1 Biiturus

Ɗerewol

Biiturus

Arandewol

Habaru dow ɗerewol ngo’ol

Biiturus lilaaɗo Yeesu Almasiihu windi ɗerewol ngo’ol. O windiingol hakkunde duuɓi 60‑69 A.D., waato duuɓi 60‑69 gaɗa danyngol Yeesu. O windanngol tokkuɓe Yeesu jooɗiiɓe bigeeje feere‑feere. Ko waɗi ɓe njooɗii nder bigeeje feere‑feere woni goɗɗo laamiiɗo bi’eteeɗo Kaysar Neero torriiɓe sankitiɓe. Biiturus windaniiɓe wiiki ɓe munya nder torra ka ɓe njarata. O wi’iiɓe ɓe ngaɗa jonde aadilaaku, ɓe ngaɗa ɓerɗe maɓɓe dow Yeesu tan, ɓe ngarta ceniiɓe, ɓe ngaɗa ka hoolaaki Yeesu. O holliiɓe no haani tokkuɓe Yeesu njooɗoroo nder waɗuki ko wooɗi, e tokkuki Allah e ɓernde go’o, e yiɗindirki hakkunde maɓɓe.

Ko Woni Nder:

Kownol Biiturus (1.1‑2)

Kammunde bonde (1.3‑12)

Jonde lamnde (1.13‑2.10)

Jonde tokkuɓe Yeesu carel torra (2.11‑4.19)

Paamanee ornde Joomiraawo (5.1‑11)

Kownol cakitiingol (5.12‑14)

¹Min Biiturus lilaaɗo Yeesu Almasiihu windi ɗerewol ngo’ol.

Mi windanngol yimɓe ɓe Allah suɓi, cankitiiɓe, gaɗooɓe jonde koɗaaku e leydi Fantus, e leydi Galaatiya, e leydi Kafadookiya, e leydi Aasiya, e leydi Bitiiniya. ²Allah Nyaako Mo Dow suɓii’on nder yidde maako. Ruuhu maako wartirii’on ceniiɓe, ngam tokkon ko Yeesu Almasiihu wi’i, laaɓon barka ƴiiƴam maako.

Allah ɓeyda barkiɗinki’on, ɓeyda hokkuki’on jam.

Kammunde Bonde

³Yettoore tabbita to Allah, Nyaako Joomiraawo meeɗen Yeesu Almasiihu. Ngam yurmeende maako mawnde o hokkii’en yonki kesum barka ummaaki Yeesu daga mayde. Ngam maajum en ngoodi kammunde tabbutunde, ⁴en keɓay ndonu ngu lallataa, ngu wonnataako, nden ngu re’ataa, ngu ɗum resani’on ton dow. ⁵Onon bawɗe Allah e surana’on barka hoolaaki Yeesu, ngam keɓon kisndam ɗam o siryii wanginki nyalnde re’uki duuniyaaru.

⁶Ngam non, nanee belɗum ɗuɗɗum, koo nde jooni ɗum waɗoto on nattay torraaji feere‑feere carel seɗɗa ⁷ngam tabbitinki hoolaare mooɗon. Hoolaare nden nde ɓuri jiinaari. Koo nde jiinaari nyalnde go’o ɗum re’ay, e ɗum foondiree hiite. Non maa ɗum foonday hoolaare mooɗon ɗum tabbitinande ngam keɓon manteeki, e teddineeki, e mawnineeki nyalnde nde Yeesu Almasiihu wartata. ⁸Koo nde on meeɗaayi yiikimo, on ngiɗimo. Koo nde naa’ on ngi’amo jooni, on koolakemo, on nana belɗum mawɗum nder ɓerɗe mooɗon ƴaɓɓiiɗum meteeki. ⁹Ngam on koolake Yeesu Almasiihu waɗi on keɓa kisndam.

