يَحَيَ

حَبَرُ يٜىٰسُ طُمْ

يَحَيَ

وِنْدِ

حَبَرُ دٛوْ طٜرٜوٛلْ نغٛعٛلْ

بِنْدُطٛ طٜرٜوٛلْ نغٛعٛلْ وٛنِ يَحَيَ، اٛ غٛعٛتٛ ندٜرْ تٛکُّٻٜ يٜىٰسُ سَڤّٛ اٜ طِطٛ؞ طٜرٜوٛلْ نغٛلْ حٛلِّي يٜىٰسُ وٛنِ وٛلْدٜ اَللَّه تَبُّتُندٜ ‏«‏اٛ وَرْتِي نٜطّٛ، اٛ جٛوطِي ندٜرْ مٜىٰطٜنْ، اٛ کٜوْطٛ يِدّٜ اٜ غٛونغَ؞»‏ يَحَيَ وِعِ نغٛلْ وِنْدَا نغَمْ يِمْٻٜ کٛولٛو يٜىٰسُ وٛنِ اَلْمَسِيحُ ٻِطّٛ اَللَّه، ندٜنْ لَاوٛلْ حٛولَاکِمٛ ٻٜ کٜٻَ يٛنْکِ کِ رٜعَتَا بَرْکَ اِنْدٜ مَاکٛ؞

يَحَيَ مٜتِي دٛوْ يٛنْکِ کِ رٜعَتَا کِ طُمْ حٜٻَتَ بَرْکَ اَلْمَسِيحُ؞ جَٻُٻٜ يٜىٰسُ وٛنِ لَاوٛلْ، يٜىٰسُ وٛنِ غٛونغَ، يٜىٰسُ وٛنِ يٛنْکِ، کَمْٻٜ کٜٻَتَ يٛنْکِ کِنْ؞ طٛنْمَا يَحَيَ وِعِ يٜىٰسُ وٛنِ جَيْنغٛلْ، يٜىٰسُ وٛنِ دَمُّغَلْ، يٜىٰسُ وٛنِ غَيْنَاکٛ بٛطّٛ؞

وٛلْدٜ کٛکَّيْندٜ يٛنْکِ

¹دَغَ کٛ دُونِيَارُ تَغٜىٰ بِعٜتٜىٰطٛ وٛلْدٜ اٜ طٛنْ، اٜ مٛ وٛنْدِ اٜ اَللَّه، ندٜنْ اٛ اَللَّه؞ ²دَغَ کٛ دُونِيَارُ تَغٜىٰ بِعٜتٜىٰطٛ وٛلْدٜ اٛنْ اٜ وٛنْدِ اٜ اَللَّه؞ ³اٛ تَغِي کٛو طُمٜ؞ وَلَا غٛطُّمْ ندٜرْ فُو کٛ تَغَا طُمْ اُمْ تَغِرَايِ لَاوٛلْ مَاکٛ؞ ⁴تٛ مَاکٛ يٛنْکِ پِوٛيِ، ندٜنْ يٛنْکِ کِنْ وٛنِ جَيْنغٛلْ يِمْٻٜ؞ ⁵جَيْنغٛلْ نغٛلْ اٜ وَطِ کَ يٜيْنَاکِ ندٜرْ ݧِوْرٜ، ݧِوْرٜ بٛو وَاوَايِ جَالَاکِنغٛلْ؞

⁶اٜ وٛودِ غٛطّٛ نٜطّٛ مٛ اَللَّه لِلٛيِ بِعٜتٜىٰطٛ يَحَيَ؞ ⁷اٛ وَرِي اٛ اَنْدِنَ يِمْٻٜ حَبَرُ جَيْنغٛلْ نغٛلْ، نغَمْ اٜ لَاوٛلْ مَاکٛ کٛو مٛيٜ جَٻَ جَيْنغٛلْ نغٛلْ؞ ⁸نَاع کَنْکٛ وٛنِ جَيْنغٛلْ نغٛلْ؞ اٛ وَرٛيِ اٛ اَنْدِنَ حَبَرُ تَنْ دٛوْ مَاغٛلْ؞ ⁹کَنْغٛلْ وٛنِ جَيْنغٛلْ غٛونغَوٛلْ يٜيْنٛتٛونغٛلْ دٛوْ کٛو مٛيٜ؞ نغٛلْ بٛو وَرِي ندٜرْ دُونِيَارُ؞

¹⁰بِعٜتٜىٰطٛ وٛلْدٜ اٛنْ ندٜنّٛ اٜ مٛ ندٜرْ دُونِيَارُ؞ کٛو ندٜ کَنْکٛ تَغِ دُونِيَارُ، فُو اٜ نٛنْ دُونِيَارُ اَنْدَامٛ؞ ¹¹اٛ وَرِي تٛ ٻٜ مَاکٛ، اَمَّا ٻٜ نجَٻَايِمٛ؞ ¹²اَمَّا فُو جَٻُٻٜمٛ کٛولِيٻٜ اِنْدٜ مَاکٛ، اٛ حٛکِّيٻٜ بَوْطٜ وَرْتُکِ ٻِٻّٜ اَللَّه؞ ¹³ٻٜ نغَرْتَايِ ٻِٻّٜ اَللَّه نغَمْ ٻٜ ندَݧَامَ نٛ طُمْ دَݧِرْتَ يِمْٻٜ، کٛو نغَمْ يِمْٻٜ نغِطِ نٛنْ وَطَ؞ اَللَّه اٜ حٛورٜ مُوطُمْ وَرْتِرِٻٜ ٻِٻّٜ مَاکٛ؞

¹⁴بِعٜتٜىٰطٛ وٛلْدٜ اٛنْ، اٛ وَرْتِي نٜطّٛ، اٛ جٛوطِي ندٜرْ مٜىٰطٜنْ، اٛ کٜوْطٛ يِدّٜ اٜ غٛونغَ؞ اٜنْ نغِعِي تٜدُّنغَلْ مَاکٛ، تٜدُّنغَلْ ٻِطّٛ بَجّٛ پِوٛيْطٛ تٛ ݧَاکٛ مٛ دٛوْ؞

¹⁵يَحَيَ حٛکِّي شٜيْدَ دٛوْ مَاکٛ، مٜتِي سٜمْبٜىٰ وِعِي، ‏«‏دٛوْ اٛعٛ مٜتُنٛومِ ندٜ مبِيمِ، ‏‹‏اٛنْ طٛنْ غَرَيْطٛ غَطَ اَمْ اٛ ٻُرِييَمْ مَنْغُ، نغَمْ اٜ مٛ طٛنْ کٛ مِ دَݧٜىٰ؞›‏ »‏

¹⁶نغَمْ يِدّٜ مَوْندٜ ندٜ اٛ يِطِعٜنْ، اٛ بَرْکِطِنِيعٜنْ اٜنْ فُو، بَرْکَ دٛوْ بَرْکَ؞ ¹⁷اَللَّه حٛکِّي اَتَّوْرَ اٜ لَاوٛلْ مُوسَ، اَمَّا اٜ لَاوٛلْ يٜىٰسُ اَلْمَسِيحُ اٛ حٛلِّي يِدّٜ اٜ غٛونغَ؞ ¹⁸وَلَا نٜطّٛ مٜىٰطُطٛ يِيکِ اَللَّه؞ ٻِطّٛ مَاکٛ بَجّٛ، غٛنْطٛ ندٜرْ ٻٜرْندٜ ݧَاکٛ مٛ دٛوْ، کَنْکٛ حٛلِّعٜنْ نٛ اَللَّه وَعِ؞

يَحَيَ غَطٛووٛ بَڤْتِسْمَ مٜتِي دٛوْ يٜىٰسُ

¹⁹رَا شٜيْدَ طُمْ يَحَيَ حٛکِّ شَرٜلْ کٛ اَرْدِيٻٜ يَحُودَنْکٛعٜنْ ندٜرْ اُرُشَلِيمَ لِلِ وٛٻّٜ اَرْدِيٻٜ دِينَ اٜ لٜىٰوِيَنْکٛعٜنْ تٛ مَاکٛ ٻٜ پَمَمٛ کَنْکٛ اٛ مٛيٜ؞

²⁰اٛ وَݧَايِ نٛوتَاکِٻٜ، اَمَّا اٛ وِعِٻٜ اٜ نجَيْرِ، ‏«‏نَاع مِنْ وٛنِ اَلْمَسِيحُ؞»‏

²¹ٻٜ مبِعِمٛ، ‏«‏تٛ نَاع اَنْ وٛنِ اَلْمَسِيحُ، تٛو، اَنْ اَ مٛيٜ؟ اَنْ وٛنِ اِلِيَ؟»‏

يَحَيَ نٛوتِي وِعِٻٜ، ‏«‏کٛو سٜطَّ، نَاع طُمْ مِنْ؞»‏

ٻٜ پَمِمٛ ٻٜ مبِعِ، ‏«‏اَنْ وٛنِ اٛنْ طٛنْ اَنَّبِيجٛ؟»‏

اٛ وِعِ، ‏«‏اَاعَ؞»‏

²²سٜيْ ٻٜ مبِعِمٛ، ‏«‏تٛو، وِعُمِنْ، اَنْ، اَ مٛيٜ؟ وِعُمِنْ کٛ مِنْ مبِعَتَ لِلٛيْٻٜمِنْ؞ مٛيٜ نٛدِّرْتَا حٛورٜ مَاطَ؟»‏

²³سٜيْ يَحَيَ وِعِٻٜ کٛ اَنَّبِ اِشَايَ وِعُنٛ، اٛ وِعِ، ‏«‏مِنْ وٛنِ غٛطّٛ نٛدّٛووٛ ندٜرْ لَدّٜ اٜ وِعَ، ‏‹‏ڤٛرْتٜىٰ لَاوٛلْ نغَمْ جٛومِرَاوٛ؞›‏ »‏ ²⁴سٜيْ وٛٻّٜ فَارِسَنْکٛعٜنْ ٻٜ طُمْ لِلِ ²⁵پَمِمٛ مبِعِ، ‏«‏تٛ نِ نَاع اَنْ وٛنِ اَلْمَسِيحُ، کَدِنْ نَاع اَنْ وٛنِ اِلِيَ، کٛو اٛنْ طٛنْ اَنَّبِيجٛ، نغَمْ طُمٜ نغَطَنْتَا يِمْٻٜ بَڤْتِسْمَ؟»‏

²⁶يَحَيَ وِعِٻٜ، ‏«‏اٜ مِ وَطِرَ بَڤْتِسْمَ اٜ ندِيَمْ، اَمَّا ندٜرْ مٛوطٛنْ اٜ وٛودِ غٛطّٛ مٛ اٛنْ اَنْدَا، ²⁷غَرٛيَيْطٛ غَطَ اَمْ؞ مِ فٛتَايِ فِتُّکِ لٛکُّلِّ ڤَطٜ مَاکٛ؞»‏

²⁸فُو طُعُمْ طُمْ وَطِي تٛ بٜتَنِ فٛنْغٛ شَانغٛلْ اُرْدُنْ، تٛ يَحَيَ وَطَتَ بَڤْتِسْمَ؞

کَرٛورِ اَللَّه

²⁹غَطَ طُعُمْ وَطِي ندٜ فِنِ يَحَيَ يِعِ يٜىٰسُ اٜ وَرٛيَ تٛ مُوطُمْ، اٛ وِعِ، ‏«‏رَا کَرٛورِ اَللَّه، اِتَّيْندِ حَکّٜىٰجِ دُونِيَارُ!‏ ³⁰اٛعٛ دٛوْ مَاکٛ مٜتَيْنٛومِ ندٜ مبِيمِ، ‏‹‏غٛطّٛ اٜ وَرَ غَطَ اَمْ اٛ ٻُرِييَمْ مَنْغُ، نغَمْ اٜ مٛ طٛنْ کٛ مِ دَݧٜىٰ؞›‏ ³¹مِنْ اٜ حٛورٜ اَمْ مِ اَنْدَامٛ، اَمَّا مِ وَرِي اٜ مِ وَطِرَ بَڤْتِسْمَ اٜ ندِيَمْ نغَمْ اٛ وَنْغِنَنٜىٰ يِمْٻٜ اِسْرَاعِيلَ؞»‏

³²سٜيْ يَحَيَ حٛکِّ شٜيْدَ وِعِ، ‏«‏مِ يِعِي رُوحُ اَللَّه اٜ جِڤّٛيٛو دَغَ دٛوْ بٛ فٛوندُ، طُمْ جٛوطِي دٛوْ مَاکٛ؞ ³³مِنْ اٜ حٛورٜ اَمْ مِ اَنْدَامٛ، اَمَّا لِلٛيْطٛيَمْ مِ وَطِرَ بَڤْتِسْمَ اٜ ندِيَمْ وِعِيَمْ، ‏‹‏نٜطّٛ مٛ نغِيطَا رُوحُ اَمْ جِڤّٛيَکٜ دَغَ دٛوْ جٛوطِي دٛوْ مَاکٛ، کَنْکٛ وٛنِ غَطِرَيْطٛ بَڤْتِسْمَ اٜ رُوحُ اَمْ؞›‏ »‏ ³⁴طٛنْمَا يَحَيَ وِعِ، ‏«‏مِ يِعِيطُمْ، مِ شٜيْدَکٜ کَنْکٛ وٛنِ ٻِطّٛ اَللَّه؞»‏

اَرْتُٻٜ تٛکُّکِ يٜىٰسُ

³⁵طٛنْمَا غَطَ طُعُمْ وَطِي ندٜ فِنِ يَحَيَ اٜ دَرِي کَنْکٛ اٜ تٛکُّٻٜمٛ طِطٛ، ³⁶سٜيْ اٛ يِعِ يٜىٰسُ اٜ پَٻّٛو، اٛ وِعِ، ‏«‏رَا کَرٛورِ اَللَّه!‏»‏

³⁷ندٜ تٛکُّٻٜمٛ طِطٛ ٻٜنْ نَنِ اٛ وِعِي نٛنْ، سٜيْ ٻٜ تٛکِّ يٜىٰسُ؞ ³⁸يٜىٰسُ وَيْلِتِي يِعِ اٜ ٻٜ تٛکِّمٛ، اٛ وِعِٻٜ، ‏«‏طُمٜ طَٻِّتٛتٛنْ؟»‏

ٻٜ مبِعِمٛ، ‏«‏رَبِّ، تٛيٜ نجٛوطٛتٛطَا؟»‏ مَعَنَ ‏«‏رَبِّ»‏ وٛنِ ‏«‏مٛودِبّٛ؞»‏

³⁹اٛ وِعِٻٜ، ‏«‏نغَرٜىٰ، نغِعٛنْ؞»‏ اٜ شَرٜلْ نغٜلْ طُمْ نجَمْندِ نَيِ اَلَاسَرَ؞ سٜيْ ٻٜ تٛکِّمٛ ٻٜ نغِعِ تٛ اٛ جٛوطٛتٛو، ٻٜ کِرْتِدِ اٜ مَاکٛ؞

⁴⁰غٛعٛتٛ ندٜرْ يِمْٻٜ طِطٛ نَنْٻٜ کٛ يَحَيَ وِعِ تٛکِّ يٜىٰسُ ٻٜنْ وٛنِ اَنْدِرَاوُسْ مِݧِرَاوٛ سِيمَنْ بِيتُرُسْ؞ ⁴¹اَرْتُطُمْ اَنْدِرَاوُسْ تَوِ مَوْنِرَاوٛ مَاکٛ سِيمَنْ، اٛ وِعِمٛ، ‏«‏مِنْ کَوْرِي اٜ اَلْمَسِيحُ،»‏ وَاتٛ شُٻَاطٛ اَللَّه؞ ⁴²سٜيْ اٛ يَارِ سِيمَنْ تٛ يٜىٰسُ؞ يٜىٰسُ رَارِ سِيمَنْ اٛنْ وِعِمٛ، ‏«‏اَنْ وٛنِ سِيمَنْ ٻِطّٛ يَحَيَ؞ طُمْ نٛدِّرْتٜ کٜىٰفَسْ؞»‏ مَعَنَ کٜىٰفَسْ وٛنِ بِيتُرُسْ، وَاتٛ ‏«‏حَيْرٜ؞»‏

يٜىٰسُ نٛدِّي فِلِبُسْ اٜ نَتَانِيَلْ

⁴³غَطَ طُعُمْ وَطِي ندٜ فِنِ يٜىٰسُ سُٻِ يَحَ لٜيْدِ غَلِيلِ؞ سٜيْ اٛ تَوِ فِلِبُسْ، اٛ وِعِمٛ، ‏«‏تٛکَّمْ؞»‏ ⁴⁴فِلِبُسْ بٛو اٛ نٜطّٛ غَرِيرِ بٜتَسَيْدَ؞ کَيْرِ وٛنِ غَرِيرِ اَنْدِرَاوُسْ اٜ بِيتُرُسْ؞ ⁴⁵سٜيْ فِلِبُسْ يَحِ تَوِ نَتَانِيَلْ وِعِمٛ، ‏«‏مِنْ کَوْرِي اٜ اٛنْ طٛنْ نٜطّٛ مٛ مُوسَ وِنْدِ دٛوْ مُوطُمْ ندٜرْ اَتَّوْرَ، مٛ اَنَّبٛعٜنْ مَا مبِنْدِ دٛوْ مَاکٛ، وَاتٛ يٜىٰسُ ٻِطّٛ يُسُفُ پِوٛيْطٛ غَرِيرِ نَجَرَتْ؞»‏

⁴⁶نَتَانِيَلْ وِعِ فِلِبُسْ، ‏«‏اٜ يِيکِ مَاطَ غٛطُّمْ بٛطُّمْ وُرْتٛيْتٛ نَجَرَتْ؟»‏

فِلِبُسْ وِعِمٛ، ‏«‏وٛرٛيْ، نغِعَا؞»‏

⁴⁷ندٜ يٜىٰسُ يِعِ نَتَانِيَلْ اٜ وَرٛيَ تٛ مُوطُمْ، سٜيْ مٜتِ دٛوْ مَاکٛ، وِعِ، ‏«‏رَا اِسْرَاعِيلَنْکٜىٰجٛ مٛ غٛونغَ مٛ فٜوَتَا؞»‏

⁴⁸نَتَانِيَلْ پَمِ يٜىٰسُ وِعِ، ‏«‏نٛ وَطِ اَنْدُطَايَمْ؟»‏

يٜىٰسُ وِعِمٛ، ‏«‏مِ يِعِيمَ لٜيْ لٜکِّ اِبِّ کٛ فِلِبُسْ نٛدُّمَا؞»‏

⁴⁹نَتَانِيَلْ وِعِمٛ، ‏«‏مٛودِبّٛ، اَنْ وٛنِ ٻِطّٛ اَللَّه!‏ اَنْ وٛنِ لَامِيطٛ اِسْرَاعِيلَ؞»‏

⁵⁰يٜىٰسُ وِعِمٛ، ‏«‏اَ حٛولِيَمْ نغَمْ مِ وِعِيمَ مِ يِعِيمَ لٜيْ لٜکِّ اِبِّ؟ اَ يِعَيْ فِي طُطُّمْ ٻُرْطُمْ طُعُمْ؞»‏ ⁵¹سٜيْ يٜىٰسُ ٻٜيْدِ وِيکِٻٜ، ‏«‏اٜ مِ وِعَعٛنْ غٛونغَ، اٛنْ نغِعَيْ دٛوْ مَٻِّتَکٜ، مَلَاعِکَعٜنْ اَللَّه اٜ پٜنْتَ اٜ نجِڤّٛيٛو يٜىٰسٛ ٻِي نٜطّٛ؞»‏

حُمْتٛ تٜىٰغَلْ اٜ غَرِيرِ کَانَ

¹بَلْطٜ طِطِ غَطَ نٛنْ وَطِي طُمْ وَطِ حُمْتٛ تٜىٰغَلْ اٜ غَرِيرِ کَانَ نغٛنْدِ ندٜرْ لٜيْدِ غَلِيلِ؞ مَدُوجٛ يٜىٰسُ بٛو اٜ طٛنْ؞ ²يٜىٰسُ اٜ تٛکُّٻٜمٛ مَا کُمْڤِتَامَ حُمْتٛ تٜىٰغَلْ نغَلْ؞ ³ندٜ ندِيَمْ اِنَبٛجَمْ طَمْ حٛٻّٜ نجَرَتَ تٛ حُمْتٛ تٜىٰغَلْ نغَلْ رٜعِ، مَدُوجٛ يٜىٰسُ وِعِمٛ، ‏«‏ندِيَمْ اِنَبٛجَمْ رٜعِ؞»‏

⁴يٜىٰسُ وِعِمٛ، ‏«‏نغَمْ طُمٜ نَتِّنْطَايَمْ ندٜرْ طُعُمْ؟ شَرٜلْ اَمْ وَطَايِ تَوْ؞»‏

⁵سٜيْ مَدُوجٛ يٜىٰسُ وِعِ مَشُّٻٜ کُوٛوٻٜ طٛنْ، ‏«‏نغَطٜىٰ کٛو طُمٜ کٛ اٛ وِعِعٛنْ؞»‏

⁶حَادٜ طٛنْ اٜ وٛودِ لٛوطٜ جٛوٜىٰغٛعٛ طٜ کَاپٜ اِرِ لٛوطٜ طٜ يَحُودَنْکٛعٜنْ کُوتِرْتَ لٛوتٛو نغَمْ لَاٻِنْکِ کٛعٜ مَٻّٜ نٛ دِينَ مَٻّٜ وِعِ؞ کٛو ندٜيٜ لٛوندٜ اٜ حٛشَّ ڤَالِ ندِيَمْ 20 يَاکِ 30؞ ⁷سٜيْ يٜىٰسُ وِعِ مَشُّٻٜ ٻٜنْ، ‏«‏کٜبِّنٜىٰ طٜعٜ لٛوطٜ اٜ ندِيَمْ؞»‏ ٻٜ کٜبِّنِطٜ ندِيَمْ نَا کِ طٜ کٜىٰوِ تٜڤْ؞ ⁸سٜيْ اٛ وِعِٻٜ، ‏«‏جٛونِ ݧٜطٜىٰ ندِيَمْ طَمْ سٜطَّ نجَارَنٛنْ ڤَامَنٛووٛ تٜىٰغَلْ نغَلْ؞»‏ سٜيْ ٻٜ نجَارَنِمٛطَمْ؞ ⁹طَمْ يَادَکٜ طَمْ وَرْتِي اِنَبٛجَمْ، سٜيْ اٛ يَرِطَمْ؞ اٛ اَنْدَا تٛ طَمْ پِوٛيِ، اَمَّا مَشُّٻٜ ݧٜطُٻٜطَمْ اٜ اَنْدِ تٛ طَمْ پِوٛيِ؞ سٜيْ اٛ نٛدِّ اَنْغٛوجٛ اٛنْ، ¹⁰اٛ وِعِمٛ، ‏«‏کٛو مٛيٜ اٜ اَرْتَ حٛکُّکِ حٛٻّٜ اِنَبٛجَمْ ٻُرْطَمْ وٜلْکِ، غَطَ ٻٜ نجَرِي ٻٜ کَارِي، ندٜنْ اٛ حٛکَّٻٜ اِنَبٛجَمْ طَمْ حٜوْتَايِ اَرَنْدٜجَمْ طَمْ وٜلْکِ؞ اَمَّا اَنْ، اَ اَلِ اِنَبٛجَمْ ٻُرْطَمْ وٜلْکِ طَمْ نَا جٛونِ؞»‏

¹¹کَنْجُمْ وٛنِ فِي کَيْطِنِيطُمْ اَرَنْدٜجُمْ طُمْ يٜىٰسُ وَطِ اٜ غَرِيرِ کَانَ نغٛنْدِ لٜيْدِ غَلِيلِ؞ نٛنْ اٛ حٛلِّرِ تٜدُّنغَلْ مَاکٛ، ندٜنْ تٛکُّٻٜمٛ کٛولِيمٛ؞

¹²غَطَ طُعُمْ، يٜىٰسُ يَحِ کَفَرْنَحُمْ، کَنْکٛ اٜ مَدُوجٛ مَاکٛ، اٜ مِݧِرَاٻٜ مَاکٛ، اٜ تٛکُّٻٜمٛ، ٻٜ نجٛوطِي تٛنْ بَلْطٜ سٜطَّ؞

يٜىٰسُ نَتِّي وُرٛ شٜنِينغٛ

¹³ندٜ شَرٜلْ ٻَدِي نغٜلْ حُمْتٛ سَکِّنْکِ نغٛ يَحُودَنْکٛعٜنْ، يٜىٰسُ يَحِ اُرُشَلِيمَ؞ ¹⁴تٛنْ اٜ اُرُشَلِيمَ ندٜرْ وُرٛ شٜنِينغٛ اٛ تَوِ يِمْٻٜ اٜ شٛورَ نَعِ، اٜ بَالِ، اٜ تَتَّبَرَاجِ؞ ندٜنْ اٜ وٛودِ وٛٻّٜ غَيْلِتٛوٻٜ شٜىٰدٜ رٛومَنْکٛعٜنْ يَاکِ شٜىٰدٜ يَحُودَنْکٛعٜنْ، اٜ ٻٜ نجٛوطِي حَادٜ تٜىٰبُرْجِ مَٻّٜ اٜ ٻٜ نغَيْلِتَ شٜىٰدٜ؞ ¹⁵سٜيْ اٛ وَالِ ٻٛغِّ اٛ وَرْتِرِطِ لٛوسٛلْ، اٛ رِيوِ فُو ٻٜ سٛورٜ‑سٛورٜ دَغَ ندٜرْ وُرٛ شٜنِينغٛ نغٛنْ حَوْتِ اٜ بَالِ مَٻّٜ اٜ نَعِ مَٻّٜ؞ کَدِنْ اٛ سَنْکِتِ شٜىٰدٜ غَيْلِتٛوٻٜ شٜىٰدٜ ٻٜنْ، اٛ دٛعِّ تٜىٰبُرْجِ مَٻّٜ؞ ¹⁶سٜيْ اٛ وِعِ شٛورٛوٻٜ تَتَّبَرَاجِ ٻٜنْ، ‏«‏مبُرْتِنٜىٰطِ طٛعٛ!‏ تٛع اٛنْ نغَرْتِرْ وُرٛ ݧَاکٛ اَمْ لُومٛ؞»‏ ¹⁷تٛکُّٻٜمٛ شِفْتٛرِ کٛ وِنْدَا، ‏«‏يَا اَللَّه، يِدّٜ ندٜ نغِطُمِ وُرٛ مَاطَ اٜ وُلَ ندٜرْ اَمْ بٛ حِيتٜ؞»‏

¹⁸سٜيْ اَرْدِيٻٜ يَحُودَنْکٛعٜنْ پَمِ يٜىٰسُ ٻٜ مبِعِ، ‏«‏طُمٜ کَيْطِنِيطُمْ نغَطَنْتَامِنْ نغَمْ حٛلُّکِ اَ وٛودِ لَامُ وَطُکِ فِي طُعُمْ؟»‏

¹⁹يٜىٰسُ وِعِٻٜ، ‏«‏ڤُسٜىٰ وُرٛ شٜنِينغٛ نغٛعٛ، ندٜنْ ندٜرْ بَلْطٜ تَتِ مِ مَحِتَيْنغٛ؞»‏

²⁰ٻٜ مبِعِمٛ، ‏«‏طُمْ وَطِي دُوٻِ 64 کٛ طُمْ يٛتِّنَ ݧِٻُکِ وُرٛ شٜنِينغٛ نغٛعٛ، اَنْ، اَ وِعِي اَ مَحِتَيْنغٛ ندٜرْ بَلْطٜ تَتِ؟»‏

²¹اَمَّا وُرٛ شٜنِينغٛ نغٛ يٜىٰسُ مٜتَتَ دٛوْ مَغّٛ وٛنِ ٻَنْدُ مَاکٛ؞ ²²غَطَ اٛ اُمِّنَامَ دَغَ مَيْدٜ، سٜيْ تٛکُّٻٜمٛ شِفْتٛرِ کَعَ حَالَ کَ اٛ وِعُنٛ، ندٜنْ ٻٜ نجَٻِ کٛ اَايَاجٜ مبِعِ اٜ کٛ يٜىٰسُ وِعِ؞

يٜىٰسُ اٜ اَنْدِ ٻٜرْندٜ کٛو مٛيٜ

²³شَرٜلْ نغٜلْ يٜىٰسُ وٛنِ اُرُشَلِيمَ نغَمْ حُمْتٛ سَکِّنْکِ، يِمْٻٜ طُطْٻٜ کٛولِيمٛ نغَمْ ٻٜ نغِعِي کُوطٜ کَيْطِنِيطٜ طٜ اٛ وَطِ؞ ²⁴اَمَّا يٜىٰسُ وٜدِّتَنَاکِٻٜ، نغَمْ اٜ مٛ اَنْدِ نغِکُّ نٜطّٛ؞ ²⁵نَاع نَا غٛطّٛ حٛکِّيمٛ شٜيْدَ دٛوْ يِمْٻٜ، نغَمْ کَنْکٛ اٜ حٛورٜ مَاکٛ اٜ مٛ اَنْدِ کٛ وٛنِ ندٜرْ ٻٜرْندٜ کٛو مٛيٜ؞

يٜىٰسُ اٜ نِکٛودِمُسْ

¹اٜ وٛودِ غٛطّٛ فَارِسَنْکٜىٰجٛ بِعٜتٜىٰطٛ نِکٛودِمُسْ، اٜ مٛ ندٜرْ کَوْتَلْ اَرْدِيٻٜ يَحُودَنْکٛعٜنْ؞ ²اٛ يَحِ تٛ يٜىٰسُ جٜمَّ، اٛ وِعِمٛ، ‏«‏مٛودِبّٛ، اٜ مِنْ اَنْدِ اَ مٛودِبّٛ مٛ اَللَّه لِلٛيِ، نغَمْ وَلَا بَاوَيْطٛ وَطَ کُوطٜ کَيْطِنِيطٜ طٜعٜ طٜ نغَطَتَا سٜيْ نِ تٛ اَللَّه اٜ وٛنْدِ اٜ مَاکٛ؞»‏

³يٜىٰسُ وِعِمٛ، ‏«‏اٜ مِ وِعُمَا غٛونغَ، وَلَا بَاوَيْطٛ نَتَّ لَامُ اَللَّه سٜيْ تٛ طُمْ فُطِّتِي طُمْ دَݧِيمٛ؞»‏

⁴نِکٛودِمُسْ پَمِمٛ وِعِ، ‏«‏نٛ نٜطّٛ مَوْطٛ دَݧِتِرْتٜىٰ؟ طُمْ وَطَتَاکٛ اٛ سٛعّٛ ندٜرْ رٜىٰدُ مَدُوجٛ مَاکٛ طُمْ فُطِّتَ طُمْ دَݧَمٛ طِطَٻُمْ؞»‏

⁵يٜىٰسُ وِعِمٛ، ‏«‏اٜ مِ وِعُمَا غٛونغَ، وَلَا بَاوَيْطٛ نَتَّ لَامُ اَللَّه سٜيْ نِ تٛ ندِيَمْ اٜ رُوحُ اَللَّه دَݧِيمٛ؞ ⁶کٛ نٜطّٛ دَݧِ طُمْ نٜطّٛ، اَمَّا کٛ رُوحُ دَݧِ طُمْ رُوحُ؞ ⁷تَاع حَيْطِنْ نغَمْ مِ وِعِيمَ دٛولٜ طُمْ فُطِّتَ طُمْ دَݧُمَا؞ ⁸حٜنْدُ اٜ وِسَ تٛ يِطِرِ، اَ نَنَ سٛنْݧٛ مَيْرُ، اَمَّا اَ اَنْدَا تٛ ندُ پِوٛيِ کٛو تٛ ندُ يَحَتَ؞ نٛنْ مَا طُمْ وٛنْتِندِرِ اٜ کٛو مٛيٜ مٛ رُوحُ اَللَّه دَݧِ؞»‏

⁹نِکٛودِمُسْ پَمِمٛ وِعِ، ‏«‏نٛ طُعُمْ وَطٛرْتٛو؟»‏

¹⁰يٜىٰسُ نٛوتِي وِعِمٛ، ‏«‏اَ مٛودِبّٛ مَوْطٛ ندٜرْ اِسْرَاعِيلَ، اَمَّا اَ فَامَايِ طُعُمْ؟ ¹¹اٜ مِ وِعُمَا غٛونغَ، اٜ مِنْ مٜتَ دٛوْ کٛ مِنْ اَنْدِ، ندٜنْ اٜ مِنْ کٛکَّ شٜيْدَ دٛوْ کٛ مِنْ نغِعِ، اَمَّا اٛنْ نجَٻَايِ کٛ مِنْ مبِعِعٛنْ؞ ¹²مِ مٜتَنِيعٛنْ دٛوْ فِي دُونِيَارُ، اَمَّا اٛنْ نجَٻَايِ؞ نٛ وَطَتَ نجَٻٛنْ تٛ مِ وِعِيعٛنْ کٛ وٛنِ اٜ دٛوْ؟ ¹³وَلَا مٜىٰطُطٛ يَاکِ دٛوْ سٜيْ نِ اٛنْ طٛنْ پِوٛيْطٛ دَغَ دٛوْ، وَاتٛ ٻِي نٜطّٛ؞

¹⁴‏«‏نٛنْ نٛ مُوسَ پٜفْتِرِ مبٛودِ غَطِرَاندِ نجَمْندِ مبٛطٜىٰرِ ندٜرْ لَدّٜ، نٛنْ مَا دٛولٜ ٻِي نٜطّٛ پٜفْتٜىٰ، ¹⁵نغَمْ کٛو مٛيٜ کٛولِيطٛمٛ حٜٻَ يٛنْکِ کِ رٜعَتَا؞ ¹⁶نغَمْ يِدّٜ ندٜ اَللَّه يِطِ دُونِيَارُ حَا اٛ حٛکِّي ٻِطّٛ مَاکٛ بَجّٛ، نغَمْ کٛو مٛيٜ کٛولِيطٛمٛ تٛع حَلْکَ اَمَّا حٜٻَ يٛنْکِ کِ رٜعَتَا؞ ¹⁷نغَمْ اَللَّه لِلٛيَايِ ٻِطّٛ مُوطُمْ ندٜرْ دُونِيَارُ نغَمْ اٛ تَپَنَنْدُ کِيتَ؞ اَمَّا اٛ لِلٛيِيمٛ نغَمْ اٛ حِسْنَ دُونِيَارُ اٜ لَاوٛلْ مَاکٛ؞

¹⁸‏«‏کٛو مٛيٜ کٛولِيطٛمٛ تَپَنْتَاکٜ کِيتَ، اَمَّا مٛ حٛولَاکِمٛ اٛ يَادَکٜ اٛ تَپَنَامَ کِيتَ، نغَمْ اٛ حٛولَاکِ ٻِطّٛ اَللَّه بَجّٛ؞ ¹⁹رَا کٛ وَطِ اَللَّه تَپَنْتَ يِمْٻٜ کِيتَ:‏ جَيْنغٛلْ وَرِي ندٜرْ دُونِيَارُ، اَمَّا ٻٜ ٻُرِي يِطُکِ ݧِوْرٜ دٛوْ جَيْنغٛلْ، نغَمْ کُوطٜ مَٻّٜ طٜ کَلُّطٜ؞ ²⁰کٛو مٛيٜ غَطٛووٛ کٛ حَلِّ وَݧِي جَيْنغٛلْ، ندٜنْ اٛ نَتَّتَا تٛ جَيْنغٛلْ وٛنِ، نغَمْ اٜ مٛ حُلَ تٛع کُوطٜ مَاکٛ کَلُّطٜ مبُرْتِنٜىٰ اٜ نجَيْرِ؞ ²¹اَمَّا کٛو مٛيٜ غَطٛووٛ غٛونغَ اٜ نَتَّ جَيْنغٛلْ، نغَمْ طُمْ يِعَ اٜ نجَيْرِ اٜ مٛ وَطَ کٛ اَللَّه يِطِ؞»‏

يٜىٰسُ اٜ يَحَيَ

²²غَطَ طُعُمْ، يٜىٰسُ اٜ تٛکُّٻٜمٛ نجَحِ لَدّٜ لٜيْدِ يَحُودِيَ؞ تٛنْ اٛ جٛوطِي اٛ نٜىٰٻِدِ اٜ تٛکُّٻٜمٛ اٜ مٛ وَطَنَ يِمْٻٜ بَڤْتِسْمَ؞ ²³يَحَيَ مَا اٜ وَطَنَ يِمْٻٜ بَڤْتِسْمَ اٜ اَيْنٛنْ حَادٜ سَلِمْ، نغَمْ اٜ وٛودِ ندِيَمْ طُطَّمْ تٛنْ؞ يِمْٻٜ نغَطِ کَ يَاکِ تٛ مَاکٛ اٜ مٛ وَطَنَٻٜ بَڤْتِسْمَ؞ ²⁴طُعُمْ طُمْ وَطُ کٛ يَحَيَ سُرٜىٰ ندٜرْ سُودُ شُرَلْ؞

²⁵سٜيْ غٜدِّ اُمِّي حَکُّندٜ تٛکُّٻٜ يَحَيَ اٜ غٛطّٛ يَحُودَنْکٜىٰجٛ دٛوْ لٛوتَاکِ کِ نٜطّٛ وَطَتَ نٛ دِينَ يَحُودَنْکٛعٜنْ وِعِ؞ ²⁶تٛکُّٻٜ يَحَيَ نجَحِ تٛ مَاکٛ ٻٜ مبِعِمٛ، ‏«‏مٛودِبّٛ، اٛنْ طٛنْ نٜطّٛ غٛنْدُنٛوطٛ اٜ مَاطَ اٜ فٛنْغٛ شَانغٛلْ اُرْدُنْ، مٛ کٛکُّطَا شٜيْدَ دٛوْ مَاکٛ، تٛو، اٜ مٛ تٛنْ وَطَنَ يِمْٻٜ بَڤْتِسْمَ، کٛو مٛيٜ اٜ يَحَ تٛ مَاکٛ؞»‏

²⁷يَحَيَ وِعِٻٜ، ‏«‏وَلَا کٜٻٛووٛ غٛطُّمْ سٜيْ نِ تٛ اَللَّه حٛکِّيمٛطُمْ؞ ²⁸اٛنٛنْ اٜ کٛعٜ مٛوطٛنْ اٛنْ شٜيْدُعٜنْ مِ وِعِي، ‏‹‏نَاع مِنْ وٛنِ اَلْمَسِيحُ، اَمَّا مِ لِلٛيَ مِ اَرْتَمٛ وَرْکِ؞›‏ ²⁹اَنْغٛوجٛ جٜيِ ٻَݝَاطٛ؞ حِغٛ اَنْغٛوجٛ اٛنْ دَرِيطٛ اٜ نَنَ کٛ اٛ وِعَتَ، اٛ نَنَيْ بٜلْطُمْ نَاع سٜطَّ تٛ اٛ نَنِي حٛنٛنْدٜ اَنْغٛوجٛ اٛنْ؞ اِرِ بٜلْطُمْ طُمْ حِغٛ اَنْغٛوجٛ اٛنْ نَنِ، اِرِ مَاجُمْ نَنَيْمِ نَاع سٜطَّ جٛونِ؞ ³⁰دٛولٜ مَنْغُ يٜىٰسُ وَطَ کَ ٻٜيْدَاکِ، مِنْ بٛو مَنْغُ اَمْ وَطَ کَ اُسْتَاکِ؞

