Yaakubu

Ɗerewol

Yaakubu

Habaru dow ɗerewol ngo’ol

Yaakubu windi ɗerewol ngo’ol. E ɗum kammoo o windiingol hakkunde 45‑50 A.D., waato duuɓi 45‑50 gaɗa danyngol Yeesu. Nder Alkawal Kesal e woodi Yaakubu’en haa nayo, ammaa o’o Yaakubu kanko woni minyiraawo Yeesu (Maatiyu 13:35; Markus 6.3). O’o Yaakubu naa’ kanko woni Yaakubu ɓii Jabadi go’oto nder tokkuɓe Yeesu sappo e ɗiɗo mo Hirudus laamiiɗo wari. O’o Yaakubu kanko woni ardiiɗo kawtal tokkuɓe Yeesu wonɓe Urucaliima. Nder ɗerewol ngo’ol o hollii no haani tokkuɓe Yeesu njooɗoroo. Ɗonmaa o hollii no hoolaare yaadirta e kuuɗe, e no hoolaare nde goonga waddirta kuuɗe boɗɗe e ngikku boɗɗum. O haɓanii holluki feerootirol hakkunde yimɓe. O metii dow no ɗemngal wonnirta. O wi’ii waaduki higaaku e duuniyaaru ɗum wanyuki Joomiraawo. E timmoode o metii dow sembiɗinki tokkuɓe Yeesu ɓe ngaɗa ka waɗuki do’aare e ɓe munya nder koo ɗume.

Ko Woni Nder:

Kownol Yaakubu (1.1)

Hoolaare e faamu (1.2‑8)

Risku e ciya (1.9‑11)

Foondeeki e torraaji (1.12‑18)

Nanki Wolde Joomiraawo e tokkukinde (1.19‑27)

Wagginki dow holluki feerootirol (2.1‑13)

Hoolaare e kuuɗe (2.14‑26)

Wonnere nde ɗemngal waɗata (3.1‑18)

Waaduki higaaku e duuniyaaru (4.1—5.6)

Munyal e do’aare (5.7‑20)

¹Min, Yaakubu, windi ɗerewol ngo’ol. Mi maccuɗo Allah e Joomiraawo meeɗen Yeesu Almasiihu. E mi howna’on, onon tokkuɓe Yeesu cankitiiɓe nder duuniyaaru.

Hoolaare e Faamu

²Bandiraaɓe am, to torraaji feere‑feere ngaranii’on, njaɓeeɗi e welwelo, ³ngam on andi to hoolaare mooɗon foondaama, nde waɗay ɓeydon munyal. ⁴Doole ekkitooɗon munyal nder koo ɗume, ngam ngarton keewuɓe, ɓe ndullaayi goɗɗum. ⁵To goɗɗo nder mooɗon dullii faamu, sey o toroo Allah kokkoowo koo moye ɓernde go’o metitataako, o hokkaymo. ⁶Ammaa to o toroto Allah, o toroo nder hoolaare. To’ o waɗa ɓerɗe ɗiɗi, ngam gaɗoowo ɓerɗe ɗiɗi e nandi e geelooɗi1.6: Waato ƴuuge. ndiyam ɗi hendu yiilata to ndu yiɗiri fuu. ⁷Iri maako to’ o kammoo o heɓay goɗɗum to Joomiraawo. ⁸Ɓernde maako sendake ɗiɗi, o darnataa ɓernde maako nder ko o waɗata fuu.

Risku e Ciya

⁹Tokkuɗo Yeesu mo walanaa nana belɗum, ngam yeeso Allah o mawɗo. ¹⁰Ammaa tokkuɗo Yeesu diskuɗo nana belɗum to Allah lestinii hoore maako. Ngam diskuɗo e nandi e piindi geene ndi neeɓataa. ¹¹To naange wurtoyake gulɗum magge fiyii geene ɗen, ɗe ɗaylay, piindi maaje saama, wooɗuki maaje fuu lalla. Non diskuɗo re’irta carel ngel fiidata e kuugal muuɗum.

