1 Tasaloonikanko’en

Ɗerewol Arandewol Ngol Bulus Windani

Tasaloonikanko’en

Habaru dow ɗerewol ngo’ol

Bulus lilaaɗo Yeesu windi ɗerewol ngo’ol. O windangol tokkuɓe Yeesu wonɓe gariiri Tasaloonika ngondi nder leydi Makidooniya. E ɗum kammoo Bulus windii ɗerewol ngo’ol hakkunde duuɓi 50-51 A.D., waato hakkunde duuɓi 50 e 51 gaɗa danyngol Yeesu. O windungol carel ko o woni e gariiri Korinti gaɗa o riiwaama daga gariiri Tasaloonika.

O windungol ngam o sembiɗina tokkuɓe Yeesu dow hoolaare maɓɓe. O yettii Allah ngam hoolaare maɓɓe, e holluki yidde hakkunde maɓɓe, e waɗuki ɓernde maɓɓe dow Almasiihu. O sembiɗini tokkuɓe Yeesu dow nyalnde wartoyki Almasiihu. O ekkitiniiɓe no ɓe njooɗortoo e no ɓe ngaɗirta ka kuugal haa Yeesu wartoya.

Ko Woni Nder:

Kownol Bulus (1.1)

Hoolaare Tasaloonikanko’en (1.2—3.13)

Jonde yimɓe nde Allah yiɗi (4.1‑12)

Ko hollata wartoyki Yeesu (4.13—5.11)

Sembiɗinki cakitiiki (5.12‑22)

Kownol cakitiingol (5.23‑28)

¹Min Bulus e Siila e Timooti windi ɗerewol ngo’ol. Min mbindanngol tokkuɓe Yeesu wonɓe gariiri Tasaloonika ɓe Allah Nyaako Mo Dow e Yeesu Almasiihu Joomiraawo jeyi.1.1: KL 17.1.

Allah barkiɗina’on hokka’on jam.

Jonde Tasaloonikanko’en e Hoolaare Maɓɓe

²Koo ndeye e min ngetta Allah ngam mooɗon on fuu, e min ngaɗana’on do’aare. ³Yeeso Allah meeɗen Nyaako meeɗen Mo Dow, e min nyuma dow kuuɗe mooɗon ɗe hoolaare, e no yidde nde ngooduɗon waɗata’on on kuwa naa’ seɗɗa, e no munyirton nder torra ngam kammunde mooɗon dow Joomiraawo meeɗen Yeesu Almasiihu. ⁴Bandiraaɓe ɓe Allah yiɗi, e min andi Allah suɓii’on. ⁵Ngam Habaru Belɗum ɗum min ngaddani’on naa’ ɗum boliiɗe tan, ammaa e ɗum woodi bawɗe, e Ruuhu Allah, e tabbitinki goonga maajum. On andi iri jonde nde min ngaɗi hakkunde mooɗon ngam ɗum nafana’on. ⁶On ngartii ekkitotooɓe to amin e to Joomiraawo, ngam on njaɓii Wolde Allah nder welwelo ngo Ruuhu Allah hokkata, koo nde on njarii torra naa’ seɗɗa.1.6: KL 17.5‑9.⁷Non ngartirɗon ko fuu tokkuɓe Yeesu wonɓe leydi Makidooniya e Akaaya ekkitotoo. ⁸Ngam daga to mooɗon wolde Joomiraawo heɓi sankitaaki naa’ e leydi Makidooniya e Akaaya tan, ammaa koo toye ɗum andii hoolaare mooɗon dow Allah. Ngam non naa’ sey to min mbi’ii goɗɗum dow maajum. ⁹Ngam kamɓe e ko’e maɓɓe kokkata habaru no njaɓɓoriiɗonmin ko min ngari to mooɗon. Ɓe kokkiimin habaru no alirɗon tokkuki gunkiiji ngartuɗon to Allah, ngam kuwanon Allah mo yonki mo goonga, ¹⁰nden keɗooɗon wartoyki Ɓiɗɗo maako daga dow, mo o ummini daga mayde, waato Yeesu kisnayɗo’en daga monnere Allah garaynde.

