1 JƆN

KAWƆL NƐ

JƆN

JUŊKPAR N SIBƐ NA

Kamalga nɛ k bee sa ŋkpa na be asheŋ

¹Yesu Kristo nɛ baa tre Kamalga nɛ k bee sa ŋkpa nsaa wɔtɔ durnya be sososo kikɛ na be asheŋ nɛ anyee sibɛ a sa menyi na. E malga nɛ an nu nseŋ wu mo kenishiso ŋ keni mo nseŋ ta an be enɔana m beta mo. ²Le be ŋkpa ere ka ba lar efuli nɛ an wu kumo, amoso nɛ anyee ji kumo be shɛda a sa menyi a kaŋɛ menyi ŋkpa nɛ k maŋ kɔ ekar ere be asheŋ na. K daa wɔ Ebɔrɛ na kutɔ nna pɔɛŋ nɛ b lara kumo efuli n sa anyi. ³Asɔ nɛ an wu nseŋ nu nɛ anyee ta a kaŋɛ menyi alɛ gba na, saŋɛ na so menyeeŋ tu anyi a wɔ kɔnɔkoŋwule be kebaawɔtɔ mo nɛ anyi nɛ Etuto Ebɔrɛ nɛ mo Pibinyɛn Yesu Kristo kɔ na to. ⁴Anyi alɛ naa sibɛ kawɔl ere nna nɛ anyi be ŋgbene e fuli anyi parr.

Kebaana kefulto to be asheŋ

⁵Baru mo nɛ an nu ashi Ebɔrɛ Pibinyɛn na kutɔ nsaa bɔ kumo a sa menyi na nde fanɛ Ebɔrɛ la kefulto nna nɛ tentembiri malɛ kikɛ maŋ wɔ mo to kuraa. ⁶To, nɛ anyee kaŋɛ fanɛ anyi nɛ Ebɔrɛ kɔ kɔnɔkoŋwule be kebaawɔtɔ nsaa na tentembiri to, efɛ nɛ anyee ku na, anyi alɛ nsaa maŋ naa wɔ kashenteŋ be kebaawɔtɔ to. ⁷Ama nɛ fanɛ an baa na kefulto to fanɛ kananɛ e wɔ kefulto to na bre, kumo ere anyi nɛ an braana beeŋ baa kɔ kɔnɔkoŋwule be kebaawɔtɔ nɛ mo Pibinyɛn Yesu be ŋklaŋ nɛ a lar saŋɛ nɛ e wu na e baa fɔr kulubi kikɛ nyam ashi anyi be ŋgbene to. ⁸Nɛ an baŋ kaŋɛ fanɛ an maŋ kɔ kulubi bre, anyee fule anyi be amu nna nɛ kashenteŋ malɛ maŋ wɔ anyi to kuraa. ⁹Ama nɛ fanɛ an bugi to ŋ kaŋɛ Ebɔrɛ anyi be alubi bre, e la esa nɛ e niŋi nna nɛ anyeeŋ tiŋ n yirda mo nɛ e ta anyi be alubi kikɛ nyam m paŋ anyi nseŋ fɔr kulubi kikɛ nyam ashi anyi be ŋgbene to. ¹⁰Nɛ an baŋ kaŋɛ fanɛ an maŋ wora alubi bre, kumo ere anyee tre Ebɔrɛ efɛpo nna na nɛ mbe kamalga na malɛ maŋ wɔ anyi to.

¹Ma mbi shasoana, mee sibɛ kawɔl ere nna a sa menyi nɛ men sa maŋ wora alubi. Ama nɛ k ba fanɛ ekama nɛ e ba wora kulubi bre, an kɔ ematapo ashi anyi nɛ Ebɔrɛ Etuto na be nferinto. Mo e la Yesu Kristo, esa nɛ e la esa lela Ebɔrɛ be anishito na. ²Mo e wu m mata be luwu nɛ k shin nɛ an nya alubi be ketampaŋ. Mannɛ anyi nawule be alubi so nɛ e wu, durnyaebi kikɛ be alubi so nɛ e wu.

