مَرْکُسْ

حَبَرُ يٜىٰسُ طُمْ

مَرْکُسْ

وِنْدِ

حَبَرُ دٛوْ طٜرٜوٛلْ نغٛعٛلْ

بِنْدُطٛ طٜرٜوٛلْ نغٛعٛلْ وٛنِ مَرْکُسْ، کَنْکٛ اٛ تٛکُّطٛ يٜىٰسُ، کَنْکٛ وِعٜتٜىٰ يَحَيَ مَرْکُسْ؞ اٛ حِغٛ بِيتُرُسْ نَاع سٜطَّ؞ اٛ وِنْدِي طٜرٜوٛلْ نغٛعٛلْ ندٜرْ غَرِيرِ رٛومَ اٜ حِتَاندٜ ندٜ طُمْ سَنْکِتِ اُرُشَلِيمَ وَاتٛ دُوٻِ 70 غَطَ دَݧْنغٛلْ يٜىٰسُ؞ طٜرٜوٛلْ نغٛعٛلْ وٛنِ طٜرٜوٛلْ اَرْتُنغٛلْ وِنْدٜىٰکِ فُو ندٜرْ طٜرٜىٰجِ حَبَرُ يٜىٰسُ نَيِ؞

مَرْکُسْ فُطِّرِي طٜرٜوٛلْ مُوطُمْ اٜ وِيکِ، ‏«‏طُعُمْ وٛنِ حَبَرُ بٜلْطُمْ دٛوْ يٜىٰسُ اَلْمَسِيحُ؞»‏ اٛ حٛلِّي يٜىٰسُ اٛ کُوٛووٛ کُوطٜ کَيْطِنِيطٜ، غٛودُطٛ بَوْطٜ دَغَ تٛ اَللَّه؞ بَوْطٜ مَاکٛ وَنْغِي ندٜ اٛ اٜکِّتِنِ يِمْٻٜ، ندٜ اٛ رِيوِ غِنِّ، ندٜ اٛ يَافَنِي يِمْٻٜ حَکّٜ مَٻّٜ؞ يٜىٰسُ نٛدِّرِي حٛورٜ مُوطُمْ ٻِي نٜطّٛ غَرْطٛ حٛکُّکِ يٛنْکِ مُوطُمْ نغَمْ اٛ حِسْنَ يِمْٻٜ دَغَ حَکّٜ مَٻّٜ؞ کَلُّٻٜ مبَرِمٛ، اَمَّا اٛ اُمَّکٜ دَغَ مَيْدٜ غَطَ بَلْطٜ تَتِ؞ نغٛلْ حٛلِّي تٛکُّطٛ يٜىٰسٛ فُو تٛ مَايِ نَتَّيْ وُرٛ اَللَّه؞

وَعَجُ يَحَيَ غَطٛووٛ بَڤْتِسْمَ

¹طُعُمْ وٛنِ حَبَرُ بٜلْطُمْ دٛوْ يٜىٰسُ اَلْمَسِيحُ، ٻِطّٛ اَللَّه؞ ²طُمْ وِنْدَامَ ندٜرْ دٜفْتٜرٜ اَنَّبِ اِشَايَ وِيکِ،

‏«‏اَللَّه وِعِ، ‏‹‏رَطُّمْ، مِ لِلٛيَيْ لِلَاطٛ اَمْ

اٛ اَرْدٛو يٜىٰسٛ مَاطَ اٛ مٛعِّنَنْمَا لَاوٛلْ؞›‏

³غٛطّٛ اٜ نٛدَّ ندٜرْ لَدّٜ، اٜ وِعَ،

‏‹‏مٛعِّنٜىٰ طَتَلْ جٛومِرَاوٛ، ڤٛرْتٜىٰ لَاوٛلْ نغَمْ

غَرٛلْ مَاکٛ؞›‏ »‏

⁴نٛنْ بٛو يَحَيَ غَطٛووٛ بَڤْتِسْمَ جٛوطِي ندٜرْ لَدّٜ، اٜ وَعَجِنَ، اٜ مٛ وِعَ، ‏«‏تُوبٜىٰ، طُمْ وَطَنَعٛنْ بَڤْتِسْمَ، ندٜنْ اَللَّه يَافَنْتٛعٛنْ حَکّٜىٰجِ مٛوطٛنْ؞»‏ ⁵يِمْٻٜ طُطْٻٜ دَغَ لٜيْدِ يَحُودِيَ فُو اٜ غَرِيرِ اُرُشَلِيمَ نغَطِ کَ يَاکِ تٛ مَاکٛ؞ اٜ ٻٜ مبِعَ فُو کٛ وٛوطَا طُمْ ٻٜ نغَطِ، اٜ مٛ وَطَنَٻٜ بَڤْتِسْمَ ندٜرْ شَانغٛلْ اُرْدُنْ؞

⁶يَحَيَ اٜ ٻٛرْنِي کٛلْتٜ طٜ طُمْ وَطِرِ لٜىٰٻٜ نغٜىٰلٛوبَ، اٜ مٛ تَادِي تَادٛرْدٜ لَرَلْ؞ ݧَمْندُ مَاکٛ وٛنِ بَابٜىٰجِ اٜ نجُمْرِ؞ ⁷اٜ مٛ وَعَجِنَ، اٜ مٛ وِعَ، ‏«‏غٛطّٛ اٜ وَرَ غَطَ اَمْ اٛ ٻُرِييَمْ مَنْغُ، کٛو لٛکُّلِّ ڤَطٜ مَاکٛ مِ فٛتَايِ تُرَاکِ مِ فِتَّطِ؞ ⁸اٜ مِ وَطِرَنَعٛنْ بَڤْتِسْمَ اٜ ندِيَمْ، اَمَّا کَنْکٛ اٛ وَطِرَنَيْعٛنْ بَڤْتِسْمَ اٜ رُوحُ اَللَّه؞»‏

يٜىٰسُ وَطَنَامَ بَڤْتِسْمَ

⁹ندٜرْ بَلْطٜ طٜنْ يٜىٰسُ وَرٛيِ دَغَ غَرِيرِ نَجَرَتْ ندٜرْ لٜيْدِ غَلِيلِ، سٜيْ يَحَيَ وَطَنِمٛ بَڤْتِسْمَ ندٜرْ شَانغٛلْ اُرْدُنْ؞ ¹⁰اٜ وُرْتَاکِ يٜىٰسُ دَغَ ندٜرْ ندِيَمْ طَمْ، اٛ يِعِ دٛوْ اٜ مَٻِّتٛو، رُوحُ اَللَّه اٜ جِڤّٛيٛو دٛوْ مَاکٛ بٛ فٛوندُ؞ ¹¹حٛنٛنْدٜ پِوٛيِ دَغَ دٛوْ وِعِ، ‏«‏اَنْ وٛنِ ٻِطّٛ اَمْ، مٛ نغِطُمِ؞ اٜ مِ نَنَ بٜلْطُمْ مَاطَ؞»‏

¹²طٛنْ اٜ طٛنْ رُوحُ اَللَّه يَارِمٛ ندٜرْ لَدّٜ؞ ¹³تٛنْ اٛ وَطِ بَلْطٜ 40 شٜيْطَنْ اٜ فٛوندَمٛ؞ اٜ مٛ وٛنْدِ اٜ مَرْلٜ لَدّٜ، مَلَاعِکَعٜنْ مبَلِّمٛ؞

تٛکُّٻٜ يٜىٰسُ اَرْتُٻٜ

¹⁴تٛو، غَطَ طُمْ سُرِي يَحَيَ ندٜرْ سُودُ شُرَلْ، يٜىٰسُ يَحِ غَلِيلِ اٜ وَعَجِنَ حَبَرُ بٜلْطُمْ دَغَ تٛ اَللَّه؞ ¹⁵اٜ مٛ وِعَ، ‏«‏شَرٜلْ وَطِي!‏ لَامُ اَللَّه وَرِي حَادٜ مٛوطٛنْ؞ تُوبٜىٰ، نجَٻٛنْ حَبَرُ بٜلْطُمْ؞»‏

¹⁶يٜىٰسُ اٜ يَحَ حَادٜ مبٜىٰلَ غَلِيلِ، سٜيْ اٛ يِعِ سِيمَنْ اٜ مِݧِرَاوٛ مُوطُمْ اَنْدِرَاوُسْ اٜ ٻٜ نغَطَ نَنْغِرْطُمْ لِپِّ مَٻّٜ ندٜرْ ندِيَمْ، نغَمْ ٻٜ نَنْغٛوٻٜ لِپِّ؞ ¹⁷سٜيْ يٜىٰسُ وِعِٻٜ، ‏«‏تٛکّٜىٰيَمْ، مِ وَرْتِرَيْعٛنْ غَدَّيْٻٜ يِمْٻٜ تٛ اَمْ؞»‏ ¹⁸طٛنْ اٜ طٛنْ ٻٜ اَلِ نَنْغِرْطُمْ لِپِّ مَٻّٜ ٻٜ تٛکِّمٛ؞

¹⁹ندٜ اٛ ٻٜيْدِ يٜىٰسٛ سٜطَّ، سٜيْ اٛ يِعِ يَاکُبُ ٻِي جَبَدِ اٜ مِݧِرَاوٛ مُوطُمْ يَحَيَ اٜ ٻٜ ندٜرْ کٛمِوَلْ مَٻّٜ، اٜ ٻٜ مٛعِّنَ نَنْغِرْطُمْ لِپِّ مَٻّٜ؞ ²⁰طٛنْ اٜ طٛنْ اٛ نٛدِّٻٜ؞ سٜيْ ٻٜ اَلِ ݧَاکٛ مَٻّٜ جَبَدِ ندٜرْ کٛمِوَلْ اٜ کُوَنٛوٻٜٻٜ، ٻٜ تٛکِّ يٜىٰسُ؞

غٛودُطٛ غِنّٛلْ

²¹سٜيْ يٜىٰسُ اٜ تٛکُّٻٜمٛ نجَحِ غَرِيرِ کَفَرْنَحُمْ؞ ندٜ ݧَلْندٜ سِوْتَارٜ وَرِ، اٛ نَتِّ سُودُ دٛعَارٜ، اٛ فُطِّ اٜکِّتِنْکِ؞ ²²يِمْٻٜ کَيْطِنِ اٜ اٜکِّتِنٛلْ مَاکٛ، نغَمْ اٛ اٜکِّتِنِرَايِٻٜ نٛ مٛودِٻّٜ اَتَّوْرَ اٜکِّتِنِرْتَ، اَمَّا اٛ اٜکِّتِنِيٻٜ اٜ بَوْطٜ؞

²³طٛنْ اٜ طٛنْ غٛودُطٛ غِنّٛلْ ندٜرْ سُودُ دٛعَارٜ ندُنْ وُلِّ سٜمْبٜىٰ، ²⁴وِعِ، ‏«‏کٛ وَنُّمَا اٜ اَمِنْ، يٜىٰسُ نَجَرَنْکٜىٰجٛ؟ اَ وَرٛيِ نغَمْ کَلْکَامِنْ؟ اٜ مِ اَنْدِ اَنْ اَ مٛيٜ؞ اَنْ وٛنِ شٜنِيطٛ اَللَّه؞»‏

²⁵سٜيْ يٜىٰسُ حَٻَنِنغٛلْ، وِعِ، ‏«‏دٜعُّتُ!‏ وُرْتَ ندٜرْ مَاکٛ؞»‏

²⁶سٜيْ غِنّٛلْ نغٛلْ دِمْبِمٛ دِمْبٛلْ کَلُّنغٛلْ، نغٛلْ وُلِّ سٜمْبٜىٰ، نغٛلْ وُرْتِي ندٜرْ مَاکٛ؞ ²⁷ٻٜ فُو ٻٜ کَيْطِنِ، ٻٜ نغَطِ کَ پَمْپَمْتِرْکِ، اٜ ٻٜ مبِعَ، ‏«‏طُمْ اُمْ طُمٜ؟ نغٛعٛلْ اٜکِّتِنٛلْ نغٛلْ کٜسٛلْ!‏ نٜطّٛ اٛعٛ اٜ وٛودِ بَوْطٜ حَا غِنِّ اٜ نغَطَ کٛ اٛ وِعِطِ؞»‏

²⁸ندٜرْ شَرٜلْ سٜطَّ حَبَرُ يٜىٰسُ سَنْکِتِي کٛو تٛيٜ ندٜرْ لٜيْدِ غَلِيلِ؞

يٜىٰسُ يَمْطِتِنِي يِمْٻٜ طُطْٻٜ

²⁹ندٜ يٜىٰسُ اٜ يَاکُبُ اٜ يَحَيَ ٻٜ مبُرْتِي دَغَ سُودُ دٛعَارٜ ندُنْ، ٻٜ نَتِّ وُرٛ بِيتُرُسْ اٜ اَنْدِرَاوُسْ؞ ³⁰اٜسِرَاوٛ بِيتُرُسْ دٜبّٛ اٜ مٛ فِيدَ اٜ جٛنْتٜ اٜ مٛ فُکِّي؞ اٜ نَتُّکِ يٜىٰسُ ٻٜ کٛکِّمٛ حَبَرُ مَاکٛ؞ ³¹سٜيْ يٜىٰسُ يَحِ تٛ مَاکٛ جٛغَنِيمٛ جُنْغٛ اُمِّنِمٛ؞ طٛنْ اٜ طٛنْ جٛنْتٜ طٜنْ نجٛوفِمٛ، اٛ اُمِّي اٛ فُطِّ وَدَّنْکِٻٜ ݧَمْندُ؞

³²فُتُرٛ، غَطَ نَانغٜ حِيرِي، يِمْٻٜ نغَدَّنِ يٜىٰسُ فُو ݧَوْٻٜ اٜ غٛودُٻٜ غِنِّ؞ ³³سٜيْ يِمْٻٜ غَرِيرِ ندِنْ طُطْٻٜ کَوْرِتِ اٜ دَمُّغَلْ وُرٛ نغٛنْ؞ ³⁴يٜىٰسُ يَمْطِتِنِ طُطْٻٜ غٛودُٻٜ ݧَوُوجِ فٜىٰرٜ‑فٜىٰرٜ؞ اٛ وُرْتِنَنِ يِمْٻٜ طُطْٻٜ غِنِّ، اٛ حَطِطِ مٜتُکِ نغَمْ اٜ طِ اَنْدِمٛ؞

يٜىٰسُ وَعَجِنِي ندٜرْ لٜيْدِ غَلِيلِ

³⁵اِلَا سُبَکَ، دَغَ ݧِوْرٜ اٜ حٛرِي، اٛ اُمِّي اٛ يَحِ وٛنْدٜ وِغٜىٰرٜ ندٜرْ لَدّٜ، اٛ وَطِ دٛعَارٜ تٛنْ؞ ³⁶سٜيْ سِيمَنْ اٜ غٛنْدُٻٜ اٜ مَاکٛ ندِلِّ طَٻُّتُکِمٛ؞ ³⁷ندٜ ٻٜ کٜٻْتِمٛ، ٻٜ مبِعِمٛ، ‏«‏کٛو مٛيٜ اٜ طَٻُّتُمَا!‏»‏

³⁸سٜيْ يٜىٰسُ وِعِٻٜ، ‏«‏اٜنْ نجَحُ غَرِيجٜ غٛنْطٜ حَادٜ طٛعٛ مِ وَعَجِنَ تٛنْ مَا، نغَمْ کَنْجُمْ نغَرْمِ مِ وَطَ؞»‏

³⁹اٛ يَحِ کٛو تٛيٜ ندٜرْ لٜيْدِ غَلِيلِ، اٜ مٛ وَعَجِنَ ندٜرْ شُوطِ دٛعَارٜ مَٻّٜ، اٜ مٛ وُرْتِنَنَ يِمْٻٜ غِنِّ؞

غٛودُطٛ ݧَوُ ݧَامٛووُ لَرَلْ

⁴⁰غٛطّٛ غٛودُطٛ ݧَوُ ݧَامٛوجُمْ لَرَلْ وَرِ تٛ يٜىٰسُ دِشِّي اٜ تٛرٛومٛ، اٜ وِعَ، ‏«‏تَا جَٻِي، اَ وَاوَيْ نجَمْطِتِنَايَمْ؞»‏

⁴¹جُرُمْطُمْ نَنْغِ يٜىٰسُ، اٛ فٛرْتِ جُنْغٛ، اٛ مٜىٰمِمٛ، اٛ وِعِمٛ، ‏«‏مِ جَٻِي؞ يَمْطُتُ!‏»‏ ⁴²طٛنْ اٜ طٛنْ ݧَوُ طُمْ اَلِمٛ، اٛ يَمْطِتِ؞ ⁴³سٜيْ يٜىٰسُ وَغِّنِمٛ، وِعِمٛ، ‏«‏دِلُّ، ⁴⁴فَامُ، تَاع وِعُکَ کٛو مٛيٜ، اَمَّا يَحُ کٛلَّا حٛورٜ مَاطَ تٛ اَرْدِيطٛ دِينَ، ندٜنْ کٛکَّا شَکِّرِ نٛ مُوسَ وِعِ طُمْ وَطَ نغَمْ لَاٻٛلْ مَاطَ؞ وَطُ نٛنْ نغَمْ تَبِّتِنَنْکِ يِمْٻٜ اَ يَمْطِتِي؞»‏

⁴⁵اَمَّا اٛ دِلِّ اٜ مٛ وِعَکَ کٛو تٛيٜ، اٜ مٛ سَنْکِتَ حَبَرُ طُمْ؞ نٛنْ وَطِ يٜىٰسُ وَاوَايِ نَتُّکِ وٛنْدِ غَرِيرِ اٜ نجَيْرِ، اَمَّا اٛ جٛوطِي اٜ لَدّٜ؞ فُو اٜ نٛنْ، يِمْٻٜ طُطْٻٜ نغَطِ کَ وَرْکِ تٛ مَاکٛ دَغَ کٛو تٛيٜ؞

يٜىٰسُ يَمْطِتِنِي جَرَاطٛ

¹غَطَ بَلْطٜ سٜطَّ يٜىٰسُ سٛعِّي کَفَرْنَحُمْ؞ سٜيْ يِمْٻٜ نَنِ حَبَرُ اٜ مٛ وُرٛ؞ ²يِمْٻٜ طُطْٻٜ کَوْرِتِ کٜىٰوِ وُرٛ نغٛنْ حَا وَلَا نجَيْرِ ندٜرْ وُرٛ نغٛنْ اٜ يَاسِ دَمُّغَلْ مَاغٛ؞ اٜ مٛ وَعَجِنَنَٻٜ وٛلْدٜ اَللَّه؞ ³سٜيْ وٛٻّٜ نغَرٛيِ، ٻٜ نغَدَّنِمٛ غٛطّٛ جَرَاطٛ، يِمْٻٜ نَيٛ اٜ کٛشّٛيِمٛ؞ ⁴ندٜ ٻٜ مبَاوَايِ نَتِّنْکِمٛ تٛ يٜىٰسُ وٛنِ نغَمْ يِمْٻٜ طُوطِي، سٜيْ ٻٜ پٜنْتِنِمٛ دٛوْ سُودُ ندُنْ، ٻٜ نجُلِندُ، ٻٜ نغَطِمٛ ندٜرْ يُلْندٜ ندٜنْ دٛوْ دَاغٛ مَاکٛ، ٻٜ نجِڤِّنِمٛ يٜىٰسٛ يٜىٰسُ؞ ⁵ندٜ يٜىٰسُ يِعِ حٛولَارٜ مَٻّٜ، اٛ وِعِ جَرَاطٛ اٛنْ، ‏«‏حِغٛ، اَ يَافَنَامَ حَکّٜىٰجِ مَاطَ؞»‏

⁶وٛٻّٜ مٛودِٻّٜ اَتَّوْرَ اٜ نجٛوطِي طٛنْ اٜ ٻٜ ݧُمَ ندٜرْ ٻٜرْطٜ مَٻّٜ، ⁷اٜ ٻٜ مبِعَ، ‏«‏نغَمْ طُمٜ نٜطّٛ اٛعٛ مٜتِرْتَ نِحِ؟ اٜ مٛ فٛتِّدِنَ حٛورٜ مَاکٛ اٜ اَللَّه!‏ مٛيٜ وَاوَتَ يَافَاکِ حَکّٜ تٛ نَاع اَللَّه تَنْ؟»‏

⁸طٛنْ اٜ طٛنْ يٜىٰسُ فَامِ ندٜرْ ٻٜرْندٜ مُوطُمْ اٜ ٻٜ ݧُمَ دٛوْ فِي طُعُمْ ندٜرْ ٻٜرْطٜ مَٻّٜ، اٛ وِعِٻٜ، ‏«‏نغَمْ طُمٜ ݧُمٛتٛنْ اِرِ ݧُمٛوجِ طِعِ ندٜرْ ٻٜرْطٜ مٛوطٛنْ؟ ⁹کٛ ٻُرِ حٛيْکِ، طُمْ وِعَ جَرَاطٛ اٛعٛ، ‏‹‏اَ يَافَنَامَ حَکّٜ مَاطَ،›‏ کٛو طُمْ وِعَمٛ، ‏‹‏اُمَّ حٛشُّ دَاغٛ مَاطَ، يَاٻُ؟›‏ ¹⁰اَمَّا اٜ مِ يِطِ اَنْدٛنْ ٻِي نٜطّٛ اٜ وٛودِ لَامُ ندٜرْ دُونِيَارُ يَافٛو حَکّٜ؞»‏ نغَمْ نٛنْ اٛ وِعِ جَرَاطٛ اٛنْ، ¹¹‏«‏اٜ مِ وِعُمَا، اُمَّ، کٛشَّا دَاغٛ مَاطَ، کٛوتَا وُرٛ؞»‏

¹²سٜيْ اٛ اُمِّي، اٛ حٛشِّ دَاغٛ مَاکٛ، اٛ وُرْتِي، اٛ دِلِّ يٜىٰسٛ کٛو مٛيٜ؞ فِي طُعُمْ حَيْطِنِ فُو يِمْٻٜ غٛنْٻٜ طٛنْ، ٻٜ مَنْتِ اَللَّه، ٻٜ مبِعِ، ‏«‏مِنْ مٜىٰطَايِ يِيکِ اِرِ فِي طُعُمْ!‏»‏

يٜىٰسُ نٛدِّي لٜىٰوِ

¹³يٜىٰسُ فُطِّتِ وُرْتِي يَحِ حَادٜ مبٜىٰلَ غَلِيلِ؞ يِمْٻٜ طُطْٻٜ نغَرِ تٛ مَاکٛ اٛ اٜکِّتِٻٜ؞ ¹⁴اٜ مٛ پَٻّٛو، اٛ يِعِ لٜىٰوِ ٻِي حَلْفَ اٜ جٛوطِي تٛ طُمْ جَٻَتَ شٜىٰدٜ لٜيْدِ، سٜيْ يٜىٰسُ وِعِمٛ، ‏«‏تٛکَّمْ؞»‏ سٜيْ لٜىٰوِ اُمِّي تٛکِّمٛ؞

¹⁵غَطَ طٛنْ يٜىٰسُ اٜ تٛکُّٻٜمٛ اٜ ٻٜ نجٛوطِي اٜ ٻٜ کِرْتٛو تٛ وُرٛ لٜىٰوِ؞ جَٻٛوٻٜ شٜىٰدٜ لٜيْدِ طُطْٻٜ اٜ غَطٛوٻٜ حَکّٜ اٜ ݧَمْدَ اٜ مَاکٛ اٜ تٛکُّٻٜمٛ، نغَمْ اٜ وٛودِ يِمْٻٜ طُطْٻٜ اِرِ مَٻّٜ اٜ تٛکِّمٛ؞ ¹⁶ندٜ مٛودِٻّٜ اَتَّوْرَ فَارِسَنْکٛعٜنْ نغِعِ اٜ مٛ ݧَمْدَ اٜ غَطٛوٻٜ حَکّٜ اٜ جَٻٛوٻٜ شٜىٰدٜ لٜيْدِ، ٻٜ مبِعِ تٛکُّٻٜمٛ، ‏«‏نغَمْ طُمٜ اٛ ݧَمْدَتَ اٜ جَٻٛوٻٜ شٜىٰدٜ لٜيْدِ اٜ غَطٛوٻٜ حَکّٜ؟»‏

¹⁷ندٜ يٜىٰسُ نَنِ نٛنْ، اٛ وِعِٻٜ، ‏«‏نَاع يَمْٻٜ نغِطِ ݧَوْندٛووٛ، سٜيْ نِ ݧَوْٻٜ؞ مِ وَرٛيَايِ نغَمْ نٛدُّکِ ݧُمٛوٻٜ ٻٜ اَادِلِعٜنْ، اَمَّا مِ وَرٛيِ نغَمْ نٛدُّکِ اَنْدُٻٜ ٻٜ غَطٛوٻٜ حَکّٜ؞»‏

پَمٛلْ دٛوْ سُومَاکِ

¹⁸تٛو، تٛکُّٻٜ يَحَيَ غَطٛووٛ بَڤْتِسْمَ اٜ تٛکُّٻٜ فَارِسَنْکٛعٜنْ اٜ شُومٛو؞ سٜيْ وٛٻّٜ نغَرِ پَمِ يٜىٰسُ، ٻٜ مبِعِ، ‏«‏نغَمْ طُمٜ تٛکُّٻٜ يَحَيَ اٜ تٛکُّٻٜ فَارِسَنْکٛعٜنْ اٜ شُومٛو، اَمَّا تٛکُّٻٜمَ شُومَتَاکٛ؟»‏

¹⁹يٜىٰسُ نٛوتِي، وِعِٻٜ، ‏«‏اٜ يِيکِ مٛوطٛنْ حِغٛوٻٜ اَنْغٛوجٛ شُومٛتٛ اٜ شَرٜلْ نغٜلْ اَنْغٛوجٛ اٛنْ اٜ وٛنْدِ اٜ مَٻّٜ؟ تٛ نِ اٜ ٻٜ نغٛنْدِ اٜ اَنْغٛوجٛ اٛنْ، ٻٜ شُومَتَاکٛ؞ ²⁰اَمَّا شَرٜلْ اٜ وَرَ نغٜلْ طُمْ حٛشَّتَ اَنْغٛوجٛ اٛنْ دَغَ ندٜرْ مَٻّٜ، ندٜنْ اٜ ݧَلْندٜ ندٜنْ ٻٜ شُومٛتٛو؞

²¹‏«‏وَلَا ݧٛوتَيْطٛ لٜفٜلْ کٜسٜلْ تٛ لِمْشٜرٜ کِيندٜ؞ تٛ اٛ وَطِي نٛنْ، لٜفٜلْ کٜسٜلْ نغٜلْ سٜىٰکَيْ اٜ لِمْشٜرٜ کِيندٜ ندٜنْ؞ نٛنْ وَطَيْ ندٜ ٻُرَ نٛ ندٜنّٛ سٜىٰکُکِ؞ ²²نٛنْ مَا وَلَا غَطَيْطٛ ندِيَمْ اِنَبٛجَمْ کٜسَمْ ندٜرْ فَاندُ حِيندُ؞ تٛ اٛ وَطِي نٛنْ، طَمْ پُوفَيْ طَمْ ڤُسَ فَاندُ ندُنْ، ندٜنْ طُمْ دُلَّيْطَمْ، طُمْ دُلَّ فَاندُ ندُنْ؞ اَمَّا ندِيَمْ اِنَبٛجَمْ کٜسَمْ حَانِ وَطٜىٰ ندٜرْ فَاندُ حٜيْرُ؞»‏

پَمٛلْ دٛوْ ݧَلْندٜ سِوْتَارٜ

²³وٛنْدٜ ݧَلْندٜ سِوْتَارٜ يٜىٰسُ اٜ تٛکُّٻٜمٛ اٜ پَٻّٛو ندٜرْ غٜسٜ اَلْکَمَارِ، سٜيْ تٛکُّٻٜمٛ ڤُطِّ ٻٛرُکِ شَمّٜىٰجٜ مَيْرِ اٜ ٻٜ ݧَامَ؞ ²⁴سٜيْ فَارِسَنْکٛعٜنْ مبِعِمٛ، ‏«‏رَا کٛ تٛکُّٻٜمَ نغَطَتَ؞ کٛ وَطَتَ اٜ ٻٜ نغَطَ کٛ اَتَّوْرَ حَطِ طُمْ وَطَ ݧَلْندٜ سِوْتَارٜ؟»‏

²⁵يٜىٰسُ وِعِٻٜ، ‏«‏اٛنْ مٜىٰطَايِ جَنْغُکِ کٛ دَوْدَ وَطِ، کَنْکٛ اٜ غٛنْدُٻٜ اٜ مَاکٛ ندٜ ٻٜ نَنِ وٜىٰلٛ کَدِنْ اٜ ٻٜ ندٜرْ دُلّٜرٜ ݧَمْندُ؟ ²⁶اٜ جَامَنُ طُمْ اَبِيَتَ وٛنِ مَوْطٛ مَوْٻٜ اَرْدِيٻٜ دِينَ، دَوْدَ نَتِّ لُکُرُ سٜنِيطُمْ ݧَامِ بُرٛودِ شٜنِيطُمْ؞ اَتَّوْرَ بٛو وِعِي اَرْدِيٻٜ دِينَ تَنْ حَانِ ݧَامُکِ بُرٛودِ طُمْ، اَمَّا دَوْدَ ݧَامِطُمْ حَا مَا اٛ حٛکّٛرِ جَادٛوٻٜ اٜ مَاکٛ؞»‏

²⁷سٜيْ يٜىٰسُ وِعِٻٜ، ‏«‏ݧَلْندٜ سِوْتَارٜ وَطَا نغَمْ نٜطّٛ، نَاع نٜطّٛ وَطَا نغَمْ ݧَلْندٜ سِوْتَارٜ؞ ²⁸نغَمْ نٛنْ ٻِي نٜطّٛ اٛ جٛومُ کٛو طُمٜ حَا اٜ ݧَلْندٜ سِوْتَارٜ؞»‏

نٜطّٛ مٛ جُنْغٛ يَرَانغٛ

¹وٛنْدٜ ݧَلْندٜ يٜىٰسُ نَتِّ سُودُ دٛعَارٜ، اٜ وٛودِ غٛطّٛ مٛ جُنْغٛ جَرَانغٛ ندٜرْ مَيْرُ؞ ²سٜيْ وٛٻّٜ ندٜرْ سُودُ دٛعَارٜ ندُنْ شُتِيمٛ کٛو اٛ يَمْطِتِنَيْ نٜطّٛ اٛنْ ݧَلْندٜ سِوْتَارٜ نغَمْ ٻٜ کٜٻَ کٛ ٻٜ نغُلِّرٛيْتٛومٛ؞ ³سٜيْ يٜىٰسُ وِعِ مٛ جُنْغٛ جَرَانغٛ اٛنْ، ‏«‏وٛرٛيْ طٛعٛ؞»‏ ⁴ندٜنْ يٜىٰسُ پَمِٻٜ وِعِ، ‏«‏کٛ اَتَّوْرَ وِعِ طُمْ وَطَ ݧَلْندٜ سِوْتَارٜ؟ طُمْ وَطَ کٛ وٛوطِ، کٛو طُمْ وَطَ کٛ وٛوطَا؟ طُمْ حِسْنَ يٛنْکِ، کٛو طُمْ وَطَ وَرْحٛورٜ؟»‏

اَمَّا ٻٜ فُو ٻٜ ندٜعِّتِ؞ ⁵يٜىٰسُ رَارِٻٜ ٻٜرْندٜ مُوطُمْ اٜ مٜتِّ، اٛ وَنِّي نغَمْ ٻٜرْطٜ مَٻّٜ طٜ شَاتُطٜ؞ سٜيْ اٛ وِعِ مٛ جُنْغٛ جَرَانغٛ اٛنْ، ‏«‏فٛرْتُ جُنْغٛ مَاطَ؞»‏ اٛ فٛرْتِنغٛ، سٜيْ نغٛ يَمْطِتِ؞ ⁶سٜيْ فَارِسَنْکٛعٜنْ مبُرْتِي سُودُ دٛعَارٜ ندُنْ، ٻٜ ڤُطِّ مٜدُّکِ اٜ يِمْٻٜ حِرُدُسْ دٛوْ نٛ ٻٜ مبَرْدَتَ يٜىٰسُ؞

