Wahayu Yahaya

Wahayu Yahaya

Dow Yeesu Almasiihu

Habaru dow ɗerewol ngo’ol

Binduɗo ɗerewol ngo’ol woni Yahaya go’oto nder tokkuɓe Yeesu sappo e ɗiɗo. E ɗum kammoo ɗerewol ngo’ol windaama ko 100 A.D., waato ko duuɓi 100 gaɗa danyngol Yeesu, carel ko tokkuɓe Yeesu ngoni nder torra ngam e ɓe tokki Yeesu. Yahaya o go’oto nder yimɓe ɓe laamiiɓe torri; o yaaraama wondi leydi ngondi caka ndiyam ngam o wa’ajinii Wolde Joomiraawo. Ton to wigeere nden o windi ɗerewol ngo’ol. O windungol ngam sembiɗinki tokkuɓe Yeesu, ɓe munya nder torra ka ɓe njarata, ɓe ngaɗa kammunde maɓɓe dow wartoyki Yeesu carel ko o wartoyta nder teddungal. Ɗerewol ngo’ol e holla ko wangata Nyalnde Jaango e no ɗum halkirta ganyuɓe tokka Yeesu. Nden e ngol holla no ɗum hisnirta tokkuɓe Yeesu gaɗuɓe jonde wooɗunde yeeso Allah.

Ko Woni Nder:

Tokkuɓe Yeesu gonɓe nder gariije joweeɗiɗi (1.1‑8)

Wahayu dow Almasiihu (1.9—3.22)

Ɗerewol e haatimiije joweeɗiɗi (4.1—8.1)

Habaru dow duudaali joweeɗiɗi (8.2—11.19)

Habaru dow mbooga e marle ɗiɗi kalluɗe (12.1—13.18)

Wahayu feere‑feere (14.1—15.8)

Tummuɗe monnere Joomiraawo (16.1‑21)

Halkuki gariiri Baabiila, e heɓuki jaalorgal dow mardi kallundi, e annabiijo fewre, e Ceyɗan (17.1—20.10)

Nyalnde Jaango (20.1‑15)

Waɗuki dow kesum, e duuniyaaru heyru, e gariiri Urucaliima keyri (21.1—22.5)

Wartuki Yeesu Almasiihu (22.6‑21)

¹Nde’e deftere e nde saawi wahayu ɗum Allah hokki Yeesu Almasiihu ngam o holla maccuɓe maako ko waɗata naa’ ko neeɓi. Yeesu lili malaa’ikaajo muuɗum to maccuɗo maako Yahaya ngam o wi’amo fii ɗum. ²Yahaya wi’i koo ɗume ɗum yi’i dow Wolde Allah, e ko Yeesu Almasiihu wi’i e ko waɗi. ³O barkiɗinaaɗo neɗɗo janganoowo woɓɓe ɗu’um habaru ɗum annabaaku, nden ɓe barkiɗinaaɓe nanɓe ko windaa nder deftere nde’e tokkande, ngam carel ko fii ɗum wangata ɓadake.

Tokkuɓe Yeesu Gonɓe Nder Gariije Joweeɗiɗi

⁴Min Yahaya e mi windana tokkuɓe Yeesu wonɓe nder gariije joweeɗiɗi nder leydi Aasiya.

Allah gonɗo jooni e ndenno e ɗo’o yeeso, e Ruuhuuji joweeɗiɗi gonɗi yeeso jooɗorgal laamu maako,1.4: Wur 3.14; WY 4.5.⁵e Yeesu Almasiihu, ceyduujo Allah mo goonga, barkiɗina’on, hokka’on jam. Yeesu artuɗo ummaaki daga mayde kanko woni laamiiɗo laamiiɓe duuniyaaru.

E mo yiɗi’en, o hisnii’en daga hakkeeji meeɗen barka ƴiiƴam mayde maako.1.5: Ica 55.4; Jab 89.27.⁶O wartirii’en yimɓe maako ardiiɓe diina kuwanooɓe Allah Nyaako maako. Mangu e laamu tabbita to Yeesu Almasiihu haa abadaa abadin. Aamin.1.6: Wur 19.6; WY 5.10.

⁷Raɗɗum e mo wara nder duule, koo moye yi’aymo haa maa e barɓemo. Fuu yimɓe duuniyaaru mboyay ngam gartol maako! Goonga, ɗum waɗay. Aamin.1.7: Daan 7.13; Maat 24.30; Mar 13.26; Luk 21.27; 1Tas 4.17; Jak 12.10; Yah 19.34,37; Jak 12.10; Maat 24.30.

⁸Allah Joomiraawo Joomu Bawɗe wi’i, “Min woni Alfa, min woni Omeega,” waato Fuɗɗoode e Timmoode. Kanko woni jooni, e ndenno, e yeeso ɗo’o.1.8: WY 22.13; Wur 3.14.

Wahayu Almasiihu

⁹Min woni Yahaya bandiraawo mooɗon nder tokkuki Yeesu. En njara torra ngam en yimɓe nder laamu maako, ammaa o hokkii’en ɓerɗe munyal. Ɗum yaariiyam leydi ngondi caka ndiyam bi’eteendi Batamos ngam mi wa’ajinii Wolde Allah mi hokkii habaru Yeesu. ¹⁰E nyalnde Alal, Ruuhu Allah jippoyii dow am, sey nanmi wonde hononde cembinde gaɗa am bo duuduki luwal. ¹¹Hononde nden e wi’a, “Windu ko ngiiɗaa nder ɗerewol lildanaa kawte tokkuɓe Yeesu wonɓe nder gariije joweeɗiɗi, waato ɓe Aafisa, e ɓe Samirna, e ɓe Birgamum, e ɓe Tayaatira, e ɓe Sardis, e ɓe Filadelfiya, nden e ɓe Lawdiikiya.”

¹²Sey ngaylitiimi ngam mi yi’a metanayɗoyam. E waylitaaki am sey ngiimi fitilaaji joweeɗiɗi ɗi jiinaari. ¹³Caka fitilaaji ɗin boo mi yi’i goɗɗo bo Ɓii Neɗɗo e mo ɓornii kolte haa koyɗe, e mo taadii taadorde jiinaari to gabaare maako.1.13: Daan 7.13; Daan 10.5.¹⁴Hoore maako e gaasa maako e ranni tar bo hottollo, tar bo nyaalal, nden gite maako bo ɗemngal hiite.1.14: Daan 7.9.¹⁵Koyɗe maako e ɗelkitoo bo njamndi mboɗeeri ɓolinaandi ngoggaandi ndi ɗum defi nder hiite wa’ildu, nden hononde maako bo hoolo doggudu ndiyam.1.14,15: Daan 10.6.1.15: Ijik 1.24; 43.2.¹⁶E mo jogii koode joweeɗiɗi e jungo maako nyaamo, kaafahi welki koo nduye wuttudu e wurtoyoo daga nder honduko maako. Yeeso maako boo e ɗelkitoo bo naange caka nyalawma. ¹⁷Nde ngiimoomi, sey njanumi yeeso maako bo mayɗo. Ammaa o yowaniyam jungo maako nyaamo o wi’i, “Taa’ hulu. Min woni arandeejo, min woni cakitiiɗo.1.17: Ica 44.6; 48.12; WY 2.8; 22.13.¹⁸Min woni mo yonki! Ndenno mi maayiino. Ammaa jooni e mi woodi yonki haa abadaa abadin, e mi woodi laamu dow Mayde nden e mi woodi laamu dow Laahira. ¹⁹Windu ko ngiiɗaa, ko waɗata jooni, e ko waɗata ɗo’o yeeso. ²⁰Raa ma’ana sirru koode joweeɗiɗi ɗe ngiiɗaa e jungo am nyaamo, nden e ma’ana fitilaaji jiinaari joweeɗiɗi ɗi ngiiɗaa: koode joweeɗiɗi ɗen ɗon ngoni malaa’ika’en faamanooɓe kawte joweeɗiɗi ɗe tokkuɓeyam, nden fitilaaji joweeɗiɗi ɗin ɗon boo ɗum kawte ɗen.”

Lilal Ngam Ɓe Aafisa

¹Nden o wi’iyam, “Windan malaa’ikaajo kawtal tokkuɓe Yeesu wonɓe gariiri Aafisa wi’uki:

“Min jogiiɗo koode ɗen ɗon joweeɗiɗi e jungo nyaamo, jahoowo caka fitilaaji jiinaari joweeɗiɗi ɗin ɗon. ²E mi andi kuuɗe mooɗon. E mi andi on kuwii naa’ seɗɗa, on munyii nder torraaji ɗi njaroton. E mi andi on pijantaa kalluɓe. Nden wi’ooɓe ko’e maɓɓe ɓe lilaaɓe, ammaa naa’ ɗum non on poondiiɓe on tawii ɓe pewooɓe. ³E mi andi on munyii, on natti torraaji kalluɗi ngam am nden on comaayi. ⁴Ammaa raa ko wooɗaa ɗum nangirmi’on: on alii yidde nde ngoodunooɗon. ⁵Ciptoree ko njoofunooɗon, tuubee, ngaɗon ko ngaɗaynooɗon ndenno. To naa’ non, mi waranay’on mi itta fitilaaru mooɗon to ndu resaa, sey ni to on tuubii. ⁶Ammaa on ngaɗa fii go’o boɗɗum. On nganyii kuuɗe Nikoolatanko’en, non no nganyirmi kuuɗe maɓɓe.

⁷“Fuu gooduɗo noppi nanooji nana ko Ruuhu Allah wi’ata kawte tokkuɓe Yeesu.2.7: Fuɗ 2.9; WY 22.2; Ijik 28.13; 31.8.

“Fuu keɓuɗo jaalorgal mi alaymo o nyaama ɓikkoy lekki kokkoohi yonki wonki nder ngesa Allah.

Lilal Ngam Ɓe Samirna

⁸“Nden windan malaa’ikaajo kawtal tokkuɓe Yeesu wonɓe Samirna wi’uki:

“Min woni arandeejo e cakitiiɗo, maayunooɗo jooni e mo woodi yonki.2.8: Ica 44.6; 48.12; WY 1.17; 22.13.⁹E mi andi torra ka njaroton, e mi andi on ngalanaa, ammaa on diskuɓe. E mi andi haala kalluka ka yimɓe metata dow mooɗon, wi’ooɓe ɓe yimɓe Allah, ammaa naa’ ɗum non, ɓe yimɓe Ceyɗan. ¹⁰To’ on kulu torra ka njaroton yeeso ɗo’o. Raɗɗum Ceyɗan siryake maɓɓa woɓɓe mooɗon nder suudu cural ngam ɗum foonda’on. On ngaɗay balɗe sappo on njara torra kalluka. Ammaa njogee ko kooliiɗon koo ɗum waray’on. Min boo mi hokkay’on yonki, kanki woni dokkal heɓuki jaalorgal mooɗon.

¹¹“Fuu gooduɗo noppi nanooji nana ko Ruuhu Allah wi’ata kawte tokkuɓe Yeesu.

“Fuu keɓuɗo jaalorgal, mayde ɗiɗawre meemataamo, waato o nattintaake hiite.2.11: WY 20.14; 21.8.

Lilal Ngam Ɓe Birgamum

¹²“Nden windan malaa’ikaajo kawtal tokkuɓe Yeesu wonɓe gariiri Birgamum wi’uki:

“Min woni jogiiɗo kaafahi welki to koo nduye wuttudu. ¹³E mi andi to njooɗiiɗon; on njooɗoo to Ceyɗan laamotoo. Fuu e non, on ngaɗa ko mbiimi’on, on alaayi hoolaakiyam koo nde ɗum wari Antifas ga’ajinɗo dow am mo goonga. ¹⁴Ammaa e woodi fii seɗɗa ɗum nangirmi’on. E woodi woɓɓe nder mooɗon tokkuɓe ekkitinol Bala’amu, ekkitinɗo Balak no waɗirta Israa’iilanko’en ngaɗa ko wooɗaa, ɓe nyaama ko ɗum hirsani allaaji fewre ɓe ngaɗa njeenu.2.14: Lim 22.5,7; 31.16; TA 23.4; Lim 25.1‑3.¹⁵Non maa on ngoodi woɓɓe tokkuɓe ekkitinol Nikoolatanko’en. ¹⁶Tuubee jooni! To naa’ non, mi waranay’on naa’ ko neeɓi, mi honidaɓe e kaafahi burtoytooki daga honduko am.

¹⁷“Fuu gooduɗo noppi nanooji nana ko Ruuhu Allah wi’ata kawte tokkuɓe Yeesu.

“Fuu keɓuɗo jaalorgal, mi hokkaymo manna cuuɗiiɗum o nyaama. Ɗonmaa mi hokkaymo hayre raneere inde heyre e windii dow mayre. Walaa anduɗo inde nden sey ni kokkaaɗo hayre nden.2.17: Wur 16.14,15; 16.33,34; Yah 6.48‑50; Ica 62.2; 65.15.

Lilal Yaaki to Tayaatira

¹⁸“Nden windan malaa’ikaajo kawtal tokkuɓe Yeesu e gariiri Tayaatira wi’uki:

“Min woni Ɓiɗɗo Allah gooduɗo gite bo ɗemngal hiite, mo koyɗe bo njamndi mboɗeeri ngoggaandi. ¹⁹E mi andi kuuɗe mooɗon e no ngiɗirɗon tokkuɓeyam e no kooloriiɗonyam e no tokkirɗonyam e no munyirɗon. E mi andi kuugal mooɗon ngal jooni ɓurii ngal ndenno. ²⁰Ammaa raa ko wooɗaa ɗum nangirmi’on. On munyanii debbo on ɗon Jejebel bi’oowo hoore maako o annabiijo. Ekkitinol maako e majjina yimɓe am e ɓe ngaɗa njeenu, ɗonmaa e ɓe nyaama kusel ngel ɗum sakkani allaaji fewre.2.20: 1Laam 16.31; 2Laam 9.22,30.²¹Mi hokkiimo carel ngam o tuuba daga njeenu ɗum o waɗata, ammaa o wanyii o tuuba. ²²Ngam non mi waɗay o nyawa nyawu kalluɗum. Ɓe o waadata njeenu boo mi torrayɓe torra kalluka, sey ni to ɓe alii waɗuki iri kuuɗe maako. ²³Mi waray tokkuɓe ekkitinol maako. Sey fuu kawte tokkuɓe Yeesu anda min woni anduɗo nyumooji yimɓe e ko woni nder ɓerɗe maɓɓe. Mi waatanay koo moye mooɗon ko fottidi e kuugal muuɗum.2.23: Jab 7.9; Irm 17.10; Jab 62.12.

