رٛومَنْکٛعٜنْ

طٜرٜوٛلْ نغٛلْ بُلُسْ وِنْدَنِ

رٛومَنْکٛعٜنْ

حَبَرُ دٛوْ طٜرٜوٛلْ نغٛعٛلْ

بُلُسْ لِلَاطٛ يٜىٰسُ اَلْمَسِيحُ وِنْدَنِ تٛکُّٻٜ يٜىٰسُ وٛنْٻٜ غَرِيرِ رٛومَ طٜرٜوٛلْ نغٛعٛلْ؞ اٛ وِنْدِينغٛلْ دُوٻِ 75 غَطَ دَݧْنغٛلْ يٜىٰسُ؞ طُمْ غَطٛتٛوطُمْ اٛ وِنْدِي طٜرٜوٛلْ نغٛعٛلْ اٜ غَرِيرِ کٛرِنْتِ شَرٜلْ کٛ اٛ وَطِ يَادُ مَاکٛ تَتَوْرُ نغَمْ وَعَجِنْکِ؞

طٜرٜوٛلْ نغٛعٛلْ نغٛلْ وِنْدَا نغَمْ سِرْيَنَاکِ بُلُسْ لَاوٛلْ نغَمْ سُمْڤٛ نغٛ اٛ يِطِ يَارَنْکِ تٛکُّٻٜ يٜىٰسُ غٛنْٻٜ غَرِيرِ رٛومَ؞ کٛ اٛ يِطِ وَطُکِ وٛنِ اٛ حُوَ ندٜرْ تٛکُّٻٜ يٜىٰسُ غٛنْٻٜ رٛومَ نغَمْ شَرٜلْ سٜطَّ، ندٜنْ غَطَ مَاجُمْ، اٜ مٛ يِطِ ٻٜ مبَلَّمٛ نغَمْ اٛ حٜٻَ يَاکِ اَسْبَانِيَ؞ اٛ وِنْدُ طٜرٜوٛلْ نغٛعٛلْ نغَمْ اٛ حٛلَّ کٛ اٛ فَامِ دٛوْ حٛولَاکِ يٜىٰسُ اٜ نٛ حَانِ تٛکُّٻٜ يٜىٰسُ تٛکِّرَمٛ؞ غَطَ بُلُسْ حٛوْنِي تٛکُّٻٜ يٜىٰسُ غٛنْٻٜ غَرِيرِ رٛومَ، اٛ وِعِٻٜ نٛ اٛ وَطِرَنْتَٻٜ دٛعَارٜ؞ ندٜرْ طٜرٜوٛلْ نغٛعٛلْ بُلُسْ وِعِ، ‏«‏حَبَرُ بٜلْطُمْ اٜ حٛلَّ اَادِلَاکُ اَللَّه کٜٻٜتٜىٰطُمْ بَرْکَ حٛولَاکِ يٜىٰسُ تَنْ؞»‏

اٜ رٜعِرْدٜ بُلُسْ وِنْدِي دٛوْ نٛ حَانِ تٛکُّٻٜ يٜىٰسُ نجٛوطٛرٛو، کٛ ٻُرِ مَا وٛنِ ٻٜ کٛلِّندِرَ يِدّٜ ندٜرْ سُمْڤٛوتِرْکِ مَٻّٜ اٜ وٛٻّٜ؞ اٛ مٜتِي دٛوْ حُوَنْکِ اَللَّه، اٜ نٛ حَانِ تٛکُّٻٜ يٜىٰسُ تٛکِّرَ اَرْدِيٻٜ، اٜ نٛ حَانِ تٛکُّٻٜ يٜىٰسُ نجٛوطٛرٛو حَکُّندٜ مَٻّٜ؞ اٛ يٛتِّنِ طٜرٜوٛلْ نغٛلْ اٜ حٛوْنُکِ بَنْدِرَاٻٜ اٜ مَنْتُکِ اَللَّه؞

کٛوْنٛلْ بُلُسْ

¹مِنْ بُلُسْ وِنْدِ طٜرٜوٛلْ نغٛعٛلْ؞ مِ مَشُّطٛ يٜىٰسُ اَلْمَسِيحُ لِلَاطٛ مَاکٛ شُٻَاطٛ مٛ اَللَّه نٛدِّ وَعَجِنَ حَبَرُ بٜلْطُمْ؞

²حَبَرُ بٜلْطُمْ طُمْ اٛ وَطِ اَلْکَوَلْ کٛ نٜىٰٻِ دَغَ تٛ کٛنْدُطٜ اَنَّبٛعٜنْ مَاکٛ ندٜرْ دٜفْتٜرٜ شٜنِيندٜ؞ ³حَبَرُ طُعُمْ طُمْ دٛوْ ٻِطّٛ مَاکٛ جٛومِرَاوٛ مٜىٰطٜنْ يٜىٰسُ اَلْمَسِيحُ؞ ندٜرْ ٻَنْدُ کَنْکٛ دَغَ لٜݧٛلْ دَوْدَ؞ ⁴اَمَّا اَللَّه حٛلِّي اٜ بَوْطٜ مَوْطٜ يٜىٰسُ اَلْمَسِيحُ جٛومِرَاوٛ مٜىٰطٜنْ اٛ ٻِطّٛ مَاکٛ ندٜ اٛ اُمِّنِمٛ دَغَ مَيْدٜ بَرْکَ رُوحُ مَاکٛ؞ ⁵بَرْکَ يٜىٰسُ اَلْمَسِيحُ اٜ نغَمْ اِنْدٜ مَاکٛ، اَللَّه بَرْکِطِنِييَمْ وَرْتِرِييَمْ لِلَاطٛ نغَمْ لٜݧِ دُونِيَارُ فُو حٛولٛومٛ تٛکَّ کٛ اٛ وِعِ؞ ⁶طُعُمْ حَوْتِي اٜ مٛوطٛنْ اٛنٛنْ ٻٜ اَللَّه نٛدِّ نغَمْ نغَرْتَ ٻٜ يٜىٰسُ اَلْمَسِيحُ؞

⁷اٜ مِ حٛوْنَعٛنْ اٛنْ فُو مٛوطٛنْ غٛنْٻٜ غَرِيرِ رٛومَ، اٛنٛنْ ٻٜ اَللَّه يِطِ نٛدِّ نغَمْ ٻٜ نغَرْتَ يِمْٻٜ مُوطُمْ؞ اَللَّه ݧَاکٛ مٜىٰطٜنْ اٜ جٛومِرَاوٛ مٜىٰطٜنْ يٜىٰسُ اَلْمَسِيحُ بَرْکِطِنَعٛنْ حٛکَّعٛنْ جَمْ؞

دٛعَارٜ يٜتُّکِ اَللَّه

⁸اَرَنْدٜ، اٜ مِ يٜتَّ اَللَّه اَمْ بَرْکَ يٜىٰسُ اَلْمَسِيحُ نغَمْ مٛوطٛنْ اٛنْ فُو، نغَمْ دُونِيَارُ فُو اٜ نَنَ حَبَرُ نٛ کٛولٛرِيطٛنْ يٜىٰسُ؞ ⁹اَللَّه مٛ کُوَنَيْمِ کُوغَلْ وَعَجِنْکِ حَبَرُ بٜلْطُمْ دٛوْ ٻِطّٛ مَاکٛ اٜ ٻٜرْندٜ اَمْ فُو، کَنْکٛ وٛنِ شٜيْدُوجٛ اَمْ، کٛو ندٜيٜ مِ يٜجِّتَتَاعٛنْ ندٜرْ دٛعَارٜ اَمْ؞ ¹⁰اٜ مِ تٛرٛو اَللَّه تٛ اٛ جَٻِي اٛ مَٻِّتَنَيَمْ لَاوٛلْ مِ يَحَ تٛ مٛوطٛنْ جٛونِ؞ ¹¹اٜ مِ يِطِ يِيکِعٛنْ نَاع سٜطَّ نغَمْ مِ وَلَّعٛنْ کٜٻٛنْ بَرْکَ غٛنْطُمْ ندٜرْ رُوحُ اَللَّه شٜمْبِطِنَيْطُمْعٛنْ؞ ¹²کٛ نغِطُمِ وٛنِ شٜمْبِطِندِرٜنْ؛ حٛولَارٜ اَمْ سٜمْبِطِنَعٛنْ، ندٜنْ حٛولَارٜ مٛوطٛنْ سٜمْبِطِنَيَمْ؞

¹³بَنْدِرَاٻٜ اَمْ، اٜ مِ يِطِ اَنْدٛنْ ندٜ طُطُّمْ اٜ مِ سِرْيٛو يَاکِ تٛ مٛوطٛنْ، اَمَّا کٛو ندٜيٜ غٛطُّمْ اٜ حَطَيَمْ يَاکِ؞ اٜ مِ يِطِ مِ حٜٻَ تٛکُّٻٜ يٜىٰسُ ندٜرْ مٛوطٛنْ، نٛنْ نٛ کٜٻِرْمِ تٛکُّٻٜ يٜىٰسُ ندٜرْ غٛطِّ لٜݧِ؞ ¹⁴اٜ وٛودِ تٜدّٛرَلْ دٛوْ اَمْ، تٜدّٛرَلْ يِمْٻٜ غَرِيرِ اٜ لَدّٜعٜنْ، اٜ جَنْغُٻٜ اٜ ٻٜ نجَنْغَايِ؞ ¹⁵نغَمْ مَاجُمْ، مِ حَاٻِي وَعَجِنَنْکِعٛنْ حَبَرُ بٜلْطُمْ اٛنٛنْ مَا جٛوطِيٻٜ غَرِيرِ رٛومَ؞

بَوْطٜ حَبَرُ بٜلْطُمْ

¹⁶مِ نَنَتَا شٜمْتُطُمْ وَعَجِنْکِ حَبَرُ بٜلْطُمْ، نغَمْ طُمْ بَوْطٜ اَللَّه بَاوَيْطٜ حِسْنَ کٛو مٛيٜ کٛولِيطٛمٛ؞ اَرَنْدٜ طُمْ اَنْدِنِيطُمْ يَحُودَنْکٛعٜنْ، ندٜنْ سٜيْ يِمْٻٜ نَاع يَحُودَنْکٛعٜنْ؞ ¹⁷نغَمْ حَبَرُ بٜلْطُمْ اٜ حٛلَّ اَادِلَاکُ اَللَّه کٜٻٜتٜىٰطُمْ بَرْکَ حٛولَاکِ يٜىٰسُ تَنْ؞ نٛنْ نٛ طُمْ وِنْدِرَا، ‏«‏اَادِلِيجٛ اٛ وَطَيْ جٛنْدٜ حٛولَاکِ اَللَّه؞»‏

کٛو مٛيٜ وَطِي حَکّٜ

¹⁸مٛنّٜرٜ اَللَّه اٜ وَنْغَ دَغَ دٛوْ دٛوْ يِمْٻٜ ٻٜ کُلَتَا اَللَّه اٜ دٛوْ کُوطٜ مَٻّٜ کَلُّطٜ طٜ ٻٜ ݧٛعِّرْتَ غٛونغَ؞ ¹⁹نغَمْ کٛ طُمْ وَاوَتَ اَنْدُکِ دٛوْ اَللَّه، اٜ نجَيْرِ طُمْ وٛنِ تٛ مَٻّٜ، نغَمْ اَللَّه حٛلِّيٻٜطُمْ؞ ²⁰نغَمْ دَغَ فُطّٛودٜ تَغُکِ دُونِيَارُ، نغِکُّ اَللَّه طُمْ يِعَتَاکٜ، اٜ نجَيْرِ طُمْ وٛنِ، وَاتٛ بَوْطٜ مَاکٛ تَبِتَيْطٜ، اٜ کٛ حٛلِّ اٛ اَللَّه؞ طُمْ يِعَامَ اٜ نجَيْرِ ندٜرْ کٛ اٛ تَغِ؞ نغَمْ مَاجُمْ، يِمْٻٜ نغَلَا کٛ مبِعَ؞ ²¹کٛو ندٜ اٜ ٻٜ اَنْدِ اَللَّه، ٻٜ مَوْنِنَايِمٛ بٛ اَللَّه کٛو ٻٜ نغٜتَّمٛ، اَمَّا ݧُمٛ مَٻّٜ وَرْتِي مٜىٰرٜ، ٻٜرْطٜ مَٻّٜ طٜ مبَاوَتَا فَامُکِ غٛونغَ طٜ کٜىٰوِ ݧِوْرٜ؞ ²²اٜ ٻٜ مبِعَ اٜ ٻٜ نغٛودِ پٛيْرٜ، اَمَّا ٻٜ نغَرْتِي حَاݝَاٻٜ؞ ²³اَللَّه تَبِتَيْطٛ حَانِ ٻٜ مَوْنِنَ، اَمَّا اٜ ٻٜ مَوْنِنَ غُنْکِيجِ غَطَاطِ ندٜرْ نَنْدِ نٜطّٛ مَايَيْطٛ، اٜ ندٜرْ نَنْدِ شٛلِّ، اٜ ندٜرْ نَنْدِ مَرْلٜ، اٜ ندٜرْ نَنْدِ کٛ دَسٛتٛو؞

²⁴نغَمْ نٛنْ، اَللَّه اَلِيٻٜ ٻٜ تٛکَّ سُونٛوجِ ٻٜرْطٜ مَٻّٜ نٜفْنِيطِ نغَمْ ٻٜ نغَطِندِرَ کٛ سٜمْتِنِي اٜ ٻَلِّ مَٻّٜ؞ ²⁵ٻٜ نغَيْلِتِ غٛونغَ اَللَّه وَرْتِ فٜوْرٜ؞ اٜ ٻٜ مَوْنِنَ کٛ تَغَا حَا اٜ ٻٜ کُوَنَطُمْ، اَمَّا اَللَّه تَغٛووٛ تَنْ حَانِ ٻٜ مَوْنِنَ؞ کَنْکٛ وٛنِ کَانُطٛ مَنْتٜىٰکِ حَا اَبَدَا!‏ اَامِنْ؞

²⁶نغَمْ نٛنْ، اَللَّه اَلِٻٜ ٻٜ تٛکَّ سُونٛوجِ مَٻّٜ شٜمْتِنِيطِ؞ رٜوْٻٜ مَٻّٜ نغَيْلِتِ کٛ طُمْ اَنْدِ، رٜوْٻٜ اٜ مبَلْدَ اٜ رٜوْٻٜ؞ ²⁷نٛنْ مَا وٛرْٻٜ اَلِ کٛ طُمْ اَنْدِ، ٻٜ اَلِ وَلْدُکِ اٜ رٜوْٻٜ، سُونٛ وٛرْٻٜ نَنْغِٻٜ؞ وٛرْٻٜ اٜ مبَلْدَ اٜ وٛرْٻٜ؞ نغَمْ نٜفْنِيطُمْ طُمْ ٻٜ نغَطَتَ، ٻٜ کٜٻِ حَلْکٜرٜ نٛ حَانَنِٻٜ؞ ²⁸ندٜ ٻٜ نغَݧِي ٻٜ اَنْدَ اَللَّه، اَللَّه اَلِيٻٜ ٻٜ تٛکَّ ݧُمٛوجِ کَلُّطِ نغَمْ ٻٜ نغَطَ کٛ حَانَا طُمْ وَطَ؞ ²⁹اٜ ٻٜ کٜىٰوِ کٛو اِرِ طُمٜ فِي طُمْ وٛوطَا، اٜ حَلّٜىٰندٜ، اٜ يِطُکِ کٛ ٻٜ نجٜيَايِ، اٜ نغِکُّ کَلُّطُمْ، اٜ لَوْلِيرُ، اٜ وَرٜ‑وَرٜ، اٜ حَوْرٜ، اٜ مَجِّنْکِ يِمْٻٜ، اٜ ٻٜرْطٜ ٻَلٜىٰجٜ؞ اٜ ٻٜ مٜتَ دٛوْ وٛٻّٜ، ³⁰اٜ ٻٜ مٜتَ کَلُّکَ دٛوْ وٛٻّٜ، اٜ ٻٜ نغَݧَ اَللَّه، اٜ ٻٜ کٛلَّ مَنْغُ، اٜ ٻٜ نغٛودِ مَنْغُ حٛورٜ، مَوْنِنٛوٻٜ کٛعٜ مَٻّٜ، اٜ ٻٜ طَٻِّتَ لَاوٛلْ وَطُکِ کٛ حَلِّ، ٻٜ مَوْنِنْتَا دَݧٛوٻٜ؞ ³¹ٻٜ نغَلَا حَکِّيلٛ، ٻٜ کٜبِّنْتَا اَلْکَوَلْ، ٻٜ نغَلَا يِدّٜ، ٻٜ نجُرْمِنَنْتَا يِمْٻٜ؞ ³²اٜ ٻٜ اَنْدِ اَللَّه وِعِي يِمْٻٜ غَطٛوٻٜ اِرِ کُوطٜ طٜنْ طٛنْ اٜ حَانِ ٻٜ کَلْکٜىٰ؞ فُو اٜ نٛنْ، نَاع کُوطٜ طٜنْ تَنْ ٻٜ نغَطَتَ، حَا مَا اٜ ٻٜ مبِعَ غَطٛوٻٜ کُوطٜ طٜنْ اٜ نغَطَ کٛ وٛوطِ؞

کِيتَ اَللَّه

¹نغَمْ نٛنْ، اَنْ، شَڤّٛتٛوطٛ کٛ وٛوطَا طُمْ غٛطّٛ وَطِ، اَ وَلَا کٛ مبِعَتَا، کٛو اَنْ اَ مٛيٜ؞ نغَمْ فُو شَرٜلْ کٛ شَڤّٛتٛطَا کٛ وٛوطَا طُمْ غٛطّٛ وَطِ، اَ وَطَنَ حٛورٜ مَاطَ کِيتَ؞ نغَمْ کٛ وٛوطَا طُمْ شَڤّٛرْتٛطَا غٛطّٛ، کَنْجُمْ نغَطَتَا اَنْ مَا؞ ²اٜنْ اَنْدِ کِيتَ اَللَّه طُمْ غٛونغَ دٛوْ غَطٛوٻٜ اِرِ طُمْ طٛنْ فِي؞ ³اَ ݧُمَ اَنْ، اَ حِسَيْ کِيتَ اَللَّه، ندٜ اَ وَطَ کٛ وٛوطَا طُمْ شَڤّٛرْتٛطَا وٛٻّٜ؟ ⁴کٛو اَنْ اَ يَوَنَ يِدّٜ اَللَّه مَوْندٜ، اٜ شِيَ يَاوُکِ مٛنّٜرٜ مَاکٛ، اٜ مُݧَلْ مَاکٛ؟ اَ اَنْدَا يِدّٜ اَللَّه اٜ فٛوطُمَا تُوبَا؟ ⁵اَمَّا ٻٜرْندٜ مَاطَ ندٜ شَاتُندٜ غَݧُندٜ تُوبُکِ؞ نغَمْ نٛنْ، اَ حَوْرِتَنَ حٛورٜ مَاطَ مٛنّٜرٜ اَللَّه، ݧَلْندٜ مٛنّٜرٜ مَاکٛ ندٜ اٛ وَطَتَ کِيتَ غٛونغَ؞ ⁶نغَمْ اٛ وَاتَنَيْ کٛو مٛيٜ کٛ فٛتِّدِ اٜ کٛ وَطِ؞ ⁷يِمْٻٜ مُݧُٻٜ ندٜرْ وَطُکِ کٛ وٛوطِ، طَٻُّتُٻٜ تٜدُّنغَلْ اٜ مَنْغُ اٜ يٛنْکِ کِ رٜعَتَا، کَمْٻٜ اَللَّه حٛکَّتَ يٛنْکِ کِ رٜعَتَا؞ ⁸اَمَّا يِمْٻٜ غِطَنْٻٜ کٛعٜ مَٻّٜ تَنْ غَݧُٻٜ غٛونغَ تٛکِّ کٛ وٛوطَا، ٻٜ کَوْرَيْ اٜ مٛنّٜرٜ اَللَّه اٜ حَلْکٜرٜ مَاکٛ؞ ⁹کٛو مٛيٜ غَطٛووٛ کٛ حَلِّ يَرَيْ تٛرَّ اٜ بٛنٜ، کٛو مٛيٜ، يَحُودَنْکٛعٜنْ اٜ يِمْٻٜ نَاع يَحُودَنْکٛعٜنْ؞ ¹⁰اَمَّا فُو يِمْٻٜ غَطٛوٻٜ بٛطُّمْ، اَللَّه وَطَيْ ٻٜ کٜٻَ تٜدُّنغَلْ، اٜ مَنْغُ، اٜ جَمْ؛ اَرَنْدٜ يَحُودَنْکٛعٜنْ، ندٜنْ سٜيْ يِمْٻٜ نَاع يَحُودَنْکٛعٜنْ، ¹¹نغَمْ اَللَّه حٛلَّتَا فٜىٰرٛوتِرٛلْ؞

¹²کٛو مٛيٜ غَطّٛ حَکّٜ، تٛ اٛ وَلَا لٜيْ اَتَّوْرَ، اٛ وَطَنْتَاکٜ کِيتَ دٛوْ کٛ اَتَّوْرَ وِعِ؞ اَمَّا کٛو مٛيٜ غٛنْطٛ لٜيْ اَتَّوْرَ، تٛ وَطِي حَکّٜ، طُمْ وَطَنَيْمٛ کِيتَ دٛوْ کٛ اَتَّوْرَ وِعِ؞ ¹³نغَمْ نَاع نَنٛوٻٜ کٛ اَتَّوْرَ وِعِ نغٛنِ اَادِلِعٜنْ يٜىٰسٛ اَللَّه، اَمَّا تٛکُّٻٜ کٛ طُمْ وِعِ، کَمْٻٜ نٛدِّرْتٜىٰ اَادِلِعٜنْ؞ ¹⁴تٛ يِمْٻٜ نَاع يَحُودَنْکٛعٜنْ ٻٜ نغَلَا اَتَّوْرَ نغَطِي کٛ اَتَّوْرَ وِعِ ندٜرْ يِدّٜ کٛعٜ مَٻّٜ، ٻٜ کٛلِّي اٜ ٻٜ اَنْدِ کٛ حَانِ طُمْ وَطَ، کٛو ندٜ ٻٜ نغَلَا اَتَّوْرَ؞ ¹⁵ٻٜ کٛلِّي کٛ اَتَّوْرَ وِعِ طُمْ وَطَ اٜ وِنْدِي ندٜرْ ٻٜرْطٜ مَٻّٜ؞ ٻٜرْطٜ مَٻّٜ مَا اٜ کٛلَّ طُمْ غٛونغَ، نغَمْ بَنْݧٜ ݧُمٛ مَٻّٜ اٜ حٛلَّٻٜ ٻٜ نغَطِي کٛ وٛوطَا، بَنْݧٜ بٛو اٜ نغٛ سُرَنَٻٜ؞ ¹⁶نٛنْ نٛ حَبَرُ بٜلْطُمْ طُمْ نغَعَجِنْمِ وِعِ، نٛنْ وَطَيْ ݧَلْندٜ ندٜ اَللَّه وَطَنْتَ ݧُمٛوجِ شُوطِيطِ طِ يِمْٻٜ کِيتَ لَاوٛلْ يٜىٰسُ اَلْمَسِيحُ؞

