يَاکُبُ

طٜرٜوٛلْ

يَاکُبُ

حَبَرُ دٛوْ طٜرٜوٛلْ نغٛعٛلْ

يَاکُبُ وِنْدِ طٜرٜوٛلْ نغٛعٛلْ؞ اٜ طُمْ کَمّٛو اٛ وِنْدِينغٛلْ دُوٻِ 50‏‑45 غَطَ دَݧْنغٛلْ يٜىٰسُ؞ ندٜرْ اَلْکَوَلْ کٜسَلْ اٜ وٛودِ يَاکُبُعٜنْ حَا نَيٛ، اَمَّا اٛعٛ يَاکُبُ کَنْکٛ وٛنِ مِݧِرَاوٛ يٜىٰسُ؞ اٛعٛ يَاکُبُ نَاع کَنْکٛ وٛنِ يَاکُبُ ٻِي جَبَدِ غٛعٛتٛ ندٜرْ تٛکُّٻٜ يٜىٰسُ سَڤّٛ اٜ طِطٛ مٛ حِرُدُسْ لَامِيطٛ وَرِ؞ اٛعٛ يَاکُبُ کَنْکٛ وٛنِ اَرْدِيطٛ کَوْتَلْ تٛکُّٻٜ يٜىٰسُ وٛنْٻٜ اُرُشَلِيمَ؞ ندٜرْ طٜرٜوٛلْ نغٛعٛلْ اٛ حٛلِّي نٛ حَانِ تٛکُّٻٜ يٜىٰسُ نجٛوطٛرٛو؞ طٛنْمَا اٛ حٛلِّي نٛ حٛولَارٜ يَادِرْتَ اٜ کُوطٜ، اٜ نٛ حٛولَارٜ ندٜ غٛونغَ وَدِّرْتَ کُوطٜ بٛطّٜ اٜ نغِکُّ بٛطُّمْ؞ اٛ حَٻَنِي حٛلُّکِ فٜىٰرٛوتِرٛلْ حَکُّندٜ يِمْٻٜ؞ اٛ مٜتِي دٛوْ نٛ طٜمْنغَلْ وٛنِّرْتَ؞ اٛ وِعِي وَادُکِ حِغَاکُ اٜ دُونِيَارُ طُمْ وَݧُکِ جٛومِرَاوٛ؞ اٜ تِمّٛودٜ اٛ مٜتِي دٛوْ سٜمْبِطِنْکِ تٛکُّٻٜ يٜىٰسُ ٻٜ نغَطَ کَ وَطُکِ دٛعَارٜ اٜ ٻٜ مُݧَ ندٜرْ کٛو طُمٜ؞

¹مِنْ، يَاکُبُ، وِنْدِ طٜرٜوٛلْ نغٛعٛلْ؞ مِ مَشُّطٛ اَللَّه اٜ جٛومِرَاوٛ مٜىٰطٜنْ يٜىٰسُ اَلْمَسِيحُ؞ اٜ مِ حٛوْنَعٛنْ، اٛنٛنْ تٛکُّٻٜ يٜىٰسُ شَنْکِتِيٻٜ ندٜرْ دُونِيَارُ؞

حٛولَارٜ اٜ فَامُ

²بَنْدِرَاٻٜ اَمْ، تٛ تٛرَّاجِ فٜىٰرٜ‑فٜىٰرٜ نغَرَنِيعٛنْ، نجَٻٜىٰطِ اٜ وٜلْوٜلٛ، ³نغَمْ اٛنْ اَنْدِ تٛ حٛولَارٜ مٛوطٛنْ فٛوندَامَ، ندٜ وَطَيْ ٻٜيْدٛنْ مُݧَلْ؞ ⁴دٛولٜ اٜکِّتٛوطٛنْ مُݧَلْ ندٜرْ کٛو طُمٜ، نغَمْ نغَرْتٛنْ کٜىٰوُٻٜ، ٻٜ ندُلَّايِ غٛطُّمْ؞ ⁵تٛ غٛطّٛ ندٜرْ مٛوطٛنْ دُلِّي فَامُ، سٜيْ اٛ تٛرٛو اَللَّه کٛکّٛووٛ کٛو مٛيٜ ٻٜرْندٜ غٛعٛ مٜتِتَتَاکٛ، اٛ حٛکَّيْمٛ؞ ⁶اَمَّا تٛ اٛ تٛرٛتٛ اَللَّه، اٛ تٛرٛو ندٜرْ حٛولَارٜ؞ تٛع اٛ وَطَ ٻٜرْطٜ طِطِ، نغَمْ غَطٛووٛ ٻٜرْطٜ طِطِ اٜ نَنْدِ اٜ غٜىٰلٛوطِ ندِيَمْ طِ حٜنْدُ يِيلَتَ تٛ ندُ يِطِرِ فُو؞ ⁷اِرِ مَاکٛ تٛع اٛ کَمّٛو اٛ حٜٻَيْ غٛطُّمْ تٛ جٛومِرَاوٛ؞ ⁸ٻٜرْندٜ مَاکٛ سٜنْدَکٜ طِطِ، اٛ دَرْنَتَا ٻٜرْندٜ مَاکٛ ندٜرْ کٛ اٛ وَطَتَ فُو؞