²⁴“Ammaa onon horiiɓe wonɓe gariiri Tayaatira ɓe tokkaayi ekkitinol ngo’ol, on ekkitaaki ko woɓɓe mbi’ata ‘Sirru Ceyɗan lugguɗum.’ E mi wi’a’on mi yowantaa’on wongal teddoral. ²⁵Ngaɗee ka hoolaakiyam boɗɗum naa mi wartii. ²⁶Fuu keɓuɗo jaalorgal e waɗa ko mbiimi haa timmoode, mi hokkaymo laamu dow leƴƴi duuniyaaru no Nyaako am Mo Dow hokkiriyamɗum. ²⁷O laamortoɓe e sawru njamndi, o pusipusinaɓe bo gojiije leydi.2.26,27: Jab 2.8,9.²⁸Ɗonmaa mi hokkaymo hoodere subaka.

²⁹“Fuu gooduɗo noppi nanki nana ko Ruuhu Allah wi’ata kawte tokkuɓe Yeesu.

Lilal Ngam Ɓe Sardis

¹“Windan malaa’ikaajo kawtal tokkuɓe Yeesu wonɓe gariiri Sardis wi’uki:

“Min woni jogiiɗo Ruuhuuji joweeɗiɗi ɗi Allah e koode joweeɗiɗi ɗen ɗon. E mi andi kuugal mooɗon, e ɗum yi’a bo on ngoodi yonki, ammaa on mayɓe. ²Ummee, ndarooɗon! Mo’’inee ko horanii’on ngam ɗum ɓadake lalluki, ngam mi yi’ii kuuɗe mooɗon ɗe keewaayi yeeso Allah. ³Ngam non ciftoree e ko ɗum ekkitini’on e ko nanɗon, tokkeeɗum nden tuubee daga hakkeeji mooɗon. To boo on ummaaki, mi waray e carel ngel on kammaaki bo gujjo. Nden on andataa carel ngel ngaranaymi’on.3.3: Maat 24.43,44; Luk 12.39,40; WY 16.15.⁴Ammaa haa jooni e woodi yimɓe mooɗon seɗɗa nder gariiri Sardis ɓe mbonnaayi ko’e maɓɓe e waɗuki hakke. Ɓe njaaday e am nder kolte daneeje ngam ɓe kewtii ɓe ngaɗa non. ⁵Fuu keɓuɗo jaalorgal ɗum ɓornaymo kolte daneeje, nden mi ittataa inde maako daga nder deftere yonki. Mi wi’ay kanko ɗum mo am yeeso Nyaako am e yeeso malaa’ika’en maako.3.5: Wur 32.32,33; Jab 69.28; WY 20.12; Maat 10.32; Luk 12.8.

⁶“Fuu gooduɗo noppi nanki nana ko Ruuhu Allah wi’ata kawte tokkuɓe Yeesu.

Lilal Ngam Ɓe Filadelfiya

⁷“Windan malaa’ikaajo kawtal tokkuɓe Yeesu wonɓe gariiri Filadelfiya wi’uki:

“Min woni Ceniiɗo mo goonga jogiiɗo maɓɓitirgel Dawda. To o maɓɓitii dammugal, walaa maɓɓayɗongal, to o maɓɓiingal, walaa maɓɓitayɗongal.3.7: Ica 22.22; Ayu 12.14.⁸E mi andi kuuɗe mooɗon. Raa mi alanii’on dammugal e maɓɓitii, walaa baawayɗo maɓɓukingal. E mi andi on cembiɗaa, ammaa fuu e non on tokka ko mbiimi, on nganyaayi wi’uki on tokkuɓeyam. ⁹Yimɓe ɓen ɗon wonɓe nder yimɓe Ceyɗan wi’ooɓe ɓe yimɓe Allah ammaa ɓe peway, mi waɗayɓe ɓe ngara ɓe ndiccoo yeeso mooɗon ɓe anda e mi yiɗi’on.3.9: Ica 49.23; 60.14; Ica 43.4.¹⁰Nde on njogake wolde am nder munyal e sembe ɓernde, mi suranay’on torra garanayka duuniyaaru ngam ɗum foonda yimɓe mayru. ¹¹E mi waroya naa’ ko neeɓi. Ngaɗee ka hoolaakiyam boɗɗum ngam to’ goɗɗo teetana’on giifi jaalorgal. ¹²Fuu keɓuɗo jaalorgal mi wartiraymo darŋalal nder wuro ceniingo ngo Allah am, o fuɗɗitataa o wurtoo wuro ngon. Mi winday inde Allah am dow maako e inde gariiri Allah am, waato Urucaliima keyri jippoytoondi daga to Allah am ton dow. Ɗonmaa mi winday inde am heyre dow maako.3.12: WY 21.2; Ica 62.2; 65.15.

¹³“Fuu gooduɗo noppi nanki fuu nana ko Ruuhu Allah wi’ata kawte tokkuɓe Yeesu.

Lilal Ngam Ɓe Lawdiikiya

¹⁴“Windan malaa’ikaajo kawtal tokkuɓe Yeesu wonɓe gariiri Lawdiikiya wi’uki:

“Min woni bi’eteeɗo Aamin, ceyduujo mo goonga, barka am Allah tagi koo ɗume.3.14: Wag 8.22.¹⁵E mi andi kuuɗe mooɗon, on peewaa on ngulaa. E mi yiɗi daa on peewii koo on ngulii! ¹⁶Ammaa caka‑caka ngonɗon, on peewaa on ngulaa. Ngam non mi tuttay’on daga nder honduko am, waato mi wanyay’on. ¹⁷On mbi’a, ‘E min ngoodi risku. E min ngoodi jawdi, walaa ko min ndulli.’ Ammaa on andaa on coyɓe on ngartii ko yurminii, on ngalanaa, on wumɓe, on ɓornaaki. ¹⁸Ngam non e mi hokka’on caawori. Coodee jiinaari to am ɗum um seɗiri hiite ngam ndiskon, e kolte daneeje ngam cuddon ɓalli mooɗon to’ cemton, e nebbam ngam moytanon gite keɓon ngi’on. ¹⁹E mi haɓana ɓe nginmi, mi hollitaɓe. Ngam non njawnee tuubee.3.19: Wag 3.12; Ibr 12.6.²⁰Rammi darii e dammugal e mi silminoo. Fuu nanɗo hononde am, maɓɓiti dammugal, mi nattay mi nyamda nyamndu e maako kanko maa e am. ²¹Fuu keɓuɗo jaalorgal o laamodoto e am nder laamu am, non no keɓirmi jaalorgal e mi laamodoo e Nyaako am nder laamu maako.

²²“Fuu gooduɗo noppi nanki nana ko Ruuhu Allah wi’ata kawte tokkuɓe Yeesu!”

Mawninki Allah E Dow

¹Gaɗa non mi raarii, sey ngiimi wongal dammugal e maɓɓitii e ton dow.

Sey nanmi hononde nde nanunoomi arande nandunde e duudol luwal nde wi’i, “Ƴentoy ɗo’o, mi hollumaa ko waɗata gaɗa ɗu’um.” ²Ɗon e ɗon Ruuhu Allah jippoyii dow am, sey ngiimi jooɗorgal laamu e dow, goɗɗo e jooɗii dow maagal. ³Jooɗiiɗo on e ɗelkitoo bo ɗelkitaaki kaaƴe jasfa e kaneeliyan. Nden timbotimbola4.3: Waato njaroowa ndiyam koo callal. ɗelkitotoonga bo hayre emeral e filii jooɗorgal ngal.4.2,3: Ijik 1.26‑28; 10.1.⁴Haade maagal e woodi goɗɗe jooɗorle kanje 24 e ɗe piliingal. Nden woɓɓe mawɓe kamɓe 24 e njooɗii dow maaje. E ɓe bornii kolte daneeje e ɓe taari giifi jiinaari to ko’e maɓɓe e ɓe njooɗii dow jooɗorle ɗen. ⁵Maƴƴe ngaɗi ka wurtoyaaki to jooɗorgal ngal, e hoolo e palmaali, nden yeeso maagal fitilaaji joweeɗiɗi e nyaama, kanji ngoni Ruuhuuji Allah joweeɗiɗi.4.5: Wur 19.16; WY 8.5; 11.19; 16.18; Ijik 1.13; WY 1.4; Jak 4.2.⁶Ɗonmaa yeeso maagal e woodi goɗɗum nanduɗum e mbeela ɗelkitotoonga bo daaroggal.

Ɗonmaa e woodi goɗɗum tagaaɗum kanjum nayum gooduɗum gite koo toye gaɗa e yeeso e ɗum filii jooɗorgal ngal koo nduye wuttudu.4.6: Ijik 1.22.⁷Tagaaɗum arandejum e nandi e sembindu, ɗiɗaɓum ɗum e nandi e ngaari, tataɓum e woodi yeeso bo ngo neɗɗo, nayaɓum e nandi e ciila piiroowa.4.6,7: Ijik 1.5‑10; 10.14.⁸Ɗum ɗon tagaaɗum nayum gooduɗum yonki, koo ɗume e woodi biyeeli joweego’o. E ɗum woodi gite to ɓandu koo toye. Jemma e nyalawma ɗum alataa yimuki e ɗum wi’a,

“O ceniiɗo, o ceniiɗo, o ceniiɗo, Allah Joomiraawo Joomu Bawɗe,

kanko woni ndenno, kanko woni jooni, kanko woni yeeso ɗo’o!”4.8: Ijik 1.18; 10.12; Ica 6.2,3.

⁹Fuu carel ngel ɗum ɗon tagaaɗum gooduɗum yonki yimi gimol mantuki, e mawninki, e yettuki on ɗon jooɗiiɗo dow jooɗorgal ngal gooduɗo yonki haa abadaa abadin, ¹⁰sey mawɓe 24 ɓen njana yeeso jooɗiiɗo dow jooɗorgal ngal ɓe mawninamo, kanko gooduɗo yonki haa abadaa abadin. Ɓe ndesa giifi maɓɓe yeeso jooɗorgal ngal e ɓe mbi’a,

¹¹“Yaa Joomiraawo Allah amin,

a hewtii mawnineeki. Mangu e laamu e bawɗe fuu an jeyiɗum,

ngam an tagi koo ɗume.

E yidde maaɗa ɗum tagaa, ɗum jooɗii.”

Karoori e Deftere Goodunde Haatimiije

¹Sey ngiimi jooɗiiɗo dow jooɗorgal ngal e jogii wonde deftere e jungo nyaamo windaande nder e yaasi, e nde maɓɓiraa haatimiije joweeɗiɗi.5.1: Ijik 2.9,10; Ica 29.11.²Nden mi yi’i goɗɗo malaa’ikaajo gooduɗo laamu e mo wi’a e sembe, “Moye hewti takkita haatimiije deftere nde’e maɓɓitande?” ³Ammaa ɗum heɓaayi goɗɗo e ton dow koo nder duuniyaaru koo nder mayɓe potuɗo maɓɓutuki deftere nden koo raara nder mayre. ⁴Sey puɗɗumi bojji nawɗi ngam ɗum heɓaayi kewtuɗo maɓɓitande raara nder mayre. ⁵Sey go’oto nder mawɓe ɓen wi’iyam, “Alu bojji. Raɗɗum sembindu ndu lenyol Yahuuda, suudu Dawda, heɓii jaalorgal, o takkitay haatimiije joweeɗiɗi nden o maɓɓita deftere nden.”5.5: Fuɗ 49.9; Ica 11.1,10.

⁶Sey ngiimi wondi Karoori e darii haade jooɗorgal ngal. Tagaaɗum nayum gooduɗum yonki ɗum e mawɓe ɓen e piliindi. Karoori ndin bo ndi hirsaanoma. E ndi woodi luwe joweeɗiɗi e gite joweeɗiɗi, kanje ngoni Ruuhuuji Allah joweeɗiɗi lilaaɗi nder duuniyaaru fuu.5.6: Ica 53.7; Jak 4.10.⁷Sey Karoori ndin yahi jaɓi deftere nden e jungo nyaamo jooɗiiɗo dow jooɗorgal ngal. ⁸Nde ndi jaɓinde, tagaaɗum nayum gooduɗum yonki ɗum e mawɓe 24 ɓen njani yeeso mayri mawninindi. Koo moye e jogii garaayaaru e tummude jiinaari e nde heewi urde welnde, kayre woni do’aaje yimɓe Allah.5.8: Jab 141.2.⁹Ɓe ngimi gimol kesol e ɓe mbi’a,

“A hewtii njaɓaa deftere nden

takkitaa haatimiije mayre,

ngam ndenno a waraama, nden barka ƴiiƴam maaɗa a rimɗinanii Allah

yimɓe daga koo ngole lenyol, e koo ngale ɗemngal, e daga koo ɓeye yimɓe, e daga koo ndiye leydi.5.9: Jab 33.3; 98.1; Ica 42.10.

¹⁰A wartiriiɓe yimɓe maaɗa ardiiɓe diina ngam ɓe kuwana Allah meeɗen,

ɓe laamoto e duuniyaaru.”5.10: Wur 19.6; WY 1.6.

¹¹Gaɗa ɗon mi raarii, sey nanmi hononde malaa’ika’en ɗuɗɓe, ɗuuɗuki maɓɓe walaa keerol. E ɓe pilii jooɗorgal ngal e tagaaɗum gooduɗum yonki ɗum ɗon e mawɓe ɓen,5.11: Daan 7.10.¹²e ɓe ngima sembee e ɓe mbi’a,

“Karoori baraandi ndin

ndi hewtii ndi heɓa bawɗe, e risku, e faamu, e sembe,

e mangu, e mawnineeki, e manteeki!”

¹³Sey nanmi koo ɗume ko tagaa e dow, e nder duuniyaaru, e ley leydi, e nder ndiyam, e ko woni nder maajum fuu, e ɗum yima e ɗum wi’a,

“Mantuki, e mangu, e mawnineeki, e laamu

ɗum tabbita to Jooɗiiɗo dow jooɗorgal laamu on, e Karoori ndin

haa abadaa abadin!”

¹⁴Sey tagaaɗum gooduɗum yonki ɗum ɗon nayum mbi’i, “Aamin!” Sey mawɓe ɓen ndiccii mawnini Joomiraawo.