يَحُودَنْکٛعٜنْ اٜ اَتَّوْرَ

¹⁷اَمَّا تَا نٛدِّرَ حٛورٜ مَاطَ يَحُودَنْکٜىٰجٛ، تَا مَنْتٛرٛو اَتَّوْرَ، تَا فِيَ غَبَارٜ دٛوْ سُمْڤٛ مَاطَ اٜ اَللَّه، ¹⁸تَا اَنْدِ کٛ اَللَّه يِطِ نغَطَا، تَا سُٻِي کٛ ٻُرِ وٛوطُکِ نغَمْ اَ اٜکِّتِنَامَ اَتَّوْرَ، ¹⁹تَا تَبِّتِنِي اَنْ وٛنِ کٛلَّيْطٛ بُمْطٛ لَاوٛلْ، اَنْ وٛنِ جَيْنغٛلْ نغَمْ غٛنْٻٜ ندٜرْ ݧِوْرٜ، ²⁰تَا اٜکِّتِنٛووٛ ٻٜ نغَلَا اَنْدَلْ کٛ حَانِ، تَا اٜکِّتِنٛووٛ سُکَاٻٜ، تَا تَبِّتِنِي اَ اَنْدِ کٛو طُمٜ، ندٜنْ فُو کٛ مبِعَتَا طُمْ غٛونغَ نغَمْ اَ وٛودِ اَتَّوْرَ – ²¹اَنْ اٜکِّتِنٛووٛ وٛٻّٜ، اَ اٜکِّتِنْتَا حٛورٜ مَاطَ؟ اَنْ نغَعَجِنٛووٛ دٛوْ طُمْ اَلَ نغُيْکَ، اَنْ اَ وُجَّتَا؟ ²²اَنْ بِعٛووٛ تٛع يِمْٻٜ نغَطَ نجٜىٰنُ، اَنْ اَ وَطَتَا نجٜىٰنُ؟ اَنْ نٜفٛووٛ غُنْکِيجِ، اَنْ اَ وُجَّتَا ندٜرْ سُودُ غُنْکِيجِ؟ ²³اَنْ ڤِيٛووٛ غَبَارٜ دٛوْ دٛوکَ اَللَّه، اَ يَوَنْتَا اَللَّه لَاوٛلْ يٜوُکِ دٛوکَ مَاکٛ؟ ²⁴نٛنْ نٛ طُمْ وِنْدِرَا، ‏«‏نغَمْ مٛوطٛنْ يَحُودَنْکٛعٜنْ، يِمْٻٜ نَاع يَحُودَنْکٛعٜنْ اٜ مٜتَ حَالَ کَلُّکَ دٛوْ اَللَّه؞»‏

²⁵تَا تٛکِّي کٛ اَتَّوْرَ وِعِ، نَادُکِ مَاطَ اٜ نَفِ؞ اَمَّا تَا يٜوِي کٛ اَتَّوْرَ وِعِ، نَادُکِ مَاطَ وَرْتِي بٛ اَ نَادَاکَ؞ ²⁶تٛ نٜطّٛ مٛ نَادَاکَ تٛکِّي کٛ اَتَّوْرَ وِعِ، نَاع اَللَّه يِعَيْمٛ بٛ اٛ نَادَاطٛ؟ ²⁷نٜطّٛ مٛ نَادَاکَ، تٛ اٛ تٛکِّي اَتَّوْرَ، اٛ حٛلَّيْ اٛنْ نغَطِي کٛ وٛوطَا، نغَمْ اٛنْ نغٜوِ اَتَّوْرَ کٛو ندٜ اٛنْ نغٛودِطُمْ بِنْدَاطُمْ ندٜنْ اٛنْ نَادَاٻٜ؞ ²⁸يَحُودَنْکٜىٰجٛ مٛ غٛونغَ نَاع اٛ يَحُودَنْکٜىٰجٛ اٜ ٻَنْدُ تَنْ، کَدِنْ نَادُکِ کِ غٛونغَ نَاع اٜ ٻَنْدُ تَنْ کِ وٛنِ، کٛو اٜ تَپُکِ لَرَلْ؞ ²⁹نغَمْ مَاجُمْ، يَحُودَنْکٜىٰجٛ مٛ غٛونغَ، کَنْکٛ وٛنِ يَحُودَنْکٜىٰجٛ دَغَ ندٜرْ ٻٜرْندٜ، ندٜنْ نَادُکِ کِ غٛونغَ، کَنْکِ وٛنِ نَادُکِ ٻٜرْندٜ کِ رُوحُ وَطَتَ، نَاع نغَمْ تٛکُّکِ اَتَّوْرَ بِنْدَاطُمْ؞ اِرِ اٛعٛ نٜطّٛ نَاع يِمْٻٜ مَنْتَتَمٛ، اَللَّه مَنْتَتَمٛ؞

¹طُمٜ يَحُودَنْکٛعٜنْ ٻُرْدِ يِمْٻٜ نَاع يَحُودَنْکٛعٜنْ؟ طُمٜ نَادُکِ نَفَتَ؟ ²اٜ طُمْ وٛوطِ نَاع سٜطَّ اٜ طَتٜ طُطّٜ؞ اَرَنْدٜ، يَحُودَنْکٛعٜنْ طُمْ حٛکِّ بٛلِيطٜ اَللَّه؞ ³غٛونغَ، وٛٻّٜ مَٻّٜ کٛولَاکِ اَللَّه؞ اَمَّا شِيَ حٛولَاکِ مَٻّٜ وَاوَيْ وَرْتِرَ اَللَّه مٛ حٜبِّنْتَا اَلْکَوَلْ مُوطُمْ؟ ⁴غٛونغَ طُمْ وَاوَتَا!‏ اَللَّه اٛ غٛودُطٛ غٛونغَ، کٛو ندٜ کٛو مٛيٜ نٜطّٛ اٛ ڤٜوٛووٛ؞ نٛنْ نٛ طُمْ وِنْدِرَا،

‏«‏نغَمْ طُمْ تَبِّتِنَ حَالَ مَاطَ اٜ وٛودِ غٛونغَ،

ندٜنْ ندٜرْ کِيتَ کٜٻَا جَالٛرْغَلْ؞»‏

⁵اَمَّا تٛ شِيَ اَادِلَاکُ مٜىٰطٜنْ وَرْتِي لَاوٛلْ تَبِّتِنْکِ اَادِلَاکُ اَللَّه، طُمٜ مبِعٜتٜنْ؟ اٜنْ مبَاوَيْ وِيکِ اَللَّه وَلَا اَادِلَاکُ تٛ اٛ تٛرِّيعٜنْ؟ ﴿اٜ مِ مٜتَ طٛعٛ نٛ يِمْٻٜ مٜتِرْتَ؞﴾ ⁶طُعُمْ وَطَتَاکٛ!‏ تٛ اَللَّه وَلَا اَادِلَاکُ، نٛ اٛ وَطِرَنْتَ دُونِيَارُ کِيتَ؟

⁷طُمْ غَطٛتٛوطُمْ غٛطّٛ وِعَ، ‏«‏تٛ شِيَ غٛونغَ اَمْ وَلِّي يِمْٻٜ نغِعَ غٛونغَ اَللَّه اٜ نجَيْرِ حَا ٻٜ مَوْنِنِمٛ، نغَمْ طُمٜ حَا جٛونِ اٜ طُمْ وَطَنَيَمْ کِيتَ دٛوْ مِنْ مِ غَطٛووٛ حَکّٜ؟»‏ ⁸تٛ نٜطّٛ اٜ ݧُمِرَ نٛنْ، اٛ وِعَيْ، ‏«‏اٜنْ نغَطُ کٛ وٛوطَا نغَمْ طُمْ وَرْتَ لَاوٛلْ وُرْتِنْکِ غٛطُّمْ بٛطُّمْ؞»‏ غٛونغَ، وٛٻّٜ يِمْٻٜ اٜ مبِعَ اٜنْ مبِعَ نٛنْ، اَمَّا نَاع طُمْ غٛونغَ، طُمْ حُطُکِ تَنْ؞ طُمْ وَطَنَيْٻٜ کِيتَ نٛ حَانَنِٻٜ؞

وَلَا اَادِلِيجٛ

⁹تٛو، طُمٜ مبِعٜتٜنْ؟ اٜنٜنْ يَحُودَنْکٛعٜنْ اٜنْ ٻُرِي يِمْٻٜ نَاع يَحُودَنْکٛعٜنْ وٛنْ طٛنْ؟ غٛونغَ نَاع نٛنْ؞ مِ يَادَکٜ مِ حٛلِّي وِيکِ يَحُودَنْکٛعٜنْ اٜ يِمْٻٜ نَاع يَحُودَنْکٛعٜنْ ٻٜ فُو لٜيْ لَامُ حَکّٜ ٻٜ نغٛنِ؞ ¹⁰نٛنْ نٛ طُمْ وِنْدِرَا،

‏«‏وَلَا نٜطّٛ اَادِلِيجٛ، وَلَا کٛو غٛعٛتٛ،

¹¹وَلَا غٛودُطٛ فَامُ،

وَلَا طَٻُّتُطٛ اَللَّه؞

¹²يِمْٻٜ فُو نغَيْلِتَنِي اَللَّه ٻَاوٛ، ٻٜ نغَرْتِي وَلَا کٛ ٻٜ نَفِ؞

وَلَا غَطٛووٛ کٛ وٛوطِ، وَلَا کٛو غٛعٛتٛ؞

¹³کٛنْدُطٜ مَٻّٜ طُمْ يٜنَاندٜ اٛمْتِيندٜ؞

اٜ ٻٜ کُوتِرَ طٜمْطٜ مَٻّٜ نغَمْ مَجِّنْکِ يِمْٻٜ اٜ فٜوْرٜ؞

بٛلِيطٜ

¹⁴کٛنْدُطٜ مَٻّٜ اٜ کٜىٰوِ کُلّٜ اٜ بٛلِيطٜ نَوْطٜ؞

¹⁵اٜ ٻٜ نجَاوَ وَرُکِ يِمْٻٜ؞

¹⁶فُو تٛ ٻٜ نجَحِ، حَلْکٜرٜ اٜ تٛرَّ اٜ تٛکِّٻٜ؞

¹⁷ٻٜ اَنْدَا لَاوٛلْ وَدُّکِ جَمْ؞

¹⁸ٻٜ نغَلَا کُلٛلْ اَللَّه؞»‏

¹⁹جٛونِ اٜنْ اَنْدِ کٛو طُمٜ کٛ اَتَّوْرَ وِعِ، طُمْ وِعَ نغَمْ ٻٜنْ طٛنْ غٛنْٻٜ لٜيْ اَتَّوْرَ، نغَمْ کٛو مٛيٜ مَٻَّ حٛنْدُکٛ مُوطُمْ، کَدِنْ فُو يِمْٻٜ دُونِيَارُ اَنْدَ لٜيْ کِيتَ اَللَّه ٻٜ نغٛنِ؞ ²⁰نغَمْ وَلَا نٜطّٛ نٛدّٜتٜىٰطٛ اَادِلِيجٛ يٜىٰسٛ اَللَّه نغَمْ تٛکُّکِ اَتَّوْرَ، نغَمْ کٛ اَتَّوْرَ وَطَتَ وٛنِ طُمْ حٛلَّ نٜطّٛ حَکّٜ مُوطُمْ؞

وَرْتُکِ اَادِلِيجٛ

²¹اَمَّا جٛونِ اَللَّه وُرْتِنِي لَاوٛلْ نغٛلْ طُمْ تٛکَّتَ طُمْ وَرْتَ اَادِلِيجٛ يٜىٰسٛ مَاکٛ؞ طُمْ حٜٻَتَا اَادِلَاکُ طُمْ نغَمْ تٛکُّکِ اَتَّوْرَ؞ اَتَّوْرَ اٜ اَنَّبٛعٜنْ کٛکِّي شٜيْدَ دٛوْ مَاجُمْ؞ ²²طُعُمْ اَادِلَاکُ اَللَّه اٜ طُمْ حٜٻٜىٰ بَرْکَ حٛولَاکِ يٜىٰسُ اَلْمَسِيحُ؞ فُو کٛولِيطٛ يٜىٰسُ، اَللَّه وَرْتِرَيْمٛ اَادِلِيجٛ، نغَمْ اٛ حٛلَّتَا فٜىٰرٛوتِرٛلْ؞ ²³کٛو مٛيٜ نٜطّٛ وَطِ حَکّٜ وٛطِّتَکٜ کٛ اَللَّه يِطِ اٛ وَطَ؞ ²⁴اَمَّا جٛونِ اَللَّه وَرْتِرِيعٜنْ اَادِلِعٜنْ؞ اٛ وَطَنِيعٜنْ نٛنْ شَاحُ نغَمْ يِدّٜ مَاکٛ بَرْکَ رِمْطِنْکِ کٜٻٜتٜىٰکِ لَاوٛلْ يٜىٰسُ اَلْمَسِيحُ؞ ²⁵اَللَّه لِلِي يٜىٰسُ اَلْمَسِيحُ وَرْتَ شَکِّرِ، نغَمْ تٛ يِمْٻٜ کٛولَکٜمٛ طُمْ يَافَنٛوٻٜ حَکّٜ مَٻّٜ بَرْکَ پِيپَمْ مَاکٛ؞ اَللَّه وَطِي طُعُمْ نغَمْ حٛلَّ اَادِلَاکُ مُوطُمْ؞ نغَمْ ندٜنّٛ اٛ مُݧَنِي غَطُٻٜ حَکّٜ اٛ تَپَنَايِٻٜ کِيتَ؞ ²⁶اٛ وَطُ نٛنْ نغَمْ اٜ شَرٜلْ نغٜلْ اٛ حٛلَّ کَنْکٛ اٜ حٛورٜ مَاکٛ اٛ اَادِلِيجٛ، ندٜنْ اٜ مٛ وَطَ کٛو مٛيٜ کٛولِيطٛ يٜىٰسُ وَرْتَ اَادِلِيجٛ؞

²⁷نغَمْ نٛنْ، وَلَا غٛطُّمْ طُمْ غٛطّٛ مَنْتٛرْتٛو؞ نغَمْ طُمٜ؟ نغَمْ اٜنْ نغَرْتَايِ اَادِلِعٜنْ نغَمْ کُوطٜ مٜىٰطٜنْ، سٜيْ نِ نغَمْ اٜنْ کٛولَکٜ يٜىٰسُ؞ ²⁸نغَمْ اٜنْ اَنْدِ نٜطّٛ وَرْتَيْ اَادِلِيجٛ يٜىٰسٛ اَللَّه تٛ حٛولَکٜ يٜىٰسُ، نَاع نغَمْ تٛکُّکِ اَتَّوْرَ؞ ²⁹کٛو اَللَّه اٛ اَللَّه يَحُودَنْکٛعٜنْ تَنْ؟ نَاع فُو کَنْکٛ وٛنِ اَللَّه يِمْٻٜ نَاع يَحُودَنْکٛعٜنْ؟ غٛونغَ، اٛ اَللَّه يِمْٻٜ نَاع يَحُودَنْکٛعٜنْ، کَمْٻٜ مَا؞ ³⁰اَللَّه اٛ غٛعٛتٛ، غَرْتِرَيْطٛ يَحُودَنْکٛعٜنْ اَادِلِعٜنْ يٜىٰسٛ مَاکٛ تٛ ٻٜ کٛولَکٜ يٜىٰسُ؞ نٛنْ مَا يِمْٻٜ نَاع يَحُودَنْکٛعٜنْ، اٛ وَرْتِرَيْٻٜ اَادِلِعٜنْ تٛ ٻٜ کٛولَکٜ يٜىٰسُ؞ ³¹تٛ طُمْ نٛنْ، اٜنْ اَلَيْ تٛکُّکِ اَتَّوْرَ نغَمْ اٜنْ کٛولَکٜ يٜىٰسُ؟ طُمْ وَطَتَاکٛ!‏ سٜيْ نِ، اٜنْ تَبِّتِنَطُمْ؞

حٛولَارٜ اِبْرَاهِمْ

¹تٛو، طُمٜ مبِعٜتٜنْ دٛوْ اِبْرَاهِمْ، مَامَ مٜىٰطٜنْ؟ ²تٛ اَللَّه وَرْتِرِي اِبْرَاهِمْ اَادِلِيجٛ نغَمْ کٛ اٛ وَطِ، اٛ حٜٻَيْ کٛ اٛ مَنْتٛرْتٛو، اَمَّا نَاع يٜىٰسٛ اَللَّه؞ ³اَايَارٜ وِعِ، ‏«‏اِبْرَاهِمْ حٛولَکٜ اَللَّه؛ نغَمْ مَاجُمْ اَللَّه وِعِ اٛ اَادِلِيجٛ؞»‏ ⁴نٜطّٛ کُوٛووٛ نغَمْ يٛٻٜىٰ، طُمْ حٛشَّتَا کٛ اٛ يٛٻَا بٛ شَاحُ، اَمَّا بٛ غٛطُّمْ طُمْ اٛ حٜٻَنِ حٛورٜ مَاکٛ؞ ⁵نٜطّٛ مٛ وَطَايِ ٻٜرْندٜ مُوطُمْ دٛوْ کُوطٜ مُوطُمْ، اَمَّا اٛ وَطِ ٻٜرْندٜ مَاکٛ دٛوْ اَللَّه غَطٛووٛ غَطٛوٻٜ حَکّٜ نغَرْتَ اَادِلِعٜنْ، طُمْ نٛدَّيْ حٛولَاکِ مَاکٛ اَادِلَاکُ؞ ⁶نٛنْ دَوْدَ وِعِ ندٜ اٛ مٜتِ دٛوْ نٜطّٛ بَرْکِطِنَاطٛ مٛ اَللَّه نٛدِّ اَادِلِيجٛ نَاع نغَمْ کُوطٜ مَاکٛ؞ اٛ وِعِي،

⁷‏«‏ٻٜ بَرْکِطِنَاٻٜ يِمْٻٜ ٻٜ طُمْ يَافَنِي کٛ وٛوطَا طُمْ ٻٜ نغَطِ،

ٻٜ حَکّٜ مُعّٜنْ نجَافَا؞

⁸اٛ بَرْکِطِنَاطٛ مٛ جٛومِرَاوٛ لِمَتَا حَکّٜ مَاکٛ؞»‏

⁹تٛو، بَرْکَ طُعُمْ، يَحُودَنْکٛعٜنْ تَنْ کٜٻَتَطُمْ، کٛو حَا اٜ يِمْٻٜ نَاع يَحُودَنْکٛعٜنْ؟ اٜنْ مبِعِي، ‏«‏اِبْرَاهِمْ حٛولَکٜ اَللَّه؛ نغَمْ مَاجُمْ اَللَّه وِعِ اٛ اَادِلِيجٛ؞»‏ ¹⁰ندٜيٜ فِي طُعُمْ وَطِ؟ کٛ اِبْرَاهِمْ نَادٜىٰ، کٛو غَطَ اٛ نَادَامَ؟ کٛ اٛ نَادٜىٰ طُمْ وَطِ، نَاع غَطَ اٛ نَادَامَ؞ ¹¹نَادُکِ کِ اٛ وَطَنَا وٛنِ اَلَامَ کٛلُّطُمْ اَللَّه جَٻِي اٛ اَادِلِيجٛ نغَمْ اٛ حٛولَکٜمٛ کٛ اٛ نَادٜىٰ؞ نغَمْ مَاجُمْ، اِبْرَاهِمْ وٛنِ ݧَاکٛ کٛو مٛيٜ کٛولِيطٛ اَللَّه مٛ اَللَّه وَرْتِرِ اَادِلِيجٛ، کٛو اٛ نَادَاکَ؞ ¹²نٛنْ مَا کَنْکٛ وٛنِ ݧَاکٛ ٻٜنْ طٛنْ نَادَاٻٜ، نَاع نغَمْ ٻٜ نَادَاٻٜ، اَمَّا نغَمْ ٻٜ کٛولَکٜ اَللَّه اِرِ حٛولَاکِ کِ اٛ وٛودِ کٛ اٛ نَادٜىٰ؞

اَلْکَوَلْ اَللَّه دٛوْ کٛولِيٻٜمٛ

¹³اَللَّه وَطَنِي اِبْرَاهِمْ اٜ ٻِٻّٜ ٻِٻّٜىٰجِ مَاکٛ اَلْکَوَلْ وِيکِ کَمْٻٜ ندٛنَتَ دُونِيَارُ؞ اَللَّه وَطِي اَلْکَوَلْ نغَعَلْ نَاع نغَمْ اِبْرَاهِمْ اٜ تٛکَّ کٛ اَتَّوْرَ وِعِ، اَمَّا نغَمْ اَادِلَاکُ کٜٻٜتٜىٰطُمْ بَرْکَ حٛولَاکِ اَللَّه؞ ¹⁴تٛ تٛکّٛوٻٜ اَتَّوْرَ نغٛنِ دٛنٛوٻٜ دُونِيَارُ، حٛولَارٜ نٜطّٛ وَرْتِي مٜىٰرٜ، ندٜنْ اَلْکَوَلْ اَللَّه وَرْتِي کٛو کٛ نَفِ؞ ¹⁵اَتَّوْرَ اٜ وَدَّ مٛنّٜرٜ اَللَّه، اَمَّا فُو تٛ دٛوکَ وَلَا، نَاع نٛ طُمْ وَطَتَ طُمْ يٜوَ دٛوکَ؞

