تِيتُسْ

طٜرٜوٛلْ نغٛلْ بُلُسْ وِنْدَنِ

تِيتُسْ

حَبَرُ دٛوْ طٜرٜوٛلْ نغٛعٛلْ

بُلُسْ لِلَاطٛ يٜىٰسُ اَلْمَسِيحُ وِنْدِ طٜرٜوٛلْ نغٛعٛلْ دُوٻِ 56 غَطَ دَݧْنغٛلْ يٜىٰسُ؞ اٛ وِنْدَنْغٛلْ تِيتُسْ نٜطّٛ لٜيْدِ کِرِتِ تٛکُّطٛ يٜىٰسُ؞ تِيتُسْ نَاع اٛ يَحُودَنْکٜىٰجٛ؞ اٛ سُکَ، اَمَّا اٛ وَرْتِي بَلّٛووٛ بُلُسْ ندٜرْ کُوغَلْ مُوطُمْ نغَلْ وَعَجِنْکِ حَبَرُ بٜلْطُمْ؞ بُلُسْ اَلِيمٛ تٛ کِرِتِ نغَمْ اٛ فَامَنَ کَوْتَلْ تٛکُّٻٜ يٜىٰسُ غٛنْٻٜ تٛنْ؞

ندٜرْ طٜرٜوٛلْ نغٛعٛلْ بُلُسْ مٜتِي دٛوْ فِي تَتُمْ مَوْطُمْ؞ اَرَنْدٜ، بُلُسْ اٜ سِفْتٛرَنَ تِيتُسْ نغِکُّ طُمْ اَرْدِيٻٜ کَوْتَلْ تٛکُّٻٜ يٜىٰسُ حَانِ نغَطَ؞ اٛ مٜتَنْ تِيتُسْ دٛوْ طُعُمْ نغَمْ نغِکُّوجِ کَلُّطِ طِ طُطْٻٜ ندٜرْ کِرِيتِيَنْکٛعٜنْ نغٛودِ؞ طِطَٻُمْ وٛنِ، بُلُسْ اٜ حٛکَّ تِيتُسْ شَاوٛرِ نٛ اٛ اٜکِّتِنِرْتَ يِمْٻٜ فٜىٰرٜ‑فٜىٰرٜ غٛنْٻٜ ندٜرْ کَوْتَلْ تٛکُّٻٜ يٜىٰسُ، بٛ ندٛتِّعٜنْ، اٜ رٜوْٻٜ نَيٜعٜنْ، اٜ سُرْبَاٻٜ، اٜ کَيٜعٜنْ، ندٜنْ اٜ مَشُّٻٜ؞ شَکِتِيطُمْ وٛنِ، بُلُسْ حٛکِّي تِيتُسْ شَاوٛرِ دٛوْ نٛ حَانِ تٛکُّٻٜ يٜىٰسُ نجٛوطٛرٛو؞ اٛ وِعِ اٜ حَانِ ٻٜ نجٛوطٛدٛو جَمْ، ٻٜ نغِطِندِرَ، ٻٜ اَلَ وَݧْوَݧْتِرْکِ، اٜ غٜدِّ، اٜ حٛلُّکِ فٜىٰرٛوتِرٛلْ حَکُّندٜ مَٻّٜ؞

کٛوْنٛلْ بُلُسْ

¹مِنْ، بُلُسْ مَشُّطٛ اَللَّه لِلَاطٛ يٜىٰسُ اَلْمَسِيحُ وِنْدِ طٜرٜوٛلْ نغٛعٛلْ؞ اٛ سُٻِييَمْ نغَمْ مِ سٜمْبِطِنَ يِمْٻٜ اَللَّه شُٻَاٻٜ دٛوْ حٛولَاکِ يٜىٰسُ، مِ اٜکِّتِنَٻٜ غٛونغَ نغَمْ ٻٜ نجٛوطٛو جٛنْدٜ وٛوطُندٜ يٜىٰسٛ اَللَّه؞ ²غٛونغَ کَعَ وَطَيْ ٻٜ نغَطَ ٻٜرْطٜ دٛوْ حٜٻُکِ يٛنْکِ کِ رٜعَتَا؞ اَللَّه وَطِي اَلْکَوَلْ دٛوْ يٛنْکِ کِنْ کٛ دُونِيَارُ تَغٜىٰ، اٛ بٛو فٜوَتَا؞ ³ندٜ شَرٜلْ مَاکٛ وَطِ، کَنْکٛ اَللَّه کِسْنٛووٛ مٜىٰطٜنْ اٛ وَنْغِنِي غٛونغَ کَنْ ندٜرْ وَعَجُ، اٛ وِعِي مِ وَعَجِنَکَ؞ ⁴نغٛعٛلْ طٜرٜوٛلْ، اَنْ مبِنْدَنْمِنغٛلْ تِيتُسْ، اَ ٻِطّٛ اَمْ مٛ غٛونغَ ندٜرْ حٛولَاکِ يٜىٰسُ؞ اَللَّه ݧَاکٛ مٜىٰطٜنْ مٛ دٛوْ، اٜ يٜىٰسُ اَلْمَسِيحُ کِسْنٛووٛ مٜىٰطٜنْ بَرْکِطِنْمَا، حٛکُّمَا جَمْ؞