Haatimiije Joweeɗiɗi

¹Nden mi yi’i Karoori ndin takkitii go’o nder haatimiije joweeɗiɗi ɗen. Sey nanmi go’o nder tagaaɗum nayum gooduɗum yonki ɗum ɗon noddii sembee bo hoolo falmaango6.1: Waato riggaango. wi’i, “Woroy!” ²Nde ndarmi sey ngiimi wongu puccu ndanewu. Gonɗo dow maggu e jogii bakahi, ɗum hokkimo giifol. O keɓuɗo jaalorgal o wurtii ngam o ɓeyda heɓuki jaalorgal.6.2: Jak 1.8; 6.3,6.

³Nde Karoori ndin takkiti haatimiire ɗiɗawre, sey nanmi tagaaɗum gooduɗum yonki ɗiɗaɓum wi’ii, “Woroy!” ⁴Sey wongu puccu woɗewu coloy wurtoyii ɗum wi’i gonɗo dow maggu itta jam daga nder duuniyaaru, ngam yimɓe mbarmbartira. O hokkaa kaafahi mawki.6.4: Jak 1.8; 6.2.

⁵Nde Karoori ndin takkiti haatimiire tatawre sey nanmi tagaaɗum tataɓum gooduɗum yonki wi’ii, “Woroy!” Nde ndarmi sey ngiimi puccu ɓalewu. Gonɗo dow maggu e jogii poondirɗum e jungo.6.5: Jak 6.2,6.⁶Sey nanmi goɗɗum bo hononde e wurtoyoo hakkunde tagaaɗum nayum gooduɗum yonki ɗum ɗon e nde wi’a, “Ɗum yoɓay ceede kuugal nyalnde go’o ngam poondirgel alkamaari go’o. Ɗum yoɓay ceede kuugal nyalnde go’o ngam poondirkoy tatoy koy gawri. Ammaa taa’ wonnu nebbam jaytun koo ndiyam inabooje.”

⁷Nde Karoori ndin takkiti haatimiire nayawre mi nanii go’otum nder tagaaɗum nayum ɗum wi’ii, “Woroy!” ⁸Nden mi yi’ii wongu puccu haako haakowu. Inde gonɗo dow maggu Mayde, Laahira e tokkirimo gaɗa. Ɗum hokkiɓe laamu ɓe mbara neɗɗo go’oto nder koo ɓeye yimɓe nayo nder duuniyaaru ngam ɓe mbardaɓe e kaafaaje6.8: Ɓe ngaɗay yimɓe mbarmbartira nder konu., e weelo kallungo, e nyawuuji, e diiwe ladde.6.8: Ijik 14.21.

⁹Nde Karoori ndin takkiti haatimiire njowaɓre nden, mi yi’ii yonkiiji ɓe ɗum wari ngam ɓe nga’ajinii Wolde Allah e goonga. E ɓe ley to ɗum wulata urde. ¹⁰Sey ɓe ƴefti hononde sembee ɓe mbi’i, “Yaa Joomiraawo Joomu koo ɗume, ceniiɗo, gooduɗo goonga, naa ndeye ngaɗantaa duuniyaaru kiita ngaatanoɗaamin ngam warki ki ɓe mbarimin?” ¹¹Sey ɗum hokki koo moye maɓɓe limcere raneere, ɗum wi’iɓe ɓe ciwtoo seɗɗa, naa ɗum hebbitii waruki horiiɓe nder higooɓe kuugal maɓɓe tokkuɓe Yeesu, ɓe ɗum warata non no ɗum wardiɓe.

¹²Nde Karoori ndin takkiti haatimiire joweego’oore, sey ɗum waɗi dimbol leydi mangol. Naange ɓalwi kirim bo ƴulɓe. Lewru wooji coloy bo ƴiiƴam.6.12: WY 11.13; 16.18; Ica 13.10; Yow 2.10,31; 3.15; Maat 24.29; Mar 13.24,25; Luk 21.25.¹³Koode boo njani njaninoyi no ɓikkoy ibbe njaniroyta to hendu dimbii lekki kin. ¹⁴Sey dow taggii no ɗum taggirta daago, ɗum sottini koo ndeye hocceere e leydi ngondi caka ndiyam daga to ɗum woni.6.13,14: Ica 34.4.6.14: WY 16.20.¹⁵Sey laamiiɓe duuniyaaru, e ardiiɓe, e mawɓe sooji’en, e gooduɓe risku, e gooduɓe laamu, e maccuɓe, e naa’ maccuɓe ɓe cuuɗii nder luurooji6.15: Waato loogooji kaaƴe. e ley kaaƴe nder kocceeje.6.15: Ica 2.19,21.¹⁶Ɓe mbi’i kocceeje ɗen e kaaƴe ɗen, “Njanoyee dow amin, cuuɗonmin to’ gonɗo dow jooɗorgal laamu yi’amin, nden to’ Karoori ndin halkamin.6.16: Yuuc 10.8; Luk 23.30.¹⁷Ngam nyalnde monnere maɓɓe kallunde warii. Moye waawata daraaki?”6.17: Yow 2.11; Mal 3.2.

Yimɓe Israa’iila 144,000

¹Gaɗa non mi yi’ii malaa’ika’en nayo e ndarii e guttulli nayi ɗi duuniyaaru. E ɓe curi henduuji nayi ɗi duuniyaaru ngam to’ hendu wisa dow leydi koo dow maayo koo dow koo kiye lekki.7.1: Irm 49.36; Daan 7.2; Jak 6.5.²Sey ngiimi goɗɗo malaa’ikaajo e ƴenta dow daga fuuna e mo jogii haatimiire Allah gooduɗo yonki. O metani malaa’ika’en nayo ɓen ɗon ɓe Allah hokki laamu lallinki leydi e maayo. O metaniɓe e hononde cembinde, ³o wi’i, “To’ on lallin leydi koo maayo koo leɗɗe naa min ngaɗanii maccuɓe Allah meeɗen alaama to tiiɗe maɓɓe taw.”7.3: Ijik 9.4,6.⁴Sey nanmi ɗuɗki ɓe ɗum waɗani alaama ɓen kewtii yimɓe 144,000. Ɓe fuu maɓɓe daga nder lenyi Israa’iila sappo e ɗiɗi ɓe ngoni, ⁵yimɓe 12,000 daga lenyol Yahuuda, yimɓe 12,000 daga lenyol Rubaynu, yimɓe 12,000 daga lenyol Gat, ⁶yimɓe 12,000 daga lenyol Aaciru, yimɓe 12,000 daga lenyol Naftaali, yimɓe 12,000 daga lenyol Manaase, ⁷yimɓe 12,000 daga lenyol Saaminu, yimɓe 12,000 daga lenyol Leewi, yimɓe 12,000 daga lenyol Isaaka, ⁸yimɓe 12,000 daga lenyol Jabaluuna, yimɓe 12,000 daga lenyol Isufu, yimɓe 12,000 daga lenyol Biliyaaminu.

Yimɓe Ɗuɗɓe Daga Koo Ngole Lenyol

⁹Gaɗa ɗum ɗon mi raarii sey ngiimi yimɓe ɗuɗɓe ɓe ƴaɓɓake limngal. Ɓe ngaroyii daga koo ndiye leydi, e koo ngole lenyol, e koo ɓeye yimɓe, e koo ngale ɗemngal, e ɓe ndarii yeeso jooɗorgal laamu ngal e Karoori ndin e ɓe ɓornii kolte daneeje tar. E ɓe njogii licoy haako dabiinooje e juuɗe maɓɓe. ¹⁰E ɓe ƴefta hononde sembee e ɓe mbi’a, “Kisndam waroyii daga to Allah meeɗen jooɗiiɗo dow jooɗorgal laamu e Karoori ndin!” ¹¹Malaa’ika’en fuu e ndarii pilii jooɗorgal laamu ngal e mawɓe ɓen ɗon e tagaaɗum nayum gooduɗum yonki ɗum ɗon. Ɓe fuu ɓe njani ɓe mawnini Allah. ¹²E ɓe mbi’a, “Aamin! Mantuki, e teddungal, e faamu, e yettoore, e mangu, e bawɗe, e sembe tabbita to Allah meeɗen haa abadaa abadin! Aamin.” ¹³Sey go’oto nder mawɓe ɓen ɗon ƴamiyam wi’i, “Ɗum ɓeye ɓe’e yimɓe ɓorniiɓe kolte daneeje? Nden daga toye ɓe ƴiwoyi?” ¹⁴Sey mbiimoomi, “Mi andaa, mawɗo. An a andi.” Sey o wi’iyam, “Ɓe’e yimɓe kamɓe ƴiwoyi daga nder torra kalluka. Ɓe laɓɓiniri kolte maɓɓe e ƴiiƴam Karoori ndin ɗe ndanni tar.7.14: Daan 12.1; Maat 24.21; Mar 13.19.¹⁵Kanjum waɗi e ɓe ndarii yeeso jooɗorgal laamu Allah. E ɓe kuwanamo jemma e nyalawma nder wuro maako. Jooɗiiɗo dow jooɗorgal laamu ngal o suranayɓe. ¹⁶Ɓe ɓeydataa ɓe nana weelo, ɓe ɓeydataa ɓe nana ɗonka. Naange fuɗɗitataa piyaɓe koo goɗɗum gulɗum sam.7.16: Ica 49.10.¹⁷Ngam Karoori ngondi caka jooɗorgal laamu ngal ndi wartay gaynaako maɓɓe. Nden ndi yaarayɓe to ndiyam yonki ɓuliroyta. Allah boo moytanayɓe fuu gonɗi maɓɓe.”7.17: Jab 23.1; Ijik 34.23; Jab 23.2; Ica 49.10; Ica 25.8.

Haatimiire Joweeɗiɗawre

¹Nde Karoori ndin takkiti haatimiire joweeɗiɗawre, sey koo ɗume de’’iti ton dow haade mintiiji 30. ²Nden mi yi’ii malaa’ika’en njoweeɗiɗo dariiɓe yeeso Allah ɗum hokkiɓe luwe joweeɗiɗi.

³Sey goɗɗo malaa’ikaajo wari darii yeeso to ɗum wulata urde welnde e mo jogii tummude jiinaari nde ɗum wulata urde nder mayre. Ɗum hokkimo urde ɗunde ngam o hawtande e do’aare yimɓe Allah o hokkande Allah to ɗum wulata urde welnde ɗum jiinaari gonɗum yeeso jooɗorgal laamu ngal.8.3: Amos 9.1; Wur 30.1,3.⁴Sey curka urde nden ummii daga nder tummude nde o jogii nden hawti e do’aaje yimɓe Allah ɓen ka yahi yeeso Allah. ⁵Sey malaa’ikaajo on hocci tummude nden hebbininde hiite daga to ɗum wulata urde welnde, o sankitinge dow duuniyaaru. Sey ɗum nangi waɗuki palmaali, e hoolo, e maƴƴe, e dimbol leydi.8.5: KLee 16.12; Ijik 10.2; Wur 19.16; WY 11.19; 16.18.

Luwe Nayi

⁶Nden malaa’ika’en ɓen ɗon njoweeɗiɗo jogiiɓe luwe joweeɗiɗi ɓe ciryii duudukiɗe.

⁷Malaa’ikaajo arandeejo duudi luwal muuɗum sey raa malemalleeje kalluɗe e hiite e ɗum jillindirii e ƴiiƴam ɗum meccoyaa dow duuniyaaru. Hiite ngen boo nyaami sendere go’o nder cende tati ɗe duuniyaaru, nge nyaami sendere go’o nder cende tati ɗe leɗɗe e fuɗe fuɗeeji.8.7: Wur 9.23‑25; Ijik 38.22.

⁸Nde malaa’ikaajo ɗiɗaɓo duudi luwal muuɗum, sey ɗum hubii goɗɗum nder maayo nanduɗum e hocceere mawnde e ɗum nyaama hiite. Daga ɗon sendere go’o nder cende tati ɗe maayo ngon warti ƴiiƴam. ⁹Nden sendere go’o nder cende tati ɗe marle maayo ngon mbaati, nden sendere go’o nder cende tati ɗe komiije gonɗe ɗon kalki.

¹⁰Nde malaa’ikaajo tataɓo duudi luwal muuɗum, sey wonde hoodere yanoyi daga dow e nde nyaama hiite bo yawre nde ɗum yardata nyaaki. Nde yani dow sendere go’o nder cende tati ɗe canɗi e to ndiyam ɓuliroyta.8.10: Ica 14.12.¹¹Inde hoodere nden “Kaɗɗum.” Sey sendere go’o nder cende tati ɗe ndiyam warti kaɗɗam. Yimɓe ɗuɗɓe nde njari ndiyam ɗam ɓe maayi ngam ɗam wartii kaɗɗam.8.11: Irm 9.15.

¹²Nde malaa’ikaajo nayaɓo duudi luwal muuɗum, sey ɗum piyi sendere go’o nder cende tati ɗe naange e lewru e koode, haa sendere go’o nder cende tati ɗe jayngol naange e lewru e koode nyiɓɓi. Sendere go’o nder cende tati nde nyalawma warti nyiwre; non maa jemma.8.12: Ica 13.10; Ijik 32.7; Yow 2.10,31; 3.15.

¹³Nden nde ndaarumi, sey nanmi wonga ciila e nga fiira e dow e nga wi’a e sembe, “On mbonii! On mbonii! On mbonii onon jooɗiiɓe nder duuniyaaru, to ɗum duudii luwe koriiɗe ɗe malaa’ika’en ɓen ɗon tato ciryii duuduki!”

Luwal Njowaɓal

¹Nde malaa’ikaajo njowaɓo duudi luwal muuɗum, sey ngiimi hoodere yanoyii nder duuniyaaru daga dow. Sey ɗum hokkinde maɓɓitirgel dammugal ngayka kalluka lugguka. ²Nde hoodere nden maɓɓiti ngayka kan, sey wokka curka ɓaleha wurtoyii bo curka ladde nyaamoore hiite, ka ɓalwini naange e njayri dow.9.2: Fuɗ 19.28. ³Sey mbaabeho9.3: Waato baɓatti. mburtoyii daga nder curka kan ko njipponoyii duuniyaaru. Ɗum hokkiko sembe ŋatuki bo jahe.9.3: Wur 10.12‑15. ⁴Sey ɗum wi’iko to’ ko meema geene, koo leɗɗe, koo goɗɗum fuɗe‑fuɗe, sey ni yimɓe ɓe ngalaa alaama Allah e tiiɗe maɓɓe tan.9.4: Ijik 9.4.⁵Ɗum aliko ko torra yimɓe ɓen torra kalluka haa lebbi jowi, ammaa to’ ko mbaraɓe. Nawɗum ŋatuki maako bo nawɗum ŋatuki jahe. ⁶Nder balɗe ɗen yimɓe ɗaɓɓitay mayde, ammaa ɓe keɓataande; ɓe kaaɓay ɓe maaya, ammaa mayde nden doggayɓe.9.6: Ayu 3.21; Irm 8.3.