¹⁶نغَمْ نٛنْ، يِمْٻٜ کٛولِيٻٜ اَللَّه نغٛنِ کٜٻٛوٻٜ کٛ اٛ وَطِ اَلْکَوَلْ، نغَمْ طُمْ حٜٻَ کٛ اٛ وَطِ اَلْکَوَلْ شَاحُ، ندٜنْ فُو ٻِٻّٜ ٻِٻّٜىٰجِ اِبْرَاهِمْ تَبِّتِنَ حٜٻُکِطُمْ، نَاع تٛکّٛوٻٜ اَتَّوْرَ تَنْ، اَمَّا حَا اٜ کٛولِيٻٜ اَللَّه نٛنْ نٛ اِبْرَاهِمْ حٛولٛرِيمٛ؞ نغَمْ اِبْرَاهِمْ وٛنِ ݧَاکٛ مٜىٰطٜنْ اٜنْ فُو؞ ¹⁷نٛنْ نٛ طُمْ وِنْدِرَا، ‏«‏مِ وَرْتِرِيمَ ݧَاکٛ لٜݧِ طُطِّ؞»‏ کَنْکٛ وٛنِ ݧَاکٛ مٜىٰطٜنْ يٜىٰسٛ اَللَّه مٛ اٛ حٛولِي، اَللَّه کٛکّٛووٛ مَيْٻٜ يٛنْکِ، نٛدّٛووٛ کٛ وَلَا سٜيْ طُمْ وَنْغَ؞ ¹⁸اِبْرَاهِمْ حٛولَکٜ اَللَّه، اٛ وَطِي کَمُّندٜ کٛو ندٜ وَلَا دَلِيلَ وَطُکِ کَمُّندٜ مَاکٛ؞ نغَمْ مَاجُمْ، اٛ وَرْتِي ‏«‏ݧَاکٛ لٜݧِ طُطِّ،»‏ نٛنْ نٛ اٛ وِعَا، ‏«‏تَانِرَاٻٜ مَاطَ طُوطِرَيْ بٛ کٛودٜ دٛوْ؞»‏ ¹⁹اٛ اَلَايِ حٛولَاکِ اَللَّه، کٛو ندٜ اٛ يِعِ ٻَنْدُ مَاکٛ سٛمِي نغَمْ اٛ ٻَدَکٜ دُوٻِ 100، ندٜنْ دٜبّٛ مَاکٛ سَارَتُ دَݧَتَا؞ ²⁰اٛ وَطَايِ سٜکٛ دٛوْ کٛ اَللَّه وَطَنِمٛ اَلْکَوَلْ، اَمَّا اٛ ٻٜيْدِي حٛولَاکِ اَللَّه، اٛ مَنْتِيمٛ؞ ²¹اٛ تَبِّتِنِي اَللَّه وَاوَيْ وَطَ کٛ وَطِ اَلْکَوَلْ؞ ²²نغَمْ اِبْرَاهِمْ حٛولَکٜ اَللَّه، ‏«‏اَللَّه وِعِ اٛ اَادِلِيجٛ؞»‏ ²³بٛلِيطٜ بِيطٜ ‏«‏اَللَّه وِعِ اٛ اَادِلِيجٛ،»‏ نَاع نغَمْ مَاکٛ تَنْ طٜ مبِنْدَا؞ ²⁴طٜ مبِنْدَامَ نغَمْ مٜىٰطٜنْ اٜنٜنْ مَا ٻٜ اَللَّه وَرْتِرْتَ اَادِلِعٜنْ، اٜنٜنْ کٛولِيٻٜ اُمِّنْطٛ يٜىٰسُ جٛومِرَاوٛ مٜىٰطٜنْ دَغَ مَيْدٜ؞ ²⁵اٛ وَرَامَ نغَمْ حَکّٜ مٜىٰطٜنْ، ندٜنْ اٛ اُمِّنَامَ دَغَ مَيْدٜ نغَمْ نغَرْتٜنْ اَادِلِعٜنْ يٜىٰسٛ اَللَّه؞

سِرْيٛوتِرْکِ اٜ اَللَّه

¹نغَمْ نٛنْ، ندٜ اَللَّه وَرْتِرِعٜنْ اَادِلِعٜنْ نغَمْ اٜنْ کٛولَکٜ يٜىٰسُ اَلْمَسِيحُ، اٜنْ شِرْيٛوتِرِي اٜ اَللَّه بَرْکَ جٛومِرَاوٛ مٜىٰطٜنْ يٜىٰسُ اَلْمَسِيحُ؞ ²بَرْکَ مَاکٛ کٜٻُطٜنْ لَاوٛلْ حٜٻُکِ طُعُمْ شَاحُ اَللَّه طُمْ غٛنْطٜنْ ندٜرْ جٛونِ؞ طٛنْمَا اٜنْ مبٜلْمبٜلْتَ نغَمْ اٜنْ تَبِّتِنِي اَللَّه حٛلَّيْعٜنْ تٜدُّنغَلْ مُوطُمْ؞ ³نَاع نٛنْ تَنْ، حَا مَا اٜنْ مبٜلْمبٜلْتَ ندٜرْ تٛرَّاجِ طِ نجَرٜتٜنْ، نغَمْ اٜنْ اَنْدِ يَرُکِ تٛرَّاجِ اٜ وَدَّ مُݧَلْ؞ ⁴تٛ اٜنْ مُݧِي ندٜرْ تٛرَّ، اٜنْ کٜٻَيْ نغِکُّ طُمْ اَللَّه يِطِ، تٛ اٛ يِطِي نغِکُّ مٜىٰطٜنْ، نٛنْ وَطَيْ نغَطٜنْ کَمُّندٜ؞ ⁵کَمُّندٜ ندٜنْ سٜمْتِنْتَاعٜنْ، نغَمْ اَللَّه حٛلِّعٜنْ اٜ مٛ يِطِعٜنْ ندٜرْ ٻٜرْطٜ مٜىٰطٜنْ بَرْکَ رُوحُ مَاکٛ، طُمْ اٛ حٛکِّعٜنْ؞

⁶ندٜرْ شَرٜلْ نغٜلْ تَمْڤُطٜنْ، اَلْمَسِيحُ مَايِي نغَمْ غَطٛوٻٜ حَکّٜ ندٜرْ شَرٜلْ نغٜلْ اَللَّه سُٻِ؞ ⁷اٜ طُمْ سَطِ غٛطّٛ مَايَ نغَمْ اَادِلِيجٛ؞ سٜيْ نِ طُمْ غَطٛتٛوطُمْ غٛطّٛ وَطَ سٜمْبٜ ٻٜرْندٜ مَايَ نغَمْ نٜطّٛ مٛ نغِکُّ بٛطُّمْ؞ ⁸اَمَّا لَاوٛلْ نغٛلْ اَللَّه حٛلِّيعٜنْ يِدّٜ مَاکٛ وٛنِ، شَرٜلْ کٛ نغٛنْطٜنْ ندٜرْ حَکّٜ، اَلْمَسِيحُ مَايِي نغَمْ مٜىٰطٜنْ؞ ⁹ندٜ جٛونِ اٜنْ نغَرْتِي اَادِلِعٜنْ بَرْکَ پِيپَمْ اَلْمَسِيحُ، فِي ٻُرْطُمْ تَبُّتُکِ وٛنِ اٛ حِسْنَيْعٜنْ دَغَ مٛنّٜرٜ اَللَّه غَرَيْندٜ؞ ¹⁰ندٜنّٛ اٜنْ وَݧْوَݧْٻٜ اَللَّه، اَمَّا طُمْ سِرْيٛوتِرِيعٜنْ اٜ مَاکٛ بَرْکَ مَيْدٜ ٻِطّٛ مَاکٛ؞ جٛونِ ندٜ اٜنْ شِرْيٛوتِرِي اٜ اَللَّه، اٜنْ ٻُرَيْ تَبِّتِنْکِ اَلْمَسِيحُ حِسْنَيْعٜنْ نغَمْ اٜ مٛ فٛوفَ؞ ¹¹اَمَّا نَاع کَنْجُمْ تَنْ، حَا مَا اٜنْ نَنَ بٜلْطُمْ نغَمْ کٛ اَللَّه وَطِ بَرْکَ جٛومِرَاوٛ مٜىٰطٜنْ يٜىٰسُ اَلْمَسِيحُ، شِرْيٛوتِرْطٛعٜنْ اٜ اَللَّه جٛونِ؞

اَادَمُ اٜ اَلْمَسِيحُ

¹²حَکّٜ نَتِّي ندٜرْ دُونِيَارُ ندُعُ لَاوٛلْ نٜطّٛ غٛعٛتٛ؞ حَکّٜ طُمْ اٛ وَطِ نغَدِّي مَيْدٜ؞ نٛنْ کٛو مٛيٜ وَرْتِي مَايَيْطٛ، نغَمْ کٛو مٛيٜ وَطِي حَکّٜ؞ ¹³غٛونغَ، کٛ اَتَّوْرَ وَدّٜىٰ، حَکّٜ اٜ طٛنْ ندٜرْ دُونِيَارُ، اَمَّا اَللَّه جٛغَتَاکٛ حَکّٜ نٜطّٛ ندٜرْ ٻٜرْندٜ مُوطُمْ تٛ دٛوکَ وَلَا؞ ¹⁴فُو اٜ نٛنْ، دَغَ جَامَنُ اَادَمُ يَاکِ جَامَنُ مُوسَ، مَيْدٜ لَامَکٜ دٛوْ کٛو مٛيٜ، حَا اٜ دٛوْ يِمْٻٜ ٻٜ نغَطَايِ حَکّٜ اِرِ طُمْ اَادَمُ وَطِ؞

اَادَمُ وٛنِ مِسَالُ اٛنْ طٛنْ غَرَيْطٛ؞ ¹⁵اَمَّا شَاحُ طُمْ اَللَّه حٛکَّتَ طُمْ نَنْدَا اٜ حَکّٜ اَادَمُ؞ يِمْٻٜ طُطْٻٜ مَايِي نغَمْ حَکّٜ نٜطّٛ غٛعٛتٛ، اَمَّا يِدّٜ اَللَّه ٻُرِي مَوْنُکِ نَاع سٜطَّ، نٛنْ مَا شَاحُ طُمْ اٛ حٛکَّتَ يِمْٻٜ طُطْٻٜ بَرْکَ نٜطّٛ غٛعٛتٛ، وَاتٛ يٜىٰسُ اَلْمَسِيحُ؞ ¹⁶شَاحُ اَللَّه اٜ فٜىٰرٛوتِرِ اٜ کٛ حَکّٜ طُمْ نٜطّٛ غٛعٛتٛ فٛوطِ؞ نغَمْ کِيتَ اَللَّه تٛکُّطُمْ غَطَ حَکّٜ طُمْ اَادَمُ وَطِ وٛنِ کِيتَ حَلْکٜرٜ، اَمَّا شَاحُ طُمْ اَللَّه حٛکِّ، کَنْجُمْ طُمْ وَرْتِرِعٜنْ اَادِلِعٜنْ کٛو ندٜ اٜنْ نغَطِي حَکّٜ نَاع سٜطَّ؞ ¹⁷نغَمْ حَکّٜ طُمْ نٜطّٛ غٛعٛتٛ وَطِ، مَيْدٜ فُطِّ لَامَاکِ دٛوْ کٛو مٛيٜ؞ اَمَّا لَامُ طُمْ، طُمْ حٜوْتَايِ کٛو طُمٜ تٛ طُمْ حَوْتَامَ اٜ لَامُ طُمْ نٜطّٛ غٛعٛتٛ وَدِّ، وَاتٛ يٜىٰسُ اَلْمَسِيحُ؞ کٛو مٛيٜ مٛ اَللَّه حٛلِّ يِدّٜ مَوْندٜ وَرْتِرِيمٛ اَادِلِيجٛ شَاحُ، اٛ حٜٻَيْ جَالٛرْغَلْ دٛوْ حَکّٜ بَرْکَ اَلْمَسِيحُ؞

¹⁸نغَمْ نٛنْ، نٛنْ نٛ حَکّٜ نٜطّٛ غٛعٛتٛ فٛوطِرَنِ فُو يِمْٻٜ کِيتَ حَلْکٜرٜ، نٛنْ مَا کُوغَلْ اَادِلَاکُ نغَلْ نٜطّٛ غٛعٛتٛ وَطِ وَرْتِرِي يِمْٻٜ طُطْٻٜ اَادِلِعٜنْ حٛکِّيٻٜ يٛنْکِ کٜسِ؞ ¹⁹نٛنْ نٛ يِمْٻٜ طُطْٻٜ نغَرْتِ غَطٛوٻٜ حَکّٜ نغَمْ نٜطّٛ غٛعٛتٛ وَݧِي کٛ اَللَّه وِعِ، نٛنْ مَا يِمْٻٜ طُطْٻٜ نغَرْتَيْ اَادِلِعٜنْ نغَمْ نٜطّٛ غٛعٛتٛ وَطِي کٛ اَللَّه يِطِ؞

²⁰اَتَّوْرَ وَدَّامَ نغَمْ کٛ وٛوطَا طُمْ يِمْٻٜ نغَطَتَ وُرْتٛو اٜ نجَيْرِ؞ اَمَّا فُو تٛ حَکّٜ ٻٜيْدِي، سٜيْ يِدّٜ اَللَّه ٻُرَ ٻٜيْدَاکِ؞ ²¹حَکّٜ لَامَکٜ يِمْٻٜ نغَمْ طُمْ ڤٛوطَنِيٻٜ مَيْدٜ؞ اَمَّا جٛونِ يِدّٜ اَللَّه اٜ لَامٛو لَاوٛلْ اَادِلَاکُ، ندٜنْ اَللَّه جَٻِيعٜنْ بَرْکَ يٜىٰسُ اَلْمَسِيحُ جٛومِرَاوٛ مٜىٰطٜنْ؞ نٛنْ وَطَيْ کٜٻٜنْ يٛنْکِ کِ رٜعَتَا؞

بَوْطٜ حَکّٜ نغٜوَامَ

¹تٛو، طُمٜ مبِعٜتٜنْ؟ اٜنْ نغَطَيْ کَ وَطُکِ حَکّٜ نغَمْ يِدّٜ اَللَّه ٻٜيْدٛو؟ ²غٛونغَ نَاع نٛنْ!‏ حَانَا ݧَمْرٜنْ يٜىٰسٛ اٜ وَطُکِ حَکّٜ، نغَمْ اٜنْ نجَادَکٜ اٜنْ نغَرْتِي بٛ مَيْٻٜ تٛ حَکّٜ؞ نٛ وَطَتَ کَدِنْ اٜنْ ݧَمْرَ يٜىٰسٛ اٜ جٛنْدٜ ندٜرْ حَکّٜ؟ ³غٛونغَ اٛنْ اَنْدِ ندٜ طُمْ وَطَنِيعٜنْ بَڤْتِسْمَ نغَمْ شُمْڤٛوتِرٜنْ اٜ يٜىٰسُ اَلْمَسِيحُ، اٜنْ نغَطَنَ بَڤْتِسْمَ نغَمْ اٜنْ مَيْدِ اٜ مَاکٛ؞ ⁴نغَمْ نٛنْ، بَڤْتِسْمَ طُمْ اُمْ وَطَنِعٜنْ بٛ طُمْ اُوُدُعٜنْ اٜ مَاکٛ، ندٜنْ اٜنْ نغَرْتِي غٛعٛ اٜ مَاکٛ ندٜرْ مَيْدٜ مَاکٛ، نغَمْ، نٛنْ نٛ تٜدُّنغَلْ ݧَاکٛ مٜىٰطٜنْ مٛ دٛوْ اُمِّنِرِ اَلْمَسِيحُ دَغَ مَيْدٜ، نٛنْ اٜنٜنْ مَا اٜنْ نغَطُ جٛنْدٜ حٜيْرٜ؞

⁵نغَمْ تٛ اٜنْ نغَرْتِي غٛعٛ اٜ اَلْمَسِيحُ ندٜرْ مَيْدٜ اِرِ ندٜ مَاکٛ، نٛنْ مَا اٜنْ تَبِّتِنِي اٜنْ نغَرْتَيْ غٛعٛ اٜ مَاکٛ ندٜرْ اُمَّاکِ دَغَ مَيْدٜ نٛ اٛ اُمّٛرِي؞ ⁶اٜنْ اَنْدِ نغِکُّ مٜىٰطٜنْ طُمْ ندٜنّٛ طُمْ وَرْدَامَ اٜ اَلْمَسِيحُ دٛوْ غَافَانغَلْ، نغَمْ ٻَنْدُ مٜىٰطٜنْ ندُ حَکّٜ حَلْکٜىٰ، نغَمْ تٛع ڤُطِّتٜنْ نغَرْتٜنْ مَشُّٻٜ حَکّٜ؞ ⁷نغَمْ فُو مَيْطٛ، حَکّٜ وَلَا بَوْطٜ دٛوْ مَاکٛ؞ ⁸تٛ اٜنْ مَيْدِي اٜ اَلْمَسِيحُ، اٜنْ تَبِّتِنِي اٜنْ نجٛوطٛدٛتٛ اٜ مَاکٛ؞ ⁹نغَمْ اٜنْ اَنْدِ اَلْمَسِيحُ اُمِّنَامَ دَغَ مَيْدٜ، ندٜنْ اٛ فُطِّتَتَا اٛ مَايَ کَدِنْ؞ مَيْدٜ فُطِّتَتَا حٜٻَ بَوْطٜ دٛوْ مَاکٛ؞ ¹⁰مَيْدٜ ندٜ اٛ مَايِ اٛ مَايُ ندٜ غٛعٛ نغَمْ اٛ يٜوَ سٜمْبٜ حَکّٜ حَا اَبَدَا، ندٜنْ جٛنْدٜ ندٜ اٛ وَطَتَ جٛونِ اٜ مٛ وَطَندٜ ندٜرْ سُمْڤٛوتِرْکِ اٜ اَللَّه؞ ¹¹نٛنْ اٛنٛنْ مَا، دٛولٜ کٛشّٜىٰ کٛعٜ مٛوطٛنْ بٛ مَيْٻٜ ٻٜ بَوْطٜ حَکّٜ لَامَاکِ دٛوْ مَٻّٜ، اَمَّا جٛونِ اٛنْ نغَطَ جٛنْدٜ نغَمْ نغَطٛنْ کٛ اَللَّه يِطِ بَرْکَ سُمْڤٛوتِرْکِ اٜ يٜىٰسُ اَلْمَسِيحُ؞

¹²نغَمْ نٛنْ، تٛع اٛنْ اَلُ حَکّٜ لَامٛو دٛوْ ٻَلِّ مٛوطٛنْ مَايَيْطِ حَا تٛکّٛنْ کٛ سُونٛ ٻَلِّ مٛوطٛنْ نغِطِ؞ ¹³تٛع اٛنْ ڤُطُّتُ اَلَنٛنْ حَکّٜ وٛنْدٜ جٛکّٛودٜ ٻَنْدُ مٛوطٛنْ ندٜ حُوتِرٜىٰ فِي کَلُّطُمْ؞ اَمَّا کٛکّٜىٰ اَللَّه کٛعٜ مٛوطٛنْ بٛ يِمْٻٜ ٻٜ طُمْ اُمِّنِ دَغَ مَيْدٜ يَاکِ يٛنْکِ، ندٜنْ کٛکّٛنْمٛ فُو کٛعٜ مٛوطٛنْ نغَمْ اٛ حُوتِرَعٛنْ کُوطٜ اَادِلَاکُ؞ ¹⁴نغَمْ حَکّٜ حٜٻَتَا جَالٛرْغَلْ دٛوْ مٛوطٛنْ، ندٜ نَاع لٜيْ اَتَّوْرَ نغٛنْطٛنْ، اَمَّا لٜيْ يِدّٜ اَللَّه نغٛنْطٛنْ؞

مَشُّٻٜ اَادِلَاکُ

¹⁵طُمٜ نغَطٜتٜنْ؟ اٜنْ نغَطَيْ حَکّٜ نغَمْ لٜيْ يِدّٜ اَللَّه غٛنْطٜنْ نَاع لٜيْ اَتَّوْرَ؟ تٛع اٜنْ نغَطُ نٛنْ!‏ ¹⁶غٛونغَ اٛنْ اَنْدِ تٛ اٛنْ تٛکِّي کٛ غٛطّٛ وِعِعٛنْ نٛ مَشُّٻٜ نغَطَتَ، اٛنْ نغَرْتِي مَشُّٻٜ اٛنْ طٛنْ مٛ نغَطٛتٛنْ کٛ وِعِ، کٛو حَکّٜ ڤٛوطَيْطُمْ مَيْدٜ، کٛو وَطُکِ کٛ اَللَّه يِطِ غَرْتِرَيْطُمْ نٜطّٛ اَادِلِيجٛ؞ ¹⁷اَمَّا يٜتّٛورٜ تَبِّتَنَ اَللَّه، نغَمْ ندٜنّٛ اٛنْ مَشُّٻٜ حَکّٜ، اَمَّا جٛونِ اٛنْ تٛکَّ اٜکِّتِنٛلْ نغٛلْ طُمْ اٜکِّتِنِعٛنْ اٜ ٻٜرْطٜ مٛوطٛنْ فُو؞ ¹⁸اٛنْ ندِمْطِنَامَ دَغَ وَطُکِ حَکّٜ، اٛنْ نغَرْتِي مَشُّٻٜ اَادِلَاکُ؞ ¹⁹اٜ مِ حُوتِرَ بٛلِيطٜ طٜ شَطَا نغَمْ اٛنْ شٜمْبِطَا؞ ندٜنّٛ اٛنْ نغَرْتِرِي کٛعٜ مٛوطٛنْ مَشُّٻٜ وَطُکِ فِي نٜفْنِيطُمْ اٜ فِي کَلُّطُمْ غَطُطُمْ کَ ٻٜيْدَاکِ نَاع سٜطَّ؞ نٛنْ مَا، جٛونِ نغَرْتِرٜىٰ کٛعٜ مٛوطٛنْ مَشُّٻٜ اَادِلَاکُ نغَمْ نغَطٛنْ جٛنْدٜ شٜنِيندٜ؞

²⁰کٛ نغٛنّٛوطٛنْ مَشُّٻٜ حَکّٜ، وَلَا کٛ وَنِّعٛنْ اٜ کُوطٜ اَادِلَاکُ؞ ²¹ندِيٜ ٻٜيْدَارِ کٜٻُطٛنْ ندٜرْ کٛ نغَطَيْنٛوطٛنْ ندٜنّٛ طُمْ شٜمْتٛتٛنْ جٛونِ؟ کٛ فِي طُمْ طٛنْ فٛوطَتَ وٛنِ مَيْدٜ!‏ ²²اَمَّا جٛونِ ندٜ طُمْ رِمْطِنِيعٛنْ دَغَ حَکّٜ، ندٜنْ اٛنْ نغَرْتِي مَشُّٻٜ اَللَّه، ٻٜيْدَارِ ندِ کٜٻٛتٛنْ وٛنِ جٛنْدٜ لَمْندٜ، ندٜنْ اٜ رٜعِرْدٜ کٜٻٛنْ يٛنْکِ کِ رٜعَتَا؞ ²³نغَمْ نجٛٻَارِ حَکّٜ طُمْ مَيْدٜ، اَمَّا شَاحُ اَللَّه وٛنِ يٛنْکِ کِ رٜعَتَا کٜٻٜتٜىٰکِ بَرْکَ سُمْڤٛوتِرْکِ اٜ يٜىٰسُ اَلْمَسِيحُ جٛومِرَاوٛ مٜىٰطٜنْ؞