يِمْٻٜ طُطْٻٜ نغَرِي تٛ يٜىٰسُ

⁷سٜيْ يٜىٰسُ دِلِّدِ اٜ تٛکُّٻٜمٛ يَاکِ حَادٜ مبٜىٰلَ غَلِيلِ؞ سٜيْ يِمْٻٜ طُطْٻٜ پِوٛيِٻٜ غَلِيلِ تٛکِّمٛ؞ ⁸ندٜ يِمْٻٜ طُطْٻٜ نَنِ حَبَرُ فُو کٛ اٛ وَطَتَ، ٻٜ نغَرِ تٛ مَاکٛ دَغَ يَحُودِيَ، اٜ اُرُشَلِيمَ، اٜ اِدُومِيَ، اٜ فٛنْغٛ شَانغٛلْ اُرْدُنْ، اٜ لٜيْدِ حَادٜ غَرِيجٜ تَايَ اٜ سِدٛنْ؞ ⁹اٛ وِعِ تٛکُّٻٜمٛ نغَدَّنَمٛ کٛمِوَلْ نغَمْ يِمْٻٜ طُطْٻٜ کَوْرِتِي تٛع ٻٜ ٻِطَّمٛ؞ ¹⁰اٛ وَطُ نٛنْ نغَمْ اٛ يَمْطِتِنِي يِمْٻٜ طُطْٻٜ حَا ݧَوْٻٜ طُطْٻٜ نغَطِ کَ فِيدُکِ نغَمْ ٻٜ مٜىٰمَمٛ؞ ¹¹فُو شَرٜلْ نغٜلْ يِمْٻٜ غٛودُٻٜ غِنِّ نغِعِمٛ، سٜيْ ٻٜ نجَنَ يٜىٰسٛ مَاکٛ اٜ ٻٜ مبِعَ اٜ سٜمْبٜ، ‏«‏اَنْ اَ ٻِطّٛ اَللَّه!‏»‏

¹²اَمَّا اٛ وَغِّنِٻٜ تٛع ٻٜ مبِعَکَ کٛو مٛيٜ کَنْکٛ اٛ مٛيٜ؞

يٜىٰسُ سُٻِي تٛکُّٻٜمٛ سَڤّٛ اٜ طِطٛ

¹³يٜىٰسُ پٜنْتِ حٛشّٜىٰرٜ نٛدِّ ٻٜ اٛ يِطِ؞ ٻٜ نجَحِ تٛ مَاکٛ؞ ¹⁴اٛ سُٻِ يِمْٻٜ سَڤّٛ اٜ طِطٛ نغَمْ ٻٜ نجٛوطٛدٛو اٜ مَاکٛ، ندٜنْ اٛ لِلَٻٜ ٻٜ نغَعَجِنٛيَ، اٛ نٛدِّٻٜ لِلَاٻٜ، ¹⁵اٛ حٛکِّٻٜ بَوْطٜ وُرْتِنْکِ غِنِّ؞

¹⁶رَا اِنْطٜ يِمْٻٜ ٻٜ اٛ سُٻِ ٻٜنْ:‏ سِيمَنْ مٛ اٛ حٛکِّ اِنْدٜ بِيتُرُسْ، ¹⁷اٜ يَاکُبُ ٻِي جَبَدِ، اٜ مِݧِرَاوٛ مُوطُمْ يَحَيَ، اٛ حٛکِّٻٜ اِنْدٜ بُوَرْنَجِسْ، وَاتٛ ٻِٻّٜ رِغَّانغٛ، ¹⁸اٜ اَنْدِرَاوُسْ، اٜ فِلِبُسْ، اٜ بَتِلٛومِ، اٜ مَاتِيُ، اٜ تٛومَ، اٜ يَاکُبُ ٻِي حَلْفَ، اٜ تَادِيُسْ، اٜ سِيمَنْ کَنَنِيَنْکٜىٰجٛ، ¹⁹اٜ يَحُودَ اِسْکَرِيٛوتِ، غَرْتُطٛ کٛکِّتِرْطٛ يٜىٰسُ؞

يٜىٰسُ اٜ بَعَلْجَبُلْ

²⁰ندٜنْ يٜىٰسُ نَتِّ وُرٛ تٛ جٛوطٛتٛو، سٜيْ يِمْٻٜ طُطْٻٜ فُطِّتِ کَوْرِتِ تٛ مَاکٛ حَا کَنْکٛ اٜ تٛکُّٻٜمٛ ٻٜ مبَاوَايِ ݧَامُکِ ݧَمْندُ؞ ²¹ندٜ بَنْدِرَاٻٜ مَاکٛ نَنِي نٛنْ، ٻٜ نجَحِ نغَمْ ٻٜ نَنْغٛيَمٛ، نغَمْ ٻٜ نَنِي يِمْٻٜ اٜ مبِعَ، ‏«‏اٛ حَاݝَکٜ؞»‏

²²مٛودِٻّٜ اَتَّوْرَ غَرٛيْٻٜ دَغَ اُرُشَلِيمَ مبِعِ، ‏«‏بَعَلْجَبُلْ لَامِيطٛ غِنِّ نَنْغِمٛ، ندٜنْ اٜ بَوْطٜ مَاغٛلْ اٛ وُرْتِنِرْتَ غِنِّ؞»‏

²³سٜيْ يٜىٰسُ نٛدِّٻٜ حٛکِّٻٜ مِسَالُ وِعِٻٜ، ‏«‏نٛ وَطَتَ شٜيْطَنْ رِيوَ شٜيْطَنْ؟ ²⁴تٛ لَامُ سٜنْدَکٜ اٜ وَݧْوَݧْتِرَ، طُمْ وَاوَتَا طُمْ دَرٛو؞ ²⁵نٛنْ مَا تٛ وُرٛ سٜنْدَکٜ اٜ وَݧْوَݧْتِرَ، نغٛنْ طٛنْ وُرٛ نغٛ وَاوَتَا نغٛ دَرٛو؞ ²⁶تٛ لَامُ شٜيْطَنْ سٜنْدَکٜ اٜ وَݧْوَݧْتِرَ، طُمْ وَاوَتَا طُمْ دَرٛو، رٜعِرْدٜ مَاجُمْ وَرِي وٛنْ طٛنْ؞

²⁷‏«‏وَلَا بَاوَيْطٛ نَتَّ وُرٛ شٜمْبِطّٛ تٜىٰتَنَمٛ کٛ اٛ وٛودِ، سٜيْ نِ اَرْتَ حَٻُّکِمٛ، ندٜنْ وَاوَ حٛشُّکِ کٛ اٛ وٛودِ ندٜرْ وُرٛ نغٛنْ؞

²⁸‏«‏اٜ مِ وِعَعٛنْ غٛونغَ، طُمْ وَاوَيْ يَافَنَاکِ يِمْٻٜ حَکّٜ اٜ کٛو اِرِ طِيٜ حَالَاجِ کَلُّطِ طِ ٻٜ مٜتِ؞ ²⁹اَمَّا فُو بِعُطٛ کٛ وٛوطَا دٛوْ رُوحُ اَللَّه، اٛ يَافَنْتَاکٜ حَا اَبَدَا؞ حَا اَبَدَا حَکّٜ طُمْ اٜ دٛوْ مَاکٛ؞»‏ ³⁰يٜىٰسُ وِعِي نٛنْ نغَمْ اٜ ٻٜ مبِعَ، ‏«‏اٜ مٛ وٛودِ غِنّٛلْ؞»‏

مَدُوجٛ يٜىٰسُ اٜ مِݧِرَاٻٜ مَاکٛ

³¹سٜيْ مَدُوجٛ يٜىٰسُ اٜ مِݧِرَاٻٜ مَاکٛ نغَرِ ندَرِي يَاسِ، ٻٜ لِلِ غٛطّٛ نٛدّٛيَ يٜىٰسُ؞ ³²يِمْٻٜ طُطْٻٜ اٜ نجٛوطِي اٜ ٻٜ ڤِلِي يٜىٰسُ، ٻٜ مبِعِمٛ، ‏«‏مَدُوجٛ مَاطَ اٜ مِݧِرَاٻٜ مَاطَ اٜ ٻٜ تٛنْ يَاسِ، اٜ ٻٜ طَٻُّتُمَا؞»‏

³³يٜىٰسُ پَمِٻٜ وِعِ، ‏«‏مٛيٜ وٛنِ مَدُوجٛ اَمْ، ندٜنْ ٻٜيٜ نغٛنِ مِݧِرَاٻٜ اَمْ؟»‏ ³⁴اٛ رَارِ جٛوطِيٻٜ اٜ ڤِلِيمٛ اٛ وِعِ، ‏«‏رَا مَدُوجٛ اَمْ اٜ مِݧِرَاٻٜ اَمْ طٛعٛ!‏ ³⁵فُو غَطُطٛ کٛ اَللَّه يِطِ، کَنْکٛ وٛنِ مِݧِرَاوٛ اَمْ اٜ مَدُوجٛ اَمْ؞»‏

مِسَالُ دٛوْ دٜمٛووٛ

¹طٛنْمَا يٜىٰسُ فُطِّ اٜکِّتِنْکِ حَادٜ مبٜىٰلَ غَلِيلِ؞ يِمْٻٜ طُطْٻٜ کَوْرِتِ تٛ مَاکٛ نَاکِ اٛ نَتِّ کٛمِوَلْ اٛ جٛوطِي ندٜرْ مَاغَلْ دٛوْ ندِيَمْ؞ کَوْرُتُٻٜ ٻٜنْ فُو اٜ ٻٜ حَادٜ مبٜىٰلَ نغَنْ دٛوْ نجَارٜىٰندِ؞ ²سٜيْ اٛ حُوتِرِ مِسَالُ اٛ اٜکِّتِٻٜ اٜکِّتِنٛلْ فٜىٰرٜ‑فٜىٰرٜ طُطْنغٛلْ؞ ندٜرْ اٜکِّتِنٛلْ مَاکٛ اٛ وِعِ،

³‏«‏کٜتِّندٜىٰ!‏ غٛطّٛ دٜمٛووٛ يَحِ نغٜسَ نغَمْ سَاکَ اَوْدِ؞ ⁴اٜ مٛ ندٜرْ سَاکُکِ اَوْدِ ندِنْ، وٛنْدِ يَنِ دٛوْ طَتَلْ، شٛلِّ نغَرِ شُڤِّدِندِ؞ ⁵وٛنْدِ بٛو يَنِ ندٜرْ کَاپٜ؛ طٛنْ ندِ حٜٻَايِ لٜيْدِ طُنْدِ؞ ندِ فُطِ جَوْطُمْ نغَمْ لٜيْدِ ندِنْ لُغَّا؞ ⁶اَمَّا ندٜ نَانغٜ وُرْتٛيِي فِيِندِ، سٜيْ ندِ يٛورِ نغَمْ ندِ وَلَا طَطِ؞ ⁷وٛنْدِ اَوْدِ بٛو يَنِ ندٜرْ غِعٜ، سٜيْ غِعٜ طٜنْ مَوْنِ ٻِطِّندِ حَا ندِ وَاوَايِ وَطُکِ شَمّٜىٰجٜ؞ ⁸اَمَّا وٛنْدِ اَوْدِ يَنِ دٛوْ لٜيْدِ مبٛنْدِ ندِ فُطِ ندِ مَوْنِ ندِ وَطِ شَمّٜىٰجٜ؞ وٛنْدِ وَطِ غَبّٜ 30، وٛنْدِ وَطِ غَبّٜ 60، وٛنْدِ حَا 100؞»‏

⁹ندٜ يٜىٰسُ حٜىٰݧِ حٛکُّکِ مِسَالُ طُعُمْ، سٜيْ اٛ وِعِ، ‏«‏غٛودُطٛ نٛڤِّ نَنُکِ فُو نَنَ؞»‏

کٛ وَطِ يٜىٰسُ اٜ حُوتِرَ مِسَالُ

¹⁰ندٜ يٜىٰسُ اٜ جٛوطِي کَنُمْ تَنْ، تٛکُّٻٜمٛ سَڤّٛ اٜ طِطٛ اٜ وٛٻّٜ تٛکُّٻٜمٛ نجَحِ تٛ مَاکٛ ٻٜ پَمِمٛ اٛ حٛکَّٻٜ مَعَنَ طُمْ طٛنْ مِسَالُ؞ ¹¹سٜيْ اٛ وِعِٻٜ، ‏«‏اٛنٛنْ اٛنْ کٛکَّامَ فَامُکِ سِرُّ لَامُ اَللَّه، اَمَّا يِمْٻٜ ٻٜ نغَلَا ندٜرْ مٛوطٛنْ، کٛو طُمٜ سٜيْ اٜ مِسَالُ، ¹²نغَمْ،

‏‹‏اٜ ٻٜ ندَارَ، اَمَّا ٻٜ نغِعَتَا؞

اٜ ٻٜ نَنَ، اَمَّا ٻٜ ڤَامَتَا؞

نغَمْ تٛ نَاع نٛنْ طُمْ غَطٛتٛوطُمْ ٻٜ نَنَ، ٻٜ تُوبَ،

طُمْ يَافَنٛوٻٜ؞›‏ »‏

مَعَنَ مِسَالُ دٛوْ دٜمٛووٛ

¹³سٜيْ يٜىٰسُ وِعِٻٜ، ‏«‏اٛنْ ڤَامَايِ مِسَالُ طُعُمْ؟ تٛو، نٛ ڤَامِرْتٛنْ مِسَالُ کٛرِيطُمْ؟ ¹⁴کٛ دٜمٛووٛ اٛنْ سَاکِ وٛنِ وٛلْدٜ اَللَّه؞ ¹⁵وٛٻّٜ يِمْٻٜ اٜ نَنْدِ اٜ اَوْدِ نجَنُندِ دٛوْ طَتَلْ؞ شَرٜلْ نغٜلْ ٻٜ نَنِ وٛلْدٜ اَللَّه، طٛنْ اٜ طٛنْ شٜيْطَنْ وَرَ حٛشَّندٜ دَغَ ندٜرْ ٻٜرْطٜ مَٻّٜ؞ ¹⁶وٛٻّٜ بٛو اٜ نَنْدِ اٜ اَوْدِ نجَنُندِ حَکُّندٜ کَاپٜ؞ تٛ ٻٜ نَنِي وٛلْدٜ اَللَّه، طٛنْ اٜ طٛنْ ٻٜ نجَٻَندٜ ندٜرْ بٜلْطُمْ ٻٜرْندٜ؞ ¹⁷اَمَّا ندٜ ٻٜ نغَلَا طَطِ، ٻٜ مُݧَيْ شَرٜلْ سٜطَّ تَنْ؞ تٛ شَطٜىٰلٜ کٛو تٛرَّ وَرِي نغَمْ وٛلْدٜ ندٜنْ، طٛنْ اٜ طٛنْ ٻٜ نجٛوفَندٜ؞ ¹⁸وٛٻّٜ کَدِنْ اٜ نَنْدِ اٜ اَوْدِ شَاکَاندِ ندٜرْ غِعٜ؞ ٻٜ نَنِ وٛلْدٜ ندٜنْ، ¹⁹اَمَّا وَنُّکِ اٜ فِي دُونِيَارُ، اٜ يِدّٜ جَوْدِ، اٜ سُونٛ فٜىٰرٜ‑فٜىٰرٜ نَتِّ ٻٜرْطٜ مَٻّٜ ٻِطِّ وٛلْدٜ ندٜنْ کَطِندٜ وَلُّکِٻٜ ٻٜ نغَطَ کٛ اَللَّه يِطِ؞ ²⁰وٛٻّٜ بٛو اٜ نَنْدِ اٜ اَوْدِ شَاکَاندِ دٛوْ لٜيْدِ مبٛنْدِ؞ ٻٜ نَنِ وٛلْدٜ اَللَّه، ٻٜ نجَٻِندٜ، ٻٜ کُوتِنِرِندٜ حَا ٻٜ کٜٻِ ٻٜيْدَارِ، وٛٻّٜ کٜٻِ ندٜ 30، وٛٻّٜ کٜٻِ ندٜ 60، وٛٻّٜ حَا ندٜ 100؞»‏

مِسَالُ دٛوْ فِتِلَارُ

²¹اٛ وِعِٻٜ، ‏«‏اٛنْ نغَدَّيْ فِتِلَارُ کِڤّٛنْ تُمُّدٜ دٛوْ مَيْرُ، کٛو ندٜسٛنْدُ لٜيْ لٜىٰسٛ؟ نَاع اٛنْ ندٜسَيْندُ دٛوْ دَنْکِ؟ ²²فُو کٛ سُوطِي، طُمْ وُرْتِنَيْطُمْ اٜ نجَيْرِ، نٛنْ مَا فُو کٛ اٛمْبَا طُمْ اٛمْتٜتٜىٰطُمْ؞ ²³غٛودُطٛ نٛڤِّ نَنُکِ فُو نَنَ؞»‏

²⁴اٛ فُطِّتِ اٛ وِعِٻٜ، ‏«‏ڤَامٜىٰ بٛطُّمْ اٜ کٛ نَنٛتٛنْ!‏ اٜ ڤٛوندِرْغٜلْ نغٜلْ ڤٛوندِرْتٛنْ، اٜ مَاغٜلْ طُمْ فٛوندِرَنْتَعٛنْ حَا مَا طُمْ ٻٜيْدَنَعٛنْ؞ ²⁵نغَمْ فُو غٛودُطٛ فَامُ دٛوْ لَامُ اَللَّه طُمْ ٻٜيْدَنَيْمٛ؞ اَمَّا مٛ وَلَا فَامُ دٛوْ لَامُ اَللَّه، کٛو کٛ اٛ وٛودِ مَا طُمْ جَٻَيْطُمْ؞»‏

مِسَالُ دٛوْ اَوْدِ ڤُطُندِ

²⁶يٜىٰسُ فُطِّتِ وِعِ، ‏«‏لَامُ اَللَّه اٜ نَنْدِ اٜ نٜطّٛ شَاکٛووٛ اَوْدِ اٜ نغٜسَ؞ ²⁷وَالَ فِنَ، کٛو اٜ مٛ طَانِي کٛو اٛ طَانَاکِ، اَوْدِ ندِنْ فُطَيْ مَوْنَ، اَمَّا اٛ اَنْدَا نٛ طُمْ وَطِرِ؞ ²⁸لٜيْدِ اٜ وُرْتِنَ غَوْرِ اٜ حٛورٜ مَيْرِ؞ اَرَنْدٜ پٛمْبَلْ وُرْتٛتٛ، ندٜنْ سَمّٜىٰرٜ، ندٜنْ سَمّٜىٰرٜ ندٜنْ وُرْتِنَ نغَبّٛيْ؞ ²⁹تٛ غَوْرِ ندِنْ ٻٜنْدِي، سٜيْ اٛ يَادَ اٜ لَوْجٜىٰرُ اٛ تَپَ، نغَمْ شَرٜلْ اِتُّکِندِ وَرِي؞»‏

مِسَالُ دٛوْ غَبّٜلْ مَسْتَتْ

³⁰يٜىٰسُ کَدِنْ وِعِ، ‏«‏کٛ نَنْدِنَيْمِ لَامُ اَللَّه؟ کٛو بٛو اٜ طُمٜ مِسَالُ نَنْدِنَيْمِطُمْ؟ ³¹اٜ طُمْ نَنْدِ اٜ غَبّٜلْ مَسْتَتْ، غَبّٜلْ ٻُرْنغٜلْ کٛو نغٜلٜ غَبّٜلْ اَاوٜتٜىٰنغٜلْ فَمْطُکِ؞ ³²فُو اٜ نٛنْ تٛ نغٜلْ اَاوَامَ، اٜ نغٜلْ مَوْنَ نغٜلْ ٻُرَ کٛو نغٜلٜ لٜغّٜلْ مَوْنُکِ، نغٜلْ وَطَ لِشٜ مَوْطٜ حَا شٛلِّ کٛطَ ندٜرْ طٛوْدِ مَاغٜلْ؞»‏

³³يٜىٰسُ حُوتِرِي اِرِ مِسَالُ طُعُمْ طُطُّمْ، اٛ وَعَجِنَنِٻٜ وٛلْدٜ اَللَّه حَا کٜىٰرٛلْ نٛ ٻٜ مبَاوِ فَامُکِ؞ ³⁴فُو کٛ اٛ وِعَتَٻٜ اٜ مٛ حُوتِرَ مِسَالُ؞ اَمَّا تٛ اٜ مٛ وٛنْدِ اٜ تٛکُّٻٜمٛ کَمْٻٜ تَنْ، سٜيْ اٛ وِعَٻٜ مَعَنَ کٛ اٛ وِعِ؞

يٜىٰسُ دَرْنِي حٜنْدُ شٜمْبِنْدُ

³⁵اٜ ندٜنْ طٛنْ ݧَلْندٜ اَلَاسَرَ يٜىٰسُ وِعِ تٛکُّٻٜمٛ، ‏«‏اٜنْ کُولُ فٛنْغٛ مبٜىٰلَ؞»‏ ³⁶سٜيْ تٛکُّٻٜمٛ اَلِ يِمْٻٜ حَوْرُتُٻٜ، ٻٜ نَتِّ ندٜرْ کٛمِوَلْ نغَلْ اٛ وٛنِ ندٜرْ، ٻٜ ندِلِّدِ اٜ مَاکٛ؞ اٜ وٛودِ کٛمِيجٜ فٜىٰرٜ تٛکِّٻٜ؞ ³⁷سٜيْ اِيٜىٰندٜ اٜ حٜنْدُ شٜمْبِنْدُ اُمّٛيِي، غٜىٰلٛوطِ ندِيَمْ ڤُطِّ ڤِيکِ کٛمِوَلْ نغَلْ، ندِيَمْ نَتِّ ندٜرْ مَاغَلْ حَا نَاکِ کٛمِوَلْ نغَلْ ٻَدِي حٜىٰوَ ندِيَمْ؞ ³⁸يٜىٰسُ بٛو اٜ تٛنْ غَطَ کٛمِوَلْ نغَلْ اٜ طَانِي دٛوْ ٻَنْتِرْطُمْ حٛورٜ؞ سٜيْ تٛکُّٻٜمٛ ڤِنْدِنِمٛ مبِعِمٛ، ‏«‏مٛودِبّٛ، اَ وَنَّايِ تٛ اٜنْ کَلْکِي؟»‏

³⁹سٜيْ اٛ اُمِّي، اٛ حَٻَنِ حٜنْدُ ندُنْ، اٛ وِعِ غٜىٰلٛوطِ ندِيَمْ طِنْ، ‏«‏ندٜعِّتٜىٰ!‏ اَلٜىٰ!‏»‏ سٜيْ حٜنْدُ ندُنْ اَلِ، کٛو طُمٜ دٜعِّتِ؞ ⁴⁰اٛ وِعِ تٛکُّٻٜمٛ، ‏«‏نغَمْ طُمٜ نغٛودُطٛنْ کُلٛلْ؟ حَا جٛونِ اٛنْ کٛولَاکِيَمْ؟»‏

⁴¹ٻٜ کُلْتٛرِ، ٻٜ پَمْپَمْتِرِ، ٻٜ مبِعِ، ‏«‏طُمْ مٛيٜ اٛعٛ؟ حَا حٜنْدُ اٜ غٜىٰلٛوطِ ندِيَمْ اٜ نغَطَ کٛ اٛ وِعِ!‏»‏

يٜىٰسُ يَمْطِتِنِي غٛودُطٛ غِنِّ

¹يٜىٰسُ اٜ تٛکُّٻٜمٛ کُولِ فٛنْغٛ مبٜىٰلَ ٻٜ نجٛتِّي لٜيْدِ غَارَسِنْکٛعٜنْ؞ ²ندٜ يٜىٰسُ وُرْتِي دَغَ ندٜرْ کٛمِوَلْ نغَلْ، سٜيْ غٛطّٛ غٛودُطٛ غِنّٛلْ پِوٛيِ تٛ غٜنَالٜ تَٻِّيمٛ؞ ³نٜطّٛ اٛنْ ندٜرْ غٜنَالٜ اٛ جٛوطٛتٛو، وَلَا بَاوَيْطٛ حَٻُّکِمٛ، کٛو اٜ ٻٛغِّ نجَمْندِ؞ ⁴ندٜ طُطُّمْ اٜ مٛ حَٻِّرٜىٰ ٻٛغِّ نجَمْندِ جُوطٜ اٜ کٛيْطٜ، اَمَّا اٛ تَپَطِ اٛ يٜوَ نجَمْندِ غَطَاندِ تٛ کٛيْطٜ مَاکٛ؞ وَلَا غٛودُطٛ سٜمْبٜ بَاوَيْطٛ جٛغَاکِمٛ؞ ⁵جٜمَّ اٜ ݧَلَوْمَ اٜ مٛ ندٜرْ غٜنَالٜ کٛو دٛوْ کٛشّٜىٰجٜ، اٜ مٛ وُلَّ سٜمْبٜىٰ، اٜ مٛ تَپِرَ ٻَنْدُ مَاکٛ اٜ کَاپٜ؞

⁶ندٜ اٛ حَيْنِي يٜىٰسُ، اٛ دٛغِّ اٛ يَحِ تٛ مَاکٛ، اٛ دِشِّي يٜىٰسٛ مَاکٛ؞ ⁷اٛ وُلِّ سٜمْبٜىٰ اٛ وِعِ، ‏«‏کٛ وَنُّمَا اٜ اَمْ، يٜىٰسُ ٻِطّٛ اَللَّه جٛومُ مَنْغُ؟ اٜ مِ تٛرٛمَا نغَمْ اَللَّه، تَاع تٛرَّمْ؞»‏ ⁸اٛ وِعُ نٛنْ نغَمْ يٜىٰسُ وِعِي، ‏«‏اَنْ غِنّٛلْ، وُرْتَ ندٜرْ نٜطّٛ اٛعٛ!‏»‏

⁹سٜيْ يٜىٰسُ پَمِنغٛلْ وِعِ، ‏«‏نٛ اِنْدٜ مَاطَ؟»‏

نغٛلْ نٛوتِي نغٛلْ وِعِ، ‏«‏طُطِّ، نغَمْ اٜ مِنْ طُوطِ؞»‏ ¹⁰سٜيْ نغٛلْ وَطِ کَ تٛرَاکِ يٜىٰسُ تٛع اٛ رِيوَطِ دَغَ لٜيْدِ ندِنْ؞

¹¹حَادٜ طٛنْ اٜ وٛودِ اٛرْندٜ اَلَدٜىٰجِ طُطِّ اٜ دُرَ تٛ رٜغٛرْدٜ حٛشّٜىٰرٜ؞ ¹²سٜيْ غِنِّ طِنْ تٛرِي يٜىٰسُ طِ مبِعِ، ‏«‏اَلُمِنْ مِنْ نَتّٛيَ اَلَدٜىٰجِ طِنْ نِ؞»‏ ¹³يٜىٰسُ جَٻِ، سٜيْ طِ مبُرْتِي طِ نَتّٛيِ اَلَدٜىٰجِ طِنْ؞ اَلَدٜىٰجِ طِنْ بٛو کٜوْتِي 2,000؞ اٛرْندٜ ندٜنْ فُو ݧَارِ جِڤّٛيِي دَغَ دٛوْ پٛلْدٜ ندٜنْ يَنِ ندٜرْ مبٜىٰلَ، ندِيَمْ ݧَامِطِ؞

¹⁴وٛيْنَاٻٜ اَلَدٜىٰجِ طِنْ ندٛغِّ مبِعٛيِکَ يِمْٻٜ ندٜرْ غَرِيرِ اٜ يِمْٻٜ نغَرِحٛيْ؞ يِمْٻٜ ٻٜنْ نجَحِ نغِعَ کٛ وَطِ؞ ¹⁵ندٜ ٻٜ نغَرِ تٛ يٜىٰسُ وٛنِ، ٻٜ نغِعِ غٛودُنٛوطٛ غِنِّ طُطِّ اٛنْ، اٜ مٛ جٛوطِي طٛنْ، اٜ ٻٛرْنِي، اٜ مٛ ندٜرْ حَکِّيلٛ مَاکٛ؞ کٛو مٛيٜ مَٻّٜ حُلِ؞ ¹⁶غِعُٻٜ کٛ وَطِ ٻٜ مبِعِ يِمْٻٜ ٻٜنْ کٛ حٜٻِ غٛودُنٛوطٛ غِنِّ اٛنْ اٜ اَلَدٜىٰجِ طِنْ؞

¹⁷سٜيْ يِمْٻٜ ٻٜنْ ڤُطِّ تٛرَاکِ يٜىٰسُ اَلَنَٻٜ لٜيْدِ مَٻّٜ؞

¹⁸يٜىٰسُ اٜ نَتَّ کٛمِوَلْ، سٜيْ غٛودُنٛوطٛ غِنِّ اٛنْ تٛرِي دِلِّدَ اٜ يٜىٰسُ؞

¹⁹اَمَّا يٜىٰسُ جَٻَايِ اٛ دِلِّدَ اٜ مُوطُمْ، وِعِمٛ، ‏«‏حٛوتُ تٛ بَنْدِرَاٻٜ مَاطَ مبِعَٻٜ فِي مَوْطُمْ طُمْ جٛومِرَاوٛ وَطَنْمَا اٜ نٛ اٛ يُرْمِنِرَنْمَا؞»‏

²⁰سٜيْ نٜطّٛ اٛنْ دِلِّ لٜيْدِ دِکَڤٛلِسْ، اٛ فُطِّ حٛکُّکِ حَبَرُ فِي مَوْطُمْ طُمْ يٜىٰسُ وَطَنِمٛ؞ فُو يِمْٻٜ ٻٜنْ کَيْطِنِ؞

ٻِطّٛ جَايِرُسْ اٜ غٛطّٛ دٜبّٛ

²¹ندٜ يٜىٰسُ فُطِّتِ حُولِ فٛنْغٛ مبٜىٰلَ ندٜرْ کٛمِوَلْ، يِمْٻٜ طُطْٻٜ کَوْرِتِ تٛ مَاکٛ، کَنْکٛ بٛو اٜ مٛ حَادٜ مبٜىٰلَ نغَنْ؞ ²²سٜيْ غٛعٛتٛ ندٜرْ اَرْدِيٻٜ سُودُ دٛعَارٜ بِعٜتٜىٰطٛ جَايِرُسْ وَرِ؞ ندٜ اٛ يِعِ يٜىٰسُ، اٛ دِشِّي يٜىٰسٛ مَاکٛ، ²³اٛ وَطِ کَ تٛرَاکِ يٜىٰسُ، اٜ مٛ وِعَ، ‏«‏ٻِطّٛ اَمْ سُرْبَاجٛ ڤَمَرٛ ٻَدَکٜ مَيْدٜ، اٜ مِ تٛرٛمَا نغَرَا مٜىٰمَامٛ نغَمْ اٛ يَمْطِتَ تٛع اٛ مَايَ؞»‏

