مَاتِيُ

حَبَرُ يٜىٰسُ طُمْ

مَاتِيُ

وِنْدِ

حَبَرُ دٛوْ طٜرٜوٛلْ نغٛعٛلْ

غٛعٛتٛ ندٜرْ لِلَاٻٜ يٜىٰسُ سَڤّٛ اٜ طِطٛ بِعٜتٜىٰطٛ مَاتِيُ وِنْدِ طٜرٜوٛلْ نغٛعٛلْ؞ طٜرٜوٛلْ نغٛعٛلْ اٜ حٛلَّ يٜىٰسُ وٛنِ اَلْمَسِيحُ مٛ اَلْکَوَلْ کِينغَلْ وَطِ اَلْکَوَلْ اٛ وَرَيْ؞ مَاتِيُ اٛ يَحُودَنْکٜىٰجٛ، ندٜنْ اٜ مٛ مٜتَ دٛوْ کٛ يَحُودَنْکٛعٜنْ مبٛووِ، وَاتٛ اَتَّوْرَ اٜ سَکَّنْکِ اَللَّه اٜ دِينَ مَٻّٜ؞ اٛ حٛلِّي يٜىٰسُ وٛنِ کِسْنٛووٛ مٛ يَحُودَنْکٛعٜنْ اٜ کٛو مٛيٜ کٜطِي غَرٛلْ مُوطُمْ؞ طُعُمْ حَبَرُ طُمْ حَبَرُ بٜلْطُمْ نغَمْ کٛو مٛيٜ؞

طٜرٜوٛلْ نغٛعٛلْ نغٛلْ سِرْيَامَ بٛطُّمْ؞ نغٛلْ فُطِّرِي اٜ حَبَرُ لٜݧٛلْ يٜىٰسُ؞ لٜݧٛلْ مَاکٛ حٛلِّي اٛ حٜبِّنِي اَنَّبَاکُ طُمْ اَنَّبٛعٜنْ نغَطِ دٛوْ اَلْمَسِيحُ؞ طٜرٜوٛلْ نغٛلْ حٛلِّي دَݧْنغٛلْ مَاکٛ اٜ نٛ دَݧْنغٛلْ نغٛلْ وٛودِرِ تٜدُّنغَلْ اَللَّه؞ طٛنْمَا نغٛلْ حٛلِّي بَڤْتِسْمَ مَاکٛ، اٜ نٛ اٛ فٛوندِرَا، اٜ نٛ اٛ وَعَجِنِرِ، اٜ نٛ اٛ اٜکِّتِنِرِ، اٜ نٛ اٛ يَمْطِتِنِرِ يِمْٻٜ؞ ندٜنْ نغٛلْ حٛلِّي نٛ اٛ تٛرِّرَا اٜ نٛ اٛ وَرِرَا دٛوْ غَافَانغَلْ نغَمْ حَکّٜ يِمْٻٜ فُو؞ طٛنْمَا نغٛلْ حٛلِّي اٛ اُمَّکٜ دَغَ مَيْدٜ؞

مَامَعٜنْ يٜىٰسُ

¹طٜعٜ نغٛنِ اِنْطٜ مَامَعٜنْ يٜىٰسُ اَلْمَسِيحُ لٜݧٛلْ دَوْدَ، دَوْدَ لٜݧٛلْ اِبْرَاهِمْ؞

²اِبْرَاهِمْ دَݧِ اِشِيَاکُ، ندٜنْ اِشِيَاکُ دَݧِ يَاکُبُ، ندٜنْ يَاکُبُ دَݧِ يَحُودَ اٜ سَکِرَاٻٜ مَاکٛ، ³يَحُودَ دَݧِ فٜرٜسَ اٜ جٜىٰرَ، مَدُوجٛ جٜىٰرَ وٛنِ تَامَرْ، فٜرٜسَ دَݧِ حٜسٜرُونَ، حٜسٜرُونَ دَݧِ اَرَمْ، ⁴اَرَمْ دَݧِ اَمِينَدَبْ، اَمِينَدَبْ دَݧِ نَاشٛنْ، نَاشٛنْ دَݧِ سَلْمٛنْ، ⁵سَلْمٛنْ دَݧِ بٛعَاجَ، مَدُوجٛ بٛعَاجَ وٛنِ رَحَبْ، بٛعَاجَ دَݧِ اٛبِدَ، مَدُوجٛ اٛبِدَ وٛنِ رُتْ، اٛبِدَ دَݧِ جٜىٰسِ، ⁶جٜىٰسِ دَݧِ دَوْدَ لَامِيطٛ، دَوْدَ لَامِيطٛ دَݧِ سُلٜيْمَانُ، مَدُوجٛ سُلٜيْمَانُ وٛنِ دٜبّٛ اُرِيَ ندٜنّٛ، ⁷سُلٜيْمَانُ دَݧِ رٜحٛبٛوَمْ، رٜحٛبٛوَمْ دَݧِ اَبِجَ، اَبِجَ دَݧِ اَاسَ، ⁸اَاسَ دَݧِ جٜحٛوشَفَتْ، جٜحٛوشَفَتْ دَݧِ جٛورَمْ، جٛورَمْ دَݧِ اَجَارِيَ، ⁹اَجَارِيَ دَݧِ جٛوتَمَ، جٛوتَمَ دَݧِ اَحَسْ، اَحَسْ دَݧِ حٜجٜکَايَ، ¹⁰حٜجٜکَايَ دَݧِ مَنَاسٜ، مَنَاسٜ دَݧِ اَمٛنْ، اَمٛنْ دَݧِ جٛوسَيَ، ¹¹جٛوسَيَ دَݧِ جٜکٛونِيَ اٜ سَکِرَاٻٜ مَاکٛ وٛرْٻٜ، شَرٜلْ کٛ يَحُودَنْکٛعٜنْ نَنْغَا نجَارَا لٜيْدِ بَابِيلَ؞

¹²غَطَ طُمْ يَارِيٻٜ لٜيْدِ بَابِيلَ، جٜکٛونِيَ دَݧِ شٜيَلْتِيَلْ، شٜيَلْتِيَلْ دَݧِ جَرُوبَبٜلْ، ¹³جَرُوبَبٜلْ دَݧِ اَبِيحُدُ، اَبِيحُدُ دَݧِ اٜلِيَاکِمْ، اٜلِيَاکِمْ دَݧِ اَاجٛرٛ، ¹⁴اَاجٛرٛ دَݧِ جَادٛکْ، جَادٛکْ دَݧِ اَاکِمْ، اَاکِمْ دَݧِ اَلِييُدُ، ¹⁵اَلِييُدُ دَݧِ اٜلٜيَاجَرْ، اٜلٜيَاجَرْ دَݧِ مَتَانَ، مَتَانَ دَݧِ يَاکُبُ، ¹⁶يَاکُبُ دَݧِ يُسُفُ غٛرْکٛ مَرْيَامَ، مَرْيَامَ دَݧِ يٜىٰسُ بِعٜتٜىٰطٛ اَلْمَسِيحُ؞

¹⁷اٜ وٛودِ مَامَعٜنْ سَڤّٛ اٜ نَيٛ دَغَ جَامَنُ اِبْرَاهِمْ يَاکِ جَامَنُ دَوْدَ؞ اٜ وٛودِ مَامَعٜنْ سَڤّٛ اٜ نَيٛ دَغَ جَامَنُ دَوْدَ يَاکِ شَرٜلْ نغٜلْ يَحُودَنْکٛعٜنْ نجَارَا مَشُّنغَاکُ تٛ لٜيْدِ بَابِيلَ؞ اٜ وٛودِ مَامَعٜنْ سَڤّٛ اٜ نَيٛ دَغَ شَرٜلْ نغٜلْ يَحُودَنْکٛعٜنْ نجَارَا مَشُّنغَاکُ تٛ لٜيْدِ بَابِيلَ يَاکِ دَݧْنغٛلْ اَلْمَسِيحُ؞

دَݧْنغٛلْ يٜىٰسُ اَلْمَسِيحُ

¹⁸رَا نٛ يٜىٰسُ اَلْمَسِيحُ دَݧِرَا؞ مَدُوجٛ مَاکٛ مَرْيَامَ وَادِ اَلْکَوَلْ تٜىٰغَلْ اٜ يُسُفُ؞ اَمَّا کٛ ٻٜ نغَطَ تٜىٰغَلْ، سٜيْ اٛ تَوْرَا رٜىٰدُ دَغَ تٛ رُوحُ اَللَّه؞ ¹⁹ندٜ يُسُفُ اٛ نٜطّٛ اَادِلِيجٛ، اٛ يِطَا اٛ سٜمْتِنَمٛ اٜ نجَيْرِ؞ اٛ دَرْوِ اٛ يٛوفَمٛ اٜ سُوطٜ؞ ²⁰اَمَّا شَرٜلْ نغٜلْ اٛ ݧُمَتَ دٛوْ مَاجُمْ، مَلَاعِکَاجٛ جٛومِرَاوٛ وَنْغَنِمٛ ندٜرْ کٛيْطٛلْ، وِعِمٛ، ‏«‏يُسُفُ ٻِي دَوْدَ، تَاع حُلُ تٜعُکِ مَرْيَامَ، نغَمْ ٻِنْغٜلْ نغٜلْ اٛ سَاوِ دَغَ تٛ رُوحُ اَللَّه نغٜلْ پِوٛيِ؞ ²¹اٛ دَݧَيْ ٻِطّٛ غٛرْکٛ ندٜنْ اَ نٛدَّيْمٛ يٜىٰسُ، نغَمْ اٛ حِسْنَيْ يِمْٻٜ مَاکٛ دَغَ حَکّٜ مَٻّٜ؞»‏

²²فُو فِي طُعُمْ طُمْ وَطِ نغَمْ طُمْ حٜبِّنَ کٛ جٛومِرَاوٛ وِعِ دَغَ حٛنْدُکٛ اَنَّبِيجٛ، اٛ وِعِ، ²³‏«‏رَطُّمْ، سُرْبَاجٛ مٛ اَنْدَا غٛرْکٛ دَݧَيْ ٻِطّٛ غٛرْکٛ، ندٜنْ طُمْ نٛدَّيْ اِنْدٜ مَاکٛ اِمَانُوٜلْ؞»‏ مَعَنَ اِمَانُوٜلْ وٛنِ، ‏«‏اَللَّه اٜ وٛنْدِ اٜ مٜىٰطٜنْ؞»‏

²⁴ندٜ يُسُفُ اُمِّي دَغَ طٜيْنغٛلْ نغٛلْ، سٜيْ وَطِ کٛ مَلَاعِکَاجٛ جٛومِرَاوٛ اٛنْ وِعِمٛ، اٛ تٜعِ مَرْيَامَ؞ ²⁵اَمَّا اٛ اَنْدَامٛ نَاکِ غَطَ اٛ دَݧِ ٻِطّٛ مَاکٛ؞ ندٜنْ يُسُفُ نٛدِّ ٻِطّٛ اٛنْ يٜىٰسُ؞

غَرٛلْ اَنْدَنْٻٜ کٛودٜ

¹غَطَ يٜىٰسُ دَݧَامَ اٜ غَرِيرِ بَيْتَلَامِ ندٜرْ لٜيْدِ يَحُودِيَ، ندٜرْ شَرٜلْ نغٜلْ حِرُدُسْ لَامٛتٛ، وٛٻّٜ اَنْدَنْٻٜ کٛودٜ دَغَ فُونَ ٻٜ نغَرِ اُرُشَلِيمَ، ²اٜ ٻٜ پَمَ، ‏«‏تٛيٜ اٛنْ طٛنْ دَݧَاطٛ لَامِيطٛ يَحُودَنْکٛعٜنْ؟ نغَمْ مِنْ نغِعِ حٛودٜرٜ مَاکٛ دَغَ فُونَ، مِنْ نغَرِي مِنْ مَوْنِنَمٛ؞»‏

³ندٜ حِرُدُسْ لَامِيطٛ نَنِ نٛنْ، اٛ وَنِّ، کَنْکٛ اٜ يِمْٻٜ اُرُشَلِيمَ طُطْٻٜ؞ ⁴سٜيْ اٛ نٛدِّ مَوْٻٜ اَرْدِيٻٜ دِينَ اٜ مٛودِٻّٜ اَتَّوْرَ، اٛ پَمِٻٜ، ‏«‏تٛيٜ اَلْمَسِيحُ دَݧٜتٜىٰ؟»‏

⁵ٻٜ مبِعِمٛ، ‏«‏ندٜرْ غَرِيرِ بَيْتَلَامِ ندٜرْ لٜيْدِ يَحُودِيَ؞ نغَمْ رَا کٛ اَنَّبِيجٛ وِنْدِ،

⁶‏‹‏اَمَّا، اَنْ، غَرِيٜلْ بَيْتَلَامِ غٛنْغٜلْ ندٜرْ لٜيْدِ يَحُودَ،

اَنْ اَ غَرِيٜلْ غٛودُنغٜلْ تٜدُّنغَلْ ندٜرْ لٜيْدِ ندِنْ،

نغَمْ دَغَ ندٜرْ مَاطَ غٛطّٛ لَامِيطٛ پِوٛيْتَ،

کَنْکٛ وَرْتَتَ غَيْنَاکٛ يِمْٻٜ اَمْ اِسْرَاعِيلَنْکٛعٜنْ؞›‏ »‏

⁷سٜيْ حِرُدُسْ نٛدِّ ٻٜنْ طٛنْ اَنْدَنْٻٜ کٛودٜ اٜ سُوطٜ، اٛ پَمِٻٜ شَرٜلْ نغٜلْ ٻٜ نغِعِ حٛودٜرٜ ندٜنْ، ٻٜ مبِعِمٛکَ؞ ⁸سٜيْ اٛ لِلِٻٜ بَيْتَلَامِ، اٛ وِعِ، ‏«‏نجَحٜىٰ طَٻِّتٛنْ ٻِنْغٜلْ نغٜلْ بٛطُّمْ؞ تٛ اٛنْ نغِعِينغٜلْ، نغَرٛنْ مبِعٛنْيَمْکَ، نغَمْ مِنْ مَا مِ يَحَ مِ مَوْنِنَنغٜلْ؞»‏

^9‏-10ندٜ ٻٜ نَنِ کٛ لَامِيطٛ اٛنْ وِعِ، سٜيْ ٻٜ نَنْغِ لَاوٛلْ؞ ندٜ ٻٜ نغِعِ حٛودٜرٜ ندٜنْ، ٻٜ نَنِ بٜلْطُمْ نَاع سٜطَّ؞ حٛودٜرٜ ندٜنْ اَرْدِيٻٜ نَاکِ ندٜ دَرِ دٛوْ تٛ ٻِنْغٜلْ نغٜلْ وٛنِ؞ ¹¹ندٜ ٻٜ نَتِّ وُرٛ نغٛنْ، ٻٜ تَوِ ٻِنْغٜلْ نغٜلْ اٜ مَرْيَامَ مَدُوجٛ مَاغٜلْ؞ ٻٜ ندِشِّ ٻٜ مَوْنِنِنغٜلْ، ندٜنْ ٻٜ ڤِتِّ دٛݝْلٜ مَٻّٜ ٻٜ کٛکِّنغٜلْ شَاحُ جِينَارِ، اٜ اُرْدٜ وٜلْندٜ بِعٜتٜىٰندٜ فِرَنْکِسٜنْ، اٜ نٜبَّمْ اُرٛوجَمْ بِعٜتٜىٰطَمْ مُرْ؞

¹²ندٜ اَللَّه حَطِيٻٜ ندٜرْ کٛيْطٛلْ تٛع ٻٜ شٛعّٛو تٛ حِرُدُسْ، سٜيْ ٻٜ تٛکِّ لَاوٛلْ فٜىٰرٜ ٻٜ شٛعِّ لٜيْدِ مَٻّٜ؞

دٛغُّکِ يَاکِ لٜيْدِ مَسَرْ

¹³غَطَ اَنْدَنْٻٜ کٛودٜ ٻٜنْ ندِلِّ، سٜيْ مَلَاعِکَاجٛ جٛومِرَاوٛ وَنْغَنِ يُسُفُ ندٜرْ کٛيْطٛلْ، وِعِمٛ، ‏«‏اُمَّ کٛشَّا ٻِنْغٜلْ نغٜلْ اٜ مَدُوجٛ مَاغٜلْ ندٛغَّا نجَحَا لٜيْدِ مَسَرْ؞ نجٛوطٜىٰ تٛنْ نَا مِ وِعِيعٛنْ نغَرْتٛنْ، نغَمْ حِرُدُسْ اٜ يِطِ طَٻِّتَ ٻِنْغٜلْ نغٜلْ نغَمْ اٛ وَرَنغٜلْ؞»‏

¹⁴يُسُفُ اُمِّي حٛشِّ ٻِنْغٜلْ نغٜلْ اٜ مَدُوجٛ مَاغٜلْ شَکَ جٜمَّ، اٛ دِلِّ لٜيْدِ مَسَرْ؞ ¹⁵تٛنْ ٻٜ نجٛوطِ نَاکِ حِرُدُسْ مَايِ؞ نٛنْ وَطِي نغَمْ طُمْ حٜبِّنَ کٛ جٛومِرَاوٛ وِعِ دَغَ حٛنْدُکٛ اَنَّبِيجٛ مَاکٛ وِيکِ، ‏«‏دَغَ لٜيْدِ مَسَرْ مِ نٛدِّ ٻِطّٛ اَمْ؞»‏

ٻِکّٛيْ ڤَمَرٛيْ مبَرَامَ

¹⁶ندٜ حِرُدُسْ فَامِ اَنْدَنْٻٜ کٛودٜ ٻٜنْ پٛيْرِيمٛ، سٜيْ ٻٜرْندٜ مَاکٛ مٜتِّ نَاع سٜطَّ؞ اٛ وِعِ طُمْ وَرَ ٻِکّٛيْ ڤَمَرٛيْ فُو نغٛرٛيْ نغٛودُکٛيْ دُوٻِ طِطِ يَاکِ لٜيْ نغٛنْکٛيْ ندٜرْ غَرِيٜلْ بَيْتَلَامِ اٜ حَادٜ غَرِيٜلْ نغٜلْ؞ اٛ وَطُ نٛنْ نغَمْ اَنْدَنْٻٜ کٛودٜ ٻٜنْ مبِعِمٛ اَرَنْدٜ حٛودٜرٜ ندٜنْ وَنْغَنِيٻٜ دُوٻِ طِطِ پَٻِّيطِ؞

¹⁷نٛنْ حٜبِّنِ کٛ اَللَّه وِعِ دَغَ حٛنْدُکٛ اَنَّبِ اِرْمِيَ وِيکِ،

¹⁸‏«‏طُمْ نَنِ حٛنٛنْدٜ ندٜرْ غَرِيرِ رَامَ،

بٛجِّ نَوْطِ؞

طُمْ رَحِيلَ وٛيَنْتَ ٻِٻّٜ مَاکٛ،

اٛ وَݧِ اٛ وَلْتِنَنٜىٰ ٻٜرْندٜ،

نغَمْ ٻِٻّٜ مَاکٛ مَايِ؞»‏

وَرْتٛيْکِ دَغَ لٜيْدِ مَسَرْ

¹⁹غَطَ حِرُدُسْ مَايِ، سٜيْ مَلَاعِکَاجٛ جٛومِرَاوٛ وَنْغَنِ يُسُفُ ندٜرْ کٛيْطٛلْ اٜ مَسَرْ، وِعِ، ²⁰‏«‏اُمَّ کٛشَّا ٻِنْغٜلْ نغٜلْ اٜ مَدُوجٛ مَاغٜلْ شٛعّٛطَا لٜيْدِ اِسْرَاعِيلَ، نغَمْ ٻٜنْ طٛنْ طَٻُّتُٻٜ مبَرَ ٻِنْغٜلْ نغٜلْ ٻٜ مَايِ؞»‏ ²¹سٜيْ يُسُفُ اُمِّي، حٛشِّ ٻِنْغٜلْ نغٜلْ اٜ مَدُوجٛ مَاغٜلْ، ٻٜ شٛعِّي لٜيْدِ اِسْرَاعِيلَ؞

²²اَمَّا ندٜ اٛ نَنِ اَرْکِلَيُسْ رٛنِي جٛوطٛرْغَلْ لَامُ ݧَاکٛ مُوطُمْ حِرُدُسْ اٜ مٛ لَامٛ لٜيْدِ يَحُودِيَ، سٜيْ اٛ حُلِ يَاکِ تٛنْ؞ اَمَّا ندٜ طُمْ وَغِّنِمٛ ندٜرْ کٛيْطٛلْ، سٜيْ اٛ سٛعِّ اٛ يَحِ لٜيْدِ غَلِيلِ؞ ²³اٛ يَحِ اٛ جٛوطِي ندٜرْ وٛنْدِ غَرِيرِ بِعٜتٜىٰندِ نَجَرَتْ، نغَمْ طُمْ حٜبِّنَ کٛ اَللَّه وِعِ دَغَ کٛنْدُطٜ اَنَّبٛعٜنْ وِيکِ، ‏«‏طُمْ نٛدَّيْمٛ نَجَرَنْکٜىٰجٛ؞»‏

وَعَجُ يَحَيَ غَطٛووٛ بَڤْتِسْمَ

¹غَطَ دُوٻِ طُطِّ يَحَيَ غَطٛووٛ بَڤْتِسْمَ يَحِ ندٜرْ لَدّٜ يَحُودِيَ، اٜ مٛ وَعَجِنَ، ²اٜ مٛ وِعَ، ‏«‏تُوبٜىٰ، نغَمْ لَامُ اَللَّه ٻَدَکٜ!‏»‏ ³اٛنْ طٛنْ کَنْکٛ وٛنِ مٛ اَنَّبِ اِشَايَ مٜتِ دٛوْ مَاکٛ، وِعِ،

‏«‏غٛطّٛ اٜ نٛدَّ ندٜرْ لَدّٜ، اٜ وِعَ،

‏‹‏مٛعِّنٜىٰ طَتَلْ جٛومِرَاوٛ،

ڤٛرْتٜىٰ لَاوٛلْ نغَمْ غَرٛلْ مَاکٛ!‏›‏ »‏

⁴يَحَيَ اٜ ٻٛرْنِي کٛلْتٜ طٜ طُمْ وَطِرِ لٜىٰٻٜ نغٜىٰلٛوبَ، اٜ مٛ تَادِي تَادٛرْدٜ لَرَلْ؞ ݧَمْندُ مَاکٛ وٛنِ بَابٜىٰجِ اٜ نجُمْرِ؞ ⁵سٜيْ يِمْٻٜ طُطْٻٜ دَغَ غَرِيرِ اُرُشَلِيمَ اٜ لٜيْدِ يَحُودِيَ فُو اٜ غَرِيجٜ طٜ حَادٜ شَانغٛلْ اُرْدُنْ ٻٜ نغَطِ کَ يَاکِ تٛ مَاکٛ؞ ⁶اٜ ٻٜ مبِعَ فُو کٛ وٛوطَا طُمْ ٻٜ نغَطِ، اٜ مٛ وَطَنَٻٜ بَڤْتِسْمَ ندٜرْ شَانغٛلْ اُرْدُنْ؞

⁷اَمَّا ندٜ يَحَيَ يِعِ فَارِسَنْکٛعٜنْ اٜ سَادُسَنْکٛعٜنْ طُطْٻٜ نغَرِ نغَمْ اٛ وَطَنَٻٜ بَڤْتِسْمَ، اٛ وِعِٻٜ، ‏«‏اٛنٛنْ ٻِٻّٜ بٛولٜ!‏ مٛيٜ وِعِعٛنْ ندٛغّٛنْ بٛنٜ غَرَيْطُمْ؟ ⁸نغَطٜىٰ کٛ حٛلَّتَ اٛنْ اَلِ حَکّٜىٰجِ مٛوطٛنْ؞ ⁹تٛع اٛنْ ݧُمُ اٛنْ مبِعَيْ ندٜرْ ٻٜرْطٜ مٛوطٛنْ، ‏‹‏مِنٛنْ، مِنْ ٻِٻّٜ اَنَّبِ اِبْرَاهِمْ؞›‏ نغَمْ اٜ مِ وِعَعٛنْ، اَللَّه وَاوَيْ اُمِّنَنْکِ اَنَّبِ اِبْرَاهِمْ ٻِٻّٜ دَغَ ندٜرْ کَاپٜ طٜعٜ؞ ¹⁰کٛو جٛونِ فٜعِّرْدٜ پٜفْتَامَ نغَمْ فٜعَّ لٜطّٜ دَغَ طَطِ مَاجٜ؞ لٜکِّ فُو کِ رِمَتَا ٻِکّٛيْ مبٛطْکٛيْ، طُمْ فٜعَّيْکِ طُمْ فَطَّکِ ندٜرْ حِيتٜ؞ ¹¹مِنْ، اٜ مِ وَطِرَنَعٛنْ بَڤْتِسْمَ اٜ ندِيَمْ نغَمْ حٛلُّکِ اٛنْ تُوبِ؞ اَمَّا ٻُرْطٛيَمْ مَنْغُ اٜ وَرَ غَطَ اَمْ؞ مِ فٛتَايِ مِ جٛغٛو ڤَطٜ مَاکٛ؞ اٛ وَطِرَنَيْعٛنْ بَڤْتِسْمَ اٜ رُوحُ اَللَّه اٜ حِيتٜ؞ ¹²اٜ مٛ جٛغِي بٜسِرْطُمْ غَوْرِ مَاکٛ نغَمْ سٜنْدُکِ غَوْرِ اٜ ݧَاندٜ؞ اٛ حَوْرِتَيْ غَوْرِ ندِنْ، اٛ وَطَندِ ندٜرْ رٜسِرْدٜ غَوْرِ مَاکٛ، اَمَّا اٛ وُلَ ݧَاندٜ ندٜنْ ندٜرْ حِيتٜ نغٜ وَاتَتَا؞»‏

يٜىٰسُ وَطَنَامَ بَڤْتِسْمَ

¹³اٜ شَرٜلْ نغٜلْ يٜىٰسُ وَرٛيِ دَغَ لٜيْدِ غَلِيلِ؞ اٛ يَحِ شَانغٛلْ اُرْدُنْ تٛ يَحَيَ نغَمْ يَحَيَ وَطَنَمٛ بَڤْتِسْمَ؞ ¹⁴اَمَّا يَحَيَ يِطِي وَݧَ وَطَنْکِمٛ بَڤْتِسْمَ، اٜ وِعَ، ‏«‏اٜ حَانِ نغَطَنَايَمْ بَڤْتِسْمَ، اَمَّا اَ وَرِ تٛ اَمْ؟»‏

¹⁵اَمَّا يٜىٰسُ نٛوتِي وِعِ، ‏«‏اَلُ طُمْ وَرْتَ نٛنْ جٛونِ، نغَمْ نٛنْ حَانِ کٜبِّنِرٜنْ کٛ اَللَّه يِطِ نغَطٜنْ؞»‏ ندٜنْ يَحَيَ جَٻِ؞

¹⁶ندٜ طُمْ وَطَنِ يٜىٰسُ بَڤْتِسْمَ، اٜ مٛ وُرْتٛ ندٜرْ ندِيَمْ طَمْ، سٜيْ طٛنْ اٜ طٛنْ دٛوْ مَٻِّتِي اٛ يِعِ رُوحُ اَللَّه اٜ جِڤّٛيٛ دٛوْ مَاکٛ اٜ ٻَنْدُ بٛ فٛوندُ؞ ¹⁷سٜيْ حٛنٛنْدٜ پِوٛيِ دَغَ دٛوْ وِعِ، ‏«‏اٛعٛ وٛنِ ٻِطّٛ اَمْ مٛ نغِطُمِ، اٜ مِ نَنَ بٜلْطُمْ مَاکٛ؞»‏

شٜيْطَنْ فٛوندِي يٜىٰسُ

¹سٜيْ رُوحُ اَللَّه يَارِ يٜىٰسُ ندٜرْ لَدّٜ نغَمْ شٜيْطَنْ فٛوندَمٛ؞ ²غَطَ يٜىٰسُ وَطِي بَلْطٜ 40 اٜ سُومٛو جٜمَّ اٜ ݧَلَوْمَ، وٜىٰلٛ نَنْغِمٛ؞ ³سٜيْ شٜيْطَنْ وَرِ، وِعِمٛ، ‏«‏تٛ اَنْ وٛنِ ٻِطّٛ اَللَّه، وِعُ طٜعٜ کَاپٜ نغَرْتَ بُرٛودِ؞»‏

⁴يٜىٰسُ نٛوتِي وِعِمٛ، ‏«‏اَايَارٜ وِعِي، ‏‹‏نَاع اٜ ݧَمْندُ تَنْ نٜطّٛ مَرٛرْتٛو، سٜيْ نِ اٜ کٛو ندٜيٜ وٛلْدٜ غَرٛيْندٜ دَغَ تٛ اَللَّه؞›‏ »‏

⁵سٜيْ شٜيْطَنْ يَارِمٛ اُرُشَلِيمَ غَرِيرِ شٜنِيندِ دَرْنِمٛ تٛنْ دٛوْ حٛورٜ وُرٛ شٜنِينغٛ، ⁶وِعِمٛ، ‏«‏تٛ اَنْ وٛنِ ٻِطّٛ اَللَّه، دِوُ دَغَ طٛعٛ نغَمْ اَايَارٜ وِعِي،

‏‹‏اَللَّه وِعَيْ مَلَاعِکَعٜنْ مُوطُمْ مبَلُّمَا بٛطُّمْ؞

ٻٜ تَٻّٜتٜ ندٜرْ جُوطٜ مَٻّٜ،

نغَمْ تٛع نَوْنَا کٛيْطٜ مَاطَ دٛوْ حَيْرٜ؞›‏ »‏

⁷يٜىٰسُ وِعِمٛ، ‏«‏طٛنْمَا اَايَارٜ وِعِي، ‏‹‏تَاع فٛوندُ اَللَّه جٛومِرَاوٛ مَاطَ!‏›‏ »‏

⁸شٜيْطَنْ فُطِّتِ يَارِمٛ دٛوْ وٛنْدٜ حٛشّٜىٰرٜ تٛوْندٜ حٛلِّمٛ لٜيْطٜ دُونِيَارُ فُو اٜ جَوْدِ مَاجٜ، ⁹اٛ وِعِمٛ، ‏«‏طُعُمْ فُو مِ حٛکّٜتٜطُمْ تَا دِشَّکٜ اَ مَوْنِنِييَمْ؞»‏

¹⁰سٜيْ يٜىٰسُ وِعِمٛ، ‏«‏اُمَّ دَغَ طٛعٛ، اَنْ شٜيْطَنْ!‏ اَايَارٜ وِعِي، ‏‹‏مَوْنِنْ اَللَّه جٛومِرَاوٛ مَاطَ، کَنْکٛ تَنْ مَوْنِنْتَا؞›‏ »‏

¹¹سٜيْ شٜيْطَنْ اَلِمٛ، مَلَاعِکَعٜنْ نغَرِ مبَلِّمٛ؞

يٜىٰسُ فُطِّ وَعَجِنْکِ

¹²تٛو، ندٜ يٜىٰسُ نَنِ طُمْ مَٻِّي يَحَيَ ندٜرْ سُودُ شُرَلْ، اٛ سٛعِّي لٜيْدِ غَلِيلِ؞ ¹³اٛ اَلِ غَرِيرِ نَجَرَتْ، اٛ يَحِ اٛ جٛوطِي غَرِيرِ کَفَرْنَحُمْ نغٛنْدِ حَادٜ مبٜىٰلَ ندٜرْ لٜيْدِ جَبَلُونَ اٜ نَفْتَالِ؞ ¹⁴اٛ وَطِي نٛنْ نغَمْ طُمْ حٜبِّنَ کٛ اَللَّه وِعِ دَغَ حٛنْدُکٛ اَنَّبِ اِشَايَ وِيکِ،

¹⁵‏«‏لٜيْدِ جَبَلُونَ اٜ لٜيْدِ نَفْتَالِ،

اٛنٛنْ لٜيْطٜ غٛنْطٜ دٛوْ لَاوٛلْ حَادٜ مبٜىٰلَ، فٛنْغٛ شَانغٛلْ اُرْدُنْ،

ندٜرْ لٜيْدِ غَلِيلِ ندِ يِمْٻٜ نَاع يَحُودَنْکٛعٜنْ!‏

¹⁶يِمْٻٜ جٛوطِيٻٜ ندٜرْ ݧِوْرٜ

ٻٜ نغِعِي جَيْنغٛلْ مَنْغٛلْ،

ندٜنْ ٻٜنْ طٛنْ جٛوطِيٻٜ ندٜرْ لٜيْدِ ندِ طٛوْدِ مَيْدٜ،

جَيْنغٛلْ وُرْتٛيَکٜ يٜيْنِ دٛوْ مَٻّٜ؞»‏

¹⁷دَغَ شَرٜلْ نغٜلْ، يٜىٰسُ فُطِّ وَعَجِنْکِ، اٜ وِعَ، ‏«‏تُوبٜىٰ، نغَمْ لَامُ اَللَّه وَرِي حَادٜ مٛوطٛنْ؞»‏

يٜىٰسُ نٛدِّ نَنْغٛوٻٜ لِپِّ نَيٛ

¹⁸يٜىٰسُ اٜ يَحَ حَادٜ مبٜىٰلَ غَلِيلِ، اٛ يِعِ سَکِرَاٻٜ طِطٛ، سِيمَنْ بِعٜتٜىٰطٛ بِيتُرُسْ اٜ مِݧِرَاوٛ مَاکٛ اَنْدِرَاوُسْ، اٜ ٻٜ نغَطَ نَنْغِرْطُمْ لِپِّ مَٻّٜ ندٜرْ ندِيَمْ، نغَمْ ٻٜ نَنْغٛوٻٜ لِپِّ؞ ¹⁹سٜيْ يٜىٰسُ وِعِٻٜ، ‏«‏تٛکّٜىٰيَمْ، مِ وَرْتِرَيْعٛنْ غَدَّيْٻٜ يِمْٻٜ تٛ اَمْ؞»‏ ²⁰طٛنْ اٜ طٛنْ ٻٜ اَلِ نَنْغِرْطُمْ لِپِّ مَٻّٜ ٻٜ تٛکِّمٛ؞

²¹ندٜ اٛ ٻٜيْدِ يٜىٰسٛ سٜطَّ، سٜيْ اٛ يِعِ وٛٻّٜ سَکِرَاٻٜ طِطٛ، يَاکُبُ اٜ مِݧِرَاوٛ مُوطُمْ يَحَيَ ٻِٻّٜ جَبَدِ، اٜ ٻٜ ندٜرْ کٛمِوَلْ اٜ ݧَاکٛ مَٻّٜ جَبَدِ، اٜ ٻٜ مٛعِّنَ نَنْغِرْطُمْ لِپِّ مَٻّٜ، سٜيْ يٜىٰسُ نٛدِّٻٜ؞ ²²طٛنْ اٜ طٛنْ ٻٜ اَلِ کٛمِوَلْ نغَلْ اٜ ݧَاکٛ مَٻّٜ اٛنْ، ٻٜ تٛکِّ يٜىٰسُ؞

يٜىٰسُ اٜکِّتِنِ، وَعَجِنِ، يَمْطِتِنِ

²³يٜىٰسُ يَحِ کٛو تٛيٜ ندٜرْ لٜيْدِ غَلِيلِ، اٜ مٛ اٜکِّتِنَ ندٜرْ شُوطِ دٛعَارٜ مَٻّٜ، اٜ مٛ وَعَجِنَ حَبَرُ بٜلْطُمْ دٛوْ لَامُ اَللَّه، ندٜنْ اٜ مٛ يَمْطِتِنَ کٛو اِرِ طُمٜ ݧَوُ اٜ شِيَ نجَمُ ندٜرْ يِمْٻٜ؞ ²⁴حَبَرُ مَاکٛ سَنْکِتِ کٛو تٛيٜ ندٜرْ لٜيْدِ سِيرِيَ؞ يِمْٻٜ نغَدَّنِمٛ فُو ݧَوْٻٜ، ڤِيدٛوٻٜ اٜ ݧَوُوجِ فٜىٰرٜ‑فٜىٰرٜ، اٜ ڤِيدٛوٻٜ اٜ نَوْطُمْ ٻَلِّ، اٜ غٛودُٻٜ غِنِّ، اٜ غٛودُٻٜ ڤَطّٜ، اٜ جَرَاٻٜ، اٛ يَمْطِتِنِٻٜ؞ ²⁵يِمْٻٜ طُطْٻٜ تٛکِّ يٜىٰسُ پِوٛيْٻٜ لٜيْدِ غَلِيلِ، اٜ لٜيْدِ دِکَڤٛلِسْ، اٜ اُرُشَلِيمَ، اٜ لٜيْدِ يَحُودِيَ، اٜ فٛنْغٛ شَانغٛلْ اُرْدُنْ؞

يٜىٰسُ وَعَجِنِ دٛوْ پٛلْدٜ

¹ندٜ يٜىٰسُ يِعِ يِمْٻٜ طُطْٻٜ نغَرِ، سٜيْ اٛ پٜنْتِ پٛلْدٜ اٛ جٛوطِ، تٛکُّٻٜمٛ نغَرِ تٛ مَاکٛ؞ ²سٜيْ اٛ فُطِّ اٜکِّتِنْکِٻٜ، اٛ وِعِ،

بَرْکِطِنْکِ

³‏«‏ٻٜ بَرْکِطِنَاٻٜ غَطُٻٜ فُو کَمُّندٜ دٛوْ اَللَّه،

نغَمْ کَمْٻٜ نجٜيِ لَامُ اَللَّه؞

⁴‏«‏ٻٜ بَرْکِطِنَاٻٜ يِمْٻٜ وٛيٛوٻٜ،

نغَمْ طُمْ وَلْتِنَيْ ٻٜرْطٜ مَٻّٜ؞

⁵‏«‏ٻٜ بَرْکِطِنَاٻٜ لٜيْنٛوٻٜ کٛعٜ،

نغَمْ کَمْٻٜ ندٛنَتَ دُونِيَارُ؞

⁶‏«‏ٻٜ بَرْکِطِنَاٻٜ نَنٛوٻٜ وٜىٰلٛ

اٜ طٛنْکَ وَطُکِ اَادِلَاکُ،

نغَمْ ٻٜ کَرْنٜتٜىٰٻٜ؞

⁷‏«‏ٻٜ بَرْکِطِنَاٻٜ جُرْمِنَنٛوٻٜ يِمْٻٜ،

نغَمْ کَمْٻٜ مَا طُمْ يُرْمِنَنَيْٻٜ؞

⁸‏«‏ٻٜ بَرْکِطِنَاٻٜ ٻٜ ٻٜرْطٜ لَٻْطٜ،

نغَمْ ٻٜ نغِعَيْ اَللَّه؞

⁹‏«‏ٻٜ بَرْکِطِنَاٻٜ شِرْيٛوتِرٛوٻٜ يِمْٻٜ،

نغَمْ طُمْ نٛدِّرَيْٻٜ ٻِٻّٜ اَللَّه؞

¹⁰‏«‏ٻٜ بَرْکِطِنَاٻٜ تٛرّٜتٜىٰٻٜ نغَمْ وَطُکِ

اَادِلَاکُ،

نغَمْ کَمْٻٜ نجٜيِ لَامُ اَللَّه؞

¹¹‏«‏اٛنْ بَرْکِطِنَاٻٜ تٛ يِمْٻٜ کُطِيعٛنْ، تٛرِّيعٛنْ، ڤٜوَنِيعٛنْ مبِعِي حَالَاجِ کَلُّطِ فٜىٰرٜ‑فٜىٰرٜ دٛوْ مٛوطٛنْ نغَمْ اَمْ؞ ¹²نَنٜىٰ بٜلْطُمْ، مبٜلْمبٜلْتٜىٰ، نغَمْ بَرْکَ مٛوطٛنْ طُمْ طُطُّمْ اٜ دٛوْ، نغَمْ نٛنْ ٻٜ نغَطَنّٛو اَنَّبٛعٜنْ اَرَنْدٜعٜنْ؞

لَمْطَمْ اٜ جَيْنغٛلْ

¹³‏«‏اٛنٛنْ نغٛنِ لَمْطَمْ دُونِيَارُ؞ اَمَّا تٛ بٜلْطُمْ مَاجَمْ اِتَّکٜ، کٛ وَرْتِرْتَ بٜلْطُمْ مَاجَمْ؟ وَلَا کٛ طَمْ نَفَتَ کَدِنْ، سٜيْ نِ طَمْ رُفٜىٰ يِمْٻٜ نجَاٻَطَمْ؞

¹⁴‏«‏اٛنٛنْ نغٛنِ جَيْنغٛلْ دُونِيَارُ؞ غَرِيرِ نغٛنْدِ دٛوْ پٛلْدٜ ندِ سُوطَتَاکٛ؞ ¹⁵وَلَا غَطَنَيْطٛ فِتِلَارُ حِيتٜ حِڤَّ تُمُّدٜ دٛوْ مَيْرُ؞ سٜيْ نِ اٛ رٜسَندُ دٛوْ دَنْکِ، ندُ يٜيْنَنٛو کٛو مٛيٜ غٛنْطٛ ندٜرْ وُرٛ نغٛنْ؞ ¹⁶نٛنْ اٛنٛنْ مَا، اَلٜىٰ جَيْنغٛلْ مٛوطٛنْ يٜيْنَنٛو يِمْٻٜ، نغَمْ ٻٜ نغِعَ کُوطٜ مٛوطٛنْ بٛطّٜ، ٻٜ مَوْنِنَ ݧَاکٛ مٛوطٛنْ مٛ دٛوْ؞

اَتَّوْرَ اٜ دٜفْتٜ اَنَّبٛعٜنْ

¹⁷‏«‏تٛع اٛنْ کَمّٛ مِ وَرٛيِ نغَمْ مِ وَرْتِرَ اَتَّوْرَ کٛو دٜفْتٜ اَنَّبٛعٜنْ مٜىٰرٜ؞ مِ وَرٛيِ نَاع نغَمْ مِ وَرْتِرَطُمْ مٜىٰرٜ، اَمَّا نغَمْ مِ حٜبِّنَطُمْ؞ ¹⁸اٜ مِ وِعَعٛنْ غٛونغَ، حَا دٛوْ اٜ لٜيْ رٜعَ، وَلَا بِنْدٜلْ غٛعٛ کٛو تٛٻّٜلْ غٛعٜلْ اِتّٜتٜىٰنغٜلْ ندٜرْ اَتَّوْرَ نَا کٛو نغٜلٜ بِنْدٜلْ ندٜرْ اَتَّوْرَ حٜبِّنَامَ؞ ¹⁹نغَمْ نٛنْ، کٛو مٛيٜ يٜوِ غٛعٛ ندٜرْ کٛو کٛ ٻُرِ فَمْطُکِ ندٜرْ کٛ اَللَّه وِعِ طُمْ وَطَ، ندٜنْ اٛ اٜکِّتِنِ وٛٻّٜ نغَطَ نٛنْ، طُمْ نٛدَّيْمٛ ٻُرْطٛ فَمْطُکِ ندٜرْ لَامُ اَللَّه؞ اَمَّا کٛو مٛيٜ وَطِ کٛ اَللَّه وِعِ طُمْ وَطَ، ندٜنْ اٛ اٜکِّتِنِ وٛٻّٜ نغَطَ نٛنْ، طُمْ نٛدَّيْمٛ مَوْطٛ ندٜرْ لَامُ اَللَّه؞ ²⁰اٜ مِ وِعَعٛنْ، تٛ اَادِلَاکُ مٛوطٛنْ ٻُرَايِ طُمْ مٛودِٻّٜ اَتَّوْرَ اٜ فَارِسَنْکٛعٜنْ، اٛنْ نَتَّتَا لَامُ اَللَّه کٛو سٜطَّ!‏

وَعَجِنْکِ دٛوْ مٛنّٜرٜ

²¹‏«‏اٛنْ نَنِ طُمْ وِعِ يِمْٻٜ ندٜنّٛ، ‏‹‏تَاع وَطُ وَرْحٛورٜ،›‏ ندٜنْ ‏‹‏کٛو مٛيٜ وَطِ وَرْحٛورٜ اٛ کِيتٜتٜىٰطٛ؞›‏ ²²اَمَّا اٜ مِ وِعَعٛنْ، کٛو مٛيٜ مٛنَّنِ غٛطّٛ، اَللَّه حِيتٛتٛمٛ؞ کَدِنْ کٛو مٛيٜ حُطِ غٛطّٛ، اَرْدِيٻٜ حِيتٛتٛمٛ؞ ندٜنْ کٛو مٛيٜ وِعِ غٛطّٛ ‏‹‏اَ مٜىٰرٜىٰجٛ!‏›‏ اٜ مٛ دٛوْ لَاوٛلْ نَتُّکِ وُرٛ حِيتٜ؞ ²³نغَمْ نٛنْ، تَا وَرِي حٛکُّکِ دٛکَّلْ نغَمْ اَللَّه تٛ سَکِّرْدٜ، تَا سِفْتٛرِي بَنْدِرَاوٛ مَاطَ اٜ مٛنَّنْمَا، ²⁴اَلُ دٛکَّلْ مَاطَ يٜىٰسٛ سَکِّرْدٜ ندٜنْ، اَرَنْدٜ يَحُ شِرْيٛوتِرَا اٜ بَنْدِرَاوٛ مَاطَ اٛنْ، ندٜنْ نغَرْتَا کٛکَّا دٛکَّلْ مَاطَ؞

²⁵‏«‏تٛ غٛطّٛ وُلّٛيَکٜمَ، شَرٜلْ نغٜلْ نغٛنْطٛنْ دٛوْ طَتَلْ يَاکِ يٜىٰسٛ لَامُ سِرْيٛوتِرْ اٜ مَاکٛ جَوْطُمْ؞ تٛ نَاع نٛنْ، اٛ يَارٜتٜ يٜىٰسٛ غَطٛووٛ کِيتَ، غَطٛووٛ کِيتَ وَطُمَا ندٜرْ جُوطٜ تَادِيٻٜ، طُمْ مَٻُّمَا ندٜرْ سُودُ شُرَلْ؞ ²⁶اٜ مِ وِعَعٛنْ غٛونغَ، اَ وُرْتَتَاکٛ نَا اَ يٛٻِي فُو شٜىٰدٜ طٜ طُمْ تٛکَّتَمَ کٛو اَنِينِيٜلْ حٛرَتَاکٛ؞

وَعَجِنْکِ دٛوْ نجٜىٰنُ

²⁷‏«‏اٛنْ نَنِ طُمْ وِعِي، ‏‹‏تَاع وَطُ نجٜىٰنُ؞›‏ ²⁸اَمَّا مِنْ، اٜ مِ وِعَعٛنْ کٛو مٛيٜ رَارِ دٜبّٛ دَرْطٜ سُونٛ يَادَکٜ وَادِي نجٜىٰنُ اٜ مَاکٛ ندٜرْ ٻٜرْندٜ؞ ²⁹تٛ حِتٜرٜ مَاطَ ندٜ ݧَامٛ اٜ وَطُمَا نغَطَا حَکّٜ، اِتُّندٜ، ڤَطَّاندٜ؞ طُمْ ٻُرَنِيمَ ندُلَّا جٛکّٛودٜ غٛعٛ ندٜرْ جٛکّٛوطٜ ٻَنْدُ مَاطَ اٜ دٛوْ طُمْ حُبِنَ فُو ٻَنْدُ مَاطَ ندٜرْ وُرٛ حِيتٜ؞ ³⁰تٛ جُنْغٛ مَاطَ ݧَامٛ اٜ وَطُمَا نغَطَا حَکّٜ، اِتُّنغٛ، ڤَطَّانغٛ؞ طُمْ ٻُرَنِيمَ ندُلَّا جٛکّٛودٜ غٛعٛ ندٜرْ جٛکّٛوطٜ ٻَنْدُ مَاطَ اٜ دٛوْ فُو ٻَنْدُ مَاطَ نَتَّ ندٜرْ وُرٛ حِيتٜ؞

وَعَجِنْکِ دٛوْ وَرْکِ تٜىٰغَلْ

³¹‏«‏کَدِنْ طُمْ وِعِ، ‏‹‏کٛو مٛيٜ يٛوفِ دٜبّٛ مُوطُمْ، سٜيْ حٛکَّمٛ طٜرٜوٛلْ وَرْکِ تٜىٰغَلْ؞›‏ ³²اَمَّا مِنْ، اٜ مِ وِعَعٛنْ، کٛو مٛيٜ يٛوفِ دٜبّٛ مُوطُمْ تٛ نَاع نجٜىٰنُ اٛ وَطِ، تٛو، اٛ وَطِيمٛ وَطُکِ نجٜىٰنُ تٛ اٛ وَطِي وٛنْغَلْ تٜىٰغَلْ؞ ندٜنْ کٛو مٛيٜ تٜعِ جٛوفَاطٛ وَطِ نجٜىٰنُ؞

