غَلَاتِيَنْکٛعٜنْ

طٜرٜوٛلْ نغٛلْ بُلُسْ وِنْدَنِ

غَلَاتِيَنْکٛعٜنْ

حَبَرُ دٛوْ طٜرٜوٛلْ نغٛعٛلْ

بُلُسْ وِنْدِي طٜرٜوٛلْ نغٛعٛلْ نغَمْ شَطُّمْ اُمَّکٜ شَرٜلْ نغٜلْ يِمْٻٜ نَاع يَحُودَنْکٛعٜنْ وٛنْٻٜ لٜيْدِ غَلَاتِيَ ڤُطِّي تٛکُّکِ يٜىٰسُ؞ وٛٻّٜ يَحُودَنْکٛعٜنْ مبِعِ دٛولٜ نَا نٜطّٛ تٛکِّي اَتَّوْرَ کٛ وَرْتَ تٛکُّطٛ يٜىٰسُ مٛ غٛونغَ؞ بُلُسْ وِعِ طُعُمْ نَاع طُمْ نٛنْ؞ اٛ وِعِ کٛ حَانِ تٛکُّطٛ يٜىٰسُ وَطَ ندٜرْ جٛنْدٜ مُوطُمْ وٛنِ حٛولَاکِ يٜىٰسُ، نغَمْ بَرْکَ حٛولَاکِ يٜىٰسُ يِمْٻٜ شِرْيٛوتِرِ اٜ اَللَّه؞ اَمَّا ندٜرْ کَوْتٜ تٛکُّٻٜ يٜىٰسُ وٛنْٻٜ غَلَاتِيَ وٛٻّٜ يِمْٻٜ نغَݧِ اٜکِّتِنٛلْ بُلُسْ، اٜ ٻٜ مبِعَ دٛولٜ نٜطّٛ تٛکَّ اَتَّوْرَ کٛ شِرْيٛوتِرَ اٜ اَللَّه؞

طٜرٜوٛلْ نغٛعٛلْ وِنْدَا نغَمْ وٛٻّٜ ندٜرْ مَٻّٜ مَجِّنِرَامَ اٜکِّتِنٛلْ فٜوْرٜ نغٛعٛلْ؞ اَرَنْدٜ بُلُسْ وِعِ اَللَّه سُٻِمٛ، نَاع يِمْٻٜ سُٻِمٛ؞ اَللَّه سُٻُمٛ نغَمْ اٛ وَرْتَ لِلَاطٛ يٜىٰسُ اَلْمَسِيحُ اٛ حٛلَّ يِمْٻٜ نَاع يَحُودَنْکٛعٜنْ لَاوٛلْ کِسْندَمْ؞ کَدِنْ بُلُسْ تَبِّتِنِي وِيکِ بَرْکَ حٛولَاکِ يٜىٰسُ تَنْ نٜطّٛ وَرْتَتَ اَادِلِيجٛ يٜىٰسٛ اَللَّه؞ ندٜرْ سُورَاجِ شَکِتِيطِ بُلُسْ حٛلِّي وِيکِ نغِکُّ تٛکُّٻٜ يٜىٰسُ پِوٛيِي دَغَ يِدّٜ ندٜ اَللَّه حٛکِّٻٜ بَرْکَ حٛولَاکِ يٜىٰسُ؞

¹مِنْ بُلُسْ لِلَاطٛ وِنْدِ طٜرٜوٛلْ نغٛعٛلْ؞ نَاع يِمْٻٜ شُٻِيَمْ، نَاع نٜطّٛ وَرْتِرِيَمْ لِلَاطٛ؞ يٜىٰسُ اَلْمَسِيحُ اٜ اَللَّه ݧَاکٛ مٛ دٛوْ، اُمِّنْطٛ يٜىٰسُ دَغَ مَيْدٜ وَرْتِرِيَمْ لِلَاطٛ؞ ²مِنْ اٜ فُو بَنْدِرَاٻٜ غٛنْدُٻٜ اٜ اَمْ طٛعٛ اٜ مِنْ کٛوْنَ تٛکُّٻٜ يٜىٰسُ وٛنْٻٜ غَلَاتِيَ؞

³اَللَّه ݧَاکٛ مٛ دٛوْ اٜ يٜىٰسُ اَلْمَسِيحُ جٛومِرَاوٛ بَرْکِطِنَعٛنْ حٛکَّعٛنْ جَمْ؞

⁴يٜىٰسُ حٛکِّي حٛورٜ مُوطُمْ نغَمْ حَکّٜ مٜىٰطٜنْ نغَمْ اٛ حِسْنَعٜنْ دَغَ جَامَنُ کَلُّطُمْ طُعُمْ؞ نٛنْ طُمْ شُٻٛلْ اَللَّه ݧَاکٛ مٜىٰطٜنْ مٛ دٛوْ؞ ⁵تٜدُّنغَلْ تَبِّتَ تٛ اَللَّه حَا اَبَدَا اَبَدِنْ؞ اَامِنْ؞

وَلَا غٛطُّمْ حَبَرُ بٜلْطُمْ فٜىٰرٜ

⁶مِ حَيْطِنِي ندٜ نجَاوُطٛنْ وَيْلِتَنْکِ اَللَّه ٻَاوٛ، کَنْکٛ نٛدُّطٛعٛنْ بَرْکَ يِدّٜ اَلْمَسِيحُ مَوْندٜ شٛعَّنِيطٛنْ وٛنْغٛلْ اٜکِّتِنٛلْ اٛنْ ݧُمَ طُمْ حَبَرُ بٜلْطُمْ؞ ⁷غٛونغَ، وَلَا غٛطُّمْ حَبَرُ بٜلْطُمْ فٜىٰرٜ، اَمَّا اٜ وٛودِ وٛٻّٜ يِمْٻٜ غَنّٛوٻٜعٛنْ؞ اٜ ٻٜ نغِطِ وَيْلُتُکِ حَبَرُ بٜلْطُمْ طُمْ اَلْمَسِيحُ؞ ⁸اَمَّا کٛو مِنٛنْ، کٛو مَلَاعِکَاجٛ پِوٛيْطٛ دَغَ دٛوْ وَعَجِنَنِعٛنْ وَعَجِنْکِ فٜىٰرٛوتِرْکِ اٜ حَبَرُ بٜلْطُمْ طُمْ مِنْ نغَعَجِنَنِعٛنْ، اَللَّه حَلْکَمٛ ندٜرْ حِيتٜ؞ ⁹نٛنْ نٛ مِنْ مبِعُنٛو ندٜنّٛ، جٛونِ اٜ مِ فُطِّتَ وِيکِ:‏ تٛ غٛطّٛ وَعَجِنَنِيعٛنْ وَعَجِنْکِ فٜىٰرٛوتِرْکِ اٜ حَبَرُ بٜلْطُمْ طُمْ نجَٻُطٛنْ اَرَنْدٜ، اَللَّه حَلْکَمٛ ندٜرْ حِيتٜ؞

¹⁰تٛو، جٛونِ يِدّٜ يِمْٻٜ طَٻِّتَيْمِ، کٛو يِدّٜ اَللَّه؟ کٛو بٛو اٜ مِ طَٻِّتَ وٜلْنَنْکِ يِمْٻٜ ٻٜرْطٜ؟ نَاع نٛنْ!‏ دَا حَا جٛونِ يِمْٻٜ طَٻِّتَيْمِ وٜلْنَنْکِ ٻٜرْطٜ، دَا مِ وَرْتَايِ مَشُّطٛ اَلْمَسِيحُ؞

نٛ بُلُسْ وَرْتِرِ لِلَاطٛ

¹¹بَنْدِرَاٻٜ اَمْ، اٜ مِ يِطِ اَنْدٛنْ، حَبَرُ بٜلْطُمْ طُمْ نغَعَجِنْمِ، نَاع تٛ نٜطّٛ طُمْ پِوٛيِ؞ ¹²نَاع تٛ نٜطّٛ کٜٻُمِطُمْ، نٛنْ مَا وَلَا اٜکِّتِنْطٛيَمْطُمْ، اَمَّا يٜىٰسُ اَلْمَسِيحُ وَنْغِنَنِيَمْطُمْ؞

