PITA

KAWƆL NƐ

1 PITA

JUŊKPAR N SIBƐ NA

¹Kawɔl ere shi ma Pita nɛ n la Yesu Kristo be eshuŋipo na kutɔ nna a yɔ Ebɔrɛ be basa laraso nɛ b pesaŋ to a wɔ durnya ere to fanɛ befɔ a wɔ Pɔntes nɛ Galeesha nɛ Kapadosia nɛ Eeshia nɛ Bitinia be nsawuleana so na kutɔ nna. ²Ebɔrɛ Etuto na bɔla mbe kanyiasheŋ so nna a nyi kusɔ kama nseŋ lara bumo n naŋ bɔla Kiyoyu na to n ta bumo ŋ ki basa cheembi nɛ b baa nu a sa Yesu Kristo nɛ e ta mbe ŋklaŋ n fɔr bumo so na.

Ebɔrɛ be kuwɔr be kakɛ nɛ kagbenewushi e baa wora keshi menyi to a ti so.

Tama mo nɛ k wɔtɔ saŋkikɛ na be asheŋ

³Anyee di Ebɔrɛ nɛ e la an Nyɛnpe Yesu Kristo mo Tuto na epaŋ. Ŋkpal mbe kuwɔrgboŋ so e shin nɛ an nya ŋkpa popɔr ŋkpal Yesu Kristo ka tiŋi luwu to na so. ⁴Kede e shin nɛ an kɔ tama nɛ k maa chɛrga nseŋ naa keni enɛfa damta nɛ Ebɔrɛ kɔ a jo mbe basa na ekpa. Ebɔrɛso nɛ e kɔ amo a jo menyi, kakpa nɛ a maaŋ tiŋ m bɛ ŋko n jija ŋko ŋ kpeŋ kikɛ na. ⁵Loŋ be enɛfa na la menyi nɛ Ebɔrɛ kpal men be yirda so n ta mbe eleŋ a keni menyi so a jo saŋɛ nɛ kumɔlga beeŋ lar efuli lalaloge be jemanɛ na peya nna.

⁶Kashenteŋ nna fanɛ shere naniere naniere bre, men be ŋgbene beeŋ jija menyi nchɛnnyɔ ko ŋkpal kechɔŋkeni be etɔrɔ be nnaŋ to mo nɛ a bee tu menyi so, ama men shin nɛ men be ŋgbene e baa fuli menyi ŋkpal enɛfa na so. ⁷Le be kechɔŋkeni ere bee ba menyi so nna nɛ a ba keni ŋko menyi be yirda na kɔ eleŋ a. Men baa nyi fanɛ hale shuwa nɛ k bee jija ere gba, baa kaa ta edɛ a wora kumo a keni. To, loŋ koŋwule na e daga fanɛ men be yirda mo nɛ k chɔ shuwa na gba, b ka chɔ kumo ŋ keni ŋko k beeŋ tiŋ n yili a. Saŋɛ na so baaŋ di menyi epaŋ nseŋ sa menyi kemaŋkura nɛ bunyaŋ kacha nɛ Ebɔrɛ beeŋ lara Yesu Kristo ŋ ŋini na.

⁸Men maŋ naŋ wu mo nna na pɔɛŋ ŋkaa sha mo na. Men maŋ naŋ wu mo naniere, ama menyi alɛ yirda mo nsaa kɔ kagbenefuli damta nɛ esa maaŋ tiŋ n ji kumo be asheŋ nɛ kemaŋkura wɔ kumo to na e bɔlɔ menyi to nna. ⁹Ŋkpal manɛ so, men be ayoyu be kumɔlga nɛ k la men be yirda ere be tɔnɔ na nɛ menyee nya.