اٜکِّتِنٛلْ دٛوْ وَطُکِ اَلْکَوَلْ

³³‏«‏اٛنْ نَنِي طُمْ وِعِي يِمْٻٜ ندٜنّٛ، ‏‹‏تَاع حُنَ دٛوْ فٜوْرٜ، اَمَّا حٜبِّنْ اَلْکَوَلْ نغَلْ نغَطَنْطَا جٛومِرَاوٛ؞›‏ ³⁴اَمَّا اٜ مِ وِعَعٛنْ، تٛع اٛنْ کُنٛ کٛو سٜطَّ؞ تٛع اٛنْ کُنٛرٛ دٛوْ، نغَمْ تٛنْ وٛنِ تٛ اَللَّه جٛوطٛتٛ؞ ³⁵ندٜنْ تٛع اٛنْ کُنٛرٛ دُونِيَارُ، نغَمْ طٛنْ وٛنِ تٛ اَللَّه رٜسَتَ کٛيْطٜ مُوطُمْ؞ ندٜنْ تٛع اٛنْ کُنٛرٛ اُرُشَلِيمَ نغَمْ کَيْرِ وٛنِ غَرِيرِ لَامِيطٛ مَوْطٛ؞ ³⁶تٛع اٛنْ کُنٛرٛ غَاسَ کٛعٜ مٛوطٛنْ، نغَمْ اٛنْ مبَاوَتَا وَرْتِرْکِ لَاسٛلْ غٛعٛتٛلْ دَنٜوٛلْ کٛو ٻَلٜوٛلْ؞ ³⁷اَلْ ‏‹‏اٜىٰ›‏ مٛوطٛنْ وَرْتَ ‏‹‏اٜىٰ،›‏ ندٜنْ ‏‹‏اَاعَ›‏ مٛوطٛنْ وَرْتَ ‏‹‏اَاعَ؞›‏ فُو کٛ پَٻِّي طُعُمْ، دَغَ تٛ شٜيْطَنْ طُمْ پِوٛيِ؞

اٜکِّتِنٛلْ دٛوْ وَاتَاکِ

³⁸‏«‏اٛنْ نَنِ طُمْ وِعِي، ‏‹‏حِتٜرٜ نغَمْ حِتٜرٜ، ندٜنْ ݧِيندٜ نغَمْ ݧِيندٜ؞›‏ ³⁹اَمَّا اٜ مِ وِعَعٛنْ، تٛ غٛطّٛ وَطَنِيعٛنْ غٛطُّمْ کَلُّطُمْ، تٛع اٛنْ نغَاتٛ؞ تٛ غٛطّٛ فِيِيمَ تٛ وٛلٛ ݧَامٛ، وَيْلِتَنْمٛ وٛعٛتٛ نغٛنْ مَا؞ ⁴⁰تٛ غٛطّٛ يَارِيمَ يٜىٰسٛ لَامُ نغَمْ جَٻَنْمَا تٛغّٛورٜ، حٛکُّمٛ فُو اٜ شُدَّارِ مَاطَ؞ ⁴¹تٛ غٛطّٛ وَطِيمَ نغَطَا يَادُ مِلْ غٛعٛ، يَادُ اٜ مَاکٛ مِلْ طِطِ؞ ⁴²تٛرِيطٛمَ غٛطُّمْ فُو، حٛکُّمٛ؞ تٛ غٛطّٛ پَمِيمَ ݧَمَاندٜ، تَاع حَطُمٛ؞

يِطُ غَݧٛ مَاطَ

⁴³‏«‏اٛنْ نَنِي طُمْ وِعِي، ‏‹‏يِطُ بَنْدِرَاوٛ مَاطَ، وَݧُ غَݧٛ مَاطَ؞›‏ ⁴⁴اَمَّا اٜ مِ وِعَعٛنْ، نغِطٜىٰ غَݧٛوٻٜ مٛوطٛنْ، نغَطَنٜىٰ تٛرّٛوٻٜعٛنْ دٛعَارٜ، ⁴⁵نغَمْ نغَرْتٛنْ ٻِٻّٜ ݧَاکٛ مٛ دٛوْ؞ نغَمْ اٜ مٛ وَطَ نَانغٜ مَاکٛ يٜيْنٛو دٛوْ يِمْٻٜ کَلُّٻٜ اٜ يِمْٻٜ غَطٛوٻٜ کٛ وٛوطِ، ندٜنْ اٜ مٛ وَطَ ندِيَمْ تٛٻَ دٛوْ اَادِلِعٜنْ اٜ ٻٜ نغَلَا اَادِلَاکُ؞ ⁴⁶تٛ يِطُٻٜعٛنْ تَنْ نغِطّٛنْ، طُمٜ بَرْکَ کٜٻٛتٛنْ؟ کٛو جَٻٛوٻٜ شٜىٰدٜ لٜيْدِ مَا اٜ نغِطِ يِطُٻٜٻٜ؞ ⁴⁷تٛ بَنْدِرَاٻٜ مٛوطٛنْ تَنْ کٛوْنٛتٛنْ، طُمٜ نغَطٛتٛنْ ٻُرْطُمْ طُمْ وٛٻّٜ نغَطَتَ؟ يِمْٻٜ نَاع يَحُودَنْکٛعٜنْ نَاع اٜ نغَطَ نٛنْ؟ ⁴⁸نغَمْ نٛنْ، نغَرْتٜىٰ کٜىٰوُٻٜ نٛ ݧَاکٛ مٛوطٛنْ مٛ دٛوْ اٛ کٜوْطٛ؞

اٜکِّتِنٛلْ دٛوْ وَلُّکِ ٻٜ نغَلَنَا

¹‏«‏ڤَامٜىٰ تٛع نغَطٛنْ کُوطٜ اَادِلَاکُ مٛوطٛنْ يٜىٰسٛ يِمْٻٜ نغَمْ ٻٜ نغِعَ؞ نغَمْ تٛ اٛنْ نغَطِي نٛنْ، اٛنْ کٜٻَتَا مبَرْجَارِ تٛ ݧَاکٛ مٛوطٛنْ مٛ دٛوْ؞

²‏«‏نغَمْ نٛنْ، تَا حٛکَّيْ ٻٜ نغَلَنَا شَاحُ، تَاع اَنْدِنْکَ کٛو مٛيٜ نٛ مُنَافُکِعٜنْ نغَطَتَ ندٜرْ شُوطِ دٛعَارٜ اٜ دٛوْ طَتَلْ نغَمْ يِمْٻٜ نغِعَ مَنْتَٻٜ؞ اٜ مِ وِعَعٛنْ غٛونغَ، ٻٜ نجَادَکٜ ٻٜ کٜٻِ مبَرْجَارِ مَٻّٜ؞ ³اَمَّا تَا حٛکَّيْ مٛ وَلَنَا شَاحُ، تَاع جَٻُ جُنْغٛ نَنٛ مَاطَ اَنْدَ کٛ جُنْغٛ ݧَامٛ مَاطَ وَطَتَ؞ ⁴حٛکُّ شَاحُ مَاطَ اٜ سُوطٜ، ندٜنْ ݧَاکٛ مَاطَ مٛ دٛوْ اَنْدُطٛ کٛو طُمٜ غَطَاطُمْ اٜ سُوطٜ، اٛ حٛکّٜتٜ مبَرْجَارِ؞

اٜکِّتِنٛلْ دٛوْ دٛعَارٜ

⁵‏«‏تٛ اٛنْ نغَطَيْ دٛعَارٜ، تٛع اٛنْ نغَطُ نٛ مُنَافُکِعٜنْ نغَطَتَ، نغَمْ اٜ ٻٜ نغِطِ وَطُکِ دٛعَارٜ اٜ ٻٜ ندَرِي ندٜرْ شُوطِ دٛعَارٜ اٜ دٛوْ تٛ طَتٜ کَوْرِ نغَمْ کٛو مٛيٜ يِعَٻٜ؞ اٜ مِ وِعَعٛنْ غٛونغَ، ٻٜ نجَادَکٜ ٻٜ کٜٻِي مبَرْجَارِ مَٻّٜ؞ ⁶اَمَّا تَا وَطَيْ دٛعَارٜ، نَتُّ سُودُ مَاطَ مَٻَّا دَمُّغَلْ، تٛرٛطَا ݧَاکٛ مَاطَ مٛ دٛوْ مٛ يِعَتَاکٜ؞ ندٜنْ کَنْکٛ غِعٛووٛ کٛ وَطٜتٜىٰ اٜ سُوطٜ اٛ حٛکّٜتٜ مبَرْجَارِ؞

⁷‏«‏تٛ اٛنْ نغَطَ دٛعَارٜ، تٛع اٛنْ مٜتُ حَالَاجِ مٜىٰرٜ نٛ يِمْٻٜ ٻٜ اَنْدَا اَللَّه نغَطَتَ؞ اٜ ٻٜ ݧُمَ اَلَّاجِ مَٻّٜ نَنَيْ کٛ ٻٜ مبِعِ نغَمْ ٻٜ کُوتِرِ بٛلِيطٜ طُطّٜ؞ ⁸تٛع اٛنْ نغَطُ نٛ ٻٜ نغَطَتَ نغَمْ ݧَاکٛ مٛوطٛنْ مٛ دٛوْ اٜ اَنْدِ کٛ نغِطّٛنْ کٛ تٛرٛوطٛنْمٛ؞ ⁹رَا نٛ نغَطِرْتٛنْ دٛعَارٜ،

‏‹‏يَا اَللَّه ݧَاکٛ اَمِنْ مٛ دٛوْ،

اِنْدٜ مَاطَ شٜنِيندٜ مَوْنِنٜىٰ؞

¹⁰لَامُ مَاطَ وَرَ،

کٛ نغِطَّا وَطٜىٰ ندٜرْ دُونِيَارُ، نٛ طُمْ وَطِرْتٜىٰ اٜ دٛوْ؞

¹¹حٛکُّمِنْ کٛ مِنْ ݧَامَتَ حَنْدٜ؞

¹²يَافَنَمِنْ حَکّٜىٰجِ اَمِنْ

نٛ مِنْ نجَافٛرَنْتٛو غَطَنْٻٜمِنْ کٛ وٛوطَا؞

¹³تَاع اَلُ مِنْ نجَحَ تٛ مِنْ نغَطَتَ حَکّٜ،

اَمَّا حِسْنُمِنْ دَغَ کَلُّطٛ؞›‏

¹⁴‏«‏نغَمْ تٛ اٛنْ نجَافَنَکٜ غَطَنْٻٜعٛنْ کٛ وٛوطَا، ݧَاکٛ مٛوطٛنْ مٛ دٛوْ مَا يَافَنْتٛعٛنْ؞ ¹⁵اَمَّا تٛ اٛنْ نجَافَنَاکِٻٜ، کَنْکٛ مَا اٛ يَافَنْتَاکٛعٛنْ حَکّٜ مٛوطٛنْ؞

اٜکِّتِنٛلْ دٛوْ سُومَاکِ

¹⁶‏«‏تٛ اٛنْ شُومِي، تٛع اٛنْ مبٛنُّ غٜىٰشٜ مٛوطٛنْ نٛ مُنَافُکِعٜنْ نغَطَتَ، نغَمْ کَمْٻٜ اٜ ٻٜ مبٛنَّ غٜىٰشٜ مَٻّٜ نغَمْ ٻٜ کٛلَّ يِمْٻٜ اٜ ٻٜ شُومِي؞ اٜ مِ وِعَعٛنْ غٛونغَ، ٻٜ نجَادَکٜ ٻٜ کٜٻِي مبَرْجَارِ مَٻّٜ؞ ¹⁷اَمَّا تَا سُومِي، سُلْمَ، مٛيْتَنَا حٛورٜ مَاطَ نٜبَّمْ؞ ¹⁸تَا وَطِي نٛنْ، وَلَا اَنْدَيْطٛ اَ سُومِي، سٜيْ نِ ݧَاکٛ مَاطَ مٛ دٛوْ مٛ يِعَتَاکٜ؞ ندٜنْ کَنْکٛ غِعٛووٛ کٛ وَطٜتٜىٰ اٜ سُوطٜ، اٛ حٛکّٜتٜ مبَرْجَارِ؞

رٜسُکِ جَوْدِ تٛنْ دٛوْ

¹⁹‏«‏تٛع اٛنْ ندٜسَنْ کٛعٜ مٛوطٛنْ جَوْدِ اٜ دُونِيَارُ تٛ مٛوپُ وٛنَّتَندِ، کٛو ندِ ݧٛلَ، کٛو تٛ وُيْٻٜ ڤُسَتَ، نَتَّ، نغُجَّندِ؞ ²⁰اَمَّا ندٜسَنٜىٰ کٛعٜ مٛوطٛنْ جَوْدِ تٛنْ دٛوْ تٛ مٛوپُ وٛنَّتَاندِ، کٛو ندِ ݧٛلَ، تٛ وُيْٻٜ مبَاوَتَا ڤُسَ نَتَّ نغُجَّندِ؞ ²¹نغَمْ تٛ جَوْدِ مَاطَ وٛنِ، تٛنْ ٻٜرْندٜ مَاطَ مَا سٛعّٛتٛو؞

جَيْنغٛلْ ٻَنْدُ

²²‏«‏غِتٜ نغٛنِ فِتِلَارُ ٻَنْدُ؞ تٛ غِتٜ مَاطَ اٜ نجَمْطِ، ٻَنْدُ مَاطَ فُو حٜىٰوَيْ جَيْنغٛلْ؞ ²³اَمَّا تٛ غِتٜ مَاطَ نجَمْطَا، ٻَنْدُ مَاطَ فُو حٜىٰوَيْ ݧِوْرٜ؞ تٛ جَيْنغٛلْ غٛنْغٛلْ ندٜرْ ٻَنْدُ مَاطَ طُمْ ݧِوْرٜ، ݧِوْرٜ ندٜنْ وَرْتَيْ ٻَلٜىٰرٜ نَاع سٜطَّ؞

اَللَّه کٛو جَوْدِ

²⁴‏«‏وَلَا بَاوَيْطٛ جَغَّنَاکِ جٛومُ وُرٛعٜنْ طِطٛ؞ کٛو اٛ وَݧَ غٛعٛتٛ اٛ يِطَ غٛعٛتٛ، کٛو اٛ مَوْنِنَ غٛعٛتٛ اٛ يَوَنَ غٛعٛتٛ؞ نٛنْ اٛنٛنْ مَا، اٛنْ مبَاوَتَا جَغَّنَاکِ اَللَّه اٜ جَغَّنَاکِ جَوْدِ شَرٜلْ غٛعٛ؞

تَاع وَنُّ

²⁵‏«‏نغَمْ نٛنْ، اٜ مِ وِعَعٛنْ، تٛع اٛنْ نغَنُّ دٛوْ جٛنْدٜ مٛوطٛنْ، وَاتٛ دٛوْ کٛ ݧَامٛتٛنْ، کٛو کٛ نجَرٛتٛنْ، کٛو کٛ ٻٛرْنٛتٛوطٛنْ؞ نَاع يٛنْکِ ٻُرِي ݧَمْندُ؟ ندٜنْ نَاع ٻَنْدُ ٻُرِي کٛلْتٜ؟ ²⁶ندَارٜىٰ شٛلِّ!‏ طِ اَاوَتَا، طِ ڤٜعَّتَا، طِ نغَلَا تٛ طِ ندٜسَتَ ݧَمْندُ؞ فُو اٜ نٛنْ ݧَاکٛ مٛوطٛنْ مٛ دٛوْ اٜ ݧَمْنَطِ؞ نَاع اٛنْ ٻُرِي شٛلِّ دَرَجَ؟ ²⁷مٛيٜ ندٜرْ مٛوطٛنْ تٛ وَنِّي وَاوَتَ ٻٜيْدَنْکِ حٛورٜ مُوطُمْ شَرٜلْ سٜطَّ ندٜرْ بَلْطٜ مُوطُمْ؟

²⁸‏«‏تٛو، نغَمْ طُمٜ نغَنّٛتٛنْ دٛوْ کٛ ٻٛرْنٛتٛوطٛنْ؟ ندَارٜىٰ ڤِنْدِ لَدّٜ نٛ مَوْنِرْتَ، ندِ حُوَتَا، ندِ سَݧَتَا کٛلْتٜ؞ ²⁹فُو اٜ نٛنْ اٜ مِ وِعَعٛنْ، اَنَّبِ سُلٜيْمَانُ فُو اٜ رِسْکُ مُوطُمْ مٜىٰطَايِ مٛعِّتِنَاکِ بٛ ڤِنْدِ وٛعٛيْرِ ندِعِ؞ ³⁰تٛ اَللَّه اٜ مٛعِّتِنِرَ ڤِنْدِ لَدّٜ نِحِ، حَنْدٜ اٜ ندِ طٛنْ، جَانغٛ ندِ وُلٜىٰ، حَکّٛ اٛنٛنْ، اٛ ٻُرَيْ نٛنْ ٻٛرْنُکِعٛنْ، اٛنٛنْ کٛولِيٻٜمٛ سٜطَّ!‏

³¹‏«‏نغَمْ نٛنْ، تٛع اٛنْ نغَنُّ مبِعٛنْ، ‏‹‏کٛ ݧَامٜتٜنْ؟›‏، کٛو ‏‹‏کٛ نجَرٜتٜنْ؟›‏، کٛو ‏‹‏کٛ ٻٛرْنٛتٛوطٜنْ؟›‏ ³²نغَمْ اِرِ طُمْ طٛنْ يِمْٻٜ ٻٜ اَنْدَا اَللَّه طَٻِّتَتَ؞ ݧَاکٛ مٛوطٛنْ مٛ دٛوْ اٜ اَنْدِ اٛنْ نغِطِ فُو فِي طُعُمْ؞ ³³اَمَّا اَرَنْدٜ طَٻِّتٜىٰ لَامُ اَللَّه اٜ اَادِلَاکُ مَاکٛ، ندٜنْ طُمْ ٻٜيْدَنَيْعٛنْ فُو فِي طُعُمْ؞ ³⁴نغَمْ نٛنْ، تٛع اٛنْ نغَنُّ اٜ جَانغٛ، نغَمْ جَانغٛ اٜ وٛودِ وَنَّارٜ مُوطُمْ؞ کٛو ندٜيٜ ݧَلْندٜ اٜ وٛودِ وَنَّارٜ مَيْرٜ کٜپَيْندٜندٜ؞

تٛع اٛنْ کِيتٛ وٛٻّٜ

¹‏«‏تٛع اٛنْ کِيتٛ وٛٻّٜ، نغَمْ تٛع طُمْ حِيتٛعٛنْ؞ ²نغَمْ نٛنْ نٛ کِيتٛرِيطٛنْ وٛٻّٜ، اٛنٛنْ مَا نٛنْ طُمْ حِيتٛرَنْتٛوعٛنْ، ندٜنْ اٜ ڤٛوندِرْغٜلْ نغٜلْ ڤٛوندِرْطٛنْ، اٜ مَاغٜلْ طُمْ فٛوندِرَنْتَعٛنْ؞ ³نغَمْ طُمٜ ندَارَتَا غٜىٰنٜلْ غٛنْغٜلْ ندٜرْ حِتٜرٜ بَنْدِرَاوٛ مَاطَ، اَمَّا اَ وَنَّايِ اٜ لٜغَّ وٛنْغَ ندٜرْ حِتٜرٜ مَاطَ؟ ⁴نٛ وَطَتَ مبِعَا بَنْدِرَاوٛ مَاطَ، ‏‹‏اَلْ مِ اِتَّنْمَا غٜىٰنٜلْ ندٜرْ حِتٜرٜ مَاطَ،›‏ ندٜنْ بٛو اٜ وٛودِ لٜغَّ ندٜرْ حِتٜرٜ مَاطَ؟ ⁵اَنْ مُنَافُکِيجٛ، اَرْتُ اِتُّکِ لٜغَّ وٛنْغَ ندٜرْ حِتٜرٜ مَاطَ، ندٜنْ نغِعَا بٛطُّمْ کٜٻَا نٛ اِتِّرَا غٜىٰنٜلْ غٛنْغٜلْ ندٜرْ حِتٜرٜ بَنْدِرَاوٛ مَاطَ؞

⁶‏«‏تٛع اٛنْ کٛکُّ کُتِيجِ غٛطُّمْ شٜنِيطُمْ؞ تٛ اٛنْ نغَطِي نٛنْ، طِ نغَيْلِتٛتٛ، طِ شِشِّتَعٛنْ؞ تٛع اٛنْ کُبَنٛ اَلَدٜىٰجِ لُعُ‑لُعُ؞ تٛ اٛنْ نغَطِي نٛنْ، طِ نجَاٻَيْطُمْ تَنْ؞

تٛرٜىٰ، طَٻِّتٜىٰ، شِلْمِنٜىٰ

⁷‏«‏تٛرٜىٰ، طُمْ حٛکَّيْعٛنْ؞ طَٻِّتٜىٰ، اٛنْ کٜٻَيْ؞ شِلْمِنٜىٰ، طُمْ مَٻِّتَنَيْعٛنْ دَمُّغَلْ؞ ⁸نغَمْ کٛو مٛيٜ تٛرِيطٛ طُمْ حٛکَّيْمٛ، طَٻُّتُطٛ بٛو حٜٻَيْ، ندٜنْ کٛو مٛيٜ شِلْمِنِيطٛ طُمْ مَٻِّتَنَيْمٛ دَمُّغَلْ؞ ⁹مٛيٜ ندٜرْ مٛوطٛنْ تٛ ٻِطّٛ مُوطُمْ تٛرَکٜمٛ بُرٛودِ، اٛ حٛکَّمٛ حَيْرٜ؟ ¹⁰کٛو بٛو تٛ اٛ تٛرَکٜمٛ لِنْغُ، اٛ حٛکَّمٛ مبٛودِ؟ ¹¹تٛ اٛنٛنْ کَلُّٻٜ، اٛنْ اَنْدِ نٛ کٛکِّرْتٛنْ ٻِٻّٜ مٛوطٛنْ فِي بٛطُّمْ، حَکّٛ ݧَاکٛ مٛوطٛنْ مٛ دٛوْ!‏ اٛ ٻُرَيْ نٛنْ حٛکُّکِ تٛرِيٻٜمٛ فِي بٛطُّمْ!‏

¹²‏«‏فُو کٛ نغِطّٛنْ وٛٻّٜ نغَطَنَعٛنْ، اٛنٛنْ مَا نغَطَنٜىٰٻٜ نٛنْ، نغَمْ کَنْجُمْ وٛنِ کٛ اَتَّوْرَ اٜ دٜفْتٜ اَنَّبٛعٜنْ مبِعِ؞

دَمُّغَلْ ٻِطِّينغَلْ

¹³‏«‏نَتِّرٜىٰ دَمُّغَلْ ٻِطِّينغَلْ؞ نغَمْ دَمُّغَلْ جَارَيْنغَلْ حَلْکٜرٜ نغَلْ جَاجُنغَلْ، ندٜنْ نغَلْ سَطَا تٛکُّکِ، نَتِّرٛوٻٜنغَلْ اٜ طُوطِ؞ ¹⁴اَمَّا دَمُّغَلْ جَارَيْنغَلْ يٛنْکِ کِ رٜعَتَا نغَلْ ٻِطِّينغَلْ، طٛنْمَا طَتَلْ جَارَيْنغَلْ يٛنْکِ کِ رٜعَتَا اٜ نغَلْ سَطِ تٛکُّکِ، يِمْٻٜ سٜطَّ تٛکَّتَنغَلْ؞

لٜکِّ اٜ ٻِکّٛيْ مَاکِ

¹⁵‏«‏ڤَامَنٜىٰ اَنَّبٛعٜنْ فٜوْرٜ غَرَيْٻٜ تٛ مٛوطٛنْ ندٜرْ نَنْدِ بَالِ، اَمَّا ندٜرْ ٻٜرْطٜ مَٻّٜ اٜ ٻٜ نَنْدِ اٜ شَافَالِ کَلُّطِ؞ ¹⁶اٛنْ اَنْدِتِرَيْٻٜ کُوطٜ مَٻّٜ؞ طُمْ حٜٻَتَا ٻِکّٛيْ اِنَبٛوجٜ تٛ غِعٜحِ، کٛو اِبّٜ دَغَ تٛ کٛورَاجٜ؞ ¹⁷نٛنْ مَا، کٛو کِيٜ لٜکِّ بٛطْکِ اٜ کِ رِمَ ٻِکّٛيْ مبٛطْکٛيْ؞ لٜکِّ کِ وٛوطَا بٛو اٜ کِ رِمَ ٻِکّٛيْ کٛيْ مبٛوطَا؞ ¹⁸لٜکِّ بٛطْکِ رِمَتَا ٻِکّٛيْ کٛيْ مبٛوطَا؞ نٛنْ مَا، لٜکِّ کِ وٛوطَا رِمَتَا ٻِکّٛيْ مبٛطْکٛيْ؞ ¹⁹فُو لٜکِّ کِ رِمَتَا ٻِکّٛيْ مبٛطْکٛيْ طُمْ فٜعَّيْکِ طُمْ فَطَّکِ ندٜرْ حِيتٜ؞ ²⁰نغَمْ نٛنْ، اٛنْ اَنْدِتِرَيْٻٜ کُوطٜ کَلُّطٜ طٜ ٻٜ نغَطَتَ؞

مِ مٜىٰطَايِ اَنْدُکِعٛنْ

²¹‏«‏نَاع فُو بِعَيْطٛيَمْ، ‏‹‏مٛودِبّٛ، مٛودِبّٛ،›‏ نَتَّتَ لَامُ اَللَّه، سٜيْ نِ غَطُطٛ کٛ ݧَاکٛ اَمْ مٛ دٛوْ يِطِ؞ ²²اٜ ݧَلْندٜ جَانغٛ يِمْٻٜ طُطْٻٜ مبِعَيْيَمْ، ‏‹‏مٛودِبّٛ، مٛودِبّٛ!‏ نَاع مِنْ نغَعَجِنِي ندٜرْ اِنْدٜ مَاطَ؟ نَاع مِنْ مبُرْتِنِي غِنِّ ندٜرْ اِنْدٜ مَاطَ؟ نَاع مِنْ نغَطِي کَيْطِنِيطُمْ طُطُّمْ ندٜرْ اِنْدٜ مَاطَ؟›‏ ²³اَمَّا مِ وِعَيْٻٜ، ‏‹‏مِ اَنْدَاعٛنْ؞ شٜنْدِرٜىٰ اٜ اَمْ، اٛنٛنْ کَلُّٻٜ؞›‏

مَحٛوٻٜ طِطٛ

²⁴‏«‏نغَمْ نٛنْ، نٜطّٛ فُو نَنْطٛ طٜعٜ بٛلِيطٜ اَمْ وَطِ کٛ مبِيمِ اٜ نَنْدِ اٜ نٜطّٛ غٛودُطٛ فَامُ مَحُطٛ وُرٛ مُوطُمْ دٛوْ تَفَارٜ؞ ²⁵ندٜ ندِيَمْ وَطِ، شَنْطِ کٜىٰوِ، حٜنْدُ اُمّٛيِي ڤِيِ وُرٛ نغٛنْ، اَمَّا نغٛ يَنَايِ نغَمْ نغٛ مَحَامَ دٛوْ تَفَارٜ؞

²⁶‏«‏اَمَّا کٛو مٛيٜ نَنْطٛ بٛلِيطٜ اَمْ وَطَايِ کٛ مبِيمِ اٜ نَنْدِ اٜ نٜطّٛ مٛ وَلَا حَکِّيلٛ مَحُطٛ وُرٛ مُوطُمْ دٛوْ نجَارٜىٰندِ؞ ²⁷ندٜ ندِيَمْ وَطِ، شَنْطِ کٜىٰوِ، حٜنْدُ اُمّٛيِي ڤِيِ وُرٛ نغٛنْ، سٜيْ نغٛ يَنِ نغٛ سَنْکِتِي نغٛ فُو؞»‏

بَوْطٜ اٜکِّتِنٛلْ يٜىٰسُ

²⁸ندٜ يٜىٰسُ يٛتِّنِ کٛ وِعَتَ، يِمْٻٜ حَوْرُتُٻٜ کَيْطِنِ اٜ اٜکِّتِنٛلْ مَاکٛ، ²⁹نغَمْ اٛ اٜکِّتِنِرَايِٻٜ نٛ مٛودِٻّٜ اَتَّوْرَ اٜکِّتِنِرْتَ، اَمَّا اٛ اٜکِّتِنِيٻٜ اٜ بَوْطٜ؞

غٛودُطٛ ݧَوُ ݧَامٛووُ لَرَلْ

¹ندٜ يٜىٰسُ جِڤّٛيِي دَغَ دٛوْ حٛشّٜىٰرٜ ندٜنْ، يِمْٻٜ طُطْٻٜ تٛکِّمٛ؞ ²سٜيْ غٛطّٛ غٛودُطٛ ݧَوُ ݧَامٛوجُمْ لَرَلْ وَرِ دِشِّي يٜىٰسٛ مَاکٛ، وِعِ، ‏«‏مٛودِبّٛ، تَا جَٻِي، اَ وَاوَيْ نجَمْطِتِنَايَمْ؞»‏

³سٜيْ يٜىٰسُ فٛرْتِ جُنْغٛ مُوطُمْ، مٜىٰمِمٛ، وِعِ، ‏«‏مِ جَٻِي؞ يَمْطُتُ!‏»‏ طٛنْ اٜ طٛنْ ݧَوُ طُمْ اَلِمٛ، اٛ يَمْطِتِ؞ ⁴سٜيْ يٜىٰسُ وِعِمٛ، ‏«‏فَامُ، تَاع وِعُکَ کٛو مٛيٜ، اَمَّا يَحُ کٛلَّا حٛورٜ مَاطَ تٛ اَرْدِيطٛ دِينَ، ندٜنْ کٛکَّا شَکِّرِ نٛ مُوسَ وِعِ طُمْ وَطَ نغَمْ لَاٻٛلْ مَاطَ؞ وَطُ نٛنْ نغَمْ تَبِّتِنَنْکِ يِمْٻٜ اَ يَمْطِتِي؞»‏

حٛولَارٜ مَوْطٛ سٛوجِعٜنْ

⁵ندٜ يٜىٰسُ نَتِّ غَرِيرِ کَفَرْنَحُمْ، سٜيْ غٛطّٛ مَوْطٛ سٛوجِعٜنْ رٛومَ وَرِ تٛ مَاکٛ، اٜ تٛرٛومٛ، وِعِ، ⁶‏«‏مٛودِبّٛ، مَشُّطٛ اَمْ اٜ فُکِّي اٜ وُرٛ اٛ جَرَاطٛ، اٜ مٛ فِيدَ اٜ نَوْطُمْ کَلُّطُمْ؞»‏

⁷يٜىٰسُ وِعِمٛ، ‏«‏مِ يَحَيْ مِ يَمْطِتِنَمٛ؞»‏

⁸سٜيْ مَوْطٛ سٛوجِعٜنْ اٛنْ نٛوتِي وِعِ، ‏«‏مٛودِبّٛ، مِ فٛتَايِ نَتَّا وُرٛ اَمْ، اَمَّا مٜتُ تَنْ، مَشُّطٛ اَمْ يَمْطِتَيْ؞ ⁹نغَمْ مِنْ اٜ حٛورٜ اَمْ لٜيْ لَامُ وٛٻّٜ سٛوجِعٜنْ نغٛنْمِ، مِنْ مَا، اٜ مِ لَامٛو سٛوجِعٜنْ؞ تٛ مِ وِعِي اٛعٛ، ‏‹‏دِلُّ!‏›‏ اٛ دِلَّيْ؞ تٛ مِ وِعِي اٛنْ تٛنْ، ‏‹‏وٛرٛيْ!‏›‏ اٛ وَرَيْ؞ تٛ بٛو مِ وِعِي مَشُّطٛ اَمْ، ‏‹‏وَطُ طُعُمْ!‏›‏ اٛ وَطَيْطُمْ؞»‏

¹⁰ندٜ يٜىٰسُ نَنِ نٛنْ، حَيْطِنِ، وِعِ کَوْرُتُٻٜ اٜ تٛکِّمٛ، ‏«‏اٜ مِ وِعَعٛنْ غٛونغَ، کٛو ندٜرْ اِسْرَاعِيلَ مِ حٜٻَايِ کٛولِيطٛيَمْ ٻٜرْندٜ غٛعٛ بٛ اٛعٛ؞ ¹¹اٜ مِ وِعَعٛنْ، يِمْٻٜ نَاع يَحُودَنْکٛعٜنْ طُطْٻٜ نغَرَيْ دَغَ فُونَ اٜ حِرْنَ ٻٜ نجٛوطٛو ٻٜ ݧَامَ ݧَمْندُ حُمْتٛ اٜ اَنَّبِ اِبْرَاهِمْ، اٜ اِشِيَاکُ، اٜ يَاکُبُ ندٜرْ لَامُ اَللَّه؞ ¹²حَانُٻٜ نغَرْتَ يِمْٻٜ اَللَّه اَمَّا ٻٜ نغَݧِ، طُمْ فَطَّيْٻٜ ندٜرْ ݧِوْرٜ ٻَلٜىٰرٜ؞ طٛنْ ٻٜ مبٛيَتَ ٻٜ ݧٜرْپِندِرَ ݧِيپٜ؞»‏ ¹³سٜيْ يٜىٰسُ وِعِ مَوْطٛ سٛوجِعٜنْ رٛومَ اٛنْ، ‏«‏يَحُ!‏ نغَمْ اَ حٛولَکٜ اَللَّه، مَشُّطٛ مَاطَ يَمْطِتَيْ؞»‏ طٛنْ اٜ طٛنْ مَشُّطٛ سٛوجِيجٛ اٛنْ يَمْطِتِ؞

يٜىٰسُ يَمْطِتِنِي يِمْٻٜ طُطْٻٜ

¹⁴ندٜ يٜىٰسُ يَحِ وُرٛ بِيتُرُسْ يِعِ اٜسِرَاوٛ بِيتُرُسْ دٜبّٛ اٜ فُکِّي، جٛنْتٜ کَلُّطٜ اٜ تٛرَّمٛ، ¹⁵اٛ مٜىٰمِ جُنْغٛ مَاکٛ؞ جٛنْتٜ طٜنْ نجٛوفِ دٜبّٛ اٛنْ، اٛ اُمِّي، اٛ فُطِّ وَدَّنْکِمٛ ݧَمْندُ؞

¹⁶ندٜ فُتُرٛ وَطِ، يِمْٻٜ نغَدَّنِ يٜىٰسُ غٛودُٻٜ غِنِّ طُطْٻٜ؞ اٛ مٜتَنِطِ وٛلْدٜ غٛعٛ طِ مبُرْتِي؞ اٛ يَمْطِتِنِ فُو ٻٜ نجَمْطَا؞ ¹⁷نٛنْ وَطِي نغَمْ طُمْ حٜبِّنَ کٛ اَللَّه وِعِ دَغَ حٛنْدُکٛ اَنَّبِ اِشَايَ، وِيکِ، ‏«‏اٛ اِتِّي ݧَوُوجِ مٜىٰطٜنْ، اٛ يَمْطِتِنِيعٜنْ؞»‏

وِعٛوٻٜ تٛکَّيْ يٜىٰسُ

¹⁸ندٜ يٜىٰسُ يِعِ يِمْٻٜ طُطْٻٜ اٜ ڤِلِيمٛ، اٛ وِعِ تٛکُّٻٜمٛ، ‏«‏اٜنْ کُولُ فٛنْغٛ مبٜىٰلَ؞»‏ ¹⁹سٜيْ غٛطّٛ مٛودِبّٛ اَتَّوْرَ وَرِ تٛ مَاکٛ، وِعِمٛ، ‏«‏مٛودِبّٛ، مِ تٛکّٜتٜ تٛ نجَحَتَا فُو؞»‏

²⁰يٜىٰسُ وِعِمٛ، ‏«‏دِلَاجِ اٜ نغٛودِ غَيْطٜ، شٛلِّ اٜ نغٛودِ شَٻّٜ، اَمَّا ٻِي نٜطّٛ وَلَا تٛ فُکّٛتٛو؞»‏

²¹غٛطّٛ ندٜرْ تٛکُّٻٜمٛ وِعِمٛ، ‏«‏مٛودِبّٛ، اَلْ مِ يَحَ مِ اُوٛيَ ݧَاکٛ اَمْ تَوْ؞»‏

²²اَمَّا يٜىٰسُ وِعِمٛ، ‏«‏تٛکَّمْ، اَلُ مَيْٻٜ اُوَ مَيْٻٜ مُعّٜنْ؞»‏

يٜىٰسُ دَرْنِي اِيٜىٰندٜ

²³يٜىٰسُ نَتِّ کٛمِوَلْ، تٛکُّٻٜمٛ مَا تٛکِّمٛ؞ ²⁴سٜيْ حٜنْدُ شٜمْبِنْدُ اُمّٛيِي دٛوْ مبٜىٰلَ نغَنْ، غٜىٰلٛوطِ ندِيَمْ ڤُطِّ ڤِيکِ کٛمِوَلْ نغَلْ، ندِيَمْ نَتِّ ندٜرْ مَاغَلْ حَا نَاکِ نغَلْ ٻَدِي حٜىٰوَ ندِيَمْ، اَمَّا يٜىٰسُ اٜ ندٜرْ مَاغَلْ اٜ طَانِي؞ ²⁵سٜيْ تٛکُّٻٜمٛ ٻَدِّي ڤِنْدِنِمٛ، ٻٜ مبِعِ، ‏«‏مٛودِبّٛ، حِسْنُعٜنْ!‏ اٜنْ کَلْکَيْ!‏»‏

²⁶سٜيْ اٛ وِعِٻٜ، ‏«‏نغَمْ طُمٜ کُلْتٛرْطٛنْ، اٛنٛنْ کٛولِيٻٜيَمْ سٜطَّ؟»‏ سٜيْ اٛ اُمِّي، اٛ حَٻَنِ حٜنْدُ ندُنْ اٜ غٜىٰلٛوطِ ندِيَمْ طِنْ؞ سٜيْ کٛو طُمٜ دٜعِّتِ؞

²⁷کٛو مٛيٜ حَيْطِنِ وِعِ، ‏«‏اٛعٛ طُمْ اِرِ مٛيٜ نٜطّٛ، حَا کٜنِ اٜ غٜىٰلٛوطِ ندِيَمْ اٜ نغَطَ کٛ اٛ وِعِ؟»‏

يٜىٰسُ يَمْطِتِنِي غٛودُٻٜ غِنِّ

²⁸ندٜ يٜىٰسُ يٛتِّي فٛنْغٛ مبٜىٰلَ ندٜرْ لٜيْدِ غَارَسِنْکٛعٜنْ، سٜيْ وٛٻّٜ وٛرْٻٜ طِطٛ تَٻِّيمٛ، غٛودُٻٜ غِنِّ جٛوطٛتٛوٻٜ تٛ غٜنَالٜ؞ ٻٜ نغَرْتِي کٛ حُلْنِي نَاع سٜطَّ حَا مَا وَلَا بَاوَيْطٛ تٛکِّرَ لَاوٛلْ نغٛلْ طٛنْ!‏ ²⁹طٛنْ اٜ طٛنْ ٻٜ نغُلِّ، اٜ ٻٜ مبِعَ، ‏«‏کٛ وَنُّمَا اٜ اَمِنْ، ٻِطّٛ اَللَّه؟ اَ وَرِي نغَمْ تٛرَّامِنْ کٛ شَرٜلْ وَطَ؟»‏

³⁰حَادٜ طٛنْ اٜ وٛودِ اٛرْندٜ اَلَدٜىٰجِ طُطِّ اٜ دُرَ؞ ³¹غِنِّ طِنْ تٛرِي يٜىٰسُ، مبِعِ، ‏«‏تَا رِيوِيمِنْ، اَلُمِنْ مِنْ نَتّٛيَ اٛرْندٜ اَلَدٜىٰجِ طِنْ نِي؞»‏

³²سٜيْ اٛ وِعِطِ، ‏«‏ندِلّٜىٰ!‏»‏ سٜيْ طِ مبُرْتِي، طِ نَتّٛيِ اَلَدٜىٰجِ طِنْ؞ سٜيْ اٛرْندٜ ندٜنْ فُو ݧَارِ جِڤّٛيِي دَغَ دٛوْ پٛلْدٜ ندٜنْ، يَنِ ندٜرْ مبٜىٰلَ، ندِيَمْ ݧَامِطِ؞

³³وٛيْنَاٻٜ اَلَدٜىٰجِ طِنْ ندٛغِّ نجَحِ ندٜرْ غَرِيرِ مبِعٛيِ کٛو طُمٜ کٛ وَطِ؞ طٛنْمَا ٻٜ مبِعِ کٛ حٜٻِ غٛودُٻٜ غِنِّ طِنْ؞ ³⁴سٜيْ يِمْٻٜ غَرِيرِ ندِنْ طُطْٻٜ مبُرْتٛيِي تَٻِّي يٜىٰسُ؞ ندٜ ٻٜ نغِعِمٛ، ٻٜ تٛرِيمٛ اٛ اَلَنَٻٜ لٜيْدِ مَٻّٜ؞

يٜىٰسُ يَمْطِتِنِي جَرَاطٛ

¹سٜيْ يٜىٰسُ نَتِّ کٛمِوَلْ حُولِ سٛعِّي غَرِيرِ مُوطُمْ؞ ²سٜيْ وٛٻّٜ نغَدَّنِمٛ غٛطّٛ جَرَاطٛ دٛوْ دَاغٛ؞ ندٜ يٜىٰسُ يِعِ حٛولَارٜ مَٻّٜ، اٛ وِعِ جَرَاطٛ اٛنْ، ‏«‏تَاع وَنُّ، حِغٛ اَمْ، اَ يَافَنَامَ حَکّٜىٰجِ مَاطَ؞»‏

³ندٜ وٛٻّٜ مٛودِٻّٜ اَتَّوْرَ نَنِ نٛنْ، ٻٜ ڤُطِّ مٜتِتَاکِ حَکُّندٜ مَٻّٜ، اٜ ٻٜ مبِعَ، ‏«‏اٛعٛ نٜطّٛ اٛ فٛتِّدِنِ حٛورٜ مَاکٛ اٜ اَللَّه؞ کَعَ حَالَ کَ کَلُّکَ؞»‏

⁴اَمَّا يٜىٰسُ فَامِ کٛ وٛنِ ندٜرْ ٻٜرْطٜ مَٻّٜ، سٜيْ اٛ وِعِٻٜ، ‏«‏نغَمْ طُمٜ ݧُمٛتٛنْ ݧُمٛ کَلُّنغٛ ندٜرْ ٻٜرْطٜ مٛوطٛنْ؟ ⁵کٛ ٻُرِ حٛيْکِ، طُمْ وِعَ، ‏‹‏اَ يَافَنَامَ حَکّٜ مَاطَ،›‏ کٛو طُمْ وِعَ، ‏‹‏اُمَّ يَاٻُ؟›‏ ⁶اَمَّا اٜ مِ يِطِ اَنْدٛنْ ٻِي نٜطّٛ اٜ وٛودِ لَامُ ندٜرْ دُونِيَارُ يَافٛو حَکّٜ؞»‏ سٜيْ اٛ وِعِ جَرَاطٛ اٛنْ، ‏«‏اُمَّ کٛشَّا دَاغٛ مَاطَ، کٛوتَا وُرٛ؞»‏

⁷سٜيْ جَرَاطٛ اٛنْ اُمِّي حٛوتِ وُرٛ؞ ⁸ندٜ کَوْرُتُٻٜ طٛنْ نغِعِ نٛنْ، ٻٜ کُلِ، ٻٜ مَنْتِ اَللَّه، کٛکُّطٛ يِمْٻٜ اِرِ طٜعٜ بَوْطٜ؞

يٜىٰسُ نٛدِّي مَاتِيُ

⁹يٜىٰسُ اٜ اَلَ وِغٜىٰرٜ ندٜنْ، سٜيْ يِعِ غٛطّٛ جَٻٛووٛ شٜىٰدٜ لٜيْدِ بِعٜتٜىٰطٛ مَاتِيُ اٜ جٛوطِي تٛ طُمْ جَٻَتَ شٜىٰدٜ لٜيْدِ؞ سٜيْ يٜىٰسُ وِعِمٛ، ‏«‏تٛکَّمْ؞»‏

سٜيْ مَاتِيُ اُمِّي، تٛکِّمٛ؞

¹⁰غَطَ طٛنْ يٜىٰسُ يَحِ وُرٛ مَاتِيُ، جٛوطِي اٜ ݧَامَ حِرَاندٜ، سٜيْ جَٻٛوٻٜ شٜىٰدٜ لٜيْدِ اٜ غَطٛوٻٜ حَکّٜ نغَرِ نجٛوطِي تٛ مَاکٛ اٜ تٛکُّٻٜمٛ؞ ¹¹ندٜ فَارِسَنْکٛعٜنْ نغِعِ نٛنْ، ٻٜ مبِعِ تٛکُّٻٜمٛ، ‏«‏نغَمْ طُمٜ مٛودِبّٛ مٛوطٛنْ ݧَمْدَتَ اٜ جَٻٛوٻٜ شٜىٰدٜ لٜيْدِ اٜ غَطٛوٻٜ حَکّٜ؟»‏

¹²ندٜ يٜىٰسُ نَنِ نٛنْ، وِعِ، ‏«‏نَاع يَمْٻٜ نغِطِ ݧَوْندٛووٛ، سٜيْ نِ ݧَوْٻٜ؞ ¹³نجَحٜىٰ، اٜکِّتٛوطٛنْ مَعَنَ اَايَارٜ بِيندٜ، ‏‹‏اٜ مِ يِطِ کٛلّٛنْ يُرْمٜىٰندٜ، نَاع سَکُّکِ شَکِّرِ؞›‏ مِ وَرٛيَايِ نغَمْ نٛدُّکِ ݧُمٛوٻٜ ٻٜ اَادِلِعٜنْ، اَمَّا مِ وَرٛيِ نغَمْ نٛدُّکِ اَنْدُٻٜ ٻٜ غَطٛوٻٜ حَکّٜ؞»‏

پَمٛلْ دٛوْ سُومَاکِ

¹⁴سٜيْ تٛکُّٻٜ يَحَيَ غَطٛووٛ بَڤْتِسْمَ نغَرِ تٛ يٜىٰسُ ٻٜ پَمِمٛ، ٻٜ مبِعِ، ‏«‏نغَمْ طُمٜ مِنٛنْ اٜ فَارِسَنْکٛعٜنْ اٜ مِنْ شُومٛو، اَمَّا تٛکُّٻٜمَ شُومَتَاکٛ؟»‏

¹⁵سٜيْ يٜىٰسُ نٛوتِي وِعِٻٜ، ‏«‏اٜ يِيکِ مٛوطٛنْ حِغٛوٻٜ اَنْغٛوجٛ نَنَيْ بٜلْطُمْ شَرٜلْ نغٜلْ اَنْغٛوجٛ اٛنْ وٛنْدِ اٜ مَٻّٜ؟ اَمَّا شَرٜلْ اٜ وَرَ نغٜلْ طُمْ حٛشَّتَ اَنْغٛوجٛ اٛنْ دَغَ ندٜرْ مَٻّٜ، اٜ شَرٜلْ نغٜلْ ٻٜ شُومٛتٛ؞

¹⁶‏«‏وَلَا ݧٛوتَيْطٛ لٜفٜلْ کٜسٜلْ تٛ لِمْشٜرٜ کِيندٜ، نغَمْ لٜفٜلْ نغٜلْ نغٜلْ سٜىٰکَيْ لِمْشٜرٜ کِيندٜ ندٜنْ؞ نٛنْ وَطَيْ ندٜ ٻُرَ نٛ ندٜنّٛ سٜىٰکُکِ؞ ¹⁷نٛنْ مَا وَلَا غَطَيْطٛ ندِيَمْ اِنَبٛجَمْ کٜسَمْ ندٜرْ فَاندُ حِيندُ؞ تٛ اٛ وَطِي نٛنْ، طَمْ پُوفَيْ، طَمْ ڤُسَ فَاندُ ندُنْ، طَمْ رُفَ، فَاندُ ندُنْ بٛو لَلِّ وٛنْ طٛنْ؞ اَمَّا ندِيَمْ اِنَبٛجَمْ کٜسَمْ اٜ وَطٜىٰ ندٜرْ فَاندُ حٜيْرُ نغَمْ تٛع طُمْ دُلَّطَمْ طُمْ دُلَّ فَاندُ ندُنْ؞»‏

ٻِطّٛ جَايِرُسْ اٜ دٜبّٛ مٛ پِيپَمْ رُفَنْتَ

¹⁸يٜىٰسُ اٜ ندٜرْ وِيکِٻٜ نٛنْ، سٜيْ غٛطّٛ اَرْدِيطٛ سُودُ دٛعَارٜ بِعٜتٜىٰطٛ جَايِرُسْ وَرِ؞ اٛ دِشِّي يٜىٰسٛ يٜىٰسُ، اٛ وِعِ، ‏«‏ٻِطّٛ اَمْ سُرْبَاجٛ مَايِي جٛونِ‑جٛونِ، اَمَّا وَرٛيْ نجَحٜنْ مٜىٰمَامٛ، اٛ اُمّٛتٛ؞»‏

¹⁹يٜىٰسُ اُمّٛدِي اٜ تٛکُّٻٜمٛ ٻٜ ندِلِّدِ اٜ مَاکٛ؞

²⁰تٛو، اٜ وٛودِ غٛطّٛ دٜبّٛ طٛنْ غَطُطٛ دُوٻِ سَڤّٛ اٜ طِطِ اٜ تٛرّٛدٛو اٜ رُفُکِ پِيپَمْ اٛ پِوٛيِ غَطَ يٜىٰسُ، اٛ مٜىٰمِ شِلْمبِ تٛغّٛورٜ مَاکٛ؞ ²¹نغَمْ اٛ وِعِي ندٜرْ ٻٜرْندٜ مَاکٛ، ‏«‏کٛو تٛغّٛورٜ مَاکٛ تَنْ مٜىٰمُمِ، مِ يَمْطِتَيْ؞»‏

²²ندٜ يٜىٰسُ وَيْلِتِي، يِعِمٛ، وِعِ، ‏«‏تَاع وَنُّ، بَنْدِرَاوٛ؞ حٛولَارٜ مَاطَ يَمْطِتِنِيمَ؞»‏ طٛنْ اٜ طٛنْ دٜبّٛ اٛنْ يَمْطِتِ؞

