لُکَ

حَبَرُ يٜىٰسُ طُمْ

لُکَ

وِنْدِ

حَبَرُ دٛوْ طٜرٜوٛلْ نغٛعٛلْ

نٜطّٛ بِعٜتٜىٰطٛ لُکَ وِنْدِ طٜرٜوٛلْ نغٛعٛلْ؞ کَنْکٛ اٛ ݧَوْندٛووٛ، ندٜنْ نَاع اٛ يَحُودَنْکٜىٰجٛ؞ طٛنْمَا نَاع اٛ غٛعٛتٛ ندٜرْ تٛکُّٻٜ يٜىٰسُ سَڤّٛ اٜ طِطٛ؞ اٜ طُمْ کَمّٛو لُکَ وِنْدِ طٜرٜوٛلْ نغٛعٛلْ کٛ اٜ مٛ غَرِيرِ رٛومَ؞ اٛ وِنْدُنغٛلْ نغَمْ کٛو مٛيٜ، کٛو ندٜ اٛ اِنِّي اِنْدٜ تِيٛوفِلُسْ؞

طٜرٜوٛلْ نغٛعٛلْ طُمْ حَبَرُ يٜىٰسُ اَلْمَسِيحُ، اٜ نٛ اٛ دَݧِرَا اٜ نٛ اٛ جٛوطٛرِي؞ اٛ يَمْطِتِنِي ݧَوْٻٜ، اٛ وُرْتِنَنِي يِمْٻٜ غِنِّ، اٛ اُمِّنِي مَيْٻٜ، اٛ اٜکِّتِنِي يِمْٻٜ دٛوْ لَاوٛلْ اَللَّه؞ کَلُّٻٜ مبَرِمٛ، اَمَّا اٛ اُمَّکٜ دَغَ مَيْدٜ غَطَ بَلْطٜ تَتِ؞ نغٛلْ وِعِ يٜىٰسُ وَاوَيْ يَافَاکِ حَکّٜ نٜطّٛ؞ نغٛلْ حٛلِّي تٛکُّطٛ يٜىٰسٛ فُو تٛ مَايِ نَتَّيْ وُرٛ اَللَّه؞

حَبَرُ يٜىٰسُ طُمْ لُکَ وِنْدِ

¹يَا تِيٛوفِلُسْ مَوْطٛ،

يِمْٻٜ طُطْٻٜ فُطِّي وِنْدُکِ حَبَرُ دٛوْ کٛ يٜىٰسُ وَطِ ندٜرْ اَمِنْ؞ ²ٻٜ مبِنْدِ حَبَرُ طُمْ نَنْطٜنْ دَغَ کٛنْدُطٜ غِيٻٜ کٛ وَطِ اٜ غِتٜ مَٻّٜ، اَنْدِنٛوٻٜ وٛلْدٜ اَللَّه؞ ³نغَمْ نٛنْ، مِنْ مَا طُمْ وٛوطَنِييَمْ مِ طَٻِّتَ کٛو طُمٜ اٜ سٜىٰسٜ‑سٜىٰسٜ دَغَ فُطُّکِ مَاجُمْ، مِ وِنْدَنْمَا کٛو طُمٜ نٛ وٛنِ، ⁴نغَمْ اَنْدَا غٛونغَ دٛوْ کٛو طُمٜ کٛ طُمْ اٜکِّتِنْمَا؞

طُمْ اَنْدِنِي دَݧْنغٛلْ يَحَيَ غَطٛووٛ بَڤْتِسْمَ

⁵ندٜرْ شَرٜلْ نغٜلْ حِرُدُسْ لَامِيطٛ لٜيْدِ يَحُودِيَ لَامٛتٛو، اٜ وٛودِ اَرْدِيطٛ دِينَ بِعٜتٜىٰطٛ جَکَارِيَ، اٜ مٛ ندٜرْ اَرْدِيٻٜ دِينَ دَغَ لٜݧٛلْ اَبِجَ؞ دٜبّٛ مَاکٛ اَلِسَبَتُ پِوٛيِي دَغَ لٜݧٛلْ هَرُونَ، وَاتٛ اَرْدِيٻٜ دِينَ؞ ⁶ٻٜ فُو طِطٛ ٻٜ نجٛوطَکٜ جٛنْدٜ وٛوطُندٜ يٜىٰسٛ اَللَّه، اٜ ٻٜ نغَطَ کٛو طُمٜ کٛ جٛومِرَاوٛ وِعِ يِمْٻٜ نغَطَ؞ ⁷اَمَّا ٻٜ نغَلَا ٻِٻّٜ، نغَمْ اَلِسَبَتُ اٛ دَݧَتَا، کَدِمَا ٻٜ فُو طِطٛ ٻٜ نَوْيِي؞

⁸وٛنْدٜ ݧَلْندٜ جَکَارِيَ اٜ حُوَ يٜىٰسٛ اَللَّه ندٜرْ وُرٛ شٜنِينغٛ اٜ ٻٜ اٛ حُودَتَ؞ ⁹طُمْ سُٻِيمٛ، نٛ اَرْدِيٻٜ دِينَ مبٛووِ وَطُکِ، نغَمْ اٛ نَتَّ ندٜرْ سُودُ جٛومِرَاوٛ اٛ وُلَ اُرْدٜ وٜلْندٜ نغَمْ جٛومِرَاوٛ؞ ¹⁰ندٜ شَرٜلْ وُلُکِ اُرْدٜ وٜلْندٜ وَطِ، مٛٻْغَلْ فُو اٜ دَرِ يَاسِ اٜ ٻٜ نغَطَ دٛعَارٜ؞ ¹¹سٜيْ مَلَاعِکَاجٛ جٛومِرَاوٛ وَنْغِ تٛ مَاکٛ اٜ دَرِي وُتُّدُ ݧَامٛ تٛ طُمْ وُلَتَ اُرْدٜ وٜلْندٜ؞ ¹²ندٜ جَکَارِيَ يِعِمٛ، ٻٜرْندٜ مُوطُمْ تَپِ، کُلٛلْ نَنْغِمٛ؞ ¹³اَمَّا مَلَاعِکَاجٛ اٛنْ وِعِمٛ، ‏«‏تَاع حُلُ جَکَارِيَ، جٛومِرَاوٛ نَنِي دٛعَارٜ مَاطَ؞ دٜبّٛ مَاطَ اَلِسَبَتُ دَݧَنْتٜ ٻِطّٛ غٛرْکٛ، ندٜنْ اَ حٛکَّيْمٛ اِنْدٜ يَحَيَ؞ ¹⁴ٻِطّٛ اٛنْ وَطٜتٜ نَنَا بٜلْطُمْ طُطُّمْ، طُطْٻٜ مَا نَنَيْ بٜلْطُمْ نغَمْ دَݧٜىٰکِ مَاکٛ، ¹⁵نغَمْ اٛ وَرْتَيْ مَوْطٛ يٜىٰسٛ جٛومِرَاوٛ؞ اٛ يَرَتَا ندِيَمْ اِنَبٛجَمْ کٛو نجَرُ غَيْلِتَيْنغُ حٛورٜ، ندٜنْ اٛ حٜىٰوَيْ رُوحُ اَللَّه دَغَ اٜ مٛ ندٜرْ رٜىٰدُ مَدُوجٛ مَاکٛ؞ ¹⁶اٛ وَرْتِرَيْ ٻِٻّٜ اِسْرَاعِيلَ طُطْٻٜ تٛ اَللَّه جٛومِرَاوٛ مَٻّٜ؞ ¹⁷اٛ اَرْتَيْ اَلْمَسِيحُ وَرْکِ ندٜرْ بَوْطٜ رُوحُ اَللَّه طٜ اَنَّبِ اِلِيَ حٜٻُنٛو، اٛ سِرْيٛوتِرَيْ دَݧٛوٻٜ اٜ ٻِٻّٜ مَٻّٜ؞ اٛ وَيْلِتَيْ شَلِيٻٜ طَتَلْ جٛومِرَاوٛ تٛ طَتَلْ غٛودُٻٜ غٛونغَ؞ اٛ وَطَيْ يِمْٻٜ شِرْيٛو نغَمْ غَرٛلْ جٛومِرَاوٛ؞»‏

¹⁸جَکَارِيَ پَمِ مَلَاعِکَاجٛ اٛنْ وِعِ، ‏«‏نٛيٜ اَنْدِرَيْمِ کٛ مبِيطَا طُمْ غٛونغَ؟ مِنْ، مِ نَوْيِي، دٜبّٛ اَمْ بٛو دُوٻِ مُوطُمْ طُوطِي؞»‏

¹⁹مَلَاعِکَاجٛ اٛنْ وِعِمٛ، ‏«‏مِنْ وٛنِ جِبِرِيلُ دَرٛتٛوطٛ يٜىٰسٛ اَللَّه، مِ لِلٛيَا تٛ مَاطَ نغَمْ مِ حٛکُّمَا حَبَرُ بٜلْطُمْ طُعُمْ؞ ²⁰اَمَّا جٛونِ اَ وَاوَتَا مٜتُکِ نَا ݧَلْندٜ ندٜ فِي طُعُمْ وَطِ، نغَمْ اَ جَٻَايِ حَالَ اَمْ تَبِّتَيْکَ تٛ شَرٜلْ مَاکَ وَرِي؞»‏

²¹اٜ شَرٜلْ نغٜلْ يِمْٻٜ اٜ کٜطِي جَکَارِيَ يَاسِ، ٻٜ کَيْطِنِي کٛ وَطِ اٛ نٜىٰٻِرِ نٛنْ ندٜرْ سُودُ جٛومِرَاوٛ؞ ²²ندٜ اٛ وُرْتٛيِي، اٛ وَاوَايِ مٜتَنْکِٻٜ؞ ٻٜ فَامِ اٛ يِعِ وَحَيُ ندٜرْ سُودُ جٛومِرَاوٛ؞ اٛ وَطِ کَ مٜتِرَنْکِٻٜ جُوطٜ، اَمَّا نٛنْ اٛ جٛوطٛرِي اٛ مٜتَتَا؞

²³ندٜ اٛ حٜىٰݧِ بَلْطٜ کُوغَلْ مَاکٛ، اٛ سٛعِّي وُرٛ مَاکٛ؞ ²⁴غَطَ فِي طُعُمْ وَطِي، دٜبّٛ مَاکٛ اَلِسَبَتُ حٜٻِ رٜىٰدُ، وَطِ لٜبِّ جٛوِ اٛ وُرْتَاکِ دَغَ ندٜرْ وُرٛ؞ اٛ وِعِ، ²⁵‏«‏جٛومِرَاوٛ وَطَنِييَمْ طُعُمْ؞ ندٜرْ بَلْطٜ طٜعٜ، اٛ اِتَّنِييَمْ سٜمْتٜىٰندٜ اَمْ حَکُّندٜ يِمْٻٜ؞»‏

مَلَاعِکَاجٛ حٛکِّي حَبَرُ دَݧْنغٛلْ يٜىٰسُ

²⁶ندٜرْ لٜوْرُ جٛوٜىٰغٛعٛورُ غَطَ اَلِسَبَتُ حٜٻِي رٜىٰدُ، اَللَّه لِلِ مَلَاعِکَاجٛ جِبِرِيلُ تٛ غَرِيرِ بِعٜتٜىٰندِ نَجَرَتْ نغٛنْدِ ندٜرْ لٜيْدِ غَلِيلِ؞ ²⁷مَلَاعِکَاجٛ اٛنْ يَحِ تٛ سُرْبَاجٛ بِعٜتٜىٰطٛ مَرْيَامَ غَطَنَاطٛ اَلْکَوَلْ تٜىٰغَلْ اٜ بِعٜتٜىٰطٛ يُسُفُ، دَغَ لٜݧٛلْ دَوْدَ؞ مَرْيَامَ اٛنْ اَنْدَا غٛرْکٛ؞ ²⁸مَلَاعِکَاجٛ اٛنْ وِعِمٛ، ‏«‏اٜ مِ سِلْمِنٛو، بَرْکِطِنَاطٛ جٛومِرَاوٛ!‏ جٛومِرَاوٛ اٜ وٛنْدِ اٜ مَاطَ!‏»‏

²⁹حَالَ کَنْ وَنِّي مَرْيَامَ کٛ طُوطِ؞ اٛ وِعِ ندٜرْ ٻٜرْندٜ مَاکٛ، ‏«‏مِنْ، مِ مٛيٜ اٛعٛ مٜتِّرَنْتَيَمْ نِحِ؟»‏ ³⁰اَمَّا مَلَاعِکَاجٛ اٛنْ وِعِمٛ، ‏«‏تَاع حُلُ، مَرْيَامَ، اَللَّه سُٻِي بَرْکِطِنْمَا؞ ³¹اَ حٜٻَيْ رٜىٰدُ، اَ دَݧَيْ ٻِطّٛ غٛرْکٛ، ندٜنْ اَ نٛدَّيْ اِنْدٜ مَاکٛ يٜىٰسُ؞ ³²اٛ وَرْتَيْ مَوْطٛ، طُمْ نٛدَّيْمٛ ٻِطّٛ اَللَّه جٛومُ مَنْغُ؞ اَللَّه جٛومِرَاوٛ حٛکَّيْمٛ جٛوطٛرْغَلْ لَامُ مَامَ مَاکٛ دَوْدَ؞ ³³اٛ لَامٛتٛ دٛوْ ٻِٻّٜ اِسْرَاعِيلَ حَا اَبَدَا؞ لَامُ مَاکٛ رٜعَتَا؞»‏

³⁴مَرْيَامَ وِعِ مَلَاعِکَاجٛ اٛنْ، ‏«‏نٛيٜ طُمْ وَطٛرْتٛو؟ مِ اَنْدَا غٛرْکٛ سَمْ؞»‏

³⁵مَلَاعِکَاجٛ اٛنْ وِعِمٛ، ‏«‏رُوحُ اَللَّه جِڤّٛيْتٛ دٛوْ مَاطَ، بَوْطٜ اَللَّه جٛومُ مَنْغُ سُدّٜتٜ بٛ طٛوْدِ؞ نغَمْ نٛنْ، دَݧٜتٜىٰطٛ اٛنْ طُمْ نٛدِّرَيْمٛ ‏‹‏ٻِطّٛ اَللَّه، شٜنِيطٛ؞›‏ ³⁶رَا، اَلِسَبَتُ بَنْدِرَاوٛ مَاطَ حٜٻِي رٜىٰدُ ندٜرْ نَيٜوُ مُوطُمْ، اٛ دَݧَيْ ٻِطّٛ غٛرْکٛ؞ کَنْکٛ مٛ يِمْٻٜ مبِعَتَ اٛ دَݧَتَا، جٛونِ اٜ مٛ وٛودِ رٜىٰدُ ندُ لٜبِّ جٛوٜىٰغٛعٛ؞ ³⁷نغَمْ وَلَا کٛ سَلٛرْتَ اَللَّه؞»‏

³⁸ندٜنْ مَرْيَامَ وِعِ، ‏«‏مِ کٛرْطٛ جٛومِرَاوٛ، طُمْ وَرْتَنَيَمْ نٛنْ نٛ مبِيطَا؞»‏ سٜيْ مَلَاعِکَاجٛ اٛنْ دِلِّ اَلِمٛ؞

مَرْيَامَ يَحِ تٛ اَلِسَبَتُ

³⁹ندٜرْ بَلْطٜ طٜنْ، مَرْيَامَ اُمِّي ندٜرْ يَوْطَارٜ يَحِ غَرِيرِ نغٛنْدِ ندٜرْ کٛشّٜىٰجٜ لٜيْدِ يَحُودِيَ؞ ⁴⁰اٛ نَتِّ وُرٛ جَکَارِيَ، اٛ حٛوْنِ اَلِسَبَتُ؞ ⁴¹شَرٜلْ کٛ اَلِسَبَتُ نَنِ کٛوْنٛلْ مَرْيَامَ، ٻِطّٛ غٛنْطٛ ندٜرْ رٜىٰدُ مَاکٛ دِوِ نغَمْ بٜلْطُمْ، اَلِسَبَتُ بٛو حٜبِّنَا رُوحُ اَللَّه؞ ⁴²اٛ نٛدِّ مَرْيَامَ اٜ سٜمْبٜ، اٛ وِعِ، ‏«‏اَ بَرْکِطِنَاطٛ ندٜرْ رٜوْٻٜ!‏ ٻِطّٛ مٛ شَاوُطَا اٛ بَرْکِطِنَاطٛ؞ ⁴³مِنْ، مِ مٛيٜ ندٜ اِنَّ اَلْمَسِيحُ وَرَتَ تٛ اَمْ؟ ⁴⁴ندٜ نَنُمِ کٛوْنٛلْ مَاطَ، ٻِطّٛ غٛنْطٛ ندٜرْ رٜىٰدُ اَمْ دِوِي نغَمْ بٜلْطُمْ؞ ⁴⁵اَ بَرْکِطِنَاطٛ نغَمْ اَ جَٻِي کٛ جٛومِرَاوٛ وَطَنْمَا اَلْکَوَلْ طُمْ حٜىٰوَيْ؞»‏

غِمٛلْ مَرْيَامَ

⁴⁶ندٜنْ مَرْيَامَ وِعِ،

‏«‏اٜ مِ مَنْتَ جٛومِرَاوٛ اٜ ٻٜرْندٜ اَمْ فُو؞

⁴⁷اٜ مِ نَنَ بٜلْطُمْ طُطُّمْ ندٜرْ ٻٜرْندٜ اَمْ نغَمْ اَللَّه، کِسْنٛووٛيَمْ،

⁴⁸نغَمْ اٛ يُرْمِنَنِييَمْ، مِنْ، کٛرْطٛ مَاکٛ، لٜسْتِنْطٛ حٛورٜ؞

دَغَ جٛونِ يِمْٻٜ دُونِيَارُ فُو نٛدِّرَيْيَمْ بَرْکِطِنَاطٛ،

⁴⁹نغَمْ اَللَّه بَاوُطٛ وَطَنِييَمْ فِي مَوْطُمْ طُطُّمْ،

اٛ شٜنِيطٛ؞

⁵⁰جُرُمْطُمْ مَاکٛ جٛوطٛتٛ دٛوْ کُلٛوٻٜمٛ حَا اَبَدَا؞

⁵¹اٜ مٛ وَطَ فِي مَوْطُمْ اٜ جُنْغٛ مَاکٛ سٜمْبِنْغٛ،

اٜ مٛ سَنْکِتَ مَوْنِنْٻٜ کٛعٜ مَٻّٜ اٜ کٛ ٻٜ مَنْتٛرْتٛو ندٜرْ ٻٜرْطٜ مَٻّٜ؞

⁵²اٜ مٛ اِتَّ لَامِيٻٜ دٛوْ لَامُ مَٻّٜ،

اَمَّا اٜ مٛ مَوْنِنَ لٜسْنُٻٜ کٛعٜ مَٻّٜ؞

⁵³اٜ مٛ حَرْنَ نَنٛوٻٜ وٜىٰلٛ اٜ فِي بٛطُّمْ،

اَمَّا اٜ مٛ اَلَ رِسْکُٻٜ جُوطٜ مٜىٰرٜ؞

⁵⁴اٜ مٛ وَلَّ يِمْٻٜ اِسْرَاعِيلَ مَشُّٻٜ مَاکٛ،

اٛ يٜجِّتَتَا يُرْمِنَنْکِ

⁵⁵اِبْرَاهِمْ اٜ لٜݧٛلْ مُوطُمْ حَا اَبَدَا،

نٛ اٛ وِعُنٛو مَامَعٜنْ مٜىٰطٜنْ؞»‏

⁵⁶مَرْيَامَ جٛوطٛدَکٜ اٜ اَلِسَبَتُ کٛ وَطِ لٜبِّ تَتِ، ندٜنْ اٛ سٛعِّي وُرٛ مَاکٛ؞

دَݧْنغٛلْ يَحَيَ غَطٛووٛ بَڤْتِسْمَ

⁵⁷ندٜ شَرٜلْ دَݧُکِ اَلِسَبَتُ وَطِ، اٛ دَݧِ ٻِطّٛ غٛرْکٛ؞ ⁵⁸ٻٜ اٛ حٜدِّ اٜ بَنْدِرَاٻٜ مَاکٛ ٻٜ نَنِدِ بٜلْطُمْ اٜ مَاکٛ ندٜ ٻٜ نَنِ جٛومِرَاوٛ يُرْمِنَنِمٛ؞

⁵⁹ندٜ ٻِنْغٜلْ نغٜلْ وَطِ بَلْطٜ جٛوٜىٰتَتِ، ٻٜ نغَرِ نَادُکِنغٜلْ؞ ٻٜ نغِطِينٛ نٛدَّنْکِنغٜلْ اِنْدٜ ݧَاکٛ مَاغٜلْ جَکَارِيَ؞ ⁶⁰اَمَّا مَدُوجٛ مَاغٜلْ وِعِ، ‏«‏نَاع نٛنْ، طُمْ نٛدَّنَنغٜلْ يَحَيَ؞»‏

⁶¹ٻٜ مبِعِمٛ، ‏«‏وَلَا غٛطّٛ ندٜرْ لٜݧٛلْ مَاطَ غٛودُطٛ اِنْدٜ ندٜنْ طٛنْ؞»‏ ⁶²سٜيْ ٻٜ مٜتِرَنِ ݧَاکٛ مَاغٜلْ جُوطٜ، نغَمْ ٻٜ اَنْدَ اِنْدٜ ندٜ اٛ يِطِ طُمْ نٛدَّنَنغٜلْ؞

⁶³جَکَارِيَ حٛلِّٻٜ اٜ مٛ يِطِ اَلّٛوَلْ، اٛ وِنْدِ، ‏«‏اِنْدٜ مَاغٜلْ يَحَيَ؞»‏ ٻٜ فُو فِي طُمْ حُلْنِيٻٜ؞ ⁶⁴طٛنْ اٜ طٛنْ، حٛنْدُکٛ مَاکٛ مَٻِّتِي، طٜمْنغَلْ مَاکٛ يٛوفِ، ندٜنْ اٛ فُطِّ مٜتُکِ، اٜ مٛ مَنْتَ اَللَّه؞ ⁶⁵کُلٛلْ نَنْغِ ٻٜ اٛ حٜدِّ فُو، کٛو مٛيٜ وَطِ کَ مٜتُکِ دٛوْ فِي طُمْ فُو ندٜرْ کٛشّٜىٰجٜ لٜيْدِ يَحُودِيَ؞ ⁶⁶کٛو مٛيٜ نَنْطٛ فِي طُعُمْ ݧُمِ دٛوْ مَاجُمْ، اٜ وِعَ، ‏«‏طُمٜ ٻِنْغٜلْ نغٜعٜلْ وَرْتَتَ تٛ مَوْنِ؟»‏ نغَمْ جُنْغٛ جٛومِرَاوٛ اٜ وٛنْدِ اٜ مَاغٜلْ؞

اَنَّبَاکُ جَکَارِيَ

⁶⁷جَکَارِيَ، ݧَاکٛ ٻِنْغٜلْ نغٜلْ، اٜ حٜىٰوِ رُوحُ اَللَّه، وَطِ اَنَّبَاکُ، اٛ وِعِ،

⁶⁸‏«‏اٜنْ مَنْتُ جٛومِرَاوٛ، اَللَّه اِسْرَاعِيلَ،

نغَمْ اٛ وَرٛيِي اٛ رِمْطِنِي يِمْٻٜ مَاکٛ؞

⁶⁹اَللَّه وَدَّنِيعٜنْ کِسْنٛووٛ مَوْطٛ

پِوٛيْطٛ دَغَ لٜݧٛلْ دَوْدَ، مَشُّطٛ مَاکٛ؞

⁷⁰نٛ اٛ وِعُنٛو ندٜرْ کٛنْدُطٜ اَنَّبٛعٜنْ مَاکٛ شُٻَاٻٜ دَغَ کٛ نٜىٰٻِ،

⁷¹اٛ حِسْنَيْعٜنْ دَغَ غَݧٛوٻٜ مٜىٰطٜنْ اٜ کَلَّنْٻٜعٜنْ؞

⁷²اٛ وِعِينٛ اٛ يُرْمِنَنَيْ مَامَعٜنْ مٜىٰطٜنْ،

اٛ يٜجِّتَتَا اَلْکَوَلْ مَاکٛ شٜنِينغَلْ،

⁷³نغَلْ اٛ وَطَنّٛو مَامَ مٜىٰطٜنْ اِبْرَاهِمْ؞

⁷⁴اٛ وِعِي اٛ حِسْنَيْعٜنْ دَغَ جُوطٜ غَݧٛوٻٜ مٜىٰطٜنْ،

نغَمْ کُوَنٜنْمٛ کُلٛلْ وَلَا،

⁷⁵نجٛوطٛوطٜنْ جٛنْدٜ شٜنِيندٜ اٜ اَادِلَاکُ يٜىٰسٛ مَاکٛ ندٜرْ بَلْطٜ مٜىٰطٜنْ فُو،

نغَطٜنْ کٛو طُمٜ کٛ اٛ وِعِ؞

اَنَّبَاکُ جَکَارِيَ دٛوْ ٻِطّٛ مُوطُمْ

⁷⁶‏«‏اَنْ ٻِنْغٜلْ اَمْ، طُمْ نٛدِّرْتٜ اَنَّبِيجٛ جٛومِرَاوٛ جٛومُ مَنْغُ،

اَ اَرْتَيْ اَلْمَسِيحُ وَرْکِ نغَمْ مٛعِّنَنَامٛ لَاوٛلْ،

⁷⁷نغَمْ اَنْدِنَا يِمْٻٜ مَاکٛ طُمْ حِسْنَيْٻٜ لَاوٛلْ يَافَاکِ حَکّٜ مَٻّٜ؞

⁷⁸اَللَّه وَطِي فِي طُعُمْ نغَمْ اٛ کٜىٰوُطٛ جُرُمْطُمْ؞ نغَمْ جُرُمْطُمْ مَاکٛ،

اَلْمَسِيحُ وَرٛيَيْ تٛ مٜىٰطٜنْ دَغَ دٛوْ نٛ نَانغٜ وُرْتِرٛيْتٛو،

⁷⁹نغَمْ اٛ يٜيْنَنٛو وٛنْٻٜ ندٜرْ ݧِوْرٜ اٜ ندٜرْ کُلٛلْ مَيْدٜ،

طُمْ تٛکِّنَيْ کٛيْطٜ مٜىٰطٜنْ دٛوْ لَاوٛلْ جَمْ؞»‏

⁸⁰ٻِطّٛ اٛنْ مَوْنِ، فَامُ مَاکٛ ٻٜيْدِي؞ اٜ مٛ جٛوطِي ندٜرْ لَدّٜ حَا شَرٜلْ کٛ طُمْ اَنْدِنِمٛ تٛ يِمْٻٜ اِسْرَاعِيلَ؞

دَݧْنغٛلْ يٜىٰسُ

¹شَرٜلْ کٛ يَحَيَ غَطٛووٛ بَڤْتِسْمَ دَݧَا، مَوْطٛ لَامِيٻٜ لٜيْطٜ رٛومَ بِعٜتٜىٰطٛ کَيْسَرْ اَغُسْتُسْ وِعِ وٛنْٻٜ ندٜرْ لَامُ رٛومَ فُو طُمْ وِنْدَ اِنْطٜ مَٻّٜ؞ ²کَنْکِ وٛنِ وِنْدُکِ اَرَنْدٜحِ کِ طُمْ وَطِ شَرٜلْ کٛ کِرِينِيُسْ وٛنِ غٛمْنَاجٛ لٜيْدِ سِيرِيَ؞ ³کٛو مٛيٜ يَحِ تٛ لٜݧٛلْ مُوطُمْ پِوٛيِ نغَمْ طُمْ وِنْدَ اِنْدٜ مُوطُمْ؞

⁴سٜيْ يُسُفُ مَا اُمِّي دَغَ غَرِيرِ نَجَرَتْ ندٜرْ لٜيْدِ غَلِيلِ؞ اٛ يَحِ غَرِيرِ تٛ دَوْدَ دَݧَا بِعٜتٜىٰندِ بَيْتَلَامِ نغٛنْدِ ندٜرْ لٜيْدِ يَحُودِيَ، نغَمْ کَنْکٛ دَغَ لٜݧٛلْ دَوْدَ؞ ⁵اٛ يَحُ تٛنْ نغَمْ طُمْ وِنْدَ اِنْدٜ مَاکٛ، کَنْکٛ اٜ مَرْيَامَ، مٛ طُمْ وَطَنِمٛ اَلْکَوَلْ تٜىٰغَلْ؞ مَرْيَامَ اٛنْ اٜ وٛودِ رٜىٰدُ؞ ⁶اٜ ٻٜ ندٜرْ بَيْتَلَامِ، سٜيْ شَرٜلْ دَݧْنغٛلْ مَاکٛ وَطِ؞ ⁷سٜيْ اٛ دَݧِ ٻِطّٛ غٛرْکٛ، اَفٛ مَاکٛ، اٛ سَاوِمٛ ندٜرْ وُدٜرٜ وٛوطُندٜ، اٛ فُکِّنِمٛ ندٜرْ تٛ طُمْ وَطَنْتَ مَرْلٜ ݧَمْندُ، نغَمْ وَلَا نجَيْرِ ندٜرْ سُودُ حٛٻّٜ؞

مَلَاعِکَعٜنْ وَنْغَنِي وٛيْنَاٻٜ

⁸اٜ وٛودِ وٛيْنَاٻٜ حَادٜ طٛنْ اٜ ٻٜ مبَالَ يَاسِ، اٜ ٻٜ ندٜىٰنَ مَرْلٜ مَٻّٜ جٜمَّ؞ ⁹سٜيْ مَلَاعِکَاجٛ جٛومِرَاوٛ وَنْغَنِٻٜ ندٜرْ تٜدُّنغَلْ جٛومِرَاوٛ، کُلٛلْ نَنْغِٻٜ؞ ¹⁰اَمَّا مَلَاعِکَاجٛ اٛنْ وِعِٻٜ، ‏«‏تٛع اٛنْ کُلُ!‏ مِ وَدَّنِيعٛنْ حَبَرُ ٻُرْطُمْ وٜلْکِ نغَمْ کٛو مٛيٜ؞ ¹¹حَنْدٜ ندٜرْ غَرِيرِ دَوْدَ طُمْ دَݧَنِيعٛنْ کِسْنٛووٛ، کَنْکٛ وٛنِ اَلْمَسِيحُ، جٛومِرَاوٛ؞ ¹²رَا نٛ کٜٻْتِرْتٛنْمٛ، اٛنْ تَوَيْ ٻِنْغٜلْ اٜ سَاوَا ندٜرْ وُدٜرٜ، ندٜنْ اٜ نغٜلْ فُکِّنَا ندٜرْ تٛ طُمْ وَطَنْتَ مَرْلٜ ݧَمْندُ؞»‏

¹³طٛنْ اٜ طٛنْ سٜيْ وٛٻّٜ مَلَاعِکَعٜنْ طُطْٻٜ وَنْغِ حَادٜ مَلَاعِکَاجٛ اٛنْ، اٜ ٻٜ مَوْنِنَ مَنْغُ اَللَّه، اٜ ٻٜ مبِعَ،

¹⁴‏«‏اٜنْ مَوْنِنْ اَللَّه مٛ دٛوْ،

جَمْ جٛوطٛو ندٜرْ دُونِيَارُ اٜ دٛوْ يِمْٻٜ ٻٜ اٛ نَنَتَ بٜلْطُمْ مَٻّٜ؞»‏

¹⁵ندٜ مَلَاعِکَعٜنْ ٻٜنْ شٛعِّي دٛوْ، سٜيْ وٛيْنَاٻٜ ٻٜنْ نغَطِ کَ مٜدُّکِ، اٜ ٻٜ مبِعَ، ‏«‏اٜنْ نجَحُ بَيْتَلَامِ نغِعٜنْ فِي طُعُمْ طُمْ جٛومِرَاوٛ وِعِعٜنْ؞»‏

¹⁶سٜيْ ٻٜ نجَوْطِي، ٻٜ نجَحِ، ٻٜ تَوِ مَرْيَامَ اٜ يُسُفُ اٜ ٻِنْغٜلْ نغٜلْ اٜ نغٜلْ فُکِّي ندٜرْ تٛ طُمْ وَطَنْتَ مَرْلٜ ݧَمْندُ؞ ¹⁷ندٜ ٻٜ نغِعِنغٜلْ، ٻٜ ندِلِّ، ٻٜ مبِعِ يِمْٻٜ کٛ مَلَاعِکَاجٛ وِعِٻٜ دٛوْ مَاغٜلْ؞ ¹⁸کٛ وٛيْنَاٻٜ ٻٜنْ مبِعِ کَيْطِنِي کٛو مٛيٜ نَنْطٛ؞ ¹⁹اَمَّا مَرْيَامَ بٛو اٜ جٛغِي کٛ نَنِ فُو ندٜرْ ٻٜرْندٜ مُوطُمْ، اٛ وَطِ کَ ݧُمُکِ دٛوْ مَاجُمْ؞ ²⁰سٜيْ وٛيْنَاٻٜ ٻٜنْ شٛعِّي، اٜ ٻٜ مَوْنِنَ اَللَّه، اٜ ٻٜ مَنْتَمٛ نغَمْ کٛو طُمٜ کٛ ٻٜ نَنِ اٜ کٛ ٻٜ نغِعِ، نٛنْ نٛ طُمْ وِعِرِٻٜ؞

يٜىٰسُ وَطَنَامَ اِنْدٜ

²¹ندٜ ٻِنْغٜلْ نغٜلْ وَطِ بَلْطٜ جٛوٜىٰتَتِ، طُمْ نَادِمٛ طُمْ حٛکِّمٛ اِنْدٜ يٜىٰسُ، اِنْدٜ ندٜ مَلَاعِکَاجٛ حٛکِّمٛ کٛ طُمْ وَطَ رٜىٰدُ مَاکٛ؞

طُمْ يَارِي يٜىٰسُ وُرٛ شٜنِينغٛ

²²غَطَ بَلْطٜ لٛوتَاکِ مَٻّٜ حٜىٰݧِ نٛ اَنَّبِ مُوسَ وِعِ ندٜرْ اَتَّوْرَ ٻٜ نغَطَ تٛ ٻٜ ندَݧِي، يُسُفُ اٜ مَرْيَامَ نجَارِ يٜىٰسُ اُرُشَلِيمَ يٜىٰسٛ جٛومِرَاوٛ؞ ²³نٛنْ طُمْ وِنْدِرَا ندٜرْ اَتَّوْرَ، ‏«‏کٛو مٛيٜ غٛرْکٛ اَفٛ، جٛومِرَاوٛ جٜيِمٛ؞»‏ ²⁴ٻٜ شَکَّنِ اَللَّه نٛ طُمْ وِنْدِرَا ندٜرْ اَتَّوْرَ، ‏«‏ڤٛولِ طِطِ کٛو بٛو تَتَّبَرَحٛيْ طِطٛيْ؞»‏

²⁵اٜ شَرٜلْ نغٜلْ اٜ وٛودِ غٛطّٛ نٜطّٛ ندٜرْ اُرُشَلِيمَ بِعٜتٜىٰطٛ سَامِنُ، اَادِلِيجٛ، کُلٛووٛ اَللَّه؞ اٛ حَاٻِي اٛ يِعَ غَرٛلْ اَلْمَسِيحُ نغَمْ حِسْنَ يِمْٻٜ اِسْرَاعِيلَ؞ رُوحُ اَللَّه اٜ وٛنْدِ اٜ مَاکٛ، ²⁶حٛلِّيمٛ اٛ مَايَتَا نَا اٛ يِعِي اَلْمَسِيحُ جٛومِرَاوٛ؞ ²⁷رُوحُ اَللَّه يَارِمٛ ندٜرْ وُرٛ شٜنِينغٛ؞ سٜيْ مَرْيَامَ اٜ يُسُفُ نغَدّٛيِ يٜىٰسُ ندٜرْ وُرٛ نغٛنْ نغَمْ وَطَنْکِمٛ کٛ اَتَّوْرَ وِعِ؞ ²⁸سَامِنُ جَٻِ ٻِنْغٜلْ نغٜلْ ندٜرْ جُوطٜ مُوطُمْ، ندٜنْ مَنْتِ اَللَّه، وِعِ،

²⁹‏«‏يَا جٛومِرَاوٛ، اَ حٜبِّنِي اَلْکَوَلْ مَاطَ؞

جٛونِ اَلُ مَشُّطٛ مَاطَ دِلَّ جَمْ؞

³⁰نغَمْ غِتٜ اَمْ نغِعِي کِسْنٛووٛ مٛ لِلٛيْطَا،

³¹مٛ شِرْيَنِطَا لٜݧِ فُو؞

³²اٛ وَرْتَيْ بٛ جَيْنغٛلْ، اٛ حٛلَّيْ لٜݧِ دُونِيَارُ لَاوٛلْ مَاطَ،

اٛ وَطَيْ يِمْٻٜ مَاطَ يَحُودَنْکٛعٜنْ کٜٻَ مَنْغُ؞»‏

³³ݧَاکٛ ٻِنْغٜلْ نغٜلْ اٜ مَدُوجٛ مَاغٜلْ ٻٜ کَيْطِنِ اٜ کٛ طُمْ وِعِ دٛوْ مَاغٜلْ؞ ³⁴سٜيْ سَامِنُ بَرْکِطِنِٻٜ، ندٜنْ اٛ وِعِ مَرْيَامَ، مَدُوجٛ يٜىٰسُ، ‏«‏ٻِنْغٜلْ نغٜعٜلْ وَرْتَيْ طَتَلْ يَنُکِ طُطْٻٜ اٜ اُمَّاکِ طُطْٻٜ ندٜرْ لٜيْدِ اِسْرَاعِيلَ؞ نغٜلْ وَرْتَيْ اَنْدِتِرْطُمْ دَغَ اَللَّه طُمْ يِمْٻٜ طُطْٻٜ نغَݧَتَ؞ ³⁵ٻِطّٛ اٛعٛ وَنْغِنَيْ ݧُمٛوجِ يِمْٻٜ شُوطِيطِ؞ اَنْ مَا، ٻٜرْندٜ مَاطَ نَاوَيْ بٛنٛ کَافَحِ تُفِندٜ؞»‏

³⁶طٛنْمَا اٜ وٛودِ اَنَّبِيجٛ دٜبّٛ بِعٜتٜىٰطٛ حَنَّتُ ٻِي فَانُوٜلْ، پِوٛيْطٛ دَغَ لٜݧٛلْ اَاشِرُ؞ دٜبّٛ اٛنْ اٛ نَيٜىٰجٛ، اٛ جٛوطٛدَکٜ اٜ غٛرْکٛ مَاکٛ دُوٻِ جٛوٜىٰطِطِ، ندٜنْ غٛرْکٛ اٛنْ مَايِي؞ ³⁷غَطَ غٛرِيکٛ مَايِ، اٛ جٛوطِي اٛ تٜعَاکَ حَا دُوٻِ مَاکٛ نغَطِ 48؞ کٛو ندٜيٜ اٜ مٛ يَحَ وُرٛ شٜنِينغٛ اٜ مٛ مَوْنِنَ اَللَّه، اٜ مٛ سُومٛو، اٜ مٛ وَطَ دٛعَارٜ جٜمَّ اٜ ݧَلَوْمَ؞ ³⁸اٜ شَرٜلْ نغٜلْ، اٛ وَرٛيِ تٛ مَٻّٜ، اٛ يٜتِّ اَللَّه، اٛ يَحِ تٛ کَاٻُٻٜ يِعُکِ شَرٜلْ کٛ اَللَّه رِمْطِنْتَ اُرُشَلِيمَ، اٛ حٛکِّٻٜ حَبَرُ دٛوْ ٻِنْغٜلْ نغٜلْ؞

دَݧٛوٻٜ يٜىٰسُ شٛعَّکٜ نَجَرَتْ

³⁹ندٜ يُسُفُ اٜ مَرْيَامَ نجٛتِّنِ کٛو طُمٜ کٛ اَتَّوْرَ وِعِ طُمْ وَطَ، ٻٜ شٛعِّي غَرِيرِ مَٻّٜ نَجَرَتْ ندٜرْ لٜيْدِ غَلِيلِ؞ ⁴⁰يٜىٰسُ مَوْنِ، سٜمْبِطِ، فَامُ حٜىٰوِمٛ، ندٜنْ بَرْکَ اَللَّه اٜ دٛوْ مَاکٛ؞

يٜىٰسُ ندٜرْ وُرٛ شٜنِينغٛ

⁴¹کٛو طُمٜ ندُنْغُ دَݧٛوٻٜ يٜىٰسُ اٜ نجَحَ اُرُشَلِيمَ نغَمْ حُمْتٛ سَکِّنْکِ؞ ⁴²ندٜ يٜىٰسُ وَطِ دُوٻِ سَڤّٛ اٜ طِطِ، ٻٜ نجَحِ حُمْتٛ نٛ ٻٜ مبٛووِ؞ ⁴³غَطَ حُمْتٛ نغٛنْ حٜىٰݧِ، دَݧٛوٻٜ مَاکٛ اٜ دٛوْ طَتَلْ حٛوتُکِ وُرٛ، يٜىٰسُ بٛو دَرِي ندٜرْ اُرُشَلِيمَ، اَمَّا دَݧٛوٻٜ ٻٜنْ اَنْدَا اٛ دَرَکٜ؞ ⁴⁴اٜ ٻٜ کَمِّي اٜ مٛ ندٜرْ ٻٜ ٻٜ نجَادَتَ، ٻٜ نغَطِ يَادُ ݧَلْندٜ غٛعٛ، ندٜنْ ٻٜ ڤُطِّ طَٻُّتُکِمٛ ندٜرْ بَنْدِرَاٻٜ مَٻّٜ اٜ حِغٛوٻٜ مَٻّٜ؞ ⁴⁵ندٜ ٻٜ طَٻِّتِ ٻٜ کٜٻْتَايِمٛ، ٻٜ شٛعِّي اُرُشَلِيمَ نغَمْ طَٻُّتُکِمٛ؞ ⁴⁶ندٜرْ ݧَلْندٜ تَتَوْرٜ ٻٜ تَوِمٛ ندٜرْ وُرٛ شٜنِينغٛ، اٜ مٛ جٛوطِي حَکُّندٜ مٛودِٻّٜ، اٜ مٛ نَنَٻٜ، ندٜنْ اٜ مٛ پَمَٻٜ؞ ⁴⁷نَنْطٛمٛ فُو حَيْطِنِ اٜ فَامُ مَاکٛ اٜ نٛوتَاکِ مَاکٛ؞ ⁴⁸ندٜ دَݧٛوٻٜ مَاکٛ نغِعِمٛ، ٻٜ کَيْطِنِ؞ مَدُوجٛ مَاکٛ وِعِمٛ، ‏«‏ٻِطّٛ اَمْ، کٛ وَطِ نغَطَنْطَامِنْ نِينِ؟ مِنْ اٜ ݧَاکٛ مَاطَ ندٜ مِنْ طَٻِّتِ مِنْ نغِعَايِمَ، مِنْ نغَنِّي؞»‏

⁴⁹اٛ وِعِٻٜ، ‏«‏کٛ وَطِ طَٻِّتٛتٛيْيَمْ؟ اٛنْ اَنْدَا اٜ حَانِ مِ جٛوطٛو ندٜرْ وُرٛ ݧَاکٛ اَمْ؟»‏ ⁵⁰اَمَّا ٻٜ فَامَايِ کٛ اٛ وِعِٻٜ؞

⁵¹سٜيْ يٜىٰسُ سٛعّٛدِي اٜ مَٻّٜ نَجَرَتْ، اٜ مٛ وَطَ کٛ ٻٜ مبِعِمٛ فُو؞ مَدُوجٛ مَاکٛ جٛغِي فِي طُعُمْ فُو ندٜرْ ٻٜرْندٜ مُوطُمْ؞ ⁵²يٜىٰسُ مَوْنِ، ٻٜيْدِ فَامُ اٜ حٜٻُکِ يِدّٜ دَغَ تٛ اَللَّه اٜ تٛ يِمْٻٜ؞

حَالَ يَحَيَ غَطٛووٛ بَڤْتِسْمَ

¹مَوْطٛ لَامِيٻٜ لٜيْطٜ رٛومَ بِعٜتٜىٰطٛ کَيْسَرْ تِبَارِيَ اٜ وٛودِ دُوٻِ سَڤّٛ اٜ جٛوِ دٛوْ لَامُ، اٜ شَرٜلْ نغٜلْ بُنْتُسْ بِلَاتُسْ وٛنِ غٛمْنَاجٛ لٜيْدِ يَحُودِيَ؞ حِرُدُسْ بٛو اٜ لَامِي لٜيْدِ غَلِيلِ، مَوْنِيکٛ فِلِبُسْ بٛو اٜ لَامِي لٜيْدِ اِتُورِيَ اٜ تَرَکُنِيتَسْ، ندٜنْ لِسَانِيَسْ اٜ لَامِي لٜيْدِ اَبِيلِيَ؞ ²حَنَانَ اٜ کَيَافَ بٛو نغٛنِ مَوْٻٜ مَوْٻٜ اَرْدِيٻٜ دِينَ؞ اٜ شَرٜلْ نغٜلْ وٛلْدٜ اَللَّه وَرَنِ يَحَيَ، ٻِطّٛ جَکَارِيَ، ندٜرْ لَدّٜ؞ ³نغَمْ نٛنْ، يَحَيَ يَحِ بِغٜىٰجٜ غٛنْطٜ حَادٜ شَانغٛلْ اُرْدُنْ فُو، اٜ مٛ وَعَجِنَ، اٜ مٛ وِعَ، ‏«‏تُوبٜىٰ، طُمْ وَطَنَعٛنْ بَڤْتِسْمَ، ندٜنْ اَللَّه يَافَنْتٛعٛنْ حَکّٜىٰجِ مٛوطٛنْ؞»‏ ⁴نٛ طُمْ وِنْدِرَا ندٜرْ دٜفْتٜرٜ اَنَّبِ اِشَايَ دٛوْ يَحَيَ،

‏«‏غٛطّٛ اٜ نٛدَّ ندٜرْ لَدّٜ اٜ وِعَ،

‏‹‏مٛعِّنٜىٰ طَتَلْ جٛومِرَاوٛ،

ڤٛرْتٜىٰ لَاوٛلْ نغَمْ غَرٛلْ مَاکٛ؞

⁵ڤٛغٛوجِ فُو طِ کٜبِّنْتٜىٰطِ،

کٛشّٜىٰجٜ اٜ پٛولٜ فُو طٜ نَمٜتٜىٰطٜ؞

طَتٜ غُورِيطٜ طٜ دَرْتِنْتٜىٰطٜ، طَتٜ بٛنِّيطٜ طٜ مٛعِّنْتٜىٰطٜ؞

⁶يِمْٻٜ دُونِيَارُ فُو ٻٜ نغِعَيْ کِسْندَمْ اَللَّه؞›‏ »‏

⁷يِمْٻٜ طُطْٻٜ نغَرٛيِ تٛ يَحَيَ نغَمْ اٛ وَطَنَٻٜ بَڤْتِسْمَ؞ اٛ وِعِٻٜ، ‏«‏اٛنٛنْ ٻِٻّٜ بٛولٜ!‏ مٛيٜ وِعِعٛنْ ندٛغّٛنْ بٛنٜ غَرَيْطُمْ؟ ⁸نغَطٜىٰ کٛ حٛلَّتَ اٛنْ اَلِي حَکّٜىٰجِ مٛوطٛنْ؞ تٛع اٛنْ مبِعُ ندٜرْ ٻٜرْطٜ مٛوطٛنْ، ‏‹‏مِنٛنْ، مِنْ ٻِٻّٜ اَنَّبِ اِبْرَاهِمْ؞›‏ نغَمْ اٜ مِ وِعَعٛنْ، اَللَّه وَاوَيْ اُمِّنَنْکِ اَنَّبِ اِبْرَاهِمْ ٻِٻّٜ دَغَ ندٜرْ کَاپٜ طٜعٜ؞ ⁹کٛو جٛونِ فٜعِّرْدٜ پٜفْتَامَ نغَمْ فٜعَّ لٜطّٜ دَغَ طَطِ مَاجٜ؞ لٜکِّ فُو کِ رِمَتَا ٻِکّٛيْ مبٛطْکٛيْ، طُمْ فٜعَّيْکِ طُمْ فَطَّکِ ندٜرْ حِيتٜ؞»‏

¹⁰يِمْٻٜ مبِعِمٛ، ‏«‏کٛ حَانِ مِنْ نغَطَ؟»‏

¹¹يَحَيَ وِعِٻٜ، ‏«‏غٛودُطٛ تٛغّٛوجٜ طِطِ فُو حٛکَّ مٛ وَلَنَا غٛعٛ، ندٜنْ غٛودُطٛ ݧَمْندُ فُو حٛکّٛرَ مٛ وَلَنَا؞»‏

¹²جَٻٛوٻٜ شٜىٰدٜ لٜيْدِ مَا نغَرِ نغَمْ ٻٜ نغَطَنٜىٰ بَڤْتِسْمَ، ٻٜ مبِعِمٛ، ‏«‏مٛودِبّٛ، کٛ حَانِ مِنْ نغَطَ؟»‏

¹³اٛ وِعِٻٜ، ‏«‏تٛع اٛنْ نجَٻُ کٛ ٻُرِ نٛ طُمْ وِعِعٛنْ نجَٻٛنْ؞»‏

¹⁴وٛٻّٜ سٛوجِعٜنْ پَمِمٛ مبِعِ، ‏«‏مِنٛنْ مَا، کٛ حَانِ مِنْ نغَطَ؟»‏

اٛ وِعِٻٜ، ‏«‏تٛع اٛنْ تٜىٰتَنْ يِمْٻٜ شٜىٰدٜ اٜ سٜمْبٜ، تٛع اٛنْ مبِعُ يِمْٻٜ نغَطِي کٛ ٻٜ نغَطَايِ نغَمْ نجَٻَنٛنْٻٜ شٜىٰدٜ؞ مُݧٜىٰ دٛوْ کٛ طُمْ يٛٻَتَعٛنْ؞»‏

¹⁵يِمْٻٜ کَاٻِي نغِعَ اَلْمَسِيحُ؞ کٛو مٛيٜ ندٜرْ مَٻّٜ اٜ ݧُمَ ندٜرْ ٻٜرْندٜ مُوطُمْ کٛو يَحَيَ وٛنِ اَلْمَسِيحُ؞ ¹⁶يَحَيَ وِعِٻٜ، ‏«‏اٜ مِ وَطِرَنَعٛنْ بَڤْتِسْمَ اٜ ندِيَمْ، اَمَّا ٻُرْطٛيَمْ مَنْغُ اٜ وَرَ؞ مِ فٛتَايِ فِتُّکِ لٛکُّلِّ ڤَطٜ مَاکٛ؞ اٛ وَطِرَنَيْعٛنْ بَڤْتِسْمَ اٜ رُوحُ اَللَّه اٜ حِيتٜ؞ ¹⁷اٜ مٛ جٛغِي بٜسِرْطُمْ غَوْرِ مَاکٛ نغَمْ سٜنْدُکِ غَوْرِ اٜ ݧَاندٜ؞ اٛ حَوْرِتَيْ غَوْرِ ندِنْ، اٛ وَطَندِ ندٜرْ رٜسِرْدٜ غَوْرِ مَاکٛ، اَمَّا اٛ وُلَ ݧَاندٜ ندٜنْ ندٜرْ حِيتٜ نغٜ وَاتَتَا؞»‏

