheŋ

¹Kachako nɛ Israɛlebi na yɔ nɛ b ya kɔ Filistiebi kena nseŋ ya wora bumo be keeyi to ashi Ebeneeza nɛ Filistiebi na bela ase n ya wora bumo alɛ be keeyi to ashi Afɛk. ²Kena na to nɛ Filistiebi na kɔ m pɔɔ Israɛlebi na so nseŋ mɔ Israɛlebi na be basa ŋgboŋ ana. ³Israɛl be benapo nɛ b ka na ka bɛta n yɔ bumo be keeyi to na, nɛ bumo be benimu na kaŋɛ le: “Manɛ nna nɛ Enyɛnpe Ebɔrɛ shin nɛ Filistiebi ere kɔ m pɔɔ anyi so kabre loŋ? Men shin nɛ an ya ta Enyɛnpe Ebɔrɛ be ŋkre be deka nɛ k wɔ Shilo na m ba, saŋɛ na so Ebɔrɛ beeŋ bɛ anyi so n ya mɔlga anyi ashi anyi doŋana kutɔ.” ⁴Ndoŋ nna nɛ b shuŋi basa ko fanɛ b yɔ Shilo n ya ta Enyɛnpe be ŋkre be deka nɛ mbe ketre Enyɛnpetale deŋ mbe kuwurputi so ashi shuwa be emalaika anyɔ na be nferinto na m ba. Eli be mbinyɛnsobi anyɔ nɛ baa tre, Hofni nɛ Finihas gba daŋ ti bumo nɛ b ya ta ŋkre be deka na m ba na so.

⁵B ka bar ŋkre be deka na, nɛ Israɛlebi na be ŋgbene fuli bumo nɛ b cha awɔr ga hale nɛ kasawule bee gbuŋgbuŋ. ⁶Filistiebi na ka nu loŋ nɛ b kaŋɛ le: “Manɛ nna nɛ Israɛlebi na bee cha awɔr bumo be keeyi to loŋ?” B ka nu fanɛ Enyɛnpe be ŋkre be deka na ba Israɛlebi na be keeyi to, ⁷nɛ kufu pɛ bumo nɛ b kaŋɛ le: “Bumo be Ebɔrɛ ba bumo be keeyi na to! Amoso naniere bre an luri asheŋ to! Le be kesheŋ ere be kaduli maŋ naŋ tu anyi kikɛ! ⁸Nuso be asheŋ nde? Wanɛ e naaŋ tiŋ m mɔlga anyi ashi Israɛl be Ebɔrɛ lempo ere be enɔ to? Loŋ be Ebɔrɛ ere e shin nɛ alɔ be yiri yiri ba mɔ Ijiptebi ashi keshishɛrsawule na to dra dra na. ⁹Amoso Filistiebi men shin nɛ an baa kɔ kenyɛn nsaa kɔ kena fanɛ benyɛn! Nɛ manɛ aloŋ Israɛl be basa ere beeŋ pɔɔ anyi so nseŋ ta anyi ŋ ki bumo be anya.”

¹⁰Ndoŋ nna nɛ Filistiebi na naaŋ ya kɔ Israɛlebi na kena m pɔɔ bumo so alegaiso m mɔ bumo be basa ŋgboŋ adesa, nɛ bumo nɛ b ka na kikɛ shile n yɔ bumo be elaŋ to. ¹¹Filistiebi na daŋ sɔ Ebɔrɛ be ŋkre be deka na nna nseŋ mɔ Eli be mbinyɛnsobi anyɔ nɛ baa tre Hofni nɛ Finihas na.

Eli be luwu be asheŋ

¹²Kumo be kamɔnchɛ na kikɛ nɛ Bɛnjamin be kanaŋ to be enapo ko shile kena na to n yɔ Shilo. E daŋ kpɛa mbe asɔbuuso to nna nseŋ muu shishɛr n wurge mbe kumu so a ŋini kagbenejija nɛ k tɔr mo so. ¹³E ka fo Shilo nɛ Eli tase mbe kabɛ so ekpakar a jo, ŋkpal manɛ so e daa lɔ kufu nna ŋkpal kusɔ nɛ k beeŋ wora ŋkre be deka na so. Kanyɛn na ka luri kade to n ya kaŋɛ bumo kusɔ nɛ k wora na, nɛ basa na kikɛ fara a shu. ¹⁴Eli ka nu basa na be kushu nɛ e bishi le: “Awɔr nɛ k bee cha ere be kifito a?” Nɛ kanyɛn na shile n yɔ Eli kutɔ nɛ e ya kaŋɛ mo kusɔ nɛ k wora. ¹⁵Kumo be jemanɛ so nɛ Eli la nfɛ adekpanu nɛ aburwa. Mo alɛ daa maŋ naa wu. ¹⁶Ndoŋ nna nɛ kanyɛn na kaŋɛ Eli le: “N shile kena nna hale m ba fo nfe kabre na.”

Nɛ Eli malɛ bishi mo le: “M pibinyɛn, manɛ e wora?”

¹⁷Nɛ kanyɛn nɛ e bar baru na kaŋɛ le: “Filisti be benapo pɔɔ Israɛl be benapo na so, anyi alɛ be kekɔntɔr na shibi ga! Kumo alɛ be kaman fo mbinyɛnsobi Hofni nɛ Finihas gba wu nɛ b ta Ebɔrɛ be ŋkre be deka na gba n choŋ.”

¹⁸Eli daa tase mbe kabɛ so nna m mata kade na be egbal be kabunagboŋ na nɛ kanyɛn na ba kaŋɛ fanɛ Filistiebi na ta ŋkre be deka na n choŋ, nɛ e lar mbe kabɛ na so n tɔr mbe kaman. Ŋkpal mo alɛ ka daŋ bel ga nsaa shi so nɛ mbe kubɔ bu nɛ e wu. Nfɛ adena nɛ e daŋ juŋkpar Israɛlebi na.

Finihas be ekulpoche na be luwu be asheŋ

¹⁹Eli mo shache nɛ e la Finihas be eche na daŋ di kedampo nna n taga to kakurge. E ka nu fanɛ b ta Ebɔrɛ be ŋkre be deka na nɛ mo shanyɛn nɛ mo kul be luwu be asheŋ, nɛ kakurge ta mo epul na to. Mbe kakurge na daŋ ki kpakpa nna nɛ e bee shin nɛ e wu. ²⁰E ka bee shin nɛ e wu na nɛ beche nɛ baa chɛ mo to nɛ e kurge na kaŋɛ mo le: “Baa leŋ fo kumu to! Ebinyɛn nɛ fo kurge!” Ama mbe nfɛra gba daa maŋ wɔ bumo so. Mo alɛ daa maŋ tuge bumo shɛŋ, ²¹nseŋ kaŋɛ: “Kebia na be ketre e la Ikabod, kumo be kifito bee ŋini fanɛ, Ebɔrɛ be kemaŋkura maŋ naa wɔ Israɛl so.” Ŋkpal b ka suge ŋkre be deka na nɛ mo shanyɛn nɛ mo kul kikɛ be luwu so nɛ e kaŋɛ loŋ na. ²²Ebɔrɛ be kemaŋkura maŋ naa wɔ Israɛl so ŋkpal b ka ta Ebɔrɛ be ŋkre be deka na n yɔ so.

Ebɔrɛ be ŋkre be deka na ka wɔ Filistiebi kutɔ be asheŋ

¹Filistiebi na ka sɔ Ebɔrɛ be ŋkre be deka na nɛ b ta kumo ashi Ebeneeza n yɔ Ashdɔd bumo be kade to, ²nseŋ ta kumo n ya yili bumo be kegbir Dagɔn be lambu to m mata kegbir na be kapɔrduli. ³Ŋklade kachipurdidi nɛ Ashdɔd be basa na wu kegbir na be kapɔrduli ka tɔr kasawule a dese kumo be epun so ashi Enyɛnpe Ebɔrɛ be ŋkre be deka na be anishito. Ndoŋ nna nɛ b naŋ niŋi kumo to n yili kumo be eyilikpa. ⁴Kare ka naŋ chɛ kachipurdidi, nɛ b naŋ wu kegbir na be kapɔrduli na ka naŋ tɔr kasawule ŋkre be deka na be anishito m buu epun so. Kumo be kumu nɛ mbre kikɛ daŋ chuge nna n ya tɔr kabuna to. Kumo be eyur nawule e daa maŋ chuge to. ⁵Amoso yili loŋ be saŋɛ m ba fo kabre Dagɔn be kegbirwura kikɛ nɛ basa nɛ b wɔ Ashdɔd a shuŋ kumo na kikɛ baa luri ebu na to baa tɛmbaŋ kakpa nɛ kegbir na tɔr na nna.

⁶Enyɛnpe Ebɔrɛ daŋ shin nna nɛ etɔrɔ damta tɔr Ashdɔd be basa na nɛ basa nɛ b wɔ nde nɛ a mata bumo na so ga. E daŋ shin nna nɛ achuubɔbɔ pɛ bumo nɛ keyeŋiyeŋi malɛ gba tɔr bumo so ga. ⁷B ka wu kusɔ nɛ k bee wora na nɛ b kaŋɛ abar le: “Israɛl be Ebɔrɛ na e naa gberge anyi nɛ an be kegbir Dagɔn ere kusoe na. Anyi maaŋ naŋ shin nɛ Ebɔrɛ be ŋkre be deka ere e baa wɔ anyi kutɔ nfe.” ⁸Ndoŋ nna nɛ b shuŋi mbɔ n tre Filistiebi na be bewura anu na kikɛ m ba shɛr m bishi bumo le: “Nuso nɛ anyeeŋ wora Israɛlebi be Ebɔrɛ be ŋkre be deka ere?” Nɛ b kaŋɛ bumo le: “Men ta kumo n yɔ Gaaf.” Ndoŋ nna nɛ b ta kumo n yɔ ndoŋ. ⁹B ka bar kumo Gaaf na nɛ Enyɛnpe Ebɔrɛ be kasogberge ba kade na to ebi gba so. Nɛ e shin nɛ keyeŋiyeŋi tɔr bumo so, nɛ achuubɔbɔ pɛ kade na to be basa, mbia nɛ benimu kikɛ. ¹⁰Ndoŋ nna nɛ b ta ŋkre be deka na n yɔ Ekrɔn, ama b kaa bee luri kade na to na nɛ basa na fara a cha awɔr a kaŋɛ le: “B bar Israɛl be Ebɔrɛ be ŋkre be deka na nfe nna nɛ k ba mɔ anyi nɛ an wɔ kade ere to kikɛ!” ¹¹Ndoŋ nna nɛ b naŋ shuŋi n tre Filisti be bewura na kikɛ ŋ kaŋɛ bumo le: “Men shin nɛ an lara Ebɔrɛ be ŋkre be deka na ashi anyi to saŋɛ na so k maaŋ mɔ anyi nɛ anyi be basa kikɛ.” Nɛ keyeŋiyeŋi tɔr kade na be basa kikɛ so ŋkpal Ebɔrɛ be kasogberge ka daŋ ba bumo so alegaiso so. ¹²Achuubɔbɔ daŋ pɛ kade na to be basa kikɛ nna ama bumo be bumo nɛ achuubɔbɔ na daa maŋ mɔ na daa shu a tre bumo be agbirana nna fanɛ a ba mɔlga bumo.

B ka bɛta ŋkre be deka na m ba Israɛl be asheŋ

¹Enyɛnpe Ebɔrɛ be ŋkre be deka na ka ji afɔl ashunu ashi Filisti be efuli so be kaman, ²nɛ Filistiebi na tre bumo be agbirwuraana nɛ bekpalpo m bishi bumo le: “Nuso nɛ anyeeŋ wora Enyɛnpe Ebɔrɛ be ŋkre be deka ere? Men kaŋɛ anyi kananɛ anyeeŋ wora m bɛta kumo n yɔ kumo be kakpa nɛ k shi.”

³Nɛ b kaŋɛ le: “Nɛ men baa sha kebɛta kumo n yɔ kumo be kakpa nɛ k shi bre, kumo ere men fin sarga be kakɛ ko n ti so a ya kule alubi be ketampaŋ ŋkpal men ka suge kumo so. Loŋ na nɛ menyeeŋ pin kusɔ nɛ k ba nɛ Enyɛnpe Ebɔrɛ be kasogberge wɔ menyi so. Ŋkpal manɛ so, k maŋ daga b ka bɛta ŋkre be deka na n yɔ nɛ kakɛ maŋ ti kumo so.”

⁴Nɛ basa na naŋ bishi le: “Nuso be kakɛ e daga an ka ta n ya sa mo?” Nɛ agbirwuraana na nɛ bekpalpo na kaŋɛ: “Men ta shuwa n lɔŋɛ asɔ anu fanɛ achuubɔbɔ nseŋ naŋ ta shuwa n lɔŋɛ eshiboe anu nɛ a yili n sa Filisti be bewura anu na, ŋkpal manɛ so kulɔ na teŋ pɛ menyi nɛ bewura na kikɛ. ⁵Men ta asɔ nɛ men lɔŋɛ nɛ a duli eshiboe nɛ a bee jija men be adɔjibi na nɛ amo nɛ a duli achuubɔbɔ a tɔrɔ menyi na n ti ŋkre be deka na so n yɔ nɛ a baa ŋini fanɛ menyee sa Israɛl be Ebɔrɛ na bunyaŋ. Nɛ men wora loŋ bre, ashere e maaŋ naŋ shin nɛ etɔrɔ e ba menyi nɛ men be agbirana nɛ menyi be kasawule ere so. ⁶Men sa maŋ kaŋ wora men be ŋgbene kpakpa fanɛ Ijiptebi na nɛ bumo be ewura. Dra na Ebɔrɛ be kasogberge gboŋgboŋi daŋ ba bumo so nna pɔɛŋ nɛ b sa Israɛlebi na ekpa nɛ b lar Ijipt to. ⁷Amoso men fin enache anyɔ nɛ b maŋ naŋ ta n dɔ ŋ ku so nɛ b kɔ anabi. Kumo be kaman nɛ men fin turko popɔr n chɛ ana na nseŋ chɛ anabi na malɛ m muni kuluu to. ⁸Kumo be kaman nɛ men ta Ebɔrɛ be ŋkre be deka na n deŋi turko na so nseŋ ta shuwa be asɔ nɛ men lɔŋɛ a yɔ nɛ men ya sa mo fanɛ men be alubi be kewora be kakɛ na n wɔtɔ deka pɔtɛ to m mata kumo, nseŋ ju ana na nɛ bumo nawule e baa yɔ. ⁹Kede be kaman nɛ menyi alɛ e yili a keni bumo. Nɛ ana na baŋ sɔ Bɛf Shimɛsh be kade to be kaba so, kumo ere k baŋ di efuli nna fanɛ Israɛl be Ebɔrɛ na e shin nɛ le be aleblawu ere ba anyi so na. Nɛ loŋ baa maŋ wora bre, kumo ere k bee ŋini nna fanɛ mannɛ Ebɔrɛ e shin nɛ loŋ be aleblawu na ba anyi so. K daŋ chɛr a beeŋ ba nna.”

¹⁰Ndoŋ nna nɛ basa na nu kusɔ nɛ b kaŋɛ bumo na nseŋ ta ana na n chɛ turko na nseŋ chɛ bumo be anabi na bre m muni kuluu to. ¹¹Kede be kaman nɛ b ta ŋkre be deka na nɛ deka nɛ asɔ nɛ b ta shuwa n lɔŋɛ nɛ a du fanɛ eshiboe nɛ achuubɔbɔ wɔtɔ na n ti ŋkre be deka na so n yili turko na to. ¹²Nɛ enache na bɔla Bɛf Shimɛsh be ekpa n niŋi tinini a shu a yɔ. Nɛ Filisti be bewura anu na bɛ bumo so hale n ya ka taga to Bɛf Shimɛsh be kade to.

¹³Bɛf Shimɛsh be basa daa wɔ ketaŋɛ to nna a teŋi bumo be ayu. B ka maŋ bumo be amu so nseŋ wu ŋkre be deka na, nɛ bumo be ŋgbene fuli bumo ga hale nɛ b yige kasɔteŋi na. ¹⁴Ndoŋ nna nɛ ana na gberge turko na m ba kanyɛn ko nɛ e shi Bɛf Shimɛsh nɛ baa tre mo Joshuwa be ndɔ to m ba yili kejembu gboŋgboŋi ko ase. Nɛ basa ko ba kuya turko na be ndibi to m puga edɛ nseŋ mɔ ana na n ta amo n chɔɔ n lara sarga n sa Enyɛnpe Ebɔrɛ. ¹⁵Ndoŋ nɛ Livaiebiana na daŋ lara Enyɛnpe Ebɔrɛ be ŋkre be deka na nɛ deka nɛ achuubɔbɔ nɛ eshiboe be asɔ nɛ b ta shuwa n lɔŋɛ na ashi turko na so n deŋi kejembu gboŋgboŋi na so. Kumo be kaman nɛ Bɛf Shimɛsh be basa ba lara esarga chɔɔso nɛ esarga ko ana gba n ti so n sa Enyɛnpe Ebɔrɛ. ¹⁶Filisti be bewura anu na ka wu kusɔ nɛ k wora na nɛ b bɛta n yɔ Ekrɔn be kade to kamɔnchɛ na kikɛ.

¹⁷Asɔ anu nɛ Filistiebi na ta shuwa n lɔŋɛ nɛ a du fanɛ achuubɔbɔ nɛ b ta n ti ŋkre be deka na so n yɔ Bɛf Shimɛsh na be kekama daŋ yili nna a ŋini bunyaŋ nɛ Filistiebi be nde nɛ baa tre Ashdɔd nɛ Gaaza nɛ Ashkɛlɔn nɛ Gaaf nɛ Ekrɔn na kɔ a sa Enyɛnpe Ebɔrɛ. ¹⁸Shuwa be asɔ anu nɛ a du fanɛ eshiboe na be kekama malɛ daŋ yili nna n sa Filistiebi be nde nɛ b pɔr egbal ŋ kulti na nɛ ndewurbi nɛ a mata amo na be bewura anu na. Kejembu gboŋgboŋi nɛ Livaiebi na daŋ ta Enyɛnpe Ebɔrɛ be ŋkre be deka na n ya yili so ashi Bɛf Shimɛsh be kanyɛn ko nɛ baa tre Joshuwa na be ndɔ to na, kraa dese shɛda so hale kabre.

¹⁹Enyɛnpe Ebɔrɛ daŋ mɔ Bɛf Shimɛsh be benyɛn adushunu kikɛ nna ŋkpal b ka jule ŋ keni ŋkre be deka na to so. Nɛ basa na shu keeli ga ŋkpal basa damta nɛ Enyɛnpe Ebɔrɛ mɔ na so.

B ka ta ŋkre be deka na n yɔ Kiriaf Jearim be asheŋ

²⁰Ndoŋ nna nɛ Bɛf Shimɛsh be benyɛn na bishi abar le: “Wanɛ e naŋ tiŋ n yili Enyɛnpe Ebɔrɛ cheembi ere be anishito n ji efute? K daga fanɛ an lara ŋkre be deka ere nfe, ama nnɛ nɛ anyeeŋ yɛr kumo?” ²¹Nɛ b shuŋi mbɔ fanɛ b ya kaŋɛ Kiriaf Jearim be basa na le: “Filistiebi na bɛta Enyɛnpe Ebɔrɛ be ŋkre be deka na m ba. Men ba ta kumo n yɔ menyi pe.”

¹Ndoŋ nna nɛ Kiriaf Jearim be basa na ba ta Enyɛnpe Ebɔrɛ be ŋkre be deka na n yɔ kanyɛn ko nɛ baa tre Abinadab nɛ mbe laŋ wɔ kebee be esoso na pe nseŋ lara mo pibinyɛn Eliaza n yili fanɛ e baa keni kumo so.

Samuɛl ka ki Israɛlebi be ejuŋkparpo be asheŋ

²Enyɛnpe Ebɔrɛ be ŋkre be deka na daŋ ji nfɛ adunyɔ kikɛ nna ashi Kiriaf Jearim. Loŋ be jemanɛ na malɛ nɛ Israɛlebi na bee shu a kule Enyɛnpe Ebɔrɛ a fin kechɛto.

³Ndoŋ nna nɛ Samuɛl kaŋɛ Israɛlebi na le: “Nɛ men bɛta a ba Enyɛnpe Ebɔrɛ kutɔ bre, kumo ere a daga men ka yige efuli pɔtɛana so be agbir nɛ kegbirche Ashtɔrɛf be kebaashuŋ, nseŋ ta men be ŋgbene kikɛ n sa Enyɛnpe Ebɔrɛ, nsaa bunyaŋ mo nawule. Saŋɛ na so e beeŋ mɔlga menyi ashi Filistiebi na be enɔ to.” ⁴Nɛ Israɛlebi na yige agbir nɛ baa tre Baal nɛ Ashtɔrɛf na be kebaashuŋ nsaa shuŋ Enyɛnpe Ebɔrɛ nawule.

⁵Ndoŋ nna nɛ Samuɛl kaŋɛ le: “Men tre Israɛlebi na kikɛ nɛ b ba shɛr Mizpa nɛ ŋ kule Enyɛnpe Ebɔrɛ na n sa menyi.” ⁶Nɛ Israɛlebi na ba shɛr abar so ashi Mizpa. Samuɛl e daa la bumo be ejuŋkparpo. B daŋ saŋ nchu nna n chulgi n wurge kasawule fanɛ sarga n sa Enyɛnpe Ebɔrɛ. Bumo alɛ daŋ kishi kumo be kamɔnchɛ kikɛ nna nseŋ bugi to ŋ kaŋɛ Enyɛnpe Ebɔrɛ fanɛ b wora alubi n da mo so.

⁷Filistiebi na ka nu fanɛ Israɛlebi na shɛr Mizpa nɛ bumo be bewura nɛ benapo yɔ nɛ b ya kɔ Israɛlebi na. Israɛlebi na ka nu loŋ, nɛ kufu pɛ bumo. ⁸Nɛ b kaŋɛ Samuɛl le: “Baa kule Enyɛnpe Ebɔrɛ na fanɛ e mɔlga anyi ashi Filistiebi ere be enɔ to.” ⁹Ndoŋ nna nɛ Samuɛl mɔ kubɔlpobi n ta kumo kikɛ n chɔɔ n lara sarga n sa Enyɛnpe Ebɔrɛ fanɛ e chɛ Israɛlebi to. Nɛ Enyɛnpe Ebɔrɛ nu mbe kabɔrɛkule na. ¹⁰Samuɛl kraa lara sarga na nna, nɛ Filistiebi na gbaŋ m buu bumo so nɛ b kɔ bumo, nɛ Enyɛnpe Ebɔrɛ shin nɛ bɔrɛ ponte nɛ Filistiebi na be nfɛra wul bumo to nɛ keyeŋiyeŋi tɔr bumo so nɛ b shile. ¹¹Nɛ Israɛlebi na lar Mizpa n ju m buu Filistiebi na so m mɔ bumo n ya kaa taga to Bɛf Kaar.

¹²Ndoŋ nna nɛ Samuɛl ta kejembu n yuu Mizpa nɛ Shɛn be kefɛato nseŋ nase kumo be ketre Ebeneeza ŋ kaŋɛ le: “Enyɛnpe Ebɔrɛ na e chɛ anyi to m ba fo nfe.” ¹³Israɛl be benapo na daŋ pɔɔ Filistiebi na so nna. Samuɛl be jemanɛ so malɛ kikɛ Enyɛnpe Ebɔrɛ daŋ chɛ Israɛlebi na to nna nɛ Filistiebi na maŋ naŋ tiŋ n sɔ bumo be efuli kikɛ. ¹⁴Nɛ Israɛl be nde nɛ a wɔ Ekrɔn nɛ Gaaf be kefɛato nɛ Filistiebi daŋ sɔ na kikɛ naŋ laŋɛ ŋ ki Israɛlebi peya. Nɛ kagbenewushi malɛ ba Amɔriebi na nɛ Israɛlebi na be kefɛato.

¹⁵Samuɛl e daa la Israɛl be demujipo hale n ya wu. ¹⁶Kafɛ kikɛ e bee nite a chambɔ Bɛtɛl nɛ Gilgaal nɛ Mizpa be nde nna a ji Israɛlebi nɛ b wɔ ndoŋ be asheŋ n sa bumo. ¹⁷Saŋkama malɛ nɛ e baŋ loge mbe kushuŋ e bee bɛta nna n yɔ Raama mbe kade to n ya kaa ji bumo alɛ gba be asheŋ a sa bumo. E daŋ pɔr bɔrɛsure ashi Raama nna n sa Enyɛnpe Ebɔrɛ.

Israɛlebi ka bee fin ewura be asheŋ

¹Samuɛl ka bel, nɛ e lara mbe mbinyɛnsobi anyɔ nɛ b ki Israɛl be demujipoana. ²Mo pibinyɛn nimuso na be ketre e daa la Jowɛl nɛ ekekarso na malɛ be ketre daa la Abija. Bumo kikɛ daa wɔ kade nɛ baa tre Bɛshiba na nna. ³Ama bumo ere daa maŋ du fanɛ bumo tuto. Amansherbi nɛ bumo kenishi daŋ pere so ga, nɛ baa puni basa a sɔ bumo be asɔ nsaa ji basa be edemuana durmu so.

⁴Ndoŋ nna nɛ Israɛl be bejuŋkparpoana na kikɛ gbargbar abar n yɔ Samuɛl kutɔ ashi Raama ⁵n ya kaŋɛ mo le: “Naniere fo bel nna na, nɛ fo mbinyɛnsobi ere malɛ maŋ du fanɛ fo, amoso lara ewura n sa anyi nɛ e baa juŋkpar anyi fanɛ kananɛ efuli pɔtɛana na gba be basa kɔ bewura na.” ⁶K daŋ maŋ par Samuɛl ŋkpal b ka kaŋɛ fanɛ baa fin ewura so. Ndoŋ nna nɛ e kule Enyɛnpe Ebɔrɛ a yɔ kumo be kaplɛa so. ⁷Nɛ Enyɛnpe Ebɔrɛ kaŋɛ mo le: “Kusɔ kama nɛ b kaŋɛ fo, fo nu n sa bumo. Mannɛ fo nɛ b kini; ma nɛ b kini fanɛ bumo be ewura. ⁸Yili saŋɛ so nɛ n lara bumo ashi Ijipt be kasawule so dra dra na kikɛ nɛ b kini ma nseŋ ya kaa bɛ agbir so. Kusɔ nɛ b wora ma na gbagba nɛ b ta a wora fo alɛ gba naniere na. ⁹Kusɔ kama nɛ b kaŋɛ, fo nu n sa bumo, ama wora ania ŋ kpele bumo kusoe kenishipereso nɛ b pin kananɛ ewura na beeŋ ba kaa wora bumo.”

¹⁰Ndoŋ nna nɛ Samuɛl kaŋɛ basa nɛ baa kule mo fanɛ e fin ewura n sa bumo na kusɔ kama nɛ Enyɛnpe Ebɔrɛ na kaŋɛ mo. ¹¹E yɛ: “Le nɛ menyi be ewura na beeŋ wora menyi. E beeŋ tintiŋ men be mbinyɛnsobi nɛ b ki mbe benapo nseŋ shin nɛ bumo be beko e baa far mbe egbaŋɛturko nɛ beko malɛ e baa di egbaŋɛ a kɔ kena, nɛ beko e baa shile a juŋkpar mbe egbaŋɛturko. ¹²E beeŋ lara bumo be beko nɛ b ki benapo ŋgboŋto ŋgboŋto be benimu nɛ beko malɛ e ki benapo adununu be benimu. E beeŋ shin nɛ bumo be beko e baa dɔ mo nɛ beko malɛ e baa teŋi mbe asɔ nɛ beko e baa wora akɔsɔ nɛ mbe egbaŋɛturko be asɔ. ¹³Men be mbichebi beeŋ baa wora etulale a sa mo nseŋ ki mbe bedaŋɛpo nɛ ebodobodotɔpoana. ¹⁴E beeŋ sɔ menyi be nsawule lela nɛ ndibi nɛ baa tre ɔlif na be ndɔana nɛ ndibi nɛ baa tre greep na be ndɔana n sa mbe benimuana. ¹⁵E beeŋ baa sɔ menyi be ayu nɛ menyi be greep be asɔrso be kudu kudusopo a sa mbe benimuana nɛ mbe ekrachiana. ¹⁶Ewura na beeŋ baa sɔ men be nyɛrbi nɛ mbita nɛ men be ana lela nɛ men be ekurma a shin nɛ b baa shuŋ mo. ¹⁷Mo alɛ beeŋ naa sɔ menyi be mbolpɔ nɛ mboe be kudu kudusopo. Nɛ menyi alɛ gbagba e ki mbe anya. ¹⁸Loŋ be saŋɛ na kaŋ fo, menyeeŋ fubel ga ŋ gbiti menyi be ewura nɛ men gbagba fin na, ama ma Enyɛnpe Ebɔrɛ malɛ maaŋ nu menyi be nfubel na.”