²³ندٜ يٜىٰسُ يٛتِّي وُرٛ جَايِرُسْ اٛنْ، يِعِ دُودٛوٻٜ دُودَالِ اٜ حَوْرُتُٻٜ اٜ ٻٜ نغُلَّ سٜمْبٜىٰ، ²⁴سٜيْ اٛ وِعِٻٜ، ‏«‏اَلٜىٰ طٛعٛ، نغَمْ سُرْبَاجٛ اٛنْ مَايَايِ، اَمَّا اٛ طَانِ؞»‏ سٜيْ ٻٜ نجَلِمٛ؞ ²⁵اَمَّا غَطَ اٛ وُرْتِنِي کٛو مٛيٜ يَاسِ، اٛ نَتِّ، اٛ جٛغِي جُنْغٛ سُرْبَاجٛ اٛنْ، سٜيْ سُرْبَاجٛ اٛنْ اُمِّي؞ ²⁶حَبَرُ طُمْ بٛو سَنْکِتِي کٛو تٛيٜ ندٜرْ لٜيْدِ ندِنْ؞

يٜىٰسُ يَمْطِتِنِي وُمْٻٜ

²⁷يٜىٰسُ اٜ اَلَ وِغٜىٰرٜ ندٜنْ، سٜيْ وٛٻّٜ وُمْٻٜ طِطٛ تٛکِّمٛ اٜ نٛدَّ سٜمْبٜىٰ، اٜ مبِعَ، ‏«‏ٻِطّٛ دَوْدَ، يُرْمِنَنْمِنْ!‏»‏

²⁸ندٜ يٜىٰسُ نَتِّ وٛنْغٛ وُرٛ، سٜيْ وُمْٻٜ ٻٜنْ نغَرِ تٛ مَاکٛ، اٛ پَمِٻٜ، اٛ وِعِ، ‏«‏اٛنْ نجَٻِي مِ وَاوَيْ يَمْطِتِنْکِعٛنْ؟»‏ ٻٜ مبِعِمٛ، ‏«‏اٜىٰ، مٛودِبّٛ؞»‏

²⁹سٜيْ يٜىٰسُ مٜىٰمِ غِتٜ مَٻّٜ، وِعِ، ‏«‏نٛنْ نٛ کٛولٛرِيطٛنْيَمْ مِ يَمْطِتِنَيْعٛنْ؞»‏ ³⁰طٛنْ اٜ طٛنْ غِتٜ مَٻّٜ مبُمْتِي؞ سٜيْ يٜىٰسُ وَغِّنِٻٜ، وِعِ، ‏«‏تٛع اٛنْ مبِعُکَ غٛطّٛ؞»‏

³¹اَمَّا ٻٜ ندِلِّ ٻٜ شَنْکِتِ حَبَرُ مَاکٛ کٛو تٛيٜ ندٜرْ لٜيْدِ ندِنْ؞

يٜىٰسُ يَمْطِتِنِي ڤَحٛ

³²وُمْٻٜ ٻٜنْ اٜ ندِلَّ، سٜيْ طُمْ وَدَّنِ يٜىٰسُ غٛطّٛ غٛودُطٛ غِنّٛلْ غَرْتِرْنغٛلْمٛ ڤَحٛ؞ ³³غَطَ يٜىٰسُ وُرْتِنِي غِنّٛلْ نغٛلْ، نٜطّٛ اٛنْ فُطِّ مٜتُکِ؞ يِمْٻٜ طُطْٻٜ کَوْرُتُٻٜ طٛنْ کَيْطِنِ، مبِعِ، ‏«‏طُمْ مٜىٰطَايِ يِيکِ غٛطُّمْ اِرِ طُعُمْ ندٜرْ لٜيْدِ اِسْرَاعِيلَ؞»‏

³⁴اَمَّا فَارِسَنْکٛعٜنْ مبِعِ، ‏«‏اٜ بَوْطٜ بَعَلْجَبُلْ لَامِيطٛ غِنِّ اٛ وُرْتِنِرْتَ غِنِّ؞»‏

يٜىٰسُ يُرْمِنَنِي يِمْٻٜ

³⁵يٜىٰسُ يَحِ غَرِيجٜ مَوْطٜ اٜ نغَرِحٛيْ ڤَمَرٛيْ فُو، اٜ اٜکِّتِنَ ندٜرْ شُوطِ دٛعَارٜ طِ يَحُودَنْکٛعٜنْ، اٜ وَعَجِنَ حَبَرُ بٜلْطُمْ دٛوْ لَامُ اَللَّه، اٜ مٛ يَمْطِتِنَ يِمْٻٜ غٛودُٻٜ کٛو اِرِ طُمٜ ݧَوُ، اٜ کٛو اِرِ طُمٜ شِيَ نجَمُ؞ ³⁶ندٜ اٛ يِعِ يِمْٻٜ طُطْٻٜ کَوْرِتِي، سٜيْ اٛ نَنِ جُرُمْطُمْ مَٻّٜ، نغَمْ اٜ ٻٜ تٛرّٛو، وَلَا بَلَّيْطٛٻٜ، بٛ بَالِ طِ نغَلَا غَيْنَاکٛ؞ ³⁷سٜيْ اٛ وِعِ تٛکُّٻٜمٛ، ‏«‏غٜسٜ ٻٜنْدُطٜ اٜ طُوطِ، اَمَّا حُوٛوٻٜ طُوطَا؞ ³⁸تٛرٜىٰ جٛومُ غٜسٜ طٜنْ لِلٛيَ حُوٛوٻٜ ندٜرْ غٜسٜ مَاکٛ؞»‏

لِلَاٻٜ سَڤّٛ اٜ طِطٛ

¹سٜيْ يٜىٰسُ نٛدِّ تٛکُّٻٜمٛ سَڤّٛ اٜ طِطٛ، اٛ حٛکِّٻٜ بَوْطٜ وُرْتِنْکِ غِنِّ اٜ يَمْطِتِنْکِ يِمْٻٜ دَغَ کٛو اِرِ طُمٜ ݧَوُ اٜ شِيَ نجَمُ؞ ²رَا اِنْطٜ لِلَاٻٜ سَڤّٛ اٜ طِطٛ ٻٜنْ:‏ اَرَنْدٜ اٜ وٛودِ سِيمَنْ بِعٜتٜىٰطٛ بِيتُرُسْ، اٜ مِݧِرَاوٛ مَاکٛ اَنْدِرَاوُسْ، اٜ يَاکُبُ ٻِي جَبَدِ، اٜ مِݧِرَاوٛ مَاکٛ يَحَيَ، ³اٜ فِلِبُسْ، اٜ بَتِلٛومِ، اٜ تٛومَ، اٜ مَاتِيُ جَٻٛووٛ شٜىٰدٜ لٜيْدِ، اٜ يَاکُبُ ٻِي حَلْفَ، اٜ تَادِيُسْ، ⁴اٜ سِيمَنْ کَنَنِيَنْکٜىٰجٛ، ندٜنْ اٜ يَحُودَ اِسْکَرِيٛوتِ، غَرْتُطٛ کٛکِّتِرْطٛ يٜىٰسُ؞

يٜىٰسُ لِلِي تٛکُّٻٜمٛ سَڤّٛ اٜ طِطٛ

⁵يٜىٰسُ لِلِ تٛکُّٻٜمٛ سَڤّٛ اٜ طِطٛ ٻٜنْ، اٛ وِعِٻٜ، ‏«‏تٛع اٛنْ نجَحُ تٛ يِمْٻٜ نَاع يَحُودَنْکٛعٜنْ؞ طٛنْمَا تٛع اٛنْ نَتُّ غَرِيجٜ سَمَارِيَنْکٛعٜنْ؞ ⁶سٜيْ نِ نجَحٛنْ تٛ يِمْٻٜ اِسْرَاعِيلَ غَرْتُٻٜ بٛ بَالِ مَجُّطِ؞ ⁷نجَحٜىٰ، نغَعَجِنَنٛنْٻٜ، مبِعٛنْ، ‏‹‏لَامُ اَللَّه وَرِي حَادٜ؞›‏ ⁸نجَمْطِتِنٜىٰ ݧَوْٻٜ، اُمِّنٜىٰ مَيْٻٜ دَغَ مَيْدٜ، نجَمْطِتِنٜىٰ غٛودُٻٜ ݧَوُ ݧَامٛوجُمْ لَرَلْ، مبُرْتِنَنٜىٰ يِمْٻٜ غِنِّ؞ مِ حٛکِّيعٛنْ بَوْطٜ يَمْطِتِنْکِ يِمْٻٜ شَاحُ، نغَمْ نٛنْ نجَمْطِتِنٜىٰ يِمْٻٜ شَاحُ؞ ⁹تٛع اٛنْ نجٛغٛ شٜىٰدٜ جِينَارِ، کٛو شٜىٰدٜ اَجُرْفَارِ، کٛو شٜىٰدٜ نجَمْندِ مبٛطٜىٰرِ؞ ¹⁰ندٜنْ تٛع اٛنْ نجَادُ اٜ جَکَارٜ، کٛو تٛغّٛوجٜ طِطِ، کٛو ڤَطٜ کٛيْطٜ طِطِ، کٛو سَوْرُ، نغَمْ کُوٛووٛ حَانِي حٛکّٜىٰ ݧَمْندُ؞

¹¹‏«‏فُو غَرِيرِ کٛو غَرِيٜلْ ڤَمَرٜلْ تٛ نَتُّطٛنْ، طَٻِّتٜىٰ نٜطّٛ مٛ نغِکُّ بٛطُّمْ، نجٛوطٛوطٛنْ وُرٛ مَاکٛ نَا اٛنْ اَلِي وِغٜىٰرٜ ندٜنْ؞ ¹²تٛ اٛنْ نَتِّي وُرٛ نغٛنْ، شِلْمِنٜىٰ؞ ¹³تٛ يِمْٻٜ وُرٛ نغٛنْ نجَٻَّکٜعٛنْ بٛطُّمْ، اَلٜىٰ بَرْکَ مٛوطٛنْ جٛوطٛو دٛوْ مَٻّٜ؞ اَمَّا تٛ ٻٜ نجَٻَّاکِعٛنْ بٛطُّمْ، اَلٜىٰ بَرْکَ مٛوطٛنْ وَرْتَ تٛ مٛوطٛنْ؞ ¹⁴فُو مٛ جَٻَّاکِعٛنْ، کٛو وَݧِ کٛ مبِيطٛنْ، تٛ اٛنْ مبُرْتَکٜ وُرٛ نغٛنْ کٛو غَرِيرِ ندِنْ، ڤِطّٜىٰ سٛلَّارٜ کٛيْطٜ مٛوطٛنْ؞ ¹⁵اٜ مِ وِعَعٛنْ غٛونغَ، ݧَلْندٜ جَانغٛ اَللَّه ٻُرَيْ يُرْمِنَنْکِ يِمْٻٜ سٛدٛمْ اٜ غٛمٛورَ دٛوْ يِمْٻٜ غَرِيرِ ندِنْ طٛنْ؞

تٛرَّاجِ غَرَيْطِ

¹⁶‏«‏رَطُّمْ، اٜ مِ لِلَعٛنْ بٛنٛ مبَالٛيْ شَکَ شَافَالِ؞ نغَمْ نٛنْ، ڤَامَنٜىٰ کٛعٜ مٛوطٛنْ نٛ بٛولٜ نغَطَتَ، طٛنْمَا نغَرْتٜىٰ ٻٜ کَلَّا بٛ ڤٛولِ؞ ¹⁷ڤَامَنٜىٰ يِمْٻٜ، نغَمْ ٻٜ نجَارَيْعٛنْ يٜىٰسٛ مَوْٻٜ، ٻٜ ڤِيَعٛنْ ندٜرْ شُوطِ دٛعَارٜ مَٻّٜ، ¹⁸ٻٜ نجَارَعٛنْ يٜىٰسٛ مَوْٻٜ لٜيْدِ اٜ لَامِيٻٜ، نغَمْ اٛنْ تٛکُّٻٜيَمْ اٛنْ کٛکَّيْٻٜ حَبَرُ اَمْ؞ نٛنْ وَرْتَيْ لَاوٛلْ نٛ کٛکِّرْتٛنْٻٜ حَبَرُ اَمْ کَمْٻٜ اٜ يِمْٻٜ نَاع يَحُودَنْکٛعٜنْ؞ ¹⁹فُو شَرٜلْ نغٜلْ طُمْ نَنْغِعٛنْ طُمْ يَارِعٛنْ يٜىٰسٛ لَامُ، تٛع اٛنْ نغَنُّ دٛوْ نٛ مٜتِرْتٛنْ، کٛو کٛ مبِعٛتٛنْ، نغَمْ ندٜرْ شَرٜلْ نغٜلْ طُمْ وِعَيْعٛنْ کٛ مبِعٛتٛنْ؞ ²⁰نغَمْ نَاع طُمْ اٛنٛنْ مٜتَتَ، اَمَّا طُمْ رُوحُ ݧَاکٛ مٛوطٛنْ مٛ دٛوْ مٜتَتَ ندٜرْ کٛنْدُطٜ مٛوطٛنْ؞

²¹‏«‏نٜطّٛ حٛکِّتِرَيْ سَکِرَاوٛ مُوطُمْ طُمْ وَرَمٛ، ݧَاکٛ مَا حٛکِّتِرَيْ ٻِطّٛ مُوطُمْ؞ ٻِٻّٜ اُمَّنْتٛ دَݧٛوٻٜ مَٻّٜ، ٻٜ نغَطَ طُمْ وَرَٻٜ؞ ²²کٛو مٛيٜ وَݧَيْعٛنْ نغَمْ اٛنْ تٛکُّٻٜيَمْ؞ اَمَّا مُݧُطٛ حَا رٜعِرْدٜ حِسَيْ؞ ²³تٛ يِمْٻٜ تٛرِّيعٛنْ ندٜرْ وٛنْدِ غَرِيرِ، ندٛغّٜىٰ نجَحٛنْ وٛنْدِ غَرِيرِ؞ اٜ مِ وِعَعٛنْ غٛونغَ، کٛ نجَحِدٛنْ غَرِيجٜ اِسْرَاعِيلَ فُو، ٻِي نٜطّٛ وَرْتٛيَيْ؞

²⁴‏«‏اٜکِّتٛتٛوطٛ ٻُرَتَا مٛودِبّٛ مُوطُمْ، مَشُّطٛ بٛو ٻُرَتَا جٜيْطٛمٛ؞ ²⁵اٜکِّتٛتٛوطٛ نَنَيْ بٜلْطُمْ تٛ وَرْتِي بٛ مٛودِبّٛ مُوطُمْ، مَشُّطٛ مَا نَنَيْ بٜلْطُمْ تٛ وَرْتِي بٛ جٜيْطٛمٛ؞ تٛ ٻٜ نٛدِّرِي جٛومُ وُرٛ اٛنْ بَعَلْجَبُلْ لَامِيطٛ غِنِّ، ٻٜ ٻُرَيْ وِيکِ کٛ حَلِّ دٛوْ ٻٜ وُرٛ نغٛنْ!‏

کَانُطٛ حُلٜىٰ

²⁶‏«‏نغَمْ نٛنْ، تٛع اٛنْ کُلُ يِمْٻٜ، نغَمْ وَلَا غٛطُّمْ اٛمْبَاطُمْ طُمْ اٛمْتَتَاکٜ، نٛنْ مَا وَلَا شُوطِيطُمْ طُمْ سُورِتَتَاکٜ؞ ²⁷کٛ مبِيمِعٛنْ ندٜرْ ݧِوْرٜ، مبِعٜىٰکَ ݧَلَوْمَ، نٛنْ مَا کٛ نَنْطٛنْ تٛ اَمْ اٜ سُوطٜ، مبِعٜىٰکَ اٜ نجَيْرِ؞ ²⁸تٛع اٛنْ کُلُ وَرٛوٻٜ ٻَنْدُ نٜطّٛ، اَمَّا ٻٜ مبَاوَتَا وَرْکِ يٛنْکِ مَاکٛ؞ سٜيْ نِ کُلٛنْ اٛنْ طٛنْ بَاوَيْطٛ حَلْکَ ٻَنْدُ اٜ يٛنْکِ فُو ندٜرْ وُرٛ حِيتٜ؞ ²⁹نَاع شٛلٛيْ طِطٛيْ اٜ شٛورٜىٰ يَمْندٜ غٛعٛ؟ فُو اٜ نٛنْ وَلَا کٛو غٛعٛتٜلْ مَاکٛيْ بَاتَيْنغٜلْ نَا اٜ يِدّٜ ݧَاکٛ مٛوطٛنْ مٛ دٛوْ؞ ³⁰کٛو غَاسَ کٛعٜ مٛوطٛنْ مَا فُو کَ لِمَامَ؞ ³¹نغَمْ نٛنْ، تٛع اٛنْ کُلُ، اٛنْ ٻُرِي شٛلٛيْ طُطْکٛيْ؞

جَٻُکِ اَلْمَسِيحُ يٜىٰسٛ يِمْٻٜ

³²‏«‏کٛو مٛيٜ جَٻُطٛيَمْ يٜىٰسٛ يِمْٻٜ، مِ جَٻَيْمٛ يٜىٰسٛ ݧَاکٛ اَمْ مٛ دٛوْ؞ ³³اَمَّا فُو غَݧُطٛيَمْ يٜىٰسٛ يِمْٻٜ، مِنْ مَا مِ وَݧَيْمٛ يٜىٰسٛ ݧَاکٛ اَمْ مٛ دٛوْ؞

مِ وَدَّايِ جٛنْدٜ جَمْ

³⁴‏«‏تٛع اٛنْ کَمّٛ مِ وَرٛيِي وَدَّنْکِ دُونِيَارُ جٛنْدٜ جَمْ؞ مِ وَرٛيَايِ نغَمْ وَدُّکِ جٛنْدٜ جَمْ، سٜيْ نِ حَوْرٜ؞ ³⁵مِ وَرِي نغَمْ مِ وَدَّ سٜنْدِرْکِ حَکُّندٜ ٻِطّٛ اٜ ݧَاکٛ مُوطُمْ، ٻِطّٛ دٜبّٛ اٜ مَدُوجٛ مُوطُمْ، دٜبّٛ بٛو اٜ اٜسِرَاوٛ مُوطُمْ دٜبّٛ؞ ³⁶ٻٜ نجٛوطٛدِطَا وُرٛ غٛعٛ ٻٜ نغَرْتَيْ وَݧْوَݧْٻٜ مَاطَ؞

³⁷‏«‏کٛو مٛيٜ ٻُرِ يِطُکِ ݧَاکٛ مُوطُمْ کٛو مَدُوجٛ مُوطُمْ دٛوْ اَمْ، اٛ فٛتَايِ وَرْتُکِ تٛکُّطٛيَمْ؞ طٛنْمَا فُو ٻُرْطٛ يِطُکِ ٻِطّٛ مُوطُمْ دٛوْ اَمْ، اٛ فٛتَايِ وَرْتُکِ تٛکُّطٛيَمْ؞ ³⁸ندٜنْ فُو مٛ حٛشَّايِ غَافَانغَلْ مُوطُمْ تٛکِّيَمْ، اٛ فٛتَايِ وَرْتُکِ تٛکُّطٛيَمْ؞ ³⁹فُو غِطّٛ حِسْنُکِ يٛنْکِ مُوطُمْ، اٛ دُلَّيْکِ؞ اَمَّا فُو دُلُّطٛ يٛنْکِ مُوطُمْ نغَمْ اَمْ، اٛ حِسْنَيْکِ؞

مبَرْجَارِ

⁴⁰‏«‏فُو جَٻُطٛعٛنْ جَٻِييَمْ، طٛنْمَا فُو جَٻُطٛيَم جَٻِي اٛنْ طٛنْ لِلٛيْطٛيَمْ؞ ⁴¹کٛو مٛيٜ جَٻُطٛ اَنَّبِيجٛ نغَمْ اٛ اَنَّبِيجٛ، اٛ حٜٻَيْ مبَرْجَارِ اَنَّبِيجٛ؞ ندٜنْ کٛو مٛيٜ جَٻُطٛ اَادِلِيجٛ نغَمْ اٛ اَادِلِيجٛ، اٛ حٜٻَيْ مبَرْجَارِ اَادِلِيجٛ؞ ⁴²کٛو مٛيٜ کٛکُّطٛ ٻُرْطٛ فَمْطُکِ ندٜرْ تٛکُّٻٜيَمْ ٻٜعٜ کٛو ندِيَمْ ڤٜوْطَمْ ندٜرْ جَرْدُغٜلْ نغَمْ اٛ تٛکُّطٛيَمْ، اٜ مِ وِعَعٛنْ غٛونغَ، اٛ دُلَّتَا حٜٻُکِ مبَرْجَارِ؞»‏

يٜىٰسُ اٜ يَحَيَ غَطٛووٛ بَڤْتِسْمَ

¹ندٜ يٜىٰسُ يٛتِّنِ کٛ وِعَتَ تٛکُّٻٜمٛ سَڤّٛ اٜ طِطٛ، سٜيْ اٛ اُمِّي دَغَ طٛنْ، اٛ دِلِّ، اٜ مٛ اٜکِّتِنَ، اٜ مٛ وَعَجِنَ ندٜرْ غَرِيجٜ؞

²اٜ شَرٜلْ نغٜلْ، يَحَيَ غَطٛووٛ بَڤْتِسْمَ سُرَامَ ندٜرْ سُودُ شُرَلْ؞ ندٜ اٛ نَنِ حَبَرُ کٛ اَلْمَسِيحُ وَطَتَ، سٜيْ اٛ نٛدِّ وٛٻّٜ ندٜرْ تٛکُّٻٜمٛ اٛ لِلِٻٜ تٛ مَاکٛ ³نغَمْ ٻٜ پَمَمٛ، ٻٜ مبِعَ، ‏«‏اَنْ وٛنِ اَلْمَسِيحُ مٛ طُمْ وِعِ وَرَيْ، کٛو مِنْ کٜطٛو غٛطّٛ؟»‏

⁴يٜىٰسُ نٛوتِي، وِعِٻٜ، ‏«‏نجَحٜىٰ، مبِعٛنْ يَحَيَ کٛ نَنُطٛنْ اٜ کٛ نغِيطٛنْ:‏ ⁵وُمْٻٜ اٜ مبُمْتَ، جَرَاٻٜ اٜ نجَاٻَ، غٛودُٻٜ ݧَوُ ݧَامٛوجُمْ لَرَلْ اٜ نجَمْطِتِنٜىٰ، ڤَحُٻٜ اٜ نَنَ، مَيْٻٜ اٜ اُمِّنٜىٰ، ٻٜ نغَلَنَا اٜ نغَعَجِنَنٜىٰ حَبَرُ بٜلْطُمْ؞ ⁶اٛ بَرْکِطِنَاطٛ نٜطّٛ مٛ اَلَايِ حٛولَاکِيَمْ؞»‏

⁷غَطَ لِلَاٻٜ ٻٜنْ ندِلِّ، سٜيْ يٜىٰسُ فُطِّ مٜتَنْکِ يِمْٻٜ دٛوْ يَحَيَ، اٛ وِعِٻٜ، ‏«‏طُمٜ نجَاطٛنْ رَارٛيْکِ ندٜرْ لَدّٜ؟ کُطٛلْ نغٛلْ حٜنْدُ دِمْبَتَ ندَارٛيْطٛنْ؟ ⁸تٛ نَاع نٛنْ، طُمٜ نجَاطٛنْ رَارٛيْکِ؟ نٜطّٛ ٻٛرْنِيطٛ لِمْشٜ بٛطّٜ؟ نَاع نٛنْ، نغَمْ ٻٛرْنٛتٛوٻٜ لِمْشٜ بٛطّٜ اٜ لَامٛرْدٜ ٻٜ نغٛنِ؞ ⁹تٛو، طُمٜ نجَاطٛنْ رَارٛيْکِ؟ اَنَّبِيجٛ؟ اٜ مِ وِعَعٛنْ غٛونغَ، اٛ ٻُرِي اَنَّبِيجٛ؞ ¹⁰کَنْکٛ وٛنِ مٛ اَللَّه وِعِ ندٜرْ اَايَارٜ، ‏‹‏رَطُّمْ، مِ لِلٛيَيْ لِلَاطٛ اَمْ اٛ اَرْدٛو يٜىٰسٛ مَاطَ اٛ مٛعِّنَنْمَا لَاوٛلْ؞›‏ ¹¹اٜ مِ وِعَعٛنْ غٛونغَ، ندٜرْ ٻٜ رٜوْٻٜ ندَݧِ فُو وَلَا ٻُرْطٛ يَحَيَ غَطٛووٛ بَڤْتِسْمَ مَنْغُ؞ فُو اٜ نٛنْ، ٻُرْطٛ فَمْطُکِ ندٜرْ لَامُ اَللَّه ٻُرِيمٛ مَنْغُ؞ ¹²دَغَ جَامَنُ يَحَيَ غَطٛووٛ بَڤْتِسْمَ حَا وَدُّکِ حَنْدٜ، لَامُ اَللَّه اٜ تٛرّٜىٰ؞ تٛرّٛوٻٜ لَامُ طُمْ اٜ نغِطِ تٜىٰتَطُمْ اٜ سٜمْبٜ؞ ¹³نغَمْ دٜفْتٜ اَنَّبٛعٜنْ فُو اٜ اَتَّوْرَ مٜتِي دٛوْ لَامُ طُمْ نَا يَحَيَ غَطٛووٛ بَڤْتِسْمَ وَرِ؞ ¹⁴تٛ اٛنْ نجَٻَيْ کٛ ٻٜ مبِعِ، يَحَيَ وٛنِ اِلِيَ مٛ طُمْ وِعِ وَرَيْ؞ ¹⁵غٛودُطٛ نٛڤِّ نَنُکِ فُو نَنَ؞

¹⁶‏«‏کٛ نَنْدِنَيْمِ يِمْٻٜ جَامَنُ طُعُمْ؟ اٜ ٻٜ نَنْدِ اٜ سُکَحٛيْ نجٛوطِيکٛيْ ندٜرْ لُومٛ اٜ نٛدِّندِرَ، اٜ مبِعَ، ¹⁷‏‹‏مِنْ ندُودَنِيعٛنْ دُودَاندُ، اَمَّا اٛنْ نغَمَايِ؞ مِنْ مبٛيِ بٛ غٛطّٛ مَايِ، اَمَّا اٛنْ مبٛيَايِ؞›‏ ¹⁸نغَمْ يَحَيَ غَطٛووٛ بَڤْتِسْمَ وَرِي ݧَامَتَا ݧَمْندُ يَرَتَا ندِيَمْ اِنَبٛجَمْ، سٜيْ ٻٜ مبِعِ، ‏‹‏اٜ مٛ وٛودِ غِنّٛلْ؞›‏ ¹⁹ٻِي نٜطّٛ بٛو وَرِي اٜ ݧَامَ اٜ يَرَ، سٜيْ ٻٜ مبِعِ، ‏‹‏رَا اٛعٛ، اٛ بٜىٰلَاطٛ اٛ جَرٛووٛ، حِغٛ جَٻٛوٻٜ شٜىٰدٜ لٜيْدِ اٜ غَطٛوٻٜ حَکّٜ؞›‏ فُو اٜ نٛنْ، تٛکُّٻٜ لَاوٛلْ اَللَّه فُو اٜ ٻٜ کٛلَّ کَنْغٛلْ وٛنِ غٛونغَوٛلْ؞»‏

غَرِيجٜ طٜ تُوبَايِ

²⁰سٜيْ اٛ فُطِّ حَٻَنْکِ غَرِيجٜ طٜ اٛ وَطِ کُوطٜ کَيْطِنِيطٜ ندٜرْ مَاجٜ نغَمْ يِمْٻٜ غَرِيجٜ طٜنْ تُوبَايِ؞ ²¹اٛ وِعِ، ‏«‏يِمْٻٜ غَرِيرِ کٛرَسِنْ، اٛنْ مبٛنِي!‏ يِمْٻٜ غَرِيرِ بٜتَسَيْدَ، اٛنْ مبٛنِي!‏ دَا کُوطٜ کَيْطِنِيطٜ غَطَاطٜ ندٜرْ مٛوطٛنْ طٜ نغَطَنَامَ يِمْٻٜ تَايَ اٜ سِدٛنْ، دَا ٻٜ ٻٛرْنَکٜ کٛلْتٜ کٛلَّيْطٜ وَنَّارٜ ٻٜ نجٛوطَکٜ ندٜرْ تٛوکَ نغَمْ حٛلُّکِ ٻٜ تُوبِي؞ ²²اَمَّا اٜ مِ وِعَعٛنْ، ݧَلْندٜ جَانغٛ اَللَّه ٻُرَيْ يُرْمِنَنْکِ يِمْٻٜ تَايَ اٜ سِدٛنْ دٛوْ مٛوطٛنْ؞ ²³اٛنٛنْ بٛو، يِمْٻٜ غَرِيرِ کَفَرْنَحُمْ، اٛنْ کَمِّي طُمْ حٛشَّيْعٛنْ يَاکِ دٛوْ؟ نَاع نٛنْ!‏ طُمْ نَتِّنَيْعٛنْ ندٜرْ نغَيْکَ حِيتٜ؞ دَا کُوطٜ کَيْطِنِيطٜ غَطَاطٜ ندٜرْ مَاطَ طٜ نغَطَامَ ندٜرْ غَرِيرِ سٛدٛمْ، دَا اٜ ندِ طٛنْ حَا جٛونِ؞ ²⁴اَمَّا اٜ مِ وِعَعٛنْ، ݧَلْندٜ جَانغٛ اَللَّه ٻُرَيْ يُرْمِنَنْکِ يِمْٻٜ سٛدٛمْ دٛوْ مٛوطٛنْ؞»‏

سِوْتَارٜ تٛرّٛتٛوٻٜ

²⁵اٜ شَرٜلْ نغٜلْ يٜىٰسُ وِعِ، ‏«‏مِ يٜتِّيمَ، ݧَاکٛ اَمْ مٛ دٛوْ، جٛومِرَاوٛ دٛوْ اٜ لٜيْ، نغَمْ اَ سُوطِي فِي طُعُمْ تٛ غٛودُٻٜ فَامُ اٜ اَنْدَلْ، اَ حٛلِّيطُمْ ٻِکّٛيْ ڤَمَرٛيْ؞ ²⁶نٛنْ ݧَاکٛ اَمْ، نغَمْ نٛنْ وٜلَنْمَا نغَطَا؞»‏

²⁷سٜيْ اٛ وِعِ يِمْٻٜ، ‏«‏ݧَاکٛ اَمْ حٛکِّييَمْ کٛو طُمٜ؞ وَلَا اَنْدُطٛ مٛيٜ وٛنِ ٻِطّٛ اٛنْ سٜيْ نِ ݧَاکٛ اٛنْ، نٛنْ مَا وَلَا اَنْدُطٛ ݧَاکٛ اٛنْ سٜيْ نِ ٻِطّٛ اٛنْ، اٜ مٛ ٻِطّٛ اٛنْ يِطِ اَنْدِنَ ݧَاکٛ اٛنْ؞

²⁸‏«‏نغَرٜىٰ تٛ اَمْ اٛنْ فُو دٛنْدِيٻٜ دٛݝْلٜ تٜدُّطٜ، مِ حٛکَّيْعٛنْ سِوْتَارٜ؞ ²⁹تٛکّٜىٰ کٛ مبِعَيْمِعٛنْ؞ اٜکِّتٜىٰ تٛ اَمْ، نغَمْ اٜ مِ وٛودِ حَکِّيلٛ، مِ لٜسْتِنْطٛ حٛورٜ، ندٜنْ ٻٜرْطٜ مٛوطٛنْ مبَلْتٛتٛ؞ ³⁰نغَمْ کٛ مبِيمِعٛنْ نغَطٛنْ طُمْ سَطَا وَطُکِ، ندٜنْ دٛنْغَلْ اَمْ تٜدَّا؞»‏

پَمٛلْ دٛوْ ݧَلْندٜ سِوْتَارٜ

¹اٜ شَرٜلْ نغٜلْ طُمْ ݧَلْندٜ سِوْتَارٜ؞ يٜىٰسُ اٜ يَحَ ندٜرْ نغٜسَ اَلْکَمَارِ، سٜيْ تٛکُّٻٜمٛ نَنِ وٜىٰلٛ ٻٜ ڤُطِّ ٻٛرُکِ شَمّٜىٰجٜ مَيْرِ اٜ ٻٜ ݧَامَ؞ ²اَمَّا ندٜ وٛٻّٜ فَارِسَنْکٛعٜنْ نغِعِ نٛنْ، مبِعِ يٜىٰسُ، ‏«‏رَا تٛکُّٻٜمَ اٜ نغَطَ کٛ اَتَّوْرَ حَطِ طُمْ وَطَ ݧَلْندٜ سِوْتَارٜ؞»‏

³سٜيْ يٜىٰسُ وِعِٻٜ، ‏«‏اٛنْ مٜىٰطَايِ جَنْغُکِ کٛ دَوْدَ وَطِ ندٜ نَنِ وٜىٰلٛ، کَنْکٛ اٜ غٛنْدُٻٜ اٜ مَاکٛ؟ ⁴اٛ نَتِّ لُکُرُ سٜنِيطُمْ، اٛ ݧَامِ بُرٛودِ شٜنِيطُمْ، اٛ حٛکّٛرِ جَادٛوٻٜ اٜ مَاکٛ؞ اَتَّوْرَ بٛو وِعِي اَرْدِيٻٜ دِينَ تَنْ حَانِ ݧَامُکِ بُرٛودِ طُمْ؞ ⁵کٛو اٛنْ مٜىٰطَايِ جَنْغُکِ ندٜرْ اَتَّوْرَ نٛ اَرْدِيٻٜ دِينَ نغٜوِرْتَ دٛوکَ ݧَلْندٜ سِوْتَارٜ ندٜرْ وُرٛ شٜنِينغٛ، اَمَّا طُمْ وَرْتَايِ حَکّٜ؟ ⁶اٜ مِ وِعَعٛنْ، رَا ٻُرْطٛ وُرٛ شٜنِينغٛ طٛعٛ؞ ⁷اَمَّا دَا اٛنْ اَنْدُنٛو مَعَنَ اَايَارٜ ندٜعٜ بِعُندٜ، ‏‹‏اٜ مِ يِطِ کٛلّٛنْ يُرْمٜىٰندٜ، نَاع سَکُّکِ شَکِّرِ،›‏ دَا اٛنْ کِيتَاکِ ٻٜ نغَطَايِ حَکّٜ؞ ⁸نغَمْ ٻِي نٜطّٛ وٛنِ جٛومُ ݧَلْندٜ سِوْتَارٜ؞»‏

يٜىٰسُ يَمْطِتِنِي مٛ جُنْغٛ جَرَانغٛ

⁹سٜيْ يٜىٰسُ اَلِ طٛنْ دِلِّ، نَتِّ سُودُ دٛعَارٜ مَٻّٜ؞ ¹⁰اٜ وٛودِ غٛطّٛ مٛ جُنْغٛ جَرَانغٛ ندٜرْ مَيْرُ؞ سٜيْ فَارِسَنْکٛعٜنْ پَمِ يٜىٰسُ، مبِعِ، ‏«‏اَتَّوْرَ جَٻِي طُمْ يَمْطِتِنَ ݧَلْندٜ سِوْتَارٜ؟»‏ ٻٜ مبِعُ نٛنْ نغَمْ ٻٜ کٜٻَ کٛ ٻٜ نغُلِّرٛيْتٛومٛ؞

¹¹سٜيْ يٜىٰسُ وِعِٻٜ، ‏«‏مٛيٜ ندٜرْ مٛوطٛنْ تٛ اٜ وٛودِ مبَالَ غٛعٛ تٛ نغَ يَنِي ندٜرْ نغَيْکَ ݧَلْندٜ سِوْتَارٜ، اٛ جٛغَتَاکٛنغَ اٛ اِتّٛيَنغَ؟ ¹²تٛو!‏ نٜطّٛ ٻُرِي مبَالَ دَرَجَ نَاع سٜطَّ!‏ نغَمْ نٛنْ، اَتَّوْرَ حَطَايِ طُمْ وَطَ کٛ وٛوطِ ݧَلْندٜ سِوْتَارٜ؞»‏ ¹³سٜيْ اٛ وِعِ نٜطّٛ اٛنْ، ‏«‏فٛرْتُ جُنْغٛ مَاطَ؞»‏

سٜيْ اٛ فٛرْتِنغٛ، سٜيْ نغٛ يَمْطِتِ، نغٛ وَرْتِ بٛ وٛعٛتٛ نغٛنْ؞ ¹⁴اَمَّا فَارِسَنْکٛعٜنْ ٻٜنْ مبُرْتِي مٜدِّ دٛوْ نٛ ٻٜ مبَرْدَتَ يٜىٰسُ؞

مَشُّطٛ مٛ اَللَّه سُٻِ

¹⁵ندٜ يٜىٰسُ فَامِ کٛ ٻٜ شِرْيٛتٛو، سٜيْ اٛ اُمِّي اٛ اَلِ وِغٜىٰرٜ ندٜنْ؞ سٜيْ يِمْٻٜ طُطْٻٜ تٛکِّمٛ، اٛ يَمْطِتِنِٻٜ ٻٜ فُو، ¹⁶اٛ وَغِّنِٻٜ تٛع ٻٜ مبِعَکَ کٛو مٛيٜ کَنْکٛ اٛ مٛيٜ؞ ¹⁷طُعُمْ فُو وَطِي نغَمْ طُمْ حٜبِّنَ کٛ اَللَّه وِعِ دَغَ حٛنْدُکٛ اَنَّبِ اِشَايَ، وِيکِ،

¹⁸‏«‏اٛعٛ وٛنِ مَشُّطٛ مٛ شُٻُمِ،

مٛ نغِطُمِ، اٜ مِ نَنَ بٜلْطُمْ مَاکٛ نَاع سٜطَّ؞

مِ حٛکَّيْمٛ رُوحُ اَمْ،

اٛ حٛکَّيْ لٜݧِ حَبَرُ کِسْندَمْ اَمْ؞

¹⁹اٛ يٜدَّتَا اٛ مٜتَتَا سٜمْبٜىٰ،

وَلَا نَنَيْطٛ حٛولٛ حٛنٛنْدٜ مَاکٛ دٛوْ طَتٜ؞

²⁰اٛ حٜىٰݧِتَتَا يٜوُکِ پٛمْبَلْ ٻَدِينغَلْ يٜوُکِ؞

اٛ ݧِفَتَا فِتِلَارُ ٻَدِيندُ وَاتُکِ،

نَا اٛ وَطِي اَادِلَاکُ حٜٻِ جَالٛرْغَلْ دٛوْ حَلّٜىٰندٜ؞

²¹لٜݧِ فُو نغَطَيْ کَمُّندٜ دٛوْ مَاکٛ؞»‏

يٜىٰسُ اٜ بَعَلْجَبُلْ

²²سٜيْ طُمْ وَدَّنِمٛ غٛطّٛ ڤَحٛ بُمْطٛ غٛودُطٛ غِنّٛلْ؞ يٜىٰسُ بٛو يَمْطِتِنِمٛ، اٛ وَرْتِ اٜ مٛ مٜتَ، اٜ مٛ يِعَ؞ ²³کَوْرُتُٻٜ فُو کَيْطِنِ، مبِعِ، ‏«‏اٜ يِيکِ مٛوطٛنْ کٛو اٛعٛ وٛنِ ٻِطّٛ دَوْدَ؟»‏

²⁴اَمَّا ندٜ فَارِسَنْکٛعٜنْ نَنِ نٛنْ، ٻٜ مبِعِ، ‏«‏اٜ بَوْطٜ بَعَلْجَبُلْ لَامِيطٛ غِنِّ اٛ وُرْتِنِرْتَ غِنِّ؞»‏

²⁵اَمَّا يٜىٰسُ اٜ اَنْدِ کٛ وٛنِ ندٜرْ ٻٜرْطٜ مَٻّٜ، اٛ وِعِٻٜ، ‏«‏لَامُ فُو شٜنْدِيطُمْ اٜ وَݧْوَݧْتِرَ، طُمْ لَلَّيْ؞ نٛنْ مَا تٛ غَرِيرِ کٛو وُرٛ سٜنْدَکٜ اٜ وَݧْوَݧْتِرَ، طُمْ وَاوَتَا طُمْ دَرٛو؞ ²⁶تٛ شٜيْطَنْ اٜ وُرْتِنَ غِنِّ شٜيْطَنْ ندٜرْ لَامُ شٜيْطَنْ، شٜيْطَنْ سٜنْدَکٜ اٜ وَݧْوَݧْتِرَ وٛنْ طٛنْ؞ تٛ لَامُ مَاکٛ سٜنْدَکٜ، نٛيٜ لَامُ طُمْ دَرٛرْتٛو؟ ²⁷تٛ اٜ مِ وُرْتِنِرَ غِنِّ ندٜرْ بَوْطٜ بَعَلْجَبُلْ، اٜ بَوْطٜ مٛيٜ تٛکُّٻٜعٛنْ مبُرْتِنِرْتَطِ؟ نغَمْ نٛنْ تٛکُّٻٜعٛنْ کٛلَّيْ اٛنْ نغَلَا غٛونغَ؞ ²⁸اَمَّا، تٛ اٜ مِ وُرْتِنَ غِنِّ ندٜرْ بَوْطٜ رُوحُ اَللَّه، تٛو، حٛلِّي لَامُ اَللَّه وَرَنِيعٛنْ؞

²⁹‏«‏نٛ وَطَتَ طُمْ وَاوَ نَتُّکِ وُرٛ نٜطّٛ شٜمْبِطّٛ طُمْ تٜىٰتَنَمٛ کٛ اٛ وٛودِ، نَاع سٜيْ تٛ طُمْ اَرْتِي حَٻُّکِمٛ؟ ندٜنْ طُمْ وَاوَ حٛشُّکِ کٛ اٛ وٛودِ ندٜرْ وُرٛ نغٛنْ؞

³⁰‏«‏مٛ وٛنْدَا اٜ اَمْ فُو، اٛ غَݧٛ اَمْ؞ مٛ وَلَّايِيَمْ مٛٻْتُکِ فُو، اٛ شَنْکِتٛووٛ؞ ³¹نغَمْ نٛنْ، اٜ مِ وِعَعٛنْ، طُمْ وَاوَيْ يَافَنَاکِ يِمْٻٜ حَکّٜ اٜ کٛو اِرِ طِيٜ حَالَاجِ طِ مبٛوطَا طِ ٻٜ مٜتِ، اَمَّا بِعُطٛ کٛ وٛوطَا دٛوْ رُوحُ اَللَّه اٛ يَافَنْتَاکٜ؞ ³²فُو بِعُطٛ کٛ وٛوطَا دٛوْ ٻِي نٜطّٛ، طُمْ وَاوَيْ يَافَنَاکِمٛ؞ اَمَّا فُو بِعُطٛ کٛ وٛوطَا دٛوْ رُوحُ اَللَّه، اٛ يَافَنْتَاکٜ حَا اَبَدَا؞

لٜکِّ اٜ ٻِکّٛيْ مَاکِ

³³‏«‏لٜکِّ بٛطْکِ اٜ رِمَ ٻِکّٛيْ مبٛطْکٛيْ، نٛنْ مَا لٜکِّ کِ وٛوطَا اٜ رِمَ ٻِکّٛيْ کٛيْ مبٛوطَا؞ کٛو کِيٜ لٜکِّ اٜ اَنْدِرٜىٰ ٻِکّٛيْ مَاکِ؞ ³⁴اٛنٛنْ بٛولٜ کَلُّطٜ!‏ نٛ وَطَتَ اٛنٛنْ کَلُّٻٜ مٜتٛنْ کٛ وٛوطِ؟ نغَمْ حٛنْدُکٛ نٜطّٛ اٜ مٜتَ کٛ وٛنِ ندٜرْ ٻٜرْندٜ مُوطُمْ؞ ³⁵نٜطّٛ مٛ نغِکُّ بٛطُّمْ اٜ وُرْتِنَ فِي بٛطُّمْ دَغَ ندٜرْ ٻٜرْندٜ مُوطُمْ؞ نٛنْ مَا نٜطّٛ کَلُّطٛ اٜ وُرْتِنَ حَلّٜىٰندٜ دَغَ ندٜرْ ٻٜرْندٜ مُوطُمْ؞

³⁶‏«‏اٜ مِ وِعَعٛنْ، ندٜرْ ݧَلْندٜ جَانغٛ کٛو مٛيٜ دٛولٜ وِعَ اَللَّه نغَمْ طُمٜ وِعِ کٛو طٜيٜ بٛلِيطٜ مٜىٰرٜىٰجٜ؞ ³⁷دٛوْ بٛلِيطٜ طٜ مبِعُطَا طُمْ وَطِرَنْتَمَ کِيتَ، کٛو طٜ نَنْغُمَا، کٛو طٜ مبُرْتِنْمَا؞»‏

يِطُکِ حٛلّٜىٰکِ کَيْطِنِيطُمْ

³⁸سٜيْ وٛٻّٜ ندٜرْ مٛودِٻّٜ اَتَّوْرَ اٜ فَارِسَنْکٛعٜنْ مبِعِمٛ، ‏«‏مٛودِبّٛ، اٜ مِنْ نغِطِ يِيکِ غٛطُّمْ کَيْطِنِيطُمْ دَغَ تٛ مَاطَ تَبِّتِنَيْطُمْ اَللَّه لِلٛيْمَا؞»‏

³⁹سٜيْ يٜىٰسُ نٛوتِي، وِعِٻٜ، ‏«‏يِمْٻٜ جَامَنُ طُعُمْ کَلُّٻٜ ٻٜ کُلَتَا اَللَّه، اٜ ٻٜ نغِطِ حٛلّٜىٰکِ غٛطُّمْ کَيْطِنِيطُمْ، اَمَّا وَلَا کٛ طُمْ حٛلَّتَٻٜ سٜيْ نِ کٛ حٜٻُنٛ اَنَّبِ اِنُوسَ؞ ⁴⁰نغَمْ نٛنْ، نٛ اِنُوسَ وَطِرِ بَلْطٜ تَتِ جٜمَّ اٜ ݧَلَوْمَ ندٜرْ وٛنْغَ لِنْغَ مَنْغَ، نٛنْ مَا ٻِي نٜطّٛ وَطِرْتَ بَلْطٜ تَتِ جٜمَّ اٜ ݧَلَوْمَ ندٜرْ يٜنَاندٜ؞ ⁴¹اٜ ݧَلْندٜ جَانغٛ يِمْٻٜ غَرِيرِ نِينٜبَ ٻٜ اُمّٛدٛتٛ اٜ يِمْٻٜ جَامَنُ طُعُمْ؞ ٻٜ کٛلَّ کٛ يِمْٻٜ جَامَنُ طُعُمْ نغَطِ طُمْ وٛوطَا، نغَمْ کَمْٻٜ، ندٜ ٻٜ نَنِ وَعَجُ اَنَّبِ اِنُوسَ، ٻٜ تُوبِي؞ رَا بٛو ٻُرْطٛ اِنُوسَ طٛعٛ؞ ⁴²ݧَلْندٜ جَانغٛ لَامِيطٛ لٜيْدِ فٛمْبِنَ دٜبّٛ اٛ اُمّٛدٛتٛ اٜ يِمْٻٜ جَامَنُ طُعُمْ؞ اٛ حٛلَّ کٛ ٻٜ نغَطِ طُمْ وٛوطَا، نغَمْ کَنْکٛ اٛ وَرٛيِي دَغَ ٻَدَاکِ نَنُکِ فَامُ اَنَّبِ سُلٜيْمَانُ؞ رَا بٛو ٻُرْطٛ سُلٜيْمَانُ طٛعٛ؞

وَرْتُکِ غِنّٛلْ

⁴³‏«‏تٛ غِنّٛلْ وُرْتَکٜ ندٜرْ ٻَنْدُ نٜطّٛ، نغٛلْ يَحَيْ تٛ بِغٜىٰجٜ جٛرْطٜ اٜ نغٛلْ طَٻِّتَ تٛ نغٛلْ سِوْتٛتٛو؞ اَمَّا تٛ نغٛلْ حٜٻَايِ، ⁴⁴سٜيْ نغٛلْ وِعَ، ‏‹‏مِ سٛعّٛتٛ وُرٛ نغٛ مبُرْتٛيِيمِ؞›‏ تٛ نغٛلْ وَرْتِي، نغٛلْ تَوِي وُرٛ نغٛنْ وَلَا غٛطُّمْ ندٜرْ، نغٛ وُووَامَ نغٛ مٛعِّنَامَ؞ ⁴⁵سٜيْ نغٛلْ يَحَ نغٛلْ وَدّٛيَ غِنِّ جٛوٜىٰطِطِ ٻُرْطِنغٛلْ حَلُّکِ، طِ نَتَّ طِ نجٛوطٛو طٛنْ؞ ندٜنْ رٜعِرْدٜ نٜطّٛ اٛنْ ٻُرَيْ فُطّٛودٜ مَاکٛ حَلُّکِ؞ نٛنْ طُمْ وَرْتَنْتَ يِمْٻٜ جَامَنُ طُعُمْ کَلُّطُمْ؞»‏

