1 Timooti

Ɗerewol Arandewol Ngol Bulus Windani

Timooti

Habaru dow ɗerewol ngo’ol

Bulus windi ɗerewol ngo’ol hakkunde duuɓi 65‑67 A.D., waato duuɓi 65‑67 gaɗa danyngol Yeesu. O windanngol Timooti mo o sembiɗini nder tokkuki Yeesu. Timooti o suka tokkuɗo Yeesu ƴiwoyɗo leydi Aasiya Pamardi. Maduujo maako o Yahuudankeejo, nden nyaako maako o Helenankeejo. O warti jaadoowo e Bulus e mo wallamo nder kuugal wa’ajinki Habaru Belɗum.

Bulus metii dow fii tatum mawɗum. Arande, o wagginii dow ekkitinol fewre nder kawtal tokkuɓe Yeesu. Ekkitinol ngol wurtake ngam woɓɓe e mbi’aɓe duuniyaaru ndu’u ndu kallundu. E ɓe mbi’a walaa kisayɗo, sey to heɓii andal cuuɗiingal, e aluki nyaamuki goɗɗi nyamnduuji, e aluki waɗuki teegal. Ɗerewol ngol kadin e saawi wagginki dow kawtal tokkuɓe Yeesu e no ɓe ardortoo, e no ɓe mawninirta Allah. Ɗonmaa e ngol holla iri ngikku ɗum ardiiɓe e ballooɓe nder kawtal tokkuɓe Yeesu haani ngaɗa. Cakitiiɗum woni, Bulus hokkii Timooti caawori no wartirta kuwanoowo Yeesu Almasiihu boɗɗo, e teddoral gongal dow maako dow yimɓe feere‑feere gonɓe nder kawtal tokkuɓe Yeesu.

Ko Woni Nder:

Kownol Bulus (1.1‑2)

Kawtal tokkuɓe Yeesu e ardiiɓeɓe (1.3‑3.16)

Bulus ekkitinii Timooti dow kuugal muuɗum (4.1—6.21)

¹Ɗerewol ngo’ol ƴiwoyii daga jungo am, min Bulus. Allah Kisnoowo meeɗen e Yeesu Almasiihu mo ngaɗɗen ɓernde dow muuɗum wi’ii mi warta lilaaɗo maako.

²E mi windanmaa ɗerewol ngo’ol, Timooti, ɓiɗɗo am mo goonga nder tokkuki Yeesu.

Allah Nyaako meeɗen Mo Dow e Yeesu Almasiihu Joomiraawo meeɗen barkiɗinmaa, yurminanmaa, hokkumaa jam.1.2: KL 16.1.

Wagginol Dow Ekkitinol Fewre

³E mi yiɗi njooɗoɗaa e Aafisa, non no tororimaami carel ko njahaynoomi Makidooniya, ngam mbagginaa woɓɓe yimɓe ekkitinooɓe ekkitinol fewre ɓe ala. ⁴Wi’uɓe ɓe cendira e habaruuji fewre ɗin ɗon e feerootirki lenyol ki walaa keerol, ngam iri non hollataa no ɗum hoolortoo Allah, sey ni ɗum ummina geddi tan. ⁵Ko waɗi mbiimi ngaɗaa non woni ngam ɗum waɗa’en ngiɗindiren yidde ƴiwoynde nder ɓernde lamnde e ɓernde kollaynde en ngaɗa ko wooɗi, e ɓernde kooliinde Yeesu e goonga. ⁶Woɓɓe yimɓe nde ali waɗuki non, ɓe majjii laawol goonga, ɓe puɗɗi metuki haalaaji meereeji. ⁷E ɓe ngiɗi ɗum anda ɓe moodiɓɓe Attawra, ammaa ɓe paamataa ko ɓe mbi’ata, koo dow ko ɓe ekkitinta ɓernde go’o.