¹⁹Nɛ basa na kini kenu n sa Samuɛl nseŋ kaŋɛ le: “Mm, anyi ere, ewura nɛ anyee sha. ²⁰Saŋɛ na so anyi alɛ gba beeŋ ba du fanɛ efuli pɔtɛana a kɔ an gbagba be ewura nɛ e baa ji anyi so kuwura nsaa juŋkpar anyi a yɔ ana to n ya kaa kɔ a sa anyi.” ²¹Samuɛl ka nu kusɔ kama nɛ b kaŋɛ na n loge nɛ e ya kaŋɛ Enyɛnpe Ebɔrɛ kumo. ²²Nɛ Enyɛnpe Ebɔrɛ kaŋɛ le: “Wora kusɔ nɛ baa sha n sa bumo nseŋ sa bumo ewura.” Ndoŋ nna nɛ Samuɛl kaŋɛ Israɛl be basa na kikɛ fanɛ b baa yɔ epe.

Sɔɔl nɛ Samuɛl ka tu abar be asheŋ

¹Damawura ko e daa wɔtɔ nɛ baa tre mo Kish nɛ e shi Bɛnjamin be yiri to. Mo tuto be ketre e daa la Abiɛl nɛ mo nananyɛn malɛ daa la Zɛrɔ. Zɛrɔ malɛ mo tuto e daa la Bɛkurɔf nɛ Bɛkurɔf malɛ mo tuto daa la Afaya. ²Kish pibinyɛn ko be ketre e daa la Sɔɔl. Sɔɔl daa walɛ kayɛrbi nna ga, nsaa maŋ kɔ sara kikɛ. Mo e daa wɔ nteŋ a chɔ Israɛl be esa kikɛ.

³Kish daa kɔ ekurma nna nɛ b foe. Ndoŋ nna nɛ e kaŋɛ Sɔɔl le: “Keta nyɛrbi na be eko nɛ fo nɛ mo e ya fin ekurma na.” ⁴Ndoŋ nna nɛ b bɔla Efrayim be abee ase nɛ Shalisha be efuli so be kaba so, n fin amo ŋ gben, nseŋ naŋ bɔla Shaalim malɛ be efuli so be kaba so, ama bumo alɛ daa maŋ wu ekurma na. Ndoŋ nna nɛ b bɔla Bɛnjamin be efuli so be kaba so a fin ekurma na ama b daa maŋ wu amo. ⁵B ka bee taga to Zuuf be kasawule so, nɛ Sɔɔl kaŋɛ mbe kayɛrbi na le: “Shin nɛ an bɛta n yɔ epe, nɛ mannɛ loŋ, n tuto beeŋ yige ekurma na be asheŋ be kebaafɛ nsaa fɛ anyi be asheŋ.”

⁶Nɛ kayɛrbi na kaŋɛ le: “N nyɛnpe, kebɔrɛnya ko wɔ kade ere to nɛ basa bee sa mo bunyaŋ ga, ŋkpal manɛ so kusɔ kama nɛ e baŋ kaŋɛ, k bee wora kashenteŋ nna. An yɔ mo kutɔ, ashere e beeŋ tiŋ ŋ ŋini anyi kakpa nɛ ekurma na wɔ.”

⁷Nɛ Sɔɔl bishi mo le: “An kaŋ yɔ mo kutɔ, manɛ bre nɛ anyeeŋ sa mo? Anyi be ajibi nɛ a wɔ anyi be ebɔtɛ to na kikɛ loge, anyi alɛ maŋ naa kɔ shɛŋ nɛ an ya sa mo; ŋko an kɔ kusɔ ko?”

⁸Nɛ kayɛrbi na naŋ kaŋɛ mo le: “Ma ere kɔ gbiti be kadɛrbi fimbi ko. Meeŋ ta kumo n sa mo saŋɛ na so e beeŋ ŋini anyi kakpa nɛ anyeeŋ wu ekurma na.”

⁹Ndoŋ nna nɛ Sɔɔl kaŋɛ le: “Mbo! An yɔ kebɔrɛnya nɛ e bee wu asheŋ a kaŋɛ na kutɔ.” E daŋ kaŋɛ le nna ŋkpal manɛ so loŋ be jemanɛ na so Ebɔrɛ daa bɔla asheŋ be kewuŋkaŋɛ so nna a malga a sa basa. Basa nɛ baa wu asheŋ a kaŋɛ na nɛ b daa tre anebiana loŋ be jemanɛ na. ¹⁰Ndoŋ nna nɛ Sɔɔl nɛ kayɛrbi na yɔ kakpa nɛ anebi na wɔ na. ¹¹B ka dii kebee a yɔ kade na to na, nɛ b ya tu besuŋgurbi ko nɛ baa ba nɛ b ba saŋ nchu, nɛ b bishi bumo le: “Anyee fin kanyɛn nɛ e bee wu asheŋ a kaŋɛ na nna. E wɔtɔ nna ere a?”

¹²Nɛ b yɛ: “Mm, e wɔ kade to kabre ŋkpal manɛ so, baa sha kelara sarga ashi kebee nɛ k mata nfe ere so kabre nna. Mo e wɔ menyi be anishito a yɔ na, amoso men wora manaŋ. ¹³Men baŋ luri kade na to, menyeeŋ wu mo pɔɛŋ nɛ e yɔ kakpa nɛ baa lara sarga na. Basa na maaŋ fara a ji sargajibi na ama e baŋ ya nɛfa amo na pɔɛŋ. Nɛ men baŋ yɔ naniere, menyeeŋ tu mo pɔɛŋ nɛ e yɔ ndoŋ.” ¹⁴Ndoŋ nna nɛ Sɔɔl nɛ mbe kayɛrbi na luri kade to nseŋ wu Samuɛl nɛ e bee shɛr bumo to a yɔ sarga na be kakpa.

¹⁵Kumo be ŋklade, pɔɛŋ nɛ Sɔɔl ba na, le nɛ Enyɛnpe Ebɔrɛ daŋ kaŋɛ Samuɛl. ¹⁶“N wu kananɛ ma basa bee ji awurfoŋ. Ma alɛ nu bumo be kushu nɛ baa shu a fin kechɛto na. Echefo saŋɛ ere so gbagba, meeŋ shuŋi esa ko nɛ e shi Bɛnjamin be kanaŋ to nɛ fo duga ŋku n do mbe kumu so n lara mo ŋ ki Israɛl be ejuŋkparpo. Mo e naaŋ mɔlga bumo ashi Filistiebi na be enɔ to.”

¹⁷Samuɛl ka wu Sɔɔl na nɛ Enyɛnpe Ebɔrɛ kaŋɛ mo le: “Kanyɛn ere be asheŋ nɛ ŋ kaŋɛ fo na. Mo e naa shin nɛ e ki Israɛl be ejuŋkparpo na.” ¹⁸Ndoŋ nna nɛ Sɔɔl yɔ Samuɛl kutɔ ashi kabunagboŋ na ekpa n ya bishi le: “Jande ŋini ma esa nɛ e bee wu asheŋ a kaŋɛ na be laŋ to.”

¹⁹Nɛ Samuɛl kaŋɛ le: “Ma nna na. Men ba nɛ an yɔ kakpa nɛ baa lara sarga na. Menyeeŋ tu ma n ji kabre, ama echefo kachipurso nɛ meeŋ kaŋɛ menyi kusɔ nɛ k wɔtɔ pɔɛŋ nɛ men baa yɔ. ²⁰Sa maŋ shin nɛ fo ekurma nɛ b foe nchɛ asa kikɛ ere bre be asheŋ e baa fɔŋ fo. B wu bumo. Wanɛ bre nɛ fee tama fanɛ Israɛl bee sha e ka ki bumo be ejuŋkparpo? Mannɛ fo nɛ fo kanaŋ a?”

²¹Ndoŋ nna nɛ Sɔɔl kaŋɛ mo le: “Bɛnjamin be yiri to ebi e la ma. Bumo e la yiri mo nɛ b maŋ shibi ashi Israɛl kikɛ to. Ma alɛ be laŋ to ebi nɛ b maa keni a bɔlɔ kenishi ashi anyi be yiri na to. Nɛ manɛ a ba nɛ fee malga ŋ kutɔ le?”

²²Nɛ Samuɛl keta Sɔɔl nɛ mbe kayɛrbi na n yɔ ejikpa be lambu to n ya shin nɛ b chena bunyaŋ be echenakpa, kakpa nɛ befɔ beeŋ wora fanɛ basa adesa daa tase a ji na. ²³Ndoŋ nna nɛ Samuɛl kaŋɛ edaŋɛpo na le: “Ta eblaŋ lela nɛ ŋ kaŋɛ fanɛ fo ta n yili ŋ kɔr na m ba.” ²⁴Nɛ edaŋɛpo na ta eblaŋ na m ba yili Sɔɔl be anishito. Nɛ Samuɛl kaŋɛ mo le: “Ade kikɛ la feya nna. N ta amo kikɛ nna n yili fo, amoso baa we. N tre befɔ ere kikɛ nna nɛ b ba tu fo n ji.”

Sɔɔl nɛ Samuɛl ka ji n loge, ²⁵nɛ b bɔla kakpa nɛ baa shuŋ Ebɔrɛ na m bɛta n yɔ kade to. Ndoŋ nna nɛ b nase kelaŋ n sa Sɔɔl kuchoŋi be esoso ashi Samuɛl be laŋ to, ²⁶nɛ e dese nɛ mo nɛ Samuɛl ber bare.

Samuɛl ka duga ŋku n do Sɔɔl so n ta mo ŋ ki ejuŋkparpo be asheŋ

Kare ka chɛ kachipurdidi, nɛ Samuɛl tre Sɔɔl kuchoŋi na so ŋ kaŋɛ mo le: “Koso, nɛ n shuŋi fo akpa.” Nɛ Sɔɔl koso nɛ mo nɛ Samuɛl bɛ abar so n lar. ²⁷B ka bee fo kade na be ekarso, nɛ Samuɛl kaŋɛ Sɔɔl le: “Kaŋɛ fo kayɛrbi na nɛ e juŋkpar anyi a yɔ.” Nɛ kayɛrbi na choŋ. Ndoŋ nna nɛ Samuɛl naŋ kaŋɛ Sɔɔl le: “Jo nfe gbrɛbi nɛ n wora ŋ kaŋɛ fo kusɔ nɛ Ebɔrɛ kaŋɛ ma.”

¹Ndoŋ nna nɛ Samuɛl ta ɔlif be ŋku kɔlbabi to n chulgi n wurge Sɔɔl be kumu so nseŋ chɔrɔ mo fanɛ kananɛ baa chɔrɔ ewura na ŋ kaŋɛ le: “Enyɛnpe Ebɔrɛ na e lara fo fanɛ mbe basa Israɛlebi be ejuŋkparpo. Feeŋ baa juŋkpar mbe basa a kuŋ bumo ashi bumo doŋana kikɛ kutɔ. Kusɔ nɛ ŋ kaŋɛ ere be tɔɔnɛ nɛ feeŋ wu nde: ²Fo baŋ lar ma kutɔ kabre a yɔ feeŋ ya tu benyɛn anyɔ ko a mata Reechel be nchaŋ nɛ k mata Zelza ashi Bɛnjamin be efuli so na. Baaŋ kaŋɛ fo fanɛ: B wu ekurma nɛ menyee fin na. Amoso naniere fo asheŋ e naa tir fo tuto nɛ e bee fɛ kananɛ e beeŋ wora n wu fo, mannɛ ekurma na bre.” ³Fo baŋ naŋ yili ndoŋ a yɔ, feeŋ ya tu kedibi gboŋgboŋi ko ashi Tabɔɔ, nseŋ wu benyɛn asa ko ka bee yɔ Bɛtɛl nɛ b ya bunyaŋ Ebɔrɛ. Bumo to be eko beeŋ juŋkpar mboefɔlbi asa, nɛ enyɔsopo na malɛ e sulɔ ebodobodo asa, nɛ esasopo na e sulɔ nsa belbelso deŋkeŋ be bɔlɔ. ⁴B baŋ chɔrɔ fo n loge, baaŋ sa fo ebodobodo na be anyɔ. B kaŋ sa fo amo, fo sɔ. ⁵Kumo be kaman nɛ fo yɔ Gibia, kakpa nɛ Filistiebi be benapo be keeyi to wɔ na. Fo baa luri kade na to, feeŋ tu anebiana be katuŋ ko nɛ b bɛ abar so n shi kakpa nɛ baa bunyaŋ Ebɔrɛ na a gbelge to a ba nɛ b juŋkpar bumo a laŋ ejaŋjilaŋ nɛ ŋkure nɛ egoji nsaa foŋ nlopi nɛ bumo alɛ bee wu asheŋ a kaŋɛ. ⁶Enyɛnpe Ebɔrɛ be kiyoyu be eleŋ beeŋ gbelge fo so epul to na to nɛ fo alɛ gba e tu bumo a wu asheŋ a kaŋɛ nsaa wora asheŋ nɛ fo daa maa wora. ⁷Le be etɔɔnɛsheŋ ere baŋ wora m bɔlɔ so, kumo ere fo wora kusɔ kama nɛ fee fɛ fanɛ k walɛ, ŋkpal manɛ so, Ebɔrɛ beeŋ baa juŋkpar fo. ⁸Juŋkpar ma a yɔ Gilgaal nɛ m ba tu fo ndoŋ n lara sarga chɔɔso nɛ kɔnɔkoŋwuleso be esarga. Ya jo ma ndoŋ bɔkwe nɛ m ba kaŋɛ fo kusɔ nɛ feeŋ wora.

⁹Sɔɔl ka yige Samuɛl a yɔ kumo be kamɔnchɛ na nɛ Ebɔrɛ sa Sɔɔl nfɛra popɔr, nɛ kusɔ kama nɛ Samuɛl kaŋɛ mo na bɔlɔ so. ¹⁰Sɔɔl nɛ mbe kayɛrbi ka fo Gibia, nɛ anebiana be katuŋ ko ba tu bumo epul to na to nɛ Ebɔrɛ be kiyoyu gbelge mo so eleŋso nɛ mo alɛ gba fara a wu asheŋ a kaŋɛ. ¹¹Basa nɛ b daa nyi mo dra na ka wu kusɔ nɛ e bee wora na, nɛ b bishi abar le: “Manɛ e kɔ Kish pibinyɛn ere? Sɔɔl malɛ naŋ ki anebi nna?” ¹²Nɛ kanyɛn ko nɛ e wɔ ndoŋ bishi le: “Kanaŋ mo bre to nɛ anebiana ere shi?” Nɛ k ki sara nɛ baa kaŋɛ le na: “Sɔɔl gba ki anebiana na be eko nna a?” ¹³Sɔɔl ka wora kewuŋkaŋɛ be asheŋ na n loge nɛ e dii kebee nɛ baa bunyaŋ Ebɔrɛ na so.

¹⁴Sɔɔl mo wɔpa ka wu mo nɛ mbe kayɛrbi na nɛ e bishi bumo le: “Nnɛ nɛ men yɔ?”

Nɛ Sɔɔl yɛ: “Ekurma nɛ an ya ka fin ama an ka fin bumo ŋ gben na nɛ an ya wu Samuɛl.”

¹⁵Nɛ Sɔɔl mo wɔpa naŋ bishi le: “Nɛ nuso nɛ e kaŋɛ menyi?”

¹⁶Nɛ Sɔɔl kaŋɛ: “E kaŋɛ anyi nna fanɛ b wu ekurma na, ama mo alɛ maŋ kaŋɛ mo wɔpa kananɛ Samuɛl yɛ e beeŋ ki ewura be asheŋ.”

B ka yɛ Sɔɔl beeŋ ki ewura be asheŋ

¹⁷Nɛ Samuɛl shin nɛ Israɛlebi na gbargbar abar ashi Mizpa n shuŋ Enyɛnpe Ebɔrɛ ndoŋ ¹⁸nɛ e kaŋɛ bumo fanɛ Enyɛnpe Israɛl be Ebɔrɛ na yɛ: “Ma e lara menyi ashi Ijipt be kasawule so nseŋ mɔlga menyi ashi Ijiptebi na be enɔ to nɛ bekama nɛ baa mɛaŋ menyi na kutɔ. ¹⁹Ma e la Ebɔrɛ nɛ e lara menyi ashi menyi be etɔrɔ nɛ awurfoŋ kikɛ to na, ama kabre men kini ma nseŋ kaŋɛ ma fanɛ n fin ewura n sa menyi. Amoso men yɔ n ya gbargbar abar yiriyiri so nɛ mbuna mbuna be ntuŋ so n yili ma anishito.”

²⁰Samuɛl ka shin nɛ Israɛl be yiri yiri na kikɛ bee lar a ba kebɛso kebɛso na, Bɛnjamin be yiri na nɛ Enyɛnpe Ebɔrɛ daŋ lara. ²¹Ndoŋ nna nɛ Samuɛl shin nɛ Bɛnjamin be kanaŋ na lar n yili mbuna mbuna so nɛ Ebɔrɛ lara Matri be kabuna ebi. Matri be kabuna be benyɛn na ka lar a ba kebɛso kebɛso na nɛ e lara Kish pibinyɛn Sɔɔl. Ama b ka bee fin mo, b daa maŋ wu mo. ²²Ndoŋ nna nɛ b bishi Enyɛnpe Ebɔrɛ le: “Esa ko kraŋ naa wɔtɔ a?”

Nɛ Enyɛnpe Ebɔrɛ kaŋɛ fanɛ Sɔɔl e ka, ama mo alɛ ŋana esulɔ na be kaman.

²³Nɛ basa na shile n ya fin Sɔɔl ŋ keta mo m ba nshɛr na to nseŋ wu fanɛ e do basa kama nɛ b daa wɔ ndoŋ nna kikɛ kumu. ²⁴Ndoŋ nna nɛ Samuɛl kaŋɛ basa na le: “Kanyɛn nɛ Enyɛnpe Ebɔrɛ lara nna na! Esa kama maŋ du fanɛ mo.”

Ndoŋ nna nɛ basa na kikɛ cha awɔr ŋ kaŋɛ le: “Ewura! Ebɔrɛ e sa fo ŋkpa tenteŋ!”

²⁵Nɛ Samuɛl bugi asheŋ to n sa bumo a yɔ kuwurji be kaplɛa so, nseŋ sibɛ kumo be mbra n nase kawɔl to n ya nase bɔrɛlambu to. Kumo be kaman nɛ e shin nɛ ekama yɔ epe. ²⁶Ndoŋ nna nɛ Ebɔrɛ malga n sa benapo lempo ko nɛ b ber ŋgbene n shuŋi Sɔɔl n yɔ Gibia. ²⁷Ama basa nɛ baa ku asheŋ na bre daŋ kaŋɛ le nna: “Nuso nɛ Sɔɔl malɛ beeŋ tiŋ m mɔlga anyi ashi anyi doŋana kutɔ?” B daa maa sha Sɔɔl ka ki bumo be ewura, ŋkpal loŋ so b daa maŋ bar mo kakɛ kikɛ. Ama Sɔɔl malɛ daa maŋ kaŋɛ shɛŋ.

Sɔɔl ka kɔ m pɔɔ Ammɔnebi so be asheŋ

¹Kede be kaman nɛ Ammɔnebi be ewura nɛ baa tre Nahaash na nɛ mbe benapo kre kena m ba kulti kade nɛ baa tre Jabesh nɛ k wɔ Giliad be efuli so na n wɔtɔ. Le nɛ basa nɛ b wɔ Jabesh na daŋ kaŋɛ ewura Nahaash: “Shin nɛ anyi nɛ fo e wora kɔnɔkoŋwule, saŋɛ na so, anyeeŋ ba wɔ fo kaseto nsaa ka lampo a sa fo.”

²Nɛ Nahaash kaŋɛ le: “Kusɔ koŋwule so nɛ meeŋ yili nɛ ma nɛ menyi e wora kɔnɔkoŋwule be ŋkre. Meeŋ chule men be ekama be jisoso be kenishi nɛ anishinyɔr e pɛ Israɛlebi na kikɛ.”

³Nɛ Jabesh be benimuana na kaŋɛ le: “Sa anyi nchɛnshunu nɛ an ta n shuŋi mbɔ anyi be basa nɛ b ka ashi Israɛl be kasawule so na kutɔ. Esa kama baa maŋ ba chɛ anyi to bre, kumo ere anyeeŋ shuli so n sa fo.”

⁴Mbɔ na ka ta baru na n yɔ Gibia nɛ k la Sɔɔl be kade to na n ya kaŋɛ bumo, nɛ Gibiaebi na kikɛ fara a shu awɔrso. ⁵K maŋ chɛr ko nɛ Sɔɔl shi ndɔ to m bɛ mbe ana dɔso so a ba m ba bishi bumo le: “Manɛ e wora a? Manɛ nna nɛ ekama bee shu loŋ?” Ndoŋ nna nɛ b kaŋɛ mo kusɔ nɛ mbɔ nɛ b shi Jabesh na ba kaŋɛ. ⁶Sɔɔl ka nu loŋ, nɛ Ebɔrɛ be kiyoyu gbelge mo so eleŋso nɛ e nya agbo ga ŋkpal kusɔ nɛ Nahaash kaŋɛ na so. ⁷Ndoŋ nna nɛ Sɔɔl mɔ ana dɔso na be anyɔ nseŋ kuya bumo to n ta eblaŋ na be eko n shuŋi mbɔ ŋ kaŋɛ bumo fanɛ b ta eblaŋ kuyatoso na n yɔ Israɛl be efuli so kikɛ n ya kpele bumo kusoe ŋ kaŋɛ le: “Esa kama nɛ e baa maŋ bɛ Sɔɔl nɛ Samuɛl so n yɔ kena to, le nɛ amodoŋwura gba be ana beeŋ ki na!”

Ndoŋ nna nɛ Enyɛnpe Ebɔrɛ shin nɛ kufu tɔr Israɛl be basa na so ga nɛ bumo kikɛ gbargbar abar so. ⁸Sɔɔl daŋ shin nna nɛ bumo kikɛ gbargbar ashi Bɛzɛk. Bumo nɛ b daŋ shi Israɛl daa la basa ŋgboŋ alfa asa, nɛ basa ŋgboŋ adesa malɛ daŋ shi Juda. ⁹Ndoŋ nna nɛ b kaŋɛ mbɔ nɛ b shi Jabesh na le: “Men kaŋɛ menyi be basa fanɛ pɔɛŋ nɛ kapa e fo echefo anyeeŋ mɔlga bumo.” Jabesh be basa ka nu loŋ be baru na nɛ bumo be ŋgbene fuli bumo ga. ¹⁰Nɛ b kaŋɛ Nahaash le: “Echefo anyeeŋ shuli so n sa fo, saŋɛ na so feeŋ wora anyi kusɔ kama nɛ k par fo.”

¹¹Kumo be ŋklade nɛ Sɔɔl barga mbe basa na to ntuŋ asa nseŋ ta kena n ya tu bumo doŋana Ammɔnebi na ashi bumo be keeyi to kachipurdidi na. Israɛlebi na daŋ mɔ Ammɔnebi na nna hale n ya fo kapaso. Bumo be bumo nɛ b daa maŋ nya m mɔ na malɛ daŋ pesaŋ to nna nɛ bumo be basa anyɔ kama daŋ maŋ naa wɔ abar so.

¹²Ndoŋ nna nɛ Israɛl be basa na kaŋɛ Samuɛl le: “Nnɛ nɛ basa nɛ b kaŋɛ fanɛ Sɔɔl e sa maa la anyi be ewura na wɔ? Men bar bumo m ba sa anyi nɛ an mɔ!”

¹³Ama le nɛ Sɔɔl bre daŋ kaŋɛ: “B maaŋ mɔ esa kama kabre ŋkpal manɛ so le be kachɛ ere nɛ Enyɛnpe Ebɔrɛ ta m mɔlga Israɛl be basa.” ¹⁴Nɛ Samuɛl kaŋɛ bumo le: “Men shin nɛ an kikɛ e yɔ Gilgaal n naŋ ya lɔŋɛ ŋ kaŋɛ fanɛ Sɔɔl e la anyi be ewura.” ¹⁵Ndoŋ nna nɛ bumo kikɛ yɔ Gilgaal be kakpa nɛ baa bunyaŋ Ebɔrɛ na n ya yili kumo fanɛ Sɔɔl e la bumo be ewura. Kumo be kaman nɛ b lara kɔnɔkoŋwuleso be esarga ndoŋ nseŋ ji eyur ndoŋ ga.

Samuɛl be ŋkla be kamalga be asheŋ

¹Ndoŋ nɛ Samuɛl kaŋɛ Israɛl be basa na kikɛ le: “Kusɔ nɛ menyee sha na, naniere bre n wora kumo n sa menyi. N sa menyi ewura mo nɛ e beeŋ baa juŋkpar menyi. ²Men gbagba ere wu kananɛ n juŋkpar menyi saŋɛ so nɛ n la kabrantiɛ na kikɛ. Naniere bre m bel nɛ ma emin malɛ gba fuli. Ma mbinyɛnsobi gba ki benimu. Naniere k daga men ka keni kananɛ menyi be ewura na beeŋ ba keni menyi so. ³Ma e yili nfe na. Nɛ n wora kusɔ ko ŋ gbɛ to nna, kumo ere men kaŋɛ kulubi nɛ n wora na ashi Enyɛnpe Ebɔrɛ nɛ mbe ewura laraso na kikɛ be anishito. Wanɛ be kena ŋko kurma nɛ n daŋ suge? Wanɛ nɛ n daŋ puni ŋko m mɛaŋ? Wanɛ kutɔ nɛ n daŋ sɔ brɔbu? Nɛ fanɛ n wora asɔ ere be kekama nna, kumo ere meeŋ ka kumo be kukɔ.”

⁴Ndoŋ nna nɛ basa na kaŋɛ le: “M-m, fo maŋ puni anyi, fo alɛ maŋ naŋ mɛaŋ anyi; fo alɛ maŋ suge anyi be shɛŋ.”

⁵Nɛ Samuɛl kaŋɛ basa na le: “Enyɛnpe Ebɔrɛ nɛ mbe ewura laraso na e la ma eshɛdajipo fanɛ men maŋ wu kulubi kikɛ ma so.”

Nɛ bumo alɛ kaŋɛ le: “Mm, Enyɛnpe Ebɔrɛ na e la anyi be shɛdajipo.”

⁶Nɛ Samuɛl kaŋɛ bumo le: “Enyɛnpe Ebɔrɛ na e lara Mosis nɛ Ɛɛrɔn nseŋ lara men nananyɛnana ashi Ijipt be efuli so dra dra na. ⁷Naniere men yili nfe nɛ n nyiŋi menyi asheŋ tumase nɛ Enyɛnpe Ebɔrɛ wora nɛ kananɛ e mɔlga menyi nɛ men nananyɛnana na. ⁸Jeekɔb nɛ mbe laŋ to ebi ka daŋ yɔ Ijipt be kasawule so na, Ijiptebi na daa mɛaŋ bumo nna nɛ b shu ŋ ŋini Enyɛnpe Ebɔrɛ fanɛ e chɛ bumo to. Ndoŋ nna nɛ e shuŋi Mosis nɛ Ɛɛrɔn nɛ b ya lara bumo Ijipt be kasawule so m ba kasawule ere so. ⁹Ama ŋkpal Israɛlebi na ka daŋ kini kenu n sa Enyɛnpe Ebɔrɛ so, E daŋ sa Filistiebi na nɛ Mowab be ewura nɛ Sisɛra nɛ e la Heezɔ be kade be benapo be enimu na ekpa nna nɛ b kɔ m pɔɔ bumo so.” ¹⁰Ndoŋ nna nɛ b naŋ shu n tre Enyɛnpe Ebɔrɛ ŋ kaŋɛ le: “An wora kulubi ŋkpal an ka kini keshuŋ fo Enyɛnpe Ebɔrɛ na nsaa shuŋ agbir nɛ baa tre Baal nɛ kegbirche Ashtɔrɛf na so so. Mɔlga anyi ashi an doŋana kutɔ saŋɛ na so anyeeŋ shuŋ fo!” ¹¹Nɛ Enyɛnpe Ebɔrɛ shuŋi Gidiɔn nɛ Barak nɛ Jɛfta nɛ ma, nɛ an mɔlga menyi ashi men doŋana kutɔ nɛ men nya menyi be amu. ¹²Ama men ka wu Nahaash nɛ e la Ammɔn be ewura na ka bee ba nɛ e ba kɔ menyi na, nɛ men kini Enyɛnpe Ebɔrɛ na fanɛ menyi be ewura nsaa fin menyi gbagba be ewura nɛ e beeŋ baa juŋkpar menyi.