مَدُوجٛ يٜىٰسُ اٜ مِݧِرَاٻٜ مَاکٛ

⁴⁶يٜىٰسُ اٜ مٜدَّ اٜ يِمْٻٜ طُطْٻٜ حَوْرُتُٻٜ، سٜيْ رَا مَدُوجٛ مَاکٛ اٜ مِݧِرَاٻٜ مَاکٛ نغَرِ ندَرِي يَاسِ، اٜ ٻٜ نغِطِ مٜدُّکِ اٜ مَاکٛ؞ ⁴⁷سٜيْ غٛطّٛ وِعِمٛ، ‏«‏مَدُوجٛ مَاطَ اٜ مِݧِرَاٻٜ مَاطَ اٜ تٛنْ ندَرِي يَاسِ، اٜ ٻٜ نغِطِ مٜدُّکِ اٜ مَاطَ؞»‏ ⁴⁸اَمَّا اٛ وِعِ بِيطٛمٛکَ اٛنْ، ‏«‏مٛيٜ وٛنِ مَدُوجٛ اَمْ، ندٜنْ ٻٜيٜ نغٛنِ مِݧِرَاٻٜ اَمْ؟»‏ ⁴⁹سٜيْ اٛ سَڤِّي تٛکُّٻٜمٛ، اٛ وِعِ، ‏«‏رَا مَدُوجٛ اَمْ اٜ مِݧِرَاٻٜ اَمْ طٛعٛ!‏ ⁵⁰نغَمْ کٛو مٛيٜ وَطِ کٛ ݧَاکٛ اَمْ مٛ دٛوْ يِطِ، کَنْکٛ وٛنِ مِݧِرَاوٛ اَمْ اٜ مَدُوجٛ اَمْ؞»‏

مِسَالُ دٛوْ دٜمٛووٛ

¹ݧَلْندٜ ندٜنْ يٜىٰسُ وُرْتِي وُرٛ نغٛنْ، يَحِ جٛوطِي حَادٜ مبٜىٰلَ غَلِيلِ؞ ²يِمْٻٜ طُطْٻٜ کَوْرِتِ تٛ مَاکٛ نَاکِ اٛ نَتِّ کٛمِوَلْ اٛ جٛوطِي ندٜرْ مَاغَلْ دٛوْ ندِيَمْ؞ کَوْرُتُٻٜ فُو ندَرِي حَادٜ مبٜىٰلَ نغَنْ؞ ³سٜيْ اٛ حُوتِرِ مِسَالُ اٛ اٜکِّتِٻٜ اٜکِّتِنٛلْ فٜىٰرٜ‑فٜىٰرٜ طُطْنغٛلْ، اٛ وِعِ،

‏«‏غٛطّٛ دٜمٛووٛ يَحِ نغٜسَ نغَمْ سَاکَ اَوْدِ؞ ⁴اٜ مٛ ندٜرْ سَاکُکِ اَوْدِ ندِنْ، وٛنْدِ يَنِ دٛوْ طَتَلْ، شٛلِّ نغَرِ شُڤِّدِندِ؞ ⁵وٛنْدِ بٛو يَنِ ندٜرْ کَاپٜ، طٛنْ ندِ حٜٻَايِ لٜيْدِ طُنْدِ؞ ندِ فُطِ جَوْطُمْ نغَمْ لٜيْدِ ندِنْ لُغَّا؞ ⁶اَمَّا ندٜ نَانغٜ وُرْتٛيِي فِيِندِ، سٜيْ ندِ يٛورِ نغَمْ ندِ وَلَا طَطِ؞ ⁷وٛنْدِ اَوْدِ بٛو يَنِ ندٜرْ غِعٜ، سٜيْ غِعٜ طٜنْ مَوْنِ ٻِطِّندِ حَا ندِ وَاوَايِ وَطُکِ شَمّٜىٰجٜ؞ ⁸اَمَّا وٛنْدِ اَوْدِ يَنِ دٛوْ لٜيْدِ مبٛنْدِ ندِ فُطِ ندِ مَوْنِ ندِ وَطِ شَمّٜىٰجٜ؞ وٛنْدِ وَطِ غَبّٜ 100، وٛنْدِ وَطِ غَبّٜ 60، وٛنْدِ وَطِ 30؞»‏

⁹ندٜ يٜىٰسُ حٜىٰݧِ حٛکُّکِ مِسَالُ طُعُمْ، سٜيْ وِعِ، ‏«‏غٛودُطٛ نٛڤِّ نَنُکِ فُو نَنَ؞»‏

کٛ وَطِ يٜىٰسُ حُوتِرِ مِسَالُ

¹⁰سٜيْ تٛکُّٻٜمٛ نغَرِ پَمِمٛ، مبِعِ، ‏«‏نغَمْ طُمٜ مٜتِرَنْتَاٻٜ اٜ مِسَالُ نِحِ؟»‏

¹¹اٛ نٛوتِي اٛ وِعِٻٜ، ‏«‏اٛنٛنْ اٛنْ کٛکَّامَ فَامُ سِرُّ لَامُ اَللَّه، اَمَّا کَمْٻٜ ٻٜ کٛکَّاکَ؞ ¹²نغَمْ فُو غٛودُطٛ فَامُ دٛوْ لَامُ اَللَّه طُمْ ٻٜيْدَنَيْمٛ، حَا طُمْ طُوطَنَمٛ؞ اَمَّا مٛ وَلَا فَامُ دٛوْ لَامُ اَللَّه، کٛو کٛ اٛ وٛودِ مَا طُمْ جَٻَيْطُمْ؞ ¹³کٛ وَطِ مٜتِرَنَيْمِ يِمْٻٜ اٜ مِسَالُ وٛنِ، نغَمْ کٛو ٻٜ ندَارِي ٻٜ نغِعَتَا، کٛو ٻٜ کٜتِّنْدَکٜ ٻٜ نَنَتَا، طٛنْمَا ٻٜ ڤَامَتَا؞ ¹⁴دٛوْ مَٻّٜ طُمْ حٜبِّنِ کٛ اَللَّه وِعِ دَغَ حٛنْدُکٛ اِشَايَ،

‏‹‏اٛنْ نغَطَيْ کَ نَنُکِ، اَمَّا اٛنْ ڤَامَتَا کٛو سٜطَّ؞

اٛنْ نغَطَيْ کَ رَارُکِ، اَمَّا اٛنْ نغِعَتَا کٛو سٜطَّ؞

¹⁵نغَمْ ٻٜرْطٜ يِمْٻٜ ٻٜنْ طٛنْ طٜ شٜمْبِطّٜ،

ندٜنْ ٻٜ شُکِّي نٛڤِّ مَٻّٜ،

ٻٜ مَٻِّي غِتٜ مَٻّٜ،

نغَمْ تٛع ٻٜ نغِعَ اٜ غِتٜ مَٻّٜ،

تٛع ٻٜ نَنَ اٜ نٛڤِّ مَٻّٜ،

ٻٜ ڤَامَ ندٜرْ ٻٜرْطٜ مَٻّٜ حَا

ٻٜ نغَرْتَ تٛ اَمْ،

مِ يَمْطِتِنَ ٻٜرْطٜ مَٻّٜ؞›‏

¹⁶‏«‏اَمَّا اٛنٛنْ، غِتٜ مٛوطٛنْ طٜ بَرْکِطِنَاطٜ نغَمْ اٜ طٜ نغِعَ، اٜ نٛڤِّ مٛوطٛنْ نغَمْ اٜ طِ نَنَ؞ ¹⁷اٜ مِ وِعَعٛنْ غٛونغَ، اَنَّبٛعٜنْ اٜ اَادِلِعٜنْ طُطْٻٜ نغِطِي نغِعَ کٛ نغِيطٛنْ، اَمَّا ٻٜ نغِعَايِ؞ ٻٜ بٛو نغِطِي نَنُکِ کٛ نَنٛتٛنْ، اَمَّا ٻٜ نَنَايِ؞

مَعَنَ مِسَالُ دٛوْ دٜمٛووٛ

¹⁸‏«‏تٛو، رَا مَعَنَ مِسَالُ دٜمٛووٛ اٛنْ طٛنْ؞ ¹⁹فُو نَنُطٛ حَبَرُ لَامُ اَللَّه اٛ حٜٻْتَايِطُمْ، سٜيْ شٜيْطَنْ وَرَ حٛشَّ کٛ طُمْ اَاوِ ندٜرْ ٻٜرْندٜ مَاکٛ؞ طُمْ طٛنْ وٛنِ مِسَالُ اَوْدِ نجَنُندِ دٛوْ طَتَلْ؞ ²⁰جَنُندِ دٛوْ کَاپٜ وٛنِ مِسَالُ نَنُطٛ وٛلْدٜ اَللَّه طٛنْ اٜ طٛنْ اٛ جَٻَندٜ اٜ بٜلْطُمْ ٻٜرْندٜ؞ ²¹اَمَّا ندٜ وٛلْدٜ ندٜنْ وَلَا طَطِ ندٜرْ ٻٜرْندٜ مَاکٛ، اٛ مُݧَيْ شَرٜلْ سٜطَّ تَنْ؞ تٛ شَطٜىٰلٜ کٛو تٛرَّ وَرِي نغَمْ وٛلْدٜ ندٜنْ، طٛنْ اٜ طٛنْ اٛ يٛوفَندٜ؞ ²²جَنُندِ ندٜرْ غِعٜ وٛنِ مِسَالُ نَنْٻٜ وٛلْدٜ اَللَّه، اَمَّا وَنُّکِ اٜ فِي دُونِيَارُ، اٜ يِدّٜ جَوْدِ، ٻِطِّ وٛلْدٜ ندٜنْ کَطِندٜ وَلُّکِٻٜ ٻٜ نغَطَ کٛ اَللَّه يِطِ؞ ²³اَمَّا اَوْدِ شَاکَاندِ دٛوْ لٜيْدِ مبٛنْدِ وٛنِ مِسَالُ نَنْطٛ وٛلْدٜ اَللَّه، اٛ فَامِندٜ بٛطُّمْ، اٛ وَطِ کٛ اَللَّه وِعِ، اٛ حُوتِنِرِندٜ حَا اٛ حٜٻِ ٻٜيْدَارِ؞ غٛطّٛ حٜٻِ ندٜ 100، غٛطّٛ بٛو حٜٻِ ندٜ 60، غٛطّٛ حٜٻِ ندٜ 30؞»‏

غٜىٰنٜ ندٜرْ نغٜسَ اَلْکَمَارِ

²⁴سٜيْ يٜىٰسُ حٛکِّٻٜ غٛطُّمْ مِسَالُ وِعِ، ‏«‏لَامُ اَللَّه اٜ نَنْدِ اٜ غٛطّٛ نٜطّٛ اَاوُطٛ اَلْکَمَارِ مبٛنْدِ ندٜرْ نغٜسَ مُوطُمْ؞ ²⁵اَمَّا جٜمَّ، کٛو مٛيٜ اٜ طَانِي، سٜيْ غٛطّٛ غَݧٛ مَاکٛ يَحِ سَاکِ اَوْدِ غٛطّٜ غٜىٰنٜ ندٜرْ اَلْکَمَارِ ندِنْ دِلِّ؞ ²⁶ندٜ اَلْکَمَارِ ندِنْ فُطِ، مَوْنِ وَطِ شَمّٜىٰجٜ، سٜيْ غٜىٰنٜ طٜنْ مَا اُمّٛيِي؞ ²⁷سٜيْ مَشُّٻٜ جٛومُ نغٜسَ کَنْ نغَرِ مبِعِمٛ، ‏‹‏جٛومُ وُرٛ، نَاع اَوْدِ مبٛنْدِ اَاوُطَا تٛ نغٜسَ مَاطَ؟ تٛو، نٛ وَطِ غٜىٰنٜ ڤُطٛيِ ندٜرْ مَيْرِ؟›‏ ²⁸اٛ وِعِٻٜ، ‏‹‏طُمْ غٛطّٛ غَݧٛ اَمْ وَطِ نٛنْ؞›‏ سٜيْ مَشُّٻٜ ٻٜنْ مبِعِمٛ، ‏‹‏اَ يِطِ مِنْ نجَحَ مِنْ اِتَّطٜ؟›‏ ²⁹اَمَّا اٛ وِعِٻٜ، ‏‹‏نَاع نٛنْ؞ نغَمْ تٛ اٛنْ اِتَّطٜ، اٛنْ اِتَّيْ فُو اٜ اَلْکَمَارِ ندِنْ؞ ³⁰اَلٜىٰطٜ طٜ مَوْنِدَ اٜ مَيْرِ نَا شَرٜلْ تَپُکِندِ وَطِ؞ تٛ شَرٜلْ تَپُکِندِ وَطِ، مِ وِعَيْ تَپٛوٻٜ ٻٜنْ اَرْتَ تَپُکِ غٜىٰنٜ طٜنْ ٻٜ کَٻَّطٜ کَٻّٜ‑کَٻّٜ، طُمْ وُلَطٜ؞ اَمَّا اَلْکَمَارِ ندِنْ، ٻٜ نغَطَندِ ندٜرْ رٜسِرْدٜ غَوْرِ اَمْ؞›‏ »‏

مِسَالُ دٛوْ غَبّٜلْ مَسْتَتْ

³¹يٜىٰسُ فُطِّتِ حٛکِّٻٜ غٛطُّمْ مِسَالُ وِعِ، ‏«‏لَامُ اَللَّه اٜ نَنْدِ اٜ غَبّٜلْ مَسْتَتْ نغٜلْ غٛطّٛ حٛشِّ اَاوِ ندٜرْ نغٜسَ مُوطُمْ؞ ³²کَنْغٜلْ وٛنِ غَبّٜلْ ٻُرْنغٜلْ فَمْطُکِ ندٜرْ نغَبّٛيْ فُو، اَمَّا تٛ نغٜلْ مَوْنِ، سٜيْ نغٜلْ ٻُرَ کٛو نغٜلٜ لٜغّٜلْ مَوْنُکِ، حَا شٛلِّ نغَرَ نغَطَ شَٻّٜ دٛوْ لِشٜ مَاغٜلْ؞»‏

مِسَالُ دٛوْ پُوفِنِرْطُمْ

³³يٜىٰسُ فُطِّتِ حٛکِّٻٜ غٛطُّمْ مِسَالُ وِعِ، ‏«‏لَامُ اَللَّه اٜ نَنْدِ اٜ پُوفِنِرْطُمْ طُمْ غٛطّٛ دٜبّٛ حٛشِّ لَنْشِندِرِ اٜ شٛنْدِ اَلْکَمَارِ ڤٛوندِرْکٛيْ تَتٛيْ، حَا ندِ فُو ندِ پُوفِ؞»‏

کٛ وَطِ يٜىٰسُ حُوتِرِ مِسَالُ

³⁴يٜىٰسُ مٜتِرَنِ حَوْرُتُٻٜ ٻٜنْ فُو فِي طُعُمْ اٜ مِسَالُ؞ فُو کٛ اٛ وِعَتَٻٜ اٜ مٛ حُوتِرَ مِسَالُ؞ ³⁵اٛ وَطِي نٛنْ نغَمْ اٛ حٜبِّنَ کٛ اَللَّه وِعِ دَغَ حٛنْدُکٛ اَنَّبِيجٛ وِيکِ،

‏«‏مِ مٜتِرَنَيْ يِمْٻٜ اٜ مِسَالُ؞

کٛ سُوطِي دَغَ تَغُکِ دُونِيَارُ، مِ وُرْتِنَيْطُمْ اٜ نجَيْرِ؞»‏

مَعَنَ مِسَالُ غٜىٰنٜ ندٜرْ اَلْکَمَارِ

³⁶سٜيْ يٜىٰسُ اَلِ يِمْٻٜ ٻٜنْ نَتِّ وُرٛ؞ تٛکُّٻٜمٛ نغَرِ تٛ مَاکٛ مبِعِمٛ، ‏«‏وِعُمِنْ مَعَنَ مِسَالُ غٜىٰنٜ ندٜرْ نغٜسَ اَلْکَمَارِ؞»‏

³⁷اٛ وِعِٻٜ، ‏«‏اَاوُطٛ اَوْدِ مبٛنْدِ ندِنْ وٛنِ ٻِي نٜطّٛ؞ ³⁸نغٜسَ کَنْ وٛنِ دُونِيَارُ؞ ندٜنْ اَوْدِ مبٛنْدِ ندِنْ وٛنِ ٻِٻّٜ لَامُ اَللَّه؞ غٜىٰنٜ طٜنْ نغٛنِ ٻِٻّٜ شٜيْطَنْ؞ ³⁹اٛنْ طٛنْ غَݧٛ اَاوُطٛ غٜىٰنٜ طٜنْ، کَنْکٛ وٛنِ شٜيْطَنْ؞ شَرٜلْ تَپُکِندِ وٛنِ رٜعُکِ دُونِيَارُ، ندٜنْ تَپٛوٻٜنْدِ نغٛنِ مَلَاعِکَعٜنْ؞ ⁴⁰نٛنْ نٛ طُمْ حَوْرِتِرْتَ غٜىٰنٜ طُمْ وُلَطٜ، نٛنْ طُمْ وَطَتَ اٜ رٜعُکِ دُونِيَارُ؞ ⁴¹ٻِي نٜطّٛ لِلٛيَيْ مَلَاعِکَعٜنْ مُوطُمْ، ٻٜ مبُرْتِنَ کٛو طُمٜ ڤٛوطٛوجُمْ يِمْٻٜ نغَطَ حَکّٜ اٜ فُو غَطٛوٻٜ کٛ حَلِّ ندٜرْ لَامُ اَللَّه؞ ⁴²سٜيْ مَلَاعِکَعٜنْ ٻٜنْ کُبٛوٻٜ ندٜرْ حِيتٜ کَلُّنغٜ؞ طٛنْ ٻٜ مبٛيَتَ ٻٜ ݧٜرْپِندِرَ ݧِيپٜ؞ ⁴³ندٜنْ اَادِلِعٜنْ طٜلْکِتٛتٛ بٛ نَانغٜ ندٜرْ لَامُ ݧَاکٛ مَٻّٜ مٛ دٛوْ؞ فُو غٛودُطٛ نٛڤِّ نَنُکِ نَنَ؞

جَوْدِ شُوطِيندِ

⁴⁴‏«‏لَامُ اَللَّه اٜ نَنْدِ اٜ جَوْدِ شُوطِيندِ اٜ نغٜسَ ندِ غٛطّٛ حٜٻْتِ، اٛ فُطِّتِ اٛ سُوطِندِ؞ ندٜرْ وٜلْوٜلٛ اٛ يَحِ، اٛ سٛورِ فُو کٛ اٛ وٛودِ اٛ سٛودِ نغٜسَ کَنْ؞

مِسَالُ دٛوْ لُعُ‑لُعُ

⁴⁵‏«‏طٛنْمَا لَامُ اَللَّه اٜ نَنْدِ اٜ نٜطّٛ شٛودٛووٛ اٜ سٛورِتٛو طَٻِّتٛووٛ لُعُ‑لُعُ غٛودُطُمْ شٜىٰدٜ؞ ⁴⁶ندٜ اٛ يِعِ غٛعٛ غٛودُطُمْ شٜىٰدٜ طُطّٜ، سٜيْ اٛ يَحِ اٛ سٛورِ فُو کٛ اٛ وٛودِ، اٛ سٛودِ لُعُ‑لُعُ طُمْ؞

مِسَالُ دٛوْ نَنْغِرْطُمْ لِپِّ

⁴⁷‏«‏طٛنْمَا لَامُ اَللَّه اٜ نَنْدِ اٜ نَنْغِرْطُمْ لِپِّ طُمْ وٛٻّٜ کُبِي ندٜرْ مبٜىٰلَ، طُمْ نَنْغٛيِ کٛو اِرِ طِيٜ لِپِّ؞ ⁴⁸ندٜ طُمْ حٜىٰوِ، ٻٜ ڤٛوطٛيِطُمْ دَاندٜ مبٜىٰلَ نغَنْ، ٻٜ نجٛوطِي، ٻٜ شُڤْتِ لِپِّ بٛطِّ، ٻٜ نغَطِطِ ندٜرْ فَاندُ، اَمَّا ٻٜ شَنْکِتِ طِ مبٛوطَا طِنْ؞ ⁴⁹نٛنْ طُمْ وَطَتَ اٜ رٜعُکِ دُونِيَارُ؞ مَلَاعِکَعٜنْ نغَرَيْ کَکِّتَ کَلُّٻٜ دَغَ ندٜرْ اَادِلِعٜنْ، ⁵⁰ٻٜ کُبٛو کَلُّٻٜ ٻٜنْ ندٜرْ حِيتٜ کَلُّنغٜ؞ طٛنْ ٻٜ مبٛيَتَ ٻٜ ݧٜرْپِندِرَ ݧِيپٜ؞

جَوْدِ کٜيْرِ اٜ کِيندِ

⁵¹‏«‏اٛنْ ڤَامِي فُو طُعُمْ؟»‏ ٻٜ نٛوتِي ٻٜ مبِعِ، ‏«‏اٜىٰ؞»‏

⁵²سٜيْ اٛ وِعِٻٜ، ‏«‏تٛو، فُو مٛودِبّٛ اَتَّوْرَ اٜکِّتِيطٛ دٛوْ لَامُ اَللَّه اٜ مٛ نَنْدِ اٜ جٛومُ وُرٛ بُرْتِنْطٛ جَوْدِ کٜيْرِ اٜ کِيندِ ندٜرْ ندٜسَ مُوطُمْ؞»‏

طُمْ وَݧِي يٜىٰسُ ندٜرْ غَرِيرِ نَجَرَتْ

⁵³ندٜ يٜىٰسُ حٜىٰݧِ وِيکِٻٜ فُو مِسَالُ طُعُمْ، سٜيْ اٛ اُمِّي اٛ اَلِ وِغٜىٰرٜ ندٜنْ؞ ⁵⁴اٛ يَحِ غَرِيرِ تٛ اٛ مَوْنِ، اٛ فُطِّ اٜکِّتِنْکِ يِمْٻٜ ندٜرْ سُودُ دٛعَارٜ مَٻّٜ حَا ٻٜ کَيْطِنِ، ٻٜ مبِعِ، ‏«‏تٛيٜ نٜطّٛ اٛعٛ حٜٻِ فَامُ طُعُمْ اٜ بَوْطٜ وَطُکِ کُوطٜ کَيْطِنِيطٜ طٜعٜ؟ ⁵⁵نَاع کَنْکٛ وٛنِ ٻِطّٛ اٛنْ طٛنْ شٜحٛووٛ؟ نَاع مَدُوجٛ مَاکٛ اٜ وِعٜىٰ مَرْيَامَ؟ نَاع يَاکُبُ اٜ يُسُفُ اٜ سِيمَنْ اٜ يَحُودَ نغٛنِ مِݧِرَاٻٜ مَاکٛ؟ ⁵⁶ندٜنْ نَاع اٜنْ نغٛنْدِ اٜ مِݧِرَاٻٜ مَاکٛ رٜوْٻٜ؟ تٛو، تٛيٜ نٜطّٛ اٛعٛ حٜٻِ فُو فِي طُعُمْ؟»‏ ⁵⁷سٜيْ ٻٜ نغَݧِ حٛولَاکِ يٜىٰسُ؞

اَمَّا يٜىٰسُ وِعِٻٜ، ‏«‏کٛو تٛيٜ يِمْٻٜ اٜ کٛکَّ اَنَّبِيجٛ مَنْغُ، اَمَّا يِمْٻٜ غَرِيرِ مَاکٛ، اٜ يِمْٻٜ وُرٛ مَاکٛ ٻٜ کٛکَّتَامٛ مَنْغُ؞»‏ ⁵⁸يٜىٰسُ وَطَايِ غٛطُّمْ کَيْطِنِيطُمْ تٛنْ نغَمْ ٻٜ کٛولَاکِمٛ؞

مَيْدٜ يَحَيَ غَطٛووٛ بَڤْتِسْمَ

¹اٜ شَرٜلْ نغٜلْ حِرُدُسْ لَامِيطٛ نَنِ حَبَرُ يٜىٰسُ؞ ²سٜيْ اٛ وِعِ مَشُّٻٜ مَاکٛ، ‏«‏اٛنْ طٛنْ طُمْ يَحَيَ غَطٛووٛ بَڤْتِسْمَ اُمِّنَا دَغَ مَيْدٜ، کَنْجُمْ وَطِ اٜ مٛ وٛودِ بَوْطٜ وَطُکِ کُوطٜ کَيْطِنِيطٜ؞»‏

³نغَمْ ندٜنّٛ حِرُدُسْ اٜ حٛورٜ مُوطُمْ وَطِي طُمْ نَنْغِي يَحَيَ، طُمْ حَٻِّمٛ، طُمْ سُرِمٛ ندٜرْ سُودُ شُرَلْ؞ حِرُدُسْ وَطِ نٛنْ نغَمْ حِرُودِيَ دٜبّٛ مَوْنِرَاوٛ مَاکٛ فِلِبُسْ مٛ اٛ تٜعِ؞ ⁴نغَمْ ندٜنّٛ يَحَيَ وِعِي حِرُدُسْ، ‏«‏طُمْ حَانَايِ تٜعَامٛ؞»‏ ⁵نٛنْ وَطِ حِرُدُسْ اٜ يِطِ وَرْکِ يَحَيَ، اَمَّا اٜ مٛ حُلَ يِمْٻٜ، نغَمْ ٻٜ نجَٻِي يَحَيَ اٛ اَنَّبِيجٛ؞

⁶اَمَّا ندٜ ݧَلْندٜ حُمْتٛ سِفْتٛرْکِ دَݧْنغٛلْ حِرُدُسْ وَرِ، سٜيْ ٻِطّٛ حِرُودِيَ سُرْبَاجٛ وَمِ يٜىٰسٛ حٛٻّٜ غَرْٻٜ حُمْتٛ نغٛنْ؞ غَمٛلْ مَاکٛ وٜلِي حِرُدُسْ، ⁷حَا وَطَنِمٛ اَلْکَوَلْ حُنَنِيمٛ وِيکِ حٛکَّيْمٛ کٛو طُمٜ کٛ اٛ تٛرِي؞

⁸سٜيْ مَدُوجٛ مَاکٛ وِعِمٛ کٛ اٛ وِعَتَ؞ سُرْبَاجٛ اٛنْ وِعِ حِرُدُسْ، ‏«‏حٛکَّمْ حٛورٜ يَحَيَ غَطٛووٛ بَڤْتِسْمَ ندٜرْ لٜعَلْ جٛونِ؞»‏

⁹لَامِيطٛ اٛنْ بٛو وَنِّ، اَمَّا نغَمْ اٛ يَادَکٜ اٛ حُنَنَکٜمٛ يٜىٰسٛ حٛٻّٜ، اٛ وَطِ طُمْ حٛکَّمٛ حٛورٜ ندٜنْ؞ ¹⁰اٛ لِلِ وٛٻّٜ اِتّٛنٛيِ يَحَيَ حٛورٜ ندٜرْ سُودُ شُرَلْ؞ ¹¹طُمْ وَدِّ حٛورٜ ندٜنْ ندٜرْ لٜعَلْ، طُمْ حٛکِّ سُرْبَاجٛ اٛنْ؞ سُرْبَاجٛ اٛنْ بٛو وَدَّنِندٜ مَدُوجٛ مُوطُمْ؞ ¹²سٜيْ تٛکُّٻٜ يَحَيَ اٛنْ نغَرِ کٛشِّ ٻَنْدُ ندُنْ اُوٛيِندُ؞ ندٜنْ ٻٜ نجَحِ ٻٜ مبِعٛيِکَ يٜىٰسُ؞

يٜىٰسُ ݧَمْنِي يِمْٻٜ ‏5,000

¹³ندٜ يٜىٰسُ نَنِ نٛنْ، سٜيْ نَتِّ کٛمِوَلْ اٜ تٛکُّٻٜمٛ ٻٜ ندِلِّ تٛ وِغٜىٰرٜ ندٜرْ لَدّٜ کَمْٻٜ تَنْ؞ اَمَّا ندٜ يِمْٻٜ طُطْٻٜ نَنِ نٛنْ، ٻٜ مبُرْتٛيِي دَغَ غَرِيجٜ، ٻٜ تٛکِّمٛ اٜ کٛيْطٜ؞ ¹⁴اٜ جِڤَّاکِ يٜىٰسُ دَغَ ندٜرْ کٛمِوَلْ نغَلْ اٛ يِعِ يِمْٻٜ طُطْٻٜ اٜ کَوْرِتِ، سٜيْ اٛ نَنِ جُرُمْطُمْ مَٻّٜ، اٛ يَمْطِتِنِ ٻٜ نجَمْطَا ندٜرْ مَٻّٜ؞

¹⁵ندٜ نَانغٜ حِيرِي، سٜيْ تٛکُّٻٜمٛ نغَرِ تٛ مَاکٛ، مبِعِمٛ، ‏«‏طٛعٛ طُمْ لَدّٜ، طٛنْمَا نَانغٜ حِيرِ؞ وِعُ يِمْٻٜ ٻٜعٜ ندِلَّ نغَمْ ٻٜ نجَحَ نغَرِحٛيْ ٻٜ شٛودَنَ کٛعٜ مَٻّٜ کٛ ٻٜ ݧَامَتَ؞»‏

¹⁶يٜىٰسُ وِعِٻٜ، ‏«‏نَاع دٛولٜ ٻٜ ندِلَّ؞ اٛنٛنْ کٛکّٜىٰٻٜ کٛ ٻٜ ݧَامَتَ؞»‏

¹⁷سٜيْ ٻٜ نٛوتِي ٻٜ مبِعِمٛ، ‏«‏بُرٛودِ جٛوِ اٜ لِپِّ طِطِ تَنْ مِنْ نغٛودِ؞»‏

¹⁸سٜيْ اٛ وِعِ، ‏«‏نغَدَّنٜىٰيَمْطُمْ طٛعٛ؞»‏ ¹⁹اٛ وِعِ حَوْرُتُٻٜ ٻٜنْ نجٛوطٛو دٛوْ حُطٛ حٜشّٛ؞ اٛ حٛشِّ بُرٛودِ جٛوِ طُمْ اٜ لِپِّ طِطِ طِنْ، اٛ رَارِ دٛوْ، اٛ يٜتِّ اَللَّه، اٛ سٜنْدِ بُرٛودِ طُمْ اٛ حٛکِّ تٛکُّٻٜمٛ، سٜيْ تٛکُّٻٜمٛ نغٜىٰدَنِ يِمْٻٜ حَوْرُتُٻٜ؞ ²⁰ٻٜ فُو ٻٜ ݧَامِ ٻٜ کَارِ؞ تٛکُّٻٜمٛ مٛٻْتِ کٛ حٛرِ کٛ وَطِ کٛنْدٛوجٜ سَڤّٛ اٜ طِطِ؞ ²¹ݧَامُٻٜ ݧَمْندُ ندُنْ وٛرْٻٜ تَنْ ٻَدَکٜ ‏5,000، سُکَاٻٜ اٜ رٜوْٻٜ لِمَاکَ؞

يٜىٰسُ وَطِي يَادُ دٛوْ ندِيَمْ

²²طٛنْ اٜ طٛنْ يٜىٰسُ وَطِ تٛکُّٻٜمٛ نَتَّ کٛمِوَلْ ٻٜ اَرْتَمٛ حُولُکِ يَاکِ فٛنْغٛ، کَنْکٛ بٛو اٛ جَٻِّتٛتٛ کَوْرُتُٻٜ؞ ²³غَطَ اٛ جَٻِّتَکٜ حَوْرُتُٻٜ ٻٜنْ، اٛ پٜنْتِ حٛشّٜىٰرٜ کَنْکٛ تَنْ نغَمْ اٛ وَطَ دٛعَارٜ؞ ندٜ فُتُرٛ وَطِ، اٜ مٛ تٛنْ کَنْکٛ تَنْ؞ ²⁴اٜ شَرٜلْ نغٜلْ کٛمِوَلْ نغَلْ اٜ شَکَ مبٜىٰلَ؞ غٜىٰلٛوطِ ندِيَمْ اٜ ڤِيَنغَلْ، حٜنْدُ اٜ حَطَٻٜ يَادُ؞

²⁵فَجِرِ اٜ مٛ يَحَ تٛ مَٻّٜ، اٜ مٛ يَحَ دٛوْ ندِيَمْ مبٜىٰلَ نغَنْ؞ ²⁶اَمَّا ندٜ ٻٜ نغِعِمٛ اٜ مٛ يَحَ دٛوْ ندِيَمْ، ٻٜ کُلْتٛرِ، ٻٜ مبِعِ، ‏«‏طُمْ غِنّٛلْ!‏»‏ سٜيْ ٻٜ نغُلِّ نغَمْ کُلٛلْ؞

²⁷اَمَّا طٛنْ اٜ طٛنْ اٛ مٜتَنِٻٜ، اٛ وِعِ، ‏«‏ڤُکِّنٜىٰ ٻٜرْطٜ مٛوطٛنْ، طُمْ مِنْ؞ تٛع اٛنْ کُلُ؞»‏

²⁸سٜيْ بِيتُرُسْ نٛوتِي، وِعِمٛ، ‏«‏مٛودِبّٛ، تٛ طُمْ اَنْ، وِعَمْ مِ وَرَ تٛ مَاطَ دٛوْ ندِيَمْ طَمْ؞»‏

²⁹يٜىٰسُ وِعِمٛ، ‏«‏وٛرٛيْ؞»‏ سٜيْ بِيتُرُسْ وُرْتِي ندٜرْ کٛمِوَلْ نغَلْ فُطِّ يَادُ دٛوْ ندِيَمْ طَمْ يَاکِ تٛ يٜىٰسُ؞ ³⁰اَمَّا ندٜ اٛ نَنِ حٜنْدُ شٜمْبِنْدُ، سٜيْ اٛ حُلْتٛرِ، ندِيَمْ طَمْ فُطِّ مٛطُکِمٛ، سٜيْ اٛ وُلِّ، اٛ وِعِ، ‏«‏مٛودِبّٛ، حِسْنَمْ!‏»‏

³¹طٛنْ اٜ طٛنْ يٜىٰسُ فٛرْتِ جُنْغٛ مُوطُمْ فٛوطٛيِمٛ، وِعِمٛ، ‏«‏اَنْ غٛودُطٛ حٛولَارٜ سٜطَّ، نغَمْ طُمٜ نغَطُطَا سٜکٛ؟»‏

³²اٜ نَتُّکِ مَٻّٜ ندٜرْ کٛمِوَلْ نغَلْ، حٜنْدُ ندُنْ دَرِي؞ ³³وٛنْٻٜ ندٜرْ کٛمِوَلْ نغَلْ مَوْنِنِ يٜىٰسُ، اٜ مبِعَ، ‏«‏غٛونغَ، اَنْ اَ ٻِطّٛ اَللَّه؞»‏

يٜىٰسُ يَمْطِتِنِي ݧَوْٻٜ اٜ غَرِيرِ جَنِسَرَتْ

³⁴ندٜ ٻٜ کُولِ فٛنْغٛ مبٜىٰلَ نغَنْ، ٻٜ نجٛتِّي لٜيْدِ جَنِسَرَتْ؞ ³⁵ندٜ يِمْٻٜ لٜيْدِ ندِنْ اَنْدِتِ يٜىٰسُ، ٻٜ لِلِ کٛو تٛيٜ ندٜرْ لٜيْدِ ندِنْ طُمْ وَدّٛيَ فُو ݧَوْٻٜ تٛ مَاکٛ؞ ³⁶ٻٜ تٛرِيمٛ ݧَوْٻٜ ٻٜنْ مٜىٰمَ شِلْمبِ تٛغّٛورٜ مَاکٛ تَنْ؞ فُو مٜىٰمُٻٜطِ نجَمْطِتِ؞

ندٛنُ مَامَعٜنْ

¹سٜيْ وٛٻّٜ فَارِسَنْکٛعٜنْ اٜ مٛودِٻّٜ اَتَّوْرَ نغَرِ تٛ يٜىٰسُ دَغَ اُرُشَلِيمَ، ٻٜ مبِعِ، ²‏«‏نغَمْ طُمٜ تٛکُّٻٜمَ تٛکَّتَا ندٛنُ مَامَعٜنْ مٜىٰطٜنْ؟ نغَمْ ٻٜ لٛوتَتَا جُوطٜ مَٻّٜ کٛ ٻٜ ڤُطَّ ݧَامُکِ ݧَمْندُ؞»‏

³سٜيْ يٜىٰسُ نٛوتِي، وِعِٻٜ، ‏«‏اٛنٛنْ مَا، نغَمْ طُمٜ اٛنْ تٛکَّتَا کٛ اَللَّه وِعِ نغَمْ ندٛنُ مٛوطٛنْ؟ ⁴نغَمْ اَللَّه وِعِي، ‏‹‏حٛکُّ ݧَاکٛ مَاطَ اٜ مَدُوجٛ مَاطَ مَنْغُ،›‏ ندٜنْ، ‏‹‏کٛو مٛيٜ حُطِ ݧَاکٛ مُوطُمْ کٛو مَدُوجٛ مُوطُمْ دٛولٜ وَرٜىٰ؞›‏ ⁵اَمَّا اٛنٛنْ اٛنْ مبِعَ تٛ نٜطّٛ وِعِي ݧَاکٛ مُوطُمْ کٛو مَدُوجٛ مُوطُمْ، ‏‹‏فُو کٛ کٛکَّيْنٛمَامِ، مِ حٛکِّيطُمْ اَللَّه،›‏ تٛو، نَاع دٛولٜ نٜطّٛ اٛنْ مَوْنِنَ ݧَاکٛ مَاکٛ وٛنْ طٛنْ؞ ⁶نٛنْ نغَرْتِرْطٛنْ وٛلْدٜ اَللَّه مٜىٰرٜ نغَمْ ندٛنُ مٛوطٛنْ؞ ⁷اٛنٛنْ مُنَافُکِعٜنْ!‏ اِشَايَ وِعِي غٛونغَ ندٜ اٛ وَطِ اَنَّبَاکُ دٛوْ مٛوطٛنْ وِيکِ،

⁸اَللَّه وِعِي، ‏‹‏ٻٜنْ طٛنْ يِمْٻٜ اٜ حٛنْدُکٛ تَنْ ٻٜ مَوْنِنْتَيَمْ،

اَمَّا ٻٜرْطٜ مَٻّٜ اٜ نغٛطِّتِييَمْ؞

⁹اٜ مٜىٰرٜ ٻٜ مَوْنِنْتَيَمْ؞

اٜ ٻٜ اٜکِّتِنَ دٛوکَ يِمْٻٜ بٛ تٛ اَمْ طُمْ پِوٛيِ؞›‏ »‏

فِي غَطَيْطُمْ نٜطّٛ وَرْتَ مٛ لَاٻَا يٜىٰسٛ اَللَّه

¹⁰سٜيْ يٜىٰسُ نٛدِّ يِمْٻٜ حَوْرُتُٻٜ، وِعِٻٜ، ‏«‏کٜتِّندٜىٰ، ڤَامٛنْ؞ ¹¹نَاع کٛ نَتَّتَ نٜطّٛ اٜ حٛنْدُکٛ وَرْتِرْتَ ٻٜرْندٜ مَاکٛ ندٜ لَاٻَا يٜىٰسٛ اَللَّه، اَمَّا کٛ وُرْتٛيْتٛو دَغَ ندٜرْ حٛنْدُکٛ مَاکٛ وَرْتِرْتَمٛ مٛ لَاٻَا يٜىٰسٛ اَللَّه؞»‏

¹²سٜيْ تٛکُّٻٜمٛ نغَرِ تٛ مَاکٛ، مبِعِمٛ، ‏«‏اَ اَنْدِ فَارِسَنْکٛعٜنْ نَنِي مٛنّٜرٜ ندٜ ٻٜ نَنِ کَنْ طٛنْ حَالَ کَ مبِيطَا؟»‏

¹³يٜىٰسُ نٛوتِي، وِعِ، ‏«‏فُو اَوْرٜ ندٜ طُمْ اَاوِ، تٛ نَاع ݧَاکٛ اَمْ مٛ دٛوْ اَاوِندٜ، طُمْ طٛوفَيْندٜ؞ ¹⁴اَلٜىٰٻٜ!‏ ٻٜ وُمْٻٜ اَرْدِيٻٜ وُمْٻٜ؞ تٛ بُمْطٛ اَرْدَکٜ بُمْطٛ، ٻٜ فُو طِطٛ ٻٜ نجَنَيْ ندٜرْ نغَيْکَ؞»‏

¹⁵سٜيْ بِيتُرُسْ وِعِمٛ، ‏«‏وِعُمِنْ مَعَنَ طُعُمْ مِسَالُ؞»‏

¹⁶يٜىٰسُ وِعِٻٜ، ‏«‏حَا جٛونِ اٛنٛنْ مَا اٛنْ ڤَامَايِ؟ ¹⁷اٛنْ اَنْدَا فُو کٛ نَتِّ ندٜرْ حٛنْدُکٛ نٜطّٛ ندٜرْ رٜىٰدُ مَاکٛ طُمْ نَتِّ، ندٜنْ طُمْ وُرْتٛتٛ؟ ¹⁸اَمَّا کٛ وُرْتٛيِي ندٜرْ حٛنْدُکٛ، دَغَ ندٜرْ ٻٜرْندٜ طُمْ پِوٛيِ؞ کَنْجُمْ وَرْتِرْتَ نٜطّٛ مٛ لَاٻَا يٜىٰسٛ اَللَّه؞ ¹⁹نغَمْ دَغَ ندٜرْ ٻٜرْندٜ نٜطّٛ ݧُمٛ کَلُّنغٛ وُرْتٛيْتٛو، اٜ وَرْحٛورٜ، اٜ نجٜىٰنُ، اٜ نجٜىٰنُ حَکُّندٜ يِمْٻٜ ٻٜ نغَلَا تٜىٰغَلْ، اٜ نغُيْکَ، اٜ شٜيْدَ فٜوْرٜ، اٜ وٛنُّکِ اِنْدٜ نٜطّٛ؞ ²⁰طُعُمْ کَنْجُمْ وَرْتِرْتَ نٜطّٛ مٛ لَاٻَا يٜىٰسٛ اَللَّه، اَمَّا ݧَامُکِ ݧَمْندُ اٜ جُوطٜ طٜ لٛوتَاکَ نَاع کَنْجُمْ وَرْتِرْتَ نٜطّٛ مٛ لَاٻَا يٜىٰسٛ اَللَّه؞»‏

حٛولَارٜ دٜبّٛ کَنْعَانِيَنْکٜىٰجٛ

²¹يٜىٰسُ اَلِ طٛنْ يَحِ حَادٜ غَرِيجٜ تَايَ اٜ سِدٛنْ؞ ²²سٜيْ رَا غٛطّٛ کَنْعَانِيَنْکٜىٰجٛ دٜبّٛ نٜطّٛ لٜيْدِ ندِنْ وَرِ نٛدِّ سٜمْبٜىٰ، وِعِ، ‏«‏مٛودِبّٛ، ٻِي دَوْدَ، يُرْمِنَنَمْ!‏ وٛنْغٛلْ غِنّٛلْ اٜ تٛرَّ ٻِطّٛ اَمْ سُرْبَاجٛ؞»‏

²³اَمَّا يٜىٰسُ وِعَايِمٛ غٛطُّمْ؞ سٜيْ تٛکُّٻٜمٛ نغَرِ تٛرِيمٛ، مبِعِ، ‏«‏رِيوُمٛ، نغَمْ اٜ مٛ تٛکِّعٜنْ اٜ مٛ وَنَّعٜنْ اٜ وُلُّکِ!‏»‏

²⁴سٜيْ اٛ وِعِ دٜبّٛ اٛنْ، ‏«‏مِ لِلٛيَاکَ تٛ وٛٻّٜ، سٜيْ تٛ بَالِ مَجُّطِ طِ لٜݧٛلْ اِسْرَاعِيلَ تَنْ؞»‏

²⁵اَمَّا اٛ وَرِ اٛ دِشِّي يٜىٰسٛ يٜىٰسُ، اٛ وِعِ، ‏«‏مٛودِبّٛ، وَلَّمْ!‏»‏

²⁶يٜىٰسُ نٛوتِي، وِعِ، ‏«‏طُمْ حَانَايِ طُمْ حٛشَّ ݧَمْندُ ٻِکّٛيْ طُمْ حُبَنٛوندُ کُتِحٛيْ؞»‏

²⁷اٛ وِعِ، ‏«‏اٜىٰ، طُمْ نٛنْ، مٛودِبّٛ، اَمَّا کٛو کُتِحٛيْ اٜ ݧَامَ حٛرَانٛ جَنُطُمْ دَغَ تٜىٰبُرْ جٜيْطٛکٛيْ؞»‏

²⁸سٜيْ يٜىٰسُ نٛوتِي، وِعِمٛ، ‏«‏حٛولَارٜ مَاطَ اٜ طُوطِ!‏ طُمْ وَطَنْتٜ نٛ نغِطَّا؞»‏ طٛنْ اٜ طٛنْ ٻِطّٛ مَاکٛ يَمْطِتِ؞

يٜىٰسُ يَمْطِتِنِي يِمْٻٜ طُطْٻٜ

²⁹يٜىٰسُ اُمِّي، اَلِ طٛنْ، تٛکِّ حَادٜ مبٜىٰلَ غَلِيلِ، اٛ پٜنْتِ دٛوْ حٛشّٜىٰرٜ اٛ جٛوطِي؞ ³⁰يِمْٻٜ طُطْٻٜ نغَرِ تٛ مَاکٛ، ٻٜ نغَدّٛيِ ٻٜ کٛيْطٜ جَرَاطٜ، اٜ وُمْٻٜ، اٜ لَپٛوٻٜ، اٜ ٻٜ مبَاوَتَا مٜتُکِ، اٜ وٛٻّٜ طُطْٻٜ غٛودُٻٜ ݧَوُوجِ؞ ٻٜ ندٜسِٻٜ يٜىٰسٛ مَاکٛ، سٜيْ اٛ يَمْطِتِنِٻٜ؞ ³¹يِمْٻٜ کَيْطِنِ ندٜ نغِعِ يِمْٻٜ ٻٜ مٜتَتَا اٜ مٜتَ، لَپٛوٻٜ اٜ نجَحَ، ٻٜ کٛيْطٜ جَرَاطٜ اٜ نجَاٻَ، وُمْٻٜ اٜ نغِعَ؞ سٜيْ ٻٜ مَنْتِ اَللَّه اِسْرَاعِيلَ؞

يٜىٰسُ ݧَمْنِي يِمْٻٜ ‏4,000

³²سٜيْ يٜىٰسُ نٛدِّ تٛکُّٻٜمٛ، وِعِٻٜ، ‏«‏اٜ مِ نَنَ جُرُمْطُمْ يِمْٻٜ ٻٜعٜ نغَمْ حَنْدٜ بَلْطٜ مَٻّٜ تَتِ اٜ ٻٜ نغٛنْدِ اٜ اَمْ، اَمَّا ٻٜ نغَلَا کٛ ٻٜ ݧَامَتَ؞ مِ يِطَا ٻٜ ندِلِّدَ اٜ وٜىٰلٛ، نغَمْ طُمْ سَطَا ٻٜ ڤٜکّٛرَ دٛوْ طَتَلْ؞»‏

³³سٜيْ تٛکُّٻٜمٛ مبِعِمٛ، ‏«‏تٛيٜ مِنْ کٜٻٛيْتَ بُرٛودِ ندٜرْ لَدّٜ ندٜعٜ کٜپَيْطُمْ يِمْٻٜ طُطْٻٜ ٻٜعٜ؟»‏

³⁴يٜىٰسُ پَمِٻٜ وِعِ، ‏«‏بُرٛودِ نٛيٜ نغٛودُطٛنْ؟»‏

ٻٜ مبِعِ، ‏«‏بُرٛودِ جٛوٜىٰطِطِ اٜ لِپِّ سٜطَّ؞»‏

³⁵سٜيْ اٛ وِعِ يِمْٻٜ حَوْرُتُٻٜ ٻٜنْ فُو ٻٜ نجٛوطٛو اٜ لٜيْدِ؞ ³⁶اٛ حٛشِّ بُرٛودِ جٛوٜىٰطِطِ طُمْ اٜ لِپِّ طِنْ، اٛ يٜتِّ اَللَّه، اٛ سٜنْدِطُمْ، اٛ حٛکِّ تٛکُّٻٜمٛ، کَمْٻٜ بٛو ٻٜ نغٜىٰدَنِ يِمْٻٜ ٻٜنْ؞ ³⁷يِمْٻٜ ٻٜنْ فُو ݧَامِ کَارِ؞ غَطَ مَاجُمْ تٛکُّٻٜمٛ مٛٻْتِ کٛ حٛرِي، طُمْ حٜىٰوِ کٛنْدٛوجٜ جٛوٜىٰطِطِ؞ ³⁸ݧَمْٻٜ ٻٜنْ وٛرْٻٜ تَنْ نغَطِ ‏4,000، رٜوْٻٜ اٜ سُکَاٻٜ لِمَاکَ؞

³⁹غَطَ يٜىٰسُ جَٻِّتَکٜ حَوْرُتُٻٜ ٻٜنْ، سٜيْ اٛ نَتِّ کٛمِوَلْ، اٛ دِلِّ لٜيْدِ مَغَدَنْ؞

