اِبْرَانِيَنْکٛعٜنْ

طٜرٜوٛلْ نغٛلْ طُمْ وِنْدَنِ

اِبْرَانِيَنْکٛعٜنْ

حَبَرُ دٛوْ طٜرٜوٛلْ نغٛلْ

وَلَا تَبِّتِنْطٛ مٛيٜ وِنْدِ طٜرٜوٛلْ نغٛعٛلْ؞ نغٛلْ وِنْدَ دُوٻِ 70 غَطَ دَݧْنغٛلْ يٜىٰسُ؞ طُمْ وِنْدَنْغٛلْ وٛنْغَلْ کَوْتَلْ تٛکُّٻٜ يٜىٰسُ نَتُّٻٜ تٛرَّاجِ فٜىٰرٜ‑فٜىٰرٜ؞ تٛرَّاجِ مَٻّٜ اٜ ٻٜيْدٛو؞ بِنْدُطٛ طٜرٜوٛلْ نغٛلْ سٜمْبِطِنِيٻٜ دٛوْ تٛکُّکِ يٜىٰسُ؞ اٛ حٛلِّيٻٜ يٜىٰسُ اَلْمَسِيحُ وٛنِ کِسْنٛووٛ مٛ اَللَّه لِلٛيِ؞ اٛ حٛلِّيٻٜ فِي تَتُمْ:‏ اَرَنْدٜ اٛ حٛلِّيٻٜ وِيکِ يٜىٰسُ اٛ ٻِطّٛ اَللَّه؞ ندٜ يٜىٰسُ وٛنِ ٻِطّٛ اَللَّه، اٛ ٻُرِي اَنَّبٛعٜنْ، اٜ مَلَاعِکَعٜنْ، اٜ اَنَّبِ مُوسَ؞ طِطَٻُمْ وٛنِ اَللَّه وَرْتِرِي يٜىٰسُ اَرْدِيطٛ دِينَ مٛ حَا اَبَدَا، ٻُرْطٛ اَرْدِيٻٜ دِينَ اَرَنْدٜعٜنْ؞ تَتَٻُمْ بَرْکَ يٜىٰسُ کٛولِيٻٜمٛ کِسِي دَغَ حَکّٜ مَٻّٜ، ٻٜ بٛو کِسِي دَغَ کُلٛلْ اٜ مَيْدٜ؞ حِرْسُکِ مَرْلٜ کِ يَحُودَنْکٛعٜنْ نغَطَيْنٛو نغَمْ سَکَّنْکِ اَللَّه وٛنِ مِسَالُ نٛ يٜىٰسُ وَرْتِرِ شَکِّرِ نغَمْ حَکّٜ مٜىٰطٜنْ حَا اَبَدَا؞

اَللَّه مٜتِرِي ٻِطّٛ مُوطُمْ

¹ندٜنّٛ اَللَّه مٜتَنِي مَامَعٜنْ مٜىٰطٜنْ ندٜ طُطُّمْ اٜ طَتٜ طُطّٜ دَغَ کٛنْدُطٜ اَنَّبٛعٜنْ؞ ²اَمَّا ندٜرْ بَلْطٜ طٜعٜ طٜ رٜعُکِ دُونِيَارُ اٛ مٜتِرَنِيعٜنْ ٻِطّٛ مَاکٛ، مٛ اٛ سُٻِ وَرْتَ دٛنٛووٛ کٛو طُمٜ؞ طٛنْمَا بَرْکَ مَاکٛ اَللَّه تَغِ دُونِيَارُ؞ ³اٜ مٛ حٛلَّ جَيْنغٛلْ تٜدُّنغَلْ اَللَّه، ندٜنْ ندٜرْ کٛو طُمٜ اٜ مٛ نَنْدِ اٜ اَللَّه؞ اٜ مٛ جٛغٛرِي کٛو طُمٜ وٛلْدٜ مَاکٛ غٛودُندٜ بَوْطٜ؞ غَطَ اٛ وَطِي لَاوٛلْ يَافَاکِ حَکّٜ، اٛ جٛوطِي تٛنْ دٛوْ تٛ جُنْغٛ ݧَامٛ نغٛ اَللَّه جٛومُ مَنْغُ؞

نٛ يٜىٰسُ ٻُرْدِ مَلَاعِکَعٜنْ

⁴اَللَّه حٛکِّي ٻِطّٛ مُوطُمْ لَامُ ٻُرْطُمْ طُمْ مَلَاعِکَعٜنْ، نٛنْ نٛ اِنْدٜ ندٜ اَللَّه حٛکِّمٛ ندٜ ٻُرِي اِنْطٜ مَٻّٜ؞ ⁵نغَمْ اَللَّه مٜىٰطَايِ وِيکِ غٛطّٛ مَلَاعِکَاجٛ،

‏«‏اَنْ، اَ ٻِطّٛ اَمْ،

حَنْدٜ مِ وَرْتِي ݧَاکٛ مَاطَ؞»‏

طٛنْمَا اَللَّه مٜىٰطَايِ مٜتِ دٛوْ غٛطّٛ مَلَاعِکَاجٛ وِعِ،

‏«‏مِ وَرْتَيْ ݧَاکٛ تٛ مَاکٛ،

ندٜنْ اٛ وَرْتَيْ ٻِطّٛ تٛ اَمْ؞»‏

⁶اَمَّا ندٜ اَللَّه سِرْيِي لِلَ ٻِطّٛ مُوطُمْ اَفٛ ندٜرْ دُونِيَارُ، اٛ وِعِي،

‏«‏فُو مَلَاعِکَعٜنْ اَللَّه دٛولٜ مَوْنِنَمٛ؞»‏

⁷دٛوْ مَلَاعِکَعٜنْ بٛو، اٛ وِعِي،

‏«‏اَللَّه وَطِي مَلَاعِکَعٜنْ مُوطُمْ نغَرْتَ بٛ حٜنْدُ،

ندٜنْ اٛ وَطِي مَشُّٻٜ مَاکٛ نغَرْتَ بٛ طٜمْطٜ حِيتٜ؞»‏

⁸اَمَّا اٛ وِعِي ٻِطّٛ اٛنْ،

‏«‏يَا اَللَّه، لَامُ مَاطَ تَبِتَيْ حَا اَبَدَا اَبَدِنْ؞

اَادِلَاکُ وٛنِ سَوْرُ ندُ لَامٛرْتٛطَا يِمْٻٜ مَاطَ؞

⁹اَ يِطِ اَادِلَاکُ، اَ وَݧِي کٛ وٛوطَا؞

کَنْجُمْ وَطِ مِنْ، اَللَّه مَاطَ، شُٻُمَامِ نغَطُمِ کٜٻُطَا مَنْغُ غَدَّيْطُمْ نَنُکِ بٜلْطُمْ ٻُرْطُمْ طُمْ

ٻٜ نغٛنْدُطَا؞»‏

¹⁰طٛنْمَا اٛ وِعِي،

‏«‏اَنْ جٛومِرَاوٛ، دَغَ اَرَنْدٜ اَنْ تَغِ دُونِيَارُ ندُعُ،

اٜ جُوطٜ مَاطَ نغَطِرْطَا دٛوْ؞

¹¹طُمْ رٜعَيْ، اَمَّا اَنْ اَ تَبٛتٛ؞

طُمْ فُو طُمْ حِيطَيْ بٛ کٛلْتٜ؞

¹²اَ تَغَّيْطُمْ بٛ شُدَّارِ،

طُمْ وَيْلِتَيْطُمْ نٛ طُمْ وَيْلِتِرْتَ کٛلْتٜ؞

اَمَّا اَنْ، اَ طٛنْ نٛ نغٛنْتِندِرْطَا،

حَا اَبَدَا دُوٻِ مَاطَ نغَلَا کٜىٰرٛلْ؞»‏

¹³اَللَّه مٜىٰطَايِ وِعُکِ غٛطّٛ مَلَاعِکَاجٛ،

‏«‏جٛوطَ تٛ جُنْغٛ ݧَامٛ اَمْ

نَا مِ وَطِي وَݧْوَݧْٻٜ مَاطَ نغَرْتِي

تٛ نجٛوَتَا کٛيْطٜ مَاطَ؞»‏

¹⁴مَلَاعِکَعٜنْ طُمْ ٻٜيٜ؟ ٻٜ رُوحُوجِ کُوَنٛوجِ اَللَّه ٻٜ اٛ لِلَتَ نغَمْ مبَلَّ کٜٻَيْٻٜ کِسْندَمْ؞

کِسْندَمْ مَوْطَمْ

¹نغَمْ مَاجُمْ دٛولٜ نغَطٜنْ فُو حَکِّيلٛ مٜىٰطٜنْ دٛوْ کٛ نَنْطٜنْ، نغَمْ تٛع شٜلٜنْ دَغَ تٛکُّکِطُمْ؞ ²حَالَ کَ طُمْ مٜتِ دَغَ کٛنْدُطٜ مَلَاعِکَعٜنْ کَ تَبِّتِنَامَ، ندٜنْ کٛو مٛيٜ غَݧُطٛ تٛکَّکَ حٜٻِي تٛرَّ نٛ حَانَنِمٛ؞ ³تٛ طُمْ نٛنْ، نٛ وَطَتَ ندَطٜنْ تٛ اٜنْ نغَطَايِ حَکِّيلٛ مٜىٰطٜنْ دٛوْ کِسْندَمْ طَعَمْ مَوْطَمْ؟ جٛومِرَاوٛ اَرْتِي مٜتُکِ دٛوْ مَاجَمْ، ندٜنْ ٻٜنْ طٛنْ نَنْٻٜمٛ تَبِّتِنَنِيمِنْ وِيکِ طُمْ غٛونغَ؞ ⁴نٛنْ مَا اَللَّه تَبِّتِنِيطُمْ اٜ اَلَامَاجِ، اٜ کُوطٜ کَيْطِنِيطٜ فٜىٰرٜ‑فٜىٰرٜ، اٜ حٛکُّکِ رُوحُ مَاکٛ نٛنْ نٛ اٛ يِطِرِ؞

اَرْدِيطٛ کِسْندَمْ

⁵دُونِيَارُ غَرَيْندُ ندُ مِنْ مٜتَتَ، نَاع مَلَاعِکَعٜنْ اَللَّه وَطِ لَامٛوندُ؞ ⁶اَمَّا اٜ وٛودِ اَايَارٜ تٛ طُمْ وِعِ،

‏«‏يَا اَللَّه، نٜطّٛ طُمْ طُمٜ حَا ݧُمَتَا دٛوْ مَاکٛ؟

ٻِي نٜطّٛ اٛ مٛيٜ حَا اَ فَامَنَمٛ؟

⁷اَ لٜسْتِنِيمٛ لٜيْ مَلَاعِکَعٜنْ نغَمْ شَرٜلْ سٜطَّ،

اَمَّا غَطَ طٛنْ اَ حٛکِّيمٛ تٜدُّنغَلْ اٜ مَنْغُ،

⁸اَ وَطِي کٛو طُمٜ لٜيْ لَامُ مَاکٛ؞»‏

ندٜ اَللَّه وَطِ کٛو طُمٜ لٜيْ لَامُ مَاکٛ، اَلَايِ غٛطُّمْ طُمْ وَلَا لٜيْ لَامُ مَاکٛ؞ فُو اٜ نٛنْ، حَا جٛونِ اٜنْ نغِعَايِ کٛو طُمٜ فُو لٜيْ لَامُ مَاکٛ؞ ⁹شَرٜلْ سٜطَّ طُمْ حٛکِّ يٜىٰسُ مَنْغُ طُمْ حٜوْتَايِ طُمْ مَلَاعِکَعٜنْ؞ اَمَّا جٛونِ اٜنْ نغِعِي اٛ حٛکَّامَ تٜدُّنغَلْ اٜ مَنْغُ نغَمْ تٛرَّ مَيْدٜ کَ اٛ يَرِ، نغَمْ بَرْکَ يِدّٜ اَللَّه اٛ مَايَ نغَمْ کٛو مٛيٜ؞ ¹⁰اَللَّه تَغِ کٛو طُمٜ، کَنْکٛ فَامَنْتَ کٛو طُمٜ؞ اٛ وَطِي کٛ حَانِ ندٜ اٛ وَرْتِرِ يٜىٰسُ کٜوْطٛ لَاوٛلْ تٛرَّ کَ يَرِ، نغَمْ اٛ وَدَّ يِمْٻٜ طُطْٻٜ تٛ تٜدُّنغَلْ مَاکٛ؞ يٜىٰسُ وٛنِ مَٻُّتُطٛ لَاوٛلْ کِسْندَمْ تٛکِّنٛووٛٻٜ لَاوٛلْ نغٛلْ ٻٜ کِسَ؞

¹¹لٛوتَنٛووٛ يِمْٻٜ حَکّٜ، کَنْکٛ اٜ ٻٜنْ طٛنْ لٛوتَنَاٻٜ ٻٜ فُو ݧَاکٛ مَٻّٜ اٛ غٛعٛتٛ؞ کَنْجُمْ وَطِ يٜىٰسُ نَنَتَا شٜمْتُطُمْ نٛدِّرْکِٻٜ مِݧِرَاٻٜ مُوطُمْ؞ ¹²اٛ وِعِي اَللَّه،

‏«‏مِ وِعَيْ مِݧِرَاٻٜ اَمْ کُوطٜ طٜ نغَطَّا،

مِ مَنْتٜتٜ ندٜرْ کَوْتَلْ مَٻّٜ؞»‏

¹³کَدِنْ اٛ وِعِي، ‏«‏مِ حٛولٛتٛ اَللَّه؞»‏ ندٜنْ کَدِنْ اٛ وِعِي، ‏«‏رَمِّ طٛعٛ اٜ ٻِٻّٜ ٻٜ اَللَّه حٛکِّيَمْ؞»‏

¹⁴ندٜ ٻِٻّٜ ٻٜنْ ٻٜ غٛودُٻٜ ٻَنْدُ اٜ پِيپَمْ، يٜىٰسُ اٜ حٛورٜ مُوطُمْ وَرْتِي نٜطّٛ بٛ مَٻّٜ؞ اٛ وَطُ نٛنْ نغَمْ بَرْکَ مَيْدٜ مَاکٛ اٛ حَلْکَ اٛنْ طٛنْ جٛغِيطٛ بَوْطٜ مَيْدٜ، وَاتٛ شٜيْطَنْ؞ ¹⁵نٛنْ اٛ يٛوفِرِ يِمْٻٜ ٻٜ کُلٛلْ مَيْدٜ حَٻِّ کٜىٰرٛلْ بَلْطٜ مَٻّٜ؞ ¹⁶اٜنْ تَبِّتِنِي نَاع مَلَاعِکَعٜنْ اٛ وَلِّ، اَمَّا ٻِٻّٜ ٻِٻّٜىٰجِ اِبْرَاهِمْ اٛ وَلِّ؞ ¹⁷نغَمْ مَاجُمْ دٛولٜ اٛ وَرْتِرَا نٜطّٛ اٜ کٛو نغٛلٜ لَاوٛلْ، نغَمْ اٛ وَرْتَ مَوْطٛ مَوْٻٜ اَرْدِيطٛ دِينَ مٛ غٛونغَ غٛودُطٛ يُرْمٜىٰندٜ ندٜرْ کُوغَلْ اَللَّه نغَمْ حَکّٜ يِمْٻٜ نجَافٜىٰ؞ ¹⁸ندٜ کَنْکٛ اٜ حٛورٜ مَاکٛ اٛ تٛرَّکٜ ندٜ اٛ فٛونْدَا، اٜ مٛ وَاوِ وَلُّکِ فٛوندٜتٜىٰٻٜ؞