Kebaabɛ Ebɔrɛ be mmalga naseso so be asheŋ

³Nɛ an baa bɛ Ebɔrɛ be mmalga naseso so bre, kumo ere an baa nyi geeŋ fanɛ an nyi mo. ⁴Esa kama nɛ e bee kaŋɛ fanɛ: “Ma ere nyi mo,” mo alɛ nsaa maa bɛ Ebɔrɛ na be mmalga naseso so, amodoŋwura la efɛpo nna nɛ kashenteŋ na malɛ maŋ wɔ mo to. ⁵Ama esa kama nɛ e bee bɛ Ebɔrɛ na be mmalga naseso so, amodoŋwura e la esa nɛ Ebɔrɛ be kasha bɔlɔ mo to felɛlɛ kashenteŋto Loŋ malɛ nɛ anyee ta a pin fanɛ an ka wɔ Ebɔrɛ to. ⁶Ekama malɛ nɛ e bee kaŋɛ fanɛ e wɔ Ebɔrɛ na to, a daga fanɛ amodoŋwura e baa wora asheŋ fanɛ kananɛ Yesu daa wora na.

Mbra popɔr na be asheŋ

⁷N teri shasoana, mannɛ kamalga naseso popɔr nɛ mee sibɛ a sa menyi, kedra nna. Kumo alɛ nɛ men nya sososo kikɛ na. Kamalga naseso dra na e la kubɔya mo nɛ men teŋ nu na. ⁸Ama kamalga naseso mo nɛ mee sibɛ a sa menyi ere malɛ du fanɛ kepopɔr nna. Menyi nɛ Kristo be kebaawɔtɔ malɛ to nɛ baa wu kumo be loŋ be kashenteŋ na, ŋkpal manɛ so, tentembiri na bee choŋ nna nɛ kashenteŋ be kefulto na tea fuli to. ⁹Esa kama nɛ e bee kaŋɛ fanɛ e wɔ kefulto na to, mo alɛ nsaa kishi mo niopibi, kraa wɔ tentembiri to nna na. ¹⁰Esa kama malɛ nɛ e bee sha mo niopibi wɔ kefulto na to nna na nɛ shɛŋ malɛ maŋ naa wɔ mo to a kagle mo ekpa a shin nɛ e bee fiti a tɔr. ¹¹Ama ekama nɛ e bee kishi mo niopibi wɔ tentembiri to nna na, mo alɛ nsaa na tentembiri to. E maŋ nyi kakpa nɛ e bee yɔ, ŋkpal manɛ so, tentembiri na e naa shin nɛ e maa wu.

¹²Ma mbi shasoana, mee sibɛ nna a sa menyi ŋkpal Ebɔrɛ ka ta menyi be alubi m paŋ menyi ŋkpal Yesu so na. ¹³Mee sibɛ nna a sa menyi betutoana ŋkpal men ka nyi mo ere esa nɛ e wɔ ŋkpa to sososo kikɛ na so. Mee sibɛ nna a sa menyi mbrantiɛbia ŋkpal men ka pɔɔ alubipo na so so. ¹⁴Mee sibɛ nna a sa menyi mbia ŋkpal men ka nyi etuto na so. Mee sibɛ nna a sa menyi betutoana ŋkpal men ka nyi mo ere esa nɛ e wɔ ŋkpa to sososo kikɛ na so. Mee sibɛ nna a sa menyi mbrantiɛbia ŋkpal men ka kɔ eleŋ nɛ Ebɔrɛ be kamalga na wɔ menyi to nɛ men pɔɔ alubipo na so so.

