Markus

Habaru Yeesu Ɗum

Markus

Windi

Habaru dow ɗerewol ngo’ol

Binduɗo ɗerewol ngo’ol woni Markus, kanko o tokkuɗo Yeesu, kanko wi’etee Yahaya Markus. O higo Biiturus naa’ seɗɗa. (1 Biiturus 5.13) O windii ɗerewol ngo’ol nder gariiri Rooma e hitaande nde ɗum sankiti Urucaliima 70 A.D., waato duuɓi 70 gaɗa danyngol Yeesu. Ɗerewol ngo’ol woni ɗerewol artungol windeeki fuu nder ɗereeji habaru Yeesu nayi.

Markus fuɗɗirii ɗerewol muuɗum e wiiki, “Ɗu’um woni Habaru Belɗum dow Yeesu Almasiihu.” O hollii Yeesu o kuwoowo kuuɗe kayɗiniiɗe, gooduɗo bawɗe daga to Allah. Bawɗe maako wangii nde o ekkitini yimɓe, nde o riiwi ginni, nde o yaafanii yimɓe hakke maɓɓe. Yeesu noddirii hoore muuɗum Ɓii Neɗɗo garɗo hokkuki yonki muuɗum ngam o hisna yimɓe daga hakke maɓɓe. Kalluɓe mbarimo, ammaa o ummake daga mayde gaɗa balɗe tati. Ngol hollii tokkuɗo Yeeso fuu to maayi nattay Wuro Allah.

Ko Woni Nder:

No Habaru Belɗum fuɗɗiri (1.1‑13)

Kuuɗe Yeesu to leydi Galiili (1.14—9.50)

Daga Galiili yaaki Urucaliima (10.1‑52)

Yontoore Yeesu cakitiinde (11.1—15.47)

Ummaaki Yeesu daga mayde (16.1‑8)

Yeesu wanganii tokkuɓemo (16.9‑20)

Wa’aju Yahaya Gaɗoowo Baptisma

(Maatiyu 3.1‑12; Luka 3.1‑18; Yahaya 1.19‑28)

¹Ɗu’um woni Habaru Belɗum dow Yeesu Almasiihu, Ɓiɗɗo Allah. ²Ɗum windaama nder deftere Annabi Icaaya wiiki,

“Allah wi’i, ‘Raɗɗum, mi liloyay lilaaɗo am

o ardoo yeeso maaɗa o mo’’inanmaa laawol.’1.2: Mal 3.1.

³Goɗɗo e nodda nder ladde, e wi’a,

‘Mo’’inee ɗatal Joomiraawo, portee laawol ngam garol maako.’ ”1.3: Ica 40.3.

⁴Non boo Yahaya Gaɗoowo Baptisma jooɗii nder ladde, e wa’ajina, e mo wi’a, “Tuubee, ɗum waɗana’on baptisma, nden Allah yaafanto’on hakkeeji mooɗon.” ⁵Yimɓe ɗuɗɓe daga leydi Yahuudiya fuu e gariiri Urucaliima ngaɗi ka yaaki to maako. E ɓe mbi’a fuu ko wooɗaa ɗum ɓe ngaɗi, e mo waɗanaɓe baptisma nder Caangol Urdun.

⁶Yahaya e ɓornii kolte ɗe ɗum waɗiri leeɓe ngeelooba, e mo taadii taadorde laral. Nyamndu maako woni baabeeji e njumri.1.6: 2Laam 1.8.⁷E mo wa’ajina, e mo wi’a, “Goɗɗo e wara gaɗa am o ɓuriiyam mangu, koo lokkulli paɗe maako mi fotaayi turaaki mi fittaɗi. ⁸E mi waɗirana’on baptisma e ndiyam, ammaa kanko o waɗiranay’on baptisma e Ruuhu Allah.”

Yeesu Waɗanaama Baptisma

(Maatiyu 3.13—4.11; Luka 3.21,22; 4.1‑13)

⁹Nder balɗe ɗen Yeesu waroyi daga gariiri Najarat nder leydi Galiili, sey Yahaya waɗanimo baptisma nder Caangol Urdun. ¹⁰E wurtaaki Yeesu daga nder ndiyam ɗam, o yi’i dow e maɓɓitoo, Ruuhu Allah e jippoyoo dow maako bo foondu. ¹¹Hononde ƴiwoyi daga dow wi’i, “An woni Ɓiɗɗo am, mo ngiɗumi. E mi nana belɗum maaɗa.”1.11: Fuɗ 22.2; Jab 2.7; Ica 42.1; Maat 3.17; 12.18; Mar 9.7; Luk 3.22.

¹²Ɗon e ɗon Ruuhu Allah yaarimo nder ladde. ¹³Ton o waɗi balɗe 40 Ceyɗan e foondamo. E mo wondi e marle ladde, malaa’ika’en mballimo.

Tokkuɓe Yeesu Artuɓe

(Maatiyu 4.12‑22; Luka 4.14,15; 5.1‑11)

¹⁴Too, gaɗa ɗum surii Yahaya nder suudu cural, Yeesu yahi Galiili e wa’ajina Habaru Belɗum daga to Allah. ¹⁵E mo wi’a, “Carel waɗii! Laamu Allah warii haade mooɗon. Tuubee, njaɓon Habaru Belɗum.”1.15: Maat 3.2.

¹⁶Yeesu e yaha haade Mbeela Galiili, sey o yi’i Siiman e minyiraawo muuɗum Andiraawus e ɓe ngaɗa nangirɗum liƴƴi maɓɓe nder ndiyam, ngam ɓe nangooɓe liƴƴi. ¹⁷Sey Yeesu wi’iɓe, “Tokkeeyam, mi wartiray’on gaddayɓe yimɓe to am.” ¹⁸Ɗon e ɗon ɓe ali nangirɗum liƴƴi maɓɓe ɓe tokkimo.

¹⁹Nde o ɓeydi yeeso seɗɗa, sey o yi’i Yaakubu ɓii Jabadi e minyiraawo muuɗum Yahaya e ɓe nder komiwal maɓɓe, e ɓe mo’’ina nangirɗum liƴƴi maɓɓe. ²⁰Ɗon e ɗon o noddiɓe. Sey ɓe ali nyaako maɓɓe Jabadi nder komiwal e kuwanooɓeɓe, ɓe tokki Yeesu.

Gooduɗo Ginnol

(Luka 4.31‑37)

²¹Sey Yeesu e tokkuɓemo njahi gariiri Kafarnahum. Nde Nyalnde Siwtaare wari, o natti suudu do’aare, o fuɗɗi ekkitinki. ²²Yimɓe kayɗini e ekkitinol maako, ngam o ekkitiniraayiɓe no moodiɓɓe Attawra ekkitinirta, ammaa o ekkitiniiɓe e bawɗe.1.22: Maat 7.28,29.

²³Ɗon e ɗon gooduɗo ginnol nder suudu do’aare ndun wulli sembee, ²⁴wi’i, “Ko wannumaa e amin, Yeesu Najarankeejo? A waroyi ngam kalkaamin? E mi andi an a moye. An woni Ceniiɗo Allah.”

²⁵Sey Yeesu haɓaningol, wi’i, “De’’utu! Wurta nder maako.”

²⁶Sey ginnol ngol dimbimo dimbol kallungol, ngol wulli sembee, ngol wurtii nder maako. ²⁷Ɓe fuu ɓe kayɗini, ɓe ngaɗi ka ƴamƴamtirki, e ɓe mbi’a, “Ɗum um ɗume? Ngo’ol ekkitinol ngol kesol! Neɗɗo o’o e woodi bawɗe haa ginni e ngaɗa ko o wi’iɗi.”

²⁸Nder carel seɗɗa habaru Yeesu sankitii koo toye nder leydi Galiili.

Yeesu Yamɗitinii Yimɓe Ɗuɗɓe

(Maatiyu 8.14‑17; Luka 4.38‑41)

²⁹Nde Yeesu e Yaakubu e Yahaya ɓe mburtii daga suudu do’aare ndun, ɓe natti wuro Biiturus e Andiraawus. ³⁰Esiraawo Biiturus debbo e mo fiida e jonte e mo fukkii. E nattuki Yeesu ɓe kokkimo habaru maako. ³¹Sey Yeesu yahi to maako joganiimo jungo umminimo. Ɗon e ɗon jonte ɗen njoofimo, o ummii o fuɗɗi waddankiɓe nyamndu.

³²Futuro, gaɗa naange hiirii, yimɓe ngaddani Yeesu fuu nyawɓe e gooduɓe ginni. ³³Sey yimɓe gariiri ndin ɗuɗɓe kawriti e dammugal wuro ngon. ³⁴Yeesu yamɗitini ɗuɗɓe gooduɓe nyawuuji feere‑feere. O wurtinani yimɓe ɗuɗɓe ginni, o haɗiɗi metuki ngam e ɗi andimo.

Yeesu Wa’ajinii Nder Leydi Galiili

(Luka 4.42‑44)

³⁵Ilaa subaka, daga nyiwre e horii, o ummii o yahi wonde wigeere nder ladde, o waɗi do’aare ton. ³⁶Sey Siiman e gonduɓe e maako ndilli ɗaɓɓutukimo. ³⁷Nde ɓe keɓtimo, ɓe mbi’imo, “Koo moye e ɗaɓɓutumaa!”

³⁸Sey Yeesu wi’iɓe, “En njahu gariije gonɗe haade ɗo’o mi wa’ajina ton maa, ngam kanjum ngarmi mi waɗa.”

³⁹O yahi koo toye nder leydi Galiili, e mo wa’ajina nder cuuɗi do’aare maɓɓe, e mo wurtinana yimɓe ginni.1.39: Maat 4.23; 9.35.

Gooduɗo Nyawu Nyaamoowu Laral

(Maatiyu 8.1‑4; Luka 5.12‑16)

⁴⁰Goɗɗo gooduɗo nyawu nyaamoojum laral wari to Yeesu diccii e toroomo, e wi’a, “Taa jaɓii, a waaway njamɗitinaayam.”

⁴¹Jurumɗum nangi Yeesu, o forti jungo, o meemimo, o wi’imo, “Mi jaɓii. Yamɗutu!” ⁴²Ɗon e ɗon nyawu ɗum alimo, o yamɗiti. ⁴³Sey Yeesu wagginimo, wi’imo, “Dillu, ⁴⁴faamu, taa’ wi’uka koo moye, ammaa yahu kollaa hoore maaɗa to ardiiɗo diina, nden kokkaa cakkiri no Muusa wi’i ɗum waɗa ngam laaɓol maaɗa. Waɗu non ngam tabbitinanki yimɓe a yamɗitii.”1.44: KLee 14.1‑32.

⁴⁵Ammaa o dilli e mo wi’aka koo toye, e mo sankita habaru ɗum. Non waɗi Yeesu waawaayi nattuki wondi gariiri e njayri, ammaa o jooɗii e ladde. Fuu e non, yimɓe ɗuɗɓe ngaɗi ka warki to maako daga koo toye.

Yeesu Yamɗitinii Jaraaɗo

(Maatiyu 9.1‑8; Luka 5.17‑26)

¹Gaɗa balɗe seɗɗa Yeesu so’’ii Kafarnahum. Sey yimɓe nani habaru e mo wuro. ²Yimɓe ɗuɗɓe kawriti keewi wuro ngon haa walaa njayri nder wuro ngon e yaasi dammugal maago. E mo wa’ajinanaɓe Wolde Allah. ³Sey woɓɓe ngaroyi, ɓe ngaddanimo goɗɗo jaraaɗo, yimɓe nayo e koccoyimo. ⁴Nde ɓe mbaawaayi nattinkimo to Yeesu woni ngam yimɓe ɗuuɗii, sey ɓe ƴentinimo dow suudu ndun, ɓe njulindu, ɓe ngaɗimo nder yulnde nden dow daago maako, ɓe njippinimo yeeso Yeesu. ⁵Nde Yeesu yi’i hoolaare maɓɓe, o wi’i jaraaɗo on, “Higo, a yaafanaama hakkeeji maaɗa.”

⁶Woɓɓe moodiɓɓe Attawra e njooɗii ɗon e ɓe nyuma nder ɓerɗe maɓɓe, ⁷e ɓe mbi’a, “Ngam ɗume neɗɗo o’o metirta nihi? E mo fottidina hoore maako e Allah! Moye waawata yaafaaki hakke to naa’ Allah tan?”

⁸Ɗon e ɗon Yeesu faami nder ɓernde muuɗum e ɓe nyuma dow fii ɗu’um nder ɓerɗe maɓɓe, o wi’iɓe, “Ngam ɗume nyumoton iri nyumooji ɗi’i nder ɓerɗe mooɗon? ⁹Ko ɓuri hoyki, ɗum wi’a jaraaɗo o’o, ‘A yaafanaama hakke maaɗa,’ koo ɗum wi’amo, ‘Umma hoccu daago maaɗa, yaaɓu?’ ¹⁰Ammaa e mi yiɗi andon Ɓii Neɗɗo e woodi laamu nder duuniyaaru yaafoo hakke.” Ngam non o wi’i jaraaɗo on, ¹¹“E mi wi’umaa, umma, koccaa daago maaɗa, kootaa wuro.”

¹²Sey o ummii, o hocci daago maako, o wurtii, o dilli yeeso koo moye. Fii ɗu’um hayɗini fuu yimɓe gonɓe ɗon, ɓe manti Allah, ɓe mbi’i, “Min meeɗaayi yiiki iri fii ɗu’um!”

Yeesu Noddii Leewi

(Maatiyu 9.9‑13; Luka 5.27‑32)

¹³Yeesu fuɗɗiti wurtii yahi haade Mbeela Galiili. Yimɓe ɗuɗɓe ngari to maako o ekkitiɓe. ¹⁴E mo ƴaɓɓoo, o yi’i Leewi ɓii Halfa e jooɗii to ɗum jaɓata ceede leydi, sey Yeesu wi’imo, “Tokkam.” Sey Leewi ummii tokkimo.

¹⁵Gaɗa ɗon Yeesu e tokkuɓemo e ɓe njooɗii e ɓe kirtoo to wuro Leewi. Jaɓooɓe ceede leydi ɗuɗɓe e gaɗooɓe hakke e nyamda e maako e tokkuɓemo, ngam e woodi yimɓe ɗuɗɓe iri maɓɓe e tokkimo. ¹⁶Nde moodiɓɓe Attawra Faarisanko’en ngi’i e mo nyamda e gaɗooɓe hakke e jaɓooɓe ceede leydi, ɓe mbi’i tokkuɓemo, “Ngam ɗume o nyamdata e jaɓooɓe ceede leydi e gaɗooɓe hakke?”

¹⁷Nde Yeesu nani non, o wi’iɓe, “Naa’ yamɓe ngiɗi nyawndoowo, sey ni nyawɓe. Mi waroyaayi ngam nodduki nyumooɓe ɓe aadili’en, ammaa mi waroyi ngam nodduki anduɓe ɓe gaɗooɓe hakke.”

Ƴamol Dow Suumaaki

(Maatiyu 9.14‑17; Luka 5.33‑39)

¹⁸Too, tokkuɓe Yahaya Gaɗoowo Baptisma e tokkuɓe Faarisanko’en e cuumoo. Sey woɓɓe ngari ƴami Yeesu, ɓe mbi’i, “Ngam ɗume tokkuɓe Yahaya e tokkuɓe Faarisanko’en e cuumoo, ammaa tokkuɓema cuumataako?”

¹⁹Yeesu nootii, wi’iɓe, “E yiiki mooɗon higooɓe angoojo cuumoto e carel ngel angoojo on e wondi e maɓɓe? To ni e ɓe ngondi e angoojo on, ɓe cuumataako. ²⁰Ammaa carel e wara ngel ɗum hoccata angoojo on daga nder maɓɓe, nden e nyalnde nden ɓe cuumotoo.

²¹“Walaa nyootayɗo lefel kesel to limcere kiinde. To o waɗii non, lefel kesel ngel seekay e limcere kiinde nden. Non waɗay nde ɓura no ndenno seekuki. ²²Non maa walaa gaɗayɗo ndiyam inabojam kesam nder faandu hiindu. To o waɗii non, ɗam ƴuufay ɗam pusa faandu ndun, nden ɗum dullayɗam, ɗum dulla faandu ndun. Ammaa ndiyam inabojam kesam haani waɗee nder faandu heyru.”

Ƴamol Dow Nyalnde Siwtaare

(Maatiyu 12.1‑8; Luka 6.1‑5)

²³Wonde Nyalnde Siwtaare Yeesu e tokkuɓemo e ƴaɓɓoo nder gese alkamaari, sey tokkuɓemo puɗɗi ɓoruki cammeeje mayri e ɓe nyaama.2.23: TA 23.25.²⁴Sey Faarisanko’en mbi’imo, “Raa ko tokkuɓema ngaɗata. Ko waɗata e ɓe ngaɗa ko Attawra haɗi ɗum waɗa Nyalnde Siwtaare?”

²⁵Yeesu wi’iɓe, “On meeɗaayi janguki ko Dawda waɗi, kanko e gonduɓe e maako nde ɓe nani weelo kadin e ɓe nder dullere nyamndu? ²⁶E jaamanu ɗum Abiyata woni Mawɗo Mawɓe Ardiiɓe Diina, Dawda natti Lukuru Seniiɗum nyaami buroodi ceniiɗum. Attawra boo wi’ii ardiiɓe diina tan haani nyaamuki buroodi ɗum, ammaa Dawda nyaamiɗum haa maa o hokkori jaadooɓe e maako.”2.26: KLee 24.9.2.25,26: 1Sam 21.1‑6.

²⁷Sey Yeesu wi’iɓe, “Nyalnde Siwtaare waɗaa ngam neɗɗo, naa’ neɗɗo waɗaa ngam Nyalnde Siwtaare. ²⁸Ngam non Ɓii Neɗɗo o Joomu koo ɗume haa e Nyalnde Siwtaare.”

Neɗɗo Mo Jungo Yaraango

(Maatiyu 12.9‑14; Luka 6.6‑11)

¹Wonde nyalnde Yeesu natti suudu do’aare, e woodi goɗɗo mo jungo jaraango nder mayru. ²Sey woɓɓe nder suudu do’aare ndun cutiimo koo o yamɗitinay neɗɗo on Nyalnde Siwtaare ngam ɓe keɓa ko ɓe ngulliroytoomo. ³Sey Yeesu wi’i mo jungo jaraango on, “Woroy ɗo’o.” ⁴Nden Yeesu ƴamiɓe wi’i, “Ko Attawra wi’i ɗum waɗa Nyalnde Siwtaare? Ɗum waɗa ko wooɗi, koo ɗum waɗa ko wooɗaa? Ɗum hisna yonki, koo ɗum waɗa warhoore?”