¹⁰Le be kumɔlga ere be asheŋ nɛ anebiana na daŋ pere kenishi ŋ keni to nɛnɛ n fin nseŋ daŋ wu loŋ be kuwɔr be kakɛ mo nɛ k beeŋ ki menyeya ere be asheŋ ŋ kaŋɛ na. ¹¹Kristo be Kiyoyu mo nɛ e daa wɔ bumo to na daŋ wu Kristo be etɔrɔ nɛ kemaŋkura mo nɛ k beeŋ lar etɔrɔ na be kaman na nna ŋ kaŋɛ bumo nɛ b wora ania a fin saŋɛ nɛ asheŋ na kikɛ beeŋ wora. ¹²Ebɔrɛ daŋ lara nna ŋ ŋini anebiana na fanɛ mannɛ bumo gbagba so nɛ b daa shuŋ, ama menyi so nɛ b daŋ shuŋ fanɛ kananɛ b daŋ malga asheŋ nɛ naniere menyee nu Baru Lela na be mbɔ ka kɔ Kiyoyu Cheeŋ nɛ b shi ebɔrɛso n shuŋi na be eleŋ a bɔ kubɔya na. Le be asheŋ ere la asɔ nɛ emalaika gba daa beeŋ baa sha kepinto nna.

Kebaadu cheembi be asheŋ

¹³Amoso, men bela men be amu ase nɛnɛ ashi men be nfɛraana to a jo asheŋ be kewora. Men baa kɔ nfɛra cheembi nseŋ ta men be tama kikɛ n wɔtɔ nɛfa mo nɛ menyeeŋ nya saŋɛ nɛ Ebɔrɛ beeŋ lara Yesu Kristo ŋ ŋini na. ¹⁴Kananɛ naniere men la kasonu be mbia ere bre, men sa maŋ naŋ shin nɛ men be ayɛlgasɔ nɛ men daa kɔ saŋɛ nɛ men daa maŋ nyi Ebɔrɛ be ekpa na e naa wɔ menyi. ¹⁵Ama men baa du cheembi kusɔ kama nɛ menyee wora to fanɛ kananɛ emo nɛ e tre menyi na du na. ¹⁶Ŋkpal manɛ so, abɔrɛsibɛ na bee kaŋɛ fanɛ Ebɔrɛ kaŋɛ: “Men baa du cheembi, ŋkpal manɛ so, n du cheembi nna.”

¹⁷Ŋkpal men ka bee tre esa nɛ e bee ji dimɛdi kikɛ be aworbi demu ŋkaa maa kpɛa mo to na men Tuto ere so, a daga fanɛ men baa wɔ durnya ere to fanɛ befɔ a ŋana Ebɔrɛ. ¹⁸Ŋkpal manɛ so, men nyi fanɛ mannɛ asɔ nɛ a beeŋ tiŋ n jija fanɛ egbiti nɛ eshuwa nɛ b daŋ ta n sɔ menyi ashi men be kebaawɔtɔ fuloŋ mo nɛ men nya ashi men nanaana kutɔ na n yige. ¹⁹Kristo nɛ e du fanɛ kpakpafɔlbi a maŋ dulgi kikɛ na ŋko nɛ saŋgre kikɛ maŋ wɔ mo to na be ŋklaŋ nɛ b ta n sɔ menyi n yige. ²⁰Ebɔrɛ lara mo nna pɔɛŋ nseŋ to durnya ere, ama lalaloge be nchɛ ere to nɛ e lara mo ŋ ŋini ŋkpal menyi so. ²¹Mo so nɛ men ta men be yirda n wɔtɔ Ebɔrɛ mo nɛ e tiŋi mo ashi luwu to nseŋ maŋkura mo na, amoso, men be yirda nɛ tama wɔ Ebɔrɛ na to nna. ²²Naniere bre men ka nu n sa kashenteŋ na nɛ b fɔr men be ŋgbeneana to nɛ men nyalɛ so a kɔ kashenteŋ be kasha a sha men kurgepoana ere, men baa ta men be ŋgbene kikɛ a sha abar kagbene koŋwuleso. ²³Ŋkpal manɛ so, b naŋ lɔŋɛ ŋ kurge menyi kela nyɔsopo nna, loŋ be kakurge na malɛ maŋ shi kusɔ nɛ k beeŋ tiŋ n jija to, ama Ebɔrɛ be kamalga mo nɛ k wɔtɔ saŋkikɛ a maŋ kɔ ekar na to nɛ b bɔla ŋ kurge menyi. ²⁴Loŋ malɛ nɛ abɔrɛsibɛ na bee kaŋɛ fanɛ:

“Basa kikɛ du fanɛ kefitiri nna

nɛ bumo be kemaŋkura malɛ kikɛ du fanɛ kefitiri na be ketoto.