¹³Ewura nɛ men lara na nde. “Menyi e kule fanɛ menyee sha ewura nɛ Enyɛnpe Ebɔrɛ lara mo n sa menyi. ¹⁴Nɛ fanɛ menyi nɛ men be ewura bee bunyaŋ Enyɛnpe Ebɔrɛ nna nsaa shuŋ mo a nu a sa mo nsaa bɛ mbe mmalga naseso so bre, asheŋ beeŋ nyalɛ n sa menyi. ¹⁵Ama nɛ men baa maa nu a sa Enyɛnpe Ebɔrɛ na nsaa kplaŋ mbe mbra so bre, e beeŋ lara kenishi n yuu menyi nɛ men be ewura fanɛ kananɛ e daŋ wora men nananyɛnana na dra na. ¹⁶Amoso men baa yil to kakpa nseŋ keni kusɔ nɛ Enyɛnpe Ebɔrɛ be eleŋ beeŋ wora. ¹⁷Mannɛ ketarso nde a? Meeŋ kule Enyɛnpe Ebɔrɛ nɛ e shin nɛ bɔrɛ e ba nseŋ ponte eleŋso. Le be kesheŋ kaŋ wora na, nɛ menyeeŋ pin men ka wora kulubi gboŋgboŋi ŋ gbiti Enyɛnpe Ebɔrɛ, ŋkpal men ka kule mo fanɛ e sa menyi ewura so.”

¹⁸Ndoŋ nna nɛ Samuɛl kule Enyɛnpe Ebɔrɛ nɛ e shin nɛ bɔrɛ ba nseŋ ponte eleŋso kumo be kamɔnchɛ na kikɛ. Nɛ basa na kikɛ fara a ŋana Enyɛnpe Ebɔrɛ nɛ Samuɛl.

¹⁹Ndoŋ nna nɛ b kaŋɛ Samuɛl le: “Jande kule Enyɛnpe fo Ebɔrɛ na n sa anyi, saŋɛ na so anyi maaŋ wu. Naniere an pin fanɛ anyi be alubi nɛ an wora na kikɛ be kaman, anyi be kekaŋɛ fanɛ anyee sha ewura na gba la kulubi nna.”

²⁰Ndoŋ nna nɛ Samuɛl kaŋɛ le: “Men sa maa lɔ kufu. Kashenteŋ nna fanɛ men wora kulubi, ama amo na amo kikɛ, men sa maŋ lar Enyɛnpe Ebɔrɛ na kaman ama men ta menyi be ŋgbene kikɛ a shuŋ mo. ²¹Men sa maa shuŋ agbir, ŋkpal manɛ so, a maaŋ tiŋ n chɛ menyi to ŋko m mɔlga menyi. Agbir la asɔ fuloŋ nna. ²²Ebɔrɛ na e lara menyi fanɛ mo gbagba be basa. Ŋkpal mbe ketre ka shibi so, e maaŋ yige menyi kikɛ. ²³Nɛ m baŋ yige kebaakule Ebɔrɛ a sa menyi, kumo ere Enyɛnpe Ebɔrɛ na nɛ m maŋ wora kasonu na. Meeŋ ŋini menyi kusɔ nɛ k daga fanɛ men baa wora. ²⁴Men baa nu a sa Enyɛnpe Ebɔrɛ na nsaa ta menyi be ŋgbene kikɛ a shuŋ mo nsaa nyiŋi asheŋgboŋ damta nɛ e wora n sa menyi na. ²⁵Ama nɛ fanɛ men kraŋ baa wɔtɔ a wora alubi bre, Enyɛnpe Ebɔrɛ na beeŋ mur menyi nɛ men be ewura kikɛ.”

Israɛlebi ka kɔ Filistiebi na kena be asheŋ

¹Sɔɔl daa la nfɛ adesa nna nseŋ ba ki Ewura. E daŋ ji Israɛl be kuwura nfɛ adena nɛ anyɔ nna. ²Kachako nɛ Sɔɔl lara Israɛl be benyɛn ŋgboŋ asa nɛ b ki mbe benapo. Benapo na be ŋgboŋ anyɔ daa wɔ mo kutɔ nna ashi abee nɛ a kulti Mikmash nɛ Bɛtɛl na, nɛ kagboŋ koŋwule malɛ daa wɔ Jonatan kutɔ ashi Gibia nɛ k wɔ Bɛnjamin be efuli so na, nɛ e shin bumo nɛ b ka na yɔ epe.

³Nɛ Jonatan be benapo yɔ n ya kɔ Filistiebi be benapo ashi Gɛba, nɛ Filistiebi na kikɛ nu kumo be asheŋ. Ndoŋ nna nɛ Sɔɔl shuŋi mbɔ fanɛ b nite efuli na so kikɛ n foŋ kabel ŋ kaŋɛ basa kusɔ nɛ k wora. ⁴Nɛ mbɔ na kaŋɛ Israɛl be basa le: “Sɔɔl mɔ Filistiebi be benapo be enimu na ashi Gɛba nɛ Israɛlebi be asheŋ pɛ Filistiebi na agbo ga, amoso k daga fanɛ kade kikɛ ka lara benapo nɛ b ya ti Sɔɔl be benapo so ashi Gilgaal.”

⁵Ndoŋ nna nɛ Filistiebi na tre bumo be benapo m ba shɛr abar so nɛ b kɔ Israɛlebi kena. B daa kɔ egbaŋɛturko ŋgboŋ asa nɛ egbaŋɛdiipoana ŋgboŋ ashe nɛ bumo be benapo nɛ b na aya so malɛ daa shi fanɛ teku ase be leele. Nɛ b ya wora bumo be keeyi to ashi Mikmash nɛ k wɔ Bɛf Avɛn be epeŋilarkpa be kaba so na. ⁶Ndoŋ nɛ b yili ŋ kre kena m ba kɔ Israɛlebi na n shin nɛ ebɔl lar bumo. Nɛ Israɛl be benapo ko shile n ya ŋana abeelaŋ to nɛ beko malɛ ya ŋana amaŋ to nɛ abee to nɛ ajanmaŋ to nɛ atirbu nɛ a maŋ kɔ nchu to; ⁷nɛ beko malɛ dii Jɔɔdan be Lɔr na n yɔ Gad nɛ Giliad be efuliana so.

Sɔɔl bre daa wɔ Gilgaal nna, nɛ benapo nɛ mo nɛ bumo daa wɔ ndoŋ na daa chicha kufuso. ⁸Nchɛnshunu nɛ Samuɛl kaŋɛ Sɔɔl fanɛ e jo nɛ e ba, ama Samuɛl malɛ daa maŋ nya manaŋ m ba Gilgaal, nɛ benapo na fara a shile Sɔɔl kutɔ. ⁹Ndoŋ nna nɛ Sɔɔl kaŋɛ benapo na le: “Men ta asɔbɔya nɛ meeŋ ta n lara sarga chɔɔso nɛ amo nɛ meeŋ ta n lara kɔnɔkoŋwule be sarga na m bar ma.” Nɛ b ta amo m ba sa mo nɛ e lara sarga chɔɔso n sa Enyɛnpe Ebɔrɛ. ¹⁰E baa lara sarga chɔɔso na nna a loge nɛ Samuɛl nde. Nɛ Sɔɔl shɛr mo to n wora mo ansaŋ nɛ keba.

¹¹Nɛ Samuɛl bishi mo le: “Manɛ nɛ fo wora ere?”

Nɛ Sɔɔl kaŋɛ: “Ma benapo na bee pesaŋ to nna a yɔ, fo alɛ maŋ ba saŋɛ nɛ k daga fanɛ fo ba na. Kumo be kaman Filistiebi na bee gama abar nna ashi Mikmash. ¹²Ndoŋ nna nɛ n fɛ fanɛ Filistiebi na beeŋ ba kɔ ma kena ashi Gilgaal. Ma alɛ daa maŋ lara sarga kikɛ a fin kechɛto ashi Enyɛnpe Ebɔrɛ kutɔ, amoso nɛ n fɛ fanɛ k daga fanɛ n lara sarga na.”

¹³Ndoŋ nna nɛ Samuɛl kaŋɛ mo le: “Fo wora kawulisheŋ ga. Fo maŋ bɛ kenishipere be mmalga nɛ Enyɛnpe fo Ebɔrɛ na kaŋɛ fo na so. Fo daŋ bɛ amo so nna e daa beeŋ shin nɛ fo nɛ fo kaman to ebi e baa ji Israɛl be kuwura mbaanaayɔ. ¹⁴Ama ŋkpal fo ka kini kenu n sa Enyɛnpe Ebɔrɛ so nɛ e yɛ e maaŋ naŋ lara fo kanaŋ to be esa kikɛ nɛ e ki Israɛl be ewura na. E teŋ lara mo gbagba be kepar be esa nɛ e beeŋ baa la mbe basa be ewura.”

¹⁵Kumo be kaman nɛ Samuɛl lar Gilgaal m pɛ mbe ekpa n choŋ. Ndoŋ nna nɛ basa na be beko bɛ Sɔɔl so n ya ti benapo nɛ b ka na so. Gilgaal nɛ b daŋ fara n nite hale n ya fo Gibia nɛ k wɔ Bɛnjamin be efuli so na. Sɔɔl ka karga benapo nɛ b ka na, b daa wɔ basa alfa ashe.

¹⁶Sɔɔl nɛ mo pibinyɛn Jonatan nɛ bumo be benapo daŋ yɔ bumo be keeyi to ashi Gɛba nɛ k wɔ Bɛnjamin be efuli so na nna. Ama Filisti be benapo na bre be keeyi to daa wɔ Mikmash nna. ¹⁷Filisti be benapo nɛ baa ta kena a purgi basa a suge bumo be asɔ na daŋ barga bumo amu to ntuŋ asa nna n lar bumo be keeyi to. Ntuŋ na be kuko daŋ bɔla Ɔfra ashi Shuwal be efuli so nna. ¹⁸Nɛ kuko bɔla Bɛf Hɔrɔn be kaba so nɛ katuŋ nɛ k ka na malɛ bɔla Zeboyim be ketaŋɛ na be kaba nɛ k dese n shoŋi keshishɛrsawule na be ekarso be kaba so na.

¹⁹Filisti be ebɔyɛpo na daa maa shin nɛ Israɛlebi na bee koya kananɛ baa bɛl etokobi nɛ akpa, saŋɛ na so Israɛlebi na maaŋ baa lɔŋɛ amo. ²⁰Filistiebi na kutɔ nɛ Israɛlebi na daa ya ka yee bumo be ana dɔso be ntekpa be nnɔ nɛ bumo be ntɔkɔrɔ nɛ akpanfu nɛ eloji kikɛ be nnɔ. ²¹Filistiebi daa sɔ Israɛlebi amansherbi damta nna pɔɛŋ nsaa yee bumo be akpanfu nɛ ana dɔso be ntekpa nɛ ntɔkɔrɔ ŋko a lɔŋɛ anyembi nɛ baa ta a da ana dɔso a shin nɛ a bee nite na.

²²Amoso Israɛl be benapo na be ekama daa maa keta tokobi ŋko kekpa a yɔ kena to, she Sɔɔl nɛ mo pibinyɛn Jonatan nawule. ²³Ndoŋ nna nɛ Filistiebi na shuŋi benapo be katuŋ ko fanɛ b yɔ Mikmash n ya kuŋ ekpa nɛ k dese m bɔla abee na to na.

Jonatan ka kɔ Filistiebi na kena be asheŋ

¹Kachako nɛ Sɔɔl pibinyɛn Jonatan kaŋɛ kabrantiɛbia nɛ e bee sulɔ mbe akɔsɔ na le: “Shin nɛ an yɔ Filistiebi be benapo na be keeyi to.” Ama Jonatan malɛ daa maŋ kaŋɛ mo tuto Sɔɔl kumo be asheŋ, ²Sɔɔl be benapo alfa ashe na daa wɔ mbe keeyi to ashi kedibi nɛ k duli kokotiko na be kifito ashi Migrɔn nɛ kumo nɛ Gibia daa maŋ wɔ kufɔ ko na nna. ³Ahija nɛ e daa la bɔrɛmatapo na gba daa wɔ ndoŋ. Mo e daa buu kale lela nɛ baa tre Ɛfɔd na nɛ bɔrɛmatapo nimuso bee buu a bishi kusɔ nɛ Ebɔrɛ bee sha na. Ahija mo tuto e daa la Ahitub nɛ mo tuto mo da malɛ daa la Ikabod. Ahitub malɛ mo tuto e daa la Finihas nɛ Finihas malɛ mo tuto daa la Eli mo nɛ e daa la Enyɛnpe Ebɔrɛ be bɔrɛmatapo ashi Shilo na. Bumo alɛ be ekama daa maŋ nyi fanɛ Jonatan lar ndoŋ.

⁴Ajembu gboŋgboŋi anyɔ ko daa wɔ ekpa nɛ k bɔla kebee na ase nɛ Jonatan daŋ bɔla n yɔ kakpa nɛ Filistiebi be benapo na wɔ na nna. Ajembu na be kumo nɛ baa tre Bozɛz na daa dese ekpa na be kaba ko nna nɛ kumo nɛ baa tre Sene na malɛ dese kaba ko. ⁵Ajembu gboŋgboŋi na be kuko daa yil kebee na be kelargato be esoso be kaba so nna a shoŋi Mikmash, nɛ kuko malɛ wɔ kelargato be kaseto nsaa shoŋi Gɛba be kaba so.

⁶Nɛ Jonatan kaŋɛ kabrantiɛbia nɛ e bee sulɔ mbe akɔsɔ na le: “Ba nɛ an yɔ Filistiebi, nnyamase na, be keeyi to. Ashere Enyɛnpe Ebɔrɛ na beeŋ chɛ anyi to. Nɛ e baŋ shuli fanɛ e beeŋ chɛ anyi to nɛ an kɔ m pɔɔ so bre, shɛŋ shɛŋ maaŋ tiŋ ŋ kuŋ mo ekpa. K maŋ tir fanɛ an shibi ŋko anyi maŋ shibi.”

⁷Nɛ kabrantiɛbia na kaŋɛ le: “Wora kusɔ kama nɛ fee sha. M bɛ fo so nɛ ma kagbene kikɛ.”

⁸Ndoŋ nna nɛ Jonatan malɛ kaŋɛ le: “Anyeeŋ dii n yɔ kakpa nɛ Filistiebi na beeŋ wu anyi. ⁹Nɛ b baŋ kaŋɛ fanɛ an yili kakpa nɛ an wɔ na a jo bumo bre, kumo ere anyeeŋ yili ndoŋ a jo bumo. ¹⁰Ama nɛ b baŋ kaŋɛ fanɛ an ba bumo kutɔ bre, anyeeŋ yɔ, ŋkpal manɛ so, kumo be loŋ e naaŋ ŋini fanɛ Enyɛnpe Ebɔrɛ na beeŋ shin nɛ an kɔ m pɔɔ bumo so.”

¹¹Ndoŋ nna nɛ b shin nɛ Filistiebi na wu bumo nseŋ kaŋɛ le: “Men keni Israɛlebi na ka lar amaŋ nɛ b daŋ ŋana amo to na a ba.” ¹²Kumo be kaman nɛ Filistiebi ponte ŋ kaŋɛ Jonatan nɛ kabrantiɛbia na le: “Men dii a ba nfe nɛ an ŋini menyi fanɛ durnya ere wɔ anyɔ!”

Nɛ Jonatan kaŋɛ kabrantiɛbia na le: “Bɛ ma so, Enyɛnpe Ebɔrɛ na beeŋ shin nɛ an kɔ m pɔɔ so.” ¹³Jonatan daŋ gbeye mbe enɔana nɛ mbe amuli so nna n yɔ kebee na be esoso nɛ kabrantiɛbia na malɛ bɛ mo so. B ka dii n yɔ kebee na be esoso na, nɛ Jonatan mɔ Filistiebi be benapo nɛ b wɔ anishito a kɔ mo na, nɛ kabrantiɛbia na malɛ mɔ bumo nɛ b wɔ kaman a kɔ mo na. ¹⁴Pɔɛŋ nɛ Jonatan nɛ kabrantiɛbia nɛ e bee sulɔ mbe akɔsɔ na nite fanɛ ateŋgreŋ kalfa nɛ b teŋ mɔ Filistiebi na be benapo adunyɔ ashi sososo be kena nɛ b kɔ na to. ¹⁵Ndoŋ nna nɛ kufu pɛ Filisti be benapo na ga. Bumo nɛ b wɔ keeyi na to na nɛ bumo nɛ b wɔ kade na be kupuŋ to na gba nɛ benapo nɛ baa ta kena a purgi basa na nɛ benapo nɛ b wɔ anishito a kuŋ keeyi na kikɛ daa chicha kufuso nna, nɛ Ebɔrɛ shin nɛ kasawule gbuŋgbuŋ nɛ keyeŋiyeŋi tɔr bumo so.

Israɛlebi ka pɔɔ Filistiebi so be asheŋ

¹⁶Sɔɔl be benapo nɛ b wɔ Gibia na k wɔ Bɛnjamin be kasawule so a dara bumo doŋana na, daŋ wu Filisti be benapo na ka bee shile a yɛla kenishi to kaplɛkama. ¹⁷Ndoŋ nna nɛ Sɔɔl kaŋɛ mbe benapo na le: “Men karga benapo na ŋ keni bumo e maŋ wɔtɔ!” B ka karga bumo nɛ b wu fanɛ Jonatan nɛ kabrantiɛbia nɛ e bee sulɔ mbe akɔsɔ na e maŋ wɔtɔ. ¹⁸Ndoŋ nna nɛ Sɔɔl kaŋɛ Ahija nɛ e daa la bɔrɛmatapo na le: “Ba nɛ an bishi Ebɔrɛ kusɔ nɛ e bee sha fanɛ an wora.” ¹⁹Saŋɛ nɛ Sɔɔl bee malga bɔrɛmatapo na kutɔ na nɛ kebagato nɛ k wɔ Filistiebi na be keeyi to na bee wora keshi a ti so. Ndoŋ nna nɛ Sɔɔl kaŋɛ le: “Yige, ŋkpal manɛ so saŋɛ maŋ naa wɔtɔ nɛ fo bishi Enyɛnpe Ebɔrɛ kusɔ nɛ anyeeŋ wora.”

²⁰Kumo be kaman nɛ Sɔɔl nya manaŋ n tre mbe benapo m ba abar so nɛ b yɔ Filistiebi na be keeyi to nɛ b ya kɔ bumo kena, ama b ka yɔ nɛ kebagato tɔr Filistiebi na so nɛ bumo gbagba kilgi a mɔ abar. ²¹Israɛlebi na be benapo ko nɛ Filistiebi na daŋ haya fanɛ b chɛ bumo to ŋ kɔ na gba daŋ naŋ kilgi nna n ya ti Sɔɔl nɛ Jonatan so a kɔ Filistiebi na. ²²Israɛlebi damta nɛ b daŋ ŋana abee nɛ a wɔ Efrayim be efuli so na ka nu fanɛ Filistiebi na bee shile na, nɛ b lar kakpa nɛ b ŋana na m ba chɛ to a ju Filistiebi na kenishipereso. ²³B daŋ kɔ bumo kena hale n ya choŋ Bɛf Avɛn so. Kumo be kamɔnchɛ nɛ Enyɛnpe Ebɔrɛ mɔlga Israɛlebi na.

Asɔ nɛ a wora kena na be kaman be asheŋ

²⁴Akoŋ daŋ mɔ Israɛlebi be benapo na nna nɛ b bɛlɛ ŋkpal Sɔɔl ka daŋ bɔ ntaŋ ŋ kaŋɛ le so: “Kɔnɔsho e baa wɔ ekama nɛ e beeŋ ji ajibi pɔɛŋ nɛ n wora ma doŋana n tal to so.” Ŋkpal loŋ so esa kama daa maŋ ji shɛŋ kumo be kamɔnchɛ. ²⁵Benapo na kikɛ ka nite m ba luri kupo ko to nɛ b wu mushoŋ ka bee chise a do kasawule. ²⁶Mushoŋ na daŋ baa chise ndibi so nna a do kasawule, ama ekama malɛ daa maŋ ji amo ŋkpal b ka daa ŋana fanɛ Sɔɔl be kɔnɔsho na beeŋ pɛ bumo so. ²⁷Jonatan bre daa maŋ wɔ ndoŋ n nu kananɛ mo tuto bɔ ntaŋ na, amoso e daŋ ta mbe kekpabi nɛ e daŋ keta na be kɔnɔso nna n nyɔ mushoŋ na to n ji. E ka baŋ wora loŋ nɛ mbe anishito saŋɛ mo. ²⁸Ndoŋ nna nɛ benapo na be eko kaŋɛ mo le: “Akoŋ mɔ anyi kikɛ nna nɛ an bɛlɛ ŋkpal fo tuto ka kaŋɛ fanɛ, kɔnɔsho e baa wɔ ekama nɛ e beeŋ ji ajibi kabre so.”

²⁹Nɛ Jonatan kaŋɛ le: “Nuso be asheŋ nɛ n tuto bar m ba sa anyi be basa le! Ma ere ka baŋ ji mushoŋ na gbrɛbi nɛ n naaŋ nya eleŋ! ³⁰Nɛ fanɛ an be basa daŋ ji ajibi nɛ Filistiebi na yige n shile na nna bre, dafanɛ Filistiebi nɛ an daa beeŋ mɔ na daa beeŋ ba shi ga!”

³¹Ta n ya ka fo kaaseso be jemanɛ nɛ Israɛl be benapo na kikɛ gben ga ŋkpal b ka fara Mikmash a mɔ Filistiebi na hale n ya fo Aijalɔn so. ³²Amoso b daŋ shile nna n ya kaa mɔ mbolpɔ nɛ ana nɛ anabi nɛ b kɔ Filistiebi m pɔɔ so n suge na epul to ndoŋ a kuya amo to a we amo nɛ ŋklaŋ. ³³Nɛ esa ko kaŋɛ Sɔɔl le: “Keni basa na bee wora alubi a gbiti Enyɛnpe Ebɔrɛ na nna ŋkpal b ka bee we eblaŋ nɛ a kɔ ŋklaŋ amo to so.”

Nɛ Sɔɔl kaŋɛ kenishipereso le: “Kashenteŋ nɛ fo ji, b wora n da Enyɛnpe Ebɔrɛ so nna na. Men gbelti kejembu gboŋgboŋi m ba nfe manaŋ m ba sa ma.” ³⁴Kumo be kaman nɛ Sɔɔl kaŋɛ le: “Ya kaŋɛ basa na kikɛ nɛ b ta bumo be ana nɛ mbolpɔ na m ba nfe.” K daga fanɛ b mɔ amo n we nfe a chɔ kebaawe amo nɛ ŋklaŋ nsaa wora alubi a gbiti Enyɛnpe Ebɔrɛ. Amoso bumo kikɛ daŋ bar bumo be ana kanyɛso na nna m ba mɔ amo ndoŋ. ³⁵Nɛ Sɔɔl pɔr bɔrɛsure n sa Enyɛnpe Ebɔrɛ ndoŋ. Kumo e daa la bɔrɛsure sososo mo nɛ e pɔr.

³⁶Kumo be kaman nɛ Sɔɔl kaŋɛ le: “Men shin nɛ an ya kɔ Filistiebi na kanyɛ ere kikɛ hale n ya fo karechɛso m mɔ bumo kikɛ nseŋ muu bumo be asɔ kikɛ.”

Ndoŋ nna nɛ b kaŋɛ le: “Anyeeŋ wora kusɔ kama nɛ fee sha.”

Nɛ bɔrɛmatapo Ahija malɛ kaŋɛ le: “Men shin nɛ an bishi Ebɔrɛ kusɔ nɛ anyeeŋ wora.”

³⁷Nɛ Sɔɔl bishi Ebɔrɛ le: “N naaŋ ya kɔ Filistiebi na kena a? Feeŋ shin nɛ an kɔ m pɔɔ bumo so a?” Ama kumo be kamɔnchɛ na Ebɔrɛ daŋ maŋ kaŋɛ bumo shɛŋ. ³⁸Ndoŋ nna nɛ Sɔɔl tre mbe benapo be benimu ŋ kaŋɛ bumo le: “Men shin nɛ an lege to n fin kulubi nɛ k wɔ anyi to kabre nɛ Ebɔrɛ kpal kumo so ŋ kini ketuge anyi ere. ³⁹Ŋkpal Enyɛnpe Ebɔrɛ nɛ e bee shin nɛ Israɛlebi bee kɔ a pɔɔ so na ka la ma shɛdajipo so, esa kama nɛ e wora kulubi daga luwu nna, hale nɛ k ba fanɛ m pibinyɛn Jonatan gba e wora kumo.” Ama esa kama daa maŋ kaŋɛ shɛŋ. ⁴⁰Kumo be kaman nɛ Sɔɔl kaŋɛ Israɛlebi be benapo na kikɛ le: “Men kikɛ e ya yili ndoŋ ere nɛ ma alɛ nɛ Jonatan e ya yili nfe ere.”

Nɛ bumo kikɛ shuli so.

⁴¹Nɛ Sɔɔl kule Enyɛnpe Israɛl be Ebɔrɛ na ŋ kaŋɛ le: “Enyɛnpe, manɛ nna nɛ fo maŋ tuge ma kabre? Jande ŋini anyi esa nɛ e wora kulubi. Nɛ ma nɛ m pibinyɛn Jonatan e wora kulubi ŋko fo basa Israɛlebi na e wora kulubi, fo kaŋɛ anyi.” Nɛ bɔrɛmatapo na bishi Ebɔrɛ nseŋ wu fanɛ kulubi na shi Jonatan ŋko Sɔɔl kutɔ nna. ⁴²Ndoŋ nna nɛ Sɔɔl kaŋɛ bɔrɛmatapo na le: “Bishi Ebɔrɛ, ma nɛ m pibinyɛn Jonatan be emo nɛ e wora kulubi na.” Nɛ k tɔr Jonatan so. ⁴³Nɛ Sɔɔl Kaŋɛ Jonatan le: “Kaŋɛ ma kusɔ nɛ fo wora.”

Nɛ Jonatan yɛ: “N ta ma kekpabi nna n nyɔ mushoŋ to gbrɛbi n ji; nɛ kumo so nɛ k daga fanɛ n wu bre, kumo ere ma nde.”

⁴⁴Nɛ Sɔɔl kaŋɛ Jonatan le: “Nɛ fo baa maŋ wu bre, kumo ere Ebɔrɛ e mɔ ma.”

⁴⁵Ama le nɛ basa na daŋ kaŋɛ Sɔɔl: “Jonatan nɛ e kɔ kena m pɔɔ so n sa Israɛl be efuli ere e daga luwu a? Loŋ maaŋ wora kikɛ, ŋkpal manɛ so, an teŋ nase kɔnɔ Enyɛnpe Ebɔrɛ nɛ e la anyi be shɛdajipo na be anishito fanɛ Jonatan be kemin gba maaŋ tia, ŋkpal manɛ so, Ebɔrɛ e chɛ mo to nɛ e wora kusɔ nɛ e wora kabre ere.” Amoso basa na e daŋ mɔlga Jonatan nɛ e maŋ luri luwu to.

⁴⁶Kumo be kaman nɛ Sɔɔl yige kebaaju a buu Filistiebi na so; nɛ Filistiebi na bɛta n yɔ bumo be efuli so.