²⁴سٜيْ يٜىٰسُ يَادِ اٜ مَاکٛ؞ يِمْٻٜ طُطْٻٜ تٛکِّمٛ، اٜ ٻٜ ٻِطَّمٛ؞

²⁵اٜ وٛودِ غٛطّٛ دٜبّٛ طٛنْ غَطُطٛ دُوٻِ سَڤّٛ اٜ طِطِ اٜ تٛرّٛدٛو اٜ رُفُکِ پِيپَمْ؞ ²⁶دٜبّٛ اٛنْ تٛرَّکٜ نَاع سٜطَّ تٛ جُوطٜ ݧَوْندٛوٻٜ طُطْٻٜ، اٛ مَجِّنِي فُو جَوْدِ مَاکٛ؞ اٛ يَمْطِتَايِ، اَمَّا ݧَوُ طُمْ ٻٜيْدِي؞ ²⁷ندٜنْ مَا اٛ نَنِي حَبَرُ يٜىٰسُ، سٜيْ اٛ پِوٛيِ غَطَ يٜىٰسُ ندٜرْ يِمْٻٜ، اٛ مٜىٰمِ تٛغّٛورٜ مَاکٛ؞ ²⁸نغَمْ اٛ وِعِي ندٜرْ ٻٜرْندٜ مَاکٛ، ‏«‏کٛو تٛغّٛورٜ مَاکٛ مٜىٰمُمِ تَنْ، مِ يَمْطِتَيْ؞»‏

²⁹طٛنْ اٜ طٛنْ پِيپَمْ طَمْ دَرِي، اٛ نَنِ ندٜرْ ٻَنْدُ مَاکٛ طُمْ يَمْطِتِنِيمٛ دَغَ ݧَوُ مَاکٛ؞ ³⁰طٛنْ اٜ طٛنْ يٜىٰسُ فَامِ بَوْطٜ مبُرْتَکٜ دَغَ ندٜرْ مُوطُمْ؞ اٛ وَيْلِتِي ندٜرْ يِمْٻٜ، اٛ وِعِ، ‏«‏مٛيٜ مٜىٰمِ تٛغّٛورٜ اَمْ؟»‏

³¹سٜيْ تٛکُّٻٜمٛ مبِعِمٛ، ‏«‏اَ يِعَ يِمْٻٜ طُطْٻٜ اٜ ٻِطُّمَا، اَمَّا اَ پَمَ مٛيٜ مٜىٰمُمَا؟»‏

³²اَمَّا يٜىٰسُ وَطِ کَ رَارُکِ ندٜرْ يِمْٻٜ ٻٜنْ نغَمْ يِعَ مٛيٜ مٜىٰمِمٛ؞ ³³دٜبّٛ اٛنْ بٛو ندٜ اٜ مٛ اَنْدِ کٛ حٜٻِ ٻَنْدُ مَاکٛ، اٛ وَرِ ندٜرْ کُلٛلْ اٜ مٛ دِوْنَ، اٛ دِشِّي يٜىٰسٛ يٜىٰسُ، اٛ وِعِمٛ غٛونغَ دٛوْ کٛو طُمٜ کٛ وَطِ؞ ³⁴سٜيْ يٜىٰسُ وِعِمٛ، ‏«‏بَنْدِرَاوٛ، حٛولَارٜ مَاطَ يَمْطِتِنِيمَ؞ نجِڤّٛطَا جَمْ، اَ حٛيِي دَغَ ݧَوُ مَاطَ؞»‏

³⁵يٜىٰسُ اٜ مٜتَ، سٜيْ وٛٻّٜ دَغَ وُرٛ جَايِرُسْ اَرْدِيطٛ سُودُ دٛعَارٜ اٛنْ نغَرِ، ٻٜ مبِعِمٛ، ‏«‏ٻِطّٛ مَاطَ مَايِي؞ نغَمْ طُمٜ نغَنَّتَا مٛودِبّٛ کَدِنْ؟»‏ ³⁶اَمَّا يٜىٰسُ وَنَّايِ اٜ کٛ ٻٜ مبِعِ، اٛ وِعِ اَرْدِيطٛ سُودُ دٛعَارٜ اٛنْ، ‏«‏تَاع حُلُ، حٛولَيَمْ تَنْ؞»‏ ³⁷اٛ اَلَايِ کٛو مٛيٜ يَادِ اٜ مَاکٛ سٜيْ بِيتُرُسْ، اٜ يَاکُبُ، اٜ يَحَيَ مِݧِرَاوٛ يَاکُبُ؞ ³⁸ندٜ ٻٜ نجٛتِّي وُرٛ جَايِرُسْ، يٜىٰسُ يِعِ يِمْٻٜ ندٜرْ وَنَّارٜ، وٛٻّٜ اٜ مبٛيَ، وٛٻّٜ اٜ نغُلَّ اٜ سٜمْبٜ؞ ³⁹اٛ نَتِّ، اٛ وِعِ، ‏«‏نغَمْ طُمٜ نَتُّطٛنْ وَنَّارٜ ندٜعٜ اٛنْ مبٛيَ؟ سُرْبَاجٛ اٛنْ اٛ مَايَايِ، اَمَّا اٛ طَانِ تَنْ؞»‏

⁴⁰سٜيْ ٻٜ نجَلِمٛ؞ اٛ وُرْتِنِٻٜ ٻٜ فُو يَاسِ، اٛ حٛشِّ ݧَاکٛ سُرْبَاجٛ اٛنْ اٜ مَدُوجٛ مَاکٛ اٜ تٛکُّٻٜمٛ ٻٜ اٛ وٛنْدِ، ٻٜ نَتِّ تٛ سُرْبَاجٛ اٛنْ وٛنِ؞ ⁴¹يٜىٰسُ جٛغِي جُنْغٛ سُرْبَاجٛ اٛنْ وِعِ، ‏«‏تَلِيتَ، کُمِ،»‏ وَاتٛ، ‏«‏سُرْبَاجٛ، اُمَّ!‏»‏

⁴²طٛنْ اٜ طٛنْ سُرْبَاجٛ اٛنْ اُمِّي فُطِّ يَادُ؞ اٜ مٛ وٛودِ دُوٻِ سَڤّٛ اٜ طِطِ؞ فِي طُمْ حَيْطِنِٻٜ نَاع سٜطَّ؞ ⁴³يٜىٰسُ وَغِّنِٻٜ وِعِ تٛع ٻٜ نجَٻَ ٻٜ مبِعَکَ کٛو مٛيٜ؞ ندٜنْ اٛ وِعِٻٜ، ‏«‏کٛکّٜىٰمٛ غٛطُّمْ اٛ ݧَامَ؞»‏

يٜىٰسُ وَݧَامَ تٛ نَجَرَتْ

¹سٜيْ يٜىٰسُ اَلِ وِغٜىٰرٜ ندٜنْ سٛعِّي غَرِيرِ تٛ مَوْنِ، تٛکُّٻٜمٛ نجَادِ اٜ مَاکٛ؞ ²ندٜ ݧَلْندٜ سِوْتَارٜ وَرِ، اٛ فُطِّ اٜکِّتِنْکِ ندٜرْ سُودُ دٛعَارٜ؞ يِمْٻٜ طُطْٻٜ نَنْٻٜ کٛ اٛ وِعِ، ٻٜ کَيْطِنِ اٜ اٜکِّتِنٛلْ مَاکٛ؞ اٜ ٻٜ مبِعَ، ‏«‏تٛيٜ نٜطّٛ اٛعٛ حٜٻِ فُو فِي طُعُمْ؟ تٛيٜ اٛ حٜٻِ اِرِ فَامُ طُعُمْ؟ تٛيٜ اٛ حٜٻِ بَوْطٜ وَطُکِ اِرِ کُوطٜ کَيْطِنِيطٜ طٜعٜ؟ ³نَاع کَنْکٛ وٛنِ اٛنْ طٛنْ شٜحٛووٛ، ٻِطّٛ مَرْيَامَ، مَوْنِرَاوٛ يَاکُبُ، اٜ يُسُفُ، اٜ يَحُودَ، اٜ سِيمَنْ؟ ندٜنْ مِݧِرَاٻٜ مَاکٛ رٜوْٻٜ نَاع اٜنْ نغٛنْدِ اٜ مَٻّٜ طٛعٛ؟»‏ سٜيْ ٻٜ نجَوَنِمٛ؞

⁴يٜىٰسُ وِعِٻٜ، ‏«‏کٛو تٛيٜ يِمْٻٜ اٜ کٛکَّ اَنَّبِيجٛ مَنْغُ، اَمَّا يِمْٻٜ غَرِيرِ مَاکٛ، اٜ بَنْدِرَاٻٜ مَاکٛ، اٜ يِمْٻٜ وُرٛ مَاکٛ، ٻٜ کٛکَّتَامٛ مَنْغُ؞»‏

⁵يٜىٰسُ وَاوَايِ وَطُکِ غٛطُّمْ کَيْطِنِيطُمْ تٛنْ، سٜيْ نِ يِمْٻٜ سٜطَّ ٻٜ نجَمْطَا اٛ يٛوِ جُوطٜ مَاکٛ دٛوْ مَٻّٜ اٛ يَمْطِتِنِٻٜ؞ ⁶اٛ حَيْطِنِ نغَمْ ٻٜ کٛولَاکِمٛ؞

يٜىٰسُ لِلِ تٛکُّٻٜمٛ سَڤّٛ اٜ طِطٛ

يٜىٰسُ اٜ يِيلٛو اٜ اٜکِّتِنَ ندٜرْ نغَرِحٛيْ؞ ⁷اٛ نٛدِّ تٛکُّٻٜمٛ سَڤّٛ اٜ طِطٛ، اٛ لِلِٻٜ طِطٛ‑طِطٛ، اٛ حٛکِّٻٜ لَامُ دٛوْ غِنِّ؞ ⁸اٛ وِعِٻٜ تٛع ٻٜ کٛشَّ غٛطُّمْ نغَمْ يَادُ، کٛو ݧَمْندُ، کٛو جَکَارٜ، کٛو شٜىٰدٜ اٜ جِيبَ؞ سَوْرُ تَنْ ٻٜ نجٛغٛتٛو؞ ⁹ٻٜ نغَتَّ ڤَطٜ، اَمَّا تٛع ٻٜ ٻٛرْنٛو تٛغّٛوجٜ طِطِ؞ ¹⁰اٛ بٛو وِعِٻٜ، ‏«‏فُو وُرٛ نغٛ نجِڤِّيطٛنْ، نجٛوطٜىٰ ندٜرْ مَاغٛ نَا اٛنْ اَلِي غَرِيرِ ندِنْ؞ ¹¹تٛ طُمْ جَٻَّاکِعٛنْ اٜ وِغٜىٰرٜ، کٛو طُمْ وَݧِي حٜتِّندَنَاکِعٛنْ، ڤِطّٜىٰ سٛلَّارٜ کٛيْطٜ مٛوطٛنْ شَرٜلْ کٛ اَلٛتٛنْ وِغٜىٰرٜ ندٜنْ؞ کَنْجُمْ حٛلَّتَ ٻٜ نغَطِي حَکّٜ؞»‏

¹²سٜيْ ٻٜ ندِلِّ اٜ ٻٜ نغَعَجِنَ وِعُکِ يِمْٻٜ تُوبَ؞ ¹³ٻٜ مبُرْتِنَنِ يِمْٻٜ طُطْٻٜ غِنِّ، طُطْٻٜ ٻٜ نجَمْطَا بٛو ٻٜ مٛيْتَنِٻٜ نٜبَّمْ ٻٜ نجَمْطِتِنِٻٜ؞

مَيْدٜ يَحَيَ غَطٛووٛ بَڤْتِسْمَ

¹⁴حِرُدُسْ لَامِيطٛ نَنِ حَبَرُ فِي طُعُمْ، نغَمْ اِنْدٜ يٜىٰسُ اَنْدَامَ کٛو تٛيٜ؞ وٛٻّٜ اٜ مبِعَ يَحَيَ غَطٛووٛ بَڤْتِسْمَ اُمِّنَا دَغَ مَيْدٜ، کَنْجُمْ وَطِ اٜ مٛ وٛودِ بَوْطٜ وَطُکِ کُوطٜ کَيْطِنِيطٜ؞

¹⁵وٛٻّٜ بٛو مبِعِ، ‏«‏طُمْ اَنَّبِ اِلِيَ؞»‏

ندٜنْ وٛٻّٜ مبِعِ، ‏«‏اٛ اَنَّبِيجٛ بٛ اَنَّبٛعٜنْ ندٜنّٛ؞»‏

¹⁶اَمَّا ندٜ حِرُدُسْ نَنِ نٛنْ، اٛ وِعِ، ‏«‏يَحَيَ مٛ اِتَّنْمِ حٛورٜ، کَنْکٛ اُمِّنَا دَغَ مَيْدٜ!‏»‏ ¹⁷نغَمْ ندٜنّٛ حِرُدُسْ اٜ حٛورٜ مُوطُمْ وَطِي طُمْ نَنْغِي يَحَيَ، طُمْ حَٻِّمٛ، طُمْ سُرِمٛ ندٜرْ سُودُ شُرَلْ؞ اٛ وَطُ نٛنْ نغَمْ حِرُودِيَ دٜبّٛ مَوْنِرَاوٛ مَاکٛ فِلِبُسْ مٛ اٛ تٜعِ؞ ¹⁸نغَمْ يَحَيَ وَطِي کَ وِيکِ حِرُدُسْ، ‏«‏طُمْ حَانَايِ تٜعَا دٜبّٛ مَوْنِرَاوٛ مَاطَ؞»‏

¹⁹حِرُودِيَ بٛو ندٜرْ ٻٜرْندٜ مَاکٛ اٜ مٛ جٛغِتِي يَحَيَ اٜ مٛ يِطِ وَرْکِمٛ؞ اَمَّا اٛ وَاوَايِ وَرْکِمٛ، ²⁰نغَمْ حِرُدُسْ اٜ حُلَ يَحَيَ اٜ سُرَنَمٛ، ندٜ اٜ مٛ اَنْدِ کَنْکٛ اٛ اَادِلِيجٛ اٛ شٜنِيطٛ؞ فُو شَرٜلْ نغٜلْ حِرُدُسْ نَنِ حَالَ يَحَيَ، اٜ مٛ نَتَّ وَنَّارٜ؞ اَمَّا فُو اٜ نٛنْ اٜ مٛ يِطِ حٜتِّندَنَاکِمٛ؞

²¹اَمَّا حِرُودِيَ حٜٻِ لَاوٛلْ نٛ وَرِرْتَ يَحَيَ؞ ݧَلْندٜ حُمْتٛ سِفْتٛرْکِ دَݧْنغٛلْ حِرُدُسْ، حِرُدُسْ سِرْيِي حُمْتٛ نغَمْ کُوٛوٻٜ مَوْٻٜ ندٜرْ لَامُ مَاکٛ، اٜ مَوْٻٜ اَرْدِيٻٜ سٛوجِعٜنْ، اٜ مَوْٻٜ لٜيْدِ غَلِيلِ؞ ²²ندٜ ٻِطّٛ حِرُودِيَ سُرْبَاجٛ نَتِّ وَمِ، اٛ وٜلْنَنِ حِرُدُسْ ٻٜرْندٜ اٜ حٛٻّٜ مَاکٛ؞ سٜيْ حِرُدُسْ وِعِمٛ، ‏«‏تٛرَيَمْ فُو کٛ نغِطَّا، مِ حٛکّٜتٜطُمْ؞»‏ ²³حِرُدُسْ حُنَنِيمٛ وِعِ، ‏«‏فُو کٛ تٛرِطَايَمْ مِ حٛکّٜتٜطُمْ حَا کٛ حٜوْتَتَ سٜنْدٜرٜ لَامُ اَمْ؞»‏

²⁴سٜيْ سُرْبَاجٛ اٛنْ وُرْتِي وِعِ مَدُوجٛ مُوطُمْ، ‏«‏کٛ حَانِ مِ تٛرٛو؟»‏

مَدُوجٛ اٛنْ وِعِمٛ، ‏«‏تٛرَمٛ حٛورٜ يَحَيَ غَطٛووٛ بَڤْتِسْمَ؞»‏

²⁵طٛنْ اٜ طٛنْ سُرْبَاجٛ اٛنْ ندٜرْ يَوْطَارٜ اٛ سٛعِّي تٛ لَامِيطٛ اٛنْ اٛ وِعِمٛ، ‏«‏اٜ مِ يِطِ جٛونِ‑جٛونِ کٛکَّايَمْ حٛورٜ يَحَيَ غَطٛووٛ بَڤْتِسْمَ ندٜرْ لٜعَلْ؞»‏

²⁶حِرُدُسْ لَامِيطٛ وَنِّي نَاع سٜطَّ، اَمَّا ندٜ اٛ يَادَکٜ اٛ حُنَنَکٜمٛ يٜىٰسٛ حٛٻّٜ، اٛ يِطَا اٛ حَطَمٛ؞ ²⁷طٛنْ اٜ طٛنْ اٛ وَطِ سٛوجِيجٛ اٛ يَحَ اٛ وَدّٛيَ حٛورٜ يَحَيَ؞ سٛوجِيجٛ اٛنْ يَحِ اِتَّنِ يَحَيَ حٛورٜ ندٜرْ سُودُ شُرَلْ، ²⁸اٛ وَدّٛيِ حٛورٜ ندٜنْ ندٜرْ لٜعَلْ، اٛ حٛکِّندٜ سُرْبَاجٛ اٛنْ؞ سُرْبَاجٛ اٛنْ بٛو حٛکِّندٜ مَدُوجٛ مُوطُمْ؞ ²⁹ندٜ تٛکُّٻٜ يَحَيَ نَنِ نٛنْ ٻٜ نغَرِ ٻٜ کٛشِّ ٻَنْدُ مَاکٛ ٻٜ ڤُکِّنٛيِندُ ندٜرْ يٜنَاندٜ غَسَاندٜ ندٜرْ حَيْرٜ؞

يٜىٰسُ ݧَمْنِي يِمْٻٜ 5,000

³⁰لِلَاٻٜ ٻٜ يٜىٰسُ لِلُنٛو نغَرْتٛيِي تٛ مَاکٛ، ٻٜ مبِعِمٛ کٛو طُمٜ کٛ ٻٜ نغَطِ اٜ کٛ ٻٜ اٜکِّتِنِ؞ ³¹اٛ وِعِٻٜ، ‏«‏نغَرٜىٰ، نجَحٜنْ تٛ وِغٜىٰرٜ غٜوْتُندٜ کٜٻٛنْ شِوْتٛوطٛنْ سٜطَّ؞»‏ اٛ وِعِي نٛنْ نغَمْ يِمْٻٜ طُطْٻٜ اٜ نغَرَ اٜ شٛعّٛو حَا حٜوْتِ ٻٜ کٜٻَايِ کٛو شَرٜلْ ٻٜ ݧَامِ ݧَمْندُ؞ ³²سٜيْ ٻٜ نَتِّ کٛمِوَلْ ٻٜ ندِلِّ تٛ وِغٜىٰرٜ ندٜرْ لَدّٜ کَمْٻٜ تَنْ؞

³³اَمَّا شَرٜلْ نغٜلْ ٻٜ ندِلَّتَ يِمْٻٜ طُطْٻٜ نغِعِٻٜ اَندِتِٻٜ؞ يِمْٻٜ ٻٜنْ مبُرْتٛيِي دَغَ غَرِيجٜ طُطّٜ ٻٜ ندٛغِّ اٜ کٛيْطٜ ٻٜ اَرْتِٻٜ يَاکِ تٛنْ؞ ³⁴اٜ جِڤَّاکِ يٜىٰسُ دَغَ ندٜرْ کٛمِوَلْ نغَلْ اٛ يِعِ يِمْٻٜ طُطْٻٜ اٜ کَوْرِتِ، سٜيْ اٛ نَنِ جُرُمْطُمْ مَٻّٜ، نغَمْ اٜ ٻٜ طٛنْ بٛ بَالِ طِ نغَلَا غَيْنَاکٛ؞ سٜيْ اٛ فُطِّ اٜکِّتِنْکِٻٜ فِي طُطُّمْ؞ ³⁵ندٜ اَلَاسَرَ وَطِ، سٜيْ تٛکُّٻٜمٛ نغَرِ تٛ مَاکٛ مبِعِمٛ، ‏«‏طٛعٛ طُمْ لَدّٜ، طٛنْمَا نَانغٜ حِيرِي؞ ³⁶وِعُ يِمْٻٜ ٻٜعٜ ندِلَّ نغَمْ ٻٜ نجَحَ غُرٜ غٛنْطٜ حَادٜ اٜ نغَرِحٛيْ نغٛنْکٛيْ حَادٜ ٻٜ شٛودَنَ کٛعٜ مَٻّٜ کٛ ٻٜ ݧَامَتَ؞»‏

³⁷اَمَّا يٜىٰسُ وِعِٻٜ، ‏«‏اٛنٛنْ کٛکّٜىٰٻٜ کٛ ٻٜ ݧَامَتَ؞»‏ سٜيْ ٻٜ مبِعِمٛ، ‏«‏اَ يِطِ مِنْ نجَحَ مِنْ شٛودٛنٛيَٻٜ ݧَمْندُ کٜوْتُندُ شٜىٰدٜ طٜ کُوٛووٛ يٛٻٜتٜىٰ بَلْطٜ 200 مِنْ کٛکَّٻٜ ٻٜ ݧَامَ؟»‏

³⁸اٛ وِعِٻٜ، ‏«‏بُرٛودِ نٛيٜ نغٛودُطٛنْ؟ نجَحٜىٰ ندَارٛنْ؞»‏

ندٜ ٻٜ ندَارِ، ٻٜ مبِعِ، ‏«‏بُرٛودِ جٛوِ اٜ لِپِّ طِطِ؞»‏

³⁹سٜيْ يٜىٰسُ وِعِٻٜ ٻٜ مبِعَ يِمْٻٜ نجٛوطٛو مٛٻْطٜ‑مٛٻْطٜ دٛوْ حُطٛ حٜشّٛ؞ ⁴⁰سٜيْ ٻٜ نجٛوطِي مٛٻْطٜ 100‏‑100، وٛٻّٜ نجٛوطِي مٛٻْطٜ 50‏‑50؞ ⁴¹اٛ حٛشِّ بُرٛودِ جٛوِ طُمْ اٜ لِپِّ طِطِ طِنْ، اٛ رَارِ دٛوْ، اٛ يٜتِّ اَللَّه، اٛ سٜنْدِ بُرٛودِ طُمْ اٛ حٛکِّ تٛکُّٻٜمٛ نغٜىٰدَنَ يِمْٻٜ فُو؞ نٛنْ اٛ وَادِ اٜ لِپِّ طِطِ طِنْ مَا؞ ⁴²ٻٜ فُو ٻٜ ݧَامِ ٻٜ کَارِ؞ ⁴³تٛکُّٻٜمٛ مٛٻْتِ بُرٛودِ کٛرِيطُمْ اٜ لِپِّ کٛرِيطِ کٛ وَطِ کٛنْدٛوجٜ سَڤّٛ اٜ طِطِ؞ ⁴⁴ݧَامُٻٜ بُرٛودِ طُمْ وٛرْٻٜ تَنْ ٻَدَکٜ 5,000؞

يٜىٰسُ وَطِي يَادُ دٛوْ ندِيَمْ

⁴⁵طٛنْ اٜ طٛنْ يٜىٰسُ وَطِ تٛکُّٻٜمٛ نَتَّ کٛمِوَلْ ٻٜ اَرْتَمٛ حُولُکِ يَاکِ بٜتَسَيْدَ، کَنْکٛ بٛو اٛ جَٻِّتٛتٛ کَوْرُتُٻٜ؞ ⁴⁶غَطَ اٛ جَٻِّتَکٜٻٜ اٛ پٜنْتِ وٛنْدٜ حٛشّٜىٰرٜ نغَمْ اٛ وَطَ دٛعَارٜ؞ ⁴⁷ندٜ فُتُرٛ وَطِ، کٛمِوَلْ نغَلْ اٜ شَکَ مبٜىٰلَ، يٜىٰسُ بٛو اٜ دٛوْ حٛشّٜىٰرٜ کَنُمْ تَنْ؞ ⁴⁸اٛ يِعِ تٛکُّٻٜمٛ اٜ ڤِيدَ اٜ کٛمِوَلْ، نغَمْ حٜنْدُ اٜ حَطَٻٜ يَادُ؞ فَجِرِ اٜ مٛ يَحَ تٛ مَٻّٜ، اٜ مٛ يَحَ دٛوْ ندِيَمْ مبٜىٰلَ نغَنْ؞ اٜ مٛ يِطِ اٛ پَٻّٛوٻٜ، ⁴⁹اَمَّا ندٜ ٻٜ نغِعِمٛ اٜ مٛ يَحَ دٛوْ ندِيَمْ، ٻٜ کَمِّ طُمْ غِنّٛلْ، سٜيْ ٻٜ نغُلِّ، ⁵⁰نغَمْ ٻٜ فُو ٻٜ نغِعِيمٛ ٻٜ کُلْتٛرِي؞ اَمَّا طٛنْ اٜ طٛنْ اٛ مٜتَنِٻٜ، اٛ وِعِ، ‏«‏ڤُکِّنٜىٰ ٻٜرْطٜ مٛوطٛنْ، طُمْ مِنْ؞ تٛع اٛنْ کُلُ؞»‏ ⁵¹ندٜنْ اٛ نَتِّ کٛمِوَلْ نغَلْ تٛ مَٻّٜ، سٜيْ حٜنْدُ ندُنْ دَرِي؞ ٻٜ کَيْطِنِ نَاع سٜطَّ، ⁵²نغَمْ ٻٜ ڤَامَايِ مَعَنَ ݧَمْنُکِ يِمْٻٜ 5,000 کِ اٛ وَطِ، نغَمْ ٻٜرْطٜ مَٻّٜ ڤَامَايِ مَعَنَ مَاجُمْ؞

يٜىٰسُ يَمْطِتِنِي ݧَوْٻٜ تٛ لٜيْدِ جَنِسَرَتْ

⁵³ندٜ ٻٜ کُولِ فٛنْغٛ مبٜىٰلَ نغَنْ، ٻٜ نجٛتِّي لٜيْدِ جَنِسَرَتْ ٻٜ کَٻِّ کٛمِوَلْ نغَلْ؞ ⁵⁴ندٜ ٻٜ مبُرْتِي ندٜرْ مَاغَلْ، طٛنْ اٜ طٛنْ يِمْٻٜ اَنْدِتِ يٜىٰسُ؞ ⁵⁵يِمْٻٜ ٻٜنْ ندٛغِّ ٻٜ نجَحِ کٛو تٛيٜ ندٜرْ لٜيْدِ ندِنْ، اٜ ٻٜ نغَدّٛيَ ݧَوْٻٜ دٛوْ مبٜعِّتَارِ تٛ يٜىٰسُ کٛو تٛيٜ تٛ ٻٜ نَنِ اٛ وٛنِ؞ ⁵⁶کٛو تٛيٜ تٛ اٛ يَحِ، کٛو ندٜرْ نغَرِحٛيْ، کٛو ندٜرْ غَرِيجٜ مَوْطٜ، کٛو ندٜرْ غُرٜ لَدّٜ، يِمْٻٜ اٜ ڤُکِّنَ ݧَوْٻٜ ندٜرْ لُومٛ، ٻٜ تٛرٛومٛ ݧَوْٻٜ ٻٜنْ مٜىٰمَ کٛو شِلْمبِ تٛغّٛورٜ مَاکٛ؞ فُو مٜىٰمُٻٜطِ نجَمْطِتِ؞

ندٛنُ مَامَعٜنْ

¹فَارِسَنْکٛعٜنْ اٜ وٛٻّٜ ندٜرْ مٛودِٻّٜ اَتَّوْرَ غَرٛيْٻٜ دَغَ اُرُشَلِيمَ ٻٜ کَوْرِتِ تٛ يٜىٰسُ؞ ²سٜيْ ٻٜ نغِعِ وٛٻّٜ تٛکُّٻٜ يٜىٰسُ اٜ ٻٜ ݧَامَ ݧَمْندُ ٻٜ لٛوتَايِ جُوطٜ مَٻّٜ نٛ دِينَ يَحُودَنْکٛعٜنْ وِعِ؞

³فَارِسَنْکٛعٜنْ اٜ فُو يَحُودَنْکٛعٜنْ ٻٜ ݧَامَتَا ݧَمْندُ نَا ٻٜ لٛوتِي جُوطٜ مَٻّٜ نٛ دِينَ مَٻّٜ وِعِ، اٜ ٻٜ تٛکِّ ندٛنُ مَامَعٜنْ مَٻّٜ؞ ⁴تٛ ٻٜ نغَرْتٛيِي دَغَ لُومٛ، ٻٜ ݧَامَتَا ݧَمْندُ نَا ٻٜ لٛوتَکٜ نٛ دِينَ مَٻّٜ وِعِ؞ طٛنْمَا اٜ ٻٜ تٛکَّ ندٛنُ طُطُّمْ طُمْ ٻٜ ندٛنِ، بٛ لٛوتُکِ جَرْدُطٜ، اٜ غٛجِيجٜ، اٜ ڤَالِ غَطِرَاطِ نجَمْندِ مبٛطٜىٰرِ؞

⁵سٜيْ فَارِسَنْکٛعٜنْ اٜ مٛودِٻّٜ اَتَّوْرَ ٻٜنْ پَمِ يٜىٰسُ ٻٜ مبِعِ، ‏«‏نغَمْ طُمٜ تٛکُّٻٜمَ تٛکَّتَا ندٛنُ مَامَعٜنْ مٜىٰطٜنْ، اَمَّا اٜ ٻٜ ݧَامِرَ ݧَمْندُ جُوطٜ طٜ لَاٻَا؟»‏

⁶سٜيْ يٜىٰسُ نٛوتِي وِعِ، ‏«‏اَنَّبِ اِشَايَ وِعِي غٛونغَ ندٜ وَطِ اَنَّبَاکُ دٛوْ مٛوطٛنْ، اٛنٛنْ مُنَافُکِعٜنْ، نٛ طُمْ وِنْدِرَا،

اَللَّه وِعِي، ‏‹‏ٻٜنْ طٛنْ يِمْٻٜ اٜ حٛنْدُکٛ تَنْ ٻٜ مَوْنِنْتَيَمْ،

اَمَّا ٻٜرْطٜ مَٻّٜ اٜ نغٛطِّتِييَمْ؞

⁷اٜ مٜىٰرٜ ٻٜ مَوْنِنْتَيَمْ؛

اٜ ٻٜ اٜکِّتِنَ دٛوکَ يِمْٻٜ

بٛ تٛ اَمْ طُمْ پِوٛيِ؞›‏

⁸‏«‏اٛنْ اَلِي تٛکُّکِ کٛ اَللَّه وِعِ طُمْ وَطَ، اٛنْ نجٛغَکٜ ندٛنُوجِ يِمْٻٜ؞»‏

⁹سٜيْ اٛ وِعِٻٜ، ‏«‏اٛنْ ݧُمَ اٛنْ نغَطِي فِي بٛطُّمْ ندٜ نغَݧُطٛنْ کٛ اَللَّه وِعِ نغَمْ تٛکّٛنْ ندٛنُ مٛوطٛنْ؞ ¹⁰نغَمْ مُوسَ وِعِي، ‏‹‏حٛکُّ ݧَاکٛ مَاطَ اٜ مَدُوجٛ مَاطَ مَنْغُ،›‏ ندٜنْ، ‏‹‏کٛو مٛيٜ حُطِ ݧَاکٛ مُوطُمْ کٛو مَدُوجٛ مُوطُمْ دٛولٜ وَرٜىٰ؞›‏ ¹¹اَمَّا اٛنْ مبِعَ تٛ نٜطّٛ وِعِي ݧَاکٛ مُوطُمْ کٛو مَدُوجٛ مُوطُمْ، ‏‹‏فُو کٛ کٛکَّيْنٛمَامِ، طُمْ کٛرْبَنْ، وَاتٛ مِ حٛکِّيطُمْ اَللَّه،›‏ ¹²ندٜ مبِيطٛنْ نٛنْ اٛنْ کَطِي يِمْٻٜ مبَلَّ دَݧٛوٻٜ مَٻّٜ؞ ¹³نٛنْ نغَرْتِرْطٛنْ وٛلْدٜ اَللَّه مٜىٰرٜ لَاوٛلْ ندٛنُ طُمْ اٜکِّتِنْطٛنْ؞ کَدِنْ اٛنْ نغَطَ فِي طُطُّمْ اِرِ طُعُمْ؞»‏