Foondeeki e Torraaji

¹²O barkiɗinaaɗo fuu munyuɗo nder torra, ngam to o heɓii jaalorgal dow torra kan, Allah hokkaymo giifol ngol o waɗani yiɗuɓemo alkawal, waato yonki ki re’ataa. ¹³To neɗɗo foondaama, to’ o wi’a, “Allah foondiyam.” Ngam Allah foondirtaake halleende, kadimaa boo Allah foondataa koo moye. ¹⁴Ammaa e ɗum foonda neɗɗo to suuno maako hoccii hakkiilo maako. ¹⁵Nden to suuno ngon waɗii reedu, ngo rimay hakke. To hakke mawnii boo, ɗum fooɗay mayde.

¹⁶Bandiraaɓe am ɓe ngiɗumi, to’ on njaɓu ɗum majjina’on. ¹⁷Koo ngale dokkal bongal e koo ɗume caahu jamum fuu daga to Allah Nyaako Mo Dow ɗum ƴiwoyta, taguɗo naange e lewru e koode. Kanko o waylitataako, o nandaa e ɗowdi goosotoondi. ¹⁸Ɗum cuɓol maako o hokki’en yonki kesum barka wolde goonga, ngam ngarten bo ko arti ɓenduki nder ko o tagi.1.18: Waato yimɓe ɓe o ɓuri yiɗuki nder koo ɗume ko o tagi.

Nanuki Wolde Allah e Tokkukinde

¹⁹Onon bandiraaɓe am ɓe ngiɗumi, andee ɗu’um: koo moye yaawa nanuki, ammaa to’ yaawa metuki, to’ yaawa monnuki. ²⁰Ngam monnere neɗɗo waddataa jonde aadilaaku nde Allah yiɗi. ²¹Ngam maajum, kubinee fuu kuuɗe ɗe mbooɗaa e kuuɗe kalluɗe. Lestinee ko’e mooɗon, njaɓon Wolde Allah nde o aawi nder ɓerɗe mooɗon, baawaynde hisnuki’on.

²²To’ on majjin ko’e mooɗon. Ngaɗee ko Wolde Allah wi’i, to’ on ngartu nanooɓende tan. ²³Ngam fuu nanɗo Wolde Allah waɗaayi ko nde wi’i e nandi e neɗɗo daaruɗo yeeso muuɗum nder daaroggal, ²⁴yi’i no wa’i, dilli, ɗon e ɗon yejjiti no wa’i. ²⁵Ammaa gaɗɗo hakkiilo muuɗum fuu dow dooka kewɗum rimɗinayɗum yimɓe, e mo waɗi ka waɗuki hakkiilo dow maajum, naa’ nanoowoɗum tan e yejjita, ammaa e mo waɗa ko ɗum wi’i, o heɓay barka nder waɗukiɗum.

²⁶Neɗɗo fuu kammiiɗo o tokkuɗo diina no haani, ammaa o suraayi ɗemngal maako, o majjinii hoore maako, diina maako wartii meere. ²⁷Diina laaɓuka ka Allah Nyaako meeɗen Mo Dow yiɗi, kanka woni walluki maraaya’en e rewɓe ɓe worɓe mu’’en maayi torrotooɓe, nden e suruki hoore daga hoccuki tuundi duuniyaaru.

Wagginki Dow Holluki Feerootirol

¹Bandiraaɓe am, nde on koolii Joomiraawo meeɗen Yeesu Almasiihu, Joomu Mangu, to’ on kollu feerootirol hakkunde mooɗon. ²Misaalu, goɗɗo gooduɗo jabbaare2.2: Waato zobe (H). jiinaari warii kawtal mooɗon e mo ɓornii kolte ɗe ceede, nden goɗɗo mo walanaa mo kolte ceekuɗe kanum maa warii nder kawtal ngal. ³To on kokkii on ɗon gooduɗo risku mangu on mbi’iimo, “Raa jooɗorgal bongal, jooɗa,” mo walanaa on boo mbiiɗonmo, “Dara ɗaa’e,” koo boo, “Jooɗa e leydi,” ⁴on kollii feerootirol hakkunde mooɗon won ɗon, on cuɓana ko’e mooɗon ko ngaɗoton nder nyumo kallungo. ⁵Bandiraaɓe am ɓe ngiɗumi, nanee ko mbi’aymi. Naa’ Allah suɓii ɓe ngalanaa nder duuniyaaru ndu’u ɓe ngarta kooliiɓe Yeesu ɓe ndona barka gonɗum nder laamu Allah ɗum o waɗani yiɗuɓemo alkawal? ⁶Ammaa on ngartira ɓe ngalanaa naa’ ɗum goɗɗum. Naa’ gooduɓe risku torrata’on? Naa’ ɗum kamɓe njaarata’on yeeso laamu? ⁷Naa’ ɗum kamɓe kuɗata inde nden ɗon mawnde nde Joomiraawo mooɗon?