رِسْکُ اٜ شِيَ

⁹تٛکُّطٛ يٜىٰسُ مٛ وَلَنَا نَنَ بٜلْطُمْ، نغَمْ يٜىٰسٛ اَللَّه اٛ مَوْطٛ؞ ¹⁰اَمَّا تٛکُّطٛ يٜىٰسُ دِسْکُطٛ نَنَ بٜلْطُمْ تٛ اَللَّه لٜسْتِنِي حٛورٜ مَاکٛ؞ نغَمْ دِسْکُطٛ اٜ نَنْدِ اٜ ڤِيندِ غٜىٰنٜ ندِ نٜىٰٻَتَا؞ ¹¹تٛ نَانغٜ وُرْتٛيَکٜ غُلْطُمْ مَغّٜ فِيِي غٜىٰنٜ طٜنْ، طٜ طَيْلَيْ، ڤِيندِ مَاجٜ سَامَ، وٛوطُکِ مَاجٜ فُو لَلَّ؞ نٛنْ دِسْکُطٛ رٜعِرْتَ شَرٜلْ نغٜلْ فِيدَتَ اٜ کُوغَلْ مُوطُمْ؞

فٛوندٜىٰکِ اٜ تٛرَّاجِ

¹²اٛ بَرْکِطِنَاطٛ فُو مُݧُطٛ ندٜرْ تٛرَّ، نغَمْ تٛ اٛ حٜٻِي جَالٛرْغَلْ دٛوْ تٛرَّ کَنْ، اَللَّه حٛکَّيْمٛ غِيفٛلْ نغٛلْ اٛ وَطَنِ يِطُٻٜمٛ اَلْکَوَلْ، وَاتٛ يٛنْکِ کِ رٜعَتَا؞ ¹³تٛ نٜطّٛ فٛوندَامَ، تٛع اٛ وِعَ، ‏«‏اَللَّه فٛوندِيَمْ؞»‏ نغَمْ اَللَّه فٛوندِرْتَاکٜ حَلّٜىٰندٜ، کَدِمَا بٛو اَللَّه فٛوندَتَا کٛو مٛيٜ؞ ¹⁴اَمَّا اٜ طُمْ فٛوندَ نٜطّٛ تٛ سُونٛ مَاکٛ حٛشِّي حَکِّيلٛ مَاکٛ؞ ¹⁵ندٜنْ تٛ سُونٛ نغٛنْ وَطِي رٜىٰدُ، نغٛ رِمَيْ حَکّٜ؞ تٛ حَکّٜ مَوْنِي بٛو، طُمْ فٛوطَيْ مَيْدٜ؞

¹⁶بَنْدِرَاٻٜ اَمْ ٻٜ نغِطُمِ، تٛع اٛنْ نجَٻُ طُمْ مَجِّنَعٛنْ؞ ¹⁷کٛو نغَلٜ دٛکَّلْ بٛنْغَلْ اٜ کٛو طُمٜ شَاحُ جَمُمْ فُو دَغَ تٛ اَللَّه ݧَاکٛ مٛ دٛوْ طُمْ پِوٛيْتَ، تَغُطٛ نَانغٜ اٜ لٜوْرُ اٜ کٛودٜ؞ کَنْکٛ اٛ وَيْلِتَتَاکٛ، اٛ نَنْدَا اٜ طٛوْدِ غٛوسٛتٛوندِ؞ ¹⁸طُمْ شُٻٛلْ مَاکٛ اٛ حٛکِّعٜنْ يٛنْکِ کٜسُمْ بَرْکَ وٛلْدٜ غٛونغَ، نغَمْ نغَرْتٜنْ بٛ کٛ اَرْتِ ٻٜنْدُکِ ندٜرْ کٛ اٛ تَغِ؞

نَنُکِ وٛلْدٜ اَللَّه اٜ تٛکُّکِندٜ

¹⁹اٛنٛنْ بَنْدِرَاٻٜ اَمْ ٻٜ نغِطُمِ، اَنْدٜىٰ طُعُمْ:‏ کٛو مٛيٜ يَاوَ نَنُکِ، اَمَّا تٛع يَاوَ مٜتُکِ، تٛع يَاوَ مٛنُّکِ؞ ²⁰نغَمْ مٛنّٜرٜ نٜطّٛ وَدَّتَا جٛنْدٜ اَادِلَاکُ ندٜ اَللَّه يِطِ؞ ²¹نغَمْ مَاجُمْ، کُبِنٜىٰ فُو کُوطٜ طٜ مبٛوطَا اٜ کُوطٜ کَلُّطٜ؞ لٜسْتِنٜىٰ کٛعٜ مٛوطٛنْ، نجَٻٛنْ وٛلْدٜ اَللَّه ندٜ اٛ اَاوِ ندٜرْ ٻٜرْطٜ مٛوطٛنْ، بَاوَيْندٜ حِسْنُکِعٛنْ؞

²²تٛع اٛنْ مَجِّنْ کٛعٜ مٛوطٛنْ؞ نغَطٜىٰ کٛ وٛلْدٜ اَللَّه وِعِ، تٛع اٛنْ نغَرْتُ نَنٛوٻٜندٜ تَنْ؞ ²³نغَمْ فُو نَنْطٛ وٛلْدٜ اَللَّه وَطَايِ کٛ ندٜ وِعِ اٜ نَنْدِ اٜ نٜطّٛ دَارُطٛ يٜىٰسٛ مُوطُمْ ندٜرْ دَارٛغَّلْ، ²⁴يِعِ نٛ وَعِ، دِلِّ، طٛنْ اٜ طٛنْ يٜجِّتِ نٛ وَعِ؞ ²⁵اَمَّا غَطّٛ حَکِّيلٛ مُوطُمْ فُو دٛوْ دٛوکَ کٜوْطُمْ رِمْطِنَيْطُمْ يِمْٻٜ، اٜ مٛ وَطِ کَ وَطُکِ حَکِّيلٛ دٛوْ مَاجُمْ، نَاع نَنٛووٛطُمْ تَنْ اٜ يٜجِّتَ، اَمَّا اٜ مٛ وَطَ کٛ طُمْ وِعِ، اٛ حٜٻَيْ بَرْکَ ندٜرْ وَطُکِطُمْ؞