¹⁰Annabo’en gaɗuɓe annabaaku dow caahu ɗum keɓoton, waato kisndam, ɓe ngaɗii ka ɗaɓɓutuki laawol kisndam ɗam ɗon naa’ seɗɗa. ¹¹Ruuhu Allah gonɗum nder ɓerɗe maɓɓe wi’iiɓe no Almasiihu torrortoo, nden gaɗa ɗon o mawninee. Ngam non, ɓe ɗaɓɓitii naa’ seɗɗa ngam ɓe anda moye woni Almasiihu, nden ndeye fii ɗu’um waɗata. ¹²Ɗum wi’iiɓe onon ɓe kuwanta naa’ ko’e maɓɓe, nde ɓe meti dow fuu fii ɗum ɗon ɗum nanɗon jooni. On naniiɗum daga to ga’ajinanɓe’on Habaru Belɗum barka Ruuhu Allah liloyaaɗum daga dow. Koo malaa’ika’en e ngiɗi faamukiɗum.

Jonde Lamnde

¹³Ngam non, ciryee ɓerɗe mooɗon, curee ko’e mooɗon, ngaɗee kammunde mooɗon fuu dow barka ɗum um hokkata’on nyalnde wartoyki Yeesu Almasiihu. ¹⁴Ngaɗee jonde bo ɓiɓɓe gaɗooɓe ko ɗum wi’iɓe. To’ on tokkiran suuno mooɗon ngo ndenno, ngo ngoodunooɗon carel ko on andaa koo ɗume. ¹⁵Ammaa non no Allah nodduɗo’on o ceniiɗo, onon maa, ngartee ceniiɓe nder ko ngaɗoton fuu. ¹⁶Ngam aayaare wi’ii, “Ngartee ceniiɓe, ngam min mi ceniiɗo.”1.16: KLee 11.44,45; 19.2.

¹⁷On nodda Allah Nyaako Mo Dow nder do’aare mooɗon. Nde e mo waɗana koo moye kiita dow kuuɗe ɗe waɗi, o hollataa feerootirol, ngaɗee jonde mooɗon nde koɗaaku e duuniyaaru ndu’u nder kulol Allah. ¹⁸On andi ɗum rimɗinii’on daga ngikkuuji meereeji ɗi ndonuɗon to maama’en mooɗon. Ɗum rimɗiniraayi’on fii re’oojum bo ajurfaari e jiinaari. ¹⁹Ɗum rimɗinirii’on ƴiiƴam Almasiihu gooduɗam daraja. Kanko woni bo karoori ndi walaa goɗɗum ko haanaa. ²⁰Kanko Allah suɓi daga ko ɗum taga duuniyaaru, ammaa ɗum wanginimo ngam mooɗon e balɗe ɗe’e ɗe re’uki duuniyaaru. ²¹Barka maako kooliiɗon Allah, umminɗomo daga mayde, hokkimo mangu. Ngam non, e hoolaare mooɗon e kammunde mooɗon dow Allah ɗum woni.

²²Tokkuki goonga laaɓinanii’on ɓerɗe on ngiɗindiri yidde nde goonga. Ngam maajum, ngiɗindiree e ɓernde go’o. ²³Ngaɗee non ngam Allah hokkii’on yonki kesum barka wolde maako goodunde yonki tabbutunde haa abadaa. ²⁴No aayaare wi’i,

“Fuu yimɓe bo geene mba’i,

fuu laɓki maɓɓe bo piindi ladde wa’i.

Geene e njoora, piindi e saama,

²⁵ammaa Wolde Joomiraawo e nde ɗon haa abadaa.”1.24,25: Ica 40.6‑8.

Nde’e wolde kayre woni Habaru Belɗum dow Yeesu Almasiihu ɗum um wa’ajinani’on.

Onon Ngoni Yimɓe Ceniiɓe Ɓe Allah

¹Ngam non, alee koo iri ɗume ngikku kalluɗum. Alee fewre, e ngikku munaafukiijo, e lawliiru, e huɗuki woɓɓe koo iri kiye. ²No ɓikkoy keccoy ngiɗiri enɗam, onon maa ngiɗiree Wolde Allah non ngam nde waɗa’on cembiɗon nder kisndam ɗam keɓuɗon, ³nde on meeɗii nanki belɗum yurmeende Joomiraawo.2.3: Jab 34.8.

