وَحَيُ يَحَيَ

وَحَيُ يَحَيَ

دٛوْ يٜىٰسُ اَلْمَسِيحُ

حَبَرُ دٛوْ طٜرٜوٛلْ نغٛعٛلْ

بِنْدُطٛ طٜرٜوٛلْ نغٛعٛلْ وٛنِ يَحَيَ غٛعٛتٛ ندٜرْ تٛکُّٻٜ يٜىٰسُ سَڤّٛ اٜ طِطٛ؞ طٜرٜوٛلْ نغٛعٛلْ وِنْدَامَ شَرٜلْ کٛ تٛکُّٻٜ يٜىٰسُ نغٛنِ ندٜرْ تٛرَّ نغَمْ اٜ ٻٜ تٛکِّ يٜىٰسُ؞ يَحَيَ اٛ غٛعٛتٛ ندٜرْ يِمْٻٜ ٻٜ لَامِيٻٜ تٛرِّ؛ اٛ يَارَامَ وٛنْدِ لٜيْدِ نغٛنْدِ شَکَ ندِيَمْ نغَمْ اٛ وَعَجِنِي وٛلْدٜ جٛومِرَاوٛ؞ تٛنْ تٛ وِغٜىٰرٜ ندٜنْ اٛ وِنْدِ طٜرٜوٛلْ نغٛعٛلْ؞ اٛ وِنْدُنغٛلْ نغَمْ سٜمْبِطِنْکِ تٛکُّٻٜ يٜىٰسُ، ٻٜ مُݧَ ندٜرْ تٛرَّ کَ ٻٜ نجَرَتَ، ٻٜ نغَطَ کَمُّندٜ مَٻّٜ دٛوْ وَرْتٛيْکِ يٜىٰسُ شَرٜلْ کٛ اٛ وَرْتٛيْتَ ندٜرْ تٜدُّنغَلْ؞ طٜرٜوٛلْ نغٛعٛلْ اٜ حٛلَّ کٛ وَنْغَتَ ݧَلْندٜ جَانغٛ اٜ نٛ طُمْ حَلْکِرْتَ غَݧُٻٜ تٛکَّ يٜىٰسُ؞ ندٜنْ اٜ نغٛلْ حٛلَّ نٛ طُمْ حِسْنِرْتَ تٛکُّٻٜ يٜىٰسُ غَطُٻٜ جٛنْدٜ وٛوطُندٜ يٜىٰسٛ اَللَّه؞

¹ندٜعٜ دٜفْتٜرٜ اٜ ندٜ سَاوِ وَحَيُ طُمْ اَللَّه حٛکِّ يٜىٰسُ اَلْمَسِيحُ نغَمْ اٛ حٛلَّ مَشُّٻٜ مَاکٛ کٛ وَطَتَ نَاع کٛ نٜىٰٻِ؞ يٜىٰسُ لِلِ مَلَاعِکَاجٛ مُوطُمْ تٛ مَشُّطٛ مَاکٛ يَحَيَ نغَمْ اٛ وِعَمٛ فِي طُمْ؞ ²يَحَيَ وِعِ کٛو طُمٜ طُمْ يِعِ دٛوْ وٛلْدٜ اَللَّه، اٜ کٛ يٜىٰسُ اَلْمَسِيحُ وِعِ اٜ کٛ وَطِ؞ ³اٛ بَرْکِطِنَاطٛ نٜطّٛ جَنْغَنٛووٛ وٛٻّٜ طُعُمْ حَبَرُ طُمْ اَنَّبَاکُ، ندٜنْ ٻٜ بَرْکِطِنَاٻٜ نَنْٻٜ کٛ وِنْدَا ندٜرْ دٜفْتٜرٜ ندٜعٜ تٛکَّندٜ، نغَمْ شَرٜلْ کٛ فِي طُمْ وَنْغَتَ ٻَدَکٜ؞

تٛکُّٻٜ يٜىٰسُ غٛنْٻٜ ندٜرْ غَرِيجٜ جٛوٜىٰطِطِ

⁴مِنْ يَحَيَ اٜ مِ وِنْدَنَ تٛکُّٻٜ يٜىٰسُ وٛنْٻٜ ندٜرْ غَرِيجٜ جٛوٜىٰطِطِ ندٜرْ لٜيْدِ اَاسِيَ؞

اَللَّه غٛنْطٛ جٛونِ اٜ ندٜنّٛ اٜ طٛعٛ يٜىٰسٛ، اٜ رُوحُوجِ جٛوٜىٰطِطِ غٛنْطِ يٜىٰسٛ جٛوطٛرْغَلْ لَامُ مَاکٛ، ⁵اٜ يٜىٰسُ اَلْمَسِيحُ، شٜيْدُوجٛ اَللَّه مٛ غٛونغَ، بَرْکِطِنَعٛنْ، حٛکَّعٛنْ جَمْ؞ يٜىٰسُ اَرْتُطٛ اُمَّاکِ دَغَ مَيْدٜ کَنْکٛ وٛنِ لَامِيطٛ لَامِيٻٜ دُونِيَارُ؞

اٜ مٛ يِطِعٜنْ، اٛ حِسْنِيعٜنْ دَغَ حَکّٜىٰجِ مٜىٰطٜنْ بَرْکَ پِيپَمْ مَيْدٜ مَاکٛ؞ ⁶اٛ وَرْتِرِيعٜنْ يِمْٻٜ مَاکٛ اَرْدِيٻٜ دِينَ کُوَنٛوٻٜ اَللَّه ݧَاکٛ مَاکٛ؞ مَنْغُ اٜ لَامُ تَبِّتَ تٛ يٜىٰسُ اَلْمَسِيحُ حَا اَبَدَا اَبَدِنْ؞ اَامِنْ؞

⁷رَطُّمْ اٜ مٛ وَرَ ندٜرْ دُولٜ، کٛو مٛيٜ يِعَيْمٛ حَا مَا اٜ بَرْٻٜمٛ؞ فُو يِمْٻٜ دُونِيَارُ مبٛيَيْ نغَمْ غَرْتٛلْ مَاکٛ!‏ غٛونغَ، طُمْ وَطَيْ؞ اَامِنْ؞

⁸اَللَّه جٛومِرَاوٛ جٛومُ بَوْطٜ وِعِ، ‏«‏مِنْ وٛنِ اَلْفَ، مِنْ وٛنِ اٛمٜىٰغَ،»‏ وَاتٛ فُطّٛودٜ اٜ تِمّٛودٜ؞ کَنْکٛ وٛنِ جٛونِ، اٜ ندٜنّٛ، اٜ يٜىٰسٛ طٛعٛ؞

وَحَيُ اَلْمَسِيحُ

⁹مِنْ وٛنِ يَحَيَ بَنْدِرَاوٛ مٛوطٛنْ ندٜرْ تٛکُّکِ يٜىٰسُ؞ اٜنْ نجَرَ تٛرَّ نغَمْ اٜنْ يِمْٻٜ ندٜرْ لَامُ مَاکٛ، اَمَّا اٛ حٛکِّيعٜنْ ٻٜرْطٜ مُݧَلْ؞ طُمْ يَارِييَمْ لٜيْدِ نغٛنْدِ شَکَ ندِيَمْ بِعٜتٜىٰندِ بَتَمٛسْ نغَمْ مِ وَعَجِنِي وٛلْدٜ اَللَّه مِ حٛکِّي حَبَرُ يٜىٰسُ؞ ¹⁰اٜ ݧَلْندٜ اَلَلْ، رُوحُ اَللَّه جِڤّٛيِي دٛوْ اَمْ، سٜيْ نَنْمِ وٛنْدٜ حٛنٛنْدٜ شٜمْبِنْدٜ غَطَ اَمْ بٛ دُودُکِ لُوَلْ؞ ¹¹حٛنٛنْدٜ ندٜنْ اٜ وِعَ، ‏«‏وِنْدُ کٛ نغِيطَا ندٜرْ طٜرٜوٛلْ لِلْدَنَا کَوْتٜ تٛکُّٻٜ يٜىٰسُ وٛنْٻٜ ندٜرْ غَرِيجٜ جٛوٜىٰطِطِ، وَاتٛ ٻٜ اَافِسَ، اٜ ٻٜ سَمِرْنَ، اٜ ٻٜ بِرْغَمُمْ، اٜ ٻٜ تَيَاتِرَ، اٜ ٻٜ سَرْدِسْ، اٜ ٻٜ فِلَدٜلْفِيَ، ندٜنْ اٜ ٻٜ لَوْدِيکِيَ؞»‏

¹²سٜيْ نغَيْلِتِيمِ نغَمْ مِ يِعَ مٜتَنَيْطٛيَمْ؞ اٜ وَيْلِتَاکِ اَمْ سٜيْ نغِيمِ فِتِلَاجِ جٛوٜىٰطِطِ طِ جِينَارِ؞ ¹³شَکَ فِتِلَاجِ طِنْ بٛو مِ يِعِ غٛطّٛ بٛ ٻِي نٜطّٛ اٜ مٛ ٻٛرْنِي کٛلْتٜ حَا کٛيْطٜ، اٜ مٛ تَادِي تَادٛرْدٜ جِينَارِ تٛ غَبَارٜ مَاکٛ؞ ¹⁴حٛورٜ مَاکٛ اٜ غَاسَ مَاکٛ اٜ رَنِّ تَرْ بٛ حٛتّٛلّٛ، تَرْ بٛ ݧَالَلْ، ندٜنْ غِتٜ مَاکٛ بٛ طٜمْنغَلْ حِيتٜ؞ ¹⁵کٛيْطٜ مَاکٛ اٜ طٜلْکِتٛو بٛ نجَمْندِ مبٛطٜىٰرِ ٻٛلِنَاندِ نغٛغَّاندِ ندِ طُمْ دٜفِ ندٜرْ حِيتٜ وَعِلْدُ، ندٜنْ حٛنٛنْدٜ مَاکٛ بٛ حٛولٛ دٛغُّدُ ندِيَمْ؞ ¹⁶اٜ مٛ جٛغِي کٛودٜ جٛوٜىٰطِطِ اٜ جُنْغٛ مَاکٛ ݧَامٛ، کَافَحِ وٜلْکِ کٛو ندُيٜ وُتُّدُ اٜ وُرْتٛيٛو دَغَ ندٜرْ حٛنْدُکٛ مَاکٛ؞ يٜىٰسٛ مَاکٛ بٛو اٜ طٜلْکِتٛو بٛ نَانغٜ شَکَ ݧَلَوْمَ؞ ¹⁷ندٜ نغِيمٛومِ، سٜيْ نجَنُمِ يٜىٰسٛ مَاکٛ بٛ مَيْطٛ؞ اَمَّا اٛ يٛوَنِيَمْ جُنْغٛ مَاکٛ ݧَامٛ اٛ وِعِ، ‏«‏تَاع حُلُ؞ مِنْ وٛنِ اَرَنْدٜىٰجٛ، مِنْ وٛنِ شَکِتِيطٛ؞ ¹⁸مِنْ وٛنِ مٛ يٛنْکِ!‏ ندٜنّٛ مِ مَايِينٛ؞ اَمَّا جٛونِ اٜ مِ وٛودِ يٛنْکِ حَا اَبَدَا اَبَدِنْ، اٜ مِ وٛودِ لَامُ دٛوْ مَيْدٜ ندٜنْ اٜ مِ وٛودِ لَامُ دٛوْ لَاحِرَ؞ ¹⁹وِنْدُ کٛ نغِيطَا، کٛ وَطَتَ جٛونِ، اٜ کٛ وَطَتَ طٛعٛ يٜىٰسٛ؞ ²⁰رَا مَعَنَ سِرُّ کٛودٜ جٛوٜىٰطِطِ طٜ نغِيطَا اٜ جُنْغٛ اَمْ ݧَامٛ، ندٜنْ اٜ مَعَنَ فِتِلَاجِ جِينَارِ جٛوٜىٰطِطِ طِ نغِيطَا:‏ کٛودٜ جٛوٜىٰطِطِ طٜنْ طٛنْ نغٛنِ مَلَاعِکَعٜنْ فَامَنٛوٻٜ کَوْتٜ جٛوٜىٰطِطِ طٜ تٛکُّٻٜيَمْ، ندٜنْ فِتِلَاجِ جٛوٜىٰطِطِ طِنْ طٛنْ بٛو طُمْ کَوْتٜ طٜنْ؞»‏

لِلَلْ نغَمْ ٻٜ اَافِسَ

¹ندٜنْ اٛ وِعِيَمْ، ‏«‏وِنْدَنْ مَلَاعِکَاجٛ کَوْتَلْ تٛکُّٻٜ يٜىٰسُ وٛنْٻٜ غَرِيرِ اَافِسَ وِعُکِ:‏

‏«‏مِنْ جٛغِيطٛ کٛودٜ طٜنْ طٛنْ جٛوٜىٰطِطِ اٜ جُنْغٛ ݧَامٛ، جَحٛووٛ شَکَ فِتِلَاجِ جِينَارِ جٛوٜىٰطِطِ طِنْ طٛنْ؞ ²اٜ مِ اَنْدِ کُوطٜ مٛوطٛنْ؞ اٜ مِ اَنْدِ اٛنْ کُوِي نَاع سٜطَّ، اٛنْ مُݧِي ندٜرْ تٛرَّاجِ طِ نجَرٛتٛنْ؞ اٜ مِ اَنْدِ اٛنْ ڤِجَنْتَا کَلُّٻٜ؞ ندٜنْ وِعٛوٻٜ کٛعٜ مَٻّٜ ٻٜ لِلَاٻٜ، اَمَّا نَاع طُمْ نٛنْ اٛنْ ڤٛوندِيٻٜ اٛنْ تَوِي ٻٜ ڤٜوٛوٻٜ؞ ³اٜ مِ اَنْدِ اٛنْ مُݧِي، اٛنْ نَتِّ تٛرَّاجِ کَلُّطِ نغَمْ اَمْ ندٜنْ اٛنْ شٛمَايِ؞ ⁴اَمَّا رَا کٛ وٛوطَا طُمْ نَنْغِرْمِعٛنْ:‏ اٛنْ اَلِي يِدّٜ ندٜ نغٛودُنٛوطٛنْ؞ ⁵شِڤْتٛرٜىٰ کٛ نجٛوفُنٛوطٛنْ، تُوبٜىٰ، نغَطٛنْ کٛ نغَطَيْنٛوطٛنْ ندٜنّٛ؞ تٛ نَاع نٛنْ، مِ وَرَنَيْعٛنْ مِ اِتَّ فِتِلَارُ مٛوطٛنْ تٛ ندُ رٜسَا، سٜيْ نِ تٛ اٛنْ تُوبِي؞ ⁶اَمَّا اٛنْ نغَطَ فِي غٛعٛ بٛطُّمْ؞ اٛنْ نغَݧِي کُوطٜ نِکٛولَتَنْکٛعٜنْ، نٛنْ نٛ نغَݧِرْمِ کُوطٜ مَٻّٜ؞

⁷‏«‏فُو غٛودُطٛ نٛڤِّ نَنٛوجِ نَنَ کٛ رُوحُ اَللَّه وِعَتَ کَوْتٜ تٛکُّٻٜ يٜىٰسُ؞

‏«‏فُو کٜٻُطٛ جَالٛرْغَلْ مِ اَلَيْمٛ اٛ ݧَامَ ٻِکّٛيْ لٜکِّ کٛکّٛوحِ يٛنْکِ وٛنْکِ ندٜرْ نغٜسَ اَللَّه؞

لِلَلْ نغَمْ ٻٜ سَمِرْنَ

⁸‏«‏ندٜنْ وِنْدَنْ مَلَاعِکَاجٛ کَوْتَلْ تٛکُّٻٜ يٜىٰسُ وٛنْٻٜ سَمِرْنَ وِعُکِ:‏

‏«‏مِنْ وٛنِ اَرَنْدٜىٰجٛ اٜ شَکِتِيطٛ، مَايُنٛوطٛ جٛونِ اٜ مٛ وٛودِ يٛنْکِ؞ ⁹اٜ مِ اَنْدِ تٛرَّ کَ نجَرٛتٛنْ، اٜ مِ اَنْدِ اٛنْ نغَلَنَا، اَمَّا اٛنْ دِسْکُٻٜ؞ اٜ مِ اَنْدِ حَالَ کَلُّکَ کَ يِمْٻٜ مٜتَتَ دٛوْ مٛوطٛنْ، وِعٛوٻٜ ٻٜ يِمْٻٜ اَللَّه، اَمَّا نَاع طُمْ نٛنْ، ٻٜ يِمْٻٜ شٜيْطَنْ؞ ¹⁰تٛع اٛنْ کُلُ تٛرَّ کَ نجَرٛتٛنْ يٜىٰسٛ طٛعٛ؞ رَطُّمْ شٜيْطَنْ سِرْيَکٜ مَٻَّ وٛٻّٜ مٛوطٛنْ ندٜرْ سُودُ شُرَلْ نغَمْ طُمْ فٛوندَعٛنْ؞ اٛنْ نغَطَيْ بَلْطٜ سَڤّٛ اٛنْ نجَرَ تٛرَّ کَلُّکَ؞ اَمَّا نجٛغٜىٰ کٛ کٛولِيطٛنْ کٛو طُمْ وَرَيْعٛنْ؞ مِنْ بٛو مِ حٛکَّيْعٛنْ يٛنْکِ، کَنْکِ وٛنِ دٛکَّلْ حٜٻُکِ جَالٛرْغَلْ مٛوطٛنْ؞

¹¹‏«‏فُو غٛودُطٛ نٛڤِّ نَنٛوجِ نَنَ کٛ رُوحُ اَللَّه وِعَتَ کَوْتٜ تٛکُّٻٜ يٜىٰسُ؞

‏«‏فُو کٜٻُطٛ جَالٛرْغَلْ، مَيْدٜ طِطَوْرٜ مٜىٰمَتَامٛ، وَاتٛ اٛ نَتِّنْتَاکٜ حِيتٜ؞

لِلَلْ نغَمْ ٻٜ بِرْغَمُمْ

¹²‏«‏ندٜنْ وِنْدَنْ مَلَاعِکَاجٛ کَوْتَلْ تٛکُّٻٜ يٜىٰسُ وٛنْٻٜ غَرِيرِ بِرْغَمُمْ وِعُکِ:‏

‏«‏مِنْ وٛنِ جٛغِيطٛ کَافَحِ وٜلْکِ تٛ کٛو ندُيٜ وُتُّدُ؞ ¹³اٜ مِ اَنْدِ تٛ نجٛوطِيطٛنْ؛ اٛنْ نجٛوطٛو تٛ شٜيْطَنْ لَامٛتٛو؞ فُو اٜ نٛنْ، اٛنْ نغَطَ کٛ مبِيمِعٛنْ، اٛنْ اَلَايِ حٛولَاکِيَمْ کٛو ندٜ طُمْ وَرِ اَنْتِفَسْ غَعَجِنْطٛ دٛوْ اَمْ مٛ غٛونغَ؞ ¹⁴اَمَّا اٜ وٛودِ فِي سٜطَّ طُمْ نَنْغِرْمِعٛنْ؞ اٜ وٛودِ وٛٻّٜ ندٜرْ مٛوطٛنْ تٛکُّٻٜ اٜکِّتِنٛلْ بَلَعَمُ، اٜکِّتِنْطٛ بَلَکْ نٛ وَطِرْتَ اِسْرَاعِيلَنْکٛعٜنْ نغَطَ کٛ وٛوطَا، ٻٜ ݧَامَ کٛ طُمْ حِرْسَنِ اَلَّاجِ فٜوْرٜ ٻٜ نغَطَ نجٜىٰنُ؞ ¹⁵نٛنْ مَا اٛنْ نغٛودِ وٛٻّٜ تٛکُّٻٜ اٜکِّتِنٛلْ نِکٛولَتَنْکٛعٜنْ؞ ¹⁶تُوبٜىٰ جٛونِ!‏ تٛ نَاع نٛنْ، مِ وَرَنَيْعٛنْ نَاع کٛ نٜىٰٻِ، مِ حٛنِدَٻٜ اٜ کَافَحِ بُرْتٛيْتٛوکِ دَغَ حٛنْدُکٛ اَمْ؞

¹⁷‏«‏فُو غٛودُطٛ نٛڤِّ نَنٛوجِ نَنَ کٛ رُوحُ اَللَّه وِعَتَ کَوْتٜ تٛکُّٻٜ يٜىٰسُ؞

‏«‏فُو کٜٻُطٛ جَالٛرْغَلْ، مِ حٛکَّيْمٛ مَنَّ شُوطِيطُمْ اٛ ݧَامَ؞ طٛنْمَا مِ حٛکَّيْمٛ حَيْرٜ رَنٜىٰرٜ اِنْدٜ حٜيْرٜ اٜ وِنْدِي دٛوْ مَيْرٜ؞ وَلَا اَنْدُطٛ اِنْدٜ ندٜنْ سٜيْ نِ کٛکَّاطٛ حَيْرٜ ندٜنْ؞

لِلَلْ يَاکِ تٛ تَيَاتِرَ

¹⁸‏«‏ندٜنْ وِنْدَنْ مَلَاعِکَاجٛ کَوْتَلْ تٛکُّٻٜ يٜىٰسُ اٜ غَرِيرِ تَيَاتِرَ وِعُکِ:‏

‏«‏مِنْ وٛنِ ٻِطّٛ اَللَّه غٛودُطٛ غِتٜ بٛ طٜمْنغَلْ حِيتٜ، مٛ کٛيْطٜ بٛ نجَمْندِ مبٛطٜىٰرِ نغٛغَّاندِ؞ ¹⁹اٜ مِ اَنْدِ کُوطٜ مٛوطٛنْ اٜ نٛ نغِطِرْطٛنْ تٛکُّٻٜيَمْ اٜ نٛ کٛولٛرِيطٛنْيَمْ اٜ نٛ تٛکِّرْطٛنْيَمْ اٜ نٛ مُݧِرْطٛنْ؞ اٜ مِ اَنْدِ کُوغَلْ مٛوطٛنْ نغَلْ جٛونِ ٻُرِي نغَلْ ندٜنّٛ؞ ²⁰اَمَّا رَا کٛ وٛوطَا طُمْ نَنْغِرْمِعٛنْ؞ اٛنْ مُݧَنِي دٜبّٛ اٛنْ طٛنْ جٜجٜبٜلْ بِعٛووٛ حٛورٜ مَاکٛ اٛ اَنَّبِيجٛ؞ اٜکِّتِنٛلْ مَاکٛ اٜ مَجِّنَ يِمْٻٜ اَمْ اٜ ٻٜ نغَطَ نجٜىٰنُ، طٛنْمَا اٜ ٻٜ ݧَامَ کُسٜلْ نغٜلْ طُمْ سَکَّنِ اَلَّاجِ فٜوْرٜ؞ ²¹مِ حٛکِّيمٛ شَرٜلْ نغَمْ اٛ تُوبَ دَغَ نجٜىٰنُ طُمْ اٛ وَطَتَ، اَمَّا اٛ وَݧِي اٛ تُوبَ؞ ²²نغَمْ نٛنْ مِ وَطَيْ اٛ ݧَوَ ݧَوُ کَلُّطُمْ؞ ٻٜ اٛ وَادَتَ نجٜىٰنُ بٛو مِ تٛرَّيْٻٜ تٛرَّ کَلُّکَ، سٜيْ نِ تٛ ٻٜ اَلِي وَطُکِ اِرِ کُوطٜ مَاکٛ؞ ²³مِ وَرَيْ تٛکُّٻٜ اٜکِّتِنٛلْ مَاکٛ؞ سٜيْ فُو کَوْتٜ تٛکُّٻٜ يٜىٰسُ اَنْدَ مِنْ وٛنِ اَنْدُطٛ ݧُمٛوجِ يِمْٻٜ اٜ کٛ وٛنِ ندٜرْ ٻٜرْطٜ مَٻّٜ؞ مِ وَاتَنَيْ کٛو مٛيٜ مٛوطٛنْ کٛ فٛتِّدِ اٜ کُوغَلْ مُوطُمْ؞

²⁴‏«‏اَمَّا اٛنٛنْ حٛرِيٻٜ وٛنْٻٜ غَرِيرِ تَيَاتِرَ ٻٜ تٛکَّايِ اٜکِّتِنٛلْ نغٛعٛلْ، اٛنْ اٜکِّتَاکِ کٛ وٛٻّٜ مبِعَتَ ‏‹‏سِرُّ شٜيْطَنْ لُغُّطُمْ؞›‏ اٜ مِ وِعَعٛنْ مِ يٛوَنْتَاعٛنْ وٛنْغَلْ تٜدّٛرَلْ؞ ²⁵نغَطٜىٰ کَ حٛولَاکِيَمْ بٛطُّمْ نَا مِ وَرْتِي؞ ²⁶فُو کٜٻُطٛ جَالٛرْغَلْ اٜ وَطَ کٛ مبِيمِ حَا تِمّٛودٜ، مِ حٛکَّيْمٛ لَامُ دٛوْ لٜپِّ دُونِيَارُ نٛ ݧَاکٛ اَمْ مٛ دٛوْ حٛکِّرِيَمْطُمْ؞ ²⁷اٛ لَامٛرْتٛٻٜ اٜ سَوْرُ نجَمْندِ، اٛ ڤُسِڤُسِنَٻٜ بٛ غٛجِيجٜ لٜيْدِ؞ ²⁸طٛنْمَا مِ حٛکَّيْمٛ حٛودٜرٜ سُبَکَ؞