¹⁸نٛنْ يَحَيَ وَغِّنِ يِمْٻٜ اٜ بٛلِيطٜ طُطّٜ، اٛ اَنْدِنِيٻٜ حَبَرُ بٜلْطُمْ؞ ¹⁹ندٜنْ اٛ حَٻَنِ حِرُدُسْ لَامِيطٛ لٜيْدِ نغَمْ تٜعِ دٜبّٛ مَوْنِرَاوٛ مُوطُمْ بِعٜتٜىٰطٛ حِرُودِيَ، کَدِمَا نغَمْ کُوطٜ کَلُّطٜ فُو طٜ اٛ وَطِ؞ ²⁰سٜيْ اٛ ٻٜيْدِ وَطُکِ کٛ ٻُرِ نٛنْ، اٛ وَطِ طُمْ مَٻِّ يَحَيَ ندٜرْ سُودُ شُرَلْ؞

يٜىٰسُ وَطَنَامَ بَڤْتِسْمَ

²¹ندٜ يِمْٻٜ فُو نغَطَنَا بَڤْتِسْمَ، يٜىٰسُ مَا وَطَنَا بَڤْتِسْمَ؞ اٜ مٛ ندٜرْ وَطُکِ دٛعَارٜ، سٜيْ دَمُّغَلْ دٛوْ مَٻِّتِي؞ ²²رُوحُ اَللَّه جِڤّٛيِي دٛوْ مَاکٛ اٜ ٻَنْدُ بٛ فٛوندُ؞ حٛنٛنْدٜ پِوٛيِ دَغَ دٛوْ وِعِ، ‏«‏اَنْ وٛنِ ٻِطّٛ اَمْ، مٛ نغِطُمِ؞ اٜ مِ نَنَ بٜلْطُمْ مَاطَ؞»‏

مَامَعٜنْ يٜىٰسُ

²³کٛ يٜىٰسُ فُطِّ کُوغَلْ مُوطُمْ، اٛ ٻَدَکٜ دُوٻِ 30؞ يِمْٻٜ اٜ ݧُمَ يٜىٰسُ طُمْ ٻِطّٛ يُسُفُ؞ يُسُفُ ٻِطّٛ حٜىٰلِ، ²⁴حٜىٰلِ ٻِطّٛ مَتَتْ، مَتَتْ ٻِطّٛ لٜىٰوِ، لٜىٰوِ ٻِطّٛ مَلْکِ، مَلْکِ ٻِطّٛ يَنَّ، يَنَّ ٻِطّٛ يُسُفُ، ²⁵يُسُفُ ٻِطّٛ مَتَاتِيَ، مَتَاتِيَ ٻِطّٛ اَمٛسْ، اَمٛسْ ٻِطّٛ نَاحُمْ، نَاحُمْ ٻِطّٛ اَجَلِيَ، اَجَلِيَ ٻِطّٛ نَجَيَ، ²⁶نَجَيَ ٻِطّٛ مَعَتَ، مَعَتَ ٻِطّٛ مَتَاتِيَ، مَتَاتِيَ ٻِطّٛ شِمٜىٰيَ، شِمٜىٰيَ ٻِطّٛ جٛوسٜکْ، جٛوسٜکْ ٻِطّٛ يَحُودَ، ²⁷يَحُودَ ٻِطّٛ يٛوَانَنْ، يٛوَانَنْ ٻِطّٛ رٜفَيَ، رٜفَيَ ٻِطّٛ جَرُوبَبٜلْ، جَرُوبَبٜلْ ٻِطّٛ شٜيَلْتِيَلْ، شٜيَلْتِيَلْ ٻِطّٛ نٜىٰرِ، ²⁸نٜىٰرِ ٻِطّٛ مَلْکِ، مَلْکِ ٻِطّٛ اَدِّ، اَدِّ ٻِطّٛ کٛسْمَ، کٛسْمَ ٻِطّٛ اَلْمَدَمَ، اَلْمَدَمَ ٻِطّٛ اٜرْ، ²⁹اٜرْ ٻِطّٛ جٛوشُوَ، جٛوشُوَ ٻِطّٛ اٜلِيٜىٰجَ، اٜلِيٜىٰجَ ٻِطّٛ يٛرِمْ، يٛرِمْ ٻِطّٛ مَتَتْ، مَتَتْ ٻِطّٛ لٜىٰوِ، ³⁰لٜىٰوِ ٻِطّٛ سَامِنُ، سَامِنُ ٻِطّٛ يَحُودَ، يَحُودَ ٻِطّٛ يُسُفُ، يُسُفُ ٻِطّٛ يٛنَنَ، يٛنَنَ ٻِطّٛ اٜلِيَاکِمْ، ³¹اٜلِيَاکِمْ ٻِطّٛ مَلَيَ، مَلَيَ ٻِطّٛ مَيْنَنَ، مَيْنَنَ ٻِطّٛ مَتَاتَ، مَتَاتَ ٻِطّٛ نَاتَنْ، نَاتَنْ ٻِطّٛ دَوْدَ، ³²دَوْدَ ٻِطّٛ جٜىٰسِ، جٜىٰسِ ٻِطّٛ اٛبِدَ، اٛبِدَ ٻِطّٛ بٛعَاجَ، بٛعَاجَ ٻِطّٛ سَلْمٛنْ، سَلْمٛنْ ٻِطّٛ نَاشٛنْ، ³³نَاشٛنْ ٻِطّٛ اَمِينَدَبْ، اَمِينَدَبْ ٻِطّٛ اَرَمْ، اَرَمْ ٻِطّٛ حٜسٜرُونَ، حٜسٜرُونَ ٻِطّٛ فٜرٜسَ، فٜرٜسَ ٻِطّٛ يَحُودَ، ³⁴يَحُودَ ٻِطّٛ يَاکُبُ، يَاکُبُ ٻِطّٛ اِشِيَاکُ، اِشِيَاکُ ٻِطّٛ اِبْرَاهِمْ، اِبْرَاهِمْ ٻِطّٛ تٜىٰرَ، تٜىٰرَ ٻِطّٛ نَاحٛ، ³⁵نَاحٛ ٻِطّٛ سٜرُغْ، سٜرُغْ ٻِطّٛ رٜيُ، رٜيُ ٻِطّٛ فٜىٰلٜ، فٜىٰلٜ ٻِطّٛ اٜبٜرْ، اٜبٜرْ ٻِطّٛ شٜىٰلَ، ³⁶شٜىٰلَ ٻِطّٛ کٜنَنْ، کٜنَنْ ٻِطّٛ اَرْفَکَشَادِ، اَرْفَکَشَادِ ٻِطّٛ شٜمْ، شٜمْ ٻِطّٛ نُحُ، نُحُ ٻِطّٛ لَمٜکْ، ³⁷لَمٜکْ ٻِطّٛ مٜتُسٜلَ، مٜتُسٜلَ ٻِطّٛ اٜنٛکْ، اٜنٛکْ ٻِطّٛ يَرٜدْ، يَرٜدْ ٻِطّٛ مَحَالَلٜلْ، مَحَالَلٜلْ ٻِطّٛ کٜنَنْ، ³⁸کٜنَنْ ٻِطّٛ اٜنٛشْ، اٜنٛشْ ٻِطّٛ شِيتُ، شِيتُ ٻِطّٛ اَادَمُ، اَادَمُ مٛ اَللَّه؞

شٜيْطَنْ فٛوندِ يٜىٰسُ

¹يٜىٰسُ پِوٛيِ دَغَ شَانغٛلْ اُرْدُنْ اٜ حٜىٰوِ رُوحُ اَللَّه؞ سٜيْ رُوحُ اَللَّه يَارِمٛ ندٜرْ لَدّٜ؞ ²تٛنْ اٛ وَطِ بَلْطٜ 40 شٜيْطَنْ اٜ فٛوندَمٛ، اٛ ݧَامَايِ غٛطُّمْ ندٜرْ بَلْطٜ طٜنْ؞ ندٜنْ غَطَ مَاجٜ، وٜىٰلٛ نَنْغِمٛ؞

³شٜيْطَنْ وِعِمٛ، ‏«‏تٛ اَنْ وٛنِ ٻِطّٛ اَللَّه، وِعُ ندٜعٜ حَيْرٜ وَرْتَ بُرٛودِ؞»‏

⁴يٜىٰسُ نٛوتِي وِعِمٛ، ‏«‏اَايَارٜ وِعِي، ‏‹‏نَاع اٜ ݧَمْندُ تَنْ نٜطّٛ مَرٛرْتٛو؞›‏ »‏

⁵سٜيْ شٜيْطَنْ يَارِمٛ وٛنْدٜ وِغٜىٰرٜ تٛوْندٜ، بٛ مَپُّکِ حٛلِّمٛ لٜيْطٜ دُونِيَارُ فُو؞ ⁶ندٜنْ شٜيْطَنْ وِعِمٛ، ‏«‏مِ حٛکّٜتٜ لَامُ اٜ مَنْغُ دٛوْ لٜيْطٜ طٜعٜ فُو، نغَمْ طُمْ حٛکِّييَمْطٜ؞ مِ وَاوَيْ حٛکُّکِطٜ کٛو مٛيٜ مٛ نغِطُمِ؞ ⁷نغَمْ نٛنْ، تَا مَوْنِنِييَمْ، طُعُمْ فُو طُمْ وَرْتَيْ طُمْ مَاطَ؞»‏

⁸يٜىٰسُ وِعِمٛ، ‏«‏اَايَارٜ وِعِي،

‏‹‏مَوْنِنْ اَللَّه جٛومِرَاوٛ مَاطَ، کَنْکٛ تَنْ مَوْنِنْتَا؞›‏ »‏

⁹سٜيْ شٜيْطَنْ يَارِمٛ اُرُشَلِيمَ، دَرْنِمٛ تٛنْ دٛوْ حٛورٜ وُرٛ شٜنِينغٛ، وِعِمٛ، ‏«‏تٛ اَنْ وٛنِ ٻِطّٛ اَللَّه، دِوُ دَغَ طٛعٛ، ¹⁰نغَمْ اَايَارٜ وِعِي، ‏‹‏اَللَّه وِعَيْ مَلَاعِکَعٜنْ مُوطُمْ مبَلُّمَا بٛطُّمْ؞ ¹¹ٻٜ تَٻّٜتٜ ندٜرْ جُوطٜ مَٻّٜ، نغَمْ تٛع نَوْنَا کٛيْطٜ مَاطَ دٛوْ حَيْرٜ؞›‏ »‏

¹²يٜىٰسُ وِعِمٛ، ‏«‏اَايَارٜ وِعِ، ‏‹‏تَاع فٛوندُ اَللَّه جٛومِرَاوٛ مَاطَ؞›‏ »‏

¹³ندٜ شٜيْطَنْ حٜىٰݧِ فٛوندُکِ يٜىٰسُ فُو، سٜيْ اٛ اَلِمٛ يَاکِ وٛنْغٜلْ شَرٜلْ؞

يٜىٰسُ فُطِّ کُوغَلْ مُوطُمْ ندٜرْ غَلِيلِ

¹⁴سٜيْ يٜىٰسُ سٛعِّي لٜيْدِ غَلِيلِ ندٜرْ بَوْطٜ رُوحُ اَللَّه؞ حَبَرُ مَاکٛ سَنْکِتِي ندٜرْ لٜيْدِ ندِنْ؞ ¹⁵اٛ فُطِّ اٜکِّتِنْکِ ندٜرْ شُوطِ دٛعَارٜ مَٻّٜ، کٛو مٛيٜ مَنْتِمٛ؞

طُمْ وَݧِي يٜىٰسُ ندٜرْ نَجَرَتْ

¹⁶يٜىٰسُ يَحِ نَجَرَتْ، غَرِيرِ تٛ مَوْنِ؞ ݧَلْندٜ سِوْتَارٜ، اٛ نَتِّ سُودُ دٛعَارٜ نٛ اٛ وٛووِ وَطُکِ؞ سٜيْ اٛ اُمِّي اٛ دَرِي نغَمْ اٛ جَنْغَ دٜفْتٜرٜ شٜنِيندٜ؞ ¹⁷طُمْ حٛکِّمٛ دٜفْتٜرٜ اَنَّبِ اِشَايَ، اٛ مَٻِّتِندٜ، اٛ جَنْغِ اَايَاجٜ بِعُطٜ،

¹⁸‏«‏رُوحُ جٛومِرَاوٛ اٜ دٛوْ اَمْ،

نغَمْ اٛ سُٻِييَمْ مِ حٛکَّ ٻٜ نغَلَنَا حَبَرُ بٜلْطُمْ؞

اٛ لِلِييَمْ مِ وَدَّ حَبَرُ يٛوفُکِ مَشُّٻٜ،

مِ وُمْتِنَ وُمْٻٜ،

مِ وَطَ طُمْ اَلَ تٛرّٜتٜىٰٻٜ ندِلَّ،

¹⁹مِ وَعَجِنَنَ دُونِيَارُ وِيکِ حِتَاندٜ ندٜ جٛومِرَاوٛ حِسْنَتَ يِمْٻٜ مُوطُمْ وَرٛيِ؞»‏

²⁰سٜيْ اٛ مَٻِّ دٜفْتٜرٜ ندٜنْ، اٛ حٛکِّتِندٜ بَلِّتٛووٛ اٛ جٛوطِي؞ کٛو مٛيٜ غٛنْطٛ ندٜرْ سُودُ دٛعَارٜ ندُنْ سُتِيمٛ؞ ²¹سٜيْ يٜىٰسُ وِعِٻٜ، ‏«‏طٜعٜ اَايَاجٜ طٜ نَنْطٛنْ، حَنْدٜ طٜ کٜىٰوِي؞»‏

²²کٛو مٛيٜ اٜ وِعَ بٛطُّمْ دٛوْ مَاکٛ؞ بٛلِيطٜ بٛطّٜ بُرْتِيطٜ ندٜرْ حٛنْدُکٛ مَاکٛ حَيْطِنِيٻٜ؞ ٻٜ مبِعِ، ‏«‏نَاع اٛعٛ وٛنِ ٻِطّٛ يُسُفُ؟»‏

²³اٛ وِعِٻٜ، ‏«‏وَلَا سٜکٛ اٛنْ مبِعَيْيَمْ حَالَ کَعَ، ‏‹‏ݧَوْندٛووٛ، يَمْطِنْ حٛورٜ مَاطَ!‏ کٛ مِنْ نَنِ اَ وَطِي ندٜرْ کَفَرْنَحُمْ، وَطُ طُمْ طٛعٛ ندٜرْ غَرِيرِ مَاطَ؞›‏ »‏ ²⁴کَدِمَا اٛ وِعِٻٜ، ‏«‏غٛونغَ، اٜ مِ وِعَعٛنْ، وَلَا اَنَّبِيجٛ جَٻٜتٜىٰطٛ تٛ غَرِيرِ مُوطُمْ؞ ²⁵اٜ مِ وِعَعٛنْ غٛونغَ، اٜ شَرٜلْ اَنَّبِ اِلِيَ اٜ وٛودِ رٜوْٻٜ طُطْٻٜ ندٜرْ لٜيْدِ اِسْرَاعِيلَ ٻٜ وٛرْٻٜ مُعّٜنْ مَايِ؞ اٜ شَرٜلْ نغٜلْ، طُمْ وَطِ دُوٻِ تَتِ اٜ لٜبِّ جٛوٜىٰغٛعٛ ندِيَمْ تٛٻَايِ، ندٜنْ طُمْ وَطِ وٜىٰلٛ کَلُّنغٛ ندٜرْ لٜيْدِ ندِنْ فُو؞ ²⁶اَمَّا اَنَّبِ اِلِيَ لِلٛيَاکَ تٛ کٛو مٛيٜ مَٻّٜ، سٜيْ تٛ غٛطّٛ دٜبّٛ نَاع يَحُودَنْکٜىٰجٛ مٛ غٛرْکٛ مُوطُمْ مَايِ، غٛنْطٛ غَرِيرِ جَرِفَتْ ندٜرْ لٜيْدِ سِدٛنْ؞ ²⁷کَدِمَا اٜ وٛودِ غٛودُٻٜ ݧَوُ ݧَامٛوجُمْ لَرَلْ طُطْٻٜ ندٜرْ اِسْرَاعِيلَ اٜ شَرٜلْ اَنَّبِ اِلِيشَ، اَمَّا وَلَا جَمْطِنَاطٛ ندٜرْ مَٻّٜ سٜيْ نَعَمَنْ نٜطّٛ لٜيْدِ سِيرِيَ، نَاع اٛ يَحُودَنْکٜىٰجٛ؞»‏

²⁸ندٜ يِمْٻٜ وٛنْٻٜ ندٜرْ سُودُ دٛعَارٜ ندُنْ نَنِ نٛنْ، ٻٜ فُو ٻٜرْطٜ مَٻّٜ مٜتِّ؞ ²⁹ٻٜ اُمِّي، ٻٜ ندِيوِمٛ دَغَ ندٜرْ غَرِيرِ، ندٜنْ ٻٜ نجَارِمٛ دٛوْ پٛلْدٜ تٛ غَرِيرِ مَٻّٜ وٛنِ، نغَمْ ٻٜ تُورٛيٛومٛ لٜيْ، ³⁰اَمَّا اٛ تٛکِّ حَکُّندٜ مَٻّٜ، اٛ دِلِّ؞

يٜىٰسُ وُرْتِنِ غِنّٛلْ

³¹سٜيْ يٜىٰسُ يَحِ غَرِيرِ کَفَرْنَحُمْ ندٜرْ لٜيْدِ غَلِيلِ، اٜ مٛ اٜکِّتِنَٻٜ ندٜرْ سُودُ دٛعَارٜ ݧَلْندٜ سِوْتَارٜ؞ ³²ٻٜ کَيْطِنِ اٜ اٜکِّتِنٛلْ مَاکٛ، نغَمْ بٛلِيطٜ مَاکٛ اٜ وٛودِ بَوْطٜ؞

³³اٜ وٛودِ غٛودُطٛ غِنّٛلْ ندٜرْ سُودُ دٛعَارٜ ندُنْ، اٛ وُلِّ سٜمْبٜىٰ، اٛ وِعِ، ³⁴‏«‏وَيْيٛو!‏ کٛ وَنُّمَا اٜ اَمِنْ، يٜىٰسُ نَجَرَنْکٜىٰجٛ؟ اَ وَرٛيِ نغَمْ کَلْکَامِنْ؟ اٜ مِ اَنْدِ اَنْ اَ مٛيٜ؞ اَنْ وٛنِ شٜنِيطٛ اَللَّه!‏»‏

³⁵يٜىٰسُ حَٻَنِنغٛلْ وِعِ، ‏«‏دٜعُّتُ!‏ وُرْتَ ندٜرْ مَاکٛ!‏»‏ سٜيْ غِنّٛلْ نغٛلْ دٛعِّ نٜطّٛ اٛنْ يٜىٰسٛ مَٻّٜ، نغٛلْ وُرْتِي نغٛلْ نَوْنَايِمٛ؞

³⁶ٻٜ فُو ٻٜ کَيْطِنِ، ٻٜ نغَطِ کَ مٜتُکِ حَکُّندٜ مَٻّٜ، اٜ ٻٜ مبِعَ، ‏«‏اِرِ طٜيٜ بٛلِيطٜ نغٛنِ طٛعٛ؟ نغَمْ اٜ مٛ مٜتَنَ غِنِّ ندٜرْ لَامُ اٜ بَوْطٜ، اٜ طِ مبُرْتٛو؞»‏ ³⁷ندٜنْ حَبَرُ يٜىٰسُ سَنْکِتِي ندٜرْ لٜيْدِ ندِنْ؞

يٜىٰسُ يَمْطِتِنِ يِمْٻٜ طُطْٻٜ

³⁸غَطَ يٜىٰسُ اَلِي سُودُ دٛعَارٜ، دِلِّي وُرٛ سِيمَنْ؞ اٜسِرَاوٛ بِيتُرُسْ دٜبّٛ جٛنْتٜ کَلُّطٜ اٜ تٛرَّمٛ، ٻٜ تٛرِي يٜىٰسُ يَمْطِتِنَمٛ؞ ³⁹اٛ وَرِ تٛ ݧَوْطٛ اٛنْ، اٛ حَٻَنِ جٛنْتٜ طٜنْ، سٜيْ طٜ نجٛوفِمٛ؞ طٛنْ اٜ طٛنْ ݧَوْطٛ اٛنْ اُمِّي، فُطِّ وَدَّنْکِٻٜ ݧَمْندُ؞

⁴⁰ندٜ نَانغٜ حِيرِ، يِمْٻٜ نغَدَّنِ يٜىٰسُ غٛودُٻٜ ݧَوُوجِ فٜىٰرٜ‑فٜىٰرٜ، اٛ يٛوِ جُوطٜ مَاکٛ دٛوْ کٛو مٛيٜ ݧَوْطٛ، اٛ يَمْطِتِنِٻٜ؞ ⁴¹غِنِّ مَا مبُرْتِي ندٜرْ يِمْٻٜ طُطْٻٜ، اٜ طِ نغُلَّ، اٜ طِ مبِعَ، ‏«‏اَنْ، اَ ٻِطّٛ اَللَّه!‏»‏

اَمَّا اٛ حَٻَنِطِ، اٛ حَطِطِ مٜتُکِ، نغَمْ اٜ طِ اَنْدِ کَنْکٛ وٛنِ اَلْمَسِيحُ؞

يٜىٰسُ وَعَجِنِ ندٜرْ سُودُ دٛعَارٜ

⁴²ندٜ وٜىٰتِ، يٜىٰسُ وُرْتِي غَرِيرِ ندِنْ يَحِ وٛنْدٜ وِغٜىٰرٜ ندٜرْ لَدّٜ؞ يِمْٻٜ نغَطِ کَ طَٻُّتُکِمٛ؞ ندٜ ٻٜ تَوِمٛ، ٻٜ نغِطَا اٛ دِلَّ اٛ اَلَٻٜ؞ ⁴³اَمَّا اٛ وِعِٻٜ، ‏«‏دٛولٜ مِ وَعَجِنَ حَبَرُ بٜلْطُمْ دٛوْ لَامُ اَللَّه اٜ غٛطّٜ غَرِيجٜ، نغَمْ مَاجُمْ طُمْ لِلٛيِيَمْ؞»‏

⁴⁴ندٜنْ اٛ وَطِ کَ وَعَجِنْکِ ندٜرْ شُوطِ دٛعَارٜ لٜيْدِ يَحُودِيَ؞

يٜىٰسُ نٛدِّي تٛکُّٻٜمٛ اَرَنْدٜعٜنْ

¹وٛنْدٜ ݧَلْندٜ يٜىٰسُ اٜ دَرِي دَاندٜ مبٜىٰلَ جَنِسَرَتْ، يِمْٻٜ اٜ ڤِلِيمٛ اٜ نَنَ وٛلْدٜ اَللَّه؞ ²اٛ يِعِ کٛمِيجٜ طِطِ اٜ طٜ ندٜسِي دَاندٜ ندِيَمْ؞ نَنْغٛوٻٜ لِپِّ مبُرْتِي ندٜرْ مَاجٜ، اٜ ٻٜ لَٻِّنَ نَنْغِرْطُمْ لِپِّ مَٻّٜ؞ ³اٛ نَتِّ کٛمِوَلْ سِيمَنْ، اٛ تٛرِي سِيمَنْ دِرْدِنَنغَلْ سٜطَّ ندٜرْ ندِيَمْ؞ اٛ جٛوطِي ندٜرْ مَاغَلْ، اٜ مٛ اٜکِّتِنَ يِمْٻٜ؞

⁴ندٜ اٛ حٜىٰݧِ کٛ اٛ وِعَتَ، اٛ وِعِ سِيمَنْ، ‏«‏تُرْتَ کٛمِوَلْ نغَلْ يَاکِ تٛنْ تٛ لُغِّ، نغَطَا نَنْغِرْطُمْ لِپِّ مَاطَ ندٜرْ ندِيَمْ نغَمْ نَنْغُکِ لِپِّ؞»‏

⁵سِيمَنْ بِيتُرُسْ وِعِ، ‏«‏مٛودِبّٛ، مِنْ کُوِي جٜمَّارٜ فُو، مِنْ نَنْغَايِ غٛطُّمْ؞ اَمَّا دَغَ اَ وِعِ نٛنْ، مِ وَطَيْ نَنْغِرْطُمْ لِپِّ ندٜرْ ندِيَمْ؞»‏ ⁶ندٜ ٻٜ نغَطِ نٛنْ، ٻٜ نَنْغِ لِپِّ طُطِّ حَا نَنْغِرْطُمْ طُمْ فُطِّ سٜىٰکُکِ؞ ⁷سٜيْ ٻٜ نٛدِّرِ حِغٛوٻٜ مَٻّٜ جُوطٜ، وٛنْٻٜ ندٜرْ وٛنْغَلْ کٛمِوَلْ، نغَمْ ٻٜ نغَرَ ٻٜ مبَلَّٻٜ؞ ٻٜ نغَرِ، ٻٜ کٜبِّنِ کٛمِيجٜ طٜنْ طٜ فُو طِطِ اٜ لِپِّ نَاکِ طٜ فُطِّ مُتُکِ ندٜرْ ندِيَمْ؞ ⁸ندٜ سِيمَنْ يِعِ نٛنْ، اٛ دِشِّي يٜىٰسٛ يٜىٰسُ، اٛ وِعِ، ‏«‏مٛودِبّٛ، وٛطِّتَيَمْ، مِ نٜطّٛ غٛودُطٛ حَکّٜ!‏»‏

⁹سِيمَنْ وِعِ نٛنْ نغَمْ کَنْکٛ اٜ غٛنْدُٻٜ اٜ مَاکٛ ٻٜ کَيْطِنِي اٜ لِپِّ طُطِّ طِ ٻٜ نَنْغِ؞ ¹⁰يَاکُبُ اٜ يَحَيَ، ٻِٻّٜ جَبَدِ، حِغٛوٻٜ کُوغَلْ سِيمَنْ، کَمْٻٜ مَا ٻٜ کَيْطِنِي؞ يٜىٰسُ وِعِ سِيمَنْ، ‏«‏تَاع حُلُ!‏ دَغَ جٛونِ اَ وَدَّيْ يِمْٻٜ تٛ اَمْ؞»‏

¹¹ٻٜ مبُرْتِنِ کٛمِيجٜ مَٻّٜ دَغَ ندٜرْ ندِيَمْ، ٻٜ اَلِ کٛو طُمٜ، ٻٜ تٛکِّ يٜىٰسُ؞

غٛودُطٛ ݧَوُ ݧَامٛووُ لَرَلْ

¹²وٛنْدٜ ݧَلْندٜ يٜىٰسُ اٜ ندٜرْ وٛنْدِ غَرِيرِ، غٛطّٛ وَرٛيِ غٛودُطٛ ݧَوُ ݧَامٛوجُمْ لَرَلْ فُو ٻَنْدُ مَاکٛ؞ ندٜ اٛ يِعِ يٜىٰسُ، اٛ دِشِّي، اٛ تٛرِي يٜىٰسُ، اٛ وِعِ، ‏«‏مٛودِبّٛ، تَا جَٻِي، اَ وَاوَيْ نجَمْطِتِنَايَمْ؞»‏

¹³سٜيْ يٜىٰسُ فٛرْتِ جُنْغٛ مُوطُمْ، مٜىٰمِمٛ، وِعِ، ‏«‏مِ جَٻِي؞ يَمْطُتُ!‏»‏ طٛنْ اٜ طٛنْ اٛ يَمْطِتِ، ݧَوُ نغُنْ اَلِمٛ؞ ¹⁴يٜىٰسُ وِعِمٛ، ‏«‏تَاع وِعُکَ غٛطّٛ؞ اَمَّا يَحُ، کٛلَّا حٛورٜ مَاطَ تٛ اَرْدِيطٛ دِينَ، کٛکَّا شَکِّرِ نٛ اَنَّبِ مُوسَ وِعِ نغَمْ لَاٻٛلْ مَاطَ؞ وَطُ نٛنْ نغَمْ تَبِّتِنَنْکِ يِمْٻٜ اَ يَمْطِتِي؞»‏

¹⁵اَمَّا کٛو ندٜ يٜىٰسُ حَطِيمٛ وِعُکِکَ، حَبَرُ طُمْ وٛطِّنِي، يِمْٻٜ طُطْٻٜ نغَرِ نغَمْ نَنُکِ اٜکِّتِنٛلْ مَاکٛ اٜ يَمْطِتِنٜىٰکِ دَغَ ݧَوُوجِ مُعّٜنْ؞ ¹⁶اَمَّا نٛ يٜىٰسُ وٛووِ اٜ يَحَ وِغٜىٰرٜ ندٜرْ لَدّٜ وَطَ دٛعَارٜ؞

يٜىٰسُ يَمْطِتِنِي جَرَاطٛ

¹⁷وٛنْدٜ ݧَلْندٜ يٜىٰسُ اٜ ندٜرْ اٜکِّتِنْکِ، فَارِسَنْکٛعٜنْ اٜ مٛودِٻّٜ اَتَّوْرَ اٜ نجٛوطِي طٛنْ پِوٛيْٻٜ نغَرِحٛيْ فُو نغٛنْکٛيْ ندٜرْ لٜيْطٜ غَلِيلِ اٜ يَحُودِيَ اٜ غَرِيرِ اُرُشَلِيمَ؞ بَوْطٜ جٛومِرَاوٛ اٜ وٛنْدِ اٜ مَاکٛ، اٜ مٛ يَمْطِتِنَ ݧَوْٻٜ؞ ¹⁸سٜيْ وٛٻّٜ نغَدِّ غٛطّٛ جَرَاطٛ دٛوْ دَاغٛ، ٻٜ طَٻِّتِ طَتَلْ نغَلْ ٻٜ نَتِّنِرْتَمٛ ندٜرْ وُرٛ نغٛنْ، ٻٜ ڤُکِّنَمٛ يٜىٰسٛ يٜىٰسُ؞ ¹⁹اَمَّا ٻٜ مبَاوَايِ نَتِّنْکِمٛ نغَمْ يِمْٻٜ طُوطِي، سٜيْ ٻٜ پٜنْتِنِمٛ دٛوْ سُودُ ندُنْ، ٻٜ نجُلِندُ، ٻٜ نجِڤِّنِمٛ دَغَ دٛوْ مَيْرُ يَاکِ حَکُّندٜ يِمْٻٜ يٜىٰسٛ يٜىٰسُ؞ ²⁰ندٜ يٜىٰسُ يِعِ حٛولَارٜ مَٻّٜ، اٛ وِعِ جَرَاطٛ اٛنْ، ‏«‏حِغٛ، طُمْ يَافَنَکٜمَ حَکّٜىٰجِ مَاطَ؞»‏

²¹سٜيْ فَارِسَنْکٛعٜنْ اٜ مٛودِٻّٜ اَتَّوْرَ ڤُطِّ مٜتِتَاکِ حَکُّندٜ مَٻّٜ، اٜ ٻٜ مبِعَ، ‏«‏اٛعٛ طُمْ مٛيٜ ڤٛتِّدِنٛووٛ حٛورٜ مُوطُمْ اٜ اَللَّه؟ مٛيٜ وَاوَتَ يَافَاکِ حَکّٜ تٛ نَاع اَللَّه؟»‏

²²يٜىٰسُ فَامِ ݧُمٛ مَٻّٜ، اٛ وِعِٻٜ، ‏«‏نغَمْ طُمٜ ݧُمٛتٛنْ اِرِ ݧُمٛوجِ طِعِ ندٜرْ ٻٜرْطٜ مٛوطٛنْ؟ ²³کٛ ٻُرِ حٛيْکِ، طُمْ وِعَ، ‏‹‏اَ يَافَنَامَ حَکّٜ مَاطَ،›‏ کٛو طُمْ وِعَ، ‏‹‏اُمَّ يَاٻُ؟›‏ ²⁴اَمَّا اٜ مِ يِطِ اَنْدٛنْ ٻِي نٜطّٛ اٜ وٛودِ لَامُ ندٜرْ دُونِيَارُ يَافٛو حَکّٜ؞»‏ سٜيْ اٛ وِعِ جَرَاطٛ اٛنْ، ‏«‏اٜ مِ وِعِمَا، اُمَّ، کٛشَّا دَاغٛ مَاطَ، کٛوتَا وُرٛ!‏»‏

²⁵طٛنْ اٜ طٛنْ اٛ اُمِّي يٜىٰسٛ مَٻّٜ، اٛ حٛشِّ دَاغٛ مَاکٛ، اٛ حٛوتِ وُرٛ، اٜ مٛ مَنْتَ اَللَّه؞ ²⁶ٻٜ فُو ٻٜ کَيْطِنِ، ٻٜ مَوْنِنِ اَللَّه؞ کُلٛلْ نَنْغِٻٜ، ٻٜ مبِعِ، ‏«‏حَنْدٜ اٜنْ نغِعِ کٛ حُلْنِي!‏»‏

يٜىٰسُ نٛدِّي لٜىٰوِ

²⁷غَطَ طٛنْ، يٜىٰسُ وُرْتِي يِعِ جَٻٛووٛ شٜىٰدٜ لٜيْدِ بِعٜتٜىٰطٛ لٜىٰوِ، اٜ مٛ جٛوطِي تٛ طُمْ جَٻَتَ شٜىٰدٜ لٜيْدِ، يٜىٰسُ وِعِمٛ، ‏«‏تٛکَّمْ؞»‏ ²⁸لٜىٰوِ اُمِّي، اَلِ کٛو طُمٜ، تٛکِّمٛ؞

²⁹سٜيْ لٜىٰوِ يَارِ يٜىٰسُ وُرٛ مُوطُمْ دٜفَنِمٛ ݧَمْندُوجِ فٜىٰرٜ‑فٜىٰرٜ؞ جَٻٛوٻٜ شٜىٰدٜ لٜيْدِ طُطْٻٜ اٜ وٛٻّٜ يِمْٻٜ اٜ ݧَمْدَ اٜ مَٻّٜ؞ ³⁰اَمَّا، فَارِسَنْکٛعٜنْ اٜ مٛودِٻّٜ اَتَّوْرَ مَٻّٜ نغَطِ کَ مٜتِتَاکِ، اٜ ٻٜ مبِعَ تٛکُّٻٜ يٜىٰسُ، ‏«‏نغَمْ طُمٜ ݧَمْدٛتٛنْ اٜ جَٻٛوٻٜ شٜىٰدٜ لٜيْدِ اٜ غَطٛوٻٜ حَکّٜ؟»‏

³¹يٜىٰسُ وِعِٻٜ، ‏«‏نَاع يَمْٻٜ نغِطِ ݧَوْندٛووٛ، سٜيْ نِ ݧَوْٻٜ؞ ³²مِ وَرٛيَايِ نغَمْ نٛدُّکِ ݧُمٛوٻٜ ٻٜ اَادِلِعٜنْ، اَمَّا مِ وَرٛيِ نغَمْ نٛدُّکِ اَنْدُٻٜ ٻٜ غَطٛوٻٜ حَکّٜ ٻٜ تُوبَ؞»‏

پَمٛلْ دٛوْ سُومَاکِ

³³ٻٜ مبِعِمٛ، ‏«‏کٛو ندٜيٜ تٛکُّٻٜ يَحَيَ غَطٛووٛ بَڤْتِسْمَ اٜ شُومٛو اٜ نغَطَ دٛعَارٜ، نٛنْ مَا تٛکُّٻٜ فَارِسَنْکٛعٜنْ نغَطَتَ، اَمَّا تٛکُّٻٜمَ اٜ ݧَامَ اٜ نجَرَ؞»‏

³⁴يٜىٰسُ نٛوتِي وِعِٻٜ، ‏«‏اٛنْ مبَاوَيْ کَطٛنْ حِغٛوٻٜ اَنْغٛوجٛ ݧَامُکِ ݧَمْندُ شَرٜلْ نغٜلْ اٛ وٛنْدِ اٜ مَٻّٜ؟ اٛنْ مبَاوَتَا!‏ ³⁵اَمَّا شَرٜلْ اٜ وَرَ نغٜلْ طُمْ حٛشَّتَ اَنْغٛوجٛ اٛنْ دَغَ ندٜرْ مَٻّٜ، غَطَ طٛنْ ٻٜ شُومٛتٛ؞»‏

³⁶اٛ وِعِٻٜ مِسَالُ طُعُمْ، ‏«‏وَلَا شٜىٰکٛووٛ لٜفٜلْ دَغَ لِمْشٜرٜ حٜيْرٜ ݧٛوتَنغٜلْ تٛ لِمْشٜرٜ کِيندٜ؞ تٛ اٛ وَطِي نٛنْ، اٛ سٜىٰکَيْ لِمْشٜرٜ حٜيْرٜ ندٜنْ، لٜفٜلْ کٜسٜلْ نغٜلْ بٛو يَادَتَا اٜ لِمْشٜرٜ حِيندٜ ندٜنْ؞ ³⁷نٛنْ مَا وَلَا غَطَيْطٛ اِنَبٛجَمْ کٜسَمْ ندٜرْ فَاندُ حِيندُ؞ تٛ اٛ وَطِي نٛنْ، طَمْ پُوفَيْ، طَمْ ڤُسَ فَاندُ ندُنْ، طَمْ رُفَ؞ ³⁸اَمَّا، اِنَبٛجَمْ کٜسَمْ حَانِ وَطٜىٰ ندٜرْ فَاندُ حٜيْرُ؞ ³⁹وَلَا بٛو جَرٛووٛ اِنَبٛجَمْ کِيطَمْ غَطَ طٛنْ طَٻِّتَ کٜسَمْ، نغَمْ اٛ وِعَيْ، ‏‹‏کِيطَمْ طَمْ ٻُرِي؞›‏ »‏

پَمٛلْ دٛوْ ݧَلْندٜ سِوْتَارٜ

¹وٛنْدٜ ݧَلْندٜ سِوْتَارٜ يٜىٰسُ اٜ يَحَ ندٜرْ نغٜسَ اَلْکَمَارِ، سٜيْ تٛکُّٻٜمٛ نغَطِ کَ ٻٛرُکِ شَمّٜىٰجٜ مَيْرِ اٜ مٛلْمَطٜ ندٜرْ جُوطٜ مَٻّٜ، اٜ ٻٜ ݧَامَ؞ ²اَمَّا وٛٻّٜ فَارِسَنْکٛعٜنْ مبِعِٻٜ، ‏«‏کٛ وَطِ نغَطٛتٛنْ کٛ اَتَّوْرَ حَطِ طُمْ وَطَ ݧَلْندٜ سِوْتَارٜ؟»‏

³يٜىٰسُ وِعِٻٜ، ‏«‏اٛنْ مٜىٰطَايِ جَنْغُکِ کٛ دَوْدَ وَطِ ندٜ نَنِ وٜىٰلٛ، کَنْکٛ اٜ غٛنْدُٻٜ اٜ مَاکٛ؟ ⁴اٛ نَتِّ لُکُرُ سٜنِيطُمْ، اٛ حٛشِّ بُرٛودِ شٜنِيطُمْ، اٛ ݧَامِطُمْ؞ اَتَّوْرَ بٛو وِعِي اَرْدِيٻٜ دِينَ تَنْ حَانِ ݧَامُکِ بُرٛودِ طُمْ، اَمَّا دَوْدَ ݧَامِطُمْ حَا مَا اٛ حٛکّٛرِ جَادٛوٻٜ اٜ مَاکٛ؞»‏

⁵سٜيْ يٜىٰسُ وِعِٻٜ، ‏«‏ٻِي نٜطّٛ وٛنِ جٛومُ ݧَلْندٜ سِوْتَارٜ؞»‏

يٜىٰسُ يَمْطِتِنِي مٛ جُنْغٛ جَرَانغٛ

⁶وٛنْدٜ ݧَلْندٜ سِوْتَارٜ اٛ نَتِّ ندٜرْ سُودُ دٛعَارٜ، اٜ مٛ اٜکِّتِنَ؞ غٛطّٛ مٛ جُنْغٛ جَرَانغٛ اٜ ندٜرْ مَيْرُ؞ ⁷مٛودِٻّٜ اَتَّوْرَ اٜ فَارِسَنْکٛعٜنْ شُتِي يٜىٰسُ کٛو اٛ يَمْطِتِنَيْ غٛطّٛ ندٜرْ ݧَلْندٜ سِوْتَارٜ، نغَمْ ٻٜ کٜٻَ کٛ ٻٜ نغُلِّرٛيْتٛومٛ؞ ⁸اَمَّا، يٜىٰسُ اٜ اَنْدِ کٛ وٛنِ ندٜرْ ٻٜرْطٜ مَٻّٜ، سٜيْ اٛ وِعِ نٜطّٛ مٛ جُنْغٛ جَرَانغٛ اٛنْ، ‏«‏وٛرٛيْ، ندَرٛطَا شَکَ مَٻّٜ؞»‏ اٛ اُمِّي، اٛ دَرِي طٛنْ؞ ⁹سٜيْ يٜىٰسُ وِعِٻٜ، ‏«‏اٜ مِ پَمَعٛنْ، کٛ اَتَّوْرَ وِعِ طُمْ وَطَ ندٜرْ ݧَلْندٜ سِوْتَارٜ، وَطَ کٛ وٛوطِ کٛو وَطَ کٛ وٛوطَا، حِسْنَ يٛنْکِ کٛو حَلْکَکِ؟»‏ ¹⁰غَطَ اٛ رَارِيٻٜ ٻٜ فُو، سٜيْ اٛ وِعِ نٜطّٛ اٛنْ، ‏«‏فٛرْتُ جُنْغٛ مَاطَ؞»‏ اٛ فٛرْتِنغٛ، سٜيْ نغٛ يَمْطِتِ؞

¹¹اَمَّا ٻٜرْطٜ مَٻّٜ مٜتِّ نَاع سٜطَّ، ٻٜ مٜتِ حَکُّندٜ مَٻّٜ دٛوْ کٛ ٻٜ نغَطَنْتَ يٜىٰسُ؞

يٜىٰسُ سُٻِي لِلَاٻٜ سَڤّٛ اٜ طِطٛ

¹²ندٜرْ بَلْطٜ طٜنْ، يٜىٰسُ يَحِ دٛوْ حٛشّٜىٰرٜ نغَمْ وَطَ دٛعَارٜ؞ اٛ وَالِ وَطُکِ دٛعَارٜ؞ ¹³ندٜ وٜىٰتِ، اٛ نٛدِّ تٛکُّٻٜمٛ، اٛ سُٻِ سَڤّٛ اٜ طِطٛ، اٛ حٛکِّٻٜ اِنْدٜ لِلَاٻٜ؞ ¹⁴کَمْٻٜ نغٛنِ:‏ سِيمَنْ مٛ اٛ حٛکِّ اِنْدٜ بِيتُرُسْ، اٜ مِݧِرَاوٛ مَاکٛ اَنْدِرَاوُسْ، اٜ يَاکُبُ، اٜ يَحَيَ، اٜ فِلِبُسْ، اٜ بَتِلٛومِ، ¹⁵اٜ مَاتِيُ، اٜ تٛومَ، اٜ يَاکُبُ ٻِي حَلْفَ، اٜ سِيمَنْ بِعٜتٜىٰطٛ جَلٛوتِ، ¹⁶اٜ يَحُودَ ٻِي يَاکُبُ، اٜ يَحُودَ اِسْکَرِيٛوتِ، غَرْتُطٛ کٛکِّتِرْطٛ يٜىٰسُ؞

يٜىٰسُ اٜکِّتِنِي مٛٻْغَلْ، يَمْطِتِنِي ݧَوْٻٜ

¹⁷سٜيْ يٜىٰسُ جِڤّٛدِي اٜ مَٻّٜ اٛ دَرِي اٜ نجَيْرِ؞ تٛکُّٻٜمٛ طُطْٻٜ اٜ طٛنْ اٜ يِمْٻٜ طُطْٻٜ پِوٛيْٻٜ دَغَ لٜيْدِ يَحُودِيَ فُو، اٜ اُرُشَلِيمَ، اٜ لٜيْدِ تَايَ اٜ سِدٛنْ حَادٜ مبٜىٰلَ؞ ¹⁸ٻٜ نغَرٛيِ نغَمْ نَنُکِمٛ اٜ يَمْطِنٜىٰکِ دَغَ ݧَوُوجِ مَٻّٜ؞ ٻٜ غِنِّ تٛرَّتَ نجَمْطِنَا؞ ¹⁹وٛنْٻٜ طٛنْ فُو اٜ ٻَدّٛو نغَمْ مٜىٰمَ يٜىٰسُ، نغَمْ بَوْطٜ اٜ مبُرْتٛو دَغَ ندٜرْ مَاکٛ، اٜ مٛ يَمْطِتِنَ کٛو مٛيٜ؞

بَرْکِطِنْکِ اٜ لَانُکِ

²⁰يٜىٰسُ رَارِ تٛکُّٻٜمٛ، وِعِ،

‏«‏اٛنْ بَرْکِطِنَاٻٜ، اٛنٛنْ ٻٜ نغَلَنَا،

نغَمْ اٛنٛنْ نجٜيِ لَامُ اَللَّه؞

²¹‏«‏اٛنْ بَرْکِطِنَاٻٜ، اٛنٛنْ نَنٛوٻٜ وٜىٰلٛ جٛونِ،

نغَمْ اٛنْ نغَرْتَيْ کَرْنٜتٜىٰٻٜ؞

‏«‏اٛنْ بَرْکِطِنَاٻٜ، اٛنٛنْ وٛيٛوٻٜ جٛونِ،

نغَمْ اٛنْ نغَرْتَيْ جَلَيْٻٜ؞

²²‏«‏اٛنْ بَرْکِطِنَاٻٜ تٛ يِمْٻٜ نغَݧِيعٛنْ، ندِيوِيعٛنْ، کُطِيعٛنْ، مبٛنِّي اِنْطٜ مٛوطٛنْ نغَمْ ٻِي نٜطّٛ؞ ²³نَنٜىٰ بٜلْطُمْ ندٜرْ ݧَلْندٜ ندٜنْ، نغَمٜىٰ نغَمْ بٜلْطُمْ، نغَمْ بَرْکَ مٛوطٛنْ طُمْ طُطُّمْ اٜ دٛوْ؞ نٛنْ مَامَعٜنْ مَٻّٜ نغَطَنّٛو اَنَّبٛعٜنْ اَرَنْدٜعٜنْ؞

²⁴‏«‏اٛنْ مبٛنِي، اٛنٛنْ رِسْکُٻٜ،

نغَمْ اٛنْ کٜٻِي کٛ طَٻِّتٛتٛنْ؞

²⁵‏«‏اٛنْ مبٛنِي، اٛنٛنْ کَرْٻٜ جٛونِ،

نغَمْ اٛنْ نَنَيْ وٜىٰلٛ؞

‏«‏اٛنْ مبٛنِي، اٛنٛنْ جَلَيْٻٜ جٛونِ،

نغَمْ اٛنْ نَنَتَا بٜلْطُمْ، اٛنْ مبٛيَيْ بٛجِّ نَوْطِ؞

²⁶‏«‏اٛنْ مبٛنِي تٛ يِمْٻٜ فُو مَنِيعٛنْ، نغَمْ نٛنْ مَامَعٜنْ مَٻّٜ نغَطَنّٛو اَنَّبٛعٜنْ فٜوْرٜ؞

نغِطٜىٰ غَݧٛوٻٜ مٛوطٛنْ

²⁷‏«‏اَمَّا اٜ مِ وِعَعٛنْ اٛنٛنْ نَنٛوٻٜ کٛ مبِعَيْمِ:‏ نغِطٜىٰ غَݧٛوٻٜ مٛوطٛنْ، نغَطَنٜىٰ وَݧُٻٜعٛنْ کٛ وٛوطِ، ²⁸مبَرْکِطِنٜىٰ لَانٛوٻٜعٛنْ، نغَطَنٜىٰ تٛرّٛوٻٜعٛنْ دٛعَارٜ؞ ²⁹تٛ غٛطّٛ فِيِيمَ تٛ وٛلٛ، وَيْلِتَنْمٛ وٛعٛتٛ نغٛنْ مَا؞ تٛ غٛطّٛ جَٻِي شُدَّارِ مَاطَ، تَاع حَطُمٛ تٛغّٛورٜ مَاطَ؞ ³⁰تٛرِيطٛمَ غٛطُّمْ فُو، حٛکُّمٛ؞ تٜىٰتَنْطٛمَ غٛطُّمْ، تَاع وِعِمٛ اٛ حٛکُّتُمَا؞ ³¹نغَطَنٜىٰ وٛٻّٜ کٛ نغِطّٛنْ ٻٜ نغَطَنَعٛنْ؞

³²‏«‏تٛ يِطُٻٜعٛنْ تَنْ نغِطّٛنْ، طُمٜ بَرْکَ کٜٻٛتٛنْ؟ کٛو کَلُّٻٜ مَا اٜ نغِطِ يِطُٻٜٻٜ؞ ³³تٛ غَطَنٛوٻٜعٛنْ بٛطُّمْ تَنْ نغَطَنْتٛنْ بٛطُّمْ، طُمٜ بَرْکَ کٜٻٛتٛنْ؟ اَيْ، کَلُّٻٜ مَا اٜ نغَطَ نٛنْ؞ ³⁴تٛ ٻٜ کَمِّيطٛنْ نجٛٻَيْعٛنْ تَنْ کٛکّٛتٛنْ ݧَمَاندٜ، طُمٜ بَرْکَ کٜٻٛتٛنْ؟ اَيْ، کَلُّٻٜ مَا اٜ کٛکَّ کَلُّٻٜ ݧَمَاندٜ، اٜ ٻٜ کَمّٛو حٛکِّتٜىٰکِ ݧَمَاندٜ مَٻّٜ؞ ³⁵اَمَّا نغِطٜىٰ غَݧٛوٻٜ مٛوطٛنْ، نغَطَنٜىٰٻٜ بٛطُّمْ، کٛکّٜىٰٻٜ ݧَمَاندٜ، تٛع اٛنْ کَمّٛو حٛکِّتٜىٰکِ؞ تٛ اٛنْ نغَطِي نٛنْ، اٛنْ کٜٻَيْ بَرْکَ طُطُّمْ، اٛنْ نغَرْتَيْ ٻِٻّٜ اَللَّه جٛومُ مَنْغُ؞ نغَمْ اَللَّه اٜ يُرْمِنَنَ ٻٜ نغٜتَّتَا اٜ کَلُّٻٜ؞ ³⁶نجُرْمِنَنٜىٰ يِمْٻٜ نٛنْ نٛ ݧَاکٛ مٛوطٛنْ مٛ دٛوْ يُرْمِرْتَ؞

تٛع اٛنْ کِيتٛ وٛٻّٜ

³⁷‏«‏تٛع اٛنْ کِيتٛ وٛٻّٜ، اٛنْ کِيتَتَاکٜ؞ تٛع اٛنْ مٜتُ کَلُّکَ دٛوْ غٛطّٛ، طُمْ مٜتَتَا کَلُّکَ دٛوْ مٛوطٛنْ؞ نجَافٜىٰ، طُمْ يَافَنْتٛعٛنْ؞ ³⁸کٛکّٜىٰ، طُمْ حٛکَّيْعٛنْ اٜ ڤٛوندِرْغٜلْ کٜوْنغٜلْ تِطَّانغٜلْ دِمْبَانغٜلْ بٛطُّمْ، طُمْ وَيْلَنَيْعٛنْ ندٜرْ تُمُّطٜ مٛوطٛنْ، نغَمْ ڤٛوندِرْغٜلْ نغٜلْ ڤٛوندِرْطٛنْ، اٜ مَاغٜلْ طُمْ فٛوندِرَنْتَعٛنْ؞»‏