اَرْدِيٻٜ نغِطِ وَطَنٜىٰکِ کَيْطِنِيطُمْ

¹فَارِسَنْکٛعٜنْ اٜ سَادُسَنْکٛعٜنْ نغَرِ تٛ يٜىٰسُ، اٜ ٻٜ نغِطِ فٛوندُکِمٛ، سٜيْ ٻٜ مبِعِمٛ اٛ وَطَنَٻٜ غٛطُّمْ کَيْطِنِيطُمْ پِوٛيْطُمْ تٛ اَللَّه؞ ²يٜىٰسُ نٛوتِي، وِعِٻٜ، ‏«‏تٛ نَانغٜ حِيرِي، دٛوْ وٛوجِي، اٛنْ مبِعَ، ‏‹‏جَانغٛ نجَيْرِ وٛوطَيْ؞›‏ ³طٛنْمَا تٛ سُبَکَ وَطِي اٛنْ نغِعِي دٛوْ وٛوجِي اٜ وٛودِ دُولٜ کٛو تٛيٜ، اٛنْ مبِعَ، ‏‹‏حَنْدٜ طُمْ وَطَيْ اِيٜىٰندٜ؞›‏ اٛنْ مبَاوِ رَارُکِ کٛ وٛنِ اٜ دٛوْ اَنْدٛنْ کٛ وَطَتَ، اَمَّا اٛنْ مبَاوَتَا فَامُکِ مَعَنَ کُوطٜ طٜ نغَطَيْمِ؞ ⁴يِمْٻٜ جَامَنُ طُعُمْ کَلُّٻٜ ٻٜ کُلَتَا اَللَّه، اٜ ٻٜ نغِطِ حٛلّٜىٰکِ غٛطُّمْ کَيْطِنِيطُمْ، اَمَّا وَلَا کٛ طُمْ حٛلَّتَٻٜ سٜيْ نِ کٛ حٜٻُنٛ اَنَّبِ اِنُوسَ؞»‏

سٜيْ اٛ اَلِٻٜ اٛ دِلِّ؞

پُوفِنِرْطُمْ فَارِسَنْکٛعٜنْ اٜ سَادُسَنْکٛعٜنْ

⁵ندٜ تٛکُّٻٜمٛ کُولِ فٛنْغٛ مبٜىٰلَ، ٻٜ نغِعِ ٻٜ نغٜجِّتِي ٻٜ نغَرْدٛيَ اٜ بُرٛودِ؞ ⁶سٜيْ يٜىٰسُ وِعِٻٜ، ‏«‏ڤَامٜىٰ، نغَطٜىٰ حَکِّيلٛ اٜ پُوفِنِرْطُمْ فَارِسَنْکٛعٜنْ اٜ سَادُسَنْکٛعٜنْ؞»‏

⁷سٜيْ تٛکُّٻٜمٛ مٜدِّ حَکُّندٜ مَٻّٜ، ٻٜ مبِعِ، ‏«‏اٛ وِعُ نٛنْ نغَمْ اٜنْ نغَدَّايِ بُرٛودِ؞»‏

⁸ندٜ يٜىٰسُ فَامِ کٛ ٻٜ مبِعَتَ، سٜيْ اٛ پَمِٻٜ، اٛ وِعِي، ‏«‏اٛنٛنْ غٛودُٻٜ حٛولَارٜ سٜطَّ، نغَمْ طُمٜ مٜدّٛتٛنْ دٛوْ اٛنْ نغَلَا بُرٛودِ؟ ⁹حَا جٛونِ اٛنْ ڤَامَايِ؟ اٛنْ شِفْتٛرَايِ نٛ ݧَمْنِرْمِ يِمْٻٜ ‏5,000 اٜ بُرٛودِ جٛوِ، اٜ کٛنْدٛوجٜ سَڤّٛ اٜ طِطِ طٜ ٻٛڤْتُطٛنْ اٜ کٜىٰوِ حٛرَانٛ؟ ¹⁰طٛنْمَا اٛنْ شِفْتٛرَايِ نٛ ݧَمْنِرْمِ يِمْٻٜ ‏4,000 اٜ بُرٛودِ جٛوٜىٰطِطِ، اٜ کٛنْدٛوجٜ جٛوٜىٰطِطِ طٜ ٻٛڤْتُطٛنْ اٜ کٜىٰوِ حٛرَانٛ؟ ¹¹نٛ طُمْ وَطِ اٛنْ ڤَامَايِ نَاع دٛوْ بُرٛودِ مٜتَيْمِ؟ مِ وِعِي ڤَامَنٜىٰ پُوفِنِرْطُمْ فَارِسَنْکٛعٜنْ اٜ سَادُسَنْکٛعٜنْ؞»‏

¹²ندٜنْ تٛکُّٻٜمٛ کٜٻْتِ نَاع اٜ مٛ مٜتَنَٻٜ ٻٜ ڤَامَ دٛوْ پُوفِنِرْطُمْ غَطٜتٜىٰطُمْ ندٜرْ بُرٛودِ، اَمَّا ٻٜ نغَطَ حَکِّيلٛ اٜ اٜکِّتِنٛلْ فَارِسَنْکٛعٜنْ اٜ سَادُسَنْکٛعٜنْ؞

بِيتُرُسْ وِعِي يٜىٰسُ وٛنِ اَلْمَسِيحُ

¹³ندٜ يٜىٰسُ وَرِ لٜيْدِ کَيْسَارِيَ فِلِبِ، سٜيْ اٛ پَمِ تٛکُّٻٜمٛ، اٛ وِعِ، ‏«‏مٛيٜ يِمْٻٜ مبِعَتَ ٻِي نٜطّٛ وٛنِ؟»‏

¹⁴سٜيْ ٻٜ مبِعِ، ‏«‏وٛٻّٜ اٜ مبِعَ اَ يَحَيَ غَطٛووٛ بَڤْتِسْمَ؞ وٛٻّٜ بٛو اٜ مبِعَ اَ اَنَّبِ اِلِيَ؞ ندٜنْ وٛٻّٜ اٜ مبِعَ اَ اَنَّبِ اِرْمِيَ کٛو غٛعٛتٛ ندٜرْ اَنَّبٛعٜنْ؞»‏

¹⁵اٛ وِعِٻٜ، ‏«‏اَمَّا اٛنٛنْ، مٛيٜ مبِعٛتٛنْيَمْ؟»‏

¹⁶سٜيْ سِيمَنْ بِيتُرُسْ نٛوتِي، وِعِ، ‏«‏اَنْ وٛنِ اَلْمَسِيحُ، ٻِطّٛ اَللَّه مٛ يٛنْکِ؞»‏

¹⁷يٜىٰسُ نٛوتِي وِعِمٛ، ‏«‏اَ بَرْکِطِنَاطٛ، سِيمَنْ ٻِي اِنُوسَ، نغَمْ نَاع طُمْ نٜطّٛ وِعِمَاکَ، سٜيْ نِ ݧَاکٛ اَمْ مٛ دٛوْ؞ ¹⁸اٜ مِ وِعِمَا، اَنْ وٛنِ بِيتُرُسْ، وَاتٛ تَفَارٜ؞ دٛوْ تَفَارٜ ندٜنْ نجٛوطِنَيْمِ تٛکُّٻٜيَمْ؞ مَيْدٜ فُو اٜ بَوْطٜ مَيْرٜ وَاوَتَا جَالٛوٻٜ؞ ¹⁹مِ حٛکّٜتٜ مَٻِّتِرْکٛيْ لَامُ اَللَّه، فُو کٛ کَطُطَا اٜ دُونِيَارُ، اَللَّه مٛ دٛوْ جَٻِ؞ طٛنْمَا فُو کٛ اَلُطَا طُمْ وَطَ اٜ دُونِيَارُ، اَللَّه مٛ دٛوْ جَٻِي؞»‏

²⁰سٜيْ يٜىٰسُ حَطِ تٛکُّٻٜمٛ تٛع ٻٜ مبِعَکَ کٛو مٛيٜ کَنْکٛ وٛنِ اَلْمَسِيحُ؞

يٜىٰسُ وِعِي نٛ مَيْرَتَ

²¹دَغَ نغٜلْ طٛنْ شَرٜلْ يٜىٰسُ فُطِّ وِيکِ تٛکُّٻٜمٛ دٛولٜ اٛ يَحَ اُرُشَلِيمَ، اٛ يَرَ بٛنٜ طُطُّمْ تٛ جُوطٜ مَوْٻٜ يِمْٻٜ، اٜ مَوْٻٜ اَرْدِيٻٜ دِينَ، اٜ مٛودِٻّٜ اَتَّوْرَ، ندٜنْ اٛ وَرٜىٰ؞ ندٜرْ ݧَلْندٜ تَتَوْرٜ بٛو طُمْ اُمِّنَيْمٛ؞

²²سٜيْ بِيتُرُسْ نٛدِّمٛ وُتُّدُ غٛعٛ فُطِّ حَٻَنْکِمٛ، اٜ وِعَ، ‏«‏اَللَّه حٛيْنَ، مٛودِبّٛ!‏ نٛنْ حٜٻَتَامَ حَا اَبَدَا!‏»‏

²³اَمَّا يٜىٰسُ وَيْلِتِي، وِعِ بِيتُرُسْ، ‏«‏سٜنْدِرْ اٜ اَمْ، اَنْ شٜيْطَنْ!‏ اَ کَطَيْطٛيَمْ وَطُکِ کٛ اَللَّه يِطِ، نغَمْ نَاع تٛ اَللَّه ݧُمٛ مَاطَ پِوٛيِ، اِرِ ݧُمٛ يِمْٻٜ ݧُمَتَا؞»‏

²⁴سٜيْ يٜىٰسُ وِعِ تٛکُّٻٜمٛ، ‏«‏فُو غِطّٛ وَرْتَ تٛکُّطٛيَمْ، دٛولٜ وَݧَ حٛورٜ مُوطُمْ، حٛشَّ غَافَانغَلْ مُوطُمْ، تٛکَّيَمْ؞ ²⁵نغَمْ فُو غِطّٛ حِسْنُکِ يٛنْکِ مُوطُمْ اٛ دُلَّيْکِ؞ اَمَّا فُو دُلَّيْطٛ يٛنْکِ مُوطُمْ نغَمْ اَمْ اٛ حٜٻَيْکِ؞ ²⁶کٛ طُمْ نَفَنْتَ نٜطّٛ تٛ اٛ حٜٻِي دُونِيَارُ فُو، اَمَّا دُلِّي يٛنْکِ مَاکٛ؟ کٛو بٛو کٛ نٜطّٛ وَاوَتَ حٛکُّکِ نغَمْ جَٻْتٛيَ يٛنْکِ مُوطُمْ؟ ²⁷نغَمْ ٻِي نٜطّٛ وَرَيْ ندٜرْ تٜدُّنغَلْ ݧَاکٛ مُوطُمْ مٛ دٛوْ اٜ مَلَاعِکَعٜنْ مَاکٛ، اٛ وَاتَنَيْ کٛو مٛيٜ کٛ وَطِ؞ ²⁸اٜ مِ وِعَعٛنْ غٛونغَ، اٜ وٛودِ وٛٻّٜ دَرِيٻٜ طٛعٛ ٻٜ مَايَتَا نَا ٻٜ نغِعِي ٻِي نٜطّٛ اٜ وَرٛيَ ندٜرْ لَامُ مُوطُمْ؞»‏

يٜىٰسُ وَنْغِي ندٜرْ مَنْغُ مُوطُمْ

¹غَطَ بَلْطٜ جٛوٜىٰغٛعٛ، سٜيْ يٜىٰسُ حٛشِّ بِيتُرُسْ اٜ يَاکُبُ اٜ مِݧِرَاوٛ مَاکٛ يَحَيَ، اٛ يَارِٻٜ دٛوْ وٛنْدٜ حٛشّٜىٰرٜ تٛوْندٜ کَمْٻٜ تَنْ؞ ²سٜيْ نَنْدِ مَاکٛ وَيْلِتِ يٜىٰسٛ مَٻّٜ؞ يٜىٰسٛ مَاکٛ اٜ طٜلْکِتٛو بٛ نَانغٜ؞ کٛلْتٜ مَاکٛ نغَرْتِ دَنٜىٰجٜ تَرْ بٛ جَيْنغٛلْ؞ ³طٛنْ اٜ طٛنْ سٜيْ اَنَّبِ مُوسَ اٜ اَنَّبِ اِلِيَ وَنْغَنِٻٜ اٜ ٻٜ مٜدَّ اٜ يٜىٰسُ؞ ⁴سٜيْ بِيتُرُسْ وِعِ يٜىٰسُ، ‏«‏مٛودِبّٛ، وٛنْکِ اَمِنْ طٛعٛ اٜ وٛوطِ؞ اَلْ مِنْ ݧِٻَ شُوطِ تَتِ طٛعٛ، وٛعٛيْرُ ندُ مَاطَ، وٛعٛيْرُ ندُ مُوسَ، ندٜنْ وٛعٛيْرُ ندُ اِلِيَ؞»‏

⁵اٜ مٛ ندٜرْ مٜتُکِ، سٜيْ رَا وٛنْغَ ندُولَ طٜلْکِتٛتٛونغَ وَرِ سُدِّٻٜ؞ ٻٜ نَنِ حٛنٛنْدٜ اَللَّه دَغَ ندٜرْ مَاغَ، وِعِ، ‏«‏اٛعٛ وٛنِ ٻِطّٛ اَمْ مٛ نغِطُمِ؞ اٜ مِ نَنَ بٜلْطُمْ مَاکٛ نَاع سٜطَّ؞ نَنٜىٰ کٛ اٛ وِعَتَعٛنْ!‏»‏

⁶ندٜ تٛکُّٻٜمٛ نَنِ حٛنٛنْدٜ ندٜنْ، کُلٛلْ مَنْغٛلْ نَنْغِٻٜ ٻٜ نجَنِ اٜ لٜيْدِ؞ ⁷سٜيْ يٜىٰسُ وَرِ مٜىٰمِٻٜ، وِعِ، ‏«‏اُمّٜىٰ، تٛع اٛنْ کُلُ؞»‏ ⁸ندٜ ٻٜ پٜفْتِ کٛعٜ، ٻٜ نغِعَايِ غٛطّٛ سٜيْ يٜىٰسُ تَنْ؞

⁹اٜ ٻٜ نجِڤّٛيٛو دَغَ دٛوْ حٛشّٜىٰرٜ ندٜنْ، سٜيْ يٜىٰسُ وَغِّنِٻٜ، وِعِ، ‏«‏تٛع اٛنْ مبِعُ غٛطّٛ کٛ نغِيطٛنْ نَا طُمْ اُمِّنِ ٻِي نٜطّٛ دَغَ مَيْدٜ؞»‏

¹⁰تٛکُّٻٜمٛ پَمِمٛ، مبِعِ، ‏«‏تٛو، نغَمْ طُمٜ مٛودِٻّٜ اَتَّوْرَ اٜ مبِعَ دٛولٜ اَنَّبِ اِلِيَ اَرْتَ اَلْمَسِيحُ وَرْکِ؟»‏

¹¹اٛ نٛوتِي، اٛ وِعِ، ‏«‏غٛونغَ اَنَّبِ اِلِيَ اَرْتَيْ وَرْکِ، نغَمْ اٛ سِرْيٛو کٛو طُمٜ؞ ¹²اَمَّا اٜ مِ وِعَعٛنْ، اِلِيَ يَادَکٜ وَرِي، ٻٜ بٛو کٜٻْتَايِ طُمْ کَنْکٛ، اَمَّا ٻٜ نغَطَنِمٛ فُو کٛ ٻٜ نغِطِ؞ نٛنْ مَا ٻِي نٜطّٛ يَرَيْ بٛنٜ اٜ جُوطٜ مَٻّٜ؞»‏

¹³ندٜنْ تٛکُّٻٜمٛ ڤَامِ اٜ مٛ مٜتَنَٻٜ دٛوْ يَحَيَ غَطٛووٛ بَڤْتِسْمَ؞

يٜىٰسُ يَمْطِتِنِي سُکَ غٛودُطٛ غِنّٛلْ

¹⁴ندٜ ٻٜ نجٛتِّي تٛ يِمْٻٜ طُطْٻٜ کَوْرِتِ، سٜيْ غٛطّٛ نٜطّٛ وَرِ تٛ يٜىٰسُ دِشِّي يٜىٰسٛ مَاکٛ وِعِ، ¹⁵‏«‏مٛودِبّٛ، يُرْمِنَنْ سُکَ اَمْ اٜ وٛودِ ݧَوُ ڤَطّٜ، اٜ مٛ تٛرّٛو نَاع سٜطَّ؞ ندٜ طُطُّمْ اٜ مٛ يَنَ ندٜرْ حِيتٜ اٜ ندٜرْ ندِيَمْ؞ ¹⁶مِ يَارِيمٛ تٛ تٛکُّٻٜمَ، اَمَّا ٻٜ مبَاوَايِ يَمْطِتِنْکِمٛ؞»‏

¹⁷سٜيْ يٜىٰسُ نٛوتِي وِعِ، ‏«‏اٛنٛنْ يِمْٻٜ جَامَنُ طُعُمْ کَلُّطُمْ اٛنْ کٛولَاکِيَمْ، حَا ندٜيٜ نجٛوطٛدٛتٛومِ اٜ مٛوطٛنْ اٜ مِ مُݧِدَ اٜ مٛوطٛنْ؟ نغَدَّنٜىٰيَمْ سُکَ اٛنْ طٛعٛ؞»‏ ¹⁸سٜيْ يٜىٰسُ حَٻَنِ غِنّٛلْ نغٛلْ، نغٛلْ وُرْتِي سُکَ اٛنْ، طٛنْ اٜ طٛنْ اٛ يَمْطِتِ؞

¹⁹سٜيْ تٛکُّٻٜمٛ نغَرِ تٛ مَاکٛ کَمْٻٜ تَنْ، ٻٜ پَمِمٛ ٻٜ مبِعِ، ‏«‏نغَمْ طُمٜ مِنٛنْ مِنْ مبَاوَايِ وُرْتِنْکِ غِنّٛلْ نغٛلْ؟»‏

²⁰يٜىٰسُ نٛوتِي وِعِٻٜ، ‏«‏نغَمْ حٛولَارٜ مٛوطٛنْ فَمْطِي؞ اٜ مِ وِعَعٛنْ غٛونغَ، دَا اٛنْ نغٛودِ حٛولَاکِ فَمْطِرْکِ بٛ غَبّٜلْ مَسْتَتْ، اٛنْ مبَاوَيْ مبِعٛنْ حٛشّٜىٰرٜ ندٜعٜ، ‏‹‏اِتَّ دَغَ طٛعٛ، يَحُ طَاعٜ،›‏ سٜيْ ندٜ وَطَ کٛ مبِيطٛنْ؞ وَلَا بٛو کٛ سَلٛرْتَعٛنْ؞ ²¹‏[‏اَمَّا اِرِ نغٛعٛلْ غِنّٛلْ نغٛلْ وُرْتَتَاکٛ سٜيْ اٜ دٛعَارٜ اٜ سُومَاکِ؞]‏»‏

يٜىٰسُ فُطِّتِي وِعِ اِرِ نٛ مَيْرَتَ

²²ندٜ يٜىٰسُ اٜ تٛکُّٻٜمٛ کَوْرِتِ اٜ لٜيْدِ غَلِيلِ، سٜيْ اٛ وِعِٻٜ، ‏«‏طُمْ حٛکِّتِرَيْ ٻِي نٜطّٛ ندٜرْ جُوطٜ يِمْٻٜ، ²³ٻٜ مبَرَمٛ، اٜ ݧَلْندٜ تَتَوْرٜ طُمْ اُمِّنَيْمٛ؞»‏ سٜيْ فِي طُمْ وَنِّ تٛکُّٻٜمٛ نَاع سٜطَّ؞

شٜىٰدٜ وُرٛ شٜنِينغٛ

²⁴ندٜ يٜىٰسُ اٜ تٛکُّٻٜمٛ نجٛتِّي غَرِيرِ کَفَرْنَحُمْ، جَٻٛوٻٜ شٜىٰدٜ نغَمْ وُرٛ شٜنِينغٛ نغَرِ تٛ بِيتُرُسْ، ٻٜ مبِعِمٛ، ‏«‏مٛودِبّٛ مٛوطٛنْ اٜ حٛکَّ شٜىٰدٜ وَلُّکِ وُرٛ شٜنِينغٛ؟»‏

²⁵اٛ وِعِ، ‏«‏اٜىٰ، اٜ مٛ حٛکَّ؞»‏

ندٜ بِيتُرُسْ وَرْتِ وُرٛ، سٜيْ يٜىٰسُ اَرْتِ مٜتَنْکِمٛ، وِعِ، ‏«‏نٛ نغِيطَا، بِيتُرُسْ؟ تٛ ٻٜيٜ لَامِيٻٜ دُونِيَارُ ندُعُ نجَٻَتَ شٜىٰدٜ لٜيْدِ، تٛ ٻِٻّٜ مَٻّٜ کٛو تٛ وٛٻّٜ؟»‏

²⁶ندٜ بِيتُرُسْ وِعِ، ‏«‏تٛ وٛٻّٜ،»‏ سٜيْ يٜىٰسُ وِعِ، ‏«‏تٛو، ٻِٻّٜ مَٻّٜ نجٛٻَتَا وٛنْ طٛنْ؞ ²⁷فُو اٜ نٛنْ، نغَمْ تٛع ٻٜ نَنَ مٛنّٜرٜ مٜىٰطٜنْ، يَحُ مبٜىٰلَ نغَطَا نَنْغِرْطُمْ لِپِّ مَاطَ؞ فُو لِنْغُ نغُ اَرْتُطَا نَنْغُکِ، مَٻُّتُ حٛنْدُکٛ مَاغُ اَ تَوَيْ يَمْندٜ اَجُرْفَارِ ندٜرْ؞ حٛشُّندٜ، کٛکَّاٻٜ نجٛٻَارِ وُرٛ شٜنِينغٛ نغَمْ مِنْ اٜ مَاطَ؞»‏

مٛيٜ ٻُرِ مَنْغُ؟

¹اٜ نغٜلْ طٛنْ شَرٜلْ تٛکُّٻٜ يٜىٰسُ نغَرِ پَمِمٛ، مبِعِ، ‏«‏مٛيٜ ٻُرِ مَنْغُ فُو ندٜرْ لَامُ اَللَّه؟»‏

²سٜيْ يٜىٰسُ نٛدِّ وٛنْغٜلْ سُکَيٜلْ ڤَمَرٜلْ دَرْنِنغٜلْ شَکَ مَٻّٜ، ³وِعِ، ‏«‏اٜ مِ وِعَعٛنْ غٛونغَ، تٛ نَاع اٛنْ لٜسْتِنْ کٛعٜ مٛوطٛنْ نغَرْتُطٛنْ بٛ سُکَحٛيْ، اٛنْ نَتَّتَا لَامُ اَللَّه کٛو سٜطَّ!‏ ⁴فُو لٜسْتِنْطٛ حٛورٜ مُوطُمْ بٛ سُکَيٜلْ ڤَمَرٜلْ نغٜعٜلْ، کَنْکٛ وٛنِ ٻُرْطٛ مَنْغُ ندٜرْ لَامُ اَللَّه؞ ⁵ندٜنْ فُو جَٻُطٛ سُکَيٜلْ ڤَمَرٜلْ بٛ نغٜعٜلْ ندٜرْ اِنْدٜ اَمْ جَٻِييَمْ؞

کٛ وَدَّتَ حَکّٜ

⁶‏«‏اَمَّا فُو غَطُطٛ غٛعٛتٛ ندٜرْ سُکَاٻٜ ٻٜعٜ کٛولِيٻٜيَمْ وَطِ حَکّٜ، طُمْ ٻُرَنَيْمٛ اٛ حَٻَّنٜىٰ کَاپَ نَمٛلْ مَنْغَ اٜ دَاندٜ مَاکٛ طُمْ فَطَّمٛ ندٜرْ مبٜىٰلَ لُغُّنغَ؞ ⁷دُونِيَارُ وٛنِي نغَمْ اٜ وٛودِ کٛ فٛوطَتَ يِمْٻٜ نغَطَ حَکّٜ!‏ نغَمْ دٛولٜ کٛ فٛوطَتَ يِمْٻٜ نغَطَ حَکّٜ وَرَ، فُو اٜ نٛنْ فٛوطُطٛ غٛطّٛ وَطِ حَکّٜ وٛنِي؞

⁸‏«‏تٛ جُنْغٛ مَاطَ کٛو کٛيْنغَلْ مَاطَ اٜ وَطُمَا نغَطَا حَکّٜ، تٛو، اِتُّنغٛ ڤَطَّانغٛ، کٛو اِتُّنغَلْ ڤَطَّانغَلْ؞ طُمْ ٻُرَنِيمَ نَتَّا وُرٛ اَللَّه اٜ جُنْغٛ وٛعٛتٛ کٛو کٛيْنغَلْ غٛعٛتَلْ دٛوْ طُمْ حُبٛمَا ندٜرْ حِيتٜ نغٜ ݧِفَتَا حَا اَبَدَا اٜ جُوطٜ طِطِ کٛو کٛيْطٜ طِطِ؞ ⁹تٛ بٛو حِتٜرٜ مَاطَ اٜ وَطُمَا نغَطَا حَکّٜ، اِتُّندٜ ڤَطَّاندٜ؞ طُمْ ٻُرَنِيمَ نَتَّا وُرٛ اَللَّه اٜ حِتٜرٜ غٛعٛ دٛوْ طُمْ حُبٛمَا ندٜرْ وُرٛ حِيتٜ اٜ غِتٜ طِطِ؞

مِسَالُ دٛوْ مبَالَ مَجُّنغَ

¹⁰‏«‏ڤَامٜىٰ، تٛع اٛنْ نجَوَنْ کٛو غٛعٛتٛ ندٜرْ سُکَحٛيْ ڤَمَرٛيْ کٛعٛيْ؞ نغَمْ اٜ مِ وِعَعٛنْ، مَلَاعِکَعٜنْ مَاکٛيْ تٛنْ دٛوْ کٛو ندٜيٜ اٜ ندَارَ يٜىٰسٛ ݧَاکٛ اَمْ مٛ دٛوْ؞ ¹¹‏[‏ندٜنْ ٻِي نٜطّٛ وَرٛيِي نغَمْ حِسْنَ کٛ مَجِّ؞]‏

¹²‏«‏تٛو، کٛ ݧُمٛتٛنْ؟ تٛ نٜطّٛ اٜ وٛودِ بَالِ 100، سٜيْ غٛعٛ ندٜرْ بَالِ طِنْ مَجِّ، نَاع اٛ اَلَيْ کٛرِيطِ لٜيْ حٛشّٜىٰرٜ، اٛ دِلَّ طَٻُّتُکِ مبَالَ مَجُّنغَ نغَنْ؟ ¹³اٜ مِ وِعَعٛنْ غٛونغَ، تٛ اٛ حٜٻْتٛيِينغَ، بٜلْطُمْ طُمْ اٛ نَنَتَ دٛوْ مَاغَ طُمْ ٻُرِي طُمْ بَالِ کٛرِيطِ طِنْ طِ مٜىٰطَايِ مَجُّکِ؞ ¹⁴نٛنْ ݧَاکٛ مٛوطٛنْ مٛ دٛوْ يِطَا کٛو غٛعٛتٛ ندٜرْ سُکَاٻٜ ڤَمَرْٻٜ ٻٜعٜ حَلْکَ؞

تٛ غٛطّٛ وَطَنِيمَ کٛ وٛوطَا

¹⁵‏«‏تٛ بَنْدِرَاوٛ مَاطَ وَطَنِيمَ کٛ وٛوطَا، يَحُ مبِعَامٛ کٛ وٛوطَا طُمْ اٛ وَطَنْمَا، اَنْ اٜ مَاکٛ تَنْ؞ تٛ اٛ جَٻِي، اَ وَرْتِرِي سُمْڤٛ حَکُّندٜ مٛوطٛنْ وٛنْ طٛنْ؞ ¹⁶اَمَّا تٛ اٛ وَݧِي جَٻُکِ، سٜيْ فُطِّتَا شٛعّٛدٛطَا اٜ نٜطّٛ غٛعٛتٛ کٛو طِطٛ تٛ مَاکٛ، نغَمْ ‏‹‏دٛولٜ طُمْ حٜٻَ شٜيْدُعٜنْ طِطٛ کٛو تَتٛ کٛ طُمْ تَبِّتِنَ حَالَ؞›‏ ¹⁷تٛ بٛو اٛ وَݧِي کٛ ٻٜ مبِعِ کَمْٻٜ مَا، سٜيْ مبِعَاکَ کَوْتَلْ تٛکُّٻٜيَمْ؞ طٛنْمَا تٛ اٛ وَݧِي نَنْکِ کَوْتَلْ تٛکُّٻٜيَمْ، حٛشُّمٛ بٛ مٛ اَنْدَا اَللَّه کٛو غٛودُطٛ حَکّٜ غَݧُطٛ تُوبَ؞

¹⁸‏«‏اٜ مِ وِعَعٛنْ غٛونغَ، فُو کٛ کَطُطٛنْ اٜ دُونِيَارُ، اَللَّه مٛ دٛوْ جَٻِ؞ طٛنْمَا فُو کٛ اَلُطٛنْ طُمْ وَطَ اٜ دُونِيَارُ، اَللَّه مٛ دٛوْ جَٻِ؞

¹⁹‏«‏طٛنْمَا، اٜ مِ وِعَعٛنْ، تٛ يِمْٻٜ طِطٛ ندٜرْ مٛوطٛنْ کَوْتِي کٛعٜ تٛرَکٜ غٛطُّمْ اٜ دُونِيَارُ، ݧَاکٛ اَمْ مٛ دٛوْ وَطَنَيْٻٜطُمْ؞ ²⁰نغَمْ تٛ يِمْٻٜ طِطٛ کٛو تَتٛ کَوْرِتِ ندٜرْ اِنْدٜ اَمْ، اٜ مِ وٛنْدِ اٜ مَٻّٜ؞»‏

مِسَالُ دٛوْ مَشُّطٛ مٛ يَافَاکِ

²¹سٜيْ بِيتُرُسْ ٻَدّٛيِي وِعِ يٜىٰسُ، ‏«‏مٛودِبّٛ، ندٜ نٛيٜ بَنْدِرَاوٛ اَمْ اٜ وَطَنَيَمْ کٛ وٛوطَا اٜ مِ يَافَنٛومٛ؟ ندٜ جٛوٜىٰطِطِ؟»‏

²²يٜىٰسُ نٛوتِي وِعِمٛ، ‏«‏نَاع ندٜ جٛوٜىٰطِطِ تَنْ، اَمَّا جٛوٜىٰطِطِ ندٜ شَڤَّنْطٜ جٛوٜىٰطِطِ؞ ²³نغَمْ نٛنْ، طُمْ نَنْدِنَيْ لَامُ اَللَّه اٜ غٛطّٛ لَامِيطٛ غِطّٛ لِمَ جَوْدِ مُوطُمْ نغٛنْدِ جُنْغٛ کُوَنٛوٻٜمٛ؞ ²⁴ندٜ اٛ فُطِّ لِمُکِندِ، سٜيْ طُمْ وَدَّنِمٛ غٛطّٛ مٛ اٛ تٛکَّتَ ݧَمَاندٜ شٜىٰدٜ طٜ اٛ وَاوَتَا يٛٻُکِ حَا کٜىٰرٛلْ جٛنْدٜ مَاکٛ اٜ دُونِيَارُ؞ ²⁵ندٜ اٛ تَمڤِ يٛٻُکِ، سٜيْ لَامِيطٛ اٛنْ وَطِ طُمْ سٛورَمٛ اٜ دٜبّٛ مَاکٛ اٜ ٻِٻّٜ مَاکٛ اٜ کٛو طُمٜ کٛ اٛ وٛودِ نغَمْ طُمْ يٛٻَ شٜىٰدٜ طٜنْ؞ ²⁶سٜيْ مَشُّطٛ اٛنْ دِشِّي يٜىٰسٛ مَاکٛ، تٛرِيمٛ، وِعِ، ‏‹‏وَطُ مُݧَلْ؞ مِ يٛٻٜتٜ کٛو طُمٜ؞›‏ ²⁷سٜيْ لَامِيطٛ اٛنْ نَنِ جُرُمْطُمْ مَشُّطٛ اٛنْ يَافَنِيمٛ ݧَمَاندٜ ندٜنْ يٛوفِمٛ؞

²⁸‏«‏اَمَّا مَشُّطٛ اٛنْ اٜ وُرْتَاکِ مَاکٛ اٛ تَوِ غٛطّٛ مٛ اٛ حُودَتَ مٛ اٛ تٛکَّتَ ݧَمَاندٜ شٜىٰدٜ طٜ طُمْ يٛٻَتَ کُوٛووٛ تٛ نغٜسَ لٜبِّ جٛوِ؞ اٛ طٜطَّنِمٛ دَاندٜ، اٛ وِعِمٛ، ‏‹‏يٛٻَمْ کٛ تٛکَّيْمَامِ!‏›‏ ²⁹سٜيْ مٛ اٛ حُودَتَ اٛنْ دِشِّ تٛرِيمٛ، وِعِ، ‏‹‏وَطَنَمْ مُݧَلْ مِ يٛٻٜتٜ؞›‏ ³⁰اَمَّا اٛ وَݧِ، اٛ وَطِ طُمْ مَٻِّمٛ ندٜرْ سُودُ شُرَلْ سٜيْ ندٜ اٛ يٛٻِمٛ کٛ اٛ تٛکَّتَمٛ؞ ³¹ندٜ حِغٛوٻٜ کُوغَلْ مَاکٛ نغِعِ نٛنْ، ٻٜ نغَنِّ نَاع سٜطَّ؞ سٜيْ ٻٜ نجَحِ ٻٜ مبِعِکَ لَامِيطٛ اٛنْ فُو کٛ وَطِ؞

³²‏«‏سٜيْ لَامِيطٛ اٛنْ نٛدِّ مَشُّطٛ اٛنْ، وِعِمٛ، ‏‹‏اَنْ اَ مَشُّطٛ کَلُّطٛ!‏ مِ يَافَنَکٜمَ فُو ݧَمَاندٜ ندٜ تٛکَّيْمَامِ نغَمْ اَ تٛرَکٜيَمْ؞ ³³تٛو، حَانَايِ نجُرْمِنَنَا مٛ کُودَتَا نٛنْ نٛ نجُرْمِنِرَنْمَامِ؟›‏ ³⁴لَامِيطٛ اٛنْ نَنِ مٛنّٜرٜ نَاع سٜطَّ، اٛ وَطِ طُمْ نَنْغِمٛ طُمْ وَطَ کَ تٛرُّکِمٛ نَا اٛ يٛٻِي کٛو طُمٜ کٛ طُمْ تٛکَّتَمٛ؞

³⁵‏«‏نٛنْ ݧَاکٛ اَمْ مٛ دٛوْ وَطَنْتَ کٛو مٛيٜ مٛوطٛنْ مٛ يَافَنَاکِ بَنْدِرَاوٛ مُوطُمْ اٜ ٻٜرْندٜ غٛعٛ؞»‏

اٜکِّتِنٛلْ يٜىٰسُ دٛوْ وَرْکِ تٜىٰغَلْ

¹ندٜ يٜىٰسُ حٜىٰݧِ وِيکِ فِي طُعُمْ، سٜيْ اٛ اَلِ لٜيْدِ غَلِيلِ اٛ نَتِّ لٜيْدِ يَحُودِيَ نغٛنْدِ فٛنْغٛ شَانغٛلْ اُرْدُنْ؞ ²يِمْٻٜ طُطْٻٜ تٛکِّمٛ، اٛ يَمْطِتِنِ ݧَوْٻٜ تٛنْ؞

³سٜيْ وٛٻّٜ فَارِسَنْکٛعٜنْ نغَرِ تٛ مَاکٛ نغَمْ ٻٜ ڤٛوندَمٛ، ٻٜ پَمِمٛ، ٻٜ مبِعِ، ‏«‏اٜ يِيکِ مَاطَ اَتَّوْرَ اَلِي نٜطّٛ يٛوفَ دٜبّٛ مُوطُمْ؟»‏

⁴اٛ نٛوتِي، اٛ وِعِ، ‏«‏تٛو، اٛنْ مٜىٰطَايِ جَنْغُکِ اَايَارٜ بِيندٜ تَغُطٛ يِمْٻٜ دَغَ فُطّٛودٜ تَغُکِ اٛ تَغِيٻٜ غٛرْکٛ اٜ دٜبّٛ؟ ⁵اٛ وِعِي، ‏‹‏نغَمْ نٛنْ نٜطّٛ اَلَيْ ݧَاکٛ مُوطُمْ اٜ مَدُوجٛ مُوطُمْ تَکَّنٛو دٜبّٛ مُوطُمْ، کَمْٻٜ طِطٛ ٻٜ نغَرْتَ غٛعٛ؞›‏ ⁶نغَمْ نٛنْ نَاع ٻٜ طِطٛ کَدِنْ، اَمَّا ٻٜ نغَرْتِي نٜطّٛ غٛعٛتٛ؞ نغَمْ مَاجُمْ کٛ اَللَّه حَوْتِ، تٛع نٜطّٛ سٜنْدَطُمْ؞»‏

⁷سٜيْ ٻٜ مبِعِمٛ، ‏«‏تٛو، نغَمْ طُمٜ اَنَّبِ مُوسَ وِعِ نٜطّٛ وِنْدَنَ دٜبّٛ مُوطُمْ طٜرٜوٛلْ وَرْکِ تٜىٰغَلْ وِعَمٛ اٛ دِلَّ؟»‏

⁸سٜيْ يٜىٰسُ وِعِٻٜ، ‏«‏نغَمْ ٻٜرْطٜ مٛوطٛنْ طٜ شَاتُطٜ وَطِ مُوسَ اَلِعٛنْ نجٛوفٛنْ رٜوْٻٜ مٛوطٛنْ، اَمَّا نَاع نٛنْ طُمْ وٛنِ دَغَ اَرَنْدٜ؞ ⁹اٜ مِ وِعَعٛنْ، کٛو مٛيٜ يٛوفِ دٜبّٛ مُوطُمْ، تٛ نَاع نجٜىٰنُ اٛ وَطِ، ندٜنْ تٜعِ غٛطّٛ دٜبّٛ، وَطِي نجٜىٰنُ وٛنْ طٛنْ؞»‏

¹⁰سٜيْ تٛکُّٻٜمٛ مبِعِمٛ، ‏«‏تٛ نٛنْ طُمْ وٛنِ حَکُّندٜ نٜطّٛ اٜ دٜبّٛ مُوطُمْ، تٛو، شِيَ تٜىٰغَلْ مَا ٻُرِي؞»‏

¹¹اَمَّا اٛ وِعِٻٜ، ‏«‏نَاع کٛو مٛيٜ وَاوَتَ جَٻُکِ حَالَ کَعَ، سٜيْ نِ ٻٜ اَللَّه وَوْنِ؞ ¹²نغَمْ اٜ وٛودِ ٻٜ طُمْ دَݧِ نغٛرْغُ مَٻّٜ اٜ وَاتِ؞ اٜ وٛودِ وٛٻّٜ بٛو ٻٜ يِمْٻٜ تَڤِّ؞ ندٜنْ اٜ وٛودِ وٛٻّٜ ٻٜ تٜعَتَا نغَمْ طَٻُّتُکِ لَامُ اَللَّه؞ فُو بَاوَيْطٛ جَٻُکِ حَالَ کَعَ جَٻَکَ؞»‏

يٜىٰسُ بَرْکِطِنِي سُکَحٛيْ ڤَمَرٛيْ

¹³سٜيْ طُمْ وَدَّنِ يٜىٰسُ سُکَحٛيْ ڤَمَرٛيْ نغَمْ اٛ يٛوَنَکٛيْ جُوطٜ اٛ وَطَنَکٛيْ دٛعَارٜ؞ اَمَّا تٛکُّٻٜمٛ کَٻَنِ غَدَّيْٻٜکٛيْ؞ ¹⁴سٜيْ يٜىٰسُ وِعِٻٜ، ‏«‏اَلٜىٰ سُکَحٛيْ ڤَمَرٛيْ نغَرَ تٛ اَمْ؞ تٛع اٛنْ کَطُکٛيْ، نغَمْ غٛودُٻٜ ٻٜرْطٜ اِرِ طٜ مَاکٛيْ نجٜيِ لَامُ اَللَّه؞»‏

¹⁵سٜيْ اٛ يٛوَنِکٛيْ جُوطٜ مَاکٛ نغَمْ بَرْکِطِنْکِ، ندٜنْ اٛ دِلِّ؞

کَيٜىٰجٛ دِسْکُطٛ

¹⁶سٜيْ غٛطّٛ ٻَدّٛيِي تٛ يٜىٰسُ وِعِ، ‏«‏مٛودِبّٛ، طُمٜ فِي غٜىٰتُمْ حَانِ مِ وَطَ نغَمْ مِ حٜٻَ يٛنْکِ کِ رٜعَتَا؟»‏

¹⁷سٜيْ يٜىٰسُ وِعِمٛ، ‏«‏نغَمْ طُمٜ پَمَتَايَمْ دٛوْ غٜىٰتُمْ؟ اٜ وٛودِ غٜىٰتٛ غٛعٛتٛ تَنْ؞ تَا يِطِ کٜٻَا يٛنْکِ کِ رٜعَتَا، تٛکُّ کٛ اَتَّوْرَ وِعِ؞»‏

¹⁸سٜيْ اٛ وِعِ يٜىٰسُ، ‏«‏طُمٜ اَتَّوْرَ وِعِ؟»‏

سٜيْ يٜىٰسُ وِعِ، ‏«‏تَاع وَطُ وَرْحٛورٜ؞ تَاع وَطُ نجٜىٰنُ؞ تَاع وُجُّ؞ تَاع حٛکُّ شٜيْدَ فٜوْرٜ؞ ¹⁹حٛکُّ ݧَاکٛ مَاطَ اٜ مَدُوجٛ مَاطَ مَنْغُ؞ يِطُ بَنْدِرَاوٛ مَاطَ نٛ نغِطِرْطَا حٛورٜ مَاطَ؞»‏

²⁰سٜيْ کَيٜىٰجٛ اٛنْ وِعِمٛ، ‏«‏اٜ مِ وَطَ فُو فِي طُعُمْ؞ کٛ حٛرَنِييَمْ کَدِنْ؟»‏

²¹يٜىٰسُ وِعِمٛ، ‏«‏تَا يِطِ نغَرْتَا کٜوْطٛ، يَحُ، شٛورَا کٛ نغٛودُطَا فُو، کٛکَّا ٻٜ نغَلَنَا شٜىٰدٜ طٜنْ، ندٜنْ اَ حٜٻَيْ مبَرْجَارِ تٛنْ دٛوْ؞ ندٜنْ نغَرَا، تٛکَّايَمْ؞»‏

²²ندٜ کَيٜىٰجٛ اٛنْ نَنِ نٛنْ، اٛ دِلِّ اٛ نَنَايِ بٜلْطُمْ، نغَمْ اٜ مٛ وٛودِ رِسْکُ طُطُّمْ؞

²³سٜيْ يٜىٰسُ وِعِ تٛکُّٻٜمٛ، ‏«‏اٜ مِ وِعَعٛنْ غٛونغَ، اٜ طُمْ سَطِ نَاع سٜطَّ دِسْکُطٛ نَتَّ لَامُ اَللَّه؞ ²⁴طٛنْمَا اٜ مِ وِعَعٛنْ، طُمْ ٻُرَيْ حٛيْکِ نغٜىٰلٛوبَ تٛکَّ ندٜرْ يٛلْندٜ بَاتَلْ دٛوْ دِسْکُطٛ نَتَّ لَامُ اَللَّه؞»‏

²⁵ندٜ تٛکُّٻٜمٛ نَنِ نٛنْ، ٻٜ کَيْطِنِ نَاع سٜطَّ، ٻٜ مبِعِ، ‏«‏تٛو، تٛ طُمْ نٛنْ، مٛيٜ حِسَتَ؟»‏

²⁶اَمَّا يٜىٰسُ رَارِٻٜ، وِعِ، ‏«‏تٛ يِمْٻٜ طُمْ وَطَتَاکٛ، اَمَّا تٛ اَللَّه کٛو طُمٜ طُمْ غَطٛتٛوطُمْ؞»‏

²⁷سٜيْ بِيتُرُسْ وِعِ، ‏«‏تٛو، رَطُّمْ، مِنٛنْ مِنْ اَلِي کٛو طُمٜ مِنْ تٛکِّيمَ؞ کٛ مِنْ کٜٻَتَ؟»‏

²⁸يٜىٰسُ وِعِٻٜ، ‏«‏اٜ مِ وِعَعٛنْ غٛونغَ، اٜ جَامَنُ غَرَيْطُمْ، تٛ ٻِي نٜطّٛ جٛوطَکٜ دٛوْ جٛوطٛرْغَلْ لَامُ مُوطُمْ طُمْ تٜدُّنغَلْ، اٛنٛنْ تٛکُّٻٜيَمْ اٛنٛنْ مَا اٛنْ نجٛوطٛتٛ دٛوْ جٛوطٛرْلٜ لَامُ سَڤّٛ اٜ طِطِ، اٛنْ لَامٛو لٜݧِ اِسْرَاعِيلَ سَڤّٛ اٜ طِطِ؞ ²⁹طٛنْمَا کٛو مٛيٜ اَلُطٛ غُرٜىٰجٜ، کٛو سَکِرَاٻٜ مُوطُمْ وٛرْٻٜ کٛو رٜوْٻٜ، کٛو ݧَاکٛ، کٛو مَدُوجٛ، کٛو ٻِٻّٜ، کٛو غٜسٜ نغَمْ اَمْ، اٛ حٜٻَيْ کٛ ٻُرِ نٛنْ ندٜ 100، ندٜنْ اٛ حٜٻَيْ يٛنْکِ کِ رٜعَتَا؞ ³⁰اَمَّا يِمْٻٜ طُطْٻٜ اَرْتُٻٜ ٻٜ نغَرْتَيْ شَکِتِيٻٜ، ندٜنْ شَکِتِيٻٜ نغَرْتَيْ اَرْتُٻٜ؞

حُوٛوٻٜ ندٜرْ نغٜسَ اِنَبٛوجٜ

¹‏«‏لَامُ اَللَّه اٜ نَنْدِ اٜ غٛطّٛ جٛومُ نغٜسَ بُرْتِيطٛ اِلَا سُبَکَ نغَمْ اٛ حٜٻَ حُوٛوٻٜ تٛ نغٜسَ اِنَبٛوجٜ مَاکٛ؞ ²اٛ وَادِ اٜ مَٻّٜ اٛ يٛٻَيْٻٜ يَمْندٜ اَجُرْفَارِ غٛعٛ اٜ ݧَلْندٜ، سٜيْ اٛ وِعِٻٜ ٻٜ نجَحَ نغٜسَ کَنْ؞ ³ندٜ اٛ وُرْتِي فَرٛ نجَمْندِ جٛوٜىٰنَيِ سُبَکَ، سٜيْ اٛ يِعِ وٛٻّٜ اٜ نجٛوطِي اٜ مٜىٰرٜ ندٜرْ لُومٛ؞ ⁴سٜيْ اٛ وِعِٻٜ، ‏‹‏اٛنٛنْ مَا نجَحٜىٰ نغٜسَ اَمْ، مِ يٛٻَيْعٛنْ کٛ حَانِ؞›‏ سٜيْ ٻٜ نجَحِ؞ ⁵ندٜ اٛ فُطِّتِ اٛ وُرْتِي، اٛ وَطِ نٛنْ فَرٛ شَکَ ݧَلَوْمَ اٜ فَرٛ نجَمْندِ تَتِ اَلَاسَرَ؞ ⁶فَرٛ نجَمْندِ جٛوِ اَلَاسَرَ اٛ فُطِّتِ اٛ وُرْتِي اٛ تَوِ وٛٻّٜ اٜ ندَرِي، اٛ وِعِٻٜ، ‏‹‏نغَمْ طُمٜ ݧَلُّطٛنْ اٛنْ ندَرِي اٜ مٜىٰرٜ؟›‏ ⁷سٜيْ ٻٜ مبِعِمٛ، ‏‹‏نغَمْ وَلَا کٛشُّطٛمِنْ کُوغَلْ؞›‏ سٜيْ اٛ وِعِٻٜ، ‏‹‏اٛنٛنْ مَا نجَحٜىٰ نغٜسَ اَمْ؞›‏

⁸‏«‏ندٜ فُتُرٛ وَطِ، جٛومُ نغٜسَ اٛنْ وِعِ ڤَامَنٛووٛ کُوغَلْ نغٜسَ کَنْ، ‏‹‏نٛدّٛيْ حُوٛوٻٜ ٻٜنْ، نجٛٻَاٻٜ نجٛٻَارِ مَٻّٜ، اَرْتِرَا شَکِتِيٻٜ ٻٜنْ حَا يَاکِ اَرَنْدٜعٜنْ ٻٜنْ؞›‏ ⁹ندٜ کٛشَّاٻٜ فَرٛ نجَمْندِ جٛوِ اَلَاسَرَ نغَرِ، کٛو مٛيٜ حٛکَّا يَمْندٜ اَجُرْفَارِ غٛعٛ؞ ¹⁰نغَمْ نٛنْ، ندٜ اَرَنْدٜعٜنْ نغَرِ، اٜ ٻٜ کَمِّي ٻٜ کٜٻَيْ کٛ ٻُرِ نٛنْ، اَمَّا کٛو مٛيٜ مَٻّٜ حٛکَّا يَمْندٜ اَجُرْفَارِ غٛعٛ؞ ¹¹ندٜ ٻٜ نجَٻِ شٜىٰدٜ طٜنْ، ٻٜ مٜتِتَنِ جٛومُ نغٜسَ اٛنْ، ¹²اٜ ٻٜ مبِعَ، ‏‹‏ٻٜعٜ شَکِتِيٻٜ اٜ وَرُکِ، شَرٜلْ سٜطَّ تَنْ ٻٜ کُوِ، ندٜنْ اَ حٛکِّيٻٜ نٛ کٛکُّطَامِنْ، مِنٛنْ ݧَلُّٻٜ ندٜرْ نَانغٜ اٜ کُوَ؞›‏ ¹³سٜيْ اٛ نٛوتِي، اٛ وِعِ غٛعٛتٛ ندٜرْ مَٻّٜ، ‏‹‏حِغٛ، مِ حَلَّنَايِمَ؞ نَاع اٜنْ نغَادِي دٛوْ يَمْندٜ اَجُرْفَارِ غٛعٛ اٜ ݧَلْندٜ؟ ¹⁴جَٻُ نجٛٻَارِ مَاطَ، ندِلَّا؞ مِنْ يِطِ حٛکُّکِ شَکِتِيٻٜ ٻٜنْ نٛ کٛکُّمَامِ؞ ¹⁵مِ وَلَا لَامُ مِ وَطَ نٛ نغِطُمِ وَطُکِ اٜ شٜىٰدٜ اَمْ؟ کٛو اَ نَنَ لَوْلِيرُ نغَمْ مِ وَطِ کٛ وٛوطِ؟›‏ »‏

