Galaatiyanko’en

Ɗerewol ngol Bulus windani

Galaatiyanko’en

Habaru dow ɗerewol ngo’ol

Bulus windii ɗerewol ngo’ol ngam caɗɗum ummake carel ngel yimɓe naa’ Yahuudanko’en wonɓe leydi Galaatiya puɗɗii tokkuki Yeesu. Woɓɓe Yahuudanko’en mbi’i doole naa neɗɗo tokkii Attawra ko warta tokkuɗo Yeesu mo goonga. Bulus wi’i ɗu’um naa’ ɗum non. O wi’i ko haani tokkuɗo Yeesu waɗa nder jonde muuɗum woni hoolaaki Yeesu, ngam barka hoolaaki Yeesu yimɓe ciryootiri e Allah. Ammaa nder kawte tokkuɓe Yeesu wonɓe Galaatiya woɓɓe yimɓe nganyi ekkitinol Bulus, e ɓe mbi’a doole neɗɗo tokka Attawra ko ciryootira e Allah.

Ɗerewol ngo’ol windaa ngam woɓɓe nder maɓɓe majjiniraama ekkitinol fewre ngo’ol. Arande Bulus wi’i Allah suɓimo, naa’ yimɓe suɓimo. Allah suɓumo ngam o warta lilaaɗo Yeesu Almasiihu o holla yimɓe naa’ Yahuudanko’en laawol kisndam. Kadin Bulus tabbitinii wiiki barka hoolaaki Yeesu tan neɗɗo wartata aadiliijo yeeso Allah. Nder suuraaji cakitiiɗi Bulus hollii wiiki ngikku tokkuɓe Yeesu ƴiwoyii daga yidde nde Allah hokkiɓe barka hoolaaki Yeesu.

Ko Woni Nder:

Kownol Bulus (1.1‑10)

Bulus e woodi laamu ɗum lilaaɗo (1.11—2.21)

Habaru Belɗum ɗum yidde Allah (3.1—4.31)

Rimɗinki ki tokkuɓe Yeesu keɓi e ko ɓe ngaɗata (5.1—6.10)

Wagginki e kownol cakitiingol (6.11‑18)

¹Min Bulus lilaaɗo windi ɗerewol ngo’ol. Naa’ yimɓe cuɓiyam, naa’ neɗɗo wartiriyam lilaaɗo. Yeesu Almasiihu e Allah Nyaako Mo Dow, umminɗo Yeesu daga mayde wartiriyam lilaaɗo. ²Min e fuu bandiraaɓe gonduɓe e am ɗo’o e min kowna tokkuɓe Yeesu wonɓe Galaatiya.

³Allah Nyaako Mo Dow e Yeesu Almasiihu Joomiraawo barkiɗina’on hokka’on jam.

⁴Yeesu hokkii hoore muuɗum ngam hakke meeɗen ngam o hisna’en daga jaamanu kalluɗum ɗu’um. Non ɗum cuɓol Allah Nyaako meeɗen Mo Dow. ⁵Teddungal tabbita to Allah haa abadaa abadin. Aamin.

Walaa Goɗɗum Habaru Belɗum Feere

⁶Mi hayɗinii nde njaawuɗon waylitanki Allah ɓaawo, kanko nodduɗo’on barka yidde Almasiihu mawnde co’’aniiɗon wongol ekkitinol on nyuma ɗum Habaru Belɗum. ⁷Goonga, walaa goɗɗum Habaru Belɗum feere, ammaa e woodi woɓɓe yimɓe gannooɓe’on. E ɓe ngiɗi waylutuki Habaru Belɗum ɗum Almasiihu. ⁸Ammaa koo minon, koo malaa’ikaajo ƴiwoyɗo daga dow wa’ajinani’on wa’ajinki feerootirki e Habaru Belɗum ɗum min nga’ajinani’on, Allah halkamo nder hiite. ⁹Non no min mbi’unoo ndenno, jooni e mi fuɗɗita wiiki: To goɗɗo wa’ajinanii’on wa’ajinki feerootirki e Habaru Belɗum ɗum njaɓuɗon arande, Allah halkamo nder hiite.

¹⁰Too, jooni yidde yimɓe ɗaɓɓitaymi, koo yidde Allah? Koo boo e mi ɗaɓɓita welnanki yimɓe ɓerɗe? Naa’ non! Daa haa jooni yimɓe ɗaɓɓitaymi welnanki ɓerɗe, daa mi wartaayi maccuɗo Almasiihu.