غَرٛيْطٛ دَغَ دٛوْ

³¹‏«‏اٛنْ طٛنْ پِوٛيْطٛ دَغَ دٛوْ اٛ ٻُرِي کٛو مٛيٜ مَنْغُ؞ اٛنْ طٛنْ پِوٛيْطٛ دُونِيَارُ، دُونِيَارُ جٜيِمٛ، ندٜنْ اٜ مٛ مٜتَ دٛوْ فِي دُونِيَارُ؞ پِوٛيْطٛ دَغَ دٛوْ اٛنْ اٛ ٻُرِي کٛو مٛيٜ؞ ³²اٛ مٜتِي دٛوْ کٛ اٛ يِعِ اٜ کٛ اٛ نَنِ، اَمَّا وَلَا جَٻُطٛ کٛ اٛ وِعِ؞ ³³کٛو مٛيٜ جَٻُطٛ کٛ اٛ وِعِ تَبِّتِنِي جَٻِي کٛ اَللَّه وِعِ طُمْ غٛونغَ؞ ³⁴اٛنْ طٛنْ مٛ اَللَّه لِلِ، اٜ مٛ مٜتَ کٛ اَللَّه وِعِ، نغَمْ اَللَّه حٛکِّيمٛ رُوحُ مُوطُمْ کٜىٰرٛلْ وَلَا؞ ³⁵ݧَاکٛ مٛ دٛوْ اٜ يِطِ ٻِطّٛ مُوطُمْ، اٛ وَطِي کٛو طُمٜ ندٜرْ جُوطٜ مَاکٛ؞ ³⁶کٛو مٛيٜ کٛولِيطٛ ٻِطّٛ اٛنْ اٜ وٛودِ يٛنْکِ کِ رٜعَتَا؞ اَمَّا کٛو مٛيٜ مٛ تٛکَّايِ کٛ ٻِطّٛ اٛنْ وِعِ، اٛ حٜٻَتَا يٛنْکِ کِ رٜعَتَا، اَمَّا مٛنّٜرٜ اَللَّه اٜ دٛوْ مَاکٛ حَا اَبَدَا؞»‏

يٜىٰسُ مٜدِّ اٜ سَمَارِيَنْکٜىٰجٛ دٜبّٛ

¹فَارِسَنْکٛعٜنْ نَنِ حَبَرُ يٜىٰسُ اٜ حٜٻَ تٛکُّٻٜمٛ ٻُرِي يَحَيَ، طٛنْمَا اٜ مٛ وَطَنَ يِمْٻٜ بَڤْتِسْمَ ٻُرِي يَحَيَ، ²﴿کٛو ندٜ غٛونغَ نَاع طُمْ يٜىٰسُ اٜ حٛورٜ مُوطُمْ وَطَنْتَ يِمْٻٜ بَڤْتِسْمَ طُمْ، اَمَّا تٛکُّٻٜمٛ نغَطَتَطُمْ؞﴾ ³ندٜ يٜىٰسُ نَنِ فَارِسَنْکٛعٜنْ نَنِي حَبَرُ کٛ اٛ وَطَتَ، سٜيْ اٛ اَلِ لٜيْدِ يَحُودِيَ، اٛ سٛعِّي غَلِيلِ؞

⁴دٛوْ لَاوٛلْ مَاکٛ طُمْ وَرْتَنِمٛ دٛولٜ اٛ تٛکَّ ندٜرْ لٜيْدِ سَمَارِيَ؞ ⁵سٜيْ اٛ يٛتِّي وٛنْدِ غَرِيرِ نغٛنْدِ ندٜرْ لٜيْدِ سَمَارِيَ بِعٜتٜىٰندِ سَيْکَرْ نغٛنْدِ حَادٜ نجَيْرِ ندِ يَاکُبُ حٛکِّ ٻِطّٛ مُوطُمْ اِسُفُ دَغَ ندٜنّٛ؞ ⁶اٜ وٛودِ ٻُنْدُ ندُ يَاکُبُ وَسِ اٜ نجَيْرِ ندِنْ؞ يٜىٰسُ بٛو سٛمِي نغَمْ يَادُ اٛ جٛوطِي حَادٜ ٻُنْدُ ندُنْ؞ اٜ شَرٜلْ نغٜلْ طُمْ شَکَ ݧَلَوْمَ؞

⁷سٜيْ غٛطّٛ سَمَارِيَنْکٜىٰجٛ دٜبّٛ وَرِي پٛوغُکِ، يٜىٰسُ وِعِمٛ، ‏«‏حٛکّٛرَمْ ندِيَمْ مِ يَرَ؞»‏ ⁸اٜ شَرٜلْ نغٜلْ تٛکُّٻٜمٛ نجَادَکٜ نَتِّي ندٜرْ غَرِياِرِ ندِنْ نغَمْ سٛودٛيْکِ ݧَمْندُ؞

⁹سٜيْ دٜبّٛ اٛنْ وِعِ يٜىٰسُ، ‏«‏اَ يَحُودَنْکٜىٰجٛ، مِنْ بٛو مِ سَمَارِيَنْکٜىٰجٛ؞ نٛيٜ مبِعَتَايَمْ مِ حٛکُّمَا ندِيَمْ نجَرَا؟»‏ اٛ وِعُ نٛنْ نغَمْ وَلَا کٛ حَوْتِ يَحُودَنْکٛعٜنْ اٜ سَمَارِيَنْکٛعٜنْ؞

¹⁰يٜىٰسُ وِعِمٛ، ‏«‏دَا اَ اَنْدِ شَاحُ طُمْ اَللَّه يِطِ حٛکُّکِمَ، کَدِنْ دَا اَ اَنْدِ پَمُطٛمَ ندِيَمْ نجَرٜتٜىٰطَمْ، دَا اَ تٛرَکٜمٛ، دَا اٛ حٛکِّيمَ ندِيَمْ کٛکّٛوجَمْ يٛنْکِ؞»‏

¹¹سٜيْ دٜبّٛ اٛنْ وِعِ يٜىٰسُ، ‏«‏مٛودِبّٛ، اَ وَلَا کٛ ݧٜطِرْتَا ندِيَمْ طَمْ، کَدِنْ بٛو ٻُنْدُ ندُنْ اٜ لُغِّ؞ تٛيٜ کٜٻَتَا طَمْ طٛنْ ندِيَمْ کٛکّٛوجَمْ يٛنْکِ؟ ¹²اَ ٻُرِي مَامَ مٜىٰطٜنْ يَاکُبُ کٛکُّطٛعٜنْ ندُعُ ٻُنْدُ؟ کَنْکٛ اٜ ٻِٻّٜ مَاکٛ اٜ مَرْلٜ مَاکٛ فُو ٻٜ نجَرِي ندِيَمْ ٻُنْدُ ندُعُ؞»‏

¹³يٜىٰسُ وِعِمٛ، ‏«‏کٛو مٛيٜ جَرْطٛ ندِيَمْ ٻُنْدُ ندُعُ فُطِّتَيْ نَنَ طٛنْکَ، ¹⁴اَمَّا کٛو مٛيٜ جَرْطٛ ندِيَمْ طَمْ کٛکَّيْمٛومِ اٛ فُطِّتَتَا اٛ نَنَ طٛنْکَ کَدِنْ؞ ندِيَمْ طَمْ کٛکَّيْمٛومِ طَمْ وَرْتَيْ ندٜرْ مَاکٛ ندِيَمْ ٻُلٛوجَمْ کٛکَّيْطَمّٛ يٛنْکِ کِ رٜعَتَا؞»‏

¹⁵دٜبّٛ اٛنْ وِعِمٛ، ‏«‏مٛودِبّٛ، حٛکَّمْ طَمْ طٛنْ ندِيَمْ نغَمْ تٛع مِ فُطِّتَ مِ نَنَ طٛنْکَ، طٛنْمَا تٛع مِ فُطِّتَ مِ وَرَ طٛعٛ نغَمْ پٛوغُکِ؞»‏

¹⁶يٜىٰسُ وِعِمٛ، ‏«‏يَحُ نٛدّٛيَا غٛرْکٛ مَاطَ، نغَرْدٛيٛنْ؞»‏

¹⁷دٜبّٛ اٛنْ وِعِ، ‏«‏مِ وَلَا غٛرْکٛ؞»‏

يٜىٰسُ وِعِمٛ، ‏«‏اَ وِعِي غٛونغَ ندٜ مبِيطَا اَ وَلَا غٛرْکٛ؞ ¹⁸غٛونغَ کَنْ وٛنِ اَ وَطِي تٜىٰلٜ جٛوِ، نٜطّٛ مٛ نجٛوطٛدِطَا جٛونِ بٛو نَاع اٛ غٛرْکٛ مَاطَ؞ کٛ مبِيطَا طُمْ غٛونغَ؞»‏

¹⁹دٜبّٛ اٛنْ وِعِ، ‏«‏مٛودِبّٛ، مِ فَامِي اَ اَنَّبِيجٛ؞ ²⁰مَامَعٜنْ اَمِنْ مَوْنِنِي اَللَّه دٛوْ حٛشّٜىٰرٜ ندٜعٜ، اَمَّا اٛنٛنْ يَحُودَنْکٛعٜنْ اٛنْ مبِعَ اُرُشَلِيمَ وٛنِ تٛ حَانِ طُمْ مَوْنِنَ اَللَّه؞»‏

²¹يٜىٰسُ وِعِمٛ، ‏«‏جَٻُ کٛ مبِعَيْمِ، شَرٜلْ اٜ وَرَ نغٜلْ مَوْنِنْتٛنْ ݧَاکٛ مٛ دٛوْ نَاع دٛوْ حٛشّٜىٰرٜ ندٜعٜ نَاع ندٜرْ اُرُشَلِيمَ؞ ²²اٛنٛنْ سَمَارِيَنْکٛعٜنْ اٛنْ مَوْنِنَ کٛ اٛنْ اَنْدَا، اَمَّا مِنٛنْ يَحُودَنْکٛعٜنْ اٜ مِنْ مَوْنِنَ کٛ مِنْ اَنْدِ، نغَمْ دَغَ تٛ يَحُودَنْکٛعٜنْ کِسْندَمْ پِوٛيِ؞ ²³اَمَّا شَرٜلْ اٜ وَرَ، نغٜلْ يَادَکٜ نغٜلْ وَرِي، شَرٜلْ نغٜلْ يِمْٻٜ مَوْنِنٛوٻٜ اَللَّه نٛ حَانِ ٻٜ مَوْنِنَيْ ݧَاکٛ مٛ دٛوْ ندٜرْ غٛونغَ اٜ ندٜرْ بَوْطٜ رُوحُ اَللَّه، نغَمْ اِرِ مَٻّٜ ݧَاکٛ مٛ دٛوْ يِطِ ٻٜ مَوْنِنَمٛ؞ ²⁴اَللَّه اٛ رُوحُ، مَوْنِنٛوٻٜمٛ بٛو دٛولٜ مَوْنِنَمٛ ندٜرْ رُوحُ اٜ غٛونغَ؞»‏

²⁵دٜبّٛ اٛنْ وِعِ يٜىٰسُ، ‏«‏اٜ مِ اَنْدِ اَلْمَسِيحُ اٜ وَرَ، وَاتٛ شُٻَاطٛ اَللَّه؞ تٛ اٛ وَرِي، اٛ وِعَيْمِنْ کٛو طُمٜ؞»‏

²⁶سٜيْ يٜىٰسُ وِعِمٛ، ‏«‏مِنْ مٜدّٛووٛ اٜ مَاطَ، مِنْ وٛنِ اَلْمَسِيحُ اٛنْ؞»‏

²⁷اٜ نغٜلْ طٛنْ شَرٜلْ تٛکُّٻٜ يٜىٰسُ نغَرْتٛيِ، ٻٜ کَيْطِنِ ندٜ ٻٜ تَوِ اٜ مٛ مٜدَّ اٜ دٜبّٛ؞ اَمَّا وَلَا غٛطّٛ ندٜرْ مَٻّٜ بِيطٛمٛ، ‏«‏کٛ نغِطَّا؟»‏ کٛو، ‏«‏نغَمْ طُمٜ مٜدَّتَا اٜ مَاکٛ؟»‏

²⁸سٜيْ دٜبّٛ اٛنْ اَلِ پٛوغِرْدٜ مُوطُمْ، سٛعِّي غَرِيرِ وِعِ يِمْٻٜ، ²⁹‏«‏نغَرٜىٰ، نغِعٛنْ نٜطّٛ بِيطٛيَمْ کٛو طُمٜ کٛ مٜىٰطُمِ وَطُکِ؞ کٛو کَنْکٛ وٛنِ اَلْمَسِيحُ؟»‏ ³⁰سٜيْ يِمْٻٜ ٻٜنْ اَلِ غَرِيرِ ندِنْ ٻٜ نجَحِ تٛ يٜىٰسُ؞

³¹اٜ طُمْ ندٜرْ نٛنْ سٜيْ تٛکُّٻٜمٛ تٛرِيمٛ مبِعِمٛ، ‏«‏مٛودِبّٛ، ݧَامُ غٛطُّمْ؞»‏

³²اَمَّا اٛ وِعِٻٜ، ‏«‏اٜ مِ وٛودِ ݧَمْندُ ندُ ݧَامَيْمِ، اٛنْ اَنْدَا کٛو طُمٜ دٛوْ مَيْرُ؞»‏

³³سٜيْ تٛکُّٻٜمٛ ڤُطِّ پَمْپَمْتِرْکِ اٜ مبِعَ، ‏«‏کٛو غٛطّٛ وَدَّنِيمٛ ݧَمْندُ؟»‏

³⁴يٜىٰسُ وِعِٻٜ، ‏«‏ݧَمْندُ اَمْ وٛنِ مِ وَطَ کٛ لِلْطٛيَمْ وِعِيَمْ، مِ يٛتِّنَ کُوغَلْ نغَلْ اٛ حٛکِّيَمْ؞ ³⁵نَاع اٛنْ مبِعَ، ‏‹‏حٛرِي لٜبِّ نَيِ طُمْ اِتَّ کٛ رٜمَا؟›‏ اٜ مِ وِعَعٛنْ، ندَارٜىٰ غٜسٜ بٛطُّمْ؞ کٛ رٜمَا ٻٜنْدِي طُمْ حٜوْتِي اِتّٜىٰکِ؞ ³⁶اِتّٛووٛ کٛ رٜمَا اٜ يٛٻٜىٰ، کٛ رٜمَا طُمْ اٛ حَوْرِتَتَ وٛنِ يِمْٻٜ کٜٻٛوٻٜ يٛنْکِ کِ رٜعَتَا، نغَمْ اَاوُطٛ اٜ اِتُّطٛ کٛ ٻٜنْدِ ٻٜ کَوْتَ ٻٜ مبٜلْمبٜلْتَ؞ ³⁷کَعَ حَالَ طُمْ غٛونغَ بِيکَ، ‏‹‏غٛطّٛ اَاوِي، غٛطّٛ بٛو اِتِّي کٛ ٻٜنْدِ؞›‏ ³⁸مِ لِلِيعٛنْ اِتّٛنْ کٛ ٻٜنْدِ طُمْ اٛنْ کُوَنَايِ؞ وٛٻّٜ کُوِي نَاع سٜطَّ، اٛنٛنْ بٛو اٛنْ ݧَامِي بٛتٜ کُوغَلْ مَٻّٜ؞»‏

³⁹سَمَارِيَنْکٛعٜنْ طُطْٻٜ اٜ ندِنْ طٛنْ غَرِيرِ کٛولِي يٜىٰسُ نغَمْ اٛنْ طٛنْ دٜبّٛ وِعِي، ‏«‏اٛ وِعِييَمْ کٛو طُمٜ طُمْ مٜىٰطُمِ وَطُکِ؞»‏ ⁴⁰نغَمْ نٛنْ، ندٜ سَمَارِيَنْکٛعٜنْ ٻٜنْ نغَرِ تٛ يٜىٰسُ، ٻٜ تٛرِيمٛ اٛ جٛوطٛدٛو اٜ مَٻّٜ؞ سٜيْ اٛ جٛوطٛدِي اٜ مَٻّٜ بَلْطٜ طِطِ؞

⁴¹يِمْٻٜ کٛولِيٻٜ يٜىٰسُ ٻٜيْدِي نَاع سٜطَّ نغَمْ بٛلِيطٜ مَاکٛ؞ ⁴²ٻٜ مبِعِ دٜبّٛ اٛنْ، ‏«‏جٛونِ مِنْ کٛولَکٜ يٜىٰسُ، نَاع نغَمْ کٛ مبِيطَا تَنْ، اَمَّا نغَمْ مِنٛنْ اٜ کٛعٜ اَمِنْ مِنْ نَنِي کٛ اٛ وِعِ، مِنْ تَبِّتِنِي کَنْکٛ وٛنِ کِسْنٛووٛ دُونِيَارُ؞»‏

يٜىٰسُ يَمْطِتِنِ ٻِي مَوْطٛ

⁴³غَطَ يٜىٰسُ وَطِي بَلْطٜ طِطِ طٛنْ، اٛ دِلِّ غَلِيلِ، ⁴⁴نغَمْ کَنْکٛ اٜ حٛورٜ مَاکٛ اٛ وِعِ، ‏«‏اَنَّبِيجٛ مَوْنِنْتَاکٜ تٛ لٜيْدِ مُوطُمْ؞»‏ ⁴⁵ندٜ اٛ يٛتِّي غَلِيلِ، غَلِلَنْکٛعٜنْ نجَٻِّيمٛ، نغَمْ کَمْٻٜ مَا ٻٜ نجَحِينٛ حُمْتٛ سَکِّنْکِ ندٜرْ اُرُشَلِيمَ، ٻٜ نغِعِي فُو کٛ اٛ وَطِ تٛنْ؞

⁴⁶سٜيْ يٜىٰسُ فُطِّتِ سٛعِّي غَرِيرِ کَانَ نغٛنْدِ ندٜرْ لٜيْدِ غَلِيلِ؞ کَيْرِ وٛنِ تٛ اٛ وَيْلِتِ ندِيَمْ طَمْ وَرْتِ اِنَبٛجَمْ؞ تٛو، ندٜرْ غَرِيرِ کَفَرْنَحُمْ اٜ وٛودِ غٛطّٛ مَوْطٛ ندٜرْ غٛمْنَتِ، ٻِطّٛ مَاکٛ اٜ ݧَوَ؞ ⁴⁷ندٜ نٜطّٛ اٛنْ نَنِ يٜىٰسُ اَلِي لٜيْدِ يَحُودِيَ وَرِي لٜيْدِ غَلِيلِ، اٛ يَحِ تٛ يٜىٰسُ اٛ تٛرِيمٛ اٛ يَحَ کَفَرْنَحُمْ اٛ يَمْطِتِنَ ٻِطّٛ مَاکٛ ٻَدِيطٛ مَايَ؞ ⁴⁸يٜىٰسُ وِعِمٛ، ‏«‏اٛنٛنْ يِمْٻٜ تٛ نَاع اٛنْ نغِعُ مِ وَطِي اَلَامَاجِ اٜ کُوطٜ کَيْطِنِيطٜ، اٛنْ کٛولَتَاکٛيَمْ؞»‏

⁴⁹اٛ وِعِ يٜىٰسُ، ‏«‏مٛودِبّٛ، اٜنْ نجَحُ کٛ ٻِطّٛ اَمْ مَايَ؞»‏

⁵⁰سٜيْ يٜىٰسُ وِعِمٛ، ‏«‏يَحُ، ٻِطّٛ مَاطَ مَايَتَا؞»‏

نٜطّٛ اٛنْ جَٻِ کٛ يٜىٰسُ وِعِمٛ، اٛ دِلِّ؞ ⁵¹اٜ مٛ دٛوْ لَاوٛلْ سٛعَّاکِ وُرٛ، سٜيْ مَشُّٻٜ مَاکٛ کَوْرِ اٜ مَاکٛ ٻٜ مبِعِمٛ، ‏«‏ٻِطّٛ مَاطَ يَمْطِتِي؞»‏

⁵²ندٜ اٛ پَمِٻٜ نغٜلٜ شَرٜلْ ٻِطّٛ اٛنْ يَمْطِتِ، ٻٜ مبِعِمٛ، ‏«‏کٜىٰݧَ نجَمْندِ غٛعٛ ندِ ݧَلَوْمَ جٛنْتٜ طٜنْ نجٛوفِمٛ؞»‏ ⁵³سٜيْ اٛ فَامِ شَرٜلْ نغٜلْ ٻِطّٛ اٛنْ يَمْطِتِ طُمْ شَرٜلْ نغٜلْ يٜىٰسُ وِعُنٛومٛ، ‏«‏ٻِطّٛ مَاطَ مَايَتَا؞»‏ نغَمْ نٛنْ، کَنْکٛ اٜ فُو وُرٛ مَاکٛ ٻٜ کٛولِي يٜىٰسُ؞

⁵⁴طُعُمْ کَنْجُمْ وٛنِ کَيْطِنِيطُمْ طِطَٻُمْ طُمْ يٜىٰسُ وَطِ تٛ غَلِيلِ؞ اٛ وَطِيطُمْ غَطَ اٛ وَرْتٛيِي دَغَ لٜيْدِ يَحُودِيَ؞

يٜىٰسُ يَمْطِتِنِ جَرَاطٛ

¹غَطَ طُعُمْ يٜىٰسُ يَحِ اُرُشَلِيمَ نغَمْ وٛنْغٛ حُمْتٛ دِينَ يَحُودَنْکٛعٜنْ؞ ²تٛنْ اُرُشَلِيمَ اٜ وٛودِ نجٛنْغَ ندِيَمْ حَادٜ وٛنْغَلْ دَمُّغَلْ غَرِيرِ ندِنْ بِعٜتٜىٰنغَلْ دَمُّغَلْ بَالِ؞ حَادٜ نجٛنْغَ نغَنْ اٜ وٛودِ رُمڤَاجِ جٛوِ؞ ندٜرْ اِبْرَانِيَنْکٛورٜ اٜ نغَ نٛدِّرٜىٰ بٜتَسْدَ؞ ^3‏-4ݧَوْٻٜ طُطْٻٜ اٜ ڤُکّٛو حَادٜ نجٛنْغَ نغَنْ؞ اٜ وٛودِ وُمْٻٜ، اٜ يِمْٻٜ ٻٜ کٛيْطٜ ݧَوْطٜ، اٜ جَرَاٻٜ؞ ⁵اٜ وٛودِ غٛطّٛ نٜطّٛ طٛنْ غَطّٛ دُوٻِ 83 اٜ ݧَوَ؞ ⁶ندٜ يٜىٰسُ يِعِمٛ اٜ مٛ فُکِّي طٛنْ، کَدِنْ اٜ اَنْدِ اٛ نٜىٰٻِي اٜ مٛ فِيدَ اٜ طُمْ طٛنْ ݧَوُ، سٜيْ يٜىٰسُ پَمِمٛ وِعِ، ‏«‏اَ يِطِ طُمْ يَمْطِتِنْمَا؟»‏

⁷ݧَوْطٛ اٛنْ وِعِمٛ، ‏«‏مٛودِبّٛ، مِ وَلَا بَلَّيْطٛيَمْ حٛشَّيَمْ سُووَيَمْ ندٜرْ نجٛنْغَ نغَنْ شَرٜلْ نغٜلْ ندِيَمْ طَمْ لَنْشَا؞ فُو شَرٜلْ نغٜلْ نغِطُمِ نَتُّکِ، سٜيْ غٛطّٛ اَرْتَيَمْ؞»‏

⁸سٜيْ يٜىٰسُ وِعِمٛ، ‏«‏اُمَّ کٛشَّا دَاغٛ مَاطَ، نجَاٻَا؞»‏ ⁹طٛنْ اٜ طٛنْ نٜطّٛ اٛنْ يَمْطِتِ، حٛشِّ دَاغٛ مُوطُمْ، فُطِّ يَادُ؞

تٛو، ݧَلْندٜ ندٜ فِي طُعُمْ وَطِ طُمْ ݧَلْندٜ سِوْتَارٜ؞ ¹⁰نغَمْ نٛنْ، اَرْدِيٻٜ يَحُودَنْکٛعٜنْ مبِعِ جَمْطِتِنَاطٛ اٛنْ، ‏«‏حَنْدٜ طُمْ ݧَلْندٜ سِوْتَارٜ، اَتَّوْرَ حَطِي کٛشَّا دَاغٛ مَاطَ؞»‏

¹¹اَمَّا جَمْطِتِنَاطٛ اٛنْ وِعِٻٜ، ‏«‏جَمْطِتِنْطٛيَمْ وِعِيَمْ مِ حٛشَّا دَاغٛ اَمْ مِ ندِلَّا؞»‏

¹²ٻٜ پَمِمٛ ٻٜ مبِعِ، ‏«‏مٛيٜ وٛنِ بِيطٛمَ کٛشَّا دَاغٛ مَاطَ ندِلَّا؟»‏

¹³اَمَّا جَمْطُتُطٛ اٛنْ اَنْدَا مٛيٜ يَمْطِتِنِمٛ، نغَمْ اٜ وٛودِ يِمْٻٜ طُطْٻٜ اٜ وِغٜىٰرٜ ندٜنْ؛ يٜىٰسُ بٛو يَادَکٜ نَتِّي ندٜرْ مَٻّٜ؞

¹⁴غَطَ نٛنْ يٜىٰسُ تَوِمٛ ندٜرْ وُرٛ شٜنِينغٛ وِعِمٛ، ‏«‏رَا، اَ يَمْطِتِي!‏ اَلُ وَطُکِ حَکّٜ تٛع غٛطُّمْ ٻُرْطُمْ طُعُمْ حَلُّکِ حٜٻُمَا؞»‏

¹⁵سٜيْ نٜطّٛ اٛنْ يَحِ وِعِ اَرْدِيٻٜ يَحُودَنْکٛعٜنْ يٜىٰسُ يَمْطِتِنِمٛ؞ ¹⁶نغَمْ يٜىٰسُ اٜ حُوَ اِرِ کُوطٜ طٜعٜ ݧَلْندٜ سِوْتَارٜ، اَرْدِيٻٜ يَحُودَنْکٛعٜنْ ڤُطِّ حَلَّنْکِمٛ؞ ¹⁷يٜىٰسُ بٛو وِعِٻٜ، ‏«‏حَا حَنْدٜ ݧَاکٛ اَمْ اٜ حُوَ، مِنْ مَا اٜ مِ حُوَ؞»‏

¹⁸کَعَ حَالَ وَطِ اَرْدِيٻٜ يَحُودَنْکٛعٜنْ ٻٜيْدِ طَٻُّتُکِ لَاوٛلْ نٛ مبَرْدَتَمٛ؞ نغَمْ نَاع دٛوکَ ݧَلْندٜ سِوْتَارٜ تَنْ اٛ يٜوِ، اَمَّا حَا مَا اٛ وِعِي اَللَّه طُمْ ݧَاکٛ مَاکٛ، وَاتٛ اٛ وَرْتِرِي حٛورٜ مَاکٛ غٛعٛ اٜ اَللَّه وٛنْ طٛنْ؞

لَامُ طُمْ ٻِطّٛ اَللَّه وٛودِ

¹⁹يٜىٰسُ نٛوتِي وِعِٻٜ، ‏«‏اٜ مِ وِعَعٛنْ غٛونغَ، ٻِطّٛ اٛنْ وَطَتَا کٛو طُمٜ کَنُمْ تَنْ، کٛ اٛ يِعِ ݧَاکٛ مَاکٛ اٜ وَطَ تَنْ اٛ وَطَتَ، نغَمْ کٛو طُمٜ کٛ ݧَاکٛ اٛنْ وَطَتَ، کَنْجُمْ ٻِطّٛ اٛنْ وَطَتَ؞ ²⁰ݧَاکٛ اٛنْ اٜ يِطِ ٻِطّٛ اٛنْ، ندٜنْ فُو کٛ اٛ وَطَتَ اٜ حٛورٜ مَاکٛ اٛ حٛلِّيطُمْ ٻِطّٛ اٛنْ؞ اٛ حٛلَّيْمٛ کُوطٜ مَوْطٜ ٻُرْطٜ طٜعٜ نغَمْ کَيْطِنٛنْ؞ ²¹نٛنْ نٛ ݧَاکٛ اٛنْ اُمِّنِرْتَ مَيْٻٜ حٛکَّٻٜ يٛنْکِ، نٛنْ مَا ٻِطّٛ اٛنْ اٜ حٛکَّ کٛو مٛيٜ مٛ يِطِ يٛنْکِ؞ ²²ݧَاکٛ اٛنْ وَطَنْتَا کٛو مٛيٜ کِيتَ اٜ حٛورٜ مَاکٛ؞ اٛ حٛکِّ ٻِطّٛ مَاکٛ لَامُ وَطَنْکِ کٛو طُمٜ کِيتَ، ²³نغَمْ کٛو مٛيٜ مَوْنِنَ ٻِطّٛ اٛنْ نٛنْ نٛ مَوْنِنِرْتَ ݧَاکٛ اٛنْ؞ کٛو مٛيٜ مٛ مَوْنِنَايِ ٻِطّٛ اٛنْ مَوْنِنْتَا ݧَاکٛ لِلٛيْطٛمٛ؞

²⁴‏«‏اٜ مِ وِعَعٛنْ غٛونغَ، کٛو مٛيٜ نَنْطٛ بٛلِيطٜ اَمْ حٛولِي اٛنْ طٛنْ لِلٛيْطٛيَمْ اٜ وٛودِ يٛنْکِ کِ رٜعَتَا، اٛ تَپَنْتَاکٜ کِيتَ، اٛ يَادَکٜ اٛ پَٻَّکٜ مَيْدٜ اٛ حٜٻِي يٛنْکِ کِ رٜعَتَا؞ ²⁵اٜ مِ وِعَ اٛنْ غٛونغَ، شَرٜلْ اٜ وَرَ، شَرٜلْ نغٜلْ يَادَکٜ وَرِي نغٜلْ يِمْٻٜ ٻٜ کٜٻَايِ يٛنْکِ کِ رٜعَتَا نَنَتَ حٛنٛنْدٜ ٻِطّٛ اَللَّه؞ نَنْٻٜ ندٜ نجَٻِ کٛو ندٜ وِعِ کٜٻَيْ يٛنْکِ کِ رٜعَتَا؞ ²⁶نٛنْ نٛ ݧَاکٛ اٛنْ وٛودِرِ بَوْطٜ حٛکُّکِ يٛنْکِ، نٛنْ مَا اٛ حٛکِّي ٻِطّٛ اٛنْ بَوْطٜ حٛکُّکِ يٛنْکِ؞ ²⁷کَدِنْ اٛ حٛکِّي ٻِطّٛ اٛنْ لَامُ تَپُکِ کِيتَ، نغَمْ اٛ ٻِي نٜطّٛ؞ ²⁸تٛع اٛنْ کَيْطِنْ اٜ طُعُمْ، نغَمْ شَرٜلْ اٜ وَرَ نغٜلْ فُو مَيْٻٜ غٛنْٻٜ ندٜرْ غٜنَالٜ نَنَتَ حٛنٛنْدٜ ٻِي نٜطّٛ ²⁹ٻٜ مبُرْتٛيٛو دَغَ ندٜرْ غٜنَالٜ مَٻّٜ؞ غَطُٻٜ کٛ وٛوطِ ٻٜ اُمّٛتٛ ٻٜ کٜٻَ يٛنْکِ کِ رٜعَتَا، ندٜنْ غَطُٻٜ کٛ حَلِّ بٛو ٻٜ اُمّٛتٛ ٻٜ تَپَنٜىٰ کِيتَ؞

شٜيْدَ دٛوْ يٜىٰسُ

³⁰‏«‏مِ وَاوَتَا مِ وَطَ غٛطُّمْ اٜ حٛورٜ اَمْ، اٜ مِ وَطَ کِيتَ نٛ اَللَّه وِعِيَمْ مِ وَطَ تَنْ؞ اٜ مِ وَطَ کِيتَ غٛونغَ، نغَمْ نَاع کٛ وٜلْنَنْتَيَمْ ٻٜرْندٜ نغَطَيْمِ، اَمَّا کٛ وٜلْنَتَ ٻٜرْندٜ اٛنْ طٛنْ لِلْطٛيَمْ نغَطَيْمِ؞

³¹‏«‏تٛ مِ حٛکِّي شٜيْدَ حٛورٜ اَمْ، طُمْ حٛشَّيْ کٛ مبِيمِ نَاع طُمْ غٛونغَ؞ ³²اَمَّا اٜ وٛودِ غٛطّٛ کٛکّٛووٛ شٜيْدَ دٛوْ اَمْ، اٜ مِ اَنْدِ شٜيْدَ غٛونغَ اٛ حٛکَّتَ دٛوْ اَمْ؞ ³³اٛنْ لِلِ يِمْٻٜ تٛ يَحَيَ، کَنْکٛ بٛو اٛ حٛکِّعٛنْ شٜيْدَ غٛونغَ دٛوْ اَمْ؞ ³⁴نَاع مِ دَرِي دٛوْ شٜيْدَ طُمْ نٜطّٛ حٛکَّتَ، اَمَّا مِ وِعُکَ نغَمْ کِسٛنْ؞ ³⁵يَحَيَ اٜ نَنْدِ اٜ فِتِلَارُ کُٻَّيْندُ حٛکَّ جَيْنغٛلْ، ندٜنْ نغَمْ شَرٜلْ سٜطَّ اٛنْ شُٻِي نَنْکِ بٜلْطُمْ جَيْنغٛلْ؞ ³⁶اَمَّا اٜ مِ وٛودِ شٜيْدَ دٛوْ اَمْ ٻُرْطُمْ شٜيْدَ طُمْ يَحَيَ حٛکِّ؞ طٜعٜ کُوطٜ طٜ کُوَيْمِ جٛونِ طٜ ݧَاکٛ مٛ دٛوْ حٛکِّيَمْ مِ يٛتِّنَ، اٜ طٜ کٛکَّ شٜيْدَ ݧَاکٛ اٛنْ لِلٛيِيَمْ؞ ³⁷ݧَاکٛ لِلٛيْطٛيَمْ، کَنْکٛ اٜ حٛورٜ مَاکٛ اٛ حٛکِّي شٜيْدَ دٛوْ اَمْ؞ اٛنْ مٜىٰطَايِ نَنْکِ حٛنٛنْدٜ مَاکٛ، اٛنْ مٜىٰطَايِ يِيکِ نٛ اٛ وَعِ؞ ³⁸وٛلْدٜ مَاکٛ بٛو وَلَا ندٜرْ ٻٜرْطٜ مٛوطٛنْ نغَمْ اٛنْ کٛولَاکِ مٛ اٛ لِلٛيِ؞ ³⁹اٛنْ نجَنْغَ اَايَاجٜ اَللَّه نغَمْ اٛنْ ݧُمَ اٜ لَاوٛلْ مَاجٜ کٜٻٛتٛنْ يٛنْکِ کِ رٜعَتَا؞ طٜعٜ اَايَاجٜ طٜ نجَنْغٛتٛنْ بٛو اٜ طٜ کٛکَّ شٜيْدَ دٛوْ اَمْ؞ ⁴⁰اَمَّا فُو اٜ نٛنْ اٛنْ نغَݧِي وَرْکِ تٛ اَمْ کٜٻٛنْ يٛنْکِ کِ رٜعَتَا؞

⁴¹‏«‏مِ طَٻِّتَتَا مَوْنِنٜىٰکِ دَغَ تٛ يِمْٻٜ؞ ⁴²اَمَّا اٜ مِ اَنْدِ اٛنْ نغِطَا اَللَّه ندٜرْ ٻٜرْطٜ مٛوطٛنْ؞ ⁴³مِ وَرْدِي اٜ لَامُ ݧَاکٛ اَمْ، اَمَّا اٛنْ نجَٻَايِيَمْ؞ اَمَّا تٛ غٛطّٛ وَرْدِي اٜ لَامُ حٛورٜ مُوطُمْ، اٛنْ نجَٻَيْمٛ؞ ⁴⁴نٛ وَطَتَ کٛولٛوطٛنْيَمْ تٛ اٛنْ طَٻِّتَ مَنْتِندِرْکِ، اَمَّا اٛنْ ندُرْوَايِ کٜٻٛنْ مَنْتٜىٰکِ دَغَ تٛ اَللَّه؟ کَنْکٛ تَنْ وٛنِ اَللَّه؞ ⁴⁵تٛع اٛنْ ݧُمُ مِ وُلّٛتٛعٛنْ يٜىٰسٛ ݧَاکٛ اَمْ؞ مُوسَ مٛ نغَطُطٛنْ کَمُّندٜ دٛوْ مُوطُمْ، کَنْکٛ وٛنِ غُلّٛتٛوطٛعٛنْ؞ ⁴⁶دَا اٛنْ کٛولَکٜنٛ مُوسَ اٜ غٛونغَ، دَا اٛنْ کٛولَکٜيَمْ، نغَمْ دٛوْ اَمْ اٛ وِنْدِ؞ ⁴⁷اَمَّا ندٜ اٛنْ نجَٻَايِ کٛ اٛ وِنْدِ، نٛ نجَٻِرْتٛنْ کٛ مبِيمِ؟»‏

يٜىٰسُ ݧَمْنِي يِمْٻٜ 5,000

¹غَطَ طُعُمْ، يٜىٰسُ يَحِ فٛنْغٛ مبٜىٰلَ غَلِيلِ، وَاتٛ مبٜىٰلَ تِبَارِيَ؞ ²يِمْٻٜ طُطْٻٜ تٛکِّمٛ، نغَمْ ٻٜ نغِعِ فِي کَيْطِنِيطُمْ طُمْ اٛ وَطَنِ ٻٜ نجَمْطَا؞ ³سٜيْ يٜىٰسُ پٜنْتِ حٛشّٜىٰرٜ جٛوطٛدِي اٜ تٛکُّٻٜمٛ؞ ⁴اٜ شَرٜلْ نغٜلْ حُمْتٛ سَکِّنْکِ نغٛ يَحُودَنْکٛعٜنْ ٻَدَکٜ؞ ⁵ندٜ يٜىٰسُ رَارِ يِعِ يِمْٻٜ طُطْٻٜ اٜ نغَرَ تٛ مَاکٛ، اٛ وِعِ فِلِبُسْ، ‏«‏تٛيٜ شٛودٜتٜنْ ݧَمْندُ کٜپَيْندُ يِمْٻٜ ٻٜعٜ؟»‏ ⁶اٛ وِعُ فِلِبُسْ نٛنْ نغَمْ اٛ فٛوندَمٛ، نغَمْ کَنْکٛ اٜ حٛورٜ مَاکٛ اٜ مٛ اَنْدِ کٛ اٛ وَطَتَ؞

⁷فِلِبُسْ وِعِمٛ، ‏«‏کٛو نجٛٻَارِ ندِ کُوٛووٛ حٜٻَتَ ندٜرْ لٜبِّ جٛوٜىٰتَتِ ندِ حٜپَتَا سٛودُکِ ݧَمْندُ کٜپَيْندُ کٛو مٛيٜ مَٻّٜ حٜٻَ سٜطَّ؞»‏

⁸غٛطّٛ ندٜرْ تٛکُّٻٜمٛ بِعٜتٜىٰطٛ اَنْدِرَاوُسْ مِݧِرَاوٛ سِيمَنْ بِيتُرُسْ وِعِمٛ، ⁹‏«‏اٜ وٛودِ غٛطّٛ سُکَ طٛعٛ غٛودُطٛ مبُرٛودِحٛيْ نجٛوٛيْ اٜ لِپِّ طِطِ؞ اَمَّا غٛونغَ کٛو کٛ طُمْ وَطَنْتَ يِمْٻٜ ٻٜعٜ؞»‏