²⁶نٜطّٛ فُو کَمِّيطٛ اٛ تٛکُّطٛ دِينَ نٛ حَانِ، اَمَّا اٛ سُرَايِ طٜمْنغَلْ مَاکٛ، اٛ مَجِّنِي حٛورٜ مَاکٛ، دِينَ مَاکٛ وَرْتِي مٜىٰرٜ؞ ²⁷دِينَ لَاٻُکَ کَ اَللَّه ݧَاکٛ مٜىٰطٜنْ مٛ دٛوْ يِطِ، کَنْکَ وٛنِ وَلُّکِ مَرَايَعٜنْ اٜ رٜوْٻٜ ٻٜ وٛرْٻٜ مُعّٜنْ مَايِ تٛرّٛتٛوٻٜ، ندٜنْ اٜ سُرُکِ حٛورٜ دَغَ حٛشُّکِ تُوندِ دُونِيَارُ؞

وَغِّنْکِ دٛوْ حٛلُّکِ فٜىٰرٛوتِرٛلْ

¹بَنْدِرَاٻٜ اَمْ، ندٜ اٛنْ کٛولِي جٛومِرَاوٛ مٜىٰطٜنْ يٜىٰسُ اَلْمَسِيحُ، جٛومُ مَنْغُ، تٛع اٛنْ کٛلُّ فٜىٰرٛوتِرٛلْ حَکُّندٜ مٛوطٛنْ؞ ²مِسَالُ، غٛطّٛ غٛودُطٛ جَبَّارٜ جِينَارِ وَرِي کَوْتَلْ مٛوطٛنْ اٜ مٛ ٻٛرْنِي کٛلْتٜ طٜ شٜىٰدٜ، ندٜنْ غٛطّٛ مٛ وَلَنَا مٛ کٛلْتٜ شٜىٰکُطٜ کَنُمْ مَا وَرِي ندٜرْ کَوْتَلْ نغَلْ؞ ³تٛ اٛنْ کٛکِّي اٛنْ طٛنْ غٛودُطٛ رِسْکُ مَنْغُ اٛنْ مبِعِيمٛ، ‏«‏رَا جٛوطٛرْغَلْ بٛنْغَلْ، جٛوطَ،»‏ مٛ وَلَنَا اٛنْ بٛو مبِيطٛنْمٛ، ‏«‏دَرَ طَاعٜ،»‏ کٛو بٛو، ‏«‏جٛوطَ اٜ لٜيْدِ،»‏ ⁴اٛنْ کٛلِّي فٜىٰرٛوتِرٛلْ حَکُّندٜ مٛوطٛنْ وٛنْ طٛنْ، اٛنْ شُٻَنَ کٛعٜ مٛوطٛنْ کٛ نغَطٛتٛنْ ندٜرْ ݧُمٛ کَلُّنغٛ؞ ⁵بَنْدِرَاٻٜ اَمْ ٻٜ نغِطُمِ، نَنٜىٰ کٛ مبِعَيْمِ؞ نَاع اَللَّه سُٻِي ٻٜ نغَلَنَا ندٜرْ دُونِيَارُ ندُعُ ٻٜ نغَرْتَ کٛولِيٻٜ يٜىٰسُ ٻٜ ندٛنَ بَرْکَ غٛنْطُمْ ندٜرْ لَامُ اَللَّه طُمْ اٛ وَطَنِ يِطُٻٜمٛ اَلْکَوَلْ؟ ⁶اَمَّا اٛنْ نغَرْتِرَ ٻٜ نغَلَنَا نَاع طُمْ غٛطُّمْ؞ نَاع غٛودُٻٜ رِسْکُ تٛرَّتَعٛنْ؟ نَاع طُمْ کَمْٻٜ نجَارَتَعٛنْ يٜىٰسٛ لَامُ؟ ⁷نَاع طُمْ کَمْٻٜ کُطَتَ اِنْدٜ ندٜنْ طٛنْ مَوْندٜ ندٜ جٛومِرَاوٛ مٛوطٛنْ؟

⁸اٛنْ نغَطِي کٛ وٛوطِ تٛ اٛنْ تٛکِّي دٛوکَ طُمْ لَامُ اَللَّه بِنْدَاطُمْ ندٜرْ اَايَارٜ بِيندٜ، ‏«‏يِطُ بَنْدِرَاوٛ مَاطَ نٛ نغِطِرْطَا حٛورٜ مَاطَ؞»‏ ⁹اَمَّا تٛ اٛنْ کٛلَّ فٜىٰرٛوتِرٛلْ حَکُّندٜ مٛوطٛنْ، اٛنْ نغَطِي حَکّٜ؞ کِيتَ نَنْغِيعٛنْ، نغَمْ اٛنْ غٜوٛوٻٜ دٛوکَ؞ ¹⁰نغَمْ فُو تٛکُّطٛ دٛوکَاجِ طِ فُو، اَمَّا اٛ يٜوِ غٛعٛ، تٛو، اٛ يٜوِيطِ طِ فُو؞ ¹¹نغَمْ اٛنْ طٛنْ بِيطٛ، ‏«‏تَاع وَطُ نجٜىٰنُ،»‏ کَنْکٛ وِعِ، ‏«‏تَاع وَطُ وَرْحٛورٜ؞»‏ تَا وَطَايِ نجٜىٰنُ، اَمَّا اَ وَطِي وَرْحٛورٜ، تٛو، اَ وَرْتِي غٜوٛووٛ دٛوکَ اَللَّه وٛنْ طٛنْ؞ ¹²اَلٜىٰ مٜتٛ مٛوطٛنْ اٜ کُوطٜ مٛوطٛنْ وَرْتَ بٛ طُمْ يِمْٻٜ ٻٜ طُمْ وَطَنْتَ کِيتَ دٛوْ دٛوکَ رِمْطِنٛوجُمْ؞ ¹³نغَمْ اٜ ݧَلْندٜ کِيتَ، اَللَّه يُرْمِنَنْتَا مٛ وَلَا يُرْمٜىٰندٜ؞ اَمَّا يُرْمٜىٰندٜ اٜ حٜٻَ جَالٛرْغَلْ دٛوْ کِيتَ؞