⁴Ngaree to maako. Kanko woni hayre goodunde yonki. Yimɓe nganyiimo, ammaa Allah suɓiimo mawniniimo. ⁵Onon boo, bo kaaƴe gooduɗe yonki, alee ɗum huutira’on ɗum maha wuro ceniingo ngam Ruuhu Allah. Onon ngoni kawtal ardiiɓe diina, on kokka Allah cakkiri2.5: Ɗo’o cakkiri woni mantuki Allah, e mawninkimo, e yettukimo, (WY 7.15; Ibr 13.15) e huwankimo, e holluki ngikku boɗɗum (Ibr 13.16.) ndi Ruuhu maako wallata’on kokkon. E mo jaɓandi laawol Yeesu Almasiihu. ⁶Ngam aayaare wi’ii,

“Raɗɗum, mi suɓii hayre ɓurnde koo ndeye darnuki maadi,

mi tiggiinde nde joɗɗina maadi gariiri Sihiyoona;

fuu kooliiɗomo o semtintaake koo seɗɗa.”2.6: Ica 28.16.

⁷Hayre nden ɗon e nde woodi mangu to mooɗon onon kooliiɓe Yeesu. Ammaa to ganyuɓe kooloomo ɓe ngi’ay no,

“Hayre nde mahooɓe nganyi,

kayre woni hayre ɓurnde koo ndeye darnuki maadi.”2.7: Jab 118.22.

⁸Ɗonmaa wonde aayaare wi’ii,

“Ɗum hayre gaɗoore yimɓe feggoo,

gaɗoore yimɓe njana.”2.8: Ica 8.14,15.

E ɓe peggoo ngam ɓe nganyii waɗuki ko Wolde Allah wi’i. Non ɗum siryaniiɓe.

⁹Ammaa onon ɗum lenyol ngol Allah suɓi, on kawtal ardiiɓe diina kuwanooɓe laamiiɗo mawɗo, yimɓe ceniiɓe, ɓe Allah jeyi. O suɓu’on ngam nga’ajinon habaru kuuɗe maako kayɗiniiɗe. O wurtinoy’on nder nyiwre ngam natton jayngol maako kayɗiniingol.2.9: Wur 19.5,6; Ica 43.20; Wur 19.5; TA 4.20; 7.6; 14.2; Tiit 2.14; Ica 43.21; Ica 9.2.¹⁰Ndenno naa’ on yimɓe Allah, ammaa jooni on yimɓe maako. Ndenno on keɓaayi yurmeende maako, ammaa jooni on keɓii.2.10: Yuuc 2.23.

Maccuɓe Allah

¹¹Onon ɓe ngiɗumi, on hoɓɓe nder duuniyaaru ndu’u, onon naa’ ɗum ɓe ɗo’o. Ngam non e mi toroo’on, cendiree e suunooji ɓandu giɗɗi halkuki’on. ¹²Kollee ngikku boɗɗum nder yimɓe ɓe andaa Allah, ngam to ɓe mbi’ay on kalluɓe, sey ɓe ngi’a kuuɗe mooɗon ɗe boɗɗe, ɓe mawnina Allah nyalnde wartuki maako.

¹³Koo ɗume laamu laamotooɗum yimɓe, tokkee ko ɗum wi’i, ngam non Joomiraawo yiɗi. Tokkee mawɗo laamiiɓe, ardiiɗo dow koo moye, ¹⁴haa e gomna’en, ngam laamiiɗo on liliɓe ɓe kokka gaɗooɓe ko wooɗaa bone, ɓe manta gaɗooɓe ko wooɗi. ¹⁵Ngam Allah e yiɗi ngaɗon ko wooɗi yeeso yimɓe ɓe ngalaa andal, ngam ngaɗon ɓe ala metemeteeji ɗi ngalaa faamu. ¹⁶Naa’ on maccuɓe, on rimɗinaaɓe, ammaa to’ on ngartir rimɗinki mooɗon warta laawol waɗuki ko halli, ammaa ngaɗee jonde bo maccuɓe Allah. ¹⁷Kokkee koo moye mangu, ngiɗee tokkuɓe Yeesu. Kulee Allah, mawninee laamiiɗo.

