2 Tasaloonikanko’en

Ɗerewol Ɗiɗaɓol Ngol Bulus Windani

Tasaloonikanko’en

Habaru dow ɗerewol ngo’ol

Bulus lilaaɗo Yeesu Almasiihu windii ɗerewol ngo’ol hakkunde duuɓi 51-52 A.D., waato hakkunde duuɓi 51-52 gaɗa danyngol Yeesu.

Ciya faamu dow wartoyki Almasiihu nyamrii yeeso e fooɗuki wannaare nder kawtal tokkuɓe Yeesu gonɓe gariiri Tasaloonika. Bulus metii dow yimɓe nyumooɓe nyalnde nde Joomiraawo wartoyta yaadake warii. O wi’iɓe to’ ɓe njaɓa goɗɗo majjinaɓe e ekkitinol fewre dow fii ɗu’um. O holliiɓe wiiki ko Almasiihu wartoya halleende e kuuɗe kalluɗe ɓeydoto naa’ seɗɗa ley laamu goɗɗo bi’eteeɗo Kalluɗo, ganyo Almasiihu.

Bulus ɓeydii wiiki Tasaloonikanko’en ndaroo dow hoolaare maɓɓe, koo nder torra koo nder yarki bone. Ɓe kuwa ɓe keɓa ko ɓe marortoo non no Bulus e ɓe o huudata ngaɗata. Nden ɓe nyamra yeeso e waɗuki ko wooɗi.

Ko Woni Nder:

Kownol Bulus (1.1‑2)

Gartol Almasiihu (1.3‑12)

Wagginki dow gartol Almasiihu (2.1‑17)

Ngaɗaneemin do’aare (3.1‑15)

Kownol cakitiingol (3.16‑18)

Kownol Bulus

¹Min Bulus windi ɗerewol ngo’ol hawti e Siila e Timooti. Min mbindanngol tokkuɓe Yeesu gonɓe gariiri Tasaloonika, ɓe Allah Nyaako meeɗen e Yeesu Almasiihu Joomiraawo jeyi.1.1: KL 17.1.

²Allah Nyaako Mo Dow e Yeesu Almasiihu Joomiraawo barkiɗina’on hokka’on jam.

Gartol Almasiihu

³Bandiraaɓe amin, e haani min ngaɗa ka yettuki Allah koo ndeye ngam mooɗon, ngam hoolaare mooɗon e ɓeydoo naa’ seɗɗa, nden yidde nde ngiɗindiron e ɓeydoo. ⁴Kanjum waɗi minon e ko’e amin e min mantoroo’on nder kawte tokkuɓe Allah. E min ɗiiwitanaɓe no munyirɗon e hoolaare mooɗon nder fuu torraaji e caɗeele ɗe njaroton.

⁵Fuu ɗu’um tabbitinii kiita Allah e woodi goonga, ngam maajum ɗum wartiray’on kewtuɓe jooɗaaki nder laamu maako, ngam dow maajum njaroton torra. ⁶Allah o gaɗoowo ko haani. O waatanay ɓen ɗon torrayɓe’on e torra, ⁷o waltinay ɓerɗe mooɗon onon torreteeɓe. Minon maa o waltinay ɓerɗe amin. O waɗay non nyalnde nde Yeesu Almasiihu wangata daga dow nder hiite hawti e malaa’ika’en maako gooduɓe bawɗe. ⁸Ganyuɓe Allah e ganyuɓe ngaɗa ko Habaru Belɗum ɗum Joomiraawo meeɗen Yeesu wi’i, Allah waatanayɓe halkere kallunde. ⁹Ɓe njaray torra halkere nde haa abadaa, ɗum ittayɓe daga yeeso Joomiraawo e yeeso mangu bawɗe maako.1.9: Ica 2.10.¹⁰Halkere nden wangay nyalnde nde o wartoyta. O wartoyay ngam ceniiɓe maako teddinamo fuu kooliiɓemo mawninamo. Onon maa on kawtay e maɓɓe, ngam on njaɓii habaru ɗum min kokki’on. ¹¹Kanjum waɗi koo ndeye e min ngaɗana’on do’aare. E min toroo Allah meeɗen wartira’on yimɓe gaɗooɓe iri jonde nde o noddi’on ngaɗon. Barka bawɗe maako o hebbina koo ɗume boɗɗum ɗum ngiɗɗon waɗuki ngam on koolake Yeesu. ¹²E min ngaɗa do’aare nde’e ngam inde Joomiraawo meeɗen Yeesu mawninee nder mooɗon, kanko boo o mawnina’on barka yidde Allah meeɗen e Yeesu Almasiihu Joomiraawo.