³⁹طٛنْمَا اٛ حٛکِّٻٜ مِسَالُ طُعُمْ، اٛ وِعِ، ‏«‏اٛنْ نغِعَ بُمْطٛ وَاوَيْ اَرْدَاکِ بُمْطٛ؟ ٻٜ فُو طِطٛ نَاع سٜيْ ٻٜ نجَنَ ندٜرْ نغَيْکَ؟ ⁴⁰اٜکِّتٛتٛوطٛ ٻُرَتَا مٛودِبّٛ مُوطُمْ، اَمَّا کٛو مٛيٜ اٜکِّتِنَاطٛ بٛطُّمْ وَرْتَيْ بٛ مٛودِبّٛ مُوطُمْ؞

⁴¹‏«‏نغَمْ طُمٜ ندَارَتَا غٜىٰنٜلْ غٛنْغٜلْ ندٜرْ حِتٜرٜ بَنْدِرَاوٛ مَاطَ، اَمَّا اَ وَنَّايِ اٜ لٜغَّ وٛنْغَ ندٜرْ حِتٜرٜ مَاطَ؟ ⁴²نٛ وَطَتَ مبِعَا بَنْدِرَاوٛ مَاطَ، ‏‹‏بَنْدِرَاوٛ، اَلْ مِ اِتَّنْمَا غٜىٰنٜلْ ندٜرْ حِتٜرٜ مَاطَ،›‏ ندٜنْ اَنْ اٜ حٛورٜ مَاطَ اَ يِعَايِ لٜغَّ وٛنْغَ ندٜرْ حِتٜرٜ مَاطَ؟ اَنْ مُنَافُکِيجٛ، اَرْتُ اِتُّکِ لٜغَّ وٛنْغَ ندٜرْ حِتٜرٜ مَاطَ، ندٜنْ نغِعَا بٛطُّمْ کٜٻَا نٛ اِتِّرَا غٜىٰنٜلْ غٛنْغٜلْ ندٜرْ حِتٜرٜ بَنْدِرَاوٛ مَاطَ؞

لٜکِّ اٜ اَنْدِرٜىٰ ٻِکّٛيْ مَاکِ

⁴³‏«‏لٜکِّ بٛطْکِ رِمَتَا ٻِکّٛيْ کٛيْ مبٛوطَا، نٛنْ مَا لٜکِّ کِ وٛوطَا رِمَتَا ٻِکّٛيْ مبٛطْکٛيْ؞ ⁴⁴نغَمْ کٛو کِيٜ لٜکِّ اٜ اَنْدِرٜىٰ ٻِکّٛيْ مَاکِ؞ طُمْ تٜٻِّتَتَا اِبّٜ تٛ لٜکِّ کٛورَاجٜ، نٛنْ تٛ غِعٜحِ طُمْ تٜٻِّتَتَا ٻِکّٛيْ بُمّٜىٰجٜ؞ ⁴⁵نٜطّٛ مٛ نغِکُّ بٛطُّمْ اٜ وُرْتِنَ فِي بٛطُّمْ دَغَ ندٜرْ کٛ وٛنِ ندٜرْ ٻٜرْندٜ مُوطُمْ؞ نٛنْ مَا نٜطّٛ کَلُّطٛ اٜ وُرْتِنَ حَلّٜىٰندٜ دَغَ ندٜرْ ٻٜرْندٜ مُوطُمْ، نغَمْ حٛنْدُکٛ نٜطّٛ اٜ مٜتَ کٛ وٛنِ ندٜرْ ٻٜرْندٜ مُوطُمْ؞»‏

ٻٛلِيطٜ يٜىٰسُ اَلْمَسِيحُ اٜ شٜمْبِطِ بٛ تَفَارٜ

⁴⁶اٛ وِعِٻٜ، ‏«‏نغَمْ طُمٜ نٛدِّرْتٛيْيَمْ، ‏‹‏مٛودِبّٛ، مٛودِبّٛ،›‏ اَمَّا اٛنْ نغَطَتَا کٛ مبِيمِعٛنْ؟ ⁴⁷نٜطّٛ فُو غَرْطٛ تٛ اَمْ نَنِ بٛلِيطٜ اَمْ وَطِ کٛ مبِيمِ، مِ حٛلَّيْعٛنْ کٛ اٛ نَنْدِ؞ ⁴⁸اٜ مٛ نَنْدِ اٜ نٜطّٛ مَحٛووٛ وُرٛ غَسُطٛ لٜيْدِ لُغُّطُمْ حَا اٛ حٜوْتِ تَفَارٜ، اٛ مَحِ وُرٛ دٛوْ مَيْرٜ؞ شَانغٛلْ حٜىٰوِ فَلْپِ فِيِ وُرٛ نغٛنْ، اَمَّا نغٛ دِمْبَاکِ، نغَمْ نغٛ مَحَامَ دٛوْ تَفَارٜ؞ ⁴⁹اَمَّا نَنْطٛ بٛلِيطٜ اَمْ، ندٜنْ وَطَايِ کٛ مبِيمِ اٜ نَنْدِ اٜ نٜطّٛ مَحُطٛ وُرٛ دٛوْ نجَارٜىٰندِ؞ ندٜ شَانغٛلْ فَلْپِ فِيِنغٛ، طٛنْ اٜ طٛنْ نغٛ يَنِ نغٛ فُو!‏»‏

حٛولَارٜ سٛوجِيجٛ اَرْدِيطٛ

¹ندٜ يٜىٰسُ يٛتِّنِ فُو کٛ وِعَتَ يِمْٻٜ، اٛ دِلِّ اٛ نَتِّ غَرِيرِ کَفَرْنَحُمْ؞ ²تٛنْ اٜ وٛودِ غٛطّٛ مَوْطٛ سٛوجِعٜنْ اٜ مٛ وٛودِ مَشُّطٛ مٛ اٛ يِطِ نَاع سٜطَّ؞ مَشُّطٛ اٛنْ يَمْطَا، اٛ ٻَدَکٜ مَيْدٜ؞ ³ندٜ مَوْطٛ سٛوجِعٜنْ اٛنْ نَنِ حَبَرُ يٜىٰسُ، اٛ لِلِ وٛٻّٜ مَوْٻٜ يَحُودَنْکٛعٜنْ تٛ مَاکٛ نغَمْ ٻٜ تٛرٛومٛ اٛ وَرَ اٛ يَمْطِتِنَ مَشُّطٛ مَاکٛ؞ ⁴ندٜ ٻٜ نغَرِ تٛ يٜىٰسُ، ٻٜ تٛرِيمٛ کٛ طُوطِ، ٻٜ مبِعِ، ‏«‏اٜ حَانِ مبَلَّا نٜطّٛ اٛعٛ، ⁵نغَمْ اٜ مٛ يِطِ لٜݧٛلْ مٜىٰطٜنْ، کَنْکٛ مَحِ سُودُ دٛعَارٜ مٜىٰطٜنْ؞»‏

⁶سٜيْ يٜىٰسُ يَادِ اٜ مَٻّٜ؞ ندٜ اٛ ٻَدِي وُرٛ نغٛنْ، مَوْطٛ سٛوجِعٜنْ اٛنْ لِلٛيِ حِغٛوٻٜ مُوطُمْ مبِعَمٛ، ‏«‏مٛودِبّٛ، تَاع تٛرُّ حٛورٜ مَاطَ نغَمْ مِ فٛتَايِ نَتَّا وُرٛ اَمْ؞ ⁷کَنْجُمْ وَطِ ندَارُمِ حٛورٜ اَمْ مِ فٛتَايِ وَرْکِ تٛ مَاطَ، اَمَّا مٜتُ تَنْ، مَشُّطٛ اَمْ يَمْطِتَيْ؞ ⁸نغَمْ مِنْ اٜ حٛورٜ اَمْ لٜيْ لَامُ وٛٻّٜ سٛوجِعٜنْ نغٛنْمِ، مِنْ مَا، اٜ مِ لَامٛو سٛوجِعٜنْ؞ تٛ مِ وِعِي اٛعٛ، ‏‹‏دِلُّ!‏›‏ اٛ دِلَّيْ؞ تٛ مِ وِعِي اٛنْ تٛنْ، ‏‹‏وٛرٛيْ!‏›‏ اٛ وَرَيْ؞ تٛ مِ وِعِي مَشُّطٛ اَمْ، ‏‹‏وَطُ طُعُمْ!‏›‏ اٛ وَطَيْطُمْ؞»‏

⁹ندٜ يٜىٰسُ نَنِ نٛنْ، طُمْ حَيْطِنِيمٛ، اٛ يٜىٰپِي يِمْٻٜ طُطْٻٜ تٛکُّٻٜمٛ، اٛ وِعِ، ‏«‏اٜ مِ وِعَعٛنْ، کٛو ندٜرْ اِسْرَاعِيلَ مِ حٜٻَايِ کٛولِيطٛيَمْ ٻٜرْندٜ غٛعٛ بٛ اٛعٛ!‏»‏

¹⁰سٜيْ لِلَاٻٜ ٻٜنْ شٛعِّي وُرٛ نغٛنْ، ٻٜ تَوِ مَشُّطٛ اٛنْ يَمْطِتِي؞

يٜىٰسُ اُمِّنِي مَيْطٛ

¹¹غَطَ مَاجُمْ سٜطَّ، يٜىٰسُ يَحِ وٛنْدِ غَرِيرِ بِعٜتٜىٰندِ نَايِنْ، کَنْکٛ اٜ تٛکُّٻٜمٛ سَڤّٛ اٜ طِطٛ اٜ يِمْٻٜ طُطْٻٜ؞ ¹²ندٜ اٛ ٻَدِي دَمُّغَلْ غَرِيرِ ندِنْ، اٛ حَوْرِ اٜ وٛٻّٜ اٜ کٛشّٛيِ مَيْطٛ ٻٜ اُوٛيَيْمٛ، کَنْکٛ تَنْ مَدُوجٛ مَاکٛ وٛودِ؞ دٜبّٛ اٛنْ بٛو غٛرْکٛ مُوطُمْ مَايِ، يِمْٻٜ غَرِيرِ ندِنْ طُطْٻٜ اٜ تٛکِّمٛ؞ ¹³ندٜ يٜىٰسُ يِعِمٛ، يُرْمِنَنِ دٜبّٛ اٛنْ، وِعِ، ‏«‏اَلُ بٛجِّ؞»‏ ¹⁴اٛ ٻَدِّي، اٛ مٜىٰمِ کٛشِّرْطُمْ مَيْطٛ اٛنْ؞ سٜيْ کٛشُّٻٜمٛ ٻٜنْ ندَرِي؞ اٛ وِعِ، ‏«‏سُکَ، اٜ مِ وِعُمَا، اُمَّ؞»‏ ¹⁵مَيْطٛ اٛنْ اُمِّي، جٛوطِي، فُطِّ مٜتُکِ؞ سٜيْ يٜىٰسُ حٛکِّتِمٛ مَدُوجٛ مَاکٛ؞

¹⁶کُلٛلْ نَنْغِٻٜ ٻٜ فُو، ٻٜ مَنْتِ اَللَّه، ٻٜ مبِعِ، ‏«‏اَنَّبِيجٛ مَوْطٛ وَنْغِي حَکُّندٜ مٜىٰطٜنْ!‏ اَللَّه وَرِي وَلُّکِ يِمْٻٜ مُوطُمْ!‏»‏

¹⁷حَبَرُ طُمْ سَنْکِتِي ندٜرْ لٜيْدِ يَحُودِيَ اٜ لٜيْطٜ غٛنْطٜ حَادٜ فُو؞

لِلَاٻٜ يَحَيَ غَطٛووٛ بَڤْتِسْمَ

¹⁸ندٜ تٛکُّٻٜ يَحَيَ غَطٛووٛ بَڤْتِسْمَ مبِعِمٛ فِي طُعُمْ فُو، اٛ نٛدِّ طِطٛ ندٜرْ مَٻّٜ؞ ¹⁹اٛ لِلِٻٜ تٛ يٜىٰسُ ٻٜ پَمَمٛ، ٻٜ مبِعَ، ‏«‏اَنْ وٛنِ اَلْمَسِيحُ مٛ طُمْ وِعِ وَرَيْ، کٛو مِنْ کٜطٛو غٛطّٛ؟»‏

²⁰ندٜ ٻٜ نجَحِ تٛ يٜىٰسُ، ٻٜ مبِعِمٛ، ‏«‏يَحَيَ غَطٛووٛ بَڤْتِسْمَ لِلٛيِيمِنْ تٛ مَاطَ مِنْ پَمُمَا، ‏‹‏اَنْ وٛنِ اَلْمَسِيحُ مٛ طُمْ وِعِ وَرَيْ، کٛو مِنْ کٜطٛو غٛطّٛ؟›‏ »‏

²¹اٜ شَرٜلْ نغٜلْ يٜىٰسُ يَمْطِتِنِي يِمْٻٜ طُطْٻٜ غٛودُٻٜ ݧَوُوجِ، اٛ وُرْتِنِي غِنِّ، اٛ وُمْتِنِي وُمْٻٜ طُطْٻٜ؞ ²²اٛ وِعِ لِلَاٻٜ يَحَيَ، ‏«‏نجَحٜىٰ، مبِعٛنْ يَحَيَ کٛ نغِيطٛنْ اٜ کٛ نَنُطٛنْ:‏ وُمْٻٜ اٜ مبُمْتَ، جَرَاٻٜ اٜ نجَاٻَ، غٛودُٻٜ ݧَوُ ݧَامٛوجُمْ لَرَلْ اٜ نجَمْطِتِنٜىٰ، ڤَحُٻٜ اٜ نَنَ، مَيْٻٜ اٜ اُمِّنٜىٰ، ٻٜ نغَلَنَا اٜ نغَعَجِنَنٜىٰ حَبَرُ بٜلْطُمْ؞ ²³اٛ بَرْکِطِنَاطٛ نٜطّٛ مٛ اَلَايِ حٛولَاکِيَمْ؞»‏

²⁴غَطَ ٻٜ يَحَيَ لِلٛيِ ندِلِّي، يٜىٰسُ فُطِّ مٜتَنْکِ يِمْٻٜ دٛوْ يَحَيَ، اٛ وِعِٻٜ، ‏«‏طُمٜ نجَاطٛنْ رَارٛيْکِ ندٜرْ لَدّٜ؟ کُطٛلْ نغٛلْ حٜنْدُ دِمْبَتَ ندَارٛيْطٛنْ؟ ²⁵تٛ نَاع نٛنْ، طُمٜ نجَاطٛنْ رَارٛيْکِ؟ نٜطّٛ ٻٛرْنِيطٛ لِمْشٜ بٛطّٜ؟ نَاع نٛنْ، اَيْ ٻٛرْنٛتٛوٻٜ لِمْشٜ بٛطّٜ اٜ نَنٛوٻٜ بٜلْطُمْ فُو اٜ لَامٛرْدٜ ٻٜ نغٛنِ؞ ²⁶تٛو، طُمٜ نجَاطٛنْ رَارٛيْکِ؟ اَنَّبِيجٛ؟ اٜ مِ وِعَعٛنْ غٛونغَ، اٛ ٻُرِي اَنَّبِيجٛ؞ ²⁷کَنْکٛ وٛنِ مٛ اَللَّه وِعِ ندٜرْ اَايَارٜ، ‏‹‏رَطُّمْ، مِ لِلٛيَيْ لِلَاطٛ اَمْ اٛ اَرْدٛو يٜىٰسٛ مَاطَ، اٛ مٛعِّنَنْمَا لَاوٛلْ؞›‏ ²⁸اٜ مِ وِعَعٛنْ، ندٜرْ ٻٜ رٜوْٻٜ ندَݧِ فُو وَلَا ٻُرْطٛ يَحَيَ غَطٛووٛ بَڤْتِسْمَ مَنْغُ؞ فُو اٜ نٛنْ ٻُرْطٛ فَمْطُکِ ندٜرْ لَامُ اَللَّه ٻُرِيمٛ مَنْغُ؞»‏

²⁹ندٜ يِمْٻٜ فُو اٜ جَٻٛوٻٜ شٜىٰدٜ لٜيْدِ نَنِ کٛ يٜىٰسُ وِعِ، ٻٜ نجَٻِ طَتَلْ اَللَّه وٛنِ غٛونغَ؞ کَمْٻٜ نغٛنِ ٻٜ يَحَيَ وَطَنّٛو بَڤْتِسْمَ؞ ³⁰اَمَّا فَارِسَنْکٛعٜنْ اٜ مٛودِٻّٜ اَتَّوْرَ نغَݧِ کٛ اَللَّه يِطَنِٻٜ؞ ٻٜعٜ نغٛنّٛو غَݧُٻٜ يَحَيَ وَطَنَٻٜ بَڤْتِسْمَ؞

³¹طٛنْمَا يٜىٰسُ وِعِ، ‏«‏کٛ نَنْدِنَيْمِ يِمْٻٜ جَامَنُ طُعُمْ؟ ³²اٜ ٻٜ نَنْدِ اٜ سُکَحٛيْ نجٛوطِيکٛيْ ندٜرْ لُومٛ اٜ نٛدِّندِرَ اٜ مبِعَ، ‏‹‏مِنْ ندُودَنِيعٛنْ دُودَاندُ، اَمَّا اٛنْ نغَمَايِ؞ مِنْ مبٛيِ بٛ غٛطّٛ مَايِ، اَمَّا اٛنْ مبٛيَايِ؞›‏ ³³نغَمْ يَحَيَ غَطٛووٛ بَڤْتِسْمَ وَرِي ݧَامَتَا ݧَمْندُ يَرَتَا ندِيَمْ اِنَبٛجَمْ، اٛنْ مبِعِي، ‏‹‏اٜ مٛ وٛودِ غِنّٛلْ؞›‏ ³⁴ندٜنْ ٻِي نٜطّٛ وَرِي اٜ ݧَامَ اٜ يَرَ، اٛنْ مبِعِي، ‏‹‏رَا اٛعٛ، اٛ بٜىٰلَاطٛ اٛ جَرٛووٛ، حِغٛ جَٻٛوٻٜ شٜىٰدٜ لٜيْدِ اٜ غَطٛوٻٜ حَکّٜ؞›‏ ³⁵فُو اٜ نٛنْ، تٛکُّٻٜ لَاوٛلْ اَللَّه فُو اٜ ٻٜ کٛلَّ کَنْغٛلْ وٛنِ غٛونغَوٛلْ؞»‏

يٜىٰسُ اٜ ندٜرْ وُرٛ سِيمَنْ فَارِسَنْکٜىٰجٛ

³⁶غٛعٛتٛ ندٜرْ فَارِسَنْکٛعٜنْ وِعِ يٜىٰسُ اٜ يِطِ يٜىٰسُ يَحَ وُرٛ مُوطُمْ نغَمْ ٻٜ کِرْتٛو؞ اٛ يَحِ وُرٛ نغٛنْ اٛ جٛوطِي نغَمْ اٛ ݧَامَ ݧَمْندُ؞ ³⁷اٜ وٛودِ کَارُوَاجٛ اٜ غَرِيرِ ندِنْ، ندٜ اٛ نَنِ يٜىٰسُ اٜ حِرْتٛو اٜ وُرٛ فَارِسَنْکٜىٰجٛ اٛنْ، اٛ وَدِّ جٛلّٛيٜلْ حَيْرٜ بٛنْغٜلْ نغٜلْ نٜبَّمْ اُرٛوجَمْ؞ ³⁸اٛ دَرِي غَطَ يٜىٰسُ حَادٜ کٛيْطٜ مَاکٛ، اٜ مٛ وٛيَ، غٛنْطِ مَاکٛ فُطِّ سٛفْنُکِ کٛيْطٜ يٜىٰسُ، اٛ مٛيْتِرِطٜ غَاسَ حٛورٜ مَاکٛ اٛ مٜىٰمِرِطٜ حٛنْدُکٛ مَاکٛ اٛ مٛيْتَنِطٜ نٜبَّمْ اُرٛوجَمْ؞ ³⁹ندٜ فَارِسَنْکٜىٰجٛ اٛنْ يِعِ نٛنْ، اٛ وِعِ ندٜرْ ٻٜرْندٜ مَاکٛ، ‏«‏دَا نٜطّٛ اٛعٛ اٛ اَنَّبِيجٛ، دَا اٛ اَنْدَيْ طُمْ اِرِ مٛيٜ دٜبّٛ مٜىٰمَتَمٛ، دَا اٛ اَنْدَيْ اٛ غَطٛووٛ حَکّٜ؞»‏

⁴⁰يٜىٰسُ وِعِ فَارِسَنْکٜىٰجٛ اٛنْ، ‏«‏سِيمَنْ، اٜ وٛودِ کٛ مبِعَيْمَامِ؞»‏

اٛ وِعِمٛ، ‏«‏وِعُکَ مٛودِبّٛ!‏»‏

⁴¹يٜىٰسُ وِعِمٛ، ‏«‏اٜ وٛودِ يِمْٻٜ طِطٛ جَٻُٻٜ ݧَمَاندٜ شٜىٰدٜ تٛ غٛطّٛ کٛکّٛووٛ ݧَمَاندٜ؞ غٛعٛتٛ جَٻِ شٜىٰدٜ اَجُرْفَارِ 500، غٛعٛتٛ اٛنْ جَٻِ شٜىٰدٜ اَجُرْفَارِ 50؞ ⁴²وَلَا غٛودُطٛ شٜىٰدٜ ندٜرْ مَٻّٜ طٜ يٛٻِرْتَمٛ، نغَمْ نٛنْ اٛ يَافَنِيٻٜ ݧَمَاندٜ ندٜنْ؞ اٜ يِيکِ مَاطَ، مٛيٜ ندٜرْ مَٻّٜ ٻُرَتَ يِطُکِمٛ؟»‏

⁴³سِيمَنْ وِعِمٛ، ‏«‏اٜ مِ کَمّٛو مٛ اٛ يَافَنِي شٜىٰدٜ ٻُرْطٜ طُوطُکِ؞»‏

يٜىٰسُ وِعِمٛ، ‏«‏اَ وِعِي غٛونغَ؞»‏ ⁴⁴سٜيْ اٛ يٜىٰپِي دٜبّٛ اٛنْ اٛ وِعِ سِيمَنْ، ‏«‏اَ يِعِ دٜبّٛ اٛعٛ؟ مِ نَتِّي وُرٛ مَاطَ، اَ حٛکَّايِيَمْ ندِيَمْ لٛوتُمِ کٛيْطٜ اَمْ؞ اَمَّا دٜبّٛ اٛعٛ اٛ سٛفْنِرِي کٛيْطٜ اَمْ غٛنْطِ مَاکٛ اٛ مٛيْتِرِيطٜ غَاسَ حٛورٜ مَاکٛ؞ ⁴⁵اَ حٛوْنَايِيَمْ حٛوْنُکِ حِغَاکُ، اَمَّا دَغَ نَتّٛيْکِ اَمْ دٜبّٛ اٛعٛ حٛوْنِيَمْ بٛطُّمْ، اٛ وَطِ کَ لٛوتُکِ کٛيْطٜ اَمْ؞ ⁴⁶اَ مٛيْتَنَايِ حٛورٜ اَمْ نٜبَّمْ، اَمَّا کَنْکٛ اٛ مٛيْتَنِي کٛيْطٜ اَمْ نٜبَّمْ اُرٛوجَمْ؞ ⁴⁷نغَمْ نٛنْ اٜ مِ وِعُمَا، اٛ حٛلِّييَمْ يِدّٜ مَوْندٜ نغَمْ اٜ مٛ اَنْدِ اٛ يَافَنَامَ حَکّٜ طُطُّمْ؞ اَمَّا جَافَنَاطٛ سٜطَّ، يِدّٜ سٜطَّ حٛلَّتَ؞»‏

⁴⁸سٜيْ يٜىٰسُ وِعِ دٜبّٛ اٛنْ، ‏«‏اَ يَافَنَامَ حَکّٜىٰجِ مَاطَ؞»‏

⁴⁹ݧَمْدٛوٻٜ اٜ مَاکٛ ڤُطِّ مٜتُکِ حَکُّندٜ مَٻّٜ، اٜ مبِعَ، ‏«‏طُمْ مٛيٜ وٛنِ اٛعٛ، حَا حَکّٜ فُو اٜ مٛ يَافٛ؟»‏

⁵⁰يٜىٰسُ وِعِ دٜبّٛ اٛنْ، ‏«‏اَ حِسِي نغَمْ اَ حٛولَکٜيَمْ، يَحُ جَمْ؞»‏

رٜوْٻٜ بَلّٛوٻٜ يٜىٰسُ

¹غَطَ طٛنْ، يٜىٰسُ يَحِ غَرِيجٜ اٜ نغَرِحٛيْ ڤَمَرٛيْ فُو، اٜ وَعَجِنَ حَبَرُ بٜلْطُمْ دٛوْ لَامُ اَللَّه؞ تٛکُّٻٜمٛ سَڤّٛ اٜ طِطٛ اٜ نغٛنْدِ اٜ مَاکٛ، ²اٜ وٛٻّٜ رٜوْٻٜ بُرْتِنَنَاٻٜ غِنِّ اٜ جَمْطِتِنَاٻٜ دَغَ ݧَوُوجِ؞ کَمْٻٜ نغٛنِ مَرْيَامَ پِوٛيْطٛ مَغَدَلَ، مٛ غِنِّ جٛوٜىٰطِطِ مبُرْتِي ندٜرْ مُوطُمْ، ³اٜ يٛوَانَ، دٜبّٛ کُوجَ، اَرْدِيطٛ کُوٛوٻٜ وُرٛ حِرُدُسْ، اٜ سُجَانَ، اٜ وٛٻّٜ رٜوْٻٜ طُطْٻٜ، بَلّٛوٻٜٻٜ دَغَ ندٜرْ جَوْدِ مَٻّٜ؞

مِسَالُ دٛوْ دٜمٛووٛ

⁴يِمْٻٜ طُطْٻٜ نغَطِ کَ وَرْکِ تٛ يٜىٰسُ دَغَ غَرِيجٜ فٜىٰرٜ‑فٜىٰرٜ؞ ندٜ يِمْٻٜ طُطْٻٜ کَوْرِتِ، اٛ حٛکِّٻٜ مِسَالُ طُعُمْ، اٛ وِعِ،

⁵‏«‏غٛطّٛ دٜمٛووٛ يَحِ نغٜسَ نغَمْ سَاکَ اَوْدِ؞ اٜ مٛ ندٜرْ سَاکُکِ اَوْدِ ندِنْ، وٛنْدِ يَنِ دٛوْ طَتَلْ، ندِ يَاٻَا، شٛلِّ شُڤِّدِندِ؞ ⁶وٛنْدِ بٛو يَنِ ندٜرْ کَاپٜ، ندٜ ندِ فُطِ، ندِ يٛورِ نغَمْ ندِيَمْ حٜپَايِندِ؞ ⁷وٛنْدِ اَوْدِ بٛو يَنِ ندٜرْ غِعٜ، طٜ مَوْنِدِ اٜ مَيْرِ، طٜ طٜطِّندِ؞ ⁸اَمَّا وٛنْدِ اَوْدِ يَنِ دٛوْ لٜيْدِ مبٛنْدِ، ندِ مَوْنِ، ندِ وَطِ شَمّٜىٰجٜ؞ غَبّٜلْ غٛعٛ فُو وَطِ نغَبّٛيْ 100؞»‏

ندٜ يٜىٰسُ حٜىٰݧِ حٛکُّکِٻٜ مِسَالُ طُعُمْ، اٛ نٛدِّ اٜ سٜمْبٜ، اٛ وِعِ، ‏«‏غٛودُطٛ نٛڤِّ نَنُکِ فُو نَنَ!‏»‏

دَلِيلَ وَطُکِ مِسَالُ

⁹تٛکُّٻٜمٛ پَمِمٛ اٛ فَمْتِنَٻٜ مِسَالُ طُعُمْ؞ ¹⁰اٛ وِعِ، ‏«‏اٛنٛنْ اٛنْ کٛکَّامَ فَامُ سِرُّ لَامُ اَللَّه، اَمَّا وٛٻّٜ سٜيْ اٜ مِسَالُ طُعُمْ، نغَمْ

‏‹‏اٜ ٻٜ ندَارَ، اَمَّا ٻٜ نغِعَتَا؛

اٜ ٻٜ نَنَ، اَمَّا ٻٜ ڤَامَتَا؞›‏ »‏

يٜىٰسُ فَمْتِنِي مِسَالُ دٛوْ دٜمٛووٛ

¹¹اٛ وِعِ، ‏«‏رَا مَعَنَ مِسَالُ طُعُمْ:‏ اَوْدِ ندِنْ وٛنِ وٛلْدٜ اَللَّه؞ ¹²نجَنُندِ دٛوْ طَتَلْ وٛنِ نَنُٻٜ وٛلْدٜ اَللَّه، ندٜنْ شٜيْطَنْ وَرَ حٛشَّندٜ دَغَ ندٜرْ ٻٜرْطٜ مَٻّٜ، نغَمْ تٛع ٻٜ مبَاوَ جَٻُکِندٜ ٻٜ کِسَ؞ ¹³نجَنُندِ دٛوْ حَيْرٜ وٛنِ يِمْٻٜ جَٻُٻٜ وٛلْدٜ اَللَّه ندٜرْ بٜلْطُمْ ٻٜرْندٜ، اَمَّا ندٜ وَلَا طَطِ، ندٜ جٛوطَاکِ ندٜرْ ٻٜرْطٜ مَٻّٜ؞ ٻٜ نجَٻُندٜ نغَمْ شَرٜلْ سٜطَّ، اَمَّا ندٜ طُمْ فٛوندِٻٜ، ٻٜ نجٛوفِندٜ؞ ¹⁴اَوْدِ نجَنُندِ ندٜرْ غِعٜ بٛو وٛنِ يِمْٻٜ نَنُٻٜ وٛلْدٜ ندٜنْ، اَمَّا وَنَّارٜ، اٜ رِسْکُ، اٜ بٜلْطُمْ دُونِيَارُ ٻِطِّ ٻٜرْطٜ مَٻّٜ، نغَمْ نٛنْ ٻٜ مَوْنَايِ ندٜرْ طَتَلْ اَللَّه؞ ¹⁵اَمَّا اَوْدِ جَنُندِ دٛوْ لٜيْدِ مبٛنْدِ وٛنِ نَنُٻٜ وٛلْدٜ اَللَّه، ٻٜ نجٛغٛوندٜ ٻٜرْندٜ غٛعٛ، ندٜرْ مُݧَلْ ٻٜ تٛکَّندٜ حَا ٻٜ نغَطَ کٛ اَللَّه يِطِ؞

مِسَالُ دٛوْ فِتِلَارُ

¹⁶‏«‏وَلَا غَطَنَيْطٛ فِتِلَارُ حِيتٜ حِڤَّ تُمُّدٜ دٛوْ مَيْرُ کٛو رٜسَندُ لٜيْ لٜىٰسٛ؞ سٜيْ نِ اٛ رٜسَندُ دٛوْ دَنْکِ، نغَمْ ندُ يٜيْنَنٛو نَتُّطٛ فُو؞

¹⁷‏«‏نغَمْ وَلَا فِي شُوطِيطُمْ طُمْ سُورِتَتَاکٜ؞ نٛنْ بٛو وَلَا سِرُّ طُمْ اَنْدِتَتَاکٜ؞

¹⁸‏«‏نغَمْ نٛنْ ڤَامٜىٰ بٛطُّمْ نٛ نَنِرْتٛنْ؞ نغَمْ فُو غٛودُطٛ فَامُ دٛوْ لَامُ اَللَّه طُمْ ٻٜيْدَنَيْمٛ؞ اَمَّا مٛ وَلَا فَامُ دٛوْ لَامُ اَللَّه، حَا کٛ اٛ ݧُمَتَ اٜ مٛ وٛودِ طُمْ جَٻَيْطُمْ؞»‏

مِݧِرَاٻٜ يٜىٰسُ اٜ مَدُوجٛ مَاکٛ

¹⁹ندٜنْ مَدُوجٛ يٜىٰسُ اٜ مِݧِرَاٻٜ مَاکٛ نغَرِ تٛ مَاکٛ، اَمَّا ٻٜ کٜٻَايِ يٛتَّاکِ حَادٜ مَاکٛ نغَمْ يِمْٻٜ طُوطِي؞ ²⁰غٛطّٛ وِعِمٛ، ‏«‏مَدُوجٛ مَاطَ اٜ مِݧِرَاٻٜ مَاطَ اٜ ٻٜ تٛنْ ندَرِي يَاسِ، اٜ ٻٜ نغِطِ يِيکِمَ؞»‏ ²¹اَمَّا اٛ نٛوتِي، اٛ وِعِ، ‏«‏نَنٛوٻٜ وٛلْدٜ اَللَّه، نغَطَ کٛ ندٜ وِعِ، کَمْٻٜ نغٛنِ مَدُوجٛ اَمْ اٜ مِݧِرَاٻٜ اَمْ؞»‏

يٜىٰسُ دَرْنِي حٜنْدُ شٜمْبِنْدُ

²²وٛنْدٜ ݧَلْندٜ يٜىٰسُ نَتِّ کٛمِوَلْ، کَنْکٛ اٜ تٛکُّٻٜمٛ، اٛ وِعِٻٜ، ‏«‏اٜنْ کُولُ فٛنْغٛ مبٜىٰلَ؞»‏ سٜيْ ٻٜ ندِلِّ؞ ²³اٜ ٻٜ ندٜرْ حُولُکِ، يٜىٰسُ طَانِي؞ اِيٜىٰندٜ اٜ حٜنْدُ شٜمْبِنْدُ اُمّٛيِي دٛوْ مبٜىٰلَ نغَنْ، کٛمِوَلْ نغَلْ فُطِّ ݧٜطُکِ ندِيَمْ، ٻٜ ٻَدِي حَلْکُکِ؞ ²⁴ٻٜ ٻَدِّي يٜىٰسُ، ٻٜ ڤِنْدِنِمٛ، اٜ ٻٜ مبِعَ، ‏«‏مٛودِبّٛ، مٛودِبّٛ، اٜنْ کَلْکَيْ!‏»‏

اٛ اُمِّي، اٛ حَٻَنِ حٜنْدُ ندُنْ اٜ غٜىٰلٛوطِ ندِيَمْ طِنْ؞ کٛو طُمٜ دَرِي، دٜعِّتِ؞ ²⁵اٛ وِعِٻٜ، ‏«‏کٛ وَطِ اٛنْ کٛولَاکِيَمْ؟»‏

ٻٜ کُلِ، ٻٜ کَيْطِنِ، ٻٜ نغَطِ کَ مٜتُکِ حَکُّندٜ مَٻّٜ، اٜ ٻٜ مبِعَ، ‏«‏اٛعٛ طُمْ مٛيٜ؟ اٛ حَٻَنِي کٜنِ اٜ ندِيَمْ، اٜ طِ نغَطَ کٛ اٛ وِعِ!‏»‏

يٜىٰسُ يَمْطِتِنِ غٛودُطٛ غِنِّ

²⁶ٻٜ نجٛتِّي لٜيْدِ غَارَسِنْکٛعٜنْ نغٛنْدِ فٛنْغٛ مبٜىٰلَ غَلِيلِ؞ ²⁷ندٜ يٜىٰسُ وُرْتِي ندٜرْ کٛمِوَلْ، اٛ حَوْرِ اٜ نٜطّٛ غَرِيرِ ندِنْ غٛودُطٛ غِنِّ؞ طُمْ نٜىٰٻِي نٜطّٛ اٛنْ اٜ يَحَ ٻٛرْنَتَاکٛ، اٛ جٛوطَتَاکٛ ندٜرْ وُرٛ، سٜيْ ندٜرْ غٜنَالٜ؞ ²⁸ندٜ اٛ يِعِ يٜىٰسُ، اٛ يَنِ يٜىٰسٛ مَاکٛ، اٛ وُلِّ سٜمْبٜىٰ، اٛ وِعِ، ‏«‏وَيْيٛو!‏ کٛ وَنُّمَا اٜ اَمْ، يٜىٰسُ ٻِطّٛ اَللَّه جٛومُ مَنْغُ؟ اٜ مِ تٛرٛمَا، تَاع تٛرَّمْ؞»‏ ²⁹اٛ وِعُ نٛنْ نغَمْ يٜىٰسُ حَٻَنِي غِنّٛلْ نغٛلْ نغٛلْ وُرْتٛو ندٜرْ مَاکٛ؞ ندٜنْ مَا، نغٛلْ نٜىٰٻِ اٜ نغٛلْ نَنْغَمٛ؞ اٜ مٛ حَٻِّرٜىٰ ٻٛغِّ نجَمْندِ جُوطٜ اٜ کٛيْطٜ، اَمَّا اٜ مٛ تَپَ ٻٛغِّ طِنْ، نغٛلْ وَطَمٛ اٛ نَتَّ لَدّٜ؞

³⁰يٜىٰسُ پَمِمٛ، وِعِ، ‏«‏نٛ اِنْدٜ مَاطَ؟»‏

اٛ نٛوتِي اٛ وِعِ، ‏«‏اٜ مِ نٛدِّرٜىٰ طُطِّ،»‏ نغَمْ اٜ مٛ وٛودِ غِنِّ طُطِّ؞ ³¹طِ نغَطِ کَ تٛرَاکِ يٜىٰسُ تٛع اٛ وِعَ طِ نَتَّ نغَيْکَ کَلُّکَ لُغُّکَ؞

³²حَادٜ طٛنْ اٜ وٛودِ اٛرْندٜ اَلَدٜىٰجِ طُطِّ اٜ ندُرَ دٛوْ پٛلْدٜ؞ طِ تٛرِي يٜىٰسُ اَلَطِ طِ نَتّٛيِ ندٜرْ اَلَدٜىٰجِ طِنْ؞ سٜيْ اٛ اَلِطِ؞ ³³طِ مبُرْتِي ندٜرْ نٜطّٛ اٛنْ، طِ نَتّٛيِ اٛرْندٜ اَلَدٜىٰجِ طِنْ؞ اٛرْندٜ ندٜنْ فُو ݧَارِ جِڤّٛيِي دَغَ دٛوْ پٛلْدٜ ندٜنْ، يَنِ ندٜرْ مبٜىٰلَ، ندِيَمْ ݧَامِطِ؞

³⁴ندٜ وٛيْنَاٻٜ اَلَدٜىٰجِ طِنْ نغِعِ نٛنْ، ٻٜ ندٛغِّ، ٻٜ مبِعٛيِکَ يِمْٻٜ غَرِيرِ اٜ يِمْٻٜ نغَرِحٛيْ؞ ³⁵سٜيْ يِمْٻٜ ٻٜنْ نجَحِ نغِعٛيَ کٛ فٛفِ؞ ندٜ ٻٜ نغَرِ تٛ يٜىٰسُ، ٻٜ تَوِ بُرْتِنَنَاطٛ غِنِّ اٛنْ اٜ جٛوطِي حَادٜ يٜىٰسُ، اٜ ٻٛرْنِي، اٜ مٛ ندٜرْ حَکِّيلٛ مَاکٛ؞ کٛو مٛيٜ مَٻّٜ حُلِ؞ ³⁶غِعُٻٜ کٛ وَطِ مبِعِ يِمْٻٜ نٛ غٛودُنٛوطٛ غِنِّ اٛنْ يَمْطِتِنِرَا؞ ³⁷يِمْٻٜ لٜيْدِ غَارَسِنْ فُو تٛرِي يٜىٰسُ اَلَنَٻٜ لٜيْدِ مَٻّٜ، نغَمْ کُلٛلْ مَنْغٛلْ نَنْغِيٻٜ؞ نغَمْ مَاجُمْ اٛ نَتِّ کٛمِوَلْ اٛ سٛعّٛ؞ ³⁸نٜطّٛ بُرْتِنَنَاطٛ غِنِّ اٛنْ تٛرِي يٜىٰسُ نغَمْ اٛ دِلِّدَ اٜ مَاکٛ، اَمَّا اٛ سٛعِّمٛ، اٛ وِعِ، ³⁹‏«‏سٛعَّ وُرٛ مَاطَ، مبِعَا فِي مَوْطُمْ طُمْ اَللَّه وَطَنْمَا؞»‏

سٜيْ نٜطّٛ اٛنْ سٛعِّي اٜ وِعَ يِمْٻٜ غَرِيرِ ندِنْ فِي مَوْطُمْ طُمْ يٜىٰسُ وَطَنِمٛ؞

اُمِّنْکِ ٻِي جَايِرُسْ اٜ يَمْطِنْکِ دٜبّٛ

⁴⁰ندٜ يٜىٰسُ سٛعِّي، کَوْرُتُٻٜ نجَٻِّيمٛ، نغَمْ ٻٜ فُو ٻٜ کَاٻِي ٻٜ نغِعَمٛ؞ ⁴¹سٜيْ غٛطّٛ بِعٜتٜىٰطٛ جَايِرُسْ، اَرْدِيطٛ سُودُ دٛعَارٜ وَرِ، دِشِّي يٜىٰسٛ يٜىٰسُ، تٛرِيمٛ اٛ يَحَ وُرٛ مَاکٛ، ⁴²نغَمْ اٜ مٛ وٛودِ ٻِطّٛ غٛعٛتٛ سُرْبَاجٛ، دُوٻِ مَاکٛ نغَطَيْ سَڤّٛ اٜ طِطِ، اٛ ٻَدَکٜ مَيْدٜ؞

يٜىٰسُ اٜ يَحَ، يِمْٻٜ طُطْٻٜ اٜ تٛکِّمٛ حَا اٜ ٻٜ ٻِطَّمٛ؞ ⁴³اٜ وٛودِ غٛطّٛ دٜبّٛ غَطُطٛ دُوٻِ سَڤّٛ اٜ طِطِ اٜ تٛرّٛدٛو اٜ رُفُکِ پِيپَمْ؞ اٛ مَجِّنِي فُو جَوْدِ مَاکٛ تٛ ݧَوْندٛوٻٜ، اَمَّا وَلَا بَوْطٛ يَمْطِنْکِمٛ؞ ⁴⁴اٛ پِوٛيِ غَطَ يٜىٰسُ، اٛ مٜىٰمِ شِلْمبِ تٛغّٛورٜ مَاکٛ؞ سٜيْ طٛنْ اٜ طٛنْ رُفُکِ پِيپَمْ طَمْ دَرِي؞ ⁴⁵يٜىٰسُ وِعِ، ‏«‏مٛيٜ مٜىٰمِيَمْ؟»‏

کٛو مٛيٜ وِعِ نَاع طُمْ کَنُمْ؞ بِيتُرُسْ بٛو وِعِمٛ، ‏«‏مٛودِبّٛ، حَکُّندٜ يِمْٻٜ طُطْٻٜ نغٛنْطَا، اٜ ٻٜ ٻِطُّمَا؞»‏

⁴⁶اَمَّا يٜىٰسُ وِعِ، ‏«‏غٛطّٛ مٜىٰمِييَمْ؞ مِ نَنِي بَوْطٜ مبُرْتَکٜ ندٜرْ اَمْ؞»‏ ⁴⁷ندٜ دٜبّٛ اٛنْ اَنْدِتِ سُوطَتَاکٛ، وَرِ اٜ دِوْنَ، دِشِّي يٜىٰسٛ مَاکٛ؞ يٜىٰسٛ يِمْٻٜ فُو اٛ وِعِ کٛ وَطِ اٛ مٜىٰمِمٛ، اٜ نٛ اٛ يَمْطِتِرِ طٛنْ اٜ طٛنْ؞ ⁴⁸يٜىٰسُ وِعِمٛ، ‏«‏بَنْدِرَاوٛ، حٛولَارٜ مَاطَ يَمْطِتِنِيمَ؞ نجِڤّٛطَا جَمْ؞»‏

⁴⁹يٜىٰسُ اٜ مٜتَ، سٜيْ غٛطّٛ وَرٛيِ دَغَ وُرٛ جَايِرُسْ اَرْدِيطٛ سُودُ دٛعَارٜ، وِعِمٛ، ‏«‏جَايِرُسْ، ٻِطّٛ مَاطَ مَايِ؞ تَاع وَنُّ مٛودِبّٛ کَدِنْ؞»‏

⁵⁰اَمَّا ندٜ يٜىٰسُ نَنِ نٛنْ، وِعِ جَايِرُسْ، ‏«‏تَاع حُلُ، حٛولَيَمْ تَنْ، ندٜنْ ٻِطّٛ مَاطَ اُمّٛتٛ؞»‏

⁵¹ندٜ اٛ يٛتِّي وُرٛ جَايِرُسْ، اٛ حَطِ کٛو مٛيٜ نَتِّدَ اٜ مَاکٛ، سٜيْ بِيتُرُسْ، اٜ يَحَيَ، اٜ يَاکُبُ، اٜ ݧَاکٛ سُرْبَاجٛ اٛنْ اٜ مَدُوجٛ مَاکٛ؞ ⁵²کٛو مٛيٜ اٜ وٛيَ اٜ وُلَّ سٜمْبٜىٰ؞ اَمَّا يٜىٰسُ وِعِٻٜ، ‏«‏اَلٜىٰ وٛيُکِ؞ اٛ مَايَايِ، اٛ طَانِ تَنْ؞»‏

⁵³سٜيْ ٻٜ نجَلِمٛ نغَمْ اٜ ٻٜ اَنْدِ سُرْبَاجٛ اٛنْ مَايِ؞ ⁵⁴اَمَّا يٜىٰسُ جٛغِي جُنْغٛ مَيْطٛ اٛنْ، نٛدِّمٛ، وِعِ، ‏«‏سُرْبَاجٛ، اُمَّ!‏»‏ ⁵⁵يٛنْکِ سُرْبَاجٛ اٛنْ وَرْتِ، طٛنْ اٜ طٛنْ اٛ اُمِّي؞ ندٜنْ يٜىٰسُ وِعِٻٜ ٻٜ کٛکَّمٛ کٛ اٛ ݧَامَتَ؞ ⁵⁶دَݧٛوٻٜ سُرْبَاجٛ اٛنْ کَيْطِنِ، اَمَّا اٛ وِعِٻٜ تٛع ٻٜ مبِعَکَ کٛو مٛيٜ؞

يٜىٰسُ لِلِي تٛکُّٻٜمٛ سَڤّٛ اٜ طِطٛ

¹غَطَ يٜىٰسُ نٛدِّي تٛکُّٻٜمٛ سَڤّٛ اٜ طِطٛ، اٛ حٛکِّٻٜ بَوْطٜ اٜ لَامُ دٛوْ وُرْتِنْکِ غِنِّ اٜ يَمْطِنْکِ ݧَوُوجِ؞ ²اٛ لِلِٻٜ ٻٜ نغَعَجِنَ لَامُ اَللَّه، ٻٜ نجَمْطِتِنَ ٻٜ نجَمْطَا؞ ³اٛ وِعِٻٜ، ‏«‏تٛع اٛنْ کٛشُّ کٛو طُمٜ نغَمْ يَادُ، کٛو سَوْرُ، کٛو جَکَارٜ، کٛو ݧَمْندُ، کٛو شٜىٰدٜ، کٛو تٛغّٛوجٜ طِطِ؞ ⁴وُرٛ نغٛ اَرْتُطٛنْ نَتُّکِ فُو، نجٛوطٜىٰ طٛنْ نَا اٛنْ اَلِي غَرِيرِ ندِنْ؞ ⁵تٛ يِمْٻٜ ندٜرْ غَرِيرِ ندِنْ نجَٻَّاکِعٛنْ، اَلٜىٰ غَرِيرِ ندِنْ، ڤِطّٜىٰ سٛلَّارٜ کٛيْطٜ مٛوطٛنْ؞ کَنْجُمْ حٛلَّتَ ٻٜ نغَطِي حَکّٜ؞»‏

⁶سٜيْ ٻٜ ندِلِّ، ٻٜ نجَحِ نغَرِحٛيْ فٜىٰرٜ‑فٜىٰرٜ، اٜ ٻٜ نغَعَجِنَ حَبَرُ بٜلْطُمْ، اٜ ٻٜ نجَمْطِتِنَ يِمْٻٜ کٛو تٛيٜ؞

حِرُدُسْ وَنِّي

⁷ندٜ حِرُدُسْ، لَامِيطٛ لٜيْدِ غَلِيلِ، نَنِ کٛو طُمٜ کٛ وَطَتَ، اٛ وَنِّي نغَمْ وٛٻّٜ اٜ مبِعَ طُمْ يَحَيَ غَطٛووٛ بَڤْتِسْمَ اُمِّي دَغَ مَيْدٜ؞ ⁸وٛٻّٜ بٛو اٜ مبِعَ طُمْ اَنَّبِ اِلِيَ وَنْغِ، اَمَّا وٛٻّٜ کَدِمَا اٜ مبِعَ طُمْ غٛعٛتٛ ندٜرْ اَنَّبٛعٜنْ ندٜنّٛ اُمِّي؞ ⁹حِرُدُسْ وِعِ، ‏«‏مِ اِتَّنِي يَحَيَ حٛورٜ؞ طُمْ مٛيٜ کَدِنْ وٛنِ اٛعٛ، مٛ نَنَيْمِ فِي طُعُمْ دٛوْ مُوطُمْ؟»‏ ندٜنْ اٛ طَٻِّتِ نٛ اٛ يِعِرْتَ يٜىٰسُ؞

يٜىٰسُ ݧَمْنِي يِمْٻٜ 5,000

¹⁰ندٜ لِلَاٻٜ نغَرْتِ، ٻٜ مبِعِ يٜىٰسُ کٛ ٻٜ نغَطِ؞ سٜيْ اٛ حٛشِّٻٜ کَمْٻٜ تَنْ يَاکِ حَادٜ غَرِيرِ بِعٜتٜىٰندِ بٜتَسَيْدَ؞ ¹¹اَمَّا ندٜ يِمْٻٜ طُطْٻٜ حَوْرُتُٻٜ نغِعِ نٛنْ، ٻٜ تٛکِّمٛ؞ اٛ جَٻِّيٻٜ، اٛ مٜتَنِٻٜ دٛوْ لَامُ اَللَّه؞ اٛ يَمْطِتِنِ غِطْٻٜ يَمْطِتِنٜىٰکِ؞

¹²ندٜ نَانغٜ حِيرِ، تٛکُّٻٜمٛ سَڤّٛ اٜ طِطٛ نغَرِ تٛ مَاکٛ، مبِعِ، ‏«‏وِعُ حَوْرُتُٻٜ ندِلَّ نغَرِحٛيْ اٜ غُرٜ غٛنْطٜ حَادٜ نغَمْ ٻٜ کٜٻَ کٛ ٻٜ ݧَامَتَ اٜ تٛ ٻٜ مبَالَتَ، نغَمْ طٛعٛ طُمْ لَدّٜ؞»‏

¹³سٜيْ اٛ وِعِٻٜ، ‏«‏اٛنٛنْ کٛکّٜىٰٻٜ کٛ ٻٜ ݧَامَتَ؞»‏

اَمَّا ٻٜ مبِعِمٛ، ‏«‏بُرٛودِ جٛوِ اٜ لِپِّ طِطِ تَنْ مِنْ نغٛودِ طٛعٛ؞ سٜيْ نِ مِنْ نجَحَ، مِنْ شٛودَ ݧَمْندُ نغَمْ يِمْٻٜ ٻٜعٜ فُو؞»‏ ¹⁴وٛرْٻٜ تَنْ ندٜرْ حَوْرُتُٻٜ ٻٜنْ ٻَدَکٜ 5,000؞

سٜيْ يٜىٰسُ وِعِ تٛکُّٻٜمٛ، ‏«‏مبِعٜىٰٻٜ ٻٜ نجٛوطٛ مٛٻْدٜ يِمْٻٜ 50 ‑ 50 کٛو تٛيٜ؞»‏