²⁹‏«‏فُو غٛودُطٛ نٛڤِّ نَنْکِ نَنَ کٛ رُوحُ اَللَّه وِعَتَ کَوْتٜ تٛکُّٻٜ يٜىٰسُ؞

لِلَلْ نغَمْ ٻٜ سَرْدِسْ

¹‏«‏وِنْدَنْ مَلَاعِکَاجٛ کَوْتَلْ تٛکُّٻٜ يٜىٰسُ وٛنْٻٜ غَرِيرِ سَرْدِسْ وِعُکِ:‏

‏«‏مِنْ وٛنِ جٛغِيطٛ رُوحُوجِ جٛوٜىٰطِطِ طِ اَللَّه اٜ کٛودٜ جٛوٜىٰطِطِ طٜنْ طٛنْ؞ اٜ مِ اَنْدِ کُوغَلْ مٛوطٛنْ، اٜ طُمْ يِعَ بٛ اٛنْ نغٛودِ يٛنْکِ، اَمَّا اٛنْ مَيْٻٜ؞ ²اُمّٜىٰ، ندَرٛوطٛنْ!‏ مٛعِّنٜىٰ کٛ حٛرَنِيعٛنْ نغَمْ طُمْ ٻَدَکٜ لَلُّکِ، نغَمْ مِ يِعِي کُوطٜ مٛوطٛنْ طٜ کٜىٰوَايِ يٜىٰسٛ اَللَّه؞ ³نغَمْ نٛنْ شِفْتٛرٜىٰ اٜ کٛ طُمْ اٜکِّتِنِعٛنْ اٜ کٛ نَنْطٛنْ، تٛکّٜىٰطُمْ ندٜنْ تُوبٜىٰ دَغَ حَکّٜىٰجِ مٛوطٛنْ؞ تٛ بٛو اٛنْ اُمَّاکِ، مِ وَرَيْ اٜ شَرٜلْ نغٜلْ اٛنْ کَمَّاکِ بٛ غُجّٛ؞ ندٜنْ اٛنْ اَنْدَتَا شَرٜلْ نغٜلْ نغَرَنَيْمِعٛنْ؞ ⁴اَمَّا حَا جٛونِ اٜ وٛودِ يِمْٻٜ مٛوطٛنْ سٜطَّ ندٜرْ غَرِيرِ سَرْدِسْ ٻٜ مبٛنَّايِ کٛعٜ مَٻّٜ اٜ وَطُکِ حَکّٜ؞ ٻٜ نجَادَيْ اٜ اَمْ ندٜرْ کٛلْتٜ دَنٜىٰجٜ نغَمْ ٻٜ کٜوْتِي ٻٜ نغَطَ نٛنْ؞ ⁵فُو کٜٻُطٛ جَالٛرْغَلْ طُمْ ٻٛرْنَيْمٛ کٛلْتٜ دَنٜىٰجٜ، ندٜنْ مِ اِتَّتَا اِنْدٜ مَاکٛ دَغَ ندٜرْ دٜفْتٜرٜ يٛنْکِ؞ مِ وِعَيْ کَنْکٛ طُمْ مٛ اَمْ يٜىٰسٛ ݧَاکٛ اَمْ اٜ يٜىٰسٛ مَلَاعِکَعٜنْ مَاکٛ؞

⁶‏«‏فُو غٛودُطٛ نٛڤِّ نَنْکِ نَنَ کٛ رُوحُ اَللَّه وِعَتَ کَوْتٜ تٛکُّٻٜ يٜىٰسُ؞

لِلَلْ نغَمْ ٻٜ فِلَدٜلْفِيَ

⁷‏«‏وِنْدَنْ مَلَاعِکَاجٛ کَوْتَلْ تٛکُّٻٜ يٜىٰسُ وٛنْٻٜ غَرِيرِ فِلَدٜلْفِيَ وِعُکِ:‏

‏«‏مِنْ وٛنِ شٜنِيطٛ مٛ غٛونغَ جٛغِيطٛ مَٻِّتِرْغٜلْ دَوْدَ؞ تٛ اٛ مَٻِّتِي دَمُّغَلْ، وَلَا مَٻَّيْطٛنغَلْ، تٛ اٛ مَٻِّينغَلْ، وَلَا مَٻِّتَيْطٛنغَلْ؞ ⁸اٜ مِ اَنْدِ کُوطٜ مٛوطٛنْ؞ رَا مِ اَلَنِيعٛنْ دَمُّغَلْ اٜ مَٻِّتِي، وَلَا بَاوَيْطٛ مَٻُّکِنغَلْ؞ اٜ مِ اَنْدِ اٛنْ شٜمْبِطَا، اَمَّا فُو اٜ نٛنْ اٛنْ تٛکَّ کٛ مبِيمِ، اٛنْ نغَݧَايِ وِعُکِ اٛنْ تٛکُّٻٜيَمْ؞ ⁹يِمْٻٜ ٻٜنْ طٛنْ وٛنْٻٜ ندٜرْ يِمْٻٜ شٜيْطَنْ وِعٛوٻٜ ٻٜ يِمْٻٜ اَللَّه اَمَّا ٻٜ ڤٜوَيْ، مِ وَطَيْٻٜ ٻٜ نغَرَ ٻٜ ندِشّٛو يٜىٰسٛ مٛوطٛنْ ٻٜ اَنْدَ اٜ مِ يِطِعٛنْ؞ ¹⁰ندٜ اٛنْ نجٛغَکٜ وٛلْدٜ اَمْ ندٜرْ مُݧَلْ اٜ سٜمْبٜ ٻٜرْندٜ، مِ سُرَنَيْعٛنْ تٛرَّ غَرَنَيْکَ دُونِيَارُ نغَمْ طُمْ فٛوندَ يِمْٻٜ مَيْرُ؞ ¹¹اٜ مِ وَرٛيَ نَاع کٛ نٜىٰٻِ؞ نغَطٜىٰ کَ حٛولَاکِيَمْ بٛطُّمْ نغَمْ تٛع غٛطّٛ تٜىٰتَنَعٛنْ غِيفِ جَالٛرْغَلْ؞ ¹²فُو کٜٻُطٛ جَالٛرْغَلْ مِ وَرْتِرَيْمٛ دَرْݝَلَلْ ندٜرْ وُرٛ شٜنِينغٛ نغٛ اَللَّه اَمْ، اٛ فُطِّتَتَا اٛ وُرْتٛو وُرٛ نغٛنْ؞ مِ وِنْدَيْ اِنْدٜ اَللَّه اَمْ دٛوْ مَاکٛ اٜ اِنْدٜ غَرِيرِ اَللَّه اَمْ، وَاتٛ اُرُشَلِيمَ کٜيْرِ جِڤّٛيْتٛوندِ دَغَ تٛ اَللَّه اَمْ تٛنْ دٛوْ؞ طٛنْمَا مِ وِنْدَيْ اِنْدٜ اَمْ حٜيْرٜ دٛوْ مَاکٛ؞

¹³‏«‏فُو غٛودُطٛ نٛڤِّ نَنْکِ فُو نَنَ کٛ رُوحُ اَللَّه وِعَتَ کَوْتٜ تٛکُّٻٜ يٜىٰسُ؞

لِلَلْ نغَمْ ٻٜ لَوْدِيکِيَ

¹⁴‏«‏وِنْدَنْ مَلَاعِکَاجٛ کَوْتَلْ تٛکُّٻٜ يٜىٰسُ وٛنْٻٜ غَرِيرِ لَوْدِيکِيَ وِعُکِ:‏

‏«‏مِنْ وٛنِ بِعٜتٜىٰطٛ اَامِنْ، شٜيْدُوجٛ مٛ غٛونغَ، بَرْکَ اَمْ اَللَّه تَغِ کٛو طُمٜ؞ ¹⁵اٜ مِ اَنْدِ کُوطٜ مٛوطٛنْ، اٛنْ ڤٜىٰوَا اٛنْ نغُلَا؞ اٜ مِ يِطِ دَا اٛنْ ڤٜىٰوِي کٛو اٛنْ نغُلِي!‏ ¹⁶اَمَّا شَکَ‑شَکَ نغٛنْطٛنْ، اٛنْ ڤٜىٰوَا اٛنْ نغُلَا؞ نغَمْ نٛنْ مِ تُتَّيْعٛنْ دَغَ ندٜرْ حٛنْدُکٛ اَمْ، وَاتٛ مِ وَݧَيْعٛنْ؞ ¹⁷اٛنْ مبِعَ، ‏‹‏اٜ مِنْ نغٛودِ رِسْکُ؞ اٜ مِنْ نغٛودِ جَوْدِ، وَلَا کٛ مِنْ ندُلِّ؞›‏ اَمَّا اٛنْ اَنْدَا اٛنْ شٛيْٻٜ اٛنْ نغَرْتِي کٛ يُرْمِنِي، اٛنْ نغَلَنَا، اٛنْ وُمْٻٜ، اٛنْ ٻٛرْنَاکِ؞ ¹⁸نغَمْ نٛنْ اٜ مِ حٛکَّعٛنْ شَاوٛرِ؞ شٛودٜىٰ جِينَارِ تٛ اَمْ طُمْ اُمْ سٜطِرِ حِيتٜ نغَمْ ندِسْکٛنْ، اٜ کٛلْتٜ دَنٜىٰجٜ نغَمْ شُدّٛنْ ٻَلِّ مٛوطٛنْ تٛع شٜمْتٛنْ، اٜ نٜبَّمْ نغَمْ مٛيْتَنٛنْ غِتٜ کٜٻٛنْ نغِعٛنْ؞ ¹⁹اٜ مِ حَٻَنَ ٻٜ نغِنْمِ، مِ حٛلِّتَٻٜ؞ نغَمْ نٛنْ نجَوْنٜىٰ تُوبٜىٰ؞ ²⁰رَمِّ دَرِي اٜ دَمُّغَلْ اٜ مِ سِلْمِنٛو؞ فُو نَنْطٛ حٛنٛنْدٜ اَمْ، مَٻِّتِ دَمُّغَلْ، مِ نَتَّيْ مِ ݧَمْدَ ݧَمْندُ اٜ مَاکٛ کَنْکٛ مَا اٜ اَمْ؞ ²¹فُو کٜٻُطٛ جَالٛرْغَلْ اٛ لَامٛدٛتٛ اٜ اَمْ ندٜرْ لَامُ اَمْ، نٛنْ نٛ کٜٻِرْمِ جَالٛرْغَلْ اٜ مِ لَامٛدٛو اٜ ݧَاکٛ اَمْ ندٜرْ لَامُ مَاکٛ؞

²²‏«‏فُو غٛودُطٛ نٛڤِّ نَنْکِ نَنَ کٛ رُوحُ اَللَّه وِعَتَ کَوْتٜ تٛکُّٻٜ يٜىٰسُ!‏»‏

مَوْنِنْکِ اَللَّه اٜ دٛوْ

¹غَطَ نٛنْ مِ رَارِي، سٜيْ نغِيمِ وٛنْغَلْ دَمُّغَلْ اٜ مَٻِّتِي اٜ تٛنْ دٛوْ؞

سٜيْ نَنْمِ حٛنٛنْدٜ ندٜ نَنُنٛومِ اَرَنْدٜ نَنْدُندٜ اٜ دُودٛلْ لُوَلْ ندٜ وِعِ، ‏«‏پٜنْتٛيْ طٛعٛ، مِ حٛلُّمَا کٛ وَطَتَ غَطَ طُعُمْ؞»‏ ²طٛنْ اٜ طٛنْ رُوحُ اَللَّه جِڤّٛيِي دٛوْ اَمْ، سٜيْ نغِيمِ جٛوطٛرْغَلْ لَامُ اٜ دٛوْ، غٛطّٛ اٜ جٛوطِي دٛوْ مَاغَلْ؞ ³جٛوطِيطٛ اٛنْ اٜ طٜلْکِتٛو بٛ طٜلْکِتَاکِ کَاپٜ جَسْفَ اٜ کَنٜىٰلِيَنْ؞ ندٜنْ تِمْبٛتِمْبٛلَ طٜلْکِتٛتٛونْغَ بٛ حَيْرٜ اٜمٜرَلْ اٜ فِلِي جٛوطٛرْغَلْ نغَلْ؞ ⁴حَادٜ مَاغَلْ اٜ وٛودِ غٛطّٜ جٛوطٛرْلٜ کَنْجٜ 42 اٜ طٜ ڤِلِينغَلْ؞ ندٜنْ وٛٻّٜ مَوْٻٜ کَمْٻٜ 42 اٜ نجٛوطِي دٛوْ مَاجٜ؞ اٜ ٻٜ بٛرْنِي کٛلْتٜ دَنٜىٰجٜ اٜ ٻٜ تَارِ غِيفِ جِينَارِ تٛ کٛعٜ مَٻّٜ اٜ ٻٜ نجٛوطِي دٛوْ جٛوطٛرْلٜ طٜنْ؞ ⁵مَپّٜ نغَطِ کَ وُرْتٛيَاکِ تٛ جٛوطٛرْغَلْ نغَلْ، اٜ حٛولٛ اٜ ڤَلْمَالِ، ندٜنْ يٜىٰسٛ مَاغَلْ فِتِلَاجِ جٛوٜىٰطِطِ اٜ ݧَامَ، کَنْجِ نغٛنِ رُوحُوجِ اَللَّه جٛوٜىٰطِطِ؞ ⁶طٛنْمَا يٜىٰسٛ مَاغَلْ اٜ وٛودِ غٛطُّمْ نَنْدُطُمْ اٜ مبٜىٰلَ طٜلْکِتٛتٛونغَ بٛ دَارٛغَّلْ؞

طٛنْمَا اٜ وٛودِ غٛطُّمْ تَغَاطُمْ کَنْجُمْ نَيُمْ غٛودُطُمْ غِتٜ کٛو تٛيٜ غَطَ اٜ يٜىٰسٛ اٜ طُمْ فِلِي جٛوطٛرْغَلْ نغَلْ کٛو ندُيٜ وُتُّدُ؞ ⁷تَغَاطُمْ اَرَنْدٜجُمْ اٜ نَنْدِ اٜ سٜمْبِنْدُ، طِطَٻُمْ طُمْ اٜ نَنْدِ اٜ نغَارِ، تَتَٻُمْ اٜ وٛودِ يٜىٰسٛ بٛ نغٛ نٜطّٛ، نَيَٻُمْ اٜ نَنْدِ اٜ شِيلَ ڤِيرٛووَ؞ ⁸طُمْ طٛنْ تَغَاطُمْ نَيُمْ غٛودُطُمْ يٛنْکِ، کٛو طُمٜ اٜ وٛودِ بِيٜىٰلِ جٛوٜىٰغٛعٛ؞ اٜ طُمْ وٛودِ غِتٜ تٛ ٻَنْدُ کٛو تٛيٜ؞ جٜمَّ اٜ ݧَلَوْمَ طُمْ اَلَتَا يِمُکِ اٜ طُمْ وِعَ،

‏«‏اٛ شٜنِيطٛ، اٛ شٜنِيطٛ، اٛ شٜنِيطٛ، اَللَّه جٛومِرَاوٛ جٛومُ بَوْطٜ،

کَنْکٛ وٛنِ ندٜنّٛ، کَنْکٛ وٛنِ جٛونِ، کَنْکٛ وٛنِ يٜىٰسٛ طٛعٛ!‏»‏

⁹فُو شَرٜلْ نغٜلْ طُمْ طٛنْ تَغَاطُمْ غٛودُطُمْ يٛنْکِ يِمِ غِمٛلْ مَنْتُکِ، اٜ مَوْنِنْکِ، اٜ يٜتُّکِ اٛنْ طٛنْ جٛوطِيطٛ دٛوْ جٛوطٛرْغَلْ نغَلْ غٛودُطٛ يٛنْکِ حَا اَبَدَا اَبَدِنْ، ¹⁰سٜيْ مَوْٻٜ 42 ٻٜنْ نجَنَ يٜىٰسٛ جٛوطِيطٛ دٛوْ جٛوطٛرْغَلْ نغَلْ ٻٜ مَوْنِنَمٛ، کَنْکٛ غٛودُطٛ يٛنْکِ حَا اَبَدَا اَبَدِنْ؞ ٻٜ ندٜسَ غِيفِ مَٻّٜ يٜىٰسٛ جٛوطٛرْغَلْ نغَلْ اٜ ٻٜ مبِعَ،

¹¹‏«‏يَا جٛومِرَاوٛ اَللَّه اَمِنْ،

اَ حٜوْتِي مَوْنِنٜىٰکِ؞ مَنْغُ اٜ لَامُ اٜ بَوْطٜ فُو اَنْ جٜيِطُمْ،

نغَمْ اَنْ تَغِ کٛو طُمٜ؞

اٜ يِدّٜ مَاطَ طُمْ تَغَا، طُمْ جٛوطِي؞»‏

کَرٛورِ اٜ دٜفْتٜرٜ غٛودُندٜ حَاتِمِيجٜ

¹سٜيْ نغِيمِ جٛوطِيطٛ دٛوْ جٛوطٛرْغَلْ نغَلْ اٜ جٛغِي وٛنْدٜ دٜفْتٜرٜ اٜ جُنْغٛ ݧَامٛ وِنْدَاندٜ ندٜرْ اٜ يَاسِ، اٜ ندٜ مَٻِّرَا حَاتِمِيجٜ جٛوٜىٰطِطِ؞ ²ندٜنْ مِ يِعِ غٛطّٛ مَلَاعِکَاجٛ غٛودُطٛ لَامُ اٜ مٛ وِعَ اٜ سٜمْبٜ، ‏«‏مٛيٜ حٜوْتِ تَکِّتَ حَاتِمِيجٜ دٜفْتٜرٜ ندٜعٜ مَٻِّتَندٜ؟»‏ ³اَمَّا طُمْ حٜٻَايِ غٛطّٛ اٜ تٛنْ دٛوْ کٛو ندٜرْ دُونِيَارُ کٛو ندٜرْ مَيْٻٜ ڤٛتُطٛ مَٻُّتُکِ دٜفْتٜرٜ ندٜنْ کٛو رَارَ ندٜرْ مَيْرٜ؞ ⁴سٜيْ ڤُطُّمِ بٛجِّ نَوْطِ نغَمْ طُمْ حٜٻَايِ کٜوْتُطٛ مَٻِّتَندٜ رَارَ ندٜرْ مَيْرٜ؞ ⁵سٜيْ غٛعٛتٛ ندٜرْ مَوْٻٜ ٻٜنْ وِعِيَمْ، ‏«‏اَلُ بٛجِّ؞ رَطُّمْ سٜمْبِنْدُ ندُ لٜݧٛلْ يَحُودَ، سُودُ دَوْدَ، حٜٻِي جَالٛرْغَلْ، اٛ تَکِّتَيْ حَاتِمِيجٜ جٛوٜىٰطِطِ ندٜنْ اٛ مَٻِّتَ دٜفْتٜرٜ ندٜنْ؞»‏

⁶سٜيْ نغِيمِ وٛنْدِ کَرٛورِ اٜ دَرِي حَادٜ جٛوطٛرْغَلْ نغَلْ؞ تَغَاطُمْ نَيُمْ غٛودُطُمْ يٛنْکِ طُمْ اٜ مَوْٻٜ ٻٜنْ اٜ ڤِلِيندِ؞ کَرٛورِ ندِنْ بٛ ندِ حِرْسَانٛمَ؞ اٜ ندِ وٛودِ لُوٜ جٛوٜىٰطِطِ اٜ غِتٜ جٛوٜىٰطِطِ، کَنْجٜ نغٛنِ رُوحُوجِ اَللَّه جٛوٜىٰطِطِ لِلَاطِ ندٜرْ دُونِيَارُ فُو؞ ⁷سٜيْ کَرٛورِ ندِنْ يَحِ جَٻِ دٜفْتٜرٜ ندٜنْ اٜ جُنْغٛ ݧَامٛ جٛوطِيطٛ دٛوْ جٛوطٛرْغَلْ نغَلْ؞ ⁸ندٜ ندِ جَٻِندٜ، تَغَاطُمْ نَيُمْ غٛودُطُمْ يٛنْکِ طُمْ اٜ مَوْٻٜ 42 ٻٜنْ نجَنِ يٜىٰسٛ مَيْرِ مَوْنِنِندِ؞ کٛو مٛيٜ اٜ جٛغِي غَرَايَارُ اٜ تُمُّدٜ جِينَارِ اٜ ندٜ حٜىٰوِ اُرْدٜ وٜلْندٜ، کَيْرٜ وٛنِ دٛعَاجٜ يِمْٻٜ اَللَّه؞ ⁹ٻٜ نغِمِ غِمٛلْ کٜسٛلْ اٜ ٻٜ مبِعَ،

‏«‏اَ حٜوْتِي نجَٻَا دٜفْتٜرٜ ندٜنْ

تَکِّتَا حَاتِمِيجٜ مَيْرٜ،

نغَمْ ندٜنّٛ اَ وَرَامَ، ندٜنْ بَرْکَ پِيپَمْ مَاطَ اَ رِمْطِنَنِي اَللَّه

يِمْٻٜ دَغَ کٛو نغٛلٜ لٜݧٛلْ، اٜ کٛو نغَلٜ طٜمْنغَلْ، اٜ دَغَ کٛو ٻٜيٜ يِمْٻٜ، اٜ دَغَ کٛو ندِيٜ لٜيْدِ؞

¹⁰اَ وَرْتِرِيٻٜ يِمْٻٜ مَاطَ اَرْدِيٻٜ دِينَ نغَمْ ٻٜ کُوَنَ اَللَّه مٜىٰطٜنْ،

ٻٜ لَامٛتٛ اٜ دُونِيَارُ؞»‏

¹¹غَطَ طٛنْ مِ رَارِي، سٜيْ نَنْمِ حٛنٛنْدٜ مَلَاعِکَعٜنْ طُطْٻٜ، طُوطُکِ مَٻّٜ وَلَا کٜىٰرٛلْ؞ اٜ ٻٜ ڤِلِي جٛوطٛرْغَلْ نغَلْ اٜ تَغَاطُمْ غٛودُطُمْ يٛنْکِ طُمْ طٛنْ اٜ مَوْٻٜ ٻٜنْ، ¹²اٜ ٻٜ نغِمَ سٜمْبٜىٰ اٜ ٻٜ مبِعَ،

‏«‏کَرٛورِ بَرَاندِ ندِنْ

ندِ حٜوْتِي ندِ حٜٻَ بَوْطٜ، اٜ رِسْکُ، اٜ فَامُ، اٜ سٜمْبٜ،

اٜ مَنْغُ، اٜ مَوْنِنٜىٰکِ، اٜ مَنْتٜىٰکِ!‏»‏

¹³سٜيْ نَنْمِ کٛو طُمٜ کٛ تَغَا اٜ دٛوْ، اٜ ندٜرْ دُونِيَارُ، اٜ لٜيْ لٜيْدِ، اٜ ندٜرْ ندِيَمْ، اٜ کٛ وٛنِ ندٜرْ مَاجُمْ فُو، اٜ طُمْ يِمَ اٜ طُمْ وِعَ،

‏«‏مَنْتُکِ، اٜ مَنْغُ، اٜ مَوْنِنٜىٰکِ، اٜ لَامُ

طُمْ تَبِّتَ تٛ جٛوطِيطٛ دٛوْ جٛوطٛرْغَلْ لَامُ اٛنْ، اٜ کَرٛورِ ندِنْ

حَا اَبَدَا اَبَدِنْ!‏»‏

¹⁴سٜيْ تَغَاطُمْ غٛودُطُمْ يٛنْکِ طُمْ طٛنْ نَيُمْ مبِعِ، ‏«‏اَامِنْ!‏»‏ سٜيْ مَوْٻٜ ٻٜنْ ندِشِّي مَوْنِنِ جٛومِرَاوٛ؞

حَاتِمِيجٜ جٛوٜىٰطِطِ

¹ندٜنْ مِ يِعِ کَرٛورِ ندِنْ تَکِّتِي غٛعٛ ندٜرْ حَاتِمِيجٜ جٛوٜىٰطِطِ طٜنْ؞ سٜيْ نَنْمِ غٛعٛ ندٜرْ تَغَاطُمْ نَيُمْ غٛودُطُمْ يٛنْکِ طُمْ طٛنْ نٛدِّي سٜمْبٜىٰ بٛ حٛولٛ فَلْمَانغٛ وِعِ، ‏«‏وٛرٛيْ!‏»‏ ²ندٜ ندَرْمِ سٜيْ نغِيمِ وٛنْغُ ڤُشُّ ندَنٜوُ؞ غٛنْطٛ دٛوْ مَغُّ اٜ جٛغِي بَکَحِ، طُمْ حٛکِّمٛ غِيفٛلْ؞ اٛ کٜٻُطٛ جَالٛرْغَلْ اٛ وُرْتِي نغَمْ اٛ ٻٜيْدَ حٜٻُکِ جَالٛرْغَلْ؞