Kefitiri na bee kaa wɔl nna

nɛ ketoto na e chuge n tɔr,

²⁵ama Enyɛnpe be kamalga na bre wɔtɔ nna mbaanaayɔ.”

Loŋ be kamalga na e la baru lela mo nɛ b daŋ bɔ n sa menyi na.

¹Amoso, men lara alubi kikɛ ashi menyi to. Men sa maŋ naa ku efɛ ŋko a kɔ kebirkɔnshi ŋko yurkishi ŋko katege be mmalga. ²Men baa sha kashenteŋ be abɔrɛsheŋ na ga fanɛ kananɛ mbi popɔrbi bee sha kenyipo na, saŋɛ na so menyeeŋ bɔla amo so n yɔ anishito ashi men be kumɔlga ere to. ³Ŋkpal manɛ so, naniere men da Enyɛnpe be kebaawɔtɔ ŋ keni m pin fanɛ e walɛ. ⁴Men baa ba Enyɛnpe nɛ e bee sa ŋkpa na kutɔ. Mo e du fanɛ kejembu nɛ k kɔ ŋkpa nɛ basa keni jiga ŋ kini mo na, ama Ebɔrɛ bre kutɔ, e la mbe esa laraso nɛ mbe kenishi nna. ⁵Men shin nɛ b ta menyi alɛ gba fanɛ ajembu nɛ a kɔ ŋkpa nɛ b ta m pɔr na nɛ men ki Ebɔrɛ be ebu a la bɔrɛmatapo cheembiana a bɔla Yesu Kristo so a lara kiyoyu to be esarga nɛ a bee par Ebɔrɛ. ⁶Ŋkpal manɛ so, abɔrɛsibɛ na bee kaŋɛ fanɛ Ebɔrɛ bee kaŋɛ le nna:

“Men keni, kejembu nɛ n lara

nɛ k la ma kenishi nɛ n ta n nase Zayɔn to na,

k la kebonfu to be gbaltɔlasejembu nna

nɛ esa kama malɛ nɛ e yirda mo maaŋ ji anishinyɔr kikɛ.”

⁷Loŋ be kejembu ere la tɔnɔ be kusɔ gboŋgboŋi nna ga n sa menyi nɛ men yirda ere, ama bumo nɛ b maŋ yirda na bre, abɔrɛsibɛ na bee kaŋɛ fanɛ: “Kejembu mo nɛ bepɔrpo keni jiga na e ba ki ajembu to kikɛ be kelela ga na.” ⁸Baa fiti a tɔr nna ŋkpal b ka maŋ yirda kamalga na so, kusɔ nɛ Ebɔrɛ malɛ yili bumo nna na. ⁹Ama menyi ere la kanaŋ mo nɛ Ebɔrɛ lara nna nɛ men baa la bɔrɛmatapoana nɛ b shi kuwurji be kanaŋ to nseŋ naa la kanaŋ cheembi to ebi nɛ b la Ebɔrɛ be basa gbagba nɛ men ba kute esa nɛ e tre menyi ashi tentembiri to a yɔ mo gbagba be mamachi be kefulto to na be asheŋgboŋ be asheŋ n sa basa. ¹⁰Saŋko men daa maŋ la Ebɔrɛ be basa, ama naniere men la mbe basa nna. Saŋko Ebɔrɛ daa maŋ wu menyi kuwɔr, ama naniere men nya mbe kuwɔr.

Ebɔrɛ be anya be asheŋ

¹¹N teri lelaana, mee kule menyi nna fanɛ men baa gelge ayɛlgasɔ lubiana nɛ a wɔ men be eyurana to a kɔ men be ayoyuana kena, a na fanɛ befɔ nɛ benitepo ashi durnya ere to. ¹²Men baa kɔ da lela a wɔ basa nɛ b maŋ la bebɛsopo na to, saŋɛ na so nɛ b kaa malga a gbiti menyi fanɛ alubiworapoana, baaŋ wu men be alelasheŋ nseŋ ta kemaŋkura n sa Ebɔrɛ kachɛ nɛ e beeŋ ba na.