⁷Mbaabeho kon e nandi e pucci ciryiiɗi ngam konu, e ko ngoodi goɗɗum to ko’e bo giifi jiinaari, geece maako boo e nandi e ɗe yimɓe.9.7: Yow 2.4.⁸Gaasa maako e nandi e gaasa ko’e rewɓe, nden nyiiƴe maako e nandi e ɗe sembindu.9.8: Yow 1.6.⁹Gabaaje maako e cuddorii e goɗɗum nanduɗum e toggohoy njamndi, sonnyo biyeeli maako boo e nandi e sonnyo pucci kaɓɓanaaɗi keeke konu e ɗi ndogga e ɗi ummanii konu.9.9: Yow 2.5.¹⁰E ko ngoodi bicce piɗooje bo ɗe jahe. Bicce ɗen boo e ngoodi sembe nawnuki yimɓe haa lebbi jowi. ¹¹Nden e ko ngoodi laamiiɗo laamotooɗoko, kanko woni malaa’ikaajo ngayka kalluka lugguka kan. Inde maako nder Ibraaniyankoore woni “Abaddon,” nder Helenankoore boo “Afooliyon,” waato Kalkoowo.

¹²Bone kalluɗum arandejum ƴaɓɓake. Horii bone kalluɗum ɗiɗum garayɗum.

Luwal Joweego’owal

¹³Nden malaa’ikaajo joweego’oojo duudi luwal muuɗum, sey nanmi hononde e wurtoyoo daga nder noppi nayi ɗi to ɗum wulata urde ɗum jiinaari gonɗum yeeso Allah.9.13: Wur 30.1‑3.¹⁴Hononde nden wi’i malaa’ikaajo on, “Yoofu malaa’ika’en nayo ɓen ɗon kaɓɓaaɓe to iloowo mango bi’eteengo Yuferitis!” ¹⁵Sey ɗum yoofi malaa’ika’en ɓen ɗon nayo ɓe ɗum siryanii carel nge’el, e nyalnde nde’e nde lewru ndu’u e ndungu ngu’u ngam ɓe mbara sendere go’o nder cende tati ɗe yimɓe duuniyaaru. ¹⁶Ɗum wi’iyam ɗuuɗuki sooji’en wonɓe dow pucci waɗii 200,000,000. ¹⁷Nder wahayu ɗum mi yi’i pucci e wonɓe dow majji, e ɓe cuddi gabaaje maɓɓe e toggohoy njamndi e koy mbooji coloy bo hiite, e cuuɗijum, e nareerijum. Kadimaa koo nguye puccu e woodi hoore bo nde sembindu, nden hiite e curka e kaaƴe nyaamooje hiite e wurtoyoo daga konduɗe majji. ¹⁸Sendere go’o nder cende tati ɗe duuniyaaru mbardaa e bone kalluɗum tatum ɗum ɗon, waato hiite, e curka, e kaaƴe nyaamooje hiite burtoytooɗum daga konduɗe maaji. ¹⁹Sembe maaji nder konduɗe maaji e bicce maaji ngoni. Bicce ɗen e ngoodi ko’e bo ɗe boole, e maaje ɗi nawnirta yimɓe.

²⁰Yimɓe koriiɓe ɓe bone ɗum ɗon mbaraayi, ɓe tuubaayi ɓe cendiri e ko ɓe ngaɗi e juuɗe maɓɓe. Ɓe alaayi mawninki ginni, e allaaji fewre gaɗiraaɗi jiinaari, koo ajurfaari, koo njamndi mboɗeeri, koo hayre, koo lekki. Ɗi fuu ɗi ngi’ataa, ɗi nanataa, ɗi njahataa.9.20: Jab 115.4‑7; 135.15‑17; Daan 5.23.²¹Nden ɓe alaayi waruki yimɓe, e huutirki bawɗe ginni, e njeenu, e wujje‑wujje maɓɓe.

Malaa’ikaajo e Ɗerewol

¹Nden mi fuɗɗitii mi yi’i goɗɗo malaa’ikaajo gooduɗo laamu, e mo jippoyoo daga dow, e mo suddorii duule. E mo woodi timbotimbola10.1: Waato njaroowa ndiyam koo callal. dow hoore maako, yeeso maako bo naange, koyɗe maako bo lekko nyaamooho hiite. ²E mo jogii wongol ɗerewol pamarol e jungo maako e ngol maɓɓitii. O waɗi koyngal maako ngal nyaamo dow maayo, koyngal maako ngal nano boo dow leydi. ³Sey o meti e hononde cembinde bo bojji sembindu. Nde o meti, sey palmaali joweeɗiɗi nootii e hoolo cembingo. ⁴Nde palmaali joweeɗiɗi ɗin kooli, sey ciryiimi mi winday. Ammaa sey nanmi wonde hononde daga dow wi’ii, “Taa’ wi’u goɗɗo ko palmaali joweeɗiɗi ɗin ɗon mbi’i nden taa’ winduɗum!”

⁵Nden malaa’ikaajo mo ngiimi e darii dow leydi e dow maayo ƴefti jungo muuɗum nyaamo dow. ⁶O hunorii inde Allah gooduɗo yonki haa abadaa abadin, taguɗo dow e ley e maayo e ko woni nder maajum. O wi’i, “Wonnuki carel horaaki kadin! ⁷Ammaa carel ko malaa’ikaajo joweeɗiɗaɓo duudata luwal muuɗum, Allah hebbinay sirru10.7: Waato kuuɗe Allah cuuɗiiɗe. muuɗum, non no o wi’unoo maccuɓe maako annabo’en.”10.5‑7: Wur 20.11; TA 32.40; Daan 12.7; Amos 3.7.

⁸Nden hononde nde nanunoomi daga dow, nde fuɗɗitii nde metaniiyam nde wi’i, “Yahu njaɓaa ɗerewol ngol ɗon maɓɓitiingol e jungo malaa’ikaajo on ɗon dariiɗo dow maayo e dow leydi.”

⁹Sey njahumi to malaa’ikaajo on mbiimoomi o hokkayam ɗerewol ngol. Sey o wi’iyam, “Jaɓungol nyaamaa. Ngol wartay kaɗɗum nder reedu maaɗa, ammaa to honduko maaɗa ngol welay bo njumri.”

¹⁰Sey njaɓumi ɗerewol ngol e jungo malaa’ikaajo on nyaamumingol. Sey ngol warti belngol e honduko am bo njumri, ammaa gaɗa mi moɗiingol ngol warti kaɗɗum nder reedu am.10.8‑10: Ijik 2.8—3.3.¹¹Sey ɗum fuɗɗiti ɗum wi’iyam, “Doole puɗɗitaa mbi’a ko heɓata yimɓe e leyɗe feere‑feere, e lenyi, e ɗemɗe, e laamiiɓe ɗuɗɓe.”

Ceydu’en Allah Ɗiɗo

¹Nden ɗum hokkiyam goɗɗum poondirɗum nanduɗum e sawru, ɗum wi’iyam, “Umma njahaa poondaa wuro ceniingo e to ɗum hokkata Allah caahu, nden limaa mawninooɓe Allah nder maggo.11.1: Ijik 40.3; Jak 2.1,2.²Ammaa taa’ foondu njayri yaasi wuro ngon, alundi, ngam ɗum hokkiindi leƴƴi duuniyaaru, ɓe laamoo Gariiri Ceniindi e sembe haa lebbi 42.11.2: Luk 21.24.³Nden mi hokkay ceydu’en am ɗiɗo laamu ɓe nga’ajina wolde am haa balɗe 1,260, e ɓe ɓornii kolte kollayɗe wannaare.”

⁴Ɓen ɗon ceydu’en ɗiɗo kamɓe ngoni leɗɗe jaytun ɗiɗi e fitilaaji ɗiɗi dariiɗi yeeso Joomu duuniyaaru fuu.11.4: Jak 4.3,11‑14.⁵Fuu giɗɗo hallanaɓe, sey hiite wurtoyoo daga nder konduɗe maɓɓe halkamo. Non ɗum warirta koo moye giɗɗo hallankiɓe. ⁶E ɓe ngoodi laamu haɗuki ndiyam toɓa nder balɗe ɗe ɓe nga’ajinta Wolde Joomiraawo. Nden e ɓe ngoodi laamu ɓe ngartira ndiyam ƴiiƴam. Ɗonmaa e ɓe ngoodi laamu jippinanki duuniyaaru koo iri ɗume bone kalluɗum ɗum ɓe ngiɗi.11.6: 1Laam 17.1; Wur 7.17‑19; 1Sam 4.8.

⁷Gaɗa ɓe keenyii wa’ajinki maɓɓe sey wondi mardi kallundi burtoytoondi nder ngayka lugguka kan honaɓe. Ndi heɓa jaalorgal dow maɓɓe ndi waraɓe.11.7: Daan 7.7; WY 13.5‑7; 17.8; Daan 7.21.⁸Ɗum alay ɓalli maɓɓe caka luumo gariiri mawndi.11.8: Waato Urucaliima. E ɗum noddira gariiri ndin “Sodom” koo “Masar” ngam ngikku jooɗiiɓe nder mayri. Nder mayri ɗum piyani Joomiraawo maɓɓe kuusaaje dow gaafaangal.11.8: Ica 1.9,10.⁹Yimɓe daga koo ndiye leydi, e lenyi, e ɗemɗe ɓe ndaaray ɓalli ɗin haa balɗe tati e sendere ɓe kaɗa ɗum uwoyaɗi. ¹⁰Yimɓe duuniyaaru fuu nanay belɗum ɓe ngaɗa humto ɓe kokkindira dokke ngam annabo’en ɗiɗo ɓen mbaraama. Ɓe ngaɗay non ngam annabo’en ɓen pooɗaniino duuniyaaru fuu torra kalluka.

¹¹Ammaa gaɗa balɗe tati e sendere, sey foofaango yonki waroyi daga to Allah nattiɓe. Ɓe ummii ɓe ndarii, kulol mangol nangi koo moye giiɗoɓe.11.11: Ijik 37.10.¹²Sey annabo’en ɗiɗo ɓen nani wonde hononde cembinde daga dow e wi’aɓe, “Ƴentoyee ɗo’o!” Sey ɓe koccaa yaaki dow nder nduula, wanywanyɓe maɓɓe e ndaara.11.12: 2Laam 2.11.¹³Ɗon e ɗon ɗum waɗi wongol dimbol leydi kallungol, sey sendere go’o nder cende sappo ɗe gariiri ndin yani, ɗum wari yimɓe 7,000. Kulol mangol nangi yimɓe koriiɓe, ɓe mawnini Allah Mo Dow.11.13: WY 6.12; 16.18.

¹⁴Halkere ɗiɗawre ƴaɓɓake. Halkere tatawre e wara naa’ ko neeɓi.

Luwal Joweeɗiɗaɓal

¹⁵Sey malaa’ikaajo joweeɗiɗaɓo duudi luwal muuɗum, sey ɗum nani hononɗe cembiɗɗe daga dow e mbi’a, “Laamu duuniyaaru fuu wartii ɗum Joomiraawo meeɗen e Almasiihu maako. O laamoto haa abadaa abadin!”11.15: Wur 15.18; Daan 2.44; 7.14,27.¹⁶Sey mawɓe ɓen ɗon 24 jooɗiiɓe dow jooɗorle laamu maɓɓe yeeso Allah ɓe njani yeeso maako ɓe mawninimo. ¹⁷E ɓe mbi’a,

“Yaa Allah Joomiraawo Joomu Bawɗe, an woni jooni, an woni ndenno!

Min ngettiima ngam a huutirii bawɗe maaɗa a fuɗɗii laamaaki.

¹⁸Yimɓe ɓe andaama ɓernii,

ammaa carel monnere maaɗa warii.

Carel warii ngel ɗum waɗanta mayɓe kiita,

nden ɗum waatana maccuɓe maaɗa annabo’en ko ɓe ngaɗi,

e yimɓe kulooɓe inde maaɗa

mawɗo e pamaro,

nden ɗum halka barooɓe yimɓe.”11.18: Jab 2.5; 110.5; Jab 115.13.

¹⁹Sey ɗum maɓɓiti wuro ceniingo ton dow, ɗum yi’i Akwaatiya Alkawal maako nder maggo. Sey ɗum nangi waɗuki maƴƴe e palmaali e riggaaki e dimbol leydi e malemalleho mawko‑mawko.11.19: WY 8.5; 16.18; WY 16.21.

Debbo e Mbooga Manga

¹Sey goɗɗum kulniiɗum kayɗiniiɗum wangi e dow. Goɗɗo debbo e suddorii naange e mo darii dow lewru. E mo taari giifol goodungol koode sappo e ɗiɗi. ²E mo woodi reedu e mo diccii o danyay, e mo woya ngam nawɗum danyngol kalluɗum.

³Ɗonmaa goɗɗum kulniiɗum kayɗiniiɗum wangi e dow: wonga mbooga mboɗewa ngoodunga ko’e joweeɗiɗi e luwe sappo, koo ndeye hoore e woodi giifol.12.3: Daan 7.7.⁴Sey wicco maaga wuuwi sendere go’o nder cende tati ɗe koode nga rufoyiɗe dow duuniyaaru. Sey nga wari nga darii yeeso on ɗon debbo dicciiɗo danyay ngam nga nyaama ɓingel maako to o danyiingel.12.4: Daan 8.10.⁵O danyi ɓiɗɗo gorko laamotooɗo duuniyaaru e sawru njamndi. Ammaa ɗum hocci ɓiɗɗo on ɗum yaarimo to Allah to jooɗorgal laamu maako.12.5: Ica 66.7; Jab 2.9.⁶Debbo on boo doggi natti ladde yaaki wonde wigeere to Allah siryaniimo to ɗum faamantamo haa balɗe 1,260.

⁷Sey konu ummii ton dow. Miikaa’ilu e malaa’ika’en muuɗum konidi e mbooga ngan e malaa’ika’en magga.12.7: Daan 10.13,21; 12.1; Yahu 9.⁸Ammaa ɗum heɓi jaalorgal dow mbooga ngan, ɗum riiwinga e malaa’ika’en maaga daga ton dow. ⁹Ɗum hubinoyinga nder duuniyaaru. Kanga woni mbooga nga daga ndenno bi’eteenga Gullotooɗo koo Ceyɗan, majjinoowo duuniyaaru. Ɗum hubininga nder duuniyaaru fuu e malaa’ika’en maako.12.9: Fuɗ 3.1; Luk 10.18.