No Bulus Wartiri Lilaaɗo

¹¹Bandiraaɓe am, e mi yiɗi andon, Habaru Belɗum ɗum nga’ajinmi, naa’ to neɗɗo ɗum ƴiwoyi. ¹²Naa’ to neɗɗo keɓumiɗum, non maa walaa ekkitinɗoyamɗum, ammaa Yeesu Almasiihu wanginaniyamɗum.

¹³On nanii no njooɗoriimi ndenno nder diina Yahuudanko’en, no torrirmi yimɓe Allah tokkuɓe Yeesu, yurmeende walaa, mi waɗii ko mbaawaymi waɗuki ngam mi halkaɓe.1.13: KL 8.3; 22.4,5; 26.9‑11.¹⁴Mi luggii nder diina Yahuudanko’en haa mi ɓurii ɗuɗɓe nder Yahuudanko’en walde’en am, e mi woodi yidde tokkuki ndonuuji maama’en am naa’ seɗɗa.1.14: KL 22.3.

¹⁵Ammaa Allah, cuɓuɗoyam ko mi danyee, noddiyam barka yidde maako, o suɓi ¹⁶wanginankiyam Ɓiɗɗo maako, ngam mi wa’ajinamo nder yimɓe naa’ Yahuudanko’en. Nde non waɗi, mi yahaayi to goɗɗo ngam hokkayam caawori,1.15,16: KL 9.3‑6; 22.6‑10; 26.13‑18.¹⁷non maa mi yahaayi Urucaliima ngam mi yi’a ɓen ɗon artuɓeyam wartuki lilaaɓe. Ammaa ɗon e ɗon njaami leydi Laarabanko’en1.17: Waato Araabiya., nden co’’iimi Dimasku. ¹⁸Gaɗa duuɓi tati mi yahii Urucaliima ngam mi medda e Biiturus1.18: Koo boo: “Keefas.”, nden njooɗodiimi e maako balɗe sappo e jowi.1.18: KL 9.26‑30.¹⁹Ammaa mi yi’aayi goɗɗo nder lilaaɓe sey ni Yaakubu, minyiraawo Yeesu.

²⁰Ko mbindanmi’on ɗum goonga. Allah e andi naa’ mi feway.

²¹Gaɗa ɗon mi yahii leydi Siiriya e leydi Kiliikiya. ²²E ngel ton carel, kawte tokkuɓe Yeesu wonɓe leydi Yahuudiya meeɗaayi yiikiyam. ²³Ko ɓe nani tan woni, “Neɗɗo torraynooɗo’en, jooni e mo wa’ajina tokkuki Yeesu ki o yiɗunoo o lallina!” ²⁴Ɓe manti Allah ngam ko o waɗaniyam.

Bulus e Lilaaɓe Koriiɓe

¹Gaɗa duuɓi sappo e nayi mi fuɗɗiti mi yahii Urucaliima hawti e Barnaba, min njaadi e Tiitus.2.1: KL 11.30; 15.2.²Mi yahu Urucaliima ngam Allah holliiyam mi yaha. Nde njaami mi hawrii e ardiiɓe tokkuɓe Yeesu tan, mi holliiɓe Habaru Belɗum ɗum nga’ajinanmi yimɓe naa’ Yahuudanko’en. Mi waɗu non ngam mi yiɗaa kuugal ngal kuwumi ndenno e ngal kuwaymi jooni warta meere. ³Koo Tiitus mo njaadaymi, koo nde naa’ o Yahuudankeejo, ɗum waɗaayimo doole o naadee, ⁴koo nde woɓɓe e ngiɗunoo o naadee. Ɓe ngaɗii bo ɓe tokkuɓe Yeesu, ɓe natti nder kawtal meeɗen, e ɓe ndaara iri rimɗinki ki ngooduɗen nder sumpootirki e Yeesu Almasiihu, ngam ɓe ngartira’en maccuɓe. ⁵Ammaa ngam ɗum surana’on goonga Habaru Belɗum, min njaɓaayi ko ɓe mbi’i koo seɗɗa.

