Maatiyu

Habaru Yeesu Ɗum

Maatiyu

Windi

Habaru dow ɗerewol ngo’ol

Go’oto nder lilaaɓe Yeesu sappo e ɗiɗo bi’eteeɗo Maatiyu windi ɗerewol ngo’ol. Ɗerewol ngo’ol e holla Yeesu woni Almasiihu mo Alkawal Kiingal waɗi alkawal o waray. Maatiyu o Yahuudankeejo, nden e mo meta dow ko Yahuudanko’en mboowi, waato Attawra e sakkanki Allah e diina maɓɓe. O hollii Yeesu woni kisnoowo mo Yahuudanko’en e koo moye keɗii garol muuɗum. Ɗu’um habaru ɗum Habaru Belɗum ngam koo moye.

Ɗerewol ngo’ol ngol siryaama boɗɗum. Ngol fuɗɗirii e habaru lenyol Yeesu. Lenyol maako hollii o hebbinii annabaaku ɗum annabo’en ngaɗi dow Almasiihu. Ɗerewol ngol hollii danyngol maako e no danyngol ngol woodiri teddungal Allah. Ɗonmaa ngol hollii baptisma maako, e no o foondiraa, e no o wa’ajiniri, e no o ekkitiniri, e no o yamɗitiniri yimɓe. Nden ngol hollii no o torriraa e no o wariraa dow gaafaangal ngam hakke yimɓe fuu. Ɗonmaa ngol hollii o ummake daga mayde.

Ko Woni Nder:

Lenyol Yeesu e danyngol maako (1—2.23)

Wa’ajinki Yahaya Gaɗoowo Baptisma (3.1‑12)

Baptisma Yeesu e no Ceyɗan foondirimo (3.13—4.11)

Kuuɗe Yeesu e leydi Galiili (4.12—18.35)

Daga Galiili yaaki Urucaliima (19.1—20.34)

Yontoore Yeesu cakitiinde (21.1—27.66)

Ummaaki Yeesu daga mayde e yaaki maako dow (28.1‑20)

Maama’en Yeesu

(Luka 3.23‑38)

¹Ɗe’e ngoni inɗe maama’en Yeesu Almasiihu lenyol Dawda, Dawda lenyol Ibraahim.

²Ibraahim danyi Iciyaaku, nden Iciyaaku danyi Yaakubu, nden Yaakubu danyi Yahuuda e sakiraaɓe maako, ³Yahuuda danyi Feresa e Jeera, maduujo Jeera woni Taamar, Feresa danyi Heseruuna, Heseruuna danyi Aram, ⁴Aram danyi Amiinadab, Amiinadab danyi Naacon, Naacon danyi Salmon, ⁵Salmon danyi Bo’aaja, maduujo Bo’aaja woni Rahab, Bo’aaja danyi Obida, maduujo Obida woni Rut, Obida danyi Jeesi, ⁶Jeesi danyi Dawda Laamiiɗo, Dawda Laamiiɗo danyi Suleymaanu, maduujo Suleymaanu woni debbo Uriya ndenno, ⁷Suleymaanu danyi Rehobowam, Rehobowam danyi Abija, Abija danyi Aasa, ⁸Aasa danyi Jehoocafat, Jehoocafat danyi Jooram, Jooram danyi Ajaariya, ⁹Ajaariya danyi Jootama, Jootama danyi Ahas, Ahas danyi Hejekaaya, ¹⁰Hejekaaya danyi Manaase, Manaase danyi Amon, Amon danyi Joosaya, ¹¹Joosaya danyi Jekooniya e sakiraaɓe maako worɓe, carel ko Yahuudanko’en nangaa njaaraa leydi Baabiila.1.11: 2Laam 24.14,15; 2HL 36.10; Irm 27.20.

¹²Gaɗa ɗum yaariiɓe leydi Baabiila, Jekooniya danyi Ceyaltiyal, Ceyaltiyal danyi Jaruubabel, ¹³Jaruubabel danyi Abiihudu, Abiihudu danyi Eliyaakim, Eliyaakim danyi Aajoro, ¹⁴Aajoro danyi Jaadok, Jaadok danyi Aakim, Aakim danyi Aliiyudu, ¹⁵Aliiyudu danyi Eleyaajar, Eleyaajar danyi Mataana, Mataana danyi Yaakubu, ¹⁶Yaakubu danyi Yusufu gorko Maryaama, Maryaama danyi Yeesu bi’eteeɗo Almasiihu.

¹⁷E woodi maama’en sappo e nayo daga jaamanu Ibraahim yaaki jaamanu Dawda. E woodi maama’en sappo e nayo daga jaamanu Dawda yaaki carel ngel Yahuudanko’en njaaraa maccungaaku to leydi Baabiila. E woodi maama’en sappo e nayo daga carel ngel Yahuudanko’en njaaraa maccungaaku to leydi Baabiila yaaki danyngol Almasiihu.

Danyngol Yeesu Almasiihu

(Luka 2.1‑7)

¹⁸Raa no Yeesu Almasiihu danyiraa. Maduujo maako Maryaama waadi alkawal teegal e Yusufu. Ammaa ko ɓe ngaɗa teegal, sey o tawraa reedu daga to Ruuhu Allah.1.18: Luk 1.27.¹⁹Nde Yusufu o neɗɗo aadiliijo, o yiɗaa o semtinamo e njayri. O darwi o yoofamo e suuɗe. ²⁰Ammaa carel ngel o nyumata dow maajum, malaa’ikaajo Joomiraawo wanganimo nder koyɗol, wi’imo, “Yusufu ɓii Dawda, taa’ hulu te’uki Maryaama, ngam ɓingel ngel o saawi daga to Ruuhu Allah ngel ƴiwoyi. ²¹O danyay ɓiɗɗo gorko nden a noddaymo Yeesu, ngam o hisnay yimɓe maako daga hakke maɓɓe.”

²²Fuu fii ɗu’um ɗum waɗi ngam ɗum hebbina ko Joomiraawo wi’i daga honduko annabiijo, o wi’i, ²³“Raɗɗum, surbaajo mo andaa gorko danyay ɓiɗɗo gorko, nden ɗum nodday inde maako Imaanuwel.” Ma’ana Imaanuwel woni, “Allah e wondi e meeɗen.”1.23: Ica 7.14.

²⁴Nde Yusufu ummii daga ɗeyngol ngol, sey waɗi ko malaa’ikaajo Joomiraawo on wi’imo, o te’i Maryaama. ²⁵Ammaa o andaamo naaki gaɗa o danyi ɓiɗɗo maako. Nden Yusufu noddi ɓiɗɗo on Yeesu.1.25: Luk 2.21.

Garol Andanɓe Koode

¹Gaɗa Yeesu danyaama e gariiri Baytalaami nder leydi Yahuudiya, nder carel ngel Hirudus laamoto, woɓɓe andanɓe koode daga fuuna ɓe ngari Urucaliima, ²e ɓe ƴama, “Toye on ɗon danyaaɗo laamiiɗo Yahuudanko’en? Ngam min ngi’i hoodere maako daga fuuna, min ngarii min mawninamo.”

³Nde Hirudus laamiiɗo nani non, o wanni, kanko e yimɓe Urucaliima ɗuɗɓe. ⁴Sey o noddi mawɓe ardiiɓe diina e moodiɓɓe Attawra, o ƴamiɓe, “Toye Almasiihu danyetee?”

⁵Ɓe mbi’imo, “Nder gariiri Baytalaami nder leydi Yahuudiya. Ngam raa ko annabiijo windi,

⁶‘Ammaa, an, gariyel Baytalaami gongel nder leydi Yahuuda,

an a gariyel goodungel teddungal nder leydi ndin,

ngam daga nder maaɗa goɗɗo laamiiɗo ƴiwoyta,

kanko wartata gaynaako yimɓe am Israa’iilanko’en.’ ”2.6: Miik 5.2.

⁷Sey Hirudus noddi ɓen ɗon andanɓe koode e suuɗe, o ƴamiɓe carel ngel ɓe ngi’i hoodere nden, ɓe mbi’imoka. ⁸Sey o liliɓe Baytalaami, o wi’i, “Njahee ɗaɓɓiton ɓingel ngel boɗɗum. To on ngi’iingel, ngaron mbi’onyamka, ngam min maa mi yaha mi mawninangel.”

^9-10Nde ɓe nani ko laamiiɗo on wi’i, sey ɓe nangi laawol. Nde ɓe ngi’i hoodere nden, ɓe nani belɗum naa’ seɗɗa. Hoodere nden ardiiɓe naaki nde dari dow to ɓingel ngel woni. ¹¹Nde ɓe natti wuro ngon, ɓe tawi ɓingel ngel e Maryaama maduujo maagel. Ɓe ndicci ɓe mawniningel, nden ɓe pitti doŋle maɓɓe ɓe kokkingel caahu jiinaari, e urde welnde bi’eteende firankisen, e nebbam uroojam bi’eteeɗam mur.

¹²Nde Allah haɗiiɓe nder koyɗol to’ ɓe co’’oo to Hirudus, sey ɓe tokki laawol feere ɓe co’’i leydi maɓɓe.

Dogguki Yaaki Leydi Masar

¹³Gaɗa andanɓe koode ɓen ndilli, sey malaa’ikaajo Joomiraawo wangani Yusufu nder koyɗol, wi’imo, “Umma koccaa ɓingel ngel e maduujo maagel ndoggaa njahaa leydi Masar. Njooɗee ton naa mi wi’ii’on ngarton, ngam Hirudus e yiɗi ɗaɓɓita ɓingel ngel ngam o warangel.”

¹⁴Yusufu ummii hocci ɓingel ngel e maduujo maagel caka jemma, o dilli leydi Masar. ¹⁵Ton ɓe njooɗi naaki Hirudus maayi. Non waɗii ngam ɗum hebbina ko Joomiraawo wi’i daga honduko annabiijo maako wiiki, “Daga leydi Masar mi noddi Ɓiɗɗo am.”2.15: Yuuc 11.1.

Ɓikkoy Pamaroy Mbaraama

¹⁶Nde Hirudus faami andanɓe koode ɓen ƴoyriimo, sey ɓernde maako metti naa’ seɗɗa. O wi’i ɗum wara ɓikkoy pamaroy fuu ngoroy ngoodukoy duuɓi ɗiɗi yaaki ley ngonkoy nder gariyel Baytalaami e haade gariyel ngel. O waɗu non ngam andanɓe koode ɓen mbi’imo arande hoodere nden wanganiiɓe duuɓi ɗiɗi ƴaɓɓiiɗi.

¹⁷Non hebbini ko Allah wi’i daga honduko Annabi Irmiya wiiki,

¹⁸“Ɗum nani hononde nder gariiri Raama,

bojji nawɗi.

Ɗum Rahiila woyanta ɓiɓɓe maako,

o wanyi o waltinanee ɓernde,

ngam ɓiɓɓe maako maayi.”2.18: Irm 31.15.

Wartoyki Daga Leydi Masar

¹⁹Gaɗa Hirudus maayi, sey malaa’ikaajo Joomiraawo wangani Yusufu nder koyɗol e Masar, wi’i, ²⁰“Umma koccaa ɓingel ngel e maduujo maagel co’’oɗaa leydi Israa’iila, ngam ɓen ɗon ɗaɓɓutuɓe mbara ɓingel ngel ɓe maayi.” ²¹Sey Yusufu ummii, hocci ɓingel ngel e maduujo maagel, ɓe co’’ii leydi Israa’iila.

²²Ammaa nde o nani Arkilayus ronii jooɗorgal laamu nyaako muuɗum Hirudus e mo laamo leydi Yahuudiya, sey o huli yaaki ton. Ammaa nde ɗum wagginimo nder koyɗol, sey o so’’i o yahi leydi Galiili. ²³O yahi o jooɗii nder wondi gariiri bi’eteendi Najarat, ngam ɗum hebbina ko Allah wi’i daga konduɗe annabo’en wiiki, “Ɗum noddaymo Najarankeejo.”2.23: Mar 1.24; Luk 2.39; Yah 1.45.

Wa’aju Yahaya Gaɗoowo Baptisma

(Markus 1.1‑8; Luka 3.1‑18; Yahaya 1.19‑28)

¹Gaɗa duuɓi ɗuɗɗi Yahaya Gaɗoowo Baptisma yahi nder ladde Yahuudiya, e mo wa’ajina, ²e mo wi’a, “Tuubee, ngam Laamu Allah ɓadake!”3.2: Maat 4.17; Mar 1.15.³On ɗon kanko woni mo Annabi Icaaya meti dow maako, wi’i,

“Goɗɗo e nodda nder ladde, e wi’a,

‘Mo’’inee ɗatal Joomiraawo,

portee laawol ngam garol maako!’ ”3.3: Ica 40.3.

⁴Yahaya e ɓornii kolte ɗe ɗum waɗiri leeɓe ngeelooba, e mo taadii taadorde laral. Nyamndu maako woni baabeeji e njumri.3.4: 2Laam 1.8.⁵Sey yimɓe ɗuɗɓe daga gariiri Urucaliima e leydi Yahuudiya fuu e gariije ɗe haade Caangol Urdun ɓe ngaɗi ka yaaki to maako. ⁶E ɓe mbi’a fuu ko wooɗaa ɗum ɓe ngaɗi, e mo waɗanaɓe baptisma nder Caangol Urdun.

⁷Ammaa nde Yahaya yi’i Faarisanko’en e Saadusanko’en ɗuɗɓe ngari ngam o waɗanaɓe baptisma, o wi’iɓe, “Onon ɓiɓɓe boole! Moye wi’i’on ndoggon bone garayɗum?3.7: Maat 12.34; 23.33.⁸Ngaɗee ko hollata on ali hakkeeji mooɗon. ⁹To’ on nyumu on mbi’ay nder ɓerɗe mooɗon, ‘Minon, min ɓiɓɓe Annabi Ibraahim.’ Ngam e mi wi’a’on, Allah waaway umminanki Annabi Ibraahim ɓiɓɓe daga nder kaaƴe ɗe’e.3.9: Yah 8.33.¹⁰Koo jooni fe’’irde ƴeftaama ngam fe’’a leɗɗe daga ɗaɗi maaje. Lekki fuu ki rimataa ɓikkoy mboɗkoy, ɗum fe’’ayki ɗum faɗɗaki nder hiite.3.10: Maat 7.19.¹¹Min, e mi waɗirana’on baptisma e ndiyam ngam holluki on tuubi. Ammaa ɓurɗoyam mangu e wara gaɗa am. Mi fotaayi mi jogoo paɗe maako. O waɗiranay’on baptisma e Ruuhu Allah e hiite. ¹²E mo jogii besirɗum gawri maako ngam senduki gawri e nyaande. O hawritay gawri ndin, o waɗandi nder resirde gawri maako, ammaa o wula nyaande nden nder hiite nge waatataa.”

Yeesu Waɗanaama Baptisma

(Markus 1.9‑11; Luka 3.21,22)

¹³E carel ngel Yeesu waroyi daga leydi Galiili. O yahi Caangol Urdun to Yahaya ngam Yahaya waɗanamo baptisma. ¹⁴Ammaa Yahaya yiɗii wanya waɗankimo baptisma, e wi’a, “E haani ngaɗanaayam baptisma, ammaa a wari to am?”

¹⁵Ammaa Yeesu nootii wi’i, “Alu ɗum warta non jooni, ngam non haani kebbiniren ko Allah yiɗi ngaɗen.” Nden Yahaya jaɓi.

¹⁶Nde ɗum waɗani Yeesu baptisma, e mo wurto nder ndiyam ɗam, sey ɗon e ɗon dow maɓɓitii o yi’i Ruuhu Allah e jippoyo dow maako e ɓandu bo foondu. ¹⁷Sey hononde ƴiwoyi daga dow wi’i, “O’o woni Ɓiɗɗo am mo ngiɗumi, e mi nana belɗum maako.”3.17: Fuɗ 22.2; Jab 2.7; Ica 42.1; Maat 12.18; 17.5; Mar 1.11; Luk 9.35.

Ceyɗan Foondii Yeesu

(Markus 1.12,13; Luka 4.1‑13)

¹Sey Ruuhu Allah yaari Yeesu nder ladde ngam Ceyɗan foondamo.4.1: Ibr 2.18; 4.15.²Gaɗa Yeesu waɗii balɗe 40 e suumoo jemma e nyalawma, weelo nangimo. ³Sey Ceyɗan wari, wi’imo, “To an woni Ɓiɗɗo Allah, wi’u ɗe’e kaaƴe ngarta buroodi.”

⁴Yeesu nootii wi’imo, “Aayaare wi’ii, ‘Naa’ e nyamndu tan neɗɗo marortoo, sey ni e koo ndeye wolde garoynde daga to Allah.’ ”4.4: TA 8.3.

⁵Sey Ceyɗan yaarimo Urucaliima Gariiri Ceniindi darnimo ton dow hoore Wuro Ceniingo, ⁶wi’imo, “To an woni Ɓiɗɗo Allah, diwu daga ɗo’o ngam aayaare wi’ii,

‘Allah wi’ay malaa’ika’en muuɗum mballumaa boɗɗum.

Ɓe taɓɓete nder juuɗe maɓɓe,

ngam to’ nawnaa koyɗe maaɗa dow hayre.’ ”4.6: Jab 91.11,12.

⁷Yeesu wi’imo, “Ɗonmaa aayaare wi’ii, ‘Taa’ foondu Allah Joomiraawo maaɗa!’ ”4.7: TA 6.16.

⁸Ceyɗan fuɗɗiti yaarimo dow wonde hocceere townde hollimo leyɗe duuniyaaru fuu e jawdi maaje, ⁹o wi’imo, “Ɗu’um fuu mi hokketeɗum taa diccake a mawniniiyam.”

¹⁰Sey Yeesu wi’imo, “Umma daga ɗo’o, an Ceyɗan! Aayaare wi’ii, ‘Mawnin Allah Joomiraawo maaɗa, kanko tan mawnintaa.’ ”4.10: TA 6.13.

¹¹Sey Ceyɗan alimo, malaa’ika’en ngari mballimo.

Yeesu Fuɗɗi Wa’ajinki

(Markus 1.14,15; Luka 4.14,15)

¹²Too, nde Yeesu nani ɗum maɓɓii Yahaya nder suudu cural, o so’’ii leydi Galiili.4.12: Maat 14.3; Mar 6.17; Luk 3.19,20.¹³O ali gariiri Najarat, o yahi o jooɗii gariiri Kafarnahum ngondi haade mbeela nder leydi Jabaluuna e Naftaali.4.13: Yah 2.12.¹⁴O waɗii non ngam ɗum hebbina ko Allah wi’i daga honduko Annabi Icaaya wiiki,

¹⁵“Leydi Jabaluuna e leydi Naftaali,

onon leyɗe gonɗe dow laawol haade mbeela, fongo Caangol Urdun,

nder leydi Galiili ndi yimɓe naa’ Yahuudanko’en!

¹⁶Yimɓe jooɗiiɓe nder nyiwre

ɓe ngi’ii jayngol mangol,

nden ɓen ɗon jooɗiiɓe nder leydi ndi ɗowdi mayde,

jayngol wurtoyake yeyni dow maɓɓe.”4.15,16: Ica 9.1,2.

¹⁷Daga carel ngel, Yeesu fuɗɗi wa’ajinki, e wi’a, “Tuubee, ngam Laamu Allah warii haade mooɗon.”4.17: Maat 3.2.

Yeesu Noddi Nangooɓe liƴƴi Nayo

(Markus 1.16‑20; Luka 5.1‑11)

¹⁸Yeesu e yaha haade Mbeela Galiili, o yi’i sakiraaɓe ɗiɗo, Siiman bi’eteeɗo Biiturus e minyiraawo maako Andiraawus, e ɓe ngaɗa nangirɗum liƴƴi maɓɓe nder ndiyam, ngam ɓe nangooɓe liƴƴi. ¹⁹Sey Yeesu wi’iɓe, “Tokkeeyam, mi wartiray’on gaddayɓe yimɓe to am.” ²⁰Ɗon e ɗon ɓe ali nangirɗum liƴƴi maɓɓe ɓe tokkimo.

²¹Nde o ɓeydi yeeso seɗɗa, sey o yi’i woɓɓe sakiraaɓe ɗiɗo, Yaakubu e minyiraawo muuɗum Yahaya ɓiɓɓe Jabadi, e ɓe nder komiwal e nyaako maɓɓe Jabadi, e ɓe mo’’ina nangirɗum liƴƴi maɓɓe, sey Yeesu noddiɓe. ²²Ɗon e ɗon ɓe ali komiwal ngal e nyaako maɓɓe on, ɓe tokki Yeesu.

Yeesu Ekkitini, Wa’ajini, Yamɗitini

(Luka 6.17‑19)

²³Yeesu yahi koo toye nder leydi Galiili, e mo ekkitina nder cuuɗi do’aare maɓɓe, e mo wa’ajina Habaru Belɗum dow Laamu Allah, nden e mo yamɗitina koo iri ɗume nyawu e ciya njamu nder yimɓe.4.23: Maat 9.35; Mar 1.39.²⁴Habaru maako sankiti koo toye nder leydi Siiriya. Yimɓe ngaddanimo fuu nyawɓe, piidooɓe e nyawuuji feere‑feere, e piidooɓe e nawɗum ɓalli, e gooduɓe ginni, e gooduɓe paɗɗe, e jaraaɓe, o yamɗitiniɓe. ²⁵Yimɓe ɗuɗɓe tokki Yeesu ƴiwoyɓe leydi Galiili, e leydi Dikapolis4.25: Waato Gariije Sappo., e Urucaliima, e leydi Yahuudiya, e fongo Caangol Urdun.

Yeesu Wa’ajini Dow Ƴolde

¹Nde Yeesu yi’i yimɓe ɗuɗɓe ngari, sey o ƴenti ƴolde o jooɗi, tokkuɓemo ngari to maako. ²Sey o fuɗɗi ekkitinkiɓe, o wi’i,

Barkiɗinki

(Luka 6.20‑23)

³“Ɓe barkiɗinaaɓe gaɗuɓe fuu kammunde dow Allah,

ngam kamɓe njeyi Laamu Allah.

⁴“Ɓe barkiɗinaaɓe yimɓe woyooɓe,

ngam ɗum waltinay ɓerɗe maɓɓe.5.4: Ica 61.2.

⁵“Ɓe barkiɗinaaɓe leynooɓe ko’e,

ngam kamɓe ndonata duuniyaaru.5.5: Jab 37.11.

⁶“Ɓe barkiɗinaaɓe nanooɓe weelo e ɗonka waɗuki aadilaaku,

ngam ɓe karneteeɓe.5.6: Ica 55.1,2.

⁷“Ɓe barkiɗinaaɓe jurminanooɓe yimɓe,

ngam kamɓe maa ɗum yurminanayɓe.

⁸“Ɓe barkiɗinaaɓe ɓe ɓerɗe laɓɗe,

ngam ɓe ngi’ay Allah.5.8: Jab 24.3,4.

⁹“Ɓe barkiɗinaaɓe ciryootirooɓe yimɓe,

ngam ɗum noddirayɓe ɓiɓɓe Allah.

¹⁰“Ɓe barkiɗinaaɓe torreteeɓe ngam waɗuki aadilaaku,

ngam kamɓe njeyi Laamu Allah.5.10: 1Biit 3.14.

¹¹“On barkiɗinaaɓe to yimɓe kuɗii’on, torrii’on, pewanii’on mbi’ii haalaaji kalluɗi feere‑feere dow mooɗon ngam am.5.11: 1Biit 4.14.¹²Nanee belɗum, mbelmbeltee, ngam barka mooɗon ɗum ɗuɗɗum e dow, ngam non ɓe ngaɗannoo annabo’en arande’en.5.12: 2HL 36.16; KL 7.52.

Lamɗam e Jayngol

(Markus 9.50; Luka 14.34,35)

¹³“Onon ngoni lamɗam duuniyaaru. Ammaa to belɗum maajam ittake, ko wartirta belɗum maajam? Walaa ko ɗam nafata kadin, sey ni ɗam rufee yimɓe njaaɓaɗam.5.13: Mar 9.50; Luk 14.34,35.

¹⁴“Onon ngoni jayngol duuniyaaru. Gariiri ngondi dow ƴolde ndi suuɗataako.5.14: Yah 8.12; 9.5.¹⁵Walaa gaɗanayɗo fitilaaru hiite hippa tummude dow mayru. Sey ni o resandu dow danki, ndu yeynanoo koo moye gonɗo nder wuro ngon.5.15: Mar 4.21; Luk 8.16; 11.33.¹⁶Non onon maa, alee jayngol mooɗon yeynanoo yimɓe, ngam ɓe ngi’a kuuɗe mooɗon boɗɗe, ɓe mawnina Nyaako mooɗon Mo Dow.5.16: 1Biit 2.12.

Attawra e Defte Annabo’en

¹⁷“To’ on kammo mi waroyi ngam mi wartira Attawra koo Defte Annabo’en meere. Mi waroyi naa’ ngam mi wartiraɗum meere, ammaa ngam mi hebbinaɗum. ¹⁸E mi wi’a’on goonga, haa dow e ley re’a, walaa bindel go’o koo toɓɓel go’el itteteengel nder Attawra naa koo ngele bindel nder Attawra hebbinaama.5.18: Luk 16.17.¹⁹Ngam non, koo moye yewi go’o nder koo ko ɓuri famɗuki nder ko Allah wi’i ɗum waɗa, nden o ekkitini woɓɓe ngaɗa non, ɗum noddaymo ɓurɗo famɗuki nder Laamu Allah. Ammaa koo moye waɗi ko Allah wi’i ɗum waɗa, nden o ekkitini woɓɓe ngaɗa non, ɗum noddaymo mawɗo nder Laamu Allah. ²⁰E mi wi’a’on, to aadilaaku mooɗon ɓuraayi ɗum moodiɓɓe Attawra e Faarisanko’en, on nattataa Laamu Allah koo seɗɗa!

Wa’ajinki Dow Monnere

²¹“On nani ɗum wi’i yimɓe ndenno, ‘Taa’ waɗu warhoore,’ nden ‘koo moye waɗi warhoore o kiiteteeɗo.’5.21: Wur 20.13; TA 5.17.²²Ammaa e mi wi’a’on, koo moye monnani goɗɗo, Allah hiitotomo. Kadin koo moye huɗi goɗɗo, ardiiɓe hiitotomo. Nden koo moye wi’i goɗɗo ‘A meereejo!’ e mo dow laawol nattuki wuro hiite. ²³Ngam non, taa warii hokkuki dokkal ngam Allah to sakkirde, taa siftorii bandiraawo maaɗa e monnanmaa, ²⁴alu dokkal maaɗa yeeso sakkirde nden, arande yahu ciryootiraa e bandiraawo maaɗa on, nden ngartaa kokkaa dokkal maaɗa.

²⁵“To goɗɗo wulloyakema, carel ngel ngonɗon dow ɗatal yaaki yeeso laamu siryootir e maako jawɗum. To naa’ non, o yaarete yeeso gaɗoowo kiita, gaɗoowo kiita waɗumaa nder juuɗe taadiiɓe, ɗum maɓɓumaa nder suudu cural. ²⁶E mi wi’a’on goonga, a wurtataako naa a yoɓii fuu ceede ɗe ɗum tokkatama koo aniiniyel horataako.

Wa’ajinki Dow Njeenu

²⁷“On nani ɗum wi’ii, ‘Taa’ waɗu njeenu.’5.27: Wur 20.14; TA 5.18.²⁸Ammaa min, e mi wi’a’on koo moye raari debbo darɗe suuno yaadake waadii njeenu e maako nder ɓernde. ²⁹To hitere maaɗa nde nyaamo e waɗumaa ngaɗaa hakke, ittunde, paɗɗaande. Ɗum ɓuraniima ndullaa jokkoode go’o nder jokkooɗe ɓandu maaɗa e dow ɗum hubina fuu ɓandu maaɗa nder wuro hiite.5.29: Maat 18.9; Mar 9.47.³⁰To jungo maaɗa nyaamo e waɗumaa ngaɗaa hakke, ittungo, paɗɗaango. Ɗum ɓuraniima ndullaa jokkoode go’o nder jokkooɗe ɓandu maaɗa e dow fuu ɓandu maaɗa natta nder wuro hiite.5.30: Maat 18.8; Mar 9.43.

Wa’ajinki Dow Warki Teegal

(Maatiyu 19.9; Markus 10.11,12; Luka 16.18)

³¹“Kadin ɗum wi’i, ‘Koo moye yoofi debbo muuɗum, sey hokkamo ɗerewol warki teegal.’5.31: TA 24.1‑4; Maat 19.7; Mar 10.4.³²Ammaa min, e mi wi’a’on, koo moye yoofi debbo muuɗum to naa’ njeenu o waɗi, too, o waɗiimo waɗuki njeenu to o waɗii wongal teegal. Nden koo moye te’i joofaaɗo waɗi njeenu.5.32: Maat 19.9; Mar 10.11,12; Luk 16.18; 1Kor 7.10,11.