¹⁰يٜىٰسُ وِعِٻٜ، ‏«‏مبِعٜىٰ يِمْٻٜ نجٛوطٛو؞»‏ وِغٜىٰرٜ ندٜنْ اٜ وٛودِ غٜىٰنٜ طُطّٜ، نغَمْ نٛنْ يِمْٻٜ ٻٜنْ نجٛوطِي دٛوْ مَاجٜ؞ وٛرْٻٜ تَنْ ندٜرْ مَٻّٜ ٻَدَکٜ 5,000؞ ¹¹سٜيْ يٜىٰسُ حٛشِّ بُرٛودِ طُمْ، اٛ يٜتِّ اَللَّه، اٛ سٜنْدَنِطُمْ جٛوطِيٻٜ طٛنْ نٛنْ نٛ حٜپَتَٻٜ؞ نٛنْ مَا اٛ وَادِ اٜ لِپِّ طِنْ؞ ¹²ندٜ فُو يِمْٻٜ ٻٜنْ ݧَامِ کَارِ، اٛ وِعِ تٛکُّٻٜمٛ، ‏«‏کَوْرِتٜىٰ کٛ حٛرِي، تٛع طُمْ لَلِّنَ کٛو سٜطَّ مَاجُمْ؞»‏ ¹³سٜيْ ٻٜ مٛٻْتِ کٛ حٛرِي دَغَ مبُرٛودِحٛيْ نجٛوٛيْ کٛيْ يِمْٻٜ ݧَامِ کٛرْنِ، ٻٜ کٜبِّنِ کٛنْدٛوجٜ سَڤّٛ اٜ طِطِ؞

¹⁴ندٜ يِمْٻٜ نغِعِ فِي کَيْطِنِيطُمْ طُعُمْ طُمْ يٜىٰسُ وَطِ، ٻٜ ڤُطِّ وِيکِ، ‏«‏غٛونغَ اٛعٛ وٛنِ اٛنْ طٛنْ اَنَّبِيجٛ غَرَيْطٛ دُونِيَارُ؞»‏ ¹⁵يٜىٰسُ اٜ اَنْدِ اٜ ٻٜ نغِطِ نَنْغُکِمٛ، ٻٜ نغَرْتِرَمٛ لَامِيطٛ اٜ سٜمْبٜ؞ نغَمْ نٛنْ اٛ اَلِٻٜ اٛ پٜنْتِ حٛشّٜىٰرٜ کَنْکٛ تَنْ؞

يٜىٰسُ وَطِي يَادُ دٛوْ ندِيَمْ

¹⁶ندٜ نَانغٜ حِيرِ، تٛکُّٻٜ يٜىٰسُ نجَحِ مبٜىٰلَ، ¹⁷ٻٜ نَتِّ کٛمِوَلْ، ٻٜ ڤُطِّ حُولُکِ مبٜىٰلَ نغَنْ يَاکِ کَفَرْنَحُمْ؞ اٜ شَرٜلْ نغٜلْ جٜمَّ وَطِي، يٜىٰسُ بٛو وَرٛيَايِ تٛ مَٻّٜ تَوْ؞ ¹⁸مبٜىٰلَ نغَنْ وَطِ کَ فَلْپُکِ نغَمْ حٜنْدُ شٜمْبِنْدُ اٜ وَطَ؞ ¹⁹ندٜ ٻٜ نغَطِ يَادُ ندٜرْ مبٜىٰلَ نغَنْ حٜوْتِ مِلْ تَتِ کٛو نَيِ، ٻٜ نغِعِ يٜىٰسُ اٜ يَحَ دٛوْ ندِيَمْ طَمْ اٜ وَرٛيَ تٛ کٛمِوَلْ مَٻّٜ، کُلٛلْ نَنْغِٻٜ؞ ²⁰اَمَّا يٜىٰسُ وِعِٻٜ، ‏«‏تٛع اٛنْ کُلُ، طُمْ مِنْ؞»‏ ²¹سٜيْ ٻٜ نجَٻِ ٻٜ کٛشِّمٛ ندٜرْ کٛمِوَلْ نغَلْ، طٛنْ اٜ طٛنْ کٛمِوَلْ نغَلْ يٛتِّي تٛ ٻٜ نجِڤّٛتٛو؞

يِمْٻٜ طَٻِّتِي يٜىٰسُ

²²ندٜ فِنِ، حٛرِيٻٜ غٛنْٻٜ نغٛنْ تٛنْ فٛنْغٛ مبٜىٰلَ تٛ تٛکُّٻٜ يٜىٰسُ نَتِّ کٛمِوَلْ، ٻٜ ڤَامِ کٛمِوَلْ غٛعٛتَلْ تَنْ وٛنْدٛنٛ طٛنْ، ندٜنْ يٜىٰسُ بٛو نَتِّدَايِ کٛمِوَلْ نغَلْ اٜ تٛکُّٻٜمٛ، اَمَّا کَمْٻٜ تَنْ ندِلِّ ندٜرْ مَاغَلْ؞ ²³سٜيْ غٛطّٜ کٛمِيجٜ پِوٛيْطٜ تِبَارِيَ نجٛتِّي دَاندٜ مبٜىٰلَ حَادٜ وِغٜىٰرٜ تٛ يِمْٻٜ ݧَامِ بُرٛودِ غَطَ يٜىٰسُ يٜتِّي اَللَّه؞ ²⁴ندٜ يِمْٻٜ نغِعِ يٜىٰسُ اٜ تٛکُّٻٜمٛ نغَلَا طٛنْ، سٜيْ ٻٜ نَتِّ کٛمِيجٜ طٜنْ، ٻٜ نجَحِ کَفَرْنَحُمْ اٜ ٻٜ طَٻِّتَ يٜىٰسُ؞

يٜىٰسُ وٛنِ بُرٛودِ کٛکَّيْطُمْ يٛنْکِ

²⁵ندٜ ٻٜ تَوِمٛ فٛنْغٛ مبٜىٰلَ تٛ کَفَرْنَحُمْ، ٻٜ مبِعِمٛ، ‏«‏مٛودِبّٛ، ندٜيٜ نغَرٛيْطَا طٛعٛ؟»‏

²⁶يٜىٰسُ نٛوتِي وِعِٻٜ، ‏«‏اٜ مِ وِعَعٛنْ غٛونغَ، اٛنْ طَٻِّتَيَمْ نَاع نغَمْ اٛنْ نغِعِي کَيْطِنِيطُمْ طُمْ نغَطُمِ، اَمَّا نغَمْ اٛنْ ݧَامِي بُرٛودِ اٛنْ کَارِي؞ ²⁷تٛع اٛنْ کُوَنْ ݧَمْندُ لَلَّيْندُ، اَمَّا کُوَنٜىٰ ݧَمْندُ تَبِّتَيْندُ کٛکَّيْندُ يٛنْکِ کِ رٜعَتَا، ندُ ٻِي نٜطّٛ حٛکَّتَعٛنْ، نغَمْ اَللَّه ݧَاکٛ مٛ دٛوْ وَطَنِيمٛ اَلَامَ کٛلَّيْطُمْ جَٻِيمٛ؞»‏ ²⁸سٜيْ ٻٜ پَمِ يٜىٰسُ ٻٜ مبِعِ، ‏«‏طُمٜ مِنْ نغَطَتَ نغَمْ مِنْ نغَطَ کٛ اَللَّه يِطِ؟»‏

²⁹يٜىٰسُ وِعِٻٜ، ‏«‏کٛ اَللَّه يِطِ نغَطٛنْ وٛنِ کٛولٛوطٛنْ اٛنْ طٛنْ مٛ اٛ لِلٛيِ؞»‏

³⁰ٻٜ مبِعِمٛ، ‏«‏طُمٜ کَيْطِنِيطُمْ نغَطَتَا نغَمْ مِنْ نغِعَطُمْ مِنْ کٛولٛمَا؟ طُمٜ نغَطَتَا؟ ³¹مَامَعٜنْ مٜىٰطٜنْ ݧَامِي ݧَمْندُ ندٜرْ لَدّٜ پِوٛيْندُ دَغَ دٛوْ بِعٜتٜىٰندُ مَنَّ، نٛنْ نٛ طُمْ وِنْدِرَا، ‏‹‏اٛ حٛکِّيٻٜ ݧَمْندُ پِوٛيْندُ دَغَ دٛوْ نغَمْ ٻٜ ݧَامَ؞›‏ »‏

³²يٜىٰسُ وِعِٻٜ، ‏«‏اٜ مِ وِعَعٛنْ غٛونغَ، نَاع مُوسَ حٛکِّعٛنْ ݧَمْندُ پِوٛيْندُ دَغَ دٛوْ، اَمَّا ݧَاکٛ اَمْ وٛنِ کٛکُّطٛعٛنْ ݧَمْندُ غٛونغَارُ پِوٛيْندُ دَغَ دٛوْ؞ ³³نغَمْ ݧَمْندُ ندُ اَللَّه حٛکِّ وٛنِ اٛنْ طٛنْ غَرٛيْطٛ دَغَ دٛوْ کٛکّٛووٛ دُونِيَارُ يٛنْکِ کِ رٜعَتَا؞»‏

³⁴ٻٜ مبِعِمٛ، ‏«‏مٛودِبّٛ، حٛکُّمِنْ ݧَمْندُ ندُعُ کٛو ندٜيٜ؞»‏

³⁵يٜىٰسُ وِعِٻٜ، ‏«‏مِنْ وٛنِ ݧَمْندُ کٛکَّيْندُ يٛنْکِ؞ فُو غَرْطٛ تٛ اَمْ فُطِّتَتَا نَنَ وٜىٰلٛ، فُو کٛولِيطٛيَمْ فُطِّتَتَا نَنَ طٛنْکَ؞ ³⁶اَمَّا نٛ مبِيمِعٛنْ، اٛنْ نغِعِييَمْ، فُو اٜ نٛنْ اٛنْ کٛولَاکِيَمْ؞ ³⁷کٛو مٛيٜ مٛ ݧَاکٛ اَمْ حٛکِّيَمْ وَرَيْ تٛ اَمْ، ندٜنْ فُو غَرْطٛ تٛ اَمْ مِ رِيوَتَامٛ؞ ³⁸نغَمْ مِ وَرٛيِي دَغَ دٛوْ نَاع نغَمْ مِ وَطَ کٛ نغِطُمِ، اَمَّا مِ وَطَ کٛ لِلٛيْطٛيَمْ يِطِ؞ ³⁹کٛ لِلٛيْطٛيَمْ يِطِ مِ وَطَ وٛنِ، تٛع مِ دُلَّ کٛو غٛعٛتٛ ندٜرْ ٻٜ اٛ حٛکِّيَمْ، اَمَّا مِ اُمِّنَٻٜ ݧَلْندٜ جَانغٛ؞ ⁴⁰نغَمْ کٛ ݧَاکٛ اَمْ يِطِ وٛنِ کٛو مٛيٜ دَارُطٛ ٻِطّٛ اٛنْ حٛولِيمٛ حٜٻَ يٛنْکِ کِ رٜعَتَا، ندٜنْ مِنْ بٛو مِ اُمِّنَيْمٛ ݧَلْندٜ جَانغٛ؞»‏

⁴¹سٜيْ يَحُودَنْکٛعٜنْ ڤُطِّ مٜتِتَاکِ دٛوْ مَاکٛ، نغَمْ اٛ وِعِي، ‏«‏مِنْ وٛنِ ݧَمْندُ پِوٛيْندُ دَغَ دٛوْ؞»‏ ⁴²ٻٜ مبِعِ، ‏«‏نَاع اٛعٛ وٛنِ يٜىٰسُ ٻِطّٛ يُسُفُ؟ اٜنْ اَنْدِ ݧَاکٛ مَاکٛ اٜ مَدُوجٛ مَاکٛ؞ نٛ وَطَتَ جٛونِ اٛ وِعَ دَغَ دٛوْ اٛ پِوٛيِ؟»‏

⁴³يٜىٰسُ وِعِٻٜ، ‏«‏اَلٜىٰ مٜتِتَاکِ حَکُّندٜ مٛوطٛنْ؞ ⁴⁴وَلَا غَرَيْطٛ تٛ اَمْ سٜيْ تٛ ݧَاکٛ اَمْ لِلٛيْطٛيَمْ وَدِّيمٛ، مِنْ بٛو مِ اُمِّنَيْمٛ ݧَلْندٜ جَانغٛ؞ ⁴⁵اَنَّبٛعٜنْ مبِنْدِي وِيکِ، ‏‹‏اَللَّه اٜکِّتِنَيْ کٛو مٛيٜ؞›‏ کٛو مٛيٜ کٜتِّندَنِيطٛ ݧَاکٛ اٛنْ اٜکِّتِي دَغَ تٛ مَاکٛ اٜ وَرَ تٛ اَمْ؞ ⁴⁶وَلَا مٜىٰطُطٛ يِيکِ ݧَاکٛ اٛنْ سٜيْ نِ اٛنْ طٛنْ پِوٛيْطٛ دَغَ تٛ مَاکٛ، کَنْکٛ تَنْ مٜىٰطِ يِيکِ ݧَاکٛ اٛنْ؞ ⁴⁷اٜ مِ وِعَعٛنْ غٛونغَ، کٛو مٛيٜ کٛولِيطٛيَمْ اٜ وٛودِ يٛنْکِ کِ رٜعَتَا؞ ⁴⁸مِنْ وٛنِ ݧَمْندُ کٛکَّيْندُ يٛنْکِ کِ رٜعَتَا؞ ⁴⁹مَامَعٜنْ مٛوطٛنْ ݧَامِي ‏‹‏مَنَّ،›‏ اَمَّا فُو اٜ نٛنْ ٻٜ مَايِي؞ ⁵⁰اَمَّا رَا ݧَمْندُ پِوٛيْندُ دَغَ دٛوْ، تٛ نٜطّٛ ݧَامِيندُ مَايَتَا؞ ⁵¹مِنْ وٛنِ ݧَمْندُ کٛکَّيْندُ يٛنْکِ پِوٛيْندُ دَغَ دٛوْ؞ فُو ݧَامُطٛندُ، اٛ جٛوطٛتٛ حَا اَبَدَا؞ ندُعُ ݧَمْندُ طُمْ ٻَنْدُ اَمْ، ندُ کٛکَّيْمِ نغَمْ يِمْٻٜ دُونِيَارُ کٜٻَ يٛنْکِ کِ رٜعَتَا؞»‏

⁵²سٜيْ يَحُودَنْکٛعٜنْ ٻٜنْ ڤُطِّ غٜدِّ حَکُّندٜ مَٻّٜ، اٜ ٻٜ مبِعَ، ‏«‏نٛ وَطَتَ نٜطّٛ اٛعٛ حٛکَّعٜنْ ٻَنْدُ مَاکٛ ݧَامٜنْ؟»‏

⁵³يٜىٰسُ وِعِٻٜ، ‏«‏اٜ مِ وِعَعٛنْ غٛونغَ، تٛ اٛنْ ݧَامَايِ ٻَنْدُ ٻِي نٜطّٛ، کَدِنْ تٛ اٛنْ نجَرَايِ پِيپَمْ مَاکٛ، اٛنْ نغَلَا يٛنْکِ ندٜرْ مٛوطٛنْ؞ ⁵⁴فُو ݧَامُطٛ ٻَنْدُ اَمْ ندٜنْ يَرِ پِيپَمْ اَمْ اٜ وٛودِ يٛنْکِ کِ رٜعَتَا، ندٜنْ مِ اُمِّنَيْمٛ ݧَلْندٜ جَانغٛ؞ ⁵⁵نغَمْ ٻَنْدُ اَمْ وٛنِ ݧَمْندُ غٛونغَارُ، پِيپَمْ اَمْ بٛو وٛنِ نجَرَمْ طَمْ غٛونغَ؞ ⁵⁶کٛو مٛيٜ ݧَامِ ٻَنْدُ اَمْ يَرِ پِيپَمْ اَمْ، اٜ مٛ سُمْڤٛوتِرَ اٜ اَمْ، مِنْ مَا اٜ مِ سُمْڤٛوتِرَ اٜ مَاکٛ؞ ⁵⁷نٛنْ نٛ ݧَاکٛ غٛودُطٛ يٛنْکِ لِلِيَمْ، کَدِنْ اٜ مِ وَطَ جٛنْدٜ اَمْ نغَمْ مَاکٛ، نٛنْ مَا فُو ݧَامُطٛ ٻَنْدُ اَمْ وَطَيْ جٛنْدٜ مُوطُمْ نغَمْ اَمْ؞ ⁵⁸کَنْجُمْ وٛنِ ݧَمْندُ پِوٛيْندُ دَغَ دٛوْ نَاع اِرِ ݧَمْندُ ندُ مَامَعٜنْ مٛوطٛنْ ݧَامِ مَايِ؞ اَمَّا فُو ݧَامُطٛ ݧَمْندُ ندُعُ اٛ حٜٻَيْ يٛنْکِ کِ رٜعَتَا؞»‏

⁵⁹يٜىٰسُ وِعِ طُعُمْ شَرٜلْ کٛ اٛ اٜکِّتِنْتَ ندٜرْ سُودُ دٛعَارٜ تٛ کَفَرْنَحُمْ؞

حَالَ دٛوْ يٛنْکِ کِ رٜعَتَا

⁶⁰طُطْٻٜ ندٜرْ تٛکُّٻٜمٛ ندٜ نَنِ نٛنْ، ٻٜ مبِعِ، ‏«‏نغٛعٛلْ اٜکِّتِنٛلْ اٜ نغٛلْ سَطِ؞ مٛيٜ فَامَتَنغٛلْ؟»‏

⁶¹اَمَّا يٜىٰسُ اٜ اَنْدِ تٛکُّٻٜمٛ اٜ مٜتِتٛو دٛوْ کٛ اٛ وِعِ، اٛ وِعِٻٜ، ‏«‏اٜکِّتِنٛلْ نغٛعٛلْ وَنِّعٛنْ؟ ⁶²کٛ نغَطٛتٛنْ تٛ اٛنْ نغِعِي ٻِي نٜطّٛ اٜ سٛعّٛو تٛ وٛنْدٛنٛ؟ ⁶³رُوحُ اَللَّه اٜ حٛکَّ يٛنْکِ؞ ٻَنْدُ نَاع طُمْ غٛطُّمْ؞ حَالَ کَ مٜتَنْمِعٛنْ کَ وَطَيْعٛنْ کٜٻٛنْ رُوحُ اَللَّه کٛکَّيْطُمْ يٛنْکِ؞ ⁶⁴اَمَّا اٜ وٛودِ وٛٻّٜ ندٜرْ مٛوطٛنْ ٻٜ کٛولَاکِيَمْ؞»‏ دَغَ اَرَنْدٜ يٜىٰسُ اٜ اَنْدِ يِمْٻٜ ٻٜ کٛولَاکِمٛ اٜ نٜطّٛ کٛکِّتِرَيْطٛمٛ؞ ⁶⁵سٜيْ اٛ وِعِٻٜ، ‏«‏کَنْجُمْ وَطِ مبِيمِعٛنْ وَلَا غَرَيْطٛ تٛ اَمْ سٜيْ تٛ ݧَاکٛ مٛ دٛوْ جَٻِي اٛ وَرَ؞»‏

⁶⁶غَطَ طُعُمْ تٛکُّٻٜمٛ طُطْٻٜ شٜنْدِرِ اٜ مَاکٛ اَلِ تٛکُّکِمٛ؞ ⁶⁷يٜىٰسُ وِعِ تٛکُّٻٜمٛ سَڤّٛ اٜ طِطٛ، ‏«‏اٛنٛنْ مَا اٛنْ نغِطِ اَلُکِيَمْ؟»‏

⁶⁸سِيمَنْ بِيتُرُسْ وِعِمٛ، ‏«‏مٛودِبّٛ، تٛ مٛيٜ مِنْ نجَحَتَ؟ اَنْ وٛودِ بٛلِيطٜ کٛکَّيْطٜ يٛنْکِ کِ رٜعَتَا؞ ⁶⁹مِنْ نجَادَکٜ مِنْ کٛولَکٜمَ، اٜ مِنْ اَنْدِ اَنْ وٛنِ شٜنِيطٛ مٛ اَللَّه؞»‏

⁷⁰سٜيْ يٜىٰسُ وِعِٻٜ، ‏«‏نَاع اٛنٛنْ سَڤّٛ اٜ طِطٛ شُٻُمِ؟ غٛعٛتٛ مٛوطٛنْ اٛ شٜيْطَنْ!‏»‏ ⁷¹اٜ مٛ مٜتَ دٛوْ يَحُودَ ٻِي سِيمَنْ اِسْکَرِيٛوتِ، کٛو ندٜ اٛ غٛعٛتٛ ندٜرْ تٛکُّٻٜمٛ سَڤّٛ اٜ طِطٛ ٻٜنْ، کَنْکٛ وٛنِ کٛکِّتِرَيْطٛ يٜىٰسُ؞

يٜىٰسُ اٜ مِݧِرَاٻٜ مُوطُمْ

¹غَطَ طُعُمْ يٜىٰسُ وَطِ کَ يِيلَاکِ ندٜرْ لٜيْدِ غَلِيلِ؞ اٛ يِطَا يِيلَاکِ ندٜرْ لٜيْدِ يَحُودِيَ، نغَمْ اَرْدِيٻٜ يَحُودَنْکٛعٜنْ وٛنْٻٜ تٛنْ اٜ ٻٜ طَٻِّتَ لَاوٛلْ نٛ ٻٜ مبَرِرْتَمٛ؞ ²تٛو، شَرٜلْ حُمْتٛ لُکُرُوجِ نغٛ يَحُودَنْکٛعٜنْ ٻَدَکٜ؞ ³نغَمْ نٛنْ مِݧِرَاٻٜ يٜىٰسُ وٛرْٻٜ مبِعِمٛ، ‏«‏اَلُ وِغٜىٰرٜ ندٜعٜ نجَحَا لٜيْدِ يَحُودِيَ، نغَمْ تٛکُّٻٜمَ نغِعَ کُوطٜ طٜ کُوَتَا؞ ⁴فُو غِطّٛ اَنْدٜىٰ اٜ کٛو تٛيٜ حُوَتَا اٜ سُوطٜ؞ ندٜ اَ حُوَ کُوطٜ کَيْطِنِيطٜ اِرِ طٜعٜ، وَنْغِنْ حٛورٜ مَاطَ نغَمْ دُونِيَارُ فُو يِعُمَا؞»‏ ⁵کٛو مِݧِرَاٻٜ مَاکٛ ٻٜنْ مَا ٻٜ کٛولَاکِمٛ؞

⁶يٜىٰسُ وِعِٻٜ، ‏«‏شَرٜلْ اَمْ وَطَايِ تَوْ، اَمَّا اٛنٛنْ کٛو نغٜلٜ شَرٜلْ نغٜلْ کَانُنغٜلْ؞ ⁷جٛونِ دُونِيَارُ حٜٻَايِ کٛ وَݧِرْتَعٛنْ، اَمَّا اٜ ندُ وَݧِييَمْ نغَمْ اٜ مِ وِعَ کُوطٜ مَيْرُ طٜ کَلُّطٜ؞ ⁸اٛنٛنْ نجَحٜىٰ حُمْتٛ نغٛنْ، مِنْ مِ يَحَتَا، نغَمْ شَرٜلْ اَمْ وَطَايِ تَوْ؞»‏ ⁹غَطَ اٛ وِعِي نٛنْ، اٛ جٛوطِي ندٜرْ لٜيْدِ غَلِيلِ؞

يٜىٰسُ يَحِي حُمْتٛ لُکُرُوجِ يَحُودَنْکٛعٜنْ

¹⁰اَمَّا غَطَ مِݧِرَاٻٜ مَاکٛ نجَحِي حُمْتٛ نغٛنْ، سٜيْ کَنْکٛ مَا اٛ يَحِ نَاع اٜ نجَيْرِ اَمَّا اٜ سُوطٜ؞ ¹¹تٛ حُمْتٛ نغٛنْ، اَرْدِيٻٜ يَحُودَنْکٛعٜنْ اٜ طَٻِّتَمٛ، اٜ ٻٜ پَمَ يِمْٻٜ، ‏«‏تٛيٜ اٛ وٛنِ؟»‏

¹²ندٜرْ حَوْرِيندٜ ندٜنْ يِمْٻٜ اٜ سٛوندٛوتِرَ دٛوْ مَاکٛ نَاع سٜطَّ؞ وٛٻّٜ اٜ مبِعَ، ‏«‏اٛعٛ نٜطّٛ اٜ وٛودِ نغِکُّ بٛطُّمْ؞»‏ وٛٻّٜ بٛو اٜ مبِعَ، ‏«‏اٜ مٛ پٛيْرَ يِمْٻٜ؞»‏ ¹³اَمَّا نغَمْ اٜ ٻٜ کُلَ اَرْدِيٻٜ يَحُودَنْکٛعٜنْ وَلَا مٜتُطٛ دٛوْ مَاکٛ اٜ نجَيْرِ؞

¹⁴ندٜ سٜنْدٜرٜ بَلْطٜ حُمْتٛ نغٛنْ پَٻِّي، يٜىٰسُ نَتِّ وُرٛ شٜنِينغٛ فُطِّ اٜکِّتِنْکِ؞ ¹⁵اَرْدِيٻٜ يَحُودَنْکٛعٜنْ کَيْطِنِ اٜ اٜکِّتِنٛلْ مَاکٛ، ٻٜ مبِعِ، ‏«‏نٛ وَطِ نٜطّٛ اٛعٛ وٛودِرِ اَنْدَلْ نِحِ ندٜ کٛو جَنْدٜ اٛ مٜىٰطَايِ يَاکِ؟»‏

¹⁶يٜىٰسُ وِعِٻٜ، ‏«‏کٛ اٜکِّتِنَيْمِ نَاع طُمْ اٜکِّتِنٛلْ اَمْ، اَمَّا طُمْ اٜکِّتِنٛلْ اٛنْ طٛنْ لِلٛيْطٛيَمْ؞ ¹⁷کٛو مٛيٜ شُٻُطٛ وَطَ کٛ اَللَّه يِطِ اٛ اَنْدَيْ کٛو کٛ اٜکِّتِنَيْمِ تٛ اَللَّه طُمْ پِوٛيِ، کٛو کٛ مبِعَيْمِ طُمْ بٛلِيطٜ اَمْ؞ ¹⁸کٛو مٛيٜ مٜتٛووٛ بٛلِيطٜ حٛورٜ مُوطُمْ اٜ طَٻِّتَنَ حٛورٜ مُوطُمْ مَنْغُ، اَمَّا کُوٛووٛ نغَمْ مَوْنِنَ اٛنْ طٛنْ لِلٛيْطٛمٛ اٛ نٜطّٛ مٛ غٛونغَ، وَلَا وٛنْدٜ فٜوْرٜ تٛ مَاکٛ؞ ¹⁹نَاع مُوسَ حٛکِّيعٛنْ اَتَّوْرَ؟ فُو اٜ نٛنْ وَلَا غٛطّٛ مٛوطٛنْ تٛکُّطٛطُمْ؞ نغَمْ طُمٜ نغِطّٛنْ وَرْکِيَمْ؟»‏

²⁰يِمْٻٜ ٻٜنْ مبِعِمٛ، ‏«‏اَ غِنَّاطٛ!‏ مٛيٜ يِطِ وَرْکِمَ؟»‏

²¹يٜىٰسُ وِعِٻٜ، ‏«‏مِ وَطِي کٛ حَيْطِنِي غٛعٛ، اٛنْ فُو اٛنْ کَيْطِنِي؞ ²²مُوسَ وِعِعٛنْ نغَطٛنْ کَ نَادُکِ ٻِٻّٜ مٛوطٛنْ، اٛنْ نَادَ ݧَلْندٜ سِوْتَارٜ؞ کٛو ندٜ نَاع مُوسَ فُطِّطُمْ، اَمَّا مَامَعٜنْ مٜىٰطٜنْ اَرَنْدٜعٜنْ فُطِّطُمْ؞ ²³تٛ طُمْ نَادِي ٻِنْغٜلْ ݧَلْندٜ سِوْتَارٜ نغَمْ تٛع طُمْ يٜوَ اَتَّوْرَ مُوسَ، نغَمْ طُمٜ مٛنَّنْتٛنْيَمْ نغَمْ مِ يَمْطِتِنِي ٻَنْدُ نٜطّٛ فُو ݧَلْندٜ سِوْتَارٜ؟ ²⁴تٛع اٛنْ نغَطَنْ يِمْٻٜ کِيتَ دٛوْ کٛ غِتٜ نغِعَتَ تَنْ، اَمَّا نغَطٜىٰ کِيتَ غٛونغَ؞»‏

کٛو يٜىٰسُ وٛنِ اَلْمَسِيحُ؟

²⁵وٛٻّٜ يِمْٻٜ اُرُشَلِيمَ مبِعِ، ‏«‏نَاع اٛعٛ نٜطّٛ وٛنِ مٛ اَرْدِيٻٜ طَٻِّتَتَ وَرْکِ؟ ²⁶رَمّٛ طٛعٛ اٜ مٛ مٜتَ اٜ نجَيْرِ ٻٜ مبِعَايِمٛ غٛطُّمْ؞ اٛنْ ݧُمَ اَرْدِيٻٜ تَبِّتِنِي اٛعٛ نٜطّٛ وٛنِ اَلْمَسِيحُ؟ ²⁷اَمَّا اٜنْ اَنْدِ تٛ نٜطّٛ اٛعٛ پِوٛيِ؞ تٛ اَلْمَسِيحُ وَرِي، وَلَا اَنْدَيْطٛ تٛ اٛ پِوٛيِ؞»‏

²⁸يٜىٰسُ اٜ ندٜرْ اٜکِّتِنْکِ ندٜرْ وُرٛ شٜنِينغٛ نغٛنْ، سٜيْ وِعِ اٜ سٜمْبٜ، ‏«‏غٛونغَ، اٛنْ اَنْدِيَمْ، اٛنْ اَنْدِ تٛ پِوٛيْمِ؞ مِ وَرٛيَايِ نغَمْ حٛورٜ اَمْ؞ اَمَّا اٛنْ طٛنْ لِلٛيْطٛيَمْ اٜ مٛ وٛودِ غٛونغَ؞ کَنْکٛ بٛو اٛنْ اَنْدَامٛ، ²⁹اَمَّا مِنْ اٜ مِ اَنْدِمٛ، نغَمْ دَغَ تٛ مَاکٛ پِوٛيْمِ، کَنْکٛ لِلٛيِيَمْ؞»‏

³⁰وٛٻّٜ نغِطِي نَنْغُکِمٛ، اَمَّا وَلَا غَطُطٛ جُنْغٛ دٛوْ مَاکٛ، نغَمْ شَرٜلْ مَاکٛ وَطَايِ تَوْ؞ ³¹اَمَّا فُو اٜ نٛنْ طُطْٻٜ ندٜرْ حَوْرُتُٻٜ ٻٜنْ کٛولِيمٛ مبِعِ، ‏«‏تٛ اَلْمَسِيحُ وَرِي، اٛ وَطَيْ کٛ حَيْطِنِ ٻُرْطُمْ طُمْ نٜطّٛ اٛعٛ وَطِ؟»‏

طُمْ لِلِي تَادِيٻٜ وُرٛ شٜنِينغٛ نَنْغَ يٜىٰسُ

³²فَارِسَنْکٛعٜنْ نَنِ يِمْٻٜ حَوْرُتُٻٜ اٜ مٜتَ اِرِ حَالَ کَعَ دٛوْ يٜىٰسُ، سٜيْ کَمْٻٜ اٜ مَوْٻٜ اَرْدِيٻٜ دِينَ ٻٜ لِلِ تَادِيٻٜ وُرٛ شٜنِينغٛ نغَمْ نَنْغَمٛ؞ ³³يٜىٰسُ وِعِ، ‏«‏مِ جٛوطٛدٛتٛ اٜ مٛوطٛنْ شَرٜلْ سٜطَّ يٜىٰسٛ طٛعٛ، غَطَ طٛنْ مِ سٛعّٛتٛ تٛ لِلٛيْطٛيَمْ؞ ³⁴اٛنْ طَٻِّتَيْيَمْ اٛنْ کٜٻَتَايَمْ، تٛ نغٛنُمِ بٛو اٛنْ مبَاوَتَا يَاکِ؞»‏

³⁵سٜيْ اَرْدِيٻٜ يَحُودَنْکٛعٜنْ مبِعِ حَکُّندٜ مَٻّٜ، ‏«‏تٛيٜ نٜطّٛ اٛعٛ يِطِ يَاکِ تٛ اٜنْ مبَاوَتَا حٜٻُکِمٛ؟ کٛو اٜ مٛ يِطِ يَاکِ ندٜرْ غَرِيجٜ حٜلٜنَنْکٛعٜنْ تٛ يِمْٻٜ مٜىٰطٜنْ نغٛنِ اٛ اٜکِّتِنَ حٜلٜنَنْکٛعٜنْ؟ ³⁶طُمٜ اٛ يِطِ وِيکِ ندٜ اٛ وِعِ، ‏‹‏اٛنْ طَٻِّتَيْيَمْ اَمَّا اٛنْ کٜٻَتَايَمْ؞›‏ کَدِنْ کٛ اٛ يِطِ وِيکِ ندٜ اٛ وِعِ، ‏‹‏تٛ نغٛنْمِ اٛنْ مبَاوَتَا يَاکِ؟›‏ »‏

شَنْطِ ندِيَمْ کٛکّٛوجَمْ يٛنْکِ

³⁷ݧَلْندٜ ندٜ حُمْتٛ نغٛنْ رٜعَتَ، کَيْرٜ وٛنِ ݧَلْندٜ مَوْندٜ ندٜ حُمْتٛ نغٛنْ؞ اٜ ݧَلْندٜ ندٜنْ يٜىٰسُ اُمِّي، دَرِي، وِعِ اٜ سٜمْبٜ، ‏«‏فُو نَنَيْطٛ طٛنْکَ وَرَ تٛ اَمْ مِ حٛکَّيْمٛ کٛ اٛ يَرَتَ؞ ³⁸نٛنْ نٛ طُمْ وِنْدِرَا، ‏‹‏کٛو مٛيٜ کٛولِيطٛيَمْ، شَنْطِ ندِيَمْ کٛکّٛوجَمْ يٛنْکِ وَطَيْ کَ اِلُکِ دَغَ ندٜرْ ٻٜرْندٜ مَاکٛ؞›‏ »‏ ³⁹ندٜ يٜىٰسُ وِعِ طُعُمْ، دٛوْ رُوحُ اَللَّه اٛ مٜتَتَ طُمْ کٛولِيٻٜمٛ کٜٻَتَ؞ اٜ نغٜلْ طٛنْ شَرٜلْ اَللَّه حٛکَّايِ رُوحُ مُوطُمْ تَوْ، نغَمْ يٜىٰسُ تٜدِّنَاکَ تَوْ؞

سٜنْدِندِرْکِ نَتِّي حَکُّندٜ يِمْٻٜ

⁴⁰ندٜ يِمْٻٜ حَوْرُتُٻٜ نَنِ حَالَ کَعَ کَ يٜىٰسُ وِعِ، وٛٻّٜ ندٜرْ مَٻّٜ مبِعِ، ‏«‏اٛعٛ نٜطّٛ، غٛونغَ، اٛ اٛنْ طٛنْ اَنَّبِيجٛ؞»‏

⁴¹وٛٻّٜ بٛو مبِعِ، ‏«‏کَنْکٛ وٛنِ اَلْمَسِيحُ؞»‏ اَمَّا وٛٻّٜ مبِعِ، ‏«‏نٛ وَطَتَ اَلْمَسِيحُ پِوٛيَ لٜيْدِ غَلِيلِ؟

⁴²‏«‏نَاع اَايَارٜ وِعِي، اَلْمَسِيحُ پِوٛيَيْ دَغَ ندٜرْ لٜݧٛلْ دَوْدَ، ندٜنْ طُمْ دَݧَيْمٛ تٛ بَيْتَلَامِ، غَرِيرِ تٛ دَوْدَ جٛوطِنٛو؟»‏ ⁴³نغَمْ نٛنْ طُمْ حٜٻِ سٜنْدِندِرْکِ حَکُّندٜ حَوْرُتُٻٜ ٻٜنْ دٛوْ يٜىٰسُ؞ ⁴⁴وٛٻّٜ اٜ نغِطِ نَنْغُکِمٛ، اَمَّا وَلَا غَطُطٛ جُنْغٛ دٛوْ مَاکٛ؞

اَرْدِيٻٜ يَحُودَنْکٛعٜنْ نغَݧِي کٛولٛو يٜىٰسُ

⁴⁵سٜيْ تَادِيٻٜ وُرٛ شٜنِينغٛ ٻٜنْ شٛعِّي تٛ مَوْٻٜ اَرْدِيٻٜ دِينَ اٜ فَارِسَنْکٛعٜنْ؞ مَوْٻٜ ٻٜنْ اٜ فَارِسَنْکٛعٜنْ ٻٜنْ پَمِٻٜ، مبِعِ، ‏«‏نغَمْ طُمٜ اٛنْ نَنْغَايِمٛ نغَدُّطٛنْمٛ؟»‏

⁴⁶تَادِيٻٜ ٻٜنْ مبِعِ، ‏«‏وَلَا مٜىٰطُطٛ مٜتِرْکِ نٛ نٜطّٛ اٛعٛ مٜتِرِ؞»‏

⁴⁷فَارِسَنْکٛعٜنْ مبِعِٻٜ، ‏«‏کٛو اٛنٛنْ مَا اٛ پٛيْرِيعٛنْ؟ ⁴⁸کٛو اٛنْ نغِعِي غٛطّٛ ندٜرْ اَرْدِيٻٜ يَحُودَنْکٛعٜنْ اٜ فَارِسَنْکٛعٜنْ حٛولَکٜمٛ؟ ⁴⁹اَمَّا ٻٜعٜ حَوْرُتُٻٜ ٻٜ اَنْدَا کٛو طُمٜ دٛوْ اَتَّوْرَ، ٻٜ لَانَاٻٜ؞»‏

⁵⁰نِکٛودِمُسْ جَانٛوطٛ تٛ يٜىٰسُ اٛ غٛعٛتٛ ندٜرْ فَارِسَنْکٛعٜنْ ٻٜنْ، اٛ وِعِٻٜ، ⁵¹‏«‏کٛ اَتَّوْرَ مٜىٰطٜنْ وِعِ وٛنِ اٜنْ نغَطَنْتَا نٜطّٛ کِيتَ نَا طُمْ نَنِي کٛ اٛ وِعِ نغَمْ طُمْ اَنْدَ کٛ اٛ وَطَتَ؞»‏

⁵²ٻٜ مبِعِمٛ، ‏«‏اَنْ مَا غَلِيلِ پِوٛيْطَا؟ جَنْغُ وٛلْدٜ اَللَّه بٛطُّمْ، اَ يِعَيْ وَلَا اَنَّبِيجٛ پِوٛيَيْطٛ دَغَ غَلِيلِ؞»‏ ⁵³سٜيْ کٛو مٛيٜ حٛوتِ؞

