Luka

Habaru Yeesu Ɗum

Luka

Windi

Habaru dow ɗerewol ngo’ol

Neɗɗo bi’eteeɗo Luka windi ɗerewol ngo’ol. Kanko o nyawndoowo, nden naa’ o Yahuudankeejo. Ɗonmaa naa’ o go’oto nder tokkuɓe Yeesu sappo e ɗiɗo. O windii ɗerewol ngo’ol duuɓi 59‑63 A.D., koo 70‑80 A.D., waato duuɓi 59‑63, koo 70‑80 gaɗa danyngol Yeesu. E ɗum kammoo Luka windi ɗerewol ngo’ol ko e mo gariiri Rooma. O windungol ngam koo moye, koo nde o innii inde Tiyoofilus.

Ɗerewol ngo’ol ɗum habaru Yeesu Almasiihu, e no o danyiraa e no o jooɗorii. O yamɗitinii nyawɓe, o wurtinanii yimɓe ginni, o umminii mayɓe, o ekkitinii yimɓe dow laawol Allah. Kalluɓe mbarimo, ammaa o ummake daga mayde gaɗa balɗe tati. Ngol wi’i Yeesu waaway yaafaaki hakke neɗɗo. Ngol hollii tokkuɗo Yeeso fuu to maayi nattay Wuro Allah.

Ko Woni Nder:

Fuɗɗoode (1.1‑4)

Danyngol Yahaya Gaɗoowo Baptisma e danyngol Yeesu (1.5—2.52)

Wa’ajinki Yahaya Gaɗoowo Baptisma (3.1‑20)

Baptisma Yeesu e no Ceyɗan foondirimo (3.21—4.13)

Kuuɗe Yeesu e leydi Galiili (4.14—9.50)

Daga Galiili yaaki Urucaliima (9.51—19.27)

Yontoore Yeesu cakitiinde (19.28—23.56)

Ummaaki Yeesu daga mayde e yaaki maako dow (24.1‑53)

Habaru Yeesu Ɗum Luka Windi

¹Yaa Tiyoofilus mawɗo,

Yimɓe ɗuɗɓe fuɗɗii winduki habaru dow ko Yeesu waɗi nder amin. ²Ɓe mbindi habaru ɗum nanɗen daga konduɗe giiɓe ko waɗi e gite maɓɓe, andinooɓe Wolde Allah. ³Ngam non, min maa ɗum wooɗaniiyam mi ɗaɓɓita koo ɗume e seese‑seese daga fuɗɗuki maajum, mi windanmaa koo ɗume no woni, ⁴ngam andaa goonga dow koo ɗume ko ɗum ekkitinmaa.

Ɗum Andinii Danyngol Yahaya Gaɗoowo Baptisma

⁵Nder carel ngel Hirudus laamiiɗo leydi Yahuudiya laamotoo, e woodi ardiiɗo diina bi’eteeɗo Jakaariya, e mo nder ardiiɓe diina daga lenyol Abija. Debbo maako Alisabatu ƴiwoyii daga lenyol Haruuna, waato ardiiɓe diina.1.5: 1HL 24.10.⁶Ɓe fuu ɗiɗo ɓe njooɗake jonde wooɗunde yeeso Allah, e ɓe ngaɗa koo ɗume ko Joomiraawo wi’i yimɓe ngaɗa. ⁷Ammaa ɓe ngalaa ɓiɓɓe, ngam Alisabatu o danyataa, kadimaa ɓe fuu ɗiɗo ɓe nawyii.

⁸Wonde nyalnde Jakaariya e huwa yeeso Allah nder Wuro Ceniingo e ɓe o huudata. ⁹Ɗum suɓiimo, no ardiiɓe diina mboowi waɗuki, ngam o natta nder Suudu Joomiraawo o wula urde welnde ngam Joomiraawo. ¹⁰Nde carel wuluki urde welnde waɗi, moɓgal fuu e dari yaasi e ɓe ngaɗa do’aare. ¹¹Sey malaa’ikaajo Joomiraawo wangi to maako e darii wuttudu nyaamo to ɗum wulata urde welnde. ¹²Nde Jakaariya yi’imo, ɓernde muuɗum taƴi, kulol nangimo. ¹³Ammaa malaa’ikaajo on wi’imo, “Taa’ hulu Jakaariya, Joomiraawo nanii do’aare maaɗa. Debbo maaɗa Alisabatu danyante ɓiɗɗo gorko, nden a hokkaymo inde Yahaya. ¹⁴Ɓiɗɗo on waɗete nanaa belɗum ɗuɗɗum, ɗuɗɓe maa nanay belɗum ngam danyeeki maako, ¹⁵ngam o wartay mawɗo yeeso Joomiraawo. O yarataa ndiyam inabojam koo njaru gaylitayngu hoore, nden o heeway Ruuhu Allah daga e mo nder reedu maduujo maako.1.15: Lim 6.3.¹⁶O wartiray ɓiɓɓe Israa’iila ɗuɗɓe to Allah Joomiraawo maɓɓe. ¹⁷O artay Almasiihu warki nder bawɗe Ruuhu Allah ɗe Annabi Iliya heɓunoo, o siryootiray danyooɓe e ɓiɓɓe maɓɓe. O waylitay caliiɓe ɗatal Joomiraawo to ɗatal gooduɓe goonga. O waɗay yimɓe ciryoo ngam garol Joomiraawo.”1.17: Mal 4.5,6.

¹⁸Jakaariya ƴami malaa’ikaajo on wi’i, “Noye andiraymi ko mbiiɗaa ɗum goonga? Min, mi nawyii, debbo am boo duuɓi muuɗum ɗuuɗii.”

¹⁹Malaa’ikaajo on wi’imo, “Min woni Jibiriilu darotooɗo yeeso Allah, mi liloyaa to maaɗa ngam mi hokkumaa Habaru Belɗum ɗu’um.1.19: Daan 8.16; 9.21.²⁰Ammaa jooni a waawataa metuki naa nyalnde nde fii ɗu’um waɗi, ngam a jaɓaayi haala am tabbitayka to carel maaka warii.”

²¹E carel ngel yimɓe e keɗii Jakaariya yaasi, ɓe kayɗinii ko waɗi o neeɓiri non nder Suudu Joomiraawo. ²²Nde o wurtoyii, o waawaayi metankiɓe. Ɓe faami o yi’i wahayu nder Suudu Joomiraawo. O waɗi ka metirankiɓe juuɗe, ammaa non o jooɗorii o metataa.

²³Nde o heenyi balɗe kuugal maako, o so’’ii wuro maako. ²⁴Gaɗa fii ɗu’um waɗii, debbo maako Alisabatu heɓi reedu, waɗi lebbi jowi o wurtaaki daga nder wuro. O wi’i, ²⁵“Joomiraawo waɗaniiyam ɗu’um. Nder balɗe ɗe’e, o ittaniiyam semteende am hakkunde yimɓe.”

Malaa’ikaajo Hokkii Habaru Danyngol Yeesu

²⁶Nder lewru joweego’ooru gaɗa Alisabatu heɓii reedu, Allah lili malaa’ikaajo Jibiriilu to gariiri bi’eteendi Najarat ngondi nder leydi Galiili. ²⁷Malaa’ikaajo on yahi to surbaajo bi’eteeɗo Maryaama gaɗanaaɗo alkawal teegal e bi’eteeɗo Yusufu, daga lenyol Dawda.1.27: Dawda on woni laaminooɗo leydi Israa’iila ndenno. Maryaama on andaa gorko.1.27: Maat 1.18.²⁸Malaa’ikaajo on wi’imo, “E mi silminoo, barkiɗinaaɗo Joomiraawo! Joomiraawo e wondi e maaɗa!”

²⁹Haala kan wannii Maryaama ko ɗuuɗi. O wi’i nder ɓernde maako, “Min, mi moye o’o mettirantayam nihi?” ³⁰Ammaa malaa’ikaajo on wi’imo, “Taa’ hulu, Maryaama, Allah suɓii barkiɗinmaa. ³¹A heɓay reedu, a danyay ɓiɗɗo gorko, nden a nodday inde maako Yeesu.1.31: Maat 1.21.³²O wartay mawɗo, ɗum noddaymo Ɓiɗɗo Allah Joomu Mangu. Allah Joomiraawo hokkaymo jooɗorgal laamu maama maako Dawda. ³³O laamoto dow ɓiɓɓe Israa’iila haa abadaa. Laamu maako re’ataa.”1.32,33: 2Sam 7.12,13,16; Ica 9.7.

³⁴Maryaama wi’i malaa’ikaajo on, “Noye ɗum waɗortoo? Mi andaa gorko sam.”

³⁵Malaa’ikaajo on wi’imo, “Ruuhu Allah jippoyto dow maaɗa, bawɗe Allah Joomu Mangu suddete bo ɗowdi. Ngam non, danyeteeɗo on ɗum noddiraymo ‘Ɓiɗɗo Allah, Ceniiɗo.’ ³⁶Raa, Alisabatu bandiraawo maaɗa heɓii reedu nder nayewu muuɗum, o danyay ɓiɗɗo gorko. Kanko mo yimɓe mbi’ata o danyataa, jooni e mo woodi reedu ndu lebbi joweego’o. ³⁷Ngam walaa ko salorta Allah.”1.37: Fuɗ 18.14.

³⁸Nden Maryaama wi’i, “Mi korɗo Joomiraawo, ɗum wartanayam non no mbiiɗaa.” Sey malaa’ikaajo on dilli alimo.

Maryaama Yahi to Alisabatu

³⁹Nder balɗe ɗen, Maryaama ummii nder yawɗaare yahi gariiri ngondi nder kocceeje leydi Yahuudiya. ⁴⁰O natti wuro Jakaariya, o howni Alisabatu. ⁴¹Carel ko Alisabatu nani kownol Maryaama, ɓiɗɗo gonɗo nder reedu maako diwi ngam belɗum, Alisabatu boo hebbinaa Ruuhu Allah. ⁴²O noddi Maryaama e sembe, o wi’i, “A barkiɗinaaɗo nder rewɓe! Ɓiɗɗo mo caawuɗaa o barkiɗinaaɗo. ⁴³Min, mi moye nde inna Almasiihu warata to am? ⁴⁴Nde nanumi kownol maaɗa, ɓiɗɗo gonɗo nder reedu am diwii ngam belɗum. ⁴⁵A barkiɗinaaɗo ngam a jaɓii ko Joomiraawo waɗanmaa alkawal ɗum heeway.”

Gimol Maryaama

⁴⁶Nden Maryaama wi’i,

“E mi manta Joomiraawo e ɓernde am fuu.

⁴⁷E mi nana belɗum ɗuɗɗum nder ɓernde am ngam Allah, Kisnoowoyam,

⁴⁸ngam o yurminaniiyam, min, korɗo maako, lestinɗo hoore.

Daga jooni yimɓe duuniyaaru fuu noddirayyam barkiɗinaaɗo,1.48: 1Sam 1.11.

⁴⁹ngam Allah Baawuɗo waɗaniiyam fii mawɗum ɗuɗɗum,

o ceniiɗo.

⁵⁰Jurumɗum maako jooɗoto dow kulooɓemo haa abadaa.

⁵¹E mo waɗa fii mawɗum e jungo maako sembingo,

e mo sankita mawninɓe ko’e maɓɓe e ko ɓe mantortoo nder ɓerɗe maɓɓe.

⁵²E mo itta laamiiɓe dow laamu maɓɓe,

ammaa e mo mawnina lesnuɓe ko’e maɓɓe.1.52: Ayu 5.11; 12.19.

⁵³E mo harna nanooɓe weelo e fii boɗɗum,

ammaa e mo ala riskuɓe juuɗe meere.

⁵⁴E mo walla yimɓe Israa’iila maccuɓe maako,

o yejjitataa yurminanki

⁵⁵Ibraahim e lenyol muuɗum haa abadaa,

no o wi’unoo maama’en meeɗen.”1.55: Fuɗ 17.7.1.46‑55: 1Sam 2.1‑10.

⁵⁶Maryaama jooɗodake e Alisabatu ko waɗi lebbi tati, nden o so’’ii wuro maako.

Danyngol Yahaya Gaɗoowo Baptisma

⁵⁷Nde carel danyuki Alisabatu waɗi, o danyi ɓiɗɗo gorko. ⁵⁸Ɓe o heddi e bandiraaɓe maako ɓe nanidi belɗum e maako nde ɓe nani Joomiraawo yurminanimo.

⁵⁹Nde ɓingel ngel waɗi balɗe joweetati, ɓe ngari naadukingel. Ɓe ngiɗiino noddankingel inde nyaako maagel Jakaariya.1.59: KLee 12.3.⁶⁰Ammaa maduujo maagel wi’i, “Naa’ non, ɗum noddanangel Yahaya.”

⁶¹Ɓe mbi’imo, “Walaa goɗɗo nder lenyol maaɗa gooduɗo inde nden ɗon.” ⁶²Sey ɓe metirani nyaako maagel juuɗe, ngam ɓe anda inde nde o yiɗi ɗum noddanangel.

⁶³Jakaariya holliɓe e mo yiɗi allowal, o windi, “Inde maagel Yahaya.” Ɓe fuu fii ɗum hulniiɓe. ⁶⁴Ɗon e ɗon, honduko maako maɓɓitii, ɗemngal maako yoofi, nden o fuɗɗi metuki, e mo manta Allah. ⁶⁵Kulol nangi ɓe o heddi fuu, koo moye waɗi ka metuki dow fii ɗum fuu nder kocceeje leydi Yahuudiya. ⁶⁶Koo moye nanɗo fii ɗu’um nyumi dow maajum, e wi’a, “Ɗume ɓingel nge’el wartata to mawni?” Ngam jungo Joomiraawo e wondi e maagel.

Annabaaku Jakaariya

⁶⁷Jakaariya, nyaako ɓingel ngel, e heewi Ruuhu Allah, waɗi annabaaku, o wi’i,

⁶⁸“En mantu Joomiraawo, Allah Israa’iila,

ngam o waroyii o rimɗinii yimɓe maako.

⁶⁹Allah waddanii’en kisnoowo mawɗo

ƴiwoyɗo daga lenyol Dawda, maccuɗo maako.

⁷⁰No o wi’unoo nder konduɗe annabo’en maako cuɓaaɓe daga ko neeɓi,

⁷¹o hisnay’en daga ganyooɓe meeɗen e kallanɓe’en.

⁷²O wi’iino o yurminanay maama’en meeɗen,

o yejjitataa alkawal maako ceniingal,

⁷³ngal o waɗannoo maama meeɗen Ibraahim.

⁷⁴O wi’ii o hisnay’en daga juuɗe ganyooɓe meeɗen,

ngam kuwanenmo kulol walaa,

⁷⁵njooɗooɗen jonde ceniinde e aadilaaku yeeso maako nder balɗe meeɗen fuu,

ngaɗen koo ɗume ko o wi’i.

Annabaaku Jakaariya Dow Ɓiɗɗo Muuɗum

⁷⁶“An ɓingel am, ɗum noddirte annabiijo Joomiraawo Joomu Mangu,

a artay Almasiihu warki ngam mo’’inanaamo laawol,1.76: Mal 3.1.

⁷⁷ngam andinaa yimɓe maako ɗum hisnayɓe laawol yaafaaki hakke maɓɓe.

⁷⁸Allah waɗii fii ɗu’um ngam o keewuɗo jurumɗum. Ngam jurumɗum maako,

Almasiihu waroyay to meeɗen daga dow no naange wurtiroytoo,

⁷⁹ngam o yeynanoo wonɓe nder nyiwre e nder kulol mayde,

ɗum tokkinay koyɗe meeɗen dow laawol jam.”1.79: Ica 9.2.

⁸⁰Ɓiɗɗo on mawni, faamu maako ɓeydii. E mo jooɗii nder ladde haa carel ko ɗum andinimo to yimɓe Israa’iila.

Danyngol Yeesu

(Maatiyu 1.18‑25)

¹Carel ko Yahaya Gaɗoowo Baptisma danyaa, Mawɗo Laamiiɓe leyɗe Rooma bi’eteeɗo Kaysar Agustus wi’i wonɓe nder laamu Rooma fuu ɗum winda inɗe maɓɓe. ²Kanki woni winduki arandehi ki ɗum waɗi carel ko Kiriiniyus woni gomnaajo leydi Siiriya. ³Koo moye yahi to lenyol muuɗum ƴiwoyi ngam ɗum winda inde muuɗum.

⁴Sey Yusufu maa ummii daga gariiri Najarat nder leydi Galiili. O yahi gariiri to Dawda danyaa bi’eteendi Baytalaami ngondi nder leydi Yahuudiya, ngam kanko daga lenyol Dawda. ⁵O yahu ton ngam ɗum winda inde maako, kanko e Maryaama, mo ɗum waɗanimo alkawal teegal. Maryaama on e woodi reedu. ⁶E ɓe nder Baytalaami, sey carel danyngol maako waɗi. ⁷Sey o danyi ɓiɗɗo gorko, afo maako, o saawimo nder wudere wooɗunde, o fukkinimo nder to ɗum waɗanta marle nyamndu, ngam walaa njayri nder suudu hoɓɓe.

Malaa’ika’en Wanganii Woynaaɓe

⁸E woodi woynaaɓe haade ɗon e ɓe mbaala yaasi, e ɓe ndeena marle maɓɓe jemma. ⁹Sey malaa’ikaajo Joomiraawo wanganiɓe nder teddungal Joomiraawo, kulol nangiɓe. ¹⁰Ammaa malaa’ikaajo on wi’iɓe, “To’ on kulu! Mi waddanii’on habaru ɓurɗum welki ngam koo moye. ¹¹Hande nder gariiri Dawda ɗum danyanii’on kisnoowo, kanko woni Almasiihu, Joomiraawo. ¹²Raa no keɓtirtonmo, on taway ɓingel e saawaa nder wudere, nden e ngel fukkinaa nder to ɗum waɗanta marle nyamndu.”

¹³Ɗon e ɗon sey woɓɓe malaa’ika’en ɗuɗɓe wangi haade malaa’ikaajo on, e ɓe mawnina mangu Allah, e ɓe mbi’a,

¹⁴“En mawnin Allah Mo Dow,

jam jooɗoo nder duuniyaaru e dow yimɓe ɓe o nanata belɗum maɓɓe.”

¹⁵Nde malaa’ika’en ɓen co’’ii dow, sey woynaaɓe ɓen ngaɗi ka medduki, e ɓe mbi’a, “En njahu Baytalaami ngi’en fii ɗu’um ɗum Joomiraawo wi’i’en.”

¹⁶Sey ɓe njawɗii, ɓe njahi, ɓe tawi Maryaama e Yusufu e ɓingel ngel e ngel fukkii nder to ɗum waɗanta marle nyamndu. ¹⁷Nde ɓe ngi’ingel, ɓe ndilli, ɓe mbi’i yimɓe ko malaa’ikaajo wi’iɓe dow maagel. ¹⁸Ko woynaaɓe ɓen mbi’i kayɗinii koo moye nanɗo. ¹⁹Ammaa Maryaama boo e jogii ko nani fuu nder ɓernde muuɗum, o waɗi ka nyumuki dow maajum. ²⁰Sey woynaaɓe ɓen co’’ii, e ɓe mawnina Allah, e ɓe mantamo ngam koo ɗume ko ɓe nani e ko ɓe ngi’i, non no ɗum wi’iriɓe.

Yeesu Waɗanaama Inde

²¹Nde ɓingel ngel waɗi balɗe joweetati, ɗum naadimo ɗum hokkimo inde Yeesu, inde nde malaa’ikaajo hokkimo ko ɗum waɗa reedu maako.2.21: KLee 12.3; Luk 1.31.

Ɗum Yaarii Yeesu Wuro Ceniingo

²²Gaɗa balɗe lootaaki maɓɓe heenyi no Annabi Muusa wi’i nder Attawra ɓe ngaɗa to ɓe ndanyii, Yusufu e Maryaama njaari Yeesu Urucaliima yeeso Joomiraawo. ²³Non ɗum windiraa nder Attawra, “Koo moye gorko afo, Joomiraawo jeyimo.”2.23: Wur 13.2,12.²⁴Ɓe cakkani Allah no ɗum windiraa nder Attawra, “pooli ɗiɗi koo boo tattabarahoy ɗiɗoy.”2.22‑24: KLee 12.6‑8.

²⁵E carel ngel e woodi goɗɗo neɗɗo nder Urucaliima bi’eteeɗo Saaminu, aadiliijo, kuloowo Allah. O haaɓii o yi’a garol Almasiihu ngam hisna yimɓe Israa’iila. Ruuhu Allah e wondi e maako, ²⁶holliimo o maayataa naa o yi’ii Almasiihu Joomiraawo. ²⁷Ruuhu Allah yaarimo nder Wuro Ceniingo. Sey Maryaama e Yusufu ngaddoyi Yeesu nder wuro ngon ngam waɗankimo ko Attawra wi’i. ²⁸Saaminu jaɓi ɓingel ngel nder juuɗe muuɗum, nden manti Allah, wi’i,

²⁹“Yaa Joomiraawo, a hebbinii alkawal maaɗa.

Jooni alu maccuɗo maaɗa dilla jam.

³⁰Ngam gite am ngi’ii kisnoowo mo liloyɗaa,

³¹mo ciryaniɗaa lenyi fuu.

³²O wartay bo jayngol, o hollay lenyi duuniyaaru laawol maaɗa,

o waɗay yimɓe maaɗa Yahuudanko’en keɓa mangu.”2.32: Ica 42.6; 49.6; 52.10.

³³Nyaako ɓingel ngel e maduujo maagel ɓe kayɗini e ko ɗum wi’i dow maagel. ³⁴Sey Saaminu barkiɗiniɓe, nden o wi’i Maryaama, maduujo Yeesu, “Ɓingel nge’el wartay ɗatal yanuki ɗuɗɓe e ummaaki ɗuɗɓe nder leydi Israa’iila. Ngel wartay anditirɗum daga Allah ɗum yimɓe ɗuɗɓe nganyata. ³⁵Ɓiɗɗo o’o wanginay nyumooji yimɓe cuuɗiiɗi. An maa, ɓernde maaɗa naaway bono kaafahi tufinde.”

³⁶Ɗonmaa e woodi annabiijo debbo bi’eteeɗo Hannatu ɓii Faanuwel, ƴiwoyɗo daga lenyol Aaciru. Debbo on o nayeejo, o jooɗodake e gorko maako duuɓi joweeɗiɗi, nden gorko on maayii. ³⁷Gaɗa goriiko maayi, o jooɗii o te’aaka haa duuɓi maako ngaɗi 84. Koo ndeye e mo yaha Wuro Ceniingo e mo mawnina Allah, e mo suumoo, e mo waɗa do’aare jemma e nyalawma. ³⁸E carel ngel, o waroyi to maɓɓe, o yetti Allah, o yahi to kaaɓuɓe yi’uki carel ko Allah rimɗinta Urucaliima, o hokkiɓe habaru dow ɓingel ngel.

Danyooɓe Yeesu Co’’ake Najarat

³⁹Nde Yusufu e Maryaama njottini koo ɗume ko Attawra wi’i ɗum waɗa, ɓe co’’ii gariiri maɓɓe Najarat nder leydi Galiili.2.39: Maat 2.23.⁴⁰Yeesu mawni, sembiɗi, faamu heewimo, nden barka Allah e dow maako.

Yeesu Nder Wuro Ceniingo

⁴¹Koo ɗume ndungu danyooɓe Yeesu e njaha Urucaliima ngam Humto Sakkinki.2.41: Wur 12.1‑27; TA 16.1‑8.⁴²Nde Yeesu waɗi duuɓi sappo e ɗiɗi, ɓe njahi humto no ɓe mboowi. ⁴³Gaɗa humto ngon heenyi, danyooɓe maako e dow ɗatal hootuki wuro, Yeesu boo darii nder Urucaliima, ammaa danyooɓe ɓen andaa o darake. ⁴⁴E ɓe kammii e mo nder ɓe ɓe njaadata, ɓe ngaɗi yaadu nyalnde go’o, nden ɓe puɗɗi ɗaɓɓutukimo nder bandiraaɓe maɓɓe e higooɓe maɓɓe. ⁴⁵Nde ɓe ɗaɓɓiti ɓe keɓtaayimo, ɓe co’’ii Urucaliima ngam ɗaɓɓutukimo. ⁴⁶Nder nyalnde tatawre ɓe tawimo nder Wuro Ceniingo, e mo jooɗii hakkunde moodiɓɓe, e mo nanaɓe, nden e mo ƴamaɓe. ⁴⁷Nanɗomo fuu hayɗini e faamu maako e nootaaki maako. ⁴⁸Nde danyooɓe maako ngi’imo, ɓe kayɗini. Maduujo maako wi’imo, “Ɓiɗɗo am, ko waɗi ngaɗanɗaamin niini? Min e nyaako maaɗa nde min ɗaɓɓiti min ngi’aayima, min ngannii.”

⁴⁹O wi’iɓe, “Ko waɗi ɗaɓɓitotoyyam? On andaa e haani mi jooɗoo nder wuro Nyaako am?” ⁵⁰Ammaa ɓe faamaayi ko o wi’iɓe.

⁵¹Sey Yeesu so’’odii e maɓɓe Najarat, e mo waɗa ko ɓe mbi’imo fuu. Maduujo maako jogii fii ɗu’um fuu nder ɓernde muuɗum. ⁵²Yeesu mawni, ɓeydi faamu e heɓuki yidde daga to Allah e to yimɓe.2.52: 1Sam 2.26; Wag 3.4.

Haala Yahaya Gaɗoowo Baptisma

(Maatiyu 3.1‑12; Markus 1.1‑8; Yahaya 1.19‑28)

¹Mawɗo Laamiiɓe leyɗe Rooma bi’eteeɗo Kaysar Tibaariya e woodi duuɓi sappo e jowi dow laamu, e carel ngel Buntus Bilaatus woni gomnaajo leydi Yahuudiya. Hirudus3.1: Hirudus o’o kanko woni Hirudus Antifas ɓiɗɗo Laamiiɗo Hirudus mo ɗum inni nder suurawol go’o. boo e laamii leydi Galiili, mawniiko Filibus boo e laamii leydi Ituuriya e Tarakuniitas, nden Lisaaniyas e laamii leydi Abiiliya. ²Hanaana e Kayaafa boo ngoni Mawɓe Mawɓe Ardiiɓe Diina. E carel ngel Wolde Allah warani Yahaya, ɓiɗɗo Jakaariya, nder ladde. ³Ngam non, Yahaya yahi bigeeje gonɗe haade Caangol Urdun fuu, e mo wa’ajina, e mo wi’a, “Tuubee, ɗum waɗana’on baptisma, nden Allah yaafanto’on hakkeeji mooɗon.” ⁴No ɗum windiraa nder deftere Annabi Icaaya dow Yahaya,

“Goɗɗo e nodda nder ladde e wi’a,

‘Mo’’inee ɗatal Joomiraawo,

portee laawol ngam garol maako.

⁵Pogooji fuu ɗi kebbinteeɗi,

kocceeje e ƴoole fuu ɗe nameteeɗe.

Ɗate guuriiɗe ɗe dartinteeɗe, ɗate bonniiɗe ɗe mo’’inteeɗe.

⁶Yimɓe duuniyaaru fuu ɓe ngi’ay kisndam Allah.’ ”3.4‑6: Ica 40.3‑5.

⁷Yimɓe ɗuɗɓe ngaroyi to Yahaya ngam o waɗanaɓe baptisma. O wi’iɓe, “Onon ɓiɓɓe boole! Moye wi’i’on ndoggon bone garayɗum?3.7: Maat 12.34; 23.33.⁸Ngaɗee ko hollata on alii hakkeeji mooɗon. To’ on mbi’u nder ɓerɗe mooɗon, ‘Minon, min ɓiɓɓe Annabi Ibraahim.’ Ngam e mi wi’a’on, Allah waaway umminanki Annabi Ibraahim ɓiɓɓe daga nder kaaƴe ɗe’e.3.8: Yah 8.33.⁹Koo jooni fe’’irde ƴeftaama ngam fe’’a leɗɗe daga ɗaɗi maaje. Lekki fuu ki rimataa ɓikkoy mboɗkoy, ɗum fe’’ayki ɗum faɗɗaki nder hiite.”3.9: Maat 7.19.

¹⁰Yimɓe mbi’imo, “Ko haani min ngaɗa?”

¹¹Yahaya wi’iɓe, “Gooduɗo toggooje ɗiɗi fuu hokka mo walanaa go’o, nden gooduɗo nyamndu fuu hokkora mo walanaa.”

¹²Jaɓooɓe ceede leydi maa ngari ngam ɓe ngaɗanee baptisma, ɓe mbi’imo, “Moodibbo, ko haani min ngaɗa?”3.12: Luk 7.29.

¹³O wi’iɓe, “To’ on njaɓu ko ɓuri no ɗum wi’i’on njaɓon.”

¹⁴Woɓɓe sooji’en ƴamimo mbi’i, “Minon maa, ko haani min ngaɗa?”

O wi’iɓe, “To’ on teetan yimɓe ceede e sembe, to’ on mbi’u yimɓe ngaɗii ko ɓe ngaɗaayi ngam njaɓanonɓe ceede. Munyee dow ko ɗum yoɓata’on.”

¹⁵Yimɓe kaaɓii ngi’a Almasiihu. Koo moye nder maɓɓe e nyuma nder ɓernɗe muuɗum koo Yahaya woni Almasiihu. ¹⁶Yahaya wi’iɓe, “E mi waɗirana’on baptisma e ndiyam, ammaa ɓurɗoyam mangu e wara. Mi fotaayi fittuki lokkulli paɗe maako. O waɗiranay’on baptisma e Ruuhu Allah e hiite. ¹⁷E mo jogii besirɗum gawri maako ngam senduki gawri e nyaande. O hawritay gawri ndin, o waɗandi nder resirde gawri maako, ammaa o wula nyaande nden nder hiite nge waatataa.”

¹⁸Non Yahaya waggini yimɓe e boliiɗe ɗuɗɗe, o andiniiɓe Habaru Belɗum. ¹⁹Nden o haɓani Hirudus laamiiɗo leydi ngam te’i debbo mawniraawo muuɗum bi’eteeɗo Hiruudiya, kadimaa ngam kuuɗe kalluɗe fuu ɗe o waɗi. ²⁰Sey o ɓeydi waɗuki ko ɓuri non, o waɗi ɗum maɓɓi Yahaya nder suudu cural.3.19,20: Maat 14.3,4; Mar 6.17,18.