Ekkitinol Dow Waɗuki Alkawal

³³“On nanii ɗum wi’ii yimɓe ndenno, ‘Taa’ huna dow fewre, ammaa hebbin alkawal ngal ngaɗanɗaa Joomiraawo.’5.33: KLee 19.12; Lim 30.2; TA 23.21.³⁴Ammaa e mi wi’a’on, to’ on kuno koo seɗɗa. To’ on kunoro dow, ngam ton woni to Allah jooɗoto.5.34: Yaak 5.12; Ica 66.1; Maat 23.22.³⁵Nden to’ on kunoro duuniyaaru, ngam ɗon woni to Allah resata koyɗe muuɗum. Nden to’ on kunoro Urucaliima ngam kayri woni gariiri Laamiiɗo Mawɗo.5.35: Ica 66.1; Jab 48.2.³⁶To’ on kunoro gaasa ko’e mooɗon, ngam on mbaawataa wartirki laasol go’otol danewol koo ɓalewol. ³⁷Al ‘Ee’ mooɗon warta ‘Ee,’ nden ‘Aa’a’ mooɗon warta ‘Aa’a.’ Fuu ko ƴaɓɓii ɗu’um, daga to Ceyɗan ɗum ƴiwoyi.

Ekkitinol Dow Waataaki

(Luka 6.29,30)

³⁸“On nani ɗum wi’ii, ‘Hitere ngam hitere, nden nyiinde ngam nyiinde.’5.38: Wur 21.24; KLee 24.20; TA 19.21.³⁹Ammaa e mi wi’a’on, to goɗɗo waɗanii’on goɗɗum kalluɗum, to’ on ngaato. To goɗɗo fiyiima to wolo nyaamo, waylitanmo wo’oto ngon maa. ⁴⁰To goɗɗo yaariima yeeso laamu ngam jaɓanmaa toggoore, hokkumo fuu e cuddaari maaɗa. ⁴¹To goɗɗo waɗiima ngaɗaa yaadu mil go’o, yaadu e maako mil ɗiɗi. ⁴²Toriiɗoma goɗɗum fuu, hokkumo. To goɗɗo ƴamiima nyamaande, taa’ haɗumo.

Yiɗu Ganyo Maaɗa

(Luka 6.27,28,32‑36)

⁴³“On nanii ɗum wi’ii, ‘Yiɗu bandiraawo maaɗa, wanyu ganyo maaɗa.’ ⁴⁴Ammaa e mi wi’a’on, ngiɗee ganyooɓe mooɗon, ngaɗanee torrooɓe’on do’aare, ⁴⁵ngam ngarton ɓiɓɓe Nyaako Mo Dow. Ngam e mo waɗa naange maako yeynoo dow yimɓe kalluɓe e yimɓe gaɗooɓe ko wooɗi, nden e mo waɗa ndiyam toɓa dow aadili’en e ɓe ngalaa aadilaaku. ⁴⁶To yiɗuɓe’on tan ngiɗɗon, ɗume barka keɓoton? Koo jaɓooɓe ceede leydi maa e ngiɗi yiɗuɓeɓe. ⁴⁷To bandiraaɓe mooɗon tan kownoton, ɗume ngaɗoton ɓurɗum ɗum woɓɓe ngaɗata? Yimɓe naa’ Yahuudanko’en naa’ e ngaɗa non? ⁴⁸Ngam non, ngartee keewuɓe no Nyaako mooɗon Mo Dow o kewɗo.5.48: KLee 19.2; TA 18.13.

Ekkitinol Dow Walluki Ɓe Ngalanaa

¹“Paamee to’ ngaɗon kuuɗe aadilaaku mooɗon yeeso yimɓe ngam ɓe ngi’a. Ngam to on ngaɗii non, on keɓataa mbarjaari to Nyaako mooɗon Mo Dow.6.1: Maat 23.5.

²“Ngam non, taa hokkay ɓe ngalanaa caahu, taa’ andinka koo moye no munaafuki’en ngaɗata nder cuuɗi do’aare e dow ɗatal ngam yimɓe ngi’a mantaɓe. E mi wi’a’on goonga, ɓe njaadake ɓe keɓi mbarjaari maɓɓe. ³Ammaa taa hokkay mo walanaa caahu, taa’ jaɓu jungo nano maaɗa anda ko jungo nyaamo maaɗa waɗata. ⁴Hokku caahu maaɗa e suuɗe, nden Nyaako maaɗa Mo Dow anduɗo koo ɗume gaɗaaɗum e suuɗe, o hokkete mbarjaari.

Ekkitinol Dow Do’aare

(Luka 11.2‑4)

⁵“To on ngaɗay do’aare, to’ on ngaɗu no munaafuki’en ngaɗata, ngam e ɓe ngiɗi waɗuki do’aare e ɓe ndarii nder cuuɗi do’aare e dow to ɗate kawri ngam koo moye yi’aɓe. E mi wi’a’on goonga, ɓe njaadake ɓe keɓii mbarjaari maɓɓe.6.5: Luk 18.10‑14.⁶Ammaa taa waɗay do’aare, nattu suudu maaɗa maɓɓaa dammugal, toroɗaa Nyaako maaɗa Mo Dow mo yi’ataake. Nden kanko gi’oowo ko waɗetee e suuɗe o hokkete mbarjaari.

⁷“To on ngaɗa do’aare, to’ on metu haalaaji meere no yimɓe ɓe andaa Allah ngaɗata. E ɓe nyuma allaaji maɓɓe nanay ko ɓe mbi’i ngam ɓe kuutiri boliiɗe ɗuɗɗe. ⁸To’ on ngaɗu no ɓe ngaɗata ngam Nyaako mooɗon Mo Dow e andi ko ngiɗɗon ko torooɗonmo. ⁹Raa no ngaɗirton do’aare,

‘Yaa Allah Nyaako amin Mo Dow,

inde maaɗa ceniinde mawninee.

¹⁰Laamu maaɗa wara,

ko ngiɗɗaa waɗee nder duuniyaaru, no ɗum waɗirtee e dow.

¹¹Hokkumin ko min nyaamata hande.

¹²Yaafanamin hakkeeji amin

no min njaaforantoo gaɗanɓemin ko wooɗaa.

¹³Taa’ alu min njaha to min ngaɗata hakke,

ammaa hisnumin daga Kalluɗo.’

¹⁴“Ngam to on njaafanake gaɗanɓe’on ko wooɗaa, Nyaako mooɗon Mo Dow maa yaafanto’on. ¹⁵Ammaa to on njaafanaakiɓe, kanko maa o yaafantaako’on hakke mooɗon.6.14,15: Mar 11.25,26.

Ekkitinol Dow Suumaaki

¹⁶“To on cuumii, to’ on mbonnu geece mooɗon no munaafuki’en ngaɗata, ngam kamɓe e ɓe mbonna geece maɓɓe ngam ɓe kolla yimɓe e ɓe cuumii. E mi wi’a’on goonga, ɓe njaadake ɓe keɓii mbarjaari maɓɓe. ¹⁷Ammaa taa suumii, sulma, moytanaa hoore maaɗa nebbam. ¹⁸Taa waɗii non, walaa andayɗo a suumii, sey ni Nyaako maaɗa Mo Dow mo yi’ataake. Nden kanko gi’oowo ko waɗetee e suuɗe, o hokkete mbarjaari.

Resuki Jawdi Ton Dow

(Luka 12.33,34)

¹⁹“To’ on ndesan ko’e mooɗon jawdi e duuniyaaru to mooƴu wonnatandi, koo ndi nyola, koo to wuyɓe pusata natta ngujjandi.6.19: Yaak 5.2,3.²⁰Ammaa ndesanee ko’e mooɗon jawdi ton dow to mooƴu wonnataandi, koo ndi nyola, to wuyɓe mbaawataa pusa natta ngujjandi. ²¹Ngam to jawdi maaɗa woni, ton ɓernde maaɗa maa so’’otoo.

Jayngol Ɓandu

(Luka 11.34‑36)

²²“Gite ngoni fitilaaru ɓandu. To gite maaɗa e njamɗi, ɓandu maaɗa fuu heeway jayngol. ²³Ammaa to gite maaɗa njamɗaa, ɓandu maaɗa fuu heeway nyiwre. To jayngol gongol nder ɓandu maaɗa ɗum nyiwre, nyiwre nden wartay ɓaleere naa’ seɗɗa.

Allah Koo Jawdi

(Luka 16.13; 12.22‑31)

²⁴“Walaa baawayɗo jagganaaki joomu wuro’en ɗiɗo. Koo o wanya go’oto o yiɗa go’oto, koo o mawnina go’oto o yawana go’oto. Non onon maa, on mbaawataa jagganaaki Allah e jagganaaki jawdi carel go’o.

Taa’ Wannu

²⁵“Ngam non, e mi wi’a’on, to’ on ngannu dow jonde mooɗon, waato dow ko nyaamoton, koo ko njaroton, koo ko ɓornotooɗon. Naa’ yonki ɓurii nyamndu? Nden naa’ ɓandu ɓurii kolte? ²⁶Ndaaree colli! Ɗi aawataa, ɗi pe’’ataa, ɗi ngalaa to ɗi ndesata nyamndu. Fuu e non Nyaako mooɗon Mo Dow e nyamnaɗi. Naa’ on ɓurii colli daraja? ²⁷Moye nder mooɗon to wannii waawata ɓeydanki hoore muuɗum carel seɗɗa nder balɗe muuɗum?

²⁸“Too, ngam ɗume ngannoton dow ko ɓornotooɗon? Ndaaree pindi ladde no mawnirta, ndi huwataa, ndi sanyataa kolte. ²⁹Fuu e non e mi wi’a’on, Annabi Suleymaanu fuu e risku muuɗum meeɗaayi mo’’itinaaki bo pindi wo’oyri ndi’i.6.29: 1Laam 10.4‑7; 2HL 9.3‑6.³⁰To Allah e mo’’itinira pindi ladde nihi, hande e ndi ɗon, jaango ndi wulee, hakko onon, o ɓuray non ɓornuki’on, onon kooliiɓemo seɗɗa!

³¹“Ngam non, to’ on ngannu mbi’on, ‘Ko nyaameten?’, koo ‘Ko njareten?’, koo ‘Ko ɓornotooɗen?’ ³²Ngam iri ɗum ɗon yimɓe ɓe andaa Allah ɗaɓɓitata. Nyaako mooɗon Mo Dow e andi on ngiɗi fuu fii ɗu’um. ³³Ammaa arande ɗaɓɓitee Laamu Allah e aadilaaku maako, nden ɗum ɓeydanay’on fuu fii ɗu’um. ³⁴Ngam non, to’ on ngannu e jaango, ngam jaango e woodi wannaare muuɗum. Koo ndeye nyalnde e woodi wannaare mayre keƴayndende.

To’ On Kiito Woɓɓe

(Luka 6.37,38,41,42)

¹“To’ on kiito woɓɓe, ngam to’ ɗum hiito’on. ²Ngam non no kiitoriiɗon woɓɓe, onon maa non ɗum hiitorantoo’on, nden e poondirgel ngel poondirɗon, e maagel ɗum foondiranta’on.7.2: Mar 4.24.³Ngam ɗume ndaarataa geenel gongel nder hitere bandiraawo maaɗa, ammaa a wannaayi e legga wonga nder hitere maaɗa? ⁴No waɗata mbi’aa bandiraawo maaɗa, ‘Al mi ittanmaa geenel nder hitere maaɗa,’ nden boo e woodi legga nder hitere maaɗa? ⁵An munaafukiijo, artu ittuki legga wonga nder hitere maaɗa, nden ngi’aa boɗɗum keɓaa no ittiraa geenel gongel nder hitere bandiraawo maaɗa.

⁶“To’ on kokku kutiiji goɗɗum ceniiɗum. To on ngaɗii non, ɗi ngaylitoto, ɗi ciccita’on. To’ on kubano aladeeji lu’u‑lu’u. To on ngaɗii non, ɗi njaaɓayɗum tan.

Toree, Ɗaɓɓitee, Cilminee

⁷“Toree, ɗum hokkay’on. Ɗaɓɓitee, on keɓay. Cilminee, ɗum maɓɓitanay’on dammugal. ⁸Ngam koo moye toriiɗo ɗum hokkaymo, ɗaɓɓutuɗo boo heɓay, nden koo moye cilminiiɗo ɗum maɓɓitanaymo dammugal. ⁹Moye nder mooɗon to ɓiɗɗo muuɗum torakemo buroodi, o hokkamo hayre? ¹⁰Koo boo to o torakemo lingu, o hokkamo mboodi? ¹¹To onon kalluɓe, on andi no kokkirton ɓiɓɓe mooɗon fii boɗɗum, hakko Nyaako mooɗon Mo Dow! O ɓuray non hokkuki toriiɓemo fii boɗɗum!

¹²“Fuu ko ngiɗɗon woɓɓe ngaɗana’on, onon maa ngaɗaneeɓe non, ngam kanjum woni ko Attawra e Defte Annabo’en mbi’i.7.12: Luk 6.31.

Dammugal Ɓiɗɗiingal

¹³“Nattiree dammugal ɓiɗɗiingal. Ngam dammugal jaarayngal halkere ngal jaajungal, nden ngal saɗaa tokkuki, nattirooɓengal e ɗuuɗi. ¹⁴Ammaa dammugal jaarayngal yonki ki re’ataa ngal ɓiɗɗiingal, ɗonmaa ɗatal jaarayngal yonki ki re’ataa e ngal saɗi tokkuki, yimɓe seɗɗa tokkatangal.

Lekki e Ɓikkoy Maaki

¹⁵“Paamanee annabo’en fewre garayɓe to mooɗon nder nandi baali, ammaa nder ɓerɗe maɓɓe e ɓe nandi e caafaali kalluɗi. ¹⁶On anditirayɓe kuuɗe maɓɓe. Ɗum heɓataa ɓikkoy inabooje to gi’ehi, koo ibbe daga to kooraaje. ¹⁷Non maa, koo kiye lekki boɗki e ki rima ɓikkoy mboɗkoy. Lekki ki wooɗaa boo e ki rima ɓikkoy koy mbooɗaa. ¹⁸Lekki boɗki rimataa ɓikkoy koy mbooɗaa. Non maa, lekki ki wooɗaa rimataa ɓikkoy mboɗkoy. ¹⁹Fuu lekki ki rimataa ɓikkoy mboɗkoy ɗum fe’’ayki ɗum faɗɗaki nder hiite.7.19: Maat 3.10; Luk 3.9.²⁰Ngam non, on anditirayɓe kuuɗe kalluɗe ɗe ɓe ngaɗata.7.20: Maat 12.33.

Mi Meeɗaayi Anduki’on

²¹“Naa’ fuu bi’ayɗoyam, ‘Moodibbo, Moodibbo,’ nattata Laamu Allah, sey ni gaɗuɗo ko Nyaako am Mo Dow yiɗi. ²²E Nyalnde Jaango yimɓe ɗuɗɓe mbi’ayyam, ‘Moodibbo, Moodibbo! Naa’ min nga’ajinii nder inde maaɗa? Naa’ min mburtinii ginni nder inde maaɗa? Naa’ min ngaɗii kayɗiniiɗum ɗuɗɗum nder inde maaɗa?’ ²³Ammaa mi wi’ayɓe, ‘Mi andaa’on. Cendiree e am, onon kalluɓe.’7.23: Jab 6.8.

Mahooɓe Ɗiɗo

(Luka 6.47‑49)

²⁴“Ngam non, neɗɗo fuu nanɗo ɗe’e boliiɗe am waɗi ko mbiimi e nandi e neɗɗo gooduɗo faamu mahuɗo wuro muuɗum dow tafaare. ²⁵Nde ndiyam waɗi, canɗi keewi, hendu ummoyii piyi wuro ngon, ammaa ngo yanaayi ngam ngo mahaama dow tafaare.

²⁶“Ammaa koo moye nanɗo boliiɗe am waɗaayi ko mbiimi e nandi e neɗɗo mo walaa hakkiilo mahuɗo wuro muuɗum dow njaareendi. ²⁷Nde ndiyam waɗi, canɗi keewi, hendu ummoyii piyi wuro ngon, sey ngo yani ngo sankitii ngo fuu.”

Bawɗe Ekkitinol Yeesu

²⁸Nde Yeesu yottini ko wi’ata, yimɓe hawrutuɓe kayɗini e ekkitinol maako, ²⁹ngam o ekkitiniraayiɓe no moodiɓɓe Attawra ekkitinirta, ammaa o ekkitiniiɓe e bawɗe.7.28,29: Mar 1.22; Luk 4.32.

Gooduɗo Nyawu Nyaamoowu Laral

(Markus 1.40‑45; Luka 5.12‑16)

¹Nde Yeesu jippoyii daga dow hocceere nden, yimɓe ɗuɗɓe tokkimo. ²Sey goɗɗo gooduɗo nyawu nyaamoojum laral wari diccii yeeso maako, wi’i, “Moodibbo, taa jaɓii, a waaway njamɗitinaayam.”

³Sey Yeesu forti jungo muuɗum, meemimo, wi’i, “Mi jaɓii. Yamɗutu!” Ɗon e ɗon nyawu ɗum alimo, o yamɗiti. ⁴Sey Yeesu wi’imo, “Faamu, taa’ wi’uka koo moye, ammaa yahu kollaa hoore maaɗa to ardiiɗo diina, nden kokkaa cakkiri no Muusa wi’i ɗum waɗa ngam laaɓol maaɗa. Waɗu non ngam tabbitinanki yimɓe a yamɗitii.”8.4: KLee 14.1‑32.

Hoolaare Mawɗo Sooji’en

(Luka 7.1‑10)

⁵Nde Yeesu natti gariiri Kafarnahum, sey goɗɗo mawɗo sooji’en Rooma wari to maako, e toroomo, wi’i, ⁶“Moodibbo, maccuɗo am e fukkii e wuro o jaraaɗo, e mo fiida e nawɗum kalluɗum.”

⁷Yeesu wi’imo, “Mi yahay mi yamɗitinamo.”

⁸Sey mawɗo sooji’en on nootii wi’i, “Moodibbo, mi fotaayi nattaa wuro am, ammaa metu tan, maccuɗo am yamɗitay. ⁹Ngam min e hoore am ley laamu woɓɓe sooji’en ngonmi, min maa, e mi laamoo sooji’en. To mi wi’ii o’o, ‘Dillu!’ o dillay. To mi wi’ii on ton, ‘Woroy!’ o waray. To boo mi wi’ii maccuɗo am, ‘Waɗu ɗu’um!’ o waɗayɗum.”

¹⁰Nde Yeesu nani non, hayɗini, wi’i kawrutuɓe e tokkimo, “E mi wi’a’on goonga, koo nder Israa’iila mi heɓaayi kooliiɗoyam ɓernde go’o bo o’o. ¹¹E mi wi’a’on, yimɓe naa’ Yahuudanko’en ɗuɗɓe ngaray daga fuuna e hirna ɓe njooɗoo ɓe nyaama nyamndu humto e Annabi Ibraahim, e Iciyaaku, e Yaakubu nder Laamu Allah.8.11: Luk 13.29.¹²Haanuɓe ngarta yimɓe Allah ammaa ɓe nganyi, ɗum faɗɗayɓe nder nyiwre ɓaleere. Ɗon ɓe mboyata ɓe nyerƴindira nyiiƴe.”8.12: Maat 22.13; 25.30; Luk 13.28.¹³Sey Yeesu wi’i mawɗo sooji’en Rooma on, “Yahu! Ngam a hoolake Allah, maccuɗo maaɗa yamɗitay.” Ɗon e ɗon maccuɗo soojiijo on yamɗiti.

Yeesu Yamɗitinii Yimɓe Ɗuɗɓe

(Markus 1.29‑34; Luka 4.38‑41)

¹⁴Nde Yeesu yahi wuro Biiturus yi’i esiraawo Biiturus debbo e fukkii, jonte kalluɗe e torramo, ¹⁵o meemi jungo maako. Jonte ɗen njoofi debbo on, o ummii, o fuɗɗi waddankimo nyamndu.

¹⁶Nde futuro waɗi, yimɓe ngaddani Yeesu gooduɓe ginni ɗuɗɓe. O metaniɗi wolde go’o ɗi mburtii. O yamɗitini fuu ɓe njamɗaa. ¹⁷Non waɗii ngam ɗum hebbina ko Allah wi’i daga honduko Annabi Icaaya, wiiki, “O ittii nyawuuji meeɗen, o yamɗitinii’en.”8.17: Ica 53.4.

Wi’ooɓe Tokkay Yeesu

(Luka 9.57‑62)

¹⁸Nde Yeesu yi’i yimɓe ɗuɗɓe e piliimo, o wi’i tokkuɓemo, “En kuulu fongo mbeela.” ¹⁹Sey goɗɗo moodibbo Attawra wari to maako, wi’imo, “Moodibbo, mi tokkete to njahataa fuu.”

²⁰Yeesu wi’imo, “Dilaaji e ngoodi gayɗe, colli e ngoodi caɓɓe, ammaa Ɓii Neɗɗo walaa to fukkotoo.”

²¹Goɗɗo nder tokkuɓemo wi’imo, “Moodibbo, al mi yaha mi uwoya nyaako am taw.”

²²Ammaa Yeesu wi’imo, “Tokkam, alu mayɓe uwa mayɓe mu’’en.”

Yeesu Darnii Iyeende

(Markus 4.35‑41; Luka 8.22‑25)

²³Yeesu natti komiwal, tokkuɓemo maa tokkimo. ²⁴Sey hendu cembindu ummoyii dow mbeela ngan, geelooɗi ndiyam puɗɗi piiki komiwal ngal, ndiyam natti nder maagal haa naaki ngal ɓadii heewa ndiyam, ammaa Yeesu e nder maagal e ɗaanii. ²⁵Sey tokkuɓemo ɓaddii pindinimo, ɓe mbi’i, “Moodibbo, hisnu’en! En kalkay!”

²⁶Sey o wi’iɓe, “Ngam ɗume kultorɗon, onon kooliiɓeyam seɗɗa?” Sey o ummii, o haɓani hendu ndun e geelooɗi ndiyam ɗin. Sey koo ɗume de’’iti.

²⁷Koo moye hayɗini wi’i, “O’o ɗum iri moye neɗɗo, haa keni e geelooɗi ndiyam e ngaɗa ko o wi’i?”

Yeesu Yamɗitinii Gooduɓe Ginni

(Markus 5.1‑20; Luka 8.26‑39)

²⁸Nde Yeesu yottii fongo mbeela nder leydi Gaarasinko’en, sey woɓɓe worɓe ɗiɗo taɓɓiimo, gooduɓe ginni jooɗotooɓe to genaale. Ɓe ngartii ko hulnii naa’ seɗɗa haa maa walaa baawayɗo tokkira laawol ngol ɗon! ²⁹Ɗon e ɗon ɓe ngulli, e ɓe mbi’a, “Ko wannumaa e amin, Ɓiɗɗo Allah? A warii ngam torraamin ko carel8.29: Waato Nyalnde Jaango. waɗa?”

³⁰Haade ɗon e woodi ornde aladeeji ɗuɗɗi e dura. ³¹Ginni ɗin torii Yeesu, mbi’i, “Taa riiwiimin, alumin min nattoya ornde aladeeji ɗin nii.”

³²Sey o wi’iɗi, “Ndillee!” Sey ɗi mburtii, ɗi nattoyi aladeeji ɗin. Sey ornde nden fuu nyaari jippoyii daga dow ƴolde nden, yani nder mbeela, ndiyam nyaamiɗi.

³³Woynaaɓe aladeeji ɗin ndoggi njahi nder gariiri mbi’oyi koo ɗume ko waɗi. Ɗonmaa ɓe mbi’i ko heɓi gooduɓe ginni ɗin. ³⁴Sey yimɓe gariiri ndin ɗuɗɓe mburtoyii taɓɓii Yeesu. Nde ɓe ngi’imo, ɓe toriimo o alanaɓe leydi maɓɓe.

Yeesu Yamɗitinii Jaraaɗo

(Markus 2.1‑12; Luka 5.17‑26)

¹Sey Yeesu natti komiwal huuli so’’ii gariiri muuɗum. ²Sey woɓɓe ngaddanimo goɗɗo jaraaɗo dow daago. Nde Yeesu yi’i hoolaare maɓɓe, o wi’i jaraaɗo on, “Taa’ wannu, higo am, a yaafanaama hakkeeji maaɗa.”

³Nde woɓɓe moodiɓɓe Attawra nani non, ɓe puɗɗi metitaaki hakkunde maɓɓe, e ɓe mbi’a, “O’o neɗɗo o fottidini hoore maako e Allah. Ka’a haala ka kalluka.”

⁴Ammaa Yeesu faami ko woni nder ɓerɗe maɓɓe, sey o wi’iɓe, “Ngam ɗume nyumoton nyumo kallungo nder ɓerɗe mooɗon? ⁵Ko ɓuri hoyki, ɗum wi’a, ‘A yaafanaama hakke maaɗa,’ koo ɗum wi’a, ‘Umma yaaɓu?’ ⁶Ammaa e mi yiɗi andon Ɓii Neɗɗo e woodi laamu nder duuniyaaru yaafoo hakke.” Sey o wi’i jaraaɗo on, “Umma koccaa daago maaɗa, kootaa wuro.”

⁷Sey jaraaɗo on ummii hooti wuro. ⁸Nde kawrutuɓe ɗon ngi’i non, ɓe kuli, ɓe manti Allah, kokkuɗo yimɓe iri ɗe’e bawɗe.

Yeesu Noddii Maatiyu

(Markus 2.13‑17; Luka 5.27‑32)

⁹Yeesu e ala wigeere nden, sey yi’i goɗɗo jaɓoowo ceede leydi bi’eteeɗo Maatiyu e jooɗii to ɗum jaɓata ceede leydi. Sey Yeesu wi’imo, “Tokkam.”

Sey Maatiyu ummii, tokkimo.

¹⁰Gaɗa ɗon Yeesu yahi wuro Maatiyu, jooɗii e nyaama hiraande, sey jaɓooɓe ceede leydi e gaɗooɓe hakke ngari njooɗii to maako e tokkuɓemo. ¹¹Nde Faarisanko’en ngi’i non, ɓe mbi’i tokkuɓemo, “Ngam ɗume moodibbo mooɗon nyamdata e jaɓooɓe ceede leydi e gaɗooɓe hakke?”9.10,11: Luk 15.1,2.

¹²Nde Yeesu nani non, wi’i, “Naa’ yamɓe ngiɗi nyawndoowo, sey ni nyawɓe. ¹³Njahee, ekkitooɗon ma’ana aayaare biinde, ‘E mi yiɗi kollon yurmeende, naa’ sakkuki cakkiri.’9.13: Yuuc 6.6. Mi waroyaayi ngam nodduki nyumooɓe ɓe aadili’en, ammaa mi waroyi ngam nodduki anduɓe ɓe gaɗooɓe hakke.”9.13: Maat 12.7; Yuuc 6.6.

Ƴamol Dow Suumaaki

(Markus 2.18‑22; Luka 5.33‑39)

¹⁴Sey tokkuɓe Yahaya Gaɗoowo Baptisma ngari to Yeesu ɓe ƴamimo, ɓe mbi’i, “Ngam ɗume minon e Faarisanko’en e min cuumoo, ammaa tokkuɓema cuumataako?”

¹⁵Sey Yeesu nootii wi’iɓe, “E yiiki mooɗon higooɓe angoojo nanay belɗum carel ngel angoojo on wondi e maɓɓe? Ammaa carel e wara ngel ɗum hoccata angoojo on daga nder maɓɓe, e carel ngel ɓe cuumoto.

¹⁶“Walaa nyootayɗo lefel kesel to limcere kiinde, ngam lefel ngel ngel seekay limcere kiinde nden. Non waɗay nde ɓura no ndenno seekuki. ¹⁷Non maa walaa gaɗayɗo ndiyam inabojam kesam nder faandu hiindu. To o waɗii non, ɗam ƴuufay, ɗam pusa faandu ndun, ɗam rufa, faandu ndun boo lalli won ɗon. Ammaa ndiyam inabojam kesam e waɗee nder faandu heyru ngam to’ ɗum dullaɗam ɗum dulla faandu ndun.”

Ɓiɗɗo Jaayirus e Debbo Mo Ƴiiƴam Rufanta

(Markus 5.21‑43; Luka 8.40‑56)

¹⁸Yeesu e nder wiikiɓe non, sey goɗɗo ardiiɗo suudu do’aare bi’eteeɗo Jaayirus wari. O diccii yeeso Yeesu, o wi’i, “Ɓiɗɗo am surbaajo maayii jooni‑jooni, ammaa waroy njahen meemaamo, o ummoto.”

¹⁹Yeesu ummodii e tokkuɓemo ɓe ndillidi e maako.

²⁰Too, e woodi goɗɗo debbo ɗon gaɗuɗo duuɓi sappo e ɗiɗi e torrodoo e rufuki ƴiiƴam o ƴiwoyi gaɗa Yeesu, o meemi cilmbi toggoore maako. ²¹Ngam o wi’ii nder ɓernde maako, “Koo toggoore maako tan meemumi, mi yamɗitay.”

²²Nde Yeesu waylitii, yi’imo, wi’i, “Taa’ wannu, bandiraawo. Hoolaare maaɗa yamɗitiniima.” Ɗon e ɗon debbo on yamɗiti.

²³Nde Yeesu yottii wuro Jaayirus on, yi’i duudooɓe duudaali e hawrutuɓe e ɓe ngulla sembee, ²⁴sey o wi’iɓe, “Alee ɗo’o, ngam surbaajo on maayaayi, ammaa o ɗaani.” Sey ɓe njalimo. ²⁵Ammaa gaɗa o wurtinii koo moye yaasi, o natti, o jogii jungo surbaajo on, sey surbaajo on ummii. ²⁶Habaru ɗum boo sankitii koo toye nder leydi ndin.