⁸En andi dooka e wooɗi to ɗum huutiraama no haani ɗum huutiree. ⁹Kadimaa en andi dooka waɗaaka ngam aadili’en, ammaa ngam gewooɓe dooka, e yimɓe ɓe ngaɗataa ko ɗum wi’iɓe, e ɓe kulataa Allah, e gaɗooɓe ko wooɗaa, e yimɓe ɓe cenaaki, e kuɗooɓe Allah, e yimɓe barooɓe danyooɓe mu’’en, e gaɗooɓe warhoore, ¹⁰e gaɗooɓe njeenu, e gaɗooɓe luuɗu, e coorooɓe maccuɓe, e pewooɓe, e ceydotooɓe fewre, e koo ɗume ɗum tokkaayi ekkitinol goonga, ¹¹gongol nder Habaru Belɗum ɗum Allah joomu mangu barkiɗinaaɗo wi’iyam mi wa’ajina.

Bulus Yettii Allah

¹²Mi yettii Yeesu Almasiihu Joomiraawo meeɗen kokkuɗoyam sembe kuugal am. Mi yettiimo ngam o yiiriiyam goonga o suɓiiyam mi huwanamo. ¹³Koo nde ndenno mi metii haalaaji kalluɗi dow maako, mi torrii tokkuɓemo, mi huɗiimo, ammaa Allah yurminaniiyam, ngam e carel ngel, mi andaa ko ngaɗaymi, mi hoolaaki Yeesu Almasiihu.1.13: KL 8.3; 9.4,5.¹⁴Joomiraawo meeɗen yaafanakeyam hakke caahu, nden o hokkiiyam hoolaare e yidde gonde nder Yeesu Almasiihu. ¹⁵Yeesu Almasiihu warii nder duuniyaaru ngam hisna gaɗooɓe hakke. Haala ka’a ka tabbutuka ka hewtii ɗum jaɓaka. Min boo, mi ɓurii koo moye waɗuki hakke. ¹⁶Ammaa Allah yurminaniiyam ngam Yeesu Almasiihu holliiyam munyal ngal walaa keerol, min ɓurɗo koo moye hakke, ngam ɗum warta misaalu to koo moye tokkayɗomo yeeso ɗo’o ngam heɓa yonki ki re’ataa. ¹⁷O Laamiiɗo haa abadaa, o walaa keerol, o yi’ataako, kanko tan woni Allah. Mangu e teddungal tabbita to maako haa abadaa abadin.

¹⁸Ɓiɗɗo am, Timooti, e mi wagginmaa dow ko annabo’en mbiinoo dow maaɗa. Tokku ko ɓe mbi’i ngam mbaawaa waɗuki kuugal ngal Allah hokkumaa, ¹⁹a hooloomo e ɓernde lamnde. Woɓɓe yimɓe nde nganyi waɗuki non, ɓe lallinii hoolaare maɓɓe. ²⁰Nder maɓɓe e woodi Himeeniyus e Alijanda. Mi aldiiɓe e Ceyɗan ngam ɓe ekkitoo aluki metuki haalaaji kalluɗi dow Allah.

Ekkitinki Dow Do’aare

¹Ngam non, arande e mi wi’a ɗum waɗa ka toraaki Allah, ɗum waɗa do’aare, ɗum toroomo, ɗum yettamo ngam koo moye. ²Ɗum waɗana laamiiɓe do’aare, e koo moye ardiiɗo ngam njooɗooɗen jam hakkiilo meeɗen e fukkii, en mawnina Allah, en ngaɗa ko o wi’i. ³Non e wooɗi. Allah Kisnoowo meeɗen e nana belɗum maajum, ⁴ngam e mo yiɗi koo moye anda goonga hisa. ⁵Ngam Allah o go’oto, nden ciryootirɗo hakkunde Allah e yimɓe o go’oto. Kanko woni Yeesu Almasiihu, ⁶kokkuɗo hoore maako ngam o rimɗina yimɓe. Kanjum woni ceyda ɗum um hokki nde carel waɗi. ⁷Ngam maajum ɗum suɓiiyam mi warta ga’ajinoowo e lilaaɗo e ekkitinoowo yimɓe naa’ Yahuudanko’en dow hoolaaki goongahi. Goonga mbi’aymi, naa’ mi feway!2.7: 2Tim 1.11.