¹⁰Sey nanmi wonde hononde cembinde daga dow e wi’a, “Jooni kisndam, e laamu, e bawɗe Allah meeɗen, e laamu Almasiihu maako warii. Ngam on ɗon gullotooɗo bandiraaɓe meeɗen yeeso Allah jemma e nyalawma riiwaama daga dow.12.10: Ayu 1.9‑11; Jak 3.1.¹¹Ɓe keɓii jaalorgal dow maako barka ƴiiƴam Karoori ndin nden e barka Wolde Allah ngam ɓe njaɓii ɓe ndulla yonki maɓɓe. ¹²Ngam non, onon wonɓe nder wuro Allah ton dow, nanee belɗum! Ammaa on mbonii onon wonɓe nder duuniyaaru e ko woni nder maayo! Ngam Ceyɗan jipponoyake’on e ɓerni bo pusay ngam e mo andi carel maako ɓadake re’uki.”

¹³Nde mbooga ngan anditi riiwaama nder duuniyaaru, sey nga fuɗɗi tokkuki debbo on ɗon danyuɗo ɓiɗɗo gorko. ¹⁴Ammaa ɗum hokki debbo on biyeeli ɗiɗi ɗi ciila manga ngam o fiira o yaha wigeere nde ɗum siryaniimo nder ladde. Ton ɗum faamantamo haa duuɓi tati e sendere.12.14: Daan 7.25; 12.7.¹⁵Sey mbooga ngan tuuti ndiyam bo caangol gaɗa debbo on, ngam ndiyam ɗam dillida e maako. ¹⁶Ammaa leydi wallimo ndi omti honduko ndi yardi ndiyam ɗam. ¹⁷Sey mbooga ngan monnani debbo on, nga ummoyii nga hona lenyol maako, waato koo moye tokkoowo ko Allah wi’i jaɓuɗo goonga ka Yeesu waddi. ¹⁸Sey mbooga ngan darii dow njaareendi ngondi daande maayo.

Marle Ɗiɗi

¹Sey ngiimi wondi mardi e wurtoyoo daga nder maayo e ndi woodi luwe sappo e ko’e joweeɗiɗi. Koo ngale luwal e woodi giifol nden koo ndeye hoore e woodi inde kollaynde Allah yawaare.13.1: Daan 7.3; WY 17.3,7‑12.²Mardi ndi ngiimi ndin e ndi nandi e cembindu e ndi woodi koyɗe mawɗe gooduɗe gaasa e peɗeeli juutuɗi bo ɗi wonga ndiwriwa ladde bi’eteenga beyar. Honduko mayri e nandi e ko sembindu. Mbooga ngan boo hokkindi bawɗe muuɗum, e jooɗorgal laamu muuɗum, e laamu mawɗum.13.2: Daan 7.4‑6.³Nden hoore wo’oyre daga nder ko’e mardi ndin e woodi wonde nawnoode baawaynde warkindi. Ammaa nawnoode nden yaadake hoyii. Ngam non koo moye nder duuniyaaru hayɗini tokki mardi ndin. ⁴Ɓe mawnini mbooga ngan, ngam nga hokkiindi laamu. Ɗonmaa ɓe mawnini mardi ndin, e ɓe mbi’a, “Moye hewti bo mardi ndi’i? Moye waawata haɓda e mayri?”

⁵Ɗum ali mardi ndin mawnina hoore muuɗum e huɗa Joomiraawo, ɗum alindi ndi laamoo lebbi 42. ⁶Ndi fuɗɗi huɗuki Allah e inde maako e to o jooɗotoo, e fuu jooɗiiɓe ton dow.13.5,6: Daan 7.8,25; 11.36.⁷Ɗum alindi ndi hona yimɓe Allah ndi heɓa jaalorgal dow maɓɓe. Ndi hokkaa laamu dow koo ngole lenyol, e koo ɓeye yimɓe, e koo ngale ɗemngal, e koo ndiye leydi.13.7: Daan 7.21.⁸Fuu yimɓe jooɗiiɓe e duuniyaaru ɓe mawninayndi, sey ni ɓe ɗum windi inɗe maɓɓe ko duuniyaaru tagee nder deftere yonki nde Karoori baraandi.13.8: Jab 69.28.

⁹“Fuu gooduɗo noppi nanooji nana! ¹⁰Koo moye ɗum windi naa yahii maccungaaku, too, naa yahii: nden koo moye ɗum windi e kaafahi o wardetee, too, e kaafahi kin o wardetee. Ngam maajum sey yimɓe Allah kooloomo ngaɗa munyal.”13.10: Irm 15.2; 43.11.

¹¹Nden mi yi’ii wondi mardi e wurtoyoo daga nder leydi. E ndi woodi luwe ɗiɗi bo ɗe karoori, e ndi meta bo mbooga. ¹²E ndi huutira laamu mardi arandeeri ndin fuu yeeso arandeeri ndin. Ndi waɗii duuniyaaru e koo moye gonɗo nder mayru mawnina mardi arandeeri ndin, ndin ɗon ndi nawnoode mayri hoyi. ¹³Mardi ɗiɗawri ndin waɗi fii kayɗiniiɗum ɗuɗɗum, haa maa ndi waɗi hiite rufoyi nder duuniyaaru daga dow. Ndi waɗi non yeeso gite koo moye. ¹⁴Ndi majjini yimɓe wonɓe duuniyaaru e kayɗiniiɗum ɗum um alindi ndi waɗa e yeeso mardi arandeeri nawniraandi kaafahi ammaa e ndi woodi yonki. Nden ndi wi’iɓe ɓe ngaɗa ngunkiwa nandunga e mardi arandeeri ndin ngam hokkukindi mangu. ¹⁵Ɗum ali mardi ɗiɗawri ndin fuufana ko ɓe ngaɗi ɗum foofaango yonki ngam ɗum meta ɗum waɗa fuu ganyuɗo mawninkiɗum waree. ¹⁶Ɗonmaa mardi ɗiɗawri ndin waɗi koo moye waɗanee alaama mayri e jungo nyaamo koo e tiinde, mawɗo e pamaro, gooduɗo risku e mo walanaa, maccuɗo e naa’ maccuɗo. ¹⁷Ndi waɗu non ngam to’ goɗɗo sooda koo soora to walaa alaama mayri, waato inde mayri koo lamba inde mayri.

¹⁸Ɗo’o e haani kuutiron faamu. Fuu gooduɗo andal o wurtina ma’ana lamba mardi ndin ɗon, ngam lamba ɗum ɗum inde neɗɗo. Lamba ɗum woni 666.

Gimol Keɓuɓe Kisndam

¹Nden mi raarii sey ngiimi Karoori ndin e darii dow Hocceere Sihiyoona. E mo wondi e yimɓe 144,000 ɓe ɗum windani inde maako e nde Nyaako maako to tiiɗe maɓɓe.14.1: Ijik 9.4; WY 7.3.²Sey nanmi wonde hononde daga dow cembinde bo hoolo ndiyamji doggooji, bo hoolo riggaango cembingo. E nde nandi e iido fiiki garaayaaji. ³E ɓe ngima wongol gimol kesol yeeso jooɗorgal laamu ngal e tagaaɗum nayum gooduɗum yonki ɗum ɗon e yeeso mawɓe ɓen ɗon. Walaa baawayɗo ekkitaaki gimol ngol, sey ɓen ɗon yimɓe 144,000 tan ɓe ɗum rimɗini daga duuniyaaru. ⁴Kamɓe ngoni gaɗuɓe jonde lamnde ngam ɓe meeɗaayi walduki e rewɓe, e ɓe tokka Karoori ndin fuu to ndi fa’i. Kamɓe ngoni rimɗinaaɓe nder yimɓe horiiɓe, kamɓe ngoni ɓe ɗum arti hokkuki Allah e Karoori ndin. ⁵Ɗum meeɗaayi nanki fewre daga konduɗe maɓɓe, ngam ɓe meeɗaayi waɗuki goɗɗum ko wooɗaa.14.5: Jaf 3.13.

Lilal Malaa’ika’en Tato

⁶Nden mi yi’ii goɗɗo malaa’ikaajo e fiira ton dow, e mo yaada e Habaru Belɗum tabitayɗum ngam o wa’ajinana yimɓe duuniyaaru ɓe koo ngole lenyol, e koo ɓeye yimɓe, e koo ngale ɗemngal, e koo ndiye leydi. ⁷O ƴefti hononde sembee o wi’i, “Kulee Allah mawnineemo! Ngam carel ngel o waɗanta duuniyaaru kiita waɗii. Mawninee taguɗo dow e ley, e maayo e to ndiyam ɓulata.”

⁸Sey malaa’ikaajo ɗiɗaɓo tokki arandeejo on e wi’a, “Gariiri Baabiila halkaama! Gariiri mawndi ndin ndi halkaama! Ndi yarnii lenyi wongu njaru gaylitayngu hoore, waato njeenu, ndi fooɗoyi monnere Allah.”14.8: Ica 21.9; Irm 51.8; WY 18.2.

⁹Sey malaa’ikaajo tataɓo tokki ɗiɗo arande’en ɓen e wi’a e sembe, “Fuu mawninɗo ndin ɗon mardi arandeeri e ngunkiwa nandunga e mayri, nden jaɓi alaama mayri e jungo muuɗum koo e tiinde muuɗum, ¹⁰o yaray bone kalluɗum ɗum Allah siryii e sembe muuɗum nder tummude monnere muuɗum. Ɗum torriraymo hiite e kibiritu yeeso malaa’ika’en ceniiɓe e Karoori ndin.14.10: Ica 51.17; Fuɗ 19.24; Ijik 38.22.¹¹Curka hiite gulayngeɓe ka waɗay ka ummaaki dow haa abadaa abadin. Ɓen ɗon mawninɓe mardi ndin ɗon e ngunkiwa nandunga e mayri e fuu gaɗanaaɓe alaama inde mayri, ɓe keɓataa ustaneeki bone jemma e nyalawma.”14.11: Ica 34.10.

¹²Ngam maajum yimɓe Allah tokkooɓe ko o wi’i kooliiɓe Yeesu ngaɗa munyal.

¹³Sey puɗɗutumi nanmi wonde hononde daga dow e wi’a, “Windu ɗu’um, ‘Ɓe barkiɗinaaɓe maayayɓe daga jooni e tokki Joomiraawo.’ ”

Ruuhu Allah wi’ii, “Goonga, ɓe ciwtoto daga kuugal maɓɓe e torra maɓɓe, ngam ko ɓe ngaɗi tokkayɓe.”

Nyalnde Jaango

¹⁴Nden mi raarii sey ngiimi goɗɗe duule daneeje e woodi goɗɗo bo Ɓii Neɗɗo e jooɗii dow maaje, e mo taari giifol jiinaari to hoore maako, e mo jogii lawjeeru nyaaɗundu e jungo maako.14.14: Daan 7.13.¹⁵Sey goɗɗo malaa’ikaajo wurtoyii daga nder wuro ceniingo ton dow o metani jooɗiiɗo dow duule on e hononde cembinde o wi’i, “Waɗu lawjeeru maaɗa, puɗɗaa taƴuki ko ɓendi, ngam carel fe’’uki gese duuniyaaru waɗii.”14.15: Yow 3.13.¹⁶Sey on ɗon jooɗiiɗo dow duule waɗi lawjeeru muuɗum taƴi ko ɓendi nder duuniyaaru.

¹⁷Ɗonmaa goɗɗo malaa’ikaajo wurtoyii daga nder wuro ceniingo nder wuro Allah ton dow. Kanko maa e mo jogii lawjeeru nyaaɗundu.

¹⁸Sey goɗɗo malaa’ikaajo paamanoowo hiite wurtoyii daga nder to ɗum wulata urde. O metani malaa’ikaajo jogiiɗo lawjeeru welndu nder hononde cembinde o wi’i, “Waɗu lawjeeru maaɗa taƴaa inabooje duuniyaaru,14.18: Waato yimɓe. ngam ngesa inabooje duuniyaaru ɓendii.” ¹⁹Sey malaa’ikaajo on waɗi lawjeeru muuɗum nder duuniyaaru taƴi ɓikkoy inabooje daga layi maaje, o hubiikoy nder ngayka to ɗum yaaɓatakoy. Ɗu’um holli no Allah monniranta kalluɓe. ²⁰Ɗum yaaɓikoy nder ngayka kan gaɗa gariiri. Ƴiiƴam waɗi ka wurtoyaaki e dogga daga nder ngayka kan, to ɗam yaari waɗii mil 29614.20: Koo boo: “1,600 stadia.” nden lugguki maajam waɗii sawru go’o.14.20: Ica 63.3; DB 1.15; WY 19.15.

Bone Joweeɗiɗi Cakitiiɗum

¹Sey ngiimi goɗɗum alaama ton dow mawɗum kayɗiniiɗum. Mi yi’ii malaa’ika’en njoweeɗiɗo jogiiɓe bone joweeɗiɗi kalluɗum cakitiiɗum, ngam kanje ngoni keerol monnere Allah.

²Sey ngiimi goɗɗum bo maayo daarolle hawti e hiite. Nden mi yi’i keɓuɓe jaalorgal dow mardi arandeeri ndin ɗon e ngunkiwa nandunga e mayri e lamba kollayɗum inde mayri. E ɓe ndarii daande maayo daarolle ngon e ɓe njogii garaayaaji ɗi Allah hokkiɓe. ³E ɓe ngima gimol Muusa maccuɗo Allah e gimol Karoori ndin, e ɓe mbi’a,

“Yaa Allah Joomiraawo Joomu Bawɗe,

kuuɗe maaɗa ɗe mawɗe kayɗiniiɗe.

Laamiiɗo leƴƴi fuu,

koo ɗume ko ngaɗataa e woodi aadilaaku e goonga!15.3: Wur 15.1.

⁴Moye woni hulataama, yaa Joomiraawo?

Moye woni mawnintaa mangu maaɗa?

Ngam an tan woni ceniiɗo.

Yimɓe duuniyaaru fuu mawninte,

ngam koo moye yi’ii kuuɗe maaɗa ɗe aadilaaku.”15.4: Irm 10.7; Jab 86.9.