³ندٜ کَرٛورِ ندِنْ تَکِّتِ حَاتِمِيرٜ طِطَوْرٜ، سٜيْ نَنْمِ تَغَاطُمْ غٛودُطُمْ يٛنْکِ طِطَٻُمْ وِعِي، ‏«‏وٛرٛيْ!‏»‏ ⁴سٜيْ وٛنْغُ ڤُشُّ وٛطٜوُ شٛلٛيْ وُرْتٛيِي طُمْ وِعِ غٛنْطٛ دٛوْ مَغُّ اِتَّ جَمْ دَغَ ندٜرْ دُونِيَارُ، نغَمْ يِمْٻٜ مبَرْمبَرْتِرَ؞ اٛ حٛکَّا کَافَحِ مَوْکِ؞

⁵ندٜ کَرٛورِ ندِنْ تَکِّتِ حَاتِمِيرٜ تَتَوْرٜ سٜيْ نَنْمِ تَغَاطُمْ تَتَٻُمْ غٛودُطُمْ يٛنْکِ وِعِي، ‏«‏وٛرٛيْ!‏»‏ ندٜ ندَرْمِ سٜيْ نغِيمِ ڤُشُّ ٻَلٜوُ؞ غٛنْطٛ دٛوْ مَغُّ اٜ جٛغِي ڤٛوندِرْطُمْ اٜ جُنْغٛ؞ ⁶سٜيْ نَنْمِ غٛطُّمْ بٛ حٛنٛنْدٜ اٜ وُرْتٛيٛو حَکُّندٜ تَغَاطُمْ نَيُمْ غٛودُطُمْ يٛنْکِ طُمْ طٛنْ اٜ ندٜ وِعَ، ‏«‏طُمْ يٛٻَيْ شٜىٰدٜ کُوغَلْ ݧَلْندٜ غٛعٛ نغَمْ ڤٛوندِرْغٜلْ اَلْکَمَارِ غٛعٛ؞ طُمْ يٛٻَيْ شٜىٰدٜ کُوغَلْ ݧَلْندٜ غٛعٛ نغَمْ ڤٛوندِرْکٛيْ تَتٛيْ کٛيْ غَوْرِ؞ اَمَّا تَاع وٛنُّ نٜبَّمْ جَيْتُنْ کٛو ندِيَمْ اِنَبٛوجٜ؞»‏

⁷ندٜ کَرٛورِ ندِنْ تَکِّتِ حَاتِمِيرٜ نَيَوْرٜ مِ نَنِي غٛعٛتُمْ ندٜرْ تَغَاطُمْ نَيُمْ طُمْ وِعِي، ‏«‏وٛرٛيْ!‏»‏ ⁸ندٜنْ مِ يِعِي وٛنْغُ ڤُشُّ حَاکٛ حَاکٛوُ؞ اِنْدٜ غٛنْطٛ دٛوْ مَغُّ مَيْدٜ، لَاحِرَ اٜ تٛکِّرِمٛ غَطَ؞ طُمْ حٛکِّٻٜ لَامُ ٻٜ مبَرَ نٜطّٛ غٛعٛتٛ ندٜرْ کٛو ٻٜيٜ يِمْٻٜ نَيٛ ندٜرْ دُونِيَارُ نغَمْ ٻٜ مبَرْدَٻٜ اٜ کَافَاجٜ

⁹ندٜ کَرٛورِ ندِنْ تَکِّتِ حَاتِمِيرٜ نجٛوَٻْرٜ ندٜنْ، مِ يِعِي يٛنْکِيجِ ٻٜ طُمْ وَرِ نغَمْ ٻٜ نغَعَجِنِي وٛلْدٜ اَللَّه اٜ غٛونغَ؞ اٜ ٻٜ لٜيْ تٛ طُمْ وُلَتَ اُرْدٜ؞ ¹⁰سٜيْ ٻٜ پٜفْتِ حٛنٛنْدٜ سٜمْبٜىٰ ٻٜ مبِعِ، ‏«‏يَا جٛومِرَاوٛ جٛومُ کٛو طُمٜ، شٜنِيطٛ، غٛودُطٛ غٛونغَ، نَا ندٜيٜ نغَطَنْتَا دُونِيَارُ کِيتَ نغَاتَنٛطَامِنْ نغَمْ وَرْکِ کِ ٻٜ مبَرِمِنْ؟»‏ ¹¹سٜيْ طُمْ حٛکِّ کٛو مٛيٜ مَٻّٜ لِمْشٜرٜ رَنٜىٰرٜ، طُمْ وِعِٻٜ ٻٜ شِوْتٛو سٜطَّ، نَا طُمْ حٜبِّتِي وَرُکِ حٛرِيٻٜ ندٜرْ حِغٛوٻٜ کُوغَلْ مَٻّٜ تٛکُّٻٜ يٜىٰسُ، ٻٜ طُمْ وَرَتَ نٛنْ نٛ طُمْ وَرْدِٻٜ؞

¹²ندٜ کَرٛورِ ندِنْ تَکِّتِ حَاتِمِيرٜ جٛوٜىٰغٛعٛورٜ، سٜيْ طُمْ وَطِ دِمْبٛلْ لٜيْدِ مَنْغٛلْ؞ نَانغٜ ٻَلْوِ کِرِمْ بٛ پُلْٻٜ؞ لٜوْرُ وٛوجِ شٛلٛيْ بٛ پِيپَمْ؞ ¹³کٛودٜ بٛو نجَنِ نجَنِنٛيِ نٛ ٻِکّٛيْ اِبّٜ نجَنِرٛيْتَ تٛ حٜنْدُ دِمْبِي لٜکِّ کِنْ؞ ¹⁴سٜيْ دٛوْ تَغِّي نٛ طُمْ تَغِّرْتَ دَاغٛ، طُمْ سٛتِّنِ کٛو ندٜيٜ حٛشّٜىٰرٜ اٜ لٜيْدِ نغٛنْدِ شَکَ ندِيَمْ دَغَ تٛ طُمْ وٛنِ؞ ¹⁵سٜيْ لَامِيٻٜ دُونِيَارُ، اٜ اَرْدِيٻٜ، اٜ مَوْٻٜ سٛوجِعٜنْ، اٜ غٛودُٻٜ رِسْکُ، اٜ غٛودُٻٜ لَامُ، اٜ مَشُّٻٜ، اٜ نَاع مَشُّٻٜ ٻٜ شُوطِي ندٜرْ لُورٛوجِ اٜ لٜيْ کَاپٜ ندٜرْ کٛشّٜىٰجٜ؞ ¹⁶ٻٜ مبِعِ کٛشّٜىٰجٜ طٜنْ اٜ کَاپٜ طٜنْ، ‏«‏نجَنٛيٜىٰ دٛوْ اَمِنْ، شُوطٛنْمِنْ تٛع غٛنْطٛ دٛوْ جٛوطٛرْغَلْ لَامُ يِعَمِنْ، ندٜنْ تٛع کَرٛورِ ندِنْ حَلْکَمِنْ؞ ¹⁷نغَمْ ݧَلْندٜ مٛنّٜرٜ مَٻّٜ کَلُّندٜ وَرِي؞ مٛيٜ وَاوَتَ دَرَاکِ؟»‏

يِمْٻٜ اِسْرَاعِيلَ 144,000

¹غَطَ نٛنْ مِ يِعِي مَلَاعِکَعٜنْ نَيٛ اٜ ندَرِي اٜ غُتُّلِّ نَيِ طِ دُونِيَارُ؞ اٜ ٻٜ شُرِ حٜنْدُوجِ نَيِ طِ دُونِيَارُ نغَمْ تٛع حٜنْدُ وِسَ دٛوْ لٜيْدِ کٛو دٛوْ مَايٛ کٛو دٛوْ کٛو کِيٜ لٜکِّ؞ ²سٜيْ نغِيمِ غٛطّٛ مَلَاعِکَاجٛ اٜ پٜنْتَ دٛوْ دَغَ فُونَ اٜ مٛ جٛغِي حَاتِمِيرٜ اَللَّه غٛودُطٛ يٛنْکِ؞ اٛ مٜتَنِ مَلَاعِکَعٜنْ نَيٛ ٻٜنْ طٛنْ ٻٜ اَللَّه حٛکِّ لَامُ لَلِّنْکِ لٜيْدِ اٜ مَايٛ؞ اٛ مٜتَنِٻٜ اٜ حٛنٛنْدٜ شٜمْبِنْدٜ، ³اٛ وِعِ، ‏«‏تٛع اٛنْ لَلِّنْ لٜيْدِ کٛو مَايٛ کٛو لٜطّٜ نَا مِنْ نغَطَنِي مَشُّٻٜ اَللَّه مٜىٰطٜنْ اَلَامَ تٛ تِيطٜ مَٻّٜ تَوْ؞»‏ ⁴سٜيْ نَنْمِ طُطْکِ ٻٜ طُمْ وَطَنِ اَلَامَ ٻٜنْ کٜوْتِي يِمْٻٜ 144,000؞ ٻٜ فُو مَٻّٜ دَغَ ندٜرْ لٜݧِ اِسْرَاعِيلَ سَڤّٛ اٜ طِطِ ٻٜ نغٛنِ، ⁵يِمْٻٜ 12,000 دَغَ لٜݧٛلْ يَحُودَ، يِمْٻٜ 12,000 دَغَ لٜݧٛلْ رُبَيْنُ، يِمْٻٜ 12,000 دَغَ لٜݧٛلْ غَتْ، ⁶يِمْٻٜ 12,000 دَغَ لٜݧٛلْ اَاشِرُ، يِمْٻٜ 12,000 دَغَ لٜݧٛلْ نَفْتَالِ، يِمْٻٜ 12,000 دَغَ لٜݧٛلْ مَنَاسٜ، ⁷يِمْٻٜ 12,000 دَغَ لٜݧٛلْ سَامِنُ، يِمْٻٜ 12,000 دَغَ لٜݧٛلْ لٜىٰوِ، يِمْٻٜ 12,000 دَغَ لٜݧٛلْ عِسَاکَ، ⁸يِمْٻٜ 12,000 دَغَ لٜݧٛلْ جَبَلُونَ، يِمْٻٜ 12,000 دَغَ لٜݧٛلْ اِسُفُ، يِمْٻٜ 12,000 دَغَ لٜݧٛلْ بِلِيَامِنُ؞

يِمْٻٜ طُطْٻٜ دَغَ کٛو نغٛلٜ لٜݧٛلْ

⁹غَطَ طُمْ طٛنْ مِ رَارِي سٜيْ نغِيمِ يِمْٻٜ طُطْٻٜ ٻٜ پَٻَّکٜ لِمْنغَلْ؞ ٻٜ نغَرٛيِي دَغَ کٛو ندِيٜ لٜيْدِ، اٜ کٛو نغٛلٜ لٜݧٛلْ، اٜ کٛو ٻٜيٜ يِمْٻٜ، اٜ کٛو نغَلٜ طٜمْنغَلْ، اٜ ٻٜ ندَرِي يٜىٰسٛ جٛوطٛرْغَلْ لَامُ نغَلْ اٜ کَرٛورِ ندِنْ اٜ ٻٜ ٻٛرْنِي کٛلْتٜ دَنٜىٰجٜ تَرْ؞ اٜ ٻٜ نجٛغِي لِشٛيْ حَاکٛ دَبِينٛوجٜ اٜ جُوطٜ مَٻّٜ؞ ¹⁰اٜ ٻٜ پٜفْتَ حٛنٛنْدٜ سٜمْبٜىٰ اٜ ٻٜ مبِعَ، ‏«‏کِسْندَمْ وَرٛيِي دَغَ تٛ اَللَّه مٜىٰطٜنْ جٛوطِيطٛ دٛوْ جٛوطٛرْغَلْ لَامُ اٜ کَرٛورِ ندِنْ!‏»‏ ¹¹مَلَاعِکَعٜنْ فُو اٜ ندَرِي ڤِلِي جٛوطٛرْغَلْ لَامُ نغَلْ اٜ مَوْٻٜ ٻٜنْ طٛنْ اٜ تَغَاطُمْ نَيُمْ غٛودُطُمْ يٛنْکِ طُمْ طٛنْ؞ ٻٜ فُو ٻٜ نجَنِ ٻٜ مَوْنِنِ اَللَّه؞ ¹²اٜ ٻٜ مبِعَ، ‏«‏اَامِنْ!‏ مَنْتُکِ، اٜ تٜدُّنغَلْ، اٜ فَامُ، اٜ يٜتّٛورٜ، اٜ مَنْغُ، اٜ بَوْطٜ، اٜ سٜمْبٜ تَبِّتَ تٛ اَللَّه مٜىٰطٜنْ حَا اَبَدَا اَبَدِنْ!‏ اَامِنْ؞»‏ ¹³سٜيْ غٛعٛتٛ ندٜرْ مَوْٻٜ ٻٜنْ طٛنْ پَمِيَمْ وِعِ، ‏«‏طُمْ ٻٜيٜ ٻٜعٜ يِمْٻٜ ٻٛرْنِيٻٜ کٛلْتٜ دَنٜىٰجٜ؟ ندٜنْ دَغَ تٛيٜ ٻٜ پِوٛيِ؟»‏ ¹⁴سٜيْ مبِيمٛومِ، ‏«‏مِ اَنْدَا، مَوْطٛ؞ اَنْ اَ اَنْدِ؞»‏ سٜيْ اٛ وِعِيَمْ، ‏«‏ٻٜعٜ يِمْٻٜ کَمْٻٜ پِوٛيِ دَغَ ندٜرْ تٛرَّ کَلُّکَ؞ ٻٜ لَٻِّنِرِ کٛلْتٜ مَٻّٜ اٜ پِيپَمْ کَرٛورِ ندِنْ طٜ ندَنِّ تَرْ؞ ¹⁵کَنْجُمْ وَطِ اٜ ٻٜ ندَرِي يٜىٰسٛ جٛوطٛرْغَلْ لَامُ اَللَّه؞ اٜ ٻٜ کُوَنَمٛ جٜمَّ اٜ ݧَلَوْمَ ندٜرْ وُرٛ مَاکٛ؞ جٛوطِيطٛ دٛوْ جٛوطٛرْغَلْ لَامُ نغَلْ اٛ سُرَنَيْٻٜ؞ ¹⁶ٻٜ ٻٜيْدَتَا ٻٜ نَنَ وٜىٰلٛ، ٻٜ ٻٜيْدَتَا ٻٜ نَنَ طٛنْکَ؞ نَانغٜ فُطِّتَتَا ڤِيَٻٜ کٛو غٛطُّمْ غُلْطُمْ سَمْ؞ ¹⁷نغَمْ کَرٛورِ نغٛنْدِ شَکَ جٛوطٛرْغَلْ لَامُ نغَلْ ندِ وَرْتَيْ غَيْنَاکٛ مَٻّٜ؞ ندٜنْ ندِ يَارَيْٻٜ تٛ ندِيَمْ يٛنْکِ ٻُلِرٛيْتَ؞ اَللَّه بٛو مٛيْتَنَيْٻٜ فُو غٛنْطِ مَٻّٜ؞»‏

حَاتِمِيرٜ جٛوٜىٰطِطَوْرٜ

¹ندٜ کَرٛورِ ندِنْ تَکِّتِ حَاتِمِيرٜ جٛوٜىٰطِطَوْرٜ، سٜيْ کٛو طُمٜ دٜعِّتِ تٛنْ دٛوْ حَادٜ مِنْتِيجِ 30؞ ²ندٜنْ مِ يِعِي مَلَاعِکَعٜنْ نجٛوٜىٰطِطٛ دَرِيٻٜ يٜىٰسٛ اَللَّه طُمْ حٛکِّٻٜ لُوٜ جٛوٜىٰطِطِ؞

³سٜيْ غٛطّٛ مَلَاعِکَاجٛ وَرِ دَرِي يٜىٰسٛ تٛ طُمْ وُلَتَ اُرْدٜ وٜلْندٜ اٜ مٛ جٛغِي تُمُّدٜ جِينَارِ ندٜ طُمْ وُلَتَ اُرْدٜ ندٜرْ مَيْرٜ؞ طُمْ حٛکِّمٛ اُرْدٜ طُنْدٜ نغَمْ اٛ حَوْتَندٜ اٜ دٛعَارٜ يِمْٻٜ اَللَّه اٛ حٛکَّندٜ اَللَّه تٛ طُمْ وُلَتَ اُرْدٜ وٜلْندٜ طُمْ جِينَارِ غٛنْطُمْ يٜىٰسٛ جٛوطٛرْغَلْ لَامُ نغَلْ؞ ⁴سٜيْ شُرْکَ اُرْدٜ ندٜنْ اُمِّي دَغَ ندٜرْ تُمُّدٜ ندٜ اٛ جٛغِي ندٜنْ حَوْتِ اٜ دٛعَاجٜ يِمْٻٜ اَللَّه ٻٜنْ کَ يَحِ يٜىٰسٛ اَللَّه؞ ⁵سٜيْ مَلَاعِکَاجٛ اٛنْ حٛشِّ تُمُّدٜ ندٜنْ حٜبِّنِندٜ حِيتٜ دَغَ تٛ طُمْ وُلَتَ اُرْدٜ وٜلْندٜ، اٛ سَنْکِتِنغٜ دٛوْ دُونِيَارُ؞ سٜيْ طُمْ نَنْغِ وَطُکِ ڤَلْمَالِ، اٜ حٛولٛ، اٜ مَپّٜ، اٜ دِمْبٛلْ لٜيْدِ؞

لُوٜ نَيِ

⁶ندٜنْ مَلَاعِکَعٜنْ ٻٜنْ طٛنْ نجٛوٜىٰطِطٛ جٛغِيٻٜ لُوٜ جٛوٜىٰطِطِ ٻٜ شِرْيِي دُودُکِطٜ؞

⁷مَلَاعِکَاجٛ اَرَنْدٜىٰجٛ دُودِ لُوَلْ مُوطُمْ سٜيْ رَا مَلٜمَلّٜىٰجٜ کَلُّطٜ اٜ حِيتٜ اٜ طُمْ جِلِّندِرِي اٜ پِيپَمْ طُمْ مٜشّٛيَا دٛوْ دُونِيَارُ؞ حِيتٜ نغٜنْ بٛو ݧَامِ سٜنْدٜرٜ غٛعٛ ندٜرْ شٜنْدٜ تَتِ طٜ دُونِيَارُ، نغٜ ݧَامِ سٜنْدٜرٜ غٛعٛ ندٜرْ شٜنْدٜ تَتِ طٜ لٜطّٜ اٜ فُطٜ فُطٜىٰجِ؞

⁸ندٜ مَلَاعِکَاجٛ طِطَٻٛ دُودِ لُوَلْ مُوطُمْ، سٜيْ طُمْ حُبِي غٛطُّمْ ندٜرْ مَايٛ نَنْدُطُمْ اٜ حٛشّٜىٰرٜ مَوْندٜ اٜ طُمْ ݧَامَ حِيتٜ؞ دَغَ طٛنْ سٜنْدٜرٜ غٛعٛ ندٜرْ شٜنْدٜ تَتِ طٜ مَايٛ نغٛنْ وَرْتِ پِيپَمْ؞ ⁹ندٜنْ سٜنْدٜرٜ غٛعٛ ندٜرْ شٜنْدٜ تَتِ طٜ مَرْلٜ مَايٛ نغٛنْ مبَاتِ، ندٜنْ سٜنْدٜرٜ غٛعٛ ندٜرْ شٜنْدٜ تَتِ طٜ کٛمِيجٜ غٛنْطٜ طٛنْ کَلْکِ؞

¹⁰ندٜ مَلَاعِکَاجٛ تَتَٻٛ دُودِ لُوَلْ مُوطُمْ، سٜيْ وٛنْدٜ حٛودٜرٜ يَنٛيِ دَغَ دٛوْ اٜ ندٜ ݧَامَ حِيتٜ بٛ يَوْرٜ ندٜ طُمْ يَرْدَتَ ݧَاکِ؞ ندٜ يَنِ دٛوْ سٜنْدٜرٜ غٛعٛ ندٜرْ شٜنْدٜ تَتِ طٜ شَنْطِ اٜ تٛ ندِيَمْ ٻُلِرٛيْتَ؞ ¹¹اِنْدٜ حٛودٜرٜ ندٜنْ ‏«‏کَطُّمْ؞»‏ سٜيْ سٜنْدٜرٜ غٛعٛ ندٜرْ شٜنْدٜ تَتِ طٜ ندِيَمْ وَرْتِ کَطَّمْ؞ يِمْٻٜ طُطْٻٜ ندٜ نجَرِ ندِيَمْ طَمْ ٻٜ مَايِ نغَمْ طَمْ وَرْتِي کَطَّمْ؞

¹²ندٜ مَلَاعِکَاجٛ نَيَٻٛ دُودِ لُوَلْ مُوطُمْ، سٜيْ طُمْ ڤِيِ سٜنْدٜرٜ غٛعٛ ندٜرْ شٜنْدٜ تَتِ طٜ نَانغٜ اٜ لٜوْرُ اٜ کٛودٜ، حَا سٜنْدٜرٜ غٛعٛ ندٜرْ شٜنْدٜ تَتِ طٜ جَيْنغٛلْ نَانغٜ اٜ لٜوْرُ اٜ کٛودٜ ݧِٻِّ؞ سٜنْدٜرٜ غٛعٛ ندٜرْ شٜنْدٜ تَتِ ندٜ ݧَلَوْمَ وَرْتِ ݧِوْرٜ؛ نٛنْ مَا جٜمَّ؞

¹³ندٜنْ ندٜ ندَارُمِ، سٜيْ نَنْمِ وٛنْغَ شِيلَ اٜ نغَ فِيرَ اٜ دٛوْ اٜ نغَ وِعَ اٜ سٜمْبٜ، ‏«‏اٛنْ مبٛنِي!‏ اٛنْ مبٛنِي!‏ اٛنْ مبٛنِي اٛنٛنْ جٛوطِيٻٜ ندٜرْ دُونِيَارُ، تٛ طُمْ دُودِي لُوٜ کٛرِيطٜ طٜ مَلَاعِکَعٜنْ ٻٜنْ طٛنْ تَتٛ شِرْيِي دُودُکِ!‏»‏

لُوَلْ نجٛوَٻَلْ

¹ندٜ مَلَاعِکَاجٛ نجٛوَٻٛ دُودِ لُوَلْ مُوطُمْ، سٜيْ نغِيمِ حٛودٜرٜ يَنٛيِي ندٜرْ دُونِيَارُ دَغَ دٛوْ؞ سٜيْ طُمْ حٛکِّندٜ مَٻِّتِرْغٜلْ دَمُّغَلْ نغَيْکَ کَلُّکَ لُغُّکَ؞ ²ندٜ حٛودٜرٜ ندٜنْ مَٻِّتِ نغَيْکَ کَنْ، سٜيْ وٛکَّ شُرْکَ ٻَلٜحَ وُرْتٛيِي بٛ شُرْکَ لَدّٜ ݧَامٛورٜ حِيتٜ، کَ ٻَلْوِنِ نَانغٜ اٜ نجَيْرِ دٛوْ؞ ³سٜيْ مبَابٜحٛ مبُرْتٛيِي دَغَ ندٜرْ شُرْکَ کَنْ کٛ نجِڤّٛنٛيِي دُونِيَارُ؞ طُمْ حٛکِّکٛ سٜمْبٜ ݝَتُکِ بٛ جَحٜ؞ ⁴سٜيْ طُمْ وِعِکٛ تٛع کٛ مٜىٰمَ غٜىٰنٜ، کٛو لٜطّٜ، کٛو غٛطُّمْ فُطٜ‑فُطٜ، سٜيْ نِ يِمْٻٜ ٻٜ نغَلَا اَلَامَ اَللَّه اٜ تِيطٜ مَٻّٜ تَنْ؞ ⁵طُمْ اَلِکٛ کٛ تٛرَّ يِمْٻٜ ٻٜنْ تٛرَّ کَلُّکَ حَا لٜبِّ جٛوِ، اَمَّا تٛع کٛ مبَرَٻٜ؞ نَوْطُمْ ݝَتُکِ مَاکٛ بٛ نَوْطُمْ ݝَتُکِ جَحٜ؞ ⁶ندٜرْ بَلْطٜ طٜنْ يِمْٻٜ طَٻِّتَيْ مَيْدٜ، اَمَّا ٻٜ کٜٻَتَاندٜ؛ ٻٜ کَاٻَيْ ٻٜ مَايَ، اَمَّا مَيْدٜ ندٜنْ دٛغَّيْٻٜ؞