Sɔɔl be kuwurji nɛ mbe kaman to ebi be asheŋ

⁴⁷Saŋɛ nɛ Sɔɔl daa ji kuwura ashi Israɛl be efuli so na, e daŋ yɔ kaplɛkama nɛ mo doŋana wɔ nna n ya kɔ bumo kena. Mo doŋana e daa la Mowab be basa nɛ Ammɔn nɛ Edɔm be basa nɛ Zoba be bewura nɛ Filistiebi. Kaplɛkama malɛ nɛ e daŋ kɔ kena, e daŋ pɔɔ so nna. ⁴⁸E daŋ kɔ kena kenyɛnso nna ga hale m pɔɔ Amalɛk be basa so. Mo e daŋ mɔlga Israɛl be basa ashi basa nɛ baa ta kena a purgi basa a suge bumo be asɔ na kutɔ.

⁴⁹Sɔɔl be mbinyɛnsobi e daa la Jonatan nɛ Ishvi nɛ Malkishuwa. Mo pibiche nimuso be ketre e daa la Mɛrab nɛ ekekarso malɛ be ketre daa la Mikaal. ⁵⁰Mbe eche e daa la Ahinɔam nɛ e la Ahimaaz pibiche na. Mbe benapo be enimu malɛ e daa la mo tutokar Neer pibinyɛn Abna. ⁵¹Sɔɔl mo tuto Kish nɛ Abna malɛ mo tuto Neer kikɛ daa la Abiɛl be mbinyɛnsobi nna.

⁵²Sɔɔl ka daa wɔ ŋkpa to na, mo nɛ Filistiebi na daŋ kɔ ana kpakpaso damta nna. Mo alɛ daŋ baŋ wu enapo kama nɛ e kɔ eleŋ ŋko kenyɛn, e daa ta mo nna a ti mbe benapo so.

Israɛlebi ka kɔ Amalɛkebi be asheŋ

¹Kachako nɛ Samuɛl kaŋɛ Sɔɔl le: “Ma nɛ Enyɛnpe Ebɔrɛ shuŋi fanɛ m ba ta ŋku n do fo kumu so n lara fo ŋ ki mbe basa Israɛlebi be ewura. Amoso kaŋ kusoe naniere n nu kusɔ nɛ Enyɛnpetale bee kaŋɛ. ²E beeŋ gberge Amalɛk be basa kusoe ŋkpal bumo nananyɛnana ka daŋ ŋana ekpa to ŋ kɔ Israɛlebi kena saŋɛ nɛ b daŋ lar Ijipt be efuli so a ba na so. ³Men ya kɔ Amalɛkebi na nseŋ jija bumo be kusɔ kama nɛ b kɔ kikɛ kuraa. Men sa maŋ kaŋ yige shɛŋ shɛŋ. Men mɔ bumo be benyɛn nɛ beche nɛ mbia nɛ mbi popɔrbi kikɛ. Men mɔ bumo be ana nɛ mbolpɔ nɛ enyɔma nɛ ekurma gba.”

⁴Ndoŋ nna nɛ Sɔɔl tre mbe benapo m ba shɛr abar so ashi Tɛlɛm. Benapo ŋgboŋ alfa anyɔ e daŋ shi Israɛl be efuli so nɛ ŋgboŋ kudu malɛ shi Juda be efuli so. ⁵Nɛ Sɔɔl nɛ mbe benapo na ya ŋana ketaŋɛ ko nɛ k taga kade nɛ baa tre Amalɛk na to a jo nɛ b kɔ Amalɛkebi na kena. ⁶Le nɛ Sɔɔl daŋ kaŋɛ Kenebi ko nɛ b daŋ chena m mata Amalɛkebi na: “Saŋɛ nɛ anyi be efuli ere so ebi daŋ lar Ijipt a ba na, menyi be basa daŋ wora bumo kelela ga. Amoso men lar Amalɛkebi ere to manaŋ nɛ an sa maŋ kaŋ mɔ menyi n ti bumo so saŋɛ nɛ anyee kɔ bumo kena na.” Ndoŋ nna nɛ Kenebi na lar Amalɛkebi na to.

⁷Nɛ Sɔɔl yili Havila kikɛ ŋ kɔ m pɔɔ Amalɛkebi na so hale n ya fo Shur nɛ k wɔ Ijipt be efuli so be epeŋilarkpa na. ⁸E daŋ pɛ Amalɛk be ewura Agag nna nseŋ mɔ mbe basa kikɛ. ⁹Sɔɔl nɛ mbe benapo na daa maŋ mɔ Agag. B daa maŋ mɔ mbolpɔ lela nɛ bumo be bibi nɛ ana lela nɛ bumo be bibi ŋko n jija kusɔ kama nɛ k walɛ m par bumo na; kusɔ kama nɛ k daa maŋ kɔ tɔnɔ na nɛ b daŋ jija.

Ebɔrɛ ka kini Sɔɔl fanɛ ewura be asheŋ

¹⁰Nɛ Enyɛnpe Ebɔrɛ kaŋɛ Samuɛl le: ¹¹“K wora ma kagbenejija ga fanɛ ŋ ka ta Sɔɔl ŋ ki ewura; ŋkpal manɛ so e pal kaman n sa ma nseŋ kini ma mbra be keb so.” Kumo be loŋ daŋ pɛ Samuɛl agbo ga nɛ e kule Ebɔrɛ awɔrso hale nɛ kare ba chɛ. ¹²Kumo be ŋklade kachipurdidi Samuɛl koso nɛ e ya fin Sɔɔl, nseŋ nu fanɛ Sɔɔl yɔ Kamɛl be kade to. Ndoŋ nɛ e pɔr kapɔrduli tenteŋ n yili nɛ b baa kɔ kumo a nyiŋi mo. E ka loge nɛ e yɔ Gilgaal. ¹³Samuɛl ka yɔ Sɔɔl kutɔ na nɛ Sɔɔl kaŋɛ mo le: “Enyɛnpe Ebɔrɛ e nɛfa fo Samuɛl! N wora kusɔ nɛ Enyɛnpe Ebɔrɛ kaŋɛ ma na kikɛ.”

¹⁴Ndoŋ nna nɛ Samuɛl bishi le: “Nɛ nuso be ana nɛ mbolpɔ e naa shu ere?”

¹⁵Nɛ Sɔɔl kaŋɛ: “Ma benapo na e sɔ bumo ashi Amalɛkebi na kutɔ. B ta ana nɛ mbolpɔ duliduli na kikɛ nna nɛ b ya lara sarga n sa Eyɛnpe fo Ebɔrɛ na. Ama an mur amo nɛ a ka na bre kikɛ.”

¹⁶Nɛ Samuɛl kaŋɛ le: “Yili nɛ ŋ kaŋɛ fo kusɔ nɛ Enyɛnpe Ebɔrɛ kaŋɛ ma ndre kanyɛso.”

Nɛ Sɔɔl yɛ: “Baa malga.”

¹⁷Nɛ Samuɛl yɛ: “Fo gbagba nyi fo ka daa maŋ la shɛŋ; ama naniere mannɛ fo e ba ki Israɛl be eyiri kikɛ be ejuŋkparpo ere a? Fo nɛ Enyɛnpe Ebɔrɛ lara fanɛ fo ki Israɛl be ewura naniere, ¹⁸nɛ e shuŋi fo fanɛ fo ya mur Amalɛkebi nɛ b la basa lubi na kikɛ. E yɛ: Men kɔ bumo kena m mur bumo kikɛ kuraa! ¹⁹Manɛ nna nɛ fo maŋ wora kasonu n sa Enyɛnpe Ebɔrɛ? Manɛ nna nɛ fo kuse n ya muu asɔ lela na kikɛ nseŋ shin nɛ Enyɛnpe Ebɔrɛ nya agbo?”

²⁰Nɛ Sɔɔl kaŋɛ le: “N wora kasonu n sa Enyɛnpe Ebɔrɛ, ŋkpal manɛ so n ya mɔ Amalɛkebi na kikɛ nna nseŋ pɛ bumo be ewura Agag. ²¹Ama ma benapo na daa maŋ mɔ bumo be mbolpɔ nɛ ana lela na bre. B ta bumo nna m ba Gilgaal nɛ b ba lara sarga n sa Enyɛnpe fo Ebɔrɛ na.”

²²Ndoŋ nna nɛ Samuɛl kaŋɛ le: “Ade be kumo bre nɛ Enyɛnpe Ebɔrɛ na bee sha ga? Kebaakɔ kasonu ŋko kebaalara esarga? Kebaakɔ kasonu bɔ fo kaa ta mbolpɔ duliduli a lara esarga e sa mo. ²³Kekini kenu n sa Enyɛnpe Ebɔrɛ du fanɛ kegbaya nna. Nɛ kamoowu malɛ du fanɛ kagbirshuŋ. Ŋkpal fo ka kini kenu n sa Enyɛnpe Ebɔrɛ na so, mo alɛ gba kini fo fanɛ ewura.”

²⁴Ndoŋ nna nɛ Sɔɔl kaŋɛ Samuɛl le: “N shuli fanɛ n wora kulubi. Ŋ kini kenu n sa fo nɛ Enyɛnpe Ebɔrɛ kikɛ. Benapo na nɛ n daa ŋana nseŋ nu n sa bumo. ²⁵Ama naniere bre mee kule fo nna nɛ fo ta ma alubi m paŋ ma nseŋ shin nɛ n tu fo n ya bunyaŋ Enyɛnpe Ebɔrɛ.”

²⁶Nɛ Samuɛl yɛ: “M-m, Fo maaŋ naŋ bɛ ma so n yɔ. Ŋkpal fo ka kini Enyɛnpe Ebɔrɛ be mbra na be kebɛso na so, mo alɛ gba kini fo fanɛ ewura.”

²⁷Ndoŋ nna nɛ Samuɛl kilgi nɛ e yɔ nɛ Sɔɔl to m pɛ Samuɛl be piŋi tenteŋ nɛ e buu na be kɔnɔ so to nɛ k kpɛa. ²⁸Nɛ Samuɛl kaŋɛ mo le: “Kananɛ fo baŋ kpɛa ma piŋi ere be kɔnɔso ere, loŋ gbagba na chap nɛ Enyɛnpe Ebɔrɛ gboŋi fo Israɛl be kuwurji to kabre nseŋ ta kumo m buu fo echenashapo nɛ e bɔ fo. ²⁹Israɛl be Ebɔrɛ nɛ e kɔ kemaŋkura na maa ku efɛ ŋko a chɛrga mbe nfɛra, ŋkpal manɛ so, e maŋ la dimɛdi.”

³⁰Nɛ Sɔɔl kaŋɛ le: “N wora kulubi ama mee kule fo nna nɛ fo ta bunyaŋ m buu ma so ashi benapo be benimu ere nɛ Israɛl be basa kikɛ be anishito n shin nɛ n tu fo n ya bunyaŋ Enyɛnpe fo Ebɔrɛ na.” ³¹Ndoŋ nna nɛ mo nɛ Samuɛl bɛta n yɔ nɛ Sɔɔl ya bunyaŋ Enyɛnpe Ebɔrɛ.

³²Nɛ Samuɛl ponte ŋ kaŋɛ le: “Men ta Amalɛk be ewura Agag na m ba sa ma nfe.” Nɛ Agag ba yili Samuɛl kutɔ nsaa chicha kufuso a fɛ mbe kumu to le: “Naniere bre b maaŋ naŋ mɔ ma.” ³³Ndoŋ nna nɛ Samuɛl kaŋɛ Agag le: “Fo e naa suge mbiwurbi bumo nioana kutɔ a mɔ nɛ baa paŋ mbia na. Fo nio gba beeŋ paŋ ebi naniere kikɛ.” Ndoŋ nna nɛ Samuɛl mɔ Agag nseŋ ŋele mo to fanɛ mblaŋkul bɔrɛsure na ase ashi Gilgaal.

³⁴Kede be kaman nɛ Samuɛl bɛta n yɔ Raama nɛ Sɔɔl malɛ bɛta n yɔ mbe kade to Gibia. ³⁵Baŋ yili kumo be saŋɛ na so kikɛ n ya fo saŋɛ so nɛ Samuɛl wu, e daa maŋ naŋ wu Sɔɔl kenishiso kikɛ. Ama Samuɛl be kagbene daŋ jija mo nna ga ŋkpal Sɔɔl so. K daŋ tɔrɔ Enyɛnpe Ebɔrɛ malɛ nna ga ŋkpal e ka daŋ ta Sɔɔl ŋ ki Israɛl be ewura so.

Samuɛl ka ta ŋku n do Deevid be kumu so n ta mo ŋ ki ewura be asheŋ

¹Nɛ Enyɛnpe Ebɔrɛ kaŋɛ Samuɛl le: “Nchɛ afanɛ nɛ fo shin nɛ fo chena kagbenejijaso a fɛ Sɔɔl be asheŋ? M maŋ naŋ shuli fanɛ e baa la Israɛl be ewura, amoso ta ɔlif be ŋku n yɔ kanyɛn nɛ baa tre Jɛsi nɛ e wɔ Bɛtlɛhɛm na pe. N lara mbe mbia na be eko nɛ e ki Israɛl be ewura.”

²Nɛ Samuɛl kaŋɛ le: “M baŋ wora loŋ nɛ Sɔɔl nu, e beeŋ mɔ ma!”

Nɛ Enyɛnpe Ebɔrɛ kaŋɛ mo: “Ta kenabi a yɔ n ya kaŋɛ fanɛ fo ba nna nɛ fo ba lara sarga n sa Enyɛnpe Ebɔrɛ. ³Fo kaŋ baa lara sarga na fo tre Jɛsi nɛ e ba ndoŋ nɛ ŋ ŋini fo kusɔ nɛ feeŋ wora. Meeŋ ŋini fo esa nɛ feeŋ chulgi ŋku na n do mbe kumu so n lara ŋ ki ewura na.”

⁴Ndoŋ nna nɛ Samuɛl wora kusɔ nɛ Enyɛnpe Ebɔrɛ kaŋɛ fanɛ e wora na nseŋ yɔ Bɛtlɛhɛm, nɛ ndoŋ be benimuana na ba mo kutɔ m ba kaa chicha kufuso, nseŋ bishi le: “Kagbenewushi so nɛ fo ba ere a?” ⁵Nɛ Samuɛl yɛ: “Mm. M ba nna nɛ m ba lara sarga n sa Enyɛnpe Ebɔrɛ, amoso men lara alubi ashi men be ŋgbene to pɔɛŋ nseŋ ba ŋ kutɔ.” Kumo be kaman nɛ e kaŋɛ Jɛsi nɛ mbe mbia fanɛ b lara kulubi ashi bumo be ŋgbene to pɔɛŋ nseŋ ba kakpa nɛ baa lara sarga na.

⁶B ka fo ndoŋ na, nɛ Samuɛl wu Jɛsi pibinyɛn Eliab nseŋ fɛ mbe kagbene to le: “Kashenteŋto kanyɛn ere e la Enyɛnpe Ebɔrɛ be esa laraso na.” ⁷Ndoŋ nna nɛ Enyɛnpe Ebɔrɛ naŋ kaŋɛ mo le: “Sa maŋ keni mbe nteŋ ŋko mbe kayɛrbi. Mannɛ mo nɛ n lara, ŋkpal manɛ so ma ere maa keni asheŋ fanɛ kananɛ dimɛdi bee kini asheŋ na. Dimɛdi bre bee keni eyur so nna ama ma ere bee keni kagbene to nna.”

⁸Ndoŋ nna nɛ Jɛsi naŋ tre mo pibinyɛn Abinadab m ba Samuɛl kutɔ, nɛ Samuɛl kaŋɛ le: “Manɛ ede gba nɛ Enyɛnpe Ebɔrɛ na lara.” ⁹Nɛ Jɛsi naŋ keta Shamaa malɛ m ba. Nɛ Samuɛl kaŋɛ mo le: “Enyɛnpe Ebɔrɛ maŋ lara ede gba.” ¹⁰Jɛsi daŋ keta mbia ashunu nna m ba Samuɛl kutɔ nɛ Samuɛl kaŋɛ mo le: “Enyɛnpe Ebɔrɛ na maŋ lara bede be ekama.” ¹¹Nseŋ bishi mo le: “Fo kraa kɔ mbia ko a?”

Nɛ Jɛsi yɛ: “Mm, m pibi kekarkarso Deevid e ka, ama mo alɛ wɔ kupuŋ to a kpa mbolpɔ.”

Nɛ Samuɛl kaŋɛ mo le: “Shuŋi nɛ b ya tre mo m ba. Nɛ mannɛ loŋ, anyi maaŋ lara sarga ere ama an baaŋ wu mo nna.” ¹²Nɛ Jɛsi shuŋi nɛ b ya tre Deevid m ba. E daŋ baŋ yili enyɛn nna a walɛ kayɛrbi ga nsaa kɔ eleŋ. Kebia na ka ba nɛ Enyɛnpe Ebɔrɛ kaŋɛ Samuɛl le: “Mo gbagba nna na. Ta ŋku n do mbe kumu so n lara mo nɛ e ki ewura.” ¹³Nɛ Samuɛl duga ŋku na n do Deevid be kumu so nɛ mo daana yil a keni mo. Baŋ yili kumo be kamɔnchɛ na kikɛ nɛ Enyɛnpe Ebɔrɛ be kiyoyu ba luri m bɔlɔ Deevid to eleŋso nsaa wɔ mo to saŋkikɛ. Kumo be kamɔnchɛ na malɛ kikɛ nɛ Samuɛl bɛta n yɔ Raama.

Deevid ka bee shuŋ Sɔɔl be asheŋ

¹⁴Nɛ Enyɛnpe Ebɔrɛ be kiyoyu lar Sɔɔl to, nɛ kiyoyu lubi ba luri mo to a tɔrɔ mo ga. ¹⁵Nɛ Sɔɔl be nyɛrbi kaŋɛ mo le: “An baa nyi fanɛ Ebɔrɛ e sa ekpa nɛ kiyoyu lubi ere bee tɔrɔ fo ga le na. ¹⁶Amoso, sa anyi ekpa nɛ an ya fin esa nɛ e nyi jaŋjilaŋ be kelaŋ, saŋɛ na so saŋkama nɛ kiyoyu lubi na baŋ ba fo so, esa na beeŋ laŋ mbe jaŋjilaŋ nɛ fo eyur e wushi fo.”

¹⁷Ndoŋ nna nɛ Sɔɔl kaŋɛ bumo le: “Men fin esa nɛ e nyi jaŋjilaŋ be kelaŋ nɛnɛ m bar ma.”

¹⁸Nɛ mbe nyɛrbi na be eko kaŋɛ: “Kanyɛn ko nɛ baa tre Jɛsi nɛ e wɔ Bɛtlɛhɛm na be kebia nyi jaŋjilaŋ be kelaŋ ga. E la enapo mo nɛ e kɔ kenyɛn nna ga nsaa walɛ kayɛrbi ga nɛ mbe mmalga gba wɔ ebel nɛ Enyɛnpe Ebɔrɛ na wɔ mo kutɔ.”

¹⁹Ndoŋ nna nɛ Sɔɔl shuŋi mbɔ fanɛ b ya kaŋɛ Jɛsi le: “Kaŋɛ fo pibinyɛn Deevid nɛ e bee kpa mbolpɔ na fanɛ e ba ŋ kutɔ.” ²⁰Nɛ Jɛsi kre bodobodo n deŋi kurma so n ta kaboe fɔlbi nɛ nsa belbelso deŋkeŋ be bɔlɔ n ti so n shuŋi Deevid fanɛ e ya sa Sɔɔl. ²¹Ndoŋ nna nɛ Deevid yɔ Sɔɔl kutɔ n ya kaa shuŋ mo. Sɔɔl daa sha mbe asheŋ ga hale n lara mo fanɛ e baa sulɔ mbe kena to be akɔsɔ. ²²Kumo be kaman nɛ Sɔɔl ta ebɔl n shoŋi Jɛsi fanɛ e shin nɛ Deevid e ba wɔ mo kutɔ a shuŋ a sa mo, ŋkpal manɛ so mbe asheŋ bee par mo ga. ²³Baŋ yili loŋ be saŋɛ na nɛ Ebɔrɛ baŋ sa ekpa nɛ kiyoyu lubi na ba Sɔɔl so, Deevid bee ta mbe jaŋjilaŋ nna n laŋ, nɛ Sɔɔl be eyur e naa ŋ wushi mo.

Goliɛf ka to Israɛl be benapo emaŋ be asheŋ

¹Kachako nɛ Filisti be basa ba abar so ashi Sukɔɔ nɛ k wɔ Juda be efuli so na nɛ b ba kɔ Israɛl be basa kena. B daŋ wora bumo be keeyi to ashi Efis Dammim nɛ k wɔ Sukɔɔ nɛ Azeka be kefɛato na nna. ²Nɛ Sɔɔl nɛ Israɛl be benapo malɛ ba abar so m ba wora bumo be keeyi to ashi ketaŋɛ nɛ baa tre Ela na be kaba nseŋ yili ndoŋ m bela ase m bɛ abar so kelargato nɛ b ya kɔ Filistiebi na kena. ³Filistiebi na daa wɔ kebee ko so nna nɛ Israɛlebi na malɛ wɔ kebee ko so, nɛ ketaŋɛ na dese bumo nɛ bumo be kefɛato.

⁴Kanyɛn ko nɛ baa tre Goliɛf nɛ e shi Gaaf be kade to daŋ lar Filistiebi na be keeyi to nna m ba kaa to Israɛlebi na emaŋ. E daa shibi a chɔ dimɛdi kikɛ nɛ mbe nteŋ daa sa fanɛ ayadra akpanu nɛ gbrɛbi, ⁵nɛ e buu kenyɛnkale nɛ b ta danyaŋ n wora nɛ kumo be egbɛ sa fanɛ kilo adunu nɛ ashunu nseŋ buu danyaŋ be kekpaŋwuro gba n ti so. ⁶E daa kɔ danyaŋ be asɔ nɛ e bee ta a wɔtɔ a kuŋ mbe aya gba nna, nseŋ ta danyaŋ be tokobi a di mbe kaman. ⁷Mbe kekpa be kedibi be bumburuŋ daa sa fanɛ keyapuye, nɛ kumo be kumu be egbɛ malɛ sa fanɛ kilo ashunu. Enapo ko daa juŋkpar mo nna a keta mbe kebɛlso be kusɔ kuŋso na. ⁸Ndoŋ nna nɛ Goliɛf yili a ponte a kaŋɛ Israɛlebi na le: “Nuso be kena nɛ menyi alɛ gbare abar a ba nɛ men ba kɔ ere? Filisti be esa e la ma nɛ menyi alɛ la Sɔɔl be nyɛrbi! Amoso men lara menyi be enapo ko nɛ e gbelge m ba nɛ ma nɛ mo e kɔ. ⁹Enapo na kaŋ tiŋ m pɔɔ ma so m mɔ ma, kumo ere, anyeeŋ ki menyi be anya, nɛ ma alɛ kaŋ pɔɔ mo so m mɔ mo, menyi alɛ beeŋ ki anyi be anya. ¹⁰Menyi Israɛlebi be benapo fupo ere nɛ mee to emaŋ na. Men lara esa ko nɛ ma nɛ mo e kɔ abar!” ¹¹Sɔɔl nɛ mbe basa ka nu kusɔ nɛ Goliɛf kaŋɛ na, nɛ kufu pɛ bumo ga nɛ bumo be aba pɔ bumo.

Deevid ka yɔ Sɔɔl be keeyi to be asheŋ

¹²Deevid mo tuto e daa la Jɛsi nɛ e la Efrat be kanaŋ to be esa nsaa shi Bɛtlɛhɛm nɛ k wɔ Juda be efuliso na. Jɛsi daa kɔ mbia aburwa nna, ama saŋɛ nɛ Sɔɔl daa la ewura na nɛ e teŋ bel ga. ¹³Jɛsi be mbia nimuso asa na nɛ Sɔɔl e daŋ yɔ kena to. Eliab e daa la bumo kikɛ to be enimu nɛ Aminadab bɛ so n ta Shamaa m bɛ so. ¹⁴Deevid e daa la bumo kikɛ to be kebia, ¹⁵nsaa wɔ Sɔɔl pe a bɛta a yɔ Bɛtlɛhɛm saŋko saŋko n ya ka kpa mo tuto be mbolpɔ.

¹⁶Nchɛ adena kikɛ nɛ Goliɛf bee yili a to Israɛlebi na emaŋ kapa nɛ kanyɛ.

¹⁷Kachako nɛ Jɛsi kaŋɛ Deevid le: “Ta aboyu keeso be kilo kudu nɛ bodobodo kudu ere n shile n ya sa fo daana ashi bumo be keeyi to, ¹⁸nseŋ ta wagashi kudu ere malɛ n ya sa fo daana be katuŋ na be enimu. Kumo be kaman nɛ fo keni kananɛ fo daana du ndoŋ nseŋ fin shɛdaso be kusɔ ko ndoŋ m ba ŋini fanɛ fo wu bumo nɛ b kɔ alenfia. ¹⁹Ewura Sɔɔl nɛ fo daana nɛ Israɛl be benapo kikɛ wɔ Ela be ketaŋɛ na ase a wora shiriya nɛ b ya kɔ Filistiebi na.”

²⁰Kumo be ŋklade kachipurdidi nɛ Deevid koso nseŋ shin nɛ esa ko bee keni mbe mbolpɔ so nɛ e ta ajibi na n yɔ fanɛ kananɛ Jɛsi ŋini mo na gbagba chap. Saŋɛ so nɛ Israɛl be benapo na baŋ lar a boŋ kena to be nshɛ a yɔ kakpa nɛ baaŋ ya yili ŋ kɔ kena na, nɛ Deevid fo ndoŋ. ²¹Ndoŋ nna nɛ Filisti be benapo na nɛ Israɛl be benapo na kikɛ belase manaŋ n ya yili ketaŋɛ na be kaba nɛ kaba a keni abar. ²²Nɛ Deevid yige ajibi na n yili benapo be enimu nɛ e bee keni ajibi be asheŋ so na kutɔ nseŋ shile n yɔ mo daana kutɔ ashi kaboŋ nɛ b wɔ na n ya bishi bumo kananɛ asheŋ du. ²³Saŋɛ nɛ e bee malga mo daana kutɔ na, nɛ Goliɛf lar kakpa nɛ mbe basa wɔ na m ba ka to Israɛlebi na emaŋ a tege bumo fanɛ kananɛ e chɛr a wora na. Nɛ Deevid nu kumo. ²⁴Israɛl be benapo na ka wu Goliɛf, nɛ kufu pɛ bumo nɛ bumo kikɛ shile. ²⁵Ndoŋ nna nɛ b kaŋɛ abar le: “Men keni, kananɛ kanyɛn ere bee ba kaa to anyi emaŋ nsaa tege anyi. Esa kama nɛ e tiŋ m mɔ mo, ewura na beeŋ sa mo kakɛ gboŋ. E beeŋ ta mo pibiche n sa mo nɛ e kil nɛ mbe kanaŋ malɛ kikɛ gba maaŋ naŋ ka lampo kikɛ ashi Israɛl be efuli so.”

²⁶Nɛ Deevid bishi benapo nɛ b yili n taga mo to na le: “Manɛ nɛ baaŋ sa esa kama nɛ e beeŋ mɔ Filisti be esa ere nseŋ lara Israɛl ashi le be anishinyɔr ere to? Kanyamase jiga ere malɛ e la wanɛ nɛ e bee keni Ebɔrɛ nɛ e wɔ ŋkpa to na be benapo jiga?” ²⁷Nɛ b kaŋɛ mo kusɔ nɛ ewura na beeŋ wora n sa esa kama nɛ e mɔ Goliɛf.

²⁸Deevid mo da Eliab ka nu Deevid nɛ benapo na ka bee malga, nɛ agbo pɛ Eliab ga nɛ e kaŋɛ le: “Manɛ nɛ fee fin nfe? Wanɛ nɛ fo yige fo mbolpɔ kiyi na to n sa fanɛ e ba keni so? Fo kebia kpeŋso ere! Fo ba nfe nna nɛ fo baa keni kananɛ baa kɔ kena, ŋko?”

²⁹Nɛ Deevid malɛ bishi le: “Manɛ nɛ n wora? Ama m maŋ kɔ ekpa nɛ m bishi shɛŋ a?” ³⁰Nɛ e naŋ bishi enapo ko loŋ be kesheŋ koŋwule na. Saŋkama malɛ nɛ e baŋ bishi kesheŋ na, kusɔ koŋwule nɛ e nu na gbagba chap nɛ baa kaŋɛ mo.

