2 Teesaloonika

Bəra’inə ŋga ləkaləkatə ŋga Bulusə ka ənji

Teesaloonika

¹Wiinə ləkaləkatə ca dzə koonə, Ikəliisiya ŋga Teesaloonika, dacii inə Bulusə da Silasə da Timooti. Agi nəhəpaanə niinə tuunə, ənji ŋga Əntaŋfə Dəsənaamə da Slandanə Yeesu *Aləmasiihu. 1.1 1 Tees. 1.1.²Wa Əntaŋfə Dəsənaamə da Slandanə Yeesu Aləmasiihu a ɗa koonə pwapoonə, təya vii koonə ndzaanə jamə.

Shinə ŋga Aləmasiihu ka ɗa gəŋwanə

³Ndzəkəŋushi’ina, taa guci patə agi kuyiriinə niinə tə Əntaŋfə ka putə goonə. Ma dəɓeekii ina ɗa ha’ə, acii agi gərənə nə vii gooŋga goonə aakəŋwə aakəŋwa. Agi tsakə gərənə nə uuɗəshinə ahadoonə patə əsə. 1.3 2.13; 1 Tees. 1.2-3.⁴Aciikii, inə də neenə na, agi dəlanə niinə duunə ahada Ikəliisiyanyinə ŋga Əntaŋfə. Agi banə niinə ka tii makə sətə kəŋaanuunə agi vii gooŋga goonə dagi ciɓa da ŋgəra’wə patə ətə ɗii unə agikii. 1.4 1 Tees. 2.19-20; 3.3,7.

⁵Ci nə səndə ca ɓaarii tuu’ina, də rəgwa nə Əntaŋfə a ɗa gəŋwanə ka ənja. Ka mbu’utəginə nə ci duunə koona ndzaanə agi ŋwaŋuunaakii, acii ka putakii cuuna sa ciɓa. 1.5 Fil. 1.28.⁶Ka slənənə nə Əntaŋfə sətə dəɓee, waatoo ka ciɓeenə nə ci ka ənjitə ca ciɓee koonə. 1.6 Rooma 12.19; Səniinə 18.6.⁷Ma unə ənə ca ciɓə, ka viinə nə ci koonə əpisəka deenə əsə. Ha’ə na ɗa saa’itə nə Slandanə Yeesu a jiga dadagyə tii da madiigərə malaa’ikanyinaakii ahada gana ŋga gunə. 1.7 Mat. 25.31; 1 Tees. 5.1-2.⁸Ma cii kəya sha, ka ciɓee ka ənjitə kaaree ka Əntaŋfə da ənjitə naanagi ka luu Ŋunyi Habara ŋga Slandanaamə Yeesu. 1.8 Isaa. 66.15; Rooma 2.8; 1 Piita 4.17.⁹Kadə nə təya sa ciɓa, Əntaŋfə a zamagi də tii ka ca’ə ndəŋwə ndəŋwə; Slandanə a lakəgi tə tii dzaɗə, paa tii na nee ka məghərəvənaakii da baawəɗaakii. ¹⁰Ma ətsə patə, ka slənənə saa’itə nii kəya ənya. Maa kə mbu’ya maɗuunə uusəraakii, ka ɗuunətənə nə ənjaakii tə ci. Patənə ŋga ənjitə vii ka ci gooŋga əsə, təya dəla də ci. Da i unə na ɗa ha’ə saa’ikii, acii kə liwuunə waɓəətə bii inə koonə.