Ammaa ɓe fuu ɓe nde’’iti. ⁵Yeesu raariɓe ɓernde muuɗum e metti, o wannii ngam ɓerɗe maɓɓe ɗe caatuɗe. Sey o wi’i mo jungo jaraango on, “Fortu jungo maaɗa.” O fortingo, sey ngo yamɗiti. ⁶Sey Faarisanko’en mburtii suudu do’aare ndun, ɓe puɗɗi medduki e yimɓe Hirudus dow no ɓe mbardata Yeesu.

Yimɓe Ɗuɗɓe Ngarii To Yeesu

⁷Sey Yeesu dillidi e tokkuɓemo yaaki haade Mbeela Galiili. Sey yimɓe ɗuɗɓe ƴiwoyiɓe Galiili tokkimo. ⁸Nde yimɓe ɗuɗɓe nani habaru fuu ko o waɗata, ɓe ngari to maako daga Yahuudiya, e Urucaliima, e Iduumiya, e fongo Caangol Urdun, e leydi haade gariije Taaya e Sidon. ⁹O wi’i tokkuɓemo ngaddanamo komiwal ngam yimɓe ɗuɗɓe kawritii to’ ɓe ɓiɗɗamo. ¹⁰O waɗu non ngam o yamɗitinii yimɓe ɗuɗɓe haa nyawɓe ɗuɗɓe ngaɗi ka fiiduki ngam ɓe meemamo.3.9,10: Mar 4.1; Luk 5.1‑3.¹¹Fuu carel ngel yimɓe gooduɓe ginni ngi’imo, sey ɓe njana yeeso maako e ɓe mbi’a e sembe, “An a Ɓiɗɗo Allah!”

¹²Ammaa o wagginiɓe to’ ɓe mbi’aka koo moye kanko o moye.

Yeesu Suɓii Tokkuɓemo Sappo e Ɗiɗo

(Maatiyu 10.1‑4; Luka 6.12‑16)

¹³Yeesu ƴenti hocceere noddi ɓe o yiɗi. Ɓe njahi to maako. ¹⁴O suɓi yimɓe sappo e ɗiɗo ngam ɓe njooɗodoo e maako, nden o lilaɓe ɓe nga’ajinoya, o noddiɓe lilaaɓe, ¹⁵o hokkiɓe bawɗe wurtinki ginni.

¹⁶Raa inɗe yimɓe ɓe o suɓi ɓen: Siiman mo o hokki inde Biiturus, ¹⁷e Yaakubu ɓii Jabadi, e minyiraawo muuɗum Yahaya, o hokkiɓe inde Buwarnajis, waato Ɓiɓɓe Riggaango, ¹⁸e Andiraawus, e Filibus, e Batiloomi, e Maatiyu, e Tooma, e Yaakubu ɓii Halfa, e Taadiyus, e Siiman Kananiyankeejo, ¹⁹e Yahuuda Iskariyooti, gartuɗo kokkitirɗo Yeesu.

Yeesu e Ba’aljabul

(Maatiyu 12.22‑32; Luka 11.14‑23; 12.10)

²⁰Nden Yeesu natti wuro to jooɗotoo, sey yimɓe ɗuɗɓe fuɗɗiti kawriti to maako haa kanko e tokkuɓemo ɓe mbaawaayi nyaamuki nyamndu. ²¹Nde bandiraaɓe maako nanii non, ɓe njahi ngam ɓe nangoyamo, ngam ɓe nanii yimɓe e mbi’a, “O haaŋake.”

²²Moodiɓɓe Attawra garoyɓe daga Urucaliima mbi’i, “Ba’aljabul laamiiɗo ginni nangimo, nden e bawɗe maagol o wurtinirta ginni.”3.22: Maat 9.34; 10.25.

²³Sey Yeesu noddiɓe hokkiɓe misaalu wi’iɓe, “No waɗata Ceyɗan riiwa Ceyɗan? ²⁴To laamu sendake e wanywanytira, ɗum waawataa ɗum daroo. ²⁵Non maa to wuro sendake e wanywanytira, ngon ɗon wuro ngo waawataa ngo daroo. ²⁶To laamu Ceyɗan sendake e wanywanytira, ɗum waawataa ɗum daroo, re’irde maajum warii won ɗon.

²⁷“Walaa baawayɗo natta wuro cembiɗɗo teetanamo ko o woodi, sey ni arta haɓɓukimo, nden waawa hoccuki ko o woodi nder wuro ngon.

²⁸“E mi wi’a’on goonga, ɗum waaway yaafanaaki yimɓe hakke e koo iri ɗiye haalaaji kalluɗi ɗi ɓe meti. ²⁹Ammaa fuu bi’uɗo ko wooɗaa dow Ruuhu Allah, o yaafantaake haa abadaa. Haa abadaa hakke ɗum e dow maako.”3.29: Luk 12.10.³⁰Yeesu wi’ii non ngam e ɓe mbi’a, “E mo woodi ginnol.”

Maduujo Yeesu e Minyiraaɓe Maako

(Maatiyu 12.46‑50; Luka 8.19‑21)

³¹Sey maduujo Yeesu e minyiraaɓe maako ngari ndarii yaasi, ɓe lili goɗɗo noddoya Yeesu. ³²Yimɓe ɗuɗɓe e njooɗii e ɓe pilii Yeesu, ɓe mbi’imo, “Maduujo maaɗa e minyiraaɓe maaɗa e ɓe ton yaasi, e ɓe ɗaɓɓutumaa.”

³³Yeesu ƴamiɓe wi’i, “Moye woni maduujo am, nden ɓeye ngoni minyiraaɓe am?” ³⁴O raari jooɗiiɓe e piliimo o wi’i, “Raa maduujo am e minyiraaɓe am ɗo’o! ³⁵Fuu gaɗuɗo ko Allah yiɗi, kanko woni minyiraawo am e maduujo am.”

Misaalu Dow Demoowo

(Maatiyu 13.1‑9; Luka 8.4‑8)

¹Ɗonmaa Yeesu fuɗɗi ekkitinki haade Mbeela Galiili. Yimɓe ɗuɗɓe kawriti to maako naaki o natti komiwal o jooɗii nder maagal dow ndiyam. Kawrutuɓe ɓen fuu e ɓe haade mbeela ngan dow njaareendi.4.1: Luk 5.1‑3.²Sey o huutiri misaalu o ekkitiɓe ekkitinol feere‑feere ɗuɗngol. Nder ekkitinol maako o wi’i,

³“Kettindee! Goɗɗo demoowo yahi ngesa ngam saaka awdi. ⁴E mo nder saakuki awdi ndin, wondi yani dow ɗatal, colli ngari cuppidindi. ⁵Wondi boo yani nder kaaƴe; ɗon ndi heɓaayi leydi ɗundi. Ndi fuɗi jawɗum ngam leydi ndin luggaa. ⁶Ammaa nde naange wurtoyii fiyindi, sey ndi yoori ngam ndi walaa ɗaɗi. ⁷Wondi awdi boo yani nder gi’e, sey gi’e ɗen mawni ɓiɗɗindi haa ndi waawaayi waɗuki cammeeje. ⁸Ammaa wondi awdi yani dow leydi mbondi ndi fuɗi ndi mawni ndi waɗi cammeeje. Wondi waɗi gabbe 30, wondi waɗi gabbe 60, wondi haa 100.”

⁹Nde Yeesu heenyi hokkuki misaalu ɗu’um, sey o wi’i, “Gooduɗo noppi nanuki fuu nana.”

Ko Waɗi Yeesu e Huutira Misaalu

(Maatiyu 13.10‑17; Luka 8.9,10)

¹⁰Nde Yeesu e jooɗii kanum tan, tokkuɓemo sappo e ɗiɗo e woɓɓe tokkuɓemo njahi to maako ɓe ƴamimo o hokkaɓe ma’ana ɗum ɗon misaalu. ¹¹Sey o wi’iɓe, “Onon on kokkaama faamuki sirru Laamu Allah, ammaa yimɓe ɓe ngalaa nder mooɗon, koo ɗume sey e misaalu, ¹²ngam,

‘E ɓe ndaara, ammaa ɓe ngi’ataa.

E ɓe nana, ammaa ɓe paamataa.

Ngam to naa’ non ɗum gaɗotooɗum ɓe nana, ɓe tuuba,

ɗum yaafanooɓe.’ ”4.12: Ica 6.9,10.

Ma’ana Misaalu Dow Demoowo

(Maatiyu 13.18‑23; Luka 8.11‑15)

¹³Sey Yeesu wi’iɓe, “On paamaayi misaalu ɗu’um? Too, no paamirton misaalu koriiɗum? ¹⁴Ko demoowo on saaki woni Wolde Allah. ¹⁵Woɓɓe yimɓe e nandi e awdi njanundi dow ɗatal. Carel ngel ɓe nani Wolde Allah, ɗon e ɗon Ceyɗan wara hoccande daga nder ɓerɗe maɓɓe. ¹⁶Woɓɓe boo e nandi e awdi njanundi hakkunde kaaƴe. To ɓe nanii Wolde Allah, ɗon e ɗon ɓe njaɓande nder belɗum ɓernde. ¹⁷Ammaa nde ɓe ngalaa ɗaɗi, ɓe munyay carel seɗɗa tan. To caɗeele koo torra warii ngam wolde nden, ɗon e ɗon ɓe njoofande. ¹⁸Woɓɓe kadin e nandi e awdi caakaandi nder gi’e. Ɓe nani Wolde nden, ¹⁹ammaa wannuki e fii duuniyaaru, e yidde jawdi, e suuno feere‑feere natti ɓerɗe maɓɓe ɓiɗɗi wolde nden kaɗinde wallukiɓe ɓe ngaɗa ko Allah yiɗi. ²⁰Woɓɓe boo e nandi e awdi caakaandi dow leydi mbondi. Ɓe nani Wolde Allah, ɓe njaɓinde, ɓe kuutinirinde haa ɓe keɓi ɓeydaari, woɓɓe keɓi nde 30, woɓɓe keɓi nde 60, woɓɓe haa nde 100.”

Misaalu Dow Fitilaaru

(Luka 8.16‑18)

²¹O wi’iɓe, “On ngadday fitilaaru kippon tummude dow mayru, koo ndesonndu ley leeso? Naa’ on ndesayndu dow danki?4.21: Maat 5.15; Luk 11.33.²²Fuu ko suuɗii, ɗum wurtinayɗum e njayri, non maa fuu ko ombaa ɗum omteteeɗum.4.22: Maat 10.26; Luk 12.2.²³Gooduɗo noppi nanuki fuu nana.”

²⁴O fuɗɗiti o wi’iɓe, “Paamee boɗɗum e ko nanoton! E poondirgel ngel poondirton, e maagel ɗum foondiranta’on haa maa ɗum ɓeydana’on.4.24: Maat 7.2; Luk 6.38.²⁵Ngam fuu gooduɗo faamu dow Laamu Allah ɗum ɓeydanaymo. Ammaa mo walaa faamu dow Laamu Allah, koo ko o woodi maa ɗum jaɓayɗum.”4.25: Maat 13.12; 25.29; Luk 19.26.

Misaalu Dow Awdi Puɗundi

²⁶Yeesu fuɗɗiti wi’i, “Laamu Allah e nandi e neɗɗo caakoowo awdi e ngesa. ²⁷Waala fina, koo e mo ɗaanii koo o ɗaanaaki, awdi ndin fuɗay mawna, ammaa o andaa no ɗum waɗiri. ²⁸Leydi e wurtina gawri e hoore mayri. Arande ƴombal wurtoto, nden sammeere, nden sammeere nden wurtina ngabboy. ²⁹To gawri ndin ɓendii, sey o yaada e lawjeeru o taƴa, ngam carel ittukindi warii.”4.29: Yow 3.13.

Misaalu Dow Gabbel Mastat

(Maatiyu 13.31,32,34; Luka 13.18,19)

³⁰Yeesu kadin wi’i, “Ko nandinaymi Laamu Allah? Koo boo e ɗume misaalu nandinaymiɗum? ³¹E ɗum nandi e gabbel mastat, gabbel ɓurngel koo ngele gabbel aaweteengel famɗuki. ³²Fuu e non to ngel aawaama, e ngel mawna ngel ɓura koo ngele leggel mawnuki, ngel waɗa lice mawɗe haa colli koɗa nder ɗowdi maagel.”

³³Yeesu huutirii iri misaalu ɗu’um ɗuɗɗum, o wa’ajinaniɓe Wolde Allah haa keerol no ɓe mbaawi faamuki. ³⁴Fuu ko o wi’ataɓe e mo huutira misaalu. Ammaa to e mo wondi e tokkuɓemo kamɓe tan, sey o wi’aɓe ma’ana ko o wi’i.

Yeesu Darnii Hendu Cembindu

(Maatiyu 8.23‑27; Luka 8.22‑25)

³⁵E nden ɗon nyalnde alaasara Yeesu wi’i tokkuɓemo, “En kuulu fongo mbeela.” ³⁶Sey tokkuɓemo ali yimɓe hawrutuɓe, ɓe natti nder komiwal ngal o woni nder, ɓe ndillidi e maako. E woodi komiije feere tokkiɓe. ³⁷Sey iyeende e hendu cembindu ummoyii, geelooɗi ndiyam puɗɗi piiki komiwal ngal, ndiyam natti nder maagal haa naaki komiwal ngal ɓadii heewa ndiyam. ³⁸Yeesu boo e ton gaɗa komiwal ngal e ɗaanii dow ɓantirɗum hoore. Sey tokkuɓemo pindinimo mbi’imo, “Moodibbo, a wannaayi to en kalkii?”

³⁹Sey o ummii, o haɓani hendu ndun, o wi’i geelooɗi ndiyam ɗin, “Nde’’itee! Alee!” Sey hendu ndun ali, koo ɗume de’’iti. ⁴⁰O wi’i tokkuɓemo, “Ngam ɗume ngooduɗon kulol? Haa jooni on koolaakiyam?”

⁴¹Ɓe kultori, ɓe ƴamƴamtiri, ɓe mbi’i, “Ɗum moye o’o? Haa hendu e geelooɗi ndiyam e ngaɗa ko o wi’i!”

Yeesu Yamɗitinii Gooduɗo Ginni

(Maatiyu 8.28‑34; Luka 8.26‑39)

¹Yeesu e tokkuɓemo kuuli fongo mbeela ɓe njottii leydi Gaarasinko’en. ²Nde Yeesu wurtii daga nder komiwal ngal, sey goɗɗo gooduɗo ginnol ƴiwoyi to genaale taɓɓiimo. ³Neɗɗo on nder genaale o jooɗotoo, walaa baawayɗo haɓɓukimo, koo e ɓoggi njamndi. ⁴Nde ɗuɗɗum e mo haɓɓiree ɓoggi njamndi juuɗe e koyɗe, ammaa o taƴaɗi o yewa njamndi gaɗaandi to koyɗe maako. Walaa gooduɗo sembe baawayɗo jogaakimo. ⁵Jemma e nyalawma e mo nder genaale koo dow kocceeje, e mo wulla sembee, e mo taƴira ɓandu maako e kaaƴe.

⁶Nde o haynii Yeesu, o doggi o yahi to maako, o diccii yeeso maako. ⁷O wulli sembee o wi’i, “Ko wannumaa e am, Yeesu Ɓiɗɗo Allah Joomu Mangu? E mi toromaa ngam Allah, taa’ torram.” ⁸O wi’u non ngam Yeesu wi’ii, “An ginnol, wurta nder neɗɗo o’o!”

⁹Sey Yeesu ƴamingol wi’i, “No inde maaɗa?”

Ngol nootii ngol wi’i, “Ɗuɗɗi, ngam e min ɗuuɗi.” ¹⁰Sey ngol waɗi ka toraaki Yeesu to’ o riiwaɗi daga leydi ndin.

¹¹Haade ɗon e woodi ornde aladeeji ɗuɗɗi e dura to regorde hocceere. ¹²Sey ginni ɗin torii Yeesu ɗi mbi’i, “Alumin min nattoya aladeeji ɗin ni.” ¹³Yeesu jaɓi, sey ɗi mburtii ɗi nattoyi aladeeji ɗin. Aladeeji ɗin boo kewtii 2,000. Ornde nden fuu nyaari jippoyii daga dow ƴolde nden yani nder mbeela, ndiyam nyaamiɗi.

¹⁴Woynaaɓe aladeeji ɗin ndoggi mbi’oyika yimɓe nder gariiri e yimɓe ngarihoy. Yimɓe ɓen njahi ngi’a ko waɗi. ¹⁵Nde ɓe ngari to Yeesu woni, ɓe ngi’i goodunooɗo ginni ɗuɗɗi on, e mo jooɗii ɗon, e ɓornii, e mo nder hakkiilo maako. Koo moye maɓɓe huli. ¹⁶Gi’uɓe ko waɗi ɓe mbi’i yimɓe ɓen ko heɓi goodunooɗo ginni on e aladeeji ɗin.

¹⁷Sey yimɓe ɓen puɗɗi toraaki Yeesu alanaɓe leydi maɓɓe.

¹⁸Yeesu e natta komiwal, sey goodunooɗo ginni on torii dillida e Yeesu.

¹⁹Ammaa Yeesu jaɓaayi o dillida e muuɗum, wi’imo, “Hootu to bandiraaɓe maaɗa mbi’aɓe fii mawɗum ɗum Joomiraawo waɗanmaa e no o yurminiranmaa.”

²⁰Sey neɗɗo on dilli leydi Dikapolis5.20: Waato Gariije Sappo., o fuɗɗi hokkuki habaru fii mawɗum ɗum Yeesu waɗanimo. Fuu yimɓe ɓen kayɗini.

Ɓiɗɗo Jaayirus e Goɗɗo Debbo

(Maatiyu 9.18‑26; Luka 8.40‑56)

²¹Nde Yeesu fuɗɗiti huuli fongo mbeela nder komiwal, yimɓe ɗuɗɓe kawriti to maako, kanko boo e mo haade mbeela ngan. ²²Sey go’oto nder ardiiɓe suudu do’aare bi’eteeɗo Jaayirus wari. Nde o yi’i Yeesu, o diccii yeeso maako, ²³o waɗi ka toraaki Yeesu, e mo wi’a, “Ɓiɗɗo am surbaajo pamaro ɓadake mayde, e mi toromaa ngaraa meemaamo ngam o yamɗita to’ o maaya.”

²⁴Sey Yeesu yaadi e maako. Yimɓe ɗuɗɓe tokkimo, e ɓe ɓiɗɗamo.

²⁵E woodi goɗɗo debbo ɗon gaɗuɗo duuɓi sappo e ɗiɗi e torrodoo e rufuki ƴiiƴam. ²⁶Debbo on torrake naa’ seɗɗa to juuɗe nyawndooɓe ɗuɗɓe, o majjinii fuu jawdi maako. O yamɗitaayi, ammaa nyawu ɗum ɓeydii. ²⁷Nden maa o nanii habaru Yeesu, sey o ƴiwoyi gaɗa Yeesu nder yimɓe, o meemi toggoore maako. ²⁸Ngam o wi’ii nder ɓernde maako, “Koo toggoore maako meemumi tan, mi yamɗitay.”

