اَافِسَنْکٛعٜنْ

طٜرٜوٛلْ نغٛلْ بُلُسْ وِنْدَنِ

اَافِسَنْکٛعٜنْ

حَبَرُ دٛوْ طٜرٜوٛلْ نغٛعٛلْ

طٜرٜوٛلْ نغٛعٛلْ بُلُسْ وِنْدِنغٛلْ شَرٜلْ کٛ اٛ سُرَا ندٜرْ غَرِيرِ رٛومَ نغَمْ وَعَجِنْکِ حَبَرُ يٜىٰسُ؞ اٛ وِنْدِنغٛلْ دُوٻِ 60 غَطَ دَݧْنغٛلْ يٜىٰسُ؞ اَرَنْدٜ اٛ مٜتِي دٛوْ کٛ اَللَّه يِطِ وَطُکِ نغَمْ حَوْتَ فُو کٛ تَغِ غٛنْطُمْ دٛوْ اٜ غٛنْطُمْ ندٜرْ دُونِيَارُ اٛ وَرْتِرَ اَلْمَسِيحُ اَرْدٛتٛوطٛطُمْ؞ ندٜنْ بُلُسْ تٛرَکٜ يِمْٻٜ اَللَّه کَوْتَ حٛورٜ نغَرْتَ غٛعٛ ندٜرْ تٛکُّکِ يٜىٰسُ اَلْمَسِيحُ؞

ندٜرْ طٜرٜوٛلْ نغٛعٛلْ بُلُسْ مٜتِي دٛوْ نٛ اَللَّه سُٻِرِ يِمْٻٜ مُوطُمْ، اٜ نٛ طُمْ يَافٛرِي حَکّٜ مَٻّٜ، اٜ نٛ ٻٜ رِمْطِنِرَا دَغَ حَکّٜ مَٻّٜ بَرْکَ يٜىٰسُ اَلْمَسِيحُ، اٜ نٛ رُوحُ اَللَّه تَبِّتِنِرِ اَلْکَوَلْ مَاکٛ مَنْغَلْ؞ طٛنْمَا اٛ تٛرَکٜ اَافِسَنْکٛعٜنْ وَرْتُکِ غٛعٛ کِ ٻٜ نغَرْتِ ندٜرْ تٛکُّکِ اَلْمَسِيحُ کِ وَرْتَ غٛونغَ ندٜرْ جٛنْدٜ ندٜ ٻٜ نجٛوطٛدِي؞

طُمْ حُوتِرِ بٛلِيطٜ شُوطِيطٜ طُطّٜ نغَمْ حٛلُّکِ يِمْٻٜ اَللَّه نغَرْتِ غٛعٛ ندٜرْ سُمْڤٛوتِرْکِ اٜ اَلْمَسِيحُ؞ مِسَالُ بٛلِيطٜ شُوطِيطٜ طٜنْ نغٛنِ:‏ تٛکُّٻٜ يٜىٰسُ اٜ نَنْدِ اٜ ٻَنْدُ، يٜىٰسُ وٛنِ بٛ حٛورٜ مَيْرُ؞ ندٜنْ اٜ ٻٜ نَنْدِ اٜ مَادِ، يٜىٰسُ وٛنِ بٛ حَيْرٜ دَرْنُندٜ مَادِ ندِنْ؞ طٛنْمَا اٜ ٻٜ نَنْدِ اٜ دٜبّٛ تٜىٰغَلْ، يٜىٰسُ وٛنِ بٛ غٛرْکٛ مَاکٛ؞

کٛوْنٛلْ بُلُسْ

¹مِنْ بُلُسْ مٛ اَللَّه سُٻِ مِ وَرْتَ لِلَاطٛ يٜىٰسُ اَلْمَسِيحُ، وِنْدِ طٜرٜوٛلْ نغٛعٛلْ؞ مِ وِنْدَنْ يِمْٻٜ اَللَّه غٛنْٻٜ ندٜرْ غَرِيرِ اَافِسَ کٛولِيٻٜ يٜىٰسُ اَلْمَسِيحُ اٜ ٻٜرْندٜ غٛعٛ؞ ²اَللَّه ݧَاکٛ مٜىٰطٜنْ اٜ يٜىٰسُ اَلْمَسِيحُ جٛومِرَاوٛ مٜىٰطٜنْ بَرْکِطِنَعٛنْ، حٛکَّعٛنْ جَمْ؞