⁷مبَابٜحٛ کٛنْ اٜ نَنْدِ اٜ ڤُشِّ شِرْيِيطِ نغَمْ کٛنُ، اٜ کٛ نغٛودِ غٛطُّمْ تٛ کٛعٜ بٛ غِيفِ جِينَارِ، غٜىٰشٜ مَاکٛ بٛو اٜ نَنْدِ اٜ طٜ يِمْٻٜ؞ ⁸غَاسَ مَاکٛ اٜ نَنْدِ اٜ غَاسَ کٛعٜ رٜوْٻٜ، ندٜنْ ݧِيپٜ مَاکٛ اٜ نَنْدِ اٜ طٜ سٜمْبِنْدُ؞ ⁹غَبَاجٜ مَاکٛ اٜ شُدّٛرِي اٜ غٛطُّمْ نَنْدُطُمْ اٜ تٛغّٛحٛيْ نجَمْندِ، سٛنْݧٛ بِيٜىٰلِ مَاکٛ بٛو اٜ نَنْدِ اٜ سٛنْݧٛ ڤُشِّ کَٻَّنَاطِ کٜىٰکٜ کٛنُ اٜ طِ ندٛغَّ اٜ طِ اُمَّنِي کٛنُ؞ ¹⁰اٜ کٛ نغٛودِ بِشّٜ ڤِطٛوجٜ بٛ طٜ جَحٜ؞ بِشّٜ طٜنْ بٛو اٜ نغٛودِ سٜمْبٜ نَوْنُکِ يِمْٻٜ حَا لٜبِّ جٛوِ؞ ¹¹ندٜنْ اٜ کٛ نغٛودِ لَامِيطٛ لَامٛتٛوطٛکٛ، کَنْکٛ وٛنِ مَلَاعِکَاجٛ نغَيْکَ کَلُّکَ لُغُّکَ کَنْ؞ اِنْدٜ مَاکٛ ندٜرْ اِبْرَانِيَنْکٛورٜ وٛنِ ‏«‏اَبَدّٛنْ،»‏ ندٜرْ حٜلٜنَنْکٛورٜ بٛو ‏«‏اَفٛولِيٛنْ،»‏ وَاتٛ کَلْکٛووٛ؞

¹²بٛنٜ کَلُّطُمْ اَرَنْدٜجُمْ پَٻَّکٜ؞ حٛرِي بٛنٜ کَلُّطُمْ طِطُمْ غَرَيْطُمْ؞

لُوَلْ جٛوٜىٰغٛعٛوَلْ

¹³ندٜنْ مَلَاعِکَاجٛ جٛوٜىٰغٛعٛوجٛ دُودِ لُوَلْ مُوطُمْ، سٜيْ نَنْمِ حٛنٛنْدٜ اٜ وُرْتٛيٛو دَغَ ندٜرْ نٛڤِّ نَيِ طِ تٛ طُمْ وُلَتَ اُرْدٜ طُمْ جِينَارِ غٛنْطُمْ يٜىٰسٛ اَللَّه؞ ¹⁴حٛنٛنْدٜ ندٜنْ وِعِ مَلَاعِکَاجٛ اٛنْ، ‏«‏يٛوفُ مَلَاعِکَعٜنْ نَيٛ ٻٜنْ طٛنْ کَٻَّاٻٜ تٛ اِلٛووٛ مَنْغٛ بِعٜتٜىٰنغٛ يُفٜرِتِسْ!‏»‏ ¹⁵سٜيْ طُمْ يٛوفِ مَلَاعِکَعٜنْ ٻٜنْ طٛنْ نَيٛ ٻٜ طُمْ سِرْيَنِي شَرٜلْ نغٜعٜلْ، اٜ ݧَلْندٜ ندٜعٜ ندٜ لٜوْرُ ندُعُ اٜ ندُنْغُ نغُعُ نغَمْ ٻٜ مبَرَ سٜنْدٜرٜ غٛعٛ ندٜرْ شٜنْدٜ تَتِ طٜ يِمْٻٜ دُونِيَارُ؞ ¹⁶طُمْ وِعِيَمْ طُوطُکِ سٛوجِعٜنْ وٛنْٻٜ دٛوْ ڤُشِّ وَطِي 200,000,000؞ ¹⁷ندٜرْ وَحَيُ طُمْ مِ يِعِ ڤُشِّ اٜ وٛنْٻٜ دٛوْ مَجِّ، اٜ ٻٜ شُدِّ غَبَاجٜ مَٻّٜ اٜ تٛغّٛحٛيْ نجَمْندِ اٜ کٛيْ مبٛوجِ شٛلٛيْ بٛ حِيتٜ، اٜ شُوطِجُمْ، اٜ نَرٜىٰرِجُمْ؞ کَدِمَا کٛو نغُيٜ ڤُشُّ اٜ وٛودِ حٛورٜ بٛ ندٜ سٜمْبِنْدُ، ندٜنْ حِيتٜ اٜ شُرْکَ اٜ کَاپٜ ݧَامٛوجٜ حِيتٜ اٜ وُرْتٛيٛو دَغَ کٛنْدُطٜ مَجِّ؞ ¹⁸سٜنْدٜرٜ غٛعٛ ندٜرْ شٜنْدٜ تَتِ طٜ دُونِيَارُ مبَرْدَا اٜ بٛنٜ کَلُّطُمْ تَتُمْ طُمْ طٛنْ، وَاتٛ حِيتٜ، اٜ شُرْکَ، اٜ کَاپٜ ݧَامٛوجٜ حِيتٜ بُرْتٛيْتٛوطُمْ دَغَ کٛنْدُطٜ مَاجِ؞ ¹⁹سٜمْبٜ مَاجِ ندٜرْ کٛنْدُطٜ مَاجِ اٜ بِشّٜ مَاجِ نغٛنِ؞ بِشّٜ طٜنْ اٜ نغٛودِ کٛعٜ بٛ طٜ بٛولٜ، اٜ مَاجٜ طِ نَوْنِرْتَ يِمْٻٜ؞

²⁰يِمْٻٜ کٛرِيٻٜ ٻٜ بٛنٜ طُمْ طٛنْ مبَرَايِ، ٻٜ تُوبَايِ ٻٜ شٜنْدِرِ اٜ کٛ ٻٜ نغَطِ اٜ جُوطٜ مَٻّٜ؞ ٻٜ اَلَايِ مَوْنِنْکِ غِنِّ، اٜ اَلَّاجِ فٜوْرٜ غَطِرَاطِ جِينَارِ، کٛو اَجُرْفَارِ، کٛو نجَمْندِ مبٛطٜىٰرِ، کٛو حَيْرٜ، کٛو لٜکِّ؞ طِ فُو طِ نغِعَتَا، طِ نَنَتَا، طِ نجَحَتَا؞ ²¹ندٜنْ ٻٜ اَلَايِ وَرُکِ يِمْٻٜ، اٜ حُوتِرْکِ بَوْطٜ غِنِّ، اٜ نجٜىٰنُ، اٜ وُجّٜ‑وُجّٜ مَٻّٜ؞

مَلَاعِکَاجٛ اٜ طٜرٜوٛلْ

¹ندٜنْ مِ فُطِّتِي مِ يِعِ غٛطّٛ مَلَاعِکَاجٛ غٛودُطٛ لَامُ، اٜ مٛ جِڤّٛيٛو دَغَ دٛوْ، اٜ مٛ سُدّٛرِي دُولٜ؞ اٜ مٛ وٛودِ تِمْبٛتِمْبٛلَ دٛوْ حٛورٜ مَاکٛ، يٜىٰسٛ مَاکٛ بٛ نَانغٜ، کٛيْطٜ مَاکٛ بٛ لٜکّٛ ݧَامٛوحٛ حِيتٜ؞ ²اٜ مٛ جٛغِي وٛنْغٛلْ طٜرٜوٛلْ ڤَمَرٛلْ اٜ جُنْغٛ مَاکٛ اٜ نغٛلْ مَٻِّتِي؞ اٛ وَطِ کٛيْنغَلْ مَاکٛ نغَلْ ݧَامٛ دٛوْ مَايٛ، کٛيْنغَلْ مَاکٛ نغَلْ نَنٛ بٛو دٛوْ لٜيْدِ؞ ³سٜيْ اٛ مٜتِ اٜ حٛنٛنْدٜ شٜمْبِنْدٜ بٛ بٛجِّ سٜمْبِنْدُ؞ ندٜ اٛ مٜتِ، سٜيْ ڤَلْمَالِ جٛوٜىٰطِطِ نٛوتِي اٜ حٛولٛ شٜمْبِنْغٛ؞ ⁴ندٜ ڤَلْمَالِ جٛوٜىٰطِطِ طِنْ کٛولِ، سٜيْ شِرْيِيمِ مِ وِنْدَيْ؞ اَمَّا سٜيْ نَنْمِ وٛنْدٜ حٛنٛنْدٜ دَغَ دٛوْ وِعِي، ‏«‏تَاع وِعُ غٛطّٛ کٛ ڤَلْمَالِ جٛوٜىٰطِطِ طِنْ طٛنْ مبِعِ ندٜنْ تَاع وِنْدُطُمْ!‏»‏

⁵ندٜنْ مَلَاعِکَاجٛ مٛ نغِيمِ اٜ دَرِي دٛوْ لٜيْدِ اٜ دٛوْ مَايٛ پٜفْتِ جُنْغٛ مُوطُمْ ݧَامٛ دٛوْ؞ ⁶اٛ حُنٛرِي اِنْدٜ اَللَّه غٛودُطٛ يٛنْکِ حَا اَبَدَا اَبَدِنْ، تَغُطٛ دٛوْ اٜ لٜيْ اٜ مَايٛ اٜ کٛ وٛنِ ندٜرْ مَاجُمْ؞ اٛ وِعِ، ‏«‏وٛنُّکِ شَرٜلْ حٛرَاکِ کَدِنْ!‏ ⁷اَمَّا شَرٜلْ کٛ مَلَاعِکَاجٛ جٛوٜىٰطِطَٻٛ دُودَتَ لُوَلْ مُوطُمْ، اَللَّه حٜبِّنَيْ سِرُّ مُوطُمْ، نٛنْ نٛ اٛ وِعُنٛو مَشُّٻٜ مَاکٛ اَنَّبٛعٜنْ؞»

⁸ندٜنْ حٛنٛنْدٜ ندٜ نَنُنٛومِ دَغَ دٛوْ، ندٜ فُطِّتِي ندٜ مٜتَنِييَمْ ندٜ وِعِ، ‏«‏يَحُ نجَٻَا طٜرٜوٛلْ نغٛلْ طٛنْ مَٻِّتِينغٛلْ اٜ جُنْغٛ مَلَاعِکَاجٛ اٛنْ طٛنْ دَرِيطٛ دٛوْ مَايٛ اٜ دٛوْ لٜيْدِ؞»‏

⁹سٜيْ نجَحُمِ تٛ مَلَاعِکَاجٛ اٛنْ مبِيمٛومِ اٛ حٛکَّيَمْ طٜرٜوٛلْ نغٛلْ؞ سٜيْ اٛ وِعِيَمْ، ‏«‏جَٻُنغٛلْ ݧَامَا؞ نغٛلْ وَرْتَيْ کَطُّمْ ندٜرْ رٜىٰدُ مَاطَ، اَمَّا تٛ حٛنْدُکٛ مَاطَ نغٛلْ وٜلَيْ بٛ نجُمْرِ؞»‏

¹⁰سٜيْ نجَٻُمِ طٜرٜوٛلْ نغٛلْ اٜ جُنْغٛ مَلَاعِکَاجٛ اٛنْ ݧَامُمِنغٛلْ؞ سٜيْ نغٛلْ وَرْتِ بٜلْنغٛلْ اٜ حٛنْدُکٛ اَمْ بٛ نجُمْرِ، اَمَّا غَطَ مِ مٛطِينغٛلْ نغٛلْ وَرْتِ کَطُّمْ ندٜرْ رٜىٰدُ اَمْ؞ ¹¹سٜيْ طُمْ فُطِّتِ طُمْ وِعِيَمْ، ‏«‏دٛولٜ ڤُطِّتَا مبِعَ کٛ حٜٻَتَ يِمْٻٜ اٜ لٜيْطٜ فٜىٰرٜ‑فٜىٰرٜ، اٜ لٜݧِ، اٜ طٜمْطٜ، اٜ لَامِيٻٜ طُطْٻٜ؞»‏

شٜيْدُعٜنْ اَللَّه طِطٛ

¹ندٜنْ طُمْ حٛکِّيَمْ غٛطُّمْ ڤٛوندِرْطُمْ نَنْدُطُمْ اٜ سَوْرُ، طُمْ وِعِيَمْ، ‏«‏اُمَّ نجَحَا ڤٛوندَا وُرٛ شٜنِينغٛ اٜ تٛ طُمْ حٛکَّتَ اَللَّه شَاحُ، ندٜنْ لِمَا مَوْنِنٛوٻٜ اَللَّه ندٜرْ مَغّٛ؞ ²اَمَّا تَاع فٛوندُ نجَيْرِ يَاسِ وُرٛ نغٛنْ، اَلُندِ، نغَمْ طُمْ حٛکِّيندِ لٜپِّ دُونِيَارُ، ٻٜ لَامٛو غَرِيرِ شٜنِيندِ اٜ سٜمْبٜ حَا لٜبِّ 42؞ ³ندٜنْ مِ حٛکَّيْ شٜيْدُعٜنْ اَمْ طِطٛ لَامُ ٻٜ نغَعَجِنَ وٛلْدٜ اَمْ حَا بَلْطٜ 1,260، اٜ ٻٜ ٻٛرْنِي کٛلْتٜ کٛلَّيْطٜ وَنَّارٜ؞»‏

⁴ٻٜنْ طٛنْ شٜيْدُعٜنْ طِطٛ کَمْٻٜ نغٛنِ لٜطّٜ جَيْتُنْ طِطِ اٜ فِتِلَاجِ طِطِ دَرِيطِ يٜىٰسٛ جٛومُ دُونِيَارُ فُو؞ ⁵فُو غِطّٛ حَلَّنَٻٜ، سٜيْ حِيتٜ وُرْتٛيٛو دَغَ ندٜرْ کٛنْدُطٜ مَٻّٜ حَلْکَمٛ؞ نٛنْ طُمْ وَرِرْتَ کٛو مٛيٜ غِطّٛ حَلَّنْکِٻٜ؞ ⁶اٜ ٻٜ نغٛودِ لَامُ حَطُکِ ندِيَمْ تٛٻَ ندٜرْ بَلْطٜ طٜ ٻٜ نغَعَجِنْتَ وٛلْدٜ جٛومِرَاوٛ؞ ندٜنْ اٜ ٻٜ نغٛودِ لَامُ ٻٜ نغَرْتِرَ ندِيَمْ پِيپَمْ؞ طٛنْمَا اٜ ٻٜ نغٛودِ لَامُ جِڤِّنَنْکِ دُونِيَارُ کٛو اِرِ طُمٜ بٛنٜ کَلُّطُمْ طُمْ ٻٜ نغِطِ؞

⁷غَطَ ٻٜ کٜىٰݧِي وَعَجِنْکِ مَٻّٜ سٜيْ وٛنْدِ مَرْدِ کَلُّندِ بُرْتٛيْتٛوندِ ندٜرْ نغَيْکَ لُغُّکَ کَنْ حٛنَٻٜ؞ ندِ حٜٻَ جَالٛرْغَلْ دٛوْ مَٻّٜ ندِ وَرَٻٜ؞ ⁸طُمْ اَلَيْ ٻَلِّ مَٻّٜ شَکَ لُومٛ غَرِيرِ مَوْندِ؞ اٜ طُمْ نٛدِّرَ غَرِيرِ ندِنْ ‏«‏سٛدٛمْ»‏ کٛو ‏«‏مَسَرْ»‏ نغَمْ نغِکُّ جٛوطِيٻٜ ندٜرْ مَيْرِ؞ ندٜرْ مَيْرِ طُمْ ڤِيَنِ جٛومِرَاوٛ مَٻّٜ کُوسَاجٜ دٛوْ غَافَانغَلْ؞ ⁹يِمْٻٜ دَغَ کٛو ندِيٜ لٜيْدِ، اٜ لٜݧِ، اٜ طٜمْطٜ ٻٜ ندَارَيْ ٻَلِّ طِنْ حَا بَلْطٜ تَتِ اٜ سٜنْدٜرٜ ٻٜ کَطَ طُمْ اُوٛيَطِ؞ ¹⁰يِمْٻٜ دُونِيَارُ فُو نَنَيْ بٜلْطُمْ ٻٜ نغَطَ حُمْتٛ ٻٜ کٛکِّندِرَ دٛکّٜ نغَمْ اَنَّبٛعٜنْ طِطٛ ٻٜنْ مبَرَامَ؞ ٻٜ نغَطَيْ نٛنْ نغَمْ اَنَّبٛعٜنْ ٻٜنْ ڤٛوطَنِينٛ دُونِيَارُ فُو تٛرَّ کَلُّکَ؞

¹¹اَمَّا غَطَ بَلْطٜ تَتِ اٜ سٜنْدٜرٜ، سٜيْ فٛوفَانغٛ يٛنْکِ وَرٛيِ دَغَ تٛ اَللَّه نَتِّٻٜ؞ ٻٜ اُمِّي ٻٜ ندَرِي، کُلٛلْ مَنْغٛلْ نَنْغِ کٛو مٛيٜ غِيطٛٻٜ؞ ¹²سٜيْ اَنَّبٛعٜنْ طِطٛ ٻٜنْ نَنِ وٛنْدٜ حٛنٛنْدٜ شٜمْبِنْدٜ دَغَ دٛوْ اٜ وِعَٻٜ، ‏«‏پٜنْتٛيٜىٰ طٛعٛ!‏»‏ سٜيْ ٻٜ کٛشَّا يَاکِ دٛوْ ندٜرْ ندُولَ، وَݧْوَݧْٻٜ مَٻّٜ اٜ ندَارَ؞ ¹³طٛنْ اٜ طٛنْ طُمْ وَطِ وٛنْغٛلْ دِمْبٛلْ لٜيْدِ کَلُّنغٛلْ، سٜيْ سٜنْدٜرٜ غٛعٛ ندٜرْ شٜنْدٜ سَڤّٛ طٜ غَرِيرِ ندِنْ يَنِ، طُمْ وَرِ يِمْٻٜ 7,000؞ کُلٛلْ مَنْغٛلْ نَنْغِ يِمْٻٜ کٛرِيٻٜ، ٻٜ مَوْنِنِ اَللَّه مٛ دٛوْ؞

¹⁴حَلْکٜرٜ طِطَوْرٜ پَٻَّکٜ؞ حَلْکٜرٜ تَتَوْرٜ اٜ وَرَ نَاع کٛ نٜىٰٻِ؞

لُوَلْ جٛوٜىٰطِطَٻَلْ

¹⁵سٜيْ مَلَاعِکَاجٛ جٛوٜىٰطِطَٻٛ دُودِ لُوَلْ مُوطُمْ، سٜيْ طُمْ نَنِ حٛنٛنْطٜ شٜمْبِطّٜ دَغَ دٛوْ اٜ مبِعَ، ‏«‏لَامُ دُونِيَارُ فُو وَرْتِي طُمْ جٛومِرَاوٛ مٜىٰطٜنْ اٜ اَلْمَسِيحُ مَاکٛ؞ اٛ لَامٛتٛ حَا اَبَدَا اَبَدِنْ!‏»‏ ¹⁶سٜيْ مَوْٻٜ ٻٜنْ طٛنْ 42 جٛوطِيٻٜ دٛوْ جٛوطٛرْلٜ لَامُ مَٻّٜ يٜىٰسٛ اَللَّه ٻٜ نجَنِ يٜىٰسٛ مَاکٛ ٻٜ مَوْنِنِمٛ؞ ¹⁷اٜ ٻٜ مبِعَ،

‏«‏يَا اَللَّه جٛومِرَاوٛ جٛومُ بَوْطٜ، اَنْ وٛنِ جٛونِ، اَنْ وٛنِ ندٜنّٛ!‏

مِنْ نغٜتِّيمَ نغَمْ اَ حُوتِرِي بَوْطٜ مَاطَ اَ فُطِّي لَامَاکِ؞

¹⁸يِمْٻٜ ٻٜ اَنْدَامَ ٻٜرْنِي،

اَمَّا شَرٜلْ مٛنّٜرٜ مَاطَ وَرِي؞

شَرٜلْ وَرِي نغٜلْ طُمْ وَطَنْتَ مَيْٻٜ کِيتَ،

ندٜنْ طُمْ وَاتَنَ مَشُّٻٜ مَاطَ اَنَّبٛعٜنْ کٛ ٻٜ نغَطِ،

اٜ يِمْٻٜ کُلٛوٻٜ اِنْدٜ مَاطَ

مَوْطٛ اٜ ڤَمَرٛ،

ندٜنْ طُمْ حَلْکَ بَرٛوٻٜ يِمْٻٜ؞»‏

¹⁹سٜيْ طُمْ مَٻِّتِ وُرٛ شٜنِينغٛ تٛنْ دٛوْ، طُمْ يِعِ اَکوَاتِيَ اَلْکَوَلْ مَاکٛ ندٜرْ مَغّٛ؞ سٜيْ طُمْ نَنْغِ وَطُکِ مَپّٜ اٜ ڤَلْمَالِ اٜ رِغَّاکِ اٜ دِمْبٛلْ لٜيْدِ اٜ مَلٜمَلّٜحٛ مَوْکٛ‑مَوْکٛ؞

دٜبّٛ اٜ مبٛوغَ مَنْغَ

¹سٜيْ غٛطُّمْ کُلْنِيطُمْ کَيْطِنِيطُمْ وَنْغِ اٜ دٛوْ؞ غٛطّٛ دٜبّٛ اٜ سُدّٛرِي نَانغٜ اٜ مٛ دَرِي دٛوْ لٜوْرُ؞ اٜ مٛ تَارِ غِيفٛلْ غٛودُنغٛلْ کٛودٜ سَڤّٛ اٜ طِطِ؞ ²اٜ مٛ وٛودِ رٜىٰدُ اٜ مٛ دِشِّي اٛ دَݧَيْ، اٜ مٛ وٛيَ نغَمْ نَوْطُمْ دَݧْنغٛلْ کَلُّطُمْ؞

³طٛنْمَا غٛطُّمْ کُلْنِيطُمْ کَيْطِنِيطُمْ وَنْغِ اٜ دٛوْ:‏ وٛنْغَ مبٛوغَ مبٛطٜوَ نغٛودُنغَ کٛعٜ جٛوٜىٰطِطِ اٜ لُوٜ سَڤّٛ، کٛو ندٜيٜ حٛورٜ اٜ وٛودِ غِيفٛلْ؞ ⁴سٜيْ وِشّٛ مَاغَ وُووِ سٜنْدٜرٜ غٛعٛ ندٜرْ شٜنْدٜ تَتِ طٜ کٛودٜ نغَ رُفٛيِطٜ دٛوْ دُونِيَارُ؞ سٜيْ نغَ وَرِ نغَ دَرِي يٜىٰسٛ اٛنْ طٛنْ دٜبّٛ دِشِّيطٛ دَݧَيْ نغَمْ نغَ ݧَامَ ٻِنْغٜلْ مَاکٛ تٛ اٛ دَݧِينغٜلْ؞ ⁵اٛ دَݧِ ٻِطّٛ غٛرْکٛ لَامٛتٛوطٛ دُونِيَارُ اٜ سَوْرُ نجَمْندِ؞ اَمَّا طُمْ حٛشِّ ٻِطّٛ اٛنْ طُمْ يَارِمٛ تٛ اَللَّه تٛ جٛوطٛرْغَلْ لَامُ مَاکٛ؞ ⁶دٜبّٛ اٛنْ بٛو دٛغِّ نَتِّ لَدّٜ يَاکِ وٛنْدٜ وِغٜىٰرٜ تٛ اَللَّه سِرْيَنِيمٛ تٛ طُمْ فَامَنْتَمٛ حَا بَلْطٜ 1,260؞

⁷سٜيْ کٛنُ اُمِّي تٛنْ دٛوْ؞ مِيکَاعِلُ اٜ مَلَاعِکَعٜنْ مُوطُمْ کٛنِدِ اٜ مبٛوغَ نغَنْ اٜ مَلَاعِکَعٜنْ مَغَّ؞ ⁸اَمَّا طُمْ حٜٻِ جَالٛرْغَلْ دٛوْ مبٛوغَ نغَنْ، طُمْ رِيوِنغَ اٜ مَلَاعِکَعٜنْ مَاغَ دَغَ تٛنْ دٛوْ؞ ⁹طُمْ حُبِنٛيِنغَ ندٜرْ دُونِيَارُ؞ کَنْغَ وٛنِ مبٛوغَ نغَ دَغَ ندٜنّٛ بِعٜتٜىٰنغَ غُلّٛتٛوطٛ کٛو شٜيْطَنْ، مَجِّنٛووٛ دُونِيَارُ؞ طُمْ حُبِنِنغَ ندٜرْ دُونِيَارُ فُو اٜ مَلَاعِکَعٜنْ مَاکٛ؞