Durnya be kasha be asheŋ

¹⁵Men sa maa sha durnya ere ŋko kusɔ kama nɛ k la durnya ere peya. Esa kama nɛ e bee sha durnya ere maŋ kɔ kasha a sa Etuto Ebɔrɛ na. ¹⁶Ŋkpal manɛ so, asɔ nɛ a la durnya ere to be asɔ fanɛ asɔ nɛ dimɛdi be kapɔr lubi ere bee sha nɛ asɔ nɛ basa bee wu nsaa yɛlga nɛ durnya ere to be kamoowusheŋ kikɛ nyam maŋ shi Etuto na kutɔ, a la durnya ere to be asɔ nna. ¹⁷Durnya ere malɛ nɛ kumo be ayɛlgasɔ kikɛ nyam bee choŋ nna, ama esa kama nɛ e bee wora Ebɔrɛ na be aparsheŋ bre wɔ ŋkpa to nna mbaanaayɔ.

Kristo mo doŋ be asheŋ

¹⁸Ma mbi shasoana, lalaloge be saŋɛ na bee fo nna na. Men daŋ nu fanɛ Kristo mo doŋ beeŋ ba, naniere malɛ Kristo mo doŋana damta ba, amoso nɛ an pin fanɛ lalaloge be jemanɛ na fo. ¹⁹Le be basa ere daŋ shi anyi be katuŋ to nna, ama kashenteŋto, b daa maŋ la anyi to be basa, amoso nɛ b lar anyi to n yɔ na. Nɛ b daa la anyi to be basa nna b daa maaŋ lar. Ama bumo be kelar anyi to na e naa ŋini fanɛ mannɛ bumo be ekama e la anyi to be eko.

²⁰Ama menyi ere, Yesu Kristo ta Kiyoyu Cheeŋ na nna n wɔtɔ menyi to nɛ menyi kikɛ e pin kashenteŋ na. ²¹Mannɛ fanɛ men ka maŋ nyi kashenteŋ na so e shin nɛ mee sibɛ asɔ ere a sa menyi, ama menyi ka nyi kumo so nseŋ naa nyi fanɛ efɛ kikɛ maŋ wɔ kashenteŋ na to so nɛ mee sibɛ amo a sa menyi.

²²Esa mo malɛ e baa la efɛpo nɛ mannɛ esa nɛ e bee kaŋɛ fanɛ mannɛ Yesu e la Kristo, Ebɔrɛ be esa laraso na. Loŋ be esa e la Kristo mo doŋ na, emo nɛ e bee kini Ebɔrɛ Etuto na nɛ Ebinyɛn na kikɛ na. ²³Ŋkpal manɛ so, ekama nɛ e bee kini Ebinyɛn na maŋ kɔ Etuto na nna na, nɛ ekama malɛ nɛ e bee sɔ Ebinyɛn na kɔ Etuto na gba.

²⁴Ama menyi ere e shin nɛ kusɔ nɛ men nu sososo kikɛ na e shir a wɔ menyi to. Nɛ kusɔ nɛ men nu sososo kikɛ na baa wɔ menyi to bre, kumo ere menyi alɛ gba beeŋ baa wɔ Ebinyɛn na nɛ Etuto na to. ²⁵Kusɔ nɛ mo alɛ nase kɔnɔ fanɛ e beeŋ sa anyi e la ŋkpa nɛ k maŋ kɔ ekar na.

²⁶Mee sibɛ asɔ ere nna a sa menyi nɛ ŋ kaŋɛ menyi basa nɛ baa sha kefule menyi na be asheŋ. ²⁷Ama menyi ere, Yesu Kristo ta Kiyoyu Cheeŋ na nna n wɔtɔ menyi to nɛ e shir a wɔ menyi to. A maŋ daga fanɛ men naŋ nya esa ko nɛ e ŋini menyi, ŋkpal manɛ so, mbe Kiyoyu na e naa ŋini menyi asɔ kikɛ. Kusɔ kama malɛ nɛ e bee ŋini la kashenteŋ nna, mannɛ efɛ. Amoso, men baa bɛ Kiyoyu na be keŋini so nseŋ shir a wɔ Kristo na to.