⁶Ammaa ɓen ɗon ardiiɓe ɓe ɓeydaayi goɗɗum dow ekkitinol am. Koo kamɓe ɓe ɓeye walaa feerootirol to am, ngam Allah hollataa feerootirol.2.6: TA 10.17.⁷Ammaa ɓe ngi’i Allah hokkiiyam kuugal wa’ajinanki yimɓe naa’ Yahuudanko’en Habaru Belɗum, non no o hokkiri Biiturus kuugal wa’ajinanki Yahuudanko’en Habaru Belɗum. ⁸Ngam no Allah wartiri Biiturus lilaaɗo to Yahuudanko’en, non o wartiriyam lilaaɗo yaaki to yimɓe naa’ Yahuudanko’en. ⁹Yaakubu e Biiturus e Yahaya, noddeteeɓe ardiiɓe mawɓe, nde ɓe ngi’i Allah barkiɗinii kuugal amin bongal, ɓe njaɓɓiiyam min e Barnaba juuɗe ɗiɗi. Ɓe njaɓi min e Barnaba min nga’ajina nder yimɓe naa’ Yahuudanko’en, nden kamɓe ɓe nga’ajina nder Yahuudanko’en. ¹⁰Fii go’o ɗum ɓe toriimin woni to’ min ngejjita ɓe ngalanaa wonɓe nder maɓɓe, nden maa kanjum woni ko kaaɓumi waɗuki.

Bulus Haɓani Biiturus To Gariiri Antaakiya

¹¹Ammaa nde Biiturus wari Antaakiya, mi haɓaniimo gite e gite, ngam ko wooɗaa ɗum o waɗi e njayri ɗum woni. ¹²Ko woɓɓe yimɓe ɓe Yaakubu lili njottoo ton, Biiturus e nyamda e yimɓe naa’ Yahuudanko’en. Ammaa gaɗa yimɓe ɓen njottake, Biiturus hakkiti hoore muuɗum e maɓɓe, ngam e mo hula ɓen ɗon yimɓe bi’ooɓe doole yimɓe naa’ Yahuudanko’en tokkuɓe Yeesu naadee. ¹³Yahuudanko’en tokkuɓe Yeesu koriiɓe maa puɗɗi waɗuki ciya goonga ɗum Biiturus waɗata, haa ko ɓe ngaɗata majjini Barnaba o fuɗɗi waɗuki ciya goonga ɗum ɓe ngaɗata. ¹⁴Nde ngiimi ɓe tokkaayi goonga Habaru Belɗum, mbiimi Biiturus yeeso maɓɓe ɓe fuu, “A Yahuudankeejo, ammaa a waɗa jonde iri nde neɗɗo naa’ Yahuudankeejo. No waɗata a waɗa yimɓe naa’ Yahuudanko’en ngaɗa jonde iri nde Yahuudanko’en?”

Leƴƴi Fuu Kisay to Hoolake Yeesu

¹⁵Enen e ko’e meeɗen en Yahuudanko’en gaɗa e yeeso, naa’ en “yimɓe naa’ Yahuudanko’en gaɗooɓe hakke,” no ɓe noddirtee. ¹⁶Fuu e non, en andi Allah jaɓataa neɗɗo o aadiliijo ngam tokkuki Attawra, ammaa o jaɓaymo barka hoolaaki Yeesu Almasiihu. Enen maa en koolake Yeesu Almasiihu ngam Allah jaɓa’en en aadili’en barka hoolaaki Almasiihu, naa’ ngam tokkuki Attawra. Ngam walaa mo Allah jaɓata o aadiliijo ngam tokkuki Attawra.2.16: Jab 143.2; Room 3.20; Room 3.22.¹⁷Carel ngel ɗaɓɓiteten Allah jaɓa’en en aadili’en barka sumpootirki e Almasiihu, to ɗum tawrii’en e hakke, too, Almasiihu wartii gaɗoowo’en ngaɗen hakke won ɗon? Goonga naa’ ɗum non! ¹⁸To mi fuɗɗitii mi nyiɓii ko cankutumi, nden mi hollii mi neɗɗo gewoowo ko Attawra wi’i. ¹⁹Ndenno e mi tokka Attawra, ammaa ɗum yoofiiyam daga bawɗe maajum, ngam mi waɗa jonde huwanki Allah. ²⁰Min bo mi wardaama e Almasiihu dow gaafaangal. Jooni jonde nde ngaɗaymi naa’ min e hoore am waɗatande, ammaa ɗum Almasiihu jooɗiiɗo nder am. Jooni jonde nde njooɗiimi nder ɓandu, e mi waɗande nder hoolaaki Ɓiɗɗo Allah, giɗɗoyam hokki yonki muuɗum ngam am. ²¹Mi wanyataa yidde Allah. Ngam to neɗɗo waaway wartuki aadiliijo ngam tokkuki Attawra, too, mayde Almasiihu wartii meere.