Yarki Torra Iri Ka Almasiihu Yari

¹⁸Onon maccuɓe, ngaɗee ko jeyɓe’on mbi’i’on kokkonɓe mangu koo ndeye. Naa’ gooduɓe ngikku boɗɗum tan e ɓe caɗaa ngaɗanton non, haa maa e gooduɓe ɓerɗe kaɓooje. ¹⁹To neɗɗo munyii nder torra ngam e nyuma dow ko Allah yiɗi, Allah barkiɗinaymo, to e mo yara torra kan naa’ ngam waɗuki ko wooɗaa. ²⁰To on ngaɗii ko wooɗaa on piyaama on munyii, moye mantata munyal mooɗon? Ammaa to on ngaɗii ko wooɗi on torraama on munyii, Allah barkiɗinay’on. ²¹Dow iri kan ɗon torra Allah noddi’on, ngam Almasiihu maa yarii torra ngam mooɗon. O alanii’on ko tokkoton ngam njooɗorooɗon no o jooɗorii. ²²O meeɗaayi waɗuki hakke koo seɗɗa, ɗum meeɗaayi nanki fewre wurtake daga honduko maako.2.22: Ica 53.9.²³Nde o huɗaa, o waataaki. Nde o yari torra, o wi’aayi o waatoto, ammaa o alanii Allah gaɗoowo kiita goonga.2.23: Ica 53.7.²⁴Kanko e hoore maako jaɓi o yowanee hakke ɗum ngaɗuɗen o ɓilee dow gaafaangal. O waɗu non ngam laawol mayde maako alen waɗuki hakke, njooɗooɗen jonde aadilaaku. No aayaare wi’i, “Barka nawnooɗe maako on njamɗitii.” ²⁵Ndenno on nandii e baali majjuɗi laawol, ammaa jooni ɗum so’’oyii’on ngam tokkon Gaynaako Paamanayɗo yonkiiji mooɗon.2.24,25: Ica 53.5,6.

Jonde Teegal

¹Non maa onon rewɓe teegal, tokkee ko worɓe mooɗon mbi’i. Ngam to e woodi woɓɓe worɓe ɓe tokkaayi Wolde Allah, ɗum gaɗotooɗum ngikku rewɓe maɓɓe waɗa ɓe tokka Allah, naa’ sey to ɓe metanaama,3.1: Aaf 5.22; Kol 3.18.²to ɓe ngi’ii ngikku mooɗon boɗɗum nden ɓe ngi’i on ngaɗa ko ɓe mbi’i. ³To’ mo’’itinaaki ki mo’’itintooɗon warta ki ɓandu tan, bo morɗi, e ko waɗiraa e jiinaari, e kolte gooduɗe ceede.3.3: 1Tim 2.9.⁴Sey ni mo’’itinaaki mooɗon warta mo’’inki ɓerɗe mooɗon e waɗuki ko lallataa waato lestinki hoore, e suruki hoore. Iri kin ɗon mo’’itinaaki ki lallataa; kanki woni ɓurki wooɗuki yeeso Allah. ⁵Ngam ndenno non rewɓe ceniiɓe gaɗuɓe ɓerɗe maɓɓe dow Allah mo’’itinorii nde ɓe tokki worɓe maɓɓe. ⁶Misaalu, Saaratu waɗii ko gorko muuɗum Ibraahim wi’i, e mo noddiramo joomu maako. Jooni, onon ngoni ɓiɓɓe Saaratu to on ngaɗii ko wooɗi, on njaɓaayi goɗɗum hulni’on.3.6: Fuɗ 18.12.

⁷Non maa, onon worɓe, njooɗodee e rewɓe mooɗon no haani. Kokkeeɓe mangu ngam kamɓe ɓe ngalaa sembe bo mooɗon, ɗonmaa onon e rewɓe mooɗon on fuu on keɓay caahu Joomiraawo, waato yonki ki re’ataa. Ngaɗee non ngam to’ goɗɗum haɗa’on waɗuki do’aare.3.7: Aaf 5.25; Kol 3.19.