Ebɔrɛ be mbia be asheŋ

²⁸To, naniere ma mbi shasoana, men baa kraa wɔ mo to, saŋɛ na so, e kaŋ ba, anyi maaŋ baa shika to kikɛ, anyi alɛ maaŋ naŋ ji anishinyɔr mbe anishito ŋkpal menyi so. ²⁹Menyi alɛ gba baa nyi Kristo na ka niŋi kusɔ kikɛ to. Kumo ere a daga fanɛ men baa nyi fanɛ esa kama nɛ e bee wora asɔ nɛ a niŋi la Ebɔrɛ pibi nna na.

¹Men keni kananɛ Etuto na sha anyi loŋ n shin nɛ baa tre anyi mbe mbia, kumo alɛ maŋ kɔ emɔrɔ malɛ fanɛ an ka la mbe mbia. Amoso nɛ durnyaebi maa pin anyi to na. Ebɔrɛ nɛ b maŋ pin to pɔɛŋ. ²N teri shasoana, naniere an la Ebɔrɛ be mbia nna na, ama kananɛ anyeeŋ ba kaa du kachako so bre e maŋ naŋ lar efuli. Kusɔ nɛ an baa nyi kikɛ e la fanɛ Kristo kaŋ ba lar efuli, anyeeŋ baa du fanɛ mo gbagba nna, ŋkpal manɛ so, anyeeŋ wu mo kananɛ e baa du. ³Esa kama nɛ e kɔ le be tama ere ashi Kristo to bee keni mbe kumu so nna a du cheembi fanɛ kananɛ Kristo du cheembi na. ⁴Esa kama nɛ e bee wora alubi bee wora nna a da Ebɔrɛ malɛ gba so na, ŋkpal manɛ so, kewora kulubi la ketɔr Ebɔrɛ be ntaŋ nna. ⁵Men nyi Kristo ka ba nɛ e ba ta basa be alubi n lɛ n sa bumo. Kulubi kikɛ malɛ maŋ wɔ mo to. ⁶Amoso, esa kama malɛ nɛ e shir a wɔ mo to maa wora alubi. Esa kama nɛ e baa wɔtɔ a wora alubi bre maŋ naŋ wu mo ŋko m pin mo Yesu na nna na.

⁷Ma mbi shasoana, men sa maŋ shin nɛ esa kikɛ e shin nɛ men foe ekpa. Ekama nɛ e bee wora asheŋ nɛ a niŋi la esa niŋiso nna ashi Ebɔrɛ be anishito fanɛ kananɛ Kristo niŋi na. ⁸Esa kama malɛ nɛ e bee wora asheŋ lubi la alubipo na peya nna, ŋkpal manɛ so, durnya be sososo na kikɛ nɛ alubipo na wɔtɔ a wora alubi m ba fo mbre. To, loŋ malɛ so nɛ Ebɔrɛ Pibinyɛn na lar m ba nɛ e ba jija alubipo na be ashuŋ.

⁹Esa kama nɛ e la Ebɔrɛ pibi maa wora alubi. Ŋkpal Ebɔrɛ be kapɔr gbagba ka wɔ mo to so nɛ ŋkpal Ebɔrɛ ka la mo Tuto na so so, e maaŋ tiŋ n shir a wɔ alubi to a wora amo. ¹⁰To, loŋ malɛ nɛ anyee ta a pin Ebɔrɛ be mbia nɛ bumo nɛ bumo alɛ la alubipo na be mbia. Esa kama nɛ e bee wora asɔ nɛ a maa niŋi, maŋ la Ebɔrɛ pibi. Ekama malɛ gba nɛ e maa sha mo niopibi, maŋ la Ebɔrɛ pibi.