¹³Men baa kpal Enyɛnpe so a nu a sa kenimuji kikɛ nɛ k wɔ basa to. K beeŋ tiŋ a la men be efuli so be ewurgboŋ nɛ e la ejuŋkparpo ashi kenimuji kikɛ to na ¹⁴ŋko mbe beyaasepo mo nɛ ewurgboŋ na bee kaa shuŋi fanɛ b ya kaa gberge alubiworapoana kusoe nsaa sa alelashenworapoana na mbo. ¹⁵Ŋkpal manɛ so, kusɔ nɛ k bee par Ebɔrɛ e la fanɛ men baa wora kelela, nɛ loŋ e tiŋ n shin nɛ bumo nɛ b maŋ nyi nsaa malga kawuliso be mmalga na e lo bumo be nnɔ. ¹⁶Men baa wɔtɔ fanɛ basa nɛ b wɔ bumo be amu a ji, ama men sa maa kɔ loŋ be kamooji na a buu kulubi kama so. Men baa kɔ kebaawɔtɔ mo nɛ k du fanɛ Ebɔrɛ be anya peya a wɔtɔ. ¹⁷Men baa sa basa kikɛ bunyaŋ nsaa sha bekurgepoana na kikɛ. Men baa ŋana Ebɔrɛ nsaa bunyaŋ men be efuli so be ewurgboŋ na.

Kananɛ Kristo be awurfoŋ la keŋini be asheŋ

¹⁸Anya, men baa nu a sa men nyɛnpeana nsaa sa bumo bunyaŋ kikɛ nɛ k daga, mannɛ bumo nɛ b la benyɛnpe lela nsaa shu basa so na nawule, bumo nɛ b du nyaŋnyaŋ na gba ti so. ¹⁹Ŋkpal manɛ so, nɛ men baa ji kasogberge be ebesa mo nɛ k maŋ daga ŋkpal men ka bee fɛ Ebɔrɛ be asheŋ so, menyeeŋ nya nɛfa damta. ²⁰Ama nɛ fanɛ b kpal men be alubi so nna m bri menyi nɛ men nyiti loŋ be kebri na, manɛ be mbo e wɔ kumo to? Ama nɛ fanɛ b kpal kelela ko so nna n tɔrɔ menyi nɛ men nyiti loŋ be tɔrɔ na, kumo ere, k kɔ mbo ashi Ebɔrɛ be anishito. ²¹Kashenteŋto malɛ, loŋ so nɛ Ebɔrɛ tre menyi, ŋkpal manɛ so, loŋ nɛ Kristo gba ji tɔrɔ m bugi loŋ be ekpa na n nase fanɛ men bɛ mbe aya so. ²²E daa maŋ wora kulubi kikɛ, kafulesheŋ malɛ kikɛ daa maŋ lar mbe kɔnɔ to. ²³B daŋ tege mo, ama mo alɛ daa maŋ laŋɛ katege n sa bumo. B daŋ tɔrɔ mo, ama e daa maŋ nyaŋɛ to n tu bumo. Ama e daŋ ta mbe kumu nna m bɔɔ esa nɛ e bee ji asheŋ amo be ekpa so na enɔ. ²⁴Mo ere gbagba e ta mbe eyur n ta an be alubi n yɔ kedibi largato na so nɛ an baa la basa nɛ b wu alubi be kaplɛa so nsaa wɔtɔ ŋkpal alelasheŋ so. Mbe eyur be kemurgi so nɛ men nya kechɛ. ²⁵Ŋkpal manɛ so, men daa du fanɛ mbolpɔ ka yeŋ to nna, ama naniere bre, men bɛta m ba men be ayoyu be Ekpapo nɛ Ekenipo kutɔ.