يٜىٰسُ ٻُرِي اَنَّبِ مُوسَ

¹نغَمْ نٛنْ، بَنْدِرَاٻٜ اَمْ تٛکُّٻٜ يٜىٰسُ ٻٜ اَللَّه نٛدِّ، ݧُمٜىٰ دٛوْ يٜىٰسُ، لِلَاطٛ، مَوْطٛ مَوْٻٜ اَرْدِيٻٜ دِينَ مٛ مبِعٜتٜنْ يِمْٻٜ اٜنْ تٛکَّ؞ ²اٛ حُوَنِ اَللَّه اٜ غٛونغَ شُٻُطٛمٛ، نٛنْ نٛ مُوسَ حُوِرَنِ اَللَّه ندٜرْ يِمْٻٜ مَاکٛ اٜ غٛونغَ؞ ³اَمَّا طُمْ يِعِي يٜىٰسُ ٻُرِي مُوسَ مَنْغُ نَاع سٜطَّ، نٛنْ نٛ مَحٛووٛ وُرٛ ٻُرِرِ مَادِ ندِنْ مَنْغُ؞ ⁴نغَمْ کٛو نغٛيٜ وُرٛ غٛطّٛ مَحِنغٛ، اَمَّا اَللَّه وٛنِ مَحُطٛ کٛو طُمٜ؞ ⁵مُوسَ اٛ مَشُّطٛ اَللَّه مٛ غٛونغَ ندٜرْ کُوغَلْ وَلُّکِ يِمْٻٜ اَللَّه، اٛ مٜتِي دٛوْ کٛ اَللَّه وِعَتَ طٛعٛ يٜىٰسٛ؞ ⁶اَمَّا اَلْمَسِيحُ اٛ ٻِطّٛ، ڤَامَنٛووٛ يِمْٻٜ اَللَّه اٜ غٛونغَ؞ اٜنْ يِمْٻٜ اَللَّه تٛ اٜنْ نجٛغَکٜ سٜمْبٜ ٻٜرْندٜ اٜ شِيَ کُلٛلْ دٛوْ کٛ کَمِّيطٜنْ؞

سِوْتَارٜ يِمْٻٜ اَللَّه

⁷نغَمْ نٛنْ، نٛ رُوحُ اَللَّه وِعِ،

‏«‏حَنْدٜ، تٛ اٛنْ نَنِي حٛنٛنْدٜ اَللَّه،

⁸تٛع اٛنْ شَاتِنْ ٻٜرْطٜ مٛوطٛنْ نٛ مَامَعٜنْ مٛوطٛنْ نغَطُنٛو

شَرٜلْ کٛ ٻٜ نغَݧِ کٛ اَللَّه وِعِ

ٻٜ ڤٛوندِمٛ ندٜرْ لَدّٜ؞

⁹اَللَّه وِعِي، ‏‹‏تٛنْ مَامَعٜنْ مٛوطٛنْ ڤٛوندِيَمْ،

کٛو ندٜ دُوٻِ 40 اٜ ٻٜ نغِعَ کُوطٜ اَمْ طٜ نغَطُمِ؞›‏

¹⁰نغَمْ نٛنْ، مِ مٛنَّنِي يِمْٻٜ جَامَنُ طُمْ، مِ وِعِ،

‏‹‏کٛو ندٜيٜ اٜ ٻٜ شٜلَ لَاوٛلْ اَمْ،

اٜ ٻٜ نغَݧَ تٛکُّکِيَمْ؞›‏

¹¹سٜيْ ٻٜرْنُمِ کُنِيمِ مبِيمِ،

‏‹‏ٻٜ نَتَّتَا تٛ شِوْتِنَيْمِٻٜ!‏›‏ »‏

¹²بَنْدِرَاٻٜ اَمْ تٛکُّٻٜ يٜىٰسُ، ڤَامٜىٰ تٛع ٻٜرْندٜ کٛو مٛيٜ مٛوطٛنْ حَلَّ وَݧَ حٛولَاکِ، اَلٛنْ تٛکُّکِمٛ؞ ¹³اَمَّا شٜمْبِطِنْدِرٜىٰ ٻٜرْطٜ مٛوطٛنْ کٛو ندٜيٜ ݧَلْندٜ، کُوتِرٜىٰ کٛو نغٜلٜ شَرٜلْ بِعٜتٜىٰنغٜلْ ‏«‏حَنْدٜ،»‏ نغَمْ تٛع حَکّٜ پٛيْرَ غٛطّٛ مٛوطٛنْ اٛ وَرْتَ مٛ ٻٜرْندٜ شَاتُندٜ؞ ¹⁴تٛ اٜنْ نجٛغَکٜ حٛولَاکِ کِ نغٛودُنٛوطٜنْ دَغَ اَرَنْدٜ بٛطُّمْ حَا کٜىٰرٛلْ بَلْطٜ مٜىٰطٜنْ، اٜنْ نغَرْتِ غٛنْدُٻٜ اٜ اَلْمَسِيحُ؞

¹⁵نٛ اَايَارٜ وِعِ،

‏«‏حَنْدٜ، تٛ اٛنْ نَنِي حٛنٛنْدٜ اَللَّه،

تٛع اٛنْ شَاتِنْ ٻٜرْطٜ مٛوطٛنْ نٛ مَامَعٜنْ مٛوطٛنْ نغَطُنٛو

ندٜ ٻٜ نغَݧِ کٛ اَللَّه وِعِ؞»‏

¹⁶ٻٜيٜ نغٛنّٛو نَنْٻٜ حٛنٛنْدٜ اَللَّه، اَمَّا فُو اٜ نٛنْ نغَݧِ کٛ اٛ وِعِ؟ نَاع طُمْ ٻٜنْ طٛنْ ٻٜ فُو ٻٜ مُوسَ اَرْدِي وُرْتِنِ لٜيْدِ مَسَرْ؟ ¹⁷ندٜنْ ٻٜيٜ اَللَّه وَطِ دُوٻِ 40 اٜ مٛنَّنَ؟ نَاع طُمْ ٻٜنْ طٛنْ يِمْٻٜ غَطُٻٜ حَکّٜ مَايِ ندٜرْ لَدّٜ؟ ¹⁸دٛوْ ٻٜيٜ اَللَّه حُنِي وِيکِ ٻٜ نَتَّتَا تٛ شِوْتِنْتَٻٜ کٛو سٜطَّ؟ نَاع طُمْ ٻٜنْ طٛنْ غَݧُٻٜ کٛ اٛ وِعِ؟ ¹⁹نغَمْ نٛنْ، اٜنْ نغِعِي ٻٜ مبَاوَايِ نَتُّکِ لٜيْدِ ندِنْ نغَمْ ٻٜ کٛولَاکِ اَللَّه؞

¹ندٜ اَلْکَوَلْ نغَلْ اَللَّه وَطَنِعٜنْ نغَلْ نَتُّکِ تٛ اٛ سِوْتِنْتَعٜنْ اٜ طٛنْ، اٜنْ ڤَامُ، تٛع غٛطّٛ مٛوطٛنْ دُلَّ نَتُّکِ سِوْتَارٜ ندٜنْ؞ ²نغَمْ اٜنْ نَنِي حَبَرُ بٜلْطُمْ، نٛنْ نٛ ٻٜ نَنِرِطُمْ؞ اَمَّا کٛ ٻٜ نَنِ طُمْ نَفَايِٻٜ، نغَمْ شَرٜلْ نغٜلْ ٻٜ نَنِطُمْ، ٻٜ نجَٻَايِطُمْ؞ ³نغَمْ اٜنٜنْ کٛولِيٻٜ اَللَّه اٜنٜنْ نغٛنِ نَتّٛوٻٜ سِوْتَارٜ ندٜنْ طٛنْ؞ نٛنْ نٛ اَللَّه وِعِ،

‏«‏مِ مٛنِّي مِ حُنَکٜ مِ وِعِ،

‏‹‏ٻٜ نَتَّتَا تٛ شِوْتِنَيْمِٻٜ!‏›‏ »‏

اٛ وِعِي نٛنْ کٛو ندٜ اٛ يٛتِّنِ سِرْيَاکِ کٛو طُمٜ دَغَ شَرٜلْ کٛ اٛ تَغَتَ دُونِيَارُ؞ ⁴نغَمْ بَنْݧٜ ندٜرْ دٜفْتٜرٜ شٜنِيندٜ اَللَّه مٜتِي دٛوْ ݧَلْندٜ جٛوٜىٰطِطَوْرٜ وِيکِ، ‏«‏ݧَلْندٜ جٛوٜىٰطِطَوْرٜ اَللَّه سِوْتِي دَغَ فُو کُوغَلْ مُوطُمْ؞»‏ ⁵ندٜنْ طُمْ فُطِّتِي طُمْ مٜتِي دٛوْ مَاجُمْ وِيکِ، ‏«‏ٻٜ نَتَّتَا تٛ شِوْتِنَيْمِٻٜ؞»‏ ⁶ٻٜنْ طٛنْ اَرْتُٻٜ نَنْکِ حَبَرُ بٜلْطُمْ ٻٜ کٜٻَايِ نَتُّکِ سِوْتَارٜ ندٜنْ طٛنْ نغَمْ ٻٜ نغَطَايِ کٛ اَللَّه وِعِ؞ اَمَّا اٜ وٛودِ وٛٻّٜ ٻٜ طُمْ اَلَتَ نَتَّ؞ ⁷اَللَّه فُطِّتِي وَطِي وٛنْدٜ ݧَلْندٜ اٛ نٛدِّرِندٜ، ‏«‏حَنْدٜ؞»‏ غَطَ دُوٻِ طُطِّ اٛ مٜتِرِي حٛنْدُکٛ دَوْدَ دٛوْ مَاجُمْ ندٜرْ اَايَارٜ ندٜ نَنُنٛوطٜنْ بِيندٜ،

‏«‏حَنْدٜ، تٛ اٛنْ نَنِي حٛنٛنْدٜ اَللَّه،

تٛع اٛنْ شَاتِنْ ٻٜرْطٜ مٛوطٛنْ؞»‏

⁸دَا جٛوشُوَ نَتِّنِينٛ يِمْٻٜ سِوْتَارٜ ندٜنْ، دَا اَللَّه فُطِّتَايِ مٜتِ دٛوْ وٛنْدٜ ݧَلْندٜ سِوْتَارٜ؞ ⁹نٛنْ حٛلِّي حَا جٛونِ اٜ وٛودِ وٛنْدٜ سِوْتَارٜ نغَمْ يِمْٻٜ اَللَّه؞ ¹⁰نغَمْ کٛو مٛيٜ نَتُّطٛ سِوْتَارٜ ندٜ اَللَّه وَطِ اَلْکَوَلْ، اٛ سِوْتٛتٛ دَغَ کُوطٜ مَاکٛ، نٛنْ نٛ اَللَّه سِوْتٛرِي دَغَ کُوطٜ مُوطُمْ؞ ¹¹نغَمْ نٛنْ اٜنْ نغَطُ کٛ مبَاوٜتٜنْ وَطُکِ نغَمْ نَتّٜنْ سِوْتَارٜ ندٜنْ طٛنْ؞ تٛع غٛطّٛ مٜىٰطٜنْ وَطَ نٛ ٻٜنْ تٛنْ، وَݧَ کٛ اَللَّه وِعِ دُلَّ سِوْتَارٜ ندٜنْ؞

¹²وٛلْدٜ اَللَّه اٜ وٛودِ يٛنْکِ اٜ ندٜ حُوَ، ندٜ ٻُرِي کٛو کِيٜ کَافَحِ وٜلْکِ؞ اٜ ندٜ تَپَ حَا ندٜ سٜنْدَ يٛنْکِ اٜ ٻٜرْندٜ، ندٜ سٜنْدَ جٛکّٛوطٜ اٜ مبٛرْٻٛوندِ؞ اٜ ندٜ سٜنْدَ سُونٛوجِ اٜ ݧُمٛوجِ ٻٜرْندٜ بٛطِّ اٜ طِ مبٛوطَا؞ ¹³ندٜرْ فُو کٛ تَغَا، وَلَا کٛ سُوطِي تٛ اَللَّه؞ کٛو طُمٜ اٜ نجَيْرِ طُمْ وٛنِ، اٜ طُمْ مَٻِّتِي يٜىٰسٛ مَاکٛ؞ ندٜنْ دٛولٜ کَنْکٛ مبِعٜتٜنْ فُو کٛ نغَطّٜنْ؞

مَوْطٛ مَوْٻٜ اَرْدِيٻٜ دِينَ ٻُرْطٛ کٛو مٛيٜ

¹⁴ندٜ اٜنْ نغٛودِ مَوْطٛ مَوْٻٜ اَرْدِيٻٜ دِينَ جَاطٛ دٛوْ حَا يٜىٰسٛ اَللَّه، وَاتٛ يٜىٰسُ، ٻِطّٛ اَللَّه، اٜنْ نجٛغٛ کٛ کٛولِيطٜنْ بٛطُّمْ؞ ¹⁵مَوْطٛ مَوْٻٜ اَرْدِيٻٜ دِينَ مٛ نغٛودُطٜنْ نَاع اٛ غٛطّٛ مٛ وَاوَتَا يُرْمِنَنْکِعٜنْ اٜنٜنْ تَمْڤُٻٜ؞ اَمَّا اٛ فٛوندَامَ اٜ کٛو نغٛلٜ لَاوٛلْ نٛ طُمْ فٛوندِرْتَعٜنْ، فُو اٜ نٛنْ اٛ وَطَايِ حَکّٜ؞ ¹⁶نغَمْ نٛنْ، اٜنْ نغَطُ سٜمْبٜ ٻٜرْندٜ ٻَدّٛوطٜنْ جٛوطٛرْغَلْ لَامُ اَللَّه جٛومُ يِدّٜ، نغَمْ کٜٻٜنْ يُرْمٜىٰندٜ اٜ يِدّٜ بَلَّيْندٜعٜنْ اٜ شَرٜلْ نغٜلْ نغِطّٜنْدٜ؞

¹کٛو مٛيٜ مَوْطٛ مَوْٻٜ اَرْدِيٻٜ دِينَ شُٻَاطٛ دَغَ ندٜرْ يِمْٻٜ، طُمْ حٛکُّمٛ کُوغَلْ نغَمْ اٛ حُوَنَ اَللَّه نغَمْ مَٻّٜ، اٛ حٛکَّ اَللَّه شَکِّرِ اٜ دٛکّٜ نغَمْ حَکّٜ مَٻّٜ؞ ²ندٜ کَنْکٛ مَا اٜ حٛورٜ مَاکٛ اٛ تَمْڤُطٛ اٜ طَتٜ طُطّٜ، اٛ وَاوَيْ اٛ وَادَ مُݧَلْ اٜ ٻٜ نغَلَا اَنْدَلْ اٜ شٜلُٻٜ لَاوٛلْ؞ ³ندٜنْ ندٜ کَنْکٛ اٜ حٛورٜ مَاکٛ اٛ تَمْڤُطٛ، دٛولٜ اٛ سَکَّنَ اَللَّه نغَمْ حَکّٜ يِمْٻٜ اٜ حَکّٜ مَاکٛ، کَنْکٛ مَا؞ ⁴وَلَا کٜٻَنَيْطٛ حٛورٜ مُوطُمْ مَنْغُ وَرْتُکِ مَوْطٛ مَوْٻٜ اَرْدِيٻٜ دِينَ، اَمَّا اَللَّه نٛدَّتَمٛ، نٛنْ نٛ نٛدِّرِ هَرُونَ؞

⁵نٛنْ مَا اَلْمَسِيحُ نَاع کَنُمْ مَوْنِنِ حٛورٜ مُوطُمْ وَرْتِ مَوْطٛ مَوْٻٜ اَرْدِيٻٜ دِينَ، اَمَّا اَللَّه حٛکِّمٛ کُوغَلْ نغَلْ، وِعِمٛ،

