فِلِبِيَنْکٛعٜنْ

طٜرٜوٛلْ نغٛلْ بُلُسْ وِنْدَنِ

فِلِبِيَنْکٛعٜنْ

حَبَرُ دٛوْ طٜرٜوٛلْ نغٛعٛلْ

بُلُسْ لِلَاطٛ يٜىٰسُ اَلْمَسِيحُ وِنْدِ طٜرٜوٛلْ نغٛعٛلْ حَکُّندٜ دُوٻِ 16‏-95 غَطَ دَݧْنغٛلْ يٜىٰسُ؞ اٛ وِنْدَنْغٛلْ تٛکُّٻٜ يٜىٰسُ غٛنْٻٜ ندٜرْ غَرِيرِ فِلِبِ ندٜرْ لٜيْدِ مَکِدٛونِيَ ندٜرْ لٜيْطٜ غٛنْطٜ لٜيْ لَامُ رٛومَ؞ اٛ وِنْدُنغٛلْ شَرٜلْ نغٜلْ اٛ مَٻَّا ندٜرْ سُودُ شُرَلْ اٜ رٛومَ؞

طٛنْمَا اٛ وِنْدُنغٛلْ نغَمْ اٛ يٜتَّ تٛکُّٻٜ يٜىٰسُ وٛنْٻٜ غَرِيرِ فِلِبِ دٛوْ بَلَّلْ مَٻّٜ نغَلْ ٻٜ لِلَنِمٛ اٜ دٛعَاجٜ مَٻّٜ طٜ ٻٜ نغَطَنْتَمٛ کٛ اٛ وٛنِ ندٜرْ سُودُ شُرَلْ؞ اٛ حَٻَنِي کُوٛوٻٜ کُوغَلْ وَعَجِنْکِ ٻٜ کَوْتَ حٛورٜ اٜ مَاکٛ؞ بُلُسْ وَغِّنِي اٜکِّتِنٛوٻٜ فٜوْرٜ ندٜرْ تٛکُّٻٜ يٜىٰسُ اٜ فِلِبِ وِعٛوٻٜ نَا نٜطّٛ تٛکِّي دٛوکَ مُوسَ حٜٻَ کِسْندَمْ؞ نغٛعٛلْ طٜرٜوٛلْ سٜمْبِطِنِي تٛکُّٻٜ يٜىٰسُ ٻٜ نغَطَ کَ حٛولَاکِ يٜىٰسُ، ٻٜ اٜکِّتٛو لٜسْنِنْکِ حٛورٜ اِرِ کِ يٜىٰسُ اٜ اِرِ مُݧَلْ نغَلْ بُلُسْ وَطِ، ٻٜ نجٛوطٛو ندٜرْ بٜلْطُمْ ٻٜرْندٜ کٛو ندٜيٜ؞ اٛ سِفْتٛرَنِيٻٜ جٛنْدٜ مَٻّٜ ندٜرْ سُمْڤٛوتِرْکِ اٜ اَلْمَسِيحُ طُمْ شَاحُ اَللَّه طُمْ ٻٜ کٜٻِ بَرْکَ حٛولَاکِ يٜىٰسُ اَلْمَسِيحُ نَاع نغَمْ تٛکُّکِ اَتَّوْرَ؞

¹مِنْ بُلُسْ اٜ تِمٛوتِ مِنْ مَشُّٻٜ يٜىٰسُ اَلْمَسِيحُ؞

مِنْ مبِنْدَنْ فُو يِمْٻٜ اَللَّه تٛکُّٻٜ يٜىٰسُ وٛنْٻٜ غَرِيرِ فِلِبِ اٜ مَوْٻٜ اٜ حُوٛوٻٜ ندٜرْ کَوْتَلْ تٛکُّٻٜ يٜىٰسُ؞ ²اَللَّه ݧَاکٛ مٜىٰطٜنْ اٜ يٜىٰسُ اَلْمَسِيحُ جٛومِرَاوٛ بَرْکِطِنَعٛنْ حٛکَّعٛنْ جَمْ؞

دٛعَارٜ بُلُسْ نغَمْ فِلِبِيَنْکٛعٜنْ

³اٜ مِ يٜتَّ اَللَّه کٛو نغٜلٜ شَرٜلْ تٛ مِ ݧُمِي دٛوْ مٛوطٛنْ؞ ⁴کٛو ندٜيٜ ندٜرْ فُو دٛعَاجٜ اَمْ طٜ نغَطَنَيْمِعٛنْ اٛنْ فُو، اٜ مِ وَطَطٜ ندٜرْ بٜلْطُمْ ٻٜرْندٜ، ⁵نغَمْ اٛنْ نغٛنْدِ اٜ اَمْ ندٜرْ وَعَجِنْکِ حَبَرُ بٜلْطُمْ، دَغَ ݧَلْندٜ اَرَنْدٜىٰرٜ ندٜ ڤُطُّطٛنْ نَنْکِطُمْ حَا وَرْکِ جٛونِ؞ ⁶مِ تَبِّتِنِي اٛنْ طٛنْ ڤُطُّطٛ کُوغَلْ بٛنْغَلْ ندٜرْ مٛوطٛنْ اٛ يٛتِّنَيْنغَلْ حَا يَاکِ ݧَلْندٜ وَرْتٛيْکِ يٜىٰسُ اَلْمَسِيحُ؞ ⁷طُمْ وٛوطَنِييَمْ مِ ݧُمِرَ نِحِ دٛوْ مٛوطٛنْ اٛنْ فُو، نغَمْ اٛنْ ندٜرْ ٻٜرْندٜ اَمْ؞ کٛو ندٜرْ سُرُکِ کِ طُمْ سُرِيَمْ، کٛو ندٜرْ سُرَنْکِ مَنْغُ حَبَرُ بٜلْطُمْ اٜ تَبِّتِنْکِطُمْ، اٛنْ فُو اٛنْ کٜٻِي بَرْکَ اَللَّه حَوْتِ اٜ اَمْ؞ ⁸نغَمْ اَللَّه وٛنِ شٜيْدِيطٛ نٛ کَاٻِرْمِ يِيکِعٛنْ اٜ نٛ نغِطِرْمِعٛنْ، اٛنْ فُو، نٛنْ نٛ يٜىٰسُ اَلْمَسِيحُ يِطِرِعٛنْ؞