Yeesu Yamɗitinii Wumɓe

²⁷Yeesu e ala wigeere nden, sey woɓɓe wumɓe ɗiɗo tokkimo e nodda sembee, e mbi’a, “Ɓiɗɗo Dawda, yurminanmin!”

²⁸Nde Yeesu natti wongo wuro, sey wumɓe ɓen ngari to maako, o ƴamiɓe, o wi’i, “On njaɓii mi waaway yamɗitinki’on?” Ɓe mbi’imo, “Ee, moodibbo.”

²⁹Sey Yeesu meemi gite maɓɓe, wi’i, “Non no kooloriiɗonyam mi yamɗitinay’on.” ³⁰Ɗon e ɗon gite maɓɓe mbumtii. Sey Yeesu wagginiɓe, wi’i, “To’ on mbi’uka goɗɗo.”

³¹Ammaa ɓe ndilli ɓe cankiti habaru maako koo toye nder leydi ndin.

Yeesu Yamɗitinii Paho

³²Wumɓe ɓen e ndilla, sey ɗum waddani Yeesu goɗɗo gooduɗo ginnol gartirngolmo paho. ³³Gaɗa Yeesu wurtinii ginnol ngol, neɗɗo on fuɗɗi metuki. Yimɓe ɗuɗɓe kawrutuɓe ɗon kayɗini, mbi’i, “Ɗum meeɗaayi yiiki goɗɗum iri ɗu’um nder leydi Israa’iila.”

³⁴Ammaa Faarisanko’en mbi’i, “E bawɗe Ba’aljabul laamiiɗo ginni o wurtinirta ginni.”9.34: Maat 10.25; 12.24; Mar 3.22; Luk 11.15.

Yeesu Yurminanii Yimɓe

³⁵Yeesu yahi gariije mawɗe e ngarihoy pamaroy fuu, e ekkitina nder cuuɗi do’aare ɗi Yahuudanko’en, e wa’ajina Habaru Belɗum dow Laamu Allah, e mo yamɗitina yimɓe gooduɓe koo iri ɗume nyawu, e koo iri ɗume ciya njamu.9.35: Maat 4.23; Mar 1.39; Luk 4.44.³⁶Nde o yi’i yimɓe ɗuɗɓe kawritii, sey o nani jurumɗum maɓɓe, ngam e ɓe torroo, walaa ballayɗoɓe, bo baali ɗi ngalaa gaynaako.9.36: Lim 27.17; 1Laam 22.17; 2HL 18.16; Ijik 34.5; Mar 6.34.³⁷Sey o wi’i tokkuɓemo, “Gese ɓenduɗe e ɗuuɗi, ammaa huwooɓe ɗuuɗaa. ³⁸Toree Joomu gese ɗen liloya huwooɓe nder gese maako.”9.37,38: Luk 10.2.

Lilaaɓe Sappo e Ɗiɗo

(Markus 3.13‑19; Luka 6.12‑16)

¹Sey Yeesu noddi tokkuɓemo sappo e ɗiɗo, o hokkiɓe bawɗe wurtinki ginni e yamɗitinki yimɓe daga koo iri ɗume nyawu e ciya njamu. ²Raa inɗe lilaaɓe sappo e ɗiɗo ɓen: arande e woodi Siiman bi’eteeɗo Biiturus, e minyiraawo maako Andiraawus, e Yaakubu ɓii Jabadi, e minyiraawo maako Yahaya, ³e Filibus, e Batiloomi, e Tooma, e Maatiyu jaɓoowo ceede leydi, e Yaakubu ɓii Halfa, e Taadiyus, ⁴e Siiman Kananiyankeejo10.4: Koo boo Siiman Jalooti. Ma’ana Jalooti woni gooduɗo lawliiru lenyol maako., nden e Yahuuda Iskariyooti, gartuɗo kokkitirɗo Yeesu.

Yeesu Lilii Tokkuɓemo Sappo e Ɗiɗo

(Markus 6.7‑13; Luka 9.1‑6)

⁵Yeesu lili tokkuɓemo sappo e ɗiɗo ɓen, o wi’iɓe, “To’ on njahu to yimɓe naa’ Yahuudanko’en. Ɗonmaa to’ on nattu gariije Samaariyanko’en. ⁶Sey ni njahon to yimɓe Israa’iila gartuɓe bo baali majjuɗi. ⁷Njahee, nga’ajinanonɓe, mbi’on, ‘Laamu Allah warii haade.’ ⁸Njamɗitinee nyawɓe, umminee mayɓe daga mayde, njamɗitinee gooduɓe nyawu nyaamoojum laral, mburtinanee yimɓe ginni. Mi hokkii’on bawɗe yamɗitinki yimɓe caahu, ngam non njamɗitinee yimɓe caahu. ⁹To’ on njogo ceede jiinaari, koo ceede ajurfaari, koo ceede njamndi mboɗeeri. ¹⁰Nden to’ on njaadu e jakaare, koo toggooje ɗiɗi, koo paɗe koyɗe ɗiɗi, koo sawru, ngam kuwoowo haanii hokkee nyamndu.10.10: 1Kor 9.14; 1Tim 5.18.

¹¹“Fuu gariiri koo gariyel pamarel to nattuɗon, ɗaɓɓitee neɗɗo mo ngikku boɗɗum, njooɗooɗon wuro maako naa on alii wigeere nden. ¹²To on nattii wuro ngon, cilminee. ¹³To yimɓe wuro ngon njaɓɓake’on boɗɗum, alee barka mooɗon jooɗoo dow maɓɓe. Ammaa to ɓe njaɓɓaaki’on boɗɗum, alee barka mooɗon warta to mooɗon. ¹⁴Fuu mo jaɓɓaaki’on, koo wanyi ko mbiiɗon, to on mburtake wuro ngon koo gariiri ndin, piɗɗee sollaare koyɗe mooɗon.10.14: KL 13.51.¹⁵E mi wi’a’on goonga, Nyalnde Jaango Allah ɓuray yurminanki yimɓe Sodom e Gomoora dow yimɓe gariiri ndin ɗon.10.15: Maat 11.24; Fuɗ 19.24‑28.10.7‑15: Luk 10.4‑12.

Torraaji Garayɗi

(Markus 13.9‑13; Luka 21.12‑17)

¹⁶“Raɗɗum, e mi lila’on bono mbaaloy caka caafaali. Ngam non, paamanee ko’e mooɗon no boole ngaɗata, ɗonmaa ngartee ɓe kallaa bo pooli.10.16: Luk 10.3.¹⁷Paamanee yimɓe, ngam ɓe njaaray’on yeeso mawɓe, ɓe piya’on nder cuuɗi do’aare maɓɓe, ¹⁸ɓe njaara’on yeeso mawɓe leydi e laamiiɓe, ngam on tokkuɓeyam on kokkayɓe habaru am. Non wartay laawol no kokkirtonɓe habaru am kamɓe e yimɓe naa’ Yahuudanko’en. ¹⁹Fuu carel ngel ɗum nangi’on ɗum yaari’on yeeso laamu, to’ on ngannu dow no metirton, koo ko mbi’oton, ngam nder carel ngel ɗum wi’ay’on ko mbi’oton. ²⁰Ngam naa’ ɗum onon metata, ammaa ɗum Ruuhu Nyaako mooɗon Mo Dow metata nder konduɗe mooɗon.10.17‑20: Mar 13.9‑11; Luk 12.11,12; 21.12‑15.

²¹“Neɗɗo hokkitiray sakiraawo muuɗum ɗum waramo, nyaako maa hokkitiray ɓiɗɗo muuɗum. Ɓiɓɓe ummanto danyooɓe maɓɓe, ɓe ngaɗa ɗum waraɓe.10.21: Mar 13.12; Luk 21.16.²²Koo moye wanyay’on ngam on tokkuɓeyam. Ammaa munyuɗo haa re’irde hisay.10.22: Maat 24.9; Mar 13.13; Luk 21.17; Maat 24.13; Mar 13.13.²³To yimɓe torrii’on nder wondi gariiri, ndoggee njahon wondi gariiri. E mi wi’a’on goonga, ko njahidon gariije Israa’iila fuu, Ɓii Neɗɗo wartoyay.

²⁴“Ekkitotooɗo ɓurataa moodibbo muuɗum, maccuɗo boo ɓurataa jeyɗomo.10.24: Luk 6.40; Yah 13.16; 15.20.²⁵Ekkitotooɗo nanay belɗum to wartii bo moodibbo muuɗum, maccuɗo maa nanay belɗum to wartii bo jeyɗomo. To ɓe noddirii joomu wuro on Ba’aljabul laamiiɗo ginni, ɓe ɓuray wiiki ko halli dow ɓe wuro ngon!10.25: Maat 9.34; 12.24; Mar 3.22; Luk 11.15.

Kaanuɗo Hulee

(Luka 12.2‑7)

²⁶“Ngam non, to’ on kulu yimɓe, ngam walaa goɗɗum ombaaɗum ɗum omtataake, non maa walaa cuuɗiiɗum ɗum suuritataake.10.26: Mar 4.22; Luk 8.17.²⁷Ko mbiimi’on nder nyiwre, mbi’eeka nyalawma, non maa ko nanɗon to am e suuɗe, mbi’eeka e njayri. ²⁸To’ on kulu warooɓe ɓandu neɗɗo, ammaa ɓe mbaawataa warki yonki maako. Sey ni kulon on ɗon baawayɗo halka ɓandu e yonki fuu nder wuro hiite. ²⁹Naa’ coloy ɗiɗoy e cooree yamnde go’o? Fuu e non walaa koo go’otel maakoy baatayngel naa e yidde Nyaako mooɗon Mo Dow. ³⁰Koo gaasa ko’e mooɗon maa fuu ka limaama. ³¹Ngam non, to’ on kulu, on ɓurii coloy ɗuɗkoy.

Jaɓuki Almasiihu Yeeso Yimɓe

(Luka 12.8,9)

³²“Koo moye jaɓuɗoyam yeeso yimɓe, mi jaɓaymo yeeso Nyaako am Mo Dow. ³³Ammaa fuu ganyuɗoyam yeeso yimɓe, min maa mi wanyaymo yeeso Nyaako am Mo Dow.10.33: 2Tim 2.12.

Mi Waddaayi Jonde Jam

(Luka 12.51‑53; 14.26,27)

³⁴“To’ on kammo mi waroyii waddanki duuniyaaru jonde jam. Mi waroyaayi ngam wadduki jonde jam, sey ni hawre. ³⁵Mi warii ngam mi wadda sendirki hakkunde ɓiɗɗo e nyaako muuɗum, ɓiɗɗo debbo e maduujo muuɗum, debbo boo e esiraawo muuɗum debbo. ³⁶Ɓe njooɗodiɗaa wuro go’o ɓe ngartay wanywanyɓe maaɗa.10.35,36: Miik 7.6.

³⁷“Koo moye ɓuri yiɗuki nyaako muuɗum koo maduujo muuɗum dow am, o fotaayi wartuki tokkuɗoyam. Ɗonmaa fuu ɓurɗo yiɗuki ɓiɗɗo muuɗum dow am, o fotaayi wartuki tokkuɗoyam. ³⁸Nden fuu mo hoccaayi gaafaangal muuɗum tokkiyam, o fotaayi wartuki tokkuɗoyam.10.38: Maat 16.24; Mar 8.34; Luk 9.23.³⁹Fuu giɗɗo hisnuki yonki muuɗum, o dullayki. Ammaa fuu dulluɗo yonki muuɗum ngam am, o hisnayki.10.39: Maat 16.25; Mar 8.35; Luk 9.24; 17.33; Yah 12.25.

Mbarjaari

(Markus 9.41)

⁴⁰“Fuu jaɓuɗo’on jaɓiiyam, ɗonmaa fuu jaɓuɗoyam jaɓii on ɗon liloyɗoyam.10.40: Luk 10.16; Yah 13.20; Mar 9.37; Luk 9.48.⁴¹Koo moye jaɓuɗo annabiijo ngam o annabiijo, o heɓay mbarjaari annabiijo. Nden koo moye jaɓuɗo aadiliijo ngam o aadiliijo, o heɓay mbarjaari aadiliijo. ⁴²Koo moye kokkuɗo ɓurɗo famɗuki nder tokkuɓeyam ɓe’e koo ndiyam pewɗam nder jardugel ngam o tokkuɗoyam, e mi wi’a’on goonga, o dullataa heɓuki mbarjaari.”

Yeesu e Yahaya Gaɗoowo Baptisma

(Luka 7.18‑35)

¹Nde Yeesu yottini ko wi’ata tokkuɓemo sappo e ɗiɗo, sey o ummii daga ɗon, o dilli, e mo ekkitina, e mo wa’ajina nder gariije.

²E carel ngel, Yahaya Gaɗoowo Baptisma suraama nder suudu cural. Nde o nani habaru ko Almasiihu waɗata, sey o noddi woɓɓe nder tokkuɓemo o liliɓe to maako ³ngam ɓe ƴamamo, ɓe mbi’a, “An woni Almasiihu mo ɗum wi’i waray, koo min keɗoo goɗɗo?”

⁴Yeesu nootii, wi’iɓe, “Njahee, mbi’on Yahaya ko nanuɗon e ko ngiiɗon: ⁵wumɓe e mbumta, jaraaɓe e njaaɓa, gooduɓe nyawu nyaamoojum laral e njamɗitinee, pahuɓe e nana, mayɓe e umminee, ɓe ngalanaa e nga’ajinanee Habaru Belɗum.11.5: Ica 35.5,6; Ica 61.1.⁶O barkiɗinaaɗo neɗɗo mo alaayi hoolaakiyam.”

⁷Gaɗa lilaaɓe ɓen ndilli, sey Yeesu fuɗɗi metanki yimɓe dow Yahaya, o wi’iɓe, “Ɗume njaaɗon raaroyki nder ladde? Kuɗol ngol hendu dimbata ndaaroyɗon? ⁸To naa’ non, ɗume njaaɗon raaroyki? Neɗɗo ɓorniiɗo limce boɗɗe? Naa’ non, ngam ɓornotooɓe limce boɗɗe e laamorde ɓe ngoni. ⁹Too, ɗume njaaɗon raaroyki? Annabiijo? E mi wi’a’on goonga, o ɓurii annabiijo. ¹⁰Kanko woni mo Allah wi’i nder aayaare, ‘Raɗɗum, mi liloyay lilaaɗo am o ardoo yeeso maaɗa o mo’’inanmaa laawol.’11.10: Mal 3.1.¹¹E mi wi’a’on goonga, nder ɓe rewɓe ndanyi fuu walaa ɓurɗo Yahaya Gaɗoowo Baptisma mangu. Fuu e non, ɓurɗo famɗuki nder Laamu Allah11.11: Neɗɗo nattay Laamu Allah carel ngel o jaɓi Yeesu woni Joomiraawo. ɓuriimo mangu. ¹²Daga jaamanu Yahaya Gaɗoowo Baptisma haa wadduki hande, Laamu Allah e torree. Torrooɓe laamu ɗum e ngiɗi teetaɗum e sembe. ¹³Ngam Defte Annabo’en fuu e Attawra metii dow laamu ɗum naa Yahaya Gaɗoowo Baptisma wari.11.12,13: Luk 16.16.¹⁴To on njaɓay ko ɓe mbi’i, Yahaya woni Iliya mo ɗum wi’i waray.11.14: Mal 4.5; Maat 17.10‑13; Mar 9.11‑13.¹⁵Gooduɗo noppi nanuki fuu nana.

¹⁶“Ko nandinaymi yimɓe jaamanu ɗu’um? E ɓe nandi e sukahoy njooɗiikoy nder luumo e noddindira, e mbi’a, ¹⁷‘Min nduudanii’on duudaandu, ammaa on ngamaayi. Min mboyi bo goɗɗo maayi, ammaa on mboyaayi.’ ¹⁸Ngam Yahaya Gaɗoowo Baptisma warii nyaamataa nyamndu yarataa ndiyam inabojam, sey ɓe mbi’i, ‘E mo woodi ginnol.’ ¹⁹Ɓii Neɗɗo boo warii e nyaama e yara, sey ɓe mbi’i, ‘Raa o’o, o beelaaɗo o jaroowo, higo jaɓooɓe ceede leydi e gaɗooɓe hakke.’ Fuu e non, tokkuɓe laawol Allah fuu e ɓe kolla kangol woni goongawol.”

Gariije Ɗe Tuubaayi

(Luka 10.13‑15)

²⁰Sey o fuɗɗi haɓanki gariije ɗe o waɗi kuuɗe kayɗiniiɗe nder maaje ngam yimɓe gariije ɗen tuubaayi. ²¹O wi’i, “Yimɓe gariiri Korasin, on mbonii! Yimɓe gariiri Betasayda, on mbonii! Daa kuuɗe kayɗiniiɗe gaɗaaɗe nder mooɗon ɗe ngaɗanaama yimɓe Taaya e Sidon, daa ɓe ɓornake kolte kollayɗe wannaare ɓe njooɗake nder tooka ngam holluki ɓe tuubii.11.21: Ica 23.1‑18; Ijik 26.1—28.26; Yow 3.4‑8; Amos 1.9,10; Jak 9.2‑4.²²Ammaa e mi wi’a’on, Nyalnde Jaango Allah ɓuray yurminanki yimɓe Taaya e Sidon dow mooɗon. ²³Onon boo, yimɓe gariiri Kafarnahum, on kammii ɗum hoccay’on yaaki dow? Naa’ non! Ɗum nattinay’on nder ngayka hiite. Daa kuuɗe kayɗiniiɗe gaɗaaɗe nder maaɗa ɗe ngaɗaama nder gariiri Sodom, daa e ndi ɗon haa jooni.11.23: Ica 14.13‑15; Fuɗ 19.24‑28.²⁴Ammaa e mi wi’a’on, Nyalnde Jaango Allah ɓuray yurminanki yimɓe Sodom dow mooɗon.”11.24: Maat 10.15; Luk 10.12.

Siwtaare Torrotooɓe

(Luka 10.21,22)

²⁵E carel ngel Yeesu wi’i, “Mi yettiima, Nyaako am Mo Dow, Joomiraawo dow e ley, ngam a suuɗii fii ɗu’um to gooduɓe faamu e andal, a holliiɗum ɓikkoy pamaroy. ²⁶Non Nyaako am, ngam non welanmaa ngaɗaa.”

²⁷Sey o wi’i yimɓe, “Nyaako am hokkiiyam koo ɗume. Walaa anduɗo moye woni Ɓiɗɗo on sey ni Nyaako on, non maa walaa anduɗo Nyaako on sey ni Ɓiɗɗo on, e mo Ɓiɗɗo on yiɗi andina Nyaako on.11.27: Yah 3.35; Yah 1.18; 10.15.

²⁸“Ngaree to am on fuu dondiiɓe doŋle tedduɗe, mi hokkay’on siwtaare. ²⁹Tokkee ko mbi’aymi’on. Ekkitee to am, ngam e mi woodi hakkiilo, mi lestinɗo hoore, nden ɓerɗe mooɗon mbaltoto.11.29: Irm 6.16.³⁰Ngam ko mbiimi’on ngaɗon ɗum saɗaa waɗuki, nden dongal am teddaa.”

Ƴamol Dow Nyalnde Siwtaare

(Markus 2.23‑28; Luka 6.1‑5)

¹E carel ngel ɗum Nyalnde Siwtaare. Yeesu e yaha nder ngesa alkamaari, sey tokkuɓemo nani weelo ɓe puɗɗi ɓoruki cammeeje mayri e ɓe nyaama.12.1: TA 23.25.²Ammaa nde woɓɓe Faarisanko’en ngi’i non, mbi’i Yeesu, “Raa tokkuɓema e ngaɗa ko Attawra haɗi ɗum waɗa Nyalnde Siwtaare.”

³Sey Yeesu wi’iɓe, “On meeɗaayi janguki ko Dawda waɗi nde nani weelo, kanko e gonduɓe e maako? ⁴O natti Lukuru Seniiɗum, o nyaami buroodi ceniiɗum, o hokkori jaadooɓe e maako. Attawra boo wi’ii ardiiɓe diina tan haani nyaamuki buroodi ɗum.12.3,4: 1Sam 21.1‑6.12.4: KLee 24.9.⁵Koo on meeɗaayi janguki nder Attawra no ardiiɓe diina ngewirta dooka Nyalnde Siwtaare nder Wuro Ceniingo, ammaa ɗum wartaayi hakke?12.5: Lim 28.9,10.⁶E mi wi’a’on, raa ɓurɗo Wuro Ceniingo ɗo’o. ⁷Ammaa daa on andunoo ma’ana aayaare nde’e bi’unde, ‘E mi yiɗi kollon yurmeende, naa’ sakkuki cakkiri,’ daa on kiitaaki ɓe ngaɗaayi hakke.12.7: Maat 9.13; Yuuc 6.6.⁸Ngam Ɓii Neɗɗo woni Joomu Nyalnde Siwtaare.”

Yeesu Yamɗitinii Mo Jungo Jaraango

(Markus 3.1‑6; Luka 6.6‑11)

⁹Sey Yeesu ali ɗon dilli, natti suudu do’aare maɓɓe. ¹⁰E woodi goɗɗo mo jungo jaraango nder mayru. Sey Faarisanko’en ƴami Yeesu, mbi’i, “Attawra jaɓii ɗum yamɗitina Nyalnde Siwtaare?” Ɓe mbi’u non ngam ɓe keɓa ko ɓe ngulliroytoomo.

¹¹Sey Yeesu wi’iɓe, “Moye nder mooɗon to e woodi mbaala go’o to nga yanii nder ngayka Nyalnde Siwtaare, o jogataakonga o ittoyanga? ¹²Too! Neɗɗo ɓurii mbaala daraja naa’ seɗɗa! Ngam non, Attawra haɗaayi ɗum waɗa ko wooɗi Nyalnde Siwtaare.”12.12: Luk 14.5.¹³Sey o wi’i neɗɗo on, “Fortu jungo maaɗa.”

Sey o fortingo, sey ngo yamɗiti, ngo warti bo wo’oto ngon. ¹⁴Ammaa Faarisanko’en ɓen mburtii meddi dow no ɓe mbardata Yeesu.

Maccuɗo Mo Allah Suɓi

¹⁵Nde Yeesu faami ko ɓe ciryotoo, sey o ummii o ali wigeere nden. Sey yimɓe ɗuɗɓe tokkimo, o yamɗitiniɓe ɓe fuu, ¹⁶o wagginiɓe to’ ɓe mbi’aka koo moye kanko o moye. ¹⁷Ɗu’um fuu waɗii ngam ɗum hebbina ko Allah wi’i daga honduko Annabi Icaaya, wiiki,

¹⁸“O’o woni maccuɗo mo cuɓumi,

mo ngiɗumi, e mi nana belɗum maako naa’ seɗɗa.

Mi hokkaymo Ruuhu am,

o hokkay lenyi habaru kisndam am.

¹⁹O yeddataa o metataa sembee,

walaa nanayɗo hoolo hononde maako dow ɗate.

²⁰O heenyitataa yewuki ƴombal ɓadiingal yewuki.

O nyifataa fitilaaru ɓadiindu waatuki,

naa o waɗii aadilaaku heɓi jaalorgal dow halleende.

²¹Lenyi fuu ngaɗay kammunde dow maako.”12.18‑21: Ica 42.1‑4.

Yeesu e Ba’aljabul

(Markus 3.20‑30; Luka 11.14‑23)

²²Sey ɗum waddanimo goɗɗo paho bumɗo gooduɗo ginnol. Yeesu boo yamɗitinimo, o warti e mo meta, e mo yi’a. ²³Kawrutuɓe fuu kayɗini, mbi’i, “E yiiki mooɗon koo o’o woni Ɓiɗɗo Dawda?”

²⁴Ammaa nde Faarisanko’en nani non, ɓe mbi’i, “E bawɗe Ba’aljabul laamiiɗo ginni o wurtinirta ginni.”12.24: Maat 9.34; 10.25.

²⁵Ammaa Yeesu e andi ko woni nder ɓerɗe maɓɓe, o wi’iɓe, “Laamu fuu cendiiɗum e wanywanytira, ɗum lallay. Non maa to gariiri koo wuro sendake e wanywanytira, ɗum waawataa ɗum daroo. ²⁶To Ceyɗan e wurtina ginni Ceyɗan nder laamu Ceyɗan, Ceyɗan sendake e wanywanytira won ɗon. To laamu maako sendake, noye laamu ɗum darortoo? ²⁷To e mi wurtinira ginni nder bawɗe Ba’aljabul, e bawɗe moye tokkuɓe’on mburtinirtaɗi? Ngam non tokkuɓe’on kollay on ngalaa goonga. ²⁸Ammaa, to e mi wurtina ginni nder bawɗe Ruuhu Allah, too, hollii Laamu Allah waranii’on.

²⁹“No waɗata ɗum waawa nattuki wuro neɗɗo cembiɗɗo ɗum teetanamo ko o woodi, naa’ sey to ɗum artii haɓɓukimo? Nden ɗum waawa hoccuki ko o woodi nder wuro ngon.

³⁰“Mo wondaa e am fuu, o ganyo am. Mo wallaayiyam moɓtuki fuu, o cankitoowo.12.30: Mar 9.40.³¹Ngam non, e mi wi’a’on, ɗum waaway yaafanaaki yimɓe hakke e koo iri ɗiye haalaaji ɗi mbooɗaa ɗi ɓe meti, ammaa bi’uɗo ko wooɗaa dow Ruuhu Allah o yaafantaake. ³²Fuu bi’uɗo ko wooɗaa dow Ɓii Neɗɗo, ɗum waaway yaafanaakimo. Ammaa fuu bi’uɗo ko wooɗaa dow Ruuhu Allah, o yaafantaake haa abadaa.12.32: Luk 12.10.

Lekki e Ɓikkoy Maaki

(Luka 6.43‑45)

³³“Lekki boɗki e rima ɓikkoy mboɗkoy, non maa lekki ki wooɗaa e rima ɓikkoy koy mbooɗaa. Koo kiye lekki e andiree ɓikkoy maaki.12.33: Maat 7.20; Luk 6.44.³⁴Onon boole kalluɗe! No waɗata onon kalluɓe meton ko wooɗi? Ngam honduko neɗɗo e meta ko woni nder ɓernde muuɗum.12.34: Maat 3.7; 23.33; Luk 3.7; Maat 15.18; Luk 6.45.³⁵Neɗɗo mo ngikku boɗɗum e wurtina fii boɗɗum daga nder ɓernde muuɗum. Non maa neɗɗo kalluɗo e wurtina halleende daga nder ɓernde muuɗum.

³⁶“E mi wi’a’on, nder Nyalnde Jaango koo moye doole wi’a Allah ngam ɗume wi’i koo ɗeye boliiɗe meereeje. ³⁷Dow boliiɗe ɗe mbi’uɗaa ɗum waɗirantama kiita, koo ɗe nangumaa, koo ɗe mburtinmaa.”

Yiɗuki Holleeki Kayɗiniiɗum

(Markus 8.11,12; Luka 11.29‑32)

³⁸Sey woɓɓe nder moodiɓɓe Attawra e Faarisanko’en mbi’imo, “Moodibbo, e min ngiɗi yiiki goɗɗum kayɗiniiɗum daga to maaɗa tabbitinayɗum Allah liloymaa.”12.38: Maat 16.1; Mar 8.11; Luk 11.16.

³⁹Sey Yeesu nootii, wi’iɓe, “Yimɓe jaamanu ɗu’um kalluɓe ɓe kulataa Allah, e ɓe ngiɗi holleeki goɗɗum kayɗiniiɗum, ammaa walaa ko ɗum hollataɓe sey ni ko heɓuno Annabi Inuusa.12.39: Maat 16.4; Mar 8.12.⁴⁰Ngam non, no Inuusa waɗiri balɗe tati jemma e nyalawma nder wonga linga manga, non maa Ɓii Neɗɗo waɗirta balɗe tati jemma e nyalawma nder yenaande.12.40: Inu 1.17.⁴¹E Nyalnde Jaango yimɓe gariiri Niineba ɓe ummodoto e yimɓe jaamanu ɗu’um. Ɓe kolla ko yimɓe jaamanu ɗu’um ngaɗi ɗum wooɗaa, ngam kamɓe, nde ɓe nani wa’aju Annabi Inuusa, ɓe tuubii. Raa boo ɓurɗo Inuusa ɗo’o.12.41: Inu 3.5.⁴²Nyalnde Jaango laamiiɗo leydi fombina debbo o ummodoto e yimɓe jaamanu ɗu’um. O holla ko ɓe ngaɗi ɗum wooɗaa, ngam kanko o waroyii daga ɓadaaki nanuki faamu Annabi Suleymaanu. Raa boo ɓurɗo Suleymaanu ɗo’o.12.42: 1Laam 10.1‑10; 2HL 9.1‑12.