Kebaasha abar be asheŋ

¹¹Kubɔya ere nɛ men daŋ nu sososo kikɛ na fanɛ a daga fanɛ an baa sha abar. ¹²A maŋ daga fanɛ an baa du fanɛ Keen nɛ e daa la alubipo na peya nseŋ bri mo sipo m mɔ na. Nɛ manɛ e daŋ ba nɛ e daŋ bri mo m mɔ? Kusɔ nɛ k daŋ ba e la fanɛ mbe asheŋ woraso daa maa niŋi nna nɛ mo sipo bre peya daa niŋi. ¹³Amoso, n niopibiana, nɛ durnya ere to ebi kishi menyi, men sa maŋ shin nɛ k baa chinchiŋ menyi. ¹⁴Esa kama nɛ e maa sha mo braana kraa wɔ luwu to nna na. Ama anyi ere nyi fanɛ an lar luwu to m ba luri ŋkpa to nna, ŋkpal manɛ so, anyee sha an niopibiana. ¹⁵Esa kama nɛ e kishi mo niopibi la emɔpo nna, menyi alɛ nyi fanɛ emɔpo kikɛ maŋ kɔ ŋkpa nɛ k maŋ kɔ ekar na mo to. ¹⁶Le nɛ an bɔla m pin kusɔ nɛ k la kasha. Yesu Kristo e shin nɛ b lara mbe ŋkpa ashi mo to n sa anyi. Amoso, a daga fanɛ anyi alɛ gba ka ta anyi be ŋkpaana n sa an niopibiana. ¹⁷Ama esa kama nɛ e kɔ durnya ere to be asɔ nseŋ wu fanɛ mo niopibi daga kechɛto, mo alɛ nseŋ ti mbe kagbene a maŋ chɛ mo to, nuso nɛ Ebɔrɛ be kasha bee wora a chena esa na wura to?

Kristo mo doŋana be asheŋ

¹⁸Ma mbi shasoana, men sa maŋ shin nɛ an baa kɔ mmalga ŋko nnɔ nawule a sha basa, men shin nɛ an baa kɔ aworbi nɛ kashenteŋ a sha basa.

¹⁹Loŋ nɛ anyeeŋ pin an ka wɔ kashenteŋ na to nɛ saŋkama malɛ nɛ an be ŋgbene bee ji a bri anyi, anyeeŋ wushi amo ashi Ebɔrɛ be anishito. ²⁰Anyi alɛ beeŋ tiŋ n wora ade kikɛ nna, ŋkpal manɛ so, Ebɔrɛ e chɔ anyi be ŋgbene, mo alɛ nseŋ naa nyi kusɔ kama. ²¹Beshapo, nɛ an be ŋgbene baa maa ji a bri anyi, kumo ere anyi maa shika to Ebɔrɛ be anishito. ²²Anyi alɛ naa tiŋ a nya kusɔ kama nɛ anyee kule mo ŋkpal an ka bee bɛ mbe mmalga naseso so so nsaa wora asɔ nɛ a bee par mo na so. ²³Mbe kamalga naseso na malɛ nde fanɛ, a daga fanɛ an ka yirda mo Pibinyɛn Yesu Kristo be ketre na nsaa sha abar fanɛ kananɛ e yili anyi fanɛ an baa wora na. ²⁴Bekama malɛ nɛ baa bɛ mbe mmalga nasesoana na so shir a wɔ mo to nna nɛ mo alɛ gba wɔ bumo to. To, kananɛ anyee wora a pin fanɛ e wɔ anyi to nde: Mbe Kiyoyu nɛ e ta n sa anyi na so so nɛ an pin loŋ.