⁸On ngaɗii ko wooɗi to on tokkii dooka ɗum Laamu Allah bindaaɗum nder aayaare biinde, “Yiɗu bandiraawo maaɗa no ngiɗirɗaa hoore maaɗa.” ⁹Ammaa to on kolla feerootirol hakkunde mooɗon, on ngaɗii hakke. Kiita nangii’on, ngam on gewooɓe dooka. ¹⁰Ngam fuu tokkuɗo dookaaji ɗi fuu, ammaa o yewi go’o, too, o yewiiɗi ɗi fuu. ¹¹Ngam on ɗon biiɗo, “Taa’ waɗu njeenu,” kanko wi’i, “Taa’ waɗu warhoore.” Taa waɗaayi njeenu, ammaa a waɗii warhoore, too, a wartii gewoowo dooka Allah won ɗon. ¹²Alee meto mooɗon e kuuɗe mooɗon warta bo ɗum yimɓe ɓe ɗum waɗanta kiita dow dooka rimɗinoojum. ¹³Ngam e nyalnde kiita, Allah yurminantaa mo walaa yurmeende. Ammaa yurmeende e heɓa jaalorgal dow kiita.

Hoolaare e Kuuɗe

¹⁴Onon bandiraaɓe am, ko ɗum nafi to neɗɗo wi’ii e hoolii Yeesu, ammaa kuuɗe maako kollaayi hoolaare nden? Nden ɗon hoolaare maako nde waaway hisnukimo? ¹⁵Misaalu, to goɗɗo tokkuɗo Yeesu gorko koo debbo mo walaa ko ɓornotoo koo ko nyaamata, ¹⁶goɗɗo mooɗon wi’iimo, “Jippa jam! Allah hokkumaa ko ɓornotoɗaa e ko nyaamataa,” ammaa o hokkaayimo kolte koo nyamndu, ɗume ɗum nafi? ¹⁷Non maa hoolaare, to nde walaa kuuɗe kollayɗende, nde wartii waatunde.

¹⁸Ammaa goɗɗo wi’ay, “An a woodi hoolaare, min e mi woodi kuuɗe.” Too, hollam hoolaare maaɗa nde walaa kuuɗe. Min boo, mi hollete hoolaare am nder kuuɗe am. ¹⁹A jaɓii Allah o go’oto. Too, boɗɗum! Koo ginni maa njaɓii non. Kanjum waɗi e ɗi ndiwna ngam kulol. ²⁰An kaaŋaaɗo! A yiɗi ɗum hollumaa hoolaare nde walaa kuuɗe nde meere? ²¹Naa’ maama meeɗen Ibraahim noddiraama aadiliijo ngam ko o waɗi nde o hokki Allah ɓiɗɗo maako Iciyaaku dow sakkirde?2.21: Fuɗ 22.1‑14. ²²Too, a yi’ii hoolaare maako e yaada e kuuɗe maako. Nden hoolaare maako wartii kewnde ngam ko o waɗi. ²³Ɗum hebbinii aayaare2.23: Fuɗ 15.6. biinde, “Ibraahim hoolake Allah, ngam maajum Allah wi’i o aadiliijo.” Ɗonmaa ɗum noddimo higo Allah. ²⁴Too, on ngi’ii Allah e jaɓa neɗɗo o aadiliijo ngam ko o waɗi, naa’ ngam hoolaare tan.

