1 KRONIKƐLS

KRONIKƐLS

BE KAWƆL JUŊKPARSO

Yili Adam n ya fo Eebraham be kaman to ebi be asheŋ

(Jɛnesis 5:1-32; 10:1-32; 11:10-26)

¹Adam pibi e daa la Sɛf nɛ Sɛf malɛ pibi daa la Inɔsh nɛ Inɔsh malɛ pibi daa la Keenan, ²nɛ Keenan pibi la Mahalel nɛ Mahalel malɛ pibi la Jarɛɛd, ³Nɛ Jarɛɛd malɛ pibi la Inɔk nɛ Inɔk malɛ pibi la Mɛtusɛla nɛ Mɛtusɛla malɛ pibi la Lamɛk nɛ Lamɛk malɛ pibi la Nowa. ⁴Nowa daa kɔ mbinyɛnsobi asa nna. Bumo e daa la Shɛm nɛ Ham nɛ Jafɛf.

⁵Jafɛf be mbinyɛnsobi e daa la Gooma nɛ Magɔg nɛ Madai nɛ Javan nɛ Tubal nɛ Mɛshaak nɛ Tiras. Efuliana nɛ a bee ji bumo be atre ere be basa e la bumo be kenana. ⁶Gooma be kaman to ebi e daa la Ashkenaz nɛ Rifaaf nɛ Togaama. ⁷Jaavan malɛ be kaman to ebi e daa la Elaisha nɛ Taashish nɛ Kitebi nɛ Rodanebi.

⁸Ham be mbinyɛnsobi e daa la Kush nɛ Ijipt nɛ Libiya nɛ Keenan. Efuliana nɛ a bee ji bumo be atre ere be basa e la bumo be kenana. ⁹Kush be kaman to ebi e daa la Sɛba nɛ Havila nɛ Sɛbta nɛ Raama nɛ Sabteka be basa. Raama be kaman to ebi e daa la Sheba nɛ Dedan be basa. ¹⁰Kush pibinyɛn e daa la Nimrɔd. Nimrɔd e daa la durnya kikɛ be sososo be enapogboŋ. ¹¹Ijipt malɛ be kaman to ebi e daa la Libiya nɛ Anaam nɛ Lehab nɛ Naftu be basa, ¹²nɛ Patrɔs nɛ Kaslu nɛ Kreet, nɛ Filistiebi shi na, be basa. ¹³Keenan be mbia e daa la Sidɔn nɛ Hɛf. Sidɔn e daa la mo pibinyɛn nimuso. Efuliana nɛ a bee ji bumo be atre ere be basa e daa la bumo be kenana. ¹⁴Keenan malɛ be kenana e daa la Jebusiebi nɛ Amɔriebi nɛ Gɛgashebi, ¹⁵nɛ Hivebi nɛ Aakebi nɛ Sinebi, ¹⁶nɛ Arvadebi nɛ Zimarebi nɛ Hamafebi.

¹⁷Shɛm be mbinyɛnsobi e daa la Elaam nɛ Ashuur nɛ Apakshad nɛ Luud nɛ Araam nɛ Uz nɛ Huul nɛ Gɛda nɛ Mɛshɛk. Efuliana nɛ a bee ji bumo be atre ere be basa e daa la bumo be kenana. ¹⁸Apakshad pibi e daa la Shɛla nɛ Shɛla malɛ pibi la Heba. ¹⁹Heba daa kɔ mbinyɛnsobi anyɔ nna. Enimuso na e daa la Pɛlɛg. B daŋ sa mo ketre na nna ŋkpal durnya ka daŋ barga to ntuŋso loŋ be jemanɛ na so. Ebibiso na malɛ e la Jɔktan. ²⁰Jɔktan be kaman to ebi e daa la Almodad nɛ Shɛlef nɛ Hazamavɛf nɛ Jera nɛ ²¹Hadoram nɛ Uzal nɛ Dikla nɛ ²²Ebal nɛ Abimaɛl nɛ Shɛba nɛ ²³Ɔfir nɛ Havila nɛ Jobaab.

²⁴Kananɛ Shɛm be kanaŋ bɛ abar so m ba fo Eebraham nde. Bumo e daa la Shɛm nɛ Apakshad nɛ Shɛla ²⁵nɛ Heba nɛ Pɛlɛg nɛ Reu ²⁶nɛ Serɔg nɛ Nahɔɔ nɛ Tɛɛra ²⁷nɛ Eebram nɛ e ki Eebraham na.

Eebraham be kaman to ebi be asheŋ

(Jɛnesis 25:12-16)

²⁸Eebraham daa kɔ mbinyɛnsobi anyɔ nna. Bumo e daa la Aizek nɛ Ishmaɛl. ²⁹Ishmaɛl be mbinyɛnsobi nɛ b daŋ ki eyiri kuduanyɔ be mbuna be benimu na e daa la Nebaiɔf nɛ e daa la Ishmaɛl pibinyɛn nimuso na, n ta Kedaar m bɛ so nɛ Adbeel nɛ Mibsam, ³⁰nɛ Mishma nɛ Duma nɛ Maasa nɛ Hadad nɛ Tɛma ³¹nɛ Jɛtur nɛ Nafish nɛ Kɛdɛma.

³²Eebraham daa kɔ ejipoche ko nɛ baa tre mo Ketura, nɛ mo nɛ mo kurge mbinyɛnsobi ashe. Bumo e la Zimran nɛ Jɔkshan nɛ Medan nɛ Midian nɛ Ishbak nɛ Shuwa. Jɔkshan daa kɔ mbinyɛnsobi anyɔ nna. Bumo e la Sheeba nɛ Dedan. ³³Midian daa kɔ mbinyɛnsobi anu nna. Bumo e la: Efa nɛ Efɛ nɛ Hanɔk nɛ Abida nɛ Ɛlda.

Isɔɔ be kaman to ebi be asheŋ

(Jɛnesis 36:1-19)

³⁴Eebraham pibinyɛn Aizek be mbinyɛnsobi daa wɔ benyɔ. Bumo e la Isɔɔ nɛ Jeekɔb. ³⁵Isɔɔ be mbinyɛnsobi e daa la Elifas nɛ Ruwɛl nɛ Jewush nɛ Jalam nɛ Koora. ³⁶Ɛlifaz be mbia e daa la Teman nɛ Omaar nɛ Zefi nɛ Gatam nɛ Kenaaz nɛ Timna nɛ Amalɛk. ³⁷Ruwɛl malɛ be mbia e daa la Nahaf nɛ Zera nɛ Shamaa nɛ Miiza.

Basa nɛ b juŋkpar n chena Edɔm be asheŋ

(Jɛnesis 36:20-30)

³⁸Basa nɛ b juŋkpar n chena Edɔm na daŋ shi Siir be mbinyɛnsobi be kanaŋ to nna. Siir be mbinyɛnsobi e daa la Lotan nɛ Shobal nɛ Zibiɔn nɛ Ana nɛ Dishɔn nɛ Ezɛr nɛ Dishan. ³⁹Lotan be mbinyɛnsobi e daa la Hɔri nɛ Homam. Lotan mo sipoche e daa la Timna. ⁴⁰Shobaal be mbinyɛnsobi e daa la Alvan nɛ Manahaf nɛ Ebal nɛ Shefo nɛ Onam. Zibiɔn be mbinyɛnsobi e daa la Aya nɛ Ana. ⁴¹Ana pibinyɛn e daa la Dishɔn. Dishɔn malɛ be mbinyɛnsobi e daa la Hamran nɛ Eshban nɛ Itran nɛ Cheran. ⁴²Ezɛr be mbinyɛnsobi e daa la Bilhan nɛ Zaavan nɛ Jaakan. Dishan e daa la Uz nɛ Aran bumo tuto.

Edɔm be bewura be asheŋ

(Jɛnesis 36:31-43)

^43-50Le be bewura ere e daŋ ji Edɔm be kasawule so be kuwura pɔɛŋ nɛ Israɛl be efuli so nya bewura.

Bumo e la Bɛla nɛ mo tuto la Biyɔɔ nɛ e shi Dinhaba na,

nɛ Johab nɛ mo tuto la Zɛra nɛ e shi Bozra na

nɛ Husham nɛ e shi Teman be efuli so nɛ na m bɛ so,

nɛ Hadad nɛ mo tuto la Bɛdad nɛ e shi Avif nseŋ daŋ kɔ kena m pɔ Midianebi so ashi Mowab be kasawule so na,

nɛ Samla nɛ e shi Masreka na,

nɛ Shaul nɛ e shi Rehobof be lɔr ase na,

nɛ Baal Hanan nɛ mo tuto la Akɔɔ na;

nɛ Hadad nɛ e shi Pawu na. Mbe eche e daa la Matrid pibiche Mehetabel nɛ mo nanache daa la Mezahab na.

⁵¹Edɔm be basa be mbuna be bewura e daa la, Timna nɛ Alvan nɛ Jatɛf ⁵²nɛ Oholibama nɛ Ela nɛ Pinɔn ⁵³nɛ Keenaz nɛ Teman nɛ Mibza ⁵⁴nɛ Magdiel nɛ Iram.

Juda be kaman to ebi be asheŋ

¹Jeekɔb daa kɔ mbinyɛnsobi kuduanyɔ nna. Bumo e la Ruben nɛ Simiɔn nɛ Livai nɛ Juda nɛ Isaaka nɛ Zɛbyulɔn ²nɛ Dan nɛ Josɛf nɛ Bɛnjamin nɛ Naftali nɛ Gad nɛ Ashɛr.

³Juda nɛ mbe Keenanche nɛ baa tre Bafshuwa na daa kɔ mbinyɛnsobi asa nna. Bumo e la Ɛr nɛ Onan nɛ Shɛla. Ɛr daa wora asheŋ lubi damta nna ŋkpal loŋ so nɛ Enyɛnpe Ebɔrɛ daŋ shin nɛ e wu. ⁴Juda nɛ mo pibinyɛn be eche Tamaa gba daŋ kurge mbinyɛnsobi anyɔ nna. Bumo e daa la Pɛrɛs nɛ Zɛra.

⁵Pɛrɛs be mbinyɛnsobi e daa la Hezrɔn nɛ Hamuul. ⁶Zɛra malɛ be mbinyɛnsobi e daa la Zimri nɛ Etan nɛ Heman nɛ Kalkol nɛ Daada. ⁷Kaami nɛ e shi Zɛra be kanaŋ to na pibinyɛn Eekan e daŋ ta asɔ nɛ a la Ebɔrɛ peya, nɛ aleblawu tɔr Israɛl be efuli kikɛ so ŋkpal loŋ so na.

⁸Ebinyɛn koŋwule nɛ Etan daa kɔ, mo e la Azariya.

Ewura Deevid be kaman to ebi be asheŋ

⁹Mbinyɛnsobi asa nɛ Hɛzrɔn daa kɔ. Bumo e la Jeramiil nɛ Raam nɛ Kalɛb.

¹⁰Yili Raam be kanaŋ n ya fo Jɛsi be kanaŋ be kananɛ k bɛ abar so nde. Raam pibinyɛn e daa la Aminadab nɛ Aminadab malɛ pibi daa la Nashɔn. Nashɔn e daa la Juda be yiri na to be ejuŋkparpo. ¹¹Nashɔn pibi e daa la Salmon nɛ Salmon malɛ pibi daa la Boaz. ¹²Boaz pibi e daa la Obɛd nɛ Obɛd malɛ pibi daa la Jɛsi. ¹³Jɛsi be mbinyɛnsobi daa wɔ beshunu. Kananɛ b bɛ abar so kenimu kenimuso nde. Eliab e la mo pibinyɛn nimuso n ta Abinadab nɛ Shamaa ¹⁴nɛ Netanɛl nɛ Raddai ¹⁵nɛ Ozɛm nɛ Deevid m bɛso. ¹⁶Mbe mbichesobi daa wɔ benyɔ nna. Bumo e la Zeruwa nɛ Abigɛl.

Jɛsi pibiche Zeruwa daa kɔ mbinyɛnsobi asa. Bumo e daa la Abishai nɛ Jɔab nɛ Asahɛl. ¹⁷Abigɛl mo kul be ketre e daa la Jɛta nɛ e daŋ shi Ishmaɛl be kanaŋ to. Bumo pibinyɛn be ketre e daa la Amasa.

Hezrɔn be kaman to ebi be asheŋ

¹⁸Hezrɔn pibinyɛn Kalɛb e daŋ ta Azuba ŋ kurge ebiche nɛ baa tre mo Jeriɔf. Jeriɔf be mbinyɛnsobi e daa la Jɛsha nɛ Shobab nɛ Adɔn. ¹⁹Azuba ka wu be kaman nɛ Kalɛb naŋ ta eche nɛ baa tre mo Efraf nseŋ kurge ebinyɛn nɛ baa tre mo Hur. ²⁰Hur pibinyɛn e daa la Yuri nɛ Yuri malɛ pibinyɛn la Bazilɛl.

²¹Hezrɔn ka ji nfɛ adeshe nɛ e ta Makiir pibiche nɛ e wɔ Giliad be efuli so na mo sipo ŋ kurge ebinyɛn nɛ baa tre Segɔb na, ²²nɛ Segɔb malɛ kurge ebinyɛn nɛ baa tre mo Jair. Jair e daa la ewura nsaa keni nde adunyɔ nɛ asa so ashi Giliad be efuli na so. ²³Jemanɛ ko ka ba fo, nɛ Gɛshur nɛ Mɛsopoteemia be efuli so be basa kɔ n sɔ nde adeshe ashi efuli na so. B daŋ sɔ Jair nɛ Kɛnaf gba be nde nɛ nde nɛ ndewurbi nɛ a kulti amo na kikɛ n ti so. Bekama nɛ b daa wɔ Giliad be efuli so na kikɛ daa la Makiir be kaman to ebi nna. ²⁴Hezrɔn ka wu be kaman, nɛ Kalɛb ta Efraf nɛ e daa la mo tuto be ekulpoche na a kil. Bumo pibinyɛn e daa la Ashuur nɛ e daŋ chena Tekua na.

Jeramiil be kaman to ebi be asheŋ

²⁵Jeramiil nɛ e daa la Hezrɔn pibinyɛn nimuso na daa kɔ mbinyɛnsobi anu nna. Raam e daa la mo pibinyɛn nimuso n ta Buna nɛ Orɛn nɛ Ozɛm nɛ Ahija m bɛso. ²⁶Jeramiil daa kɔ eche nyɔsopo nɛ baa tre mo Atara nɛ mo nɛ mo kɔ ebinyɛn nɛ baa tre Onam. ²⁷Raam daa kɔ mbinyɛnsobi asa nna. Bumo e daa la Maaz nɛ Jamin nɛ Eka. ²⁸Onam daa kɔ mbinyɛnsobi anyɔ nna. Bumo e daa la Shammai nɛ Jaada. Shammai malɛ gba daa kɔ mbinyɛnsobi anyɔ nna. Bumo e daa la Nadab nɛ Abishur.

²⁹Abishur be eche e daa la Abiheel. B daŋ kurge mbinyɛnsobi anyɔ nna. Bumo e daa la Aban nɛ Mɔlid. ³⁰Nadab daa kɔ mbinyɛnsobi anyɔ nna. Bumo e daa la Sɛlɛd nɛ Apayim, ama Sɛlɛd bre daa maŋ kurge. ³¹Apayim pibinyɛn e daa la Ishi nɛ Ishi malɛ pibi daa la Sheshan nɛ Sheshan malɛ pibinyɛn daa la Alai.

³²Jɛta nɛ Jonatan bumo tuto e daa la Jaada. Jɛta bre daa maŋ kurge. ³³Jonatan bre daa kɔ mbinyɛnsobi anyɔ nna. Bumo e daa la Pɛlɛf nɛ Zaaza. Bumo kikɛ daa la Jeramiil be kaman to ebi nna.

³⁴Sheshan bre daa maŋ kɔ mbinyɛnsobi, beche nawule nɛ e daŋ kurge. E daa kɔ kayɛrbi ko nɛ e shi Ijipt be efuli so nɛ baa tre mo Jaaha. ³⁵Sheshan daŋ ta mo pibiche ko nna n sa mbe kayɛrbi na nɛ e kil nseŋ kurge ebinyɛn nɛ baa tre mo Attai. ³⁶Yili Attai be kanaŋ n ya fo Elishama be kanaŋ be kananɛ k bɛ abar so nde. Attai pibi e daa la Neetan nɛ Neetan malɛ pibi daa la Zabad. ³⁷Zaabad pibi e daa la Efaal nɛ Efaal malɛ pibi daa la Obɛd, ³⁸Obɛd pibi e daa la Jehu nɛ Jehu malɛ pibi daa la Azariya, ³⁹Azariya pibi e daa la Hɛlɛz nɛ Hɛlɛz malɛ pibi daa la Eliaza, ⁴⁰Eliaza pibi e daa la Sismai nɛ Sismai malɛ pibi daa la Shalum, ⁴¹Shalum, pibi e daa la Jekamaya nɛ Jekamaya malɛ pibi daa la Elishaama.

Kalɛb be kaman to ebi be asheŋ

⁴²Kalɛb nɛ e daa la Jeramiil mo sipo na be kaman to ebi nde. Mɛsha e daa la mo pibinyɛn nimuso. Mɛsha pibi e daa la Ziif nɛ Ziif malɛ pibi daa la Marɛsha nɛ Marɛsha malɛ pibi daa la Hibrɔn. ⁴³Hibrɔn daa kɔ mbinyɛnsobi ana nna. Bumo e la Koora nɛ Tapua nɛ Rekɛm nɛ Shema. ⁴⁴Shema pibi e daa la Raham nɛ Raham malɛ pibi daa la Jɔkiam nɛ Jɔkiam pibi daa la Rekɛm nɛ Rekɛm malɛ pibi la Shammai. ⁴⁵Shammai pibi e daa la Moan nɛ Moan malɛ pibi daa la Bɛfzur.

⁴⁶Kalɛb daa kɔ ejipoche ko nɛ baa tre mo Efa. Mo nɛ eche na daa kɔ mbinyɛnsobi asa nna. Bumo e la Haran nɛ Moza nɛ Gazɛz. Haran gba daa kɔ ebinyɛn ko nɛ baa tre mo Gazɛz.

⁴⁷Jadai daa kɔ mbinyɛnsobi ashe nna. Bumo e la, Regɛm nɛ Jotam nɛ Geshan nɛ Pɛlɛt nɛ Efa nɛ Shaaf.

⁴⁸Kalɛb be eche ko be ketre e daa la Maaka. Mo nɛ Maaka daŋ kurge mbinyɛnsobi anyɔ nna. Bumo e la Sheba nɛ Tirhana. ⁴⁹K maŋ chɛr ko nɛ mo nɛ eche na naŋ kurge mbinyɛnsobi anyɔ. Bumo e la Shaaf nɛ e la Madmana mo tuto na, nɛ Sheeva nɛ mo alɛ la Makbeena mo tuto na nɛ Gibia.

Kalɛb pibiche e daa la Aksa.

⁵⁰Kalɛb be kaman to ebi e kraa la bede gba.

Kalɛb pibinyɛn nimuso nɛ mo nɛ mbe eche Efraf daŋ kurge e daa la Hur. Hur pibinyɛn Shobal e daŋ juŋkpar n chena Kiriaf Jearim. ⁵¹Mo pibinyɛn nyɔsopo nɛ baa tre Salma na, e daŋ juŋkpar n chena Bɛtlɛhɛm, nɛ mo pibinyɛn sasopo nɛ baa tre Harif na e daŋ juŋkpar n chena Bɛfgaada.

⁵²Shobaal nɛ e juŋkpar n chena Kiriaf Jearim na b kenana e daa la Harowe be basa nɛ Menuhɔf be kabuna ebi na be bargato, ⁵³n ta Itriebi nɛ Putebi nɛ Shumebi nɛ Mishraebi be mbuna nɛ bumo alɛ gba daa wɔ Kiriaf Jearim na.

⁵⁴Salma nɛ e daŋ juŋkpar n chena Bɛtlɛhɛm na e daa la Netofa be basa nɛ Atrɔf Bɛf Jɔab nɛ Zorebi nɛ b daa la Manahaf be mbuna anyɔ na be kuko bumo nananyɛn.

⁵⁵Salma e daa la Jabez be kabuna ebi na bumo nananyɛn mo nɛ e daa sibɛ bumo be demuji be asheŋ nɛ abane be asheŋ kikɛ a nase. Bumo e daa la, Tirafebi nɛ Shimitebi nɛ Sukaebi. Bumo nɛ Rekabebi kikɛ daa la Haamaf nɛ e la Kɛn be esa na be kenana nna.

Ewura Deevid be mbia be asheŋ

^1-3Saŋɛ so nɛ Deevid daa wɔ Hibrɔn na, mbinyɛnsobi ashe nɛ e daŋ kurge. Kananɛ b bɛ abar so kenimu kenimuso nde:

Mo pibi nɛ e juŋkpar e la Ammɔn nɛ mo nio daa la Ahinɔam nɛ e shi Jizreel na.

Emo nɛ e bɛ so enyɔsopo e la Danɛl nɛ mo nio daa la Abigɛl nɛ e shi Kamɛl na.

Emo nɛ e bɛ so esasopo e la Absalɔm nɛ mo nio daa la Maaka nɛ e daa la Gɛshur be ewura Talmai pibiche na.

Emo nɛ e bɛ so enasopo e la Adonija nɛ mo nio daa la Hagif na.

Emo nɛ e bɛ so enusopo e la Shefatiya nɛ mo nio daa la Abitaal na.

Emo nɛ e bɛ so eshesopo e la Itriam nɛ mo nio daa la Egla na

⁴Saŋɛ so nɛ Deevid daŋ ji kuwura ashi Hibrɔn nfɛ ashunu nɛ bargato na nɛ b daŋ kurge mbinyɛnsobi ashe ere kikɛ.

Nfɛ adesa nɛ asa nɛ e daŋ ji kuwura ashi Jerusalɛm to, ⁵nseŋ naŋ kurge mbinyɛnsobiana ko gba ndoŋ.

Mo nɛ mbe eche Bɛshiba nɛ mo nio daa la Ammiɛl na daŋ kurge mbinyɛnsobi ana nna. Bumo e la Shimia nɛ Shobab nɛ Neetan nɛ Sɔlɔmɔn.

⁶Mbe mbinyɛnsobi akpanu ko malɛ e daa la Ibhar nɛ Elishuwa nɛ Elpelɛt ⁷nɛ Noga nɛ Nefɛg nɛ Jafia ⁸nɛ Elishaama nɛ Eliada nɛ Elifelɛt. ⁹Deevid be mbinyɛnsobi ere be kaman nɛ e naŋ ta bejipo ko nɛ mo nɛ bumo naŋ kurge mbinyɛnsobi. E daŋ kurge ebiche gba nɛ baa tre mo Tamaa.

Ewura Sɔlɔmɔn be kaman to ebi be asheŋ

¹⁰Kananɛ ewura Sɔlɔmɔn be kaman to ebi lar nde: Sɔlɔmɔn be mbinyɛnsobi e daa la Rehoboam nɛ Abija nɛ Asa nɛ Jehoshafat nɛ ¹¹Jehoram nɛ Ahaziya nɛ Jɔash nɛ ¹²Amaziya nɛ Uziya nɛ Jotam nɛ ¹³Ahaz nɛ Hɛzekaya nɛ Manase nɛ ¹⁴Ammɔn nɛ Josaya. ¹⁵Josaya daa kɔ mbinyɛnsobi ana nna. Bumo e la Johanan nɛ Jehowakim nɛ Zɛdekaya nɛ Shallɔm. ¹⁶Jehowakim malɛ daa kɔ mbinyɛnsobi anyɔ. Bumo e la Jehowachin nɛ Zɛdekaya.

Ewura Jehowachin be kaman to ebi be asheŋ

¹⁷Ewura Jehowachin nɛ Babilɔnebi daŋ pɛ n yɔ bumo be efuli so na daa kɔ mbia ashunu nna. Bumo e la Shialtiɛl ¹⁸nɛ Malchiram nɛ Pɛdaya nɛ Shenazza nɛ Jekamaya nɛ Hoshaama nɛ Nedabiya. ¹⁹Pɛdaya malɛ daa kɔ mbinyɛnsobi anyɔ nna. Bumo e la Zerubabel nɛ Shimei. Zerubabel daa kɔ mbinyɛnsobi anyɔ nna. Bumo e la Mɛshulam nɛ Hananiya. E daa kɔ kebichebi koŋwule ko nɛ baa tre mo Shelomif. ²⁰Mbe mbinyɛnsobi anu ko e daa la Hashuba nɛ Ohɛl nɛ Bɛrekiya nɛ Hasadiya nɛ Jushab Hɛsɛd.

²¹Hananiya daa kɔ mbinyɛnsobi anyɔ nna. Bumo e la Pelatia nɛ Jeshaya. Rafia mo tuto e daa la Jeshaya, nɛ Arnaan malɛ mo tuto daa la Rafia nɛ Obadaya malɛ mo tuto daa la Arnaan, nɛ Shekanaya malɛ mo tuto daa la Obadaya. ²²Shekanaya daa kɔ ebinyɛn koŋwule nɛ baa tre mo Shemaya. Shekanaya mo nanabiana daa wɔ mbinyɛnsobi anu nna. Bumo e la Hatush nɛ Igaal nɛ Baria nɛ Neriya nɛ Shafat. ²³Neriya daa kɔ mbinyɛnsobi asa nna. Bumo e la Elionai nɛ Hizkiya nɛ Azrikam. ²⁴Elionai malɛ daa kɔ mbinyɛnsobi ashunu nna. Bumo e la Hadoviya nɛ Eliashib nɛ Pelaya nɛ Akuub nɛ Johanan nɛ Delaya nɛ Anani.

Juda be kaman to ebi be asheŋ

¹Juda be kaman to ebi na be beko e daa la Pɛrez nɛ Hezrɔn nɛ Kaami nɛ Hur nɛ Shobaal. ²Shobaal pibi e daa la Riya, nɛ Riya malɛ pibi daa la Jahaf, nɛ Jahaf malɛ be mbinyɛnsobi daa la Ahumai nɛ Lahad. Bumo e daŋ ki Zoraebi be mbuna mbuna na.

^3-4Kalɛb nɛ mbe eche Efraf pibinyɛn nimuso e daa la Hur. Hur be kaman to ebi e daŋ juŋkpar n chena Bɛtlɛhɛm. E daa kɔ mbinyɛnsobi asa nna. Bumo e daa la Etam nɛ Pɛnuɛl nɛ Eza. Etan malɛ daa kɔ mbinyɛnsobi asa nna. Bumo e daa la Jizreel nɛ Ishma nɛ Idbaash. Ebiche koŋwule nɛ e daa kɔ nɛ baa tre mo Hazelelfoni. Pɛnuɛl e daŋ juŋkpar n chena Gɛdɔ, nɛ Ezɛr malɛ juŋkpar n chena Huusha.

⁵Ashuur nɛ e daŋ juŋkpar n chena Tekua na daa kɔ beche anyɔ nna. Bumo e daa la Hɛla nɛ Naara. ⁶Ashuur nɛ Naara daa kɔ mbinyɛnsobi ana nna. Bumo e daa la Ahuzaam nɛ Heefa nɛ Temeni nɛ Haahashtari. ⁷Ashuur nɛ Heela daa kɔ mbinyɛnsobi asa nna. Bumo e daa la Zeref nɛ Iza nɛ Efnan.

⁸Kooz nɛ mbe mbinyɛnsobi daa la Anuub nɛ Zobeba na be kabuna ebi e daa la Ahahɛl nɛ Harum.