طُمْ نَنْغِي دٜبّٛ اٜ وَطَ نجٜىٰنُ

¹اَمَّا يٜىٰسُ يَحِ حٛشّٜىٰرٜ ندٜ لٜطّٜ جَيْتُنْ؞ ²ندٜ فِنِ اِلَا سُبَکَ اٛ سٛعِّي وُرٛ شٜنِينغٛ؞ يِمْٻٜ طُطْٻٜ کَوْرِتِ حَادٜ مَاکٛ، اٛ جٛوطِي اٛ فُطِّي اٜکِّتِنْکِٻٜ؞ ³سٜيْ مٛودِٻّٜ اَتَّوْرَ اٜ فَارِسَنْکٛعٜنْ نغَدِّ دٜبّٛ نَنْغَاطٛ اٜ وَطَ نجٜىٰنُ؞ ٻٜ نغَطِ دٜبّٛ اٛنْ دَرِي يٜىٰسٛ يِمْٻٜ غٛنْٻٜ طٛنْ فُو؞ ⁴ٻٜ مبِعِ يٜىٰسُ، ‏«‏مٛودِبّٛ، اٛعٛ دٜبّٛ نَنْغَامَ اٜ مٛ وَطَ نجٜىٰنُ؞ ⁵ندٜرْ اَتَّوْرَ مُوسَ وِعِيعٜنْ کُبٛرٛوطٜنْ اِرِ دٜبّٛ اٛعٛ کَاپٜ مبَرٜنْمٛ؞ جٛونِ اَنْ، طُمٜ مبِيطَا؟»‏ ⁶ٻٜ پَمُمٛ پَمٛلْ نغٛعٛلْ نغَمْ ٻٜ ڤٛوندَمٛ ٻٜ کٜٻَ کٛ ٻٜ نغُلّٛرْتٛومٛ؞ اَمَّا يٜىٰسُ تُرِي فُطِّ وِنْدِرْکِ حٛوندُ مُوطُمْ اٜ لٜيْدِ؞ ⁷ندٜ ٻٜ نغَطِ کَ پَمُکِمٛ، سٜيْ اٛ اُمِّي، اٛ دَرِي، اٛ وِعِٻٜ، ‏«‏فُو مٛ مٜىٰطَايِ وَطُکِ حَکّٜ ندٜرْ مٛوطٛنْ اَرْتَ حُبَاکِ دٜبّٛ اٛعٛ حَيْرٜ؞»‏ ⁸سٜيْ اٛ فُطِّتِ اٛ تُرِي، اٛ وِنْدِ اٜ لٜيْدِ؞ ⁹ندٜ ٻٜ نَنِ کٛ اٛ وِعِ، ٻٜ ندِلِّ غٛعٛتٛ‑غٛعٛتٛ، ندٛتِّعٜنْ اَرْتِ دِلُّکِ؞ طُمْ اَلِ يٜىٰسُ طٛنْ کَنُمْ تَنْ، دٜبّٛ اٛنْ اٜ دَرِي يٜىٰسٛ مَاکٛ؞ ¹⁰يٜىٰسُ اُمِّي، دَرِي، وِعِمٛ، ‏«‏تٛ ٻٜ نغٛنِ؟ اٜ وٛودِ تَپَنْطٛمَ کِيتَ؟»‏

¹¹دٜبّٛ اٛنْ نٛوتِي وِعِ، ‏«‏مٛودِبّٛ، وَلَا کٛو غٛعٛتٛ؞»‏

يٜىٰسُ وِعِمٛ، ‏«‏تٛو، مِنْ مَا مِ تَپَنْتَامَ کِيتَ؞ دِلُّ، اَمَّا تَاع فُطُّتُ نغَطَا حَکّٜ؞»‏

يٜىٰسُ وٛنِ جَيْنغٛلْ دُونِيَارُ

¹²يٜىٰسُ فُطِّتِ مٜتَنِ يِمْٻٜ وِعِ، ‏«‏مِنْ وٛنِ جَيْنغٛلْ دُونِيَارُ؞ فُو تٛکُّطٛيَمْ يَحَتَا ندٜرْ ݧِوْرٜ، اَمَّا حٜٻَيْ جَيْنغٛلْ يٛنْکِ؞»‏

¹³سٜيْ فَارِسَنْکٛعٜنْ مبِعِمٛ، ‏«‏اَ حٛکَّ شٜيْدَ حٛورٜ مَاطَ، کٛ مبِعَتَا نَاع طُمْ غٛونغَ؞»‏

¹⁴يٜىٰسُ وِعِٻٜ، ‏«‏کٛو تٛ مِ حٛکِّي شٜيْدَ حٛورٜ اَمْ، کٛ مبِعَيْمِ طُمْ غٛونغَ، نغَمْ اٜ مِ اَنْدِ تٛ پِوٛيْمِ اٜ تٛ نجَحَيْمِ؞ اَمَّا اٛنٛنْ اٛنْ اَنْدَا تٛ پِوٛيْمِ اٜ تٛ نجَحَيْمِ؞ ¹⁵اٛنْ نغَطَ کِيتَ نٛ يِمْٻٜ دُونِيَارُ نغَطِرْتَ کِيتَ، مِنْ بٛو وَلَا مٛ نغَطَنْمِ کِيتَ؞ ¹⁶اَمَّا فُو اٜ نٛنْ تٛ مِ وَطِي کِيتَ، کِيتَ اَمْ طُمْ غٛونغَ، نغَمْ نَاع مِنْ تَنْ وَطَتَ کِيتَ کَنْ، اَمَّا مِنْ اٜ ݧَاکٛ اَمْ لِلٛيْطٛيَمْ وَطَتَکَ؞ ¹⁷ندٜرْ اَتَّوْرَ مٛوطٛنْ طُمْ وِنْدِ وِيکِي شٜيْدَ کَ يِمْٻٜ طِطٛ کٛکِّ اٜ کَ وٛودِ غٛونغَ؞ ¹⁸اٜ مِ حٛکَّ شٜيْدَ حٛورٜ اَمْ، ندٜنْ ݧَاکٛ اَمْ لِلٛيْطٛيَمْ مَا اٜ حٛکَّ شٜيْدَ اَمْ؞»‏

¹⁹ٻٜ مبِعِمٛ، ‏«‏تٛيٜ ݧَاکٛ مَاطَ اٛنْ وٛنِ؟»‏

يٜىٰسُ وِعِٻٜ، ‏«‏اٛنْ اَنْدَايَمْ، اٛنْ بٛو اَنْدَا ݧَاکٛ اَمْ؞ دَا اٛنْ اَنْدِيَمْ، دَا اٛنْ اَنْدِ ݧَاکٛ اَمْ مَا؞»‏

²⁰يٜىٰسُ مٜتِي حَالَ کَعَ شَرٜلْ کٛ اٛ اٜکِّتِنْتَ ندٜرْ وُرٛ شٜنِينغٛ حَادٜ اَکْوَاتِيجِ تٛ طُمْ رٜسَتَ دٛکّٜ نغَمْ اَللَّه؞ اَمَّا وَلَا نَنْغُطٛمٛ نغَمْ شَرٜلْ مَاکٛ وَطَايِ تَوْ؞

يٜىٰسُ مٜتِ دٛوْ مَيْدٜ مُوطُمْ

²¹سٜيْ يٜىٰسُ فُطِّتِ وِعِ يِمْٻٜ ٻٜنْ، ‏«‏مِ دِلَّيْ، اٛنْ طَٻِّتَيْيَمْ، اَمَّا اٛنْ مَايَيْ ندٜرْ حَکّٜ مٛوطٛنْ؞ تٛ نجَحَيْمِ بٛو، اٛنْ مبَاوَتَا يَاکِ؞»‏

²²طُعُمْ وَطِ اَرْدِيٻٜ يَحُودَنْکٛعٜنْ مبِعِ، ‏«‏اٛ وَرَيْ حٛورٜ مَاکٛ وٛنْ طٛنْ؟ کٛو کَنْجُمْ اٛ يِطِ وِيکِ ندٜ اٛ وِعِ، ‏‹‏تٛ نجَحَيْمِ اٛنْ مبَاوَتَا يَاکِ؟›‏ »‏

²³اَمَّا يٜىٰسُ وِعِٻٜ، ‏«‏اٛنٛنْ دَغَ دُونِيَارُ ندُعُ پِوٛيْطٛنْ، مِنْ بٛو دَغَ دٛوْ پِوٛيْمِ؞ اٛنٛنْ دُونِيَارُ جٜيِعٛنْ، مِنْ نَاع دُونِيَارُ جٜيِيَمْ؞ ²⁴مِ وِعِيعٛنْ اٛنْ مَايَيْ ندٜرْ حَکّٜ مٛوطٛنْ، غٛونغَ اٛنْ مَايَيْ ندٜرْ حَکّٜ مٛوطٛنْ سٜيْ نِ تٛ اٛنْ نجَٻِي مِنْ وٛنِ مٛ مبِيمِعٛنْ؞»‏

²⁵ٻٜ مبِعِمٛ، ‏«‏اَنْ اَ مٛيٜ؟»‏

يٜىٰسُ وِعِٻٜ، ‏«‏مِنْ وٛنِ اٛنْ طٛنْ مٛ مبِيمِعٛنْ دَغَ اَرَنْدٜ؞ ²⁶اٜ وٛودِ فِي طُطُّمْ طُمْ نغِطُمِ وِيکِ دٛوْ مٛوطٛنْ، کَدِنْ اٜ وٛودِ فِي طُطُّمْ طُمْ نغِطُمِ تَپَنْکِعٛنْ کِيتَ دٛوْ مَاجُمْ؞ اَمَّا اٛنْ طٛنْ لِلٛيْطٛيَمْ اٜ وٛودِ غٛونغَ؞ کٛ نَنْمِ تٛ مَاکٛ تَنْ مبِعَيْمِ دُونِيَارُ؞»‏

²⁷ٻٜ ڤَامَايِ يٜىٰسُ اٜ مٜتَنَٻٜ دٛوْ ݧَاکٛ مٛ دٛوْ؞ ²⁸سٜيْ يٜىٰسُ وِعِ، ‏«‏شَرٜلْ نغٜلْ پٜفْتُطٛنْ ٻِي نٜطّٛ، اٛنْ اَنْدَيْ مِنْ وٛنِ اٛنْ طٛنْ مٛ مبِعَيْمِ؞ کَدِنْ اٛنْ اَنْدَيْ فُو کٛ نغَطَيْمِ نَاع اٜ لَامُ اَمْ نغَطِرَيْمِطُمْ، اَمَّا کٛ ݧَاکٛ اَمْ اٜکِّتِنِيَمْ مبِعَيْمِ؞ ²⁹اٛنْ طٛنْ لِلٛيْطٛيَمْ اٜ وٛنْدِ اٜ اَمْ، اٛ اَلَايِيَمْ مِنْ تَنْ، نغَمْ کٛو ندٜيٜ اٜ مِ وَطَ کٛ وٜلْنَنْتَمٛ ٻٜرْندٜ؞»‏

³⁰شَرٜلْ نغٜلْ يٜىٰسُ وِعَتَ نٛنْ، طُطْٻٜ کٛولِيمٛ؞

غٛونغَ رِمْطِنَيْعٛنْ

³¹سٜيْ يٜىٰسُ وِعِ يَحُودَنْکٛعٜنْ کٛولِيٻٜمٛ، ‏«‏تٛ اٛنْ تٛکِّي اٜکِّتِنٛلْ اَمْ، اٛنْ تٛکُّٻٜيَمْ ٻٜ غٛونغَ؞ ³²ندٜنْ اٛنْ اَنْدَيْ غٛونغَ، غٛونغَ بٛو رِمْطِنَيْعٛنْ؞»‏

³³ٻٜ مبِعِمٛ، ‏«‏مِنْ تَانِرَاٻٜ اِبْرَاهِمْ، مِنْ مٜىٰطَايِ وَرْتُکِ مَشُّٻٜ غٛطّٛ؞ نٛ وَطَتَ مبِعَا، ‏‹‏طُمْ رِمْطِنَيْمِنْ؟›‏ »‏

³⁴يٜىٰسُ وِعِٻٜ، ‏«‏اٜ مِ وِعَعٛنْ غٛونغَ، کٛو مٛيٜ غَطٛووٛ حَکّٜ اٛ مَشُّطٛ حَکّٜ؞ ³⁵مَشُّطٛ جٛوطَتَاکٛ ندٜرْ وُرٛ حَا اَبَدَا، اَمَّا ٻِطّٛ وٛنِ جٛوطٛتٛوطٛ ندٜرْ مَاغٛ حَا اَبَدَا؞ ³⁶نغَمْ نٛنْ تٛ ٻِطّٛ اٛنْ رِمْطِنِيعٛنْ، اٛنْ کٜٻِي رِمْطِنٜىٰکِ کِ غٛونغَ؞ ³⁷اٜ مِ اَنْدِ اٛنْ تَانِرَاٻٜ اِبْرَاهِمْ، فُو اٜ نٛنْ اٛنْ طَٻِّتَ وَرْکِيَمْ، نغَمْ اٛنْ نجَٻَايِ اٜکِّتِنٛلْ اَمْ؞ ³⁸اٜ مِ وِعَعٛنْ کٛ نغِيمِ تٛ ݧَاکٛ اَمْ، اٛنٛنْ بٛو اٛنْ نغَطَ کٛ نَنْطٛنْ دَغَ تٛ ݧَاکٛ مٛوطٛنْ؞»‏

³⁹ٻٜ مبِعِمٛ، ‏«‏اِبْرَاهِمْ وٛنِ ݧَاکٛ اَمِنْ؞»‏

يٜىٰسُ وِعِٻٜ، ‏«‏دَا اٛنْ ٻِٻّٜ اِبْرَاهِمْ، اٛنْ نغَطَيْ کٛ اِبْرَاهِمْ وَطِ؞ ⁴⁰اَمَّا جٛونِ اٛنْ طَٻِّتَ وَرْکِيَمْ، مِنْ بِيطٛعٛنْ غٛونغَ کَ نَنْمِ دَغَ تٛ اَللَّه؞ طُعُمْ نَاع کَنْجُمْ اِبْرَاهِمْ وَطِ؞ ⁴¹اٛنْ نغَطَ کٛ ݧَاکٛ مٛوطٛنْ وَطِ؞»‏

ٻٜ مبِعِمٛ، ‏«‏مِنٛنْ نَاع مِنْ جَالُعٜنْ، اَللَّه وٛنِ ݧَاکٛ اَمِنْ، کَنْکٛ تَنْ وٛنِ ݧَاکٛ مٛ مِنْ نغٛودِ؞»‏

⁴²يٜىٰسُ وِعِٻٜ، ‏«‏دَا اَللَّه وٛنِ ݧَاکٛ مٛوطٛنْ، دَا اٛنْ نغِطَيْيَمْ، نغَمْ دَغَ تٛ مَاکٛ پِوٛيْمِ، جٛونِ بٛو اٜ مِ طٛعٛ؞ مِ وَرَايِ نغَمْ حٛورٜ اَمْ، اَمَّا کَنْکٛ لِلٛيِيَمْ؞ ⁴³نغَمْ طُمٜ اٛنْ ڤَامَايِ کٛ مبِيمِ؟ کَنْجُمْ وٛنِ نغَمْ اٛنْ مبَاوَتَا جَٻُکِ وٛلْدٜ اَمْ؞ ⁴⁴اٛنٛنْ اٛنْ ٻِٻّٜ ݧَاکٛ مٛوطٛنْ شٜيْطَنْ، کٛ نغِطّٛنْ وٛنِ نغَطٛنْ کٛ ݧَاکٛ مٛوطٛنْ يِطِ؞ دَغَ اَرَنْدٜ اٛ غَطٛووٛ وَرْحٛورٜ؞ وَلَا کٛ وَنِّمٛ اٜ غٛونغَ، نغَمْ اٛ وَلَا غٛونغَ؞ تٛ اٛ فٜوِي، طُمْ نغِکُّ مَاکٛ، نغَمْ اٛ ڤٜوٛووٛ، ݧَاکٛ فٜوْرٜ؞ ⁴⁵اَمَّا نغَمْ مِ وِعِ غٛونغَ، اٛنْ کٛولَاکِيَمْ؞ ⁴⁶مٛيٜ ندٜرْ مٛوطٛنْ وَاوَتَ تَبِّتِنْکِ مِ وَطِي حَکّٜ؟ تٛ نِ غٛونغَ مبِعَيْمِ، نغَمْ طُمٜ اٛنْ کٛولَتَاکٛيَمْ؟ ⁴⁷کٛو مٛيٜ مٛ اَللَّه جٜيِ اٜ نَنَ کٛ اَللَّه وِعِ؞ کٛ حَطِعٛنْ نَنْکِ کٛ مبِيمِ وٛنِ اٛنٛنْ نَاع طُمْ ٻٜ اَللَّه؞»‏

يٜىٰسُ اٜ اِبْرَاهِمْ

⁴⁸مَوْٻٜ يَحُودَنْکٛعٜنْ نٛوتِي مبِعِمٛ، ‏«‏نَاع طُمْ غٛونغَ مِنْ مبِعِ ندٜ مِنْ مبِعِ اَ سَمَارِيَنْکٜىٰجٛ ندٜنْ اَ وٛودِ غِنّٛلْ؟»‏

⁴⁹يٜىٰسُ وِعِٻٜ، ‏«‏مِ وَلَا غِنّٛلْ، اَمَّا ݧَاکٛ اَمْ کٛکَّيْمِ مَنْغُ، اٛنٛنْ بٛو اٛنْ نجَوَنَيَمْ؞ ⁵⁰مِ طَٻِّتَنْتَا حٛورٜ اَمْ تٜدُّنغَلْ، اَمَّا اٜ وٛودِ غٛطّٛ طَٻِّتَنَيْطٛيَمْنغَلْ، کَنْکٛ وٛنِ غَطَيْطٛ کِيتَ؞ ⁵¹اٜ مِ وِعَعٛنْ غٛونغَ، فُو غَطٛووٛ کٛ مبِيمِ، اٛ مَايَتَا؞»‏

⁵²يَحُودَنْکٛعٜنْ مبِعِمٛ، ‏«‏جٛونِ اٜ مِنْ اَنْدِ اَ وٛودِ غِنّٛلْ؞ اِبْرَاهِمْ مَايِي، نٛنْ مَا اَنَّبٛعٜنْ، اَمَّا اَ وِعِي فُو غَطٛووٛ کٛ مبِيطَا مَايَتَا؞ ⁵³اَ ٻُرِي ݧَاکٛ اَمِنْ اِبْرَاهِمْ؟ اٛ مَايِي، نٛنْ مَا اَنَّبٛعٜنْ حٛرِيٻٜ مَايِي؞ مٛيٜ ݧُمَتَا غٛنْطَا؟»‏

⁵⁴يٜىٰسُ نٛوتِي وِعِ، ‏«‏تٛ مِ تٜدِّنِي حٛورٜ اَمْ، تٜدُّنغَلْ اَمْ وَرْتِي مٜىٰرٜ؞ ݧَاکٛ اَمْ مٛ مبِعٛتٛنْ وٛنِ اَللَّه مٛوطٛنْ، کَنْکٛ وٛنِ تٜدِّنْطٛيَمْ؞ ⁵⁵کٛو ندٜ اٛنْ اَنْدَامٛ، اَمَّا مِنْ اٜ مِ اَنْدِمٛ؞ دَا مِ وِعِينٛعٛنْ مِ اَنْدَامٛ، دَا مِ وَرْتِي ڤٜوٛووٛ بٛ مٛوطٛنْ؞ اَمَّا اٜ مِ اَنْدِمٛ، اٜ مِ تٛکَّ وٛلْدٜ مَاکٛ؞ ⁵⁶ݧَاکٛ مٛوطٛنْ اِبْرَاهِمْ اٜ وٜلْوٜلْتَ تٛ اٛ ݧُمِي دٛوْ ݧَلْندٜ ندٜ نغَرَيْمِ؞ اٛ يِعِيندٜ، اٛ بٛو نَنِي بٜلْطُمْ؞»‏

⁵⁷ٻٜ مبِعِمٛ، ‏«‏اَ حٜوْتَايِ دُوٻِ 50 تَوْ، اَمَّا اَ وِعَ اَ يِعِي اِبْرَاهِمْ؟»‏

⁵⁸يٜىٰسُ وِعِٻٜ، ‏«‏اٜ مِ وِعَعٛنْ غٛونغَ، کٛ اِبْرَاهِمْ دَݧٜىٰ اٜ مِ طٛنْ؞»‏

⁵⁹ندٜ اٛ وِعِ نٛنْ، سٜيْ ٻٜ کٛشِّ کَاپٜ نغَمْ ٻٜ کُبٛومٛ، اَمَّا يٜىٰسُ سُوطِ حٛورٜ مُوطُمْ، وُرْتِي ندٜرْ وُرٛ شٜنِينغٛ نغٛنْ دِلِّ؞

يٜىٰسُ يَمْطِتِنِي نٜطّٛ دَݧَاطٛ اٜ وُمِ

¹يٜىٰسُ اٜ ندٜرْ يَادُ، سٜيْ اٛ يِعِ نٜطّٛ دَݧَاطٛ اٜ وُمِ؞ ²تٛکُّٻٜمٛ پَمِمٛ مبِعِ، ‏«‏مٛودِبّٛ، حَکّٜ مٛيٜ وَطِ طُمْ دَݧِ نٜطّٛ اٛعٛ اٜ وُمِ؟ طُمْ حَکّٜ مَاکٛ کٛو حَکّٜ دَݧٛوٻٜ مَاکٛ؟»‏

³يٜىٰسُ وِعِ، ‏«‏نَاع نغَمْ حَکّٜ نٜطّٛ اٛعٛ کٛو نغَمْ حَکّٜ دَݧٛوٻٜ مَاکٛ وَطِ اٛ دَݧَا بُمْطٛ؞ اٛ دَݧَا اٜ مٛ وُمِ نغَمْ طُمْ حٛلَّ بَوْطٜ اَللَّه دٛوْ مَاکٛ؞ ⁴دٛولٜ کُوٜنْ کُوطٜ اٛنْ طٛنْ لِلٛيْطٛيَمْ دَغَ نَانغٜ اٜ طٛنْ؞ جٜمَّ ٻَدَکٜ؞ اٜ شَرٜلْ نغٜلْ وَلَا بَاوَيْطٛ حُوَ؞ ⁵تٛ نِ اٜ مِ دُونِيَارُ، مِنْ وٛنِ جَيْنغٛلْ دُونِيَارُ؞»‏

⁶غَطَ يٜىٰسُ وِعِي نٛنْ، سٜيْ اٛ تُوتِ جٛودٜ اٜ لٜيْدِ، اٛ جِيٻِرِ لٜيْدِ ندِنْ اٜ مَاجٜ، اٛ حٛشِّندِ، اٛ مٛيْتَنِ نٜطّٛ اٛنْ تٛ غِتٜ؞ ⁷اٛ وِعِمٛ، ‏«‏دِلُّ، شُلْمٛطَا تٛ نجٛنْغَ بِعٜتٜىٰنغَ سِلُوَمْ؞»‏ مَعَنَ سِلُوَمْ وٛنِ ‏«‏لِلَاطٛ؞»‏ سٜيْ نٜطّٛ اٛنْ يَحِ سُلْمِي، وَرْتِ اٜ يِعَ؞

⁸کٜدُّٻٜ اٜ مَاکٛ اٜ وٛووُٻٜ يِيکِمٛ اٜ مٛ تٛرٛو ندٜنّٛ مبِعِ، ‏«‏نَاع طُمْ نٜطّٛ اٛعٛ وٛنِ جٛوطٛتٛنٛوطٛ اٜ تٛرٛو؟»‏

⁹وٛٻّٜ مبِعِ، ‏«‏طُمْ کَنْکٛ؞»‏ وٛٻّٜ بٛو مبِعِ، ‏«‏نَاع طُمْ کَنْکٛ، طُمْ نَنْدُطٛ اٜ مَاکٛ؞»‏

اَمَّا نٜطّٛ اٛنْ وِعِ، ‏«‏طُمْ مِنْ؞»‏

¹⁰ٻٜ مبِعِمٛ، ‏«‏نٛ طُمْ وَطِ جٛونِ اَ يِعَ؟»‏

¹¹اٛ وِعِٻٜ، ‏«‏نٜطّٛ بِعٜتٜىٰطٛ يٜىٰسُ جِيٻِ لٜيْدِ مٛيْتَنِيَمْ تٛ غِتٜ، وِعِيَمْ مِ يَحَ نجٛنْغَ سِلُوَمْ مِ سُلْمٛو؞ سٜيْ نجَحُمِ، شُلْمِيمِ سٜيْ مبُمْتُمِ؞»‏

¹²ٻٜ پَمِمٛ ٻٜ مبِعِ، ‏«‏تٛ نٜطّٛ اٛعٛ وٛنِ؟»‏

اٛ وِعِٻٜ، ‏«‏مِ اَنْدَا؞»‏

فَارِسَنْکٛعٜنْ پَمِي نٛ بُمْطٛ اٛنْ وُمْتِرِ

¹³سٜيْ ٻٜ نجَارِ بُمْتُطٛ اٛنْ تٛ فَارِسَنْکٛعٜنْ؞ ¹⁴تٛو، ݧَلْندٜ ندٜ يٜىٰسُ جِيٻِ لٜيْدِ وُمْتِنِ بُمْطٛ اٛنْ طُمْ ݧَلْندٜ سِوْتَارٜ؞ ¹⁵فَارِسَنْکٛعٜنْ ٻٜنْ مَا ڤُطِّ پَمُکِ نٜطّٛ اٛنْ نٛ اٛ وُمْتِرِ، اٛ وِعِٻٜ، ‏«‏اٛ وَطُ لٜيْدِ تٛ غِتٜ اَمْ، شُلْمِيمِ، جٛونِ اٜ مِ يِعَ؞»‏

¹⁶وٛٻّٜ ندٜرْ فَارِسَنْکٛعٜنْ ٻٜنْ مبِعِ، ‏«‏نٜطّٛ غَطُطٛ فِي طُعُمْ نَاع دَغَ تٛ اَللَّه اٛ پِوٛيِ، نغَمْ اٛ تٛکَّايِ دٛوکَ ݧَلْندٜ سِوْتَارٜ؞»‏

وٛٻّٜ بٛو مبِعِ، ‏«‏نٛ وَطَتَ نٜطّٛ غَطٛووٛ حَکّٜ وَاوَ وَطُکِ اِرِ کَيْطِنِيطُمْ طُعُمْ؟»‏ نغَمْ نٛنْ، فٜىٰرٛوتِرٛلْ نَتِّ حَکُّندٜ مَٻّٜ؞

¹⁷نغَمْ نٛنْ، ٻٜ ڤُطِّتِ ٻٜ پَمِ نٜطّٛ اٛنْ ٻٜ مبِعِ، ‏«‏طُمٜ مبِعَتَا دٛوْ مَاکٛ، ندٜ اَنْ اٛ وُمْتِنِ؟»‏

نٜطّٛ اٛنْ وِعِ، ‏«‏اٛ اَنَّبِيجٛ؞»‏

¹⁸اَرْدِيٻٜ يَحُودَنْکٛعٜنْ نجَٻَايِ نٜطّٛ اٛنْ ندٜنّٛ اٛ بُمْطٛ جٛونِ بٛو اٜ مٛ يِعَ، نَاکِ ٻٜ نٛدِّ دَݧٛوٻٜ مَاکٛ، ¹⁹ٻٜ پَمِٻٜ ٻٜ مبِعِ، ‏«‏اٛعٛ طُمْ ٻِطّٛ مٛوطٛنْ مٛ مبِيطٛنْ دَݧَامَ اٜ وُمِ؟ نٛ وَطِ جٛونِ اٜ مٛ يِعَ؟»‏

²⁰دَݧٛوٻٜ نٜطّٛ اٛنْ مبِعِ، ‏«‏اٜ مِنْ اَنْدِ اٛ ٻِطّٛ اَمِنْ، کَدِنْ مَا اٛ دَݧَامَ اٜ مٛ وُمِ؞ ²¹اَمَّا مِنْ اَنْدَا نٛ وَطِ جٛونِ اٜ مٛ يِعَ، نٛنْ مَا مِنْ اَنْدَا مٛيٜ وُمْتِنِمٛ؞ پَمٜىٰمٛ، نَاع اٛ سُکَ، اٛ وِعَيْعٛنْ کَ اٜ حٛورٜ مَاکٛ؞»‏ ²²دَݧٛوٻٜ نٜطّٛ اٛنْ مبِعِي نٛنْ نغَمْ اٜ ٻٜ کُلَ اَرْدِيٻٜ يَحُودَنْکٛعٜنْ؞ نغَمْ اَرْدِيٻٜ يَحُودَنْکٛعٜنْ ٻٜنْ نجَادَکٜ شِرْيَکٜ وِيکِ کٛو مٛيٜ بِيطٛ يٜىٰسُ وٛنِ اَلْمَسِيحُ طُمْ رِيوَيْمٛ دَغَ ندٜرْ لٜݧٛلْ؞ ²³کَنْجُمْ وَطِ دَݧٛوٻٜ بُمْتِنَاطٛ اٛنْ مبِعِ، ‏«‏نَاع اٛ سُکَ، پَمٜىٰمٛ؞»‏

²⁴سٜيْ اَرْدِيٻٜ ٻٜنْ نٛدِّتِي بُمْتِنَاطٛ اٛنْ، ٻٜ مبِعِمٛ، ‏«‏وِعُ غٛونغَ نغَمْ تٜدِّنَا اَللَّه؞ اٜ مِنْ اَنْدِ نٜطّٛ جَمْطِتِنْطٛمَ اٛ غَطٛووٛ حَکّٜ؞»‏

²⁵بُمْتِنَاطٛ اٛنْ وِعِٻٜ، ‏«‏کٛو اٛ غَطٛووٛ حَکّٜ مِ اَنْدَا، فِي غٛعٛ طُمْ اَنْدُمِ وٛنِ ندٜنّٛ مِ بُمْطٛ، جٛونِ بٛو اٜ مِ يِعَ؞»‏

²⁶ٻٜ مبِعِمٛ، ‏«‏طُمٜ اٛ وَطَنْمَا؟ نٛ اٛ مَٻِّتِرِ غِتٜ مَاطَ؟»‏

²⁷نٜطّٛ اٛنْ وِعِٻٜ، ‏«‏مِ يَادَکٜ مِ وِعِيعٛنْکَ اٛنْ نجَٻَايِ؞ نغَمْ طُمٜ نغِطّٛنْ نَنْکِکَ کَدِنْ؟ کٛو اٛنٛنْ مَا اٛنْ نغِطِ وَرْتُکِ تٛکُّٻٜمٛ؟»‏

²⁸سٜيْ ٻٜ کُطِمٛ ٻٜ مبِعِ، ‏«‏اَنْ وٛنِ تٛکُّطٛمٛ، اَمَّا مِنٛنْ مِنْ تٛکُّٻٜ مُوسَ!‏ ²⁹اٜ مِنْ اَنْدِ اَللَّه مٜتَنِي مُوسَ، اَمَّا نٜطّٛ اٛعٛ مِنْ اَنْدَا تٛ اٛ پِوٛيِ؞»‏

³⁰نٜطّٛ اٛنْ وِعِٻٜ، ‏«‏طُعُمْ طُمْ فِي کَيْطِنِيطُمْ!‏ اٛنْ اَنْدَا تٛ اٛ پِوٛيِ، اَمَّا اٛ وُمْتِنِييَمْ؞ ³¹اٜنْ اَنْدِ اَللَّه نَنَتَا دٛعَارٜ غَطٛوٻٜ حَکّٜ، اَمَّا اٜ مٛ نَنَ دٛعَارٜ کُلٛووٛمٛ غَطٛووٛ کٛ اٛ يِطِ؞ ³²دَغَ دُونِيَارُ تَغَا وَلَا مٜىٰطُطٛ نَنُکِ غٛطّٛ وُمْتِنِي نٜطّٛ دَݧَاطٛ اٜ وُمِ؞ ³³دَا نٜطّٛ اٛعٛ نَاع تٛ اَللَّه اٛ پِوٛيِ، دَا اٛ وَاوَتَا اٛ وَطَ غٛطُّمْ؞»‏

³⁴ٻٜ مبِعِمٛ، ‏«‏اَ دَݧَامَ ندٜرْ حَکّٜ اَ مَوْنِي ندٜرْ حَکّٜ، نٛ وَطَتَ اٜکِّتِنَامِنْ؟»‏ سٜيْ ٻٜ ندِيوِمٛ؞

وُمَنْکِ کٛ اَللَّه يِطِ

³⁵يٜىٰسُ نَنِ ٻٜ ندِيوِي نٜطّٛ اٛنْ؞ ندٜ اٛ تَوِ نٜطّٛ اٛنْ، اٛ پَمِمٛ اٛ وِعِ، ‏«‏اَ حٛولَکٜ ٻِي نٜطّٛ؟»‏

³⁶نٜطّٛ اٛنْ وِعِ، ‏«‏مٛودِبّٛ، مٛيٜ وٛنِ ٻِي نٜطّٛ؟ وِعَمْکَ نغَمْ مِ حٛولٛومٛ؞»‏

³⁷يٜىٰسُ وِعِمٛ، ‏«‏اَ يِعِيمٛ، کَنْکٛ وٛنِ مٜدّٛووٛ اٜ مَاطَ؞»‏

³⁸نٜطّٛ اٛنْ وِعِ، ‏«‏مٛودِبّٛ، مِ حٛولَکٜمَ؞»‏ اٛ دِشِّي يٜىٰسٛ يٜىٰسُ، اٛ مَوْنِنِمٛ؞

³⁹يٜىٰسُ وِعِ، ‏«‏مِ وَرٛيِي دُونِيَارُ ندُعُ نغَمْ وَطُکِ کِيتَ، نغَمْ وُمْٻٜ نغِعَ ندٜنْ غِعٛوٻٜ بٛو نغَرْتَ وُمْٻٜ؞»‏

⁴⁰ندٜ وٛٻّٜ فَارِسَنْکٛعٜنْ غٛنْٻٜ حَادٜ يٜىٰسُ نَنِ اٛ وِعِ طُعُمْ، ٻٜ مبِعِمٛ، ‏«‏مِنٛنْ مَا مِنْ وُمْٻٜ؟»‏

⁴¹يٜىٰسُ وِعِٻٜ، ‏«‏دَا اٛنْ وُمْٻٜ، دَا اٛنْ تَپَنْتَاکٜ کِيتَ کٛو ندٜ اٛنْ نغَطِي حَکّٜ؞ اَمَّا جٛونِ ندٜ مبِعٛتٛنْ اٛنْ نغِعَ، طُمْ تَپَنَيْعٛنْ کِيتَ نغَمْ حَکّٜ مٛوطٛنْ؞»‏

مِسَالُ دٛوْ غَيْنَاکٛ اٜ بَالِ مَاکٛ

¹يٜىٰسُ وِعِ، ‏«‏اٜ مِ وِعَعٛنْ غٛونغَ، کٛو مٛيٜ مٛ نَتِّرَايِ حٛغّٛ بَالِ دَمُّغَلْ، اَمَّا اٛ پٜنْتِ حٛغّٛ نغٛنْ اٛ نَتِّ، اٛ غُجّٛ اٛ تٜىٰتٛووٛ؞ ²نَتِّرْطٛ حٛغّٛ بَالِ دَمُّغَلْ مَاغٛ، کَنْکٛ وٛنِ غَيْنَاکٛ بَالِ طِنْ؞ ³دٜىٰنٛووٛ دَمُّغَلْ حٛغّٛ نغٛنْ مَٻِّتَنَيْمٛ دَمُّغَلْ، بَالِ طِنْ بٛو اٜ اَنْدِ حٛنٛنْدٜ مَاکٛ؞ اٜ مٛ نٛدِّرَطِ اِنْطٜ مَاجِ، اٛ اَرْدٛوطِ طِ مبُرْتٛو؞ ⁴تٛ اٛ وُرْتِنِي فُو بَالِ مَاکٛ، اٛ اَرْدٛتٛطِ، طِ تٛکَّيْمٛ، نغَمْ اٜ طِ اَنْدِ حٛنٛنْدٜ مَاکٛ؞ ⁵اَمَّا طِ تٛکَّتَا کٛطٛ، طِ ندٛغَّيْمٛ، نغَمْ طِ اَنْدَا حٛنٛنْدٜ کٛطٛ؞»‏

⁶يٜىٰسُ حٛکِّ يِمْٻٜ مِسَالُ طُعُمْ، اَمَّا ٻٜ ڤَامَايِ کٛ اٛ وِعَتَٻٜ؞

يٜىٰسُ وٛنِ غَيْنَاکٛ بٛطّٛ

⁷نغَمْ نٛنْ يٜىٰسُ فُطِّتِ وِعِٻٜ، ‏«‏اٜ مِ وِعَعٛنْ غٛونغَ، مِنْ وٛنِ دَمُّغَلْ بَالِ؞ ⁸فُو اَرْتُٻٜيَمْ وَرْکِ ٻٜ وُيْٻٜ ٻٜ تٜىٰتٛوٻٜ، بَالِ طِنْ بٛو کٜتِّندَنَاکِٻٜ؞ ⁹مِنْ وٛنِ دَمُّغَلْ؞ فُو تٛکِّرْطٛ تٛ اَمْ نَتِّ حِسَيْ، اٛ نَتَّيْ، اٛ وُرْتٛو، اٛ حٜٻَ کٛ اٛ مَرٛرْتٛو؞ ¹⁰غُجّٛ وَرَيْ تَنْ نغَمْ وُجَّ، وَطَ وَرْحٛورٜ، حَلْکَ؞ مِنْ بٛو مِ وَرٛيِ نغَمْ تٛکِّرْٻٜ تٛ اَمْ کٜٻَ يٛنْکِ، ٻٜ کٜٻَکِ کٜىٰوُکِ؞

¹¹‏«‏مِنْ وٛنِ غَيْنَاکٛ بٛطّٛ؞ غَيْنَاکٛ بٛطّٛ اٜ حٛکَّ يٛنْکِ مُوطُمْ نغَمْ بَالِ مُوطُمْ؞ ¹²نٜطّٛ کٛشَّاطٛ دُرْنغٛلْ نَاع اٛ جٜيْطٛ بَالِ طِنْ؞ تٛ اٛ يِعِي شَافَاندُ اٜ وَرَ، اٛ اَلَيْ بَالِ طِنْ اٛ دٛغَّ؞ شَافَاندُ ندُنْ نَنْغَطِ سَنْکِتَطِ؞ ¹³اٛ دٛغَّيْ نغَمْ اٛ کٛشَّاطٛ دُرْنغٛلْ، وَلَا کٛ وَنِّمٛ اٜ بَالِ طِنْ؞ ¹⁴مِنْ وٛنِ غَيْنَاکٛ بٛطّٛ؞ اٜ مِ اَنْدِ بَالِ اَمْ، ندٜنْ بَالِ اَمْ اٜ اَنْدِيَمْ، ¹⁵نٛنْ نٛ ݧَاکٛ اَمْ اَنْدِرِيَمْ، اٜ نٛ اَنْدِرْمٛومِ؞ مِ حٛکِّي يٛنْکِ اَمْ نغَمْ بَالِ طِنْ؞ ¹⁶اٜ مِ وٛودِ غٛطِّ بَالِ طِ نغَلَا ندٜرْ حٛغّٛ نغٛعٛ؞ دٛولٜ مِ وَدَّطِ کَنْجِ مَا؞ طِ کٜتِّندَنْتٛ حٛنٛنْدٜ اَمْ؞ نغَمْ نٛنْ طِ نغَرْتَيْ اٛرْندٜ غٛعٛ، غَيْنَاکٛ غٛعٛ؞

¹⁷‏«‏کٛ وَطِ ݧَاکٛ اَمْ مٛ دٛوْ اٜ يِطِيَمْ، کَنْجُمْ وٛنِ مِ حٛکَّيْ يٛنْکِ اَمْ، نغَمْ مِ فُطِّتَ مِ حٛشَّکِ کَدِنْ؞ ¹⁸وَلَا اِتَّنٛووٛيَمْ يٛنْکِ؞ مِنْ اٜ حٛورٜ اَمْ حٛکَّتَکِ؞ اٜ مِ وٛودِ بَوْطٜ حٛکُّکِکِ، ندٜنْ اٜ مِ وٛودِ بَوْطٜ مِ وَرْتِرَکِ؞ طُعُمْ کَنْجُمْ ݧَاکٛ اَمْ وِعِيَمْ مِ وَطَ؞»‏