⁸Ngam non e mi yiɗi to tokkuɓe Yeesu kawriti fuu, worɓe ngaɗa do’aare e ɓe ƴefta juuɗe ceniiɗe naa’ nder monnere koo geddi. ⁹Non maa, e mi yiɗi rewɓe ɓornoo kolte no haani ngam semteende e faamanki hoore. Mi yiɗaa ɓe ɓornoo kolte ɗe ceede e mo’’itinaaki koccayki hakkiilo yimɓe bo mo’’inki gaasa, koo waɗuki coddi, koo jiinaari,2.9: 1Biit 3.3.¹⁰sey ni ɓe kuwa kuuɗe boɗɗe no rewɓe kulooɓe Allah haani ngaɗa. ¹¹Rewɓe ekkitoo ekkitinol nder de’’utuki e lesnuki hoore. ¹²Mi jaɓaayi goɗɗo debbo ekkitina gorko koo laamoo dow maako; doole ɓe nde’’ita. ¹³Ngam Aadamu Allah arti taguki, nden Hawwaa’u.2.13: Fuɗ 2.7; Fuɗ 2.21,22.¹⁴Nden naa’ Aadamu ɗum ƴoyri, ɗum debbo on ɗum ƴoyri, o yewi dooka Allah.2.14: Fuɗ 3.1‑6.¹⁵Fuu e non, rewɓe nder danyngol ɓiɓɓe ɓe kisay to ɓe ngaɗii ka hoolaaki Yeesu e ɓe kolla yidde e ɓe ngaɗa jonde lamnde e semteende.

Ardiiɓe Kawtal Tokkuɓe Yeesu

¹Haala kan ɗon ka tabbutuka wi’uki: Gaɗɗo ɓernde muuɗum dow wartuki mawɗo kawtal tokkuɓe Yeesu, o yiɗii kuugal bongal won ɗon. ²Ngam non doole mawɗo kawtal tokkuɓe Yeesu warta walaa ko ɗum huɗirtamo, gooduɗo debbo go’oto, curɗo hoore muuɗum, gaɗoowo ko haani, jaɓɓotooɗo hoɓɓe, bawɗo ekkitinki. ³To’ o warta jaroowo, koo ɗaɓɓitoowo hawre, ammaa mo hakkiilo, giɗɗo jonde jam, naa’ gooduɗo yidde ceede. ⁴Doole o jogoo wuro maako boɗɗum, o ekkitina ɓiɓɓe maako ngaɗa ko o wi’i, ɓe kokkamo mangu. ⁵Ngam to neɗɗo andaa no jogortoo wuro muuɗum, no o ardortoo kawtal yimɓe Allah? ⁶Haanaa boo tokkuɗo Yeesu keso warta ardiiɗo, ngam ɗum gaɗotooɗum o mawnina hoore maako, nden ɗum waɗanamo no ɗum waɗani Ceyɗan. ⁷E haani o warta neɗɗo mo koo moye andi jonde maako e wooɗi haa maa e ɓe tokkaayi Yeesu. Ngam to’ o warta ko semtinii o yana nder tarkowol Ceyɗan.3.2‑7: Tiit 1.6‑9.