¹⁵سٜيْ ٻٜ نغَطِ نٛنْ، کٛو مٛيٜ جٛوطِي؞ ¹⁶يٜىٰسُ حٛشِّ بُرٛودِ جٛوِ طِنْ اٜ لِپِّ طِطِ طِنْ، اٛ رَارِ دٛوْ، اٛ يٜتِّ اَللَّه، اٛ سٜنْدِطُمْ، اٛ حٛکِّ تٛکُّٻٜمٛ نغٜىٰدَنَ حَوْرُتُٻٜ؞ ¹⁷ٻٜ فُو ٻٜ ݧَامِ، ٻٜ کَارِ؞ تٛکُّٻٜمٛ مٛٻْتِ کٛ حٛرِي کٛ وَطِ کٛنْدٛوجٜ سَڤّٛ اٜ طِطِ؞

يٜىٰسُ وٛنِ اَلْمَسِيحُ

¹⁸وٛنْدٜ ݧَلْندٜ يٜىٰسُ اٜ وَطَ دٛعَارٜ، کَنُمْ تَنْ، تٛکُّٻٜمٛ اٜ حَادٜ مَاکٛ؞ اٛ پَمِٻٜ، اٛ وِعِ، ‏«‏مٛيٜ يِمْٻٜ مبِعَتَيَمْ؟»‏

¹⁹ٻٜ نٛوتِي ٻٜ مبِعِ، ‏«‏وٛٻّٜ اٜ مبِعَ اَ يَحَيَ غَطٛووٛ بَڤْتِسْمَ؞ وٛٻّٜ بٛو اٜ مبِعَ اَ اَنَّبِ اِلِيَ؞ ندٜنْ وٛٻّٜ کَدِمَا اٜ مبِعَ غٛعٛتٛ ندٜرْ اَنَّبٛعٜنْ ندٜنّٛ اُمِّي؞»‏

²⁰اٛ وِعِٻٜ، ‏«‏اَمَّا اٛنٛنْ، مٛيٜ مبِعٛتٛنْيَمْ؟»‏

سٜيْ بِيتُرُسْ نٛوتِي، وِعِ، ‏«‏اَنْ وٛنِ اَلْمَسِيحُ مٛ اَللَّه!‏»‏

يٜىٰسُ وِعِي نٛ مَيْرَتَ

²¹اَمَّا يٜىٰسُ حَطِٻٜ تٛع ٻٜ مبِعَکَ کٛو مٛيٜ؞ ²²ندٜنْ اٛ وِعِ، ‏«‏دٛولٜ ٻِي نٜطّٛ يَرَ بٛنٜ طُطُّمْ؞ مَوْٻٜ يِمْٻٜ اٜ مَوْٻٜ اَرْدِيٻٜ دِينَ اٜ مٛودِٻّٜ اَتَّوْرَ نغَݧَمٛ، ندٜنْ اٛ وَرٜىٰ؞ ندٜرْ ݧَلْندٜ تَتَوْرٜ بٛو طُمْ اُمِّنَيْمٛ؞»‏

²³سٜيْ اٛ وِعِٻٜ ٻٜ فُو، ‏«‏فُو غِطّٛ وَرْتَ تٛکُّطٛيَمْ، تٛع وَطَ کٛ حٛورٜ مُوطُمْ يِطِ وَطُکِ تَنْ، اَمَّا دٛولٜ حٛشَّ غَافَانغَلْ مُوطُمْ کٛو ندٜيٜ تٛکَّيَمْ؞ ²⁴نغَمْ فُو غِطّٛ حِسْنُکِ يٛنْکِ مُوطُمْ اٛ دُلَّيْکِ؞ اَمَّا فُو دُلَّيْطٛ يٛنْکِ مُوطُمْ نغَمْ اَمْ اٛ حِسْنَيْکِ؞ ²⁵کٛ طُمْ نَفَنْتَ نٜطّٛ، تٛ اٛ حٜٻِي دُونِيَارُ فُو، اَمَّا اٛ مَجِّنِي حٛورٜ مَاکٛ کٛو اٛ حَلْکِ؟ ²⁶کٛو مٛيٜ غَݧُطٛيَمْ، مِنْ ٻِي نٜطّٛ اٜ بٛلِيطٜ اَمْ، مِ وَݧَيْمٛ تٛ مِ وَرْتٛيِي ندٜرْ تٜدُّنغَلْ اَمْ، اٜ ندٜرْ تٜدُّنغَلْ ݧَاکٛ اَمْ مٛ دٛوْ، اٜ مَلَاعِکَعٜنْ مَاکٛ شٜنِيٻٜ؞ ²⁷اٜ مِ وِعَعٛنْ غٛونغَ، اٜ وٛودِ وٛٻّٜ دَرِيٻٜ طٛعٛ ٻٜ مَايَتَا نَا ٻٜ نغِعِي لَامُ اَللَّه؞»‏

يٜىٰسُ وَنْغِي ندٜرْ مَنْغُ مُوطُمْ

²⁸بَلْطٜ جٛوٜىٰتَتِ غَطَ يٜىٰسُ وِعِٻٜ بٛلِيطٜ طٜنْ، اٛ پٜىٰݝِ دٛوْ حٛشّٜىٰرٜ نغَمْ اٛ وَطَ دٛعَارٜ؞ بِيتُرُسْ، اٜ يَحَيَ، اٜ يَاکُبُ اٜ وٛنْدِ اٜ مَاکٛ؞ ²⁹اٜ مٛ ندٜرْ دٛعَارٜ سٜيْ يٜىٰسٛ مَاکٛ اٜ کٛلْتٜ مَاکٛ نغَرْتِ دَنٜىٰجٜ تَرْ؞ ³⁰طٛنْ اٜ طٛنْ سٜيْ رَا، اَنَّبٛعٜنْ طِطٛ، مُوسَ اٜ اِلِيَ، وَنْغِ ³¹ندٜرْ تٜدُّنغَلْ، اٜ ٻٜ مٜدَّ اٜ مَاکٛ؞ ٻٜ مٜدِّ دٛوْ مَيْدٜ مَاکٛ ندٜ تَبِّتَيْ نَاع کٛ نٜىٰٻِ ندٜرْ اُرُشَلِيمَ؞ ³²بِيتُرُسْ اٜ غٛنْدُٻٜ اٜ مُوطُمْ طَانَکٜ، شَرٜلْ کٛ ٻٜ کُيْلِي، ٻٜ نغِعِ تٜدُّنغَلْ مَاکٛ اٜ يِمْٻٜ طِطٛ دَرٛدِيٻٜ اٜ مَاکٛ؞ ³³شَرٜلْ کٛ اَنَّبٛعٜنْ ٻٜنْ اَلَتَ يٜىٰسُ، بِيتُرُسْ وِعِمٛ، ‏«‏مٛودِبّٛ، وٛنْکِ اَمِنْ طٛعٛ اٜ وٛوطِ؞ اَلْ مِنْ ݧِٻَ شُوطِ تَتِ، وٛعٛيْرُ ندُ مَاطَ، وٛعٛيْرُ ندُ مُوسَ، ندٜنْ وٛعٛيْرُ ندُ اِلِيَ؞»‏ اَمَّا بِيتُرُسْ اَنْدَا کٛ وِعَتَ؞

³⁴اٜ مٛ ندٜرْ مٜتُکِ، سٜيْ ندُولَ وَنْغِ، سُدِّٻٜ، ٻٜ کُلْتٛرِ؞ ³⁵ٻٜ نَنِ حٛنٛنْدٜ اَللَّه دَغَ ندٜرْ ندُولَ نغَنْ وِعِ، ‏«‏اٛعٛ وٛنِ ٻِطّٛ اَمْ مٛ شُٻُمِ؞ نَنٜىٰ کٛ اٛ وِعَتَعٛنْ؞»‏

³⁶ندٜ حٛنٛنْدٜ ندٜنْ دٜعِّتِ، ٻٜ نغِعِ يٜىٰسُ کَنُمْ تَنْ؞ تٛکُّٻٜمٛ اَلِطُمْ حَکُّندٜ مَٻّٜ، ندٜرْ ݧَلْطٜ طٜنْ ٻٜ مبِعَايِ غٛطّٛ کٛ ٻٜ نغِعِ؞

يٜىٰسُ يَمْطِتِنِي ٻِطّٛ غٛودُطٛ غِنّٛلْ

³⁷ندٜ وٜىٰتِ، ٻٜ نجِڤّٛيِي دَغَ دٛوْ حٛشّٜىٰرٜ ندٜنْ، کَوْرُتُٻٜ طُطْٻٜ تَوِمٛ؞ ³⁸ندٜرْ کَوْرُتُٻٜ ٻٜنْ غٛطّٛ غٛرْکٛ نٛدِّ اٜ سٜمْبٜ، وِعِ، ‏«‏مٛودِبّٛ، اٜ مِ تٛرٛمَا، رَارُ ٻِطّٛ اَمْ غٛرْکٛ نغَمْ کَنْکٛ تَنْ نغٛودُمِ؞ ³⁹غِنّٛلْ نٜىٰٻِي اٜ نَنْغَمٛ؞ تٛ نغٛلْ نَنْغِيمٛ، اٛ فُطَّ وُلُّکِ، اٛ وَطَ کَ دِوْنُکِ، نغُوفٛ نغَطَ کَ وُرْتٛيَاکِ ندٜرْ حٛنْدُکٛ مَاکٛ، نغٛلْ اَلَتَامٛ نَا نغٛلْ نَوْنِيمٛ؞ ⁴⁰مِ تٛرَکٜ تٛکُّٻٜمَ مبُرْتِنَنغٛلْ، اَمَّا ٻٜ مبَاوَايِ؞»‏

⁴¹يٜىٰسُ نٛوتِي، وِعِ، ‏«‏اٛنٛنْ يِمْٻٜ جَامَنُ طُعُمْ کَلُّطُمْ اٛنْ کٛولَاکِيَمْ، حَا ندٜيٜ نجٛوطٛدٛتٛومِ اٜ مٛوطٛنْ اٜ مِ مُݧِدَ اٜ مٛوطٛنْ؟ وَدُّ ٻِطّٛ مَاطَ طٛعٛ؞»‏

⁴²ٻِطّٛ اٛنْ اٜ وَرٛيَ، سٜيْ غِنّٛلْ نغٛلْ دٛعِّمٛ، اٜ مٛ دِوْنَ؞ اَمَّا يٜىٰسُ حَٻَنِ غِنّٛلْ نغٛلْ، يَمْطِتِنِ سُکَ اٛنْ، حٛکِّتِمٛ ݧَاکٛ مَاکٛ؞ ⁴³وٛنْٻٜ طٛنْ فُو کَيْطِنِ اٜ مَنْغُ اَللَّه؞

يٜىٰسُ فُطِّتِ وِعِ ٻَدَکٜ مَايُکِ

اَمَّا اٜ ٻٜ ندٜرْ حَيْطِنْکِ دٛوْ کٛ اٛ وَطِ، يٜىٰسُ وِعِ تٛکُّٻٜمٛ، ⁴⁴‏«‏ڤَامٜىٰ بٛطُّمْ نَنٛنْ کٛ مبِعَيْمِعٛنْ!‏ طُمْ حٛکِّتِرَيْ ٻِي نٜطّٛ ندٜرْ جُوطٜ يِمْٻٜ؞»‏ ⁴⁵اَمَّا ٻٜ ڤَامَايِ کٛ اٛ وِعِٻٜ؞ طُمْ سُوطَنَکٜٻٜ نغَمْ تٛع ٻٜ ڤَامَطُمْ، ندٜنْ اٜ ٻٜ کُلَ پَمُکِمٛ دٛوْ مَاجُمْ؞

مٛيٜ ٻُرِ مَنْغُ؟

⁴⁶ندٜنْ غٜدِّ اُمِّي حَکُّندٜ تٛکُّٻٜمٛ دٛوْ طُمْ مٛيٜ ٻُرِ مَنْغُ ندٜرْ مَٻّٜ؞ ⁴⁷اَمَّا يٜىٰسُ حٜٻْتِ کٛ وٛنِ ندٜرْ ٻٜرْطٜ مَٻّٜ، سٜيْ اٛ حٛشِّ سُکَيٜلْ ڤَمَرٜلْ، اٛ دَرْنِنغٜلْ حَادٜ مَاکٛ؞ ⁴⁸ندٜنْ اٛ وِعِٻٜ، ‏«‏کٛو مٛيٜ جَٻُطٛ سُکَيٜلْ ڤَمَرٜلْ بٛ نغٜعٜلْ ندٜرْ اِنْدٜ اَمْ جَٻِييَمْ؞ ندٜنْ کٛو مٛيٜ جَٻُطٛيَمْ جَٻِي لِلٛيْطٛيَمْ؞ نغَمْ لٜسْتِنْطٛ حٛورٜ مُوطُمْ فُو ندٜرْ مٛوطٛنْ، کَنُمْ وٛنِ مَوْطٛ؞»‏

مٛ وَݧَايِعٛنْ فُو اٜ وٛنْدِ اٜ مٛوطٛنْ

⁴⁹يَحَيَ نٛوتِي، وِعِ، ‏«‏مٛودِبّٛ، مِنْ نغِعِي غٛطّٛ اٜ وُرْتِنَ غِنِّ ندٜرْ اِنْدٜ مَاطَ، مِنْ کَطِمٛ نغَمْ کَنْکٛ نَاع اٛ تٛکُّطٛعٜنْ؞»‏

⁵⁰اَمَّا يٜىٰسُ وِعِمٛ، ‏«‏تٛع اٛنْ کَطُمٛ، نغَمْ فُو مٛ وَݧَايِعٛنْ اٜ وٛنْدِ اٜ مٛوطٛنْ؞»‏

يِمْٻٜ غَرِيرِ سَمَارِيَ نغَݧِي يٜىٰسُ

⁵¹ندٜ شَرٜلْ ٻَدِي نغَمْ طُمْ حٛشَّمٛ يَاکِ دٛوْ، يٜىٰسُ اٜ حٛورٜ مُوطُمْ سُٻِ يَحُکِ اُرُشَلِيمَ؞ ⁵²سٜيْ اٛ لِلِ لِلَاٻٜ يٜىٰسٛ مَاکٛ، ٻٜ نجَحَ ندٜرْ غَرِيٜلْ سَمَارِيَنْکٛعٜنْ نغَمْ ٻٜ شِرْيٛو کٛو طُمٜ نغَمْ غَرٛلْ مَاکٛ؞ ⁵³اَمَّا يِمْٻٜ غَرِيٜلْ نغٜلْ نجَٻَايِمٛ نغَمْ ٻٜ کٜٻْتِي اُرُشَلِيمَ اٛ فَعِ؞ ⁵⁴ندٜ تٛکُّٻٜمٛ يَاکُبُ اٜ يَحَيَ نغِعِ نٛنْ، ٻٜ مبِعِ، ‏«‏مٛودِبّٛ، اَ يِطِ مِنْ نٛدَّ حِيتٜ دَغَ دٛوْ وَرَ حَلْکَٻٜ؟»‏

⁵⁵اَمَّا يٜىٰسُ وَيْلِتِي حَٻَنِٻٜ، ⁵⁶سٜيْ ٻٜ نجَحِ وٛنْغٜلْ غَرِيٜلْ؞

تٛکُّکِ يٜىٰسُ

⁵⁷اٜ ٻٜ ندٜرْ يَادُ دٛوْ طَتَلْ، سٜيْ غٛطّٛ وِعِمٛ، ‏«‏مِ تٛکّٜتٜ تٛ نجَحَتَا فُو؞»‏

⁵⁸يٜىٰسُ وِعِمٛ، ‏«‏دِلَاجِ اٜ نغٛودِ غَيْطٜ، شٛلِّ اٜ نغٛودِ شَٻّٜ، اَمَّا ٻِي نٜطّٛ وَلَا تٛ فُکّٛتٛو؞»‏

⁵⁹اٛ وِعِ غٛطّٛ نٜطّٛ، ‏«‏تٛکَّمْ؞»‏

اَمَّا نٜطّٛ اٛنْ وِعِمٛ، ‏«‏مٛودِبّٛ، اَلْ مِ يَحَ، مِ اُوٛيَ ݧَاکٛ اَمْ تَوْ؞»‏

⁶⁰اَمَّا يٜىٰسُ وِعِمٛ، ‏«‏اَلُ مَيْٻٜ اُوَ مَيْٻٜ مُعّٜنْ، اَمَّا اَنْ، يَحُ، نغَعَجِنَا لَامُ اَللَّه؞»‏

⁶¹غٛطّٛ کَدِمَا وِعِ، ‏«‏مِ تٛکّٜتٜ، مٛودِبّٛ، اَمَّا اَلْ مِ يَحَ مِ پَمَ ٻٜ وُرٛ اَمْ تَوْ؞»‏

⁶²اَمَّا يٜىٰسُ وِعِمٛ، ‏«‏کٛو مٛيٜ جٛغِيطٛ رٜمٜرْغٛ فُطِّ رٜمُکِ اٜ يٜىٰپٛو غَطَ، وَلَا کٛ نَفِ ندٜرْ کُوغَلْ اَللَّه؞»‏

يٜىٰسُ لِلِي تٛکُّٻٜمٛ 27

¹غَطَ مَاجُمْ يٜىٰسُ سُٻِ وٛٻّٜ کَمْٻٜ 27، ندٜنْ اٛ لِلِٻٜ طِطٛ‑طِطٛ، ٻٜ اَرْتَمٛ يَاکِ کٛو ندِيٜ غَرِيرِ اٜ وِغٜىٰرٜ تٛ اٛ يِطِ يَحُکِ فُو؞ ²اٛ وِعِٻٜ، ‏«‏غٜسٜ ٻٜنْدُطٜ اٜ طُوطِ، اَمَّا حُوٛوٻٜ طُوطَا؞ تٛرٜىٰ جٛومُ غٜسٜ طٜنْ لِلٛيَ حُوٛوٻٜ ندٜرْ غٜسٜ مَاکٛ؞ ³نجَحٜىٰ؞ مِ لِلِيعٛنْ تٛ يِمْٻٜ بٛنٛ مبَالٛيْ حَکُّندٜ شَافَالِ؞ ⁴تٛع اٛنْ نجَادُ اٜ جَکَارٜ شٜىٰدٜ کٛو جَکَارٜ لِمْشٜ، کٛو ڤَطٜ، ندٜنْ تٛع اٛنْ کٛوْنُ غٛطّٛ کٛوْنٛلْ جُوتُنغٛلْ دٛوْ طَتَلْ؞ ⁵وُرٛ نغٛ نَتُّطٛنْ فُو، ڤُطّٜىٰ وِعُکِ، ‏‹‏اَللَّه حٛکَّ وُرٛ نغٛعٛ جَمْ!‏›‏ ⁶تٛ اٜ وٛودِ نٜطّٛ غِطّٛ جَمْ ندٜرْ وُرٛ نغٛنْ، بَرْکَ مٛوطٛنْ جٛوطٛتٛ دٛوْ مَاکٛ، اَمَّا تٛ وَلَا، طُمْ وَرْتَيْ تٛ مٛوطٛنْ؞ ⁷نجٛوطٜىٰ ندٜرْ وُرٛ نغٛ طُمْ جَٻِّيعٛنْ، ݧَامٜىٰ، نجَرٜىٰ کٛو طُمٜ کٛ ٻٜ کٛکِّعٛنْ، نغَمْ کُوٛووٛ اٜ حَانِ يٛٻٜىٰکِ؞ تٛع اٛنْ کَکِّتٛ دَغَ وُرٛ يَاکِ وُرٛ؞ ⁸فُو غَرِيرِ ندِ نَتُّطٛنْ، تٛ يِمْٻٜ مَيْرِ نجَٻَّکٜعٛنْ، ݧَامٜىٰ کٛ طُمْ رٜسِ يٜىٰسٛ مٛوطٛنْ؞ ⁹نجَمْطِنٜىٰ ݧَوْٻٜ وٛنْٻٜ ندٜرْ غَرِيرِ ندِنْ، ندٜنْ مبِعٛنْٻٜ، ‏‹‏لَامُ اَللَّه وَرِي حَادٜ مٛوطٛنْ؞›‏ ¹⁰اَمَّا، غَرِيرِ ندِ نَتُّطٛنْ فُو، تٛ ٻٜ نجَٻَّاکِعٛنْ، مبُرْتٜىٰ نجَحٛنْ دٛوْ طَتٜ مَيْرِ مبِعٛنْ، ¹¹‏‹‏مِنْ ڤِطِّي سٛلَّارٜ غَرِيرِ مٛوطٛنْ دَغَ کٛيْطٜ اَمِنْ، کَنْجُمْ طُمْ حٜٻْتِرْتَ اٛنْ نغَطِي حَکّٜ؞ اَمَّا اَنْدٜىٰ طُعُمْ، لَامُ اَللَّه وَرِي حَادٜ مٛوطٛنْ؞›‏ ¹²اٜ مِ وِعَعٛنْ، اٜ ݧَلْندٜ جَانغٛ اَللَّه ٻُرَيْ يُرْمِنَنْکِ يِمْٻٜ غَرِيرِ سٛدٛمْ دٛوْ يِمْٻٜ غَرِيرِ ندِنْ طٛنْ؞»‏

غَرِيجٜ طٜ نجَٻَايِ غٛونغَ نجَرَيْ بٛنٜ

¹³اٛ وِعِ، ‏«‏يِمْٻٜ غَرِيرِ کٛرَسِنْ، اٛنْ مبٛنِي!‏ يِمْٻٜ غَرِيرِ بٜتَسَيْدَ، اٛنْ مبٛنِي!‏ دَا کُوطٜ کَيْطِنِيطٜ غَطَاطٜ ندٜرْ مٛوطٛنْ طٜ نغَطَنَامَ يِمْٻٜ تَايَ اٜ سِدٛنْ، دَا ٻٜ ٻٛرْنَکٜ کٛلْتٜ کٛلَّيْطٜ وَنَّارٜ ٻٜ نجٛوطَکٜ ندٜرْ تٛوکَ نغَمْ حٛلُّکِ ٻٜ تُوبِي؞ ¹⁴اَمَّا ݧَلْندٜ جَانغٛ اَللَّه ٻُرَيْ يُرْمِنَنْکِ يِمْٻٜ تَايَ اٜ سِدٛنْ دٛوْ مٛوطٛنْ؞ ¹⁵اٛنٛنْ بٛو، يِمْٻٜ غَرِيرِ کَفَرْنَحُمْ، اٛنْ کَمِّي طُمْ حٛشَّيْعٛنْ يَاکِ دٛوْ؟ نَاع نٛنْ!‏ طُمْ نَتِّنَيْعٛنْ ندٜرْ نغَيْکَ حِيتٜ؞»‏

¹⁶ندٜنْ يٜىٰسُ وِعِ تٛکُّٻٜمٛ، ‏«‏جَٻُطٛ کٛ مبِيطٛنْ فُو جَٻِي کٛ مبِيمِ، غَݧُطٛعٛنْ بٛو وَݧِييَمْ، ندٜنْ غَݧُطٛيَمْ وَݧِي اٛنْ طٛنْ لِلٛيْطٛيَمْ؞»‏

سٛعّٛيَاکِ لِلَاٻٜ 27

¹⁷سٜيْ تٛکُّٻٜمٛ 27 نغَرْتِ اٜ نَنَ بٜلْطُمْ، ٻٜ مبِعِ، ‏«‏مٛودِبّٛ، حَا غِنِّ مَا نغَطِي کٛ مِنْ مبِعِطِ فُو ندٜرْ اِنْدٜ مَاطَ!‏»‏

¹⁸اٛ وِعِٻٜ، ‏«‏مِ يِعِي شٜيْطَنْ يَنٛيِي بٛ مَپّٜرٜ دَغَ دٛوْ؞ ¹⁹رَا، مِ حٛکِّيعٛنْ لَامُ يَاٻُکِ دٛوْ بٛولٜ اٜ جَحٜ اٜ حٜٻُکِ جَالٛرْغَلْ دٛوْ بَوْطٜ غَݧٛ، وَلَا کٛ حٜٻَتَعٛنْ؞ ²⁰اَمَّا تٛع اٛنْ نَنُ بٜلْطُمْ نغَمْ غِنِّ اٜ نغَطَ کٛ مبِيطٛنْ، اَمَّا نَنٜىٰ بٜلْطُمْ نغَمْ اِنْطٜ مٛوطٛنْ مبِنْدَامَ اٜ وُرٛ اَللَّه؞»‏

يٜىٰسُ نَنِي بٜلْطُمْ

²¹اٜ شَرٜلْ نغٜلْ، يٜىٰسُ نَنِ بٜلْطُمْ ندٜرْ رُوحُ اَللَّه، اٛ وِعِ، ‏«‏مِ يٜتِّيمَ، ݧَاکٛ اَمْ مٛ دٛوْ، جٛومِرَاوٛ دٛوْ اٜ لٜيْ، نغَمْ اَ سُوطِي فِي طُعُمْ تٛ غٛودُٻٜ فَامُ اٜ اَنْدَلْ، اَ حٛلِّيطُمْ ٻِکّٛيْ ڤَمَرٛيْ؞ نٛنْ ݧَاکٛ اَمْ، نغَمْ نٛنْ وٜلَنْمَا نغَطَا؞»‏

²²سٜيْ اٛ وِعِ يِمْٻٜ، ‏«‏ݧَاکٛ اَمْ حٛکِّييَمْ کٛو طُمٜ؞ وَلَا اَنْدُطٛ مٛيٜ وٛنِ ٻِطّٛ اٛنْ سٜيْ نِ ݧَاکٛ اٛنْ، نٛنْ مَا وَلَا اَنْدُطٛ مٛيٜ وٛنِ ݧَاکٛ اٛنْ سٜيْ نِ ٻِطّٛ اٛنْ، اٜ مٛ ٻِطّٛ اٛنْ يِطِ اَنْدِنَ ݧَاکٛ اٛنْ؞»‏

²³سٜيْ اٛ وَيْلِتِي تٛ تٛکُّٻٜمٛ اٛ وِعِٻٜ کَمْٻٜ تَنْ، ‏«‏غِتٜ غِعُطٜ کٛ نغِيطٛنْ طٜ بَرْکِطِنَاطٜ!‏ ²⁴نغَمْ اٜ مِ وِعَعٛنْ، اَنَّبٛعٜنْ طُطْٻٜ اٜ لَامِنٛوٻٜ طُطْٻٜ نغِطِي نغِعَ کٛ نغِيطٛنْ، اَمَّا ٻٜ نغِعَايِ؞ ٻٜ نغِطِي نَنُکِ کٛ نَنٛتٛنْ، اَمَّا ٻٜ نَنَايِ؞»‏

مِسَالُ دٛوْ سَمَارِيَنْکٜىٰجٛ بٛطّٛ

²⁵سٜيْ غٛطّٛ مٛودِبّٛ دٛوکَ اُمِّي دَرِي نغَمْ فٛوندَ يٜىٰسُ، اٛ وِعِ، ‏«‏مٛودِبّٛ، کٛ حَانِ مِ وَطَ نغَمْ مِ حٜٻَ يٛنْکِ کِ رٜعَتَا؟»‏

²⁶سٜيْ يٜىٰسُ وِعِمٛ، ‏«‏کٛ وِنْدَا ندٜرْ اَتَّوْرَ؟ نٛيٜ نجَنْغِرْتَا؟»‏

²⁷اٛ نٛوتِي، اٛ وِعِ، ‏«‏ ‏‹‏يِطُ جٛومِرَاوٛ اَللَّه مَاطَ اٜ ٻٜرْندٜ مَاطَ فُو، اٜ يٛنْکِ مَاطَ فُو، اٜ سٜمْبٜ مَاطَ فُو، اٜ حَکِّيلٛ مَاطَ فُو،›‏ ندٜنْ، ‏‹‏يِطُ بَنْدِرَاوٛ مَاطَ نٛ نغِطِرْطَا حٛورٜ مَاطَ؞›‏ »‏

²⁸يٜىٰسُ وِعِمٛ، ‏«‏اَ نٛوتَکٜ بٛطُّمْ؞ وَطُ نٛنْ، ندٜنْ اَ حٜٻَيْ يٛنْکِ کِ رٜعَتَا؞»‏

²⁹اَمَّا مٛودِبّٛ دٛوکَ اٛنْ يِطِي وُرْتِنَ حٛورٜ مُوطُمْ، سٜيْ اٛ پَمِ يٜىٰسُ، اٛ وِعِ، ‏«‏مٛيٜ وٛنِ بَنْدِرَاوٛ اَمْ؟»‏

³⁰يٜىٰسُ وِعِمٛ، ‏«‏غٛطّٛ نٜطّٛ اٜ يَحَ دَغَ اُرُشَلِيمَ يَاکِ جٜرِيکٛ، سٜيْ وٛٻّٜ وُيْٻٜ تَٻِّيمٛ؞ ٻٜ ٻٛرْتِمٛ، ٻٜ نجَٻِ کٛ اٛ وٛودِ فُو، ٻٜ ڤِيِمٛ بٛطُّمْ، ٻٜ ندِلِّ، ٻٜ اَلِمٛ حَکُّندٜ يٛنْکِ اٜ مَيْدٜ؞ ³¹سٜيْ اَرْدِيطٛ دِينَ تٛکّٛيِ طَتَلْ نغَلْ؞ ندٜ اٛ يِعِ نٜطّٛ اٛنْ، اٛ سٜلِ، اٛ پَٻِّي؞ ³²کَدِمَا، غٛطّٛ لٜىٰوِيَنْکٜىٰجٛ تٛکّٛيِ طَتَلْ نغَلْ، ندٜ اٛ وَرٛيِ تٛ نٜطّٛ اٛنْ وٛنِ، اٛ يِعِمٛ، اٛ سٜلِ، اٛ پَٻِّي؞ ³³اَمَّا غٛطّٛ سَمَارِيَنْکٜىٰجٛ اٜ ندٜرْ يَادُ اٛ وَرٛيِ تٛ نٜطّٛ اٛنْ وٛنِ، اٛ يِعِمٛ، اٛ يُرْمِنَنِمٛ؞ ³⁴اٛ يَحِ تٛ مَاکٛ، اٛ لٛوتَنِمٛ نَوْنٛوطٜ اٜ نٜبَّمْ اٜ ندِيَمْ اِنَبٛجَمْ، اٛ حَٻَّنِمٛ نَوْنٛوطٜ طٜنْ؞ ندٜنْ اٛ وَطِّنِمٛ دٛوْ مبَبَّ مَاکٛ اٛ يَارِمٛ وُرٛ تٛ طُمْ يٛٻَتَ طُمْ وَالَ، اٛ وَلِّمٛ؞ ³⁵ندٜ وٜىٰتِ، سَمَارِيَنْکٜىٰجٛ اٛنْ اِتِّ شٜىٰدٜ اَجُرْفَارِ طِطِ دَغَ جِيبَ مُوطُمْ، حٛکِّ مَوْطٛ وُرٛ اٛنْ وِعِمٛ، ‏‹‏وَلُّمٛ؞ تَا مَجِّنِي شٜىٰدٜ کٛ ٻُرِ طٜعٜ، مِ يٛٻٜتٜ تٛ مِ سٛعّٛيَکٜ؞›‏ »‏

³⁶سٜيْ يٜىٰسُ پَمِ مٛودِبّٛ دٛوکَ اٛنْ وِعِ، ‏«‏مٛيٜ ندٜرْ يِمْٻٜ تَتٛ ٻٜعٜ کَمِّطَا وٛنِ بَنْدِرَاوٛ مٛ وُيْٻٜ ڤِيِ اٛنْ؟»‏

³⁷اٛ وِعِ، ‏«‏اٛنْ طٛنْ جُرْمِنَنْطٛمٛ؞»‏

سٜيْ يٜىٰسُ وِعِمٛ، ‏«‏اَنْ مَا، يَحُ نغَطَا نٛنْ؞»‏

يٜىٰسُ يَحِي وُرٛ مَرْتَ اٜ مَرْيَامَ

³⁸يٜىٰسُ اٜ تٛکُّٻٜمٛ اٜ ندٜرْ يَادُ، سٜيْ اٛ نَتِّ وٛنْغٜلْ غَرِيٜلْ، غٛطّٛ دٜبّٛ بِعٜتٜىٰطٛ مَرْتَ جَٻِّيمٛ تٛ وُرٛ مُوطُمْ؞ ³⁹مَرْتَ اٛنْ اٜ وٛودِ مِݧِرَاوٛ بِعٜتٜىٰطٛ مَرْيَامَ؞ مَرْيَامَ جٛوطِي حَادٜ يٜىٰسُ اٜ مٛ نَنَ اٜکِّتِنٛلْ مَاکٛ؞ ⁴⁰اَمَّا مَرْتَ وَنِّي نغَمْ اٜ حُوَ کُوطٜ طُطّٜ؞ سٜيْ اٛ وَرِ تٛ يٜىٰسُ، اٛ وِعِ، ‏«‏مٛودِبّٛ، اَ وَنَّايِ ندٜ مِݧِرَاوٛ اَمْ اَلْدِيَمْ اٜ کُوغَلْ نغَعَلْ مِنْ تَنْ؟ وِعُمٛ اٛ اُمّٛو اٛ وَلَّيَمْ!‏»‏

⁴¹اَمَّا يٜىٰسُ نٛوتِي، وِعِ، ‏«‏مَرْتَ، مَرْتَ، اَ وَنِّي حٛورٜ مَاطَ دٛوْ فِي طُطُّمْ؞ ⁴²اَمَّا فِي غٛعٛ تَنْ يِطَا؞ مَرْيَامَ بٛو سُٻِي کٛ ٻُرِ وٛوطُکِ، طُمْ جَٻْتَتَاکٜ تٛ مَاکٛ؞»‏

اٜکِّتِنْکِ دٛوْ دٛعَارٜ

¹وٛنْدٜ ݧَلْندٜ يٜىٰسُ اٜ وَطَ دٛعَارٜ تٛ وٛنْدٜ وِغٜىٰرٜ؞ ندٜ اٛ حٜىٰݧِ دٛعَارٜ ندٜنْ، غٛعٛتٛ ندٜرْ تٛکُّٻٜمٛ وِعِمٛ، ‏«‏مٛودِبّٛ، اٜکِّتِنْمِنْ نٛ مِنْ نغَطِرْتَ دٛعَارٜ، نٛنْ نٛ يَحَيَ غَطٛووٛ بَڤْتِسْمَ اٜکِّتِنِرِ تٛکُّٻٜمٛ؞»‏

²يٜىٰسُ وِعِٻٜ، ‏«‏تٛ اٛنْ نغَطَيْ دٛعَارٜ، مبِعٜىٰ،

‏‹‏يَا اَللَّه ݧَاکٛ اَمِنْ مٛ دٛوْ،

اِنْدٜ مَاطَ شٜنِيندٜ مَوْنِنٜىٰ،

لَامُ مَاطَ وَرَ؞

³حٛکُّمِنْ کٛ مِنْ ݧَامَتَ کٛو ندٜيٜ ݧَلْندٜ؞

⁴يَافَنَمِنْ حَکّٜىٰجِ اَمِنْ،

نغَمْ مِنٛنْ مَا اٜ مِنْ نجَافَنٛو کٛو مٛيٜ غَطَنْطٛمِنْ حَکّٜ؞

تَاع اَلُ مِنْ نجَحَ تٛ مِنْ نغَطَتَ حَکّٜ؞›‏ »‏

⁵ندٜنْ اٛ حٛکِّٻٜ مِسَالُ، اٛ وِعِ، ‏«‏تٛ غٛعٛتٛ ندٜرْ مٛوطٛنْ يَحِي تٛ حِغٛ مُوطُمْ شَکَ جٜمَّ وِعِمٛ، ‏‹‏حِغٛ، وُپَمْ مبُرٛودِحٛ تَتٛ، ⁶نغَمْ حِغٛ اَمْ اٜ دٛوْ يَادُ يَالٛيِي وَالَ اٜ وُرٛ اَمْ، رَا بٛو مِ وَلَا کٛ کٛکَّيْمٛمِ اٛ ݧَامَ؞›‏ ⁷سٜيْ اٛ نٛوتِي دَغَ ندٜرْ سُودُ، اٛ وِعِ، ‏‹‏تَاع وَنَّمْ، نغَمْ طُمْ يَادَکٜ طُمْ مَٻِّي دَمُّغَلْ، ندٜنْ مِنْ اٜ ٻِٻّٜ اَمْ مِنْ نجَادَکٜ مِنْ ڤُکَّکٜ؞ مِ وَاوَتَا اُمَّاکِ جٛونِ مِ حٛکُّمَا غٛطُّمْ؞›‏ »‏ ⁸يٜىٰسُ وِعِ، ‏«‏اٜ مِ وِعَعٛنْ، تٛ اٛ سَلَکٜ اُمَّاکِ اٛ حٛکَّمٛ بُرٛودِ طُمْ نغَمْ حِغَاکُ، اٛ اُمّٛتٛ اٛ حٛکَّمٛطُمْ نغَمْ اٛ وَطِي کَ تٛرَاکِمٛ؞ ⁹نغَمْ نٛنْ اٜ مِ وِعَعٛنْ، تٛرٜىٰ، طُمْ حٛکَّيْعٛنْ؞ طَٻِّتٜىٰ، اٛنْ کٜٻَيْ؞ شِلْمِنٜىٰ، طُمْ مَٻِّتَنَيْعٛنْ دَمُّغَلْ؞ ¹⁰نغَمْ کٛو مٛيٜ تٛرِيطٛ طُمْ حٛکَّيْمٛ، طَٻُّتُطٛ بٛو حٜٻَيْ، ندٜنْ کٛو مٛيٜ شِلْمِنِيطٛ طُمْ مَٻِّتَنَيْمٛ دَمُّغَلْ؞ ¹¹مٛيٜ ندٜرْ مٛوطٛنْ تٛ ٻِطّٛ مُوطُمْ تٛرَکٜمٛ لِنْغُ، اٛ حٛکَّمٛ مبٛودِ؟ ¹²کٛو بٛو تٛ اٛ تٛرَکٜمٛ ٻٛشّٛوندٜ، اٛ حٛکَّمٛ يَارٜ؟ ¹³تٛ اٛنٛنْ کَلُّٻٜ، اٛنْ اَنْدِ نٛ کٛکِّرْتٛنْ ٻِٻّٜ مٛوطٛنْ فِي بٛطُّمْ، حَکّٛ ݧَاکٛ مٛوطٛنْ مٛ دٛوْ!‏ اٛ ٻُرَيْ نٛنْ حٛکُّکِ تٛرِيٻٜمٛ رُوحُ اَللَّه؞»‏

يٜىٰسُ اٜ شٜيْطَنْ

¹⁴وٛنْدٜ ݧَلْندٜ يٜىٰسُ اٜ وُرْتِنَنَ غٛطّٛ غِنّٛلْ ڤَحٛلْ؞ غَطَ غِنّٛلْ نغٛلْ وُرْتَکٜ، نٜطّٛ اٛنْ فُطِّ مٜتُکِ، سٜيْ يِمْٻٜ طُطْٻٜ کَوْرُتُٻٜ کَيْطِنِ؞ ¹⁵اَمَّا وٛٻّٜ مَٻّٜ مبِعِ، ‏«‏اٜ بَوْطٜ بَعَلْجَبُلْ لَامِيطٛ غِنِّ اٛ وُرْتِنِرْتَ غِنِّ»‏

¹⁶وٛٻّٜ اٜ نغِطِ فٛوندُکِمٛ، نغَمْ نٛنْ ٻٜ مبِعِمٛ اٛ وَطَنَٻٜ غٛطُّمْ کَيْطِنِيطُمْ پِوٛيْطُمْ تٛ اَللَّه؞ ¹⁷اَمَّا يٜىٰسُ اٜ اَنْدِ کٛ وٛنِ ندٜرْ ٻٜرْطٜ مَٻّٜ، اٛ وِعِٻٜ، ‏«‏لَامُ فُو شٜنْدِيطُمْ اٜ وَݧْوَݧْتِرَ، طُمْ لَلَّيْ؞ نٛنْ مَا وُرٛ شٜنْدِينغٛ اٜ وَݧْوَݧْتِرَ، نغٛ لَلَّيْ؞ ¹⁸تٛ لَامُ شٜيْطَنْ سٜنْدَکٜ اٜ وَݧْوَݧْتِرَ، نٛيٜ لَامُ طُمْ دَرٛرْتٛو؟ مِ وِعُ نٛنْ نغَمْ اٛنْ مبِعَ اٜ مِ وُرْتِنَ غِنِّ اٜ سٜمْبٜ بَعَلْجَبُلْ لَامِيطٛ غِنِّ؞ ¹⁹تٛ اٜ مِ وُرْتِنَ غِنِّ ندٜر بَوْطٜ بَعَلْجَبُلْ، اٜ بَوْطٜ مٛيٜ تٛکُّٻٜعٛنْ مبُرْتِنِرْتَطِ؟ نغَمْ نٛنْ تٛکُّٻٜعٛنْ کٛلَّيْ اٛنْ نغَلَا غٛونغَ؞ ²⁰اَمَّا، تٛ اٜ مِ وُرْتِنَ غِنِّ ندٜرْ بَوْطٜ اَللَّه، ندٜنْ لَامُ اَللَّه وَرَنِيعٛنْ؞

²¹‏«‏تٛ نٜطّٛ شٜمْبِطّٛ جٛغَکٜ کَافَحِ رٜىٰنِي وُرٛ مُوطُمْ، وَلَا کٛ حٜٻَتَ کٛ اٛ وٛودِ فُو؞ ²²اَمَّا، تٛ غٛطّٛ ٻُرْطٛمٛ سٜمْبٜ وَرَنِيمٛ تٜىٰتَيْ کَافَحِ کِ اٛ مَنْتٛرْتٛو کِنْ، ٻُرْطٛ مٛ سٜمْبٜ اٛنْ سٜنْدَنَيْ وٛٻّٜ جَوْدِ ندِنْ؞

²³‏«‏مٛ وٛنْدَا اٜ اَمْ فُو، اٛ غَݧٛ اَمْ؞ مٛ وَلَّايِيَمْ مٛٻْتُکِ فُو، اٛ شَنْکِتٛووٛ؞

وَرْتُکِ غِنّٛلْ

²⁴‏«‏تٛ غِنّٛلْ وُرْتَکٜ ندٜرْ ٻَنْدُ نٜطّٛ، نغٛلْ يَحَيْ تٛ بِغٜىٰجٜ جٛرْطٜ اٜ نغٛلْ طَٻِّتَ تٛ نغٛلْ سِوْتٛتٛو؞ اَمَّا تٛ نغٛلْ حٜٻَايِ، سٜيْ نغٛلْ وِعَ، ‏‹‏مِ سٛعّٛتٛ وُرٛ نغٛ مبُرْتٛيِيمِ؞›‏ ²⁵تٛ نغٛلْ وَرْتِي، نغٛلْ تَوِي وُرٛ نغٛنْ وُووَامَ نغٛ مٛعِّنَامَ، ²⁶سٜيْ نغٛلْ يَحَ نغٛلْ وَدّٛيَ غِنِّ جٛوٜىٰطِطِ ٻُرْطِنغٛلْ حَلُّکِ، طِ نَتَّ طِ نجٛوطٛو طٛنْ؞ ندٜنْ رٜعِرْدٜ نٜطّٛ اٛنْ ٻُرَيْ فُطّٛودٜ مَاکٛ حَلُّکِ؞»‏

بَرْکَ ٻُرْطُمْ

²⁷ندٜ يٜىٰسُ وِعِ نٛنْ، غٛطّٛ دٜبّٛ ندٜرْ حَوْرُتُٻٜ نٛدِّ سٜمْبٜىٰ وِعِ، ‏«‏دٜبّٛ دَݧُطٛمَ کٛکُّطٛمَ مُسِنْطَا، اٛ بَرْکِطِنَاطٛ؞»‏

²⁸اَمَّا يٜىٰسُ وِعِمٛ، ‏«‏نٛنْ، اَمَّا ٻُرْٻٜ بَرْکِطِنٜىٰکِ نغٛنِ نَنٛوٻٜ وٛلْدٜ اَللَّه اٜ تٛکَّندٜ؞»‏

يِمْٻٜ جَامَنُ کَلُّطُمْ

²⁹ندٜ يِمْٻٜ نغَطِ کَ مٛٻْتَاکِ تٛ يٜىٰسُ، اٛ وِعِٻٜ، ‏«‏يِمْٻٜ جَامَنُ طُعُمْ ٻٜ کَلُّٻٜ، اٜ ٻٜ نغِطِ حٛلّٜىٰکِ غٛطُّمْ کَيْطِنِيطُمْ، اَمَّا وَلَا کٛ طُمْ حٛلَّتَٻٜ سٜيْ نِ کٛ حٜٻُنٛو اَنَّبِ اِنُوسَ؞ ³⁰کٛ حٜٻِ اَنَّبِ اِنُوسَ حٛلِّي يِمْٻٜ نِينٜبَ اَللَّه لِلٛيِمٛ، نٛنْ مَا کٛ حٜٻَتَيَمْ، مِنْ ٻِي نٜطّٛ، طُمْ حٛلَّيْ يِمْٻٜ جَامَنُ طُعُمْ اَللَّه لِلٛيِيَمْ؞ ³¹ݧَلْندٜ جَانغٛ، لَامِيطٛ لٜيْدِ فٛمْبِنَ دٜبّٛ اٛ اُمّٛدٛتٛ اٜ يِمْٻٜ جَامَنُ طُعُمْ؞ اٛ حٛلَّ کٛ يِمْٻٜ جَامَنُ طُعُمْ نغَطِ طُمْ وٛوطَا، نغَمْ کَنْکٛ اٛ وَرٛيِي دَغَ ٻَدَاکِ نَنُکِ فَامُ اَنَّبِ سُلٜيْمَانُ؞ رَا بٛو، ٻُرْطٛ اَنَّبِ سُلٜيْمَانُ طٛعٛ؞ ³²اٜ ݧَلْندٜ جَانغٛ يِمْٻٜ نِينٜبَ مَا ٻٜ اُمّٛدٛتٛ اٜ يِمْٻٜ جَامَنُ طُعُمْ، ٻٜ کٛلَّ کٛ يِمْٻٜ جَامَنُ طُعُمْ نغَطِ طُمْ وٛوطَا، نغَمْ کَمْٻٜ ندٜ ٻٜ نَنِ وَعَجُ اَنَّبِ اِنُوسَ ٻٜ تُوبِي، رَا بٛو ٻُرْطٛ اَنَّبِ اِنُوسَ طٛعٛ؞

جَيْنغٛلْ ٻَنْدُ

³³‏«‏وَلَا غَطَنَيْطٛ فِتِلَارُ حِيتٜ سُوطَندُ کٛو حِڤَّ تُمُّدٜ دٛوْ مَيْرُ؞ سٜيْ نِ اٛ رٜسَندُ دٛوْ دَنْکِ نغَمْ ندُ يٜيْنَنٛو نَتُّطٛ فُو؞ ³⁴غِتٜ مَاطَ نغٛنِ فِتِلَارُ ٻَنْدُ مَاطَ؞ تٛ غِتٜ مَاطَ اٜ نجَمْطِ، ٻَنْدُ مَاطَ فُو حٜىٰوَيْ جَيْنغٛلْ، اَمَّا تٛ غِتٜ مَاطَ نجَمْطَا فُو، ٻَنْدُ مَاطَ حٜىٰوَيْ ݧِوْرٜ؞ ³⁵فَامُ بٛطُّمْ کٛو جَيْنغٛلْ غٛنْغٛلْ ندٜرْ مَاطَ طُمْ ݧِوْرٜ؞ ³⁶تٛ ٻَنْدُ مَاطَ فُو اٜ حٜىٰوِ جَيْنغٛلْ، تٛ ندُ وَلَا ݧِوْرٜ کٛو سٜطَّ، ندُ يٜيْنٛتٛ کٛو تٛيٜ نٛ جَيْنغٛلْ فِتِلَارُ يٜيْنٛرَنْتٛمَا؞»‏

فَارِسَنْکٛعٜنْ اٜ مٛودِٻّٜ اَتَّوْرَ

³⁷يٜىٰسُ اٜ ندٜرْ مٜتُکِ سٜيْ غٛطّٛ فَارِسَنْکٜىٰجٛ وِعِمٛ اٛ يَحَ وُرٛ مُوطُمْ اٛ حِرْتٛيٛو؞ يٜىٰسُ يَحِ جٛوطِي فُطِّ ݧَامُکِ ݧَمْندُ؞ ³⁸فَارِسَنْکٜىٰجٛ اٛنْ حَيْطِنِ ندٜ يِعِ يٜىٰسُ فُطِّي ݧَامُکِ ݧَمْندُ لٛوتَايِ جُوطٜ مُوطُمْ؞ ³⁹سٜيْ يٜىٰسُ وِعِمٛ، ‏«‏اٛنٛنْ فَارِسَنْکٛعٜنْ اٛنْ لَيْٻَ غَطَ نجَرْدُکٛيْ مٛوطٛنْ اٜ لٜعٛيْ مٛوطٛنْ، اَمَّا ندٜرْ مٛوطٛنْ اٛنْ کٜىٰوُٻٜ نغُيْکَ اٜ حَلّٜىٰندٜ؞ ⁴⁰اٛنٛنْ حَاݝَاٻٜ!‏ کٛو مٛيٜ اٜ اَنْدِ غَطُطٛ يَاسِ کَنْکٛ وَطِ ندٜرْ؞ ⁴¹نغَمْ نٛنْ کٛکّٜىٰ ٻٜ نغَلَنَا کٛ وٛنِ ندٜرْ جَرْدُطٜ اٜ لٜعٛيْ مٛوطٛنْ، ندٜنْ طٜ فُو طٜ لَاٻَنَيْعٛنْ؞

⁴²‏«‏اٛنْ مبٛنِي، اٛنٛنْ فَارِسَنْکٛعٜنْ، نغَمْ اٛنْ کٛکِّي اَللَّه جَکَّ حَاکٛحٛيْ نجٛنْغٜتٜىٰکٛيْ، اَمَّا اٛنْ نغَطَنْتَا يِمْٻٜ کٛ حَانِ، اٛنْ نغَلَا يِدّٜ اَللَّه؞ طُعُمْ تَتُمْ اٜ حَانِ نغَطٛنْطُمْ، اَمَّا تٛع اٛنْ اَلُ وَطُکِ کٛ حٛرِي؞

⁴³‏«‏اٛنْ مبٛنِي، اٛنٛنْ فَارِسَنْکٛعٜنْ، نغَمْ اٛنْ نغِطِ جٛوطَاکِ دٛوْ جٛوطٛرْلٜ مَوْٻٜ ندٜرْ شُوطِ دٛعَارٜ، اٛنْ نغِطِ حٛوْنِرٜىٰکِ مَنْغُ ندٜرْ لُومٛ؞ ⁴⁴اٛنْ مبٛنِي!‏ اٛنْ نَنْدِ اٜ غٜنَالٜ طٜ نغِعَتَاکٜ، يِمْٻٜ اٜ تٛکَّ دٛوْ مَاجٜ اَنْدَا؞»‏

⁴⁵غٛعٛتٛ ندٜرْ مٛودِٻّٜ اَتَّوْرَ وِعِ يٜىٰسُ، ‏«‏مٛودِبّٛ، ندٜ مبِيطَا نٛنْ، مِنٛنْ مَا اَ حُطِيمِنْ!‏»‏