Yarki Torra Ngam Waɗuki Aadilaaku

⁸Jooni e mi yiɗi yottinki ko mbi’aymi e wiiki, on fuu nyumo mooɗon warta go’o. Njurmindiree, ngiɗindiree no haani tokkuɓe Yeesu ngaɗa, mballindiree, lestinee ko’e mooɗon. ⁹To’ on ngaato halleende e halleende, koo huɗuki e huɗuki, ammaa ngaatoree barkiɗinki, ngam Allah noddii’on ngaɗon non ngam o barkiɗina’on. ¹⁰Aayaare wi’ii,

“Fuu giɗɗo nana belɗum jonde muuɗum,

neeɓa e duuniyaaru,

sey o ala meto kallungo,

o ala fewre.

¹¹O ala waɗuki ko halli, o waɗa aadilaaku;

o ɗaɓɓita jam e ɓernde go’o.

¹²Ngam Joomiraawo e faamana gooduɓe aadilaaku,

e mo nana do’aaje maɓɓe,

ammaa e mo wanya kuwooɓe ko halli.”3.10‑12: Jab 34.12‑16.

¹³To on ngaɗa ko mbaawoton waɗuki ngam ngaɗon ko wooɗi, moye hallanta’on? ¹⁴Ammaa koo to on njarii torra ngam waɗuki ko wooɗi, Allah barkiɗinay’on. Ngam non, to’ on kulu torrayɓe’on, to’ on ngannu.3.14: Maat 5.10.¹⁵Ammaa mawninee Almasiihu nder ɓerɗe mooɗon ngam kanko woni Joomiraawo. Koo ndeye njooɗee on ciryii nootaaki koo moye ƴamuɗo’on dow waɗuki ɓernde ki ngaɗɗon dow Almasiihu. Ngaɗee non nder lesnuki hoore e mawninki.3.14,15: Ica 8.12,13.¹⁶Koo ndeye ɗum tawra’on e ɓernde lamnde, ngam to ɗum huɗii’on, ɓen ɗon kuɗooɓe ngikku mooɗon boɗɗum ngam on tokkuɓe Yeesu ɓe cemta. ¹⁷Ngam ɗum ɓurii neɗɗo yara torra ngam waɗuki fii boɗɗum, to ɗum cuɓol Allah, e dow yara torra ngam waɗuki ko halli. ¹⁸Ngam Almasiihu maayii nde go’o ngam ittuki hakkeeji meeɗen. Kanko o gooduɗo aadilaaku, ammaa o maayii ngam ɓe ngalaa aadilaaku ngam o yaara’en to Allah. Ɗum wariimo, ammaa Ruuhu Allah hokkiimo yonki. ¹⁹Nder bawɗe Ruuhu ɗum o yahi o wa’ajinani ruuhuuji maɓɓaaɗi. ²⁰Ruuhuuji ɗin ɗon kanji ngoni ɗi tokkaayi Allah ndenno e jaamanu Annabi Nuhu. Allah heɗake e munya carel ko Annabi Nuhu waɗata komiwal. Yimɓe seɗɗa tan nattingal kisi ndiyam tufaana, kamɓe njoweetato.3.20: Fuɗ 6.1—7.24.²¹Ndiyam ɗam boo ɗum misaalu baptisma. Jooni baptisma hisnii’on barka bawɗe ummaaki Yeesu Almasiihu daga mayde. Baptisma naa’ ɗum ittuki tuundi daga ɓalli meeɗen, ɗum alkawal ngal neɗɗo waɗani Allah e ɓernde lamnde. ²²Yeesu yahi dow, e mo jooɗii to jungo Allah nyaamo, e mo laamoo malaa’ika’en, e gooduɓe laamu, e gooduɓe bawɗe.