حٛولَارٜ اٜ کُوطٜ

¹⁴اٛنٛنْ بَنْدِرَاٻٜ اَمْ، کٛ طُمْ نَفِ تٛ نٜطّٛ وِعِي اٜ حٛولِي يٜىٰسُ، اَمَّا کُوطٜ مَاکٛ کٛلَّايِ حٛولَارٜ ندٜنْ؟ ندٜنْ طٛنْ حٛولَارٜ مَاکٛ ندٜ وَاوَيْ حِسْنُکِمٛ؟ ¹⁵مِسَالُ، تٛ غٛطّٛ تٛکُّطٛ يٜىٰسُ غٛرْکٛ کٛو دٜبّٛ مٛ وَلَا کٛ ٻٛرْنٛتٛو کٛو کٛ ݧَامَتَ، ¹⁶غٛطّٛ مٛوطٛنْ وِعِيمٛ، ‏«‏جِڤَّ جَمْ!‏ اَللَّه حٛکُّمَا کٛ ٻٛرْنٛتٛطَا اٜ کٛ ݧَامَتَا،»‏ اَمَّا اٛ حٛکَّايِمٛ کٛلْتٜ کٛو ݧَمْندُ، طُمٜ طُمْ نَفِ؟ ¹⁷نٛنْ مَا حٛولَارٜ، تٛ ندٜ وَلَا کُوطٜ کٛلَّيْطٜندٜ، ندٜ وَرْتِي وَاتُندٜ؞

¹⁸اَمَّا غٛطّٛ وِعَيْ، ‏«‏اَنْ اَ وٛودِ حٛولَارٜ، مِنْ اٜ مِ وٛودِ کُوطٜ؞»‏ تٛو، حٛلَّمْ حٛولَارٜ مَاطَ ندٜ وَلَا کُوطٜ؞ مِنْ بٛو، مِ حٛلّٜتٜ حٛولَارٜ اَمْ ندٜرْ کُوطٜ اَمْ؞ ¹⁹اَ جَٻِي اَللَّه اٛ غٛعٛتٛ؞ تٛو، بٛطُّمْ!‏ کٛو غِنِّ مَا نجَٻِي نٛنْ؞ کَنْجُمْ وَطِ اٜ طِ ندِوْنَ نغَمْ کُلٛلْ؞ ²⁰اَنْ کَاݝَاطٛ!‏ اَ يِطِ طُمْ حٛلُّمَا حٛولَارٜ ندٜ وَلَا کُوطٜ ندٜ مٜىٰرٜ؟ ²¹نَاع مَامَ مٜىٰطٜنْ اِبْرَاهِمْ نٛدِّرَامَ اَادِلِيجٛ نغَمْ کٛ اٛ وَطِ ندٜ اٛ حٛکِّ اَللَّه ٻِطّٛ مَاکٛ اِشِيَاکُ دٛوْ سَکِّرْدٜ؟ ²²تٛو، اَ يِعِي حٛولَارٜ مَاکٛ اٜ يَادَ اٜ کُوطٜ مَاکٛ؞ ندٜنْ حٛولَارٜ مَاکٛ وَرْتِي کٜوْندٜ نغَمْ کٛ اٛ وَطِ؞ ²³طُمْ حٜبِّنِي اَايَارٜ بِيندٜ، ‏«‏اِبْرَاهِمْ حٛولَکٜ اَللَّه، نغَمْ مَاجُمْ اَللَّه وِعِ اٛ اَادِلِيجٛ؞»‏ طٛنْمَا طُمْ نٛدِّمٛ حِغٛ اَللَّه؞ ²⁴تٛو، اٛنْ نغِعِي اَللَّه اٜ جَٻَ نٜطّٛ اٛ اَادِلِيجٛ نغَمْ کٛ اٛ وَطِ، نَاع نغَمْ حٛولَارٜ تَنْ؞

²⁵نٛنْ مَا، کَارُوَاجٛ اٛنْ طٛنْ بِعٜتٜىٰطٛ رَحَبْ، اٛ نٛدِّرَامَ اَادِلِيجٛ نغَمْ کٛ اٛ وَطِ ندٜ اٛ جَٻِّي ٻٜ طُمْ لِلٛيِ نغَمْ ندَارَ سِرُّ لٜيْدِ ندِنْ؞ اٛ وَلِّٻٜ ٻٜ ندَطِرِ وٛنْغٛلْ لَاوٛلْ فٜىٰرٜ؞

²⁶تٛو، نٛنْ نٛ ٻَنْدُ ندُ وَلَا فٛوفَانغٛ وَرْتِي مَيْندُ، نٛنْ مَا حٛولَارٜ ندٜ وَلَا کُوطٜ وَرْتِي بَاتُندٜ؞