¹³اٛنْ نَنِي نٛ نجٛوطٛرِيمِ ندٜنّٛ ندٜرْ دِينَ يَحُودَنْکٛعٜنْ، نٛ تٛرِّرْمِ يِمْٻٜ اَللَّه تٛکُّٻٜ يٜىٰسُ، يُرْمٜىٰندٜ وَلَا، مِ وَطِي کٛ مبَاوَيْمِ وَطُکِ نغَمْ مِ حَلْکَٻٜ؞ ¹⁴مِ لُغِّي ندٜرْ دِينَ يَحُودَنْکٛعٜنْ حَا مِ ٻُرِي طُطْٻٜ ندٜرْ يَحُودَنْکٛعٜنْ وَلْدٜعٜنْ اَمْ، اٜ مِ وٛودِ يِدّٜ تٛکُّکِ ندٛنُوجِ مَامَعٜنْ اَمْ نَاع سٜطَّ؞

¹⁵اَمَّا اَللَّه، شُٻُطٛيَمْ کٛ مِ دَݧٜىٰ، نٛدِّيَمْ بَرْکَ يِدّٜ مَاکٛ، اٛ سُٻِ ¹⁶وَنْغِنَنْکِيَمْ ٻِطّٛ مَاکٛ، نغَمْ مِ وَعَجِنَمٛ ندٜرْ يِمْٻٜ نَاع يَحُودَنْکٛعٜنْ؞ ندٜ نٛنْ وَطِ، مِ يَحَايِ تٛ غٛطّٛ نغَمْ حٛکَّيَمْ شَاوٛرِ، ¹⁷نٛنْ مَا مِ يَحَايِ اُرُشَلِيمَ نغَمْ مِ يِعَ ٻٜنْ طٛنْ اَرْتُٻٜيَمْ وَرْتُکِ لِلَاٻٜ؞ اَمَّا طٛنْ اٜ طٛنْ نجَامِ لٜيْدِ لَارَبَنْکٛعٜنْ، ندٜنْ شٛعِّيمِ دِمَسْکُ؞ ¹⁸غَطَ دُوٻِ تَتِ مِ يَحِي اُرُشَلِيمَ نغَمْ مِ مٜدَّ اٜ بِيتُرُسْ، ندٜنْ نجٛوطٛدِيمِ اٜ مَاکٛ بَلْطٜ سَڤّٛ اٜ جٛوِ؞ ¹⁹اَمَّا مِ يِعَايِ غٛطّٛ ندٜرْ لِلَاٻٜ سٜيْ نِ يَاکُبُ، مِݧِرَاوٛ يٜىٰسُ؞

²⁰کٛ مبِنْدَنْمِعٛنْ طُمْ غٛونغَ؞ اَللَّه اٜ اَنْدِ نَاع مِ فٜوَيْ؞

²¹غَطَ طٛنْ مِ يَحِي لٜيْدِ سِيرِيَ اٜ لٜيْدِ کِلِيکِيَ؞ ²²اٜ نغٜلْ تٛنْ شَرٜلْ، کَوْتٜ تٛکُّٻٜ يٜىٰسُ وٛنْٻٜ لٜيْدِ يَحُودِيَ مٜىٰطَايِ يِيکِيَمْ؞ ²³کٛ ٻٜ نَنِ تَنْ وٛنِ، ‏«‏نٜطّٛ تٛرَّيْنٛوطٛعٜنْ، جٛونِ اٜ مٛ وَعَجِنَ تٛکُّکِ يٜىٰسُ کِ اٛ يِطُنٛو اٛ لَلِّنَ!‏»‏ ²⁴ٻٜ مَنْتِ اَللَّه نغَمْ کٛ اٛ وَطَنِيَمْ؞

بُلُسْ اٜ لِلَاٻٜ کٛرِيٻٜ

¹غَطَ دُوٻِ سَڤّٛ اٜ نَيِ مِ فُطِّتِ مِ يَحِي اُرُشَلِيمَ حَوْتِ اٜ بَرْنَبَ، مِنْ نجَادِ اٜ تِيتُسْ؞ ²مِ يَحُ اُرُشَلِيمَ نغَمْ اَللَّه حٛلِّييَمْ مِ يَحَ؞ ندٜ نجَامِ مِ حَوْرِي اٜ اَرْدِيٻٜ تٛکُّٻٜ يٜىٰسُ تَنْ، مِ حٛلِّيٻٜ حَبَرُ بٜلْطُمْ طُمْ نغَعَجِنَنْمِ يِمْٻٜ نَاع يَحُودَنْکٛعٜنْ؞ مِ وَطُ نٛنْ نغَمْ مِ يِطَا کُوغَلْ نغَلْ کُوُمِ ندٜنّٛ اٜ نغَلْ کُوَيْمِ جٛونِ وَرْتَ مٜىٰرٜ؞ ³کٛو تِيتُسْ مٛ نجَادَيْمِ، کٛو ندٜ نَاع اٛ يَحُودَنْکٜىٰجٛ، طُمْ وَطَايِمٛ دٛولٜ اٛ نَادٜىٰ، ⁴کٛو ندٜ وٛٻّٜ اٜ نغِطُنٛو اٛ نَادٜىٰ؞ ٻٜ نغَطِي بٛ ٻٜ تٛکُّٻٜ يٜىٰسُ، ٻٜ نَتِّ ندٜرْ کَوْتَلْ مٜىٰطٜنْ، اٜ ٻٜ ندَارَ اِرِ رِمْطِنْکِ کِ نغٛودُطٜنْ ندٜرْ سُمْڤٛوتِرْکِ اٜ يٜىٰسُ اَلْمَسِيحُ، نغَمْ ٻٜ نغَرْتِرَعٜنْ مَشُّٻٜ؞ ⁵اَمَّا نغَمْ طُمْ سُرَنَعٛنْ غٛونغَ حَبَرُ بٜلْطُمْ، مِنْ نجَٻَايِ کٛ ٻٜ مبِعِ کٛو سٜطَّ؞

⁶اَمَّا ٻٜنْ طٛنْ اَرْدِيٻٜ ٻٜ ٻٜيْدَايِ غٛطُّمْ دٛوْ اٜکِّتِنٛلْ اَمْ؞ کٛو کَمْٻٜ ٻٜ ٻٜيٜ وَلَا فٜىٰرٛوتِرٛلْ تٛ اَمْ، نغَمْ اَللَّه حٛلَّتَا فٜىٰرٛوتِرٛلْ؞ ⁷اَمَّا ٻٜ نغِعِ اَللَّه حٛکِّييَمْ کُوغَلْ وَعَجِنَنْکِ يِمْٻٜ نَاع يَحُودَنْکٛعٜنْ حَبَرُ بٜلْطُمْ، نٛنْ نٛ اٛ حٛکِّرِ بِيتُرُسْ کُوغَلْ وَعَجِنَنْکِ يَحُودَنْکٛعٜنْ حَبَرُ بٜلْطُمْ؞ ⁸نغَمْ نٛ اَللَّه وَرْتِرِ بِيتُرُسْ لِلَاطٛ تٛ يَحُودَنْکٛعٜنْ، نٛنْ اٛ وَرْتِرِيَمْ لِلَاطٛ يَاکِ تٛ يِمْٻٜ نَاع يَحُودَنْکٛعٜنْ؞ ⁹يَاکُبُ اٜ بِيتُرُسْ اٜ يَحَيَ، نٛدّٜتٜىٰٻٜ اَرْدِيٻٜ مَوْٻٜ، ندٜ ٻٜ نغِعِ اَللَّه بَرْکِطِنِي کُوغَلْ اَمِنْ بٛنْغَلْ، ٻٜ نجَٻِّييَمْ مِنْ اٜ بَرْنَبَ جُوطٜ طِطِ؞ ٻٜ نجَٻِ مِنْ اٜ بَرْنَبَ مِنْ نغَعَجِنَ ندٜرْ يِمْٻٜ نَاع يَحُودَنْکٛعٜنْ، ندٜنْ کَمْٻٜ ٻٜ نغَعَجِنَ ندٜرْ يَحُودَنْکٛعٜنْ؞ ¹⁰فِي غٛعٛ طُمْ ٻٜ تٛرِيمِنْ وٛنِ تٛع مِنْ نغٜجِّتَ ٻٜ نغَلَنَا وٛنْٻٜ ندٜرْ مَٻّٜ، ندٜنْ مَا کَنْجُمْ وٛنِ کٛ کَاٻُمِ وَطُکِ؞