¹⁰سٜيْ نَنْمِ وٛنْدٜ حٛنٛنْدٜ شٜمْبِنْدٜ دَغَ دٛوْ اٜ وِعَ، ‏«‏جٛونِ کِسْندَمْ، اٜ لَامُ، اٜ بَوْطٜ اَللَّه مٜىٰطٜنْ، اٜ لَامُ اَلْمَسِيحُ مَاکٛ وَرِي؞ نغَمْ اٛنْ طٛنْ غُلّٛتٛوطٛ بَنْدِرَاٻٜ مٜىٰطٜنْ يٜىٰسٛ اَللَّه جٜمَّ اٜ ݧَلَوْمَ رِيوَامَ دَغَ دٛوْ؞ ¹¹ٻٜ کٜٻِي جَالٛرْغَلْ دٛوْ مَاکٛ بَرْکَ پِيپَمْ کَرٛورِ ندِنْ ندٜنْ اٜ بَرْکَ وٛلْدٜ اَللَّه نغَمْ ٻٜ نجَٻِي ٻٜ ندُلَّ يٛنْکِ مَٻّٜ؞ ¹²نغَمْ نٛنْ، اٛنٛنْ وٛنْٻٜ ندٜرْ وُرٛ اَللَّه تٛنْ دٛوْ، نَنٜىٰ بٜلْطُمْ!‏ اَمَّا اٛنْ مبٛنِي اٛنٛنْ وٛنْٻٜ ندٜرْ دُونِيَارُ اٜ کٛ وٛنِ ندٜرْ مَايٛ!‏ نغَمْ شٜيْطَنْ جِڤّٛنٛيَکٜعٛنْ اٜ ٻٜرْنِ بٛ ڤُسَيْ نغَمْ اٜ مٛ اَنْدِ شَرٜلْ مَاکٛ ٻَدَکٜ رٜعُکِ؞»‏

¹³ندٜ مبٛوغَ نغَنْ اَنْدِتِ رِيوَامَ ندٜرْ دُونِيَارُ، سٜيْ نغَ فُطِّ تٛکُّکِ دٜبّٛ اٛنْ طٛنْ دَݧُطٛ ٻِطّٛ غٛرْکٛ؞ ¹⁴اَمَّا طُمْ حٛکِّ دٜبّٛ اٛنْ بِيٜىٰلِ طِطِ طِ شِيلَ مَنْغَ نغَمْ اٛ فِيرَ اٛ يَحَ وِغٜىٰرٜ ندٜ طُمْ سِرْيَنِيمٛ ندٜرْ لَدّٜ؞ تٛنْ طُمْ فَامَنْتَمٛ حَا دُوٻِ تَتِ اٜ سٜنْدٜرٜ؞ ¹⁵سٜيْ مبٛوغَ نغَنْ تُوتِ ندِيَمْ بٛ شَانغٛلْ غَطَ دٜبّٛ اٛنْ، نغَمْ ندِيَمْ طَمْ دِلِّدَ اٜ مَاکٛ؞ ¹⁶اَمَّا لٜيْدِ وَلِّمٛ ندِ اٛمْتِ حٛنْدُکٛ ندِ يَرْدِ ندِيَمْ طَمْ؞ ¹⁷سٜيْ مبٛوغَ نغَنْ مٛنَّنِ دٜبّٛ اٛنْ، نغَ اُمّٛيِي نغَ حٛنَ لٜݧٛلْ مَاکٛ، وَاتٛ کٛو مٛيٜ تٛکّٛووٛ کٛ اَللَّه وِعِ جَٻُطٛ غٛونغَ کَ يٜىٰسُ وَدِّ؞ ¹⁸سٜيْ مبٛوغَ نغَنْ دَرِي دٛوْ نجَارٜىٰندِ نغٛنْدِ دَاندٜ مَايٛ؞

مَرْلٜ طِطِ

¹سٜيْ نغِيمِ وٛنْدِ مَرْدِ اٜ وُرْتٛيٛو دَغَ ندٜرْ مَايٛ اٜ ندِ وٛودِ لُوٜ سَڤّٛ اٜ کٛعٜ جٛوٜىٰطِطِ؞ کٛو نغَلٜ لُوَلْ اٜ وٛودِ غِيفٛلْ ندٜنْ کٛو ندٜيٜ حٛورٜ اٜ وٛودِ اِنْدٜ کٛلَّيْندٜ اَللَّه يَوَارٜ؞ ²مَرْدِ ندِ نغِيمِ ندِنْ اٜ ندِ نَنْدِ اٜ شٜمْبِنْدُ اٜ ندِ وٛودِ کٛيْطٜ مَوْطٜ غٛودُطٜ غَاسَ اٜ ڤٜطٜىٰلِ جُوتُطِ بٛ طِ وٛنْغَ ندِوْرِوَ لَدّٜ بِعٜتٜىٰنغَ بٜيَرْ؞ حٛنْدُکٛ مَيْرِ اٜ نَنْدِ اٜ کٛ سٜمْبِنْدُ؞ مبٛوغَ نغَنْ بٛو حٛکِّندِ بَوْطٜ مُوطُمْ، اٜ جٛوطٛرْغَلْ لَامُ مُوطُمْ، اٜ لَامُ مَوْطُمْ؞ ³ندٜنْ حٛورٜ وٛعٛيْرٜ دَغَ ندٜرْ کٛعٜ مَرْدِ ندِنْ اٜ وٛودِ وٛنْدٜ نَوْنٛودٜ بَاوَيْندٜ وَرْکِندِ؞ اَمَّا نَوْنٛودٜ ندٜنْ يَادَکٜ حٛيِي؞ نغَمْ نٛنْ کٛو مٛيٜ ندٜرْ دُونِيَارُ حَيْطِنِ تٛکِّ مَرْدِ ندِنْ؞ ⁴ٻٜ مَوْنِنِ مبٛوغَ نغَنْ، نغَمْ نغَ حٛکِّيندِ لَامُ؞ طٛنْمَا ٻٜ مَوْنِنِ مَرْدِ ندِنْ، اٜ ٻٜ مبِعَ، ‏«‏مٛيٜ حٜوْتِ بٛ مَرْدِ ندِعِ؟ مٛيٜ وَاوَتَ حَٻْدَ اٜ مَيْرِ؟»‏

⁵طُمْ اَلِ مَرْدِ ندِنْ مَوْنِنَ حٛورٜ مُوطُمْ اٜ حُطَ جٛومِرَاوٛ، طُمْ اَلِندِ ندِ لَامٛو لٜبِّ 42؞ ⁶ندِ فُطِّ حُطُکِ اَللَّه اٜ اِنْدٜ مَاکٛ اٜ تٛ اٛ جٛوطٛتٛو، اٜ فُو جٛوطِيٻٜ تٛنْ دٛوْ؞ ⁷طُمْ اَلِندِ ندِ حٛنَ يِمْٻٜ اَللَّه ندِ حٜٻَ جَالٛرْغَلْ دٛوْ مَٻّٜ؞ ندِ حٛکَّا لَامُ دٛوْ کٛو نغٛلٜ لٜݧٛلْ، اٜ کٛو ٻٜيٜ يِمْٻٜ، اٜ کٛو نغَلٜ طٜمْنغَلْ، اٜ کٛو ندِيٜ لٜيْدِ؞ ⁸فُو يِمْٻٜ جٛوطِيٻٜ اٜ دُونِيَارُ ٻٜ مَوْنِنَيْندِ، سٜيْ نِ ٻٜ طُمْ وِنْدِ اِنْطٜ مَٻّٜ کٛ دُونِيَارُ تَغٜىٰ ندٜرْ دٜفْتٜرٜ يٛنْکِ ندٜ کَرٛورِ بَرَاندِ؞

⁹‏«‏فُو غٛودُطٛ نٛڤِّ نَنٛوجِ نَنَ!‏ ¹⁰کٛو مٛيٜ طُمْ وِنْدِ نَا يَحِي مَشُّنغَاکُ، تٛو، نَا يَحِي:‏ ندٜنْ کٛو مٛيٜ طُمْ وِنْدِ اٜ کَافَحِ اٛ وَرْدٜتٜىٰ، تٛو، اٜ کَافَحِ کِنْ اٛ وَرْدٜتٜىٰ؞ نغَمْ مَاجُمْ سٜيْ يِمْٻٜ اَللَّه کٛولٛومٛ نغَطَ مُݧَلْ؞»‏

¹¹ندٜنْ مِ يِعِي وٛنْدِ مَرْدِ اٜ وُرْتٛيٛو دَغَ ندٜرْ لٜيْدِ؞ اٜ ندِ وٛودِ لُوٜ طِطِ بٛ طٜ کَرٛورِ، اٜ ندِ مٜتَ بٛ مبٛوغَ؞ ¹²اٜ ندِ حُوتِرَ لَامُ مَرْدِ اَرَنْدٜىٰرِ ندِنْ فُو يٜىٰسٛ اَرَنْدٜىٰرِ ندِنْ؞ ندِ وَطِي دُونِيَارُ اٜ کٛو مٛيٜ غٛنْطٛ ندٜرْ مَيْرُ مَوْنِنَ مَرْدِ اَرَنْدٜىٰرِ ندِنْ، ندِنْ طٛنْ ندِ نَوْنٛودٜ مَيْرِ حٛيِ؞ ¹³مَرْدِ طِطَوْرِ ندِنْ وَطِ فِي کَيْطِنِيطُمْ طُطُّمْ، حَا مَا ندِ وَطِ حِيتٜ رُفٛيِ ندٜرْ دُونِيَارُ دَغَ دٛوْ؞ ندِ وَطِ نٛنْ يٜىٰسٛ غِتٜ کٛو مٛيٜ؞ ¹⁴ندِ مَجِّنِ يِمْٻٜ وٛنْٻٜ دُونِيَارُ اٜ کَيْطِنِيطُمْ طُمْ اُمْ اَلِندِ ندِ وَطَ اٜ يٜىٰسٛ مَرْدِ اَرَنْدٜىٰرِ نَوْنِرَاندِ کَافَحِ اَمَّا اٜ ندِ وٛودِ يٛنْکِ؞ ندٜنْ ندِ وِعِٻٜ ٻٜ نغَطَ نغُنْکِوَ نَنْدُنغَ اٜ مَرْدِ اَرَنْدٜىٰرِ ندِنْ نغَمْ حٛکُّکِندِ مَنْغُ؞ ¹⁵طُمْ اَلِ مَرْدِ طِطَوْرِ ندِنْ فُوفَنَ کٛ ٻٜ نغَطِ طُمْ فٛوفَانغٛ يٛنْکِ نغَمْ طُمْ مٜتَ طُمْ وَطَ فُو غَݧُطٛ مَوْنِنْکِطُمْ وَرٜىٰ؞ ¹⁶طٛنْمَا مَرْدِ طِطَوْرِ ندِنْ وَطِ کٛو مٛيٜ وَطَنٜىٰ اَلَامَ مَيْرِ اٜ جُنْغٛ ݧَامٛ کٛو اٜ تِيندٜ، مَوْطٛ اٜ ڤَمَرٛ، غٛودُطٛ رِسْکُ اٜ مٛ وَلَنَا، مَشُّطٛ اٜ نَاع مَشُّطٛ؞ ¹⁷ندِ وَطُ نٛنْ نغَمْ تٛع غٛطّٛ سٛودَ کٛو سٛورَ تٛ وَلَا اَلَامَ مَيْرِ، وَاتٛ اِنْدٜ مَيْرِ کٛو لَمْبَ اِنْدٜ مَيْرِ؞

¹⁸طٛعٛ اٜ حَانِ کُوتِرٛنْ فَامُ؞ فُو غٛودُطٛ اَنْدَلْ اٛ وُرْتِنَ مَعَنَ لَمْبَ مَرْدِ ندِنْ طٛنْ، نغَمْ لَمْبَ طُمْ طُمْ اِنْدٜ نٜطّٛ؞ لَمْبَ طُمْ وٛنِ 666؞

غِمٛلْ کٜٻُٻٜ کِسْندَمْ

¹ندٜنْ مِ رَارِي سٜيْ نغِيمِ کَرٛورِ ندِنْ اٜ دَرِي دٛوْ حٛشّٜىٰرٜ سِحِيٛونَ؞ اٜ مٛ وٛنْدِ اٜ يِمْٻٜ 144,000 ٻٜ طُمْ وِنْدَنِ اِنْدٜ مَاکٛ اٜ ندٜ ݧَاکٛ مَاکٛ تٛ تِيطٜ مَٻّٜ؞ ²سٜيْ نَنْمِ وٛنْدٜ حٛنٛنْدٜ دَغَ دٛوْ شٜمْبِنْدٜ بٛ حٛولٛ ندِيَمْجِ دٛغّٛوجِ، بٛ حٛولٛ رِغَّانغٛ شٜمْبِنْغٛ؞ اٜ ندٜ نَنْدِ اٜ اِيدٛ فِيکِ غَرَايَاجِ؞ ³اٜ ٻٜ نغِمَ وٛنْغٛلْ غِمٛلْ کٜسٛلْ يٜىٰسٛ جٛوطٛرْغَلْ لَامُ نغَلْ اٜ تَغَاطُمْ نَيُمْ غٛودُطُمْ يٛنْکِ طُمْ طٛنْ اٜ يٜىٰسٛ مَوْٻٜ ٻٜنْ طٛنْ؞ وَلَا بَاوَيْطٛ اٜکِّتَاکِ غِمٛلْ نغٛلْ، سٜيْ ٻٜنْ طٛنْ يِمْٻٜ 144,000 تَنْ ٻٜ طُمْ رِمْطِنِ دَغَ دُونِيَارُ؞ ⁴کَمْٻٜ نغٛنِ غَطُٻٜ جٛنْدٜ لَمْندٜ نغَمْ ٻٜ مٜىٰطَايِ وَلْدُکِ اٜ رٜوْٻٜ، اٜ ٻٜ تٛکَّ کَرٛورِ ندِنْ فُو تٛ ندِ فَعِ؞ کَمْٻٜ نغٛنِ رِمْطِنَاٻٜ ندٜرْ يِمْٻٜ حٛرِيٻٜ، کَمْٻٜ نغٛنِ ٻٜ طُمْ اَرْتِ حٛکُّکِ اَللَّه اٜ کَرٛورِ ندِنْ؞ ⁵طُمْ مٜىٰطَايِ نَنْکِ فٜوْرٜ دَغَ کٛنْدُطٜ مَٻّٜ، نغَمْ ٻٜ مٜىٰطَايِ وَطُکِ غٛطُّمْ کٛ وٛوطَا؞

لِلَلْ مَلَاعِکَعٜنْ تَتٛ

⁶ندٜنْ مِ يِعِي غٛطّٛ مَلَاعِکَاجٛ اٜ فِيرَ تٛنْ دٛوْ، اٜ مٛ يَادَ اٜ حَبَرُ بٜلْطُمْ تَبِتَيْطُمْ نغَمْ اٛ وَعَجِنَنَ يِمْٻٜ دُونِيَارُ ٻٜ کٛو نغٛلٜ لٜݧٛلْ، اٜ کٛو ٻٜيٜ يِمْٻٜ، اٜ کٛو نغَلٜ طٜمْنغَلْ، اٜ کٛو ندِيٜ لٜيْدِ؞ ⁷اٛ پٜفْتِ حٛنٛنْدٜ سٜمْبٜىٰ اٛ وِعِ، ‏«‏کُلٜىٰ اَللَّه مَوْنِنٜىٰمٛ!‏ نغَمْ شَرٜلْ نغٜلْ اٛ وَطَنْتَ دُونِيَارُ کِيتَ وَطِي؞ مَوْنِنٜىٰ تَغُطٛ دٛوْ اٜ لٜيْ، اٜ مَايٛ اٜ تٛ ندِيَمْ ٻُلَتَ؞»‏

⁸سٜيْ مَلَاعِکَاجٛ طِطَٻٛ تٛکِّ اَرَنْدٜىٰجٛ اٛنْ اٜ وِعَ، ‏«‏غَرِيرِ بَابِيلَ حَلْکَامَ!‏ غَرِيرِ مَوْندِ ندِنْ ندِ حَلْکَامَ!‏ ندِ يَرْنِي لٜݧِ وٛنْغُ نجَرُ غَيْلِتَيْنغُ حٛورٜ، وَاتٛ نجٜىٰنُ، ندِ فٛوطٛيِ مٛنّٜرٜ اَللَّه؞»‏

⁹سٜيْ مَلَاعِکَاجٛ تَتَٻٛ تٛکِّ طِطٛ اَرَنْدٜعٜنْ ٻٜنْ اٜ وِعَ اٜ سٜمْبٜ، ‏«‏فُو مَوْنِنْطٛ ندِنْ طٛنْ مَرْدِ اَرَنْدٜىٰرِ اٜ نغُنْکِوَ نَنْدُنغَ اٜ مَيْرِ، ندٜنْ جَٻِ اَلَامَ مَيْرِ اٜ جُنْغٛ مُوطُمْ کٛو اٜ تِيندٜ مُوطُمْ، ¹⁰اٛ يَرَيْ بٛنٜ کَلُّطُمْ طُمْ اَللَّه سِرْيِي اٜ سٜمْبٜ مُوطُمْ ندٜرْ تُمُّدٜ مٛنّٜرٜ مُوطُمْ؞ طُمْ تٛرِّرَيْمٛ حِيتٜ اٜ کِبِرِتُ يٜىٰسٛ مَلَاعِکَعٜنْ شٜنِيٻٜ اٜ کَرٛورِ ندِنْ؞ ¹¹شُرْکَ حِيتٜ غُلَيْنغٜٻٜ کَ وَطَيْ کَ اُمَّاکِ دٛوْ حَا اَبَدَا اَبَدِنْ؞ ٻٜنْ طٛنْ مَوْنِنْٻٜ مَرْدِ ندِنْ طٛنْ اٜ نغُنْکِوَ نَنْدُنغَ اٜ مَيْرِ اٜ فُو غَطَنَاٻٜ اَلَامَ اِنْدٜ مَيْرِ، ٻٜ کٜٻَتَا اُسْتَنٜىٰکِ بٛنٜ جٜمَّ اٜ ݧَلَوْمَ؞»‏

¹²نغَمْ مَاجُمْ يِمْٻٜ اَللَّه تٛکّٛوٻٜ کٛ اٛ وِعِ کٛولِيٻٜ يٜىٰسُ نغَطَ مُݧَلْ؞

¹³سٜيْ ڤُطُّتُمِ نَنْمِ وٛنْدٜ حٛنٛنْدٜ دَغَ دٛوْ اٜ وِعَ، ‏«‏وِنْدُ طُعُمْ، ‏‹‏ٻٜ بَرْکِطِنَاٻٜ مَايَيْٻٜ دَغَ جٛونِ اٜ تٛکِّ جٛومِرَاوٛ؞›‏ »‏

رُوحُ اَللَّه وِعِي، ‏«‏غٛونغَ، ٻٜ شِوْتٛتٛ دَغَ کُوغَلْ مَٻّٜ اٜ تٛرَّ مَٻّٜ، نغَمْ کٛ ٻٜ نغَطِ تٛکَّيْٻٜ؞»‏

ݧَلْندٜ جَانغٛ

¹⁴ندٜنْ مِ رَارِي سٜيْ نغِيمِ غٛطّٜ دُولٜ دَنٜىٰجٜ اٜ وٛودِ غٛطّٛ بٛ ٻِي نٜطّٛ اٜ جٛوطِي دٛوْ مَاجٜ، اٜ مٛ تَارِ غِيفٛلْ جِينَارِ تٛ حٛورٜ مَاکٛ، اٜ مٛ جٛغِي لَوْجٜىٰرُ ݧَاطُندُ اٜ جُنْغٛ مَاکٛ؞ ¹⁵سٜيْ غٛطّٛ مَلَاعِکَاجٛ وُرْتٛيِي دَغَ ندٜرْ وُرٛ شٜنِينغٛ تٛنْ دٛوْ اٛ مٜتَنِ جٛوطِيطٛ دٛوْ دُولٜ اٛنْ اٜ حٛنٛنْدٜ شٜمْبِنْدٜ اٛ وِعِ، ‏«‏وَطُ لَوْجٜىٰرُ مَاطَ، ڤُطَّا تَپُکِ کٛ ٻٜنْدِ، نغَمْ شَرٜلْ فٜعُّکِ غٜسٜ دُونِيَارُ وَطِي؞»‏ ¹⁶سٜيْ اٛنْ طٛنْ جٛوطِيطٛ دٛوْ دُولٜ وَطِ لَوْجٜىٰرُ مُوطُمْ تَپِ کٛ ٻٜنْدِ ندٜرْ دُونِيَارُ؞

¹⁷طٛنْمَا غٛطّٛ مَلَاعِکَاجٛ وُرْتٛيِي دَغَ ندٜرْ وُرٛ شٜنِينغٛ ندٜرْ وُرٛ اَللَّه تٛنْ دٛوْ؞ کَنْکٛ مَا اٜ مٛ جٛغِي لَوْجٜىٰرُ ݧَاطُندُ؞

¹⁸سٜيْ غٛطّٛ مَلَاعِکَاجٛ ڤَامَنٛووٛ حِيتٜ وُرْتٛيِي دَغَ ندٜرْ تٛ طُمْ وُلَتَ اُرْدٜ؞ اٛ مٜتَنِ مَلَاعِکَاجٛ جٛغِيطٛ لَوْجٜىٰرُ وٜلْندُ ندٜرْ حٛنٛنْدٜ شٜمْبِنْدٜ اٛ وِعِ، ‏«‏وَطُ لَوْجٜىٰرُ مَاطَ تَپَا اِنَبٛوجٜ دُونِيَارُ، نغَمْ نغٜسَ اِنَبٛوجٜ دُونِيَارُ ٻٜنْدِي؞»‏ ¹⁹سٜيْ مَلَاعِکَاجٛ اٛنْ وَطِ لَوْجٜىٰرُ مُوطُمْ ندٜرْ دُونِيَارُ تَپِ ٻِکّٛيْ اِنَبٛوجٜ دَغَ لَيِ مَاجٜ، اٛ حُبِيکٛيْ ندٜرْ نغَيْکَ تٛ طُمْ يَاٻَتَکٛيْ؞ طُعُمْ حٛلِّ نٛ اَللَّه مٛنِّرَنْتَ کَلُّٻٜ؞ ²⁰طُمْ يَاٻِکٛيْ ندٜرْ نغَيْکَ کَنْ غَطَ غَرِيرِ؞ پِيپَمْ وَطِ کَ وُرْتٛيَاکِ اٜ دٛغَّ دَغَ ندٜرْ نغَيْکَ کَنْ، تٛ طَمْ يَارِ وَطِي مِلْ 692 ندٜنْ لُغُّکِ مَاجَمْ وَطِي سَوْرُ غٛعٛ؞

بٛنٜ جٛوٜىٰطِطِ شَکِتِيطُمْ

¹سٜيْ نغِيمِ غٛطُّمْ اَلَامَ تٛنْ دٛوْ مَوْطُمْ کَيْطِنِيطُمْ؞ مِ يِعِي مَلَاعِکَعٜنْ نجٛوٜىٰطِطٛ جٛغِيٻٜ بٛنٜ جٛوٜىٰطِطِ کَلُّطُمْ شَکِتِيطُمْ، نغَمْ کَنْجٜ نغٛنِ کٜىٰرٛلْ مٛنّٜرٜ اَللَّه؞

²سٜيْ نغِيمِ غٛطُّمْ بٛ مَايٛ دَارٛلّٜ حَوْتِ اٜ حِيتٜ؞ ندٜنْ مِ يِعِ کٜٻُٻٜ جَالٛرْغَلْ دٛوْ مَرْدِ اَرَنْدٜىٰرِ ندِنْ طٛنْ اٜ نغُنْکِوَ نَنْدُنغَ اٜ مَيْرِ اٜ لَمْبَ کٛلَّيْطُمْ اِنْدٜ مَيْرِ؞ اٜ ٻٜ ندَرِي دَاندٜ مَايٛ دَارٛلّٜ نغٛنْ اٜ ٻٜ نجٛغِي غَرَايَاجِ طِ اَللَّه حٛکِّٻٜ؞ ³اٜ ٻٜ نغِمَ غِمٛلْ مُوسَ مَشُّطٛ اَللَّه اٜ غِمٛلْ کَرٛورِ ندِنْ، اٜ ٻٜ مبِعَ،