تٛکُّکِ يٜىٰسُ اٜ وَدَّ بَرْکَ

³يٜتّٛورٜ تَبِّتَ تٛ اَللَّه ݧَاکٛ يٜىٰسُ اَلْمَسِيحُ جٛومِرَاوٛ مٜىٰطٜنْ؞ ندٜرْ سُمْڤٛوتِرْکِ اٜ اَلْمَسِيحُ اٛ حٛکِّيعٜنْ کٛو اِرِ طُمٜ بَرْکَ دَغَ دٛوْ؞ ⁴کٛ دُونِيَارُ تَغٜىٰ، اَللَّه سُٻِيعٜنْ نغَرْتٜنْ ٻٜ مَاکٛ بَرْکَ يٜىٰسُ، نغَمْ نغَرْتٜنْ شٜنِيٻٜ ٻٜ نغَلَا تٛٻّٜلْ حَکّٜ يٜىٰسٛ مَاکٛ؞

⁵اٛ دَرْوِي ندٜرْ يِدّٜ نغَرْتٜنْ ٻِٻّٜ مَاکٛ بَرْکَ يٜىٰسُ اَلْمَسِيحُ، نغَمْ کَنْجُمْ وٛنِ کٛ اٛ يِطَنِعٜنْ؞ نٛنْ وٜلَنِيمٛ؞ ⁶اٜنْ مَنْتُ اَللَّه نغَمْ اٛ يِطِيعٜنْ يِدّٜ مَوْندٜ، نغَمْ شَاحُ طُمْ اٛ حٛکِّعٜنْ بَرْکَ ٻِطّٛ مَاکٛ مٛ اٛ يِطِ؞ ^7‏-8سُمْڤٛوتِرْکِ اٜ يٜىٰسُ رِمْطِنِيعٜنْ بَرْکَ پِيپَمْ مَاکٛ اٛ يَافَنَکٜعٜنْ حَکّٜ مٜىٰطٜنْ، نغَمْ يِدّٜ ندٜ اَللَّه حٛلِّعٜنْ کٜىٰرٛلْ وَلَا؞ يِدّٜ ندٜنْ ندٜ مَوْندٜ؞ ⁹ندٜرْ فَامُ مَاکٛ اٜ اَنْدَلْ مَاکٛ، اٛ حٛلِّيعٜنْ سِرُّ کٛ اٛ يِطِ اٛ وَطَ بَرْکَ اَلْمَسِيحُ؞ ¹⁰فِي طُعُمْ طُمْ اَللَّه يِطِ وَطُکِ اٛ وَطَيْطُمْ تٛ شَرٜلْ وَطِي؞ کٛ اٛ يِطِ وَطُکِ کَنْجُمْ وٛنِ اٛ حَوْتَ کٛو طُمٜ کٛ وٛنِ اٜ لٜيْ اٜ کٛ وٛنِ اٜ دٛوْ وَرْتَ لٜيْ لَامُ اَلْمَسِيحُ؞

¹¹اَللَّه سُٻِيعٜنْ وَرْتِرِيعٜنْ يِمْٻٜ مَاکٛ بَرْکَ يٜىٰسُ اَلْمَسِيحُ؞ کٛ دُونِيَارُ تَغٜىٰ اٛ سِرْيِي فِي طُعُمْ، نغَمْ کَنْکٛ وٛنِ غَطٛووٛ فُو کٛ يِطِ نٛنْ نٛ اٛ يِطِ؞ ¹²اٛ وَطُ نٛنْ نغَمْ اٜنٜنْ، اَرْتُٻٜ نغَطِ ٻٜرْطٜ دٛوْ اَلْمَسِيحُ، نغَطٜنْ جٛنْدٜ مَنْتُکِ تٜدُّنغَلْ اَللَّه؞

¹³اٛنٛنْ مَا، اٛنْ نغَرْتِي يِمْٻٜ اَللَّه شَرٜلْ کٛ نَنْطٛنْ وٛلْدٜ غٛونغَ، وَاتٛ حَبَرُ بٜلْطُمْ دٛوْ يٜىٰسُ غَدَّنْطُمْعٛنْ کِسْندَمْ؞ اٛنْ کٛولَکٜمٛ، اَللَّه بٛو حٛکِّيعٛنْ رُوحُ مُوطُمْ طُمْ اٛ وَطَنِعٛنْ اَلْکَوَلْ؞ رُوحُ طُمْ حٛلِّي اٛنْ نغَرْتِي ٻٜ مَاکٛ؞ ¹⁴ندٜ اٜنْ نغٛودِ رُوحُ اَللَّه، اٜنْ تَبِّتِنِي اٜنْ کٜٻَيْ کٛو طُمٜ بٛطُّمْ طُمْ اَللَّه وَطَنِعٜنْ اَلْکَوَلْ؞ ندٜنْ طُمْ رِمْطِنَيْعٜنْ نغَمْ طُمْ مَنْتَ مَنْغُ اَللَّه؞