⁴⁶يٜىٰسُ وِعِ، ‏«‏اٛنْ مبٛنِي، اٛنٛنْ مَا مٛودِٻّٜ اَتَّوْرَ، نغَمْ اٛنْ نجٛوَنَ يِمْٻٜ دٛݝْلٜ تٜدُّطٜ، اَمَّا اٛنٛنْ کٛو کٛولٜلْ غٛعٛ اٛنْ نغَطَتَا مبَلّٛنْٻٜ؞ ⁴⁷اٛنْ مبٛنِي!‏ نغَمْ اٛنْ مَحَ غٜنَالٜ بٛطّٜ طٜ سِفْتٛرْکِ اَنَّبٛعٜنْ ٻٜ مَامَاجِ مٛوطٛنْ مبَرِ؞ ⁴⁸نٛنْ حٛلِّي کٛ مَامَعٜنْ مٛوطٛنْ نغَطِ وٜلِيعٛنْ، نغَمْ ٻٜ مبَرِي اَنَّبٛعٜنْ، اٛنٛنْ بٛو اٛنْ مَحَنِ اَنَّبٛعٜنْ ٻٜنْ غٜنَالٜ؞ ⁴⁹کَنْجُمْ وَطِ اَللَّه وِعِ ندٜرْ اَنْدَلْ مُوطُمْ، ‏‹‏مِ لِلَنَيْٻٜ اَنَّبٛعٜنْ اٜ لِلَاٻٜ، ٻٜ مبَرَ وٛٻّٜ ٻٜ تٛرَّ وٛٻّٜ؞›‏ ⁵⁰نغَمْ نٛنْ پِيپَمْ اَنَّبٛعٜنْ ندُفَاطَمْ دَغَ فُطّٛودٜ دُونِيَارُ، طُمْ طَٻِّتَيْطَمْ تٛ جُوطٜ يِمْٻٜ جَامَنُ طُعُمْ، ⁵¹دَغَ پِيپَمْ حَبِيلَ حَا يَاکِ پِيپَمْ اَنَّبِ جَکَارِيَ بَرَاطٛ حَکُّندٜ سُودُ جٛومِرَاوٛ اٜ سَکِّرْدٜ؞ اٜ مِ وِعَعٛنْ غٛونغَ، پِيپَمْجِ طِنْ طٛنْ فُو طُمْ طَٻِّتَيْطِ تٛ جُوطٜ يِمْٻٜ جَامَنُ طُعُمْ؞

⁵²‏«‏اٛنْ مبٛنِي، اٛنٛنْ مٛودِٻّٜ اَتَّوْرَ، نغَمْ اٛنْ نجٛغَکٜ مَٻِّتِرْغٜلْ دَمُّغَلْ اَنْدَلْ، اٛنٛنْ اٛنْ نَتَّايِ، اٛنْ اَلَايِ وٛٻّٜ نَتِّ؞»‏

⁵³ندٜ يٜىٰسُ اَلِ طٛنْ، مٛودِٻّٜ اَتَّوْرَ اٜ فَارِسَنْکٛعٜنْ ٻٜرْطٜ مَٻّٜ مٜتِّ دٛوْ مَاکٛ، ٻٜ نغَطِ کَ پَمُکِمٛ پَمْطٜ دٛوْ فِي طُطُّمْ، ⁵⁴نغَمْ ٻٜ نَنَ اٛ وِعِي غٛطُّمْ کٛ حَانَا، ٻٜ کٜٻَ کٛ ٻٜ نَنْغِرْتَمٛ؞

يٜىٰسُ وَغِّنِي يِمْٻٜ دٛوْ نغِکُّ مُنَافُکِعٜنْ

¹اٜ شَرٜلْ نغٜلْ، يِمْٻٜ طُطْٻٜ مٛٻْتِي حَا ٻٜ نغَطِ کَ يَٻْيَٻْتِرْکِ؞ يٜىٰسُ وِعِ تٛکُّٻٜمٛ، ‏«‏ڤَامٜىٰ تٛع نغَرْتٛنْ بٛ فَارِسَنْکٛعٜنْ نغَمْ ٻٜ مُنَافُکِعٜنْ؞ ²وَلَا غٛطُّمْ اٛمْبَاطُمْ طُمْ اٛمْتَتَاکٜ، نٛنْ مَا وَلَا غٛطُّمْ شُوطِيطُمْ طُمْ سُورِتَتَاکٜ؞ ³کٛ مبِيطٛنْ ندٜرْ ݧِوْرٜ فُو، طُمْ نَنَيْطُمْ ݧَلَوْمَ، نٛنْ مَا کٛ مٜتُطٛنْ اٜ سُوطٜ، طُمْ مٜتَيْطُمْ اٜ نجَيْرِ؞

مٛ طُمْ حُلَتَ

⁴‏«‏اٜ مِ وِعَعٛنْ، اٛنٛنْ حِغٛوٻٜ اَمْ، تٛع اٛنْ کُلُ وَرٛوٻٜ ٻَنْدُ نٜطّٛ، غَطَ طٛنْ ٻٜ مبَاوَتَا وَطُکِ غٛطُّمْ؞ ⁵اَمَّا مِ وِعَيْعٛنْ مٛ کُلٛتٛنْ؞ کُلٜىٰ اٛنْ طٛنْ بَاوَيْطٛ وَرْکِعٛنْ غَطَ طٛنْ اٛ وَطَعٛنْ ندٜرْ وُرٛ حِيتٜ، اٜ مِ وِعَعٛنْ، کَنْکٛ کُلٛتٛنْ!‏

⁶‏«‏نَاع شٛلٛيْ نجٛوٛيْ اٜ شٛورٜىٰ جَمْطٜ طِطِ؟ فُو اٜ نٛنْ اَللَّه يٜجِّتَتَا کٛو غٛعٛتٜلْ مَاکٛيْ؞ ⁷کٛو غَاسَ کٛعٜ مٛوطٛنْ مَا فُو کَ لِمَامَ؞ تٛع اٛنْ کُلُ، اٛنْ ٻُرِي شٛلٛيْ طُطْکٛيْ؞

جَٻُکِ يٜىٰسُ اٜ وَݧُکِمٛ

⁸‏«‏اٜ مِ وِعَعٛنْ، جَٻُطٛيَمْ يٜىٰسٛ يِمْٻٜ فُو، مِنْ ٻِي نٜطّٛ، مِ جَٻَيْمٛ يٜىٰسٛ مَلَاعِکَعٜنْ اَللَّه؞ ⁹اَمَّا غَݧُطٛيَمْ يٜىٰسٛ يِمْٻٜ، مِ وَݧَيْمٛ يٜىٰسٛ مَلَاعِکَعٜنْ اَللَّه؞

¹⁰‏«‏فُو بِعُطٛ کٛ وٛوطَا دٛوْ ٻِي نٜطّٛ، طُمْ وَاوَيْ يَافَنَاکِمٛ؞ اَمَّا فُو بِعُطٛ کٛ وٛوطَا دٛوْ رُوحُ اَللَّه، اٛ يَافَنْتَاکٜ؞

¹¹‏«‏تٛ يِمْٻٜ نجَارِيعٛنْ يٜىٰسٛ مَوْٻٜ اٜ لَامِيٻٜ، تٛع اٛنْ نغَنُّ دٛوْ نٛ مبُرْتِنِرْتٛنْ کٛعٜ مٛوطٛنْ کٛو کٛ مبِعٛتٛنْ؞ ¹²نغَمْ رُوحُ اَللَّه اٜکِّتِنَيْعٛنْ اٜ شَرٜلْ نغٜلْ کٛ حَانِ مبِعٛنْ؞»‏

مِسَالُ دٛوْ دِسْکُطٛ کَاݝَاطٛ

¹³غٛطّٛ ندٜرْ حَوْرُتُٻٜ وِعِمٛ، ‏«‏مٛودِبّٛ، وِعُ مَوْنِرَاوٛ اَمْ سٜنْدِدَ ندٛنُ اٜ اَمْ؞»‏

¹⁴اَمَّا يٜىٰسُ وِعِمٛ، ‏«‏حِغٛ!‏ مٛيٜ لَمْنِيَمْ دٛوْ مٛوطٛنْ؟ مٛيٜ وَرْتِرِيَمْ شٜنْدَنَيْطٛعٛنْ ندٛنُ؟»‏ ¹⁵ندٜنْ اٛ وِعِٻٜ، ‏«‏ڤَامٜىٰ!‏ نغٛطِّتٜىٰ يِدّٜ جَوْدِ دُونِيَارُ، نغَمْ حٜٻُکِ جَوْدِ حٛکَّتَا نٜطّٛ يٛنْکِ؞»‏

¹⁶اٛ حٛکِّٻٜ مِسَالُ طُعُمْ، اٛ وِعِ، ‏«‏نغٜسَ غٛطّٛ دِسْکُطٛ يٜىٰطِي نَاع سٜطَّ؞ ¹⁷اٛ وِعِ حٛورٜ مَاکٛ، ‏‹‏کٛ نغَطَيْمِ؟ مِ وَلَا تٛ ندٜسَيْمِ کٛ ندٜمُمِ؞›‏ ¹⁸اٛ وِعِ، ‏‹‏يَوَّا!‏ مِ حٜٻْتِي کٛ نغَطَيْمِ، مِ ڤُسَيْ شُوطِ رٜسُکِ ݧَمْندُ اَمْ، مِ مَحَ غٛطِّ ٻُرْطِطِ مَنْغُ، مِ مٛٻْتَ ݧَمْندُ اَمْ اٜ جَوْدِ اَمْ فُو ندٜرْ مَاجِ؞ ¹⁹مِ وِعَ حٛورٜ اَمْ ‏«‏اَ وٛودِ فِي طُطُّمْ بٛطُّمْ کٜپَيْطُمَّ دُوٻِ طُطِّ؞ سِوْتَ، ݧَامَا، نجَرَا، نَنَا بٜلْطُمْ؞»‏ ›‏ ²⁰اَمَّا اَللَّه وِعِمٛ، ‏‹‏اَ کَاݝَاطٛ!‏ ندٜرْ جٜمَّارٜ ندٜعٜ طُمْ حٛشَّيْ يٛنْکِ مَاطَ؞ مٛيٜ رٛنَتَ کٛ مٛٻْتَنْطَا حٛورٜ مَاطَ؟›‏ »‏

²¹سٜيْ يٜىٰسُ وِعِٻٜ، ‏«‏کٛو مٛيٜ مٛٻْتَنْطٛ حٛورٜ مُوطُمْ جَوْدِ دُونِيَارُ، ندٜنْ وَلَا کٛ اٛ رٜسِ تٛ اَللَّه، نٛنْ حٜٻَتَمٛ؞»‏

حٛولَاکِ اَللَّه

²²غَطَ طٛنْ، يٜىٰسُ وِعِ تٛکُّٻٜمٛ، ‏«‏نغَمْ نٛنْ اٜ مِ وِعَعٛنْ، تٛع اٛنْ نغَنُّ دٛوْ جٛنْدٜ مٛوطٛنْ، وَاتٛ دٛوْ کٛ ݧَامٛتٛنْ کٛو کٛ نجَرٛتٛنْ کٛو کٛ ٻٛرْنٛتٛوطٛنْ؞ ²³نغَمْ يٛنْکِ ٻُرِي ݧَمْندُ، ٻَنْدُ بٛو ٻُرِي کٛلْتٜ؞ ²⁴ندَارٜىٰ دَوْلٜ؞ طٜ اَاوَتَا، طٜ ڤٜعَّتَا، طٜ نغَلَا سُودُ تٛ طٜ مٛٻْتَتَ ݧَمْندُ کٛو تٛ طٜ ندٜسَتَ غٛطُّمْ؛ فُو اٜ نٛنْ اَللَّه اٜ ݧَمْنَطٜ؞ اٛنْ ٻُرِي شٛلِّ دَرَجَ!‏ ²⁵مٛيٜ ندٜرْ مٛوطٛنْ تٛ وَنِّي وَاوَتَ ٻٜيْدَنْکِ حٛورٜ مُوطُمْ شَرٜلْ سٜطَّ ندٜرْ بَلْطٜ مُوطُمْ؟ ²⁶تٛ اٛنْ مبَاوَتَا وَطُکِ فِي ڤَمَرُمْ طُعُمْ، کٛ وَطَتَ اٛنْ نغَنَّ اٜ کٛ حٛرِي؟ ²⁷ندَارٜىٰ ڤِنْدِ نٛ مَوْنِرْتَ؞ ندِ حُوَتَا، ندِ سَݧَتَا کٛلْتٜ؞ فُو اٜ نٛنْ، اٜ مِ وِعَعٛنْ، اَنَّبِ سُلٜيْمَانُ فُو اٜ رِسْکُ مُوطُمْ مٜىٰطَايِ مٛعِّتِنَاکِ بٛ ڤِنْدِ وٛعٛيْرِ ندِعِ؞ ²⁸تٛ اَللَّه اٜ مٛعِّتِنِرَ ڤِنْدِ لَدّٜ نِحِ، حَنْدٜ اٜ ندِ طٛنْ، جَانغٛ ندِ وُلٜىٰ، حَکّٛ اٛنٛنْ، اٛ ٻُرَيْ نٛنْ ٻٛرْنُکِعٛنْ، اٛنٛنْ کٛولِيٻٜمٛ سٜطَّ؞

²⁹‏«‏ندٜنْ تٛع اٛنْ نغَطُ ٻٜرْطٜ مٛوطٛنْ دٛوْ کٛ ݧَامَتٛنْ کٛو بٛو کٛ نجَرٛتٛنْ؞ تٛع اٛنْ نغَنُّ کٛعٜ مٛوطٛنْ دٛوْ مَاجُمْ؞ ³⁰نغَمْ اِرِ طُمْ طٛنْ فِي يِمْٻٜ دُونِيَارُ طَٻِّتَتَ؞ ݧَاکٛ مٛوطٛنْ مٛ دٛوْ اٜ اَنْدِ اٛنْ نغِطِ فِي طُمْ طٛنْ؞ ³¹اَمَّا طَٻِّتٜىٰ لَامُ مَاکٛ، ندٜنْ طُمْ ٻٜيْدَنَيْعٛنْ فِي طُعُمْ؞

جَوْدِ ندِ وٛنَّتَاکٛ

³²‏«‏اٛنٛنْ اٛرْندٜ اَمْ ڤَمَرْدٜ، تٛع اٛنْ کُلُ، نغَمْ ݧَاکٛ مٛوطٛنْ مٛ دٛوْ اٜ نَنَ بٜلْطُمْ حٛکُّکِعٛنْ لَامُ مُوطُمْ؞ ³³شٛورٜىٰ کٛ نغٛودُطٛنْ، کٛکّٛنْ ٻٜ نغَلَنَا شٜىٰدٜ طٜنْ؞ ندٜسَنٜىٰ کٛعٜ مٛوطٛنْ جَوْدِ ندِ وٛنَّتَاکٛ، جَوْدِ ندِ دٛوْ ندِ رٜعَتَا؞ تٛنْ غُجّٛ ٻَدَّتَاکٛندِ، ندٜنْ وَلَا مٛوپُ ݧَامَيْنغُندِ؞ ³⁴نغَمْ تٛ جَوْدِ مَاطَ وٛنِ، تٛنْ ٻٜرْندٜ مَاطَ مَا سٛعّٛتٛو؞

تَادٜىٰ شِرْيٛوطٛنْ

³⁵‏«‏تَادٜىٰ شِرْيٛوطٛنْ نغَمْ کُوغَلْ اَللَّه، اَلْدٜىٰ فِتِلَاجِ مٛوطٛنْ اٜ حِيتٜ، ³⁶بٛ مَشُّٻٜ کٜطِيٻٜ جٛومُ وُرٛ مَٻّٜ وَرْتٛيَ دَغَ حُمْتٛ تٜىٰغَلْ، نغَمْ تٛ اٛ وَرْتٛيِي اٛ سِلْمِنَکٜ، طٛنْ اٜ طٛنْ ٻٜ مَٻِّتَنَمٛ دَمُّغَلْ؞ ³⁷ٻٜ بَرْکِطِنَاٻٜ مَشُّٻٜ ٻٜ جٛومُ وُرٛ مَٻّٜ تَوِ اٜ ندٜىٰنَ تٛ اٛ وَرْتٛيِي؞ اٜ مِ وِعَعٛنْ غٛونغَ، اٛ تَادٛتٛ نغَمْ کُوغَلْ، اٛ جٛطِّنَٻٜ، اٛ وَدَّنَٻٜ ݧَمْندُ؞ ³⁸تٛ اٛ وَرْتٛيِي شَکَ جٜمَّ کٛو فَجِرِ، مَشُّٻٜ ٻٜ اٛ تَوِ اٜ ٻٜ شِرْيِ، ٻٜ بَرْکِطِنَاٻٜ؞ ³⁹اَمَّا اَنْدٜىٰ طُعُمْ، دَا جٛومُ وُرٛ اٜ اَنْدِ شَرٜلْ کٛ غُجّٛ وَرَتَ، اٛ اَلَتَا اٛ نَتَّنَمٛ وُرٛ؞ ⁴⁰اٛنٛنْ مَا دٛولٜ نجٛوطٛوطٛنْ اٛنْ شِرْيِي نغَمْ اٜ شَرٜلْ نغٜلْ اٛنْ اَنْدَا ٻِي نٜطّٛ وَرَتَ؞»‏

مَشُّطٛ غَطٛووٛ غٛونغَ

⁴¹بِيتُرُسْ وِعِ، ‏«‏مٛودِبّٛ، اَ وِعَ مِسَالُ طُعُمْ نغَمْ مِنٛنْ تَنْ کٛو نغَمْ کٛو مٛيٜ؟»‏

⁴²يٜىٰسُ نٛوتِي وِعِ، ‏«‏مٛيٜ وٛنِ کُوٛووٛ مٛ غٛونغَ مٛ فَامُ، مٛ جٛومُ وُرٛ مُوطُمْ يٛوِ دٛوْ مَشُّٻٜ مُوطُمْ، نغَمْ اٛ حٛکَّٻٜ ݧَمْندُ ندٜرْ شَرٜلْ؟ ⁴³اٛ بَرْکِطِنَاطٛ مَشُّطٛ مٛ جٛومُ وُرٛ مُوطُمْ وَرْتِ تَوِ اٜ مٛ وَطَ نٛنْ؞ ⁴⁴اٜ مِ وِعَعٛنْ غٛونغَ، جٛومُ وُرٛ اٛنْ يٛوَيْمٛ دٛوْ جَوْدِ مُوطُمْ فُو؞ ⁴⁵اَمَّا تٛ مَشُّطٛ اٛنْ وِعِي حٛورٜ مُوطُمْ، ‏‹‏جٛومُ وُرٛ اَمْ وَرْتَتَا جٛونِ،›‏ سٜيْ اٛ فُطِّ فِيُکِ مَشُّٻٜ وٛرْٻٜ اٜ رٜوْٻٜ اٜ مٛ ݧَامَ اٜ مٛ يَرَ نجَرُ نَا حٛورٜ مَاکٛ وَيْلِتَکٜ؞ ⁴⁶جٛومُ وُرٛ اٛنْ وَرْتَيْ اٜ ݧَلْندٜ ندٜ مَشُّطٛ اٛنْ کَمَّاکِ اٜ شَرٜلْ نغٜلْ اٛ اَنْدَا، اٛ فِيَيْمٛ بٛطُّمْ اٛ وَطَمٛ ندٜرْ ٻٜ نغَلَا غٛونغَ؞

⁴⁷‏«‏مَشُّطٛ اَنْدُطٛ کٛ جٛومُ وُرٛ مُوطُمْ يِطِ اٛ وَطَ، اَمَّا اٛ سِرْيَاکِ کٛو بٛو اٛ وَطَايِ کٛ جٛومُ وُرٛ اٛنْ يِطِ، طُمْ فِيَيْمٛ بٛطُّمْ؞ ⁴⁸اَمَّا مَشُّطٛ مٛ اَنْدَا کٛ جٛومُ وُرٛ مُوطُمْ يِطِ اٛ وَطَ، تٛ اٛ وَطِي فِي کَلُّطُمْ، طُمْ فِيَيْمٛ سٜطَّ؞ فُو کٛکَّاطٛ طُطُّمْ، طُطُّمْ طُمْ طَٻِّتَتَ تٛ مَاکٛ؞ فُو تَمْبِنَاطٛ طُطُّمْ، اٛ پَمٜتٜىٰطٛ کٛ ٻُرِ طُطْکِ؞

يٜىٰسُ وَدِّي سٜنْدِرْکِ

⁴⁹‏«‏حِيتٜ نغَرٛيْمِ وَطُکِ ندٜرْ دُونِيَارُ، اٜ يِدّٜ اَمْ نغٜ حُٻّٜىٰ جٛونِ؞ ⁵⁰اَمَّا اٜ وٛودِ بَڤْتِسْمَ طُمْ نغَطَنْتٜىٰمِ، مِ وَنِّي نَا طُمْ وَطَنِييَمْطُمْ؞ ⁵¹اٛنْ کَمِّي مِ وَرٛيِ وَدَّنْکِ دُونِيَارُ جٛنْدٜ جَمْ؟ اٜ مِ وِعَعٛنْ، نَاع نٛنْ، اَمَّا سٜنْدُکِ يِمْٻٜ نغَدُّمِ؞ ⁵²دَغَ جٛونِ طُمْ تَوَيْ يِمْٻٜ نجٛوٛ ندٜرْ وُرٛ غٛعٛ ٻٜ کُوشِندِرَا، تَتٛ اُمَّنْتٛ طِطٛ، طِطٛ اُمَّنْتٛ تَتٛ؞ ⁵³ݧَاکٛ سٜنْدِرَيْ اٜ ٻِطّٛ مُوطُمْ، ٻِطّٛ اٛنْ مَا سٜنْدِرَيْ اٜ ݧَاکٛ مُوطُمْ؞ اِنَّ سٜنْدِرَيْ اٜ ٻِطّٛ مُوطُمْ دٜبّٛ، ٻِطّٛ اٛنْ مَا سٜنْدِرَيْ اٜ اِنَّ مُوطُمْ؞ اٜسِرَاوٛ مَا سٜنْدِرَيْ اٜ اٜسِرَاوٛ مُوطُمْ؞»‏

اَنْدُکِ شَرٜلْ

⁵⁴يٜىٰسُ وِعِ حَوْرُتُٻٜ، ‏«‏تٛ اٛنْ نغِعِي دُولٜ اٜ اُمّٛيٛو دَغَ حِرْنَ، طٛنْ اٜ طٛنْ اٛنْ مبِعَيْ، ‏‹‏ندِيَمْ تٛٻَيْ،›‏ سٜيْ طَمْ تٛٻَ بٛو؞ ⁵⁵تٛ حٜنْدُ فٛمْبِنَ اُمّٛيَکٜ، اٛنْ مبِعَيْ، ‏‹‏طُمْ وَطَيْ نغُلٜىٰنغَ،›‏ سٜيْ طُمْ وَطَ بٛو؞ ⁵⁶اٛنٛنْ مُنَافُکِعٜنْ!‏ اٛنْ مبَاوِ رَارُکِ کٛ وٛنِ اٜ لٜيْدِ اٜ کٛ وٛنِ اٜ دٛوْ اَنْدٛنْ کٛ وَطَتَ، اَمَّا نغَمْ طُمٜ اٛنْ مبَاوَتَا فَامُکِ کٛ وَطَتَ اٜ شَرٜلْ نغٜعٜلْ؟

سِرْيٛوتِرْ اٜ غُلّٛيِيطٛمَ

⁵⁷‏«‏نغَمْ طُمٜ اٛنْ مبَاوَتَا سُٻَنْکِ کٛعٜ مٛوطٛنْ کٛ حَانِ؟ ⁵⁸تَا يَادَ اٜ غُلّٛيِيطٛمَ يٜىٰسٛ لَامُ، طَٻُّتُ شِرْيٛوتِرٛنْ دٛوْ طَتَلْ؞ تٛ نَاع نٛنْ، اٛ يَارٜتٜ يٜىٰسٛ غَطٛووٛ کِيتَ، غَطٛووٛ کِيتَ وَطُمَا ندٜرْ جُوطٜ تَادِيٻٜ ٻٜ مَٻُّمَا ندٜرْ سُودُ شُرَلْ؞ ⁵⁹اٜ مِ وِعُمَا، اَ وُرْتَتَاکٛ نَا اَ يٛٻِي فُو شٜىٰدٜ طٜ طُمْ تٛکَّتَمَ کٛو اَنِينِيٜلْ حٛرَتَاکٛ؞»‏

اَ مَايَيْ تَا اَلَايِ حَکّٜ مَاطَ

¹اٜ شَرٜلْ نغٜلْ اٜ وٛودِ وٛٻّٜ طٛنْ بِعُٻٜ يٜىٰسُ کٛ حٜٻِ وٛٻّٜ غَلِلَنْکٛعٜنْ؞ غَلِلَنْکٛعٜنْ ٻٜنْ اٜ کِرْسَنَ اَللَّه شَکِّرِ، سٜيْ بِلَاتُسْ غٛمْنَاجٛ وَطِ طُمْ وَرِٻٜ حَا پِيپَمْ مَٻّٜ حَوْتِي اٜ پِيپَمْ کٛ ٻٜ شَکِّ؞ ²يٜىٰسُ نٛوتِي وِعِٻٜ، ‏«‏اٛنْ کَمّٛو غَلِلَنْکٛعٜنْ ٻٜنْ طٛنْ ٻُرِي غَلِلَنْکٛعٜنْ کٛرِيٻٜ فُو حَکّٜ نغَمْ ٻٜ تٛرِّرَامَ نِحِ؟ ³اٜ مِ وِعَعٛنْ، نَاع نٛنْ!‏ اَمَّا تٛ نَاع اٛنْ تُوبُ، اٛنٛنْ مَا اٛنْ فُو اٛنْ کَلْکٜتٜىٰٻٜ؞ ⁴کٛو مَا يِمْٻٜ سَڤّٛ اٜ نجٛوٜىٰتَتٛ مَيْٻٜ شَرٜلْ کٛ سُودُ تٛوْندُ ندُ سِلُوَمْ يَنِ دٛوْ مَٻّٜ، اٛنْ کَمّٛو ٻٜ ٻُرِي يِمْٻٜ کٛرِيٻٜ جٛوطِيٻٜ ندٜرْ اُرُشَلِيمَ فُو وَطُکِ حَکّٜ؟ ⁵اٜ مِ وِعَعٛنْ، نَاع نٛنْ!‏ اَمَّا تٛ نَاع اٛنْ تُوبُ، اٛنٛنْ مَا نٛنْ کَلْکِرْتٛنْ؞»‏

مِسَالُ دٛوْ لٜکِّ کِ رِمَتَا

⁶سٜيْ اٛ حٛکِّ مِسَالُ طُعُمْ، اٛ وِعِ، ‏«‏غٛطّٛ نٜطّٛ اٜ وٛودِ لٜکِّ اِبِّ ندٜرْ نغٜسَ مُوطُمْ، اٛ يَحِ اٛ يِعَ کٛو اٜ کِ وٛودِ ٻِکّٛيْ، اَمَّا اٛ تَوِ کِ وَلَنَا؞ ⁷نغَمْ نٛنْ اٛ وِعِ نٜطّٛ کُوَنٛووٛمٛ تٛ نغٜسَ کَنْ، ‏‹‏رَا، دُوٻِ تَتِ اٜ مِ وَرَ طَٻُّتُکِ اِبّٜ دٛوْ اِبِّ کِعِ، اَمَّا مِ حٜٻَتَا؞ فٜعُّکِ!‏ نغَمْ طُمٜ کِ سُرَتَ لٜيْدِ اٜ مٜىٰرٜ؟›‏ ⁸کُوٛووٛ تٛ نغٜسَ کَنْ وِعِمٛ، ‏‹‏جٛومُ وُرٛ، ٻٜيْدَنْکِ ندُنْغُ غٛعٛ، مِ مٛعِّنَنَکِ لٜيْدِ، مِ وَطَنَکِ نغٛوبَارِ؞ ⁹تٛ کِ رِمِي ٻِکّٛيْ حِتَاندٜ غَرَيْندٜ، تٛو، وٛوطِي، اَمَّا تٛ کِ رِمَايِ، سٜيْ ڤٜعَّاکِ؞›‏ »‏

يٜىٰسُ يَمْطِتِنِي دٜبّٛ ندٜرْ ݧَلْندٜ سِوْتَارٜ

¹⁰وٛنْدٜ ݧَلْندٜ سِوْتَارٜ يٜىٰسُ اٜ اٜکِّتِنَ ندٜرْ سُودُ دٛعَارٜ؞ ¹¹اٜ وٛودِ دٜبّٛ طٛنْ غِنّٛلْ اٜ حَٻِّمٛ دُوٻِ سَڤّٛ اٜ جٛوٜىٰتَتِ، اٜ نغٛلْ تُرْنِمٛ، کٛو حٛورٜ مَاکٛ اٛ وَاوَتَا پٜفْتُکِ؞ ¹²ندٜ يٜىٰسُ يِعِمٛ، نٛدِّمٛ حَادٜ، وِعِمٛ، ‏«‏بَنْدِرَاوٛ، اَ حٛيِي دَغَ ݧَوُ مَاطَ؞»‏ ¹³يٜىٰسُ يٛوِ جُوطٜ مُوطُمْ دٛوْ مَاکٛ، طٛنْ اٜ طٛنْ اٛ ٻَنْتِي اٛ فُطِّ مَنْتُکِ اَللَّه؞

¹⁴ٻٜرْندٜ اَرْدِيطٛ سُودُ دٛعَارٜ ندُنْ مٜتِّ نغَمْ يٜىٰسُ يَمْطِتِنِي غٛطّٛ ݧَلْندٜ سِوْتَارٜ؞ نغَمْ مَاجُمْ اٛ وِعِ يِمْٻٜ، ‏«‏اٜ وٛودِ بَلْطٜ جٛوٜىٰغٛعٛ نغَمْ کُوطٜ، نغَرٜىٰ طُمْ يَمْطِتِنَعٛنْ ندٜرْ بَلْطٜ طٜنْ، نَاع نِ ندٜرْ ݧَلْندٜ سِوْتَارٜ؞»‏

¹⁵سٜيْ يٜىٰسُ نٛوتِي وِعِمٛ، ‏«‏اٛنٛنْ مُنَافُکِعٜنْ!‏ نَاع کٛو مٛيٜ مٛوطٛنْ اٜ فِتَّ نغَارِ مُوطُمْ کٛو مبَبَّ مُوطُمْ ندٜرْ ݧَلْندٜ سِوْتَارٜ يَرْنٛيَنغَ؟ ¹⁶اٛعٛ دٜبّٛ تَانُ اِبْرَاهِمْ، مٛ شٜيْطَنْ حَٻِّ دُوٻِ سَڤّٛ اٜ جٛوٜىٰتَتِ، حَانَا اٛ فِتّٜىٰ ݧَلْندٜ سِوْتَارٜ؟»‏ ¹⁷ندٜ اٛ وِعِ نٛنْ، وَݧْوَݧْٻٜ مَاکٛ فُو شٜمْتِ، اَمَّا يِمْٻٜ نَنِ بٜلْطُمْ اٜ فِي کَيْطِنِيطُمْ فُو طُمْ اٛ وَطَتَ؞

مِسَالُ دٛوْ غَبّٜلْ مَسْتَتْ

¹⁸ندٜنْ يٜىٰسُ وِعِ، ‏«‏طُمٜ لَامُ اَللَّه نَنْدِ؟ کٛ نَنْدِنَيْمِطُمْ؟ ¹⁹لَامُ اَللَّه اٜ نَنْدِ اٜ غَبّٜلْ مَسْتَتْ نغٜلْ غٛطّٛ حٛشِّ اَاوِ ندٜرْ نغٜسَ مُوطُمْ؞ غَبّٜلْ نغٜلْ فُطِ، وَرْتِ لٜغّٜلْ، شٛلِّ نغَطِ شَٻّٜ دٛوْ لِشٜ مَاکِ؞»‏

مِسَالُ دٛوْ پُوفِنِرْطُمْ

²⁰اٛ وِعِ کَدِنْ، ‏«‏طُمٜ نَنْدِنَيْمِ لَامُ اَللَّه؟ ²¹اٜ طُمْ نَنْدِ اٜ پُوفِنِرْطُمْ طُمْ غٛطّٛ دٜبّٛ حٛشِّ لَنْشِندِرِ اٜ شٛنْدِ اَلْکَمَارِ ڤٛوندِرْکٛيْ تَتٛيْ ندِ فُو ندِ پُوفِ؞»‏

دَمُّغَلْ ٻِطِّينغَلْ

²²يٜىٰسُ اٜ يَحَ اُرُشَلِيمَ اٛ تٛکِّ غَرِيجٜ اٜ نغَرِحٛيْ اٜ مٛ اٜکِّتِنَ؞ ²³غٛطّٛ پَمِمٛ وِعِ، ‏«‏مٛودِبّٛ، يِمْٻٜ سٜطَّ تَنْ کِسَتَ؟»‏

اٛ وِعِٻٜ، ²⁴‏«‏ندُرْوٜىٰ نَتِّرٛنْ تٛ دَمُّغَلْ ٻِطِّينغَلْ، نغَمْ اٜ مِ وِعَعٛنْ، طُطْٻٜ ندٛولَيْ نغَمْ نَتَّ اَمَّا ٻٜ مبَاوَتَا؞ ²⁵تٛ جٛومُ وُرٛ نغٛنْ اُمَّکٜ مَٻِّي دَمُّغَلْ نغَلْ، اٛنْ ندَرٛتٛ يَاسِ اٛنْ ڤِيَ دَمُّغَلْ نغَلْ اٛنْ تٛرٛو اٛنْ مبِعَ، ‏‹‏مٛودِبّٛ، مَٻِّتَنْمِنْ دَمُّغَلْ!‏›‏ اَمَّا اٛ وِعَيْعٛنْ، ‏‹‏مِ اَنْدَاعٛنْ، مِ اَنْدَا تٛ پِوٛيْطٛنْ؞›‏ ²⁶ندٜنْ اٛنْ مبِعَيْ، ‏‹‏مِنْ ݧَمْدِي، مِنْ نجَرْدِي اٜ مَاطَ، اَ اٜکِّتِنِي ندٜرْ غَرِيجٜ اَمِنْ؞›‏ ²⁷اَمَّا اٛ وِعَيْ، ‏‹‏اٜ مِ وِعَعٛنْ، مِ اَنْدَاعٛنْ، مِ اَنْدَا تٛ پِوٛيْطٛنْ؞ شٜنْدِرٜىٰ اٜ اَمْ، اٛنٛنْ کَلُّٻٜ؞›‏ ²⁸تٛ اٛنْ نغِعِي اِبْرَاهِمْ اٜ اِشِيَاکُ اٜ يَاکُبُ اٜ اَنَّبٛعٜنْ فُو ندٜرْ لَامُ اَللَّه، اَمَّا اٛنٛنْ اٛنْ مبُرْتِنَامَ، اٛنْ مبٛيَيْ ݧٜرْپِندِرٛنْ ݧِيپٜ؞ ²⁹يِمْٻٜ نَاع يَحُودَنْکٛعٜنْ نغَرَيْ دَغَ فُونَ اٜ حِرْنَ اٜ وٛيْلَ اٜ فٛمْبِنَ ٻٜ نجٛوطٛو ٻٜ ݧَامَ ݧَمْندُ حُمْتٛ ندٜرْ لَامُ اَللَّه؞ ³⁰رَطُّمْ، وٛٻّٜ شَکِتِيٻٜ ٻٜ نغَرْتَيْ اَرْتُٻٜ، ندٜنْ وٛٻّٜ اَرْتُٻٜ ٻٜ نغَرْتَيْ شَکِتٛتٛوٻٜ؞»‏

يٜىٰسُ اٜ وَنِّي دٛوْ اُرُشَلِيمَ

³¹اٜ شَرٜلْ نغٜلْ، وٛٻّٜ فَارِسَنْکٛعٜنْ نغَرِ تٛ يٜىٰسُ مبِعِمٛ، ‏«‏اَلُ طٛعٛ نغَمْ حِرُدُسْ اٜ يِطِ وَرْمَا؞»‏

³²اٛ وِعِٻٜ، ‏«‏نجَحٜىٰ مبِعٛنْ دِلَارُ ندُنْ طٛنْ، ‏‹‏رَطُّمْ، حَنْدٜ اٜ جَانغٛ مِ وُرْتِنَيْ غِنِّ مِ يَمْطِتِنَيْ ٻٜ نجَمْطَا؞ اٜ ݧَلْندٜ تَتَوْرٜ مِ يٛتِّنَيْ کُوغَلْ اَمْ؞›‏ ³³فُو اٜ نٛنْ، دٛولٜ مِ نَنْغَ لَاوٛلْ حَنْدٜ اٜ جَانغٛ اٜ فَٻِّ جَانغٛ، نغَمْ حَانَا طُمْ وَرَ اَنَّبِيجٛ بَنْݧٜ سٜيْ ندٜرْ اُرُشَلِيمَ؞

³⁴‏«‏جَلَّ اُرُشَلِيمَ، اُرُشَلِيمَ اَ وَرِي اَنَّبٛعٜنْ، اَ وَرْدِي لِلٛيَاٻٜ تٛ مَاطَ اٜ کَاپٜ!‏ ندٜ طُطُّمْ اٜ مِ يِطِ مٛٻْتُکِ يِمْٻٜ مَاطَ نٛ غٜرٛوغَلْ مٛٻْتِرْتَ ٻِکّٛيْ مَاغَلْ لٜيْ بِيٜىٰلِ مَاغَلْ، اَمَّا اَ جَٻَايِ؞ ³⁵رَطُّمْ، اَللَّه اَلَنَيْعٛنْ وُرٛ شٜنِينغٛ مٛوطٛنْ؞ اٜ مِ وِعَعٛنْ، اٛنْ ڤُطِّتَتَا نغِعٛنْيَمْ، نَا ݧَلْندٜ ندٜ مبِيطٛنْ، ‏‹‏اٛ بَرْکِطِنَاطٛ، غَرٛيْطٛ ندٜرْ اِنْدٜ جٛومِرَاوٛ؞›‏ »‏

يٜىٰسُ يَمْطِتِنِي غٛودُطٛ ݧَوُ ٻُدِّ

¹وٛنْدٜ ݧَلْندٜ سِوْتَارٜ يٜىٰسُ يَحِ وُرٛ غٛعٛتٛ ندٜرْ اَرْدِيٻٜ فَارِسَنْکٛعٜنْ نغَمْ اٛ ݧَامَ ݧَمْندُ؞ سٜيْ ٻٜ نغَطِ کَ رَارُکِمٛ، کٛو اٛ وَطَيْ کٛ ٻٜ کٜٻَتَ ٻٜ نَنْغِرَمٛ؞ ²حَادٜ مَاکٛ اٜ وٛودِ غٛطّٛ غٛرْکٛ غٛودُطٛ ݧَوُ ٻُدِّ؞ ³يٜىٰسُ پَمِ فَارِسَنْکٛعٜنْ اٜ مٛودِٻّٜ اَتَّوْرَ اٛ وِعِ، ‏«‏دٛوکَ جَٻِي طُمْ يَمْطِتِنَ نٜطّٛ ݧَلْندٜ سِوْتَارٜ کٛ اَاعَ؟»‏

⁴اَمَّا ٻٜ نٛوتَاکِ؞ سٜيْ يٜىٰسُ مٜىٰمِ ݧَوْطٛ اٛنْ يَمْطِتِنِمٛ، وِعِمٛ اٛ دِلَّ؞ ⁵ندٜنْ اٛ پَمِٻٜ، اٛ وِعِ، ‏«‏مٛيٜ ندٜرْ مٛوطٛنْ تٛ ٻِطّٛ مُوطُمْ کٛو نغَارِ مُوطُمْ يَنِي ندٜرْ ٻُنْدُ ݧَلْندٜ سِوْتَارٜ اِتّٛيْتَامٛ طٛنْ اٜ طٛنْ؟»‏

⁶ٻٜ کٜٻَايِ کٛ ٻٜ مبِعِمٛ؞

حٛشُّ حٛورٜ مَاطَ نَاع اَ غٛطُّمْ

⁷ندٜ يٜىٰسُ فَامِ کُمْڤِتَاٻٜ ݧَامُکِ ݧَمْندُ طٛنْ فُو اٜ شُٻَ جٛوطَاکِ تٛ مَوْٻٜ نجٛوطٛتٛو، اٛ حٛکِّٻٜ مِسَالُ طُعُمْ، اٛ وِعِ، ⁸‏«‏تٛ غٛطّٛ حُمْڤِتِيمَ حُمْتٛ، تَاع جٛوطَ تٛ مَوْٻٜ نجٛوطٛتٛو؞ طُمْ غَطٛتٛوطُمْ اٛ حُمْڤِتِي غٛطّٛ ٻُرْطٛمَ مَنْغُ؞ ⁹ندٜنْ کُمْڤِتٛيْطٛمَ اٛنْ اٛ وَرٛيَيْ اٛ وِعُمَا، ‏‹‏اُمَّ نٜطّٛ اٛعٛ جٛوطٛو؞›‏ نغَمْ نٛنْ بٛو اَ سٜمْتَيْ، نجٛوطٛطَا تٛ جٛوطٛرْغَلْ شَکِتِينغَلْ؞ ¹⁰اَمَّا تٛ طُمْ حُمْڤِتِيمَ، جٛوطَ تٛ جٛوطٛرْغَلْ شَکِتِينغَلْ، نغَمْ تٛ کُمْڤِتٛيْطٛمَ وَرٛيِ، اٛ وِعٜتٜ، ‏‹‏حِغٛ، اُمَّ، نجٛوطٛيٛطَا دٛوْ جٛوطٛرْغَلْ مَوْٻٜ؞›‏ نٛنْ حٛکّٜتٜ مَنْغُ يٜىٰسٛ غَرٛيْٻٜ طٛنْ فُو؞ ¹¹نغَمْ مَوْنِنْطٛ حٛورٜ مُوطُمْ فُو اٛ لٜسْنٜتٜىٰطٛ، لٜسْنِنْطٛ حٛورٜ مُوطُمْ بٛو اٛ مَوْنِنْتٜىٰطٛ؞»‏

¹²ندٜنْ اٛ وِعِ کُمْڤِتٛيْطٛمٛ، ‏«‏تَا حُمْڤِتَيْ يِمْٻٜ حُمْتٛ تٛ وُرٛ مَاطَ، تَاع حُمْڤُتُ حِغٛوٻٜ مَاطَ تَنْ، کٛو مَوْنِرَاٻٜ اٜ مِݧِرَاٻٜ مَاطَ تَنْ، کٛو بَنْدِرَاٻٜ مَاطَ تَنْ، کٛو ٻٜ کٜدُّطَا رِسْکُٻٜ؞ نغَمْ ٻٜ کُمْڤِتٜتٜ کَمْٻٜ مَا، ٻٜ نغَاتَنْمَا کٛ نغَطَنْطَاٻٜ؞ ¹³اَمَّا تَا وٛودِ حُمْتٛ، حُمْڤُتُ ٻٜ نغَلَنَا، اٜ جَرَاٻٜ، اٜ غُرْغُعٜنْ، اٜ وُمْٻٜ؞ ¹⁴طُمْ بَرْکِطِنْتٜ، نغَمْ ٻٜ مبَاوَتَا وَاتَنْکِمَ کٛ نغَطَنْطَاٻٜ؞ اَللَّه وَاتَنْتٜ ݧَلْندٜ جَانغٛ، ݧَلْندٜ ندٜ اٛ اُمِّنْتَ مَيْٻٜ غَطُٻٜ جٛنْدٜ وٛوطُندٜ؞»‏

مِسَالُ دٛوْ حُمْتٛ مَنْغٛ

¹⁵ندٜ غٛطّٛ ندٜرْ جٛوطٛدِيٻٜ اٜ مَاکٛ نَنِ نٛنْ، اٛ وِعِ يٜىٰسُ، ‏«‏نٜطّٛ ݧَامٛووٛ ݧَمْندُ ندٜرْ لَامُ اَللَّه اٛ بَرْکِطِنَاطٛ!‏»‏

¹⁶سٜيْ يٜىٰسُ وِعِمٛ، ‏«‏اٜ وٛودِ غٛطّٛ نٜطّٛ شِرْيِيطٛ حُمْتٛ مَنْغٛ اٛ حُمْڤِتِ يِمْٻٜ طُطْٻٜ؞ ¹⁷ندٜ شَرٜلْ حُمْتٛ نغٛنْ وَطِ، اٛ لِلِ مَشُّطٛ مَاکٛ وِعٛيَ کُمْڤِتَاٻٜ ٻٜنْ، ‏‹‏نغَرٛيٜىٰ، کٛو طُمٜ سِرْيَامَ!‏›‏ ¹⁸اَمَّا ٻٜ فُو ٻٜ نغَطِ کَ طَٻُّتُکِ نٛ ٻٜ شَلٛرْتٛو نغَمْ ٻٜ نغِطَا يَاکِ؞ اَرَنْدٜىٰجٛ اٛنْ وِعِمٛ، ‏‹‏مِ سٛودِي نغٜسَ، دٛولٜ مِ يَحَ مِ يِعَکَ؞ وَطُ مُݧَلْ، مِ حٜٻَتَا يَاکِ؞›‏ ¹⁹طِطَٻٛ وِعِمٛ، ‏‹‏مِ سٛودِي نَعِ دٜمٛوجِ کَنْجِ سَڤّٛ، اٜ مِ يِطِ يَاکِ مِ فٛوندَطِ جٛونِ؞ وَطُ مُݧَلْ مِ حٜٻَتَا يَاکِ؞›‏ ²⁰نٛنْ تَتَٻٛ مَا وِعِ، ‏‹‏مِ نٜىٰٻَايِ کٛ تٜعُمِ، نغَمْ نٛنْ مِ حٜٻَتَا يَاکِ؞›‏ ²¹مَشُّطٛ اٛنْ سٛعِّي وِعِ جٛومُ وُرٛ مُوطُمْ کٛو طُمٜ؞ ٻٜرْندٜ جٛومُ وُرٛ اٛنْ مٜتِّ، اٛ وِعِ مَشُّطٛ اٛنْ، ‏‹‏يَوْنُ نجَحَا دٛوْ طَتٜ مَوْطٜ اٜ طَتٜ ڤَمَرٜ ندٜرْ غَرِيرِ، نٛدَّنٛوَايَمْ ٻٜ نغَلَنَا، اٜ جَرَاٻٜ، اٜ وُمْٻٜ، اٜ غُرْغُعٜنْ؞›‏ ²²غَطَ مَشُّطٛ اٛنْ وَرْتٛيِي وِعِ جٛومُ وُرٛ مُوطُمْ، ‏‹‏کٛ مبِيطَا طُمْ وَطَ وَطَامَ، اَمَّا فُو اٜ نٛنْ نجَيْرِ اٜ حٛرِي؞›‏ ²³سٜيْ جٛومُ وُرٛ اٛنْ وِعِ مَشُّطٛ اٛنْ، ‏‹‏يَحُ دٛوْ طَتٜ مَوْطٜ اٜ طَتٜ ڤَمَرٜ غَطَ غَرِيرِ، نٛدَّا يِمْٻٜ نغَرٛيَ نَتَّ وُرٛ اَمْ نغَمْ نغٛ حٜىٰوَ؞ ²⁴اٜ مِ وِعَعٛنْ، ندٜرْ کُمْڤِتَاٻٜ اَرَنْدٜعٜنْ وَلَا ݧَامَيْطٛ ݧَمْندُ حُمْتٛ اَمْ؞›‏ »‏

بٛنٜ تٛکُّکِ يٜىٰسُ

²⁵وٛنْدٜ ݧَلْندٜ يِمْٻٜ طُطْٻٜ اٜ نجَادَ اٜ يٜىٰسُ؞ سٜيْ اٛ رَارِٻٜ اٛ وِعِ، ²⁶‏«‏غَرٛيْطٛ تٛ اَمْ فُو تٛ ٻُرَايِ يِطُکِيَمْ دٛوْ ݧَاکٛ مُوطُمْ اٜ مَدُوجٛ مُوطُمْ اٜ دٜبّٛ مُوطُمْ اٜ ٻِٻّٜ مُوطُمْ اٜ مَوْنِرَاٻٜ اٜ مِݧِرَاٻٜ مُوطُمْ ‑ حَا مَا اٜ يٛنْکِ مُوطُمْ، اٛ وَاوَتَا وَرْتُکِ تٛکُّطٛيَمْ؞ ²⁷کٛو مٛيٜ تٛ حٛشَّايِ غَافَانغَلْ مُوطُمْ تٛکِّيَمْ وَاوَتَا وَرْتُکِ تٛکُّطٛيَمْ؞ ²⁸مِسَالُ، تٛ غٛطّٛ مٛوطٛنْ اٜ يِطِ مَحُکِ وُرٛ مَنْغٛ، اَيْ اَرَنْدٜ اٛ جٛوطٛتٛ تَوْ اٛ لِمَ کٛ اٛ مَجِّنْتَ، اٛ يِعَ کٛو اٜ مٛ وٛودِ کٛ حٜپَتَمٛ اٛ يٛتِّنَنْغٛ؞ ²⁹تٛ نَاع نٛنْ، تٛ اٛ فُطِّي مَحُکِنغٛ اٛ وَاوَتَا يٛتِّنْکِنغٛ، غِعُطٛنغٛ فُو جَلَيْمٛ ³⁰وِعَ، ‏‹‏رَا نٜطّٛ اٛعٛ فُطِّي مَحُکِ، اَمَّا اٛ وَاوَايِ يٛتِّنْکِ؞›‏ ³¹کٛو بٛو تٛ لَامِيطٛ غٛودُطٛ سٛوجِعٜنْ 10,000 حٛنِدَيْ اٜ لَامِيطٛ غَرٛيْطٛ حٛنَمٛ اٜ سٛوجِعٜنْ 20,000، اَرَنْدٜ اٛ جٛوطٛتٛ تَوْ اٛ يِعَ کٛو اٜ مٛ وٛودِ سٜمْبٜ حٛنُدُکِ اٜ مَاکٛ؞ ³²تٛ اٛ يِعِي اٛ وَاوَتَا، اٛ لِلَيْ لِلَاٻٜ تٛ غَرَيْطٛ اٛنْ کٛ اٛ يٛتّٛ، نغَمْ ٻٜ طَٻِّتَ سِرْيٛوتِرْکِ اٜ مَاکٛ؞ ³³نٛنْ مَا، کٛو مٛيٜ تٛ سٜنْدِرَايِ اٜ کٛ وٛودِ فُو وَاوَتَا وَرْتُکِ تٛکُّطٛيَمْ؞

لَمْطَمْ مبَاتُطَمْ

³⁴‏«‏لَمْطَمْ طُمْ فِي بٛطُّمْ، اَمَّا تٛ بٜلْطُمْ مَاجَمْ اِتَّکٜ، کٛ وَرْتِرْتَ بٜلْطُمْ مَاجَمْ؟ ³⁵وَلَا کٛ طَمْ وَطٜتٜىٰ؞ طَمْ نَفَتَا غٛطُّمْ، سٜيْ نِ طَمْ رُفٜىٰ؞ غٛودُطٛ نٛڤِّ نَنٛوجِ فُو نَنَ!‏»‏