Kashenteŋ be Kiyoyu na nɛ efɛ be ayoyu be asheŋ

¹N teri shasoana, men sa maa yirda basa kama nɛ baa kaŋɛ fanɛ Ebɔrɛ be Kiyoyu wɔ bumo to. Men baa wora bumo a keni ŋko ayoyu mo nɛ b kɔ na shi Ebɔrɛ kutɔ nna ŋko a maŋ shi mo kutɔ, ŋkpal manɛ so, anebi fɛpo damtaana lar n luri durnya to. ²To, kananɛ menyeeŋ wora m pin Ebɔrɛ be Kiyoyu na esa to nde: Kiyoyu kama nɛ e wɔ esa to a bugi to a kaŋɛ fanɛ Yesu Kristo ta eyur nna m ba durnya ere to na, shi Ebɔrɛ kutɔ nna. ³Ama kiyoyu kama nɛ e maa ji Yesu be asheŋ be shɛda, loŋ be kiyoyu maŋ shi Ebɔrɛ kutɔ. Loŋ be kiyoyu na e la edoŋ na be kiyoyu mo nɛ men nu fanɛ e bee ba na. Mo e teŋ ba durnya ere to na.

⁴Ama menyi ere, ma mbi shasoana, men la Ebɔrɛ be basa nna m pɔɔ loŋ be anebi fɛpoana so, ŋkpal manɛ so, esa nɛ e wɔ menyi to na e chɔ emo nɛ e wɔ durnya ere to na. ⁵Durnya ere to be basa e la bumo, amoso, durnya ere to be mmalga nɛ baa malga nɛ durnya ere to ebi malɛ bee nu bumo be mmalga na. ⁶Anyi ere la Ebɔrɛ be basa nna, ekama malɛ nɛ e nyi Ebɔrɛ bee nu anyi be mmalga nna. Ama ekama malɛ nɛ e maŋ la Ebɔrɛ peya maa nu kusɔ nɛ anyee kaŋɛ. Loŋ malɛ nɛ anyee ta a pin kashenteŋ be Kiyoyu na nɛ efɛ be kiyoyu na to.

Ebɔrɛ be kasha nɛ anyi be kasha be asheŋ

⁷N teri shasoana, men shin nɛ an baa sha abar, ŋkpal manɛ so, kasha shi Ebɔrɛ kutɔ nna. Esa kama nɛ e kɔ kasha la Ebɔrɛ pibi nna na, mo alɛ nsaa nyi Ebɔrɛ. ⁸Ama ekama nɛ e maŋ kɔ kasha maŋ nyi Ebɔrɛ, ŋkpal manɛ so, Ebɔrɛ e la kashawura. ⁹Kananɛ Ebɔrɛ ŋini anyi mbe kasha nde: E shuŋi mo Pibinyɛn koŋwule nna durnya ere to fanɛ an bɔla mo so n nya ŋkpa. ¹⁰Kede nɛ baa tre kasha gbagba na, mannɛ anyi gbagba be kasha nɛ an ta n sha Ebɔrɛ, mo e sha anyi nseŋ shuŋi mo Pibinyɛn fanɛ e ba wu m mata be luwu nɛ k shin nɛ an nya alubi be ketampaŋ.

¹¹N teri shasoana, ŋkpal kananɛ Ebɔrɛ sha anyi ere so, a daga fanɛ anyi alɛ gba e baa sha abar. ¹²Esa kama maŋ naŋ wu Ebɔrɛ kenishiso, ama nɛ an baa sha abar bre, kumo ere Ebɔrɛ wɔ anyi to nɛ mbe kasha malɛ bɔlɔ anyi to felɛlɛ kashenteŋto.

¹³Kananɛ anyee wora a pin fanɛ an wɔ mo to nɛ mo alɛ gba wɔ anyi to nde: E ta mo gbagba be Kiyoyu nna n sa anyi. ¹⁴Anyi alɛ wu nseŋ ji kumo be shɛda fanɛ Etuto na shuŋi mo Pibinyɛn fanɛ e ba kaa la durnya ere to be Emɔlgapo. ¹⁵Ekama nɛ e bee bugi to a kaŋɛ basa fanɛ Yesu e la Ebɔrɛ Pibinyɛn na, Ebɔrɛ e wɔ amodoŋwura to nɛ mo alɛ gba wɔ Ebɔrɛ to. ¹⁶Anyi alɛ gba ba pin nseŋ yirda kasha mo nɛ Ebɔrɛ kɔ a sa anyi na.