²⁹Ɗon e ɗon ƴiiƴam ɗam darii, o nani nder ɓandu maako ɗum yamɗitiniimo daga nyawu maako. ³⁰Ɗon e ɗon Yeesu faami bawɗe mburtake daga nder muuɗum. O waylitii nder yimɓe, o wi’i, “Moye meemi toggoore am?”

³¹Sey tokkuɓemo mbi’imo, “A yi’a yimɓe ɗuɗɓe e ɓiɗɗumaa, ammaa a ƴama moye meemumaa?”

³²Ammaa Yeesu waɗi ka raaruki nder yimɓe ɓen ngam yi’a moye meemimo. ³³Debbo on boo nde e mo andi ko heɓi ɓandu maako, o wari nder kulol e mo diwna, o diccii yeeso Yeesu, o wi’imo goonga dow koo ɗume ko waɗi. ³⁴Sey Yeesu wi’imo, “Bandiraawo, hoolaare maaɗa yamɗitiniima. Njippoɗaa jam, a hoyii daga nyawu maaɗa.”

³⁵Yeesu e meta, sey woɓɓe daga wuro Jaayirus ardiiɗo suudu do’aare on ngari, ɓe mbi’imo, “Ɓiɗɗo maaɗa maayii. Ngam ɗume ngannataa moodibbo kadin?” ³⁶Ammaa Yeesu wannaayi e ko ɓe mbi’i, o wi’i ardiiɗo suudu do’aare on, “Taa’ hulu, hoolayam tan.” ³⁷O alaayi koo moye yaadi e maako sey Biiturus, e Yaakubu, e Yahaya minyiraawo Yaakubu. ³⁸Nde ɓe njottii wuro Jaayirus, Yeesu yi’i yimɓe nder wannaare, woɓɓe e mboya, woɓɓe e ngulla e sembe. ³⁹O natti, o wi’i, “Ngam ɗume nattuɗon wannaare nde’e on mboya? Surbaajo on o maayaayi, ammaa o ɗaani tan.”

⁴⁰Sey ɓe njalimo. O wurtiniɓe ɓe fuu yaasi, o hocci nyaako surbaajo on e maduujo maako e tokkuɓemo ɓe o wondi, ɓe natti to surbaajo on woni. ⁴¹Yeesu jogii jungo surbaajo on wi’i, “Taliita, kumi,” waato, “Surbaajo, umma!”

⁴²Ɗon e ɗon surbaajo on ummii fuɗɗi yaadu. E mo woodi duuɓi sappo e ɗiɗi. Fii ɗum hayɗiniɓe naa’ seɗɗa. ⁴³Yeesu wagginiɓe wi’i to’ ɓe njaɓa ɓe mbi’aka koo moye. Nden o wi’iɓe, “Kokkeemo goɗɗum o nyaama.”

Yeesu Wanyaama To Najarat

(Maatiyu 13.53‑58; Luka 4.16‑30)

¹Sey Yeesu ali wigeere nden so’’ii gariiri to mawni, tokkuɓemo njaadi e maako. ²Nde Nyalnde Siwtaare wari, o fuɗɗi ekkitinki nder suudu do’aare. Yimɓe ɗuɗɓe nanɓe ko o wi’i, ɓe kayɗini e ekkitinol maako. E ɓe mbi’a, “Toye neɗɗo o’o heɓi fuu fii ɗu’um? Toye o heɓi iri faamu ɗu’um? Toye o heɓi bawɗe waɗuki iri kuuɗe kayɗiniiɗe ɗe’e? ³Naa’ kanko woni on ɗon cehoowo, ɓiɗɗo Maryaama, mawniraawo Yaakubu, e Yusufu, e Yahuuda, e Siiman? Nden minyiraaɓe maako rewɓe naa’ en ngondi e maɓɓe ɗo’o?” Sey ɓe njawanimo.

⁴Yeesu wi’iɓe, “Koo toye yimɓe e kokka annabiijo mangu, ammaa yimɓe gariiri maako, e bandiraaɓe maako, e yimɓe wuro maako, ɓe kokkataamo mangu.”6.4: Yah 4.44.

⁵Yeesu waawaayi waɗuki goɗɗum kayɗiniiɗum ton, sey ni yimɓe seɗɗa ɓe njamɗaa o yowi juuɗe maako dow maɓɓe o yamɗitiniɓe. ⁶O hayɗini ngam ɓe koolaakimo.

Yeesu Lili Tokkuɓemo Sappo e Ɗiɗo

(Maatiyu 10.5‑15; Luka 9.1‑6)

Yeesu e yiiloo e ekkitina nder ngarihoy. ⁷O noddi tokkuɓemo sappo e ɗiɗo, o liliɓe ɗiɗo‑ɗiɗo, o hokkiɓe laamu dow ginni. ⁸O wi’iɓe to’ ɓe kocca goɗɗum ngam yaadu, koo nyamndu, koo jakaare, koo ceede e jiiba. Sawru tan ɓe njogotoo. ⁹Ɓe ngatta paɗe, ammaa to’ ɓe ɓornoo toggooje ɗiɗi. ¹⁰O boo wi’iɓe, “Fuu wuro ngo njippiiɗon, njooɗee nder maago naa on alii gariiri ndin. ¹¹To ɗum jaɓɓaaki’on e wigeere, koo ɗum wanyii hettindanaaki’on, piɗɗee sollaare koyɗe mooɗon carel ko aloton wigeere nden. Kanjum hollata ɓe ngaɗii hakke.”6.11: KL 13.51.6.8‑11: Luk 10.4‑11.

¹²Sey ɓe ndilli e ɓe nga’ajina wi’uki yimɓe tuuba. ¹³Ɓe mburtinani yimɓe ɗuɗɓe ginni, ɗuɗɓe ɓe njamɗaa boo ɓe moytaniɓe nebbam ɓe njamɗitiniɓe.6.13: Yaak 5.14.

Mayde Yahaya Gaɗoowo Baptisma

(Maatiyu 14.1‑12; Luka 9.7‑9)

¹⁴Hirudus Laamiiɗo nani habaru fii ɗu’um, ngam inde Yeesu andaama koo toye. Woɓɓe e mbi’a Yahaya Gaɗoowo Baptisma umminaa daga mayde, kanjum waɗi e mo woodi bawɗe waɗuki kuuɗe kayɗiniiɗe.

¹⁵Woɓɓe boo mbi’i, “Ɗum Annabi Iliya.”

Nden woɓɓe mbi’i, “O annabiijo bo annabo’en ndenno.”6.14,15: Maat 16.14; Mar 8.28; Luk 9.19.

¹⁶Ammaa nde Hirudus nani non, o wi’i, “Yahaya mo ittanmi hoore, kanko umminaa daga mayde!” ¹⁷Ngam ndenno Hirudus e hoore muuɗum waɗii ɗum nangii Yahaya, ɗum haɓɓimo, ɗum surimo nder suudu cural. O waɗu non ngam Hiruudiya debbo mawniraawo maako Filibus mo o te’i. ¹⁸Ngam Yahaya waɗii ka wiiki Hirudus, “Ɗum haanaayi te’aa debbo mawniraawo maaɗa.”6.17,18: Luk 3.19,20.

¹⁹Hiruudiya boo nder ɓernde maako e mo jogitii Yahaya e mo yiɗi warkimo. Ammaa o waawaayi warkimo, ²⁰ngam Hirudus e hula Yahaya e suranamo, nde e mo andi kanko o aadiliijo o ceniiɗo. Fuu carel ngel Hirudus nani haala Yahaya, e mo natta wannaare. Ammaa fuu e non e mo yiɗi hettindanaakimo.

²¹Ammaa Hiruudiya heɓi laawol no warirta Yahaya. Nyalnde humto siftorki danyngol Hirudus, Hirudus siryii humto ngam kuwooɓe mawɓe nder laamu maako, e mawɓe ardiiɓe sooji’en, e mawɓe leydi Galiili. ²²Nde ɓiɗɗo Hiruudiya surbaajo natti wami, o welnani Hirudus ɓernde e hoɓɓe maako. Sey Hirudus wi’imo, “Torayam fuu ko ngiɗɗaa, mi hokketeɗum.” ²³Hirudus hunaniimo wi’i, “Fuu ko toriɗaayam mi hokketeɗum haa ko hewtata sendere laamu am.”

²⁴Sey surbaajo on wurtii wi’i maduujo muuɗum, “Ko haani mi toroo?”

Maduujo on wi’imo, “Toramo hoore Yahaya Gaɗoowo Baptisma.”

²⁵Ɗon e ɗon surbaajo on nder yawɗaare o so’’ii to laamiiɗo on o wi’imo, “E mi yiɗi jooni‑jooni kokkaayam hoore Yahaya Gaɗoowo Baptisma nder le’al.”

²⁶Hirudus Laamiiɗo wannii naa’ seɗɗa, ammaa nde o yaadake o hunanakemo yeeso hoɓɓe, o yiɗaa o haɗamo. ²⁷Ɗon e ɗon o waɗi soojiijo o yaha o waddoya hoore Yahaya. Soojiijo on yahi ittani Yahaya hoore nder suudu cural, ²⁸o waddoyi hoore nden nder le’al, o hokkinde surbaajo on. Surbaajo on boo hokkinde maduujo muuɗum. ²⁹Nde tokkuɓe Yahaya nani non ɓe ngari ɓe kocci ɓandu maako ɓe pukkinoyindu nder yenaande gasaande nder hayre.

Yeesu Nyamnii Yimɓe 5,000

(Maatiyu 14.13‑21; Luka 9.10‑17; Yahaya 6.1‑14)

³⁰Lilaaɓe ɓe Yeesu lilunoo ngartoyii to maako, ɓe mbi’imo koo ɗume ko ɓe ngaɗi e ko ɓe ekkitini. ³¹O wi’iɓe, “Ngaree, njahen to wigeere gewtunde keɓon ciwtooɗon seɗɗa.” O wi’ii non ngam yimɓe ɗuɗɓe e ngara e co’’oo haa hewti ɓe keɓaayi koo carel ɓe nyaami nyamndu. ³²Sey ɓe natti komiwal ɓe ndilli to wigeere nder ladde kamɓe tan.

³³Ammaa carel ngel ɓe ndillata yimɓe ɗuɗɓe ngi’iɓe anditiɓe. Yimɓe ɓen mburtoyii daga gariije ɗuɗɗe ɓe ndoggi e koyɗe ɓe artiɓe yaaki ton. ³⁴E jippaaki Yeesu daga nder komiwal ngal o yi’i yimɓe ɗuɗɓe e kawriti, sey o nani jurumɗum maɓɓe, ngam e ɓe ɗon bo baali ɗi ngalaa gaynaako. Sey o fuɗɗi ekkitinkiɓe fii ɗuɗɗum.6.34: Lim 27.17; 1Laam 22.17; 2HL 18.16; Ijik 34.5; Maat 9.36.³⁵Nde alaasara waɗi, sey tokkuɓemo ngari to maako mbi’imo, “Ɗo’o ɗum ladde, ɗonmaa naange hiirii. ³⁶Wi’u yimɓe ɓe’e ndilla ngam ɓe njaha gure gonɗe haade e ngarihoy ngonkoy haade ɓe coodana ko’e maɓɓe ko ɓe nyaamata.”

³⁷Ammaa Yeesu wi’iɓe, “Onon kokkeeɓe ko ɓe nyaamata.” Sey ɓe mbi’imo, “A yiɗi min njaha min coodonoyaɓe nyamndu kewtundu ceede ɗe kuwoowo yoɓetee balɗe 200 min kokkaɓe ɓe nyaama?”

³⁸O wi’iɓe, “Buroodi noye ngooduɗon? Njahee ndaaron.”

Nde ɓe ndaari, ɓe mbi’i, “Buroodi jowi e liƴƴi ɗiɗi.”

³⁹Sey Yeesu wi’iɓe ɓe mbi’a yimɓe njooɗoo moɓɗe‑moɓɗe dow huɗo hecco. ⁴⁰Sey ɓe njooɗii moɓɗe 100‑100, woɓɓe njooɗii moɓɗe 50‑50. ⁴¹O hocci buroodi jowi ɗum e liƴƴi ɗiɗi ɗin, o raari dow, o yetti Allah, o sendi buroodi ɗum o hokki tokkuɓemo ngeedana yimɓe fuu. Non o waadi e liƴƴi ɗiɗi ɗin maa. ⁴²Ɓe fuu ɓe nyaami ɓe kaari. ⁴³Tokkuɓemo moɓti buroodi koriiɗum e liƴƴi koriiɗi ko waɗi kondooje sappo e ɗiɗi. ⁴⁴Nyaamuɓe buroodi ɗum worɓe tan ɓadake 5,000.

Yeesu Waɗii Yaadu Dow Ndiyam

(Maatiyu 14.22‑33; Yahaya 6.15‑21)

⁴⁵Ɗon e ɗon Yeesu waɗi tokkuɓemo natta komiwal ɓe artamo huuluki yaaki Betasayda, kanko boo o jaɓɓitoto kawrutuɓe. ⁴⁶Gaɗa o jaɓɓitakeɓe o ƴenti wonde hocceere ngam o waɗa do’aare. ⁴⁷Nde futuro waɗi, komiwal ngal e caka mbeela, Yeesu boo e dow hocceere kanum tan. ⁴⁸O yi’i tokkuɓemo e piida e komiwal, ngam hendu e haɗaɓe yaadu. Fajiri e mo yaha to maɓɓe, e mo yaha dow ndiyam mbeela ngan. E mo yiɗi o ƴaɓɓooɓe, ⁴⁹ammaa nde ɓe ngi’imo e mo yaha dow ndiyam, ɓe kammi ɗum ginnol, sey ɓe ngulli, ⁵⁰ngam ɓe fuu ɓe ngi’iimo ɓe kultorii. Ammaa ɗon e ɗon o metaniɓe, o wi’i, “Pukkinee ɓerɗe mooɗon, ɗum min. To’ on kulu.” ⁵¹Nden o natti komiwal ngal to maɓɓe, sey hendu ndun darii. Ɓe kayɗini naa’ seɗɗa, ⁵²ngam ɓe paamaayi ma’ana nyamnuki yimɓe 5,000 ki o waɗi, ngam ɓerɗe maɓɓe paamaayi ma’ana maajum.

Yeesu Yamɗitinii Nyawɓe To Leydi Janisarat

(Maatiyu 14.34‑36)

⁵³Nde ɓe kuuli fongo mbeela ngan, ɓe njottii leydi Janisarat ɓe kaɓɓi komiwal ngal. ⁵⁴Nde ɓe mburtii nder maagal, ɗon e ɗon yimɓe anditi Yeesu. ⁵⁵Yimɓe ɓen ndoggi ɓe njahi koo toye nder leydi ndin, e ɓe ngaddoya nyawɓe dow mbe’’itaari to Yeesu koo toye to ɓe nani o woni. ⁵⁶Koo toye to o yahi, koo nder ngarihoy, koo nder gariije mawɗe, koo nder gure ladde, yimɓe e pukkina nyawɓe nder luumo, ɓe toroomo nyawɓe ɓen meema koo cilmbi toggoore maako. Fuu meemuɓeɗi njamɗiti.

Ndonu Maama’en

(Maatiyu 15.1‑9)

¹Faarisanko’en e woɓɓe nder moodiɓɓe Attawra garoyɓe daga Urucaliima ɓe kawriti to Yeesu. ²Sey ɓe ngi’i woɓɓe tokkuɓe Yeesu e ɓe nyaama nyamndu ɓe lootaayi juuɗe maɓɓe no diina Yahuudanko’en wi’i.

³Faarisanko’en e fuu Yahuudanko’en ɓe nyaamataa nyamndu naa ɓe lootii juuɗe maɓɓe no diina maɓɓe wi’i, e ɓe tokki ndonu maama’en maɓɓe. ⁴To ɓe ngartoyii daga luumo, ɓe nyaamataa nyamndu naa ɓe lootake no diina maɓɓe wi’i. Ɗonmaa e ɓe tokka ndonu ɗuɗɗum ɗum ɓe ndoni, bo lootuki jarduɗe, e gojiije, e paali gaɗiraaɗi njamndi mboɗeeri.

⁵Sey Faarisanko’en e moodiɓɓe Attawra ɓen ƴami Yeesu ɓe mbi’i, “Ngam ɗume tokkuɓema tokkataa ndonu maama’en meeɗen, ammaa e ɓe nyaamira nyamndu juuɗe ɗe laaɓaa?”

⁶Sey Yeesu nootii wi’i, “Annabi Icaaya wi’ii goonga nde waɗi annabaaku dow mooɗon, onon munaafuki’en, no ɗum windiraa,

Allah wi’ii, ‘Ɓen ɗon yimɓe e honduko tan ɓe mawnintayam,

ammaa ɓerɗe maɓɓe e ngoɗɗitiiyam.

⁷E meere ɓe mawnintayam;

E ɓe ekkitina dooka yimɓe

bo to am ɗum ƴiwoyi.’7.6,7: Ica 29.13.

⁸“On alii tokkuki ko Allah wi’i ɗum waɗa, on njogake ndonuuji yimɓe.”

⁹Sey o wi’iɓe, “On nyuma on ngaɗii fii boɗɗum nde nganyuɗon ko Allah wi’i ngam tokkon ndonu mooɗon. ¹⁰Ngam Muusa wi’ii, ‘Hokku nyaako maaɗa e maduujo maaɗa mangu,’ nden, ‘Koo moye huɗi nyaako muuɗum koo maduujo muuɗum doole waree.’7.10: Wur 20.12; TA 5.16; Wur 21.17; KLee 20.9.¹¹Ammaa on mbi’a to neɗɗo wi’ii nyaako muuɗum koo maduujo muuɗum, ‘Fuu ko kokkaynomaami, ɗum Korban, waato mi hokkiiɗum Allah,’ ¹²nde mbiiɗon non on kaɗii yimɓe mballa danyooɓe maɓɓe. ¹³Non ngartirɗon Wolde Allah meere laawol ndonu ɗum ekkitinɗon. Kadin on ngaɗa fii ɗuɗɗum iri ɗu’um.”

Ko Wartirta Neɗɗo Mo Laaɓaa Yeeso Allah

(Maatiyu 15.10‑20)

¹⁴Sey Yeesu fuɗɗiti noddi yimɓe hawrutuɓe, o wi’i, “Kettindee, on fuu, paamon. ^15-16Walaa goɗɗum yaasi ɓandu neɗɗo nattayɗum nder maako wartiramo mo laaɓaa yeeso Allah. Ammaa ko wurtoytoo daga nder ɓernde neɗɗo kalluɗum kanjum wartirtamo mo laaɓaa yeeso Allah.”