دٛعَارٜ بُلُسْ

¹⁵نغَمْ مَاجُمْ، دَغَ شَرٜلْ نغٜلْ نَنُمِ حَبَرُ نٛ کٛولٛرِيطٛنْ جٛومِرَاوٛ مٜىٰطٜنْ يٜىٰسُ اٜ نٛ نغِرُّطٛنْ يِمْٻٜ اَللَّه، ¹⁶مِ اَلَايِ يٜتُّکِ اَللَّه نغَمْ مٛوطٛنْ، اٜ مِ وَطَنَعٛنْ دٛعَارٜ کٛو ندٜيٜ؞ ¹⁷اٜ مِ تٛرٛو اَللَّه مٛ يٜىٰسُ اَلْمَسِيحُ جٛومِرَاوٛ مٜىٰطٜنْ، ݧَاکٛ مٛ مَنْغُ، حٛکَّعٛنْ رُوحُ مُوطُمْ ڤَمْتِنَيْطُمْعٛنْ ٻٜيْدَنَعٛنْ اَنْدَلْ اَللَّه، نغَمْ اَنْدٛنْمٛ بٛطُّمْ؞ ¹⁸اٜ مِ وَطَ دٛعَارٜ کَدِنْ اَللَّه مَٻِّتَ ٻٜرْطٜ مٛوطٛنْ نغَمْ اَنْدٛنْ کَمُّندٜ ندٜ اٛ نٛدِّرِعٛنْ اٜ بَرْکَ مَوْطُمْ طُمْ اٛ وَطَنِ يِمْٻٜ مَاکٛ اَلْکَوَلْ؞

¹⁹طٛنْمَا، اٜ مِ وَطَ دٛعَارٜ اَنْدٛنْ نٛ بَوْطٜ مَاکٛ مَوْطٜ کُوِرْتَ ندٜرْ مٜىٰطٜنْ، اٜنٜنْ تٛکُّٻٜ يٜىٰسُ؞ بَوْطٜ طٜنْ طٜ غٛعٛ اٜ بَوْطٜ شٜمْبِطّٜ ²⁰طٜ اَللَّه حُوتِرِ شَرٜلْ کٛ اٛ اُمِّنِ اَلْمَسِيحُ دَغَ مَيْدٜ اٛ جٛوطِنِمٛ دٛوْ جٛوطٛرْغَلْ لَامُ تٛ جُنْغٛ مَاکٛ ݧَامٛ تٛنْ دٛوْ؞ ²¹تٛنْ يٜىٰسُ لَامِي دٛوْ کٛو مٛيٜ لَامِيطٛ، اٜ لَامُ، اٜ بَوْطٜ، اٜ اَرْدِيطٛ، اٜ کٛو اِرِ طُمٜ لَامُ غٛنْطُمْ دٛوْ اٜ لٜيْ، نَاع جٛونِ تَنْ، اَمَّا حَا اَبَدَا؞ ²²اَللَّه وَطِي کٛو طُمٜ لٜيْ لَامُ مَاکٛ؞ اٛ وَرْتِرِيمٛ اَرْدِيطٛ کٛو طُمٜ اٜ اَرْدِيطٛ کَوْتَلْ تٛکُّٻٜمٛ؞ ²³کَوْتَلْ تٛکُّٻٜ يٜىٰسُ نغٛنِ بٛ ٻَنْدُ مَاکٛ؞ کَنْکٛ بٛو وٛنِ کٜبِّنْطٛ کٛو طُمٜ، اٜ مٛ ندٜرْ مَٻّٜ کٛو تٛيٜ؞