⁹Kanyɛn ko malɛ daa wɔtɔ nɛ baa tre mo Jabez nɛ e daa kɔ bunyaŋ ga ashi mbe kanaŋ to. Mo nio daŋ nase mo ketre ere nna ŋkpal e kaŋ daŋ nu ebesa mbe kakurge to so. ¹⁰Ama Jabez daŋ kule Israɛl be Ebɔrɛ na nna ŋ kaŋɛ le: “Ebɔrɛ, nɛfa ma nseŋ shin nɛ ma kasawule e wora keshi ga. Baa wɔ ŋ kutɔ nsaa kuŋ ma ashi kulubi to, saŋɛ na so ebesa maaŋ ba ma so.” Nɛ Ebɔrɛ wora kusɔ nɛ e kule na gbagba n sa mo.

¹¹Shuwa mo sipo Kelub pibinyɛn e daa la Mehiir. Eshtɔn malɛ mo tuto e daa la Mehiir. ¹²Eshtɔn daa kɔ mbinyɛnsobi asa nna. Bumo e la: Bɛtrafa nɛ Pasiya nɛ Tehinna. Tehinna e daŋ juŋkpar n chena Nahaash. Basa ere be kaman to ebi e daa la Reekaebi.

¹³Keenaz daa kɔ mbinyɛnsobi anyɔ nna. Bumo e la Ofniɛl nɛ Seraya. Ofniɛl malɛ gba daa kɔ mbinyɛnsobi anyɔ nna. Bumo e daa la Hataaf nɛ Meonotai. ¹⁴Meonotai pibi e daa la Ofra. Seraya pibi e daa la Jɔab. Seraya e daŋ juŋkpar n chena kepla nɛ baa tre enɔ to be kushuŋ be kenyi na ase. Basa nɛ b wɔ ndoŋ na kikɛ daa kɔ enɔ to be kushuŋ be kenyi nna ga.

¹⁵Jefune pibinyɛn Kalɛb daa kɔ mbinyɛnsobi asa nna. Bumo e la: Iru nɛ Ela nɛ Naam. Keenaz mo tuto e daa la Ela.

¹⁶Jehalelɛl daa kɔ mbinyɛnsobi ana nna. Bumo e la Ziif nɛ Ziifa nɛ Tiiriya nɛ Asarɛl.

^17-18Ɛzra daa kɔ mbinyɛnsobi ana nna. Bumo e daa la Jɛta nɛ Merɛd nɛ Efa nɛ Jaalɔn. Merɛd e daŋ ta Bitia nɛ e daa la Ijipt be ewura pibiche na ŋ kurge ebiche nɛ baa tre mo Miriam na. Miriam mo siponyɛnana e daa la Shammai nɛ Ishba. Ishba e daŋ juŋkpar n chena Eshtamɔa. Merɛd daŋ ta Juda be kanaŋ to be eche ko nɛ mo nɛ mo kurge mbinyɛnsobi asa. Bumo e daa la Jerɛd nɛ e daŋ juŋkpar n chena Gɛdɔ na, nɛ Hɛba nɛ mo alɛ juŋkpar n chena Soko na, nɛ Jekutiɛl nɛ e juŋkpar n chena Zanua na.

¹⁹Hodaya e daŋ ta Nahaam mo sipoche. Bumo be kaman to ebi e daa la Gaam be kabuna ebi nɛ b daa wɔ Keila na, nɛ Maaka be kabuna ebi, nɛ bumo alɛ daa wɔ Eshtamɔa be kade to na.

²⁰Shimɔn daa kɔ mbinyɛnsobi ana nna. Bumo e daa la Amnɔn nɛ Rina nɛ Bɛnhanan nɛ Tilɔn.

Ishi daa kɔ mbinyɛnsobi anyɔ, bumo e daa la Zohɛf nɛ Bɛnzohɛf.

Shɛla be kaman to ebi be asheŋ

²¹Juda be mbinyɛnsobi na be eko e daa la Shɛla. Mbe kaman to ebi na be beko e daa la Err nɛ e daŋ juŋkpar n chena Leka na. Laada malɛ e daŋ juŋkpar n chena Marɛsha. Mbe kabuna ebi e daa wɔ Bɛf Ashbiya be kade to nsaa kɔ ago be ewajɛ be kelue be kenyi ga na. ²²Jokim nɛ basa nɛ b wɔ Koziba be kade to na, nɛ Jɔash nɛ Saraf, nɛ b daŋ ta Mowabebi be beche na, daŋ chena Bɛtlɛhɛm nna. B daŋ sibɛ le be asheŋ ere n nase la dra dra nna. ²³Bumo e daa pɔr mpuya nɛ mba nsaa wɔ Netaim nɛ Gɛdera be nde to a shuŋ a sa ewura na.

Simiɔn be kaman to ebi be asheŋ

²⁴Simiɔn daa kɔ mbinyɛnsobi anu nna. Bumo e la Nemuɛl nɛ Jamin nɛ Jarib nɛ Zɛra nɛ Shawul. ²⁵Shawul pibinyɛn e daa la Shallɔm nɛ mo nanabinyɛnso malɛ la Mibsam nɛ mo kenanafofonyɛnso malɛ la Mishma. ²⁶Mishma pibinyɛn Hamuɛl nɛ mo nanabi Zakuur nɛ mbe kenanafofonyɛnso e daa la mbe kaman to ebi. ²⁷Mbinyɛnsobi kuduashe nɛ mbichesobi ashe nɛ Shimei daa kɔ, ama mo kurgepoana bre daa maŋ kurge ga, ŋkpal loŋ so Simiɔn be yiri to ebi daa maŋ shibi fanɛ Juda be yiri to ebi.

²⁸Pɔɛŋ nɛ Deevid ba ki ewura na, Simiɔn be kaman to ebi na daa chena Bɛshiba nɛ Molada nɛ Hazashuwal nɛ ²⁹Bilha nɛ Ezɛm nɛ Tolad nɛ ³⁰Betuwɛl nɛ Hɔɔma nɛ Ziklag nɛ ³¹Bɛf Maakabof nɛ Hazasusim nɛ Bɛfbiri nɛ Shaaraim nna. ³²B daŋ chena Etam nɛ Ayin nɛ Rimmɔn nɛ Tochɛn nɛ Ashan, ³³hale n ya fo Baalaf be kelargato be kaseto be kaba so a laŋɛ epeŋitɔrkpa be kaba so gba. Kusɔ nɛ Simiɔn be kaman to ebi sibɛ n nase a laŋɛ bumo be kaman to ebi nɛ bumo be echenakpaana be asheŋ be kaplɛa so nna na.

^34-38Basa nɛ b daa la bumo be mbuna na be bejuŋkparpo e la,

Mɛshobab nɛ Jamlɛk nɛ Amaziya pibinyɛn Josha nɛ Jowɛl

nɛ Joshibiya pibinyɛn Jehu nɛ Sɛraya pibinyɛn Joshibiya nɛ Asiɛl malɛ pibinyɛn Sɛraya

nɛ Elionai nɛ Jakɔba nɛ Jeshohaya nɛ Asaya nɛ Adiɛl nɛ Jesimiɛl nɛ Bɛnaya nɛ

Shifi pibinyɛn Ziza nɛ Jedaya pibinyɛn Alɔn nɛ Shemaya pibinyɛn Shimri.

Bumo be kanaŋ na daŋ baa wora keshi nna a ti so, ³⁹amoso b daŋ salga to nna n sɔ Gɛra be epeŋilarkpa be kaba so a fin bumo be asɔbɔya be ejikpa. ⁴⁰B daŋ wu asɔbɔya be ejikpa be kasawule gboŋgboŋi lela ko nna nɛ awɔr kikɛ maŋ wɔ ndoŋ nɛ ndoŋ kɔ kayurwushi ga. Hamebi e daŋ chena ndoŋ ŋ ku so.

⁴¹Saŋɛ so nɛ Hɛzekaya daa la Juda be ewura na, nɛ Simiɔn be kaman to ebi ko ya kɔ Hamebi nɛ Meuniebi kena n ju bumo n sɔ kasawule na n chena so ŋkpal asɔbɔya be ejikpa ka daa shibi ndoŋ ga so. ⁴²Kede be kaman nɛ Ishi be mbinyɛnsobi nɛ baa tre Pɛlatiya nɛ Neriya nɛ Rafaya nɛ Uziɛl na juŋkpar Simiɔn be yiri na to be basa alfa anu n ya kɔ n sɔ Edɔm be efuli. ⁴³B daŋ mɔ Amalɛkebi nɛ b ka ndoŋ na kikɛ nna nseŋ sɔ kakpa na n chena hale kabre.

Ruben be kaman to ebi be asheŋ

¹Ruben nɛ e la Jeekɔb pibinyɛn nimuso na daŋ paŋ mbe kuwurkoŋ be eyilikpa nna nɛ b ta kumo n sa Josɛf ŋkpal mo nɛ mo tuto be eche ko ka daŋ di keche nɛ kenyɛnso. Amoso bumo be kakurge to, b maa karga mo fanɛ wurkoŋ. ²Juda be yiri na e daa kɔ eleŋ ga, hale nɛ Israɛl be ejuŋkparpo gba bɔla kanaŋ na to m ba, ama amo nɛ amo kikɛ Josɛf be kanaŋ e nya kuwurkoŋ na be eyilikpa. ³Jeekɔb pibinyɛn nimuso Ruben daa kɔ mbinyɛnsobi ana nna. Bumo e la Hanɔk nɛ Palu nɛ Hezrɔn nɛ Kaami.

^4-6Jowɛl be kaman to ebi e daa la Shemaya nɛ Gɔg nɛ Shimei nɛ Mika nɛ Reya nɛ Baal nɛ Biira nɛ e daa la Ruben be yiri na be ejuŋkparpo na. Tiglaf Pilesa nɛ e daa la Asiriya be ewura na e daŋ kɔ m pɔɔ Biira so nseŋ pɛ mo n yɔ bumo be kasawule so.

⁷Ruben be yiri na to be kanaŋ be bejuŋkparpo e la Jeɛl nɛ Zakareya nɛ ⁸Azaz pibinyɛn Bɛla nɛ mo nanabinyɛnso Shema nɛ e la Jowɛl pibinyɛn na. B daŋ chena Arowa nna hale n ya fo kelargato be esoso be kaba so ashi Nebo nɛ Baal Miɔn kikɛ. ⁹Ŋkpal b ka daa kɔ asɔbɔya damta ashi Giliad be kasawule so so, b daŋ chena nna hale n ya fo keshishɛrsawule nɛ k dese a laŋɛ Yufreetes be Lɔr na be epeŋilarkpa be kaba so na.

¹⁰Jemanɛ nɛ Sɔɔl daa ji kuwura na, nɛ Ruben be yiri na ya kɔ Hagebi kena nseŋ mɔ bumo n sɔ bumo be kasawule nɛ k wɔ Giliad be epeŋilarkpa be kaba so na n chena.

Gad be kaman to ebi be asheŋ

¹¹Gad be yiri na daŋ chena Baashan be kasawule so nna a yɔ Ruben be yiri na be kelargato be esoso be kaba so n ta n ya fo Saleka be epeŋilarkpa be kaba so. ¹²Bumo be mbuna be bejuŋkparpo e daa la Jowɛl nɛ Shaafam nɛ Janai nɛ Shaafat. ¹³Bumo kurgepoana ko e daa la Maikel nɛ Mɛshulam nɛ Sheeba nɛ Jorai nɛ Jaakan nɛ Ziya nɛ Heba. ¹⁴B daa la Huuri nɛ mo nananyɛnana daa la Jarowa nɛ Giliad nɛ Maikel nɛ Jeshishai nɛ Jaado nɛ Buz pibinyɛn Abihail be kaman to ebi nna. ¹⁵Abdiɛl pibinyɛn Ahi nɛ e la Guni mo nanabi na e daa la mbuna ere be enimu. ¹⁶Bashan nɛ Giliad be kasawule so be nde to, nɛ kakpa nɛ Sharɔn be asɔbɔya bee ji nɛ Gad be basa daa wɔ. ¹⁷Saŋɛ so nɛ ewura Jotam daa ji Juda be efuli so be kuwura nɛ ewura Jeroboam nyɔsopo malɛ bee ji Israɛl be kuwura na nɛ b sibɛ bumo kanaŋ to be asheŋ ere kikɛ n wɔtɔ nwɔl to.

Epeŋilarkpa be kaba so be yiriana be benapo na be asheŋ

¹⁸Ruben nɛ Gad nɛ Manase be basa nɛ b wɔ epeŋilarkpa be kaba so na daa kɔ benapo ŋgboŋ adena nɛ ana nɛ alfa ashunu nɛ adeshe nɛ b ŋini bumo kananɛ baa ta abɛlso be asɔ kuŋso nɛ etokobi nɛ ata nɛ atanyembi a kɔ kena. ¹⁹B daŋ ya kɔ Hagebi nɛ Jetur nɛ Nafish nɛ Nadab be eyiriana na kena nna. ²⁰B daŋ ta bumo be yirda nna n deŋi Ebɔrɛ so ŋ kule mo fanɛ e chɛ bumo to. Nɛ Ebɔrɛ nu bumo be kekule nseŋ chɛ bumo to nɛ b kɔ m pɔɔ Hagebi nɛ basa nɛ b chɛ bumo to a kɔ kena na kikɛ so. ²¹B ka daŋ kɔ Hagebi na kena na, b daŋ sɔ bumo enyɔma ŋgboŋ adunu nɛ mbolpɔ ŋgboŋ alfa anyɔ nɛ adunu nɛ ekurma ŋgboŋ anyɔ nseŋ pɛ basa ŋgboŋ kalfa kena na to n yɔ bumo be efuli so. ²²Hag be basa damta daŋ wu kena na to nna ŋkpal Ebɔrɛ ka daŋ chɛ to ŋ kɔ bumo so. Ndoŋ nna nɛ Ruben nɛ Gad nɛ Manase be epeŋilarkpa be kaba so be basa sɔ bumo be efuli na n chena so n ya fo jemanɛ nɛ b pɛ bumo n yɔ Asiriya be efuli so.

Manase be yiri nɛ k wɔ epeŋilarkpa be kaba so na be asheŋ

²³Manase be yiri nɛ k wɔ epeŋilarkpa be kaba so na daa shibi ga, ŋkpal loŋ so bumo be basa daŋ chena Bashan be efuli na be kelargato be esoso be kaba so a yɔ Baal Hɛɛmɔn nɛ Senir nɛ kebeegboŋ nɛ baa tre Hɛɛmɔn na be kelargato be esoso be kaba so nna. ²⁴Efa nɛ Ishi nɛ Elliɛl nɛ Azriɛl nɛ Jɛremaya nɛ Hodaviya nɛ Jadiɛl e daa la bumo be kabuna na be bejuŋkparpo. B daa la benapo lempo nna ashi bumo be kabuna na.

B ka kɔ m pɔɔ epeŋilarkpa be eyiri na so be asheŋ

²⁵Ruben nɛ Gad nɛ Manase be epeŋilarkpa be eyiriana na daa maa ji kashenteŋ a sa bumo nananyɛnana be Ebɔrɛ na nseŋ shile mo n ya kaa shuŋ efuliana nɛ Ebɔrɛ ju ashi Keenan be kasawule so na be agbirana. ²⁶Amoso Ebɔrɛ daŋ shin nna nɛ Asiriya be ewura Puul nɛ mbe ketre ko bee ji Tiglaf Pilesa na, ya kɔ bumo be efuli na m pɔɔ bumo so. E daŋ pɛ Ruben nɛ Gad nɛ Manase be epeŋilarkpa be kaba so be basa nna n tintiŋ bumo n yɔ nde wɔfɔ nɛ baa tre Haala nɛ Haabɔ nɛ Haara nɛ a mata Gozan be Lɔr na n shin nɛ b chena ndoŋ hale kabre.

Bɔrɛmatapowura nimusoana be kanaŋ be asheŋ

¹Livai daa kɔ mbinyɛnsobi asa nna. Bumo e daa la Gɛshɔn nɛ Kohaf nɛ Mɛrari.

²Kohaf daa kɔ mbinyɛnsobi ana nna. Bumo e daa la Amram nɛ Izha nɛ Hibrɔn nɛ Uziɛl.

³Amram malɛ daa kɔ mbinyɛnsobi anyɔ nna. Bumo e la: Ɛɛrɔn nɛ Mosis nɛ ebicheso nɛ baa tre mo Miriam.

Ɛɛrɔn daa kɔ mbinyɛnsobi ana nna. Bumo e la Nadab nɛ Abihu nɛ Eliaza nɛ Itama.

⁴Eliaza be kaman to ebi e la Finihas nɛ Abishuwa ⁵nɛ Buuki nɛ Uzzi nɛ ⁶Zerahiya nɛ Mɛrayɔf nɛ ⁷Amariya nɛ Ahitub nɛ ⁸Zadɔk nɛ Ahimaaz nɛ ⁹Azariya nɛ Johanan nɛ ¹⁰Azariya mo nɛ e daa shuŋ bɔrɛlambu nɛ Sɔlɔmɔn daŋ pɔr ashi Jerusalɛm na to na, ¹¹nɛ Amariya nɛ Ahitub nɛ ¹²Zadɔk nɛ Shalɔm nɛ ¹³Hilkiya nɛ Azariya nɛ ¹⁴Sɛraya nɛ Jehozadak. ¹⁵Ewura Nebukadneeza daŋ pɛ Jehozadak nna n tintiŋ mo n yɔ kade wɔfɔ nɛ baa tre Babilɔn saŋɛ so nɛ Enyɛnpe Ebɔrɛ shin nɛ b pɛ Juda nɛ Jerusalɛm be basa n yɔ efuli pɔtɛ so na.

Livai be kaman to ebi ko be asheŋ

¹⁶Livai daa kɔ mbinyɛnsobi asa nna. Bumo e la Gɛshɔn nɛ Kohaf nɛ Mɛrari. ¹⁷Bumo be ekama daa kɔ mbinyɛnsobi. Gɛshɔn be mbia e daa la Libni nɛ Shimei. ¹⁸Kohaf malɛ be mbia e daa la Amram nɛ Iza nɛ Hibrɔn nɛ Uziɛl. ¹⁹Mɛrari malɛ be mbia e daa la Maali nɛ Muushi.

²⁰Gɛshɔn be kaman to ebi e daa la Libni nɛ Jahaaf nɛ Zimma nɛ ²¹Jɔa nɛ Iddo nɛ Zɛra nɛ Jeaterai.

²²Kohaf malɛ be kaman to ebi e la Aminadab nɛ Koora nɛ Asiir nɛ ²³Ɛlkana nɛ Ebiasaf nɛ Asiir nɛ ²⁴Tahaaf nɛ Yuriɛl nɛ Uziya nɛ Shawul.

²⁵Ɛlkana daa kɔ mbinyɛnsobi anyɔ nna. Bumo e la Amasai nɛ Ahimɔf. ²⁶Ahimɔf malɛ be kaman to ebi e daa la Ɛlkana nɛ Zofaya nɛ Nahaf nɛ ²⁷Eliab nɛ Jeroham nɛ Ɛlkana.

²⁸Samuɛl daa kɔ mbinyɛnsobi anyɔ nna. Jowɛl e daa la mo pibi nimuso nɛ Abija malɛ la ebibiso.

²⁹Mɛrari be kaman to ebi e daa la, Maali nɛ Libni nɛ Shimei nɛ Uzza nɛ ³⁰Shimeya nɛ Hagiya nɛ Asaya.

Bɔrɛlambu to be beshɛbompo be asheŋ

³¹Saŋɛ so nɛ ewura Deevid shin nɛ b ta ŋkre be deka na n yɔ Jerusalɛm na, e daŋ lara basa ko nna fanɛ bumo e naŋ baa boŋ nshɛ nsaa laŋ alaŋsɔ ashi kakpa nɛ baa bunyaŋ Eyɛnpe Ebɔrɛ na. ³²B daa boŋ nshɛ ashi wajɛbu cheembi na ase nna pɔɛŋ nɛ ewura Sɔlɔmɔn ba pɔr bɔrɛlambu na. ³³Le nɛ basa nɛ baa boŋ nshɛ na be kaman to ebi lar.

Kohaf be kabuna be basa nɛ b daa la beshɛbompo na nde. Hɛman e daa la beshɛbompo be katuŋ juŋkparso na be ejuŋkparpo. Jeekɔb be kaman to ebi e daa la mo. Mo tuto e daa la Jowɛl nɛ Jowɛl malɛ mo tuto daa la Samuɛl, ³⁴nɛ Samuɛl malɛ mo tuto daa la Ɛlkana nɛ Ɛlkana mo tuto daa la Jeroham nɛ Jeroham mo tuto daa la Eliɛl nɛ Eliɛl mo tuto daa la Toa, ³⁵Toa mo tuto e daa la Zuuf nɛ Zuuf mo tuto la Ɛlkana nɛ Ɛlkana mo tuto daa la Mahaf nɛ Mahaf mo tuto daa la Amasai nɛ Amasai mo tuto daa la ³⁶Ɛlkana nɛ Ɛlkana mo tuto daa la Jowɛl nɛ Jowɛl mo tuto daa la Azariya nɛ Azariya mo tuto daa la Zifanaya nɛ Zifanaya mo tuto daa la ³⁷Tahaaf nɛ Tahaaf mo tuto daa la Asiir nɛ Asiir malɛ mo tuto daa la Ebiasaf nɛ Ebiasaf malɛ mo tuto daa la Koora nɛ Koora malɛ mo tuto daa la, ³⁸Iza nɛ Iza malɛ mo tuto daa la Kohaaf nɛ Kohaf malɛ mo tuto daa la Livai nɛ Livai malɛ mo tuto daa la Jeekɔb.

³⁹Asaf e daa la beshɛbompo be katuŋ nyɔsopo na be ejuŋkparpo. E daŋ shi Livai be kanaŋ to nna. Asaf be kanaŋ to ebi e daa la Bɛrekaya nɛ Shimeya nɛ ⁴⁰Maikel nɛ Basia nɛ Malkija nɛ ⁴¹Ɛfni n ta Zɛra nɛ Adaya nɛ ⁴²Ɛtan nɛ Ziima nɛ Shimei nɛ ⁴³Jahaaf nɛ Gɛshɔn nɛ Livai.

⁴⁴Mɛrari be kabuna nɛ Etan nɛ e la beshɛbompo be katuŋ sasopo na to be ejuŋkparpo na daŋ shi. Kananɛ mbe kanaŋ daŋ lar ashi Livai be yiri na to nde. Kishi pibinyɛn e daa la Etan nɛ Abdi malɛ pibinyɛn daa la Kish nɛ Maluk malɛ pibinyɛn daa la Abdi, ⁴⁵nɛ Hashabia malɛ pibinyɛn daa la Maluk nɛ Amaziya malɛ pibinyɛn daa la Hashabia nɛ Hilkiya malɛ pibinyɛn daa la Amaziya, ⁴⁶nɛ Amzi malɛ pibinyɛn daa la Hilkiya nɛ Bani malɛ pibinyɛn daa la Amzi nɛ Shema malɛ pibinyɛn daa la Bani, ⁴⁷nɛ Maali malɛ pibinyɛn daa la Shema nɛ Muushi malɛ pibinyɛn daa la Maali nɛ Mɛrari malɛ pibinyɛn daa la Muushi nɛ Livai malɛ pibinyɛn daa la Mɛrari.

⁴⁸Livaiebi nɛ b ka na bre, b daŋ lara bumo nna fanɛ b baa shuŋ wajɛbu cheembi na to.

Ɛɛrɔn be kaman to ebi be asheŋ

⁴⁹Ɛɛrɔn nɛ mbe kaman to ebi nawule e daa lara duwu be sarga nɛ esarga chɔɔso bɔrɛsure na so. Bumo be kushuŋ e daa la kebaakeni acheembiana to be kakpa cheembi na be kabɔrɛshuŋ so nsaa yili Israɛlebi be katelamu to a lara alubi be ketampaŋ be sarga fanɛ kananɛ Ebɔrɛ be kayɛrbi Mosis kaŋɛ bumo na gbagba. ⁵⁰Kananɛ Ɛɛrɔn be kaman to ebi lar nde. Ɛɛrɔn pibinyɛn e daa la Eliaza nɛ Eliaza malɛ pibinyɛn daa la Finihas nɛ Finihas malɛ pibinyɛn daa la Abishuwa, ⁵¹nɛ Abishuwa malɛ pibinyɛn daa la Buuki nɛ Buuki malɛ pibinyɛn daa la Uzzi nɛ Uzzi malɛ pibinyɛn daa la Zerahiya ⁵²nɛ Zerahiya malɛ pibinyɛn daa la Mɛriɔf nɛ Mɛriɔf malɛ pibinyɛn daa la Amariya nɛ Amariya malɛ pibinyɛn daa la Ahitub ⁵³nɛ Ahitub malɛ pibinyɛn daa la Zadɔk nɛ Zadɔk malɛ pibinyɛn daa la Ahimaaz.

Livaiebi be nde be asheŋ

⁵⁴Mboŋ nɛ b daŋ ta n sa Ɛɛrɔn be kaman to ebi nɛ b shi Kohaf be kabuna nseŋ juŋkpar n nya kasawule be kachige nɛ b daŋ ta n sa Livaiebi na nde: ⁵⁵B daŋ ta Hibrɔn nɛ k wɔ Juda be efuli so na nɛ asɔbɔya be ejikpa nɛ a kulti kumo na kikɛ nna n sa bumo. ⁵⁶Ama b daŋ ta kumo be adɔsawule nɛ ndewurbiana nɛ a chena ŋ kulti kumo na bre n sa Jefune pibinyɛn Kalɛb nna. ^57-59B daŋ ta le be kesɔnyige be nde nɛ esa nɛ e maŋ kute m mɔ esa beeŋ tiŋ n shile n ya ŋana ndoŋ nna n sa Ɛɛrɔn nɛ mbe kaman to ebi. Amo e la: Hibrɔn nɛ Jatiir nɛ Libna nɛ Eshtemɔa nɛ Hilɛn nɛ Dɛbir nɛ Ashan nɛ Bɛf Shɛmɛsh, n ta mboŋ nɛ bumo be asɔbɔya bee ya ka ji be nsawule n ti so. ⁶⁰B daŋ ta Gɛba nɛ Alemɛf nɛ Anatɔf nɛ amo be asɔbɔya be ejikpa be nsawule ashi Bɛnjamin be yiri to nna n sa Ɛɛrɔn be kaman to ebi. Nde nɛ b daŋ ta n sa Ɛɛrɔn be kaman to ebi kikɛ daa wɔ nde kuduasa. ⁶¹B daŋ ta nde kudu nna ashi Manase be epeŋitɔrkpa be kaba so n sa Kohaf be kabuna nɛ k ka ashi Livai be yiri to na.

⁶²B daŋ ta nde kuduasa ashi Isaaka nɛ Ashɛr nɛ Naftali nɛ Manase nɛ k wɔ epeŋitɔrkpa be kaba so ashi Bashan be efuli so na nna n sa Gɛshɔn be kabuna nɛ b shi Livai be yiri to na. ⁶³Loŋ koŋwule na nɛ b ta nde kuduanyɔ nɛ a wɔ Ruben nɛ Gad nɛ Zɛbyulɔn be yiri be nsawule so na nna n sa Mɛrari be kabuna ebi. ⁶⁴Kananɛ Israɛlebi na daŋ sa Livaiebi na nde nɛ asɔbɔya be ejikpa be nsawule nɛ a kulti ndoŋ nna na. ⁶⁵B daŋ to beri nna n fin Enyɛnpe Ebɔrɛ be nfɛra pɔɛŋ nseŋ chige nde nɛ a wɔ Juda nɛ Simiɔn nɛ Bɛnjamin be eyiri to be nsawule so na.

⁶⁶Kohaf be kanaŋ na be kabuna ko bre daŋ nya bumo be nde nɛ asɔbɔya be ejikpa nna ashi Efrayim be yiri na be kasawule so. ⁶⁷Nde nɛ b daŋ ta n sa bumo e daa la Shɛkɛm nɛ k wɔ Efrayim be abee so be efuli so nsaa la kesɔnyige be nde na be kuko na, nɛ Gɛzɛr ⁶⁸nɛ Jokmiam nɛ Bɛf Hɔrɔn ⁶⁹nɛ Aijalɔn nɛ Gaf Rimmɔn. ⁷⁰B daŋ ta Manase be epeŋitɔrkpa be kaba so be nsawule nɛ amo be asɔbɔya be ejikpa nɛ a wɔ Ana nɛ Biliam na gba nna n sa bumo.