¹⁷Nde o sendiri e yimɓe fuu, o natti wuro, tokkuɓemo ƴamimo ma’ana ekkitinol ngo’ol. ¹⁸O nootii o wi’i, “Onon maa on paamaayi ma’ana ɗu’um? On andaa walaa ko nattata neɗɗo daga yaasi wartiramo mo laaɓaa? ¹⁹Ngam naa’ nder ɓernde ɗum nattata, ammaa nder reedu, nden ɗum wurto ɓandu.” (Nde Yeesu wi’i ɗu’um, o hollii koo nduye nyamndu ndu lamndu.)

²⁰O ɓeydi wi’uki, “Ko wurtotoo daga nder ɓernde neɗɗo, kanjum waɗata neɗɗo warta mo laaɓaa yeeso Allah. ²¹Ngam daga nder ɓernde neɗɗo nyumo kallungo wurtoytoo, e waɗuki njeenu hakkunde yimɓe ɓe ngalaa teegal, e nguyka, e warhoore, e njeenu, ²²e suuno fii duuniyaaru, e halleende, e ƴoyre kallunde, e fuu kuuɗe kalluɗe ɗe ɓerɗe maɓɓe ngiɗi, e lawliiru, e wonnuki inde neɗɗo, e mawninki hoore, e wanyuki waɗuki ko wooɗi. ²³Fuu ɗe’e kuuɗe kalluɗe daga nder ɓernde ɗe mburtoytoo ɗe ngartira neɗɗo mo laaɓaa yeeso Allah.”

Hoolaare Goɗɗo Debbo

(Maatiyu 15.21‑28)

²⁴Daga ɗon Yeesu dilli yahi wigeere haade gariije Taaya e Sidon. O natti wongo wuro, o yiɗaa koo moye anda e mo ɗon ɗum. Ammaa fuu e non o waawaayi suuɗaaki yimɓe. ²⁵Ɗon e ɗon goɗɗo debbo gooduɗo ɓiɗɗo surbaajo pamaro gooduɗo ginnol nani habaru Yeesu. Sey o wari o diccii yeeso Yeesu. ²⁶Debbo on boo o Helenankeejo to Finiikiya nder leydi Siiriya o danyaa. O torii Yeesu wurtinana ɓiɗɗo maako ginnol ngol. ²⁷Sey Yeesu wi’imo, “Arande al ɗum nyamna ɓikkoy, ngam ɗum haanaayi ɗum hocca nyamndu ɓikkoy ɗum hubanoondu kutihoy.”

²⁸Ammaa debbo on wi’imo, “Ee, Moodibbo, ammaa haa kutihoy ngonkoy ley teebur e nyaama horaano sukaaɓe ɓen.”

²⁹Sey Yeesu wi’imo, “Ngam a wi’ii non, hootu, ginnol ngol wurtake ɓiɗɗo maaɗa.”

³⁰Sey debbo on so’’ii wuro tawi ɓiɗɗo muuɗum e fukkii dow leeso, ginnol ngol boo wurtake daga nder maako.

Yeesu Yamɗitinii Paho

³¹Sey Yeesu ali wigeere gonde haade gariiri Taaya, o tokkiri gariiri Sidon, o regoyii Mbeela Galiili, o natti leydi Dikapolis7.31: Waato Gariije Sappo.. ³²Ton woɓɓe yimɓe ngaddanimo goɗɗo paho mo meto muuɗum wurtataako boɗɗum. Ɓe torii Yeesu yowa juuɗe muuɗum dow maako yamɗitinamo. ³³E woodi yimɓe ɗuɗɓe ɗon, sey Yeesu hakkitii kanko e paho on, o waɗi kooli maako nder noppi paho on. O tutti joode o meemi ɗemngal paho on. ³⁴Nden Yeesu raari dow foofi foofaango juutungo wi’imo, “Ifata,” waato, “Maɓɓita!”

³⁵Ɗon e ɗon noppi neɗɗo on maɓɓitii, ɗemngal maako yoofii, o fuɗɗi metuki boɗɗum. ³⁶Sey Yeesu wi’iɓe to’ ɓe mbi’aka goɗɗo. Ammaa fuu carel ngel o haɗiɓe wi’ukika, sey ɓe ɓeyda wi’ukika koo toye. ³⁷Yimɓe kayɗini naa’ seɗɗa mbi’i, “O waɗii koo ɗume boɗɗum, haa maa e mo waɗa pahuɓe nana, e mo waɗa ɓe mbaawataa metuki meta.”

Yeesu Nyamnii Yimɓe 4,000

(Maatiyu 15.32‑39)

¹Nder ɗen ɗon balɗe yimɓe ɗuɗɓe fuɗɗiti kawri to Yeesu. Nde ɓe ngalaa ko ɓe nyaamata, sey Yeesu noddi tokkuɓemo, wi’iɓe, ²“E mi nana jurumɗum yimɓe ɓe’e ngam hande balɗe maɓɓe tati e ɓe ngondi e am, ammaa ɓe ngalaa ko ɓe nyaamata. ³To mi wi’iiɓe ɓe kootida e weelo, ɓe pekkoray dow ɗatal, ngam woɓɓe ngaroyii daga ɓadaaki.”

⁴Tokkuɓemo nootii mbi’i, “Toye goɗɗo heɓata buroodi nder ladde nde’e keƴayɗum yimɓe ɓe’e?” ⁵Yeesu ƴamiɓe wi’i, “Buroodi noye ngooduɗon?” Ɓe mbi’imo, “Joweeɗiɗi.” ⁶Sey o wi’i yimɓe hawrutuɓe ɓen fuu ɓe njooɗoo e leydi. O hocci buroodi joweeɗiɗi ɗum, o yetti Allah, o sendiɗum, o hokki tokkuɓemo ngeedana yimɓe, kamɓe boo ɓe ngeedani yimɓe hawrutuɓe ɓen. ⁷Ɗonmaa e ɓe ngoodi goɗɗi liƴƴi pamari seɗɗanaaji, sey o yetti Allah ngam maaji, o wi’i tokkuɓemo kanji maa ɓe ngeedana yimɓe. ⁸Yimɓe ɓen nyaami kaari. Gaɗa maajum tokkuɓemo moɓti ko horii, ɗum heewi kondooje joweeɗiɗi. ⁹Yimɓe ɓen ɓadake 4,000. Sey o jaɓɓitiiɓe ¹⁰o natti komiwal, kanko e tokkuɓemo, ɓe ndilli leydi Dalmanuuta.

Yiɗuki Holleeki Kayɗiniiɗum

(Maatiyu 16.1‑4)

¹¹Faarisanko’en ngari puɗɗi yeddootirki e Yeesu. E ɓe ngiɗi foondukimo, sey ɓe mbi’imo o waɗanaɓe goɗɗum kayɗiniiɗum ƴiwoyɗum to Allah.8.11: Maat 12.38; Luk 11.16.¹²Sey Yeesu fofti foofaango juutungo wi’i, “Ngam ɗume onon yimɓe jaamanu ɗu’um ɗaɓɓitoton holleeki goɗɗum kayɗiniiɗum? E mi wi’a’on goonga, walaa ko ɗum hollata yimɓe jaamanu ɗu’um.”8.12: Maat 12.39; Luk 11.29.

¹³Daga ɗon o aliɓe, o fuɗɗiti o natti komiwal, o huuli yaaki ngon ton fongo.

Ƴuufinirɗum Faarisanko’en e Hirudus

(Maatiyu 16.5‑12)

¹⁴Tokkuɓe Yeesu ngejjitii ngardoya e buroodi, sey buroodi go’o tan ɗum ɓe ngoodi nder komiwal maɓɓe. ¹⁵Yeesu wagginiɓe wi’i, “Paamee, ngaɗee hakkiilo e ƴuufinirɗum Faarisanko’en e ɗum Hirudus.”8.15: Luk 12.1.

¹⁶Sey tokkuɓemo meddi hakkunde maɓɓe, ɓe mbi’i, “O wi’u non ngam en ngalaa buroodi.”

¹⁷Nde Yeesu faami ko ɓe mbi’ata, sey o ƴamiɓe, o wi’i, “Ngam ɗume meddoton dow on ngalaa buroodi? Haa jooni on keɓtaayi on paamaayi? Koo ɓerɗe caatuɗe ngooduɗon? ¹⁸On ngoodi gite, ammaa tampuɗon yiiki? On ngoodi noppi, ammaa tampuɗon nanuki? On ciftoraayi?8.18: Irm 5.21; Ijik 12.2; Mar 4.12.¹⁹Carel ngel nyamnumi yimɓe 5,000 buroodi jowi, kondooje noye ɓoptuɗon e keewi horaano?”

Ɓe mbi’i, “Sappo e ɗiɗi.”

²⁰“Nden carel ngel nyamnumi yimɓe 4,000 buroodi joweeɗiɗi, kondooje noye ɓoptuɗon e keewi horaano?”

Ɓe mbi’imo, “Joweeɗiɗi.”

²¹Sey Yeesu wi’iɓe, “Haa jooni on paamaayi?”

Yeesu Wumtinii Bumɗo e Gariiri Betasayda

²²Yeesu e tokkuɓemo njottii gariiri Betasayda, sey woɓɓe yimɓe ngaddi bumɗo, ɓe torii Yeesu meemamo ngam yamɗitinamo. ²³Yeesu jogii jungo bumɗo on, yaarimo ton gaɗa gariyel, tuttanimo joode to gite yowi juuɗe muuɗum dow maako, sey ƴamimo, wi’i, “A yi’ii goɗɗum?”

²⁴Sey bumɗo on ƴefti hoore, raari, wi’i, “E mi yi’a yimɓe, ammaa e ɓe nandi e leɗɗe e ɓe ngiiloo.”

²⁵Sey Yeesu fuɗɗiti meemi gite ɗen. Bumɗo on maɓɓiti gite boɗɗum, gite maako njamɗiti, o yi’i koo ɗume boɗɗum. ²⁶Sey Yeesu wi’imo o hoota, wi’imo, “Taa’ nattu nder gariyel ngel.”

Biiturus Wi’ii Yeesu Woni Almasiihu

(Maatiyu 16.13‑20; Luka 9.18‑21)

²⁷Yeesu e tokkuɓemo ɓe ndilli yaaki ngarihoy ngonkoy haade gariiri Kaysaariya Filibi. E ɓe njaha dow ɗatal sey o ƴamiɓe, o wi’i, “Moye yimɓe mbi’atayam?”

²⁸Ɓe nootii ɓe mbi’i, “Woɓɓe e mbi’a a Yahaya Gaɗoowo Baptisma. Woɓɓe boo e mbi’a a Annabi Iliya. Nden woɓɓe e mbi’a a go’oto nder annabo’en ndenno.”8.28: Mar 6.14,15; Luk 9.7,8.

²⁹Sey o ƴamiɓe, o wi’i, “Ammaa onon, moye mbi’otonyam?”

Sey Biiturus nootii wi’i, “An woni Almasiihu.”8.29: Yah 6.68,69.

³⁰Nden Yeesu wagginiɓe naa’ seɗɗa wi’iɓe to’ ɓe mbi’aka koo moye kanko o moye.

Yeesu Wi’ii No Mayrata

(Maatiyu 16.21‑28; Luka 9.22‑27)

³¹Sey Yeesu fuɗɗi ekkitinkiɓe e wi’a doole Ɓii Neɗɗo torroo naa’ seɗɗa. Mawɓe yimɓe, e mawɓe ardiiɓe diina, e moodiɓɓe Attawra nganyamo, nden o waree. Gaɗa balɗe tati boo o ummoto daga mayde. ³²Yeesu metii haala ka’a e njayri. Sey Biiturus noddimo wuttudu go’o fuɗɗi haɓankimo. ³³Ammaa Yeesu waylitii raari tokkuɓemo koriiɓe, haɓani Biiturus, wi’i, “Sendir e am, an Ceyɗan! Naa’ to Allah nyumo maaɗa ƴiwoyi, iri nyumo yimɓe nyumataa.”

³⁴Sey o noddi yimɓe ɗuɗɓe hawrutuɓe hawti e tokkuɓemo, o wi’iɓe, “Fuu giɗɗo warta tokkuɗoyam, to’ waɗa ko hoore muuɗum yiɗi waɗuki tan, ammaa doole hocca gaafaangal muuɗum tokkayam.8.34: Maat 10.38; Luk 14.27.³⁵Ngam fuu giɗɗo hisnuki yonki muuɗum o dullayki. Ammaa fuu dullayɗo yonki muuɗum ngam am e ngam Habaru Belɗum o hisnayki.8.35: Maat 10.39; Luk 17.33; Yah 12.25.³⁶Ko ɗum nafanta neɗɗo, to o heɓii duuniyaaru fuu, ammaa o dullii yonki maako? ³⁷Koo boo ko neɗɗo waawata hokkuki ngam jaɓtoya yonki muuɗum? ³⁸Koo moye ganyuɗoyam e boliiɗe am nder ɗu’um jaamanu ɗum hakke, ɗum walaa goonga, min Ɓii Neɗɗo mi wanyaymo to mi wartidoyii e malaa’ika’en ceniiɓe nder teddungal Nyaako am Mo Dow.”

¹O wi’iɓe, “E mi wi’a’on goonga, e woodi woɓɓe dariiɓe ɗo’o ɓe maayataa naa ɓe ngi’ii Laamu Allah wardi e bawɗe.”

Yeesu Wangii Nder Mangu Muuɗum

(Maatiyu 17.1‑13; Luka 9.28‑36)

²Gaɗa balɗe joweego’o, sey Yeesu hocci Biiturus, e Yaakubu, e Yahaya, o yaariɓe dow wonde hocceere townde kamɓe tan. Sey nandi maako waylitii yeeso maɓɓe. ³Kolte maako ngarti daneeje tar. Walaa goɗɗo baawayɗo laaɓinira kolte non nder duuniyaaru fuu. ⁴Sey Annabi Iliya e Annabi Muusa mbanganiɓe e ɓe medda e Yeesu. ⁵Sey Biiturus wi’i Yeesu, “Moodibbo, wonki amin ɗo’o e wooɗi. Al min nyiɓa cuuɗi tati ɗo’o, wo’oyru ndu maaɗa, wo’oyru ndu Muusa, wo’oyru ndu Iliya.” ⁶Biiturus no dullu ko wi’ata ngam kanko e tokkuɓe Yeesu koriiɓe ɓe kultorii naa’ seɗɗa.

⁷Sey nduula wangi suddiɓe, sey wonde hononde ƴiwoyi nder nduula ngan, wi’i, “O’o woni Ɓiɗɗo am mo ngiɗumi. Nanee ko o wi’ata’on!”9.2‑7: 2Biit 1.17,18.9.7: Maat 3.17; Mar 1.11; Luk 3.22.⁸Ɗon e ɗon ɓe ndaari ɓe ngi’aayi goɗɗo e wondi e maɓɓe sey Yeesu tan.

⁹E ɓe njippoyoo daga dow hocceere nden, sey Yeesu wagginiɓe wi’i to’ ɓe mbi’a koo moye ko ɓe ngi’i naa gaɗa Ɓii Neɗɗo ummake daga mayde.

¹⁰Ngam non ɓe ali haala kan hakkunde maɓɓe, e ɓe medda dow ma’ana “ummaaki daga mayde.” ¹¹Sey ɓe ƴamimo, ɓe mbi’i, “Ngam ɗume moodiɓɓe Attawra e mbi’a doole Annabi Iliya arta Almasiihu warki?”9.11: Mal 4.5; Maat 11.14.

¹²Yeesu nootii, wi’i, “Goonga, Annabi Iliya artay warki ngam o siryoo koo ɗume. Ngam ɗume ɗum windi wiiki doole Ɓii Neɗɗo torroo naa’ seɗɗa nden o wanyee? ¹³Ammaa e mi wi’a’on Iliya yaadake warii, yimɓe boo ngaɗaniimo fuu ko ɓe ngiɗi, non no ɗum windiraa dow maako.”

Yeesu Yamɗitinii Suka Mo Ginnol

(Maatiyu 17.14‑21; Luka 9.37‑43)

¹⁴Nde Yeesu e tokkuɓemo njottii to tokkuɓemo koriiɓe, sey ɓe ngi’i yimɓe ɗuɗɓe e piliiɓe. Woɓɓe moodiɓɓe Attawra e ngeddootira e maɓɓe. ¹⁵Nde fuu yimɓe ɓen ngi’i Yeesu, ɓe kayɗini naa’ seɗɗa, ɓe ndoggi ɓe njahi to maako ngam ɓe kownamo. ¹⁶Sey Yeesu ƴamiɓe wi’i, “Dow ɗume ngeddootirton e maɓɓe?”

¹⁷Sey go’oto nder yimɓe ɓen nootii wi’i, “Moodibbo, mi waddaniima ɓiɗɗo am gooduɗo ginnol. Ginnol ngol haɗiimo o meta. ¹⁸Fuu carel ngel ginnol ngol nangimo, sey ngol do’’amo to leydi, nguufo ngaɗa ka wurtaaki e honduko maako, e mo nyerƴindira nyiiƴe maako, ɓandu maako warta bo lekki. Mi torake tokkuɓema mburtinangol, ammaa ɓe mbaawaayi.”

¹⁹Yeesu nootii wi’i, “Onon yimɓe jaamanu ɗu’um ɗum hoolaakiyam, haa ndeye njooɗodotoomi e mooɗon e mi munyida e mooɗon? Ngaddaneeyam suka on.” ²⁰Sey ɓe ngaddimo. Nde ginnol ngol yi’i Yeesu, ɗon e ɗon ngol waɗi ɓandu suka on waɗi ka diwnuki, o yani to leydi, e mo tallitoo, honduko maako e wurtina nguufo. ²¹Sey Yeesu ƴami nyaako suka on, wi’i, “Daga ndeye ɗu’um fii heɓi suka on?”

Nyaako on wi’i, “Daga o pamaro. ²²Nde ɗuɗɗum e ngol faɗɗamo nder hiite koo nder ndiyam ngam ngol waramo. Ammaa taa waaway waɗuki goɗɗum, yurminanmin mballaamin.”

²³Yeesu wi’imo, “Ngam ɗume mbi’ataayam, ‘taa waaway?’ Koo ɗume ɗum gaɗotooɗum to neɗɗo hoolakeyam.”

²⁴Ɗon e ɗon sey nyaako suka on ƴefti hononde wi’i, “Mi hoolakema. Wallam mi jaaloo ciya hoolaare am!”

²⁵Nde Yeesu yi’i yimɓe e ngaroya e doggudu ngam ngi’a ko waɗata, sey o haɓani ginnol ngol, o wi’ingol, “An, ginnol kaɗungol suka o’o metuki e nanuki, e mi wi’imaa, wurta daga nder maako! Taa’ fuɗɗutu nattukimo!”

²⁶Sey ginnol ngol wulli, ngol waɗi suka on diwni naa’ seɗɗa, nden ngol wurtii. Suka on warti bo mayɗo, haa maa yimɓe ɗuɗɓe mbi’i, “O maayii.” ²⁷Ammaa Yeesu jogii jungo maako umminimo, o darii.