Jonde Tokkuɗo Almasiihu

¹Nde Almasiihu yarii torra nder ɓandu, onon maa ciryee ɓerɗe mooɗon ngam yarki torra. Ngam fuu jarɗo torra nder ɓandu, alii waɗuki hakke. ²Ngam non, nder balɗe mooɗon koriiɗe e duuniyaaru, to’ on ɓeydu tokkuki suuno ɓandu, ammaa tokkee ko Allah yiɗi. ³Jonde nde ngaɗɗon ndenno iri nde yimɓe ɓe andaa Allah ngiɗi, nde heƴii non. Ndenno on ngaɗi ka halleende, e suunooji kalluɗi, e yareyareeji pooɗooji jonde meere, e mawninki gunkiiji fii koo wooɗaa. ⁴E ɓe kayɗina ngam on kawtataa ko’e e maɓɓe jooni nder waɗuki kuuɗe ɗuɗɗe ɗe mbooɗaa. Ngam non e ɓe kuɗa’on. ⁵Ammaa ɓe mbi’ay Allah ko ɓe ngaɗi, kanko kiitotooɗo ɓe yonki e mayɓe. ⁶Kanjum waɗi haa mayɓe maa nga’ajinanaa Habaru Belɗum dow Yeesu Almasiihu. Ngam koo nde Allah torririiɓe mayde nder ɓandu bo koo moye, yonkiiji maɓɓe njooɗodoto e Allah.

Jogiiɓe Dokke Allah Boɗɗum

⁷Re’uki koo ɗume ɓadake. Ngam non paamee, curee ko’e mooɗon ngam mbaawon waɗuki do’aare. ⁸Ko ɓuri koo ɗume woni, ngiɗindiree naa’ seɗɗa, ngam yidde e waɗa ɗum yaafoo hakkeeji ɗuɗɗi.4.8: Wag 10.12. ⁹Ngaɗee ka jaɓɓootirki nder gureeje mooɗon naa’ e metemeteeji. ¹⁰Nde Allah hokki koo moye tokkuɗo Yeesu dokkal, kuutiree dokkal ngal hakkunde mooɗon no paamanoowo dokkal Allah boɗɗum waɗata. ¹¹Fuu ga’ajinoowo, sey wa’ajina Wolde Allah. Fuu balloowo sey wallira sembe ɗum Allah hokkimo, ngam nder koo ɗume ɗum mawnina Allah barka Yeesu Almasiihu. Mangu e laamu tabbita to maako haa abadaa abadin. Aamin.

Torra Ngam Tokkuki Yeesu

¹²Onon ɓe ngiɗumi, to’ on kayɗin dow torra kalluka keɓuka’on. Ka heɓu’on ngam ɗum foonda’on. To’ on nyumu goɗɗum fii kesum heɓii’on. ¹³Ammaa nanee belɗum to on njara torra iri ka Almasiihu yari, ngam to o wartii nder mangu maako nanon belɗum naa’ seɗɗa. ¹⁴On barkiɗinaaɓe, to e ɗum huɗa’on ngam inde Almasiihu, ngam Ruuhu Allah gooduɗum teddungal e wondi e mooɗon. ¹⁵Ammaa to’ goɗɗo nder mooɗon yara torra ngam waɗuki warhoore, koo nguyka, koo waɗuki ko halli, koo waɗuki ko waɗaaka. ¹⁶Ammaa to goɗɗo yarii torra ngam o tokkuɗo Yeesu, too, to’ o nana cemtuɗum, sey ni o yetta Allah ngam o noddiraama inde Almasiihu.

¹⁷Ngam carel waɗii ngel ɗum waɗanta yimɓe kiita. Ɓe ɗum fuɗɗanta waɗanki kiita boo woni yimɓe Allah. To dow meeɗen enen yimɓe Allah ɗum fuɗɗirta kiita, too, no ɗum wartanta ganyuɓe tokka Habaru Belɗum ɗum Allah? ¹⁸Aayaare wi’ii,

“To e ɗum saɗi aadili’en kisa,

too, ko heɓata ɓe kulataa Allah e gooduɓe hakke?”4.18: Wag 11.31.