⁷¹B daŋ ta Manase be yiri to be epeŋilarkpa be kaba so be kade nɛ baa tre Golan nɛ k wɔ Bahan be kasawule so na nɛ Ashterɔf, nɛ amo be asɔbɔya be ejikpa be nsawule nna n sa Gɛshɔnebi.

⁷²Nseŋ ta ⁷³Kadɛsh nɛ Daberaf nɛ Ramɔf nɛ Anɛm ashi Isaaka malɛ be yiri to n ti bumo so.

⁷⁴Nde nɛ b daŋ nya ashi Ashɛr malɛ be yiri na to nɛ amo be asɔbɔya be ejikpa be nsawule e daa la Mashaal nɛ Abdɔn ⁷⁵nɛ Hukɔk nɛ Rehɔb.

⁷⁶Nde nɛ amo be asɔbɔya be ejikpa be nsawule nɛ Gɛshɔnebi na daŋ nya ashi Naftali malɛ be yiri na to e daa la Kadɛsh nɛ k wɔ Galili na nɛ Hammɔn nɛ Kiriataim.

⁷⁷Nde nɛ Mɛrari malɛ be kabuna nɛ k ka na daŋ nya e daa la,

Rimmɔn nɛ Tabo nɛ amo be asɔbɔya be ejikpa be nsawule nɛ a wɔ Zɛbyulɔn be yiri to be kasawule be kaba so na.

⁷⁸B daŋ naŋ nya nde ana ashi Ruben be yiri na kutɔ ashi Jɔɔdan be Lɔr na be epeŋilarkpa be kaba so a mata Jɛriko. Nde na e la Bɛza nɛ k wɔ kebeesawule so na nɛ Jaaza ⁷⁹nɛ Kɛdɛmɔf nɛ Mɛfaaf nɛ amo be asɔbɔya be ejikpa be nsawule. ⁸⁰Nde nɛ Mɛrariebi na daŋ nya ashi Gad malɛ be yiri na to e daa la Ramɔf nɛ k wɔ Galiad na nɛ Mahanaim ⁸¹nɛ Hishbɔn nɛ Jaaza n ta amo be asɔbɔya be ejikpa be nsawule n ti so.

Isaaka be kaman to ebi be asheŋ

¹Isaaka daa kɔ mbinyɛnsobi ana. Bumo e la Tola nɛ Puwa nɛ Jashub nɛ Shimrɔn.

²Tola malɛ daa kɔ mbinyɛnsobi ashe nna. Bumo e la Uzzi nɛ Refaya nɛ Jeriɛl nɛ Jamai nɛ Ibsam nɛ Shemuɛl. Bumo e daa la Tola be kabuna na be bejuŋkparpo nɛ benapo lempo. Jemanɛ nɛ ewura Deevid daa ji kuwura na nɛ bumo be kaman to ebi daa la basa ŋgboŋ adunyɔ nɛ anyɔ nɛ alfa ashe nna.

³Uzzi malɛ daa kɔ ebinyɛn koŋwule nna. Mo e la Izrahiya. Mbinyɛnsobi ana nɛ Izrahiya malɛ daa kɔ nɛ bumo kikɛ daa la bumo be nnaŋ na to be bejuŋkparpo. Bumo e la Maikel nɛ Obadaya nɛ Jowɛl nɛ Ishiya. ⁴B daa kɔ beche damta nɛ mbia damta ga, ŋkpal loŋ so bumo be kanaŋ na to be benapo nawule daa wɔ ŋgboŋ adesa nɛ ashe.

⁵B ka karga Isaaka be kanaŋ na to be basa nɛ b fo kena to be keyɔ, b daa wɔ benapo ŋgboŋ aduburwa nɛ ashunu.

Bɛnjamin nɛ Dan be mman to ebi be asheŋ

⁶Bɛnjamin daa kɔ mbinyɛnsobi asa nna. Bumo e la Bɛla nɛ Bɛka nɛ Jediɛl.

⁷Bɛla daa kɔ mbinyɛnsobi anu nna. Bumo e la Ezbɔn nɛ Uzzi nɛ Uziɛl nɛ Jɛrimɔf nɛ Iri. Bumo kikɛ daa la bejuŋkparpo nɛ benapo lempo nna ashi bumo be kanaŋ na to. Bumo be kanaŋ na to be benapo nɛ b daŋ fo kena to be keyɔ daa wɔ benyɛn ŋgboŋ adunyɔ nɛ anyɔ nɛ adesa nɛ ana.

⁸Bɛka daa kɔ mbinyɛnsobi akpanu nna. Bumo e la Zimira nɛ Jɔash nɛ Elieza nɛ Elionai nɛ Omri nɛ Jɛrimɔf nɛ Abija nɛ Anatɔf nɛ Alemɛf. ⁹B ka daŋ karga bumo be benapo nɛ b daŋ fo kena to be keyɔ, b daa wɔ basa ŋgboŋ adunyɔ nɛ alfa anyɔ.

¹⁰Jediɛl daa kɔ ebinyɛn koŋwule nna. Mo e la Bilhan. Mbinyɛnsobi ashunu nɛ Bilhan malɛ daa kɔ. Bumo e la Jewush nɛ Bɛnjamin nɛ Ehud nɛ Chenani nɛ Zeetan nɛ Tashish nɛ Ahishaha. ¹¹Bumo kikɛ daa la bejuŋkparpo nɛ benapo lempo nna ashi bumo be kanaŋ na to. Bumo be kanaŋ na to be bumo nɛ b fo kena to b keyɔ daa wɔ benyɛn ŋgboŋ kuduashunu nɛ alfa anyɔ. ¹²Shuppim nɛ Hupim bumo tuto e daa la Irr nɛ b la Aher be kaman to ebi.

Dan daa kɔ ebinyɛn koŋwule nna. Mo e daa la Hushim.

Naftali be kaman to ebi be asheŋ

¹³Naftali daa kɔ mbinyɛnsobi ana. Bumo e daa la Jaziɛl nɛ Guni nɛ Jɛza nɛ Shallum. Naftali mo nio e daa la Bilha.

Manase be kaman to ebi be asheŋ

¹⁴Manase daŋ ta Aremiya be eche nna ŋ kurge mbinyɛnsobi anyɔ. Bumo e daa la Asriɛl nɛ Makiir. Makiir pibi e daa la Giliad. ¹⁵Makiir e daŋ fin eche n sa Huppim nɛ Shuppim. Mo sipoche be ketre e daa la Maaka. Makiir pibinyɛn nyɔsopo e daa la Zelofehad. Mbichesobi nawule nɛ Zelofehad daa kɔ.

¹⁶Makiir be eche Maaka daŋ kurge mbinyɛnsobi anyɔ nna nseŋ nase bumo be atre Pɛrɛsh nɛ Shɛrɛsh. Pɛrɛsh malɛ gba daa kɔ mbinyɛnsobi anyɔ nna. Bumo e daa la Ulam nɛ Rakɛm. ¹⁷Ulam malɛ pibinyɛn e daa la Bɛdan. Makiir pibinyɛn Giliad nɛ e la Manase mo nanabi na be kaman to ebi e daa la bumo.

¹⁸Giliad mo sipoche Hamolɛchɛf daa kɔ mbinyɛnsobi asa nna. Bumo e la Ishɔd nɛ Abieza nɛ Maala. ¹⁹Shamida malɛ daa kɔ mbinyɛnsobi ana nna. Bumo e la Ahian nɛ Shɛkɛm nɛ Likhi nɛ Aniam.

Efrayim be kaman to ebi be asheŋ

²⁰Efrayim be kaman to ebi e daa la Shutɛla nɛ Bɛrɛd nɛ Tahaaf nɛ Elɛada nɛ ²¹Zabad nɛ Shutɛla. Shutɛla be kaman, Efrayim daŋ naŋ kurge mbinyɛnsobi anyɔ nna. Bumo e la Eza nɛ Eliad nɛ b daa sha keyuri Gaaf be ndetobia be asɔbɔya nɛ b mɔ bumo na. ²²Bumo tuto Efrayim daŋ shu bumo be keeli nchɛ damta nna nɛ mo kurgepoana ba lolo mo. ²³Mo nɛ mbe eche ka di keche nɛ kenyɛn nɛ eche na di kedampo ŋ kurge ebinyɛn nɛ b nase mbe ketre Bɛriya ŋkpal asheŋ kraŋ kraŋ ka ba bumo be kanaŋ na to so.

²⁴Efrayim pibiche e daa la Sheera. Mo e daŋ pɔr Bɛf Hɔrɔn be kelargato be esoso nɛ kaseto be kaba so be ndeana na nɛ Uzzen Sheera.

²⁵Efrayim daŋ naa kɔ ebinyɛn ko nɛ baa tre mo Refa. Mbe kaman to ebi e daa la Reshɛf nɛ Tɛla nɛ Tehan nɛ ²⁶Ladan nɛ Amihuud nɛ Eliashama nɛ ²⁷Nun nɛ Joshuwa.

²⁸B daŋ sɔ Bɛtɛl nɛ kumo be ndewurbiana nɛ a kulti kumo n ya fo Naraan be epeŋilarkpa be kaba so nɛ Gɛza be epeŋitɔrkpa be kaba so nɛ nde nɛ a kulti amo na kikɛ nɛ amo be nsawule nna n chena so. Shɛkɛm nɛ Aya nɛ nde nɛ a kulti amo na kikɛ gba daŋ ti so.

²⁹Manase be kaman to ebi na e daa ji Bɛf Shan nɛ Taanak nɛ Majido nɛ Dɔɔ nɛ nde nɛ a kulti kumo na kikɛ so eleŋ.

Le be nde ere to nɛ Jeekɔb pibinyɛn Josɛf be kaman to ebi daa wɔ.

Asha be kaman to ebi be asheŋ

³⁰Ashɛr daa kɔ mbinyɛnsobi ana nna. Bumo e la Imna nɛ Ishva nɛ Ishvi nɛ Bɛriya, nseŋ ta ebiche koŋwule nɛ baa tre mo Sɛra.

³¹Bɛriya malɛ daa kɔ mbinyɛnsobi anyɔ nna. Bumo e daa la Hɛba nɛ Malchiɛl. Malchiɛl e daŋ juŋkpar n chena Birzaf be kade to.

³²Hɛba daa kɔ mbinyɛnsobi asa nna. Bumo e la Jaflɛt nɛ Shoma nɛ Hotam nɛ ebiche koŋwule nɛ baa tre mo Shuwa.

³³Jaflɛt daa kɔ mbinyɛnsobi asa nna. Bumo e la Pasak nɛ Bimhaal nɛ Ashvaf.

³⁴Shoma daa kɔ mbinyɛnsobi ana nna. Bumo e la Ahi nɛ Rooga nɛ Jehuba nɛ Aram. ³⁵Mo da Hotam daa kɔ mbinyɛnsobi ana nna. Bumo e la Zofa nɛ Imna nɛ Shɛlɛsh nɛ Amal.

³⁶Zofa be kaman to ebi e daa la Suwa nɛ Hanɛfa nɛ Shuwal nɛ Bɛri nɛ Imra nɛ ³⁷Bɛza nɛ Hɔɔd nɛ Shaama nɛ Shilsha nɛ Itran nɛ Beera.

³⁸Jɛta be kaman to ebi e daa la Jefune nɛ Pispa nɛ Ara. ³⁹Ulla malɛ be kaman to ebi e daa la Ara nɛ Haniɛl nɛ Riziya.

⁴⁰Ashɛr be kaman to ebi kikɛ nna na. Bumo kikɛ daa la kanaŋ na to be bejuŋkparpo nɛ b kɔ bunyaŋ ga nɛ benapo lempo nna. Ashɛr be kaman to ebi na be bumo nɛ b fo kena to be keyɔ daa wɔ benapo ŋgboŋ adunyɔ nɛ ashe.

Bɛnjamin be kaman to ebi be asheŋ

¹Bɛnjamin daa kɔ mbinyɛnsobi anu nna. Le nɛ b bɛ abar so kenimuso. Bɛla e daa la enimu n ta Ashbel m bɛ so nɛ Ahara nɛ ²Noha nɛ Raafa.

³Bɛla be kaman to ebi e daa la Ada nɛ Gɛra nɛ Abihuud nɛ ⁴Abishuwa nɛ Neeman nɛ Ahɔa nɛ ⁵Gɛra nɛ Shɛfufan nɛ Huram.

^6-7Ehud be kaman to ebi e daa la Neeman nɛ Abija nɛ Gɛra. Bumo kikɛ daa la kanaŋ na to be bejuŋkparpoana nna nsaa wɔ Gɛba ama saŋko b daŋ ba tintiŋ bumo nna n lara bumo n yɔ Manahaf. B ka daa sha k lar na, Uzza mo tuto Gɛra nɛ Ahihuud e daŋ juŋkpar bumo.

^8-9Shaharaim daŋ kini mbe beche anyɔ nɛ baa tre Hushim nɛ Baraa na nna. E ka yɔ Mowab be efuli so na, nɛ e ya ta Hodɛsh nseŋ kurge mbinyɛnsobi ashunu. Bumo e la Jobaab nɛ Zibia nɛ Mɛsha nɛ Malkam nɛ ¹⁰Jewush nɛ Sakiya nɛ Mirma. Mbe mbinyɛnsobiana e daŋ ba ki kanaŋ na to be bejuŋkparpoana.

¹¹Mo nɛ Hushim daŋ kurge mbinyɛnsobi anyɔ nna. Bumo e la Abitub nɛ Elpaal.

¹²Elpaal malɛ gba daa kɔ mbinyɛnsobi asa nna. Bumo e la Eba nɛ Misham nɛ Shemɛd. Shemɛd e daŋ juŋkpar n chena Ono nɛ Lɔd nɛ ndewurbi nɛ a kulti amo na.

Bɛnjaminebi nɛ b wɔ Gaaf nɛ Aijalɔn be asheŋ

¹³Bɛriya nɛ Shema e daa la kanaŋ nɛ b chena Aijalɔn na be benimu. Bumo e ju basa nɛ b wɔ Gaaf be kasawule so na. ¹⁴Bɛriya be kaman to ebi e daa la Ahio nɛ Shashak nɛ Jɛrimɔf nɛ ¹⁵Zebadiya nɛ Arad nɛ Eda nɛ ¹⁶Maikel nɛ Ishpa nɛ Joha.

Bɛnjaminebi nɛ b wɔ Jerusalɛm na be asheŋ

¹⁷Epal be kaman to ebi e daa la Zebadiya nɛ Mɛshulam nɛ Hizki nɛ Hɛba nɛ ¹⁸Ishmeraya nɛ Izliya nɛ Jobaab.

¹⁹Shimei be kaman to ebi e daa la Jakim nɛ Zikri nɛ Zabdi nɛ ²⁰Elianaya nɛ Ziletai nɛ Eliɛl nɛ ²¹Adaya nɛ Bɛraya nɛ Shimraf.

²²Shashak be kaman to ebi e daa la Ishpan nɛ Eba nɛ Eliɛl nɛ ²³Abdɔn nɛ Zikri nɛ Hana nɛ ²⁴Hananiya nɛ Elam nɛ Antotija nɛ ²⁵Ipdeya nɛ Penuɛl.

²⁶Jaarashiya be kaman to ebi e daa la Shamsheraya nɛ Shehariya nɛ Atalia nɛ ²⁷Jaarashiya nɛ Elaija nɛ Zikri.

²⁸Bumo kikɛ daa la kanaŋ to be benimu nna nɛ bumo nananyɛnana daŋ chena Jerusalɛm.

²⁹Gibiɔn mo tuto Jeɛl daa wɔ Gibiɔn be kade to nna. Mbe eche e daa la Maaka, ³⁰nɛ mo pibi nimuso malɛ daa la Abdɔn. Mbe mbinyɛnsobi ko e daa la Zur nɛ Kish nɛ Baal nɛ Nɛrr nɛ Nadab nɛ ³¹Gɛdɔ nɛ Ahio nɛ Zeka nɛ ³²Miklɔf nɛ mo pibi la Shimia na. Bumo be kenan to ebi ko daŋ yɔ Jerusalɛm nna n ya chena bumo kurgepoana kutɔ.

Ewura Sɔɔl be kaman to ebi

³³Neer pibi e daa la Kish, nɛ Kish malɛ pibi daa la ewura Sɔɔl. Ewura Sɔɔl malɛ daa kɔ mbinyɛnsobi ana nna. Bumo e la Jonatan nɛ Malchishuwa nɛ Abinadab nɛ Eshbaal. ³⁴Jonatan pibi e daa la Mɛribaal nɛ Mɛribaal malɛ pibi daa la Maika.

³⁵Maika daa kɔ mbinyɛnsobi ana nna. Bumo e la Pitɔn nɛ Mɛlɛk nɛ Tariya nɛ Ahaz. ³⁶Ahaz pibi e daa la Jehowada. Jehowada daa kɔ mbinyɛnsobi asa nna. Bumo e la Alɛmɛf nɛ Azmavɛf nɛ Zimri. Zimri pibi e daa la Moza. ³⁷Moza pibi e daa la Binia nɛ Binia malɛ pibi daa la Rafa nɛ Rafa malɛ pibi daa la Eliaza nɛ Eliaza malɛ pibi daa la Azɛl.

³⁸Azɛl daa kɔ mbinyɛnsobi ashe nna. Bumo e la Azrikam nɛ Bokɛru nɛ Ishmaɛl nɛ Sheriya nɛ Obadaya nɛ Hanan. ³⁹Azɛl mo daa Eshɛk da kɔ mbinyɛnsobi asa nna. Bumo e la Ulaam nɛ Jewush nɛ Elifelɛt.

⁴⁰Ulaam be mbinyɛnsobi na daa la benapo nɛ bekpampogboŋ nɛ b kɔ kenyɛn ga nna. Mbe mbinyɛnsobi nɛ mo nanabinyɛnsoana kikɛ daa wɔ basa kalfa nɛ adunu. Bumo kikɛ daa la Bɛnjamin be kaman to ebi nna.

Basa nɛ b pɛ kena to n yɔ efuli ko so na ka bɛta m ba be asheŋ

¹B daŋ sibɛ Israɛlebi na kikɛ be atre kanaŋ kanaŋ so nna n wɔtɔ Israɛl be bewura be nwɔl to.

Judaebi na ka daŋ wora alubi ŋ gbiti Ebɔrɛ na so nɛ b daŋ pɛ bumo nseŋ tintiŋ bumo n yɔ Babilɔn be efuli wɔfɔ na so na. ²B ka bɛta a ba na be bumo nɛ b juŋkpar m ba bumo be nde to e daa la Israɛl be ndetobia na nɛ bɔrɛmatapoana na nɛ Livaiebi na nɛ bɔrɛlambu na to be beshumpo na. ³Bumo be basa nɛ b shi Juda nɛ Bɛnjamin nɛ Efrayim nɛ Manase be yiri to na daŋ ya chena Jerusalɛm nna.

^4-6Juda be yiri to be basa nɛ b daŋ ya chena Jerusalɛm na daa wɔ nnaŋ alfa ashe nɛ adekpanu.

Bumo kikɛ ere daa la Juda be mbinyɛnsobi asa na be kaman to ebi nna. Bumo e la Pɛrɛs nɛ Shela nɛ Zɛra na. Bumo be bejuŋkparpoana e daa la Utai nɛ Asaya nɛ Jewuɛl. Amihuud pibinyɛn e daa la Utai. Utai be kaman to ebi e daa la Omri nɛ Imri nɛ Bani nɛ Pɛrɛs. Shɛla be kaman to be esa e daa la Asaya, nɛ Zɛra malɛ be kanaŋ to be esa daa la Jewuɛl.

^7-8Bɛnjamin be yiri to be basa nɛ b daŋ ya chena Jerusalɛm na e la Sallu nɛ mo tuto daa la Mɛshulam nɛ mo alɛ mo tuto daa Hodaviya nɛ mo alɛ mo tuto la

Hassenuwa na, n ta

Ibneya nɛ mo tuto daa la Jeroham, n ta

Ela nɛ mo tuto la Uzzi nɛ mo alɛ mo tuto la Mikri na,

n ta Mɛshulam nɛ mo tuto la Shefatiya nɛ mo alɛ mo tuto la Rewuɛl nɛ mo alɛ mo tuto la Ibnija na.

⁹Bɛnjamin be yiri to be nnaŋ nɛ b daa wɔ Jerusalɛm na kikɛ daa wɔ basa alfa akpanu nɛ adunu nɛ ashe. Benyɛn nɛ b sibɛ bumo be atre nfe ere kikɛ daa la kanaŋ na to be benimuana nna.

Bɔrɛmatopoana nɛ b daa wɔ Jerusalɛm na be asheŋ

^10-12Bɔrɛmatopoana nɛ b daa wɔ Jerusalɛm na e la

Jedaya nɛ Jehowarib nɛ Jakin,

nɛ Hilkiya pibinyɛn Azariya nɛ e daa la bɔrɛlambu to be ekrachi be enimu na nɛ mo nananyɛnana daa la Mɛshulam nɛ Zadɔk nɛ Mɛrayɔf nɛ Ahitub na; nɛ

Jeroham pibinyɛn Adaya nɛ mo nananyɛnana daa la Pashɔr nɛ Malkija na; nɛ

Adiɛl pibinyɛn Maasai nɛ mo nananyɛnana daa la Jazera nɛ Mɛshulam nɛ Mɛshillemif nɛ Imma na.

¹³Bɔrɛmatapowuraana nɛ b daa la kanaŋ na to be benimu na kikɛ daa wɔ basa kagboŋ nɛ alfa ashunu nɛ adeshe. B daa la basa nɛ b kɔ kenyi nna a shuŋ bɔrɛlambu na to be kushuŋ kikɛ.

Livaiebi nɛ b daa wɔ Jerusalɛm na be asheŋ

^14-16Livaiebi nɛ b daa wɔ Jerusalɛm na e la Shemaya nɛ e shi Mɛrari be kabuna nɛ mo nananyɛnana daa la Hashuub nɛ Azrikam nɛ Hashabia na;

n ta Bakbakar nɛ Hɛrɛs nɛ Galaal nɛ

Mika pibinyɛn Mataniya nɛ mo nananyɛnana daa la Zikri nɛ Asaf na;

n ta Shemaya pibinyɛn Obadaya nɛ mo nananyɛnana daa la Galaal nɛ Jedutum na;

n ta Asa pibinyɛn Bɛrekaya nɛ mo nananyɛn daa la Elkana nɛ e daa wɔ efuli nɛ k wɔ Netofa be ndekarso na.

Bɔrɛlambu na to be beshumpo nɛ b wɔ Jerusalɛm na be asheŋ

¹⁷Bɔrɛlambu na be mbuna be bekumpo e daa la: Shallɔm nɛ Akuub nɛ Talmɔn nɛ Ahiman. Bumo be ejuŋkparpo e daa la Shallɔm. ¹⁸B daŋ keni kakpa nɛ baa tre ewura be kabuna nɛ k wɔ epeŋilarkpa be kaba so na so na n chɛr. Sososo bre, bumo nananyɛnana daa keni Livaiebi na be echenakpaana be mbuna so.

¹⁹Kɔr pibinyɛn Shallɔm nɛ mo nananyɛn daa la Ebiasaf na nɛ Koora be kabuna be basa ko e daa keni kabuna nɛ baa bɔla a luri bɔrɛlambu na to na so fanɛ kananɛ bumo nananyɛnana daa keni wajɛbu cheembi na be kabuna so na. ²⁰Jemanɛ nɛ Eliaza pibinyɛn Finihas daa keni mbunakumpoana na so na, Enyɛnpe Ebɔrɛ na daa wɔ mo kutɔ nna.

²¹Mɛshɛlemiya pibinyɛn Zakareya gba daa keni Enyɛnpe Ebɔrɛ be wajɛbu na be mbuna na be kuko so nna.

²²Basa nɛ b daŋ lara fanɛ b baa keni mbuna so nseŋ sibɛ bumo be ketre n wɔtɔ bumo be nnaŋ nɛ nde be nwɔl to na kikɛ daa wɔ benyɛn alfa anyɔ nɛ kuduanyɔ. Ewura Deevid nɛ anebi Samuɛl e daŋ lara bumo nananyɛnana fanɛ b baa shuŋ loŋ be kushuŋ na. ²³Bumo nɛ bumo be kaman to ebi be kushuŋ e la kebaakeni bɔrɛlambu na be mbunaana na so. ²⁴Mbuna na be kuko daa wɔ kelargato be esoso be kaba so nna nɛ kuko wɔ kelargato be kaseto be kaba so nɛ kuko wɔ epeŋilarkpa be kaba so nɛ kuko malɛ wɔ epeŋitɔrkpa be kaba so, nɛ amo alɛ be kekama kɔ kumo be bekumpo be enimu. ²⁵Mbunakenipoana be bekurgepoana daa shi bumo be nde nɛ a wɔ kadegboŋ na be ekarso na nna m ba kaa chɛ bumo to a shuŋ nchɛnshunu shunu pɔɛŋ nɛ beko malɛ e ba ka sɔ bumo so. ²⁶B daŋ ta ebuana nɛ a wɔ bɔrɛlambu na to na nɛ ekpanjawu nɛ a wɔ kumo to na kikɛ be kushuŋ nna n sa mbunakenipoana be benimu ana nɛ b la Livaiebi na nna. ²⁷B daa keni bɔrɛlambu na so kapa nɛ kanyɛ kikɛ nna nsaa bugi kumo be mbuna na kachipurso kikɛ.

Livaiebi nɛ b ka na be asheŋ

²⁸Livaiebi na be beko be kushuŋ e daa la kebaakeni ntishaŋ nɛ b kɔ a shuŋ Enyɛnpe Ebɔrɛ be bɔrɛlambu to na so. Pɔɛŋ nɛ b ta amo n shuŋ, baa karga amo nna. B naŋ ta amo n shuŋ n loge, nɛ b naŋ karga amo pɔɛŋ nseŋ ta amo n ya yili. ²⁹Bumo be beko malɛ e naa keni bɔrɛlambu na be asɔ cheembi nɛ b kɔ a shuŋ kumo to na, nɛ kumo to be nyifu nɛ nsa nɛ ɔlif be ŋku nɛ duwu nɛ asɔ nɛ a bee shin nɛ ajibi bee wora ebel na kikɛ so. ³⁰Bɔrɛmatapoana na nawule e kɔ ekpa nɛ b ta asɔ nɛ a bee shin nɛ ajibi bee wora ebel na n wea abar to.

³¹Matatiya nɛ e la Shallɔm pibinyɛn nimuso nsaa la Livai nseŋ shi Koora be kabuna na be kushuŋ e daa la kebaawora bodobodo nɛ baa ta a lara sarga a sa Ebɔrɛ na. ³²Livaiebi nɛ b shi Kohaf be kabuna na be kushuŋ e daa la kebaawora bodobodo cheembi a deŋi teebɔl na so kewushiachɛ kikɛ.

³³Livai be kanaŋ na to be bejuŋkparpo nɛ b la bɔrɛlambu na to be beshɛbompo na daa wɔ bɔrɛlambu na to nna. Bumo ere daa maŋ naa kɔ kushuŋ kikɛ a shuŋ ŋkpal manɛ so kapa nɛ kanyɛ kikɛ baa shuŋ bɔrɛlambu na to nna.

³⁴Le be basa ere kikɛ daa la Livai be kanaŋ na to be bejuŋkparpo nna nɛ b sibɛ bumo be kekurge to be asheŋ n nase. Jerusalɛm nɛ bumo be bejuŋkparpoana na kikɛ daŋ chena.