²⁸Nde Yeesu natti nder wuro, tokkuɓemo ngari to maako kamɓe tan, ɓe ƴamimo ɓe mbi’i, “Ngam ɗume minon min mbaawaayi wurtinki ginnol ngol?”

²⁹Yeesu nootii, wi’i, “Iri ngo’ol ginnol ngol wurtataako sey e do’aare.”

Yeesu Fuɗɗitii Metii Dow Mayde Muuɗum

(Maatiyu 17.22,23; Luka 9.43b‑45)

³⁰Sey Yeesu e tokkuɓemo ali ɗon ɓe ndilli ɓe ƴiwi nder leydi Galiili. Yeesu yiɗaa koo moye anda to ɓe ngoni, ³¹ngam e mo ekkitina tokkuɓemo, e mo wi’aɓe, “Ɗum hokkitiray Ɓii Neɗɗo nder juuɗe yimɓe ɓe mbaramo. Nden to o waraama, gaɗa balɗe tati o ummoto.”

³²Ammaa ɓe paamaayi ko o wi’iɓe, nden e ɓe kula ƴamukimo.

Moye Ɓuri Mangu?

(Maatiyu 18.1‑5; Luka 9.46‑48)

³³Sey ɓe njottii Kafarnahum. Gaɗa Yeesu nattii wuro, o ƴami tokkuɓemo, o wi’i, “Dow ɗume meddoton dow ɗatal?”

³⁴Ammaa ɓe nde’’iti ngam dow ɗatal ɓe ngeddootiri dow moye woni ɓurɗo mangu nder maɓɓe.9.34: Luk 22.24.³⁵Sey o jooɗii, o noddi tokkuɓemo sappo e ɗiɗo ɓen, o wi’iɓe, “Fuu giɗɗo warta mawɗo, doole o warta pamaro, nden o warta maccuɗo koo moye.”9.35: Maat 20.26,27; 23.11; Mar 10.43,44; Luk 22.26.³⁶Sey o hocci suka pamaro, o darningel caka maɓɓe, o wuundiingel, o wi’iɓe, ³⁷“Fuu jaɓuɗo sukayel pamarel bo nge’el nder inde am jaɓiiyam. Fuu jaɓuɗoyam boo naa’ min tan jaɓi, ammaa jaɓii liloyɗoyam maa.”9.37: Maat 10.40; Luk 10.16; Yah 13.20.

Mo Wanyaayi’en Fuu e Wondi e Meeɗen

(Luka 9.49,50)

³⁸Sey Yahaya wi’imo, “Moodibbo, min ngi’i goɗɗo e wurtina ginni nder inde maaɗa min kaɗimo, ngam kanko naa’ o tokkuɗo’en.”

³⁹Ammaa Yeesu wi’i, “To’ on kaɗumo, ngam walaa gaɗoowo goɗɗum kayɗiniiɗum nder inde am nden ɗon e ɗon wi’a haala kalluka dow am. ⁴⁰Ngam fuu mo wanyaayi’en e wondi e meeɗen.9.40: Maat 12.30; Luk 11.23.⁴¹E mi wi’a’on goonga, koo moye hokki’on ndiyam nder jardugel njaron ngam onon ɗum ɓe Almasiihu, goonga o dullataa heɓuki mbarjaari.9.41: Maat 10.42.

Ko Waddata Hakke

(Maatiyu 18.6‑9; Luka 17.1,2)

⁴²“To goɗɗo waɗii go’oto nder sukahoy pamaroy ko’oy kooliikoyyam waɗii hakke, ɗum ɓuraniimo o haɓɓanee kaaƴa namol manga e daande ɗum faɗɗamo nder mbeela. ⁴³To jungo maaɗa e waɗumaa ngaɗaa hakke, ittungo. Ɗum ɓuraniima nattaa wuro Allah jungo wo’oto dow ɗum hubomaa nder wuro hiite nge nyifataa e juuɗe ɗiɗi.9.43: Maat 5.30.^44-45Non maa to koyngal maaɗa e waɗumaa ngaɗaa hakke, ittungal. Ɗum ɓuraniima nattaa wuro Allah e koyngal go’otal dow ɗum hubomaa nder wuro hiite e koyɗe ɗiɗi. ^46-47To boo hitere maaɗa e waɗumaa ngaɗaa hakke, ittunde. Ɗum ɓuraniima nattaa wuro Allah e hitere go’o dow ɗum hubomaa nder wuro hiite e gite ɗiɗi.9.47: Maat 5.29.⁴⁸Nder hiite ngen ‘gilƴi nyaamayɗiɓe ɗi mbaatataa, hiite ngen boo nge nyifataa.’9.48: Ica 66.24.

⁴⁹“Non no wondu nyamndu doole waɗanee lamɗam ngam ndu wela, non maa fuu yimɓe doole natta hiite, waato caɗeele, ngam ngikku maɓɓe warta boɗɗum.

⁵⁰“Lamɗam ɗum fii boɗɗum, ammaa to belɗum maajam ittake, ko wartirta belɗum maajam? Ngartee bo lamɗam, waato mbelnindiree ɓerɗe mooɗon, nden njooɗee jam hakkunde mooɗon.”9.50: Maat 5.13; Luk 14.34,35.

Wagginol Yeesu Dow Warki Teegal

(Maatiyu 19.1‑12; Luka 16.18)

¹Sey Yeesu ummii ali ɗon yahi leydi Yahuudiya e fongo Caangol Urdun. Yimɓe ɗuɗɓe fuɗɗiti kawriti to maako, o ekkitiniɓe no o woowi waɗuki.

²Sey woɓɓe Faarisanko’en ngari to maako ngam ɓe poondamo, ɓe ƴamimo ɓe mbi’i, “E yiiki maaɗa Attawra alii neɗɗo yoofa debbo muuɗum?”

³Yeesu nootii wi’i, “Ɗume Muusa wi’i’on ngaɗon?” ⁴Ɓe mbi’i, “Muusa wi’i neɗɗo waaway windana debbo muuɗum ɗerewol warki teegal wi’amo o dilla.”10.4: TA 24.1‑4; Maat 5.31.⁵Sey Yeesu wi’iɓe, “Ngam ɓerɗe mooɗon ɗe caatuɗe waɗi Muusa windani’on ɗu’um dooka. ⁶Ammaa daga fuɗɗoode taguki ‘Allah tagiiɓe gorko e debbo.’10.6: Fuɗ 1.27; 5.2.⁷‘Ngam non neɗɗo alay nyaako muuɗum e maduujo muuɗum takkanoo debbo muuɗum, ⁸kamɓe ɗiɗo ɓe ngarta go’o.’ Ngam non naa’ ɓe ɗiɗo kadin, ammaa ɓe ngartii neɗɗo go’oto.10.7,8: Fuɗ 2.24.⁹Ngam maajum ko Allah hawti, to’ neɗɗo sendaɗum.”

¹⁰E ɓe nder wuro kadin, tokkuɓemo ƴamimo dow haala kan. ¹¹Sey o wi’iɓe, “Koo moye yoofi debbo muuɗum te’i goɗɗo, njeenu o waadata e maako. ¹²Ɗonmaa to debbo sendirii e gorko muuɗum teeri e goɗɗo, njeenu o waɗata.”10.11,12: Maat 5.32; 1Kor 7.10,11.

Yeesu Barkiɗinii Sukahoy Pamaroy

(Maatiyu 19.13‑15; Luka 18.15‑17)

¹³Yimɓe e ngaddana Yeesu sukahoy pamaroy ngam o barkiɗinakoy, ammaa tokkuɓemo kaɓaniɓe. ¹⁴Nde Yeesu yi’i non, ɓernde muuɗum metti, o wi’iɓe, “Alee sukahoy pamaroy ngara to am. To’ on kaɗukoy, ngam gooduɓe ɓerɗe iri ɗe maakoy njeyi Laamu Allah. ¹⁵E mi wi’a’on goonga, fuu mo jaɓaayi Laamu Allah bo sukayel pamarel, o nattataa laamu ɗum koo seɗɗa!”10.15: Maat 18.3.¹⁶Sey Yeesu wuundiikoy go’o‑go’o, o yowanikoy juuɗe maako ngam barkiɗinki.

Neɗɗo Gooduɗo Risku

(Maatiyu 19.16‑30; Luka 18.18‑30)

¹⁷Yeesu nangi laawol won ɗon, sey goɗɗo neɗɗo doggi yahi diccii yeeso maako. Neɗɗo on ƴamimo, wi’i, “Moodibbo geeto, ko haani mi waɗa mi heɓa yonki ki re’ataa?”

¹⁸Yeesu wi’imo, “Ngam ɗume noddirɗaayam geeto? Walaa geeto sey Allah tan. ¹⁹A andi ko Attawra wi’i: ‘Taa’ waɗu warhoore. Taa’ waɗu njeenu. Taa’ wujju. Taa’ hokku ceyda fewre. Taa’ ƴoyru neɗɗo njaɓanaamo ko o jeyi. Hokku nyaako maaɗa e maduujo maaɗa mangu.’ ”10.19: Wur 20.13; TA 5.17; Wur 20.14; TA 5.18; Wur 20.15; TA 5.19; Wur 20.16; TA 5.20; Wur 20.12; TA 5.16.

²⁰Sey o wi’i Yeesu, “Moodibbo, e mi waɗa fuu fii ɗu’um daga e mi suka.” ²¹Yeesu raarimo nder yidde, wi’imo, “A dullii waɗuki fii go’o. Yahu, cooraa ko ngooduɗaa, kokkaa ɓe ngalanaa ceede ɗen, nden a heɓay mbarjaari ton dow. Nden ngaraa, tokkaayam.” ²²Nde neɗɗo on nani non, ɓernde maako taƴi, o dilli o nanaayi belɗum, ngam e mo woodi risku ɗuɗɗum.

²³Yeesu raari tokkuɓemo wi’iɓe, “E ɗum saɗi diskuɗo natta Laamu Allah!”

²⁴Tokkuɓemo kayɗinii e ko o wi’i, ammaa o fuɗɗiti o wi’iɓe, “Ɓiɓɓe am, nattuki Laamu Allah e saɗi naa’ seɗɗa! ²⁵Ɗum ɓuray hoyki ngeelooba tokka nder yolnde baatal dow diskuɗo natta Laamu Allah.”

²⁶Tokkuɓemo kayɗini naa’ seɗɗa, ɓe mbi’imo, “Too, to ɗum non, moye hisata?”

²⁷Yeesu raariɓe, wi’i, “To yimɓe ɗum waɗataako, ammaa to Allah ɗum waɗoto. Ngam to maako koo ɗume ɗum gaɗotooɗum.”

²⁸Sey Biiturus wi’imo, “Too, raɗɗum, minon min alii koo ɗume min tokkiima.”

²⁹Yeesu wi’i, “E mi wi’a’on goonga, fuu aluɗo wuro muuɗum, koo sakiraaɓe muuɗum worɓe koo rewɓe, koo maduujo muuɗum, koo nyaako muuɗum, koo ɓiɓɓe muuɗum, koo gese muuɗum ngam am e Habaru Belɗum, ³⁰o heɓay ko ɓuri non nder ɗu’um jaamanu. O heɓay gureeje, e sakiraaɓe worɓe e rewɓe, e danyooɓe, e ɓiɓɓe, e gese nde 100. Ɗonmaa yimɓe torraymo, ammaa Nyalnde Jaango o heɓay yonki ki re’ataa. ³¹Ammaa yimɓe ɗuɗɓe artuɓe ɓe ngartay cakitiiɓe, nden cakitiiɓe ngartay artuɓe.”

Yeesu Fuɗɗitii Wi’i No O Mayrata

(Maatiyu 20.17‑19; Luka 18.31‑34)

³²Yeesu e tokkuɓemo sappo e ɗiɗo e woɓɓe tokkuɓemo e ɓe dow laawol yaaki Urucaliima, Yeesu e ardiiɓe. Tokkuɓemo sappo e ɗiɗo ɓen e kayɗini, tokkuɓemo koriiɓe boo e kula. Yeesu fuɗɗiti noddi tokkuɓemo sappo e ɗiɗo ɓen kamɓe tan, o fuɗɗi wi’ukiɓe ko heɓatamo, ³³o wi’i, “Raɗɗum, en njahay Urucaliima, nden ɗum waɗay Ɓii Neɗɗo nder juuɗe mawɓe ardiiɓe diina e moodiɓɓe Attawra. Ɓe taƴanaymo kiita mayde, nden ɓe ngaɗamo nder juuɗe yimɓe naa’ Yahuudanko’en, ³⁴ɓe njukkitamo, ɓe tuttanamo joode, ɓe piyamo, ɓe mbaramo. Nden gaɗa balɗe tati, o ummoto daga mayde.”

Ko Yaakubu e Yahaya Torii Yeesu

(Maatiyu 20.17‑19; Luka 18.31‑34)

³⁵Sey Yaakubu e Yahaya ɓiɓɓe Jabadi ɓaddii Yeesu, mbi’i, “Moodibbo, e min ngiɗi ngaɗanaamin fuu ko min torimaa.”

³⁶Sey Yeesu wi’iɓe, “Ko ngiɗɗon mi waɗana’on?”

³⁷Ɓe mbi’i, “Taa jooɗake dow jooɗorgal laamu maaɗa nder teddungal maaɗa, go’oto amin jooɗoo to nyaamo maaɗa, go’oto to nano maaɗa.”

³⁸Ammaa Yeesu wi’iɓe, “On andaa ko torotooɗon. On mbaaway njaron iri jardugel torra ngel njaraymi yeeso ɗo’o? Koo on mbaaway ɗum waɗana’on iri baptisma torra ɗum um waɗantayam yeeso ɗo’o?”10.38: Luk 12.50.

³⁹Ɓe mbi’i, “Ee, min mbaaway.”

Sey Yeesu wi’iɓe, “On njaray iri jardugel torra ngel njaraymi, nden ɗum waɗana’on baptisma iri ɗum um waɗantayam. ⁴⁰Ammaa jooɗaaki e jungo am nyaamo e jungo am nano naa’ min hokkataɗum. Ɗe’e bigeeje ɗum ɗe ɓen ɗon ɓe ɗum siryaniiɗe.”

⁴¹Nde horiiɓe tokkuɓe Yeesu sappo nani non, ɓe puɗɗi monnanki Yaakubu e Yahaya. ⁴²Sey Yeesu noddiɓe, wi’iɓe, “On andi nder yimɓe naa’ Yahuudanko’en, yimɓe ɓe ɗum andiri laamu e kolla laamu sembe, nden mawɓe maɓɓe e kolla ɓural. ⁴³Ammaa onon, to’ on ngaɗu non hakkunde mooɗon. Fuu giɗɗo warta mawɗo nder mooɗon, doole warta jaggantooɗo’on.10.42,43: Luk 22.25,26.⁴⁴Kadin fuu giɗɗo warta ardiiɗo, doole o warta maccuɗo koo moye.10.43,44: Maat 23.11; Mar 9.35; Luk 22.26.⁴⁵Ngam Ɓii Neɗɗo warii naa’ ngam o jagganee, ammaa ngam o jagganoo yimɓe, o hokka yonki maako ngam rimɗinki ɗuɗɓe.”

Bumɗo Bi’eteeɗo Bartimaawus Wumtinaama

(Maatiyu 20.29‑34; Luka 18.35‑43)

⁴⁶Sey ɓe njottii gariiri Jeriiko. Yeesu e tokkuɓemo hawti e yimɓe ɗuɗɓe e mburtoo gariiri Jeriiko, goɗɗo bumɗo torotooɗo e jooɗii haade ɗatal. Inde maako Bartimaawus, waato ɓii Timaawus. ⁴⁷Nde o nani Yeesu Najarankeejo ƴaɓɓotoo, o fuɗɗi nodduki e sembe, e mo wi’a, “Yeesu, Ɓiɗɗo Dawda, yurminanam!”

⁴⁸Yimɓe ɗuɗɓe kaɓanimo mbi’imo o de’’ita, ammaa o ɓeydi nodduki e sembe, e mo wi’a, “Ɓiɗɗo Dawda, yurminanam!”

⁴⁹Sey Yeesu darii, wi’i, “Noddaneeyammo.”

Ɓe noddi bumɗo on, ɓe mbi’imo, “Nanu belɗum! Umma! E mo noddumaa.”

⁵⁰Sey o hubini cuddaari maako, o ummii jawɗum, o yahi to Yeesu.

⁵¹Sey Yeesu ƴamimo, wi’i, “Ɗume ngiɗɗaa mi waɗanmaa?”

Bumɗo on nootii wi’i, “Moodibbo, e mi yiɗi mbumtinaayam.”

⁵²Sey Yeesu wi’imo, “Dillu. Hoolaare maaɗa yamɗitiniima.”

Ɗon e ɗon gite maako mbumti, o tokki Yeesu, ɓe ndillidi.

Yeesu Nattii Urucaliima

(Maatiyu 21.1‑11; Luka 19.28‑40; Yahaya 12.12‑19)

¹Nde ɓe ɓadii Urucaliima, to gariije Betafaaji e Betani to Hocceere Nde Leɗɗe Jaytun, sey Yeesu lili tokkuɓemo ɗiɗo, ²o wi’iɓe, “Nattee gariyel gongel yeeso mooɗon. E nattuki mooɗon, on taway mbabba mola e nga haɓɓii, ɗum meeɗaayi waɗɗaakinga. Pittoyeenga ngaddonnga ɗo’o. ³To goɗɗo ƴamii’on, ‘Ko waɗi pittotonnga?’ mbi’eemo, ‘Moodibbo e yiɗi huutirkinga, o waɗay ɗum wartiranga naa’ ko neeɓi.’ ”

⁴Sey ɓe njahi ɓe tawi mbabba mola ngan e haɓɓii to dammugal, haade ɗatal. E ɓe pittanga, ⁵sey woɓɓe dariiɓe ɗon ƴamiɓe mbi’i, “Ngam ɗume pittotonnga?”

⁶Kamɓe boo ɓe mbi’iɓe ko Yeesu wi’i, sey yimɓe ɓen aliɓe ɓe ndillidi e maaga. ⁷Ɓe njaaraninga Yeesu, ɓe mbe’’iti cuddaari maɓɓe dow magga. Yeesu waɗɗiinga. ⁸Sey yimɓe ɗuɗɓe mbe’’iti cuddaari maɓɓe dow ɗatal, woɓɓe boo mbe’’iti haako ko ɓe ngewoyi to saabeere. ⁹Yimɓe wonɓe yeeso maako e wonɓe gaɗa maako, e ɓe mbi’a e sembe, “Hosaana! O barkiɗinaaɗo on ɗon garoyɗo nder inde Joomiraawo!11.9: Jab 118.25,26.¹⁰Laamu maama meeɗen Dawda garayɗum ɗum barkiɗinaaɗum! En mantu Allah Mo Dow!”