Kuwooɓe Nder Kawtal Tokkuɓe Yeesu

⁸Non maa doole kuwooɓe nder kawtal tokkuɓe Yeesu ngarta gooduɓe ngikku boɗɗum, wi’ooɓe goonga, naa’ jarooɓe, koo gooduɓe yidde ceede. ⁹Doole ɓe njogoo goonga lugguka dow hoolaaki Yeesu e ɓernde lamnde. ¹⁰Arande ɗum foondaɓe taw ɗum yi’a. To ɓe ngalaa ko ɗum huɗirtaɓe, sey ɓe kuwa kuugal ngal. ¹¹Non maa rewɓe ɓen ngarta ɓe ngikku boɗɗum, to’ ɓe ngarta bi’ooɓe haalaaji kalluɗi dow woɓɓe, ammaa ɓe ngarta curɓe ko’e maɓɓe, gaɗooɓe goonga dow koo ɗume. ¹²Kuwoowo nder tokkuɓe Yeesu wona gooduɗo debbo go’oto, jogiiɗo wuro muuɗum boɗɗum. ¹³Ɓen ɗon kuwooɓe kuuɗe maɓɓe boɗɗum, ɓe keɓani ko’e maɓɓe inɗe boɗɗe, ɓe mbaaway ɓe meta kulol walaa dow hoolaaki Yeesu Almasiihu.

Sirru Diina Meeɗen

¹⁴E mi winda ɗerewol ngo’ol, e mi kammoo waroyki to maaɗa naa’ ko neeɓi. ¹⁵Ammaa to mi warilawaayi, ɗerewol ngo’ol wallete andaa no haani njooɗorooɗen nder wuro Allah, waato kawtal tokkuɓe Allah mo yonki, darŋalal jogotoongal goonga. ¹⁶Walaa wongo seko, sirru diina meeɗen e mawni, wiiki:

Almasiihu warii nder ɓandu neɗɗo,

Ruuhu Allah hollii e mo waɗa ko Allah yiɗi,

malaa’ika’en ngi’iimo,

ɗum hokkii habaru maako nder lenyi,

ɗum hoolakemo nder duuniyaaru,

ɗum hocciimo yaaki dow nder mangu maako.

Ekkitinooɓe Fewre

¹Ruuhu Allah tabbitinii wi’uki e balɗe re’uki duuniyaaru woɓɓe yimɓe alay hoolaaki Yeesu, ɓe tokka ekkitinooɓe fewre keɓuɓe andal mu’’en to ginni. ²Ekkitinooɓe ɓen ɓe munaafuki’en, ɓe pewooɓe ɓe nyumo waatungo. ³E ɓe kaɗa teegal, e ɓe kaɗa nyaamuki goɗɗi nyamnduuji. Ammaa Allah waɗii teegal e koo iri nduye nyamndu ngam kooliiɓemo anduɓe goonga njaɓa ngettamo. ⁴Ngam fuu ko Allah waɗi e ɗum wooɗi. Nden to’ ɗum wanya koo ɗume, ammaa ɗum jaɓee nder yettoore, ⁵ngam Wolde Allah e do’aare laaɓiniiɗum.

Kuwanoowo Yeesu Almasiihu Boɗɗo

⁶Taa ekkitinii tokkuɓe Yeesu niini, a wartay kuwanoowo Yeesu Almasiihu boɗɗo mawnoowo nder boliiɗe goonga ɗe hoolaaki Yeesu e ekkitinol bongol ngol tokkuɗaa. ⁷Woɗɗita habaruuji fewre ɗi meere ɗi ngalaa goonga dow Allah. Ekkitin hoore maaɗa tokkuki Allah. ⁸Koo nde ekkitinki ɓandu nafante seɗɗa, tokkuki Allah nafante keerol walaa. Ngam taa waɗii non, ɗum nafante jooni, nden ɗum nafante nder yonki ki keɓataa gaɗa mayde. ⁹Haala ka’a ka tabbutuka ka hewtii ɗum jaɓaka. ¹⁰En kuwa, en piida naa’ seɗɗa ngam en ngaɗii ɓerɗe meeɗen dow Allah mo yonki, Kisnoowo koo moye, waato kooliiɓemo.