کٛ وَرْتِرْتَ نٜطّٛ مٛ لَاٻَا يٜىٰسٛ اَللَّه

¹⁴سٜيْ يٜىٰسُ فُطِّتِ نٛدِّ يِمْٻٜ حَوْرُتُٻٜ، اٛ وِعِ، ‏«‏کٜتِّندٜىٰ، اٛنْ فُو، ڤَامٛنْ؞ ^15‏-16وَلَا غٛطُّمْ يَاسِ ٻَنْدُ نٜطّٛ نَتَّيْطُمْ ندٜرْ مَاکٛ وَرْتِرَمٛ مٛ لَاٻَا يٜىٰسٛ اَللَّه؞ اَمَّا کٛ وُرْتٛيْتٛو دَغَ ندٜرْ ٻٜرْندٜ نٜطّٛ کَلُّطُمْ کَنْجُمْ وَرْتِرْتَمٛ مٛ لَاٻَا يٜىٰسٛ اَللَّه؞»‏

¹⁷ندٜ اٛ سٜنْدِرِ اٜ يِمْٻٜ فُو، اٛ نَتِّ وُرٛ، تٛکُّٻٜمٛ پَمِمٛ مَعَنَ اٜکِّتِنٛلْ نغٛعٛلْ؞ ¹⁸اٛ نٛوتِي اٛ وِعِ، ‏«‏اٛنٛنْ مَا اٛنْ ڤَامَايِ مَعَنَ طُعُمْ؟ اٛنْ اَنْدَا وَلَا کٛ نَتَّتَ نٜطّٛ دَغَ يَاسِ وَرْتِرَمٛ مٛ لَاٻَا؟ ¹⁹نغَمْ نَاع ندٜرْ ٻٜرْندٜ طُمْ نَتَّتَ، اَمَّا ندٜرْ رٜىٰدُ، ندٜنْ طُمْ وُرْتٛ ٻَنْدُ؞»‏ ﴿ندٜ يٜىٰسُ وِعِ طُعُمْ، اٛ حٛلِّي کٛو ندُيٜ ݧَمْندُ ندُ لَمْندُ؞﴾

²⁰اٛ ٻٜيْدِ وِعُکِ، ‏«‏کٛ وُرْتٛتٛو دَغَ ندٜرْ ٻٜرْندٜ نٜطّٛ، کَنْجُمْ وَطَتَ نٜطّٛ وَرْتَ مٛ لَاٻَا يٜىٰسٛ اَللَّه؞ ²¹نغَمْ دَغَ ندٜرْ ٻٜرْندٜ نٜطّٛ ݧُمٛ کَلُّنغٛ وُرْتٛيْتٛو، اٜ وَطُکِ نجٜىٰنُ حَکُّندٜ يِمْٻٜ ٻٜ نغَلَا تٜىٰغَلْ، اٜ نغُيْکَ، اٜ وَرْحٛورٜ، اٜ نجٜىٰنُ، ²²اٜ سُونٛ فِي دُونِيَارُ، اٜ حَلّٜىٰندٜ، اٜ پٛيْرٜ کَلُّندٜ، اٜ فُو کُوطٜ کَلُّطٜ طٜ ٻٜرْطٜ مَٻّٜ نغِطِ، اٜ لَوْلِيرُ، اٜ وٛنُّکِ اِنْدٜ نٜطّٛ، اٜ مَوْنِنْکِ حٛورٜ، اٜ وَݧُکِ وَطُکِ کٛ وٛوطِ؞ ²³فُو طٜعٜ کُوطٜ کَلُّطٜ دَغَ ندٜرْ ٻٜرْندٜ طٜ مبُرْتٛيْتٛو طٜ نغَرْتِرَ نٜطّٛ مٛ لَاٻَا يٜىٰسٛ اَللَّه؞»‏

حٛولَارٜ غٛطّٛ دٜبّٛ

²⁴دَغَ طٛنْ يٜىٰسُ دِلِّ يَحِ وِغٜىٰرٜ حَادٜ غَرِيجٜ تَايَ اٜ سِدٛنْ؞ اٛ نَتِّ وٛنْغٛ وُرٛ، اٛ يِطَا کٛو مٛيٜ اَنْدَ اٜ مٛ طٛنْ طُمْ؞ اَمَّا فُو اٜ نٛنْ اٛ وَاوَايِ سُوطَاکِ يِمْٻٜ؞ ²⁵طٛنْ اٜ طٛنْ غٛطّٛ دٜبّٛ غٛودُطٛ ٻِطّٛ سُرْبَاجٛ ڤَمَرٛ غٛودُطٛ غِنّٛلْ نَنِ حَبَرُ يٜىٰسُ؞ سٜيْ اٛ وَرِ اٛ دِشِّي يٜىٰسٛ يٜىٰسُ؞ ²⁶دٜبّٛ اٛنْ بٛو اٛ حٜلٜنَنْکٜىٰجٛ تٛ فِنِيکِيَ ندٜرْ لٜيْدِ سِيرِيَ اٛ دَݧَا؞ اٛ تٛرِي يٜىٰسُ وُرْتِنَنَ ٻِطّٛ مَاکٛ غِنّٛلْ نغٛلْ؞ ²⁷سٜيْ يٜىٰسُ وِعِمٛ، ‏«‏اَرَنْدٜ اَلْ طُمْ ݧَمْنَ ٻِکّٛيْ، نغَمْ طُمْ حَانَايِ طُمْ حٛشَّ ݧَمْندُ ٻِکّٛيْ طُمْ حُبَنٛوندُ کُتِحٛيْ؞»‏

²⁸اَمَّا دٜبّٛ اٛنْ وِعِمٛ، ‏«‏اٜىٰ، مٛودِبّٛ، اَمَّا حَا کُتِحٛيْ نغٛنْکٛيْ لٜيْ تٜىٰبُرْ اٜ ݧَامَ حٛرَانٛ سُکَاٻٜ ٻٜنْ؞»‏

²⁹سٜيْ يٜىٰسُ وِعِمٛ، ‏«‏نغَمْ اَ وِعِي نٛنْ، حٛوتُ، غِنّٛلْ نغٛلْ وُرْتَکٜ ٻِطّٛ مَاطَ؞»‏

³⁰سٜيْ دٜبّٛ اٛنْ سٛعِّي وُرٛ تَوِ ٻِطّٛ مُوطُمْ اٜ فُکِّي دٛوْ لٜىٰسٛ، غِنّٛلْ نغٛلْ بٛو وُرْتَکٜ دَغَ ندٜرْ مَاکٛ؞

يٜىٰسُ يَمْطِتِنِي ڤَحٛ

³¹سٜيْ يٜىٰسُ اَلِ وِغٜىٰرٜ غٛنْدٜ حَادٜ غَرِيرِ تَايَ، اٛ تٛکِّرِ غَرِيرِ سِدٛنْ، اٛ رٜغٛيِي مبٜىٰلَ غَلِيلِ، اٛ نَتِّ لٜيْدِ دِکَڤٛلِسْ؞ ³²تٛنْ وٛٻّٜ يِمْٻٜ نغَدَّنِمٛ غٛطّٛ ڤَحٛ مٛ مٜتٛ مُوطُمْ وُرْتَتَاکٛ بٛطُّمْ؞ ٻٜ تٛرِي يٜىٰسُ يٛوَ جُوطٜ مُوطُمْ دٛوْ مَاکٛ يَمْطِتِنَمٛ؞ ³³اٜ وٛودِ يِمْٻٜ طُطْٻٜ طٛنْ، سٜيْ يٜىٰسُ حَکِّتِي کَنْکٛ اٜ ڤَحٛ اٛنْ، اٛ وَطِ کٛولِ مَاکٛ ندٜرْ نٛڤِّ ڤَحٛ اٛنْ؞ اٛ تُتِّ جٛودٜ اٛ مٜىٰمِ طٜمْنغَلْ ڤَحٛ اٛنْ؞ ³⁴ندٜنْ يٜىٰسُ رَارِ دٛوْ فٛوفِ فٛوفَانغٛ جُوتُنغٛ وِعِمٛ، ‏«‏اِفَتَ،»‏ وَاتٛ، ‏«‏مَٻِّتَ!‏»‏

³⁵طٛنْ اٜ طٛنْ نٛڤِّ نٜطّٛ اٛنْ مَٻِّتِي، طٜمْنغَلْ مَاکٛ يٛوفِي، اٛ فُطِّ مٜتُکِ بٛطُّمْ؞ ³⁶سٜيْ يٜىٰسُ وِعِٻٜ تٛع ٻٜ مبِعَکَ غٛطّٛ؞ اَمَّا فُو شَرٜلْ نغٜلْ اٛ حَطِٻٜ وِعُکِکَ، سٜيْ ٻٜ ٻٜيْدَ وِعُکِکَ کٛو تٛيٜ؞ ³⁷يِمْٻٜ کَيْطِنِ نَاع سٜطَّ مبِعِ، ‏«‏اٛ وَطِي کٛو طُمٜ بٛطُّمْ، حَا مَا اٜ مٛ وَطَ ڤَحُٻٜ نَنَ، اٜ مٛ وَطَ ٻٜ مبَاوَتَا مٜتُکِ مٜتَ؞»‏

يٜىٰسُ ݧَمْنِي يِمْٻٜ 4,000

¹ندٜرْ طٜنْ طٛنْ بَلْطٜ يِمْٻٜ طُطْٻٜ فُطِّتِ کَوْرِ تٛ يٜىٰسُ؞ ندٜ ٻٜ نغَلَا کٛ ٻٜ ݧَامَتَ، سٜيْ يٜىٰسُ نٛدِّ تٛکُّٻٜمٛ، وِعِٻٜ، ²‏«‏اٜ مِ نَنَ جُرُمْطُمْ يِمْٻٜ ٻٜعٜ نغَمْ حَنْدٜ بَلْطٜ مَٻّٜ تَتِ اٜ ٻٜ نغٛنْدِ اٜ اَمْ، اَمَّا ٻٜ نغَلَا کٛ ٻٜ ݧَامَتَ؞ ³تٛ مِ وِعِيٻٜ ٻٜ کٛوتِدَ اٜ وٜىٰلٛ، ٻٜ ڤٜکّٛرَيْ دٛوْ طَتَلْ، نغَمْ وٛٻّٜ نغَرٛيِي دَغَ ٻَدَاکِ؞»‏

⁴تٛکُّٻٜمٛ نٛوتِي مبِعِ، ‏«‏تٛيٜ غٛطّٛ حٜٻَتَ بُرٛودِ ندٜرْ لَدّٜ ندٜعٜ کٜپَيْطُمْ يِمْٻٜ ٻٜعٜ؟»‏ ⁵يٜىٰسُ پَمِٻٜ وِعِ، ‏«‏بُرٛودِ نٛيٜ نغٛودُطٛنْ؟»‏ ٻٜ مبِعِمٛ، ‏«‏جٛوٜىٰطِطِ؞»‏ ⁶سٜيْ اٛ وِعِ يِمْٻٜ حَوْرُتُٻٜ ٻٜنْ فُو ٻٜ نجٛوطٛو اٜ لٜيْدِ؞ اٛ حٛشِّ بُرٛودِ جٛوٜىٰطِطِ طُمْ، اٛ يٜتِّ اَللَّه، اٛ سٜنْدِطُمْ، اٛ حٛکِّ تٛکُّٻٜمٛ نغٜىٰدَنَ يِمْٻٜ، کَمْٻٜ بٛو ٻٜ نغٜىٰدَنِ يِمْٻٜ حَوْرُتُٻٜ ٻٜنْ؞ ⁷طٛنْمَا اٜ ٻٜ نغٛودِ غٛطِّ لِپِّ ڤَمَرِ سٜطَّنَاجِ، سٜيْ اٛ يٜتِّ اَللَّه نغَمْ مَاجِ، اٛ وِعِ تٛکُّٻٜمٛ کَنْجِ مَا ٻٜ نغٜىٰدَنَ يِمْٻٜ؞ ⁸يِمْٻٜ ٻٜنْ ݧَامِ کَارِ؞ غَطَ مَاجُمْ تٛکُّٻٜمٛ مٛٻْتِ کٛ حٛرِي، طُمْ حٜىٰوِ کٛنْدٛوجٜ جٛوٜىٰطِطِ؞ ⁹يِمْٻٜ ٻٜنْ ٻَدَکٜ 4,000؞ سٜيْ اٛ جَٻِّتِيٻٜ ¹⁰اٛ نَتِّ کٛمِوَلْ، کَنْکٛ اٜ تٛکُّٻٜمٛ، ٻٜ ندِلِّ لٜيْدِ دَلْمَنُوتَ؞

يِطُکِ حٛلّٜىٰکِ کَيْطِنِيطُمْ

¹¹فَارِسَنْکٛعٜنْ نغَرِ ڤُطِّ يٜدّٛوتِرْکِ اٜ يٜىٰسُ؞ اٜ ٻٜ نغِطِ فٛوندُکِمٛ، سٜيْ ٻٜ مبِعِمٛ اٛ وَطَنَٻٜ غٛطُّمْ کَيْطِنِيطُمْ پِوٛيْطُمْ تٛ اَللَّه؞ ¹²سٜيْ يٜىٰسُ فٛفْتِ فٛوفَانغٛ جُوتُنغٛ وِعِ، ‏«‏نغَمْ طُمٜ اٛنٛنْ يِمْٻٜ جَامَنُ طُعُمْ طَٻِّتٛتٛنْ حٛلّٜىٰکِ غٛطُّمْ کَيْطِنِيطُمْ؟ اٜ مِ وِعَعٛنْ غٛونغَ، وَلَا کٛ طُمْ حٛلَّتَ يِمْٻٜ جَامَنُ طُعُمْ؞»‏

¹³دَغَ طٛنْ اٛ اَلِٻٜ، اٛ فُطِّتِ اٛ نَتِّ کٛمِوَلْ، اٛ حُولِ يَاکِ نغٛنْ تٛنْ فٛنْغٛ؞

پُوفِنِرْطُمْ فَارِسَنْکٛعٜنْ اٜ حِرُدُسْ

¹⁴تٛکُّٻٜ يٜىٰسُ نغٜجِّتِي نغَرْدٛيَ اٜ بُرٛودِ، سٜيْ بُرٛودِ غٛعٛ تَنْ طُمْ ٻٜ نغٛودِ ندٜرْ کٛمِوَلْ مَٻّٜ؞ ¹⁵يٜىٰسُ وَغِّنِٻٜ وِعِ، ‏«‏ڤَامٜىٰ، نغَطٜىٰ حَکِّيلٛ اٜ پُوفِنِرْطُمْ فَارِسَنْکٛعٜنْ اٜ طُمْ حِرُدُسْ؞»‏

¹⁶سٜيْ تٛکُّٻٜمٛ مٜدِّ حَکُّندٜ مَٻّٜ، ٻٜ مبِعِ، ‏«‏اٛ وِعُ نٛنْ نغَمْ اٜنْ نغَلَا بُرٛودِ؞»‏

¹⁷ندٜ يٜىٰسُ فَامِ کٛ ٻٜ مبِعَتَ، سٜيْ اٛ پَمِٻٜ، اٛ وِعِ، ‏«‏نغَمْ طُمٜ مٜدّٛتٛنْ دٛوْ اٛنْ نغَلَا بُرٛودِ؟ حَا جٛونِ اٛنْ کٜٻْتَايِ اٛنْ ڤَامَايِ؟ کٛو ٻٜرْطٜ شَاتُطٜ نغٛودُطٛنْ؟ ¹⁸اٛنْ نغٛودِ غِتٜ، اَمَّا تَمْڤُطٛنْ يِيکِ؟ اٛنْ نغٛودِ نٛڤِّ، اَمَّا تَمْڤُطٛنْ نَنُکِ؟ اٛنْ شِفْتٛرَايِ؟ ¹⁹شَرٜلْ نغٜلْ ݧَمْنُمِ يِمْٻٜ 5,000 بُرٛودِ جٛوِ، کٛنْدٛوجٜ نٛيٜ ٻٛڤْتُطٛنْ اٜ کٜىٰوِ حٛرَانٛ؟»‏

ٻٜ مبِعِ، ‏«‏سَڤّٛ اٜ طِطِ؞»‏

²⁰‏«‏ندٜنْ شَرٜلْ نغٜلْ ݧَمْنُمِ يِمْٻٜ 4,000 بُرٛودِ جٛوٜىٰطِطِ، کٛنْدٛوجٜ نٛيٜ ٻٛڤْتُطٛنْ اٜ کٜىٰوِ حٛرَانٛ؟»‏

ٻٜ مبِعِمٛ، ‏«‏جٛوٜىٰطِطِ؞»‏

²¹سٜيْ يٜىٰسُ وِعِٻٜ، ‏«‏حَا جٛونِ اٛنْ ڤَامَايِ؟»‏

يٜىٰسُ وُمْتِنِي بُمْطٛ اٜ غَرِيرِ بٜتَسَيْدَ

²²يٜىٰسُ اٜ تٛکُّٻٜمٛ نجٛتِّي غَرِيرِ بٜتَسَيْدَ، سٜيْ وٛٻّٜ يِمْٻٜ نغَدِّ بُمْطٛ، ٻٜ تٛرِي يٜىٰسُ مٜىٰمَمٛ نغَمْ يَمْطِتِنَمٛ؞ ²³يٜىٰسُ جٛغِي جُنْغٛ بُمْطٛ اٛنْ، يَارِمٛ تٛنْ غَطَ غَرِيٜلْ، تُتَّنِمٛ جٛودٜ تٛ غِتٜ يٛوِ جُوطٜ مُوطُمْ دٛوْ مَاکٛ، سٜيْ پَمِمٛ، وِعِ، ‏«‏اَ يِعِي غٛطُّمْ؟»‏

²⁴سٜيْ بُمْطٛ اٛنْ پٜفْتِ حٛورٜ، رَارِ، وِعِ، ‏«‏اٜ مِ يِعَ يِمْٻٜ، اَمَّا اٜ ٻٜ نَنْدِ اٜ لٜطّٜ اٜ ٻٜ نغِيلٛو؞»‏

²⁵سٜيْ يٜىٰسُ فُطِّتِ مٜىٰمِ غِتٜ طٜنْ؞ بُمْطٛ اٛنْ مَٻِّتِ غِتٜ بٛطُّمْ، غِتٜ مَاکٛ نجَمْطِتِ، اٛ يِعِ کٛو طُمٜ بٛطُّمْ؞ ²⁶سٜيْ يٜىٰسُ وِعِمٛ اٛ حٛوتَ، وِعِمٛ، ‏«‏تَاع نَتُّ ندٜرْ غَرِيٜلْ نغٜلْ؞»‏

بِيتُرُسْ وِعِي يٜىٰسُ وٛنِ اَلْمَسِيحُ

²⁷يٜىٰسُ اٜ تٛکُّٻٜمٛ ٻٜ ندِلِّ يَاکِ نغَرِحٛيْ نغٛنْکٛيْ حَادٜ غَرِيرِ کَيْسَارِيَ فِلِبِ؞ اٜ ٻٜ نجَحَ دٛوْ طَتَلْ سٜيْ اٛ پَمِٻٜ، اٛ وِعِ، ‏«‏مٛيٜ يِمْٻٜ مبِعَتَيَمْ؟»‏

²⁸ٻٜ نٛوتِي ٻٜ مبِعِ، ‏«‏وٛٻّٜ اٜ مبِعَ اَ يَحَيَ غَطٛووٛ بَڤْتِسْمَ؞ وٛٻّٜ بٛو اٜ مبِعَ اَ اَنَّبِ اِلِيَ؞ ندٜنْ وٛٻّٜ اٜ مبِعَ اَ غٛعٛتٛ ندٜرْ اَنَّبٛعٜنْ ندٜنّٛ؞»‏

²⁹سٜيْ اٛ پَمِٻٜ، اٛ وِعِ، ‏«‏اَمَّا اٛنٛنْ، مٛيٜ مبِعٛتٛنْيَمْ؟»‏

سٜيْ بِيتُرُسْ نٛوتِي وِعِ، ‏«‏اَنْ وٛنِ اَلْمَسِيحُ؞»‏

³⁰ندٜنْ يٜىٰسُ وَغِّنِٻٜ نَاع سٜطَّ وِعِٻٜ تٛع ٻٜ مبِعَکَ کٛو مٛيٜ کَنْکٛ اٛ مٛيٜ؞

يٜىٰسُ وِعِي نٛ مَيْرَتَ

³¹سٜيْ يٜىٰسُ فُطِّ اٜکِّتِنْکِٻٜ اٜ وِعَ دٛولٜ ٻِي نٜطّٛ تٛرّٛو نَاع سٜطَّ؞ مَوْٻٜ يِمْٻٜ، اٜ مَوْٻٜ اَرْدِيٻٜ دِينَ، اٜ مٛودِٻّٜ اَتَّوْرَ نغَݧَمٛ، ندٜنْ اٛ وَرٜىٰ؞ غَطَ بَلْطٜ تَتِ بٛو اٛ اُمّٛتٛ دَغَ مَيْدٜ؞ ³²يٜىٰسُ مٜتِي حَالَ کَعَ اٜ نجَيْرِ؞ سٜيْ بِيتُرُسْ نٛدِّمٛ وُتُّدُ غٛعٛ فُطِّ حَٻَنْکِمٛ؞ ³³اَمَّا يٜىٰسُ وَيْلِتِي رَارِ تٛکُّٻٜمٛ کٛرِيٻٜ، حَٻَنِ بِيتُرُسْ، وِعِ، ‏«‏سٜنْدِرْ اٜ اَمْ، اَنْ شٜيْطَنْ!‏ نَاع تٛ اَللَّه ݧُمٛ مَاطَ پِوٛيِ، اِرِ ݧُمٛ يِمْٻٜ ݧُمَتَا؞»‏

³⁴سٜيْ اٛ نٛدِّ يِمْٻٜ طُطْٻٜ حَوْرُتُٻٜ حَوْتِ اٜ تٛکُّٻٜمٛ، اٛ وِعِٻٜ، ‏«‏فُو غِطّٛ وَرْتَ تٛکُّطٛيَمْ، تٛع وَطَ کٛ حٛورٜ مُوطُمْ يِطِ وَطُکِ تَنْ، اَمَّا دٛولٜ حٛشَّ غَافَانغَلْ مُوطُمْ تٛکَّيَمْ؞ ³⁵نغَمْ فُو غِطّٛ حِسْنُکِ يٛنْکِ مُوطُمْ اٛ دُلَّيْکِ؞ اَمَّا فُو دُلَّيْطٛ يٛنْکِ مُوطُمْ نغَمْ اَمْ اٜ نغَمْ حَبَرُ بٜلْطُمْ اٛ حِسْنَيْکِ؞ ³⁶کٛ طُمْ نَفَنْتَ نٜطّٛ، تٛ اٛ حٜٻِي دُونِيَارُ فُو، اَمَّا اٛ دُلِّي يٛنْکِ مَاکٛ؟ ³⁷کٛو بٛو کٛ نٜطّٛ وَاوَتَ حٛکُّکِ نغَمْ جَٻْتٛيَ يٛنْکِ مُوطُمْ؟ ³⁸کٛو مٛيٜ غَݧُطٛيَمْ اٜ بٛلِيطٜ اَمْ ندٜرْ طُعُمْ جَامَنُ طُمْ حَکّٜ، طُمْ وَلَا غٛونغَ، مِنْ ٻِي نٜطّٛ مِ وَݧَيْمٛ تٛ مِ وَرْتِدٛيِي اٜ مَلَاعِکَعٜنْ شٜنِيٻٜ ندٜرْ تٜدُّنغَلْ ݧَاکٛ اَمْ مٛ دٛوْ؞»‏

¹اٛ وِعِٻٜ، ‏«‏اٜ مِ وِعَعٛنْ غٛونغَ، اٜ وٛودِ وٛٻّٜ دَرِيٻٜ طٛعٛ ٻٜ مَايَتَا نَا ٻٜ نغِعِي لَامُ اَللَّه وَرْدِ اٜ بَوْطٜ؞»‏

يٜىٰسُ وَنْغِي ندٜرْ مَنْغُ مُوطُمْ

²غَطَ بَلْطٜ جٛوٜىٰغٛعٛ، سٜيْ يٜىٰسُ حٛشِّ بِيتُرُسْ، اٜ يَاکُبُ، اٜ يَحَيَ، اٛ يَارِٻٜ دٛوْ وٛنْدٜ حٛشّٜىٰرٜ تٛوْندٜ کَمْٻٜ تَنْ؞ سٜيْ نَنْدِ مَاکٛ وَيْلِتِي يٜىٰسٛ مَٻّٜ؞ ³کٛلْتٜ مَاکٛ نغَرْتِ دَنٜىٰجٜ تَرْ؞ وَلَا غٛطّٛ بَاوَيْطٛ لَاٻِنِرَ کٛلْتٜ نٛنْ ندٜرْ دُونِيَارُ فُو؞ ⁴سٜيْ اَنَّبِ اِلِيَ اٜ اَنَّبِ مُوسَ مبَنْغَنِٻٜ اٜ ٻٜ مٜدَّ اٜ يٜىٰسُ؞ ⁵سٜيْ بِيتُرُسْ وِعِ يٜىٰسُ، ‏«‏مٛودِبّٛ، وٛنْکِ اَمِنْ طٛعٛ اٜ وٛوطِ؞ اَلْ مِنْ ݧِٻَ شُوطِ تَتِ طٛعٛ، وٛعٛيْرُ ندُ مَاطَ، وٛعٛيْرُ ندُ مُوسَ، وٛعٛيْرُ ندُ اِلِيَ؞»‏ ⁶بِيتُرُسْ نٛ دُلُّ کٛ وِعَتَ نغَمْ کَنْکٛ اٜ تٛکُّٻٜ يٜىٰسُ کٛرِيٻٜ ٻٜ کُلْتٛرِي نَاع سٜطَّ؞

⁷سٜيْ ندُولَ وَنْغِ سُدِّٻٜ، سٜيْ وٛنْدٜ حٛنٛنْدٜ پِوٛيِ ندٜرْ ندُولَ نغَنْ، وِعِ، ‏«‏اٛعٛ وٛنِ ٻِطّٛ اَمْ مٛ نغِطُمِ؞ نَنٜىٰ کٛ اٛ وِعَتَعٛنْ!‏»‏ ⁸طٛنْ اٜ طٛنْ ٻٜ ندَارِ ٻٜ نغِعَايِ غٛطّٛ اٜ وٛنْدِ اٜ مَٻّٜ سٜيْ يٜىٰسُ تَنْ؞

⁹اٜ ٻٜ نجِڤّٛيٛو دَغَ دٛوْ حٛشّٜىٰرٜ ندٜنْ، سٜيْ يٜىٰسُ وَغِّنِٻٜ وِعِ تٛع ٻٜ مبِعَ کٛو مٛيٜ کٛ ٻٜ نغِعِ نَا غَطَ ٻِي نٜطّٛ اُمَّکٜ دَغَ مَيْدٜ؞

¹⁰نغَمْ نٛنْ ٻٜ اَلِ حَالَ کَنْ حَکُّندٜ مَٻّٜ، اٜ ٻٜ مٜدَّ دٛوْ مَعَنَ ‏«‏اُمَّاکِ دَغَ مَيْدٜ؞»‏ ¹¹سٜيْ ٻٜ پَمِمٛ، ٻٜ مبِعِ، ‏«‏نغَمْ طُمٜ مٛودِٻّٜ اَتَّوْرَ اٜ مبِعَ دٛولٜ اَنَّبِ اِلِيَ اَرْتَ اَلْمَسِيحُ وَرْکِ؟»‏

¹²يٜىٰسُ نٛوتِي، وِعِ، ‏«‏غٛونغَ، اَنَّبِ اِلِيَ اَرْتَيْ وَرْکِ نغَمْ اٛ سِرْيٛو کٛو طُمٜ؞ نغَمْ طُمٜ طُمْ وِنْدِ وِيکِ دٛولٜ ٻِي نٜطّٛ تٛرّٛو نَاع سٜطَّ ندٜنْ اٛ وَݧٜىٰ؟ ¹³اَمَّا اٜ مِ وِعَعٛنْ اِلِيَ يَادَکٜ وَرِي، يِمْٻٜ بٛو نغَطَنِيمٛ فُو کٛ ٻٜ نغِطِ، نٛنْ نٛ طُمْ وِنْدِرَا دٛوْ مَاکٛ؞»‏

يٜىٰسُ يَمْطِتِنِي سُکَ مٛ غِنّٛلْ

¹⁴ندٜ يٜىٰسُ اٜ تٛکُّٻٜمٛ نجٛتِّي تٛ تٛکُّٻٜمٛ کٛرِيٻٜ، سٜيْ ٻٜ نغِعِ يِمْٻٜ طُطْٻٜ اٜ ڤِلِيٻٜ؞ وٛٻّٜ مٛودِٻّٜ اَتَّوْرَ اٜ نغٜدّٛوتِرَ اٜ مَٻّٜ؞ ¹⁵ندٜ فُو يِمْٻٜ ٻٜنْ نغِعِ يٜىٰسُ، ٻٜ کَيْطِنِ نَاع سٜطَّ، ٻٜ ندٛغِّ ٻٜ نجَحِ تٛ مَاکٛ نغَمْ ٻٜ کٛوْنَمٛ؞ ¹⁶سٜيْ يٜىٰسُ پَمِٻٜ وِعِ، ‏«‏دٛوْ طُمٜ نغٜدّٛوتِرْتٛنْ اٜ مَٻّٜ؟»‏

¹⁷سٜيْ غٛعٛتٛ ندٜرْ يِمْٻٜ ٻٜنْ نٛوتِي وِعِ، ‏«‏مٛودِبّٛ، مِ وَدَّنِيمَ ٻِطّٛ اَمْ غٛودُطٛ غِنّٛلْ؞ غِنّٛلْ نغٛلْ حَطِيمٛ اٛ مٜتَ؞ ¹⁸فُو شَرٜلْ نغٜلْ غِنّٛلْ نغٛلْ نَنْغِمٛ، سٜيْ نغٛلْ دٛعَّمٛ تٛ لٜيْدِ، نغُوفٛ نغَطَ کَ وُرْتَاکِ اٜ حٛنْدُکٛ مَاکٛ، اٜ مٛ ݧٜرْپِندِرَ ݧِيپٜ مَاکٛ، ٻَنْدُ مَاکٛ وَرْتَ بٛ لٜکِّ؞ مِ تٛرَکٜ تٛکُّٻٜمَ مبُرْتِنَنغٛلْ، اَمَّا ٻٜ مبَاوَايِ؞»‏

¹⁹يٜىٰسُ نٛوتِي وِعِ، ‏«‏اٛنٛنْ يِمْٻٜ جَامَنُ طُعُمْ طُمْ حٛولَاکِيَمْ، حَا ندٜيٜ نجٛوطٛدٛتٛومِ اٜ مٛوطٛنْ اٜ مِ مُݧِدَ اٜ مٛوطٛنْ؟ نغَدَّنٜىٰيَمْ سُکَ اٛنْ؞»‏ ²⁰سٜيْ ٻٜ نغَدِّمٛ؞ ندٜ غِنّٛلْ نغٛلْ يِعِ يٜىٰسُ، طٛنْ اٜ طٛنْ نغٛلْ وَطِ ٻَنْدُ سُکَ اٛنْ وَطِ کَ دِوْنُکِ، اٛ يَنِ تٛ لٜيْدِ، اٜ مٛ تَلِّتٛو، حٛنْدُکٛ مَاکٛ اٜ وُرْتِنَ نغُوفٛ؞ ²¹سٜيْ يٜىٰسُ پَمِ ݧَاکٛ سُکَ اٛنْ، وِعِ، ‏«‏دَغَ ندٜيٜ طُعُمْ فِي حٜٻِ سُکَ اٛنْ؟»‏