Kuuɗe Bulus Nder Tasaloonika

¹Bandiraaɓe, onon e ko’e mooɗon on andi garol amin to mooɗon naa’ e meere ngol woni. ²Ammaa koo nde ndenno min njarii torra e semtineeki e Filibi, non no anduɗon, e ballal Allah meeɗen min kokkii’on Habaru Belɗum ƴiwoyɗum to maako kulol walaa, koo nde yimɓe nganyiimin naa’ seɗɗa.2.2: KL 16.19‑24; KL 17.1‑9.³Carel ngel min torii’on njaɓon Habaru Belɗum, min kuutiraayi fewre, walaa halleende nder ɓerɗe amin, min ƴoyraayi’on. ⁴Ammaa non no Allah hooloriimin hokkimin kuugal wa’ajinki Habaru Belɗum, non min nga’ajinirtaɗum, naa’ ngam min mbelnana yimɓe ɓerɗe, ammaa ngam min mbelnana Allah ɓernde kanko poondoowo ɓerɗe amin. ⁵On andi min meeɗaayi metanki’on meto belɗum honduko, non maa min ngalaa suuno goɗɗum ngo boliiɗe amin suuɗata, Allah woni ceyduujo amin. ⁶Min ɗaɓɓitaayi mangu to yimɓe, koo to mooɗon, koo to woɓɓe, koo nde min mbaaway min mbi’a’on doole ngaɗanonmin goɗɗum ngam min lilaaɓe Almasiihu. ⁷Ammaa e min jogorii’on seese‑seese no maduujo jogortoo ɓingel muuɗum. ⁸Ngam yidde nde min ngiɗi’on haa e min ciryii naa’ min kokka’on Habaru Belɗum ɗum Allah tan, ammaa fuu e yonkiiji amin, ngam on ngartii ɓe min ngiɗi naa’ seɗɗa. ⁹Bandiraaɓe, on ngejjitaayi kuuɗe ɗe min kuwi naa’ seɗɗa. Min kuwii jemma e nyalawma ngam to’ min njowana goɗɗo nder mooɗon wongal teddoral carel ko min nga’ajinanta’on Habaru Belɗum ƴiwoyɗum to Allah.

¹⁰Onon on ceydu’en, Allah maa o ceyduujo dow no min njooɗorinoo jonde ceniinde e aadilaaku e jonde nde walaa goɗɗum ko wooɗaa nder mooɗon, onon kooliiɓe Yeesu. ¹¹Ngam on andi no nyaako jogorii ɓiɓɓe muuɗum, non min jogorii’on. ¹²Min mbagginii’on, min cembiɗinii’on, min mbi’ii’on doole ngaɗon jonde belnanaynde Allah ɓernde nodduɗo’on nder Laamu maako e teddungal maako.

¹³Non maa koo ndeye e min ngetta Allah, ngam carel ngel njaɓuɗon Wolde Allah nde nanɗon to amin, on njaɓaayinde bo wolde neɗɗo, ammaa on njaɓiinde nde Wolde Allah, non no nde wontindiri. E nde huwa nder ɓerɗe mooɗon, onon kooliiɓe Allah. ¹⁴Bandiraaɓe, on ngartii ekkitotooɓe jonde tokkuɓe Allah wonɓe leydi Yahuudiya ɓe Yeesu Almasiihu. On njarii torra to yimɓe leydi mooɗon non no kamɓe maa ɓe njariri torra to juuɗe Yahuudanko’en.2.14: KL 17.5.¹⁵Yahuudanko’en ɓen mbari Yeesu Joomiraawo e annabo’en, nden ɓe ndiiwimin. E ɓe ngaɗa ko Allah yiɗaa, e ɓe nganya koo moye!2.15: KL 9.23,29; 13.45,50; 14.2,5,19; 17.5,13; 18.12.¹⁶E ɓe kaɗamin wa’ajinanki yimɓe naa’ Yahuudanko’en ngam to’ yimɓe ɓen keɓa kisndam. Non e waɗa koo ndeye e ɓe kebbina poondirɗum hakke maɓɓe. Ammaa monnere Allah yaadake jipponoyakeɓe.