⁹دٛعَارٜ اَمْ وٛنِ يِدّٜ مٛوطٛنْ وَطَ کَ ٻٜيْدَاکِ حَوْتِ اٜ اَنْدَلْ اٜ فُو فٜىٰرٛوتِرْکِ حَکُّندٜ غٛونغَ اٜ فٜوْرٜ، ¹⁰نغَمْ مبَاوٛنْ سُٻُکِ کٛ ٻُرِ وٛوطُکِ، نغَرْتٛنْ ٻٜ ٻٜرْطٜ لَٻْطٜ، نغَرْتٛنْ ٻٜ نغَلَا کٛ طُمْ حُطِرْتَعٛنْ حَا يَاکِ ݧَلْندٜ غَرْتٛلْ يٜىٰسُ اَلْمَسِيحُ، ¹¹نغَمْ نغِکُّ مٛوطٛنْ حٜىٰوَ اَادِلَاکُ کٜٻٜتٜىٰطُمْ تٛ يٜىٰسُ اَلْمَسِيحُ، نغَمْ اَللَّه تٜدِّنٜىٰ، مَنْتٜىٰ؞

بُلُسْ اٜ وَطَ جٛنْدٜ نغَمْ اَلْمَسِيحُ تَنْ

¹²بَنْدِرَاٻٜ اَمْ، اٜ مِ يِطِ اَنْدٛنْ کٛ حٜٻِيَمْ وَطِي حَبَرُ بٜلْطُمْ ٻٜيْدِي سَنْکِتَاکِ، ¹³حَا مَا فُو سٛوجِعٜنْ رٜىٰنٛوٻٜ لَامٛرْدٜ اٜ يِمْٻٜ کٛرِيٻٜ اَنْدِي طُمْ حَٻَّمْ نغَمْ مِ مَشُّطٛ اَلْمَسِيحُ؞ ¹⁴حَٻُّکِيَمْ سٜمْبِطِنِي تٛکُّٻٜ يٜىٰسُ طُطْٻٜ ندٜرْ تٛکُّکِمٛ، ٻٜ ٻٜيْدِي حٜٻُکِ سٜمْبٜ ٻٜرْندٜ وَعَجِنْکِ وٛلْدٜ اَللَّه کُلٛلْ وَلَا؞

¹⁵طُمْ غٛونغَ وٛٻّٜ اٜ نغَعَجِنَ حَبَرُ اَلْمَسِيحُ نغَمْ لَوْلِيرُ اٜ طَٻُّتُکِ فٛطْفٛطْتِرْکِ، اَمَّا وٛٻّٜ اٜ نغَعَجِنَ نغَمْ ݧُمٛوجِ بٛطِّ؞ ¹⁶ٻٜعٜ يِمْٻٜ اٜ ٻٜ نغَعَجِنَ نغَمْ يِدّٜ، اٜ ٻٜ اَنْدِ مِ سُرَ طٛعٛ نغَمْ سُرُکِ غٛونغَ حَبَرُ بٜلْطُمْ؞ ¹⁷ٻٜنْ تٛنْ بٛو اٜ ٻٜ نغَعَجِنَ حَبَرُ اَلْمَسِيحُ نغَمْ ٻٜيْدَارِ کٛعٜ مَٻّٜ، نَاع اٜ غٛونغَ، اٜ ٻٜ ݧُمَ ٻٜ اُمِّنَنَيْيَمْ حَکِّيلٛ ندٜرْ نغٜعٜلْ شَرٜلْ نغٜلْ طُمْ حَٻِّيَمْ؞