¹¹Sey Yeesu natti Urucaliima, o natti Wuro Ceniingo, o raari koo ɗume gaɗeteeɗum ɗon. Ngam naange hiirii, sey o wurtii, o dilli Betani kanko e tokkuɓemo sappo e ɗiɗo.

Yeesu Laanii Lekki Ibbi

(Maatiyu 21.18,19)

¹²Nde weeti, e ɓe ala Betani, Yeesu nani weelo. ¹³O haynii lekki ibbi gooduki haako, o yahi o yi’a koo o heɓay ibbe to maaki. Nde o yottii to maaki, o tawaayi goɗɗum sey haako, ngam naa’ ɗum carel ɓikkoy maaki. ¹⁴Sey o wi’i lekki kin, “To’ koo moye ɓeyda nyaamuki ɓikkoy daga to maaɗa!” Tokkuɓemo boo nanii ko o wi’i.

Yeesu Laaɓinii Wuro Ceniingo

(Maatiyu 21.12‑17; Luka 19.45‑48; Yahaya 2.13‑22)

¹⁵Nde ɓe natti Urucaliima, Yeesu natti Wuro Ceniingo, sey o fuɗɗi riiwuki soorooɓe e soodooɓe nder maggo. O talli teeburji gaylitooɓe ceede Roomanko’en yaaki ceede Wuro Ceniingo e jooɗorle coorooɓe pooli. ¹⁶O haɗi koo moye ƴaɓɓodoo e dongal nder njayri Wuro Ceniingo. ¹⁷O wi’iɓe, “Ɗum windaama, Allah wi’ii, ‘Ɗum noddiray wuro am wuro do’aare ngam leƴƴi fuu,’ ammaa onon on ngartiriingo luuro wuyɓe.”11.17: Ica 56.7; Irm 7.11.

¹⁸Mawɓe ardiiɓe diina e moodiɓɓe Attawra nani ko Yeesu waɗi, sey ɓe ngaɗi ka ɗaɓɓutuki laawol no ɓe mbardatamo. E ɓe kulamo, ngam yimɓe fuu kayɗini e ekkitinol maako.

¹⁹Nde naange hiiri, Yeesu e tokkuɓemo mburtii gariiri ndin.

Ibbi Ki Yeesu Laani Ki Yoorii

(Maatiyu 21.20‑22)

²⁰Subaka e ɓe ƴaɓɓoo, sey ɓe ngi’i lekki ibbi kin yoorii haa e ɗaɗi maaki. ²¹Biiturus siftori wi’i Yeesu, “Moodibbo, raaru! Ibbi kin ɗon ki laanuɗaa ki yoorii.”

²²Yeesu nootii wi’iɓe, “Koolee Allah. ²³E mi wi’a’on goonga, to goɗɗo wi’ii hocceere nde’e, ‘Dillu, kuboɗaa hoore maaɗa nder mbeela,’ to o waɗaayi seko nder ɓernde maako, ammaa o hoolii ko o wi’i ɗum waɗay, ɗum waɗanaymoɗum.11.23: Maat 17.20; 1Kor 13.2.²⁴Ngam non e mi wi’a’on, fuu ko toriiɗon nder do’aare, koolee on keɓiiɗum, nden ɗum wartay ɗum mooɗon. ^25-26Koo ndeye to on ndarake on ngaɗa do’aare, to e woodi mo njogitiiɗon nder ɓerɗe mooɗon, njaafaneemo, ngam Nyaako mooɗon Mo Dow maa yaafanoo’on hakke mooɗon.”11.25,26: Maat 6.14,15.

Ƴamol Dow To Laamu Yeesu Ƴiwoyi

(Maatiyu 21.23‑27; Luka 20.1‑8)

²⁷Ɗonmaa Yeesu e tokkuɓemo natti Urucaliima. Yeesu e yiiloo nder Wuro Ceniingo, sey mawɓe ardiiɓe diina e moodiɓɓe Attawra e mawɓe yimɓe ngari to maako. ²⁸Ɓe mbi’imo, “E laamu moye ngaɗataa kuuɗe ɗe’e? Moye hokkumaa laamu waɗukiɗe?”

²⁹Yeesu nootii wi’iɓe, “Mi ƴamay’on ƴamol go’o. Nootaneeyam, nden mi wi’ay’on e ɗume laamu ngaɗiraymi kuuɗe ɗe’e. ³⁰Baptisma ɗum Yahaya waɗi, to Allah ɗum ƴiwoyi, koo to yimɓe ɗum ƴiwoyi? Nootaneeyam!”

³¹Sey ɓe meddi hakkunde maɓɓe, ɓe mbi’i, “To en mbi’ii, ‘Daga to Allah ɗum ƴiwoyi,’ o wi’ay, ‘Ko waɗi on jaɓaayi ko o wi’i?’ ³²Ammaa to en mbi’ii, ‘To yimɓe ɗum ƴiwoyi…’ ” Ɓe mbi’u non ngam e ɓe kula yimɓe, ngam koo moye jaɓii Yahaya o annabiijo. ³³Sey ɓe nootii ɓe mbi’i Yeesu, “Min andaa.”

Yeesu wi’iɓe, “Non min maa, mi wi’ataa’on koo e ɗume laamu ngaɗiraymi kuuɗe ɗe’e.”

Misaalu Dow Guƴiiɓe Ngesa Inabooje

(Maatiyu 21.33‑46; Luka 20.9‑19)

¹Sey Yeesu fuɗɗi metirankiɓe e misaalu, wi’i, “Goɗɗo neɗɗo waɗi ngesa inabooje, o howika, o wasi ngayka mawka nder tafaare ngam moyluki ndiyam daga nder inabooje ɗen, o mahi suudu towndu ngam reenuki ngesa kan. Sey o hokkika woɓɓe remooɓe mo’’inaka, o dilli wondi leydi.12.1: Ica 5.1,2.²Nde carel ɓenduki inabooje ɗen waɗi, o lili maccuɗo maako to yimɓe ɓe o hokki ngesa kan ngam o jaɓanoyamo ko ɓe ngaadunoo nder ko ɓendi. ³Ammaa ɓe nangi maccuɗo on, ɓe piyimo, ɓe ndiiwimo koo ko ɓe kokkimo. ⁴Sey joomu ngesa on fuɗɗiti lili goɗɗo maccuɗo to maɓɓe, kanko maa ɓe piyanimo hoore, ɓe kuɗikuɗinimo. ⁵Sey o fuɗɗiti o lili goɗɗo maccuɗo, kanko boo ɓe mbarimo. O lilililinii maccuɓe ɗuɗɓe. Ɓe piyi woɓɓe, ɓe mbari woɓɓe. ⁶Joomu ngesa kan e woodi go’oto mo o lilaayi, waato ɓiɗɗo maako mo o yiɗi. Gaɗa maajum fuu o lili ɓiɗɗo on to maɓɓe, o wi’i, ‘Ɓe kokkay ɓiɗɗo am mangu.’ ⁷Ammaa ɓe o hokki ngesa ɓen mbi’i hakkunde maɓɓe, ‘Too! Raa donoowo ngesa kan. Ngaree mbarenmo, ndonu ngesa kan warta ɗum meeɗen.’ ⁸Sey ɓe nangimo ɓe mbarimo, ɓe paɗɗimo gaɗa ngesa kan.

⁹“Too, ko joomu ngesa kan waɗata? O waray o halkaɓe, o hokka woɓɓe ngesa kan. ¹⁰On meeɗaayi janguki ko aayaare wi’i? Nde wi’ii,

‘Hayre nde mahooɓe nganyi

kayre warti hayre ɓurnde darnuki maadi.

¹¹Ɗu’um ɗum kuugal Joomiraawo, ɗum kayɗiniiɗum to meeɗen.’ ”12.10,11: Jab 118.22,23.

¹²Daga ɗon sey mawɓe ɓen ɗaɓɓiti laawol no ɓe nangirtamo, ngam e ɓe andi dow maɓɓe o hokki misaalu ɗum, ammaa e ɓe kula yimɓe. Ngam non ɓe alimo, ɓe ndilli.

Yoɓuki Kaysar Ceede Leydi

(Maatiyu 22.15‑22; Luka 20.20‑26)

¹³Gaɗa maajum ɓe lili woɓɓe Faarisanko’en e woɓɓe yimɓe Hirudus to Yeesu ngam ɓe keɓa ko ɓe nangirtamo nder meto maako. ¹⁴Ɓe ngari to Yeesu, ɓe mbi’imo, “Moodibbo, e min andi ko mbi’ataa e ko ngaɗataa ɗum goonga. A hollataa feerootirol hakkunde yimɓe, ngam a hoccii yimɓe fuu e pottidi. Ɗonmaa a ekkitina laawol Allah e goonga. Too, wi’umin, e ɗum haani min njoɓa Kaysar Mawɗo Laamiiɓe ceede leydi, koo ɗum haanaayi? ¹⁵Min njoɓa ceede leydi, koo to’ min njoɓa?”

Ammaa Yeesu e andi e ɓe ngiɗi ƴoyrukimo, sey o wi’iɓe, “Ngam ɗume poondotonyam? Ngaddaneeyam yamnde ajurfaari mi raarande.”

¹⁶Ɓe ngaddanimo yamnde go’o. O wi’iɓe, “Ɗowdi moye e inde moye woni dow mayre?”

Ɓe nootii ɓe mbi’i, “Ɗum Kaysar.”

¹⁷Sey Yeesu wi’iɓe, “Too, kokkee Kaysar ko woni ɗum Kaysar, nden kokkon Allah ko woni ɗum Allah.”

Sey o hayɗiniɓe naa’ seɗɗa.

Ƴamol Dow Ummaaki Mayɓe

(Maatiyu 22.23‑33; Luka 20.27‑40)

¹⁸Saadusanko’en e mbi’a walaa ummaaki mayɓe. Woɓɓe maɓɓe ngari to Yeesu, ɓe ƴamimo, ɓe mbi’i,12.18: KL 23.8.¹⁹“Moodibbo, Annabi Muusa wi’ii to neɗɗo te’ii debbo maayii danyidaayi e maako, sakiraawo maako sey te’amo ngam heɓana mayɗo on ɓiɓɓe.12.19: TA 25.5.²⁰Too, ndenno e woodi woɓɓe sakiraaɓe worɓe njoweeɗiɗo. Afo on te’i, maayi, ali debbo walaa ɓiɗɗo. ²¹Sey ɗiɗaɓo on te’i debbo on. Kanko maa o maayi, o ali debbo on walaa ɓiɗɗo. Tataɓo on maa non. ²²Ɓe fuu njoweeɗiɗo ɓen ɓe te’ii debbo on, ɓe maayi, ɓe alimo walaa ɓiɗɗo. Gaɗa ɗon debbo on maa maayi. ²³Too, nyalnde nde mayɓe ummotoo, debbo on wartay debbo moye nder maɓɓe? Ngam ɓe fuu njoweeɗiɗo ɓe te’iimo.”

²⁴Sey Yeesu nootii wi’iɓe, “On mboofii ngam on andaa ko aayaaje mbi’i, nden on andaa bawɗe Allah. ²⁵To mayɓe ummake daga mayde, walaa te’ayɗo walaa te’eteeɗo, ammaa ɓe ngartay bo malaa’ika’en Allah. ²⁶Nden dow ummaaki mayɓe daga mayde, on jangaayi deftere Muusa dow habaru leggel goodungel hiite? Allah wi’iimo, ‘Min woni Allah mo Ibraahim, Allah mo Iciyaaku, Allah mo Yaakubu.’12.26: Wur 3.6.²⁷Kanko naa’ o Allah mayɓe, ammaa o Allah gooduɓe yonki. On majji naa’ seɗɗa!”

Dooka Ɓurɗum Mangu

(Maatiyu 22.34‑40; Luka 10.25‑28)

²⁸Go’oto nder moodiɓɓe Attawra wari nani e ɓe ngeddootira hakkunde maɓɓe. Nde o nani Yeesu nootanakeɓe boɗɗum, sey o ƴami Yeesu, o wi’i, “Nder dookaaji ɗi Allah waɗi, ɗume ɓuri mangu?”

²⁹Yeesu nootii wi’i, “Ɓurɗum mangu woni, ‘Yimɓe Israa’iila nanee, Allah Joomiraawo meeɗen o Joomiraawo go’oto. ³⁰Yiɗu Allah Joomiraawo maaɗa e ɓernde maaɗa fuu, e yonki maaɗa fuu, e hakkiilo maaɗa fuu, e sembe maaɗa fuu.’12.29,30: TA 6.4,5.³¹Ɗiɗaɓum boo woni, ‘Yiɗu bandiraawo maaɗa no ngiɗirɗaa hoore maaɗa.’ Nder dookaaji ɗi Allah waɗi walaa ɓurɗum ɗi’i ɗiɗi.”12.31: KLee 19.18.

³²Sey moodibbo Attawra on wi’i, “Moodibbo, a wi’ii goonga nde mbiiɗaa Allah o go’oto, walaa goɗɗo sey kanko tan.12.32: TA 4.35.³³Neɗɗo yiɗamo e ɓernde muuɗum fuu, e faamu muuɗum fuu, e sembe muuɗum fuu, nden yiɗa bandiraawo muuɗum no yiɗiri hoore muuɗum, ɗum ɓurii marle gulanteeɗe Allah e fuu ko ɗum sakkantamo.”12.33: Yuuc 6.6.

³⁴Nde Yeesu nani o nootorake faamu, sey wi’imo, “Goonga a woɗɗidaa e Laamu Allah.”12.28‑34: Luk 10.25‑28.

Gaɗa maajum walaa gaɗuɗo sembe ɓernde ƴamimo wongol ƴamol.

Ƴamol Dow Almasiihu

(Maatiyu 22.41‑46; Luka 20.41‑44)

³⁵Yeesu e ekkitina nder njayri Wuro Ceniingo, sey o ƴami, o wi’i, “Ngam ɗume moodiɓɓe Attawra e mbi’a Almasiihu o ɓiɗɗo Dawda? ³⁶Ngam Dawda e hoore muuɗum, nder bawɗe Ruuhu Allah o wi’ii,

‘Joomiraawo wi’ii Joomiraawo am,

“Jooɗa to jungo am nyaamo,

naa mi waɗii a yaaɓii wanywanyɓe maaɗa.” ’12.36: Jab 110.1.

³⁷Dawda e hoore muuɗum noddiriimo Joomiraawo. Too, no waɗata Almasiihu warta ɓiɗɗo Dawda?”

Yeesu Wagginii Yimɓe Dow Moodiɓɓe Attawra

(Maatiyu 23.1‑36; Luka 20.45‑47)

Yimɓe ɗuɗɓe kawrutuɓe kettindaniimo nder welwelo. ³⁸Yeesu e ekkitina, wi’i, “Paamanee moodiɓɓe Attawra, giɗuɓe yiilaaki e ɓornii toggoho njuutuko, giɗuɓe hownireeki mangu nder luumo. ³⁹E ɓe ngiɗi jooɗaaki dow jooɗorle mawɓe nder cuuɗi do’aare e jooɗorle mawɓe to humto. ⁴⁰Kamɓe ngoni nyaamooɓe jawdi rewɓe ɓe worɓe mu’’en maayi haa e gure maɓɓe, e ɓe ngaɗa do’aare juutunde ngam ɗum yi’aɓe. Iri ɓen ɗon yimɓe ɗum waɗanayɓe kiita ɓurka halluki.”

Dokkal Ngal Debbo Mo Gorko Muuɗum Maayi

(Luka 21.1‑4)

⁴¹Yeesu jooɗii nder Wuro Ceniingo haade to ɗum hokkata ceede ngam Allah. E mo raara yimɓe e ɓe ngaɗa ceede maɓɓe nder to ɗum hokkata ceede ngam Allah. Riskuɓe ɗuɗɓe ngaɗi ceede ɗuɗɗe nder. ⁴²Sey raa goɗɗo debbo mo walanaa mo gorko muuɗum maayi. O wari o waɗi ceede njamkoy ɗiɗoy koy njamndi mboɗeeri nder. Ɗum ceedoy seɗɗanahoy tan. ⁴³Sey Yeesu noddi tokkuɓemo, wi’iɓe, “E mi wi’a’on goonga, o’o debbo mo walanaa, ko o hokki ɗum ɓurii ko horiiɓe fuu kokki. ⁴⁴Ngam kamɓe ɓe kokki daga nder risku maɓɓe. Ammaa kanko boo, daga nder ciya maako, o hokki fuu ko o woodi, waato koo ɗume ɗum o marortoo.”

Yeesu Wi’ii Ɗum Sankitay Wuro Ceniingo

(Maatiyu 24.1,2; Luka 21.5,6)

¹Yeesu e wurtoyoo Wuro Ceniingo, sey go’oto nder tokkuɓemo wi’imo, “Moodibbo, raaru kaaƴe mawɗe ɗe ɗum mahiri wuro ngo’o! Raaru no maadi ndin wooɗiri.”

²Sey Yeesu wi’imo, “A yi’ii ndi’i maadi mawndi? Walaa wonde hayre aleteende dow wonde. Ɗe fuu ɗum sankitayɗe.”

Torraaji e Caɗeele

(Maatiyu 24.3‑14; Luka 21.7‑19)

³Yeesu e jooɗii dow Hocceere Nde Leɗɗe Jaytun daaraynde Wuro Ceniingo, sey Biiturus, e Yaakubu, e Yahaya, e Andiraawus ɓe njahi to maako kamɓe tan, ɓe ƴamimo ɓe mbi’i, ⁴“Wi’umin, ndeye fii ɗu’um waɗata? Ɗume woni ko hollata fuu fii ɗu’um ɓadake heewa?”

⁵Sey Yeesu wi’iɓe, “Paamee to’ goɗɗo majjina’on. ⁶Yimɓe ɗuɗɓe noddiray ko’e maɓɓe inde am, ɓe mbi’a ‘Min woni Almasiihu,’ ɓe majjina yimɓe ɗuɗɓe. ⁷To on nanii habaru konuuji gaɗeteeɗi haade mooɗon, e konuuji gaɗeteeɗi ɓadaaki, to’ on kulu. Doole ɗu’um waɗa, ammaa re’uki duuniyaaru e horii taw. ⁸Lenyol ummanto lenyol, laamu ummanto laamu. Ɗum waɗay weelo kallungo e dimbol leydi to bigeeje feere‑feere. Ɗu’um ɗum fuɗɗoode torraaji garayɗi.