Bulus Yiɗii So’’aaki Tasaloonika

¹⁷Bandiraaɓe, ɗum sendii’en ngam carel seɗɗa nder ɓandu, ammaa min alaayi nyumuki dow mooɗon. Min kaaɓii yiiki’on; ngam non min ngaɗii ko min mbaawata waɗuki min ngi’a’on gite e gite. ¹⁸Min ngiɗii warki to mooɗon. Goonga, min Bulus, mi yiɗii mi wara naa’ nde go’o naa’ nde ɗiɗi, ammaa Ceyɗan haɗiimin. ¹⁹Dow ɓeye min ngaɗi ɓerɗe amin? Ɓeye mbelnantamin ɓerɗe? Ɓeye ngoni ɓe min mantortoo yeeso Joomiraawo meeɗen Yeesu nyalnde wartoyki maako? Naa’ ɗum onon? ²⁰Goonga, ɗum onon min mantortoo. Onon ngoni belɗum ɓerɗe amin.

¹Ngam non nde min mbaawaayi munyuki, sey min ngi’i ɗum ɓurii wooɗuki ɗum alamin e Atina, minon tan.3.1: KL 17.15.²Min liloyi bandiraawo amin Timooti to mooɗon, mo min kuudata, e mo huwana Allah nder hokkuki Habaru Belɗum ɗum Almasiihu. Min lilumo ngam o tabbitina hoolaare mooɗon o sembiɗina’on, ³ngam to’ torra ka njarɗon waɗa goɗɗo mooɗon yewra ala hoolaaki Yeesu. Onon e ko’e mooɗon on andi doole njaren torra iri ka’a. ⁴Ngam carel ko min ngondunoo e mooɗon, min ngaɗii ka wiiki’on daga ilaa en njaray torra. Ɗum boo waɗii non, no anduɗon. ⁵Ngam non, nde tampumi munyuki, mi liloyii ngam mi nana habaru hoolaare mooɗon. E mi hula koo Ceyɗan majjinii’on, kuugal amin wartii meere.

⁶Ammaa jooni Timooti wartii daga to mooɗon, o hokkiimin habaru boɗɗum dow hoolaare mooɗon e yidde nde ngooduɗon. O wi’iimin koo ndeye on nyuma nyumol bongol dow amin, nden on ngiɗi yiikimin non no min ngiɗiri yiiki’on.3.6: KL 18.5.⁷Ngam non, bandiraaɓe, nder fuu wannaare e torra ɗum min njari, on pewnaniimin ɓerɗe ngam hoolaare mooɗon. ⁸Jooni e min ngoodi yonki goonga, to on ndarake e sembe nder tokkuki Joomiraawo. ⁹Iri ndeye yettoore min ngettata Allah ngam mooɗon? E min ngettamo ngam belɗum ɓernde ɗum min nanata yeeso maako ngam mooɗon. ¹⁰Jemma e nyalawma e min ngaɗa do’aare naa’ seɗɗa ngam min puɗɗita min ngi’a’on gite e gite, min kebbitina ko ndulluɗon nder hoolaare mooɗon.

¹¹Allah Nyaako meeɗen e hoore muuɗum e Joomiraawo meeɗen Yeesu siryanoomin laawol no min ngarirta to mooɗon. ¹²Joomiraawo ɓeyda yidde nde ngiɗindirɗon naa’ seɗɗa e yidde nde ngiɗɗon woɓɓe maa, non no yidde amin ɓeydorii dow mooɗon. ¹³O sembiɗina ɓerɗe mooɗon ngam ngarton ɓe ngalaa goɗɗum ko wooɗaa, ngarton ceniiɓe yeeso Allah Nyaako meeɗen nyalnde wartuki Joomiraawo meeɗen Yeesu e fuu ceniiɓe maako.