مِسَالُ دٛوْ مبَالَ مَجُّنغَ

¹وٛنْدٜ ݧَلْندٜ جَٻٛوٻٜ شٜىٰدٜ لٜيْدِ اٜ غَطٛوٻٜ حَکّٜ نغَرِ تٛ يٜىٰسُ نغَمْ ٻٜ نَنَ کٛ اٛ وِعَتَ؞ ²اَمَّا فَارِسَنْکٛعٜنْ اٜ مٛودِٻّٜ اَتَّوْرَ نغَطِ کَ مٜتِتَاکِ اٜ ٻٜ مبِعَ، ‏«‏نٜطّٛ اٛعٛ اٜ جَٻّٛو غَطٛوٻٜ حَکّٜ حَا مَا اٜ مٛ ݧَمْدَ اٜ مَٻّٜ؞»‏ ³سٜيْ يٜىٰسُ حٛکِّٻٜ مِسَالُ طُعُمْ، وِعِ،

⁴‏«‏تٛ غٛطّٛ ندٜرْ مٛوطٛنْ اٜ وٛودِ بَالِ 100، غٛعٛ ندٜرْ بَالِ طِنْ مَجِّي، اٛ اَلَيْ کٛرِيطِ اٜ ندُرَ ندٜرْ لَدّٜ، اٛ طَٻِّتٛيَ مَجُّنغَ نغَنْ نَا اٛ حٜٻْتِينغَ؞ ⁵تٛ اٛ حٜٻْتٛيِينغَ، اٛ نَنَيْ بٜلْطُمْ اٛ تٛوٛيَنغَ اٜ دَاندٜ مَاکٛ؞ ⁶تٛ اٛ سٛعَّکٜ وُرٛ، اٛ نٛدَّيْ حِغٛوٻٜ مَاکٛ اٜ ٻٜ اٛ حٜدِّ، اٛ وِعَٻٜ، ‏‹‏مبَلّٜىٰيَمْ نَنْکِ بٜلْطُمْ نغَمْ مِ حٜٻْتِي مبَالَ اَمْ مَجُّنٛونغَ؞›‏ ⁷اٜ مِ وِعَعٛنْ، بٛ نٛنْ طُمْ ٻُرَيْ نَنْکِ بٜلْطُمْ اٜ تٛنْ دٛوْ تٛ غَطٛووٛ حَکّٜ غٛعٛتٛ تُوبِي سٛعَّکٜ تٛ اَللَّه، دٛوْ يِمْٻٜ 99 ݧُمٛوٻٜ نغَلَا حَکّٜ؞

مِسَالُ دٛوْ شٜىٰدٜ مَجُّطٜ

⁸‏«‏مِسَالُ، تٛ دٜبّٛ اٜ وٛودِ جَمْطٜ سَڤّٛ طٜ اَجُرْفَارِ، غٛعٛ مَجِّي، اَيْ اٛ وَطَيْ حِيتٜ اٜ فِتِلَارُ، اٛ وُووَ وُرٛ نغٛنْ، اٛ طَٻِّتَ اٜ سٜىٰسٜ‑سٜىٰسٜ کٛو تٛيٜ نَا اٛ حٜٻْتِي يَمْندٜ مَجُّندٜ ندٜنْ؞ ⁹تٛ اٛ حٜٻْتِيندٜ، اٛ نٛدَّيْ حِغٛوٻٜ مَاکٛ اٜ ٻٜ اٛ حٜدِّ، اٛ وِعَٻٜ، ‏‹‏مبَلّٜىٰيَمْ نَنْکِ بٜلْطُمْ، نغَمْ مِ حٜٻْتِي يَمْندٜ اَمْ مَجُّنٛوندٜ؞›‏ ¹⁰اٜ مِ وِعَعٛنْ، بٛ نٛنْ مَلَاعِکَعٜنْ نَنِرْتَ بٜلْطُمْ يٜىٰسٛ اَللَّه تٛ غَطٛووٛ حَکّٜ غٛعٛتٛ اَلِي وَطُکِ حَکّٜ سٛعَّکٜ تٛ اَللَّه؞»‏

مِسَالُ دٛوْ ٻِطّٛ مَجُّطٛ

¹¹کَدِمَا اٛ وِعِ، ‏«‏اٜ وٛودِ غٛطّٛ نٜطّٛ غٛودُطٛ ٻِٻّٜ طِطٛ؞ ¹²ڤَمَرٛ اٛنْ وِعِ ݧَاکٛ مُوطُمْ، ‏‹‏بَڤَّ، حٛکَّمْ ندٛنُ اَمْ؞›‏ سٜيْ ݧَاکٛ اٛنْ سٜنْدَنِٻٜ جَوْدِ مُوطُمْ؞ ¹³غَطَ بَلْطٜ سٜطَّ، ڤَمَرٛ اٛنْ حَوْتِ کٛ وٛودِ فُو، اٛ يَحِ لٜيْدِ نغٛطُّندِ، تٛنْ اٛ لَلِّنِ جَوْدِ مَاکٛ ندٜرْ جٛنْدٜ مٜىٰرٜ؞ ¹⁴غَطَ اٛ لَلِّنِي جَوْدِ ندِنْ فُو، طُمْ وَطِ وٜىٰلٛ کَلُّنغٛ ندٜرْ لٜيْدِ ندِنْ، اٛ وَرْتِ مٛ وَلَا کٛو طُمٜ؞ ¹⁵نغَمْ نٛنْ اٛ يَحِ اٛ حُوَنَ غٛطّٛ نٜطّٛ لٜيْدِ ندِنْ، نٜطّٛ اٛنْ يَارِمٛ تٛ اَلَدٜىٰجِ مَاکٛ حٛکِّمٛ کُوغَلْ ݧَمْنُکِطِ؞ ¹⁶کَيٜىٰجٛ اٛنْ اٜ يِطُنٛو تٛ اٛ حٜٻَيْنٛ اٛ ݧَامَ ݧَمْندُ اَلَدٜىٰجِ، اَمَّا وَلَا کٛکُّطٛمٛ غٛطُّمْ؞ ¹⁷ندٜ حَکِّيلٛ مَاکٛ وَرْتِ، اٛ وِعِ ندٜرْ ٻٜرْندٜ مَاکٛ، ‏‹‏کُوَنٛوٻٜ ݧَاکٛ اَمْ اٜ نغٛودِ ݧَمْندُ کٜپَيْندُٻٜ حَا ندُ حٛرٛو، اَمَّا مِنْ بٛو اٜ مِ طٛعٛ وٜىٰلٛ ٻَدَکٜ وَرْکِيَمْ؞ ¹⁸مِ سٛعّٛتٛ تٛ ݧَاکٛ اَمْ، مِ وِعَمٛ، ‏«‏بَڤَّ، مِ وَطِي حَکّٜ يٜىٰسٛ اَللَّه اٜ يٜىٰسٛ مَاطَ؞ ¹⁹مِ حٜوْتَايِ طُمْ نٛدَّيَمْ ٻِطّٛ مَاطَ، اٜ مِ تٛرٛمَا اَلَمْ مِ وَرْتَ غٛعٛتٛ ندٜرْ کُوَنٛوٻٜمَ؞»‏ ›‏ ²⁰سٜيْ اٛ اُمِّي اٛ سٛعِّي تٛ ݧَاکٛ مَاکٛ؞

‏«‏کٛ اٛ يٛتّٛو وُرٛ نغٛنْ، ݧَاکٛ مَاکٛ يِعِمٛ يُرْمِنَنِمٛ، دٛغِّ وُوندٛيِيمٛ جَٻِّيمٛ بٛطُّمْ؞ ²¹ٻِطّٛ اٛنْ وِعِمٛ، ‏‹‏بَڤَّ، مِ وَطِي حَکّٜ يٜىٰسٛ اَللَّه اٜ يٜىٰسٛ مَاطَ، جٛونِ مِ حٜوْتَايِ طُمْ نٛدَّيَمْ ٻِطّٛ مَاطَ؞›‏ ²²اَمَّا ݧَاکٛ اٛنْ وِعِ مَشُّٻٜ مُوطُمْ، ‏‹‏نجَوْنٜىٰ نغَدّٛنْ لِمْشٜ ٻُرْطٜ وٛوطُکِ، ٻٛرْنٛنْمٛ؞ نغَطَنٜىٰمٛ جَبَّارٜ اٜ حٛوندُ مَاکٛ اٜ ڤَطٜ اٜ کٛيْطٜ مَاکٛ؞ ²³نغَدّٜىٰ نغَارِ ڤَيْندِ، کِرْسٛنْدِ، ݧَامٜنْ نَنٜنْ بٜلْطُمْ، ²⁴نغَمْ ٻِطّٛ اَمْ اٛعٛ، اٛ مَايِينٛ، اَمَّا اٛ اُمَّکٜ، اٛ مَجِّينٛ، اَمَّا اٛ حٜٻْتَامَ!‏›‏ سٜيْ ٻٜ ڤُطِّ ݧَامُکِ، اٜ ٻٜ نَنَ بٜلْطُمْ؞

²⁵‏«‏اٜ شَرٜلْ نغٜلْ مَوْنِرَاوٛ اٛنْ اٜ تٛنْ نغٜسَ؞ سٜيْ اٜ مٛ وَرْتٛيَ، ندٜ اٛ ٻَدِي وُرٛ، اٛ نَنِ اٜ طُمْ فِيَ بَوْطِ اٜ طُمْ وَمَ؞ ²⁶سٜيْ اٛ نٛدِّ غٛعٛتٛ ندٜرْ مَشُّٻٜ اٛ پَمِمٛ، اٛ وِعِ، ‏‹‏کٛ وَنْغِ؟›‏ ²⁷مَشُّطٛ اٛنْ وِعِمٛ، ‏‹‏مِݧِرَاوٛ مَاطَ وَرْتِ، ݧَاکٛ مَاطَ بٛو حِرْسِي نغَارِ ڤَيْندِ نغَمْ اٛ وَرْتِي جَمْ کٛو کٛ يَنِمٛ؞›‏ ²⁸ٻٜرْندٜ مَوْنِرَاوٛ اٛنْ مٜتِّ اٛ سَلِي نَتُّکِ وُرٛ نغٛنْ؞ ݧَاکٛ اٛنْ وُرْتٛيِي تٛرِيمٛ اٛ نَتَّ؞ ²⁹اَمَّا اٛ وِعِ ݧَاکٛ اٛنْ، ‏‹‏رَا، دُوٻِ طُطِّ اٜ مِ حُوَنْمَا بٛ مَشُّطٛ، مِ مٜىٰطَايِ سَلَاکِ کٛ مبِيطَايَمْ، اَمَّا فُو اٜ نٛنْ اَ مٜىٰطَايِ حٛکُّکِيَمْ کٛو دَمْنغٜلْ غٛعٜلْ نغَمْ مِ نَنْدَ بٜلْطُمْ اٜ حِغٛوٻٜ اَمْ؞ ³⁰اَمَّا ندٜ ٻِطّٛ مَاطَ اٛعٛ وَرْتٛيِ، ݧَامُطٛ جَوْدِ مَاطَ دٛوْ تٛکُّکِ رٜوْٻٜ، اَ حِرْسَنِيمٛ نغَارِ ڤَيْندِ؞›‏

³¹‏«‏ݧَاکٛ اٛنْ وِعِمٛ، ‏‹‏ٻِطّٛ اَمْ، اَنْ اَ وٛنْدِ اٜ اَمْ کٛو ندٜيٜ، کٛ نغٛودُمِ فُو اَنْ جٜيِطُمْ؞ ³²اٜ حَانِ نَنٜنْ بٜلْطُمْ، نغَمْ مِݧِرَاوٛ مَاطَ اٛعٛ اٛ مَايِينٛ، اَمَّا جٛونِ اٛ اُمَّکٜ، اٛ مَجِّينٛ، اَمَّا جٛونِ اٛ حٜٻْتَامَ؞›‏ »‏

جٛوَاطٛ دٛوْ جَوْدِ مٛ وَلَا غٛونغَ

¹يٜىٰسُ وِعِ تٛکُّٻٜمٛ، ‏«‏اٜ وٛودِ غٛطّٛ دِسْکُطٛ جٛوُطٛ غٛطّٛ دٛوْ جَوْدِ مُوطُمْ نغَمْ فَامَنَنْدِ؞ غٛطّٛ وِعِ دِسْکُطٛ اٛنْ، ‏‹‏اٛنْ طٛنْ مٛ نجٛوْطَا دٛوْ جَوْدِ مَاطَ اٜ مٛ وٛنَّندِ؞›‏ ²نغَمْ نٛنْ دِسْکُطٛ اٛنْ نٛدِّمٛ، وِعِمٛ، ‏‹‏کٛ نَنَيْمِ دٛوْ مَاطَ نِحِ؟ وِعَمْ نٛ نجٛغٛرِطَا جَوْدِ اَمْ نغَمْ دَغَ جٛونِ مِ اِتّٜتٜ دٛوْ جَوْدِ اَمْ؞›‏ ³ڤَامَنٛووٛ جَوْدِ اٛنْ وِعِ ندٜرْ ٻٜرْندٜ مُوطُمْ، ‏‹‏نٛ نغَطَيْمِ جٛونِ؟ رَا جٛومُ وُرٛ اَمْ رِيوَيْيَمْ دٛوْ کُوغَلْ نغَعَلْ، رَا بٛو مِ وَلَا سٜمْبٜ رٜمُکِ، مِ سٜمْتَيْ بٛو تٛرَاکِ؞ ⁴يَوَّا!‏ جٛونِ اٜ مِ اَنْدِ نٛ نغَطَيْمِ نغَمْ يِمْٻٜ نجَٻَيَمْ ندٜرْ غُرٜىٰجٜ مَٻّٜ تٛ مِ رِيوَامَ دَغَ کُوغَلْ نغَعَلْ؞›‏ ⁵سٜيْ اٛ لِلَنِ ٻٜ جٛومُ وُرٛ مَاکٛ تٛکَّتَ ݧَمَاندٜ، اٛ وِعِ اَرَنْدٜىٰجٛ، ‏‹‏نٛ جٛومُ وُرٛ اَمْ تٛکَّتَمَ؟›‏ ⁶اٛ وِعِمٛ، ‏‹‏ڤَالِ نٜبَّمْ جَيْتُنْ 800 تٛکّٜتٜىٰمِ؞›‏ ڤَامَنٛووٛ جَوْدِ اٛنْ وِعِمٛ، ‏‹‏جَٻُ طٜرٜوٛلْ ݧَمَاندٜ مَاطَ، يَوْنُ وِنْدُ 400؞›‏ ⁷ندٜنْ اٛ وِعِ طِطَٻٛ اٛنْ، ‏‹‏اَنْ بٛو، نٛيٜ تٛکّٜتٜطَا؟›‏ اٛ وِعِمٛ، ‏‹‏بُحُوجِ اَلْکَمَارِ 1,000 تٛکّٜتٜىٰمِ؞›‏ اٛ وِعِمٛ، ‏‹‏جَٻُ طٜرٜوٛلْ ݧَمَاندٜ مَاطَ وِنْدُ بُحُوجِ 800؞›‏ ⁸جٛومُ وُرٛ اٛنْ مَنِ ڤَامَنٛووٛ جَوْدِ مٛ وَلَا غٛونغَ اٛنْ، نغَمْ اٜ مٛ وٛودِ پٛيْرٜ؞ مِ حٛکُّعٛنْ مِسَالُ طُعُمْ نغَمْ اَنْدٛنْ يِمْٻٜ ٻٜ تٛکَّايِ اَللَّه ٻُرِي يِمْٻٜ تٛکُّٻٜمٛ پٛيْرٜ دٛوْ فِي دُونِيَارُ؞

⁹‏«‏اٜ مِ وِعَعٛنْ، کُوتِرٜىٰ جَوْدِ دُونِيَارُ نغَمْ کٜٻٛنْ حِغٛوٻٜ، نغَمْ تٛ جَوْدِ ندِنْ رٜعِي، طُمْ جَٻَعٛنْ ندٜرْ وُرٛ اَللَّه نغٛ حَا اَبَدَا؞ ¹⁰فُو غَطُطٛ کٛ حَانِ اٜ فِي سٜطَّ، اٛ وَطَيْ کٛ حَانِ اٜ فِي طُطُّمْ؞ نٛنْ مَا مٛ وَلَا غٛونغَ دٛوْ فِي سٜطَّ وَطَتَا غٛونغَ دٛوْ فِي طُطُّمْ؞ ¹¹تٛ اٛنْ نغَلَا غٛونغَ اٜ جٛغَاکِ جَوْدِ دُونِيَارُ، مٛيٜ حٛولٛتٛوعٛنْ اٜ جٛغَاکِ جَوْدِ غٛونغَارِ؟ ¹²تٛ اٛنْ نجٛغٛرَاکِ جَوْدِ غٛطّٛ غٛونغَ، مٛيٜ حٛکَّتَعٛنْ کٛ وَرْتَتَ طُمْ مٛوطٛنْ؟

¹³‏«‏وَلَا مَشُّطٛ بَاوَيْطٛ جَغَّنَاکِ جٛومُ وُرٛعٜنْ طِطٛ؞ کٛو اٛ وَݧَ غٛعٛتٛ اٛ يِطَ غٛعٛتٛ، کٛو اٛ مَوْنِنَ غٛعٛتٛ اٛ يَوَنَ غٛعٛتٛ؞ نٛنْ اٛنٛنْ مَا اٛنْ مبَاوَتَا جَغَّنَاکِ اَللَّه اٜ جَغَّنَاکِ جَوْدِ شَرٜلْ غٛعٛ؞»‏

غٛطّٜ بٛلِيطٜ يٜىٰسُ

¹⁴ندٜ فَارِسَنْکٛعٜنْ نَنِ فُو کٛ اٛ وِعِ، ٻٜ طُرْتِيمٛ نغَمْ ٻٜ غِطْٻٜ شٜىٰدٜ؞ ¹⁵اٛ وِعِٻٜ، ‏«‏اٛنٛنْ نغٛنِ کٛلّٛوٻٜ کٛعٜ مٛوطٛنْ اٛنْ غَطٛوٻٜ کٛ حَانِ يٜىٰسٛ يِمْٻٜ، اَمَّا اَللَّه اٜ اَنْدِ ٻٜرْطٜ مٛوطٛنْ؞ نغَمْ کٛ يِمْٻٜ مَوْنِنْتَ اٜ حَرْمِنِ يٜىٰسٛ اَللَّه؞

¹⁶‏«‏اَتَّوْرَ اٜ دٜفْتٜ اَنَّبٛعٜنْ نغٛنِ کٛ طُمْ وَعَجِنْتَ حَا شَرٜلْ يَحَيَ غَطٛووٛ بَڤْتِسْمَ؞ دَغَ شَرٜلْ نغٜلْ، اٜ طُمْ اَنْدِنَ حَبَرُ بٜلْطُمْ دٛوْ لَامُ اَللَّه، کٛو مٛيٜ اٜ دُرْوَ نغَمْ حٜٻَ نَتُّکِ؞ ¹⁷اَمَّا فُو اٜ نٛنْ، طُمْ ٻُرَيْ حٛيُکِ دٛوْ اٜ لٜيْ رٜعَ اٜ دٛوْ تٛٻّٜلْ غٛعٜلْ نغٜلْ اَتَّوْرَ مَجِّنٜىٰ؞

¹⁸‏«‏کٛو مٛيٜ يٛوفِ دٜبّٛ مُوطُمْ تٜعِ غٛطّٛ، نجٜىٰنُ اٛ وَطَتَ؞ نٜطّٛ تٜعُطٛ جٛوفَاطٛ مَا، نجٜىٰنُ اٛ وَطَتَ؞»‏

دِسْکُطٛ اٜ لِعَاجَرُ

¹⁹‏«‏اٜ وٛودِ غٛطّٛ دِسْکُطٛ ٻٛرْنٛتٛوطٛ لِمْشٜ طٜ شٜىٰدٜ، اٜ مٛ ݧَامَ کٛ اٛ يِطِ کٛو ندٜيٜ؞ ²⁰اٜ دَمُّغَلْ وُرٛ مَاکٛ کٛو ندٜيٜ اٜ طُمْ وَدَّ غٛطّٛ مٛ وَلَنَا بِعٜتٜىٰطٛ لِعَاجَرُ اٜ مٛ وٛودِ ڤُتّٜ کٛو تٛيٜ اٜ ٻَنْدُ مَاکٛ؞ ²¹اٜ مٛ يِطِ ݧَامُکِ کٛ يَنِ اٜ لٜيْدِ دَغَ ندٜرْ ݧَمْندُ دِسْکُطٛ اٛنْ؞ کٛ ٻُرِ نٛنْ، کُتِيجِ مَا اٜ نغَرَ اٜ تَحَ ڤُتّٜ مَاکٛ؞ ²²ندٜ مٛ وَلَنَا اٛنْ مَايِ، مَلَاعِکَعٜنْ نجَارِمٛ اٛ جٛوطٛو حَادٜ اَنَّبِ اِبْرَاهِمْ؞ دِسْکُطٛ اٛنْ مَا مَايِ اٛ اُوَا؞ ²³اٛ نَتِّنَا حِيتٜ اٜ مٛ يَرَ بٛنٜ، سٜيْ اٛ پٜفْتِ غِتٜ مَاکٛ، اٛ يِعِ لِعَاجَرُ اٜ جٛوطِي حَادٜ اَنَّبِ اِبْرَاهِمْ؞ ²⁴اٛ نٛدِّ اِبْرَاهِمْ اٜ سٜمْبٜ، اٛ وِعِ، ‏‹‏يَا اِبْرَاهِمْ، يُرْمِنَنَمْ، لِلٛيْ لِعَاجَرُ مبِعَامٛ اٛ سُووَ حٛوندُ مَاکٛ ندٜرْ ندِيَمْ اٛ فٜوْنَ طٜمْنغَلْ اَمْ نغَمْ اٜ مِ يَرَ بٛنٜ کَلُّطُمْ ندٜرْ حِيتٜ نغٜعٜ؞›‏ ²⁵اِبْرَاهِمْ وِعِمٛ، ‏‹‏ٻِطّٛ اَمْ، سِفْتٛرْ شَرٜلْ کٛ نغٛنّٛطَا دُونِيَارُ اَ حٜٻِي کٛ نغِطَّا فُو، لِعَاجَرُ بٛو يَرِي بٛنٜ کَلُّطُمْ؞ اَمَّا جٛونِ اٜ مٛ نَنَ بٜلْطُمْ طٛعٛ، اَنْ بٛو اَ طٛنْ يَرَ بٛنٜ کَلُّطُمْ؞ ²⁶غَطَ نٛنْ، اٜ وٛودِ نغَيْکَ لُغُّکَ حَکُّندٜ مٜىٰطٜنْ؞ وَلَا بَاوَيْطٛ حُولَ دَغَ طٛعٛ يَحَ تٛ نغٛنْطَا، نٛنْ مَا دَغَ تٛ نغٛنْطَا وَلَا بَاوَيْطٛ حُولٛيَ تٛ اَمِنْ؞›‏ ²⁷اَمَّا دِسْکُطٛ اٛنْ وِعِ، ‏‹‏اٜ مِ تٛرٛمَا، بَڤَّ، لِلُ لِعَاجَرُ تٛ وُرٛ ݧَاکٛ اَمْ؞ ²⁸اٜ مِ وٛودِ مِݧِرَاٻٜ نجٛوٛ، اٜ مِ يِطِ اٛ يَحَ اٛ وَغِّنَٻٜ نغَمْ کَمْٻٜ مَا تٛع ٻٜ نغَرَ تٛ نجَرَيْمِ بٛنٜ کَلُّطُمْ طٛعٛ؞›‏ ²⁹اَمَّا اِبْرَاهِمْ وِعِمٛ، ‏‹‏اٜ ٻٜ نغٛودِ اَتَّوْرَ اٜ دٜفْتٜ اَنَّبٛعٜنْ، اَلْ ٻٜ نغَطَ کٛ طٜ مبِعِ؞›‏ ³⁰دِسْکُطٛ اٛنْ وِعِ، ‏‹‏نَاع نٛنْ، يَا اِبْرَاهِمْ، تٛ غٛطّٛ ندٜرْ مَيْٻٜ يَحَنِيٻٜ، ٻٜ تُوبَيْ؞›‏ ³¹اِبْرَاهِمْ وِعِمٛ، ‏‹‏تٛ ٻٜ نَنَايِ کٛ اَتَّوْرَ اٜ دٜفْتٜ اَنَّبٛعٜنْ مبِعَتَ، ٻٜ نجَٻَتَا کٛ اُمِّيطٛ دَغَ مَيْدٜ وِعِٻٜ؞›‏ »‏

بٛنٜ وَطُکِ حَکّٜ

¹سٜيْ يٜىٰسُ وِعِ تٛکُّٻٜمٛ، ‏«‏دٛولٜ کٛ وَطَتَ يِمْٻٜ نغَطَ حَکّٜ وَرَ، اَمَّا غَطُطٛ غٛطّٛ وَطِ حَکّٜ يَرَيْ بٛنٜ؞ ²طُمْ ٻُرَنَيْ نٜطّٛ اٛنْ حَٻَّنٜىٰ کَاپَ نَمٛلْ مَنْغَ اٜ دَاندٜ اٛ فَطّٜىٰ ندٜرْ ندِيَمْ مبٜىٰلَ، دٛوْ اٛ وَطَ غٛعٛتٛ ندٜرْ سُکَاٻٜ ڤَمَرْٻٜ ٻٜعٜ کٛولِيٻٜيَمْ وَطَ حَکّٜ؞ ³ڤَامَنٜىٰ کٛعٜ مٛوطٛنْ؞

‏«‏تٛ بَنْدِرَاوٛ مَاطَ وَطَنِيمَ کٛ وٛوطَا، مٜتَنْمٛ؞ تٛ اٛ تُوبِي، يَافَنَمٛ؞ ⁴تٛ اٛ وَطَنِيمَ کٛ وٛوطَا ندٜ جٛوٜىٰطِطِ اٜ ݧَلْندٜ غٛعٛ، ندٜنْ ندٜ جٛوٜىٰطِطِ اٜ مٛ وَرَ تٛ مَاطَ اٜ مٛ وِعَ، ‏‹‏مِ تُوبِي،›‏ دٛولٜ نجَافَنٛطَامٛ؞»‏

حٛولَاکِ اَللَّه بٛ غَبّٜلْ مَسْتَتْ

⁵لِلَاٻٜ يٜىٰسُ مبِعِمٛ، ‏«‏ٻٜيْدَنْمِنْ حٛولَاکِ اَللَّه!‏»‏

⁶يٜىٰسُ نٛوتِي وِعِٻٜ، ‏«‏دَا اٛنْ نغٛودِ حٛولَاکِ فَمْطِرْکِ بٛ غَبّٜلْ مَسْتَتْ، اٛنْ مبَاوَيْ مبِعٛنْ لٜکِّ کِعِ، ‏‹‏طٛوفَ تِغّٛيٛطَا ندٜرْ ندِيَمْ،›‏ سٜيْ کِ وَطَ بٛ کٛ مبِيطٛنْ؞

کُوغَلْ مَشُّطٛ

⁷‏«‏مٛيٜ ندٜرْ مٛوطٛنْ غٛودُطٛ مَشُّطٛ دٜمَيْطٛ کٛو دُرَيْطٛ بَالِ، تٛ مَشُّطٛ اٛنْ وَرْتٛيِي دَغَ نغٜسَ اٛ وِعَمٛ، ‏‹‏وٛرٛيْ، جٛوطَ ݧَامَا ݧَمْندُ؟›‏ ⁸سَمْ وَلَا بِعٛووٛ نٛنْ، سٜيْ نِ اٛ وِعَمٛ، ‏‹‏ٻٛرْنَ لِمْشٜرٜ دٜفُکِ، ندٜفَنَايَمْ حِرَاندٜ، نغَدَّنَايَمْ، مِ ݧَامَ مِ يَرَ تَوْ، ندٜنْ ݧَامَا نجَرَا؞›‏ ⁹اٛنْ کَمّٛو اٛ يٜتَّيْ مَشُّطٛ اٛنْ نغَمْ اٛ وَطِي کٛ اٛ وِعِ؟ ¹⁰اَاعَ؞ نٛنْ اٛنٛنْ مَا، تٛ اٛنْ کُوِي کٛ طُمْ وِعِعٛنْ، اٛنْ مبِعَيْ، ‏‹‏مِنْ مَشُّٻٜ ٻٜ نغَلَا بٛتٜ؞ مِنْ نغَطِي کٛ حَانِ مِنْ نغَطَ تَنْ؞›‏ »‏

يٜىٰسُ يَمْطِتِنِي يِمْٻٜ سَڤّٛ

¹¹يٜىٰسُ اٜ يَحَ اُرُشَلِيمَ، اٛ تٛکِّ کٜىٰرٛلْ لٜيْدِ سَمَارِيَ اٜ لٜيْدِ غَلِيلِ؞ ¹²اٜ مٛ نَتَّ وٛنْغٜلْ غَرِيٜلْ، سٜيْ يِمْٻٜ سَڤّٛ غٛودُٻٜ ݧَوُ ݧَامٛوجُمْ لَرَلْ کَوْرِ اٜ مَاکٛ، ٻٜ ندَرِي تٛ وٛطِّ؞ ¹³ٻٜ نٛدِّ اٜ سٜمْبٜ، ٻٜ مبِعِ، ‏«‏يٜىٰسُ!‏ مَوْطٛ!‏ يُرْمِنَنْمِنْ!‏»‏

¹⁴ندٜ يٜىٰسُ يِعِٻٜ، اٛ وِعِٻٜ، ‏«‏نجَحٜىٰ اَرْدِيٻٜ دِينَ نغِعَعٛنْ؞»‏

اٜ ٻٜ ندٜرْ يَادُ، سٜيْ ٻٜ نجَمْطِتِ؞ ¹⁵ندٜ غٛعٛتٛ مَٻّٜ يِعِ يَمْطِتِي، اٛ سٛعِّي اٜ مٛ مَنْتَ اَللَّه اٜ سٜمْبٜ؞ ¹⁶اٛ دِشِّي يٜىٰسٛ يٜىٰسُ، اٛ يٜتِّمٛ؞ کَنْکٛ بٛو اٛ سَمَارِيَنْکٜىٰجٛ؞ ¹⁷يٜىٰسُ وِعِمٛ، ‏«‏نَاع اٛنٛنْ سَڤّٛ نجَمْطِتِ؟ تٛ نجٛوٜىٰنَيٛ ٻٜنْ نغٛنِ؟ ¹⁸وَلَا مٛ طُمْ حٜٻِ سٛعّٛيِي يٜتِّ اَللَّه سٜيْ کٛطٛ اٛعٛ تَنْ؟»‏ ¹⁹سٜيْ اٛ وِعِ سَمَارِيَنْکٜىٰجٛ اٛنْ، ‏«‏اُمَّ ندِلَّا؞ اَ يَمْطِتِي نغَمْ اَ حٛولَکٜيَمْ؞»‏

غَرٛلْ لَامُ اَللَّه

²⁰وٛٻّٜ فَارِسَنْکٛعٜنْ پَمِ يٜىٰسُ ٻٜ مبِعِ، ‏«‏ندٜيٜ لَامُ اَللَّه وَرٛيْتَ؟»‏ اٛ وِعِٻٜ، ‏«‏طُمْ يِعَتَا لَامُ اَللَّه اٜ غِتٜ؞ ²¹وَلَا بِعٛووٛ، ‏‹‏رَا لَامُ اَللَّه طٛعٛ،›‏ کٛو ‏‹‏رَا لَامُ اَللَّه تٛنْ نِي،›‏ نغَمْ لَامُ اَللَّه اٜ ندٜرْ مٛوطٛنْ؞»‏

²²سٜيْ اٛ وِعِ تٛکُّٻٜمٛ، ‏«‏بَلْطٜ اٜ نغَرَ کٛ کَاٻٛتٛنْ يِعُکِ ݧَلْندٜ وٛعٛيْرٜ ندٜرْ ݧَلْطٜ ٻِي نٜطّٛ، اَمَّا اٛنْ نغِعَتَا؞ ²³اٜ شَرٜلْ نغٜلْ يِمْٻٜ مبِعَيْعٛنْ، ‏‹‏رَمّٛ طَاعٜ!‏›‏ کٛو بٛو، ‏‹‏رَمّٛ طٛعٛ!‏›‏ تٛع اٛنْ نجَحُ؞ تٛع اٛنْ تٛکُّٻٜ؞ ²⁴نٛ مَپّٜرٜ مَپِّرْتَ يِعٜىٰ کٛو تٛيٜ، نٛنْ غَرْتٛلْ ٻِي نٜطّٛ وَعَتَ؞ ²⁵اَمَّا اَرَنْدٜ دٛولٜ اٛ يَرَ تٛرَّ کَلُّکَ، يِمْٻٜ جَامَنُ طُعُمْ نغَݧَمٛ؞ ²⁶کٛ وَطُنٛ ندٜرْ جَامَنُ اَنَّبِ نُحُ، نٛنْ وَطٜتٜىٰ ندٜرْ بَلْطٜ کٛ ٻِي نٜطّٛ وَرْتٛيْتَ؞ ²⁷يِمْٻٜ اٜ ݧَامَ، اٜ نجَرَ، اٜ تٜعَ، اٜ تٜعٜىٰ حَا شَرٜلْ کٛ اَنَّبِ نُحُ نَتِّ کٛمِوَلْ مَنْغَلْ، ندِيَمْ وَرِ حَلْکِٻٜ ٻٜ فُو؞ ²⁸نٛنْ مَا نٛ طُمْ وَطُنٛ ندٜرْ جَامَنُ لُوتُ؞ يِمْٻٜ اٜ ݧَامَ، اٜ نجَرَ، اٜ شٛودَ، اٜ شٛورَ، اٜ ندٜمَ، اٜ مَحَ؞ ²⁹اَمَّا ݧَلْندٜ ندٜ لُوتُ وُرْتِي دَغَ ندٜرْ غَرِيرِ سٛدٛمْ، طُمْ يٛوفٛيِ حِيتٜ اٜ کَاپٜ ݧَامٛوجٜ حِيتٜ دَغَ دٛوْ، نغٜ حَلْکِٻٜ ٻٜ فُو؞ ³⁰نٛنْ وَطٜتٜىٰ ݧَلْندٜ ندٜ ٻِي نٜطّٛ وَنْغَتَ؞

³¹‏«‏اٜ ݧَلْندٜ ندٜنْ غٛنْطٛ دٛوْ سُودُ فُو تٛع جِڤّٛيٛو نغَمْ حٛشُّکِ جَوْدِ مَاکٛ ندٜرْ سُودُ؞ غٛنْطٛ تٛ نغٜسَ بٛو تٛع سٛعّٛو وُرٛ؞ ³²شِفْتٛرٜىٰ دٜبّٛ لُوتُ!‏ ³³کٛو مٛيٜ طَٻُّتُطٛ حِسْنَ يٛنْکِ مُوطُمْ دُلَّيْکِ، اَمَّا کٛو مٛيٜ دُلِّ يٛنْکِ مُوطُمْ نغَمْ اَمْ حِسْنَيْکِ؞ ³⁴اٜ مِ وِعَعٛنْ، اٜ جٜمَّارٜ ندٜنْ يِمْٻٜ طِطٛ ڤُکّٛدٛتٛ دٛوْ لٜىٰسٛ غٛعٛ طُمْ حٛشَّ غٛعٛتٛ، طُمْ اَلَ غٛعٛتٛ؞ ³⁵رٜوْٻٜ طِطٛ اٜ نَمِدَ، طُمْ حٛشَّ غٛعٛتٛ، طُمْ اَلَ غٛعٛتٛ؞ ³⁶‏[‏يِمْٻٜ طِطٛ اٜ کُوَ ندٜرْ نغٜسَ، طُمْ حٛشَّ غٛعٛتٛ، طُمْ اَلَ غٛعٛتٛ؞]‏»‏

³⁷تٛکُّٻٜمٛ مبِعِمٛ، ‏«‏مٛودِبّٛ، تٛيٜ فِي طُعُمْ وَطَتَ؟»‏

اٛ وِعِٻٜ، ‏«‏تٛ بَاتُطُمْ وٛنِ، طٛنْ جِغَاجٜ کَوْرِتَتَ؞»‏

مِسَالُ دٛوْ اَلْکَالِيجٛ اٜ غٛطّٛ دٜبّٛ

¹سٜيْ يٜىٰسُ حٛکِّ تٛکُّٻٜمٛ مِسَالُ طُعُمْ نغَمْ اٛ حٛلَّٻٜ ٻٜ نغَطَ کَ وَطُکِ دٛعَارٜ تٛع ٻٜ شٛمَ؞ ²اٛ وِعِ، ‏«‏اٜ وٛنْدِ غَرِيرِ اٜ وٛودِ غٛطّٛ اَلْکَالِيجٛ مٛ حُلَتَا اَللَّه اٛ وَنَّا اٜ يِمْٻٜ؞ ³اٜ وٛودِ غٛطّٛ دٜبّٛ ندٜرْ غَرِيرِ ندِنْ غٛرْکٛ مَاکٛ مَايِ؞ کٛو ندٜيٜ اٜ مٛ يَحَ تٛ اَلْکَالِيجٛ اٛنْ اٜ مٛ تٛرٛومٛ اٜ مٛ وِعَ، ‏‹‏وَطُ کٛ حَانِ حَکُّندٜ اَمْ اٜ غَݧٛ اَمْ؞›‏ ⁴اَلْکَالِيجٛ اٛنْ نٜىٰٻِ جَٻَايِ؞ اَمَّا غَطَ طٛنْ اٛ وِعِ ندٜرْ ٻٜرْندٜ مَاکٛ، ‏‹‏کٛو ندٜ مِ حُلَتَا اَللَّه، کَدِنْ مِ وَنَّا اٜ کٛو مٛيٜ، ⁵اَمَّا نغَمْ دٜبّٛ اٛعٛ اٜ وَنَّيَمْ، مِ وَطَنَيْمٛ کٛ حَانِ، نغَمْ تٛع اٛ وَطَ مِ سٛمَ اٜ غَرٛلْ مَاکٛ؞›‏ »‏

⁶ندٜنْ يٜىٰسُ وِعِ، ‏«‏نَنٜىٰ کٛ اَلْکَالِيجٛ اٛعٛ مٛ حُلَتَا جٛومِرَاوٛ وِعِ؞ ⁷اٜ يِعُکِ مٛوطٛنْ اَللَّه وَطَنْتَا شُٻَاٻٜ مُوطُمْ تٛرٛتٛوٻٜمٛ جٜمَّ اٜ ݧَلَوْمَ کٛ حَانِ؟ اٛ نٜىٰٻَيْ اٛ وَلَّايِٻٜ؟ ⁸اٜ مِ وِعَعٛنْ، اٛ يَاوَيْ وَطَنْکِٻٜ کٛ حَانِ؞ اَمَّا تٛ ٻِي نٜطّٛ وَرْتٛيِي، اٛ تَوَيْ کٛولِيٻٜمٛ ندٜرْ دُونِيَارُ بٛو؟»‏

مِسَالُ دٛوْ فَارِسَنْکٜىٰجٛ اٜ جَٻٛووٛ شٜىٰدٜ لٜيْدِ

⁹اٜ وٛودِ نغِعٛوٻٜ کٛعٜ مُعّٜنْ ٻٜ غَطٛوٻٜ کٛ اَللَّه يِطِ، اٜ ٻٜ نجَوَنَ وٛٻّٜ؞ يٜىٰسُ حٛکِّٻٜ مِسَالُ طُعُمْ؞ ¹⁰اٛ وِعِ، ‏«‏يِمْٻٜ طِطٛ نجَحِ وُرٛ شٜنِينغٛ نغَمْ ٻٜ نغَطَ دٛعَارٜ، غٛعٛتٛ فَارِسَنْکٜىٰجٛ، غٛعٛتٛ بٛو جَٻٛووٛ شٜىٰدٜ لٜيْدِ؞ ¹¹فَارِسَنْکٜىٰجٛ اٛنْ دَرِي، وَطِ دٛعَارٜ ندٜرْ ٻٜرْندٜ مُوطُمْ وِعِ، ‏‹‏اَللَّه، مِ يٜتِّيمَ نغَمْ مِ وَطَتَا کٛ وٛٻّٜ يِمْٻٜ نغَطَتَ، بٛ وُيْٻٜ، اٜ غَطٛوٻٜ کٛ وٛوطَا، اٜ غَطٛوٻٜ نجٜىٰنُ، کٛو مَا بٛ جَٻٛووٛ شٜىٰدٜ لٜيْدِ اٛعٛ؞ ¹²اٜ مِ سُومٛو ندٜ طِطِ ندٜرْ يٛنْتٛورٜ غٛعٛ، ندٜنْ اٜ مِ اِتَّ جَکَّ ندٜرْ کٛ کٜٻُمِ فُو؞›‏ ¹³اَمَّا جَٻٛووٛ شٜىٰدٜ لٜيْدِ اٛنْ دَرِي تٛ وٛطِّ؞ اٛ رَارَايِ دٛوْ، اٜ مٛ رٛنْدِ جُوطٜ مَاکٛ دٛوْ حٛورٜ، اٜ مٛ وِعَ، ‏‹‏يَا اَللَّه، يُرْمِنَنَمْ، مِ وَطِي حَکّٜ؞›‏ ¹⁴اٜ مِ وِعَعٛنْ، جَٻٛووٛ شٜىٰدٜ لٜيْدِ اٛنْ حٛوتِي وُرٛ اٛ جَافَنَاطٛ حَکّٜ مَاکٛ، اَمَّا فَارِسَنْکٜىٰجٛ اٛنْ يَافَنَاکَ؞ نغَمْ کٛو مٛيٜ مَوْنِنْطٛ حٛورٜ مُوطُمْ اٛ ڤَمْطِنْتٜىٰطٛ، ندٜنْ لٜسْتِنْطٛ حٛورٜ مُوطُمْ بٛو اٛ مَوْنِنْتٜىٰطٛ؞»‏

يٜىٰسُ بَرْکِطِنِ ٻِکّٛيْ ڤَمَرٛيْ

¹⁵يِمْٻٜ اٜ نغَدَّنَ يٜىٰسُ سُکَحٛيْ مَٻّٜ ڤَمَرٛيْ نغَمْ اٛ بَرْکِطِنَکٛيْ، اَمَّا ندٜ تٛکُّٻٜمٛ نغِعِ نٛنْ، ٻٜ کَٻَنِٻٜ؞ ¹⁶اَمَّا يٜىٰسُ نٛدِّ سُکَحٛيْ کٛيْ تٛ مُوطُمْ، وِعِ، ‏«‏اَلٜىٰ سُکَحٛيْ ڤَمَرٛيْ نغَرَ تٛ اَمْ؞ تٛع اٛنْ کَطُکٛيْ، نغَمْ غٛودُٻٜ ٻٜرْطٜ اِرِ طٜ مَاکٛيْ نجٜيِ لَامُ اَللَّه؞ ¹⁷اٜ مِ وِعَعٛنْ غٛونغَ، کٛو مٛيٜ مٛ جَٻَايِ لَامُ اَللَّه بٛنٛ سُکَيٜلْ ڤَمَرٜلْ، اٛ نَتَّتَا لَامُ طُمْ کٛو سٜطَّ؞»‏

لَامِيطٛ دِسْکُطٛ

¹⁸سٜيْ غٛطّٛ لَامِيطٛ پَمِمٛ وِعِ، ‏«‏مٛودِبّٛ غٜىٰتٛ، کٛ حَانِ مِ وَطَ مِ حٜٻَ يٛنْکِ کِ رٜعَتَا؟»‏

¹⁹يٜىٰسُ نٛوتِي، وِعِمٛ، ‏«‏نغَمْ طُمٜ نٛدِّرْطَايَمْ غٜىٰتٛ؟ وَلَا غٜىٰتٛ سٜيْ اَللَّه تَنْ؞ ²⁰اَ اَنْدِ کٛ اَتَّوْرَ وِعِ، ‏‹‏تَاع وَطُ نجٜىٰنُ؞ تَاع وَطُ وَرْحٛورٜ؞ تَاع وُجُّ؞ تَاع حٛکُّ شٜيْدَ فٜوْرٜ؞ حٛکُّ ݧَاکٛ مَاطَ اٜ مَدُوجٛ مَاطَ مَنْغُ؞›‏ »‏

²¹اٛ وِعِ، ‏«‏اٜ مِ وَطَ فِي طُعُمْ فُو دَغَ اٜ مِ سُکَ؞»‏

²²ندٜ يٜىٰسُ نَنِ نٛنْ، وِعِمٛ، ‏«‏حَا جٛونِ حٛرَنِمَا فِي غٛعٛ؞ سٛورُ کٛ نغٛودُطَا فُو، شٜنْدَنَا ٻٜ نغَلَنَا شٜىٰدٜ طٜنْ، ندٜنْ اَ حٜٻَيْ مبَرْجَارِ تٛنْ دٛوْ؞ ندٜنْ نغَرَا، تٛکَّايَمْ؞»‏ ²³ندٜ اٛ نَنِ نٛنْ، اٛ نَنَايِ بٜلْطُمْ، نغَمْ اٜ مٛ وٛودِ رِسْکُ طُطُّمْ؞

²⁴يٜىٰسُ رَارِمٛ وِعِ، ‏«‏اٜ طُمْ سَطِ نَاع سٜطَّ دِسْکُطٛ نَتَّ لَامُ اَللَّه!‏ ²⁵طُمْ ٻُرَيْ حٛيْکِ نغٜىٰلٛوبَ تٛکَّ ندٜرْ يٛلْندٜ بَاتَلْ دٛوْ دِسْکُطٛ نَتَّ لَامُ اَللَّه؞»‏

²⁶نَنُٻٜ کٛ اٛ وِعِ مبِعِمٛ، ‏«‏تٛو، تٛ طُمْ نٛنْ، مٛيٜ حِسَتَ؟»‏

²⁷يٜىٰسُ وِعِٻٜ، ‏«‏کٛ يِمْٻٜ مبَاوَتَا وَطُکِ، اَللَّه وَاوَيْ وَطُکِطُمْ؞»‏

²⁸بِيتُرُسْ وِعِمٛ، ‏«‏رَطُّمْ، مِنْ اَلِي کٛ مِنْ نغٛودِ فُو مِنْ تٛکِّيمَ؞»‏

²⁹يٜىٰسُ وِعِٻٜ، ‏«‏اٜ مِ وِعَعٛنْ غٛونغَ، کٛو مٛيٜ اَلُطٛ وُرٛ مُوطُمْ، کٛو دٜبّٛ مُوطُمْ، کٛو سَکِرَاٻٜ مُوطُمْ، کٛو دَݧٛوٻٜ مُوطُمْ، کٛو ٻِٻّٜ مُوطُمْ، نغَمْ لَامُ اَللَّه، ³⁰اٛ حٜٻَيْ کٛ ٻُرِ نٛنْ طُوطُکِ ندٜرْ جَامَنُ طُعُمْ، ندٜنْ تٛ اٛ مَايِي اٛ حٜٻَيْ يٛنْکِ کِ رٜعَتَا؞»‏

يٜىٰسُ مٜتِي مٜتُکِ تَتَٻِ دٛوْ نٛ مَيْرَتَ

³¹سٜيْ يٜىٰسُ نٛدِّ تٛکُّٻٜمٛ سَڤّٛ اٜ طِطٛ، ٻٜ کَکِّتِي اٛ وِعِٻٜ، ‏«‏رَطُّمْ، اٜنْ نجَحَيْ اُرُشَلِيمَ، ندٜنْ کٛو طُمٜ کٛ اَنَّبٛعٜنْ مبِنْدِ دٛوْ ٻِي نٜطّٛ طُمْ حٜىٰوَيْ؞ ³²طُمْ نَنْغَيْمٛ، طُمْ حٛکِّتِرَمٛ ندٜرْ جُوطٜ حٜىٰفٜرْٻٜ، ٻٜ نجُکِّتَمٛ، ٻٜ کُطَمٛ، ٻٜ تُتَّنَمٛ جٛودٜ، ³³ٻٜ ڤِيَمٛ، ٻٜ مبَرَمٛ؞ ندٜنْ ݧَلْندٜ تَتَوْرٜ اٛ اُمّٛتٛ دَغَ مَيْدٜ؞»‏

³⁴تٛکُّٻٜمٛ سَڤّٛ اٜ طِطٛ ٻٜنْ ڤَامَايِ کٛ اٛ وِعِ دٛوْ حٛورٜ مَاکٛ؞ فَامُ طُمْ سُوطَنَکٜٻٜ، ٻٜ کٜٻْتَايِ دٛوْ طُمٜ اٛ مٜتَتَ؞

يٜىٰسُ يَمْطِتِنِي بُمْطٛ تٛرٛتٛوطٛ

³⁵ندٜ يٜىٰسُ ٻَدِي يٛتَّاکِ غَرِيرِ جٜرِيکٛ، غٛطّٛ بُمْطٛ اٜ جٛوطِي حَادٜ طَتَلْ اٜ تٛرٛو؞ ³⁶ندٜ بُمْطٛ اٛنْ نَنِ يِمْٻٜ طُطْٻٜ اٜ پَٻّٛو، اٛ پَمِ، ‏«‏کٛ وَنْغِ؟»‏

³⁷ٻٜ مبِعِمٛ، ‏«‏يٜىٰسُ نَجَرَنْکٜىٰجٛ پَٻّٛتٛو؞»‏

³⁸اٛ نٛدِّ اٜ سٜمْبٜ، اٛ وِعِ، ‏«‏يٜىٰسُ، ٻِطّٛ دَوْدَ، يُرْمِنَنَمْ!‏»‏

³⁹جَحٛوٻٜ يٜىٰسٛ يٜىٰسُ کَٻَنِمٛ مبِعِمٛ اٛ دٜعِّتَ، اَمَّا اٛ ٻٜيْدِ نٛدُّکِ اٜ سٜمْبٜ، اٜ مٛ وِعَ، ‏«‏ٻِطّٛ دَوْدَ، يُرْمِنَنَمْ!‏»‏

⁴⁰نغَمْ نٛنْ يٜىٰسُ دَرِي وِعِ طُمْ وَدَّ بُمْطٛ اٛنْ تٛ مَاکٛ؞ ندٜ اٛ ٻَدّٛيِي حَادٜ، يٜىٰسُ پَمِمٛ، وِعِ، ⁴¹‏«‏طُمٜ نغِطَّا مِ وَطَنْمَا؟»‏

اٛ وِعِ، ‏«‏مٛودِبّٛ، اٜ مِ يِطِ مبُمْتِنَايَمْ؞»‏

⁴²سٜيْ يٜىٰسُ وِعِمٛ، ‏«‏وُمْتُ!‏ حٛولَارٜ مَاطَ يَمْطِتِنِيمَ؞»‏

⁴³طٛنْ اٜ طٛنْ غِتٜ مَاکٛ مبُمْتِ، اٛ تٛکِّ يٜىٰسُ، اٜ مٛ مَنْتَ اَللَّه؞ ندٜ وٛنْٻٜ طٛنْ فُو نغِعِ کٛ وَطِ، کَمْٻٜ مَا ٻٜ مَنْتِ اَللَّه؞

يٜىٰسُ اٜ جَکَّ

¹يٜىٰسُ نَتِّ جٜرِيکٛ اٜ مٛ پَٻّٛو ندٜرْ غَرِيرِ ندِنْ؞ ²اٜ وٛودِ غٛطّٛ نٜطّٛ تٛنْ مَوْطٛ جَٻٛوٻٜ شٜىٰدٜ لٜيْدِ، بِعٜتٜىٰطٛ جَکَّ، اٛ دِسْکُطٛ؞ ³اٜ مٛ يِطِ اٛ يِعَ مٛيٜ وٛنِ يٜىٰسُ، اَمَّا اٛ وَاوَايِ نغَمْ يِمْٻٜ طُوطِي، کَدِمَا اٛ دَمُّطٛ؞ ⁴سٜيْ اٛ دٛغِّ اٛ اَرْدِي اٛ پٜىٰݝِ لٜکِّ نغَمْ اٛ يِعَ يٜىٰسُ، نغَمْ طٛنْ يٜىٰسُ پِوَتَ؞ ⁵ندٜ يٜىٰسُ يٛتِّي وِغٜىٰرٜ ندٜنْ تِجِّي وِعِمٛ، ‏«‏جَکَّ، يَوْنُ نجِڤّٛيٛطَا نغَمْ حَنْدٜ وُرٛ مَاطَ مبَالَيْمِ؞»‏