Yeesu Waɗanaama Baptisma

(Maatiyu 3.13‑17; Markus 1.9‑11)

²¹Nde yimɓe fuu ngaɗanaa baptisma, Yeesu maa waɗanaa baptisma. E mo nder waɗuki do’aare, sey dammugal dow maɓɓitii. ²²Ruuhu Allah jippoyii dow maako e ɓandu bo foondu. Hononde ƴiwoyi daga dow wi’i, “An woni Ɓiɗɗo am, mo ngiɗumi. E mi nana belɗum maaɗa.”3.22: Fuɗ 22.2; Jab 2.7; Ica 42.1; Maat 3.17; Mar 1.11; Luk 9.35.

Maama’en Yeesu

(Maatiyu 1.1‑17)

²³Ko Yeesu fuɗɗi kuugal muuɗum, o ɓadake duuɓi 30. Yimɓe e nyuma Yeesu ɗum ɓiɗɗo Yusufu. Yusufu ɓiɗɗo Heeli, ²⁴Heeli ɓiɗɗo Matat, Matat ɓiɗɗo Leewi, Leewi ɓiɗɗo Malki, Malki ɓiɗɗo Yanna, Yanna ɓiɗɗo Yusufu, ²⁵Yusufu ɓiɗɗo Mataatiya, Mataatiya ɓiɗɗo Amos, Amos ɓiɗɗo Naahum, Naahum ɓiɗɗo Ajaliya, Ajaliya ɓiɗɗo Najaya, ²⁶Najaya ɓiɗɗo Ma’ata, Ma’ata ɓiɗɗo Mataatiya, Mataatiya ɓiɗɗo Cimeeya, Cimeeya ɓiɗɗo Joosek, Joosek ɓiɗɗo Yahuuda, ²⁷Yahuuda ɓiɗɗo Yowaanan, Yowaanan ɓiɗɗo Refaya, Refaya ɓiɗɗo Jaruubabel, Jaruubabel ɓiɗɗo Ceyaltiyal, Ceyaltiyal ɓiɗɗo Neeri, ²⁸Neeri ɓiɗɗo Malki, Malki ɓiɗɗo Addi, Addi ɓiɗɗo Kosma, Kosma ɓiɗɗo Almadama, Almadama ɓiɗɗo Er, ²⁹Er ɓiɗɗo Joocuwa, Joocuwa ɓiɗɗo Eliyeeja, Eliyeeja ɓiɗɗo Yorim, Yorim ɓiɗɗo Matat, Matat ɓiɗɗo Leewi, ³⁰Leewi ɓiɗɗo Saaminu, Saaminu ɓiɗɗo Yahuuda, Yahuuda ɓiɗɗo Yusufu, Yusufu ɓiɗɗo Yonana, Yonana ɓiɗɗo Eliyaakim, ³¹Eliyaakim ɓiɗɗo Malaya, Malaya ɓiɗɗo Maynana, Maynana ɓiɗɗo Mataata, Mataata ɓiɗɗo Naatan, Naatan ɓiɗɗo Dawda, ³²Dawda ɓiɗɗo Jeesi, Jeesi ɓiɗɗo Obida, Obida ɓiɗɗo Bo’aaja, Bo’aaja ɓiɗɗo Salmon, Salmon ɓiɗɗo Naacon, ³³Naacon ɓiɗɗo Amiinadab, Amiinadab ɓiɗɗo Aram, Aram ɓiɗɗo Heseruuna, Heseruuna ɓiɗɗo Feresa, Feresa ɓiɗɗo Yahuuda, ³⁴Yahuuda ɓiɗɗo Yaakubu, Yaakubu ɓiɗɗo Iciyaaku, Iciyaaku ɓiɗɗo Ibraahim, Ibraahim ɓiɗɗo Teera, Teera ɓiɗɗo Naaho, ³⁵Naaho ɓiɗɗo Serug, Serug ɓiɗɗo Reyu, Reyu ɓiɗɗo Feele, Feele ɓiɗɗo Eber, Eber ɓiɗɗo Ceela, ³⁶Ceela ɓiɗɗo Kenan, Kenan ɓiɗɗo Arfakacaadi, Arfakacaadi ɓiɗɗo Cem, Cem ɓiɗɗo Nuhu, Nuhu ɓiɗɗo Lamek, ³⁷Lamek ɓiɗɗo Metusela, Metusela ɓiɗɗo Enok, Enok ɓiɗɗo Yared, Yared ɓiɗɗo Mahaalalel, Mahaalalel ɓiɗɗo Kenan, ³⁸Kenan ɓiɗɗo Enoc, Enoc ɓiɗɗo Ciitu, Ciitu ɓiɗɗo Aadamu, Aadamu mo Allah.

Ceyɗan Foondi Yeesu

(Maatiyu 4.1‑11; Markus 1.12,13)

¹Yeesu ƴiwoyi daga Caangol Urdun e heewi Ruuhu Allah. Sey Ruuhu Allah yaarimo nder ladde. ²Ton o waɗi balɗe 40 Ceyɗan e foondamo, o nyaamaayi goɗɗum nder balɗe ɗen. Nden gaɗa maaje, weelo nangimo.

³Ceyɗan wi’imo, “To an woni Ɓiɗɗo Allah, wi’u nde’e hayre warta buroodi.”

⁴Yeesu nootii wi’imo, “Aayaare wi’ii, ‘Naa’ e nyamndu tan neɗɗo marortoo.’ ”4.4: TA 8.3.

⁵Sey Ceyɗan yaarimo wonde wigeere townde, bo maƴƴuki hollimo leyɗe duuniyaaru fuu. ⁶Nden Ceyɗan wi’imo, “Mi hokkete laamu e mangu dow leyɗe ɗe’e fuu, ngam ɗum hokkiiyamɗe. Mi waaway hokkukiɗe koo moye mo ngiɗumi. ⁷Ngam non, taa mawniniiyam, ɗu’um fuu ɗum wartay ɗum maaɗa.”

⁸Yeesu wi’imo, “Aayaare wi’ii,

‘Mawnin Allah Joomiraawo maaɗa, kanko tan mawnintaa.’ ”4.8: TA 6.13.

⁹Sey Ceyɗan yaarimo Urucaliima, darnimo ton dow hoore Wuro Ceniingo, wi’imo, “To an woni Ɓiɗɗo Allah, diwu daga ɗo’o, ¹⁰ngam aayaare wi’ii, ‘Allah wi’ay malaa’ika’en muuɗum mballumaa boɗɗum. ¹¹Ɓe taɓɓete nder juuɗe maɓɓe, ngam to’ nawnaa koyɗe maaɗa dow hayre.’ ”4.10,11: Jab 91.11,12.

¹²Yeesu wi’imo, “Aayaare wi’i, ‘Taa’ foondu Allah Joomiraawo maaɗa.’ ”4.12: TA 6.16.

¹³Nde Ceyɗan heenyi foonduki Yeesu fuu, sey o alimo yaaki wongel carel.

Yeesu Fuɗɗi Kuugal Muuɗum Nder Galiili

(Maatiyu 4.12‑17; Markus 1.14,15)

¹⁴Sey Yeesu so’’ii leydi Galiili nder bawɗe Ruuhu Allah. Habaru maako sankitii nder leydi ndin. ¹⁵O fuɗɗi ekkitinki nder cuuɗi do’aare maɓɓe, koo moye mantimo.

Ɗum Wanyii Yeesu Nder Najarat

(Maatiyu 13.53‑58; Markus 6.1‑6)

¹⁶Yeesu yahi Najarat, gariiri to mawni. Nyalnde Siwtaare, o natti suudu do’aare no o woowi waɗuki. Sey o ummii o darii ngam o janga Deftere Ceniinde. ¹⁷Ɗum hokkimo deftere Annabi Icaaya, o maɓɓitinde, o jangi aayaaje bi’uɗe,

¹⁸“Ruuhu Joomiraawo e dow am,

ngam o suɓiiyam mi hokka ɓe ngalanaa Habaru Belɗum.

O liliiyam mi wadda habaru yoofuki maccuɓe,

mi wumtina wumɓe,

mi waɗa ɗum ala torreteeɓe ndilla,

¹⁹Mi wa’ajinana duuniyaaru wiiki hitaande nde Joomiraawo hisnata yimɓe muuɗum waroyi.”4.18,19: Ica 61.1,2.

²⁰Sey o maɓɓi deftere nden, o hokkitinde ballitoowo o jooɗii. Koo moye gonɗo nder suudu do’aare ndun sutiimo. ²¹Sey Yeesu wi’iɓe, “Ɗe’e aayaaje ɗe nanɗon, hande ɗe keewii.”

²²Koo moye e wi’a boɗɗum dow maako. Boliiɗe boɗɗe burtiiɗe nder honduko maako hayɗiniiɓe. Ɓe mbi’i, “Naa’ o’o woni ɓiɗɗo Yusufu?”

²³O wi’iɓe, “Walaa seko on mbi’ayyam haala ka’a, ‘Nyawndoowo4.23: Waato likitaajo., yamɗin hoore maaɗa! Ko min nani a waɗii nder Kafarnahum, waɗu ɗum ɗo’o nder gariiri maaɗa.’ ” ²⁴Kadimaa o wi’iɓe, “Goonga, e mi wi’a’on, walaa annabiijo jaɓeteeɗo to gariiri muuɗum.4.24: Yah 4.44.²⁵E mi wi’a’on goonga, e carel Annabi Iliya e woodi rewɓe ɗuɗɓe nder leydi Israa’iila ɓe worɓe mu’’en maayi. E carel ngel, ɗum waɗi duuɓi tati e lebbi joweego’o ndiyam toɓaayi, nden ɗum waɗi weelo kallungo nder leydi ndin fuu.4.25: 1Laam 17.1.²⁶Ammaa Annabi Iliya liloyaaka to koo moye maɓɓe, sey to goɗɗo debbo naa’ Yahuudankeejo mo gorko muuɗum maayi, gonɗo gariiri Jarifat nder leydi Sidon.4.26: 1Laam 17.8‑16.²⁷Kadimaa e woodi gooduɓe nyawu nyaamoojum laral ɗuɗɓe nder Israa’iila e carel Annabi Iliica, ammaa walaa jamɗinaaɗo nder maɓɓe sey Na’aman neɗɗo leydi Siiriya, naa’ o Yahuudankeejo.”4.27: 2Laam 5.1‑14.

²⁸Nde yimɓe wonɓe nder suudu do’aare ndun nani non, ɓe fuu ɓerɗe maɓɓe metti. ²⁹Ɓe ummii, ɓe ndiiwimo daga nder gariiri, nden ɓe njaarimo dow ƴolde to gariiri maɓɓe woni, ngam ɓe tuuroyoomo ley, ³⁰ammaa o tokki hakkunde maɓɓe, o dilli.

Yeesu Wurtini Ginnol

(Markus 1.21‑28)

³¹Sey Yeesu yahi gariiri Kafarnahum nder leydi Galiili, e mo ekkitinaɓe nder suudu do’aare Nyalnde Siwtaare. ³²Ɓe kayɗini e ekkitinol maako, ngam boliiɗe maako e woodi bawɗe.4.32: Maat 7.28,29.

³³E woodi gooduɗo ginnol nder suudu do’aare ndun, o wulli sembee, o wi’i, ³⁴“Wayyoo! Ko wannumaa e amin, Yeesu Najarankeejo? A waroyi ngam kalkaamin? E mi andi an a moye. An woni Ceniiɗo Allah!”

³⁵Yeesu haɓaningol wi’i, “De’’utu! Wurta nder maako!” Sey ginnol ngol do’’i neɗɗo on yeeso maɓɓe, ngol wurtii ngol nawnaayimo.

³⁶Ɓe fuu ɓe kayɗini, ɓe ngaɗi ka metuki hakkunde maɓɓe, e ɓe mbi’a, “Iri ɗeye boliiɗe ngoni ɗo’o? Ngam e mo metana ginni nder laamu e bawɗe, e ɗi mburtoo.” ³⁷Nden habaru Yeesu sankitii nder leydi ndin.

Yeesu Yamɗitini Yimɓe Ɗuɗɓe

(Maatiyu 8.14‑17; Markus 1.29‑34)

³⁸Gaɗa Yeesu alii suudu do’aare, dillii wuro Siiman. Esiraawo Biiturus debbo jonte kalluɗe e torramo, ɓe torii Yeesu yamɗitinamo. ³⁹O wari to nyawɗo on, o haɓani jonte ɗen, sey ɗe njoofimo. Ɗon e ɗon nyawɗo on ummii, fuɗɗi waddankiɓe nyamndu.

⁴⁰Nde naange hiiri, yimɓe ngaddani Yeesu gooduɓe nyawuuji feere‑feere, o yowi juuɗe maako dow koo moye nyawɗo, o yamɗitiniɓe. ⁴¹Ginni maa mburtii nder yimɓe ɗuɗɓe, e ɗi ngulla, e ɗi mbi’a, “An, a Ɓiɗɗo Allah!”

Ammaa o haɓaniɗi, o haɗiɗi metuki, ngam e ɗi andi kanko woni Almasiihu.

Yeesu Wa’ajini Nder Suudu Do’aare

(Markus 1.35‑39)

⁴²Nde weeti, Yeesu wurtii gariiri ndin yahi wonde wigeere nder ladde. Yimɓe ngaɗi ka ɗaɓɓutukimo. Nde ɓe tawimo, ɓe ngiɗaa o dilla o alaɓe. ⁴³Ammaa o wi’iɓe, “Doole mi wa’ajina Habaru Belɗum dow Laamu Allah e goɗɗe gariije, ngam maajum ɗum liloyiyam.”

⁴⁴Nden o waɗi ka wa’ajinki nder cuuɗi do’aare leydi Yahuudiya.

Yeesu Noddii Tokkuɓemo Arande’en

(Maatiyu 4.18‑22; Markus 1.16‑20)

¹Wonde nyalnde Yeesu e darii daande Mbeela Janisarat5.1: Waato Mbeela Galiili., yimɓe e piliimo e nana Wolde Allah. ²O yi’i komiije ɗiɗi e ɗe ndesii daande ndiyam. Nangooɓe liƴƴi mburtii nder maaje, e ɓe laɓɓina nangirɗum liƴƴi maɓɓe. ³O natti komiwal Siiman, o torii Siiman dirdinangal seɗɗa nder ndiyam. O jooɗii nder maagal, e mo ekkitina yimɓe.5.1‑3: Maat 13.1,2; Mar 3.9,10; 4.1.

⁴Nde o heenyi ko o wi’ata, o wi’i Siiman, “Turta komiwal ngal yaaki ton to luggi, ngaɗaa nangirɗum liƴƴi maaɗa nder ndiyam ngam nanguki liƴƴi.”

⁵Siiman Biiturus wi’i, “Moodibbo, min kuwii jemmaare fuu, min nangaayi goɗɗum. Ammaa daga a wi’i non, mi waɗay nangirɗum liƴƴi nder ndiyam.”5.5: Yah 21.3.⁶Nde ɓe ngaɗi non, ɓe nangi liƴƴi ɗuɗɗi haa nangirɗum ɗum fuɗɗi seekuki.5.6: Yah 21.6.⁷Sey ɓe noddiri higooɓe maɓɓe juuɗe, wonɓe nder wongal komiwal, ngam ɓe ngara ɓe mballaɓe. Ɓe ngari, ɓe kebbini komiije ɗen ɗe fuu ɗiɗi e liƴƴi naaki ɗe fuɗɗi mutuki5.7: Waato nusaaki. nder ndiyam. ⁸Nde Siiman yi’i non, o diccii yeeso Yeesu, o wi’i, “Moodibbo, woɗɗitayam, mi neɗɗo gooduɗo hakke!”

⁹Siiman wi’i non ngam kanko e gonduɓe e maako ɓe kayɗinii e liƴƴi ɗuɗɗi ɗi ɓe nangi. ¹⁰Yaakubu e Yahaya, ɓiɓɓe Jabadi, higooɓe kuugal Siiman, kamɓe maa ɓe kayɗinii. Yeesu wi’i Siiman, “Taa’ hulu! Daga jooni a wadday yimɓe to am.”

¹¹Ɓe mburtini komiije maɓɓe daga nder ndiyam, ɓe ali koo ɗume, ɓe tokki Yeesu.

Gooduɗo Nyawu Nyaamoowu Laral

(Maatiyu 8.1‑4; Markus 1.40‑45)

¹²Wonde nyalnde Yeesu e nder wondi gariiri, goɗɗo waroyi gooduɗo nyawu nyaamoojum laral fuu ɓandu maako. Nde o yi’i Yeesu, o diccii, o torii Yeesu, o wi’i, “Moodibbo, taa jaɓii, a waaway njamɗitinaayam.”

¹³Sey Yeesu forti jungo muuɗum, meemimo, wi’i, “Mi jaɓii. Yamɗutu!” Ɗon e ɗon o yamɗiti, nyawu ngun alimo. ¹⁴Yeesu wi’imo, “Taa’ wi’uka goɗɗo. Ammaa yahu, kollaa hoore maaɗa to ardiiɗo diina, kokkaa cakkiri no Annabi Muusa wi’i ngam laaɓol maaɗa. Waɗu non ngam tabbitinanki yimɓe a yamɗitii.”5.14: KLee 14.1‑32.

¹⁵Ammaa koo nde Yeesu haɗiimo wi’ukika, habaru ɗum woɗɗinii, yimɓe ɗuɗɓe ngari ngam nanuki ekkitinol maako e yamɗitineeki daga nyawuuji mu’’en. ¹⁶Ammaa no Yeesu woowi e yaha wigeere nder ladde waɗa do’aare.

Yeesu Yamɗitinii Jaraaɗo

(Maatiyu 9.1‑8; Markus 2.1‑12)

¹⁷Wonde nyalnde Yeesu e nder ekkitinki, Faarisanko’en e moodiɓɓe Attawra e njooɗii ɗon ƴiwoyɓe ngarihoy fuu ngonkoy nder leyɗe Galiili e Yahuudiya e gariiri Urucaliima. Bawɗe Joomiraawo e wondi e maako, e mo yamɗitina nyawɓe. ¹⁸Sey woɓɓe ngaddi goɗɗo jaraaɗo dow daago, ɓe ɗaɓɓiti ɗatal ngal ɓe nattinirtamo nder wuro ngon, ɓe pukkinamo yeeso Yeesu. ¹⁹Ammaa ɓe mbaawaayi nattinkimo ngam yimɓe ɗuuɗii, sey ɓe ƴentinimo dow suudu ndun, ɓe njulindu, ɓe njippinimo daga dow mayru yaaki hakkunde yimɓe yeeso Yeesu. ²⁰Nde Yeesu yi’i hoolaare maɓɓe, o wi’i jaraaɗo on, “Higo, ɗum yaafanakema hakkeeji maaɗa.”

²¹Sey Faarisanko’en e moodiɓɓe Attawra puɗɗi metitaaki hakkunde maɓɓe, e ɓe mbi’a, “O’o ɗum moye pottidinoowo hoore muuɗum e Allah? Moye waawata yaafaaki hakke to naa’ Allah?”

²²Yeesu faami nyumo maɓɓe, o wi’iɓe, “Ngam ɗume nyumoton iri nyumooji ɗi’i nder ɓerɗe mooɗon? ²³Ko ɓuri hoyki, ɗum wi’a, ‘A yaafanaama hakke maaɗa,’ koo ɗum wi’a, ‘Umma yaaɓu?’ ²⁴Ammaa e mi yiɗi andon Ɓii Neɗɗo e woodi laamu nder duuniyaaru yaafoo hakke.” Sey o wi’i jaraaɗo on, “E mi wi’imaa, umma, koccaa daago maaɗa, kootaa wuro!”

²⁵Ɗon e ɗon o ummii yeeso maɓɓe, o hocci daago maako, o hooti wuro, e mo manta Allah. ²⁶Ɓe fuu ɓe kayɗini, ɓe mawnini Allah. Kulol nangiɓe, ɓe mbi’i, “Hande en ngi’i ko hulnii!”

Yeesu Noddii Leewi

(Maatiyu 9.9‑13; Markus 2.13‑17)

²⁷Gaɗa ɗon, Yeesu wurtii yi’i jaɓoowo ceede leydi bi’eteeɗo Leewi, e mo jooɗii to ɗum jaɓata ceede leydi, Yeesu wi’imo, “Tokkam.” ²⁸Leewi ummii, ali koo ɗume, tokkimo.

²⁹Sey Leewi yaari Yeesu wuro muuɗum defanimo nyamnduuji feere‑feere. Jaɓooɓe ceede leydi ɗuɗɓe e woɓɓe yimɓe e nyamda e maɓɓe. ³⁰Ammaa, Faarisanko’en e moodiɓɓe Attawra maɓɓe ngaɗi ka metitaaki, e ɓe mbi’a tokkuɓe Yeesu, “Ngam ɗume nyamdoton e jaɓooɓe ceede leydi e gaɗooɓe hakke?”5.30: Luk 15.1,2.

³¹Yeesu wi’iɓe, “Naa’ yamɓe ngiɗi nyawndoowo, sey ni nyawɓe. ³²Mi waroyaayi ngam nodduki nyumooɓe ɓe aadili’en, ammaa mi waroyi ngam nodduki anduɓe ɓe gaɗooɓe hakke ɓe tuuba.”

Ƴamol Dow Suumaaki

(Maatiyu 9.14‑17; Markus 2.18‑22)

³³Ɓe mbi’imo, “Koo ndeye tokkuɓe Yahaya Gaɗoowo Baptisma e cuumoo e ngaɗa do’aare, non maa tokkuɓe Faarisanko’en ngaɗata, ammaa tokkuɓema e nyaama e njara.”

³⁴Yeesu nootii wi’iɓe, “On mbaaway kaɗon higooɓe angoojo nyaamuki nyamndu carel ngel o wondi e maɓɓe? On mbaawataa! ³⁵Ammaa carel e wara ngel ɗum hoccata angoojo on daga nder maɓɓe, gaɗa ɗon ɓe cuumoto.”

³⁶O wi’iɓe misaalu ɗu’um, “Walaa ceekoowo lefel daga limcere heyre nyootangel to limcere kiinde. To o waɗii non, o seekay limcere heyre nden, lefel kesel ngel boo yaadataa e limcere hiinde nden. ³⁷Non maa walaa gaɗayɗo inabojam kesam nder faandu hiindu. To o waɗii non, ɗam ƴuufay, ɗam pusa faandu ndun, ɗam rufa. ³⁸Ammaa, inabojam kesam haani waɗee nder faandu heyru. ³⁹Walaa boo jaroowo inabojam kiiɗam gaɗa ɗon ɗaɓɓita kesam, ngam o wi’ay, ‘Kiiɗam ɗam ɓurii.’ ”

Ƴamol Dow Nyalnde Siwtaare

(Maatiyu 12.1‑8; Markus 2.23‑28)

¹Wonde Nyalnde Siwtaare Yeesu e yaha nder ngesa alkamaari, sey tokkuɓemo ngaɗi ka ɓoruki cammeeje mayri e molmaɗe nder juuɗe maɓɓe, e ɓe nyaama.6.1: TA 23.25.²Ammaa woɓɓe Faarisanko’en mbi’iɓe, “Ko waɗi ngaɗoton ko Attawra haɗi ɗum waɗa Nyalnde Siwtaare?”

³Yeesu wi’iɓe, “On meeɗaayi janguki ko Dawda waɗi nde nani weelo, kanko e gonduɓe e maako? ⁴O natti Lukuru Seniiɗum, o hocci buroodi ceniiɗum, o nyaamiɗum. Attawra boo wi’ii ardiiɓe diina tan haani nyaamuki buroodi ɗum, ammaa Dawda nyaamiɗum haa maa o hokkori jaadooɓe e maako.”6.4: KLee 24.9.6.3,4: 1Sam 21.1‑6.

⁵Sey Yeesu wi’iɓe, “Ɓii Neɗɗo woni Joomu Nyalnde Siwtaare.”

Yeesu Yamɗitinii Mo Jungo Jaraango

(Maatiyu 12.9‑14; Markus 3.1‑6)

⁶Wonde Nyalnde Siwtaare o natti nder suudu do’aare, e mo ekkitina. Goɗɗo mo jungo jaraango e nder mayru. ⁷Moodiɓɓe Attawra e Faarisanko’en cutii Yeesu koo o yamɗitinay goɗɗo nder Nyalnde Siwtaare, ngam ɓe keɓa ko ɓe ngulliroytoomo. ⁸Ammaa, Yeesu e andi ko woni nder ɓerɗe maɓɓe, sey o wi’i neɗɗo mo jungo jaraango on, “Woroy, ndaroɗaa caka maɓɓe.” O ummii, o darii ɗon. ⁹Sey Yeesu wi’iɓe, “E mi ƴama’on, ko Attawra wi’i ɗum waɗa nder Nyalnde Siwtaare, waɗa ko wooɗi koo waɗa ko wooɗaa, hisna yonki koo halkaki?” ¹⁰Gaɗa o raariiɓe ɓe fuu, sey o wi’i neɗɗo on, “Fortu jungo maaɗa.” O fortingo, sey ngo yamɗiti.

¹¹Ammaa ɓerɗe maɓɓe metti naa’ seɗɗa, ɓe meti hakkunde maɓɓe dow ko ɓe ngaɗanta Yeesu.

Yeesu Suɓii Lilaaɓe Sappo e Ɗiɗo

(Maatiyu 10.1‑4; Markus 3.13‑19)

¹²Nder balɗe ɗen, Yeesu yahi dow hocceere ngam waɗa do’aare. O waali waɗuki do’aare. ¹³Nde weeti, o noddi tokkuɓemo, o suɓi sappo e ɗiɗo, o hokkiɓe inde lilaaɓe. ¹⁴Kamɓe ngoni: Siiman mo o hokki inde Biiturus, e minyiraawo maako Andiraawus, e Yaakubu, e Yahaya, e Filibus, e Batiloomi, ¹⁵e Maatiyu, e Tooma, e Yaakubu ɓii Halfa, e Siiman bi’eteeɗo Jalooti6.15: Ma’ana inde nden woni giɗɗo lenyol maako naa’ seɗɗa, gooduɗo lawliiru lenyol maako., ¹⁶e Yahuuda ɓii Yaakubu, e Yahuuda Iskariyooti, gartuɗo kokkitirɗo Yeesu.

Yeesu Ekkitinii Moɓgal, Yamɗitinii Nyawɓe

(Maatiyu 4.23‑25)

¹⁷Sey Yeesu jippodii e maɓɓe o darii e njayri. Tokkuɓemo ɗuɗɓe e ɗon e yimɓe ɗuɗɓe ƴiwoyɓe daga leydi Yahuudiya fuu, e Urucaliima, e leydi Taaya e Sidon haade mbeela. ¹⁸Ɓe ngaroyi ngam nanukimo e yamɗineeki daga nyawuuji maɓɓe. Ɓe ginni torrata njamɗinaa. ¹⁹Wonɓe ɗon fuu e ɓaddoo ngam meema Yeesu, ngam bawɗe e mburtoo daga nder maako, e mo yamɗitina koo moye.

Barkiɗinki e Laanuki

(Maatiyu 5.1‑12)

²⁰Yeesu raari tokkuɓemo, wi’i,

“On barkiɗinaaɓe, onon ɓe ngalanaa,

ngam onon njeyi Laamu Allah.

²¹“On barkiɗinaaɓe, onon nanooɓe weelo jooni,

ngam on ngartay karneteeɓe.

“On barkiɗinaaɓe, onon woyooɓe jooni,

ngam on ngartay jalayɓe.

²²“On barkiɗinaaɓe to yimɓe nganyii’on, ndiiwii’on, kuɗii’on, mbonnii inɗe mooɗon ngam Ɓii Neɗɗo.6.22: 1Biit 4.14.²³Nanee belɗum nder nyalnde nden, ngamee ngam belɗum, ngam barka mooɗon ɗum ɗuɗɗum e dow. Non maama’en maɓɓe ngaɗannoo annabo’en arande’en.6.23: 2HL 36.16; KL 7.52.

²⁴“On mbonii, onon riskuɓe,

ngam on keɓii ko ɗaɓɓitoton.

²⁵“On mbonii, onon karɓe jooni,

ngam on nanay weelo.

“On mbonii, onon jalayɓe jooni,

ngam on nanataa belɗum, on mboyay bojji nawɗi.

²⁶“On mbonii to yimɓe fuu manii’on, ngam non maama’en maɓɓe ngaɗannoo annabo’en fewre.

Ngiɗee Ganyooɓe Mooɗon

(Maatiyu 5.38‑48; 7.12)

²⁷“Ammaa e mi wi’a’on onon nanooɓe ko mbi’aymi: Ngiɗee ganyooɓe mooɗon, ngaɗanee wanyuɓe’on ko wooɗi, ²⁸mbarkiɗinee laanooɓe’on, ngaɗanee torrooɓe’on do’aare. ²⁹To goɗɗo fiyiima to wolo, waylitanmo wo’oto ngon maa. To goɗɗo jaɓii cuddaari maaɗa, taa’ haɗumo toggoore maaɗa. ³⁰Toriiɗoma goɗɗum fuu, hokkumo. Teetanɗoma goɗɗum, taa’ wi’imo o hokkutumaa. ³¹Ngaɗanee woɓɓe ko ngiɗɗon ɓe ngaɗana’on.6.31: Maat 7.12.

³²“To yiɗuɓe’on tan ngiɗɗon, ɗume barka keɓoton? Koo kalluɓe maa e ngiɗi yiɗuɓeɓe. ³³To gaɗanooɓe’on boɗɗum tan ngaɗanton boɗɗum, ɗume barka keɓoton? Ay, kalluɓe maa e ngaɗa non. ³⁴To ɓe kammiiɗon njoɓay’on tan kokkoton nyamaande, ɗume barka keɓoton? Ay, kalluɓe maa e kokka kalluɓe nyamaande, e ɓe kammoo hokkiteeki nyamaande maɓɓe. ³⁵Ammaa ngiɗee ganyooɓe mooɗon, ngaɗaneeɓe boɗɗum, kokkeeɓe nyamaande, to’ on kammoo hokkiteeki. To on ngaɗii non, on keɓay barka ɗuɗɗum, on ngartay ɓiɓɓe Allah Joomu Mangu. Ngam Allah e yurminana ɓe ngettataa e kalluɓe. ³⁶Njurminanee yimɓe non no Nyaako mooɗon Mo Dow yurmirta.