³¹Benapo na be beko ka nu kusɔ nɛ Deevid kaŋɛ na, nɛ b ya kaŋɛ Sɔɔl. Ndoŋ nna nɛ Sɔɔl shuŋi nɛ b ya tre Deevid. ³²Nɛ Deevid kaŋɛ Sɔɔl le: “Yiramu! Men sa maŋ shin nɛ Filisti be kanyɛn na e ta anyi ŋ ki befupo. Ma ere beeŋ ya tu mo ŋ kɔ.”

³³Nɛ Sɔɔl kaŋɛ le: “M-m, fo maaŋ tiŋ n tu kanyɛn ere ŋ kɔ kikɛ, ŋkpal manɛ so kabrantiɛbia e kraa la fo, ama kanyɛn ere bre be kebia to kikɛ nɛ e kɔ kena hale m ba fo kabre!”

³⁴Nɛ Deevid kaŋɛ le: “Yiramu! Mee keni n tuto be mbolpɔ so nna. Saŋkama malɛ nɛ buluŋ ŋko shishiri baŋ pɛ mbolpɔ na be kekama, ³⁵mee shile nna m bɛ kumo so n ya sɔ kubolpɔ na. Nɛ buluŋ na ŋko shishiri na baŋ kilgi n tu ma, mee pɛ kumo be kubɔ to nna n nyaŋ kumo m mɔ. ³⁶M mɔ ebuluŋ nɛ eshishiri kikɛ, amoso loŋ be ekpa koŋwule na so nɛ meeŋ bɔla so m mɔ Filisti be kanyamasenyɛn nɛ e bee keni Enyɛnpe Ebɔrɛ nɛ e wɔ ŋkpa to na be benapo jiga na. ³⁷Enyɛnpe Ebɔrɛ na ka baŋ mɔlga ma ashi ebuluŋ nɛ eshishiri to ere bre, e beeŋ mɔlga ma ashi Filisti be kanyɛn ere gba be enɔ to.”

Nɛ Sɔɔl malɛ kaŋɛ mo le: “Enyɛnpe Ebɔrɛ na beeŋ chɛ fo to, amoso baa yɔ n ya kɔ mo.” ³⁸Ndoŋ nna nɛ Sɔɔl ta mbe kenyɛnkale n sa Deevid fanɛ e buu. E daŋ ta mbe danyaŋ be kekpaŋwuro gba nna n sa mo fanɛ e buu. ³⁹Nɛ Deevid ta Sɔɔl be tokobi n di n deŋi akɔsɔ nɛ e buu na so, nseŋ wora ania nɛ e nite, ama e nite ŋ gben ŋkpal amo be kebuu ka maŋ deŋ mo so.

Nɛ e kaŋɛ Sɔɔl le: “Ma ere maaŋ tiŋ m buu le be asɔ n yɔ kena to, ŋkpal manɛ so amo be kebuu maŋ deŋ ma.” Nseŋ gbaŋ asɔ na kikɛ. ⁴⁰Kumo be kaman nɛ e ta kekpabi nɛ e kɔ a kpa mbolpɔ na nseŋ yɔ kabombi ko ase n ya tise ajembu mɔlmɔlbi anu n wɔtɔ mbe kɔlgu to nseŋ ta mbe ketababu a shɛr Goliɛf to.

Deevid ka pɔɔ Goliɛf so be asheŋ

⁴¹Le be saŋɛ ere nɛ esa nɛ e bee keta Goliɛf be kebɛlso be kusɔ kuŋso na juŋkpar mo nɛ e bɛ so a shɛr Deevid to. E ka taga Deevid to ŋ ⁴²keni n wu fanɛ e la kabrantiɛbia nna nsaa walɛ kayɛrbi, nɛ e wora mo eyurto ⁴³ŋ kaŋɛ Deevid le: “Jɔnɔ e la ma nɛ fee ta ndibi a ba ŋ kutɔ a?” Nɛ e melgi Deevid n sa Filistiebi na be agbir. ⁴⁴Kumo be kaman nɛ e ponte ŋ kaŋɛ Deevid le: “Ba nfe, nɛ m mɔ fo, n ta fo eyur ere n sa mbuibi nɛ kupuŋ to be asɔbɔya nɛ b ji!”

⁴⁵Nɛ Deevid kaŋɛ mo le: “Fo ere ta tokobi nɛ kekpa nɛ chutre nna m ba nɛ fo ba kɔ ma, ama ma ere ba nna nɛ m ba kɔ fo ashi Enyɛnpetale nɛ e la Israɛl be benapo be Ebɔrɛ mo nɛ fee keni jiga na be ketre to. ⁴⁶Kabre be kachɛ ere, Enyɛnpe Ebɔrɛ beeŋ ta fo m bɔɔ ma enɔ nɛ m pɔɔ fo so ŋ ku fo kumu ere, nseŋ ta Filisti be benapo be eyurana n sa mbuibi nɛ kupuŋ to be asɔbɔya nɛ b ji. Saŋɛ na so nɛ durnya kikɛ e pin fanɛ Ebɔrɛ wɔ Israɛlebi kutɔ. ⁴⁷Ekama malɛ nfe beeŋ pin fanɛ mannɛ etokobi ŋko akpa nɛ Enyɛnpe Ebɔrɛ na bee ta a kɔ a mɔlga mbe basa. E la ekɔmpɔɔsopo kena kikɛ to nna. Mo alɛ beeŋ chɛ anyi to nɛ an kɔ m pɔɔ menyi so.”

⁴⁸Goliɛf ka bee ba Deevid kutɔ na, nɛ Deevid malɛ bee shɛr mo to nɛ e kɔ mo. ⁴⁹Ndoŋ nna nɛ Deevid lara kejembu mbe kɔlgu na to n wɔtɔ mbe ketababu to n to Goliɛf nɛ k ŋmɛa mbe kasɔto m bure n luri nɛ e tɔr mbe epun so. ⁵⁰Ketababu nɛ kejembu nɛ Deevid daŋ ta m pɔɔ Goliɛf so. E daa maŋ ta tokobi. ⁵¹Deevid daŋ shile nna n ya pe Goliɛf be tokobi ashi kumo be efar to ŋ ku Goliɛf be kumu. Filistiebi na ka wu fanɛ bumo kikɛ to be elempo na wu, nɛ b lara keya n shile. ⁵²Ndoŋ nna nɛ Israɛl nɛ Juda be benapo cha awɔr ga nseŋ shile n ju m buu Filistiebi na so hale n ya fo Filisti be nde nɛ baa tre Gaaf nɛ Ekrɔn be mbunagboŋ na. Nɛ Filistiebi wu n dese Shaaraim be ekpa na to hale n ya fo Gaaf nɛ Ekrɔn. ⁵³Israɛl be benapo na ka yige kebaaju Filistiebi na, nɛ b bɛta m ba bumo doŋana na be keeyi to m baa muu bumo be asɔ. ⁵⁴Ndoŋ nna nɛ Deevid ta Goliɛf be kumu na n yɔ Jerusalɛm, nseŋ ta mbe akɔsɔ na bre n nase mo ere Deevid be wajɛbu to.

B ka bar Deevid m ba sa ewura Sɔɔl be asheŋ

⁵⁵Saŋɛ nɛ Deevid daa yɔ nɛ e ya kɔ Goliɛf na, nɛ Sɔɔl bishi mbe benapo be enimu Abna le: “Abna, wanɛ pibinyɛn nde?”

Nɛ Abna yɛ: “Yiramu, m maŋ nyi.”

⁵⁶Nɛ Sɔɔl kaŋɛ le: “Kumo ere fo ya bishi to n nu.”

⁵⁷Deevid ka shi mo nɛ Goliɛf be kena na to m ba nɛ Abna keta mo n yɔ Sɔɔl kutɔ nɛ e kraŋ keta Goliɛf be kumu na. ⁵⁸Ndoŋ nna nɛ Sɔɔl bishi mo le: “Wanɛ pibinyɛn e la fo?”

Nɛ Deevid yɛ: “Fo kayɛrbi Jɛsi nɛ e shi Bɛtlɛhɛm na pibinyɛn e la ma.”

¹Deevid nɛ Sɔɔl ka malga n loge na, k maŋ chɛr ko nɛ Deevid nɛ Jonatan ki beteri kpakpaso. Jonatan daa sha Deevid be asheŋ ga fanɛ kananɛ e bee sha mo gbagba be kumu. ²Baŋ yili kumo be kachɛ na kikɛ Sɔɔl daŋ shin nna nɛ Deevid wɔ mo kutɔ. Mo alɛ daa maŋ sa mo ekpa nɛ e bɛta n yɔ mo tuto be laŋ to. ³Ŋkpal Jonatan malɛ ka bee sha Deevid ga so, e daŋ shin nna nɛ b nase keteri kpakpaso be kɔnɔ n sa abar. ⁴Nɛ Jonatan lara mbe piŋi nɛ e buu na n sa Deevid. E daŋ ta mbe kenyɛnkale gba nɛ mbe tokobi nɛ mbe keta nɛ amo be atanyembi nɛ mbe kreso n ti so nna n sa mo. ⁵Deevid daa ji kɔŋkɔŋ kusɔ kama nɛ Sɔɔl daa shuŋi mo fanɛ e ya wora to nna. Nɛ Sɔɔl ta mo ŋ ki mbe benapo be enimu gboŋ ko. Kumo be loŋ daŋ wora ekama nɛ Sɔɔl be benapo be benimu na kikɛ ebel ga.

Sɔɔl ka bee kɔ Deevid kukɔrkɔ be asheŋ

⁶Deevid ka mɔ Goliɛf, nɛ benapo na bɛta a ba epe na, nɛ beche nɛ b shi Israɛl be nde karso na kikɛ lar a ba nɛ b ba chɔrɔ ewura Sɔɔl. B daa boŋ kagbenefuli be nshɛ nna nsaa laŋ echakachaka nɛ ejaŋjilaŋ a foŋ nlopi a cha. ⁷Le be kashɛ nɛ beche na daa boŋ a cha: “Sɔɔl mɔ basa kagboŋ, ama Deevid bre mɔ basa ŋgboŋ kudu.” ⁸Nɛ bumo be kashɛ na shin nɛ Sɔɔl nya agbo ga n fɛ le: “B kaa bee kaŋɛ fanɛ Deevid mɔ basa ŋgboŋ kudu nɛ ma ere mɔ kagboŋ nawule ere, kusɔ nɛ k ka e la keta mo ŋ ki ewura.” ⁹Amoso baŋ yili loŋ be kachɛ na a yɔ nɛ Sɔɔl fara a kɔ Deevid kukɔrkɔ nsaa maŋ naŋ yirda mo nɛnɛ kikɛ.

¹⁰Kumo be ŋklade nɛ Ebɔrɛ sa ekpa nɛ kiyoyu lubi ko ba luri Sɔɔl to eleŋso nɛ e fara a wora fanɛ ebompo ashi mbe laŋ to. Nɛ Deevid ba kaa laŋ jaŋjilaŋ a sa mo fanɛ kananɛ e chɛr a wora karechɛ kama na. Loŋ be saŋɛ na so nɛ Sɔɔl kɔ kekpa to. ¹¹Ndoŋ nna nɛ Sɔɔl fɛ fanɛ e beeŋ kpa kekpa na n da Deevid m mata egbal nseŋ kpa mo kumo ale anyɔ kikɛ nɛ Deevid gbar amo kikɛ.

¹²Kumo be kaman nɛ Sɔɔl fara a ŋana Deevid ŋkpal Enyɛnpe Ebɔrɛ ka daa chɛ Deevid to nseŋ kplaŋ mo ere Sɔɔl so so. ¹³Ndoŋ nna nɛ Sɔɔl ju Deevid mbe laŋ to nseŋ shin nɛ e ya ki benapo kagboŋ be enimu a juŋkpar bumo a yɔ kena to. ¹⁴Saŋkama malɛ nɛ Deevid baŋ yɔ kena to, e daa kɔ nna a pɔɔ so ŋkpal Enyɛnpe Ebɔrɛ ka daa wɔ mo kutɔ so. ¹⁵Sɔɔl ka wu fanɛ Deevid bee kɔ a pɔɔ so saŋkama na, nɛ e naa ŋana mo ga a ti so. ¹⁶Ama Israɛl nɛ Juda be basa bre kikɛ daa sha Deevid be asheŋ nna ga ŋkpal e ka daa juŋkpar bumo kena to nɛ baa kɔ a pɔɔ so na so.

Deevid ka ta Sɔɔl pibiche be asheŋ

¹⁷Kachako nɛ Sɔɔl kaŋɛ Deevid le: “Nɛ feeŋ nya kenyɛn a kɔ Enyɛnpe Ebɔrɛ be ana a sa ma bre, kumo ere ma alɛ beeŋ ta m pibiche nimuso Mɛrab n sa fo.” Sɔɔl be nfɛra e daa la fanɛ nɛ e wora loŋ, Filistiebi na beeŋ nya Deevid m mɔ, saŋɛ na so k maaŋ ba fanɛ mo e mɔ mo.

¹⁸Nɛ Deevid kaŋɛ le: “Nuso nɛ ma alɛ le beeŋ tiŋ n ta ewura lelemu pibiche ŋ ki ma eche? M maŋ la esa gboŋ ko ashi ma laŋ to nɛ n tutoana be kanaŋ gba maŋ la shɛŋ ashi Israɛl be kasawule so.” ¹⁹Ama k ka ba fo jemanɛ nɛ k daga fanɛ Mɛrab e kil Deevid na, nɛ Sɔɔl kaŋɛ fanɛ e ya kil kanyɛn nɛ baa tre Adriɛl nɛ e shi Mɛhola na.

²⁰Sɔɔl daa kɔ ebiche ko gba nɛ baa tre mo Mikaal nɛ e daa sha Deevid ga. Sɔɔl ka nu loŋ, nɛ mbe kagbene fuli mo. ²¹Ndoŋ nna nɛ e fɛ le: “Meeŋ kaŋɛ Deevid nɛ e ta Mikaal ŋ ki mbe eche, ama mee sha nna nɛ n wora loŋ saŋɛ na so Filistiebi na beeŋ mɔ mo.” Kede e ti so kela nyɔsopo Sɔɔl ka kaŋɛ fanɛ Deevid beeŋ ki mo sha. ²²Kede be kaman nɛ e kaŋɛ mbe benimuana na fanɛ b tre Deevid n lar ekarso ŋ kaŋɛ mo le: “Ewura na nɛ mbe benimuana na kikɛ bee sha fo asheŋ ga, amoso saŋɛ fo nɛ fo ta mo pibiche na.”

²³B ka kaŋɛ Deevid loŋ nɛ mo alɛ kaŋɛ le: “K beeŋ ba la bunyaŋ gboŋgboŋi nna n sa ma fanɛ m ba la ewura mo shanyɛn ama mannɛ etirpo nɛ ebɔlpo be asheŋ nna na.”

²⁴Sɔɔl be benimuana na ka kaŋɛ Sɔɔl kusɔ nɛ Deevid kaŋɛ na, ²⁵nɛ Sɔɔl kaŋɛ bumo fanɛ b ya kaŋɛ Deevid le: “Keshaji nɛ ewura baa fin fo kutɔ e la fanɛ fo mɔ Filistiebi na be basa kalfa nseŋ ba kaŋɛ ma fanɛ fo wora loŋ. Kumo be loŋ e naŋ ŋini fanɛ an kɔ an doŋana na n tal to.” Kananɛ Sɔɔl bre daŋ kre nna na, saŋɛ na so Filistiebi na beeŋ nya Deevid m mɔ. ²⁶Sɔɔl be benimuana na ka kaŋɛ Deevid kusɔ nɛ Sɔɔl kaŋɛ na, nɛ Deevid be kagbene fuli mo ŋkpal e ka bee fɛ fanɛ e beeŋ nya ewura na pibiche n ta so. Amoso pɔɛŋ nɛ kejafɔ achɛ na e fo na ²⁷nɛ Deevid bre nɛ mbe benapo teŋ ya mɔ Filistiebi be basa alfanyɔ nseŋ ba kaŋɛ ewura na. Saŋɛ na so e beeŋ nya ewura na pibiche na n ta. Ŋkpal loŋ so nɛ Sɔɔl ta mo pibiche Mikaal n sa Deevid.

²⁸Sɔɔl ka pin geeŋ fanɛ Enyɛnpe Ebɔrɛ wɔ Deevid be kaman nɛ mo pibiche Mikaal malɛ bee sha Deevid ga na ²⁹nɛ e naa ŋana Deevid alegaiso nseŋ ta Deevid ŋ ki mo doŋ hale n ya fo mbe luwu be jemanɛ.

³⁰Saŋkama nɛ Filisti be bewura nɛ benapo nɛ Israɛlebi baa kɔ, Deevid e naa kaa kɔ a pɔɔ so a chɔ Sɔɔl be benapo be benimu na be ekama. Ŋkpal loŋ so, nɛ Deevid be ketre daŋ dii ga.

Sɔɔl ka bee fin Deevid nɛ e mɔ be asheŋ

¹Sɔɔl daŋ kaŋɛ mo pibinyɛn Jonatan nɛ mbe benimuana fanɛ e bee kre kemɔ Deevid nna, ama Jonatan daa sha Deevid be asheŋ ga. ²Ndoŋ nna nɛ Jonatan kpele Deevid kusoe ŋ kaŋɛ mo le: “N tuto bee fin fo nɛ e mɔ, amoso baa da so. Echefo chipurso ya ŋana kupuŋ to nsaa wɔ ndoŋ. ³Meeŋ keta n tuto m ba kakpa nɛ fo ŋana nna m ba malga fo asheŋ n sa mo, kumo be kaman, nɛ ŋ kaŋɛ fo kusɔ kama nɛ k wɔtɔ.”

⁴Ndoŋ nna nɛ Jonatan yɔ mo tuto Sɔɔl kutɔ n ya kpaŋ Deevid ŋ kaŋɛ le: “Jande, sa maŋ kaŋ wora fo kenya Deevid kulubi kikɛ, ŋkpal manɛ so, e maŋ naŋ wora fo kulubi kikɛ. Mo alɛ be kusɔ kama nɛ e wora n sa fo kikɛ la kechɛto nna. ⁵E ta mbe kumu gba nna ŋ kpa kelera saŋɛ nɛ e ya mɔ Goliɛf na. Kumo alɛ be loŋ e shin nɛ Enyɛnpe Ebɔrɛ kɔ n sɔ Israɛl be basa na. Fo alɛ gba ka wu kumo be loŋ nɛ fo kagbene fuli fo. Nɛ manɛ e ba nɛ fee sha kewora esa nɛ e maŋ wora shɛŋ kulubi hale a fin Deevid nɛ fo mɔ kenyanyaŋɛso?”

⁶Ndoŋ nna nɛ Sɔɔl nu kusɔ nɛ Jonatan kaŋɛ na nseŋ nase kɔnɔ fanɛ ŋkpal Enyɛnpe Ebɔrɛ na ka la mbe shɛdajipo so, e maaŋ mɔ Deevid. ⁷Amoso Jonatan daŋ tre Deevid nna ŋ kaŋɛ mo kusɔ kama nɛ k wɔtɔ nseŋ keta mo n yɔ Sɔɔl kutɔ nɛ e ya ka shuŋ mo kananɛ e daa shuŋ mo na.

⁸Ndoŋ nna nɛ kena naŋ koso Israɛlebi nɛ Filistiebi na be kefɛato. Nɛ Deevid nɛ mbe benapo kɔ Filistiebi be benapo na eleŋso m pɔɔ bumo so nɛ b shile.

⁹Kachako nɛ Sɔɔl tase mbe ebu to ŋ keta mbe kekpa nɛ Deevid malɛ wɔ mo kutɔ a laŋ mbe jaŋjilaŋ nɛ Enyɛnpe Ebɔrɛ sa ekpa nɛ kiyoyu lubi luri Sɔɔl to. ¹⁰Ndoŋ nna nɛ Sɔɔl kpa kekpa na nɛ e da Deevid m mata egbal nɛ Deevid gbar, nɛ kekpa na ya da egbal na m muni. Kumo be kanyɛso na kikɛ nɛ Deevid shile n lar Sɔɔl be laŋ to nɛ shɛŋ maŋ wora mo.

¹¹Ndoŋ nna nɛ Sɔɔl shuŋi mbe basa fanɛ b ya kulti Deevid be laŋ n wɔtɔ, kare kaŋ chɛ kachipurso nɛ b mɔ mo. Nɛ Deevid be eche Mikaal kpele mo kusoe ŋ kaŋɛ le: “Fo baa maŋ shile kanyɛ ere, echefo baaŋ mɔ fo.” ¹²Kumo be kaman nɛ Mikaal chɛ Deevid to nɛ e bɔla tokuro to n lar n shile. ¹³Ndoŋ nna nɛ Mikaal ta kedibi ko nɛ b shɛl kumo fanɛ kegbir na n ya nase gedo so nseŋ ta kaboe be afuibi n deŋi kumo be kumu so nseŋ ta wajɛ m buu kumo be eyur so. ¹⁴Sɔɔl be basa na ka ba nɛ b ba pɛ Deevid, nɛ Mikaal kaŋɛ bumo fanɛ Deevid bee lɔ nna. ¹⁵B ka bɛta n ya kaŋɛ Sɔɔl loŋ, nɛ e kaŋɛ bumo fanɛ bumo gbagba e bɛta n ya wu Deevid kenishiso, nseŋ ponte ŋ kaŋɛ bumo le: “Men ya maŋ mo nɛ mbe gedo na kikɛ so m bar ma nfe nɛ m mɔ mo.” ¹⁶Basa na ka luri Deevid be ebu to, kedibi nɛ b shɛl fanɛ kegbir na nɛ b ya wu mbe gedo so nɛ kaboe be afuibi deŋ kumo be kumu so. ¹⁷Ndoŋ nna nɛ Sɔɔl tre Mikaal m bishi mo le: “Manɛ nna nɛ fo fule ma nɛ ma doŋ nya ekpa n shile?”

Nɛ Mikaal kaŋɛ le: “E yɛ, nɛ m baa maŋ chɛ mo to nɛ e shile, e beeŋ mɔ ma.”

¹⁸Deevid daŋ shile n yɔ Samuɛl kutɔ nna ashi Raama n ya kaŋɛ mo kusɔ nɛ Sɔɔl wora mo. Ndoŋ nna nɛ mo nɛ Samuɛl yɔ Nayɔf n ya ka wɔ ndoŋ. ¹⁹Ndoŋ nna nɛ Sɔɔl nu fanɛ Deevid wɔ Nayɔf nɛ k mata Raama na, ²⁰nseŋ shuŋi basa fanɛ b ya pɛ Deevid m ba. Basa na ka yɔ Raama nɛ b ya wu anebiana be katuŋ ko nɛ bumo nɛ Samuɛl nɛ e la bumo kikɛ be enimu na bee wu abɔrɛsheŋ a malga. Ndoŋ nna nɛ Ebɔrɛ be kiyoyu na ba luri Sɔɔl be basa na gba to nɛ bumo alɛ gba fara a wu asheŋ a malga. ²¹Sɔɔl ka nu loŋ na nɛ e naŋ shuŋi mbɔ damta ko ndoŋ nɛ bumo alɛ gba fara a wu abɔrɛsheŋ a malga. Nɛ e naŋ shuŋi mbɔ be katuŋ sasopo, nɛ bumo alɛ gba ya wora loŋ koŋwule na. ²²Ndoŋ nna nɛ mo gbagba koso a yɔ Raama. E ka ya fo ketirbu gboŋgboŋi ko ase ashi Seku nseŋ bishi Samuɛl nɛ Deevid be asheŋ, nɛ b kaŋɛ mo fanɛ b wɔ Nayɔf nɛ k mata Raama na. ²³Ndoŋ nna, nɛ Ebɔrɛ be kiyoyu gbelge mo so nɛ mo alɛ gba fara a wu abɔrɛsheŋ a malga hale n ya fo Nayɔf. ²⁴Sɔɔl daŋ yili Samuɛl gba be anishito n wu abɔrɛsheŋ ŋ kaŋɛ hale ŋ gbaŋ mbe epiŋi n le. Yili kachipurso kikɛ nɛ e daŋ baŋ delgeso n tɔr a dese Samuɛl be anishito hale n ya fo kanyɛso. Kananɛ k ji nna nɛ basa bee bishi le na: “Sɔɔl gba naŋ ki anebi nna a?”

Jonatan ka chɛ Deevid to be asheŋ

¹Ndoŋ nna nɛ Deevid shile n lar Nayɔf nɛ k wɔ Raama na n yɔ Jonatan kutɔ n ya bishi mo le: “Manɛ nɛ n wora fo tuto Sɔɔl nɛ e bee sha kemɔ ma? Manɛ be kulubi nɛ n wora?”

²Nɛ Jonatan kaŋɛ le: “Ebɔrɛ maaŋ shuli gba nɛ n tuto e mɔ fo. E maa ta kusɔ kama a ŋana ma so. Kede bre nɛ e beeŋ ta ŋ ŋana ma so a? K maŋ la kashenteŋ!”

³Ama le nɛ Deevid daŋ kaŋɛ: “Fo tuto gba nyi kananɛ fee sha ma ga, amoso nɛ e yili kumo fanɛ e maaŋ kaŋɛ fo kusɔ nɛ e kre na, saŋɛ na so fo kagbene maaŋ jija fo ga. Fo nɛ Ebɔrɛ e la ma shɛdajipo fanɛ ma nɛ luwu maŋ naa wɔ kufɔ!”

⁴Nɛ Jonatan kaŋɛ Deevid le: “Kusɔ kama nɛ fee sha, meeŋ wora kumo n sa fo.”

⁵Nɛ Deevid kaŋɛ le: “Echefo e la kufɔl popɔr be kachɛ sososo be kejigboŋ na, nɛ k daga fanɛ ŋ ka ya tu fo tuto n ji, ama m maaŋ wora loŋ. Meeŋ yɔ kupuŋ to n ya fin kakpa ko ŋ ŋana n ya fo eklade be kaaseso. ⁶Sɔɔl kaa fin ma, fo kaŋɛ mo fanɛ ŋ kule fo ekpa nna m bɛta n yɔ ma kade to Bɛtlɛhɛm nɛ n ya tu ma basa n lara kafɛ kikɛ be sarga nɛ baa lara ndoŋ na. ⁷Nɛ e kaŋ maŋ kaŋɛ shɛŋ bre, kumo ere meeŋ nya ma kumu ama e kaŋ nya agbo bre kumo ere, e nya ma, e beeŋ tɔrɔ ma. ⁸Jande, wora ma kechɛto nseŋ bɛ kɔnɔ nɛ ma nɛ fo yili Enyɛnpe Ebɔrɛ be ketre so n nase na so. Nɛ n wora kulubi nna, kumo ere fo gbagba mɔ ma bɔ fo ka ta ma n sa fo tuto nɛ e mɔ.”

⁹Nɛ Jonatan yɛ: “Kare gba! Nɛ n daa nyi fanɛ n tuto bee fin fo nna kashenteŋto nɛ e mɔ, dafanɛ maŋ kaŋɛ fo a?”

¹⁰Nɛ Deevid malɛ bishi mo le: “Nɛ fo kaŋ ya kaŋɛ fo tuto nɛ e nya agbo, wanɛ e naaŋ naŋ kaŋɛ ma?”

¹¹Ndoŋ nna nɛ Jonatan kaŋɛ mo le: “Shin nɛ an yɔ kupuŋ to nɛ n ya kaŋɛ fo kusɔ ko.” B ka yɔ na, ¹²nɛ Jonatan kaŋɛ le: “Enyɛnpe Ebɔrɛ nɛ e la Israɛl be Ebɔrɛ nsaa la ma shɛdajipo na be eleŋto, ta n ya ka fo eklade saŋɛ ere so nɛ m pin kusɔ nɛ n tuto bee fɛ. E kaa fɛ fo nfɛra lela, meeŋ kaŋɛ fo. ¹³Nɛ fanɛ e bee sha ketɔrɔ fo malɛ nna, meeŋ kaŋɛ fo nseŋ chɛ fo to nɛ fo shile ŋ ŋana mo so. Nɛ ma alɛ kaa maŋ wora loŋ, kumo ere Enyɛnpe Ebɔrɛ e gberge ma kusoe. Ma kabɔrɛkule e la fanɛ Enyɛnpe Ebɔrɛ e chɛ fo to fanɛ kananɛ e chɛ n tuto to na, ¹⁴nɛ ŋ kraa wɔ ŋkpa to, kumo ere fo wora kusɔ nɛ fo nase kɔnɔ fanɛ feeŋ wora n sa ma na. Nɛ k ba fanɛ n wu malɛ nna, ¹⁵kumo ere fo wora ma kanaŋ kelela. Hale nɛ Enyɛnpe Ebɔrɛ mur fo doŋana kikɛ gba, baa kraa wora ma kanaŋ kelela. ¹⁶Anyi be kɔnɔ nɛ an nase n sa abar na maaŋ jija kikɛ. Nɛ k baŋ jija malɛ, Enyɛnpe Ebɔrɛ e gberge fo kusoe.”