¹¹Aciikii ciina ɗa də’wa ka putə goonə taa guci patə. Ina kədii acii Əntaŋfə kaa ca mbu’utəgi duunə, una ndzaa bahə makə sətə ’wii ci tuunə koona ndzaanə. Agi kədiinə niinə əsə kaa ca tsakə tuunə agi slənə ŋga’əətə cuuna moo ɗanə patə, ca tsakə tuunə əsə koona dzə aakəŋwa də slənətə cuuna ɗa acii kə vii unə gooŋga ka ci. Wa ca tsakə tuunə ha’ə də baawəɗaakii. 1.11 1 Tees. 1.2-3; 5.24.¹²Də ha’ə viinə ənji məghərəvənə ka ləmə ŋga Slandanaamə Yeesu putə goonə. Ma unə əsə, ka viinə nə ci koonə məghərəvənə. Ma ətsə patə ka ɗanə ha’ə, də pwapoonə ŋga Əntaŋfə gaamə da Slandanaamə Yeesu Aləmasiihu.

Sətə na takəŋwa ɗanə taabu’u shinə ŋga Yeesu

¹Ndzəkəŋushi’ina, agi gəranə nuunə shinə ŋga Slandanaamə Yeesu Aləmasiihu da dzatə də nə gaamə akəŋwaciikii. Amma agi kədiinə niinə acii unə, 2.1-2 1 Tees. 4.15-17; 5.1-2.²maa kə fii unə kə bii ənji oo’i, kə mbu’ya uusəra ŋga ənyanə ŋga Slandana, ga haŋkala goonə a gwazəgi pii pii. Goona ŋgwalə, goona luuvə əsə, taa kə fii unə, kə ɗii ənji anabaakwaanə, taa waazanə, taa kə nyaahə ənji asəkə ləkaləkatə də banə oo’i, da meenə shigi, goona luuvə shaŋə. 2.2 2.15.³Taa də iitiitə patə, goona kapaa rəgwa ka ənjə a isəkwa tuunə. Acii ma taabu’u mbu’yanə uusərakii, ka bwaseenə nə ənji laŋə ka nə’unə tə Əntaŋfə, ŋwaŋwə ’waslyakəənə a shigi. Ma ca, əndə ŋga gunə nə ci. 2.3 1 Tim. 4.1; 1 Yooh. 2.18.⁴Ka bərapaanə nə ci sə ŋga paslənə patə, ca ɗuunətə naakii nə palee ka uushi’inə patə. Ha’ə ca dzə aasəkə *yi ŋga Əntaŋfə, ca ndzaa davə, ca ba oo’i, ci nə Əntaŋfə ndilə ndilə. 2.4 Əzaki. 28.2; Dan. 11.36; Səniinə 13.5-6.⁵Uushi’iitsə patə, kə bii nyi koonə saa’itə nyi ma’ə ahadoonə. Anii kə zaanə koonə saŋa?

⁶Ma əndzə’i, tə’i uushi pa’əgi ka uushi’iitsə rəgwa. Kə shii unə səkii əsə. Amma, maa kə mbu’i saa’ikii, ka shiginə nə ŋwaŋwə ’waslyakəənə paŋgəraŋə. ⁷Taa əndzə’i, laŋə ci ənjə a slənə bwaya bwayaanə ka Əntaŋfə. Ma amə, kə shii amə makə sətə ci ənjə a slənə bwaya bwayaatsa, acii kə ɓaarii Əntaŋfə kaamə. Amma, ma sətə na slənə, ma’ə zəku’i. See maɗa ŋgiragi Əntaŋfə sətə pa’əgi ka tii rəgwa. ⁸Maa kə ŋgərəgi ci, wata ŋwaŋwə ’waslyakəətsə a shigi paŋgəraŋə. Amma, maa kə ənya Slandanə Yeesu, ka ɓələginə nə ci tə ci də məɗə ŋga bamakii, ca həhəɗəgi tə ci də baawəɗa ŋga məghərəvənaakii. 2.8 Isaa. 11.4; Səniinə 19.15.⁹Taabu’u ɓələginə Yeesu tə ci, kadə nə ŋwaŋwə ’waslyakəənə a shi də baawəɗa ŋga *Seetanə. Ca slənə sə ŋga hurəshishinə ŋga jirakənə kama kama. 2.9 Mat. 24.24; Səniinə 13.11-13.¹⁰Ma ənjitə uugi ŋgərə rəgwa ŋga zanə, ka isəkwanə nə ci tə tii də taa ŋgutə tsarə ŋga məza jarəwiinaakii. Ma ənjitsa, ka zanə nə tii, acii kə kaaree tii ka uuɗə gooŋga kaa təya upaa luupaanə. ¹¹Acii ha’ə, kadə nə Əntaŋfə a kavə tə tii, kaa haŋkalatii a zə’ugi, təya nə’u jirakənə. 2.11 2 Tim. 4.4.¹²Ma nii kəya ɗa ha’ə, kaa gəŋwanaakii a kula aanə patənə ŋga ənjitə kaaree ka nə’u gooŋga, təya ɗa mooɗasəka də slənə ’waslyakəənatii. 2.12 1.6-8.