بُلُسْ حَٻَنِ بِيتُرُسْ تٛ غَرِيرِ اَنْتَاکِيَ

¹¹اَمَّا ندٜ بِيتُرُسْ وَرِ اَنْتَاکِيَ، مِ حَٻَنِيمٛ غِتٜ اٜ غِتٜ، نغَمْ کٛ وٛوطَا طُمْ اٛ وَطِ اٜ نجَيْرِ طُمْ وٛنِ؞ ¹²کٛ وٛٻّٜ يِمْٻٜ ٻٜ يَاکُبُ لِلِ نجٛتّٛو تٛنْ، بِيتُرُسْ اٜ ݧَمْدَ اٜ يِمْٻٜ نَاع يَحُودَنْکٛعٜنْ؞ اَمَّا غَطَ يِمْٻٜ ٻٜنْ نجٛتَّکٜ، بِيتُرُسْ حَکِّتِ حٛورٜ مُوطُمْ اٜ مَٻّٜ، نغَمْ اٜ مٛ حُلَ ٻٜنْ طٛنْ يِمْٻٜ بِعٛوٻٜ دٛولٜ يِمْٻٜ نَاع يَحُودَنْکٛعٜنْ تٛکُّٻٜ يٜىٰسُ نَادٜىٰ؞ ¹³يَحُودَنْکٛعٜنْ تٛکُّٻٜ يٜىٰسُ کٛرِيٻٜ مَا ڤُطِّ وَطُکِ شِيَ غٛونغَ طُمْ بِيتُرُسْ وَطَتَ، حَا کٛ ٻٜ نغَطَتَ مَجِّنِ بَرْنَبَ اٛ فُطِّ وَطُکِ شِيَ غٛونغَ طُمْ ٻٜ نغَطَتَ؞ ¹⁴ندٜ نغِيمِ ٻٜ تٛکَّايِ غٛونغَ حَبَرُ بٜلْطُمْ، مبِيمِ بِيتُرُسْ يٜىٰسٛ مَٻّٜ ٻٜ فُو، ‏«‏اَ يَحُودَنْکٜىٰجٛ، اَمَّا اَ وَطَ جٛنْدٜ اِرِ ندٜ نٜطّٛ نَاع يَحُودَنْکٜىٰجٛ؞ نٛ وَطَتَ اَ وَطَ يِمْٻٜ نَاع يَحُودَنْکٛعٜنْ نغَطَ جٛنْدٜ اِرِ ندٜ يَحُودَنْکٛعٜنْ؟»‏

لٜپِّ فُو کِسَيْ تٛ حٛولَکٜ يٜىٰسُ

¹⁵اٜنٜنْ اٜ کٛعٜ مٜىٰطٜنْ اٜنْ يَحُودَنْکٛعٜنْ غَطَ اٜ يٜىٰسٛ، نَاع اٜنْ ‏«‏يِمْٻٜ نَاع يَحُودَنْکٛعٜنْ غَطٛوٻٜ حَکّٜ،»‏ نٛ ٻٜ نٛدِّرْتٜىٰ؞ ¹⁶فُو اٜ نٛنْ، اٜنْ اَنْدِ اَللَّه جَٻَتَا نٜطّٛ اٛ اَادِلِيجٛ نغَمْ تٛکُّکِ اَتَّوْرَ، اَمَّا اٛ جَٻَيْمٛ بَرْکَ حٛولَاکِ يٜىٰسُ اَلْمَسِيحُ؞ اٜنٜنْ مَا اٜنْ کٛولَکٜ يٜىٰسُ اَلْمَسِيحُ نغَمْ اَللَّه جَٻَعٜنْ اٜنْ اَادِلِعٜنْ بَرْکَ حٛولَاکِ اَلْمَسِيحُ، نَاع نغَمْ تٛکُّکِ اَتَّوْرَ؞ نغَمْ وَلَا مٛ اَللَّه جَٻَتَ اٛ اَادِلِيجٛ نغَمْ تٛکُّکِ اَتَّوْرَ؞ ¹⁷شَرٜلْ نغٜلْ طَٻِّتٜتٜنْ اَللَّه جَٻَعٜنْ اٜنْ اَادِلِعٜنْ بَرْکَ سُمْڤٛوتِرْکِ اٜ اَلْمَسِيحُ، تٛ طُمْ تَوْرِيعٜنْ اٜ حَکّٜ، تٛو، اَلْمَسِيحُ وَرْتِي غَطٛووٛعٜنْ نغَطٜنْ حَکّٜ وٛنْ طٛنْ؟ غٛونغَ نَاع طُمْ نٛنْ!‏ ¹⁸تٛ مِ فُطِّتِي مِ ݧِٻِي کٛ شَنْکُتُمِ، ندٜنْ مِ حٛلِّي مِ نٜطّٛ غٜوٛووٛ کٛ اَتَّوْرَ وِعِ؞ ¹⁹ندٜنّٛ اٜ مِ تٛکَّ اَتَّوْرَ، اَمَّا طُمْ يٛوفِييَمْ دَغَ بَوْطٜ مَاجُمْ، نغَمْ مِ وَطَ جٛنْدٜ حُوَنْکِ اَللَّه؞ ²⁰مِنْ بٛ مِ وَرْدَامَ اٜ اَلْمَسِيحُ دٛوْ غَافَانغَلْ؞ جٛونِ جٛنْدٜ ندٜ نغَطَيْمِ نَاع مِنْ اٜ حٛورٜ اَمْ وَطَتَندٜ، اَمَّا طُمْ اَلْمَسِيحُ جٛوطِيطٛ ندٜرْ اَمْ؞ جٛونِ جٛنْدٜ ندٜ نجٛوطِيمِ ندٜرْ ٻَنْدُ، اٜ مِ وَطَندٜ ندٜرْ حٛولَاکِ ٻِطّٛ اَللَّه، غِطّٛيَمْ حٛکِّ يٛنْکِ مُوطُمْ نغَمْ اَمْ؞ ²¹مِ وَݧَتَا يِدّٜ اَللَّه؞ نغَمْ تٛ نٜطّٛ وَاوَيْ وَرْتُکِ اَادِلِيجٛ نغَمْ تٛکُّکِ اَتَّوْرَ، تٛو، مَيْدٜ اَلْمَسِيحُ وَرْتِي مٜىٰرٜ؞

اَتَّوْرَ کٛو حٛولَاکِ يٜىٰسُ

¹اٛنٛنْ غَلَاتِيَنْکٛعٜنْ حَاݝَاٻٜ!‏ مٛيٜ وَيْلِتِ حَکِّيلٛ مٛوطٛنْ؟ طُمْ وِعِيعٛنْ اٜ نجَيْرِ نٛ يٜىٰسُ اَلْمَسِيحُ وَرِرَا دٛوْ غَافَانغَلْ؞ ²اٜ مِ يِطِ مِ پَمَعٛنْ طُعُمْ تَنْ:‏ اٛنْ کٜٻُ رُوحُ اَللَّه نغَمْ وَطُکِ کٛ اَتَّوْرَ وِعِ طُمْ وَطَ، کٛو نغَمْ نَنْکِ حَبَرُ يٜىٰسُ اٜ حٛولَاکِمٛ؟ ³نغَمْ طُمٜ ندُلُّطٛنْ حَکِّيلٛ؟ غَطَ اٛنْ ڤُطِّرِي رُوحُ اَللَّه، جٛونِ اٛنْ نغِطِ يٛتِّنِرْکِ سٜمْبٜ مٛوطٛنْ؟ ⁴جٛونِ فُو تٛرَّاجِ طِ نجَرْطٛنْ نغَرْتِي مٜىٰرٜ وٛنْ طٛنْ؟ غٛونغَ اٛنْ تٛرَّاکِ اٜ مٜىٰرٜ؞ ⁵اَللَّه کٛکُّطٛعٛنْ رُوحُ مُوطُمْ کُوُطٛ کُوطٜ کَيْطِنِيطٜ ندٜرْ مٛوطٛنْ، اٛنْ ݧُمَ اٛ وَطُطُمْ نغَمْ اٛنْ نغَطِي کٛ اَتَّوْرَ وِعِ، کٛو نغَمْ نَنْکِ حَبَرُ يٜىٰسُ اٜ حٛولَاکِمٛ؟