‏«‏يَا اَللَّه جٛومِرَاوٛ جٛومُ بَوْطٜ،

کُوطٜ مَاطَ طٜ مَوْطٜ کَيْطِنِيطٜ؞

لَامِيطٛ لٜپِّ فُو،

کٛو طُمٜ کٛ نغَطَتَا اٜ وٛودِ اَادِلَاکُ اٜ غٛونغَ!‏

⁴مٛيٜ وٛنِ حُلَتَامَ، يَا جٛومِرَاوٛ؟

مٛيٜ وٛنِ مَوْنِنْتَا مَنْغُ مَاطَ؟

نغَمْ اَنْ تَنْ وٛنِ شٜنِيطٛ؞

يِمْٻٜ دُونِيَارُ فُو مَوْنِنْتٜ،

نغَمْ کٛو مٛيٜ يِعِي کُوطٜ مَاطَ طٜ اَادِلَاکُ؞»‏

⁵غَطَ نٛنْ مِ يِعِي وِغٜىٰرٜ ٻُرْندٜ سٜنَاکِ ندٜرْ وُرٛ اَللَّه تٛنْ دٛوْ اٜ اٛمْتِي؞ ⁶سٜيْ ٻٜنْ طٛنْ مَلَاعِکَعٜنْ نجٛوٜىٰطِطٛ جٛغِيٻٜ بٛنٜ کَلُّطُمْ مبُرْتٛيِي دَغَ ندٜرْ وُرٛ نغٛنْ اٜ ٻٜ ٻٛرْنِي کٛلْتٜ طٜلْمُطٜ بٛطّٜ طٜلْکِتٛتٛوطٜ، اٜ ٻٜ تَادِي تَادٛرْطٜ جِينَارِ تٛ غَبَاجٜ مَٻّٜ؞ ⁷سٜيْ غٛعٛ ندٜرْ تَغَاطُمْ نَيُمْ غٛودُطُمْ يٛنْکِ طُمْ طٛنْ حٛکِّ مَلَاعِکَعٜنْ نجٛوٜىٰطِطٛ ٻٜنْ تُمُّطٜ جٛوٜىٰطِطِ طٜ جِينَارِ اٜ طٜ کٜىٰوِ مٛنّٜرٜ اَللَّه غٛودُطٛ يٛنْکِ حَا اَبَدَا اَبَدِنْ؞ ⁸سٜيْ شُرْکَ پِوٛيِ دَغَ تٛ بَوْطٜ اَللَّه اٜ تٜدُّنغَلْ مَاکٛ حٜىٰوِ وُرٛ نغٛنْ حَا وَلَا بَوْطٛ نَتُّکِنغٛ نَا بٛنٜ جٛوٜىٰطِطِ طُمْ طٛنْ طُمْ مَلَاعِکَعٜنْ نجٛوٜىٰطِطٛ ندٜعِي؞

تُمُّطٜ بٛنٜ جٛوٜىٰطِطِ طُمْ مٛنّٜرٜ اَللَّه

¹سٜيْ نَنْمِ وٛنْدٜ حٛنٛنْدٜ شٜمْبِنْدٜ دَغَ ندٜرْ وُرٛ شٜنِينغٛ تٛنْ دٛوْ اٜ ندٜ وِعَ مَلَاعِکَعٜنْ نجٛوٜىٰطِطٛ ٻٜنْ طٛنْ، ‏«‏نجَحٜىٰ ندُفَنٛنْ دُونِيَارُ تُمُّطٜ جٛوٜىٰطِطِ طٜنْ طٛنْ طٜ مٛنّٜرٜ اَللَّه!‏»‏

²دَغَ طٛنْ سٜيْ مَلَاعِکَاجٛ اَرَنْدٜىٰجٛ يَحِ وَيْلِ کٛ وٛنِ ندٜرْ تُمُّدٜ مُوطُمْ دٛوْ دُونِيَارُ؞ سٜيْ نغٛکّٛ ڤُتّٛ نَوْکٛ کَلُّکٛ مبُرْتٛنٛيِي ٻٜنْ طٛنْ غٛودُٻٜ اَلَامَ مَرْدِ اَرَنْدٜىٰرِ ندِنْ طٛنْ اٜ مَوْنِنْٻٜ نغُنْکِوَ نَنْدُنغَ اٜ مَيْرِ؞

³مَلَاعِکَاجٛ طِطَٻٛ مَا وَيْلِ کٛ وٛنِ ندٜرْ تُمُّدٜ مُوطُمْ ندٜرْ مَايٛ؞ سٜيْ ندِيَمْ مَايٛ نغٛنْ وَرْتِ بٛ پِيپَمْ مَيْطٛ؞ کٛو طُمٜ کٛ وٛودِ يٛنْکِ غٛنْطُمْ ندٜرْ مَاغٛ وَاتِ؞

⁴سٜيْ مَلَاعِکَاجٛ تَتَٻٛ مَا وَيْلِ کٛ وٛنِ ندٜرْ تُمُّدٜ مُوطُمْ ندٜرْ شَنْطِ اٜ تٛ ندِيَمْ ٻُلِرٛيْتَ؞ سٜيْ طُمْ فُو طُمْ وَرْتِ پِيپَمْ؞ ⁵مِ نَنِي مَلَاعِکَاجٛ ڤَامَنٛووٛ ندِيَمْ اٜ وِعَ، ‏«‏يَا شٜنِيطٛ، اَنْ وٛنِ ندٜنّٛ اَنْ وٛنِ جٛونِ؞ اَنْ اَ اَادِلِيجٛ ندٜرْ کِيتَ مَاطَ کَنْ طٛنْ؞ ⁶نغَمْ کَلُّٻٜ ندُفِي پِيپَمْ يِمْٻٜ مَاطَ اٜ اَنَّبٛعٜنْ مَاطَ، رَطُّمْ بٛو اَ حٛکِّيٻٜ پِيپَمْ ٻٜ نجَرَ نغَمْ نٛنْ حَانَنِٻٜ؞»‏ ⁷سٜيْ نَنْمِ حٛنٛنْدٜ دَغَ تٛ طُمْ وُلَتَ اُرْدٜ وٜلْندٜ اٜ وِعَ، ‏«‏غٛونغَ، اَللَّه جٛومِرَاوٛ جٛومُ بَوْطٜ!‏ اَ وَطِرَ کِيتَ اٜ غٛونغَ اٜ اَادِلَاکُ!‏»‏

⁸سٜيْ مَلَاعِکَاجٛ نَيَٻٛ وَيْلِ کٛ وٛنِ ندٜرْ تُمُّدٜ مُوطُمْ دٛوْ نَانغٜ؞ سٜيْ طُمْ اَلِنغٜ نغٜ وُلَ يِمْٻٜ غُلْطُمْ کَلُّطُمْ؞ ⁹سٜيْ نغٜ وُلِ يِمْٻٜ نٛ حَلِّ، ٻٜ کُطِ اِنْدٜ اَللَّه، کَنْکٛ غٛودُطٛ لَامُ دٛوْ بٛنٜ جٛوٜىٰطِطِ طُمْ طٛنْ؞ اَمَّا ٻٜ تُوبَايِ ٻٜ مَوْنِنَايِمٛ؞

¹⁰مَلَاعِکَاجٛ نجٛوَٻٛ مَا وَيْلِ کٛ وٛنِ ندٜرْ تُمُّدٜ مُوطُمْ دٛوْ جٛوطٛرْغَلْ لَامُ مَرْدِ اَرَنْدٜىٰرِ ندِنْ، سٜيْ ݧِوْرٜ مَٻِّ کٛو تٛيٜ تٛ ندِ لَامٛتٛو؞ يِمْٻٜ ݝَتِ طٜمْطٜ مَٻّٜ نغَمْ بٛنٜ، ¹¹ٻٜ کُطِ اَللَّه مٛ دٛوْ نغَمْ نَوْطُمْ ڤُتّٛ کَلُّکٛ کٜٻُکٛٻٜ؞ اَمَّا فُو اٜ نٛنْ ٻٜ تُوبَايِ دَغَ کُوطٜ مَٻّٜ کَلُّطٜ؞

¹²سٜيْ مَلَاعِکَاجٛ جٛوٜىٰغٛعٛوجٛ وَيْلِ کٛ وٛنِ ندٜرْ تُمُّدٜ مُوطُمْ ندٜرْ اِلٛووٛ مَنْغٛ بِعٜتٜىٰنغٛ يُفٜرِتِسْ مَنْغٛ؞ سٜيْ نغٛ ٻٜىٰٻِ نغٛ يٛورِ نغَمْ طُمْ مٛعِّنَنَ لَامِيٻٜ فُونَ لَاوٛلْ؞ ¹³سٜيْ نغِيمِ غٛطِّ غِنِّ کَنْجِ تَتِ اٜ طِ نَنْدِ اٜ ڤَاٻِ، غٛعٛتٛلْ اٜ وُرْتٛيٛو دَغَ ندٜرْ حٛنْدُکٛ مبٛوغَ نغَنْ طٛنْ، غٛعٛتٛلْ بٛو اٜ وُرْتٛيٛو دَغَ ندٜرْ حٛنْدُکٛ مَرْدِ اَرَنْدٜىٰرِ ندِنْ طٛنْ، ندٜنْ غٛعٛتٛلْ اٜ وُرْتٛيٛو دَغَ ندٜرْ حٛنْدُکٛ اَنَّبِيجٛ اٛنْ طٛنْ مٛ فٜوْرٜ؞ ¹⁴کَنْجِ نغٛنِ غِنِّ غَطٛوجِ کُوطٜ کَيْطِنِيطٜ؞ کَنْجِ نغٛنِ جَحٛوجِ تٛ لَامِيٻٜ دُونِيَارُ فُو طِ کَوْرِتَٻٜ نغَمْ کٛنُ اٜ ندٜنْ طٛنْ ݧَلْندٜ مَوْندٜ ندٜ اَللَّه جٛومُ بَوْطٜ؞

¹⁵يٜىٰسُ وِعِ، ‏«‏رَطُّمْ اٜ مِ وَرٛيَ بٛ غُجّٛ!‏ اٛ بَرْکِطِنَاطٛ فُو جٛوطِيطٛ اٜ سِرْيِي نغَمْ ٻٛرْنٛو کٛلْتٜ مُوطُمْ نغَمْ تٛع اٛ دِلَّ اٛ ٻٛرْنَاکِ اٛ سٜمْتَ يٜىٰسٛ لٜݧٛلْ؞»‏

¹⁶سٜيْ غِنِّ طِنْ کَوْرِتِ لَامِيٻٜ ٻٜنْ تٛ وِغٜىٰرٜ بِعٜتٜىٰندٜ اَرْمَغٜدٛنْ ندٜرْ طٜمْنغَلْ اِبْرَانِيَنْکٛورٜ؞

¹⁷ندٜنْ مَلَاعِکَاجٛ نجٛوٜىٰطِطَٻٛ وَيْلِ کٛ وٛنِ ندٜرْ تُمُّدٜ مُوطُمْ اٜ نجَيْرِ دٛوْ؞ سٜيْ وٛنْدٜ حٛنٛنْدٜ شٜمْبِنْدٜ وُرْتٛيِي دَغَ جٛوطٛرْغَلْ لَامُ ندٜرْ وُرٛ شٜنِينغٛ تٛنْ دٛوْ اٜ ندٜ وِعَ، ‏«‏طُمْ حٜىٰݧِي!‏»‏ ¹⁸سٜيْ طُمْ وَطِ کَ مَپّٜ اٜ رِغَّاکِ اٜ ڤَلْمَالِ اٜ دِمْبٛلْ لٜيْدِ کَلُّنغٛلْ اِرِ نغٛلْ طُمْ مٜىٰطَايِ وَطُکِ دَغَ طُمْ فُطِّ تَغُکِ يِمْٻٜ؞ دِمْبٛلْ نغٛلْ ٻُرِي کٛو نغٛلٜ دِمْبٛلْ نغٛلْ طُمْ مٜىٰطِ وَطُکِ حَلُّکِ؞ ¹⁹غَرِيرِ بَابِيلَ ندِنْ طٛنْ مَوْندِ سٜنْدِي تَتِ، غَرِيجٜ دُونِيَارُ مَا نجَنِ نجَنِنِ؞ سٜيْ اَللَّه سِفْتٛرِ اٜ غَرِيرِ بَابِيلَ مَوْندِ، اٛ وَطِندِ ندِ يَرِ تٛرَّ مٛنّٜرٜ مَاکٛ کَلُّندٜ؞ ²⁰کٛو ندِيٜ لٜيْدِ نغٛنْدِ شَکَ ندِيَمْ ندِيَمْ ݧَامِندِ، ندٜنْ کٛشّٜىٰجٜ شَنْکِتِي؞ ²¹مَلٜمَلّٜىٰحٛ مَوْکٛ تٜدِّرْکٛ بٛ بُحُ مَسَرَارِ نغَطِ کَ يَنٛيْکِ دٛوْ يِمْٻٜ دَغَ دٛوْ حَا يِمْٻٜ ٻٜنْ کُطِ اَللَّه نغَمْ بٛنٜ مَلٜمَلّٜحٛ کٛنْ، نغَمْ تٛرَّ کَنْ حَلِّي نَاع سٜطَّ!‏

دٜبّٛ اٜ مَرْدِ ندِنْ

¹سٜيْ غٛعٛتٛ ندٜرْ مَلَاعِکَعٜنْ نجٛوٜىٰطِطٛ ٻٜنْ طٛنْ جٛغِيٻٜ تُمُّطٜ جٛوٜىٰطِطِ طٜنْ وَرِ وِعِيَمْ، ‏«‏وٛرٛيْ مِ حٛلّٛيْمَا نٛ اَللَّه حَلْکِرْتَ کَارُوَاجٛ اِنْدِنْطٛ، اٛنْ طٛنْ وَاتٛ غَرِيرِ مَوْندِ ندِنْ طٛنْ نغٛنْدِ حَادٜ شَنْطِ؞ ²لَامِيٻٜ دُونِيَارُ نغَطِدِي نجٜىٰنُ اٜ مَاکٛ؞ نجٜىٰنُ طُمْ ٻٜ نغَادِ يِلْتِيٻٜ بٛ اٛ حٛکُّٻٜ نجَرُ غَيْلِتَيْنغُ حٛورٜ، کَمْٻٜ اٜ يِمْٻٜ دُونِيَارُ فُو؞»‏

³ندٜرْ وَحَيُ طُمْ، مَلَاعِکَاجٛ اٛنْ حٛشِّيَمْ يَارِيَمْ ندٜرْ لَدّٜ تٛنْ نغِيمِ غٛطّٛ دٜبّٛ اٜ جٛوطِي دٛوْ وٛنْدِ مَرْدِ مبٛطٜىٰرِ شٛلٛيْ؞ ٻَنْدُ مَيْرِ فُو اٜ وٛودِ اِنْطٜ کُطٛوجٜ اَللَّه اٜ ندِ وٛودِ کٛعٜ جٛوٜىٰطِطِ اٜ لُوٜ سَڤّٛ؞ ⁴دٜبّٛ اٛنْ اٜ ٻٛرْنِي کٛلْتٜ شُوطِيجٜ اٜ بٛطٜىٰجٜ شٛلٛيْ، اٜ مٛ مٛعِّتِنٛرِي شٛدِّ جِينَارِ، اٜ شٛدِّ غَطِرَاندِ کَاپٜ طٜ شٜىٰدٜ فٜىٰرٜ‑فٜىٰرٜ؞ اٜ مٛ جٛغِي تُمُّدٜ جِينَارِ اٜ جُنْغٛ مَاکٛ اٜ ندٜ حٜىٰوِ ندِيَمْ اِنَبٛجَمْ، وَاتٛ کٛ نٜفْنِي کَلُّطُمْ طُمْ اٛ وَطِدِ اٜ وٛرْٻٜ؞ ⁵اٜ تِيندٜ مَاکٛ طُمْ وِنْدِ وٛنْدٜ اِنْدٜ غٛودُندٜ مَعَنَ شُوطِيطُمْ، وِعُکِ، ‏«‏بَابِيلَ مَوْندِ اِنَّ کَارُوَعٜنْ اِنَّ کٛو طُمٜ کٛ نٜفْنِي طُمْ دُونِيَارُ؞»‏ ⁶سٜيْ نغِيمِ دٜبّٛ اٛنْ اٜ يِلْتِي نغَمْ پِيپَمْ يِمْٻٜ اَللَّه طَمْ اٛ يَرِ اٜ پِيپَمْ ٻٜ طُمْ وَرِ نغَمْ تٛکُّکِ يٜىٰسُ؞

ندٜ نغِيمٛومِ مِ حَيْطِنِي نَاع سٜطَّ؞ ⁷اَمَّا مَلَاعِکَاجٛ اٛنْ پَمِيَمْ وِعِ، ‏«‏نغَمْ طُمٜ کَيْطِنْتَا؟ مِ وِعٜتٜ مَعَنَ سِرُّ دٜبّٛ اٛعٛ اٜ سِرُّ مَرْدِ کٛشُّندِمٛ نغٛودُندِ کٛعٜ جٛوٜىٰطِطِ اٜ لُوٜ سَڤّٛ؞ ⁸مَرْدِ ندِ نغِيطَا، ندٜنّٛ اٜ ندِ وٛودُنٛو يٛنْکِ، جٛونِ ندِ وَلَا يٛنْکِ، ندٜنْ طٛعٛ يٜىٰسٛ ندِ وُرْتٛيْتٛ دَغَ ندٜرْ نغَيْکَ کَلُّکَ لُغُّکَ ندِ يَحَ تٛ ندِ حَلْکٜتٜىٰ؞ جٛوطِيٻٜ اٜ دُونِيَارُ ٻٜ طُمْ وِنْدَايِ اِنْطٜ مَٻّٜ ندٜرْ دٜفْتٜرٜ يٛنْکِ کٛ دُونِيَارُ تَغٜىٰ، ٻٜ کَيْطِنَيْ اٜ يِعُکِ مَرْدِ ندِنْ طٛنْ؞ نغَمْ ندٜنّٛ اٜ ندِ وٛودُنٛو يٛنْکِ، جٛونِ ندِ وَلَا يٛنْکِ، ندٜنْ ندِ وَرْتٛيَيْ؞

⁹‏«‏طٛعٛ اٜ حَانِ نٜطّٛ حُوتِرَ فَامُ نغَمْ اَنْدُکِ مَعَنَ طُعُمْ؞ کٛعٜ جٛوٜىٰطِطِ طٜنْ طٛنْ طُمْ پٛولٜ جٛوٜىٰطِطِ تٛ دٜبّٛ اٛنْ طٛنْ جٛوطٛتٛو، ¹⁰طٛنْمَا کَنْجٜ نغٛنِ لَامِيٻٜ نجٛوٜىٰطِطٛ؞ نجٛوٛ ندٜرْ مَٻّٜ مَايِ، ندٜنْ غٛعٛتٛ اٜ لَامٛو جٛونِ، غٛعٛتٛ اٛنْ بٛو وَرَايِ تَوْ؞ تٛ اٛ وَرِي، اٛ لَامٛتٛ شَرٜلْ سٜطَّ تَنْ؞ ¹¹مَرْدِ ندِنْ طٛنْ غٛودُنٛوندِ يٛنْکِ، جٛونِ بٛو ندِ وَلَا يٛنْکِ، کَيْرِ وٛنِ غٛعٛتٛ ندٜرْ لَامِيٻٜ نجٛوٜىٰطِطٛ، ندِ وَرْتَيْ لَامِيطٛ نجٛوٜىٰتَتَٻٛ، ندٜنْ طُمْ حَلْکَندِ؞

¹²‏«‏لُوٜ طٜنْ طٛنْ سَڤّٛ طٜ نغِيطَا بٛو طُمْ لَامِيٻٜ سَڤّٛ ٻٜ ڤُطَّايِ لَامُ تَوْ، اَمَّا طُمْ حٛکَّيْٻٜ لَامُ ٻٜ لَامٛو اَوَ غٛعٛ اٜ مَرْدِ ندِنْ طٛنْ؞ ¹³ٻٜ فُو ݧُمٛ مَٻّٜ غٛعٛ، ندٜنْ ٻٜ کٛکَّيْ مَرْدِ ندِنْ طٛنْ بَوْطٜ مَٻّٜ اٜ لَامُ مَٻّٜ؞ ¹⁴ٻٜ کٛنَيْ کَرٛورِ ندِنْ، اَمَّا کَرٛورِ ندِنْ حٜٻَ جَالٛرْغَلْ دٛوْ مَٻّٜ نغَمْ کَنْکٛ وٛنِ جٛومِرَاوٛ جٛومِرَاٻٜ، لَامِيطٛ لَمْلَمْٻٜ؞ وٛنْدُٻٜ اٜ مَاکٛ بٛو ٻٜ نٛدَّاٻٜ، ٻٜ شُٻَاٻٜ، ٻٜ تٛکُّٻٜ جٛومِرَاوٛ بٛطُّمْ؞»‏

¹⁵طٛنْمَا مَلَاعِکَاجٛ اٛنْ وِعِيَمْ، ‏«‏ندِيَمْ طَمْ طٛنْ طَمْ نغِيطَا، تٛ دٜبّٛ اٛنْ طٛنْ جٛوطِي؞ کَنْجَمْ وٛنِ لٜݧِ، اٜ يِمْٻٜ طُطْٻٜ دَغَ لٜيْطٜ فٜىٰرٜ‑فٜىٰرٜ اٜ طٜمْطٜ فٜىٰرٜ‑فٜىٰرٜ؞ ¹⁶لُوٜ طٜنْ طٛنْ بٛو سَڤّٛ طٜ نغِيطَا، کَنْجٜ اٜ مَرْدِ ندِنْ طٛنْ طٜ نغَݧَيْ دٜبّٛ اٛنْ طٛنْ طٜ تٜىٰتَ کٛو طُمٜ کٛ اٛ وٛودِ، طٜ ٻٛرْتَمٛ، طٜ ݧَامَ کُسٜلْ ٻَنْدُ مَاکٛ، طٜ نغُلِرَمٛ حِيتٜ؞ ¹⁷نغَمْ اَللَّه وَطِيٻٜ ٻٜ کُوَ کٛ اٛ يِطِ ٻٜ نغَرْتَ ٻٜ ݧُمٛ غٛعٛ، ٻٜ کٛکَّ مَرْدِ ندِنْ لَامُ مَٻّٜ، نَا طُمْ حٜبِّنِي کٛ اَللَّه وِعِ؞

¹⁸‏«‏دٜبّٛ اٛنْ طٛنْ مٛ نغِيطَا، کَنْکٛ وٛنِ غَرِيرِ مَوْندِ ندِنْ طٛنْ غٛودُندِ لَامُ دٛوْ لَامِيٻٜ دُونِيَارُ؞»‏

حَلْکُکِ بَابِيلَ

¹غَطَ نٛنْ مِ يِعِي غٛطّٛ مَلَاعِکَاجٛ اٜ جِڤّٛيٛو دَغَ دٛوْ؞ اٜ مٛ وٛودِ لَامُ مَوْطُمْ تٜدُّنغَلْ مَاکٛ يٜيْنَنِي دُونِيَارُ فُو؞ ²سٜيْ اٛ نٛدِّ ندٜرْ حٛنٛنْدٜ شٜمْبِنْدٜ، اٛ وِعِ، ‏«‏غَرِيرِ بَابِيلَ حَلْکَامَ!‏ غَرِيرِ مَوْندِ يَنِي!‏ ندِ وَرْتِي تٛ غِنِّ نجٛوطٛتٛو، تٛ غِنِّ کَوْرِتَتَ اٜ کٛو طِيٜ شٛلِّ نٜفْنِيطِ کَرْمِنِيطِ؞ ³نغَمْ کَيْرِ وٛنِ غَرِيرِ بٛنُّندِ لٜݧِ دُونِيَارُ اٜ وَادُکِ نجٜىٰنُ اٜ مَيْرِ؞ نجٜىٰنُ طُمْ ٻٜ نغَادِ وَرْتَنِيٻٜ بٛ نجَرُ غَيْلِتَيْنغُ حٛورٜ؞ لَامِيٻٜ دُونِيَارُ نغَادِي نجٜىٰنُ اٜ مَيْرِ؞ سٛودٛوٻٜ اٜ شٛورِتٛو کٛو تٛيٜ ندٜرْ دُونِيَارُ کٜٻِي رِسْکُ نغَمْ بَابِيلَ اٜ يِطِ وَطُکِ نجٜىٰنُ نَاع سٜطَّ؞»‏

⁴سٜيْ نَنْمِ وٛنْدٜ حٛنٛنْدٜ دَغَ دٛوْ اٜ ندٜ وِعَ،

‏«‏اٛنٛنْ يِمْٻٜ اَمْ، مبُرْتٛيٜىٰ دَغَ ندٜرْ مَيْرِ،

نغَمْ تٛع حَکّٜىٰجِ مَيْرِ حَوْتَ اٜ مٛوطٛنْ،

نغَمْ تٛع بٛنٜ کَلُّطُمْ کٜٻَيْطُمْندِ حٜٻَعٛنْ؞

⁵نغَمْ حَکّٜىٰجِ مَيْرِ تٛوِي حَا کٜوْتِي دٛوْ؛

اَللَّه بٛو يٜجِّتَايِ کَلُّطُمْ طُمْ ندِ وَطِ؞

⁶نغَطَنٜىٰندِ نٛنْ نٛ ندِ وَطِ فُو؞

کٛ ندِ وَطِ، نغَطَنٜىٰندِ نٛنْ ندٜ طِطِ؞

شُوتَنٜىٰندِ کٛ ٻُرِ سٜمْبٜ ندٜ طِطِ ندٜرْ تُمُّدٜ مَيْرِ کٛ ندِ سُوتَنِ وٛٻّٜ؞

⁷کٛکّٜىٰندِ بٛنٜ ڤٛوطَنٜىٰندِ وَنَّارٜ، نٛنْ نٛ ندِ مَوْنِنِرِ حٛورٜ مَيْرِ اٜ نَنْکِ بٜلْطُمْ طُمْ ندِ نَنِ؞