To’ On Kiito Woɓɓe

(Maatiyu 7.1‑5)

³⁷“To’ on kiito woɓɓe, on kiitataake. To’ on metu kalluka dow goɗɗo, ɗum metataa kalluka dow mooɗon. Njaafee, ɗum yaafanto’on. ³⁸Kokkee, ɗum hokkay’on e poondirgel kewngel tiɗɗaangel dimbaangel boɗɗum, ɗum waylanay’on nder tummuɗe mooɗon, ngam poondirgel ngel poondirɗon, e maagel ɗum foondiranta’on.”

³⁹Ɗonmaa o hokkiɓe misaalu ɗu’um, o wi’i, “On ngi’a bumɗo waaway ardaaki bumɗo? Ɓe fuu ɗiɗo naa’ sey ɓe njana nder ngayka?6.39: Maat 15.14.⁴⁰Ekkitotooɗo ɓurataa moodibbo muuɗum, ammaa koo moye ekkitinaaɗo boɗɗum wartay bo moodibbo muuɗum.6.40: Maat 10.24,25; Yah 13.16; 15.20.

⁴¹“Ngam ɗume ndaarataa geenel gongel nder hitere bandiraawo maaɗa, ammaa a wannaayi e legga wonga nder hitere maaɗa? ⁴²No waɗata mbi’aa bandiraawo maaɗa, ‘Bandiraawo, al mi ittanmaa geenel nder hitere maaɗa,’ nden an e hoore maaɗa a yi’aayi legga wonga nder hitere maaɗa? An munaafukiijo, artu ittuki legga wonga nder hitere maaɗa, nden ngi’aa boɗɗum keɓaa no ittiraa geenel gongel nder hitere bandiraawo maaɗa.

Lekki e Andiree Ɓikkoy Maaki

(Maatiyu 7.16‑20; 12.33‑35)

⁴³“Lekki boɗki rimataa ɓikkoy koy mbooɗaa, non maa lekki ki wooɗaa rimataa ɓikkoy mboɗkoy. ⁴⁴Ngam koo kiye lekki e andiree ɓikkoy maaki. Ɗum teɓɓitataa ibbe to lekki kooraaje, non to gi’ehi ɗum teɓɓitataa ɓikkoy bummeeje.6.44: Maat 12.33.⁴⁵Neɗɗo mo ngikku boɗɗum e wurtina fii boɗɗum daga nder ko woni nder ɓernde muuɗum. Non maa neɗɗo kalluɗo e wurtina halleende daga nder ɓernde muuɗum, ngam honduko neɗɗo e meta ko woni nder ɓernde muuɗum.”6.45: Maat 12.34.

Ɓoliiɗe Yeesu Almasiihu e Cembiɗi Bo Tafaare

(Maatiyu 7.24‑27)

⁴⁶O wi’iɓe, “Ngam ɗume noddirtoyyam, ‘Moodibbo, Moodibbo,’ ammaa on ngaɗataa ko mbiimi’on? ⁴⁷Neɗɗo fuu garɗo to am nani boliiɗe am waɗi ko mbiimi, mi hollay’on ko o nandi. ⁴⁸E mo nandi e neɗɗo mahoowo wuro gasuɗo leydi lugguɗum haa o hewti tafaare, o mahi wuro dow mayre. Caangol heewi falƴi fiyi wuro ngon, ammaa ngo dimbaaki, ngam ngo mahaama dow tafaare. ⁴⁹Ammaa nanɗo boliiɗe am, nden waɗaayi ko mbiimi e nandi e neɗɗo mahuɗo wuro dow njaareendi. Nde caangol falƴi fiyingo, ɗon e ɗon ngo yani ngo fuu!”

Hoolaare Soojiijo Ardiiɗo

(Maatiyu 8.5‑13)

¹Nde Yeesu yottini fuu ko wi’ata yimɓe, o dilli o natti gariiri Kafarnahum. ²Ton e woodi goɗɗo mawɗo sooji’en e mo woodi maccuɗo mo o yiɗi naa’ seɗɗa. Maccuɗo on yamɗaa, o ɓadake mayde. ³Nde mawɗo sooji’en on nani habaru Yeesu, o lili woɓɓe mawɓe Yahuudanko’en to maako ngam ɓe toroomo o wara o yamɗitina maccuɗo maako. ⁴Nde ɓe ngari to Yeesu, ɓe toriimo ko ɗuuɗi, ɓe mbi’i, “E haani mballaa neɗɗo o’o, ⁵ngam e mo yiɗi lenyol meeɗen, kanko mahi suudu do’aare meeɗen.”

⁶Sey Yeesu yaadi e maɓɓe. Nde o ɓadii wuro ngon, mawɗo sooji’en on liloyi higooɓe muuɗum mbi’amo, “Moodibbo, taa’ torru hoore maaɗa ngam mi fotaayi nattaa wuro am. ⁷Kanjum waɗi ndaarumi hoore am mi fotaayi warki to maaɗa, ammaa metu tan, maccuɗo am yamɗitay. ⁸Ngam min e hoore am ley laamu woɓɓe sooji’en ngonmi, min maa, e mi laamoo sooji’en. To mi wi’ii o’o, ‘Dillu!’ o dillay. To mi wi’ii on ton, ‘Woroy!’ o waray. To mi wi’ii maccuɗo am, ‘Waɗu ɗu’um!’ o waɗayɗum.”

⁹Nde Yeesu nani non, ɗum hayɗiniimo, o yeeƴii yimɓe ɗuɗɓe tokkuɓemo, o wi’i, “E mi wi’a’on, koo nder Israa’iila mi heɓaayi kooliiɗoyam ɓernde go’o bo o’o!”

¹⁰Sey lilaaɓe ɓen co’’ii wuro ngon, ɓe tawi maccuɗo on yamɗitii.

Yeesu Umminii Mayɗo

¹¹Gaɗa maajum seɗɗa, Yeesu yahi wondi gariiri bi’eteendi Naayin, kanko e tokkuɓemo sappo e ɗiɗo e yimɓe ɗuɗɓe. ¹²Nde o ɓadii dammugal gariiri ndin, o hawri e woɓɓe e koccoyi mayɗo ɓe uwoyaymo, kanko tan maduujo maako woodi. Debbo on boo gorko muuɗum maayi, yimɓe gariiri ndin ɗuɗɓe e tokkimo. ¹³Nde Yeesu yi’imo, yurminani debbo on, wi’i, “Alu bojji.” ¹⁴O ɓaddii, o meemi koccirɗum mayɗo on. Sey koccuɓemo ɓen ndarii. O wi’i, “Suka, e mi wi’umaa, umma.” ¹⁵Mayɗo on ummii, jooɗii, fuɗɗi metuki. Sey Yeesu hokkitimo maduujo maako.

¹⁶Kulol nangiɓe ɓe fuu, ɓe manti Allah, ɓe mbi’i, “Annabiijo mawɗo wangii hakkunde meeɗen! Allah warii walluki yimɓe muuɗum!”

¹⁷Habaru ɗum sankitii nder leydi Yahuudiya e leyɗe gonɗe haade fuu.

Lilaaɓe Yahaya Gaɗoowo Baptisma

(Maatiyu 11.2‑19)

¹⁸Nde tokkuɓe Yahaya Gaɗoowo Baptisma mbi’imo fii ɗu’um fuu, o noddi ɗiɗo nder maɓɓe. ¹⁹O liliɓe to Yeesu ɓe ƴamamo, ɓe mbi’a, “An woni Almasiihu mo ɗum wi’i waray, koo min keɗoo goɗɗo?”

²⁰Nde ɓe njahi to Yeesu, ɓe mbi’imo, “Yahaya Gaɗoowo Baptisma liloyiimin to maaɗa min ƴamumaa, ‘An woni Almasiihu mo ɗum wi’i waray, koo min keɗoo goɗɗo?’ ”

²¹E carel ngel Yeesu yamɗitinii yimɓe ɗuɗɓe gooduɓe nyawuuji, o wurtinii ginni, o wumtinii wumɓe ɗuɗɓe. ²²O wi’i lilaaɓe Yahaya, “Njahee, mbi’on Yahaya ko ngiiɗon e ko nanuɗon: wumɓe e mbumta, jaraaɓe e njaaɓa, gooduɓe nyawu nyaamoojum laral e njamɗitinee, pahuɓe e nana, mayɓe e umminee, ɓe ngalanaa e nga’ajinanee Habaru Belɗum.7.22: Ica 35.5,6; Ica 61.1.²³O barkiɗinaaɗo neɗɗo mo alaayi hoolaakiyam.”

²⁴Gaɗa ɓe Yahaya liloyi ndillii, Yeesu fuɗɗi metanki yimɓe dow Yahaya, o wi’iɓe, “Ɗume njaaɗon raaroyki nder ladde? Kuɗol ngol hendu dimbata ndaaroyɗon? ²⁵To naa’ non, ɗume njaaɗon raaroyki? Neɗɗo ɓorniiɗo limce boɗɗe? Naa’ non, ay ɓornotooɓe limce boɗɗe e nanooɓe belɗum fuu e laamorde ɓe ngoni. ²⁶Too, ɗume njaaɗon raaroyki? Annabiijo? E mi wi’a’on goonga, o ɓurii annabiijo. ²⁷Kanko woni mo Allah wi’i nder aayaare, ‘Raɗɗum, mi liloyay lilaaɗo am o ardoo yeeso maaɗa, o mo’’inanmaa laawol.’7.27: Mal 3.1.²⁸E mi wi’a’on, nder ɓe rewɓe ndanyi fuu walaa ɓurɗo Yahaya Gaɗoowo Baptisma mangu. Fuu e non ɓurɗo famɗuki nder Laamu Allah7.28: Neɗɗo nattay Laamu Allah carel ko o jaɓi Yeesu woni Joomiraawo. ɓuriimo mangu.”

²⁹Nde yimɓe fuu e jaɓooɓe ceede leydi nani ko Yeesu wi’i, ɓe njaɓi ɗatal Allah woni goonga. Kamɓe ngoni ɓe Yahaya waɗannoo baptisma. ³⁰Ammaa Faarisanko’en e moodiɓɓe Attawra nganyi ko Allah yiɗaniɓe. Ɓe’e ngonnoo nganyuɓe Yahaya waɗanaɓe baptisma.7.29,30: Maat 21.32; Luk 3.12.

³¹Ɗonmaa Yeesu wi’i, “Ko nandinaymi yimɓe jaamanu ɗu’um? ³²E ɓe nandi e sukahoy njooɗiikoy nder luumo e noddindira e mbi’a, ‘Min nduudanii’on duudaandu, ammaa on ngamaayi. Min mboyi bo goɗɗo maayi, ammaa on mboyaayi.’ ³³Ngam Yahaya Gaɗoowo Baptisma warii nyaamataa nyamndu yarataa ndiyam inabojam, on mbi’ii, ‘E mo woodi ginnol.’ ³⁴Nden Ɓii Neɗɗo warii e nyaama e yara, on mbi’ii, ‘Raa o’o, o beelaaɗo o jaroowo, higo jaɓooɓe ceede leydi e gaɗooɓe hakke.’ ³⁵Fuu e non, tokkuɓe laawol Allah fuu e ɓe kolla kangol woni goongawol.”

Yeesu e Nder Wuro Siiman Faarisankeejo

³⁶Go’oto nder Faarisanko’en wi’i Yeesu e yiɗi Yeesu yaha wuro muuɗum ngam ɓe kirtoo. O yahi wuro ngon o jooɗii ngam o nyaama nyamndu. ³⁷E woodi kaaruwaajo e gariiri ndin, nde o nani Yeesu e hirtoo e wuro Faarisankeejo on, o waddi jolloyel hayre bongel ngel nebbam uroojam. ³⁸O darii gaɗa Yeesu haade koyɗe maako, e mo woya, gonɗi maako fuɗɗi sofnuki koyɗe Yeesu, o moytiriɗe gaasa hoore maako o meemiriɗe honduko maako o moytaniɗe nebbam uroojam.7.37,38: Maat 26.7; Mar 14.3; Yah 12.3.³⁹Nde Faarisankeejo on yi’i non, o wi’i nder ɓernde maako, “Daa neɗɗo o’o o annabiijo, daa o anday ɗum iri moye debbo meematamo, daa o anday o gaɗoowo hakke.”

⁴⁰Yeesu wi’i Faarisankeejo on, “Siiman, e woodi ko mbi’aymaami.”

O wi’imo, “Wi’uka moodibbo!”

⁴¹Yeesu wi’imo, “E woodi yimɓe ɗiɗo jaɓuɓe nyamaande ceede to goɗɗo kokkoowo nyamaande. Go’oto jaɓi ceede ajurfaari 500, go’oto on jaɓi ceede ajurfaari 50. ⁴²Walaa gooduɗo ceede nder maɓɓe ɗe yoɓirtamo, ngam non o yaafaniiɓe nyamaande nden. E yiiki maaɗa, moye nder maɓɓe ɓurata yiɗukimo?”

⁴³Siiman wi’imo, “E mi kammoo mo o yaafanii ceede ɓurɗe ɗuuɗuki.”

Yeesu wi’imo, “A wi’ii goonga.” ⁴⁴Sey o yeeƴii debbo on o wi’i Siiman, “A yi’i debbo o’o? Mi nattii wuro maaɗa, a hokkaayiyam ndiyam lootumi koyɗe am. Ammaa debbo o’o o sofnirii koyɗe am gonɗi maako o moytiriiɗe gaasa hoore maako. ⁴⁵A hownaayiyam hownuki higaaku, ammaa daga nattoyki am debbo o’o howniyam boɗɗum, o waɗi ka lootuki koyɗe am. ⁴⁶A moytanaayi hoore am nebbam, ammaa kanko o moytanii koyɗe am nebbam uroojam. ⁴⁷Ngam non e mi wi’umaa, o holliiyam yidde mawnde ngam e mo andi o yaafanaama hakke ɗuɗɗum. Ammaa jaafanaaɗo seɗɗa, yidde seɗɗa hollata.”

⁴⁸Sey Yeesu wi’i debbo on, “A yaafanaama hakkeeji maaɗa.”

⁴⁹Nyamdooɓe e maako puɗɗi metuki hakkunde maɓɓe, e mbi’a, “Ɗum moye woni o’o, haa hakke fuu e mo yaafo?”

⁵⁰Yeesu wi’i debbo on, “A hisii7.50: Waato yaafanaama. ngam a hoolakeyam, yahu jam.”

Rewɓe Ballooɓe Yeesu

¹Gaɗa ɗon, Yeesu yahi gariije e ngarihoy pamaroy fuu, e wa’ajina Habaru Belɗum dow Laamu Allah. Tokkuɓemo sappo e ɗiɗo e ngondi e maako, ²e woɓɓe rewɓe burtinanaaɓe ginni e jamɗitinaaɓe daga nyawuuji. Kamɓe ngoni Maryaama ƴiwoyɗo Magadala, mo ginni joweeɗiɗi mburtii nder muuɗum, ³e Yowaana, debbo Kuuja, ardiiɗo kuwooɓe wuro Hirudus, e Sujaana, e woɓɓe rewɓe ɗuɗɓe, ballooɓeɓe daga nder jawdi maɓɓe.8.2,3: Maat 27.55,56; Mar 15.40,41; Luk 23.49.

Misaalu Dow Demoowo

(Maatiyu 13.1‑9; Markus 4.1‑9)

⁴Yimɓe ɗuɗɓe ngaɗi ka warki to Yeesu daga gariije feere‑feere. Nde yimɓe ɗuɗɓe kawriti, o hokkiɓe misaalu ɗu’um, o wi’i,

⁵“Goɗɗo demoowo yahi ngesa ngam saaka awdi. E mo nder saakuki awdi ndin, wondi yani dow ɗatal, ndi yaaɓaa, colli cuppidindi. ⁶Wondi boo yani nder kaaƴe, nde ndi fuɗi, ndi yoori ngam ndiyam heƴaayindi. ⁷Wondi awdi boo yani nder gi’e, ɗe mawnidi e mayri, ɗe ɗeɗɗindi. ⁸Ammaa wondi awdi yani dow leydi mbondi, ndi mawni, ndi waɗi cammeeje. Gabbel go’o fuu waɗi ngabboy 100.”

Nde Yeesu heenyi hokkukiɓe misaalu ɗu’um, o noddi e sembe, o wi’i, “Gooduɗo noppi nanuki fuu nana!”

Daliila Waɗuki Misaalu

(Maatiyu 13.10‑17; Markus 4.10‑12)

⁹Tokkuɓemo ƴamimo o famtinaɓe misaalu ɗu’um. ¹⁰O wi’i, “Onon on kokkaama faamu sirru Laamu Allah, ammaa woɓɓe sey e misaalu ɗu’um, ngam

‘e ɓe ndaara, ammaa ɓe ngi’ataa;

e ɓe nana, ammaa ɓe paamataa.’ ”8.10: Ica 6.9.

Yeesu Famtinii Misaalu Dow Demoowo

(Maatiyu 13.18‑23; Markus 4.13‑20)

¹¹O wi’i, “Raa ma’ana misaalu ɗu’um: Awdi ndin woni Wolde Allah. ¹²Njanundi dow ɗatal woni nanuɓe Wolde Allah, nden Ceyɗan wara hoccande daga nder ɓerɗe maɓɓe, ngam to’ ɓe mbaawa jaɓukinde ɓe kisa. ¹³Njanundi dow hayre woni yimɓe jaɓuɓe Wolde Allah nder belɗum ɓernde, ammaa nde walaa ɗaɗi, nde jooɗaaki nder ɓerɗe maɓɓe. Ɓe njaɓunde ngam carel seɗɗa, ammaa nde ɗum foondiɓe, ɓe njoofinde. ¹⁴Awdi njanundi nder gi’e boo woni yimɓe nanuɓe Wolde nden, ammaa wannaare, e risku, e belɗum duuniyaaru ɓiɗɗi ɓerɗe maɓɓe, ngam non ɓe mawnaayi nder ɗatal Allah. ¹⁵Ammaa awdi janundi dow leydi mbondi woni nanuɓe Wolde Allah, ɓe njogoonde ɓernde go’o, nder munyal ɓe tokkande haa ɓe ngaɗa ko Allah yiɗi.

Misaalu Dow Fitilaaru

(Markus 4.21‑25)

¹⁶“Walaa gaɗanayɗo fitilaaru hiite hippa tummude dow mayru koo resandu ley leeso. Sey ni o resandu dow danki, ngam ndu yeynanoo nattuɗo fuu.8.16: Maat 5.15; Luk 11.33.

¹⁷“Ngam walaa fii cuuɗiiɗum ɗum suuritataake. Non boo walaa sirru ɗum anditataake.8.17: Maat 10.26; Luk 12.2.

¹⁸“Ngam non paamee boɗɗum no nanirton. Ngam fuu gooduɗo faamu dow Laamu Allah ɗum ɓeydanaymo. Ammaa mo walaa faamu dow Laamu Allah, haa ko o nyumata e mo woodi ɗum jaɓayɗum.”8.18: Maat 25.29; Luk 19.26.

Minyiraaɓe Yeesu e Maduujo Maako

(Maatiyu 12.46‑50; Markus 3.31‑35)

¹⁹Nden maduujo Yeesu e minyiraaɓe maako ngari to maako, ammaa ɓe keɓaayi yottaaki haade maako ngam yimɓe ɗuuɗii. ²⁰Goɗɗo wi’imo, “Maduujo maaɗa e minyiraaɓe maaɗa e ɓe ton ndarii yaasi, e ɓe ngiɗi yiikima.” ²¹Ammaa o nootii, o wi’i, “Nanooɓe Wolde Allah, ngaɗa ko nde wi’i, kamɓe ngoni maduujo am e minyiraaɓe am.”

Yeesu Darnii Hendu Cembindu

(Maatiyu 8.23‑27; Markus 4.35‑41)

²²Wonde nyalnde Yeesu natti komiwal, kanko e tokkuɓemo, o wi’iɓe, “En kuulu fongo mbeela.” Sey ɓe ndilli. ²³E ɓe nder huuluki, Yeesu ɗaanii. Iyeende e hendu cembindu ummoyii dow mbeela ngan, komiwal ngal fuɗɗi nyeɗuki ndiyam, ɓe ɓadii halkuki. ²⁴Ɓe ɓaddii Yeesu, ɓe pindinimo, e ɓe mbi’a, “Moodibbo, Moodibbo, en kalkay!”

O ummii, o haɓani hendu ndun e geelooɗi ndiyam ɗin. Koo ɗume darii, de’’iti. ²⁵O wi’iɓe, “Ko waɗi on koolaakiyam?”

Ɓe kuli, ɓe kayɗini, ɓe ngaɗi ka metuki hakkunde maɓɓe, e ɓe mbi’a, “O’o ɗum moye? O haɓanii keni e ndiyam, e ɗi ngaɗa ko o wi’i!”

Yeesu Yamɗitini Gooduɗo Ginni

(Maatiyu 8.28‑34; Markus 5.1‑20)

²⁶Ɓe njottii leydi Gaarasinko’en ngondi fongo Mbeela Galiili. ²⁷Nde Yeesu wurtii nder komiwal, o hawri e neɗɗo gariiri ndin gooduɗo ginni. Ɗum neeɓii neɗɗo on e yaha ɓornataako, o jooɗataako nder wuro, sey nder genaale. ²⁸Nde o yi’i Yeesu, o yani yeeso maako, o wulli sembee, o wi’i, “Wayyoo! Ko wannumaa e am, Yeesu Ɓiɗɗo Allah Joomu Mangu? E mi toromaa, taa’ torram.” ²⁹O wi’u non ngam Yeesu haɓanii ginnol ngol ngol wurtoo nder maako. Nden maa, ngol neeɓi e ngol nangamo. E mo haɓɓiree ɓoggi njamndi juuɗe e koyɗe, ammaa e mo taƴa ɓoggi ɗin, ngol waɗamo o natta ladde.

³⁰Yeesu ƴamimo, wi’i, “No inde maaɗa?”

O nootii o wi’i, “E mi noddiree Ɗuɗɗi,” ngam e mo woodi ginni ɗuɗɗi. ³¹Ɗi ngaɗi ka toraaki Yeesu to’ o wi’a ɗi natta ngayka kalluka lugguka.

³²Haade ɗon e woodi ornde aladeeji ɗuɗɗi e ndura dow ƴolde. Ɗi torii Yeesu alaɗi ɗi nattoyi nder aladeeji ɗin. Sey o aliɗi. ³³Ɗi mburtii nder neɗɗo on, ɗi nattoyi ornde aladeeji ɗin. Ornde nden fuu nyaari jippoyii daga dow ƴolde nden, yani nder mbeela, ndiyam nyaamiɗi.

³⁴Nde woynaaɓe aladeeji ɗin ngi’i non, ɓe ndoggi, ɓe mbi’oyika yimɓe gariiri e yimɓe ngarihoy. ³⁵Sey yimɓe ɓen njahi ngi’oya ko fofi. Nde ɓe ngari to Yeesu, ɓe tawi burtinanaaɗo ginni on e jooɗii haade Yeesu, e ɓornii, e mo nder hakkiilo maako. Koo moye maɓɓe huli. ³⁶Gi’uɓe ko waɗi mbi’i yimɓe no goodunooɗo ginni on yamɗitiniraa. ³⁷Yimɓe leydi Gaarasin fuu torii Yeesu alanaɓe leydi maɓɓe, ngam kulol mangol nangiiɓe. Ngam maajum o natti komiwal o so’’o. ³⁸Neɗɗo burtinanaaɗo ginni on torii Yeesu ngam o dillida e maako, ammaa o so’’imo, o wi’i, ³⁹“So’’a wuro maaɗa, mbi’aa fii mawɗum ɗum Allah waɗanmaa.”

Sey neɗɗo on so’’ii e wi’a yimɓe gariiri ndin fii mawɗum ɗum Yeesu waɗanimo.

Umminki Ɓii Jaayirus e Yamɗinki Debbo

(Maatiyu 9.18‑26; Markus 5.21‑43)

⁴⁰Nde Yeesu so’’ii, kawrutuɓe njaɓɓiimo, ngam ɓe fuu ɓe kaaɓii ɓe ngi’amo. ⁴¹Sey goɗɗo bi’eteeɗo Jaayirus, ardiiɗo suudu do’aare wari, diccii yeeso Yeesu, toriimo o yaha wuro maako, ⁴²ngam e mo woodi ɓiɗɗo go’oto surbaajo, duuɓi maako ngaɗay sappo e ɗiɗi, o ɓadake mayde.

Yeesu e yaha, yimɓe ɗuɗɓe e tokkimo haa e ɓe ɓiɗɗamo. ⁴³E woodi goɗɗo debbo gaɗuɗo duuɓi sappo e ɗiɗi e torrodoo e rufuki ƴiiƴam. O majjinii fuu jawdi maako to nyawndooɓe, ammaa walaa bawɗo yamɗinkimo. ⁴⁴O ƴiwoyi gaɗa Yeesu, o meemi cilmbi toggoore maako. Sey ɗon e ɗon rufuki ƴiiƴam ɗam darii. ⁴⁵Yeesu wi’i, “Moye meemiyam?”

Koo moye wi’i naa’ ɗum kanum. Biiturus boo wi’imo, “Moodibbo, hakkunde yimɓe ɗuɗɓe ngonɗaa, e ɓe ɓiɗɗumaa.”

⁴⁶Ammaa Yeesu wi’i, “Goɗɗo meemiiyam. Mi nanii bawɗe mburtake nder am.” ⁴⁷Nde debbo on anditi suuɗataako, wari e diwna, diccii yeeso maako. Yeeso yimɓe fuu o wi’i ko waɗi o meemimo, e no o yamɗitiri ɗon e ɗon. ⁴⁸Yeesu wi’imo, “Bandiraawo, hoolaare maaɗa yamɗitiniima. Njippoɗaa jam.”

⁴⁹Yeesu e meta, sey goɗɗo waroyi daga wuro Jaayirus ardiiɗo suudu do’aare, wi’imo, “Jaayirus, ɓiɗɗo maaɗa maayi. Taa’ wannu moodibbo kadin.”

⁵⁰Ammaa nde Yeesu nani non, wi’i Jaayirus, “Taa’ hulu, hoolayam tan, nden ɓiɗɗo maaɗa ummoto.”

⁵¹Nde o yottii wuro Jaayirus, o haɗi koo moye nattida e maako, sey Biiturus, e Yahaya, e Yaakubu, e nyaako surbaajo on e maduujo maako. ⁵²Koo moye e woya e wulla sembee. Ammaa Yeesu wi’iɓe, “Alee woyuki. O maayaayi, o ɗaani tan.”

⁵³Sey ɓe njalimo ngam e ɓe andi surbaajo on maayi. ⁵⁴Ammaa Yeesu jogii jungo mayɗo on, noddimo, wi’i, “Surbaajo, umma!” ⁵⁵Yonki surbaajo on warti, ɗon e ɗon o ummii. Nden Yeesu wi’iɓe ɓe kokkamo ko o nyaamata. ⁵⁶Danyooɓe surbaajo on kayɗini, ammaa o wi’iɓe to’ ɓe mbi’aka koo moye.

Yeesu Lilii Tokkuɓemo Sappo e Ɗiɗo

(Maatiyu 10.5‑15; Markus 6.7‑13)

¹Gaɗa Yeesu noddii tokkuɓemo sappo e ɗiɗo, o hokkiɓe bawɗe e laamu dow wurtinki ginni e yamɗinki nyawuuji. ²O liliɓe ɓe nga’ajina Laamu Allah, ɓe njamɗitina ɓe njamɗaa. ³O wi’iɓe, “To’ on koccu koo ɗume ngam yaadu, koo sawru, koo jakaare, koo nyamndu, koo ceede, koo toggooje ɗiɗi. ⁴Wuro ngo artuɗon nattuki fuu, njooɗee ɗon naa on alii gariiri ndin. ⁵To yimɓe nder gariiri ndin njaɓɓaaki’on, alee gariiri ndin, piɗɗee sollaare koyɗe mooɗon. Kanjum hollata ɓe ngaɗii hakke.”9.5: KL 13.51.9.3‑5: Luk 10.4‑11.

⁶Sey ɓe ndilli, ɓe njahi ngarihoy feere‑feere, e ɓe nga’ajina Habaru Belɗum, e ɓe njamɗitina yimɓe koo toye.

Hirudus Wannii

(Maatiyu 14.1‑12; Markus 6.14‑29)

⁷Nde Hirudus, laamiiɗo leydi Galiili, nani koo ɗume ko waɗata, o wannii ngam woɓɓe e mbi’a ɗum Yahaya Gaɗoowo Baptisma ummii daga mayde. ⁸Woɓɓe boo e mbi’a ɗum Annabi Iliya wangi, ammaa woɓɓe kadimaa e mbi’a ɗum go’oto nder annabo’en ndenno ummii.9.7,8: Maat 16.14; Mar 8.28; Luk 9.19.⁹Hirudus wi’i, “Mi ittanii Yahaya hoore. Ɗum moye kadin woni o’o, mo nanaymi fii ɗu’um dow muuɗum?” Nden o ɗaɓɓiti no o yi’irta Yeesu.

Yeesu Nyamnii Yimɓe 5,000

(Maatiyu 14.13‑21; Markus 6.30‑44; Yahaya 6.1‑14)

¹⁰Nde lilaaɓe ngarti, ɓe mbi’i Yeesu ko ɓe ngaɗi. Sey o hocciɓe kamɓe tan yaaki haade gariiri bi’eteendi Betasayda. ¹¹Ammaa nde yimɓe ɗuɗɓe hawrutuɓe ngi’i non, ɓe tokkimo. O jaɓɓiiɓe, o metaniɓe dow Laamu Allah. O yamɗitini giɗɓe yamɗitineeki.

¹²Nde naange hiiri, tokkuɓemo sappo e ɗiɗo ngari to maako, mbi’i, “Wi’u hawrutuɓe ndilla ngarihoy e gure gonɗe haade ngam ɓe keɓa ko ɓe nyaamata e to ɓe mbaalata, ngam ɗo’o ɗum ladde.”