ݧَاکٛ اٛنْ وِعِ، ‏«‏دَغَ اٛ ڤَمَرٛ؞ ²²ندٜ طُطُّمْ اٜ نغٛلْ فَطَّمٛ ندٜرْ حِيتٜ کٛو ندٜرْ ندِيَمْ نغَمْ نغٛلْ وَرَمٛ؞ اَمَّا تَا وَاوَيْ وَطُکِ غٛطُّمْ، يُرْمِنَنْمِنْ مبَلَّامِنْ؞»‏

²³يٜىٰسُ وِعِمٛ، ‏«‏نغَمْ طُمٜ مبِعَتَايَمْ، ‏‹‏تَا وَاوَيْ؟›‏ کٛو طُمٜ طُمْ غَطٛتٛوطُمْ تٛ نٜطّٛ حٛولَکٜيَمْ؞»‏

²⁴طٛنْ اٜ طٛنْ سٜيْ ݧَاکٛ سُکَ اٛنْ پٜفْتِ حٛنٛنْدٜ وِعِ، ‏«‏مِ حٛولَکٜمَ؞ وَلَّمْ مِ جَالٛو شِيَ حٛولَارٜ اَمْ!‏»‏

²⁵ندٜ يٜىٰسُ يِعِ يِمْٻٜ اٜ نغَرٛيَ اٜ دٛغُّدُ نغَمْ نغِعَ کٛ وَطَتَ، سٜيْ اٛ حَٻَنِ غِنّٛلْ نغٛلْ، اٛ وِعِنغٛلْ، ‏«‏اَنْ، غِنّٛلْ کَطُنغٛلْ سُکَ اٛعٛ مٜتُکِ اٜ نَنُکِ، اٜ مِ وِعِمَا، وُرْتَ دَغَ ندٜرْ مَاکٛ!‏ تَاع فُطُّتُ نَتُّکِمٛ!‏»‏

²⁶سٜيْ غِنّٛلْ نغٛلْ وُلِّ، نغٛلْ وَطِ سُکَ اٛنْ دِوْنِ نَاع سٜطَّ، ندٜنْ نغٛلْ وُرْتِي؞ سُکَ اٛنْ وَرْتِ بٛ مَيْطٛ، حَا مَا يِمْٻٜ طُطْٻٜ مبِعِ، ‏«‏اٛ مَايِي؞»‏ ²⁷اَمَّا يٜىٰسُ جٛغِي جُنْغٛ مَاکٛ اُمِّنِمٛ، اٛ دَرِي؞

²⁸ندٜ يٜىٰسُ نَتِّ ندٜرْ وُرٛ، تٛکُّٻٜمٛ نغَرِ تٛ مَاکٛ کَمْٻٜ تَنْ، ٻٜ پَمِمٛ ٻٜ مبِعِ، ‏«‏نغَمْ طُمٜ مِنٛنْ مِنْ مبَاوَايِ وُرْتِنْکِ غِنّٛلْ نغٛلْ؟»‏

²⁹يٜىٰسُ نٛوتِي، وِعِ، ‏«‏اِرِ نغٛعٛلْ غِنّٛلْ نغٛلْ وُرْتَتَاکٛ سٜيْ اٜ دٛعَارٜ؞»‏

يٜىٰسُ فُطِّتِي مٜتِي دٛوْ مَيْدٜ مُوطُمْ

³⁰سٜيْ يٜىٰسُ اٜ تٛکُّٻٜمٛ اَلِ طٛنْ ٻٜ ندِلِّ ٻٜ پِوِ ندٜرْ لٜيْدِ غَلِيلِ؞ يٜىٰسُ يِطَا کٛو مٛيٜ اَنْدَ تٛ ٻٜ نغٛنِ، ³¹نغَمْ اٜ مٛ اٜکِّتِنَ تٛکُّٻٜمٛ، اٜ مٛ وِعَٻٜ، ‏«‏طُمْ حٛکِّتِرَيْ ٻِي نٜطّٛ ندٜرْ جُوطٜ يِمْٻٜ ٻٜ مبَرَمٛ؞ ندٜنْ تٛ اٛ وَرَامَ، غَطَ بَلْطٜ تَتِ اٛ اُمّٛتٛ؞»‏

³²اَمَّا ٻٜ ڤَامَايِ کٛ اٛ وِعِٻٜ، ندٜنْ اٜ ٻٜ کُلَ پَمُکِمٛ؞

مٛيٜ ٻُرِ مَنْغُ؟

³³سٜيْ ٻٜ نجٛتِّي کَفَرْنَحُمْ؞ غَطَ يٜىٰسُ نَتِّي وُرٛ، اٛ پَمِ تٛکُّٻٜمٛ، اٛ وِعِ، ‏«‏دٛوْ طُمٜ مٜدّٛتٛنْ دٛوْ طَتَلْ؟»‏

³⁴اَمَّا ٻٜ ندٜعِّتِ نغَمْ دٛوْ طَتَلْ ٻٜ نغٜدّٛوتِرِ دٛوْ مٛيٜ وٛنِ ٻُرْطٛ مَنْغُ ندٜرْ مَٻّٜ؞ ³⁵سٜيْ اٛ جٛوطِي، اٛ نٛدِّ تٛکُّٻٜمٛ سَڤّٛ اٜ طِطٛ ٻٜنْ، اٛ وِعِٻٜ، ‏«‏فُو غِطّٛ وَرْتَ مَوْطٛ، دٛولٜ اٛ وَرْتَ ڤَمَرٛ، ندٜنْ اٛ وَرْتَ مَشُّطٛ کٛو مٛيٜ؞»‏ ³⁶سٜيْ اٛ حٛشِّ سُکَ ڤَمَرٛ، اٛ دَرْنِنغٜلْ شَکَ مَٻّٜ، اٛ وُوندِينغٜلْ، اٛ وِعِٻٜ، ³⁷‏«‏فُو جَٻُطٛ سُکَيٜلْ ڤَمَرٜلْ بٛ نغٜعٜلْ ندٜرْ اِنْدٜ اَمْ جَٻِييَمْ؞ فُو جَٻُطٛيَمْ بٛو نَاع مِنْ تَنْ جَٻِ، اَمَّا جَٻِي لِلٛيْطٛيَمْ مَا؞»‏

مٛ وَݧَايِعٜنْ فُو اٜ وٛنْدِ اٜ مٜىٰطٜنْ

³⁸سٜيْ يَحَيَ وِعِمٛ، ‏«‏مٛودِبّٛ، مِنْ نغِعِ غٛطّٛ اٜ وُرْتِنَ غِنِّ ندٜرْ اِنْدٜ مَاطَ مِنْ کَطِمٛ، نغَمْ کَنْکٛ نَاع اٛ تٛکُّطٛعٜنْ؞»‏

³⁹اَمَّا يٜىٰسُ وِعِ، ‏«‏تٛع اٛنْ کَطُمٛ، نغَمْ وَلَا غَطٛووٛ غٛطُّمْ کَيْطِنِيطُمْ ندٜرْ اِنْدٜ اَمْ ندٜنْ طٛنْ اٜ طٛنْ وِعَ حَالَ کَلُّکَ دٛوْ اَمْ؞ ⁴⁰نغَمْ فُو مٛ وَݧَايِعٜنْ اٜ وٛنْدِ اٜ مٜىٰطٜنْ؞ ⁴¹اٜ مِ وِعَعٛنْ غٛونغَ، کٛو مٛيٜ حٛکِّعٛنْ ندِيَمْ ندٜرْ جَرْدُغٜلْ نجَرٛنْ نغَمْ اٛنٛنْ طُمْ ٻٜ اَلْمَسِيحُ، غٛونغَ اٛ دُلَّتَا حٜٻُکِ مبَرْجَارِ؞

کٛ وَدَّتَ حَکّٜ

⁴²‏«‏تٛ غٛطّٛ وَطِي غٛعٛتٛ ندٜرْ سُکَحٛيْ ڤَمَرٛيْ کٛعٛيْ کٛولِيکٛيْيَمْ وَطِي حَکّٜ، طُمْ ٻُرَنِيمٛ اٛ حَٻَّنٜىٰ کَاپَ نَمٛلْ مَنْغَ اٜ دَاندٜ طُمْ فَطَّمٛ ندٜرْ مبٜىٰلَ؞ ⁴³تٛ جُنْغٛ مَاطَ اٜ وَطُمَا نغَطَا حَکّٜ، اِتُّنغٛ؞ طُمْ ٻُرَنِيمَ نَتَّا وُرٛ اَللَّه جُنْغٛ وٛعٛتٛ دٛوْ طُمْ حُبٛمَا ندٜرْ وُرٛ حِيتٜ نغٜ ݧِفَتَا اٜ جُوطٜ طِطِ؞ ^44‏-45نٛنْ مَا تٛ کٛيْنغَلْ مَاطَ اٜ وَطُمَا نغَطَا حَکّٜ، اِتُّنغَلْ؞ طُمْ ٻُرَنِيمَ نَتَّا وُرٛ اَللَّه اٜ کٛيْنغَلْ غٛعٛتَلْ دٛوْ طُمْ حُبٛمَا ندٜرْ وُرٛ حِيتٜ اٜ کٛيْطٜ طِطِ؞ ^46‏-47تٛ بٛو حِتٜرٜ مَاطَ اٜ وَطُمَا نغَطَا حَکّٜ، اِتُّندٜ؞ طُمْ ٻُرَنِيمَ نَتَّا وُرٛ اَللَّه اٜ حِتٜرٜ غٛعٛ دٛوْ طُمْ حُبٛمَا ندٜرْ وُرٛ حِيتٜ اٜ غِتٜ طِطِ؞ ⁴⁸ندٜرْ حِيتٜ نغٜنْ ‏‹‏غِلْپِ ݧَامَيْطِٻٜ طِ مبَاتَتَا، حِيتٜ نغٜنْ بٛو نغٜ ݧِفَتَا؞›‏

⁴⁹‏«‏نٛنْ نٛ وٛنْدُ ݧَمْندُ دٛولٜ وَطَنٜىٰ لَمْطَمْ نغَمْ ندُ وٜلَ، نٛنْ مَا فُو يِمْٻٜ دٛولٜ نَتَّ حِيتٜ، وَاتٛ شَطٜىٰلٜ، نغَمْ نغِکُّ مَٻّٜ وَرْتَ بٛطُّمْ؞

⁵⁰‏«‏لَمْطَمْ طُمْ فِي بٛطُّمْ، اَمَّا تٛ بٜلْطُمْ مَاجَمْ اِتَّکٜ، کٛ وَرْتِرْتَ بٜلْطُمْ مَاجَمْ؟ نغَرْتٜىٰ بٛ لَمْطَمْ، وَاتٛ مبٜلْنِنْدِرٜىٰ ٻٜرْطٜ مٛوطٛنْ، ندٜنْ نجٛوطٜىٰ جَمْ حَکُّندٜ مٛوطٛنْ؞»‏

وَغِّنٛلْ يٜىٰسُ دٛوْ وَرْکِ تٜىٰغَلْ

¹سٜيْ يٜىٰسُ اُمِّي اَلِ طٛنْ يَحِ لٜيْدِ يَحُودِيَ اٜ فٛنْغٛ شَانغٛلْ اُرْدُنْ؞ يِمْٻٜ طُطْٻٜ فُطِّتِ کَوْرِتِ تٛ مَاکٛ، اٛ اٜکِّتِنِٻٜ نٛ اٛ وٛووِ وَطُکِ؞

²سٜيْ وٛٻّٜ فَارِسَنْکٛعٜنْ نغَرِ تٛ مَاکٛ نغَمْ ٻٜ ڤٛوندَمٛ، ٻٜ پَمِمٛ ٻٜ مبِعِ، ‏«‏اٜ يِيکِ مَاطَ اَتَّوْرَ اَلِي نٜطّٛ يٛوفَ دٜبّٛ مُوطُمْ؟»‏

³يٜىٰسُ نٛوتِي وِعِ، ‏«‏طُمٜ مُوسَ وِعِعٛنْ نغَطٛنْ؟»‏ ⁴ٻٜ مبِعِ، ‏«‏مُوسَ وِعِ نٜطّٛ وَاوَيْ وِنْدَنَ دٜبّٛ مُوطُمْ طٜرٜوٛلْ وَرْکِ تٜىٰغَلْ وِعَمٛ اٛ دِلَّ؞»‏ ⁵سٜيْ يٜىٰسُ وِعِٻٜ، ‏«‏نغَمْ ٻٜرْطٜ مٛوطٛنْ طٜ شَاتُطٜ وَطِ مُوسَ وِنْدَنِعٛنْ طُعُمْ دٛوکَ؞ ⁶اَمَّا دَغَ فُطّٛودٜ تَغُکِ ‏‹‏اَللَّه تَغِيٻٜ غٛرْکٛ اٜ دٜبّٛ؞›‏ ⁷‏‹‏نغَمْ نٛنْ نٜطّٛ اَلَيْ ݧَاکٛ مُوطُمْ اٜ مَدُوجٛ مُوطُمْ تَکَّنٛو دٜبّٛ مُوطُمْ، ⁸کَمْٻٜ طِطٛ ٻٜ نغَرْتَ غٛعٛ؞›‏ نغَمْ نٛنْ نَاع ٻٜ طِطٛ کَدِنْ، اَمَّا ٻٜ نغَرْتِي نٜطّٛ غٛعٛتٛ؞ ⁹نغَمْ مَاجُمْ کٛ اَللَّه حَوْتِ، تٛع نٜطّٛ سٜنْدَطُمْ؞»‏

¹⁰اٜ ٻٜ ندٜرْ وُرٛ کَدِنْ، تٛکُّٻٜمٛ پَمِمٛ دٛوْ حَالَ کَنْ؞ ¹¹سٜيْ اٛ وِعِٻٜ، ‏«‏کٛو مٛيٜ يٛوفِ دٜبّٛ مُوطُمْ تٜعِ غٛطّٛ، نجٜىٰنُ اٛ وَادَتَ اٜ مَاکٛ؞ ¹²طٛنْمَا تٛ دٜبّٛ سٜنْدِرِي اٜ غٛرْکٛ مُوطُمْ تٜىٰرِ اٜ غٛطّٛ، نجٜىٰنُ اٛ وَطَتَ؞»‏

يٜىٰسُ بَرْکِطِنِي سُکَحٛيْ ڤَمَرٛيْ

¹³يِمْٻٜ اٜ نغَدَّنَ يٜىٰسُ سُکَحٛيْ ڤَمَرٛيْ نغَمْ اٛ بَرْکِطِنَکٛيْ، اَمَّا تٛکُّٻٜمٛ کَٻَنِٻٜ؞ ¹⁴ندٜ يٜىٰسُ يِعِ نٛنْ، ٻٜرْندٜ مُوطُمْ مٜتِّ، اٛ وِعِٻٜ، ‏«‏اَلٜىٰ سُکَحٛيْ ڤَمَرٛيْ نغَرَ تٛ اَمْ؞ تٛع اٛنْ کَطُکٛيْ، نغَمْ غٛودُٻٜ ٻٜرْطٜ اِرِ طٜ مَاکٛيْ نجٜيِ لَامُ اَللَّه؞ ¹⁵اٜ مِ وِعَعٛنْ غٛونغَ، فُو مٛ جَٻَايِ لَامُ اَللَّه بٛ سُکَيٜلْ ڤَمَرٜلْ، اٛ نَتَّتَا لَامُ طُمْ کٛو سٜطَّ!‏»‏ ¹⁶سٜيْ يٜىٰسُ وُوندِيکٛيْ غٛعٛ‑غٛعٛ، اٛ يٛوَنِکٛيْ جُوطٜ مَاکٛ نغَمْ بَرْکِطِنْکِ؞

نٜطّٛ غٛودُطٛ رِسْکُ

¹⁷يٜىٰسُ نَنْغِ لَاوٛلْ وٛنْ طٛنْ، سٜيْ غٛطّٛ نٜطّٛ دٛغِّ يَحِ دِشِّي يٜىٰسٛ مَاکٛ؞ نٜطّٛ اٛنْ پَمِمٛ، وِعِ، ‏«‏مٛودِبّٛ غٜىٰتٛ، کٛ حَانِ مِ وَطَ مِ حٜٻَ يٛنْکِ کِ رٜعَتَا؟»‏

¹⁸يٜىٰسُ وِعِمٛ، ‏«‏نغَمْ طُمٜ نٛدِّرْطَايَمْ غٜىٰتٛ؟ وَلَا غٜىٰتٛ سٜيْ اَللَّه تَنْ؞ ¹⁹اَ اَنْدِ کٛ اَتَّوْرَ وِعِ:‏ ‏‹‏تَاع وَطُ وَرْحٛورٜ؞ تَاع وَطُ نجٜىٰنُ؞ تَاع وُجُّ؞ تَاع حٛکُّ شٜيْدَ فٜوْرٜ؞ تَاع پٛيْرُ نٜطّٛ نجَٻَنَامٛ کٛ اٛ جٜيِ؞ حٛکُّ ݧَاکٛ مَاطَ اٜ مَدُوجٛ مَاطَ مَنْغُ؞›‏ »‏

²⁰سٜيْ اٛ وِعِ يٜىٰسُ، ‏«‏مٛودِبّٛ، اٜ مِ وَطَ فُو فِي طُعُمْ دَغَ اٜ مِ سُکَ؞»‏ ²¹يٜىٰسُ رَارِمٛ ندٜرْ يِدّٜ، وِعِمٛ، ‏«‏اَ دُلِّي وَطُکِ فِي غٛعٛ؞ يَحُ، شٛورَا کٛ نغٛودُطَا، کٛکَّا ٻٜ نغَلَنَا شٜىٰدٜ طٜنْ، ندٜنْ اَ حٜٻَيْ مبَرْجَارِ تٛنْ دٛوْ؞ ندٜنْ نغَرَا، تٛکَّايَمْ؞»‏ ²²ندٜ نٜطّٛ اٛنْ نَنِ نٛنْ، ٻٜرْندٜ مَاکٛ تَپِ، اٛ دِلِّ اٛ نَنَايِ بٜلْطُمْ، نغَمْ اٜ مٛ وٛودِ رِسْکُ طُطُّمْ؞

²³يٜىٰسُ رَارِ تٛکُّٻٜمٛ وِعِٻٜ، ‏«‏اٜ طُمْ سَطِ دِسْکُطٛ نَتَّ لَامُ اَللَّه!‏»‏

²⁴تٛکُّٻٜمٛ کَيْطِنِي اٜ کٛ اٛ وِعِ، اَمَّا اٛ فُطِّتِ اٛ وِعِٻٜ، ‏«‏ٻِٻّٜ اَمْ، نَتُّکِ لَامُ اَللَّه اٜ سَطِ نَاع سٜطَّ!‏ ²⁵طُمْ ٻُرَيْ حٛيْکِ نغٜىٰلٛوبَ تٛکَّ ندٜرْ يٛلْندٜ بَاتَلْ دٛوْ دِسْکُطٛ نَتَّ لَامُ اَللَّه؞»‏

²⁶تٛکُّٻٜمٛ کَيْطِنِ نَاع سٜطَّ، ٻٜ مبِعِمٛ، ‏«‏تٛو، تٛ طُمْ نٛنْ، مٛيٜ حِسَتَ؟»‏

²⁷يٜىٰسُ رَارِٻٜ، وِعِ، ‏«‏تٛ يِمْٻٜ طُمْ وَطَتَاکٛ، اَمَّا تٛ اَللَّه طُمْ وَطٛتٛ؞ نغَمْ تٛ مَاکٛ کٛو طُمٜ طُمْ غَطٛتٛوطُمْ؞»‏

²⁸سٜيْ بِيتُرُسْ وِعِمٛ، ‏«‏تٛو، رَطُّمْ، مِنٛنْ مِنْ اَلِي کٛو طُمٜ مِنْ تٛکِّيمَ؞»‏

²⁹يٜىٰسُ وِعِ، ‏«‏اٜ مِ وِعَعٛنْ غٛونغَ، فُو اَلُطٛ وُرٛ مُوطُمْ، کٛو سَکِرَاٻٜ مُوطُمْ وٛرْٻٜ کٛو رٜوْٻٜ، کٛو مَدُوجٛ مُوطُمْ، کٛو ݧَاکٛ مُوطُمْ، کٛو ٻِٻّٜ مُوطُمْ، کٛو غٜسٜ مُوطُمْ نغَمْ اَمْ اٜ حَبَرُ بٜلْطُمْ، ³⁰اٛ حٜٻَيْ کٛ ٻُرِ نٛنْ ندٜرْ طُعُمْ جَامَنُ؞ اٛ حٜٻَيْ غُرٜىٰجٜ، اٜ سَکِرَاٻٜ وٛرْٻٜ اٜ رٜوْٻٜ، اٜ دَݧٛوٻٜ، اٜ ٻِٻّٜ، اٜ غٜسٜ ندٜ 100؞ طٛنْمَا يِمْٻٜ تٛرَّيْمٛ، اَمَّا ݧَلْندٜ جَانغٛ اٛ حٜٻَيْ يٛنْکِ کِ رٜعَتَا؞ ³¹اَمَّا يِمْٻٜ طُطْٻٜ اَرْتُٻٜ ٻٜ نغَرْتَيْ شَکِتِيٻٜ، ندٜنْ شَکِتِيٻٜ نغَرْتَيْ اَرْتُٻٜ؞»‏

يٜىٰسُ فُطِّتِي وِعِ نٛ اٛ مَيْرَتَ

³²يٜىٰسُ اٜ تٛکُّٻٜمٛ سَڤّٛ اٜ طِطٛ اٜ وٛٻّٜ تٛکُّٻٜمٛ اٜ ٻٜ دٛوْ لَاوٛلْ يَاکِ اُرُشَلِيمَ، يٜىٰسُ اٜ اَرْدِيٻٜ؞ تٛکُّٻٜمٛ سَڤّٛ اٜ طِطٛ ٻٜنْ اٜ کَيْطِنِ، تٛکُّٻٜمٛ کٛرِيٻٜ بٛو اٜ کُلَ؞ يٜىٰسُ فُطِّتِ نٛدِّ تٛکُّٻٜمٛ سَڤّٛ اٜ طِطٛ ٻٜنْ کَمْٻٜ تَنْ، اٛ فُطِّ وِعُکِٻٜ کٛ حٜٻَتَمٛ، ³³اٛ وِعِ، ‏«‏رَطُّمْ، اٜنْ نجَحَيْ اُرُشَلِيمَ، ندٜنْ طُمْ وَطَيْ ٻِي نٜطّٛ ندٜرْ جُوطٜ مَوْٻٜ اَرْدِيٻٜ دِينَ اٜ مٛودِٻّٜ اَتَّوْرَ؞ ٻٜ تَپَنَيْمٛ کِيتَ مَيْدٜ، ندٜنْ ٻٜ نغَطَمٛ ندٜرْ جُوطٜ يِمْٻٜ نَاع يَحُودَنْکٛعٜنْ، ³⁴ٻٜ نجُکِّتَمٛ، ٻٜ تُتَّنَمٛ جٛودٜ، ٻٜ ڤِيَمٛ، ٻٜ مبَرَمٛ؞ ندٜنْ غَطَ بَلْطٜ تَتِ، اٛ اُمّٛتٛ دَغَ مَيْدٜ؞»‏

کٛ يَاکُبُ اٜ يَحَيَ تٛرِي يٜىٰسُ

³⁵سٜيْ يَاکُبُ اٜ يَحَيَ ٻِٻّٜ جَبَدِ ٻَدِّي يٜىٰسُ، مبِعِ، ‏«‏مٛودِبّٛ، اٜ مِنْ نغِطِ نغَطَنَامِنْ فُو کٛ مِنْ تٛرِمَا؞»‏

³⁶سٜيْ يٜىٰسُ وِعِٻٜ، ‏«‏کٛ نغِطّٛنْ مِ وَطَنَعٛنْ؟»‏

³⁷ٻٜ مبِعِ، ‏«‏تَا جٛوطَکٜ دٛوْ جٛوطٛرْغَلْ لَامُ مَاطَ ندٜرْ تٜدُّنغَلْ مَاطَ، غٛعٛتٛ اَمِنْ جٛوطٛو تٛ ݧَامٛ مَاطَ، غٛعٛتٛ تٛ نَنٛ مَاطَ؞»‏

³⁸اَمَّا يٜىٰسُ وِعِٻٜ، ‏«‏اٛنْ اَنْدَا کٛ تٛرٛتٛوطٛنْ؞ اٛنْ مبَاوَيْ نجَرٛنْ اِرِ جَرْدُغٜلْ تٛرَّ نغٜلْ نجَرَيْمِ يٜىٰسٛ طٛعٛ؟ کٛو اٛنْ مبَاوَيْ طُمْ وَطَنَعٛنْ اِرِ بَڤْتِسْمَ تٛرَّ طُمْ اُمْ وَطَنْتَيَمْ يٜىٰسٛ طٛعٛ؟»‏

³⁹ٻٜ مبِعِ، ‏«‏اٜىٰ، مِنْ مبَاوَيْ؞»‏

سٜيْ يٜىٰسُ وِعِٻٜ، ‏«‏اٛنْ نجَرَيْ اِرِ جَرْدُغٜلْ تٛرَّ نغٜلْ نجَرَيْمِ، ندٜنْ طُمْ وَطَنَعٛنْ بَڤْتِسْمَ اِرِ طُمْ اُمْ وَطَنْتَيَمْ؞ ⁴⁰اَمَّا جٛوطَاکِ اٜ جُنْغٛ اَمْ ݧَامٛ اٜ جُنْغٛ اَمْ نَنٛ نَاع مِنْ حٛکَّتَطُمْ؞ طٜعٜ بِغٜىٰجٜ طُمْ طٜ ٻٜنْ طٛنْ ٻٜ طُمْ سِرْيَنِيطٜ؞»‏

⁴¹ندٜ حٛرِيٻٜ تٛکُّٻٜ يٜىٰسُ سَڤّٛ نَنِ نٛنْ، ٻٜ ڤُطِّ مٛنَّنْکِ يَاکُبُ اٜ يَحَيَ؞ ⁴²سٜيْ يٜىٰسُ نٛدِّٻٜ، وِعِٻٜ، ‏«‏اٛنْ اَنْدِ ندٜرْ يِمْٻٜ نَاع يَحُودَنْکٛعٜنْ، يِمْٻٜ ٻٜ طُمْ اَنْدِرِ لَامُ اٜ کٛلَّ لَامُ سٜمْبٜ، ندٜنْ مَوْٻٜ مَٻّٜ اٜ کٛلَّ ٻُرَلْ؞ ⁴³اَمَّا اٛنٛنْ، تٛع اٛنْ نغَطُ نٛنْ حَکُّندٜ مٛوطٛنْ؞ فُو غِطّٛ وَرْتَ مَوْطٛ ندٜرْ مٛوطٛنْ، دٛولٜ وَرْتَ جَغَّنْتٛوطٛعٛنْ؞ ⁴⁴کَدِنْ فُو غِطّٛ وَرْتَ اَرْدِيطٛ، دٛولٜ اٛ وَرْتَ مَشُّطٛ کٛو مٛيٜ؞ ⁴⁵نغَمْ ٻِي نٜطّٛ وَرِي نَاع نغَمْ اٛ جَغَّنٜىٰ، اَمَّا نغَمْ اٛ جَغَّنٛو يِمْٻٜ، اٛ حٛکَّ يٛنْکِ مَاکٛ نغَمْ رِمْطِنْکِ طُطْٻٜ؞»‏

بُمْطٛ بِعٜتٜىٰطٛ بَرْتِمَاوُسْ وُمْتِنَامَ

⁴⁶سٜيْ ٻٜ نجٛتِّي غَرِيرِ جٜرِيکٛ؞ يٜىٰسُ اٜ تٛکُّٻٜمٛ حَوْتِ اٜ يِمْٻٜ طُطْٻٜ اٜ مبُرْتٛو غَرِيرِ جٜرِيکٛ، غٛطّٛ بُمْطٛ تٛرٛتٛوطٛ اٜ جٛوطِي حَادٜ طَتَلْ؞ اِنْدٜ مَاکٛ بَرْتِمَاوُسْ، وَاتٛ ٻِي تِمَاوُسْ؞ ⁴⁷ندٜ اٛ نَنِ يٜىٰسُ نَجَرَنْکٜىٰجٛ پَٻّٛتٛو، اٛ فُطِّ نٛدُّکِ اٜ سٜمْبٜ، اٜ مٛ وِعَ، ‏«‏يٜىٰسُ، ٻِطّٛ دَوْدَ، يُرْمِنَنَمْ!‏»‏

⁴⁸يِمْٻٜ طُطْٻٜ کَٻَنِمٛ مبِعِمٛ اٛ دٜعِّتَ، اَمَّا اٛ ٻٜيْدِ نٛدُّکِ اٜ سٜمْبٜ، اٜ مٛ وِعَ، ‏«‏ٻِطّٛ دَوْدَ، يُرْمِنَنَمْ!‏»‏

⁴⁹سٜيْ يٜىٰسُ دَرِي، وِعِ، ‏«‏نٛدَّنٜىٰيَمّٛ؞»‏

ٻٜ نٛدِّ بُمْطٛ اٛنْ، ٻٜ مبِعِمٛ، ‏«‏نَنُ بٜلْطُمْ!‏ اُمَّ!‏ اٜ مٛ نٛدُّمَا؞»‏

⁵⁰سٜيْ اٛ حُبِنِ شُدَّارِ مَاکٛ، اٛ اُمِّي جَوْطُمْ، اٛ يَحِ تٛ يٜىٰسُ؞

⁵¹سٜيْ يٜىٰسُ پَمِمٛ، وِعِ، ‏«‏طُمٜ نغِطَّا مِ وَطَنْمَا؟»‏

بُمْطٛ اٛنْ نٛوتِي وِعِ، ‏«‏مٛودِبّٛ، اٜ مِ يِطِ مبُمْتِنَايَمْ؞»‏

⁵²سٜيْ يٜىٰسُ وِعِمٛ، ‏«‏دِلُّ؞ حٛولَارٜ مَاطَ يَمْطِتِنِيمَ؞»‏

طٛنْ اٜ طٛنْ غِتٜ مَاکٛ مبُمْتِ، اٛ تٛکِّ يٜىٰسُ، ٻٜ ندِلِّدِ؞

يٜىٰسُ نَتِّي اُرُشَلِيمَ

¹ندٜ ٻٜ ٻَدِي اُرُشَلِيمَ، تٛ غَرِيجٜ بٜتَفَاجِ اٜ بٜتَنِ تٛ حٛشّٜىٰرٜ ندٜ لٜطّٜ جَيْتُنْ، سٜيْ يٜىٰسُ لِلِ تٛکُّٻٜمٛ طِطٛ، ²اٛ وِعِٻٜ، ‏«‏نَتّٜىٰ غَرِيٜلْ غٛنْغٜلْ يٜىٰسٛ مٛوطٛنْ؞ اٜ نَتُّکِ مٛوطٛنْ، اٛنْ تَوَيْ مبَبَّ مٛلَ اٜ نغَ حَٻِّي، طُمْ مٜىٰطَايِ وَطَّاکِنغَ؞ ڤِتّٛيٜىٰنغَ نغَدّٛنْغَ طٛعٛ؞ ³تٛ غٛطّٛ پَمِيعٛنْ، ‏‹‏کٛ وَطِ ڤِتّٛتٛنْغَ؟›‏ مبِعٜىٰمٛ، ‏‹‏مٛودِبّٛ اٜ يِطِ حُوتِرْکِنغَ، اٛ وَطَيْ طُمْ وَرْتِرَنغَ نَاع کٛ نٜىٰٻِ؞›‏ »‏

⁴سٜيْ ٻٜ نجَحِ ٻٜ تَوِ مبَبَّ مٛلَ نغَنْ اٜ حَٻِّي تٛ دَمُّغَلْ، حَادٜ طَتَلْ؞ اٜ ٻٜ ڤِتَّنغَ، ⁵سٜيْ وٛٻّٜ دَرِيٻٜ طٛنْ پَمِٻٜ مبِعِ، ‏«‏نغَمْ طُمٜ ڤِتّٛتٛنْغَ؟»‏