‏«‏اَنْ اَ ٻِطّٛ اَمْ؞

حَنْدٜ مِ وَرْتِي ݧَاکٛ مَاطَ؞»‏

⁶نٛ اٛ وِعِ ندٜرْ وٛنْدٜ اَايَارٜ،

‏«‏اَنْ اَ اَرْدِيطٛ دِينَ حَا اَبَدَا

بٛ مَلْکِسَدِکْ؞»‏

⁷شَرٜلْ کٛ يٜىٰسُ وٛنِ ندٜرْ دُونِيَارُ، اٛ وَطِي دٛعَاجٜ اٜ حٛنٛنْدٜ شٜمْبِنْدٜ اٜ غٛنْطِ اٛ تٛرَکٜ اَللَّه بَاوَيْطٛ حِسْنُکِمٛ دَغَ مَيْدٜ؞ طُمْ بٛو جَٻِي دٛعَارٜ مَاکٛ نغَمْ اٛ وَطِي کٛ اَللَّه وِعِ ندٜرْ کُلٛلْ اَللَّه؞ ⁸کٛو ندٜ اٛ ٻِطّٛ اَللَّه اٛ اٜکِّتَکٜ وَطُکِ کٛ اَللَّه وِعِ ندٜرْ تٛرَّ کَ اٛ يَرِ؞ ⁹ندٜ اٛ وَرْتِرَا کٜوْطٛ، اٛ وَرْتِي کٛکّٛووٛ فُو غَطٛوٻٜ کٛ اٛ وِعِ کِسْندَمْ تَبِتَيْطَمْ؞ ¹⁰اَللَّه نٛدِّيمٛ اٛ وَرْتَ مَوْطٛ مَوْٻٜ اَرْدِيٻٜ دِينَ بٛ مَلْکِسَدِکْ؞

وَغِّنْکِ دٛوْ سٜلُکِ لَاوٛلْ غٛونغَ

¹¹دٛوْ حَالَ کَعَ اٜ مِنْ نغٛودِ فِي طُطُّمْ طُمْ مِنْ مبِعَتَ، اَمَّا اٜ طُمْ سَطِ فَمْتِنٜىٰکِ نغَمْ اٛنْ نجَاوَا فَامُکِ؞ ¹²اٜ حَانِ جٛونِ دَا اٛنْ نغَرْتِي مٛودِٻّٜ، اَمَّا حَا جٛونِ سٜيْ تٛ غٛطّٛ اٜکِّتِنِيعٛنْ اٜکِّتِنٛلْ اَرَنْدٜوٛلْ نغٛلْ وٛلْدٜ اَللَّه؞ اٜ حَانِ ݧَامٛنْ ݧَمْندُ شٜمْبِنْدُ، اَمَّا حَا جٛونِ اٛنْ مُسِنَ؞ ¹³نغَمْ کٛو مٛيٜ مُسِنٛووٛ حَا جٛونِ اٛ ٻِنْغٜلْ، اٛ اَنْدَا اٜکِّتِنٛلْ اَادِلَاکُ؞ ¹⁴اَمَّا ݧَمْندُ شٜمْبِنْدُ بٛو، طُمْ ندُ مَوْنُٻٜ؞ کَمْٻٜ نغٛنِ حُوتِرْٻٜ حَکِّيلٛ مَٻّٜ کٛو ندٜيٜ حَا اٜ ٻٜ مبَاوِ فٜىٰرٛوتِرْکِ حَکُّندٜ کٛ وٛوطِ اٜ کٛ وٛوطَا؞

¹نغَمْ نٛنْ، اٜنْ ݧَمْرُ يٜىٰسٛ دٛوْ اٜکِّتِنٛلْ نغٛلْ طٛنْ اَرَنْدٜوٛلْ نغٛلْ کٜٻُطٜنْ دٛوْ اَلْمَسِيحُ، نغَمْ نغَرْتٜنْ ٻٜ اَنْدَلْ کٜوْنغَلْ؞ تٛع طُمْ وِعَ حَا جٛونِ اٜنْ مٜتَ دٛوْ اٜکِّتِنٛلْ نغٛلْ حٛولَاکِ اَللَّه، اٜ تُوبُکِ دَغَ کُوطٜ جَارَيْطٜ حَلْکٜرٜ، ²اٜ اٜکِّتِنٛلْ دٛوْ بَڤْتِسْمَ، اٜ يٛوَنْکِ يِمْٻٜ جُوطٜ نغَمْ بَرْکِطِنْکِٻٜ، اٜ اُمَّاکِ مَيْٻٜ، اٜ نٛ اَللَّه تَپِرَنْتَ يِمْٻٜ کِيتَ تَبٛتٛوکَ؞ ³اٜنْ ݧَمْرَيْ يٜىٰسٛ، تٛ اَللَّه جَٻِي؞

⁴نغَمْ طُمْ وَطَتَاکٛ اَلُٻٜ جَيْنغٛلْ اَللَّه شٛعّٜىٰ تُوبَ کَدِنْ، مٜىٰمُٻٜ دٛکَّلْ مَاکٛ، کٜٻُٻٜ رُوحُ مَاکٛ؞ ⁵ندٜنْ ٻٜ مٜىٰمِي بٜلْطُمْ وٛلْدٜ اَللَّه ٻٜ نَنِي، ندٜنْ ٻٜ مٜىٰمِي بَوْطٜ غَطٜتٜىٰطٜ تٛ يٜىٰسُ وَرْتِي، ٻٜ نَنِي؞ ⁶تٛ ٻٜ نغَيْلِتَنِي اَللَّه ٻَاوٛ، طُمْ وَطَتَاکٛ ٻٜ شٛعّٜىٰ ٻٜ تُوبَ، نغَمْ کٛ ٻٜ نغَطِ بٛ ٻٜ ڤُطُّتُ فِيَنْکِ ٻِطّٛ اَللَّه کُوسَاجٜ دٛوْ غَافَانغَلْ، اٜ ٻٜ شٜمْتِنَمٛ يٜىٰسٛ يِمْٻٜ؞

⁷لٜيْدِ نجَرَيْندِ ندِيَمْ تٛٻٛوجَمْ کٛو ندٜيٜ، ندٜنْ اٜ ندِ وُرْتِنَ فُطٜ‑فُطٜ نَفَنٛوجُمْ جٜيْٻٜ لٜيْدِ ندِنْ، اَللَّه اٜ بَرْکِطِنَنْدِ؞ ⁸اَمَّا تٛ ندِ وُرْتِنِي غِعٜ اٜ کٛورَاجٜ، ندِ وَرْتِي کٛو کٛ ندِ نَفِ، نَاع کٛ نٜىٰٻِ اَللَّه لَانَيْندِ، رٜعُکِ مَيْرِ بٛو طُمْ وُلَيْندِ؞

⁹کٛو ندٜ اٜ مِنْ مٜتِرَ نِينِ، فُو اٜ نٛنْ، اٛنٛنْ ٻٜ مِنْ نغِطِ، مِنْ تَبِّتِنِي اٛنٛنْ اٛنْ دٛوْ لَاوٛلْ بٛنْغٛلْ، لَاوٛلْ کِسْندَمْ؞ ¹⁰اَللَّه نَاع اٛ غَطٛووٛ کٛ حَانَا؞ اٛ يٜجِّتَتَا کُوغَلْ نغَلْ نغَطّٛنْ کٛو يِدّٜ ندٜ کٛلُّطٛنْمٛ ندٜ مبَلُّطٛنْ يِمْٻٜ مَاکٛ، ݧَمْرُطٛنْ يٜىٰسٛ اٜ وَلُّکِٻٜ حَا جٛونِ؞ ¹¹اٜ مِنْ نغِطِ کٛو مٛيٜ مٛوطٛنْ ݧَمْرَ يٜىٰسٛ اٜ وَطُکِ نِينِ حَا يَاکِ رٜعِرْدٜ، نغَمْ کٜٻٛنْ فُو کٛ نغَطّٛنْ کَمُّندٜ دٛوْ مَاجُمْ؞ ¹²مِنْ نغِطَا نغَرْتٛنْ تَمْڤُٻٜ، اَمَّا تٛکّٜىٰ لَاوٛلْ دٛنُٻٜ کٛ اَللَّه وَطِ اَلْکَوَلْ بَرْکَ حٛولَارٜ مَٻّٜ اٜ مُݧَلْ مَٻّٜ؞

اَلْکَوَلْ اَللَّه تَبُّتُنغَلْ

¹³شَرٜلْ کٛ اَللَّه وَطَنِ اِبْرَاهِمْ اَلْکَوَلْ، ندٜ وَلَا ٻُرْطٛمٛ مَنْغُ مٛ اٛ حُنٛرْتٛو، اٛ حُنٛرَکٜ حٛورٜ مَاکٛ، ¹⁴اٛ وِعِي، ‏«‏غٛونغَ، مِ بَرْکِطِنْتٜ مِ طُطِّنَ لٜݧٛلْ مَاطَ؞»‏ ¹⁵نٛنْ بٛو، غَطَ اِبْرَاهِمْ مُݧِي، اٛ حٜٻِي کٛ اَللَّه وَطَنِمٛ اَلْکَوَلْ؞ ¹⁶يِمْٻٜ اٜ کُنٛرٛو کٛ ٻُرِٻٜ مَنْغُ، ندٜنْ حُنَيٜىٰرٜ وٛنِ کٛ سٜنْدَتَ کٛو طُمٜ ندٜرْ غٜدِّ مَٻّٜ؞ ¹⁷نٛنْ مَا، ندٜ اَللَّه وَطِ اَلْکَوَلْ نغَلْ، سٜيْ اٛ حُنِي نغَمْ اٛ تَبِّتِنَنَ دٛنٛوٻٜنغَلْ وِيکِ اٛ وَيْلِتَتَا ݧُمٛ مَاکٛ؞ ¹⁸فِي طِطُمْ طُعُمْ، وَاتٛ اَلْکَوَلْ نغَلْ اٜ حُنَيٜىٰرٜ ندٜنْ طُمْ وَيْلِتَتَاکٛ حَا اَبَدَا، نغَمْ طُمْ وَطَتَاکٛ اَللَّه فٜوَ؞ نٛنْ اٜ سٜمْبِطِنَعٜنْ، اٜنٜنْ دٛغُّٻٜ نجَحِ تٛ مَاکٛ، نجٛغٛوطٜنْ کَمُّندٜ غٛنْدٜ يٜىٰسٛ مٜىٰطٜنْ بٛطُّمْ؞ ¹⁹کَمُّندٜ ندٜعٜ ندٜ نغٛودُطٜنْ اٜ ندٜ نَنْدِ اٜ دَرْنِرْطُمْ يٛنْکِ مٜىٰطٜنْ؞ ندٜ يَمْرٜ ندٜ تَبُّتُندٜ؞ کَيْرٜ نَتَّتَ غَطَ وُدٜرٜ غٛنْدٜ ندٜرْ وُرٛ شٜنِينغٛ تٛنْ دٛوْ؞ ²⁰تٛنْ يٜىٰسُ اَرْتُطٛعٜنْ نَتِّ نغَمْ مٜىٰطٜنْ؞ اٛ وَرْتِي مَوْطٛ مَوْٻٜ اَرْدِيٻٜ دِينَ حَا اَبَدَا بٛ مَلْکِسَدِکْ؞

مَلْکِسَدِکْ اَرْدِيطٛ دِينَ

¹اٛعٛ مَلْکِسَدِکْ، اٛ لَامِيطٛ سَلٜمْ، اٛ اَرْدِيطٛ دِينَ مٛ اَللَّه جٛومُ مَنْغُ؞ اٛ حَوْرِي اٜ اِبْرَاهِمْ شَرٜلْ کٛ وَرْتٛيْتَ دَغَ کٛنُ طُمْ حٜٻِ جَالٛرْغَلْ دٛوْ وٛٻّٜ لَامِيٻٜ، اٛ بَرْکِطِنِ اِبْرَاهِمْ؞ ²اِبْرَاهِمْ حٛکِّمٛ جَکَّ ندٜرْ فُو کٛ حٜٻِ تٛ کٛنُ؞ مَعَنَ اَرَنْدٜجُمْ طُمْ اِنْدٜ مَلْکِسَدِکْ وٛنِ ‏«‏لَامِيطٛ اَادِلَاکُ»‏؛ ندٜنْ کَدِنْ کَنْکٛ وٛنِ لَامِيطٛ سَلٜمْ، وَاتٛ ‏«‏لَامِيطٛ جَمْ؞»‏ ³طُمْ وِنْدَايِ کٛو اٜ مٛ وٛودِ ݧَاکٛ، کٛو مَدُوجٛ، کٛو لٜݧٛلْ؞ طُمْ وِنْدَايِ دٛوْ ݧَلْندٜ دَݧْنغٛلْ مَاکٛ، کٛو ݧَلْندٜ مَيْدٜ مَاکٛ؞ اٜ مٛ نَنْدِ اٜ ٻِطّٛ اَللَّه، اٛ اَرْدِيطٛ دِينَ حَا اَبَدَا؞

⁴ندَارٜىٰ اِرِ مَنْغُ طُمْ اٛ وٛودِ، حَا اِبْرَاهِمْ مَامَ مَامَعٜنْ مٜىٰطٜنْ حٛکِّيمٛ جَکَّ ندٜرْ فُو کٛ حٜٻِ تٛ کٛنُ؞ ⁵ندٜنْ ٻٜنْ طٛنْ ٻِٻّٜ ٻِٻّٜىٰجِ لٜىٰوِ اَرْدِيٻٜ دِينَ، اَتَّوْرَ وِعِي ٻٜ نجَٻَ جَکَّ ندٜرْ فُو کٛ اِسْرَاعِيلَنْکٛعٜنْ نغٛودِ، وَاتٛ دَغَ تٛ بَنْدِرَاٻٜ مَٻّٜ، کٛو ندٜ کَمْٻٜ مَا ٻٜ ٻِٻّٜ ٻِٻّٜىٰجِ اِبْرَاهِمْ؞ ⁶مَلْکِسَدِکْ نَاع دَغَ لٜݧٛلْ لٜىٰوِ پِوٛيِ، اَمَّا اٛ جَٻِي جَکَّ تٛ اِبْرَاهِمْ، اٛ بَرْکِطِنِ اِبْرَاهِمْ مٛ اَللَّه وَطَنِ اَلْکَوَلْ؞ ⁷وَلَا سٜکٛ بَرْکِطِنْطٛ ٻُرِي مٛ اٛ بَرْکِطِنِ مَنْغُ؞ ⁸اَرْدِيٻٜ دِينَ نغٛنِ ٻٜ طُمْ حٛکَّتَ جَکَّ، اَمَّا ٻٜ مَايٛوٻٜ؞ مَلْکِسَدِکْ بٛو، اَايَارٜ وِعِي اٜ مٛ وٛودِ يٛنْکِ؞ ⁹طٛنْمَا لٜىٰوِ اٜ لٜݧٛلْ مُوطُمْ وٛنِ جَٻٛوٻٜ جَکَّ؞ اَمَّا طُمْ وَاوَيْ وِيکِ، لٜىٰوِ اٜ حٛورٜ مُوطُمْ حٛکِّي جَکَّ لَاوٛلْ اِبْرَاهِمْ؞ ¹⁰نغَمْ شَرٜلْ کٛ اِبْرَاهِمْ حَوْرِ اٜ مَلْکِسَدِکْ، لٜىٰوِ دَݧَاکَ تَوْ، اَمَّا اٜ مٛ ندٜرْ ٻَنْدُ اِبْرَاهِمْ؞