¹⁹سٜيْ فٜىٰرٛوتِرٛلْ فُطِّتِ نَتِّ حَکُّندٜ يَحُودَنْکٛعٜنْ نغَمْ حَالَ کَعَ؞ ²⁰طُطْٻٜ ندٜرْ مَٻّٜ مبِعِ، ‏«‏اٜ مٛ وٛودِ غِنّٛلْ، اٛ کَاݝَاطٛ؞ نغَمْ طُمٜ کٜتِّندَنْتٛوطٛنْمٛ؟»‏

²¹وٛٻّٜ بٛو مبِعِ، ‏«‏کَعَ حَالَ نَاع طُمْ کَ نٜطّٛ غٛودُطٛ غِنّٛلْ؞ نٛ وَطَتَ غِنّٛلْ وَاوَ وُمْتِنْکِ بُمْطٛ؟»‏

يٜىٰسُ وَݧَامَ

²²تٛو، طُمْ شَرٜلْ ڤٜىٰوٛلْ، اٜ طُمْ وَطَ حُمْتٛ لَاٻِنْکِ وُرٛ شٜنِينغٛ ندٜرْ اُرُشَلِيمَ؞ ²³يٜىٰسُ اٜ وٛوسٛو ندٜرْ رُمْڤَارُ سُلٜيْمَانُ ندٜرْ وُرٛ شٜنِينغٛ نغٛنْ؞ ²⁴سٜيْ يَحُودَنْکٛعٜنْ کَوْرِتِ ڤِلِيمٛ مبِعِمٛ، ‏«‏حَا ندٜيٜ اَلَتَامِنْ ندٜرْ سٜکٛ؟ تٛ اَنْ وٛنِ اَلْمَسِيحُ وِعُمِنْکَ اٜ نجَيْرِ؞»‏

²⁵يٜىٰسُ وِعِٻٜ، ‏«‏مِ وِعِيعٛنْکَ، اَمَّا اٛنْ کٛولَاکِيَمْ؞ کُوطٜ کَيْطِنِيطٜ طٜ نغَطَيْمِ ندٜرْ اِنْدٜ ݧَاکٛ اَمْ، اٜ طٜ کٛلَّ مِنْ طُمْ مٛيٜ، ²⁶اَمَّا اٛنْ کٛولَاکِيَمْ، نغَمْ اٛنٛنْ نَاع اٛنْ بَالِ اَمْ؞ ²⁷بَالِ اَمْ اٜ کٜتِّندَنٛويَمْ؞ اٜ مِ اَنْدِطِ، ندٜنْ اٜ طِ تٛکَّيَمْ؞ ²⁸مِ حٛکِّيطِ يٛنْکِ کِ رٜعَتَا، طِ کَلْکَتَا حَا اَبَدَا، ندٜنْ وَلَا تٜىٰتَيْطٛطِ دَغَ جُنْغٛ اَمْ؞ ²⁹ݧَاکٛ اَمْ کٛکُّطٛيَمْ بَالِ طِنْ، اٛ ٻُرِي کٛو طُمٜ بَوْطٜ، ندٜنْ وَلَا بَاوَيْطٛ تٜىٰتَطِ دَغَ جُنْغٛ مَاکٛ؞ ³⁰مِنْ اٜ ݧَاکٛ مٛ دٛوْ مِنْ غٛعٛ؞»‏

³¹سٜيْ يَحُودَنْکٛعٜنْ ڤُطِّتِ کٛشِّ کَاپٜ نغَمْ کُبٛومٛ مبَرَمٛ؞ ³²يٜىٰسُ وِعِٻٜ، ‏«‏مِ حٛلِّيعٛنْ کُوطٜ بٛطّٜ طُطّٜ طٜ ݧَاکٛ مٛ دٛوْ حٛکِّيَمْ مِ وَطَ؞ نغَمْ نغَلٜ ندٜرْ مَاجٜ نغِطّٛنْ حُبٛرَاکِيَمْ کَاپٜ؟»‏

³³ٻٜ مبِعِ يٜىٰسُ، ‏«‏نَاع نغَمْ کُوطٜ بٛطّٜ طٜ نغَطُطَا مِنْ کُبٛتٛمَا، اَمَّا نغَمْ حُطُکِ اَللَّه؞ نغَمْ اَنْ اَ نٜطّٛ تَنْ، اَمَّا اَ وَرْتِرَ حٛورٜ مَاطَ اَللَّه؞»‏

³⁴يٜىٰسُ وِعِٻٜ، ‏«‏نَاع طُمْ وِنْدَامَ ندٜرْ اَتَّوْرَ مٛوطٛنْ، ‏‹‏مِ وِعِيعٛنْ، اٛنٛنْ اٛنْ اَلَّاجِ؟›‏ ³⁵دٜفْتٜرٜ شٜنِيندٜ طُمْ غٛونغَ حَا اَبَدَا، ندٜنْ اَللَّه نٛدِّرِي نَنْٻٜ وٛلْدٜ مُوطُمْ اَلَّاجِ، يِمْٻٜ کٛکَّاٻٜ وٛلْدٜ مَاکٛ؞ ³⁶تٛ طُمْ نٛنْ، مِنْ مٛ ݧَاکٛ مٛ دٛوْ سُٻِ نغَمْ کُوغَلْ مَاکٛ لِلٛيِيَمْ ندٜرْ دُونِيَارُ، مِ حُطِي اَللَّه وٛنْ طٛنْ ندٜ مبِيمِ، ‏‹‏مِنْ مِ ٻِطّٛ اَللَّه؟›‏ ³⁷تٛ نَاع کُوطٜ ݧَاکٛ اَمْ نغَطَيْمِ، تٛع اٛنْ کٛولَيَمْ؞ ³⁸اَمَّا تٛ اٜ مِ وَطَ کُوطٜ مَاکٛ، کٛو تٛ اٛنْ کٛولَاکِيَمْ، کٛولٜىٰ کُوطٜ طٜنْ، نغَمْ اَنْدٛنْ ڤَامٛنْ ݧَاکٛ مٛ دٛوْ اٜ ندٜرْ اَمْ، مِنْ مَا اٜ مِ ندٜرْ مَاکٛ؞»‏

³⁹ٻٜ ڤُطِّتِ ٻٜ ندَرْوِ نَنْغُکِمٛ، اَمَّا اٛ وُرْتِي جُوطٜ مَٻّٜ اٛ دَطِ؞

⁴⁰سٜيْ يٜىٰسُ دِلِّ حُولِ شَانغٛلْ اُرْدُنْ، وِغٜىٰرٜ تٛ يَحَيَ وَطَيْنٛ بَڤْتِسْمَ، اٛ جٛوطِي طٛنْ؞ ⁴¹يِمْٻٜ طُطْٻٜ نغَرِ تٛ مَاکٛ، اٜ ٻٜ مبِعَ، ‏«‏يَحَيَ وَطَايِ غٛطُّمْ کَيْطِنِيطُمْ، اَمَّا کٛو طُمٜ طُمْ اٛ وِعِ دٛوْ نٜطّٛ اٛعٛ طُمْ غٛونغَ؞»‏ ⁴²يِمْٻٜ طُطْٻٜ کٛولِي يٜىٰسُ طٛنْ؞

مَيْدٜ لِعَاجَرُ

¹غٛطّٛ نٜطّٛ بِعٜتٜىٰطٛ لِعَاجَرُ شِيَ نجَمُ نَنْغِمٛ؞ غَرِيرِ بٜتَنِ اٛ جٛوطٛتٛو، غَرِيرِ ندِ مَرْيَامَ اٜ مَوْنِرَاوٛ مُوطُمْ مَرْتَ نجٛوطٛتٛو؞ ²مَرْيَامَ اٛعٛ، کَنْکٛ وَيْلَنِ کٛيْطٜ يٜىٰسُ نٜبَّمْ اُرٛوجَمْ اٛ مٛيْتِرِطٜ غَاسَ حٛورٜ مَاکٛ؞ لِعَاجَرُ مٛ يَمْطَا اٛنْ، اٛ سَکِرَاوٛ مَاکٛ؞ ³سٜيْ مَرْيَامَ اٜ سَکِرَاوٛ مُوطُمْ مَرْتَ ٻٜ لِلَنِ يٜىٰسُ ٻٜ مبِعِ، ‏«‏مٛودِبّٛ، حِغٛ مَاطَ مٛ نغِطَّا يَمْطَا؞»‏

⁴اَمَّا ندٜ يٜىٰسُ نَنِ نٛنْ، اٛ وِعِ، ‏«‏طُعُمْ ݧَوُ طُمْ نَنْغُ لِعَاجَرُ نَاع نغَمْ اٛ مَايَ، اٛ ݧَوُ نغَمْ طُمْ تٜدِّنَ اَللَّه، طُمْ وَرْتَ لَاوٛلْ نٛ ٻِطّٛ اَللَّه تٜدِّنِرْتٜىٰ؞»‏

⁵يٜىٰسُ اٜ يِطِ مَرْتَ اٜ مَرْيَامَ اٜ لِعَاجَرُ؞ ⁶فُو اٜ نٛنْ ندٜ اٛ نَنِ لِعَاجَرُ يَمْطَا، سٜيْ اٛ ٻٜيْدِ وَطُکِ بَلْطٜ طِطِ تٛ اٛ وٛنِ؞ ⁷غَطَ مَاجُمْ اٛ وِعِ تٛکُّٻٜمٛ، ‏«‏اٜنْ شٛعّٛ لٜيْدِ يَحُودِيَ؞»‏

⁸تٛکُّٻٜمٛ مبِعِمٛ، ‏«‏مٛودِبّٛ، نَاع کٛ نٜىٰٻِ يَحُودَنْکٛعٜنْ اٜ نغِطُنٛو حُبٛرَاکِمَ کَاپٜ مبَرُمَا، فُو اٜ نٛنْ اَ يِطِ سٛعَّاکِ تٛنْ؟»‏

⁹يٜىٰسُ وِعِٻٜ، ‏«‏نَاع ݧَلْندٜ غٛعٛ اٜ وٛودِ اَوَاجِ سَڤّٛ اٜ طِطِ؟ کٛو مٛيٜ جَحٛووٛ ݧَلَوْمَ فٜغَّتَاکٛ نغَمْ اٜ مٛ يِعِرَ جَيْنغٛلْ دُونِيَارُ ندُعُ؞ ¹⁰اَمَّا فُو جَحٛووٛ ندٜرْ ݧِوْرٜ اٛ فٜغّٛتٛ، نغَمْ اٛ وَلَا جَيْنغٛلْ ندٜرْ مَاکٛ؞»‏ ¹¹غَطَ يٜىٰسُ وِعِي نٛنْ، سٜيْ اٛ ٻٜيْدِ وِيکِ، ‏«‏حِغٛ مٜىٰطٜنْ لِعَاجَرُ طَانَکٜ، اَمَّا مِ يَحَيْ مِ فِنْدِنَمٛ؞»‏

¹²تٛکُّٻٜمٛ مبِعِمٛ، ‏«‏مٛودِبّٛ، تٛ نِ اٛ طَانِ، اٛ يَمْطِتَيْ؞»‏

¹³کٛ يٜىٰسُ وِعَتَ وٛنِ لِعَاجَرُ مَايِي، اَمَّا کَمْٻٜ اٜ ٻٜ ݧُمَ کٛ يٜىٰسُ وِعَتَ وٛنِ اٜ مٛ طَانِي نغَمْ اٛ سِوْتٛو؞ ¹⁴سٜيْ يٜىٰسُ وِعِٻٜ اٜ نجَيْرِ، ‏«‏لِعَاجَرُ مَايِي؞ ¹⁵اَمَّا مِ نَنِي بٜلْطُمْ مِ وَلَا تٛنْ، نغَمْ کٛولٛوطٛنْيَمْ؞ اَمَّا اٜنْ نجَحُ تٛ مَاکٛ؞»‏

¹⁶سٜيْ تٛومَ بِعٜتٜىٰطٛ شِوْتَاطٛ وِعِ تٛکُّٻٜ يٜىٰسُ حٛرِيٻٜ، ‏«‏اٜنْ نجَحُ اٜنٜنْ مَا نغَمْ مَيْدٜنْ اٜ مَاکٛ؞»‏

يٜىٰسُ وَلْتِنِي ٻٜرْطٜ مَرْيَامَ اٜ مَرْتَ

¹⁷ندٜ يٜىٰسُ يٛتِّي تَوِ طُمْ يَادَکٜ طُمْ اُوِي لِعَاجَرُ بَلْطٜ نَيِ پَٻِّيطٜ؞ ¹⁸حَکُّندٜ بٜتَنِ اٜ اُرُشَلِيمَ حٜوْتَايِ مِلْ طِطِ؞ ¹⁹يَحُودَنْکٛعٜنْ طُطْٻٜ نغَرِ تٛ مَرْتَ اٜ مَرْيَامَ نغَمْ ٻٜ مبَلْتِنَنَٻٜ ٻٜرْطٜ دٛوْ مَيْدٜ سَکِرَاوٛ مَٻّٜ؞

²⁰ندٜ مَرْتَ نَنِ يٜىٰسُ اٜ وَرَ، اٛ يَحِ نغَمْ اٛ تَٻّٛيٛومٛ، مَرْيَامَ بٛو جٛوطِي تٛ وُرٛ؞ ²¹مَرْتَ تَٻِّي يٜىٰسُ وِعِمٛ، ‏«‏مٛودِبّٛ، دَا اَ طٛنّٛ طٛعٛ، دَا سَکِرَاوٛ اَمْ مَايَايِ؞ ²²اَمَّا اٜ مِ اَنْدِ کٛو جٛونِ فُو کٛ تٛرِطَا اَللَّه اٛ حٛکّٜتٜطُمْ؞»‏

²³يٜىٰسُ وِعِمٛ، ‏«‏سَکِرَاوٛ مَاطَ اُمّٛتٛ کَدِنْ؞»‏

²⁴مَرْتَ وِعِمٛ، ‏«‏اٜ مِ اَنْدِ اٛ اُمّٛتٛ ݧَلْندٜ جَانغٛ ݧَلْندٜ ندٜ مَيْٻٜ اُمّٛتٛو؞»‏

²⁵يٜىٰسُ وِعِمٛ، ‏«‏مِنْ وٛنِ اُمِّنَيْطٛ مَيْٻٜ، مِنْ وٛنِ کٛکَّيْطٛ يٛنْکِ؞ کٛو مٛيٜ کٛولِيطٛيَمْ، کٛو اٛ مَايِي، اٛ فُطِّتَيْ اٛ وَطَ يٛنْکِ؞ ²⁶کٛو مٛيٜ غٛودُطٛ يٛنْکِ کٛولِيطٛيَمْ، تٛ اٛ مَايِي اٛ حَلْکَتَا؞ اَ جَٻِي کٛ مبِيمِ؟»‏

²⁷مَرْتَ وِعِمٛ، ‏«‏اٜىٰ، مٛودِبّٛ، مِ جَٻِي اَنْ وٛنِ اَلْمَسِيحُ، ٻِطّٛ اَللَّه، مٛ طُمْ وِعِ وَرَيْ ندٜرْ دُونِيَارُ؞»‏

يٜىٰسُ وٛيِي

²⁸غَطَ مَرْتَ وِعِي نٛنْ، اٛ يَحِ اٛ نٛدِّ مِݧِرَاوٛ مَاکٛ مَرْيَامَ ٻٜ کَکِّتِ اٛ وِعِمٛ، ‏«‏مٛودِبّٛ اٜ طٛعٛ اٜ مٛ يِطِ يِيکِمَ؞»‏ ²⁹ندٜ مَرْيَامَ نَنِ نٛنْ، اُمِّي ندٜرْ يَوْطَارٜ يَحِ تٛ يٜىٰسُ؞ ³⁰يٜىٰسُ بٛو يٛتَّاکِ غَرِيرِ بٜتَنِ تَوْ، اَمَّا اٜ مٛ طٛنْ اٜ وِغٜىٰرٜ تٛ مَرْتَ تَوِمٛ؞ ³¹يَحُودَنْکٛعٜنْ غٛنْدُٻٜ اٜ مَرْيَامَ ندٜرْ وُرٛ نغَمْ حِنُّکِ، ندٜ ٻٜ نغِعِ مَرْيَامَ اُمَّکٜ جَوْطُمْ وُرْتَکٜ، سٜيْ ٻٜ تٛکِّمٛ، اٜ ٻٜ کَمّٛو اٛ يَحَيْ يٜنَاندٜ اٛ وٛيَ تٛنْ؞

³²ندٜ مَرْيَامَ يٛتِّي تٛ يٜىٰسُ وٛنِ يِعِمٛ، دِشِّ، وِعِمٛ، ‏«‏مٛودِبّٛ، دَا اَ طٛعٛ، دَا سَکِرَاوٛ اَمْ مَايَايِ؞»‏

³³ندٜ يٜىٰسُ يِعِ اٜ مٛ وٛيَ حَوْتِ اٜ يَحُودَنْکٛعٜنْ غَرْدُٻٜ اٜ مَاکٛ، سٜيْ ٻٜرْندٜ مَاکٛ اُمِّي نَاع سٜطَّ اٛ وَنِّي؞ ³⁴اٛ وِعِ، ‏«‏تٛيٜ اُوُطٛنْمٛ؟»‏

ٻٜ مبِعِمٛ، ‏«‏مٛودِبّٛ، وٛرٛيْ، نغِعَ؞»‏

³⁵سٜيْ يٜىٰسُ وٛيِ؞ ³⁶يَحُودَنْکٛعٜنْ ٻٜنْ مبِعِ، ‏«‏رَا نٛ اٛ يِطِرِمٛ!‏»‏

³⁷اَمَّا وٛٻّٜ مبِعِ، ‏«‏اٛ وُمْتِنِي بُمْطٛ؞ تٛو، طُمٜ حَطِمٛ وَطُکِ غٛطُّمْ کَطَيْطُمْ نٜطّٛ اٛعٛ مَايُکِ؟»‏

يٜىٰسُ اُمِّنِي لِعَاجَرُ دَغَ مَيْدٜ

³⁸يٜىٰسُ فُطِّتِ وَنِّ نَاع سٜطَّ، اٛ يَحِ يٜنَاندٜ ندٜنْ؞ يٜنَاندٜ ندٜنْ بٛو طُمْ لُورٛ حَيْرٜ، حٛنْدُکٛ مَيْرٜ اٜ مَٻِّرَا کَاپَ؞ ³⁹يٜىٰسُ وِعِ، ‏«‏اِتّٜىٰ کَاپَ نغَنْ؞»‏

مَرْتَ مَوْنِرَاوٛ مَيْطٛ اٛنْ وِعِ يٜىٰسُ، ‏«‏مٛودِبّٛ، جٛونِ اٜ وٛودِ لُمْنغٛلْ کَلُّنغٛلْ، نغَمْ اٛ وَطِي بَلْطٜ نَيِ دَغَ اٛ مَايِ؞»‏

⁴⁰سٜيْ يٜىٰسُ وِعِمٛ، ‏«‏نَاع مِ وِعِيمَ تَا حٛولَکٜيَمْ، اَ يِعَيْ تٜدُّنغَلْ اَللَّه؟»‏ ⁴¹سٜيْ ٻٜ اِتِّ کَاپَ نغَنْ دَغَ دَمُّغَلْ يٜنَاندٜ ندٜنْ؞ سٜيْ يٜىٰسُ رَارِ دٛوْ وِعِ، ‏«‏ݧَاکٛ مٛ دٛوْ، مِ يٜتِّيمَ نغَمْ اَ نَنِي دٛعَارٜ اَمْ؞ ⁴²اٜ مِ اَنْدِ اَ نَنَ دٛعَارٜ اَمْ کٛو ندٜيٜ، اَمَّا مِ وِعُ نٛنْ نغَمْ ٻٜيْدَارِ يِمْٻٜ غٛنْٻٜ طٛعٛ، نغَمْ ٻٜ نجَٻَ اَنْ لِلٛيِيَمْ؞»‏ ⁴³غَطَ اٛ وِعِي نٛنْ، اٛ نٛدِّ اٜ سٜمْبٜ، ‏«‏لِعَاجَرُ، وُرْتٛيَ!‏»‏ ⁴⁴سٜيْ مَيْطٛ اٛنْ وُرْتٛيِي دَغَ ندٜرْ يٜنَاندٜ ندٜنْ، ٻَنْدُ مَاکٛ اٜ تَارِرَا وُدٜرٜ، جُوطٜ مَاکٛ اٜ کٛيْطٜ مَاکٛ اٜ کَٻِّرَا لٜفِ، يٜىٰسٛ مَاکٛ بٛو اٜ تَارِرَا لٜفٛلْ فٜىٰرٜ؞ يٜىٰسُ وِعِٻٜ، ‏«‏تَارْتٜىٰمٛ، اَلٛنْمٛ اٛ دِلَّ؞»‏

طُمْ حَٻِّي وَرْکِ يٜىٰسُ

⁴⁵طُطْٻٜ ندٜرْ يَحُودَنْکٛعٜنْ غَرْدُٻٜ اٜ مَرْيَامَ غِعُٻٜ کٛ يٜىٰسُ وَطِ، ٻٜ کٛولِيمٛ؞ ⁴⁶اَمَّا وٛٻّٜ مَٻّٜ نجَحِ تٛ فَارِسَنْکٛعٜنْ مبِعِٻٜ کٛ يٜىٰسُ وَطِ؞ ⁴⁷نغَمْ نٛنْ، مَوْٻٜ اَرْدِيٻٜ دِينَ اٜ فَارِسَنْکٛعٜنْ ٻٜ نٛدِّ کَوْتَلْ مَوْٻٜ، ٻٜ مبِعِ، ‏«‏طُمٜ نغَطٜتٜنْ؟ نٜطّٛ اٛعٛ اٜ وَطَ کُوطٜ کَيْطِنِيطٜ طُطّٜ؞ ⁴⁸تٛ اٜنْ اَلِيمٛ اٛ ݧَمْرِي يٜىٰسٛ اٜ وَطُکِ طُعُمْ، کٛو مٛيٜ حٛولٛتٛمٛ، ندٜنْ رٛومَنْکٛعٜنْ نغَرَيْ تٜىٰتَ وُرٛ شٜنِينغٛ مٜىٰطٜنْ اٜ لٜيْدِ مٜىٰطٜنْ؞»‏

⁴⁹اَمَّا غٛعٛتٛ مَٻّٜ بِعٜتٜىٰطٛ کَيَافَ مَوْطٛ مَوْٻٜ اَرْدِيٻٜ دِينَ اٜ طُمْ طٛنْ ندُنْغُ وِعِٻٜ، ‏«‏وَلَا کٛ اَنْدُطٛنْ!‏ ⁵⁰اٛنْ اَنْدَا طُمْ ٻُرَنِيعٛنْ نٜطّٛ غٛعٛتٛ مَايَ نغَمْ کٛو مٛيٜ دٛوْ لٜݧٛلْ يَحُودَنْکٛعٜنْ فُو حَلْکَ؞»‏ ⁵¹حَالَ کَعَ کَ کَيَافَ وِعِ نَاع طُمْ ݧُمٛ مَاکٛ، اَمَّا ندٜ کَنْکٛ وٛنِ مَوْطٛ مَوْٻٜ اَرْدِيٻٜ دِينَ اٜ طُمْ طٛنْ ندُنْغُ اٛ وَطِ اَنَّبَاکُ وِيکِ يٜىٰسُ مَايَيْ نغَمْ لٜݧٛلْ يَحُودَنْکٛعٜنْ؞ ⁵²اٛ مَايَيْ نَاع نغَمْ يَحُودَنْکٛعٜنْ تَنْ، اَمَّا حَا اٜ يِمْٻٜ اَللَّه شَنْکِتِيٻٜ ندٜرْ غٛطّٜ لٜيْطٜ، اٛ حَوْرِتَٻٜ اٛ وَرْتِرَٻٜ غٛعٛ؞

⁵³دَغَ ندٜنْ طٛنْ ݧَلْندٜ ٻٜ ندَرْوِ وَرْکِ يٜىٰسُ؞ ⁵⁴نغَمْ نٛنْ يٜىٰسُ اَلِ يِيلَاکِ ندٜرْ يَحُودَنْکٛعٜنْ اٜ نجَيْرِ؞ اَمَّا اٛ اَلِ طٛنْ اٛ يَحِ وٛنْدٜ وِغٜىٰرٜ حَادٜ کَرٜ اٛ نَتِّ وٛنْدِ غَرِيرِ بِعٜتٜىٰندِ اِفِرَايِمْ، اٛ جٛوطِي طٛنْ، کَنْکٛ اٜ تٛکُّٻٜمٛ؞

⁵⁵ندٜ حُمْتٛ سَکِّنْکِ نغٛ يَحُودَنْکٛعٜنْ ٻَدِي، يِمْٻٜ طُطْٻٜ جٛوطٛتٛوٻٜ ندٜرْ نغَرِحٛيْ لَدّٜ ٻٜ ندِلِّ اُرُشَلِيمَ نغَمْ ٻٜ لَاٻِنَ کٛعٜ مَٻّٜ کٛ حُمْتٛ نغٛنْ؞ ⁵⁶ٻٜ نغَطِ کَ طَٻُّتُکِ يٜىٰسُ؞ ندٜ ٻٜ کَوْرِتِ ندٜرْ وُرٛ شٜنِينغٛ، ٻٜ نغَطِ کَ پَمْپَمْتِرْکِ اٜ ٻٜ مبِعَ، ‏«‏طُمٜ نغِيطٛنْ؟ اٛ وَرَيْ حُمْتٛ نغٛعٛ بٛو؟»‏ ⁵⁷مَوْٻٜ اَرْدِيٻٜ دِينَ اٜ فَارِسَنْکٛعٜنْ ٻٜ نجَادَکٜ ٻٜ مبِعِي فُو اَنْدُطٛ تٛ يٜىٰسُ وٛنِ، اٛ اَنْدِنَٻٜ نغَمْ ٻٜ نَنْغَمٛ؞

يٜىٰسُ مٛيْتَنَامَ نٜبَّمْ تٛ بٜتَنِ

¹بَلْطٜ جٛوٜىٰغٛعٛ کٛ حُمْتٛ سَکِّنْکِ وَطَ، يٜىٰسُ وَرِ بٜتَنِ تٛ لِعَاجَرُ جٛوطٛتٛو، مٛ اٛ اُمِّنِ دَغَ مَيْدٜ؞ ²تٛنْ طُمْ جٛنْغَنِ يٜىٰسُ حِرَاندٜ؞ مَرْتَ وٛنِ غٜىٰدُطٛ ݧَمْندُ ندُنْ؞ لِعَاجَرُ بٛو اٛ غٛعٛتٛ ندٜرْ جٛوطِيٻٜ اٜ ݧَمْندَ اٜ يٜىٰسُ؞ ³مَرْيَامَ حٛشِّ جٛلّٛيٜلْ نٜبَّمْ اُرٛوجَمْ طَمْ طُمْ وَطِرِ نَرْدِ غٛودُطَمْ شٜىٰدٜ، اٛ وَيْلِطَمْ دٛوْ کٛيْطٜ يٜىٰسُ، اٛ مٛيْتِرِطٜ غَاسَ حٛورٜ مَاکٛ؞ وُرٛ نغٛنْ حٜىٰوِ اُرْنغٛلْ نٜبَّمْ طَمْ؞ ⁴اَمَّا يَحُودَ اِسْکَرِيٛوتِ، غٛعٛتٛ ندٜرْ تٛکُّٻٜمٛ، کٛکِّتِرَيْطٛمٛ، وِعِ، ⁵‏«‏نغَمْ طُمٜ طُمْ سٛورَايِ نٜبَّمْ طَعَمْ طُمْ حٛکَّ ٻٜ نغَلَنَا شٜىٰدٜ طٜنْ؟ شٜىٰدٜ مَاجَمْ کٜوْتَيْ شٜىٰدٜ طٜ طُمْ يٛٻَتَ کُوٛووٛ حِتَاندٜ غٛعٛ؞»‏ ⁶اٛ وِعُ نٛنْ نَاع نغَمْ اٜ مٛ وَنِّدِ اٜ ٻٜ نغَلَنَا، اَمَّا نغَمْ اٛ غُجّٛ؞ کَنْکٛ وٛنِ دٜسٛووٛ شٜىٰدٜ مَٻّٜ، اٛ بٛو وٛووِ اِتُّکِ شٜىٰدٜ طٜنْ اٜ مٛ حُوتِرَطٜ نغَمْ حٛورٜ مَاکٛ؞

⁷يٜىٰسُ وِعِ، ‏«‏اَلُ دٜبّٛ اٛعٛ؞ اٛ رٜسُطَمْ نغَمْ ݧَلْندٜ ندٜ اُوٜتٜىٰمِ؞ ⁸کٛو ندٜيٜ اٛنْ نغٛنْدِ اٜ ٻٜ نغَلَنَا ندٜرْ مٛوطٛنْ، اَمَّا مِنْ، شَرٜلْ اٜ وَرَ نغٜلْ اَلَيْمِعٛنْ؞»‏

طُمْ دَرْوِ طُمْ وَرَ لِعَاجَرُ

⁹ندٜ يَحُودَنْکٛعٜنْ طُطْٻٜ نَنِ حَبَرُ يٜىٰسُ اٜ تٛنْ بٜتَنِ، سٜيْ ٻٜ نجَحِ، نَاع نغَمْ يٜىٰسُ تَنْ، اَمَّا نغَمْ ٻٜ نغِعَ لِعَاجَرُ، مٛ اٛ اُمِّنِ دَغَ مَيْدٜ؞ ¹⁰نغَمْ نٛنْ، مَوْٻٜ اَرْدِيٻٜ دِينَ کَٻِّ وَرْکِ لِعَاجَرُ کَنُمْ مَا، ¹¹ندٜ نغَمْ مَاکٛ يَحُودَنْکٛعٜنْ طُطْٻٜ اٜ اَلَ دِينَ مَٻّٜ اٜ کٛولٛو يٜىٰسُ؞

يٜىٰسُ نَتِّ اُرُشَلِيمَ بٛ لَامِيطٛ

¹²ندٜ فِنِ، يِمْٻٜ طُطْٻٜ غَرْٻٜ حُمْتٛ نغٛنْ نَنِ حَبَرُ يٜىٰسُ اٜ دٛوْ لَاوٛلْ وَرْکِ اُرُشَلِيمَ؞ ¹³نغَمْ نٛنْ ٻٜ کٛشِّ لِشٜ دَبِينٛوجٜ ٻٜ مبُرْتِي نغَمْ تَٻّٛيَاکِمٛ، اٜ ٻٜ مبِعَ اٜ سٜمْبٜ، ‏«‏حٛسَانَ!‏ اٛ بَرْکِطِنَاطٛ اٛنْ طٛنْ غَرٛيْطٛ ندٜرْ اِنْدٜ جٛومِرَاوٛ؞ اٛ بَرْکِطِنَاطٛ لَامِيطٛ اِسْرَاعِيلَ!‏»‏ ¹⁴يٜىٰسُ بٛو حٜٻِ مبَبَّ مٛلَ وَطِّينغَ، نٛنْ نٛ طُمْ وِنْدِرَا،

¹⁵‏«‏تَاع حُلُ، غَرِيرِ سِحِيٛونَ؞

رَا لَامِيطٛ مَاطَ اٜ وَرَ

دٛوْ مبَبَّ مٛلَ؞»‏

¹⁶اَرَنْدٜ تٛکُّٻٜمٛ ڤَامَايِ طُعُمْ، اَمَّا غَطَ يٜىٰسُ تٜدِّنَامَ، سٜيْ ٻٜ شِفْتٛرِ طُعُمْ طُمْ وِنْدَا دٛوْ مَاکٛ طُمْ بٛو وَطَنِيمٛطُمْ؞

¹⁷غٛنْدُنٛوٻٜ اٜ مَاکٛ شَرٜلْ نغٜلْ اٛ نٛدِّ لِعَاجَرُ دَغَ ندٜرْ يٜنَاندٜ اٛ اُمِّنِمٛ دَغَ مَيْدٜ، ٻٜ ݧَمْرِ يٜىٰسٛ اٜ وِيکِ کٛ وَطِ؞ ¹⁸يِمْٻٜ طُطْٻٜ نجَحِ تَٻّٛيٛومٛ نغَمْ ٻٜ نَنِي حَبَرُ اٛ وَطِي طُعُمْ فِي کَيْطِنِيطُمْ؞ ¹⁹سٜيْ فَارِسَنْکٛعٜنْ مبِعِ حَکُّندٜ مَٻّٜ، ‏«‏نغِعٜىٰ، وَلَا کٛ مبَاوٜتٜنْ وَطُکِ، نغَمْ دُونِيَارُ فُو تٛکِّيمٛ؞»‏

وٛٻّٜ حٜلٜنَنْکٛعٜنْ طَٻِّتِي يٜىٰسُ

²⁰اٜ وٛودِ وٛٻّٜ حٜلٜنَنْکٛعٜنْ ندٜرْ جَاٻٜ اُرُشَلِيمَ نغَمْ مَوْنِنْکِ اَللَّه شَرٜلْ حُمْتٛ سَکِّنْکِ؞ ²¹ٻٜ نجَحِ تٛ فِلِبُسْ پِوٛيْطٛ بٜتَسَيْدَ ندٜرْ لٜيْدِ غَلِيلِ، ٻٜ مبِعِمٛ، ‏«‏مٛودِبّٛ، اٜ مِنْ نغِطِ يِيکِ يٜىٰسُ؞»‏

²²فِلِبُسْ يَحِ وِعِکَ اَنْدِرَاوُسْ ٻٜ کَوْتِ ٻٜ نجَحِ ٻٜ مبِعِکَ يٜىٰسُ؞ ²³يٜىٰسُ وِعِٻٜ، ‏«‏شَرٜلْ وَرِي نغٜلْ ٻِي نٜطّٛ تٜدِّنْتٜىٰ؞ ²⁴اٜ مِ وِعَعٛنْ غٛونغَ، تٛ نَاع غَبّٜلْ اَلْکَمَارِ يَنِ تٛ لٜيْدِ وَاتِ، نغٜلْ جٛوطٛتٛ کَنْغٜلْ تَنْ؞ اَمَّا تٛ نغٜلْ وَاتِي، نغٜلْ رِمَيْ غَبّٜ طُطّٜ؞ ²⁵فُو غِطّٛ يٛنْکِ مُوطُمْ دُلَّيْکِ، ندٜنْ کٛو مٛيٜ غَݧُطٛ يٛنْکِ مُوطُمْ ندٜرْ دُونِيَارُ ندُعُ اٛ حٜٻَيْ يٛنْکِ کِ رٜعَتَا؞ ²⁶فُو کُوَنٛووٛيَمْ دٛولٜ تٛکَّيَمْ؞ ندٜنْ تٛ نغٛنْمِ، تٛنْ کُوَنٛووٛيَمْ وٛنَتَ، کَنْکٛ مَا؞ کٛو مٛيٜ کُوَنَيْطٛيَمْ، ݧَاکٛ اَمْ حٛکَّيْمٛ مَنْغُ؞»‏

يٜىٰسُ مٜتِي دٛوْ مَيْدٜ مُوطُمْ

²⁷يٜىٰسُ ݧَمْرِ يٜىٰسٛ اٜ وِيکِ، ‏«‏جٛونِ ٻٜرْندٜ اَمْ وَنِّي؞ طُمٜ مبِعَيْمِ؟ مِ وِعَ، ‏‹‏ݧَاکٛ اَمْ، حِسْنَمْ دَغَ شَرٜلْ نغٜعٜلْ؟›‏ نَاع نٛنْ، نغَمْ کَنْجُمْ وَطِ نغَرْمِ شَرٜلْ نغٜعٜلْ؞ ²⁸يَا ݧَاکٛ اَمْ، تٜدِّنْ اِنْدٜ مَاطَ!‏»‏

سٜيْ حٛنٛنْدٜ پِوٛيِ دَغَ دٛوْ وِعِ، ‏«‏مِ تٜدِّنِيندٜ، مِ فُطِّتَيْ مِ تٜدِّنَندٜ؞»‏

²⁹يِمْٻٜ طُطْٻٜ غٛنْٻٜ طٛنْ نَنِي حٛنٛنْدٜ ندٜنْ؞ وٛٻّٜ مبِعِ طُمْ رِغَّانغٛ، ندٜنْ وٛٻّٜ بٛو مبِعِ، ‏«‏مَلَاعِکَاجٛ مٜتَنِمٛ؞»‏

³⁰اَمَّا يٜىٰسُ وِعِٻٜ، ‏«‏حٛنٛنْدٜ ندٜعٜ وَرٛيِ نغَمْ ٻٜيْدَارِ مٛوطٛنْ، نَاع نغَمْ ٻٜيْدَارِ اَمْ؞ ³¹جٛونِ وٛنِ شَرٜلْ نغٜلْ طُمْ وَطَنْتَ يِمْٻٜ دُونِيَارُ ندُعُ کِيتَ؞ جٛونِ طُمْ رِيوَيْ لَامِيطٛ دُونِيَارُ ندُعُ؞ ³²اَمَّا مِنْ، تٛ مِ پٜفْتَامَ دٛوْ غَافَانغَلْ، مِ فٛوطَيْ کٛو مٛيٜ تٛ اَمْ؞»‏ ³³اٛ وِعُ نٛنْ نغَمْ اٛ حٛلَّ اِرِ مَيْدٜ ندٜ اٛ مَايَتَ؞

³⁴سٜيْ يِمْٻٜ حَوْرُتُٻٜ ٻٜنْ نٛوتِي مبِعِمٛ، ‏«‏اَتَّوْرَ اَلْمَسِيحُ جٛوطٛتٛ حَا اَبَدَا؞ نٛ وَطَتَ مبِعَا دٛولٜ طُمْ پٜفْتَ ٻِي نٜطّٛ دٛوْ؟ طُمْ مٛيٜ مَا نٜىٰ وٛنِ اٛعٛ ٻِي نٜطّٛ؟»‏

³⁵يٜىٰسُ وِعِٻٜ، ‏«‏جَيْنغٛلْ اٜ وٛنْدِ اٜ مٛوطٛنْ نغَمْ شَرٜلْ سٜطَّ؞ نغَطٜىٰ کَ يَادُ شَرٜلْ نغٜلْ غٛودُطٛنْ جَيْنغٛلْ، نغَمْ تٛع ݧِوْرٜ وَرَ سُدَّعٛنْ؞ فُو جَحٛووٛ ندٜرْ ݧِوْرٜ اَنْدَا تٛ يَحَتَ؞ ³⁶نغٜعٜلْ شَرٜلْ نغٜلْ نغٛنْدُطٛنْ اٜ جَيْنغٛلْ، کٛولٜىٰ جَيْنغٛلْ نغٛلْ، نغَمْ نغَرْتٛنْ ٻِٻّٜ جَيْنغٛلْ؞»‏ ندٜ يٜىٰسُ وِعِ نٛنْ، سٜيْ اٛ دِلِّ اٛ سُوطِ حٛورٜ مَاکٛ دَغَ مَٻّٜ؞

شِيَ حٛولَارٜ يِمْٻٜ

³⁷کٛو ندٜ يٜىٰسُ وَطِي کٛ حَيْطِنِ طُطُّمْ يٜىٰسٛ مَٻّٜ، فُو اٜ نٛنْ ٻٜ کٛولَاکِمٛ؞ ³⁸طُعُمْ وَطِ نغَمْ طُمْ حٜبِّنَ کٛ اَنَّبِ اِشَايَ وِعِ،