کُوغَلْ تِيتُسْ اٜ لٜيْدِ کِرِتِ

⁵مِ اَلِيمَ اٜ لٜيْدِ کِرِتِ نغَمْ کٜىٰݧِتَا کٛو طُمٜ کٛ حٛرِي، شُٻَا مَوْٻٜ اٜ کٛو ندِيٜ غَرِيرِ نٛنْ نٛ مبِيمَامِ؞ ⁶دٛولٜ اَرْدِيطٛ ندٜرْ کَوْتَلْ تٛکُّٻٜ يٜىٰسُ وَرْتَ وَلَا کٛ طُمْ حُطِرْتَمٛ، غٛودُطٛ دٜبّٛ غٛعٛتٛ، مٛ ٻِٻّٜ مَاکٛ ٻٜ تٛکُّٻٜ يٜىٰسُ ٻٜ نغَلَا نغِکُّ کَلُّطُمْ کٛو شِيَ حَکِّيلٛ؞ ⁷ندٜ مَوْطٛ کَوْتَلْ تٛکُّٻٜ يٜىٰسُ اٛ کُوَنٛووٛ اَللَّه، دٛولٜ اٛ وَرْتَ وَلَا کٛ طُمْ حُطِرْتَمٛ؞ تٛع اٛ وَرْتَ مَوْنِنٛووٛ حٛورٜ، کٛو جَوْطٛ مٜتِّنْکِ ٻٜرْندٜ، کٛو جَرٛووٛ، کٛو طَٻِّتٛووٛ حَوْرٜ، کٛو غِطّٛ شٜىٰدٜ؞ ⁸اٛ وَرْتَ جَٻّٛتٛوطٛ حٛٻّٜ، غِطّٛ وَطُکِ بٛطُّمْ، شُرْطٛ حٛورٜ مُوطُمْ، اَادِلِيجٛ، شٜنِيطٛ، مٛ حَکِّيلٛ؞ ⁹اٛ وَرْتَ جٛغِيطٛ وٛلْدٜ اَللَّه تَبُّتُندٜ اٜ غٛونغَ نٛ طُمْ اٜکِّتِنِرِمٛ، نغَمْ اٛ وَاوَ سٜمْبِطِنْکِ ٻٜرْطٜ وٛٻّٜ اٛ اٜکِّتِنَٻٜ غٛونغَ؞ طٛنْمَا اٛ وَاوَ حٛلُّکِ غَݧُٻٜ وٛلْدٜ اَللَّه فَرْکُکِ مَٻّٜ؞