Attawra Koo Hoolaaki Yeesu

¹Onon Galaatiyanko’en haaŋaaɓe! Moye wayliti hakkiilo mooɗon? Ɗum wi’ii’on e njayri no Yeesu Almasiihu wariraa dow gaafaangal. ²E mi yiɗi mi ƴama’on ɗu’um tan: On keɓu Ruuhu Allah ngam waɗuki ko Attawra wi’i ɗum waɗa, koo ngam nanki habaru Yeesu e hoolaakimo? ³Ngam ɗume ndulluɗon hakkiilo? Gaɗa on puɗɗirii Ruuhu Allah, jooni on ngiɗi yottinirki sembe mooɗon? ⁴Jooni fuu torraaji ɗi njarɗon ngartii meere won ɗon? Goonga on torraaki e meere. ⁵Allah kokkuɗo’on Ruuhu muuɗum kuwuɗo kuuɗe kayɗiniiɗe nder mooɗon, on nyuma o waɗuɗum ngam on ngaɗii ko Attawra wi’i, koo ngam nanki habaru Yeesu e hoolaakimo?

⁶Nyumee dow Ibraahim. Aayaare wi’ii, “Ibraahim boo hoolake Allah, ngam maajum Allah wi’i o aadiliijo.”3.6: Fuɗ 15.6; Room 4.3.⁷Too, on ngi’ii ɓiɓɓe Ibraahim ɓe goonga woni yimɓe kooliiɓe Allah.3.7: Room 4.16.⁸Ko neeɓi aayaare wi’ii Allah jaɓay yimɓe naa’ Yahuudanko’en ɓe aadili’en to ɓe koolakemo. Kanjum waɗi Allah wa’ajinani Ibraahim Habaru Belɗum wi’i, “Barka maaɗa ɗum barkiɗinay koo ngole lenyol nder duuniyaaru.”3.8: Fuɗ 12.3.⁹Ngam maajum fuu kooliiɓe Allah ɓe barkiɗinaaɓe hawti e Ibraahim kooliiɗo Allah.

¹⁰Fuu giɗɓe welnanki Allah ɓernde laawol tokkuki Attawra ɓe laanaaɓe. Ngam aayaare wi’ii, “Koo moye mo tokkaayi koo ɗume bindaaɗum nder deftere Attawra o laanaaɗo.”3.10: TA 27.26.¹¹Jooni e njayri ɗum woni, walaa mo Allah jaɓata o aadiliijo ngam tokkuki Attawra, ngam aayaare wi’ii, “Aadiliijo o waɗay jonde hoolaaki Allah.”3.11: Hab 2.4.¹²Hoolaaki Allah e feerootiri e tokkuki Attawra. Ngam aayaare wi’ii, “Koo moye gaɗoowo ko Attawra wi’i o heɓay jonde nde goonga.”3.12: KLee 18.5.

¹³Yeesu Almasiihu rimɗinii’en daga laaneeki ki Attawra waddi, nde o warti ko laanaa ngam meeɗen. Ngam aayaare wi’ii, “Koo moye baraaɗo dow lekki3.13: Waato gaafaangal. o laanaaɗo.”3.13: TA 21.23.¹⁴Yeesu Almasiihu rimɗinii’en, ngam barka maako yimɓe naa’ Yahuudanko’en keɓa barka ɗum Allah waɗani Ibraahim alkawal. O waɗu non ngam barka hoolaakimo keɓen Ruuhu ɗum Allah waɗi alkawal hokkuki.

Attawra e Alkawal

¹⁵Onon bandiraaɓe am, al mi hokka’on misaalu dow fii ɗum anduɗon. Gaɗa yimɓe ɗiɗo kawtii njaɓii goɗɗum, to ɓe ngaadii alkawal dow maajum, walaa potuɗo sankitaɗum, koo ɓeyda goɗɗum dow maajum. ¹⁶Too, Allah waɗanii Ibraahim alkawal muuɗum e ɓiɓɓe ɓiɓɓeeji maako. Aayaare wi’aayi, “e taaniraaɓe,” waato yimɓe ɗuɗɓe, ammaa nde wi’i, “e taaniraawo maaɗa,” waato neɗɗo go’o tan, kanko woni Almasiihu. ¹⁷Ko nginmi wiiki woni Attawra ɗum Allah hokki duuɓi 430 gaɗa ɗon, ɗum yewataa alkawal ngal Allah waɗunoo, nden ɗum sankitataangal.3.17: Wur 12.40.¹⁸Ngam to barka ɗum keɓuɗen to Allah en keɓuɗum ngam tokkuki Attawra, too, en keɓaayiɗum ngam alkawal ngal o waɗi. Ammaa Allah barkiɗinii Ibraahim ngam alkawal ngal Allah waɗanimo.3.18: Room 4.14.