‏«‏جٛومِرَاوٛ، مٛيٜ جَٻِ کٛ مبِيطٜنْ؟

مٛيٜ جٛومِرَاوٛ وَنْغِنَنِ بَوْطٜ مُوطُمْ؟»‏

³⁹کَنْجُمْ وَطِ ٻٜ کٛولَاکِمٛ، نغَمْ اَنَّبِ اِشَايَ وِعِ طٛنْمَا اَللَّه وِعِ،

⁴⁰‏«‏مِ وُمْنِي غِتٜ مَٻّٜ

مِ سَاتِنِي ٻٜرْطٜ مَٻّٜ،

نغَمْ تٛع ٻٜ نغِعَ اٜ غِتٜ مَٻّٜ،

ٻٜ ڤَامَ ندٜرْ ٻٜرْطٜ مَٻّٜ،

ٻٜ شٛعّٛو تٛ اَمْ،

مِ يَمْطِتِنَ ٻٜرْطٜ مَٻّٜ؞»‏

⁴¹اَنَّبِ اِشَايَ وِعُ طُعُمْ نغَمْ ندٜنّٛ اٛ يِعِي تٜدُّنغَلْ يٜىٰسُ، طٛنْمَا اٛ مٜتِي دٛوْ مَاکٛ؞

⁴²فُو اٜ نٛنْ، کٛو ندٜرْ اَرْدِيٻٜ، طُطْٻٜ کٛولِي يٜىٰسُ؞ اَمَّا نغَمْ فَارِسَنْکٛعٜنْ ٻٜ مبِعَايِکَ اٜ نجَيْرِ نغَمْ اٜ ٻٜ کُلَ طُمْ رِيوَٻٜ دَغَ لٜݧٛلْ؞ ⁴³نغَمْ ٻٜ ٻُرِي يِطُکِ يِمْٻٜ مَنَٻٜ اٜ دٛوْ اَللَّه مَنَٻٜ؞

⁴⁴سٜيْ يٜىٰسُ وِعِ اٜ سٜمْبٜ، ‏«‏فُو کٛولِيطٛيَمْ، نَاع مِنْ تَنْ اٛ حٛولِي، اَمَّا فُو اٜ اٛنْ طٛنْ لِلٛيْطٛيَمْ؞ ⁴⁵فُو غِيطٛيَمْ يِعِ اٛنْ طٛنْ لِلٛيْطٛيَمْ؞ ⁴⁶مِ وَرِي ندٜرْ دُونِيَارُ ندُعُ بٛ جَيْنغٛلْ، نغَمْ فُو کٛولِيطٛيَمْ تٛع جٛوطٛو ندٜرْ ݧِوْرٜ؞ ⁴⁷فُو نَنْطٛ اٜکِّتِنٛلْ اَمْ تٛکَّايِنغٛلْ، مِ وَطَنْتَامٛ کِيتَ، نغَمْ مِ وَرَايِ وَطَنْکِ دُونِيَارُ کِيتَ، اَمَّا مِ وَرٛيِ نغَمْ حِسْنُکِندُ؞ ⁴⁸فُو غَݧُطٛيَمْ وَݧِ جَٻُکِ اٜکِّتِنٛلْ اَمْ، اٜ وٛودِ غَطَنَيْطٛمٛ کِيتَ؞ وٛلْدٜ ندٜ مٜتُمِ وَطَنَيْمٛ کِيتَ ݧَلْندٜ جَانغٛ؞ ⁴⁹نغَمْ مِ مٜتِرَايِ لَامُ اَمْ، ݧَاکٛ مٛ دٛوْ لِلْطٛيَمْ وِعِيَمْ کٛ مبِعَيْمِ اٜ نٛ مبِعِرَيْمِطُمْ؞ ⁵⁰کٛ اٛ وِعِ طُمْ وَطَ، اٜ مِ اَنْدِ طُمْ وَدَّيْ يٛنْکِ کِ رٜعَتَا؞ نغَمْ نٛنْ، فُو کٛ مبِيمِ مِ وِعُطُمْ نٛنْ نٛ ݧَاکٛ اَمْ وِعِيَمْ مِ وِعَ؞»‏

يٜىٰسُ لٛوتِي کٛيْطٜ تٛکُّٻٜمٛ

¹تٛو، طُمْ ݧَلْندٜ غٛعٛ کٛ طُمْ وَطَ حُمْتٛ سَکِّنْکِ؞ يٜىٰسُ اٜ اَنْدِ شَرٜلْ وَطِي نغٜلْ اٛ اَلَتَ دُونِيَارُ ندُعُ اٛ سٛعّٛو تٛ ݧَاکٛ مٛ دٛوْ؞ يٜىٰسُ اٜ يِطِ يِمْٻٜ مُوطُمْ غٛنْٻٜ ندٜرْ دُونِيَارُ، جٛونِ بٛو اٛ حٛلَّيْٻٜ مَنْغُ يِدّٜ مَاکٛ؞

²يٜىٰسُ اٜ تٛکُّٻٜمٛ اٜ ٻٜ کِرْتٛو؞ شٜيْطَنْ يَادَکٜ وَطِي ݧُمٛ حٛکِّتِرْکِ يٜىٰسُ ندٜرْ ٻٜرْندٜ يَحُودَ اِسْکَرِيٛوتِ ٻِطّٛ سِيمَنْ؞ ³يٜىٰسُ اٜ اَنْدِ ݧَاکٛ مٛ دٛوْ وَطِي کٛو طُمٜ ندٜرْ جُوطٜ مُوطُمْ، کَدِنْ اٜ مٛ اَنْدِ دَغَ تٛ اَللَّه اٛ پِوٛيِ، تٛ اَللَّه کَدِنْ اٛ سٛعّٛتٛو؞ ⁴نغَمْ نٛنْ، اٛ اُمِّي دَغَ تٛ ٻٜ ݧَامَتَ ݧَمْندُ، اٛ ٻٛرْتِي تٛغّٛورٜ مَاکٛ، اٛ تَادِي غُدٜلْ؞ ⁵سٜيْ اٛ ݧٜطِ ندِيَمْ ندٜرْ تُمُّدٜ، اٛ فُطِّ لٛوتُکِ کٛيْطٜ تٛکُّٻٜمٛ، اٜ مٛ مٛيْتِرَطٜ غُدٜلْ نغٜلْ اٛ تَادِي؞ ⁶اٛ وَرِ تٛ سِيمَنْ بِيتُرُسْ، سِيمَنْ بِيتُرُسْ وِعِمٛ، ‏«‏مٛودِبّٛ، اَنْ لٛوتَنْتَيَمْ کٛيْطٜ؟»‏

⁷يٜىٰسُ وِعِمٛ، ‏«‏جٛونِ اَ فَامَتَا کٛ نغَطَيْمِ، اَمَّا يٜىٰسٛ طٛعٛ اَ فَامَيْ؞»‏

⁸سٜيْ بِيتُرُسْ وِعِ، ‏«‏اَاعَ!‏ غٛونغَ اَ لٛوتَنْتَايَمْ کٛيْطٜ؞»‏

يٜىٰسُ وِعِمٛ، ‏«‏تٛ مِ لٛوتَنَايِمَ کٛيْطٜ، اَنْ نَاع اَ تٛکُّطٛيَمْ؞»‏

⁹سِيمَنْ بِيتُرُسْ وِعِمٛ، ‏«‏مٛودِبّٛ، تَاع لٛوتُ کٛيْطٜ اَمْ تَنْ، حَوْتُ فُو اٜ جُوطٜ اَمْ اٜ حٛورٜ اَمْ!‏»‏

¹⁰سٜيْ يٜىٰسُ وِعِ، ‏«‏کٛو مٛيٜ لٛوتِيطٛ، فُو ٻَنْدُ مَاکٛ وَرْتِي لَمْندُ؞ نَاع نَا اٛ فُطِّتِي اٛ لٛوتِي حٛورٜ مَاکٛ، سٜيْ نِ اٛ لٛوتَ کٛيْطٜ مَاکٛ؞ اٛنٛنْ بٛو اٛنْ لَاٻُٻٜ، اَمَّا نَاع اٛنْ فُو مٛوطٛنْ؞»‏ ¹¹يٜىٰسُ اٜ اَنْدِ کٛکِّتِرَيْطٛمٛ، کَنْجُمْ وَطِ اٛ وِعِ، ‏«‏نَاع اٛنْ فُو نغٛنِ لَاٻُٻٜ؞»‏

¹²غَطَ يٜىٰسُ لٛوتِي کٛيْطٜ مَٻّٜ، اٛ ٻٛرْنِي تٛغّٛورٜ مَاکٛ، اٛ سٛعِّي اٛ جٛوطِي تٛ اٛ وٛنّٛو؞ اٛ وِعِٻٜ، ‏«‏اٛنْ ڤَامِي کٛ نغَطَنْمِعٛنْ جٛونِ؟ ¹³اٛنْ نٛدَّيَمْ مٛودِبّٛ اٜ مَوْطٛ، اٜ طُمْ حَانِ ندٜ نغَطّٛنْ نٛنْ، نغَمْ نٛنْ نغٛنُمِ؞ ¹⁴جٛونِ، ندٜ مِنْ، مَوْطٛ مٛوطٛنْ اٜ مٛودِبّٛ مٛوطٛنْ، مِ لٛوتِي کٛيْطٜ مٛوطٛنْ، اٛنٛنْ مَا اٜ حَانِ لٛوتِندِرٛنْ کٛيْطٜ؞ ¹⁵مِ وَطَنِيعٛنْ کٛ اٜکِّتٛتٛوطٛنْ، نغَمْ اٛنٛنْ مَا نغَطَنٛنْ وٛٻّٜ نٛنْ نٛ نغَطَنْمِعٛنْ؞ ¹⁶اٜ مِ وِعَعٛنْ غٛونغَ، وَلَا مَشُّطٛ ٻُرْطٛ جٜيْطٛمٛ، ندٜنْ وَلَا لِلَاطٛ ٻُرْطٛ لِلْطٛمٛ؞ ¹⁷جٛونِ ندٜ اٛنْ اَنْدِ فُو فِي طُعُمْ، اٛنْ بَرْکِطِنَاٻٜ تٛ اٛنْ نغَطِيطُمْ؞

¹⁸‏«‏نَاع دٛوْ مٛوطٛنْ اٛنْ فُو مٜتَيْمِ؞ اٜ مِ اَنْدِ ٻٜ شُٻُمِ؞ اَمَّا اَايَارٜ ندٜعٜ دٛولٜ ندٜ حٜىٰوَ بِيندٜ، ‏‹‏نٜطّٛ مٛ ݧَمْدَيْمِ ݧَمْندُ اَمْ وَرْتِي غَݧٛ اَمْ؞›‏ ¹⁹اٜ مِ وِعَعٛنْ طُعُمْ جٛونِ کٛ طُمْ وَطَ، نغَمْ تٛ طُمْ وَطِي کٛولٛوطٛنْ، ‏‹‏مِنْ وٛنِ مٛ نغٛنُمِ؞›‏ ²⁰اٜ مِ وِعَعٛنْ غٛونغَ، فُو جَٻُطٛ کٛو مٛيٜ مٛ لِلُمِ جَٻِييَمْ، کَدِنْ فُو جَٻُطٛيَمْ جَٻِي اٛنْ طٛنْ لِلٛيْطٛيَمْ؞»‏

يٜىٰسُ مٜتِي دٛوْ کٛکِّتِرَيْطٛمٛ

²¹غَطَ يٜىٰسُ وِعِي نٛنْ، اٛ وَنِّ نَاع سٜطَّ، سٜيْ اٛ وِعِ اٜ نجَيْرِ، ‏«‏اٜ مِ وِعَعٛنْ غٛونغَ، غٛعٛتٛ ندٜرْ مٛوطٛنْ حٛکِّتِرَيْيَمْ؞»‏

²²سٜيْ تٛکُّٻٜمٛ ندَرْندَرْتِرِ، ٻٜ ڤَامَايِ دٛوْ مٛيٜ مَٻّٜ اٛ مٜتَتَ؞ ²³غٛعٛتٛ مَٻّٜ مٛ يٜىٰسُ يِطِ نَاع سٜطَّ اٜ جٛوطِي حَادٜ يٜىٰسُ؞ ²⁴سِيمَنْ بِيتُرُسْ سَڤِّيمٛ وِعِ، ‏«‏پَمُ يٜىٰسُ دٛوْ مٛيٜ مٜتَتَ؞»‏

²⁵سٜيْ اٛ ٻَدِّي يٜىٰسُ اٛ وِعِ، ‏«‏مٛودِبّٛ، طُمْ مٛيٜ؟»‏

²⁶يٜىٰسُ نٛوتِي وِعِ، ‏«‏کَنْکٛ وٛنِ مٛ کٛکَّيْمِ نغٜعٜلْ ݝٛشِّتٜلْ بُرٛودِ غَطَ مِ سُووِينغٜلْ ندٜرْ تُمُّدٜ؞»‏ سٜيْ يٜىٰسُ سُووِ ݝٛشِّتٜلْ بُرٛودِ ندٜرْ تُمُّدٜ، اٛ حٛکِّنغٜلْ يَحُودَ، ٻِي سِيمَنْ اِسْکَرِيٛوتِ؞ ²⁷غَطَ يَحُودَ جَٻِي ݝٛشِّتٜلْ نغٜلْ، شٜيْطَنْ نَتِّ ٻٜرْندٜ مَاکٛ؞ يٜىٰسُ وِعِمٛ، ‏«‏يَوْنُ نغَطَا کٛ نغِطَّا وَطُکِ؞»‏ ²⁸فُو جٛوطِيٻٜ طٛنْ وَلَا ڤَامُطٛ نغَمْ طُمٜ يٜىٰسُ وِعِمٛ نٛنْ؞ ²⁹ندٜ يَحُودَ وٛنِ دٜسٛووٛ شٜىٰدٜ مَٻّٜ، وٛٻّٜ ندٜرْ مَٻّٜ ݧُمِ يٜىٰسُ وِعُمٛ اٛ يَحَ اٛ سٛودَ کٛ ٻٜ کُوتِنِرْتَ ندٜرْ حُمْتٛ، کٛو اٛ حٛکَّ ٻٜ نغَلَنَا غٛطُّمْ؞

³⁰غَطَ يَحُودَ جَٻِي بُرٛودِ طُمْ، اٛ وُرْتِي طٛنْ اٜ طٛنْ؞ اٜ شَرٜلْ نغٜلْ طُمْ جٜمَّ؞

نغِطِندِرٜىٰ

³¹غَطَ يَحُودَ اَلِي طٛنْ، يٜىٰسُ وِعِ، ‏«‏جٛونِ تٜدُّنغَلْ ٻِي نٜطّٛ وَنْغَيْ، ندٜنْ لَاوٛلْ مَاکٛ تٜدُّنغَلْ اَللَّه وَنْغَيْ؞ ³²تٛ طُمْ تٜدِّنِي اَللَّه لَاوٛلْ مَاکٛ، ندٜنْ اَللَّه اٜ حٛورٜ مُوطُمْ نٛ تٜدِّنَيْ ٻِي نٜطّٛ، اٛ تٜدِّنَيْمٛ نَاع کٛ نٜىٰٻِ؞ ³³ٻِٻّٜ اَمْ، مِ جٛوطٛدٛتٛ اٜ مٛوطٛنْ شَرٜلْ سٜطَّ تَنْ؞ اٛنْ طَٻِّتَيْيَمْ، اَمَّا کٛ مبِينٛومِ اَرْدِيٻٜ يَحُودَنْکٛعٜنْ، اٛنٛنْ مَا اٜ مِ وِعَعٛنْ نٛنْ جٛونِ، ‏‹‏تٛ نجَحَيْمِ، اٛنْ مبَاوَتَا يَاکِ؞›‏ ³⁴جٛونِ رَا غٛطُّمْ کٜسُمْ طُمْ نغِطُمِ نغَطٛنْ:‏ نغِطِندِرٜىٰ؞ نٛنْ نٛ نغِطِرْمِعٛنْ، اٛنٛنْ مَا سٜيْ نغِطِنْدِرٛنْ؞ ³⁵تٛ اٛنْ نغِطِندِرِي، نٛنْ وَطَيْ کٛو مٛيٜ اَنْدَ اٛنٛنْ اٛنْ تٛکُّٻٜيَمْ؞»‏

يٜىٰسُ وِعِي بِيتُرُسْ وِعَيْ اَنْدَامٛ

³⁶سِيمَنْ بِيتُرُسْ پَمِ يٜىٰسُ وِعِ، ‏«‏مٛودِبّٛ، تٛيٜ نجَحَتَا؟»‏ يٜىٰسُ وِعِمٛ، ‏«‏تٛ نجَحَيْمِ، اَ وَاوَتَا تٛکُّکِيَمْ جٛونِ، اَمَّا يٜىٰسٛ طٛعٛ اَ تٛکَّيْيَمْ؞»‏

³⁷بِيتُرُسْ وِعِمٛ، ‏«‏مٛودِبّٛ، کٛ حَطَتَ مِ تٛکُّمَا جٛونِ؟ اٜ مِ سِرْيِي مِ مَايَ نغَمْ مَاطَ؞»‏

³⁸يٜىٰسُ نٛوتِي، وِعِ، ‏«‏اَ سِرْيِي مَايَ نغَمْ اَمْ؟ اٜ مِ وِعُمَا غٛونغَ، کٛ نجَکَرْدِ حَنَ، اَ وِعَيْ اَ اَنْدَايَمْ ندٜ تَتِ؞»‏

يٜىٰسُ وٛنِ لَاوٛلْ يَاکِ تٛ ݧَاکٛ مٛ دٛوْ

¹يٜىٰسُ وِعِٻٜ، ‏«‏تٛع اٛنْ نغَنُّ ندٜرْ ٻٜرْطٜ مٛوطٛنْ، کٛولٜىٰ اَللَّه، کٛولٜىٰيَمْ؞ ²ندٜرْ وُرٛ ݧَاکٛ اَمْ مٛ دٛوْ اٜ وٛودِ شُوطِ طُطِّ؞ دَا نَاع طُمْ نٛنْ، دَا مِ وِعَيْعٛنْ کَ؞ مِ يَحَيْ تٛنْ مِ سِرْيَنٛوعٛنْ تٛ نجٛوطٛتٛوطٛنْ؞ ³تٛ مِ يَحِي، مِ سِرْيَنَکٜعٛنْ تٛ نجٛوطٛتٛوطٛنْ، مِ سٛعّٛيْتٛ، مِ حٛشَّعٛنْ مِ يَارَعٛنْ تٛ اَمْ، نغَمْ اٛنٛنْ مَا نجٛوطٛوطٛنْ تٛ نغٛنْمِ؞ ⁴اٛنْ اَنْدِ لَاوٛلْ جَحَيْنغٛلْ وِغٜىٰرٜ ندٜ نجَحَيْمِ؞»‏

⁵سٜيْ تٛومَ وِعِمٛ، ‏«‏مٛودِبّٛ، مِنْ اَنْدَا تٛ نجَحَتَا، نٛ مِنْ اَنْدِرْتَ لَاوٛلْ نغٛلْ؟»‏

⁶يٜىٰسُ وِعِمٛ، ‏«‏مِنْ وٛنِ لَاوٛلْ، مِنْ وٛنِ غٛونغَ، مِنْ وٛنِ يٛنْکِ؞ وَلَا جَحَيْطٛ تٛ ݧَاکٛ مٛ دٛوْ سٜيْ تٛ تٛکِّييَمْ؞»‏ ⁷اٛ وِعِٻٜ، ‏«‏دَا اٛنْ اَنْدِيَمْ، دَا اٛنْ اَنْدِ ݧَاکٛ اَمْ مٛ دٛوْ مَا؞ دَغَ جٛونِ اٛنْ اَنْدِمٛ اٛنْ نغِعِيمٛ؞»‏

⁸فِلِبُسْ وِعِمٛ، ‏«‏مٛودِبّٛ، حٛلُّمِنْ ݧَاکٛ مٛ دٛوْ اٛنْ، نٛنْ حٜپِيمِنْ؞»‏

⁹يٜىٰسُ نٛوتِي وِعِ، ‏«‏فِلِبُسْ، کٛ نٜىٰٻِ اٜ مِ وٛنْدِ اٜ مٛوطٛنْ، اَمَّا فُو اٜ نٛنْ اَ اَنْدَايَمْ؟ کٛو مٛيٜ غِيطٛيَمْ يِعِي ݧَاکٛ مٛ دٛوْ؞ نغَمْ طُمٜ مبِعَتَا مِ حٛلَّعٛنْ ݧَاکٛ مٛ دٛوْ؟ ¹⁰فِلِبُسْ، اَ حٛولَاکِ اٜ مِ ندٜرْ ݧَاکٛ اٛنْ، ندٜنْ ݧَاکٛ اٛنْ اٜ ندٜرْ اَمْ؟ کٛ مبِيمِعٛنْ نَاع بٛلِيطٜ طٜ حٛورٜ اَمْ مبِيمِعٛنْ، اَمَّا ݧَاکٛ مٛ دٛوْ، غٛنْطٛ ندٜرْ اَمْ، کَنُمْ حُوَتَ کُوطٜ مُوطُمْ؞ ¹¹نجَٻٜىٰ کٛ مبِيمِ ندٜ مبِيمِ اٜ مِ ندٜرْ ݧَاکٛ مٛ دٛوْ، کَنْکٛ مَا اٜ مٛ ندٜرْ اَمْ؞ تٛ اٛنْ کٛولَاکِ کٛ مبِيمِ، کٛولٜىٰيَمْ نغَمْ کُوطٜ طٜ نغَطُمِ؞ ¹²اٜ مِ وِعَعٛنْ غٛونغَ، کٛو مٛيٜ کٛولِيطٛيَمْ حُوَيْ کُوطٜ طٜ کُوُمِ، حَا مَا اٛ حُوَ کُوطٜ ٻُرْطٜ طٜ کُوُمِ، نغَمْ مِ يَحَيْ تٛ ݧَاکٛ مٛ دٛوْ؞ ¹³مِ وَطَيْ کٛو طُمٜ طُمْ تٛرِيطٛنْ ندٜرْ اِنْدٜ اَمْ، نغَمْ طُمْ يِعَ مَنْغُ ݧَاکٛ مٛ دٛوْ بَرْکَ ٻِطّٛ اٛنْ؞ ¹⁴تٛ اٛنْ تٛرَکٜيَمْ کٛو طُمٜ ندٜرْ اِنْدٜ اَمْ، مِ وَطَيْطُمْ؞

اَلْکَوَلْ غَرٛلْ رُوحُ اَللَّه

¹⁵‏«‏تٛ اٛنْ نغِطِيَمْ، اٛنْ نغَطَيْ کٛ مبِيمِ نغَطٛنْ؞ ¹⁶مِ تٛرٛتٛ ݧَاکٛ مٛ دٛوْ، ندٜنْ اٛ حٛکَّيْعٛنْ غٛطُّمْ بَلَّيْطُمْ، جٛوطٛدٛتٛوطُمْ اٜ مٛوطٛنْ حَا اَبَدَا؞ ¹⁷کَنْکٛ وٛنِ رُوحُ کٛلَّيْطُمْ غٛونغَ؞ يِمْٻٜ دُونِيَارُ ندُعُ نجَٻَتَاطُمْ، نغَمْ ٻٜ نغِعَتَاطُمْ، ٻٜ اَنْدَاطُمْ؞ اَمَّا اٛنٛنْ اٛنْ اَنْدِطُمْ نغَمْ اٜ طُمْ وٛنْدِ اٜ مٛوطٛنْ، ندٜنْ طُمْ جٛوطٛتٛ ندٜرْ مٛوطٛنْ؞

¹⁸‏«‏تٛ مِ دِلِّي، مِ اَلَتَاعٛنْ بٛ مَرَايَعٜنْ؞ مِ سٛعّٛيْتٛ تٛ مٛوطٛنْ؞ ¹⁹يٜىٰسٛ طٛعٛ سٜطَّ، دُونِيَارُ ندُعُ فُطِّتَتَا يِعَيَمْ، اَمَّا اٛنٛنْ اٛنْ نغِعَيْيَمْ؞ نغَمْ اٜ مِ وٛودِ يٛنْکِ، اٛنٛنْ مَا اٛنْ کٜٻَيْ يٛنْکِ؞ ²⁰اٜ ندٜنْ طٛنْ ݧَلْندٜ اٛنْ اَنْدَيْ اٜ مِ ندٜرْ ݧَاکٛ اَمْ، ندٜنْ اٛنٛنْ بٛو اٛنْ ندٜرْ اَمْ، مِنْ مَا اٜ مِ ندٜرْ مٛوطٛنْ؞

²¹‏«‏کٛو مٛيٜ جٛغِيطٛ کٛ مبِيمِ طُمْ وَطَ تٛکِّطُمْ، کَنْکٛ وٛنِ غِطّٛيَمْ؞ فُو غِطّٛيَمْ ݧَاکٛ اَمْ يِطَيْمٛ، ندٜنْ مِنْ مَا مِ يِطَيْمٛ مِ وَنْغِنَنَامٛ حٛورٜ اَمْ؞»‏ ²²سٜيْ يَحُودَ ﴿نَاع يَحُودَ اِسْکَرِيٛوتِ﴾ پَمِمٛ، وِعِ، ‏«‏مٛودِبّٛ، کٛ وَطِ شُٻُطَا وَنْغِنَنْکِمِنْ حٛورٜ مَاطَ نَاع يِمْٻٜ دُونِيَارُ؟»‏

²³يٜىٰسُ وِعِ، ‏«‏فُو غِطّٛيَمْ تٛکَّيْ اٜکِّتِنٛلْ اَمْ؞ ݧَاکٛ اَمْ بٛو يِطَيْمٛ، ندٜنْ مِنْ اٜ ݧَاکٛ اَمْ مِنْ نغَرَيْ تٛ مَاکٛ مِنْ جٛوطٛدٛو اٜ مَاکٛ؞ ²⁴کٛو مٛيٜ مٛ يِطَايَمْ بٛو تٛکَّتَا اٜکِّتِنٛلْ اَمْ؞ اٜکِّتِنٛلْ نغٛلْ نَنْطٛنْ، نَاع طُمْ نغٛلْ اَمْ، طُمْ نغٛلْ ݧَاکٛ مٛ دٛوْ لِلٛيْطٛيَمْ؞

²⁵‏«‏مِ وِعُعٛنْ فُو طُعُمْ جٛونِ ندٜ نغٛنْدُمِ اٜ مٛوطٛنْ؞ ²⁶اَمَّا اٜ وٛودِ بَلَّيْطُمْ، وَاتٛ رُوحُ اَللَّه طُمْ ݧَاکٛ مٛ دٛوْ لِلٛيْتَ ندٜرْ اِنْدٜ اَمْ؞ طُمْ اٜکِّتِنَيْعٛنْ کٛو طُمٜ، طُمْ سِفْتٛرَنَيْعٛنْ فُو کٛ مبِيمِعٛنْ؞

²⁷‏«‏جَمْ وٛنِ کٛ اَلْدُمِعٛنْ، جَمْ اَمْ کٛکُّمِعٛنْ؞ مِ حٛکِّيعٛنْطُمْ نَاع نٛ يِمْٻٜ دُونِيَارُ کٛکِّرْتَ؞ تٛع اٛنْ اَلُ ٻٜرْطٜ مٛوطٛنْ نغَنَّ، تٛع اٛنْ کُلُ؞ ²⁸اٛنْ نَنِي اٜ مِ وِعَ، ‏‹‏مِ دِلَّيْ، اَمَّا مِ وَرْتٛيَيْ تٛ مٛوطٛنْ؞›‏ تٛ اٛنْ نغِطِيَمْ، اٛنْ نَنَيْ بٜلْطُمْ مِ يَحَيْ تٛ ݧَاکٛ مٛ دٛوْ، نغَمْ اٛ ٻُرِييَمْ مَنْغُ؞ ²⁹مِ وِعُعٛنْکَ جٛونِ کٛ طُمْ وَطَ، نغَمْ تٛ طُمْ وَطِي نجَٻٛنْ کٛ مبِيمِ؞ ³⁰مِ نٜىٰٻَتَا اٜ مِ مٜدَّ اٜ مٛوطٛنْ، نغَمْ لَامِيطٛ دُونِيَارُ ندُعُ اٜ وَرَ؞ اٛ وَلَا بَوْطٜ دٛوْ اَمْ؞ ³¹اَمَّا دٛولٜ يِمْٻٜ دُونِيَارُ ندُعُ اَنْدَ اٜ مِ يِطِ ݧَاکٛ مٛ دٛوْ، کَدِنْ اٜ مِ وَطَ کٛو طُمٜ کٛ اٛ وِعِيَمْ مِ وَطَ؞ اُمّٜىٰ ندِلّٜنْ، اَلٜنْ وِغٜىٰرٜ ندٜعٜ؞»‏

يٜىٰسُ وٛنِ لَيٛلْ اِنَبٛحِ غٛونغَوٛلْ

¹‏«‏مِنْ وٛنِ لَيٛلْ اِنَبٛحِ غٛونغَوٛلْ، ندٜنْ ݧَاکٛ اَمْ وٛنِ ڤَامَنَيْطٛنغٛلْ؞ ²اٛ اِتَّيْ کٛو نغَلٜ لِسَلْ اَمْ نغَلْ رِمَتَا، ندٜنْ اٛ مٛعِّنَيْ کٛو نغَلٜ لِسَلْ دِمٛووَلْ، نغَمْ نغَلْ ٻٜيْدَ رِمُکِ؞ ³وٛلْدٜ ندٜ مٜتَنْمِعٛنْ يَادَکٜ وَرْتِرِيعٛنْ لَٻّٜ؞ ⁴نجٛوطٜىٰ اٛنْ نجٛکّٛوتِرِ اٜ اَمْ، ندٜنْ مِنْ مَا مِ جٛوطٛتٛ اٜ مِ جٛکّٛوتِرِ اٜ مٛوطٛنْ؞ لِسَلْ وَاوَتَا رِمَ کَنُمْ تَنْ، سٜيْ تٛ نغَلْ جٛکّٛوتِرِي اٜ لَيٛلْ؞ نٛنْ اٛنٛنْ مَا اٛنْ مبَاوَتَا نغَطٛنْ غٛطُّمْ طُمْ اَللَّه يِطِ سٜيْ تٛ اٛنْ نجٛکّٛوتِرِي اٜ اَمْ؞

⁵‏«‏مِنْ وٛنِ لَيٛلْ اِنَبٛحِ، اٛنٛنْ نغٛنِ لِشٜ مَاغٛلْ؞ کٛو مٛيٜ جٛوطِيطٛ اٜ جٛکّٛوتِرِ اٜ اَمْ، مِنْ مَا اٜ مِ جٛکّٛوتِرِ اٜ مَاکٛ، اٛ وَرْتَيْ بٛ لِسَلْ دِمَيْنغَلْ ٻِکّٛيْ طُطْکٛيْ؞ نغَمْ تٛ نَاع اٛنْ کَوْتُ اٜ اَمْ، اٛنْ مبَاوَتَا نغَطٛنْ غٛطُّمْ؞ ⁶فُو نٜطّٛ مٛ جٛکّٛتِرَايِ اٜ اَمْ، اٜ مٛ نَنْدِ اٜ لِسَلْ ڤٜعِّتَانغَلْ يٛورِ؞ اِرِ نغَلْ طٛنْ لِسَلْ اٜ نغَلْ حٛشّٜىٰ نغَلْ حُبِنٜىٰ ندٜرْ حِيتٜ نغَلْ وُلَ؞ ⁷تٛ اٛنْ نجٛکّٛوتِرِي اٜ اَمْ ندٜنْ بٛلِيطٜ اَمْ اٜ نجٛکّٛوتِرِ اٜ مٛوطٛنْ، تٛرٜىٰ کٛو طُمٜ طُمْ نغِطّٛنْ، طُمْ حٛکَّيْعٛنْ طُمْ؞ ⁸کٛ تٜدِّنْتَ ݧَاکٛ اَمْ وٛنِ نغَطٛنْ کٛ اٛ يِطِ ندٜ طُطُّمْ؞ کَنْجُمْ حٛلَّتَ اٛنْ تٛکُّٻٜيَمْ؞ ⁹نٛنْ نٛ ݧَاکٛ مٛ دٛوْ يِطِرِيَمْ، نٛنْ مِنْ مَا اٜ مِ يِطِعٛنْ؞ نجٛوطٜىٰ ندٜرْ يِدّٜ اَمْ؞ ¹⁰تٛ اٛنْ نغَطِي کٛ مبِيمِ طُمْ وَطَ، اٛنْ نجٛوطٛتٛ ندٜرْ يِدّٜ اَمْ، نٛنْ نٛ نغَطِرْمِ کٛ ݧَاکٛ اَمْ مٛ دٛوْ وِعِ طُمْ وَطَ نجٛوطِيمِ ندٜرْ يِدّٜ مَاکٛ؞

¹¹‏«‏مِ وِعُعٛنْ طُعُمْ نغَمْ نَنٛنْ بٜلْطُمْ ندٜرْ ٻٜرْطٜ مٛوطٛنْ اِرِ طُمْ اَمْ، ندٜنْ بٜلْطُمْ طُمْ وَرْتَ کٜوْطُمْ؞ ¹²کٛ نغِنْمِ نغَطٛنْ وٛنِ نغِطِنْدِرٛنْ نٛنْ نٛ نغِطِرْمِعٛنْ؞ ¹³وَلَا يِدّٜ ٻُرْندٜ ندٜعٜ، وَاتٛ نٜطّٛ حٛکَّ يٛنْکِ مُوطُمْ نغَمْ حِغٛوٻٜ مُوطُمْ؞ ¹⁴اٛنٛنْ نغٛنِ حِغٛوٻٜ اَمْ تٛ اٛنْ نغَطِي کٛ مبِيمِ طُمْ وَطَ؞ ¹⁵مِ فُطِّتَتَا مِ نٛدِّرَعٛنْ مَشُّٻٜ، نغَمْ مَشُّطٛ اَنْدَا کٛ جٜيْطٛمٛ وَطَتَ؞ اَمَّا مِ نٛدِّيعٛنْ حِغٛوٻٜ، نغَمْ مِ اَنْدِنِيعٛنْ کٛو طُمٜ طُمْ نَنْمِ تٛ ݧَاکٛ اَمْ؞ ¹⁶نَاع اٛنٛنْ شُٻِيَمْ، مِنْ سُٻِعٛنْ حٛکِّعٛنْ کُوغَلْ نجَحٛنْ نغَطٛنْ غٛطُّمْ طُمْ اَللَّه يِطِ تَبِتَيْطُمْ؞ ندٜنْ ݧَاکٛ مٛ دٛوْ حٛکَّيْعٛنْ کٛو طُمٜ طُمْ تٛرِيطٛنْمٛ ندٜرْ اِنْدٜ اَمْ؞ ¹⁷کٛ مبِيمِ نغَطٛنْ وٛنِ، نغِطِندِرٜىٰ؞

نغَݧَاندِ دُونِيَارُ

¹⁸‏«‏تٛ يِمْٻٜ دُونِيَارُ نغَݧِيعٛنْ، اَنْدٜىٰ مِنْ ٻٜ اَرْتِ وَݧُکِ؞ ¹⁹دَا دُونِيَارُ ندُعُ جٜيِعٛنْ، دَا ندُ يِطَيْعٛنْ نٛ ندُ يِطِرِ ٻٜ مَيْرُ؞ اَمَّا مِ سُٻِيعٛنْ دَغَ ندٜرْ دُونِيَارُ، نغَمْ اٛنٛنْ نَاع طُمْ ٻٜ دُونِيَارُ؞ کَنْجُمْ وَطِ يِمْٻٜ مَيْرُ نغَݧِعٛنْ؞ ²⁰ݧُمٜىٰ کٛ مبِينٛومِعٛنْ، ‏‹‏وَلَا مَشُّطٛ ٻُرْطٛ جٜيْطٛمٛ؞›‏ تٛ يِمْٻٜ دُونِيَارُ تٛرِّييَمْ، اٛنٛنْ مَا ٻٜ تٛرَّيْعٛنْ؞ تٛ ٻٜ تٛکِّي اٜکِّتِنٛلْ اَمْ، اٛنٛنْ مَا ٻٜ تٛکَّيْ اٜکِّتِنٛلْ مٛوطٛنْ؞ ²¹اَمَّا ٻٜ نغَطَنَيْعٛنْ فُو فِي طُعُمْ نغَمْ اٛنٛنْ طُمْ ٻٜ اَمْ، نغَمْ ٻٜ اَنْدَا اٛنْ طٛنْ لِلٛيْطٛيَمْ؞ ²²دَا مِ وَرَايِ مٜتَنْمِٻٜ، دَا ٻٜ نغَلَا حَکّٜ؞ اَمَّا جٛونِ ٻٜ نغَلَا کٛ ٻٜ مبِعَتَ نغَمْ حَکّٜ مَٻّٜ؞ ²³کٛو مٛيٜ غَݧُطٛيَمْ وَݧِي ݧَاکٛ اَمْ مَا؞ ²⁴دَا مِ وَطَايِنٛ کُوطٜ طٜ غٛطّٛ مٜىٰطَايِ وَطُکِ ندٜرْ مَٻّٜ، دَا ٻٜ نغَلَا حَکّٜ؞ اَمَّا جٛونِ ٻٜ نغِعِي کُوطٜ کَيْطِنِيطٜ طٜعٜ، فُو اٜ نٛنْ ٻٜ نغَݧِييَمْ مِنْ اٜ ݧَاکٛ اَمْ مٛ دٛوْ؞ ²⁵طُعُمْ طُمْ وَطُ نغَمْ طُمْ حٜبِّنَ کٛ وِنْدَا ندٜرْ اَتَّوْرَ مَٻّٜ، ‏‹‏ٻٜ نغَݧِييَمْ وَلَا دَلِيلَ؞›‏

²⁶‏«‏بَلَّيْطُمْ وَرَيْ، وَاتٛ رُوحُ اَللَّه کٛلَّيْطُمْ غٛونغَ، طُمْ لِلٛيَيْمِ دَغَ تٛ ݧَاکٛ مٛ دٛوْ؞ تٛ طُمْ وَرِي، طُمْ حٛکَّيْ شٜيْدَ دٛوْ اَمْ؞ ²⁷اٛنٛنْ مَا دٛولٜ کٛکّٛنْ شٜيْدَ دٛوْ اَمْ نغَمْ اٛنْ نغٛنْدِ اٜ اَمْ دَغَ اَرَنْدٜ؞

¹‏«‏مِ وِعُ فُو طُعُمْ نغَمْ تٛع اَلٛنْ حٛولَاکِيَمْ؞ ²طُمْ رِيوَيْعٛنْ دَغَ ندٜرْ لٜݧٛلْ؞ غٛونغَ، شَرٜلْ اٜ وَرَ نغٜلْ کٛو مٛيٜ بَرْطٛعٛنْ ݧُمَيْ اَللَّه حُوَنْتَ؞ ³يِمْٻٜ نغَطَنَيْعٛنْ نٛنْ نغَمْ ٻٜ اَنْدَا ݧَاکٛ مٛ دٛوْ، ٻٜ اَنْدَايَمْ؞ ⁴اَمَّا مِ وِعُعٛنْکَ نغَمْ تٛ شَرٜلْ نغٜلْ وَطِي شِفْتٛرٛنْ کٛ مبِيمِعٛنْ؞ مِ وِعَايِعٛنْکَ دَغَ اَرَنْدٜ نغَمْ اٜ مِ وٛنْدِ اٜ مٛوطٛنْ؞