⁶ݧُمٜىٰ دٛوْ اِبْرَاهِمْ؞ اَايَارٜ وِعِي، ‏«‏اِبْرَاهِمْ بٛو حٛولَکٜ اَللَّه، نغَمْ مَاجُمْ اَللَّه وِعِ اٛ اَادِلِيجٛ؞»‏ ⁷تٛو، اٛنْ نغِعِي ٻِٻّٜ اِبْرَاهِمْ ٻٜ غٛونغَ وٛنِ يِمْٻٜ کٛولِيٻٜ اَللَّه؞ ⁸کٛ نٜىٰٻِ اَايَارٜ وِعِي اَللَّه جَٻَيْ يِمْٻٜ نَاع يَحُودَنْکٛعٜنْ ٻٜ اَادِلِعٜنْ تٛ ٻٜ کٛولَکٜمٛ؞ کَنْجُمْ وَطِ اَللَّه وَعَجِنَنِ اِبْرَاهِمْ حَبَرُ بٜلْطُمْ وِعِ، ‏«‏بَرْکَ مَاطَ طُمْ بَرْکِطِنَيْ کٛو نغٛلٜ لٜݧٛلْ ندٜرْ دُونِيَارُ؞»‏ ⁹نغَمْ مَاجُمْ فُو کٛولِيٻٜ اَللَّه ٻٜ بَرْکِطِنَاٻٜ حَوْتِ اٜ اِبْرَاهِمْ کٛولِيطٛ اَللَّه؞

¹⁰فُو غِطْٻٜ وٜلْنَنْکِ اَللَّه ٻٜرْندٜ لَاوٛلْ تٛکُّکِ اَتَّوْرَ ٻٜ لَانَاٻٜ؞ نغَمْ اَايَارٜ وِعِي، ‏«‏کٛو مٛيٜ مٛ تٛکَّايِ کٛو طُمٜ بِنْدَاطُمْ ندٜرْ دٜفْتٜرٜ اَتَّوْرَ اٛ لَانَاطٛ؞»‏ ¹¹جٛونِ اٜ نجَيْرِ طُمْ وٛنِ، وَلَا مٛ اَللَّه جَٻَتَ اٛ اَادِلِيجٛ نغَمْ تٛکُّکِ اَتَّوْرَ، نغَمْ اَايَارٜ وِعِي، ‏«‏اَادِلِيجٛ اٛ وَطَيْ جٛنْدٜ حٛولَاکِ اَللَّه؞»‏ ¹²حٛولَاکِ اَللَّه اٜ فٜىٰرٛوتِرِ اٜ تٛکُّکِ اَتَّوْرَ؞ نغَمْ اَايَارٜ وِعِي، ‏«‏کٛو مٛيٜ غَطٛووٛ کٛ اَتَّوْرَ وِعِ اٛ حٜٻَيْ جٛنْدٜ ندٜ غٛونغَ؞»‏

¹³يٜىٰسُ اَلْمَسِيحُ رِمْطِنِيعٜنْ دَغَ لَانٜىٰکِ کِ اَتَّوْرَ وَدِّ، ندٜ اٛ وَرْتِ کٛ لَانَا نغَمْ مٜىٰطٜنْ؞ نغَمْ اَايَارٜ وِعِي، ‏«‏کٛو مٛيٜ بَرَاطٛ دٛوْ لٜکِّ اٛ لَانَاطٛ؞» ¹⁴يٜىٰسُ اَلْمَسِيحُ رِمْطِنِيعٜنْ، نغَمْ بَرْکَ مَاکٛ يِمْٻٜ نَاع يَحُودَنْکٛعٜنْ کٜٻَ بَرْکَ طُمْ اَللَّه وَطَنِ اِبْرَاهِمْ اَلْکَوَلْ؞ اٛ وَطُ نٛنْ نغَمْ بَرْکَ حٛولَاکِمٛ کٜٻٜنْ رُوحُ طُمْ اَللَّه وَطِ اَلْکَوَلْ حٛکُّکِ؞

اَتَّوْرَ اٜ اَلْکَوَلْ

¹⁵اٛنٛنْ بَنْدِرَاٻٜ اَمْ، اَلْ مِ حٛکَّعٛنْ مِسَالُ دٛوْ فِي طُمْ اَنْدُطٛنْ؞ غَطَ يِمْٻٜ طِطٛ کَوْتِي نجَٻِي غٛطُّمْ، تٛ ٻٜ نغَادِي اَلْکَوَلْ دٛوْ مَاجُمْ، وَلَا ڤٛتُطٛ سَنْکِتَطُمْ، کٛو ٻٜيْدَ غٛطُّمْ دٛوْ مَاجُمْ؞ ¹⁶تٛو، اَللَّه وَطَنِي اِبْرَاهِمْ اَلْکَوَلْ مُوطُمْ اٜ ٻِٻّٜ ٻِٻّٜىٰجِ مَاکٛ؞ اَايَارٜ وِعَايِ، ‏«‏اٜ تَانِرَاٻٜ،»‏ وَاتٛ يِمْٻٜ طُطْٻٜ، اَمَّا ندٜ وِعِ، ‏«‏اٜ تَانِرَاوٛ مَاطَ،»‏ وَاتٛ نٜطّٛ غٛعٛ تَنْ، کَنْکٛ وٛنِ اَلْمَسِيحُ؞ ¹⁷کٛ نغِنْمِ وِيکِ وٛنِ اَتَّوْرَ طُمْ اَللَّه حٛکِّ دُوٻِ 430 غَطَ طٛنْ، طُمْ يٜوَتَا اَلْکَوَلْ نغَلْ اَللَّه وَطُنٛو، ندٜنْ طُمْ سَنْکِتَتَانغَلْ؞ ¹⁸نغَمْ تٛ بَرْکَ طُمْ کٜٻُطٜنْ تٛ اَللَّه اٜنْ کٜٻُطُمْ نغَمْ تٛکُّکِ اَتَّوْرَ، تٛو، اٜنْ کٜٻَايِطُمْ نغَمْ اَلْکَوَلْ نغَلْ اٛ وَطِ؞ اَمَّا اَللَّه بَرْکِطِنِي اِبْرَاهِمْ نغَمْ اَلْکَوَلْ نغَلْ اَللَّه وَطَنِمٛ؞

¹⁹تٛ طُمْ نٛنْ، نغَمْ طُمٜ طُمْ وَدِّ اَتَّوْرَ؟ طُمْ وَدَّ نغَمْ طُمْ حٛلَّ کٛ وٛنِ حَکّٜ؞ اَللَّه وَدُّطُمْ طُمْ حُوتِرٜىٰ نَا شَرٜلْ نغٜلْ تَانِرَاوٛ اِبْرَاهِمْ اٛنْ طٛنْ وَرِي، مٛ طُمْ وَطُنٛ اَلْکَوَلْ؞ اَللَّه لِلِ مَلَاعِکَعٜنْ ٻٜ کٛکِّ مُوسَ اَتَّوْرَ، مُوسَ حٛکِّطُمْ اِسْرَاعِيلَنْکٛعٜنْ؞ ²⁰اَمَّا ندٜ اَللَّه وَطَنِ اِبْرَاهِمْ اَلْکَوَلْ، اٛ مٜدِّ اٜ اِبْرَاهِمْ کَنْکٛ اٜ حٛورٜ مَاکٛ؞