Iri Jonde Nde Allah Yiɗi

¹E re’irde bandiraaɓe, e min toroo’on, ngam Yeesu Joomiraawo, ngaɗee jonde kaanunde nde Allah nanata belɗum mayre, non no ekkitiiɗon to amin, non no njooɗoriiɗon jooni. Ɓeydee jooɗoraaki non. ²Ngam on andi min mbi’ii’on ko Yeesu Joomiraawo wi’i ngaɗon. ³Ngam Allah e yiɗi ngarton ceniiɓe, ngoɗɗitooɗon waɗuki njeenu. ⁴Koo moye mooɗon ekkitoo no surirta ɓandu muuɗum nder senaaki e mangu, ⁵naa’ nder suuno ngo wooɗaa non no heeferɓe ɓe andaa Allah ngaɗata. ⁶Dow fii ɗu’um, to’ goɗɗo hallana bandiraawo muuɗum koo waɗanamo ko wooɗaa. Min mbi’ii’on ka daga arande, min mbagginii’on wiiki, Joomiraawo waatanay gaɗoowo non e bone. ⁷Allah noddaayi’en ngam ngarten ɓe cenaaki, ammaa o noddu’en ngaɗen jonde ceniinde. ⁸Ngam non, fuu ganyuɗo ekkitinol ngo’ol, naa’ neɗɗo o wanyi, Allah o wanyi, kokkoowo’on Ruuhu maako.

⁹Dow no haani ngiɗindiron boo, naa’ sey to goɗɗo windanii’on, ngam onon e ko’e mooɗon Allah ekkitinii’on ngiɗindiron. ¹⁰Min tabbitinii on ngiɗi fuu bandiraaɓe meeɗen wonɓe leydi Makidooniya. Fuu e non bandiraaɓe, e min ɓeyda wiiki’on, ɓeydee waɗuki non. ¹¹Ngaɗee ko mbaawoton waɗuki ngaɗon jonde jam, paamanee ko woni yeeso mooɗon tan, on kuutira juuɗe mooɗon non no min mbi’i’on ngaɗon. ¹²Non waɗay ɓe tokkaayi Yeesu ndarda’on e mangu, nden on njowataa kammunde mooɗon dow koo moye ngam ko ngiɗɗon.

Wartoyki Joomiraawo

¹³Bandiraaɓe, e min ngiɗi andon goonga dow ɓen ɗon tokkuɓe Yeesu mayɓe ngam to’ ngaɗon ka wannuki bo yimɓe horiiɓe ɓe ngalaa kammunde. ¹⁴Nde en njaɓii Yeesu maayii ummake, non maa en njaɓii Allah wadday tokkuɓe Yeesu mayɓe hawti e Yeesu.

¹⁵E min mbi’a’on dow ko wolde Joomiraawo wi’i, carel ngel Joomiraawo wartata, goonga enen gooduɓe yonki en artataa tokkuɓe Yeesu mayɓe yaaki dow. ¹⁶Ngam Joomiraawo e hoore muuɗum jippoyto daga dow e noddol cembingol, e hononde malaa’ikaajo mawɗo, e duudol luwal Allah. Mayɓe e tokki Almasiihu kamɓe artata ummaaki. ¹⁷Nden enen tokkuɓe Yeesu gooduɓe yonki e carel ngel ɗum hoccay’en hawti e maɓɓe nder duule ngam kawren e Joomiraawo e njayri dow. Gaɗa ɗon en njooɗodoto e maako haa abadaa.4.15‑17: 1Kor 15.51,52.¹⁸Ngam non, cembiɗinee bandiraaɓe mooɗon e haala ka’a.