Beche kilpo nɛ bumo kulana be asheŋ

¹Beche, menyi alɛ gba e baa nu a sa men kulana, saŋɛ na so nɛ bumo be ekama maŋ yirda kamalga na, nɛ men maŋ malga n sa bumo gba, baaŋ wu men be kebaawɔtɔ nseŋ ba yirda. ²Ŋkpal manɛ so, baaŋ wu kananɛ men du cheembi nɛ kananɛ men be kabɔrɛŋana be kebaawɔtɔ du. ³Men sa maŋ shin nɛ men be kebita e baa shi eyur so be kelɔŋɛ fanɛ amu be kekre ŋko eshuwa be abitasɔ be kewɔtɔ nɛ asɔbuuso lela be kebaabuu to. ⁴A daga fanɛ men be kela e baa shi men be ŋgbene to gbagba to, kumo e la fanɛ men baa kɔ ŋgbene nɛ a du boeŋ a maa gbri. Loŋ be kela na e maa terge kikɛ nsaa walɛ ashi Ebɔrɛ be anishito. ⁵Ŋkpal manɛ so, loŋ nɛ dra na be beche mo nɛ b daa du cheembi nseŋ daŋ ta bumo be tama n wɔtɔ Ebɔrɛ to na daa ji bumo be kebita nseŋ daa nu a sa bumo kulana. ⁶An ta fanɛ Sɛɛra le, e daŋ nu n sa mo kul Eebraham nseŋ daŋ tre mo mo nyɛnpe. To, nɛ menyi alɛ gba baa wora asheŋ nɛ a daga ŋkaa maa lɔ kufu, menyeeŋ baa la mbe mbichesoana.

⁷Bekul, loŋ koŋwule na a daga fanɛ menyi alɛ gba e baa kɔ kushuso ashi menyi nɛ men be beche be kebaawɔtɔana to nsaa bunyaŋ bumo a ta bumo fanɛ men braana mo nɛ b maŋ kɔ eleŋ, bumo alɛ ŋkaa beeŋ tu menyi n nya Ebɔrɛ be ŋkpa be kakɛ na. Men baa wora loŋ nɛ shɛŋ shɛŋ e sa maŋ kagle men be kabɔrɛkuleana ekpa nɛ a fo Ebɔrɛ ŋ gben.

Keji awurfoŋ ŋkpal kelela be kewora so be asheŋ

⁸Kusɔ nɛ k baa wɔtɔ kikɛ e la fanɛ men kikɛ e baa kɔ kɔnɔkoŋwule a wɔ abar so. Men baa shu abar so a kɔ keniopibi be kasha a sha abar nsaa la basa nseŋ naa bar men be amu kaseto. ⁹Men sa maa laŋɛ kulubi a ka kulubi ŋko a laŋɛ katege a ka katege. Ama kusɔ nɛ k daga e la fanɛ men baa nɛfa basa nɛ baa wora menyi loŋ be alubiana, ŋkpal manɛ so, Ebɔrɛ ka tre menyi na, nɛfa nɛ e nase kɔnɔ fanɛ e beeŋ sa menyi. ¹⁰Kumo alɛ nɛ abɔrɛsibɛ na bee kaŋɛ na fanɛ:

“Esa kama nɛ e bee sha ŋkpa

nsaa sha kewu nchɛ lela,

kumo ere, amodoŋwura

e sa maŋ shin nɛ mbe kɔnɔ

e baa malga asheŋ lubi ŋko ku efɛ.

¹¹A daga fanɛ amodoŋwura e baa lar alubi to nsaa wora alela.

A daga fanɛ e baa fin kagbenewushi nsaa bɛ kumo so saŋkikɛ.

¹²Ŋkpal manɛ so, Enyɛnpe be anishi wɔ belelapo kikɛ so nna,

mo alɛ nsaa kaŋ kusoe a nu bumo be kabɔrɛkule,

ama bekama nɛ baa wora alubi bre, e bee pal kaman nna a sa bumo.”