⁵Gaɗa non mi yi’ii Wigeere Ɓurnde Senaaki nder wuro Allah ton dow e omtii.15.5: Wur 38.21.⁶Sey ɓen ɗon malaa’ika’en njoweeɗiɗo jogiiɓe bone kalluɗum mburtoyii daga nder wuro ngon e ɓe ɓornii kolte ɗelmuɗe boɗɗe ɗelkitotooɗe, e ɓe taadii taadorɗe jiinaari to gabaaje maɓɓe. ⁷Sey go’o nder tagaaɗum nayum gooduɗum yonki ɗum ɗon hokki malaa’ika’en njoweeɗiɗo ɓen tummuɗe joweeɗiɗi ɗe jiinaari e ɗe keewi monnere Allah gooduɗo yonki haa abadaa abadin. ⁸Sey curka ƴiwoyi daga to bawɗe Allah e teddungal maako heewi wuro ngon haa walaa bawɗo nattukingo naa bone joweeɗiɗi ɗum ɗon ɗum malaa’ika’en njoweeɗiɗo nde’ii.15.8: Wur 40.34; 1Laam 8.10,11; 2HL 5.13,14; Ica 6.4.

Tummuɗe Bone Joweeɗiɗi Ɗum Monnere Allah

¹Sey nanmi wonde hononde cembinde daga nder wuro ceniingo ton dow e nde wi’a malaa’ika’en njoweeɗiɗo ɓen ɗon, “Njahee ndufanon duuniyaaru tummuɗe joweeɗiɗi ɗen ɗon ɗe monnere Allah!”

²Daga ɗon sey malaa’ikaajo arandeejo yahi wayli ko woni nder tummude muuɗum dow duuniyaaru. Sey ngokko putto nawko kalluko mburtonoyii ɓen ɗon gooduɓe alaama mardi arandeeri ndin ɗon e mawninɓe ngunkiwa nandunga e mayri.16.2: Wur 9.10.

³Malaa’ikaajo ɗiɗaɓo maa wayli ko woni nder tummude muuɗum nder maayo. Sey ndiyam maayo ngon warti bo ƴiiƴam mayɗo. Koo ɗume ko woodi yonki gonɗum nder maago waati.

⁴Sey malaa’ikaajo tataɓo maa wayli ko woni nder tummude muuɗum nder canɗi e to ndiyam ɓuliroyta. Sey ɗum fuu ɗum warti ƴiiƴam.16.4: Wur 7.17‑21; Jab 78.44.⁵Mi nanii malaa’ikaajo paamanoowo ndiyam e wi’a, “Yaa Ceniiɗo, an woni ndenno an woni jooni. An a aadiliijo nder kiita maaɗa kan ɗon. ⁶Ngam kalluɓe ndufii ƴiiƴam yimɓe maaɗa e annabo’en maaɗa, raɗɗum boo a hokkiiɓe ƴiiƴam ɓe njara ngam non haananiɓe.” ⁷Sey nanmi hononde daga to ɗum wulata urde welnde e wi’a, “Goonga, Allah Joomiraawo Joomu Bawɗe! A waɗira kiita e goonga e aadilaaku!”

⁸Sey malaa’ikaajo nayaɓo wayli ko woni nder tummude muuɗum dow naange. Sey ɗum alinge nge wula yimɓe gulɗum kalluɗum. ⁹Sey nge wuli yimɓe no halli, ɓe kuɗi inde Allah, kanko gooduɗo laamu dow bone joweeɗiɗi ɗum ɗon. Ammaa ɓe tuubaayi ɓe mawninaayimo.

¹⁰Malaa’ikaajo njowaɓo maa wayli ko woni nder tummude muuɗum dow jooɗorgal laamu mardi arandeeri ndin, sey nyiwre maɓɓi koo toye to ndi laamotoo. Yimɓe ŋati ɗemɗe maɓɓe ngam bone,16.10: Wur 10.21.¹¹ɓe kuɗi Allah Mo Dow ngam nawɗum putto kalluko keɓukoɓe. Ammaa fuu e non ɓe tuubaayi daga kuuɗe maɓɓe kalluɗe.

¹²Sey malaa’ikaajo joweego’oojo wayli ko woni nder tummude muuɗum nder iloowo mango bi’eteengo Yuferitis mango. Sey ngo ɓeeɓi ngo yoori ngam ɗum mo’’inana laamiiɓe fuuna laawol.16.12: Ica 11.15.¹³Sey ngiimi goɗɗi ginni kanji tati e ɗi nandi e paaɓi, go’otol e wurtoyoo daga nder honduko mbooga ngan ɗon, go’otol boo e wurtoyoo daga nder honduko mardi arandeeri ndin ɗon, nden go’otol e wurtoyoo daga nder honduko annabiijo16.13: Annabiijo fewre on kanko woni mardi ɗiɗawri ɗin. on ɗon mo fewre. ¹⁴Kanji ngoni ginni gaɗooji kuuɗe kayɗiniiɗe. Kanji ngoni jahooji to laamiiɓe duuniyaaru fuu ɗi kawritaɓe ngam konu e nden ɗon nyalnde mawnde nde Allah Joomu Bawɗe.

¹⁵Yeesu wi’i, “Raɗɗum e mi waroya bo gujjo! O barkiɗinaaɗo fuu jooɗiiɗo e siryii ngam ɓornoo kolte muuɗum ngam to’ o dilla o ɓornaaki o semta yeeso lenyol.”16.15: Maat 24.43,44; Luk 12.39,40; WY 3.3.

¹⁶Sey ginni ɗin kawriti laamiiɓe ɓen to wigeere bi’eteende Armagedon nder ɗemngal Ibraaniyankoore.16.16: 2Laam 23.29; Jak 12.11.

¹⁷Nden malaa’ikaajo njoweeɗiɗaɓo wayli ko woni nder tummude muuɗum e njayri dow. Sey wonde hononde cembinde wurtoyii daga jooɗorgal laamu nder wuro ceniingo ton dow e nde wi’a, “Ɗum heenyii!” ¹⁸Sey ɗum waɗi ka maƴƴe e riggaaki e palmaali e dimbol leydi kallungol iri ngol ɗum meeɗaayi waɗuki daga ɗum fuɗɗi taguki yimɓe. Dimbol ngol ɓurii koo ngole dimbol ngol ɗum meeɗi waɗuki halluki.16.18: WY 8.5; 11.13,19.¹⁹Gariiri Baabiila ndin ɗon mawndi sendii tati, gariije duuniyaaru maa njani njanini. Sey Allah siftori e gariiri Baabiila mawndi, o waɗindi ndi yari torra monnere maako kallunde.16.19: Ica 51.17.²⁰Koo ndiye leydi ngondi caka ndiyam ndiyam nyaamindi, nden kocceeje cankitii.16.20: WY 6.14.²¹Malemalleeho mawko teddirko bo buhu masaraari ngaɗi ka yanoyki dow yimɓe daga dow haa yimɓe ɓen kuɗi Allah ngam bone malemalleho kon, ngam torra kan hallii naa’ seɗɗa!16.21: Wur 9.23; WY 11.19.

Debbo e Mardi Ndin

¹Sey go’oto nder malaa’ika’en njoweeɗiɗo ɓen ɗon jogiiɓe tummuɗe joweeɗiɗi ɗen wari wi’iyam, “Woroy mi holloymaa no Allah halkirta kaaruwaajo indinɗo, on ɗon waato gariiri mawndi ndin ɗon ngondi haade canɗi.17.1: Irm 51.13.²Laamiiɓe duuniyaaru ngaɗidii njeenu e maako. Njeenu ɗum ɓe ngaadi yiltiiɓe bo o hokkuɓe njaru gaylitayngu hoore, kamɓe e yimɓe duuniyaaru fuu.”17.2: Ica 23.17; Irm 51.7.

³Nder wahayu ɗum, malaa’ikaajo on hocciyam yaariyam nder ladde ton ngiimi goɗɗo debbo e jooɗii dow wondi mardi mboɗeeri coloy. Ɓandu mayri fuu e woodi inɗe kuɗooje Allah e ndi woodi ko’e joweeɗiɗi e luwe sappo.17.3: WY 13.1.⁴Debbo on e ɓornii kolte cuuɗiije e boɗeeje coloy, e mo mo’’itinorii coddi jiinaari, e coddi gaɗiraandi kaaƴe ɗe ceede feere‑feere. E mo jogii tummude jiinaari e jungo maako e nde heewi ndiyam inabojam, waato ko nefnii kalluɗum ɗum o waɗidi e worɓe.17.4: Irm 51.7.⁵E tiinde maako ɗum windi wonde inde goodunde ma’ana cuuɗiiɗum, wi’uki, “Baabiila Mawndi inna kaaruwa’en inna koo ɗume ko nefnii ɗum duuniyaaru.” ⁶Sey ngiimi debbo on e yiltii ngam ƴiiƴam yimɓe Allah ɗam o yari e ƴiiƴam ɓe ɗum wari ngam tokkuki Yeesu.

Nde ngiimoomi mi hayɗinii naa’ seɗɗa. ⁷Ammaa malaa’ikaajo on ƴamiyam wi’i, “Ngam ɗume kayɗintaa? Mi wi’ete ma’ana sirru debbo o’o e sirru mardi koccundimo ngoodundi ko’e joweeɗiɗi e luwe sappo. ⁸Mardi ndi ngiiɗaa, ndenno e ndi woodunoo yonki, jooni ndi walaa yonki, nden ɗo’o yeeso ndi wurtoyto daga nder ngayka kalluka lugguka ndi yaha to ndi halketee. Jooɗiiɓe e duuniyaaru ɓe ɗum windaayi inɗe maɓɓe nder deftere yonki ko duuniyaaru tagee, ɓe kayɗinay e yi’uki mardi ndin ɗon. Ngam ndenno e ndi woodunoo yonki, jooni ndi walaa yonki, nden ndi wartoyay.17.8: Daan 7.7; WY 11.7; Jab 69.28.

⁹“Ɗo’o e haani neɗɗo huutira faamu ngam anduki ma’ana ɗu’um. Ko’e joweeɗiɗi ɗen ɗon ɗum ƴoole joweeɗiɗi to debbo on ɗon jooɗotoo, ¹⁰ɗonmaa kanje ngoni laamiiɓe njoweeɗiɗo. Njowo nder maɓɓe maayi, nden go’oto e laamoo jooni, go’oto on boo waraayi taw. To o warii, o laamoto carel seɗɗa tan. ¹¹Mardi ndin ɗon goodunoondi yonki, jooni boo ndi walaa yonki, kayri woni go’oto nder laamiiɓe njoweeɗiɗo, ndi wartay laamiiɗo njoweetataɓo, nden ɗum halkandi.

¹²“Luwe ɗen ɗon sappo ɗe ngiiɗaa boo ɗum laamiiɓe sappo ɓe puɗɗaayi laamu taw, ammaa ɗum hokkayɓe laamu ɓe laamoo awa go’o e mardi ndin ɗon.17.12: Daan 7.24.¹³Ɓe fuu nyumo maɓɓe go’o, nden ɓe kokkay mardi ndin ɗon bawɗe maɓɓe e laamu maɓɓe. ¹⁴Ɓe konay Karoori ndin, ammaa Karoori ndin heɓa jaalorgal dow maɓɓe ngam kanko woni Joomiraawo joomiraaɓe, Laamiiɗo lamlamɓe. Wonduɓe e maako boo ɓe noddaaɓe, ɓe cuɓaaɓe, ɓe tokkuɓe Joomiraawo boɗɗum.”

¹⁵Ɗonmaa malaa’ikaajo on wi’iyam, “Ndiyam ɗam ɗon ɗam ngiiɗaa, to debbo on ɗon jooɗii. Kanjam woni lenyi, e yimɓe ɗuɗɓe daga leyɗe feere‑feere e ɗemɗe feere‑feere. ¹⁶Luwe ɗen ɗon boo sappo ɗe ngiiɗaa, kanje e mardi ndin ɗon ɗe nganyay debbo on ɗon ɗe teeta koo ɗume ko o woodi, ɗe ɓortamo, ɗe nyaama kusel ɓandu maako, ɗe nguliramo hiite. ¹⁷Ngam Allah waɗiiɓe ɓe kuwa ko o yiɗi ɓe ngarta ɓe nyumo go’o, ɓe kokka mardi ndin laamu maɓɓe, naa ɗum hebbinii ko Allah wi’i.

¹⁸“Debbo on ɗon mo ngiiɗaa, kanko woni gariiri mawndi ndin ɗon goodundi laamu dow laamiiɓe duuniyaaru.”

Halkuki Baabiila

¹Gaɗa non mi yi’ii goɗɗo malaa’ikaajo e jippoyoo daga dow. E mo woodi laamu mawɗum teddungal maako yeynanii duuniyaaru fuu. ²Sey o noddi nder hononde cembinde, o wi’i, “Gariiri Baabiila halkaama! Gariiri mawndi yanii! Ndi wartii to ginni njooɗotoo, to ginni kawritata e koo ɗiye colli nefniiɗi karminiiɗi.18.2: Ica 21.9; Irm 51.8; WY 14.8; Ica 13.21; Irm 50.39.³Ngam kayri woni gariiri bonnundi lenyi duuniyaaru e waaduki njeenu e mayri. Njeenu ɗum ɓe ngaadi wartaniiɓe bo njaru gaylitayngu hoore. Laamiiɓe duuniyaaru ngaadii njeenu e mayri. Soodooɓe e cooritoo koo toye nder duuniyaaru keɓii risku ngam Baabiila e yiɗi waɗuki njeenu naa’ seɗɗa.”18.3: Ica 23.17; Irm 51.7.

⁴Sey nanmi wonde hononde daga dow e nde wi’a,

“Onon yimɓe am, mburtoyee daga nder mayri,

ngam to’ hakkeeji mayri hawta e mooɗon,

ngam to’ bone kalluɗum keɓayɗumndi heɓa’on.18.4: Ica 48.20; Irm 50.8; 51.6,45.

⁵Ngam hakkeeji mayri towii haa kewtii dow;

Allah boo yejjitaayi kalluɗum ɗum ndi waɗi.18.5: Fuɗ 18.20,21; Irm 51.9.

⁶Ngaɗaneendi non no ndi waɗi fuu.

Ko ndi waɗi, ngaɗaneendi non nde ɗiɗi.

Cuutaneendi ko ɓuri sembe nde ɗiɗi nder tummude mayri ko ndi suutani woɓɓe.18.6: Jab 137.8; Irm 50.29.

⁷Kokkeendi bone pooɗaneendi wannaare, non no ndi mawniniri hoore mayri e nanki belɗum ɗum ndi nani.

Ngam e ndi wi’a hoore mayri,

‘E mi jooɗii, mi laamiiɗo.