مِسَالُ دٛوْ تٜىٰغَلْ

¹بَنْدِرَاٻٜ اَمْ، ندٜ اٛنْ فُو اٛنْ اَنْدِ دٛوکَ، اٛنْ ڤَامَيْ کٛ نغِطْمِ وِيکِ؞ دٛوکَ اٜ لَامٛو دٛوْ نٜطّٛ تٛ اٜ مٛ فٛوفَ تَنْ؞ ²مِسَالُ، دٜبّٛ تٜىٰغَلْ دٛوکَ حَٻِّيمٛ اٜ غٛرْکٛ مَاکٛ تٛ نِ غٛرْکٛ اٛنْ اٜ فٛوفَ؞ اَمَّا تٛ غٛرْکٛ اٛنْ مَايِي، دٜبّٛ اٛنْ فِتَّکٜ دَغَ دٛوکَ کَٻِّندِرْطُمّٛ اٜ غٛرْکٛ اٛنْ؞ ³نغَمْ نٛنْ، تٛ غٛرْکٛ مَاکٛ اٜ فٛوفَ اٛ جٛوطٛدِي اٜ غٛرْکٛ فٜىٰرٜ، طُمْ نٛدِّرَيْمٛ غَطٛووٛ نجٜىٰنُ؞ اَمَّا تٛ غٛرْکٛ مَاکٛ مَايِي، دٛوکَ يٛوفِيمٛ، ندٜنْ تٛ اٛ تٜىٰرِي اٜ غٛطّٛ فٜىٰرٜ، نَاع نجٜىٰنُ اٛ وَطَتَ؞ ⁴بَنْدِرَاٻٜ اَمْ، دٛوْ اَتَّوْرَ، اٛنْ نغَرْتِي بٛ مَيْٻٜ بَرْکَ مَيْدٜ اَلْمَسِيحُ دٛوْ غَافَانغَلْ، نغَمْ نغَرْتٛنْ ٻٜ غٛطّٛ جٜيِ؞ جٛونِ جٜيْطٛعٛنْ وٛنِ اَلْمَسِيحُ اُمِّيطٛ دَغَ مَيْدٜ، نغَمْ نغَرْتٜنْ کُوٛوٻٜ ندٜرْ کُوغَلْ اَللَّه؞ ⁵شَرٜلْ کٛ نغَطٜتٜنْ کٛ ٻَلِّ مٜىٰطٜنْ نغِطِ، سُونٛوجِ ڤٛوطَيْطِ حَکّٜ، طِ ٻٜيْدِي سٜمْبٜ ندٜرْ مٜىٰطٜنْ کٛ نَنْطٜنْ ندٜرْ اَتَّوْرَ، اٜ طِ کُوَ ندٜرْ ٻَلِّ مٜىٰطٜنْ نغَمْ کُوٜنْ کٛ فٛوطَنْتَعٜنْ مَيْدٜ؞ ⁶اَمَّا جٛونِ اٜنْ ندِمْطِنَامَ دَغَ اَتَّوْرَ غَرْتِرْطُمْعٜنْ مَشُّٻٜ، نغَمْ اٜنْ مَيْدِي اٜ اَلْمَسِيحُ؞ جٛونِ اٜنْ کُوَنَ اَللَّه ندٜرْ لَاوٛلْ کٜسٛلْ نغٛلْ رُوحُ مَاکٛ، نَاع ندٜرْ تٛکُّکِ لَاوٛلْ کِينغٛلْ نغٛلْ دٛوکَ بِنْدَاطُمْ؞

اَتَّوْرَ اٜ حَکّٜ

⁷طُمٜ مبِعٜتٜنْ کَدِنْ؟ اَتَّوْرَ طُمْ حَکّٜ؟ غٛونغَ نَاع نٛنْ!‏ اَمَّا دَا اَتَّوْرَ وَلَا، دَا مِ اَنْدَا کٛ وٛنِ حَکّٜ؞ دَا اَتَّوْرَ وِعَايِنٛ، ‏«‏تَاع يِطُ فِي طُمْ اَ جٜيَايِ،»‏ دَا مِ اَنْدَا يِطُکِ فِي طُمْ مِ جٜيَايِ وٛوطَا؞ ⁸اَمَّا حَکّٜ حٜٻِي لَاوٛلْ ندٜرْ دٛوکَ فٛوطَنِييَمْ کٛو اِرِ نغٛيٜ سُونٛ يِطُکِ فِي طُمْ مِ جٜيَايِ؞ نغَمْ تٛ دٛوکَ وَلَا، سٜمْبٜ حَکّٜ وَاتِي؞ ⁹ندٜنّٛ کٛ مِ اَنْدَا کٛ دٛوکَ حَطِ، اٜ مِ ݧُمَ مِ وَلَا حَکّٜ؞ اَمَّا ندٜ اَنْدُمِطُمْ، سٜيْ ڤَامُمِ مِ يٜوِيطُمْ، مِ غَطٛووٛ حَکّٜ، ندٜنْ اَنْدُمِ يٜىٰسٛ اَللَّه مِ مَيْطٛ؞ ¹⁰دٛوکَ کَانُطُمْ حٛلَّيَمْ لَاوٛلْ نغٛلْ تٛکَّيْمِ مِ حٜٻَ يٛنْکِ کِ رٜعَتَا، طُمْ فٛوطَنِييَمْ حَلْکٜرٜ؞ ¹¹حَکّٜ کٜٻِي لَاوٛلْ ندٜرْ دٛوکَ، طُمْ کُوتِرِيطُمْ، طُمْ پٛيْرِييَمْ، طُمْ فٛوطَنِييَمْ حَلْکٜرٜ؞

¹²نغَمْ نٛنْ، اَتَّوْرَ دَغَ تٛ اَللَّه طُمْ پِوٛيِ، نٛنْ مَا دٛوکَ دَغَ تٛ اَللَّه طُمْ پِوٛيِ، اٜ طُمْ وِعَ کٛ حَانِ، اٜ طُمْ وٛوطِ؞ ¹³تٛو، طُمْ طٛنْ دٛوکَ بٛطُّمْ طُمْ فٛوطَنِييَمْ حَلْکٜرٜ وٛنْ طٛنْ؟ نَاع نٛنْ!‏ اَمَّا نغَمْ حَکّٜ اَنْدٜىٰ طُمْ حَکّٜ، طُمْ ڤٛوطَنِييَمْ حَلْکٜرٜ لَاوٛلْ طُمْ طٛنْ دٛوکَ بٛطُّمْ، نغَمْ اٜ لَاوٛلْ دٛوکَ حَکّٜ وَرْتَ فِي کَلُّطُمْ نَاع سٜطَّ؞ ¹⁴اٜنْ اَنْدِ اَتَّوْرَ طُمْ کُوغَلْ رُوحُ اَللَّه، اَمَّا مِنْ مِ نٜطّٛ تَنْ، مِ مَشُّطٛ حَکّٜ؞

حَٻْدُکِ اٜ حَکّٜ

¹⁵مِ فَامَايِ نغَمْ طُمٜ نغَطَيْمِ کٛ نغَطَيْمِ؞ نغَمْ مِ وَطَتَا کٛ نغِطُمِ وَطُکِ، اَمَّا اٜ مِ وَطَ کٛ نغَݧُمِ؞ ¹⁶تٛ مِ وَطِي کٛ مِ يِطَا وَطُکِ، نٛنْ حٛلِّي مِ جَٻِي اَتَّوْرَ اٜ وٛوطِ؞ ¹⁷نغَمْ نٛنْ، نَاع طُمْ مِنْ وَطَتَطُمْ، اَمَّا طُمْ حَکّٜ غٛنْطُمْ ندٜرْ اَمْ؞ ¹⁸اٜ مِ اَنْدِ وَلَا غٛطُّمْ بٛطُّمْ ندٜرْ اَمْ، وَاتٛ ندٜرْ نغِکُّ اَمْ طُمْ حَکّٜ؞ اٜ مِ يِطِ وَطُکِ فِي بٛطُّمْ، اَمَّا مِ وَاوَتَا وَطُکِطُمْ؞ ¹⁹مِ وَطَتَا فِي بٛطُّمْ طُمْ نغِطُمِ وَطُکِ، اَمَّا اٜ مِ وَطَ فِي کَلُّطُمْ طُمْ مِ يِطَا وَطُکِ؞ ²⁰تٛو، تٛ مِ وَطِي کٛ مِ يِطَا وَطُکِ، نٛنْ حٛلِّي نَاع طُمْ مِنْ وَطَتَطُمْ، اَمَّا طُمْ حَکّٜ غٛنْطُمْ ندٜرْ اَمْ وَطَتَطُمْ؞

²¹طُمْ وَرْتَنِييَمْ نغِکُّ، فُو شَرٜلْ کٛ نغِطُمِ وَطُکِ غٛطُّمْ بٛطُّمْ، سٜيْ غٛطُّمْ کَلُّطُمْ غٛنْطُمْ ندٜرْ اَمْ حَطَيَمْ وَطُکِطُمْ؞ ²²دَغَ ندٜرْ ٻٜرْندٜ اَمْ اٜ مِ نَنَ بٜلْطُمْ دٛوکَ پِوٛيْطُمْ دَغَ تٛ اَللَّه؞ ²³اَمَّا ندٜرْ ٻَنْدُ اَمْ مِ يِعِي غٛطُّمْ دٛوکَ فٜىٰرٜ اٜ حٛنِدَ اٜ دٛوکَ طُمْ ٻٜرْندٜ اَمْ يِطِ؞ طُمْ وَرْتِرِييَمْ مَشُّطٛ حَکّٜ غٛنْطُمْ ندٜرْ ٻَنْدُ اَمْ؞ ²⁴مِ نٜطّٛ جُرْمِنِيطٛ!‏ مٛيٜ حِسْنَتَيَمْ دَغَ ندُعُ ٻَنْدُ اَمْ ڤٛوطَنَيْندُيَمْ حَلْکٜرٜ؟ ²⁵يٜتّٛورٜ تَبِّتَ تٛ اَللَّه بَرْکَ جٛومِرَاوٛ مٜىٰطٜنْ يٜىٰسُ اَلْمَسِيحُ!‏

نغَمْ نٛنْ، مِنْ اٜ حٛورٜ اَمْ ندٜرْ ٻٜرْندٜ اَمْ مِ مَشُّطٛ دٛوکَ اَللَّه، اَمَّا نغَمْ نغِکُّ اَمْ طُمْ حَکّٜ مِ مَشُّطٛ حَکّٜ؞

جٛنْدٜ ندٜرْ رُوحُ اَللَّه

¹نغَمْ نٛنْ، جٛونِ طُمْ تَپَنْتَا ٻٜنْ طٛنْ شُمْڤٛوتِرٛوٻٜ اٜ يٜىٰسُ اَلْمَسِيحُ کِيتَ حَلْکٜرٜ؞ ²نغَمْ دٛوکَ رُوحُ اَللَّه کٛکّٛوجُمْ يٛنْکِ ندٜرْ سُمْڤٛوتِرْکِ اٜ يٜىٰسُ رِمْطِنِييَمْ دَغَ بَوْطٜ حَکّٜ لَامٛتٛوطُمْعٜنْ ڤٛوطَنَيْطُمْعٜنْ حَلْکٜرٜ؞ ³کٛ اَتَّوْرَ وَاوَايِ وَطُکِ، نغَمْ نغِکُّ حَکّٜ طُمْ نٜطّٛ وٛودِ، اَللَّه وَطِيطُمْ؞ ندٜ اٛ لِلِ ٻِطّٛ مَاکٛ ندٜرْ نَنْدِ ٻَنْدُ مٜىٰطٜنْ ندُ حَکّٜ نغَمْ اٛ وَرْتَ شَکِّرِ نغَمْ حَکّٜ مٜىٰطٜنْ، اٛ سَنْکِتِي لَامُ حَکّٜ ندٜرْ ٻَنْدُ؞ ⁴اَللَّه وَطِي طُعُمْ نغَمْ مبَاوٜنْ وَطُکِ فُو کُوطٜ اَادِلَاکُ طٜ اَتَّوْرَ وِعِ طُمْ وَطَ، اٜنٜنْ تٛکّٛوٻٜ کٛ رُوحُ اَللَّه وِعِ، نَاع کٛ ٻَلِّ مٜىٰطٜنْ نغِطِ؞ ⁵يِمْٻٜ غَطٛوٻٜ کٛ ٻَلِّ مَٻّٜ نغِطِ، اٜ ٻٜ نجٛوَ ٻٜرْطٜ مَٻّٜ دٛوْ کٛ ٻَلِّ مَٻّٜ نغِطِ؞ اَمَّا يِمْٻٜ غَطٛوٻٜ کٛ رُوحُ اَللَّه وِعِ، اٜ ٻٜ نجٛوَ ٻٜرْطٜ مَٻّٜ دٛوْ کٛ رُوحُ اَللَّه يِطِ؞ ⁶يٛوُکِ ٻٜرْندٜ دٛوْ کٛ ٻَنْدُ يِطِ اٜ طُمْ فٛوطَ حَلْکٜرٜ، اَمَّا يٛوُکِ ٻٜرْندٜ دٛوْ کٛ رُوحُ اَللَّه يِطِ اٜ طُمْ وَدَّ يٛنْکِ اٜ جَمْ؞ ⁷نغَمْ يٛوُکِ ٻٜرْندٜ دٛوْ کٛ ٻَنْدُ يِطِ طُمْ وَݧُکِ اَللَّه، طُمْ تٛکَّتَا کٛ دٛوکَ اَللَّه وِعِ، طُمْ وَاوَتَا وَطُکِطُمْ؞ ⁸يِمْٻٜ غَطٛوٻٜ کٛ ٻَلِّ مَٻّٜ نغِطِ ٻٜ مبَاوَتَا وٜلْنَنْکِ اَللَّه ٻٜرْندٜ؞

⁹اَمَّا اٛنٛنْ اٛنْ نغَطَتَا کٛ ٻَلِّ مٛوطٛنْ نغِطِ؞ اٛنْ نغَطَ کٛ رُوحُ اَللَّه وِعِ، تٛ نِ طُمْ غٛونغَ رُوحُ اَللَّه اٜ جٛوطِي ندٜرْ ٻٜرْطٜ مٛوطٛنْ؞ کٛو مٛيٜ تٛ وَلَا رُوحُ اَلْمَسِيحُ، نَاع اَلْمَسِيحُ جٜيِمٛ؞ ¹⁰اَمَّا تٛ اَلْمَسِيحُ اٜ جٛوطِي ندٜرْ ٻٜرْطٜ مٛوطٛنْ، کٛو ندٜ ٻَلِّ مٛوطٛنْ مَايَيْ نغَمْ حَکّٜ، فُو اٜ نٛنْ رُوحُ اَللَّه حٛکَّيْعٛنْ يٛنْکِ، نغَمْ اٛنْ نغَرْتِرَامَ اَادِلِعٜنْ؞ ¹¹تٛ رُوحُ اَللَّه اُمِّنْطٛ يٜىٰسُ دَغَ مَيْدٜ اٜ جٛوطٛو ندٜرْ ٻٜرْطٜ مٛوطٛنْ، اٛنْ طٛنْ اُمِّنْطٛ اَلْمَسِيحُ دَغَ مَيْدٜ حٛکَّيْ ٻَلِّ مٛوطٛنْ مَايَيْطِ يٛنْکِ بَرْکَ رُوحُ مَاکٛ جٛوطِيطُمْ ندٜرْ ٻٜرْطٜ مٛوطٛنْ؞

¹²نغَمْ نٛنْ بَنْدِرَاٻٜ اَمْ، اٜ وٛودِ غٛطُّمْ طُمْ نغَطٜتٜنْ دٛولٜ، اَمَّا کَنْجُمْ نَاع طُمْ تٛکُّکِ کٛ ٻَلِّ مٜىٰطٜنْ نغِطِ؞ ¹³نغَمْ تٛ اٛنْ نغَطَ جٛنْدٜ نٛ ٻَلِّ مٛوطٛنْ نغِطِرِ، اٛنْ مَايَيْ؞ اَمَّا بَرْکَ رُوحُ اَللَّه، تٛ اٛنْ مبَرِي کُوطٜ طٜ ٻَلِّ مٛوطٛنْ نغِطِ وَطُکِ، اٛنْ کٜٻَيْ يٛنْکِ کِ رٜعَتَا؞ ¹⁴نغَمْ فُو يِمْٻٜ ٻٜ رُوحُ اَللَّه تٛکِّنْتَ ٻٜ ٻِٻّٜ اَللَّه؞ ¹⁵نغَمْ اَللَّه حٛکَّايِعٛنْ رُوحُ غَرْتِرَيْطُمْعٛنْ مَشُّٻٜ حَا ڤُطِّتٛنْ نغَطٛنْ جٛنْدٜ ندٜرْ کُلٛلْ، اَمَّا اٛ حٛکُّعٛنْ رُوحُ غَرْتِرَيْطُمْعٛنْ ٻِٻّٜ مَاکٛ؞ بَرْکَ رُوحُ طُمْ اٜنْ مبَاوَيْ نٛدّٜنْ اَللَّه ‏«‏اَبَّ! ݧَاکٛ مٜىٰطٜنْ!‏»‏ ¹⁶رُوحُ اَللَّه اٜ حٛورٜ مَاجُمْ حَوْتِ اٜ ٻٜرْطٜ مٜىٰطٜنْ تَبِّتِنْتَ اٜنٜنْ اٜنْ ٻِٻّٜ اَللَّه؞ ¹⁷جٛونِ ندٜ اٜنْ ٻِٻّٜ، اٜنْ نغَرْتِي دٛنٛوٻٜ؞ اٜنْ ندٛنَيْ فِي بٛطُّمْ طُمْ اَللَّه رٜسَنِ يِمْٻٜ مَاکٛ، کَدِنْ اٜنْ دٛنِدٛوٻٜ اٜ اَلْمَسِيحُ، تٛ نِ اٜنْ نجَرْدِي تٛرَّ اٜ مَاکٛ نغَمْ کٜٻٜنْ تٜدُّنغَلْ حَوْتِ اٜ مَاکٛ؞

تٜدِّنْکِ کِ طُمْ تٜدِّنْتَعٜنْ طٛعٛ يٜىٰسٛ

¹⁸مِ تَبِّتِنِي تٛرَّ کَ نجَرٜتٜنْ جٛونِ کَ حٜوْتَايِ کَ حَوْتٜىٰ اٜ تٜدُّنغَلْ نغَلْ طُمْ تٜدِّنْتَعٜنْ طٛعٛ يٜىٰسٛ؞ ¹⁹فُو کٛ تَغَا اٜ حٜطِي اٜ حَاٻِ نغَمْ يِعَ اَللَّه وَنْغِنِي ٻِٻّٜ مُوطُمْ؞ ²⁰نغَمْ کٛ تَغَا وَرْتِرَامَ مٜىٰرٜ، نَاع نغَمْ يِدّٜ مَاجُمْ، اَمَّا نٛنْ اَللَّه يِطِرِ طُمْ وَطٛرٛو؞ فُو اٜ نٛنْ اٜ وٛودِ کَمُّندٜ، ²¹نغَمْ کٛ تَغَا اٜ حٛورٜ مَاجُمْ طُمْ دِمْطِنْتٜىٰطُمْ دَغَ مَشُّنغَاکُ ݧٛلُکِ، طُمْ حٜٻَ رِمْطِنٜىٰکِ اٜ تٜدِّنٜىٰکِ طُمْ يِمْٻٜ اَللَّه نجٜيِ؞ ²²اٜنْ اَنْدِ حَا جٛونِ فُو کٛ تَغَا اٜ اٛتَّ نغَمْ نَوْطُمْ نٛ دٜبّٛ ڤِيدٛووٛ اٜ نَوْطُمْ دَݧْنغٛلْ اٛتِّرْتَ؞ ²³اَمَّا نَاع کٛ تَغَا تَنْ اٛتَّتَ، حَا مَا اٜ اٜنٜنْ؞ اٜنٜنْ غٛودُٻٜ رُوحُ اَللَّه، دٛکَّلْ مَاکٛ اَرَنْدٜوَلْ ندٜرْ کٛ اٛ حٛکَّتَعٜنْ، اٜنْ اٛتَّ ندٜرْ ٻٜرْطٜ مٜىٰطٜنْ، اٜنْ کَاٻِي اَللَّه وَرْتِرَعٜنْ ٻِٻّٜ مَاکٛ، طٛنْمَا اٛ رِمْطِنَ ٻَلِّ مٜىٰطٜنْ؞ ²⁴دَغَ شَرٜلْ کٛ طُمْ حِسْنِعٜنْ نغٛودُطٜنْ کَمُّندٜ ندٜعٜ؞ اَمَّا تٛ اٜنْ نغِعَ کٛ کَمِّيطٜنْ، نَاع طُمْ کَمُّندٜ وٛنْ طٛنْ؞ مٛيٜ وَطَتَ کَمُّندٜ دٛوْ کٛ يَادِ حٜٻِ؟ ²⁵اَمَّا تٛ اٜنْ نغَطَ کَمُّندٜ دٛوْ غٛطُّمْ طُمْ اٜنْ نغِعَتَا، اٜنْ کٜطٛطُمْ ندٜرْ مُݧَلْ؞

²⁶نٛنْ مَا، رُوحُ اَللَّه اٜ وَلَّعٜنْ تٛ تَمْڤُطٜنْ؞ نغَمْ اٜنْ اَنْدَا نٛ حَانِ نغَطِرٜنْ دٛعَارٜ، اَمَّا رُوحُ اَللَّه اٜ حٛورٜ مَاجُمْ اٜ تٛرٛو اَللَّه نغَمْ مٜىٰطٜنْ شَرٜلْ نغٜلْ ندُلُّطٜنْ کٛ مبِعٜتٜنْ اٜنْ اٛتَّ؞ ²⁷ندٜنْ اَللَّه اَنْدُطٛ کٛ وٛنِ ندٜرْ ٻٜرْطٜ مٜىٰطٜنْ، اٜ مٛ اَنْدِ کٛ رُوحُ يِطِ، نغَمْ رُوحُ اٜ تٛرٛو اَللَّه نغَمْ يِمْٻٜ مَاکٛ نٛنْ نٛ اٛ يِطِرِ؞

²⁸اٜنْ اَنْدِ ندٜرْ کٛو طُمٜ اَللَّه اٜ حُوَ نغَمْ ٻٜيْدَارِ يِمْٻٜ غِطْٻٜمٛ، ٻٜ اٛ سُٻِ نٛنْ نٛ اٛ يِطِرِ؞ ²⁹اَللَّه اٜ اَندِٻٜ دَغَ اَرَنْدٜ اٛ سُٻِيٻٜ کٛ دُونِيَارُ تَغٜىٰ نغَمْ ٻٜ نغَرْتَ بٛ ٻِطّٛ مَاکٛ، نغَمْ ٻِطّٛ اٛنْ وَرْتَ اَفٛ ندٜرْ بَنْدِرَاٻٜ طُطْٻٜ؞ ³⁰ٻٜنْ طٛنْ ٻٜ اٛ سُٻِ، اٛ نٛدِّيٻٜ، اٛ وَرْتِرِيٻٜ اَادِلِعٜنْ، اٛ نَتِّنِيٻٜ تٜدُّنغَلْ مَاکٛ؞