Ewura Sɔɔl be kanaŋ to ebi be asheŋ

³⁵Jeɛl e juŋkpar n chena Gibiɔn. Mbe eche be ketre e daa la Maaka. ³⁶Mo pibinyɛn nimuso e daa la Abdɔn nɛ mbe mbinyɛnsobiana ko malɛ daa la Zur nɛ Kish nɛ Baal nɛ Neer nɛ Nadab nɛ ³⁷Gɛdɔ nɛ Ahio nɛ Zakareya nɛ Miklɔf ³⁸nɛ e la Shimiya mo tuto na. Bumo kikɛ daŋ chena m mata bumo be kabuna be basa nna ashi Jerusalɛm to.

³⁹Neer pibi e daa la Kish nɛ Kish malɛ pibi daa la Sɔɔl, nɛ e daŋ ba ki Israɛl be ewura na. Sɔɔl daa kɔ mbinyɛnsobi ana nna. Bumo e daa la Jonatan nɛ Malkishuwa nɛ Abinadab nɛ Eshbaal. ⁴⁰Jonatan pibi e daa la Mɛribaal nɛ Mɛribaal malɛ pibi daa la Maika. ⁴¹Maika daa kɔ mbinyɛnsobi ana nna. Bumo e daa la Pitɔn nɛ Mɛlɛk nɛ Tariya nɛ Ahaz. ⁴²Ahaz pibi e daa la Jaara. Jaara daa kɔ mbinyɛnsobi asa nna. Bumo e daa la Alɛmɛf nɛ Azmavɛf nɛ Zimri. Zimri pibi e daa la Moza. ⁴³Moza malɛ pibi e daa la Binia nɛ Binia pibi daa la Refaya nɛ Refaya malɛ pibi daa la Eliaza nɛ Eliaza malɛ pibi daa la Azɛl.

⁴⁴Azɛl daa kɔ mbinyɛnsobi ashe nna. Bumo e la Azrikam nɛ Bocheru nɛ Ishmaɛl nɛ Sheriya nɛ Obadaya nɛ Haran.

Ewura Sɔɔl be luwu be asheŋ

(1 Samuɛl 31:1-13)

¹Kebeegboŋ nɛ baa tre Gilbɔa na so nɛ Filistiebi na daŋ yili a kɔ Israɛlebi na. B daŋ mɔ Israɛlebi na be bedamta kena na to nna nɛ bumo nɛ b ka na nɛ ewura Sɔɔl nɛ mbe mbinyɛnsobi shile. ²Filistiebi na daŋ ju m buu Sɔɔl nɛ mbe mbia na so nna n ya mɔ Sɔɔl be mbinyɛnsobi asa, Jonatan nɛ Abinadab nɛ Malkishuwa. ³Kena na be kenishipere be kakpa nɛ Sɔɔl daa wɔ, ŋkpal loŋ so bedoŋ na be atanyembi daŋ da mo nna n doro mo alegaiso. ⁴Nɛ Sɔɔl kaŋɛ enapo nɛ e bee sulɔ mbe akɔsɔ na le: “Pee fo tokobi m mɔ ma! M maa sha Filistiebi, nnyamase ere ka wora ma eyurto nseŋ mɔ ma.” Ama enapo na daŋ kini kewora loŋ nna ŋkpal kufu ka daŋ pɛ mo ga so. Ndoŋ nna nɛ Sɔɔl ta mo gbagba be tokobi be kumu ase n yuu kasawule nseŋ tɔr kumo so. ⁵Enapo nɛ e bee sulɔ Sɔɔl be akɔsɔ na ka wu fanɛ Sɔɔl wu na, nɛ mo alɛ gba wora kananɛ Sɔɔl wora na gbagba m mɔ mbe kumu. ⁶Kananɛ Sɔɔl nɛ mbe mbinyɛnsobi asa nɛ mo kurgepoana nyɛnso kikɛ daŋ wu kachɛ koŋwule nna na. Kachɛ koŋwule na nɛ Sɔɔl nɛ mbe benapo na kikɛ daŋ wu. ⁷Israɛlebi nɛ b wɔ Jizreel be ketaŋɛ to na ka nu fanɛ Israɛl be benapo shile nɛ b mɔ Sɔɔl nɛ mbe mbinyɛnsobi, nɛ bumo alɛ gba shile ŋ ka bumo be nde, nɛ Filistiebi na ba sɔ amo n chena.

⁸B ka kɔ kena na ŋ ŋklade na nɛ Filistiebi na yɔ nɛ b ya muu bubuni na be asɔ, nseŋ ya wu Sɔɔl nɛ mbe mbinyɛnsobi asa na nɛ b wu a dese kebeegboŋ nɛ baa tre Gilbɔa na so. ⁹Ndoŋ nna nɛ Filistiebi na ku Sɔɔl be kumu nseŋ gbaŋ mbe kenyɛnkale nseŋ shuŋi mbɔ fanɛ b nite Filisti be efuli so be agbirlambu to nɛ kaplɛkama nɛ bumo be basa wɔ m bɔ baru lela ere. ¹⁰Kumo be kaman nɛ b ta mbe kena to be akɔsɔ na n ya yili bumo be agbir be lambu ko to nseŋ ta mbe kumu na malɛ n shiga bumo be kegbir Dagɔn be lambu to.

¹¹Jabesh be basa nɛ b wɔ Giliad na ka nu kusɔ nɛ Filistiebi na wora Sɔɔl na, ¹²nɛ bumo be basa nɛ b kɔ kenyɛn ga na koso n ya ta Sɔɔl nɛ mbe mbinyɛnsobi na be kebuni n yɔ Jabesh n ya puli kedibi gboŋgboŋi ko be kifito, nseŋ kishi nchɛ ashunu a ŋini kananɛ bumo be ŋgbene daŋ jija bumo.

¹³Sɔɔl ka daa maa ji kashenteŋ a sa Enyɛnpe Ebɔrɛ so nɛ e daŋ wu na. E daŋ kini kebɛ Ebɔrɛ be mbra so nna nsaa yɔ belejipo kutɔ n ya ka kpal. ¹⁴Loŋ so nɛ Enyɛnpe Ebɔrɛ daŋ shin nɛ e wu nɛ e ta mbe kuwurji n sa Jɛsi pibinyɛn Deevid na.

Deevid ka ki Israɛl nɛ Juda be ewura be asheŋ

(2 Samuɛl 5:1-10)

¹Israɛlebi na kikɛ daŋ ba Deevid kutɔ ashi Hibrɔn m ba kaŋɛ mo le: “Fo nio pibiana e la anyi. ²Dra na kikɛ, hale saŋɛ so nɛ Sɔɔl daa la anyi be ewura na gba, fo e juŋkpar Israɛlebi na n yɔ kena to. Enyɛnpe Ebɔrɛ na e daŋ yili kumo fanɛ, fo e naŋ ba ki anyi be ejuŋkparpo nɛ ewura a keni anyi so fanɛ kananɛ mbolpɔkpapo bee keni mbe mbolpɔ so na.” ³Amoso Israɛlebi be bejuŋkparpoana nɛ b daŋ ba Deevid kutɔ ashi Hibrɔn na shin nɛ bumo nɛ mo wora kɔnɔkoŋwule be ŋkre ashi Ebɔrɛ be anishito nna. Kumo be kaman nɛ b ta ŋku n do mbe kumu so m buu mo Israɛl be kuwura fanɛ kananɛ Enyɛnpe Ebɔrɛ ŋini anebi Samuɛl na gbagba.

⁴Ewura Deevid daŋ keta Israɛl be benapo kikɛ nna n ya kɔ Jerusalɛmebi. Loŋ be jemanɛ na nɛ b daa tre Jerusalɛm Jebusi nna. Jebusiebi na e daŋ juŋkpar n chena Jerusalɛm be kasawule na so. ⁵Jebusiebi na daŋ kaŋɛ Deevid nna fanɛ e maaŋ tiŋ n luri bumo be kade na to kikɛ, ama Deevid daŋ ya tiŋ ŋ kɔ n sɔ kebeegboŋ nɛ baa tre Zayɔn na be kumɔlga be mboŋ lempo kikɛ nna nɛ kade na ki Deevid be kade to. ⁶Ewura Deevid daŋ kaŋɛ mbe benapo nna le: “Ekama nɛ e baŋ juŋkpar m mɔ Jebusi be esa e naŋ ki ma benapo kikɛ be enimu!” Ndoŋ nna nɛ Jɔab nɛ mo nio la Zeruwa na, juŋkpar n yɔ kena na to nɛ b ta mo ŋ ki benapo na kikɛ be enimu. ⁷Deevid daŋ ya chena kumɔlga be kakpa lempo na nna amoso nɛ b daa tre kumo “Deevid be kadegboŋ na.” ⁸E daŋ shin nna nɛ b yili kebee na be epeŋilarkpa be kaba so be kakpa nɛ b sulɔ shishɛr m mata na n lɔŋɛ kade na m pɔr nɛ Jɔab malɛ pɔr kakpa nɛ k ka na n chɛ so. ⁹Ŋkpal Enyɛnpetale ka daa wɔ Deevid kutɔ so, mbe kuwurji daŋ baa nya eleŋ nna a ti so saŋkikɛ.

Deevid be benapo lempo be asheŋ

(2 Samuɛl 23:8-39)

¹⁰Enyɛnpe Ebɔrɛ daŋ nase kɔnɔ nna fanɛ Deevid beeŋ ki ewura nɛ Israɛlebi na kikɛ e yili mbe kaman. Mbe kuwurji daŋ ji eleŋ ga ŋkpal benapo lempo ko ka daŋ chɛ mo to so.

¹¹Benapo lempo na be ejuŋkparpo e daa la Jashobiam nɛ e la Hachmɔn pibinyɛn na. Mo e daa la benapo lempo na to be bekpakpaso asa be enimu na. Mo e daŋ ta kekpa m mɔ benapo alfa asa ashi kena koŋwule to na. ¹²Benapo lempo asa na to be emo nɛ e naŋ bɛ so e la Dodo pibinyɛn Eliaza nɛ e shi Aho be kabuna na. ¹³E daŋ chɛ Deevid to nna ŋ kɔ Filistiebi na kena ashi Pas Dummin. Ayu be kudɔ to nɛ e daa wɔ nɛ Israɛlebi na fara a shile, ¹⁴ndoŋ nna nɛ mo nɛ mbe benapo yili kudɔ na be nferinto ŋ kɔ Filistiebi na kena nɛ Enyɛnpe Ebɔrɛ shin nɛ b kɔ m pɔɔ Filistiebi na so nɛnɛ.

¹⁵Kachako nɛ benapo lempo adesa to be benapo asa yɔ Deevid kutɔ kefalta ko ase ashi Adulam be kebeelaŋ ase nɛ Filistiebi malɛ be benapo wora bumo be keeyi to ashi Refaebi be Ketaŋɛ to. ¹⁶Loŋ be jemanɛ na nɛ Deevid malɛ wɔ kumɔlga be kakpa lempo ashi kebee na so nɛ Filistiebi ko malɛ wɔ Bɛtlɛhɛm. ¹⁷Ndoŋ nna nɛ achukoŋ pɛ Deevid nɛ e kaŋɛ le: “Nɛ esa ko daa beeŋ ya jɔ Bɛtlɛhɛm be kabunagboŋ na ase be ketirbu na be nchu m bar ma nɛ n nu nna, k daa beeŋ par ma ga!” ¹⁸Nɛ benapo lempo asa na ŋana n yɔ Filistiebi na be keeyi to n ya jɔ ketirbu nɛ k wɔ Bɛtlɛhɛm be kabunagboŋ na ase na be nchu m bar Deevid nɛ e kini amo be kenu nseŋ chulgi amo n wurge kasawule fanɛ sarga n sa Enyɛnpe Ebɔrɛ, ¹⁹ŋ kaŋɛ le: “M maaŋ nuu nchu ere! M baŋ nuu amo, k beeŋ baa du fanɛ ŋ ka nuu basa nɛ b ta bumo be amu ŋ kpa kelara ere be ŋklaŋ nna!” Ndoŋ nna nɛ e kini amo be kenu. Benapo lempo asa na be kenyɛn nɛ b daŋ ji nna na.

²⁰Jɔab mo da Abishai e daa la benapo adesa na be ejuŋkparpo. Mo e daŋ ta mbe kekpa m mɔ benapo alfa asa kikɛ na. Amoso mbe ketre daŋ dii nna fanɛ benapo lempo asa na. ²¹Mbe ketre e daŋ dii ga ashi benapo adesa na to, hale nɛ e ki bumo be ejuŋkparpo ama k daa maŋ dii n fo benapo lempo asa na peya so.

²²Jehowada pibinyɛn Bɛnaya nɛ e shi Kabziil na daa la enapo lempo nna. E daŋ ji kenyɛn ekpa damta so ga hale m mɔ Mowab be benapo lempo anyɔ ko. Kachako nɛ e daŋ lar bɔrɛ nɛ abɔrɛjembubi to n ya gbelge kejamaŋ to m mɔ buluŋ. ²³E daŋ mɔ Ijipt be kanyɛn gboŋgboŋi ko nɛ mbe nteŋ du fanɛ ayadra ashunu nɛ bargato nɛ e daŋ keta kekpa gboŋgboŋi ko a kɔ mo, ama Bɛnaya bre daŋ ta kaprɛ nna ŋ kɔ mo nseŋ suge Ijipt be esa na be kekpa na ashi mbe enɔ to nseŋ mɔ mo. ²⁴Le be kenyɛn nɛ Bɛnaya nɛ e daa la benapo lempo adesa na to be eko na daŋ ji. ²⁵Mbe ketre daŋ dii ga ashi benapo adesa na kikɛ to ama mo alɛ daa maŋ fo benapo lempo asa na so. Mo nɛ ewura Deevid daŋ ta ŋ ki basa nɛ baa kuŋ mo na be enimu.

^26-47Benapo lempo Adesa na be beko e la: Asahɛl nɛ e la Jɔab mo sipo na, nɛ Dodo nɛ e shi Bɛtlɛhɛm na pibinyɛn Elhanan, nɛ Shamma nɛ e shi Haarɔd na nɛ Hɛlɛz nɛ mo alɛ shi Pɛlɛt na, nɛ Ikkish nɛ e shi Tekua na pibinyɛn Ira, nɛ Abieza nɛ e shi Anatɔf na, nɛ Sibika nɛ e shi Husha na, nɛ Ilai nɛ e shi Aho, nɛ Maharai nɛ e shi Nɛtofa na, nɛ Baana nɛ e shi Nɛtofa na pibinyɛn Hɛlɛb, nɛ Ribai nɛ e shi Gibia nɛ k wɔ Bɛnjamin be efuli so na pibinyɛn Itai, nɛ Bɛnaya nɛ e shi Piratɔn na, nɛ Hurai nɛ mo alɛ shi ketaŋɛ nɛ k mata Gaash na, nɛ Abiɛl nɛ e shi Aba na, nɛ Azmavɛf nɛ e shi Bahurim na, nɛ Eliab nɛ e shi Shaalbɔn na kikɛ daa la Hashɛn nɛ e shi Gizɔn na be mbinyɛnsobi nna. Shagee nɛ e shi Haraa na pibinyɛn Jonatan, nɛ Saaka nɛ e shi Haara na pibinyɛn Ahiam, nɛ Ur pibinyɛn Elifal nɛ Hifa nɛ e shi Mɛkera na, nɛ Ahija nɛ e shi Pɛlɔn na, nɛ Hɛzro nɛ e shi Kamɛl na, nɛ Ezbai pibinyɛn Narai nɛ Neetan mo sipo Jowɛl nɛ Hagri pibinyɛn Mibha nɛ Zɛlɛk nɛ e shi Ammɔn na, nɛ Naharai nɛ e shi Bɛɛrɔf nseŋ daa keta Zeruwa pibinyɛn Jɔab be akɔsɔ na, nɛ Ira nɛ Garɛb nɛ b shi Jatiir na, nɛ Yuriya nɛ e la Hiti be esa na, nɛ Alai pibinyɛn Zabad nɛ Shiza pibinyɛn Adina, nɛ e daa la Ruben be yiri na to be ejuŋkparpo nsaa juŋkpar benapo adesa na, nɛ Maaka pibinyɛn Haanan nɛ Joshafat nɛ e shi Mitan na, nɛ Uziya nɛ e shi Ashtira na nɛ Hotam nɛ e shi Arowa na be mbinyɛnsobi Shaama nɛ Jiɛl nɛ Shimri nɛ e shi Tiiz na be mbinyɛnsobi Jediɛl nɛ Joha nɛ Eliɛl nɛ e shi Mahava na nɛ Elnaam be mbinyɛnsobi Jeribai nɛ Joshaviya nɛ Itma nɛ mo alɛ shi Mowab na nɛ Eliɛl nɛ Obɛd nɛ Jaasiɛl nɛ e shi Zoba na.

Deevid be bebɛsopo nɛ b shi Bɛnjamin be yiri to na be asheŋ

¹Jemanɛ ko Deevid daŋ yɔ Ziklag nna n ya ŋana Kish pibinyɛn ewura Sɔɔl so. Ndoŋ nɛ benapo lempo ko ba tu mo. ²Benapo na daŋ shi Bɛnjamin be yiri nɛ Sɔɔl gba shi kumo to na nna. B daa nyi ata nɛ atababu be keto ga. B daa tiŋ a ta enɔjiso nɛ enɔ bena kikɛ a to ata. ^3-7Shema nɛ e shi Gibia na be mbinyɛnsobi Ahieza nɛ Jɔash e daa la bumo be bejuŋkparpo.

Benapo na e daa la Azmavɛf be mbinyɛnsobi Jeziɛl nɛ Pɛlɛt nɛ

Berika nɛ Jehu nɛ b shi Anatɔf na nɛ

Ishmaya nɛ e la enapo lempo nseŋ shi Gibiɔn n daa la benapo adesa na be ejuŋkparpo na,

nɛ Jɛremaya nɛ Jahaziɛl nɛ Johanan nɛ Jozabad nɛ e shi Gɛdera na,

nɛ Eluzai nɛ Jɛrimɔf nɛ Bialia nɛ Shamariya nɛ Shefatiya nɛ e shi Harif na,

nɛ Ɛlkana nɛ Isshaya nɛ Azarɛl nɛ Joeza nɛ Joshabim nɛ e shi Koora be kabuna na,

nɛ Jeroham nɛ e shi Gɛdɔ na be mbinyɛnsobi Jola nɛ Zebadiya.

Deevid be bebɛsopo nɛ b shi Gad be yiri to na be asheŋ

⁸Gad be yiri na to be basa ko gba daŋ ya tu Deevid ashi mbe kumɔlga be kakpa lempo keshishɛrsawule na so nna nseŋ ki mbe benapo. Bumo alɛ gba daa la benapo lempo nna nsaa nyi kananɛ baa ta asɔ kuŋso nɛ ekpa a kɔ kena nsaa gbir kenishi fanɛ ebuluŋ nseŋ naa du wurɛwurɛbi malɛ fanɛ kebee so be chibir. ^9-13Kananɛ b bɛ abar so nde. Eza e daa la bumo be ejuŋkparpo, n ta Obadaya m bɛ so n ta Eliab nɛ Mishmana nɛ Jɛremaya nɛ Attai nɛ Eliɛl nɛ Johanan nɛ Elzabad nɛ Jɛremaya nɛ Makbanaya.

¹⁴Gad be yiri to be basa ere be beko daa la benapo be benimugboŋ nɛ b daa keni benapo be katuŋ kagboŋ so nna nɛ beko malɛ la benimu nɛ baa keni benapo be katuŋ kalfa so. ¹⁵Bumo e daŋ dii Jɔɔdan be lɔr na saŋɛ nɛ k bɔlɔ n lar apla kafɛ be kufɔl juŋkparso to na n ju basa nɛ b wɔ kumo be epeŋilarkpa nɛ epeŋitɔrkpa be kaba so be kepla so na nɛ b pesaŋ to.

Deevid be bebɛsopo nɛ b shi Bɛnjamin nɛ Juda na be asheŋ

¹⁶Saŋko Bɛnjamin nɛ Juda be benapo be katuŋ ko daŋ yɔ Deevid kutɔ nna ashi kumɔlga be kakpa lempo na. ¹⁷Ndoŋ nna nɛ Deevid daŋ lar n ya tu bumo nseŋ kaŋɛ bumo le: “Nɛ men la beteri nɛ baa ba nɛ b ba chɛ ma to ŋ kɔ nna bre, kumo ere mee wora menyi ansaŋ nɛ keba. Ama nɛ fanɛ men ba nna nɛ men ba debɔr ma ŋ ŋini ma doŋana saŋɛ nɛ m maŋ wora menyi kulubi kikɛ ere, an nananyɛnana be Ebɔrɛ na beeŋ gberge menyi kusoe.”

¹⁸Ebɔrɛ be kiyoyu daŋ gbelge Amasai nɛ e la bumo be eko nseŋ ba ki benapo adesa na be enimu na so nna, nɛ e kaŋɛ:

“Jɛsi pibinyɛn Deevid, an la feya nna!

Fo nɛ fo basa beeŋ ba kɔ a pɔso saŋkama!

Ŋkpal manɛ so Ebɔrɛ wɔ fo kaman.”

Nɛ Deevid sɔ bumo nɛnɛ nseŋ ta bumo ŋ ki mbe benapo nɛ baa ta kena a purgi basa na be benimu.

Deevid be bebɛsopo nɛ b shi Manase be yiri to na be asheŋ

¹⁹Manase be yiri to be benapo ko daŋ ya ti Deevid be benapo so nna saŋɛ nɛ e daŋ lar n ya tu Filistiebi na nɛ e kɔ ewura Sɔɔl kena na. E daa maŋ naŋ chɛ Filistiebi na to ŋkpal manɛ so b daa fɛ nna fanɛ e beeŋ debɔr bumo ŋ ŋini mo nyɛnpe dra Sɔɔl. Amoso b daŋ shin nna nɛ Deevid bɛta n yɔ Ziklag. ²⁰Benapo nɛ b daŋ shi Manase be yiri to n ya ti Deevid so saŋɛ so nɛ e bɛta a yɔ Ziklag na e daa la Adna nɛ Jozabad nɛ Jedial nɛ Maikel nɛ Jozabad nɛ Elihu nɛ Zilletai. Bumo b ekama daa keni benapo kagboŋ be katuŋ so ashi Manase be yiri to nna. ²¹B daa la benapo lempo nna. Ŋkpal loŋ so nɛ Deevid ta bumo ŋ ki mbe benapo be benimu. Bumo e daa chɛ mo to a kɔ mo doŋana nɛ baa ta kena a purgi basa na.

²²Saŋkama benapo popɔr daa ti Deevid be benapo na so nna ŋkpal loŋ so nɛ mbe benapo na wora kishi ga.

Deevid be benapo be asheŋ

^23-37Saŋɛ so nɛ Deevid daa wɔ Hibrɔn na, benapo damta ko daŋ ba ti mbe benapo so nna nseŋ ta Deevid ŋ ki ewura n tal Sɔɔl be katelamu fanɛ kananɛ Enyɛnpe Ebɔrɛ kaŋɛ na gbagba. Kananɛ benapo na daa sa nde.

Juda be benapo daa wɔ ŋgboŋ ashe nɛ alfa aburwa nsaa kɔ akɔsɔ damta nseŋ keta asɔ kuŋso nɛ akpa.

Simiɔn be yiri to be benapo nɛ b nyi kena be kekɔ nɛnɛ daa wɔ ŋgboŋ ashunu nɛ kalfa.

Livai be yiri to be benapo daa wɔ ŋgboŋ ana nɛ alfa ashe.

Ɛɛrɔn mo nanabi Jehowada be benapo nɛ b daa bɛ mo so daa la ŋgboŋ asa nɛ alfa ashunu nna.

Zadɔk nɛ e la enapo lempo na malɛ mo kurgepoana nɛ b la benapo daa wɔ basa adunyɔ nɛ anyɔ.

Bɛnjamin be yiri nɛ k la Sɔɔl gbagba be yiri na daa kɔ benapo ŋgboŋ asa. Bɛnjamin be yiri na to be basa damta daa shuŋ Sɔɔl nna.

Efrayim be yiri to be benapo lempo nɛ bumo be kanaŋ to be mbuna nɛ ekama nyi bumo be asheŋ daa wɔ basa ŋgboŋ adunyɔ nɛ alfa aburwa.

Manase be yiri na to be epeŋitɔrkpa be kaba so be benapo nɛ b daŋ lara fanɛ b ya buu Deevid kuwura m ba na daa wɔ basa ŋgboŋ kuduaburwa.

Isaaka be yiri to be bejuŋkparpo nɛ basa nɛ b daa juŋkpar a ŋini kusɔ nɛ k daga kewora nɛ kusɔ nɛ k ba nɛ k daga b ka wora kumo na kikɛ daa wɔ basa alfa anyɔ.

Zɛbyulɔn be yiri to be benapo nɛ b nyi akɔsɔ be yiri kikɛ be keta ŋ kɔ kena nseŋ wora kena to be keyɔ be shiriya saŋkama malɛ daa wɔ basa ŋgboŋ adunu,

Naftali be yiri to be benapo juŋkparpo daa wɔ kagboŋ, nɛ bumo nɛ bumo be benapo nɛ b nyi asɔkuŋso nɛ ekpa b keta ŋ kɔ kena nɛnɛ malɛ daa wɔ basa ŋgboŋ adesa nɛ ashunu.

Dan be yiri na to be benapo nɛ b koya kena be kekɔ nɛnɛ daa wɔ ŋgboŋ adunyɔ nɛ aburwa nɛ alfa ashe.

Asha be yiri to be benapo nɛ b wora shiriya nɛ b yɔ kena to saŋkama daa wɔ basa ŋgboŋ adena.

Ruben nɛ Gad nɛ Manase be epeŋilarkpa be yiri nɛ b daa wɔ Jɔɔdan be lɔr na be epeŋilarkpa be kaba so na be benapo nɛ b nyi akɔsɔ be yiri kikɛ b k ta ŋ kɔ kena na, daa wɔ ŋgboŋ kalfa nɛ adunyɔ.

³⁸Benapo na kikɛ daŋ yɔ Hibrɔn nna nɛ b ya buu Deevid Israɛl be kuwura. Israɛlebi kikɛ gba daa sha kumo be loŋ nna. ³⁹Bumo nɛ Deevid kikɛ daŋ ji ndoŋ nchɛ asa nna nsaa ji ajibi a nuu asɔnuuso nɛ bumo kurgepoana bar bumo na. ⁴⁰Isaaka nɛ Zɛbyulɔn nɛ Naftali be eyiri nɛ b wɔ kufɔ na daŋ sulɔ ajibi nɛ nyifu nɛ asɔrso nɛ baa tre greep na be awɔlso nɛ asɔnuuso nɛ ɔlif be ŋku, ekurma nɛ enyɔma nɛ egbolufɛlso so nna. B daŋ bar ana nɛ mbolpɔ gba ndoŋ m ba mɔ n ji. Ade kikɛ daa ŋini kagbenefuli nɛ b nya efuli na so nna.

B bar ŋkre be deka na Kiriaf Jearim be asheŋ

(2 Samuɛl 6:1-11)

¹Ewura Deevid daŋ tre mbe benapo be benimu nɛ baa keni benapo be ntuŋ kagboŋ kagboŋ nɛ kalfa kalfa so na nna nɛ mo nɛ bumo to jina. ²Kumo be kaman nɛ e kaŋɛ Israɛlebi na kikɛ le: “Nɛ kepar menyi nsaa la Enyɛnpe Ebɔrɛ gba be kepar, kumo ere men shin nɛ an shuŋi mbɔ anyi be basa nɛ b ka na nɛ bɔrɛmatapoana na nɛ Livaiebi nɛ b wɔ bumo be nde to na kutɔ ŋ kaŋɛ bumo nɛ b ba anyi kutɔ nfe. ³Saŋɛ na so anyeeŋ ya ta Enyɛnpe Ebɔrɛ be ŋkre be deka nɛ an daŋ kplaŋ so saŋɛ so nɛ Sɔɔl daa la ewura na.” ⁴E ka sa le be nfɛra ere n loge, nɛ kumo be loŋ par basa na kikɛ ga nɛ b shuli kumo be loŋ.