¹⁷Ŋkpal Jonatan ka daa sha Deevid fanɛ kananɛ e bee sha mo gbagba be kumu so e daŋ shin nɛ Deevid nase kɔnɔ kela nyɔsopo nna n sa mo fanɛ e beeŋ baa la mo teri kpakpaso. ¹⁸Ade kikɛ be kaman nɛ Jonatan kaŋɛ le: Echefo e la kufɔl popɔr be kachɛ sososo be kejigboŋ na, fo alɛ baa maŋ yɔ ndoŋ, ekama nyam beeŋ pin fo ka maŋ wɔ ndoŋ. ¹⁹Eklade be kaaseso bre nɛ baaŋ pin ga fanɛ fo maŋ wɔtɔ, amoso naŋ yɔ kakpa nɛ fo daŋ ŋana saŋɛ so nɛ le be asheŋ ere kikɛ fara na, n ya ŋana ajembu nɛ a deŋ abar so kululu na ase. ²⁰Meeŋ to atanyembi asa n yɔ ajembu nɛ a deŋ abar so kululu na ase fanɛ ŋ ka bee to kusɔ ko na. ²¹Kumo be kaman nɛ n shuŋi ma kayɛrbi fanɛ e ya fin atanyembi na. Nɛ ŋ kaŋ baŋ kaŋɛ mo le: “Keni atanyembi na e dese fo anishito na, ta amo,” kumo ere shɛŋ maaŋ wora fo nna na, feeŋ tiŋ n lar a ba. Enyɛnpe Ebɔrɛ na e la ma shɛdajipo fanɛ shɛŋ maaŋ wora fo. ²²Ama nɛ m baŋ kaŋɛ mo fanɛ: “Keni atanyembi na e dese kufɔ ndoŋ ere nna, kumo ere Enyɛnpe Ebɔrɛ na bee sha fanɛ fo baa yɔ nna na, nɛ fo baa yɔ.” ²³Anyi be kɔnɔ nɛ an nase n sa abar na bre, Enyɛnpe Ebɔrɛ na gbagba beeŋ chɛ anyi to nɛ an bɛ kumo so mbaanaayɔ.

²⁴Ndoŋ nna nɛ Deevid ya ŋana kupuŋ to. Kachɛ nɛ baa ji kufɔl popɔr be kachɛ sososo be kejigboŋ na nɛ Sɔɔl ba kejigboŋ na to ²⁵nseŋ ya chena kakpa nɛ e bee kaa chena na ŋ gbasa egbal nɛ Abna chena m bɛ mo so nɛ Jonatan malɛ chena ŋ kilgi anishito n shoŋi mo, ama esa kikɛ daa maŋ chena Deevid bre be kakpa na. ²⁶Kumo be kamɔnchɛ na Sɔɔl daa maŋ kaŋɛ shɛŋ ŋkpal manɛ so e daa fɛ nna fanɛ, ashere Deevid wora n da daŋkare be ekishi ko so nna so nɛ e maŋ tiŋ n wea bumo to. ²⁷B ka ji kufɔl popɔr be kachɛ sososo be kejigboŋ na ŋklade nɛ esa kama kraa maŋ tase Deevid be kakpa na, nɛ Sɔɔl bishi Jonatan le: “Manɛ nna nɛ Deevid maŋ ba kejigboŋ na to ndre nɛ kabre kikɛ?”

²⁸Nɛ Jonatan kaŋɛ mo le: “E kule ma nna fanɛ n sa mo ekpa nɛ e yɔ Bɛtlɛhɛm. ²⁹E yɛ, ‘Jande, shin nɛ n yɔ Bɛtlɛhɛm, ŋkpal manɛ so ma kanaŋ bee lara sarga nna kabre, amoso nɛ mee sha fanɛ ma alɛ gba e ba wɔ ndoŋ. Nɛ fanɛ n la fo teri gbagba nna bre, kumo ere fo sa ma ekpa nɛ n ya wu ŋ kurgepoana.’ Amoso nɛ e maŋ wɔ fo ejikpa nfe na.”

³⁰Ndoŋ nna nɛ Sɔɔl nya agbo ga n wɔtɔ Jonatan nseŋ kaŋɛ mo le: “Fo maŋ naa la m pibinyɛn ŋkpal manɛ so, fo ki edebɔrpo nna! Naniere nɛ m pin fanɛ fo nɛ Deevid e wɔ aya. Fo paŋ anishinyɔr ga. Fo nio kurge fo ŋ gben jiga. ³¹Fo maŋ nyi fanɛ nɛ Deevid baa wɔ ŋkpa to, fo maaŋ ji efuli ere be kuwura kikɛ a? Men ya pɛ Deevid m bar ma nfe, ŋkpal manɛ so, e daga luwu!”

³²Nɛ Jonatan bishi mo tuto le: “Manɛ nɛ Deevid wora nɛ fee sha kemɔ mo?”

³³Ndoŋ nna nɛ Sɔɔl ta mbe kekpa ŋ kpa Jonatan nɛ e mɔ mo. Ndoŋ nɛ Jonatan pin fanɛ mo tuto daa fin Deevid nna kenishipereso nɛ e mɔ. ³⁴Jonatan daŋ nya agbo nna ga ŋkpal mo tuto ka daŋ tege Deevid so so, nseŋ koso ajibi na ase ŋ ka bumo. Mo alɛ daa maŋ naŋ ji shɛŋ kumo be kamɔnchɛ kikɛ. ³⁵Kumo be ŋklade be kachipurso nɛ Jonatan lar n yɔ kupuŋ na to n ya tu Deevid. E daŋ keta kabrantiɛ fɔlbi ko nna n ti mbe kumu so n yɔ. ³⁶B ka bee yɔ na, nɛ e kaŋɛ kebia na le: “M baŋ to atanyembi ere, fo shile manaŋ n ya fin amo m bar ma.” Kabrantiɛbia na ka fara a shile na, nɛ Jonatan to keta na nɛ ketanyembi na ya bɔla kebia na be kumu so n ya tɔr mbe anishito kufɔ. ³⁷Kebrantiɛ fɔlbi na ka ya fo kakpa nɛ ketanyembi na tɔr na, nɛ Jonatan ponte mo so ŋ kaŋɛ mo le: “Baa yɔ! Ketanyembi na kraa dese anishito! ³⁸Sa maŋ yili ndoŋ, wora manaŋ!” Ndoŋ nna nɛ kebia na ta ketanyembi na m ba sa mo nyɛnpe Jonatan. ³⁹Kebrantiɛ fɔlbi na bre daa maŋ nyi kesheŋ nɛ k wora na be kifito ama Jonatan nɛ Deevid nawule e nyi. ⁴⁰Nɛ Jonatan ta mbe akɔsɔ n sa kabrantiɛbia na fanɛ e ta amo m bɛta a yɔ kade to.

⁴¹Kabrantiɛbia na ka yɔ na be kaman, nɛ Deevid koso ashi ajembu nɛ a deŋ abar so kululu na ase n ya jɔŋɛ Jonatan ase ale asa. Nɛ b chɔrɔ abar kashaso nseŋ shu ga. Ama Deevid e daŋ shu ga. ⁴²Ndoŋ nna nɛ Jonatan kaŋɛ Deevid le: “Ebɔrɛ e yɛr fo nɛ alenfia, ama baa nyiŋi kananɛ ma nɛ fo nase kɔnɔ Enyɛnpe Ebɔrɛ be ketre to a yɔ anyi be keteri be kaplɛa so n sa abar na. Ebɔrɛ malɛ beeŋ shin nɛ ma kanaŋ nɛ fo kanaŋ e bɛ kɔnɔ naseso ere so hale mbaanaayɔ.” Ndoŋ nna nɛ Deevid choŋ, nɛ Jonatan malɛ bɛta n yɔ kade to.

Deevid ka shile Sɔɔl kutɔ be asheŋ

¹Nɛ Deevid yɔ bɔrɛmatapo Ahimɛlɛk kutɔ ashi kade nɛ baa tre Nɔb na. Nɛ Ahimɛlɛk chicha kufuso n lar m ba Deevid kutɔ m ba bishi mo le: “Manɛ nna nɛ fo nawule kpeŋ ba nfe?”

²Nɛ Deevid kaŋɛ mo le: “Ewura be kushuŋ so nɛ m ba. E kaŋɛ nna fanɛ n sa maŋ kaŋɛ esa kama kusɔ nɛ e shuŋi ma fanɛ m ba wora nfe. Ama ŋ ŋini mbraana na bre kaboŋ ko fanɛ b ba tu ma ndoŋ. ³Manɛ be ajibi nɛ fo kɔ nfe nɛ fo sa ma? Fo maŋ kɔ ebodobodo anu nɛ fo sa ma?”

⁴Nɛ bɔrɛmatapo na kaŋɛ mo le: “Bodobodo cheembi na nawule nɛ ŋ kɔ, ama nɛ fanɛ fo braana na nɛ beche maŋ di keche nɛ kenyɛn nchɛ nyɔ ere bre, feeŋ tiŋ n ta amo.”

⁵Nɛ Deevid yɛ: “Kashenteŋto, b maŋ di beche. Ŋkpal manɛ so hale nɛ anyee yɔ nɛ an ya shuŋ kushuŋ kama gba, b maa wora loŋ. Ama ewura be kushuŋ to bre nɛ baaŋ wora loŋ a?”

⁶Ndoŋ nna nɛ bɔrɛmatapo na ta bodobodo cheembi nɛ b daŋ deŋi Enyɛnpe Ebɔrɛ na be teebɔl cheembi so na nseŋ ta apopɔr n deŋi so na, n sa Deevid ŋkpal manɛ so bodobodo kikɛ daŋ maŋ naa wɔtɔ.

⁷Duɛg nɛ e shi Edɔm be efuli so nsaa la Sɔɔl be mbolpɔkpapo nimuso na gba daŋ ba ndoŋ kumo be kamɔnchɛ nna, nɛ e ba bunyaŋ Enyɛnpe Ebɔrɛ.

⁸Nɛ Deevid kaŋɛ Ahimɛlɛk le: “Fo kɔ kekpa ŋko tokobi nɛ fo sa ma a? Ewura na ka tre ma eleŋso na e shin nɛ ŋ kuse nseŋ teŋ ma tokobi nɛ ma akɔsɔ na be kekama so.”

⁹Nɛ Ahimɛlɛk malɛ kaŋɛ le: “Ŋ kɔ Goliɛf nɛ e la Filisti be esa nɛ fo mɔ ashi Ela be ketaŋɛ to na be tokobi ŋ kutɔ. B ta wajɛ m mɛa kumo so nɛ k wɔ kale lela nɛ baa tre Ɛfɔd na be kaman. Nɛ fee sha fo ta kumo ŋkpal manɛ so kumo nawule e la kekɔsɔ nfe.” Nɛ Deevid kaŋɛ: “Tokobi kama maŋ naa wɔtɔ n fo kumo so. Ta kumo n sa ma.”

¹⁰Kumo be kamɔnchɛ na nɛ Deevid fara a shile a ŋana Sɔɔl so hale n yɔ ewura Akish kutɔ ashi Gaaf nɛ k wɔ Filisti be efuli so na. ¹¹Ndoŋ nna nɛ ewura na be benimuana na kaŋɛ Akish le: “Mannɛ Deevid ere e la mbe efuli so be ewura na a? Mannɛ mbe asheŋ nɛ beche bee boŋ kashɛ a cha a kaŋɛ fanɛ:

‘Sɔɔl mɔ basa kagboŋ

ama Deevid bre mɔ basa ŋgboŋto kudu nna.’ ”

¹²Bumo be mmalga na daŋ shin nna nɛ Deevid fara a ŋana ewura Akish ga. ¹³Ŋkpal loŋ so saŋkama nɛ basa baa wɔ mo kutɔ Deevid bee wora fanɛ eboŋ ka dii mo nna. B baŋ yɔ nɛ b ya pɛ mo malɛ e bee yɔ nna n ya ka chaŋ a chaŋ kade na be kabuna to be kukuloŋ gboŋ na so nsaa shin nɛ echɔl bee juye a wurge mbe katɔl so. ¹⁴Ndoŋ nna nɛ Akish kaŋɛ mbe benimuana le: “Men keni! Kanyɛn na bee lɔ eboŋ nna na. Manɛ nna nɛ men bar mo ŋ kutɔ? ¹⁵Bebompo damta tia wɔ kade ere to nɛ manɛ nna nɛ men naŋ keta ede m ba nɛ men ba ti so nɛ e baa wora kawulisheŋ? Men lara mo ma laŋ to!”

B ka mɔ bɔrɛmatapoana na be asheŋ

¹Ndoŋ nna nɛ Deevid shile Gaaf be kade to n yɔ kebeelaŋ ko nɛ k mata kade nɛ baa tre Adulam na to. Mo daana nɛ mbe kanaŋ nɛ b ka na ka nu fanɛ e wɔ ndoŋ nɛ b yɔ ndoŋ n ya tu mo. ²Basa nɛ b daa ji awurfoŋ na nɛ bumo nɛ b ji akɔ nɛ bumo nɛ asheŋ maa bɔlɔ bumo kenishi na kikɛ daŋ shile nna n yɔ mo kutɔ. Loŋ be basa na daa sa fanɛ basa alfa ana, nɛ Deevid ki bumo be ejuŋkparpo.

³Kumo be kaman nɛ Deevid lar kebeelaŋ nɛ k mata Adulam na to n yɔ Mizpa ashi Mowab be efuli so n ya kaŋɛ Mowab be ewura le: “Jande shin nɛ n tuto nɛ n nio e ba chena fo kutɔ n ya fo saŋɛ nɛ meeŋ wu kusɔ nɛ Ebɔrɛ beeŋ wora n sa ma.” ⁴Nɛ Mowab be ewura na shuli nɛ Deevid shin nɛ mo tuto nɛ mo nio ya kaa wɔ ewura na kutɔ nɛ Deevid bre kraŋ ŋana.

⁵Ndoŋ nna nɛ anebi Gad kaŋɛ Deevid le: “Sa maŋ chena nfe. Bɛta n yɔ Juda be kasawule so manaŋ.” Nɛ Deevid lar n yɔ Hɛrɛf be kupo to.

⁶Kachako nɛ Sɔɔl tase kedibi fimbi ko nɛ baa tre tamariski na be kifito ashi Gibia be kebee na so nseŋ keta mbe kekpa nɛ mbe benapo be benimu kikɛ wɔ ndoŋ. Ndoŋ nna nɛ e nu fanɛ b wu Deevid nɛ mbe basa. ⁷Nɛ e kaŋɛ mbe benimuana na le: “Men nu nfe! Men la Bɛnjamin be kaman to ebi nna, amoso men baŋ shin nɛ Jɛsi pibinyɛn ere ki ewura, e maaŋ sa menyi kudɔsawule ŋko ndibi nɛ baa tre Greep na be adɔ. Mo alɛ maaŋ naŋ ta menyi ŋ ki mbe benapo ŋgboŋ ŋgboŋ nɛ kalfa kalfa be bejuŋkparpoana fanɛ kananɛ n ta menyi ŋ ki ere. ⁸Ama menyi kikɛ maŋ yil ma kaman. Menyi alɛ be ekama malɛ maŋ kaŋɛ ma fanɛ m pibinyɛn Jonatan nɛ Deevid wora kɔnɔkoŋwule be ŋkre nna. Ma asheŋ maŋ tir menyi, amoso esa kama maŋ kaŋɛ ma fanɛ Jonatan e naa leŋ Deevid to fanɛ e mɔ ma!”

⁹Duɛg nɛ e la Edɔm be esa na gba daa yil Sɔɔl be benimuana na kutɔ nna nseŋ kaŋɛ le: “N daŋ wu Deevid ka wɔ Ahitub pibinyɛn Ahimɛlɛk nɛ e la bɔrɛmatapo na kutɔ ashi Nɔb. ¹⁰Nɛ Ahimɛlɛk bishi Enyɛnpe Ebɔrɛ kusɔ nɛ k daga Deevid ka wora nseŋ sa Deevid ajibi. E ta Goliɛf nɛ e la Filisti be esa na be tokobi gba n ti so n sa mo.”

¹¹Ndoŋ nna nɛ ewura Sɔɔl shuŋi n tre bɔrɛmatapo Ahimɛlɛk nɛ mbe kanaŋ, nɛ bumo kikɛ la bɔrɛmatapoana ashi Nɔb na, nɛ b ba mo kutɔ. ¹²Nɛ Sɔɔl kaŋɛ Ahimɛlɛk: “Keni, nu nfe!”

Nɛ Ahimɛlɛk yɛ: “Yiramu! Fo e wɔ ma.”

¹³Nɛ Sɔɔl bishi mo le: “Manɛ nna nɛ fo nɛ Deevid bee fin ma kulubi? Manɛ nna nɛ fo sa mo ajibi nɛ tokobi nseŋ naŋ malga Ebɔrɛ kutɔ gba n sa mo? Naniere bre e nyaŋɛ to n wɔtɔ ma nsaa fin ma nɛ e mɔ.”

¹⁴Ndoŋ nna nɛ Ahimɛlɛk malɛ kaŋɛ le: “Fo benimuana ere be ekama maŋ wɔtɔ a ji kashenteŋ fanɛ Deevid. E la fo sha nna nseŋ naa la fo benapo nɛ baa kuŋ fo na be enimu nseŋ naa kɔ bunyaŋ gba ashi fo laŋ to ebi kikɛ kutɔ. ¹⁵Mannɛ kede e la ma sososo ŋ ka bee malga Ebɔrɛ kutɔ ŋkpal Deevid so. Kumo alɛ be loŋ maŋ naŋ dii fo agbo kikɛ. Nɛ manɛ be kulubi nɛ mee fin fo? Sa maŋ wu ma ŋko ma kanaŋ to be esa kikɛ kulubi ŋkpal le be asheŋ ere so!”

¹⁶Nɛ Sɔɔl kaŋɛ le: “Ahimɛlɛk, fo nɛ fo kanaŋ kikɛ daga luwu.” ¹⁷Kumo be kaman nɛ Sɔɔl ponte ŋ kaŋɛ bekumpo na le: “Men mɔ Enyɛnpe Ebɔrɛ be bɔrɛmatapoana na kikɛ, ŋkpal manɛ so, bumo nɛ Deevid e wora kɔnɔ ŋ kre asheŋ. B nyi Deevid ka daa shile nɛ b kini kekaŋɛ ma.” Ama bekumpo na be ekama maŋ teŋi keshilbi gba ŋ ŋini Enyɛnpe Ebɔrɛ be bɔrɛmatapoana na. ¹⁸Nɛ Sɔɔl kilgi ŋ kaŋɛ Duɛg nɛ e shi Edɔm na le: “Mɔ bɔrɛmatapoana na kikɛ!” Kumo be kamɔnchɛ bɔrɛmatapoana nɛ b fo kabɔrɛmata be epiŋi nɛ baa tre Ɛfɔd na be kebuu na be basa aduburwa nɛ anu nɛ Duɛg mɔ. ¹⁹Sɔɔl daŋ shin nna nɛ Duɛg yɔ Nɔb, nɛ k la bɔrɛmatapoana be kade to na, n ya mɔ ndoŋebi kikɛ. E daŋ mɔ benyɛn nɛ beche nɛ mbia nɛ mbi popɔrbiana nɛ ana nɛ ekurma nɛ mbolpɔ kikɛ nna.

²⁰Ama Ahimɛlɛk pibinyɛn ko nɛ baa tre Abiata na bre daŋ ŋana nna n shile n ya tu Deevid. ²¹E daŋ ya kaŋɛ mo kananɛ Sɔɔl mɔ Enyɛnpe Ebɔrɛ be bɔrɛmatapoana nna. ²²Nɛ Deevid yɛ: “Kachɛ nɛ n wu Duɛg na nɛ m pin kashenteŋto fanɛ e beeŋ ya kaŋɛ Sɔɔl. Ma ere so nɛ b kpal m mɔ fo kanaŋ na. ²³Amoso ba wɔ ŋ kutɔ. Sɔɔl bee fin ma nɛ fo kikɛ nna nɛ e mɔ, ama sa maa lɔ kufu, an kikɛ beeŋ lar.”

Deevid ka mɔlga kade nɛ baa tre Kiila na be asheŋ

¹Deevid ka nu fanɛ Filistiebi na bee kɔ Kiilaebi kena hale a yuri bumo be aboyu popɔr nɛ b buri n nase kugooro so, ²nɛ e bishi Enyɛnpe Ebɔrɛ le: “N ya kɔ Filistiebi na kena a?”

Nɛ Enyɛnpe Ebɔrɛ kaŋɛ le: “Mm, ya kɔ bumo kena nseŋ mɔlga Kiilaebi.”

³Ama le nɛ Deevid be basa na daŋ kaŋɛ mo: “Hale Juda nfe gba, anyee lɔ kufu nna; an kaŋ yɔ Kiila nɛ an ya kɔ Filistiebi ere bre, kufu na beeŋ naŋ wora kishi n ti so ga!” ⁴Amoso Deevid daŋ naŋ laŋɛ nna fanɛ m bishi Enyɛnpe Ebɔrɛ na kumo be asheŋ to nɛnɛ, nɛ Enyɛnpe Ebɔrɛ kaŋɛ mo le: “Ya kɔ Filistiebi na kena Kiila, ŋkpal manɛ so, meeŋ shin nɛ men kɔ m pɔɔ bumo so.” ⁵Ndoŋ nna nɛ Deevid nɛ mbe basa yɔ Kiila n ya kɔ Filistiebi na kena m mɔ bumo be basa damta nseŋ ta bumo be asɔbɔya. Kananɛ Deevid wora m mɔlga Kiila be kade na nna na.

⁶Ahimɛlɛk pibinyɛn Abiata ka shile n ya tu Deevid ashi Kiila na, e daŋ ta kabɔrɛmata be piŋi nɛ baa tre Ɛfɔd na nna n ti so n yɔ. ⁷Ndoŋ nna nɛ b kaŋɛ Sɔɔl fanɛ Deevid yɔ Kiila, nɛ Sɔɔl kaŋɛ le: “Ebɔrɛ ta mo n bɔɔ ma enɔ nna na. Deevid teŋ kre mbe kumu n sa ma na nna ŋkpal e ka luri kade nɛ b pɔr egbal ŋ kulti kumo nɛ k kɔ akuloŋ lempo nɛ abersobi so.” ⁸Kede be kaman nɛ Sɔɔl shin nɛ mbe benapo kre kena n wora shiriya nɛ b ya pugi ŋ kulti Kiila, saŋɛ na so, baaŋ nya Deevid nɛ mbe basa m pɛ.

⁹Deevid ka nu fanɛ Sɔɔl bee kre nɛ e ba kɔ mo na, nɛ e kaŋɛ bɔrɛmatapo Abiata le: “Ta kabɔrɛmata be piŋi lela nɛ baa tre Ɛfɔd na m ba, saŋɛ na so anyeeŋ bishi Ebɔrɛ kusɔ nɛ k daga an ka wora.” ¹⁰Nɛ Deevid kule Ebɔrɛ ŋ kaŋɛ le: “O Enyɛnpe, nɛ fo la Israɛl be Ebɔrɛ, n nu fanɛ Sɔɔl bee ba nɛ e ba mur Kiila be kade ebi ŋkpal fo kenya so. ¹¹Kiila be ndetobia na beeŋ ta ma n sa Sɔɔl a? Kashenteŋto nɛ Sɔɔl bee ba fanɛ kananɛ n nu ere a? Enyɛnpe nɛ fo la Israɛl be Ebɔrɛ, jande kaŋɛ ma kusɔ nɛ k la!”

Nɛ Enyɛnpe Ebɔrɛ kaŋɛ le: “Mm Sɔɔl beeŋ ba.”

¹²Nɛ Deevid naŋ bishi le: “Kiilaebi beeŋ ta ma nɛ ma basa m bɔɔ Sɔɔl enɔ a?”

Nɛ Enyɛnpe Ebɔrɛ yɛ: “Mm, baaŋ wora loŋ.”

¹³Ndoŋ nna nɛ Deevid nɛ mbe basa alfa ashe kikɛ lar Kiila epul na to n ya kaa chena mboŋ ko a wora kashiŋ nsaa koso ndoŋ a yɔ anishi to. Sɔɔl ka nu fanɛ Deevid lar Kiila n choŋ, nɛ e chɛrga mbe nfɛra nsaa maŋ naŋ yɔ ndoŋ.

Deevid ka yɔ kebee so be kade ko ase be asheŋ

¹⁴Deevid daŋ ya ŋana abeelaŋ nɛ a wɔ keshishɛrsawule nɛ baa tre Ziif na to nna. Sɔɔl daŋ baa fin mo nna saŋkama, ama Ebɔrɛ daa maŋ ta Deevid m bɔɔ mo enɔ. ¹⁵Jemanɛ ko Deevid ka wɔ Hɔrɛsh nɛ k wɔ keshishɛrsawule nɛ baa tre Ziif na; e daa lɔ kufu nna ŋkpal Sɔɔl ka daŋ ba ndoŋ nɛ e ba fin mo m mɔ so. ¹⁶Ndoŋ nna nɛ Jonatan yɔ Deevid kutɔ n ya leŋ mo to ŋ kaŋɛ mo fanɛ Ebɔrɛ beeŋ kuŋ mo, ¹⁷nseŋ naŋ kaŋɛ mo le: “N tuto Sɔɔl maaŋ tiŋ n wora fo shɛŋ, amoso sa maa lɔ kufu. E baa nyi geeŋ fanɛ fo e naa shin nɛ fo ba ki Israɛl be ewura nɛ ma alɛ e baa la enimu m bɛ so.” ¹⁸Ndoŋ nna nɛ bumo benyɔ kikɛ naŋ nase keteri kpakpaso be nnɔ ashi Ebɔrɛ be anishito n sa abar. Nɛ Deevid bre daŋ shir a wɔ Hɔrɛsh nɛ Jonatan malɛ yɔ epe.

¹⁹Ade be kaman nɛ basa ko nɛ b shi Ziif be kade to yɔ Sɔɔl kutɔ ashi Gibia n ya kaŋɛ le: “Deevid maŋ wɔ kufɔ. E wɔ anyi be efuli so be kebeegboŋ nɛ baa tre Hakila nɛ k wɔ Jeshimɔn be kelargato be kaseto be kaba so m mata Hɔrɛsh na. ²⁰Amoso Yiramu, ba anyi be efuli so saŋkama nɛ k par fo nɛ an chɛ fo to nɛ fo nya mo m pɛ.”

²¹Nɛ Sɔɔl kaŋɛ le: “Enyɛnpe Ebɔrɛ e nɛfa menyi ŋkpal kusɔ nɛ men kaŋɛ ma ere so. ²²N nu fanɛ e kɔ kanyiasheŋ ga, amoso men naŋ bɛta n ya fin mo m pin kakpa nɛ e wɔ gbagba nseŋ bishi to nɛnɛ ŋ keni esa ko gba wu mo ndoŋ n ti so a? ²³Men lege to n fin mboŋ kama nɛ e bee kaa shile a ŋana na nseŋ ba kaŋɛ ma. Saŋɛ na so ma nɛ menyi beeŋ fin mo. E baa wɔ efuli ere so bre men nya mo. Hale nɛ meeŋ keni Juda be efuli so kikɛ gba n fin mo nna meeŋ wora loŋ.”