يِدّٜ اَللَّه

³¹طُمٜ مبِعٜتٜنْ دٛوْ فِي طُعُمْ؟ تٛ اَللَّه اٜ وٛنْدِ اٜ مٜىٰطٜنْ، مٛيٜ وَاوَتَ حٜٻَ جَالٛرْغَلْ دٛوْ مٜىٰطٜنْ؟ ³²اَللَّه حَطَايِ ٻِطّٛ مُوطُمْ يَرْکِ تٛرَّ، اَمَّا اٛ حٛکِّيمٛ نغَمْ اٛ سَکّٜىٰ نغَمْ مٜىٰطٜنْ اٜنْ فُو؞ ندٜ اٛ وَطِي نٛنْ، اٛ حٛکَّتَاعٜنْ کٛو طُمٜ شَاحُ؟ ³³مٛيٜ وَاوَتَ وُلَّاکِ يِمْٻٜ ٻٜ اَللَّه سُٻِ؟ طُمْ اَللَّه اٜ حٛورٜ مُوطُمْ وَرْتِرِٻٜ اَادِلِعٜنْ؞ ³⁴مٛيٜ وَاوَتَ تَپَنْکِٻٜ کِيتَ؟ وَلَا!‏ يٜىٰسُ اَلْمَسِيحُ مَايِي، کٛ ٻُرِ وٛنِ اٛ اُمِّنَامَ دَغَ مَيْدٜ، اٜ مٛ تٛنْ جٛوطِي تٛ جُنْغٛ ݧَامٛ نغٛ اَللَّه، کَدِنْ اٜ مٛ تٛرٛو اَللَّه نغَمْ مٜىٰطٜنْ؞ ³⁵طُمٜ وَاوَتَ سٜنْدَعٜنْ اٜ يِدّٜ ندٜ اَلْمَسِيحُ يِطِعٜنْ؟ طُمْ تٛرَّ کَلُّکَ، کٛو بٛنٜ، کٛو حَلّٜىٰندٜ يِمْٻٜ، کٛو وٜىٰلٛ، کٛو شِيَ کٛلْتٜ، کٛو نغَݧَاندِ يِمْٻٜ، کٛو مَيْدٜ؟ ³⁶نٛنْ نٛ طُمْ وِنْدِرَا،

‏«‏نغَمْ مَاطَ کٛو ندٜيٜ ݧَلْندٜ اٜ طُمْ طَٻِّتَ وَرْکِمِنْ؛

طُمْ حٛشِّيمِنْ بٛ بَالِ طِ طُمْ حِرْسَتَ؞»‏

³⁷نَاع نٛنْ، ندٜرْ فُو فِي طُعُمْ اٜنْ کٜٻِي جَالٛرْغَلْ بَرْکَ اَلْمَسِيحُ غِطّٛعٜنْ؞ ³⁸نغَمْ مِ تَبِّتِنِي وَلَا کٛ وَاوَتَ حَطَ اَلْمَسِيحُ يِطُکِعٜنْ، کٛو مَيْدٜ، کٛو يٛنْکِ، کٛو مَلَاعِکَعٜنْ، کٛو کٛ لَامٛتٛو دٛوْ، کٛو جَامَنُ طُعُمْ، کٛو جَامَنُ غَرَيْطُمْ، کٛو بَوْطٜ، ³⁹کٛو کٛ وٛنِ اٜ دٛوْ، کٛو کٛ وٛنِ اٜ لٜيْ، وَلَا غٛطُّمْ ندٜرْ فُو کٛ تَغَا بَاوَيْطُمْ حَطَ اَللَّه يِطُکِعٜنْ يِدّٜ ندٜ اٛ حٛلَّتَعٜنْ بَرْکَ يٜىٰسُ اَلْمَسِيحُ جٛومِرَاوٛ مٜىٰطٜنْ؞

اَللَّه اٜ يِمْٻٜ مَاکٛ

¹کٛ مبِعَيْمِ طُمْ غٛونغَ؞ اَلْمَسِيحُ جٜيِيَمْ، نغَمْ نٛنْ مِ فٜوَتَا؞ رُوحُ اَللَّه اٜ لَامٛو ٻٜرْندٜ اَمْ ندٜ تَبِّتِنَنِييَمْ کٛ مبِعَيْمِ نَاع طُمْ فٜوْرٜ؞ ²اٜ مِ وَنِّي نَاع سٜطَّ، ندٜنْ نَوْطُمْ ٻٜرْندٜ اَمْ وَلَا رٜعِرْدٜ نغَمْ بَنْدِرَاٻٜ اَمْ يَحُودَنْکٛعٜنْ؞ ³دَا مِنْ اٜ حٛورٜ اَمْ مِ لَانٜىٰ طُمْ سٜنْدَيَمْ اٜ اَلْمَسِيحُ نغَمْ لٜݧٛلْ اَمْ کٜٻَ کِسْندَمْ؞ ⁴کَمْٻٜ نغٛنِ اِسْرَاعِيلَنْکٛعٜنْ، ٻٜ اَللَّه وَرْتِرِ ٻِٻّٜ مُوطُمْ؞ اٛ وَنْغِنَنِيٻٜ تٜدُّنغَلْ مَاکٛ، اٛ وَطَنِيٻٜ اَلْکَوَلْجِ، اٛ حٛکِّيٻٜ اَتَّوْرَ، اٛ حٛلِّيٻٜ نٛ ٻٜ مَوْنِنِرْتَمٛ مَوْنِنْکِ کِ غٛونغَ، ندٜنْ اٛ وَطَنِيٻٜ اَلْکَوَلْجِ طُطِّ؞ ⁵ٻٜ پِوٛيِ دَغَ مَامَعٜنْ يَحُودَنْکٛعٜنْ مَوْٻٜ اَنْدَاٻٜ، ندٜنْ دَغَ لٜݧٛلْ مَٻّٜ اَلْمَسِيحُ وَرٛيِ ندٜرْ ٻَنْدُ؞ اَللَّه لَامٛتٛوطٛ کٛو طُمٜ مَنْتٜىٰ حَا اَبَدَا!‏ اَامِنْ؞

⁶نَاع اٜ مِ وِعَ اَللَّه حٜبِّنَايِ اَلْکَوَلْ مُوطُمْ؞ نغَمْ نَاع فُو اِسْرَاعِيلَنْکٛعٜنْ نغٛنِ يِمْٻٜ اَللَّه ٻٜ غٛونغَ؞ ⁷طٛنْمَا نَاع فُو ٻِٻّٜ ٻِٻّٜىٰجِ اِبْرَاهِمْ نغٛنِ ٻِٻّٜ اَللَّه؞ اَمَّا اَللَّه وِعِي اِبْرَاهِمْ، ‏«‏بَرْکَ اِشِيَاکُ کٜٻَتَا ٻِٻّٜ ٻِٻّٜىٰجِ ٻٜ نغَطَنْمَامِ اَلْکَوَلْ؞»‏ ⁸طُعُمْ حٛلِّي ٻِٻّٜ دَݧَاٻٜ نٛ طُمْ دَݧِرِ کٛو مٛيٜ نَاع کَمْٻٜ نغٛنِ ٻِٻّٜ اَللَّه؞ اَمَّا ٻِٻّٜ ٻٜ طُمْ دَݧَنِ اِبْرَاهِمْ نغَمْ اَللَّه وَطَنِيمٛ اَلْکَوَلْ مَٻّٜ، کَمْٻٜ نغٛنِ ٻِٻّٜ مَاکٛ ٻٜ غٛونغَ؞ ⁹نغَمْ طُعُمْ وٛنِ کٛ اَللَّه وِعِ ندٜرْ اَلْکَوَلْ نغَلْ اٛ وَطِ، اٛ وِعِ، ‏«‏حِتَاندٜ غَرَيْندٜ بٛ نغٜعٜلْ شَرٜلْ مِ سٛعّٛيْتٛ، ندٜنْ سَارَتُ دَݧَيْ ٻِطّٛ غٛرْکٛ؞»‏

¹⁰نَاع مَا طُعُمْ تَنْ، اَمَّا ٻِٻّٜ رِفْکَتُ سِوْتَاٻٜ، ݧَاکٛ مَٻّٜ اٛ غٛعٛتٛ، وَاتٛ مَامَ مٜىٰطٜنْ اِشِيَاکُ؞ ^11‏-12اَمَّا کٛ سِوْتَاٻٜ ٻٜنْ ندَݧٜىٰ، کٛو کٛ ٻٜ نغَطَ غٛطُّمْ بٛطُّمْ کٛو غٛطُّمْ طُمْ وٛوطَا، اَللَّه وِعِي رِفْکَتُ، ‏«‏ٻِطّٛ مَوْطٛ اٛنْ اٛ جَغَّنْتٛ ڤَمَرٛ اٛنْ؞»‏ طُعُمْ تَبِّتِنِي اَللَّه اٜ سُٻَ يِمْٻٜ نَاع نغَمْ کُوطٜ طٜ ٻٜ نغَطِ، اَمَّا نغَمْ نٛنْ اٛ يِطِ طُمْ وَطٛرٛو؞ ¹³نٛنْ نٛ طُمْ وِنْدِرَا، ‏«‏اٜ مِ يِطِ يَاکُبُ، اَمَّا مِ وَݧِي اِسَوْ؞»‏

¹⁴طُمٜ مبِعٜتٜنْ؟ جٛونِ اٜنْ مبِعَيْ اَللَّه وَطِي شِيَ اَادِلَاکُ وٛنْ طٛنْ؟ نَاع نٛنْ، کٛو سٜطَّ!‏ ¹⁵نغَمْ اٛ وِعِي مُوسَ، ‏«‏مِ وَلَّيْ کٛو مٛيٜ مٛ نغِطُمِ وَلُّکِ، مِ يُرْمِنَنَيْ کٛو مٛيٜ مٛ نغِطُمِ يُرْمِنَنْکِ؞»‏ ¹⁶نغَمْ نٛنْ، اَللَّه اٜ سُٻَ نٜطّٛ نَاع نغَمْ نٜطّٛ اٜ يِطِ اَللَّه سُٻَمٛ کٛو نغَمْ تِينَارٜ مَاکٛ، اَمَّا طُمْ يُرْمٜىٰندٜ اَللَّه تَنْ؞ ¹⁷نغَمْ اَايَارٜ وِعِي اَللَّه وِعِي فِرعَوْنَ، ‏«‏مِ وَرْتِرِيمَ لَامِيطٛ نغَمْ مِ حُوتِرْمَا مِ حٛلَّ بَوْطٜ اَمْ طُمْ اَنْدِنَ اِنْدٜ اَمْ کٛو تٛيٜ ندٜرْ دُونِيَارُ؞»‏ ¹⁸نغَمْ نٛنْ، اَللَّه اٜ يُرْمِنَنَ کٛو مٛيٜ مٛ اٛ يِطِ يُرْمِنَنْکِ، ندٜنْ اٜ مٛ سَاتِنَ ٻٜرْندٜ کٛو مٛيٜ مٛ اٛ يِطِ سَاتِنَنْکِ ٻٜرْندٜ؞

مٛنّٜرٜ اَللَّه اٜ يُرْمٜىٰندٜ مَاکٛ

¹⁹غٛطّٛ ندٜرْ مٛوطٛنْ وِعَيْيَمْ، ‏«‏تٛ فِي طُعُمْ طُمْ نٛنْ، نغَمْ طُمٜ حَا جٛونِ اَللَّه اٜ يِعِرَعٜنْ کٛ وٛوطَا؟ مٛيٜ وَاوَتَ وَݧَ وَطُکِ کٛ اَللَّه يِطِ؟»‏ ²⁰اَمَّا اَنْ نٜطّٛ، اَ مٛيٜ حَا اَ فٛطْفٛطْتِرَ اٜ اَللَّه؟ غٛجِيرٜ وَاوَتَا وِعَ غَطُطٛندٜ، ‏«‏نغَمْ طُمٜ نغَطِرْطَايَمْ نِحِ؟»‏ ²¹نغَمْ غَطٛووٛ غٛجِيجٜ اٛ وَاوَيْ اٛ حُوتِرَ لٛوڤٜ نٛ اٛ يِطِ؞ اٛ وَاوَيْ اٛ حُوتِرَ لٛوڤٜ اٛ وَطَ غٛجِيجٜ، غٛطّٜ نغَمْ طٜ کُوتِنِرٜىٰ کُوطٜ طٜ دَرَجَ، غٛطّٜ نغَمْ طٜ کُوتِنِرٜىٰ کُوطٜ طٜ نغَلَا دَرَجَ؞

²²نٛنْ کُوطٜ اَللَّه مبَعِ؞ اٛ يِطِينٛ اٛ حٛلَّ مٛنّٜرٜ مَاکٛ، ندٜنْ اٛ وَنْغِنَ بَوْطٜ مَاکٛ دٛوْ کَانُٻٜ اٛ مٛنَّنَٻٜ، کٜوْتُٻٜ کَلْکٜىٰ، اَمَّا اٛ مُݧَنِيٻٜ مُݧَلْ مَنْغَلْ؞ ²³طٛنْمَا اٛ يِطِي اٛ وَنْغِنَنَ يِمْٻٜ ٻٜ اٛ يُرْمِنَنِ تٜدُّنغَلْ مَاکٛ مَنْغَلْ؞ دَغَ اَرَنْدٜ کَمْٻٜ اٛ سِرْيِي کٜٻَ تٜدُّنغَلْ مَاکٛ؞ ²⁴وَاتٛ اٜنٜنْ ٻٜ اَللَّه نٛدِّ نَاع دَغَ ندٜرْ يَحُودَنْکٛعٜنْ تَنْ، اَمَّا حَا مَا دَغَ ندٜرْ يِمْٻٜ نَاع يَحُودَنْکٛعٜنْ؞ ²⁵نٛنْ نٛ اَللَّه وِعِ ندٜرْ دٜفْتٜرٜ يُوشَعُ،

‏«‏يِمْٻٜ ٻٜ مِ جٜيَايِ، مِ نٛدَّيْٻٜ ‏‹‏يِمْٻٜ اَمْ،›‏

لٜݧٛلْ نغٛلْ مِ يِطَا، مِ نٛدَّيْنغٛلْ، ‏‹‏لٜݧٛلْ نغٛلْ نغِطُمِ؞›‏

²⁶ندٜنْ اٜ ندٜنْ طٛنْ وِغٜىٰرٜ تٛ طُمْ وِعِٻٜ، ‏‹‏نَاع اٛنْ يِمْٻٜ اَمْ،›‏

طٛنْ طُمْ طُمْ نٛدَّتَٻٜ ٻِٻّٜ اَللَّه مٛ يٛنْکِ؞»‏

²⁷ندٜنْ اِشَايَ مٜتِي اٜ سٜمْبٜ دٛوْ اِسْرَاعِيلَ وِعِ، ‏«‏کٛو ندٜ ٻِٻّٜ اِسْرَاعِيلَ طُوطِرِي بٛ نجَارٜىٰندِ مَايٛ، فُو اٜ نٛنْ سٜطَّ ندٜرْ مَٻّٜ تَنْ کِسَتَ، ²⁸نغَمْ جٛومِرَاوٛ يٛتِّنَيْ تَپَنْکِ دُونِيَارُ کِيتَ ندٜرْ يَوْطَارٜ؞»‏ ²⁹طٛنْمَا اِشَايَ وِعِ، ‏«‏دَا جٛومِرَاوٛ جٛومُ بَوْطٜ اَلَايِ يِمْٻٜ سٜطَّ دَغَ ندٜرْ لٜݧٛلْ مٜىٰطٜنْ، دَا اٜنْ نغَرْتِي بٛ غَرِيرِ سٛدٛمْ، دَا اٜنْ نغَرْتِرَامَ بٛ غَرِيرِ غٛمٛورَ؞»‏

اِسْرَاعِيلَنْکٛعٜنْ اٜ حَبَرُ بٜلْطُمْ

³⁰طُمٜ مبِعٜتٜنْ کَدِنْ؟ يِمْٻٜ نَاع يَحُودَنْکٛعٜنْ ٻٜ طَٻِّتَايِ ٻٜ نغَرْتَ اَادِلِعٜنْ، کَمْٻٜ نغَرْتِرَا اَادِلِعٜنْ، وَاتٛ اَادِلَاکُ کٜٻٜتٜىٰطُمْ بَرْکَ حٛولَاکِ اَلْمَسِيحُ؞ ³¹اَمَّا اِسْرَاعِيلَنْکٛعٜنْ طَٻُّتُٻٜ نغَرْتَ اَادِلِعٜنْ نغَمْ تٛکُّکِ اَتَّوْرَ، ٻٜ کٜٻَايِطُمْ؞ ³²نغَمْ طُمٜ؟ نغَمْ ٻٜ طَٻِّتَايِ وَرْتُکِ اَادِلِعٜنْ بَرْکَ حٛولَاکِ اَللَّه، اَمَّا ٻٜ طَٻِّتِيطُمْ اٜ لَاوٛلْ وَطُکِ کُوطٜ بٛطّٜ؞ ٻٜ ڤٜغِّي ندٜنْ طٛنْ ‏«‏حَيْرٜ غَطٛورٜ يِمْٻٜ ڤٜغّٛو،»‏ ³³نٛ اَايَارٜ وِعِ،

‏«‏ندَارٜىٰ، مِ رٜسِي حَيْرٜ ندٜرْ سِحِيٛونَ

غَطَيْندٜ يِمْٻٜ ڤٜغّٛو، ندٜ وَطَيْ ٻٜ نجَنَ؞

فُو کٛولِيطٛمٛ سٜمْتِنْتَاکٜ؞»‏

¹بَنْدِرَاٻٜ اَمْ، کٛ نغِطُمِ ندٜرْ ٻٜرْندٜ اَمْ اٜ کٛ تٛرٛتٛومِ اَللَّه، کَنْجُمْ وٛنِ اِسْرَاعِيلَنْکٛعٜنْ کِسَ؞ ²مِ وَاوَيْ مِ حٛکَّ شٜيْدَ دٛوْ مَٻّٜ اٜ ٻٜ نغِطِ حُوَنْکِ اَللَّه نَاع سٜطَّ، اَمَّا اٜ ٻٜ کُوَنَمٛ نَاع دٛوْ فَامُ بٛطُّمْ؞ ³ٻٜ ڤَامَايِ لَاوٛلْ نغٛلْ اَللَّه وَرْتِرْتَ يِمْٻٜ اَادِلِعٜنْ، ٻٜ ندَرْوِي لَاوٛلْ نغٛلْ ٻٜ تٛکَّتَ؞ نغَمْ نٛنْ، ٻٜ نجَٻَايِ تٛکُّکِ لَاوٛلْ نغٛلْ اَللَّه وَرْتِرْتَ يِمْٻٜ اَادِلِعٜنْ؞ ⁴نغَمْ اَلْمَسِيحُ وٛنِ دٜعُطٛ کُوطٜ اَتَّوْرَ، نغَمْ کٛو مٛيٜ کٛولِيطٛمٛ وَرْتَ اَادِلِيجٛ؞ ⁵مُوسَ وِنْدِي دٛوْ وَرْتُکِ اَادِلِيجٛ لَاوٛلْ تٛکُّکِ اَتَّوْرَ، اٛ وِعِي، ‏«‏کٛو مٛيٜ غَطٛووٛ کٛ اَتَّوْرَ وِعِ اٛ حٜٻَيْ جٛنْدٜ ندٜ غٛونغَ؞»‏ ⁶اَمَّا طُعُمْ وٛنِ کٛ وٛلْدٜ اَللَّه وِعِ دٛوْ وَرْتُکِ اَادِلِيجٛ بَرْکَ حٛولَاکِ اَلْمَسِيحُ، ‏«‏تَاع وِعُ ندٜرْ ٻٜرْندٜ مَاطَ، ‏‹‏مٛيٜ يَحَتَ تٛنْ دٛوْ؟›‏ »‏ ﴿وَاتٛ نغَمْ وَدّٛيَ اَلْمَسِيحُ ندٜرْ دُونِيَارُ﴾، ⁷کٛو، ‏«‏مٛيٜ يَحَتَ لَاحِرَ تٛ نغَيْکَ کَلُّکَ لُغُّکَ؟»‏ ﴿وَاتٛ نغَمْ اُمِّنٛيَ اَلْمَسِيحُ دَغَ ندٜرْ مَيْٻٜ﴾؞ ⁸رَا کٛ اَايَارٜ وِعِ، ‏«‏وٛلْدٜ اَللَّه اٜ حَادٜ مَاطَ اٜ ندٜ دٛوْ طٜمْنغَلْ مَاطَ اٜ ٻٜرْندٜ مَاطَ،»‏ وَاتٛ وَعَجُ حٛولَاکِ اَللَّه طُمْ مِنْ نغَعَجِنْتَ؞ ⁹نغَمْ تَا وِعِي اٜ حٛنْدُکٛ مَاطَ، ‏«‏يٜىٰسُ اٛ جٛومِرَاوٛ،»‏ ندٜنْ تَا حٛولَکٜ ندٜرْ ٻٜرْندٜ مَاطَ وِيکِ اَللَّه اُمِّنِيمٛ دَغَ مَيْدٜ، اَ حِسَيْ؞ ¹⁰نغَمْ ندٜرْ ٻٜرْندٜ نٜطّٛ حٛولٛتٛو اَلْمَسِيحُ ندٜنْ اَللَّه وَرْتِرَمٛ اَادِلِيجٛ، ندٜنْ اٜ حٛنْدُکٛ نٜطّٛ وِعَتَ اٜ نجَيْرِ يٜىٰسُ وٛنِ جٛومِرَاوٛ حِسَ؞ ¹¹وٛنْدٜ اَايَارٜ وِعِي، ‏«‏کٛو مٛيٜ کٛولِيطٛمٛ سٜمْتِنْتَاکٜ؞»‏ ¹²نغَمْ وَلَا فٜىٰرٛوتِرٛلْ حَکُّندٜ يَحُودَنْکٛعٜنْ اٜ يِمْٻٜ نَاع يَحُودَنْکٛعٜنْ، جٛومِرَاوٛ کَنْکٛ وٛنِ جٛومِرَاوٛ کٛو مٛيٜ، اٜ مٛ بَرْکِطِنَ کٛو مٛيٜ تٛرٛتٛوطٛمٛ نَاع سٜطَّ؞ ¹³نٛ اَايَارٜ وِعِ، ‏«‏کٛو مٛيٜ تٛرِيطٛ جٛومِرَاوٛ حِسْنَمٛ، جٛومِرَاوٛ حِسْنَيْمٛ؞»‏

¹⁴اَمَّا نٛ طُمْ وَطَتَ يِمْٻٜ تٛرٛو مٛ ٻٜ کٛولَاکِ؟ ندٜنْ نٛ وَطَتَ ٻٜ کٛولٛومٛ تٛ ٻٜ مٜىٰطَايِ نَنْکِ حَبَرُ مَاکٛ؟ ندٜنْ نٛ وَطَتَ ٻٜ نَنَ حَبَرُ مَاکٛ تٛ نَاع غٛطّٛ وَعَجِنَنِٻٜ؟ ¹⁵ندٜنْ نٛ يِمْٻٜ نغَعَجِنِرْتَ تٛ ٻٜ لِلَاکَ؟ نٛنْ نٛ طُمْ وِنْدِرَا، ‏«‏طُمْ فِي بٛطُّمْ يٛتَّاکِ ٻٜنْ طٛنْ غَدُّٻٜ حَبَرُ بٜلْطُمْ؞»‏ ¹⁶اَمَّا نَاع فُو اِسْرَاعِيلَنْکٛعٜنْ نجَٻِ حَبَرُ بٜلْطُمْ؛ نغَمْ اِشَايَ وِعِ، ‏«‏جٛومِرَاوٛ، مٛيٜ جَٻِ حَالَ مٜىٰطٜنْ؟»‏ ¹⁷نغَمْ نٛنْ، حٛولَاکِ اَللَّه اٜ حٜٻٜىٰ لَاوٛلْ نَنْکِ حَبَرُ اَلْمَسِيحُ، ندٜنْ حَبَرُ اَلْمَسِيحُ اٜ نَنٜىٰ لَاوٛلْ وَعَجِنْکِ دٛوْ مَاکٛ؞