دَلِيلَ اَتَّوْرَ

²¹جٛونِ طُعُمْ اٜ حٛلَّ اَتَّوْرَ اٜ وَݧَ اَلْکَوَلْ اَللَّه وٛنْ طٛنْ؟ غٛونغَ نَاع طُمْ نٛنْ؞ دَا طُمْ حٛکِّي دٛوکَ کٛکّٛوجُمْ يٛنْکِ، دَا کٛو مٛيٜ وَاوَيْ وَرْتُکِ اَادِلِيجٛ تٛ تٛکِّيطُمْ؞ ²²اَمَّا اَايَارٜ وِعِي حَکّٜ حَٻِّي کٛو مٛيٜ غٛنْطٛ ندٜرْ دُونِيَارُ، نغَمْ کٛ اَللَّه وَطِ اَلْکَوَلْ کٜٻٜتٜىٰطُمْ تٛ طُمْ حٛولَکٜ يٜىٰسُ اَلْمَسِيحُ، طُمْ حٛکَّيْطُمْ کٛولِيٻٜمٛ؞

²³کٛ شَرٜلْ حٛولَاکِ يٜىٰسُ وَرَ، اَتَّوْرَ حَٻِّيمِنْ بٛ شُرَاٻٜ نَاکِ ندٜ حٛولَاکِ يٜىٰسُ وَرٛيِ؞ ²⁴نغَمْ نٛنْ، مِنْ نغَطَا لٜيْ لَامُ اَتَّوْرَ يَاکِ شَرٜلْ نغٜلْ اَلْمَسِيحُ وَرِ نغَمْ مِنْ نغَرْتَ اَادِلِعٜنْ، تٛ مِنْ کٛولَکٜمٛ؞ ²⁵جٛونِ ندٜ حٛولَاکِ اَلْمَسِيحُ وَرِي، اَتَّوْرَ وَلَا لَامُ دٛوْ اَمِنْ کَدِنْ؞

²⁶اٛنْ فُو اٛنْ ٻِٻّٜ اَللَّه بَرْکَ حٛولَاکِ يٜىٰسُ اَلْمَسِيحُ؞ ²⁷اٛنْ فُو اٛنْ نغَطَنَامَ بَڤْتِسْمَ کٛلُّطُمْ اَلْمَسِيحُ جٜيِعٛنْ اٛنْ ٻٛرْنَکٜ نغِکُّ اَلْمَسِيحُ وٛنْ طٛنْ نٛ ٻٛرْنٛرْتٛوطٛنْ کٛلْتٜ؞ ²⁸نغَمْ نٛنْ وَلَا فٜىٰرٛوتِرٛلْ حَکُّندٜ يَحُودَنْکٛعٜنْ اٜ نَاع يَحُودَنْکٛعٜنْ، اٜ حَکُّندٜ مَشُّٻٜ اٜ نَاع مَشُّٻٜ، اٜ حَکُّندٜ وٛرْٻٜ اٜ رٜوْٻٜ؞ اٛنْ فُو اٛنْ نغَرْتِي غٛعٛ ندٜرْ سُمْڤٛوتِرْکِ اٜ يٜىٰسُ اَلْمَسِيحُ؞ ²⁹تٛ اَلْمَسِيحُ جٜيِعٛنْ، اٛنٛنْ نغٛنِ ٻِٻّٜ اِبْرَاهِمْ، اٛنٛنْ کٜٻَتَ کٛ اَللَّه وَطِ اَلْکَوَلْ؞

¹کٛ نغِنْمِ وِيکِ وٛنِ ٻِطّٛ دٛنٛووٛ جَوْدِ ݧَاکٛ مُوطُمْ بٛ مَشُّطٛ اٛ وٛنِ شَرٜلْ کٛ اٛ وٛنِ سُکَ ڤَمَرٛ، کٛو ندٜ کَنْکٛ رٛنَتَ کٛو طُمٜ کٛ ݧَاکٛ مَاکٛ وٛودِ؞ ²اٛ جٛوطٛتٛ لٜيْ وٛٻّٜ ڤَامَنَيْٻٜمٛ اٜ ڤَامَنَيْٻٜ جَوْدِ ندِ اٛ رٛنَتَ ندِنْ نَا ݧَلْندٜ ندٜ ݧَاکٛ مَاکٛ وِعِ؞ ³نٛنْ، اٜنٜنْ مَا کٛ اَلْمَسِيحُ رِمْطِنَعٜنْ، غِنِّ غٛودُطِ بَوْطٜ ندٜرْ لَامٛتٛوعٜنْ؞ ⁴اَمَّا ندٜ شَرٜلْ وَطِ، اَللَّه لِلٛيِ ٻِطّٛ مُوطُمْ؞ دٜبّٛ دَݧِمٛ، اٛ جٛوطِي لٜيْ اَتَّوْرَ، ⁵نغَمْ اٛ رِمْطِنَ ٻٜنْ طٛنْ تٛکّٛوٻٜ اَتَّوْرَ، نغَمْ نغَرْتٜنْ ٻِٻّٜ اَللَّه؞

⁶نغَمْ اٛنْ ٻِٻّٜ اَللَّه، اٛ لِلٛيِ رُوحُ ٻِطّٛ مَاکٛ ندٜرْ ٻٜرْطٜ مٜىٰطٜنْ، اٜ طُمْ نٛدَّ اَللَّه اٜ طُمْ وِعَ، ‏«‏ݧَاکٛ اَمْ، ݧَاکٛ اَمْ؞»‏ ⁷نغَمْ نٛنْ، جٛونِ نَاع اَ مَشُّطٛ، اَمَّا اَ ٻِطّٛ؞ ندٜنْ ندٜ اَ ٻِطّٛ، اَللَّه وَرْتِرِيمَ دٛنَيْطٛمٛ؞

وَنَّارٜ بُلُسْ دٛوْ غَلَاتِيَنْکٛعٜنْ

⁸ندٜنّٛ کٛ اٛنْ اَنْدَا اَللَّه، اٛنْ مَشُّٻٜ تٛکّٛوٻٜ اَلَّاجِ فٜوْرٜ؞ ⁹اَمَّا جٛونِ ندٜ اَنْدُطٛنْ اَللَّه، کٛو بٛو ندٜ اَللَّه اَندِعٛنْ، نغَمْ طُمٜ شٛعَّنْتٛوطٛنْ طِنْ طٛنْ غِنِّ تَمْڤُطِ طِ نَفَنْتَاعٛنْ؟ نغَمْ طُمٜ نغِطّٛنْ وَرْتُکِ مَشُّٻٜ مَاجِ کَدِنْ؟ ¹⁰اٛنْ مَوْنِنَ غٛطّٜ ݧَلْطٜ، اٜ غٛطِّ لٜبِّ، اٜ غٛطِّ دُوٻِ؞ ¹¹اٜ مِ حُلَ تٛع کُوغَلْ نغَلْ کُوُمِ ندٜرْ مٛوطٛنْ وَرْتَ مٜىٰرٜ؞

¹²اٛنٛنْ بَنْدِرَاٻٜ اَمْ، اٜ مِ تٛرٛوعٛنْ، نغَرْتٜىٰ بٛ اَمْ، نغَمْ مِنْ مَا مِ وَرْتِي بٛ مٛوطٛنْ؞ اٛنْ نغَطَنَايِيَمْ غٛطُّمْ کٛ وٛوطَا؞ ¹³اٛنْ اَنْدِ نغَمْ مِ يَمْطَا وَطِ کٜٻُمِ لَاوٛلْ نغَعَجِنَنْمِعٛنْ حَبَرُ بٜلْطُمْ اَرَنْدٜ؞ ¹⁴کٛو ندٜ شِيَ نجَمُ اَمْ فٛوطَنِيعٛنْ تٛرَّ، اٛنْ نجَوَنَايِيَمْ، اٛنْ نغَݧَايِيَمْ؞ اَمَّا اٛنْ نجَٻِييَمْ بٛ مَلَاعِکَاجٛ اَللَّه، اٛنْ نجَٻِييَمْ نٛ نجَٻِرْطٛنْ يٜىٰسُ اَلْمَسِيحُ؞ ¹⁵تٛ نَنْکِ بٜلْطُمْ کِ نَنُنٛوطٛنْ وٛنِ؟ مِ تَبِّتِنِي، دَا طُمْ وَطٛتٛ، دَا اٛنْ اِتِّي غِتٜ مٛوطٛنْ اٛنْ کٛکِّييَمْ؞ ¹⁶جٛونِ مِ وَرْتِي غَݧٛ مٛوطٛنْ ندٜ مبِيمِعٛنْ غٛونغَ؟