¹¹اٜنْ اَنْدِ شَرٜلْ کٛ اَللَّه حٛکِّ اِسْرَاعِيلَنْکٛعٜنْ اَتَّوْرَ، اٛ سُٻِي لٜىٰوِيَنْکٛعٜنْ نغَرْتَ اَرْدِيٻٜ دِينَ؞ تٛو، دَا کُوغَلْ لٜىٰوِيَنْکٛعٜنْ ٻٜنْ وَاوَيْ وَرْتِرْکِ يِمْٻٜ کٜىٰوُٻٜ، دَا حَالَ حٜٻُکِ اَرْدِيطٛ دِينَ فٜىٰرٜ اُمّٛيَاکِ؞ دَا مٛيٜ وِعَتَ طُمْ حٜٻَ اَرْدِيطٛ دِينَ بٛ مَلْکِسَدِکْ، نَاع اَرْدِيطٛ دِينَ بٛ هَرُونَ؟ ¹²نغَمْ تٛ طُمْ وَيْلِتِي کُوغَلْ اَرْدِيٻٜ دِينَ، نٛنْ مَا دٛولٜ طُمْ وَيْلِتَ دٛوکَ؞ ¹³مٛ طُمْ مٜتَتَ دٛوْ مُوطُمْ، وَاتٛ يٜىٰسُ، اٛ پِوٛيِي دَغَ وٛنْغٛلْ لٜݧٛلْ؞ ندٜرْ لٜݧٛلْ نغٛلْ بٛو وَلَا مٜىٰطُطٛ حُوَ کُوغَلْ اَرْدِيطٛ دِينَ؞ ¹⁴طُمْ تَبُّتُطُمْ اٛ پِوٛيِي دَغَ لٜݧٛلْ يَحُودَ، ندٜنْ مُوسَ مٜتَايِ دٛوْ لٜݧٛلْ نغٛعٛلْ ندٜ مٜتِ دٛوْ اَرْدِيٻٜ دِينَ؞

اَرْدِيطٛ دِينَ بٛ مَلْکِسَدِکْ

¹⁵کَنْ طٛنْ حَالَ ٻٜيْدِي وُرْتَاکِ اٜ نجَيْرِ ندٜ غٛطّٛ اَرْدِيطٛ دِينَ بٛ مَلْکِسَدِکْ وُرْتٛيِي؞ ¹⁶اٛ وَرْتِرَاکَ اَرْدِيطٛ دِينَ نغَمْ لٜݧٛلْ مَاکٛ، اَمَّا اٛ وَرْتِرَا اَرْدِيطٛ دِينَ بَرْکَ بَوْطٜ يٛنْکِ کِ رٜعَتَا؞ ¹⁷نغَمْ اَايَارٜ وِعِي، ‏«‏اَنْ اَ اَرْدِيطٛ دِينَ حَا اَبَدَا بٛ مَلْکِسَدِکْ؞»‏ ¹⁸طُمْ رٜسِي دٛوکَ کِيطُمْ وُتُّدُ، نغَمْ طُمْ سٜمْبِطَا طُمْ نَفَتَا؞ ¹⁹نغَمْ اَتَّوْرَ وَطَتَا کٛو طُمٜ وَرْتَ کٜوْطُمْ؞ اَمَّا جٛونِ طُمْ حٛکِّيعٜنْ کٛ ٻُرِ وٛوطُکِ طُمْ نغَطٜتٜنْ کَمُّندٜ دٛوْ مَاجُمْ؞ لَاوٛلْ مَاجُمْ ٻَدّٛتٛوطٜنْ حَادٜ اَللَّه؞

²⁰طٛنْمَا اَللَّه حُنَکٜ وِيکِ يٜىٰسُ وَرْتَيْ اَرْدِيطٛ دِينَ حَا اَبَدَا، اَمَّا اٛ مٜىٰطَايِ وِيکِ غٛطّٛ اَرْدِيطٛ دِينَ نٛنْ؞ ²¹يٜىٰسُ تَنْ اٛ وِعِ،

‏«‏جٛومِرَاوٛ يَادَکٜ حُنَکٜ

ندٜنْ بٛو اٛ وَيْلِتَتَا کٛ اٛ وِعِ،

‏‹‏اَنْ اَ اَرْدِيطٛ دِينَ حَا اَبَدَا؞›‏ »‏

²²نغَمْ حُنَيٜىٰرٜ ندٜنْ، يٜىٰسُ وَرْتِي تَبِّتِنْطٛ اَلْکَوَلْ ٻُرْنغَلْ اَلْکَوَلْ کِينغَلْ؞

²³اَرْدِيٻٜ دِينَ ٻٜ ندٜنّٛ ٻٜ طُطْٻٜ، نغَمْ تٛ غٛطّٛ مَايِ، سٜيْ غٛطّٛ ݧَمْرَ يٜىٰسٛ اٜ کُوغَلْ نغَلْ؞ ²⁴اَمَّا کُوغَلْ يٜىٰسُ نغَلْ اَرْدِيطٛ دِينَ اٜ طٛنْ حَا اَبَدَا نغَمْ کَنْکٛ مَا اٜ مٛ طٛنْ حَا اَبَدَا؞ ²⁵نغَمْ نٛنْ، حَنْدٜ اٜ کٛو ندٜيٜ اٜ مٛ وٛودِ بَوْطٜ اٛ حِسْنَ ٻَدّٛتٛوٻٜ اَللَّه لَاوٛلْ مَاکٛ؞ اٜ مٛ وَاوِ حِسْنُکِٻٜ نغَمْ اٜ مٛ وٛودِ يٛنْکِ حَا اَبَدَا، ندٜنْ اٜ مٛ تٛرٛو اَللَّه نغَمْ مَٻّٜ؞

²⁶اِرِ اٛعٛ مَوْطٛ مَوْٻٜ اَرْدِيٻٜ دِينَ حَانَنِعٜنْ؞ اٛ شٜنِيطٛ، اٛ وَلَا غٛطُّمْ کَلُّطُمْ، اٛ وَلَا حَکّٜ، اٛ وُرْتِنَامَ ندٜرْ غَطٛوٻٜ حَکّٜ اٛ مَوْنِنَا دٛوْ کٛو طُمٜ تٛنْ دٛوْ؞ ²⁷کَنْکٛ نَاع بٛ ٻٜنْ تٛنْ مَوْٻٜ مَوْٻٜ اَرْدِيٻٜ دِينَ حٛرِيٻٜ؞ کَمْٻٜ سٜيْ تٛ ٻٜ شَکَّنِي اَللَّه کٛو ندٜيٜ ݧَلْندٜ، اَرَنْدٜ نغَمْ حَکّٜ مَٻّٜ، ندٜنْ نغَمْ حَکّٜ يِمْٻٜ؞ اَمَّا يٜىٰسُ نَاع نٛنْ؞ اٛ سَکَّنِي اَللَّه ندٜ غٛعٛ، جٛتِّنْطُمْ کٛو طُمٜ، ندٜ اٛ سَکَّنِ اَللَّه حٛورٜ مَاکٛ؞ ²⁸ندٜنْ اَتَّوْرَ اٜ سُٻَ يِمْٻٜ تَمْڤُٻٜ نغَرْتَ مَوْٻٜ مَوْٻٜ اَرْدِيٻٜ دِينَ؞ اَمَّا حُنَيٜىٰرٜ اَللَّه وَرِي غَطَ اَتَّوْرَ؞ کَيْرٜ سُٻِ ٻِطّٛ مَاکٛ غَرْتِرَاطٛ کٜوْطٛ حَا اَبَدَا؞

يٜىٰسُ وٛنِ مَوْطٛ مَوْٻٜ اَرْدِيٻٜ دِينَ

¹جٛونِ فُو کٛ مِنْ مبِعَتَ کَنْجُمْ وٛنِ، اٜنْ نغٛودِ مَوْطٛ مَوْٻٜ اَرْدِيٻٜ دِينَ؞ اٜ مٛ جٛوطِي اٜ جُنْغٛ ݧَامٛ جٛوطٛرْغَلْ جٛومُ مَنْغُ تٛنْ دٛوْ؞ ²اٜ مٛ حُوَ ندٜرْ وِغٜىٰرٜ ٻُرْندٜ سٜنَاکِ، وَاتٛ ندٜرْ لُکُرُ غٛونغَجُمْ طُمْ جٛومِرَاوٛ تِغِّ تٛنْ دٛوْ، نَاع اٜ جُوطٜ يِمْٻٜ؞

³کٛو مٛيٜ مَوْطٛ مَوْٻٜ اَرْدِيطٛ دِينَ اٛ سُٻَ نغَمْ اٛ حٛکَّ اَللَّه دٛکّٜ اٛ سَکَّنَمٛ مَرْلٜ؞ نٛنْ مَا مَوْطٛ مَوْٻٜ اَرْدِيٻٜ دِينَ مٜىٰطٜنْ دٛولٜ حٜٻَ کٛ سَکَّتَ؞ ⁴تٛو، دَا اٜ مٛ دُونِيَارُ جٛونِ، دَا اٛ وَرْتَتَا اَرْدِيطٛ دِينَ کٛو سٜطَّ، نغَمْ اٜ وٛودِ اَرْدِيٻٜ دِينَ کٛکّٛوٻٜ اَللَّه دٛکّٜ نٛ اَتَّوْرَ وِعِ؞ ⁵ٻٜنْ طٛنْ اَرْدِيٻٜ دِينَ اٜ ٻٜ کُوَ کُوغَلْ مَٻّٜ تٛ وِغٜىٰرٜ ٻُرْندٜ سٜنَاکِ نَنْدُندٜ اٜ وٛنْدٜ تٛنْ دٛوْ؞ نغَمْ کٛ مُوسَ فُطَّ تِغُّکِ لُکُرُ سٜنِيطُمْ؞ جٛومِرَاوٛ وِعِمٛ، ‏«‏تَبِّتِنْ اَ وَطِي کٛو طُمٜ نٛنْ نٛ طُمْ حٛلِّرْمَاطُمْ دٛوْ حٛشّٜىٰرٜ؞»‏ ⁶اَمَّا جٛونِ يٜىٰسُ حٛکَّامَ کُوغَلْ اَرْدِيطٛ دِينَ ٻُرْنغَلْ وٛوطُکِ، نٛنْ نٛ اَلْکَوَلْ نغَلْ اٛ سِرْيِي حَکُّندٜ اَللَّه اٜ يِمْٻٜ نغَلْ ٻُرِي وٛوطُکِ؞ اَلْکَوَلْ نغَلْ طٛنْ نغَلْ ٻُرِي وٛوطُکِ نغَمْ نغَلْ وَطَامَ دٛوْ فِي طُمْ اَللَّه وِعِ وَطَنَيْعٜنْ ٻُرْطُمْ طُمْ ندٜنّٛ؞ ⁷دَا اَلْکَوَلْ اَرَنْدٜوَلْ وَلَا غٛطُّمْ شَطُّمْ، دَا نَاع سٜيْ تٛ طُمْ حٜٻِي اَلْکَوَلْ طِطَٻَلْ؞ ⁸اَمَّا اَللَّه يِعِي يِمْٻٜ مُوطُمْ نغٜوِي اَلْکَوَلْ اَرَنْدٜوَلْ نٛ اَايَارٜ وِعِ،

جٛومِرَاوٛ وِعِي، ‏«‏بَلْطٜ اٜ نغَرَ

طٜ نغَادَيْمِ اَلْکَوَلْ کٜسَلْ اٜ يِمْٻٜ اِسْرَاعِيلَ اٜ يِمْٻٜ يَحُودَ؞

⁹اَلْکَوَلْ نغَلْ وَرْتَتَا بٛ اَلْکَوَلْ نغَلْ نغَادُمِ اٜ مَامَعٜنْ مَٻّٜ

ݧَلْندٜ ندٜ نجٛغَنِيمِٻٜ جُنْغٛ اَرْدِيمِٻٜ ٻٜ مبُرْتِي لٜيْدِ مَسَرْ؞

نغَمْ ٻٜ نجٛغَاکِ اَلْکَوَلْ نغَلْ نغَادُمِ اٜ مَٻّٜ،

نغَمْ نٛنْ مِ وَيْلِتَنِيٻٜ ٻَاوٛ؞ مِنْ جٛومِرَاوٛ وِعِ نٛنْ؞»‏

¹⁰اٛ ٻٜيْدِ وِيکِ، ‏«‏رَا اَلْکَوَلْ نغَلْ نغَادَيْمِ اٜ يِمْٻٜ اِسْرَاعِيلَ

غَطَ بَلْطٜ طٜنْ؞

مِ وَطَيْ دٛوکَ اَمْ ندٜرْ ݧُمٛ مَٻّٜ،

ندٜنْ مِ وِنْدَطُمْ ندٜرْ ٻٜرْطٜ مَٻّٜ؞

مِ وَرْتَيْ اَللَّه مَٻّٜ،

کَمْٻٜ بٛو ٻٜ نغَرْتَيْ يِمْٻٜ اَمْ؞

¹¹نَاع نَا غٛطّٛ اٜکِّتِنِي مٛ جٛوطٛدِي،

کٛو اٜکِّتِنَ بَنْدِرَاوٛ مُوطُمْ وِيکِ،

‏‹‏اَنْدُ جٛومِرَاوٛ،›‏

نغَمْ ٻٜ فُو ٻٜ اَنْدَيْيَمْ،

دَغَ ڤَمَرٛ مَٻّٜ حَا مَوْطٛ مَٻّٜ؞

¹²مِ يَافَنْتٛٻٜ حَکّٜ مَٻّٜ،

ندٜنْ مِ فُطِّتَتَا مِ سِفْتٛرَ کٛ حَلِّ طُمْ ٻٜ نغَطِ؞»‏

¹³ندٜ اَللَّه نٛدِّ اَلْکَوَلْ نغَعَلْ اَلْکَوَلْ کٜسَلْ حٛلِّي اٛ وَرْتِرِي اَرَنْدٜوَلْ نغَلْ کِينغَلْ؞ ندٜنْ بٛو کٛو طُمٜ غَرْتُطُمْ کِيطُمْ، تٛ طُمْ وَطِي کَ حِيطُکِ، طُمْ نٜىٰٻَتَا طُمْ لَلَّيْ؞

مَوْنِنْکِ اَللَّه ندٜرْ دُونِيَارُ

¹اَلْکَوَلْ اَرَنْدٜوَلْ اٜ وٛودِ دٛوکَاجِ نٛ طُمْ مَوْنِنِرْتَ اَللَّه ندٜنْ اٜ وُرٛ نغٛ طُمْ ݧِٻِ ندٜرْ دُونِيَارُ نغَمْ مَوْنِنْکِمٛ طٛنْمَا؞ ²لُکُرُ تِغَّامَ سٜنْدَا شُوطِ طِطِ؞ سُودُ اَرَنْدٜىٰرُ اٜ نٛدِّرٜىٰ وِغٜىٰرٜ شٜنِيندٜ؞ ندٜرْ مَيْرُ اٜ وٛودِ تٛ طُمْ رٜسَتَ فِتِلَارُ اٜ دَنْکِ اٜ بُرٛودِ طُمْ اُمْ حٛکَّتَ اَللَّه؞ ³غَطَ وُدٜرٜ شٜنْدُندٜ سُودُ ندُنْ اٜ وٛودِ وِغٜىٰرٜ بِعٜتٜىٰندٜ وِغٜىٰرٜ ٻُرْندٜ سٜنَاکِ؞ ⁴ندٜرْ وِغٜىٰرٜ ندٜنْ اٜ وٛودِ سَکِّرْدٜ جِينَارِ تٛ طُمْ وُلَتَ اُرْدٜ وٜلْندٜ، ندٜنْ اٜ وٛودِ اَکوَاتِيَ اَلْکَوَلْ شُدِّرَانغَ جِينَارِ؞ ندٜنْ ندٜرْ مَاغَ اٜ وٛودِ تُمُّغٜلْ غَطِرَانغٜلْ جِينَارِ؛ ندٜرْ مَغّٜلْ بٛو اٜ وٛودِ ݧَمْندُ بِعٜتٜىٰندُ مَنَّ؞ طٛنْمَا اٜ وٛودِ سَوْرُ هَرُونَ غَطُندُ ڤِنْدِ، اٜ اَلّٛوجٜ طِطِ طٜ کَاپٜ طٜ طُمْ وِنْدِ دٛوکَاجِ اَللَّه دٛوْ مَاجٜ؞ ⁵دٛوْ اَکوَاتِيَ نغَنْ بٛو اٜ وٛودِ کٜرُبَعٜنْ غَطِرَاٻٜ جِينَارِ کٛلّٛوٻٜ تٜدُّنغَلْ اَللَّه؞ بِيٜىٰلِ مَٻّٜ اٜ شُدِّ مَٻّٛودٜ اَکوَاتِيَ نغَنْ تٛ طُمْ يَافٛتٛو حَکّٜ؞ اَمَّا جٛونِ طُمْ وَاوَتَا طُمْ وِعَ کٛو طُمٜ نٛ وٛنْتِندِرِ دٛوْ مَاجُمْ؞