¹⁹To ɗum non, ngam ɗume ɗum waddi Attawra? Ɗum wadda ngam ɗum holla ko woni hakke. Allah wadduɗum ɗum huutiree naa carel ngel taaniraawo Ibraahim on ɗon warii, mo ɗum waɗuno alkawal. Allah lili malaa’ika’en ɓe kokki Muusa Attawra, Muusa hokkiɗum Israa’iilanko’en. ²⁰Ammaa nde Allah waɗani Ibraahim alkawal, o meddi e Ibraahim kanko e hoore maako.

Daliila Attawra

²¹Jooni ɗu’um e holla Attawra e wanya alkawal Allah won ɗon? Goonga naa’ ɗum non. Daa ɗum hokkii dooka kokkoojum yonki, daa koo moye waaway wartuki aadiliijo to tokkiiɗum. ²²Ammaa aayaare wi’ii hakke haɓɓii koo moye gonɗo nder duuniyaaru, ngam ko Allah waɗi alkawal keɓeteeɗum to ɗum hoolake Yeesu Almasiihu, ɗum hokkayɗum kooliiɓemo.

²³Ko carel hoolaaki Yeesu wara, Attawra haɓɓiimin bo curaaɓe naaki nde hoolaaki Yeesu waroyi. ²⁴Ngam non, min ngaɗaa ley laamu Attawra yaaki carel ngel Almasiihu wari ngam min ngarta aadili’en, to min koolakemo. ²⁵Jooni nde hoolaaki Almasiihu warii, Attawra walaa laamu dow amin kadin.

²⁶On fuu on ɓiɓɓe Allah barka hoolaaki Yeesu Almasiihu. ²⁷On fuu on ngaɗanaama baptisma kolluɗum Almasiihu jeyi’on on ɓornake ngikku Almasiihu won ɗon no ɓornortooɗon kolte. ²⁸Ngam non walaa feerootirol hakkunde Yahuudanko’en e naa’ Yahuudanko’en, e hakkunde maccuɓe e naa’ maccuɓe, e hakkunde worɓe e rewɓe. On fuu on ngartii go’o nder sumpootirki e Yeesu Almasiihu. ²⁹To Almasiihu jeyi’on, onon ngoni ɓiɓɓe Ibraahim, onon keɓata ko Allah waɗi alkawal.3.29: Room 4.13.

¹Ko nginmi wiiki woni ɓiɗɗo donoowo jawdi nyaako muuɗum bo maccuɗo o woni carel ko o woni suka pamaro, koo nde kanko ronata koo ɗume ko nyaako maako woodi. ²O jooɗoto ley woɓɓe paamanayɓemo e paamanayɓe jawdi ndi o ronata ndin naa nyalnde nde nyaako maako wi’i. ³Non, enen maa ko Almasiihu rimɗina’en, ginni gooduɗi bawɗe nder laamotoo’en. ⁴Ammaa nde carel waɗi, Allah liloyi Ɓiɗɗo muuɗum. Debbo danyimo, o jooɗii ley Attawra, ⁵ngam o rimɗina ɓen ɗon tokkooɓe Attawra, ngam ngarten ɓiɓɓe Allah.

⁶Ngam on ɓiɓɓe Allah, o liloyi Ruuhu Ɓiɗɗo4.6: Ruuhu Ɓiɗɗo e Ruuhu Allah fuu ɗum go’o. maako nder ɓerɗe meeɗen, e ɗum nodda Allah e ɗum wi’a, “Nyaako am, Nyaako am.” ⁷Ngam non, jooni naa’ a maccuɗo, ammaa a ɓiɗɗo. Nden nde a ɓiɗɗo, Allah wartiriima donayɗomo.4.5‑7: Room 8.15‑17.

Wannaare Bulus Dow Galaatiyanko’en

⁸Ndenno ko on andaa Allah, on maccuɓe tokkooɓe allaaji fewre. ⁹Ammaa jooni nde anduɗon Allah, koo boo nde Allah andi’on, ngam ɗume co’’antooɗon ɗin ɗon ginni tampuɗi ɗi nafantaa’on? Ngam ɗume ngiɗɗon wartuki maccuɓe maaji kadin? ¹⁰On mawnina goɗɗe nyalɗe, e goɗɗi lebbi, e goɗɗi duuɓi. ¹¹E mi hula to’ kuugal ngal kuwumi nder mooɗon warta meere.