²⁴Ndoŋ nna nɛ Ziif be basa na bɛta n juŋkpar Sɔɔl n yɔ Ziif. Ama Deevid nɛ mbe basa bre daa wɔ Mayɔn be kiyi to nna ashi Jeshimɔn be kelargato be kaseto be kaba so. ²⁵Ndoŋ nna nɛ Sɔɔl nɛ mbe benapo lar nɛ b ya fin Deevid, ama Deevid ka nu fanɛ Sɔɔl bee ba, nɛ e yɔ kefalta be kebee ko so ashi Mayɔn be kiyi to n ya kaa wɔ ndoŋ. Sɔɔl ka pin fanɛ Deevid wɔ ndoŋ na, nɛ e naŋ fara a ju a buu mo so. ²⁶Sɔɔl nɛ mbe basa daa wɔ kebee na be kaba ko nna nɛ Deevid malɛ nɛ mbe basa wɔ kaba ko a fin kananɛ baaŋ wora n nya ekpa n shile. A daŋ ka gbrɛbi nɛ Sɔɔl nɛ mbe basa e pɛ Deevid nɛ mbe basa. ²⁷Nɛ kabɔ ko ba kaŋɛ Sɔɔl le: “Men ba manaŋ! Filistiebi na ta kena m ba purgi anyi be efuli ebi!” ²⁸Ndoŋ nna nɛ Sɔɔl yige kebaa ju a buu Deevid so nseŋ yɔ nɛ e ya kɔ Filistiebi na. Amoso nɛ baa tre kebee na “Kefalta nɛ k barga basa to.” ²⁹Kede be kaman nɛ Deevid lar ndoŋ n ya ŋana kakpa nɛ k beeŋ baa du kpakpa nɛ b wu mo ashi Engedi be kebonfu so.

Deevid ka kini kemɔ Sɔɔl be asheŋ

¹Sɔɔl ka ya kɔ Filistiebi na kena n loge nseŋ bɛta m ba, nɛ b kaŋɛ mo fanɛ Deevid wɔ keshishɛrsawule nɛ k mata Engedi na ase. ²Nɛ Sɔɔl keta mbe benapo nɛ b kɔ eleŋ a kɔ kena ga ashi Israɛl kikɛ to na be ŋgboŋ asa a fin Deevid nɛ mbe basa a yɔ kakpa nɛ baa tre chibir be afalta na be kaba so. ³E daŋ ba kebeelaŋ ko nɛ k mata mbolpɔ be aluu nɛ a mata ekpa na nna nseŋ luri ndoŋ nɛ e ya jɔŋɛ. Loŋ be saŋɛ na nɛ Deevid nɛ mbe basa malɛ ŋana loŋ be kebeelaŋ na be ŋkpar to. ⁴Nɛ Deevid be basa na kuli ŋ kaŋɛ mo le: “Ekpa bugi n sa fo alɛ gba naniere nna na! Enyɛnpe Ebɔrɛ kaŋɛ fanɛ e beeŋ ta fo doŋ n wɔtɔ fo enɔ to nɛ fo wora mo kusɔ kama nɛ fee sha.” Ndoŋ nna nɛ Deevid pete n ya ku Sɔɔl be piŋi be keyɛlbi nɛ Sɔɔl maŋ nyi. ⁵Kumo be kaman nɛ Deevid be nfɛra fara a tɔrɔ mo ŋkpal e ka wora loŋ so. ⁶Ndoŋ nna nɛ e kaŋɛ mbe basa na le: “Enyɛnpe Ebɔrɛ e baa pete ma nɛ n wora n nyɛnpe nɛ Enyɛnpe Ebɔrɛ lara fanɛ ewura kulubi. K maŋ daga fanɛ n wora mo kulubi kikɛ!” ⁷Kumo be kaman nɛ Deevid kpele mbe basa kusoe fanɛ b sa maŋ kaŋ wora Sɔɔl shɛŋ.

Nɛ Sɔɔl lar kebeelaŋ na to m pɛ ekpa a yɔ. ⁸K maŋ chɛr ko nɛ Deevid malɛ gba lar kebeelaŋ na to nseŋ yili kufɔ m ponte ŋ tre: “Yiramu!” Sɔɔl ka gbɛ ŋ keni, nɛ Deevid jɔŋɛ bunyanso ⁹nseŋ ŋ kaŋɛ le: “Manɛ nna nɛ fee nu kusɔ nɛ basa bee kaŋɛ fo, fanɛ mee sha kewora fo kulubi nna? ¹⁰Fo gbagba wu fanɛ Enyɛnpe Ebɔrɛ daŋ ta fo nna m bɔɔ ma enɔ ashi kebeelaŋ ere to kabre. Ma basa ko kaŋɛ ma fanɛ m mɔ fo, ama ma ere yige fo nseŋ kaŋɛ bumo fanɛ, k maŋ daga fanɛ n wora fo kulubi kikɛ, ŋkpal manɛ so, fo nɛ Enyɛnpe Ebɔrɛ lara fanɛ fo ba la ewura. ¹¹Yiramu, keni kusɔ nɛ ŋ keta ere, fo gbagba be piŋi be keyɛlbi nna na. Baa nyi fanɛ kananɛ m baŋ nya ekpa ŋ ku fo piŋi be keyɛlbi ere, loŋ be ekpa nɛ n daa kɔ nɛ n tiŋ m mɔ fo gba, ama ma alɛ maŋ wora loŋ. Amoso le e daga fo alɛ gba ka pin fanɛ ma ere maŋ kɔ nfɛra lubi kikɛ n sa fo. Kashenteŋ nna fanɛ maŋ wora fo shɛŋ, ama fo alɛ pere kenishi a fin ma kemɔ. ¹²Enyɛnpe Ebɔrɛ nawule e naaŋ ji anyi kikɛ demu m pin emo nɛ e wora n foe ekpa. Mo alɛ beeŋ gberge fo kusoe ŋkpal kusɔ nɛ fo wora ma ere so. Ama ma ere maaŋ wora fo shɛŋ. ¹³Dra kikɛ nɛ baa bɔ keŋasa a kaŋɛ fanɛ: ‘Basa lubi e naa wora kulubi.’ Amoso ma ere maaŋ wora fo kulubi kikɛ. ¹⁴Wanɛ e la ma alɛ, kujɔnɔmu fuloŋ nɛ kejaŋjaŋkɔrso, nɛ Israɛl be ewura ju a buu ma so a fin ma nɛ e mɔ le ere? ¹⁵Ŋkeshin nɛ Enyɛnpe Ebɔrɛ na beeŋ ji ma nɛ fo kikɛ demu nseŋ lara anyi to be emo nɛ e maŋ wora nɛnɛ. Ma kabɔrɛkule e la fanɛ Ebɔrɛ e yili ma kaman nseŋ mɔlga ma ashi fo enɔ to.”

¹⁶Deevid ka malga n loge nɛ Sɔɔl kaŋɛ le: “M pibi Deevid, fo nna a?” Kumo be kaman nɛ e fara a shu awɔrso ¹⁷nseŋ kaŋɛ Deevid le: “Fo kɔ kashenteŋ a chɔ ma. Fo wora ma kelela ga, ama kulubi nɛ ma ere ta a ka fo kukɔ! ¹⁸Ama kabre, fo kaŋɛ ma kelela nɛ fo wora ma saŋɛ so nɛ Enyɛnpe Ebɔrɛ ta ma m bɔɔ fo enɔ nɛ fo kini kemɔ ma na. ¹⁹Nɛ fo daa la ma doŋ nna kashenteŋto, dafanɛ fo daa maaŋ yige ma kemɔ. Enyɛnpe Ebɔrɛ e nɛfa fo ŋkpal kusɔ nɛ fo wora ma ere so. ²⁰Naniere nɛ m pin fanɛ, fo e naaŋ ba ki Israɛl be ewura nɛ fo kuwurji malɛ e ji eleŋ ga. ²¹Ama nase kɔnɔ Enyɛnpe Ebɔrɛ be ketre to n sa ma fanɛ fo maaŋ mur ma kanaŋ. Saŋɛ na so, ma kanaŋ be ketre maaŋ mur.” ²²Nɛ Deevid nase kɔnɔ fanɛ e beeŋ wora loŋ.

Ade kikɛ be kaman nɛ Sɔɔl bɛta n yɔ epe nɛ Deevid malɛ nɛ mbe basa bɛta n yɔ bumo be eŋanakpa.

Samuɛl be luwu be asheŋ

¹Samuɛl ka wu nɛ Israɛlebi na kikɛ ba abar so m ba shu mbe keeli, nseŋ ta mo n ya puli mbe kade to ashi Raama.

Deevid nɛ Abigɛl be asheŋ

Ade kikɛ be kaman nɛ Deevid yɔ Paran be kiyi to. ^2-3Kanyɛn ko malɛ daŋ shi Kalɛb be kanaŋ to nɛ baa tre mo Nabaal. E daŋ shi Mayɔn be kade to nna n daa kɔ mo gbagba be kasawule nɛ k dese m mata Kamɛl be kade to. E daa la damawura nna nsaa kɔ mbolpɔ ŋgboŋ asa nɛ mboe malɛ kagboŋ koŋwule. Mbe eche e daa la Abigɛl, nɛ e daa walɛ kebita ga nsaa nyi asheŋ; ama Nabaal bre daa kɔ miiri nna ga, mo alɛ nsaa nya agbo manaŋ manaŋ.

Kamɛl be kade to nɛ Nabaal daa wɔ a kuya mbe mbolpɔ be afuibi, ⁴nɛ Deevid malɛ wɔ kiyi to nseŋ nu kumo be asheŋ. ⁵Ndoŋ nna nɛ Deevid shuŋi mbrantiɛfɔlbi kudu kikɛ fanɛ b yɔ Kamɛl n ya fin Nabaal n chɔrɔ mo n sa mo. ⁶Le be kubɔya nɛ e daŋ ta n shuŋi bumo Nabaal kutɔ. E yɛ: “Fo teri Deevid e naa chɔrɔ fo na, nsaa bishi fo nɛ fo kanaŋ nɛ kusɔ kama nɛ fo kɔ be alenfia be asheŋ. ⁷E yɛ e nu fanɛ fee kuya fo mbolpɔ be afuibi nna amoso nɛ e bee sha fo ka pin fanɛ fo mbolpɔkpapoana wɔ anyi kutɔ nfe, anyi alɛ maŋ tɔrɔ bumo ekpa kikɛ so. Saŋkama malɛ nɛ bumo nɛ ma basa tu abar, ma basa maa sɔ bumo shɛŋ. ⁸Fo bishi fo mbolpɔkpapoana na, bumo alɛ gba beeŋ kaŋɛ fo le be kesheŋ koŋwule ere. Kejigboŋ be kachɛ nɛ an ba na, amoso Deevid yɛ, fo keta anyi nɛnɛ. E yɛ kusɔ kama nɛ fo kɔ, fo ta kumo n chɛ fo teri Deevid nɛ fo nyɛrbi to.”

⁹Le be kubɔya ere nɛ Deevid be basa na daŋ ta n ya sa Nabaal nsaa jo nɛ b nu kusɔ ko ashi mo kutɔ. ¹⁰Ndoŋ nna nɛ Nabaal malɛ kaŋɛ le: “Wanɛ bre e la Jɛsi pibinyɛn Deevid ere? Naniere kananɛ nyɛrbi damta bee shile bumo nyɛnpeana nna na! ¹¹Ashere bumo be eko e la mo alɛ gba na. M maaŋ ta ma ajibi nɛ nchu nɛ ma eblaŋ nɛ m bar nɛ m ba sa basa nɛ baa kuya mbolpɔ be afuibi na n sa basa nɛ m maŋ nyi!”

¹²Nɛ Deevid be basa na bɛta n ya kaŋɛ mo kusɔ nɛ Nabaal kaŋɛ na kikɛ. ¹³Ndoŋ nna nɛ Deevid kaŋɛ bumo le: “Men ta men be etokobi!” Deevid nɛ mbe benapo, beeŋ wora fanɛ basa alfa ana, e ta bumo be etokobi nɛ b yɔ nseŋ yige basa alfa anyɔ malɛ bumo be keeyi to.

¹⁴Nɛ Nabaal be nyɛrbi na be eko kaŋɛ Nabaal be eche Abigɛl le: “Fo nu fanɛ Deevid shuŋi mbe nyɛrbi ashi kiyi na to fanɛ b ya chɔrɔ an nyɛnpe nɛ e koso a tege bumo a? ¹⁵Ama b daa wora anyi kelela ga. B daa maa tɔrɔ anyi. Anyi nɛ bumo ka wɔ kupuŋ na to na, beyu daa maa yuri anyi be shɛŋ. ¹⁶Saŋkama nɛ anyee keni anyi be mbolpɔ so, b daa kuŋ anyi kapa nɛ kanyɛ nna. ¹⁷Amoso jande, fɛ asheŋ ere be nfɛra nseŋ wora kusɔ ko a laŋɛ kumo be kaplɛa so, ŋkpal manɛ so, k beeŋ tiŋ m bar asheŋ m ba sa an nyɛnpe nɛ mbe kanaŋ kikɛ. Ŋkpal mo alɛ ka la kagbene kpakpasowura so, e maa nu a sa esa kama!”

¹⁸Nɛ Abigɛl wora manaŋ n ta ebodobodo alfanyɔ nɛ nsaturbi be bɔlɔ anyɔ nɛ mbolpɔ nɛ b mɔ ŋ ŋese anu nɛ aboyu keeso be kilo kudu ashunu nɛ asɔrso jiso be asha kalfa nɛ figi be asɔrso wɔlso be ekrakashi alfa anyɔ ŋ kre amo n deŋi ekurma so. ¹⁹Kumo be kaman nɛ e kaŋɛ nyɛrbi na le: “Men ta asɔ ere a juŋkpar nɛ ma alɛ e wora a bɛ menyi so a ba.” Ama e daa maŋ kaŋɛ mo kul Nabaal kusɔ nɛ e daa wora.

²⁰Abigɛl ka dii mbe kurma m bɔla ekpa nɛ k bɔla abee na to na, nɛ e ba tu Deevid nɛ mbe basa nɛ b shi kebee na so a gbelge to a shɛr mo to. ²¹Deevid daa fɛ le be nfɛra nna: “M baŋ jija ma saŋɛ nna ŋ keni Nabaal be asɔ so ashi kiyi to nɛ b maŋ nya amo n yuri. Kelela nɛ n wora mo, ama kulubi nɛ mo ere ta a ka ma kukɔ. ²²Ta a ba kachipurso nɛ mbe kanaŋ to be enyɛn kama kraa wɔ ŋkpa to, kumo ere Ebɔrɛ e mɔ ma!”

²³Abigɛl ka baŋ wu Deevid, nɛ e gbelge mbe kurma so manaŋ, m ba gbir Deevid be anishito ŋ kurgi kumu n yuu to, ²⁴nseŋ kaŋɛ Deevid le: “Jande n nyɛnpe, mee kule fo nna, ta kusɔ kama nɛ k wora na be kulubi n sulɔ ma. ²⁵Jande sa maŋ kaŋ nu n sa Nabaal, esa jiga na. Mbe ketre na be kifito e la ewulpo! Nɛ mo alɛ be asheŋ woraso nɛ mbe ketre na duli abar. Ma ere daa maŋ wɔtɔ nna nɛ fo nyɛrbi na ba. ²⁶Enyɛnpe Ebɔrɛ na e shin nɛ fo maŋ wora n tal fo doŋana to m mɔ bumo, ama Enyɛnpe Ebɔrɛ nɛ e la ma shɛdajipo na be ketre to, fo doŋana nɛ basa nɛ baa sha ketɔrɔ fo na kikɛ beeŋ nya kasogberge fanɛ kananɛ fee sha kegberge Nabaal kusoe ere. ²⁷Amoso n nyɛnpe, sɔ ma kakɛ ere n sa fo basa na. ²⁸Jande, nɛ n wora fo kulubi ko gba nna, fo ta m paŋ ma. Enyɛnpe Ebɔrɛ na beeŋ shin nɛ fo ki ewura nɛ fo kanaŋ to ebi e baa ji kuwura ŋkpal fo ka bee kɔ a sa mo so. Ma kabɔrɛkule e la fanɛ fo maaŋ wora kulubi kikɛ hale nɛ fo ba lar durnya ere to. ²⁹Enyɛnpe Ebɔrɛ na beeŋ kuŋ fo ashi bedoŋ kama nɛ baa fin fo nɛ b mɔ na be enɔ to. E beeŋ kuŋ fo fanɛ kananɛ esa bee kuŋ mbe kpanjawu na. Ama fo doŋana na bre Ebɔrɛ beeŋ kpa bumo n ya lɛ fanɛ kananɛ baa ta ajembu a wɔtɔ ketababu to a kpa a lɛ na. ³⁰Enyɛnpe Ebɔrɛ malɛ kaŋ wora alelasheŋ damta nɛ e nase kɔnɔ n sa fo na kikɛ nseŋ shin nɛ fo ki Israɛl be ewura, ³¹fo maaŋ wora n daa nyi ŋkpal fo ka wora n tal fo doŋana to so. Ama n nyɛnpe, jande, nɛ Enyɛnpe Ebɔrɛ na kaŋ nɛfa fo, fo baa nyiŋi ma.”

³²Ndoŋ nna nɛ Deevid kaŋɛ Abigɛl le: “Kemaŋkura e baa la Enyɛnpe, Israɛl be Ebɔrɛ nɛ e shuŋi fo fanɛ fo ba shɛr ma to kabre ere peya! ³³Ama fo alɛ gba kɔ kechɔrɔ ŋkpal kanyiasheŋ be kasotoji nɛ fo sa ma kabre nɛ k kuŋ ma ashi kamɔ nɛ kewora n tal to be kulubi to so. ³⁴Enyɛnpe Ebɔrɛ na e shin nɛ m maŋ tɔrɔ fo na. Ama Enyɛnpe, Israɛl be Ebɔrɛ na be ketre to, nɛ fanɛ fo daa maŋ nya manaŋ m ba nna, ndafanɛ ta n ya ka fo kachipurso nɛ Nabaal nɛ mbe kanaŋ to be benyɛn kikɛ maŋ naa wɔ ŋkpa to.” ³⁵Kumo be kaman nɛ Deevid sɔ asɔ nɛ Abigɛl ta m ba na, nseŋ kaŋɛ mo le: “Bɛta a yɔ epe nsaa maŋ shin nɛ kafɔŋ e baa kɔ fo. Kusɔ kama nɛ fee sha, meeŋ wora kumo n sa fo.”

³⁶Abigɛl ka bɛta n yɔ nɛ mo kul Nabaal wɔ laŋ to a wora kejigboŋ fanɛ ewura ka wora kejigboŋ na. E daŋ boo nna le chil; ŋkpal loŋ so, Abigɛl daa maŋ kaŋɛ mo shɛŋ hale nɛ kare ya chɛ kachipurso. ³⁷Kare ka chɛ nɛ mbe kaboo na lar mo to na, nɛ Abigɛl kaŋɛ mo kusɔ kama nɛ k wora. Ndoŋ nna nɛ Nabaal kreŋ n dese fanɛ kejembu na. ³⁸Kumo be nchɛ kudu be kefɛato, nɛ Enyɛnpe Ebɔrɛ na gberge Nabaal kusoe nɛ e wu.

³⁹Deevid ka nu fanɛ Nabaal wu na, nɛ e kaŋɛ le: “Kemaŋkura e baa la Enyɛnpe Ebɔrɛ na peya ŋkpal Nabaal ka bee tege ma nɛ e sɔ ma kɔnɔ ŋ kɔ mo n sa ma so. Nabaal be kulubi so nɛ Enyɛnpe Ebɔrɛ gberge mo kusoe na.”

Kede be kaman nɛ Deevid shuŋi n ya sha Abigɛl. ⁴⁰Abigɛl kraa wɔ Kamɛl nna nɛ Deevid be mbɔ ya kaŋɛ mo le: “Deevid yɛ an ba ta fo m ba nɛ fo ba kaa kil mo.”

⁴¹Nɛ Abigɛl gbir ŋ kaŋɛ le: “N wora shiriya nɛ ŋ ki mbe kebita nsaa fɔr mbe nyɛrbi be aya so.” ⁴²Ndoŋ nna nɛ e koso epul na to n dii mbe kurma. Nɛ mo nɛ mbe mbita anu kikɛ tu Deevid be nyɛrbi na n yɔ nɛ Deevid ya ta mo ŋ ki mbe eche.

⁴³Deevid daŋ chɛr a kɔ eche ko nɛ e shi Jizreel be kade to nɛ baa tre mo Ahinɔam pɔɛŋ nseŋ ta Abigɛl n ya ti mo so. ⁴⁴Loŋ be saŋɛ na so nɛ Sɔɔl teŋ sɔ mo pibiche Mikaal nɛ e daa la Deevid be eche na n sa kanyɛn nɛ baa tre Laash nɛ e shi Galiim be kade to na pibinyɛn nɛ baa tre Paalti na.

Deevid ka naŋ kini kemɔ Sɔɔl be asheŋ

¹Basa ko daŋ shi Ziif nna m ba Sɔɔl kutɔ ashi Gibia m ba kaŋɛ mo fanɛ Deevid ŋana kebeegboŋ nɛ baa tre Hakila nɛ k mata Jeshimɔn na ase ashi Juda be efuli so be kiyi to be ekarso. ²Epul to nɛ Sɔɔl keta Israɛl be benapo nɛ b nyi kena be kekɔ ga na be ŋgboŋ asa n yɔ Ziif be kiyi na to nɛ e ya fin Deevid. ³B daŋ ya wora bumo be keeyi to nna ashi ekpa nɛ k dese kebeegboŋ nɛ baa tre Hakila na ase. Loŋ be saŋɛ na nɛ Deevid kraa wɔ kiyi to, ama e ka nu fanɛ Sɔɔl bee fin mo na, ⁴nɛ e shuŋi basa nɛ b ya ŋana n dara nseŋ wu fanɛ Sɔɔl wɔ ndoŋ kashenteŋto. ⁵Ndoŋ nna nɛ Deevid koso epul na to n ya dara n wu kakpa nɛ Sɔɔl nɛ Neer pibinyɛn Abna nɛ e la Sɔɔl be benapo be enimu dese na. Sɔɔl daa dese keeyi na to nna a di nɛ mbe benapo malɛ dese ŋ kulti mo.

⁶Nɛ Deevid bishi Ahimɛlɛk nɛ e la Hiti be esa na nɛ Zeruwa pibinyɛn Abishai nɛ e la Jɔab mo sipo na le: “Menyi basa anyɔ ere be emo e naaŋ shuŋi ma n yɔ Sɔɔl kutɔ ashi mbe keeyi to?” Nɛ Abishai yɛ: “Meeŋ shuŋi fo n yɔ.”

⁷Loŋ be kanyɛ na nɛ Deevid nɛ Abishai yɔ Sɔɔl be keeyi to n ya wu Sɔɔl nɛ e dese a di nɛ mbe kekpa yuu kasawule m mata mbe kumu ase. Abna nɛ benapo nɛ b ka na malɛ kikɛ daa dese ŋ kulti mo nna a di. ⁸Nɛ Abishai kuli ŋ kaŋɛ Deevid le: “Naniere bre Ebɔrɛ ta fo doŋ n wɔtɔ fo enɔ to nna na. Shin nɛ n ta mo gbagba be kekpa ere m baŋ da mo m mata kasawule kela koŋwule paati. M maaŋ da mo kumo ale anyɔ!”

⁹Ama le nɛ Deevid daŋ kaŋɛ mo: “Sa maŋ kaŋ mɔ mo! Enyɛnpe Ebɔrɛ na beeŋ gberge esa kama nɛ e beeŋ mɔ mbe ewura laraso kusoe. ¹⁰Enyɛnpe Ebɔrɛ nɛ e la ma shɛdajipo ere be ketre to, n nyi fanɛ mo ere Enyɛnpe Ebɔrɛ na gbagba beeŋ shin nɛ Sɔɔl e wu saŋɛ ŋko kachɛ nɛ e yili n sa mo ŋko n shin nɛ b mɔ mo kena to. ¹¹Enyɛnpe Ebɔrɛ e baa pete ma nɛ m mɔ esa nɛ mo ere Enyɛnpe Ebɔrɛ lara ŋ ki ewura. Men shin nɛ an ta mbe kekpa nɛ mbe kusɔjɔnchu a yɔ.” ¹²Ndoŋ nna nɛ Deevid ta Sɔɔl be kekpa nɛ mbe kusɔjɔnchu nɛ a yil m mata Sɔɔl be kumu ase nɛ mo nɛ Abishai lar keeyi na to n yɔ. Sɔɔl be benapo na malɛ be ekama maŋ tiŋ m pin kusɔ nɛ k wora ŋko n tiŋi edi to. Ŋkpal manɛ so Enyɛnpe Ebɔrɛ na e daŋ shin nɛ bumo kikɛ di m mel.

¹³Kede be kaman nɛ Deevid nɛ Abishai dii ketaŋɛ na n yɔ kebee na be esoso be kakpa nɛ Sɔɔl be benapo na maaŋ nya bumo m mɔ na, ¹⁴nseŋ ponte n tre Sɔɔl be benapo na nɛ Abna ŋ kaŋɛ le: “Abna! Menyee nu anyi be ebɔl a?”

Nɛ Abna malɛ bishi le: “Wanɛ bre e naa wora awɔr nɛ e tiŋi ewura ere?”

¹⁵Nɛ Deevid malɛ shuli so ŋ kaŋɛ le: “Mannɛ fo nɛ basa bee kaŋɛ Israɛl be efuli so kikɛ fanɛ fo e kɔ kenyɛn ga na a? Nɛ manɛ e ba nɛ fo maa kuŋ fo nyɛnpe nɛ fo ewura? Naniere nɛ esa ko yɔ menyi be keeyi to nɛ e ya mɔ fo nyɛnpe na. ¹⁶Abna! Fo maŋ shuŋ fo kushuŋ nɛnɛ. Ebɔrɛ nɛ e la ma shɛdajipo na be ketre to, menyi kikɛ daga luwu nna ŋkpal men ka maŋ kuŋ men nyɛnpe nɛ Enyɛnpe Ebɔrɛ lara mo n sa menyi fanɛ ewura na so. Men keni, ewura be kekpa nɛ mbe kusɔjɔnchu nɛ a yil mbe kumu ase na kraa wɔtɔ a?”

¹⁷Ndoŋ nɛ Sɔɔl pin Deevid be ebɔl nseŋ kaŋɛ le: “Fo nna a m pibinyɛn Deevid?”

Nɛ Deevid malɛ shuli so ŋ kaŋɛ le: “Yiramu mm, ma nna.” ¹⁸Nseŋ naŋ kaŋɛ le: “Manɛ nɛ fo kayɛrbi wora nɛ fo kraa ju a buu mo so loŋ? Manɛ be kulubi nɛ n wora fo? ¹⁹Yiramu, nu kusɔ nɛ mee sha nɛ ŋ kaŋɛ fo ere! Nɛ fanɛ Enyɛnpe Ebɔrɛ na e shin nɛ fee kɔ ma, kumo ere meeŋ lara sarga n sa mo nɛ e chɛrga mbe nfɛra. Nɛ fanɛ dimɛdi malɛ e naa wora loŋ, Enyɛnpe Ebɔrɛ be kɔnɔsho na e pɛ amodoŋwura. Ŋkpal manɛ so, b ju ma ashi Enyɛnpe Ebɔrɛ be kasawule so n ya lɛ nnyamase be efuli so, kakpa nɛ m maaŋ tiŋ n shuŋ Ebɔrɛ. ²⁰Sa maŋ kaŋ mɔ ma ashi nnyamase be kasawule so, ashi kakpa nɛ Enyɛnpe Ebɔrɛ na maŋ taga to, ŋkpal manɛ so, m maŋ la shɛŋ. Kejaŋjaŋkɔrso gba chɔ ma! Nɛ manɛ e ba nɛ Israɛl be ewura bee fin ma alɛ le nɛ e mɔ fanɛ mbuibi ashi kebee so?”

²¹Nɛ Sɔɔl malɛ kaŋɛ le: “M pibinyɛn Deevid n wora kulubi, amoso bɛta a ba! M maaŋ naŋ tɔrɔ fo kikɛ ŋkpal fo ka shin nɛ n ji efute kanyɛ ere so. N wora kawulisheŋ ga! M maŋ wora nɛnɛ!”