²⁵Non maa, kaaruwaajo on ɗon bi’eteeɗo Rahab, o noddiraama aadiliijo ngam ko o waɗi nde o jaɓɓii ɓe ɗum liloyi ngam ndaara sirru leydi ndin. O walliɓe ɓe ndaɗiri wongol laawol feere.

²⁶Too, non no ɓandu ndu walaa foofaango wartii mayndu, non maa hoolaare nde walaa kuuɗe wartii baatunde.

Wonnere Nde Ɗemngal Waɗata

¹Onon bandiraaɓe am, to’ ɗuɗɓe mooɗon ngarta ekkitinooɓe, ngam on andi minon ekkitinooɓe ɗum ɓuray waɗankimin kiita kalluka. ²Ngam en fuu en parka naa’ seɗɗa. To boo goɗɗo farkataa nder koo ɗume ko o wi’ata, too, kanko o kewɗo, e mo waawa o sura hoore maako.

³Raa misaalu. To en ngaɗanii puccu njamndi gaɗeteendi e honduko maagu ngam ngu waɗa ko ngiɗɗen, en mbaaway ngaylitenngu fuu to ngiɗɗen. ⁴Ndaaree komiije ndiyam maa ngi’on. Koo nde ɗe mawɗe, hendu cembindu fooɗataɗe, e jamngel pamarel pooɗoowo komiwal ngal fooɗirtangal faada e maagal fuu to yiɗi. ⁵Non maa, ɗemngal ɗum goɗɗum pamarum nder ɓandu, ammaa e ngal mantitoo dow fii mawɗum. Ndaaree ngi’on no doccel hiite wulirta ladde mawnde. ⁶Ɗemngal ɗum hiite, e ngal heewi halleende, e ngal wonna koo ɗume neɗɗo. E ngal nanginana fuu jonde neɗɗo hiite ƴiwoynge daga wuro hiite3.6: Waato jahannama..

⁷Neɗɗo e waawa elta koo iri ndiye mardi, e colli, e marle dasotooɗe, e koo ɗume gonɗum nder ndiyam. Yimɓe njaadake eltiiɗe. ⁸Ammaa walaa baawayɗo eltuki koo suruki ɗemngal. Ɗemngal ɗum fii kalluɗum, e ngal heewi tooke barooje. ⁹E maagal mantirten Joomiraawo Nyaako meeɗen Mo Dow, nden e maagal kuɗirten yimɓe ɓe ɗum tagi nder nandi Allah. ¹⁰Mantuki e huɗuki e wurtoyoo daga honduko go’o. Onon bandiraaɓe am, non haanaa. ¹¹Ndiyam mbelɗam e ndiyam kaɗɗam waaway ɓula wigeere go’o? ¹²Bandiraaɓe am, ibbi waaway rima ɓikkoy jaytun? Koo inabohi waaway rima ɓikkoy ibbe? Non maa ɗum waɗataako wigeere to ndiyam gooduɗam lamɗam ɓulata wurtina ndiyam mbelɗam.

Andal Ƴiwoyngal Daga Dow

¹³Moye woodi andal e faamu nder mooɗon? Sey o hollaɗum nder waɗuki jonde wooɗunde e kuuɗe boɗɗe nder lesnuki hoore e faamu. ¹⁴Ammaa to on ngoodi lawliiru kallundu e yidde hoore nder ɓerɗe mooɗon, to’ on mantito dow maajum koo nganyon goonga. ¹⁵Iri nga’al andal naa’ daga dow ngal ƴiwoyi, ɗum ngal duuniyaaru. Nden naa’ daga to Ruuhu Allah ngal ƴiwoyi, to Ceyɗan ngal ƴiwoyi. ¹⁶Ngam fuu to lawliiru e yidde hoore woni, ɗon ciya jonde jam e koo iri ndeye halleende waɗetee. ¹⁷Ammaa andal ƴiwoyngal daga dow, arande ngal lamngal, nden ngal waddataa wannaare, e ngal wadda hakkiilo, ngal walaa mangu hoore, e ngal heewi yurmeende e kuuɗe boɗɗe. Ngal hollataa feerootirol, ngal walaa ciya goonga. ¹⁸Gaddooɓe jonde jam aawuɓe jam, ɓe pe’’ay aadilaaku.