¹⁸اَمَّا، اٜ مِ پَمَ، طُمْ غٛونغَ ٻٜ نَنَايِ حَبَرُ طُمْ؟ غٛونغَ ٻٜ نَنِيطُمْ، نغَمْ اَايَارٜ وِعِي،

‏«‏حَبَرُ اَللَّه يَحِي کٛو تٛيٜ ندٜرْ دُونِيَارُ،

بٛلِيطٜ مَٻّٜ نَتِّي کٛو تٛيٜ ندٜرْ دُونِيَارُ؞»‏

¹⁹طٛنْمَا اٜ مِ پَمَ، يِمْٻٜ اِسْرَاعِيلَ ڤَامَايِ؟ اَرَنْدٜ مُوسَ وِعِي کٛ اَللَّه وِعِ يِمْٻٜ اِسْرَاعِيلَ،

‏«‏مِ وَطَيْ نغَطٛنْ لَوْلِيرُ

يِمْٻٜ ٻٜ کٛشُّطٛنْ نَاع ٻٜ غٛطُّمْ؞

لَاوٛلْ يِمْٻٜ ٻٜ اَنْدَا غٛطُّمْ،

مِ وَطَيْعٛنْ مٛنّٛنْ؞»‏

²⁰ندٜنْ اِشَايَ مٜتِي اٜ سٜمْبٜ ٻٜرْندٜ وِعِي اَللَّه وِعِي،

‏«‏ٻٜنْ طٛنْ ٻٜ طَٻِّتَتَايَمْ ٻٜ کٜٻِييَمْ؛

مِ وَنْغِنِي حٛورٜ اَمْ تٛ يِمْٻٜ ٻٜ پَمَايِ نٛ ٻٜ کٜٻِرْتَيَمْ؞»‏

²¹اَمَّا دٛوْ اِسْرَاعِيلَ اٛ وِعِ اَللَّه وِعِ، ‏«‏کٛ نٜىٰٻِ اٜ مِ طَٻِّتَ سِرْيٛوتِرْکِ اٜ يِمْٻٜ ٻٜ نغَطَتَا کٛ مبِعَيْمِ، ٻٜ ٻٜرْطٜ شَاتُطٜ؞»‏

يُرْمٜىٰندٜ اَللَّه دٛوْ اِسْرَاعِيلَ

¹اٜ مِ پَمَ، اَللَّه وَݧِي يِمْٻٜ مُوطُمْ؟ غٛونغَ، اٛ وَݧَايِٻٜ؞ مِنْ اٜ حٛورٜ اَمْ مِ اِسْرَاعِيلَنْکٜىٰجٛ، تَانِرَاوٛ اِبْرَاهِمْ دَغَ لٜݧٛلْ بِلِيَامِنُ؞ ²اَللَّه وَݧَايِ يِمْٻٜ مُوطُمْ ٻٜ اٛ سُٻِ دَغَ فُطّٛودٜ دُونِيَارُ؞ اٛنْ اَنْدِ کٛ اَايَارٜ وِعِ دٛوْ اِلِيَ، نٛ اٛ وُلّٛرِي اِسْرَاعِيلَنْکٛعٜنْ تٛ اَللَّه؞ ³اٛ وِعِي، ‏«‏جٛومِرَاوٛ، ٻٜ مبَرِي اَنَّبٛعٜنْ مَاطَ، ٻٜ ڤُسِي شَکِّرْلٜ مَاطَ؞ مِنْ تَنْ وٛنِ کٛرِيطٛ، ندٜنْ اٜ ٻٜ طَٻِّتَ وَرْکِيَمْ؞»‏ ⁴اَمَّا طُمٜ اَللَّه وِعِمٛ؟ اَللَّه وِعِمٛ، ‏«‏مِ رٜسَنِي حٛورٜ اَمْ يِمْٻٜ 7,000 ٻٜ مٜىٰطَايِ مَوْنِنْکِ نغُنْکِوَ مبِعٜتٜىٰنغَ بَعَلْ؞»‏ ⁵نٛنْ طُمْ وٛنْتِندِرِ ندٜرْ جَامَنُ طُعُمْ، اٜ وٛودِ يِمْٻٜ سٜطَّ کٛرِيٻٜ ٻٜ اَللَّه سُٻِ، نغَمْ يِدّٜ مَاکٛ؞ ⁶تٛ اٜ مٛ سُٻِرَ يِمْٻٜ لَاوٛلْ يِدّٜ مَاکٛ، اٛ سُٻُٻٜ نَاع نغَمْ کُوطٜ بٛطّٜ طٜ ٻٜ نغَطِ؞ نغَمْ تٛ اٜ مٛ سُٻَ يِمْٻٜ نغَمْ کُوطٜ طٜ ٻٜ نغَطِ، سُٻُکِ کِنْ نَاع طُمْ شَاحُ، طُمْ نجٛٻَارِ يِدّٜ مَاکٛ نَاع ندٜ غٛونغَ؞

⁷تٛو، نٛيٜ وٛنْ طٛنْ؟ يِمْٻٜ اِسْرَاعِيلَ تَمْڤِي کٜٻَ کٛ طَٻِّتَتَ؞ سٜطَّ ندٜرْ مَٻّٜ کٜٻِطُمْ، ٻٜ اَللَّه سُٻِ، اَمَّا کٛرِيٻٜ طُمْ سَاتِنَنِيٻٜ ٻٜرْطٜ؞ ⁸نٛ اَايَارٜ وِعِ، ‏«‏اَللَّه وَرْتِرِيٻٜ يِمْٻٜ ٻٜ نغَلَا حَکِّيلٛ ٻٜ نغَلَا فَامُ؞ اٜ ٻٜ نغٛودِ غِتٜ، اَمَّا ٻٜ نغِعَتَا، اٜ ٻٜ نغٛودِ نٛڤِّ، اَمَّا ٻٜ نَنَتَا، حَا ندٜعٜ ݧَلْندٜ؞»‏ ⁹ندٜنْ دَوْدَ وِعِي،

‏«‏اَللَّه وَطَ حُمْتٛ مَٻّٜ وَرْتَنَٻٜ تَرْکٛوٛلْ

ٻٜ نجَنَ ندٜرْ مَغّٛلْ، ٻٜ نجَرَ تٛرَّ نٛ حَانَنِٻٜ؛

¹⁰غِتٜ مَٻّٜ مبُمَ ٻٜ تَمْڤَ يِيکِ،

تٛرَّ کَلُّکَ وَرْتَنَٻٜ دٛنْغَلْ حَا اَبَدَا؞»‏

¹¹اٜ مِ پَمَ، ندٜ يَحُودَنْکٛعٜنْ نجَنِ ندٜرْ حَکّٜ، ٻٜ اُمَّتَاکٛ وٛنْ طٛنْ؟ غٛونغَ نَاع نٛنْ!‏ اَمَّا نغَمْ حَکّٜ طُمْ ٻٜ نغَطِ، کِسْندَمْ وَرَنِي يِمْٻٜ نَاع يَحُودَنْکٛعٜنْ نغَمْ يَحُودَنْکٛعٜنْ نَنَ لَوْلِيرُ مَٻّٜ؞ ¹²جٛونِ تٛ حَکّٜ طُمْ يَحُودَنْکٛعٜنْ نغَطِ وَرْتِ بَرْکَ تٛ يِمْٻٜ دُونِيَارُ، ندٜنْ تٛ تَمْڤٜرٜ مَٻّٜ نغَرْتِي بَرْکَ تٛ يِمْٻٜ نَاع يَحُودَنْکٛعٜنْ، بَرْکَ طُمْ ٻُرَيْ نٛنْ تٛ فُو يَحُودَنْکٛعٜنْ ٻٜ اَللَّه سُٻِ نجَٻِي کِسْندَمْ مَاکٛ؞

کِسْندَمْ يِمْٻٜ نَاع يَحُودَنْکٛعٜنْ

¹³جٛونِ اٜ مِ مٜتَنَعٛنْ اٛنٛنْ يِمْٻٜ نَاع يَحُودَنْکٛعٜنْ؞ ندٜ مِ لِلَاطٛ تٛ يِمْٻٜ نَاع يَحُودَنْکٛعٜنْ، مِ فِيَيْ غَبَارٜ اَمْ دٛوْ کُوغَلْ نغَلْ اَللَّه حٛکِّيَمْ مِ وَطَ، ¹⁴نغَمْ مِ وَطَ بَنْدِرَاٻٜ اَمْ يَحُودَنْکٛعٜنْ نَنَ لَوْلِيرُ، نٛنْ حِسْنَ وٛٻّٜ مَٻّٜ؞ ¹⁵نغَمْ تٛ وَݧُکِ کِ اَللَّه وَݧِٻٜ وَرْتِي لَاوٛلْ سِرْيٛوتِرْکِ مَاکٛ اٜ دُونِيَارُ، نٛيٜ طُمْ وَرْتَتَ تٛ اٛ سِرْيٛوتِرِي اٜ مَٻّٜ؟ طُمْ وَرْتَيْ بٛ اٛ اُمِّنْٻٜ دَغَ مَيْدٜ؞

¹⁶تٛ طُمْ حٛکِّي اَللَّه ݝٛشِّتٜلْ بُرٛودِ، ندٜنْ فُو بُرٛودِ کٛرِيطُمْ طُمْ وَرْتِي بٛ طُمْ حٛکِّيطُمْ اَللَّه؞ تٛ طُمْ حٛکِّي اَللَّه طَطِ لٜکِّ، ندٜنْ لِشٜ مَاکِ مَا نغَرْتِي طٜ مَاکٛ؞ ¹⁷رَا مِسَالُ؞ لٜݧٛلْ اِبْرَاهِمْ، وَاتٛ يَحُودَنْکٛعٜنْ اٜ نَنْدِ اٜ لٜکِّ جَيْتُنْ کِ طُمْ اَاوِ، اَمَّا اَللَّه اِتِّي غٛطّٜ لِشٜ مَاکِ، اٛ وَدِّي لِشٜ کٜسٜ دَغَ لٜکِّ جَيْتُنْ کِ لَدّٜ اٛ تَکِّطٜ تٛ اٛ اِتِّ طٜنْ تٛنْ لِشٜ نغَمْ طٜ کٜٻَ بَرْکَ لٜکِّ کِنْ طٜ مَوْنِدَ اٜ مَاکِ؞ اٛنٛنْ يِمْٻٜ نَاع يَحُودَنْکٛعٜنْ، اٛنٛنْ نغٛنِ لِشٜ کٜسٜ طٜنْ؞ ¹⁸نغَمْ نٛنْ، تٛع اٛنْ ڤِيُ غَبَارٜ مبِعٛنْ اٛنْ ٻُرِي طٜنْ تٛنْ لِشٜ طٜ طُمْ اِتِّ؞ تٛ اٛنْ نغَطِي نٛنْ، تٛع اٛنْ نغٜجُّتُ، نَاع اٛنٛنْ نجٛغِي طَطِ لٜکِّ کِنْ، اَمَّا طَطِ طِنْ نجٛغِيعٛنْ؞

¹⁹اٛنْ مبِعَيْ، ‏«‏لِشٜ طٜنْ اِتِّ نغَمْ طُمْ تَکِّندِرَمِنْ اٜ لٜکِّ کِنْ؞»‏ ²⁰طُعُمْ طُمْ غٛونغَ؞ ٻٜ اِتَّ دَغَ لٜکِّ کِنْ نغَمْ ٻٜ کٛولَاکِ اَللَّه، اَمَّا اَنْ بٛو اَ تَکَّ اٜ لٜکِّ کِنْ نغَمْ اَ حٛولَکٜ اَلْمَسِيحُ؞ نغَمْ نٛنْ، تَاع مَوْنِنْ حٛورٜ، اَمَّا جٛوطَ ندٜرْ کُلٛلْ اَللَّه؞ ²¹نغَمْ ندٜ اَللَّه اِتِّ طٜنْ طٛنْ لِشٜ لٜکِّ جَيْتُنْ اَاوَاکِ، اٛنْ ݧُمَ اٛنٛنْ مَا اٛ اَلَيْعٛنْ؟ ²²نغَمْ نٛنْ، ݧُمُ دٛوْ يِدّٜ اَللَّه اٜ مٛنّٜرٜ مَاکٛ؞ اٜ مٛ مٛنَّنَ ٻٜنْ طٛنْ اَلُٻٜ تٛکُّکِمٛ، اَمَّا اٛ حٛلّٜتٜ يِدّٜ مَاکٛ، تَا وَطِي کَ حٛولَاکِمٛ کَنْکٛ کٛلّٛووٛ يِدّٜ؞ اَمَّا تَا وَطَايِ نٛنْ، اَنْ مَا طُمْ اِتّٜتٜ دَغَ لٜکِّ کِنْ؞ ²³ندٜنْ کٛو يَحُودَنْکٛعٜنْ اِتَّاٻٜ دَغَ لٜکِّ کِنْ، تٛ ٻٜ ݧَمْرَايِ يٜىٰسٛ اٜ شِيَ حٛولَاکِ اَللَّه، اٛ تَکِّندِرَيْٻٜ اٜ لٜکِّ کِنْ، نغَمْ اٛ وَاوَيْ اٛ فُطِّتَ اٛ تَکِّندِرَٻٜ اٜ مَاکِ؞ ²⁴اٛنٛنْ يِمْٻٜ نَاع يَحُودَنْکٛعٜنْ اٛنٛنْ نغٛنِ بٛ لِشٜ اِتَّاطٜ دَغَ لٜکِّ جَيْتُنْ ڤُطُکِ ندٜرْ لَدّٜ طٜ تَکِّندِرَا اٜ لٜکِّ جَيْتُنْ اَاوَاکِ؞ نَاع نٛنْ اَللَّه تَغِرِ لٜکِّ کِنْ؞ ندٜ طُمْ نٛنْ، طُمْ سَطَنْتَا اَللَّه اٛ فُطِّتَ اٛ سٛعَّ لِشٜ لٜکِّ جَيْتُنْ اَاوَاکِ طٜ اٛ اِتُّنٛو تٛ مَاکِ اٛ تَکَّطٜ تٛ مَاکِ؞

اَللَّه اٜ يُرْمِنَنَ کٛو مٛيٜ

²⁵بَنْدِرَاٻٜ اَمْ، مِ يِطَا ندُلّٛنْ اَنْدُکِ سِرُّ طُعُمْ، نغَمْ تٛع نغَرْتٛنْ ٻٜ مَنْغُ حٛورٜ؞ اِسْرَاعِيلَنْکٛعٜنْ طُطْٻٜ نغَطَيْ کَ وَݧُکِ کٛ اَللَّه وِعِ سٜيْ تٛ شَرٜلْ وَطِي نغٜلْ فُو يِمْٻٜ نَاع يَحُودَنْکٛعٜنْ ٻٜ اَللَّه سُٻِ کٛولِيمٛ؞ ²⁶نٛنْ اِسْرَاعِيلَنْکٛعٜنْ فُو کِسِرْتَ؞ نٛنْ نٛ طُمْ وِنْدِرَا،

‏«‏کِسْنٛووٛ وَرَيْ دَغَ سِحِيٛونَ،

اٛ اِتَّيْ فُو شِيَ کُلٛلْ اَللَّه دَغَ ٻٜرْطٜ لٜݧٛلْ يَاکُبُ؞

²⁷کَنْجُمْ وٛنِ اَلْکَوَلْ نغَلْ نغَادَيْمِ اٜ مَٻّٜ

شَرٜلْ نغٜلْ نجَافَنْتٛومِٻٜ حَکّٜىٰجِ مَٻّٜ؞»‏

²⁸يَحُودَنْکٛعٜنْ نغَرْتِي وَݧْوَݧْٻٜ اَللَّه نغَمْ ٻٜ نغَݧِي حَبَرُ بٜلْطُمْ؞ طُعُمْ وَرْتِي ٻٜيْدَارِ مٛوطٛنْ؞ اَمَّا ٻٜ شُٻَاٻٜ اَللَّه، حَا جٛونِ اٜ مٛ يِطِٻٜ، نغَمْ اٛ وَطَنِي مَامَعٜنْ مَٻّٜ اَلْکَوَلْ؞ ²⁹نغَمْ اَللَّه وَيْلِتَتَا ٻٜرْندٜ مُوطُمْ دٛوْ مٛ اٛ سُٻِ اٜ مٛ اٛ بَرْکِطِنِ؞ ³⁰ندٜنّٛ اٛنٛنْ يِمْٻٜ نَاع يَحُودَنْکٛعٜنْ، اٛنْ نغَݧِينٛ اَللَّه، اَمَّا جٛونِ اٛ يُرْمِنَنِيعٛنْ نغَمْ يَحُودَنْکٛعٜنْ نغَݧِي نغَطَ کٛ اٛ وِعِ؞ ³¹نٛنْ مَا يَحُودَنْکٛعٜنْ ٻٜ نغَݧِي ٻٜ نغَطَ کٛ اَللَّه وِعِ، نغَمْ اٜ لَاوٛلْ يُرْمٜىٰندٜ ندٜ اَللَّه حٛلِّعٛنْ کَمْٻٜ مَا اٛ يُرْمِنَنَٻٜ؞ ³²اَللَّه وَرْتِرِي فُو يِمْٻٜ بٛ شُرَاٻٜ نغَمْ ٻٜ نغَݧِي وَطُکِ کٛ اٛ وِعِ، اٛ وَطُ نٛنْ نغَمْ اٛ يُرْمِنَنَ کٛو مٛيٜ؞

مَنْتُکِ اَللَّه

³³غٛونغَ، يِدّٜ اَللَّه، اٜ فَامُ مَاکٛ، اٜ اَنْدَلْ مَاکٛ اٜ طُمْ لُغِّ؞ وَلَا بَاوَيْطٛ اَنْدَ کٛ اٛ سُٻِ وَطُکِ؞ کٛ اٛ وَطَتَ ٻُرِي سٜمْبٜ فَامُ نٜطّٛ؞ ³⁴اَايَارٜ وِعِ،

‏«‏مٛيٜ مٜىٰطِ اَنْدُکِ کٛ وٛنِ ندٜرْ ٻٜرْندٜ جٛومِرَاوٛ؟

مٛيٜ مٜىٰطِ وَرْتُکِ کٛکَّيْطٛمٛ شَاوٛرِ؟

³⁵مٛيٜ مٜىٰطِ حٛکُّکِ اَللَّه غٛطُّمْ

طُمْ اٛ وَاتَنْتَمٛ؟»‏

³⁶نغَمْ کٛو طُمٜ کَنْکٛ تَغِطُمْ، تٛ مَاکٛ کٛو طُمٜ پِوِ، تٛ مَاکٛ طُمْ سٛعّٛتٛ؞ مَنْغُ تَبِّتَ تٛ اَللَّه حَا اَبَدَا؞ اَامِنْ؞

جٛنْدٜ حُوَنْکِ اَللَّه

¹نغَمْ مَاجُمْ بَنْدِرَاٻٜ اَمْ، نغَمْ يُرْمٜىٰندٜ مَوْندٜ ندٜ اَللَّه حٛلِّعٜنْ، اٜ مِ تٛرٛوعٛنْ، کٛکّٜىٰ اَللَّه کٛعٜ مٛوطٛنْ بٛ شَکِّرِ شِرْيَاندِ نغَمْ کُوغَلْ مَاکٛ، مبٜلْنَنَيْندِمٛ ٻٜرْندٜ؞ نٛنْ وٛنِ نٛ حَانِ مَوْنِنِرٛنْ اَللَّه؞ ²تٛع اٛنْ نجَٻُ ݧُمٛ مٛوطٛنْ وَرْتَ اِرِ نغٛ يِمْٻٜ ٻٜ تٛکَّايِ يٜىٰسُ، اَمَّا اَلٜىٰ اَللَّه مٛعِّنَ جٛنْدٜ مٛوطٛنْ اٜ ݧُمٛلْ مٛوطٛنْ، نغَمْ ڤَامٛنْ کٛ اٛ يِطِ نغَطٛنْ، وَاتٛ کٛ وٛوطِ، اٜ کٛ وٜلْنَنْتَمٛ ٻٜرْندٜ، اٜ نٛ نجٛوطٛرْتٛوطٛنْ جٛنْدٜ کٜوْندٜ؞

³نغَمْ شَاحُ طُمْ اَللَّه حٛکِّيَمْ، اٜ مِ وِعَ کٛو مٛيٜ مٛوطٛنْ، تٛع حٛشَّ حٛورٜ مُوطُمْ کٛ ٻُرِ نٛ حَانِ؞ اَمَّا کٛو مٛيٜ فَامَ نٛ حٛشِّرِ حٛورٜ مُوطُمْ؞ کٛو مٛيٜ حٛشَّ حٛورٜ مُوطُمْ کٛ فٛتِّدِ اٜ حٛولَاکِ اَللَّه کِ اَللَّه حٛکِّمٛ؞ ⁴اٜنْ نغٛودِ جٛکّٛوطٜ طُطّٜ اٜ ٻَلِّ مٜىٰطٜنْ، ندٜنْ کٛو ندٜيٜ جٛکّٛودٜ اٜ وٛودِ کُوغَلْ مُوطُمْ؞ ⁵نٛنْ مَا، کٛو ندٜ اٜنْ يِمْٻٜ طُطْٻٜ، اٜنْ نغَرْتِي بٛ ٻَنْدُ غٛعٛ نغَمْ اٜنْ کٛولَکٜ اَلْمَسِيحُ، اٜنْ فُو اٜنْ نجٛکّٛوتِرِ نٛ جٛکّٛوطٜ ٻَنْدُ نجٛکِّندِرِ؞ ⁶اَللَّه حٛکِّي کٛو مٛيٜ مٜىٰطٜنْ دٛکّٜ فٜىٰرٜ‑فٜىٰرٜ؞ تٛ دٛکَّلْ مٜىٰطٜنْ طُمْ وَطُکِ اَنَّبَاکُ، سٜيْ نغَطٜنْطُمْ نٛ فٛتِّدِ اٜ حٛولَاکِ يٜىٰسُ کِ نغٛودُطٜنْ؞ ⁷ٻٜ اٛ حٛکِّ دٛکَّلْ وَلُّکِ، سٜيْ ٻٜ مبَلَّ؞ ٻٜ اٛ حٛکِّ دٛکَّلْ اٜکِّتِنْکِ، سٜيْ ٻٜ اٜکِّتِنَ؞ ⁸ٻٜ اٛ حٛکِّ دٛکَّلْ سٜمْبِطِنْکِ وٛٻّٜ، سٜيْ ٻٜ شٜمْبِطِنَٻٜ؞ ٻٜ اٛ حٛکِّ دٛکَّلْ حٛکُّکِ شَاحُ، سٜيْ ٻٜ کٛکَّطُمْ اٜ ٻٜرْندٜ غٛعٛ؞ ٻٜ اٛ حٛکِّ دٛکَّلْ اَرْدَارٜ، سٜيْ ٻٜ نغَطَ حَکِّيلٛ مَٻّٜ دٛوْ اَرْدَارٜ ندٜنْ؞ ٻٜ اٛ حٛکِّ دٛکَّلْ يُرْمِنَنْکِ يِمْٻٜ، سٜيْ ٻٜ نجُرْمِنَنَٻٜ ندٜرْ بٜلْطُمْ ٻٜرْندٜ؞