¹⁸نٛنْ وَنَّايِيَمْ!‏ کٛ ٻُرِ وٛنِ اٜ کٛو نغٛلٜ لَاوٛلْ، کٛو ندٜرْ ݧُمٛوجِ طِ مبٛوطَا، کٛو ندٜرْ ݧُمٛوجِ بٛطِّ، اَلْمَسِيحُ اٜ وَعَجِنٜىٰ؞ نغَمْ مَاجُمْ اٜ مِ نَنَ بٜلْطُمْ!‏ مِ وَطَيْ کَ نَنُکِ بٜلْطُمْ؞ ¹⁹نغَمْ اٜ مِ اَنْدِ بَرْکَ دٛعَارٜ مٛوطٛنْ اٜ بَلَّلْ نغَلْ رُوحُ يٜىٰسُ اَلْمَسِيحُ حٛکَّتَ، اٜ رٜعِرْدٜ طُمْ يٛوفَيْيَمْ دَغَ ندٜرْ سُودُ شُرَلْ؞ ²⁰کٛ کَاٻُمِ يِيکِ اٜ کٛ کَمِّيمِ وٛنِ تٛع مِ سٜمْتِنَ حٛورٜ اَمْ کٛو سٜطَّ، اَمَّا مِ مٜتَ اٜ سٜمْبٜ ٻٜرْندٜ، نغَمْ جٛونِ اٜ کٛو ندٜيٜ طُمْ مَوْنِنَ اَلْمَسِيحُ ندٜرْ کٛو طُمٜ کٛ نغَطَيْمِ، کٛو لَاوٛلْ جٛنْدٜ اَمْ، کٛو لَاوٛلْ مَيْدٜ اَمْ؞ ²¹تٛ مِ ݧَمْرِي يٜىٰسٛ اٜ جٛنْدٜ ندٜرْ دُونِيَارُ ندُعُ، مِ وَطَيْندٜ نغَمْ اَلْمَسِيحُ؞ تٛ مِ مَايِي بٛو، طُمْ ٻٜيْدَارِ؞ ²²تٛ اٜ مِ وٛودِ يٛنْکِ ندٜرْ ٻَنْدُ ندُعُ، مِ حُوَيْ کُوغَلْ نَفَيْنغَلْ؞ اَمَّا مِ دُلِّي کٛ شُٻَيْمِ؞ ²³طُمْ فُو طِطُمْ اٜ طُمْ فٛوطَنَيَمْ حَکِّيلٛ نَاع سٜطَّ؞ کٛ ٻُرْمِ يِطُکِ وٛنِ مِ دِلَّ مِ جٛوطٛدٛو اٜ اَلْمَسِيحُ، نغَمْ کَنْجُمْ ٻُرِ وٛوطُکِ نَاع سٜطَّ؞ ²⁴اَمَّا طُمْ ٻُرَيْ نَفَنْکِعٛنْ مِ جٛوطٛو تَوْ؞ ²⁵مِ تَبِّتِنِي طُمْ نٛنْ؞ نغَمْ مَاجُمْ اٜ مِ اَنْدِ مِ جٛوطٛدٛتٛ اٜ يٛنْکِ تَوْ، مِ ݧَمْرَ يٜىٰسٛ اٜ جٛوطٛدَاکِ اٜ مٛوطٛنْ اٛنْ فُو، نغَمْ ݧَمْرٛنْ يٜىٰسٛ، نَنٛنْ بٜلْطُمْ ندٜرْ حٛولَاکِ يٜىٰسُ؞ ²⁶نٛنْ وَطَيْ نغَمْ لَاوٛلْ اَمْ کٜٻٛنْ دَلِيلَ شٜمْبِطُّمْ طُمْ مَنْتٛرْتٛوطٛنْ اَلْمَسِيحُ نغَمْ سٛعّٛيَاکِ اَمْ تٛ مٛوطٛنْ؞

²⁷کٛ ٻُرِ وٛنِ نغَطٜىٰ جٛنْدٜ ڤٛتُّدُندٜ اٜ حَبَرُ بٜلْطُمْ دٛوْ اَلْمَسِيحُ، نغَمْ کٛو مِ وَرِي مِ يِعِعٛنْ، کٛو مِ وَلَا طٛنْ، مِ نَنَ حَبَرُ اٛنْ طٛنْ ندَرِي بٛطُّمْ ندٜرْ ݧُمٛ غٛعٛ، کٛ نغِطّٛنْ غٛعٛ؞ اٛنْ ڤِيدَ نغَمْ سُرَنْکِ کٛ حَبَرُ بٜلْطُمْ وِعِ، ²⁸نَاع ندٜرْ کُلٛلْ وَݧْوَݧْٻٜ مٛوطٛنْ کٛو سٜطَّ؞ نٛنْ وٛنِ اَلَامَ تَبِّتِنَنَيْطُمْٻٜ ٻٜ کَلْکَيْ، اَمَّا اٛنٛنْ طُمْ تَبِّتِنْکِ کِسْندَمْ مٛوطٛنْ؞ طُمْ فُو اَللَّه وٛنِ غَطَيْطٛطُمْ؞ ²⁹اٛ بَرْکِطِنِيعٛنْ؞ بَرْکَ طُمْ وٛنِ نَاع کٜٻٛنْ کٛولٛوطٛنْ اَلْمَسِيحُ تَنْ، اَمَّا حَا کٜٻٛنْ نجَرٛنْ تٛرَّ نغَمْ مَاکٛ؞ ³⁰تٛرَّ کَ نجَرٛتٛنْ طُمْ اِرِ تٛرَّ کَ نجَرُمِ کَ نغِيطٛنْ، کَ نَنٛتٛنْ اٜ مِ يَرَ حَا جٛونِ؞

نٛ اَلْمَسِيحُ لٜسْتِنِرِ حٛورٜ

¹ندٜ سُمْڤٛوتِرْکِ اٜ اَلْمَسِيحُ اٜ سٜمْبِطِنَعٛنْ، ندٜ يِدّٜ مَاکٛ اٜ وَلْتِنَ ٻٜرْطٜ مٛوطٛنْ، ندٜ اٛنْ شُمْڤٛوتِرَ اٜ رُوحُ اَللَّه، ندٜ اٛنْ نغٛودِ يِدّٜ اٜ يُرْمٜىٰندٜ، ²نٛ مبٜلْنِرَنْتٛنْيَمْ ٻٜرْندٜ وٛنِ ݧُمٛ مٛوطٛنْ وَرْتَ غٛعٛ، اٛنْ نغِطِندِرَ، اٛنْ کَوْتِ کٛعٜ؞ ³تٛع اٛنْ نغَطُ کٛو طُمٜ ندٜرْ يِدّٜ حٛورٜ کٛو ندٜرْ مَنْغُ حٛورٜ، اَمَّا ندٜرْ لٜسْنُکِ حٛورٜ کٛو مٛيٜ حٛشَّ بَنْدِرَاوٛ مُوطُمْ ٻُرِيمٛ؞ ⁴تٛع کٛو مٛيٜ مٛوطٛنْ يِطَ کٛ نَفَنْتَ حٛورٜ مُوطُمْ تَنْ، اَمَّا اٛ يِطَ کٛ نَفَنْتَ وٛٻّٜ مَا؞ ⁵نغِکُّ مٛوطٛنْ وَرْتَ اِرِ طُمْ يٜىٰسُ اَلْمَسِيحُ؞