¹²Onon bandiraaɓe am, e mi toroo’on, ngartee bo am, ngam min maa mi wartii bo mooɗon. On ngaɗanaayiyam goɗɗum ko wooɗaa. ¹³On andi ngam mi yamɗaa waɗi keɓumi laawol nga’ajinanmi’on Habaru Belɗum arande. ¹⁴Koo nde ciya njamu am fooɗanii’on torra, on njawanaayiyam, on nganyaayiyam. Ammaa on njaɓiiyam bo malaa’ikaajo Allah, on njaɓiiyam no njaɓirɗon Yeesu Almasiihu. ¹⁵To nanki belɗum ki nanunooɗon woni? Mi tabbitinii, daa ɗum waɗoto, daa on ittii gite mooɗon on kokkiiyam. ¹⁶Jooni mi wartii ganyo mooɗon nde mbiimi’on goonga?

¹⁷Ɓen ɗon yimɓe ɓe ngaɗii hakkiilo maɓɓe fuu dow mooɗon ngam ɓe ngaɗa’on tokkonɓe, ammaa ko ɓe ngiɗi waɗuki ɗum wooɗaa. Ko ɓe ngiɗi woni ɓe cenda’on e amin, ngam hakkiilo mooɗon so’’oo to maɓɓe. ¹⁸E ɗum wooɗi to neɗɗo waɗii hakkiilo muuɗum fuu dow goɗɗum to e ɗum wooɗi. E haani ngaɗon non koo ndeye, naa’ sey to e mi wondi e mooɗon tan. ¹⁹Onon ɓiɓɓe am ɓe ngiɗumi, non no debbo nanirta nawɗum danyngol, bo non e mi fuɗɗita nanuki iri ɗum ɗon nawɗum ngam mooɗon naa carel ngel kolluɗon ngikku Almasiihu nder jonde mooɗon. ²⁰E mi yiɗi jooɗodaaki e mooɗon, ngam mi anda no metiranaymi’on. E mi wanni dow mooɗon naa’ seɗɗa!

Misaalu Dow Hajara e Saaratu

²¹Mbi’eeyam, onon giɗuɓe tokkuki Attawra, on nanaayi ko Attawra wi’i? ²²Ngam aayaare wi’ii Ibraahim e woodi ɓiɓɓe ɗiɗo, go’oto maccuɗo debbo danyimo, go’oto on boo debbo maako dimo danyimo.4.22: Fuɗ 16.15; Fuɗ 21.2.²³Ɓiɗɗo mo maccuɗo on danyi, o danyumo no ɗum danyiri koo moye, ammaa ɓiɗɗo mo debbo maako danyi, o danyumo ngam alkawal ngal Allah waɗi. ²⁴Ɗu’um ɗum misaalu, waato ɓe’e rewɓe ɗiɗo dow alkawalji Allah ɗiɗi ɓe ngoni. Debbo mo ɓiɓɓe muuɗum danyaa nder maccungaaku, kanko wi’etee Hajara, e mo jooɗanii alkawal ngal Allah waɗi dow Hocceere Sinay. ²⁵Hajara woni misaalu Hocceere Sinay gonde leydi Laarabanko’en, nden o misaalu gariiri Urucaliima ndi jooni, ngam e ndi nder maccungaaku, kayri e ɓiɓɓe mayri. ²⁶Ammaa Saaratu o debbo dimo o misaalu gariiri Urucaliima ndi dow ndi meeɗaayi maccungaaku, kayri woni maduujo meeɗen. ²⁷Ngam aayaare wi’ii,

“Nanu belɗum an debbo mo meeɗaayi danyuki!

Jalu sembee, an mo meeɗaayi nanki nawɗum danyngol!

Ngam debbo mo gorko muuɗum wannaayi e maako o heɓay ɓiɓɓe ɗuɗɓe ɓurɓe ɓe

debbo mo gorko muuɗum wanni e muuɗum.”4.27: Ica 54.1.

²⁸Onon bandiraaɓe am, onon maa bo Iciyaaku on ɓiɓɓe alkawal. ²⁹E ngel ton carel ɓiɗɗo mo ɗum danyi no ɗum danyiri koo moye, o hallanii ɓiɗɗo mo ɗum danyi nder bawɗe Ruuhu Allah. Jooni maa non e waɗee.4.29: Fuɗ 21.9.³⁰Ammaa ko aayaare wi’i? Nde wi’i, “Riiwu on ɗon maccuɗo debbo e ɓiɗɗo maako, ngam ɓii dimo sendidataa ndonu e ɓii maccuɗo.”4.30: Fuɗ 21.10.³¹Ngam non bandiraaɓe, enen naa’ en ɓiɓɓe maccuɗo debbo, ammaa en ɓiɓɓe debbo dimo.