¹³Sey o wi’iɓe, “Onon kokkeeɓe ko ɓe nyaamata.”

Ammaa ɓe mbi’imo, “Buroodi jowi e liƴƴi ɗiɗi tan min ngoodi ɗo’o. Sey ni min njaha, min cooda nyamndu ngam yimɓe ɓe’e fuu.” ¹⁴Worɓe tan nder hawrutuɓe ɓen ɓadake 5,000.

Sey Yeesu wi’i tokkuɓemo, “Mbi’eeɓe ɓe njooɗo moɓde yimɓe 50 ‑ 50 koo toye.”

¹⁵Sey ɓe ngaɗi non, koo moye jooɗii. ¹⁶Yeesu hocci buroodi jowi ɗin e liƴƴi ɗiɗi ɗin, o raari dow, o yetti Allah, o sendiɗum, o hokki tokkuɓemo ngeedana hawrutuɓe. ¹⁷Ɓe fuu ɓe nyaami, ɓe kaari. Tokkuɓemo moɓti ko horii ko waɗi kondooje sappo e ɗiɗi.

Yeesu Woni Almasiihu

(Maatiyu 16.13‑19; Markus 8.27‑29)

¹⁸Wonde nyalnde Yeesu e waɗa do’aare, kanum tan, tokkuɓemo e haade maako. O ƴamiɓe, o wi’i, “Moye yimɓe mbi’atayam?”

¹⁹Ɓe nootii ɓe mbi’i, “Woɓɓe e mbi’a a Yahaya Gaɗoowo Baptisma. Woɓɓe boo e mbi’a a Annabi Iliya. Nden woɓɓe kadimaa e mbi’a go’oto nder annabo’en ndenno ummii.”9.19: Maat 14.1,2; Mar 6.14,15; Luk 9.7,8.

²⁰O wi’iɓe, “Ammaa onon, moye mbi’otonyam?”

Sey Biiturus nootii, wi’i, “An woni Almasiihu mo Allah!”9.20: Yah 6.68,69.

Yeesu Wi’ii No Mayrata

(Maatiyu 16.20‑28; Markus 8.30—9.1)

²¹Ammaa Yeesu haɗiɓe to’ ɓe mbi’aka koo moye. ²²Nden o wi’i, “Doole Ɓii Neɗɗo yara bone ɗuɗɗum. Mawɓe yimɓe e mawɓe ardiiɓe diina e moodiɓɓe Attawra nganyamo, nden o waree. Nder nyalnde tatawre boo ɗum umminaymo.”

²³Sey o wi’iɓe ɓe fuu, “Fuu giɗɗo warta tokkuɗoyam, to’ waɗa ko hoore muuɗum yiɗi waɗuki tan, ammaa doole hocca gaafaangal muuɗum koo ndeye tokkayam.9.23: Maat 10.38; Luk 14.27.²⁴Ngam fuu giɗɗo hisnuki yonki muuɗum o dullayki. Ammaa fuu dullayɗo yonki muuɗum ngam am o hisnayki.9.24: Maat 10.39; Luk 17.33; Yah 12.25.²⁵Ko ɗum nafanta neɗɗo, to o heɓii duuniyaaru fuu, ammaa o majjinii hoore maako koo o halki? ²⁶Koo moye ganyuɗoyam, min Ɓii Neɗɗo e boliiɗe am, mi wanyaymo to mi wartoyii nder teddungal am, e nder teddungal Nyaako am Mo Dow, e malaa’ika’en maako ceniiɓe. ²⁷E mi wi’a’on goonga, e woodi woɓɓe dariiɓe ɗo’o ɓe maayataa naa ɓe ngi’ii Laamu Allah.”

Yeesu Wangii Nder Mangu Muuɗum

(Maatiyu 17.1‑8; Markus 9.2‑8)

²⁸Balɗe joweetati gaɗa Yeesu wi’iɓe boliiɗe ɗen, o ƴeeŋi dow hocceere ngam o waɗa do’aare. Biiturus, e Yahaya, e Yaakubu e wondi e maako. ²⁹E mo nder do’aare sey yeeso maako e kolte maako ngarti daneeje tar. ³⁰Ɗon e ɗon sey raa, annabo’en ɗiɗo, Muusa e Iliya, wangi ³¹nder teddungal, e ɓe medda e maako. Ɓe meddi dow mayde maako nde tabbitay naa’ ko neeɓi nder Urucaliima. ³²Biiturus e gonduɓe e muuɗum ɗaanake, carel ko ɓe kuylii, ɓe ngi’i teddungal maako e yimɓe ɗiɗo darodiiɓe e maako. ³³Carel ko annabo’en ɓen alata Yeesu, Biiturus wi’imo, “Moodibbo, wonki amin ɗo’o e wooɗi. Al min nyiɓa cuuɗi tati, wo’oyru ndu maaɗa, wo’oyru ndu Muusa, nden wo’oyru ndu Iliya.” Ammaa Biiturus andaa ko wi’ata.

³⁴E mo nder metuki, sey nduula wangi, suddiɓe, ɓe kultori. ³⁵Ɓe nani hononde Allah daga nder nduula ngan wi’i, “O’o woni Ɓiɗɗo am mo cuɓumi. Nanee ko o wi’ata’on.”9.35: Ica 42.1; Maat 3.17; 12.18; Mar 1.11; Luk 3.22.9.28‑35: 2Biit 1.17,18.

³⁶Nde hononde nden de’’iti, ɓe ngi’i Yeesu kanum tan. Tokkuɓemo aliɗum hakkunde maɓɓe, nder nyalɗe ɗen ɓe mbi’aayi goɗɗo ko ɓe ngi’i.

Yeesu Yamɗitinii Ɓiɗɗo Gooduɗo Ginnol

(Maatiyu 17.14‑18; Markus 9.14‑27)

³⁷Nde weeti, ɓe njippoyii daga dow hocceere nden, kawrutuɓe ɗuɗɓe tawimo. ³⁸Nder kawrutuɓe ɓen goɗɗo gorko noddi e sembe, wi’i, “Moodibbo, e mi toromaa, raaru ɓiɗɗo am gorko ngam kanko tan ngoodumi. ³⁹Ginnol neeɓii e nangamo. To ngol nangiimo, o fuɗɗa wulluki, o waɗa ka diwnuki, nguufo ngaɗa ka wurtoyaaki nder honduko maako, ngol alataamo naa ngol nawniimo. ⁴⁰Mi torake tokkuɓema mburtinangol, ammaa ɓe mbaawaayi.”

⁴¹Yeesu nootii, wi’i, “Onon yimɓe jaamanu ɗu’um kalluɗum on koolaakiyam, haa ndeye njooɗodotoomi e mooɗon e mi munyida e mooɗon? Waddu ɓiɗɗo maaɗa ɗo’o.”

⁴²Ɓiɗɗo on e waroya, sey ginnol ngol do’’imo, e mo diwna. Ammaa Yeesu haɓani ginnol ngol, yamɗitini suka on, hokkitimo nyaako maako. ⁴³Wonɓe ɗon fuu kayɗini e mangu Allah.

Yeesu Fuɗɗiti Wi’i Ɓadake Maayuki

(Maatiyu 17.22,23; Markus 9.30‑32)

Ammaa e ɓe nder hayɗinki dow ko o waɗi, Yeesu wi’i tokkuɓemo, ⁴⁴“Paamee boɗɗum nanon ko mbi’aymi’on! Ɗum hokkitiray Ɓii Neɗɗo nder juuɗe yimɓe.” ⁴⁵Ammaa ɓe paamaayi ko o wi’iɓe. Ɗum suuɗanakeɓe ngam to’ ɓe paamaɗum, nden e ɓe kula ƴamukimo dow maajum.

Moye Ɓuri Mangu?

(Maatiyu 18.1‑5; Markus 9.33‑37)

⁴⁶Nden geddi ummii hakkunde tokkuɓemo dow ɗum moye ɓuri mangu nder maɓɓe.9.46: Luk 22.24.⁴⁷Ammaa Yeesu heɓti ko woni nder ɓerɗe maɓɓe, sey o hocci sukayel pamarel, o darningel haade maako. ⁴⁸Nden o wi’iɓe, “Koo moye jaɓuɗo sukayel pamarel bo nge’el nder inde am jaɓiiyam. Nden koo moye jaɓuɗoyam jaɓii liloyɗoyam. Ngam lestinɗo hoore muuɗum fuu nder mooɗon, kanum woni mawɗo.”9.48: Maat 10.40; Luk 10.16; Yah 13.20.

Mo Wanyaayi’on Fuu e Wondi e Mooɗon

(Markus 9.38‑40)

⁴⁹Yahaya nootii, wi’i, “Moodibbo, min ngi’ii goɗɗo e wurtina ginni nder inde maaɗa, min kaɗimo ngam kanko naa’ o tokkuɗo’en.”

⁵⁰Ammaa Yeesu wi’imo, “To’ on kaɗumo, ngam fuu mo wanyaayi’on e wondi e mooɗon.”

Yimɓe Gariiri Samaariya Nganyii Yeesu

⁵¹Nde carel ɓadii ngam ɗum hoccamo yaaki dow, Yeesu e hoore muuɗum suɓi yahuki Urucaliima. ⁵²Sey o lili lilaaɓe yeeso maako, ɓe njaha nder gariyel Samaariyanko’en ngam ɓe ciryoo koo ɗume ngam garol maako. ⁵³Ammaa yimɓe gariyel ngel njaɓaayimo ngam ɓe keɓtii Urucaliima o fa’i. ⁵⁴Nde tokkuɓemo Yaakubu e Yahaya ngi’i non, ɓe mbi’i, “Moodibbo, a yiɗi min nodda hiite daga dow wara halkaɓe?”9.54: 2Laam 1.9‑16.

⁵⁵Ammaa Yeesu waylitii haɓaniɓe, ⁵⁶sey ɓe njahi wongel gariyel.

Tokkuki Yeesu

(Maatiyu 8.19‑22)

⁵⁷E ɓe nder yaadu dow ɗatal, sey goɗɗo wi’imo, “Mi tokkete to njahataa fuu.”

⁵⁸Yeesu wi’imo, “Dilaaji e ngoodi gayɗe, colli e ngoodi caɓɓe, ammaa Ɓii Neɗɗo walaa to fukkotoo.”

⁵⁹O wi’i goɗɗo neɗɗo, “Tokkam.”

Ammaa neɗɗo on wi’imo, “Moodibbo, al mi yaha, mi uwoya nyaako am taw.”

⁶⁰Ammaa Yeesu wi’imo, “Alu mayɓe uwa mayɓe mu’’en, ammaa an, yahu, nga’ajinaa Laamu Allah.”

⁶¹Goɗɗo kadimaa wi’i, “Mi tokkete, moodibbo, ammaa al mi yaha mi ƴama ɓe wuro am taw.”9.61: 1Laam 19.20.

⁶²Ammaa Yeesu wi’imo, “Koo moye jogiiɗo remergo fuɗɗi remuki e yeeƴoo gaɗa, walaa ko nafi nder kuugal Allah.”

Yeesu Lilii Tokkuɓemo 72

¹Gaɗa maajum Yeesu suɓi woɓɓe kamɓe 72, nden o liliɓe ɗiɗo‑ɗiɗo, ɓe artamo yaaki koo ndiye gariiri e wigeere to o yiɗi yahuki fuu. ²O wi’iɓe, “Gese ɓenduɗe e ɗuuɗi, ammaa huwooɓe ɗuuɗaa. Toree Joomu gese ɗen liloya huwooɓe nder gese maako.10.2: Maat 9.37,38.³Njahee. Mi lilii’on to yimɓe bono mbaaloy hakkunde caafaali.10.3: Maat 10.16.⁴To’ on njaadu e jakaare ceede koo jakaare limce, koo paɗe, nden to’ on kownu goɗɗo kownol juutungol dow ɗatal. ⁵Wuro ngo nattuɗon fuu, puɗɗee wi’uki, ‘Allah hokka wuro ngo’o jam!’ ⁶To e woodi neɗɗo giɗɗo jam nder wuro ngon, barka mooɗon jooɗoto dow maako, ammaa to walaa, ɗum wartay to mooɗon. ⁷Njooɗee nder wuro ngo ɗum jaɓɓii’on, nyaamee, njaree koo ɗume ko ɓe kokki’on, ngam kuwoowo e haani yoɓeeki. To’ on kakkito daga wuro yaaki wuro.10.7: 1Kor 9.14; 1Tim 5.18.⁸Fuu gariiri ndi nattuɗon, to yimɓe mayri njaɓɓake’on, nyaamee ko ɗum resi yeeso mooɗon. ⁹Njamɗinee nyawɓe wonɓe nder gariiri ndin, nden mbi’onɓe, ‘Laamu Allah warii haade mooɗon.’ ¹⁰Ammaa, gariiri ndi nattuɗon fuu, to ɓe njaɓɓaaki’on, mburtee njahon dow ɗate mayri mbi’on, ¹¹‘Min piɗɗii sollaare gariiri mooɗon daga koyɗe amin, kanjum ɗum heɓtirta on ngaɗii hakke. Ammaa andee ɗu’um, Laamu Allah warii haade mooɗon.’10.4‑11: Maat 10.7‑14; Mar 6.8‑11; Luk 9.3‑5.¹²E mi wi’a’on, e Nyalnde Jaango Allah ɓuray yurminanki yimɓe gariiri Sodom dow yimɓe gariiri ndin ɗon.”10.12: Fuɗ 19.24‑28; Maat 11.24; Maat 10.15.

Gariije Ɗe Njaɓaayi Goonga Njaray Bone

(Maatiyu 11.20‑24)

¹³O wi’i, “Yimɓe gariiri Korasin, on mbonii! Yimɓe gariiri Betasayda, on mbonii! Daa kuuɗe kayɗiniiɗe gaɗaaɗe nder mooɗon ɗe ngaɗanaama yimɓe Taaya e Sidon, daa ɓe ɓornake kolte kollayɗe wannaare ɓe njooɗake nder tooka ngam holluki ɓe tuubii.10.13: Ica 23.1‑18; Ijik 26.1—28.26; Yow 3.4‑8; Amos 1.9,10; Jak 9.2‑4.¹⁴Ammaa Nyalnde Jaango Allah ɓuray yurminanki yimɓe Taaya e Sidon dow mooɗon. ¹⁵Onon boo, yimɓe gariiri Kafarnahum, on kammii ɗum hoccay’on yaaki dow? Naa’ non! Ɗum nattinay’on nder ngayka hiite.”10.15: Ica 14.13‑15.

¹⁶Nden Yeesu wi’i tokkuɓemo, “Jaɓuɗo ko mbiiɗon fuu jaɓii ko mbiimi, ganyuɗo’on boo wanyiiyam, nden ganyuɗoyam wanyii on ɗon liloyɗoyam.”10.16: Maat 10.40; Mar 9.37; Luk 9.48; Yah 13.20.

So’’oyaaki Lilaaɓe 72

¹⁷Sey tokkuɓemo 72 ngarti e nana belɗum, ɓe mbi’i, “Moodibbo, haa ginni maa ngaɗii ko min mbi’iɗi fuu nder inde maaɗa!”

¹⁸O wi’iɓe, “Mi yi’ii Ceyɗan yanoyii bo maƴƴere daga dow. ¹⁹Raa, mi hokkii’on laamu yaaɓuki dow boole e jahe e heɓuki jaalorgal dow bawɗe Ganyo, walaa ko heɓata’on.10.19: Jab 91.13.²⁰Ammaa to’ on nanu belɗum ngam ginni e ngaɗa ko mbiiɗon, ammaa nanee belɗum ngam inɗe mooɗon mbindaama e wuro Allah.”

Yeesu Nanii Belɗum

(Maatiyu 11.25‑27; 13.16,17)

²¹E carel ngel, Yeesu nani belɗum nder Ruuhu Allah, o wi’i, “Mi yettiima, Nyaako am Mo Dow, Joomiraawo dow e ley, ngam a suuɗii fii ɗu’um to gooduɓe faamu e andal, a holliiɗum ɓikkoy pamaroy. Non Nyaako am, ngam non welanmaa ngaɗaa.”

²²Sey o wi’i yimɓe, “Nyaako am hokkiiyam koo ɗume. Walaa anduɗo moye woni Ɓiɗɗo on sey ni Nyaako on, non maa walaa anduɗo moye woni Nyaako on sey ni Ɓiɗɗo on, e mo Ɓiɗɗo on yiɗi andina Nyaako on.”10.22: Yah 3.35; Yah 10.15.

²³Sey o waylitii to tokkuɓemo o wi’iɓe kamɓe tan, “Gite gi’uɗe ko ngiiɗon ɗe barkiɗinaaɗe! ²⁴Ngam e mi wi’a’on, annabo’en ɗuɗɓe e laaminooɓe ɗuɗɓe ngiɗii ngi’a ko ngiiɗon, ammaa ɓe ngi’aayi. Ɓe ngiɗii nanuki ko nanoton, ammaa ɓe nanaayi.”

Misaalu Dow Samaariyankeejo Boɗɗo

²⁵Sey goɗɗo moodibbo dooka10.25: Waato lawyaajo. ummii darii ngam foonda Yeesu, o wi’i, “Moodibbo, ko haani mi waɗa ngam mi heɓa yonki ki re’ataa?”

²⁶Sey Yeesu wi’imo, “Ko windaa nder Attawra? Noye njangirtaa?”

²⁷O nootii, o wi’i, “ ‘Yiɗu Joomiraawo Allah maaɗa e ɓernde maaɗa fuu, e yonki maaɗa fuu, e sembe maaɗa fuu, e hakkiilo maaɗa fuu,’ nden, ‘Yiɗu bandiraawo maaɗa no ngiɗirɗaa hoore maaɗa.’ ”10.27: TA 6.5; KLee 19.18.

²⁸Yeesu wi’imo, “A nootake boɗɗum. Waɗu non, nden a heɓay yonki ki re’ataa.”10.25‑28: Maat 22.35‑40; Mar 12.28‑34.10.28: KLee 18.5.

²⁹Ammaa moodibbo dooka on yiɗii wurtina hoore muuɗum, sey o ƴami Yeesu, o wi’i, “Moye woni bandiraawo am?”

³⁰Yeesu wi’imo, “Goɗɗo neɗɗo e yaha daga Urucaliima yaaki Jeriiko, sey woɓɓe wuyɓe taɓɓiimo. Ɓe ɓortimo, ɓe njaɓi ko o woodi fuu, ɓe piyimo boɗɗum, ɓe ndilli, ɓe alimo hakkunde yonki e mayde. ³¹Sey ardiiɗo diina tokkoyi ɗatal ngal. Nde o yi’i neɗɗo on, o seli, o ƴaɓɓii. ³²Kadimaa, goɗɗo Leewiyankeejo tokkoyi ɗatal ngal, nde o waroyi to neɗɗo on woni, o yi’imo, o seli, o ƴaɓɓii. ³³Ammaa goɗɗo Samaariyankeejo10.33: Yahuudanko’en yiɗaa Samaariyanko’en naa’ seɗɗa. e nder yaadu o waroyi to neɗɗo on woni, o yi’imo, o yurminanimo. ³⁴O yahi to maako, o lootanimo nawnooɗe e nebbam e ndiyam inabojam, o haɓɓanimo nawnooɗe ɗen. Nden o waɗɗinimo dow mbabba maako o yaarimo wuro to ɗum yoɓata ɗum waala, o wallimo.10.33,34: 1HL 28.15.³⁵Nde weeti, Samaariyankeejo on itti ceede ajurfaari ɗiɗi daga jiiba muuɗum, hokki mawɗo wuro on wi’imo, ‘Wallumo. Taa majjinii ceede ko ɓuri ɗe’e, mi yoɓete to mi so’’oyake.’ ”

³⁶Sey Yeesu ƴami moodibbo dooka on wi’i, “Moye nder yimɓe tato ɓe’e kammiɗaa woni bandiraawo mo wuyɓe piyi on?”

³⁷O wi’i, “On ɗon jurminanɗomo.”

Sey Yeesu wi’imo, “An maa, yahu ngaɗaa non.”

Yeesu Yahii Wuro Marta e Maryaama

³⁸Yeesu e tokkuɓemo e nder yaadu, sey o natti wongel gariyel, goɗɗo debbo bi’eteeɗo Marta jaɓɓiimo to wuro muuɗum. ³⁹Marta on e woodi minyiraawo bi’eteeɗo Maryaama. Maryaama jooɗii haade Yeesu e mo nana ekkitinol maako.10.38,39: Yah 11.1.⁴⁰Ammaa Marta wannii ngam e huwa kuuɗe ɗuɗɗe. Sey o wari to Yeesu, o wi’i, “Moodibbo, a wannaayi nde minyiraawo am aldiyam e kuugal nga’al min tan? Wi’umo o ummoo o wallayam!”

⁴¹Ammaa Yeesu nootii, wi’i, “Marta, Marta, a wannii hoore maaɗa dow fii ɗuɗɗum. ⁴²Ammaa fii go’o tan yiɗaa. Maryaama boo suɓii ko ɓuri wooɗuki, ɗum jaɓtataake to maako.”

Ekkitinki Dow Do’aare

(Maatiyu 6.9‑13; 7.7‑11)

¹Wonde nyalnde Yeesu e waɗa do’aare to wonde wigeere. Nde o heenyi do’aare nden, go’oto nder tokkuɓemo wi’imo, “Moodibbo, ekkitinmin no min ngaɗirta do’aare, non no Yahaya Gaɗoowo Baptisma ekkitiniri tokkuɓemo.”

²Yeesu wi’iɓe, “To on ngaɗay do’aare, mbi’ee,

‘Yaa Allah Nyaako amin Mo Dow,

inde maaɗa ceniinde mawninee,

laamu maaɗa wara.

³Hokkumin ko min nyaamata koo ndeye nyalnde.

⁴Yaafanamin hakkeeji amin,

ngam minon maa e min njaafanoo koo moye gaɗanɗomin hakke.

Taa’ alu min njaha to min ngaɗata hakke.’ ”

⁵Nden o hokkiɓe misaalu, o wi’i, “To go’oto nder mooɗon yahii to higo muuɗum caka jemma wi’imo, ‘Higo, wuƴam mburoodiho tato, ⁶ngam higo am e dow yaadu yaaloyii waala e wuro am, raa boo mi walaa ko kokkaymomi o nyaama.’ ⁷Sey o nootii daga nder suudu, o wi’i, ‘Taa’ wannam, ngam ɗum yaadake ɗum maɓɓii dammugal, nden min e ɓiɓɓe am min njaadake min pukkake. Mi waawataa ummaaki jooni mi hokkumaa goɗɗum.’ ” ⁸Yeesu wi’i, “E mi wi’a’on, to o salake ummaaki o hokkamo buroodi ɗum ngam higaaku, o ummoto o hokkamoɗum ngam o waɗii ka toraakimo. ⁹Ngam non e mi wi’a’on, toree, ɗum hokkay’on. Ɗaɓɓitee, on keɓay. Cilminee, ɗum maɓɓitanay’on dammugal. ¹⁰Ngam koo moye toriiɗo ɗum hokkaymo, ɗaɓɓutuɗo boo heɓay, nden koo moye cilminiiɗo ɗum maɓɓitanaymo dammugal. ¹¹Moye nder mooɗon to ɓiɗɗo muuɗum torakemo lingu, o hokkamo mboodi? ¹²Koo boo to o torakemo ɓoccoonde, o hokkamo yaare? ¹³To onon kalluɓe, on andi no kokkirton ɓiɓɓe mooɗon fii boɗɗum, hakko Nyaako mooɗon Mo Dow! O ɓuray non hokkuki toriiɓemo Ruuhu Allah.”

Yeesu e Ceyɗan

(Maatiyu 12.22‑30; Markus 3.20‑27)

¹⁴Wonde nyalnde Yeesu e wurtinana goɗɗo ginnol pahol. Gaɗa ginnol ngol wurtake, neɗɗo on fuɗɗi metuki, sey yimɓe ɗuɗɓe kawrutuɓe kayɗini. ¹⁵Ammaa woɓɓe maɓɓe mbi’i, “E bawɗe Ba’aljabul laamiiɗo ginni o wurtinirta ginni.”11.15: Maat 9.34; 10.25.

¹⁶Woɓɓe e ngiɗi foondukimo, ngam non ɓe mbi’imo o waɗanaɓe goɗɗum kayɗiniiɗum ƴiwoyɗum to Allah.11.16: Maat 12.38; 16.1; Mar 8.11.¹⁷Ammaa Yeesu e andi ko woni nder ɓerɗe maɓɓe, o wi’iɓe, “Laamu fuu cendiiɗum e wanywanytira, ɗum lallay. Non maa wuro cendiingo e wanywanytira, ngo lallay. ¹⁸To laamu Ceyɗan sendake e wanywanytira, noye laamu ɗum darortoo? Mi wi’u non ngam on mbi’a e mi wurtina ginni e sembe Ba’aljabul laamiiɗo ginni. ¹⁹To e mi wurtina ginni nder bawɗe Ba’aljabul, e bawɗe moye tokkuɓe’on mburtinirtaɗi? Ngam non tokkuɓe’on kollay on ngalaa goonga. ²⁰Ammaa, to e mi wurtina ginni nder bawɗe Allah, nden Laamu Allah waranii’on.

²¹“To neɗɗo cembiɗɗo jogake kaafahi reenii wuro muuɗum, walaa ko heɓata ko o woodi fuu. ²²Ammaa, to goɗɗo ɓurɗomo sembe waraniimo teetay kaafahi ki o mantortoo kin, ɓurɗo mo sembe on sendanay woɓɓe jawdi ndin.

²³“Mo wondaa e am fuu, o ganyo am. Mo wallaayiyam moɓtuki fuu, o cankitoowo.11.23: Mar 9.40.

Wartuki Ginnol

(Maatiyu 12.43‑45)

²⁴“To ginnol wurtake nder ɓandu neɗɗo, ngol yahay to bigeeje jorɗe e ngol ɗaɓɓita to ngol siwtotoo. Ammaa to ngol heɓaayi, sey ngol wi’a, ‘Mi so’’oto wuro ngo mburtoyiimi.’ ²⁵To ngol wartii, ngol tawii wuro ngon wuuwaama ngo mo’’inaama, ²⁶sey ngol yaha ngol waddoya ginni joweeɗiɗi ɓurɗingol halluki, ɗi natta ɗi njooɗoo ɗon. Nden re’irde neɗɗo on ɓuray fuɗɗoode maako halluki.”

Barka Ɓurɗum

²⁷Nde Yeesu wi’i non, goɗɗo debbo nder hawrutuɓe noddi sembee wi’i, “Debbo danyuɗoma kokkuɗoma musinɗaa, o barkiɗinaaɗo.”

²⁸Ammaa Yeesu wi’imo, “Non, ammaa ɓurɓe barkiɗineeki ngoni nanooɓe Wolde Allah e tokkande.”

Yimɓe Jaamanu Kalluɗum

(Maatiyu 12.38‑42)

²⁹Nde yimɓe ngaɗi ka moɓtaaki to Yeesu, o wi’iɓe, “Yimɓe jaamanu ɗu’um ɓe kalluɓe, e ɓe ngiɗi holleeki goɗɗum kayɗiniiɗum, ammaa walaa ko ɗum hollataɓe sey ni ko heɓunoo Annabi Inuusa.11.29: Maat 16.4; Mar 8.12.³⁰Ko heɓi Annabi Inuusa hollii yimɓe Niineba Allah liloyimo, non maa ko heɓatayam, min Ɓii Neɗɗo, ɗum hollay yimɓe jaamanu ɗu’um Allah liloyiyam.11.30: Inu 3.4.³¹Nyalnde Jaango, laamiiɗo leydi fombina debbo o ummodoto e yimɓe jaamanu ɗu’um. O holla ko yimɓe jaamanu ɗu’um ngaɗi ɗum wooɗaa, ngam kanko o waroyii daga ɓadaaki nanuki faamu Annabi Suleymaanu. Raa boo, ɓurɗo Annabi Suleymaanu ɗo’o.11.31: 1Laam 10.1‑10; 2HL 9.1‑12.³²E Nyalnde Jaango yimɓe Niineba maa ɓe ummodoto e yimɓe jaamanu ɗu’um, ɓe kolla ko yimɓe jaamanu ɗu’um ngaɗi ɗum wooɗaa, ngam kamɓe nde ɓe nani wa’aju Annabi Inuusa ɓe tuubii, raa boo ɓurɗo Annabi Inuusa ɗo’o.11.32: Inu 3.5.

Jayngol Ɓandu

(Maatiyu 5.15; 6.22,23)

³³“Walaa gaɗanayɗo fitilaaru hiite suuɗandu koo hippa tummude dow mayru. Sey ni o resandu dow danki ngam ndu yeynanoo nattuɗo fuu.11.33: Maat 5.15; Mar 4.21; Luk 8.16.³⁴Gite maaɗa ngoni fitilaaru ɓandu maaɗa. To gite maaɗa e njamɗi, ɓandu maaɗa fuu heeway jayngol, ammaa to gite maaɗa njamɗaa fuu, ɓandu maaɗa heeway nyiwre. ³⁵Faamu boɗɗum koo jayngol gongol nder maaɗa ɗum nyiwre. ³⁶To ɓandu maaɗa fuu e heewi jayngol, to ndu walaa nyiwre koo seɗɗa, ndu yeynoto koo toye no jayngol fitilaaru yeynorantomaa.”

Faarisanko’en e Moodiɓɓe Attawra

(Maatiyu 23.1‑36; Markus 12.38‑40)

³⁷Yeesu e nder metuki sey goɗɗo Faarisankeejo wi’imo o yaha wuro muuɗum o hirtoyoo. Yeesu yahi jooɗii fuɗɗi nyaamuki nyamndu. ³⁸Faarisankeejo on hayɗini nde yi’i Yeesu fuɗɗii nyaamuki nyamndu lootaayi juuɗe muuɗum. ³⁹Sey Yeesu wi’imo, “Onon Faarisanko’en on layɓa gaɗa njardukoy mooɗon e le’oy mooɗon, ammaa nder mooɗon on keewuɓe nguyka e halleende. ⁴⁰Onon haaŋaaɓe! Koo moye e andi gaɗuɗo yaasi kanko waɗi nder. ⁴¹Ngam non kokkee ɓe ngalanaa ko woni nder jarduɗe e le’oy mooɗon, nden ɗe fuu ɗe laaɓanay’on.