¹⁶ندٜنْ اٛ يٛتِّنِ اٜ وِيکِ، ‏«‏نٛنْ يِمْٻٜ شَکِتِيٻٜ ٻٜ نغَرْتَيْ اَرْتُٻٜ، ندٜنْ اَرْتُٻٜ نغَرْتَيْ شَکِتِيٻٜ؞»‏

يٜىٰسُ فُطِّتِي وِعِي نٛ مَيْرَتَ

¹⁷يٜىٰسُ اٜ تٛکُّٻٜمٛ اٜ دٛوْ طَتَلْ يَاکِ اُرُشَلِيمَ، سٜيْ اٛ نٛدِّٻٜ وُتُّدُ لَاوٛلْ، اٛ وِعِٻٜ، ¹⁸‏«‏رَطُّمْ، اٜنْ نجَحَيْ اُرُشَلِيمَ، ندٜنْ طُمْ وَطَيْ ٻِي نٜطّٛ ندٜرْ جُوطٜ مَوْٻٜ اَرْدِيٻٜ دِينَ اٜ مٛودِٻّٜ اَتَّوْرَ؞ ٻٜ تَپَنَيْمٛ کِيتَ مَيْدٜ، ¹⁹ٻٜ نغَطَمٛ ندٜرْ جُوطٜ حٜىٰفٜرْٻٜ ٻٜ نجُکِّتَمٛ، ٻٜ ڤِيَمٛ، ٻٜ مبَرَمٛ دٛوْ غَافَانغَلْ؞ ندٜنْ ݧَلْندٜ تَتَوْرٜ طُمْ اُمِّنَيْمٛ دَغَ مَيْدٜ؞»‏

تٛرْندٜ مَدُوجٛ يَاکُبُ اٜ يَحَيَ

²⁰سٜيْ مَدُوجٛ ٻِٻّٜ جَبَدِ وَرِ تٛ يٜىٰسُ اٜ ٻِٻّٜ مَاکٛ اٛ دِشِّي يٜىٰسٛ مَاکٛ، نغَمْ اٛ تٛرٛومٛ غٛطُّمْ؞

²¹سٜيْ يٜىٰسُ وِعِمٛ، ‏«‏کٛ نغِطَّا؟»‏

مَدُوجٛ اٛنْ وِعِمٛ، ‏«‏وَطُ ٻِٻّٜ اَمْ ٻٜعٜ طِطٛ نجٛوطٛو وُتُّدُ جٛوطٛرْغَلْ مَاطَ ندٜرْ لَامُ مَاطَ، غٛعٛتٛ ݧَامٛ مَاطَ غٛعٛتٛ نَنٛ مَاطَ؞»‏

²²اَمَّا يٜىٰسُ نٛوتِي، وِعِ، ‏«‏اٛنْ اَنْدَا کٛ تٛرٛتٛوطٛنْ؞ اٛنْ مبَاوَيْ نجَرٛنْ اِرِ جَرْدُغٜلْ تٛرَّ نغٜلْ نجَرَيْمِ يٜىٰسٛ طٛعٛ؟»‏

ٻٜ مبِعِمٛ، ‏«‏اٜىٰ، مِنْ مبَاوَيْ؞»‏

²³سٜيْ يٜىٰسُ وِعِٻٜ، ‏«‏اٜىٰ، اٛنْ نجَرَيْ اِرِ جَرْدُغٜلْ تٛرَّ نغٜلْ نجَرَيْمِ، اَمَّا جٛوطَاکِ اٜ جُنْغٛ اَمْ ݧَامٛ اٜ جُنْغٛ اَمْ نَنٛ نَاع مِنْ حٛکَّتَطُمْ؞ طٜعٜ بِغٜىٰجٜ طُمْ طٜ ٻٜنْ طٛنْ ٻٜ ݧَاکٛ اَمْ مٛ دٛوْ سِرْيَنِي؞»‏

²⁴ندٜ حٛرِيٻٜ تٛکُّٻٜ يٜىٰسُ سَڤّٛ نَنِ نٛنْ، ٻٜ ڤُطِّ مٛنَّنْکِ يَاکُبُ اٜ يَحَيَ؞ ²⁵اَمَّا يٜىٰسُ نٛدِّٻٜ ٻٜ فُو، وِعِٻٜ، ‏«‏اٛنْ اَنْدِ لَامِيٻٜ يِمْٻٜ نَاع يَحُودَنْکٛعٜنْ اٜ کٛلَّٻٜ لَامُ سٜمْبٜ، ندٜنْ مَوْٻٜ مَٻّٜ مَا اٜ کٛلَّ ٻُرَلْ؞ ²⁶اَمَّا اٛنٛنْ، تٛع اٛنْ نغَطُ نٛنْ حَکُّندٜ مٛوطٛنْ؞ فُو غِطّٛ وَرْتَ مَوْطٛ ندٜرْ مٛوطٛنْ دٛولٜ وَرْتَ جَغَّنْتٛوطٛعٛنْ؞ ²⁷کَدِنْ فُو غِطّٛ وَرْتَ اَرْدِيطٛ مٛوطٛنْ، دٛولٜ اٛ وَرْتَ مَشُّطٛ مٛوطٛنْ؞ ²⁸نٛنْ مَا ٻِي نٜطّٛ وَرِي نَاع نغَمْ اٛ جَغَّنٜىٰ، اَمَّا نغَمْ اٛ جَغَّنٛو يِمْٻٜ، اٛ حٛکَّ يٛنْکِ مَاکٛ نغَمْ رِمْطِنْکِ طُطْٻٜ؞»‏

يٜىٰسُ وُمْتِنِي وُمْٻٜ طِطٛ

²⁹يٜىٰسُ اٜ تٛکُّٻٜمٛ اٜ مبُرْتٛو غَرِيرِ جٜرِيکٛ، سٜيْ يِمْٻٜ طُطْٻٜ تٛکِّمٛ؞ ³⁰سٜيْ رَا وُمْٻٜ طِطٛ اٜ نجٛوطِي حَادٜ طَتَلْ؞ ندٜ ٻٜ نَنِ يٜىٰسُ اٜ پَٻّٛو، سٜيْ ٻٜ نٛدِّ سٜمْبٜىٰ، ‏«‏مٛودِبّٛ، ٻِطّٛ دَوْدَ، يُرْمِنَنْمِنْ!‏»‏

³¹کَوْرُتُٻٜ ٻٜنْ کَٻَنِٻٜ ٻٜ ندٜعِّتَ، اَمَّا ٻٜ ٻٜيْدِ نٛدُّکِ اٜ سٜمْبٜ، اٜ ٻٜ مبِعَ، ‏«‏مٛودِبّٛ، ٻِطّٛ دَوْدَ، يُرْمِنَنْمِنْ!‏»‏

³²سٜيْ يٜىٰسُ دَرِي، نٛدِّٻٜ، وِعِ، ‏«‏کٛ نغِطّٛنْ مِ وَطَنَعٛنْ؟»‏

³³ٻٜ مبِعِمٛ، ‏«‏مٛودِبّٛ، اٜ مِنْ نغِطِ مبُمْتِنَامِنْ؞»‏

³⁴يٜىٰسُ نَنِ جُرُمْطُمْ مَٻّٜ، مٜىٰمِ غِتٜ مَٻّٜ؞ طٛنْ اٜ طٛنْ غِتٜ مَٻّٜ مبُمْتِ، ٻٜ تٛکِّمٛ؞

يٜىٰسُ نَتِّي اُرُشَلِيمَ

¹ندٜ يٜىٰسُ اٜ تٛکُّٻٜمٛ ٻَدِي غَرِيٜلْ بٜتَفَاجِ حَادٜ اُرُشَلِيمَ تٛ حٛشّٜىٰرٜ ندٜ لٜطّٜ جَيْتُنْ، سٜيْ اٛ لِلِ تٛکُّٻٜمٛ طِطٛ؞ ²اٛ وِعِٻٜ، ‏«‏نجَحٜىٰ ندٜرْ غَرِيٜلْ غٛنْغٜلْ يٜىٰسٛ مٜىٰطٜنْ؞ اٜ نَتُّکِ مٛوطٛنْ، اٛنْ تَوَيْ مبَبَّ اٜ حَٻِّي اٜ ٻِنْغَ مَاغَ؞ ڤِتّٛيٜىٰطِ نغَدَّنٛنْيَمْطِ؞ ³تٛ غٛطّٛ مٜتَنِيعٛنْ، مبِعٜىٰ، ‏‹‏مٛودِبّٛ اٜ يِطِ حُوتِرَطِ، اٛ وَطَيْ طُمْ وَرْتِرَطِ نَاع کٛ نٜىٰٻِ؞›‏ »‏

⁴نٛنْ وَطِي نغَمْ طُمْ حٜبِّنَ کٛ اَللَّه وِعِ دَغَ حٛنْدُکٛ اَنَّبِ جَکَارِيَ، وِيکِ،

⁵‏«‏مبِعٜىٰ يِمْٻٜ اُرُشَلِيمَ،

‏‹‏رَا لَامِيطٛ مٛوطٛنْ اٜ وَرَ تٛ مٛوطٛنْ!‏

اٛ لٜسْتِنْطٛ حٛورٜ اٜ مٛ دٛوْ مبَبَّ،

اٜ دٛوْ مبَبَّ مٛلَ ڤَمَرَ؞›‏ »‏

⁶سٜيْ تٛکُّٻٜمٛ ٻٜنْ ندِلِّ، نغَطِ کٛ يٜىٰسُ وِعِٻٜ؞ ⁷ٻٜ نجَارِ مبَبَّ نغَنْ اٜ ٻِنْغَ مَاغَ، ٻٜ مبٜعِّتِ شُدَّارِ مَٻّٜ دٛوْ مَاجِ، اٛ پٜنْتِ اٛ جٛوطِ؞ ⁸يِمْٻٜ طُطْٻٜ حَوْرُتُٻٜ مبٜعِّتِ شُدَّارِ مَٻّٜ دٛوْ طَتَلْ نغَلْ، وٛٻّٜ بٛو نغٜوٛيِ حَاکٛ تٛ لٜطّٜ اٜ مبٜعِّتَکٛ دٛوْ طَتَلْ؞ ⁹يِمْٻٜ طُطْٻٜ يَحٛوٻٜ يٜىٰسٛ يٜىٰسُ اٜ تٛکِّرْٻٜمٛ غَطَ اٜ ٻٜ مبِعَ اٜ سٜمْبٜ، ‏«‏حٛسَانَ تٛ ٻِطّٛ دَوْدَ!‏ اٛ بَرْکِطِنَاطٛ غَرٛيْطٛ ندٜرْ اِنْدٜ جٛومِرَاوٛ!‏ اٜنْ مَنْتُ اَللَّه مٛ دٛوْ!‏»‏

¹⁰ندٜ يٜىٰسُ نَتِّ اُرُشَلِيمَ، حَکِّيلٛ يِمْٻٜ غَرِيرِ ندِنْ فُو اُمِّي، اٜ ٻٜ مبِعَ، ‏«‏طُمْ مٛيٜ اٛعٛ؟»‏

¹¹سٜيْ يِمْٻٜ طُطْٻٜ ٻٜنْ جَادٛوٻٜ اٜ يٜىٰسُ مبِعِ، ‏«‏طُمْ يٜىٰسُ، اَنَّبِيجٛ دَغَ غَرِيرِ نَجَرَتْ ندٜرْ لٜيْدِ غَلِيلِ؞»‏

يٜىٰسُ لَاٻِنِي وُرٛ شٜنِينغٛ

¹²سٜيْ يٜىٰسُ نَتِّ وُرٛ شٜنِينغٛ رِيوِ سٛورٛوٻٜ اٜ سٛودٛوٻٜ ندٜرْ مَغّٛ؞ اٛ تَلِّ تٜىٰبُرْجِ غَيْلِتٛوٻٜ شٜىٰدٜ رٛومَنْکٛعٜنْ يَاکِ شٜىٰدٜ وُرٛ شٜنِينغٛ اٜ جٛوطٛرْلٜ شٛورٛوٻٜ ڤٛولِ؞ ¹³اٛ وِعِٻٜ، ‏«‏طُمْ وِنْدَامَ اَللَّه وِعِي، ‏‹‏طُمْ نٛدِّرَيْ وُرٛ اَمْ وُرٛ دٛعَارٜ،›‏ اَمَّا اٛنْ نغَرْتِرِينغٛ لُورٛ وُيْٻٜ!‏»‏

¹⁴سٜيْ وُمْٻٜ اٜ لَپٛوٻٜ نغَرِ تٛ مَاکٛ ندٜرْ وُرٛ شٜنِينغٛ، اٛ يَمْطِتِنِٻٜ؞ ¹⁵اَمَّا مَوْٻٜ اَرْدِيٻٜ دِينَ اٜ مٛودِٻّٜ اَتَّوْرَ نَنِ مٛنّٜرٜ ندٜ ٻٜ نغِعِ کُوطٜ کَيْطِنِيطٜ طٜ اٛ وَطِ، حَا سُکَحٛيْ اٜ مبِعَ اٜ سٜمْبٜ ندٜرْ وُرٛ شٜنِينغٛ، ‏«‏حٛسَانَ تٛ ٻِطّٛ دَوْدَ!‏»‏ ¹⁶ٻٜ مبِعِمٛ، ‏«‏اَ نَنَ کٛ سُکَاٻٜ ٻٜعٜ مبِعَتَ؟»‏

يٜىٰسُ نٛوتِي، وِعِ، ‏«‏اٜىٰ؞ اٛنْ مٜىٰطَايِ جَنْغُکِ اَايَارٜ بِيندٜ، ‏‹‏اَنْ سِرْيِ سُکَحٛيْ ڤَمَرٛيْ اٜ مُسِنَيْکٛيْ مَنْتُمَا؟›‏ »‏

¹⁷سٜيْ اٛ دِلِّ اٛ اَلِٻٜ اٛ وُرْتِي غَرِيرِ ندِنْ اٛ يَحِ بٜتَنِ اٛ وَالِ تٛنْ؞

يٜىٰسُ لَانِي اِبِّ

¹⁸ندٜ وٜىٰتِ يٜىٰسُ اٜ وَرْتٛيَ غَرِيرِ اُرُشَلِيمَ اٛ نَنِ وٜىٰلٛ؞ ¹⁹ندٜ اٛ يِعِ وٛکِّ اِبِّ حَادٜ طَتَلْ، اٛ يَحِ تٛ مَاکِ، اَمَّا اٛ تَوَايِ غٛطُّمْ تٛ مَاکِ سٜيْ حَاکٛ تَنْ؞ سٜيْ اٛ وِعِکِ، ‏«‏تَاع فُطُّتُ ندِمَا حَا اَبَدَا!‏»‏ طٛنْ اٜ طٛنْ کِ يٛورِ؞

²⁰ندٜ تٛکُّٻٜمٛ نغِعِ نٛنْ، ٻٜ کَيْطِنِ، ٻٜ مبِعِ، ‏«‏نٛ طُمْ وَطِ اِبِّ کِعِ يٛورِ طٛنْ اٜ طٛنْ؟»‏

²¹يٜىٰسُ نٛوتِي، وِعِٻٜ، ‏«‏اٜ مِ وِعَعٛنْ غٛونغَ، تٛ اٛنْ نغٛودِ حٛولَارٜ، اٛنْ نغَلَا سٜکٛ کٛو سٜطَّ، اٛنْ مبَاوَيْ نغَطٛنْ کٛ ٻُرِ کٛ نغَطَنْمِ اِبِّ کِعِ، حَا مَا تٛ اٛنْ مبِعِي حٛشّٜىٰرٜ ندٜعٜ، ‏‹‏طٛوفَ دَغَ طٛعٛ، کُبٛطَا حٛورٜ مَاطَ ندٜرْ مبٜىٰلَ،›‏ سٜيْ ندٜ وَطَ نٛنْ؞ ²²تٛ اٛنْ نغٛودِ حٛولَارٜ، فُو کٛ تٛرِيطٛنْ اَللَّه اٛنْ کٜٻَيْطُمْ؞»‏

پَمٛلْ دٛوْ لَامُ يٜىٰسُ

²³ندٜ يٜىٰسُ نَتِّ وُرٛ شٜنِينغٛ اٜ مٛ ندٜرْ اٜکِّتِنْکِ، سٜيْ مَوْٻٜ اَرْدِيٻٜ دِينَ اٜ مَوْٻٜ يِمْٻٜ نغَرِ تٛ مَاکٛ مبِعِ، ‏«‏اٜ لَامُ مٛيٜ نغَطَتَا کُوطٜ طٜعٜ؟ مٛيٜ حٛکُّمَا لَامُ طُمْ؟»‏

²⁴سٜيْ يٜىٰسُ نٛوتِي، وِعِٻٜ، ‏«‏مِنْ مَا مِ پَمَيْعٛنْ؞ تٛ اٛنْ نٛوتَنَکٜيَمْ، ندٜنْ مِ وِعَيْعٛنْ اٜ طُمٜ لَامُ نغَطِرَيْمِ کُوطٜ طٜعٜ؞ ²⁵تٛو، بَڤْتِسْمَ طُمْ يَحَيَ وَطِ، تٛ اَللَّه طُمْ پِوٛيِ کٛو تٛ يِمْٻٜ؟»‏

سٜيْ ٻٜ مٜدِّ حَکُّندٜ مَٻّٜ، ٻٜ مبِعِ، ‏«‏تٛ اٜنْ مبِعِي، ‏‹‏دَغَ تٛ اَللَّه طُمْ پِوٛيِ،›‏ اٛ وِعَيْعٜنْ، ‏‹‏کٛ وَطِ اٛنْ جَٻَايِ کٛ اٛ وِعِ؟›‏ ²⁶اَمَّا تٛ اٜنْ مبِعِي، ‏‹‏تٛ يِمْٻٜ طُمْ پِوٛيِ،›‏ اٜنْ کُلَ کٛ يِمْٻٜ نغَطَنْتَعٜنْ، نغَمْ ٻٜ فُو ٻٜ نجَٻِي يَحَيَ اٛ اَنَّبِيجٛ؞»‏ ²⁷نغَمْ نٛنْ ٻٜ نٛوتِي، ٻٜ مبِعِ يٜىٰسُ، ‏«‏مِنْ اَنْدَا؞»‏

يٜىٰسُ وِعِٻٜ، ‏«‏نٛنْ مِنْ مَا، مِ وِعَتَاعٛنْ کٛو اٜ طُمٜ لَامُ نغَطِرَيْمِ کُوطٜ طٜعٜ؞

مِسَالُ دٛوْ غٛودُطٛ سُکَاٻٜ طِطٛ

²⁸‏«‏تٛو، نٛ نغِيطٛنْ؟ اٜ وٛودِ غٛطّٛ غٛودُطٛ سُکَاٻٜ طِطٛ؞ اٛ يَحِ تٛ سُکَ اَرَنْدٜىٰجٛ اٛنْ، اٛ وِعِ، ‏‹‏ٻِطّٛ اَمْ، حَنْدٜ يَحُ نغٜسَ اِنَبٛوجٜ کُوَا؞›‏ ²⁹سٜيْ سُکَ اٛنْ وِعِمٛ، ‏‹‏مِ يَحَتَا؞›‏ اَمَّا دَغَ غَطَ سُکَ اٛنْ وَيْلِتِ ݧُمٛ مُوطُمْ يَحِ؞ ³⁰سٜيْ ݧَاکٛ اٛنْ يَحِ تٛ سُکَ طِطَٻٛ اٛنْ وِعِمٛ کٛ وِعِ اٛنْ تٛنْ سُکَ اَرَنْدٜىٰجٛ اٛنْ؞ سُکَ اٛنْ نٛوتِي، وِعِ، ‏‹‏تٛو، مِ يَحَيْ، بَڤَّ،›‏ اَمَّا اٛ يَحَايِ؞ ³¹تٛو، ندٜرْ مَٻّٜ مٛيٜ وَطِ کٛ ݧَاکٛ اٛنْ يِطِ؟»‏

سٜيْ ٻٜ مبِعِ، ‏«‏اَرَنْدٜىٰجٛ اٛنْ؞»‏

يٜىٰسُ وِعِٻٜ، ‏«‏اٜ مِ وِعَعٛنْ غٛونغَ، جَٻٛوٻٜ شٜىٰدٜ لٜيْدِ اٜ کَارُوَعٜنْ اٜ ٻٜ اَرْتَعٛنْ نَتُّکِ لَامُ اَللَّه؞ ³²نغَمْ يَحَيَ وَرِي حٛلِّيعٛنْ لَاوٛلْ اَادِلَاکُ، اٛنْ کٛولَاکِمٛ؞ اَمَّا جَٻٛوٻٜ شٜىٰدٜ لٜيْدِ اٜ کَارُوَعٜنْ کٛولَکٜمٛ؞ کٛو ندٜ نغِيطٛنْ نٛنْ، دَغَ غَطَ اٛنْ تُوبَايِ کٛولِيطٛنْمٛ؞

مِسَالُ دٛوْ جَٻُٻٜ نغٜسَ اِنَبٛوجٜ

³³‏«‏تٛو، رَا غٛطُّمْ مِسَالُ؞ اٜ وٛودِ غٛطّٛ جٛومُ نغٜسَ غَطُطٛ نغٜسَ اِنَبٛوجٜ، اٛ حٛوِکَ، اٛ وَسِ نغَيْکَ مَوْکَ ندٜرْ تَفَارٜ نغَمْ مٛيْلُکِ ندِيَمْ دَغَ ندٜرْ اِنَبٛوجٜ طٜنْ، اٛ مَحِ سُودُ تٛوْندُ نغَمْ رٜىٰنُکِ نغٜسَ کَنْ؞ سٜيْ اٛ حٛکِّکَ وٛٻّٜ رٜمٛوٻٜ مٛعِّنَکَ، اٛ دِلِّ وٛنْدِ لٜيْدِ؞ ³⁴ندٜ شَرٜلْ ٻٜنْدُکِ اِنَبٛوجٜ طٜنْ وَطِ، اٛ لِلِ مَشُّٻٜ مَاکٛ تٛ ٻٜ اٛ حٛکِّ نغٜسَ کَنْ نغَمْ ٻٜ نجَٻٛنٛيَمٛ کٛ ٻٜ نغَادُنٛ ندٜرْ کٛ ٻٜنْدِ؞ ³⁵اَمَّا ٻٜ نَنْغِٻٜ ٻٜ ڤِيِ غٛعٛتٛ، ٻٜ مبَرِ غٛعٛتٛ، ٻٜ کُبٛرِي غٛعٛتٛ کَاپٜ؞ ³⁶سٜيْ اٛ فُطِّتِ اٛ لِلِ وٛٻّٜ مَشُّٻٜ مَاکٛ ٻُرْٻٜ اَرَنْدٜعٜنْ طُوطُکِ؞ کَمْٻٜ مَا رٜمٛوٻٜ ٻٜنْ نغَطَنِٻٜ نٛنْ نٛ ٻٜ نغَطَنِ اَرَنْدٜعٜنْ ٻٜنْ؞ ³⁷غَطَ طٛنْ جٛومُ نغٜسَ اٛنْ لِلِ ٻِطّٛ مَاکٛ تٛ رٜمٛوٻٜ ٻٜنْ، اٜ مٛ وِعَ، ‏‹‏ٻٜ کٛکَّيْ ٻِطّٛ اَمْ مَنْغُ؞›‏ ³⁸اَمَّا ندٜ ٻٜ اٛ حٛکِّ نغٜسَ کَنْ نغِعِ ٻِطّٛ اٛنْ، سٜيْ ٻٜ مبِعِ حَکُّندٜ مَٻّٜ، ‏‹‏تٛو!‏ رَا دٛنٛووٛ جٛومُ نغٜسَ کَنْ؞ نغَرٜىٰ مبَرٜنْمٛ، ندٛنُ نغٜسَ کَنْ وَرْتَ طُمْ مٜىٰطٜنْ؞›‏ ³⁹سٜيْ ٻٜ نَنْغِمٛ، ٻٜ مبُرْتِنِمٛ ندٜرْ نغٜسَ کَنْ، ٻٜ مبَرِمٛ؞

⁴⁰‏«‏تٛو، تٛ جٛومُ نغٜسَ اٛنْ وَرِي، کٛ اٛ وَطَنْتَ ٻٜ اٛ حٛکِّ نغٜسَ ٻٜنْ؟»‏

⁴¹سٜيْ ٻٜ مبِعِمٛ، ‏«‏اٛ وَطَنَيْ کَلُّٻٜ ٻٜنْ طٛنْ وٛکِّ وَرْکِ کَلُّکِ؞ اٛ حٛکَّ وٛٻّٜ نغٜسَ کَنْ کٛکَّيْٻٜمٛ دَغَ ندٜرْ کٛ ٻٜنْدِ؞»‏

⁴²يٜىٰسُ وِعِٻٜ، ‏«‏اٛنْ مٜىٰطَايِ جَنْغُکِ کٛ اَايَاجٜ مبِعِ؟ طٜ مبِعِ،

‏‹‏حَيْرٜ ندٜ مَحٛوٻٜ نغَݧِ،

کَيْرٜ وَرْتِ حَيْرٜ ٻُرْندٜ دَرْنُکِ مَادِ؞

طُعُمْ طُمْ کُوغَلْ جٛومِرَاوٛ،

طُمْ کَيْطِنِيطُمْ تٛ مٜىٰطٜنْ!‏›‏

⁴³‏«‏نغَمْ نٛنْ اٜ مِ وِعَعٛنْ، طُمْ جَٻَيْ لَامُ اَللَّه تٛ مٛوطٛنْ طُمْ حٛکَّطُمْ وٛٻّٜ غَطَيْٻٜ کٛ اَللَّه يِطِ؞ ⁴⁴کٛو مٛيٜ يَنٛيِ دٛوْ حَيْرٜ ندٜنْ يٜوِ يٜوِنَيْ؛ اَمَّا تٛ حَيْرٜ ندٜنْ يَنِي دٛوْ غٛطّٛ، ندٜ نَمَيْمٛ بٛ شٛنْدِ؞»‏

⁴⁵ندٜ مَوْٻٜ اَرْدِيٻٜ دِينَ اٜ فَارِسَنْکٛعٜنْ نَنِ مِسَالُ فٜىٰرٜ‑فٜىٰرٜ طُمْ اٛ حٛکِّ، سٜيْ ٻٜ ڤَامِ دٛوْ مَٻّٜ اٛ مٜتِ؞ ⁴⁶سٜيْ ٻٜ طَٻِّتِ لَاوٛلْ نٛ ٻٜ نَنْغِرْتَمٛ، اَمَّا اٜ ٻٜ کُلَ يِمْٻٜ، نغَمْ يِمْٻٜ ٻٜنْ نجَٻِي اٛ اَنَّبِيجٛ؞

مِسَالُ دٛوْ حُمْتٛ تٜىٰغَلْ

¹سٜيْ يٜىٰسُ فُطِّتِ مٜتِرَنِٻٜ مِسَالُ، وِعِ، ²‏«‏طُمْ نَنْدِنَيْ لَامُ اَللَّه اٜ غٛطّٛ لَامِيطٛ شِرْيَنِيطٛ ٻِطّٛ مُوطُمْ حُمْتٛ تٜىٰغَلْ؞ ³اٛ لِلِ مَشُّٻٜ مَاکٛ نٛدّٛيَ کُمْڤِتَاٻٜ حُمْتٛ نغٛنْ، اَمَّا کُمْڤِتَاٻٜ ٻٜنْ نغَݧِ نغَرَ؞ ⁴سٜيْ اٛ فُطِّتِ اٛ لِلِ وٛٻّٜ مَشُّٻٜ مَاکٛ، اٛ وِعِ، ‏‹‏نجَحٜىٰ مبِعٛنْ کُمْڤِتَاٻٜ ٻٜنْ، ‏«‏رَطُّمْ مِ سِرْيَکٜ ݧَمْندُ، طُمْ حِرْسِي غَعِ اٜ ݧَلْبِ ڤَيْطِ، کٛو طُمٜ سِرْيَامَ؞ نغَرٜىٰ حُمْتٛ تٜىٰغَلْ نغَلْ!‏»‏ ›‏ ⁵اَمَّا کُمْڤِتَاٻٜ ٻٜنْ نغَنَّايِ؞ غٛعٛتٛ يَحِ نغٜسَ مُوطُمْ، غٛعٛتٛ يَحِ لُومٛ مُوطُمْ؞ ⁶حٛرِيٻٜ ٻٜنْ نَنْغِ مَشُّٻٜ ٻٜنْ تٛرِّٻٜ، مبَرِٻٜ؞ ⁷سٜيْ لَامِيطٛ اٛنْ ٻٜرْنِ نَاع سٜطَّ، لِلِ سٛوجِعٜنْ مُوطُمْ ٻٜ کَلْکِ ٻٜنْ طٛنْ غَطُٻٜ وَرْحٛورٜ ٻٜ نغُلِ غَرِيرِ مَٻّٜ؞ ⁸سٜيْ اٛ وِعِ مَشُّٻٜ مَاکٛ، ‏‹‏حُمْتٛ تٜىٰغَلْ نغٛنْ سِرْيَامَ، اَمَّا کُمْڤِتَاٻٜ ٻٜنْ ٻٜ ڤٛتَايِ وَرْکِ؞ ⁹نغَمْ نٛنْ نجَحٜىٰ دٛوْ طَتٜ مَوْطٜ، کُمڤِتٛنْ فُو مٛ نغِيطٛنْ وَرَ حُمْتٛ نغٛنْ؞›‏ ¹⁰سٜيْ مَشُّٻٜ ٻٜنْ نجَحِ دٛوْ طَتٜ طٜنْ ٻٜ ٻٛڤْتٛيِ کٛو مٛيٜ مٛ ٻٜ تَوِ، فُو کَلُّٻٜ اٜ ٻٜ نغِکُّ بٛطُّمْ، حَا وُرٛ حُمْتٛ نغٛنْ حٜىٰوِ حٛٻّٜ؞

¹¹‏«‏اَمَّا ندٜ لَامِيطٛ اٛنْ نَتّٛيِ نغَمْ يِعَ حٛٻّٜ ٻٜنْ، اٛ يِعِ غٛطّٛ ندٜرْ مَٻّٜ مٛ ٻٛرْنَاکِ لِمْشٜ حُمْتٛ تٜىٰغَلْ؞ ¹²سٜيْ اٛ وِعِمٛ، ‏‹‏حِغٛ، نٛ طُمْ وَطِ نَتّٛيْطَا طٛعٛ اَ ٻٛرْنَاکِ لِمْشٜ حُمْتٛ؟›‏ اَمَّا نٜطّٛ اٛنْ دُلِّ کٛ وِعَتَ؞ ¹³سٜيْ لَامِيطٛ اٛنْ وِعِ کُوَنٛوٻٜمٛ، ‏‹‏کَٻّٜىٰ نٜطّٛ اٛعٛ جُوطٜ اٜ کٛيْطٜ، ڤَطّٛنْمٛ ندٜرْ ݧِوْرٜ کَلُّندٜ، تٛ طُمْ وٛيَتَ طُمْ ݧٜرْپِندِرَ ݧِيپٜ؞›‏ »‏

¹⁴يٜىٰسُ ٻٜيْدِ وِيکِ، ‏«‏يِمْٻٜ طُطْٻٜ کُمْڤِتَا، اَمَّا سٜطَّ شُٻَا؞»‏

يٛٻُکِ کَيْسَرْ شٜىٰدٜ لٜيْدِ

¹⁵سٜيْ فَارِسَنْکٛعٜنْ نجَحِ کَوْتِ کٛعٜ، کَٻِّ دَبَرٜ نٛ ٻٜ نَنْغِرْتَ يٜىٰسُ دٛوْ کٛ اٛ وِعِ؞ ¹⁶سٜيْ ٻٜ لِلٛيِ تٛکُّٻٜٻٜ اٜ يِمْٻٜ حِرُدُسْ، ٻٜ مبِعِ، ‏«‏مٛودِبّٛ، اٜ مِنْ اَنْدِ کٛ مبِعَتَا اٜ کٛ نغَطَتَا طُمْ غٛونغَ، اَ اٜکِّتِنَ دٛوْ لَاوٛلْ اَللَّه اٜ غٛونغَ، اَ حُلَتَا کٛ يِمْٻٜ مبِعَتَ دٛوْ مَاطَ، اَ حٛلَّتَا فٜىٰرٛوتِرٛلْ حَکُّندٜ يِمْٻٜ؞ ¹⁷تٛو، وِعُمِنْ، اٜ يِيکِ مَاطَ اٜ حَانِ مِنْ نجٛٻَ کَيْسَرْ شٜىٰدٜ لٜيْدِ کٛو طُمْ حَانَايِ؟»‏

¹⁸اَمَّا يٜىٰسُ حٜٻْتِ حَلّٜىٰندٜ مَٻّٜ، اٛ وِعِٻٜ، ‏«‏نغَمْ طُمٜ ڤٛوندٛتٛنْيَمْ، اٛنٛنْ مُنَافُکِعٜنْ؟ ¹⁹کٛلّٜىٰيَمْ يَمْندٜ ندٜ طُمْ يٛٻِرْتَ شٜىٰدٜ لٜيْدِ؞»‏

سٜيْ ٻٜ نغَدَّنِمٛ يَمْندٜ غٛعٛ؞ ²⁰يٜىٰسُ وِعِٻٜ، ‏«‏طٛوْدِ مٛيٜ اٜ اِنْدٜ مٛيٜ وٛنِ دٛوْ مَيْرٜ؟»‏

²¹ٻٜ نٛوتِي، ٻٜ مبِعِ، ‏«‏طُمْ کَيْسَرْ؞»‏

سٜيْ يٜىٰسُ وِعِٻٜ، ‏«‏تٛو، نغَمْ نٛنْ کٛکّٜىٰ کَيْسَرْ کٛ وٛنِ طُمْ کَيْسَرْ، ندٜنْ کٛکّٛنْ اَللَّه کٛ وٛنِ طُمْ اَللَّه؞»‏

²²ندٜ ٻٜ نَنِ نٛنْ، ٻٜ کَيْطِنِ، ٻٜ اَلِمٛ، ٻٜ ندِلِّ؞

پَمٛلْ دٛوْ اُمَّاکِ مَيْٻٜ

²³سَادُسَنْکٛعٜنْ اٜ مبِعَ وَلَا اُمَّاکِ مَيْٻٜ؞ اٜ ݧَلْندٜ ندٜنْ، سٜيْ وٛٻّٜ مَٻّٜ نغَرِ تٛ يٜىٰسُ، ٻٜ پَمِمٛ، ٻٜ مبِعِ، ²⁴‏«‏مٛودِبّٛ، اَنَّبِ مُوسَ وِعِي تٛ نٜطّٛ تٜعِي دٜبّٛ مَايِي دَݧِدَايِ اٜ مَاکٛ، سَکِرَاوٛ مَاکٛ سٜيْ تٜعَمٛ نغَمْ حٜٻَنَ سَکِرَاوٛ مُوطُمْ مَيْطٛ ٻِٻّٜ؞ ²⁵تٛو، ندٜنّٛ اٜ وٛودِ وٛٻّٜ سَکِرَاٻٜ وٛرْٻٜ نجٛوٜىٰطِطٛ ندٜرْ اَمِنْ؞ اَفٛ اٛنْ تٜعِ دٜبّٛ، مَايِ؞ ندٜ اٛ دَݧِدَايِ اٜ دٜبّٛ اٛنْ، اٛ اَلَنِمٛ سَکِرَاوٛ مَاکٛ؞ ²⁶نٛنْ مَا طِطَٻٛ اٛنْ اٜ تَتَٻٛ اٛنْ حَا نجٛوٜىٰطِطَٻٛ اٛنْ وَطِي نٛنْ؞ ²⁷غَطَ مَاجُمْ دٜبّٛ اٛنْ مَا مَايِ؞ ²⁸تٛو، ݧَلْندٜ ندٜ مَيْٻٜ اُمّٛتٛو دٜبّٛ اٛنْ وَرْتَيْ دٜبّٛ مٛيٜ ندٜرْ مَٻّٜ؟ نغَمْ ٻٜ فُو ٻٜ تٜعِيمٛ؞»‏

²⁹سٜيْ يٜىٰسُ نٛوتِي، وِعِٻٜ، ‏«‏اٛنْ مبٛوفِي نغَمْ اٛنْ اَنْدَا کٛ اَايَاجٜ مبِعِ، ندٜنْ اٛنْ اَنْدَا بَوْطٜ اَللَّه؞ ³⁰تٛ مَيْٻٜ اُمَّکٜ دَغَ مَيْدٜ، وَلَا تٜعَيْطٛ وَلَا تٜعٜتٜىٰطٛ، اَمَّا ٻٜ نغَرْتَيْ بٛ مَلَاعِکَعٜنْ اَللَّه؞ ³¹ندٜنْ دٛوْ اُمَّاکِ مَيْٻٜ دَغَ مَيْدٜ، اٛنْ مٜىٰطَايِ جَنْغُکِ کٛ اَللَّه وِعِعٛنْ؟ اٜ طُمْ وِنْدِ وِيکِ، ³²‏‹‏مِنْ وٛنِ اَللَّه مٛ اِبْرَاهِمْ، اَللَّه مٛ اِشِيَاکُ، اَللَّه مٛ يَاکُبُ؞›‏ کَنْکٛ نَاع اٛ اَللَّه مَيْٻٜ، اَمَّا اٛ اَللَّه غٛودُٻٜ يٛنْکِ؞»‏

³³ندٜ حَوْرُتُٻٜ طٛنْ نَنِ نٛنْ، ٻٜ کَيْطِنِ دٛوْ اٜکِّتِنٛلْ مَاکٛ؞

دٛوکَ ٻُرْطُمْ مَنْغُ

³⁴کٛ يٜىٰسُ وِعِ وَطِ سَادُسَنْکٛعٜنْ ندُلِّي کٛ مبِعَ؞ ندٜ فَارِسَنْکٛعٜنْ نَنِ نٛنْ، سٜيْ ٻٜ کَوْرِتِ؞ ³⁵غٛعٛتٛ ندٜرْ مَٻّٜ، مٛودِبّٛ اَتَّوْرَ، پَمِ يٜىٰسُ نغَمْ فٛوندَمٛ، وِعِ، ³⁶‏«‏مٛودِبّٛ، طُمٜ دٛوکَ ٻُرِ مَنْغُ فُو ندٜرْ اَتَّوْرَ؟»‏

³⁷يٜىٰسُ وِعِمٛ، ‏«‏ ‏‹‏يِطُ جٛومِرَاوٛ اَللَّه مَاطَ اٜ ٻٜرْندٜ مَاطَ فُو، اٜ يٛنْکِ مَاطَ فُو، اٜ حَکِّيلٛ مَاطَ فُو؞›‏ ³⁸طُعُمْ وٛنِ دٛوکَ مَوْطُمْ اَرَنْدٜجُمْ؞ ³⁹طِطَٻُمْ مَا اٜ فٛتِّدِ اٜ اَرَنْدٜجُمْ طُمْ؞ ‏‹‏يِطُ بَنْدِرَاوٛ مَاطَ نٛ نغِطِرْطَا حٛورٜ مَاطَ؞›‏ ⁴⁰دٛوْ طُعُمْ دٛوکَ طِطُمْ اَتَّوْرَ اٜ دٜفْتٜ اَنَّبٛعٜنْ ندَرِي؞»‏

پَمٛلْ دٛوْ اَلْمَسِيحُ

⁴¹ندٜ فَارِسَنْکٛعٜنْ کَوْرِتِ، يٜىٰسُ پَمِٻٜ، ⁴²وِعِ، ‏«‏طُمٜ ݧُمٛتٛنْ دٛوْ اَلْمَسِيحُ؟ اٛ ٻِطّٛ مٛيٜ؟»‏

ٻٜ مبِعِمٛ، ‏«‏اٛ ٻِطّٛ دَوْدَ؞»‏

⁴³سٜيْ يٜىٰسُ وِعِٻٜ، ‏«‏تٛو، نٛ طُمْ وَطِ دَوْدَ ندٜرْ بَوْطٜ رُوحُ اَللَّه نٛدِّ اَلْمَسِيحُ ‏‹‏جٛومِرَاوٛ؟›‏ اٛ وِعِ،

⁴⁴‏‹‏جٛومِرَاوٛ وِعِي جٛومِرَاوٛ اَمْ،

‏«‏جٛوطَ تٛ جُنْغٛ اَمْ ݧَامٛ،

نَا مِ وَطِي اَ يَاٻِي وَݧْوَݧْٻٜ مَاطَ؞»‏ ›‏

⁴⁵ندٜ دَوْدَ نٛدِّي اَلْمَسِيحُ ‏‹‏جٛومِرَاوٛ،›‏ تٛو، نٛ طُمْ وَطَتَ اٛ وَرْتَ ٻِطّٛ دَوْدَ؟»‏

⁴⁶وَلَا بَوْطٛ نٛوتَنَاکِمٛ؞ دَغَ ندٜنْ طٛنْ ݧَلْندٜ وَلَا غَطُطٛ سٜمْبٜ ٻٜرْندٜ پَمِمٛ وٛنْغٛلْ پَمٛلْ؞

وَغِّنْکِ دٛوْ فَارِسَنْکٛعٜنْ اٜ مٛودِٻّٜ اَتَّوْرَ

¹يٜىٰسُ مٜتَنِ حَوْرُتُٻٜ اٜ تٛکُّٻٜمٛ، وِعِ، ²‏«‏مٛودِٻّٜ اَتَّوْرَ اٜ فَارِسَنْکٛعٜنْ کٛکَّامَ لَامُ حٛکُّکِ يِمْٻٜ مَعَنَ کٛ مُوسَ وِنْدِ؞ ³نغَمْ نٛنْ، نغَطٜىٰ فُو کٛ ٻٜ اٜکِّتِنِعٛنْ تٛکّٜىٰطُمْ، اَمَّا تٛع اٛنْ نغَطُ کٛ ٻٜ نغَطَتَ، نغَمْ ٻٜ نغَطَتَا کٛ ٻٜ نغَعَجِنْتَ؞ ⁴اٜ ٻٜ کَٻَّ دٛݝْلٜ تٜدُّطٜ شَطُطٜ حٛشُّکِ، ٻٜ نجٛوَطٜ دٛوْ بَلْبٜ يِمْٻٜ، اَمَّا کَمْٻٜ اٜ کٛعٜ مَٻّٜ کٛو کٛولٜلْ غٛعٛ ٻٜ نغَطَتَا ٻٜ مبَلَّٻٜ؞ ⁵فُو کٛ ٻٜ نغَطَتَ اٜ ٻٜ نغَطَطُمْ نغَمْ يِمْٻٜ نغِعَٻٜ؞ اٜ ٻٜ کَٻَّ لَايَحٛ مَوْکٛ کٛ اَايَاجٜ دٜفْتٜرٜ شٜنِيندٜ تٛ تِيطٜ مَٻّٜ اٜ جُوطٜ مَٻّٜ، اٜ ٻٜ نجُوتِنَ شِلْمبِ تٛغّٛوجٜ مَٻّٜ؞ ⁶تٛ حُمْتٛ اٜ ٻٜ نغِطِ جٛوطَاکِ تٛ مَوْٻٜ نجٛوطٛتٛو؛ ندٜرْ شُوطِ دٛعَارٜ مَا اٜ ٻٜ نغِطِ جٛوطٛرْلٜ مَوْٻٜ؞ ⁷اٜ ٻٜ نغِطِ حٛوْنِرٜىٰکِ مَنْغُ ندٜرْ لُومٛ، ندٜنْ اٜ ٻٜ نغِطِ طُمْ وِعَٻٜ، ‏‹‏اَللَّه سَبِّنَنٜىٰ، مٛودِبّٛ؞›‏ ⁸اَمَّا اٛنٛنْ، تٛع طُمْ نٛدِّرَعٛنْ ‏‹‏مٛودِبّٛ،›‏ نغَمْ مٛودِبّٛ مٛوطٛنْ اٛ غٛعٛتٛ، ندٜنْ اٛنْ فُو اٛنْ بَنْدِرَاٻٜ؞ ⁹تٛع اٛنْ نٛدُّ کٛو مٛيٜ ‏‹‏ݧَاکٛ›‏ اٜ دُونِيَارُ، نغَمْ اٛنْ نغٛودِ ݧَاکٛ غٛعٛتٛ، غٛنْطٛ تٛنْ دٛوْ؞ ¹⁰ندٜنْ تٛع طُمْ نٛدِّرَعٛنْ ‏‹‏اَرْدِيطٛ،›‏ نغَمْ اٛنْ نغٛودِ اَرْدِيطٛ غٛعٛتٛ، کَنْکٛ وٛنِ اَلْمَسِيحُ؞ ¹¹سٜيْ مَوْطٛ ندٜرْ مٛوطٛنْ وَرْتَ جَغَّنْتٛوطٛعٛنْ؞ ¹²فُو مَوْنِنْطٛ حٛورٜ مُوطُمْ طُمْ لٜسْتِنَيْمٛ؞ فُو لٜسْتِنْطٛ حٛورٜ مُوطُمْ طُمْ مَوْنِنَيْمٛ؞

¹³‏«‏اٛنْ مبٛنِي، اٛنٛنْ مٛودِٻّٜ اَتَّوْرَ اٜ فَارِسَنْکٛعٜنْ!‏ اٛنْ مُنَافُکِعٜنْ!‏ اٛنْ مَٻَّنِي يِمْٻٜ دَمُّغَلْ نَتُّکِ لَامُ اَللَّه؞ اٛنٛنْ اٛنْ نَتَّايِ، اٛنْ اَلَايِ غِطُٻٜ نَتُّکِ نَتَّ؞ ¹⁴‏[‏اٛنْ مبٛنِي اٛنٛنْ مٛودِٻّٜ اَتَّوْرَ اٜ فَارِسَنْکٛعٜنْ!‏ اٛنْ مُنَافُکِعٜنْ!‏ اٛنْ ݧَامَ جَوْدِ رٜوْٻٜ ٻٜ وٛرْٻٜ مَٻّٜ مَايِ، اٛنْ نغَطَ دٛعَارٜ جُوتُندٜ نغَمْ يِمْٻٜ نغِعَ؞ نغَمْ نٛنْ، اَللَّه ٻُرَيْ حٛکُّکِعٛنْ بٛنٜ؞]‏

¹⁵‏«‏اٛنْ مبٛنِي، اٛنٛنْ مٛودِٻّٜ اَتَّوْرَ اٜ فَارِسَنْکٛعٜنْ!‏ اٛنْ مُنَافُکِعٜنْ!‏ نغَمْ اٛنْ کُولَ مَايٛ اٛنْ نغِيلٛو ندٜرْ لٜيْطٜ فٜىٰرٜ‑فٜىٰرٜ نغَمْ حٜٻُکِ غٛعٛتٛ تٛکَّيْطٛ دِينَ مٛوطٛنْ؞ تٛ اٛنْ کٜٻِيمٛ، اٛنْ نغَرْتِرَمٛ کَلُّطٛ ٻُرْطٛعٛنْ حَلُّکِ ندٜ طِطِ نَتَّيْطٛ حِيتٜ بٛ مٛوطٛنْ؞

¹⁶‏«‏اٛنْ مبٛنِي، اٛنٛنْ وُمْٻٜ اَرْدِيٻٜ وُمْٻٜ!‏ اٛنْ مبِعَ، ‏‹‏کٛو مٛيٜ حُنٛرِي وُرٛ شٜنِينغٛ، نَاع طُمْ غٛطُّمْ؞ اَمَّا کٛو مٛيٜ حُنٛرِي جِينَارِ غٛنْطُمْ ندٜرْ مَاغٛ، دٛولٜ اٛ وَطَ کٛ اٛ حُنَنِي؞›‏ ¹⁷اٛنٛنْ کَاݝَاٻٜ، وُمْٻٜ!‏ طُمٜ ٻُرِ مَنْغُ، جِينَارِ طُمْ، کٛو وُرٛ شٜنِينغٛ نغٛنْ غَرْتِرْنغٛ جِينَارِ طُمْ شٜنِيطُمْ؟ ¹⁸طٛنْمَا اٛنْ مبِعَ، ‏‹‏کٛو مٛيٜ حُنٛرِي سَکِّرْدٜ، نَاع طُمْ غٛطُّمْ؞ اَمَّا کٛو مٛيٜ حُنٛرِي شَکِّرِ نغٛنْدِ دٛوْ سَکِّرْدٜ ندٜنْ، دٛولٜ اٛ وَطَ کٛ اٛ حُنَنِي؞›‏ ¹⁹اٛنٛنْ وُمْٻٜ!‏ طُمٜ ٻُرِ مَنْغُ، شَکِّرِ ندِنْ، کٛو سَکِّرْدٜ غَرْتِرَيْندٜ شَکِّرِ ندِنْ شٜنِيندِ؟ ²⁰نغَمْ نٛنْ، کٛو مٛيٜ حُنٛرِي سَکِّرْدٜ ندٜنْ حُنٛرَکٜندٜ اٜ کٛو طُمٜ کٛ وٛنِ دٛوْ مَيْرٜ؞ ²¹طٛنْمَا کٛو مٛيٜ حُنٛرِي وُرٛ شٜنِينغٛ نغٛنْ حُنٛرَکٜنغٛ اٜ اَللَّه جٛوطِيطٛ ندٜرْ مَاغٛ؞ ²²ندٜنْ کٛو مٛيٜ حُنٛرِي دٛوْ، حُنٛرَکٜ جٛوطٛرْغَلْ لَامُ اَللَّه اٜ جٛوطِيطٛ دٛوْ مَاغَلْ؞