⁵Ndoŋ nna nɛ ewura Deevid tre Israɛl be basa ashi efuli na so kikɛ, yili lɔr nɛ baa tre Shihɔ nɛ k wɔ Ijipt be kasawule so na n ya fo Lebo Hamaf ashi kelargato be esoso be kaba so nɛ b ya ta ŋkre be deka na ashi Kiriaf Jearim m ba Jerusalɛm. ⁶Deevid nɛ mbe basa daŋ yɔ Baala nɛ baa tre kumo Kiriaf Jearim nɛ k wɔ Juda be efuli so na nna nɛ b ya ta Enyɛnpe be ŋkre be deka nɛ mbe ketre Enyɛnpetale deŋ mbe kuwurputi so ashi emalaika anyɔ na be nferinto kumo so na. ⁷B daŋ lara ŋkre be deka na Abinadab be laŋ to nna m ba deŋi turko popɔr ko so. Uzza nɛ Ahio e daa keni turko na so. ⁸Nɛ Deevid nɛ Israɛlebi na ta bumo be eleŋ kikɛ a cha nsaa boŋ nshɛ a maŋkura Enyɛnpe Ebɔrɛ. B daa laŋ ejaŋjilaŋ nɛ ŋkure nɛ echakachaka nna nsaa foŋ mbel.

⁹B ka fo kakpa nɛ Kidɔn bee bri mbe ayu na nɛ egbolufɛlso na fiti nɛ ŋkre be Deka na bee shin nɛ k tɔr nɛ Uzza teŋi enɔ nɛ e suse kumo to. ¹⁰Epul na to nɛ Enyɛnpe Ebɔrɛ nya agbo n wɔtɔ Uzza nseŋ mɔ mo ŋkpal e ka teŋi enɔ m beta deka na so. E daŋ tɔr Ebɔrɛ be anishito nna n wu. ¹¹Ndoŋ nna nɛ Deevid nya agbo ga ŋkpal Enyɛnpe Ebɔrɛ ka nya agbo m mɔ Uzza so. Hale nɛ mbre Enyɛnpe nɛ mbe agbo mɔ Uzza na nɛ b kraa tre loŋ be kakpa na.

¹²Nɛ Ebɔrɛ be asheŋ pɛ Deevid kufu ga nɛ e kaŋɛ le: “Nuso nɛ meeŋ wora n ta ŋkre be deka ere n yɔ naniere.” ¹³Amoso Deevid daa maŋ ta ŋkre be deka na n yɔ Jerusalɛm to. E daŋ yige kumo kanyɛn ko nɛ baa tre Obɛd Edɔm nɛ e la Gaaf be kadetobia na be laŋ to nna. ¹⁴Ŋkre be deka na daa wɔ ndoŋ nna n ya fo afɔl asa nɛ Enyɛnpe Ebɔrɛ nɛfa Obɛd Edɔm nɛ mbe kanaŋ nɛ kusɔ kama nɛ e kɔ kikɛ.

Kaboŋ nɛ ewura Deevid daa wɔ ashi Jerusalɛm be asheŋ

(2 Samuɛl 5:11-16)

¹Tai be ewura Hiram daŋ shuŋi mbɔ ewura Deevid kutɔ nna. E daŋ shuŋi ekapɛnta nɛ basa nɛ baa ta ajembu a pɔr nna nseŋ ta ndibi nɛ baa tre sida na n ti so fanɛ b ya pɔr ewura be laŋ n sa Deevid. ²Nɛ Deevid pin fanɛ Enyɛnpe Ebɔrɛ na e yili kumo kashenteŋto fanɛ e ki Israɛl be ewura nseŋ kpal mbe basa Israɛlebi so a nɛfa mbe kuwurji.

³Deevid ka lar Hibrɔn m ba Jerusalɛm na, e daŋ ta beche damta nna ŋ kurge mbinyɛnsobi nɛ mbichesobi damta. ⁴Mbia nɛ e daŋ kurge Jerusalɛm to e la Shamua nɛ Shobab nɛ Neetan nɛ Sɔlɔmɔn nɛ ⁵Ibhar nɛ Elishuwa nɛ Elpelɛt nɛ ⁶Noga nɛ Nefɛg nɛ Jafaya nɛ ⁷Elishama nɛ Beeliada nɛ Elefilɛt.

Ewura Deevid ka kɔ m pɔɔ Filistiebi na so be asheŋ

(2 Samuɛl 5:17-25)

⁸Filistiebi na ka nu fanɛ Deevid e ki Israɛl be efuli so kikɛ be ewura, nɛ bumo be benapo kikɛ ya ka fin mo nɛ b pɛ. Ndoŋ nna nɛ ewura Deevid bela ase nɛ e ya n ya tu bumo. ⁹Loŋ be jemanɛ na nɛ Filistiebi be benapo na ta kena n ya purgi Refaebi be ketaŋɛ to be ndeana nsaa muu bumo be asɔ. ¹⁰Kumo be kaman nɛ Deevid bishi Enyɛnpe Ebɔrɛ le: “K daga ŋ ka ya kɔ Filistiebi ere kena a? Feeŋ chɛ ma to nɛ ŋ kɔ m pɔɔ bumo so a?”

Nɛ Enyɛnpe Ebɔrɛ shuli so ŋ kaŋɛ: “Mm, ya kɔ bumo! Ŋkpal manɛ so, meeŋ shin nɛ fo kɔ m pɔɔ so kashenteŋto!”

¹¹Ndoŋ nna nɛ Deevid nɛ mbe benapo yɔ Baal Pɛrazim n ya kɔ m pɔɔ Filistiebi na so, nseŋ kaŋɛ le: “Enyɛnpe Ebɔrɛ bure n luri ma doŋana na to fanɛ kananɛ nchu bee bɔlɔ a luri kakpa na. Ndoŋ nna nɛ e nase kaboŋ na Baal Perazim. Kumo be kifito e la Enyɛnpe Ebɔrɛ nɛ e bee bure e luri to na.” ¹²Filistiebi be benapo na ka shile n yige bumo be agbir na nɛ Deevid kaŋɛ mbe benapo na fanɛ b ya chɔɔ amo.

¹³K maŋ chɛr ko nɛ Filistiebi be benapo na naŋ bɛta n ta kena n ya purgi Refaebi be ketaŋɛ na to be nde kikɛ. ¹⁴Nɛ Deevid naŋ bishi Enyɛnpe Ebɔrɛ kusɔ nɛ e beeŋ wora, nɛ Enyɛnpe Ebɔrɛ kaŋɛ mo le: “Men sa maŋ kaŋ ta kena n tu bumo nfe, ama men wora shiriya a kulti bumo a yɔ ndibi nɛ baa tre balsam ere ase n ya kɔ bumo ndoŋ. ¹⁵Men ka baŋ nu awɔr ka shi ndibi na so a ba fanɛ benapo ka bɛ abar so a nite na, kumo ere men fara a kɔ bumo, ŋkpal manɛ so meeŋ juŋkpar menyi n ya kɔ m pɔɔ Filistiebi be benapo na so.” ¹⁶Ndoŋ nna nɛ Deevid wora kusɔ nɛ Enyɛnpe Ebɔrɛ kaŋɛ na nseŋ yili Gibiɔn n ju Filisti be benapo na kikɛ n ya fo Gɛza. ¹⁷Amoso Deevid be ketre daŋ dii n yɔ kaplɛkama nna, nɛ Enyɛnpe Ebɔrɛ shin nɛ efuli kama so ebi bee ŋana mo.

B ka ta ŋkre be deka na m ba Jerusalɛm to be asheŋ

¹Ewura Deevid daŋ pɔr nwu damta nna ashi Jerusalɛm nseŋ shin nɛ b yuu wajɛbu nɛ b ta ŋkre be deka na bre n yili ndoŋ. ²Kumo be kaman nɛ Deevid kaŋɛ le: “Livaiebi na nawule a daga fanɛ b baa sulɔ ŋkre be deka na ŋkpal manɛ so bumo nɛ Enyɛnpe Ebɔrɛ lara fanɛ b baa sulɔ kumo nsaa shuŋ mo mbaanaayɔ.” ³Kumo be kaman nɛ Deevid tre Israɛlebi na kikɛ m ba Jerusalɛm, nɛ b ya ta ŋkre be deka na m ba wajɛbu nɛ e yuu ŋkpal kumo so na to. ⁴Kede be kaman nɛ e tre Ɛɛrɔn malɛ be kaman to ebi nɛ Livaiebi na. ⁵E daŋ tre Kohaf be kabuna nɛ b shi Livai be yiri to na be ejuŋkparpo nɛ baa tre Yuriɛl nɛ e bee juŋkpar mbe kabuna be basa kalfa nɛ adunyɔ na, ⁶nɛ Asaya nɛ e bee juŋkpar basa alfa anyɔ nɛ adunyɔ ashi Mɛrari be kabuna na, ⁷nɛ Jowɛl nɛ e bee juŋkpar basa kalfa nɛ adesa ashi Gɛshɔn be kabuna na, ⁸nɛ Shamaya nɛ e bee juŋkpar basa alfa anyɔ ashi Elizafan be kabuna na ⁹Eliɛl nɛ e daa juŋkpar basa aduburwa ashi Hibrɔn be kabuna na, ¹⁰nɛ Aminadab nɛ mo alɛ daa juŋkpar basa kalfa nɛ kuduanyɔ ashi Uziɛl be kabuna na.

¹¹Ewura Deevid daŋ shuŋi n tre Zadɔk nɛ Abiata nɛ b la bɔrɛmatapoana nɛ Livai be basa ashe nna. Bumo e la Yuriɛl nɛ Asaya nɛ Jowɛl nɛ Shemaya nɛ Eliɛl nɛ Aminadab. ¹²Le nɛ e daŋ kaŋɛ Livaiebi na: “Menyi e la Livaiebi na be kabuna be bejuŋkparpoana. Amoso menyi nɛ men braana Livaiebi na e lara alubi ashi menyi be ŋgbene to nseŋ ki cheembi, saŋɛ na so menyeeŋ tiŋ n ta Enyɛnpe Israɛl be Ebɔrɛ na be ŋkre be deka na n yɔ kakpa nɛ n lɔŋɛ fanɛ b ta kumo m ba yili na. ¹³Ŋkpal men ka daa maŋ wɔtɔ nɛ men sulɔ kumo sososo na so, Enyɛnpe Ebɔrɛ daŋ gberge anyi kusoe nna ŋkpal anyi ka daa maŋ wora kusɔ nɛ k daga so.”

¹⁴Ndoŋ nna nɛ bɔrɛmatapoana nɛ Livaiebi na lara alubi bumo be ŋgbene to nseŋ ki cheembi, saŋɛ na so baaŋ tiŋ n sulɔ Enyɛnpe Israɛl be Ebɔrɛ na be ŋkre be deka na. ¹⁵Livaiebi na daa ta ndibi tentembi nna a wɔtɔ kumo to a maŋ so a deŋi bumo be abatimu so a sulɔ fanɛ kananɛ Enyɛnpe Ebɔrɛ baaŋ kaŋɛ Mosis na gbagba.

¹⁶Ewura Deevid daŋ kaŋɛ Livaiebi be bejuŋkparpo na kenishipereso nna fanɛ b lara Livaiebi na be beko nɛ b baa boŋ nshɛ nsaa laŋ ejaŋjilaŋ nɛ echakachaka kagbenefuliso ^17-21Beshɛbompo nɛ b daa laŋ danyaŋ be echakachaka e daa la Jowɛl pibinyɛn Heman, nɛ mo kurgepo Asaf nɛ e la Berekia pibinyɛn na, nɛ Kushiya pibinyɛn Etan nɛ e shi Mɛrari be kabuna na. Basa nɛ b daa chɛ bumo to a laŋ ejaŋjilaŋ wurbi e daa la Zakareya nɛ Jaziɛl nɛ Shemiramɔf nɛ Jehiɛl nɛ Yuni nɛ Eliab nɛ Maseya nɛ Bɛnaya.

Bumo nɛ bumo alɛ daa laŋ ejaŋjilaŋ gboŋgboŋi na e daa la, Matitiya nɛ Elifilehu nɛ Mikneya nɛ Azaziya n ta Obɛd Edɔm nɛ Jeɛl nɛ b la bɔrɛlambu na to be mbuna be bekenipo na n ti so.

²²Ŋkpal Chɛnanaya ka daa kɔ nshɛ be keboŋ be kakɛ so, mo nɛ b daŋ lara fanɛ e baa la Livaiebi na be beshɛbompo be ejuŋkparpo. ^23-24Bɛrekaya nɛ Ɛlkana nɛ Obɛd Edɔm nɛ Jehiya nɛ b daŋ lara fanɛ b baa keni ŋkre be deka na so. Bɔrɛmatapoana Shebaniya nɛ Joshafat nɛ Netanɛl nɛ Amaziya nɛ Zakareya nɛ Bɛnaya nɛ Elieza nɛ b daŋ lara fanɛ b baa foŋ mbel ashi ŋkre be deka na be anishito.

B ka bar ŋkre be deka na Jerusalɛm to be asheŋ

(2 Samuɛl 6:12-22)

²⁵Ewura Deevid nɛ Israɛl be bejuŋkparpoana na nɛ benapo be benimuana na daŋ yɔ Obɛd Edɔm be laŋ to nna nɛ b ya ta ŋkre be deka na nseŋ ji eyur ndoŋ ga. ²⁶Ŋkpal Ebɔrɛ ka daŋ chɛ Livaiebi na to nɛ b tiŋ n sulɔ Enyɛnpe be ŋkre be deka na so, egbolu ashunu nɛ ekpakpa ashunu nɛ b daŋ ta n lara sarga n sa Enyɛnpe Ebɔrɛ na. ²⁷Deevid nɛ beshɛbompo be enimu Chɛnanaya nɛ Livaiebi nɛ b daŋ sulɔ ŋkre be deka na daŋ buu ago be kechɛbi lela be epiŋi nna. Ewura Deevid bre daŋ buu kabɔrɛmata be piŋi nɛ baa tre ɛfɔd na nna n daŋi mbe piŋi so. ²⁸B ka ta ŋkre be deka na a ba na, Israɛlebi na kikɛ daa boŋ nshɛ kagbenefuliso nna nsaa foŋ mbel a laŋ echakachaka nɛ ejaŋjilaŋ hale m ba luri Jerusalɛm to.

²⁹B ka ta ŋkre be deka na a luri kade na to na, nɛ Sɔɔl pibiche Mikaal keni tokuro to n wu ewura Deevid ka bee cha a tɛto, nɛ mbe asheŋ nu mo agbo alegaiso nɛ e maŋ naa keni mo a bɔlɔ kenishi.

¹B daŋ ta ŋkre be deka na nna n ya yili wajɛbu nɛ Deevid yuu ŋkpal kumo so na to, nseŋ lara esarga chɔɔso nɛ kɔnɔkoŋwuleso be esarga n sa Ebɔrɛ. ²Ewura Deevid ka lara esarga chɔɔso na n loge nɛ e nɛfa basa na ashi Enyɛnpe Ebɔrɛ be ketre to, ³nseŋ sa bumo kikɛ ajibi. E daŋ sa Israɛl be eche nɛ enyɛn kikɛ bodobodo lelemu nɛ eblaŋ tɔso nɛ greep be asɔrso wɔlso nna.

⁴Deevid daŋ lara Livaiebi na be beko nna fanɛ b baa shuŋ Enyɛnpe Israɛl be Ebɔrɛ na be kushuŋ nsaa boŋ nshɛ a maŋkura mo ashi ŋkre be deka na ase. ⁵Asaf e daa la bumo be ejuŋkparpo nɛ Zakareya bɛso. Jeɛl nɛ Shemiramɔf nɛ Jehiɛl nɛ Matitiya nɛ Eliab nɛ Benaya nɛ Obɛd Edɔm nɛ Jeɛl e daa laŋ ejaŋjilaŋ. Asaf malɛ e daa laŋ echakachaka ⁶nɛ Bɛnaya nɛ Jahaziɛl nɛ b la bɔrɛmatapoana na malɛ daa foŋ mbel ashi ŋkre be deka na be anishito saŋkama. ⁷Kumo be jemanɛ nɛ ewura Deevid ta nshɛ be keboŋ n di Enyɛnpe Ebɔrɛ epaŋ be kushuŋ n sa Asaf nɛ mo braana Livaiebi na.

Kapandi be kashɛ

(Nshɛ 105:1-15; 96:1-13; 106:1, 47-48)

⁸Men ta kechɔrɔ n sa Enyɛnpe Ebɔrɛ nsaa maŋ mbe ketregboŋ na so,

men kaŋɛ basa mbe asheŋ woraso ŋ ŋini ekama.

⁹Men boŋ kapandi be nshɛ m maŋkura Enyɛnpe Ebɔrɛ;

nseŋ kaŋɛ mbe mamachi be asheŋ woraso be asheŋ.

¹⁰Men shin nɛ men be ŋgbene e baa fuli menyi ŋkpal anyi ka la mo peya so;

nɛ bekama nɛ baa bunyaŋ mo na malɛ be ŋgbene e fuli bumo!

¹¹Men ta men be yirda n deŋi Enyɛnpe Ebɔrɛ na so,

nsaa bunyaŋ mo saŋkikɛ.

^12-13Menyi Jeekɔb be kaman to ebi nɛ Ebɔrɛ be anya nɛ menyi Israɛl be kaman to ebi nɛ Ebɔrɛ lara na, men baa nyiŋi Ebɔrɛ be emamachisheŋ

nɛ kananɛ e bee ji asheŋ nɛ amo be ekpa so be asheŋ.

¹⁴Enyɛnpe na e la anyi be Ebɔrɛ;

nɛ mbe mbra wɔtɔ n sa durnya kikɛ.

¹⁵Men sa maŋ kaŋ teŋ Ebɔrɛ be ŋkre nɛ

e kre mbaanaayɔ na kikɛ so,

¹⁶loŋ be ŋkre na nɛ mo nɛ Eebraham kre,

nɛ e nase kumo be kɔnɔ n sa Aizek malɛ na.

¹⁷Enyɛnpe Ebɔrɛ na nɛ Jeekɔb gba daŋ kre ŋkre

nɛ k beeŋ baa wɔtɔ mbaanaayɔ.

¹⁸E yɛ: “Meeŋ ta Keenan be kasawule na n sa menyi,

nɛ k baa la menyi be kapetɛ.”

¹⁹Kumo be jemanɛ na nɛ Ebɔrɛ be basa daa maŋ shi,

nseŋ daa la befɔ ashi Keenan be kasawule so.

²⁰B daŋ baa wɔtɔ nna

a kilgi to efuliana nɛ nsawuleana so.

²¹Ama Ebɔrɛ daa maŋ shuli nɛ ekama mɛaŋ bumo.

E daŋ kpele ndoŋ be bewura kusoe nna

saŋɛ na so b maaŋ wora bumo shɛŋ,

²²nseŋ kaŋɛ bumo le: “Men sa maŋ kaŋ tɔrɔ ma basa laraso,

ŋko n tɔrɔ ma anebiana.”

²³Ekama nɛ e wɔ durnya ere to e boŋ kashɛ n sa Enyɛnpe Ebɔrɛ na!

Men baa malga kananɛ e mɔlga menyi na be asheŋ karechɛ kikɛ.

²⁴Men malga kananɛ Ebɔrɛ be kemaŋkura du n sa efuliana kikɛ,

nseŋ malga mbe asheŋgboŋ nɛ e bee wora ŋ ŋini basa kikɛ.

²⁵Enyɛnpe Ebɔrɛ kɔ eleŋ nseŋ daga kemaŋkura.

Mo e daga bunyaŋ a chɔ agbir.

²⁶Agbir nɛ efuli pɔtɛana bre be basa bee shuŋ,

ama Enyɛnpe Ebɔrɛ e to esoso nɛ kasawule.

²⁷Kemaŋkura nɛ kuwurji daga mo nna, nɛ

eleŋ nɛ kagbenefuli kikɛ bɔlɔ mbe bɔrɛlambu to.

²⁸Ekama nɛ e wɔ durnya ere to e di Enyɛnpe Ebɔrɛ epaŋ,

men ta mbe kemaŋkura nɛ mbe eleŋ n sa mo.

²⁹Enyɛnpe be ketre daga bunyaŋ, amoso men shin nɛ an maŋkura mo.

Men ta men be sarga m ba mbe lambu to.

Enyɛnpe cheembi na kaŋ lar a ba,

a daga fanɛ men bunyaŋ mo.

³⁰Esa kama nɛ e wɔ durnya ere to beeŋ chicha ashi mbe anishito!

Durnya na yil kiŋkiŋ nna nsaa maa gbuŋgbuŋ.

³¹Esoso nɛ kasawule so ebi, men shin nɛ men be ŋgbene e baa fuli!

Men kaŋɛ efuliana na fanɛ Enyɛnpe Ebɔrɛ na e la ewura.

³²Teku nɛ kusɔ kama nɛ k wɔ kumo to e baa cha awɔr;

Ndɔana nɛ asɔ kama nɛ a wɔ amo to, men baa kɔ kagbenefuli!

³³Ndibi nɛ a wɔ kupo to beeŋ baa boŋ nshɛ kagbenefuli

ŋkpal manɛ so Enyɛnpe na bee ba nɛ e ba ji durnya be basa demu.

³⁴Men ta kechɔrɔ n sa Enyɛnpe Ebɔrɛ ŋkpal manɛ so, e walɛ,

nɛ mbe kasha malɛ wɔtɔ mbaanaayɔ.

³⁵Men kaŋɛ mo le: “Anyi be Ebɔrɛ nɛ anyi be emɔlgapo, mɔlga anyi.

Gbegbar anyi abar so nseŋ mɔlga anyi ashi efuli pɔtɛ ana be enɔ to,

saŋɛ na so anyeeŋ ta kechɔrɔ n sa fo,

nseŋ di fo ketre cheembi ere epaŋ.”

³⁶Men di Enyɛnpe Israɛl be Ebɔrɛ na epaŋ!

Men di mo epaŋ naniere hale mbaanaayɔ!

Ndoŋ nna nɛ basa na kikɛ shuli so ŋ kaŋɛ le: “Amɛn” Nseŋ di Enyɛnpe Ebɔrɛ epaŋ.

B ka bee shuŋ Enyɛnpe Ebɔrɛ ashi Jerusalɛm nɛ Gibiɔn be asheŋ

³⁷Ewura Deevid daŋ lara Asaf nɛ Livaiebi nɛ b la kabuna koŋwule ebi na nna fanɛ b baa keni kakpa nɛ ŋkre be deka na yil na be kushuŋ so karechɛ kikɛ. ³⁸Jedutum pibinyɛn Obɛd Edɔm nɛ mbe kabuna be basa adeshe nɛ aburwa e daa chɛ bumo to. Hosa nɛ Obɛd Edɔm e daa keni mbuna na so.

³⁹Bɔrɛmatapowura Zadɔk nɛ mo braana bɔrɛmatapoana e daa keni Enyɛnpe Ebɔrɛ be wajɛbu na so ashi Gibiɔn. ⁴⁰Kachipurso nɛ kaaseso kikɛ b daa lara sarga chɔɔso nna a deŋi bɔrɛsure na so fanɛ kananɛ Enyɛnpe Ebɔrɛ kaŋɛ Israɛlebi na mbe mbra to na gbagba. ⁴¹Heman nɛ Jedutum e daa la bumo be bechɛtopo, n ta bumo nɛ b daŋ lara fanɛ b baa boŋ nshɛ a maŋkura Enyɛnpe Ebɔrɛ ŋkpal mbe kasha ka maŋ kɔ ekarso na n ti so. ⁴²Heman nɛ Jedutum malɛ gba e daŋ naa foŋ mbel nsaa laŋ echakachaka nɛ alaŋsɔ nɛ baa laŋ nsaa boŋ nshɛ a di Ebɔrɛ epaŋ jemanɛ kikɛ. Basa nɛ b shi Jedutum be kabuna na e daa keni bumo be mbunaana so.

⁴³Ndoŋ nna nɛ ekama yɔ epe nɛ Deevid malɛ yɔ mbe kanaŋ kutɔ.

Neetan ka ta kubɔya m ba sa ewura Deevid be asheŋ

(2 Samuɛl 7:1-17)

¹Ewura Deevid ka ya kaa wɔ mbe kuwura laŋ popɔr na to nɛ e tre anebi Neetan ŋ kaŋɛ mo le: “Keni! Ndibi nɛ baa tre sida na nɛ b ta m pɔr ewura be laŋ nɛ n wɔtɔ ere, ama Enyɛnpe Ebɔrɛ be ŋkre be deka na bre wɔ wajɛbu to nna!”

²Nɛ Neetan shuli so ŋ kaŋɛ le: “Wora kusɔ kama nɛ fee fɛ fanɛ feeŋ wora, ŋkpal manɛ so Enyɛnpe Ebɔrɛ na wɔ fo kutɔ.”

³Kumo be kanyɛso, nɛ Enyɛnpe Ebɔrɛ kaŋɛ Neetan le: ⁴“Ya kaŋɛ ma kayɛrbi Deevid fanɛ ma Enyɛnpe Ebɔrɛ e naa kaŋɛ mo na fanɛ mannɛ mo nɛ mee sha fanɛ e pɔr bɔrɛlambu n sa ma nɛ m baa wɔtɔ. ⁵Yili jemanɛ so nɛ n lara Israɛlebi ashi Ijipt be efuli so dra dra na m ba fo kabre, m maŋ naŋ chena bɔrɛlambu to kikɛ. Kaplɛkama nɛ n yɔ malɛ, wajɛbu to nɛ mee luri. ⁶Enite damta nɛ ma nɛ Israɛlebi nite ere kikɛ, m maŋ naŋ bishi bumo be bejuŋkparpo nɛ n tre fanɛ b baa keni ma basa so fanɛ kananɛ mbolpɔkpapo bee keni mbe mbolpɔ so na be ekama kusɔ nɛ k ba nɛ b maŋ ta ndibi nɛ baa tre sida na m pɔr bɔrɛlambu n sa ma.”

⁷Amoso ya kaŋɛ ma kayɛrbi Deevid fanɛ le nɛ ma Enyɛnpetale na kaŋɛ: “N lara fo ashi mbolpɔkpapo be kushuŋ to nna n ta fo ŋ ki ma basa Israɛlebi na be ejuŋkparpo. ⁸Kaplɛkama nɛ fo daŋ yɔ, ma nɛ fo nna. Nɛ ma alɛ bee pɔɔ fo doŋana kikɛ so a sa fo. Kananɛ basa ko be atre dii ga durnya ere to na, loŋ gbagba nɛ meeŋ shin nɛ fo alɛ gba be ketre e dii. ^9-10N sa ma basa Israɛlebi bumo gbagba be kakpa nɛ baaŋ chena nɛ basa lubi maaŋ naŋ mɛaŋ bumo. Baŋ yili saŋɛ nɛ b ba chena kasawule ere so nɛ saŋɛ nɛ n sa bumo bejuŋkparpo na kikɛ, basa lubi maŋ yige bumo, ama loŋ maaŋ naŋ wora kikɛ. Ŋkpal manɛ so, meeŋ pɔɔ fo doŋana so n sa fo nseŋ shin nɛ fo kaman to ebi e baa ji kuwura. ¹¹Fo kaŋ wu nɛ b ta fo n ya nase fo nananyɛnana be edesekpa, meeŋ shin nɛ fo mbinyɛnsobi ere be eko e ki ewura, nɛ n shin nɛ mbe kuwurji malɛ e baa kɔ eleŋ ga. ¹²Mo e naŋ pɔr ma bɔrɛlambu n sa ma. Ma alɛ beeŋ shin nɛ mbe kuwurji e baa wɔtɔ mbaanaayɔ. ¹³Meeŋ ki mo tuto, nɛ mo alɛ e baa la m pibinyɛn. M maaŋ yige kebaachɛ mo to fanɛ kananɛ n yige Ewura Sɔɔl mo nɛ n lara kuwurji to nseŋ ta fo n yuu to na. ¹⁴Meeŋ ta mo ŋ ki ma basa be ejuŋkparpo nɛ e baa keni ma efuli kikɛ so. Mbe mbia e naŋ ba ji kuwura a ka a sa abar so mbaanaayɔ.”