⁶غَطَ طُمْ سِرْيَکٜ کٛو طُمٜ نٛنْ، اَرْدِيٻٜ دِينَ بٛو اٜ نَتَّ سُودُ اَرَنْدٜىٰرُ ندُ لُکُرُ نغَمْ ٻٜ کُوَ کُوغَلْ مَٻّٜ؞ ⁷اَمَّا مَوْطٛ مَوْٻٜ اَرْدِيٻٜ دِينَ تَنْ نَتَّتَ سُودُ طِطَوْرُ ندُ لُکُرُ طُمْ، ندٜنْ اٜ مٛ نَتَّندُ ندٜ غٛعٛ اٜ حِتَاندٜ؞ اٜ مٛ نَتِّدَ اٜ پِيپَمْ مَرْلٜ طٜ اٛ سَکَّنِ اَللَّه نغَمْ حٛورٜ مَاکٛ اٜ نغَمْ حَکّٜ طُمْ يِمْٻٜ نغَطِ اَنْدَا؞ ⁸نٛنْ رُوحُ اَللَّه حٛلِّرِعٜنْ وِيکِ لَاوٛلْ نَتُّکِ وِغٜىٰرٜ ٻُرْندٜ سٜنَاکِ مَٻِّتَاکَ تَوْ تٛ نِ لُکُرُ اَرَنْدٜجُمْ طُمْ اٜ طٛنْ دَرِي؞ ⁹طُعُمْ طُمْ مِسَالُ دٛوْ جَامَنُ طُعُمْ؞ طُمْ حٛلِّي حٛکُّکِ اَللَّه دٛکّٜ اٜ شَکِّرِ وَاوَتَا اِتُّکِ وَنَّارٜ حَکّٜ دَغَ ٻٜرْندٜ مَوْنِنٛووٛ اَللَّه؞ ¹⁰ݧَمْکِ اٜ يَرْکِ اٜ لٛوتٜ‑لٛوتٜ فٜىٰرٜ‑فٜىٰرٜ نغَمْ دِينَ، طُمْ دٛوکَاجِ نغَمْ ٻَنْدُ تَنْ، طِ طُمْ وَطِ نَا شَرٜلْ اَلْکَوَلْ کٜسَلْ وَطِي؞

¹¹اَمَّا اَلْمَسِيحُ يَادَکٜ وَرْتِي مَوْطٛ مَوْٻٜ اَرْدِيٻٜ دِينَ دٛوْ اَلْکَوَلْ کٜسَلْ نغَلْ نغٛودُطٜنْ؞ اٛ نَتِّ لُکُرُ سٜنِيطُمْ ٻُرْطُمْ طُمْ ندٜنّٛ تٜدُّنغَلْ اٜ سٜنَاکِ؞ لُکُرُ طُمْ نَاع جُنْغٛ نٜطّٛ وَطِطُمْ، نَاع اِرِ طُمْ دُونِيَارُ؞ ¹²اَلْمَسِيحُ بٛو نَتِّي ندٜرْ وِغٜىٰرٜ ٻُرْندٜ سٜنَاکِ ندٜ غٛعٛ تَنْ؞ ندٜ اٛ نَتِّ اٛ سَکَّنَ اَللَّه اٛ نَتِّدَايِ اٜ پِيپَمْ بٜعِ اٜ غَعِ، اَمَّا اٛ نَتِّدِي اٜ پِيپَمْ مَاکٛ؞ سَکُّکِ کِنْ حٜپِي حَا اَبَدَا؞ نٛنْ اٛ حٜٻِرَنِعٜنْ رِمْطِنْکِ کِ حَا اَبَدَا؞ ¹³پِيپَمْ بٜعِ اٜ پِيپَمْ غَعِ اٜ تٛوکَ وِيغٜ نغٜ طُمْ وُلِ، اٜ طُمْ مٜشَّنَطُمْ يِمْٻٜ ٻٜ دِينَ حٛلِّ ٻٜ لَاٻَا، اٜ طُمْ اِتَّ شِيَ لَٻْکِ مَٻّٜ طُمْ وَرْتِرَٻٜ لَٻّٜ ندٜرْ دِينَ؞ ¹⁴حَکّٛ پِيپَمْ اَلْمَسِيحُ طَمْ وَطَيْ کٛ ٻُرِ نٛنْ؞ بَرْکَ رُوحُ اَللَّه غٛنْطُمْ حَا اَبَدَا، اٛ حٛکِّي حٛورٜ مَاکٛ اٛ وَرْتِي شَکِّرِ ندِ وَلَا غٛطُّمْ کٛ حَانَا؞ پِيپَمْ مَاکٛ بٛو لَاٻِنَيْ ٻٜرْطٜ مٜىٰطٜنْ دَغَ کُوطٜ جَارَيْطٜ مَيْدٜ، نغَمْ کُوَنٜنْ اَللَّه مٛ يٛنْکِ؞

¹⁵نغَمْ مَاجُمْ اَلْمَسِيحُ وٛنِ شِرْيِيطٛ اَلْکَوَلْ کٜسَلْ حَکُّندٜ اَللَّه اٜ يِمْٻٜ، نغَمْ ٻٜنْ طٛنْ ٻٜ اَللَّه نٛدِّ کٜٻَ ندٛنُ تَبِتَيْطُمْ طُمْ اٛ وَطِ اَلْکَوَلْ؞ مَيْدٜ مَاکٛ رِمْطِنِي يِمْٻٜ دَغَ حَکّٜ طُمْ ٻٜ نغَطِ شَرٜلْ نغٜلْ طُمْ حُوتِرْتَ اَلْکَوَلْ اَرَنْدٜوَلْ؞ ¹⁶تٛ نٜطّٛ وَطِي اَلْکَوَلْ حٛکُّکِ غٛطّٛ ندٛنُ، دٛولٜ طُمْ تَبِّتِنَ مَيْدٜ غَطُطٛ اَلْکَوَلْ نغَلْ؞ ¹⁷نغَمْ اَلْکَوَلْ ندٛنُ تَبِّتَتَا سٜيْ تٛ غَطُطٛنغَلْ مَايِي؛ تٛ اٜ مٛ فٛوفَ، نغَلْ حُوَتَا؞ ¹⁸کَنْجُمْ وَطِ کٛو اَلْکَوَلْ اَرَنْدٜوَلْ نغَلْ فُطَّايِ حُوُکِ سٜيْ اٜ پِيپَمْ؞ ¹⁹ندٜ مُوسَ وَعَجِنَنِ يِمْٻٜ فُو کٛ اَللَّه وِعِ طُمْ وَطَ غٛنْطُمْ ندٜرْ اَتَّوْرَ، اٛ حٛشِّي پِيپَمْ غَعِ اٜ بٜعِ، اٜ ندِيَمْ، ندٜنْ اٛ حٛشِّ حَاکٛ لٜکِّ بِعٜتٜىٰکِ حِسٛڤْ اٜ لٜىٰٻٜ مبَالَ بٛطٜىٰجٜ، اٛ سُووِطُمْ ندٜرْ مَاجَمْ، اٛ مِسِطَمْ دٛوْ دٜفْتٜرٜ اَتَّوْرَ اٜ دٛوْ فُو يِمْٻٜ؞ ²⁰اٛ وِعِ، ‏«‏طَعَمْ وٛنِ پِيپَمْ تَبِّتِنْطَمْ اَلْکَوَلْ نغَلْ اَللَّه وِعِعٛنْ تٛکّٛنْ؞»‏ ²¹نٛنْ مَا اٛ مِسِ پِيپَمْ طَمْ دٛوْ لُکُرُ طُمْ اٜ دٛوْ فُو کُوتِرْتٜىٰطُمْ ندٜرْ مَوْنِنْکِ اَللَّه؞ ²²غٛونغَ، اَتَّوْرَ وِعِي حَادٜ کٛو طُمٜ اٜ لَاٻِنِرٜىٰ پِيپَمْ، ندٜنْ تٛ نَاع پِيپَمْ رُفَا، حَکّٜ يَافَتَاکٜ؞

اَلْمَسِيحُ وٛنِ شَکِّرِ اِتَّيْندِ حَکّٜ

²³فُو فِي طُمْ طٛنْ طُمْ نَنْدُطُمْ اٜ غٛنْطُمْ تٛنْ دٛوْ غٛونغَجُمْ، دٛولٜ طُمْ لَاٻِنِرٜىٰ اٜ اِرِ کِنْ طٛنْ سَکُّکِ؞ اَمَّا فُو فِي غٛنْطُمْ تٛنْ دٛوْ، دٛولٜ طُمْ لَاٻِنِرٜىٰ اٜ سَکُّکِ ٻُرْکِ کِنْ تٛنْ؞ ²⁴نغَمْ اَلْمَسِيحُ نَتَّايِ ندٜرْ وِغٜىٰرٜ ٻُرْندٜ سٜنَاکِ ندٜ نٜطّٛ وَطِ نَنْدُندٜ اٜ وِغٜىٰرٜ ندٜ غٛونغَ غٛنْدٜ دٛوْ؞ اَمَّا دٛوْ اٜ حٛورٜ مَاجُمْ اٛ نَتِّ، جٛونِ تٛنْ اٛ وٛنِ يٜىٰسٛ اَللَّه نغَمْ مٜىٰطٜنْ؞ ²⁵اَلْمَسِيحُ نَتَّايِ دٛوْ نغَمْ وَطَ کَ سَکُّکِ حٛورٜ مُوطُمْ کٛو ندٜيٜ نٛ مَوْطٛ مَوْٻٜ اَرْدِيٻٜ دِينَ نَتِّدَتَ اٜ پِيپَمْ مَرْلٜ ندٜرْ وِغٜىٰرٜ ٻُرْندٜ سٜنَاکِ کٛو ندٜيٜ حِتَاندٜ؞ ²⁶دَا طُمْ نٛنْ، دَا اَلْمَسِيحُ يَرِي تٛرَّ ندٜ طُطُّمْ دَغَ شَرٜلْ نغٜلْ دُونِيَارُ تَغَا؞ اَمَّا رَطُّمْ جٛونِ اٜ رٜعِرْدٜ دُونِيَارُ اٛ وَرِي ندٜ غٛعٛ تَنْ نغَمْ اٛ اِتَّ حَکّٜ بَرْکَ سَکُّکِ حٛورٜ مَاکٛ؞ ²⁷نٛنْ نٛ طُمْ سِرْيَنِي نٜطّٛ مَايَ ندٜ غٛعٛ، غَطَ مَيْدٜ ندٜنْ طُمْ وَطَنَيْمٛ کِيتَ، ²⁸نٛنْ مَا اَلْمَسِيحُ سَکَّامَ ندٜ غٛعٛ نغَمْ اٛ اِتَّ حَکّٜ يِمْٻٜ طُطْٻٜ؞ اٛ وَرْتٛيَيْ غَرْتٛلْ طِطَٻٛلْ نَاع نغَمْ اٛ اِتَّ حَکّٜ، اَمَّا نغَمْ اٛ حِسْنَ ٻٜنْ طٛنْ کٜطِيٻٜمٛ؞

¹اَتَّوْرَ طُمْ نَنْدِنِرْطُمْ فُو فِي بٛطُّمْ غَرَيْطُمْ يٜىٰسٛ طٛعٛ، نَاع کَنْجُمْ وٛنِ فِي طُمْ اٜ حٛورٜ مَاجُمْ؞ نغَمْ نٛنْ سَکُّکِ کِ طُمْ وَطَتَ کٛو ندٜيٜ حِتَاندٜ کِ وَرْتِرْتَا ٻٜنْ طٛنْ ٻَدّٛتٛوٻٜ اَللَّه کٜىٰوُٻٜ؞ ²دَا اٜ کِ وَاوِ وَرْتِرْکِٻٜ کٜىٰوُٻٜ، دَا ٻٜ اَلَايِ سَکَّنْکِ اَللَّه؟ دَا مَوْنِنٛوٻٜ اَللَّه ٻٜنْ لَاٻِنَامَ دَغَ حَکّٜ مَٻّٜ فُو، دَا ٻٜرْطٜ مَٻّٜ نغَنَّتَاٻٜ مبِعَٻٜ ٻٜ نغَطِي حَکّٜ؞ ³اَمَّا ندٜرْ سَکُّکِ کِعِ اٜ وٛودِ کٛ سِفْتٛرَنْتَ يِمْٻٜ حَکّٜ مَٻّٜ کٛو ندٜيٜ حِتَاندٜ؞ ⁴نغَمْ طُمْ وَطَتَاکٛ پِيپَمْ غَعِ اٜ پِيپَمْ بٜعِ اِتَّ حَکّٜ؞

⁵کَنْجُمْ وَطِ شَرٜلْ کٛ اَلْمَسِيحُ نَتِّ دُونِيَارُ اٛ وِعِي اَللَّه:‏

‏«‏نَاع سَکَّنٜىٰکِ اٜ حٛکّٜىٰکِ دٛکّٜ نغِطَّا،

اَمَّا اَ سِرْيَنَکٜيَمْ ٻَنْدُ؞

⁶نَاع شَکِّرِ غُلٜتٜىٰندِ

اٜ شَکِّرِ نغَمْ اِتُّکِ حَکّٜ وٜلْنَنْتَمَ ٻٜرْندٜ؞

⁷سٜيْ مبِيمِ، ‏‹‏يَا اَللَّه، رَمِّ طٛعٛ؞

مِ وَرِي نغَمْ مِ وَطَ کٛ نغِطَّا،

نٛنْ نٛ طُمْ وِنْدِرَا ندٜرْ اَتَّوْرَ دٛوْ اَمْ؞›‏ »‏

⁸اَرَنْدٜ اٛ وِعِي، ‏«‏اَ يِطَا سَکَّنٜىٰکِ اٜ حٛکّٜىٰکِ دٛکّٜ کٛو اٜ فُو کٛ طُمْ سَکَّتَ غُلٜتٜىٰطُمْ، کٛو کٛ طُمْ سَکَّتَ نغَمْ اِتُّکِ حَکّٜ، اَ نَنَتَا بٜلْطُمْ مَاجُمْ؞»‏ اٛ وِعِي طُعُمْ کٛو ندٜ اَتَّوْرَ وِعِي طُمْ سَکّٜىٰ؞ ⁹ندٜنْ اٛ وِعِ، ‏«‏رَمِّ طٛعٛ، مِ وَرِي نغَمْ مِ وَطَ کٛ نغِطَّا؞»‏ اَللَّه اِتِّي سَکُّکِ اَرَنْدٜحِ نغَمْ اٛ وَدَّ سَکُّکِ طِطَٻِ، وَاتٛ اَلْمَسِيحُ؞ ¹⁰ندٜ يٜىٰسُ اَلْمَسِيحُ وَطِي کٛ اَللَّه يِطِ اٛ وَطَ، اٜنْ فُو اٜنْ لَاٻِنَامَ دَغَ حَکّٜ بَرْکَ سَکُّکِ حٛورٜ مَاکٛ ندٜ غٛعٛ تَنْ نغَمْ حَا اَبَدَا؞

¹¹کٛو مٛيٜ اَرْدِيطٛ دِينَ اٜ حُوَ کُوغَلْ مُوطُمْ کٛو ندٜيٜ ݧَلْندٜ، اٜ مٛ سَکَّ سَکُّکِ اِرِ غٛعٛ کٛو ندٜيٜ؞ سَکُّکِ کِنْ بٛو اِتَّتَا حَکّٜ حَا اَبَدَا؞ ¹²اَمَّا اَلْمَسِيحُ سَکِّي حٛورٜ مُوطُمْ ندٜ غٛعٛ نغَمْ حَکّٜ يِمْٻٜ؞ کِ بٛو حٜپِي حَا اَبَدَا؞ غَطَ اٛ وَطِي نٛنْ، اٛ جٛوطِي تٛ جُنْغٛ ݧَامٛ نغٛ اَللَّه؞ ¹³دَغَ نغٜلْ تٛنْ شَرٜلْ اٜ مٛ حٜطٛو نَا اَللَّه وَرْتِرِي وَݧْوَݧْٻٜ مَاکٛ تٛ اٛ يٛوَتَ کٛيْطٜ مَاکٛ؞ ¹⁴اٜ سَکُّکِ غٛعٛتِ کِنْ طٛنْ، اٛ وَرْتِرِي ٻٜنْ طٛنْ لَاٻِنَاٻٜ دَغَ حَکّٜ مَٻّٜ کٜىٰوُٻٜ حَا اَبَدَا؞