¹³Nɛ men baŋ pere kenishi a sha kelela be kebaawora, wanɛ e naaŋ tiŋ n tɔrɔ menyi? ¹⁴Hale nɛ men wora kelela nɛ b kpal loŋ so n tɔrɔ menyi gba, nɛfa la menyeya nna. Men sa maa ŋana bumo be kafunti, menyi alɛ e sa maŋ naa shin nɛ men be ŋgbene e baa ku. ¹⁵Ama men baa sa Kristo bunyaŋ fanɛ Enyɛnpe ashi men be ŋgbene to. Men baa wora shiriya saŋkikɛ a jo esa kama nɛ e beeŋ ba bishi menyi tama mo nɛ men kɔ ere be kifito, nɛ men kaŋɛ mo. ¹⁶Ama men baa kɔ amu be kebar kaseto nɛ bunyaŋ a wora loŋ nsaa maŋ shin nɛ kesheŋ lubi e baa wɔ men be nfɛra fɛsoana to, saŋɛ na so anishinyɔr beeŋ pɛ bekama nɛ baa malga asheŋ lubi a gbiti menyi ŋkpal men ka la Kristo be basa a wora alelasheŋ na so. ¹⁷Ŋkpal manɛ so nɛ k la Ebɔrɛ be kepar be kusɔ fanɛ men nya tɔrɔ nɛ men nya loŋ be tɔrɔ na ŋkpal kelela mo nɛ men wora so, k walɛ a chɔ men ka wora alubi ŋkaa nya tɔrɔ. ¹⁸Ŋkpal manɛ so, Kristo gba wu kela koŋwule nna pati, ŋkpal basa be alubi so, esa nɛ e maŋ kɔ kulubi e wu n sa basa lubi na, saŋɛ na so e beeŋ yɛra menyi Ebɔrɛ kutɔ. B daŋ mɔ mbe eyur, ama Ebɔrɛ shin nɛ e nya ŋkpa ashi mbe Kiyoyu na to. ¹⁹Saŋko Kiyoyu na ka ba bɔla mo to na nɛ e daŋ ya bɔ baru lela na n sa bubuni be ayoyu mo nɛ a wɔ kabuti to na. ²⁰Ayoyu na la basa nɛ b daŋ kini kenu n sa Ebɔrɛ saŋɛ mo nɛ e daŋ ji bumo kanyiti jemanɛ mo nɛ Nowa daa gbir kuloŋgboŋ mo nɛ basa aburwa nawule daŋ luri to n nya kumɔlga ashi nchu na to na. ²¹Loŋ be nchu na daa la kabɔrɛbɛr nɛ k bee mɔlga menyi naniere be kaduli nna, ama k maŋ la kusɔ nɛ k bee fɔr eyur to be alubi a lɛ. K la nfɛra niŋiso be kɔnɔ naseso mo nɛ esa bee nase nna a sa Ebɔrɛ. Yesu Kristo be ketiŋi luwu to na to nɛ k bee bɔla a mɔlga menyi. ²²Mo, Yesu Kristo koŋwule na e yɔ ebɔrɛso n ya kaa tase Ebɔrɛ be jisoso, kakpa nɛ ebunyampo bee chena, a ji emalaika kikɛ nɛ bejuŋkparpoana kikɛ nɛ eleŋana kikɛ so kuwura na.

Kebaawɔtɔ popɔr be kebaakɔ be asheŋ

¹To, ŋkpal Kristo ka ji tɔrɔ mbe eyur to so, menyi alɛ gba e leŋ menyi be amu to a kɔ loŋ be kagbene, ŋkpal manɛ so, ekama nɛ e ji tɔrɔ mbe eyur to lar alubi to nna na. ²Nɛ loŋ malɛ baŋ wora, loŋ be esa na maŋ naa kɔ mbe durnya ere to be kebaawɔtɔ a wɔ edimɛdi be ayɛlgasɔ lubiana to, ama Ebɔrɛ be aparsheŋ to nɛ e kɔ mbe kebaawɔtɔ a wɔ. ³Naniere bre a daga fanɛ men ka pin fanɛ asɔ nɛ nnyamase bee sha kewora nɛ menyi alɛ gba daa wora amo na be kewora kukwe. Asɔ nɛ men daa wora saŋɛ na e daa la kusɔjigaya be aworbi nɛ kesakalea be kayɛlga be aworbi nɛ kasanuu nɛ keshɛr abar n ji nseŋ boo ana be kebaawɔtɔ nɛ kushuŋ jiga fanɛ kagbirshuŋ be aworbi. ⁴Naniere k bee chinchiŋ bumo nna, ŋkpal men ka maŋ naa tu bumo a wora loŋ be asheŋ jiga na so. Amoso nɛ baa tege menyi na. ⁵Ama esa ko wɔtɔ n wora shiriya nɛ e ji basa nɛ b kraa wɔ ŋkpa to nɛ bumo nɛ b wu na kikɛ demu. Baaŋ yili mbe anishito ŋ kaŋɛ ŋ kaŋɛ bumo be asheŋ woraso kikɛ nɛ kusɔ nɛ k ba nɛ b wora amo. ⁶To, amoso nɛ b daŋ bɔ baru lela na n sa basa nɛ b maŋ naa wɔ ŋkpa to naniere na, saŋɛ na so, dimɛdi be kaplɛa so, baaŋ ji bumo demu, ama Ebɔrɛ bre be kaplɛa so, baaŋ baa wɔ ŋkpa to ashi kiyoyu na to.