¹⁵Kusɔ nɛ Ebɔrɛ daŋ kaŋɛ Neetan na gbagba chap nɛ e kaŋɛ ewura Deevid.

Ewura Deevid be kabɔrɛchɔrɔ be asheŋ

(2 Samuɛl 7:18-29)

¹⁶Ndoŋ nna nɛ Ewura Deevid ya luri Enyɛnpe Ebɔrɛ be wajɛbu na to n ya chena ŋ kule Ebɔrɛ ŋ kaŋɛ le: “Ma nɛ ma kanaŋ maŋ daga kenya kusɔ nɛ fo wora n sa anyi ere. ¹⁷Kede be kaman, fo kraŋ nase kɔnɔ n sa ma kaman to ebi. Enyɛnpe Ebɔrɛ, fee keni ma a bɔlɔ kenishi fanɛ esagboŋ ko nna. ¹⁸Manɛ nɛ n naa kɔ nɛ ŋ kaŋɛ? Fo nyi ma, fo kenya nɛnɛ. Ama fo kraŋ ta ma n yili kemaŋkura be eyilikpa. ¹⁹Fo keparso nɛ fo wora asheŋ ere n sa ma nseŋ nase le be nnɔgboŋ ere n sa ma. ²⁰Ebɔrɛ kikɛ maŋ naa wɔtɔ fanɛ fo Enyɛnpe na. Fo nawule nɛ an nyi fo ka la Ebɔrɛ. ²¹Efuli kikɛ maŋ naa wɔ kasawule ere so fanɛ Israɛl be efuli nɛ fo lara ashi kenyaya to nseŋ shin nɛ b ki fo basa na. Mamachi be asɔ damta nɛ fo wora n sa bumo na e shin nɛ fo ketre dii durnya ere to. Fo mɔlga fo basa ashi Ijipt be kasawule so, m bar bumo nfe nseŋ ju efuli ere so ebi n shin nɛ fo basa chena bumo be nsawule so. ²²Dra dra na kikɛ nɛ fo ta Israɛlebi ŋ ki fo gbagba be basa mbaanaayɔ, nseŋ ki bumo be Ebɔrɛ.

²³N nyɛnpe nɛ ma Ebɔrɛ shin nɛ kusɔ nɛ fo nase n sa ma nɛ ma kaman to ebi na e bɔlɔ so. Enyɛnpe, jande wora kusɔ nɛ fo kaŋɛ na. ²⁴Saŋɛ na so fo ketre beeŋ dii nɛ ekama e baa kaŋɛ le: ‘Enyɛnpetale na e la Israɛl be Ebɔrɛ.’ Feeŋ yili ma kuwurji mbaanaayɔ. ²⁵Ŋkpal fo ka la ma Ebɔrɛ nseŋ nase kɔnɔ fanɛ ma kaman to ebi beeŋ baa la bewura na so nɛ fo kayɛrbi maa pɔ aba nɛ kebaakule fo na. ²⁶Enyɛnpe, fo e la Ebɔrɛ nseŋ nase le be kɔnɔ fanɛ feeŋ wora asɔ lela ere n sa ma. ²⁷Enyɛnpetale nɛfa ma kaman to ebi, saŋɛ na so feeŋ baa lara fo bewura bumo to saŋkama. Fo Enyɛnpe Ebɔrɛ na e nase kɔnɔ fanɛ fo nɛfa beeŋ baa wɔ ma kaman to ebi so hale mbaanaayɔ.”

Deevid be kekɔmpɔɔso be asheŋ

(2 Samuɛl 8:1-18)

¹Kede be kaman be jemanɛ ko ewura Deevid naŋ lɔŋɛ n ya kɔ Filistiebi na kena nna nseŋ pɔɔ bumo so. E daŋ kɔ n sɔ Gaf be kade nɛ ndewurbi nɛ a kulti kumo na kikɛ nna. ²Ewura Deevid daŋ kɔ m pɔɔ Mowabebi gba so nna nseŋ shin nɛ b sɔ mo ŋ ki bumo be ewura a ka lampo a sa mo.

³Kumo be kaman nɛ ewura Deevid lar n ya kɔ m pɔɔ Zoba nɛ k mata Hamaf nɛ k wɔ Siriya be efuli so na be ewura nɛ baa tre Hadadeza na so, saŋɛ nɛ e daŋ ya kaa shin nɛ e sɔ Yufreetes be Lɔr na ase be efuli na ŋ ki mo peya na. ⁴Kena na to nɛ ewura Deevid suge egbaŋɛturko kagboŋ nseŋ pɛ egbaŋɛdiipoana ŋgboŋ ashunu nɛ benapo nɛ b na ayaso malɛ ŋgboŋ adunyɔ. E daŋ tuge egbaŋɛ na kikɛ be achin nna nseŋ yige bumo to be kalfa nɛ baa gberge eturko na.

⁵Siriyaebi nɛ b shi Damaskɔs na ka shuŋi benapo fanɛ b ya chɛ Zoba be ewura Hadadeza to ŋ kɔ kena, nɛ ewura Deevid mɔ bumo be basa ŋgboŋ adunyɔ nɛ anyɔ. ⁶Kede be kaman nɛ Deevid shin nɛ mbe benapo na be beko chena Damaskɔs n shin nɛ Siriyaebi na sɔ Deevid ŋ ki bumo be ewura a ka lampo a sa mo. Kaplɛkama nɛ ewura Deevid daŋ baŋ yɔ Enyɛnpe Ebɔrɛ daa shin nɛ e bee kɔ a pɔɔ so nna. ⁷Ade kikɛ be kaman nɛ ewura Deevid ta Hadadeza be benimu be shuwa be asɔ kuŋso na n yɔ Jerusalɛm. ⁸E daŋ sɔ danyaŋ damta gba ashi Tibhaf nɛ Kun be nde nɛ Hadadeza daa ji kuwura amo so na gba to nna. Amo nɛ ewura Deevid pibi Sɔlɔmɔn daŋ ta n lɔŋɛ bɔrɛlambu na to be katishaŋgboŋ nɛ baa tre teku na, nɛ eshabɔrɛ nɛ danyaŋ be ntishaŋ jito na.

⁹Hamaf be kade to be ewura Toi ka nu fanɛ ewura Deevid kɔ m pɔɔ Hadadeza be benapo kikɛ so na, ¹⁰nɛ e shuŋi mo pibinyɛn Joram fanɛ e ya chɔrɔ ewura Deevid nseŋ sa mo ansaŋ nɛ kushuŋ ŋkpal e ka kɔ m pɔɔ Hadadeza nɛ mo ere Toi kɔ mo kena alɛ damta nsaa maŋ tiŋ m pɔɔ mo so so. Asɔ nɛ b ta shuwa nɛ gbiti nɛ danyaŋ n wora nɛ Joram daŋ ta m ba kɛ ewura Deevid. ¹¹Ndoŋ nna nɛ ewura Deevid ta asɔ na n ti shuwa nɛ gbiti nɛ e kɔ Edɔm nɛ Mowab nɛ Ammɔn nɛ Filisti nɛ Amalɛk be efuliana n sɔ na so m bɔɔ Ebɔrɛ enɔ.

¹²Ewura Deevid be enapo nɛ baa tre Abishai nɛ mo nio daa la Zuriya na e daŋ kɔ m pɔɔ Edɔmebi nɛ b daa wɔ Nfɔl be ketaŋɛ na ase nseŋ mɔ basa ŋgboŋ kuduaburwa kikɛ. ¹³E daŋ wora benapo be echenakpaana nna ashi Edɔm be efuli so kikɛ nna n shin nɛ basa nɛ b wɔ ndoŋ na kikɛ sɔ ewura Deevid ŋ ki bumo be ewura. Kaplɛkama malɛ nɛ ewura Deevid daŋ yɔ, Enyɛnpe Ebɔrɛ na daa shin nna nɛ e bee kɔ a pɔɔ so.

¹⁴Ewura Deevid daa la Israɛl be efuli so kikɛ be ewura nna nseŋ daa ji asheŋ nɛ amo be ekpa so nsaa wora asheŋ nɛ a niŋi. ¹⁵Zeruwa pibinyɛn Jɔab e daa la benapo na be enimu, nɛ Ahilud malɛ pibinyɛn Jehoshafat daa la esa nɛ e bee sibɛ asheŋ a nase kawɔl to. ¹⁶Ahitub pibinyɛn Zadɔk nɛ Abiata pibinyɛn Ahimɛlɛk e daa la bɔrɛmatapoana. Sɛraya malɛ e daa la ewura be esibɛpo. ¹⁷Jehowada pibinyɛn Bɛnaya e daa la benapo nɛ baa kuŋ ewura Deevid na be enimu, nɛ ewura Deevid malɛ be mbinyɛnsobi daa la mbe ekrachigboŋ.

Ewura Deevid ka kɔ m pɔɔ Ammɔnebi nɛ Siriyaebi so be asheŋ

(2 Samuɛl 10:1-19)

¹K maŋ chɛr ko nɛ Ammɔn be ewura Nahaash wu, nɛ mo pibinyɛn Hanuun ki ewura. ²Ndoŋ nna nɛ ewura Deevid fɛ le: “A daga ŋ ka bugi kagbene n wora Hanuun kelela, fanɛ kananɛ, mo tuto Nahaash gba daŋ bugi mbe kagbene n wora ma kelela na.” Amoso Deevid daŋ shuŋi mbɔ nna fanɛ b ya wora Hanuun edaŋkena. B ka ya fo Ammɔn be kasawule so, ³nɛ Ammɔn be bewurbi na kaŋɛ ewura na le: “Fee fɛ fanɛ fo tuto be bunyaŋ so nɛ ewura Deevid shuŋi basa ere fanɛ b ba wora fo edaŋkena ere a? Manɛ loŋ so nna! E shuŋi bumo nna nɛ b ba dara anyi be efuli ere saŋɛ na so e beeŋ ba kɔ m pɔɔ anyi so!”

⁴Ndoŋ nna nɛ Hanuun shin nɛ b pɛ Deevid be mbɔ na n she bumo be ntɔl nseŋ ku bumo be epiŋi be aya ase n ya fo bumo be nshɛr to nseŋ yige bumo nɛ b choŋ. ⁵Nɛ mbɔ na fin kananɛ baaŋ naŋ bɛta n yɔ epe ŋ gben ŋkpal anishinyɔr so. Ewura Deevid ka nu kusɔ nɛ k wora na nɛ e shuŋi n ya kaŋɛ mbɔ na fanɛ b ya kaa wɔ Jɛriko n ya fo jemanɛ nɛ bumo be ntɔl na beeŋ kɔr pɔɛŋ nɛ b ba epe.

⁶Ewura Hanun nɛ Ammɔnebi na malɛ ka pin fanɛ ewura Deevid ki bumo doŋ, nɛ b ta gbiti be ndarbi nɛ amo be egbɛ sa fanɛ kilo ŋgboŋ adesa nɛ ana n ya haya egbaŋɛturko nɛ egbaŋɛturko be bediipoana ashi Mɛsopoteemia be efuli so nɛ Maaka nɛ Zoba nɛ a la Siriyaebi be efuli na. ⁷Egbaŋɛturko nɛ amo be bediipo ŋgboŋ adesa nɛ anyɔ nɛ b daŋ haya na, nɛ Maaka be ewura be benapo e daŋ ba wora bumo be keyi to m mata Mɛdiba. Nɛ Ammɔn be benapo na malɛ lar bumo be nde to n ya bela ase nɛ b kɔ kena.

⁸Ewura Deevid ka nu kusɔ nɛ k bee wora na, nɛ e shuŋi Jɔab nɛ mbe benapo kikɛ nɛ b ya tu bumo. ⁹Nɛ Ammɔn be benapo kre kena n yili bumo be kade Raba be kabunagboŋ na ekpa nɛ Siriya be benapoana na malɛ kre n yili kade na be laŋgar.

¹⁰Jɔab ka wu fanɛ mo doŋana na wɔ mbe anishito nɛ kaman kikɛ na, nɛ e lara Israɛl be benapo lempo na fanɛ b ya kɔ Siriyaebi na, ¹¹nseŋ shin mo sipo Abishai malɛ juŋkpar benapo nɛ b ka na n ya kaa kɔ Ammɔnebi na. ¹²Le nɛ Jɔab kaŋɛ Abishai: “Fo baŋ wu fanɛ Siriyaebi na bee pɔɔ ma so, fo wora ania m ba chɛ ma to, nɛ Ammɔnebi na kaa pɔɔ fo alɛ so, ma alɛ beeŋ ba chɛ fo to. ¹³Baa kɔ eleŋ nsaa leŋ fo kumo to kpakpa! Men shin nɛ an pere kenishi ŋ kɔ n sa anyi be basa nɛ Ebɔrɛ be nde, nɛ Enyɛnpe Ebɔrɛ be aparsheŋ e wora.”

¹⁴Ndoŋ nna nɛ Jɔab nɛ mbe benapo yɔ nɛ b ya kɔ Siriyaebi na kena, nɛ b shile. ¹⁵Ammɔnebi na ka wu fanɛ Siriyaebi na bee shile, nɛ bumo alɛ gba lara keya fuful Abishai nɛ mbe benapo be anishito n shile n luri kade to. Ndoŋ nna nɛ Jɔab bɛta n yɔ Jerusalɛm.

¹⁶Siriyaebi na ka wu fanɛ Israɛlebi na pɔɔ bumo so na nɛ b shuŋi n tre Siriyaebi nɛ b wɔ lɔrgboŋ nɛ baa tre Yufreetes na be kaba ndoŋ na. Shobak nɛ e bee juŋkpar Zoba be ewura Hadadeza be benapo na e daa la bumo be ejuŋkparpo. ¹⁷Ewura Deevid ka nu loŋ nɛ e shin nɛ Israɛl be benapo na kikɛ chala abar so n dii Jɔɔdan be Lɔr na, n ya tu Siriyaebi na. Kena na ka fara na, ¹⁸nɛ Israɛlebi na ju m buu Siriyaebi be benapo na so nɛ ewura Deevid nɛ mbe benapo mɔ Siriyaebi na be egbaŋɛturkodiipo ŋgboŋ ashunu nɛ benapo nɛ b na ayaso malɛ ŋgboŋ adena. B daŋ mɔ Shobak nɛ e la Siriyaebi be benapo be enimu na gba kena na to nna. ¹⁹Bewura mo nɛ b daa bɛ ewura Hadadeza so na ka pin fanɛ Israɛlebi na pɔɔ bumo so nɛ b fara a fin kagbenewushi ewura Deevid kutɔ, hale n shin nɛ e ki bumo be ewura. Kumo be kaman nɛ Siriyaebi na kini fanɛ b maaŋ naŋ chɛ Ammɔnebi na to kikɛ.

Ewura Deevid ka kɔ n sɔ Raaba be asheŋ

(2 Samuɛl 12:26-31)

¹Dɔchubɔrɛ be saŋɛ nɛ bewura bee yɔ kena to na nɛ Jɔab juŋkpar Israɛl be benapo nɛ e ya kɔ n sɔ Ammɔn be kasawule. Ewura Deevid bre daŋ shir a wɔ Jerusalɛm nna. Benapo na daŋ pugi ŋ kulti kadegboŋ nɛ baa tre Raaba na nna n wɔtɔ ŋ kɔ m mur kumo. ²Kumo be kaman nɛ ewura Deevid yɔ Raaba n ya ta bumo be kegbir nɛ baa tre Mɔlɛk na be kuwurwuro nɛ b ta shuwa nɛ amo be egbɛ sa fanɛ kilo adesa nɛ ana n lɔŋɛ na. Kuwuro na to daa kɔ kemaŋkanibi lela ko nna nɛ ewura Deevid ta kumo m mata mbe kuwurwuro so. E daŋ tintiŋ nna m muu kade na to be asɔ lela kikɛ gba n yɔ. ³Nseŋ tintiŋ kade na to be basa nɛ baa ta ekapɛnta be nsaŋɛgboŋ nɛ abɛlso be ntekpa nɛ akpanfu a shuŋ. Loŋ koŋwule na nɛ e daŋ wora nde nɛ a wɔ Ammɔn be efuli so na kikɛ. Kumo be kaman nɛ mo nɛ mbe benapo bɛta n yɔ Jerusalɛm.

⁴Kede be kaman nɛ Israɛlebi na kɔ Filistiebi na kena ashi Gɛza. Loŋ be kena na to nɛ Sibikai nɛ e shi Husha na mɔ kanyɛn tenteŋ gboŋgboŋi ko nɛ baa tre Sipaya na nseŋ pɔɔ Filistiebi na so.

⁵Kena ko ka naŋ koso Israɛlebi na nɛ Filistiebi na be kefɛato nɛ Jair pibinyɛn Ɛlhanan mɔ Lami nɛ e la Goliɛf nɛ e shi Gaaf na mo da na. Mbe kekpa be kedibi be bumburuŋ daa du fanɛ keyapuye nna.

⁶Kena nyɔsopo ka naŋ koso ashi Gaaf, nɛ kanyɛn tenteŋ gboŋgboŋi ko nɛ e la Filisti be enapo nsaa kɔ ashilbi nɛ anashibi asheshe wɔ ndoŋ. E daa la dra na be basa tenteŋ gboŋgboŋiana nɛ baa tre Rafa na be kenana nna. ⁷Mo e daŋ wora Israɛlebi na eyurto nɛ ewura Deevid mo da Shamaa pibinyɛn Jonatan mɔ mo na.

⁸Basa asa nɛ ewura Deevid nɛ mbe benapo mɔ ere kikɛ daa la Gaaf be basa tenteŋ gboŋgboŋi na be kenana nna.

Ewura Deevid ka karga mbe basa be asheŋ

(2 Samuɛl 24:1-25)

¹Setani daa sha kebar tɔrɔ Israɛl be basa so nna, amoso e daŋ sa ewura Deevid nfɛra nna fanɛ e karga basa na. ²Ndoŋ nna nɛ ewura Deevid kaŋɛ Jɔab nɛ benimuana na le: “Meeŋ ya yili Dan be kade to ashi efuli na so be kelargato be esoso ŋ karga Israɛlebi na kikɛ n ya fo Bɛshiba ashi kelargato be kaseto. Saŋɛ na so meeŋ pin bumo nɛ b fo kena to be keyɔ be kɔnɔ.”

³Nɛ Jɔab kaŋɛ ewura Deevid le: “Yiramu, hale nɛ Enyɛnpe fo Ebɔrɛ na shin nɛ Israɛl be benapo wora kishi n ti so fanɛ ntuŋ kalfa a chɔ kananɛ b du naniere gba bumo kikɛ kra la fo nyɛrbi nna. Manɛ e ba nɛ fee sha fanɛ fo wora le be kesheŋ nɛ k maŋ shi Ebɔrɛ kutɔ ere n shin nɛ nfɛra lubi ere e ba efuli ere so?” ⁴Ama ewura Deevid kini kechɛrga mbe nfɛra nseŋ shin nɛ Jɔab nu n sa mo nseŋ ya karga Israɛl be benapo na nseŋ bɛta m ba Jerusalɛm, ⁵m ba kaŋɛ ewura Deevid fanɛ benapo nɛ b fo kena be kekɔ ashi Israɛl be efuli so wɔ ŋgboŋto ŋgboŋto be kagboŋ koŋwule nɛ ŋgboŋ kalfa, nɛ Juda malɛ be benapo la ŋgboŋ alfa ana nɛ adushunu. ⁶Ŋkpal ewura na be kusɔ nɛ e kaŋɛ na ka daŋ maŋ par Jɔab so, e daa maŋ karga Livai nɛ Bɛnjamin bre be eyiri na.

⁷Ŋkpal ewura Deevid ka shin nɛ b karga benapo na so Ebɔrɛ daŋ nya agbo nna nseŋ gberge Israɛlebi kusoe. ⁸Ndoŋ nna nɛ ewura Deevid kaŋɛ Enyɛnpe Ebɔrɛ le: “Kusɔ nɛ n wora ere bee ŋini nna fanɛ n wora kulubi gboŋgboŋi. Amoso jande, ta m paŋ ma ŋkpal manɛ so n wora kawulisheŋ.”

⁹Ndoŋ nna nɛ Enyɛnpe Ebɔrɛ kaŋɛ anebi Gad le: ¹⁰“Ya kaŋɛ Deevid fanɛ e lara asɔ asa nɛ mee sa mo ere to be kumo nɛ e bee sha fanɛ n ta ŋ gberge mo kusoe.”

¹¹Ndoŋ nna nɛ anebi Gad yɔ ewura Deevid kutɔ n ya kaŋɛ mo kusɔ nɛ Enyɛnpe Ebɔrɛ kaŋɛ na. E yɛ: “Asɔ asa ere to be kumo nɛ feeŋ ba sha? ¹²Akoŋgboŋ be ketɔr fo kasawule so nfɛ asa ŋko fo keshile fo doŋana afɔl asa ŋko kulɔ be aleblawu ko be keba fo kasawule so m ba mɔ basa nchɛnsa? Fɛ kumo be asheŋ nseŋ kaŋɛ ma kusɔ nɛ fee sha fanɛ ŋ kaŋɛ Enyɛnpe Ebɔrɛ.”

¹³Ndoŋ nna nɛ ewura Deevid kaŋɛ Gad le: “N wɔ kagbenejija be kebaawɔtɔ to nna ama maa sha dimɛdi ka gberge ma kusoe. Ŋkpal Enyɛnpe Ebɔrɛ ka bee wu kuwɔr so, mo gbagba e gberge ma kusoe.”

¹⁴Amoso Enyɛnpe Ebɔrɛ daŋ shin nna nɛ kulɔ be aleblawu ba Israɛlebi so nɛ bumo be basa ŋgboŋ adushunu kikɛ wu. ¹⁵Enyɛnpe Ebɔrɛ ka shuŋi malaika fanɛ e ya mur Jerusalɛm na, nɛ kuwɔr naŋ pɛ mo nɛ e chɛrga mbe nfɛra a yɔ basa na be kasogberge be kaplɛa so nseŋ kaŋɛ malaika nɛ e bee mɔ bumo na le: “K nyalɛ loŋ, Lara fo enɔ ashi bumo be asheŋ to!” Kumo be jemanɛ na nɛ Malaika na teŋ fo Aruna nɛ e shi Jerusalɛm na be kugooro na ase. ¹⁶Deevid ka wu malaika na ka wɔ esoso ŋ keta mbe tokobi nɛ e mur Jerusalɛm na, nɛ mo nɛ Israɛl be bejuŋkparpoana nɛ b buu kagbenejijaso be asɔbuuso na tɔr epun so n dese kasawule. ¹⁷Nɛ Deevid kule Enyɛnpe Ebɔrɛ ŋ kaŋɛ le: “Ma e wora n jija nseŋ wora kulubi ŋkpal ŋ ka shin nɛ baa karga basa na so. Nɛ manɛ nɛ bebɔlpo ere malɛ wora? N nyɛnpe nɛ ma Ebɔrɛ. Ma nɛ ma kanaŋ e daga fo ka gberge kusoe nseŋ yige basa ere bre.”

¹⁸Nɛ Enyɛnpe Ebɔrɛ be malaika na kaŋɛ Gad fanɛ e ya kaŋɛ ewura Deevid le: “Yɔ Aruna be kugooro nɛ baa bri asɔ na so n ya pɔr bɔrɛsure n sa Enyɛnpe Ebɔrɛ na.” ¹⁹Ndoŋ nna nɛ ewura Deevid wora kusɔ nɛ Enyɛnpe Ebɔrɛ bɔla anebi Gad so ŋ kaŋɛ mo na. ²⁰Aruna nɛ mbe mbinyɛnsobi ana ka wɔ kugooro na so a bri ayu nseŋ wu malaika na, nɛ mbe mbinyɛnsobi na shile n ya ŋana. ²¹Aruna ka wu ewura Deevid ka bee ba mo kutɔ na, nɛ e lar kugooro na so n ya gbir kasawule Deevid be anishito ŋ kur mbe kumu n yuu to. ²²Ndoŋ nna nɛ ewura Deevid kaŋɛ mo le: “M ba nna nɛ m ba tɔ fo kugooro ere m pɔr bɔrɛsure n sa Enyɛnpe Ebɔrɛ, saŋɛ na so e beeŋ ju aleblawu ere ashi anyi so. Meeŋ tɔ kumo kanaŋkama nɛ feeŋ fa kumo.”

²³Nɛ Aruna kaŋɛ le: “Yiramu! Ta kumo n wora kusɔ kama nɛ kepar fo n sa Enyɛnpe Ebɔrɛ na. Ana gba nde! Feeŋ tiŋ n ta amo n lara sarga bɔrɛsure na so nseŋ ta ndibi nɛ b kɔ a bri ayu na malɛ m puga edɛ nseŋ ta ayu malɛ n lara ajibi be sarga. Amo kikɛ la feya nna.”

²⁴Nɛ ewura Deevid malɛ kaŋɛ mo le: “M-m, meeŋ ka amo be kukɔ n sa fo ŋkpal manɛ so m maa sha k lara sarga nɛ m maŋ bɔ kukɔ kumo so n sa Enyɛnpe Ebɔrɛ.” ²⁵Kede be kaman nɛ e tɔ kugooro na Aruna kutɔ shuwa be ndarbi alfa ashe. ²⁶E daŋ pɔr bɔrɛsure ndoŋ nna n sa Enyɛnpe Ebɔrɛ nseŋ lara esarga chɔɔso nɛ kɔnɔkoŋwuleso be esarga, nɛ Enyɛnpe Ebɔrɛ shin nɛ edɛ shi esoso m ba chɔɔ sarga na ashi bɔrɛsure na so.

²⁷Ndoŋ nna nɛ Enyɛnpe Ebɔrɛ kaŋɛ malaika na fanɛ e ta mbe tokobi na n wɔtɔ kumo be efar to, nɛ e wora loŋ. ²⁸Ewura Deevid ka wu malaika na ka wora loŋ a ŋini fanɛ Enyɛnpe Ebɔrɛ nu mbe kekule na, nɛ e naŋ lara esarga n ti so n sa Enyɛnpe na ashi Aruna be kugooro na so. ²⁹Enyɛnpe Ebɔrɛ be wajɛbu nɛ Mosis daŋ yuu ashi kiyi na to nɛ bɔrɛsure nɛ e pɔr nɛ b daa lara sarga chɔɔso kumo so na kikɛ daa wɔ kakpa nɛ baa bunyaŋ Enyɛnpe Ebɔrɛ loŋ be saŋɛ na ashi Gibiɔn na nna; ³⁰ama ewura Deevid bre daa maŋ tiŋ n yɔ ndoŋ n ya bunyaŋ Ebɔrɛ ŋkpal e ka daa ŋana Enyɛnpe Ebɔrɛ be malaika na be tokobi na so.

¹Amoso le nɛ ewura Deevid daŋ kaŋɛ: “Kugooro ere so nfe ashi Jerusalɛm nɛ baaŋ pɔr Enyɛnpe Ebɔrɛ be bɔrɛlambu na, nɛ bɔrɛsure nɛ Israɛlebi beeŋ baa lara esarga kumo so na gba e baa wɔ nfe.”