وٛنّٜرٜ ندٜ طٜمْنغَلْ وَطَتَ

¹اٛنٛنْ بَنْدِرَاٻٜ اَمْ، تٛع طُطْٻٜ مٛوطٛنْ نغَرْتَ اٜکِّتِنٛوٻٜ، نغَمْ اٛنْ اَنْدِ مِنٛنْ اٜکِّتِنٛوٻٜ طُمْ ٻُرَيْ وَطَنْکِمِنْ کِيتَ کَلُّکَ؞ ²نغَمْ اٜنْ فُو اٜنْ ڤَرْکَ نَاع سٜطَّ؞ تٛ بٛو غٛطّٛ فَرْکَتَا ندٜرْ کٛو طُمٜ کٛ اٛ وِعَتَ، تٛو، کَنْکٛ اٛ کٜوْطٛ، اٜ مٛ وَاوَ اٛ سُرَ حٛورٜ مَاکٛ؞

³رَا مِسَالُ؞ تٛ اٜنْ نغَطَنِي ڤُشُّ نجَمْندِ غَطٜتٜىٰندِ اٜ حٛنْدُکٛ مَاغُ نغَمْ نغُ وَطَ کٛ نغِطّٜنْ، اٜنْ مبَاوَيْ نغَيْلِتٜنْغُ فُو تٛ نغِطّٜنْ؞ ⁴ندَارٜىٰ کٛمِيجٜ ندِيَمْ مَا نغِعٛنْ؞ کٛو ندٜ طٜ مَوْطٜ، حٜنْدُ شٜمْبِنْدُ فٛوطَتَطٜ، اٜ جَمْنغٜلْ ڤَمَرٜلْ ڤٛوطٛووٛ کٛمِوَلْ نغَلْ فٛوطِرْتَنغَلْ فَادَ اٜ مَاغَلْ فُو تٛ يِطِ؞ ⁵نٛنْ مَا، طٜمْنغَلْ طُمْ غٛطُّمْ ڤَمَرُمْ ندٜرْ ٻَنْدُ، اَمَّا اٜ نغَلْ مَنْتِتٛو دٛوْ فِي مَوْطُمْ؞ ندَارٜىٰ نغِعٛنْ نٛ دٛشّٜلْ حِيتٜ وُلِرْتَ لَدّٜ مَوْندٜ؞ ⁶طٜمْنغَلْ طُمْ حِيتٜ، اٜ نغَلْ حٜىٰوِ حَلّٜىٰندٜ، اٜ نغَلْ وٛنَّ کٛو طُمٜ نٜطّٛ؞ اٜ نغَلْ نَنْغِنَنَ فُو جٛنْدٜ نٜطّٛ حِيتٜ پِوٛيْنغٜ دَغَ وُرٛ حِيتٜ؞

⁷نٜطّٛ اٜ وَاوَ اٜلْتَ کٛو اِرِ ندِيٜ مَرْدِ، اٜ شٛلِّ، اٜ مَرْلٜ دَسٛتٛوطٜ، اٜ کٛو طُمٜ غٛنْطُمْ ندٜرْ ندِيَمْ؞ يِمْٻٜ نجَادَکٜ اٜلْتِيطٜ؞ ⁸اَمَّا وَلَا بَاوَيْطٛ اٜلْتُکِ کٛو سُرُکِ طٜمْنغَلْ؞ طٜمْنغَلْ طُمْ فِي کَلُّطُمْ، اٜ نغَلْ حٜىٰوِ تٛوکٜ بَرٛوجٜ؞ ⁹اٜ مَاغَلْ مَنْتِرْتٜنْ جٛومِرَاوٛ ݧَاکٛ مٜىٰطٜنْ مٛ دٛوْ، ندٜنْ اٜ مَاغَلْ کُطِرْتٜنْ يِمْٻٜ ٻٜ طُمْ تَغِ ندٜرْ نَنْدِ اَللَّه؞ ¹⁰مَنْتُکِ اٜ حُطُکِ اٜ وُرْتٛيٛو دَغَ حٛنْدُکٛ غٛعٛ؞ اٛنٛنْ بَنْدِرَاٻٜ اَمْ، نٛنْ حَانَا؞ ¹¹ندِيَمْ مبٜلْطَمْ اٜ ندِيَمْ کَطَّمْ وَاوَيْ ٻُلَ وِغٜىٰرٜ غٛعٛ؟ ¹²بَنْدِرَاٻٜ اَمْ، اِبِّ وَاوَيْ رِمَ ٻِکّٛيْ جَيْتُنْ؟ کٛو اِنَبٛحِ وَاوَيْ رِمَ ٻِکّٛيْ اِبّٜ؟ نٛنْ مَا طُمْ وَطَتَاکٛ وِغٜىٰرٜ تٛ ندِيَمْ غٛودُطَمْ لَمْطَمْ ٻُلَتَ وُرْتِنَ ندِيَمْ مبٜلْطَمْ؞