Njogee Rimɗinki Mooɗon

¹Almasiihu rimɗinii’en ngam to’ ngaɗen jonde bo maccuɓe. Ngam non, ndaree boɗɗum to’ on puɗɗutu co’’ooɗon nder maccungaaku.

²Nanee ko mbi’aymi! Min Bulus, e mi wi’a’on, to on alii on naadaama, Almasiihu wartay walaa ko nafi to mooɗon won ɗon. ³E mi fuɗɗita e mi wi’a koo moye jaɓuɗo naadaa, doole o tokka fuu ko Attawra wi’i. ⁴Onon giɗuɓe wartuki aadili’en ngam tokkuki Attawra, on cendirii e Almasiihu, on cendirii e caahu Allah. ⁵En tabbitinii daga to Ruuhu Allah, o jaɓay’en en aadili’en ngam en koolake Almasiihu. En kaaɓii yiikiɗum. ⁶Ngam to en cumpootira e Yeesu Almasiihu, naadeeki e ciya naadeeki fuu walaa ko nafi. Ammaa ko ɓuri woni hoolaaki Almasiihu. Ko hollata en koolimo woni ngiɗen yimɓe e Allah.

⁷Ndenno on nyamra yeeso boɗɗum! Moye haɗi’on tokkuki goonga? ⁸Naa’ Allah nodduɗo’on haɗi’on. ⁹Non no ɗum wi’ata, “Ƴuufinirɗum seɗɗa ɓuutinta condi buroodi fuu.”5.9: 1Kor 5.6.¹⁰Ngam mi hoolake Joomiraawo, mi tabbitinii on tokkataa wongol laawol feerootirngol e ngol am. Nden on ɗon neɗɗo majjinayɗo’on, koo o moye, Allah torraymo.

¹¹Onon bandiraaɓe am, to haa jooni e mi wa’ajina wiiki doole yimɓe naadee, ngam ɗume haa jooni e ɗum torrayam? Daa e mi wa’ajina dow ɗum naada, daa wa’ajinki am dow mayde Almasiihu dow gaafaangal fooɗataa caɗɗum. ¹²Daa ɗum wi’a ɓen ɗon yimɓe majjinooɓe’on ɓe tappa ko’e maɓɓe!

¹³Onon bandiraaɓe am, on nodda ngam ngarton rimɗinaaɓe. Ammaa to’ on kuutir rimɗinki mooɗon warta laawol waɗuki ko suuno ɓalli mooɗon ngiɗi. Sey ni mballindiron nder yidde. ¹⁴Ngam fuu Attawra heewii dow wolde go’o, waato, “Yiɗu bandiraawo maaɗa no ngiɗirɗaa hoore maaɗa.”5.14: KLee 19.18.¹⁵Ammaa to on kallindira on torrindira bo marle ladde, paamee to’ kalkindiron.

Feerootirol Hakkunde Ruuhu Allah e Ngikku Neɗɗo

¹⁶Ko mbi’aymi woni, ngaɗee jonde mooɗon no Ruuhu Allah holliri’on, nden on ngaɗataa ko suunooji ɓalli mooɗon ngiɗi. ¹⁷Ngam ko ɓalli meeɗen ngiɗi e wanya ko Ruuhu Allah yiɗi, non maa ko Ruuhu Allah yiɗi e wanya ko ɓalli meeɗen ngiɗi. Fii ɗiɗum ɗu’um e ɗum wanywanytira. Kanjum waɗi on mbaawataa waɗuki ko ngiɗɗon waɗuki.5.17: Room 7.15‑23.¹⁸Ammaa to on ngaɗa ko Ruuhu Allah wi’i’on ngaɗon, on ngalaa ley laamu Attawra.

¹⁹Ko ɓandu neɗɗo yiɗi waɗuki, e njayri ɗum woni: e woodi waɗuki njeenu, e waɗuki kuuɗe nefniiɗe, e waɗuki ko semtinii, ²⁰e mawninki gunkiiji, e huutirki bawɗe ginni, e wanywanytirki, e hawre, e yiɗuki ko jeyaayi, e monnuki, e yidde hoore, e yeddootirki, e wadduki sendirki, ²¹e lawliiru, e yiltaaki, e yarki njaru yiltoo haa waɗa ko halli, e waɗuki goɗɗe kuuɗe iri ɗe’e. E mi wi’a’on non no mbiimi’on ndenno, kuwooɓe iri kuuɗe ɗe’e ɓe keɓataa nattuki Laamu Allah.