Njooɗee On Ciryii Ngam Wartoyki Joomiraawo

¹Onon bandiraaɓe, dow carel e nyalnde5.1: Waato nyalnde Yeesu wartoyta. nde fuu fii ɗu’um waɗata, naa’ sey to ɗum windanii’on. ²Ngam onon e ko’e mooɗon on andi boɗɗum Nyalnde Joomiraawo waray no gujjo wardata jemma.5.2: Maat 24.43; Luk 12.39; 2Biit 3.10.³Carel ngel yimɓe mbi’ata, “E woodi jonde jam, nden ɓernde e waltii,” nden ɗon e ɗon sey halkere yanonoyaɓe. Nde waranayɓe no danyngol waranta debbo gooduɗo reedu, ɓe keɓataa laawol hisuki. ⁴Ammaa onon bandiraaɓe, naa’ nder nyiwre ngonɗon, hakko nyalnde nden ɗon uddoo’on bo gujjo. ⁵Ngam onon on fuu on ɓiɓɓe jayngol, on ɓiɓɓe nyalawma. Enen naa’ en yimɓe jemma koo yimɓe nyiwre. ⁶Ngam non, to’ en ɗaano no woɓɓe ngaɗata, ammaa en njooɗo en ciryii, en curi ko’e meeɗen. ⁷Ngam ɗaanotooɓe, jemma ɓe ɗaanotoo, nden jarooɓe njaru ngiltoo maa, jemma ɓe njarata ɓe ngiltoo. ⁸Ammaa enen, nde en yimɓe nyalawma, sey paamanen ko’e meeɗen. En ɓorno hoolaare e yidde nde warta bo toggoore njamndi meeɗen nde konu, waɗuki ɓerɗe meeɗen dow heɓuki kisndam warta bo humneere njamndi nde konu meeɗen.5.8: Ica 59.17; Aaf 6.13‑17.⁹Allah suɓaayi njaren monnere muuɗum, ammaa o suɓanii’en heɓuki kisndam barka Joomiraawo meeɗen Yeesu Almasiihu. ¹⁰Kanko maayi ngam meeɗen, ngam koo en ngoodi yonki koo en maayii, en njooɗodoto e maako. ¹¹Ngam non, cembiɗindiree mballindiree non no ngaɗoton.

Wagginki e Kownol

¹²Ammaa e mi toroo’on bandiraaɓe, kokkee kuwooɓe nder mooɗon mangu, waato ardiiɓe’on nder kuugal Joomiraawo wagginooɓe’on. ¹³Kokkeeɓe mangu naa’ seɗɗa nder yidde ngam kuugal maɓɓe. Njooɗee jam hakkunde mooɗon.

¹⁴Ɗonmaa e min toroo’on bandiraaɓe, kaɓanee ɓe ngiɗaa kuugal, cembiɗinee gewruɓe, mballee ɓe cembiɗaa, ngaadee munyal e koo moye. ¹⁵Tabbitinee to’ goɗɗo waato halleende e halleende. Ammaa koo ndeye ɗaɓɓitee waɗuki ko wooɗi hakkunde mooɗon. Ngaɗanee koo moye non.

¹⁶Nanee welwelo nder ɓerɗe mooɗon koo ndeye. ¹⁷Ngaɗee ka waɗuki do’aare. ¹⁸Nder fuu ko heɓi’on ngettee Allah, ngam kanjum woni ko Allah yiɗi ngaɗon nder tokkuki Yeesu Almasiihu.

¹⁹To’ on kaɗu kuugal Ruuhu Allah. ²⁰To’ on njawan annabaaku, ²¹ammaa poondee koo ɗume, njogooɗon ko wooɗi. ²²Ngoɗɗitee koo iri ndeye halleende.

²³Allah Joomu Jam e hoore muuɗum wartira’on laaɓuɓe gaɗa e yeeso. O sura yonkiiji mooɗon e ɓerɗe mooɗon e ɓalli mooɗon boɗɗum, ngarton ɓe ngalaa goɗɗum ko wooɗaa nyalnde wartuki Joomiraawo meeɗen Yeesu Almasiihu. ²⁴On ɗon nodduɗo’on, o waɗayɗum ngam o gaɗoowo ko o wi’i.

²⁵Bandiraaɓe, ngaɗaneemin do’aare.

²⁶Kownon fuu bandiraaɓe e hownirki higaaku.

²⁷E mi wi’a’on ngam Joomiraawo ɗum jangana fuu bandiraaɓe ɗerewol ngo’ol.

²⁸Joomiraawo meeɗen Yeesu Almasiihu barkiɗina’on.