¹⁷ٻٜنْ طٛنْ يِمْٻٜ ٻٜ نغَطِي حَکِّيلٛ مَٻّٜ فُو دٛوْ مٛوطٛنْ نغَمْ ٻٜ نغَطَعٛنْ تٛکّٛنْٻٜ، اَمَّا کٛ ٻٜ نغِطِ وَطُکِ طُمْ وٛوطَا؞ کٛ ٻٜ نغِطِ وٛنِ ٻٜ شٜنْدَعٛنْ اٜ اَمِنْ، نغَمْ حَکِّيلٛ مٛوطٛنْ سٛعّٛو تٛ مَٻّٜ؞ ¹⁸اٜ طُمْ وٛوطِ تٛ نٜطّٛ وَطِي حَکِّيلٛ مُوطُمْ فُو دٛوْ غٛطُّمْ تٛ اٜ طُمْ وٛوطِ؞ اٜ حَانِ نغَطٛنْ نٛنْ کٛو ندٜيٜ، نَاع سٜيْ تٛ اٜ مِ وٛنْدِ اٜ مٛوطٛنْ تَنْ؞ ¹⁹اٛنٛنْ ٻِٻّٜ اَمْ ٻٜ نغِطُمِ، نٛنْ نٛ دٜبّٛ نَنِرْتَ نَوْطُمْ دَݧْنغٛلْ، بٛ نٛنْ اٜ مِ فُطِّتَ نَنُکِ اِرِ طُمْ طٛنْ نَوْطُمْ نغَمْ مٛوطٛنْ نَا شَرٜلْ نغٜلْ کٛلُّطٛنْ نغِکُّ اَلْمَسِيحُ ندٜرْ جٛنْدٜ مٛوطٛنْ؞ ²⁰اٜ مِ يِطِ جٛوطٛدَاکِ اٜ مٛوطٛنْ، نغَمْ مِ اَنْدَ نٛ مٜتِرَنَيْمِعٛنْ؞ اٜ مِ وَنِّ دٛوْ مٛوطٛنْ نَاع سٜطَّ!‏

مِسَالُ دٛوْ حَجَرَ اٜ سَارَتُ

²¹مبِعٜىٰيَمْ، اٛنٛنْ غِطُٻٜ تٛکُّکِ اَتَّوْرَ، اٛنْ نَنَايِ کٛ اَتَّوْرَ وِعِ؟ ²²نغَمْ اَايَارٜ وِعِي اِبْرَاهِمْ اٜ وٛودِ ٻِٻّٜ طِطٛ، غٛعٛتٛ مَشُّطٛ دٜبّٛ دَݧِمٛ، غٛعٛتٛ اٛنْ بٛو دٜبّٛ مَاکٛ دِمٛ دَݧِمٛ؞ ²³ٻِطّٛ مٛ مَشُّطٛ اٛنْ دَݧِ، اٛ دَݧُمٛ نٛ طُمْ دَݧِرِ کٛو مٛيٜ، اَمَّا ٻِطّٛ مٛ دٜبّٛ مَاکٛ دَݧِ، اٛ دَݧُمٛ نغَمْ اَلْکَوَلْ نغَلْ اَللَّه وَطِ؞ ²⁴طُعُمْ طُمْ مِسَالُ، وَاتٛ ٻٜعٜ رٜوْٻٜ طِطٛ دٛوْ اَلْکَوَلْجِ اَللَّه طِطِ ٻٜ نغٛنِ؞ دٜبّٛ مٛ ٻِٻّٜ مُوطُمْ دَݧَا ندٜرْ مَشُّنغَاکُ، کَنْکٛ وِعٜتٜىٰ حَجَرَ، اٜ مٛ جٛوطَنِي اَلْکَوَلْ نغَلْ اَللَّه وَطِ دٛوْ حٛشّٜىٰرٜ سِنَيْ؞ ²⁵حَجَرَ وٛنِ مِسَالُ حٛشّٜىٰرٜ سِنَيْ غٛنْدٜ لٜيْدِ لَارَبَنْکٛعٜنْ، ندٜنْ اٛ مِسَالُ غَرِيرِ اُرُشَلِيمَ ندِ جٛونِ، نغَمْ اٜ ندِ ندٜرْ مَشُّنغَاکُ، کَيْرِ اٜ ٻِٻّٜ مَيْرِ؞ ²⁶اَمَّا سَارَتُ اٛ دٜبّٛ دِمٛ اٛ مِسَالُ غَرِيرِ اُرُشَلِيمَ ندِ دٛوْ ندِ مٜىٰطَايِ مَشُّنغَاکُ، کَيْرِ وٛنِ مَدُوجٛ مٜىٰطٜنْ؞ ²⁷نغَمْ اَايَارٜ وِعِي،

‏«‏نَنُ بٜلْطُمْ اَنْ دٜبّٛ مٛ مٜىٰطَايِ دَݧُکِ!‏

جَلُ سٜمْبٜىٰ، اَنْ مٛ مٜىٰطَايِ نَنْکِ نَوْطُمْ دَݧْنغٛلْ!‏

نغَمْ دٜبّٛ مٛ غٛرْکٛ مُوطُمْ وَنَّايِ اٜ مَاکٛ اٛ حٜٻَيْ ٻِٻّٜ طُطْٻٜ ٻُرْٻٜ ٻٜ

دٜبّٛ مٛ غٛرْکٛ مُوطُمْ وَنِّ اٜ مُوطُمْ؞»‏

²⁸اٛنٛنْ بَنْدِرَاٻٜ اَمْ، اٛنٛنْ مَا بٛ اِشِيَاکُ اٛنْ ٻِٻّٜ اَلْکَوَلْ؞ ²⁹اٜ نغٜلْ تٛنْ شَرٜلْ ٻِطّٛ مٛ طُمْ دَݧِ نٛ طُمْ دَݧِرِ کٛو مٛيٜ، اٛ حَلَّنِي ٻِطّٛ مٛ طُمْ دَݧِ ندٜرْ بَوْطٜ رُوحُ اَللَّه؞ جٛونِ مَا نٛنْ اٜ وَطٜىٰ؞ ³⁰اَمَّا کٛ اَايَارٜ وِعِ؟ ندٜ وِعِ، ‏«‏رِيوُ اٛنْ طٛنْ مَشُّطٛ دٜبّٛ اٜ ٻِطّٛ مَاکٛ، نغَمْ ٻِي دِمٛ سٜنْدِدَتَا ندٛنُ اٜ ٻِي مَشُّطٛ؞»‏ ³¹نغَمْ نٛنْ بَنْدِرَاٻٜ، اٜنٜنْ نَاع اٜنْ ٻِٻّٜ مَشُّطٛ دٜبّٛ، اَمَّا اٜنْ ٻِٻّٜ دٜبّٛ دِمٛ؞

نجٛغٜىٰ رِمْطِنْکِ مٛوطٛنْ

¹اَلْمَسِيحُ رِمْطِنِيعٜنْ نغَمْ تٛع نغَطٜنْ جٛنْدٜ بٛ مَشُّٻٜ؞ نغَمْ نٛنْ، ندَرٜىٰ بٛطُّمْ تٛع اٛنْ ڤُطُّتُ شٛعّٛوطٛنْ ندٜرْ مَشُّنغَاکُ؞