⁴²“On mbonii, onon Faarisanko’en, ngam on kokkii Allah jakka haakohoy njongeteekoy, ammaa on ngaɗantaa yimɓe ko haani, on ngalaa yidde Allah. Ɗu’um tatum e haani ngaɗonɗum, ammaa to’ on alu waɗuki ko horii.11.42: KLee 27.30.

⁴³“On mbonii, onon Faarisanko’en, ngam on ngiɗi jooɗaaki dow jooɗorle mawɓe nder cuuɗi do’aare, on ngiɗi hownireeki mangu nder luumo. ⁴⁴On mbonii! On nandi e genaale ɗe ngi’ataake, yimɓe e tokka dow maaje andaa.”

⁴⁵Go’oto nder moodiɓɓe Attawra wi’i Yeesu, “Moodibbo, nde mbiiɗaa non, minon maa a huɗiimin!”

⁴⁶Yeesu wi’i, “On mbonii, onon maa moodiɓɓe Attawra, ngam on njowana yimɓe doŋle tedduɗe, ammaa onon koo koolel go’o on ngaɗataa mballonɓe. ⁴⁷On mbonii! Ngam on maha genaale boɗɗe ɗe siftorki annabo’en ɓe maamaaji mooɗon mbari. ⁴⁸Non hollii ko maama’en mooɗon ngaɗi welii’on, ngam ɓe mbarii annabo’en, onon boo on mahani annabo’en ɓen genaale. ⁴⁹Kanjum waɗi Allah wi’i nder andal muuɗum, ‘Mi lilanayɓe annabo’en e lilaaɓe, ɓe mbara woɓɓe ɓe torra woɓɓe.’ ⁵⁰Ngam non ƴiiƴam annabo’en ndufaaɗam daga fuɗɗoode duuniyaaru, ɗum ɗaɓɓitayɗam to juuɗe yimɓe jaamanu ɗu’um, ⁵¹daga ƴiiƴam Habiila haa yaaki ƴiiƴam Annabi Jakaariya baraaɗo hakkunde Suudu Joomiraawo e sakkirde. E mi wi’a’on goonga, ƴiiƴamji ɗin ɗon fuu ɗum ɗaɓɓitayɗi to juuɗe yimɓe jaamanu ɗu’um.11.51: Fuɗ 4.8; 1HL 24.20,21.

⁵²“On mbonii, onon moodiɓɓe Attawra, ngam on njogake maɓɓitirgel dammugal andal, onon on nattaayi, on alaayi woɓɓe natti.”

⁵³Nde Yeesu ali ɗon, moodiɓɓe Attawra e Faarisanko’en ɓerɗe maɓɓe metti dow maako, ɓe ngaɗi ka ƴamukimo ƴamɗe dow fii ɗuɗɗum, ⁵⁴ngam ɓe nana o wi’ii goɗɗum ko haanaa, ɓe keɓa ko ɓe nangirtamo.

Yeesu Wagginii Yimɓe Dow Ngikku Munaafuki’en

(Maatiyu 10.26,27)

¹E carel ngel, yimɓe ɗuɗɓe moɓtii haa ɓe ngaɗi ka yaɓyaɓtirki. Yeesu wi’i tokkuɓemo, “Paamee to’ ngarton bo Faarisanko’en ngam ɓe munaafuki’en.12.1: Maat 16.6; Mar 8.15.²Walaa goɗɗum ombaaɗum ɗum omtataake, non maa walaa goɗɗum cuuɗiiɗum ɗum suuritataake.12.2: Mar 4.22; Luk 8.17.³Ko mbiiɗon nder nyiwre fuu, ɗum nanayɗum nyalawma, non maa ko metuɗon e suuɗe, ɗum metayɗum e njayri.

Mo Ɗum Hulata

(Maatiyu 10.28‑31)

⁴“E mi wi’a’on, onon higooɓe am, to’ on kulu warooɓe ɓandu neɗɗo, gaɗa ɗon ɓe mbaawataa waɗuki goɗɗum. ⁵Ammaa mi wi’ay’on mo kuloton. Kulee on ɗon baawayɗo warki’on gaɗa ɗon o waɗa’on nder wuro hiite, e mi wi’a’on, kanko kuloton!

⁶“Naa’ coloy njowoy e cooree jamɗe ɗiɗi? Fuu e non Allah yejjitataa koo go’otel maakoy. ⁷Koo gaasa ko’e mooɗon maa fuu ka limaama. To’ on kulu, on ɓurii coloy ɗuɗkoy.

Jaɓuki Yeesu e Wanyukimo

(Maatiyu 10.32,33; 12.32; 10.19,20)

⁸“E mi wi’a’on, jaɓuɗoyam yeeso yimɓe fuu, min Ɓii Neɗɗo, mi jaɓaymo yeeso malaa’ika’en Allah. ⁹Ammaa ganyuɗoyam yeeso yimɓe, mi wanyaymo yeeso malaa’ika’en Allah.

¹⁰“Fuu bi’uɗo ko wooɗaa dow Ɓii Neɗɗo, ɗum waaway yaafanaakimo. Ammaa fuu bi’uɗo ko wooɗaa dow Ruuhu Allah, o yaafantaake.12.10: Maat 12.32; Mar 3.29.

¹¹“To yimɓe njaarii’on yeeso mawɓe e laamiiɓe, to’ on ngannu dow no mburtinirton ko’e mooɗon koo ko mbi’oton. ¹²Ngam Ruuhu Allah ekkitinay’on e carel ngel ko haani mbi’on.”12.11,12: Maat 10.19,20; Mar 13.11; Luk 21.14,15.

Misaalu Dow Diskuɗo Kaaŋaaɗo

¹³Goɗɗo nder hawrutuɓe wi’imo, “Moodibbo, wi’u mawniraawo am sendida ndonu e am.”

¹⁴Ammaa Yeesu wi’imo, “Higo! Moye lamniyam dow mooɗon? Moye wartiriyam cendanayɗo’on ndonu?” ¹⁵Nden o wi’iɓe, “Paamee! Ngoɗɗitee yidde jawdi duuniyaaru, ngam heɓuki jawdi hokkataa neɗɗo yonki.”

¹⁶O hokkiɓe misaalu ɗu’um, o wi’i, “Ngesa goɗɗo diskuɗo yeeɗii naa’ seɗɗa. ¹⁷O wi’i hoore maako, ‘Ko ngaɗaymi? Mi walaa to ndesaymi ko ndemumi.’ ¹⁸O wi’i, ‘Yawwaa! Mi heɓtii ko ngaɗaymi, mi pusay cuuɗi resuki nyamndu am, mi maha goɗɗi ɓurɗiɗi mangu, mi moɓta nyamndu am e jawdi am fuu nder maaji. ¹⁹Mi wi’a hoore am “A woodi fii ɗuɗɗum boɗɗum keƴayɗumma duuɓi ɗuɗɗi. Siwta, nyaamaa, njaraa, nanaa belɗum.” ’ ²⁰Ammaa Allah wi’imo, ‘A kaaŋaaɗo! Nder jemmaare nde’e ɗum hoccay yonki maaɗa. Moye ronata ko moɓtanɗaa hoore maaɗa?’ ”

²¹Sey Yeesu wi’iɓe, “Koo moye moɓtanɗo hoore muuɗum jawdi duuniyaaru, nden walaa ko o resi to Allah, non heɓatamo.”

Hoolaaki Allah

(Maatiyu 6.25‑34)

²²Gaɗa ɗon, Yeesu wi’i tokkuɓemo, “Ngam non e mi wi’a’on, to’ on ngannu dow jonde mooɗon, waato dow ko nyaamoton koo ko njaroton koo ko ɓornotooɗon. ²³Ngam yonki ɓurii nyamndu, ɓandu boo ɓurii kolte. ²⁴Ndaaree dawle. Ɗe aawataa, ɗe pe’’ataa, ɗe ngalaa suudu to ɗe moɓtata nyamndu koo to ɗe ndesata goɗɗum; fuu e non Allah e nyamnaɗe. On ɓurii colli daraja! ²⁵Moye nder mooɗon to wannii waawata ɓeydanki hoore muuɗum carel seɗɗa nder balɗe muuɗum? ²⁶To on mbaawataa waɗuki fii pamarum ɗu’um, ko waɗata on nganna e ko horii? ²⁷Ndaaree pindi no mawnirta. Ndi huwataa, ndi sanyataa kolte. Fuu e non, e mi wi’a’on, Annabi Suleymaanu fuu e risku muuɗum meeɗaayi mo’’itinaaki bo pindi wo’oyri ndi’i.12.27: 1Laam 10.4‑7; 1HL 9.3‑6.²⁸To Allah e mo’’itinira pindi ladde nihi, hande e ndi ɗon, jaango ndi wulee, hakko onon, o ɓuray non ɓornuki’on, onon kooliiɓemo seɗɗa.

²⁹“Nden to’ on ngaɗu ɓerɗe mooɗon dow ko nyaamaton koo boo ko njaroton. To’ on ngannu ko’e mooɗon dow maajum. ³⁰Ngam iri ɗum ɗon fii yimɓe duuniyaaru ɗaɓɓitata. Nyaako mooɗon Mo Dow e andi on ngiɗi fii ɗum ɗon. ³¹Ammaa ɗaɓɓitee laamu maako, nden ɗum ɓeydanay’on fii ɗu’um.

Jawdi Ndi Wonnataako

(Maatiyu 6.19‑21)

³²“Onon ornde am pamarde, to’ on kulu, ngam Nyaako mooɗon Mo Dow e nana belɗum hokkuki’on laamu muuɗum. ³³Cooree ko ngooduɗon, kokkon ɓe ngalanaa ceede ɗen. Ndesanee ko’e mooɗon jawdi ndi wonnataako, jawdi ndi dow ndi re’ataa. Ton gujjo ɓaddataakondi, nden walaa mooƴu nyaamayngundi. ³⁴Ngam to jawdi maaɗa woni, ton ɓernde maaɗa maa so’’otoo.

Taadee Ciryooɗon

³⁵“Taadee ciryooɗon ngam kuugal Allah, aldee fitilaaji mooɗon e hiite,12.35: Maat 25.1‑13.³⁶bo maccuɓe keɗiiɓe joomu wuro maɓɓe wartoya daga humto teegal, ngam to o wartoyii o silminake, ɗon e ɗon ɓe maɓɓitanamo dammugal.12.36: Mar 13.34‑36.³⁷Ɓe barkiɗinaaɓe maccuɓe ɓe joomu wuro maɓɓe tawi e ndeena to o wartoyii. E mi wi’a’on goonga, o taadoto ngam kuugal, o joɗɗinaɓe, o waddanaɓe nyamndu. ³⁸To o wartoyii caka jemma koo fajiri, maccuɓe ɓe o tawi e ɓe ciryi, ɓe barkiɗinaaɓe. ³⁹Ammaa andee ɗu’um, daa joomu wuro e andi carel ko gujjo warata, o alataa o nattanamo wuro. ⁴⁰Onon maa doole njooɗooɗon on ciryii ngam e carel ngel on andaa Ɓii Neɗɗo warata.”12.39,40: Maat 24.43,44.

Maccuɗo Gaɗoowo Goonga

(Maatiyu 24.45‑51)

⁴¹Biiturus wi’i, “Moodibbo, a wi’a misaalu ɗu’um ngam minon tan koo ngam koo moye?”

⁴²Yeesu nootii wi’i, “Moye woni kuwoowo mo goonga mo faamu, mo joomu wuro muuɗum yowi dow maccuɓe muuɗum, ngam o hokkaɓe nyamndu nder carel? ⁴³O barkiɗinaaɗo maccuɗo mo joomu wuro muuɗum warti tawi e mo waɗa non. ⁴⁴E mi wi’a’on goonga, joomu wuro on yowaymo dow jawdi muuɗum fuu. ⁴⁵Ammaa to maccuɗo on wi’ii hoore muuɗum, ‘Joomu wuro am wartataa jooni,’ sey o fuɗɗi fiyuki maccuɓe worɓe e rewɓe e mo nyaama e mo yara njaru naa hoore maako waylitake. ⁴⁶Joomu wuro on wartay e nyalnde nde maccuɗo on kammaaki e carel ngel o andaa, o fiyaymo boɗɗum o waɗamo nder ɓe ngalaa goonga.

⁴⁷“Maccuɗo anduɗo ko joomu wuro muuɗum yiɗi o waɗa, ammaa o siryaaki koo boo o waɗaayi ko joomu wuro on yiɗi, ɗum fiyaymo boɗɗum. ⁴⁸Ammaa maccuɗo mo andaa ko joomu wuro muuɗum yiɗi o waɗa, to o waɗii fii kalluɗum, ɗum fiyaymo seɗɗa. Fuu kokkaaɗo ɗuɗɗum, ɗuɗɗum ɗum ɗaɓɓitata to maako. Fuu tambinaaɗo ɗuɗɗum, o ƴameteeɗo ko ɓuri ɗuɗki.

Yeesu Waddii Sendirki

(Maatiyu 10.34‑36)

⁴⁹“Hiite ngaroymi waɗuki nder duuniyaaru, e yidde am nge huɓɓee jooni. ⁵⁰Ammaa e woodi baptisma ɗum ngaɗanteemi, mi wannii naa ɗum waɗaniiyamɗum.12.50: Mar 10.38.⁵¹On kammii mi waroyi waddanki duuniyaaru jonde jam? E mi wi’a’on, naa’ non, ammaa senduki yimɓe ngaddumi. ⁵²Daga jooni ɗum taway yimɓe njowo nder wuro go’o ɓe kuucindiraa, tato ummanto ɗiɗo, ɗiɗo ummanto tato. ⁵³Nyaako sendiray e ɓiɗɗo muuɗum, ɓiɗɗo on maa sendiray e nyaako muuɗum. Inna sendiray e ɓiɗɗo muuɗum debbo, ɓiɗɗo on maa sendiray e inna muuɗum. Esiraawo maa sendiray e esiraawo muuɗum.”12.53: Miik 7.6.

Anduki Carel

(Maatiyu 16.2,3)

⁵⁴Yeesu wi’i hawrutuɓe, “To on ngi’ii duule e ummoyoo daga hirna, ɗon e ɗon on mbi’ay, ‘Ndiyam toɓay,’ sey ɗam toɓa boo. ⁵⁵To hendu fombina ummoyake, on mbi’ay, ‘Ɗum waɗay nguleenga,’ sey ɗum waɗa boo. ⁵⁶Onon munaafuki’en! On mbaawi raaruki ko woni e leydi e ko woni e dow andon ko waɗata, ammaa ngam ɗume on mbaawataa faamuki ko waɗata e carel nge’el?

Siryootir e Gulloyiiɗoma

(Maatiyu 5.25,26)

⁵⁷“Ngam ɗume on mbaawataa suɓanki ko’e mooɗon ko haani? ⁵⁸Taa yaada e gulloyiiɗoma yeeso laamu, ɗaɓɓutu ciryootiron dow ɗatal. To naa’ non, o yaarete yeeso gaɗoowo kiita, gaɗoowo kiita waɗumaa nder juuɗe taadiiɓe ɓe maɓɓumaa nder suudu cural. ⁵⁹E mi wi’umaa, a wurtataako naa a yoɓii fuu ceede ɗe ɗum tokkatama koo aniiniyel horataako.”

A Maayay Taa Alaayi Hakke Maaɗa

¹E carel ngel e woodi woɓɓe ɗon bi’uɓe Yeesu ko heɓi woɓɓe Galilanko’en. Galilanko’en ɓen e kirsana Allah cakkiri, sey Bilaatus gomnaajo waɗi ɗum wariɓe haa ƴiiƴam maɓɓe hawtii e ƴiiƴam ko ɓe cakki. ²Yeesu nootii wi’iɓe, “On kammoo Galilanko’en ɓen ɗon ɓurii Galilanko’en koriiɓe fuu hakke ngam ɓe torriraama nihi? ³E mi wi’a’on, naa’ non! Ammaa to naa’ on tuubu, onon maa on fuu on kalketeeɓe. ⁴Koo maa yimɓe sappo e njoweetato mayɓe carel ko suudu towndu ndu Siluwam yani dow maɓɓe, on kammoo ɓe ɓurii yimɓe koriiɓe jooɗiiɓe nder Urucaliima fuu waɗuki hakke? ⁵E mi wi’a’on, naa’ non! Ammaa to naa’ on tuubu, onon maa non kalkirton.”

Misaalu Dow Lekki Ki Rimataa

⁶Sey o hokki misaalu ɗu’um, o wi’i, “Goɗɗo neɗɗo e woodi lekki ibbi nder ngesa muuɗum, o yahi o yi’a koo e ki woodi ɓikkoy, ammaa o tawi ki walanaa. ⁷Ngam non o wi’i neɗɗo kuwanoowomo to ngesa kan, ‘Raa, duuɓi tati e mi wara ɗaɓɓutuki ibbe dow ibbi ki’i, ammaa mi heɓataa. Fe’’uki! Ngam ɗume ki surata leydi e meere?’ ⁸Kuwoowo to ngesa kan wi’imo, ‘Joomu wuro, ɓeydanki ndungu go’o, mi mo’’inanaki leydi, mi waɗanaki ngoobaari.13.8: Waato taakiiri, koo diɓiiri, koo bicciiri.⁹To ki rimii ɓikkoy hitaande garaynde, too, wooɗii, ammaa to ki rimaayi, sey pe’’aaki.’ ”

Yeesu Yamɗitinii Debbo Nder Nyalnde Siwtaare

¹⁰Wonde Nyalnde Siwtaare Yeesu e ekkitina nder suudu do’aare. ¹¹E woodi debbo ɗon ginnol e haɓɓimo duuɓi sappo e joweetati, e ngol turnimo, koo hoore maako o waawataa ƴeftuki. ¹²Nde Yeesu yi’imo, noddimo haade, wi’imo, “Bandiraawo, a hoyii daga nyawu maaɗa.” ¹³Yeesu yowi juuɗe muuɗum dow maako, ɗon e ɗon o ɓantii o fuɗɗi mantuki Allah.

¹⁴Ɓernde ardiiɗo suudu do’aare ndun metti ngam Yeesu yamɗitinii goɗɗo Nyalnde Siwtaare. Ngam maajum o wi’i yimɓe, “E woodi balɗe joweego’o ngam kuuɗe, ngaree ɗum yamɗitina’on nder balɗe ɗen, naa’ ni nder Nyalnde Siwtaare.”13.14: Wur 20.9,10; TA 5.13,14.

¹⁵Sey Yeesu nootii wi’imo, “Onon munaafuki’en! Naa’ koo moye mooɗon e fitta ngaari muuɗum koo mbabba muuɗum nder Nyalnde Siwtaare yarnoyanga? ¹⁶O’o debbo taanu Ibraahim, mo Ceyɗan haɓɓi duuɓi sappo e joweetati, haanaa o fittee Nyalnde Siwtaare?” ¹⁷Nde o wi’i non, wanywanyɓe maako fuu cemti, ammaa yimɓe nani belɗum e fii kayɗiniiɗum fuu ɗum o waɗata.

Misaalu Dow Gabbel Mastat

(Maatiyu 13.31,32; Markus 4.30‑32)

¹⁸Nden Yeesu wi’i, “Ɗume Laamu Allah nandi? Ko nandinaymiɗum? ¹⁹Laamu Allah e nandi e gabbel mastat ngel goɗɗo hocci aawi nder ngesa muuɗum. Gabbel ngel fuɗi, warti leggel, colli ngaɗi caɓɓe dow lice maaki.”

Misaalu Dow Ƴuufinirɗum

(Maatiyu 13.33)

²⁰O wi’i kadin, “Ɗume nandinaymi Laamu Allah? ²¹E ɗum nandi e ƴuufinirɗum ɗum goɗɗo debbo hocci lancindiri e condi alkamaari poondirkoy tatoy ndi fuu ndi ƴuufi.”

Dammugal Ɓiɗɗiingal

(Maatiyu 7.13,14,21‑23)

²²Yeesu e yaha Urucaliima o tokki gariije e ngarihoy e mo ekkitina. ²³Goɗɗo ƴamimo wi’i, “Moodibbo, yimɓe seɗɗa tan kisata?”

O wi’iɓe, ²⁴“Ndurwee nattiron to dammugal ɓiɗɗiingal, ngam e mi wi’a’on, ɗuɗɓe ndoolay ngam natta ammaa ɓe mbaawataa. ²⁵To joomu wuro ngon ummake maɓɓii dammugal ngal, on ndaroto yaasi on piya dammugal ngal on toroo on mbi’a, ‘Moodibbo, maɓɓitanmin dammugal!’ Ammaa o wi’ay’on, ‘Mi andaa’on, mi andaa to ƴiwoyɗon.’ ²⁶Nden on mbi’ay, ‘Min nyamdii, min njardii e maaɗa, a ekkitinii nder gariije amin.’ ²⁷Ammaa o wi’ay, ‘E mi wi’a’on, mi andaa’on, mi andaa to ƴiwoyɗon. Cendiree e am, onon kalluɓe.’13.27: Jab 6.8.²⁸To on ngi’ii Ibraahim e Iciyaaku e Yaakubu e annabo’en fuu nder Laamu Allah, ammaa onon on mburtinaama, on mboyay nyerƴindiron nyiiƴe.13.28: Maat 22.13; 25.30.²⁹Yimɓe naa’ Yahuudanko’en ngaray daga fuuna e hirna e woyla e fombina ɓe njooɗoo ɓe nyaama nyamndu humto nder Laamu Allah.13.28,29: Maat 8.11,12.³⁰Raɗɗum, woɓɓe cakitiiɓe ɓe ngartay artuɓe, nden woɓɓe artuɓe ɓe ngartay cakitotooɓe.”13.30: Maat 19.30; 20.16; Mar 10.31.

Yeesu e Wannii Dow Urucaliima

(Maatiyu 23.37‑39)

³¹E carel ngel, woɓɓe Faarisanko’en ngari to Yeesu mbi’imo, “Alu ɗo’o ngam Hirudus e yiɗi warmaa.”

³²O wi’iɓe, “Njahee mbi’on dilaaru ndun ɗon, ‘Raɗɗum, hande e jaango mi wurtinay ginni mi yamɗitinay ɓe njamɗaa. E nyalnde tatawre mi yottinay kuugal am.’ ³³Fuu e non, doole mi nanga laawol hande e jaango e faɓɓi jaango, ngam haanaa ɗum wara annabiijo bannye sey nder Urucaliima.

³⁴“Jalla Urucaliima, Urucaliima a warii annabo’en, a wardii liloyaaɓe to maaɗa e kaaƴe! Nde ɗuɗɗum e mi yiɗi moɓtuki yimɓe maaɗa no geroogal moɓtirta ɓikkoy maagal ley biyeeli maagal, ammaa a jaɓaayi. ³⁵Raɗɗum, Allah alanay’on Wuro Ceniingo mooɗon. E mi wi’a’on, on puɗɗitataa ngi’onyam, naa nyalnde nde mbiiɗon, ‘O barkiɗinaaɗo, garoyɗo nder inde Joomiraawo.’ ”13.35: Jab 118.26.

Yeesu Yamɗitinii Gooduɗo Nyawu Ɓuddi

¹Wonde Nyalnde Siwtaare Yeesu yahi wuro go’oto nder ardiiɓe Faarisanko’en ngam o nyaama nyamndu. Sey ɓe ngaɗi ka raarukimo, koo o waɗay ko ɓe keɓata ɓe nangiramo. ²Haade maako e woodi goɗɗo gorko gooduɗo nyawu ɓuddi. ³Yeesu ƴami Faarisanko’en e moodiɓɓe Attawra o wi’i, “Dooka jaɓii ɗum yamɗitina neɗɗo Nyalnde Siwtaare ko aa’a?”

⁴Ammaa ɓe nootaaki. Sey Yeesu meemi nyawɗo on yamɗitinimo, wi’imo o dilla. ⁵Nden o ƴamiɓe, o wi’i, “Moye nder mooɗon to ɓiɗɗo muuɗum koo ngaari muuɗum yanii nder ɓundu Nyalnde Siwtaare ittoytaamo ɗon e ɗon?”14.5: Maat 12.11.

⁶Ɓe keɓaayi ko ɓe mbi’imo.

Hoccu Hoore Maaɗa Naa’ A Goɗɗum

⁷Nde Yeesu faami kumpitaaɓe nyaamuki nyamndu ɗon fuu e cuɓa jooɗaaki to mawɓe njooɗotoo, o hokkiɓe misaalu ɗu’um, o wi’i, ⁸“To goɗɗo humpitiima humto, taa’ jooɗa to mawɓe njooɗotoo. Ɗum gaɗotooɗum o humpitii goɗɗo ɓurɗoma mangu. ⁹Nden kumpitoyɗoma on o waroyay o wi’umaa, ‘Umma neɗɗo o’o jooɗoo.’ Ngam non boo a semtay, njooɗoɗaa to jooɗorgal cakitiingal. ¹⁰Ammaa to ɗum humpitiima, jooɗa to jooɗorgal cakitiingal, ngam to kumpitoyɗoma waroyi, o wi’ete, ‘Higo, umma, njooɗoyoɗaa dow jooɗorgal mawɓe.’ Non hokkete mangu yeeso garoyɓe ɗon fuu.14.8‑10: Wag 25.6,7.¹¹Ngam mawninɗo hoore muuɗum fuu o lesneteeɗo, lesninɗo hoore muuɗum boo o mawninteeɗo.”14.11: Maat 23.12; Luk 18.14.

¹²Nden o wi’i kumpitoyɗomo, “Taa humpitay yimɓe humto to wuro maaɗa, taa’ humputu higooɓe maaɗa tan, koo mawniraaɓe e minyiraaɓe maaɗa tan, koo bandiraaɓe maaɗa tan, koo ɓe kedduɗaa riskuɓe. Ngam ɓe kumpitete kamɓe maa, ɓe ngaatanmaa ko ngaɗanɗaaɓe. ¹³Ammaa taa woodi humto, humputu ɓe ngalanaa, e jaraaɓe, e gurgu’en, e wumɓe. ¹⁴Ɗum barkiɗinte, ngam ɓe mbaawataa waatankima ko ngaɗanɗaaɓe. Allah waatante Nyalnde Jaango, nyalnde nde o umminta mayɓe gaɗuɓe jonde wooɗunde.”

Misaalu Dow Humto Mango

(Maatiyu 22.1‑10)

¹⁵Nde goɗɗo nder jooɗodiiɓe e maako nani non, o wi’i Yeesu, “Neɗɗo nyaamoowo nyamndu nder Laamu Allah o barkiɗinaaɗo!”

¹⁶Sey Yeesu wi’imo, “E woodi goɗɗo neɗɗo ciryiiɗo humto mango o humpiti yimɓe ɗuɗɓe. ¹⁷Nde carel humto ngon waɗi, o lili maccuɗo maako wi’oya kumpitaaɓe ɓen, ‘Ngaroyee, koo ɗume siryaama!’ ¹⁸Ammaa ɓe fuu ɓe ngaɗi ka ɗaɓɓutuki no ɓe calortoo ngam ɓe ngiɗaa yaaki. Arandeejo on wi’imo, ‘Mi soodii ngesa, doole mi yaha mi yi’aka. Waɗu munyal, mi heɓataa yaaki.’ ¹⁹Ɗiɗaɓo wi’imo, ‘Mi soodii na’i demooji kanji sappo, e mi yiɗi yaaki mi foondaɗi jooni. Waɗu munyal mi heɓataa yaaki.’ ²⁰Non tataɓo maa wi’i, ‘Mi neeɓaayi ko te’umi, ngam non mi heɓataa yaaki.’ ²¹Maccuɗo on so’’ii wi’i joomu wuro muuɗum koo ɗume. Ɓernde joomu wuro on metti, o wi’i maccuɗo on, ‘Yawnu njahaa dow ɗate mawɗe e ɗate pamare nder gariiri, noddanowaayam ɓe ngalanaa, e jaraaɓe, e wumɓe, e gurgu’en.’ ²²Gaɗa maccuɗo on wartoyii wi’i joomu wuro muuɗum, ‘Ko mbiiɗaa ɗum waɗa waɗaama, ammaa fuu e non njayri e horii.’ ²³Sey joomu wuro on wi’i maccuɗo on, ‘Yahu dow ɗate mawɗe e ɗate pamare gaɗa gariiri, noddaa yimɓe ngaroya natta wuro am ngam ngo heewa. ²⁴E mi wi’a’on, nder kumpitaaɓe arande’en walaa nyaamayɗo nyamndu humto am.’ ”

Bone Tokkuki Yeesu

(Maatiyu 10.37,38)

²⁵Wonde nyalnde yimɓe ɗuɗɓe e njaada e Yeesu. Sey o raariɓe o wi’i, ²⁶“Garoyɗo to am fuu to ɓuraayi yiɗukiyam dow nyaako muuɗum e maduujo muuɗum e debbo muuɗum e ɓiɓɓe muuɗum e mawniraaɓe e minyiraaɓe muuɗum ‑ haa maa e yonki muuɗum, o waawataa wartuki tokkuɗoyam.14.26: Maat 10.37.²⁷Koo moye to hoccaayi gaafaangal muuɗum tokkiyam waawataa wartuki tokkuɗoyam.14.27: Maat 10.38; 16.24; Mar 8.34; Luk 9.23.²⁸Misaalu, to goɗɗo mooɗon e yiɗi mahuki wuro mango, ay arande o jooɗoto taw o lima ko o majjinta, o yi’a koo e mo woodi ko heƴatamo o yottinango. ²⁹To naa’ non, to o fuɗɗii mahukingo o waawataa yottinkingo, gi’uɗongo fuu jalaymo ³⁰wi’a, ‘Raa neɗɗo o’o fuɗɗii mahuki, ammaa o waawaayi yottinki.’ ³¹Koo boo to laamiiɗo gooduɗo sooji’en 10,000 honiday e laamiiɗo garoyɗo honamo e sooji’en 20,000, arande o jooɗoto taw o yi’a koo e mo woodi sembe honuduki e maako. ³²To o yi’ii o waawataa, o lilay lilaaɓe to garayɗo on ko o yotto, ngam ɓe ɗaɓɓita siryootirki e maako. ³³Non maa, koo moye to sendiraayi e ko woodi fuu waawataa wartuki tokkuɗoyam.