¹¹Wi’u ɗum waɗa fuu fii ɗu’um, ekkitinɗum. ¹²Taa’ jaɓu koo moye yawana sukaaku maaɗa, ammaa wartu misaalu to tokkuɓe Yeesu nder meto maaɗa, e ngikku maaɗa, e yidde maaɗa, e hoolaare maaɗa, e jonde maaɗa lamnde. ¹³Ko mi wara, waɗu ka janganki yimɓe Wolde Allah a wa’ajina, a ekkitina. ¹⁴Taa’ fijir dokkal ngal ɗum hokkumaa carel ko ɗum waɗi annabaaku mawɓe kawtal tokkuɓe Yeesu njowanmaa juuɗe dow hoore. ¹⁵Waɗu ka waɗuki fuu fii ɗu’um, waɗu ɓernde maaɗa dow maajum ngam koo moye yi’a yahuki yeeso maaɗa. ¹⁶Faaman hoore maaɗa e ekkitinol maaɗa; waɗu ka waɗukiɗum, ngam taa waɗa non, a hisnay hoore maaɗa e nanayɓema.

No Haani Ɗum Jogoroo Tokkuɓe Yeesu

¹Taa’ haɓan ndottiijo, ammaa metanmo no metirantaa nyaako maaɗa. Waggin kaye’en no mbagginirtaa minyiraaɓe maaɗa, ²rewɓe naye’en boo, bo madu’en maaɗa, surbaaɓe boo, bo minyiraaɓe maaɗa rewɓe nder ɓernde lamnde.

³Mawnin rewɓe ɓe ngalaa wallooɓe ɓe worɓe mu’’en maayi. ⁴To debbo mo gorko muuɗum maayi e woodi ɓiɓɓe koo taaniraaɓe, ɓe puɗɗa ekkitaaki ko diina maɓɓe wi’i e haani ɓe ngaɗana danyooɓe5.4: Waato danyooɓe e maama’en fuu. maɓɓe, non ɓe ngaatiranta danyooɓe maɓɓe ko ɓe ngaɗaniɓe, ngam Allah e nana belɗum non. ⁵Debbo mo gorko muuɗum maayi alaaɗo kanum tan walaa ballayɗomo, o waɗii ɓernde maako dow Allah won ɗon, e mo waɗa ka do’aare e mo toroomo jemma e nyalawma. ⁶Ammaa debbo mo gorko muuɗum maayi giɗanɗo hoore muuɗum jonde nanki belɗum, o yaadake o maayii koo nde e mo foofa. ⁷Wi’u tokkuɓe Yeesu ngaɗa non, ngam to’ goɗɗo heɓa ko huɗirtaɓe. ⁸Fuu mo wallaayi bandiraaɓe muuɗum, ko ɓuri maa wuro muuɗum, o alii hoolaaki Yeesu e goonga, o ɓurii mo tokkaayi Yeesu halluki.

⁹To’ ɗum winda inde debbo mo gorko muuɗum maayi nder inɗe rewɓe ɓe worɓe mu’’en maayi naa o hewtii duuɓi 60 yaaki yeeso. Non maa doole o jooɗodakeno e gorko maako e goonga, o tokkaayi worɓe. ¹⁰Doole o warta mo ɗum andiri waɗuki kuuɗe boɗɗe, ekkitinɗo ɓiɓɓe maako boɗɗum, jaɓɓotooɗo hoɓɓe, gaɗanoowo tokkuɓe Yeesu fii boɗɗum nder lesnuki hoore, balloowo yimɓe nattuɓe torra, gaɗuɗo hoore muuɗum dow waɗuki boɗɗum nder koo ɗume.

¹¹Ammaa taa’ windu inɗe rewɓe sukaaɓe ɓe worɓe mu’’en maayi nder inɗe rewɓe ɓe worɓe mu’’en maayi. Mi wi’u non ngam to suuno worɓe ummanakeɓe, ngo senday hakkiilo maɓɓe e alkawal ngal ɓe ngaɗani Yeesu, ɓe ngaɗa wongal teegal. ¹²Nden kiita Allah nangayɓe ngam ɓe ngewii alkawal ngal ɓe ngaɗannoomo arande. ¹³Gaɗa non, ɓe kuwataa wongal kuugal sey natte‑natte gureeje, ammaa ko ɓuri non halluki, ɓe ngaɗay ka metuki haalaaji kalluɗi dow yimɓe e ɓe mbi’a ko haanaa wi’eeki. ¹⁴Ngam maajum mi ɓurii yiɗuki rewɓe sukaaɓe ɓe worɓe mu’’en maayi ngaɗa teegal, ndanya ɓiɓɓe, paamana wuro maɓɓe, ngam to’ wanywanyɓe meeɗen keɓa no metirta fii kalluɗum dow meeɗen. ¹⁵Mi wi’u non ngam woɓɓe nder maɓɓe celii tokkii Ceyɗan. ¹⁶To goɗɗo debbo tokkuɗo Yeesu e woodi bandiraaɓe rewɓe ɓe worɓe mu’’en maayi, sey o wallaɓe. To’ o alda kawtal tokkuɓe Yeesu e teddoral, ngam ɓe mbaawa ɓe mballa rewɓe ɓe worɓe mu’’en maayi ɓe ngalaa wallooɓe.