²نَنٜىٰ کٛ مبِعَيْمِ!‏ مِنْ بُلُسْ، اٜ مِ وِعَعٛنْ، تٛ اٛنْ اَلِي اٛنْ نَادَامَ، اَلْمَسِيحُ وَرْتَيْ وَلَا کٛ نَفِ تٛ مٛوطٛنْ وٛنْ طٛنْ؞ ³اٜ مِ فُطِّتَ اٜ مِ وِعَ کٛو مٛيٜ جَٻُطٛ نَادَا، دٛولٜ اٛ تٛکَّ فُو کٛ اَتَّوْرَ وِعِ؞ ⁴اٛنٛنْ غِطُٻٜ وَرْتُکِ اَادِلِعٜنْ نغَمْ تٛکُّکِ اَتَّوْرَ، اٛنْ شٜنْدِرِي اٜ اَلْمَسِيحُ، اٛنْ شٜنْدِرِي اٜ شَاحُ اَللَّه؞ ⁵اٜنْ تَبِّتِنِي دَغَ تٛ رُوحُ اَللَّه، اٛ جَٻَيْعٜنْ اٜنْ اَادِلِعٜنْ نغَمْ اٜنْ کٛولَکٜ اَلْمَسِيحُ؞ اٜنْ کَاٻِي يِيکِطُمْ؞ ⁶نغَمْ تٛ اٜنْ شُمْڤٛوتِرَ اٜ يٜىٰسُ اَلْمَسِيحُ، نَادٜىٰکِ اٜ شِيَ نَادٜىٰکِ فُو وَلَا کٛ نَفِ؞ اَمَّا کٛ ٻُرِ وٛنِ حٛولَاکِ اَلْمَسِيحُ؞ کٛ حٛلَّتَ اٜنْ کٛولِمٛ وٛنِ نغِطٜنْ يِمْٻٜ اٜ اَللَّه؞

⁷ندٜنّٛ اٛنْ ݧَمْرَ يٜىٰسٛ بٛطُّمْ!‏ مٛيٜ حَطِعٛنْ تٛکُّکِ غٛونغَ؟ ⁸نَاع اَللَّه نٛدُّطٛعٛنْ حَطِعٛنْ؞ ⁹نٛنْ نٛ طُمْ وِعَتَ، ‏«‏پُوفِنِرْطُمْ سٜطَّ ٻُوتِنْتَ شٛنْدِ بُرٛودِ فُو؞»‏ ¹⁰نغَمْ مِ حٛولَکٜ جٛومِرَاوٛ، مِ تَبِّتِنِي اٛنْ تٛکَّتَا وٛنْغٛلْ لَاوٛلْ فٜىٰرٛوتِرْنغٛلْ اٜ نغٛلْ اَمْ؞ ندٜنْ اٛنْ طٛنْ نٜطّٛ مَجِّنَيْطٛعٛنْ، کٛو اٛ مٛيٜ، اَللَّه تٛرَّيْمٛ؞

¹¹اٛنٛنْ بَنْدِرَاٻٜ اَمْ، تٛ حَا جٛونِ اٜ مِ وَعَجِنَ وِيکِ دٛولٜ يِمْٻٜ نَادٜىٰ، نغَمْ طُمٜ حَا جٛونِ اٜ طُمْ تٛرَّيَمْ؟ دَا اٜ مِ وَعَجِنَ دٛوْ طُمْ نَادَ، دَا وَعَجِنْکِ اَمْ دٛوْ مَيْدٜ اَلْمَسِيحُ دٛوْ غَافَانغَلْ فٛوطَتَا شَطُّمْ؞ ¹²دَا طُمْ وِعَ ٻٜنْ طٛنْ يِمْٻٜ مَجِّنٛوٻٜعٛنْ ٻٜ تَڤَّ کٛعٜ مَٻّٜ!‏

¹³اٛنٛنْ بَنْدِرَاٻٜ اَمْ، اٛنْ نٛدَّ نغَمْ نغَرْتٛنْ رِمْطِنَاٻٜ؞ اَمَّا تٛع اٛنْ کُوتِرْ رِمْطِنْکِ مٛوطٛنْ وَرْتَ لَاوٛلْ وَطُکِ کٛ سُونٛ ٻَلِّ مٛوطٛنْ نغِطِ؞ سٜيْ نِ مبَلِّندِرٛنْ ندٜرْ يِدّٜ؞ ¹⁴نغَمْ فُو اَتَّوْرَ حٜىٰوِي دٛوْ وٛلْدٜ غٛعٛ، وَاتٛ، ‏«‏يِطُ بَنْدِرَاوٛ مَاطَ نٛ نغِطِرْطَا حٛورٜ مَاطَ؞»‏ ¹⁵اَمَّا تٛ اٛنْ کَلِّندِرَ اٛنْ تٛرِّندِرَ بٛ مَرْلٜ لَدّٜ، ڤَامٜىٰ تٛع کَلْکِندِرٛنْ؞

فٜىٰرٛوتِرٛلْ حَکُّندٜ رُوحُ اَللَّه اٜ نغِکُّ نٜطّٛ

¹⁶کٛ مبِعَيْمِ وٛنِ، نغَطٜىٰ جٛنْدٜ مٛوطٛنْ نٛ رُوحُ اَللَّه حٛلِّرِعٛنْ، ندٜنْ اٛنْ نغَطَتَا کٛ سُونٛوجِ ٻَلِّ مٛوطٛنْ نغِطِ؞ ¹⁷نغَمْ کٛ ٻَلِّ مٜىٰطٜنْ نغِطِ اٜ وَݧَ کٛ رُوحُ اَللَّه يِطِ، نٛنْ مَا کٛ رُوحُ اَللَّه يِطِ اٜ وَݧَ کٛ ٻَلِّ مٜىٰطٜنْ نغِطِ؞ فِي طِطُمْ طُعُمْ اٜ طُمْ وَݧْوَݧْتِرَ؞ کَنْجُمْ وَطِ اٛنْ مبَاوَتَا وَطُکِ کٛ نغِطّٛنْ وَطُکِ؞ ¹⁸اَمَّا تٛ اٛنْ نغَطَ کٛ رُوحُ اَللَّه وِعِعٛنْ نغَطٛنْ، اٛنْ نغَلَا لٜيْ لَامُ اَتَّوْرَ؞

¹⁹کٛ ٻَنْدُ نٜطّٛ يِطِ وَطُکِ، اٜ نجَيْرِ طُمْ وٛنِ:‏ اٜ وٛودِ وَطُکِ نجٜىٰنُ، اٜ وَطُکِ کُوطٜ نٜفْنِيطٜ، اٜ وَطُکِ کٛ سٜمْتِنِي، ²⁰اٜ مَوْنِنْکِ غُنْکِيجِ، اٜ حُوتِرْکِ بَوْطٜ غِنِّ، اٜ وَݧْوَݧْتِرْکِ، اٜ حَوْرٜ، اٜ يِطُکِ کٛ جٜيَايِ، اٜ مٛنُّکِ، اٜ يِدّٜ حٛورٜ، اٜ يٜدّٛوتِرْکِ، اٜ وَدُّکِ سٜنْدِرْکِ، ²¹اٜ لَوْلِيرُ، اٜ يِلْتَاکِ، اٜ يَرْکِ نجَرُ يِلْتٛو حَا وَطَ کٛ حَلِّ، اٜ وَطُکِ غٛطّٜ کُوطٜ اِرِ طٜعٜ؞ اٜ مِ وِعَعٛنْ نٛنْ نٛ مبِيمِعٛنْ ندٜنّٛ، کُوٛوٻٜ اِرِ کُوطٜ طٜعٜ ٻٜ کٜٻَتَا نَتُّکِ لَامُ اَللَّه؞