⁹کٛلّٜىٰ يِمْٻٜ يِدّٜ ندٜ غٛونغَ؞ نغَݧٜىٰ کٛو اِرِ ندٜيٜ حَلّٜىٰندٜ، نجٛغٜىٰ کٛ وٛوطِ سٜمْبٜىٰ؞ ¹⁰نجٛغٛوتِرٜىٰ، نغِطِندِرٜىٰ بٛ بَنْدِرَاٻٜ، کٛکّٜىٰ يِمْٻٜ مَنْغُ بٛ ٻٜ ٻُرِيعٛنْ؞ ¹¹تٛع اٛنْ اَلُ تٛکُّکِ جٛومِرَاوٛ مٛوطٛنْ فٜىٰوَ، اَمَّا کُوَنٜىٰمٛ اٜ ٻٜرْندٜ غٛعٛ؞ ¹²نَنٜىٰ بٜلْطُمْ نغَمْ کَمُّندٜ ندٜ غٛودُطٛنْ، مُݧٜىٰ ندٜرْ تٛرَّاجِ طِ نجَرٛتٛنْ، نغَطٜىٰ کَ وَطُکِ دٛعَارٜ کٛو ندٜيٜ؞ ¹³شٜنْدِدٜىٰ کٛ نغٛودُطٛنْ اٜ يِمْٻٜ اَللَّه غِطُٻٜ وَلّٜىٰکِ، نجَٻّٜىٰ حٛٻّٜ ندٜرْ غُرٜىٰجٜ مٛوطٛنْ؞

¹⁴مبَرْکِطِنٜىٰ تٛرّٛوٻٜعٛنْ، مبَرْکِطِنٜىٰٻٜ، تٛع اٛنْ لَانُٻٜ؞ ¹⁵نَنْدٜىٰ بٜلْطُمْ اٜ نَنٛوٻٜ بٜلْطُمْ، مبٛيْدٜىٰ اٜ بٛيٛوٻٜ؞ ¹⁶نجٛوطٜىٰ جٛنْدٜ جَمْ حَکُّندٜ مٛوطٛنْ؞ تٛع اٛنْ مَوْنِنْ کٛعٜ مٛوطٛنْ، اَمَّا کَوْتٜىٰ کٛعٜ مٛوطٛنْ اٜ يِمْٻٜ ٻٜ طُمْ حٛشِّ نَاع ٻٜ غٛطُّمْ؞ تٛع اٛنْ کٛشُّ کٛعٜ مٛوطٛنْ بٛ اٛنْ ٻُرِي يِمْٻٜ کٛرِيٻٜ فَامُ؞

¹⁷تٛع اٛنْ نغَاتٛ حَلّٜىٰندٜ اٜ حَلّٜىٰندٜ، اَمَّا ڤَامٜىٰ نغَمْ نغَطٛنْ کٛ کٛو مٛيٜ يِعَتَ طُمْ بٛطُّمْ؞ ¹⁸نغَطٜىٰ کٛ مبَاوٛتٛنْ وَطُکِ تٛ طُمْ وَطٛتٛ نجٛوطٛدٛوطٛنْ جَمْ اٜ کٛو مٛيٜ؞ ¹⁹حِغٛوٻٜ اَمْ، تٛ طُمْ وَطَنِيعٛنْ کٛ حَلِّ، تٛع اٛنْ نغَاتَنٛ کٛعٜ مٛوطٛنْ، اَمَّا اَلٜىٰ اَللَّه وَاتَنٛوعٛنْ اٜ مٛنّٜرٜ مَاکٛ؞ نغَمْ اَايَارٜ وِعِي، ‏«‏جٛومِرَاوٛ وِعِ، ‏‹‏مِنْ وٛنِ غَاتٛتٛوطٛ، مِ وَاتٛتٛ؞›‏ »‏ ²⁰وٛنْدٜ اَايَارٜ وِعِي، ‏«‏تٛ غَݧٛ مَاطَ اٜ نَنَ وٜىٰلٛ، حٛکُّمٛ کٛ اٛ ݧَامَتَ؛ تٛ اٜ مٛ نَنَ طٛنْکَ، حٛکُّمٛ کٛ اٛ يَرَتَ؛ نغَمْ تَا وَطِي نٛنْ، طُمْ وَرْتَيْ بٛ اَ مٛٻْتَنَمٛ دٛشّٜ حِيتٜ دٛوْ حٛورٜ مَاکٛ؞»‏ ²¹تَاع اَلُ حَلّٜىٰندٜ حٜٻَ جَالٛرْغَلْ دٛوْ مَاطَ، اَمَّا حٜٻُ جَالٛرْغَلْ دٛوْ حَلّٜىٰندٜ لَاوٛلْ وَطُکِ کٛ وٛوطِ؞

کٛکّٜىٰ اَرْدِيٻٜ مَنْغُ

¹دٛولٜ کٛو مٛيٜ تٛکَّ لَامٛتٛوٻٜ، نغَمْ وَلَا غٛطُّمْ لَامُ لَامٛتٛوطُمْ سٜيْ تٛ اَللَّه جَٻِي؞ فُو اَرْدِيٻٜ ٻٜ نغٛودُطٜنْ، اَللَّه رٜسِٻٜ دٛوْ لَامُ طُمْ؞ ²نغَمْ نٛنْ، کٛو مٛيٜ غَݧُطٛ لَامُ وَݧِي کٛ اَللَّه وَطِ؞ کٛو مٛيٜ غَطُطٛ نٛنْ فٛوطَنَيْ حٛورٜ مُوطُمْ کِيتَ اَللَّه؞ ³لَامٛتٛوٻٜ لَمْنَا نَاع نغَمْ ٻٜ کُلْنَ غَطٛوٻٜ کٛ وٛوطِ، اَمَّا نغَمْ ٻٜ کُلْنَ غَطٛوٻٜ کٛ حَلِّ؞ اَ يِطِ اَلَا حُلُکِ نٜطّٛ لَامٛتٛوطٛ؟ تٛو، سٜيْ نغَطَا کٛ حَانِ، کَنْکٛ بٛو اٛ مَنْتٜتٜ، ⁴نغَمْ کَنْکٛ اٛ مَشُّطٛ اَللَّه کُوٛووٛ نغَمْ ٻٜيْدَارِ مَاطَ؞ اَمَّا تَا وَطِي کٛ وٛوطَا، حُلُ، نغَمْ نَاع اٜ مٜىٰرٜ اٛ جٛغِي بَوْطٜ مَاکٛ؞ اٛ مَشُّطٛ اَللَّه نغَمْ اٛ تَپَنَ غَطٛوٻٜ کٛ وٛوطَا کِيتَ؞ ⁵نغَمْ نٛنْ، دٛولٜ تٛکَّا لَامُ نَاع نغَمْ دَطُکِ مٛنّٜرٜ اَللَّه تَنْ، اَمَّا نغَمْ اَ اَنْدِ اٜ حَانِ تٛکَّاطُمْ؞

⁶کَنْجُمْ وَطِ اٛنْ نجٛٻَ شٜىٰدٜ لٜيْدِ کَدِنْ، نغَمْ لَامٛتٛوٻٜ ٻٜ مَشُّٻٜ اَللَّه کٛکُّٻٜ شَرٜلْ مَٻّٜ فُو نغَمْ لَامَاکِ؞ ⁷نجٛٻٜىٰ کٛو مٛيٜ ݧَمَاندٜ ندٜ تٛکَّتَعٛنْ، تٛکّٛوٻٜعٛنْ ݧَمَاندٜ شٜىٰدٜ لٜيْدِ، نجٛٻٜىٰٻٜ؞ کٛکّٜىٰ مَنْغُ حَانُٻٜ کٛکّٛنْ مَنْغُ؞

نغِطِندِرٜىٰ

⁸تٛ غٛطّٛ حٛکِّيعٛنْ ݧَمَاندٜ، نجٛٻٜىٰمٛ؞ ݧَمَاندٜ ندٜ اٛنْ مبَاوَتَا يٛٻُدُکِ ندٜ وَرْتَ يِطِندِرْکِ؞ نغَمْ کٛو مٛيٜ غِطّٛ بَنْدِرَاوٛ مُوطُمْ حٜبِّنِي کٛ اَتَّوْرَ وِعِ؞ ⁹رَا غٛطِّ دٛوکَاجِ اَللَّه، ‏«‏تَاع وَطُ نجٜىٰنُ، تَاع وَطُ وَرْحٛورٜ، تَاع وُجُّ، تَاع يِطُ کٛ غٛطّٛ جٜيِ؞»‏ طِعِ دٛوکَاجِ اٜ فُو کٛرِيطِ طِ کَوْتَامَ دٛوْ وٛلْدٜ بِيندٜ، ‏«‏يِطُ بَنْدِرَاوٛ مَاطَ نٛ نغِطِرْطَا حٛورٜ مَاطَ؞»‏ ¹⁰تَا يِطِ بَنْدِرَاوٛ مَاطَ، اَ وَطَنْتَامٛ کٛ حَلِّ؞ نغَمْ مَاجُمْ، يِدّٜ وٛنِ کٛ حٜبِّنِ کٛ دٛوکَ اَللَّه يِطِ؞

¹¹نغَطٜىٰ طُعُمْ، نغَمْ اٛنْ اَنْدِ اِرِ جَامَنُ طُمْ نغٛنْطٜنْ ندٜرْ؞ شَرٜلْ وَطِي نغٜلْ اُمّٛتٛوطٛنْ دَغَ طٜيْنغٛلْ؞ نغَمْ ݧَلْندٜ ندٜ اَللَّه حِسْنَتَعٜنْ اٜ ٻٜيْدَ ٻَدّٛيَاکِ کٛو ندٜيٜ ݧَلْندٜ دَغَ ݧَلْندٜ ندٜ کٛولِيطٜنْ يٜىٰسُ؞ ¹²جٛونِ طُمْ جٜمَّ، سُبَکَ ٻَدَکٜ؞ نغَمْ نٛنْ، اٜنْ اَلُ حُوُکِ کُوطٜ ݧِوْرٜ، اٜنْ نغَطُ جٛنْدٜ مٜىٰطٜنْ ندٜرْ جَيْنغٛلْ؞ ¹³اٜنْ نغَطُ جٛنْدٜ مٜىٰطٜنْ نٛ حَانِ بٛ يِمْٻٜ جٛوطٛتٛوٻٜ ندٜرْ جَيْنغٛلْ؞ تٛع اٜنْ نجَرُ يَرٜيَرٜىٰجِ ڤٛوطٛوجِ جٛنْدٜ مٜىٰرٜ، تٛع اٜنْ نغَطُ نجٜىٰنُ، تٛع اٜنْ نغَطُ حَلّٜىٰندٜ، تٛع اٜنْ کَٻْدُ اٜ يِمْٻٜ کٛو نَنٜنْ لَوْلِيرُ مَٻّٜ؞ ¹⁴اَمَّا، نغِکُّ مٛوطٛنْ وَرْتَ اِرِ نغِکُّ يٜىٰسُ اَلْمَسِيحُ جٛومِرَاوٛ، ندٜنْ تٛع اٛنْ نغَطُ حَکِّيلٛ مٛوطٛنْ دٛوْ نٛ مبٜلْنَنْتٛنْ سُونٛوجِ ٻَلِّ مٛوطٛنْ؞

تٛع اٛنْ نجَوَنْ وٛٻّٜ

¹نجَٻٜىٰ فُو تٛکُّطٛ يٜىٰسُ غٛودُطٛ حٛولَارٜ ندٜ سٜمْبِطَا، اَمَّا تٛع اٛنْ نغٜدّٛوتِرْ اٜ مَاکٛ دٛوْ ݧُمٛلْ مَاکٛ؞ ²غٛطّٛ اٜ اَنْدِ اَللَّه اَلِيمٛ اٛ ݧَامَ کٛو اِرِ ندُيٜ ݧَمْندُ، اَمَّا نٜطّٛ غٛودُطٛ حٛولَارٜ ندٜ سٜمْبِطَا ݧَامَتَا کٛو اِرِ ندُيٜ ݧَمْندُ؞ ³نٜطّٛ ݧَامٛووٛ کٛو اِرِ ندُيٜ ݧَمْندُ، تٛع اٛ يَوَنَ مٛ ݧَامَتَا کٛو اِرِ ندُيٜ ݧَمْندُ، ندٜنْ نٜطّٛ مٛ ݧَامَتَا کٛو اِرِ ندُيٜ ݧَمْندُ تٛع اٛ وِعَ ݧَامٛووٛ کٛو اِرِ ندُيٜ ݧَمْندُ اٜ وَطَ کٛ وٛوطَا، نغَمْ اَللَّه جَٻِي اٛنْ طٛنْ ݧَامٛووٛ کٛو اِرِ ندُيٜ ݧَمْندُ؞ ⁴اَنْ اَ مٛيٜ مبِعَتَا مَشُّطٛ غٛطّٛ وَطِي کٛ وٛوطَا؟ اَيْ، جٛومُ مَاکٛ سُٻَتَ کٛو کٛ اٛ وَطِ اٜ وٛوطِ، کٛو طُمْ وٛوطَا؞ اٛ وَطَيْ کٛ وٛوطِ، نغَمْ جٛومِرَاوٛ وَلَّيْمٛ اٛ وَطَ کٛ وٛوطِ؞

⁵غٛطّٛ حٛشِّي وٛنْدٜ ݧَلْندٜ ٻُرِي وٛنْدٜ مَنْغُ، غٛطّٛ بٛو حٛشِّي ݧَلْطٜ فُو اٜ ڤٛتِّدِ؞ کٛو مٛيٜ مٛوطٛنْ تَبِّتِنَ کٛ فَامِ؞ ⁶فُو کٛشُّطٛ وٛنْدٜ ݧَلْندٜ ٻُرِي وٛنْدٜ، اٜ مٛ وَطَطُمْ نغَمْ مَوْنِنْکِ جٛومِرَاوٛ؞ طٛنْمَا فُو ݧَامٛووٛ کٛو اِرِ ندُيٜ ݧَمْندُ، اٜ مٛ وَطَطُمْ نغَمْ مَوْنِنْکِ جٛومِرَاوٛ، ندٜ اٜ مٛ يٜتَّ اَللَّه نغَمْ ݧَمْندُ ندُنْ؞ کٛو مٛيٜ مٛ ݧَامَتَا کٛو اِرِ ندُيٜ ݧَمْندُ، اٜ مٛ وَطَطُمْ نغَمْ مَوْنِنْکِ جٛومِرَاوٛ ندٜنْ اٜ مٛ يٜتَّ اَللَّه؞ ⁷ندٜرْ مٜىٰطٜنْ وَلَا غَطٛووٛ جٛنْدٜ نغَمْ ٻٜيْدَارِ مُوطُمْ تَنْ، نٛنْ مَا وَلَا مَايَيْطٛ نغَمْ ٻٜيْدَارِ مُوطُمْ تَنْ؞ ⁸تٛ نِ اٜنْ نغَطَ جٛنْدٜ، اٜنْ نغَطَندٜ نغَمْ جٛومِرَاوٛ؞ تٛ اٜنْ مَايِ بٛو، اٜنْ مَايُ نغَمْ جٛومِرَاوٛ؞ نغَمْ نٛنْ، کٛو اٜنْ فٛوفَ، کٛو اٜنْ مَايِي، جٛومِرَاوٛ جٜيِعٜنْ؞ ⁹اَلْمَسِيحُ مَايِ ندٜنْ اُمِّي دَغَ مَيْدٜ، نغَمْ اٛ وَرْتَ جٛومِرَاوٛ مَيْٻٜ اٜ ٻٜ يٛنْکِ؞ ¹⁰ندٜنْ اَنْ، نغَمْ طُمٜ مبِعَتَا بَنْدِرَاوٛ مَاطَ وَطِي کٛ وٛوطَا؟ کٛو، نغَمْ طُمٜ نجَوَنْتَا بَنْدِرَاوٛ مَاطَ؟ نغَمْ اٜنْ فُو اٜنْ ندَرٛتٛ يٜىٰسٛ اَللَّه اٛ وَطَنَعٜنْ کِيتَ؞ ¹¹نغَمْ اَايَارٜ وِعِي،

‏«‏جٛومِرَاوٛ وِعِي، مِ حُنٛرَکٜ حٛورٜ اَمْ،

کٛو مٛيٜ نٜطّٛ دِشّٛتٛ يٜىٰسٛ اَمْ،

ندٜنْ کٛو مٛيٜ وِعَيْ اٜ نجَيْرِ مِنْ وٛنِ اَللَّه؞»‏

¹²نغَمْ نٛنْ، کٛو مٛيٜ مٜىٰطٜنْ وِعَيْ کٛ وَطِ يٜىٰسٛ اَللَّه؞

تَاع وَطُ کٛ وَطَتَ غٛطّٛ وَطَ حَکّٜ

¹³نغَمْ مَاجُمْ، اٜنْ اَلُ يٛوَنْکِ بَنْدِرَاٻٜ مٜىٰطٜنْ کٛ وٛوطَا، اَمَّا اٜنْ شُٻُ ندٜرْ ٻٜرْطٜ مٜىٰطٜنْ اٜنْ نغَطَتَا غٛطُّمْ غَطٛوجُمْ بَنْدِرَاٻٜ مٜىٰطٜنْ نغَطَ حَکّٜ؞ ¹⁴اٜ مِ اَنْدِ مِ تَبِّتِنِي نغَمْ سُمْڤٛ اَمْ اٜ يٜىٰسُ جٛومِرَاوٛ، وَلَا ݧَمْندُ ندُ لَاٻَا يٜىٰسٛ اَللَّه؞ اَمَّا فُو کٛشُّطٛ وٛنْدُ ݧَمْندُ بٛ ندُ لَاٻَا، تٛو، تٛ مَاکٛ ندُ لَاٻَا؞ ¹⁵تَا وٛنَّنِي بَنْدِرَاوٛ مَاطَ ٻٜرْندٜ نغَمْ کٛ ݧَامَتَا، اَ حٛلَّايِمٛ يِدّٜ وٛنْ طٛنْ؞ تَاع اَلُ کٛ ݧَامَتَا وَرْتَ لَاوٛلْ حَلْکٜرٜ بَنْدِرَاوٛ مَاطَ مٛ اَلْمَسِيحُ مَايِ نغَمْ مُوطُمْ؞ ¹⁶نغَمْ نٛنْ، تَاع اَلُ فِي طُمْ نغِعَتَا بٛ طُمْ بٛطُّمْ طُمْ وَرْتَ کٛ وٛٻّٜ کُطَتَ؞ ¹⁷نغَمْ لَامُ اَللَّه نَاع طُمْ ݧَامُکِ اٜ يَرْکِ، اَمَّا طُمْ اَادِلَاکُ، اٜ جٛنْدٜ جَمْ، اٜ بٜلْطُمْ ٻٜرْندٜ کٜٻٜتٜىٰطُمْ بَرْکَ رُوحُ اَللَّه؞ ¹⁸نغَمْ کٛو مٛيٜ کُوَنٛووٛ اَلْمَسِيحُ اٜ وَطَ اِرِ نغِکُّ طُعُمْ اٛ بٜلْنَنٛووٛ اَللَّه ٻٜرْندٜ؛ يِمْٻٜ بٛو کٛکَّيْمٛ مَنْغُ؞

¹⁹نغَمْ مَاجُمْ، اٜنْ نغَطُ کٛ مبَاوٜتٜنْ وَطُکِ نغَطٜنْ کٛ وَدَّتَ جٛنْدٜ جَمْ اٜ کٛ سٜمْبِطِندِرْتَعٜنْ؞ ²⁰تَاع لَلِّنْ کُوغَلْ اَللَّه نغَمْ ݧَمْندُ؞ کٛو ندُيٜ ݧَمْندُ اٜ لَاٻِ، اَمَّا طُمْ وٛوطَا نٜطّٛ ݧَامَ ݧَمْندُ غَطَيْندُ غٛطّٛ وَطَ حَکّٜ؞ ²¹طُمْ ٻُرِي تٛع ݧَامَا کُسٜلْ، کٛو نجَرَا ندِيَمْ اِنَبٛجَمْ، کٛو نغَطَا غٛطُّمْ غَطٛوجُمْ بَنْدِرَاوٛ مَاطَ وَطَ حَکّٜ؞ ²²اَلُ کٛ ݧُمَتَا دٛوْ فِي طُعُمْ حَکُّندٜ مَاطَ اٜ اَللَّه؞ اٛ بَرْکِطِنَاطٛ نٜطّٛ مٛ ݧُمَايِ وَطِي کٛ حَانَا، تٛ وَطِي غٛطُّمْ طُمْ حٛشِّ طُمْ بٛطُّمْ؞ ²³اَمَّا نٜطّٛ غٛودُطٛ سٜکٛ دٛوْ کٛ ݧَامَتَ، تٛ اٛ ݧَامِيطُمْ، اَللَّه حٛشَّيْ کٛ اٛ وَطِ طُمْ وٛوطَا، نغَمْ اٛ تَبِّتِنَايِ کٛ اٛ وَطِ طُمْ بٛطُّمْ؞ کٛو طُمٜ کٛ نٜطّٛ وَطِ، تٛ اٛ تَبِّتِنَايِ طُمْ بٛطُّمْ يٜىٰسٛ اَللَّه، تٛو، اٛ وَطِي حَکّٜ؞