Kebaakeni Ebɔrɛ be ŋkɛana so be asheŋ

⁷Asɔ kikɛ be ekar be jemanɛ na bee taga to nna na, amoso, men baa kɔ nfɛra niŋiso nsaa tiŋ men be amu, saŋɛ na so menyeeŋ tiŋ ŋ kule Ebɔrɛ nɛnɛ. ⁸Ade kikɛ be kaman, men baa sha abar kashenteŋto, ŋkpal manɛ so, kasha e naa buu alubi damta so. ⁹Men baa sɔ abar men peana nsaa maa muni to. ¹⁰Kiyoyu Cheeŋ be kakɛ kama nɛ ekama kɔ, e baa ta loŋ be kakɛ na a shuŋ mo braana fanɛ kenya lela nɛ b ta Ebɔrɛ be kuwɔr be kakɛ damtaana m bɔɔ mo enɔ. ¹¹Ekama nɛ e bee malga e shin nɛ mbe mmalga na e baa la fanɛ Ebɔrɛ be mmalga gbagba, nɛ ekama malɛ nɛ e bee shuŋ mo braana e baa ta eleŋ mo nɛ Ebɔrɛ bee sa mo na a wora loŋ, saŋɛ na so, kusɔ kama to, Ebɔrɛ beeŋ bɔla Yesu Kristo so n nya epaŋ be kedi. Kemaŋkura nɛ eleŋ e baa la mo peya mbaanaayɔ. Amɛn.

Keji awurfoŋ ŋkpal Yesu so be asheŋ

¹²Ma basa shaso, men sa maŋ shin nɛ men be ŋgbene e baa wora menyi kanaŋ ko kechɔŋkeni nɛ k bee ba menyi so fanɛ edɛ be kuwuloŋ na so a fɛ fanɛ mamachi be kesheŋ ko e naa nya menyi. ¹³Ama men shin nɛ men be ŋgbene e baa fuli menyi parr fanɛ men ka bee ji Yesu be tɔrɔ na be ako, saŋɛ na so men be ŋgbene beeŋ fuli menyi saŋɛ nɛ mbe kemaŋkura beeŋ lar efuli na. ¹⁴Nɛ b baŋ tege menyi ŋkpal men ka la Kristo be bebɛsopo so, kumo ere nɛfa la menyeya nna, ŋkpal manɛ so, Ebɔrɛ be Kiyoyu nɛ e kɔ kemaŋkura na e wɔ menyi to. ¹⁵Men sa maŋ shin nɛ tɔrɔ e baa ba menyi to be ekama so ŋkpal e ka la emɔpo ŋko eyu ŋko alubiworapo ŋko esa nɛ e bee luri basa be asheŋ to so. ¹⁶Ama nɛ men luri tɔrɔ to ŋkpal men ka la bebɛsopo so, men sa maŋ shin nɛ k baa wora menyi anishinyɔr. Men baa di Ebɔrɛ epaŋ ŋkpal men ka bee ji mbe ketre so. ¹⁷Demu be kejiachɛ na taga to, Ebɔrɛ malɛ be kowu to ebi to nɛ k bee fara. Nɛ k baŋ fara anyi to bre, nuso nɛ asheŋ beeŋ ba kaa du n sa basa nɛ b maa nu a sa Ebɔrɛ be baru lela na? ¹⁸Nɛ asheŋ baa du kpakpa n sa elelapo nɛ e nya kumɔlga, nuso nɛ a beeŋ ba kaa du n sa bɔrɛkinipo nɛ alubiworapo! ¹⁹Amoso, bumo nɛ b wɔ tɔrɔ mo nɛ a la Ebɔrɛ be keparso peya ere to ere, b baa ta bumo be amu kikɛ a bɔɔ bumo be Epɔrpo mo nɛ e maŋ kɔ kɔnɔkilgi na nsaa wɔtɔ a wora kelela na enɔ.

