Filimon

Ɗerewol Ngol Bulus Windani

Filimon

Habaru dow ɗerewol ngo’ol

Bulus lilaaɗo Yeesu Almasiihu windi ɗerewol ngo’ol hakkunde duuɓi 61‑63 A.D., waato hakkunde duuɓi 61-63 gaɗa danyngol Yeesu. Filimon o go’oto nder kawtal tokkuɓe Yeesu gonɓe gariiri Koloosi. E mo woodi maccuɗo bi’eteeɗo Onisimus. Maccuɗo on doggi alimo. Bulus holli Onisimus laawol tokkuki Yeesu. Ngo’ol ɗerewol Bulus windangol Filimon ngam siryootira e maccuɗo on. Bulus so’’aymo to Filimon. E mo yiɗi Filimon jaɓamo naa’ bo maccuɗo tan, ammaa jaɓamo no ɗum jaɓirta tokkuɗo Yeesu.

Ko Woni Nder:

Kownol Bulus (1‑3)

Yidde Filimon e no o hoolorii Yeesu (4‑7)

Bulus toranake Onisimus (8‑22)

Kownol cakitiingol (23‑25)

Kownol Bulus

¹Ɗerewol ngo’ol ƴiwoyii daga jungo am, min Bulus, e bandiraawo meeɗen Timooti. Mi maɓɓaaɗo ngam wa’ajinki habaru Yeesu Almasiihu. E mi windanmaa, Filimon, an kuudoowo e amin, giɗaaɗo, ²an e Aafiya bandiraawo meeɗen debbo, e Arkibus mo torrodotooɗen naa’ seɗɗa nder wa’ajinki, e tokkuɓe Yeesu kawritooɓe e wuro maaɗa.2: Kol 4.17.

³Allah, Nyaako meeɗen, e Joomiraawo meeɗen Yeesu Almasiihu barkiɗina’on hokka’on jam.

Yidde Filimon e No O Hoolorii Yeesu

⁴Koo ndeye to e mi waɗa do’aare, e mi yetta Allah ngam maaɗa. ⁵E mi waɗa non ngam e mi nana habaru no ngiɗirɗaa tokkuɓe Yeesu Joomiraawo e no kooloriɗaamo. ⁶Do’aare am woni sumpo wongo hakkunde meeɗen ngam hoolaaki Yeesu waɗumaa andaa koo ɗume barka ɗum ngooduɗen nder sumpootirki e maako. ⁷Bandiraawo am, mi nanii belɗum ɗuɗɗum. Ɓernde am fukkake ngam a holla tokkuɓe Yeesu yidde, a sembiɗinaɓe.

Bulus Toranake Onisimus

⁸Too, mi waaway mi waɗumaa ngaɗaa ko haani waɗee ngam mi mawɗo nder tokkuɓe Yeesu. ⁹Ammaa ngam e mi yiɗumaa, mi ɓurii yiɗuki mi toromaa, min Bulus nayeejo, mo Yeesu lili, jooni boo e mi suraa ngam tokkuki Yeesu. ¹⁰E mi toromaa ngam Onisimus gartuɗo bo ɓiɗɗo to am, ngam mi holliimo laawol Allah ko e mi surii.10: Kol 4.9.¹¹Ndenno o nafanaayima goɗɗum, ammaa jooni e mo nafanmaa fuu e am.11: Ma’ana Onisimus woni nafoowo.

¹²E mi so’’oyamo to maaɗa jooni, e mi yiɗimo naa’ seɗɗa. ¹³Daa mi heɓayno no ngiɗumi daa o jooɗodake e am ɗo’o e nge’el carel ngel ɗum suriyam ngam habaru Yeesu, ngam o huwanayam kuugal ngal kuwantaayam. ¹⁴Ammaa mi yiɗaa mi waɗumaa doole mballaayam, sey ni e mi yiɗi mballaayam taa jaɓii. Ngam mi yiɗaa mi waɗa goɗɗum sey ni e yidde maaɗa.

¹⁵Kiila Onisimus sendirii e maaɗa carel seɗɗa ngam puɗɗitaa njaɓaamo haa abadaa. ¹⁶Taa’ jaɓumo bo maccuɗo tan, ammaa bo bandiraawo giɗaaɗo nder tokkuki Yeesu. E mi yiɗimo naa’ seɗɗa, ammaa a ɓurayyam yiɗukimo. A yiɗaymo bo maccuɗo e bo tokkuɗo Yeesu Almasiihu.

¹⁷Ngam non, taa jaɓii mi higo maaɗa nder kuugal, jaɓumo non no njaɓirtaayam. ¹⁸To o waɗaniima goɗɗum ko wooɗaa, koo taa tokkamo nyamaande, yowuɗum dow am. ¹⁹Min Bulus windi ɗu’um e jungo am, mi yoɓete. Mi yiɗaa mi siftoranmaa, a andi e haani ngaɗanaayam koo ɗume ko ngiɗumi ngam mi holliima laawol kisndam. ²⁰Bandiraawo am, e mi yiɗi ngaɗanaayam non ngam Joomiraawo. Welnanam ɓernde ngam en fuu en tokkuɓe Yeesu.

²¹E mi windanmaa ɗerewol ngo’ol ngam e mi andi a waɗay ko torimaami haa maa a waɗay ko ɓuri non. ²²Ɗonmaa mo’’inanam suudu to njippotoomi, ngam e mi kammii Allah so’’oyayyam to mooɗon ngam do’aare mooɗon.

Kownol Cakitiingol

²³Abaafaras mo min ngondi nder suudu cural ngam tokkuki Yeesu Almasiihu, e mo hownumaa.23: Kol 1.7; 4.12.²⁴Higooɓe kuugal am, Markus e Aristarkus e Dimas e Luka ɓe fuu e ɓe kownumaa.24: KL 12.12,25; 13.13; 15.37‑39; Kol 4.10; KL 19.29; 27.2; Kol 4.10; Kol 4.14; 2Tim 4.10; Kol 4.14; 2Tim 4.11.

²⁵Joomiraawo meeɗen Yeesu Almasiihu barkiɗina’on.