¹⁵رُوحُ اَللَّه مَا اٜ حٛکَّعٜنْ شٜيْدَ دٛوْ مَاجُمْ؞ اَرَنْدٜ طُمْ وِعِي،

¹⁶‏«‏جٛومِرَاوٛ وِعِي، ‏‹‏رَا اَلْکَوَلْ نغَلْ نغَادَيْمِ اٜ مَٻّٜ

ندٜرْ بَلْطٜ غَرَيْطٜ:‏

مِ وَطَيْ دٛوکَاجِ اَمْ ندٜرْ ٻٜرْطٜ مَٻّٜ،

مِ وِنْدَطِ ندٜرْ ݧُمٛوجِ مَٻّٜ؞›‏ »‏

¹⁷ندٜنْ اٛ ٻٜيْدِ وِيکِ، ‏«‏مِ فُطِّتَتَا مِ سِفْتٛرَ حَکّٜ مَٻّٜ اٜ کُوطٜ مَٻّٜ کَلُّطٜ؞»‏ ¹⁸ندٜنْ تٛ طُعُمْ يَافَامَ، وَلَا وٛکِّ سَکُّکِ کَدِنْ نغَمْ اِتُّکِ حَکّٜ؞

اٜنْ نجَحُ حَادٜ اَللَّه

¹⁹نغَمْ نٛنْ، بَنْدِرَاٻٜ اَمْ، اٜنْ نغٛودِ سٜمْبٜ ٻٜرْندٜ نَتُّکِ وِغٜىٰرٜ ٻُرْندٜ سٜنَاکِ بَرْکَ پِيپَمْ يٜىٰسُ؞ ²⁰اٛ مَٻِّتَنِيعٜنْ لَاوٛلْ کٜسٛلْ، جَارَيْنغٛلْ کِسْندَمْ نَتِّرْتٜىٰنغٛلْ غَطَ وُدٜرٜ شٜنْدُندٜ سُودُ جٛومِرَاوٛ، وَاتٛ نَتِّرْتٜىٰنغٛلْ ٻَنْدُ مَاکٛ؞ ²¹اٜنْ نغٛودِ اَرْدِيطٛ دِينَ مَوْطٛ ڤَامَنٛووٛ وُرٛ اَللَّه؞ ²²نغَمْ نٛنْ اٜنْ نجَحُ حَادٜ اَللَّه اٜ ٻٜرْندٜ غٛعٛ، اٜ حٛولَارٜ تَبُّتُندٜ، اٜ ٻٜرْطٜ مٜىٰطٜنْ لَاٻِنَاطٜ دَغَ ݧُمٛ کَلُّنغٛ، اٜ ٻَلِّ لٛوتِرَاطِ ندِيَمْ لَٻْطَمْ؞ ²³کَمُّندٜ ندٜ مبِعٜتٜنْ اٜنْ نغٛودِ، اٜنْ نجٛغَندٜ بٛطُّمْ، نغَمْ اٛنْ طٛنْ غَطُطٛ اَلْکَوَلْ اٛ حٜبِّنَيْنغَلْ؞ ²⁴اٜنْ نغَطُ حَکِّيلٛ مٜىٰطٜنْ دٛوْ نٛ مبَلِّندِرْتٜنْ نغَمْ کٛلّٜنْ يِدّٜ اٜ وَطُکِ کُوطٜ بٛطّٜ؞ ²⁵تٛع اٜنْ اَلُ حَوْرُتُکِ نٛ وٛٻّٜ مبٛووِ وَطُکِ؞ اَمَّا اٜنْ شٜمْبِطِندِرْ، اٜنْ ٻٜيْدُ وَطُکِ نٛنْ ندٜ اٛنْ اَنْدِ ݧَلْندٜ ندٜ يٜىٰسُ وَرْتٛيْتَ اٜ ٻَدّٛيٛو؞

²⁶تٛ اٜنْ نغَطِي کَ وَطُکِ حَکّٜ اٜ يِدّٜ ٻٜرْندٜ مٜىٰطٜنْ غَطَ اٜنْ اَنْدِ غٛونغَ، وَلَا وٛکِّ سَکُّکِ اِتَّيْکِ حَکّٜ مٜىٰطٜنْ؞ ²⁷اَمَّا کٛ حٛرِي وٛنِ کٜطٛوطٜنْ کِيتَ اَللَّه ندٜرْ کُلٛلْ، کِيتَ غَرَيْکَ اٜ حِيتٜ کَلُّنغٜ کَلْکَيْنغٜ ٻٜنْ طٛنْ غَݧُٻٜ اَللَّه؞ ²⁸کٛو مٛيٜ غٜوُطٛ دٛوکَ مُوسَ، اٛ وَرَامَ يُرْمٜىٰندٜ وَلَا دٛوْ شٜيْدَ يِمْٻٜ طِطٛ کٛو تَتٛ تَبِّتِنْٻٜ کٛ اٛ وَطِ؞ ²⁹تٛ نٜطّٛ وَݧِي ٻِطّٛ اَللَّه، کَدِنْ اٛ وَرْتِرِي پِيپَمْ اَلْکَوَلْ اَللَّه لَاٻِنْطَنْمٛ دَغَ حَکّٜ وَلَا کٛ نَفِ، طٛنْمَا اٛ حُطِ رُوحُ اَللَّه کٛلَّيْطُمْ يِدّٜ، اِرِ طُمٜ بٛنٜ کَلُّطُمْ حَانِ اٛ يَرَ؟ اٛ يَرَيْ بٛنٜ کَلُّطُمْ ٻُرْطُمْ طُمْ غٜوٛووٛ دٛوکَ يَرَتَ؞ ³⁰نغَمْ اٜنْ اَنْدِ اٛنْ طٛنْ بِيطٛ، ‏«‏وَاتَاکِ طُمْ کِ اَمْ، مِ وَاتَنَيْ کٛو مٛيٜ کٛ وَطِ؞»‏ طٛنْمَا اٛ وِعِي، ‏«‏جٛومِرَاوٛ وَطَنَيْ يِمْٻٜ مُوطُمْ کِيتَ؞»‏ ³¹طُمْ فِي کُلْنِيطُمْ نٜطّٛ نَتَّ جُنْغٛ اَللَّه مٛ يٛنْکِ؞

³²اَمَّا شِفْتٛرٜىٰ بَلْطٜ اَرَنْدٜىٰجٜ طٜ طُمْ فَمْتِنِعٛنْ دٛوْ اَلْمَسِيحُ؞ اٛنْ مُݧِي ندٜرْ يَرْکِ تٛرَّ کَلُّکَ؞ ³³بَنْݧٜ اٜ طُمْ سٜمْتِنَعٛنْ يٜىٰسٛ يِمْٻٜ، اٜ طُمْ حُطَعٛنْ، بَنْݧٜ طُمْ تٛرَّعٛنْ، ندٜنْ بَنْݧٜ اٛنْ مبَلَّ جَرٛوٻٜ تٛرَّ اِرِ کَ مٛوطٛنْ؞ ³⁴اٛنْ نجُرْمِنَنِي شُرَاٻٜ، ندٜنْ ندٜ طُمْ تٜىٰتَنِعٛنْ کٛ نغٛودُطٛنْ، اٛنْ نجَٻِي کٛ طُمْ وَطَنِعٛنْ اٜ وٜلْوٜلٛ؞ نغَمْ اٛنْ اَنْدِ اٛنْ نغٛودِ غٛطُّمْ ٻُرْطُمْ وٛوطُکِ تَبِتَيْطُمْ حَا اَبَدَا؞ ³⁵نغَمْ نٛنْ تٛع اٛنْ ڤَطُّ سٜمْبٜ ٻٜرْطٜ مٛوطٛنْ؞ طُمْ وَدَّنَيْعٛنْ مبَرْجَارِ مَوْندِ؞ ³⁶اٜ حَانِ مُݧٛنْ نغَمْ نغَطٛنْ کٛ اَللَّه يِطِ، کٜٻٛنْ کٛ اٛ وَطِ اَلْکَوَلْ؞ ³⁷نغَمْ اَايَارٜ وِعِي،

‏«‏نَاع کٛ نٜىٰٻِ،

اٛنْ طٛنْ غَرَيْطٛ وَرَيْ؛

اٛ وٛنَّتَا شَرٜلْ؞

³⁸نٜطّٛ اَمْ اَادِلِيجٛ اٛ جٛوطٛتٛ لَاوٛلْ حٛولَاکِيَمْ؛

اَمَّا تٛ اٛ يَاتِرِي غَطَ،

مِ نَنَتَا بٜلْطُمْ مَاکٛ؞»‏

³⁹اَمَّا اٜنٜنْ نَاع اٜنْ ندٜرْ يَاتِرْٻٜ غَطَ کَلْکِ؞ اٜنٜنْ اٜنْ ندٜرْ کٛولِيٻٜ اَللَّه کِسِ؞

حٛولَاکِ اَللَّه

¹تٛو، حٛولَارٜ وٛنِ تَبِّتِنْکِ حٜٻُکِ کٛ نغَطّٜنْ کَمُّندٜ حٜٻُکِ، کَيْرٜ تَبِّتِنَنْتَعٜنْ فِي طُمْ اٜنْ نغِعَتَا؞ ²نغَمْ يِمْٻٜ اَرَنْدٜعٜنْ کٛولَکٜ اَللَّه وَطِ اٛ جَٻِٻٜ؞

³نغَمْ اٜنْ کٛولِي اَللَّه وَطِ ڤَامُطٜنْ اٛ تَغِرِي دُونِيَارُ وٛلْدٜ مَاکٛ، نغَمْ کٛ يِعٜتٜىٰ وُرْتِنَامَ دَغَ ندٜرْ کٛ يِعَتَاکٜ؞

⁴نغَمْ حَبِيلَ اٜ حٛولِي اَللَّه وَطِ سَکَّنِمٛ شَکِّرِ ٻُرْندِ ندِ کَيِنُ؞ نغَمْ اٜ مٛ حٛولِي اَللَّه وَطِ اَللَّه جَٻِمٛ اٛ اَادِلِيجٛ ندٜ جَٻِ دٛکّٜ مَاکٛ؞ کَدِمَا حٛولَارٜ ندٜنْ وَطِ کُوغَلْ مَاکٛ حَا حَنْدٜ اٜ مٜتَنَعٜنْ کٛو ندٜ اٛ مَايِ؞

⁵نغَمْ اٜنٛکْ اٜ حٛولِي اَللَّه وَطِ اٛ حٛشَّا يَاکِ دٛوْ نغَمْ تٛع اٛ مَايَ؞ وَلَا غِيطٛمٛ کَدِنْ، نغَمْ اَللَّه حٛشِّيمٛ يَاکِ دٛوْ؞ ندٜنْ اَايَارٜ وِعِي، کٛ اٛ حٛشّٜىٰ يَاکِ دٛوْ، اٛ وٜلْنَنِي اَللَّه ٻٜرْندٜ؞ ⁶تٛ نَاع نٜطّٛ حٛولِي اَللَّه وَاوَتَا وٜلْنَنْکِمٛ ٻٜرْندٜ، نغَمْ کٛو مٛيٜ غَرَيْطٛ تٛ اَللَّه دٛولٜ جَٻَ اَللَّه اٜ طٛنْ، ندٜنْ اٜ مٛ وَاتَنَ طَٻِّتٛوٻٜمٛ؞

⁷نغَمْ نُحُ اٜ حٛولِي اَللَّه وَطِ اٛ جَٻِ وَغِّنٛلْ اَللَّه دٛوْ کٛ وَرٛيْتَ يٜىٰسٛ طُمْ يِعَاکَ اٜ شَرٜلْ نغٜلْ؞ اٛ وَطِي کٛ اَللَّه وِعِ اٛ وَطِ کٛمِوَلْ نغَمْ اٛ حِسْنَ وُرٛ مَاکٛ؞ نٛنْ اٛ حٛلِّ يِمْٻٜ دُونِيَارُ نغَطِي کٛ وٛوطَا، اٛ بٛو وَرْتِي اَادِلِيجٛ لَاوٛلْ حٛولَاکِ اَللَّه؞

⁸نغَمْ اِبْرَاهِمْ اٜ حٛولِي اَللَّه وَطِ اٛ جَٻِ ندٜ اَللَّه وِعِمٛ اٛ يَحَ لٜيْدِ ندِ وَطِ اَلْکَوَلْ حٛکُّکِمٛ؞ اِبْرَاهِمْ اَلِ لٜيْدِ مُوطُمْ کٛو ندٜ اَنْدَا تٛ يَحَتَ؞ ⁹نغَمْ اٜ مٛ حٛولِي اَللَّه وَطِ اٛ جٛوطِي بٛ کٛطٛ اٜ لٜيْدِ ندِ اٛ وَطَنَا اَلْکَوَلْ؞ اٛ جٛوطِي ندٜرْ لُکُرُ؞ نٛنْ مَا اِشِيَاکُ اٜ يَاکُبُ نغَطِي دٛنُدُٻٜ اَلْکَوَلْ نغَلْ اٜ مَاکٛ؞ ¹⁰اِبْرَاهِمْ وَطِي نٛنْ نغَمْ اٛ حَاٻِي اٛ يِعَ غَرِيرِ تَبِتَيْندِ ندِ اَللَّه سِرْيِي، مَحِ؞

¹¹نغَمْ اِبْرَاهِمْ اٜ حٛولِي اَللَّه وَطِ اٛ حٜٻِ ٻِطّٛ، کٛو ندٜ اٛ نَوْيِ؞ سَارَتُ دٜبّٛ مَاکٛ بٛو دَݧَتَا؞ اٛ حٜٻِي ٻِطّٛ اٛنْ نغَمْ اٛ حٛولَکٜ اَللَّه حٜبِّنَيْ اَلْکَوَلْ مُوطُمْ؞ ¹²نغَمْ نٛنْ، دَغَ اٛعٛ نٜطّٛ غٛعٛتٛ نَيٜىٰجٛ ٻَدِيطٛ مَايَ، طُمْ حٜٻِي ٻِٻّٜ ٻِٻّٜىٰجِ طُطْٻٜ بٛ کٛودٜ دٛوْ، بٛ نجَارٜىٰندِ دَاندٜ مَايٛ ندِ لِمَتَاکٛ؞

¹³يِمْٻٜ ٻٜعٜ فُو مَايِي اٜ کٛولِي اَللَّه؞ ٻٜ کٜٻَايِ اَلْکَوَلْ نغَلْ، اَمَّا ٻٜ کَيْنَکٜنغَلْ ٻٜ نَنِي بٜلْطُمْ مَاغَلْ؞ ٻٜ مبِعِي اٜ نجَيْرِ ٻٜ حٛٻّٜ ٻٜ غَرْٻٜ ندٜرْ دُونِيَارُ ندُعُ؞ ¹⁴فُو بِيٻٜ نٛنْ، ٻٜ کٛلِّي اٜ ٻٜ طَٻِّتَ لٜيْدِ ندِ کٛعٜ مَٻّٜ؞ ¹⁵دَا طُمْ وِعَ ٻٜ نغَطِي کَ ݧُمُکِ دٛوْ لٜيْدِ ندِ ٻٜ اَلٛيِ، دَا ٻٜ کٜٻِي لَاوٛلْ سٛعَّاکِ؞ ¹⁶اَمَّا ٻٜ نغَطِي ٻٜرْطٜ مَٻّٜ دٛوْ لٜيْدِ ٻُرْندِ وٛوطُکِ، وَاتٛ ندِ تٛنْ دٛوْ؞ نغَمْ نٛنْ، نَاع طُمْ شٜمْتِنِيطُمْ تٛ اَللَّه طُمْ نٛدَّمٛ اَللَّه مَٻّٜ، نغَمْ اٛ سِرْيَنَکٜٻٜ غَرِيرِ؞