دَغَ مَيْدٜ يَاکِ يٛنْکِ

¹ندٜنّٛ اٛنْ نَنْدِي اٜ يِمْٻٜ مَيْٻٜ، نغَمْ حَکّٜىٰجِ مٛوطٛنْ اٜ وَݧُکِ کٛ اَللَّه وِعِ؞ ²اٜ شَرٜلْ نغٜلْ اٛنْ تٛکَّ طَتٜ دُونِيَارُ کَلُّطٜ؛ اٛنْ تٛکَّ شٜيْطَنْ لَامِيطٛ غِنِّ؞ کَنْکٛ وٛنِ تٛکِّنٛووٛ ٻٜرْطٜ غَݧُٻٜ تٛکَّ کٛ اَللَّه وِعِ؞ ³غٛونغَ، نٛنْ نغِکُّ مٜىٰطٜنْ وَعُنٛو:‏ اٜنْ نغَطَ کٛ نغِطّٜنْ، اٜنْ تٛکَّ کٛ ٻَلِّ مٜىٰطٜنْ اٜ ٻٜرْطٜ مٜىٰطٜنْ نغِطِ؞ اٜنْ دَݧِرَامَ نغِکُّ کَلُّطُمْ بٛ حٛرِيٻٜ ندٜرْ دُونِيَارُ، مٛنّٜرٜ اَللَّه بٛو اٜ دٛوْ مٜىٰطٜنْ؞ ⁴اَمَّا اَللَّه اٛ کٜوْطٛ يُرْمٜىٰندٜ؞ يِدّٜ ندٜ اٛ يِطِعٜنْ ندٜ مَوْندٜ؞ ⁵کٛو ندٜ اٜنْ نَنْدِ اٜ مَيْٻٜ نغَمْ حَکّٜ مٜىٰطٜنْ، اٛ حٛکِّيعٜنْ يٛنْکِ ندٜرْ اَلْمَسِيحُ؞ يِدّٜ مَاکٛ وَطِ کِسُطٜنْ؞ ⁶اٛ اُمِّدِنِيعٜنْ اٜ يٜىٰسُ اَلْمَسِيحُ دَغَ مَيْدٜ، اٛ جٛوطِدِنِعٜنْ اٜ مَاکٛ تٛنْ دٛوْ؞ ⁷اَللَّه وَطِي طُعُمْ نغَمْ اٜ جَامَنُوجِ غَرَيْطِ اٛ حٛلَّ يِدّٜ مَاکٛ ندٜ وَلَا کٜىٰرٛلْ نغَمْ کٛ يٜىٰسُ اَلْمَسِيحُ وَطِ؞ ⁸اٛنْ کِسِي نغَمْ يِدّٜ اَللَّه بَرْکَ حٛولَاکِ يٜىٰسُ؞ نَاع اٛنْ کِسُ نغَمْ غٛطُّمْ طُمْ نغَطّٛنْ، اَمَّا طُمْ شَاحُ اَللَّه، ⁹نَاع نغَمْ کُوطٜ مٛوطٛنْ، نغَمْ تٛع غٛطّٛ مَوْنِنَ حٛورٜ مُوطُمْ؞ ¹⁰اَللَّه وَرْتِرِيعٜنْ کٛ نغٛنْطٜنْ جٛونِ، بَرْکَ يٜىٰسُ اَلْمَسِيحُ اٛ تَغِتَکٜعٜنْ نغَمْ کُوٜنْ کُوطٜ بٛطّٜ طٜ اٛ يِطِ نغَطٜنْ دَغَ اَرَنْدٜ؞