اَنْدَلْ پِوٛيْنغَلْ دَغَ دٛوْ

¹³مٛيٜ وٛودِ اَنْدَلْ اٜ فَامُ ندٜرْ مٛوطٛنْ؟ سٜيْ اٛ حٛلَّطُمْ ندٜرْ وَطُکِ جٛنْدٜ وٛوطُندٜ اٜ کُوطٜ بٛطّٜ ندٜرْ لٜسْنُکِ حٛورٜ اٜ فَامُ؞ ¹⁴اَمَّا تٛ اٛنْ نغٛودِ لَوْلِيرُ کَلُّندُ اٜ يِدّٜ حٛورٜ ندٜرْ ٻٜرْطٜ مٛوطٛنْ، تٛع اٛنْ مَنْتِتٛ دٛوْ مَاجُمْ کٛو نغَݧٛنْ غٛونغَ؞ ¹⁵اِرِ نغَعَلْ اَنْدَلْ نَاع دَغَ دٛوْ نغَلْ پِوٛيِ، طُمْ نغَلْ دُونِيَارُ؞ ندٜنْ نَاع دَغَ تٛ رُوحُ اَللَّه نغَلْ پِوٛيِ، تٛ شٜيْطَنْ نغَلْ پِوٛيِ؞ ¹⁶نغَمْ فُو تٛ لَوْلِيرُ اٜ يِدّٜ حٛورٜ وٛنِ، طٛنْ شِيَ جٛنْدٜ جَمْ اٜ کٛو اِرِ ندٜيٜ حَلّٜىٰندٜ وَطٜتٜىٰ؞ ¹⁷اَمَّا اَنْدَلْ پِوٛيْنغَلْ دَغَ دٛوْ، اَرَنْدٜ نغَلْ لَمْنغَلْ، ندٜنْ نغَلْ وَدَّتَا وَنَّارٜ، اٜ نغَلْ وَدَّ حَکِّيلٛ، نغَلْ وَلَا مَنْغُ حٛورٜ، اٜ نغَلْ حٜىٰوِ يُرْمٜىٰندٜ اٜ کُوطٜ بٛطّٜ؞ نغَلْ حٛلَّتَا فٜىٰرٛوتِرٛلْ، نغَلْ وَلَا شِيَ غٛونغَ؞ ¹⁸غَدّٛوٻٜ جٛنْدٜ جَمْ اَاوُٻٜ جَمْ، ٻٜ ڤٜعَّيْ اَادِلَاکُ؞

وَادُکِ حِغَاکُ اٜ دُونِيَارُ

¹کٛ وَدَّتَ حَوْرٜ اٜ يٜدّٛوتِرْکِ حَکُّندٜ مٛوطٛنْ؟ نَاع سُونٛوجِ کٛنِدٛوجِ اٜ ٻٜرْطٜ مٛوطٛنْ وَدَّتَطُمْ؟ ²اٛنْ نغِطِي غٛطُّمْ، اٛنْ کٜٻَتَاطُمْ، نغَمْ نٛنْ اٛنْ نغَطَ وَرْحٛورٜ؞ اٛنْ نغٛودِ سُونٛ فِي طُمْ اٛنْ جٜيَايِ، اَمَّا اٛنْ کٜٻَتَاطُمْ؞ کَنْجُمْ وَطِ اٛنْ کَٻَ اٛنْ نغٜدّٛوتِرَ؞ اٛنْ نغَلَنَا نغَمْ اٛنْ تٛرَاکِ اَللَّه؞ ³اٛنْ تٛرٛو اٛنْ کٜٻَتَا نغَمْ اٛنْ تٛرٛرٛو ݧُمٛوجِ کَلُّطِ، اٛنْ نغِطِ مَجِّنٛنْ کٛ کٜٻْطٛنْ دٛوْ نَنْکِ بٜلْطُمْ ٻَلِّ مٛوطٛنْ؞ ⁴اٛنْ ݧَامٛوٻٜ اَمَانَ!‏ اٛنْ اَنْدَا وَادُکِ حِغَاکُ اٜ دُونِيَارُ طُمْ وَݧُکِ اَللَّه؟ نغَمْ نٛنْ، فُو شُٻُطٛ وَادَ حِغَاکُ اٜ دُونِيَارُ، اٛ وَرْتِرِي حٛورٜ مَاکٛ غَݧٛ اَللَّه؞ ⁵کٛو اٛنْ کَمِّي اٜ مٜىٰرٜ اَايَارٜ وِعِ، ‏«‏اَللَّه اٜ وٛودِ لَوْلِيرُ دٛوْ يٛنْکِ کِ اٛ وَطِ ندٜرْ مٜىٰطٜنْ؟»‏ ⁶اَمَّا اَللَّه اٜ ٻٜيْدَ وَلُّکِعٜنْ؞ کَنْجُمْ وَطِ اَايَارٜ وِعِ، ‏«‏اَللَّه وَݧِي غٛودُٻٜ مَنْغُ حٛورٜ، اَمَّا اٜ مٛ وَلَّ لٜسْنُٻٜ کٛعٜ؞»‏ ⁷نغَمْ نٛنْ، لٜسْنٜىٰ کٛعٜ مٛوطٛنْ نغَطٛنْ کٛ اَللَّه وِعِ؞ نغَݧٜىٰ کُوطٜ شٜيْطَنْ، کَنْکٛ بٛو اٛ دٛغَّيْعٛنْ؞ ⁸ٻَدّٛيٜىٰ حَادٜ اَللَّه، کَنْکٛ مَا اٛ ٻَدّٛتٛ حَادٜ مٛوطٛنْ؞ اٛنٛنْ غَطٛوٻٜ حَکّٜ، مٛعِّنٜىٰ جٛنْدٜ مٛوطٛنْ؞ لَاٻِنٜىٰ ٻٜرْطٜ مٛوطٛنْ، اٛنٛنْ غٛودُٻٜ ٻٜرْطٜ طِطِ؞ ⁹نغَنّٜىٰ، نغُلّٜىٰ، مبٛيٜىٰ؞ نغَيْلِتٜىٰ جَلٜىٰطٜ مٛوطٛنْ نغَرْتَ بٛجِّ، نَنُکِ بٜلْطُمْ مٛوطٛنْ وَرْتَ شِيَ نَنْکِ بٜلْطُمْ؞ ¹⁰لٜسْتِنٜىٰ کٛعٜ مٛوطٛنْ يٜىٰسٛ جٛومِرَاوٛ، کَنْکٛ بٛو اٛ مَوْنِنَيْعٛنْ؞