Asɔ nɛ a daga bejuŋkparpo nɛ basa fɔlbi ka pin be asheŋ

¹To, naniere a ka menyi to be bejuŋkparpo nɛ b du fanɛ kananɛ ma alɛ gba la men barkasa ejuŋkparpo ere nsaa la esa nɛ n la Kristo be tɔrɔ be shɛdajipo nseŋ naa la esa nɛ meeŋ tu bumo nɛ baaŋ nya kemaŋkura na saŋɛ nɛ k lar efuli na. ²Mee kule menyi nna fanɛ men baa keni Ebɔrɛ be basa nɛ b wɔ men be enɔ to a du fanɛ mbolpɔ na so. Men sa maŋ ta bumo be kekeniso na fanɛ katiŋ be kusɔ. Men baa bugi ŋgbene a keni bumo so fanɛ kananɛ Ebɔrɛ bee sha fanɛ men baa du na. Men sa maŋ baa wɔtɔ a kɔ kajɛso a fin kakɔka, men baa bugi kagbene a sha kebaashuŋ basa. ³Men sa maa ŋini bumo nɛ Ebɔrɛ ta m bɔɔ menyi enɔ na kenimu, men baa la basa nɛ mbolpɔbi na beeŋ tiŋ ŋ keni so n wora asheŋ. ⁴Saŋɛ na so, Ekenipo Nimuso na kaŋ ya lar m ba, menyeeŋ nya kemaŋkurawuro mo nɛ k maa terge kikɛ na.

⁵Mbrantiɛ, loŋ koŋwule na nɛ a daga fanɛ men baa nu a sa benyɛnnimuana. Men ta kumu be kebar kaseto m mea to fanɛ wajɛ a wɔtɔ a sa abar, ŋkpal manɛ so, Ebɔrɛ maa sa kamoowuwuraana kashuli, ama bumo nɛ baa bar bumo be amu kaseto bre, e bee wu bumo kuwɔr nna.

⁶Amoso, men baa bar men be amu kaseto a wɔtɔ Ebɔrɛ be enɔgboŋana to nɛ e maŋ menyi so mo gbagba be saŋɛ. ⁷Men ta men be asheŋ tirso kikɛ a lɛ mo so, ŋkpal manɛ so, men be asheŋ wɔ mbe kagbene to ga.

⁸Men baa da so n shin nɛ men be nfɛra e baa niŋi, ŋkpal manɛ so, men doŋ alubipo na wɔtɔ nna a kilgi to fanɛ buluŋ a fin esa nɛ e beeŋ mur. ⁹Men baa kɔ men be yirda to kpakpa a tu mo nsaa maa sa mo kashuli, ŋkpal manɛ so, menyi alɛ gba nyi fanɛ loŋ nɛ men braana bebɛsopo ashi durnya ere to be kaplɛkama gba bee nya tɔrɔ.

¹⁰Ama nɛ men baŋ ji tɔrɔ ere gbrɛbi m ba lar, kuwɔr be kakɛ kikɛ be Ebɔrɛ nɛ e bee tre menyi fanɛ men ba tu Kristo nɛ men gama n nya mbe kemaŋkura mo nɛ k maŋ kɔ ekar na gbagba beeŋ naŋ shin nɛ kusɔ kama e nyalɛ n sa menyi nseŋ wɔtɔ menyi eleŋ to n shin nɛ men baa yil to nɛnɛ a maa gbuŋgbuŋ to kikɛ. ¹¹Eleŋ e baa la mo peya hale mbaanaayɔ. Amɛn.

Lalaloge be kechɔrɔ be asheŋ

¹²Ekurgepo Silvanes mo nɛ n nyi fanɛ meeŋ tiŋ n yirda na so so nɛ mee bɔla a sibɛ menyi kawɔlbi ere na. N sibɛ kumo nna gbrɛbi loŋ nɛ n leŋ menyi to nseŋ naŋ ji shɛda ŋ kaŋɛ fanɛ kuwɔr be kakɛ mo nɛ k shi Ebɔrɛ kutɔ kashenteŋ na nna na. Men baa yil kumo to kpakpa.

¹³Babilɔn be asɔri nɛ k du fanɛ men sipoche na be basa nɛ Ebɔrɛ lara menyi nɛ bumo kikɛ na bee chɔrɔ menyi. M pibi Maak gba bee chɔrɔ menyi.

¹⁴Men baa ta kasha be kegbuŋ be kepipeso be kechɔrɔ a chɔrɔ abar.

Kagbenewushi e baa wɔ menyi nɛ men wɔ Kristo to na kikɛ so.