تٛع اٛنْ مبٜلْنَنْ کٛعٜ مٛوطٛنْ تَنْ

¹اٜنٜنْ شٜمْبِطْٻٜ ندٜرْ تٛکُّکِ يٜىٰسُ، اٜ حَانِ مُݧَنٜنْ ٻٜ شٜمْبِطَا ندٜرْ تٛکُّکِ يٜىٰسُ؞ ندٜنْ تٛع اٜنْ مبٜلْنَنْ کٛعٜ مٜىٰطٜنْ ٻٜرْطٜ تَنْ؞ ²کٛو مٛيٜ مٜىٰطٜنْ وٜلْنَنَ بَنْدِرَاوٛ مُوطُمْ ٻٜرْندٜ نغَمْ ٻٜيْدَارِ مَاکٛ اٜ سٜمْبِطِنْکِمٛ ندٜرْ تٛکُّکِ يٜىٰسُ؞ ³نغَمْ اَلْمَسِيحُ وٜلْنَنَايِ حٛورٜ مُوطُمْ ٻٜرْندٜ، اَمَّا نٛ اَايَارٜ وِعِ، ‏«‏ٻٜنْ طٛنْ کُطٛوٻٜمَ، مِنْ ٻٜ کُطَتَ؞»‏ ⁴فُو کٛ وِنْدَا دَغَ ندٜنّٛ ندٜرْ دٜفْتٜرٜ شٜنِيندٜ، طُمْ وِنْدَ نغَمْ طُمْ اٜکِّتِنَعٜنْ، نغَمْ بَرْکَ مُݧَلْ مٜىٰطٜنْ اٜ سٜمْبِطِنْکِ کِ دٜفْتٜرٜ شٜنِيندٜ سٜمْبِطِنْتَعٜنْ نغَطٜنْ کَمُّندٜ؞ ⁵اَللَّه بَلّٛووٛعٜنْ مبَاوٜنْ مُݧٜنْ شٜمْبِطِنٛووٛ ٻٜرْطٜ مٜىٰطٜنْ اٛ وَلَّعٛنْ نجٛوطٛوطٛنْ جٛنْدٜ جَمْ حَکُّندٜ مٛوطٛنْ ندٜرْ تٛکُّکِ يٜىٰسُ اَلْمَسِيحُ؞ ⁶نٛنْ نغَرْتِرْتٛنْ ٻٜ حٛنْدُکٛ غٛعٛ ٻٜ ݧُمٛ غٛعٛ ندٜرْ مَوْنِنْکِ اَللَّه ݧَاکٛ جٛومِرَاوٛ مٜىٰطٜنْ يٜىٰسُ اَلْمَسِيحُ؞ ⁷نغَمْ نٛنْ، نٛ اَلْمَسِيحُ جَٻِرِعٛنْ، اٛنٛنْ مَا نجَٻِندِرٜىٰ نٛنْ نغَمْ يِمْٻٜ مَوْنِنَ اَللَّه؞ ⁸نغَمْ اٜ مِ وِعَعٛنْ اَلْمَسِيحُ وَرْتِي مَشُّطٛ يَحُودَنْکٛعٜنْ نغَمْ اٛ حٛلَّ اَللَّه وَطَيْ کٛ وِعِ، نغَمْ طُمْ تَبِّتِنَ اَلْکَوَلْ نغَلْ طُمْ وَطَنِ مَامَعٜنْ مَٻّٜ اَرَنْدٜعٜنْ، ⁹کَدِنْ نغَمْ يِمْٻٜ نَاع يَحُودَنْکٛعٜنْ مَوْنِنَ اَللَّه نغَمْ يُرْمٜىٰندٜ مَاکٛ؞ نٛنْ نٛ طُمْ وِنْدِرَا،

‏«‏نغَمْ نٛنْ، مِ مَنْتٜتٜ ندٜرْ يِمْٻٜ نَاع يَحُودَنْکٛعٜنْ،

مِ يِمَ غِمِ مَنْتُکِ اِنْدٜ مَاطَ؞»‏

¹⁰طٛنْمَا وٛنْدٜ اَايَارٜ وِعِي،

‏«‏اٛنٛنْ يِمْٻٜ نَاع يَحُودَنْکٛعٜنْ، مبٜلْمبٜلْتٜىٰ حَوْتِ اٜ يِمْٻٜ اَللَّه؞»‏

¹¹ندٜ ٻٜيْدِي وِيکِ،

‏«‏مَنْتٜىٰ جٛومِرَاوٛ، اٛنٛنْ يِمْٻٜ نَاع يَحُودَنْکٛعٜنْ اٛنْ فُو مٛوطٛنْ،

مَنْتٜىٰمٛ، اٛنْ فُو مٛوطٛنْ يِمْٻٜ دُونِيَارُ؞»‏

¹²طٛنْمَا، اَنَّبِ اِشَايَ وِعِ،

‏«‏غٛطّٛ دَغَ ندٜرْ لٜݧٛلْ جٜىٰسِ وَرٛيَيْ،

اٛ وَرٛيَيْ نغَمْ اٛ لَامٛو يِمْٻٜ نَاع يَحُودَنْکٛعٜنْ، ٻٜ نغَطَيْ کَمُّندٜ دٛوْ مَاکٛ؞»‏

¹³اَللَّه تَبِّتِنْطٛ کَمُّندٜ مٜىٰطٜنْ وَطَعٛنْ نَنٛنْ بٜلْطُمْ کٜوْطُمْ، اٛ حٛکَّعٛنْ جَمْ بَرْکَ حٛولَاکِ کِ کٛولِيطٛنْمٛ، نغَمْ کَمُّندٜ مٛوطٛنْ وَطَ کَ ٻٜيْدَاکِ لَاوٛلْ بَوْطٜ رُوحُ مَاکٛ؞

کُوغَلْ بُلُسْ

¹⁴بَنْدِرَاٻٜ اَمْ، مِنْ اٜ حٛورٜ اَمْ مِ تَبِّتِنِي اٛنٛنْ اٜ کٛعٜ مٛوطٛنْ اٛنْ نغٛودِ نغِکُّ بٛطُّمْ نَاع سٜطَّ، اٛنْ کٜىٰوُٻٜ اَنْدَلْ، ندٜنْ اٛنْ مبَاوَيْ اٜکِّتِندِرٛنْ؞ ¹⁵اَمَّا بَنْݧٜ ندٜرْ طٜرٜوٛلْ نغٛعٛلْ مِ وِنْدَنِيعٛنْ حَالَ شٜمْبِطْکَ دٛوْ غٛطُّمْ فِي نغَمْ مِ سِفْتٛرَنَعٛنْطُمْ؞ مِ وَطُ نٛنْ نغَمْ کُوغَلْ بٛنْغَلْ نغَلْ اَللَّه حٛکِّيَمْ، ¹⁶نغَمْ مِ وَرْتَ کُوَنٛووٛ يٜىٰسُ اَلْمَسِيحُ ندٜرْ يِمْٻٜ نَاع يَحُودَنْکٛعٜنْ؞ اٜ مِ حُوَ کُوغَلْ اَرْدِيطٛ دِينَ ندٜرْ وَعَجِنْکِ حَبَرُ بٜلْطُمْ طُمْ اَللَّه، نغَمْ يِمْٻٜ نَاع يَحُودَنْکٛعٜنْ نغَرْتَ بٛ شَکِّرِ ندِ اَللَّه جَٻِ، ندِ رُوحُ اَللَّه وَرْتِرِ شٜنِيندِ؞ ¹⁷نغَمْ يٜىٰسُ اَلْمَسِيحُ جٜيِيَمْ وَطِ مَنْتٛرْتٛومِ کُوغَلْ نغَلْ کُوَنَيْمِ اَللَّه؞ ¹⁸مِ مٜتَتَا طٛعٛ دٛوْ غٛطُّمْ، سٜيْ دٛوْ کُوغَلْ اَلْمَسِيحُ نغَلْ اٛ وَلِّيَمْ نغَطُمِ؞ اٛ وَلِّييَمْ نغَمْ يِمْٻٜ نَاع يَحُودَنْکٛعٜنْ تٛکَّ کٛ اَللَّه وِعِ بَرْکَ بٛلِيطٜ اَمْ اٜ کُوطٜ اَمْ، ¹⁹اٜ کُوطٜ کَيْطِنِيطٜ طٜ نغَطُمِ لَاوٛلْ بَوْطٜ رُوحُ اَللَّه؞ دَغَ اُرُشَلِيمَ مِ فِلَکٜ حَا يَاکِ غَرِيرِ اِلِيرِکُمْ، مِ وَعَجِنِ حَبَرُ بٜلْطُمْ دٛوْ اَلْمَسِيحُ اٜ طٜنْ طٛنْ بِغٜىٰجٜ فُو؞ ²⁰کٛ وٛنِ ندٜرْ ٻٜرْندٜ اَمْ وٛنِ مِ وَعَجِنَ حَبَرُ بٜلْطُمْ تٛ يِمْٻٜ ٻٜ مٜىٰطَايِ نَنْکِ حَبَرُ اَلْمَسِيحُ، نغَمْ تٛع مِ مَحَ دٛوْ تٛ غٛطّٛ فُطِّ مَحُکِ؞ ²¹نٛنْ نٛ طُمْ وِنْدِرَا،

‏«‏يِمْٻٜ ٻٜ مٜىٰطَايِ حٛکّٜىٰکِ حَبَرُ مَاکٛ ٻٜ اَنْدَيْمٛ،

ندٜنْ ٻٜنْ طٛنْ ٻٜ مٜىٰطَايِ نَنْکِ حَبَرُ مَاکٛ ٻٜ ڤَامَيْ؞»‏

²²نغَمْ کُوغَلْ نغَلْ، مِ حٜٻَايِ شَرٜلْ وَرْکِ تٛ مٛوطٛنْ؞

بُلُسْ اٜ يِطِ يَاکِ غَرِيرِ رٛومَ

²³اَمَّا جٛونِ، ندٜ نجٛتِّنْمِ کُوغَلْ اَمْ اٜ بِغٜىٰجٜ طٜعٜ، ندٜنْ ندٜ دُوٻِ طُطِّ اٜ مِ حَاٻِ يِيکِعٛنْ، ²⁴اٜ مِ يِطِ يَالُکِ تٛ مٛوطٛنْ شَرٜلْ نغٜلْ نجَحَيْمِ اَسْبَانِيَ؞ اٜ مِ يِطِ مبَلّٛنْيَمْ مِ يَحَ تٛنْ غَطَ مِ نَنِي بٜلْطُمْ جٛوطٛدَاکِ اٜ مٛوطٛنْ بَلْطٜ سٜطَّ؞ ²⁵جٛونِ بٛو مِ يَحَيْ اُرُشَلِيمَ نغَمْ مِ يَارَنَ يِمْٻٜ اَللَّه بَلَّلْ؞ ²⁶نغَمْ تٛکُّٻٜ يٜىٰسُ غٛنْٻٜ مَکِدٛونِيَ اٜ اَکَايَ ٻٜ نَنِي بٜلْطُمْ حٛکُّکِ دٛکّٜ نغَمْ وَلُّکِ ٻٜ نغَلَنَا ندٜرْ يِمْٻٜ اَللَّه ندٜرْ اُرُشَلِيمَ؞ ²⁷ٻٜ نَنِي بٜلْطُمْ وَطُکِ نٛنْ؞ غٛونغَ تٛ مَٻّٜ طُمْ وَرْتِي بٛ يٛٻُکِ ݧَمَاندٜ؞ نغَمْ تٛ يِمْٻٜ نَاع يَحُودَنْکٛعٜنْ کٜٻِي غٜطَلْ ندٜرْ فِي بٛطُّمْ طُمْ اَللَّه وَطَنِ يَحُودَنْکٛعٜنْ اَلْکَوَلْ، ندٜنْ اٜ حَانِ ٻٜ مبَلِّرَٻٜ جَوْدِ مَٻّٜ؞ ²⁸ندٜنْ تٛ مِ يٛتِّنِي کُوغَلْ نغَعَلْ، وَاتٛ مِ حٛکِّيٻٜ بَلَّلْ نغَلْ طُمْ حَوْرِتَنِٻٜ، مِ نَنْغَيْ لَاوٛلْ يَاکِ لٜيْدِ اَسْبَانِيَ؞ دٛوْ لَاوٛلْ اَمْ يَاکِ اَسْبَانِيَ مِ يَالَيْ تٛ مٛوطٛنْ؞ ²⁹اٜ مِ اَنْدِ، تٛ مِ وَرِي تٛ مٛوطٛنْ، مِ وَرْدَيْ اٜ بَرْکَ اَلْمَسِيحُ فُو؞

³⁰بَنْدِرَاٻٜ اَمْ، نغَمْ جٛومِرَاوٛ مٜىٰطٜنْ يٜىٰسُ اَلْمَسِيحُ اٜ يِدّٜ ندٜ رُوحُ اَللَّه حٛلَّتَ، اٜ مِ تٛرٛوعٛنْ مبَلّٜىٰيَمْ وَطُکِ دٛعَارٜ نَاع سٜطَّ؞ ³¹تٛرٜىٰ اَللَّه حِسْنَيَمْ دَغَ جُوطٜ غَݧُٻٜ تٛکَّ يٜىٰسُ غٛنْٻٜ لٜيْدِ يَحُودِيَ، ندٜنْ تٛرٜىٰمٛ اٛ وَطَ کٛولِيٻٜ يٜىٰسُ غٛنْٻٜ اُرُشَلِيمَ نجَٻَ شٜىٰدٜ طٜ نجَارَنَيْمِٻٜ، ³²نغَمْ تٛ اَللَّه جَٻِي مِ وَرٛيَيْ تٛ مٛوطٛنْ اٜ بٜلْطُمْ ٻٜرْندٜ، مِ سِوْتٛدٛو اٜ مٛوطٛنْ؞ ³³اَللَّه جٛومُ جَمْ وٛنْدَ اٜ مٛوطٛنْ اٛنْ فُو؞ اَامِنْ؞

کٛوْنٛلْ بُلُسْ

¹اٜ مِ يِطِ مِ وِعَعٛنْ بَنْدِرَاوٛ مٜىٰطٜنْ دٜبّٛ بِعٜتٜىٰطٛ فِيبِ، کُوٛووٛ ندٜرْ تٛکُّٻٜ يٜىٰسُ غٛنْٻٜ کَنْکِيرِيَ، اٛ دٜبّٛ مٛ غٛونغَ؞ ²نجَٻّٜىٰمٛ ندٜرْ اِنْدٜ جٛومِرَاوٛ نٛ حَانِ يِمْٻٜ اَللَّه نجَٻّٛرٜىٰ؞ کٛکّٜىٰمٛ کٛو اِرِ نغَلٜ بَلَّلْ نغَلْ اٛ يِطِ تٛ مٛوطٛنْ، نغَمْ اٛ وَلِّي يِمْٻٜ طُطْٻٜ حَوْتِ اٜ اَمْ؞

³کٛوْنٜىٰ بِرِسْکِلَ اٜ اَکِيلَ، ٻٜ کُودَيْمِ کُوغَلْ يٜىٰسُ اَلْمَسِيحُ؞ ⁴ٻٜ کٛشِّي يٛنْکِ مَٻّٜ نَاع طُمْ غٛطُّمْ نغَمْ اَمْ؞ مِ يٜتِّيٻٜ، نَاع مِنْ تَنْ حَا اٜ کٛو نغَلٜ کَوْتَلْ تٛکُّٻٜ يٜىٰسُ غٛنْٻٜ ندٜرْ يِمْٻٜ نَاع يَحُودَنْکٛعٜنْ؞ ⁵طٛنْمَا کٛوْنٜىٰ تٛکُّٻٜ يٜىٰسُ کَوْرِتٛوٻٜ ندٜرْ وُرٛ مَٻّٜ؞ کٛوْنٜىٰ حِغٛ اَمْ مٛ نغِطُمِ بِعٜتٜىٰطٛ اَفَانِتُسْ، اَرْتُطٛ حٛولَاکِ اَلْمَسِيحُ ندٜرْ لٜيْدِ اَاسِيَ فُو؞ ⁶کٛوْنَنٜىٰيَمْ مَرْيَامَ، کُوَنْطٛ اَلْمَسِيحُ نَاع سٜطَّ نغَمْ ٻٜيْدَارِ مٛوطٛنْ؞ ⁷کٛوْنَنٜىٰيَمْ اَنْدَرٛونِکُسْ اٜ يُونِيَ، بَنْدِرَاٻٜ اَمْ يَحُودَنْکٛعٜنْ تٛکُّٻٜ يٜىٰسُ ٻٜ طُمْ مَٻِّدِ اٜ اَمْ ندٜرْ سُودُ شُرَلْ؞ لِلَاٻٜ اٜ اَندِٻٜ بٛطُّمْ، کَدِنْ ٻٜ اَرْتِييَمْ حٛولَاکِ اَلْمَسِيحُ؞

⁸اٜ مِ حٛوْنَ اَمْڤِلِيَاتُسْ حِغٛ اَمْ مٛ نغِطْمِ ندٜرْ سُمْڤٛوتِرْکِ اٜ جٛومِرَاوٛ؞ ⁹کٛوْنَنٜىٰيَمْ اُرْبَانُسْ، مٛ کُودٜتٜنْ ندٜرْ کُوغَلْ اَلْمَسِيحُ، اٜ حِغٛ اَمْ سِتَاکِسْ مٛ نغِطُمِ؞ ¹⁰کٛوْنَنٜىٰيَمْ اَفَالِسْ، مٛ طُمْ تَبِّتِنِ اٜ تٛکَّ اَلْمَسِيحُ اٜ غٛونغَ؞ کٛوْنَنٜىٰيَمْ اَرِسْتٛبُلُسْ اٜ اِيَالُ مَاکٛ اٜ فُو تٛکُّٻٜ يٜىٰسُ غٛنْٻٜ ندٜرْ وُرٛ مَاکٛ؞ ¹¹کٛوْنَنٜىٰيَمْ حِرُودِيَنْ بَنْدِرَاوٛ اَمْ يَحُودَنْکٜىٰجٛ؞ کٛوْنَنٜىٰيَمْ نَرْکِسُسْ اٜ اِيَالُ مَاکٛ اٜ فُو تٛکُّٻٜ يٜىٰسُ غٛنْٻٜ ندٜرْ وُرٛ مَاکٛ؞

¹²کٛوْنَنٜىٰيَمْ تِرِيفِنَ اٜ تِرِيفُسَ، رٜوْٻٜ کُوَنٛوٻٜ جٛومِرَاوٛ؞ طٛنْمَا کٛوْنَنٜىٰيَمْ فَرْسِسْ حِغٛ اَمْ مٛ نغِطُمِ کُوَنْطٛ جٛومِرَاوٛ نَاع سٜطَّ؞ ¹³کٛوْنَنٜىٰيَمْ رُوفُسْ کُوَنْطٛ جٛومِرَاوٛ بٛطُّمْ اٜ مَدُوجٛ مَاکٛ جٛغِيطٛيَمْ بٛ ٻِطّٛ مَاکٛ؞ ¹⁴کٛوْنَنٜىٰيَمْ اَسِنْکِرِيتُسْ، اٜ فِلِغٛونَ، اٜ حَرْمِسْ، اٜ فَتُرٛوبَسْ، اٜ حَرْمَسْ اٜ تٛکُّٻٜ يٜىٰسُ غٛنْدُٻٜ اٜ مَٻّٜ؞ ¹⁵کٛوْنَنٜىٰيَمْ فِلٛولٛغُسْ، اٜ جُولِيَ، اٜ نِرِيُسْ اٜ بَنْدِرَاوٛ مَاکٛ دٜبّٛ، اٜ اٛلِمْفَسْ، اٜ فُو يِمْٻٜ اَللَّه غٛنْدُٻٜ اٜ مَٻّٜ؞

¹⁶کٛوْنِندِرٜىٰ کٛوْنٛلْ حِغَاکُ؞ کٛو نغَلٜ کَوْتَلْ تٛکُّٻٜ يٜىٰسُ اٜ کٛوْنَعٛنْ؞

¹⁷بَنْدِرَاٻٜ اَمْ، اٜ مِ تٛرٛوعٛنْ، ڤَامَنٜىٰ غَدّٛوٻٜ شِيَ فَمْفَمْتِرْکِ حَکُّندٜ مٛوطٛنْ، مَجِّنٛوٻٜعٛنْ، غَݧٛوٻٜ اٜکِّتِنٛلْ نغٛلْ کٜٻْطٛنْ؞ نغٛطِّتٜىٰٻٜ؞ ¹⁸نغَمْ اِرِ ٻٜنْ طٛنْ يِمْٻٜ نَاع جٛومِرَاوٛ مٜىٰطٜنْ اَلْمَسِيحُ ٻٜ کُوَنْتَ، اَمَّا دٜىٰطِ مَٻّٜ ٻٜ کُوَنْتَ؞ اٜ بٛلِيطٜ بٜلْطٜ اٜ حَالَاجِ بٛطِّ ٻٜ مَجِّنِرْتَ يِمْٻٜ غٛودُٻٜ شِيَ فَامُ؞ ¹⁹کٛو مٛيٜ نَنِي حَبَرُ نٛ تٛکِّرْتٛنْ يٜىٰسُ، نٛنْ وَطِي مِ نَنِي بٜلْطُمْ نغَمْ مٛوطٛنْ؞ اَمَّا اٜ مِ يِطِ نغَرْتٛنْ غٛودُٻٜ فَامُ اَنْدٛنْ کٛ وٛوطِ، نغٛطِّتٛوطٛنْ وَطُکِ کٛ وٛوطَا؞ ²⁰اَللَّه جٛومُ جَمْ نَاع کٛ نٜىٰٻِ اٛ لَلِّنَيْ بَوْطٜ شٜيْطَنْ اٛ يٛوَعٛنْ دٛوْ مَاکٛ؞

جٛومِرَاوٛ مٜىٰطٜنْ يٜىٰسُ اَلْمَسِيحُ بَرْکِطِنَعٛنْ؞

²¹تِمٛوتِ مٛ کُودَيْمِ اٜ حٛوْنَعٛنْ، نٛنْ مَا لُوسِيُسْ، اٜ جَاسٛنْ، اٜ سٛسِفَتَ، بَنْدِرَاٻٜ اَمْ يَحُودَنْکٛعٜنْ تٛکُّٻٜ يٜىٰسُ؞

²²مِنْ تَرْتِيُسْ تٛکُّطٛ جٛومِرَاوٛ، بَلُّطٛ بُلُسْ، مِنْ وِنْدِ طٜرٜوٛلْ نغٛعٛلْ، اٜ مِ حٛوْنَعٛنْ؞

²³غَايُسْ، جَٻِّيطٛيَمْ ندٜرْ وُرٛ مُوطُمْ، مٛ تٛکُّٻٜ يٜىٰسُ کَوْرِتَتَ ندٜرْ وُرٛ مَاکٛ، اٜ مٛ حٛوْنَعٛنْ؞ اٜرَسْتُسْ، ڤَامَنٛووٛ شٜىٰدٜ غَرِيرِ، اٜ بَنْدِرَاوٛ مٜىٰطٜنْ کَوَرْتُسْ، اٜ ٻٜ کٛوْنَعٛنْ؞

²⁴‏[‏جٛومِرَاوٛ مٜىٰطٜنْ يٜىٰسُ اَلْمَسِيحُ بَرْکِطِنَعٛنْ؞ اَامِنْ؞]‏

²⁵مَنْغُ تَبِّتَ تٛ اَللَّه بَاوَيْطٛ سٜمْبِطِنَعٛنْ بَرْکَ حَبَرُ بٜلْطُمْ طُمْ نغَعَجِنَيْمِ دٛوْ يٜىٰسُ اَلْمَسِيحُ؞ حَبَرُ بٜلْطُمْ طُمْ طُمْ سِرُّ شُوطَاطُمْ دَغَ دُوٻِ طُطِّ پَٻِّيطِ؞ ²⁶اَمَّا جٛونِ طُمْ وَنْغِنَامَ اٜ نجَيْرِ، طُمْ اَنْدِنِيطُمْ لٜپِّ دُونِيَارُ فُو لَاوٛلْ دٜفْتٜ طٜ اَنَّبٛعٜنْ مبِنْدِ؞ اَللَّه تَبِيطٛ وِعِي طُمْ وَطَ نٛنْ نغَمْ لٜپِّ دُونِيَارُ فُو کٛولٛومٛ تٛکَّ کٛ اٛ وِعِ؞

²⁷تٜدُّنغَلْ تَبِّتَ تٛ اَللَّه حَا اَبَدَا بَرْکَ يٜىٰسُ اَلْمَسِيحُ!‏ کَنْکٛ تَنْ وٛنِ اَللَّه؞ کَنْکٛ تَنْ وٛودِ فَامُ ندٜرْ کٛو طُمٜ؞ اَامِنْ؞