⁶کٛو ندٜ ندٜرْ کٛو طُمٜ اٛ غٛعٛ اٜ اَللَّه، اٛ حٛشَّايِ فٛتُّدُکِ اٜ اَللَّه غٛطُّمْ کٛ اٛ جٛغٛتٛو؞

⁷اَمَّا اٛ وَرْتِرِي حٛورٜ مَاکٛ نَاع اٛ غٛطّٛ، اٛ وَرْتِ مَشُّطٛ، اٛ دَݧَا ندٜرْ نَنْدِ نٜطّٛ؞

⁸غَطَ اٛ دَݧَامَ ندٜرْ نَنْدِ نٜطّٛ، اٛ لٜسْتِنِ حٛورٜ مَاکٛ اٛ وَطِ کٛ طُمْ وِعِمٛ حَا اٛ مَايِ

مَيْدٜ دٛوْ غَافَانغَلْ؞

⁹نغَمْ نٛنْ، اَللَّه حٛکِّمٛ مَنْغُ ٻُرْطُمْ طُمْ کٛو مٛيٜ،

ندٜنْ حٛکِّمٛ اِنْدٜ ٻُرْندٜ کٛو ندٜيٜ اِنْدٜ؞

¹⁰نغَمْ کٛو طُمٜ کٛ وٛنِ اٜ دٛوْ، اٜ کٛ وٛنِ اٜ دُونِيَارُ، اٜ کٛو طُمٜ کٛ وٛنِ اٜ لَاحِرَ، طُمْ دِشَّنْتٛ يٜىٰسُ؞

¹¹ندٜنْ يٜىٰسٛ کٛو طُمٜ کٛو نغَلٜ طٜمْنغَلْ وِعَيْ يٜىٰسُ اَلْمَسِيحُ اٛ جٛومِرَاوٛ،

نغَمْ مَوْنِنْکِ اَللَّه ݧَاکٛ مٛ دٛوْ؞

نغَرْتٜىٰ جَيْنغٛلْ ندٜرْ دُونِيَارُ

¹²نغَمْ نٛنْ اٛنٛنْ ٻٜ نغِطُمِ، کٛو ندٜيٜ اٛنْ نغَطَ کٛ طُمْ وِعِعٛنْ شَرٜلْ کٛ نغٛنْدُنٛومِ اٜ مٛوطٛنْ؞ جٛونِ مَا ندٜ مِ وَلَا طٛنْ، ٻٜيْدٜىٰ وَطُکِ کٛ طُمْ وِعِعٛنْ؞ نغَطٜىٰ کَ حُوُکِ کُوغَلْ کِسْندَمْ مٛوطٛنْ ندٜرْ کُلٛلْ اَللَّه؞ ¹³نغَمْ اَللَّه اٜ حُوَ ندٜرْ ٻٜرْطٜ مٛوطٛنْ نغَمْ اٛ وَطَعٛنْ نغِطٛنْ وَطُکِ کٛ اٛ يِطِ، مبَاوٛنْ وَطُکِطُمْ؞

¹⁴فُو کٛ نغَطٛتٛنْ، تٛع اٛنْ نغَطُطُمْ ندٜرْ مٜتِتَاکِ، کٛو ندٜرْ غٜدِّ، ¹⁵نغَمْ نغَرْتٛنْ وَلَا کٛ طُمْ حُطِرْتَعٛنْ، لَاٻُٻٜ، ٻِٻّٜ اَللَّه ٻٜ نغَلَا حَلّٜىٰندٜ ندٜرْ جَامَنُ يِمْٻٜ ٻٜ نغَلَا غٛونغَ کَلُّٻٜ، نغَرْتٛنْ جَيْنٛتٛوٻٜ ندٜرْ مَٻّٜ بٛ فِتِلَاجِ اٜ دُونِيَارُ، ¹⁶ندٜرْ حٛکُّکِ حَبَرُ وٛلْدٜ کٛکَّيْندٜ يٛنْکِ؞ تٛ اٛنْ نغَطِي نٛنْ، ݧَلْندٜ وَرْتُکِ اَلْمَسِيحُ مِ مَنْتِتٛتٛ، نغَمْ کُوغَلْ اَمْ اٜ حَٻْدُکِ اَمْ وَرْتَايِ مٜىٰرٜ؞

¹⁷کُوطٜ طٜ کُوٛتٛنْ نغَمْ اٛنْ کٛولَکٜ جٛومِرَاوٛ، بٛ شَکِّرِ طٜ نغٛنِ تٛ مَاکٛ؞ کٛو تٛ طُمْ رُفَيْ پِيپَمْ اَمْ دٛوْ شَکِّرِ ندِنْ، مِ نَنَيْ بٜلْطُمْ، مبٜلْمبٜلْتٜنْ اٜنْ فُو؞ ¹⁸نٛنْ اٛنٛنْ مَا، اٜ حَانِ نَنٛنْ بٜلْطُمْ، مبٜلْمبٜلْتٜنْ؞