⁹“Ammaa paamanee ko’e mooɗon. Ɓe ngaɗay’on nder juuɗe mawɓe cuuɗi do’aare, ɗum piya’on nder cuuɗi do’aare ɗin. Ngam on tokkuɓeyam ɗum yaaray’on yeeso mawɓe leydi e laamiiɓe, non wartay laawol no kokkirtonɓe habaru am. ¹⁰Ammaa ko re’irde duuniyaaru wara, doole ɗum arta wa’ajinki Habaru Belɗum nder fuu leƴƴi duuniyaaru. ¹¹Fuu carel ngel ɗum nangi’on ɗum yaari’on yeeso laamu, to’ on ngannu dow ko mbi’oton. E carel ngel Allah hokkay’on ko mbi’oton, sey mbi’onka. Ngam naa’ ɗum onon metata, ammaa ɗum Ruuhu Allah.13.9‑11: Maat 10.17‑20; Luk 12.11,12.¹²Neɗɗo hokkitiray sakiraawo muuɗum ɗum waramo, nyaako maa hokkitiray ɓiɗɗo muuɗum. Ɓiɓɓe ummanto danyooɓe maɓɓe, ɓe ngaɗa ɗum waraɓe. ¹³Koo moye wanyay’on ngam on tokkuɓeyam. Ammaa munyuɗo haa re’irde hisay.13.13: Maat 10.22.

Torra Kalluka

(Maatiyu 24.15‑28; Luka 21.20‑24)

¹⁴“Carel e wara ngel ngi’oton ‘Nefniiɗum’ gartiroojum Wuro Ceniingo ngo laaɓaa e darii to wigeere nde haanaa. Fuu jangoowo faama ma’ana maajum. E carel ngel wonɓe nder leydi Yahuudiya ndogga nattoya kocceeje.13.14: Daan 9.27; 11.31; 12.11.¹⁵Gonɗo dow suudu to’ jippoyoo koo natta wuro ngam hoccuki goɗɗum. ¹⁶Gonɗo to ngesa to’ so’’o hocca cuddaari muuɗum.13.15,16: Luk 17.31.¹⁷Rewɓe gooduɓe deeɗi e musinteeɓe ɓe torroto naa’ seɗɗa nder ɗen ɗon balɗe! ¹⁸Ngaɗee do’aare to’ fii ɗu’um waɗa nder ndungu. ¹⁹Ngam nder ɗen ɗon balɗe ɗum waɗay torra kalluka iri ka ɗum meeɗaayi waɗuki daga carel ngel Allah tagi duuniyaaru haa jooni. Ɗum boo fuɗɗitataa ɗum waɗa iri kan ɗon torra.13.19: Daan 12.1; WY 7.14.²⁰Daa Joomiraawo ustaayi ɗen ɗon balɗe, daa walaa goɗɗo kisayɗo. Ammaa ngam ɓen ɗon cuɓaaɓe maako ɓe o suɓi, o ustii balɗe ɗen.

²¹“E ngel ɗon carel to goɗɗo wi’ii’on, ‘Raa Almasiihu ɗo’o!’ koo boo, ‘Rammo ɗaa’e!’ to’ on njaɓu. ²²Ngam Almasiihu’en fewre e annabo’en fewre ɓe mburtoyto ɓe ngaɗa alaamaaji e kuuɗe kayɗiniiɗe ngam ɓe majjina yimɓe, haa e cuɓaaɓe ɓen to ɗum waɗoto. ²³Ndaree, on ndeena! Mi wi’ii’on koo ɗume ko carel ngel wara.

Wartoyki Ɓii Neɗɗo

(Maatiyu 24.29‑31; Luka 21.25‑28)

²⁴“Ammaa nder ɗen ɗon balɗe gaɗa kan ɗon torra kalluka, ɗum ɓalwinay naange, lewru boo hokkataa jayngol mayru.13.24: Ica 13.10; Yow 2.10,31; 3.15; WY 6.12; Ica 13.10; Ijik 32.7.²⁵Koode njanoyay daga dow, nden ko woni dow fuu dimboto.13.25: Ica 34.4; WY 6.13; Yow 2.10.²⁶E carel ngel ɗum yi’ay Ɓii Neɗɗo e wara nder duule. O warday e bawɗe mawɗe e teddungal.13.26: Daan 7.13; WY 1.7.²⁷O liloyay malaa’ika’en maako ɓe kawrita ɓe o suɓi daga koo toye nder duuniyaaru, daga ngo’ol keerol duuniyaaru yaaki ngol ton keerol.

Ekkitinol Dow Lekki Ibbi

(Maatiyu 24.32‑35; Luka 21.29‑33)

²⁸“Too, ekkitee ekkitinol ngo’ol daga to lekki ibbi. To lice maaki puɗɗii wilutuki, on andi ndungu ɓadake won ɗon. ²⁹Non maa to on ngi’ii fii ɗu’um e waɗa, too, on anday Ɓii Neɗɗo ɓadake wartoya, e mo haade dammugal. ³⁰E mi wi’a’on goonga, jaamanu ɗu’um ɗum re’ataa naa fuu fii ɗu’um waɗii. ³¹Dow e ley ƴaɓɓoto, ammaa boliiɗe am ƴaɓɓataako haa abadaa.

Walaa Anduɗo Nyalnde Wartoyki Almasiihu

(Maatiyu 24.36‑44)

³²“Walaa anduɗo nden ɗon nyalnde koo ngel ɗon carel ngel fii ɗum ɗon waɗata. Koo malaa’ika’en wonɓe dow andaa, Ɓiɗɗo on maa andaa, sey Nyaako Mo Dow tan andi.13.32: Maat 24.36.³³Paamee, njooɗee on ciryii, ngam on andaa ko carel ngel warata. ³⁴Ɗum bo neɗɗo gaɗuɗo yaadu. Nde o wari dilluki o ali wuro maako nder juuɗe maccuɓe maako, o hokki koo moye kuugal ngal waɗata, o wi’i deenoowo dammugal ngal o daroo e mo reena.13.34: Luk 12.36‑38.³⁵Ngam non, njooɗee on ndeena ngam on andaa carel ngel joomu wuro ngon wartoyta, koo ɗum futuro, koo ɗum caka jemma, koo ɗum fajiri, koo ɗum subaka. ³⁶To o wartii walaa anduɗo, to’ o tawa on ɗaanii. ³⁷Ko mbiimi’on, e mi wi’aka koo moye, kanjum woni njooɗee on ciryii!”

Ɗum Darwii Warki Yeesu

(Maatiyu 26.1‑5; Luka 22.1,2; Yahaya 11.45‑53)

¹Horii balɗe ɗiɗi ɗum waɗa Humto Sakkinki e Humto Buroodi Ɗum Walaa Ƴuufinirɗum. Mawɓe ardiiɓe diina e moodiɓɓe Attawra e ɗaɓɓita laawol no ɓe nangirta Yeesu e suuɗe ɓe mbaramo.14.1: Wur 12.1‑27.²Ɓe mbi’i, “Ammaa naa’ ni carel Humto, ngam to’ yimɓe ummina hawre.”

Ɗum Moytanii Yeesu Nebbam Uroojam e Betani

(Maatiyu 26.6‑13; Yahaya 12.1‑8)

³Yeesu e nder gariiri Betani to wuro Siiman gooduɗo nyawu nyaamoojum laral. E mo nyaama nyamndu, sey goɗɗo debbo wari e jogii jolloyel hayre bongel ngel nebbam uroojam mbelɗam ɗam ɗum waɗiri nardi gooduɗam ceede. Sey o maɓɓitingel, o wayli nebbam ɗam dow hoore Yeesu.14.3: Luk 7.37,38.⁴Woɓɓe gonɓe ɗon ɓe monni ɓe mbi’i hakkunde maɓɓe, “Ngam ɗume o wonni nebbam ɗa’am nihi? ⁵Daa ɗam sooraama, daa ɗum heɓii ceede ɓurɗe ɗe ɗum yoɓata kuwoowo hitaande go’o, ɗum hokkaɗe ɓe ngalanaa.” Ɓe kaɓani debbo on sembee.

⁶Ammaa Yeesu wi’iɓe, “Aleemo. Ngam ɗume ngannotonmo? Ko o waɗaniyam ɗum boɗɗum. ⁷Koo ndeye ɓe ngalanaa e ngondi e mooɗon, on mbaaway wallukiɓe fuu carel ngel ngiɗɗon. Ammaa min, carel e wara ngel alaymi’on.14.7: TA 15.11.⁸O’o debbo waɗii ko o waawata waɗuki. O waylanii ɓandu am nebbam ngam siryaaki uwukiyam. ⁹E mi wi’a’on goonga, koo toye to ɗum wa’ajini Habaru Belɗum nder duuniyaaru fuu, ɗum hokkay habaru ko debbo o’o waɗi ngam siftorkimo.”

Yahuuda Jaɓii Hokkitira Yeesu

(Maatiyu 26.14‑16; Luka 22.3‑6)

¹⁰Sey go’oto nder tokkuɓe Yeesu sappo e ɗiɗo bi’eteeɗo Yahuuda Iskariyooti yahi to mawɓe ardiiɓe diina ngam hokkitira Yeesu nder juuɗe maɓɓe. ¹¹Ɓe nani belɗum naa’ seɗɗa nde ɓe nani non, ɓe ngaɗi alkawal hokkukimo ceede. Ngam non, Yahuuda fuɗɗi ɗaɓɓutuki laawol no hokkitirta Yeesu nder juuɗe maɓɓe.

Yeesu Waɗii Humto Sakkinki e Tokkuɓemo 12

(Maatiyu 26.17‑25; Luka 22.7‑14,21‑23; Yahaya 13.21‑30)

¹²Nyalnde arandeere nde Humto Buroodi Ɗum Walaa Ƴuufinirɗum, nyalnde nde ɗum hirsata karooji ngam Humto Sakkinki, tokkuɓe Yeesu ƴamimo, mbi’i, “Toye ngiɗɗaa min njaha min ciryanomaa ngam nyaamen nyamndu Humto Sakkinki?”

¹³Sey o lili tokkuɓemo ɗiɗo, o wi’iɓe, “Nattee gariiri, on kawray e goɗɗo e mo rondii ƴoogirde ndiyam. Tokkeemo ¹⁴yaaki wuro ngo o nattata, mbi’on joomu wuro ngon, ‘Moodibbo wi’ii min ƴamumaa: Toye suudu ndu nyaamaymi nyamndu Humto Sakkinki, min e tokkuɓeyam?’ ¹⁵O hollay’on suudu mawndu ndu dow mo’’inaandu ciryaandu. Ciryanee’en koo ɗume ɗon ngam nyaamen nyamndu Humto Sakkinki.”

¹⁶Sey tokkuɓemo ɓen nangi laawol natti gariiri ndin ɓe tawi koo ɗume non no Yeesu wi’iɓe. Sey ɓe ciryii koo ɗume ngam Humto Sakkinki.

¹⁷Nde futuro waɗi, Yeesu e tokkuɓemo sappo e ɗiɗo ngari wuro ngon. ¹⁸E ɓe njooɗii e ɓe nyaama nyamndu, sey Yeesu wi’i, “E mi wi’a’on goonga, go’oto nder mooɗon nyamndayɗo e am hokkitirayyam.”14.18: Jab 41.9.

¹⁹Sey ɓe nganni, ɓe puɗɗi wi’ukimo go’oto‑go’oto, “Naa’ ɗum min, koo?”

²⁰Yeesu nootii, wi’i, “Ɗum go’oto nder mooɗon, onon sappo e ɗiɗo ɓe cuɓumi, nyamdayɗo e am le’al go’o. ²¹Ɓii Neɗɗo maayay no ɗum windiraa dow maako, ammaa kokkitirayɗomo wonii! Ɗum ɓuranaymo daa o danyaaka.”

Kirtaari Joomiraawo

(Maatiyu 26.26‑30; Luka 22.14‑20; 1 Korintiyanko’en 11.23‑25)

²²E ɓe nder nyaamuki nyamndu, sey Yeesu hocci buroodi yetti Allah, o sendiɗum, o hokki tokkuɓemo, o wi’i, “Njaɓeeɗum. Ɗu’um ɗum ɓandu am.”

²³Ɗonmaa o hocci jardugel ndiyam inabojam, o yetti Allah, o hokkiɓeɗam, ɓe fuu ɓe njariɗam. ²⁴Nden o wi’iɓe, “Ɗa’am kanjam woni ƴiiƴam am tabbitinayɗam alkawal Allah ndufeteeɗam ngam yimɓe ɗuɗɓe.14.24: Wur 24.8; Irm 31.31‑34.²⁵E mi wi’a’on goonga, mi fuɗɗitataa mi yara ndiyam inabooje naa nyalnde nde njaraymi ngoɗɗam kesam nder Laamu Allah.”

²⁶Sey ɓe ngimi gimol mantuki Allah, nden ɓe ndilli Hocceere Nde Leɗɗe Jaytun.

Yeesu Wi’ii Biiturus Wi’ay Andaamo

(Maatiyu 26.31‑35; Luka 22.31‑34; Yahaya 13.36‑38)

²⁷Yeesu wi’i tokkuɓemo, “On fuu on ndoggay alonyam, ngam nder aayaare Allah wi’ii, ‘Mi waray gaynaako, nden baali ɗin cankitoto.’14.27: Jak 13.7.²⁸Ammaa gaɗa mi ummake daga mayde, mi artay’on yaaki Galiili.”14.28: Maat 28.16.

²⁹Sey Biiturus wi’imo, “Koo ɓe fuu ɓe aliima, min mi alataama.”

³⁰Yeesu wi’imo, “E mi wi’umaa goonga, hande, nder jemmaare nde’e, ko njakardi hana nde ɗiɗi, a wi’ay a andaayam nde tati.” ³¹Ammaa Biiturus jaɓaayi, o wi’i, “Koo ɗum wardayyam e maaɗa, mi wi’ataa mi andaama.” Horiiɓe ɓen maa mbi’i non.

Yeesu Waɗii Do’aare to Geesamani

(Maatiyu 26.36‑46; Luka 22.39‑46)

³²Sey ɓe njahi wigeere bi’eteende Geesamani14.32: Waato to ɗum namata ɓikkoy leɗɗe jaytun., Yeesu wi’i tokkuɓemo, “Njooɗee ɗo’o, mi yaha mi waɗa do’aare.” ³³Sey o hocci Biiturus, e Yaakubu, e Yahaya. Ɓernde maako boo teddi, o fuɗɗi wannuki naa’ seɗɗa. ³⁴O wi’iɓe, “Ɓernde am wannii naa’ seɗɗa haa bo mi maayay. Njooɗee ɗo’o on ndeena.”

³⁵Nde o yahi yeeso seɗɗa, sey o yani e leydi e mo hippii, o waɗi do’aare, o wi’i to ɗum gaɗotooɗum ɗum hoccanamo carel torra wonka yeeso maako. ³⁶O wi’i, “Yaa Nyaako am Mo Dow, koo ɗume ɗum gaɗotooɗum to maaɗa. Taa jaɓii, ittanam jardugel torra ka’a. Fuu e non naa’ ko ngiɗumi waɗetee, ammaa ko ngiɗɗaa waɗee.”

³⁷Gaɗa ɗon o so’’ii to ɓen ɗon tokkuɓemo tato, o tawi e ɓe ɗaanii, sey o wi’i Biiturus, “Biiturus, a ɗaanii? A waawataa jooɗaaki a ɗaanaaki koo carel seɗɗa? ³⁸Njooɗee, to’ on ɗaano, ngaɗee do’aare to ɗum foondii’on to’ ngaɗon hakke. Ɓernde e yiɗi waɗuki ko haani, ammaa ɓandu tampii.”

³⁹O fuɗɗiti o dilli, o waɗi do’aare, o wi’i ko o wi’unoo. ⁴⁰O fuɗɗiti o so’’oyii to maɓɓe, o tawi e ɓe ɗaanii, ngam e ɓe nana ɗeyngol teddungol. Ɓe ndulli ko ɓe mbi’atamo.

⁴¹O fuɗɗiti o so’’ii to maɓɓe tataɓum, o wi’iɓe, “Haa jooni on ɗaanii, on ciwtoo? Ɗum heƴii non! Carel warii. Ɗum hokkitirii Ɓii Neɗɗo nder juuɗe gaɗooɓe hakke. ⁴²Ummee ndillen! Raa on ɗon kokkitirayɗoyam e wara.”

Ɗum Nangii Yeesu

(Maatiyu 26.47‑56; Luka 22.47‑53; Yahaya 18.3‑12)

⁴³Yeesu e meta, sey Yahuuda, go’oto nder tokkuɓemo sappo e ɗiɗo yottii. O wardoyi e yimɓe ɗuɗɓe e ɓe njogii kaafaaje e cabbi. Mawɓe ardiiɓe diina, e moodiɓɓe Attawra, e mawɓe yimɓe liloyiɓe. ⁴⁴Too, nden maa kokkitirayɗo on yaadake wi’iiɓe no hollirtaɓe Yeesu, o wi’i, “Neɗɗo mo kownaymi hownuki higaaku ɗum kanko. Nangeemo, ngaɗon taadiiɓe njogoomo boɗɗum ndillida e maako.”

⁴⁵Nde Yahuuda yottii to ɓe ngoni, ɗon e ɗon o ɓaddii Yeesu, o wi’imo, “Moodibbo!” nden o hownimo hownuki higaaku. ⁴⁶Sey yimɓe ɓen nangi Yeesu ɓe njogiimo boɗɗum. ⁴⁷Ammaa go’oto nder tokkuɓe Yeesu dariiɗo ɗon solti kaafahi muuɗum fe’’i maccuɗo Mawɗo Mawɓe Ardiiɓe Diina ittanimo nowru. ⁴⁸Sey Yeesu wi’iɓe, “On ngardoyi e kaafaaje e cabbi ngam nangoyyam bo gujjo calorɗo? ⁴⁹Koo ndeye e mi wondi e mooɗon, e mi ekkitina nder Wuro Ceniingo, on nangaayiyam. Ammaa doole ko aayaaje mbi’i heewa.”14.49: Luk 19.47; 21.37.

⁵⁰Sey tokkuɓemo fuu alimo ndoggi.

⁵¹Goɗɗo kayeejo boo e tokkiri Yeesu ton gaɗa, o ɓornaaki goɗɗum, wudere nde ceede tan o waanii. Ɓe nangimo, ⁵²sey o alaniɓe wudere nden, o doggi o ɓornaaki.

Yeesu Yeeso Laamu

(Maatiyu 26.57‑68; Luka 22.54,55,63‑71; Yahaya 18.13,14,19‑24)

⁵³Ɓe njaari Yeesu to Mawɗo Mawɓe Ardiiɓe Diina. Fuu mawɓe ardiiɓe diina, e mawɓe yimɓe, e moodiɓɓe Attawra kawritii ɗon. ⁵⁴Biiturus boo tokkirimo gaɗa daga to woɗɗi haa yaaki caka wuro Mawɗo Mawɓe Ardiiɓe Diina. O jooɗodii e taadiiɓe Wuro Ceniingo, e mo irfoo haade hiite. ⁵⁵Mawɓe ardiiɓe diina e fuu Kawtal Mawɓe e ɓe ɗaɓɓita ceyda ko ɓe nangirta Yeesu, ngam ɓe keɓa ɓe mbaramo, ammaa ɓe keɓaayi goɗɗum. ⁵⁶Yimɓe ɗuɗɓe meti haalaaji fewre dow maako, ammaa ko ɓe mbi’i wardaayi go’o.