²²Ammaa Ruuhu Allah e wadda yidde, e welwelo, e jonde jam, e munyal, e yurmeende, e ngikku boɗɗum, e waɗuki goonga, ²³e leynuki hoore, e suruki hoore. Walaa dooka ganyuɗum kuuɗe ɗe’e. ²⁴Yimɓe ɓe Yeesu Almasiihu jeyi, ɓe mbarii kuuɗe kalluɗe ɗe ɓandu e fuu suunooji mayru dow gaafaangal, waato ɓe cendirii e maajum. ²⁵Nde Ruuhu Allah hokki’en yonki, en ngaɗu jonde no ɗum holliri’en. ²⁶To’ en ngartu ɓe mangu hoore, koo umminindiren hakkiilo, koo lawlindiren.

Mballindiree

¹Onon bandiraaɓe am, to on ngi’ii goɗɗo e waɗa hakke, onon keewuɓe Ruuhu Allah sey co’’onmo dow laawol nder hakkiilo. Ammaa paamanee ko’e mooɗon, to’ onon maa ngaɗon hakke. ²Mballindiree nder torraaji mooɗon. To on ngaɗii non, on ngaɗii ko dooka Almasiihu wi’i. ³To goɗɗo e nyuma kanum ɗum goɗɗum koo nde naa’ o goɗɗum, e mo majjina hoore maako. ⁴Koo moye foonda kuuɗe muuɗum yi’a to ɗe boɗɗe. Nden o mantoroo hoore maako ngam ko o waɗi naa’ sey to o foondii hoore maako e goɗɗo. ⁵Ngam koo moye doole hocca teddoral muuɗum.

⁶Fuu ekkitinaaɗo Wolde Allah e haani o sendida fuu fii boɗɗum ɗum o woodi e ekkitinɗomo.

⁷To’ on majjin ko’e mooɗon, Allah ƴoyrataake. Fuu ko neɗɗo aawi, kanjum ittata. ⁸Aawuɗo waɗuki ko ɓandu muuɗum yiɗi, daga nder waɗuki ko ɓandu maako yiɗi, o fooɗanay hoore maako halkere. Ammaa aawuɗo waɗuki ko Ruuhu Allah yiɗi, daga nder waɗuki ko Ruuhu ɗum yiɗi o heɓay yonki ki re’ataa. ⁹To’ en comu waɗuki ko wooɗi, ngam to carel waɗii en keɓay barka, to en alaayi waɗuki ko wooɗi. ¹⁰Ngam maajum fuu carel ngel keɓɗen, en ngaɗan koo moye ko wooɗi, ko ɓuri maa woni ɓen ɗon tokkuɓe Yeesu bandiraaɓe meeɗen.

Wagginol Cakitiingol e Kownol

¹¹Ndaaree iri bindi mawɗi ɗi mbindonoymi’on e jungo am. ¹²Ɓen ɗon yimɓe mawninooɓe ko’e maɓɓe ngam ko ɗum waɗaniɓe e ɓandu, kamɓe ngiɗi doole ɗum naada’on. E ɓe ngaɗa non ngam to’ ɓe torree ngam gaafaangal Almasiihu. ¹³Ngam koo ɓen ɗon naadaaɓe maa ɓe tokkataa ko Attawra wi’i, ammaa fuu e non e ɓe ngiɗi ɗum naada’on ɓe mawnina hoore ngam ɓe ngaɗii ɗum naadii’on. ¹⁴Ammaa min, koo seɗɗa mi mawnintaa hoore am sey ni dow gaafaangal Joomiraawo meeɗen Yeesu Almasiihu. Barka mayde maako dow gaafaangal, ko woni nder duuniyaaru wartii meere to am, min maa mi wartii meere to mayru. ¹⁵Ngam walaa feerootirol hakkunde naadaaɗo e mo naadaaka. Ko ɓuri woni Allah wartira neɗɗo keso. ¹⁶Jam Allah e yurmeende maako tabbita to ɓen ɗon tokkooɓe ekkitinol ngo’ol, waato yimɓe Allah ɓe goonga.

¹⁷Mi yottinay e wiiki, to’ goɗɗo ɓeyda wannukiyam, ngam tabooje ɗe ngoodumi e ɓandu kollii mi maccuɗo Yeesu. ¹⁸Joomiraawo meeɗen Yeesu Almasiihu barkiɗina’on on fuu bandiraaɓe am. Aamin.