B ka wora bɔrɛlambu na be kepɔr be shiriya be asheŋ

²Ŋkpal loŋ so ewura Deevid daŋ shin nɛ befɔ nɛ b wɔ Israɛl na kikɛ daŋ ba shɛr Jerusalɛm nna, nɛ e shin nɛ bumo be beko bee kuya ajembu be ebirkesi nɛ a shishi nɛ b pɔr bɔrɛlambu na. ³E daŋ fin abɛlso damta nɛ baaŋ ta n lɔŋɛ anyembi nɛ asɔ nɛ baaŋ ta ŋ gbir akuloŋ m mata nna, nseŋ bar danyaŋ damta nɛ b maŋ tiŋ ŋ karga amo be egbɛ. ⁴E daŋ ŋ kla nna n shoŋi Tayɛ nɛ Sidɔn be basa nɛ b bar mo sida be ndibi damta. ⁵Le nɛ ewura Deevid daŋ kaŋɛ: “Bɔrɛlambu nɛ m pibinyɛn Sɔlɔmɔn beeŋ pɔr na beeŋ baa walɛ m baŋ so nɛ durnya kikɛ e nu kumo be asheŋ. Ama ŋkpal e ka kraa la kebia a maŋ naŋ pin asɔ damta to na so, a daga fanɛ n wora kumo be shiriya n yili mo.” Amoso ewura Deevid daŋ fin bɔrɛlambu na be kapɔr be asɔ damta nna n yili pɔɛŋ nseŋ wu.

⁶Ndoŋ nna nɛ ewura Deevid shuŋi n tre mo pibinyɛn Sɔlɔmɔn ŋ kaŋɛ mo fanɛ e pɔr bɔrɛlambu n sa Enyɛnpe, Israɛl be Ebɔrɛ na. ⁷Le nɛ Deevid kaŋɛ mo: “M pibinyɛn, n daa sha fanɛ m pɔr bɔrɛlambu nna m maŋkura Enyɛnpe Ebɔrɛ na. ⁸Ama Ebɔrɛ daŋ kaŋɛ ma nna fanɛ ŋkpal ŋ ka kɔ ana damta nseŋ mɔ basa ga na so, e maaŋ shin nɛ m pɔr bɔrɛlambu n sa mo. ⁹Enyɛnpe na malɛ teŋ juŋkpar n nase le be kɔnɔ n sa ma: Fo pibi kaŋ ba ki ewura meeŋ shin nɛ kagbenewushi e baa wɔ mbe kasawule so. Kebia na be ketre e naŋ ba la Sɔlɔmɔn ŋkpal manɛ so mbe kuwurji be saŋɛ nɛ meeŋ kuŋ Israɛl nɛnɛ nɛ kagbenewushi e baa wɔ kumo to. ¹⁰Mo e naŋ pɔr bɔrɛlambu n sa ma. Meeŋ tre mo m pibi nɛ mo alɛ gba e tre ma mo tuto. Mbe mbia e naa baa ji Israɛl be kuwura a ka a sa abar mbaanaayɔ.”

¹¹Kumo be kaman nɛ Deevid yɛ: “M pibinyɛn Sɔlɔmɔn, Enyɛnpe fo Ebɔrɛ na e baa wɔ fo kutɔ n shin nɛ kɔnɔ nɛ e nase fanɛ e beeŋ chɛ fo to nɛ fo pɔr bɔrɛlambu n sa mo na e bɔlɔ so. ¹²Enyɛnpe nɛ e la fo Ebɔrɛ na e sa fo kanyiasheŋ nɛ nfɛra nɛ fo baa wora asheŋ amo be ekpa so, nseŋ juŋkpar Israɛl ashi mbe mbra be ekpa so nɛnɛ. ¹³Fo baa bɛ mbra nɛ keŋini nɛ Enyɛnpe Ebɔrɛ ta n sa an nananyɛn Mosis dra dra na fanɛ e ta n sa Israɛlebi na so bre, asheŋ beeŋ nyalɛ n sa fo. Ama baa yil to kpakpa a leŋ fo kumu to nsaa maa lɔ kufu. ¹⁴N wora ania n gama asɔ damta nɛ a daga fanɛ b ta m pɔr bɔrɛlambu na abar so. Ŋ kɔ shuwa nɛ amo be egbɛ sa fanɛ kilo ŋgboŋto ŋgboŋto be ŋgboŋ asa nɛ ŋgboŋ alfa ana, nɛ gbiti nɛ amo alɛ be egbɛ sa fanɛ kilo ŋgboŋto ŋgboŋto be ŋgboŋ adesa nɛ ana, nɛ fo ta n lɔŋɛ bɔrɛlambu na. Ŋ kɔ ndibi nɛ ajembu lela nɛ danyaŋ nɛ abɛlso damta nɛ maaŋ tiŋ ŋ karga amo be egbɛ gba. Ama fo alɛ gba kraŋ beeŋ tiŋ m bishi kusɔ kama nɛ fee sha n ti so. ¹⁵Men kɔ beshumpo damta. Basa nɛ baa bure ajembu to nɛ bepɔrpo nɛ ekapɛnta nɛ basa damta nɛ b nyi enɔ to be ashuŋ damta ¹⁶nsaa tiŋ a ta shuwa nɛ gbiti nɛ danyaŋ nɛ kebɛlso a lɔŋɛ asɔ. K daga fanɛ men fara kushuŋ na naniere nɛ Enyɛnpe Ebɔrɛ na e chɛ menyi to.”

¹⁷Kede be kaman nɛ ewura Deevid kaŋɛ Israɛl be bejuŋkparpoana nna fanɛ b chɛ Sɔlɔmɔn to. ¹⁸E yɛ: “Enyɛnpe men be Ebɔrɛ na e chɛ menyi to nseŋ sa menyi kagbenewushi ekpa kama so. E chɛ ma to nɛ ŋ kɔ m pɔɔ basa nɛ b daa wɔ kasawule na so nseŋ shin nɛ baa shuŋ ma nɛ Enyɛnpe Ebɔrɛ na. ¹⁹Men ta men be ŋgbene nɛ men be ayoyu kikɛ a shuŋ Ebɔrɛ. Men fara a pɔr bɔrɛlambu na saŋɛ na so menyeeŋ ta Enyɛnpe Ebɔrɛ be ŋkre be deka na nɛ asɔ cheembi nɛ b kɔ a bunyaŋ Enyɛnpe Ebɔrɛ na n ya yili kumo to.”

¹Deevid ka bel, nɛ e ta mo pibinyɛn Sɔlɔmɔn ŋ ki Israɛl be ewura.

Livaiebi na be kushuŋ be asheŋ

²Saŋko ka ba fo, nɛ ewura Deevid shin nɛ Israɛlebi be bejuŋkparpoana na nɛ bɔrɛmatapoana na nɛ Livaiebi na kikɛ ba shɛr abar so. ³E daŋ karga Livaiebi be benyɛn nɛ b daŋ fo nfɛ adesa ŋko m baŋ so na nna. Bumo kikɛ daa la basa ŋgboŋ adesa nɛ aburwa nna. ⁴E daŋ shin nna nɛ Livaiebi na be basa ŋgboŋ adunyɔ nɛ ana bee shuŋ bɔrɛlambu na to nɛ basa ŋgboŋ ashe malɛ la nwɔlsibɛpoana nɛ demujipoana, ⁵nɛ basa ŋgboŋ ana malɛ bee kuŋ bɔrɛlambu na nɛ ŋgboŋ ana malɛ bee ta alaŋsɔ nɛ ewura sa bumo na a laŋ a maŋkura Enyɛnpe Ebɔrɛ.

⁶Ewura Deevid daŋ barga Livaiebi na to mbuna ntuŋ asa nna. Amo e la Gɛshɔn be kabuna nɛ Kohaf be kabuna nɛ Mɛrari be kabuna.

⁷Ladan nɛ Shimei daŋ shi Gɛshɔn be kabuna nna. ⁸Ladan daa kɔ mbinyɛnsobi asa nna. Bumo e daa la Jehiɛl nɛ Zetam nɛ Jowɛl. Bumo e daa la Ladan be kabuna na be benimu. ⁹Shimei malɛ daa kɔ mbinyɛnsobi asa nna. Bumo e la Shelomɔf nɛ Haziɛl nɛ Haran. ^10-11Bede be kaman nɛ Shimei naŋ nya mbinyɛnsobi ana. Bumo e la Jahaf nɛ Zina nɛ Jewush nɛ Beriya. Jewush nɛ Beriya bre be mbia daa maŋ shi amoso b daŋ ta bumo nna m ber abar so fanɛ kanaŋ koŋwule be basa.

¹²Kohaf daa kɔ mbinyɛnsobi ana nna. Bumo e daa la Amram nɛ Izha nɛ Hibrɔn nɛ Uziɛl. ¹³Amram nɛ e daa la mo pibinyɛn nimuso na be mbia e daa la Ɛɛrɔn nɛ Mosis. Ɛɛrɔn nɛ mbe kaman to ebi nɛ b daŋ lara n yili fanɛ b baa keni asɔ cheembi na so mbaanaayɔ. Bumo alɛ e naaŋ baa chɔɔ duwu saŋɛ so nɛ baa bunyaŋ Enyɛnpe Ebɔrɛ na, nsaa shuŋ mo a kule mo fanɛ e baa nɛfa mbe basa. ¹⁴Ama Mosis nɛ e la Ebɔrɛ be esa na be mbinyɛnsobiana bre, daŋ ti Livaiebi na so nna. ¹⁵Mosis be mbinyɛnsobi e daa la Gɛshɔm nɛ Eliaza. ¹⁶Gɛshɔm pibinyɛn nimuso e daa la Shebuwɛl. ¹⁷Ebinyɛn koŋwule nɛ Eliaza daa kɔ. Mbe ketre e daa la Rahabiya. Rahabiya bre daa kɔ kaman to ebi damta nna.

¹⁸Kohaf pibinyɛn nyɔsopo e daa la Izha nɛ Izha pibinyɛn nimuso daa la Shelomif. ¹⁹Hibrɔn nɛ e la Kohaf pibinyɛn sasopo na daa kɔ mbinyɛnsobi ana nna. Bumo e la Jeriya nɛ Amariya nɛ Jehaziɛl nɛ Jekamiɛm. ²⁰Uziɛl nɛ e la Kohaf pibinyɛn nasopo na daa kɔ mbinyɛnsobi anyɔ nna. Bumo e la Maika nɛ Ashiya.

²¹Mɛrari daa kɔ mbinyɛnsobi anyɔ nna. Bumo e la Maali nɛ Mushi. Maali gba daa kɔ mbinyɛnsobi anyɔ nna. Bumo e daa la Eliaza nɛ Kish. ²²Eliaza bre daa maŋ kurge mbinyɛnsobi, mbichesobi nawule nɛ e daŋ kurge nɛ bumo alɛ kil bumo tutokar Kish be mbia. ²³Mushi nɛ e la Mɛrari pibinyɛn nyɔsopo na daa kɔ mbinyɛnsobi asa nna. Bumo e daa la Maali nɛ Eda nɛ Jerɛmɔf.

²⁴Livai be kabuna nɛ mbe kaman to ebi nɛ b daŋ karga nna na. B daŋ shin nna nɛ bumo be bumo nɛ b fo nfɛ adunyɔ ŋko m baŋ so na bre daa shuŋ Enyɛnpe Ebɔrɛ be bɔrɛlambu na to.

²⁵Ŋkpal manɛ so Deevid yɛ, Enyɛnpe Israɛl be Ebɔrɛ na sa mbe basa kagbenewushi, mo alɛ Ebɔrɛ na beeŋ baa wɔ Jerusalɛm mbaanaayɔ. ²⁶Amoso Livaiebi na maaŋ naa sulɔ Enyɛnpe Ebɔrɛ be wajɛbu na nɛ asɔ nɛ b kɔ ashuŋ kumo to na a nite. ²⁷Kusɔ nɛ Deevid yili e la fanɛ Livaiebi kama nɛ b fo nfɛ adunyɔ na daga fanɛ b sibɛ bumo be atre nɛ b fara a shuŋ. ²⁸Livaiebi na be kushuŋ e daa la kebaachɛ Ɛɛrɔn be kaman to ebi to ashi Enyɛnpe Ebɔrɛ be bɔrɛlambu na be kushuŋ to. Bumo e naŋ baa lɔŋɛ kumo nsaa keni kumo be alɔnɛ nɛ ebuana nɛ asɔ cheembi na so nɛ a saa maa wora eyurpi. ²⁹Bumo koŋwule na e naaŋ naa keni bodobodo nɛ b ta n lara sarga n sa Enyɛnpe Ebɔrɛ na, nɛ nyifu nɛ b kɔ a lara sarga na nɛ ekrakashi nɛ a maaŋ kɔ yiisi na so, nsaa wora bodobodo nɛ baa ta n lara sarga na. Bumo koŋwule na e naa karga kusɔ kama, nsaa ta duwu nɛ asɔ warabi nɛ nyifu nɛ ɔlif be ŋku a wea abar to a wora asɔ ashi bɔrɛlambu na to. ³⁰Bumo Livaiebi na e naaŋ baa chɔrɔ Enyɛnpe Ebɔrɛ nsaa boŋ nshɛ e di mo epaŋ kachipurso nɛ kaaseso kikɛ. ³¹Bumo koŋwule na e naŋ baa ta kechɔrɔ a sa Enyɛnpe Ebɔrɛ nsaa di mo epaŋ saŋkama nɛ baa lara kewushiachɛ nɛ kufɔl popɔr be nchɛgboŋ nɛ nchɛgboŋana kikɛ be esarga na. Kushuŋ nɛ b sa Livaiebi be katuŋ kama na e daga fanɛ b baa shuŋ Enyɛnpe Ebɔrɛ na be anishito saŋkama. ³²Saŋko bumo e daa keni Enyɛnpe Ebɔrɛ be wajɛbu na so, ama naniere bre bumo e naa keni bɔrɛlambu na so nsaa chɛ Ɛɛrɔn be kanaŋ nɛ b shi kebɔrɛmata be kanaŋ na to na to a shuŋ Ebɔrɛ be bɔrɛlambu na to.

Bɔrɛmatapoana be kushuŋ be asheŋ

¹B daŋ barga Ɛɛrɔn be kaman to ebi to ntuŋso nna. Ɛɛrɔn daa kɔ mbinyɛnsobi ana nna. Bumo e daa la: Nadab nɛ Abihu nɛ Eliaza nɛ Itama. ²Nadab nɛ Abihu bre daŋ wu nna pɔɛŋ nɛ bumo tuto wu. Bumo alɛ daa maŋ kurge mbinyɛnsobi, amo so nɛ Eliaza nɛ Itama daŋ ki bɔrɛmatapoana na. ³Ewura Deevid daŋ barga Ɛɛrɔn be kaman to ebi na to ntuŋso ntuŋso nna a laŋɛ bumo be kushuŋ be kaplɛa so. Eliaza mo nanabi Zadɔk nɛ Itama mo nanabi Ahimɛlɛk e daŋ chɛ Deevid to m barga bumo to. ⁴B daŋ barga Eliaza be kaman to ebi to ntuŋ kuduashe nna nseŋ barga Itama malɛ be kaman to ebi ntuŋ aburwa ŋkpal manɛ so Eliaza be kaman to ebi daa kɔ benyɛn be bejuŋkparpo damta nna. ⁵Ŋkpal bɔrɛlambu na to be beshumpo nɛ bɔrɛmatapoana ka daa wɔ Eliaza nɛ Itama kikɛ be kaman to ebi to na so, b daa to beeri nna a fin Ebɔrɛ be nfɛra pɔɛŋ nsaa barga bumo be ashuŋ to. ⁶B ka daŋ barga ashuŋ na to n sa ntuŋana na, Natanɛl nɛ e la Livai be esa na pibinyɛn Shemaya e daŋ sibɛ kanaŋ na be ejuŋkparpo nɛ e bee keni katuŋ na so be ketre n nase. Ewura Deevid nɛ mbe benimuana nɛ bɔrɛmatapo Zadɔk nɛ Abiata pibinyɛn Ahimɛlɛk nɛ kabɔrɛmata be nnaŋ na be benimuana nɛ Livai be nnaŋ na kikɛ daa wɔ ndoŋ nna.

^7-18Kananɛ b daŋ barga Bɔrɛmatapoana be ntuŋ adunyɔ nɛ ana na to nɛ b baa shuŋ kebɛso kebɛso nde. Jehowarib naaŋ juŋkpar n shuŋ nseŋ ta Jedaya m bɛso, n ta Harim n ta Seorim n ta Malkija n ta Mijamin n ta Hakkɔz n ta Abija n ta Joshuwa n ta Shekanaya n ta Eliashib n ta Jakim n ta Huupa n ta Jeshibiab n ta Bilga n ta Imma n ta Heziir n ta Hapizɛz n ta Petahiya n ta Jehezkɛl n ta Jakin n ta Gamul nɛ Delaya n ta Mazia.

¹⁹Kananɛ Enyɛnpe Ebɔrɛ nɛ e la Israɛl be Ebɔrɛ na daŋ kaŋɛ bumo nananyɛn Ɛɛrɔn nɛ e yili bumo be ashuŋ ashi bɔrɛlambu na to nna na.

²⁰Livai be kaman to ebi ko malɛ nde.

Shebuwɛl nɛ Jedaya nɛ b la Amram be kaman to ebi na,

²¹nɛ Isshaya nɛ e la Rehabiya be kaman to ebi na;

²²nɛ Shelomɔf nɛ mo tuto daa la Jahaf nɛ mo nananyɛn malɛ la Izha na;

²³nɛ Hibrɔn be mbinyɛnsobi, Jeriya nɛ Amariya;

nɛ Jahaziɛl nɛ Jakamiam nɛ b bɛ abar so kenimu kenimuso na;

²⁴nɛ Shamir nɛ mo tuto la Mika nɛ mo nananyɛn la Uziɛl na;

²⁵nɛ Mika mo da la Isshaya nɛ mo tuto la Zakareya na,

²⁶nɛ Maali nɛ Muushi nɛ Jazaya nɛ bumo tuto daa la Mɛrari na. ²⁷Jaazaya daa kɔ mbinyɛnsobi asa nna. Bumo e la Shoham nɛ Zakuur nɛ Ibri.

^28-29Maali daa kɔ mbinyɛnsobi anyɔ nna. Bumo e la Eliaza nɛ Kish. Eliaza bre daa maŋ kɔ bibinyɛn ama Kish bre daa kɔ ebinyɛn koŋwule, mo e daa la Jeramiil. ³⁰Muushi daa kɔ mbinyɛnsobi asa nna. Bumo e la Maali nɛ Eda nɛ Jerɛmɔf.

Livai be kaman to ebi nɛ b sibɛ bumo be atre mbuna mbuna so nna na.

³¹Kabuna kikɛ be enimu nɛ mo sipo daŋ to beri nna m bishi Ebɔrɛ be nfɛra a laŋɛ kushuŋ nɛ baaŋ baa shuŋ be kaplɛa so, fanɛ kananɛ bumo kurgepoana, bɔrɛmatapoana nɛ b shi Ɛɛrɔn be kanaŋ to daŋ wora na. Ewura Deevid nɛ Zadɔk nɛ Ahimɛlɛk nɛ bɔrɛmatapoana nɛ b shi Livai be kanaŋ to na be anishito nɛ b daŋ wora loŋ.

Bɔrɛlambu to be beshɛbompoana be asheŋ

¹Ewura Deevid nɛ Livaiebi be bejuŋkparpoana daŋ lara Asaf nɛ Heman nɛ Jedutum nna fanɛ b baa la bɔrɛlambu to be beshɛbompo. Bumo e naŋ baa laŋ ejaŋjilaŋ nɛ echakachaka nɛ egoji a maŋkura Ebɔrɛ nsaa juŋkpar basa a bunyaŋ Ebɔrɛ. Basa nɛ b lara fanɛ b baa juŋkpar basa a bunyaŋ Ebɔrɛ na be atre nde.

²Asaf e daa juŋkpar mbe mbinyɛnsobi ana nɛ baa laŋ alaŋsɔ nsaa boŋ nshɛ saŋkama nɛ ewura na bee sha kashɛ be kenu. Bumo e daa la Zakuur nɛ Josɛf nɛ Netaniya nɛ Asharila.

³Jedutum malɛ e daa juŋkpar mbe mbinyɛnsobi ashe nɛ baa laŋ ejaŋjilaŋ nsaa boŋ nshɛ a maŋkura Enyɛnpe Ebɔrɛ na. Bumo e daa la Gedaliya nɛ Zeeri nɛ Jeshaya nɛ Shimei nɛ Hashabia nɛ Matatiya.

⁴Heman bre daa kɔ mbinyɛnso kuduana nna. Bumo e daa la Buukiya nɛ Mataniya nɛ Uziɛl nɛ Shebuwɛl nɛ Jerimɔf nɛ Hananiya nɛ Hanani nɛ Eliata nɛ Gidalti nɛ Romamti Eza nɛ Joshbekasha nɛ Malooti nɛ Hotiir nɛ Mahaziɔf. ⁵Heman daa la ewura na be anebi ko nna nɛ Ebɔrɛ ta mbinyɛnsobi kuduana ere nɛ mbicheso asa n nɛfa mo. ⁶Heman e daa juŋkpar mbe mbia kuduana na nɛ baa laŋ echakachaka nɛ ejaŋjilaŋ a bunyaŋ Enyɛnpe Ebɔrɛ na ashi bɔrɛlambu na to. Ama ewura Deevid gbagba e daa ŋini Asaf nɛ Jedutum nɛ Heman bre kusɔ nɛ k daga fanɛ b wora.

⁷Bumo nɛ bumo braana Livaiebi nɛ bumo kikɛ koso basa alfa anyɔ nɛ aduburwa nɛ aburwa na kikɛ daa nyi nshɛ be keboŋ nɛnɛ nna.

⁸B daa to beri nna a lara ekama be kushuŋ a sa mo. K maŋ tir fanɛ fo la kebia ŋko enimu ŋko eŋinipo ŋko ekoyapo.

^9-31B daŋ barga benyɛn alfa anyɔ nɛ aduburwa nɛ aburwa na to ntuŋ adunyɔ nɛ ana nna nɛ katuŋ kama to la basa kuduanyɔ nsaa kɔ kumo be ejuŋkparpo. Katuŋ kama be ejuŋkparpo be ketre nɛ b daŋ ta n nase kumo, nɛ baa shuŋ bumo be ashuŋ kebɛso kebɛso le. Josɛf be katuŋ e juŋkpar nseŋ ta Gɛdaliya nɛ Zakuur nɛ Zeeri nɛ Netaniya nɛ Buukiya nɛ Asarila nɛ Jeshaya nɛ Mataniya nɛ Shimei nɛ Uziɛl nɛ Hashabia nɛ Shebuwɛl nɛ Matatiya nɛ Jerimɔf nɛ Hananiya nɛ Joshbekasha nɛ Hanani nɛ Malooti nɛ Eliata nɛ Hotiir nɛ Gidalti nɛ Mahaziɔf nɛ Romamti Eza be ntuŋana m bɛso.

Bɔrɛlambu to be bekumpo be asheŋ

¹B daŋ yili mbuna mbuna so nna mbarga bɔrɛlambu na to be bekumpo na to ntuŋ ntuŋ so. Koora pibinyɛn Mɛshɛlemiya nɛ e shi Koora be kabuna na daa la Asaf be kenana nna. ²E daa kɔ mbinyɛnsobi ashunu nɛ b bɛ abar so kenimu kenimuso le. Zakareya nɛ Jedial nɛ Zebadiya nɛ Jafniɛl nɛ ³Elaam nɛ Jehohanan nɛ Eliehonaya.

⁴Obɛd Edɔm gba daa kɔ mbinyɛnsobi aburwa nna. Kananɛ mbe mbinyɛnsobi na bɛ abar so kenimu kenimuso nde. Shemaya nɛ Jehozabad nɛ Jowa nɛ Saaka nɛ Natanɛl ⁵nɛ Ammiɛl nɛ Isaaka nɛ Pelletai.

^6-7Obɛd Edɔm pibinyɛn nimuso Shemaya daa kɔ mbinyɛnsobi ashe nna. Bumo e la Ofni nɛ Refɛl nɛ Obɛd nɛ Elzabad nɛ Elihu nɛ Samakiya. B daa la basagboŋ nna bumo be kanaŋ to ŋkpal kenyi nɛ b daa kɔ so. Mbe mbia anyɔ nɛ b shir kaman na bre e daa kɔ kenyi ga.

⁸Benyɛn adeshe nɛ anyɔ nɛ b nyi kushuŋ nɛnɛ a kɔ eleŋ nɛ b shuŋ bekumpo be kushuŋ ashi bɔrɛlambu na to na daŋ shi Obɛd Edɔm be kabuna nna.

⁹Benyɛn kuduaburwa nɛ bumo alɛ gba nyi kushuŋ nɛnɛ e daŋ shi Mɛshɛlemiya be kabuna.

^10-11Hoosa nɛ e shi Mɛrari be kabuna na daa kɔ mbinyɛnsobi ana nna. Bumo e la Shimri nɛ Hilkiya nɛ Tebaliya nɛ Zakareya. Hoosa daŋ ta Shimri nna ŋ ki bumo be ejuŋkparpo, ama mannɛ mo e daa la mbe wurkoŋ. Basa kuduasa e daŋ shi Hoosa be kanaŋ to a kuŋ bɔrɛlambu na.

¹²B daŋ yili kanaŋ kanaŋ so nna mbarga bɔrɛlambu na to be bekumpo na to ntuŋ ntuŋ so nseŋ sa bumo ashuŋ fanɛ bumo braana Livaiebi nɛ b ka na. ¹³Kanaŋ kama daa to beri nna a pin kabuna nɛ baaŋ baa keni so. K maŋ tir kananɛ kanaŋ na sa. ¹⁴Shelemaya e daa keni epeŋilarkpa be kabuna na so nɛ mo pibinyɛn Zakareya nɛ e daa sa kasotoji lela na daa keni kelargato be esoso be kaba so be kabuna na so. ¹⁵Kelargato be kaseto be kaba so be kabuna nɛ Obɛd Edɔm daa keni so nɛ mbe mbinyɛnsobiana malɛ bee keni ebuana nɛ bumo be asɔ bee yili to ashi loŋ be kabuna ase na so. ¹⁶Shuupim nɛ Hoosa nɛ b daŋ ta epeŋitɔrkpa be kabuna na nɛ Shalekɛf be kabuna nɛ k wɔ esoso be kubɔrbi na ase na n sa nɛ baa keni so. B daŋ barga kushuŋ na to nna n sa bekumpo na nɛ baa shuŋ kumo kebɛso kebɛso. ¹⁷Karechɛ kama bekumpo ashe e daa keni bɔrɛlambu na be epeŋilarkpa be kaba so nɛ bena malɛ bee keni kumo be kelargato be esoso be kaba so nɛ bekumpo ana malɛ bee keni kelargato be kaseto be kaba so. Bekumpo ana malɛ e daa keni ebuana nɛ baa ta bumo be asɔ a yili to na so. Basa anyɔ anyɔ e daa keni ebu koŋwule so. ¹⁸Bekumpo ana e daa keni kubɔrbi nɛ k bee yɔ kelɔnɛ nɛ k dese epeŋitɔrkpa be kaba so na so nɛ benyɔ malɛ bee keni kelɔnɛ na gbagba so. ¹⁹Mbuna be kekeniso be kushuŋ nɛ b ta n sa Koora nɛ Mɛrari be mbunaebi nna na.

Bɔrɛlambu to be ashuŋ nɛ a ka na be asheŋ

²⁰Livaiebi nɛ bumo kurgepoana la Koora nɛ Mɛrari be mbunaebi na e daa keni bɔrɛlambu na to be ebuana nɛ baa yili amansherbi nɛ asɔ nɛ b kɔ a shuŋ Ebɔrɛ amo to na so. ²¹Ladan nɛ e shi Gɛshɔn be kabuna na pibinyɛn e daa la Jehiɛl. Mo alɛ be kaman to ebi be galenga daa la nnaŋ be benimuana nna ashi kabuna na. ²²Jehiɛl be mbinyɛnsobi Zetam nɛ Jowɛl e daa keni bɔrɛlambu na be amansherbi nɛ asɔ be ebuana so.