لٜݧِ فُو نغَرْتِ غٛعٛ ندٜرْ سُمْڤٛوتِرْکِ اٜ يٜىٰسُ

¹¹نغَمْ مَاجُمْ، شِفْتٛرٜىٰ نٛ مبَانٛوطٛنْ؞ اٛنٛنْ نَاع اٛنْ يَحُودَنْکٛعٜنْ دَغَ دَݧْنغٛلْ، کَمْٻٜ نٛدِّرٛوٻٜ کٛعٜ مَٻّٜ ‏«‏نَادَاٻٜ،»‏ اٜ ٻٜ نٛدِّرَعٛنْ ‏«‏ٻٜ نَادَاکَ؞»‏ رَا بٛو نَادُکِ کِنْ طُمْ کِ ٻَنْدُ تَنْ، کِ طُمْ وَارَتَ جُوطٜ؞ ¹²شِفْتٛرٜىٰ اٜ نغٜلْ تٛنْ شَرٜلْ اٛنْ اَنْدَانٛ اَلْمَسِيحُ، اٛنْ نغَلَا ندٜرْ يِمْٻٜ ٻٜ اَللَّه سُٻِ، اٛنْ نغَلَا ندٜرْ اَلْکَوَلْ نغَلْ اَللَّه وَطِ، اٛنْ نغَلَا کَمُّندٜ، اٛنْ نغَلَا اَللَّه ندٜرْ دُونِيَارُ؞ ¹³اَمَّا جٛونِ اٛنٛنْ غٛطِّتِيٻٜ اَللَّه ندٜنّٛ، بَرْکَ پِيپَمْ يٜىٰسُ اَلْمَسِيحُ اٛنْ نغَدَّامَ حَادٜ مَاکٛ؞ ¹⁴يٜىٰسُ سِرْيٛوتِرِي حَکُّندٜ يَحُودَنْکٛعٜنْ اٜ يِمْٻٜ نَاع يَحُودَنْکٛعٜنْ، اٛ وَرْتِرِيٻٜ غٛعٛ؞ اٛ اِتِّي نغَݧَاندِ شٜنْدُندِٻٜ؞ ¹⁵مَيْدٜ مَاکٛ اِتِّي سٜمْبٜ اَتَّوْرَ اٜ دٛوکَاجِ يَحُودَنْکٛعٜنْ، نغَمْ ندٜرْ لٜݧِ طِطِ اٛ وُرْتِنَنَ حٛورٜ مَاکٛ لٜݧٛلْ غٛعٛ کٜسٛلْ؞ ندٜ اٛ وَطِ نٛنْ اٛ سِرْيٛوتِرِي لٜݧِ طِنْ؞ ¹⁶بَرْکَ مَيْدٜ مَاکٛ دٛوْ غَافَانغَلْ، اٛ اِتِّي نغَݧَاندِ نغٛنْدِ حَکُّندٜ مَاجِ؞ مَيْدٜ مَاکٛ حَوْتِي کٛعٜ لٜݧِ طِنْ نغَرْتِي غٛعٛ؞ اٛ سٛعِّيطِ تٛ اَللَّه؞ ¹⁷يٜىٰسُ وَرِي وَعَجِنَنِيعٛنْ حَبَرُ بٜلْطُمْ طُمْ جَمْ، اٛنٛنْ يِمْٻٜ نَاع يَحُودَنْکٛعٜنْ غٛطِّتِيٻٜ اَللَّه اٜ يَحُودَنْکٛعٜنْ غٛنْٻٜ حَادٜ مَاکٛ؞ ¹⁸جٛونِ، بَرْکَ اَلْمَسِيحُ اٜنْ فُو، يَحُودَنْکٛعٜنْ اٜ نَاع يَحُودَنْکٛعٜنْ، اٜنْ مبَاوَيْ نجَحٜنْ تٛ ݧَاکٛ مٜىٰطٜنْ مٛ دٛوْ ندٜرْ لَاوٛلْ غٛعٛ، وَاتٛ رُوحُ اَللَّه؞

¹⁹نغَمْ مَاجُمْ، اٛنٛنْ يِمْٻٜ نَاع يَحُودَنْکٛعٜنْ، نَاع اٛنْ حٛٻّٜ کٛو غَرْٻٜ؞ جٛونِ اٛنْ ندٜرْ لٜݧٛلْ يِمْٻٜ اَللَّه اٜ اِيَالُ مَاکٛ؞ ²⁰اٛنْ مَحَامَ دٛوْ فُطّٛودٜ مَادِ ندِ لِلَاٻٜ اٜ اَنَّبٛعٜنْ مَحِ، ندٜنْ يٜىٰسُ اَلْمَسِيحُ اٜ حٛورٜ مُوطُمْ وٛنِ حَيْرٜ دَرْنُندٜ مَادِ ندِنْ؞ ²¹کَنْکٛ جٛغِي مَادِ ندِنْ اٛ مَوْنِنِندِ ندِ وَرْتِ وُرٛ شٜنِينغٛ نغٛ جٛومِرَاوٛ؞ ²²ندٜرْ سُمْڤٛ مٛوطٛنْ اٜ مَاکٛ، اٛنٛنْ مَا اٛنْ مَحِدَامَ اٜ فُو تٛکُّٻٜ يٜىٰسُ نغَمْ نغَرْتٛنْ وِغٜىٰرٜ تٛ رُوحُ اَللَّه جٛوطٛتٛو؞