تِمٛوتِ اٜ اَبَافٛرٛدِتُسْ

¹⁹اٜ مِ کَمِّي، تٛ يٜىٰسُ جٛومِرَاوٛ جَٻِي، مِ لِلْدٛنٛيَيْعٛنْ تِمٛوتِ نَاع کٛ نٜىٰٻِ نغَمْ مِ نَنَ حَبَرُ مٛوطٛنْ طُمْ سٜمْبِطِنَيَمْ؞ ²⁰مِ وَلَا غٛطّٛ غَنُّطٛ اٜ مٛوطٛنْ بٛ مَاکٛ؞ ²¹حٛرِيٻٜ ٻٜنْ کٛو مٛيٜ کٛ وٛنِ يٜىٰسٛ مُوطُمْ تَنْ وَنِّمٛ، نَاع کٛ يٜىٰسُ اَلْمَسِيحُ يِطِ؞ ²²اَمَّا اٛنْ اَنْدِ نٛ تِمٛوتِ حٛلِّرِ نَفُکِ مُوطُمْ، اٛ حُودِي اٜ اَمْ ندٜرْ کُوغَلْ حٛکُّکِ حَبَرُ بٜلْطُمْ بٛ ٻِطّٛ اٜ ݧَاکٛ مُوطُمْ؞ ²³نغَمْ نٛنْ، کَنْکٛ نغِطُمِ لِلٛيْکِ تٛ مٛوطٛنْ نٛ نَنِرْمِ کٛ حٜٻَتَيَمْ؞ ²⁴ندٜنْ مِ تَبِّتِنِي، تٛ جٛومِرَاوٛ جَٻِي، مِنْ مَا مِ وَرَيْ نَاع کٛ نٜىٰٻِ؞

²⁵مِ يِعِي اٜ حَانِ مِ لِلٛنٛيَعٛنْ بَنْدِرَاوٛ اَمْ اَبَافٛرٛدِتُسْ حِغٛ کُوغَلْ اَمْ، حِغٛ تٛرَّ اَمْ طٛنْمَا، مٛ لِلٛيْطٛنْ وَلَّيَمْ؞ ²⁶نغَمْ اٛ حَاٻِي اٛ يِعَعٛنْ اٛنْ فُو، اٛ وَنِّي نغَمْ اٛنْ نَنِي اٛ يَمْطَا؞ ²⁷غٛونغَ اٛ وَطِي شِيَ نجَمُ حَا اٛ ٻَدَکٜ اٛ مَايَ؞ اَمَّا اَللَّه يُرْمِنَنِيمٛ، نَاع کَنْکٛ تَنْ، حَا اٜ مِنْ، نغَمْ تٛع وَنَّارٜ طُوطَنَيَمْ؞ ²⁸کَنْجُمْ وَطِ کَاٻُمِ نَاع سٜطَّ مِ لِلٛيَمٛ تٛ مٛوطٛنْ نغَمْ ڤُطِّتٛنْ نغِعٛنْمٛ نَنٛنْ بٜلْطُمْ، ندٜنْ وَنَّارٜ اَمْ اُسْتٛو؞ ²⁹نغَمْ نٛنْ، نجَٻّٜىٰمٛ ندٜرْ وٜلْوٜلٛ طُطْنغٛ نغَمْ جٛومِرَاوٛ، ندٜنْ کٛکّٜىٰ اِرِ مَاکٛ مَنْغُ نٛ حَانِ؞ ³⁰نغَمْ ندٜنّٛ اٛ ٻَدَکٜ اٛ مَايَ دٛوْ کُوغَلْ اَلْمَسِيحُ؞ اٛ سٛورِي يٛنْکِ مَاکٛ نغَمْ اٛ حُوَ کُوغَلْ وَلُّکِيَمْ نغَلْ اٛنْ مبَاوَتَا حُوُکِ؞