²²Ndoŋ nna nɛ Deevid kaŋɛ le: “Fo kekpa na nde Yiramu. Shin nɛ fo basa ere be eko e ba sɔ kumo. ²³Beshenteŋjipo nɛ basa cheembi nɛ Enyɛnpe Ebɔrɛ bee nɛfa. E ta fo nna m bɔɔ ma enɔ kabre, ama ma alɛ maŋ wora fo shɛŋ ŋkpal fo ka la Enyɛnpe Ebɔrɛ na be ewura lara so so. ²⁴Kananɛ m baŋ shin nɛ fo ji efute kabre le ere, Enyɛnpe Ebɔrɛ na e baa kuŋ ma nsaa pete ma ashi etɔrɔsheŋ kikɛ to!”

²⁵Nɛ Sɔɔl kaŋɛ Deevid le: “M pibinyɛn Deevid, Ebɔrɛ e nɛfa fo n shin nɛ fo baa kɔ a pɔɔ so ashi kusɔ kama nɛ fee wora to!”

Ndoŋ nna nɛ Deevid pɛ mbe ekpa n choŋ nɛ Sɔɔl malɛ bɛta n yɔ epe.

Deevid ka yɔ Filisti be efuli so be asheŋ

¹Kumo be kaman nɛ Deevid fɛ le: “Sɔɔl beeŋ tiŋ m mɔ ma nchɛ anyɔ ere to. Amoso kusɔ nɛ meeŋ wora e la fanɛ meeŋ shile n yɔ Filisti be efuli so n ya ŋana, saŋɛ na so e beeŋ fin ma Israɛl be efuli so ŋ gben nɛ n nya ma kumu.” ²Epul na to nɛ Deevid nɛ mbe basa alfa ashe na yɔ Mawɔk pibinyɛn Akish nɛ e la Gaaf be kade be ewura na kutɔ. ³Deevid nɛ mbe basa na nɛ bumo be nnaŋ to ebi kikɛ e daŋ ya ka wɔ Gaaf. Deevid be beche anyɔ na gba daŋ ti so. Bumo e la Ahinɔam nɛ e shi Jizreel na, nɛ Abigɛl nɛ e daa la Nabaal nɛ e shi Kamɛl na be eche. ⁴Sɔɔl ka nu fanɛ Deevid shile n yɔ Gaaf na, nɛ e yige kebaafin mo.

⁵Ndoŋ nna nɛ Deevid kaŋɛ Akish le: “Nɛ fanɛ n la fo teri kashenteŋto nna, kumo ere fo sa ma kade ko nɛ k mata nfe nɛ n ya ka wɔ ndoŋ, ŋkpal manɛ so, k maŋ daga fanɛ ma nɛ fo kikɛ e baa wɔ kadegboŋ nɛ fo chena ere to.” ⁶Ndoŋ nna nɛ Akish ta kade nɛ baa tre Ziklag na n sa Deevid. Ŋkpal loŋ so nɛ Ziklag ki Juda be bewura be kade hale mbre na. ⁷Kafɛ nɛ afɔl ana nɛ Deevid daŋ chena Filisti be kasawule so.

⁸Loŋ be saŋɛ na, Deevid nɛ mbe basa daa kre kena n ya kaa purgi Gɛshur nɛ Girzi nɛ Amalɛk be basa nɛ b daŋ chena efuli na so n chɛr ga na a suge bumo be asɔ nna. E daa yili Shur nna a wora loŋ hale n ya ka fo Ijipt be kasawule so kikɛ, ⁹nsaa mɔ bumo be benyɛn nɛ beche kikɛ a pɛ bumo be mbolpɔ nɛ ana nɛ ekurma nɛ enyɔma nsaa ta bumo be epiŋi gba a ti so. Kumo be kaman nɛ e bɛta n yɔ Akish kutɔ, ¹⁰nɛ Akish e bishi mo le: “Basa mo nɛ fo yaŋ kre kena n ya purgi kabre?” Nɛ Deevid malɛ e kaŋɛ mo fanɛ Juda be kelargato be kaseto be kaba so ŋko Jeramiil be kaman to ebi be kaba so ŋko Keenanebi na be kakpa nɛ b tase na be kaba so. ¹¹Deevid daa mɔ bumo be benyɛn nɛ beche kikɛ nna ŋkpal e ka daa maa sha esa kama ka yɔ Gaaf n ya kaŋɛ kusɔ nɛ mbe basa wora so. ¹²Akish daŋ yirda Deevid ga nsaa fɛ le: “Ŋkpal Deevid be basa, Israɛlebi, ka kishi mo ga so e beeŋ ki ma kayɛrbi mbaanaayɔ.”

¹Jemanɛ ko ka ba fo nɛ Filistiebi na gbargbar bumo be benapo nɛ b ya kɔ Israɛlebi kena. Ndoŋ nna nɛ Akish kaŋɛ Deevid le: “K daga fo nɛ fo basa gba ka chɛ ma to n ya kɔ.”

²Nɛ Deevid kaŋɛ le: “Kashenteŋ nna, fo kayɛrbi e la ma, fo gbagba malɛ beeŋ wu kusɔ nɛ meeŋ wora.”

Nɛ Akish malɛ kaŋɛ le: “Mbo! Meeŋ ta fo ŋ ki esa nɛ e beeŋ ba kuŋ ma saŋkikɛ.”

Sɔɔl ka yɔ lejipo ko kutɔ be asheŋ

³Samuɛl ka wu, nɛ Israɛlebi na kikɛ ba abar so m ba shu mbe keeli nseŋ ta mo n ya puli mbe kade to ashi Raama. Ndoŋ nna nɛ Sɔɔl ju bekpalpo nɛ belejipo kikɛ ashi Israɛl be kasawule so.

⁴Kachako nɛ Filisti be benapo na ba abar so m ba wora bumo be keeyi to m mata Shunɛm; nɛ Sɔɔl malɛ shin nɛ Israɛlebi na ya wora bumo be keeyi to ashi kebeegboŋ nɛ baa tre Gilbɔa na ase. ⁵Sɔɔl ka wu Filisti be benapo na, nɛ kufu pɛ mo ga, ⁶ndoŋ nna nɛ e bishi Enyɛnpe Ebɔrɛ kusɔ nɛ k daga e ka wora. Ama Enyɛnpe Ebɔrɛ daa maŋ kaŋɛ mo shɛŋ. E daa maŋ bɔla edare so ŋko bɔrɛmatapo so ŋko anebi so m malga n sa mo. ⁷Nɛ Sɔɔl ponte ŋ kaŋɛ mbe benimuana le: “Men fin lejipoche n sa ma nɛ n yɔ mo kutɔ n ya kpal.”

Nɛ b yɛ: “Kache ko wɔ Endɔɔ a kpal.”

⁸Ndoŋ nna nɛ Sɔɔl chɛrga mbe asɔbuuso saŋɛ na so esa kama maaŋ pin mo, nseŋ ta epiŋi pɔtɛ m buu. Kanyɛ ka biri, nɛ mo nɛ mbe benimuana na be benyɔ yɔ nɛ b ya wu kache na. Le nɛ e daŋ ya kaŋɛ kache na: “Esa kama nɛ m baŋ ti mbe ketre ŋ ŋini fo, fo tre amodoŋwura be kebuni m bishi kusɔ nɛ k beeŋ wora n sa ma.”

⁹Nɛ kache na kaŋɛ le: “Manɛ nna nɛ menyee wora nambara nɛ men nya ma m mɔ? Men nyi kashenteŋto kusɔ nɛ Ewura Sɔɔl wora. Men nyi e ka ju bekpalpo nɛ belejipo ashi Israɛl be kasawule so.”

¹⁰Ndoŋ nna nɛ Sɔɔl nase kɔnɔ ŋ kaŋɛ le: “Enyɛnpe Ebɔrɛ nɛ e la ma shɛdajipo na be ketre so, kasogberge kikɛ maaŋ ba fo so ŋkpal fo ka kpal ma so.”

¹¹Nɛ kache na bishi mo le: “Wanɛ nɛ fee sha ŋ ka tre n sa fo?”

Nɛ e yɛ “Tre Samuɛl n sa ma.”

¹²Kache na ka wu Samuɛl be kebuni nɛ e boŋ to ga ŋ kaŋɛ Sɔɔl le: “Manɛ nna nɛ fee fule ma? Ewura Sɔɔl e la fo!”

¹³Ndoŋ nna nɛ ewura na kaŋɛ mo le: “Sa maa lɔ kufu! Kaŋɛ ma kusɔ nɛ fo wu.”

Nɛ e yɛ: “N wu kiyoyu ka lar kasawule to a ba.”

¹⁴Nɛ e bishi mo le: “Manɛ nɛ k duli?”

Nɛ kache na yɛ: “K duli kanyɛnnimubi ko ka buu piŋi tenteŋ nna nseŋ lar a ba.”

Ndoŋ nna nɛ Sɔɔl pin fanɛ Samuɛl nna nseŋ jɔŋɛ kasawule n chɔrɔ mo.

¹⁵Nɛ Samuɛl kaŋɛ Sɔɔl le: “Manɛ nna nɛ fo tɔrɔ ma loŋ hale n shin nɛ n naŋ bɛta m ba?”

Nɛ Sɔɔl yɛ: “N wɔ tɔrɔ damta to nna! Filisti be basa na bee kɔ ma kena nna nɛ Ebɔrɛ kplaŋ ma so. E maŋ naa bɔla edare ŋko anebiana so a malga a sa ma. Amoso nɛ n tre fo nɛ fo kaŋɛ ma kusɔ nɛ k daga ŋ ka wora.”

¹⁶Nɛ Samuɛl kaŋɛ le: “Manɛ nna nɛ fee fin nfɛra ŋ kutɔ saŋɛ so nɛ Enyɛnpe Ebɔrɛ teŋ kplaŋ fo so nɛ fo ki mo doŋ. ¹⁷N chɛr ŋ kaŋɛ fo fanɛ Enyɛnpe Ebɔrɛ na teŋ yili kumo fanɛ e beeŋ sɔ fo kuwurji na n sa Deevid. ¹⁸Fo ka kini kenu n sa Enyɛnpe Ebɔrɛ nsaa maŋ mur Amalɛk be basa na nɛ kusɔ kama nɛ b kɔ kikɛ na so nɛ Enyɛnpe Ebɔrɛ na bee wora fo loŋ na. ¹⁹Echefo, Enyɛnpe Ebɔrɛ beeŋ shin nɛ Filisti be basa e pɔɔ Israɛl be benapo so, saŋɛ na so, fo nɛ fo mbia beeŋ wu m ba nfe m ba ti ma so.”

²⁰Sɔɔl ka nu kusɔ nɛ Samuɛl kaŋɛ na, nɛ kufu pɛ mo ga nɛ e tɔr epul na to n teŋi to a dese kasawule. E daa maŋ naa kɔ eleŋ ŋkpal e ka daa maŋ ji shɛŋ kachɛ lelemu kikɛ so. ²¹Ndoŋ nna nɛ kache na firgi n taga mo to n wu fanɛ kufu pɛ mo alegaiso, nɛ e kaŋɛ mo le: “Yiramu, n ta ma kumu nna ŋ kpa kelera pɔɛŋ nseŋ wora kusɔ nɛ fo kaŋɛ ma fanɛ n wora ere na. ²²Amoso mee kule fo nna naniere bre, nɛ fo nu n sa ma. Shin nɛ n daŋɛ ajibi n sa fo nɛ fo ji saŋɛ na so feeŋ nya eleŋ a yɔ.”

²³Nɛ Sɔɔl kini fanɛ e maaŋ ji shɛŋ. Nɛ mbe benimu na leŋ mo to ga ŋ kaŋɛ mo fanɛ e ji, pɔɛŋ nɛ e shuli nseŋ koso kasawule n chena gedo so. ²⁴Epul to nɛ kache na nya manaŋ m pɛ mbe kena fɔlbi duliduli ko nɛ e bee bela na m mɔ, nseŋ ta nyifu ŋ gbiti n wora bodobodo nɛ a maŋ kɔ yiisi amo to. ²⁵Kumo be kaman nɛ e ta ajibi na n sa Sɔɔl nɛ mbe benimuana na nɛ b ji nseŋ lar kumo be kanyɛso na kikɛ n yɔ.

Filistiebi na ka kini Deevid be asheŋ

¹Filistiebi be benapo na kikɛ ka ba shɛr abar so ashi Afɛk, nɛ Israɛlebi na malɛ wora bumo be keeyi to ashi ketirbu nɛ k wɔ Jizreel be ketaŋɛ na ase. ²Filisti be bewura anu na ka keta bumo be benapo ntuŋ kalfa kalfa nɛ ntuŋ kagboŋ kagboŋ so a yɔ, nɛ Deevid malɛ nɛ mbe basa nɛ ewura Akish wɔ bumo be kaman a ba. ³Filisti be benapo be benimu na ka wu bumo, nɛ b bishi le: “Manɛ nɛ Israɛlebi ere bee wora nfe?”

Nɛ Akish kaŋɛ le: “Deevid nɛ e daa la Sɔɔl nɛ e la Israɛl be ewura be kayɛrbi na nna? E wɔ ŋ kutɔ nfe n chɛr ga. Yili jemanɛ nɛ e ba ŋ kutɔ na malɛ m ba fo mbre m maŋ wu kulubi ko ashi mo so.”

⁴Ama Filisti be benapo be benimu na daŋ nya agbo nna n wɔtɔ Akish nseŋ kaŋɛ mo le: “Shin nɛ kanyɛn na e bɛta a yɔ kade nɛ fo sa mo na to. Sa maŋ shin nɛ e tu anyi n yɔ kena na to. Nɛ mannɛ aloŋ, e beeŋ naŋ kilgi a kɔ anyi nɛ Sɔɔl e kpal loŋ so n naŋ sɔ mo ŋ ki mbe benapo be enimu. ⁵Mo e la Deevid mo nɛ Israɛl be beche bee boŋ nshɛ a cha a dele mo e kaŋɛ le na: ‘Sɔɔl bee mɔ bedoŋ kagboŋ ama Deevid bre bee mɔ bedoŋ ŋgboŋto kudu nna.’ ”

⁶Ndoŋ nna nɛ Akish tre Deevid ŋ kaŋɛ mo le: “Israɛl be Ebɔrɛ nɛ e wɔ ŋkpa to na be ketre so, fee ji kashenteŋ a sa ma. N daa beeŋ ba sha fanɛ ma nɛ fo kikɛ ka ya kɔ kena ere. Baŋ yili kachɛ nɛ fo ba ŋ kutɔ na hale m ba fo kabre, ma ere maŋ wu kulubi kikɛ fo so. Ama bewura nɛ b ka na bre kikɛ maa sha fo ka yɔ kena na to. ⁷Amoso bɛta a yɔ epe nɛ kagbenewushi. Sa maŋ kaŋ wora kusɔ kama nɛ k beeŋ jija bumo be ŋgbene.”

⁸Nɛ Deevid kaŋɛ le: “N nyɛnpe, manɛ nɛ n wora? Fo nyi kusɔ ko nɛ n wora nɛ ŋkpal loŋ so m maaŋ tiŋ n tu n nyɛnpe nɛ ma ewura n ya kɔ mo doŋana a?”

⁹Nɛ Akish yɛ: “Fo asheŋ bɔla ma kenishi ga fanɛ Ebɔrɛ be mbɔ na be eko. Ama bewura ana na e kaŋɛ fanɛ fo sa maŋ tu anyi n yɔ kena na to. ¹⁰Amoso Deevid, a daga fanɛ fo nɛ bekama nɛ men lar Sɔɔl kutɔ m ba ma kutɔ na ka wule ŋ koso echefo kachipurso n lar nfe pɔɛŋ nɛ kakpa e bugi to.”

¹¹Ndoŋ nna nɛ Deevid nɛ mo braana na wule ŋ koso kachipurdidi m pɛ Ziklag be ekpa nɛ Filisti be benapo na malɛ lar n yɔ Jizreel nɛ b ya kɔ Israɛlebi na kena.

Deevid ka kɔ Amalɛkebi kena be asheŋ

¹Kachɛ sasopo na nɛ Deevid nɛ mbe basa luri Ziklag. Ama saŋɛ nɛ Deevid nɛ mbe basa daa maŋ wɔ ndoŋ na, Amalɛkebi na daŋ kre kena nna n ya purge Juda be kelargato be kaseto be kaba so ebi na hale ŋ kɔ Ziklag n chɔɔ kade na kikɛ ²nseŋ pɛ kade na to be beche nɛ mbia kikɛ n choŋ. Ama b daa maŋ mɔ bumo be ekama. ³Deevid nɛ mbe basa ka ba wu kananɛ b chɔɔ kade na nseŋ pɛ bumo be beche nɛ mbinyɛnsobi nɛ mbichesobi n choŋ ⁴nɛ b shu ga hale n ya chɛl pɔɛŋ nseŋ yige. ⁵B daŋ pɛ Deevid be beche anyɔ, Ahinɔam nɛ Abigɛl, gba n ti so nna n yɔ.

⁶Ndoŋ nna nɛ kagbenejija tɔr Deevid so, nɛ mbe basa be ŋgbene kikɛ kaa bumo ŋkpal b ka paŋ bumo be mbia so. Nɛ baa kaŋɛ fanɛ baaŋ kpa Deevid ajembu m mɔ nɛ Enyɛnpe Ebɔrɛ nɛ e la mbe Ebɔrɛ na leŋ mo to ga. ⁷Nɛ Deevid kaŋɛ Ahimɛlɛk pibinyɛn bɔrɛmatapo Abiata le: “Ta bɔrɛmatapo be kale nɛ baa tre Ɛfɔd na m bar ma.” Nɛ Abiata ta kumo n ya sa mo. ⁸Ndoŋ nna nɛ Deevid bishi Enyɛnpe Ebɔrɛ le: “N ju m buu basa nɛ baa kre kena a purgi basa ere so a? Meeŋ nya bumo m pɛ a?” Nɛ Enyɛnpe Ebɔrɛ yɛ: “Nɛ fo ju m buu bumo so, feeŋ ya pɛ bumo n sɔ fo basa.”

⁹Amoso Deevid nɛ mbe basa alfa ashe na daŋ koso nna a ju a buu basa na so n ya fo ketaŋɛ nɛ baa tre Bɛsɔr na ase nɛ Deevid be basa na be beko shir ndoŋ. ¹⁰Bumo be basa alfa anyɔ e daŋ shir ndoŋ ŋkpal b ka daŋ gben ga so, nɛ Deevid nɛ basa alfa ana nɛ b ka na bre dii ketaŋɛ na n ju a bɛ bumo so. ¹¹Deevid be basa na be beko daŋ ya wu Ijipt be esa ko nna ashi kupuŋ to nseŋ bar mo Deevid kutɔ m ba sa mo ajibi nɛ nchu ¹²nɛ figi be asɔrso wɔlso nɛ asɔrso jiso be asha anyɔ. E ka ji ajibi na nɛ e nya eleŋ, ŋkpal manɛ so, e daa maŋ ji shɛŋ ŋko n nuu nchu nchɛ asa kikɛ. ¹³Ndoŋ nna nɛ Deevid bishi mo le: “Fo nyɛnpe e la wanɛ? Nnɛ nɛ fo shi?”

Nɛ e yɛ: “Ijipt nɛ n shi nsaa la Amalɛk be esa ko be kenya; ama ma nchɛ asa nna na e ka yige ma n lɛ nfe ŋkpal ŋ ka bee lɔ so. ¹⁴An ta kena nna n ya tu Chereti be basa nɛ b wɔ Juda be efuli so be kelargato be kaseto be kaba so na nɛ Kalɛb be kanaŋ to ebi be kaba so nseŋ chɔɔ Ziklag.”

¹⁵Nɛ Deevid bishi mo le: “Feeŋ tiŋ n yɛr ma Amalɛkebi na kutɔ a?”

Nɛ e yɛ: “Mm, nɛ feeŋ nase kɔnɔ Ebɔrɛ be ketre to fanɛ fo maaŋ mɔ ma ŋko n ta ma m bɔɔ n nyɛnpe enɔ bre, meeŋ yɛr fo bumo kutɔ.” ¹⁶Ndoŋ nna nɛ e yɛr Deevid Amalɛkebi na kutɔ. B ka yɔ bumo kutɔ nɛ baa ji a nuu nseŋ pesaŋ to n sɔ kaplɛkama a ji bumo be eyur ŋkpal b ka ya kɔ Filistiebi nɛ Judaebi kena m pɔɔ bumo so nseŋ ta bumo be asɔ damta so. ¹⁷Kumo be ŋklade kachipurdidi nɛ Deevid nɛ mbe basa ya kɔ bumo kena hale n ya fo kaaseso. Ama Amalɛk be mbrantiɛfɔlbi alfa ana nawule e daŋ nya manaŋ n dii bumo be enyɔma n shile; nɛ b mɔ bumo nɛ b ka na kikɛ. ¹⁸Ndoŋ nɛ Deevid sɔ mbe beche anyɔ na nɛ kusɔ kama nɛ Amalɛk be basa na daŋ ta na kikɛ. ¹⁹Bumo be kusɔ kama daa maŋ foe ŋkpal manɛ so Deevid daŋ sɔ mbe basa na be mbinyɛnsobi nɛ mbichesobi nɛ asɔbɔya nɛ Amalɛkebi daŋ ta na kikɛ na m bɛta n yɔ. ²⁰Ama Amalɛk be basa na be mbolpɔ nɛ ana nɛ b kɔ na bre, e daŋ shin nna nɛ b barga amo n ya yili ŋ kɔr. Nɛ ekama malɛ shuli so fanɛ loŋ be asɔbɔya na e baa la Deevid peya.

²¹Deevid ka bɛta a yɔ na nɛ e bɔla mbe basa alfa anyɔ nɛ e yige ketaŋɛ nɛ baa tre Bɛsɔr na kutɔ. Nɛ b koso a shɛr Deevid nɛ mbe basa to, nɛ Deevid chɔrɔ bumo nseŋ bishi bumo be eyur be alenfia so. ²²Ama le nɛ Deevid be basa nɛ b daŋ yɔ kena na to nsaa la basa fuloŋ a kɔ amukpakpaso na bre daŋ kaŋɛ: “Ŋkpal basa ere ka maŋ tu anyi n yɔ kena ere to so, anyi nɛ bumo maaŋ barga asɔ nɛ an ya muu kena na to na n sa abar. Ama bumo be ekama beeŋ tiŋ ŋ keta mbe eche nɛ mbia bre a yɔ.”

²³Le nɛ Deevid malɛ daŋ kaŋɛ bumo: “Ŋkurgepoana, men sa maŋ kaŋ ta asɔ nɛ Enyɛnpe Ebɔrɛ sa anyi n wora kejimuni. Enyɛnpe Ebɔrɛ na kuŋ anyi nseŋ shin nɛ an kɔ m pɔɔ basa nɛ baa ta kena a purgi basa a muu bumo be asɔ a shile na so. ²⁴Wanɛ nɛ menyee fɛ fanɛ e beeŋ shuli m bɛ kusɔ nɛ men kaŋɛ ere so? Basa kama nɛ b ka keeyi to a keni anyi be asɔ so na nɛ bumo nɛ b yɔ kena na to na kikɛ beeŋ ji nna a sasa.” ²⁵Amoso Deevid daŋ yili kumo fanɛ mbra nna n sa Israɛlebi na, nɛ bumo alɛ bɛ kumo so hale m ba fo nɛ mbre.

²⁶Deevid ka bɛta n yɔ Ziklag nɛ e ta asɔ nɛ b ya muu kena to na be ako n ya sa mo teriana nɛ Juda be bejuŋkparpoana na nseŋ kaŋɛ bumo le be kubɔya ere: “Enyɛnpe Ebɔrɛ mo doŋana na kutɔ nɛ n suge asɔ ere nɛ m ba sa menyi fanɛ kakɛ na.” ²⁷E daŋ shin nna nɛ b ta asɔ na be ako n ya sa Bɛtɛl be basa nɛ Raama be basa nɛ b wɔ Juda be kelargato be kaseto be kaba so na nɛ basa nɛ b wɔ Jatiir, ²⁸nɛ Arowa nɛ Sipmɔɔf, nɛ Eshtemɔa, ²⁹nɛ Rakaal be nde to nna, nseŋ sa Jeramiil be kanaŋ to ebi nɛ Keenanebi, ³⁰nɛ basa nɛ b wɔ Hɔɔma nɛ Borashan nɛ Ataak ³¹nɛ Hibrɔn be kade to ebi kikɛ nna, nseŋ ta mboŋ kama nɛ mo nɛ mbe basa daŋ kilgi to n yɔ na kikɛ n ti so.

Sɔɔl nɛ mbe mbinyɛnsobi be luwu be asheŋ

¹Kebeegboŋ nɛ baa tre Gilbɔa na so nɛ Filistiebi na daŋ yili a kɔ Israɛlebi na kena. B daŋ mɔ Israɛlebi na be bedamta kena na to nna nɛ bumo nɛ b ka na nɛ ewura Sɔɔl nɛ mbe mbinyɛnsobi malɛ shile. ²Ama Filistiebi na daŋ ju m buu bumo so nna nseŋ ya mɔ Sɔɔl be mbinyɛnsobi asa, Jonatan nɛ Abinadab nɛ Malkishuwa. ³Kena na be kenishipere be kakpa nɛ Sɔɔl daa wɔ, ŋkpal loŋ so, bedoŋ na be atanyembi daŋ da mo nna n doro mo alegaiso. ⁴Nɛ Sɔɔl kaŋɛ enapo nɛ e bee keta mbe akɔsɔ na le: “Ta fo tokobi m mɔ ma! Ŋkpal manɛ so, m maa sha Filistiebi, nnyamase ere ka mɛaŋ ma m mɔ.” Ama enapo na daŋ kini kewora loŋ nna ŋkpal kufu ka daŋ pɛ mo ga so. Ndoŋ nna nɛ Sɔɔl ta mo gbagba be tokobi be kumu ase n yuu kasawule nseŋ tɔr kumo so. ⁵Enapo nɛ e bee keta Sɔɔl be akɔsɔ na ka wu fanɛ Sɔɔl wu na, nɛ mo alɛ gba wora kananɛ Sɔɔl wora na gbagba n mɔ mbe kumu. ⁶Kananɛ Sɔɔl nɛ mbe mbinyɛnsobi asa na nɛ enapo nɛ e bee keta mbe akɔsɔ na daŋ wu nna na. Kachɛ koŋwule nɛ Sɔɔl nɛ mbe benapo kikɛ daŋ wu. ⁷Israɛlebi nɛ b wɔ Jizreel be ketaŋɛ be kaba ndoŋ, nɛ bumo nɛ bumo alɛ wɔ Jɔɔdan be lɔr na be epeŋilarkpa be kaba so na ka nu fanɛ Israɛl be benapo shile nɛ b mɔ Sɔɔl nɛ mbe mbinyɛnsobi, nɛ bumo alɛ gba shile n lar bumo be nde to nɛ Filistiebi na ba sɔ amo n chena.

⁸B ka kɔ kena na ŋ klade, nɛ Filistiebi na yɔ nɛ b ya muu basa nɛ b wu na be asɔ nseŋ wu fanɛ Sɔɔl nɛ mbe mbinyɛnsobi asa na wu a dese kebeegboŋ nɛ baa tre Gilbɔa na so. ⁹Ndoŋ nna nɛ Filistiebi na ku Sɔɔl be kumu ŋ gbaŋ mbe kenyɛnkale nseŋ shuŋi mbɔ fanɛ b nite Filisti be efuli so be agbir be alambu to nɛ kaplɛkama nɛ basa wɔ ŋ bɔ baru lela ere. ¹⁰Kumo be kaman nɛ b ta mbe kena to be akɔsɔ na kikɛ n ya yili kegbirche Ashtɔrɛf be lambu to nseŋ gbir mo nɛ mbe mbia asa be eyurana malɛ m mata Bɛf Shan be kade to be egbal be kowushina.

¹¹Jabesh be basa nɛ b wɔ Giliad na ka nu kusɔ nɛ Filistiebi na wora Sɔɔl na, ¹²nɛ bumo be basa nɛ b kɔ kenyɛn ga na koso kanyɛso na kikɛ n nite n yɔ Bɛf Shan, n ya lara Sɔɔl nɛ mbe mbinyɛnsobi na be eyurana ashi egbal na so m bɛta amo n yɔ Jabesh n ya chɔɔ amo ndoŋ. ¹³Kumo be kaman nɛ b ta bumo be awibi n ya puli kedibi fimbi nɛ baa tre tamariski na be kifito nseŋ kishi nchɛ ashunu kikɛ a ŋini kananɛ bumo be ŋgbene jija bumo.