Wartuki Ginnol

(Luka 11.24‑26)

⁴³“To ginnol wurtake nder ɓandu neɗɗo, ngol yahay to bigeeje jorɗe e ngol ɗaɓɓita to ngol siwtotoo. Ammaa to ngol heɓaayi, ⁴⁴sey ngol wi’a, ‘Mi so’’oto wuro ngo mburtoyiimi.’ To ngol wartii, ngol tawii wuro ngon walaa goɗɗum nder, ngo wuuwaama ngo mo’’inaama. ⁴⁵Sey ngol yaha ngol waddoya ginni joweeɗiɗi ɓurɗingol halluki, ɗi natta ɗi njooɗoo ɗon. Nden re’irde neɗɗo on ɓuray fuɗɗoode maako halluki. Non ɗum wartanta yimɓe jaamanu ɗu’um kalluɗum.”

Maduujo Yeesu e Minyiraaɓe Maako

(Markus 3.31‑35; Luka 8.19‑21)

⁴⁶Yeesu e medda e yimɓe ɗuɗɓe hawrutuɓe, sey raa maduujo maako e minyiraaɓe maako ngari ndarii yaasi, e ɓe ngiɗi medduki e maako. ⁴⁷Sey goɗɗo wi’imo, “Maduujo maaɗa e minyiraaɓe maaɗa e ton ndarii yaasi, e ɓe ngiɗi medduki e maaɗa.” ⁴⁸Ammaa o wi’i biiɗomoka on, “Moye woni maduujo am, nden ɓeye ngoni minyiraaɓe am?” ⁴⁹Sey o sappii tokkuɓemo, o wi’i, “Raa maduujo am e minyiraaɓe am ɗo’o! ⁵⁰Ngam koo moye waɗi ko Nyaako am Mo Dow yiɗi, kanko woni minyiraawo am e maduujo am.”

Misaalu Dow Demoowo

(Markus 4.1‑9; Luka 8.4‑8)

¹Nyalnde nden Yeesu wurtii wuro ngon, yahi jooɗii haade Mbeela Galiili. ²Yimɓe ɗuɗɓe kawriti to maako naaki o natti komiwal o jooɗii nder maagal dow ndiyam. Kawrutuɓe fuu ndarii haade mbeela ngan.13.2: Luk 5.1‑3.³Sey o huutiri misaalu o ekkitiɓe ekkitinol feere‑feere ɗuɗngol, o wi’i,

“Goɗɗo demoowo yahi ngesa ngam saaka awdi. ⁴E mo nder saakuki awdi ndin, wondi yani dow ɗatal, colli ngari cuppidindi. ⁵Wondi boo yani nder kaaƴe, ɗon ndi heɓaayi leydi ɗundi. Ndi fuɗi jawɗum ngam leydi ndin luggaa. ⁶Ammaa nde naange wurtoyii fiyindi, sey ndi yoori ngam ndi walaa ɗaɗi. ⁷Wondi awdi boo yani nder gi’e, sey gi’e ɗen mawni ɓiɗɗindi haa ndi waawaayi waɗuki cammeeje. ⁸Ammaa wondi awdi yani dow leydi mbondi ndi fuɗi ndi mawni ndi waɗi cammeeje. Wondi waɗi gabbe 100, wondi waɗi gabbe 60, wondi waɗi 30.”

⁹Nde Yeesu heenyi hokkuki misaalu ɗu’um, sey wi’i, “Gooduɗo noppi nanuki fuu nana.”

Ko Waɗi Yeesu Huutiri Misaalu

(Markus 4.10‑12; Luka 8.9,10)

¹⁰Sey tokkuɓemo ngari ƴamimo, mbi’i, “Ngam ɗume metirantaaɓe e misaalu nihi?”

¹¹O nootii o wi’iɓe, “Onon on kokkaama faamu sirru Laamu Allah, ammaa kamɓe ɓe kokkaaka. ¹²Ngam fuu gooduɗo faamu dow Laamu Allah ɗum ɓeydanaymo, haa ɗum ɗuuɗanamo. Ammaa mo walaa faamu dow Laamu Allah, koo ko o woodi maa ɗum jaɓayɗum.13.12: Maat 25.29; Mar 4.25; Luk 8.18; 19.26.¹³Ko waɗi metiranaymi yimɓe e misaalu woni, ngam koo ɓe ndaarii ɓe ngi’ataa, koo ɓe kettindake ɓe nanataa, ɗonmaa ɓe paamataa. ¹⁴Dow maɓɓe ɗum hebbini ko Allah wi’i daga honduko Icaaya,

‘On ngaɗay ka nanuki, ammaa on paamataa koo seɗɗa.

On ngaɗay ka raaruki, ammaa on ngi’ataa koo seɗɗa.

¹⁵Ngam ɓerɗe yimɓe ɓen ɗon ɗe cembiɗɗe,

nden ɓe cukkii noppi maɓɓe,

ɓe maɓɓii gite maɓɓe,

ngam to’ ɓe ngi’a e gite maɓɓe,

to’ ɓe nana e noppi maɓɓe,

ɓe paama nder ɓerɗe maɓɓe haa

ɓe ngarta to am,

mi yamɗitina ɓerɗe maɓɓe.’13.14,15: Ica 6.9,10.

¹⁶“Ammaa onon, gite mooɗon ɗe barkiɗinaaɗe ngam e ɗe ngi’a, e noppi mooɗon ngam e ɗi nana. ¹⁷E mi wi’a’on goonga, annabo’en e aadili’en ɗuɗɓe ngiɗii ngi’a ko ngiiɗon, ammaa ɓe ngi’aayi. Ɓe boo ngiɗii nanuki ko nanoton, ammaa ɓe nanaayi.13.16,17: Luk 10.23,24.

Ma’ana Misaalu Dow Demoowo

(Markus 4.13‑20; Luka 8.11‑15)

¹⁸“Too, raa ma’ana misaalu demoowo on ɗon. ¹⁹Fuu nanuɗo habaru Laamu Allah o heɓtaayiɗum, sey Ceyɗan wara hocca ko ɗum aawi nder ɓernde maako. Ɗum ɗon woni misaalu awdi njanundi dow ɗatal. ²⁰Janundi dow kaaƴe woni misaalu nanuɗo Wolde Allah ɗon e ɗon o jaɓande e belɗum ɓernde. ²¹Ammaa nde wolde nden walaa ɗaɗi nder ɓernde maako, o munyay carel seɗɗa tan. To caɗeele koo torra warii ngam wolde nden, ɗon e ɗon o yoofande. ²²Janundi nder gi’e woni misaalu nanɓe Wolde Allah, ammaa wannuki e fii duuniyaaru, e yidde jawdi, ɓiɗɗi wolde nden kaɗinde wallukiɓe ɓe ngaɗa ko Allah yiɗi. ²³Ammaa awdi caakaandi dow leydi mbondi woni misaalu nanɗo Wolde Allah, o faaminde boɗɗum, o waɗi ko Allah wi’i, o huutinirinde haa o heɓi ɓeydaari. Goɗɗo heɓi nde 100, goɗɗo boo heɓi nde 60, goɗɗo heɓi nde 30.”

Geene Nder Ngesa Alkamaari

²⁴Sey Yeesu hokkiɓe goɗɗum misaalu wi’i, “Laamu Allah e nandi e goɗɗo neɗɗo aawuɗo alkamaari mbondi nder ngesa muuɗum. ²⁵Ammaa jemma, koo moye e ɗaanii, sey goɗɗo ganyo maako yahi saaki awdi goɗɗe geene nder alkamaari ndin dilli. ²⁶Nde alkamaari ndin fuɗi, mawni waɗi cammeeje, sey geene ɗen maa ummoyii. ²⁷Sey maccuɓe joomu ngesa kan ngari mbi’imo, ‘Joomu wuro, naa’ awdi mbondi aawuɗaa to ngesa maaɗa? Too, no waɗi geene puɗoyi nder mayri?’ ²⁸O wi’iɓe, ‘Ɗum goɗɗo ganyo am waɗi non.’ Sey maccuɓe ɓen mbi’imo, ‘A yiɗi min njaha min ittaɗe?’ ²⁹Ammaa o wi’iɓe, ‘Naa’ non. Ngam to on ittaɗe, on ittay fuu e alkamaari ndin. ³⁰Aleeɗe ɗe mawnida e mayri naa carel taƴukindi waɗi. To carel taƴukindi waɗi, mi wi’ay taƴooɓe ɓen arta taƴuki geene ɗen ɓe kaɓɓaɗe kaɓɓe‑kaɓɓe, ɗum wulaɗe. Ammaa alkamaari ndin, ɓe ngaɗandi nder resirde gawri am.’ ”

Misaalu Dow Gabbel Mastat

(Markus 4.30‑32; Luka 13.18,19)

³¹Yeesu fuɗɗiti hokkiɓe goɗɗum misaalu wi’i, “Laamu Allah e nandi e gabbel mastat ngel goɗɗo hocci aawi nder ngesa muuɗum. ³²Kangel woni gabbel ɓurngel famɗuki nder ngabboy fuu, ammaa to ngel mawni, sey ngel ɓura koo ngele leggel mawnuki, haa colli ngara ngaɗa caɓɓe dow lice maagel.”

Misaalu Dow Ƴuufinirɗum

(Luka 13.20,21)

³³Yeesu fuɗɗiti hokkiɓe goɗɗum misaalu wi’i, “Laamu Allah e nandi e ƴuufinirɗum ɗum goɗɗo debbo hocci lancindiri e condi alkamaari poondirkoy tatoy, haa ndi fuu ndi ƴuufi.”

Ko Waɗi Yeesu Huutiri Misaalu

(Markus 4.33,34)

³⁴Yeesu metirani hawrutuɓe ɓen fuu fii ɗu’um e misaalu. Fuu ko o wi’ataɓe e mo huutira misaalu. ³⁵O waɗii non ngam o hebbina ko Allah wi’i daga honduko annabiijo wiiki,

“Mi metiranay yimɓe e misaalu.

Ko suuɗii daga taguki duuniyaaru, mi wurtinayɗum e njayri.”13.35: Jab 78.2.

Ma’ana Misaalu Geene Nder Alkamaari

³⁶Sey Yeesu ali yimɓe ɓen natti wuro. Tokkuɓemo ngari to maako mbi’imo, “Wi’umin ma’ana misaalu geene nder ngesa alkamaari.”

³⁷O wi’iɓe, “Aawuɗo awdi mbondi ndin woni Ɓii Neɗɗo. ³⁸Ngesa kan woni duuniyaaru. Nden awdi mbondi ndin woni ɓiɓɓe Laamu Allah. Geene ɗen ngoni ɓiɓɓe Ceyɗan. ³⁹On ɗon ganyo aawuɗo geene ɗen, kanko woni Ceyɗan. Carel taƴukindi woni re’uki duuniyaaru, nden taƴooɓendi ngoni malaa’ika’en. ⁴⁰Non no ɗum hawritirta geene ɗum wulaɗe, non ɗum waɗata e re’uki duuniyaaru. ⁴¹Ɓii Neɗɗo liloyay malaa’ika’en muuɗum, ɓe mburtina koo ɗume pooɗoojum yimɓe ngaɗa hakke e fuu gaɗooɓe ko halli nder Laamu Allah. ⁴²Sey malaa’ika’en ɓen kubooɓe nder hiite kallunge. Ɗon ɓe mboyata ɓe nyerƴindira nyiiƴe. ⁴³Nden aadili’en ɗelkitoto bo naange nder Laamu Nyaako maɓɓe Mo Dow. Fuu gooduɗo noppi nanuki nana.

Jawdi Cuuɗiindi

⁴⁴“Laamu Allah e nandi e jawdi cuuɗiindi e ngesa ndi goɗɗo heɓti, o fuɗɗiti o suuɗindi. Nder welwelo o yahi, o soori fuu ko o woodi o soodi ngesa kan.

Misaalu Dow Lu’u‑Lu’u

⁴⁵“Ɗonmaa Laamu Allah e nandi e neɗɗo coodoowo e sooritoo ɗaɓɓitoowo lu’u‑lu’u gooduɗum ceede. ⁴⁶Nde o yi’i go’o gooduɗum ceede ɗuɗɗe, sey o yahi o soori fuu ko o woodi, o soodi lu’u‑lu’u ɗum.

Misaalu Dow Nangirɗum Liƴƴi

⁴⁷“Ɗonmaa Laamu Allah e nandi e nangirɗum liƴƴi ɗum woɓɓe kubii nder mbeela, ɗum nangoyi koo iri ɗiye liƴƴi. ⁴⁸Nde ɗum heewi, ɓe pooɗoyiɗum daande mbeela ngan, ɓe njooɗii, ɓe cupti liƴƴi boɗɗi, ɓe ngaɗiɗi nder faandu, ammaa ɓe cankiti ɗi mbooɗaa ɗin. ⁴⁹Non ɗum waɗata e re’uki duuniyaaru. Malaa’ika’en ngaray kakkita kalluɓe daga nder aadili’en, ⁵⁰ɓe kuboo kalluɓe ɓen nder hiite kallunge. Ɗon ɓe mboyata ɓe nyerƴindira nyiiƴe.

Jawdi Keyri e Kiindi

⁵¹“On paamii fuu ɗu’um?” Ɓe nootii ɓe mbi’i, “Ee.”

⁵²Sey o wi’iɓe, “Too, fuu moodibbo Attawra ekkitiiɗo dow Laamu Allah e mo nandi e joomu wuro burtinɗo jawdi keyri e kiindi nder ndesa muuɗum.”

Ɗum Wanyii Yeesu Nder Gariiri Najarat

(Markus 6.1‑6; Luka 4.16‑30)

⁵³Nde Yeesu heenyi wiikiɓe fuu misaalu ɗu’um, sey o ummii o ali wigeere nden. ⁵⁴O yahi gariiri to o mawni, o fuɗɗi ekkitinki yimɓe nder suudu do’aare maɓɓe haa ɓe kayɗini, ɓe mbi’i, “Toye neɗɗo o’o heɓi faamu ɗu’um e bawɗe waɗuki kuuɗe kayɗiniiɗe ɗe’e? ⁵⁵Naa’ kanko woni ɓiɗɗo on ɗon cehoowo? Naa’ maduujo maako e wi’ee Maryaama? Naa’ Yaakubu e Yusufu e Siiman e Yahuuda ngoni minyiraaɓe maako? ⁵⁶Nden naa’ en ngondi e minyiraaɓe maako rewɓe? Too, toye neɗɗo o’o heɓi fuu fii ɗu’um?” ⁵⁷Sey ɓe nganyi hoolaaki Yeesu.

Ammaa Yeesu wi’iɓe, “Koo toye yimɓe e kokka annabiijo mangu, ammaa yimɓe gariiri maako, e yimɓe wuro maako ɓe kokkataamo mangu.”13.57: Yah 4.44.⁵⁸Yeesu waɗaayi goɗɗum kayɗiniiɗum ton ngam ɓe koolaakimo.

Mayde Yahaya Gaɗoowo Baptisma

(Markus 6.14‑29; Luka 9.7‑9)

¹E carel ngel Hirudus Laamiiɗo nani habaru Yeesu. ²Sey o wi’i maccuɓe maako, “On ɗon ɗum Yahaya Gaɗoowo Baptisma umminaa daga mayde, kanjum waɗi e mo woodi bawɗe waɗuki kuuɗe kayɗiniiɗe.”

³Ngam ndenno Hirudus e hoore muuɗum waɗii ɗum nangii Yahaya, ɗum haɓɓimo, ɗum surimo nder suudu cural. Hirudus waɗi non ngam Hiruudiya debbo mawniraawo maako Filibus mo o te’i. ⁴Ngam ndenno Yahaya wi’ii Hirudus, “Ɗum haanaayi te’aamo.”14.3,4: Luk 3.19,20.14.4: KLee 18.16; 20.21.⁵Non waɗi Hirudus e yiɗi warki Yahaya, ammaa e mo hula yimɓe, ngam ɓe njaɓii Yahaya o annabiijo.

⁶Ammaa nde nyalnde humto siftorki danyngol Hirudus wari, sey ɓiɗɗo Hiruudiya surbaajo wami yeeso hoɓɓe garɓe humto ngon. Gamol maako welii Hirudus, ⁷haa waɗanimo alkawal hunaniimo wiiki hokkaymo koo ɗume ko o torii.

⁸Sey maduujo maako wi’imo ko o wi’ata. Surbaajo on wi’i Hirudus, “Hokkam hoore Yahaya Gaɗoowo Baptisma nder le’al jooni.”

⁹Laamiiɗo on boo wanni, ammaa ngam o yaadake o hunanakemo yeeso hoɓɓe, o waɗi ɗum hokkamo hoore nden. ¹⁰O lili woɓɓe ittonoyi Yahaya hoore nder suudu cural. ¹¹Ɗum waddi hoore nden nder le’al, ɗum hokki surbaajo on. Surbaajo on boo waddaninde maduujo muuɗum. ¹²Sey tokkuɓe Yahaya on ngari kocci ɓandu ndun uwoyindu. Nden ɓe njahi ɓe mbi’oyika Yeesu.

Yeesu Nyamnii Yimɓe 5,000

(Markus 6.30‑44; Luka 9.10‑17; Yahaya 6.1‑14)

¹³Nde Yeesu nani non, sey natti komiwal e tokkuɓemo ɓe ndilli to wigeere nder ladde kamɓe tan. Ammaa nde yimɓe ɗuɗɓe nani non, ɓe mburtoyii daga gariije, ɓe tokkimo e koyɗe. ¹⁴E jippaaki Yeesu daga nder komiwal ngal o yi’i yimɓe ɗuɗɓe e kawriti, sey o nani jurumɗum maɓɓe, o yamɗitini ɓe njamɗaa nder maɓɓe.

¹⁵Nde naange hiirii, sey tokkuɓemo ngari to maako, mbi’imo, “Ɗo’o ɗum ladde, ɗonmaa naange hiiri. Wi’u yimɓe ɓe’e ndilla ngam ɓe njaha ngarihoy ɓe coodana ko’e maɓɓe ko ɓe nyaamata.”

¹⁶Yeesu wi’iɓe, “Naa’ doole ɓe ndilla. Onon kokkeeɓe ko ɓe nyaamata.”

¹⁷Sey ɓe nootii ɓe mbi’imo, “Buroodi jowi e liƴƴi ɗiɗi tan min ngoodi.”

¹⁸Sey o wi’i, “Ngaddaneeyamɗum ɗo’o.” ¹⁹O wi’i hawrutuɓe ɓen njooɗoo dow huɗo hecco. O hocci buroodi jowi ɗum e liƴƴi ɗiɗi ɗin, o raari dow, o yetti Allah, o sendi buroodi ɗum o hokki tokkuɓemo, sey tokkuɓemo ngeedani yimɓe hawrutuɓe. ²⁰Ɓe fuu ɓe nyaami ɓe kaari. Tokkuɓemo moɓti ko hori ko waɗi kondooje sappo e ɗiɗi. ²¹Nyaamuɓe nyamndu ndun worɓe tan ɓadake 5,000, sukaaɓe e rewɓe limaaka.

Yeesu Waɗii Yaadu Dow Ndiyam

(Markus 6.45‑52; Yahaya 6.15‑21)

²²Ɗon e ɗon Yeesu waɗi tokkuɓemo natta komiwal ɓe artamo huuluki yaaki fongo, kanko boo o jaɓɓitoto kawrutuɓe. ²³Gaɗa o jaɓɓitake hawrutuɓe ɓen, o ƴenti hocceere kanko tan ngam o waɗa do’aare. Nde futuro waɗi, e mo ton kanko tan. ²⁴E carel ngel komiwal ngal e caka mbeela. Geelooɗi ndiyam e piyangal, hendu e haɗaɓe yaadu.

²⁵Fajiri e mo yaha to maɓɓe, e mo yaha dow ndiyam mbeela ngan. ²⁶Ammaa nde ɓe ngi’imo e mo yaha dow ndiyam, ɓe kultori, ɓe mbi’i, “Ɗum ginnol!” Sey ɓe ngulli ngam kulol.

²⁷Ammaa ɗon e ɗon o metaniɓe, o wi’i, “Pukkinee ɓerɗe mooɗon, ɗum min. To’ on kulu.”

²⁸Sey Biiturus nootii, wi’imo, “Moodibbo, to ɗum an, wi’am mi wara to maaɗa dow ndiyam ɗam.”

²⁹Yeesu wi’imo, “Woroy.” Sey Biiturus wurtii nder komiwal ngal fuɗɗi yaadu dow ndiyam ɗam yaaki to Yeesu. ³⁰Ammaa nde o nani hendu cembindu, sey o hultori, ndiyam ɗam fuɗɗi moɗukimo, sey o wulli, o wi’i, “Moodibbo, hisnam!”

³¹Ɗon e ɗon Yeesu forti jungo muuɗum fooɗoyimo, wi’imo, “An gooduɗo hoolaare seɗɗa, ngam ɗume ngaɗuɗaa seko?”

³²E nattuki maɓɓe nder komiwal ngal, hendu ndun darii. ³³Wonɓe nder komiwal ngal mawnini Yeesu, e mbi’a, “Goonga, an a Ɓiɗɗo Allah.”

Yeesu Yamɗitinii Nyawɓe e Gariiri Janisarat

(Markus 6.53‑56)

³⁴Nde ɓe kuuli fongo mbeela ngan, ɓe njottii leydi Janisarat. ³⁵Nde yimɓe leydi ndin anditi Yeesu, ɓe lili koo toye nder leydi ndin ɗum waddoya fuu nyawɓe to maako. ³⁶Ɓe toriimo nyawɓe ɓen meema cilmbi toggoore maako tan. Fuu meemuɓeɗi njamɗiti.

Ndonu Maama’en

(Markus 7.1‑13)

¹Sey woɓɓe Faarisanko’en e moodiɓɓe Attawra ngari to Yeesu daga Urucaliima, ɓe mbi’i, ²“Ngam ɗume tokkuɓema tokkataa ndonu maama’en meeɗen? Ngam ɓe lootataa juuɗe maɓɓe ko ɓe puɗɗa nyaamuki nyamndu.”

³Sey Yeesu nootii, wi’iɓe, “Onon maa, ngam ɗume on tokkataa ko Allah wi’i ngam ndonu mooɗon? ⁴Ngam Allah wi’ii, ‘Hokku nyaako maaɗa e maduujo maaɗa mangu,’ nden, ‘Koo moye huɗi nyaako muuɗum koo maduujo muuɗum doole waree.’15.4: Wur 20.12; TA 5.16; Wur 21.17; KLee 20.9.⁵Ammaa onon on mbi’a to neɗɗo wi’ii nyaako muuɗum koo maduujo muuɗum, ‘Fuu ko kokkaynomaami, mi hokkiiɗum Allah,’ too, naa’ doole neɗɗo on mawnina nyaako maako won ɗon. ⁶Non ngartirɗon Wolde Allah meere ngam ndonu mooɗon. ⁷Onon munaafuki’en! Icaaya wi’ii goonga nde o waɗi annabaaku dow mooɗon wiiki,

⁸Allah wi’ii, ‘Ɓen ɗon yimɓe e honduko tan ɓe mawnintayam,

ammaa ɓerɗe maɓɓe e ngoɗɗitiiyam.

⁹E meere ɓe mawnintayam.

E ɓe ekkitina dooka yimɓe bo to am ɗum ƴiwoyi.’ ”15.8,9: Ica 29.13.

Fii Gaɗayɗum Neɗɗo Warta Mo Laaɓaa Yeeso Allah

(Markus 7.14‑23)

¹⁰Sey Yeesu noddi yimɓe hawrutuɓe, wi’iɓe, “Kettindee, paamon. ¹¹Naa’ ko nattata neɗɗo e honduko wartirta ɓernde maako nde laaɓaa yeeso Allah, ammaa ko wurtoytoo daga nder honduko maako wartirtamo mo laaɓaa yeeso Allah.”

¹²Sey tokkuɓemo ngari to maako, mbi’imo, “A andi Faarisanko’en nanii monnere nde ɓe nani kan ɗon haala ka mbiiɗaa?”

¹³Yeesu nootii, wi’i, “Fuu awre nde ɗum aawi, to naa’ Nyaako am Mo Dow aawinde, ɗum ɗoofaynde. ¹⁴Aleeɓe! Ɓe wumɓe ardiiɓe wumɓe. To bumɗo ardake bumɗo, ɓe fuu ɗiɗo ɓe njanay nder ngayka.”15.14: Luk 6.39.

¹⁵Sey Biiturus wi’imo, “Wi’umin ma’ana ɗu’um misaalu.”

¹⁶Yeesu wi’iɓe, “Haa jooni onon maa on paamaayi? ¹⁷On andaa fuu ko natti nder honduko neɗɗo nder reedu maako ɗum natti, nden ɗum wurtoto? ¹⁸Ammaa ko wurtoyii nder honduko, daga nder ɓernde ɗum ƴiwoyi. Kanjum wartirta neɗɗo mo laaɓaa yeeso Allah.15.18: Maat 12.34.¹⁹Ngam daga nder ɓernde neɗɗo nyumo kallungo wurtoytoo, e warhoore, e njeenu, e njeenu hakkunde yimɓe ɓe ngalaa teegal, e nguyka, e ceyda fewre, e wonnuki inde neɗɗo. ²⁰Ɗu’um kanjum wartirta neɗɗo mo laaɓaa yeeso Allah, ammaa nyaamuki nyamndu e juuɗe ɗe lootaaka naa’ kanjum wartirta neɗɗo mo laaɓaa yeeso Allah.”

Hoolaare Debbo Kan’aaniyankeejo

(Markus 7.24‑30)

²¹Yeesu ali ɗon yahi haade gariije Taaya e Sidon. ²²Sey raa goɗɗo Kan’aaniyankeejo debbo neɗɗo leydi ndin wari noddi sembee, wi’i, “Moodibbo, Ɓii Dawda, yurminanam! Wongol ginnol e torra ɓiɗɗo am surbaajo.”

²³Ammaa Yeesu wi’aayimo goɗɗum. Sey tokkuɓemo ngari toriimo, mbi’i, “Riiwumo, ngam e mo tokki’en e mo wanna’en e wulluki!”

²⁴Sey o wi’i debbo on, “Mi liloyaaka to woɓɓe, sey to baali majjuɗi ɗi lenyol Israa’iila tan.”

²⁵Ammaa o wari o diccii yeeso Yeesu, o wi’i, “Moodibbo, wallam!”

²⁶Yeesu nootii, wi’i, “Ɗum haanaayi ɗum hocca nyamndu ɓikkoy ɗum hubanoondu kutihoy.”

²⁷O wi’i, “Ee, ɗum non, Moodibbo, ammaa koo kutihoy e nyaama horaano januɗum daga teebur jeyɗokoy.”

²⁸Sey Yeesu nootii, wi’imo, “Hoolaare maaɗa e ɗuuɗi! Ɗum waɗante no ngiɗɗaa.” Ɗon e ɗon ɓiɗɗo maako yamɗiti.

Yeesu Yamɗitinii Yimɓe Ɗuɗɓe

²⁹Yeesu ummii, ali ɗon, tokki haade Mbeela Galiili, o ƴenti dow hocceere o jooɗii. ³⁰Yimɓe ɗuɗɓe ngari to maako, ɓe ngaddoyi ɓe koyɗe jaraaɗe, e wumɓe, e laƴooɓe, e ɓe mbaawataa metuki, e woɓɓe ɗuɗɓe gooduɓe nyawuuji. Ɓe ndesiɓe yeeso maako, sey o yamɗitiniɓe. ³¹Yimɓe kayɗini nde ngi’i yimɓe ɓe metataa e meta, laƴooɓe e njaha, ɓe koyɗe jaraaɗe e njaaɓa, wumɓe e ngi’a. Sey ɓe manti Allah Israa’iila.

Yeesu Nyamnii Yimɓe 4,000

(Markus 8.1‑10)

³²Sey Yeesu noddi tokkuɓemo, wi’iɓe, “E mi nana jurumɗum yimɓe ɓe’e ngam hande balɗe maɓɓe tati e ɓe ngondi e am, ammaa ɓe ngalaa ko ɓe nyaamata. Mi yiɗaa ɓe ndillida e weelo, ngam ɗum saɗaa ɓe pekkora dow ɗatal.”

³³Sey tokkuɓemo mbi’imo, “Toye min keɓoyta buroodi nder ladde nde’e keƴayɗum yimɓe ɗuɗɓe ɓe’e?”

³⁴Yeesu ƴamiɓe wi’i, “Buroodi noye ngooduɗon?”

Ɓe mbi’i, “Buroodi joweeɗiɗi e liƴƴi seɗɗa.”

³⁵Sey o wi’i yimɓe hawrutuɓe ɓen fuu ɓe njooɗoo e leydi. ³⁶O hocci buroodi joweeɗiɗi ɗum e liƴƴi ɗin, o yetti Allah, o sendiɗum, o hokki tokkuɓemo, kamɓe boo ɓe ngeedani yimɓe ɓen. ³⁷Yimɓe ɓen fuu nyaami kaari. Gaɗa maajum tokkuɓemo moɓti ko horii, ɗum heewi kondooje joweeɗiɗi. ³⁸Nyamɓe ɓen worɓe tan ngaɗi 4,000, rewɓe e sukaaɓe limaaka.

³⁹Gaɗa Yeesu jaɓɓitake hawrutuɓe ɓen, sey o natti komiwal, o dilli leydi Magadan.