Lamɗam Mbaatuɗam

(Maatiyu 5.13; Markus 9.50)

³⁴“Lamɗam ɗum fii boɗɗum, ammaa to belɗum maajam ittake, ko wartirta belɗum maajam? ³⁵Walaa ko ɗam waɗetee. Ɗam nafataa goɗɗum, sey ni ɗam rufee. Gooduɗo noppi nanooji fuu nana!”

Misaalu Dow Mbaala Majjunga

(Maatiyu 18.12‑14)

¹Wonde nyalnde jaɓooɓe ceede leydi e gaɗooɓe hakke ngari to Yeesu ngam ɓe nana ko o wi’ata. ²Ammaa Faarisanko’en e moodiɓɓe Attawra ngaɗi ka metitaaki e ɓe mbi’a, “Neɗɗo o’o e jaɓɓoo gaɗooɓe hakke haa maa e mo nyamda e maɓɓe.”15.1,2: Luk 5.29,30.³Sey Yeesu hokkiɓe misaalu ɗu’um, wi’i,

⁴“To goɗɗo nder mooɗon e woodi baali 100, go’o nder baali ɗin majjii, o alay koriiɗi e ndura nder ladde, o ɗaɓɓitoya majjunga ngan naa o heɓtiinga. ⁵To o heɓtoyiinga, o nanay belɗum o towoyanga e daande maako. ⁶To o so’’ake wuro, o nodday higooɓe maako e ɓe o heddi, o wi’aɓe, ‘Mballeeyam nanki belɗum ngam mi heɓtii mbaala am majjunoonga.’ ⁷E mi wi’a’on, bo non ɗum ɓuray nanki belɗum e ton dow to gaɗoowo hakke go’oto tuubii so’’ake to Allah, dow yimɓe 99 nyumooɓe ngalaa hakke.

Misaalu Dow Ceede Majjuɗe

⁸“Misaalu, to debbo e woodi jamɗe15.8: Yamnde go’o e fottidi e ceede kuugal nyalnde go’o. sappo ɗe ajurfaari, go’o majjii, ay o waɗay hiite e fitilaaru, o wuuwa wuro ngon, o ɗaɓɓita e seese‑seese koo toye naa o heɓtii yamnde majjunde nden. ⁹To o heɓtiinde, o nodday higooɓe maako e ɓe o heddi, o wi’aɓe, ‘Mballeeyam nanki belɗum, ngam mi heɓtii yamnde am majjunoonde.’ ¹⁰E mi wi’a’on, bo non malaa’ika’en nanirta belɗum yeeso Allah to gaɗoowo hakke go’oto alii waɗuki hakke so’’ake to Allah.”

Misaalu Dow Ɓiɗɗo Majjuɗo

¹¹Kadimaa o wi’i, “E woodi goɗɗo neɗɗo gooduɗo ɓiɓɓe ɗiɗo. ¹²Pamaro on wi’i nyaako muuɗum, ‘Bappa, hokkam ndonu am.’ Sey nyaako on sendaniɓe jawdi muuɗum. ¹³Gaɗa balɗe seɗɗa, pamaro on hawti ko woodi fuu, o yahi leydi ngoɗɗundi, ton o lallini jawdi maako nder jonde meere. ¹⁴Gaɗa o lallinii jawdi ndin fuu, ɗum waɗi weelo kallungo nder leydi ndin, o warti mo walaa koo ɗume. ¹⁵Ngam non o yahi o huwana goɗɗo neɗɗo leydi ndin, neɗɗo on yaarimo to aladeeji maako hokkimo kuugal nyamnukiɗi. ¹⁶Kayeejo on e yiɗunoo to o heɓayno o nyaama nyamndu aladeeji, ammaa walaa kokkuɗomo goɗɗum. ¹⁷Nde hakkiilo maako warti, o wi’i nder ɓernde maako, ‘Kuwanooɓe nyaako am e ngoodi nyamndu keƴaynduɓe haa ndu horoo, ammaa min boo e mi ɗo’o weelo ɓadake warkiyam. ¹⁸Mi so’’oto to nyaako am, mi wi’amo, “Bappa, mi waɗii hakke yeeso Allah e yeeso maaɗa. ¹⁹Mi hewtaayi ɗum noddayam ɓiɗɗo maaɗa, e mi toromaa alam mi warta go’oto nder kuwanooɓema.” ’ ²⁰Sey o ummii o so’’ii to nyaako maako.

“Ko o yottoo wuro ngon, nyaako maako yi’imo yurminanimo, doggi wuundoyiimo jaɓɓiimo boɗɗum. ²¹Ɓiɗɗo on wi’imo, ‘Bappa, mi waɗii hakke yeeso Allah e yeeso maaɗa, jooni mi hewtaayi ɗum noddayam ɓiɗɗo maaɗa.’ ²²Ammaa nyaako on wi’i maccuɓe muuɗum, ‘Njawnee ngaddon limce ɓurɗe wooɗuki, ɓornonmo. Ngaɗaneemo jabbaare e hoondu maako e paɗe e koyɗe maako. ²³Ngaddee ngaari payndi, kirsonndi, nyaamen nanen belɗum, ²⁴ngam ɓiɗɗo am o’o, o maayiino, ammaa o ummake, o majjiino, ammaa o heɓtaama!’ Sey ɓe puɗɗi nyaamuki, e ɓe nana belɗum.

²⁵“E carel ngel mawniraawo on e ton ngesa. Sey e mo wartoya, nde o ɓadii wuro, o nani e ɗum fiya bawɗi e ɗum wama. ²⁶Sey o noddi go’oto nder maccuɓe o ƴamimo, o wi’i, ‘Ko wangi?’ ²⁷Maccuɗo on wi’imo, ‘Minyiraawo maaɗa warti, nyaako maaɗa boo hirsii ngaari payndi ngam o wartii jam koo ko yanimo.’ ²⁸Ɓernde mawniraawo on metti o salii nattuki wuro ngon. Nyaako on wurtoyii toriimo o natta. ²⁹Ammaa o wi’i nyaako on, ‘Raa, duuɓi ɗuɗɗi e mi huwanmaa bo maccuɗo, mi meeɗaayi salaaki ko mbiiɗaayam, ammaa fuu e non a meeɗaayi hokkukiyam koo damngel go’el ngam mi nanda belɗum e higooɓe am. ³⁰Ammaa nde ɓiɗɗo maaɗa o’o wartoyi, nyaamuɗo jawdi maaɗa dow tokkuki rewɓe, a hirsaniimo ngaari payndi.’

³¹“Nyaako on wi’imo, ‘Ɓiɗɗo am, an a wondi e am koo ndeye, ko ngoodumi fuu an jeyiɗum. ³²E haani nanen belɗum, ngam minyiraawo maaɗa o’o o maayiino, ammaa jooni o ummake, o majjiino, ammaa jooni o heɓtaama.’ ”

Jowaaɗo Dow Jawdi Mo Walaa Goonga

¹Yeesu wi’i tokkuɓemo, “E woodi goɗɗo diskuɗo jowuɗo goɗɗo dow jawdi muuɗum ngam faamanandi. Goɗɗo wi’i diskuɗo on, ‘On ɗon mo njowɗaa dow jawdi maaɗa e mo wonnandi.’ ²Ngam non diskuɗo on noddimo, wi’imo, ‘Ko nanaymi dow maaɗa nihi? Wi’am no njogoriɗaa jawdi am ngam daga jooni mi ittete dow jawdi am.’ ³Paamanoowo jawdi on wi’i nder ɓernde muuɗum, ‘No ngaɗaymi jooni? Raa joomu wuro am riiwayyam dow kuugal nga’al, raa boo mi walaa sembe remuki, mi semtay boo toraaki. ⁴Yawwaa! Jooni e mi andi no ngaɗaymi ngam yimɓe njaɓayam nder gureeje maɓɓe to mi riiwaama daga kuugal nga’al.’ ⁵Sey o lilani ɓe joomu wuro maako tokkata nyamaande, o wi’i arandeejo, ‘No joomu wuro am tokkatama?’ ⁶O wi’imo, ‘Paali nebbam jaytun 800 tokketeemi.’ Paamanoowo jawdi on wi’imo, ‘Jaɓu ɗerewol nyamaande maaɗa, yawnu windu 400.’ ⁷Nden o wi’i ɗiɗaɓo on, ‘An boo, noye tokketeɗaa?’ O wi’imo, ‘Buhuuji alkamaari 1,000 tokketeemi.’ O wi’imo, ‘Jaɓu ɗerewol nyamaande maaɗa windu buhuuji 800.’ ⁸Joomu wuro on mani paamanoowo jawdi mo walaa goonga on, ngam e mo woodi ƴoyre. Mi hokku’on misaalu ɗu’um ngam andon yimɓe ɓe tokkaayi Allah ɓurii yimɓe tokkuɓemo ƴoyre dow fii duuniyaaru.

⁹“E mi wi’a’on, kuutiree jawdi duuniyaaru ngam keɓon higooɓe, ngam to jawdi ndin re’ii, ɗum jaɓa’on nder wuro Allah ngo haa abadaa. ¹⁰Fuu gaɗuɗo ko haani e fii seɗɗa, o waɗay ko haani e fii ɗuɗɗum. Non maa mo walaa goonga dow fii seɗɗa waɗataa goonga dow fii ɗuɗɗum. ¹¹To on ngalaa goonga e jogaaki jawdi duuniyaaru, moye hoolotoo’on e jogaaki jawdi goongaari? ¹²To on njogoraaki jawdi goɗɗo goonga, moye hokkata’on ko wartata ɗum mooɗon?

¹³“Walaa maccuɗo baawayɗo jagganaaki joomu wuro’en ɗiɗo. Koo o wanya go’oto o yiɗa go’oto, koo o mawnina go’oto o yawana go’oto. Non onon maa on mbaawataa jagganaaki Allah e jagganaaki jawdi carel go’o.”16.13: Maat 6.24.

Goɗɗe Boliiɗe Yeesu

(Maatiyu 11.12,13; 5.31,32; Markus 10.11,12)

¹⁴Nde Faarisanko’en nani fuu ko o wi’i, ɓe ɗurtiimo ngam ɓe giɗɓe ceede. ¹⁵O wi’iɓe, “Onon ngoni kollooɓe ko’e mooɗon on gaɗooɓe ko haani yeeso yimɓe, ammaa Allah e andi ɓerɗe mooɗon. Ngam ko yimɓe mawninta e harmini yeeso Allah.

¹⁶“Attawra e Defte Annabo’en ngoni ko ɗum wa’ajinta haa carel Yahaya Gaɗoowo Baptisma. Daga carel ngel, e ɗum andina Habaru Belɗum dow Laamu Allah, koo moye e durwa ngam heɓa nattuki.16.16: Maat 11.12,13.¹⁷Ammaa fuu e non, ɗum ɓuray hoyuki dow e ley re’a e dow toɓɓel go’el ngel Attawra majjinee.16.17: Maat 5.18.

¹⁸“Koo moye yoofi debbo muuɗum te’i goɗɗo, njeenu o waɗata. Neɗɗo te’uɗo joofaaɗo maa, njeenu o waɗata.”16.18: Maat 5.32; 1Kor 7.10,11.

Diskuɗo e Li’aajaru

¹⁹“E woodi goɗɗo diskuɗo ɓornotooɗo limce ɗe ceede, e mo nyaama ko o yiɗi koo ndeye. ²⁰E dammugal wuro maako koo ndeye e ɗum wadda goɗɗo mo walanaa bi’eteeɗo Li’aajaru e mo woodi putte koo toye e ɓandu maako. ²¹E mo yiɗi nyaamuki ko yani e leydi daga nder nyamndu diskuɗo on. Ko ɓuri non, kutiiji maa e ngara e taha putte maako. ²²Nde mo walanaa on maayi, malaa’ika’en njaarimo o jooɗoo haade Annabi Ibraahim. Diskuɗo on maa maayi o uwaa. ²³O nattinaa hiite e mo yara bone, sey o ƴefti gite maako, o yi’i Li’aajaru e jooɗii haade Annabi Ibraahim. ²⁴O noddi Ibraahim e sembe, o wi’i, ‘Yaa Ibraahim, yurminanam, liloy Li’aajaru mbi’aamo o suuwa hoondu maako nder ndiyam o fewna ɗemngal am ngam e mi yara bone kalluɗum nder hiite nge’e.’ ²⁵Ibraahim wi’imo, ‘Ɓiɗɗo am, siftor carel ko ngonnoɗaa duuniyaaru a heɓii ko ngiɗɗaa fuu, Li’aajaru boo yarii bone kalluɗum. Ammaa jooni e mo nana belɗum ɗo’o, an boo a ɗon yara bone kalluɗum. ²⁶Gaɗa non, e woodi ngayka lugguka hakkunde meeɗen. Walaa baawayɗo huula daga ɗo’o yaha to ngonɗaa, non maa daga to ngonɗaa walaa baawayɗo huuloya to amin.’ ²⁷Ammaa diskuɗo on wi’i, ‘E mi toromaa, Bappa, lilu Li’aajaru to wuro nyaako am. ²⁸E mi woodi minyiraaɓe njowo, e mi yiɗi o yaha o wagginaɓe ngam kamɓe maa to’ ɓe ngara to njaraymi bone kalluɗum ɗo’o.’ ²⁹Ammaa Ibraahim wi’imo, ‘E ɓe ngoodi Attawra e Defte Annabo’en, al ɓe ngaɗa ko ɗe mbi’i.’ ³⁰Diskuɗo on wi’i, ‘Naa’ non, yaa Ibraahim, to goɗɗo nder mayɓe yahaniiɓe, ɓe tuubay.’ ³¹Ibraahim wi’imo, ‘To ɓe nanaayi ko Attawra e Defte Annabo’en mbi’ata, ɓe njaɓataa ko ummiiɗo daga mayde wi’iɓe.’ ”

Bone Waɗuki Hakke

(Maatiyu 18.6,7,21,22; Markus 9.42)

¹Sey Yeesu wi’i tokkuɓemo, “Doole ko waɗata yimɓe ngaɗa hakke wara, ammaa gaɗuɗo goɗɗo waɗi hakke yaray bone. ²Ɗum ɓuranay neɗɗo on haɓɓanee kaaƴa namol manga e daande o faɗɗee nder ndiyam mbeela, dow o waɗa go’oto nder sukaaɓe pamarɓe ɓe’e kooliiɓeyam waɗa hakke. ³Paamanee ko’e mooɗon.

“To bandiraawo maaɗa waɗaniima ko wooɗaa, metanmo. To o tuubii, yaafanamo.17.3: Maat 18.15.⁴To o waɗaniima ko wooɗaa nde joweeɗiɗi e nyalnde go’o, nden nde joweeɗiɗi e mo wara to maaɗa e mo wi’a, ‘Mi tuubii,’ doole njaafanoɗaamo.”

Hoolaaki Allah Bo Gabbel Mastat

⁵Lilaaɓe Yeesu mbi’imo, “Ɓeydanmin hoolaaki Allah!”

⁶Yeesu nootii wi’iɓe, “Daa on ngoodi hoolaaki famɗirki bo gabbel mastat, on mbaaway mbi’on lekki ki’i, ‘Ɗoofa tiggoyoɗaa nder ndiyam,’ sey ki waɗa bo ko mbiiɗon.

Kuugal Maccuɗo

⁷“Moye nder mooɗon gooduɗo maccuɗo demayɗo koo durayɗo baali, to maccuɗo on wartoyii daga ngesa o wi’amo, ‘Woroy, jooɗa nyaamaa nyamndu?’ ⁸Sam walaa bi’oowo non, sey ni o wi’amo, ‘Ɓorna limcere defuki, ndefanaayam hiraande, ngaddanaayam, mi nyaama mi yara taw, nden nyaamaa njaraa.’ ⁹On kammoo o yettay maccuɗo on ngam o waɗii ko o wi’i? ¹⁰Aa’a. Non onon maa, to on kuwii ko ɗum wi’i’on, on mbi’ay, ‘Min maccuɓe ɓe ngalaa bote. Min ngaɗii ko haani min ngaɗa tan.’ ”

Yeesu Yamɗitinii Yimɓe Sappo

¹¹Yeesu e yaha Urucaliima, o tokki keerol leydi Samaariya e leydi Galiili. ¹²E mo natta wongel gariyel, sey yimɓe sappo gooduɓe nyawu nyaamoojum laral kawri e maako, ɓe ndarii to woɗɗi. ¹³Ɓe noddi e sembe, ɓe mbi’i, “Yeesu! Mawɗo! Yurminanmin!”

¹⁴Nde Yeesu yi’iɓe, o wi’iɓe, “Njahee ardiiɓe diina ngi’a’on.”

E ɓe nder yaadu, sey ɓe njamɗiti.17.14: KLee 14.1‑32.¹⁵Nde go’oto maɓɓe yi’i yamɗitii, o so’’ii e mo manta Allah e sembe. ¹⁶O diccii yeeso Yeesu, o yettimo. Kanko boo o Samaariyankeejo. ¹⁷Yeesu wi’imo, “Naa’ onon sappo njamɗiti? To njoweenayo ɓen ngoni? ¹⁸Walaa mo ɗum heɓi so’’oyii yetti Allah sey koɗo o’o tan?” ¹⁹Sey o wi’i Samaariyankeejo on, “Umma ndillaa. A yamɗitii ngam a hoolakeyam.”

Garol Laamu Allah

(Maatiyu 24.23‑28,37‑41)

²⁰Woɓɓe Faarisanko’en ƴami Yeesu ɓe mbi’i, “Ndeye Laamu Allah waroyta?” O wi’iɓe, “Ɗum yi’ataa Laamu Allah e gite. ²¹Walaa bi’oowo, ‘Raa Laamu Allah ɗo’o,’ koo ‘Raa Laamu Allah ton nii,’ ngam Laamu Allah e nder mooɗon.”

²²Sey o wi’i tokkuɓemo, “Balɗe e ngara ko kaaɓoton yi’uki nyalnde wo’oyre nder nyalɗe Ɓii Neɗɗo, ammaa on ngi’ataa. ²³E carel ngel yimɓe mbi’ay’on, ‘Rammo ɗaa’e!’ koo boo, ‘Rammo ɗo’o!’ To’ on njahu. To’ on tokkuɓe. ²⁴No maƴƴere maƴƴirta yi’ee koo toye, non gartol Ɓii Neɗɗo wa’ata. ²⁵Ammaa arande doole o yara torra kalluka, yimɓe jaamanu ɗu’um nganyamo. ²⁶Ko waɗuno nder jaamanu Annabi Nuhu, non waɗetee nder balɗe ko Ɓii Neɗɗo wartoyta.17.26: Fuɗ 6.5‑8.²⁷Yimɓe e nyaama, e njara, e te’a, e te’ee haa carel ko Annabi Nuhu natti komiwal mangal, ndiyam wari halkiɓe ɓe fuu.17.27: Fuɗ 7.6‑24.²⁸Non maa no ɗum waɗuno nder jaamanu Luutu. Yimɓe e nyaama, e njara, e cooda, e coora, e ndema, e maha. ²⁹Ammaa nyalnde nde Luutu wurtii daga nder gariiri Sodom, ɗum yoofoyi hiite e kaaƴe nyaamooje hiite daga dow, nge halkiɓe ɓe fuu.17.28,29: Fuɗ 18.20—19.25.³⁰Non waɗetee nyalnde nde Ɓii Neɗɗo wangata.

³¹“E nyalnde nden gonɗo dow suudu fuu to’ jippoyoo ngam hoccuki jawdi maako nder suudu. Gonɗo to ngesa boo to’ so’’oo wuro.17.31: Maat 24.17,18; Mar 13.15,16.³²Ciftoree debbo Luutu!17.32: Fuɗ 19.26.³³Koo moye ɗaɓɓutuɗo hisna yonki muuɗum dullayki, ammaa koo moye dulli yonki muuɗum ngam am hisnayki.17.33: Maat 10.39; 16.25; Mar 8.35; Luk 9.24; Yah 12.25.³⁴E mi wi’a’on, e jemmaare nden yimɓe ɗiɗo pukkodoto dow leeso go’o ɗum hocca go’oto, ɗum ala go’oto. ³⁵Rewɓe ɗiɗo e namida, ɗum hocca go’oto, ɗum ala go’oto. ³⁶[Yimɓe ɗiɗo e kuwa nder ngesa, ɗum hocca go’oto, ɗum ala go’oto.]”

³⁷Tokkuɓemo mbi’imo, “Moodibbo, toye fii ɗu’um waɗata?”

O wi’iɓe, “To baatuɗum woni, ɗon jigaaje kawritata.”

Misaalu Dow Alkaaliijo e Goɗɗo Debbo

¹Sey Yeesu hokki tokkuɓemo misaalu ɗu’um ngam o hollaɓe ɓe ngaɗa ka waɗuki do’aare to’ ɓe coma. ²O wi’i, “E wondi gariiri e woodi goɗɗo alkaaliijo mo hulataa Allah o wannaa e yimɓe. ³E woodi goɗɗo debbo nder gariiri ndin gorko maako maayi. Koo ndeye e mo yaha to alkaaliijo on e mo toroomo e mo wi’a, ‘Waɗu ko haani hakkunde am e ganyo am.’ ⁴Alkaaliijo on neeɓi jaɓaayi. Ammaa gaɗa ɗon o wi’i nder ɓernde maako, ‘Koo nde mi hulataa Allah, kadin mi wannaa e koo moye, ⁵ammaa ngam debbo o’o e wannayam, mi waɗanaymo ko haani, ngam to’ o waɗa mi soma e garol maako.’ ”

⁶Nden Yeesu wi’i, “Nanee ko alkaaliijo o’o mo hulataa Joomiraawo wi’i. ⁷E yi’uki mooɗon Allah waɗantaa cuɓaaɓe muuɗum torotooɓemo jemma e nyalawma ko haani? O neeɓay o wallaayiɓe? ⁸E mi wi’a’on, o yaaway waɗankiɓe ko haani. Ammaa to Ɓii Neɗɗo wartoyii, o taway kooliiɓemo nder duuniyaaru boo?”

Misaalu Dow Faarisankeejo e Jaɓoowo Ceede Leydi

⁹E woodi ngi’ooɓe ko’e mu’’en ɓe gaɗooɓe ko Allah yiɗi, e ɓe njawana woɓɓe. Yeesu hokkiɓe misaalu ɗu’um. ¹⁰O wi’i, “Yimɓe ɗiɗo njahi Wuro Ceniingo ngam ɓe ngaɗa do’aare, go’oto Faarisankeejo, go’oto boo jaɓoowo ceede leydi. ¹¹Faarisankeejo on darii, waɗi do’aare nder ɓernde muuɗum wi’i, ‘Allah, mi yettiima ngam mi waɗataa ko woɓɓe yimɓe ngaɗata, bo wuyɓe, e gaɗooɓe ko wooɗaa, e gaɗooɓe njeenu, koo maa bo jaɓoowo ceede leydi o’o. ¹²E mi suumoo nde ɗiɗi nder yontoore go’o, nden e mi itta jakka nder ko keɓumi fuu.’ ¹³Ammaa jaɓoowo ceede leydi on darii to woɗɗi. O raaraayi dow, e mo rondi juuɗe maako dow hoore, e mo wi’a, ‘Yaa Allah, yurminanam, mi waɗii hakke.’ ¹⁴E mi wi’a’on, jaɓoowo ceede leydi on hootii wuro o jaafanaaɗo hakke maako, ammaa Faarisankeejo on yaafanaaka. Ngam koo moye mawninɗo hoore muuɗum o pamɗinteeɗo, nden lestinɗo hoore muuɗum boo o mawninteeɗo.”18.14: Maat 23.12; Luk 14.11.

Yeesu Barkiɗini Ɓikkoy Pamaroy

(Maatiyu 19.13‑15; Markus 10.13‑16)

¹⁵Yimɓe e ngaddana Yeesu sukahoy maɓɓe pamaroy ngam o barkiɗinakoy, ammaa nde tokkuɓemo ngi’i non, ɓe kaɓaniɓe. ¹⁶Ammaa Yeesu noddi sukahoy koy to muuɗum, wi’i, “Alee sukahoy pamaroy ngara to am. To’ on kaɗukoy, ngam gooduɓe ɓerɗe iri ɗe maakoy njeyi Laamu Allah. ¹⁷E mi wi’a’on goonga, koo moye mo jaɓaayi Laamu Allah bono sukayel pamarel, o nattataa laamu ɗum koo seɗɗa.”

Laamiiɗo Diskuɗo

(Maatiyu 19.16‑30; Markus 10.17‑31)

¹⁸Sey goɗɗo laamiiɗo ƴamimo wi’i, “Moodibbo geeto, ko haani mi waɗa mi heɓa yonki ki re’ataa?”

¹⁹Yeesu nootii, wi’imo, “Ngam ɗume noddirɗaayam geeto? Walaa geeto sey Allah tan. ²⁰A andi ko Attawra wi’i, ‘Taa’ waɗu njeenu. Taa’ waɗu warhoore. Taa’ wujju. Taa’ hokku ceyda fewre. Hokku nyaako maaɗa e maduujo maaɗa mangu.’ ”18.20: Wur 20.14; TA 5.18; Wur 20.13; TA 5.17; Wur 20.15; TA 5.19; Wur 20.16; TA 5.20; Wur 20.12; TA 5.16.

²¹O wi’i, “E mi waɗa fii ɗu’um fuu daga e mi suka.”

²²Nde Yeesu nani non, wi’imo, “Haa jooni horanimaa fii go’o. Sooru ko ngooduɗaa fuu, cendanaa ɓe ngalanaa ceede ɗen, nden a heɓay mbarjaari ton dow. Nden ngaraa, tokkaayam.” ²³Nde o nani non, o nanaayi belɗum, ngam e mo woodi risku ɗuɗɗum.

²⁴Yeesu raarimo wi’i, “E ɗum saɗi naa’ seɗɗa diskuɗo natta Laamu Allah! ²⁵Ɗum ɓuray hoyki ngeelooba tokka nder yolnde baatal dow diskuɗo natta Laamu Allah.”

²⁶Nanuɓe ko o wi’i mbi’imo, “Too, to ɗum non, moye hisata?”

²⁷Yeesu wi’iɓe, “Ko yimɓe mbaawataa waɗuki, Allah waaway waɗukiɗum.”

²⁸Biiturus wi’imo, “Raɗɗum, min alii ko min ngoodi fuu min tokkiima.”

²⁹Yeesu wi’iɓe, “E mi wi’a’on goonga, koo moye aluɗo wuro muuɗum, koo debbo muuɗum, koo sakiraaɓe muuɗum, koo danyooɓe muuɗum, koo ɓiɓɓe muuɗum, ngam Laamu Allah, ³⁰o heɓay ko ɓuri non ɗuuɗuki nder jaamanu ɗu’um, nden to o maayii o heɓay yonki ki re’ataa.”

Yeesu Metii Metuki Tataɓi Dow No Mayrata

(Maatiyu 20.17‑19; Markus 10.32‑34)

³¹Sey Yeesu noddi tokkuɓemo sappo e ɗiɗo, ɓe kakkitii o wi’iɓe, “Raɗɗum, en njahay Urucaliima, nden koo ɗume ko annabo’en mbindi dow Ɓii Neɗɗo ɗum heeway. ³²Ɗum nangaymo, ɗum hokkitiramo nder juuɗe heeferɓe, ɓe njukkitamo, ɓe kuɗamo, ɓe tuttanamo joode, ³³ɓe piyamo, ɓe mbaramo. Nden nyalnde tatawre o ummoto daga mayde.”

³⁴Tokkuɓemo sappo e ɗiɗo ɓen paamaayi ko o wi’i dow hoore maako. Faamu ɗum suuɗanakeɓe, ɓe keɓtaayi dow ɗume o metata.

Yeesu Yamɗitinii Bumɗo Torotooɗo

(Maatiyu 20.29‑34; Markus 10.46‑52)

³⁵Nde Yeesu ɓadii yottaaki gariiri Jeriiko, goɗɗo bumɗo e jooɗii haade ɗatal e toroo. ³⁶Nde bumɗo on nani yimɓe ɗuɗɓe e ƴaɓɓoo, o ƴami, “Ko wangi?”

³⁷Ɓe mbi’imo, “Yeesu Najarankeejo ƴaɓɓotoo.”

³⁸O noddi e sembe, o wi’i, “Yeesu, Ɓiɗɗo Dawda, yurminanam!”

³⁹Jahooɓe yeeso Yeesu kaɓanimo mbi’imo o de’’ita, ammaa o ɓeydi nodduki e sembe, e mo wi’a, “Ɓiɗɗo Dawda, yurminanam!”

⁴⁰Ngam non Yeesu darii wi’i ɗum wadda bumɗo on to maako. Nde o ɓaddoyii haade, Yeesu ƴamimo, wi’i, ⁴¹“Ɗume ngiɗɗaa mi waɗanmaa?”

O wi’i, “Moodibbo, e mi yiɗi mbumtinaayam.”

⁴²Sey Yeesu wi’imo, “Wumtu! Hoolaare maaɗa yamɗitiniima.”

⁴³Ɗon e ɗon gite maako mbumti, o tokki Yeesu, e mo manta Allah. Nde wonɓe ɗon fuu ngi’i ko waɗi, kamɓe maa ɓe manti Allah.

Yeesu e Jakka

¹Yeesu natti Jeriiko e mo ƴaɓɓoo nder gariiri ndin. ²E woodi goɗɗo neɗɗo ton mawɗo jaɓooɓe ceede leydi, bi’eteeɗo Jakka, o diskuɗo. ³E mo yiɗi o yi’a moye woni Yeesu, ammaa o waawaayi ngam yimɓe ɗuuɗii, kadimaa o dammuɗo. ⁴Sey o doggi o ardii o ƴeeŋi lekki ngam o yi’a Yeesu, ngam ɗon Yeesu ƴiwata. ⁵Nde Yeesu yottii wigeere nden tijjii wi’imo, “Jakka, yawnu njippoyoɗaa ngam hande wuro maaɗa mbaalaymi.”

⁶Sey Jakka yawni, jippoyii, jaɓɓiimo e welwelta. ⁷Nde yimɓe ngi’i Yeesu yahi wuro maako, ɓe fuu ɓe ngaɗi ka metitaaki e ɓe mbi’a, “O waalay wuro neɗɗo gaɗoowo hakke.”