⁶سٜيْ جَکَّ يَوْنِ، جِڤّٛيِي، جَٻِّيمٛ اٜ وٜلْوٜلْتَ؞ ⁷ندٜ يِمْٻٜ نغِعِ يٜىٰسُ يَحِ وُرٛ مَاکٛ، ٻٜ فُو ٻٜ نغَطِ کَ مٜتِتَاکِ اٜ ٻٜ مبِعَ، ‏«‏اٛ وَالَيْ وُرٛ نٜطّٛ غَطٛووٛ حَکّٜ؞»‏

⁸اَمَّا جَکَّ اُمِّي وِعِ يٜىٰسُ، ‏«‏مٛودِبّٛ، مِ حٛکَّيْ ٻٜ نغَلَنَا سٜنْدٜرٜ جَوْدِ اَمْ؞ کَدِمَا تٛ اٜ وٛودِ ٻٜ نجَٻَنْمِ غٛطُّمْ کٛ حَانَا فُو، مِ يٛٻَيْٻٜ کٛ نجَٻَنْمِٻٜ ندٜ نَيِ؞»‏

⁹يٜىٰسُ وِعِمٛ، ‏«‏حَنْدٜ کِسْندَمْ وَرِي ندٜرْ وُرٛ نغٛعٛ، نغَمْ کَنْکٛ مَا اٛ ٻِطّٛ اِبْرَاهِمْ؞ ¹⁰نغَمْ ٻِي نٜطّٛ وَرٛيِي طَٻِّتَ کٛ مَجِّ حِسْنَطُمْ؞»‏

مِسَالُ دٛوْ جَمْطٜ جِينَارِيَ

¹¹اٜ ٻٜ ندٜرْ نَنُکِ کٛ اٛ وِعَتَٻٜ، سٜيْ اٛ حٛکِّٻٜ مِسَالُ طُعُمْ نغَمْ اٛ ٻَدَکٜ اُرُشَلِيمَ، کَدِمَا نغَمْ يِمْٻٜ اٜ کَمّٛو لَامُ اَللَّه وَنْغَيْ طٛنْ اٜ طٛنْ؞ ¹²اٛ وِعِ، ‏«‏غٛطّٛ نٜطّٛ مَوْطٛ يَحَيْ وٛنْدِ غَرِيرِ غٛطُّندِ نغَمْ طُمْ لَمْنَمٛ اٛ سٛعّٛيٛو؞ ¹³اٛ نٛدِّ مَشُّٻٜ مَاکٛ کَمْٻٜ سَڤّٛ، اٛ حٛکِّ کٛو مٛيٜ مَٻّٜ شٜىٰدٜ طٜ کُوٛووٛ حٜٻَتَ ندٜرْ لٜبِّ تَتِ، اٛ وِعِٻٜ، ‏‹‏شٛودٜىٰ شٛورِتٛوطٛنْ اٜ شٜىٰدٜ طٜعٜ نَا مِ وَرْتٛيِي؞›‏ ¹⁴اَمَّا يِمْٻٜ لٜيْدِ مَاکٛ نغِطَامٛ، سٜيْ ٻٜ لِلِ لِلَاٻٜ غَطَ اٛ دِلِّي ٻٜ مبِعَ، ‏‹‏مِنْ نغِطَا نٜطّٛ اٛعٛ لَامٛو لٜيْدِ اَمِنْ؞›‏

¹⁵‏«‏ندٜ اٛ لَمْنَا اٛ سٛعِّي وُرٛ، اٛ وِعِ طُمْ نٛدَّنَمٛ مَشُّٻٜ ٻٜنْ طٛنْ ٻٜ اٛ حٛکُّنٛو شٜىٰدٜ، نغَمْ اٛ يِعَ ٻٜيْدَارِ نٛيٜ اٛ حٜٻِ؞ ¹⁶اَرَنْدٜىٰجٛ اٛنْ وَرٛيِ وِعِ، ‏‹‏جٛومُ وُرٛ، شٜىٰدٜ مَاطَ ٻٜيْدَکٜ ندٜ سَڤّٛ؞›‏ ¹⁷اٛ وِعِمٛ، ‏‹‏اَ حُوِي بٛطُّمْ، اَ مَشُّطٛ بٛطّٛ؞ ندٜ اَ حٛلِّي غٛونغَ مَاطَ دٛوْ فِي ڤَمَرُمْ، اَ لَامٛتٛ غَرِيجٜ سَڤّٛ؞›‏ ¹⁸طِطَٻٛ وَرِ، وِعِمٛ، ‏‹‏جٛومُ وُرٛ، شٜىٰدٜ مَاطَ ٻٜيْدَکٜ ندٜ جٛوِ؞›‏ ¹⁹جٛومُ وُرٛ اٛنْ وِعِمٛ، ‏‹‏اَنْ، اَ لَامٛتٛ غَرِيجٜ جٛوِ؞›‏ ²⁰غٛطّٛ وَرٛيِ وِعِ، ‏‹‏جٛومُ وُرٛ، رَا شٜىٰدٜ مَاطَ طٜ کَٻُّمِ ندٜرْ لِمْشٜرٜ شُوطُمِ؞ ²¹اٜ مِ حُلُمَا نغَمْ اَ نٜطّٛ شَطَنْطٛ؛ اَ حٛشَّ کٛ اَ رٜسَايِ، اَ فٜعَّ کٛ اَ اَاوَايِ؞›‏ ²²جٛومُ وُرٛ اٛنْ وِعِمٛ، ‏‹‏اَنْ، اَ مَشُّطٛ کَلُّطٛ؞ کٛ مبِيطَا اٜ حٛنْدُکٛ مَاطَ نَنْغِيمَ!‏ اٜ يِيکِ مَاطَ مِ نٜطّٛ شَطَنْطٛ؟ اَ ݧُمَ اٜ مِ حٛشَّ کٛ مِ رٜسَايِ، اٜ مِ فٜعَّ کٛ مِ اَاوَايِ؟ ²³تٛ طُمْ نٛنْ، کٛ وَطِ اَ رٜسَنَايِيَمْ شٜىٰدٜ تٛ طٜ کُوتِرْتٜىٰ طٜ ٻٜيْدٛو، نغَمْ تٛ مِ وَرْتٛيِي مِ تَوَ طٜ ٻٜيْدَکٜ؟›‏ ²⁴اٛ وِعِ دَرِيٻٜ حَادٜ طٛنْ، ‏‹‏نجَٻٜىٰ شٜىٰدٜ طٜنْ تٛ مَاکٛ، کٛکّٛنْطٜ اٛنْ طٛنْ ٻٜيْدُطٛ شٜىٰدٜ مُوطُمْ ندٜ سَڤّٛ؞›‏ ²⁵ٻٜ مبِعِمٛ، ‏‹‏جٛومُ وُرٛ، اَيْ اٛنْ طٛنْ شٜىٰدٜ مَاکٛ ٻُرِي طٜ اٛعٛ طُوطُکِ ندٜ سَڤّٛ؞›‏ ²⁶‏‹‏نٛنْ بٛو اٜ مِ وِعَعٛنْ، فُو غٛودُطٛ طُمْ ٻٜيْدَنَيْمٛ؞ اَمَّا مٛ وَلَا غٛطُّمْ، کٛو کٛ اٛ وٛودِ مَا طُمْ جَٻَيْطُمْ؞ ²⁷ٻٜنْ طٛنْ وَݧْوَݧْٻٜ اَمْ بٛو ٻٜ نغِطَا مِ لَامٛو دٛوْ مَٻّٜ، نغَدّٜىٰٻٜ طٛعٛ، مبَرٛنْٻٜ يٜىٰسٛ اَمْ؞›‏ »‏

يٜىٰسُ سِرْيَکٜ نَتُّکِ اُرُشَلِيمَ

²⁸ندٜ يٜىٰسُ وِعِ نٛنْ، اٛ نَنْغِ لَاوٛلْ يَاکِ اُرُشَلِيمَ؞ ²⁹ندٜ اٛ ٻَدِي غَرِيجٜ بٜتَفَاجِ اٜ بٜتَنِ تٛ حٛشّٜىٰرٜ ندٜ لٜطّٜ جَيْتُنْ، سٜيْ اٛ لِلِ تٛکُّٻٜمٛ طِطٛ؞ ³⁰اٛ وِعِٻٜ، ‏«‏نجَحٜىٰ ندٜرْ غَرِيٜلْ غٛنْغٜلْ يٜىٰسٛ مٛوطٛنْ؞ اٜ نَتُّکِ مٛوطٛنْ، اٛنْ تَوَيْ مبَبَّ مٛلَ اٜ نغَ حَٻِّي، طُمْ مٜىٰطَايِ وَطَّاکِنغَ؞ ڤِتّٛيٜىٰنغَ نغَدّٛنْغَ طٛعٛ؞ ³¹تٛ غٛطّٛ پَمِيعٛنْ کٛ وَطِ ڤِتّٛتٛنْغَ، مبِعٜىٰمٛ، ‏‹‏مٛودِبّٛ اٜ يِطِ حُوتِرْکِنغَ؞›‏ »‏

³²سٜيْ لِلَاٻٜ ٻٜنْ نجَحِ تَوِ مبَبَّ نغَنْ نٛنْ نٛ اٛ وِعِرِٻٜ؞ ³³اٜ ٻٜ ڤِتَّنغَ، سٜيْ جٛومِيغَ وَرِ وِعِٻٜ، ‏«‏نغَمْ طُمٜ ڤِتّٛتٛنْغَ؟»‏

³⁴ٻٜ مبِعِمٛ، ‏«‏مٛودِبّٛ اٜ يِطِ حُوتِنِرَنغَ؞»‏ ³⁵ٻٜ نجَارَنِنغَ يٜىٰسُ، ٻٜ مبٜعِّتِ شُدَّارِ مَٻّٜ دٛوْ مَغَّ، ٻٜ کٛشِّمٛ ٻٜ نجٛوِمٛ دٛوْ مَاغَ؞ ³⁶اٜ مٛ ندٜرْ يَادُ دٛوْ مبَبَّ نغَنْ، يِمْٻٜ نغَطِ کَ وٜعُّتُکِ شُدَّارِ مَٻّٜ دٛوْ طَتَلْ نغَلْ؞

³⁷ندٜ اٛ ٻَدِي اُرُشَلِيمَ تٛ رٜغٛرْدٜ حٛشّٜىٰرٜ ندٜ لٜطّٜ جَيْتُنْ، حَوْرُتُٻٜ تٛکُّٻٜمٛ ڤُطِّ وٜلْوٜلْتُکِ اٜ مَنْتَ اَللَّه اٜ سٜمْبٜ نغَمْ کُوطٜ کُلْنِيطٜ فُو طٜ ٻٜ نغِعِ؞ ³⁸اٜ ٻٜ مبِعَ، ‏«‏اٛ بَرْکِطِنَاطٛ لَامِيطٛ غَرٛيْطٛ ندٜرْ اِنْدٜ جٛومِرَاوٛ!‏ جَمْ اٜ تٛنْ دٛوْ، اٜنْ مَوْنِنْ اَللَّه!‏»‏

³⁹سٜيْ وٛٻّٜ فَارِسَنْکٛعٜنْ ندٜرْ حَوْرُتُٻٜ ٻٜنْ مبِعِ يٜىٰسُ، ‏«‏مٛودِبّٛ، حَٻَنْ تٛکُّٻٜمَ؞»‏

⁴⁰اٛ وِعِٻٜ، ‏«‏اٜ مِ وِعَعٛنْ، تٛ ٻٜ ندٜعِّتِي، کَاپٜ طٜعٜ مَنْتَيْ اَللَّه اٜ سٜمْبٜ؞»‏

يٜىٰسُ وٛيَنِي اُرُشَلِيمَ

⁴¹ندٜ يٜىٰسُ ٻَدِّي اُرُشَلِيمَ يِعِ غَرِيرِ ندِنْ، اٛ وٛيَنِندِ، ⁴²اٜ مٛ وِعَ، ‏«‏دَا اَ اَنْدُنٛو حَنْدٜ کٛ وَدَّتَ جَمْ!‏ اَمَّا طُمْ سُوطَنَکٜ غِتٜ مَاطَ؞ ⁴³نغَمْ بَلْطٜ نغَرٛيَيْ طٜ وَݧْوَݧْٻٜ مَاطَ ڤِلٛتٛمَا ٻٜ ٻِطُّمَا کٛو تٛيٜ مَاطَ، ⁴⁴ٻٜ ندٛعُّمَا اٜ لٜيْدِ، اَنْ اٜ ٻِٻّٜ مَاطَ وٛنْٻٜ ندٜرْ مَاطَ، ٻٜ اَلَتَا وٛنْدٜ حَيْرٜ دٛوْ وٛنْدٜ ندٜرْ مَاطَ، نغَمْ اَ اَنْدِتَايِ شَرٜلْ نغٜلْ اَللَّه وَرِ حِسْنُکِمَ؞»‏

يٜىٰسُ يَحِي وُرٛ شٜنِينغٛ

⁴⁵يٜىٰسُ نَتِّ وُرٛ شٜنِينغٛ، اٛ فُطِّ رِيوُکِ ٻٜ سٛورٜ‑سٛورٜ، ⁴⁶اٛ وِعِٻٜ، ‏«‏طُمْ وِنْدَامَ اَللَّه وِعِ، ‏‹‏طُمْ نٛدِّرَيْ وُرٛ اَمْ وُرٛ دٛعَارٜ،›‏ اَمَّا اٛنْ نغَرْتِرِينغٛ لُورٛ وُيْٻٜ؞»‏

⁴⁷کٛو ندٜيٜ اٜ مٛ اٜکِّتِنَ ندٜرْ وُرٛ شٜنِينغٛ، اَمَّا مَوْٻٜ اَرْدِيٻٜ دِينَ اٜ مٛودِٻّٜ اَتَّوْرَ اٜ اَرْدِيٻٜ يِمْٻٜ اٜ نغَطِ کَ طَٻُّتُکِ نٛ ٻٜ مبَرْدَتَمٛ؞ ⁴⁸اَمَّا ٻٜ کٜٻَايِ نٛ ٻٜ نَنْغِرْتَمٛ، نغَمْ يِمْٻٜ فُو اٜ کٜتِّندِ اٜ نَنَمٛ؞

پَمٛلْ دٛوْ بَڤْتِسْمَ يَحَيَ

¹وٛنْدٜ ݧَلْندٜ، يٜىٰسُ اٜ اٜکِّتِنَ يِمْٻٜ ندٜرْ وُرٛ شٜنِينغٛ، اٜ مٛ وَعَجِنَ حَبَرُ بٜلْطُمْ، سٜيْ مَوْٻٜ اَرْدِيٻٜ دِينَ اٜ مٛودِٻّٜ اَتَّوْرَ اٜ مَوْٻٜ يِمْٻٜ نغَرِ تٛ مَاکٛ، ²ٻٜ مبِعِمٛ، ‏«‏اٜ لَامُ مٛيٜ نغَطَتَا کُوطٜ طٜعٜ؟ مٛيٜ حٛکُّمَا لَامُ طُمْ؟»‏

³اٛ وِعِٻٜ، ‏«‏مِنْ مَا مِ پَمَيْعٛنْ، جٛونِ مبِعٜىٰيَمْ، ⁴بَڤْتِسْمَ طُمْ يَحَيَ وَطِ، تٛ اَللَّه طُمْ پِوٛيِ کٛو تٛ يِمْٻٜ طُمْ پِوٛيِ؟»‏

⁵سٜيْ ٻٜ مٜدِّ حَکُّندٜ مَٻّٜ، ٻٜ مبِعِ، ‏«‏تٛ اٜنْ مبِعِي، ‏‹‏دَغَ تٛ اَللَّه طُمْ پِوٛيِ،›‏ اٛ وِعَيْ، ‏‹‏کٛ وَطِ اٛنْ جَٻَايِ کٛ اٛ وِعِ؟›‏ ⁶تٛ بٛو اٜنْ مبِعِي، ‏‹‏تٛ يِمْٻٜ طُمْ پِوٛيِ،›‏ يِمْٻٜ ٻٜعٜ فُو کُبٛرْتٛعٜنْ کَاپٜ، نغَمْ ٻٜ نجَٻِي يَحَيَ اٛ اَنَّبِيجٛ؞»‏ ⁷نغَمْ نٛنْ ٻٜ مبِعِ يٜىٰسُ، ‏«‏مِنْ اَنْدَا تٛ طُمْ پِوٛيِ؞»‏

⁸سٜيْ يٜىٰسُ وِعِٻٜ، ‏«‏نٛنْ مِنْ مَا، مِ وِعَتَاعٛنْ کٛو اٜ طُمٜ لَامُ نغَطِرَيْمِ کُوطٜ طٜعٜ؞»‏

مِسَالُ طُمْ جَٻُٻٜ ݧَمَاندٜ نغٜسَ اِنَبٛوجٜ

⁹سٜيْ يٜىٰسُ فُطِّ حٛکُّکِ يِمْٻٜ مِسَالُ طُعُمْ، اٛ وِعِ، ‏«‏غٛطّٛ نٜطّٛ وَطِ نغٜسَ اِنَبٛوجٜ، اٛ حٛکِّکَ وٛٻّٜ رٜمٛوٻٜ مٛعِّنَکَ، اٛ دِلِّ وٛنْدِ لٜيْدِ اٛ نٜىٰٻِ تٛنْ؞ ¹⁰ندٜ شَرٜلْ ٻٜنْدُکِ اِنَبٛوجٜ طٜنْ وَطِ، اٛ لِلِ مَشُّطٛ تٛ ٻٜ اٛ حٛکِّ نغٜسَ کَنْ اٛ جَٻٛنٛيَمٛ کٛ ٻٜ نغَادِ ندٜرْ کٛ ٻٜنْدِ؞ سٜيْ ٻٜ ڤِيِ مَشُّطٛ اٛنْ ٻٜ ندِيوِمٛ کٛو کٛ ٻٜ کٛکِّمٛ؞ ¹¹جٛومُ نغٜسَ اٛنْ لِلِ غٛطّٛ مَشُّطٛ کَدِنْ، کَنْکٛ مَا ٻٜ ڤِيِمٛ ٻٜ کُطِ کُطِنِمٛ، ٻٜ شٛعِّمٛ، کٛو کٛ ٻٜ کٛکِّمٛ؞ ¹²سٜيْ اٛ فُطِّتِ اٛ لِلِ مَشُّطٛ تَتَٻٛ، کَنْکٛ بٛو ٻٜ نَوْنِمٛ ٻٜ مبُرْتِنِمٛ ندٜرْ نغٜسَ کَنْ؞ ¹³سٜيْ جٛومُ نغٜسَ اٛنْ وِعِ، ‏‹‏کٛ نغَطَيْمِ؟ مِ لِلَيْ ٻِطّٛ اَمْ مٛ ٻُرْمِ يِطُکِ؞ اٜ مِ کَمّٛو ٻٜ کٛکَّيْمٛ مَنْغُ؞›‏ ¹⁴اَمَّا ندٜ ٻٜ اٛ حٛکِّ نغٜسَ کَنْ نغِعِ ٻِطّٛ جٛومُ نغٜسَ اٛنْ، سٜيْ ٻٜ مبِعِ حَکُّندٜ مَٻّٜ، ‏‹‏تٛو!‏ رَا دٛنٛووٛ نغٜسَ کَنْ؞ نغَرٜىٰ مبَرٜنْمٛ، ندٛنُ نغٜسَ کَنْ وَرْتَ طُمْ مٜىٰطٜنْ؞›‏ ¹⁵سٜيْ ٻٜ مبُرْتِنِمٛ ندٜرْ نغٜسَ کَنْ ٻٜ مبَرِمٛ؞

‏«‏تٛو، کٛ کَمِّيطٛنْ جٛومُ نغٜسَ اٛنْ وَطَنْتَٻٜ؟ ¹⁶اٛ وَرَيْ اٛ حَلْکَٻٜ، اٛ حٛکَّ وٛٻّٜ نغٜسَ کَنْ؞»‏

ندٜ يِمْٻٜ نَنِ نٛنْ، ٻٜ مبِعِ، ‏«‏اَللَّه حٛيْنَ!‏»‏

¹⁷اَمَّا يٜىٰسُ رَارِٻٜ وِعِ، ‏«‏تٛو، کٛ وٛنِ مَعَنَ اَايَارٜ بِعُندٜ:‏

‏‹‏حَيْرٜ ندٜ مَحٛوٻٜ نغَݧِ،

کَيْرٜ وَرْتِ حَيْرٜ ٻُرْندٜ دَرْنُکِ مَادِ؟›‏

¹⁸‏«‏کٛو مٛيٜ يَنٛيِ دٛوْ حَيْرٜ ندٜنْ يٜوِ يٜوِنَيْ؛ اَمَّا تٛ حَيْرٜ ندٜنْ يَنِي دٛوْ غٛطّٛ، ندٜ نَمَيْمٛ بٛ شٛنْدِ؞»‏

يٛٻُکِ کَيْسَرْ شٜىٰدٜ لٜيْدِ

¹⁹مٛودِٻّٜ اَتَّوْرَ اٜ مَوْٻٜ اَرْدِيٻٜ دِينَ اٜ نغِطِ نَنْغَ يٜىٰسُ طٛنْ اٜ طٛنْ، نغَمْ ٻٜ ڤَامِي دٛوْ مَٻّٜ اٛ حٛکِّ مِسَالُ طُعُمْ، اَمَّا اٜ ٻٜ کُلَ يِمْٻٜ؞ ²⁰نغَمْ نٛنْ ٻٜ نغَطَنِ يٜىٰسُ غِتٜ، ٻٜ لِلِ وٛٻّٜ نَنْدِتِنْٻٜ اٜ يِمْٻٜ ٻٜ غٛونغَ نغَمْ ٻٜ نَنَ کٛو اٛ وِعَيْ غٛطُّمْ طُمْ ٻٜ کٜٻَتَ ٻٜ نغُلِّرٛيٛومٛ يٜىٰسٛ غٛمْنَاجٛ لٜيْدِ؞ ²¹لِلَاٻٜ ٻٜنْ سٜيْ پَمِ يٜىٰسُ مبِعِ، ‏«‏مٛودِبّٛ، اٜ مِنْ اَنْدِ کٛ مبِعَتَا اٜ کٛ نغَطَتَا طُمْ غٛونغَ، اَ حٛلَّتَا يِدّٜ حٛورٜ، اَ اٜکِّتِنَ لَاوٛلْ اَللَّه اٜ غٛونغَ؞ ²²اٜ يِيکِ مَاطَ اٜ حَانِ مِنْ نجٛٻَ کَيْسَرْ مَوْطٛ لَامِيٻٜ شٜىٰدٜ لٜيْدِ، کٛو طُمْ حَانَايِ؟»‏

²³اَمَّا يٜىٰسُ اٜ اَنْدِ پٛيْرٜ مَٻّٜ، سٜيْ اٛ وِعِٻٜ، ²⁴‏«‏کٛلّٜىٰيَمْ يَمْندٜ اَجُرْفَارِ؞ طٛوْدِ مٛيٜ اٜ اِنْدٜ مٛيٜ وٛنِ دٛوْ مَيْرٜ؟»‏

ٻٜ مبِعِ، ‏«‏طُمْ کَيْسَرْ؞»‏

²⁵اٛ وِعِٻٜ، ‏«‏نغَمْ نٛنْ، کٛکّٜىٰ کَيْسَرْ کٛ وٛنِ طُمْ کَيْسَرْ، ندٜنْ کٛکّٛنْ اَللَّه کٛ وٛنِ طُمْ اَللَّه؞»‏

²⁶ٻٜ کٜٻَايِ کٛ ٻٜ نَنْغِرْتَمٛ ندٜرْ کٛ اٛ وِعِٻٜ يٜىٰسٛ يِمْٻٜ، سٜيْ ٻٜ ندٜعِّتِ اٜ ٻٜ کَيْطِنَ اٜ نٛ اٛ نٛوتٛرَنِيٻٜ؞

پَمٛلْ دٛوْ اُمَّاکِ يِمْٻٜ دَغَ مَيْدٜ

²⁷سَادُسَنْکٛعٜنْ اٜ مبِعَ وَلَا اُمَّاکِ مَيْٻٜ؞ وٛٻّٜ مَٻّٜ نغَرِ تٛ يٜىٰسُ، ²⁸ٻٜ پَمِمٛ، ٻٜ مبِعِ، ‏«‏مٛودِبّٛ، اَنَّبِ مُوسَ وِعِي تٛ نٜطّٛ تٜعِي دٜبّٛ مَايِي دَݧِدَايِ اٜ مَاکٛ، سٜيْ سَکِرَاوٛ مَاکٛ تٜعَمٛ نغَمْ حٜٻَنَ سَکِرَاوٛ مُوطُمْ مَيْطٛ ٻِٻّٜ؞ ²⁹تٛو، ندٜنّٛ اٜ وٛودِ وٛٻّٜ سَکِرَاٻٜ وٛرْٻٜ نجٛوٜىٰطِطٛ؞ اَفٛ اٛنْ تٜعِ دٜبّٛ، مَايِ، دَݧِدَايِ اٜ مَاکٛ؞ ³⁰طِطَٻٛ اٛنْ تٜعِ دٜبّٛ اٛنْ، کَنْکٛ مَا اٛ مَايِ، ٻٜ ندَݧِدَايِ؞ ³¹تَتَٻٛ اٛنْ مَا تٜعِ دٜبّٛ اٛنْ، کَنْکٛ مَا اٛ مَايِ ٻٜ ندَݧِدَايِ؞ نٛنْ سَکِرَاٻٜ نجٛوٜىٰطِطٛ ٻٜنْ طٛنْ ٻٜ فُو ٻٜ تٜعِينٛمٛ، ٻٜ مَايِ، ٻٜ ندَݧِدَايِ اٜ مَاکٛ؞ ³²غَطَ مَاجُمْ دٜبّٛ اٛنْ مَا مَايِ؞ ³³تٛو، جٛونِ، ݧَلْندٜ ندٜ مَيْٻٜ اُمّٛتٛو، دٜبّٛ اٛنْ وَرْتَيْ دٜبّٛ مٛيٜ ندٜرْ مَٻّٜ؟ نغَمْ ٻٜ فُو نجٛوٜىٰطِطٛ ٻٜ تٜعِيمٛ؞»‏

³⁴يٜىٰسُ نٛوتِي وِعِٻٜ، ‏«‏يِمْٻٜ جَامَنُ طُعُمْ اٜ تٜعِندِرَ، ³⁵اَمَّا يِمْٻٜ ٻٜ اَللَّه يِعِ اٜ حَانِ ٻٜ اُمّٛو ݧَلْندٜ جَانغٛ، ݧَلْندٜ ندٜ طُمْ اُمِّنْتَ مَيْٻٜ، وٛرْٻٜ تٜعَتَا، رٜوْٻٜ تٜعَتَاکٜ؞ ³⁶ٻٜ ڤُطِّتَتَا ٻٜ مَايَ، نغَمْ ٻٜ نغَرْتَيْ بٛ مَلَاعِکَعٜنْ؞ ٻٜ ٻِٻّٜ اَللَّه نغَمْ ٻٜ اُمَّکٜ دَغَ مَيْدٜ؞ ³⁷کٛو ندٜرْ حَبَرُ لٜغّٜلْ غٛودُنغٜلْ حِيتٜ، اَنَّبِ مُوسَ حٛلِّي مَيْٻٜ اُمّٛتٛ، نغَمْ اٛ نٛدِّرِي جٛومِرَاوٛ ‏‹‏اَللَّه مٛ اِبْرَاهِمْ، اَللَّه مٛ اِشِيَاکُ، اَللَّه مٛ يَاکُبُ؞›‏ ³⁸کَنْکٛ نَاع اٛ اَللَّه مَيْٻٜ، اَمَّا اٛ اَللَّه غٛودُٻٜ يٛنْکِ؞ نغَمْ تٛ مَاکٛ، کٛو مٛيٜ اٜ وٛودِ يٛنْکِ؞»‏

³⁹وٛٻّٜ مٛودِٻّٜ اَتَّوْرَ مبِعِمٛ، ‏«‏مٛودِبّٛ، اَ وِعِي غٛونغَ؞»‏ ⁴⁰دَغَ طٛنْ وَلَا غَطُطٛ سٜمْبٜ ٻٜرْندٜ پَمِمٛ وٛنْغٛلْ پَمٛلْ؞

پَمٛلْ دٛوْ کِسْنٛووٛ

⁴¹اَمَّا يٜىٰسُ وِعِٻٜ، ‏«‏نٛ وَطَتَ اٜ ٻٜ مبِعَ اَلْمَسِيحُ طُمْ ٻِطّٛ دَوْدَ؟ ⁴²نغَمْ دَوْدَ اٜ حٛورٜ مُوطُمْ وِعِ ندٜرْ دٜفْتٜرٜ جَبُورَ،

‏‹‏جٛومِرَاوٛ وِعِي جٛومِرَاوٛ اَمْ،

‏«‏جٛوطَ تٛ جُنْغٛ اَمْ ݧَامٛ،

⁴³نَا مِ وَطِي اَ يَاٻِي وَݧْوَݧْٻٜ مَاطَ؞»‏ ›‏

⁴⁴دَوْدَ اٜ نٛدِّرَ اَلْمَسِيحُ ‏‹‏جٛومِرَاوٛ؞›‏ نٛ وَطَتَ اٛ وَرْتَ ٻِطّٛ دَوْدَ؟»‏

يٜىٰسُ وَغِّنِي تٛکُّٻٜمٛ دٛوْ مٛودِٻّٜ اَتَّوْرَ

⁴⁵يٜىٰسٛ کٛو مٛيٜ اٛ وِعِ تٛکُّٻٜمٛ، ⁴⁶‏«‏ڤَامَنٜىٰ مٛودِٻّٜ اَتَّوْرَ، غِطُٻٜ يِيلَاکِ اٜ ٻٛرْنِي تٛغّٛحٛ نجُوتُکٛ، غِطُٻٜ حٛوْنِرٜىٰکِ مَنْغُ ندٜرْ لُومٛ؞ اٜ ٻٜ نغِطِ جٛوطَاکِ دٛوْ جٛوطٛرْلٜ مَوْٻٜ ندٜرْ شُوطِ دٛعَارٜ اٜ جٛوطٛرْلٜ مَوْٻٜ تٛ حُمْتٛ؞ ⁴⁷کَمْٻٜ نغٛنِ ݧَامٛوٻٜ جَوْدِ رٜوْٻٜ ٻٜ وٛرْٻٜ مُعّٜنْ مَايِ، وَطٛوٻٜ دٛعَاجٜ جُوتُطٜ نغَمْ طُمْ يِعَٻٜ؞ ٻٜ ٻُرَيْ يَرُکِ بٛنٜ؞»‏

دٛکَّلْ نغَلْ دٜبّٛ مٛ غٛرْکٛ مُوطُمْ مَايِ حٛکِّ

¹يٜىٰسُ پٜفْتِ حٛورٜ مُوطُمْ يِعِ رِسْکُٻٜ اٜ نغَطَ دٛکّٜ مَٻّٜ ندٜرْ تٛ طُمْ حٛکَّتَ شٜىٰدٜ نغَمْ اَللَّه ندٜرْ وُرٛ شٜنِينغٛ؞ ²سٜيْ اٛ يِعِ غٛطّٛ دٜبّٛ مٛ وَلَنَا مٛ غٛرْکٛ مُوطُمْ مَايِ وَطِي شٜىٰدٜ نجَمْکٛيْ طِطٛيْ کٛيْ نجَمْندِ مبٛطٜىٰرِ ندٜرْ؞ ³يٜىٰسُ وِعِ، ‏«‏اٜ مِ وِعَعٛنْ غٛونغَ، اٛعٛ دٜبّٛ مٛ وَلَنَا، کٛ اٛ حٛکِّ ٻُرِي کٛ حٛرِيٻٜ فُو کٛکِّ؞ ⁴نغَمْ حٛرِيٻٜ ٻٜعٜ فُو ٻٜ کٛکِّي سٜطَّ دَغَ ندٜرْ رِسْکُ مَٻّٜ، اَمَّا کَنْکٛ بٛو ندٜرْ شِيَ مَاکٛ اٛ حٛکِّ فُو کٛ اٛ وٛودِ؞»‏

يٜىٰسُ وِعِ نٛ وُرٛ شٜنِينغٛ سَنْکِتٛرْتٛو

⁵وٛٻّٜ اٜ مٜتَ دٛوْ نٛ طُمْ مٛعِّنِرِ وُرٛ شٜنِينغٛ اٜ کَاپٜ بٛطّٜ اٜ دٛکّٜ طٜ طُمْ حٛکِّ نغَمْ اَللَّه؞ اَمَّا يٜىٰسُ وِعِ، ⁶‏«‏کٛ نغِعٛتٛنْ طٛعٛ، شَرٜلْ وَرَيْ نغٜلْ وَلَا وٛنْدٜ حَيْرٜ اَلٜتٜىٰندٜ دٛوْ وٛنْدٜ؞ طٜ فُو طُمْ سَنْکِتَيْطٜ؞»‏

شَرٜلْ شَطٜىٰلٜ وَرٛيَيْ

⁷ٻٜ پَمِمٛ، ٻٜ مبِعِ، ‏«‏مٛودِبّٛ، ندٜيٜ فِي طُعُمْ وَطَتَ؟ ندٜنْ کٛ حٛلَّتَ فُطُّکِ مَاجُمْ ٻَدَکٜ؟»‏

⁸اٛ وِعِ، ‏«‏ڤَامٜىٰ، تٛع طُمْ مَجِّنَعٛنْ؞ نغَمْ يِمْٻٜ طُطْٻٜ نغَرٛيَيْ ندٜرْ اِنْدٜ اَمْ، ٻٜ مبِعَ کَمْٻٜ نغٛنِ مِنْ، ندٜنْ، ‏‹‏شَرٜلْ ٻَدَکٜ!‏›‏ تٛع اٛنْ تٛکُّٻٜ؞ ⁹اَمَّا، تٛ اٛنْ نَنِي حَبَرُ کٛنُوجِ حَکُّندٜ لٜيْطٜ اٜ کٛنُوجِ ندٜرْ لٜيْطٜ، تٛع اٛنْ کُلُ، نغَمْ اَرَنْدٜ دٛولٜ فِي طُعُمْ وَطَ، اَمَّا نٛنْ حٛلَّايِ رٜعُکِ دُونِيَارُ وَرِي؞»‏

¹⁰ندٜنْ اٛ وِعِٻٜ، ‏«‏لٜݧٛلْ اُمَّنْتٛ لٜݧٛلْ، ندٜنْ لَامُ اُمَّنْتٛ لَامُ؞ ¹¹اٜ بِغٜىٰجٜ فٜىٰرٜ‑فٜىٰرٜ طُمْ وَطَيْ دِمْبٛلْ لٜيْدِ شٜمْبِنْغٛلْ، طُمْ وَطَيْ وٜىٰلٛ اٜ ݧَوُوجِ کَلُّطِ؞ طُمْ وَطَيْ فِي مَوْطُمْ کُلْنِيطُمْ اٜ دٛوْ، غَطٛوجُمْ يِمْٻٜ کُلْتٛرَ؞ ¹²اَمَّا کٛ فِي طُعُمْ فُو وَطَ، يِمْٻٜ نَنْغَيْعٛنْ، تٛرَّيْعٛنْ، ٻٜ نغَطَيْعٛنْ ندٜرْ جُوطٜ مَوْٻٜ شُوطِ دٛعَارٜ، ٻٜ نغَطَعٛنْ ندٜرْ شُوطِ شُرَلْ، طُمْ يَارَيْعٛنْ يٜىٰسٛ لَامِيٻٜ اٜ مَوْٻٜ لٜيْدِ، نغَمْ اٛنْ تٛکُّٻٜيَمْ؞ ¹³طُمْ وَرْتَيْ لَاوٛلْ نٛ کٛکِّرْتٛنْٻٜ حَبَرُ اَمْ؞ ¹⁴اَمَّا ڤُکِّنٜىٰ ٻٜرْطٜ مٛوطٛنْ، تٛع اٛنْ نغَنُّ کٛ شَرٜلْ نغٜلْ وَطَ نٛ مبُرْتِنِرْتٛنْ کٛعٜ مٛوطٛنْ؞ ¹⁵نغَمْ مِ حٛکَّيْعٛنْ بٛلِيطٜ اٜ اَنْدَلْ، حَا وَلَا غٛطّٛ ندٜرْ غَݧٛوٻٜ مٛوطٛنْ بَاوَيْطٛ دٛعُّکِعٛنْ کٛو يٜدُّکِ کٛ مبِيطٛنْ؞ ¹⁶دَݧٛوٻٜ مٛوطٛنْ اٜ مِݧِرَاٻٜ مٛوطٛنْ اٜ مَوْنِرَاٻٜ مٛوطٛنْ اٜ بَنْدِرَاٻٜ مٛوطٛنْ اٜ حِغٛوٻٜ مٛوطٛنْ، ٻٜ کٛکِّتِرَيْعٛنْ، ندٜنْ ٻٜ مبَرَ وٛٻّٜ مٛوطٛنْ؞ ¹⁷کٛو مٛيٜ وَݧَيْعٛنْ نغَمْ اٛنْ تٛکُّٻٜيَمْ؞ ¹⁸اَمَّا وَلَا لَاسٛلْ کٛعٜ مٛوطٛنْ غٛعٛتٛلْ کَلْکَيْنغٛلْ؞ ¹⁹تٛ اٛنْ مُݧِي، اٛنْ کٜٻَيْ يٛنْکِ کِ رٜعَتَا؞

يٜىٰسُ وِعِ حٜىٰفٜرْٻٜ کَلْکَيْ اُرُشَلِيمَ

²⁰«‏تٛ اٛنْ نغِعِي حٛنٛوٻٜ اٜ ڤِلِي اُرُشَلِيمَ، اَنْدٜىٰ حَلْکُکِ مَيْرِ ٻَدَکٜ؞ ²¹ندٜنْ وٛنْٻٜ ندٜرْ لٜيْدِ يَحُودِيَ ندٛغَّ نَتّٛيَ کٛشّٜىٰجٜ، وٛنْٻٜ ندٜرْ غَرِيرِ مَوْندِ بٛو مبُرْتٛوندِ، ندٜنْ وٛنْٻٜ ندٜرْ لَدّٜ تٛع نَتَّ غَرِيرِ؞ ²²نغَمْ بَلْطٜ طٜنْ طٛنْ طُمْ ‏‹‏بَلْطٜ بٛنٜ،›‏ نغَمْ کٛ وِنْدَا فُو حٜىٰوَيْ؞ ²³رٜوْٻٜ غٛودُٻٜ دٜىٰطِ اٜ مُسِنْتٜىٰٻٜ ٻٜ تٛرّٛتٛ نَاع سٜطَّ ندٜرْ طٜنْ طٛنْ بَلْطٜ!‏ نغَمْ طُمْ وَطَيْ تٛرَّاجِ کَلُّطِ ندٜرْ دُونِيَارُ، مٛنّٜرٜ اَللَّه جِڤّٛنٛيْتٛ لٜݧٛلْ نغٛعٛلْ؞ ²⁴طُمْ وَرْدَيْ وٛٻّٜ اٜ کَافَاجٜ، طُمْ نَنْغَيْ وٛٻّٜ، طُمْ يَارَٻٜ ندٜرْ لٜيْطٜ فُو طُمْ وَرْتِرَٻٜ مَشُّٻٜ؞ لٜݧِ دُونِيَارُ نغَطَيْ کَ سَنْکُتُکِ اُرُشَلِيمَ ٻٜ لَامٛوندِ نَا شَرٜلْ نغٜلْ طُمْ حٛکِّٻٜ وَطِي؞

غَرْتٛلْ يٜىٰسُ، ٻِي نٜطّٛ

²⁵‏«‏طُمْ وَطَيْ فِي کُلْنِيطُمْ ندٜرْ نَانغٜ اٜ لٜوْرُ اٜ کٛودٜ؞ يِمْٻٜ وٛنْٻٜ ندٜرْ لٜيْطٜ دُونِيَارُ فُو ٻٜ نغَنَّيْ ٻٜ کُلْتٛرَ، ندٜنْ ٻٜ ندُلَّ کٛ ٻٜ نغَطَتَ نغَمْ حٛنٛنْدٜ شٜمْبِنْدٜ ندٜ غٜىٰلٛوطِ ندِيَمْ مبٜىٰلَ؞ ²⁶کُلٛلْ وَطَيْ وٛٻّٜ ڤٜکّٛرَ، نغَمْ کٛ وَرٛيْتَ ندٜرْ دُونِيَارُ، نغَمْ کٛ وٛنِ دٛوْ فُو دِمْبٛتٛ؞ ²⁷اٜ شَرٜلْ نغٜلْ، ٻٜ نغِعَيْ ٻِي نٜطّٛ اٜ وَرَ ندٜرْ دُولٜ اٜ بَوْطٜ اٜ تٜدُّنغَلْ مَنْغَلْ؞ ²⁸تٛ فِي طُعُمْ فُطِّي وَطُکِ، اُمّٜىٰ ندَرٛوطٛنْ، پٜفْتٛنْ کٛعٜ مٛوطٛنْ ندَارٛنْ دٛوْ، نغَمْ کِسْندَمْ مٛوطٛنْ ٻَدَکٜ؞»‏

مِسَالُ دٛوْ لٜکِّ اِبِّ

²⁹اٛ حٛکِّٻٜ مِسَالُ طُعُمْ، اٛ وِعِ، ‏«‏ندَارٜىٰ لٜکِّ اِبِّ اٜ لٜطّٜ کٛرِيطٜ فُو؞ ³⁰تٛ اٛنْ نغِعِي طٜ مبِلِتِي، اٛنْ اَنْدِ سٜىٰتٛ ٻَدَکٜ؞ ³¹نٛنْ مَا تٛ اٛنْ نغِعِي فِي طُعُمْ اٜ وَطَ، تٛو، اٛنْ اَنْدَيْ لَامُ اَللَّه ٻَدَکٜ؞

³²‏«‏اٜ مِ وِعَعٛنْ غٛونغَ، جَامَنُ طُعُمْ رٜعَتَا نَا فُو فِي طُعُمْ وَطِي؞ ³³دٛوْ اٜ لٜيْ پَٻّٛتٛ، اَمَّا بٛلِيطٜ اَمْ پَٻَّتَاکٛ حَا اَبَدَا؞

ڤَامٜىٰ بٛطُّمْ

³⁴‏«‏ڤَامٜىٰ تٛع يَرٜ‑يَرٜ اٜ ݧَامٜ‑ݧَامٜ اٜ وَنُّکِ اٜ کٛ وٛنِ ندٜرْ دُونِيَارُ حٛشَّ ٻٜرْطٜ مٛوطٛنْ، نغَمْ تٛع ݧَلْندٜ ندٜنْ اُدّٛوعٛنْ اٛنْ اَنْدَا؞ ³⁵نغَمْ ݧَلْندٜ ندٜنْ وَرَيْ دٛوْ کٛو مٛيٜ مٛ يٛنْکِ ندٜرْ دُونِيَارُ؞ ³⁶ڤَامٜىٰ کٛو ندٜيٜ نغَطٛنْ دٛعَارٜ نغَمْ کٜٻٛنْ ندَطٛنْ فِي طُعُمْ غَطَيْطُمْ فُو، ندٜنْ ندَرٛوطٛنْ يٜىٰسٛ ٻِي نٜطّٛ؞»‏

³⁷کٛو ندٜيٜ ݧَلْندٜ يٜىٰسُ اٜ اٜکِّتِنَ ندٜرْ وُرٛ شٜنِينغٛ، اَمَّا جٜمَّ اٛ وُرْتٛو اٛ يَحَ دٛوْ حٛشّٜىٰرٜ ندٜ لٜطّٜ جَيْتُنْ اٛ وَالٛيَ؞ ³⁸کٛو ندٜيٜ اِلَا سُبَکَ يِمْٻٜ فُو اٜ نجَحَ وُرٛ شٜنِينغٛ نغَمْ نَنُکِمٛ؞

مَوْٻٜ مٜدِّي دٛوْ نٛ نَنْغِرْتَ يٜىٰسُ

¹تٛو، شَرٜلْ ٻَدَکٜ نغَمْ حُمْتٛ بُرٛودِ طُمْ وَلَا پُوفِنِرْطُمْ بِعٜتٜىٰنغٛ حُمْتٛ سَکِّنْکِ؞ ²مَوْٻٜ اَرْدِيٻٜ دِينَ اٜ مٛودِٻّٜ اَتَّوْرَ اٜ طَٻِّتَ نٛ ٻٜ مبَرْدَتَ يٜىٰسُ، نغَمْ اٜ ٻٜ کُلَ يِمْٻٜ؞

يَحُودَ جَٻِ حٛکِّتِرَ يٜىٰسُ

³سٜيْ شٜيْطَنْ نَتِّ ٻٜرْندٜ يَحُودَ بِعٜتٜىٰطٛ اِسْکَرِيٛوتِ، غٛعٛتٛ ندٜرْ تٛکُّٻٜ يٜىٰسُ سَڤّٛ اٜ طِطٛ؞ ⁴سٜيْ اٛ يَحِ تٛ مَوْٻٜ اَرْدِيٻٜ دِينَ اٜ مَوْٻٜ اَرْدِيٻٜ تَادِيٻٜ وُرٛ شٜنِينغٛ، اٛ مٜدِّ اٜ مَٻّٜ دٛوْ نٛ اٛ حٛکِّتِرْتَ يٜىٰسُ ندٜرْ جُوطٜ مَٻّٜ؞ ⁵ٻٜ نَنِ بٜلْطُمْ طُطُّمْ، ٻٜ نغَطِ اَلْکَوَلْ حٛکُّکِمٛ شٜىٰدٜ؞ ⁶کَنْکٛ بٛو اٛ جَٻِ، اٛ فُطِّ طَٻُّتُکِ لَاوٛلْ نٛ اٛ حٛکِّتِرْتَ يٜىٰسُ ندٜرْ جُوطٜ مَٻّٜ؞

يٜىٰسُ سِرْيَکٜ ݧَامُکِ ݧَمْندُ حُمْتٛ سَکِّنْکِ

⁷سٜيْ ݧَلْندٜ وَرِ ندٜ حُمْتٛ بُرٛودِ طُمْ وَلَا پُوفِنِرْطُمْ ندٜ طُمْ حِرْسَتَ کَرٛورِ حُمْتٛ سَکِّنْکِ؞ ⁸نغَمْ نٛنْ يٜىٰسُ لِلِ بِيتُرُسْ اٜ يَحَيَ وِعِٻٜ، ‏«‏نجَحٜىٰ شِرْيَنٜىٰعٜنْ کٛو طُمٜ نغَمْ ݧَامٜنْ حُمْتٛ سَکِّنْکِ؞»‏

⁹ٻٜ پَمِمٛ ٻٜ مبِعِ، ‏«‏تٛيٜ نغِطَّا مِنْ نجَحَ مِنْ شِرْيٛوطُمْ؟»‏

¹⁰اٛ وِعِٻٜ، ‏«‏رَطُّمْ، اٜ نَتُّکِ مٛوطٛنْ غَرِيرِ، اٛنْ کَوْرَيْ اٜ غٛطّٛ اٜ مٛ رٛنْدِي پٛوغِرْدٜ ندِيَمْ؞ تٛکّٜىٰمٛ يَاکِ وُرٛ نغٛ اٛ نَتَّتَ، ¹¹مبِعٛنْ جٛومُ وُرٛ نغٛنْ، ‏‹‏مٛودِبّٛ وِعِي مِنْ پَمُمَا:‏ ‏«‏تٛيٜ سُودُ ندُ ݧَامَيْمِ ݧَمْندُ حُمْتٛ سَکِّنْکِ اٜ تٛکُّٻٜيَمْ؟»‏ ›‏ ¹²اٛ حٛلَّيْعٛنْ سُودُ ندُ دٛوْ، مَوْندُ مٛعِّنَاندُ؞ شِرْيَنٜىٰعٜنْ کٛو طُمٜ طٛنْ نغَمْ ݧَامٜنْ ݧَمْندُ حُمْتٛ سَکِّنْکِ؞»‏

¹³سٜيْ ٻٜ نجَحِ ٻٜ تَوِ کٛو طُمٜ نٛ يٜىٰسُ وِعِٻٜ، سٜيْ ٻٜ شِرْيِي کٛو طُمٜ نغَمْ حُمْتٛ سَکِّنْکِ؞

کِرْتَارِ جٛومِرَاوٛ

¹⁴ندٜ شَرٜلْ وَطِ، يٜىٰسُ اٜ تٛکُّٻٜمٛ سَڤّٛ اٜ طِطٛ نجٛوطِي نغَمْ ݧَامَ؞ ¹⁵سٜيْ اٛ وِعِٻٜ، ‏«‏مِ حَاٻِي ݧَمْدُکِ ݧَمْندُ حُمْتٛ سَکِّنْکِ ندُعُ اٜ مٛوطٛنْ کٛ مِ تٛرّٜىٰ؞ ¹⁶نغَمْ اٜ مِ وِعَعٛنْ، مِ فُطِّتَتَا ݧَامُکِ ݧَمْندُ حُمْتٛ سَکِّنْکِ سٜيْ تٛ مَعَنَ مَاجُمْ حٜىٰوِي ندٜرْ لَامُ اَللَّه؞»‏

¹⁷سٜيْ اٛ حٛشِّ اِنَبٛجَمْ ندٜرْ جَرْدُغٜلْ، اٛ يٜتِّ اَللَّه، اٛ وِعِ، ‏«‏نجَٻٜىٰ نغٜعٜلْ شٜنْدٛنْ اِنَبٛجَمْ طَمْ حَکُّندٜ مٛوطٛنْ؞ ¹⁸نغَمْ اٜ مِ وِعَعٛنْ، مِ فُطِّتَتَا يَرُکِ ندِيَمْ اِنَبٛوجٜ نَا لَامُ اَللَّه وَرٛيِي؞»‏

¹⁹ندٜنْ اٛ حٛشِّ بُرٛودِ، اٛ يٜتِّ اَللَّه، اٛ سٜنْدِطُمْ، اٛ حٛکِّ تٛکُّٻٜمٛ، اٜ مٛ وِعَ، ‏«‏طُعُمْ طُمْ ٻَنْدُ اَمْ، کٛکَّاندُ نغَمْ مٛوطٛنْ؞ نغَطٜىٰ کَ وَطُکِ نٛنْ نغَمْ سِفْتٛرْکِيَمْ؞»‏ ²⁰نٛنْ مَا، غَطَ ٻٜ کِرْتَکٜ، اٛ حٛشِّ جَرْدُغٜلْ ندِيَمْ اِنَبٛجَمْ، اٛ وِعِ، ‏«‏طَعَمْ وٛنِ اَلْکَوَلْ کٜسَلْ تَبِّتَيْنغَلْ اٜ پِيپَمْ اَمْ ندُفٜتٜىٰطَمْ نغَمْ مٛوطٛنْ؞