اَادِلَاکُ طُمْ غٛونغَ

¹اٜ رٜعِرْدٜ بَنْدِرَاٻٜ اَمْ، نَنٜىٰ بٜلْطُمْ نغَمْ سُمْڤٛوتِرْکِ مٛوطٛنْ اٜ جٛومِرَاوٛ؞ مِ سٛمَايِ وِنْدَنْکِعٛنْ کٛ مبِنْدَنّٛومِعٛنْ ندٜنّٛ، نغَمْ طُمْ سُرُکِ نجَمُ مٛوطٛنْ؞ ²نغَطٜىٰ حَکِّيلٛ اٜ ٻٜنْ طٛنْ يِمْٻٜ ٻٜ نغِکُّ بٛ طُمْ کُتِيجِ، کُوٛوٻٜ کُوطٜ کَلُّطٜ، وِعٛوٻٜ دٛولٜ طُمْ نَادَ کٛ طُمْ حٜٻَ کِسْندَمْ؞ ³نغَمْ اٜنٜنْ نغٛودِ نَادُکِ کِ غٛونغَ، اٜنٜنْ مَوْنِنٛوٻٜ اَللَّه ندٜرْ رُوحُ مَاکٛ، مَنْتٛرْتٛوٻٜ يٜىٰسُ اَلْمَسِيحُ؞ اٜنٜنْ اٜنْ نغَطَتَا ٻٜرْطٜ مٜىٰطٜنْ دٛوْ کُوطٜ طٜ نغَطٜتٜنْ اٜ ٻَنْدُ نغَمْ اَللَّه جَٻَعٜنْ، ⁴کٛو ندٜ مِنْ، اٜ مِ وٛودِ دَلِيلَ وَطُکِ ٻٜرْندٜ اَمْ دٛوْ کُوطٜ ٻَنْدُ؞ تٛ اٜ وٛودِ کَمِّيطٛ اٜ وٛودِ دَلِيلَ وَطُکِ ٻٜرْندٜ دٛوْ کُوطٜ ٻَنْدُ، مِ ٻُرِيمٛ؞ ⁵مِ نَادَامَ اٜ ݧَلْندٜ جٛوٜىٰتَتَوْرٜ غَطَ مِ دَݧَامَ؞ مِ اِسْرَاعِيلَنْکٜىٰجٛ، دَغَ لٜݧٛلْ بِلِيَامِنُ، مِ اِبْرَانِيَنْکٜىٰجٛ دِمٛ، ٻِطّٛ اِبْرَانِيَنْکٛعٜنْ؞ دٛوْ تٛکُّکِ اَتَّوْرَ، مِ فَارِسَنْکٜىٰجٛ؞ ⁶مِ تٛکِّي دِينَ اَمْ حَا مِ تٛرِّي تٛکُّٻٜ يٜىٰسُ؞ دٛوْ وَطُکِ اَادِلَاکُ ندٜرْ تٛکُّکِ اَتَّوْرَ، طُمْ تَوْرَايِيَمْ غٛطُّمْ کٛ وٛوطَا؞ ⁷اَمَّا فُو کٛ نغِعَيْنٛومِ بٛ طُمْ نَفَنَيْيَمْ، جٛونِ مِ حٛشِّيطُمْ طُمْ مٜىٰرٜ نغَمْ اَلْمَسِيحُ؞ ⁸کٛ ٻُرِ نٛنْ وٛنِ مِ حٛشِّي کٛو طُمٜ مٜىٰرٜ، نغَمْ کٛ ٻُرِ مَنْغُ وٛنِ اَنْدُکِ يٜىٰسُ اَلْمَسِيحُ جٛومِرَاوٛ اَمْ؞ نغَمْ مَاکٛ شٜنْدِرْمِ اٜ کٛو طُمٜ نغَرْتِرْمِ طُمْ مٜىٰرٜ، نغَمْ مِ تٛکَّمٛ، ⁹مِ وَرْتَ شُمْڤٛوتِرٛووٛ اٜ مَاکٛ؞ مِ وَرْتَيْ نٛنْ نَاع نغَمْ اَادِلَاکُ طُمْ نغٛودُمِ نغَمْ تٛکُّکِ اَتَّوْرَ، اَمَّا نغَمْ اَادِلَاکُ کٜٻٜتٜىٰطُمْ ندٜرْ حٛولَاکِمٛ، وَاتٛ اَادِلَاکُ پِوٛيْطُمْ تٛ اَللَّه کٜٻٜتٜىٰطُمْ بَرْکَ حٛولَاکِ اَلْمَسِيحُ؞ ¹⁰کٛ نغِطُمِ وٛنِ، مِ اَنْدَ اَلْمَسِيحُ اٜ بَوْطٜ اُمَّاکِ مَاکٛ دَغَ مَيْدٜ؞ اٜ مِ يِطِ مِ يَرَ اِرِ تٛرَّ کَ اٛ يَرِ، مِ مَايِرَ نٛ اٛ مَايِرِ، ¹¹نغَمْ فُو نٛ طُمْ وَطِ مِ حٜٻَ مِ اُمّٛو دَغَ مَيْدٜ؞

طَٻُّتُکِ جَالٛرْغَلْ

¹²مِ وِعَايِ مِ يَادَکٜ مِ وَرْتِي کٛو طُمٜ کٛ حَانِ مِ وَرْتَ، کٛو بٛو مِ يَادَکٜ مِ وَرْتِي کٜوْطٛ؞ اَمَّا اٜ مِ وَطَ کٛ مبَاوَيْمِ وَطُکِ نغَمْ مِ وَرْتَ نٛنْ، نغَمْ يٜىٰسُ اَلْمَسِيحُ يَادَکٜ وَرْتِرِييَمْ مٛ مَاکٛ؞ ¹³بَنْدِرَاٻٜ، مِ حٛشَّايِ مِ يَادَکٜ مِ وَرْتِي نٛنْ؞ اَمَّا فِي غٛعٛ نغَطَيْمِ:‏ اٜ مِ يٜجِّتَ کٛ پَٻِّي، اٜ مِ وَطَ کٛ مبَاوَيْمِ وَطُکِ مِ يٛتّٛو کٛ وٛنِ يٜىٰسٛ؞ ¹⁴اٜ مِ ݧَمْرَ يٜىٰسٛ نغَمْ مِ حٜٻَ جَالٛرْغَلْ مِ حٛکّٜىٰ دٛکَّلْ، وَاتٛ نٛدّٛلْ يَاکِ دٛوْ نغٛلْ اَللَّه نٛدِّيَمْ بَرْکَ يٜىٰسُ اَلْمَسِيحُ؞

¹⁵فُو اٜنٜنْ شٜمْبِطْٻٜ ندٜرْ تٛکُّکِ يٜىٰسُ، اٜ حَانِ ݧُمِرٜنْ نٛنْ؞ تٛ اٛنْ ݧُمِي غٛطُّمْ فٜىٰرٜ، اَللَّه حٛلَّيْعٛنْ طُمْ اٜ نجَيْرِ؞ ¹⁶اَمَّا اٜنْ ݧَمْرَ يٜىٰسٛ اٜ تٛکُّکِ غٛونغَ کَ نجَادِيطٜنْ اٜکِّتِيطٜنْ؞