²³Amram nɛ Iza nɛ Hibrɔn nɛ Uziɛl nɛ b shi Koha be kabuna na gba daŋ ti basa nɛ baa keni amansherbi nɛ asɔ be ebuana so na nna.

²⁴Shebuwɛl daa la Mosis pibinyɛn Gɛshɔm be kenana nna. Mo e daa la bɔrɛlambu na to be amansherbi nɛ asɔ be ebuana be bekenipoana na be enimu. ²⁵Gɛshɔm mo da Eliaza mo kurgepo e daa la Shelomif. Eliaza pibi e daa la Rehabiya, nɛ Rehabiya malɛ pibi daa la Jeshaya nɛ Jeshaya malɛ pibi daa la Joram nɛ Joram malɛ pibi daa la Zikri nɛ Zikri malɛ pibi daa la Shelomif. ²⁶Shelomif nɛ mo kurgepoana e daa keni ŋkɛ kama nɛ ewura Deevid nɛ kanaŋ be benimuana nɛ mbuna be bejuŋkparpoana nɛ benapo be benimuana ta m ba sa Ebɔrɛ na so. ²⁷Saŋkama nɛ b kɔ kena n sɔ asɔ, baa ta amo be alela nna m ba bɔrɛlambu na to m ba bɔɔ Ebɔrɛ enɔ. ²⁸Shelomif koŋwule na nɛ mo kurgepoana e naa keni ŋkɛ nɛ anebi Samuɛl nɛ ewura Sɔɔl nɛ Neer pibinyɛn Abna nɛ Zeruwa pibinyɛn Jɔab bar bɔrɛlambu na to na nɛ amo nɛ basa pɔtɛ bar na kikɛ gba so. ²⁹Chanania nɛ e la Iza be kenana na nɛ mbe mbinyɛnsobiana e daa la ekrachi nimuso a sibɛ asheŋ a nase nwɔl to nseŋ naa la demujipoana ashi Israɛl be efuli so, ama b daa maa shuŋ bɔrɛlambu na bre to.

³⁰Hashabia nɛ e shi Hibrɔn be kanaŋ to na nɛ mo kurgepoana kagboŋ nɛ alfa ashunu nɛ b kɔ kenyi ga na e daa juŋkpar kabɔrɛshuŋ nɛ ekrachisheŋ kikɛ ashi Israɛl be efuli nɛ k wɔ Jɔɔdan be lɔr na be epeŋitɔrkpa be kaba so na. ³¹Jeriya e daa la Hibrɔn be kaman to ebi be ejuŋkparpo. Deevid ka daŋ ji kuwura na be kafɛ adenasopo to nɛ b keni Hibrɔn be kaman to ebi to nɛnɛ n wu fanɛ benapo lempo ko shi kanaŋ na to a wɔ Jaza ashi Giliad be kasawule so. ³²Ndoŋ nna nɛ ewura Deevid lara Jeriya be kanaŋ to be bejuŋkparpo nɛ baa tiŋ a wora asheŋ nɛnɛ na be basa ŋgboŋ anyɔ nɛ alfa ashunu nɛ baa juŋkpar kabɔrɛshuŋ nɛ ekrachi be asheŋ ashi Israɛl be kasawule nɛ k wɔ Jɔɔdan be lɔr na be epeŋilarkpa be kaba so nsaa la Ruben nɛ Gad nɛ Manase be yiri be bargato be nsawule na so.

Benapo be katuŋ be asheŋ

¹Kufɔl kikɛ benyɛn ŋgboŋ adunyɔ nɛ ana nɛ b daa lara nɛ baa shuŋ fanɛ benapo ashi Israɛl be efuli so. Kanaŋ to be bejuŋkparpoana nɛ benapo be benimu nɛ ewura be beyaasepo gba daŋ ti loŋ be basa na so a shuŋ.

^2-15Basa nɛ b daa juŋkpar benapo na kufɔl kufɔl e daa la,

Zabdiɛl pibinyɛn Jashobiam nɛ e shi Pɛrɛs be kabuna na e daa juŋkpar benapo ŋgboŋ adunyɔ nɛ ana na kufɔl juŋkparso na to.

Dodai nɛ e la Ahohi be kanaŋ to be esa na e daa la benapo na be enimu kufɔl nyɔsopo na to. Miklɔf malɛ e daa chɛ mo to a juŋkpar katuŋ na,

nɛ bɔrɛmatapo Jehowada pibinyɛn Bɛnaya daa la benapo na be enimu kufɔl sasopo na to. Bɛnaya ere daa la benapo adesa nɛ b kɔ kenyɛn ga na to be eko nna. Mo pibinyɛn Amizabad malɛ e daŋ sɔ mo so a juŋkpar benapo na.

Jɔab mo sipo Asahɛl e daa la benapo na be enimu kufɔl nasopo na to. Mo pibinyɛn Zebadiya e daŋ sɔ mo so ŋ ki benapo na be ejuŋkparpo.

Shamhuuf nɛ e shi Izha be kanaŋ to na e daa la benapo na be enimu kufɔl nusopo na to.

Ikkish nɛ e shi Tekua na pibinyɛn Ira e daa la benapo na be enimu kufɔl shesopo na to.

Hɛlɛz nɛ e la Efrayim be esa nsaa shi Pelɔn na e daa la benapo na be enimu kufɔl shunusopo na to.

Sibbekai nɛ e shi Husha na e daa la benapo na be enimu kufɔl burwasopo na to. E daa la Zɛra be kabuna be esa nna nsaa shi Juda be yiri to.

Abieza nɛ e shi Anatɔf nsaa la Bɛnjamin be yiri to be esa na, e daa la benapo na be enimu kufɔl kpanusopo na to.

Maharaya nɛ e shi Netofa nsaa la Zɛra be kabuna be esa na e daa la benapo na be enimu kufɔl kudusopo na to.

Bɛnaya nɛ e shi Piratɔn nɛ k wɔ Efrayim be yiri to be efuli so na e daa la benapo na be enimu kufɔl kudukakosopo na to.

Hɛldaya nɛ e shi Netofa nsaa la Ofniɛl be kenanabi na e daa la benapo na be enimu kufɔl kuduanyɔsopo na to.

Eyiriana na be benimuana be asheŋ

^16-22Israɛl be eyiriana to be ekrachi nde:

Zikri pibinyɛn Eliaza e daa la Ruben be yiri to be krachi nimuso.

Maaka pibinyɛn Shefatiya e daa la Simiɔn be yiri to be krachi nimuso.

Kemuɛl pibinyɛn Hashabia e daa la Livai be yiri to be ekrachi nimuso.

Zadɔk e daa la Ɛɛrɔn be yiri to be krachi nimuso.

Ewura Deevid mo da Elihu e daa la Juda be yiri to be krachi nimuso.

Maikel pibinyɛn Omri e daa la Isaaka be yiri to be krachi nimuso.

Obadaya pibinyɛn Ishmaya e daa la Zɛbyulɔn be yiri to be krachi nimuso.

Azriɛl pibinyɛn Jɛrimɔf e daa la Naftali be yiri to be krachi nimuso.

Azaziya pibinyɛn Hoshiya e daa la Efrayim be yiri to be krachi nimuso.

Pɛdaya pibinyɛn Jowɛl e daa la Manase be epeŋitɔrkpa be kaba so be yiri to be krachi nimuso.

Zakareya pibinyɛn Iddo e daa la Manase be epeŋilarkpa be kaba so be yiri to be krachi nimuso.

Abna pibinyɛn Jaasiɛl e daa la Bɛnjamin be yiri to be krachi nimuso.

Jeroham pibinyɛn Azarɛl e daa la Dan be yiri to be krachi nimuso.

²³Ewura Deevid daa maŋ karga Israɛl be basa nɛ b daa maŋ naŋ fo nfɛ adunyɔ na ŋkpal Enyɛnpe Ebɔrɛ ka daŋ nase kɔnɔ fanɛ e beeŋ shin nɛ Israɛl be basa e wora kishi fanɛ achɛkpabi nɛ a wɔ awɔlpa to. ²⁴Jɔab nɛ mo nio daa la Zeruwa na, e daŋ fara a karga bumo ama e maŋ tiŋ n loge ŋkpal Ebɔrɛ ka daa gberge Israɛlebi kusoe ŋkpal kabasakarga na so so. Amoso b daa maŋ sibɛ kananɛ basa na sa n nase ewura Deevid be nwɔl to.

Ekrachi nɛ baa keni ewurkpa be asɔ so be asheŋ

^25-31Basa nɛ b daa keni ewurkpa be asɔ so na nde:

Adiɛl pibinyɛn Asmavɛf e daa keni ewurkpa be ebuana nɛ baa ta ewura gbagba be asɔ a yili to na so.

Uziya pibinyɛn Jonatan e daa keni asɔ be ebuana nɛ a wɔ ndekarso nɛ ndegboŋ to na nɛ atempreŋ jeŋgreŋ nɛ bekumpo bee yili so na kikɛ so.

Chɛlub pibinyɛn Ezri e daa keni basa nɛ baa shuŋ ewura be ndɔ to na so.

Shimei nɛ e shi Rama na e daa keni asɔrso nɛ baa tre greep na be kudɔ so.

Zabdi nɛ mo alɛ shi Shefam na e daa keni greep be asɔrso na be asɔnuuso so.

Baal Haanan nɛ e la Gɛda be esa na e daa keni ndibi nɛ baa tre ɔlif nɛ sikamɔɔ nɛ a wɔ epeŋitɔrkpa be kaba so be abee be efuli so na so.

Jɔash e daa keni kakpa nɛ baa yili ɔlif be ŋku na so.

Shatai nɛ e shi Sharɔn na e daa keni ana nɛ b wɔ ndoŋ be keplasawule so na so.

Adlai pibinyɛn Shafat malɛ e daa keni ana nɛ b wɔ kebeemase na so.

Obil nɛ e la Ishmaɛl be kanaŋ to be esa na e daa keni bumo be enyɔma so.

Jedaya nɛ e shi Mɛrinɔf na e daa keni bumo be ekurma so.

Jaaziz nɛ e la Hag be esa na e daa keni bumo be mbolpɔ nɛ mboe so.

Ewura Deevid be asoetojipoana be asheŋ

³²Ewura Deevid mo wɔpa Jonatan daa la asoetojipo lela nɛ enyipo nna. Mo nɛ Hakmoni pibinyɛn Jehiɛl e daa ŋini ewura be mbinyɛnsobi. ³³Ahitofɛl e daa la ewura na be asoetojipo nɛ Hushai nɛ e la Aki be esa na, daa la ewura na mo teri nɛ asoetojipo. ³⁴Ahitofɛl ka wu be kaman, Abiata nɛ Bɛnaya pibinyɛn Jehowada e daŋ ki ewura na be besoetojipo. Jɔab malɛ e daa la ewura be benapo be enimu.

Ewura Deevid ka ŋini kananɛ baaŋ pɔr bɔrɛlambu na be asheŋ

¹Pɔɛŋ nɛ b pɔr bɔrɛlambu na ewura Deevid daŋ tre Israɛl be bejuŋkparpoana nɛ eyiriana na be benimuana nɛ ekrachi nimuso nɛ benapo be benimuana nɛ benimu nɛ baa keni ewura na nɛ mbe mbia be asɔ nɛ asɔbɔya so na nɛ ewurkpa be benimuana nɛ benapo nɛ b kɔ kenyɛn ga na m ba shɛr Jerusalɛm nna.

²Ewura Deevid daŋ niŋito nna n yili bumo be anishito nseŋ kaŋɛ bumo le: “Ma basa, men nu nfe. N daa sha kepɔr bɔrɛlambu nɛ ŋkre be deka na beeŋ baa wɔtɔ ndoŋ nna mbaanaayɔ, saŋɛ na so anyeeŋ baa yɔ ndoŋ n ya ka bunyaŋ Enyɛnpe Ebɔrɛ na. N wora asɔ kama nɛ a daga fanɛ an ta m pɔr loŋ be bɔrɛlambu na be shiriya ³ama Enyɛnpe Ebɔrɛ daa maŋ shuli fanɛ n wora loŋ ŋkpal ŋ ka la enapo nseŋ mɔ basa damta so. ⁴Enyɛnpe nɛ e la Israɛl be Ebɔrɛ na e lara ma nɛ ma kaman to ebi fanɛ an baa ji Israɛl be kuwura mbaanaayɔ. N tuto be kanaŋ ashi Juda be yiri na to nɛ e lara fanɛ b baa la bejuŋkparpo. Mbe keparso nɛ e keni n tuto be kanaŋ na kikɛ to n lara ma fanɛ ŋ ki Israɛl be ewura. ⁵Enyɛnpe Ebɔrɛ ta mbinyɛnsobi damta n nɛfa ma ama m pibinyɛn Sɔlɔmɔn nɛ e lara fanɛ e ki Israɛl be ewura ma kaman.

⁶Le nɛ Enyɛnpe Ebɔrɛ daŋ kaŋɛ ma: ‘Fo pibinyɛn Sɔlɔmɔn e naŋ pɔr ma bɔrɛlambu n sa ma. Ma e lara mo fanɛ e baa la ma kebia nɛ ma alɛ e baa la mo tuto. ⁷Nɛ e beeŋ baa bɛ ma mbraana so nɛnɛ nsaa wora kusɔ nɛ mee kaŋɛ mo saŋkama bre, mbe kuwurji beeŋ baa wɔtɔ hale mbaanaayɔ.’ ”

⁸“Amoso mee kaŋɛ menyi nna ashi Enyɛnpe Ebɔrɛ nɛ Israɛlebi kikɛ nɛ b shɛr nfe ere be anishito fanɛ men baa de so nsaa bɛ kusɔ kama nɛ Enyɛnpe Ebɔrɛ na kaŋɛ anyi na so. Saŋɛ na so kasawule lela ere kraa beeŋ ba la menyi peya, nɛ menyi alɛ gba e ta kumo n sa men be kaman to ebi nɛ k ki bumo be kapetɛ mbaanaayɔ.”

⁹Ade kikɛ be kaman nɛ e kaŋɛ Sɔlɔmɔn malɛ le: “M pibinyɛn, ta fo kagbene nɛ fo nfɛra kikɛ a shuŋ fo tuto be Ebɔrɛ na. Mo e nyi anyi be nfɛra nɛ kusɔ nɛ anyee sha kikɛ. Nɛ fo ba mo kutɔ, e beeŋ sɔ fo, ama nɛ fo shile mo bre, mo alɛ beeŋ kplaŋ fo so mbaanaayɔ. ¹⁰Baa nyi fanɛ Enyɛnpe Ebɔrɛ na e lara fo fanɛ fo pɔr mbe bɔrɛlambu cheembi na n sa mo. Amoso a daga fo ka nya kagbene m pɔr kumo nɛnɛ.”

¹¹Ewura Deevid daŋ ŋini Sɔlɔmɔn kananɛ baŋ pɔr bɔrɛlambu na nɛ kumo be ebuana nɛ baa ta asɔwurbi a yili to na nɛ kumo be epunto be ebuana nɛ acheembiana to be kakpa cheembi nɛ baa ta alubi a paŋ na nna. ¹²E daŋ ŋini mo kananɛ e beeŋ wora kumo be kelɔnɛ na nɛ ebuana nɛ a kulti kumo na nɛ kakpa nɛ baa ta bɔrɛlambu na to be amansherbi nɛ asɔ nɛ b kɔ a shuŋ Ebɔrɛ na nɛ ŋkɛ nɛ b ta m ba sa Enyɛnpe Ebɔrɛ na a wɔtɔ na nna. ¹³Ewura Deevid daŋ naŋ ŋini mo kananɛ e beeŋ barga bɔrɛmatapoana nɛ Livaiebi na to ntuŋ ntuŋ so nɛ b baa shuŋ bumo be ashuŋ bɔrɛlambu na to nsaa keni bɔrɛlambu na to be asɔ nɛ b kɔ a shuŋ Enyɛnpe Ebɔrɛ na so na nna. ¹⁴E daŋ ŋini mo shuwa nɛ gbiti nɛ a daga fanɛ b ta n lɔŋɛ asɔwurbi nɛ ¹⁵nɛ efitilatɔl na kikɛ, ¹⁶nɛ shuwa be teebɔl nɛ baaŋ baa ta bodobodo nɛ a la Ebɔrɛ peya na a deŋi so na nɛ gbiti be eteebɔl nɛ a ti so na nna. ¹⁷E daŋ naŋ ŋini mo shuwa nɛ gbiti nɛ a daga fanɛ b ta n lɔŋɛ ntoe chɛgato nɛ ntishaŋ nɛ asɔnuunchu nɛ ntishaŋ jito kikɛ, ¹⁸nɛ shuwa nɛ baaŋ ta n lɔŋɛ bɔrɛsure nɛ baaŋ baa chɔɔ duwu kumo so na nɛ kananɛ e beeŋ lɔŋɛ asɔ nɛ a du fanɛ emalaika nɛ b parga bumo be aba m buu Enyɛnpe be ŋkre be deka na be buuso so na nna. ¹⁹Kumo be kaman nɛ ewura Deevid naŋ kaŋɛ Sɔlɔmɔn le: “Kananɛ Enyɛnpe Ebɔrɛ ŋini ma bɔrɛlambu na be kananɛ k daga fanɛ b pɔr kumo nna na.”

²⁰Kede be kaman nɛ ewura Deevid naŋ kaŋɛ mo pibinyɛn Sɔlɔmɔn le: “Sa maa lɔ kufu ŋko a pɔ aba, ŋkpal manɛ so Enyɛnpe Ebɔrɛ nɛ mee shuŋ na beeŋ chɛ fo to. E maaŋ kplaŋ fo so kikɛ, ama fo pɔr bɔrɛlambu na n loge nna. ²¹Bɔrɛmatapoana nɛ Livaiebi na tea nyi ashuŋ nɛ baaŋ shuŋ bɔrɛlambu na to. Basa kama nɛ b kɔ enɔ to be kushuŋ be kenyi na gba kikɛ wora shiriya fanɛ baaŋ chɛ to n shuŋ kushuŋ na. Kusɔ kama malɛ nɛ fo kaŋɛ basa na nɛ bumo be bejuŋkparpoana fanɛ b wora, baaŋ wora.”

Ŋkɛ nɛ b ta m pɔr bɔrɛlambu na be asheŋ

¹Kede be kaman nɛ ewura Deevid kaŋɛ basa na malɛ le: “M pibinyɛn Sɔlɔmɔn nɛ Ebɔrɛ lara fanɛ e pɔr bɔrɛlambu na ama mo alɛ kra la kebia nna, e maŋ naŋ pin asheŋ nɛnɛ. Bɔrɛlambu na malɛ be kushuŋ maŋ la alefasha, ŋkpal manɛ so k maŋ la edimɛdi peya, Enyɛnpe Ebɔrɛ be bɔrɛlambu nna. ²Amoso nɛ n wora ania n fin shuwa nɛ gbiti nɛ danyaŋ nɛ abɛlso nɛ ndibi nɛ yawu kpakpaso be ajembu be yiri yiri nɛ abitasɔ nɛ ajembu kpakpaso lela nɛ baa ta a pɔr na, nɛ e beeŋ ta m pɔr kumo na. ³Ade kikɛ be kaman, n lara ŋ gbagba be gbiti nɛ shuwa n sa, nɛ loŋ bee ŋini kananɛ Ebɔrɛ be bɔrɛlambu ere be asheŋ tir ma. ⁴Shuwa lela nɛ amo be egbɛ sa fanɛ kilo ŋgboŋ kalfa, nɛ gbiti nɛ amo alɛ be egbɛ sa fanɛ kilo ŋgboŋ alfa anyɔ nɛ adena nɛ n ta n sa fanɛ b ji bɔrɛlambu na be egbalana kebita, ⁵nseŋ ta ako malɛ n sa basa nɛ b kɔ enɔ to be kushuŋ be kenyi nɛ b lɔŋɛ asɔ warabi. Naniere, wanɛ e naŋ bugi kagbene n sa kusɔ ko nɛ b ta m pɔr Enyɛnpe Ebɔrɛ be bɔrɛlambu na?”

⁶Ewura Deevid ka malga n loge na, nɛ kanaŋ kanaŋ be bejuŋkparpoana nɛ eyiri to be benimuana nɛ benapo be benimuana nɛ ekrachi nimuso kikɛ bugi ŋgbene n sa asɔ. ⁷B daŋ sa shuwa nɛ amo be egbɛ sa fanɛ kilo ŋgboŋ kalfa nɛ adushunu, nɛ gbiti nɛ amo be egbɛ sa fanɛ kilo ŋgboŋ alfa asa nɛ adena, nɛ danyaŋ nɛ amo be egbɛ sa fanɛ ŋgboŋ alfa ashe nɛ adunyɔ, nɛ abɛlso nɛ amo alɛ be egbɛ sa fanɛ kilo ŋgboŋto ŋgboŋto be ŋgboŋ asa nɛ ŋgboŋ alfa ana. ⁸Ekama nɛ e daa kɔ yawu kpakpaso be ajembu daŋ ta amo nna n yɔ bɔrɛlambu na be amansherbi nɛ asɔ be ebu nɛ Jehiɛl nɛ e la Livai be esa nsaa shi Gɛshɔm be kabuna na bee keni so na to nna. ⁹Ewura Deevid nɛ basa na kikɛ be ŋgbene daŋ fuli bumo ga nna nɛ b ji eyur ŋkpal ŋkɛ nɛ b daŋ bugi ŋgbene n sa Enyɛnpe Ebɔrɛ na so.

Ewura Deevid ka di Ebɔrɛ epaŋ be asheŋ

¹⁰Ewura Deevid daŋ yili basa na kikɛ be anishito nna n di Enyɛnpe Ebɔrɛ epaŋ ŋ kaŋɛ le: “Enyɛnpe Ebɔrɛ nɛ fo la an nana Jeekɔb be Ebɔrɛ na, kapandi e baa la fo peya mbaanaayɔ! ¹¹Fo kuwurgboŋ nɛ eleŋ nɛ kemaŋkura nɛ kuwurji wɔtɔ nna mbaanaayɔ. Fo e kɔ esoso nɛ kasawule so kikɛ be eleŋ nsaa ji kusɔ kama so kuwura. ¹²Fo e naa sa basa kedamaya nɛ eleŋ nɛ kemaŋkura. Fo gbagba be eleŋ nɛ yuku so nɛ fee ji kusɔ kama so kuwura. ¹³Anyi be Ebɔrɛ, kechɔrɔ nɛ kapandi e baa la fo peya.

¹⁴Ma nɛ ma basa maŋ kɔ ekpa nɛ an ji eyur ŋkpal ŋkɛ nɛ an sa fo ere so, ŋkpal manɛ so asɔ na kikɛ chɛr a la fo peya nna. ¹⁵An la befɔ nna a wɔ durnya ere to fanɛ kananɛ an nananyɛnana gba daa wɔ kumo to na. Anyi be nchɛ du nna fanɛ kiyoyul na, k maa chɛr nsaa choŋ. ¹⁶O Enyɛnpe Ebɔrɛ, asɔ damta nɛ an ta m ba nɛ an ba pɔr bɔrɛlambu m maŋkura fo ketre ere kikɛ la fo peya nna. Fo e wɔ amo nseŋ ta amo n sa anyi. ¹⁷N nyi fo ka nyi ekama be kagbene. Ma nɛ ma basa nɛ b wɔ nfe ere kikɛ bugi ŋgbene kagbenefuliso nna m bar asɔ ere kikɛ m ba sa fo. ¹⁸Enyɛnpe Ebɔrɛ nɛ fo la an nananyɛn Eebraham nɛ Aizek nɛ Jeekɔb be Ebɔrɛ na, shin nɛ fo basa e baa kɔ kakɛ be ŋgbene nsaa ji kashenteŋ a sa fo loŋ mbaanaayɔ. ¹⁹Jande sa m pibinyɛn Sɔlɔmɔn kasonu be kagbene nseŋ shin nɛ e ta kenishipere m pɔr bɔrɛlambu nɛ n chala kumo be kepɔr be asɔ kikɛ ere.”

²⁰Kede be kaman nɛ ewura Deevid kaŋɛ basa na kikɛ le: “Men di Enyɛnpe men nananyɛnana be Ebɔrɛ na epaŋ.” Ndoŋ nna nɛ basa na kikɛ di Ebɔrɛ epaŋ nseŋ jɔŋɛ ŋ kurgi bumo be amu n yuu to m bunyaŋ Enyɛnpe Ebɔrɛ nɛ ewura Deevid kikɛ.

²¹Kumo be ŋklade, nɛ b mɔ asɔbɔya n lara esarga n sa Enyɛnpe Ebɔrɛ na. Kumo be kaman nɛ b mɔ egbolu kagboŋ nɛ ekpakpa kagboŋ nɛ ekpakpafɔlbi kagboŋ n chɔɔ n lara sarga bɔrɛsure na so n sa mo. B daŋ ta asɔnuuso gba n ti so n lara sarga na. ²²Kumo be kamɔnchɛ ekama be kagbene daŋ fuli mo ga nɛ b ji nseŋ nuu ashi Enyɛnpe Ebɔrɛ be anishito.

Ndoŋ nɛ b lara Sɔlɔmɔn kelɛ nyɔsopo fanɛ ewura nseŋ yili Enyɛnpe Ebɔrɛ be ketre to n ta ŋku n do mo so n lara mo ŋ ki bumo be ewura nseŋ ta ŋku n do Zadɔk malɛ so n lara mo ŋ ki bumo be bɔrɛmatapo.

²³Amoso Sɔlɔmɔn e daŋ sɔ mo tuto so n ji kuwura nɛ Enyɛnpe Ebɔrɛ yili n sa bumo na, nɛ asheŋ nite nɛnɛ nɛ Israɛl be efuli na so ebi kikɛ bee nu a sa mo. ²⁴Benimuana nɛ benapo na nɛ ewura Deevid be mbinyɛnsobi na kikɛ daŋ nase kɔnɔ fanɛ baaŋ baa nu a sa mo fanɛ bumo be ewura. ²⁵Enyɛnpe Ebɔrɛ daŋ maŋ Sɔlɔmɔn so nna nseŋ shin nɛ mbe kuwurji daa kɔ kemaŋkura a chɔ Israɛl be ewura kama peya; nɛ kumo be loŋ daŋ chinchiŋ efuli na so ebi kikɛ ga.

Ewura Deevid be lalaloge be asheŋ

²⁶Jɛsi pibinyɛn Deevid nɛ e la Sɔlɔmɔn mo tuto na e daa la Israɛl kikɛ be ewura. ²⁷Nfɛ adena nɛ e daŋ ji kuwura ashi Israɛl be efuli so kikɛ. E daŋ ji kuwura Hibrɔn be kade to nfɛ ashunu nna nseŋ ji kuwura nfɛ adesa nɛ asa malɛ Jerusalɛm be kade to. ²⁸E daa la damawura nna nsaa kɔ kemaŋkura basa kutɔ, nseŋ bel pɔɛŋ n wu nɛ mo pibinyɛn Sɔlɔmɔn sɔ mo so n ji kuwura. ²⁹Kusɔ kama nɛ Deevid wora saŋɛ so nɛ e daa la ewura na be asheŋ kikɛ daa wɔ anebi Samuɛl nɛ Neetan nɛ Gad be nwɔl to. ³⁰Asheŋ nɛ b daŋ sibɛ n wɔtɔ nwɔl na to daa ŋini kananɛ e daŋ ji kuwura, nɛ kananɛ e ji eleŋ, nɛ asheŋ nɛ a tu mo nɛ Israɛl be efuli, nɛ efuliana nɛ a kulti kumo na kikɛ.