Ardiiɓe Ngiɗi Waɗaneeki Kayɗiniiɗum

(Markus 8.11‑13; Luka 12.54‑56)

¹Faarisanko’en e Saadusanko’en ngari to Yeesu, e ɓe ngiɗi foondukimo, sey ɓe mbi’imo o waɗanaɓe goɗɗum kayɗiniiɗum ƴiwoyɗum to Allah.16.1: Maat 12.38; Luk 11.16.²Yeesu nootii, wi’iɓe, “To naange hiirii, dow woojii, on mbi’a, ‘Jaango njayri wooɗay.’ ³Ɗonmaa to subaka waɗii on ngi’ii dow woojii e woodi duule koo toye, on mbi’a, ‘Hande ɗum waɗay iyeende.’ On mbaawi raaruki ko woni e dow andon ko waɗata, ammaa on mbaawataa faamuki ma’ana kuuɗe ɗe ngaɗaymi. ⁴Yimɓe jaamanu ɗu’um kalluɓe ɓe kulataa Allah, e ɓe ngiɗi holleeki goɗɗum kayɗiniiɗum, ammaa walaa ko ɗum hollataɓe sey ni ko heɓuno Annabi Inuusa.”16.4: Maat 12.39; Luk 11.29.

Sey o aliɓe o dilli.

Ƴuufinirɗum Faarisanko’en e Saadusanko’en

(Markus 8.14‑21)

⁵Nde tokkuɓemo kuuli fongo mbeela, ɓe ngi’i ɓe ngejjitii ɓe ngardoya e buroodi. ⁶Sey Yeesu wi’iɓe, “Paamee, ngaɗee hakkiilo e ƴuufinirɗum Faarisanko’en e Saadusanko’en.”16.6: Luk 12.1.

⁷Sey tokkuɓemo meddi hakkunde maɓɓe, ɓe mbi’i, “O wi’u non ngam en ngaddaayi buroodi.”

⁸Nde Yeesu faami ko ɓe mbi’ata, sey o ƴamiɓe, o wi’ii, “Onon gooduɓe hoolaare seɗɗa, ngam ɗume meddoton dow on ngalaa buroodi? ⁹Haa jooni on paamaayi? On ciftoraayi no nyamnirmi yimɓe 5,000 e buroodi jowi, e kondooje sappo e ɗiɗi ɗe ɓoptuɗon e keewi horaano?16.9: Maat 14.17‑21.¹⁰Ɗonmaa on ciftoraayi no nyamnirmi yimɓe 4,000 e buroodi joweeɗiɗi, e kondooje joweeɗiɗi ɗe ɓoptuɗon e keewi horaano?16.10: Maat 15.34‑38.¹¹No ɗum waɗi on paamaayi naa’ dow buroodi metaymi? Mi wi’ii paamanee ƴuufinirɗum Faarisanko’en e Saadusanko’en.”

¹²Nden tokkuɓemo keɓti naa’ e mo metanaɓe ɓe paama dow ƴuufinirɗum gaɗeteeɗum nder buroodi, ammaa ɓe ngaɗa hakkiilo e ekkitinol Faarisanko’en e Saadusanko’en.

Biiturus Wi’ii Yeesu Woni Almasiihu

(Markus 8.27‑30; Luka 9.18‑21)

¹³Nde Yeesu wari leydi Kaysaariya Filibi, sey o ƴami tokkuɓemo, o wi’i, “Moye yimɓe mbi’ata Ɓii Neɗɗo woni?”

¹⁴Sey ɓe mbi’i, “Woɓɓe e mbi’a a Yahaya Gaɗoowo Baptisma. Woɓɓe boo e mbi’a a Annabi Iliya. Nden woɓɓe e mbi’a a Annabi Irmiya koo go’oto nder annabo’en.”16.14: Maat 14.1,2; Mar 6.14,15; Luk 9.7,8.

¹⁵O wi’iɓe, “Ammaa onon, moye mbi’otonyam?”

¹⁶Sey Siiman Biiturus nootii, wi’i, “An woni Almasiihu, Ɓiɗɗo Allah mo yonki.”16.16: Yah 6.68,69.

¹⁷Yeesu nootii wi’imo, “A barkiɗinaaɗo, Siiman ɓii Inuusa, ngam naa’ ɗum neɗɗo wi’imaaka, sey ni Nyaako am Mo Dow. ¹⁸E mi wi’imaa, an woni Biiturus, waato Tafaare. Dow tafaare nden njooɗinaymi tokkuɓeyam. Mayde fuu e bawɗe mayre waawataa jaalooɓe. ¹⁹Mi hokkete maɓɓitirkoy Laamu Allah, fuu ko kaɗuɗaa e duuniyaaru, Allah Mo Dow jaɓi. Ɗonmaa fuu ko aluɗaa ɗum waɗa e duuniyaaru, Allah Mo Dow jaɓii.”16.19: Maat 18.18; Yah 20.23.

²⁰Sey Yeesu haɗi tokkuɓemo to’ ɓe mbi’aka koo moye kanko woni Almasiihu.

Yeesu Wi’ii No Mayrata

(Markus 8.31—9.1; Luka 9.22‑27)

²¹Daga ngel ɗon carel Yeesu fuɗɗi wiiki tokkuɓemo doole o yaha Urucaliima, o yara bone ɗuɗɗum to juuɗe mawɓe yimɓe, e mawɓe ardiiɓe diina, e moodiɓɓe Attawra, nden o waree. Nder nyalnde tatawre boo ɗum umminaymo.

²²Sey Biiturus noddimo wuttudu go’o fuɗɗi haɓankimo, e wi’a, “Allah hoyna, Moodibbo! Non heɓataama haa abadaa!”

²³Ammaa Yeesu waylitii, wi’i Biiturus, “Sendir e am, an Ceyɗan! A kaɗayɗoyam waɗuki ko Allah yiɗi, ngam naa’ to Allah nyumo maaɗa ƴiwoyi, iri nyumo yimɓe nyumataa.”

²⁴Sey Yeesu wi’i tokkuɓemo, “Fuu giɗɗo warta tokkuɗoyam, doole wanya hoore muuɗum, hocca gaafaangal muuɗum, tokkayam.16.24: Waato siryoo yaruki bone koo ndeye haa mayde. Maat 10.38; Luk 14.27.²⁵Ngam fuu giɗɗo hisnuki yonki muuɗum o dullayki. Ammaa fuu dullayɗo yonki muuɗum ngam am o heɓayki.16.25: Maat 10.39; Luk 17.33; Yah 12.25.²⁶Ko ɗum nafanta neɗɗo to o heɓii duuniyaaru fuu, ammaa dullii yonki maako? Koo boo ko neɗɗo waawata hokkuki ngam jaɓtoya yonki muuɗum? ²⁷Ngam Ɓii Neɗɗo waray nder teddungal Nyaako muuɗum Mo Dow e malaa’ika’en maako, o waatanay koo moye ko waɗi.16.27: Maat 25.31; Jab 62.12; Room 2.6.²⁸E mi wi’a’on goonga, e woodi woɓɓe dariiɓe ɗo’o ɓe maayataa naa ɓe ngi’ii Ɓii Neɗɗo e waroya nder laamu muuɗum.”

Yeesu Wangii Nder Mangu Muuɗum

(Markus 9.2‑13; Luka 9.28‑36)

¹Gaɗa balɗe joweego’o, sey Yeesu hocci Biiturus e Yaakubu e minyiraawo maako Yahaya, o yaariɓe dow wonde hocceere townde kamɓe tan. ²Sey nandi maako wayliti yeeso maɓɓe. Yeeso maako e ɗelkitoo bo naange. Kolte maako ngarti daneeje tar bo jayngol. ³Ɗon e ɗon sey Annabi Muusa e Annabi Iliya wanganiɓe e ɓe medda e Yeesu. ⁴Sey Biiturus wi’i Yeesu, “Moodibbo, wonki amin ɗo’o e wooɗi. Al min nyiɓa cuuɗi tati ɗo’o, wo’oyru ndu maaɗa, wo’oyru ndu Muusa, nden wo’oyru ndu Iliya.”

⁵E mo nder metuki, sey raa wonga nduula ɗelkitotoonga wari suddiɓe. Ɓe nani hononde Allah daga nder maaga, wi’i, “O’o woni Ɓiɗɗo am mo ngiɗumi. E mi nana belɗum maako naa’ seɗɗa. Nanee ko o wi’ata’on!”17.5: Fuɗ 22.2; Jab 2.7; Ica 42.1; Maat 3.17; 12.18; Mar 1.11; Luk 3.22; TA 18.15.17.1‑5: 2Biit 1.17,18.

⁶Nde tokkuɓemo nani hononde nden, kulol mangol nangiɓe ɓe njani e leydi. ⁷Sey Yeesu wari meemiɓe, wi’i, “Ummee, to’ on kulu.” ⁸Nde ɓe ƴefti ko’e, ɓe ngi’aayi goɗɗo sey Yeesu tan.

⁹E ɓe njippoyoo daga dow hocceere nden, sey Yeesu wagginiɓe, wi’i, “To’ on mbi’u goɗɗo ko ngiiɗon naa ɗum ummini Ɓii Neɗɗo daga mayde.”

¹⁰Tokkuɓemo ƴamimo, mbi’i, “Too, ngam ɗume moodiɓɓe Attawra e mbi’a doole Annabi Iliya arta Almasiihu warki?”17.10: Mal 4.5.

¹¹O nootii, o wi’i, “Goonga Annabi Iliya artay warki, ngam o siryoo koo ɗume. ¹²Ammaa e mi wi’a’on, Iliya yaadake warii, ɓe boo keɓtaayi ɗum kanko, ammaa ɓe ngaɗanimo fuu ko ɓe ngiɗi. Non maa Ɓii Neɗɗo yaray bone e juuɗe maɓɓe.”17.12: Maat 11.14.

¹³Nden tokkuɓemo paami e mo metanaɓe dow Yahaya Gaɗoowo Baptisma.

Yeesu Yamɗitinii Suka Gooduɗo Ginnol

(Markus 9.14‑29; Luka 9.37‑43a)

¹⁴Nde ɓe njottii to yimɓe ɗuɗɓe kawriti, sey goɗɗo neɗɗo wari to Yeesu diccii yeeso maako wi’i, ¹⁵“Moodibbo, yurminan suka am e woodi nyawu paɗɗe, e mo torroo naa’ seɗɗa. Nde ɗuɗɗum e mo yana nder hiite e nder ndiyam. ¹⁶Mi yaariimo to tokkuɓema, ammaa ɓe mbaawaayi yamɗitinkimo.”

¹⁷Sey Yeesu nootii wi’i, “Onon yimɓe jaamanu ɗu’um kalluɗum on koolaakiyam, haa ndeye njooɗodotoomi e mooɗon e mi munyida e mooɗon? Ngaddaneeyam suka on ɗo’o.” ¹⁸Sey Yeesu haɓani ginnol ngol, ngol wurtii suka on, ɗon e ɗon o yamɗiti.

¹⁹Sey tokkuɓemo ngari to maako kamɓe tan, ɓe ƴamimo ɓe mbi’i, “Ngam ɗume minon min mbaawaayi wurtinki ginnol ngol?”

²⁰Yeesu nootii wi’iɓe, “Ngam hoolaare mooɗon famɗii. E mi wi’a’on goonga, daa on ngoodi hoolaaki famɗirki bo gabbel mastat, on mbaaway mbi’on hocceere nde’e, ‘Itta daga ɗo’o, yahu ɗaa’e,’ sey nde waɗa ko mbiiɗon. Walaa boo ko salorta’on.17.20: Maat 21.21; Mar 11.23; 1Kor 13.2.²¹[Ammaa iri ngo’ol ginnol ngol wurtataako sey e do’aare e suumaaki.]”

Yeesu Fuɗɗitii Wi’i Iri No Mayrata

(Markus 9.30‑32; Luka 9.43b‑45)

²²Nde Yeesu e tokkuɓemo kawriti e leydi Galiili, sey o wi’iɓe, “Ɗum hokkitiray Ɓii Neɗɗo nder juuɗe yimɓe, ²³ɓe mbaramo, e nyalnde tatawre ɗum umminaymo.” Sey fii ɗum wanni tokkuɓemo naa’ seɗɗa.

Ceede17.24: Waato haraaji. Wuro Ceniingo

²⁴Nde Yeesu e tokkuɓemo njottii gariiri Kafarnahum, jaɓooɓe ceede ngam Wuro Ceniingo ngari to Biiturus, ɓe mbi’imo, “Moodibbo mooɗon e hokka ceede walluki Wuro Ceniingo?”17.24: Wur 30.13; 38.26.

²⁵O wi’i, “Ee, e mo hokka.”

Nde Biiturus warti wuro, sey Yeesu arti metankimo, wi’i, “No ngiiɗaa, Biiturus? To ɓeye laamiiɓe duuniyaaru ndu’u njaɓata ceede leydi, to ɓiɓɓe maɓɓe koo to woɓɓe?”

²⁶Nde Biiturus wi’i, “To woɓɓe,” sey Yeesu wi’i, “Too, ɓiɓɓe maɓɓe njoɓataa won ɗon. ²⁷Fuu e non, ngam to’ ɓe nana monnere meeɗen, yahu mbeela ngaɗaa nangirɗum liƴƴi maaɗa. Fuu lingu ngu artuɗaa nanguki, maɓɓutu honduko maagu a taway yamnde ajurfaari nder. Hoccunde, kokkaaɓe njoɓaari Wuro Ceniingo ngam min e maaɗa.”

Moye Ɓuri Mangu?

(Markus 9.33‑37; Luka 9.46‑48)

¹E ngel ɗon carel tokkuɓe Yeesu ngari ƴamimo, mbi’i, “Moye ɓuri mangu fuu nder Laamu Allah?”18.1: Luk 22.24.

²Sey Yeesu noddi wongel sukayel pamarel darningel caka maɓɓe, ³wi’i, “E mi wi’a’on goonga, to naa’ on lestin ko’e mooɗon ngartuɗon bo sukahoy, on nattataa Laamu Allah koo seɗɗa!18.3: Mar 10.15; Luk 18.17.⁴Fuu lestinɗo hoore muuɗum bo sukayel pamarel nge’el, kanko woni ɓurɗo mangu nder Laamu Allah. ⁵Nden fuu jaɓuɗo sukayel pamarel bo nge’el nder inde am jaɓiiyam.

Ko Waddata Hakke

(Markus 9.42‑48; Luka 17.1,2)

⁶“Ammaa fuu gaɗuɗo go’oto nder sukaaɓe ɓe’e kooliiɓeyam waɗi hakke, ɗum ɓuranaymo o haɓɓanee kaaƴa namol manga e daande maako ɗum faɗɗamo nder mbeela luggunga. ⁷Duuniyaaru wonii ngam e woodi ko fooɗata yimɓe ngaɗa hakke! Ngam doole ko fooɗata yimɓe ngaɗa hakke wara, fuu e non fooɗuɗo goɗɗo waɗi hakke wonii.

⁸“To jungo maaɗa koo koyngal maaɗa e waɗumaa ngaɗaa hakke, too, ittungo paɗɗaango, koo ittungal paɗɗaangal. Ɗum ɓuraniima nattaa wuro Allah e jungo wo’oto koo koyngal go’otal dow ɗum hubomaa nder hiite nge nyifataa haa abadaa e juuɗe ɗiɗi koo koyɗe ɗiɗi.18.8: Maat 5.30.⁹To boo hitere maaɗa e waɗumaa ngaɗaa hakke, ittunde paɗɗaande. Ɗum ɓuraniima nattaa wuro Allah e hitere go’o dow ɗum hubomaa nder wuro hiite e gite ɗiɗi.18.9: Maat 5.29.

Misaalu Dow Mbaala Majjunga

(Luka 15.3‑7)

¹⁰“Paamee, to’ on njawan koo go’oto nder sukahoy pamaroy ko’oy. Ngam e mi wi’a’on, malaa’ika’en maakoy ton dow koo ndeye e ndaara yeeso Nyaako am Mo Dow.18.10: Luk 19.10.¹¹[Nden Ɓii Neɗɗo waroyii ngam hisna ko majji.]18.11: Luk 19.10.

¹²“Too, ko nyumoton? To neɗɗo e woodi baali 100, sey go’o nder baali ɗin majji, naa’ o alay koriiɗi ley hocceere, o dilla ɗaɓɓutuki mbaala majjunga ngan? ¹³E mi wi’a’on goonga, to o heɓtoyiinga, belɗum ɗum o nanata dow maaga ɗum ɓurii ɗum baali koriiɗi ɗin ɗi meeɗaayi majjuki. ¹⁴Non Nyaako mooɗon Mo Dow yiɗaa koo go’oto nder sukaaɓe pamarɓe ɓe’e halka.

To Goɗɗo Waɗaniima Ko Wooɗaa

¹⁵“To bandiraawo maaɗa waɗaniima ko wooɗaa, yahu mbi’aamo ko wooɗaa ɗum o waɗanmaa, an e maako tan. To o jaɓii, a wartirii sumpo hakkunde mooɗon won ɗon.18.15: Luk 17.3.¹⁶Ammaa to o wanyii jaɓuki, sey fuɗɗitaa co’’odoɗaa e neɗɗo go’oto koo ɗiɗo to maako, ngam ‘doole ɗum heɓa ceydu’en ɗiɗo koo tato ko ɗum tabbitina haala.’18.16: TA 19.15.¹⁷To boo o wanyii ko ɓe mbi’i kamɓe maa, sey mbi’aaka kawtal tokkuɓeyam. Ɗonmaa to o wanyii nanki kawtal tokkuɓeyam, hoccumo bo mo andaa Allah koo gooduɗo hakke ganyuɗo tuuba.

¹⁸“E mi wi’a’on goonga, fuu ko kaɗuɗon e duuniyaaru, Allah Mo Dow jaɓi. Ɗonmaa fuu ko aluɗon ɗum waɗa e duuniyaaru, Allah Mo Dow jaɓi.18.18: Maat 16.19; Yah 20.23.

¹⁹“Ɗonmaa, e mi wi’a’on, to yimɓe ɗiɗo nder mooɗon kawtii ko’e torake goɗɗum e duuniyaaru, Nyaako am Mo Dow waɗanayɓeɗum. ²⁰Ngam to yimɓe ɗiɗo koo tato kawriti nder inde am, e mi wondi e maɓɓe.”

Misaalu Dow Maccuɗo Mo Yaafaaki

²¹Sey Biiturus ɓaddoyii wi’i Yeesu, “Moodibbo, nde noye bandiraawo am e waɗanayam ko wooɗaa e mi yaafanoomo? Nde joweeɗiɗi?”

²²Yeesu nootii wi’imo, “Naa’ nde joweeɗiɗi tan, ammaa joweeɗiɗi nde cappanɗe joweeɗiɗi.18.21,22: Luk 17.3,4.18.22: Fuɗ 4.24.²³Ngam non, ɗum nandinay Laamu Allah e goɗɗo laamiiɗo giɗɗo lima jawdi muuɗum ngondi jungo kuwanooɓemo. ²⁴Nde o fuɗɗi limukindi, sey ɗum waddanimo goɗɗo mo o tokkata nyamaande ceede ɗe o waawataa yoɓuki haa keerol jonde maako e duuniyaaru. ²⁵Nde o tampi yoɓuki, sey laamiiɗo on waɗi ɗum sooramo e debbo maako e ɓiɓɓe maako e koo ɗume ko o woodi ngam ɗum yoɓa ceede ɗen. ²⁶Sey maccuɗo on diccii yeeso maako, toriimo, wi’i, ‘Waɗu munyal. Mi yoɓete koo ɗume.’ ²⁷Sey laamiiɗo on nani jurumɗum maccuɗo on yaafaniimo nyamaande nden yoofimo.

²⁸“Ammaa maccuɗo on e wurtaaki maako o tawi goɗɗo mo o huudata mo o tokkata nyamaande ceede ɗe ɗum yoɓata kuwoowo to ngesa lebbi jowi. O ɗeɗɗanimo daande, o wi’imo, ‘Yoɓam ko tokkaymaami!’ ²⁹Sey mo o huudata on dicci toriimo, wi’i, ‘Waɗanam munyal mi yoɓete.’ ³⁰Ammaa o wanyi, o waɗi ɗum maɓɓimo nder suudu cural sey nde o yoɓimo ko o tokkatamo. ³¹Nde higooɓe kuugal maako ngi’i non, ɓe nganni naa’ seɗɗa. Sey ɓe njahi ɓe mbi’ika laamiiɗo on fuu ko waɗi.

³²“Sey laamiiɗo on noddi maccuɗo on, wi’imo, ‘An a maccuɗo kalluɗo! Mi yaafanakema fuu nyamaande nde tokkaymaami ngam a torakeyam. ³³Too, haanaayi njurminanaa mo kuudataa non no njurminiranmaami?’ ³⁴Laamiiɗo on nani monnere naa’ seɗɗa, o waɗi ɗum nangimo ɗum waɗa ka torrukimo naa o yoɓii koo ɗume ko ɗum tokkatamo.

³⁵“Non Nyaako am Mo Dow waɗanta koo moye mooɗon mo yaafanaaki bandiraawo muuɗum e ɓernde go’o.”

Ekkitinol Yeesu Dow Warki Teegal

(Markus 10.1‑12)

¹Nde Yeesu heenyi wiiki fii ɗu’um, sey o ali leydi Galiili o natti leydi Yahuudiya ngondi fongo Caangol Urdun. ²Yimɓe ɗuɗɓe tokkimo, o yamɗitini nyawɓe ton.

³Sey woɓɓe Faarisanko’en ngari to maako ngam ɓe poondamo, ɓe ƴamimo, ɓe mbi’i, “E yiiki maaɗa Attawra alii neɗɗo yoofa19.3: Waato seera koo sendira e debbo muuɗum. debbo muuɗum?”

⁴O nootii, o wi’i, “Too, on meeɗaayi janguki aayaare biinde taguɗo yimɓe daga fuɗɗoode taguki o tagiiɓe gorko e debbo?19.4: Fuɗ 1.27; 5.2.⁵O wi’ii, ‘Ngam non neɗɗo alay nyaako muuɗum e maduujo muuɗum takkanoo debbo muuɗum, kamɓe ɗiɗo ɓe ngarta go’o.’19.5: Fuɗ 2.24.⁶Ngam non naa’ ɓe ɗiɗo kadin, ammaa ɓe ngartii neɗɗo go’oto. Ngam maajum ko Allah hawti, to’ neɗɗo sendaɗum.”

⁷Sey ɓe mbi’imo, “Too, ngam ɗume Annabi Muusa wi’i neɗɗo windana debbo muuɗum ɗerewol warki teegal wi’amo o dilla?”19.7: TA 24.1‑4; Maat 5.31.

⁸Sey Yeesu wi’iɓe, “Ngam ɓerɗe mooɗon ɗe caatuɗe waɗi Muusa ali’on njoofon rewɓe mooɗon, ammaa naa’ non ɗum woni daga arande. ⁹E mi wi’a’on, koo moye yoofi debbo muuɗum, to naa’ njeenu o waɗi, nden te’i goɗɗo debbo, waɗii njeenu won ɗon.”19.9: Maat 5.32; 1Kor 7.10,11.

¹⁰Sey tokkuɓemo mbi’imo, “To non ɗum woni hakkunde neɗɗo e debbo muuɗum, too, ciya teegal maa ɓurii.”

¹¹Ammaa o wi’iɓe, “Naa’ koo moye waawata jaɓuki haala ka’a, sey ni ɓe Allah wawni. ¹²Ngam e woodi ɓe ɗum danyi ngorgu maɓɓe e waati. E woodi woɓɓe boo ɓe yimɓe tappi. Nden e woodi woɓɓe ɓe te’ataa ngam ɗaɓɓutuki Laamu Allah. Fuu baawayɗo jaɓuki haala ka’a jaɓaka.”

Yeesu Barkiɗinii Sukahoy Pamaroy

(Markus 10.13‑16; Luka 18.15‑17)

¹³Sey ɗum waddani Yeesu sukahoy pamaroy ngam o yowanakoy juuɗe o waɗanakoy do’aare. Ammaa tokkuɓemo kaɓani gaddayɓekoy. ¹⁴Sey Yeesu wi’iɓe, “Alee sukahoy pamaroy ngara to am. To’ on kaɗukoy, ngam gooduɓe ɓerɗe iri ɗe maakoy njeyi Laamu Allah.”

¹⁵Sey o yowanikoy juuɗe maako ngam barkiɗinki, nden o dilli.

Kayeejo Diskuɗo

(Markus 10.17‑31; Luka 18.18‑30)

¹⁶Sey goɗɗo ɓaddoyii to Yeesu wi’i, “Moodibbo, ɗume fii geetum haani mi waɗa ngam mi heɓa yonki ki re’ataa?”

¹⁷Sey Yeesu wi’imo, “Ngam ɗume ƴamataayam dow geetum? E woodi geeto go’oto tan. Taa yiɗi keɓaa yonki ki re’ataa, tokku ko Attawra wi’i.”

¹⁸Sey o wi’i Yeesu, “Ɗume Attawra wi’i?”19.18: Wur 20.13; TA 5.17; Wur 20.14; TA 5.18; Wur 20.15; TA 5.19; Wur 20.16; TA 5.20.

Sey Yeesu wi’i, “Taa’ waɗu warhoore. Taa’ waɗu njeenu. Taa’ wujju. Taa’ hokku ceyda fewre. ¹⁹Hokku nyaako maaɗa e maduujo maaɗa mangu. Yiɗu bandiraawo maaɗa no ngiɗirɗaa hoore maaɗa.”19.19: Wur 20.12; TA 5.16; KLee 19.18.

²⁰Sey kayeejo on wi’imo, “E mi waɗa fuu fii ɗu’um. Ko horaniiyam kadin?”

²¹Yeesu wi’imo, “Taa yiɗi ngartaa kewɗo, yahu, cooraa ko ngooduɗaa fuu, kokkaa ɓe ngalanaa ceede ɗen, nden a heɓay mbarjaari ton dow. Nden ngaraa, tokkaayam.”

²²Nde kayeejo on nani non, o dilli o nanaayi belɗum, ngam e mo woodi risku ɗuɗɗum.

²³Sey Yeesu wi’i tokkuɓemo, “E mi wi’a’on goonga, e ɗum saɗi naa’ seɗɗa diskuɗo natta Laamu Allah. ²⁴Ɗonmaa e mi wi’a’on, ɗum ɓuray hoyki ngeelooba tokka nder yolnde baatal dow diskuɗo natta Laamu Allah.”

²⁵Nde tokkuɓemo nani non, ɓe kayɗini naa’ seɗɗa, ɓe mbi’i, “Too, to ɗum non, moye hisata?”

²⁶Ammaa Yeesu raariɓe, wi’i, “To yimɓe ɗum waɗataako, ammaa to Allah koo ɗume ɗum gaɗotooɗum.”

²⁷Sey Biiturus wi’i, “Too, raɗɗum, minon min alii koo ɗume min tokkiima. Ko min keɓata?”

²⁸Yeesu wi’iɓe, “E mi wi’a’on goonga, e jaamanu garayɗum, to Ɓii Neɗɗo jooɗake dow jooɗorgal laamu muuɗum ɗum teddungal, onon tokkuɓeyam onon maa on njooɗoto dow jooɗorle laamu sappo e ɗiɗi, on laamoo lenyi Israa’iila sappo e ɗiɗi.19.28: Maat 25.31; Luk 22.30.²⁹Ɗonmaa koo moye aluɗo gureeje, koo sakiraaɓe muuɗum worɓe koo rewɓe, koo nyaako, koo maduujo, koo ɓiɓɓe, koo gese ngam am, o heɓay ko ɓuri non nde 100, nden o heɓay yonki ki re’ataa. ³⁰Ammaa yimɓe ɗuɗɓe artuɓe ɓe ngartay cakitiiɓe, nden cakitiiɓe ngartay artuɓe.19.30: Maat 20.16; Luk 13.30.

Huwooɓe Nder Ngesa Inabooje

¹“Laamu Allah e nandi e goɗɗo joomu ngesa burtiiɗo ilaa subaka ngam o heɓa huwooɓe to ngesa inabooje maako. ²O waadi e maɓɓe o yoɓayɓe yamnde ajurfaari go’o e nyalnde, sey o wi’iɓe ɓe njaha ngesa kan. ³Nde o wurtii faro njamndi joweenayi subaka, sey o yi’i woɓɓe e njooɗii e meere nder luumo. ⁴Sey o wi’iɓe, ‘Onon maa njahee ngesa am, mi yoɓay’on ko haani.’ Sey ɓe njahi. ⁵Nde o fuɗɗiti o wurtii, o waɗi non faro caka nyalawma e faro njamndi tati alaasara. ⁶Faro njamndi jowi alaasara o fuɗɗiti o wurtii o tawi woɓɓe e ndarii, o wi’iɓe, ‘Ngam ɗume nyalluɗon on ndarii e meere?’ ⁷Sey ɓe mbi’imo, ‘Ngam walaa koccuɗomin kuugal.’ Sey o wi’iɓe, ‘Onon maa njahee ngesa am.’