²³‏«‏اٛنْ مبٛنِي، اٛنٛنْ مٛودِٻّٜ اَتَّوْرَ اٜ فَارِسَنْکٛعٜنْ!‏ اٛنْ مُنَافُکِعٜنْ!‏ اٛنْ کٛکَّ اَللَّه جَکَّ حَاکٛحٛيْ نجٛنْغٜتٜىٰکٛيْ، اَمَّا اٛنْ تٛکَّايِ کٛ ٻُرِ دَرَجَ ندٜرْ اَتَّوْرَ، وَاتٛ وَطَنْکِ يِمْٻٜ کٛ حَانِ، اٜ يُرْمٜىٰندٜ، اٜ حٛولَاکِ اَللَّه؞ طُعُمْ تَتُمْ اٜ حَانِ نغَطٛنْطُمْ، اَمَّا تٛع اٛنْ اَلُ وَطُکِ کٛ حٛرِي؞ ²⁴اٛنٛنْ وُمْٻٜ اَرْدِيٻٜ وُمْٻٜ!‏ اٛنْ اِتَّ بُولُلٜلْ ندٜرْ ندِيَمْ طَمْ نجَرٛتٛنْ، اَمَّا اٛنْ مٛطَ نغٜىٰلٛوبَ!‏

²⁵‏«‏اٛنْ مبٛنِي، اٛنٛنْ مٛودِٻّٜ اَتَّوْرَ اٜ فَارِسَنْکٛعٜنْ، مُنَافُکِعٜنْ!‏ اٛنْ لَيْٻَ غَطَ نجَرْدُکٛيْ مٛوطٛنْ اٜ لٜعٛيْ مٛوطٛنْ، اَمَّا ندٜرْ اٜ حٜىٰوِ نغُيْکَ اٜ شِيَ سُرُکِ حٛورٜ؞ ²⁶اَنْ فَارِسَنْکٜىٰجٛ بُمْطٛ!‏ اَرْتُ لَيْٻُکِ ندٜرْ جَرْدُغٜلْ نغٜلْ اٜ لٜعٜلْ نغٜلْ، ندٜنْ کٛو تٛيٜ مَاکٛيْ وَرْتَيْ لَٻْطُمْ؞

²⁷‏«‏اٛنْ مبٛنِي، اٛنٛنْ مٛودِٻّٜ اَتَّوْرَ اٜ فَارِسَنْکٛعٜنْ!‏ اٛنْ مُنَافُکِعٜنْ!‏ اٛنْ نَنْدِ اٜ غٜنَالٜ مٛيْتَنَاطٜ نجٛوجٜىٰرِ ندَنٜىٰرِ يَاسِ مَاجٜ اٜ مبٛوطِ يِيکِ، اَمَّا ندٜرْ مَاجٜ اٜ وٛودِ پِعٜ مَيْٻٜ اٜ کٛو اِرِ طُمٜ نٜفْنِيطُمْ؞ ²⁸نٛنْ اٛنٛنْ مَا مبَاطٛنْ؞ يِمْٻٜ اٜ نغِعَعٛنْ بٛ اٛنْ اَادِلِعٜنْ، اَمَّا ندٜرْ ٻٜرْطٜ مٛوطٛنْ اٛنْ مُنَافُکِعٜنْ اٛنْ کٜىٰوِي حَلّٜىٰندٜ؞

²⁹‏«‏اٛنْ مبٛنِي، اٛنٛنْ مٛودِٻّٜ اَتَّوْرَ اٜ فَارِسَنْکٛعٜنْ!‏ اٛنْ مُنَافُکِعٜنْ!‏ اٛنْ مَحَ غٜنَالٜ بٛطّٜ طٜ سِفْتٛرْکِ اَنَّبٛعٜنْ، طٛنْمَا اٛنْ مٛعِّتِنَ غٜنَالٜ اَادِلِعٜنْ؞ ³⁰اٛنْ مبِعَ، ‏‹‏دَا اٜنْ طٛنْ شَرٜلْ مَامَاجِ مٜىٰطٜنْ، دَا اٜنْ مبَلَّايِٻٜ وَرْکِ اَنَّبٛعٜنْ؞›‏ ³¹نٛنْ کٛلِّرْطٛنْ اٛنْ ٻِٻّٜ بَرْٻٜ اَنَّبٛعٜنْ؞ ³²تٛو، سٜيْ کٜىٰݧِتٛنْ کُوغَلْ نغَلْ مَامَاجِ مٛوطٛنْ ڤُطِّ!‏ ³³اٛنٛنْ بٛولٜ، ٻِٻّٜ بٛولٜ کَلُّطٜ!‏ نٛ طُمْ وَطَتَ کِسٛنْ نَتُّکِ وُرٛ حِيتٜ؟ ³⁴نغَمْ نٛنْ، اٜ مِ لِلٛنٛيَعٛنْ اَنَّبٛعٜنْ اٜ غٛودُٻٜ فَامُ اٜ مٛودِٻّٜ؞ اٛنْ مبَرَ وٛٻّٜ، اٛنْ مبَرَ وٛٻّٜ دٛوْ غَافَانغَلْ، اٛنْ ڤِيرَ وٛٻّٜ لٛوشِ ندٜرْ شُوطِ دٛعَارٜ مٛوطٛنْ، اٛنْ تٛکَّٻٜ غَرِيرِ‑غَرِيرِ اٛنْ تٛرَّٻٜ؞ ³⁵نغَمْ نٛنْ پِيپَمْ فُو اَادِلِعٜنْ بَرَاٻٜ ندُفَاطَمْ ندٜرْ دُونِيَارُ طُمْ طَٻِّتَيْطَمْ دٛوْ مٛوطٛنْ، دَغَ پِيپَمْ حَبِيلَ اَادِلِيجٛ حَا يَاکِ پِيپَمْ اَنَّبِ جَکَارِيَ، ٻِطّٛ بٜرِيکِيَ، مٛ مبَرْطٛنْ حَکُّندٜ سُودُ جٛومِرَاوٛ اٜ سَکِّرْدٜ؞ ³⁶اٜ مِ وِعَعٛنْ غٛونغَ، پِيپَمْجِ طِنْ طٛنْ فُو طُمْ طَٻِّتَيْطِ تٛ جُوطٜ يِمْٻٜ جَامَنُ طُعُمْ؞

يٜىٰسُ يُرْمِنَنِي يِمْٻٜ اُرُشَلِيمَ

³⁷‏«‏جَلَّ اُرُشَلِيمَ، اُرُشَلِيمَ اَ وَرِي اَنَّبٛعٜنْ، اَ وَرْدِي لِلٛيَاٻٜ تٛ مَاطَ اٜ کَاپٜ!‏ ندٜ طُطُّمْ اٜ مِ يِطِ مٛٻْتُکِ يِمْٻٜ مَاطَ نٛ غٜرٛوغَلْ مٛٻْتِرْتَ ٻِکّٛيْ مَاغَلْ لٜيْ بِيٜىٰلِ مَاغَلْ، اَمَّا اَ جَٻَايِ؞ ³⁸رَطُّمْ، اَللَّه اَلَنَيْعٛنْ وُرٛ شٜنِينغٛ مٛوطٛنْ وِنْدٜ؞ ³⁹اٜ مِ وِعَعٛنْ، اٛنْ ڤُطِّتَتَا نغِعٛنْيَمْ، نَا ݧَلْندٜ ندٜ مبِيطٛنْ، ‏‹‏اٛ بَرْکِطِنَاطٛ، غَرٛيْطٛ ندٜرْ اِنْدٜ جٛومِرَاوٛ؞›‏ »‏

يٜىٰسُ مٜتِي دٛوْ نٛ طُمْ سَنْکِتِرْتَ وُرٛ شٜنِينغٛ

¹يٜىٰسُ اٜ وُرْتٛيٛو وُرٛ شٜنِينغٛ اٜ مٛ يَحَ، سٜيْ تٛکُّٻٜمٛ نغَرِ مبِعِمٛ اٛ رَارَ شُوطِ مَاغٛ؞ ²سٜيْ اٛ نٛوتِي، اٛ وِعِٻٜ، ‏«‏اٛنْ نغِعِي فُو شُوطِ طِعِ؟ اٜ مِ وِعَعٛنْ غٛونغَ، وَلَا وٛنْدٜ حَيْرٜ اَلٜتٜىٰندٜ دٛوْ وٛنْدٜ؞ طٜ فُو طُمْ سَنْکِتَيْطٜ؞»‏

تٛرَّاجِ اٜ شَطٜىٰلٜ

³يٜىٰسُ اٜ جٛوطِي دٛوْ حٛشّٜىٰرٜ ندٜ لٜطّٜ جَيْتُنْ سٜيْ تٛکُّٻٜمٛ نغَرِ تٛ مَاکٛ کَمْٻٜ تَنْ، ٻٜ مبِعِ، ‏«‏وِعُمِنْ، ندٜيٜ فِي طُعُمْ وَطَتَ؟ طُمٜ وٛنِ کٛ حٛلَّتَ وَرْتٛيْکِ مَاطَ اٜ رٜعُکِ دُونِيَارُ؟»‏

⁴سٜيْ يٜىٰسُ وِعِٻٜ، ‏«‏ڤَامٜىٰ تٛع غٛطّٛ مَجِّنَعٛنْ؞ ⁵يِمْٻٜ طُطْٻٜ نغَرٛيَيْ ٻٜ مبِعَ کَمْٻٜ نغٛنِ مِنْ، ٻٜ مبِعَ، ‏‹‏مِنْ وٛنِ اَلْمَسِيحُ،›‏ ٻٜ مَجِّنَ يِمْٻٜ طُطْٻٜ؞ ⁶اٛنْ نَنَيْ حَبَرُ کٛنُوجِ غَطٜتٜىٰطِ حَادٜ مٛوطٛنْ، اٜ حَبَرُ کٛنُوجِ غَطٜتٜىٰطِ ٻَدَاکِ؞ تٛع اٛنْ کُلُ، نغَمْ دٛولٜ طُعُمْ وَطَ، اَمَّا رٜعُکِ دُونِيَارُ اٜ حٛرِي تَوْ؞ ⁷لٜݧٛلْ اُمَّنْتٛ لٜݧٛلْ، لَامُ اُمَّنْتٛ لَامُ؞ طُمْ وَطَيْ وٜىٰلٛ کَلُّنغٛ اٜ دِمْبٛلْ لٜيْدِ تٛ بِغٜىٰجٜ فٜىٰرٜ‑فٜىٰرٜ؞ ⁸اَمَّا طُعُمْ فُو طُمْ فُطّٛودٜ تٛرَّاجِ غَرَيْطِ؞

⁹‏«‏ندٜنْ ٻٜ نغَطَيْعٛنْ ندٜرْ جُوطٜ يِمْٻٜ تٛرَّيْٻٜعٛنْ، طُمْ وَرَعٛنْ؞ فُو لٜݧِ دُونِيَارُ نغَݧَيْعٛنْ نغَمْ اٛنْ تٛکُّٻٜيَمْ؞ ¹⁰اٜ شَرٜلْ نغٜلْ يِمْٻٜ طُطْٻٜ اَلَيْ حٛولَاکِيَمْ، اٜ ٻٜ نغُلّٛوتِرَ، اٜ ٻٜ نغَݧِندِرَ؞ ¹¹اَنَّبٛعٜنْ فٜوْرٜ طُطْٻٜ اُمّٛيْتٛ، ٻٜ مَجِّنَ يِمْٻٜ طُطْٻٜ؞ ¹²حَلّٜىٰندٜ ٻٜيْدٛتٛ حَا يِدّٜ طُطْٻٜ اُسْتٛو؞ ¹³اَمَّا مُݧُطٛ حَا رٜعِرْدٜ اٛ حِسَيْ؞ ¹⁴ندٜنْ طُمْ وَعَجِنَيْ حَبَرُ بٜلْطُمْ دٛوْ لَامُ اَللَّه کٛو تٛيٜ ندٜرْ دُونِيَارُ، نغَمْ طُمْ وَرْتَ شٜيْدَ تٛ لٜپِّ فُو، ندٜنْ رٜعُکِ دُونِيَارُ کِنْ وَرَ؞

تٛرَّ کَلُّکَ

¹⁵‏«‏شَرٜلْ اٜ وَرَ نغٜلْ نغِعٛتٛنْ ‏‹‏نٜفْنِيطُم›‏ غَرْتِرٛوجُمْ وُرٛ شٜنِينغٛ نغٛ لَاٻَا اٜ دَرِي تٛ وِغٜىٰرٜ شٜنِيندٜ طُمْ اَنَّبِ دَانِيٜلْ وِعِ؞ فُو جَنْغٛووٛ فَامَ مَعَنَ مَاجُمْ؞ ¹⁶اٜ شَرٜلْ نغٜلْ وٛنْٻٜ ندٜرْ لٜيْدِ يَحُودِيَ ندٛغَّ نَتّٛيَ کٛشّٜىٰجٜ؞ ¹⁷غٛنْطٛ دٛوْ سُودُ فُو تٛع جِڤّٛيٛ نغَمْ حٛشُّکِ کٛ وٛنِ ندٜرْ سُودُ؞ ¹⁸غٛنْطٛ تٛ نغٜسَ تٛع سٛعّٛ نغَمْ حٛشُّکِ شُدَّارِ مُوطُمْ؞

¹⁹‏«‏رٜوْٻٜ غٛودُٻٜ دٜىٰطِ اٜ مُسِنْتٜىٰٻٜ ٻٜ تٛرّٛتٛ نَاع سٜطَّ ندٜرْ طٜنْ طٛنْ بَلْطٜ!‏ ²⁰نغَطٜىٰ دٛعَارٜ تٛع دٛغُّدُ ندُنْ وَرَنَعٛنْ ندٜرْ ندُنْغُ کٛو ݧَلْندٜ سِوْتَارٜ؞ ²¹نغَمْ ندٜرْ طٜنْ طٛنْ بَلْطٜ طُمْ وَطَيْ تٛرَّ کَلُّکَ مَوْکَ اِرِ کَ طُمْ مٜىٰطَايِ وَطُکِ دَغَ شَرٜلْ نغٜلْ اَللَّه تَغِ دُونِيَارُ حَا جٛونِ؞ طُمْ بٛو فُطِّتَتَا طُمْ وَطَ اِرِ کَنْ طٛنْ تٛرَّ؞ ²²دَا اَللَّه اُسْتَايِ طٜنْ طٛنْ بَلْطٜ، دَا وَلَا غٛطّٛ کِسَيْطٛ؞ اَمَّا نغَمْ ٻٜنْ طٛنْ شُٻَاٻٜ مَاکٛ، اٛ اُسْتَيْ بَلْطٜ طٜنْ؞

²³‏«‏اٜ نغٜلْ طٛنْ شَرٜلْ تٛ غٛطّٛ وِعِيعٛنْ، ‏‹‏رَا اَلْمَسِيحُ طٛعٛ!‏›‏ کٛو بٛو، ‏‹‏رَمّٛ طَاعٜ!‏›‏ تٛع اٛنْ نجَٻُ؞ ²⁴نغَمْ اَلْمَسِيحُعٜنْ فٜوْرٜ اٜ اَنَّبٛعٜنْ فٜوْرٜ مبُرْتٛيْتٛ، ٻٜ نغَطَ اَلَامَاجِ مَوْطِ اٜ کُوطٜ کَيْطِنِيطٜ نغَمْ ٻٜ مَجِّنَ يِمْٻٜ، حَا اٜ شُٻَاٻٜ ٻٜنْ تٛ طُمْ وَطٛتٛ؞ ²⁵رَطُّمْ، مِ وِعِيعٛنْ کٛو طُمٜ کٛ شَرٜلْ نغٜلْ وَرَ؞

²⁶‏«‏نغَمْ نٛنْ، تٛ ٻٜ مبِعِيعٛنْ، ‏‹‏رَمّٛ طَاعٜ ندٜرْ لَدّٜ،›‏ تٛع اٛنْ نجَحُ؞ کٛو تٛ ٻٜ مبِعِيعٛنْ، ‏‹‏رَمّٛ طٛعٛ اٜ مٛ سُوطِي ندٜرْ شُوطِ،›‏ تٛع اٛنْ نجَٻُ؞ ²⁷نٛنْ نٛ مَپّٜرٜ مَپِّرْتَ دَغَ فُونَ ندٜ يِعٜ حَا حِرْنَ، نٛنْ وَرْتُکِ ٻِي نٜطّٛ وَعَتَ؞

²⁸‏«‏فُو تٛ بَاتُطُمْ وٛنِ، طٛنْ جِغَاجٜ کَوْرِتَتَ؞

وَرْتٛيْکِ ٻِي نٜطّٛ

²⁹‏«‏غَطَ تٛرَّ کَلُّکَ کَنْ، طٛنْ اٜ طٛنْ طُمْ ٻَلْوِنَيْ نَانغٜ، لٜوْرُ بٛو حٛکَّتَا جَيْنغٛلْ مَيْرُ؞ کٛودٜ نجَنٛيَيْ دَغَ دٛوْ، ندٜنْ کٛ وٛنِ دٛوْ فُو دِمْبٛتٛ؞ ³⁰اٜ شَرٜلْ نغٜلْ طُمْ يِعَيْ اَلَامَ ٻِي نٜطّٛ وَنْغِي تٛنْ دٛوْ، ندٜنْ فُو لٜݧِ دُونِيَارُ مبٛيَيْ بٛجِّ نَوْطِ؞ سٜيْ ٻٜ نغِعَ ٻِي نٜطّٛ اٜ وَرَ ندٜرْ دُولٜ اٜ بَوْطٜ اٜ تٜدُّنغَلْ مَنْغَلْ؞ ³¹اٛ وَطَيْ طُمْ دُودَ لُوَلْ سٜمْبٜىٰ دُودُکِ لِلُکِ مَلَاعِکَعٜنْ مَاکٛ، ٻٜ کَوْرِتَ ٻٜ اٛ سُٻِ دَغَ کٛو تٛيٜ ندٜرْ دُونِيَارُ، دَغَ نغٛعٛلْ کٜىٰرٛلْ دُونِيَارُ يَاکِ نغٛلْ تٛنْ کٜىٰرٛلْ دُونِيَارُ؞

مِسَالُ دٛوْ اِبِّ

³²‏«‏تٛو، اٜکِّتٜىٰ اٜکِّتِنٛلْ نغٛعٛلْ دَغَ تٛ اِبِّ؞ تٛ لِشٜ مَاکِ ڤُطِّ وِلُتُکِ، اٛنْ اَنْدِ ندُنْغُ ٻَدَکٜ وٛنْ طٛنْ؞ ³³نٛنْ مَا تٛ اٛنْ نغِعِي فُو فِي طُعُمْ اٜ وَطَ، تٛو، اٛنْ اَنْدَيْ ٻِي نٜطّٛ ٻَدَکٜ وَرْتٛيَ، اٜ مٛ حَادٜ دَمُّغَلْ؞ ³⁴اٜ مِ وِعَعٛنْ غٛونغَ، جَامَنُ طُعُمْ طُمْ رٜعَتَا نَا فُو فِي طُعُمْ وَطِي؞ ³⁵دٛوْ اٜ لٜيْ پَٻّٛتٛ، اَمَّا بٛلِيطٜ اَمْ پَٻَّتَاکٛ حَا اَبَدَا؞

اَللَّه تَنْ اَنْدِ ݧَلْندٜ وَرْتٛيْکِ اَلْمَسِيحُ

³⁶‏«‏وَلَا اَنْدُطٛ ندٜنْ طٛنْ ݧَلْندٜ کٛو نغٜلْ طٛنْ شَرٜلْ نغٜلْ فِي طُمْ طٛنْ وَطَتَ؞ کٛو مَلَاعِکَعٜنْ وٛنْٻٜ دٛوْ اَنْدَا، کٛو ٻِطّٛ اٛنْ مَا اَنْدَا، سٜيْ ݧَاکٛ مٛ دٛوْ تَنْ اَنْدِ؞ ³⁷نٛنْ نٛ طُمْ وَطِ اٜ جَامَنُ اَنَّبِ نُحُ، نٛنْ مَا وَرْتٛيْکِ ٻِي نٜطّٛ وَعَتَ؞ ³⁸ندٜرْ بَلْطٜ کٛ ندِيَمْ تُفَانَ وَطَ، يِمْٻٜ اٜ ݧَامَ، اٜ نجَرَ، اٜ تٜعَ، اٜ تٜعٜىٰ، حَا شَرٜلْ کٛ اَنَّبِ نُحُ نَتِّ کٛمِوَلْ؞ ³⁹ٻٜ ڤَامَايِ حَا ندِيَمْ تُفَانَ وَرِ حَلْکِٻٜ ٻٜ فُو؞ نٛنْ مَا وَرْتٛيْکِ ٻِي نٜطّٛ وَعَتَ؞ ⁴⁰اٜ شَرٜلْ نغٜلْ، وٛرْٻٜ طِطٛ اٜ کُوَ اٜ نغٜسَ، طُمْ حٛشَّ غٛعٛتٛ طُمْ اَلَ غٛعٛتٛ؞ ⁴¹رٜوْٻٜ طِطٛ اٜ نَمِدَ، طُمْ حٛشَّ غٛعٛتٛ طُمْ اَلَ غٛعٛتٛ؞ ⁴²نجٛوطٜىٰ اٛنْ شِرْيِي، نغَمْ اٛنْ اَنْدَا شَرٜلْ کٛ جٛومِرَاوٛ مٛوطٛنْ وَرَتَ؞ ⁴³اَمَّا اَنْدٜىٰ طُعُمْ، دَا جٛومُ وُرٛ اٜ اَنْدِ شَرٜلْ نغٜلْ غُجّٛ وَرَنْتَمٛ جٜمَّ، دَا اٛ جٛوطٛتٛ اٜ مٛ سِرْيِي اٛ اَلَتَا اٛ نَتَّنَمٛ وُرٛ؞ ⁴⁴نغَمْ نٛنْ، اٛنٛنْ مَا دٛولٜ نجٛوطٛوطٛنْ اٛنْ شِرْيِي نغَمْ اٜ شَرٜلْ نغٜلْ اٛنْ اَنْدَا ٻِي نٜطّٛ وَرَتَ؞

مَشُّطٛ غَطٛووٛ غٛونغَ

⁴⁵‏«‏مٛيٜ وٛنِ مَشُّطٛ مٛ غٛونغَ مٛ فَامُ، مٛ جٛومُ وُرٛ مُوطُمْ يٛوِ دٛوْ مَشُّٻٜ مُوطُمْ، نغَمْ اٛ حٛکَّٻٜ ݧَمْندُ ندٜرْ شَرٜلْ؟ ⁴⁶اٛ بَرْکِطِنَاطٛ مَشُّطٛ مٛ جٛومُ وُرٛ مُوطُمْ وَرْتِ تَوِ اٜ مٛ وَطَ نٛنْ؞ ⁴⁷اٜ مِ وِعَعٛنْ غٛونغَ، جٛومُ وُرٛ اٛنْ يٛوَيْمٛ دٛوْ جَوْدِ مُوطُمْ فُو؞ ⁴⁸اَمَّا تٛ مَشُّطٛ اٛنْ اٛ کَلُّطٛ اٛ وِعَيْ حٛورٜ مَاکٛ، ‏‹‏جٛومُ وُرٛ اَمْ وَرْتَتَا جٛونِ،›‏ ⁴⁹سٜيْ اٛ فُطِّ فِيُکِ مَشُّٻٜ ٻٜ اٛ حُودَتَ، اٜ مٛ ݧَامَ، اٜ مٛ يَرْدَ نجَرُ اٜ يَرٛوٻٜ؞ ⁵⁰جٛومُ وُرٛ اٛنْ وَرْتَيْ اٜ ݧَلْندٜ ندٜ مَشُّطٛ اٛنْ کَمَّاکِ اٜ شَرٜلْ نغٜلْ اٛ اَنْدَا، ⁵¹اٛ فِيَيْمٛ بٛطُّمْ اٛ وَطَمٛ ندٜرْ مُنَافُکِعٜنْ؞ طٛنْ طُمْ وٛيَتَ طُمْ ݧٜرْپِندِرَ ݧِيپٜ؞

مِسَالُ دٛوْ سُرْبَاٻٜ سَڤّٛ

¹‏«‏ندٜنْ طُمْ نَنْدِنَيْ لَامُ اَللَّه اٜ سُرْبَاٻٜ سَڤّٛ کٛشُّٻٜ فِتِلَاجِ ٻٜ ندِلِّ تَٻّٛيَاکِ اَنْغٛوجٛ؞ ²نجٛوٛ ندٜرْ مَٻّٜ اٜ نغٛودِ فَامُ، نجٛوٛ ندٜرْ مَٻّٜ بٛو نغَلَا فَامُ؞ ³شَرٜلْ کٛ سُرْبَاٻٜ ٻٜ نغَلَا فَامُ ٻٜنْ کٛشِّ فِتِلَاجِ مَٻّٜ، ٻٜ نجٛغَاکِ نٜبَّمْ فِتِلَ فٜىٰرٜ ندٜرْ کٛلْبَاجِ؞ ⁴غٛودُٻٜ فَامُ ٻٜنْ بٛو کٛشِّ فِتِلَاجِ مَٻّٜ اٜ نٜبَّمْ فٜىٰرٜ؞ ⁵ندٜ اَنْغٛوجٛ اٛنْ نٜىٰٻِ يٛتَّاکِ، سٜيْ ٻٜ فُو ٻٜ ڤُطِّ ݝٛݝُکِ حَا ٻٜ طَانِ؞

⁶‏«‏تٛنْ شَکَ جٜمَّ سٜيْ طُمْ نَنِ نٛدّٛلْ سٜمْبٜىٰ، اٜ طُمْ وِعَ، ‏‹‏رَا اَنْغٛوجٛ اٛنْ!‏ مبُرْتٛيٜىٰ، تَٻّٜىٰمٛ!‏›‏ ⁷سٜيْ سُرْبَاٻٜ ٻٜنْ فُو اُمِّي شِرْيِي فِتِلَاجِ مَٻّٜ؞ ⁸ٻٜ نغَلَا فَامُ ٻٜنْ مبِعِ غٛودُٻٜ فَامُ ٻٜنْ، ‏‹‏کٛکّٛرٜىٰمِنْ نٜبَّمْ مٛوطٛنْ سٜطَّ؞ فِتِلَاجِ اَمِنْ اٜ مبَاتَ!‏›‏ ⁹اَمَّا غٛودُٻٜ فَامُ ٻٜنْ مبِعِٻٜ، ‏‹‏نَاع نٛنْ، طَمْ حٜپَتَاعٜنْ؞ طُمْ ٻُرِي نجَحٛنْ تٛ سٛورٛوٻٜ، شٛودٛيٛنْ طَمْ مٛوطٛنْ؞›‏ ¹⁰اٜ ٻٜ دٛوْ لَاوٛلْ سٛودٛيْکِطَمْ، سٜيْ اَنْغٛوجٛ اٛنْ يٛتِّي؞ شِرْيِيٻٜ فِتِلَاجِ ٻٜنْ نَتِّدِ اٜ مَاکٛ ندٜرْ وُرٛ تٛ طُمْ وَطَتَ حُمْتٛ نغٛنْ؞ طُمْ مَٻِّي دَمُّغَلْ وُرٛ نغٛنْ؞

¹¹‏«‏دَغَ غَطَ سٜيْ سُرْبَاٻٜ کٛرِيٻٜ ٻٜنْ مَا نغَرْتِ، ٻٜ مبِعِ، ‏‹‏جٛومُ وُرٛ!‏ جٛومُ وُرٛ!‏ مَٻِّتَنْمِنْ!‏›‏ ¹²اَمَّا اٛ نٛوتِي، اٛ وِعِ، ‏‹‏اٜ مِ وِعَعٛنْ غٛونغَ، مِ اَنْدَاعٛنْ؞›‏

¹³‏«‏نغَمْ نٛنْ، سٜيْ نجٛوطٛوطٛنْ اٛنْ شِرْيِي، نغَمْ اٛنْ اَنْدَا ݧَلْندٜ ندٜنْ کٛو شَرٜلْ نغٜلْ؞

مِسَالُ دٛوْ مَشُّٻٜ تَتٛ

¹⁴‏«‏طٛنْمَا، لَامُ اَللَّه اٜ نَنْدِ اٜ غٛطّٛ نٜطّٛ غَطَيْطٛ يَادُ، سٜيْ اٛ نٛدِّ مَشُّٻٜ مَاکٛ اٛ تَمْبِنِٻٜ جَوْدِ مَاکٛ؞ ¹⁵اٛ حٛکِّ غٛعٛتٛ جَکَاجٜ جٛوِ کٜوْطٜ شٜىٰدٜ جِينَارِ، غٛعٛتٛ بٛو جَکَاجٜ طِطِ، غٛعٛتٛ بٛو جَکَارٜ غٛعٛ؞ اٛ حٛکِّ کٛو مٛيٜ نٛ وَاوَتَ، ندٜنْ اٛ دِلِّ؞ ¹⁶جَٻُطٛ جَکَاجٜ جٛوِ اٛنْ، طٛنْ اٜ طٛنْ اٛ دِلِّ اٛ وَادِ لُومٛ اٜ شٜىٰدٜ طٜنْ حَا اٛ حٜٻِ بٛ مَاجٜ؞ ¹⁷نٛنْ مَا جَٻُطٛ جَکَاجٜ طِطِ اٛنْ حٜٻِ بٛ مَاجٜ؞ ¹⁸اَمَّا جَٻُطٛ جَکَارٜ غٛعٛ اٛنْ يَحِ وَسِ نغَيْکَ سُوطِ شٜىٰدٜ جِينَارِ جٛومُ وُرٛ مُوطُمْ؞

¹⁹‏«‏تٛو، غَطَ طُمْ نٜىٰٻِي، سٜيْ جٛومُ مَشُّٻٜ اٛنْ وَرْتِ نغَمْ يِعَ کٛ کٛو مٛيٜ حٜٻَنِمٛ؞ ²⁰سٜيْ جَٻُطٛ جَکَاجٜ جٛوِ کٜوْطٜ شٜىٰدٜ جِينَارِ وَرِ وَدِّ شٜىٰدٜ جَکَاجٜ جِينَارِ جٛوِ طٜ اٛ ٻٜيْدِي؞ اٛ وِعِ، ‏‹‏جٛومُ وُرٛ، اَ حٛکِّييَمْ جَکَاجٜ کٜوْطٜ شٜىٰدٜ جِينَارِ جٛوِ؞ رَا مِ ٻٜيْدِي جَکَاجٜ شٜىٰدٜ جٛوِ؞›‏ ²¹سٜيْ جٛومُ وُرٛ اٛنْ وِعِمٛ، ‏‹‏اَ حُوِي بٛطُّمْ، مَشُّطٛ بٛطّٛ مٛ غٛونغَ؞ ندٜ اَ وَطِي غٛونغَ دٛوْ فِي سٜطَّ، مِ تَمْبِنْتٜ طُطُّمْ؞ وٛرٛيْ، نَنِدَا بٜلْطُمْ اٜ اَمْ؞›‏ ²²سٜيْ جَٻُطٛ جَکَاجٜ طِطِ کٜوْطٜ شٜىٰدٜ جِينَارِ مَا وَرِ، وِعِ، ‏‹‏جٛومُ وُرٛ، اَ حٛکِّييَمْ جَکَاجٜ طِطِ کٜوْطٜ شٜىٰدٜ جِينَارِ؞ رَا مِ ٻٜيْدِي جَکَاجٜ شٜىٰدٜ طِطِ؞›‏ ²³سٜيْ جٛومُ وُرٛ اٛنْ وِعِمٛ، ‏‹‏اَ حُوِي بٛطُّمْ، مَشُّطٛ بٛطّٛ مٛ غٛونغَ؞ ندٜ اَ وَطِي غٛونغَ دٛوْ فِي سٜطَّ؞ مِ تَمْبِنْتٜ طُطُّمْ؞ وٛرٛيْ، نَنِدَا بٜلْطُمْ اٜ اَمْ؞›‏ ²⁴ندٜنْ جَٻُطٛ جَکَارٜ غٛعٛ کٜوْندٜ شٜىٰدٜ جِينَارِ اٛنْ وَرِ، وِعِ، ‏‹‏جٛومُ وُرٛ، اٜ مِ اَنْدِ اَ نٜطّٛ شَطَنْطٛ، اَ يِطِ فٜعُّکِ کٛ اَ اَاوَايِ، اَ غِطّٛ مٜىٰرٜ؞ ²⁵اٜ مِ حُلَ، نغَمْ نٛنْ نجَامِ نغَسُمِ نغَيْکَ شُوطُمِ شٜىٰدٜ مَاطَ ندٜرْ لٜيْدِ؞ رَا شٜىٰدٜ مَاطَ!‏›‏ ²⁶سٜيْ جٛومُ وُرٛ اٛنْ نٛوتِي، وِعِ، ‏‹‏اَنْ اَ مَشُّطٛ کَلُّطٛ، دَکِّيطٛ!‏ تٛو، اٜ يِيکِ مَاطَ اٜ مِ فٜعَّ کٛ مِ اَاوَايِ، ندٜنْ مِ غِطّٛ مٜىٰرٜ؟ ²⁷اٜ حَانِ ندٜسَنَايَمْ شٜىٰدٜ تٛ طٜ کُوتِرْتٜىٰ طٜ ٻٜيْدٛو، نغَمْ تٛ مِ وَرْتٛيِي مِ جَٻَطٜ حَا اٜ ٻٜيْدَارِ!‏ ²⁸نغَمْ نٛنْ، نجَٻٜىٰ شٜىٰدٜ طٜنْ تٛ مَاکٛ، کٛکّٛنْ اٛنْ طٛنْ غٛودُطٛ جَکَاجٜ سَڤّٛ کٜوْطٜ شٜىٰدٜ؞ ²⁹نغَمْ فُو غٛودُطٛ، طُمْ ٻٜيْدَنَيْمٛ، حَا طُمْ طُوطَنَمٛ؞ اَمَّا مٛ وَلَا، کٛو کٛ اٛ وٛودِ مَا طُمْ جَٻَيْطُمْ؞ ³⁰ندٜنْ ڤَطّٜىٰ مَشُّطٛ اٛعٛ مٜىٰرٜىٰجٛ ندٜرْ ݧِوْرٜ ٻَلٜىٰرٜ، تٛ طُمْ وٛيَتَ طُمْ ݧٜرْپِندِرَ ݧِيپٜ؞›‏

کِيتَ غَرَيْکَ

³¹‏«‏تٛ ٻِي نٜطّٛ وَرِي ندٜرْ تٜدُّنغَلْ مُوطُمْ اٜ مَلَاعِکَعٜنْ فُو، اٛ جٛوطٛتٛ دٛوْ جٛوطٛرْغَلْ لَامُ مَاکٛ طُمْ تٜدُّنغَلْ؞ ³²طُمْ حَوْرِتَيْ يِمْٻٜ دُونِيَارُ فُو يٜىٰسٛ مَاکٛ، اٛ حَکِّتَٻٜ فٜىٰرٜ‑فٜىٰرٜ نٛنْ نٛ غَيْنَاکٛ حَکِّتِرْتَ بَالِ اٜ بٜعِ؞ ³³اٛ وَطَ بَالِ اٜ جُنْغٛ ݧَامٛ مَاکٛ، بٜعِ اٜ نَنٛ مَاکٛ؞ ³⁴سٜيْ لَامِيطٛ اٛنْ وِعَ وٛنْٻٜ ݧَامٛ مُوطُمْ، ‏‹‏نغَرٜىٰ، اٛنٛنْ ٻٜ ݧَاکٛ اَمْ بَرْکِطِنِ، ندٛنٜىٰ لَامُ طُمْ اُمْ سِرْيَنِيعٛنْ دَغَ فُطّٛودٜ دُونِيَارُ؞ ³⁵نغَمْ مِ نَنِي وٜىٰلٛ اٛنْ کٛکِّييَمْ ݧَمْندُ؞ مِ نَنِي طٛنْکَ اٛنْ کٛکِّييَمْ کٛ نجَرَيْمِ؞ مِ وَطِي کٛطَاکُ اٛنْ نجِڤِّنِييَمْ؞ ³⁶مِ وَلَا کٛ ٻٛرْنٛتٛومِ اٛنْ کٛکِّييَمْ کٛلْتٜ؞ مِ وَطِي شِيَ نجَمُ اٛنْ ڤَامَنِييَمْ؞ اٜ مِ سُرِ ندٜرْ سُودُ شُرَلْ اٛنْ کٛوْنِييَمْ؞›‏ ³⁷اٜ شَرٜلْ نغٜلْ اَادِلِعٜنْ نٛوتٛتٛ، مبِعَمٛ، ‏‹‏مٛودِبّٛ، ندٜيٜ مِنْ نغِيدُمَا اٜ وٜىٰلٛ مِنْ کٛکُّمَا ݧَمْندُ، کٛو مِنْ نغِيدُمَا اٜ طٛنْکَ مِنْ کٛکُّمَا کٛ نجَرَتَا؟ ³⁸ندٜيٜ مِنْ نغِيمَا اَ کٛطٛ مِنْ نجِڤِّنْمَا، کٛو اَ وَلَا کٛ ٻٛرْنٛتٛطَا مِنْ کٛکُّمَا کٛلْتٜ؟ ³⁹ندٜيٜ مِنْ نغِيمَا اَ يَمْطَا کٛو اَ سُرِي ندٜرْ سُودُ شُرَلْ مِنْ کٛوْنُمَا؟›‏ ⁴⁰سٜيْ لَامِيطٛ اٛنْ نٛوتٛو، وِعَٻٜ، ‏‹‏اٜ مِ وِعَعٛنْ غٛونغَ، ندٜ اٛنْ نغَطَنِ غٛعٛتٛ ندٜرْ ٻٜعٜ بَنْدِرَاٻٜ اَمْ ٻُرْٻٜ فَمْطُکِ، مِنْ نغَطَنْطٛنْ؞›‏

⁴¹‏«‏ندٜنْ اٛ وِعَيْ وٛنْٻٜ نَنٛ مَاکٛ، ‏‹‏شٜنْدِرٜىٰ اٜ اَمْ، اٛنٛنْ لَانَاٻٜ!‏ نَتّٜىٰ حِيتٜ نغٜ ݧِفَتَا حَا اَبَدَا نغٜ طُمْ سِرْيَنِي شٜيْطَنْ اٜ مَلَاعِکَعٜنْ مُوطُمْ!‏ ⁴²نغَمْ مِ نَنِي وٜىٰلٛ اٛنْ کٛکَّايِيَمْ ݧَمْندُ؞ مِ نَنِي طٛنْکَ اٛنْ کٛکَّايِيَمْ کٛ نجَرَيْمِ؞ ⁴³مِ وَطِي کٛطَاکُ اٛنْ نجِڤِّنَايِيَمْ؞ مِ وَلَا کٛ ٻٛرْنٛتٛومِ اٛنْ کٛکَّايِيَمْ کٛلْتٜ؞ مِ وَطِي شِيَ نجَمُ اٛنْ ڤَامَنَايِيَمْ؞ مِ سُرَامَ ندٜرْ سُودُ شُرَلْ اٛنْ کٛوْنَايِيَمْ؞›‏ ⁴⁴ندٜنْ کَمْٻٜ مَا ٻٜ نٛوتٛو، ٻٜ مبِعَمٛ، ‏‹‏مٛودِبّٛ، ندٜيٜ مِنْ نغِيدُمَا اٜ وٜىٰلٛ، کٛو اٜ طٛنْکَ، کٛو اٜ شِيَ کٛلْتٜ، کٛو اٜ شِيَ نجَمُ، ندٜيٜ مِنْ نغِيمَا اَ کٛطٛ، کٛو اَ ندٜرْ سُودُ شُرَلْ، مِنْ مبَلَّايِمَ؟›‏ ⁴⁵سٜيْ اٛ نٛوتٛو، اٛ وِعَٻٜ، ‏‹‏اٜ مِ وِعَعٛنْ غٛونغَ، ندٜ اٛنْ نغَطَنَايِ کٛو غٛعٛتٛ ندٜرْ ٻٜعٜ ٻُرْٻٜ فَمْطُکِ، مِنْ وٛنِ اٛنْ نغَطَنَايِ؞›‏ ⁴⁶ٻٜعٜ نغٛنِ نَتَّيْٻٜ بٛنٜ طُمْ رٜعَتَا، اَادِلِعٜنْ بٛو کٜٻَ يٛنْکِ کِ رٜعَتَا؞»‏

مَوْٻٜ مٜدِّي دٛوْ نٛ نَنْغِرْتَ يٜىٰسُ

¹ندٜ يٜىٰسُ يٛتِّنِ وِيکِ فُو فِي طُعُمْ، اٛ وِعِ تٛکُّٻٜمٛ، ²‏«‏اٛنْ اَنْدِ حُمْتٛ سَکِّنْکِ حَنْدٜ حٛرِي بَلْطٜ طِطِ، طُمْ حٛکِّتِرَيْ ٻِي نٜطّٛ طُمْ وَرَمٛ دٛوْ غَافَانغَلْ؞»‏

³سٜيْ مَوْٻٜ اَرْدِيٻٜ دِينَ اٜ مَوْٻٜ يِمْٻٜ کَوْرِتِ اٜ لَامٛرْدٜ مَوْطٛ مَوْٻٜ اَرْدِيٻٜ دِينَ بِعٜتٜىٰطٛ کَيَافَ؞ ⁴ٻٜ کَٻِّ ٻٜ نَنْغَ يٜىٰسُ اٜ سُوطٜ ٻٜ مبَرَمٛ؞ ⁵ٻٜ مبِعِ، ‏«‏اَمَّا نَاع نِ شَرٜلْ حُمْتٛ سَکِّنْکِ، نغَمْ طُمْ غَطٛتٛوطُمْ يِمْٻٜ اُمِّنَ حَوْرٜ؞»‏

طُمْ مٛيْتَنِي يٜىٰسُ نٜبَّمْ اُرٛوجَمْ اٜ بٜتَنِ

⁶يٜىٰسُ اٜ ندٜرْ غَرِيرِ بٜتَنِ تٛ وُرٛ سِيمَنْ غٛودُطٛ ݧَوُ ݧَامٛوجُمْ لَرَلْ، ⁷سٜيْ غٛطّٛ دٜبّٛ وَرِ تٛ مَاکٛ اٜ جٛغِي جٛلّٛيٜلْ حَيْرٜ بٛنْغٜلْ نغٜلْ نٜبَّمْ اُرٛوجَمْ مبٜلْطَمْ غٛودُطَمْ شٜىٰدٜ؞ يٜىٰسُ اٜ ݧَامَ ݧَمْندُ، سٜيْ دٜبّٛ اٛنْ وَيْلِطَمْ دٛوْ حٛورٜ مَاکٛ؞ ⁸اَمَّا ندٜ تٛکُّٻٜمٛ نغِعِ نٛنْ، سٜيْ ٻٜرْطٜ مَٻّٜ مٜتِّ، ٻٜ مبِعِ، ‏«‏نغَمْ طُمٜ اٛ وٛنِّ نٜبَّمْ طَعَمْ نِحِ؟ ⁹دَا طَمْ سٛورَامَ شٜىٰدٜ طُطّٜ، طُمْ حٛکَّ ٻٜ نغَلَنَا شٜىٰدٜ طٜنْ؞»‏

¹⁰اَمَّا يٜىٰسُ فَامِ کٛ وٛنِ ندٜرْ ٻٜرْطٜ مَٻّٜ، سٜيْ اٛ وِعِٻٜ، ‏«‏نغَمْ طُمٜ نغَنّٛتٛنْ دٜبّٛ اٛعٛ؟ کٛ اٛ وَطَنِيَمْ طُمْ بٛطُّمْ؞ ¹¹کٛو ندٜيٜ ٻٜ نغَلَنَا اٜ نغٛنْدِ اٜ مٛوطٛنْ، اَمَّا مِنْ، شَرٜلْ اٜ وَرَ نغٜلْ اَلَيْمِعٛنْ؞ ¹²ندٜ اٛ وَيْلِ طَعَمْ نٜبَّمْ دٛوْ ٻَنْدُ اَمْ، اٛ وَطُ نٛنْ نغَمْ سِرْيَاکِ اُوُکِيَمْ؞ ¹³اٜ مِ وِعَعٛنْ غٛونغَ، کٛو تٛيٜ تٛ طُمْ وَعَجِنِ طُعُمْ حَبَرُ بٜلْطُمْ ندٜرْ دُونِيَارُ فُو، طُمْ حٛکَّيْ حَبَرُ کٛ دٜبّٛ اٛعٛ وَطِ نغَمْ سِفْتٛرْکِمٛ؞»‏

يَحُودَ جَٻِي حٛکِّتِرَ يٜىٰسُ

¹⁴سٜيْ غٛعٛتٛ ندٜرْ تٛکُّٻٜ يٜىٰسُ سَڤّٛ اٜ طِطٛ بِعٜتٜىٰطٛ يَحُودَ اِسْکَرِيٛوتِ يَحِ تٛ مَوْٻٜ اَرْدِيٻٜ دِينَ، ¹⁵اٛ وِعِ، ‏«‏طُمٜ کٛکّٛتٛنْيَمْ تٛ مِ وَطِي يٜىٰسُ ندٜرْ جُوطٜ مٛوطٛنْ؟»‏ سٜيْ ٻٜ کٛکِّمٛ شٜىٰدٜ اَجُرْفَارِ کَنْجٜ 30؞ ¹⁶دَغَ شَرٜلْ نغٜلْ يَحُودَ فُطِّ طَٻُّتُکِ لَاوٛلْ نٛ حٛکِّتِرْتَ يٜىٰسُ ندٜرْ جُوطٜ مَٻّٜ؞

يٜىٰسُ وَطِي حُمْتٛ سَکِّنْکِ اٜ تٛکُّٻٜمٛ

¹⁷ݧَلْندٜ اَرَنْدٜىٰرٜ ندٜ حُمْتٛ بُرٛودِ طُمْ وَلَا پُوفِنِرْطُمْ، سٜيْ تٛکُّٻٜمٛ نغَرِ تٛ مَاکٛ، ٻٜ مبِعِمٛ، ‏«‏تٛيٜ نغِطَّا مِنْ نجَحَ مِنْ شِرْيَنٛمَا نغَمْ ݧَامٜنْ ݧَمْندُ حُمْتٛ سَکِّنْکِ؟»‏

¹⁸سٜيْ اٛ وِعِ، ‏«‏نَتّٜىٰ غَرِيرِ تٛ غٛطّٛ نٜطّٛ مبِعٛنْمٛ، ‏‹‏مٛودِبّٛ وِعِ:‏ شَرٜلْ اَمْ ٻَدَکٜ؞ مِ وَطَيْ حُمْتٛ سَکِّنْکِ اٜ تٛکُّٻٜيَمْ تٛ وُرٛ مَاطَ؞›‏ »‏

¹⁹سٜيْ تٛکُّٻٜمٛ ٻٜنْ نغَطِ نٛنْ نٛ يٜىٰسُ وِعِٻٜ، سٜيْ ٻٜ شِرْيِي کٛو طُمٜ نغَمْ حُمْتٛ سَکِّنْکِ؞

²⁰ندٜ فُتُرٛ وَطِ، يٜىٰسُ جٛوطِي نغَمْ ݧَمْدَ اٜ تٛکُّٻٜمٛ سَڤّٛ اٜ طِطٛ؞ ²¹اٜ ٻٜ ندٜرْ ݧَامُکِ، سٜيْ اٛ وِعِ، ‏«‏اٜ مِ وِعَعٛنْ غٛونغَ، غٛعٛتٛ ندٜرْ مٛوطٛنْ حٛکِّتِرَيْيَمْ؞»‏

²²سٜيْ ٻٜ نغَنِّ نَاع سٜطَّ، ٻٜ ڤُطِّ وِعُکِمٛ غٛعٛتٛ‑غٛعٛتٛ، ‏«‏مٛودِبّٛ، نَاع طُمْ مِنْ، کٛو؟»‏

²³سٜيْ اٛ نٛوتِي، اٛ وِعِ، ‏«‏نٜطّٛ ݧَمْدَيْطٛ اٜ اَمْ اٜ لٜعَلْ غٛعٛ، کَنْکٛ حٛکِّتِرْتَيَمْ؞ ²⁴ٻِي نٜطّٛ مَايَيْ نٛ طُمْ وِنْدِرَا دٛوْ مَاکٛ، اَمَّا کٛکِّتِرَيْطٛمٛ وٛنِي!‏ طُمْ ٻُرَنَيْمٛ دَا اٛ دَݧَاکَ؞»‏

²⁵سٜيْ يَحُودَ کٛکِّتِرَيْطٛمٛ وِعِ، ‏«‏مٛودِبّٛ، نَاع طُمْ مِنْ، کٛو؟»‏

يٜىٰسُ وِعِمٛ، ‏«‏اٜىٰ، طُمْ اَنْ؞»‏

کِرْتَارِ جٛومِرَاوٛ

²⁶اٜ ٻٜ ندٜرْ ݧَامُکِ ݧَمْندُ، سٜيْ يٜىٰسُ حٛشِّ بُرٛودِ يٜتِّ اَللَّه، اٛ سٜنْدِطُمْ، اٛ حٛکِّ تٛکُّٻٜمٛ، اٛ وِعِ، ‏«‏نجَٻٜىٰطُمْ، ݧَامٛنْ؞ طُعُمْ طُمْ ٻَنْدُ اَمْ؞»‏