¹⁷نغَمْ اِبْرَاهِمْ اٜ حٛولِي اَللَّه وَطِ اٛ سِرْيِي سَکَّنْکِ اَللَّه ٻِطّٛ مَاکٛ اِشِيَاکُ ندٜ اَللَّه فٛوندِمٛ؞ کَنْکٛ غَطَنَاطٛ اَلْکَوَلْ اٜ مٛ حَادٜ سَکُّکِ ٻِطّٛ مَاکٛ بَجّٛ ¹⁸کٛو ندٜ اَللَّه وِعِينٛمٛ، ‏«‏بَرْکَ اِشِيَاکُ کٜٻَتَا ٻِٻّٜ ٻِٻّٜىٰجِ ٻٜ نغَطَنْمَامِ اَلْکَوَلْ؞»‏ ¹⁹اِبْرَاهِمْ تَبِّتِنِي اَللَّه وَاوَيْ اُمِّنْکِ مَيْطٛ؞ بٛو طُمْ وَاوَيْ طُمْ وِعَ، طُمْ حٛکِّتِي اِبْرَاهِمْ اِشِيَاکُ دَغَ مَيْدٜ؞

²⁰نغَمْ اِشِيَاکُ اٜ حٛولِي اَللَّه وَطِ اٛ بَرْکِطِنِ يَاکُبُ اٜ اِسَوْ نغَمْ يٜىٰسٛ؞

²¹نغَمْ يَاکُبُ اٜ حٛولِي اَللَّه وَطِ ندٜ اٛ ٻَدِي مَيْدٜ، اٛ بَرْکِطِنِ ٻِٻّٜ اِسُفُ غٛعٛتٛ‑غٛعٛتٛ؞ اٛ ٻَغِّ سَوْرُ ندُ اٛ يَحِرْتَ، اٛ مَوْنِنِ اَللَّه؞

²²نغَمْ اِسُفُ اٜ حٛولِي اَللَّه وَطِ ندٜ اٛ ٻَدِي مَيْدٜ، اٛ مٜتِ دٛوْ وُرْتَاکِ يِمْٻٜ اِسْرَاعِيلَ دَغَ لٜيْدِ مَسَرْ، اٛ وِعِٻٜ نٛ ٻٜ نغَادَتَ اٜ پِعٜ مَاکٛ؞

²³نغَمْ دَݧٛوٻٜ مُوسَ اٜ کٛولِي اَللَّه وَطِ ٻٜ شُوطِمٛ لٜبِّ تَتِ غَطَ اٛ دَݧَامَ، نغَمْ ٻٜ نغِعِي اٛ ٻِطّٛ بٛطّٛ، ٻٜ کُلَايِ وَݧُکِ کٛ لَامِيطٛ وِعِ طُمْ وَطَ؞

²⁴نغَمْ مُوسَ اٜ حٛولِي اَللَّه وَطِ ندٜ اٛ مَوْنِ اٛ وَݧِ اٛ نٛدِّرٜىٰ ٻِطّٛ ٻِي فِرعَوْنَ دٜبّٛ؞ ²⁵اٛ سُٻِي اٛ يَرْدَ تٛرَّ اٜ يِمْٻٜ اَللَّه دٛوْ اٛ نَنَ بٜلْطُمْ حَکّٜ نغَمْ شَرٜلْ سٜطَّ؞ ²⁶اٛ يِعِي سٜمْتِنٜىٰکِ نغَمْ اَلْمَسِيحُ طُمْ رِسْکُ ٻُرْطُمْ جَوْدِ لٜيْدِ مَسَرْ، نغَمْ حَکِّيلٛ مَاکٛ اٜ دٛوْ مبَرْجَارِ ندِ اٛ حٜٻَتَ يٜىٰسٛ؞

²⁷نغَمْ مُوسَ اٜ حٛولِي اَللَّه وَطِ اٛ اَلِ لٜيْدِ مَسَرْ، اٛ حُلَايِ مٛنّٜرٜ لَامِيطٛ لٜيْدِ ندِنْ؞ اٛ وَݧِ اٛ سٛعّٛ نغَمْ اٛ يِعِي اَللَّه مٛ يِعَتَاکٜ؞ ²⁸نغَمْ اٜ مٛ حٛولِي اَللَّه وَطِ اٛ فُطِّ حُمْتٛ سَکِّنْکِ؞ اٛ وِعِ اِسْرَاعِيلَنْکٛعٜنْ مِسَنَ دَمُّطٜ مَٻّٜ پِيپَمْ، نغَمْ تٛع مَلَاعِکَاجٛ مَيْدٜ وَرَ فُو وٛرْٻٜ اَفٛعٜنْ مَٻّٜ؞

²⁹نغَمْ اِسْرَاعِيلَنْکٛعٜنْ اٜ کٛولِي اَللَّه وَطِ ٻٜ مبَاوِ حُولُکِ مَايٛ وٛطٜوٛ بٛ دٛوْ لٜيْدِ نجٛرْندِ؞ اَمَّا ندٜ مَسَرَنْکٛعٜنْ کُولَيْ، ندِيَمْ ݧَامِٻٜ؞

³⁰نغَمْ اِسْرَاعِيلَنْکٛعٜنْ اٜ کٛولِي اَللَّه وَطِ مَادِ ڤِلِيندِ غَرِيرِ جٜرِيکٛ يَنِ غَطَ ٻٜ ڤِلَکٜندِ بَلْطٜ جٛوٜىٰطِطِ؞ ³¹نغَمْ رَحَبْ کَارُوَاجٛ اٜ حٛولِي اَللَّه وَطِ اٛ وَرْدَاکَ اٜ ٻٜنْ طٛنْ غَݧُٻٜ نغَطَ کٛ اَللَّه وِعِ، نغَمْ اٛ جَٻَّکٜ اِسْرَاعِيلَنْکٛعٜنْ بٛطُّمْ دَارٛوٻٜ سِرُّ لٜيْدِ؞

³²طُمٜ ٻٜيْدَيْمِ وِيکِ؟ وَلَا شَرٜلْ کٜپَيْنغٜلْيَمْ مِ مٜتَ دٛوْ غِدِيٛنْ، اٜ بَرَکْ، اٜ سَمْسِنْ، اٜ جٜڤْتَ، اٜ دَوْدَ، اٜ سَمَاعِلَ، اٜ اَنَّبٛعٜنْ، ³³نغَمْ اٜ ٻٜ کٛولِي اَللَّه وَطِ ٻٜ کٛنِ لٜيْطٜ طُطّٜ ٻٜ ݧَامِطٜ؞ ٻٜ لَامٛرَکٜ اَادِلَاکُ، ٻٜ کٜٻِ کٛ اَللَّه وَطِ اَلْکَوَلْ؞ ٻٜ مَٻِّي کٛنْدُطٜ شٜمْبِطِّ؞ ³⁴ٻٜ ݧِفِي حِيتٜ کَلُّنغٜ، ٻٜ ندَطِي وَرْدٜىٰکِ اٜ کَافَاجٜ؞ ٻٜ تَمْڤُٻٜ، اَمَّا ٻٜ نغَرْتِي شٜمْبِطْٻٜ؞ ٻٜ نغَرْتِي وَوْٻٜ کٛنُ، ٻٜ ندِيوِي سٛوجِعٜنْ غٛطّٜ لٜيْطٜ؞ ³⁵نغَمْ وٛٻّٜ رٜوْٻٜ مَايَنَاٻٜ اٜ کٛولِي اَللَّه وَطِ مَيْٻٜ ٻٜنْ اُمِّنَا دَغَ مَيْدٜ؞

وٛٻّٜ يِمْٻٜ بٛو ٻٜ تٛرَّا حَا ٻٜ مَايِ، ٻٜ نغَݧِي طُمْ يٛوفَٻٜ نغَمْ ٻٜ کٜٻَ ٻٜ اُمِّنٜىٰ دَغَ مَيْدٜ ندٜرْ جٛنْدٜ ٻُرْندٜ وٛوطُکِ؞ ³⁶وٛٻّٜ نجُکِّتَامَ ڤِيَامَ، حَا ٻٜ کَٻِّرَا ٻٛغِّ نجَمْندِ ٻٜ مَٻَّا ندٜرْ سُودُ شُرَلْ؞ ³⁷وٛٻّٜ مبَرِرَا کَاپٜ، وٛٻّٜ تَپَا شٜنْدَا طِطِ، وٛٻّٜ مبَرِرَا کَافَاجٜ؞ وٛٻّٜ اٜ نغِيلٛو اٜ ٻٛرْنِي لَرٜ بَالِ اٜ طٜ بٜعِ، کٛو کٛ ٻٜ نغٛودِ، ٻٜ تٛرَّامَ، ٻٜ نغَطَنَامَ کٛ حَلِّ؞ ³⁸اٜ ٻٜ نغِيلٛو ندٜرْ لَدّٜ اٜ ندٜرْ کٛشّٜىٰجٜ، اٜ ٻٜ نجٛوطٛو ندٜرْ لُورٛوجِ کَاپٜ اٜ ندٜرْ غَيْطٜ؞ دُونِيَارُ حٜوْتَايِ ٻٜ نجٛوطٛو ندٜرْ مَيْرُ؞

³⁹فُو يِمْٻٜ ٻٜعٜ ٻٜ مَنْتَامَ نغَمْ ٻٜ کٛولَکٜ اَللَّه، اَمَّا فُو اٜ نٛنْ وَلَا غٛطّٛ ندٜرْ مَٻّٜ کٜٻُطٛ کٛ اَللَّه وَطِ اَلْکَوَلْ؞ ⁴⁰اَللَّه سِرْيَکٜ غٛطُّمْ ٻُرْطُمْ وٛوطُکِ نغَمْ مٜىٰطٜنْ، نغَمْ تٛ نَاع حَوْتِ اٜ مٜىٰطٜنْ، ٻٜ نغَرْتِرْتَاکٜ کٜىٰوُٻٜ؞

اَللَّه ݧَاکٛ مٜىٰطٜنْ مٛ دٛوْ

¹نغَمْ مَاجُمْ، ندٜ اٜ وٛودِ يِمْٻٜ طُطْٻٜ کٛلُّٻٜ نٛ ٻٜ کٛولٛرِي اَللَّه، اٜنْ شٜنْدِرْ اٜ کٛو طُمٜ کَطَيْطُمْعٜنْ وَطُکِ کٛ حَانِ نغَطٜنْ اٜ حَکّٜ کَٻُّطُمْعٜنْ؞ اٜنْ نغَطُ کٛ مبَاوٜتٜنْ وَطُکِ نجٛتِّنٜنْ کٛ اَللَّه وِعِ نغَطٜنْ؞ ²اٜنْ نغَطُ حَکِّيلٛ مٜىٰطٜنْ دٛوْ يٜىٰسُ، مَٻِّتَنْطٛعٜنْ لَاوٛلْ حٛولَاکِ اَللَّه بَلَّيْطٛعٜنْ حٛولَارٜ مٜىٰطٜنْ وَرْتَ کٜوْندٜ؞ نغَمْ وٜلْوٜلٛ نغٛ اٛ حٜٻَتَ يٜىٰسٛ، اٛ مُݧِي ندٜرْ تٛرَّ ندٜ اٛ وَرَا دٛوْ غَافَانغَلْ، اٛ وَنَّايِ اٜ شٜمْتُطُمْ وَرٜىٰکِ دٛوْ غَافَانغَلْ، ندٜنْ جٛونِ اٜ مٛ تٛنْ جٛوطِي تٛ ݧَامٛ جٛوطٛرْغَلْ لَامُ اَللَّه؞

³ݧُمٜىٰ دٛوْ نٛ اٛ مُݧِرِ ندٜ غَطٛوٻٜ حَکّٜ نغَݧِمٛ؞ نٛنْ وَلَّيْعٛنْ تٛع نغٜوْرٛنْ اِتّٛنْ کَمُّندٜ؞ ⁴اٛنْ کَٻْدَ اٜ حَکّٜ، اَمَّا اٛنْ نجٛتَّاکِ تٛ حٜوْتِ طُمْ وَرَعٛنْ؞ ⁵اٛنْ نغٜجِّتِي بٛلِيطٜ شٜمْبِطِنَيْطٜعٛنْ طٜ اَللَّه مٜتَنِعٛنْ کٛلُّطٜ اٛنْ ٻِٻّٜ مَاکٛ؟ اٛ وِعِي،

‏«‏ٻِطّٛ اَمْ، تٛ جٛومِرَاوٛ اٜلْتِيمَ، تَاع وَرْتِرْطُمْ مٜىٰرٜ؞

تٛ اٛ حَٻَنِيمَ بٛو، تَاع يٜوْرُ؞

⁶نغَمْ مٛ جٛومِرَاوٛ يِطِ، کَنْکٛ اٛ اٜلْتَتَ،

ندٜنْ اٜ مٛ حَٻَنَ کٛو مٛيٜ مٛ اٛ جَٻِ اٛ ٻِطّٛ مَاکٛ؞»‏

⁷مُݧٜىٰ ندٜرْ تٛرَّ کَ نجَرٛتٛنْ نغَمْ طُمْ اٜلْتُکِعٛنْ؞ نٛنْ حٛلِّي اَللَّه اٜ جٛغِيعٛنْ بٛ ٻِٻّٜ مَاکٛ؞ مٛيٜ ٻِطّٛ وٛنِ مٛ ݧَاکٛ مُوطُمْ اٜلْتَتَا؟ ⁸کٛو مٛيٜ ٻِطّٛ طُمْ اٜلْتَيْمٛ؞ تٛ بٛو اٛنْ اٜلْتَاکَ، نٛنْ حٛلِّي نَاع اٛنْ ٻِٻّٜ، اٛنْ جَالُعٜنْ؞ ⁹کَدِمَا اٜنْ نغٛودِ دَݧٛوٻٜ اٜلْتَيْٻٜعٜنْ ندٜنْ اٜنْ کٛکَّٻٜ مَنْغُ؞ اٜنْ ٻُرَيْ نٛنْ جَٻُکِ اٜلْتُکِ کِ ݧَاکٛ مٜىٰطٜنْ مٛ دٛوْ وَطَنِعٜنْ، ندٜنْ کٜٻٜنْ يٛنْکِ کِ رٜعَتَا!‏ ¹⁰دَݧٛوٻٜ مٜىٰطٜنْ اٜ اٜلْتَعٜنْ نغَرْتٜنْ نٛ ٻٜ نغِطِ نغَمْ شَرٜلْ سٜطَّ؞ اَمَّا اَللَّه اٜ اٜلْتَعٜنْ نغَمْ ٻٜيْدَارِ مٜىٰطٜنْ، نغَمْ نغَرْتٜنْ شٜنِيٻٜ بٛ مَاکٛ؞ ¹¹شَرٜلْ نغٜلْ طُمْ اٜلْتَتَ نٜطّٛ، طُمْ وٜلَا، سٜيْ نَوْطُمْ؞ اَمَّا غَطَ طٛنْ، طُمْ وَدَّيْ اَادِلَاکُ اٜ جَمْ ندٜرْ جٛنْدٜ اٜلْتَاطٛعٛنْ؞

اٜکِّتِنْکِ اٜ وَغِّنْکِ

¹²نغَمْ مَاجُمْ شٜمْبِطِنٜىٰ جُوطٜ مٛوطٛنْ تَمْڤُطٜ، اٜ کٛڤِّ مٛوطٛنْ تَغِّيطِ؞ ¹³مٛعِّنَنٜىٰ کٛيْطٜ مٛوطٛنْ طَتٜ ڤٛرْتِيطٜ، نغَمْ تٛع کٛيْطٜ مٛوطٛنْ تَغِّيطٜ نغَرْتَ نَاع کٛ نَفِ، اَمَّا طٜ کٛيَ؞