⁶کَمْٻٜ بٛو ٻٜ مبِعِٻٜ کٛ يٜىٰسُ وِعِ، سٜيْ يِمْٻٜ ٻٜنْ اَلِٻٜ ٻٜ ندِلِّدِ اٜ مَاغَ؞ ⁷ٻٜ نجَارَنِنغَ يٜىٰسُ، ٻٜ مبٜعِّتِ شُدَّارِ مَٻّٜ دٛوْ مَغَّ؞ يٜىٰسُ وَطِّينغَ؞ ⁸سٜيْ يِمْٻٜ طُطْٻٜ مبٜعِّتِ شُدَّارِ مَٻّٜ دٛوْ طَتَلْ، وٛٻّٜ بٛو مبٜعِّتِ حَاکٛ کٛ ٻٜ نغٜوٛيِ تٛ سَابٜىٰرٜ؞ ⁹يِمْٻٜ وٛنْٻٜ يٜىٰسٛ مَاکٛ اٜ وٛنْٻٜ غَطَ مَاکٛ، اٜ ٻٜ مبِعَ اٜ سٜمْبٜ، ‏«‏حٛسَانَ!‏ اٛ بَرْکِطِنَاطٛ اٛنْ طٛنْ غَرٛيْطٛ ندٜرْ اِنْدٜ جٛومِرَاوٛ!‏ ¹⁰لَامُ مَامَ مٜىٰطٜنْ دَوْدَ غَرَيْطُمْ طُمْ بَرْکِطِنَاطُمْ!‏ اٜنْ مَنْتُ اَللَّه مٛ دٛوْ!‏»‏

¹¹سٜيْ يٜىٰسُ نَتِّ اُرُشَلِيمَ، اٛ نَتِّ وُرٛ شٜنِينغٛ، اٛ رَارِ کٛو طُمٜ غَطٜتٜىٰطُمْ طٛنْ؞ نغَمْ نَانغٜ حِيرِي، سٜيْ اٛ وُرْتِي، اٛ دِلِّ بٜتَنِ کَنْکٛ اٜ تٛکُّٻٜمٛ سَڤّٛ اٜ طِطٛ؞

يٜىٰسُ لَانِي لٜکِّ اِبِّ

¹²ندٜ وٜىٰتِ، اٜ ٻٜ اَلَ بٜتَنِ، يٜىٰسُ نَنِ وٜىٰلٛ؞ ¹³اٛ حَيْنِي لٜکِّ اِبِّ غٛودُکِ حَاکٛ، اٛ يَحِ اٛ يِعَ کٛو اٛ حٜٻَيْ اِبّٜ تٛ مَاکِ؞ ندٜ اٛ يٛتِّي تٛ مَاکِ، اٛ تَوَايِ غٛطُّمْ سٜيْ حَاکٛ، نغَمْ نَاع طُمْ شَرٜلْ ٻِکّٛيْ مَاکِ؞ ¹⁴سٜيْ اٛ وِعِ لٜکِّ کِنْ، ‏«‏تٛع کٛو مٛيٜ ٻٜيْدَ ݧَامُکِ ٻِکّٛيْ دَغَ تٛ مَاطَ!‏»‏ تٛکُّٻٜمٛ بٛو نَنِي کٛ اٛ وِعِ؞

يٜىٰسُ لَاٻِنِي وُرٛ شٜنِينغٛ

¹⁵ندٜ ٻٜ نَتِّ اُرُشَلِيمَ، يٜىٰسُ نَتِّ وُرٛ شٜنِينغٛ، سٜيْ اٛ فُطِّ رِيوُکِ سٛورٛوٻٜ اٜ سٛودٛوٻٜ ندٜرْ مَغّٛ؞ اٛ تَلِّ تٜىٰبُرْجِ غَيْلِتٛوٻٜ شٜىٰدٜ رٛومَنْکٛعٜنْ يَاکِ شٜىٰدٜ وُرٛ شٜنِينغٛ اٜ جٛوطٛرْلٜ شٛورٛوٻٜ ڤٛولِ؞ ¹⁶اٛ حَطِ کٛو مٛيٜ پَٻّٛدٛو اٜ دٛنْغَلْ ندٜرْ نجَيْرِ وُرٛ شٜنِينغٛ؞ ¹⁷اٛ وِعِٻٜ، ‏«‏طُمْ وِنْدَامَ، اَللَّه وِعِي، ‏‹‏طُمْ نٛدِّرَيْ وُرٛ اَمْ وُرٛ دٛعَارٜ نغَمْ لٜپِّ فُو،›‏ اَمَّا اٛنٛنْ اٛنْ نغَرْتِرِينغٛ لُورٛ وُيْٻٜ؞»‏

¹⁸مَوْٻٜ اَرْدِيٻٜ دِينَ اٜ مٛودِٻّٜ اَتَّوْرَ نَنِ کٛ يٜىٰسُ وَطِ، سٜيْ ٻٜ نغَطِ کَ طَٻُّتُکِ لَاوٛلْ نٛ ٻٜ مبَرْدَتَمٛ؞ اٜ ٻٜ کُلَمٛ، نغَمْ يِمْٻٜ فُو کَيْطِنِ اٜ اٜکِّتِنٛلْ مَاکٛ؞

¹⁹ندٜ نَانغٜ حِيرِ، يٜىٰسُ اٜ تٛکُّٻٜمٛ مبُرْتِي غَرِيرِ ندِنْ؞

اِبِّ کِ يٜىٰسُ لَانِ کِ يٛورِي

²⁰سُبَکَ اٜ ٻٜ پَٻّٛو، سٜيْ ٻٜ نغِعِ لٜکِّ اِبِّ کِنْ يٛورِي حَا اٜ طَطِ مَاکِ؞ ²¹بِيتُرُسْ سِفْتٛرِ وِعِ يٜىٰسُ، ‏«‏مٛودِبّٛ، رَارُ!‏ اِبِّ کِنْ طٛنْ کِ لَانُطَا کِ يٛورِي؞»‏

²²يٜىٰسُ نٛوتِي وِعِٻٜ، ‏«‏کٛولٜىٰ اَللَّه؞ ²³اٜ مِ وِعَعٛنْ غٛونغَ، تٛ غٛطّٛ وِعِي حٛشّٜىٰرٜ ندٜعٜ، ‏‹‏دِلُّ، کُبٛطَا حٛورٜ مَاطَ ندٜرْ مبٜىٰلَ،›‏ تٛ اٛ وَطَايِ سٜکٛ ندٜرْ ٻٜرْندٜ مَاکٛ، اَمَّا اٛ حٛولِي کٛ اٛ وِعِ طُمْ وَطَيْ، طُمْ وَطَنَيْمٛطُمْ؞ ²⁴نغَمْ نٛنْ اٜ مِ وِعَعٛنْ، فُو کٛ تٛرِيطٛنْ ندٜرْ دٛعَارٜ، کٛولٜىٰ اٛنْ کٜٻِيطُمْ، ندٜنْ طُمْ وَرْتَيْ طُمْ مٛوطٛنْ؞ ^25‏-26کٛو ندٜيٜ تٛ اٛنْ ندَرَکٜ اٛنْ نغَطَ دٛعَارٜ، تٛ اٜ وٛودِ مٛ نجٛغِتِيطٛنْ ندٜرْ ٻٜرْطٜ مٛوطٛنْ، نجَافَنٜىٰمٛ، نغَمْ ݧَاکٛ مٛوطٛنْ مٛ دٛوْ مَا يَافَنٛوعٛنْ حَکّٜ مٛوطٛنْ؞»‏

پَمٛلْ دٛوْ تٛ لَامُ يٜىٰسُ پِوٛيِ

²⁷طٛنْمَا يٜىٰسُ اٜ تٛکُّٻٜمٛ نَتِّ اُرُشَلِيمَ؞ يٜىٰسُ اٜ يِيلٛو ندٜرْ وُرٛ شٜنِينغٛ، سٜيْ مَوْٻٜ اَرْدِيٻٜ دِينَ اٜ مٛودِٻّٜ اَتَّوْرَ اٜ مَوْٻٜ يِمْٻٜ نغَرِ تٛ مَاکٛ؞ ²⁸ٻٜ مبِعِمٛ، ‏«‏اٜ لَامُ مٛيٜ نغَطَتَا کُوطٜ طٜعٜ؟ مٛيٜ حٛکُّمَا لَامُ وَطُکِطٜ؟»‏

²⁹يٜىٰسُ نٛوتِي وِعِٻٜ، ‏«‏مِ پَمَيْعٛنْ پَمٛلْ غٛعٛ؞ نٛوتَنٜىٰيَمْ، ندٜنْ مِ وِعَيْعٛنْ اٜ طُمٜ لَامُ نغَطِرَيْمِ کُوطٜ طٜعٜ؞ ³⁰بَڤْتِسْمَ طُمْ يَحَيَ وَطِ، تٛ اَللَّه طُمْ پِوٛيِ، کٛو تٛ يِمْٻٜ طُمْ پِوٛيِ؟ نٛوتَنٜىٰيَمْ!‏»‏

³¹سٜيْ ٻٜ مٜدِّ حَکُّندٜ مَٻّٜ، ٻٜ مبِعِ، ‏«‏تٛ اٜنْ مبِعِي، ‏‹‏دَغَ تٛ اَللَّه طُمْ پِوٛيِ،›‏ اٛ وِعَيْ، ‏‹‏کٛ وَطِ اٛنْ جَٻَايِ کٛ اٛ وِعِ؟›‏ ³²اَمَّا تٛ اٜنْ مبِعِي، ‏‹‏تٛ يِمْٻٜ طُمْ پِوٛيِ…›‏ »‏ ٻٜ مبِعُ نٛنْ نغَمْ اٜ ٻٜ کُلَ يِمْٻٜ، نغَمْ کٛو مٛيٜ جَٻِي يَحَيَ اٛ اَنَّبِيجٛ؞ ³³سٜيْ ٻٜ نٛوتِي ٻٜ مبِعِ يٜىٰسُ، ‏«‏مِنْ اَنْدَا؞»‏

يٜىٰسُ وِعِٻٜ، ‏«‏نٛنْ مِنْ مَا، مِ وِعَتَاعٛنْ کٛو اٜ طُمٜ لَامُ نغَطِرَيْمِ کُوطٜ طٜعٜ؞»‏

مِسَالُ دٛوْ غُپِيٻٜ نغٜسَ اِنَبٛوجٜ

¹سٜيْ يٜىٰسُ فُطِّ مٜتِرَنْکِٻٜ اٜ مِسَالُ، وِعِ، ‏«‏غٛطّٛ نٜطّٛ وَطِ نغٜسَ اِنَبٛوجٜ، اٛ حٛوِکَ، اٛ وَسِ نغَيْکَ مَوْکَ ندٜرْ تَفَارٜ نغَمْ مٛيْلُکِ ندِيَمْ دَغَ ندٜرْ اِنَبٛوجٜ طٜنْ، اٛ مَحِ سُودُ تٛوْندُ نغَمْ رٜىٰنُکِ نغٜسَ کَنْ؞ سٜيْ اٛ حٛکِّکَ وٛٻّٜ رٜمٛوٻٜ مٛعِّنَکَ، اٛ دِلِّ وٛنْدِ لٜيْدِ؞ ²ندٜ شَرٜلْ ٻٜنْدُکِ اِنَبٛوجٜ طٜنْ وَطِ، اٛ لِلِ مَشُّطٛ مَاکٛ تٛ يِمْٻٜ ٻٜ اٛ حٛکِّ نغٜسَ کَنْ نغَمْ اٛ جَٻَنٛيَمٛ کٛ ٻٜ نغَادُنٛو ندٜرْ کٛ ٻٜنْدِ؞ ³اَمَّا ٻٜ نَنْغِ مَشُّطٛ اٛنْ، ٻٜ ڤِيِمٛ، ٻٜ ندِيوِمٛ کٛو کٛ ٻٜ کٛکِّمٛ؞ ⁴سٜيْ جٛومُ نغٜسَ اٛنْ فُطِّتِ لِلِ غٛطّٛ مَشُّطٛ تٛ مَٻّٜ، کَنْکٛ مَا ٻٜ ڤِيَنِمٛ حٛورٜ، ٻٜ کُطِکُطِنِمٛ؞ ⁵سٜيْ اٛ فُطِّتِ اٛ لِلِ غٛطّٛ مَشُّطٛ، کَنْکٛ بٛو ٻٜ مبَرِمٛ؞ اٛ لِلِلِلِنِي مَشُّٻٜ طُطْٻٜ؞ ٻٜ ڤِيِ وٛٻّٜ، ٻٜ مبَرِ وٛٻّٜ؞ ⁶جٛومُ نغٜسَ کَنْ اٜ وٛودِ غٛعٛتٛ مٛ اٛ لِلَايِ، وَاتٛ ٻِطّٛ مَاکٛ مٛ اٛ يِطِ؞ غَطَ مَاجُمْ فُو اٛ لِلِ ٻِطّٛ اٛنْ تٛ مَٻّٜ، اٛ وِعِ، ‏‹‏ٻٜ کٛکَّيْ ٻِطّٛ اَمْ مَنْغُ؞›‏ ⁷اَمَّا ٻٜ اٛ حٛکِّ نغٜسَ ٻٜنْ مبِعِ حَکُّندٜ مَٻّٜ، ‏‹‏تٛو!‏ رَا دٛنٛووٛ نغٜسَ کَنْ؞ نغَرٜىٰ مبَرٜنْمٛ، ندٛنُ نغٜسَ کَنْ وَرْتَ طُمْ مٜىٰطٜنْ؞›‏ ⁸سٜيْ ٻٜ نَنْغِمٛ ٻٜ مبَرِمٛ، ٻٜ ڤَطِّمٛ غَطَ نغٜسَ کَنْ؞

⁹‏«‏تٛو، کٛ جٛومُ نغٜسَ کَنْ وَطَتَ؟ اٛ وَرَيْ اٛ حَلْکَٻٜ، اٛ حٛکَّ وٛٻّٜ نغٜسَ کَنْ؞ ¹⁰اٛنْ مٜىٰطَايِ جَنْغُکِ کٛ اَايَارٜ وِعِ؟ ندٜ وِعِي،

‏‹‏حَيْرٜ ندٜ مَحٛوٻٜ نغَݧِ

کَيْرٜ وَرْتِ حَيْرٜ ٻُرْندٜ دَرْنُکِ مَادِ؞

¹¹طُعُمْ طُمْ کُوغَلْ جٛومِرَاوٛ، طُمْ کَيْطِنِيطُمْ تٛ مٜىٰطٜنْ؞›‏ »‏

¹²دَغَ طٛنْ سٜيْ مَوْٻٜ ٻٜنْ طَٻِّتِ لَاوٛلْ نٛ ٻٜ نَنْغِرْتَمٛ، نغَمْ اٜ ٻٜ اَنْدِ دٛوْ مَٻّٜ اٛ حٛکِّ مِسَالُ طُمْ، اَمَّا اٜ ٻٜ کُلَ يِمْٻٜ؞ نغَمْ نٛنْ ٻٜ اَلِمٛ، ٻٜ ندِلِّ؞

يٛٻُکِ کَيْسَرْ شٜىٰدٜ لٜيْدِ

¹³غَطَ مَاجُمْ ٻٜ لِلِ وٛٻّٜ فَارِسَنْکٛعٜنْ اٜ وٛٻّٜ يِمْٻٜ حِرُدُسْ تٛ يٜىٰسُ نغَمْ ٻٜ کٜٻَ کٛ ٻٜ نَنْغِرْتَمٛ ندٜرْ مٜتٛ مَاکٛ؞ ¹⁴ٻٜ نغَرِ تٛ يٜىٰسُ، ٻٜ مبِعِمٛ، ‏«‏مٛودِبّٛ، اٜ مِنْ اَنْدِ کٛ مبِعَتَا اٜ کٛ نغَطَتَا طُمْ غٛونغَ؞ اَ حٛلَّتَا فٜىٰرٛوتِرٛلْ حَکُّندٜ يِمْٻٜ، نغَمْ اَ حٛشِّي يِمْٻٜ فُو اٜ ڤٛتِّدِ؞ طٛنْمَا اَ اٜکِّتِنَ لَاوٛلْ اَللَّه اٜ غٛونغَ؞ تٛو، وِعُمِنْ، اٜ طُمْ حَانِ مِنْ نجٛٻَ کَيْسَرْ مَوْطٛ لَامِيٻٜ شٜىٰدٜ لٜيْدِ، کٛو طُمْ حَانَايِ؟ ¹⁵مِنْ نجٛٻَ شٜىٰدٜ لٜيْدِ، کٛو تٛع مِنْ نجٛٻَ؟»‏

اَمَّا يٜىٰسُ اٜ اَنْدِ اٜ ٻٜ نغِطِ پٛيْرُکِمٛ، سٜيْ اٛ وِعِٻٜ، ‏«‏نغَمْ طُمٜ ڤٛوندٛتٛنْيَمْ؟ نغَدَّنٜىٰيَمْ يَمْندٜ اَجُرْفَارِ مِ رَارَندٜ؞»‏

¹⁶ٻٜ نغَدَّنِمٛ يَمْندٜ غٛعٛ؞ اٛ وِعِٻٜ، ‏«‏طٛوْدِ مٛيٜ اٜ اِنْدٜ مٛيٜ وٛنِ دٛوْ مَيْرٜ؟»‏

ٻٜ نٛوتِي ٻٜ مبِعِ، ‏«‏طُمْ کَيْسَرْ؞»‏

¹⁷سٜيْ يٜىٰسُ وِعِٻٜ، ‏«‏تٛو، کٛکّٜىٰ کَيْسَرْ کٛ وٛنِ طُمْ کَيْسَرْ، ندٜنْ کٛکّٛنْ اَللَّه کٛ وٛنِ طُمْ اَللَّه؞»‏

سٜيْ اٛ حَيْطِنِٻٜ نَاع سٜطَّ؞

پَمٛلْ دٛوْ اُمَّاکِ مَيْٻٜ

¹⁸سَادُسَنْکٛعٜنْ اٜ مبِعَ وَلَا اُمَّاکِ مَيْٻٜ؞ وٛٻّٜ مَٻّٜ نغَرِ تٛ يٜىٰسُ، ٻٜ پَمِمٛ، ٻٜ مبِعِ، ¹⁹‏«‏مٛودِبّٛ، اَنَّبِ مُوسَ وِعِي تٛ نٜطّٛ تٜعِي دٜبّٛ مَايِي دَݧِدَايِ اٜ مَاکٛ، سَکِرَاوٛ مَاکٛ سٜيْ تٜعَمٛ نغَمْ حٜٻَنَ مَيْطٛ اٛنْ ٻِٻّٜ؞ ²⁰تٛو، ندٜنّٛ اٜ وٛودِ وٛٻّٜ سَکِرَاٻٜ وٛرْٻٜ نجٛوٜىٰطِطٛ؞ اَفٛ اٛنْ تٜعِ، مَايِ، اَلِ دٜبّٛ وَلَا ٻِطّٛ؞ ²¹سٜيْ طِطَٻٛ اٛنْ تٜعِ دٜبّٛ اٛنْ؞ کَنْکٛ مَا اٛ مَايِ، اٛ اَلِ دٜبّٛ اٛنْ وَلَا ٻِطّٛ؞ تَتَٻٛ اٛنْ مَا نٛنْ؞ ²²ٻٜ فُو نجٛوٜىٰطِطٛ ٻٜنْ ٻٜ تٜعِي دٜبّٛ اٛنْ، ٻٜ مَايِ، ٻٜ اَلِمٛ وَلَا ٻِطّٛ؞ غَطَ طٛنْ دٜبّٛ اٛنْ مَا مَايِ؞ ²³تٛو، ݧَلْندٜ ندٜ مَيْٻٜ اُمّٛتٛو، دٜبّٛ اٛنْ وَرْتَيْ دٜبّٛ مٛيٜ ندٜرْ مَٻّٜ؟ نغَمْ ٻٜ فُو نجٛوٜىٰطِطٛ ٻٜ تٜعِيمٛ؞»‏

²⁴سٜيْ يٜىٰسُ نٛوتِي وِعِٻٜ، ‏«‏اٛنْ مبٛوفِي نغَمْ اٛنْ اَنْدَا کٛ اَايَاجٜ مبِعِ، ندٜنْ اٛنْ اَنْدَا بَوْطٜ اَللَّه؞ ²⁵تٛ مَيْٻٜ اُمَّکٜ دَغَ مَيْدٜ، وَلَا تٜعَيْطٛ وَلَا تٜعٜتٜىٰطٛ، اَمَّا ٻٜ نغَرْتَيْ بٛ مَلَاعِکَعٜنْ اَللَّه؞ ²⁶ندٜنْ دٛوْ اُمَّاکِ مَيْٻٜ دَغَ مَيْدٜ، اٛنْ جَنْغَايِ دٜفْتٜرٜ مُوسَ دٛوْ حَبَرُ لٜغّٜلْ غٛودُنغٜلْ حِيتٜ؟ اَللَّه وِعِيمٛ، ‏‹‏مِنْ وٛنِ اَللَّه مٛ اِبْرَاهِمْ، اَللَّه مٛ اِشِيَاکُ، اَللَّه مٛ يَاکُبُ؞›‏ ²⁷کَنْکٛ نَاع اٛ اَللَّه مَيْٻٜ، اَمَّا اٛ اَللَّه غٛودُٻٜ يٛنْکِ؞ اٛنْ مَجِّ نَاع سٜطَّ!‏»‏

دٛوکَ ٻُرْطُمْ مَنْغُ

²⁸غٛعٛتٛ ندٜرْ مٛودِٻّٜ اَتَّوْرَ وَرِ نَنِ اٜ ٻٜ نغٜدّٛوتِرَ حَکُّندٜ مَٻّٜ؞ ندٜ اٛ نَنِ يٜىٰسُ نٛوتَنَکٜٻٜ بٛطُّمْ، سٜيْ اٛ پَمِ يٜىٰسُ، اٛ وِعِ، ‏«‏ندٜرْ دٛوکَاجِ طِ اَللَّه وَطِ، طُمٜ ٻُرِ مَنْغُ؟»‏

²⁹يٜىٰسُ نٛوتِي وِعِ، ‏«‏ٻُرْطُمْ مَنْغُ وٛنِ، ‏‹‏يِمْٻٜ اِسْرَاعِيلَ نَنٜىٰ، اَللَّه جٛومِرَاوٛ مٜىٰطٜنْ اٛ جٛومِرَاوٛ غٛعٛتٛ؞ ³⁰يِطُ اَللَّه جٛومِرَاوٛ مَاطَ اٜ ٻٜرْندٜ مَاطَ فُو، اٜ يٛنْکِ مَاطَ فُو، اٜ حَکِّيلٛ مَاطَ فُو، اٜ سٜمْبٜ مَاطَ فُو؞›‏ ³¹طِطَٻُمْ بٛو وٛنِ، ‏‹‏يِطُ بَنْدِرَاوٛ مَاطَ نٛ نغِطِرْطَا حٛورٜ مَاطَ؞›‏ ندٜرْ دٛوکَاجِ طِ اَللَّه وَطِ وَلَا ٻُرْطُمْ طِعِ طِطِ؞»‏

³²سٜيْ مٛودِبّٛ اَتَّوْرَ اٛنْ وِعِ، ‏«‏مٛودِبّٛ، اَ وِعِي غٛونغَ ندٜ مبِيطَا اَللَّه اٛ غٛعٛتٛ، وَلَا غٛطّٛ سٜيْ کَنْکٛ تَنْ؞ ³³نٜطّٛ يِطَمٛ اٜ ٻٜرْندٜ مُوطُمْ فُو، اٜ فَامُ مُوطُمْ فُو، اٜ سٜمْبٜ مُوطُمْ فُو، ندٜنْ يِطَ بَنْدِرَاوٛ مُوطُمْ نٛ يِطِرِ حٛورٜ مُوطُمْ، طُمْ ٻُرِي مَرْلٜ غُلَنْتٜىٰطٜ اَللَّه اٜ فُو کٛ طُمْ سَکَّنْتَمٛ؞»‏

³⁴ندٜ يٜىٰسُ نَنِ اٛ نٛوتٛرَکٜ فَامُ، سٜيْ وِعِمٛ، ‏«‏غٛونغَ اَ وٛطِّدَا اٜ لَامُ اَللَّه؞»‏

غَطَ مَاجُمْ وَلَا غَطُطٛ سٜمْبٜ ٻٜرْندٜ پَمِمٛ وٛنْغٛلْ پَمٛلْ؞

پَمٛلْ دٛوْ اَلْمَسِيحُ

³⁵يٜىٰسُ اٜ اٜکِّتِنَ ندٜرْ نجَيْرِ وُرٛ شٜنِينغٛ، سٜيْ اٛ پَمِ، اٛ وِعِ، ‏«‏نغَمْ طُمٜ مٛودِٻّٜ اَتَّوْرَ اٜ مبِعَ اَلْمَسِيحُ اٛ ٻِطّٛ دَوْدَ؟ ³⁶نغَمْ دَوْدَ اٜ حٛورٜ مُوطُمْ، ندٜرْ بَوْطٜ رُوحُ اَللَّه اٛ وِعِي،

‏‹‏جٛومِرَاوٛ وِعِي جٛومِرَاوٛ اَمْ،

‏«‏جٛوطَ تٛ جُنْغٛ اَمْ ݧَامٛ،

نَا مِ وَطِي اَ يَاٻِي وَݧْوَݧْٻٜ مَاطَ؞»‏ ›‏

³⁷دَوْدَ اٜ حٛورٜ مُوطُمْ نٛدِّرِيمٛ جٛومِرَاوٛ؞ تٛو، نٛ وَطَتَ اَلْمَسِيحُ وَرْتَ ٻِطّٛ دَوْدَ؟»‏

يٜىٰسُ وَغِّنِي يِمْٻٜ دٛوْ مٛودِٻّٜ اَتَّوْرَ

يِمْٻٜ طُطْٻٜ کَوْرُتُٻٜ کٜتِّندَنِيمٛ ندٜرْ وٜلْوٜلٛ؞ ³⁸يٜىٰسُ اٜ اٜکِّتِنَ، وِعِ، ‏«‏ڤَامَنٜىٰ مٛودِٻّٜ اَتَّوْرَ، غِطُٻٜ يِيلَاکِ اٜ ٻٛرْنِي تٛغّٛحٛ نجُوتُکٛ، غِطُٻٜ حٛوْنِرٜىٰکِ مَنْغُ ندٜرْ لُومٛ؞ ³⁹اٜ ٻٜ نغِطِ جٛوطَاکِ دٛوْ جٛوطٛرْلٜ مَوْٻٜ ندٜرْ شُوطِ دٛعَارٜ اٜ جٛوطٛرْلٜ مَوْٻٜ تٛ حُمْتٛ؞ ⁴⁰کَمْٻٜ نغٛنِ ݧَامٛوٻٜ جَوْدِ رٜوْٻٜ ٻٜ وٛرْٻٜ مُعّٜنْ مَايِ حَا اٜ غُرٜ مَٻّٜ، اٜ ٻٜ نغَطَ دٛعَارٜ جُوتُندٜ نغَمْ طُمْ يِعَٻٜ؞ اِرِ ٻٜنْ طٛنْ يِمْٻٜ طُمْ وَطَنَيْٻٜ کِيتَ ٻُرْکَ حَلُّکِ؞»‏

دٛکَّلْ نغَلْ دٜبّٛ مٛ غٛرْکٛ مُوطُمْ مَايِ

⁴¹يٜىٰسُ جٛوطِي ندٜرْ وُرٛ شٜنِينغٛ حَادٜ تٛ طُمْ حٛکَّتَ شٜىٰدٜ نغَمْ اَللَّه؞ اٜ مٛ رَارَ يِمْٻٜ اٜ ٻٜ نغَطَ شٜىٰدٜ مَٻّٜ ندٜرْ تٛ طُمْ حٛکَّتَ شٜىٰدٜ نغَمْ اَللَّه؞ رِسْکُٻٜ طُطْٻٜ نغَطِ شٜىٰدٜ طُطّٜ ندٜرْ؞ ⁴²سٜيْ رَا غٛطّٛ دٜبّٛ مٛ وَلَنَا مٛ غٛرْکٛ مُوطُمْ مَايِ؞ اٛ وَرِ اٛ وَطِ شٜىٰدٜ نجَمْکٛيْ طِطٛيْ کٛيْ نجَمْندِ مبٛطٜىٰرِ ندٜرْ؞ طُمْ شٜىٰدٛيْ سٜطَّنَحٛيْ تَنْ؞ ⁴³سٜيْ يٜىٰسُ نٛدِّ تٛکُّٻٜمٛ، وِعِٻٜ، ‏«‏اٜ مِ وِعَعٛنْ غٛونغَ، اٛعٛ دٜبّٛ مٛ وَلَنَا، کٛ اٛ حٛکِّ طُمْ ٻُرِي کٛ حٛرِيٻٜ فُو کٛکِّ؞ ⁴⁴نغَمْ کَمْٻٜ ٻٜ کٛکِّ دَغَ ندٜرْ رِسْکُ مَٻّٜ؞ اَمَّا کَنْکٛ بٛو، دَغَ ندٜرْ شِيَ مَاکٛ، اٛ حٛکِّ فُو کٛ اٛ وٛودِ، وَاتٛ کٛو طُمٜ طُمْ اٛ مَرٛرْتٛو؞»‏

يٜىٰسُ وِعِي طُمْ سَنْکِتَيْ وُرٛ شٜنِينغٛ

¹يٜىٰسُ اٜ وُرْتٛيٛو وُرٛ شٜنِينغٛ، سٜيْ غٛعٛتٛ ندٜرْ تٛکُّٻٜمٛ وِعِمٛ، ‏«‏مٛودِبّٛ، رَارُ کَاپٜ مَوْطٜ طٜ طُمْ مَحِرِ وُرٛ نغٛعٛ!‏ رَارُ نٛ مَادِ ندِنْ وٛوطِرِ؞»‏

²سٜيْ يٜىٰسُ وِعِمٛ، ‏«‏اَ يِعِي ندِعِ مَادِ مَوْندِ؟ وَلَا وٛنْدٜ حَيْرٜ اَلٜتٜىٰندٜ دٛوْ وٛنْدٜ؞ طٜ فُو طُمْ سَنْکِتَيْطٜ؞»‏

تٛرَّاجِ اٜ شَطٜىٰلٜ

³يٜىٰسُ اٜ جٛوطِي دٛوْ حٛشّٜىٰرٜ ندٜ لٜطّٜ جَيْتُنْ دَارَيْندٜ وُرٛ شٜنِينغٛ، سٜيْ بِيتُرُسْ، اٜ يَاکُبُ، اٜ يَحَيَ، اٜ اَنْدِرَاوُسْ ٻٜ نجَحِ تٛ مَاکٛ کَمْٻٜ تَنْ، ٻٜ پَمِمٛ ٻٜ مبِعِ، ⁴‏«‏وِعُمِنْ، ندٜيٜ فِي طُعُمْ وَطَتَ؟ طُمٜ وٛنِ کٛ حٛلَّتَ فُو فِي طُعُمْ ٻَدَکٜ حٜىٰوَ؟»‏