Wanguki Kalluɗo

¹Dow gartol Joomiraawo meeɗen Yeesu Almasiihu e hawrutuki meeɗen e maako, e min toroo’on bandiraaɓe,2.1: 1Tas 4.15‑17.²to’ hakkiilo mooɗon ummilawoo koo ngannon dow yimɓe bi’ooɓe nyalnde nde Joomiraawo wartoyta warii. Ɗum gaɗotooɗum ɓe mbi’a minon mbi’i non nder annabaaku, koo nder wa’ajinki, koo boo nder ɗerewol min mbindiɗum. ³To’ on njaɓu goɗɗo majjina’on e koo ngole laawol. Ngam nden ɗon nyalnde waroytaa naa wongel carel waɗii ngel yimɓe ɗuɗɓe nganyata Allah. E carel ngel, Kalluɗo wangay, mo ɗum siryanii halkere nde haa abadaa. ⁴O wanyay koo ɗume ko yimɓe noddata allah koo boo ko ɓe mawninta, o mawnina hoore maako dow maajum. Haa maa o nattay Wuro Ceniingo ngo Allah, o jooɗoo, o wi’a kanko woni Allah.2.4: Daan 11.36; Ijik 28.2.

⁵On ciftoraayi ko ngondunoomi e mooɗon mi wi’ii’on ɗu’um? ⁶Jooni on andi ko haɗi Kalluɗo o’o warki. To carel kaanungel waɗii, ɗum wanginaymo. ⁷Ngam bawɗe Kalluɗo on ɗon yaadake fuɗɗii huwuki e suuɗe. Ammaa on ɗon taɓɓotooɗoɗe, o waɗay ka taɓɓaakiɗe naa o hoccaama. ⁸Gaɗa ɗon ɗum wanginay Kalluɗo on, sey Yeesu Joomiraawo wariramo e foofaango honduko muuɗum, nden halkiramo teddungal wartuki muuɗum.2.8: Ica 11.4.⁹Kalluɗo on warday e bawɗe Ceyɗan, o waɗay alaamaaji e kayɗiniiɗum e kulniiɗum feere‑feere ɗum fewre,2.9: Maat 24.24.¹⁰e koo iri ɗeye kuuɗe kalluɗe ƴoyrayɗe yimɓe kalkayɓe. Yimɓe ɓen kalkay ngam ɓe nganyii ɓe ngiɗa goonga ɓe kisa. ¹¹Ngam non, Allah lildanayɓe wembere mawnde ngam ɓe njaɓa fewre, ¹²ngam ɗum taƴa kiita dow fuu ɓe njaɓaayi goonga nanooɓe belɗum halleende.

Ndaree Boɗɗum

¹³Onon bandiraaɓe amin ɓe Joomiraawo yiɗi, e haani min ngaɗa ka yettuki Allah ngam mooɗon koo ndeye. Ngam daga arande Allah suɓii’on ngam kison barka laaɓinki ki Ruuhu maako waɗata e jaɓuki goonga. ¹⁴Ngam maajum Allah noddi’on barka Habaru Belɗum ɗum min nga’ajinani’on. O noddu’on ngam keɓon nattuki teddungal Joomiraawo meeɗen Yeesu Almasiihu. ¹⁵Ngam non bandiraaɓe, ndaree boɗɗum njogee ekkitinol ngol min ekkitini’on nder meto amin koo nder ɗerewol ngol min mbindani’on.