¹⁰کَدِمَا اٜ وٛودِ يِمْٻٜ طُطْٻٜ غَݧُٻٜ تٛکَّ غٛونغَ، مٜتٛوٻٜ حَالَاجِ مٜىٰرٜ، مَجِّنٛوٻٜ يِمْٻٜ؞ طُطْٻٜ ندٜرْ يِمْٻٜ ٻٜنْ ٻٜ يَحُودَنْکٛعٜنْ تٛکُّٻٜ يٜىٰسُ؞ ¹¹دٛولٜ طُمْ حَٻَنَٻٜ ٻٜ ندٜعِّتَ، نغَمْ اٜ ٻٜ اٜکِّتِنَ کٛ وٛوطَا، اٜ ٻٜ مَجِّنَ يِمْٻٜ وُرٛ‑وُرٛ نغَمْ ٻٜ کٜٻَ شٜىٰدٜ؞ ¹²غٛطّٛ مٛودِبّٛ مَٻّٜ، کِرِيتِيَنْکٜىٰجٛ، وِعِي، ‏«‏کِرِيتِيَنْکٛعٜنْ ٻٜ ڤٜوٛوٻٜ کٛو ندٜيٜ، ٻٜ نغِکُّ بٛ مَرْلٜ کَلُّطٜ، ٻٜ ٻٜرْطٜ بَاتُطٜ، وٜىٰلَاٻٜ؞»‏ ¹³کٛ اٛ وِعِ طُمْ غٛونغَ؞ نغَمْ مَاجُمْ حَٻَنْٻٜ بٛطُّمْ، نغَمْ حٛولَاکِ مَٻّٜ سٜمْبِطَ، ¹⁴ٻٜ اَلَ حٜتِّندَنَاکِ حَبَرُوجِ فٜوْرٜ طِ يَحُودَنْکٛعٜنْ اٜ دٛوکَاجِ غَݧُٻٜ غٛونغَ؞ ¹⁵کٛو طُمٜ اٜ لَاٻَنِ ٻٜ ٻٜرْطٜ لَاٻُطٜ؞ اَمَّا ٻٜ ٻٜرْطٜ طٜ لَاٻَا اٜ ٻٜ نجَٻَايِ غٛونغَ، وَلَا کٛ لَاٻَنِٻٜ، نغَمْ حَکّٜ وٛنِّي ٻٜرْطٜ مَٻّٜ اٜ ݧُمٛلْ مَٻّٜ؞ ¹⁶اٜ حٛنْدُکٛ اٜ ٻٜ مبِعَ اٜ ٻٜ اَنْدِ اَللَّه، اَمَّا کٛ ٻٜ نغَطَتَ اٜ حٛلَّ ٻٜ اَنْدَامٛ؞ ٻٜ نٜفْنِيٻٜ، ٻٜ نغَطَتَا کٛ اَللَّه وِعِ، وَلَا کُوغَلْ بٛنْغَلْ نغَلْ ٻٜ مبَاوَتَ وَطُکِ؞

اٜکِّتِنْ اٜکِّتِنٛلْ غٛونغَوٛلْ

¹اَمَّا اَنْ، اٜکِّتِنْ غٛونغَ؞ ²وِعُ ندٛتِّعٜنْ تٛع ٻٜ نغَرْتَ جَرٛوٻٜ، اَمَّا ٻٜ نغَرْتَ ٻٜ حَکِّيلٛ، ٻٜ شُرَ کٛعٜ مَٻّٜ؞ اٜ حَانِ ٻٜ کٛولٛو اَللَّه نَاع سٜطَّ، ٻٜ کٜىٰوَ يِدّٜ اٜ مُݧَلْ؞ ³نٛنْ مَا اٜکِّتِنَا مَدُعٜنْ نجٛوطٛو جٛنْدٜ حَانُندٜ رٜوْٻٜ تٛکُّٻٜ يٜىٰسُ نجٛوطٛو؞ تٛع ٻٜ نغَرْتَ بِعٛوٻٜ حَالَاجِ کَلُّطِ دٛوْ وٛٻّٜ، کٛو غِطُٻٜ نجَرُ؞ ٻٜ نغَرْتَ اٜکِّتِنٛوٻٜ کٛ وٛوطِ، ⁴نغَمْ ٻٜ اٜکِّتَ رٜوْٻٜ سُکَاٻٜ نٛ نغِطِرْتَ وٛرْٻٜ مَٻّٜ اٜ ٻِٻّٜ مَٻّٜ، ⁵اٜ نٛ ٻٜ نغَرْتِرْتَ شُرٛوٻٜ کٛعٜ مَٻّٜ، غٛودُٻٜ ٻٜرْطٜ لَاٻُطٜ، ڤَامَنٛوٻٜ وُرٛ مَٻّٜ، اَادِلِعٜنْ، تٛکّٛوٻٜ کٛ وٛرْٻٜ مَٻّٜ مبِعِٻٜ، نغَمْ تٛع طُمْ يَوَنَ وٛلْدٜ اَللَّه؞

⁶نٛنْ مَا وَغِّنْ کَيٜعٜنْ ٻٜ شُرَ کٛعٜ مَٻّٜ؞ ⁷اَمَّا اَنْ وَرْتُ کٛ ٻٜ اٜکِّتٛتٛو ندٜرْ کٛ نغَطَتَا فُو؞ وَطُ حَکِّيلٛ اٜ غٛونغَ ندٜرْ اٜکِّتِنْکِ مَاطَ؞ ⁸حُوتِرْ بٛلِيطٜ بٛطّٜ طٜ نغٜدَّتَاکٜ؞ ندٜنْ ٻٜنْ طٛنْ غِطْٻٜ نغٜدَّ ٻٜ شٜمْتَيْ نغَمْ ٻٜ کٜٻَتَا غٛطُّمْ کَلُّطُمْ طُمْ ٻٜ مبِعَتَ دٛوْ مٜىٰطٜنْ؞