¹⁷بَنْدِرَاٻٜ اَمْ، اٜکِّتٜىٰ تٛ اَمْ؞ ندَارٛنْ غَطٛوٻٜ جٛنْدٜ کَانُندٜ ندٜ مِنْ اٜکِّتِنِعٛنْ؞ ¹⁸نغَمْ اٜ وٛودِ يِمْٻٜ طُطْٻٜ ٻٜ مٜتَنْمِعٛنْ دٛوْ مَٻّٜ، جٛونِ اٜ مِ فُطِّتَ اٜ مِ وِعَعٛنْکَ اٜ غٛنْطِ، اٜ ٻٜ نغَطَ جٛنْدٜ وَݧْوَݧْٻٜ غَافَانغَلْ اَلْمَسِيحُ؞ ¹⁹رٜعِرْدٜ مَٻّٜ طُمْ حَلْکٜرٜ، دٜىٰطِ مَٻّٜ نغٛنِ اَلَّح مَٻّٜ، اٜ ٻٜ مَنْتٛرٛو کٛ سٜمْتِنِي طُمْ ٻٜ نغَطَتَ؞ ٻٜ نغَطِي ٻٜرْطٜ مَٻّٜ دٛوْ کٛ وٛنِ ندٜرْ دُونِيَارُ؞ ²⁰اَمَّا اٜنٜنْ طُمْ ٻٜ لَامُ دٛوْ، اٜنْ کَاٻِي وَرْتٛيْکِ کِسْنٛووٛ، وَاتٛ يٜىٰسُ اَلْمَسِيحُ جٛومِرَاوٛ غَرٛيَيْطٛ دَغَ تٛنْ؞ ²¹اٛ وَيْلِتَيْ ٻَلِّ مٜىٰطٜنْ تَمْڤُطِ مَايَيْطِ، اٛ وَرْتِرَطِ بٛ ٻَنْدُ مَاکٛ غٛودُندُ تٜدُّنغَلْ؞ اٛ وَطَيْ نٛنْ اٜ بَوْطٜ مَاکٛ طٜ اٛ وَرْتِرْتَ کٛو طُمٜ لٜيْ لَامُ مَاکٛ؞

تٛکُّکِ جٛومِرَاوٛ بٛطُّمْ

¹نغَمْ نٛنْ، اٛنٛنْ بَنْدِرَاٻٜ اَمْ ٻٜ نغِطُمِ ٻٜ کَاٻُمِ يِيکِ، اٛنٛنْ نغٛنِ بٜلْطُمْ ٻٜرْندٜ اَمْ، اٛنٛنْ مَنْتٛرْتٛومِ؞ نٛنْ حَانِ ندَرٛرٛوطٛنْ بٛطُّمْ ندٜرْ تٛکُّکِ جٛومِرَاوٛ، اٛنٛنْ ٻٜ نغِطُمِ؞

²اٜ مِ تٛرٛو يُودِيَ اٜ سِنْتِکِ ٻٜ شِرْيٛوتِرَ نغَمْ کَمْٻٜ طُمْ ٻٜ جٛومِرَاوٛ؞ ³اَنْ حِغٛ کُوغَلْ اَمْ مٛ غٛونغَ، اٜ مِ تٛرٛمَا، وَلُّ رٜوْٻٜ ٻٜعٜ، نغَمْ ٻٜ کُودِي اٜ اَمْ کُوغَلْ شَطُنغَلْ نغَلْ وَعَجِنْکِ حَبَرُ بٜلْطُمْ، حَوْتِ اٜ کِلٜمٜنْ اٜ حٛرِيٻٜ حِغٛوٻٜ کُوغَلْ اَمْ، ٻٜ اِنْطٜ مَٻّٜ اٜ وِنْدِي ندٜرْ دٜفْتٜرٜ يٛنْکِ؞

⁴کٛو ندٜيٜ نَنٜىٰ بٜلْطُمْ نغَمْ جٛومِرَاوٛ؞ اٜ مِ فُطِّتَ اٜ مِ وِعَعٛنْ، نَنٜىٰ بٜلْطُمْ!‏

⁵اَلٜىٰ کٛو مٛيٜ يِعَ مُݧَلْ مٛوطٛنْ؞ جٛومِرَاوٛ ٻَدَکٜ وَرَ؞ ⁶تٛع اٛنْ نغَنُّ دٛوْ کٛو طُمٜ، اَمَّا ندٜرْ کٛو طُمٜ مبِعٜىٰ اَللَّه کٛ نغِطّٛنْ ندٜرْ دٛعَارٜ اٜ تٛرَاکِ اٜ يٜتّٛورٜ؞ ⁷ندٜنْ جَمْ طُمْ اَللَّه حٛکَّتَ پَٻِّيطُمْ فَامُ نٜطّٛ طُمْ سُرَيْ ٻٜرْطٜ مٛوطٛنْ اٜ ݧُمٛ مٛوطٛنْ نغَمْ اٛنْ شُمْڤٛوتِرَ اٜ يٜىٰسُ اَلْمَسِيحُ؞

⁸اٜ رٜعِرْدٜ بَنْدِرَاٻٜ اَمْ، نغَطٜىٰ کَ ݧُمُکِ دٛوْ کٛو طُمٜ کٛ وٛنِ طُمْ غٛونغَ، اٜ کٛ مَوْنِنٜىٰ، اٜ کٛ حَانِ، اٜ کٛ لَاٻِ، اٜ کٛ وٜلْنَنْتَ يِمْٻٜ ٻٜرْطٜ، اٜ کٛ طُمْ يِعَتَ اٜ وٛوطِ، اٜ کٛو طُمٜ نغِکُّ بٛطُّمْ، اٜ کٛ حٜوْتِ مَنْتٜىٰکِ؞ ⁹کٛو طُمٜ کٛ اٜکِّتِيطٛنْ، اٜ کٛ کٜٻُطٛنْ، اٜ کٛ نَنْطٛنْ، اٜ کٛ نغِيطٛنْ تٛ اَمْ، نغَطٜىٰطُمْ، ندٜنْ اَللَّه جٛومُ جَمْ وٛنْدَيْ اٜ مٛوطٛنْ؞