Ndzaamə ndihə ndihə agi gooŋga

¹³Ndzəkəŋushi’ina, kaɗashinyinə ŋga Slandana, taa guci patə agi kuyiriinə niinə tə Əntaŋfə putə goonə. Ma dəɓeekii ina ɗa ha’ə, acii kə ta’i Əntaŋfə tuunə daga ci ma’ə matagamə duuniya. Ma ta’i ci tuunə, kaa ca luupaa tuunə. Ci laaɓagi tuunə də baawəɗa ŋga Malaaɓa Ma’yanə koona nə’utə gooŋgaanə. 2.13 1.3.¹⁴Ka ətsə ha’ə ’wii Əntaŋfə tuunə dagi waaza Ŋunyi Habara geenə koonə. Ma ’wii ci tuunə, koona shii upaa ndzaanə agi məghərəvənə ŋga Slandanaamə Yeesu Aləmasiihu. 2.14 1 Tees. 5.9.¹⁵Acii ha’ə, ndzəkəŋushi’inə, kəŋaanəmə ndihə ndihə, una kəsətə təŋə təŋə tə gooŋgatsə jigunyiinə koonə də bameenə da də ləkaləkatə geenə, una kəsətə təŋə təŋə. 2.15 3.6; 1 Koor. 11.2.

¹⁶Ma Slandanaamə Yeesu Aləmasiihu də naakii nə da Əntaŋfə Dəsənaamə, kə uu’i ci taamə, agi tsakənə nə ci taamə də pwapoonaakii taa guci patə, ca kavə taamə ka gəra ŋunyi sətə na shi. 2.16 1 Tees. 1.4.¹⁷Wa ca banee ka ədzəmuunə, ca vii koonə ŋgeerənə ŋga slənə ŋga’əənə da ba ŋunyi waɓənə taa guci patə.

Də’wa ka putə geenə

¹Wiinə səndə ciina uudəpaagi koonə ɗii, ndzəkəŋushi’ina: ma ɗanuuna, ɗamə də’wa ka putə geenə kaa waɓənə ŋga Slandanə a shii dzənə aakəŋwa pii pii, kaa ənjə a ɗuunətə waɓənəkii, makə sətə cuuna ɗuunətə əsə. 3.1 Slənə 2.4; Rooma 15.30; 1 Tees. 5.25.²Ɗamə keenə də’wa əsə kaa Əntaŋfə a luupaa tiinə acii bwaya ənja. Ɗamə ha’ə, acii əntaa patənə ŋga ənji nəndə da vii gooŋga. ³Amma, ma Slandana, əndə nə’utə aləkawalə nə ci. Ka tsakənə nə ci koonə ŋgeerənə a ədzəmuunə, ca nəhə tuunə acii *Seetanə. 3.3 1 Koor. 10.13; 1 Yooh. 5.18.⁴Kə yarədii inə tuunə putə ŋga Slandana. Waatoo, agi nə’utənə nuunə makə sətə bii inə koonə. Dəŋə aakəŋwa əsə, ka nə’utənə nuunə ha’ə. 3.4 1 Koor. 4.16; Gal. 5.10.⁵Wa Slandanə Yeesu Aləmasiihu a ɓaarii koonə rəgwa, una shii makə sətə uu’i Əntaŋfə tuunə, una sə’watə makə sətə sə’watə Aləmasiihu.