²¹‏«‏اَمَّا، رَطُّمْ، کٛکِّتِرَيْطٛيَمْ اٜ ݧَمْدَ اٜ اَمْ طٛعٛ؞ ²²نغَمْ ٻِي نٜطّٛ مَايَيْ نٛنْ نٛ اَللَّه سُٻِ، اَمَّا کٛکِّتِرَيْطٛمٛ وٛنِي!‏»‏

²³تٛکُّٻٜمٛ ڤُطِّ پَمْپَمْتِرْکِ حَکُّندٜ مَٻّٜ، کٛو طُمْ مٛيٜ ندٜرْ مَٻّٜ وَطَتَ فِي طُعُمْ؞

غٜدِّ دٛوْ مٛيٜ وٛنِ مَوْطٛ

²⁴کَدِمَا غٜدِّ اُمِّي حَکُّندٜ مَٻّٜ دٛوْ مٛيٜ ندٜرْ مَٻّٜ وٛنِ مَوْطٛ؞ ²⁵يٜىٰسُ وِعِٻٜ، ‏«‏لَامِيٻٜ يِمْٻٜ نَاع يَحُودَنْکٛعٜنْ اٜ کٛلَّ يِمْٻٜ مَٻّٜ لَامُ سٜمْبٜ، فُو اٜ نٛنْ اٜ ٻٜ نٛدِّرَ کٛعٜ مَٻّٜ وَلّٛوٻٜ يِمْٻٜ؞ ²⁶اَمَّا اٛنٛنْ، تٛع اٛنْ نغَطُ نٛنْ؞ سٜيْ ٻُرْطٛ مَنْغُ ندٜرْ مٛوطٛنْ وَرْتَ بٛ ڤَمَرٛ، ندٜنْ اَرْدِيطٛ وَرْتَ بٛ مَشُّطٛ؞ ²⁷مٛيٜ ٻُرِ مَنْغُ، جٛوطِيطٛ نغَمْ ݧَامَ کٛو غَدّٛووٛ ݧَمْندُ؟ اَيْ اٛنْ طٛنْ جٛوطِيطٛ وٛنِ مَوْطٛ؞ اَمَّا، اٜ مِ طٛنْ حَکُّندٜ مٛوطٛنْ بٛ مَشُّطٛ؞

²⁸‏«‏اٛنٛنْ نغٛنِ دَرٛدِيٻٜ اٜ اَمْ اٜ غٛونغَ ندٜرْ تٛرَّ کَ نجَرُمِ؞ ²⁹نٛ ݧَاکٛ اَمْ مٛ دٛوْ حٛکِّرِيَمْ لَامُ، نٛنْ مِنْ مَا، مِ حٛکِّيعٛنْ لَامُ ³⁰ݧَمْدٛنْ اٜ اَمْ نجَرْدٛنْ اٜ اَمْ ندٜرْ لَامُ اَمْ، ندٜنْ نجٛوطٛوطٛنْ دٛوْ جٛوطٛرْلٜ لَامُ، اٛنْ لَامٛو لٜݧِ اِسْرَاعِيلَ سَڤّٛ اٜ طِطِ؞

يٜىٰسُ وِعِ بِيتُرُسْ يٜدَّيْ اَنْدُکِمٛ

³¹‏«‏سِيمَنْ، سِيمَنْ، رَطُّمْ شٜيْطَنْ پَمِي لَاوٛلْ فٛوندَعٛنْ، بٛو اٛ حٛکَّامَ؞ اٜ مٛ يِطِ اٛ سٜطَعٛنْ نٛ طُمْ سٜطِرْتَ اَلْکَمَارِ اٜ ݧَاندٜ؞ ³²اَمَّا مِ وَطَنِيمَ دٛعَارٜ، سِيمَنْ، نغَمْ تٛع اَلَا حٛولَاکِيَمْ؞ اَنْ بٛو، تَا وَرْتِي تٛ اَمْ، شٜمْبِطِنَا بَنْدِرَاٻٜ مَاطَ؞»‏

³³اَمَّا بِيتُرُسْ وِعِمٛ، ‏«‏مٛودِبّٛ، اٜ مِ سِرْيِي يَادُکِ اٜ مَاطَ سُودُ شُرَلْ، حَا اٜ مَيْدٜ؞»‏

³⁴يٜىٰسُ وِعِ، ‏«‏اٜ مِ وِعُمَا، بِيتُرُسْ، حَنْدٜ کٛ نجَکَرْدِ حَنَ، اَ وِعَيْ اَ اَنْدَايَمْ ندٜ تَتِ؞»‏

شَرٜلْ تٛرَّ اٜ وَرَ

³⁵سٜيْ يٜىٰسُ پَمِٻٜ وِعِ، ‏«‏شَرٜلْ کٛ لِلْمِعٛنْ مبِيمِعٛنْ تٛع اٛنْ نجَادُ اٜ شٜىٰدٜ، تٛع اٛنْ نجَادُ اٜ جَکَارٜ کٛو ڤَطٜ کٛيْطٜ طِطِ، اٜ وٛودِ کٛ ندُلُّطٛنْ؟»‏

ٻٜ مبِعِ، ‏«‏وَلَا؞»‏

³⁶اٛ وِعِٻٜ، ‏«‏اَمَّا جٛونِ، غٛودُطٛ شٜىٰدٜ اٜ جَکَارٜ، حٛشَّ؞ مٛ وَلَا کَافَحِ، سٛورَ شُدَّارِ مُوطُمْ سٛودَ غٛعٛتِ؞ ³⁷اٜ مِ وِعَعٛنْ، اَايَارٜ ندٜعٜ دٛولٜ حٜىٰوَ دٛوْ اَمْ بِعُندٜ، ‏‹‏طُمْ حٛشَّيْمٛ بٛ کَلُّطٛ،›‏ نغَمْ کٛ وِنْدَا دٛوْ اَمْ ٻَدَکٜ حٜىٰوُکِ؞»‏

³⁸تٛکُّٻٜمٛ مبِعِ، ‏«‏مٛودِبّٛ، رَا کَافَاجٜ طِطِ؞»‏

اٛ وِعِٻٜ، ‏«‏طُمْ حٜپِي نٛنْ؞»‏

يٜىٰسُ وَطِي دٛعَارٜ دٛوْ حٛشّٜىٰرٜ ندٜ لٜطّٜ جَيْتُنْ

³⁹يٜىٰسُ وُرْتِي، يَحِ حٛشّٜىٰرٜ ندٜ لٜطّٜ جَيْتُنْ نٛ اٛ وٛووِ، تٛکُّٻٜمٛ مَا اٜ تٛکِّمٛ؞ ⁴⁰ندٜ ٻٜ نجٛتِّي وِغٜىٰرٜ ندٜنْ، اٛ وِعِٻٜ، ‏«‏نغَطٜىٰ دٛعَارٜ تٛع نجَحٛنْ تٛ نغَطٛتٛنْ حَکّٜ؞»‏

⁴¹يٜىٰسُ حَکِّتِي کَنُمْ تَنْ کٛ وَطَتَ حُبَاکِ حَيْرٜ، سٜيْ اٛ يَنِ اٜ لٜيْدِ اٜ مٛ حِڤِّي، اٛ وَطِ دٛعَارٜ، اٛ وِعِ، ⁴²‏«‏ݧَاکٛ اَمْ مٛ دٛوْ، تَا جَٻِي، اِتَّنَمْ جَرْدُغٜلْ تٛرَّ کَعَ؞ فُو اٜ نٛنْ، نَاع کٛ نغِطُمِ وَطٜتٜىٰ، اَمَّا کٛ نغِطَّا وَطٜىٰ؞»‏ ⁴³سٜيْ مَلَاعِکَاجٛ پِوٛيِ دَغَ دٛوْ وَنْغَنِمٛ سٜمْبِطِنِمٛ؞ ⁴⁴اٜ مٛ ندٜرْ تٛرَّ کَلُّکَ، نغَمْ نٛنْ اٛ ٻٜيْدِ وَطُکِ دٛعَارٜ؞ اَسَوْرٜ مَاکٛ وَرْتِ بٛ پِيپَمْ اٜ سِمْتَ اٜ لٜيْدِ؞

⁴⁵ندٜ اٛ يٛتِّنِ دٛعَارٜ، سٜيْ اٛ سٛعِّي تٛ ٻٜنْ طٛنْ تٛکُّٻٜمٛ، اٛ تَوِ اٜ ٻٜ طَانِي نغَمْ وَنَّارٜ وَطِ ٻٜ شٛمِي؞ ⁴⁶اٛ وِعِٻٜ، ‏«‏نغَمْ طُمٜ طَانٛتٛوطٛنْ؟ اُمّٜىٰ، نغَطٜىٰ دٛعَارٜ تٛ طُمْ فٛوندِيعٛنْ تٛع نغَطٛنْ حَکّٜ؞»‏

طُمْ نَنْغِي يٜىٰسُ

⁴⁷يٜىٰسُ اٜ مٜتَ، سٜيْ يِمْٻٜ طُطْٻٜ نغَرِ؞ يَحُودَ، غٛعٛتٛ ندٜرْ تٛکُّٻٜمٛ سَڤّٛ اٜ طِطٛ اٜ مٛ اَرْدِيٻٜ؞ يَحُودَ ٻَدِّي يٜىٰسُ نغَمْ حٛوْنَمٛ؞ ⁴⁸يٜىٰسُ وِعِمٛ، ‏«‏يَحُودَ، اَ حٛکِّتِرَيْ ٻِي نٜطّٛ اٜ حٛوْنُکِ حِغَاکُ؟»‏

⁴⁹ندٜ تٛکُّٻٜ يٜىٰسُ نغِعِ کٛ وَطَتَ، ٻٜ مبِعِمٛ، ‏«‏مٛودِبّٛ، مِنْ ڤٜعِّرَٻٜ کَافَاجٜ؟»‏ ⁵⁰غٛعٛتٛ مَٻّٜ فٜعِّ مَشُّطٛ مَوْطٛ مَوْٻٜ اَرْدِيٻٜ دِينَ اِتَّنِمٛ نٛوْرُ ݧَامٛ؞

⁵¹اَمَّا يٜىٰسُ وِعِ، ‏«‏اَلٜىٰ!‏ تٛع اٛنْ ٻٜيْدُ!‏»‏ يٜىٰسُ مٜىٰمِ نٛوْرُ نٜطّٛ اٛنْ، يَمْطِتِنِمٛ؞

⁵²سٜيْ يٜىٰسُ وِعِ مَوْٻٜ، اٜ مَوْٻٜ اَرْدِيٻٜ دِينَ، اٜ مَوْٻٜ تَادِيٻٜ وُرٛ شٜنِينغٛ غَرٛيْٻٜ نَنْغُکِمٛ، ‏«‏اٛنْ نغَرْدٛيِ اٜ کَافَاجٜ اٜ شَبِّ نغَمْ نَنْغٛيْيَمْ بٛ مِ غُجّٛ شَلٛرْطٛ؟ ⁵³کٛو ندٜيٜ ݧَلْندٜ اٜ مِ وٛنْدِ اٜ مٛوطٛنْ ندٜرْ وُرٛ شٜنِينغٛ، اٛنْ نَنْغَايِيَمْ؞ اَمَّا جٛونِ طُمْ شَرٜلْ مٛوطٛنْ، اٜ لَامُ ݧِوْرٜ؞»‏

بِيتُرُسْ وِعِي اَنْدَا يٜىٰسُ

⁵⁴سٜيْ ٻٜ نَنْغِ يٜىٰسُ، ٻٜ ندِلِّدِ اٜ مَاکٛ، ٻٜ نجَارِمٛ وُرٛ مَوْطٛ مَوْٻٜ اَرْدِيٻٜ دِينَ؞ بِيتُرُسْ بٛو اٜ وٛطِّتِ اٜ تٛکِّرِٻٜ غَطَ؞ ⁵⁵ندٜنْ ٻٜ کُٻِّ حِيتٜ شَکَ وُرٛ، ٻٜ نجٛوطِي، بِيتُرُسْ مَا سٜيْ جٛوطِي ندٜرْ مَٻّٜ؞ ⁵⁶سٜيْ غٛطّٛ کٛرْطٛ يِعِمٛ اٜ مٛ جٛوطِي اٜ مٛ اِرْفٛو؞ کٛرْطٛ اٛنْ بٛو سُتِيمٛ وِعِ، ‏«‏نٜطّٛ اٛعٛ مَا اٜ وٛنْدِ اٜ يٜىٰسُ؞»‏

⁵⁷اَمَّا بِيتُرُسْ يٜدِّ، وِعِ، ‏«‏مِ اَنْدَامٛ؞»‏

⁵⁸غَطَ طٛنْ سٜطَّ غٛطّٛ يِعِمٛ وِعِ، ‏«‏اَنْ مَا، اَ غٛعٛتٛ ندٜرْ تٛکُّٻٜمٛ؞»‏

اَمَّا بِيتُرُسْ وِعِ، ‏«‏حِغٛ، نَاع مِ تٛکُّطٛمٛ!‏»‏

⁵⁹ندٜ يَوْتِي سٜطَّ، غٛطّٛ مَا وِعِ، ‏«‏سٜکٛ وَلَا نٜطّٛ اٛعٛ مَا اٜ وٛنْدِ اٜ يٜىٰسُ، نغَمْ کَنْکٛ مَا اٛ غَلِلَنْکٜىٰجٛ؞»‏

⁶⁰بِيتُرُسْ وِعِمٛ، ‏«‏حِغٛ، مِ اَنْدَا کٛ مبِعَتَا!‏»‏

طٛنْ اٜ طٛنْ اٜ مٛ ندٜرْ مٜتُکِ، نجَکَرْدِ حَنِ؞ ⁶¹سٜيْ يٜىٰسُ يٜىٰپِي رَارِ بِيتُرُسْ؞ سٜيْ بِيتُرُسْ سِفْتٛرِ کٛ يٜىٰسُ وِعُنٛومٛ وِعُکِ، ‏«‏حَنْدٜ کٛ نجَکَرْدِ حَنَ، اَ وِعَيْ اَ اَنْدَايَمْ ندٜ تَتِ؞»‏ ⁶²سٜيْ اٛ وُرْتِي يَاسِ اٛ وٛيِ بٛجِّ نَوْطِ؞

طُمْ جُکِّتِي يٜىٰسُ طُمْ فِيِيمٛ

⁶³سٜيْ يِمْٻٜ جٛغِيٻٜ يٜىٰسُ فُطِّ جُکُّتُکِمٛ، اٜ ٻٜ ڤِيَمٛ؞ ⁶⁴ٻٜ شُدِّ غِتٜ مَاکٛ ٻٜ نغَطِ کَ پَمُکِمٛ ٻٜ مبِعِ، ‏«‏وَطُ اَنَّبَاکُ!‏ مٛيٜ فِيُمَا؟»‏ ⁶⁵ٻٜ کُطِرِمٛ حَالَاجِ نَوْطِ؞

يٜىٰسُ يٜىٰسٛ کَوْتَلْ مَوْٻٜ

⁶⁶ندٜ وٜىٰتِ، کَوْتَلْ مَوْٻٜ کَوْرِتِ اٜ مَوْٻٜ اَرْدِيٻٜ دِينَ اٜ مٛودِٻّٜ اَتَّوْرَ؞ يٜىٰسُ وَدَّا يٜىٰسٛ مَٻّٜ؞ ⁶⁷ٻٜ مبِعِمٛ، ‏«‏تٛ اَنْ وٛنِ اَلْمَسِيحُ، وِعُمِنْکَ؞»‏

اَمَّا يٜىٰسُ وِعِٻٜ، ‏«‏تٛ مِ وِعِيعٛنْکَ، اٛنْ نجَٻَتَا؞ ⁶⁸تٛ مِ پَمِيعٛنْ بٛو، اٛنْ نٛوتَنْتَاکٛيَمْ؞ ⁶⁹اَمَّا دَغَ جٛونِ، ٻِي نٜطّٛ جٛوطٛتٛ اٜ جُنْغٛ ݧَامٛ نغٛ اَللَّه جٛومُ بَوْطٜ؞»‏

⁷⁰ٻٜ فُو ٻٜ مبِعِ، ‏«‏اَنْ، اَ ٻِطّٛ اَللَّه؟»‏

اٛ وِعِٻٜ، ‏«‏نٛنْ نٛ مبِيطٛنْ؞»‏

⁷¹ٻٜ مبِعِ، ‏«‏اٜنْ نَنِيکَ اٜ حٛنْدُکٛ مَاکٛ جٛونِ؞ اٜ وٛودِ کٛ طَٻِّتٜتٜنْ کَدِنْ؟»‏

يٜىٰسُ يَارَامَ يٜىٰسٛ بِلَاتُسْ

¹سٜيْ حَوْرُتُٻٜ ٻٜنْ فُو اُمِّي، نجَارِمٛ يٜىٰسٛ بِلَاتُسْ، غٛمْنَاجٛ لٜيْدِ يَحُودِيَ؞ ²ٻٜ ڤُطِّ وُلَّاکِمٛ، اٜ ٻٜ مبِعَ، ‏«‏مِنْ تَوِي نٜطّٛ اٛعٛ اٜ مَجِّنَ لٜݧٛلْ اَمِنْ؞ اٜ مٛ حَطَ طُمْ يٛٻَ کَيْسَرْ مَوْطٛ لَامِيٻٜ شٜىٰدٜ لٜيْدِ، ندٜنْ اٜ مٛ وِعَ وَيْ کَنْکٛ وٛنِ اَلْمَسِيحُ، لَامِيطٛ؞»‏

³سٜيْ بِلَاتُسْ پَمِ يٜىٰسُ وِعِ، ‏«‏اَنْ وٛنِ لَامِيطٛ يَحُودَنْکٛعٜنْ؟»‏

يٜىٰسُ نٛوتِي وِعِمٛ، ‏«‏اٜىٰ، اَ وِعِيکَ؞»‏

⁴بِلَاتُسْ وِعِ مَوْٻٜ اَرْدِيٻٜ دِينَ اٜ حَوْرُتُٻٜ ٻٜنْ، ‏«‏مِ يِعَايِ غٛطُّمْ کَلُّطُمْ طُمْ نَنْغِرْطٛنْ نٜطّٛ اٛعٛ؞»‏

⁵اَمَّا ٻٜ شَلِي کٛ اٛ وِعِ، ٻٜ نغَطِ کَ مٜتُکِ دٛوْ يٜىٰسُ اٜ سٜمْبٜ، اٜ ٻٜ مبِعَ، ‏«‏کٛ اٛ اٜکِّتِنْتَ اٜ حَوْتَ يِمْٻٜ حَوْرٜ ندٜرْ لٜيْدِ يَحُودِيَ فُو؞ اٛ فُطِّي ندٜرْ لٜيْدِ غَلِيلِ، دَغَ تٛنْ حَا طٛعٛ؞»‏

يٜىٰسُ يَارَامَ يٜىٰسٛ حِرُدُسْ

⁶ندٜ بِلَاتُسْ نَنِ نٛنْ، اٛ پَمِ اٛ وِعِ، ‏«‏اٛعٛ نٜطّٛ اٛ غَلِلَنْکٜىٰجٛ؟»‏ ⁷ندٜ اٛ حٜٻْتِ يٜىٰسُ دَغَ لٜيْ لَامُ حِرُدُسْ پِوٛيِ، اٛ وَطِ طُمْ يَارِمٛ تٛ حِرُدُسْ، نغَمْ اٜ شَرٜلْ نغٜلْ حِرُدُسْ اٜ طٛنْ اٜ اُرُشَلِيمَ؞ ⁸ندٜ حِرُدُسْ يِعِ يٜىٰسُ، اٛ نَنِ بٜلْطُمْ طُطُّمْ، نغَمْ طُمْ نٜىٰٻِي اٜ مٛ يِطِ اٛ يِعَ يٜىٰسُ وَطِي غٛطُّمْ کَيْطِنِيطُمْ، نغَمْ کٛ اٛ نَنِ دٛوْ مَاکٛ؞ ⁹اٛ پَمِ يٜىٰسُ پَمْطٜ طُطّٜ، اَمَّا يٜىٰسُ وِعَايِمٛ غٛطُّمْ؞ ¹⁰مَوْٻٜ اَرْدِيٻٜ دِينَ اٜ مٛودِٻّٜ اَتَّوْرَ اٜ ندَرِي طٛنْ اٜ مبِعَ اٜ سٜمْبٜ يٜىٰسُ وَطِي کٛ حَلِّ؞ ¹¹سٜيْ حِرُدُسْ اٜ سٛوجِعٜنْ مُوطُمْ کُطِمٛ، نجُکِّتِمٛ، ندٜنْ حِرُدُسْ وَطِي طُمْ ٻٛرْنِمٛ کٛلْتٜ لَامِيطٛ، اٛ سٛعِّمٛ تٛ بِلَاتُسْ؞ ¹²اٜ ݧَلْندٜ ندٜنْ حِرُدُسْ اٜ بِلَاتُسْ ٻٜ نغَرْتِ حِغٛوٻٜ، نغَمْ کٛ فِي طُمْ وَطَ ٻٜ مبٜلْدَا؞

بِلَاتُسْ وِعِ طُمْ وَرَ يٜىٰسُ

¹³بِلَاتُسْ نٛدِّ مَوْٻٜ اَرْدِيٻٜ دِينَ، اٜ لَامِيٻٜ، اٜ يِمْٻٜ؞ ¹⁴اٛ وِعِٻٜ، ‏«‏اٛنْ نغَدَّنِييَمْ نٜطّٛ اٛعٛ، اٛنْ مبِعِ اٜ مٛ مَجِّنَ يِمْٻٜ؞ مِ پَمِيمٛ يٜىٰسٛ مٛوطٛنْ، اَمَّا مِ يِعَايِ غٛطُّمْ طُمْ نَنْغِرْطٛنْمٛ؞ ¹⁵نٛنْ مَا حِرُدُسْ، نغَمْ اٛ سٛعّٛيِيمٛ تٛ مٜىٰطٜنْ؞ رَا، اٛ وَطَايِ غٛطُّمْ کٛ حَانِ طُمْ وَرَمٛ؞ ¹⁶نغَمْ نٛنْ، مِ وَطَيْ طُمْ فِيَمٛ، ندٜنْ مِ يٛوفَمٛ؞»‏

¹⁷‏[‏تٛو، ندٜنْ مَا کٛو ندٜيٜ حِتَاندٜ بِلَاتُسْ اٜ يٛوفَنَٻٜ کَٻَّاطٛ غٛعٛتٛ؞]‏

¹⁸اَمَّا ٻٜ فُو ٻٜ نغَطِ کَ وِعُکِ اٜ سٜمْبٜ، ‏«‏وَرُ نٜطّٛ اٛعٛ؞ نجٛوفَنَامِنْ بَرَبَّسْ!‏»‏ ¹⁹بَرَبَّسْ بٛو طُمْ غٛطّٛ مٛ طُمْ وَطِ ندٜرْ سُودُ شُرَلْ نغَمْ اٜ مٛ ندٜرْ يِمْٻٜ کَٻْدُٻٜ اٜ لَامُ ندٜرْ غَرِيرِ، کَدِنْ نغَمْ اٛ وَرِي غٛطّٛ؞

²⁰بِلَاتُسْ فُطِّتِ مٜتَنِٻٜ نغَمْ اٜ مٛ يِطِ يٛوفُکِ يٜىٰسُ؞ ²¹اَمَّا ٻٜ نغَطِ کَ وِعُکِ اٜ سٜمْبٜ، ‏«‏وَرُمٛ!‏ وَرُمٛ دٛوْ غَافَانغَلْ!‏»‏

²²بِلَاتُسْ وِعِٻٜ تَتَٻُمْ، ‏«‏نغَمْ طُمٜ؟ طُمٜ کٛ حَلِّ اٛ وَطِ؟ مِ يِعَايِ کٛ اٛ وَطِ کٛ حَانِ طُمْ وَرَمٛ؞ نغَمْ نٛنْ، مِ فِيَيْمٛ، مِ يٛوفَمٛ؞»‏

²³اَمَّا ٻٜ نغَطِ کَ وِعُکِ اٜ سٜمْبٜ، ‏«‏وَرُمٛ دٛوْ غَافَانغَلْ!‏»‏ بٛلِيطٜ مَٻّٜ شَلٛرِي بِلَاتُسْ؞ ²⁴نغَمْ نٛنْ اٛ جَٻِ اٛ وَطَ کٛ ٻٜ مبِعِ؞ ²⁵اٛ يٛوفَنِٻٜ نٜطّٛ مٛ ٻٜ نغِطِ اٛ يٛوفَنَٻٜ، غَطَاطٛ ندٜرْ سُودُ شُرَلْ نغَمْ وَرْحٛورٜ اٜ حَٻْدُکِ اٜ لَامُ؞ ندٜنْ اٛ وَطِ يٜىٰسُ ندٜرْ جُوطٜ مَٻّٜ نغَمْ ٻٜ نغَطَنَمٛ کٛ ٻٜ نغِطِ؞

يٜىٰسُ وَرَامَ دٛوْ غَافَانغَلْ

²⁶اٜ ٻٜ اَرْدِنِ يٜىٰسُ، سٜيْ ٻٜ نَنْغِ سِيمَنْ سَايِرَنْکٜىٰجٛ پِوٛيْطٛ ندٜرْ لَدّٜ اٜ نَتّٛيَ غَرِيرِ ندِنْ؞ ٻٜ نجٛوَنِمٛ غَافَانغَلْ، ٻٜ نغَطِ اٛ تٛکِّرِ يٜىٰسُ غَطَ؞

²⁷يِمْٻٜ طُطْٻٜ تٛکِّمٛ، حَوْتِ اٜ وٛٻّٜ رٜوْٻٜ؞ رٜوْٻٜ ٻٜنْ اٜ ندٛوندِي جُوطٜ مُعّٜنْ، اٜ ٻٜ مبٛيَ نغَمْ مَاکٛ؞ ²⁸اَمَّا يٜىٰسُ يٜىٰپِيٻٜ وِعِ، ‏«‏رٜوْٻٜ اُرُشَلِيمَ، اَلٜىٰ وٛيَنْکِيَمْ، مبٛيَنٜىٰ کٛعٜ مٛوطٛنْ اٜ ٻِٻّٜ مٛوطٛنْ؞ ²⁹نغَمْ بَلْطٜ نغَرٛيَيْ طٜ يِمْٻٜ مبِعَتَ، ‏‹‏ٻٜ بَرْکِطِنَاٻٜ رٜوْٻٜ ٻٜ ندَݧَتَا، ٻٜ دٜىٰطِ مُعّٜنْ مٜىٰطَايِ سَاوُکِ ٻِطّٛ، ٻٜ اٜنْطِ مُعّٜنْ مٜىٰطَايِ مُسِنٜىٰکِ؞›‏ ³⁰اٜ شَرٜلْ نغٜلْ يِمْٻٜ مبِعَيْ کٛشّٜىٰجٜ، ‏‹‏نجَنٛيٜىٰ دٛوْ اَمِنْ!‏›‏ ٻٜ مبِعَ پٛولٜ ‏‹‏شُوطٜىٰمِنْ!‏›‏ ³¹تٛ يِمْٻٜ نغَطِي فِي طُعُمْ شَرٜلْ نغٜلْ لٜکِّ وٛنِ کٜشِّ، کٛ وَطَتَ تٛ کِ يٛورِي؟»‏

³²طُمْ اَرْدِنِ يٜىٰسُ اٜ وُيْٻٜ طِطٛ، نغَمْ ٻٜ مبَرٛيَٻٜ؞ ³³ٻٜ نغَرِ تٛ وٛنْدٜ وِغٜىٰرٜ بِعٜتٜىٰندٜ ‏«‏پِپَلْ حٛورٜ؞»‏ طٛنْ ٻٜ ٻِلِمٛ، ٻٜ ڤِيَنِمٛ کُوسَاجٜ دٛوْ غَافَانغَلْ، کَنْکٛ اٜ وُيْٻٜ طِطٛ ٻٜنْ، غٛعٛتٛ اٜ جُنْغٛ مَاکٛ ݧَامٛ، غٛعٛتٛ اٜ جُنْغٛ مَاکٛ نَنٛ؞ ³⁴يٜىٰسُ وِعِ، ‏«‏ݧَاکٛ اَمْ مٛ دٛوْ، يَافَنَ بَرٛوٻٜيَمْ نغَمْ ٻٜ اَنْدَا کٛ ٻٜ نغَطَتَ؞»‏

اَمَّا سٛوجِعٜنْ رٛومَ نغَطِ شَاشَ نغَمْ ٻٜ شٜنْدَ کٛلْتٜ مَاکٛ؞ ³⁵يِمْٻٜ ندَرِي اٜ ندَارَ، اَرْدِيٻٜ نجُکِّتِمٛ اٜ مبِعَ، ‏«‏اٛ حِسْنِي وٛٻّٜ؞ تٛ کَنْکٛ وٛنِ اَلْمَسِيحُ مٛ اَللَّه سُٻِ، اَلْ اٛ حِسْنَ حٛورٜ مَاکٛ؞»‏

³⁶سٛوجِعٜنْ مَا نغَطِ کَ جُکُّتُکِمٛ، ٻٜ پٜىٰݝِ حَادٜ مَاکٛ، ٻٜ کٛکِّمٛ ندِيَمْ اِنَبٛجَمْ لَمُّطَمْ، ٻٜ مبِعِمٛ، ³⁷‏«‏تٛ اَنْ وٛنِ لَامِيطٛ يَحُودَنْکٛعٜنْ، حِسْنُ حٛورٜ مَاطَ!‏»‏

³⁸کَدِمَا دٛوْ حٛورٜ غَافَانغَلْ نغَلْ طُمْ تَکِّ اَلّٛوَلْ؞ طُمْ وِنْدِ دٛوْ مَاغَلْ کٛ طُمْ وُلّٛرِيمٛ وِعُکِ، ‏«‏اٛعٛ وٛنِ لَامِيطٛ يَحُودَنْکٛعٜنْ؞»‏

³⁹غٛعٛتٛ ندٜرْ وُيْٻٜ طِطٛ ٻِلْدَاٻٜ اٜ مَاکٛ وَطَنِمٛ حَالَ نَوْکَ، وِعِ، ‏«‏نَاع اَنْ وٛنِ اَلْمَسِيحُ؟ حِسْنُ حٛورٜ مَاطَ، ندٜنْ کِسْنَامِنْ، مِنٛنْ مَا!‏»‏

⁴⁰اَمَّا غُجّٛ غٛعٛتٛ اٛنْ حَلْٻَنِمٛ، وِعِ، ‏«‏اَ حُلَتَا اَللَّه، اَنْ جَرْدٛووٛ تٛرَّ غٛعٛ اٜ مَاکٛ؟ ⁴¹اٜنٜنْ اٜنْ کٜٻِي کٛ حَانِ طُمْ وَطَنَعٜنْ، نغَمْ کٛ نغَطّٜنْ وٛوطَا؞ اَمَّا نٜطّٛ اٛعٛ، اٛ وَطَايِ غٛطُّمْ کٛ وٛوطَا؞»‏ ⁴²ندٜنْ اٛ وِعِ، ‏«‏يٜىٰسُ، تَاع يٜجِّتَمْ شَرٜلْ نغٜلْ نَتُّطَا لَامُ مَاطَ؞»‏

⁴³يٜىٰسُ وِعِمٛ، ‏«‏اٜ مِ وِعُمَا غٛونغَ، حَنْدٜ اَ وٛنْدَيْ اٜ اَمْ ندٜرْ وُرٛ اَللَّه؞»‏

مَيْدٜ يٜىٰسُ

⁴⁴اٜ شَرٜلْ نغٜلْ طُمْ شَکَ ݧَلَوْمَ، اَمَّا سٜيْ ݧِوْرٜ مَٻِّ لٜيْدِ فُو حَا يَاکِ نجَمْندِ تَتِ، ⁴⁵ݧِوْرٜ سُدِّ نَانغٜ؞ سٜيْ وُدٜرٜ شٜنْدُندٜ سُودُ جٛومِرَاوٛ سٜىٰکِ طِطِ؞ ⁴⁶يٜىٰسُ وِعِ اٜ سٜمْبٜ، ‏«‏ݧَاکٛ اَمْ مٛ دٛوْ، مِ حٛکِّي يٛنْکِ اَمْ ندٜرْ جُنْغٛ مَاطَ!‏»‏ ندٜ اٛ وِعِ نٛنْ، اٛ مَايِ؞

⁴⁷ندٜ مَوْطٛ سٛوجِعٜنْ اٛنْ يِعِ کٛ وَطِ، سٜيْ اٛ مَنْتِ اَللَّه، اٛ وِعِ، ‏«‏غٛونغَ، نٜطّٛ اٛعٛ اٛ اَادِلِيجٛ!‏»‏

⁴⁸ندٜ يِمْٻٜ فُو مٛٻْتِيٻٜ نغِعَ کٛ وَطَتَ نغِعِ نٛنْ، ٻٜ کٛوتِ اٜ ٻٜ ندٛوندِي جُوطٜ؞ ⁴⁹اَمَّا اَنْدُٻٜمٛ فُو اٜ رٜوْٻٜ تٛکّٛيْٻٜمٛ دَغَ غَلِيلِ ندَرِي تٛ وٛطِّ اٜ ندَارَ کٛو طُمٜ؞

يٜىٰسُ اُوَامَ

^50‏-51اٜ وٛودِ غٛطّٛ بِعٜتٜىٰطٛ يُسُفُ دَغَ غَرِيرِ اَرْمَاتِيَ ندٜرْ لٜيْدِ يَحُودَ، اَادِلِيجٛ؞ اٛ غٛعٛتٛ ندٜرْ کَوْتَلْ مَوْٻٜ، اَمَّا اٛ جَٻَايِ کٛ ٻٜ شُٻِ اٜ کٛ ٻٜ نغَطِ؞ اٛ حَاٻِي يِعُکِ غَرٛلْ لَامُ اَللَّه؞ ⁵²کَنْکٛ يَحِ تٛ بِلَاتُسْ، اٛ تٛرِي طُمْ حٛکَّمٛ ٻَنْدُ يٜىٰسُ؞ ⁵³اٛ وَطِ طُمْ جِڤِّنِ ٻَنْدُ ندُنْ دَغَ دٛوْ غَافَانغَلْ، اٛ تَارِرِندُ وُدٜرٜ ندٜ شٜىٰدٜ؞ سٜيْ اٛ فُکِّنٛيِندُ ندٜرْ يٜنَاندٜ وَسَاندٜ ندٜرْ حَيْرٜ، طُمْ مٜىٰطَايِ وَطُکِ غٛطّٛ ندٜرْ مَيْرٜ؞ ⁵⁴طُمْ ݧَلْندٜ سِرْيَاکِ، حٛرِي سٜطَّ طُمْ نَتَّ ݧَلْندٜ سِوْتَارٜ؞

⁵⁵رٜوْٻٜ غَرْدُٻٜ اٜ يٜىٰسُ دَغَ لٜيْدِ غَلِيلِ ٻٜ تٛکِّ يُسُفُ، ٻٜ نغِعِ يٜنَاندٜ ندٜنْ، اٜ نٛ طُمْ فُکِّنِرِ ٻَنْدُ مَاکٛ؞ ⁵⁶سٜيْ ٻٜ شٛعِّي وُرٛ، ٻٜ مٛعِّنِ نٜبَّمْ اُرٛوجَمْ، اَمَّا ٻٜ شِوْتِي اٜ ݧَلْندٜ سِوْتَارٜ نٛ اَتَّوْرَ وِعِ؞

اُمَّاکِ يٜىٰسُ دَغَ مَيْدٜ

¹ݧَلْندٜ اَلَلْ سُبَکَ، رٜوْٻٜ ٻٜنْ کٛشِّ نٜبَّمْ اُرٛوجَمْ طَمْ ٻٜ مٛعِّنِ نغَمْ ٻٜ مٛيْتَنَ ٻَنْدُ مَاکٛ، ٻٜ نجَحِ يٜنَاندٜ ندٜنْ؞ ²ٻٜ تَوِ حَيْرٜ ندٜنْ تَلِّتَامَ دَغَ دَمُّغَلْ يٜنَاندٜ ندٜنْ؞ ³اَمَّا ندٜ ٻٜ نَتِّ، ٻٜ تَوَايِ ٻَنْدُ يٜىٰسُ؞ ⁴اٜ ٻٜ ندٜرْ وَنَّارٜ دٛوْ فِي طُمْ، سٜيْ بٛ مَپّٜرٜ ٻٜ نغِعِ وٛرْٻٜ طِطٛ اٜ ندَرِي حَادٜ مَٻّٜ؞ اٜ ٻٜ ٻٛرْنِي کٛلْتٜ دَنٜىٰجٜ تَرْ؞ ⁵کُلٛلْ نَنْغِٻٜ، سٜيْ ٻٜ نجَنِ ٻٜ کِڤِّي؞ وٛرْٻٜ ٻٜنْ مبِعِٻٜ، ‏«‏نغَمْ طُمٜ طَٻِّتٛتٛنْ مٛ يٛنْکِ ندٜرْ مَيْٻٜ؟ ⁶اٛ وَلَا طٛعٛ؞ طُمْ اُمِّنِيمٛ دَغَ مَيْدٜ!‏ شِفْتٛرٜىٰ کٛ اٛ وِعُنٛوعٛنْ کٛ اٛ وٛنْدُنٛو اٜ مٛوطٛنْ ندٜرْ لٜيْدِ غَلِيلِ؞ ⁷اٛ وِعِي، ‏‹‏دٛولٜ ٻِي نٜطّٛ حٛکِّتِرٜىٰ ندٜرْ جُوطٜ کَلُّٻٜ، اٛ وَرٜىٰ دٛوْ غَافَانغَلْ، ندٜنْ اٛ اُمّٛو ندٜرْ ݧَلْندٜ تَتَوْرٜ؞›‏ »‏

⁸سٜيْ ٻٜ شِفْتٛرِ کٛ اٛ وِعُنٛوٻٜ؞ ⁹ٻٜ نغَرْتٛيِ دَغَ يٜنَاندٜ ندٜنْ، ٻٜ مبِعِ تٛکُّٻٜ يٜىٰسُ سَڤّٛ اٜ غٛعٛ، حَا اٜ وٛٻّٜ، کٛ وَطِ فُو؞ ¹⁰رٜوْٻٜ ٻٜنْ نغٛنِ مَرْيَامَ پِوٛيْطٛ مَغَدَلَ، اٜ يٛوَانَ، اٜ مَرْيَامَ مَدُوجٛ يَاکُبُ، اٜ وٛٻّٜ رٜوْٻٜ؞ ¹¹اَمَّا تٛکُّٻٜ يٜىٰسُ نجَٻَايِ کٛ رٜوْٻٜ ٻٜنْ مبِعِٻٜ، ٻٜ نغَرْتِرِ حَالَ کَنْ بٛ تَالٛلْ؞

¹²بِيتُرُسْ بٛو اُمِّي، دٛغِّ يَحِ يٜنَاندٜ ندٜنْ، يُرْنِيندٜ، غُدٜ طٜ طُمْ تَارِرْنٛو ٻَنْدُ يٜىٰسُ تَنْ اٛ يِعِ؞ اٛ سٛعِّي اٜ مٛ پَمَ حٛورٜ مَاکٛ کٛ وَطِ؞

دٛوْ طَتَلْ اِمَاوُسْ

¹³اٜ ݧَلْندٜ ندٜنْ تٛکُّٻٜ يٜىٰسُ طِطٛ اٜ نجَحَ وٛنْغٜلْ غَرِيٜلْ بِعٜتٜىٰنغٜلْ اِمَاوُسْ؞ حَکُّندٜ غَرِيٜلْ نغٜلْ اٜ اُرُشَلِيمَ وَطِي مِلْ جٛوٜىٰطِطِ؞ ¹⁴اٜ ٻٜ نجَحَ اٜ ٻٜ مٜتَ حَکُّندٜ مَٻّٜ دٛوْ کٛ وَطِ فُو؞ ¹⁵اٜ ٻٜ نغٜوْتَ دٛوْ فِي طُمْ حَکُّندٜ مَٻّٜ، سٜيْ يٜىٰسُ اٜ حٛورٜ مُوطُمْ حٜوْتِيٻٜ وَطِ کَ يَادُکِ اٜ مَٻّٜ؞ ¹⁶اَمَّا اَللَّه وَطِ ٻٜ اَنْدِتَايِمٛ؞ ¹⁷يٜىٰسُ پَمِٻٜ وِعِ، ‏«‏دٛوْ طُمٜ نغٜوْتٛتٛنْ ندٜرْ يَادُ مٛوطٛنْ؟»‏

سٜيْ ٻٜ ندَرِي، ٻٜ مبٛنِّ غٜىٰشٜ؞ ¹⁸غٛعٛتٛ مَٻّٜ بِعٜتٜىٰطٛ کِلِيٛوبَسْ وِعِ، ‏«‏اَنْ تَنْ وٛنِ کٛطٛ ندٜرْ اُرُشَلِيمَ مٛ اَنْدَا کٛ وَطِ تٛنْ ندٜرْ بَلْطٜ طٜعٜ؟»‏

¹⁹اٛ وِعِ، ‏«‏طُمٜ وَطِ؟»‏

ٻٜ مبِعِ، ‏«‏کٛ حٜٻِ يٜىٰسُ نَجَرَنْکٜىٰجٛ؞ اٛ اَنَّبِيجٛ غٛودُطٛ بَوْطٜ ندٜرْ بٛلِيطٜ اٜ کُوطٜ يٜىٰسٛ اَللَّه اٜ يِمْٻٜ فُو؞ ²⁰مَوْٻٜ اَرْدِيٻٜ دِينَ اٜ اَرْدِيٻٜ مٜىٰطٜنْ نغَطِمٛ ندٜرْ جُوطٜ لَامُ نغَمْ طُمْ وَرَمٛ، ندٜنْ ٻٜ مبَرِمٛ دٛوْ غَافَانغَلْ؞ ²¹اَمَّا اٜ مِنْ کَمِّنٛو کَنْکٛ وٛنِ رِمْطِنَيْطٛ يِمْٻٜ اِسْرَاعِيلَ؞ کٛ ٻُرِ نٛنْ مَا، حَنْدٜ وٛنِ ݧَلْندٜ تَتَوْرٜ کٛ طُعُمْ فِي فُو وَطِ؞ ²²کَدِمَا وٛٻّٜ رٜوْٻٜ ندٜرْ اَمِنْ کَيْطِنِيمِنْ؞ ٻٜ نجَحِ تٛ يٜنَاندٜ ندٜنْ حَنْدٜ سُبَکَ، ²³اَمَّا ٻٜ تَوَايِ ٻَنْدُ مَاکٛ؞ سٜيْ ٻٜ نغَرْتِ ٻٜ مبِعِمِنْ ٻٜ نغِعِي مَلَاعِکَعٜنْ وِعُٻٜ يٜىٰسُ اٜ وٛودِ يٛنْکِ؞ ²⁴وٛٻّٜ ٻٜ مِنْ نغٛنْدِ نجَحِ تٛ يٜنَاندٜ ندٜنْ، ٻٜ تَوِندٜ نٛ رٜوْٻٜ ٻٜنْ مبِعِ، اَمَّا کَنْکٛ ٻٜ نغِعَايِمٛ؞»‏

²⁵يٜىٰسُ وِعِٻٜ، ‏«‏اٛنْ نغَلَا فَامُ، ٻٜرْطٜ مٛوطٛنْ اٜ نٜىٰٻَ نجَٻَايِ کٛو طُمٜ کٛ اَنَّبٛعٜنْ مبِعُنٛو!‏ ²⁶اٛنْ اَنْدَا دٛولٜ اَلْمَسِيحُ يَرَ تٛرَّ نِحِ ندٜنْ نَتَّ تٜدُّنغَلْ مُوطُمْ؟»‏ ²⁷ندٜنْ اٛ فَمْتِنِٻٜ کٛ دٜفْتٜرٜ وِعِ وَطَيْ دٛوْ مَاکٛ، دَغَ اَتَّوْرَ يَاکِ دٜفْتٜ اَنَّبٛعٜنْ فُو؞

²⁸ندٜ ٻٜ ٻَدِي غَرِيٜلْ نغٜلْ ٻٜ نجَحَتَ، سٜيْ يٜىٰسُ وَطِ بٛ پَٻّٛتٛ؞ ²⁹اَمَّا ٻٜ تٛرِيمٛ ٻٜ مبِعِ، ‏«‏يَالُ مبَالَا تٛ اَمِنْ، نغَمْ نَانغٜ حِيرِي، جٜمَّ وَطِي؞»‏ سٜيْ اٛ يَالِ نغَمْ اٛ وَالَ؞

³⁰شَرٜلْ کٛ ٻٜ ݧَامَتَ ݧَمْندُ، اٛ حٛشِّ بُرٛودِ، اٛ يٜتِّ اَللَّه، اٛ سٜنْدِطُمْ، اٛ حٛکِّٻٜ؞ ³¹سٜيْ اَللَّه مَٻِّتِ غِتٜ مَٻّٜ، ٻٜ اَنْدِتِمٛ؞ طٛنْ اٜ طٛنْ اٛ مَجِّتِ يٜىٰسٛ مَٻّٜ؞ ³²سٜيْ ٻٜ مبِعِ حَکُّندٜ مَٻّٜ، ‏«‏اٜنْ نَنِي بٜلْطُمْ ندٜرْ ٻٜرْطٜ مٜىٰطٜنْ کٛ اٛ مٜتَنَيْنٛوعٜنْ دٛوْ طَتَلْ اٜ مٛ فَمْتِنَعٜنْ دٜفْتٜرٜ شٜنِيندٜ؞»‏

³³ٻٜ اُمِّي طٛنْ اٜ طٛنْ ٻٜ شٛعِّي اُرُشَلِيمَ؞ ٻٜ تَوِ تٛکُّٻٜ يٜىٰسُ سَڤّٛ اٜ غٛعٛ اٜ وٛنْدُٻٜ اٜ مَٻّٜ اٜ کَوْرِتِ؞ ³⁴حَوْرُتُٻٜ ٻٜنْ مبِعِ طِطٛ ٻٜنْ، ‏«‏غٛونغَ، مٛودِبّٛ اُمَّکٜ؞ اٛ وَنْغَنِي سِيمَنْ!‏»‏

³⁵سٜيْ طِطٛ ٻٜنْ مَا مبِعِٻٜ کٛ وَطِ دٛوْ طَتَلْ اٜ نٛ ٻٜ اَنْدِتِرِمٛ ندٜ اٛ سٜنْدِ بُرٛودِ؞

يٜىٰسُ وَنْغَنِي تٛکُّٻٜمٛ

³⁶اٜ ٻٜ ندٜرْ مٜتُکِ حَالَ کَنْ، سٜيْ طٛنْ اٜ طٛنْ يٜىٰسُ اٜ حٛورٜ مُوطُمْ وَنْغِ دَرِي شَکَ مَٻّٜ؞ اٛ وِعِٻٜ، ‏«‏اٜ مِ سِلْمِنٛو؞ جَمْ وٛنْدَ اٜ مٛوطٛنْ؞»‏

³⁷ٻٜرْطٜ مَٻّٜ تَپِ، ٻٜ کَمِّي غِنّٛلْ ٻٜ نغِعِ؞ ³⁸اَمَّا اٛ وِعِٻٜ، ‏«‏طُمٜ وَنِّعٛنْ؟ نغَمْ طُمٜ نغَطٛتٛنْ سٜکٛ ندٜرْ ٻٜرْطٜ مٛوطٛنْ؟ ³⁹ندَارٜىٰ جُوطٜ اَمْ اٜ کٛيْطٜ اَمْ، طُمْ مِنْ اٜ حٛورٜ اَمْ؞ مٜىٰمٜىٰيَمْ نَنٛنْ، اَيْ غِنّٛلْ وَلَا ٻَنْدُ اٜ پِعٜ نٛ نغِيرُطٛنْيَمْ؞»‏

⁴⁰ندٜ اٛ وِعِ نٛنْ، اٛ حٛلِّٻٜ جُوطٜ مَاکٛ اٜ کٛيْطٜ مَاکٛ؞ ⁴¹ٻٜ نجَٻَايِ طُمْ غٛونغَ نغَمْ بٜلْطُمْ اٜ حَيْطِنْکِ؞ سٜيْ اٛ وِعِٻٜ، ‏«‏اٛنْ نغٛودِ غٛطُّمْ کٛ ݧَامٜتٜىٰ طٛعٛ؟»‏ ⁴²سٜيْ ٻٜ کٛکِّمٛ تَيْرٜ لِنْغُ نجُطَانغُ، ⁴³اٛ حٛشِّنغُ اٛ ݧَامِ يٜىٰسٛ مَٻّٜ؞

⁴⁴ندٜنْ اٛ وِعِٻٜ، ‏«‏طُعُمْ وٛنِ کٛ مبِينٛومِعٛنْ شَرٜلْ کٛ نغٛنْدُنٛومِ اٜ مٛوطٛنْ:‏ کٛو طُمٜ کٛ وِنْدَا ندٜرْ اَتَّوْرَ، اٜ دٜفْتٜ اَنَّبٛعٜنْ، اٜ جَبُورَ دٛوْ اَمْ دٛولٜ طُمْ حٜىٰوَ؞»‏

⁴⁵ندٜنْ اٛ مَٻِّتِ فَامُ مَٻّٜ نغَمْ ٻٜ ڤَامَ دٜفْتٜرٜ شٜنِيندٜ؞ ⁴⁶اٛ وِعِٻٜ، ‏«‏اَايَارٜ وِعِي:‏ اَلْمَسِيحُ تٛرّٛتٛ، غَطَ بَلْطٜ تَتِ اٛ اُمّٛتٛ دَغَ مَيْدٜ؞ ⁴⁷ندٜرْ اِنْدٜ مَاکٛ طُمْ وَعَجِنَيْ تُوبُکِ اٜ يَافَنٜىٰکِ حَکّٜ يَاکِ ندٜرْ لٜݧِ فُو؞ طُمْ فُطَّيْ دَغَ اُرُشَلِيمَ؞ ⁴⁸اٛنٛنْ نغٛنِ اَنْدِنَيْٻٜ وٛٻّٜ فِي طُعُمْ؞ ⁴⁹رَطُّمْ، مِ لِلْدٛيَيْعٛنْ رُوحُ اَللَّه نٛ ݧَاکٛ اَمْ وَطِ اَلْکَوَلْ؞ نجٛوطٜىٰ ندٜرْ اُرُشَلِيمَ نَا رُوحُ اَللَّه جِڤّٛيَکٜ دٛوْ مٛوطٛنْ حٛکِّيعٛنْ بَوْطٜ؞»‏

يٜىٰسُ حٛشَّامَ يَاکِ دٛوْ

⁵⁰يٜىٰسُ اَرْدِيٻٜ ٻٜ مبُرْتِي ندٜرْ اُرُشَلِيمَ يَاکِ وٛنْدٜ وِغٜىٰرٜ حَادٜ غَرِيرِ بٜتَنِ، اٛ پٜفْتِ جُوطٜ مَاکٛ اٛ بَرْکِطِنِٻٜ؞ ⁵¹اٜ مٛ ندٜرْ بَرْکِطِنْکِٻٜ، سٜيْ اٛ حٛشَّا يَاکِ دٛوْ؞ ⁵²ٻٜ مَوْنِنِمٛ، ٻٜ شٛعِّي اُرُشَلِيمَ اٜ ٻٜ نَنَ بٜلْطُمْ طُطُّمْ؞ ⁵³کٛو ندٜيٜ ݧَلْندٜ اٜ ٻٜ نجَحَ وُرٛ شٜنِينغٛ اٜ ٻٜ مَنْتَ اَللَّه؞