نغَمْ اٜ ندِ وِعَ حٛورٜ مَيْرِ،

‏‹‏اٜ مِ جٛوطِي، مِ لَامِيطٛ؞

مِنْ، نَاع مِ دٜبّٛ مٛ غٛرْکٛ مُوطُمْ مَايِ،

مِ نَتَّتَا وَنَّارٜ؞›‏

⁸نغَمْ نٛنْ بٛنٜ کَلُّطُمْ وَرَنَيْمٛ ندٜرْ ݧَلْندٜ غٛعٛ،

مَيْدٜ اٜ وَنَّارٜ اٜ وٜىٰلٛ کَلُّنغٛ،

ندٜنْ طُمْ وُلَمٛ اٜ حِيتٜ،

نغَمْ اَللَّه جٛومِرَاوٛ غَطَنَيْطٛمٛ کِيتَ اٛ غٛودُطٛ لَامُ؞»‏

⁹لَامِيٻٜ دُونِيَارُ غَادُٻٜ نجٜىٰنُ اٜ کٛ وٛوطَا اٜ مَاکٛ ٻٜ مبٛيَنَيْمٛ اٜ ٻٜ نغُلَّ تٛ ٻٜ نغِعِي شُرْکَ حِيتٜ ݧَامَيْنغٜمٛ؞ ¹⁰ٻٜ ندَرٛتٛ دَغَ ٻَدَاکِ نغَمْ اٜ ٻٜ کُلَ تٛع تٛرَّ کَ اٛ يَرَتَ حَوْتَ اٜ مَٻّٜ، اٜ ٻٜ مبِعَ، ‏«‏وَيْيٛو!‏ وَيْيٛو!‏ اَنْ غَرِيرِ مَوْندِ!‏ اَنْ بَابِيلَ غَرِيرِ مَوْندِ!‏ ندٜرْ اَوَ غٛعٛ تَنْ تٛرَّ کَلُّکَ يَنٛنٛيِيمَ؞»‏

¹¹سٛودٛوٻٜ اٜ شٛورِتٛو وٛنْٻٜ کٛو تٛيٜ ندٜرْ دُونِيَارُ مبٛيَنَيْمٛ نغَمْ وَنَّارٜ، نغَمْ وَلَا شٛودٛووٛ غٛطُّمْ تٛ مَٻّٜ کَدِنْ؞ ¹²وَلَا شٛودَيْطٛ جِينَارِ مَٻّٜ، اٜ اَجُرْفَارِ مَٻّٜ، اٜ کَاپٜ طٜ شٜىٰدٜ، اٜ لُعُلُعُوجِ مَٻّٜ، اٜ کٛلْتٜ طٜلْمُطٜ لَٻْطٜ طٜلْکِتٛتٛوطٜ، اٜ کٛلْتٜ طٜلْمُطٜ طٜ شٜىٰدٜ بِعٜتٜىٰطٜ سِلِکِ، اٜ کٛلْتٜ شُوطِيجٜ، اٜ کٛلْتٜ بٛطٜىٰجٜ شٛلٛيْ، اٜ کٛو اِرِ طٜيٜ لٜطّٜ شٜحَاطٜ، اٜ کٛو طُمٜ غَطِرَاطُمْ اٜ ݧِيپٜ ݧِيوَ اٜ لٜطّٜ طٜ شٜىٰدٜ، اٜ نجَمْندِ مبٛطٜىٰرِ، اٜ طُمْ جَمْطٜ، اٜ کَاپٜ شٜحَاطٜ طٜ شٜىٰدٜ، ¹³اٜ سِنَمٛنْ، اٜ شٛنْدِ ݧَطّٜ مبٜلْندِ، اٜ اُرْدٜ وٜلْندٜ غُلٜتٜىٰندٜ، اٜ نٜبَّمْ بِعٜتٜىٰطَمْ مُرْ، اٜ اُرْدٜ وٜلْندٜ غُلٜتٜىٰندٜ بِعٜتٜىٰندٜ فِرَنْکِسٜنْ، اٜ ندِيَمْ اِنَبٛجَمْ، اٜ نٜبَّمْ، اٜ شٛنْدِ اَلْکَمَارِ، اٜ شَابَارِ اَلْکَمَارِ، اٜ نَعِ، اٜ بَالِ، اٜ بٜعِ، اٜ کٜىٰکٜىٰجِ ڤُشِّ، اٜ مَشُّٻٜ، وَاتٛ يٛنْکِيجِ يِمْٻٜ؞ ¹⁴سٛودٛوٻٜ اٜ شٛورِتٛو مبِعَيْ، ‏«‏فُو بٛطُّمْ طُمْ نغَطُطَا ٻٜرْندٜ مَاطَ اٜ دٛوْ اَ دُلِّيطُمْ؞ ندٜنْ فُو رِسْکُ مَاطَ اٜ مٛعِّتِنَاکِ مَاطَ اَ دُلِّيطُمْ، اَ فُطِّتَتَا کٜٻَاطُمْ!‏»‏ ¹⁵سٛودٛوٻٜ اٜ شٛورِتٛو کٜٻُٻٜ جَوْدِ ندٜرْ مَيْرِ، ٻٜ ندَرٛتٛ دَغَ ٻَدَاکِ، اٜ ٻٜ کُلَ نغَمْ تٛع طُمْ حَوْتَ اٜ مَٻّٜ ندٜرْ بٛنٜ طُمْ اٛ يَرَتَ، اٜ ٻٜ مبٛيَ سٜمْبٜىٰ، بٛجِّ نَوْطِ؞ ¹⁶ٻٜ مبِعَيْ، ‏«‏وَيْيٛو!‏ وَيْيٛو!‏ اَنْ غَرِيرِ مَوْندِ، ٻٛرْنِنٛوندِ کٛلْتٜ طٜلْمُطٜ لَٻْطٜ طٜلْکِتٛتٛوطٜ، اٜ کٛلْتٜ شُوطِيجٜ، اٜ کٛلْتٜ بٛطٜىٰجٜ شٛلٛيْ، مٛعِّتِنِرِيندِ جِينَارِ، اٜ کَاپٜ طٜ شٜىٰدٜ، اٜ لُعُلُعُوجِ!‏ ¹⁷ندٜرْ اَوَ غٛعٛ تَنْ جَوْدِ ندِنْ فُو حَلْکِي!‏»‏

سٜيْ فُو غٛودُٻٜ کٛمِيجٜ ندِيَمْ اٜ نَتّٛوٻٜطٜ اٜ ڤٛوطَيْٻٜطٜ، اٜ کٛو مٛيٜ شٛودٛووٛ اٜ سٛورِتٛو دٛوْ مَايٛ، ٻٜ ندَرِي دَغَ ٻَدَاکِ، ¹⁸ٻٜ مبٛيِ ندٜ ٻٜ نغِعِ شُرْکَ حِيتٜ ݧَامَيْنغٜمٛ، اٜ ٻٜ مبِعَ، ‏«‏ندِيٜ غَرِيرِ حٜوْتِ غَرِيرِ ندِعِ مَنْغُ؟»‏ ¹⁹ٻٜ شَنْکِتَنِ کٛعٜ مَٻّٜ مبُلْمبُلْدِ ٻٜ نغَطِ کَ بٛجِّ اٜ ٻٜ نغُلَّ اٜ ٻٜ مبِعَ، ‏«‏وَيْيٛو!‏ وَيْيٛو!‏ اَنْ غَرِيرِ مَوْندِ!‏ ٻٜ کٛمِيجٜ ندِيَمْ فُو ندِسْکِ دَغَ جَوْدِ مَيْرِ!‏ اَمَّا ندٜرْ اَوَ غٛعٛ کٛو طُمٜ حَلْکِي!‏»‏

²⁰نَنٜىٰ بٜلْطُمْ اٛنٛنْ وٛنْٻٜ ندٜرْ وُرٛ اَللَّه تٛنْ دٛوْ، يِمْٻٜ اَللَّه اٜ لِلَاٻٜ اٜ اَنَّبٛعٜنْ، نغَمْ اَللَّه وَاتَنَکٜعٛنْ کٛ اٛ وَطَنِعٛنْ!‏

²¹سٜيْ غٛطّٛ مَلَاعِکَاجٛ غٛودُطٛ لَامُ حٛشِّ کَاپَ مَنْغَ اٛ حُبِينغَ ندٜرْ مَايٛ، اٜ مٛ وِعَ، ‏«‏نٛنْ طُمْ حُبٛرْتٛو بَابِيلَ غَرِيرِ مَوْندِ اٜ سٜمْبٜ، طُمْ ٻٜيْدَتَا يِعُکِندِ؞ ²²طُمْ ٻٜيْدَتَا نَنْکِ ڤِيٛوٻٜ غَرَايَاجِ، اٜ يِمٛوٻٜ، اٜ دُودٛوٻٜ دُودَالِ، اٜ دُودٛوٻٜ لُوٜ ندٜرْ مَيْرِ، ندٜنْ طُمْ بٛو فُطِّتَتَا طُمْ يِعَ بَيِلّٛ کٛو شٜحٛووٛ ندٜرْ مَيْرِ، طُمْ فُطِّتَتَا طُمْ نَنَ حٛولٛ نَمَرْدٜ ندٜرْ مَيْرِ!‏ ²³فِتِلَارُ ٻٜيْدَتَا يٜيْنٛو ندٜرْ مَيْرِ؞ طٛنْمَا طُمْ ٻٜيْدَتَا طُمْ نَنَ حٛنٛنْدٜ اَنْغٛوجٛ اٜ ٻَݝَاطٛ ندٜرْ مَيْرِ؞ نغَمْ ندٜنّٛ سٛودٛوٻٜ اٜ شٛورِتٛو ندٜرْ مَيْرِ کَمْٻٜ نغٛنِ مَوْٻٜ دُونِيَارُ، سِحِرِيجِ مَيْرِ بٛو مَجِّنِي يِمْٻٜ دُونِيَارُ! ²⁴ندٜنْ طُمْ تَوْرِيندِ پِيپَمْ اَنَّبٛعٜنْ اٜ طَمْ يِمْٻٜ اَللَّه اٜ طَمْ يِمْٻٜ بَرَاٻٜ فُو ندٜرْ دُونِيَارُ؞»‏

مَوْنِنْکِ اَللَّه تٛنْ دٛوْ

¹غَطَ طٛنْ مِ نَنِي حٛولٛ شٜمْبِنْغٛ بٛ حٛنٛنْدٜ يِمْٻٜ طُطْٻٜ شٜمْبِنْدٜ تٛنْ دٛوْ اٜ ٻٜ نغِمَ اٜ ٻٜ مبِعَ، ‏«‏حَالِلُويَ!‏ اَللَّه مٜىٰطٜنْ جٜيِ کِسْندَمْ اٜ مَنْغُ اٜ لَامُ، ²نغَمْ کِيتَ مَاکٛ اٜ وٛودِ غٛونغَ اٜ اَادِلَاکُ، اٛ حَلْکِي کَارُوَاجٛ اٛنْ طٛنْ مَوْطٛ بٛنُّطٛ دُونِيَارُ اٜ نجٜىٰنُ مُوطُمْ؞ اَللَّه وَاتَنَکٜ مَشُّٻٜ مُوطُمْ ٻٜ کَارُوَاجٛ اٛنْ وَرِ؞»‏ ³سٜيْ ٻٜ فُطِّتِ ٻٜ نَنْغِ غِمٛلْ اٜ ٻٜ مبِعَ، ‏«‏حَالِلُويَ!‏ شُرْکَ حِيتٜ ݧَامُنغٜمٛ وَطَيْ کَ اُمَّاکِ حَا اَبَدَا اَبَدِنْ؞»‏ ⁴سٜيْ مَوْٻٜ ٻٜنْ طٛنْ 42 اٜ طُمْ طٛنْ تَغَاطُمْ نَيُمْ غٛودُطُمْ يٛنْکِ ندِشِّي مَوْنِنِ اَللَّه جٛوطِيطٛ دٛوْ جٛوطٛرْغَلْ لَامُ؞ اٜ ٻٜ مبِعَ، ‏«‏اَامِنْ!‏ حَالِلُويَ!‏»‏

حُمْتٛ تٜىٰغَلْ کَرٛورِ ندِنْ

⁵ندٜنْ وٛنْدٜ حٛنٛنْدٜ دَغَ جٛوطٛرْغَلْ لَامُ نغَلْ اٜ وِعَ، ‏«‏مَنْتٜىٰ اَللَّه مٜىٰطٜنْ، اٛنٛنْ مَشُّٻٜ مَاکٛ کُلٛوٻٜمٛ مَوْطٛ اٜ ڤَمَرٛ؞»‏ ⁶ندٜنْ مِ نَنِي غٛطُّمْ بٛ حٛولٛ يِمْٻٜ طُطْٻٜ، بٛ حٛولٛ ندِيَمْجِ دٛغّٛوجِ، بٛ حٛولٛ رِغَّانغٛ شٜمْبِنْغٛ، اٜ ٻٜ مبِعَ، ‏«‏حَالِلُويَ!‏ نغَمْ اَللَّه جٛومِرَاوٛ مٜىٰطٜنْ جٛومُ بَوْطٜ اٜ لَامٛو!‏ ⁷اٜنْ وٜلْوٜلْتُ نَنٜنْ بٜلْطُمْ نَاع سٜطَّ، اٜنْ مَوْنِنْمٛ، نغَمْ شَرٜلْ نغٜلْ کَرٛورِ تٜعَتَ وَرِي؞ ندٜنْ ٻَݝَاطٛ مَاکٛ اٛنْ سِرْيَکٜ؞ ⁸طُمْ حٛکِّي ٻَݝَاطٛ اٛنْ لِمْشٜرٜ طٜلْمُندٜ لَمْندٜ طٜلْکِتٛتٛوندٜ؞ لِمْشٜرٜ ندٜنْ کَيْرٜ وٛنِ کُوطٜ يِمْٻٜ اَللَّه طٜ اَادِلَاکُ؞»‏

⁹سٜيْ مَلَاعِکَاجٛ اٛنْ وِعِيَمْ، ‏«‏وِنْدُ طُعُمْ؞ ٻٜ بَرْکِطِنَاٻٜ کُمْڤِتَاٻٜ حُمْتٛ تٜىٰغَلْ کَرٛورِ ندِنْ؞»‏ ندٜنْ اٛ وِعِيَمْ، ‏«‏کَعَ حَالَ طُمْ غٛونغَ، تٛ اَللَّه طُمْ پِوٛيِ؞»‏

¹⁰سٜيْ ندِشِّيمِ يٜىٰسٛ مَاکٛ نغَمْ مِ مَوْنِنَمٛ، اَمَّا اٛ وِعِيَمْ، ‏«‏تَاع وَطُ نٛنْ!‏ مِنْ مَا، مِ مَشُّطٛ اَللَّه بٛ مَاطَ، اَنْ اٜ بَنْدِرَاٻٜ مَاطَ جٛغِيٻٜ غٛونغَ بٛطُّمْ کَ يٜىٰسُ وَنْغِنِ؞ مَوْنِنْ اَللَّه!‏ نغَمْ غٛونغَ کَ يٜىٰسُ وَنْغِنِ کَنْکَ وَطِ يِمْٻٜ مبَاوِ وَطُکِ اَنَّبَاکُ؞»‏

غٛطّٛ دٛوْ ڤُشُّ ندَنٜوُ

¹¹سٜيْ نغِيمِ دٛوْ اٜ اٛمْتِي، سٜيْ رَا وٛنْغُ ڤُشُّ ندَنٜوُ غٛنْطٛ دٛوْ مَغُّ، اٜ وِعٜىٰ غَطٛووٛ کٛ حَانِ، غٛودُطٛ غٛونغَ؞ اٜ مٛ وَطَ اَادِلَاکُ ندٜرْ کِيتَ اٜ کٛنُ؞ ¹²غِتٜ مَاکٛ بٛ طٜمْنغَلْ حِيتٜ، حٛورٜ مَاکٛ اٜ وٛودِ غِيفِ طُطِّ، ندٜنْ اِنْدٜ اٜ وِنْدِي دٛوْ مَاکٛ، وَلَا اَنْدُطٛندٜ سٜيْ کَنْکٛ تَنْ؞ ¹³اٜ مٛ ٻٛرْنِي تٛغّٛورٜ ندٜ طُمْ سٛمْنِرِ پِيپَمْ، ندٜنْ اِنْدٜ ندٜ طُمْ نٛدِّرْتَمٛ وٛنِ، ‏«‏وٛلْدٜ اَللَّه؞»‏ ¹⁴حٛنٛوٻٜ ٻٜ دٛوْ اٜ تٛکِّمٛ دٛوْ ڤُشِّ، اٜ ٻٜ بٛرْنِي کٛلْتٜ طٜلْمُطٜ لَاٻُطٜ؞ ¹⁵وٛکِّ کَافَحِ ݧَاطُکِ اٜ وُرْتٛيٛو ندٜرْ حٛنْدُکٛ مَاکٛ، اٜ مَاکِ اٛ فٜعِّرْتَ دُونِيَارُ، اٛ لَامٛرْتٛٻٜ اٜ سَوْرُ نجَمْندِ، اٛ يَاٻَيْ ٻِکّٛيْ اِنَبٛوجٜ ندٜرْ نغَيْکَ مٛنّٜرٜ اَللَّه جٛومُ بَوْطٜ؞ ¹⁶تٛ تٛغّٛورٜ مَاکٛ اٜ دَنْغٛ مَاکٛ وٛنْدٜ اِنْدٜ اٜ وِنْدِي وِعُکِ، ‏«‏لَامِيطٛ لَمْلَمْٻٜ، جٛومِرَاوٛ جٛومِرَاٻٜ؞»‏

¹⁷ندٜنْ مِ يِعِ غٛطّٛ مَلَاعِکَاجٛ اٜ دَرِي دٛوْ نَانغٜ، اٛ نٛدِّ شٛلِّ فُو ڤِيرٛوجِ اٜ دٛوْ ندٜرْ حٛنٛنْدٜ شٜمْبِنْدٜ، اٛ وِعِ، ‏«‏نغَرٜىٰ کَوْرِتٛنْ نغَمْ حُمْتٛ اَللَّه مَنْغٛ، ¹⁸ݧَامٛنْ کُسٜلْ لَامِيٻٜ، اٜ نغٜلْ سٛوجِعٜنْ مَوْٻٜ، اٜ نغٜلْ بَاوُٻٜ کٛنُ، اٜ نغٜلْ ڤُشِّ، اٜ نغٜلْ پٜنْتٛوٻٜ ڤُشِّ طِنْ، اٜ نغٜلْ يِمْٻٜ فُو مَشُّٻٜ اٜ نَاع مَشُّٻٜ، مَوْطٛ اٜ ڤَمَرٛ!‏»‏

¹⁹سٜيْ نغِيمِ مَرْدِ اَرَنْدٜىٰرِ ندِنْ طٛنْ اٜ لَامِيٻٜ دُونِيَارُ اٜ سٛوجِعٜنْ مَٻّٜ کَوْرِتِي تٛ غٛعٛ نغَمْ ٻٜ کٛنَ غٛنْطٛ دٛوْ ڤُشُّ اٛنْ اٜ سٛوجِعٜنْ مَاکٛ؞ ²⁰سٜيْ طُمْ نَنْغِ مَرْدِ ندِنْ اٜ اَنَّبِيجٛ فٜوْرٜ اٛنْ؞ کَنْکٛ وٛنِ غَطُطٛ کَيْطِنِيطُمْ يٜىٰسٛ مَيْرِ مَجِّنِ غَطَنَاٻٜ اَلَامَ مَيْرِ اٜ مَوْنِنْٻٜ نغُنْکِوَ نَنْدُنغَ اٜ مَيْرِ؞ اٜ يٛنْکِ طُمْ حُبِنِ اَنَّبِيجٛ فٜوْرٜ اٛنْ اٜ مَرْدِ ندِنْ ندٜرْ مبٜىٰلَ حِيتٜ کِبِرِتُ؞ ²¹طُمْ وَرِرِ سٛوجِعٜنْ مَٻّٜ اٜ کَافَحِ بُرْتٛيْتٛوکِ دَغَ حٛنْدُکٛ اٛنْ طٛنْ جٛوطِيطٛ دٛوْ ڤُشُّ؞ سٜيْ شٛلِّ ݧَامِ کُسٜلْ مَٻّٜ کٜىٰرٛلْ نٛ طِ مبَاوَتَ ݧَامُکِ؞

دُوٻِ 1,000

¹ندٜنْ مِ يِعِ مَلَاعِکَاجٛ اٜ جِڤّٛيٛو دَغَ دٛوْ اٜ مٛ جٛغِي مَٻِّتِرْغٜلْ نغَيْکَ کَلُّکَ لُغُّکَ، ندٜنْ اٜ مٛ جٛغِي وٛنْغٛلْ ٻٛغّٛلْ نجَمْندِ مَنْغٛلْ شٜمْبِنْغٛلْ؞ ²سٜيْ اٛ نَنْغِ مبٛوغَ نغَنْ، وَاتٛ مبٛوغَ نغَنْ طٛنْ نغَ دَغَ ندٜنّٛ بِعٜتٜىٰنغَ غَݧٛ کٛو شٜيْطَنْ، اٛ حَٻِّرِنغَ ٻٛغّٛلْ نغٛلْ حَا دُوٻِ 1,000؞ ³مَلَاعِکَاجٛ اٛنْ حُبِينغَ ندٜرْ نغَيْکَ کَنْ، اٛ مَٻِّکَ اٛ فٜطِکَ نغَمْ تٛع نغَ وُرْتٛو نغَ ٻٜيْدَ مَجِّنْکِ لٜݧِ نَا دُوٻِ طِنْ طٛنْ 1,000 کٜىٰوِي؞ غَطَ طٛنْ دٛولٜ نغَ يٛوفٜىٰ نغَمْ شَرٜلْ سٜطَّ؞

⁴ندٜنْ مِ يِعِي جٛوطٛرْلٜ لَامُ، وٛٻّٜ اٜ نجٛوطِي دٛوْ مَاجٜ؞ کَمْٻٜ نغٛنِ کٛکَّاٻٜ لَامُ وَطُکِ کِيتَ؞ طٛنْمَا مِ يِعِي يٛنْکِيجِ ٻٜ طُمْ اِتَّنِ کٛعٜ نغَمْ ٻٜ نغَعَجِنِي حَبَرُ يٜىٰسُ اٜ وٛلْدٜ اَللَّه؞ کَمْٻٜ نغٛنِ ٻٜ مَوْنِنَايِ ندِنْ طٛنْ مَرْدِ کٛو نغُنْکِوَ نَنْدُنغَ اٜ مَيْرِ، ٻٜ نجَٻَايِ طُمْ وَطَنَٻٜ اَلَامَ مَيْرِ اٜ تِيطٜ مَٻّٜ کٛو اٜ جُوطٜ مَٻّٜ؞ ٻٜ ڤُطِّتِ ٻٜ کٜٻِي يٛنْکِ، ٻٜ لَامٛدِي اٜ اَلْمَسِيحُ حَا دُوٻِ 1,000؞ ⁵کَنْجُمْ وٛنِ اُمَّاکِ مَيْٻٜ اَرَنْدٜحِ؞ ﴿حٛرِيٻٜ مَيْٻٜ بٛو ٻٜ فُطِّتَايِ ٻٜ کٜٻِ يٛنْکِ سٜيْ ندٜ دُوٻِ 1,000 طِنْ طٛنْ کٜىٰوِ؞﴾ ⁶ٻٜ بَرْکِطِنَاٻٜ ٻٜ شٜنِيٻٜ يِمْٻٜ غٛودُٻٜ غٜطَلْ ندٜرْ کِنْ طٛنْ اُمَّاکِ اَرَنْدٜحِ؞ مَيْدٜ طِطَوْرٜ مٜىٰمَتَاٻٜ، وَاتٛ ٻٜ نَتَّتَا وُرٛ حِيتٜ، ٻٜ نغَرْتَيْ کُوَنٛوٻٜ اَللَّه اٜ اَلْمَسِيحُ، ٻٜ لَامٛدٛتٛ اٜ مَاکٛ حَا دُوٻِ 1,000؞