يٛوَنْکِ غٛطّٛ کٛ وٛوطَا

¹¹بَنْدِرَاٻٜ، تٛع اٛنْ مٜتِندِرْ حَالَاجِ کَلُّطِ؞ نغَمْ فُو مٜتُطٛ حَالَ کَلُّکَ دٛوْ بَنْدِرَاوٛ مُوطُمْ، کٛو يٛوَنِمٛ کٛ وٛوطَا، مٜتِي حَالَ کَلُّکَ دٛوْ دٛوکَ اَللَّه وٛنْ طٛنْ، يٛوَنِيطُمْ کٛ وٛوطَا؞ اَمَّا تَا يٛوَنِي دٛوکَ اَللَّه کٛ وٛوطَا، اَ وَرْتِي مٛ تٛکَّتَاکَ جٛوَنٛووٛکَ کٛ وٛوطَا؞ ¹²اَللَّه تَنْ وٛنِ کٛکّٛووٛ دٛوکَ اٜ غَطٛووٛ کِيتَ؞ کَنْکٛ تَنْ وٛنِ بَاوَيْطٛ حِسْنُکِ اٜ حَلْکُکِ؞ اَمَّا اَنْ اَ مٛيٜ ندٜ نجٛوَنْتَا بَنْدِرَاوٛ مَاطَ کٛ وٛوطَا؟

مَنْتٛرَاکِ جَانغٛ

¹³نَنٜىٰيَمْ اٛنٛنْ وِعٛوٻٜ، ‏«‏حَنْدٜ کٛو جَانغٛ مِنْ نجَحَيْ ندِعِ غَرِيرِ کٛو ندِنْ تٛنْ، مِنْ نغَطَ ندُنْغُ غٛعٛ تٛنْ مِنْ نغَطَ لُومٛ مِنْ کٜٻَ شٜىٰدٜ؞»‏ ¹⁴رَا بٛو اٛنْ اَنْدَا کٛ وَنْغَتَ جَانغٛ؞ نٛ يٛنْکِ مٛوطٛنْ وَعِ؟ يٛنْکِ مٛوطٛنْ اٜ نَنْدِ اٜ شُرْکَ وَنْغٛوحَ نغَمْ شَرٜلْ سٜطَّ، غَطَ طٛنْ کَ مَجِّتَ؞ ¹⁵سٜيْ نِ مبِعٛنْ، ‏«‏تٛ جٛومِرَاوٛ جَٻِي يَارِي يٛنْکِ، مِنْ نغَطَيْ طُعُمْ اٜ طُمْ طَاعٜ؞»‏ ¹⁶اَمَّا رَطُّمْ جٛونِ ندٜرْ مَوْنِنْکِ کٛعٜ مٛوطٛنْ اٛنْ مَنْتِتٛو؞ فُو اِرِ کِنْ طٛنْ مَنْتِتَاکِ کِ کَلُّکِ؞ ¹⁷نغَمْ نٛنْ فُو اَنْدُطٛ کٛ حَانِ وَطَ، اَمَّا اٛ وَطَايِطُمْ، اٛ وَطِي حَکّٜ؞

وَغِّنْکِ غٛودُٻٜ رِسْکُ

¹جٛونِ بٛو، اٛنٛنْ رِسْکُٻٜ، نَنٜىٰ کٛ مبِعَيْمِ!‏ مبٛيٜىٰ، نغُلّٜىٰ نغَمْ بٛنٜ کَلُّطُمْ غَرٛوَيْطُمْ دٛوْ مٛوطٛنْ؞ ²رِسْکُ مٛوطٛنْ ݧٛلِي، مٛوپِ ݧَامِي کٛلْتٜ مٛوطٛنْ؞ ³جِينَارِ مٛوطٛنْ اٜ اَجُرْفَارِ مٛوطٛنْ فُونِي، فُونُکِ مَيْرِ بٛو وَرْتَيْ شٜيْدَ دٛوْ مٛوطٛنْ طُمْ ݧَامَيْ ٻَلِّ مٛوطٛنْ بٛ حِيتٜ؞ اٛنْ مٛٻْتَنِي کٛعٜ مٛوطٛنْ جَوْدِ ندٜرْ بَلْطٜ طٜعٜ طٜ رٜعُکِ دُونِيَارُ؞ ⁴رَطُّمْ!‏ نجٛٻَارِ ندِ نغَݧُطٛنْ يٛٻُکِ کُوَنٛوٻٜعٛنْ تٛ غٜسٜ ندِ وُلّٛيَکٜعٛنْ؞ بٛجِّ اِتَّنٛوٻٜعٛنْ کٛ ٻٜنْدِ تٛ غٜسٜ نجَارِي تٛ جٛومِرَاوٛ جٛومُ بَوْطٜ؞ ⁵اٛنْ نغَطِي جٛنْدٜ نَنْکِ بٜلْطُمْ اٜ دُونِيَارُ، اٛنْ ݧَامَ، اٛنْ نجَرَ، اٛنْ نغَطَ نٛ نغِطّٛنْ؞ اٛنْ ڤَيْنِي کٛعٜ مٛوطٛنْ نغَمْ ݧَلْندٜ حِرْسُکِ؞ ⁶اٛنْ تَپَنِي اَادِلِعٜنْ کِيتَ کَلُّکَ، اٛنْ مبَرِيٻٜ، کَمْٻٜ بٛو ٻٜ نغٜدَّايِعٛنْ؞