⁵⁷Sey woɓɓe ummii ɓe mbi’i haalaaji fewre ɗi’i dow maako, ɓe mbi’i, ⁵⁸“Min nanii o wi’ii o sankitay ngo’o Wuro Ceniingo ngo yimɓe mahi, nden nder balɗe tati o maha wongo naa’ e juuɗe yimɓe.”14.58: Yah 2.19.⁵⁹Ammaa fuu e non ko ɓe mbi’i wardaayi go’o.

⁶⁰Sey Mawɗo Mawɓe Ardiiɓe Diina ummii darii yeeso maɓɓe ƴami Yeesu, o wi’i, “A walaa ko mbi’ataa? Ko ɓe mbi’i dow maaɗa ɗum goonga?”

⁶¹Ammaa Yeesu de’’iti nootanaakimo.

Mawɗo Mawɓe Ardiiɓe Diina on fuɗɗiti ƴami Yeesu, wi’i, “Too, an woni Almasiihu, Ɓiɗɗo Joomu Mangu?”

⁶²Yeesu nootii, wi’i, “Ee, ɗum min. On ngi’ay Ɓii Neɗɗo e jooɗii to jungo nyaamo ngo Joomu Bawɗe, e mo waroya nder duule.”14.62: Daan 7.13.⁶³Sey Mawɗo Mawɓe Ardiiɓe Diina on seeki kolte muuɗum wi’i, “Ɗume ceyda ɗaɓɓiteten kadin? ⁶⁴On nanii ni haala kalluka ka o meti dow Allah. Ko woni cuɓol mooɗon?”

Sey yimɓe fuu mbi’i e haani o waree.14.64: KLee 24.16.

⁶⁵Woɓɓe puɗɗi tuttankimo joode, ɓe kaɓɓanimo gite, ɓe piyimo, e ɓe mbi’amo, “Waɗu annabaaku! Moye fiyimaa?” Sey taadiiɓe Wuro Ceniingo koccimo piyimo.

Biiturus Wi’ii Andaa Yeesu

(Maatiyu 26.69‑75; Luka 22.56‑62; Yahaya 18.15‑18,25‑27)

⁶⁶Biiturus e caka wuro ngon, sey go’oto nder horɓe Mawɗo Mawɓe Ardiiɓe Diina wari wigeere nden. ⁶⁷Nde o yi’i Biiturus e irfoo, o sutiimo, o wi’imo, “An maa, a wondi e Yeesu on ɗon ƴiwoyɗo gariiri Najarat.”

⁶⁸Ammaa Biiturus yeddi wi’i, “Min mi andaa, mi faamaayi ko mbi’ataa.” Biiturus wurtii yahi njayri dammugal yaasi, sey njakardi hani.

⁶⁹Korɗo on yi’i Biiturus ton, o fuɗɗiti o wi’i dariiɓe ɗon kamɓe maa, “O’o neɗɗo o go’oto maɓɓe!” ⁷⁰Ammaa Biiturus fuɗɗiti yeddi.

Gaɗa ɗon seɗɗa, dariiɓe haade ɗon mbi’i Biiturus, “Seko walaa an maa a go’oto nder tokkuɓemo, ngam a Galilankeejo.”

⁷¹Biiturus fuɗɗi laanuki hoore muuɗum hunii wi’i, “Mi andaa neɗɗo o’o mo mbi’oton.”

⁷²Ɗon e ɗon njakardi hani ɗiɗaɓum. Sey Biiturus siftori ko Yeesu wi’unoomo wi’uki, “Ko njakardi hana nde ɗiɗi, a wi’ay a andaayam nde tati.” Nden Biiturus fuɗɗi bojji.

Yeesu Yeeso Bilaatus

(Maatiyu 27.1,2,11‑14; Luka 23.1‑5; Yahaya 18.28‑38)

¹Ilaa subaka mawɓe ardiiɓe diina, e mawɓe yimɓe, e moodiɓɓe Attawra, e fuu Kawtal Mawɓe ɓe meddi dow ko ɓe ngaɗata. Sey ɓe kaɓɓi Yeesu ɓe ndillidi e maako, ɓe tambinimo Bilaatus gomnaajo. ²Bilaatus ƴamimo, wi’i, “An woni laamiiɗo Yahuudanko’en?” Yeesu nootii, wi’imo, “Ee, a wi’iika.”

³Mawɓe ardiiɓe diina ngulloriimo fii ɗuɗɗum. ⁴Sey Bilaatus fuɗɗiti ƴamimo, wi’i, “Walaa ko mbi’ataa? Raa ɓe ngullorakema fii ɗuɗɗum.”

⁵Ammaa Yeesu ɓeydaayi nootaaki, haa ɗum hayɗini Bilaatus.

Ɗum Taƴanii Yeesu Kiita Mayde

(Maatiyu 27.15‑26; Luka 23.13‑25; Yahaya 18.39—19.16)

⁶Too, e carel Humto Sakkinki Bilaatus woowii yoofankiɓe curaaɗo go’oto mo ɓe torii. ⁷E woodi goɗɗo bi’eteeɗo Barabbas curaaɗo, kanko e woɓɓe curaaɓe ngam ɓe kaɓdii e laamu, ɓe ngaɗii warhoore nder hawre nden. ⁸Sey yimɓe ɗuɗɓe ngari ɓe torii Bilaatus waɗanaɓe ko o woowi waɗankiɓe. ⁹Bilaatus ƴamiɓe wi’i, “On ngiɗi mi yoofana’on Laamiiɗo Yahuudanko’en?” ¹⁰Ngam Bilaatus faamii lawliiru waɗi mawɓe ardiiɓe diina ngaɗi Yeesu nder jungo maako.

¹¹Ammaa mawɓe ardiiɓe diina ɓen ngaɗi yimɓe mbi’a Bilaatus o yoofanaɓe Barabbas naa’ Yeesu. ¹²Sey Bilaatus ƴamiɓe, wi’i, “Too, ko ngiɗɗon mi waɗana neɗɗo o’o mo noddirton Laamiiɗo Yahuudanko’en?”

¹³Ɓe fuu ɓe mbi’i sembee, “Warumo dow gaafaangal!”

¹⁴Bilaatus ƴamiɓe, wi’i, “Ngam ɗume? Ɗume ko halli o waɗi?” Ammaa ɓe ɓeydi wi’uki sembee, “Warumo dow gaafaangal!”

¹⁵Nde Bilaatus e yiɗi waɗa ko hawrutuɓe ɓen ngiɗi, o yoofaniɓe Barabbas. O waɗi ɗum fiyi Yeesu looci, nden o tambinimo sooji’en Rooma ngam ɓe mbaroyamo dow gaafaangal.

Sooji’en Njukkitii Yeesu

(Maatiyu 27.27‑31; Yahaya 19.2,3)

¹⁶Sooji’en ɓen ardini Yeesu yaaki laamorde gomnaajo bi’eteende “Firetooriyum.” Ɓe noddi fuu sooji’en koriiɓe ɓe kawritiɓe. ¹⁷Ɓe ɓornimo iri toggoore laamiiɓe, nden ɓe mbaali giifol gi’e, ɓe taaranimongol to hoore. ¹⁸Sey ɓe puɗɗi hownukimo, e ɓe mbi’a, “Allah reene, laamiiɗo Yahuudanko’en!” ¹⁹Ɓe ngaɗi ka piirukimo sawru to hoore. E ɓe tuttanamo joode. Ɓe ndiccii yeeso maako bo ɓe kokkaymo mangu. ²⁰Gaɗa ɓe njukkitiimo, ɓe ɓortimo toggoore laamiiɓe nde ɓe ɓornunoomo, nden ɓe ɓornimo kolte maako. Sey ɓe mburtinimo ɓe ardinimo ngam ɓe mbaroyamo dow gaafaangal.

Yeesu Waraama Dow Gaafaangal

(Maatiyu 27.32‑44; Luka 23.26‑43; Yahaya 19.17‑27)

²¹Goɗɗo neɗɗo Saayirankeejo e ƴaɓɓoo bi’eteeɗo Siiman, nyaako Alijanda e Ruufus. O ƴiwoyɗo nder ladde e mo nattoya gariiri ndin. Sey ɓe ngaɗimo e sembe o hocca gaafaangal Yeesu.15.21: Room 16.13.²²Ɓe njaari Yeesu wonde wigeere bi’eteende Golgoota, waato “Wigeere Ƴiƴal Hoore.” ²³Nden ɓe kokkimo ndiyam inabojam jillindiraaɗam e mur15.23: Mur: Ɗum wokki lekki ustayki nawɗum to ɓandu neɗɗo. ngam o yara, ammaa o yaraayiɗam. ²⁴Sey, ɓe piyanimo kuusaaje dow gaafaangal. Nden ɓe cendi kolte maako hakkunde maɓɓe, ɓe ngaɗi caaca ngam ɓe ngi’a ko koo moye heɓata.15.24: Jab 22.18.²⁵Carel ngel ɓe piyanimo kuusaaje dow gaafaangal ɗum njamndi joweenayi subaka. ²⁶Dow hoore gaafaangal ngal ɗum takki allowal. Ɗum windi dow maagal ko ɗum wulloriimo wi’uki, “Laamiiɗo Yahuudanko’en.” ^27-28Kadin ɓe piyani wuyɓe ɗiɗo kuusaaje dow gaafaale haade Yeesu, go’oto e jungo maako nyaamo, go’oto e jungo maako nano. ²⁹Yimɓe ƴaɓɓotooɓe e kuɗa Yeesu e ɓe ngiila ko’e, e ɓe mbi’a, “Too! An giɗɗo pusuki Wuro Ceniingo mahitoɗaango nder balɗe tati,15.29: Jab 22.7; 109.25; Mar 14.58; Yah 2.19.³⁰jippoya daga dow gaafaangal kisnaa hoore maaɗa!”

³¹Non maa mawɓe ardiiɓe diina e moodiɓɓe Attawra ɓe njukkitimo hakkunde maɓɓe, e ɓe mbi’a, “O hisnii woɓɓe, ammaa o waawaayi hisnuki hoore maako. ³²Al o’o bi’oowo kanko woni Almasiihu, Laamiiɗo Israa’iila, o jippoyoo jooni daga dow gaafaangal ngam ngi’en koolooɗenmo.”

Ɓen ɗon wuyɓe ɓe ɗum piyani kuusaaje dow gaafaale maa kuɗimo.

Mayde Yeesu

(Maatiyu 27.45‑56; Luka 23.44‑49; Yahaya 19.28‑30)

³³Caka nyalawma, sey nyiwre maɓɓi leydi fuu haa yaaki njamndi tati ndi alaasara. ³⁴E njamndi tati ndin, sey Yeesu wi’i e sembe, “Eloy, Eloy, lama sabattani?” waato, “Yaa Allah am, Yaa Allah am, ngam ɗume cendirɗaa e am?”15.34: Jab 22.1.

³⁵Nde woɓɓe dariiɓe to wigeere nden nani non, ɓe mbi’i, “Nanee, e mo nodda Annabi Iliya.” ³⁶Sey go’oto maɓɓe doggi sofni soosowa nder ndiyam inabojam lammuɗam, o ɗiisinga to sawru, o hokki Yeesu yara. O wi’i, “Alee ngi’en koo Iliya waray jippinamo.”

³⁷Sey Yeesu wulli sembee, nden maayi.

³⁸Sey wudere cendunde Suudu Joomiraawo seeki ɗiɗi daga dow yaaki ley.15.38: Wur 26.31‑33.³⁹Mawɗo sooji’en dariiɗo ɗon e raara Yeesu. Nde o yi’i no Yeesu foftiri foofaango cakitiingo, maayi, o wi’i, “Goonga, neɗɗo o’o o Ɓiɗɗo Allah!” ⁴⁰E woodi woɓɓe rewɓe e ɓe ndaara daga to woɗɗi. Nder maɓɓe e woodi Maryaama ƴiwoyɗo Magadala, e Maryaama maduujo Yaakubu pamaro, e Yusufu, e Saloomi. ⁴¹Ɓe’e rewɓe kamɓe tokkaynoo Yeesu, e ɓe mballamo ko o wonnoo leydi Galiili. E woodi rewɓe ɗuɗɓe feere gardoyɓe Urucaliima e maako e ɓe ɗon ɗum kamɓe maa.15.40,41: Luk 8.2,3.

Uwuki Yeesu

(Maatiyu 27.57‑61; Luka 23.50‑56; Yahaya 19.38‑42)

⁴²Ɗum alaasara Nyalnde Siryaaki, waato to finii ɗum Nyalnde Siwtaare. ⁴³Ngam maajum Yusufu ƴiwoyɗo gariiri Armaatiya, o waɗi sembe ɓernde, o yahi to Bilaatus, o toriimo o hokkamo ɓandu Yeesu. Yusufu o neɗɗo mo ɗum hokkata mangu nder Kawtal Mawɓe, kanko maa o haaɓii yi’uki garol Laamu Allah. ⁴⁴Bilaatus hayɗini nde nani Yeesu yaadake maayii. O noddi mawɗo sooji’en, o ƴamimo koo ɗum non. ⁴⁵Nde o nani to honduko mawɗo sooji’en on Yeesu yaadake maayi, sey o jaɓi Yusufu hocca ɓandu ndun. ⁴⁶Sey Yusufu soodoyi wudere nde ceede, o waɗi ɗum jippini ɓandu Yeesu, o taarindu e wudere nden, o fukkinoyindu nder yenaande gasaande nder hayre. O talliti kaaƴa manga o maɓɓi dammugal yenaande nden. ⁴⁷Maryaama ƴiwoyɗo Magadala e Maryaama maduujo Yusufu ɓe ngi’i to ɗum fukkini ɓandu Yeesu.

Ummaaki Yeesu Daga Mayde

(Maatiyu 28.1‑8; Luka 24.1‑12; Yahaya 20.1‑10)

¹Nde Nyalnde Siwtaare ƴaɓɓii, Maryaama ƴiwoyɗo Magadala, e Maryaama maduujo Yaakubu, e Saloomi ɓe coodi nebbam uroojam mbelɗam ngam ɓe njaha ɓe moytana ɓandu Yeesu. ²Nyalnde Alal subaka gaɗa naange fuɗii, e ɓe dow laawol yaaki to yenaande nden, ³e ɓe mbi’a hakkunde maɓɓe, “Moye tallitanta’en kaaƴa manga nga ɗum maɓɓiri dammugal yenaande nden?” ⁴Ammaa nde ɓe ndaari ɓe ngi’i ɗum yaadake ɗum tallitii kaaƴa ngan. ⁵Nde ɓe natti yenaande nden, ɓe ngi’i goɗɗo kayeejo e jooɗii wuttudu nyaamo. E mo ɓornii kolte daneeje tar, sey ɓe kultori.

⁶Kayeejo on wi’iɓe, “To’ on kulu. On ɗaɓɓita Yeesu Najarankeejo baraaɗo dow gaafaangal. Ɗum umminiimo daga mayde! O walaa ɗo’o. Raa to ɗum fukkinnoomo. ⁷Ammaa njahee mbi’on tokkuɓemo, haa e Biiturus, o artay’on yaaki leydi Galiili. Ton ngi’otonmo non no o wi’unoo’on.”16.7: Maat 26.32; Mar 14.28.

⁸Kulol nangiɓe e ɓe ndiwna ɓe mburtii daga nder yenaande nden ɓe ndoggi. Ɓe mbi’aayi goɗɗo koo ɗume ngam e ɓe kula.

Yeesu Wanganii Maryaama Ƴiwoyɗo Magadala

(Maatiyu 28.9,10; Yahaya 20.11‑18)

⁹[Subaka Nyalnde Alal Yeesu ummii daga mayde. Gaɗa o ummake o arti wanganki Maryaama ƴiwoyɗo Magadala mo o wurtinani ginni joweeɗiɗi. ¹⁰Sey Maryaama on yahi wi’ika ɓen ɗon gondunooɓe e maako, o tawiɓe nder wannaare e ɓe mboya. ¹¹Ammaa nde ɓe nani Yeesu e woodi yonki, ɗonmaa Maryaama on yi’iimo, ɓe njaɓaayika.

Yeesu Wanganii Tokkuɓemo Ɗiɗo

(Luka 24.13‑35)

¹²Gaɗa maajum woɓɓe tokkuɓemo ɗiɗo e ɓe dow laawol nder ladde yaaki wongel gariyel, sey Yeesu wanganiɓe nder nandi feere. ¹³Sey ɓe co’’ii ɓe mbi’ika horiiɓe, ammaa ɓe njaɓaayi ko ɓe mbi’i kamɓe maa.

Kuugal Ngal Yeesu Hokki Tokkuɓemo

(Maatiyu 28.16‑20; Luka 24.36‑49; Yahaya 20.19‑23; Kuuɗe Lilaaɓe 1.6‑8)

¹⁴Daga gaɗa Yeesu wangani tokkuɓemo sappo e go’o e carel ngel e ɓe nyaama nyamndu. Sey o haɓaniɓe ngam ciya hoolaare maɓɓe e ɓerɗe caatuɗe ɗe ɓe ngoodi, ngam ɓe njaɓaayi ko giiɓemo gaɗa o ummake mbi’iɓe. ¹⁵Nden o wi’iɓe, “Njahee koo toye nder duuniyaaru nga’ajinanon koo moye Habaru Belɗum.16.15: KL 1.8.¹⁶Koo moye kooliiɗoyam waɗanaa baptisma o hisay, ammaa fuu mo hoolaakiyam ɗum taƴanaymo kiita. ¹⁷Fuu kooliiɓeyam ɓe ngaɗay kuuɗe kollayɗe e ɓe ngoodi bawɗe Allah. Nder inde am ɓe mburtinay ginni, ɓe ngaɗay do’aare nder ɗemɗe ɗe ɓe andaa. ¹⁸Ɓe nangay boole e juuɗe maɓɓe, nden to ɓe njarii tooke, ɗe ngaɗantaaɓe goɗɗum. Ɓe boo njowanay nyawɓe juuɗe, nyawɓe ɓen njamɗita.”

Yeesu Hoccaama Dow

(Luka 24.50‑53; Kuuɗe Lilaaɓe 1.9‑11)

¹⁹Gaɗa Yeesu Joomiraawo metaniiɓe, o hoccaa yaaki dow, o jooɗii jungo nyaamo ngo Allah.16.19: KL 1.9‑11.²⁰Sey tokkuɓemo ɓen ndilli ɓe nga’ajinoyi Habaru Belɗum koo toye. Joomiraawo walliɓe, o hokkiɓe bawɗe waɗuki kuuɗe kayɗiniiɗe ngam tabbitinki ko ɓe mbi’ata to maako ɗum ƴiwoyi.]16.9‑20: Ɗe’e aayaaje ɗe ngalaa nder goɗɗi bindi arandeeji.