⁵سٜيْ يٜىٰسُ وِعِٻٜ، ‏«‏ڤَامٜىٰ تٛع غٛطّٛ مَجِّنَعٛنْ؞ ⁶يِمْٻٜ طُطْٻٜ نٛدِّرَيْ کٛعٜ مَٻّٜ اِنْدٜ اَمْ، ٻٜ مبِعَ ‏‹‏مِنْ وٛنِ اَلْمَسِيحُ،›‏ ٻٜ مَجِّنَ يِمْٻٜ طُطْٻٜ؞ ⁷تٛ اٛنْ نَنِي حَبَرُ کٛنُوجِ غَطٜتٜىٰطِ حَادٜ مٛوطٛنْ، اٜ کٛنُوجِ غَطٜتٜىٰطِ ٻَدَاکِ، تٛع اٛنْ کُلُ؞ دٛولٜ طُعُمْ وَطَ، اَمَّا رٜعُکِ دُونِيَارُ اٜ حٛرِي تَوْ؞ ⁸لٜݧٛلْ اُمَّنْتٛ لٜݧٛلْ، لَامُ اُمَّنْتٛ لَامُ؞ طُمْ وَطَيْ وٜىٰلٛ کَلُّنغٛ اٜ دِمْبٛلْ لٜيْدِ تٛ بِغٜىٰجٜ فٜىٰرٜ‑فٜىٰرٜ؞ طُعُمْ طُمْ فُطّٛودٜ تٛرَّاجِ غَرَيْطِ؞

⁹‏«‏اَمَّا ڤَامَنٜىٰ کٛعٜ مٛوطٛنْ؞ ٻٜ نغَطَيْعٛنْ ندٜرْ جُوطٜ مَوْٻٜ شُوطِ دٛعَارٜ، طُمْ ڤِيَعٛنْ ندٜرْ شُوطِ دٛعَارٜ طِنْ؞ نغَمْ اٛنْ تٛکُّٻٜيَمْ طُمْ يَارَيْعٛنْ يٜىٰسٛ مَوْٻٜ لٜيْدِ اٜ لَامِيٻٜ، نٛنْ وَرْتَيْ لَاوٛلْ نٛ کٛکِّرْتٛنْٻٜ حَبَرُ اَمْ؞ ¹⁰اَمَّا کٛ رٜعِرْدٜ دُونِيَارُ وَرَ، دٛولٜ طُمْ اَرْتَ وَعَجِنْکِ حَبَرُ بٜلْطُمْ ندٜرْ فُو لٜپِّ دُونِيَارُ؞ ¹¹فُو شَرٜلْ نغٜلْ طُمْ نَنْغِعٛنْ طُمْ يَارِعٛنْ يٜىٰسٛ لَامُ، تٛع اٛنْ نغَنُّ دٛوْ کٛ مبِعٛتٛنْ؞ اٜ شَرٜلْ نغٜلْ اَللَّه حٛکَّيْعٛنْ کٛ مبِعٛتٛنْ، سٜيْ مبِعٛنْکَ؞ نغَمْ نَاع طُمْ اٛنٛنْ مٜتَتَ، اَمَّا طُمْ رُوحُ اَللَّه؞ ¹²نٜطّٛ حٛکِّتِرَيْ سَکِرَاوٛ مُوطُمْ طُمْ وَرَمٛ، ݧَاکٛ مَا حٛکِّتِرَيْ ٻِطّٛ مُوطُمْ؞ ٻِٻّٜ اُمَّنْتٛ دَݧٛوٻٜ مَٻّٜ، ٻٜ نغَطَ طُمْ وَرَٻٜ؞ ¹³کٛو مٛيٜ وَݧَيْعٛنْ نغَمْ اٛنْ تٛکُّٻٜيَمْ؞ اَمَّا مُݧُطٛ حَا رٜعِرْدٜ حِسَيْ؞

تٛرَّ کَلُّکَ

¹⁴‏«‏شَرٜلْ اٜ وَرَ نغٜلْ نغِعٛتٛنْ ‏‹‏نٜفْنِيطُم›‏ غَرْتِرٛوجُمْ وُرٛ شٜنِينغٛ نغٛ لَاٻَا اٜ دَرِي تٛ وِغٜىٰرٜ ندٜ حَانَا؞ فُو جَنْغٛووٛ فَامَ مَعَنَ مَاجُمْ؞ اٜ شَرٜلْ نغٜلْ وٛنْٻٜ ندٜرْ لٜيْدِ يَحُودِيَ ندٛغَّ نَتّٛيَ کٛشّٜىٰجٜ؞ ¹⁵غٛنْطٛ دٛوْ سُودُ تٛع جِڤّٛيٛو کٛو نَتَّ وُرٛ نغَمْ حٛشُّکِ غٛطُّمْ؞ ¹⁶غٛنْطٛ تٛ نغٜسَ تٛع سٛعّٛ حٛشَّ شُدَّارِ مُوطُمْ؞ ¹⁷رٜوْٻٜ غٛودُٻٜ دٜىٰطِ اٜ مُسِنْتٜىٰٻٜ ٻٜ تٛرّٛتٛ نَاع سٜطَّ ندٜرْ طٜنْ طٛنْ بَلْطٜ!‏ ¹⁸نغَطٜىٰ دٛعَارٜ تٛع فِي طُعُمْ وَطَ ندٜرْ ندُنْغُ؞ ¹⁹نغَمْ ندٜرْ طٜنْ طٛنْ بَلْطٜ طُمْ وَطَيْ تٛرَّ کَلُّکَ اِرِ کَ طُمْ مٜىٰطَايِ وَطُکِ دَغَ شَرٜلْ نغٜلْ اَللَّه تَغِ دُونِيَارُ حَا جٛونِ؞ طُمْ بٛو فُطِّتَتَا طُمْ وَطَ اِرِ کَنْ طٛنْ تٛرَّ؞ ²⁰دَا جٛومِرَاوٛ اُسْتَايِ طٜنْ طٛنْ بَلْطٜ، دَا وَلَا غٛطّٛ کِسَيْطٛ؞ اَمَّا نغَمْ ٻٜنْ طٛنْ شُٻَاٻٜ مَاکٛ ٻٜ اٛ سُٻِ، اٛ اُسْتِي بَلْطٜ طٜنْ؞

²¹‏«‏اٜ نغٜلْ طٛنْ شَرٜلْ تٛ غٛطّٛ وِعِيعٛنْ، ‏‹‏رَا اَلْمَسِيحُ طٛعٛ!‏›‏ کٛو بٛو، ‏‹‏رَمّٛ طَاعٜ!‏›‏ تٛع اٛنْ نجَٻُ؞ ²²نغَمْ اَلْمَسِيحُعٜنْ فٜوْرٜ اٜ اَنَّبٛعٜنْ فٜوْرٜ ٻٜ مبُرْتٛيْتٛ ٻٜ نغَطَ اَلَامَاجِ اٜ کُوطٜ کَيْطِنِيطٜ نغَمْ ٻٜ مَجِّنَ يِمْٻٜ، حَا اٜ شُٻَاٻٜ ٻٜنْ تٛ طُمْ وَطٛتٛ؞ ²³ندَرٜىٰ، اٛنْ ندٜىٰنَ!‏ مِ وِعِيعٛنْ کٛو طُمٜ کٛ شَرٜلْ نغٜلْ وَرَ؞

وَرْتٛيْکِ ٻِي نٜطّٛ

²⁴‏«‏اَمَّا ندٜرْ طٜنْ طٛنْ بَلْطٜ غَطَ کَنْ طٛنْ تٛرَّ کَلُّکَ، طُمْ ٻَلْوِنَيْ نَانغٜ، لٜوْرُ بٛو حٛکَّتَا جَيْنغٛلْ مَيْرُ؞ ²⁵کٛودٜ نجَنٛيَيْ دَغَ دٛوْ، ندٜنْ کٛ وٛنِ دٛوْ فُو دِمْبٛتٛ؞ ²⁶اٜ شَرٜلْ نغٜلْ طُمْ يِعَيْ ٻِي نٜطّٛ اٜ وَرَ ندٜرْ دُولٜ؞ اٛ وَرْدَيْ اٜ بَوْطٜ مَوْطٜ اٜ تٜدُّنغَلْ؞ ²⁷اٛ لِلٛيَيْ مَلَاعِکَعٜنْ مَاکٛ ٻٜ کَوْرِتَ ٻٜ اٛ سُٻِ دَغَ کٛو تٛيٜ ندٜرْ دُونِيَارُ، دَغَ نغٛعٛلْ کٜىٰرٛلْ دُونِيَارُ يَاکِ نغٛلْ تٛنْ کٜىٰرٛلْ؞

اٜکِّتِنٛلْ دٛوْ لٜکِّ اِبِّ

²⁸‏«‏تٛو، اٜکِّتٜىٰ اٜکِّتِنٛلْ نغٛعٛلْ دَغَ تٛ لٜکِّ اِبِّ؞ تٛ لِشٜ مَاکِ ڤُطِّي وِلُتُکِ، اٛنْ اَنْدِ ندُنْغُ ٻَدَکٜ وٛنْ طٛنْ؞ ²⁹نٛنْ مَا تٛ اٛنْ نغِعِي فِي طُعُمْ اٜ وَطَ، تٛو، اٛنْ اَنْدَيْ ٻِي نٜطّٛ ٻَدَکٜ وَرْتٛيَ، اٜ مٛ حَادٜ دَمُّغَلْ؞ ³⁰اٜ مِ وِعَعٛنْ غٛونغَ، جَامَنُ طُعُمْ طُمْ رٜعَتَا نَا فُو فِي طُعُمْ وَطِي؞ ³¹دٛوْ اٜ لٜيْ پَٻّٛتٛ، اَمَّا بٛلِيطٜ اَمْ پَٻَّتَاکٛ حَا اَبَدَا؞

وَلَا اَنْدُطٛ ݧَلْندٜ وَرْتٛيْکِ اَلْمَسِيحُ

³²‏«‏وَلَا اَنْدُطٛ ندٜنْ طٛنْ ݧَلْندٜ کٛو نغٜلْ طٛنْ شَرٜلْ نغٜلْ فِي طُمْ طٛنْ وَطَتَ؞ کٛو مَلَاعِکَعٜنْ وٛنْٻٜ دٛوْ اَنْدَا، ٻِطّٛ اٛنْ مَا اَنْدَا، سٜيْ ݧَاکٛ مٛ دٛوْ تَنْ اَنْدِ؞ ³³ڤَامٜىٰ، نجٛوطٜىٰ اٛنْ شِرْيِي، نغَمْ اٛنْ اَنْدَا کٛ شَرٜلْ نغٜلْ وَرَتَ؞ ³⁴طُمْ بٛ نٜطّٛ غَطُطٛ يَادُ؞ ندٜ اٛ وَرِ دِلُّکِ اٛ اَلِ وُرٛ مَاکٛ ندٜرْ جُوطٜ مَشُّٻٜ مَاکٛ، اٛ حٛکِّ کٛو مٛيٜ کُوغَلْ نغَلْ وَطَتَ، اٛ وِعِ دٜىٰنٛووٛ دَمُّغَلْ نغَلْ اٛ دَرٛو اٜ مٛ رٜىٰنَ؞ ³⁵نغَمْ نٛنْ، نجٛوطٜىٰ اٛنْ ندٜىٰنَ نغَمْ اٛنْ اَنْدَا شَرٜلْ نغٜلْ جٛومُ وُرٛ نغٛنْ وَرْتٛيْتَ، کٛو طُمْ فُتُرٛ، کٛو طُمْ شَکَ جٜمَّ، کٛو طُمْ فَجِرِ، کٛو طُمْ سُبَکَ؞ ³⁶تٛ اٛ وَرْتِي وَلَا اَنْدُطٛ، تٛع اٛ تَوَ اٛنْ طَانِي؞ ³⁷کٛ مبِيمِعٛنْ، اٜ مِ وِعَکَ کٛو مٛيٜ، کَنْجُمْ وٛنِ نجٛوطٜىٰ اٛنْ شِرْيِي!‏»‏

طُمْ دَرْوِي وَرْکِ يٜىٰسُ

¹حٛرِي بَلْطٜ طِطِ طُمْ وَطَ حُمْتٛ سَکِّنْکِ اٜ حُمْتٛ بُرٛودِ طُمْ وَلَا پُوفِنِرْطُمْ؞ مَوْٻٜ اَرْدِيٻٜ دِينَ اٜ مٛودِٻّٜ اَتَّوْرَ اٜ طَٻِّتَ لَاوٛلْ نٛ ٻٜ نَنْغِرْتَ يٜىٰسُ اٜ سُوطٜ ٻٜ مبَرَمٛ؞ ²ٻٜ مبِعِ، ‏«‏اَمَّا نَاع نِ شَرٜلْ حُمْتٛ، نغَمْ تٛع يِمْٻٜ اُمِّنَ حَوْرٜ؞»‏

طُمْ مٛيْتَنِي يٜىٰسُ نٜبَّمْ اُرٛوجَمْ اٜ بٜتَنِ

³يٜىٰسُ اٜ ندٜرْ غَرِيرِ بٜتَنِ تٛ وُرٛ سِيمَنْ غٛودُطٛ ݧَوُ ݧَامٛوجُمْ لَرَلْ؞ اٜ مٛ ݧَامَ ݧَمْندُ، سٜيْ غٛطّٛ دٜبّٛ وَرِ اٜ جٛغِي جٛلّٛيٜلْ حَيْرٜ بٛنْغٜلْ نغٜلْ نٜبَّمْ اُرٛوجَمْ مبٜلْطَمْ طَمْ طُمْ وَطِرِ نَرْدِ غٛودُطَمْ شٜىٰدٜ؞ سٜيْ اٛ مَٻِّتِنغٜلْ، اٛ وَيْلِ نٜبَّمْ طَمْ دٛوْ حٛورٜ يٜىٰسُ؞ ⁴وٛٻّٜ غٛنْٻٜ طٛنْ ٻٜ مٛنِّ ٻٜ مبِعِ حَکُّندٜ مَٻّٜ، ‏«‏نغَمْ طُمٜ اٛ وٛنِّ نٜبَّمْ طَعَمْ نِحِ؟ ⁵دَا طَمْ سٛورَامَ، دَا طُمْ حٜٻِي شٜىٰدٜ ٻُرْطٜ طٜ طُمْ يٛٻَتَ کُوٛووٛ حِتَاندٜ غٛعٛ، طُمْ حٛکَّطٜ ٻٜ نغَلَنَا؞»‏ ٻٜ کَٻَنِ دٜبّٛ اٛنْ سٜمْبٜىٰ؞

⁶اَمَّا يٜىٰسُ وِعِٻٜ، ‏«‏اَلٜىٰمٛ؞ نغَمْ طُمٜ نغَنّٛتٛنْمٛ؟ کٛ اٛ وَطَنِيَمْ طُمْ بٛطُّمْ؞ ⁷کٛو ندٜيٜ ٻٜ نغَلَنَا اٜ نغٛنْدِ اٜ مٛوطٛنْ، اٛنْ مبَاوَيْ وَلُّکِٻٜ فُو شَرٜلْ نغٜلْ نغِطّٛنْ؞ اَمَّا مِنْ، شَرٜلْ اٜ وَرَ نغٜلْ اَلَيْمِعٛنْ؞ ⁸اٛعٛ دٜبّٛ وَطِي کٛ اٛ وَاوَتَ وَطُکِ؞ اٛ وَيْلَنِي ٻَنْدُ اَمْ نٜبَّمْ نغَمْ سِرْيَاکِ اُوُکِيَمْ؞ ⁹اٜ مِ وِعَعٛنْ غٛونغَ، کٛو تٛيٜ تٛ طُمْ وَعَجِنِ حَبَرُ بٜلْطُمْ ندٜرْ دُونِيَارُ فُو، طُمْ حٛکَّيْ حَبَرُ کٛ دٜبّٛ اٛعٛ وَطِ نغَمْ سِفْتٛرْکِمٛ؞»‏

يَحُودَ جَٻِي حٛکِّتِرَ يٜىٰسُ

¹⁰سٜيْ غٛعٛتٛ ندٜرْ تٛکُّٻٜ يٜىٰسُ سَڤّٛ اٜ طِطٛ بِعٜتٜىٰطٛ يَحُودَ اِسْکَرِيٛوتِ يَحِ تٛ مَوْٻٜ اَرْدِيٻٜ دِينَ نغَمْ حٛکِّتِرَ يٜىٰسُ ندٜرْ جُوطٜ مَٻّٜ؞ ¹¹ٻٜ نَنِ بٜلْطُمْ نَاع سٜطَّ ندٜ ٻٜ نَنِ نٛنْ، ٻٜ نغَطِ اَلْکَوَلْ حٛکُّکِمٛ شٜىٰدٜ؞ نغَمْ نٛنْ، يَحُودَ فُطِّ طَٻُّتُکِ لَاوٛلْ نٛ حٛکِّتِرْتَ يٜىٰسُ ندٜرْ جُوطٜ مَٻّٜ؞

يٜىٰسُ وَطِي حُمْتٛ سَکِّنْکِ اٜ تٛکُّٻٜمٛ 21

¹²ݧَلْندٜ اَرَنْدٜىٰرٜ ندٜ حُمْتٛ بُرٛودِ طُمْ وَلَا پُوفِنِرْطُمْ، ݧَلْندٜ ندٜ طُمْ حِرْسَتَ کَرٛوجِ نغَمْ حُمْتٛ سَکِّنْکِ، تٛکُّٻٜ يٜىٰسُ پَمِمٛ، مبِعِ، ‏«‏تٛيٜ نغِطَّا مِنْ نجَحَ مِنْ شِرْيَنٛمَا نغَمْ ݧَامٜنْ ݧَمْندُ حُمْتٛ سَکِّنْکِ؟»‏

¹³سٜيْ اٛ لِلِ تٛکُّٻٜمٛ طِطٛ، اٛ وِعِٻٜ، ‏«‏نَتّٜىٰ غَرِيرِ، اٛنْ کَوْرَيْ اٜ غٛطّٛ اٜ مٛ رٛنْدِي پٛوغِرْدٜ ندِيَمْ؞ تٛکّٜىٰمٛ ¹⁴يَاکِ وُرٛ نغٛ اٛ نَتَّتَ، مبِعٛنْ جٛومُ وُرٛ نغٛنْ، ‏‹‏مٛودِبّٛ وِعِي مِنْ پَمُمَا:‏ تٛيٜ سُودُ ندُ ݧَامَيْمِ ݧَمْندُ حُمْتٛ سَکِّنْکِ، مِنْ اٜ تٛکُّٻٜيَمْ؟›‏ ¹⁵اٛ حٛلَّيْعٛنْ سُودُ مَوْندُ ندُ دٛوْ مٛعِّنَاندُ شِرْيَاندُ؞ شِرْيَنٜىٰعٜنْ کٛو طُمٜ طٛنْ نغَمْ ݧَامٜنْ ݧَمْندُ حُمْتٛ سَکِّنْکِ؞»‏

¹⁶سٜيْ تٛکُّٻٜمٛ ٻٜنْ نَنْغِ لَاوٛلْ نَتِّ غَرِيرِ ندِنْ ٻٜ تَوِ کٛو طُمٜ نٛنْ نٛ يٜىٰسُ وِعِٻٜ؞ سٜيْ ٻٜ شِرْيِي کٛو طُمٜ نغَمْ حُمْتٛ سَکِّنْکِ؞

¹⁷ندٜ فُتُرٛ وَطِ، يٜىٰسُ اٜ تٛکُّٻٜمٛ سَڤّٛ اٜ طِطٛ نغَرِ وُرٛ نغٛنْ؞ ¹⁸اٜ ٻٜ نجٛوطِي اٜ ٻٜ ݧَامَ ݧَمْندُ، سٜيْ يٜىٰسُ وِعِ، ‏«‏اٜ مِ وِعَعٛنْ غٛونغَ، غٛعٛتٛ ندٜرْ مٛوطٛنْ ݧَمْندَيْطٛ اٜ اَمْ حٛکِّتِرَيْيَمْ؞»‏

¹⁹سٜيْ ٻٜ نغَنِّ، ٻٜ ڤُطِّ وِعُکِمٛ غٛعٛتٛ‑غٛعٛتٛ، ‏«‏نَاع طُمْ مِنْ، کٛو؟»‏

²⁰يٜىٰسُ نٛوتِي، وِعِ، ‏«‏طُمْ غٛعٛتٛ ندٜرْ مٛوطٛنْ، اٛنٛنْ سَڤّٛ اٜ طِطٛ ٻٜ شُٻُمِ، ݧَمْدَيْطٛ اٜ اَمْ لٜعَلْ غٛعٛ؞ ²¹ٻِي نٜطّٛ مَايَيْ نٛ طُمْ وِنْدِرَا دٛوْ مَاکٛ، اَمَّا کٛکِّتِرَيْطٛمٛ وٛنِي!‏ طُمْ ٻُرَنَيْمٛ دَا اٛ دَݧَاکَ؞»‏

کِرْتَارِ جٛومِرَاوٛ

²²اٜ ٻٜ ندٜرْ ݧَامُکِ ݧَمْندُ، سٜيْ يٜىٰسُ حٛشِّ بُرٛودِ يٜتِّ اَللَّه، اٛ سٜنْدِطُمْ، اٛ حٛکِّ تٛکُّٻٜمٛ، اٛ وِعِ، ‏«‏نجَٻٜىٰطُمْ؞ طُعُمْ طُمْ ٻَنْدُ اَمْ؞»‏

²³طٛنْمَا اٛ حٛشِّ جَرْدُغٜلْ ندِيَمْ اِنَبٛجَمْ، اٛ يٜتِّ اَللَّه، اٛ حٛکِّٻٜطَمْ، ٻٜ فُو ٻٜ نجَرِطَمْ؞ ²⁴ندٜنْ اٛ وِعِٻٜ، ‏«‏طَعَمْ کَنْجَمْ وٛنِ پِيپَمْ اَمْ تَبِّتِنَيْطَمْ اَلْکَوَلْ اَللَّه ندُفٜتٜىٰطَمْ نغَمْ يِمْٻٜ طُطْٻٜ؞ ²⁵اٜ مِ وِعَعٛنْ غٛونغَ، مِ فُطِّتَتَا مِ يَرَ ندِيَمْ اِنَبٛوجٜ نَا ݧَلْندٜ ندٜ نجَرَيْمِ نغٛطَّمْ کٜسَمْ ندٜرْ لَامُ اَللَّه؞»‏

²⁶سٜيْ ٻٜ نغِمِ غِمٛلْ مَنْتُکِ اَللَّه، ندٜنْ ٻٜ ندِلِّ حٛشّٜىٰرٜ ندٜ لٜطّٜ جَيْتُنْ؞

يٜىٰسُ وِعِي بِيتُرُسْ وِعَيْ اَنْدَامٛ

²⁷يٜىٰسُ وِعِ تٛکُّٻٜمٛ، ‏«‏اٛنْ فُو اٛنْ ندٛغَّيْ اَلٛنْيَمْ، نغَمْ ندٜرْ اَايَارٜ اَللَّه وِعِي، ‏‹‏مِ وَرَيْ غَيْنَاکٛ، ندٜنْ بَالِ طِنْ شَنْکِتٛتٛ؞›‏ ²⁸اَمَّا غَطَ مِ اُمَّکٜ دَغَ مَيْدٜ، مِ اَرْتَيْعٛنْ يَاکِ غَلِيلِ؞»‏

²⁹سٜيْ بِيتُرُسْ وِعِمٛ، ‏«‏کٛو ٻٜ فُو ٻٜ اَلِيمَ، مِنْ مِ اَلَتَامَ؞»‏

³⁰يٜىٰسُ وِعِمٛ، ‏«‏اٜ مِ وِعُمَا غٛونغَ، حَنْدٜ، ندٜرْ جٜمَّارٜ ندٜعٜ، کٛ نجَکَرْدِ حَنَ ندٜ طِطِ، اَ وِعَيْ اَ اَنْدَايَمْ ندٜ تَتِ؞»‏ ³¹اَمَّا بِيتُرُسْ جَٻَايِ، اٛ وِعِ، ‏«‏کٛو طُمْ وَرْدَيْيَمْ اٜ مَاطَ، مِ وِعَتَا مِ اَنْدَامَ؞»‏ حٛرِيٻٜ ٻٜنْ مَا مبِعِ نٛنْ؞

يٜىٰسُ وَطِي دٛعَارٜ تٛ غٜىٰسَمَنِ

³²سٜيْ ٻٜ نجَحِ وِغٜىٰرٜ بِعٜتٜىٰندٜ غٜىٰسَمَنِ، يٜىٰسُ وِعِ تٛکُّٻٜمٛ، ‏«‏نجٛوطٜىٰ طٛعٛ، مِ يَحَ مِ وَطَ دٛعَارٜ؞»‏ ³³سٜيْ اٛ حٛشِّ بِيتُرُسْ، اٜ يَاکُبُ، اٜ يَحَيَ؞ ٻٜرْندٜ مَاکٛ بٛو تٜدِّ، اٛ فُطِّ وَنُّکِ نَاع سٜطَّ؞ ³⁴اٛ وِعِٻٜ، ‏«‏ٻٜرْندٜ اَمْ وَنِّي نَاع سٜطَّ حَا بٛ مِ مَايَيْ؞ نجٛوطٜىٰ طٛعٛ اٛنْ ندٜىٰنَ؞»‏

³⁵ندٜ اٛ يَحِ يٜىٰسٛ سٜطَّ، سٜيْ اٛ يَنِ اٜ لٜيْدِ اٜ مٛ حِڤِّي، اٛ وَطِ دٛعَارٜ، اٛ وِعِ تٛ طُمْ غَطٛتٛوطُمْ طُمْ حٛشَّنَمٛ شَرٜلْ تٛرَّ وٛنْکَ يٜىٰسٛ مَاکٛ؞ ³⁶اٛ وِعِ، ‏«‏يَا ݧَاکٛ اَمْ مٛ دٛوْ، کٛو طُمٜ طُمْ غَطٛتٛوطُمْ تٛ مَاطَ؞ تَا جَٻِي، اِتَّنَمْ جَرْدُغٜلْ تٛرَّ کَعَ؞ فُو اٜ نٛنْ نَاع کٛ نغِطُمِ وَطٜتٜىٰ، اَمَّا کٛ نغِطَّا وَطٜىٰ؞»‏

³⁷غَطَ طٛنْ اٛ سٛعِّي تٛ ٻٜنْ طٛنْ تٛکُّٻٜمٛ تَتٛ، اٛ تَوِ اٜ ٻٜ طَانِي، سٜيْ اٛ وِعِ بِيتُرُسْ، ‏«‏بِيتُرُسْ، اَ طَانِي؟ اَ وَاوَتَا جٛوطَاکِ اَ طَانَاکِ کٛو شَرٜلْ سٜطَّ؟ ³⁸نجٛوطٜىٰ، تٛع اٛنْ طَانٛ، نغَطٜىٰ دٛعَارٜ تٛ طُمْ فٛوندِيعٛنْ تٛع نغَطٛنْ حَکّٜ؞ ٻٜرْندٜ اٜ يِطِ وَطُکِ کٛ حَانِ، اَمَّا ٻَنْدُ تَمْڤِي؞»‏

³⁹اٛ فُطِّتِ اٛ دِلِّ، اٛ وَطِ دٛعَارٜ، اٛ وِعِ کٛ اٛ وِعُنٛو؞ ⁴⁰اٛ فُطِّتِ اٛ سٛعّٛيِي تٛ مَٻّٜ، اٛ تَوِ اٜ ٻٜ طَانِي، نغَمْ اٜ ٻٜ نَنَ طٜيْنغٛلْ تٜدُّنغٛلْ؞ ٻٜ ندُلِّ کٛ ٻٜ مبِعَتَمٛ؞

⁴¹اٛ فُطِّتِ اٛ سٛعِّي تٛ مَٻّٜ تَتَٻُمْ، اٛ وِعِٻٜ، ‏«‏حَا جٛونِ اٛنْ طَانِي، اٛنْ شِوْتٛو؟ طُمْ حٜپِي نٛنْ!‏ شَرٜلْ وَرِي؞ طُمْ حٛکِّتِرِي ٻِي نٜطّٛ ندٜرْ جُوطٜ غَطٛوٻٜ حَکّٜ؞ ⁴²اُمّٜىٰ ندِلّٜنْ!‏ رَا اٛنْ طٛنْ کٛکِّتِرَيْطٛيَمْ اٜ وَرَ؞»‏

طُمْ نَنْغِي يٜىٰسُ

⁴³يٜىٰسُ اٜ مٜتَ، سٜيْ يَحُودَ، غٛعٛتٛ ندٜرْ تٛکُّٻٜمٛ سَڤّٛ اٜ طِطٛ يٛتِّي؞ اٛ وَرْدٛيِ اٜ يِمْٻٜ طُطْٻٜ اٜ ٻٜ نجٛغِي کَافَاجٜ اٜ شَبِّ؞ مَوْٻٜ اَرْدِيٻٜ دِينَ، اٜ مٛودِٻّٜ اَتَّوْرَ، اٜ مَوْٻٜ يِمْٻٜ لِلٛيِٻٜ؞ ⁴⁴تٛو، ندٜنْ مَا کٛکِّتِرَيْطٛ اٛنْ يَادَکٜ وِعِيٻٜ نٛ حٛلِّرْتَٻٜ يٜىٰسُ، اٛ وِعِ، ‏«‏نٜطّٛ مٛ کٛوْنَيْمِ حٛوْنُکِ حِغَاکُ طُمْ کَنْکٛ؞ نَنْغٜىٰمٛ، نغَطٛنْ تَادِيٻٜ نجٛغٛومٛ بٛطُّمْ ندِلِّدَ اٜ مَاکٛ؞»‏

⁴⁵ندٜ يَحُودَ يٛتِّي تٛ ٻٜ نغٛنِ، طٛنْ اٜ طٛنْ اٛ ٻَدِّي يٜىٰسُ، اٛ وِعِمٛ، ‏«‏مٛودِبّٛ!‏»‏ ندٜنْ اٛ حٛوْنِمٛ حٛوْنُکِ حِغَاکُ؞ ⁴⁶سٜيْ يِمْٻٜ ٻٜنْ نَنْغِ يٜىٰسُ ٻٜ نجٛغِيمٛ بٛطُّمْ؞ ⁴⁷اَمَّا غٛعٛتٛ ندٜرْ تٛکُّٻٜ يٜىٰسُ دَرِيطٛ طٛنْ سٛلْتِ کَافَحِ مُوطُمْ فٜعِّ مَشُّطٛ مَوْطٛ مَوْٻٜ اَرْدِيٻٜ دِينَ اِتَّنِمٛ نٛوْرُ؞ ⁴⁸سٜيْ يٜىٰسُ وِعِٻٜ، ‏«‏اٛنْ نغَرْدٛيِ اٜ کَافَاجٜ اٜ شَبِّ نغَمْ نَنْغٛيْيَمْ بٛ غُجّٛ شَلٛرْطٛ؟ ⁴⁹کٛو ندٜيٜ اٜ مِ وٛنْدِ اٜ مٛوطٛنْ، اٜ مِ اٜکِّتِنَ ندٜرْ وُرٛ شٜنِينغٛ، اٛنْ نَنْغَايِيَمْ؞ اَمَّا دٛولٜ کٛ اَايَاجٜ مبِعِ حٜىٰوَ؞»‏

⁵⁰سٜيْ تٛکُّٻٜمٛ فُو اَلِمٛ ندٛغِّ؞

⁵¹غٛطّٛ کَيٜىٰجٛ بٛو اٜ تٛکِّرِ يٜىٰسُ تٛنْ غَطَ، اٛ ٻٛرْنَاکِ غٛطُّمْ، وُدٜرٜ ندٜ شٜىٰدٜ تَنْ اٛ وَانِي؞ ٻٜ نَنْغِمٛ، ⁵²سٜيْ اٛ اَلَنِٻٜ وُدٜرٜ ندٜنْ، اٛ دٛغِّ اٛ ٻٛرْنَاکِ؞