⁸“Nde futuro waɗi, joomu ngesa on wi’i paamanoowo kuugal ngesa kan, ‘Noddoy huwooɓe ɓen, njoɓaaɓe njoɓaari maɓɓe, artiraa cakitiiɓe ɓen haa yaaki arande’en ɓen.’20.8: KLee 19.13; TA 24.15.⁹Nde koccaaɓe faro njamndi jowi alaasara ngari, koo moye hokkaa yamnde ajurfaari go’o. ¹⁰Ngam non, nde arande’en ngari, e ɓe kammii ɓe keɓay ko ɓuri non, ammaa koo moye maɓɓe hokkaa yamnde ajurfaari go’o. ¹¹Nde ɓe njaɓi ceede ɗen, ɓe metitani joomu ngesa on, ¹²e ɓe mbi’a, ‘Ɓe’e cakitiiɓe e waruki, carel seɗɗa tan ɓe kuwi, nden a hokkiiɓe no kokkuɗaamin, minon nyalluɓe nder naange e kuwa.’ ¹³Sey o nootii, o wi’i go’oto nder maɓɓe, ‘Higo, mi hallanaayima. Naa’ en ngaadii dow yamnde ajurfaari go’o e nyalnde? ¹⁴Jaɓu njoɓaari maaɗa, ndillaa. Min yiɗi hokkuki cakitiiɓe ɓen no kokkumaami. ¹⁵Mi walaa laamu mi waɗa no ngiɗumi waɗuki e ceede am? Koo a nana lawliiru ngam mi waɗi ko wooɗi?’ ”

¹⁶Nden o yottini e wiiki, “Non yimɓe cakitiiɓe ɓe ngartay artuɓe, nden artuɓe ngartay cakitiiɓe.”20.16: Maat 19.30; Mar 10.31; Luk 13.30.

Yeesu Fuɗɗitii Wi’ii No Mayrata

(Markus 10.32‑34; Luka 18.31‑34)

¹⁷Yeesu e tokkuɓemo e dow ɗatal yaaki Urucaliima, sey o noddiɓe wuttudu laawol, o wi’iɓe, ¹⁸“Raɗɗum, en njahay Urucaliima, nden ɗum waɗay Ɓii Neɗɗo nder juuɗe mawɓe ardiiɓe diina e moodiɓɓe Attawra. Ɓe taƴanaymo kiita mayde, ¹⁹ɓe ngaɗamo nder juuɗe heeferɓe ɓe njukkitamo, ɓe piyamo, ɓe mbaramo dow gaafaangal. Nden nyalnde tatawre ɗum umminaymo daga mayde.”

Tornde Maduujo Yaakubu e Yahaya

(Markus 10.35‑45)

²⁰Sey maduujo ɓiɓɓe Jabadi wari to Yeesu e ɓiɓɓe maako o diccii yeeso maako, ngam o toroomo goɗɗum.

²¹Sey Yeesu wi’imo, “Ko ngiɗɗaa?”

Maduujo on wi’imo, “Waɗu ɓiɓɓe am ɓe’e ɗiɗo njooɗoo wuttudu jooɗorgal maaɗa nder Laamu maaɗa, go’oto nyaamo maaɗa go’oto nano maaɗa.”

²²Ammaa Yeesu nootii, wi’i, “On andaa ko torotooɗon. On mbaaway njaron iri jardugel torra ngel njaraymi yeeso ɗo’o?”

Ɓe mbi’imo, “Ee, min mbaaway.”

²³Sey Yeesu wi’iɓe, “Ee, on njaray iri jardugel torra ngel njaraymi, ammaa jooɗaaki e jungo am nyaamo e jungo am nano naa’ min hokkataɗum. Ɗe’e bigeeje ɗum ɗe ɓen ɗon ɓe Nyaako am Mo Dow siryanii.”

²⁴Nde horiiɓe tokkuɓe Yeesu sappo nani non, ɓe puɗɗi monnanki Yaakubu e Yahaya. ²⁵Ammaa Yeesu noddiɓe ɓe fuu, wi’iɓe, “On andi laamiiɓe yimɓe naa’ Yahuudanko’en e kollaɓe laamu sembe, nden mawɓe maɓɓe maa e kolla ɓural. ²⁶Ammaa onon, to’ on ngaɗu non hakkunde mooɗon. Fuu giɗɗo warta mawɗo nder mooɗon doole warta jaggantooɗo’on.20.25,26: Luk 22.25,26.²⁷Kadin fuu giɗɗo warta ardiiɗo mooɗon, doole o warta maccuɗo mooɗon.20.26,27: Maat 23.11; Mar 9.35; Luk 22.26.²⁸Non maa Ɓii Neɗɗo warii naa’ ngam o jagganee, ammaa ngam o jagganoo yimɓe, o hokka yonki maako ngam rimɗinki ɗuɗɓe.”

Yeesu Wumtinii Wumɓe Ɗiɗo

(Markus 10.46‑52; Luka 18.35‑43)

²⁹Yeesu e tokkuɓemo e mburtoo gariiri Jeriiko, sey yimɓe ɗuɗɓe tokkimo. ³⁰Sey raa wumɓe ɗiɗo e njooɗii haade ɗatal. Nde ɓe nani Yeesu e ƴaɓɓoo, sey ɓe noddi sembee, “Moodibbo, Ɓiɗɗo Dawda, yurminanmin!”

³¹Kawrutuɓe ɓen kaɓaniɓe ɓe nde’’ita, ammaa ɓe ɓeydi nodduki e sembe, e ɓe mbi’a, “Moodibbo, Ɓiɗɗo Dawda, yurminanmin!”

³²Sey Yeesu darii, noddiɓe, wi’i, “Ko ngiɗɗon mi waɗana’on?”

³³Ɓe mbi’imo, “Moodibbo, e min ngiɗi mbumtinaamin.”

³⁴Yeesu nani jurumɗum maɓɓe, meemi gite maɓɓe. Ɗon e ɗon gite maɓɓe mbumti, ɓe tokkimo.

Yeesu Nattii Urucaliima

(Markus 11.1‑11; Luka 19.28‑40; Yahaya 12.12‑19)

¹Nde Yeesu e tokkuɓemo ɓadii gariyel Betafaaji haade Urucaliima to Hocceere Nde Leɗɗe Jaytun, sey o lili tokkuɓemo ɗiɗo. ²O wi’iɓe, “Njahee nder gariyel gongel yeeso meeɗen. E nattuki mooɗon, on taway mbabba e haɓɓii e ɓinga maaga. Pittoyeeɗi ngaddanonyamɗi. ³To goɗɗo metanii’on, mbi’ee, ‘Moodibbo e yiɗi huutiraɗi, o waɗay ɗum wartiraɗi naa’ ko neeɓi.’ ”

⁴Non waɗii ngam ɗum hebbina ko Allah wi’i daga honduko Annabi Jakaariya, wiiki,

⁵“Mbi’ee yimɓe Urucaliima,

‘Raa laamiiɗo mooɗon e wara to mooɗon!

O lestinɗo hoore e mo dow mbabba,

e dow mbabba mola pamara.’ ”21.5: Jak 9.9.

⁶Sey tokkuɓemo ɓen ndilli, ngaɗi ko Yeesu wi’iɓe. ⁷Ɓe njaari mbabba ngan e ɓinga maaga, ɓe mbe’’iti cuddaari maɓɓe dow maaji, o ƴenti o jooɗi. ⁸Yimɓe ɗuɗɓe hawrutuɓe mbe’’iti cuddaari maɓɓe dow ɗatal ngal, woɓɓe boo ngewoyi haako to leɗɗe e mbe’’itako dow ɗatal. ⁹Yimɓe ɗuɗɓe yahooɓe yeeso Yeesu e tokkirɓemo gaɗa e ɓe mbi’a e sembe, “Hosaana21.9: Ma’ana Hosaana woni mantuki. to Ɓiɗɗo Dawda! O barkiɗinaaɗo garoyɗo nder inde Joomiraawo! En mantu Allah Mo Dow!”21.9: Jab 118.25,26.

¹⁰Nde Yeesu natti Urucaliima, hakkiilo yimɓe gariiri ndin fuu ummii, e ɓe mbi’a, “Ɗum moye o’o?”

¹¹Sey yimɓe ɗuɗɓe ɓen jaadooɓe e Yeesu mbi’i, “Ɗum Yeesu, annabiijo daga gariiri Najarat nder leydi Galiili.”

Yeesu Laaɓinii Wuro Ceniingo

(Markus 11.15‑19; Luka 19.45‑48; Yahaya 2.13‑22)

¹²Sey Yeesu natti Wuro Ceniingo riiwi soorooɓe e soodooɓe nder maggo. O talli teeburji gaylitooɓe ceede Roomanko’en yaaki ceede Wuro Ceniingo e jooɗorle coorooɓe pooli. ¹³O wi’iɓe, “Ɗum windaama Allah wi’ii, ‘Ɗum noddiray wuro am wuro do’aare,’ ammaa on ngartiriingo luuro wuyɓe!”21.13: Ica 56.7; Irm 7.11.

¹⁴Sey wumɓe e laƴooɓe ngari to maako nder Wuro Ceniingo, o yamɗitiniɓe. ¹⁵Ammaa mawɓe ardiiɓe diina e moodiɓɓe Attawra nani monnere nde ɓe ngi’i kuuɗe kayɗiniiɗe ɗe o waɗi, haa sukahoy e mbi’a e sembe nder Wuro Ceniingo, “Hosaana to Ɓiɗɗo Dawda!” ¹⁶Ɓe mbi’imo, “A nana ko sukaaɓe ɓe’e mbi’ata?”

Yeesu nootii, wi’i, “Ee. On meeɗaayi janguki aayaare biinde, ‘An siryi sukahoy pamaroy e musinaykoy mantumaa?’ ”21.16: Jab 8.2.

¹⁷Sey o dilli o aliɓe o wurtii gariiri ndin o yahi Betani o waali ton.

Yeesu Laanii Ibbi

(Markus 11.12‑14,20‑24)

¹⁸Nde weeti Yeesu e wartoya gariiri Urucaliima o nani weelo. ¹⁹Nde o yi’i wokki ibbi haade ɗatal, o yahi to maaki, ammaa o tawaayi goɗɗum to maaki sey haako tan. Sey o wi’iki, “Taa’ fuɗɗutu ndimaa haa abadaa!” Ɗon e ɗon ki yoori.

²⁰Nde tokkuɓemo ngi’i non, ɓe kayɗini, ɓe mbi’i, “No ɗum waɗi ibbi ki’i yoori ɗon e ɗon?”

²¹Yeesu nootii, wi’iɓe, “E mi wi’a’on goonga, to on ngoodi hoolaare, on ngalaa seko koo seɗɗa, on mbaaway ngaɗon ko ɓuri ko ngaɗanmi ibbi ki’i, haa maa to on mbi’ii hocceere nde’e, ‘Ɗoofa daga ɗo’o, kuboɗaa hoore maaɗa nder mbeela,’ sey nde waɗa non.21.21: Maat 17.20; 1Kor 13.2.²²To on ngoodi hoolaare, fuu ko toriiɗon Allah on keɓayɗum.”

Ƴamol Dow Laamu Yeesu

(Markus 11.27‑33; Luka 20.1‑8)

²³Nde Yeesu natti Wuro Ceniingo e mo nder ekkitinki, sey mawɓe ardiiɓe diina e mawɓe yimɓe ngari to maako mbi’i, “E laamu moye ngaɗataa kuuɗe ɗe’e? Moye hokkumaa laamu ɗum?”

²⁴Sey Yeesu nootii, wi’iɓe, “Min maa mi ƴamay’on. To on nootanakeyam, nden mi wi’ay’on e ɗume laamu ngaɗiraymi kuuɗe ɗe’e. ²⁵Too, baptisma ɗum Yahaya waɗi, to Allah ɗum ƴiwoyi koo to yimɓe?”

Sey ɓe meddi hakkunde maɓɓe, ɓe mbi’i, “To en mbi’ii, ‘Daga to Allah ɗum ƴiwoyi,’ o wi’ay’en, ‘Ko waɗi on jaɓaayi ko o wi’i?’ ²⁶Ammaa to en mbi’ii, ‘To yimɓe ɗum ƴiwoyi,’ en kula ko yimɓe ngaɗanta’en, ngam ɓe fuu ɓe njaɓii Yahaya o annabiijo.” ²⁷Ngam non ɓe nootii, ɓe mbi’i Yeesu, “Min andaa.”

Yeesu wi’iɓe, “Non min maa, mi wi’ataa’on koo e ɗume laamu ngaɗiraymi kuuɗe ɗe’e.

Misaalu Dow Gooduɗo Sukaaɓe Ɗiɗo

²⁸“Too, no ngiiɗon? E woodi goɗɗo gooduɗo sukaaɓe ɗiɗo. O yahi to suka arandeejo on, o wi’i, ‘Ɓiɗɗo am, hande yahu ngesa inabooje kuwaa.’ ²⁹Sey suka on wi’imo, ‘Mi yahataa.’ Ammaa daga gaɗa suka on wayliti nyumo muuɗum yahi. ³⁰Sey nyaako on yahi to suka ɗiɗaɓo on wi’imo ko wi’i on ton suka arandeejo on. Suka on nootii, wi’i, ‘Too, mi yahay, Bappa,’ ammaa o yahaayi. ³¹Too, nder maɓɓe moye waɗi ko nyaako on yiɗi?”

Sey ɓe mbi’i, “Arandeejo on.”

Yeesu wi’iɓe, “E mi wi’a’on goonga, jaɓooɓe ceede leydi e kaaruwa’en e ɓe arta’on nattuki Laamu Allah. ³²Ngam Yahaya warii hollii’on laawol aadilaaku, on koolaakimo. Ammaa jaɓooɓe ceede leydi e kaaruwa’en koolakemo. Koo nde ngiiɗon non, daga gaɗa on tuubaayi kooliiɗonmo.21.32: Luk 3.12; 7.29,30.

Misaalu Dow Jaɓuɓe Ngesa Inabooje

(Markus 12.1‑12; Luka 20.9‑19)

³³“Too, raa goɗɗum misaalu. E woodi goɗɗo joomu ngesa gaɗuɗo ngesa inabooje, o howika, o wasi ngayka mawka nder tafaare ngam moyluki ndiyam daga nder inabooje ɗen, o mahi suudu towndu ngam reenuki ngesa kan. Sey o hokkika woɓɓe remooɓe mo’’inaka, o dilli wondi leydi.21.33: Ica 5.1,2.³⁴Nde carel ɓenduki inabooje ɗen waɗi, o lili maccuɓe maako to ɓe o hokki ngesa kan ngam ɓe njaɓonoyamo ko ɓe ngaaduno nder ko ɓendi. ³⁵Ammaa ɓe nangiɓe ɓe piyi go’oto, ɓe mbari go’oto, ɓe kuborii go’oto kaaƴe. ³⁶Sey o fuɗɗiti o lili woɓɓe maccuɓe maako ɓurɓe arande’en ɗuuɗuki. Kamɓe maa remooɓe ɓen ngaɗaniɓe non no ɓe ngaɗani arande’en ɓen. ³⁷Gaɗa ɗon joomu ngesa on lili ɓiɗɗo maako to remooɓe ɓen, e mo wi’a, ‘Ɓe kokkay ɓiɗɗo am mangu.’ ³⁸Ammaa nde ɓe o hokki ngesa kan ngi’i ɓiɗɗo on, sey ɓe mbi’i hakkunde maɓɓe, ‘Too! Raa donoowo joomu ngesa kan. Ngaree mbarenmo, ndonu ngesa kan warta ɗum meeɗen.’ ³⁹Sey ɓe nangimo, ɓe mburtinimo nder ngesa kan, ɓe mbarimo.

⁴⁰“Too, to joomu ngesa on warii, ko o waɗanta ɓe o hokki ngesa ɓen?”

⁴¹Sey ɓe mbi’imo, “O waɗanay kalluɓe ɓen ɗon wokki warki kalluki. O hokka woɓɓe ngesa kan kokkayɓemo daga nder ko ɓendi.”

⁴²Yeesu wi’iɓe, “On meeɗaayi janguki ko aayaaje mbi’i? Ɗe mbi’i,

‘Hayre nde mahooɓe nganyi,

kayre warti hayre ɓurnde darnuki maadi.

Ɗu’um ɗum kuugal Joomiraawo,

ɗum kayɗiniiɗum to meeɗen!’21.42: Jab 118.22,23.

⁴³“Ngam non e mi wi’a’on, ɗum jaɓay Laamu Allah to mooɗon ɗum hokkaɗum woɓɓe gaɗayɓe ko Allah yiɗi. ⁴⁴Koo moye yanoyi dow hayre nden yewi yewinay; ammaa to hayre nden yanii dow goɗɗo, nde namaymo bo condi.”

⁴⁵Nde mawɓe ardiiɓe diina e Faarisanko’en nani misaalu feere‑feere ɗum o hokki, sey ɓe paami dow maɓɓe o meti. ⁴⁶Sey ɓe ɗaɓɓiti laawol no ɓe nangirtamo, ammaa e ɓe kula yimɓe, ngam yimɓe ɓen njaɓii o annabiijo.

Misaalu Dow Humto Teegal

(Luka 14.15‑24)

¹Sey Yeesu fuɗɗiti metiraniɓe misaalu, wi’i, ²“Ɗum nandinay Laamu Allah e goɗɗo laamiiɗo ciryaniiɗo ɓiɗɗo muuɗum humto teegal. ³O lili maccuɓe maako noddoya kumpitaaɓe humto ngon, ammaa kumpitaaɓe ɓen nganyi ngara. ⁴Sey o fuɗɗiti o lili woɓɓe maccuɓe maako, o wi’i, ‘Njahee mbi’on kumpitaaɓe ɓen, “Raɗɗum mi siryake nyamndu, ɗum hirsii ga’i e nyalbi payɗi, koo ɗume siryaama. Ngaree humto teegal ngal!” ’ ⁵Ammaa kumpitaaɓe ɓen ngannaayi. Go’oto yahi ngesa muuɗum, go’oto yahi luumo muuɗum. ⁶Horiiɓe ɓen nangi maccuɓe ɓen torriɓe, mbariɓe. ⁷Sey laamiiɗo on ɓerni naa’ seɗɗa, lili sooji’en muuɗum ɓe kalki ɓen ɗon gaɗuɓe warhoore ɓe nguli gariiri maɓɓe. ⁸Sey o wi’i maccuɓe maako, ‘Humto teegal ngon siryaama, ammaa kumpitaaɓe ɓen ɓe potaayi warki. ⁹Ngam non njahee dow ɗate mawɗe, kumpiton fuu mo ngiiɗon wara humto ngon.’ ¹⁰Sey maccuɓe ɓen njahi dow ɗate ɗen ɓe ɓoptoyi koo moye mo ɓe tawi, fuu kalluɓe e ɓe ngikku boɗɗum, haa wuro humto ngon heewi hoɓɓe.

¹¹“Ammaa nde laamiiɗo on nattoyi ngam yi’a hoɓɓe ɓen, o yi’i goɗɗo nder maɓɓe mo ɓornaaki limce humto teegal. ¹²Sey o wi’imo, ‘Higo, no ɗum waɗi nattoyɗaa ɗo’o a ɓornaaki limce humto?’ Ammaa neɗɗo on dulli ko wi’ata. ¹³Sey laamiiɗo on wi’i kuwanooɓemo, ‘Kaɓɓee neɗɗo o’o juuɗe e koyɗe, paɗɗonmo nder nyiwre kallunde, to ɗum woyata ɗum nyerƴindira nyiiƴe.’ ”22.13: Maat 8.12; 25.30; Luk 13.28.

¹⁴Yeesu ɓeydi wiiki, “Yimɓe ɗuɗɓe kumpitaa, ammaa seɗɗa cuɓaa.”

Yoɓuki Kaysar Ceede Leydi

(Markus 12.13‑17; Luka 20.20‑26)

¹⁵Sey Faarisanko’en njahi kawti ko’e, kaɓɓi dabare no ɓe nangirta Yeesu dow ko o wi’i. ¹⁶Sey ɓe liloyi tokkuɓeɓe e yimɓe Hirudus, ɓe mbi’i, “Moodibbo, e min andi ko mbi’ataa e ko ngaɗataa ɗum goonga, a ekkitina dow laawol Allah e goonga, a hulataa ko yimɓe mbi’ata dow maaɗa, a hollataa feerootirol hakkunde yimɓe. ¹⁷Too, wi’umin, e yiiki maaɗa e haani min njoɓa Kaysar ceede leydi koo ɗum haanaayi?”

¹⁸Ammaa Yeesu heɓti halleende maɓɓe, o wi’iɓe, “Ngam ɗume poondotonyam, onon munaafuki’en? ¹⁹Kolleeyam yamnde nde ɗum yoɓirta ceede leydi.”

Sey ɓe ngaddanimo yamnde go’o. ²⁰Yeesu wi’iɓe, “Ɗowdi moye e inde moye woni dow mayre?”

²¹Ɓe nootii, ɓe mbi’i, “Ɗum Kaysar.”

Sey Yeesu wi’iɓe, “Too, ngam non kokkee Kaysar ko woni ɗum Kaysar, nden kokkon Allah ko woni ɗum Allah.”

²²Nde ɓe nani non, ɓe kayɗini, ɓe alimo, ɓe ndilli.

Ƴamol Dow Ummaaki Mayɓe

(Markus 12.18‑27; Luka 20.27‑40)

²³Saadusanko’en e mbi’a walaa ummaaki mayɓe. E nyalnde nden, sey woɓɓe maɓɓe ngari to Yeesu, ɓe ƴamimo, ɓe mbi’i,22.23: KL 23.8.²⁴“Moodibbo, Annabi Muusa wi’ii to neɗɗo te’ii debbo maayii danyidaayi e maako, sakiraawo maako sey te’amo ngam heɓana sakiraawo muuɗum mayɗo ɓiɓɓe.22.24: TA 25.5.²⁵Too, ndenno e woodi woɓɓe sakiraaɓe worɓe njoweeɗiɗo nder amin. Afo on te’i debbo, maayi. Nde o danyidaayi e debbo on, o alanimo sakiraawo maako. ²⁶Non maa ɗiɗaɓo on e tataɓo on haa njoweeɗiɗaɓo on waɗii non. ²⁷Gaɗa maajum debbo on maa maayi. ²⁸Too, nyalnde nde mayɓe ummotoo debbo on wartay debbo moye nder maɓɓe? Ngam ɓe fuu ɓe te’iimo.”

²⁹Sey Yeesu nootii, wi’iɓe, “On mboofii ngam on andaa ko aayaaje mbi’i, nden on andaa bawɗe Allah. ³⁰To mayɓe ummake daga mayde, walaa te’ayɗo walaa te’eteeɗo, ammaa ɓe ngartay bo malaa’ika’en Allah. ³¹Nden dow ummaaki mayɓe daga mayde, on meeɗaayi janguki ko Allah wi’i’on? E ɗum windi wiiki, ³²‘Min woni Allah mo Ibraahim, Allah mo Iciyaaku, Allah mo Yaakubu.’ Kanko naa’ o Allah mayɓe, ammaa o Allah gooduɓe yonki.”22.32: Wur 3.6.

³³Nde hawrutuɓe ɗon nani non, ɓe kayɗini dow ekkitinol maako.

Dooka Ɓurɗum Mangu

(Markus 12.28‑34; Luka 10.25‑28)

³⁴Ko Yeesu wi’i waɗi Saadusanko’en ndullii ko mbi’a. Nde Faarisanko’en nani non, sey ɓe kawriti. ³⁵Go’oto nder maɓɓe, moodibbo Attawra, ƴami Yeesu ngam foondamo, wi’i, ³⁶“Moodibbo, ɗume dooka ɓuri mangu fuu nder Attawra?”

³⁷Yeesu wi’imo, “ ‘Yiɗu Joomiraawo Allah maaɗa e ɓernde maaɗa fuu, e yonki maaɗa fuu, e hakkiilo maaɗa fuu.’22.37: TA 6.5.³⁸Ɗu’um woni dooka mawɗum arandejum. ³⁹Ɗiɗaɓum maa e fottidi e arandejum ɗum. ‘Yiɗu bandiraawo maaɗa no ngiɗirɗaa hoore maaɗa.’22.39: KLee 19.18.⁴⁰Dow ɗu’um dooka ɗiɗum Attawra e Defte Annabo’en ndarii.”22.35‑40: Luk 10.25‑28.

Ƴamol Dow Almasiihu

(Markus 12.35‑37; Luka 20.41‑44)

⁴¹Nde Faarisanko’en kawriti, Yeesu ƴamiɓe, ⁴²wi’i, “Ɗume nyumoton dow Almasiihu? O ɓiɗɗo moye?”

Ɓe mbi’imo, “O ɓiɗɗo Dawda.”

⁴³Sey Yeesu wi’iɓe, “Too, no ɗum waɗi Dawda nder bawɗe Ruuhu Allah noddi Almasiihu ‘Joomiraawo?’ O wi’i,

⁴⁴‘Joomiraawo wi’ii Joomiraawo am,

“Jooɗa to jungo am nyaamo,

naa mi waɗii a yaaɓii wanywanyɓe maaɗa.” ’22.44: Jab 110.1.

⁴⁵Nde Dawda noddii Almasiihu ‘Joomiraawo,’ too, no ɗum waɗata o warta ɓiɗɗo Dawda?”

⁴⁶Walaa bawɗo nootanaakimo. Daga nden ɗon nyalnde walaa gaɗuɗo sembe ɓernde ƴamimo wongol ƴamol.

Wagginki Dow Faarisanko’en e Moodiɓɓe Attawra

(Markus 12.38,39; Luka 11.43,46; 20.45,46)

¹Yeesu metani hawrutuɓe e tokkuɓemo, wi’i, ²“Moodiɓɓe Attawra e Faarisanko’en kokkaama laamu hokkuki yimɓe ma’ana ko Muusa windi. ³Ngam non, ngaɗee fuu ko ɓe ekkitini’on tokkeeɗum, ammaa to’ on ngaɗu ko ɓe ngaɗata, ngam ɓe ngaɗataa ko ɓe nga’ajinta. ⁴E ɓe kaɓɓa doŋle tedduɗe caɗuɗe hoccuki, ɓe njowaɗe dow balbe yimɓe, ammaa kamɓe e ko’e maɓɓe koo koolel go’o ɓe ngaɗataa ɓe mballaɓe. ⁵Fuu ko ɓe ngaɗata e ɓe ngaɗaɗum ngam yimɓe ngi’aɓe. E ɓe kaɓɓa laayaho mawko ko aayaaje Deftere Ceniinde to tiiɗe maɓɓe e juuɗe maɓɓe, e ɓe njuutina cilmbi toggooje maɓɓe.23.5: Maat 6.1; TA 6.8; Lim 15.38.23.5: Cilmbi toggoore e juutuki maaji to maɓɓe e ɗum holla no neɗɗo ɓuriri tokkuki Allah. (Lim 15.37‑41.)⁶To humto e ɓe ngiɗi jooɗaaki to mawɓe njooɗotoo; nder cuuɗi do’aare maa e ɓe ngiɗi jooɗorle mawɓe. ⁷E ɓe ngiɗi hownireeki mangu nder luumo, nden e ɓe ngiɗi ɗum wi’aɓe, ‘Allah sabbinanee, Moodibbo.’ ⁸Ammaa onon, to’ ɗum noddira’on ‘Moodibbo,’ ngam Moodibbo mooɗon o go’oto, nden on fuu on bandiraaɓe. ⁹To’ on noddu koo moye ‘Nyaako’ e duuniyaaru, ngam on ngoodi Nyaako go’oto, gonɗo ton dow. ¹⁰Nden to’ ɗum noddira’on ‘Ardiiɗo,’ ngam on ngoodi Ardiiɗo go’oto, kanko woni Almasiihu. ¹¹Sey mawɗo nder mooɗon warta jaggantooɗo’on.23.11: Maat 20.26,27; Mar 9.35; 10.43,44; Luk 22.26.¹²Fuu mawninɗo hoore muuɗum ɗum lestinaymo. Fuu lestinɗo hoore muuɗum ɗum mawninaymo.23.12: Luk 14.11; 18.14.

¹³“On mbonii, onon moodiɓɓe Attawra e Faarisanko’en! On munaafuki’en! On maɓɓanii yimɓe dammugal nattuki Laamu Allah. Onon on nattaayi, on alaayi giɗuɓe nattuki natta. ¹⁴[On mbonii onon moodiɓɓe Attawra e Faarisanko’en! On munaafuki’en! On nyaama jawdi rewɓe ɓe worɓe maɓɓe maayi, on ngaɗa do’aare juutunde ngam yimɓe ngi’a. Ngam non, Allah ɓuray hokkuki’on bone.]

¹⁵“On mbonii, onon moodiɓɓe Attawra e Faarisanko’en! On munaafuki’en! Ngam on kuula maayo on ngiiloo nder leyɗe feere‑feere ngam heɓuki go’oto tokkayɗo diina mooɗon. To on keɓiimo, on ngartiramo kalluɗo ɓurɗo’on halluki nde ɗiɗi nattayɗo hiite bo mooɗon.