Waaduki Higaaku e Duuniyaaru

¹Ko waddata hawre e yeddootirki hakkunde mooɗon? Naa’ suunooji konidooji e ɓerɗe mooɗon waddataɗum? ²On ngiɗii goɗɗum, on keɓataaɗum, ngam non on ngaɗa warhoore. On ngoodi suuno fii ɗum on jeyaayi, ammaa on keɓataaɗum. Kanjum waɗi on kaɓa on ngeddootira. On ngalanaa ngam on toraaki Allah. ³On toroo on keɓataa ngam on tororoo nyumooji kalluɗi, on ngiɗi majjinon ko keɓɗon dow nanki belɗum ɓalli mooɗon. ⁴On nyaamooɓe amaana! On andaa waaduki higaaku e duuniyaaru ɗum wanyuki Allah? Ngam non, fuu cuɓuɗo waada higaaku e duuniyaaru, o wartirii hoore maako ganyo Allah. ⁵Koo on kammii e meere aayaare wi’i, “Allah e woodi lawliiru dow yonki ki o waɗi nder meeɗen?” ⁶Ammaa Allah e ɓeyda walluki’en. Kanjum waɗi aayaare wi’i, “Allah wanyii gooduɓe mangu hoore, ammaa e mo walla lesnuɓe ko’e.” ⁷Ngam non, lesnee ko’e mooɗon ngaɗon ko Allah wi’i. Nganyee kuuɗe Ceyɗan, kanko boo o doggay’on. ⁸Ɓaddoyee haade Allah, kanko maa o ɓaddoto haade mooɗon. Onon gaɗooɓe hakke, mo’’inee jonde mooɗon. Laaɓinee ɓerɗe mooɗon, onon gooduɓe ɓerɗe ɗiɗi. ⁹Ngannee, ngullee, mboyee. Ngaylitee jaleeɗe mooɗon ngarta bojji, nanuki belɗum mooɗon warta ciya nanki belɗum. ¹⁰Lestinee ko’e mooɗon yeeso Joomiraawo, kanko boo o mawninay’on.

Yowanki Goɗɗo Ko Wooɗaa

¹¹Bandiraaɓe, to’ on metindir haalaaji kalluɗi. Ngam fuu metuɗo haala kalluka dow bandiraawo muuɗum, koo yowanimo ko wooɗaa, metii haala kalluka dow dooka Allah won ɗon, yowaniiɗum ko wooɗaa. Ammaa taa yowanii dooka Allah ko wooɗaa, a wartii mo tokkataaka jowanoowoka ko wooɗaa. ¹²Allah tan woni kokkoowo dooka e gaɗoowo kiita. Kanko tan woni baawayɗo hisnuki e halkuki. Ammaa an a moye nde njowantaa bandiraawo maaɗa ko wooɗaa?

Mantoraaki Jaango

¹³Naneeyam onon wi’ooɓe, “Hande koo jaango min njahay ndi’i gariiri koo ndin ton, min ngaɗa ndungu go’o ton min ngaɗa luumo min keɓa ceede.” ¹⁴Raa boo on andaa ko wangata jaango. No yonki mooɗon wa’i? Yonki mooɗon e nandi e curka wangooha ngam carel seɗɗa, gaɗa ɗon ka majjita. ¹⁵Sey ni mbi’on, “To Joomiraawo jaɓii yaarii yonki, min ngaɗay ɗu’um e ɗum ɗaa’e.” ¹⁶Ammaa raɗɗum jooni nder mawninki ko’e mooɗon on mantitoo. Fuu iri kin ɗon mantitaaki ki kalluki. ¹⁷Ngam non fuu anduɗo ko haani waɗa, ammaa o waɗaayiɗum, o waɗii hakke.