يٜىٰسُ يٜىٰسٛ لَامُ

⁵³ٻٜ نجَارِ يٜىٰسُ تٛ مَوْطٛ مَوْٻٜ اَرْدِيٻٜ دِينَ؞ فُو مَوْٻٜ اَرْدِيٻٜ دِينَ، اٜ مَوْٻٜ يِمْٻٜ، اٜ مٛودِٻّٜ اَتَّوْرَ کَوْرِتِي طٛنْ؞ ⁵⁴بِيتُرُسْ بٛو تٛکِّرِمٛ غَطَ دَغَ تٛ وٛطِّ حَا يَاکِ شَکَ وُرٛ مَوْطٛ مَوْٻٜ اَرْدِيٻٜ دِينَ؞ اٛ جٛوطٛدِي اٜ تَادِيٻٜ وُرٛ شٜنِينغٛ، اٜ مٛ اِرْفٛو حَادٜ حِيتٜ؞ ⁵⁵مَوْٻٜ اَرْدِيٻٜ دِينَ اٜ فُو کَوْتَلْ مَوْٻٜ اٜ ٻٜ طَٻِّتَ شٜيْدَ کٛ ٻٜ نَنْغِرْتَ يٜىٰسُ، نغَمْ ٻٜ کٜٻَ ٻٜ مبَرَمٛ، اَمَّا ٻٜ کٜٻَايِ غٛطُّمْ؞ ⁵⁶يِمْٻٜ طُطْٻٜ مٜتِ حَالَاجِ فٜوْرٜ دٛوْ مَاکٛ، اَمَّا کٛ ٻٜ مبِعِ وَرْدَايِ غٛعٛ؞

⁵⁷سٜيْ وٛٻّٜ اُمِّي ٻٜ مبِعِ حَالَاجِ فٜوْرٜ طِعِ دٛوْ مَاکٛ، ٻٜ مبِعِ، ⁵⁸‏«‏مِنْ نَنِي اٛ وِعِي اٛ سَنْکِتَيْ نغٛعٛ وُرٛ شٜنِينغٛ نغٛ يِمْٻٜ مَحِ، ندٜنْ ندٜرْ بَلْطٜ تَتِ اٛ مَحَ وٛنْغٛ نَاع اٜ جُوطٜ يِمْٻٜ؞»‏ ⁵⁹اَمَّا فُو اٜ نٛنْ کٛ ٻٜ مبِعِ وَرْدَايِ غٛعٛ؞

⁶⁰سٜيْ مَوْطٛ مَوْٻٜ اَرْدِيٻٜ دِينَ اُمِّي دَرِي يٜىٰسٛ مَٻّٜ پَمِ يٜىٰسُ، اٛ وِعِ، ‏«‏اَ وَلَا کٛ مبِعَتَا؟ کٛ ٻٜ مبِعِ دٛوْ مَاطَ طُمْ غٛونغَ؟»‏

⁶¹اَمَّا يٜىٰسُ دٜعِّتِ نٛوتَنَاکِمٛ؞

مَوْطٛ مَوْٻٜ اَرْدِيٻٜ دِينَ اٛنْ فُطِّتِ پَمِ يٜىٰسُ، وِعِ، ‏«‏تٛو، اَنْ وٛنِ اَلْمَسِيحُ، ٻِطّٛ جٛومُ مَنْغُ؟»‏

⁶²يٜىٰسُ نٛوتِي، وِعِ، ‏«‏اٜىٰ، طُمْ مِنْ؞ اٛنْ نغِعَيْ ٻِي نٜطّٛ اٜ جٛوطِي تٛ جُنْغٛ ݧَامٛ نغٛ جٛومُ بَوْطٜ، اٜ مٛ وَرٛيَ ندٜرْ دُولٜ؞»‏ ⁶³سٜيْ مَوْطٛ مَوْٻٜ اَرْدِيٻٜ دِينَ اٛنْ سٜىٰکِ کٛلْتٜ مُوطُمْ وِعِ، ‏«‏طُمٜ شٜيْدَ طَٻِّتٜتٜنْ کَدِنْ؟ ⁶⁴اٛنْ نَنِي نِ حَالَ کَلُّکَ کَ اٛ مٜتِ دٛوْ اَللَّه؞ کٛ وٛنِ شُٻٛلْ مٛوطٛنْ؟»‏

سٜيْ يِمْٻٜ فُو مبِعِ اٜ حَانِ اٛ وَرٜىٰ؞

⁶⁵وٛٻّٜ ڤُطِّ تُتَّنْکِمٛ جٛودٜ، ٻٜ کَٻَّنِمٛ غِتٜ، ٻٜ ڤِيِمٛ، اٜ ٻٜ مبِعَمٛ، ‏«‏وَطُ اَنَّبَاکُ!‏ مٛيٜ فِيِمَا؟»‏ سٜيْ تَادِيٻٜ وُرٛ شٜنِينغٛ کٛشِّمٛ ڤِيِمٛ؞

بِيتُرُسْ وِعِي اَنْدَا يٜىٰسُ

⁶⁶بِيتُرُسْ اٜ شَکَ وُرٛ نغٛنْ، سٜيْ غٛعٛتٛ ندٜرْ حٛرْٻٜ مَوْطٛ مَوْٻٜ اَرْدِيٻٜ دِينَ وَرِ وِغٜىٰرٜ ندٜنْ؞ ⁶⁷ندٜ اٛ يِعِ بِيتُرُسْ اٜ اِرْفٛو، اٛ سُتِيمٛ، اٛ وِعِمٛ، ‏«‏اَنْ مَا، اَ وٛنْدِ اٜ يٜىٰسُ اٛنْ طٛنْ پِوٛيْطٛ غَرِيرِ نَجَرَتْ؞»‏

⁶⁸اَمَّا بِيتُرُسْ يٜدِّ وِعِ، ‏«‏مِنْ مِ اَنْدَا، مِ فَامَايِ کٛ مبِعَتَا؞»‏ بِيتُرُسْ وُرْتِي يَحِ نجَيْرِ دَمُّغَلْ يَاسِ، سٜيْ نجَکَرْدِ حَنِ؞

⁶⁹کٛرْطٛ اٛنْ يِعِ بِيتُرُسْ تٛنْ، اٛ فُطِّتِ اٛ وِعِ دَرِيٻٜ طٛنْ کَمْٻٜ مَا، ‏«‏اٛعٛ نٜطّٛ اٛ غٛعٛتٛ مَٻّٜ!‏»‏ ⁷⁰اَمَّا بِيتُرُسْ فُطِّتِ يٜدِّ؞

غَطَ طٛنْ سٜطَّ، دَرِيٻٜ حَادٜ طٛنْ مبِعِ بِيتُرُسْ، ‏«‏سٜکٛ وَلَا اَنْ مَا اَ غٛعٛتٛ ندٜرْ تٛکُّٻٜمٛ، نغَمْ اَ غَلِلَنْکٜىٰجٛ؞»‏

⁷¹بِيتُرُسْ فُطِّ لَانُکِ حٛورٜ مُوطُمْ حُنِي وِعِ، ‏«‏مِ اَنْدَا نٜطّٛ اٛعٛ مٛ مبِعٛتٛنْ؞»‏

⁷²طٛنْ اٜ طٛنْ نجَکَرْدِ حَنِ طِطَٻُمْ؞ سٜيْ بِيتُرُسْ سِفْتٛرِ کٛ يٜىٰسُ وِعُنٛومٛ وِعُکِ، ‏«‏کٛ نجَکَرْدِ حَنَ ندٜ طِطِ، اَ وِعَيْ اَ اَنْدَايَمْ ندٜ تَتِ؞»‏ ندٜنْ بِيتُرُسْ فُطِّ بٛجِّ؞

يٜىٰسُ يٜىٰسٛ بِلَاتُسْ

¹اِلَا سُبَکَ مَوْٻٜ اَرْدِيٻٜ دِينَ، اٜ مَوْٻٜ يِمْٻٜ، اٜ مٛودِٻّٜ اَتَّوْرَ، اٜ فُو کَوْتَلْ مَوْٻٜ ٻٜ مٜدِّ دٛوْ کٛ ٻٜ نغَطَتَ؞ سٜيْ ٻٜ کَٻِّ يٜىٰسُ ٻٜ ندِلِّدِ اٜ مَاکٛ، ٻٜ تَمْبِنِمٛ بِلَاتُسْ غٛمْنَاجٛ؞ ²بِلَاتُسْ پَمِمٛ، وِعِ، ‏«‏اَنْ وٛنِ لَامِيطٛ يَحُودَنْکٛعٜنْ؟»‏ يٜىٰسُ نٛوتِي، وِعِمٛ، ‏«‏اٜىٰ، اَ وِعِيکَ؞»‏

³مَوْٻٜ اَرْدِيٻٜ دِينَ نغُلّٛرِيمٛ فِي طُطُّمْ؞ ⁴سٜيْ بِلَاتُسْ فُطِّتِ پَمِمٛ، وِعِ، ‏«‏وَلَا کٛ مبِعَتَا؟ رَا ٻٜ نغُلّٛرَکٜمَ فِي طُطُّمْ؞»‏

⁵اَمَّا يٜىٰسُ ٻٜيْدَايِ نٛوتَاکِ، حَا طُمْ حَيْطِنِ بِلَاتُسْ؞

طُمْ تَپَنِي يٜىٰسُ کِيتَ مَيْدٜ

⁶تٛو، اٜ شَرٜلْ حُمْتٛ سَکِّنْکِ بِلَاتُسْ وٛووِي يٛوفَنْکِٻٜ شُرَاطٛ غٛعٛتٛ مٛ ٻٜ تٛرِي؞ ⁷اٜ وٛودِ غٛطّٛ بِعٜتٜىٰطٛ بَرَبَّسْ شُرَاطٛ، کَنْکٛ اٜ وٛٻّٜ شُرَاٻٜ نغَمْ ٻٜ کَٻْدِي اٜ لَامُ، ٻٜ نغَطِي وَرْحٛورٜ ندٜرْ حَوْرٜ ندٜنْ؞ ⁸سٜيْ يِمْٻٜ طُطْٻٜ نغَرِ ٻٜ تٛرِي بِلَاتُسْ وَطَنَٻٜ کٛ اٛ وٛووِ وَطَنْکِٻٜ؞ ⁹بِلَاتُسْ پَمِٻٜ وِعِ، ‏«‏اٛنْ نغِطِ مِ يٛوفَنَعٛنْ لَامِيطٛ يَحُودَنْکٛعٜنْ؟»‏ ¹⁰نغَمْ بِلَاتُسْ فَامِي لَوْلِيرُ وَطِ مَوْٻٜ اَرْدِيٻٜ دِينَ نغَطِ يٜىٰسُ ندٜرْ جُنْغٛ مَاکٛ؞

¹¹اَمَّا مَوْٻٜ اَرْدِيٻٜ دِينَ ٻٜنْ نغَطِ يِمْٻٜ مبِعَ بِلَاتُسْ اٛ يٛوفَنَٻٜ بَرَبَّسْ نَاع يٜىٰسُ؞ ¹²سٜيْ بِلَاتُسْ پَمِٻٜ، وِعِ، ‏«‏تٛو، کٛ نغِطّٛنْ مِ وَطَنَ نٜطّٛ اٛعٛ مٛ نٛدِّرْتٛنْ لَامِيطٛ يَحُودَنْکٛعٜنْ؟»‏

¹³ٻٜ فُو ٻٜ مبِعِ سٜمْبٜىٰ، ‏«‏وَرُمٛ دٛوْ غَافَانغَلْ!‏»‏

¹⁴بِلَاتُسْ پَمِٻٜ، وِعِ، ‏«‏نغَمْ طُمٜ؟ طُمٜ کٛ حَلِّ اٛ وَطِ؟»‏ اَمَّا ٻٜ ٻٜيْدِ وِعُکِ سٜمْبٜىٰ، ‏«‏وَرُمٛ دٛوْ غَافَانغَلْ!‏»‏

¹⁵ندٜ بِلَاتُسْ اٜ يِطِ وَطَ کٛ حَوْرُتُٻٜ ٻٜنْ نغِطِ، اٛ يٛوفَنِٻٜ بَرَبَّسْ؞ اٛ وَطِ طُمْ فِيِ يٜىٰسُ لٛوشِ، ندٜنْ اٛ تَمْبِنِمٛ سٛوجِعٜنْ رٛومَ نغَمْ ٻٜ مبَرٛيَمٛ دٛوْ غَافَانغَلْ؞

سٛوجِعٜنْ نجُکِّتِي يٜىٰسُ

¹⁶سٛوجِعٜنْ ٻٜنْ اَرْدِنِ يٜىٰسُ يَاکِ لَامٛرْدٜ غٛمْنَاجٛ بِعٜتٜىٰندٜ ‏«‏فِرٜتٛورِيُمْ؞»‏ ٻٜ نٛدِّ فُو سٛوجِعٜنْ کٛرِيٻٜ ٻٜ کَوْرِتِٻٜ؞ ¹⁷ٻٜ ٻٛرْنِمٛ اِرِ تٛغّٛورٜ لَامِيٻٜ، ندٜنْ ٻٜ مبَالِ غِيفٛلْ غِعٜ، ٻٜ تَارَنِمٛنغٛلْ تٛ حٛورٜ؞ ¹⁸سٜيْ ٻٜ ڤُطِّ حٛوْنُکِمٛ، اٜ ٻٜ مبِعَ، ‏«‏اَللَّه رٜىٰنٜ، لَامِيطٛ يَحُودَنْکٛعٜنْ!‏»‏ ¹⁹ٻٜ نغَطِ کَ ڤِيرُکِمٛ سَوْرُ تٛ حٛورٜ؞ اٜ ٻٜ تُتَّنَمٛ جٛودٜ؞ ٻٜ ندِشِّي يٜىٰسٛ مَاکٛ بٛ ٻٜ کٛکَّيْمٛ مَنْغُ؞ ²⁰غَطَ ٻٜ نجُکِّتِيمٛ، ٻٜ ٻٛرْتِمٛ تٛغّٛورٜ لَامِيٻٜ ندٜ ٻٜ ٻٛرْنُنٛومٛ، ندٜنْ ٻٜ ٻٛرْنِمٛ کٛلْتٜ مَاکٛ؞ سٜيْ ٻٜ مبُرْتِنِمٛ ٻٜ اَرْدِنِمٛ نغَمْ ٻٜ مبَرٛيَمٛ دٛوْ غَافَانغَلْ؞

يٜىٰسُ وَرَامَ دٛوْ غَافَانغَلْ

²¹غٛطّٛ نٜطّٛ سَايِرَنْکٜىٰجٛ اٜ پَٻّٛو بِعٜتٜىٰطٛ سِيمَنْ، ݧَاکٛ اَلِجَنْدَ اٜ رُوفُسْ؞ اٛ پِوٛيْطٛ ندٜرْ لَدّٜ اٜ مٛ نَتّٛيَ غَرِيرِ ندِنْ؞ سٜيْ ٻٜ نغَطِمٛ اٜ سٜمْبٜ اٛ حٛشَّ غَافَانغَلْ يٜىٰسُ؞ ²²ٻٜ نجَارِ يٜىٰسُ وٛنْدٜ وِغٜىٰرٜ بِعٜتٜىٰندٜ غٛلْغٛوتَ، وَاتٛ ‏«‏وِغٜىٰرٜ پِپَلْ حٛورٜ؞»‏ ²³ندٜنْ ٻٜ کٛکِّمٛ ندِيَمْ اِنَبٛجَمْ جِلِّندِرَاطَمْ اٜ مُرْ نغَمْ اٛ يَرَ، اَمَّا اٛ يَرَايِطَمْ؞ ²⁴سٜيْ، ٻٜ ڤِيَنِمٛ کُوسَاجٜ دٛوْ غَافَانغَلْ؞ ندٜنْ ٻٜ شٜنْدِ کٛلْتٜ مَاکٛ حَکُّندٜ مَٻّٜ، ٻٜ نغَطِ شَاشَ نغَمْ ٻٜ نغِعَ کٛ کٛو مٛيٜ حٜٻَتَ؞ ²⁵شَرٜلْ نغٜلْ ٻٜ ڤِيَنِمٛ کُوسَاجٜ دٛوْ غَافَانغَلْ طُمْ نجَمْندِ جٛوٜىٰنَيِ سُبَکَ؞ ²⁶دٛوْ حٛورٜ غَافَانغَلْ نغَلْ طُمْ تَکِّ اَلّٛوَلْ؞ طُمْ وِنْدِ دٛوْ مَاغَلْ کٛ طُمْ وُلّٛرِيمٛ وِعُکِ، ‏«‏لَامِيطٛ يَحُودَنْکٛعٜنْ؞»‏ ^27‏-28کَدِنْ ٻٜ ڤِيَنِ وُيْٻٜ طِطٛ کُوسَاجٜ دٛوْ غَافَالٜ حَادٜ يٜىٰسُ، غٛعٛتٛ اٜ جُنْغٛ مَاکٛ ݧَامٛ، غٛعٛتٛ اٜ جُنْغٛ مَاکٛ نَنٛ؞ ²⁹يِمْٻٜ پَٻّٛتٛوٻٜ اٜ کُطَ يٜىٰسُ اٜ ٻٜ نغِيلَ کٛعٜ، اٜ ٻٜ مبِعَ، ‏«‏تٛو!‏ اَنْ غِطّٛ ڤُسُکِ وُرٛ شٜنِينغٛ مَحِتٛطَانغٛ ندٜرْ بَلْطٜ تَتِ، ³⁰جِڤّٛيَ دَغَ دٛوْ غَافَانغَلْ کِسْنَا حٛورٜ مَاطَ!‏»‏

³¹نٛنْ مَا مَوْٻٜ اَرْدِيٻٜ دِينَ اٜ مٛودِٻّٜ اَتَّوْرَ ٻٜ نجُکِّتِمٛ حَکُّندٜ مَٻّٜ، اٜ ٻٜ مبِعَ، ‏«‏اٛ حِسْنِي وٛٻّٜ، اَمَّا اٛ وَاوَايِ حِسْنُکِ حٛورٜ مَاکٛ؞ ³²اَلْ اٛعٛ بِعٛووٛ کَنْکٛ وٛنِ اَلْمَسِيحُ، لَامِيطٛ اِسْرَاعِيلَ، اٛ جِڤّٛيٛو جٛونِ دَغَ دٛوْ غَافَانغَلْ نغَمْ نغِعٜنْ کٛولٛوطٜنْمٛ؞»‏

ٻٜنْ طٛنْ وُيْٻٜ ٻٜ طُمْ ڤِيَنِ کُوسَاجٜ دٛوْ غَافَالٜ مَا کُطِمٛ؞

مَيْدٜ يٜىٰسُ

³³شَکَ ݧَلَوْمَ، سٜيْ ݧِوْرٜ مَٻِّ لٜيْدِ فُو حَا يَاکِ نجَمْندِ تَتِ ندِ اَلَاسَرَ؞ ³⁴اٜ نجَمْندِ تَتِ ندِنْ، سٜيْ يٜىٰسُ وِعِ اٜ سٜمْبٜ، ‏«‏اٜلٛيْ، اٜلٛيْ، لَمَ سَبَتَّنِ؟»‏ وَاتٛ، ‏«‏يَا اَللَّه اَمْ، يَا اَللَّه اَمْ، نغَمْ طُمٜ شٜنْدِرْطَا اٜ اَمْ؟»‏

³⁵ندٜ وٛٻّٜ دَرِيٻٜ تٛ وِغٜىٰرٜ ندٜنْ نَنِ نٛنْ، ٻٜ مبِعِ، ‏«‏نَنٜىٰ، اٜ مٛ نٛدَّ اَنَّبِ اِلِيَ؞»‏ ³⁶سٜيْ غٛعٛتٛ مَٻّٜ دٛغِّ سٛفْنِ سٛوسٛوَ ندٜرْ ندِيَمْ اِنَبٛجَمْ لَمُّطَمْ، اٛ طِيسِنغَ تٛ سَوْرُ، اٛ حٛکِّ يٜىٰسُ يَرَ؞ اٛ وِعِ، ‏«‏اَلٜىٰ نغِعٜنْ کٛو اِلِيَ وَرَيْ جِڤِّنَمٛ؞»‏

³⁷سٜيْ يٜىٰسُ وُلِّ سٜمْبٜىٰ، ندٜنْ مَايِ؞

³⁸سٜيْ وُدٜرٜ شٜنْدُندٜ سُودُ جٛومِرَاوٛ سٜىٰکِ طِطِ دَغَ دٛوْ يَاکِ لٜيْ؞ ³⁹مَوْطٛ سٛوجِعٜنْ دَرِيطٛ طٛنْ اٜ رَارَ يٜىٰسُ؞ ندٜ اٛ يِعِ نٛ يٜىٰسُ فٛفْتِرِ فٛوفَانغٛ شَکِتِينغٛ، مَايِ، اٛ وِعِ، ‏«‏غٛونغَ، نٜطّٛ اٛعٛ اٛ ٻِطّٛ اَللَّه!‏»‏ ⁴⁰اٜ وٛودِ وٛٻّٜ رٜوْٻٜ اٜ ٻٜ ندَارَ دَغَ تٛ وٛطِّ؞ ندٜرْ مَٻّٜ اٜ وٛودِ مَرْيَامَ پِوٛيْطٛ مَغَدَلَ، اٜ مَرْيَامَ مَدُوجٛ يَاکُبُ ڤَمَرٛ، اٜ يُسُفُ، اٜ سَلٛومِ؞ ⁴¹ٻٜعٜ رٜوْٻٜ کَمْٻٜ تٛکَّيْنٛو يٜىٰسُ، اٜ ٻٜ مبَلَّمٛ کٛ اٛ وٛنّٛو لٜيْدِ غَلِيلِ؞ اٜ وٛودِ رٜوْٻٜ طُطْٻٜ فٜىٰرٜ غَرْدٛيْٻٜ اُرُشَلِيمَ اٜ مَاکٛ اٜ ٻٜ طٛنْ طُمْ کَمْٻٜ مَا؞

اُوُکِ يٜىٰسُ

⁴²طُمْ اَلَاسَرَ ݧَلْندٜ سِرْيَاکِ، وَاتٛ تٛ فِنِي طُمْ ݧَلْندٜ سِوْتَارٜ؞ ⁴³نغَمْ مَاجُمْ يُسُفُ پِوٛيْطٛ غَرِيرِ اَرْمَاتِيَ، اٛ وَطِ سٜمْبٜ ٻٜرْندٜ، اٛ يَحِ تٛ بِلَاتُسْ، اٛ تٛرِيمٛ اٛ حٛکَّمٛ ٻَنْدُ يٜىٰسُ؞ يُسُفُ اٛ نٜطّٛ مٛ طُمْ حٛکَّتَ مَنْغُ ندٜرْ کَوْتَلْ مَوْٻٜ، کَنْکٛ مَا اٛ حَاٻِي يِعُکِ غَرٛلْ لَامُ اَللَّه؞ ⁴⁴بِلَاتُسْ حَيْطِنِ ندٜ نَنِ يٜىٰسُ يَادَکٜ مَايِي؞ اٛ نٛدِّ مَوْطٛ سٛوجِعٜنْ، اٛ پَمِمٛ کٛو طُمْ نٛنْ؞ ⁴⁵ندٜ اٛ نَنِ تٛ حٛنْدُکٛ مَوْطٛ سٛوجِعٜنْ اٛنْ يٜىٰسُ يَادَکٜ مَايِ، سٜيْ اٛ جَٻِ يُسُفُ حٛشَّ ٻَنْدُ ندُنْ؞ ⁴⁶سٜيْ يُسُفُ سٛودٛيِ وُدٜرٜ ندٜ شٜىٰدٜ، اٛ وَطِ طُمْ جِڤِّنِ ٻَنْدُ يٜىٰسُ، اٛ تَارِندُ اٜ وُدٜرٜ ندٜنْ، اٛ فُکِّنٛيِندُ ندٜرْ يٜنَاندٜ غَسَاندٜ ندٜرْ حَيْرٜ؞ اٛ تَلِّتِ کَاپَ مَنْغَ اٛ مَٻِّ دَمُّغَلْ يٜنَاندٜ ندٜنْ؞ ⁴⁷مَرْيَامَ پِوٛيْطٛ مَغَدَلَ اٜ مَرْيَامَ مَدُوجٛ يُسُفُ ٻٜ نغِعِ تٛ طُمْ فُکِّنِ ٻَنْدُ يٜىٰسُ؞

اُمَّاکِ يٜىٰسُ دَغَ مَيْدٜ

¹ندٜ ݧَلْندٜ سِوْتَارٜ پَٻِّي، مَرْيَامَ پِوٛيْطٛ مَغَدَلَ، اٜ مَرْيَامَ مَدُوجٛ يَاکُبُ، اٜ سَلٛومِ ٻٜ شٛودِ نٜبَّمْ اُرٛوجَمْ مبٜلْطَمْ نغَمْ ٻٜ نجَحَ ٻٜ مٛيْتَنَ ٻَنْدُ يٜىٰسُ؞ ²ݧَلْندٜ اَلَلْ سُبَکَ غَطَ نَانغٜ فُطِي، اٜ ٻٜ دٛوْ لَاوٛلْ يَاکِ تٛ يٜنَاندٜ ندٜنْ، ³اٜ ٻٜ مبِعَ حَکُّندٜ مَٻّٜ، ‏«‏مٛيٜ تَلِّتَنْتَعٜنْ کَاپَ مَنْغَ نغَ طُمْ مَٻِّرِ دَمُّغَلْ يٜنَاندٜ ندٜنْ؟»‏ ⁴اَمَّا ندٜ ٻٜ ندَارِ ٻٜ نغِعِ طُمْ يَادَکٜ طُمْ تَلِّتِي کَاپَ نغَنْ؞ ⁵ندٜ ٻٜ نَتِّ يٜنَاندٜ ندٜنْ، ٻٜ نغِعِ غٛطّٛ کَيٜىٰجٛ اٜ جٛوطِي وُتُّدُ ݧَامٛ؞ اٜ مٛ ٻٛرْنِي کٛلْتٜ دَنٜىٰجٜ تَرْ، سٜيْ ٻٜ کُلْتٛرِ؞

⁶کَيٜىٰجٛ اٛنْ وِعِٻٜ، ‏«‏تٛع اٛنْ کُلُ؞ اٛنْ طَٻِّتَ يٜىٰسُ نَجَرَنْکٜىٰجٛ بَرَاطٛ دٛوْ غَافَانغَلْ؞ طُمْ اُمِّنِيمٛ دَغَ مَيْدٜ!‏ اٛ وَلَا طٛعٛ؞ رَا تٛ طُمْ فُکِّنّٛومٛ؞ ⁷اَمَّا نجَحٜىٰ مبِعٛنْ تٛکُّٻٜمٛ، حَا اٜ بِيتُرُسْ، اٛ اَرْتَيْعٛنْ يَاکِ لٜيْدِ غَلِيلِ؞ تٛنْ نغِعٛتٛنْمٛ نٛنْ نٛ اٛ وِعُنٛوعٛنْ؞»‏

⁸کُلٛلْ نَنْغِٻٜ اٜ ٻٜ ندِوْنَ ٻٜ مبُرْتِي دَغَ ندٜرْ يٜنَاندٜ ندٜنْ ٻٜ ندٛغِّ؞ ٻٜ مبِعَايِ غٛطّٛ کٛو طُمٜ نغَمْ اٜ ٻٜ کُلَ؞

يٜىٰسُ وَنْغَنِي مَرْيَامَ پِوٛيْطٛ مَغَدَلَ

⁹‏[‏سُبَکَ ݧَلْندٜ اَلَلْ يٜىٰسُ اُمِّي دَغَ مَيْدٜ؞ غَطَ اٛ اُمَّکٜ اٛ اَرْتِ وَنْغَنْکِ مَرْيَامَ پِوٛيْطٛ مَغَدَلَ مٛ اٛ وُرْتِنَنِ غِنِّ جٛوٜىٰطِطِ؞ ¹⁰سٜيْ مَرْيَامَ اٛنْ يَحِ وِعِکَ ٻٜنْ طٛنْ غٛنْدُنٛوٻٜ اٜ مَاکٛ، اٛ تَوِٻٜ ندٜرْ وَنَّارٜ اٜ ٻٜ مبٛيَ؞ ¹¹اَمَّا ندٜ ٻٜ نَنِ يٜىٰسُ اٜ وٛودِ يٛنْکِ، طٛنْمَا مَرْيَامَ اٛنْ يِعِيمٛ، ٻٜ نجَٻَايِکَ؞

يٜىٰسُ وَنْغَنِي تٛکُّٻٜمٛ طِطٛ

¹²غَطَ مَاجُمْ وٛٻّٜ تٛکُّٻٜمٛ طِطٛ اٜ ٻٜ دٛوْ لَاوٛلْ ندٜرْ لَدّٜ يَاکِ وٛنْغٜلْ غَرِيٜلْ، سٜيْ يٜىٰسُ وَنْغَنِٻٜ ندٜرْ نَنْدِ فٜىٰرٜ؞ ¹³سٜيْ ٻٜ شٛعِّي ٻٜ مبِعِکَ حٛرِيٻٜ، اَمَّا ٻٜ نجَٻَايِ کٛ ٻٜ مبِعِ کَمْٻٜ مَا؞

کُوغَلْ نغَلْ يٜىٰسُ حٛکِّ تٛکُّٻٜمٛ

¹⁴دَغَ غَطَ يٜىٰسُ وَنْغَنِ تٛکُّٻٜمٛ سَڤّٛ اٜ غٛعٛ اٜ شَرٜلْ نغٜلْ اٜ ٻٜ ݧَامَ ݧَمْندُ؞ سٜيْ اٛ حَٻَنِٻٜ نغَمْ شِيَ حٛولَارٜ مَٻّٜ اٜ ٻٜرْطٜ شَاتُطٜ طٜ ٻٜ نغٛودِ، نغَمْ ٻٜ نجَٻَايِ کٛ غِيٻٜمٛ غَطَ اٛ اُمَّکٜ مبِعِٻٜ؞ ¹⁵ندٜنْ اٛ وِعِٻٜ، ‏«‏نجَحٜىٰ کٛو تٛيٜ ندٜرْ دُونِيَارُ نغَعَجِنَنٛنْ کٛو مٛيٜ حَبَرُ بٜلْطُمْ؞ ¹⁶کٛو مٛيٜ کٛولِيطٛيَمْ وَطَنَا بَڤْتِسْمَ اٛ حِسَيْ، اَمَّا فُو مٛ حٛولَاکِيَمْ طُمْ تَپَنَيْمٛ کِيتَ؞ ¹⁷فُو کٛولِيٻٜيَمْ ٻٜ نغَطَيْ کُوطٜ کٛلَّيْطٜ اٜ ٻٜ نغٛودِ بَوْطٜ اَللَّه؞ ندٜرْ اِنْدٜ اَمْ ٻٜ مبُرْتِنَيْ غِنِّ، ٻٜ نغَطَيْ دٛعَارٜ ندٜرْ طٜمْطٜ طٜ ٻٜ اَنْدَا؞ ¹⁸ٻٜ نَنْغَيْ بٛولٜ اٜ جُوطٜ مَٻّٜ، ندٜنْ تٛ ٻٜ نجَرِي تٛوکٜ، طٜ نغَطَنْتَاٻٜ غٛطُّمْ؞ ٻٜ بٛو نجٛوَنَيْ ݧَوْٻٜ جُوطٜ، ݧَوْٻٜ ٻٜنْ نجَمْطِتَ؞»‏

يٜىٰسُ حٛشَّامَ دٛوْ

¹⁹غَطَ يٜىٰسُ جٛومِرَاوٛ مٜتَنِيٻٜ، اٛ حٛشَّا يَاکِ دٛوْ، اٛ جٛوطِي جُنْغٛ ݧَامٛ نغٛ اَللَّه؞ ²⁰سٜيْ تٛکُّٻٜمٛ ٻٜنْ ندِلِّ ٻٜ نغَعَجِنٛيِ حَبَرُ بٜلْطُمْ کٛو تٛيٜ؞ جٛومِرَاوٛ وَلِّٻٜ، اٛ حٛکِّٻٜ بَوْطٜ وَطُکِ کُوطٜ کَيْطِنِيطٜ نغَمْ تَبِّتِنْکِ کٛ ٻٜ مبِعَتَ تٛ مَاکٛ طُمْ پِوٛيِ؞]‏