کُوغَلْ بُلُسْ ندٜرْ يِمْٻٜ نَاع يَحُودَنْکٛعٜنْ

¹کَنْجُمْ وَطِ مِنْ، بُلُسْ، طُمْ مَٻِّيَمْ ندٜرْ سُودُ شُرَلْ نغَمْ اٜ مِ وَعَجِنَ حَبَرُ يٜىٰسُ اَلْمَسِيحُ تٛ اٛنٛنْ يِمْٻٜ نَاع يَحُودَنْکٛعٜنْ؞ ²غٛونغَ اٛنْ نَنِي اَللَّه حٛکِّييَمْ کُوغَلْ نغَعَلْ مِ حُوَنغَلْ نغَمْ ٻٜيْدَارِ مٛوطٛنْ؞ ³اَللَّه حٛلِّييَمْ سِرُّ مُوطُمْ، نٛنْ نٛ مبِنْدِرْمِ سٜطَّ ندٜرْ مَاجُمْ؞ ⁴تٛ اٛنْ جَنْغِي کٛ مبِنْدُمِ، اٛنْ اَنْدَيْ اٜ مِ وٛودِ فَامُ دٛوْ سِرُّ اَلْمَسِيحُ؞ ⁵ندٜنّٛ يِمْٻٜ مبِعَاکَ سِرُّ طُعُمْ، اَمَّا جٛونِ اَللَّه وَنْغِنَنِيطُمْ لِلَاٻٜ مَاکٛ اٜ اَنَّبٛعٜنْ مَاکٛ شٜنِيٻٜ بَرْکَ رُوحُ مَاکٛ؞ ⁶سِرُّ طُمْ وٛنِ بَرْکَ حَبَرُ بٜلْطُمْ دٛوْ يٜىٰسُ اَلْمَسِيحُ يِمْٻٜ نَاع يَحُودَنْکٛعٜنْ کٜٻَيْ کٛو طُمٜ کٛ اَللَّه حٛکَّتَ يَحُودَنْکٛعٜنْ؞ ٻٜ نغَرْتِي بٛ ٻَنْدُ غٛعٛ اٜ يَحُودَنْکٛعٜنْ؞ حَوْتِ اٜ يَحُودَنْکٛعٜنْ ٻٜ کٜٻَيْ کٛ اَللَّه وَطِ اَلْکَوَلْ بَرْکَ يٜىٰسُ اَلْمَسِيحُ؞

⁷بَرْکَ يِدّٜ اٜ بَوْطٜ اَللَّه، مِ حٛکَّامَ دٛکَّلْ حٛکُّکِ حَبَرُ بٜلْطُمْ دٛوْ يٜىٰسُ؞ ⁸کٛو ندٜ مِ ڤَمَرٛ ندٜرْ يِمْٻٜ اَللَّه فُو، اَللَّه سُٻِييَمْ مِ وَعَجِنَنَ يِمْٻٜ نَاع يَحُودَنْکٛعٜنْ دٛوْ بَرْکَ طُمْ لِمَتَاکٛ کٜٻٜتٜىٰطُمْ تٛ اَلْمَسِيحُ؞ ⁹ندٜنْ مِ وَطَ يِمْٻٜ فُو نغِعَ نٛ دَبَرٜ اَللَّه شُوطِيندٜ حٜىٰوِرْتَ؞ اَللَّه تَغُطٛ کٛو طُمٜ سُوطِي سِرُّ طُمْ دَغَ جَامَنُوجِ پَٻِّيطِ؞ ¹⁰اٛ وَطُ نٛنْ نغَمْ ندٜرْ جَامَنُ طُعُمْ، بَرْکَ کَوْتَلْ تٛکُّٻٜ يٜىٰسُ، مَلَاعِکَعٜنْ غٛودُٻٜ لَامُ اٜ بَوْطٜ دٛوْ، ٻٜ اَنْدَ دَبَرٜ اَللَّه مَوْندٜ؞ ¹¹طُعُمْ طُمْ وَطَامَ نٛنْ نٛ اَللَّه يِطِ وَطِرْکِطُمْ دَغَ اَرَنْدٜ، اٛ حٜبِّنِيطُمْ بَرْکَ کٛ يٜىٰسُ اَلْمَسِيحُ جٛومِرَاوٛ مٜىٰطٜنْ وَطِ؞ ¹²بَرْکَ يٜىٰسُ اٜ حٛولَاکِ کِ کٛولِيطٜنْمٛ، جٛونِ اٜنْ مبَاوِ يَاکِ يٜىٰسٛ اَللَّه کُلٛلْ وَلَا، اٜنْ تَبِّتِنَ اٛ جَٻَيْعٜنْ؞ ¹³نغَمْ نٛنْ، اٜ مِ تٛرٛوعٛنْ، تٛع اٛنْ نغٜوْرُ دٛوْ تٛرَّ کَ نجَرَيْمِ نغَمْ مٛوطٛنْ، نغَمْ تٛرَّ کَنْ وَرْتَنَيْعٛنْ فِي بٛطُّمْ؞