⁹وِعُ مَشُّٻٜ نغَطَ کٛ جٜيْٻٜٻٜ مبِعِٻٜ، ٻٜ مبٜلْنَنَٻٜ ٻٜرْطٜ ندٜرْ کٛو طُمٜ؞ تٛع ٻٜ شَلٛو کٛ ٻٜ مبِعِ، ¹⁰تٛع ٻٜ نغُجَّنَٻٜ؞ اَمَّا کٛو ندٜيٜ ٻٜ کٛلَّ ٻٜ غَطٛوٻٜ بٛطُّمْ اٜ ٻٜ نغَطَ کٛ حَانِ ٻٜ نغَطَ، نغَمْ ندٜرْ کٛو طُمٜ طُمْ ٻٜ نغَطَتَ ٻٜ مَوْنِنَ اٜکِّتِنٛلْ اَللَّه کِسْنٛووٛ مٜىٰطٜنْ؞

¹¹نغَمْ اَللَّه حٛلِّي يِدّٜ مَوْندٜ ندٜ اٛ وَطِ لَاوٛلْ کِسْندَمْ نغَمْ يِمْٻٜ فُو؞ ¹²يِدّٜ ندٜنْ اٜکِّتِنِيعٜنْ اَلٜنْ جٛنْدٜ ندٜ اَللَّه يِطَا اٜ سُونٛ فِي دُونِيَارُ، نجٛوطٛوطٜنْ ندٜرْ دُونِيَارُ اٜنْ شُرَ کٛعٜ مٜىٰطٜنْ، اٜنْ نغَطَ کٛ حَانِ، اٜنْ تٛکَّ اَللَّه اٜ ٻٜرْندٜ غٛعٛ؞ ¹³اٜنْ کٜطٛو ݧَلْندٜ بَرْکِطِنَاندٜ ندٜ کَاٻُطٜنْ، ݧَلْندٜ ندٜ تٜدُّنغَلْ اَللَّه مٜىٰطٜنْ مَوْطٛ يٜىٰسُ اَلْمَسِيحُ کِسْنٛووٛ وَنْغَتَ؞ ¹⁴يٜىٰسُ حٛکِّي حٛورٜ مُوطُمْ نغَمْ مٜىٰطٜنْ نغَمْ اٛ رِمْطِنَعٜنْ دَغَ کٛو ندٜيٜ حَلّٜىٰندٜ، اٛ وَرْتِرَعٜنْ يِمْٻٜ مَاکٛ لَٻّٜ، غِطْٻٜ وَطُکِ بٛطُّمْ؞

¹⁵اٜکِّتِنْ فُو فِي طُعُمْ، حُوتِرْ لَامُ مَاطَ ندٜرْ سٜمْبِطِنْکِ اٜ حَٻَنْکِ يِمْٻٜ؞ تَاع جَٻُ غٛطّٛ يَوَنْمَا؞