مُݧَلْ اٜ دٛعَارٜ

⁷نغَمْ نٛنْ، بَنْدِرَاٻٜ اَمْ، نغَطٜىٰ مُݧَلْ حَا يَاکِ ݧَلْندٜ ندٜ جٛومِرَاوٛ وَرْتَتَ؞ ندَارٜىٰ نٛ دٜمٛووٛ مُݧِرْتَ نغَمْ ندِيَمْ سٜىٰتٛ اٜ طَمْ پَاوٛلْ ٻٜنْدِنَ فِي بٛطُّمْ طُمْ اٛ رٜمِ؞ ⁸اٛنٛنْ مَا، مُݧٜىٰ؞ شٜمْبِطِنٜىٰ ٻٜرْطٜ مٛوطٛنْ، نغَمْ وَرْتٛيْکِ جٛومِرَاوٛ ٻَدَکٜ؞ ⁹بَنْدِرَاٻٜ اَمْ، تٛع اٛنْ مٜتِندِرْ مٜتٜمٜتٜىٰجِ نغَمْ تٛ طُمْ وَطَنَعٛنْ کِيتَ؞ رَطُّمْ، غَطٛووٛ کِيتَ اٜ دَرِي تٛ دَمُّغَلْ!‏ ¹⁰بَنْدِرَاٻٜ اَمْ، شِفْتٛرٜىٰ اَنَّبٛعٜنْ مٜتُٻٜ ندٜرْ اِنْدٜ جٛومِرَاوٛ، نٛ ٻٜ مُݧِرِ ندٜرْ تٛرَّاجِ؞ تٛکّٜىٰ کٛ ٻٜ نغَطِ؞ ¹¹اٛنْ اَنْدِ، اٜنْ نٛدِّرَ مُݧُٻٜ بَرْکِطِنَاٻٜ؞ اٛنْ نَنِي نٛ اَيُوبَ مُݧِرِ، ندٜنْ اٛنْ اَنْدِ نٛ جٛومِرَاوٛ بَرْکِطِنِرِمٛ دَغَ غَطَ؞ جٛومِرَاوٛ اٛ کٜوْطٛ يُرْمٜىٰندٜ اٜ يِدّٜ؞

¹²بَنْدِرَاٻٜ اَمْ، کٛ ٻُرِ کٛو طُمٜ وٛنِ تٛع اٛنْ کُنٛرٛ دٛوْ، کٛو لٜيْ، کٛو اٜ کٛو اِرِ طُمٜ فِي؞ تٛ اٛنْ پَمَامَ، تٛ طُمْ نٛنْ، مبِعٛنْ ‏«‏اٜىٰ»‏ تَنْ؞ تٛ نَاع طُمْ نٛنْ، مبِعٛنْ ‏«‏اَاعَ»‏ تَنْ؞ نغَطٜىٰ نٛنْ نغَمْ تٛ طُمْ تَپَنَعٛنْ کِيتَ کَلُّکَ؞

¹³اٜ وٛودِ جَرٛووٛ تٛرَّ ندٜرْ مٛوطٛنْ؟ تٛو، اٛ وَطَ دٛعَارٜ؞ اٜ وٛودِ نَنٛووٛ بٜلْطُمْ ندٜرْ ٻٜرْندٜ مُوطُمْ؟ تٛو، اٛ يِمَ غِمِ مَنْتُکِ اَللَّه؞ ¹⁴اٜ وٛودِ غٛطّٛ مٛ يَمْطَا ندٜرْ مٛوطٛنْ؟ تٛو، اٛ نٛدَّ مَوْٻٜ ندٜرْ کَوْتَلْ تٛکُّٻٜ يٜىٰسُ، ٻٜ نغَطَنَمٛ دٛعَارٜ، ٻٜ نغَطَنَمٛ نٜبَّمْ دٛوْ حٛورٜ ندٜرْ اِنْدٜ جٛومِرَاوٛ؞ ¹⁵نغَمْ دٛعَارٜ غَطَاندٜ ندٜرْ حٛولَارٜ ندٜ يَمْطِتِنَيْ مٛ يَمْطَا؞ جٛومِرَاوٛ يَمْطِتِنَيْمٛ؞ تٛ اٛ وَطِي حَکّٜ، طُمْ يَافَنْتٛمٛ؞ ¹⁶نغَمْ نٛنْ، مبِعِندِرٜىٰ حَکّٜ طُمْ نغَطّٛنْ، ندٜنْ نغَطِندِرٜىٰ دٛعَارٜ نغَمْ طُمْ يَمْطِتِنَعٛنْ؞ دٛعَارٜ اَادِلِيجٛ اٜ ندٜ وٛودِ بَوْطٜ اٜ ندٜ حُوَ؞ ¹⁷اِلِيَ اٛ نٜطّٛ بٛ مٜىٰطٜنْ؞ اٛ وَطِ دٛعَارٜ نَاع سٜطَّ نغَمْ تٛع ندِيَمْ تٛٻَ تٛ لٜيْدِ ندِنْ، سٜيْ ندٜ طُمْ وَطِ دُوٻِ تَتِ اٜ لٜبِّ جٛوٜىٰغٛعٛ طَمْ تٛٻَايِ؞ ¹⁸ندٜنْ اٛ فُطِّتِ اٛ وَطِ دٛعَارٜ، سٜيْ دٛوْ يٛوفِ ندِيَمْ، لٜيْدِ بٛو وُرْتِنِ کٛو طُمٜ کٛ فُطَتَ؞

¹⁹اٛنٛنْ بَنْدِرَاٻٜ اَمْ، تٛ غٛطّٛ مٛوطٛنْ سٜلِي لَاوٛلْ غٛونغَ، ندٜنْ غٛطّٛ وَرْتِرٛيِيمٛ دٛوْ لَاوٛلْ، ²⁰اَنْدٜىٰ طُعُمْ:‏ کٛو مٛيٜ سٛعِّ غَطٛووٛ حَکّٜ دَغَ تٛکُّکِ لَاوٛلْ نغٛلْ وٛوطَا، اٛ حِسْنَيْ يٛنْکِ غَطٛووٛ حَکّٜ اٛنْ دَغَ مَيْدٜ، ندٜنْ اٛ وَدَّيْ لَاوٛلْ يَافَاکِ حَکّٜ طُطُّمْ؞