بُلُسْ يٜتِّي تٛکُّٻٜ يٜىٰسُ وٛنْٻٜ فِلِبِ

¹⁰اٜ مِ نَنَ بٜلْطُمْ، مِ يٜتِّي جٛومِرَاوٛ نَاع سٜطَّ، نغَمْ جٛونِ اٛنْ شٛعَّکٜ اٛنْ مبَلَّيَمْ؞ غٛونغَ ندٜنّٛ اٛنْ ݧُمَ دٛوْ اَمْ، اَمَّا لَاوٛلْ وٛنِ اٛنْ کٜٻَايِ؞ ¹¹مِ وِعَايِ نٛنْ نغَمْ اٜ مِ يِطِ غٛطُّمْ؞ نغَمْ مِ اٜکِّتَکٜ ندٜرْ فُو تٛ کٜٻُمِ حٛورٜ اَمْ مِ مُݧِدَ اٜ کٛ نغٛودُمِ؞ ¹²اٜ مِ اَنْدِ نٛ نجٛوطٛرْتٛومِ ندٜرْ شِيَ، اٜ مِ اَنْدِ نٛ نجٛوطٛرْتٛومِ ندٜرْ غٛودَلْ؞ مِ اٜکِّتَکٜ نٛ نجٛوطٛرْتٛومِ ندٜرْ فُو تٛ کٜٻُمِ حٛورٜ اَمْ، کٛو ندٜرْ حَارَنْدٜ، کٛو ندٜرْ وٜىٰلٛ، کٛو ندٜرْ غٛودَلْ، کٛو ندٜرْ دُلّٜرٜ؞ ¹³مِ وَاوَيْ وَطُکِ کٛو طُمٜ بَرْکَ اٛنْ طٛنْ شٜمْبِطِنْطٛيَمْ؞

¹⁴اَمَّا اٛنْ نغَطِي بٛطُّمْ ندٜ مبَلُّطٛيْيَمْ ندٜرْ تٛرَّ اَمْ؞ ¹⁵اٛنٛنْ فِلِبِيَنْکٛعٜنْ، اٛنٛنْ اٜ کٛعٜ مٛوطٛنْ اٛنْ اَنْدِ شَرٜلْ کٛ ڤُطُّطٛنْ نَنْکِ حَبَرُ بٜلْطُمْ، ندٜ اَلْمِ لٜيْدِ مَکِدٛونِيَ، وَلَا وٛٻّٜ تٛکُّٻٜ يٜىٰسُ بَلُّٻٜيَمْ سٜيْ اٛنٛنْ تَنْ؞ ¹⁶نغَمْ کٛو شَرٜلْ کٛ نغٛنْمِ تَسَلٛونِکَ اٛنْ لِلْدَنِييَمْ بَلَّلْ نَاع ندٜ غٛعٛ، نَاع ندٜ طِطِ؞ ¹⁷نَاع اٜ مِ طَٻِّتَ دٛکَّلْ تٛ مٛوطٛنْ، اَمَّا اٜ مِ طَٻِّتَنَعٛنْ ٻٜيْدَارِ دٛوْ بَرْکَ طُمْ نغٛودُطٛنْ؞ ¹⁸مِ حٜٻِي دٛکَّلْ نغَلْ لِلْدٛيْطٛيْيَمْ تٛ جُنْغٛ اَبَافٛرٛدِتُسْ؞ نغَلْ ٻُرِ کٛ نغِطُمِ؞ نغَلْ وَرْتِي بٛ اُرْدٜ وٜلْندٜ ندٜ طُمْ حٛکَّتَ اَللَّه، شَکِّرِ ندِ اٛ جَٻَتَ، مبٜلْنَنَيْندِمٛ ٻٜرْندٜ؞ ¹⁹اَللَّه اَمْ حٛکَّيْعٛنْ کٛو طُمٜ کٛ نغِطّٛنْ دَغَ ندٜرْ رِسْکُ مَاکٛ طُطُّمْ بَرْکَ يٜىٰسُ اَلْمَسِيحُ؞ ²⁰تٜدُّنغَلْ تَبِّتَ تٛ اَللَّه مٜىٰطٜنْ، ݧَاکٛ مٜىٰطٜنْ حَا اَبَدَا اَبَدِنْ!‏ اَامِنْ؞

کٛوْنٛلْ شَکِتِينغٛلْ

²¹کٛوْنٜىٰ فُو يِمْٻٜ اَللَّه ندٜرْ اِنْدٜ يٜىٰسُ اَلْمَسِيحُ؞ تٛکُّٻٜ يٜىٰسُ وٛنْدُٻٜ اٜ اَمْ طٛعٛ اٜ کٛوْنَعٛنْ؞ ²²فُو يِمْٻٜ اَللَّه اٜ کٛوْنَعٛنْ، کٛ ٻُرِ وٛنِ کُوٛوٻٜ اٜ لَامٛرْدٜ کَيْسَرْ؞

²³يِدّٜ يٜىٰسُ اَلْمَسِيحُ جٛومِرَاوٛ وٛنْدَ اٜ مٛوطٛنْ؞ اَامِنْ؞