Ebɔrɛ e la kashawura. Ekama malɛ nɛ e wɔ kasha be kebaawɔtɔ to, wɔ Ebɔrɛ to nna na nɛ Ebɔrɛ malɛ gba wɔ amodoŋwura to.

¹⁷Kasha malɛ bɔlɔ anyi to nna felɛlɛ, saŋɛ na so demujiachɛ na anyi maaŋ shika to, ŋkpal manɛ so, anyi be kebaawɔtɔ durnya ere to nɛ kananɛ Kristo du na la kukoŋwule nna. ¹⁸Kakpa nɛ kasha wɔ, kufu maŋ wɔtɔ. Kashenteŋ be kasha bee ju kufu nna, ŋkpal manɛ so, nɛ an kraŋ baa ŋana fanɛ Ebɔrɛ beeŋ gberge anyi kusoe, kumo ere anyi maa sha mo nɛnɛ nna na. Amoso, esa nɛ e bee lɔ kufu, kasha maŋ naŋ bɔlɔ mo to felɛlɛ nna na. ¹⁹Ebɔrɛ e daŋ kesha anyi so shin nɛ anyi alɛ kɔ kasha na. ²⁰Esa kama nɛ e bee kaŋɛ le: “Mee sha Ebɔrɛ,” mo alɛ nsaa kishi mo niopibi la efɛpo nna, ŋkpal manɛ so, esa nɛ e bee wu mo niopibi ŋkaa maaŋ tiŋ n sha mo, maaŋ tiŋ n sha Ebɔrɛ mo nɛ e maŋ naŋ wu kikɛ na. ²¹To, le be kamalga naseso ere nɛ e ta m bɔɔ anyi enɔ fanɛ, esa kama nɛ e bee sha Ebɔrɛ e baa sha mo niopibi gba.

Anyi be eleŋ ka chɔ durnya ere to ebi peya be asheŋ

¹Esa kama nɛ e yirda fanɛ Yesu e la Kristo na la Ebɔrɛ pibi nna nɛ ekama malɛ nɛ e bee sha esa nɛ e kurge ebi na beeŋ baa sha ebi na gba. ²Nɛ an baa sha Ebɔrɛ nsaa bɛ mbe mmalga naseso so bre, loŋ nɛ anyeeŋ pin an ka bee sha Ebɔrɛ be mbia gba. ³Kesha Ebɔrɛ malɛ e la kebɛ mbe mmalga nasesoana so, amo alɛ maŋ du kpakpa. ⁴Ŋkpal manɛ so, esa kama nɛ e la Ebɔrɛ pibi bee pɔɔ durnya ere so nna. Eleŋ mo nɛ k bee pɔɔ durnya so e la anyi be yirda. ⁵Wanɛ e naaŋ tiŋ m pɔɔ durnya ere so nɛ mannɛ esa nɛ e yirda fanɛ Yesu e la Ebɔrɛ Pibinyɛn na?