¹⁶Joomiraawo meeɗen Yeesu Almasiihu e hoore muuɗum, e Allah Nyaako meeɗen Mo Dow, giɗɗo’en cembiɗinɗo’en sembiɗinki ki re’ataa kokkuɗo’en kammunde bonde barka yidde maako, ¹⁷o fukkinana’on ɓerɗe, o sembiɗina’on nder koo ngale kuugal bongal e wolde bonde.

Ngaɗaneemin Do’aare

¹Bandiraaɓe amin, ko sakitii woni ngaɗaneemin do’aare ngam habaru Joomiraawo sankitoo jawɗum ɗum mawninee non no mawninirɗonɗum. ²Kadin ngaɗaneemin do’aare ngam Joomiraawo hisnamin daga yimɓe kalluɓe, ngam naa’ koo moye hoolii Yeesu.

³Ammaa Joomiraawo o gaɗoowo ko o wi’i, o sembiɗinay’on, o reenay’on daga on ɗon Kalluɗo. ⁴E min koolii Joomiraawo, min tabbitinii on ngaɗa ko min mbi’i’on ngaɗon, on ngaɗay boo ka waɗukiɗum.

⁵Joomiraawo waɗa ɓeydon anduki yidde Allah o waɗa’on munyon nder torraaji ɗi njaroton non no Yeesu munyiri nder torraaji kalluɗi ɗi o yari.

Doole Koo Moye Huwa

⁶Bandiraaɓe, e min mbi’a’on nder inde Joomiraawo meeɗen Yeesu Almasiihu, doole ngoɗɗitooɗon koo moye dakkiiɗo tokkuɗo Yeesu mo tokkataa ko min ekkitini’on. ⁷Ngam onon e ko’e mooɗon on andi e haani ngaɗon ka ekkitaaki iri jonde amin. Naa’ min dakkiiɓe carel ko min njooɗodii e mooɗon. ⁸Non maa, fuu mo min nyaamani nyamndu min njoɓiimo. Min kuwii naa’ seɗɗa jemma e nyalawma ngam to’ min njowana goɗɗo mooɗon teddoral. ⁹Min ngaɗu non naa’ ngam min mbaawataa ɗaɓɓutuki ballal mooɗon, ammaa ngam min ngaɗa goɗɗum ko ekkitotooɗon. ¹⁰Ngam koo carel ko min ngondunoo e mooɗon, raa ko min mbi’i’on ngaɗon, “To neɗɗo wanyii huwa, to’ on kokkumo nyamndu.”

¹¹Ngam min nanii habaru woɓɓe mooɗon ɓe dakkiiɓe, ɓe kuwataa. E ɓe natta haala ka yaalaayiɓe. ¹²E min mbi’a iri yimɓe ɓe’e e min mbagginaɓe nder inde Joomiraawo meeɗen Yeesu Almasiihu ɓe ngaɗa jonde bonde ɓe kuwa ɓe keɓana ko’e maɓɓe ko ɓe nyaamata.

¹³Onon boo bandiraaɓe amin, to’ on comu waɗuki ko haani. ¹⁴To goɗɗo wanyii tokkuki ko min mbi’i nder ɗerewol ngo’ol, paamaneemo boɗɗum. To’ on kawtu hoore e maako ngam o nana cemtuɗum o mo’’ina ngikku maako. ¹⁵Fuu e non, to’ on koccumo bo ganyo mooɗon, ammaa mbaggineemo no mbagginirton tokkuɗo Yeesu.

Boliiɗe Cakitiiɗe

¹⁶Joomiraawo joomu jam e hoore muuɗum hokka’on jam koo ndeye nder koo ɗume. Joomiraawo wonda e mooɗon on fuu.

¹⁷Min Bulus windi kownol ngo’ol e jungo am. E mi winda ɗu’um nder fuu ɗereeji ɗi mbindumi ngam ɗum holla min windiɗi. Non mbindiraymi.

¹⁸Joomiraawo meeɗen Yeesu Almasiihu barkiɗina’on on fuu.