¹⁷Mawɓe nder kawtal tokkuɓe Yeesu ardotooɓe boɗɗum e haani ɓe ɓura hokkeeki mangu, ɓurɓe maa kamɓe ngoni wa’ajinooɓe e ekkitina. ¹⁸Mi wi’u non ngam aayaare wi’ii, “Taa’ maɓɓan ngaari honduko carel ko ndi sorɓata,” nden, “Kuwoowo e haani ɗum yoɓamo.”5.18: TA 25.4; Maat 10.10; Luk 10.7.¹⁹To neɗɗo go’oto wi’ii mawɗo nder kawtal tokkuɓe Yeesu waɗii ko wooɗaa, taa’ jaɓuka sey ni to e woodi ceydiiɓe ɗiɗo koo tato.5.19: TA 17.6; 19.15.²⁰Waggin gaɗooɓe hakke yeeso koo moye, ngam koriiɓe kula.

²¹Yeeso Allah e Yeesu Almasiihu e malaa’ika’en ceniiɓe, e mi wagginmaa taa’ waɗu yidde hoore nder waɗuki ko mbiimaami. ²²Taa’ yaawu yowanki koo moye juuɗe ngam waɗuki do’aare suɓukimo ardiiɗo. Non maa taa’ waɗu hoore maaɗa nder goɗɗum ko wooɗaa ɗum woɓɓe ngaɗata. Waɗu jonde lamnde.

²³Taa’ yaru ndiyam tan, ammaa yaru ndiyam inabojam seɗɗa ngam fukkinki nyawu ummantooɗumma nder reedu.

²⁴Hakke woɓɓe yimɓe e njayri ɗum woni ko ɗum foonda ngikku maɓɓe, ammaa hakke woɓɓe sey yeeso ɗum wurtoyto. ²⁵Non maa kuuɗe boɗɗe e njayri ɗe ngoni, koo maa e ɗe cuuɗii ɗe mburtoyto.

¹To maccuɓe e tokka Yeesu, e haani ɓe mawnina jeyɓeɓe, ngam to’ goɗɗo meta haala kalluka dow Allah e ekkitinol meeɗen. ²To maccuɓe ɓen e ngoodi jeyɓeɓe tokkuɓe Yeesu, to’ ɓe njawanaɓe ngam kamɓe maa ɓe tokkuɓe Yeesu. Ammaa ɓe kuwanaɓe ko ɓuri wooɗuki, ngam nyaamooɓe bote kuuɗe maɓɓe ɓe tokkuɓe Yeesu, giɗaaɓe.

Ekkitinol Fewre e Risku Ɗum Goonga

Doole ekkitinaa ɗu’um fuu nga’ajinaaɗum. ³Fuu ekkitinɗo ekkitinol feere caliingol tokka boliiɗe goonga ɗe Yeesu Almasiihu Joomiraawo meeɗen, ɗonmaa o wanyi ekkitinol kollungol no tokkirten Allah, ⁴o kewɗo mangu hoore, walaa ko o andi. O giɗɗo geddi e foɗfoɗtirki dow boliiɗe. Foɗfoɗtirki kin e wadda lawliiru, e yeddootirki, e huɗhuɗtirki, e nyumooji kalluɗi dow yimɓe. ⁵O giɗɗo yeddootirki ki re’ataa e yimɓe ɓe nyumo baatungo, ɓe ngalaa goonga, nyumooɓe tokkol Allah ɗum ɗatal heɓuki ceede.