حٜٻُکِ جَالٛرْغَلْ دٛوْ شٜيْطَنْ

⁷غَطَ دُوٻِ 1,000 طِنْ طٛنْ کٜىٰوِي، طُمْ يٛوفَيْ شٜيْطَنْ دَغَ تٛ طُمْ حَٻِّمٛ؞ ⁸اٛ وُرْتٛيْتٛ اٛ مَجِّنَ لٜپِّ دُونِيَارُ فُو، اٛ حَوْرِتَٻٜ نغَمْ کٛنُ؞ طُمْ نٛدِّرَيْ لٜپِّ طِنْ غٛغْ اٜ مَاغٛغْ؞ طُوطُکِ مَٻّٜ وَطِي بٛ طُوطُکِ نجَارٜىٰندِ مَايٛ؞ ⁹ٻٜ شَنْکِتِي کٛو تٛيٜ ندٜرْ دُونِيَارُ، ٻٜ ڤِلِي وِغٜىٰرٜ يِمْٻٜ اَللَّه، وَاتٛ غَرِيرِ ندِ اٛ يِطِ؞ اَمَّا حِيتٜ رُفٛيِ دَغَ دٛوْ نغٜ حَلْکِٻٜ؞ ¹⁰شٜيْطَنْ مَجِّنْطٛٻٜ بٛو حُبِنَا ندٜرْ مبٜىٰلَ حِيتٜ کِبِرِتُ تٛ مَرْدِ ندِنْ اٜ اَنَّبِيجٛ فٜوْرٜ اٛنْ طٛنْ وٛنِ؞ طُمْ وَطَيْ کَ حٛکُّکِٻٜ بٛنٜ جٜمَّ اٜ ݧَلَوْمَ حَا اَبَدَا اَبَدِنْ؞

کِيتَ شَکِتِيکَ

¹¹ندٜنْ مِ يِعِي وٛنْغَلْ جٛوطٛرْغَلْ لَامُ مَنْغَلْ دَنٜوَلْ اٜ جٛوطِيطٛ دٛوْ مَاغَلْ؞ سٜيْ دٛوْ اٜ لٜيْ دٛغِّ مَجِّتِ دَغَ يٜىٰسٛ مَاکٛ طُمْ ٻٜيْدَايِ يِعُکِطُمْ؞ ¹²سٜيْ نغِيمِ مَيْٻٜ، مَوْطٛ اٜ ڤَمَرٛ، اٜ ندَرِي يٜىٰسٛ جٛوطٛرْغَلْ نغَلْ، طُمْ مَٻِّتِ غٛطّٜ دٜفْتٜ؞ طٛنْمَا طُمْ مَٻِّتِ وٛنْدٜ دٜفْتٜرٜ، وَاتٛ دٜفْتٜرٜ يٛنْکِ؞ طُمْ وَطَنِ مَيْٻٜ کِيتَ دٛوْ کٛ ٻٜ نغَطِ نٛنْ نٛ طُمْ وِنْدِرَا ندٜرْ دٜفْتٜ طٜنْ؞ ¹³مَايٛ وُرْتِنٛيِ مَيْٻٜ وٛنْٻٜ ندٜرْ مَغّٛ؞ مَيْدٜ اٜ لَاحِرَ فُو وُرْتِنٛيِ مَيْٻٜ وٛنْٻٜ ندٜرْ مَاجُمْ؞ طُمْ وَطَنِ کٛو مٛيٜ کِيتَ دٛوْ کٛ وَطِ؞ ¹⁴سٜيْ طُمْ حُبِنِ مَيْدٜ اٜ لَاحِرَ ندٜرْ مبٜىٰلَ حِيتٜ نغَنْ؞ نغَنْ طٛنْ مبٜىٰلَ حِيتٜ کَنْغَ وٛنِ مَيْدٜ طِطَوْرٜ؞ ¹⁵فُو مٛ طُمْ تَوَايِ اِنْدٜ مُوطُمْ اٜ وِنْدِي ندٜرْ دٜفْتٜرٜ يٛنْکِ، طُمْ حُبِنِمٛ ندٜرْ مبٜىٰلَ حِيتٜ نغَنْ؞

دٛوْ کٜسُمْ اٜ لٜيْدِ کٜيْرِ

¹ندٜنْ مِ يِعِي دٛوْ کٜسُمْ اٜ لٜيْدِ کٜيْرِ، نغَمْ دٛوْ اَرَنْدٜجُمْ اٜ لٜيْدِ اَرَنْدٜىٰرِ مَجِّتِي، مَايٛ مَا وَلَا کٛو سٜطَّ؞ ²ندٜنْ مِ يِعِي غَرِيرِ شٜنِيندِ، وَاتٛ اُرُشَلِيمَ کٜيْرِ اٜ ندِ جِڤّٛيٛو دَغَ دٛوْ، دَغَ تٛ اَللَّه، ندِ سِرْيَامَ بٛ ٻَݝَاطٛ مٛعِّتِنِيطٛ نغَمْ غٛرْکٛ مُوطُمْ؞ ³ندٜنْ مِ نَنِي وٛنْدٜ حٛنٛنْدٜ شٜمْبِنْدٜ دَغَ جٛوطٛرْغَلْ لَامُ نغَلْ اٜ ندٜ وِعَ، ‏«‏رَطُّمْ تٛ اَللَّه جٛوطٛتٛو اٜ وٛنْدِ اٜ يِمْٻٜ!‏ اٛ جٛوطٛدٛتٛ اٜ مَٻّٜ، ٻٜ نغَرْتَيْ يِمْٻٜ مَاکٛ؞ اَللَّه اٜ حٛورٜ مُوطُمْ وٛنْدَيْ اٜ مَٻّٜ، اٛ وَرْتَيْ اَللَّه مَٻّٜ؞ ⁴اٛ مٛيْتَنَيْٻٜ فُو غٛنْطِ مَٻّٜ، طُمْ بٛو فُطِّتَتَا طُمْ وَطَ مَيْدٜ کٛو وَنَّارٜ کٛو بٛجِّ کٛو تٛرَّ نغَمْ کٛو طُمٜ طُمْ ندٜنّٛ پَٻَّکٜ؞»‏

⁵سٜيْ جٛوطِيطٛ دٛوْ جٛوطٛرْغَلْ لَامُ اٛنْ وِعِ، ‏«‏جٛونِ اٜ مِ وَطَ کٛو طُمٜ کٜسُمْ!‏»‏ طٛنْمَا اٛ وِعِيَمْ، ‏«‏وِنْدُ طُمْ طٛنْ، نغَمْ حَالَ کَعَ طُمْ غٛونغَ کَ تَبُّتُکَ؞»‏ ⁶ندٜنْ اٛ وِعِيَمْ، ‏«‏طُمْ حٜىٰݧِي!‏ مِنْ وٛنِ اَلْفَ، مِنْ وٛنِ اٛمٜىٰغَ، وَاتٛ فُطّٛودٜ اٜ تِمّٛودٜ؞ فُو نَنْطٛ طٛنْکَ مِ حٛکَّيْمٛ ندِيَمْ شَاحُ دَغَ تٛ ندِيَمْ يٛنْکِ ٻُلِرٛيْتَ؞ ⁷فُو کٜٻُطٛ جَالٛرْغَلْ حٜٻَيْ فِي طُعُمْ فُو دَغَ تٛ اَمْ، مِ وَرْتَيْ اَللَّه مَاکٛ، کَنْکٛ اٛ وَرْتَ ٻِطّٛ اَمْ؞ ⁸اَمَّا غٛودُٻٜ کُلٛلْ اٜ ݧَامٛوٻٜ اَمَانَ، اٜ کُوٛوٻٜ کُوغَلْ کَلُّنغَلْ، اٜ غَطٛوٻٜ وَرْحٛورٜ، اٜ غَطٛوٻٜ نجٜىٰنُ، اٜ دَرْنٛوٻٜ، اٜ مَوْنِنٛوٻٜ غُنْکِيجِ، اٜ فُو فٜوٛوٻٜ، ٻٜ فُو طُمْ نَتِّنَيْٻٜ مبٜىٰلَ حِيتٜ کِبِرِتُ، کَنْغَ وٛنِ مَيْدٜ طِطَوْرٜ؞»‏

اُرُشَلِيمَ کٜيْرِ

⁹سٜيْ غٛعٛتٛ ندٜرْ مَلَاعِکَعٜنْ نجٛوٜىٰطِطٛ ٻٜنْ وَرِ، ٻٜنْ طٛنْ جٛغِيٻٜ تُمُّطٜ جٛوٜىٰطِطِ کٜىٰوُطٜ مٛنّٜرٜ اَللَّه شَکِتِيطُمْ؞ اٛ وِعِيَمْ، ‏«‏وٛرٛيْ مِ حٛلّٛيْمَا ٻَݝَاطٛ، دٜبّٛ کَرٛورِ ندِنْ؞»‏ ¹⁰ندٜرْ وَحَيُ طُمْ، مَلَاعِکَاجٛ اٛنْ حٛشِّيَمْ يَارِيَمْ دٛوْ وٛنْدٜ حٛشّٜىٰرٜ تٛوْندٜ نَاع سٜطَّ اٛ حٛلِّيَمْ اُرُشَلِيمَ غَرِيرِ شٜنِيندِ اٜ جِڤّٛيٛو دَغَ دٛوْ، دَغَ تٛ اَللَّه؞ ¹¹غَرِيرِ ندِنْ اٜ وٛودِ تٜدُّنغَلْ اَللَّه اٜ ندِ طٜلْکِتٛو بٛ کَاپٜ طٜلْکِتٛتٛوطٜ طٜ شٜىٰدٜ، بٛ جَسْفَ اٜ ندِ طٜلْکِتٛو بٛ دَارٛغَّلْ؞ ¹²اٜ ندِ وٛودِ مَحٛلْ تٛوْنغٛلْ اٜ نغٛلْ فِلِيندِ، غٛودُنغٛلْ دَمُّطٜ سَڤّٛ اٜ طِطِ، ندٜنْ اٜ وٛودِ مَلَاعِکَعٜنْ سَڤّٛ اٜ طِطٛ ڤَامَنٛوٻٜ دَمُّطٜ طٜنْ؞ تٛ دَمُّطٜ طٜنْ بٛو طُمْ وِنْدِي اِنْطٜ لٜݧِ اِسْرَاعِيلَ سَڤّٛ اٜ طِطِ؞ ¹³کٛو ندُيٜ وُتُّدُ اٜ وٛودِ دَمُّطٜ تَتِ، دَمُّطٜ تَتِ دَغَ فُونَ، دَمُّطٜ تَتِ دَغَ حِرْنَ، دَمُّطٜ تَتِ دَغَ فٛمْبِنَ، دَمُّطٜ تَتِ دَغَ وٛيْلَ؞ ¹⁴طُمْ مَحِي مَحٛلْ ڤِلِينغٛلْ غَرِيرِ ندِنْ دٛوْ کَاپٜ سَڤّٛ اٜ طِطِ، ندٜنْ دٛوْ مَاجٜ طُمْ وِنْدِي اِنْطٜ لِلَاٻٜ سَڤّٛ اٜ طِطٛ ٻٜ کَرٛورِ ندِنْ؞

¹⁵مَلَاعِکَاجٛ مٜتَنْطٛيَمْ بٛو اٜ وٛودِ سَوْرُ ڤٛوندٛلْ ندُ جِينَارِ ندُ اٛ فٛوندِرْتَ غَرِيرِ ندِنْ اٜ دَمُّطٜ مَيْرِ اٜ مَحٛلْ ڤِلِينغٛلْندِ؞ ¹⁶غَرِيرِ ندِنْ کٛو ندُيٜ وُتُّدُ اٜ فٛتِّدِ، جُوتُکِ مَيْرِ اٜ يَاجُکِ مَيْرِ اٜ فٛتِّدِ؛ سٜيْ مَلَاعِکَاجٛ اٛنْ فٛوندِرِ غَرِيرِ ندِنْ اٜ سَوْرُ ندُنْ اٛ يِعِ ندِ وَطِي مِلْ 1,500؞ جُوتُکِ مَيْرِ اٜ يَاجُکِ مَيْرِ فُو اٜ فٛتِّدِ؞ ¹⁷طٛنْمَا اٛ فٛوندِ مَحٛلْ ڤِلِينغٛلْ غَرِيرِ ندِنْ، تٛوُکِ مَغّٛلْ وَطِي جَاٻَنْطٜ 216؞ اٛ فٛوندِرِ نٛ نٜطّٛ فٛوندِرْتَ؞

¹⁸مَحٛلْ نغٛلْ مَحِرَامَ اٜ غٛطّٜ کَاپٜ طٜ شٜىٰدٜ، بِعٜتٜىٰطٜ جَسْفَ؞ غَرِيرِ ندِنْ بٛو اٜ جِينَارِ تَنْ ندِ مَحِرَا اٜ ندِ طٜلْکِتٛو بٛ دَارٛغَّلْ؞ ¹⁹طُمْ مٛعِّنِرِي کَاپٜ غَطَاطٜ لٜيْ مَحٛلْ نغٛلْ اٜ کٛو اِرِ ندٜيٜ حَيْرٜ ندٜ شٜىٰدٜ؞ اَرَنْدٜ جَسْفَ، طِطَوْرٜ سَفَايَ، تَتَوْرٜ اَغَتْ، نَيَوْرٜ اٜمٜرَلْ، ²⁰نجٛوَٻْرٜ اٛنِسْ، جٛوٜىٰغٛعٛورٜ کَنٜىٰلِيَنْ، جٛوٜىٰطِطَوْرٜ کِرِسٛولَتِ، جٛوٜىٰتَتَوْرٜ بٜىٰرِلْ، جٛوٜىٰنَيَوْرٜ تٛوفَسْ، سَڤّٛورٜ کِرِسٛوفُرَسْ، سَڤّٛ اٜ غٛعٛورٜ جَاسِنْ، سَڤّٛ اٜ طِطَوْرٜ اَمٜىٰتِسْ؞ ²¹ندٜنْ دَمُّطٜ سَڤّٛ اٜ طِطِ طٜنْ طٛنْ طُمْ لُعُلُعُوجِ سَڤّٛ اٜ طِطِ، کٛو نغَلٜ دَمُّغَلْ وَطِرَامَ اٜ لُعُ‑لُعُ غٛعٛ؞ طٛنْمَا طَتَلْ مَنْغَلْ غٛنْغَلْ ندٜرْ غَرِيرِ ندِنْ اٜ جِينَارِ تَنْ نغَلْ وَطِرَا، اٜ نغَلْ طٜلْکِتٛو بٛ دَارٛغَّلْ؞

²²مِ يِعَايِ وُرٛ شٜنِينغٛ ندٜرْ غَرِيرِ ندِنْ، نغَمْ اَللَّه جٛومِرَاوٛ جٛومُ بَوْطٜ کَنْکٛ اٜ کَرٛورِ ندِنْ نغٛنِ وُرٛ شٜنِينغٛ مَيْرِ؞ ²³غَرِيرِ ندِنْ يِطَايِ جَيْنغٛلْ نَانغٜ کٛو نغٛلْ لٜوْرُ، نغَمْ تٜدُّنغَلْ اَللَّه يٜيْنَنْتٛوندِ، ندٜنْ کَرٛورِ ندِنْ وٛنِ فِتِلَارُ مَيْرِ؞ ²⁴يِمْٻٜ دُونِيَارُ نجَحَيْ ندٜرْ جَيْنغٛلْ غَرِيرِ ندِنْ؞ لَامِيٻٜ دُونِيَارُ بٛو نغَدَّنَيْ غَرِيرِ ندِنْ جَوْدِ مَٻّٜ؞ ²⁵دَمُّطٜ مَيْرِ بٛو مَٻَّتَاکٜ ݧَلَوْمَ حَا اَبَدَا، ندٜنْ طُمْ وَطَتَا جٜمَّ ندٜرْ مَيْرِ؞ ²⁶طُمْ وَدَّيْ کٛو طُمٜ کٛ وٛوطِ اٜ رِسْکُ يِمْٻٜ دُونِيَارُ ندٜرْ غَرِيرِ ندِنْ؞ ²⁷وَلَا غٛطُّمْ کٛ سٜنَاکِ نَتَّيْطُمْ غَرِيرِ ندِنْ، کٛو بٛو غَطٛووٛ کُوطٜ نٜفْنِيطٜ، کٛو ڤٜوٛووٛ؞ سٜيْ نِ ٻٜ طُمْ وِنْدِ اِنْطٜ مُعّٜنْ ندٜرْ دٜفْتٜرٜ يٛنْکِ ندٜ کَرٛورِ ندِنْ، کَمْٻٜ تَنْ نَتَّتَ غَرِيرِ ندِنْ؞

¹ندٜنْ مَلَاعِکَاجٛ اٛنْ حٛلِّيَمْ شَانغٛلْ ندِيَمْ يٛنْکِ اٜ نغٛلْ طٜلْکِتٛو بٛ دَارٛغَّلْ اٜ نغٛلْ اِلٛيَ دَغَ جٛوطٛرْغَلْ لَامُ اَللَّه اٜ کَرٛورِ ندِنْ، ²اٜ نغٛلْ تٛکَّ شَکَ طَتَلْ غَرِيرِ ندِنْ؞ کٛو ندُيٜ وُتُّدُ شَانغٛلْ نغٛلْ اٜ وٛودِ لٜکِّ يٛنْکِ دِمٛوحِ ٻِکّٛيْ سَڤّٛ اٜ طِطِ فٜىٰرٜ‑فٜىٰرٜ، کٛو ندُيٜ لٜوْرُ اٜ کِ رِمَ ندٜ غٛعٛ؞ حَاکٛ لٜکِّ کِنْ اٜ حُوتِنِرٜىٰ نغَمْ يَمْطِتِنْکِ لٜپِّ؞

³طُمْ حٜٻَتَا غٛطُّمْ طُمْ اَللَّه لَانِ ندٜرْ غَرِيرِ ندِنْ، اَمَّا جٛوطٛرْغَلْ لَامُ اَللَّه اٜ کَرٛورِ ندِنْ جٛوطٛتٛ ندٜرْ مَيْرِ؞ مَشُّٻٜ مَاکٛ بٛو مَوْنِنَيْمٛ؞ ⁴ندٜنْ ٻٜ نغِعَيْ يٜىٰسٛ مَاکٛ، کَدِمَا طُمْ وِنْدَيْ اِنْدٜ مَاکٛ اٜ تِيطٜ مَٻّٜ؞ ⁵طُمْ فُطِّتَتَا طُمْ وَطَ جٜمَّ، ٻٜ نغَنِّدَتَا اٜ جَيْنغٛلْ فِتِلَاجِ کٛو جَيْنغٛلْ نَانغٜ، نغَمْ اَللَّه جٛومِرَاوٛ وَرْتَيْ جَيْنغٛلْ مَٻّٜ؞ ٻٜ لَامٛتٛ حَا اَبَدَا اَبَدِنْ؞

يٜىٰسُ اٜ وَرَ

⁶سٜيْ مَلَاعِکَاجٛ اٛنْ وِعِيَمْ، ‏«‏حَالَ کَعَ طُمْ غٛونغَ تَبُّتُکَ؞ اَللَّه جٛومِرَاوٛ کٛکُّطٛ اَنَّبٛعٜنْ رُوحُ مُوطُمْ اٛ لِلٛيِ مَلَاعِکَاجٛ مَاکٛ حٛلَّ مَشُّٻٜ مَاکٛ کٛ وَطَتَ نَاع کٛ نٜىٰٻِ؞»‏

⁷‏«‏رَطُّمْ اٜ مِ وَرٛيَ نَاع کٛ نٜىٰٻِ!‏ اٛ بَرْکِطِنَاطٛ غَطٛووٛ کٛ اَنَّبَاکُ دٜفْتٜرٜ ندٜعٜ وِعِ؞»‏

⁸مِنْ يَحَيَ، مِنْ وٛنِ نَنُطٛ يِعِ فِي طُعُمْ فُو؞ شَرٜلْ کٛ نَنْمِطُمْ نغِيمِطُمْ، سٜيْ ندِشِّيمِ يٜىٰسٛ مَلَاعِکَاجٛ کٛلُّطٛيَمْطُمْ نغَمْ مِ مَوْنِنَمٛ؞ ⁹اَمَّا اٛ وِعِيَمْ، ‏«‏تَاع وَطُ نٛنْ!‏ مِنْ مَا، مِ مَشُّطٛ اَللَّه بٛ مَاطَ، اَنْ اٜ بَنْدِرَاٻٜ مَاطَ، اٜ اَنَّبٛعٜنْ، اٜ وَطٛوٻٜ کٛ دٜفْتٜرٜ ندٜعٜ وِعِ؞ اَللَّه تَنْ مَوْنِنْتَا!‏»‏ ¹⁰ندٜنْ اٛ وِعِيَمْ، ‏«‏تَاع سُوطُ حَالَ اَنَّبَاکُ دٜفْتٜرٜ ندٜعٜ؞ نغَمْ شَرٜلْ ٻَدَکٜ نغٜلْ فُو فِي طُعُمْ وَطَتَ؞ ¹¹فُو کُوٛووٛ کٛ حَلِّ وَطَ کَ حُوُکِ کٛ حَلِّ، غَطٛووٛ کٛ وٛوطَا مَا، وَطَ کَ وَطُکِ کٛ وٛوطَا؞ فُو غَطٛووٛ کٛ وٛوطِ بٛو، وَطَ کَ وَطُکِ کٛ وٛوطِ، فُو شٜنِيطٛ وَطَ کَ جٛنْدٜ مُوطُمْ سٜنِيندٜ؞»‏

¹²‏«‏رَطُّمْ اٜ مِ وَرٛيَ نَاع کٛ نٜىٰٻِ!‏ مِ وَرْدَنَيْ کٛو مٛيٜ اٜ کٛ وَاتَنْتٜىٰ نغَمْ کٛ وَطِ؞ ¹³مِنْ وٛنِ اَلْفَ، مِنْ وٛنِ اٛمٜىٰغَ، مِنْ وٛنِ اَرَنْدٜىٰجٛ، مِنْ وٛنِ شَکِتِيطٛ، مِنْ وٛنِ فُطّٛودٜ اٜ تِمّٛودٜ؞»‏

¹⁴ٻٜ بَرْکِطِنَاٻٜ لَٻِّنْٻٜ کٛلْتٜ مَٻّٜ نغَمْ ٻٜ کٜٻَ نَتُّکِ غَرِيرِ ندِنْ ٻٜ ݧَامَ ٻِکّٛيْ لٜکِّ يٛنْکِ؞ ¹⁵ٻٜ طُمْ حَطِ نَتُّکِ غَرِيرِ ندِنْ بٛو، کَمْٻٜ نغٛنِ بٛنُّٻٜ کٛعٜ مَٻّٜ، اٜ دَرْنٛوٻٜ، اٜ غَطٛوٻٜ نجٜىٰنُ، اٜ غَطٛوٻٜ وَرْحٛورٜ، اٜ مَوْنِنٛوٻٜ غُنْکِيجِ، اٜ غِطْٻٜ فٜوُکِ کٛو ندٜيٜ؞

¹⁶‏«‏مِنْ يٜىٰسُ، مِ لِلٛيِي مَلَاعِکَاجٛ اَمْ تٛ مٛوطٛنْ اٜ حَبَرُ طُعُمْ نغَمْ کَوْتٜ تٛکُّٻٜيَمْ؞ مِنْ وٛنِ فُطّٛودٜ دَوْدَ اٜ لٜݧٛلْ مَاکٛ، مِنْ وٛنِ جَابِيرٜ، حٛودٜرٜ سُبَکَ غٛودُندٜ جَيْنغٛلْ؞»‏

¹⁷رُوحُ اَللَّه اٜ ٻَݝَاطٛ اٜ ٻٜ مبِعَ، ‏«‏وٛرٛيْ!‏»‏

کٛو مٛيٜ نَنُطٛ طُعُمْ فُو وِعَ، ‏«‏وٛرٛيْ!‏»‏

فُو نَنْطٛ طٛنْکَ وَرَ، فُو غِطّٛ سٜيْ ݧٜطَ ندِيَمْ يٛنْکِ شَاحُ؞

تِمّٛودٜ

¹⁸مِنْ يَحَيَ، اٜ مِ وَغِّنَ کٛو مٛيٜ نَنْطٛ اَنَّبَاکُ دٜفْتٜرٜ ندٜعٜ؞ تٛ غٛطّٛ ٻٜيْدِي غٛطُّمْ دٛوْ مَاجُمْ، اَللَّه ٻٜيْدَنَيْمٛ بٛنٜ کَلُّطُمْ بِنْدَاطُمْ ندٜرْ دٜفْتٜرٜ ندٜعٜ؞ ¹⁹تٛ بٛو غٛطّٛ اِتِّي غٛطُّمْ ندٜرْ حَالَ اَنَّبَاکُ غٛنْطُمْ ندٜرْ دٜفْتٜرٜ ندٜعٜ، اَللَّه اِتَّيْ غٜطَلْ مَاکٛ ندٜرْ لٜکِّ يٛنْکِ اٜ غَرِيرِ شٜنِيندِ بِنْدَاطُمْ ندٜرْ دٜفْتٜرٜ ندٜعٜ؞

²⁰اٛنْ طٛنْ شٜيْدِنْطٛ فِي طُعُمْ فُو اٜ وِعَ، ‏«‏غٛونغَ اٜ مِ وَرٛيَ نَاع کٛ نٜىٰٻِ؞»‏

اَامِنْ؞ وٛرٛيْ يٜىٰسُ جٛومِرَاوٛ!‏

²¹يٜىٰسُ جٛومِرَاوٛ بَرْکِطِنَ يِمْٻٜ اَللَّه فُو؞ اَامِنْ!‏