کُوغَلْ رُوحُ اَللَّه

⁵‏«‏جٛونِ مِ سٛعّٛتٛ تٛ اٛنْ طٛنْ لِلٛيْطٛيَمْ، فُو اٜ نٛنْ ندٜرْ مٛوطٛنْ وَلَا پَمُطٛيَمْ تٛ نجَحَيْمِ؞ ⁶جٛونِ ٻٜرْطٜ مٛوطٛنْ نغَنِّي نغَمْ مِ وِعِيعٛنْ فُو فِي طُعُمْ؞ ⁷اَمَّا اٜ مِ وِعَعٛنْ غٛونغَ، نغَمْ ٻٜيْدَارِ مٛوطٛنْ ندِلَّيْمِ؞ نغَمْ تٛ مِ دِلَّايِ، طُمْ طٛنْ بَلَّيْطُمْ وَرَنْتَاعٛنْ؞ اَمَّا تٛ مِ دِلِّي، مِ لِلٛيَيْطُمْ تٛ مٛوطٛنْ؞ ⁸تٛ طُمْ وَرٛيِي، طُمْ حٛلَّيْ يِمْٻٜ دُونِيَارُ ٻٜ ڤَامَايِ بٛطُّمْ کٛ وٛنِ حَکّٜ، اٜ اَادِلَاکُ اَللَّه، اٜ کِيتَ مَاکٛ؞ ⁹ٻٜ ڤَامَايِ کٛ وٛنِ حَکّٜ، نغَمْ ٻٜ کٛولَاکِيَمْ؞ ¹⁰ٻٜ ڤَامَايِ کٛ وٛنِ اَادِلَاکُ، نغَمْ مِ سٛعّٛتٛ تٛ ݧَاکٛ مٛ دٛوْ، ندٜنْ اٛنْ ڤُطِّتَتَا نغِعٛنْيَمْ؞ ¹¹ٻٜ ڤَامَايِ کٛ وٛنِ کِيتَ اَللَّه، نغَمْ لَامِيطٛ دُونِيَارُ ندُعُ يَادَکٜ تَپَنَامَ کِيتَ؞

¹²‏«‏اٜ مِ وٛودِ فِي طُطُّمْ طُمْ نغِطُمِ وِيکِعٛنْ، اَمَّا جٛونِ طُمْ تٜدَّنَيْعٛنْ؞ ¹³اَمَّا شَرٜلْ نغٜلْ رُوحُ اَللَّه کٛلَّيْطُمْ غٛونغَ وَرِي، طُمْ اَنْدِنَيْعٛنْ غٛونغَ فُو؞ طُمْ مٜتَتَا بٛلِيطٜ طٜ حٛورٜ مَاجُمْ، کٛ طُمْ نَنِ تَنْ طُمْ مٜتَتَ، ندٜنْ طُمْ وِعَيْعٛنْ کٛ وَطَتَ يٜىٰسٛ؞ ¹⁴رُوحُ طُمْ حٛشَّيْ کٛ مبِيمِ طُمْ وِعَعٛنْکَ، نٛنْ طُمْ حٛلِّرْتَ تٜدُّنغَلْ اَمْ؞ ¹⁵فُو کٛ ݧَاکٛ مٛ دٛوْ وٛودِ، مِنْ جٜيِطُمْ؞ کَنْجُمْ وَطِ مبِيمِ رُوحُ مَاکٛ حٛشَّيْ کٛ مبِيمِ طُمْ وِعَعٛنْکَ؞

نَوْطُمْ ٻٜرْندٜ وَرْتَيْ بٜلْطُمْ ٻٜرْندٜ

¹⁶‏«‏يٜىٰسٛ طٛعٛ سٜطَّ اٛنْ نغِعَتَايَمْ، ندٜنْ غَطَ شَرٜلْ سٜطَّ اٛنْ نغِعَيْيَمْ؞»‏

¹⁷وٛٻّٜ ندٜرْ تٛکُّٻٜمٛ نغَطِ کَ پَمْپَمْتِرْکِ اٜ ٻٜ مبِعَ، ‏«‏کٛ اٛ يِطِ وِيکِ ندٜ اٛ وِعِعٜنْ يٜىٰسٛ طٛعٛ سٜطَّ اٜنْ نغِعَتَامٛ، ندٜنْ غَطَ شَرٜلْ سٜطَّ اٜنْ نغِعَيْمٛ؟ کَدِنْ اٛ وِعِ نغَمْ اٛ يَحَيْ تٛ ݧَاکٛ مٛ دٛوْ؞»‏ ¹⁸ٻٜ مبِعِ، ‏«‏کٛ اٛ يِطِ وِيکِ ندٜ اٛ وِعِ، ‏‹‏شَرٜلْ سٜطَّ؟›‏ اٜنْ اَنْدَا کٛ اٛ يِطِ وِيکِ؞»‏

¹⁹يٜىٰسُ اٜ اَنْدِ اٜ ٻٜ نغِطِ ٻٜ پَمَمٛ دٛوْ مَاجُمْ، نغَمْ نٛنْ اٛ وِعِٻٜ، ‏«‏اٛنْ مٜدَّ حَکُّندٜ مٛوطٛنْ دٛوْ مَعَنَ کٛ مبِيمِ ندٜ مبِيمِ، ‏‹‏يٜىٰسٛ طٛعٛ اٛنْ نغِعَتَايَمْ، ندٜنْ غَطَ شَرٜلْ سٜطَّ اٛنْ نغِعَيْيَمْ؟›‏ ²⁰اٜ مِ وِعَعٛنْ غٛونغَ، اٛنْ مبٛيَيْ، اٛنْ نغَنَّيْ، اَمَّا يِمْٻٜ دُونِيَارُ مبٜلْمبٜلْتَيْ؞ اٛنْ نَنَيْ نَوْطُمْ ٻٜرْندٜ، اَمَّا نَوْطُمْ ٻٜرْندٜ ندٜنْ وَرْتَيْ بٜلْطُمْ ٻٜرْندٜ؞ ²¹شَرٜلْ نغٜلْ دٜبّٛ دَݧَتَ اٛ نَنَيْ نَوْطُمْ، نغَمْ شَرٜلْ يَرْکِ بٛنٜ مَاکٛ وَرِي؞ اَمَّا تٛ اٛ دَݧِي ٻِنْغٜلْ مَاکٛ، اٛ يٜجِّتَيْ تٛرَّ کَ اٛ يَرِ، نغَمْ نَنْکِ بٜلْطُمْ ٻِنْغٜلْ دَݧَامَ ندٜرْ دُونِيَارُ؞ ²²نٛنْ طُمْ وٛنِ تٛ مٛوطٛنْ؞ جٛونِ طُمْ شَرٜلْ نغٜلْ نَنٛتٛنْ نَوْطُمْ ٻٜرْندٜ، اَمَّا مِ فُطِّتَيْ مِ يِعَعٛنْ، ندٜنْ اٛنْ مبٜلْمبٜلْتَيْ؞ وَلَا بَاوَيْطٛ اِتَّنَعٛنْ بٜلْطُمْ ٻٜرْندٜ؞

²³‏«‏اٜ ندٜنْ طٛنْ ݧَلْندٜ، اٛنْ تٛرَتَاکٛيَمْ غٛطُّمْ؞ اٜ مِ وِعَعٛنْ غٛونغَ، کٛو طُمٜ طُمْ تٛرِيطٛنْ ݧَاکٛ مٛ دٛوْ ندٜرْ اِنْدٜ اَمْ، اٛ حٛکَّيْعٛنْ طُمْ؞ ²⁴حَا جٛونِ اٛنْ تٛرَاکِ غٛطُّمْ ندٜرْ اِنْدٜ اَمْ؞ تٛرٜىٰ اٛنْ کٜٻَيْ، نغَمْ وٜلْوٜلٛ مٛوطٛنْ حٜىٰوَ؞

جَالٛرْغَلْ دٛوْ دُونِيَارُ

²⁵‏«‏مِ حُوتِرِي مِسَالُ مِ وِعِيعٛنْ فُو طُعُمْ؞ اَمَّا شَرٜلْ اٜ وَرَ نغٜلْ مِ مٜتِرَنْتَاعٛنْ مِسَالُ، اَمَّا مِ مٜتَنَيْعٛنْ اٜ نجَيْرِ دٛوْ ݧَاکٛ مٛ دٛوْ؞ ²⁶اٜ ندٜنْ طٛنْ ݧَلْندٜ اٛنْ تٛرٛتٛ ندٜرْ اِنْدٜ اَمْ؞ مِ وِعَايِعٛنْ مِ تٛرٛتٛمٛ نغَمْ مٛوطٛنْ؞ ²⁷نغَمْ ݧَاکٛ مٛ دٛوْ کَنْکٛ اٜ حٛورٜ مَاکٛ اٜ مٛ يِطِعٛنْ؞ اٜ مٛ يِطِعٛنْ نغَمْ اٛنْ نغِطِيَمْ، ندٜنْ اٛنْ کٛولَکٜ دَغَ تٛ مَاکٛ پِوٛيْمِ؞ ²⁸مِ پِوٛيِي تٛ مَاکٛ مِ وَرِ دُونِيَارُ، ندٜنْ جٛونِ مِ اَلَيْ دُونِيَارُ مِ پٜىٰݝَيْ تٛ مَاکٛ؞»‏

²⁹سٜيْ تٛکُّٻٜ يٜىٰسُ مبِعِمٛ، ‏«‏جٛونِ اَ مٜتَ اٜ نجَيْرِ اَ حُوتِرْتَا مِسَالُ؞ ³⁰جٛونِ اٜ مِنْ اَنْدِ اَ اَنْدِ کٛو طُمٜ، نَاع نَا غٛطّٛ پَمِيمَ پَمْطٜ؞ طُعُمْ وَطِي مِنْ نجَٻِ دَغَ تٛ اَللَّه پِوٛيْطَا؞»‏

³¹يٜىٰسُ وِعِٻٜ، ‏«‏جٛونِ اٛنْ کٛولَکٜيَمْ؟ ³²شَرٜلْ اٜ وَرَ نغٜلْ يَادَکٜ نغٜلْ وَرِ نغٜلْ طُمْ سَنْکِتَتَعٛنْ، کٛو مٛيٜ سٛعّٛو وُرٛ مُوطُمْ؞ اٛنْ اَلَيْيَمْ مِنْ تَنْ؞ اَمَّا نَاع طُمْ مِنْ تَنْ، نغَمْ ݧَاکٛ مٛ دٛوْ اٜ وٛنْدِ اٜ اَمْ؞ ³³مِ وِعُعٛنْ طُعُمْ نغَمْ کٜٻٛنْ بٜلْطُمْ ٻٜرْندٜ بَرْکَ سُمْڤٛوتِرْکِ اٜ اَمْ؞ ندٜرْ دُونِيَارُ ندُعُ اٛنْ نجَرَيْ تٛرَّ؞ اَمَّا تٛع اٛنْ نغَنُّ، مِ حٜٻِي جَالٛرْغَلْ دٛوْ دُونِيَارُ؞»‏

يٜىٰسُ وَطَنِي تٛکُّٻٜمٛ دٛعَارٜ

¹غَطَ يٜىٰسُ يٛتِّنِي وِيکِ بٛلِيطٜ طٜعٜ، اٛ رَارِ دٛوْ اٛ وِعِ، ‏«‏ݧَاکٛ اَمْ، شَرٜلْ وَرِي؞ مَوْنِنْ ٻِطّٛ مَاطَ، نغَمْ ٻِطّٛ مَاطَ تٜدِّنِيمَ؞ ²نغَمْ اَ حٛکِّيمٛ لَامُ دٛوْ يِمْٻٜ فُو، نغَمْ اٛ حٛکَّ فُو ٻٜ کٛکُّطَامٛ يٛنْکِ کِ رٜعَتَا؞ ³يٛنْکِ کِ رٜعَتَا وٛنِ ٻٜ اَنْدُمَا، اَنْ تَنْ وٛنِ اَللَّه غٛونغَاجٛ، ندٜنْ ٻٜ اَنْدَ يٜىٰسُ اَلْمَسِيحُ مٛ لِلٛيْطَا؞ ⁴مِ تٜدِّنِيمَ ندٜرْ دُونِيَارُ، مِ يٛتِّنِي کُوغَلْ نغَلْ کٛکُّطَايَمْ؞ ⁵ݧَاکٛ اَمْ، جٛونِ تٜدِّنَمْ يٜىٰسٛ مَاطَ تٜدُّنغَلْ نغَلْ نغٛودُنٛومِ يٜىٰسٛ مَاطَ کٛ دُونِيَارُ تَغٜىٰ؞

⁶‏«‏مِ اَنْدِنِي حَبَرُ مَاطَ تٛ ٻٜنْ طٛنْ ٻٜ کٛکُّطَايَمْ دَغَ ندٜرْ دُونِيَارُ؞ اَنْ جٜيِٻٜ، ندٜنْ اَ حٛکِّييَمْٻٜ، کَدِنْ اٜ ٻٜ تٛکِّ وٛلْدٜ مَاطَ؞ ⁷جٛونِ اٜ ٻٜ اَنْدِ کٛو طُمٜ طُمْ کٛکُّطَايَمْ تٛ مَاطَ طُمْ پِوٛيِ؞ ⁸مِ وِعِيٻٜ بٛلِيطٜ طٜ مبِيطَايَمْ، ٻٜ بٛو نجَٻِيطٜ؞ ٻٜ اَنْدِي طُمْ غٛونغَ تٛ مَاطَ پِوٛيْمِ، ندٜنْ ٻٜ کٛولَکٜ اَنْ لِلٛيِيَمْ؞

⁹‏«‏اٜ مِ وَطَنَٻٜ دٛعَارٜ؞ نَاع يِمْٻٜ دُونِيَارُ نغَطَنَيْمِ دٛعَارٜ، اَمَّا ٻٜنْ طٛنْ ٻٜ کٛکُّطَايَمْ، نغَمْ اَنْ جٜيِٻٜ؞ ¹⁰فُو ٻٜ نغٛودُمِ اَنْ جٜيِٻٜ، ندٜنْ فُو ٻٜ نغٛودُطَا مِنْ جٜيِٻٜ، ندٜنْ مِ تٜدِّنَامَ بَرْکَ مَٻّٜ؞ ¹¹جٛونِ نَاع کٛ نٜىٰٻِ مِ اَلَيْ دُونِيَارُ مِ وَرٛيَ تٛ مَاطَ، اَمَّا کَمْٻٜ اٜ ٻٜ ندٜرْ دُونِيَارُ؞ ݧَاکٛ اَمْ شٜنِيطٛ، سُرِرْٻٜ بَوْطٜ اِنْدٜ مَاطَ، اِنْدٜ ندٜ کٛکُّطَايَمْ، نغَمْ ٻٜ نغَرْتَ غٛعٛ نٛنْ نٛ اَنْ اٜ مِنْ اٜنْ غٛعٛ؞ ¹²کٛ نغٛنْدُنٛومِ اٜ مَٻّٜ مِ سُرِرِيٻٜ بَوْطٜ اِنْدٜ مَاطَ، اِنْدٜ ندٜ کٛکُّطَايَمْ؞ مِ رٜىٰنِيٻٜ، وَلَا کٛو غٛعٛتٛ مَٻّٜ مَجُّطٛ، سٜيْ نِ نٜطّٛ کَلْکَتٜىٰطٛ نغَمْ کٛ اَايَارٜ وِعِ حٜىٰوَ؞ ¹³جٛونِ اٜ مِ وَرٛيَ تٛ مَاطَ؞ مِ وِعُ فُو طُعُمْ شَرٜلْ نغٜعٜلْ نغٜلْ نغٛنْمِ ندٜرْ دُونِيَارُ نغَمْ ٻٜ نَنَ اِرِ بٜلْطُمْ ٻٜرْندٜ طُمْ نَنَيْمِ ٻٜ نَنَ طُمْ کٜوْطُمْ؞ ¹⁴مِ وِعِيٻٜ وٛلْدٜ مَاطَ؞ دُونِيَارُ وَݧِيٻٜ، نغَمْ نَاع دُونِيَارُ جٜيِٻٜ، نٛنْ نٛ مِنْ مَا نَاع دُونِيَارُ جٜيِيَمْ؞ ¹⁵نَاع اٜ مِ تٛرٛمَا نغَمْ اِتَّاٻٜ ندٜرْ دُونِيَارُ، اَمَّا اٜ مِ تٛرٛمَا نغَمْ شُرَاٻٜ دَغَ اٛنْ طٛنْ کَلُّطٛ؞ ¹⁶دُونِيَارُ جٜيَايِٻٜ نٛنْ نٛ مِنْ مَا دُونِيَارُ جٜيَايِيَمْ؞ ¹⁷وَرْتِرْٻٜ يِمْٻٜ مَاطَ لَاوٛلْ غٛونغَ مَاطَ؞ وٛلْدٜ مَاطَ وٛنِ غٛونغَ؞ ¹⁸نٛنْ نٛ لِلِرٛيْطَايَمْ ندٜرْ دُونِيَارُ، مِنْ مَا مِ لِلِيٻٜ ندٜرْ دُونِيَارُ؞ ¹⁹مِ حٛکِّيمَ حٛورٜ اَمْ نغَمْ مَٻّٜ، نغَمْ کَمْٻٜ مَا ٻٜ کٛکُّمَا کٛعٜ مَٻّٜ اٜ غٛونغَ؞

²⁰‏«‏نَاع کَمْٻٜ تَنْ نغَطَنَيْمِ دٛعَارٜ، اَمَّا فُو اٜ ٻٜنْ طٛنْ کٛولٛتٛوٻٜيَمْ لَاوٛلْ وَعَجُ مَٻّٜ؞ ²¹اٜ مِ وَطَ دٛعَارٜ ٻٜ فُو مَٻّٜ ٻٜ نغَرْتَ غٛعٛ؞ ݧَاکٛ اَمْ اٜ مِ تٛرٛمَا، ٻٜ کٜٻَ ٻٜ شُمْڤٛوتِرَ اٜ مٜىٰطٜنْ نٛنْ نٛ شُمڤٛوتِرْتٜنْ، نغَمْ دُونِيَارُ جَٻَ اَنْ لِلٛيِيَمْ؞ ²²مِ حٛکِّيٻٜ تٜدُّنغَلْ اِرِ نغَلْ کٛکُّطَايَمْ، نغَمْ ٻٜ نغَرْتَ غٛعٛ، نٛنْ نٛ مِنْ اٜ اَنْ اٜنْ غٛعٛ؞ ²³اٜ مِ سُمْڤٛوتِرَ اٜ مَٻّٜ ندٜنْ اٜنْ شُمْڤٛوتِرَ نغَمْ ٻٜ نغَرْتَ غٛعٛ ندٜرْ کٛو طُمٜ، نغَمْ دُونِيَارُ اَنْدَ اَنْ لِلِيَمْ، کَدِنْ اَ يِطِٻٜ نٛنْ نٛ نغِطِرْطَايَمْ؞

²⁴‏«‏يَا ݧَاکٛ اَمْ مٛ دٛوْ، اٜ مِ يِطِ ٻٜنْ طٛنْ ٻٜ کٛکُّطَايَمْ ٻٜ نغٛنْدَ اٜ اَمْ تٛ نغٛنْمِ، ٻٜ نغِعَ تٜدُّنغَلْ اَمْ، تٜدُّنغَلْ نغَلْ کٛکُّطَايَمْ نغَمْ اَ يِطِيَمْ کٛ دُونِيَارُ تَغٜىٰ؞ ²⁵يَا ݧَاکٛ اَمْ اَادِلِيجٛ، يِمْٻٜ دُونِيَارُ اَنْدَامَ، اَمَّا مِنْ اٜ مِ اَنْدُمَا، ندٜنْ اٜ ٻٜ اَنْدِ اَنْ لِلٛيِيَمْ؞ ²⁶مِ اَنْدِنِيٻٜ حَبَرُ مَاطَ، ندٜنْ مِ ݧَمْرَيْ يٜىٰسٛ اٜ اَنْدِنْکِ حَبَرُ مَاطَ، نغَمْ يِدّٜ ندٜ کٛلَّتَايَمْ جٛوطٛو ندٜرْ ٻٜرْطٜ مَٻّٜ، ندٜنْ مِنْ اٜ حٛورٜ اَمْ مِ سُمْڤٛوتِرَ اٜ مَٻّٜ؞»‏

يٜىٰسُ نَنْغَامَ

¹غَطَ يٜىٰسُ يٛتِّنِي ندٜعٜ دٛعَارٜ، اٛ دِلِّدِ اٜ تٛکُّٻٜمٛ ٻٜ کُولِ لُغّٜرٜ کِدِرٛنْ؞ ٻٜ نجَحِ وٛنْدٜ وِغٜىٰرٜ غٛودُندٜ نغٜسَ لٜطّٜ جَيْتُنْ، ٻٜ نَتِّ ندٜرْ لٜطّٜ طٜنْ؞ ²تٛو، يَحُودَ کٛکِّتِرَيْطٛ يٜىٰسُ اٜ اَنْدِ وِغٜىٰرٜ ندٜنْ، نغَمْ ندٜ طُطُّمْ يٜىٰسُ اٜ حَوْرَ اٜ تٛکُّٻٜمٛ تٛنْ؞ ³سٜيْ يَحُودَ يَحِ نغٜسَ کَنْ اٜ اَرْدِي کَوْتَلْ سٛوجِعٜنْ رٛومَ، اٜ وٛٻّٜ تَادِيٻٜ وُرٛ شٜنِينغٛ ٻٜ مَوْٻٜ اَرْدِيٻٜ دِينَ اٜ فَارِسَنْکٛعٜنْ لِلِ؞ اٜ ٻٜ نجٛغِي فِتِلَاجِ، اٜ جَمٜ حِيتٜ، اٜ کٛ طُمْ حٛنِرْتَ؞ ⁴يٜىٰسُ ندٜ اٜ اَنْدِ فُو کٛ حٜٻَتَمٛ، اٛ دَرِي يٜىٰسٛ مَٻّٜ اٛ پَمِٻٜ، اٛ وِعِ، ‏«‏طُمْ مٛيٜ طَٻِّتٛتٛنْ؟»‏

⁵ٻٜ مبِعِ، ‏«‏يٜىٰسُ نَجَرَنْکٜىٰجٛ؞»‏

اٛ وِعِٻٜ، ‏«‏طُمْ مِنْ؞»‏

يَحُودَ کٛکِّتِرَيْطٛمٛ بٛو اٜ دَرٛدِي اٜ مَٻّٜ؞ ⁶ندٜ يٜىٰسُ وِعِٻٜ، ‏«‏طُمْ مِنْ،»‏ ٻٜ شٛعّٛرِي غَطَ ٻٜ نجَنِ اٜ لٜيْدِ؞ ⁷سٜيْ يٜىٰسُ فُطِّتِ پَمِٻٜ وِعِ، ‏«‏مٛيٜ طَٻِّتٛتٛنْ؟»‏

ٻٜ مبِعِ، ‏«‏يٜىٰسُ نَجَرَنْکٜىٰجٛ؞»‏

⁸اٛ وِعِٻٜ، ‏«‏مِ يَادَکٜ مِ وِعِيعٛنْ طُمْ مِنْ؞ تٛ نِ مِنْ طَٻِّتٛتٛنْ، اَلٜىٰ يِمْٻٜ ٻٜعٜ ندِلَّ؞»‏ ⁹اٛ وِعُ نٛنْ نغَمْ کٛ اٛ وِعُنٛ حٜىٰوَ، ‏«‏مِ دُلَّايِ کٛو غٛعٛتٛ ندٜرْ ٻٜنْ طٛنْ ٻٜ کٛکُّطَايَمْ؞»‏

¹⁰سِيمَنْ بِيتُرُسْ اٜ وٛودِ کَافَحِ، سٜيْ سٛلْتِکِ فٜعِّ مَشُّطٛ مَوْطٛ مَوْٻٜ اَرْدِيٻٜ دِينَ اِتَّنِمٛ نٛوْرُ ݧَامٛ؞ اِنْدٜ مَشُّطٛ اٛنْ مَلْکُسْ؞ ¹¹سٜيْ يٜىٰسُ وِعِ بِيتُرُسْ، ‏«‏وَتُّ کَافَحِ مَاطَ ندٜرْ حٛلْغٛ مَاکِ؞ اَ ݧُمَ مِ يَرَتَا جَرْدُغٜلْ تٛرَّ کَ ݧَاکٛ اَمْ حٛکَّتَيَمْ؟»‏

يٜىٰسُ يَارَامَ يٜىٰسٛ حَنَانَ

¹²سٜيْ سٛوجِعٜنْ رٛومَ اٜ اَرْدِيطٛٻٜ اٜ تَادِيٻٜ وُرٛ شٜنِينغٛ نَنْغِ يٜىٰسُ، ٻٜ کَٻِّمٛ؞ ¹³اَرَنْدٜ ٻٜ نجَارِمٛ تٛ حَنَانَ اٜسِرَاوٛ کَيَافَ؞ کَيَافَ اٛنْ وٛنِ مَوْطٛ مَوْٻٜ اَرْدِيٻٜ دِينَ اٜ طُنْ طٛنْ ندُنْغُ؞ ¹⁴کَنْکٛ وٛنِ کٛکُّطٛ اَرْدِيٻٜ يَحُودَنْکٛعٜنْ شَاوٛرِ وِيکِ، طُمْ ٻُرِي نٜطّٛ غٛعٛتٛ مَايَ نغَمْ کٛو مٛيٜ؞

بِيتُرُسْ وِعِ اَنْدَا يٜىٰسُ

¹⁵سِيمَنْ بِيتُرُسْ اٜ غٛطّٛ تٛکُّطٛ يٜىٰسُ ٻٜ تٛکِّ يٜىٰسُ؞ ندٜ اٛنْ طٛنْ تٛکُّطٛ يٜىٰسُ غٛعٛتٛ اٛنْ مَوْطٛ مَوْٻٜ اَرْدِيٻٜ دِينَ اٜ اَنْدِمٛ، سٜيْ اٛ يَادِ اٜ يٜىٰسُ تٛ نجَيْرِ وُرٛ مَوْطٛ مَوْٻٜ اَرْدِيٻٜ دِينَ اٛنْ؞ ¹⁶اَمَّا بِيتُرُسْ دَرِي يَاسِ تٛ دَمُّغَلْ وُرٛ نغٛنْ؞ سٜيْ اٛنْ طٛنْ تٛکُّطٛ يٜىٰسُ مٛ مَوْطٛ مَوْٻٜ اَرْدِيٻٜ دِينَ اَنْدِ، اٛ وُرْتِي يَاسِ، اٛ مٜتَنِ دٜبّٛ ڤَامَنٛووٛ دَمُّغَلْ نغَلْ، اٛ نَتِّنِ بِيتُرُسْ؞ ¹⁷سٜيْ دٜبّٛ ڤَامَنٛووٛ دَمُّغَلْ اٛنْ وِعِ بِيتُرُسْ، ‏«‏اَنْ، نَاع اَ غٛعٛتٛ ندٜرْ تٛکُّٻٜ اٛنْ طٛنْ نٜطّٛ؟»‏

بِيتُرُسْ وِعِ، ‏«‏کٛو سٜطَّ، نَاع مِ تٛکُّطٛمٛ؞»‏

¹⁸اٜ شَرٜلْ نغٜلْ اٜ وٛودِ ڤٜىٰوٛلْ، نغَمْ نٛنْ مَشُّٻٜ اٜ تَادِيٻٜ وُرٛ شٜنِينغٛ کُٻِّ حِيتٜ، اٜ ٻٜ ڤِلِينغٜ، اٜ ٻٜ اِرْفٛو؞ سٜيْ بِيتُرُسْ کَنُمْ مَا ٻَدِّي دَرِي ندٜرْ مَٻّٜ اٜ اِرْفٛو؞

مَوْطٛ مَوْٻٜ اَرْدِيٻٜ دِينَ پَمِي يٜىٰسُ

¹⁹سٜيْ مَوْطٛ مَوْٻٜ اَرْدِيٻٜ دِينَ پَمِ يٜىٰسُ دٛوْ تٛکُّٻٜمٛ اٜ دٛوْ اٜکِّتِنٛلْ مَاکٛ؞ ²⁰يٜىٰسُ وِعِمٛ، ‏«‏کٛو ندٜيٜ اٜ مِ مٜتَنَ کٛو مٛيٜ اٜ نجَيْرِ؞ کٛو ندٜيٜ اٜ مِ اٜکِّتِنَ اٜکِّتِنٛلْ اَمْ ندٜرْ شُوطِ دٛعَارٜ اٜ ندٜرْ وُرٛ شٜنِينغٛ تٛ فُو يَحُودَنْکٛعٜنْ کَوْرَتَ؞ مِ مٜىٰطَايِ وِيکِ غٛطُّمْ اٜ سُوطٜ؞ ²¹نغَمْ طُمٜ پَمَتَايَمْ پَمْطٜ طٜعٜ؟ پَمُ يِمْٻٜ نَنْٻٜ اٜکِّتِنٛلْ اَمْ؞ غٛونغَ اٜ ٻٜ اَنْدِ کٛ مبِيمِ؞»‏

²²ندٜ يٜىٰسُ وِعِ نٛنْ، غٛعٛتٛ ندٜرْ تَادِيٻٜ دَرِيطٛ حَادٜ مَاکٛ حٜلِّمٛ تٛ وٛلٛ، وِعِ، ‏«‏نٛنْ مٜتِرَنْتَا مَوْطٛ مَوْٻٜ اَرْدِيٻٜ دِينَ؟»‏

²³يٜىٰسُ وِعِمٛ، ‏«‏تٛ نِ مِ وِعِي غٛطُّمْ طُمْ حَانَا، وِعُکَ کٛو مٛيٜ طٛعٛ؞ اَمَّا تٛ کٛ مبِيمِ طُمْ غٛونغَ، نغَمْ طُمٜ کٜلُّطَايَمْ تٛ وٛلٛ؟»‏

²⁴سٜيْ حَنَانَ وَطِ طُمْ سٛعِّ يٜىٰسُ تٛ کَيَافَ مَوْطٛ مَوْٻٜ اَرْدِيٻٜ دِينَ، اٜ مٛ حَٻِّي؞

بِيتُرُسْ فُطِّتِي وِعِ اَنْدَا يٜىٰسُ

²⁵بِيتُرُسْ اٜ دَرِي طٛنْ اٜ اِرْفٛو، سٜيْ وٛٻّٜ مبِعِمٛ، ‏«‏اَنْ مَا، نَاع اَ غٛعٛتٛ ندٜرْ تٛکُّٻٜ اٛنْ طٛنْ نٜطّٛ؟»‏

اَمَّا بِيتُرُسْ يٜدِّ وِعِ، ‏«‏نَاع مِ تٛکُّطٛمٛ؞»‏

²⁶غٛعٛتٛ ندٜرْ مَشُّٻٜ مَوْطٛ مَوْٻٜ اَرْدِيٻٜ دِينَ بَنْدِرَاوٛ نٜطّٛ مٛ بِيتُرُسْ اِتَّنِ نٛوْرُ اٛ وِعِ بِيتُرُسْ، ‏«‏نَاع مِ يِيدِيمَ اٜ مَاکٛ تٛنْ ندٜرْ نغٜسَ لٜطّٜ جَيْتُنْ؟»‏

²⁷بِيتُرُسْ فُطِّتِ وِعِ، ‏«‏نَاع طُمْ مِنْ؞»‏ اٜ مٛ وِعَکَ نجَکَرْدِ حَنِ؞

يٜىٰسُ يٜىٰسٛ بِلَاتُسْ

²⁸سٜيْ يَحُودَنْکٛعٜنْ کٛشِّ يٜىٰسُ دَغَ وُرٛ کَيَافَ ٻٜ نجَارِمٛ لَامٛرْدٜ غٛمْنَاجٛ رٛومَنْکٜىٰجٛ؞ اٜ شَرٜلْ نغٜلْ طُمْ اِلَا سُبَکَ؞ اَرْدِيٻٜ يَحُودَنْکٛعٜنْ نَتَّايِ لَامٛرْدٜ ندٜنْ، نغَمْ تٛع ٻٜ نغَرْتَ ٻٜ لَاٻَا، ٻٜ کَطٜىٰ ݧَامُکِ ݧَمْندُ حُمْتٛ سَکِّنْکِ؞ ²⁹نغَمْ نٛنْ، بِلَاتُسْ وُرْتِي يَحِ تٛ مَٻّٜ پَمِٻٜ، وِعِ، ‏«‏طُمٜ نغُلّٛرْتٛوطٛنْ نٜطّٛ اٛعٛ؟»‏

³⁰ٻٜ مبِعِمٛ، ‏«‏دَا نَاع اٛ غَطٛووٛ کٛ حَلِّ، دَا مِنْ نغَدَّايِمٛ تٛ مَاطَ؞»‏

³¹بِلَاتُسْ وِعِٻٜ، ‏«‏اٛنٛنْ اٜ کٛعٜ مٛوطٛنْ کٛشّٜىٰمٛ نغَطَنٛنْمٛ کِيتَ نٛ دٛوکَ مٛوطٛنْ وِعِ؞»‏

ٻٜ مبِعِمٛ، ‏«‏اٛنٛنْ رٛومَنْکٛعٜنْ اٛنْ اَلَتَامِنْ مِنْ تَپَنَ غٛطّٛ کِيتَ مَيْدٜ؞»‏ ³²طُعُمْ وَطُ نغَمْ طُمْ حٜبِّنَ کٛ يٜىٰسُ وِعُنٛ دٛوْ اِرِ مَيْدٜ ندٜ مَايَتَ؞

³³سٜيْ بِلَاتُسْ سٛعِّي ندٜرْ لَامٛرْدٜ، اٛ نٛدِّ يٜىٰسُ، اٛ پَمِمٛ اٛ وِعِ، ‏«‏اَنْ وٛنِ لَامِيطٛ يَحُودَنْکٛعٜنْ؟»‏

³⁴يٜىٰسُ نٛوتِي، وِعِ، ‏«‏نغٛعٛلْ پَمٛلْ تٛ مَاطَ نغٛلْ پِوِ، کٛو وٛٻّٜ کٛکُّمَا حَبَرُ اَمْ؟»‏

³⁵بِلَاتُسْ وِعِ، ‏«‏اَ ݧُمَ مِ يَحُودَنْکٜىٰجٛ؟ طُمْ لٜݧٛلْ مَاطَ اٜ مَوْٻٜ اَرْدِيٻٜ دِينَ نغَدُّمَا تٛ اَمْ؞ طُمٜ نغَطُطَا؟»‏

³⁶يٜىٰسُ وِعِ، ‏«‏لَامُ اَمْ نَاع دَغَ ندُعُ دُونِيَارُ طُمْ پِوٛيِ؞ دَا لَامُ اَمْ دَغَ مَيْرُ طُمْ پِوٛيِ، دَا تٛکُّٻٜيَمْ کٛنَيْ نغَمْ ٻٜ کَطَ طُمْ نَنْغَيَمْ طُمْ وَطَيَمْ ندٜرْ جُوطٜ اَرْدِيٻٜ يَحُودَنْکٛعٜنْ؞ اَمَّا لَامُ اَمْ نَاع دَغَ ندُعُ دُونِيَارُ طُمْ پِوٛيِ؞»‏

³⁷سٜيْ بِلَاتُسْ پَمِمٛ وِعِ، ‏«‏تٛو، اَنْ، اَ لَامِيطٛ وٛنْ طٛنْ؟»‏

يٜىٰسُ نٛوتِي، وِعِ، ‏«‏اَ وِعِي مِ لَامِيطٛ؞ نغَمْ طُعُمْ طُمْ دَݧِيَمْ، ندٜنْ نغَمْ مَاجُمْ نغَرْمِ ندٜرْ دُونِيَارُ نغَمْ مِ مٜتَ دٛوْ کٛ وٛنِ غٛونغَ؞ کٛو مٛيٜ غِطّٛ غٛونغَ تٛکَّيْ کٛ مبِيمِ؞»‏

³⁸بِلَاتُسْ پَمِمٛ وِعِ، ‏«‏طُمٜ وٛنِ غٛونغَ؟»‏

يٜىٰسُ تَپَنَامَ کِيتَ مَيْدٜ

غَطَ بِلَاتُسْ وِعِي نٛنْ فُطِّتِ وُرْتِي يَاسِ تٛ يَحُودَنْکٛعٜنْ وِعِٻٜ، ‏«‏مِ تَوْرَايِمٛ غٛطُّمْ کَلُّطُمْ؞ ³⁹اَمَّا طُمْ ندٛنُ مٛوطٛنْ مِ يٛوفَنَعٛنْ شُرَاطٛ غٛعٛتٛ شَرٜلْ حُمْتٛ سَکِّنْکِ؞ اٛنْ نغِطِ مِ يٛوفَنَعٛنْ لَامِيطٛ يَحُودَنْکٛعٜنْ؟»‏

⁴⁰ٻٜ نٛوتِي ٻٜ مبِعِ اٜ سٜمْبٜ، ‏«‏نَاع اٛعٛ نجٛوفَنْتَامِنْ، يٛوفَنْمِنْ بَرَبَّسْ!‏»‏ بَرَبَّسْ اٛنْ بٛو اٛ غٛعٛتٛ ندٜرْ کَٻْدٛوٻٜ اٜ لَامُ؞

¹سٜيْ بِلَاتُسْ وَطِ يٜىٰسُ فِيَا لٛوشِ؞ ²سٛوجِعٜنْ مبَالِ غِيفٛلْ غِعٜ، ٻٜ تَارَنِمٛنغٛلْ تٛ حٛورٜ، ندٜنْ ٻٜ ٻٛرْنِمٛ اِرِ تٛغّٛورٜ لَامِيٻٜ؞ ³ٻٜ نغَطِ کَ يَاکِ يٜىٰسٛ مَاکٛ، اٜ ٻٜ مبِعَ، ‏«‏اَللَّه رٜىٰنٜ، لَامِيطٛ يَحُودَنْکٛعٜنْ!‏»‏ ندٜنْ اٜ ٻٜ ڤِيَمٛ تٛ يٜىٰسٛ؞

⁴بِلَاتُسْ فُطِّتِ وُرْتِي يَاسِ وِعِ يَحُودَنْکٛعٜنْ، ‏«‏ندَارٜىٰ، مِ وُرْتِنَنَيْعٛنْ مٛ طٛعٛ نغَمْ اَنْدٛنْ مِ تَوْرَايِمٛ غٛطُّمْ کَلُّطُمْ؞»‏ ⁵ندٜ يٜىٰسُ وُرْتِنَا اٜ تَارَنَا غِيفٛلْ غِعٜ تٛ حٛورٜ ندٜنْ اٜ ٻٛرْنِي تٛغّٛورٜ اِرِ ندٜ لَامِيٻٜ، سٜيْ بِلَاتُسْ وِعِٻٜ، ‏«‏رَا نٜطّٛ اٛنْ؞»‏

⁶ندٜ مَوْٻٜ اَرْدِيٻٜ دِينَ اٜ تَادِيٻٜ وُرٛ شٜنِينغٛ نغِعِمٛ، ٻٜ مبِعِ اٜ سٜمْبٜ، ‏«‏وَرُمٛ!‏ وَرُمٛ دٛوْ غَافَانغَلْ!‏»‏

اَمَّا بِلَاتُسْ وِعِٻٜ، ‏«‏اٛنٛنْ کٛشّٜىٰمٛ مبَرٛنْمٛ؞ مِنْ مِ تَوْرَايِمٛ غٛطُّمْ کَلُّطُمْ؞»‏

⁷سٜيْ يَحُودَنْکٛعٜنْ مبِعِمٛ، ‏«‏اٜ مِنْ نغٛودِ دٛوکَ، کَدِنْ نٛنْ نٛ دٛوکَ طُمْ وِعِ دٛولٜ اٛ وَرٜىٰ، نغَمْ اٜ مٛ وِعَ کَنْکٛ وٛنِ ٻِطّٛ اَللَّه؞»‏