Wagginki Gooduɓe Risku

¹Jooni boo, onon riskuɓe, nanee ko mbi’aymi! Mboyee, ngullee ngam bone kalluɗum garowayɗum dow mooɗon. ²Risku mooɗon nyolii, mooƴi nyaamii kolte mooɗon. ³Jiinaari mooɗon e ajurfaari mooɗon fuunii, fuunuki mayri boo wartay ceyda dow mooɗon ɗum nyaamay ɓalli mooɗon bo hiite. On moɓtanii ko’e mooɗon jawdi nder balɗe ɗe’e ɗe re’uki duuniyaaru. ⁴Raɗɗum! Njoɓaari ndi nganyuɗon yoɓuki kuwanooɓe’on to gese ndi wulloyake’on. Bojji ittanooɓe’on ko ɓendi to gese njaarii to Joomiraawo Joomu Bawɗe. ⁵On ngaɗii jonde nanki belɗum e duuniyaaru, on nyaama, on njara, on ngaɗa no ngiɗɗon. On paynii ko’e mooɗon ngam nyalnde hirsuki. ⁶On taƴanii aadili’en kiita kalluka, on mbariiɓe, kamɓe boo ɓe ngeddaayi’on.

Munyal e Do’aare

⁷Ngam non, bandiraaɓe am, ngaɗee munyal haa yaaki nyalnde nde Joomiraawo wartata. Ndaaree no demoowo munyirta ngam ndiyam seeto e ɗam ƴaawol ɓendina fii boɗɗum ɗum o remi. ⁸Onon maa, munyee. Cembiɗinee ɓerɗe mooɗon, ngam wartoyki Joomiraawo ɓadake. ⁹Bandiraaɓe am, to’ on metindir metemeteeji ngam to ɗum waɗana’on kiita. Raɗɗum, Gaɗoowo Kiita e darii to dammugal! ¹⁰Bandiraaɓe am, ciftoree annabo’en metuɓe nder inde Joomiraawo, no ɓe munyiri nder torraaji. Tokkee ko ɓe ngaɗi. ¹¹On andi, en noddira munyuɓe barkiɗinaaɓe. On nanii no Ayuuba munyiri, nden on andi no Joomiraawo barkiɗinirimo daga gaɗa. Joomiraawo o kewɗo yurmeende e yidde.

¹²Bandiraaɓe am, ko ɓuri koo ɗume woni to’ on kunoro dow, koo ley, koo e koo iri ɗume fii. To on ƴamaama, to ɗum non, mbi’on “Ee” tan. To naa’ ɗum non, mbi’on “Aa’a” tan. Ngaɗee non ngam to ɗum taƴana’on kiita kalluka.

¹³E woodi jaroowo torra nder mooɗon? Too, o waɗa do’aare. E woodi nanoowo belɗum nder ɓernde muuɗum? Too, o yima gimi mantuki Allah. ¹⁴E woodi goɗɗo mo yamɗaa nder mooɗon? Too, o nodda mawɓe nder kawtal tokkuɓe Yeesu, ɓe ngaɗanamo do’aare, ɓe ngaɗanamo nebbam dow hoore nder inde Joomiraawo. ¹⁵Ngam do’aare gaɗaande nder hoolaare nde yamɗitinay mo yamɗaa. Joomiraawo yamɗitinaymo. To o waɗii hakke, ɗum yaafantomo. ¹⁶Ngam non, mbi’indiree hakke ɗum ngaɗɗon, nden ngaɗindiree do’aare ngam ɗum yamɗitina’on. Do’aare aadiliijo e nde woodi bawɗe e nde huwa. ¹⁷Iliya o neɗɗo bo meeɗen. O waɗi do’aare naa’ seɗɗa ngam to’ ndiyam toɓa to leydi ndin, sey nde ɗum waɗi duuɓi tati e lebbi joweego’o ɗam toɓaayi. ¹⁸Nden o fuɗɗiti o waɗi do’aare, sey dow yoofi ndiyam, leydi boo wurtini koo ɗume ko fuɗata.

¹⁹Onon bandiraaɓe am, to goɗɗo mooɗon selii laawol goonga, nden goɗɗo wartiroyiimo dow laawol, ²⁰andee ɗu’um: koo moye so’’i gaɗoowo hakke daga tokkuki laawol ngol wooɗaa, o hisnay yonki gaɗoowo hakke on daga mayde, nden o wadday laawol yaafaaki hakke ɗuɗɗum.