Bumo nɛ b ji shɛda ŋ kaŋɛ Yesu be asheŋ

⁶Yesu ere e la emo nɛ e daŋ yili kabɔrɛbɛr be nchu nɛ mbe luwu be ŋklaŋ so m ba na. Mannɛ nchu na malɛ nawule so nɛ e daŋ yili so m ba, nchu na nɛ ŋklaŋ na kikɛ so nɛ e daŋ yili so m ba. ⁷Kiyoyu na malɛ e la shɛdajipo na, ŋkpal manɛ so, Kiyoyu na e la kashenteŋ na. ⁸Eshɛdajipo asa e wɔtɔ. Kiyoyu na wɔtɔ nɛ nchu na wɔtɔ nɛ ŋklaŋ na gba wɔtɔ. Kɔnɔkoŋwule nɛ amo alɛ kikɛ kɔ. ⁹Anyi maa kplaŋ dimɛdi be shɛda so, ama an nyi fanɛ Ebɔrɛ be shɛda e chɔ dimɛdi peya, ŋkpal manɛ so, Ebɔrɛ be shɛda na nɛ e ta a ji mo Pibinyɛn be asheŋ. ¹⁰Esa kama malɛ nɛ e yirda Ebɔrɛ Pibinyɛn na kɔ loŋ be shɛda na mbe kagbene to. Ama ekama nɛ e maŋ yirda Ebɔrɛ ta mo Ebɔrɛ na ŋ ki efɛpo nna na ŋkpal amodoŋwura na ka maŋ yirda shɛda mo nɛ e bee ji mo Pibinyɛn na be asheŋ na so. ¹¹Shɛda na malɛ nde fanɛ, Ebɔrɛ sa anyi ŋkpa nɛ k maŋ kɔ ekar nɛ loŋ be ŋkpa na wɔ mo Pibinyɛn na to. ¹²Esa kama nɛ e kɔ Ebinyɛn na kɔ ŋkpa na, ama ekama nɛ e maŋ kɔ Ebɔrɛ Pibinyɛn na maŋ kɔ ŋkpa na.

Ŋkpa nɛ k maŋ kɔ ekar na be asheŋ

¹³Menyi bumo nɛ men yirda Ebɔrɛ Pibinyɛn be ketre na nɛ mee sibɛ asɔ ere a sa na nɛ men baa nyi fanɛ men kɔ ŋkpa nɛ k maŋ kɔ ekar na.

¹⁴Kusɔ nɛ k bee shin nɛ anyi maa shika to ashi Ebɔrɛ be anishito nde fanɛ, kusɔ kama nɛ an baŋ bɔla Ebɔrɛ be keparso ŋ kule mo, e beeŋ nu an be kekule. ¹⁵To, nɛ an baa nyi fanɛ kusɔ kama nɛ anyee kule mo e bee nu an be kekule, kumo ere an nyi fanɛ kusɔ kama nɛ anyee kule mo anyeeŋ nya kumo.

¹⁶Esa kama nɛ e wu mo niopibi ka bee wora kulubi nɛ k maŋ la luwu be kulubi, amodoŋwura e kule Ebɔrɛ nɛ e sa mo ŋkpa. Basa nɛ bumo be alubi maa yɛr bumo luwu to na nɛ n de na. Kulubi ko wɔtɔ a yɛr esa luwu to, mannɛ loŋ be kulubi na be kabɔrɛkule nɛ ŋ kaŋɛ fanɛ amodoŋwura na e kule. ¹⁷Kewora n jija kikɛ la kulubi nna, ama kulubi ko wɔtɔ ŋkaa maa yɛr esa luwu to.

¹⁸An baa nyi fanɛ Ebɔrɛ pibi kama maa shir a wɔ alubi to a wora amo, ŋkpal manɛ so, Ebɔrɛ Pibinyɛn e naa kuŋ mo nɛ alubipo na e sa maŋ tiŋ n doro mo.

¹⁹Anyi alɛ naa nyi fanɛ an ka la Ebɔrɛ peya, ama durnya ere bre kikɛ wɔ alubipo na be enɔ to nna.

²⁰Anyi alɛ nseŋ naa nyi Ebɔrɛ Pibinyɛn na ka ba m ba sa anyi nfɛra nɛ an pin kashenteŋ be Ebɔrɛ na, anyi alɛ wɔ mo kashenteŋ be Ebɔrɛ na to nna, hale mo Pibinyɛn Yesu Kristo na to. Mo e la kashenteŋ be Ebɔrɛ na, nɛ ŋkpa nɛ k maŋ kɔ ekar na.

²¹Ma mbi shasoana, men baa gelge agbir.