⁸Ammaa Jakka ummii wi’i Yeesu, “Moodibbo, mi hokkay ɓe ngalanaa sendere jawdi am. Kadimaa to e woodi ɓe njaɓanmi goɗɗum ko haanaa fuu, mi yoɓayɓe ko njaɓanmiɓe nde nayi.”

⁹Yeesu wi’imo, “Hande kisndam warii nder wuro ngo’o, ngam kanko maa o ɓiɗɗo Ibraahim. ¹⁰Ngam Ɓii Neɗɗo waroyii ɗaɓɓita ko majji hisnaɗum.”19.10: Maat 18.11.

Misaalu Dow Jamɗe Jiinaariya

(Maatiyu 25.14‑30)

¹¹E ɓe nder nanuki ko o wi’ataɓe, sey o hokkiɓe misaalu ɗu’um ngam o ɓadake Urucaliima, kadimaa ngam yimɓe e kammoo Laamu Allah wangay ɗon e ɗon. ¹²O wi’i, “Goɗɗo neɗɗo mawɗo yahay wondi gariiri goɗɗundi ngam ɗum lamnamo o so’’oyoo. ¹³O noddi maccuɓe maako kamɓe sappo, o hokki koo moye maɓɓe ceede ɗe kuwoowo heɓata nder lebbi tati, o wi’iɓe, ‘Coodee cooritooɗon e ceede ɗe’e naa mi wartoyii.’ ¹⁴Ammaa yimɓe leydi maako ngiɗaamo, sey ɓe lili lilaaɓe gaɗa o dillii ɓe mbi’a, ‘Min ngiɗaa neɗɗo o’o laamoo leydi amin.’

¹⁵“Nde o lamnaa o so’’ii wuro, o wi’i ɗum noddanamo maccuɓe ɓen ɗon ɓe o hokkunoo ceede, ngam o yi’a ɓeydaari noye o heɓi. ¹⁶Arandeejo on waroyi wi’i, ‘Joomu wuro, ceede maaɗa ɓeydake nde sappo.’ ¹⁷O wi’imo, ‘A huwii boɗɗum, a maccuɗo boɗɗo. Nde a hollii goonga maaɗa dow fii pamarum, a laamoto gariije sappo.’ ¹⁸Ɗiɗaɓo wari, wi’imo, ‘Joomu wuro, ceede maaɗa ɓeydake nde jowi.’ ¹⁹Joomu wuro on wi’imo, ‘An, a laamoto gariije jowi.’ ²⁰Goɗɗo waroyi wi’i, ‘Joomu wuro, raa ceede maaɗa ɗe kaɓɓumi nder limcere cuuɗumi. ²¹E mi hulumaa ngam a neɗɗo caɗanɗo; a hocca ko a resaayi, a fe’’a ko a aawaayi.’ ²²Joomu wuro on wi’imo, ‘An, a maccuɗo kalluɗo. Ko mbiiɗaa e honduko maaɗa nangiima! E yiiki maaɗa mi neɗɗo caɗanɗo? A nyuma e mi hocca ko mi resaayi, e mi fe’’a ko mi aawaayi? ²³To ɗum non, ko waɗi a resanaayiyam ceede to ɗe kuutirtee ɗe ɓeydoo,19.23: Waato banki. (E) ngam to mi wartoyii mi tawa ɗe ɓeydake?’ ²⁴O wi’i dariiɓe haade ɗon, ‘Njaɓee ceede ɗen to maako, kokkonɗe on ɗon ɓeyduɗo ceede muuɗum nde sappo.’ ²⁵Ɓe mbi’imo, ‘Joomu wuro, ay on ɗon ceede maako ɓurii ɗe o’o ɗuuɗuki nde sappo.’ ²⁶‘Non boo e mi wi’a’on, fuu gooduɗo ɗum ɓeydanaymo. Ammaa mo walaa goɗɗum, koo ko o woodi maa ɗum jaɓayɗum.19.26: Maat 13.12; Mar 4.25; Luk 8.18.²⁷Ɓen ɗon wanywanyɓe am boo ɓe ngiɗaa mi laamoo dow maɓɓe, ngaddeeɓe ɗo’o, mbaronɓe yeeso am.’ ”

Yeesu Siryake Nattuki Urucaliima

(Maatiyu 21.1‑11; Markus 11.1‑11; Yahaya 12.12‑19)

²⁸Nde Yeesu wi’i non, o nangi laawol yaaki Urucaliima. ²⁹Nde o ɓadii gariije Betafaaji e Betani to Hocceere Nde Leɗɗe Jaytun, sey o lili tokkuɓemo ɗiɗo. ³⁰O wi’iɓe, “Njahee nder gariyel gongel yeeso mooɗon. E nattuki mooɗon, on taway mbabba mola e nga haɓɓii, ɗum meeɗaayi waɗɗaakinga. Pittoyeenga ngaddonnga ɗo’o. ³¹To goɗɗo ƴamii’on ko waɗi pittotonnga, mbi’eemo, ‘Moodibbo e yiɗi huutirkinga.’ ”

³²Sey lilaaɓe ɓen njahi tawi mbabba ngan non no o wi’iriɓe. ³³E ɓe pittanga, sey joomiiga wari wi’iɓe, “Ngam ɗume pittotonnga?”

³⁴Ɓe mbi’imo, “Moodibbo e yiɗi huutiniranga.” ³⁵Ɓe njaaraninga Yeesu, ɓe mbe’’iti cuddaari maɓɓe dow magga, ɓe koccimo ɓe njowimo dow maaga. ³⁶E mo nder yaadu dow mbabba ngan, yimɓe ngaɗi ka we’’utuki cuddaari maɓɓe dow ɗatal ngal.

³⁷Nde o ɓadii Urucaliima to regorde Hocceere Nde Leɗɗe Jaytun, hawrutuɓe tokkuɓemo puɗɗi welweltuki e manta Allah e sembe ngam kuuɗe kulniiɗe fuu ɗe ɓe ngi’i. ³⁸E ɓe mbi’a, “O barkiɗinaaɗo Laamiiɗo garoyɗo nder inde Joomiraawo! Jam e ton dow, en mawnin Allah!”19.38: Jab 118.26.

³⁹Sey woɓɓe Faarisanko’en nder hawrutuɓe ɓen mbi’i Yeesu, “Moodibbo, haɓan tokkuɓema.”

⁴⁰O wi’iɓe, “E mi wi’a’on, to ɓe nde’’itii, kaaƴe ɗe’e mantay Allah e sembe.”

Yeesu Woyanii Urucaliima

⁴¹Nde Yeesu ɓaddii Urucaliima yi’i gariiri ndin, o woyanindi, ⁴²e mo wi’a, “Daa a anduno hande ko waddata jam! Ammaa ɗum suuɗanake gite maaɗa. ⁴³Ngam balɗe ngaroyay ɗe wanywanyɓe maaɗa pilotomaa ɓe ɓiɗɗumaa koo toye maaɗa, ⁴⁴ɓe ndo’’umaa e leydi, an e ɓiɓɓe maaɗa wonɓe nder maaɗa, ɓe alataa wonde hayre dow wonde nder maaɗa, ngam a anditaayi carel ngel Allah wari hisnukima.”

Yeesu Yahii Wuro Ceniingo

(Maatiyu 21.12‑17; Markus 11.15‑19; Yahaya 2.13‑22)

⁴⁵Yeesu natti Wuro Ceniingo, o fuɗɗi riiwuki ɓe soore‑soore, ⁴⁶o wi’iɓe, “Ɗum windaama Allah wi’i, ‘Ɗum noddiray wuro am wuro do’aare,’ ammaa on ngartiriingo luuro wuyɓe.”19.46: Ica 56.7; Irm 7.11.

⁴⁷Koo ndeye e mo ekkitina nder Wuro Ceniingo, ammaa mawɓe ardiiɓe diina e moodiɓɓe Attawra e ardiiɓe yimɓe e ngaɗi ka ɗaɓɓutuki no ɓe mbardatamo.19.47: Luk 21.37.⁴⁸Ammaa ɓe keɓaayi no ɓe nangirtamo, ngam yimɓe fuu e kettindi e nanamo.

Ƴamol Dow Baptisma Yahaya

(Maatiyu 21.23‑27; Markus 11.27‑33)

¹Wonde nyalnde, Yeesu e ekkitina yimɓe nder Wuro Ceniingo, e mo wa’ajina Habaru Belɗum, sey mawɓe ardiiɓe diina e moodiɓɓe Attawra e mawɓe yimɓe ngari to maako, ²ɓe mbi’imo, “E laamu moye ngaɗataa kuuɗe ɗe’e? Moye hokkumaa laamu ɗum?”

³O wi’iɓe, “Min maa mi ƴamay’on, jooni mbi’eeyam, ⁴baptisma ɗum Yahaya waɗi, to Allah ɗum ƴiwoyi koo to yimɓe ɗum ƴiwoyi?”

⁵Sey ɓe meddi hakkunde maɓɓe, ɓe mbi’i, “To en mbi’ii, ‘Daga to Allah ɗum ƴiwoyi,’ o wi’ay, ‘Ko waɗi on jaɓaayi ko o wi’i?’ ⁶To boo en mbi’ii, ‘To yimɓe ɗum ƴiwoyi,’ yimɓe ɓe’e fuu kuborto’en kaaƴe, ngam ɓe njaɓii Yahaya o annabiijo.” ⁷Ngam non ɓe mbi’i Yeesu, “Min andaa to ɗum ƴiwoyi.”

⁸Sey Yeesu wi’iɓe, “Non min maa, mi wi’ataa’on koo e ɗume laamu ngaɗiraymi kuuɗe ɗe’e.”

Misaalu Ɗum Jaɓuɓe Nyamaande Ngesa Inabooje

(Maatiyu 21.33‑46; Markus 12.1‑12)

⁹Sey Yeesu fuɗɗi hokkuki yimɓe misaalu ɗu’um, o wi’i, “Goɗɗo neɗɗo waɗi ngesa inabooje, o hokkika woɓɓe remooɓe mo’’inaka, o dilli wondi leydi o neeɓi ton.20.9: Ica 5.1.¹⁰Nde carel ɓenduki inabooje ɗen waɗi, o lili maccuɗo to ɓe o hokki ngesa kan o jaɓonoyamo ko ɓe ngaadi nder ko ɓendi. Sey ɓe piyi maccuɗo on ɓe ndiiwimo koo ko ɓe kokkimo. ¹¹Joomu ngesa on lili goɗɗo maccuɗo kadin, kanko maa ɓe piyimo ɓe kuɗi kuɗinimo, ɓe co’’imo, koo ko ɓe kokkimo. ¹²Sey o fuɗɗiti o lili maccuɗo tataɓo, kanko boo ɓe nawnimo ɓe mburtinimo nder ngesa kan. ¹³Sey joomu ngesa on wi’i, ‘Ko ngaɗaymi? Mi lilay ɓiɗɗo am mo ɓurmi yiɗuki. E mi kammoo ɓe kokkaymo mangu.’ ¹⁴Ammaa nde ɓe o hokki ngesa kan ngi’i ɓiɗɗo joomu ngesa on, sey ɓe mbi’i hakkunde maɓɓe, ‘Too! Raa donoowo ngesa kan. Ngaree mbarenmo, ndonu ngesa kan warta ɗum meeɗen.’ ¹⁵Sey ɓe mburtinimo nder ngesa kan ɓe mbarimo.

“Too, ko kammiiɗon joomu ngesa on waɗantaɓe? ¹⁶O waray o halkaɓe, o hokka woɓɓe ngesa kan.”

Nde yimɓe nani non, ɓe mbi’i, “Allah hoyna!”

¹⁷Ammaa Yeesu raariɓe wi’i, “Too, ko woni ma’ana aayaare bi’unde:

‘Hayre nde mahooɓe nganyi,

kayre warti hayre ɓurnde darnuki maadi?’20.17: Jab 118.22.

¹⁸“Koo moye yanoyi dow hayre nden yewi yewinay; ammaa to hayre nden yanii dow goɗɗo, nde namaymo bo condi.”

Yoɓuki Kaysar Ceede Leydi

(Maatiyu 22.15‑22; Markus 12.13‑17)

¹⁹Moodiɓɓe Attawra e mawɓe ardiiɓe diina e ngiɗi nanga Yeesu ɗon e ɗon, ngam ɓe paamii dow maɓɓe o hokki misaalu ɗu’um, ammaa e ɓe kula yimɓe. ²⁰Ngam non ɓe ngaɗani Yeesu gite, ɓe lili woɓɓe nanditinɓe e yimɓe ɓe goonga ngam ɓe nana koo o wi’ay goɗɗum ɗum ɓe keɓata ɓe ngulliroyoomo yeeso gomnaajo leydi. ²¹Lilaaɓe ɓen sey ƴami Yeesu mbi’i, “Moodibbo, e min andi ko mbi’ataa e ko ngaɗataa ɗum goonga, a hollataa yidde hoore, a ekkitina laawol Allah e goonga. ²²E yiiki maaɗa e haani min njoɓa Kaysar Mawɗo Laamiiɓe ceede leydi, koo ɗum haanaayi?”

²³Ammaa Yeesu e andi ƴoyre maɓɓe, sey o wi’iɓe, ²⁴“Kolleeyam yamnde ajurfaari. Ɗowdi moye e inde moye woni dow mayre?”

Ɓe mbi’i, “Ɗum Kaysar.”

²⁵O wi’iɓe, “Ngam non, kokkee Kaysar ko woni ɗum Kaysar, nden kokkon Allah ko woni ɗum Allah.”

²⁶Ɓe keɓaayi ko ɓe nangirtamo nder ko o wi’iɓe yeeso yimɓe, sey ɓe nde’’iti e ɓe kayɗina e no o nootoraniiɓe.

Ƴamol Dow Ummaaki Yimɓe Daga Mayde

(Maatiyu 22.23‑33; Markus 12.18‑27)

²⁷Saadusanko’en e mbi’a walaa ummaaki mayɓe. Woɓɓe maɓɓe ngari to Yeesu,20.27: KL 23.8.²⁸ɓe ƴamimo, ɓe mbi’i, “Moodibbo, Annabi Muusa wi’ii to neɗɗo te’ii debbo maayii danyidaayi e maako, sey sakiraawo maako te’amo ngam heɓana sakiraawo muuɗum mayɗo ɓiɓɓe.20.28: TA 25.5.²⁹Too, ndenno e woodi woɓɓe sakiraaɓe worɓe njoweeɗiɗo. Afo on te’i debbo, maayi, danyidaayi e maako. ³⁰Ɗiɗaɓo on te’i debbo on, kanko maa o maayi, ɓe ndanyidaayi. ³¹Tataɓo on maa te’i debbo on, kanko maa o maayi ɓe ndanyidaayi. Non sakiraaɓe njoweeɗiɗo ɓen ɗon ɓe fuu ɓe te’iinomo, ɓe maayi, ɓe ndanyidaayi e maako. ³²Gaɗa maajum debbo on maa maayi. ³³Too, jooni, nyalnde nde mayɓe ummotoo, debbo on wartay debbo moye nder maɓɓe? Ngam ɓe fuu njoweeɗiɗo ɓe te’iimo.”

³⁴Yeesu nootii wi’iɓe, “Yimɓe jaamanu ɗu’um e te’indira, ³⁵ammaa yimɓe ɓe Allah yi’i e haani ɓe ummoo Nyalnde Jaango, nyalnde nde ɗum umminta mayɓe, worɓe te’ataa, rewɓe te’ataake. ³⁶Ɓe puɗɗitataa ɓe maaya, ngam ɓe ngartay bo malaa’ika’en. Ɓe ɓiɓɓe Allah ngam ɓe ummake daga mayde. ³⁷Koo nder habaru leggel goodungel hiite, Annabi Muusa hollii mayɓe ummoto, ngam o noddirii Joomiraawo ‘Allah mo Ibraahim, Allah mo Iciyaaku, Allah mo Yaakubu.’20.37: Wur 3.6.³⁸Kanko naa’ o Allah mayɓe, ammaa o Allah gooduɓe yonki. Ngam to maako, koo moye e woodi yonki.”

³⁹Woɓɓe moodiɓɓe Attawra mbi’imo, “Moodibbo, a wi’ii goonga.” ⁴⁰Daga ɗon walaa gaɗuɗo sembe ɓernde ƴamimo wongol ƴamol.

Ƴamol Dow Kisnoowo

(Maatiyu 22.41‑46; Markus 12.35‑37)

⁴¹Ammaa Yeesu wi’iɓe, “No waɗata e ɓe mbi’a Almasiihu ɗum ɓiɗɗo Dawda? ⁴²Ngam Dawda e hoore muuɗum wi’i nder deftere Jabuura,

‘Joomiraawo wi’ii Joomiraawo am,

“Jooɗa to jungo am nyaamo,

⁴³naa mi waɗii a yaaɓii wanywanyɓe maaɗa.” ’ 20.42,43: Jab 110.1.

⁴⁴Dawda e noddira Almasiihu ‘Joomiraawo.’ No waɗata o warta ɓiɗɗo Dawda?”

Yeesu Wagginii Tokkuɓemo Dow Moodiɓɓe Attawra

(Maatiyu 23.1‑36; Markus 12.38‑40)

⁴⁵Yeeso koo moye o wi’i tokkuɓemo, ⁴⁶“Paamanee moodiɓɓe Attawra, giɗuɓe yiilaaki e ɓornii toggoho njuutuko, giɗuɓe hownireeki mangu nder luumo. E ɓe ngiɗi jooɗaaki dow jooɗorle mawɓe nder cuuɗi do’aare e jooɗorle mawɓe to humto. ⁴⁷Kamɓe ngoni nyaamooɓe jawdi rewɓe ɓe worɓe mu’’en maayi, waɗooɓe do’aaje juutuɗe ngam ɗum yi’aɓe. Ɓe ɓuray yaruki bone.”

Dokkal Ngal Debbo Mo Gorko Muuɗum Maayi Hokki

(Markus 12.41‑44)

¹Yeesu ƴefti hoore muuɗum yi’i riskuɓe e ngaɗa dokke maɓɓe nder to ɗum hokkata ceede ngam Allah nder Wuro Ceniingo. ²Sey o yi’i goɗɗo debbo mo walanaa mo gorko muuɗum maayi waɗii ceede njamkoy ɗiɗoy koy njamndi mboɗeeri nder. ³Yeesu wi’i, “E mi wi’a’on goonga, o’o debbo mo walanaa, ko o hokki ɓurii ko horiiɓe fuu kokki. ⁴Ngam horiiɓe ɓe’e fuu ɓe kokkii seɗɗa daga nder risku maɓɓe, ammaa kanko boo nder ciya maako o hokki fuu ko o woodi.”

Yeesu Wi’i No Wuro Ceniingo Sankitortoo

(Maatiyu 24.1,2; Markus 13.1,2)

⁵Woɓɓe e meta dow no ɗum mo’’iniri Wuro Ceniingo e kaaƴe boɗɗe e dokke ɗe ɗum hokki ngam Allah. Ammaa Yeesu wi’i, ⁶“Ko ngi’oton ɗo’o, carel waray ngel walaa wonde hayre aleteende dow wonde. Ɗe fuu ɗum sankitayɗe.”

Carel Caɗeele Waroyay

(Maatiyu 24.3‑14; Markus 13.3‑13)

⁷Ɓe ƴamimo, ɓe mbi’i, “Moodibbo, ndeye fii ɗu’um waɗata? Nden ko hollata fuɗɗuki maajum ɓadake?”

⁸O wi’i, “Paamee, to’ ɗum majjina’on. Ngam yimɓe ɗuɗɓe ngaroyay nder inde am, ɓe mbi’a kamɓe ngoni min, nden, ‘Carel ɓadake!’ To’ on tokkuɓe. ⁹Ammaa, to on nanii habaru konuuji hakkunde leyɗe e konuuji nder leyɗe, to’ on kulu, ngam arande doole fii ɗu’um waɗa, ammaa non hollaayi re’uki duuniyaaru warii.”

¹⁰Nden o wi’iɓe, “Lenyol ummanto lenyol, nden laamu ummanto laamu. ¹¹E bigeeje feere‑feere ɗum waɗay dimbol leydi cembingol, ɗum waɗay weelo e nyawuuji kalluɗi. Ɗum waɗay fii mawɗum kulniiɗum e dow, gaɗoojum yimɓe kultora. ¹²Ammaa ko fii ɗu’um fuu waɗa, yimɓe nangay’on, torray’on, ɓe ngaɗay’on nder juuɗe mawɓe cuuɗi do’aare, ɓe ngaɗa’on nder cuuɗi cural, ɗum yaaray’on yeeso laamiiɓe e mawɓe leydi, ngam on tokkuɓeyam. ¹³Ɗum wartay laawol no kokkirtonɓe habaru am. ¹⁴Ammaa pukkinee ɓerɗe mooɗon, to’ on ngannu ko carel ngel waɗa no mburtinirton ko’e mooɗon. ¹⁵Ngam mi hokkay’on boliiɗe e andal, haa walaa goɗɗo nder ganyooɓe mooɗon baawayɗo do’’uki’on koo yedduki ko mbiiɗon.21.14,15: Luk 12.11,12.¹⁶Danyooɓe mooɗon e minyiraaɓe mooɗon e mawniraaɓe mooɗon e bandiraaɓe mooɗon e higooɓe mooɗon, ɓe kokkitiray’on, nden ɓe mbara woɓɓe mooɗon. ¹⁷Koo moye wanyay’on ngam on tokkuɓeyam. ¹⁸Ammaa walaa laasol ko’e mooɗon go’otol kalkayngol. ¹⁹To on munyii, on keɓay yonki ki re’ataa.

Yeesu Wi’i Heeferɓe Kalkay Urucaliima

(Maatiyu 24.15‑21; Markus 13.14‑19)

²⁰“To on ngi’ii honooɓe e pilii Urucaliima, andee halkuki mayri ɓadake. ²¹Nden wonɓe nder leydi Yahuudiya ndogga nattoya kocceeje, wonɓe nder gariiri mawndi boo mburtoondi, nden wonɓe nder ladde to’ natta gariiri. ²²Ngam balɗe ɗen ɗon ɗum ‘Balɗe Bone,’ ngam ko windaa fuu heeway.21.22: Yuuc 9.7.²³Rewɓe gooduɓe deeɗi e musinteeɓe ɓe torroto naa’ seɗɗa nder ɗen ɗon balɗe! Ngam ɗum waɗay torraaji kalluɗi nder duuniyaaru, monnere Allah jipponoyto lenyol ngo’ol. ²⁴Ɗum warday woɓɓe e kaafaaje, ɗum nangay woɓɓe, ɗum yaaraɓe nder leyɗe fuu ɗum wartiraɓe maccuɓe. Lenyi duuniyaaru ngaɗay ka sankutuki Urucaliima ɓe laamoondi naa carel ngel ɗum hokkiɓe waɗii.

Gartol Yeesu, Ɓii Neɗɗo

(Maatiyu 24.29‑31; Markus 13.24‑27)

²⁵“Ɗum waɗay fii kulniiɗum nder naange e lewru e koode. Yimɓe wonɓe nder leyɗe duuniyaaru fuu ɓe ngannay ɓe kultora, nden ɓe ndulla ko ɓe ngaɗata ngam hononde cembinde nde geelooɗi ndiyam mbeela.21.25: Ica 13.10; Ijik 32.7; Yow 2.31; WY 6.12,13.²⁶Kulol waɗay woɓɓe pekkora, ngam ko waroyta nder duuniyaaru, ngam ko woni dow fuu dimboto. ²⁷E carel ngel, ɓe ngi’ay Ɓii Neɗɗo e wara nder duule e bawɗe e teddungal mangal.21.27: Daan 7.13; WY 1.7.²⁸To fii ɗu’um fuɗɗii waɗuki, ummee ndarooɗon, ƴefton ko’e mooɗon ndaaron dow, ngam kisndam mooɗon ɓadake.”

Misaalu Dow Lekki Ibbi

(Maatiyu 24.32‑35; Markus 13.28‑31)

²⁹O hokkiɓe misaalu ɗu’um, o wi’i, “Ndaaree lekki ibbi e leɗɗe koriiɗe fuu. ³⁰To on ngi’ii ɗe mbilitii, on andi seeto ɓadake. ³¹Non maa to on ngi’ii fii ɗu’um e waɗa, too, on anday Laamu Allah ɓadake.

³²“E mi wi’a’on goonga, jaamanu ɗu’um re’ataa naa fuu fii ɗu’um waɗii. ³³Dow e ley ƴaɓɓoto, ammaa boliiɗe am ƴaɓɓataako haa abadaa.

Paamee Boɗɗum

³⁴“Paamee to’ yare‑yare e nyaame‑nyaame e wannuki e ko woni nder duuniyaaru hocca ɓerɗe mooɗon, ngam to’ nyalnde nden uddoo’on on andaa. ³⁵Ngam nyalnde nden waray dow koo moye mo yonki nder duuniyaaru. ³⁶Paamee koo ndeye ngaɗon do’aare ngam keɓon ndaɗon fii ɗu’um gaɗayɗum fuu, nden ndarooɗon yeeso Ɓii Neɗɗo.”

³⁷Koo ndeye nyalnde Yeesu e ekkitina nder Wuro Ceniingo, ammaa jemma o wurtoo o yaha dow Hocceere Nde Leɗɗe Jaytun o waaloya.21.37: Luk 19.47.³⁸Koo ndeye ilaa subaka yimɓe fuu e njaha Wuro Ceniingo ngam nanukimo.

Mawɓe Meddii Dow No Nangirta Yeesu

(Maatiyu 26.1‑5; Markus 14.1,2; Yahaya 11.45‑53)

¹Too, carel ɓadake ngam Humto Buroodi Ɗum Walaa Ƴuufinirɗum bi’eteengo Humto Sakkinki.22.1: Wur 12.1‑27.²Mawɓe ardiiɓe diina e moodiɓɓe Attawra e ɗaɓɓita no ɓe mbardata Yeesu, ngam e ɓe kula yimɓe.

Yahuuda Jaɓi Hokkitira Yeesu

(Maatiyu 26.14‑16; Markus 14.10,11)

³Sey Ceyɗan natti ɓernde Yahuuda bi’eteeɗo Iskariyooti, go’oto nder tokkuɓe Yeesu sappo e ɗiɗo. ⁴Sey o yahi to mawɓe ardiiɓe diina e mawɓe ardiiɓe taadiiɓe Wuro Ceniingo, o meddi e maɓɓe dow no o hokkitirta Yeesu nder juuɗe maɓɓe. ⁵Ɓe nani belɗum ɗuɗɗum, ɓe ngaɗi alkawal hokkukimo ceede. ⁶Kanko boo o jaɓi, o fuɗɗi ɗaɓɓutuki laawol no o hokkitirta Yeesu nder juuɗe maɓɓe.

Yeesu Siryake Nyaamuki Nyamndu Humto Sakkinki

(Maatiyu 26.17‑25; Markus 14.12‑21; Yahaya 13.21‑30)

⁷Sey nyalnde wari nde Humto Buroodi Ɗum Walaa Ƴuufinirɗum nde ɗum hirsata karoori Humto Sakkinki. ⁸Ngam non Yeesu lili Biiturus e Yahaya wi’iɓe, “Njahee ciryanee’en koo ɗume ngam nyaamen Humto Sakkinki.”

⁹Ɓe ƴamimo ɓe mbi’i, “Toye ngiɗɗaa min njaha min ciryooɗum?”

¹⁰O wi’iɓe, “Raɗɗum, e nattuki mooɗon gariiri, on kawray e goɗɗo e mo rondii ƴoogirde ndiyam. Tokkeemo yaaki wuro ngo o nattata, ¹¹mbi’on joomu wuro ngon, ‘Moodibbo wi’ii min ƴamumaa: “Toye suudu ndu nyaamaymi nyamndu Humto Sakkinki e tokkuɓeyam?” ’ ¹²O hollay’on suudu ndu dow, mawndu mo’’inaandu. Ciryanee’en koo ɗume ɗon ngam nyaamen nyamndu Humto Sakkinki.”

¹³Sey ɓe njahi ɓe tawi koo ɗume no Yeesu wi’iɓe, sey ɓe ciryii koo ɗume ngam Humto Sakkinki.

Kirtaari Joomiraawo

(Maatiyu 26.26‑30; Markus 14.22‑26; 1 Korintiyanko’en 11.23‑25)

¹⁴Nde carel waɗi, Yeesu e tokkuɓemo sappo e ɗiɗo njooɗii ngam nyaama. ¹⁵Sey o wi’iɓe, “Mi haaɓii nyamduki nyamndu Humto Sakkinki ndu’u e mooɗon ko mi torree. ¹⁶Ngam e mi wi’a’on, mi fuɗɗitataa nyaamuki nyamndu Humto Sakkinki sey to ma’ana maajum heewii nder Laamu Allah.”

¹⁷Sey o hocci inabojam nder jardugel, o yetti Allah, o wi’i, “Njaɓee nge’el cendon inabojam ɗam hakkunde mooɗon. ¹⁸Ngam e mi wi’a’on, mi fuɗɗitataa yaruki ndiyam inabooje naa Laamu Allah waroyii.”

¹⁹Nden o hocci buroodi, o yetti Allah, o sendiɗum, o hokki tokkuɓemo, e mo wi’a, “Ɗu’um ɗum ɓandu am, kokkaandu ngam mooɗon. Ngaɗee ka waɗuki non ngam siftorkiyam.” ²⁰Non maa, gaɗa ɓe kirtake, o hocci jardugel ndiyam inabojam, o wi’i, “Ɗa’am woni alkawal kesal tabbitayngal e ƴiiƴam am ndufeteeɗam ngam mooɗon.22.20: Irm 31.31‑34.

²¹“Ammaa, raɗɗum, kokkitirayɗoyam e nyamda e am ɗo’o.22.21: Jab 41.9.²²Ngam Ɓii Neɗɗo maayay non no Allah suɓi, ammaa kokkitirayɗomo wonii!”

²³Tokkuɓemo puɗɗi ƴamƴamtirki hakkunde maɓɓe, koo ɗum moye nder maɓɓe waɗata fii ɗu’um.