¹⁹Ngam non, fuu jarooɓe torra dow ko Allah yiɗi, ɓe ngaɗa ko haani. Ɓe ngaɗa yonkiiji maɓɓe nder jungo Allah Taguɗo koo ɗume. Kanko o kebbinoowo alkawal maako.

Faamanki Ornde Joomiraawo

¹E mi toroo mawɓe kawtal tokkuɓe Yeesu gonɓe nder mooɗon. Min maa mi mawɗo nder tokkuɓe Yeesu, bandiraawo mooɗon, ceydiiɗo torra ka Almasiihu yari, keɓayɗo geɗal muuɗum nder mangu maako to o wartoyii. E mi toroo’on, ²paamanee ornde Allah nde ɗum tambini’on. Paamaneende nder belɗum ɓernde, naa’ bo doole ɗum waɗata’on, ɗonmaa naa’ ngam heɓuki ceede, ammaa ngam on ngoodi yidde kuugal ngal nder ɓerɗe mooɗon.5.2: Yah 21.15‑17.³To’ on kollu yimɓe ɓe Allah tambini’on laamu sembe, ammaa ngartee ko ɓe ekkitotoo to mooɗon. ⁴Ngam to Almasiihu laamiiɗo woynaaɓe wartoyii, on keɓay giifol mangu ngol haa abadaa.

⁵Onon sukaaɓe, ngaɗee ko mawɓe kawtal tokkuɓe Yeesu gonɓe nder mooɗon mbi’i. On fuu ngartee leynooɓe ko’e, mballindiree hakkunde mooɗon. Ngam aayaare wi’ii, “Allah wanyii gooduɓe mangu hoore, ammaa e mo walla lesnuɓe ko’e.”5.5: Wag 3.34.⁶Ngam non, lestinee ko’e mooɗon yeeso Allah mo bawɗe, ngam o waɗa keɓon mangu e carel ngel o yiɗi.5.6: Maat 23.12; Luk 14.11; 18.14.⁷Tambinaneemo fuu ko wannata’on, ngam e mo faamana’on.

⁸Curee ko’e mooɗon, njooɗooɗon on ciryii. Ganyo mooɗon Ceyɗan e mo woosoo bo sembindu ɓernundu e mo ɗaɓɓita mo o halkata. ⁹Nganyeemo, ndarooɗon dow hoolaaki Yeesu e sembe. On andi bandiraaɓe mooɗon fuu nder duuniyaaru e njara iri kan ɗon torra. ¹⁰Nden gaɗa on njarii torra carel seɗɗa, Allah gooduɗo yidde fuu, nodduɗo’on ngam keɓon geɗal nder teddungal maako tabotoongal barka Almasiihu, kanko e hoore maako o wartiray’on keewuɓe, o joɗɗina’on, o sembiɗina’on bo tafaare. ¹¹Laamu tabbita to maako haa abadaa abadin. Aamin.

Kownol Cakitiingol

¹²Silbaanus walliyam mbindanmi’on ɗerewol ngo’ol pamarol. E yiiki am o tokkuɗo Yeesu kooleteeɗo. E mi yiɗi mi sembiɗina’on mi wi’a’on ɗu’um woni caahu Allah ɗum goonga. Ndaree dow maajum e goonga.5.12: KL 15.22,40.

¹³Kawtal tokkuɓe Yeesu wonɓe ɗo’o Baabiila,5.13: Ɗum gaɗotooɗum gariiri ndi’i ɗum Rooma. Fuu to torra yaari yimɓe ɓe’e, bannye e ɓe noddira wigeere nden Baabiila ngam maama’en maɓɓe njaaraanoma maccungaaku nder leydi bi’eteendi Baabiila. ɓe Allah suɓi no o suɓiri’on, e ɓe kowna’on. Markus maa, ɓiɗɗo am nder tokkuki Yeesu, e howna’on.5.13: KL 12.12,25; 13.13; 15.37‑39; Kol 4.10; Filim 24.¹⁴Kowniree hakkunde mooɗon kownol yidde.

Allah hokka’on jam onon tokkuɓe Almasiihu fuu.