کٛ حَانِ تٛکُّٻٜ يٜىٰسُ نغَطَ

¹شِفْتٛرَنَا تٛکُّٻٜ يٜىٰسُ ٻٜ تٛکَّ لَامِيٻٜ اٜ اَرْدِيٻٜ ٻٜ نغَطَ کٛ ٻٜ مبِعِ، ٻٜ شِرْيٛو نغَمْ حُوُکِ کٛو اِرِ نغَلٜ کُوغَلْ بٛنْغَلْ؞ ²وِعُٻٜ تٛع ٻٜ مٜتَ حَالَ کَلُّکَ دٛوْ غٛطّٛ، تٛع ٻٜ نغَرْتَ طَٻِّتٛوٻٜ حَوْرٜ، تٛع ٻٜ نغَرْتَ ٻٜ ٻٜرْطٜ شَطّٜ؞ سٜيْ نِ ٻٜ کٛلَّ کٛو مٛيٜ نغِکُّ بٛطُّمْ؞ ³نغَمْ اٜنٜنْ مَا ندٜنّٛ اٜنْ اَنْدَانٛ کٛ نغَطٜتٜنْ، اٜنْ تٛکَّتَا کٛ طُمْ وِعِعٜنْ، اٜنْ مَجِّنَامَ؞ سُونٛ دُونِيَارُ حَٻِّيعٜنْ، اٜنْ نغِطِ کٛو اِرِ طُمٜ فِي کَلُّطُمْ؞ اٜنْ نغَطِي جٛنْدٜ مٜىٰطٜنْ ندٜرْ حَلّٜىٰندٜ اٜ لَوْلِيرُ، يِمْٻٜ نغَݧِيعٜنْ، اٜنٜنْ مَا اٜنْ نغَݧِيٻٜ؞ ⁴اَمَّا ندٜ اَللَّه کِسْنٛووٛعٜنْ وَنْغِنِ يُرْمٜىٰندٜ اٜ يِدّٜ مُوطُمْ، ⁵اٛ حِسْنِيعٜنْ، نَاع نغَمْ کُوطٜ بٛطّٜ طٜ نغَطُطٜنْ، اَمَّا نغَمْ يُرْمٜىٰندٜ مَاکٛ؞ اٛ حِسْنُعٜنْ بَرْکَ لٛوتُکِ ٻٜرْطٜ مٜىٰطٜنْ کِ رُوحُ مَاکٛ وَطِ وَرْتِرِيعٜنْ يِمْٻٜ حٜسْٻٜ؞ ⁶اٛ حٛکِّعٜنْ رُوحُ مَاکٛ بَرْکَ يٜىٰسُ اَلْمَسِيحُ کِسْنٛووٛ مٜىٰطٜنْ؞ ⁷تٛو، ندٜ يِدّٜ مَاکٛ وَرْتِرِيعٜنْ ٻٜ نغَلَا حَکّٜ يٜىٰسٛ مَاکٛ، جٛونِ اٜ مٛ يِطِ نغَرْتٜنْ دٛنٛوٻٜ يٛنْکِ کِ رٜعَتَا کِ نغَطّٜنْ ٻٜرْطٜ اٜنْ کٜٻَيْ؞ ⁸فِي طُعُمْ طُمْ مبِيمَامِ طُمْ غٛونغَ؞ اٜ مِ يِطِ شٜمْبِطِنَا حٛرِيٻٜ دٛوْ مَاجُمْ نغَمْ کٛولِيٻٜ اَللَّه نغَاتَ حَکِّيلٛ مَٻّٜ دٛوْ وَطُکِ کُوطٜ بٛطّٜ؞ فُو فِي طُعُمْ اٜ وٛوطِ طُمْ نَفَنَيْ کٛو مٛيٜ؞ ⁹اَمَّا اَنْ، وٛطِّتَ غٜدِّ مٜىٰرٜ اٜ فٜىٰرٛوتِرْکِ لٜݧٛلْ اٜ يِدّٜ حَوْرٜ اٜ يٜدّٛوتِرْکِ دٛوْ اَتَّوْرَ، نغَمْ وَلَا کٛ طُمْ نَفِ، طُمْ فِي مٜىٰرٜ؞ ¹⁰تٛ غٛطّٛ اٜ وَدَّ فٜىٰرٛوتِرٛلْ حَکُّندٜ مٛوطٛنْ، تٛ اٛ وَݧِي وَغِّنٛلْ مَاطَ اَرَنْدٜوٛلْ اٜ طِطَٻٛلْ، دٛغُّمٛ؞ ¹¹اَ اَنْدِ اِرِ مَاکٛ اٛ غَݧُطٛ غٛونغَ، غَطٛووٛ کٛ وٛوطَا؞ کُوطٜ کَلُّطٜ طٜ اٛ وَطَتَ اٜ کٛلَّ اٛ وٛوطَا؞

کٛوْنٛلْ شَکِتِينغٛلْ

¹²تٛ مِ لِلٛيِي اَرْتٜمَسْ کٛو تِيکِکُسْ تٛ مَاطَ، سٜيْ نجَوْطٛطَا نغَرَا تٛ اَمْ اٜ غَرِيرِ نِکَفٛلِسْ نغَمْ اٜ مِ يِطِ مِ رُومَ تٛنْ؞ ¹³وَطُ کٛ مبَاوَتَا وَطُکِ مبَلَّا جٜنَسْ لَوْيَاجٛ اٜ اَفٛولٛسْ ندٜرْ يَادُ مَٻّٜ، تَبِّتِنَا وَلَا کٛ ٻٜ ندُلِّ؞ ¹⁴دٛولٜ يِمْٻٜ مٜىٰطٜنْ اٜکِّتٛو وَطُکِ کُوطٜ بٛطّٜ، نغَمْ ٻٜ مبَاوَ وَلُّکِ حَانُٻٜ وَلّٜىٰکِ ندٜنْ نغَمْ تٛع ٻٜ نجٛوطٛو جٛنْدٜ مٜىٰرٜ؞

¹⁵فُو غٛنْدُٻٜ اٜ اَمْ اٜ کٛوْنُمَا؞ کٛوْنَنَايَمْ غِطْٻٜعٜنْ کٛولِيٻٜ يٜىٰسُ؞

اَللَّه بَرْکِطِنَعٛنْ اٛنْ فُو؞