يِدّٜ يٜىٰسُ اَلْمَسِيحُ

¹⁴نغَمْ مَاجُمْ، اٜ مِ دِشّٛو اٜ مِ تٛرٛو ݧَاکٛ مٛ دٛوْ؞ ¹⁵فُو لٜݧِ غٛنْطِ دٛوْ اٜ لٜيْ، کَنْکٛ حٛکِّطِ يٛنْکِ؞ ¹⁶اٜ مِ تٛرٛومٛ دَغَ ندٜرْ رِسْکُ مَنْغُ مَاکٛ اٛ سٜمْبِطِنَعٛنْ، اٛ حٛکَّعٛنْ بَوْطٜ لَاوٛلْ رُوحُ مَاکٛ نغَرْتٛنْ شٜمْبِطْٻٜ ندٜرْ ٻٜرْطٜ مٛوطٛنْ، ¹⁷نغَمْ اَلْمَسِيحُ جٛوطٛو ندٜرْ ٻٜرْطٜ مٛوطٛنْ بَرْکَ حٛولَاکِمٛ؞ اٜ مِ تٛرٛو اَللَّه نغَمْ يِدّٜ لُغَّ سٜمْبِطَ ندٜرْ ٻٜرْطٜ مٛوطٛنْ، ¹⁸نغَمْ يِمْٻٜ اَللَّه فُو مبَاوَ اَنْدُکِ نٛ يِدّٜ اَلْمَسِيحُ يَاجِرِ، اٜ نٛ ندٜ جُوتِرِ، اٜ نٛ ندٜ تٛوِرِ، اٜ نٛ ندٜ لُغِّرِ؞ ¹⁹کَدِنْ اٜ مِ يِطِ اَنْدٛنْ يِدّٜ اَلْمَسِيحُ ندٜ ٻُرِي سٜمْبٜ اَنْدَلْ، نغَمْ کٜٻٛنْ کٜىٰوٛنْ نغِکُّ اَللَّه؞

²⁰اَللَّه وَاوَيْ وَطُکِ کٛ ٻُرِ کٛ تٛرِيطٜنْمٛ کٛو کٛ ݧُمٜتٜنْ بَرْکَ بَوْطٜ مَاکٛ کُوٛوجٜ ندٜرْ مٜىٰطٜنْ؞ ²¹مَنْغُ تَبِّتَ تٛ اَللَّه بَرْکَ يٜىٰسُ اَلْمَسِيحُ اٜ تٛکُّٻٜمٛ ندٜرْ جَامَنُوجِ فُو حَا اَبَدَا اَبَدِنْ!‏ اَامِنْ؞

وَرْتُکِ غٛعٛ ندٜرْ رُوحُ اَللَّه

¹نغَمْ نٛنْ، اٜ مِ تٛرٛوعٛنْ، مِنْ شُرَاطٛ نغَمْ حُوَنْکِ جٛومِرَاوٛ مٜىٰطٜنْ، نغَطٜىٰ جٛنْدٜ ڤٛتُّدُندٜ اٜ کٛ اَللَّه نٛدِّرِعٛنْ؞ ²کٛو ندٜيٜ نغَرْتٜىٰ غٛودُٻٜ حَکِّيلٛ، لٜسْتِنٛنْ کٛعٜ مٛوطٛنْ، نغَرْتٛنْ ٻٜ مُݧَلْ، مُݧْمُݧْتِرٛنْ ندٜرْ يِدّٜ؞ ³نغَطٜىٰ کٛ مبَاوٛتٛنْ وَطُکِ نجٛغٛوطٛنْ کَوْتٛلْ حٛورٜ نغٛلْ رُوحُ اَللَّه حٛکِّعٛنْ ندٜرْ جٛنْدٜ جَمْ کَوْتُندٜ کٛعٜ مٛوطٛنْ؞ ⁴اٜنْ نغَرْتِي بٛ ٻَنْدُ غٛعٛ، اٜنْ نغٛودِ رُوحُ غٛعٛ، نٛنْ مَا اٜنْ نغٛودِ کَمُّندٜ وٛعٛيْرٜ ندٜ اَللَّه نٛدِّرِعٜنْ؞ ⁵اٜ وٛودِ جٛومِرَاوٛ غٛعٛتٛ، اٜنْ کٛولِي يٜىٰسُ اَلْمَسِيحُ اٜ حٛولَارٜ وٛعٛيْرٜ، اٜ وٛودِ بَڤْتِسْمَ غٛعٛ؞ ⁶اَللَّه اٛ غٛعٛتٛ، ندٜنْ کَنْکٛ وٛنِ ݧَاکٛ مٜىٰطٜنْ اٜنْ فُو، اٜ مٛ لَامٛو کٛو مٛيٜ، اٜ مٛ حُوتِرَعٜنْ، اٜ مٛ جٛوطٛو ندٜرْ مٜىٰطٜنْ؞