⁶Goonga, e woodi risku mawɗum nder kulol Allah to en munyii dow ko ngooduɗen. ⁷Ngam en ngardaayi e goɗɗum nder duuniyaaru, non maa en co’’odataako e goɗɗum. ⁸Too, to en ngoodi nyamndu e kolte, ɗum heƴii’en. ⁹Ammaa giɗɓe riskuki, saɗaa ɓe ngaɗa ko halli, ɓe njana nder tarkowol suuno fuu fii meerejum. Suuno ngon fooɗanayɓe torra ɓe lalla ɓe kalka. ¹⁰Ngam yidde ceede woni fuɗɗoode koo iri ɗume fii kalluɗum. Ngam yidde ceede, woɓɓe alii hoolaaki Yeesu ɓe pooɗani ko’e maɓɓe torraaji kalluɗi.

No Haani Tokkuɗo Yeesu Jooɗoroo

¹¹Ammaa an, nde a hoolake Allah, woɗɗita fuu fii ɗu’um. Waɗu hoore maaɗa dow waɗuki ko wooɗi, e tokkuki Allah, e hoolaakimo, e yidde, e munyal, e hakkiilo. ¹²Waɗu keerol ko mbaawataa waɗuki nder hoolaaki Yeesu Almasiihu. Keɓanaa hoore maaɗa yonki ki re’ataa, ngam kanjum waɗi ɗum noddumaa carel ko njaɓuɗaa Yeesu yeeso yimɓe ɗuɗɓe. ¹³Yeeso Allah gaɗanɗo koo ɗume yonki, e yeeso Yeesu Almasiihu biiɗo goonga dow muuɗum yeeso Bilaatus kulol walaa,6.13: Yah 18.37.¹⁴e mi wi’umaa, tokku ko Allah wi’i e goonga naa nyalnde nde Joomiraawo meeɗen Yeesu Almasiihu wartoyta. ¹⁵O wartay e carel ngel Allah suɓanimo. Allah o barkiɗinaaɗo, kanko tan jeyi laamu, Laamiiɗo lamlamɓe, Joomu koo ɗume. ¹⁶Kanko tan woni mo maayataa, e mo jooɗii nder jayngol, walaa potuɗo ɓaddoo haade maagol, walaa meeɗuɗo yiikimo, walaa baawayɗo yi’amo. Mangu e laamu ɗum re’ataa tabbita to maako. Aamin.

¹⁷Waggin gooduɓe risku nder duuniyaaru ndu’u, to’ ɓe mawnina ko’e maɓɓe, to’ ɓe ngaɗa ɓerɗe maɓɓe dow risku ɗum tabbitataa, ammaa ɓe ngaɗa ɓerɗe maɓɓe dow Allah, kokkuɗo’en koo ɗume ɓernde go’o ngam nanen belɗum. ¹⁸Wi’uɓe ɓe ngaɗa ko wooɗi, ɓe ngarta gaɗooɓe kuuɗe boɗɗe, ɓe ngarta kokkooɓe caahu ɓernde go’o, giɗɓe senduduki ko ɓe ngoodi e woɓɓe. ¹⁹To ɓe ngaɗii non, ɓe ndesanii ko’e maɓɓe risku tabbutuɗum ngam Nyalnde Jaango, ngam ɓe mbaawa heɓuki yonki tabbitayki.

²⁰Timooti, joga ko Allah hokkumaa boɗɗum. Woɗɗita haalaaji ɗi ngalaa goonga dow Allah e geddi meereeji ɗi woɓɓe yimɓe noddirta “andal,” ammaa naa’ ɗum goonga. ²¹Ngam woɓɓe e mbi’a e ngoodi andal, nder non ɓe alii hoolaaki Yeesu.

Allah barkiɗina’on.