²²اَمَّا رُوحُ اَللَّه اٜ وَدَّ يِدّٜ، اٜ وٜلْوٜلٛ، اٜ جٛنْدٜ جَمْ، اٜ مُݧَلْ، اٜ يُرْمٜىٰندٜ، اٜ نغِکُّ بٛطُّمْ، اٜ وَطُکِ غٛونغَ، ²³اٜ لٜيْنُکِ حٛورٜ، اٜ سُرُکِ حٛورٜ؞ وَلَا دٛوکَ غَݧُطُمْ کُوطٜ طٜعٜ؞ ²⁴يِمْٻٜ ٻٜ يٜىٰسُ اَلْمَسِيحُ جٜيِ، ٻٜ مبَرِي کُوطٜ کَلُّطٜ طٜ ٻَنْدُ اٜ فُو سُونٛوجِ مَيْرُ دٛوْ غَافَانغَلْ، وَاتٛ ٻٜ شٜنْدِرِي اٜ مَاجُمْ؞ ²⁵ندٜ رُوحُ اَللَّه حٛکِّعٜنْ يٛنْکِ، اٜنْ نغَطُ جٛنْدٜ نٛ طُمْ حٛلِّرِعٜنْ؞ ²⁶تٛع اٜنْ نغَرْتُ ٻٜ مَنْغُ حٛورٜ، کٛو اُمِّنِندِرٜنْ حَکِّيلٛ، کٛو لَوْلِندِرٜنْ؞

مبَلِّندِرٜىٰ

¹اٛنٛنْ بَنْدِرَاٻٜ اَمْ، تٛ اٛنْ نغِعِي غٛطّٛ اٜ وَطَ حَکّٜ، اٛنٛنْ کٜىٰوُٻٜ رُوحُ اَللَّه سٜيْ شٛعّٛنْمٛ دٛوْ لَاوٛلْ ندٜرْ حَکِّيلٛ؞ اَمَّا ڤَامَنٜىٰ کٛعٜ مٛوطٛنْ، تٛع اٛنٛنْ مَا نغَطٛنْ حَکّٜ؞ ²مبَلِّندِرٜىٰ ندٜرْ تٛرَّاجِ مٛوطٛنْ؞ تٛ اٛنْ نغَطِي نٛنْ، اٛنْ نغَطِي کٛ دٛوکَ اَلْمَسِيحُ وِعِ؞ ³تٛ غٛطّٛ اٜ ݧُمَ کَنُمْ طُمْ غٛطُّمْ کٛو ندٜ نَاع اٛ غٛطُّمْ، اٜ مٛ مَجِّنَ حٛورٜ مَاکٛ؞ ⁴کٛو مٛيٜ فٛوندَ کُوطٜ مُوطُمْ يِعَ تٛ طٜ بٛطّٜ؞ ندٜنْ اٛ مَنْتٛرٛو حٛورٜ مَاکٛ نغَمْ کٛ اٛ وَطِ نَاع سٜيْ تٛ اٛ فٛوندِي حٛورٜ مَاکٛ اٜ غٛطّٛ؞ ⁵نغَمْ کٛو مٛيٜ دٛولٜ حٛشَّ تٜدّٛرَلْ مُوطُمْ؞

⁶فُو اٜکِّتِنَاطٛ وٛلْدٜ اَللَّه اٜ حَانِ اٛ سٜنْدِدَ فُو فِي بٛطُّمْ طُمْ اٛ وٛودِ اٜ اٜکِّتِنْطٛمٛ؞

⁷تٛع اٛنْ مَجِّنْ کٛعٜ مٛوطٛنْ، اَللَّه پٛيْرَتَاکٜ؞ فُو کٛ نٜطّٛ اَاوِ، کَنْجُمْ اِتَّتَ؞ ⁸اَاوُطٛ وَطُکِ کٛ ٻَنْدُ مُوطُمْ يِطِ، دَغَ ندٜرْ وَطُکِ کٛ ٻَنْدُ مَاکٛ يِطِ، اٛ فٛوطَنَيْ حٛورٜ مَاکٛ حَلْکٜرٜ؞ اَمَّا اَاوُطٛ وَطُکِ کٛ رُوحُ اَللَّه يِطِ، دَغَ ندٜرْ وَطُکِ کٛ رُوحُ طُمْ يِطِ اٛ حٜٻَيْ يٛنْکِ کِ رٜعَتَا؞ ⁹تٛع اٜنْ شٛمُ وَطُکِ کٛ وٛوطِ، نغَمْ تٛ شَرٜلْ وَطِي اٜنْ کٜٻَيْ بَرْکَ، تٛ اٜنْ اَلَايِ وَطُکِ کٛ وٛوطِ؞ ¹⁰نغَمْ مَاجُمْ فُو شَرٜلْ نغٜلْ کٜٻْطٜنْ، اٜنْ نغَطَنْ کٛو مٛيٜ کٛ وٛوطِ، کٛ ٻُرِ مَا وٛنِ ٻٜنْ طٛنْ تٛکُّٻٜ يٜىٰسُ بَنْدِرَاٻٜ مٜىٰطٜنْ؞

وَغِّنٛلْ شَکِتِينغٛلْ اٜ کٛوْنٛلْ

¹¹ندَارٜىٰ اِرِ بِنْدِ مَوْطِ طِ مبِنْدٛنٛيْمِعٛنْ اٜ جُنْغٛ اَمْ؞ ¹²ٻٜنْ طٛنْ يِمْٻٜ مَوْنِنٛوٻٜ کٛعٜ مَٻّٜ نغَمْ کٛ طُمْ وَطَنِٻٜ اٜ ٻَنْدُ، کَمْٻٜ نغِطِ دٛولٜ طُمْ نَادَعٛنْ؞ اٜ ٻٜ نغَطَ نٛنْ نغَمْ تٛع ٻٜ تٛرّٜىٰ نغَمْ غَافَانغَلْ اَلْمَسِيحُ؞ ¹³نغَمْ کٛو ٻٜنْ طٛنْ نَادَاٻٜ مَا ٻٜ تٛکَّتَا کٛ اَتَّوْرَ وِعِ، اَمَّا فُو اٜ نٛنْ اٜ ٻٜ نغِطِ طُمْ نَادَعٛنْ ٻٜ مَوْنِنَ حٛورٜ نغَمْ ٻٜ نغَطِي طُمْ نَادِيعٛنْ؞ ¹⁴اَمَّا مِنْ، کٛو سٜطَّ مِ مَوْنِنْتَا حٛورٜ اَمْ سٜيْ نِ دٛوْ غَافَانغَلْ جٛومِرَاوٛ مٜىٰطٜنْ يٜىٰسُ اَلْمَسِيحُ؞ بَرْکَ مَيْدٜ مَاکٛ دٛوْ غَافَانغَلْ، کٛ وٛنِ ندٜرْ دُونِيَارُ وَرْتِي مٜىٰرٜ تٛ اَمْ، مِنْ مَا مِ وَرْتِي مٜىٰرٜ تٛ مَيْرُ؞ ¹⁵نغَمْ وَلَا فٜىٰرٛوتِرٛلْ حَکُّندٜ نَادَاطٛ اٜ مٛ نَادَاکَ؞ کٛ ٻُرِ وٛنِ اَللَّه وَرْتِرَ نٜطّٛ کٜسٛ؞ ¹⁶جَمْ اَللَّه اٜ يُرْمٜىٰندٜ مَاکٛ تَبِّتَ تٛ ٻٜنْ طٛنْ تٛکّٛوٻٜ اٜکِّتِنٛلْ نغٛعٛلْ، وَاتٛ يِمْٻٜ اَللَّه ٻٜ غٛونغَ؞

¹⁷مِ يٛتِّنَيْ اٜ وِيکِ، تٛع غٛطّٛ ٻٜيْدَ وَنُّکِيَمْ، نغَمْ تَبٛوجٜ طٜ نغٛودُمِ اٜ ٻَنْدُ کٛلِّي مِ مَشُّطٛ يٜىٰسُ؞ ¹⁸جٛومِرَاوٛ مٜىٰطٜنْ يٜىٰسُ اَلْمَسِيحُ بَرْکِطِنَعٛنْ اٛنْ فُو بَنْدِرَاٻٜ اَمْ؞ اَامِنْ؞