²⁷طٛنْمَا اٛ حٛشِّ جَرْدُغٜلْ ندِيَمْ اِنَبٛجَمْ، اٛ يٜتِّ اَللَّه، اٛ حٛکِّٻٜطَمْ، اٛ وِعِ، ‏«‏نجَرٜىٰ، اٛنْ فُو، ²⁸نغَمْ طَعَمْ کَنْجَمْ وٛنِ پِيپَمْ اَمْ تَبِّتِنَيْطَمْ اَلْکَوَلْ اَللَّه ندُفٜتٜىٰطَمْ نغَمْ يِمْٻٜ طُطْٻٜ نغَمْ يَافَاکِ حَکّٜ؞ ²⁹اٜ مِ وِعَعٛنْ، مِ فُطِّتَتَا مِ يَرَ ندِيَمْ اِنَبٛوجٜ نَا ݧَلْندٜ ندٜ نجَرَيْمِ نغٛطَّمْ کٜسَمْ حَوْتِ اٜ مٛوطٛنْ ندٜرْ لَامُ ݧَاکٛ اَمْ مٛ دٛوْ؞»‏

³⁰سٜيْ ٻٜ نغِمِ غِمٛلْ مَنْتُکِ اَللَّه، ندٜنْ ٻٜ ندِلِّ حٛشّٜىٰرٜ ندٜ لٜطّٜ جَيْتُنْ؞

يٜىٰسُ وِعِي بِيتُرُسْ وِعَيْ اَنْدَامٛ

³¹يٜىٰسُ وِعِ تٛکُّٻٜمٛ، ‏«‏ندٜرْ جٜمَّارٜ ندٜعٜ اٛنْ فُو اٛنْ ندٛغَّيْ اَلٛنْيَمْ، نغَمْ ندٜرْ اَايَارٜ اَللَّه وِعِي، ‏‹‏مِ وَرَيْ غَيْنَاکٛ، ندٜنْ اٛرْندٜ بَالِ طِنْ شَنْکِتٛتٛ؞›‏ ³²اَمَّا غَطَ مِ اُمَّکٜ دَغَ مَيْدٜ، مِ اَرْتَيْعٛنْ يَاکِ غَلِيلِ؞»‏

³³سٜيْ بِيتُرُسْ وِعِمٛ، ‏«‏کٛو ٻٜ فُو ٻٜ اَلِيمَ، مِنْ مِ اَلَتَامَ کٛو سٜطَّ؞»‏

³⁴يٜىٰسُ وِعِمٛ، ‏«‏اٜ مِ وِعُمَا غٛونغَ، حَنْدٜ، ندٜرْ جٜمَّارٜ ندٜعٜ، کٛ نجَکَرْدِ حَنَ، اَ وِعَيْ اَ اَنْدَايَمْ ندٜ تَتِ؞»‏

³⁵اَمَّا بِيتُرُسْ وِعِمٛ، ‏«‏کٛو طُمْ وَرْدَيْيَمْ اٜ مَاطَ، مِ وِعَتَا مِ اَنْدَامَ؞»‏

حٛرِيٻٜ ٻٜنْ مَا مبِعِ نٛنْ؞

يٜىٰسُ وَطِي دٛعَارٜ ندٜرْ غٜىٰسَمَنِ

³⁶سٜيْ يٜىٰسُ يَادِ اٜ تٛکُّٻٜمٛ وٛنْدٜ وِغٜىٰرٜ بِعٜتٜىٰندٜ غٜىٰسَمَنِ، اٛ وِعِٻٜ، ‏«‏نجٛوطٜىٰ طٛعٛ، مِ يَحَ طَاعٜ مِ وَطَ دٛعَارٜ؞»‏ ³⁷اٛ حٛشِّ بِيتُرُسْ اٜ ٻِٻّٜ جَبَدِ طِطٛ؞ ٻٜرْندٜ مَاکٛ بٛو تٜدِّ، اٛ فُطِّ وَنُّکِ نَاع سٜطَّ؞ ³⁸سٜيْ اٛ وِعِٻٜ، ‏«‏ٻٜرْندٜ اَمْ وَنِّي نَاع سٜطَّ حَا بٛ مِ مَايَيْ؞ نجٛوطٛدٜىٰ اٜ اَمْ طٛعٛ اٛنْ ندٜىٰنَ؞»‏

³⁹ندٜ اٛ يَحِ يٜىٰسٛ سٜطَّ، سٜيْ اٛ يَنِ اٜ لٜيْدِ اٜ مٛ حِڤِّي، اٛ وَطِ دٛعَارٜ، اٛ وِعِ، ‏«‏ݧَاکٛ اَمْ مٛ دٛوْ، تٛ طُمْ وَطٛتٛ، اِتَّنَمْ جَرْدُغٜلْ تٛرَّ کَعَ؞ فُو اٜ نٛنْ نَاع کٛ نغِطُمِ وَطٜتٜىٰ، اَمَّا کٛ نغِطَّا وَطٜىٰ؞»‏

⁴⁰غَطَ طٛنْ اٛ سٛعِّي تٛ ٻٜنْ طٛنْ تٛکُّٻٜمٛ تَتٛ، اٛ تَوِ اٜ ٻٜ طَانِي، سٜيْ اٛ وِعِ بِيتُرُسْ، ‏«‏تٛو، اٛنْ مبَاوَتَا جٛوطٛدَاکِ اٜ اَمْ اٛنْ طَانَاکِ کٛو شَرٜلْ سٜطَّ؟ ⁴¹نجٛوطٜىٰ، تٛع اٛنْ طَانٛ، نغَطٜىٰ دٛعَارٜ تٛ طُمْ فٛوندِيعٛنْ تٛع نغَطٛنْ حَکّٜ؞ ٻٜرْندٜ اٜ يِطِ وَطُکِ کٛ حَانِ، اَمَّا ٻَنْدُ تَمْڤِي؞»‏

⁴²اٛ فُطِّتِ اٛ دِلِّ طِطَٻُمْ، اٛ وَطِ دٛعَارٜ، اٛ وِعِ، ‏«‏ݧَاکٛ اَمْ مٛ دٛوْ، تٛ طُمْ وَطَتَاکٛ طُمْ اِتَّنَيَمْ تٛرَّ کَعَ، سٜيْ تٛ مِ يَرِيکَ، اَلْ کٛ نغِطَّا وَطٜىٰ؞»‏ ⁴³سٜيْ اٛ فُطِّتِ اٛ سٛعّٛيِي تٛ مَٻّٜ، اٛ تَوِ اٜ ٻٜ طَانِي، نغَمْ اٜ ٻٜ نَنَ طٜيْنغٛلْ تٜدُّنغٛلْ؞

⁴⁴سٜيْ اٛ فُطِّتِ اٛ دِلِّ تَتَٻُمْ اٛ وَطِ دٛعَارٜ، اٛ وِعِ نٛنْ نٛ اٛ وِعُنٛ؞ ⁴⁵اٛ فُطِّتِ اٛ سٛعِّي تٛ مَٻّٜ تَتَٻُمْ، اٛ وِعِٻٜ، ‏«‏حَا جٛونِ اٛنْ طَانِي، اٛنْ شِوْتٛو؟ شَرٜلْ وَرِي؞ طُمْ حٛکِّتِرِي ٻِي نٜطّٛ ندٜرْ جُوطٜ غَطٛوٻٜ حَکّٜ؞ ⁴⁶اُمّٜىٰ ندِلّٜنْ!‏ رَا اٛنْ طٛنْ کٛکِّتِرَيْطٛيَمْ اٜ وَرَ؞»‏

طُمْ نَنْغِي يٜىٰسُ

⁴⁷يٜىٰسُ اٜ مٜتَ، سٜيْ يَحُودَ، غٛعٛتٛ ندٜرْ تٛکُّٻٜمٛ سَڤّٛ اٜ طِطٛ وَرِ؞ اٛ وَرْدٛيِ اٜ يِمْٻٜ طُطْٻٜ اٜ ٻٜ نجٛغِي کَافَاجٜ اٜ شَبِّ؞ مَوْٻٜ اَرْدِيٻٜ دِينَ، اٜ مَوْٻٜ يِمْٻٜ لِلٛيِٻٜ؞ ⁴⁸تٛو، ندٜنْ مَا کٛکِّتِرَيْطٛ يٜىٰسُ اٛنْ اٛ يَادَکٜ اٛ وِعِيٻٜ نٛ اٛ حٛلِّرْتَٻٜ يٜىٰسُ، اٛ وِعِ، ‏«‏نٜطّٛ مٛ کٛوْنَيْمِ حٛوْنُکِ حِغَاکُ طُمْ کَنْکٛ؞ نَنْغٜىٰمٛ؞»‏

⁴⁹طٛنْ اٜ طٛنْ يَحُودَ اٛنْ ٻَدِّي يٜىٰسُ، وِعِ، ‏«‏مٛودِبّٛ، اَللَّه سَبِّنَنٜىٰ!‏»‏ ندٜنْ اٛ حٛوْنِمٛ حٛوْنُکِ حِغَاکُ؞ ⁵⁰يٜىٰسُ نٛوتِي، وِعِمٛ، ‏«‏حِغٛ اَمْ، وَطُ کٛ وَدُّمَا؞»‏

سٜيْ يِمْٻٜ ٻٜنْ ٻَدِّي نَنْغِ يٜىٰسُ ٻٜ نجٛغِيمٛ بٛطُّمْ؞ ⁵¹اٜ يِيکِ نٛنْ، غٛعٛتٛ ندٜرْ غٛنْدُٻٜ اٜ يٜىٰسُ نَنْغِ کَافَحِ مُوطُمْ سٛلْتِکِ، فٜعِّ مَشُّطٛ مَوْطٛ مَوْٻٜ اَرْدِيٻٜ دِينَ اٛ اِتَّنِمٛ نٛوْرُ؞ ⁵²اَمَّا يٜىٰسُ وِعِمٛ، ‏«‏وَتُّ کَافَحِ مَاطَ ندٜرْ حٛلْغٛ مَاکِ؞ نغَمْ فُو کٛشُّطٛ کَافَحِ، کَافَحِ وَرَتَمٛ؞ ⁵³اٛنْ کَمِّي مِ وَاوَتَا تٛرَاکِ ݧَاکٛ اَمْ مٛ دٛوْ، طٛنْ اٜ طٛنْ اٛ لِلٛيَ مٛٻْطٜ مَلَاعِکَعٜنْ ٻُرْطٜ مٛٻْطٜ سَڤّٛ اٜ طِطِ؟ ⁵⁴اَمَّا نٛ وَطَتَ اَايَاجٜ کٜىٰوَ بِيطٜ دٛولٜ طُعُمْ وَطَ نِحِ؟»‏

⁵⁵اٜ نغٜلْ طٛنْ شَرٜلْ يٜىٰسُ وِعِ غَرٛيْٻٜ ٻٜنْ، ‏«‏اٛنْ نغَرْدٛيِ اٜ کَافَاجٜ اٜ شَبِّ نغَمْ نَنْغٛيْيَمْ بٛ مِ غُجّٛ شَلٛرْطٛ؟ کٛو ندٜيٜ اٜ مِ جٛوطٛو ندٜرْ وُرٛ شٜنِينغٛ اٜ مِ اٜکِّتِنَ، اٛنْ نَنْغَايِيَمْ؞ ⁵⁶اَمَّا طُعُمْ وَطِي نغَمْ کٛ اَنَّبٛعٜنْ مبِنْدِ حٜىٰوَ؞»‏

سٜيْ فُو تٛکُّٻٜمٛ اَلِمٛ، ندٛغِّ؞

يٜىٰسُ يٜىٰسٛ لَامُ

⁵⁷سٜيْ نَنْغُٻٜ يٜىٰسُ ٻٜنْ نجَارِمٛ تٛ وُرٛ کَيَافَ مَوْطٛ مَوْٻٜ اَرْدِيٻٜ دِينَ، تٛ مٛودِٻّٜ اَتَّوْرَ اٜ مَوْٻٜ يِمْٻٜ کَوْرِتِ؞ ⁵⁸اَمَّا بِيتُرُسْ تٛکِّرِمٛ غَطَ دَغَ تٛ وٛطِّ حَا يَاکِ شَکَ وُرٛ مَوْطٛ مَوْٻٜ اَرْدِيٻٜ دِينَ اٛنْ؞ اٛ نَتِّ اٛ جٛوطٛدِي اٜ تَادِيٻٜ وُرٛ شٜنِينغٛ، نغَمْ اٛ يِعَ نٛ طُمْ وَطَنْتَ يٜىٰسُ؞ ⁵⁹مَوْٻٜ اَرْدِيٻٜ دِينَ اٜ فُو کَوْتَلْ مَوْٻٜ اٜ ٻٜ طَٻِّتَ شٜيْدَ فٜوْرٜ طُمْ ٻٜ نَنْغِرْتَ يٜىٰسُ، نغَمْ ٻٜ کٜٻَ ٻٜ مبَرَمٛ؞ ⁶⁰اَمَّا ٻٜ کٜٻَايِ غٛطُّمْ، کٛو ندٜ يِمْٻٜ طُطْٻٜ ندَرَکٜ يٜىٰسٛ مَٻّٜ کٛکِّ شٜيْدَ فٜوْرٜ؞ اٜ رٜعِرْدٜ، يِمْٻٜ طِطٛ ندَرِي يٜىٰسٛ يِمْٻٜ، ٻٜ مبِعِ، ⁶¹‏«‏اٛعٛ نٜطّٛ وِعِي، ‏‹‏مِ وَاوَيْ سَنْکُتُکِ وُرٛ شٜنِينغٛ نغٛ اَللَّه، مِ مَحِتٛونغٛ ندٜرْ بَلْطٜ تَتِ؞›‏ »‏

⁶²سٜيْ مَوْطٛ مَوْٻٜ اَرْدِيٻٜ دِينَ اُمِّي دَرِي وِعِ يٜىٰسُ، ‏«‏اَ وَلَا کٛ مبِعَتَا؟ کٛ ٻٜ مبِعِ دٛوْ مَاطَ طُمْ غٛونغَ؟»‏ ⁶³اَمَّا يٜىٰسُ دٜعِّتِ؞ سٜيْ مَوْطٛ مَوْٻٜ اَرْدِيٻٜ دِينَ اٛنْ وِعِمٛ، ‏«‏مِ حَوْتِيمَ اٜ اَللَّه مٛ يٛنْکِ، وِعُمِنْ تٛ اَنْ وٛنِ اَلْمَسِيحُ، ٻِطّٛ اَللَّه؞»‏

⁶⁴يٜىٰسُ نٛوتِي، وِعِ، ‏«‏اٜىٰ، طُمْ نٛنْ نٛ مبِيطَا؞ اَمَّا اٜ مِ وِعَعٛنْ، يٜىٰسٛ طٛعٛ اٛنْ نغِعَيْ ٻِي نٜطّٛ اٜ جٛوطِي تٛ جُنْغٛ ݧَامٛ نغٛ جٛومُ بَوْطٜ اٜ مٛ وَرٛيَ ندٜرْ دُولٜ؞»‏

⁶⁵سٜيْ مَوْطٛ مَوْٻٜ اَرْدِيٻٜ دِينَ اٛنْ سٜىٰکِ کٛلْتٜ مُوطُمْ وِعِ، ‏«‏اٛ حُطِي اَللَّه؞ طُمٜ شٜيْدَ طَٻِّتٜتٜنْ کَدِنْ؟ جٛونِ اٛنْ نَنِي نِ حَالَ کَلُّکَ کَ اٛ مٜتِ دٛوْ اَللَّه؞ ⁶⁶کٛ وٛنِ شُٻٛلْ مٛوطٛنْ؟»‏

سٜيْ ٻٜ مبِعِ، ‏«‏حٜوْتِي اٛ وَرٜىٰ!‏»‏

⁶⁷سٜيْ ٻٜ تُتَّنِمٛ جٛودٜ تٛ يٜىٰسٛ، ٻٜ ڤِيِمٛ، وٛٻّٜ کٜلِّمٛ تٛ وٛلٛ، ⁶⁸اٜ ٻٜ مبِعَمٛ، ‏«‏اَلْمَسِيحُ، وَطَنْمِنْ اَنَّبَاکُ!‏ مٛيٜ فِيُمَا؟»‏

بِيتُرُسْ وِعِي اَنْدَا يٜىٰسُ

⁶⁹بِيتُرُسْ اٜ جٛوطِي شَکَ وُرٛ نغٛنْ، سٜيْ غٛطّٛ کٛرْطٛ وَرِ تٛ مَاکٛ وِعِ، ‏«‏اَنْ مَا، اَ وٛنْدِ اٜ يٜىٰسُ غَلِلَنْکٜىٰجٛ!‏»‏

⁷⁰اَمَّا بِيتُرُسْ يٜدِّ يٜىٰسٛ مَٻّٜ ٻٜ فُو وِعِ، ‏«‏مِ اَنْدَا کٛ مبِعَتَا!‏»‏ ⁷¹سٜيْ اٛ يَحِ حَادٜ دَمُّغَلْ وُرٛ نغٛنْ؞ طٛنْمَا سٜيْ غٛطّٛ کٛرْطٛ يِعِمٛ، وِعِ يِمْٻٜ دَرِيٻٜ طٛنْ، ‏«‏اٛعٛ نٜطّٛ اٜ مٛ وٛنْدِ اٜ يٜىٰسُ نَجَرَنْکٜىٰجٛ!‏»‏

⁷²سٜيْ بِيتُرُسْ فُطِّتِ يٜدِّ حَا اٜ حُنَاکِ، وِعِ، ‏«‏مِ اَنْدَا نٜطّٛ اٛنْ!‏»‏

⁷³غَطَ طٛنْ سٜطَّ، سٜيْ دَرِيٻٜ طٛنْ ٻَدِّي بِيتُرُسْ، مبِعِ، ‏«‏سٜکٛ وَلَا اَنْ مَا اَ غٛعٛتٛ ندٜرْ تٛکُّٻٜمٛ، نغَمْ اِرِ نٛ مٜتِرْتَا نَنْغِيمَ؞»‏

⁷⁴سٜيْ بِيتُرُسْ فُطِّ لَانُکِ حٛورٜ مُوطُمْ حُنِي وِعِ، ‏«‏مِ اَنْدَا نٜطّٛ اٛنْ!‏»‏

طٛنْ اٜ طٛنْ نجَکَرْدِ حَنِ؞ ⁷⁵سٜيْ بِيتُرُسْ سِفْتٛرِ کٛ يٜىٰسُ وِعُنٛومٛ وِعُکِ، ‏«‏کٛ نجَکَرْدِ حَنَ اَ وِعَيْ ندٜ تَتِ اَ اَنْدَايَمْ؞»‏ سٜيْ اٛ وُرْتِي يَاسِ اٛ وٛيِ بٛجِّ نَوْطِ؞

يٜىٰسُ اٜ يٜىٰسٛ بِلَاتُسْ

¹ندٜ وٜىٰتِ، سٜيْ فُو مَوْٻٜ اَرْدِيٻٜ دِينَ اٜ مَوْٻٜ يِمْٻٜ مٜدِّ دٛوْ نٛ ٻٜ مبَرْدَتَ يٜىٰسُ؞ ²ٻٜ کَٻِّمٛ، ٻٜ ندِلِّدِ اٜ مَاکٛ ٻٜ نجَارِمٛ تٛ بِلَاتُسْ غٛمْنَاجٛ؞

مَيْدٜ يَحُودَ

³ندٜ يَحُودَ کٛکِّتِرْطٛ يٜىٰسُ يِعِ طُمْ تَپَنِي يٜىٰسُ کِيتَ مَيْدٜ، سٜيْ اٛ وَنِّ، اٛ سٛعِّتَنِ مَوْٻٜ اَرْدِيٻٜ دِينَ اٜ مَوْٻٜ يِمْٻٜ شٜىٰدٜ اَجُرْفَارِ 30 طٜنْ طٛنْ؞ ⁴اٛ وِعِ، ‏«‏مِ وَطِي حَکّٜ نغَمْ مِ حٛکِّتِرِي نٜطّٛ مٛ وَطَايِ کٛ وٛوطَا؞»‏

اَمَّا ٻٜ مبِعِمٛ، ‏«‏کٛ وَنِّمِنْ؟ اَنْ اَنْدِ!‏»‏

⁵سٜيْ اٛ حُبِنِ شٜىٰدٜ طٜنْ ندٜرْ وُرٛ شٜنِينغٛ، اٛ دِلِّ اٛ سَغِ حٛورٜ مَاکٛ اٜ ٻٛغّٛلْ دٛوْ لٜکِّ اٛ وَرِ حٛورٜ مَاکٛ؞

⁶اَمَّا مَوْٻٜ اَرْدِيٻٜ دِينَ ٻٛڤْتِ شٜىٰدٜ طٜنْ، مبِعِ، ‏«‏اَتَّوْرَ حَطِي طُمْ وَطَ طٜعٜ شٜىٰدٜ ندٜرْ تٛ طُمْ رٜسَتَ دٛکَّلْ نغَمْ اَللَّه ندٜرْ وُرٛ شٜنِينغٛ، ندٜ شٜىٰدٜ طٜنْ طُمْ شٜىٰدٜ پِيپَمْ؞»‏ ⁷نغَمْ نٛنْ ٻٜ شُٻِ ٻٜ کُوتِرَ شٜىٰدٜ طٜنْ ٻٜ شٛودَ نغٜسَ تٛ غٛطّٛ مَحٛووٛ غٛجِيجٜ، ٻٜ نغَرْتِرَکَ وِغٜىٰرٜ تٛ طُمْ اُوَتَ حٛٻّٜ؞ ⁸کَنْجُمْ وَطِ، حَا جٛونِ نغٜسَ کَنْ اٜ نٛدِّرٜىٰ ‏«‏نغٜسَ پِيپَمْ؞»‏

⁹نٛنْ حٜبِّنِ کٛ اَنَّبِ اِرْمِيَ وِعِ، وِيکِ، ‏«‏ٻٜ کٛشِّ شٜىٰدٜ اَجُرْفَارِ 30، شٜىٰدٜ طٜ اِسْرَاعِيلَنْکٛعٜنْ مبِعِ طُمْ يٛٻَ دٛوْ مَاکٛ؞ ¹⁰ٻٜ کُوتِرِ شٜىٰدٜ طٜنْ ٻٜ شٛودِ نغٜسَ تٛ مَحٛووٛ غٛجِيجٜ، نٛنْ نٛ جٛومِرَاوٛ وِعِ مِ وَطَ؞»‏

بِلَاتُسْ پَمِ يٜىٰسُ

¹¹يٜىٰسُ اٜ دَرِي يٜىٰسٛ غٛمْنَاجٛ، سٜيْ غٛمْنَاجٛ اٛنْ پَمِمٛ، وِعِ، ‏«‏اَنْ وٛنِ لَامِيطٛ يَحُودَنْکٛعٜنْ؟»‏

يٜىٰسُ نٛوتِي وِعِ، ‏«‏اَ وِعِيکَ؞»‏ ¹²اَمَّا ندٜ مَوْٻٜ اَرْدِيٻٜ دِينَ اٜ مَوْٻٜ يِمْٻٜ نغُلِّيمٛ، اٛ وِعَايِ غٛطُّمْ؞

¹³سٜيْ بِلَاتُسْ وِعِمٛ، ‏«‏اَ نَنَتَا ٻٜ نغُلّٛرَکٜمَ فِي طُطُّمْ؟»‏

¹⁴اَمَّا يٜىٰسُ نٛوتَنَاکِمٛ کٛو ندٜ غٛعٛ، حَا غٛمْنَاجٛ اٛنْ حَيْطِنِ نَاع سٜطَّ؞

طُمْ تَپَنِي يٜىٰسُ کِيتَ مَيْدٜ

¹⁵تٛو، اٜ شَرٜلْ حُمْتٛ سَکِّنْکِ، بِلَاتُسْ غٛمْنَاجٛ وٛووِي يٛوفَنْکِ حَوْرُتُٻٜ شُرَاطٛ غٛعٛتٛ مٛ ٻٜ نغِطِ؞ ¹⁶اٜ شَرٜلْ نغٜلْ بٛو اٜ وٛودِ شُرَاطٛ کَلُّطٛ اِنْدِنْطٛ بِعٜتٜىٰطٛ بَرَبَّسْ؞ ¹⁷ندٜ يِمْٻٜ کَوْرِتِ، سٜيْ بِلَاتُسْ پَمِٻٜ، وِعِ، ‏«‏مٛيٜ نغِطّٛنْ مِ يٛوفَنَعٛنْ؟ بَرَبَّسْ کٛو يٜىٰسُ بِعٜتٜىٰطٛ اَلْمَسِيحُ؟»‏ ¹⁸نغَمْ بِلَاتُسْ فَامِي لَوْلِيرُ وَطِ ٻٜ نغَطِ يٜىٰسُ ندٜرْ جُنْغٛ مَاکٛ؞

¹⁹بِلَاتُسْ اٜ جٛوطِي دٛوْ جٛوطٛرْغَلْ کِيتَ، سٜيْ دٜبّٛ مَاکٛ لِلٛيِ طُمْ وِعَمٛ، ‏«‏تَاع مٜىٰمُ اٛنْ طٛنْ مٛ وَطَايِ کٛ وٛوطَا، نغَمْ حَنْکِ مِ حٛيْطِي دٛوْ مَاکٛ مِ وَنِّي نَاع سٜطَّ دٛوْ کٛيْطٛلْ نغٛلْ؞»‏

²⁰مَوْٻٜ اَرْدِيٻٜ دِينَ اٜ مَوْٻٜ يِمْٻٜ نغَطِ يِمْٻٜ مبِعَ طُمْ يٛوفَ بَرَبَّسْ طُمْ وَرَ يٜىٰسُ؞ ²¹غٛمْنَاجٛ اٛنْ فُطِّتِ وِعِٻٜ، ‏«‏ندٜرْ يِمْٻٜ طِطٛ ٻٜنْ مٛيٜ نغِطّٛنْ مِ يٛوفَنَعٛنْ؟»‏ ٻٜ مبِعِ، ‏«‏بَرَبَّسْ!‏»‏

²²سٜيْ بِلَاتُسْ پَمِٻٜ وِعِ، ‏«‏تٛو، کٛ نغِطّٛنْ مِ وَطَنَ يٜىٰسُ بِعٜتٜىٰطٛ اَلْمَسِيحُ؟»‏ ٻٜ فُو ٻٜ مبِعِ، ‏«‏وَرُمٛ دٛوْ غَافَانغَلْ!‏»‏

²³بِلَاتُسْ وِعِ، ‏«‏نغَمْ طُمٜ؟ طُمٜ کٛ حَلِّ اٛ وَطِ؟»‏ اَمَّا ٻٜ ٻٜيْدِ وِعُکِ سٜمْبٜىٰ، ‏«‏وَرُمٛ دٛوْ غَافَانغَلْ!‏»‏

²⁴ندٜ بِلَاتُسْ يِعِ وَلَا کٛ وَاوَتَ وَطُکِ، ندٜنْ حَوْرٜ فُطِّ اُمَّاکِ، سٜيْ اٛ ݧٜطٛيِ ندِيَمْ اٛ لٛوتِ جُوطٜ مَاکٛ يٜىٰسٛ مَٻّٜ؞ اٛ وِعِ، ‏«‏مِ وَلَا حَکّٜ پِيپَمْ نٜطّٛ اٛعٛ؞ طُمْ شَطُّمْ مٛوطٛنْ؞»‏

²⁵سٜيْ يِمْٻٜ ٻٜنْ فُو نٛوتِي، مبِعِ، ‏«‏اٜىٰ، حَکّٜ پِيپَمْ مَاکٛ اٜ دٛوْ اَمِنْ اٜ ٻِٻّٜ اَمِنْ!‏»‏

²⁶سٜيْ اٛ يٛوفَنِٻٜ بَرَبَّسْ، اَمَّا اٛ وَطِ طُمْ فِيِ يٜىٰسُ لٛوشِ، ندٜنْ اٛ تَمْبِنِمٛ سٛوجِعٜنْ رٛومَ نغَمْ ٻٜ مبَرٛيَمٛ دٛوْ غَافَانغَلْ؞

سٛوجِعٜنْ نجُکِّتِي يٜىٰسُ

²⁷دَغَ طٛنْ سٛوجِعٜنْ غٛمْنَاجٛ نجَارِ يٜىٰسُ ندٜرْ لَامٛرْدٜ غٛمْنَاجٛ، ٻٜ کَوْرِتِ فُو سٛوجِعٜنْ کٛرِيٻٜ يٜىٰسٛ مَاکٛ؞ ²⁸ٻٜ ٻٛرْتِمٛ ٻٜ ٻٛرْنِمٛ اِرِ تٛغّٛورٜ لَامِيٻٜ؞ ²⁹ٻٜ مبَالِ غِيفٛلْ غِعٜ، ٻٜ تَارَنِمٛنغٛلْ اٜ حٛورٜ، ٻٜ نغَطَنِمٛ سَوْرُ اٜ جُنْغٛ ݧَامٛ مَاکٛ، ٻٜ ندِشِّي يٜىٰسٛ مَاکٛ، اٜ ٻٜ نجُکِّتَمٛ، اٜ ٻٜ مبِعَ، ‏«‏اَللَّه رٜىٰنٜ، لَامِيطٛ يَحُودَنْکٛعٜنْ!‏»‏ ³⁰ٻٜ تُتَّنِمٛ جٛودٜ، ٻٜ نجَٻِ سَوْرُ ندُنْ ٻٜ نغَطِ کَ ڤِيرُکِمٛندُ تٛ حٛورٜ؞ ³¹غَطَ ٻٜ نجُکِّتِيمٛ، ٻٜ ٻٛرْتِمٛ تٛغّٛورٜ لَامِيٻٜ ندٜ ٻٜ ٻٛرْنُنٛومٛ، ندٜنْ ٻٜ ٻٛرْنِمٛ کٛلْتٜ مَاکٛ؞ سٜيْ ٻٜ مبُرْتِنِمٛ ٻٜ اَرْدِنِمٛ نغَمْ ٻٜ مبَرٛيَمٛ دٛوْ غَافَانغَلْ؞

طُمْ ڤِيَنِي يٜىٰسُ کُسَاجٜ دٛوْ غَافَانغَلْ

³²اٜ ٻٜ نجَحَ سٜيْ ٻٜ کَوْرِ اٜ غٛطّٛ نٜطّٛ سَايِرَنْکٜىٰجٛ بِعٜتٜىٰطٛ سِيمَنْ؞ ٻٜ نغَطِمٛ اٜ سٜمْبٜ اٛ حٛشَّ غَافَانغَلْ يٜىٰسُ؞ ³³ندٜ ٻٜ نغَرِ تٛ وٛنْدٜ وِغٜىٰرٜ بِعٜتٜىٰندٜ غٛلْغٛوتَ، وَاتٛ ‏«‏پِپَلْ حٛورٜ،»‏ ³⁴ٻٜ کٛکِّ يٜىٰسُ ندِيَمْ اِنَبٛجَمْ جِلِّندِرَاطَمْ اٜ غٛطُّمْ کَطُّمْ؞ اَمَّا ندٜ اٛ تَحِطَمْ، اٛ سَلِي اٛ يَرَ؞

³⁵غَطَ ٻٜ ڤِيَنِيمٛ کُوسَاجٜ دٛوْ غَافَانغَلْ، ٻٜ نغَطِ شَاشَ نغَمْ ٻٜ شٜنْدَ کٛلْتٜ مَاکٛ حَکُّندٜ مَٻّٜ؞ ³⁶غَطَ نٛنْ ٻٜ نجٛوطِي اٜ ٻٜ ندٜىٰنَمٛ؞ ³⁷دٛوْ حٛورٜ غَافَانغَلْ نغَلْ طُمْ تَکِّ اَلّٛوَلْ؞ طُمْ وِنْدِ دٛوْ مَاغَلْ کٛ طُمْ وُلّٛرِيمٛ وِعُکِ، ‏«‏اٛعٛ وٛنِ يٜىٰسُ لَامِيطٛ يَحُودَنْکٛعٜنْ؞»‏ ³⁸ٻٜ ڤِيَنِ وُيْٻٜ طِطٛ کُوسَاجٜ دٛوْ غَافَالٜ حَادٜ يٜىٰسُ، غٛعٛتٛ اٜ جُنْغٛ مَاکٛ ݧَامٛ، غٛعٛتٛ اٜ جُنْغٛ مَاکٛ نَنٛ؞

³⁹يِمْٻٜ پَٻّٛتٛوٻٜ اٜ کُطَ يٜىٰسُ اٜ نغِيلَ کٛعٜ، ⁴⁰اٜ ٻٜ مبِعَ، ‏«‏اَنْ غِطّٛ ڤُسُکِ وُرٛ شٜنِينغٛ مَحِتٛونغٛ ندٜرْ بَلْطٜ تَتِ، حِسْنُ حٛورٜ مَاطَ!‏ تَا ٻِطّٛ اَللَّه، جِڤّٛيَ دَغَ دٛوْ غَافَانغَلْ!‏»‏

⁴¹نٛنْ مَا مَوْٻٜ اَرْدِيٻٜ دِينَ، اٜ مٛودِٻّٜ اَتَّوْرَ، اٜ مَوْٻٜ يِمْٻٜ نجُکِّتِمٛ، اٜ مبِعَ، ⁴²‏«‏اٛ حِسْنِي وٛٻّٜ، اَمَّا اٛ وَاوَايِ حِسْنُکِ حٛورٜ مَاکٛ؞ تٛ کَنْکٛ وٛنِ لَامِيطٛ اِسْرَاعِيلَ، اَلْ اٛ جِڤّٛيٛو دَغَ دٛوْ غَافَانغَلْ جٛونِ، اٜنٜنْ بٛو کٛولٛوطٜنْمٛ؞ ⁴³اٛ حٛولَکٜ اَللَّه؞ اَلْ اَللَّه اٛنْ حِسْنَمٛ جٛونِ تٛ اٜ مٛ يِطِمٛ، نغَمْ اٛ وِعِي، ‏‹‏مِنْ مِ ٻِطّٛ اَللَّه؞›‏ »‏

⁴⁴نٛنْ مَا ٻٜنْ طٛنْ وُيْٻٜ ٻٜ طُمْ ڤِيَنِ کُوسَاجٜ دٛوْ غَافَالٜ کُطِمٛ؞

مَيْدٜ يٜىٰسُ

⁴⁵دَغَ شَکَ ݧَلَوْمَ ݧِوْرٜ مَٻِّ لٜيْدِ فُو، حَا يَاکِ نجَمْندِ تَتِ ندِ اَلَاسَرَ؞ ⁴⁶اٜ نجَمْندِ تَتِ ندِنْ، سٜيْ يٜىٰسُ وِعِ اٜ سٜمْبٜ، ‏«‏اٜلٛيْ، اٜلٛيْ، لَمَ سَبَتَّنِ؟»‏ وَاتٛ، ‏«‏يَا اَللَّه اَمْ، يَا اَللَّه اَمْ، نغَمْ طُمٜ شٜنْدِرْطَا اٜ اَمْ؟»‏

⁴⁷ندٜ وٛٻّٜ دَرِيٻٜ تٛ وِغٜىٰرٜ ندٜنْ نَنِ نٛنْ، ٻٜ مبِعِ، ‏«‏اٜ مٛ نٛدَّ اَنَّبِ اِلِيَ؞»‏ ⁴⁸سٜيْ طٛنْ اٜ طٛنْ غٛعٛتٛ مَٻّٜ دٛغِّ حٛشِّ سٛوسٛوَ، سُووِنغَ ندٜرْ ندِيَمْ اِنَبٛجَمْ لَمُّطَمْ، اٛ طِيسِنغَ تٛ سَوْرُ، اٛ لِوَنِي يٜىٰسُ يَرَ؞

⁴⁹اَمَّا وٛٻّٜ مبِعِ، ‏«‏اَلٜىٰ نغِعٜنْ کٛو اِلِيَ وَرَيْ حِسْنَمٛ؞»‏

⁵⁰سٜيْ يٜىٰسُ فُطِّتِ وُلِّ سٜمْبٜىٰ ندٜنْ يٛوفِ يٛنْکِ مُوطُمْ؞

⁵¹سٜيْ وُدٜرٜ شٜنْدُندٜ سُودُ جٛومِرَاوٛ سٜىٰکِ طِطِ دَغَ دٛوْ يَاکِ لٜيْ؞ لٜيْدِ بٛو دِمْبِ، کَاپٜ ڤٜشَّا؞ ⁵²طُمْ اٛمْتِ غٜنَالٜ، يِمْٻٜ اَللَّه مَيْٻٜ طُطْٻٜ اُمِّي اٜ يٛنْکِ؞ ⁵³ٻٜ مبُرْتٛيِي ندٜرْ غٜنَالٜ طٜنْ؞ غَطَ يٜىٰسُ اُمَّکٜ دَغَ مَيْدٜ، ٻٜ نَتّٛيِ غَرِيرِ شٜنِيندِ، يِمْٻٜ طُطْٻٜ نغِعِٻٜ؞

⁵⁴ندٜ مَوْطٛ سٛوجِعٜنْ اٛنْ اٜ حٛرِيٻٜ سٛوجِعٜنْ رٜىٰنٛوٻٜ يٜىٰسُ نغِعِ دِمْبٛلْ لٜيْدِ نغٛلْ اٜ فُو کٛ وَطِ، سٜيْ ٻٜ کُلْتٛرِ نَاع سٜطَّ، ٻٜ مبِعِ، ‏«‏غٛونغَ نٜطّٛ اٛعٛ اٛ ٻِطّٛ اَللَّه!‏»‏

⁵⁵اٜ وٛودِ رٜوْٻٜ طُطْٻٜ تٛکّٛيْٻٜ يٜىٰسُ دَغَ لٜيْدِ غَلِيلِ وَلّٛوٻٜمٛ اٜ ٻٜ ندَارَ دَغَ تٛ وٛطِّ؞ ⁵⁶ندٜرْ مَٻّٜ اٜ وٛودِ مَرْيَامَ پِوٛيْطٛ مَغَدَلَ، اٜ مَرْيَامَ مَدُوجٛ يَاکُبُ اٜ يُسُفُ، اٜ مَدُوجٛ ٻِٻّٜ جَبَدِ؞

اُوُکِ يٜىٰسُ

⁵⁷ندٜ اَلَاسَرَ وَطِ، سٜيْ غٛطّٛ دِسْکُطٛ پِوٛيْطٛ غَرِيرِ اَرْمَاتِيَ وَرِ؞ اِنْدٜ مَاکٛ يُسُفُ؞ کَنْکٛ مَا اٛ تٛکُّطٛ يٜىٰسُ؞ ⁵⁸اٛ يَحِ تٛ بِلَاتُسْ، اٛ تٛرِيمٛ اٛ حٛکَّمٛ ٻَنْدُ يٜىٰسُ؞ سٜيْ بِلَاتُسْ وَطِ طُمْ حٛکَّمٛندُ؞ ⁵⁹سٜيْ يُسُفُ حٛشِّ ندُ تَارِندُ اٜ وُدٜرٜ لَمْندٜ ندٜ شٜىٰدٜ؞ ⁶⁰اٛ فُکِّنٛيْندُ ندٜرْ يٜنَاندٜ مَاکٛ حٜيْرٜ ندٜ اٛ وَطِ طُمْ وَسَنِمٛ ندٜرْ حَيْرٜ؞ اٛ تَلِّتِ کَاپَ مَنْغَ اٛ مَٻِّ دَمُّغَلْ يٜنَاندٜ ندٜنْ، اٛ دِلِّ؞ ⁶¹مَرْيَامَ پِوٛيْطٛ مَغَدَلَ اٜ غٛعٛتٛ مَرْيَامَ اٛنْ اٜ ٻٜ طٛنْ نجٛوطِي يٜىٰسٛ يٜنَاندٜ ندٜنْ؞

رٜىٰنٛوٻٜ يٜنَاندٜ ندٜنْ

⁶²ندٜ فِنِ، وَاتٛ غَطَ ݧَلْندٜ سِرْيَاکِ، سٜيْ مَوْٻٜ اَرْدِيٻٜ دِينَ اٜ فَارِسَنْکٛعٜنْ کَوْرِتِ يٜىٰسٛ بِلَاتُسْ؞ ⁶³ٻٜ مبِعِ، ‏«‏اَللَّه رٜىٰنٜ!‏ مِنْ شِڤْتٛرِي کٛ اٛنْ طٛنْ مَجِّنٛووٛ يِمْٻٜ وِعِ کٛ اٛ مَايَ، اٛ وِعِ، ‏‹‏مِ اُمّٛتٛ دَغَ مَيْدٜ غَطَ بَلْطٜ تَتِ؞›‏ ⁶⁴نغَمْ نٛنْ، سٜيْ نغَطَا طُمْ يَحَ طُمْ رٜىٰنَ يٜنَاندٜ ندٜنْ بٛطُّمْ حَا بَلْطٜ تَتِ، نغَمْ تٛع تٛکُّٻٜمٛ نجَحَ نغُجَّ ٻَنْدُ مَاکٛ مبِعَ يِمْٻٜ اٛ اُمَّکٜ دَغَ مَيْدٜ؞ مَجِّنْکِ يِمْٻٜ شَکِتِيکِ کِنْ ٻُرَيْ اَرَنْدٜحِ حَلُّکِ؞»‏

⁶⁵سٜيْ بِلَاتُسْ وِعِٻٜ، ‏«‏تٛو، نجَحٜىٰ، کٛشّٛنْ سٛوجِعٜنْ، نغَطٛنْ کٛ مبَاوٛتٛنْ وَطُکِ ندٜىٰنٛنْ يٜنَاندٜ ندٜنْ؞»‏

⁶⁶سٜيْ ٻٜ نجَحِ يٜنَاندٜ ندٜنْ ٻٜ ڤِيِ حَاتِمِيرٜ لَامِيطٛ دٛوْ حَيْرٜ تٛ دَمُّغَلْ يٜنَاندٜ ندٜنْ، ٻٜ نغَطِ سٛوجِعٜنْ ندٜىٰنَنْدٜ بٛطُّمْ؞

اُمَّاکِ يٜىٰسُ دَغَ مَيْدٜ

¹تٛو، غَطَ ݧَلْندٜ سِوْتَارٜ، ݧَلْندٜ اَلَلْ سُبَکَ، سٜيْ مَرْيَامَ پِوٛيْطٛ مَغَدَلَ اٜ مَرْيَامَ غٛعٛتٛ اٛنْ ٻٜ نجَحِ نغَمْ ٻٜ نغِعَ يٜنَاندٜ ندٜنْ؞ ²طٛنْ اٜ طٛنْ طُمْ وَطِ وٛنْغٛلْ دِمْبٛلْ لٜيْدِ مَنْغٛلْ، نغَمْ غٛطّٛ مَلَاعِکَاجٛ جٛومِرَاوٛ وَرِ دَغَ دٛوْ، اٛ تَلِّتِ کَاپَ نغَنْ دَغَ دَمُّغَلْ يٜنَاندٜ ندٜنْ، اٛ جٛوطِي دٛوْ مَاغَ؞ ³اٜ مٛ طٜلْکِتٛو بٛ مَپّٜرٜ، کٛلْتٜ مَاکٛ بٛو اٜ رَنِّ تَرْ بٛ حٛتّٛلّٛ؞ ⁴ندٜ سٛوجِعٜنْ رٜىٰنٛوٻٜ يٜنَاندٜ ندٜنْ نغِعِمٛ، کُلٛلْ مَنْغٛلْ نَنْغِٻٜ حَا ٻٜ ندِوْنِ، ٻٜ نجَنِ، ٻٜ نغَرْتِ بٛ مَيْٻٜ؞

⁵اَمَّا مَلَاعِکَاجٛ اٛنْ وِعِ رٜوْٻٜ ٻٜنْ، ‏«‏تٛع اٛنْ کُلُ؞ اٜ مِ اَنْدِ يٜىٰسُ طَٻِّتٛتٛنْ، بَرَاطٛ دٛوْ غَافَانغَلْ؞ ⁶اٛ وَلَا طٛعٛ؞ طُمْ اُمِّنِيمٛ دَغَ مَيْدٜ؞ نغَرٜىٰ نغِعٛنْ تٛ طُمْ فُکِّنّٛومٛ؞ ⁷نجَحٜىٰ ندٜرْ يَوْطَارٜ مبِعٛنْ تٛکُّٻٜمٛ، ‏‹‏اٛ اُمَّکٜ دَغَ مَيْدٜ؞ رَطُّمْ، اٛ اَرْتَيْعٛنْ يَاکِ لٜيْدِ غَلِيلِ؞ تٛنْ نغِعٛتٛنْمٛ؞›‏ کَنْجُمْ وٛنِ حَبَرُ طُمْ نغَدَّنْمِعٛنْ؞»‏

⁸سٜيْ رٜوْٻٜ ٻٜنْ اَلِ يٜنَاندٜ ندٜنْ جَوْطُمْ ندٜرْ کُلٛلْ، اَمَّا اٜ وٜلْوٜلٛ مَنْغٛ؞ ٻٜ ندٛغِّ ٻٜ نجَحِ نغَمْ ٻٜ مبِعَکَ تٛکُّٻٜ يٜىٰسُ؞

⁹سٜيْ يٜىٰسُ حَوْرِ اٜ مَٻّٜ، وِعِ، ‏«‏اَکُ مٛوطٛنْ!‏»‏ ٻٜ ٻَتِّيمٛ، ٻٜ ندِشِّي، ٻٜ نجٛغِي کٛيْطٜ مَاکٛ، ٻٜ مَوْنِنِمٛ؞ ¹⁰سٜيْ يٜىٰسُ وِعِٻٜ، ‏«‏تٛع اٛنْ کُلُ؞ نجَحٜىٰ مبِعٛنْ بَنْدِرَاٻٜ اَمْ نجَحَ لٜيْدِ غَلِيلِ؞ تٛنْ ٻٜ نغِعَتَيَمْ؞»‏

حَبَرُ طُمْ رٜىٰنٛوٻٜ يٜنَاندٜ نغَدِّ

¹¹رٜوْٻٜ ٻٜنْ اٜ دٛوْ لَاوٛلْ، سٜيْ وٛٻّٜ ندٜرْ سٛوجِعٜنْ رٜىٰنٛوٻٜ يٜنَاندٜ ندٜنْ نجَحِ غَرِيرِ طِيوِتِ مَوْٻٜ اَرْدِيٻٜ دِينَ فُو کٛ وَطِ؞ ¹²ندٜ مَوْٻٜ اَرْدِيٻٜ دِينَ اٜ مَوْٻٜ يِمْٻٜ کَوْرِتِ، ٻٜ ندَرْوِ دَبَرٜ؞ ٻٜ کٛکِّ سٛوجِعٜنْ ٻٜنْ شٜىٰدٜ طُطّٜ، ¹³ٻٜ مبِعِٻٜ، ‏«‏مبِعٜىٰ يِمْٻٜ، ‏‹‏تٛکُّٻٜمٛ نغَرِ جٜمَّ اٜ مِنْ طَانِي ٻٜ نغُجِّمٛ؞›‏ ¹⁴تٛ غٛمْنَاجٛ نَنِي طُعُمْ حَبَرُ، مِنْ اٜسْتَيْمٛ مِنْ شُرَنَعٛنْ نَتُّکِ تٛرَّ؞»‏

¹⁵سٜيْ سٛوجِعٜنْ ٻٜنْ نجَٻِ شٜىٰدٜ طٜنْ، ٻٜ نغَطِ نٛنْ نٛ طُمْ وِعِٻٜ ٻٜ نغَطَ؞ حَبَرُ طُمْ سَنْکِتَامَ ندٜرْ يَحُودَنْکٛعٜنْ، اٜ ٻٜ کٛکَّ حَبَرُ طُعُمْ حَا حَنْدٜ؞

کُوغَلْ نغَلْ يٜىٰسُ حٛکِّ تٛکُّٻٜمٛ

¹⁶سٜيْ تٛکُّٻٜمٛ سَڤّٛ اٜ غٛعٛ ٻٜنْ ندِلِّ لٜيْدِ غَلِيلِ تٛ حٛشّٜىٰرٜ ندٜ يٜىٰسُ وِعِٻٜ ٻٜ نجَحَ؞ ¹⁷ندٜ ٻٜ نغِعِمٛ، سٜيْ ٻٜ مَوْنِنِمٛ، اَمَّا وٛٻّٜ نغَطِ سٜکٛ ندٜرْ ٻٜرْطٜ مَٻّٜ؞ ¹⁸سٜيْ يٜىٰسُ ٻَدِّي حَادٜ مَٻّٜ، وِعِٻٜ، ‏«‏طُمْ حٛکِّييَمْ فُو لَامُ دٛوْ اٜ لٜيْ؞ ¹⁹نغَمْ نٛنْ، نجَحٜىٰ نغَرْتِرٛنْ فُو لٜݧِ دُونِيَارُ تٛکُّٻٜيَمْ، نغَطَنٛنْٻٜ بَڤْتِسْمَ ندٜرْ اِنْدٜ اَللَّه ݧَاکٛ مٛ دٛوْ، اٜ ٻِطّٛ، اٜ رُوحُ اَللَّه، ²⁰اٛنْ اٜکِّتِنَٻٜ ٻٜ تٛکَّ کٛو طُمٜ کٛ مبِيمِعٛنْ نغَطٛنْ؞ رَطُّمْ، اٜ مِ وٛنْدِ اٜ مٛوطٛنْ کٛو ندٜيٜ حَا رٜعُکِ دُونِيَارُ؞»‏