¹⁶“On mbonii, onon wumɓe ardiiɓe wumɓe! On mbi’a, ‘Koo moye hunorii Wuro Ceniingo, naa’ ɗum goɗɗum. Ammaa koo moye hunorii jiinaari gonɗum nder maago, doole o waɗa ko o hunanii.’ ¹⁷Onon kaaŋaaɓe, wumɓe! Ɗume ɓuri mangu, jiinaari ɗum, koo Wuro Ceniingo ngon gartirngo jiinaari ɗum ceniiɗum? ¹⁸Ɗonmaa on mbi’a, ‘Koo moye hunorii sakkirde, naa’ ɗum goɗɗum. Ammaa koo moye hunorii cakkiri ngondi dow sakkirde nden, doole o waɗa ko o hunanii.’ ¹⁹Onon wumɓe! Ɗume ɓuri mangu, cakkiri ndin, koo sakkirde gartiraynde cakkiri ndin ceniindi? ²⁰Ngam non, koo moye hunorii sakkirde nden hunorakende e koo ɗume ko woni dow mayre. ²¹Ɗonmaa koo moye hunorii Wuro Ceniingo ngon hunorakengo e Allah jooɗiiɗo nder maago. ²²Nden koo moye hunorii dow, hunorake jooɗorgal laamu Allah e jooɗiiɗo dow maagal.23.22: Ica 66.1; Maat 5.34.

²³“On mbonii, onon moodiɓɓe Attawra e Faarisanko’en! On munaafuki’en! On kokka Allah jakka haakohoy njongeteekoy, ammaa on tokkaayi ko ɓuri daraja nder Attawra, waato waɗanki yimɓe ko haani, e yurmeende, e hoolaaki Allah. Ɗu’um tatum e haani ngaɗonɗum, ammaa to’ on alu waɗuki ko horii.23.23: KLee 27.30.²⁴Onon wumɓe ardiiɓe wumɓe! On itta buululel nder ndiyam ɗam njaroton, ammaa on moɗa ngeelooba!

²⁵“On mbonii, onon moodiɓɓe Attawra e Faarisanko’en, munaafuki’en! On layɓa gaɗa njardukoy mooɗon e le’oy mooɗon, ammaa nder e heewi nguyka e ciya suruki hoore. ²⁶An Faarisankeejo bumɗo! Artu layɓuki nder jardugel ngel e le’el ngel, nden koo toye maakoy wartay laɓɗum.

²⁷“On mbonii, onon moodiɓɓe Attawra e Faarisanko’en! On munaafuki’en! On nandi e genaale moytanaaɗe njoojeeri ndaneeri yaasi maaje e mbooɗi yiiki, ammaa nder maaje e woodi ƴi’e mayɓe e koo iri ɗume nefniiɗum.23.27: KL 23.3.²⁸Non onon maa mbaaɗon. Yimɓe e ngi’a’on bo on aadili’en, ammaa nder ɓerɗe mooɗon on munaafuki’en on keewii halleende.

²⁹“On mbonii, onon moodiɓɓe Attawra e Faarisanko’en! On munaafuki’en! On maha genaale boɗɗe ɗe siftorki annabo’en, ɗonmaa on mo’’itina genaale aadili’en. ³⁰On mbi’a, ‘Daa en ɗon carel maamaaji meeɗen, daa en mballaayiɓe warki annabo’en.’ ³¹Non kollirɗon on ɓiɓɓe barɓe annabo’en. ³²Too, sey keenyiton kuugal ngal maamaaji mooɗon puɗɗi! ³³Onon boole, ɓiɓɓe boole kalluɗe! No ɗum waɗata kison nattuki wuro hiite?23.33: Maat 3.7; 12.34; Luk 3.7.³⁴Ngam non, e mi lilonoya’on annabo’en e gooduɓe faamu e moodiɓɓe. On mbara woɓɓe, on mbara woɓɓe dow gaafaangal, on piira woɓɓe looci nder cuuɗi do’aare mooɗon, on tokkaɓe gariiri‑gariiri on torraɓe. ³⁵Ngam non ƴiiƴam fuu aadili’en baraaɓe ndufaaɗam nder duuniyaaru ɗum ɗaɓɓitayɗam dow mooɗon, daga ƴiiƴam Habiila aadiliijo haa yaaki ƴiiƴam Annabi Jakaariya, ɓiɗɗo Beriikiya, mo mbarɗon hakkunde Suudu Joomiraawo e sakkirde.23.35: Fuɗ 4.8; 2HL 24.20,21.³⁶E mi wi’a’on goonga, ƴiiƴamji ɗin ɗon fuu ɗum ɗaɓɓitayɗi to juuɗe yimɓe jaamanu ɗu’um.

Yeesu Yurminanii Yimɓe Urucaliima

(Luka 13.34,35)

³⁷“Jalla Urucaliima, Urucaliima a warii annabo’en, a wardii liloyaaɓe to maaɗa e kaaƴe! Nde ɗuɗɗum e mi yiɗi moɓtuki yimɓe maaɗa no geroogal moɓtirta ɓikkoy maagal ley biyeeli maagal, ammaa a jaɓaayi. ³⁸Raɗɗum, Allah alanay’on Wuro Ceniingo mooɗon winde.23.38: Irm 22.5.³⁹E mi wi’a’on, on puɗɗitataa ngi’onyam, naa nyalnde nde mbiiɗon, ‘O barkiɗinaaɗo, garoyɗo nder inde Joomiraawo.’ ”23.39: Jab 118.26.

Yeesu Metii Dow No Ɗum Sankitirta Wuro Ceniingo

(Markus 13.1,2; Luka 21.5,6)

¹Yeesu e wurtoyoo Wuro Ceniingo e mo yaha, sey tokkuɓemo ngari mbi’imo o raara cuuɗi maago. ²Sey o nootii, o wi’iɓe, “On ngi’ii fuu cuuɗi ɗi’i? E mi wi’a’on goonga, walaa wonde hayre aleteende dow wonde. Ɗe fuu ɗum sankitayɗe.”

Torraaji e Caɗeele

(Markus 13.3‑13; Luka 21.7‑19)

³Yeesu e jooɗii dow Hocceere Nde Leɗɗe Jaytun sey tokkuɓemo ngari to maako kamɓe tan, ɓe mbi’i, “Wi’umin, ndeye fii ɗu’um waɗata? Ɗume woni ko hollata wartoyki maaɗa e re’uki duuniyaaru?”

⁴Sey Yeesu wi’iɓe, “Paamee to’ goɗɗo majjina’on. ⁵Yimɓe ɗuɗɓe ngaroyay ɓe mbi’a kamɓe ngoni min, ɓe mbi’a, ‘Min woni Almasiihu,’ ɓe majjina yimɓe ɗuɗɓe. ⁶On nanay habaru konuuji gaɗeteeɗi haade mooɗon, e habaru konuuji gaɗeteeɗi ɓadaaki. To’ on kulu, ngam doole ɗu’um waɗa, ammaa re’uki duuniyaaru e horii taw. ⁷Lenyol ummanto lenyol, laamu ummanto laamu. Ɗum waɗay weelo kallungo e dimbol leydi to bigeeje feere‑feere. ⁸Ammaa ɗu’um fuu ɗum fuɗɗoode torraaji garayɗi.

⁹“Nden ɓe ngaɗay’on nder juuɗe yimɓe torrayɓe’on, ɗum wara’on. Fuu lenyi duuniyaaru nganyay’on ngam on tokkuɓeyam.24.9: Maat 10.22.¹⁰E carel ngel yimɓe ɗuɗɓe alay hoolaakiyam, e ɓe ngullootira, e ɓe nganyindira. ¹¹Annabo’en fewre ɗuɗɓe ummoyto, ɓe majjina yimɓe ɗuɗɓe. ¹²Halleende ɓeydoto haa yidde ɗuɗɓe ustoo. ¹³Ammaa munyuɗo haa re’irde o hisay.24.13: Maat 10.22.¹⁴Nden ɗum wa’ajinay Habaru Belɗum dow Laamu Allah koo toye nder duuniyaaru, ngam ɗum warta ceyda to leƴƴi fuu, nden re’uki duuniyaaru kin wara.

Torra Kalluka

(Markus 13.14‑23; Luka 21.20‑24)

¹⁵“Carel e wara ngel ngi’oton ‘Nefniiɗum’ gartiroojum Wuro Ceniingo ngo laaɓaa e darii to Wigeere Ceniinde ɗum Annabi Daaniyel wi’i. Fuu jangoowo faama ma’ana maajum.24.15: Daan 9.27; 11.31; 12.11.¹⁶E carel ngel wonɓe nder leydi Yahuudiya ndogga nattoya kocceeje. ¹⁷Gonɗo dow suudu fuu to’ jippoyo ngam hoccuki ko woni nder suudu.24.17,18: Luk 17.31.¹⁸Gonɗo to ngesa to’ so’’o ngam hoccuki cuddaari muuɗum.

¹⁹“Rewɓe gooduɓe deeɗi e musinteeɓe ɓe torroto naa’ seɗɗa nder ɗen ɗon balɗe! ²⁰Ngaɗee do’aare to’ doggudu ndun warana’on nder ndungu koo Nyalnde Siwtaare. ²¹Ngam nder ɗen ɗon balɗe ɗum waɗay torra kalluka mawka iri ka ɗum meeɗaayi waɗuki daga carel ngel Allah tagi duuniyaaru haa jooni. Ɗum boo fuɗɗitataa ɗum waɗa iri kan ɗon torra.24.21: Daan 12.1; WY 7.14.²²Daa Allah ustaayi ɗen ɗon balɗe, daa walaa goɗɗo kisayɗo. Ammaa ngam ɓen ɗon cuɓaaɓe maako, o ustay balɗe ɗen.

²³“E ngel ɗon carel to goɗɗo wi’ii’on, ‘Raa Almasiihu ɗo’o!’ koo boo, ‘Rammo ɗaa’e!’ to’ on njaɓu. ²⁴Ngam Almasiihu’en fewre e annabo’en fewre mburtoyto, ɓe ngaɗa alaamaaji mawɗi e kuuɗe kayɗiniiɗe ngam ɓe majjina yimɓe, haa e cuɓaaɓe ɓen to ɗum waɗoto. ²⁵Raɗɗum, mi wi’ii’on koo ɗume ko carel ngel wara.

²⁶“Ngam non, to ɓe mbi’ii’on, ‘Rammo ɗaa’e nder ladde,’ to’ on njahu. Koo to ɓe mbi’ii’on, ‘Rammo ɗo’o e mo suuɗii nder cuuɗi,’ to’ on njaɓu. ²⁷Non no maƴƴere maƴƴirta daga fuuna nde yi’e haa hirna, non wartuki Ɓii Neɗɗo wa’ata.24.26,27: Luk 17.23,24.

²⁸“Fuu to baatuɗum woni, ɗon jigaaje kawritata.24.28: Luk 17.37.

Wartoyki Ɓii Neɗɗo

(Markus 13.24‑27; Luka 21.25‑28)

²⁹“Gaɗa torra kalluka kan, ɗon e ɗon ɗum ɓalwinay naange, lewru boo hokkataa jayngol mayru. Koode njanoyay daga dow, nden ko woni dow fuu dimboto.24.29: Ica 13.10; Yow 2.10,31; 3.15; WY 6.12; Ica 13.10; Ijik 32.7; Yow 2.10; 3.15; Ica 34.4; WY 6.13.³⁰E carel ngel ɗum yi’ay alaama Ɓii Neɗɗo wangii ton dow, nden fuu lenyi duuniyaaru mboyay bojji nawɗi. Sey ɓe ngi’a Ɓii Neɗɗo e wara nder duule e bawɗe e teddungal mangal.24.30: Daan 7.13; Jak 12.10‑14; WY 1.7.³¹O waɗay ɗum duuda luwal sembee duuduki liluki malaa’ika’en maako, ɓe kawrita ɓe o suɓi daga koo toye nder duuniyaaru, daga ngo’ol keerol duuniyaaru yaaki ngol ton keerol duuniyaaru.

Misaalu Dow Ibbi

(Markus 13.28‑31; Luka 21.29‑33)

³²“Too, ekkitee ekkitinol ngo’ol daga to ibbi. To lice maaki puɗɗi wilutuki, on andi ndungu ɓadake won ɗon. ³³Non maa to on ngi’ii fuu fii ɗu’um e waɗa, too, on anday Ɓii Neɗɗo ɓadake wartoya, e mo haade dammugal. ³⁴E mi wi’a’on goonga, jaamanu ɗu’um ɗum re’ataa naa fuu fii ɗu’um waɗii. ³⁵Dow e ley ƴaɓɓoto, ammaa boliiɗe am ƴaɓɓataako haa abadaa.

Allah Tan Andi Nyalnde Wartoyki Almasiihu

(Markus 13.32‑37; Luka 17.26‑30,34‑36)

³⁶“Walaa anduɗo nden ɗon nyalnde koo ngel ɗon carel ngel fii ɗum ɗon waɗata. Koo malaa’ika’en wonɓe dow andaa, koo Ɓiɗɗo on maa andaa, sey Nyaako Mo Dow tan andi. ³⁷Non no ɗum waɗi e jaamanu Annabi Nuhu, non maa wartoyki Ɓii Neɗɗo wa’ata.24.37: Fuɗ 6.5‑8.³⁸Nder balɗe ko ndiyam tufaana waɗa, yimɓe e nyaama, e njara, e te’a, e te’ee, haa carel ko Annabi Nuhu natti komiwal. ³⁹Ɓe paamaayi haa ndiyam tufaana wari halkiɓe ɓe fuu. Non maa wartoyki Ɓii Neɗɗo wa’ata.24.39: Fuɗ 7.6‑24.⁴⁰E carel ngel, worɓe ɗiɗo e kuwa e ngesa, ɗum hocca go’oto ɗum ala go’oto. ⁴¹Rewɓe ɗiɗo e namida, ɗum hocca go’oto ɗum ala go’oto. ⁴²Njooɗee on ciryii, ngam on andaa carel ko Joomiraawo mooɗon warata. ⁴³Ammaa andee ɗu’um, daa joomu wuro e andi carel ngel gujjo warantamo jemma, daa o jooɗoto e mo siryii o alataa o nattanamo wuro. ⁴⁴Ngam non, onon maa doole njooɗooɗon on ciryii ngam e carel ngel on andaa Ɓii Neɗɗo warata.24.43,44: Luk 12.39,40.

Maccuɗo Gaɗoowo Goonga

(Luka 12.41‑48)

⁴⁵“Moye woni maccuɗo mo goonga mo faamu, mo joomu wuro muuɗum yowi dow maccuɓe muuɗum, ngam o hokkaɓe nyamndu nder carel? ⁴⁶O barkiɗinaaɗo maccuɗo mo joomu wuro muuɗum warti tawi e mo waɗa non. ⁴⁷E mi wi’a’on goonga, joomu wuro on yowaymo dow jawdi muuɗum fuu. ⁴⁸Ammaa to maccuɗo on o kalluɗo o wi’ay hoore maako, ‘Joomu wuro am wartataa jooni,’ ⁴⁹sey o fuɗɗi fiyuki maccuɓe ɓe o huudata, e mo nyaama, e mo yarda njaru e yarooɓe. ⁵⁰Joomu wuro on wartay e nyalnde nde maccuɗo on kammaaki e carel ngel o andaa, ⁵¹o fiyaymo boɗɗum o waɗamo nder munaafuki’en. Ɗon ɗum woyata ɗum nyerƴindira nyiiƴe.

Misaalu Dow Surbaaɓe Sappo

¹“Nden ɗum nandinay Laamu Allah e surbaaɓe sappo koccuɓe fitilaaji ɓe ndilli taɓɓoyaaki angoojo.25.1: Luk 12.35.²Njowo nder maɓɓe e ngoodi faamu, njowo nder maɓɓe boo ngalaa faamu. ³Carel ko surbaaɓe ɓe ngalaa faamu ɓen kocci fitilaaji maɓɓe, ɓe njogaaki nebbam fitila feere nder kolbaaji. ⁴Gooduɓe faamu ɓen boo kocci fitilaaji maɓɓe e nebbam feere. ⁵Nde angoojo on neeɓi yottaaki, sey ɓe fuu ɓe puɗɗi ŋoŋuki haa ɓe ɗaani.

⁶“Ton caka jemma sey ɗum nani noddol sembee, e ɗum wi’a, ‘Raa angoojo on! Mburtoyee, taɓɓeemo!’ ⁷Sey surbaaɓe ɓen fuu ummii ciryii fitilaaji maɓɓe. ⁸Ɓe ngalaa faamu ɓen mbi’i gooduɓe faamu ɓen, ‘Kokkoreemin nebbam mooɗon seɗɗa. Fitilaaji amin e mbaata!’ ⁹Ammaa gooduɓe faamu ɓen mbi’iɓe, ‘Naa’ non, ɗam heƴataa’en. Ɗum ɓurii njahon to soorooɓe, coodoyon ɗam mooɗon.’ ¹⁰E ɓe dow laawol soodoykiɗam, sey angoojo on yottii. Ciryiiɓe fitilaaji ɓen nattidi e maako nder wuro to ɗum waɗata humto ngon. Ɗum maɓɓii dammugal wuro ngon.

¹¹“Daga gaɗa sey surbaaɓe koriiɓe ɓen maa ngarti, ɓe mbi’i, ‘Joomu wuro! Joomu wuro! Maɓɓitanmin!’ ¹²Ammaa o nootii, o wi’i, ‘E mi wi’a’on goonga, mi andaa’on.’25.11,12: Luk 13.25.

¹³“Ngam non, sey njooɗooɗon on ciryii, ngam on andaa nyalnde nden koo carel ngel.

Misaalu Dow Maccuɓe Tato

(Luka 19.11‑27)

¹⁴“Ɗonmaa, Laamu Allah e nandi e goɗɗo neɗɗo gaɗayɗo yaadu, sey o noddi maccuɓe maako o tambiniɓe jawdi maako. ¹⁵O hokki go’oto jakaaje jowi kewɗe ceede jiinaari, go’oto boo jakaaje ɗiɗi, go’oto boo jakaare go’o. O hokki koo moye no waawata, nden o dilli. ¹⁶Jaɓuɗo jakaaje jowi on, ɗon e ɗon o dilli o waadi luumo e ceede ɗen haa o heɓi bo maaje. ¹⁷Non maa jaɓuɗo jakaaje ɗiɗi on heɓi bo maaje. ¹⁸Ammaa jaɓuɗo jakaare go’o on yahi wasi ngayka suuɗi ceede jiinaari joomu wuro muuɗum.

¹⁹“Too, gaɗa ɗum neeɓii, sey joomu maccuɓe on warti ngam yi’a ko koo moye heɓanimo. ²⁰Sey jaɓuɗo jakaaje jowi kewɗe ceede jiinaari wari waddi ceede jakaaje jiinaari jowi ɗe o ɓeydii. O wi’i, ‘Joomu wuro, a hokkiiyam jakaaje kewɗe ceede jiinaari jowi. Raa mi ɓeydii jakaaje ceede jowi.’ ²¹Sey joomu wuro on wi’imo, ‘A huwii boɗɗum, maccuɗo boɗɗo mo goonga. Nde a waɗii goonga dow fii seɗɗa, mi tambinte ɗuɗɗum. Woroy, nanidaa belɗum e am.’ ²²Sey jaɓuɗo jakaaje ɗiɗi kewɗe ceede jiinaari maa wari, wi’i, ‘Joomu wuro, a hokkiiyam jakaaje ɗiɗi kewɗe ceede jiinaari. Raa mi ɓeydii jakaaje ceede ɗiɗi.’ ²³Sey joomu wuro on wi’imo, ‘A huwii boɗɗum, maccuɗo boɗɗo mo goonga. Nde a waɗii goonga dow fii seɗɗa. Mi tambinte ɗuɗɗum. Woroy, nanidaa belɗum e am.’ ²⁴Nden jaɓuɗo jakaare go’o kewnde ceede jiinaari on wari, wi’i, ‘Joomu wuro, e mi andi a neɗɗo caɗanɗo, a yiɗi fe’’uki ko a aawaayi, a giɗɗo meere. ²⁵E mi hula, ngam non njaami ngasumi ngayka cuuɗumi ceede maaɗa nder leydi. Raa ceede maaɗa!’ ²⁶Sey Joomu wuro on nootii, wi’i, ‘An a maccuɗo kalluɗo, dakkiiɗo! Too, e yiiki maaɗa e mi fe’’a ko mi aawaayi, nden mi giɗɗo meere? ²⁷E haani ndesanaayam ceede to ɗe kuutirtee ɗe ɓeydoo, ngam to mi wartoyii mi jaɓaɗe haa e ɓeydaari! ²⁸Ngam non, njaɓee ceede ɗen to maako, kokkon on ɗon gooduɗo jakaaje sappo kewɗe ceede. ²⁹Ngam fuu gooduɗo, ɗum ɓeydanaymo, haa ɗum ɗuuɗanamo. Ammaa mo walaa, koo ko o woodi maa ɗum jaɓayɗum.25.29: Maat 13.12; Mar 4.25; Luk 8.18.³⁰Nden paɗɗee maccuɗo o’o meereejo nder nyiwre ɓaleere, to ɗum woyata ɗum nyerƴindira nyiiƴe.’25.14‑30: Luk 19.11‑27.25.30: Maat 8.12; 22.13; Luk 13.28.

Kiita Garayka

³¹“To Ɓii Neɗɗo warii nder teddungal muuɗum e malaa’ika’en fuu, o jooɗoto dow jooɗorgal laamu maako ɗum teddungal.25.31: Maat 16.27; Maat 19.28.³²Ɗum hawritay yimɓe duuniyaaru fuu yeeso maako, o hakkitaɓe feere‑feere non no gaynaako hakkitirta baali e be’i. ³³O waɗa baali e jungo nyaamo maako, be’i e nano maako. ³⁴Sey Laamiiɗo on wi’a wonɓe nyaamo muuɗum, ‘Ngaree, onon ɓe Nyaako am barkiɗini, ndonee Laamu ɗum um siryanii’on daga fuɗɗoode duuniyaaru. ³⁵Ngam mi nanii weelo on kokkiiyam nyamndu. Mi nanii ɗonka on kokkiiyam ko njaraymi. Mi waɗii koɗaaku on njippiniiyam. ³⁶Mi walaa ko ɓornotoomi on kokkiiyam kolte. Mi waɗii ciya njamu on paamaniiyam. E mi suri nder suudu cural on kowniiyam.’ ³⁷E carel ngel aadili’en noototo, mbi’amo, ‘Moodibbo, ndeye min ngiidumaa e weelo min kokkumaa nyamndu, koo min ngiidumaa e ɗonka min kokkumaa ko njarataa? ³⁸Ndeye min ngiimaa a koɗo min njippinmaa, koo a walaa ko ɓornotoɗaa min kokkumaa kolte? ³⁹Ndeye min ngiimaa a yamɗaa koo a surii nder suudu cural min kownumaa?’ ⁴⁰Sey Laamiiɗo on nootoo, wi’aɓe, ‘E mi wi’a’on goonga, nde on ngaɗani go’oto nder ɓe’e bandiraaɓe am ɓurɓe famɗuki, min ngaɗanɗon.’

⁴¹“Nden o wi’ay wonɓe nano maako, ‘Cendiree e am, onon laanaaɓe! Nattee hiite nge nyifataa haa abadaa nge ɗum siryanii Ceyɗan e malaa’ika’en muuɗum! ⁴²Ngam mi nanii weelo on kokkaayiyam nyamndu. Mi nanii ɗonka on kokkaayiyam ko njaraymi. ⁴³Mi waɗii koɗaaku on njippinaayiyam. Mi walaa ko ɓornotoomi on kokkaayiyam kolte. Mi waɗii ciya njamu on paamanaayiyam. Mi suraama nder suudu cural on kownaayiyam.’ ⁴⁴Nden kamɓe maa ɓe nootoo, ɓe mbi’amo, ‘Moodibbo, ndeye min ngiidumaa e weelo, koo e ɗonka, koo e ciya kolte, koo e ciya njamu, ndeye min ngiimaa a koɗo, koo a nder suudu cural, min mballaayima?’ ⁴⁵Sey o nootoo, o wi’aɓe, ‘E mi wi’a’on goonga, nde on ngaɗanaayi koo go’oto nder ɓe’e ɓurɓe famɗuki, min woni on ngaɗanaayi.’ ⁴⁶Ɓe’e ngoni nattayɓe bone ɗum re’ataa, aadili’en boo keɓa yonki ki re’ataa.”25.46: Daan 12.2.

Mawɓe Meddii Dow No Nangirta Yeesu

(Markus 14.1,2; Luka 22.1,2; Yahaya 11.45‑53)

¹Nde Yeesu yottini wiiki fuu fii ɗu’um, o wi’i tokkuɓemo, ²“On andi Humto Sakkinki hande horii balɗe ɗiɗi, ɗum hokkitiray Ɓii Neɗɗo ɗum waramo dow gaafaangal.”26.2: Wur 12.1‑27.

³Sey mawɓe ardiiɓe diina e mawɓe yimɓe kawriti e laamorde Mawɗo Mawɓe Ardiiɓe Diina bi’eteeɗo Kayaafa. ⁴Ɓe kaɓɓi ɓe nanga Yeesu e suuɗe ɓe mbaramo. ⁵Ɓe mbi’i, “Ammaa naa’ ni carel Humto Sakkinki, ngam ɗum gaɗotooɗum yimɓe ummina hawre.”

Ɗum Moytanii Yeesu Nebbam Uroojam e Betani

(Markus 14.3‑9; Yahaya 12.1‑8)

⁶Yeesu e nder gariiri Betani to wuro Siiman gooduɗo nyawu nyaamoojum laral, ⁷sey goɗɗo debbo wari to maako e jogii jolloyel hayre bongel ngel nebbam uroojam mbelɗam gooduɗam ceede. Yeesu e nyaama nyamndu, sey debbo on wayliɗam dow hoore maako.26.7: Luk 7.37,38.⁸Ammaa nde tokkuɓemo ngi’i non, sey ɓerɗe maɓɓe metti, ɓe mbi’i, “Ngam ɗume o wonni nebbam ɗa’am nihi? ⁹Daa ɗam sooraama ceede ɗuɗɗe, ɗum hokka ɓe ngalanaa ceede ɗen.”

¹⁰Ammaa Yeesu faami ko woni nder ɓerɗe maɓɓe, sey o wi’iɓe, “Ngam ɗume ngannoton debbo o’o? Ko o waɗaniyam ɗum boɗɗum. ¹¹Koo ndeye ɓe ngalanaa e ngondi e mooɗon, ammaa min, carel e wara ngel alaymi’on.26.11: TA 15.11.¹²Nde o wayli ɗa’am nebbam dow ɓandu am, o waɗu non ngam siryaaki uwukiyam. ¹³E mi wi’a’on goonga, koo toye to ɗum wa’ajini ɗu’um Habaru Belɗum nder duuniyaaru fuu, ɗum hokkay habaru ko debbo o’o waɗi ngam siftorkimo.”

Yahuuda Jaɓii Hokkitira Yeesu

(Markus 14.10,11; Luka 22.3‑6)

¹⁴Sey go’oto nder tokkuɓe Yeesu sappo e ɗiɗo bi’eteeɗo Yahuuda Iskariyooti yahi to mawɓe ardiiɓe diina, ¹⁵o wi’i, “Ɗume kokkotonyam to mi waɗii Yeesu nder juuɗe mooɗon?” Sey ɓe kokkimo ceede ajurfaari kanje 30.26.15: Jak 11.12.¹⁶Daga carel ngel Yahuuda fuɗɗi ɗaɓɓutuki laawol no hokkitirta Yeesu nder juuɗe maɓɓe.

Yeesu Waɗii Humto Sakkinki e Tokkuɓemo

(Markus 14.12‑21; Luka 22.7‑13,21‑23; Yahaya 13.21‑30)

¹⁷Nyalnde arandeere nde Humto Buroodi Ɗum Walaa Ƴuufinirɗum, sey tokkuɓemo ngari to maako, ɓe mbi’imo, “Toye ngiɗɗaa min njaha min ciryanomaa ngam nyaamen nyamndu Humto Sakkinki?”

¹⁸Sey o wi’i, “Nattee gariiri to goɗɗo neɗɗo mbi’onmo, ‘Moodibbo wi’i: Carel am ɓadake. Mi waɗay Humto Sakkinki e tokkuɓeyam to wuro maaɗa.’ ”

¹⁹Sey tokkuɓemo ɓen ngaɗi non no Yeesu wi’iɓe, sey ɓe ciryii koo ɗume ngam Humto Sakkinki.

²⁰Nde futuro waɗi, Yeesu jooɗii ngam nyamda e tokkuɓemo sappo e ɗiɗo. ²¹E ɓe nder nyaamuki, sey o wi’i, “E mi wi’a’on goonga, go’oto nder mooɗon hokkitirayyam.”

²²Sey ɓe nganni naa’ seɗɗa, ɓe puɗɗi wi’ukimo go’oto‑go’oto, “Moodibbo, naa’ ɗum min, koo?”

²³Sey o nootii, o wi’i, “Neɗɗo nyamdayɗo e am e le’al go’o, kanko hokkitirtayam.26.23: Jab 41.9.²⁴Ɓii Neɗɗo maayay no ɗum windiraa dow maako, ammaa kokkitirayɗomo wonii! Ɗum ɓuranaymo daa o danyaaka.”

²⁵Sey Yahuuda kokkitirayɗomo wi’i, “Moodibbo, naa’ ɗum min, koo?”

Yeesu wi’imo, “Ee, ɗum an.”

Kirtaari Joomiraawo

(Markus 14.22‑26; Luka 22.14‑20; 1 Korintiyanko’en 11.23‑25)

²⁶E ɓe nder nyaamuki nyamndu, sey Yeesu hocci buroodi yetti Allah, o sendiɗum, o hokki tokkuɓemo, o wi’i, “Njaɓeeɗum, nyaamon. Ɗu’um ɗum ɓandu am.”