Geddi Dow Moye Woni Mawɗo

²⁴Kadimaa geddi ummii hakkunde maɓɓe dow moye nder maɓɓe woni mawɗo.22.24: Maat 18.1; Mar 9.34; Luk 9.46.²⁵Yeesu wi’iɓe, “Laamiiɓe yimɓe naa’ Yahuudanko’en e kolla yimɓe maɓɓe laamu sembe, fuu e non e ɓe noddira ko’e maɓɓe wallooɓe yimɓe. ²⁶Ammaa onon, to’ on ngaɗu non. Sey ɓurɗo mangu nder mooɗon warta bo pamaro, nden ardiiɗo warta bo maccuɗo.22.26: Maat 23.11; Mar 9.35.22.25,26: Maat 20.25‑27; Mar 10.42‑44.²⁷Moye ɓuri mangu, jooɗiiɗo ngam nyaama koo gaddoowo nyamndu? Ay on ɗon jooɗiiɗo woni mawɗo. Ammaa, e mi ɗon hakkunde mooɗon bo maccuɗo.22.27: Yah 13.12‑15.

²⁸“Onon ngoni darodiiɓe e am e goonga nder torra ka njarumi. ²⁹No Nyaako am Mo Dow hokkiriyam laamu, non min maa, mi hokkii’on laamu ³⁰nyamdon e am njardon e am nder laamu am, nden njooɗooɗon dow jooɗorle laamu, on laamoo lenyi Israa’iila sappo e ɗiɗi.22.30: Maat 19.28.

Yeesu Wi’i Biiturus Yedday Andukimo

(Maatiyu 26.31‑35; Markus 14.27‑31; Yahaya 13.36‑38)

³¹“Siiman, Siiman, raɗɗum Ceyɗan ƴamii laawol foonda’on, boo o hokkaama. E mo yiɗi o seɗa’on no ɗum seɗirta alkamaari e nyaande. ³²Ammaa mi waɗaniima do’aare, Siiman, ngam to’ alaa hoolaakiyam. An boo, taa wartii to am, cembiɗinaa bandiraaɓe maaɗa.”

³³Ammaa Biiturus wi’imo, “Moodibbo, e mi siryii yaaduki e maaɗa suudu cural, haa e mayde.”

³⁴Yeesu wi’i, “E mi wi’umaa, Biiturus, hande ko njakardi hana, a wi’ay a andaayam nde tati.”

Carel Torra e Wara

³⁵Sey Yeesu ƴamiɓe wi’i, “Carel ko lilmi’on mbiimi’on to’ on njaadu e ceede, to’ on njaadu e jakaare koo paɗe koyɗe ɗiɗi, e woodi ko ndulluɗon?”

Ɓe mbi’i, “Walaa.”22.35: Maat 10.9,10; Mar 6.8,9; Luk 9.3; 10.4.

³⁶O wi’iɓe, “Ammaa jooni, gooduɗo ceede e jakaare, hocca. Mo walaa kaafahi, soora cuddaari muuɗum sooda go’oti. ³⁷E mi wi’a’on, aayaare nde’e doole heewa dow am bi’unde, ‘Ɗum hoccaymo bo kalluɗo,’ ngam ko windaa dow am ɓadake heewuki.”22.37: Ica 53.12.

³⁸Tokkuɓemo mbi’i, “Moodibbo, raa kaafaaje ɗiɗi.”

O wi’iɓe, “Ɗum heƴii non.”

Yeesu Waɗii Do’aare Dow Hocceere Nde Leɗɗe Jaytun

(Maatiyu 26.36‑46; Markus 14.32‑42)

³⁹Yeesu wurtii, yahi Hocceere Nde Leɗɗe Jaytun no o woowi, tokkuɓemo maa e tokkimo. ⁴⁰Nde ɓe njottii wigeere nden, o wi’iɓe, “Ngaɗee do’aare to’ njahon to ngaɗoton hakke.”

⁴¹Yeesu hakkitii kanum tan ko waɗata hubaaki hayre, sey o yani e leydi e mo hippii, o waɗi do’aare, o wi’i, ⁴²“Nyaako am Mo Dow, taa jaɓii, ittanam jardugel torra ka’a. Fuu e non, naa’ ko ngiɗumi waɗetee, ammaa ko ngiɗɗaa waɗee.” ⁴³Sey malaa’ikaajo ƴiwoyi daga dow wanganimo sembiɗinimo. ⁴⁴E mo nder torra kalluka, ngam non o ɓeydi waɗuki do’aare. Asawre maako warti bo ƴiiƴam e simta e leydi.

⁴⁵Nde o yottini do’aare, sey o so’’ii to ɓen ɗon tokkuɓemo, o tawi e ɓe ɗaanii ngam wannaare22.45: Waato ɓillaare. waɗi ɓe comii. ⁴⁶O wi’iɓe, “Ngam ɗume ɗaanotooɗon? Ummee, ngaɗee do’aare to ɗum foondii’on to’ ngaɗon hakke.”

Ɗum Nangii Yeesu

(Maatiyu 26.47‑56; Markus 14.43‑50; Yahaya 18.3‑11)

⁴⁷Yeesu e meta, sey yimɓe ɗuɗɓe ngari. Yahuuda, go’oto nder tokkuɓemo sappo e ɗiɗo e mo ardiiɓe. Yahuuda ɓaddii Yeesu ngam hownamo. ⁴⁸Yeesu wi’imo, “Yahuuda, a hokkitiray Ɓii Neɗɗo e hownuki higaaku?”

⁴⁹Nde tokkuɓe Yeesu ngi’i ko waɗata, ɓe mbi’imo, “Moodibbo, min pe’’iraɓe kaafaaje?” ⁵⁰Go’oto maɓɓe fe’’i maccuɗo Mawɗo Mawɓe Ardiiɓe Diina ittanimo nowru nyaamo.

⁵¹Ammaa Yeesu wi’i, “Alee! To’ on ɓeydu!” Yeesu meemi nowru neɗɗo on, yamɗitinimo.

⁵²Sey Yeesu wi’i mawɓe, e mawɓe ardiiɓe diina, e mawɓe taadiiɓe Wuro Ceniingo garoyɓe nangukimo, “On ngardoyi e kaafaaje e cabbi ngam nangoyyam bo mi gujjo calorɗo? ⁵³Koo ndeye nyalnde e mi wondi e mooɗon nder Wuro Ceniingo, on nangaayiyam. Ammaa jooni ɗum carel mooɗon, e laamu nyiwre.”22.53: Luk 19.47; 21.37.

Biiturus Wi’ii Andaa Yeesu

(Maatiyu 26.57,58,69‑75; Markus 14.53,54,66‑72; Yahaya 18.12‑18,25‑27)

⁵⁴Sey ɓe nangi Yeesu, ɓe ndillidi e maako, ɓe njaarimo wuro Mawɗo Mawɓe Ardiiɓe Diina. Biiturus boo e woɗɗiti e tokkiriɓe gaɗa. ⁵⁵Nden ɓe kuɓɓi hiite caka wuro, ɓe njooɗii, Biiturus maa sey jooɗii nder maɓɓe. ⁵⁶Sey goɗɗo korɗo yi’imo e mo jooɗii e mo irfoo. Korɗo on boo sutiimo wi’i, “Neɗɗo o’o maa e wondi e Yeesu.”

⁵⁷Ammaa Biiturus yeddi, wi’i, “Mi andaamo.”

⁵⁸Gaɗa ɗon seɗɗa goɗɗo yi’imo wi’i, “An maa, a go’oto nder tokkuɓemo.”

Ammaa Biiturus wi’i, “Higo, naa’ mi tokkuɗomo!”

⁵⁹Nde yawtii seɗɗa, goɗɗo maa wi’i, “Seko walaa neɗɗo o’o maa e wondi e Yeesu, ngam kanko maa o Galilankeejo.”

⁶⁰Biiturus wi’imo, “Higo, mi andaa ko mbi’ataa!”

Ɗon e ɗon e mo nder metuki, njakardi hani. ⁶¹Sey Yeesu yeeƴii raari Biiturus. Sey Biiturus siftori ko Yeesu wi’unoomo wi’uki, “Hande ko njakardi hana, a wi’ay a andaayam nde tati.” ⁶²Sey o wurtii yaasi o woyi bojji nawɗi.

Ɗum Jukkitii Yeesu Ɗum Fiyiimo

(Maatiyu 26.67,68; Markus 14.65)

⁶³Sey yimɓe jogiiɓe Yeesu fuɗɗi jukkutukimo, e ɓe piyamo. ⁶⁴Ɓe cuddi gite maako ɓe ngaɗi ka ƴamukimo ɓe mbi’i, “Waɗu annabaaku! Moye fiyumaa?” ⁶⁵Ɓe kuɗirimo haalaaji nawɗi.

Yeesu Yeeso Kawtal Mawɓe

(Maatiyu 26.59‑66; Markus 14.55‑64; Yahaya 18.19‑24)

⁶⁶Nde weeti, Kawtal Mawɓe kawriti e mawɓe ardiiɓe diina e moodiɓɓe Attawra. Yeesu waddaa yeeso maɓɓe. ⁶⁷Ɓe mbi’imo, “To an woni Almasiihu, wi’uminka.”

Ammaa Yeesu wi’iɓe, “To mi wi’ii’onka, on njaɓataa. ⁶⁸To mi ƴamii’on boo, on nootantaakoyam. ⁶⁹Ammaa daga jooni, Ɓii Neɗɗo jooɗoto e jungo nyaamo ngo Allah Joomu Bawɗe.”

⁷⁰Ɓe fuu ɓe mbi’i, “An, a Ɓiɗɗo Allah?”

O wi’iɓe, “Non no mbiiɗon.”

⁷¹Ɓe mbi’i, “En naniika e honduko maako jooni. E woodi ko ɗaɓɓiteten kadin?”

Yeesu Yaaraama Yeeso Bilaatus

(Maatiyu 27.1,2,11‑14; Markus 15.1‑5; Yahaya 18.28‑38)

¹Sey hawrutuɓe ɓen fuu ummii, njaarimo yeeso Bilaatus, gomnaajo leydi Yahuudiya. ²Ɓe puɗɗi wullaakimo, e ɓe mbi’a, “Min tawii neɗɗo o’o e majjina lenyol amin. E mo haɗa ɗum yoɓa Kaysar Mawɗo Laamiiɓe ceede leydi, nden e mo wi’a way kanko woni Almasiihu, laamiiɗo.”

³Sey Bilaatus ƴami Yeesu wi’i, “An woni laamiiɗo Yahuudanko’en?”

Yeesu nootii wi’imo, “Ee, a wi’iika.”

⁴Bilaatus wi’i mawɓe ardiiɓe diina e hawrutuɓe ɓen, “Mi yi’aayi goɗɗum kalluɗum ɗum nangirɗon neɗɗo o’o.”

⁵Ammaa ɓe calii ko o wi’i, ɓe ngaɗi ka metuki dow Yeesu e sembe, e ɓe mbi’a, “Ko o ekkitinta e hawta yimɓe hawre nder leydi Yahuudiya fuu. O fuɗɗii nder leydi Galiili, daga ton haa ɗo’o.”

Yeesu Yaaraama Yeeso Hirudus

⁶Nde Bilaatus nani non, o ƴami o wi’i, “O’o neɗɗo o Galilankeejo?” ⁷Nde o heɓti Yeesu daga ley laamu Hirudus ƴiwoyi, o waɗi ɗum yaarimo to Hirudus, ngam e carel ngel Hirudus e ɗon e Urucaliima. ⁸Nde Hirudus yi’i Yeesu, o nani belɗum ɗuɗɗum, ngam ɗum neeɓii e mo yiɗi o yi’a Yeesu waɗii goɗɗum kayɗiniiɗum, ngam ko o nani dow maako. ⁹O ƴami Yeesu ƴamɗe ɗuɗɗe, ammaa Yeesu wi’aayimo goɗɗum. ¹⁰Mawɓe ardiiɓe diina e moodiɓɓe Attawra e ndarii ɗon e mbi’a e sembe Yeesu waɗii ko halli. ¹¹Sey Hirudus e sooji’en muuɗum kuɗimo, njukkitimo, nden Hirudus waɗii ɗum ɓornimo kolte laamiiɗo, o so’’imo to Bilaatus. ¹²E nyalnde nden Hirudus e Bilaatus ɓe ngarti higooɓe, ngam ko fii ɗum waɗa ɓe mbeldaa.

Bilaatus Wi’i Ɗum Wara Yeesu

(Maatiyu 27.15‑26; Markus 15.6‑15; Yahaya 18.39—19.16)

¹³Bilaatus noddi mawɓe ardiiɓe diina, e laamiiɓe, e yimɓe. ¹⁴O wi’iɓe, “On ngaddaniiyam neɗɗo o’o, on mbi’i e mo majjina yimɓe. Mi ƴamiimo yeeso mooɗon, ammaa mi yi’aayi goɗɗum ɗum nangirɗonmo. ¹⁵Non maa Hirudus, ngam o so’’oyiimo to meeɗen. Raa, o waɗaayi goɗɗum ko haani ɗum waramo. ¹⁶Ngam non, mi waɗay ɗum fiyamo, nden mi yoofamo.”

¹⁷[Too, nden maa koo ndeye hitaande Bilaatus e yoofanaɓe kaɓɓaaɗo go’oto.]

¹⁸Ammaa ɓe fuu ɓe ngaɗi ka wi’uki e sembe, “Waru neɗɗo o’o. Njoofanaamin Barabbas!” ¹⁹Barabbas boo ɗum goɗɗo mo ɗum waɗi nder suudu cural ngam e mo nder yimɓe kaɓduɓe e laamu nder gariiri, kadin ngam o warii goɗɗo.

²⁰Bilaatus fuɗɗiti metaniɓe ngam e mo yiɗi yoofuki Yeesu. ²¹Ammaa ɓe ngaɗi ka wi’uki e sembe, “Warumo! Warumo dow gaafaangal!”

²²Bilaatus wi’iɓe tataɓum, “Ngam ɗume? Ɗume ko halli o waɗi? Mi yi’aayi ko o waɗi ko haani ɗum waramo. Ngam non, mi fiyaymo, mi yoofamo.”

²³Ammaa ɓe ngaɗi ka wi’uki e sembe, “Warumo dow gaafaangal!” Boliiɗe maɓɓe calorii Bilaatus. ²⁴Ngam non o jaɓi o waɗa ko ɓe mbi’i. ²⁵O yoofaniɓe neɗɗo mo ɓe ngiɗi o yoofanaɓe, gaɗaaɗo nder suudu cural ngam warhoore e haɓduki e laamu. Nden o waɗi Yeesu nder juuɗe maɓɓe ngam ɓe ngaɗanamo ko ɓe ngiɗi.

Yeesu Waraama Dow Gaafaangal

(Maatiyu 27.32‑44; Markus 15.21‑32; Yahaya 19.17‑27)

²⁶E ɓe ardini Yeesu, sey ɓe nangi Siiman Saayirankeejo ƴiwoyɗo nder ladde e nattoya gariiri ndin. Ɓe njowanimo gaafaangal, ɓe ngaɗi o tokkiri Yeesu gaɗa.

²⁷Yimɓe ɗuɗɓe tokkimo, hawti e woɓɓe rewɓe. Rewɓe ɓen e ndoondii juuɗe mu’’en23.27: Yahuudanko’en gabaaje maɓɓe ɓe piyata to ɓe mboyay., e ɓe mboya ngam maako. ²⁸Ammaa Yeesu yeeƴiiɓe wi’i, “Rewɓe Urucaliima, alee woyankiyam, mboyanee ko’e mooɗon e ɓiɓɓe mooɗon. ²⁹Ngam balɗe ngaroyay ɗe yimɓe mbi’ata, ‘Ɓe barkiɗinaaɓe rewɓe ɓe ndanyataa, ɓe deeɗi mu’’en meeɗaayi saawuki ɓiɗɗo, ɓe enɗi mu’’en meeɗaayi musineeki.’ ³⁰E carel ngel yimɓe mbi’ay kocceeje, ‘Njanoyee dow amin!’ Ɓe mbi’a ƴoole ‘Cuuɗeemin!’23.30: Yuuc 10.8; WY 6.16.³¹To yimɓe ngaɗii fii ɗu’um carel ngel lekki woni kecci, ko waɗata to ki yoorii?”

³²Ɗum ardini Yeesu e wuyɓe ɗiɗo, ngam ɓe mbaroyaɓe. ³³Ɓe ngari to wonde wigeere bi’eteende “Ƴiƴal Hoore.” Ɗon ɓe ɓilimo, ɓe piyanimo kuusaaje dow gaafaangal, kanko e wuyɓe ɗiɗo ɓen, go’oto e jungo maako nyaamo, go’oto e jungo maako nano. ³⁴Yeesu wi’i, “Nyaako am Mo Dow, yaafana barooɓeyam ngam ɓe andaa ko ɓe ngaɗata.”23.34: Jab 22.18.

Ammaa sooji’en Rooma ngaɗi caaca ngam ɓe cenda kolte maako. ³⁵Yimɓe ndarii e ndaara, ardiiɓe njukkitimo e mbi’a, “O hisnii woɓɓe. To kanko woni Almasiihu mo Allah suɓi, al o hisna hoore maako.”23.35: Jab 22.7.

³⁶Sooji’en maa ngaɗi ka jukkutukimo, ɓe ƴeeŋi haade maako, ɓe kokkimo ndiyam inabojam lammuɗam, ɓe mbi’imo,23.36: Jab 69.21.³⁷“To an woni Laamiiɗo Yahuudanko’en, hisnu hoore maaɗa!”

³⁸Kadimaa dow hoore gaafaangal ngal ɗum takki allowal. Ɗum windi dow maagal ko ɗum wulloriimo wi’uki, “O’o woni Laamiiɗo Yahuudanko’en.”

³⁹Go’oto nder wuyɓe ɗiɗo ɓildaaɓe e maako waɗanimo haala nawka, wi’i, “Naa’ an woni Almasiihu? Hisnu hoore maaɗa, nden kisnaamin, minon maa!”

⁴⁰Ammaa gujjo go’oto on halɓanimo, wi’i, “A hulataa Allah, an jardoowo torra go’o e maako? ⁴¹Enen en keɓii ko haani ɗum waɗana’en, ngam ko ngaɗɗen wooɗaa. Ammaa neɗɗo o’o, o waɗaayi goɗɗum ko wooɗaa.” ⁴²Nden o wi’i, “Yeesu, taa’ yejjitam carel ngel nattuɗaa laamu maaɗa.”

⁴³Yeesu wi’imo, “E mi wi’umaa goonga, hande a wonday e am nder Wuro Allah.”

Mayde Yeesu

(Maatiyu 27.45‑56; Markus 15.33‑41; Yahaya 19.28‑30)

⁴⁴E carel ngel ɗum caka nyalawma, ammaa sey nyiwre maɓɓi leydi fuu haa yaaki njamndi tati, ⁴⁵nyiwre suddi naange. Sey wudere cendunde Suudu Joomiraawo seeki ɗiɗi.23.45: Wur 26.31‑33.⁴⁶Yeesu wi’i e sembe, “Nyaako am Mo Dow, mi hokkii yonki am nder jungo maaɗa!” Nde o wi’i non, o maayi.23.46: Jab 31.5.

⁴⁷Nde mawɗo sooji’en on yi’i ko waɗi, sey o manti Allah, o wi’i, “Goonga, neɗɗo o’o o aadiliijo!”

⁴⁸Nde yimɓe fuu moɓtiiɓe ngi’a ko waɗata ngi’i non, ɓe kooti e ɓe ndoondii juuɗe.23.48: Waato e ɓe piya gabaaje maɓɓe. ⁴⁹Ammaa anduɓemo fuu e rewɓe tokkoyɓemo daga Galiili ndarii to woɗɗi e ndaara koo ɗume.23.49: Luk 8.2,3.

Yeesu Uwaama

(Maatiyu 27.57‑61; Markus 15.42‑47; Yahaya 19.38‑42)

^50-51E woodi goɗɗo bi’eteeɗo Yusufu daga gariiri Armaatiya nder leydi Yahuuda, aadiliijo. O go’oto nder Kawtal Mawɓe, ammaa o jaɓaayi ko ɓe cuɓi e ko ɓe ngaɗi. O haaɓii yi’uki garol Laamu Allah. ⁵²Kanko yahi to Bilaatus, o torii ɗum hokkamo ɓandu Yeesu. ⁵³O waɗi ɗum jippini ɓandu ndun daga dow gaafaangal, o taaririndu wudere nde ceede. Sey o fukkinoyindu nder yenaande wasaande nder hayre, ɗum meeɗaayi waɗuki goɗɗo nder mayre. ⁵⁴Ɗum Nyalnde Siryaaki23.54: Waato Jummaare., horii seɗɗa ɗum natta Nyalnde Siwtaare.

⁵⁵Rewɓe garduɓe e Yeesu daga leydi Galiili ɓe tokki Yusufu, ɓe ngi’i yenaande nden, e no ɗum fukkiniri ɓandu maako. ⁵⁶Sey ɓe co’’ii wuro, ɓe mo’’ini nebbam uroojam, ammaa ɓe ciwtii e Nyalnde Siwtaare no Attawra wi’i.23.56: Wur 20.10; TA 5.14.

Ummaaki Yeesu Daga Mayde

(Maatiyu 28.1‑10; Markus 16.1‑8; Yahaya 20.1‑10)

¹Nyalnde Alal subaka, rewɓe ɓen kocci nebbam uroojam ɗam ɓe mo’’ini ngam ɓe moytana ɓandu maako, ɓe njahi yenaande nden. ²Ɓe tawi hayre nden tallitaama daga dammugal yenaande nden. ³Ammaa nde ɓe natti, ɓe tawaayi ɓandu Yeesu. ⁴E ɓe nder wannaare24.4: Koo boo ɓillaare. dow fii ɗum, sey bo maƴƴere ɓe ngi’i worɓe ɗiɗo e ndarii haade maɓɓe. E ɓe ɓornii kolte daneeje tar. ⁵Kulol nangiɓe, sey ɓe njani ɓe kippii. Worɓe ɓen mbi’iɓe, “Ngam ɗume ɗaɓɓitoton mo yonki nder mayɓe? ⁶O walaa ɗo’o. Ɗum umminiimo daga mayde! Ciftoree ko o wi’unoo’on ko o wondunoo e mooɗon nder leydi Galiili. ⁷O wi’ii, ‘Doole Ɓii Neɗɗo hokkitiree nder juuɗe kalluɓe, o waree dow gaafaangal, nden o ummoo nder nyalnde tatawre.’ ”24.6,7: Maat 16.21; 17.22,23; 20.18,19; Mar 8.31; 9.31; 10.33,34; Luk 9.22; 18.31‑33.

⁸Sey ɓe ciftori ko o wi’unooɓe. ⁹Ɓe ngartoyi daga yenaande nden, ɓe mbi’i tokkuɓe Yeesu sappo e go’o, haa e woɓɓe, ko waɗi fuu. ¹⁰Rewɓe ɓen ngoni Maryaama ƴiwoyɗo Magadala, e Yowaana, e Maryaama maduujo Yaakubu, e woɓɓe rewɓe. ¹¹Ammaa tokkuɓe Yeesu njaɓaayi ko rewɓe ɓen mbi’iɓe, ɓe ngartiri haala kan bo taalol.

¹²Biiturus boo ummii, doggi yahi yenaande nden, yurniinde, gude ɗe ɗum taarirnoo ɓandu Yeesu tan o yi’i. O so’’ii e mo ƴama hoore maako ko waɗi.

Dow Ɗatal Imaawus

(Markus 16.12,13)

¹³E nyalnde nden tokkuɓe Yeesu ɗiɗo e njaha wongel gariyel bi’eteengel Imaawus. Hakkunde gariyel ngel e Urucaliima waɗii mil joweeɗiɗi. ¹⁴E ɓe njaha e ɓe meta hakkunde maɓɓe dow ko waɗi fuu. ¹⁵E ɓe ngewta dow fii ɗum hakkunde maɓɓe, sey Yeesu e hoore muuɗum hewtiiɓe waɗi ka yaaduki e maɓɓe. ¹⁶Ammaa Allah waɗi ɓe anditaayimo. ¹⁷Yeesu ƴamiɓe wi’i, “Dow ɗume ngewtoton nder yaadu mooɗon?”

Sey ɓe ndarii, ɓe mbonni geece. ¹⁸Go’oto maɓɓe bi’eteeɗo Kiliyoobas wi’i, “An tan woni koɗo nder Urucaliima mo andaa ko waɗi ton nder balɗe ɗe’e?”

¹⁹O wi’i, “Ɗume waɗi?”

Ɓe mbi’i, “Ko heɓi Yeesu Najarankeejo. O annabiijo gooduɗo bawɗe nder boliiɗe e kuuɗe yeeso Allah e yimɓe fuu. ²⁰Mawɓe ardiiɓe diina e ardiiɓe meeɗen ngaɗimo nder juuɗe laamu ngam ɗum waramo, nden ɓe mbarimo dow gaafaangal. ²¹Ammaa e min kamminoo kanko woni rimɗinayɗo yimɓe Israa’iila. Ko ɓuri non maa, hande woni nyalnde tatawre ko ɗu’um fii fuu waɗi. ²²Kadimaa woɓɓe rewɓe nder amin kayɗiniimin. Ɓe njahi to yenaande nden hande subaka, ²³ammaa ɓe tawaayi ɓandu maako. Sey ɓe ngarti ɓe mbi’imin ɓe ngi’ii malaa’ika’en wi’uɓe Yeesu e woodi yonki. ²⁴Woɓɓe ɓe min ngondi njahi to yenaande nden, ɓe tawinde no rewɓe ɓen mbi’i, ammaa kanko ɓe ngi’aayimo.”

²⁵Yeesu wi’iɓe, “On ngalaa faamu, ɓerɗe mooɗon e neeɓa njaɓaayi koo ɗume ko annabo’en mbi’unoo! ²⁶On andaa doole Almasiihu yara torra nihi nden natta teddungal muuɗum?” ²⁷Nden o famtiniɓe ko Deftere wi’i waɗay dow maako, daga Attawra yaaki Defte Annabo’en fuu.

²⁸Nde ɓe ɓadii gariyel ngel ɓe njahata, sey Yeesu waɗi bo ƴaɓɓoto. ²⁹Ammaa ɓe toriimo ɓe mbi’i, “Yaalu mbaalaa to amin, ngam naange hiirii, jemma waɗii.” Sey o yaali ngam o waala.

³⁰Carel ko ɓe nyaamata nyamndu, o hocci buroodi, o yetti Allah, o sendiɗum, o hokkiɓe. ³¹Sey Allah maɓɓiti gite maɓɓe, ɓe anditimo. Ɗon e ɗon o majjiti yeeso maɓɓe. ³²Sey ɓe mbi’i hakkunde maɓɓe, “En nanii belɗum nder ɓerɗe meeɗen ko o metanaynoo’en dow ɗatal e mo famtina’en Deftere Ceniinde.”

³³Ɓe ummii ɗon e ɗon ɓe co’’ii Urucaliima. Ɓe tawi tokkuɓe Yeesu sappo e go’o e wonduɓe e maɓɓe e kawriti. ³⁴Hawrutuɓe ɓen mbi’i ɗiɗo ɓen, “Goonga, Moodibbo ummake. O wanganii Siiman!”

³⁵Sey ɗiɗo ɓen maa mbi’iɓe ko waɗi dow ɗatal e no ɓe anditirimo nde o sendi buroodi.

Yeesu Wanganii Tokkuɓemo

(Maatiyu 28.16‑20; Markus 16.14‑18; Yahaya 20.19‑23; Kuuɗe Lilaaɓe 1.6‑8)

³⁶E ɓe nder metuki haala kan, sey ɗon e ɗon Yeesu e hoore muuɗum wangi darii caka maɓɓe. O wi’iɓe, “E mi silminoo. Jam wonda e mooɗon.”

³⁷Ɓerɗe maɓɓe taƴi, ɓe kammii ginnol ɓe ngi’i. ³⁸Ammaa o wi’iɓe, “Ɗume wanni’on? Ngam ɗume ngaɗoton seko nder ɓerɗe mooɗon? ³⁹Ndaaree juuɗe am e koyɗe am, ɗum min e hoore am. Meemeeyam nanon, ay ginnol walaa ɓandu e ƴi’e no ngiiruɗonyam.”

⁴⁰Nde o wi’i non, o holliɓe juuɗe maako e koyɗe maako. ⁴¹Ɓe njaɓaayi ɗum goonga ngam belɗum e hayɗinki. Sey o wi’iɓe, “On ngoodi goɗɗum ko nyaametee ɗo’o?” ⁴²Sey ɓe kokkimo tayre lingu njuɗaangu, ⁴³o hoccingu o nyaami yeeso maɓɓe.

⁴⁴Nden o wi’iɓe, “Ɗu’um woni ko mbiinoomi’on carel ko ngondunoomi e mooɗon: Koo ɗume ko windaa nder Attawra, e Defte Annabo’en, e Jabuura dow am doole ɗum heewa.”

⁴⁵Nden o maɓɓiti faamu maɓɓe ngam ɓe paama Deftere Ceniinde. ⁴⁶O wi’iɓe, “Aayaare wi’ii: Almasiihu torroto, gaɗa balɗe tati o ummoto daga mayde. ⁴⁷Nder inde maako ɗum wa’ajinay tuubuki e yaafaneeki hakke yaaki nder lenyi fuu. Ɗum fuɗɗay daga Urucaliima. ⁴⁸Onon ngoni andinayɓe woɓɓe fii ɗu’um. ⁴⁹Raɗɗum, mi lildoyay’on Ruuhu Allah no Nyaako am waɗi alkawal. Njooɗee nder Urucaliima naa Ruuhu Allah jippoyake dow mooɗon hokkii’on bawɗe.”24.49: KL 1.4.

Yeesu Hoccaama Yaaki Dow

(Markus 16.19,20; Kuuɗe Lilaaɓe 1.9‑11)

⁵⁰Yeesu ardiiɓe ɓe mburtii nder Urucaliima yaaki wonde wigeere haade gariiri Betani, o ƴefti juuɗe maako o barkiɗiniɓe. ⁵¹E mo nder barkiɗinkiɓe, sey o hoccaa yaaki dow.24.50,51: KL 1.9‑11.⁵²Ɓe mawninimo, ɓe co’’ii Urucaliima e ɓe nana belɗum ɗuɗɗum. ⁵³Koo ndeye nyalnde e ɓe njaha Wuro Ceniingo e ɓe manta Allah.