Ŋga’ə nə sləna

⁶Ndzəkəŋushi’ina, waniinə ka banə koonə də ləmə ŋga Slandanə Yeesu Aləmasiihu: maɗa tə’i manya’inə ŋga ndzəkəŋushi’inə ahadoonə, goona ndzaa da tii. Ma təya, paa tii ka nə’utə səndə jigunyiinə koonə. 3.6 3.12; 1 Tees. 5.14.⁷Unə də noonə na, kə shii unə taa iitə nə’utənuunə dərəpə geenə. Acii ma saa’itə njiinə ahadoonə, əntaa manya’inə njiinə. ⁸Makapaamiinə neenə nə ka əndə a adəvə keenə yadə ki’inə ka ci saakii. Amma kə slənyiinə iza iza’u vəɗə da uusəra, acii geena ndzaa ka tərənə agyanə taa wu ahadoonə. 3.8 1 Tees. 2.9.⁹Ma ɗii inə ha’ə, əntaa mbu’unə nəndə mambu’umiinə bahə ləgwa zəmə acii unə, amma ma ɗii inə ha’ə, keena ndzaa koonə ka sə ŋga dzəgunənə, una nə’u dərəpə geenə. 3.9 Slənə 18.3; 1 Tees. 1.6; bahə ləgwa zəma: 1 Koor. 9.4.¹⁰Ma saa’itə inə ahadoonə, kə njiinə a ba koonə oo’i, ma əndətə kaaree ka sləna, ga ənjə a vii ka ci zəma. 3.10 1 Tees. 4.11.

¹¹Ma bii inə koonə ha’ə, acii kə fii inə oo’i, tə’i hara ənji ahadoonə, manya’inə nə tii. Pooshi uushi ci təya slənə, maɗaamə ndzaanə zərakə da kaala matii aagi slənə ŋga hara ənji. 3.11 1 Tim. 5.13.¹²Yoo, ma tsarə ŋga ənjitsa, waniinə ka banə ka tii də ŋgeerənə, də ləmə ŋga Slandanə Yeesu Aləmasiihu: wa təya slənə də rəgwa, təya zəməvə ka natii na. 3.12 Af. 4.28.

¹³Ndzəkəŋushi’ina, ma una, ga ca wunəənə koonə nə ɗa ŋunyi sləna. 3.13 Gal. 6.9.¹⁴Maɗa kə naanagi əndə ka nə’utə waɓəənə nyaahiinə koonə asəkə ləkaləkatəna, kantsaamə ka ci ginə, goona ndzaa da ci, kaa ayinə a shii kəsənə tə ci. 3.14 1 Koor. 5.9,11.¹⁵Amma goona nee ka ci makə əndə daawaanə goonə. Ma ɗanuuna, waɓəmə ka ci makə sətə cuuna waɓə ka ndzəkəŋushi’inuunə. 3.15 Mat. 18.15-17; 1 Tees. 5.14.

Muudinə ŋga waɓənə

¹⁶Ma Slandana, ci ca vii ndzaanə jamə. Wa ca vii koonə ndzaanə jamə ci saakii taa guci patə, taa ka ŋgutə rəgwa patə. Wa ca ndzaa doonə patə. 3.16 2 Koor. 13.11.

¹⁷Nyi Bulusə də ciinəki ca uudəpaa naahə ləkaləkatənə də nəhəpaanə tuunə. Ha’ə asəkə taa ŋgutə ləkaləkataaki əsə. Naahənə ŋga ciinəki ətsa. 3.17 1 Koor. 16.21.¹⁸Wa Slandanaamə Yeesu Aləmasiihu a ɗa koonə patə pwapoonaakii.