Min, naa’ mi debbo mo gorko muuɗum maayi,

mi nattataa wannaare.’

⁸Ngam non bone kalluɗum waranaymo nder nyalnde go’o,

mayde e wannaare e weelo kallungo,

nden ɗum wulamo e hiite,

ngam Allah Joomiraawo gaɗanayɗomo kiita o gooduɗo laamu.”18.7,8: Ica 47.7‑9.

⁹Laamiiɓe duuniyaaru gaaduɓe njeenu e ko wooɗaa e maako ɓe mboyanaymo e ɓe ngulla to ɓe ngi’ii curka hiite nyaamayngemo. ¹⁰Ɓe ndaroto daga ɓadaaki ngam e ɓe kula to’ torra ka o yarata hawta e maɓɓe, e ɓe mbi’a, “Wayyoo! Wayyoo! An gariiri mawndi! An Baabiila gariiri mawndi! Nder awa go’o tan torra kalluka yanonoyiima.”18.9,10: Ijik 26.16,17.

¹¹Soodooɓe e cooritoo wonɓe koo toye nder duuniyaaru mboyanaymo ngam wannaare, ngam walaa coodoowo goɗɗum to maɓɓe kadin.18.11: Ijik 27.31,36.¹²Walaa coodayɗo jiinaari maɓɓe, e ajurfaari maɓɓe, e kaaƴe ɗe ceede, e lu’ulu’uuji maɓɓe, e kolte ɗelmuɗe laɓɗe ɗelkitotooɗe, e kolte ɗelmuɗe ɗe ceede bi’eteeɗe siliki, e kolte cuuɗiije, e kolte boɗeeje coloy, e koo iri ɗeye leɗɗe cehaaɗe, e koo ɗume gaɗiraaɗum e nyiiƴe nyiiwa e leɗɗe ɗe ceede, e njamndi mboɗeeri, e ɗum jamɗe, e kaaƴe cehaaɗe ɗe ceede, ¹³e sinamon, e condi nyaɗɗe mbelndi, e urde welnde guleteende, e nebbam bi’eteeɗam mur, e urde welnde guleteende bi’eteende firankisen, e ndiyam inabojam, e nebbam, e condi alkamaari, e caabaari alkamaari, e na’i, e baali, e be’i, e keekeeji pucci, e maccuɓe, waato yonkiiji yimɓe.18.12,13: Ijik 27.12,13,22.¹⁴Soodooɓe e cooritoo mbi’ay, “Fuu boɗɗum ɗum ngaɗuɗaa ɓernde maaɗa e dow a dulliiɗum. Nden fuu risku maaɗa e mo’’itinaaki maaɗa a dulliiɗum, a fuɗɗitataa keɓaaɗum!” ¹⁵Soodooɓe e cooritoo keɓuɓe jawdi nder mayri, ɓe ndaroto daga ɓadaaki, e ɓe kula ngam to’ ɗum hawta e maɓɓe nder bone ɗum o yarata, e ɓe mboya sembee, bojji nawɗi.18.15: Ijik 27.31,36.¹⁶Ɓe mbi’ay, “Wayyoo! Wayyoo! An gariiri mawndi, ɓorninoondi kolte ɗelmuɗe laɓɗe ɗelkitotooɗe, e kolte cuuɗiije, e kolte boɗeeje coloy, mo’’itiniriindi jiinaari, e kaaƴe ɗe ceede, e lu’ulu’uuji! ¹⁷Nder awa go’o tan jawdi ndin fuu halkii!”

Sey fuu gooduɓe komiije ndiyam e nattooɓeɗe e pooɗayɓeɗe, e koo moye coodoowo e sooritoo dow maayo, ɓe ndarii daga ɓadaaki,18.17: Ica 23.14; Ijik 27.26‑30.¹⁸ɓe mboyi nde ɓe ngi’i curka hiite nyaamayngemo, e ɓe mbi’a, “Ndiye gariiri hewti gariiri ndi’i mangu?”18.18: Ijik 27.32.¹⁹Ɓe cankitani ko’e maɓɓe mbulmbuldi ɓe ngaɗi ka bojji e ɓe ngulla e ɓe mbi’a, “Wayyoo! Wayyoo! An gariiri mawndi! Ɓe komiije ndiyam fuu ndiski daga jawdi mayri! Ammaa nder awa go’o koo ɗume halkii!”18.19: Ijik 27.30‑34.

²⁰Nanee belɗum onon wonɓe nder wuro Allah ton dow, yimɓe Allah e lilaaɓe e annabo’en, ngam Allah waatanake’on ko o waɗani’on!18.20: TA 32.43; Irm 51.48.

²¹Sey goɗɗo malaa’ikaajo gooduɗo laamu hocci kaaƴa manga o hubiinga nder maayo, e mo wi’a, “Non ɗum hubortoo Baabiila gariiri mawndi e sembe, ɗum ɓeydataa yi’ukindi.18.21: Irm 51.63,64; Ijik 26.21.²²Ɗum ɓeydataa nanki piyooɓe garaayaaji, e yimooɓe, e duudooɓe duudaali, e duudooɓe luwe nder mayri, nden ɗum boo fuɗɗitataa ɗum yi’a bayillo koo cehoowo nder mayri, ɗum fuɗɗitataa ɗum nana hoolo namarde nder mayri!18.22: Ijik 26.13; Ica 24.8.²³Fitilaaru ɓeydataa yeynoo nder mayri. Ɗonmaa ɗum ɓeydataa ɗum nana hononde angoojo e ɓaŋaaɗo18.23: Waato amaryaajo. nder mayri. Ngam ndenno soodooɓe e cooritoo nder mayri kamɓe ngoni mawɓe duuniyaaru, sihiriiji mayri boo majjinii yimɓe duuniyaaru!18.22,23: Irm 7.34; 25.10.²⁴Nden ɗum tawriindi ƴiiƴam annabo’en e ɗam yimɓe Allah e ɗam yimɓe baraaɓe fuu nder duuniyaaru.”18.24: Irm 51.49.

Mawninki Allah Ton Dow

¹Gaɗa ɗon mi nanii hoolo cembingo bo hononde yimɓe ɗuɗɓe cembinde ton dow e ɓe ngima e ɓe mbi’a, “Haaliluuya! Allah meeɗen jeyi kisndam e mangu e laamu, ²ngam kiita maako e woodi goonga e aadilaaku, o halkii kaaruwaajo on ɗon mawɗo bonnuɗo duuniyaaru e njeenu muuɗum. Allah waatanake maccuɓe muuɗum ɓe kaaruwaajo on wari.”19.2: TA 32.43; 2Laam 9.7.³Sey ɓe fuɗɗiti ɓe nangi gimol e ɓe mbi’a, “Haaliluuya! Curka hiite nyaamungemo waɗay ka ummaaki haa abadaa abadin.”19.3: Ica 34.10.⁴Sey mawɓe ɓen ɗon 24 e ɗum ɗon tagaaɗum nayum gooduɗum yonki ndiccii mawnini Allah jooɗiiɗo dow jooɗorgal laamu. E ɓe mbi’a, “Aamin! Haaliluuya!”

Humto Teegal Karoori Ndin

⁵Nden wonde hononde daga jooɗorgal laamu ngal e wi’a, “Mantee Allah meeɗen, onon maccuɓe maako kulooɓemo mawɗo e pamaro.”19.5: Jab 115.13.⁶Nden mi nanii goɗɗum bo hoolo yimɓe ɗuɗɓe, bo hoolo ndiyamji doggooji, bo hoolo riggaango cembingo, e ɓe mbi’a, “Haaliluuya! Ngam Allah Joomiraawo meeɗen Joomu Bawɗe e laamoo!19.6: Ijik 1.24; Jab 93.1; 97.1; 99.1.⁷En welweltu nanen belɗum naa’ seɗɗa, en mawninmo, ngam carel ngel Karoori te’ata warii. Nden ɓaŋaaɗo19.7: Waato amaryaajo. maako on siryake. ⁸Ɗum hokkii ɓaŋaaɗo on limcere ɗelmunde lamnde ɗelkitotoonde. Limcere nden kayre woni kuuɗe yimɓe Allah ɗe aadilaaku.”

⁹Sey malaa’ikaajo on wi’iyam, “Windu ɗu’um. Ɓe barkiɗinaaɓe kumpitaaɓe humto teegal Karoori ndin.” Nden o wi’iyam, “Ka’a haala ɗum goonga, to Allah ɗum ƴiwoyi.”19.9: Maat 22.2,3.

¹⁰Sey ndicciimi yeeso maako ngam mi mawninamo, ammaa o wi’iyam, “Taa’ waɗu non! Min maa, mi maccuɗo Allah bo maaɗa, an e bandiraaɓe maaɗa jogiiɓe goonga boɗɗum ka Yeesu wangini. Mawnin Allah! Ngam goonga ka Yeesu wangini kanka waɗi yimɓe mbaawi waɗuki annabaaku.”

Goɗɗo Dow Puccu Ndanewu

¹¹Sey ngiimi dow e omtii, sey raa wongu puccu ndanewu gonɗo dow maggu, e wi’ee Gaɗoowo Ko Haani, Gooduɗo Goonga. E mo waɗa aadilaaku nder kiita e konu.19.11: Ijik 1.1; Jab 96.13; Ica 11.4.¹²Gite maako bo ɗemngal hiite, hoore maako e woodi giifi ɗuɗɗi, nden inde e windii dow maako, walaa anduɗonde sey kanko tan.19.12: Daan 10.6.¹³E mo ɓornii toggoore nde ɗum somniri ƴiiƴam, nden inde nde ɗum noddirtamo woni, “Wolde Allah.” ¹⁴Honooɓe ɓe dow e tokkimo dow pucci, e ɓe bornii kolte ɗelmuɗe laaɓuɗe. ¹⁵Wokki kaafahi nyaaɗuki e wurtoyoo nder honduko maako, e maaki o fe’’irta duuniyaaru, o laamortoɓe e sawru njamndi, o yaaɓay ɓikkoy inabooje nder ngayka monnere Allah Joomu Bawɗe.19.15: Jab 2.9; Ica 63.3; Yow 3.13; WY 14.20.¹⁶To toggoore maako e dango19.16: Waato asaangal koo boo cinya (H). maako wonde inde e windii wi’uki, “Laamiiɗo lamlamɓe, Joomiraawo joomiraaɓe.”

¹⁷Nden mi yi’i goɗɗo malaa’ikaajo e darii dow naange, o noddi colli fuu piirooji e dow nder hononde cembinde, o wi’i, “Ngaree kawriton ngam humto Allah mango, ¹⁸nyaamon kusel laamiiɓe, e ngel sooji’en mawɓe, e ngel baawuɓe konu, e ngel pucci, e ngel ƴentooɓe pucci ɗin, e ngel yimɓe fuu maccuɓe e naa’ maccuɓe, mawɗo e pamaro!”19.17,18: Ijik 39.17‑20.

¹⁹Sey ngiimi mardi arandeeri ndin ɗon e laamiiɓe duuniyaaru e sooji’en maɓɓe kawritii to go’o ngam ɓe kona gonɗo dow puccu on e sooji’en maako. ²⁰Sey ɗum nangi mardi ndin e annabiijo fewre on. Kanko woni gaɗuɗo kayɗiniiɗum yeeso mayri majjini gaɗanaaɓe alaama mayri e mawninɓe ngunkiwa nandunga e mayri. E yonki ɗum hubini annabiijo fewre on e mardi ndin nder mbeela hiite kibiritu.19.20: WY 13.1‑18.²¹Ɗum wariri sooji’en maɓɓe e kaafahi burtoytooki daga honduko on ɗon jooɗiiɗo dow puccu. Sey colli nyaami kusel maɓɓe keerol no ɗi mbaawata nyaamuki.

Duuɓi 1,000

¹Nden mi yi’i malaa’ikaajo e jippoyoo daga dow e mo jogii maɓɓitirgel ngayka kalluka lugguka, nden e mo jogii wongol ɓoggol njamndi mangol cembingol. ²Sey o nangi mbooga ngan, waato mbooga ngan ɗon nga daga ndenno bi’eteenga Ganyo koo Ceyɗan, o haɓɓiringa ɓoggol ngol haa duuɓi 1,000.20.2: Fuɗ 3.1.³Malaa’ikaajo on hubiinga nder ngayka kan, o maɓɓika o feɗika ngam to’ nga wurtoo nga ɓeyda majjinki lenyi naa duuɓi ɗin ɗon 1,000 keewii. Gaɗa ɗon doole nga yoofee ngam carel seɗɗa.

⁴Nden mi yi’ii jooɗorle laamu, woɓɓe e njooɗii dow maaje. Kamɓe ngoni kokkaaɓe laamu waɗuki kiita. Ɗonmaa mi yi’ii yonkiiji ɓe ɗum ittani ko’e ngam ɓe nga’ajinii habaru Yeesu e Wolde Allah. Kamɓe ngoni ɓe mawninaayi ndin ɗon mardi koo ngunkiwa nandunga e mayri, ɓe njaɓaayi ɗum waɗanaɓe alaama mayri e tiiɗe maɓɓe koo e juuɗe maɓɓe. Ɓe puɗɗiti ɓe keɓii yonki, ɓe laamodii e Almasiihu haa duuɓi 1,000.20.4: Daan 7.9,22.⁵Kanjum woni ummaaki mayɓe arandehi. (Horiiɓe mayɓe boo ɓe fuɗɗitaayi ɓe keɓi yonki sey nde duuɓi 1,000 ɗin ɗon keewi.) ⁶Ɓe barkiɗinaaɓe ɓe ceniiɓe yimɓe gooduɓe geɗal nder kin ɗon ummaaki arandehi. Mayde ɗiɗawre meemataaɓe, waato ɓe nattataa wuro hiite, ɓe ngartay kuwanooɓe Allah e Almasiihu, ɓe laamodoto e maako haa duuɓi 1,000.

Heɓuki Jaalorgal Dow Ceyɗan

⁷Gaɗa duuɓi 1,000 ɗin ɗon keewii, ɗum yoofay Ceyɗan daga to ɗum haɓɓimo. ⁸O wurtoyto o majjina leƴƴi duuniyaaru fuu, o hawritaɓe ngam konu. Ɗum noddiray leƴƴi ɗin Gog e Maagog. Ɗuuɗuki maɓɓe waɗii bo ɗuuɗuki njaareendi maayo.20.8: Ijik 7.2; Ijik 38.2,9,15.⁹Ɓe cankitii koo toye nder duuniyaaru, ɓe pilii wigeere yimɓe Allah, waato gariiri ndi o yiɗi. Ammaa hiite rufoyi daga dow nge halkiɓe. ¹⁰Ceyɗan majjinɗoɓe boo hubinaa nder mbeela hiite kibiritu to mardi ndin e annabiijo fewre on ɗon woni. Ɗum waɗay ka hokkukiɓe bone jemma e nyalawma haa abadaa abadin.