⁸ندٜ بِلَاتُسْ نَنِ نٛنْ، سٜيْ کُلٛلْ ٻٜيْدِ نَنْغُکِمٛ؞ ⁹سٜيْ اٛ سٛعِّي ندٜرْ لَامٛرْدٜ اٛ پَمِ يٜىٰسُ اٛ وِعِ، ‏«‏تٛيٜ پِوٛيْطَا؟»‏ اَمَّا يٜىٰسُ نٛوتَاکِمٛ؞ ¹⁰بِلَاتُسْ وِعِمٛ، ‏«‏اَ وَݧُ مٜتَنْکِيَمْ؟ اَ اَنْدَا اٜ مِ وٛودِ لَامُ مِ يٛوفُمَا، کَدِنْ اٜ مِ وٛودِ لَامُ مِ وَطَ طُمْ وَرُمَا دٛوْ غَافَانغَلْ؟»‏

¹¹يٜىٰسُ نٛوتِي وِعِ، ‏«‏اَ وَلَا لَامُ دٛوْ اَمْ تٛ نَاع جٛومِرَاوٛ حٛکُّمَا؞ نغَمْ نٛنْ، نٜطّٛ غَطُطٛيَمْ ندٜرْ جُنْغٛ مَاطَ وَطِي حَکّٜ ٻُرْطُمْ حَلُّکِ؞»‏ ¹²ندٜ بِلَاتُسْ نَنِ نٛنْ، اٛ طَٻِّتِ لَاوٛلْ نٛ اٛ يٛوفِرْتَ يٜىٰسُ، اَمَّا يَحُودَنْکٛعٜنْ نغَطِ کَ وِيکِ اٜ سٜمْبٜ، ‏«‏تَا يٛوفِي نٜطّٛ اٛعٛ، نَاع اَ حِغٛ کَيْسَرْ!‏ فُو نٛدِّرٛووٛ حٛورٜ مُوطُمْ لَامِيطٛ اٛ غَݧٛ کَيْسَرْ!‏»‏

¹³ندٜ بِلَاتُسْ نَنِ حَالَ کَعَ، اٛ وُرْتِنِ يٜىٰسُ، اٛ جٛوطِي دٛوْ جٛوطٛرْغَلْ کِيتَ تٛ وِغٜىٰرٜ بِعٜتٜىٰندٜ ‏«‏حَيْرٜ شٜحَاندٜ؞»‏ ندٜرْ اِبْرَانِيَنْکٛورٜ وِغٜىٰرٜ ندٜنْ اٜ نٛدِّرٜىٰ غَبَّاتَ؞ ¹⁴اٜ شَرٜلْ نغٜلْ طُمْ شَکَ ݧَلَوْمَ ݧَلْندٜ سِرْيَاکِ حُمْتٛ سَکِّنْکِ؞ بِلَاتُسْ وِعِ يَحُودَنْکٛعٜنْ ٻٜنْ، ‏«‏رَا لَامِيطٛ مٛوطٛنْ؞»‏

¹⁵ٻٜ مبِعِ بِلَاتُسْ اٜ سٜمْبٜ، ‏«‏وَرُمٛ!‏ وَرُمٛ دٛوْ غَافَانغَلْ!‏»‏

بِلَاتُسْ وِعِٻٜ، ‏«‏اٛنْ نغِطِ مِ وَرَ لَامِيطٛ مٛوطٛنْ دٛوْ غَافَانغَلْ؟»‏

سٜيْ مَوْٻٜ اَرْدِيٻٜ دِينَ نٛوتِي مبِعِ، ‏«‏مِنْ نغَلَا غٛطّٛ لَامِيطٛ سٜيْ کَيْسَرْ!‏»‏

¹⁶سٜيْ بِلَاتُسْ وَطِ يٜىٰسُ ندٜرْ جُوطٜ مَٻّٜ نغَمْ ٻٜ مبَرَمٛ دٛوْ غَافَانغَلْ؞

يٜىٰسُ وَرَامَ دٛوْ غَافَانغَلْ

¹⁷سٜيْ ٻٜ ندِلِّدِ اٜ يٜىٰسُ، اٜ مٛ وَکِّي غَافَانغَلْ مَاکٛ اٜ حٛورٜ مَاکٛ؞ ٻٜ مبُرْتِي يَاسِ غَرِيرِ يَاکِ وِغٜىٰرٜ بِعٜتٜىٰندٜ وِغٜىٰرٜ پِپَلْ حٛورٜ؞ ندٜرْ اِبْرَانِيَنْکٛورٜ وِغٜىٰرٜ ندٜنْ اٜ نٛدِّرٜىٰ غٛلْغٛوتَ؞ ¹⁸تٛ وِغٜىٰرٜ ندٜنْ ٻٜ ڤِيَنِ يٜىٰسُ کُوسَاجٜ دٛوْ غَافَانغَلْ حَوْتِ اٜ يِمْٻٜ طِطٛ؞ ٻٜ ٻِلِ غٛعٛتٛ اٜ غَافَانغَلْ جُنْغٛ يٜىٰسُ ݧَامٛ، ندٜنْ غٛعٛتٛ اٜ غَافَانغَلْ جُنْغٛ يٜىٰسُ نَنٛ، يٜىٰسُ اٜ شَکَ مَٻّٜ؞ ¹⁹بِلَاتُسْ وِنْدِ دٛوْ اَلّٛوَلْ اٛ وَطِ طُمْ تَکِّنغَلْ حٛورٜ غَافَانغَلْ يٜىٰسُ؞ کٛ اٛ وِنْدِ وٛنِ، ‏«‏يٜىٰسُ نَجَرَنْکٜىٰجٛ لَامِيطٛ يَحُودَنْکٛعٜنْ؞»‏ ²⁰يَحُودَنْکٛعٜنْ طُطْٻٜ نجَنْغِ کٛ اٛ وِنْدِ، نغَمْ وِغٜىٰرٜ تٛ يٜىٰسُ وَرَا حَادٜ غَرِيرِ وٛنِ؞ کٛ اٛ وِنْدِ اٛ وِنْدُطُمْ ندٜرْ اِبْرَانِيَنْکٛورٜ، اٜ رٛومَنْکٛورٜ، اٜ حٜلٜنَنْکٛورٜ؞ ²¹مَوْٻٜ اَرْدِيٻٜ دِينَ مبِعِ بِلَاتُسْ، ‏«‏تَاع وِنْدُ ‏‹‏لَامِيطٛ يَحُودَنْکٛعٜنْ،›‏ اَمَّا وِنْدُ نٜطّٛ اٛعٛ وِعِي کَنْکٛ وٛنِ لَامِيطٛ يَحُودَنْکٛعٜنْ؞»‏

²²بِلَاتُسْ وِعِ، ‏«‏کٛ مبِنْدُمِ جٛوطَکٜ؞»‏

²³غَطَ سٛوجِعٜنْ ٻٜنْ ڤِيَنِي يٜىٰسُ کُوسَاجٜ دٛوْ غَافَانغَلْ، سٜيْ ٻٜ کٛشِّ کٛلْتٜ مَاکٛ، ٻٜ شٜنْدِطٜ شٜنْدٜ نَيِ، کٛو مٛيٜ سٛوجِيجٛ جٛغِي سٜنْدٜرٜ غٛعٛ؞ کَدِنْ ٻٜ کٛشِّ تٛغّٛورٜ مَاکٛ؞ تٛغّٛورٜ ندٜنْ ݧٛعَاکَ ندٜ سَݧَاندٜ دَغَ دٛوْ يَاکِ لٜيْ؞ ²⁴سٛوجِعٜنْ ٻٜنْ مبِعِ حَکُّندٜ مَٻّٜ، ‏«‏تٛع اٜنْ شٜىٰکُندٜ، اٜنْ نغَطُ شَاشَ دٛوْ مَيْرٜ نغِعٜنْ مٛيٜ ݧَامَتَندٜ؞»‏ طُعُمْ وَطُ نغَمْ کٛ اَايَارٜ وِعِ حٜىٰوَ:‏

‏«‏ٻٜ شٜنْدِي کٛلْتٜ اَمْ حَکُّندٜ مَٻّٜ؛

ٻٜ نغَادِي شَاشَ اٜ تٛغّٛورٜ اَمْ؞»‏

طُعُمْ کَنْجُمْ وٛنِ کٛ سٛوجِعٜنْ ٻٜنْ نغَطِ؞

²⁵دَرِيٻٜ حَادٜ غَافَانغَلْ يٜىٰسُ کَمْٻٜ نغٛنِ مَدُوجٛ مَاکٛ، اٜ سَکِرَاوٛ مَدُوجٛ مَاکٛ دٜبّٛ، اٜ مَرْيَامَ دٜبّٛ کِلٛوبَسْ، اٜ مَرْيَامَ پِوٛيْطٛ مَغَدَلَ؞ ²⁶ندٜ يٜىٰسُ يِعِ مَدُوجٛ مُوطُمْ اٜ دَرِي طٛنْ اٜ تٛکُّطٛمٛ مٛ اٛ يِطِ نَاع سٜطَّ؞ سٜيْ اٛ وِعِ مَدُوجٛ مَاکٛ، ‏«‏رَا ٻِطّٛ مَاطَ؞»‏

²⁷ندٜنْ اٛ وِعِ اٛنْ طٛنْ تٛکُّطٛمٛ، ‏«‏رَا مَدُوجٛ مَاطَ؞»‏ دَغَ شَرٜلْ نغٜلْ تٛکُّطٛمٛ اٛنْ حٛشِّ مَرْيَامَ جٛوطِي تٛ وُرٛ مَاکٛ؞

مَيْدٜ يٜىٰسُ

²⁸غَطَ مَاجُمْ، يٜىٰسُ اٜ اَنْدِ کٛو طُمٜ يٛتِّنَامَ؞ نغَمْ کٛ اَايَارٜ وِعِ حٜىٰوَ، اٛ وِعِ، ‏«‏اٜ مِ نَنَ طٛنْکَ؞»‏

²⁹اٜ وٛودِ تُمُّدٜ طٛنْ اٜ ندٜ حٜىٰوِ ندِيَمْ اِنَبٛجَمْ لَمُّطَمْ؞ سٜيْ سٛوجِعٜنْ ٻٜنْ شُووِ سٛوسٛوَ ندٜرْ مَاجَمْ، ٻٜ طِيسِنغَ تٛ سَوْرُ حِسٛڤْ، ٻٜ پٜفْتِندُ يَاکِ حٛنْدُکٛ مَاکٛ؞ ³⁰ندٜ يٜىٰسُ يَرِ ندِيَمْ اِنَبٛجَمْ طَمْ، اٛ وِعِ، ‏«‏طُمْ يٛتِّنَامَ؞»‏

سٜيْ اٛ تُرْنِ حٛورٜ مَاکٛ اٛ يٛوفِ يٛنْکِ مَاکٛ؞

يٜىٰسُ يُوِرَامَ لَبّٛ

³¹طُمْ ݧَلْندٜ سِرْيَاکِ، ندٜنْ تٛ فِنِ طُمْ ݧَلْندٜ سِوْتَارٜ؞ نغَمْ اَرْدِيٻٜ يَحُودَنْکٛعٜنْ نغِطَا ٻَلِّ طِنْ اَلٜىٰ دٛوْ غَافَالٜ ݧَلْندٜ سِوْتَارٜ، سٜيْ ٻٜ تٛرِي بِلَاتُسْ وَطَ طُمْ يٜوَ کٛيْطٜ يٜىٰسُ اٜ کٛيْطٜ يِمْٻٜ طِطٛ ٻٜنْ، ندٜنْ ٻَلِّ طِنْ نجِڤِّنٜىٰ؞ ³²نغَمْ نٛنْ سٛوجِعٜنْ ٻٜنْ نجَحِ تٛ غَافَالٜ طٜنْ؞ ٻٜ نغٜوِ کٛيْطٜ اَرَنْدٜىٰجٛ، ندٜنْ ٻٜ نغٜوِ کٛيْطٜ طِطَٻٛ اٛنْ؞ ³³اَمَّا ندٜ ٻٜ نغَرِ تٛ يٜىٰسُ ٻٜ نغِعِ اٛ يَادَکٜ اٛ مَايِي، ٻٜ نغٜوَايِ کٛيْطٜ مَاکٛ؞ ³⁴اَمَّا غٛعٛتٛ ندٜرْ سٛوجِعٜنْ ٻٜنْ يُوِرِ يٜىٰسُ لَبّٛ تٛ بٜشّٜ، طٛنْ اٜ طٛنْ پِيپَمْ اٜ ندِيَمْ وُرْتِي؞ ³⁵غِيطٛ طُعُمْ شَرٜلْ کٛ طُمْ وَطِ، کَنْکٛ حٛکِّي شٜيْدَ دٛوْ مَاجُمْ، نغَمْ اٛنٛنْ مَا کٛولٛوطٛنْ؞ شٜيْدَ مَاکٛ بٛو طُمْ غٛونغَ، اٜ مٛ اَنْدِ غٛونغَ اٛ مٜتِ؞ ³⁶طُعُمْ وَطُ نغَمْ کٛ اَايَارٜ وِعِ حٜىٰوَ، ‏«‏وَلَا پِپَلْ مَاکٛ غٜوٜتٜىٰنغَلْ؞»‏ ³⁷کَدِنْ وٛنْدٜ اَايَارٜ وِعِي، ‏«‏ٻٜ ندَارَيْ مٛ ٻٜ نجُوِ؞»‏

يٜىٰسُ اُوَامَ

³⁸غَطَ طُعُمْ وَطِي، يُسُفُ پِوٛيْطٛ غَرِيرِ اَرْمَاتِيَ تٛرِي بِلَاتُسْ حٛکَّمٛ ٻَنْدُ يٜىٰسُ؞ يُسُفُ اٛنْ اٛ تٛکُّطٛ يٜىٰسُ، اَمَّا اٜ سُوطٜ نغَمْ اٜ مٛ حُلَ اَرْدِيٻٜ يَحُودَنْکٛعٜنْ؞ بِلَاتُسْ جَٻِ، کَنْکٛ بٛو اٛ يَحِ اٛ وَطِ طُمْ جِڤِّنِ ٻَنْدُ يٜىٰسُ؞ ³⁹نِکٛودِمُسْ جَحُنٛوطٛ تٛ يٜىٰسُ جٜمَّ يَادِ اٜ يُسُفُ اٛنْ؞ اٛ يَادِ اٜ نٜبَّمْ مُرْ اٜ اَلٛسْ اٜ طَمْ جِلِّندِرِ، طَمْ حٜوْتَيْ کِلٛ 30؞ ⁴⁰يِمْٻٜ طِطٛ ٻٜنْ کٛشِّ ٻَنْدُ يٜىٰسُ ٻٜ تَارَنِندُ غُدٜ طٜ شٜىٰدٜ حَوْتِ اٜ مُرْ اٜ اَلٛسْ نٛ يَحُودَنْکٛعٜنْ نغَطَتَ تٛ ٻٜ اُوَيْ مَيْطٛ؞ ⁴¹تٛ وِغٜىٰرٜ ندٜ يٜىٰسُ وَرَا دٛوْ غَافَانغَلْ، اٜ وٛودِ نغٜسَ؞ ندٜرْ مَاکَ اٜ وٛودِ يٜنَاندٜ حٜيْرٜ وَسَاندٜ ندٜرْ حَيْرٜ طُمْ مٜىٰطَايِ وَطُکِ غٛطّٛ ندٜرْ مَيْرٜ؞ ⁴²تٛو، ندٜ طُمْ ݧَلْندٜ سِرْيَاکِ ندٜ يَحُودَنْکٛعٜنْ شِرْيٛتٛو ݧَلْندٜ سِوْتَارٜ، ندٜنْ نغَمْ يٜنَاندٜ ندٜنْ حَادٜ ندٜ وٛنِ، ٻٜ اُوِ يٜىٰسُ ندٜرْ مَيْرٜ؞

اُمَّاکِ يٜىٰسُ دَغَ مَيْدٜ

¹ݧَلْندٜ اَلَلْ اِلَا سُبَکَ دَغَ ݧِوْرٜ اٜ حٛرِي مَرْيَامَ پِوٛيْطٛ مَغَدَلَ يَحِ يٜنَاندٜ ندٜنْ تَوِ حَيْرٜ ندٜ طُمْ مَٻِّرِ يٜنَاندٜ ندٜنْ تَلِّتَامَ دَغَ دَمُّغَلْ يٜنَاندٜ ندٜنْ؞ ²سٜيْ اٛ دٛغِّ اٛ يَحِ تٛ سِيمَنْ بِيتُرُسْ اٜ اٛنْ طٛنْ تٛکُّطٛ يٜىٰسُ مٛ يٜىٰسُ يِطِ نَاع سٜطَّ، اٛ وِعِٻٜ، ‏«‏ٻٜ کٛشِّي ٻَنْدُ يٜىٰسُ دَغَ ندٜرْ يٜنَاندٜ!‏ مِنْ اَنْدَا تٛ ٻٜ ندٜسِمٛ؞»‏

³سٜيْ بِيتُرُسْ اٜ اٛنْ طٛنْ مٛ يٜىٰسُ ٻُرِ يِطُکِ ٻٜ نجَحِ يٜنَاندٜ ندٜنْ؞ ⁴ٻٜ فُو طِطٛ اٜ ٻٜ ندٛغَّ، اَمَّا اٛنْ طٛنْ مٛ يٜىٰسُ ٻُرِ يِطُکِ ٻُرِي بِيتُرُسْ دٛغُّدُ اٛ اَرْتِمٛ يٛتَّاکِ يٜنَاندٜ ندٜنْ؞ ⁵اٛ تُرِي اٛ يُرْنِي يٜنَاندٜ ندٜنْ اٛ يِعِ غُدٜ طٜ طُمْ تَارِرْنٛو ٻَنْدُ يٜىٰسُ، اَمَّا اٛ نَتَّايِ؞ ⁶سٜيْ سِيمَنْ بِيتُرُسْ تٛکِّرْطٛمٛ غَطَ يٛتِّي، نَتِّ يٜنَاندٜ ندٜنْ؞ اٛ يِعِ غُدٜ طٜنْ اٜ ندٜسِي طٛنْ، ⁷اٜ لٜفٛلْ نغٛلْ طُمْ تَارَنِ حٛورٜ يٜىٰسُ؞ لٜفٛلْ نغٛلْ اٜ حَکِّتِي اٜ غُدٜ طٜنْ، کَنْغٛلْ تَنْ اٜ نغٛلْ تَغِّي؞ ⁸سٜيْ اٛنْ طٛنْ مٛ يٜىٰسُ ٻُرِ يِطُکِ اَرْتُطٛ يٛتَّاکِ يٜنَاندٜ ندٜنْ، کَنْکٛ مَا اٛ نَتِّ، اٛ يِعَنِ غِتٜ مَاکٛ، اٛ جَٻِ يٜىٰسُ اُمَّکٜ دَغَ مَيْدٜ؞ ⁹حَا جٛونِ ٻٜ ڤَامَايِ اَايَارٜ بِيندٜ دٛولٜ يٜىٰسُ اُمّٛو دَغَ مَيْدٜ؞ ¹⁰سٜيْ تٛکُّٻٜ يٜىٰسُ ٻٜنْ شٛعِّ غُرٜ مَٻّٜ؞

يٜىٰسُ وَنْغَنِي مَرْيَامَ پِوٛيْطٛ مَغَدَلَ

¹¹مَرْيَامَ اٜ دَرِي يَاسِ يٜنَاندٜ ندٜنْ اٜ وٛيَ؞ اٜ مٛ ندٜرْ وٛيُکِ، سٜيْ اٛ تُرِي اٛ يُرْنِي يٜنَاندٜ ندٜنْ، ¹²اٛ يِعِ مَلَاعِکَعٜنْ طِطٛ اٜ ٻٜ ٻٛرْنِي کٛلْتٜ دَنٜىٰجٜ، اٜ ٻٜ نجٛوطِي تٛ ٻَنْدُ يٜىٰسُ فُکِّنَا ندٜنّٛ؞ غٛعٛتٛ اٜ جٛوطِي تٛ حٛورٜ يٜىٰسُ وٛنْدٛنٛو، غٛعٛتٛ بٛو اٜ جٛوطِي تٛ کٛيْطٜ مَاکٛ غٛنْدٛنٛو؞ ¹³ٻٜ پَمِ مَرْيَامَ اٛنْ ٻٜ مبِعِ، ‏«‏نغَمْ طُمٜ مبٛيَتَا؟»‏

اٛ وِعِٻٜ، ‏«‏ٻٜ کٛشِّي ٻَنْدُ مٛودِبّٛ اَمْ، مِ اَنْدَا تٛ ٻٜ ندٜسِمٛ؞»‏

¹⁴سٜيْ اٛ يٜىٰپِي اٛ يِعِ يٜىٰسُ اٜ دَرِي طٛنْ، اَمَّا اٛ اَنْدِتَايِ طُمْ يٜىٰسُ؞ ¹⁵يٜىٰسُ پَمِمٛ وِعِ، ‏«‏نغَمْ طُمٜ مبٛيَتَا؟ مٛيٜ طَٻِّتَتَا؟»‏

مَرْيَامَ اٜ ݧُمَ طُمْ ڤَامَنٛووٛ نغٜسَ کَنْ، نغَمْ نٛنْ اٛ وِعِمٛ، ‏«‏مٛودِبّٛ، تٛ اَنْ حٛشِّمٛ، وِعَمْ تٛ ندٜسُطَامٛ مِ يَحَيْ مِ حٛشَّمٛ؞»‏

¹⁶يٜىٰسُ وِعِمٛ، ‏«‏مَرْيَامَ؞»‏

سٜيْ اٛ وَيْلِتِي اٛ رَارِمٛ اٛ وِعِ ندٜرْ اِبْرَانِيَنْکٛورٜ، ‏«‏رَبّٛنِ!‏»‏ مَعَنَ مَاجُمْ وٛنِ ‏«‏مٛودِبّٛ؞»‏

¹⁷يٜىٰسُ وِعِمٛ، ‏«‏تَاع جٛغَيَمْ، نغَمْ مِ پٜىٰݝَايِ تٛ ݧَاکٛ اَمْ مٛ دٛوْ تَوْ؞ اَمَّا سٛعَّ تٛ بَنْدِرَاٻٜ اَمْ مبِعَاٻٜ مِ پٜىٰݝَيْ تٛ ݧَاکٛ اَمْ، ݧَاکٛ مٛوطٛنْ، اَللَّه اَمْ، اَللَّه مٛوطٛنْ؞»‏

¹⁸سٜيْ مَرْيَامَ پِوٛيْطٛ مَغَدَلَ يَحِ تٛ تٛکُّٻٜ يٜىٰسُ وِعِٻٜ، ‏«‏مِ يِعِي يٜىٰسُ!‏»‏ سٜيْ اٛ طِيوِتَنِٻٜ کٛ اٛ وِعِمٛ؞

يٜىٰسُ وَنْغَنِي تٛکُّٻٜمٛ

¹⁹طُمْ ݧَلْندٜ اَلَلْ؞ ندٜ نَانغٜ حِيرِ، تٛکُّٻٜ يٜىٰسُ کَوْرِتِ، ٻٜ مَٻِّ دَمُّغَلْ نغَمْ اٜ ٻٜ کُلَ اَرْدِيٻٜ يَحُودَنْکٛعٜنْ؞ طٛنْ اٜ طٛنْ يٜىٰسُ وَنْغِ دَرِي شَکَ مَٻّٜ، وِعِ، ‏«‏اٜ مِ سِلْمِنٛو؞ جَمْ وٛنْدَ اٜ مٛوطٛنْ؞»‏ ²⁰غَطَ اٛ وِعِ نٛنْ، اٛ حٛلِّٻٜ جُوطٜ مَاکٛ اٜ بٜشّٜ مَاکٛ؞ سٜيْ تٛکُّٻٜمٛ نَنِ بٜلْطُمْ نَاع سٜطَّ ندٜ ٻٜ نغِعِمٛ؞ ²¹يٜىٰسُ فُطِّتِ وِعِ، ‏«‏جَمْ وٛنْدَ اٜ مٛوطٛنْ!‏ نٛنْ نٛ ݧَاکٛ مٛ دٛوْ لِلِرِيَمْ، نٛنْ مِنْ مَا اٜ مِ لِلَعٛنْ؞»‏ ²²ندٜ اٛ وِعِ نٛنْ، سٜيْ اٛ فُوفِ دٛوْ مَٻّٜ اٛ وِعِٻٜ، ‏«‏نجَٻٜىٰ رُوحُ اَللَّه؞ ²³تٛ اٛنْ نجَافَنَکٜ يِمْٻٜ حَکّٜ، ٻٜ نجَافَنَامَ، تٛ بٛو اٛنْ نجَافَنَاکِٻٜ، ٻٜ نجَافَنَاکَ؞»‏

يٜىٰسُ اٜ تٛومَ

²⁴غٛعٛتٛ ندٜرْ تٛکُّٻٜ يٜىٰسُ، بِعٜتٜىٰطٛ تٛومَ ﴿طٛنْمَا اٜ مٛ وِعٜىٰ شِوْتَاطٛ﴾، اٛ وٛنْدَا اٜ مَٻّٜ شَرٜلْ کٛ يٜىٰسُ وَرِ؞ ²⁵سٜيْ تٛکُّٻٜ يٜىٰسُ حٛرِيٻٜ مبِعِمٛ، ‏«‏مِنْ نغِعِي يٜىٰسُ؞»‏

اَمَّا تٛومَ وِعِٻٜ، ‏«‏سٜيْ تٛ مِ يِعِي جُلٛوطٜ جُوطٜ مَاکٛ تٛ اٛ فِيَنَا کُوسَاجٜ ندٜنْ مِ وَطَ حٛوندُ اَمْ ندٜرْ جُلٛوطٜ طٜنْ، ندٜنْ مِ وَطَ جُنْغٛ اَمْ ندٜرْ يُلْندٜ بٜشّٜ مَاکٛ تٛ اٛ يُوِرَا لَبّٛ، تٛ نَاع نٛنْ، مِ جَٻَتَا کٛ مبِيطٛنْ؞»‏

²⁶يٛنْتٛورٜ غٛعٛ غَطَ مَاجُمْ، تٛکُّٻٜ يٜىٰسُ اٜ ندٜرْ وُرٛ نغٛنْ کَدِنْ، تٛومَ مَا اٜ وٛنْدِ اٜ مَٻّٜ؞ کٛو ندٜ اٜ ٻٜ مَٻِّ دَمُّطٜ، طٛنْ اٜ طٛنْ يٜىٰسُ وَنْغِ دَرِي حَکُّندٜ مَٻّٜ وِعِ، ‏«‏جَمْ وٛنْدَ اٜ مٛوطٛنْ؞»‏ ²⁷سٜيْ اٛ وِعِ تٛومَ، ‏«‏رَا جُوطٜ اَمْ؞ وَطُ حٛوندُ مَاطَ ندٜرْ جُلٛوطٜ طٜنْ؞ فٛرْتُ جُنْغٛ مَاطَ نغَطَانغٛ ندٜرْ يُلْندٜ بٜشّٜ اَمْ؞ اَلُ وَطُکِ سٜکٛ، حٛولَ؞»‏

²⁸سٜيْ تٛومَ وِعِمٛ، ‏«‏جٛومِرَاوٛ اَمْ، اَللَّه اَمْ!‏»‏

²⁹يٜىٰسُ وِعِمٛ، ‏«‏اَ حٛولِيَمْ نغَمْ اَ يِعِييَمْ؟ ٻٜ بَرْکِطِنَاٻٜ يِمْٻٜ ٻٜ نغِعَايِيَمْ، فُو اٜ نٛنْ ٻٜ کٛولَکٜيَمْ؞»‏

دَلِيلَ وِنْدُکِ دٜفْتٜرٜ ندٜعٜ

³⁰يٜىٰسُ وَطِي کٛ حَيْطِنِي فٜىٰرٜ‑فٜىٰرٜ طُطُّمْ يٜىٰسٛ تٛکُّٻٜمٛ طُمْ وِنْدَاکَ ندٜرْ طٜرٜوٛلْ نغٛعٛلْ؞ ³¹اَمَّا طُعُمْ طُمْ وِنْدَا نغَمْ کٛولٛوطٛنْ يٜىٰسُ وٛنِ اَلْمَسِيحُ ٻِطّٛ اَللَّه، ندٜنْ لَاوٛلْ حٛولَاکِمٛ کٜٻٛنْ يٛنْکِ کِ رٜعَتَا بَرْکَ اِنْدٜ مَاکٛ؞

يٜىٰسُ وَنْغَنِي تٛکُّٻٜمٛ نجٛوٜىٰطِطٛ

¹غَطَ فُو فِي طُعُمْ يٜىٰسُ فُطِّتِ وَنْغَنِ تٛکُّٻٜمٛ تٛ دَاندٜ مبٜىٰلَ تِبَارِيَ؞ رَا نٛ اٛ وَنْغِنِرِ حٛورٜ مَاکٛ؞ ²سِيمَنْ بِيتُرُسْ، اٜ تٛومَ بِعٜتٜىٰطٛ شِوْتَاطٛ، اٜ نَتَانِيَلْ پِوٛيْطٛ کَانَ ندٜرْ لٜيْدِ غَلِيلِ، اٜ ٻِٻّٜ جَبَدِ، اٜ وٛٻّٜ تٛکُّٻٜ يٜىٰسُ طِطٛ ٻٜ فُو اٜ ٻٜ کَوْرِتِ؞ ³سٜيْ سِيمَنْ بِيتُرُسْ وِعِ حٛرِيٻٜ، ‏«‏مِ يَحَيْ نَنْغٛيْکِ لِپِّ؞»‏

ٻٜ مبِعِمٛ، ‏«‏مِنْ نجَادَيْ اٜ مَاطَ؞»‏ سٜيْ ٻٜ نجَحِ ٻٜ نَتِّ کٛمِوَلْ، اَمَّا ندٜنْ طٛنْ جٜمَّارٜ وَلَا کٛ ٻٜ نَنْغِ؞ ⁴نَانغٜ اٜ وُرْتٛيٛو، سٜيْ يٜىٰسُ دَرِي دَاندٜ مبٜىٰلَ نغَنْ، اَمَّا ٻٜ اَنْدَا طُمْ کَنْکٛ؞ ⁵سٜيْ يٜىٰسُ وِعِٻٜ، ‏«‏بَنْدِرَاٻٜ، اٛنْ نغٛودِ لِپِّ؟»‏

ٻٜ مبِعِمٛ، ‏«‏مِنْ نغَلَا؞»‏

⁶اٛ وِعِٻٜ، ‏«‏نغَطٜىٰ نَنْغِرْطُمْ لِپِّ مٛوطٛنْ تٛ ݧَامٛ کٛمِوَلْ مٛوطٛنْ، اٛنْ نَنْغَيْ لِپِّ؞»‏ ندٜ ٻٜ نغَطِ نٛنْ، ٻٜ مبَاوَايِ نَتِّنْکِ نَنْغِرْطُمْ لِپِّ طُمْ ندٜرْ کٛمِوَلْ نغَلْ، نغَمْ لِپِّ طُطِّ؞

⁷سٜيْ اٛنْ طٛنْ تٛکُّطٛ يٜىٰسُ مٛ يٜىٰسُ يِطِ نَاع سٜطَّ، وِعِ بِيتُرُسْ، ‏«‏طُمْ جٛومِرَاوٛ؞»‏ ندٜ بِيتُرُسْ نَنِ طُمْ جٛومِرَاوٛ، اٛ تَادِي تٛغّٛورٜ مَاکٛ نغَمْ اٛ ٻٛرْتَکٜنٛ نغَمْ کُوغَلْ، اٛ دِوِ ندٜرْ ندِيَمْ؞ ⁸تٛکُّٻٜ يٜىٰسُ حٛرِيٻٜ ندَرِي ندٜرْ کٛمِوَلْ نغَلْ، اٜ ٻٜ ڤٛوطَ نَنْغِرْطُمْ لِپِّ طُمْ اٜ طُمْ حٜىٰوِ لِپِّ، نغَمْ اٜ ٻٜ حَادٜ دَاندٜ مبٜىٰلَ نغَنْ کٛ وَطَتَ جَاٻَنْطٜ 300؞ ⁹ندٜ ٻٜ نجٛتِّي تٛ دَاندٜ ندِيَمْ، ٻٜ نغِعِ دٛشّٜ حِيتٜ اٜ لِپِّ دٛوْ مَاجٜ اٜ بُرٛودِ؞ ¹⁰يٜىٰسُ وِعِٻٜ، ‏«‏نغَدّٜىٰ غٛطِّ لِپِّ طِ نَنْغُطٛنْ جٛونِ؞»‏

¹¹سٜيْ سِيمَنْ بِيتُرُسْ نَتِّي ندٜرْ کٛمِوَلْ نغَلْ، اٛ فٛوطِ نَنْغِرْطُمْ لِپِّ طُمْ يَاکِ تٛ نجَارٜىٰندِ اٜ طُمْ حٜىٰوِ لِپِّ 351 مَوْطِ؞ کٛو ندٜ اٜ طِ طُوطِ، نَنْغِرْطُمْ طُمْ سٜىٰکَايِ؞ ¹²يٜىٰسُ وِعِٻٜ، ‏«‏نغَرٜىٰ، نغٜوٛنْ کٛوپٜ؞»‏ وَلَا غٛطّٛ ندٜرْ تٛکُّٻٜمٛ غَطّٛ سٜمْبٜ ٻٜرْندٜ پَمَمٛ، ‏«‏اَنْ اَ مٛيٜ؟»‏ نغَمْ اٜ ٻٜ اَنْدِ طُمْ جٛومِرَاوٛ؞ ¹³يٜىٰسُ حٛشِّ بُرٛودِ طُمْ، حٛکِّٻٜطُمْ، کَدِنْ اٛ حٛشِّ لِپِّ طِنْ، اٛ حٛکِّٻٜطِ؞

¹⁴طُعُمْ کَنْجُمْ وٛنِ تَتَٻُمْ يٜىٰسُ اٜ وَنْغَنَ تٛکُّٻٜمٛ غَطَ اٛ اُمِّنَامَ دَغَ مَيْدٜ؞

يٜىٰسُ اٜ بِيتُرُسْ

¹⁵غَطَ ٻٜ نجٛتِّنِي ݧَامُکِ، يٜىٰسُ پَمِ سِيمَنْ بِيتُرُسْ وِعِ، ‏«‏سِيمَنْ ٻِي يَحَيَ، اَ ٻُرِي حٛرِيٻٜ ٻٜعٜ يِطُکِيَمْ؟»‏

بِيتُرُسْ وِعِ، ‏«‏اٜىٰ، جٛومِرَاوٛ، اَ اَنْدِ اٜ مِ يِطُمَا؞»‏

يٜىٰسُ وِعِمٛ، ‏«‏دُرُ بَالِ اَمْ؞»‏ ¹⁶يٜىٰسُ فُطِّتِ پَمِمٛ طِطَٻُمْ وِعِ، ‏«‏سِيمَنْ ٻِي يَحَيَ، اَ يِطِيَمْ؟»‏

اٛ وِعِ، ‏«‏اٜىٰ، جٛومِرَاوٛ، اَ اَنْدِ اٜ مِ يِطُمَا؞»‏

يٜىٰسُ وِعِمٛ، ‏«‏فَامَنْ بَالِ اَمْ؞»‏ ¹⁷يٜىٰسُ پَمِمٛ تَتَٻُمْ وِعِ، ‏«‏سِيمَنْ، ٻِي يَحَيَ، اَ يِطِيَمْ؟»‏

بِيتُرُسْ وَنِّ نغَمْ يٜىٰسُ پَمِمٛ تَتَٻُمْ، ‏«‏اَ يِطِيَمْ؟»‏ نغَمْ نٛنْ اٛ وِعِمٛ، ‏«‏جٛومِرَاوٛ، اَ اَنْدِ کٛو طُمٜ؞ اَ اَنْدِ اٜ مِ يِطُمَا؞»‏

يٜىٰسُ وِعِمٛ، ‏«‏دُرُ بَالِ اَمْ؞ ¹⁸اٜ مِ وِعُمَا غٛونغَ، کٛ نغٛنّٛطَا سُکَ اَ ٻٛرْنَ حٛورٜ مَاطَ نجَحَا تٛ نغِطَّا؞ اَمَّا تَا نَوْيِي، اَ فٛرْتَيْ جُوطٜ مَاطَ غٛطّٛ ٻٛرْنُمَا اٛ يَارُمَا وِغٜىٰرٜ ندٜ اَ يِطَا يَاکِ؞»‏ ¹⁹يٜىٰسُ وِعُ طُعُمْ نغَمْ حٛلَّ اِرِ مَيْدٜ ندٜ بِيتُرُسْ وَطَتَ نغَمْ مَوْنِنْکِ اَللَّه؞ سٜيْ يٜىٰسُ وِعِمٛ، ‏«‏تٛکَّمْ؞»‏

يٜىٰسُ اٜ يَحَيَ

²⁰بِيتُرُسْ وَيْلِتِي يِعِ اٛنْ طٛنْ تٛکُّطٛ يٜىٰسُ مٛ يٜىٰسُ يِطِ نَاع سٜطَّ اٜ تٛکِّٻٜ؞ کَنْکٛ وٛنِ اٛنْ طٛنْ جٛوطِيطٛ حَادٜ يٜىٰسُ کٛ ٻٜ ݧَامِ کِرْتَارِ، بِيطٛ، ‏«‏مٛودِبّٛ، طُمْ مٛيٜ حٛکِّتِرْتَمَ؟»‏ ²¹ندٜ بِيتُرُسْ يِعِمٛ، پَمِ يٜىٰسُ وِعِ، ‏«‏جٛومِرَاوٛ، طُمٜ حٜٻَتَمٛ؟»‏

²²يٜىٰسُ وِعِمٛ، ‏«‏تٛ اٜ مِ يِطِ اٛ جٛوطٛدٛو اٜ يٛنْکِ نَا شَرٜلْ نغٜلْ نغَرْتٛيْمِ، کٛ وَنُّمَا؟ اَنْ نِ، تٛکَّمْ؞»‏

²³نغَمْ يٜىٰسُ وِعِ نٛنْ، سٜيْ حَبَرُ سَنْکِتِي ندٜرْ تٛکُّٻٜمٛ وِيکِ اٛعٛ تٛکُّطٛ يٜىٰسُ اٛ مَايَتَا؞ اَمَّا يٜىٰسُ وِعَايِ اٛ مَايَتَا؞ کٛ اٛ وِعِ وٛنِ، ‏«‏تٛ اٜ مِ يِطِ اٛ جٛوطٛدٛو اٜ يٛنْکِ نَا شَرٜلْ نغٜلْ نغَرْتٛيْمِ، کٛ وَنُّمَا؟»‏

²⁴اٛعٛ وٛنِ اٛنْ طٛنْ تٛکُّطٛ يٜىٰسُ اٜ مٛ حٛکَّ شٜيْدَ دٛوْ فُو فِي طُعُمْ ندٜنْ اٛ وِنْدِيطُمْ؞ اٜنْ اَنْدِ بٛو شٜيْدَ مَاکٛ طُمْ غٛونغَ؞

رٜعِرْدٜ

²⁵کَدِنْ اٜ وٛودِ فِي طُطُّمْ طُمْ يٜىٰسُ وَطِ؞ تٛ طُمْ وِنْدَامَ طُمْ فُو غٛعٛ اٜ غٛعٛ، اٜ مِ ݧُمَ فُو دُونِيَارُ وَلَا نجَيْرِ تٛ طُمْ رٜسَتَ دٜفْتٜ بِنْدٜتٜىٰطٜ؞