¹⁴نغَطٜىٰ کٛ مبَاوٛتٛنْ وَطُکِ نجٛوطٛدٛوطٛنْ جَمْ اٜ کٛو مٛيٜ نغَرْتٛنْ شٜنِيٻٜ، نغَمْ تٛ نَاع اٜ جٛنْدٜ شٜنِيندٜ وَلَا غِعَيْطٛ جٛومِرَاوٛ؞ ¹⁵ڤَامَنٜىٰ کٛعٜ مٛوطٛنْ تٛع ندُلّٛنْ حٜٻُکِ بَرْکَ اَللَّه، نغَمْ تٛع وٛنْغٛلْ طَطٛلْ کَاطُنغٛلْ مَوْنَ فٛوطَ شَطُّمْ وٛنَّ يِمْٻٜ طُطْٻٜ؞ ¹⁶تٛع غٛطّٛ وَرْتَ غَطٛووٛ نجٜىٰنُ کٛو مٛ وَلَا کُلٛلْ اَللَّه بٛ اِسَوْ شٛورُطٛ مَنْغُ مُوطُمْ طُمْ اَفٛ نغَمْ حٜٻَ ݧَامَ ندٜ غٛعٛ تَنْ؞ ¹⁷اٛنْ اَنْدِ غَطَ طٛنْ، ندٜ اٛ طَٻِّتِ ݧَاکٛ مَاکٛ بَرْکِطِنَمٛ، طُمْ وَݧِيمٛ؞ اٛ حٜٻَايِ وَيْلُکِ کٛ اٛ وَطُنٛو، کٛو ندٜ اٛ طَٻِّتِي حَا اٜ غٛنْطِ؞

¹⁸اٛنْ نغَرَايِ تٛ وِغٜىٰرٜ بٛ حٛشّٜىٰرٜ سِنَيْ ندٜ طُمْ وَاوَتَ مٜىٰمُکِ غٛودُندٜ حِيتٜ ݧَامٛويٜ، اٜ ندُولَ ٻَلٜوَ، اٜ حٜنْدُ شٜمْبِنْدُ، ¹⁹اٜ اِيدٛ دُودَاندُ، اٜ حٛنٛنْدٜ؞ ندٜ اِسْرَاعِيلَنْکٛعٜنْ نَنِ حٛنٛنْدٜ ندٜنْ، ٻٜ تٛرِي تٛع طُمْ فُطِّتَ طُمْ مٜتَنَٻٜ، ²⁰نغَمْ ٻٜ نغَنِّي دٛوْ کٛ حٛنٛنْدٜ ندٜنْ وِعِٻٜ، ‏«‏کٛو مَرْدِ مٜىٰمِ حٛشّٜىٰرٜ ندٜنْ، دٛولٜ ندِ وَرْدٜىٰ اٜ کَاپٜ؞»‏ ²¹مُوسَ حُلِي اٜ کٛ يِعِ حَا وِعِ، ‏«‏اٜ مِ حُلَ حَا اٜ مِ دِوْنَ؞»‏

²²اَمَّا اٛنْ نغَرِي حٛشّٜىٰرٜ سِحِيٛونَ، غَرِيرِ اَللَّه مٛ يٛنْکِ، وَاتٛ اُرُشَلِيمَ ندِ دٛوْ، اٜ تٛ مَلَاعِکَعٜنْ ٻٜ لِمَتَاکٛ حَوْرُتُٻٜ ندٜرْ وٜلْوٜلٛ؞ ²³اٛنْ نغَرِي تٛ کَوْتَلْ اَفٛعٜنْ اَللَّه، ٻٜ طُمْ وِنْدِ اِنْطٜ مَٻّٜ ندٜرْ وُرٛ مَاکٛ تٛنْ دٛوْ؞ اٛنْ نغَرِي تٛ اَللَّه، غَطَنٛووٛ فُو يِمْٻٜ کِيتَ، تٛ يٛنْکِيجِ اَادِلِعٜنْ غَرْتِرَاٻٜ کٜىٰوُٻٜ؞ ²⁴اٛنْ نغَرِي تٛ يٜىٰسُ، شِرْيِيطٛ اَلْکَوَلْ کٜسَلْ حَکُّندٜ يِمْٻٜ اٜ اَللَّه؞ اٛنْ نغَرِي تٛ پِيپَمْ مِسَاطَمْ مٜتُطَمْ وٛلْدٜ ٻُرْندٜ وٛوطُکِ دٛوْ کٛ پِيپَمْ حَبِيلَ وِعِ؞

²⁵ڤَامٜىٰ، تٛع نغَݧٛنْ اٛنْ طٛنْ مٜتُطٛ؞ يِمْٻٜ غَݧُٻٜ نَنَ کٛ وَغِّنْطٛٻٜ ندٜرْ دُونِيَارُ وِعِٻٜ ٻٜ ندَطَايِ؞ تٛو، نٛ وَطَتَ اٜنٜنْ ندَطٜنْ، تٛ اٜنْ نغَݧِي اٛنْ طٛنْ بَغِّنْطٛعٜنْ دَغَ دٛوْ؟ ²⁶اٜ نغٜلْ تٛنْ شَرٜلْ حٛنٛنْدٜ مَاکٛ دِمْبِي دُونِيَارُ، اَمَّا جٛونِ اٛ وَطِي اَلْکَوَلْ، اٛ وِعِي، ‏«‏مِ دِمْبَيْ دُونِيَارُ ندٜ غٛعٛ کَدِنْ؞ نَاع دُونِيَارُ تَنْ ندِمْبَيْمِ، اَمَّا فُو اٜ دٛوْ؞»‏ ²⁷طٜعٜ بٛلِيطٜ، ‏«‏ندٜ غٛعٛ کَدِنْ»‏ حٛلِّي فُو کٛ تَغَا طُمْ دِمْبٜتٜىٰطُمْ طُمْ اِتّٜىٰ، نغَمْ کٛ دِمْبَتَاکٛ جٛوطٛو؞

²⁸نغَمْ مَاجُمْ اٜنْ نغٜتُّ اَللَّه نغَمْ اٜنْ کٜٻِي لَامُ طُمْ دِمْبَتَاکٛ؞ اٜنْ مَوْنِنْ اَللَّه ندٜرْ کُلٛلْ، مَوْنِنْکِ کِ اٛ جَٻَتَ؞ ²⁹نغَمْ اَللَّه مٜىٰطٜنْ اٛ حِيتٜ کَلْکٛويٜ؞

نٛ طُمْ وٜلْنِرَنْتَ اَللَّه ٻٜرْندٜ

¹نغَطٜىٰ کَ يِطِندِرْکِ بٛ بَنْدِرَاٻٜ؞ ²تٛع اٛنْ نغٜجُّتُ جَٻَّاکِ حٛٻّٜ؞ اٜ وٛودِ غَطُٻٜ نٛنْ نجَٻِّي مَلَاعِکَعٜنْ اَنْدَا؞ ³ݧُمٜىٰ دٛوْ شُرَاٻٜ ندٜرْ سُودُ شُرَلْ بٛ اٛنْ شُرِدَ اٜ مَٻّٜ؞ ݧُمٜىٰ دٛوْ تٛرّٜتٜىٰٻٜ، بٛ اٛنْ تٛرِّدٜىٰ اٜ مَٻّٜ؞

⁴کٛو مٛيٜ مَوْنِنَ تٜىٰغَلْ، ندٜنْ تٛع غٛطّٛ وَلْدَ اٜ غٛطّٛ مٛ وَلَا تٜىٰغَلْ حَکُّندٜ مَٻّٜ؞ بَلْدُطٛ اٜ غٛطّٛ مٛ وَلَا تٜىٰغَلْ حَکُّندٜ مَٻّٜ، اَللَّه وَطَنَيْٻٜ کِيتَ؞

⁵شٜنْدٜىٰ کٛعٜ مٛوطٛنْ اٜ يِدّٜ شٜىٰدٜ؞ مُݧٜىٰ دٛوْ کٛ نغٛودُطٛنْ، نغَمْ اَللَّه وِعِي، ‏«‏حَا اَبَدَا مِ اَلَتَامَ، حَا اَبَدَا مِ سٜنْدِرْتَا اٜ مَاطَ؞»‏ ⁶نغَمْ نٛنْ اٜ ٻٜرْندٜ غٛعٛ اٜنْ مبِعَيْ،

‏«‏جٛومِرَاوٛ وٛنِ بَلَّيْطٛيَمْ،

مِ حُلَتَا؞

طُمٜ نٜطّٛ وَاوَتَ وَطَنْکِيَمْ؟»‏

⁷ݧُمٜىٰ دٛوْ اَرْدِيٻٜعٛنْ، وَعَجِنَنْٻٜعٛنْ وٛلْدٜ اَللَّه؞ ݧُمٜىٰ دٛوْ نٛ ٻٜ نجٛوطٛرِي، اٜکِّتٜىٰ نٛ ٻٜ کٛولٛرِي اَللَّه؞ ⁸يٜىٰسُ اَلْمَسِيحُ اٜ طٛنْ نٛ وٛنْتِندِرِ کٜىٰݧَ اٜ حَنْدٜ اٜ حَا اَبَدَا؞ ⁹تٛع اٛنْ نجَٻُ اٜکِّتِنٛلْ نغٛلْ تٛکَّايِ لَاوٛلْ غٛونغَ مَجِّنَعٛنْ؞ اٜ طُمْ وٛوطِ يِدّٜ اَللَّه سٜمْبِطِنَ ٻٜرْطٜ مٜىٰطٜنْ، نَاع تٛکُّکِ دٛوکَاجِ دٛوْ ݧَمْندُ؞ اِرِ طِنْ طٛنْ دٛوکَاجِ نَفَنْتَا تٛکّٛوٻٜطِ؞

¹⁰اَرْدِيٻٜ دِينَ کُوٛوٻٜ ندٜرْ لُکُرُ جٛومِرَاوٛ ٻٜ کٜٻَتَا ݧَامُکِ کٛ طُمْ سَکِّ دٛوْ سَکِّرْدٜ مٜىٰطٜنْ؞ ¹¹مَوْطٛ مَوْٻٜ اَرْدِيٻٜ دِينَ اٜ نَتِّدَ اٜ پِيپَمْ مَرْلٜ ندٜرْ وِغٜىٰرٜ ٻُرْندٜ سٜنَاکِ اٛ سَکَّنَطَمْ اَللَّه نغَمْ حَکّٜ، اَمَّا ٻَلِّ مَرْلٜ طٜنْ اٜ نغُلٜىٰ غَطَ حٛطٛرْدٜ؞ ¹²کَنْجُمْ وَطِ يٜىٰسُ مَا مَايِ غَطَ غَرِيرِ، نغَمْ اٛ لَاٻِنَ يِمْٻٜ دَغَ حَکّٜ مَٻّٜ بَرْکَ پِيپَمْ مَاکٛ؞ ¹³نغَمْ نٛنْ اٜنْ نجَحُ تٛ مَاکٛ غَطَ غَرِيرِ نجَرٜنْ سٜمْتٜىٰندٜ ندٜ اٛ يَرِ؞ ¹⁴نغَمْ اٜنْ نغَلَا غَرِيرِ تَبٛتٛوندِ ندٜرْ دُونِيَارُ ندُعُ، اَمَّا اٜنْ کٜطِي اٜنْ کَمِّي غَرِيرِ غَرَيْندِ؞ ¹⁵نغَمْ مَاجُمْ، بَرْکَ يٜىٰسُ اٜنْ مَنْتُ اَللَّه کٛو نغٜلٜ شَرٜلْ؞ مَنْتُکِ کِنْ وٛنِ کٛ شَکَّنْتٜنْمٛ، اٜنٜنْ بِعٛوٻٜ يٜىٰسُ وٛنِ جٛومِرَاوٛ؞ ¹⁶تٛع اٛنْ نغٜجُّتُ وَطُکِ کٛ وٛوطِ اٜ سٜنْدُدُکِ کٛ نغٛودُطٛنْ اٜ وٛٻّٜ، نغَمْ طُعُمْ کَنْجُمْ وٛنِ شَکِّرِ بٜلْنَنٛورِ اَللَّه ٻٜرْندٜ؞

¹⁷تٛکّٜىٰ اَرْدِيٻٜعٛنْ نغَطٛنْ کٛ ٻٜ مبِعِعٛنْ؞ اٜ ٻٜ ڤَامَنَ يٛنْکِيجِ مٛوطٛنْ:‏ اَللَّه بٛو پَمَيْٻٜ دٛوْ نٛ ٻٜ ڤَامِرَنِعٛنْ؞ تٛکّٜىٰ کٛ ٻٜ مبِعِ نغَمْ ٻٜ نغَطَ کُوغَلْ نغَلْ ندٜرْ بٜلْطُمْ ٻٜرْندٜ نَاع ندٜرْ تٜدّٛرَلْ؞ تٛ طُمْ وَرْتِي تٜدّٛرَلْ، نٛنْ وَرْتَيْ وَلَا کٛ نَفَنْتَعٛنْ؞

¹⁸نغَطٜىٰ کَ وَطَنْکِمِنْ دٛعَارٜ؞ مِنْ تَبِّتِنِي ٻٜرْطٜ اَمِنْ طٜ لَٻْطٜ، اٜ مِنْ نغِطِ وَطُکِ کٛ حَانِ ندٜرْ کٛو طُمٜ؞ ¹⁹اٜ مِ ٻٜيْدَ تٛرَاکِعٛنْ نغَطٛنْ دٛعَارٜ نغَمْ اَللَّه سٛعّٛيَيَمْ تٛ مٛوطٛنْ نَاع کٛ نٜىٰٻِ؞

دٛعَارٜ شَکِتِيندٜ

²⁰اَللَّه جٛومُ جَمْ اُمِّنِي يٜىٰسُ جٛومِرَاوٛ مٜىٰطٜنْ دَغَ مَيْدٜ لَاوٛلْ پِيپَمْ اَلْکَوَلْ تَبٛتٛونغَلْ؞ کَنْجُمْ وَطِ يٜىٰسُ وَرْتِ دُرٛووٛ بَالِ مَوْطٛ، ²¹اٛ وَطَعٛنْ مبَاوٛنْ وَطُکِ کٛو نغَلٜ کُوغَلْ بٛنْغَلْ نغَلْ اٛ يِطِ نغَطٛنْ؞ اٛ وَرْتِرَعٛنْ کٛ وٜلْنَنْتَمٛ ٻٜرْندٜ بَرْکَ يٜىٰسُ اَلْمَسِيحُ؞ مَنْغُ تَبِّتَ تٛ يٜىٰسُ حَا اَبَدَا اَبَدِنْ؞ اَامِنْ؞

بٛلِيطٜ شَکِتِيطٜ

²²اٜ مِ تٛرٛوعٛنْ بَنْدِرَاٻٜ، نجَٻٜىٰ وَغِّنٛورٜ ندٜعٜ، نغَمْ طٜرٜوٛلْ نغٛعٛلْ نغٛلْ مبِنْدَنْمِعٛنْ نغٛلْ جُوتَا؞ ²³اٜ مِ يِطِ اَنْدٛنْ بَنْدِرَاوٛ مٜىٰطٜنْ تِمٛوتِ يٛوفَامَ دَغَ ندٜرْ سُودُ شُرَلْ؞ تٛ اٛ وَرِي تٛ اَمْ نَاع کٛ نٜىٰٻِ، مِ وَرْدَيْ اٜ مَاکٛ تٛ مٛوطٛنْ؞

²⁴کٛوْنَنٛنْمِنْ فُو اَرْدِيٻٜ مٛوطٛنْ اٜ يِمْٻٜ اَللَّه حٛرِيٻٜ؞ تٛکُّٻٜ يٜىٰسُ غٛنْٻٜ لٜيْدِ اِتَالِيَ اٜ کٛوْنَعٛنْ؞

²⁵اَللَّه بَرْکِطِنَعٛنْ، اٛنْ فُو؞