Kiita Cakitiika

¹¹Nden mi yi’ii wongal jooɗorgal laamu mangal danewal e jooɗiiɗo dow maagal. Sey dow e ley doggi majjiti daga yeeso maako ɗum ɓeydaayi yi’ukiɗum. ¹²Sey ngiimi mayɓe, mawɗo e pamaro, e ndarii yeeso jooɗorgal ngal, ɗum maɓɓiti goɗɗe defte. Ɗonmaa ɗum maɓɓiti wonde deftere, waato deftere yonki. Ɗum waɗani mayɓe kiita dow ko ɓe ngaɗi non no ɗum windiraa nder defte ɗen.20.11,12: Daan 7.9,10.¹³Maayo wurtinoyi mayɓe wonɓe nder maggo. Mayde e Laahira fuu wurtinoyi mayɓe wonɓe nder maajum. Ɗum waɗani koo moye kiita dow ko waɗi. ¹⁴Sey ɗum hubini Mayde e Laahira nder mbeela hiite ngan. Ngan ɗon mbeela hiite kanga woni mayde ɗiɗawre. ¹⁵Fuu mo ɗum tawaayi inde muuɗum e windii nder deftere yonki, ɗum hubinimo nder mbeela hiite ngan.

Dow Kesum e Leydi Keyri

¹Nden mi yi’ii dow kesum e leydi keyri, ngam dow arandejum e leydi arandeeri majjitii, maayo maa walaa koo seɗɗa.21.1: Ica 65.17; 66.22; 2Biit 3.13.²Nden mi yi’ii Gariiri Ceniindi, waato Urucaliima keyri e ndi jippoyoo daga dow, daga to Allah, ndi siryaama bo ɓaŋaaɗo21.2: Waato amaryaajo. mo’’itiniiɗo ngam gorko muuɗum.21.2: Ica 52.1; WY 3.12; Ica 61.10.³Nden mi nanii wonde hononde cembinde daga jooɗorgal laamu ngal e nde wi’a, “Raɗɗum to Allah jooɗotoo e wondi e yimɓe! O jooɗodoto e maɓɓe, ɓe ngartay yimɓe maako. Allah e hoore muuɗum wonday e maɓɓe, o wartay Allah maɓɓe.21.3: Ijik 37.27; KLee 26.11,12.⁴O moytanayɓe fuu gonɗi maɓɓe, ɗum boo fuɗɗitataa ɗum waɗa mayde koo wannaare koo bojji koo torra ngam koo ɗume ɗum ndenno ƴaɓɓake.”21.4: Ica 25.8; Ica 35.10; 65.19.

⁵Sey jooɗiiɗo dow jooɗorgal laamu on wi’i, “Jooni e mi waɗa koo ɗume kesum!” Ɗonmaa o wi’iyam, “Windu ɗum ɗon, ngam haala ka’a ɗum goonga ka tabbutuka.” ⁶Nden o wi’iyam, “Ɗum heenyii! Min woni Alfa, min woni Omeega, waato Fuɗɗoode e Timmoode. Fuu nanɗo ɗonka mi hokkaymo ndiyam caahu daga to ndiyam yonki ɓuliroyta.21.6: Ica 55.1.⁷Fuu keɓuɗo jaalorgal heɓay fii ɗu’um fuu daga to am, mi wartay Allah maako, kanko o warta ɓiɗɗo am.21.7: 2Sam 7.14; Jab 89.26,27.⁸Ammaa gooduɓe kulol e nyaamooɓe amaana, e kuwooɓe kuugal kallungal, e gaɗooɓe warhoore, e gaɗooɓe njeenu, e darnooɓe, e mawninooɓe gunkiiji, e fuu fewooɓe, ɓe fuu ɗum nattinayɓe mbeela hiite kibiritu, kanga woni mayde ɗiɗawre.”

Urucaliima Keyri

⁹Sey go’oto nder malaa’ika’en njoweeɗiɗo ɓen wari, ɓen ɗon jogiiɓe tummuɗe joweeɗiɗi keewuɗe monnere Allah cakitiiɗum. O wi’iyam, “Woroy mi holloymaa ɓaŋaaɗo, debbo Karoori ndin.” ¹⁰Nder wahayu ɗum, malaa’ikaajo on hocciyam yaariyam dow wonde hocceere townde naa’ seɗɗa o holliyam Urucaliima gariiri ceniindi e jippoyoo daga dow, daga to Allah.21.10: Ijik 40.2.¹¹Gariiri ndin e woodi teddungal Allah e ndi ɗelkitoo bo kaaƴe ɗelkitotooɗe ɗe ceede, bo jasfa e ndi ɗelkitoo bo daaroggal. ¹²E ndi woodi mahol towngol e ngol filiindi, goodungol dammuɗe sappo e ɗiɗi, nden e woodi malaa’ika’en sappo e ɗiɗo paamanooɓe dammuɗe ɗen. To dammuɗe ɗen boo ɗum windii inɗe lenyi Israa’iila sappo e ɗiɗi. ¹³Koo nduye wuttudu e woodi dammuɗe tati, dammuɗe tati daga fuuna, dammuɗe tati daga hirna, dammuɗe tati daga fombina, dammuɗe tati daga woyla.21.12,13: Ijik 48.30‑35.¹⁴Ɗum mahii mahol piliingol gariiri ndin dow kaaƴe sappo e ɗiɗi, nden dow maaje ɗum windii inɗe lilaaɓe sappo e ɗiɗo ɓe Karoori ndin.

¹⁵Malaa’ikaajo metanɗoyam boo e woodi sawru poondol ndu jiinaari ndu o foondirta gariiri ndin e dammuɗe mayri e mahol piliingolndi.21.15: Ijik 40.3.¹⁶Gariiri ndin koo nduye wuttudu e fottidi, juutuki mayri e yaajuki mayri e fottidi; Sey malaa’ikaajo on foondiri gariiri ndin e sawru ndun o yi’i ndi waɗii mil 1,50021.16: Koo boo: “12,000 stadia.” . Juutuki mayri e yaajuki mayri fuu e fottidi. ¹⁷Ɗonmaa o foondi mahol piliingol gariiri ndin, towuki maggol waɗii jaaɓanɗe 216.21.17: Koo boo: “144 cubits.” O foondiri no neɗɗo foondirta.

¹⁸Mahol ngol mahiraama e goɗɗe kaaƴe ɗe ceede, bi’eteeɗe jasfa. Gariiri ndin boo e jiinaari tan ndi mahiraa e ndi ɗelkitoo bo daaroggal. ¹⁹Ɗum mo’’inirii kaaƴe gaɗaaɗe ley mahol ngol e koo iri ndeye hayre nde ceede. Arande jasfa, ɗiɗawre safaaya, tatawre agat, nayawre emeral, ²⁰njowaɓre onis, joweego’oore kaneeliyan, joweeɗiɗawre kirisoolati, joweetatawre beeril, joweenayawre toofas, sappoore kirisoofuras, sappo e go’oore jaasin, sappo e ɗiɗawre ameetis. ²¹Nden dammuɗe sappo e ɗiɗi ɗen ɗon ɗum lu’ulu’uuji sappo e ɗiɗi, koo ngale dammugal waɗiraama e lu’u‑lu’u go’o. Ɗonmaa ɗatal mangal gongal nder gariiri ndin e jiinaari tan ngal waɗiraa, e ngal ɗelkitoo bo daaroggal.21.18‑21: Ica 54.11,12.

²²Mi yi’aayi wuro ceniingo nder gariiri ndin, ngam Allah Joomiraawo Joomu Bawɗe kanko e Karoori ndin ngoni wuro ceniingo mayri. ²³Gariiri ndin yiɗaayi jayngol naange koo ngol lewru, ngam teddungal Allah yeynantoondi, nden Karoori ndin woni fitilaaru mayri.21.23: Ica 60.19,20.²⁴Yimɓe duuniyaaru njahay nder jayngol gariiri ndin. Laamiiɓe duuniyaaru boo ngaddanay gariiri ndin jawdi maɓɓe.21.24: Ica 60.3.²⁵Dammuɗe mayri boo maɓɓataake nyalawma haa abadaa, nden ɗum waɗataa jemma nder mayri. ²⁶Ɗum wadday koo ɗume ko wooɗi e risku yimɓe duuniyaaru nder gariiri ndin.21.25,26: Ica 60.11.²⁷Walaa goɗɗum ko senaaki nattayɗum gariiri ndin, koo boo gaɗoowo kuuɗe nefniiɗe, koo pewoowo. Sey ni ɓe ɗum windi inɗe mu’’en nder deftere yonki nde Karoori ndin, kamɓe tan nattata gariiri ndin.21.27: Ica 52.1; Ijik 44.9.

¹Nden malaa’ikaajo on holliyam caangol ndiyam yonki e ngol ɗelkitoo bo daaroggal e ngol iloya daga jooɗorgal laamu Allah e Karoori ndin,22.1: Ijik 47.1; Jak 14.8.²e ngol tokka caka ɗatal gariiri ndin. Koo nduye wuttudu caangol ngol e woodi lekki yonki dimoohi ɓikkoy sappo e ɗiɗi feere‑feere, koo nduye lewru e ki rima nde go’o. Haako lekki kin e huutiniree ngam yamɗitinki leƴƴi.22.2: Fuɗ 2.9.

³Ɗum heɓataa goɗɗum ɗum Allah laani nder gariiri ndin, ammaa jooɗorgal laamu Allah e Karoori ndin jooɗoto nder mayri. Maccuɓe maako boo mawninaymo.22.3: Jak 14.11; Fuɗ 3.17.⁴Nden ɓe ngi’ay yeeso maako, kadimaa ɗum winday inde maako e tiiɗe maɓɓe. ⁵Ɗum fuɗɗitataa ɗum waɗa jemma, ɓe ngannidataa e jayngol fitilaaji koo jayngol naange, ngam Allah Joomiraawo wartay jayngol maɓɓe. Ɓe laamoto haa abadaa abadin.22.5: Ica 60.19; Daan 7.18.

Yeesu e Wara

⁶Sey malaa’ikaajo on wi’iyam, “Haala ka’a ɗum goonga tabbutuka. Allah Joomiraawo kokkuɗo annabo’en Ruuhu muuɗum o liloyi malaa’ikaajo maako holla maccuɓe maako ko waɗata naa’ ko neeɓi.”

⁷“Raɗɗum e mi waroya naa’ ko neeɓi! O barkiɗinaaɗo gaɗoowo ko annabaaku deftere nde’e wi’i.”

⁸Min Yahaya, min woni nanuɗo yi’i fii ɗu’um fuu. Carel ko nanmiɗum ngiimiɗum, sey ndicciimi yeeso malaa’ikaajo kolluɗoyamɗum ngam mi mawninamo. ⁹Ammaa o wi’iyam, “Taa’ waɗu non! Min maa, mi maccuɗo Allah bo maaɗa, an e bandiraaɓe maaɗa, e annabo’en, e waɗooɓe ko deftere nde’e wi’i. Allah tan mawnintaa!” ¹⁰Nden o wi’iyam, “Taa’ suuɗu haala annabaaku deftere nde’e. Ngam carel ɓadake ngel fuu fii ɗu’um waɗata. ¹¹Fuu kuwoowo ko halli waɗa ka huwuki ko halli, gaɗoowo ko wooɗaa maa, waɗa ka waɗuki ko wooɗaa. Fuu gaɗoowo ko wooɗi boo, waɗa ka waɗuki ko wooɗi, fuu ceniiɗo waɗa ka jonde muuɗum seniinde.”22.11: Daan 12.10.

¹²“Raɗɗum e mi waroya naa’ ko neeɓi! Mi wardanay koo moye e ko waatantee ngam ko waɗi.22.12: Ica 40.10; 62.11; Jab 28.4; Ica 40.10; Irm 17.10.¹³Min woni Alfa, min woni Omeega, min woni Arandeejo, min woni Cakitiiɗo, min woni Fuɗɗoode e Timmoode.”22.13: WY 1.8; Ica 44.6; 48.12; WY 1.17; 2.8.

¹⁴Ɓe barkiɗinaaɓe laɓɓinɓe kolte maɓɓe ngam ɓe keɓa nattuki gariiri ndin ɓe nyaama ɓikkoy lekki yonki.22.14: Fuɗ 2.9; 3.22.¹⁵Ɓe ɗum haɗi nattuki gariiri ndin boo, kamɓe ngoni bonnuɓe ko’e maɓɓe, e darnooɓe, e gaɗooɓe njeenu, e gaɗooɓe warhoore, e mawninooɓe gunkiiji, e giɗɓe fewuki koo ndeye.

¹⁶“Min Yeesu, mi liloyii malaa’ikaajo am to mooɗon e habaru ɗu’um ngam kawte tokkuɓeyam. Min woni fuɗɗoode Dawda e lenyol maako, min woni Jaabiire, hoodere subaka goodunde jayngol.”22.16: Ica 11.1,10.

¹⁷Ruuhu Allah e Ɓaŋaaɗo22.17: Waato amaryaajo. e ɓe mbi’a, “Woroy!”

Koo moye nanuɗo ɗu’um fuu wi’a, “Woroy!”

Fuu nanɗo ɗonka wara, fuu giɗɗo sey nyeɗa ndiyam yonki caahu.22.17: Ica 55.1.

Timmoode

¹⁸Min Yahaya, e mi waggina koo moye nanɗo annabaaku deftere nde’e. To goɗɗo ɓeydii goɗɗum dow maajum, Allah ɓeydanaymo bone kalluɗum bindaaɗum nder deftere nde’e. ¹⁹To boo goɗɗo ittii goɗɗum nder haala annabaaku gonɗum nder deftere nde’e, Allah ittay geɗal maako nder lekki yonki e Gariiri Ceniindi bindaaɗum nder deftere nde’e.22.18,19: TA 4.2; 12.32.

²⁰On ɗon ceydinɗo fii ɗu’um fuu e wi’a, “Goonga e mi waroya naa’ ko neeɓi.”

Aamin. Woroy Yeesu Joomiraawo!

²¹Yeesu Joomiraawo barkiɗina yimɓe Allah fuu. Aamin!