²⁷Ɗonmaa o hocci jardugel ndiyam inabojam, o yetti Allah, o hokkiɓeɗam, o wi’i, “Njaree, on fuu, ²⁸ngam ɗa’am kanjam woni ƴiiƴam am tabbitinayɗam alkawal Allah ndufeteeɗam ngam yimɓe ɗuɗɓe ngam yaafaaki hakke.26.28: Wur 24.8; Irm 31.31‑34.²⁹E mi wi’a’on, mi fuɗɗitataa mi yara ndiyam inabooje naa nyalnde nde njaraymi ngoɗɗam kesam hawti e mooɗon nder Laamu Nyaako am Mo Dow.”

³⁰Sey ɓe ngimi gimol mantuki Allah, nden ɓe ndilli Hocceere Nde Leɗɗe Jaytun.

Yeesu Wi’ii Biiturus Wi’ay Andaamo

(Markus 14.27‑31; Luka 22.31‑34; Yahaya 13.36‑38)

³¹Yeesu wi’i tokkuɓemo, “Nder jemmaare nde’e on fuu on ndoggay alonyam, ngam nder aayaare Allah wi’ii, ‘Mi waray gaynaako, nden ornde baali ɗin cankitoto.’26.31: Jak 13.7.³²Ammaa gaɗa mi ummake daga mayde, mi artay’on yaaki Galiili.”26.32: Maat 28.16.

³³Sey Biiturus wi’imo, “Koo ɓe fuu ɓe aliima, min mi alataama koo seɗɗa.”

³⁴Yeesu wi’imo, “E mi wi’umaa goonga, hande, nder jemmaare nde’e, ko njakardi hana, a wi’ay a andaayam nde tati.”

³⁵Ammaa Biiturus wi’imo, “Koo ɗum wardayyam e maaɗa, mi wi’ataa mi andaama.”

Horiiɓe ɓen maa mbi’i non.

Yeesu Waɗii Do’aare Nder Geesamani

(Markus 14.32‑42; Luka 22.39‑46)

³⁶Sey Yeesu yaadi e tokkuɓemo wonde wigeere bi’eteende Geesamani26.36: Waato to ɗum namata ɓikkoy leɗɗe jaytun., o wi’iɓe, “Njooɗee ɗo’o, mi yaha ɗaa’e mi waɗa do’aare.” ³⁷O hocci Biiturus e ɓiɓɓe Jabadi ɗiɗo. Ɓernde maako boo teddi, o fuɗɗi wannuki naa’ seɗɗa. ³⁸Sey o wi’iɓe, “Ɓernde am wannii naa’ seɗɗa haa bo mi maayay. Njooɗodee e am ɗo’o on ndeena.”

³⁹Nde o yahi yeeso seɗɗa, sey o yani e leydi e mo hippii, o waɗi do’aare, o wi’i, “Nyaako am Mo Dow, to ɗum waɗoto, ittanam jardugel torra ka’a. Fuu e non naa’ ko ngiɗumi waɗetee, ammaa ko ngiɗɗaa waɗee.”

⁴⁰Gaɗa ɗon o so’’ii to ɓen ɗon tokkuɓemo tato, o tawi e ɓe ɗaanii, sey o wi’i Biiturus, “Too, on mbaawataa jooɗodaaki e am on ɗaanaaki koo carel seɗɗa? ⁴¹Njooɗee, to’ on ɗaano, ngaɗee do’aare to ɗum foondii’on to’ ngaɗon hakke. Ɓernde e yiɗi waɗuki ko haani, ammaa ɓandu tampii.”

⁴²O fuɗɗiti o dilli ɗiɗaɓum, o waɗi do’aare, o wi’i, “Nyaako am Mo Dow, to ɗum waɗataako ɗum ittanayam torra ka’a, sey to mi yariika, al ko ngiɗɗaa waɗee.” ⁴³Sey o fuɗɗiti o so’’oyii to maɓɓe, o tawi e ɓe ɗaanii, ngam e ɓe nana ɗeyngol teddungol.

⁴⁴Sey o fuɗɗiti o dilli tataɓum o waɗi do’aare, o wi’i non no o wi’uno. ⁴⁵O fuɗɗiti o so’’ii to maɓɓe tataɓum, o wi’iɓe, “Haa jooni on ɗaanii, on ciwtoo? Carel warii. Ɗum hokkitirii Ɓii Neɗɗo nder juuɗe gaɗooɓe hakke. ⁴⁶Ummee ndillen! Raa on ɗon kokkitirayɗoyam e wara.”

Ɗum Nangii Yeesu

(Markus 14.43‑50; Luka 22.47‑53; Yahaya 18.3‑12)

⁴⁷Yeesu e meta, sey Yahuuda, go’oto nder tokkuɓemo sappo e ɗiɗo wari. O wardoyi e yimɓe ɗuɗɓe e ɓe njogii kaafaaje e cabbi. Mawɓe ardiiɓe diina, e mawɓe yimɓe liloyiɓe. ⁴⁸Too, nden maa kokkitirayɗo Yeesu on o yaadake o wi’iiɓe no o hollirtaɓe Yeesu, o wi’i, “Neɗɗo mo kownaymi hownuki higaaku ɗum kanko. Nangeemo.”

⁴⁹Ɗon e ɗon Yahuuda on ɓaddii Yeesu, wi’i, “Moodibbo, Allah sabbinanee!” Nden o hownimo hownuki higaaku. ⁵⁰Yeesu nootii, wi’imo, “Higo am, waɗu ko waddumaa.”

Sey yimɓe ɓen ɓaddii nangi Yeesu ɓe njogiimo boɗɗum. ⁵¹E yiiki non, go’oto nder gonduɓe e Yeesu nangi kaafahi muuɗum soltiki, fe’’i maccuɗo Mawɗo Mawɓe Ardiiɓe Diina o ittanimo nowru. ⁵²Ammaa Yeesu wi’imo, “Wattu kaafahi maaɗa nder holgo maaki. Ngam fuu koccuɗo kaafahi, kaafahi waratamo. ⁵³On kammii mi waawataa toraaki Nyaako am Mo Dow, ɗon e ɗon o liloya moɓɗe malaa’ika’en ɓurɗe moɓɗe sappo e ɗiɗi? ⁵⁴Ammaa no waɗata aayaaje keewa biiɗe doole ɗu’um waɗa nihi?”

⁵⁵E ngel ɗon carel Yeesu wi’i garoyɓe ɓen, “On ngardoyi e kaafaaje e cabbi ngam nangoyyam bo mi gujjo calorɗo? Koo ndeye e mi jooɗoo nder Wuro Ceniingo e mi ekkitina, on nangaayiyam.26.55: Luk 19.47; 21.37.⁵⁶Ammaa ɗu’um waɗii ngam ko annabo’en mbindi heewa.”

Sey fuu tokkuɓemo alimo, ndoggi.

Yeesu Yeeso Laamu

(Markus 14.53‑65; Luka 22.54,55,63‑71; Yahaya 18.13,14,19‑24)

⁵⁷Sey nanguɓe Yeesu ɓen njaarimo to wuro Kayaafa Mawɗo Mawɓe Ardiiɓe Diina, to moodiɓɓe Attawra e mawɓe yimɓe kawriti. ⁵⁸Ammaa Biiturus tokkirimo gaɗa daga to woɗɗi haa yaaki caka wuro Mawɗo Mawɓe Ardiiɓe Diina on. O natti o jooɗodii e taadiiɓe Wuro Ceniingo, ngam o yi’a no ɗum waɗanta Yeesu. ⁵⁹Mawɓe ardiiɓe diina e fuu Kawtal Mawɓe e ɓe ɗaɓɓita ceyda fewre ɗum ɓe nangirta Yeesu, ngam ɓe keɓa ɓe mbaramo. ⁶⁰Ammaa ɓe keɓaayi goɗɗum, koo nde yimɓe ɗuɗɓe ndarake yeeso maɓɓe kokki ceyda fewre. E re’irde, yimɓe ɗiɗo ndarii yeeso yimɓe, ɓe mbi’i, ⁶¹“O’o neɗɗo wi’ii, ‘Mi waaway sankutuki Wuro Ceniingo ngo Allah, mi mahitoongo nder balɗe tati.’ ”

⁶²Sey Mawɗo Mawɓe Ardiiɓe Diina ummii darii wi’i Yeesu, “A walaa ko mbi’ataa? Ko ɓe mbi’i dow maaɗa ɗum goonga?” ⁶³Ammaa Yeesu de’’iti. Sey Mawɗo Mawɓe Ardiiɓe Diina on wi’imo, “Mi hawtiima e Allah mo yonki, wi’umin to an woni Almasiihu, Ɓiɗɗo Allah.”

⁶⁴Yeesu nootii, wi’i, “Ee, ɗum non no mbiiɗaa. Ammaa e mi wi’a’on, yeeso ɗo’o on ngi’ay Ɓii Neɗɗo e jooɗii to jungo nyaamo ngo Joomu Bawɗe e mo waroya nder duule.”26.64: Daan 7.13.

⁶⁵Sey Mawɗo Mawɓe Ardiiɓe Diina on seeki kolte muuɗum wi’i, “O huɗii Allah. Ɗume ceyda ɗaɓɓiteten kadin? Jooni on nanii ni haala kalluka ka o meti dow Allah. ⁶⁶Ko woni cuɓol mooɗon?”26.65,66: KLee 24.16.

Sey ɓe mbi’i, “Hewtii o waree!”

⁶⁷Sey ɓe tuttanimo joode to yeeso, ɓe piyimo, woɓɓe kellimo to wolo,26.67: Ica 50.6.⁶⁸e ɓe mbi’amo, “Almasiihu, waɗanmin annabaaku! Moye fiyumaa?”

Biiturus Wi’ii Andaa Yeesu

(Markus 14.66‑72; Luka 22.56‑62; Yahaya 18.15‑18,25‑27)

⁶⁹Biiturus e jooɗii caka wuro ngon, sey goɗɗo korɗo wari to maako wi’i, “An maa, a wondi e Yeesu Galilankeejo!”

⁷⁰Ammaa Biiturus yeddi yeeso maɓɓe ɓe fuu wi’i, “Mi andaa ko mbi’ataa!” ⁷¹Sey o yahi haade dammugal wuro ngon. Ɗonmaa sey goɗɗo korɗo yi’imo, wi’i yimɓe dariiɓe ɗon, “O’o neɗɗo e mo wondi e Yeesu Najarankeejo!”

⁷²Sey Biiturus fuɗɗiti yeddi haa e hunaaki, wi’i, “Mi andaa neɗɗo on!”

⁷³Gaɗa ɗon seɗɗa, sey dariiɓe ɗon ɓaddii Biiturus, mbi’i, “Seko walaa an maa a go’oto nder tokkuɓemo, ngam iri no metirtaa nangiima.”

⁷⁴Sey Biiturus fuɗɗi laanuki hoore muuɗum hunii wi’i, “Mi andaa neɗɗo on!”

Ɗon e ɗon njakardi hani. ⁷⁵Sey Biiturus siftori ko Yeesu wi’unoomo wi’uki, “Ko njakardi hana a wi’ay nde tati a andaayam.” Sey o wurtii yaasi o woyi bojji nawɗi.

Yeesu e Yeeso Bilaatus

(Markus 15.1; Luka 23.1,2; Yahaya 18.28‑32)

¹Nde weeti, sey fuu mawɓe ardiiɓe diina e mawɓe yimɓe meddi dow no ɓe mbardata Yeesu. ²Ɓe kaɓɓimo, ɓe ndillidi e maako ɓe njaarimo to Bilaatus gomnaajo.

Mayde Yahuuda

(Kuuɗe Lilaaɓe 1.18,19)

³Nde Yahuuda kokkitirɗo Yeesu yi’i ɗum taƴanii Yeesu kiita mayde, sey o wanni, o so’’itani mawɓe ardiiɓe diina e mawɓe yimɓe ceede ajurfaari 30 ɗen ɗon. ⁴O wi’i, “Mi waɗii hakke ngam mi hokkitirii neɗɗo mo waɗaayi ko wooɗaa.”

Ammaa ɓe mbi’imo, “Ko wannimin? An andi!”

⁵Sey o hubini ceede ɗen nder Wuro Ceniingo, o dilli o sagi hoore maako e ɓoggol dow lekki o wari hoore maako.

⁶Ammaa mawɓe ardiiɓe diina ɓopti ceede ɗen, mbi’i, “Attawra haɗii ɗum waɗa ɗe’e ceede nder to ɗum resata dokkal ngam Allah nder Wuro Ceniingo, nde ceede ɗen ɗum ceede ƴiiƴam.” ⁷Ngam non ɓe cuɓi ɓe kuutira ceede ɗen ɓe cooda ngesa to goɗɗo mahoowo gojiije, ɓe ngartiraka wigeere to ɗum uwata hoɓɓe. ⁸Kanjum waɗi, haa jooni ngesa kan e noddiree “Ngesa Ƴiiƴam.”27.3‑8: KL 1.18,19.

⁹Non hebbini ko Annabi Irmiya wi’i, wiiki, “Ɓe kocci ceede ajurfaari 30, ceede ɗe Israa’iilanko’en mbi’i ɗum yoɓa dow maako. ¹⁰Ɓe kuutiri ceede ɗen ɓe coodi ngesa to mahoowo gojiije, non no Joomiraawo wi’i mi waɗa.”27.9,10: Jak 11.12,13.

Bilaatus Ƴami Yeesu

(Markus 15.2‑5; Luka 23.3‑5; Yahaya 18.33‑38)

¹¹Yeesu e darii yeeso gomnaajo, sey gomnaajo on ƴamimo, wi’i, “An woni laamiiɗo Yahuudanko’en?”

Yeesu nootii wi’i, “A wi’iika.” ¹²Ammaa nde mawɓe ardiiɓe diina e mawɓe yimɓe ngulliimo, o wi’aayi goɗɗum.

¹³Sey Bilaatus wi’imo, “A nanataa ɓe ngullorakema fii ɗuɗɗum?”

¹⁴Ammaa Yeesu nootanaakimo koo nde go’o, haa gomnaajo on hayɗini naa’ seɗɗa.

Ɗum Taƴanii Yeesu Kiita Mayde

(Markus 15.6‑15; Luka 23.13‑25; Yahaya 18.39—19.16)

¹⁵Too, e carel Humto Sakkinki, Bilaatus gomnaajo woowii yoofanki hawrutuɓe curaaɗo go’oto mo ɓe ngiɗi. ¹⁶E carel ngel boo e woodi curaaɗo kalluɗo indinɗo bi’eteeɗo Barabbas. ¹⁷Nde yimɓe kawriti, sey Bilaatus ƴamiɓe, wi’i, “Moye ngiɗɗon mi yoofana’on? Barabbas koo Yeesu bi’eteeɗo Almasiihu?” ¹⁸Ngam Bilaatus faamii lawliiru waɗi ɓe ngaɗi Yeesu nder jungo maako.

¹⁹Bilaatus e jooɗii dow jooɗorgal kiita, sey debbo maako liloyi ɗum wi’amo, “Taa’ meemu on ɗon mo waɗaayi ko wooɗaa, ngam hanki mi hoyɗii dow maako mi wannii naa’ seɗɗa dow koyɗol ngol.”

²⁰Mawɓe ardiiɓe diina e mawɓe yimɓe ngaɗi yimɓe mbi’a ɗum yoofa Barabbas ɗum wara Yeesu. ²¹Gomnaajo on fuɗɗiti wi’iɓe, “Nder yimɓe ɗiɗo ɓen moye ngiɗɗon mi yoofana’on?” Ɓe mbi’i, “Barabbas!”

²²Sey Bilaatus ƴamiɓe wi’i, “Too, ko ngiɗɗon mi waɗana Yeesu bi’eteeɗo Almasiihu?” Ɓe fuu ɓe mbi’i, “Warumo dow gaafaangal!”

²³Bilaatus wi’i, “Ngam ɗume? Ɗume ko halli o waɗi?” Ammaa ɓe ɓeydi wi’uki sembee, “Warumo dow gaafaangal!”

²⁴Nde Bilaatus yi’i walaa ko waawata waɗuki, nden hawre fuɗɗi ummaaki, sey o nyeɗoyi ndiyam o looti juuɗe maako yeeso maɓɓe. O wi’i, “Mi walaa hakke ƴiiƴam neɗɗo o’o. Ɗum caɗɗum mooɗon.”27.24: TA 21.6‑9.

²⁵Sey yimɓe ɓen fuu nootii, mbi’i, “Ee, hakke ƴiiƴam maako e dow amin e ɓiɓɓe amin!”

²⁶Sey o yoofaniɓe Barabbas, ammaa o waɗi ɗum fiyi Yeesu looci, nden o tambinimo sooji’en Rooma ngam ɓe mbaroyamo dow gaafaangal.

Sooji’en Njukkitii Yeesu

(Markus 15.16‑20; Yahaya 19.2,3)

²⁷Daga ɗon sooji’en gomnaajo njaari Yeesu nder laamorde gomnaajo, ɓe kawriti fuu sooji’en koriiɓe yeeso maako. ²⁸Ɓe ɓortimo ɓe ɓornimo iri toggoore laamiiɓe. ²⁹Ɓe mbaali giifol gi’e, ɓe taaranimongol e hoore, ɓe ngaɗanimo sawru e jungo nyaamo maako, ɓe ndiccii yeeso maako, e ɓe njukkitamo, e ɓe mbi’a, “Allah reene, laamiiɗo Yahuudanko’en!” ³⁰Ɓe tuttanimo joode, ɓe njaɓi sawru ndun ɓe ngaɗi ka piirukimondu to hoore. ³¹Gaɗa ɓe njukkitiimo, ɓe ɓortimo toggoore laamiiɓe nde ɓe ɓornunoomo, nden ɓe ɓornimo kolte maako. Sey ɓe mburtinimo ɓe ardinimo ngam ɓe mbaroyamo dow gaafaangal.

Ɗum Piyanii Yeesu Kusaaje Dow Gaafaangal

(Markus 15.21‑32; Luka 23.26‑43; Yahaya 19.17‑27)

³²E ɓe njaha sey ɓe kawri e goɗɗo neɗɗo Saayirankeejo bi’eteeɗo Siiman. Ɓe ngaɗimo e sembe o hocca gaafaangal Yeesu. ³³Nde ɓe ngari to wonde wigeere bi’eteende Golgoota, waato “Ƴiƴal Hoore,” ³⁴ɓe kokki Yeesu ndiyam inabojam jillindiraaɗam e goɗɗum kaɗɗum. Ammaa nde o tahiɗam, o salii o yara.27.34: Jab 69.21.

³⁵Gaɗa ɓe piyaniimo kuusaaje dow gaafaangal, ɓe ngaɗi caaca ngam ɓe cenda kolte maako hakkunde maɓɓe.27.35: Jab 22.18.³⁶Gaɗa non ɓe njooɗii e ɓe ndeenamo. ³⁷Dow hoore gaafaangal ngal ɗum takki allowal. Ɗum windi dow maagal ko ɗum wulloriimo wi’uki, “O’o woni Yeesu Laamiiɗo Yahuudanko’en.” ³⁸Ɓe piyani wuyɓe ɗiɗo kuusaaje dow gaafaale haade Yeesu, go’oto e jungo maako nyaamo, go’oto e jungo maako nano.

³⁹Yimɓe ƴaɓɓotooɓe e kuɗa Yeesu e ngiila ko’e,27.39: Jab 22.7; 109.25.⁴⁰e ɓe mbi’a, “An giɗɗo pusuki Wuro Ceniingo mahitoongo nder balɗe tati, hisnu hoore maaɗa! Taa Ɓiɗɗo Allah, jippoya daga dow gaafaangal!”27.40: Maat 26.61; Yah 2.19.

⁴¹Non maa mawɓe ardiiɓe diina, e moodiɓɓe Attawra, e mawɓe yimɓe njukkitimo, e mbi’a, ⁴²“O hisnii woɓɓe, ammaa o waawaayi hisnuki hoore maako. To kanko woni Laamiiɗo Israa’iila, al o jippoyoo daga dow gaafaangal jooni, enen boo koolooɗenmo. ⁴³O hoolake Allah. Al Allah on hisnamo jooni to e mo yiɗimo, ngam o wi’ii, ‘Min mi Ɓiɗɗo Allah.’ ”27.43: Jab 22.8.

⁴⁴Non maa ɓen ɗon wuyɓe ɓe ɗum piyani kuusaaje dow gaafaale kuɗimo.

Mayde Yeesu

(Markus 15.33‑41; Luka 23.44‑49; Yahaya 19.28‑30)

⁴⁵Daga caka nyalawma nyiwre maɓɓi leydi fuu, haa yaaki njamndi tati ndi alaasara. ⁴⁶E njamndi tati ndin, sey Yeesu wi’i e sembe, “Eloy, Eloy, lama sabattani?” waato, “Yaa Allah am, Yaa Allah am, ngam ɗume cendirɗaa e am?”27.46: Jab 22.1.

⁴⁷Nde woɓɓe dariiɓe to wigeere nden nani non, ɓe mbi’i, “E mo nodda Annabi Iliya.” ⁴⁸Sey ɗon e ɗon go’oto maɓɓe doggi hocci soosowa, suuwinga nder ndiyam inabojam lammuɗam, o ɗiisinga to sawru, o liwanii Yeesu yara.27.48: Jab 69.21.

⁴⁹Ammaa woɓɓe mbi’i, “Alee ngi’en koo Iliya waray hisnamo.”

⁵⁰Sey Yeesu fuɗɗiti wulli sembee nden yoofi yonki muuɗum.

⁵¹Sey wudere cendunde Suudu Joomiraawo seeki ɗiɗi daga dow yaaki ley. Leydi boo dimbi, kaaƴe peccaa.27.51: Wur 26.31‑33.⁵²Ɗum omti genaale, yimɓe Allah mayɓe ɗuɗɓe ummii e yonki. ⁵³Ɓe mburtoyii nder genaale ɗen. Gaɗa Yeesu ummake daga mayde, ɓe nattoyi gariiri ceniindi27.53: Waato Urucaliima., yimɓe ɗuɗɓe ngi’iɓe.

⁵⁴Nde mawɗo sooji’en on e horiiɓe sooji’en reenooɓe Yeesu ngi’i dimbol leydi ngol e fuu ko waɗi, sey ɓe kultori naa’ seɗɗa, ɓe mbi’i, “Goonga neɗɗo o’o o Ɓiɗɗo Allah!”

⁵⁵E woodi rewɓe ɗuɗɓe tokkoyɓe Yeesu daga leydi Galiili wallooɓemo e ɓe ndaara daga to woɗɗi. ⁵⁶Nder maɓɓe e woodi Maryaama ƴiwoyɗo Magadala, e Maryaama maduujo Yaakubu e Yusufu, e maduujo ɓiɓɓe Jabadi.27.55,56: Luk 8.2,3.

Uwuki Yeesu

(Markus 15.42‑47; Luka 23.50‑56; Yahaya 19.38‑42)

⁵⁷Nde alaasara waɗi, sey goɗɗo diskuɗo ƴiwoyɗo gariiri Armaatiya wari. Inde maako Yusufu. Kanko maa o tokkuɗo Yeesu. ⁵⁸O yahi to Bilaatus, o toriimo o hokkamo ɓandu Yeesu. Sey Bilaatus waɗi ɗum hokkamondu. ⁵⁹Sey Yusufu hocci ndu taarindu e wudere lamnde nde ceede. ⁶⁰O fukkinoyndu nder yenaande maako heyre nde o waɗi ɗum wasanimo nder hayre. O talliti kaaƴa manga o maɓɓi dammugal yenaande nden, o dilli. ⁶¹Maryaama ƴiwoyɗo Magadala e go’oto Maryaama on e ɓe ɗon njooɗii yeeso yenaande nden.

Reenooɓe Yenaande Nden

⁶²Nde fini, waato gaɗa Nyalnde Siryaaki, sey mawɓe ardiiɓe diina e Faarisanko’en kawriti yeeso Bilaatus. ⁶³Ɓe mbi’i, “Allah reene! Min ciptorii ko on ɗon majjinoowo yimɓe wi’i ko o maaya, o wi’i, ‘Mi ummoto daga mayde gaɗa balɗe tati.’27.63: Maat 16.21; 17.23; 20.19; Mar 8.31; 9.31; 10.33,34; Luk 9.22; 18.31‑33.⁶⁴Ngam non, sey ngaɗaa ɗum yaha ɗum reena yenaande nden boɗɗum haa balɗe tati, ngam to’ tokkuɓemo njaha ngujja ɓandu maako mbi’a yimɓe o ummake daga mayde. Majjinki yimɓe cakitiiki kin ɓuray arandehi halluki.”

⁶⁵Sey Bilaatus wi’iɓe, “Too, njahee, koccon sooji’en, ngaɗon ko mbaawoton waɗuki ndeenon yenaande nden.”

⁶⁶Sey ɓe njahi yenaande nden ɓe piyi haatimiire laamiiɗo dow hayre to dammugal yenaande nden, ɓe ngaɗi sooji’en ndeenande boɗɗum.

Ummaaki Yeesu Daga Mayde

(Markus 16.1‑10; Luka 24.1‑12; Yahaya 20.1‑10)

¹Too, gaɗa Nyalnde Siwtaare, nyalnde Alal subaka, sey Maryaama ƴiwoyɗo Magadala e Maryaama go’oto on ɓe njahi ngam ɓe ngi’a yenaande nden. ²Ɗon e ɗon ɗum waɗi wongol dimbol leydi mangol, ngam goɗɗo malaa’ikaajo Joomiraawo wari daga dow, o talliti kaaƴa ngan daga dammugal yenaande nden, o jooɗii dow maaga. ³E mo ɗelkitoo bo maƴƴere, kolte maako boo e ranni tar bo hottollo. ⁴Nde sooji’en reenooɓe yenaande nden ngi’imo, kulol mangol nangiɓe haa ɓe ndiwni, ɓe njani, ɓe ngarti bo mayɓe.

⁵Ammaa malaa’ikaajo on wi’i rewɓe ɓen, “To’ on kulu. E mi andi Yeesu ɗaɓɓitoton, baraaɗo dow gaafaangal. ⁶O walaa ɗo’o. Ɗum umminiimo daga mayde. Ngaree ngi’on to ɗum fukkinnoomo. ⁷Njahee nder yawɗaare mbi’on tokkuɓemo, ‘O ummake daga mayde. Raɗɗum, o artay’on yaaki leydi Galiili. Ton ngi’otonmo.’ Kanjum woni habaru ɗum ngaddanmi’on.”

⁸Sey rewɓe ɓen ali yenaande nden jawɗum nder kulol, ammaa e welwelo mango. Ɓe ndoggi ɓe njahi ngam ɓe mbi’aka tokkuɓe Yeesu.

⁹Sey Yeesu hawri e maɓɓe, wi’i, “Aku mooɗon!” Ɓe ɓattiimo, ɓe ndiccii, ɓe njogii koyɗe maako, ɓe mawninimo. ¹⁰Sey Yeesu wi’iɓe, “To’ on kulu. Njahee mbi’on bandiraaɓe am njaha leydi Galiili. Ton ɓe ngi’atayam.”

Habaru Ɗum Reenooɓe Yenaande Ngaddi

¹¹Rewɓe ɓen e dow laawol, sey woɓɓe nder sooji’en reenooɓe yenaande nden njahi gariiri ɗiiwiti mawɓe ardiiɓe diina fuu ko waɗi. ¹²Nde mawɓe ardiiɓe diina e mawɓe yimɓe kawriti, ɓe ndarwi dabare. Ɓe kokki sooji’en ɓen ceede ɗuɗɗe, ¹³ɓe mbi’iɓe, “Mbi’ee yimɓe, ‘Tokkuɓemo ngari jemma e min ɗaanii ɓe ngujjimo.’ ¹⁴To Gomnaajo nanii ɗu’um habaru, min estaymo min curana’on nattuki torra.”

¹⁵Sey sooji’en ɓen njaɓi ceede ɗen, ɓe ngaɗi non no ɗum wi’iɓe ɓe ngaɗa. Habaru ɗum sankitaama nder Yahuudanko’en, e ɓe kokka habaru ɗu’um haa hande.

Kuugal Ngal Yeesu Hokki Tokkuɓemo

(Markus 16.14‑18; Luka 24.36‑49; Yahaya 20.19‑23; Kuuɗe Lilaaɓe 1.6‑8)

¹⁶Sey tokkuɓemo sappo e go’o ɓen ndilli leydi Galiili to hocceere nde Yeesu wi’iɓe ɓe njaha.28.16: Maat 26.32; Mar 14.28.¹⁷Nde ɓe ngi’imo, sey ɓe mawninimo, ammaa woɓɓe ngaɗi seko nder ɓerɗe maɓɓe. ¹⁸Sey Yeesu ɓaddii haade maɓɓe, wi’iɓe, “Ɗum hokkiiyam fuu laamu dow e ley. ¹⁹Ngam non, njahee ngartiron fuu lenyi duuniyaaru tokkuɓeyam, ngaɗanonɓe baptisma nder inde Allah Nyaako Mo Dow, e Ɓiɗɗo, e Ruuhu Allah,28.19: KL 1.8.²⁰on ekkitinaɓe ɓe tokka koo ɗume ko mbiimi’on ngaɗon. Raɗɗum, e mi wondi e mooɗon koo ndeye haa re’uki duuniyaaru.”