⁷طُمْ حٛکِّي کٛو مٛيٜ مٜىٰطٜنْ دٛکَّلْ نٛنْ نٛ اَلْمَسِيحُ سُٻِرِ؞ ⁸نٛ اَايَارٜ وِعِ،

‏«‏ندٜ اٛ يَحِ وِغٜىٰرٜ تٛوْندٜ،

اٛ يَارِي ٻٜ اٛ نَنْغِ،

اٛ حٛکِّي يِمْٻٜ دٛکّٜ؞»‏

⁹کٛ وٛنِ مَعَنَ اٛ يَحِ وِغٜىٰرٜ تٛوْندٜ؟ مَعَنَ مَاجُمْ وٛنِ، اَرَنْدٜ اَلْمَسِيحُ وَرِي ندٜرْ دُونِيَارُ ندُعُ؞ ¹⁰کَنْکٛ غَرْطٛ ندٜرْ دُونِيَارُ ندُعُ، کَنْکٛ اٛنْ وٛنِ پٜنْتُطٛ تٛنْ دٛوْ تٛ ٻُرِ کٛو تٛيٜ نغَمْ اٛ حٜبِّنَ کٛو طُمٜ؞ ¹¹اٛ سُٻِي وٛٻّٜ نغَرْتَ لِلَاٻٜ، وٛٻّٜ غَطٛوٻٜ اَنَّبَاکُ، وٛٻّٜ وَعَجِنٛوٻٜ، وٛٻّٜ ڤَسْتٛعٜنْ اٜ اٜکِّتِنٛوٻٜ؞ ¹²اٛ وَطُ نٛنْ نغَمْ اٛ سِرْيٛو يِمْٻٜ مَاکٛ نغَمْ ٻٜ کُوَ کُوغَلْ مَاکٛ، نغَمْ تٛکُّٻٜمٛ مَوْنَ، شٜمْبِطَ ندٜرْ تٛکُّکِمٛ؞ ¹³طُمْ وَطَيْ نٛنْ حَا نغَرْتٜنْ غٛعٛ ندٜرْ حٛولَاکِ يٜىٰسُ اٜ ندٜرْ اَنْدَلْ ٻِطّٛ اَللَّه، مَوْنٜنْ ندٜرْ تٛکُّکِ يٜىٰسُ، نغَرْتٜنْ يِمْٻٜ کٜىٰوُٻٜ بٛ اَلْمَسِيحُ؞ ¹⁴ندٜنْ اٜنْ ڤُطِّتَتَا نغَطٜنْ جٛنْدٜ بٛ سُکَحٛيْ، اٜنْ نغَيْلِتَ ٻٜرْطٜ مٜىٰطٜنْ دٛوْ کٛ کٛولِيطٜنْ نغَمْ مَجِّنٛوٻٜ يِمْٻٜ پٛيْرِيعٜنْ اٜ اٜکِّتِنٛلْ فٜوْرٜ؞ ¹⁵اَمَّا اٜنْ مبِعُ غٛونغَ ندٜرْ يِدّٜ، اٜنْ مَوْنُ اٜ کٛو نغٛلٜ لَاوٛلْ نغَرْتٜنْ بٛ اَلْمَسِيحُ؞ مِسَالُ، تٛکُّٻٜمٛ نغٛنِ بٛ ٻَنْدُ مَاکٛ، کَنْکٛ وٛنِ بٛ حٛورٜ مَيْرُ؞ ¹⁶کَنْکٛ حَوْتِ جٛکّٛوطٜ ٻَنْدُ ندُنْ؞ تٛ کٛو طُمٜ اٜ ٻَنْدُ ندُنْ اٜ حُوَ نٛ حَانِ، ٻَنْدُ ندُنْ مَوْنَيْ، سٜمْبِطَ، يِطِندِرَ؞

يٛنْکِ کٜسُمْ ندٜرْ سُمْڤٛوتِرْکِ اٜ يٜىٰسُ

¹⁷اٜ مِ وِعَعٛنْ طُعُمْ، اٜ مِ ٻٜيْدَ وَغِّنْکِعٛنْ ندٜرْ اِنْدٜ جٛومِرَاوٛ، اَلٜىٰ جٛنْدٜ اِرِ ندٜ حٜىٰفٜرْٻٜ ٻٜ ݧُمٛوجِ مٜىٰرٜ؞ ¹⁸ٻٜرْطٜ مَٻّٜ اٜ کٜىٰوِ ݧِوْرٜ؞ ٻٜ نغَلَا ندٜرْ کٜٻَيْٻٜ يٛنْکِ کِ اَللَّه حٛکَّتَ، نغَمْ ٻٜ نغَݧِي اَنْدَلْ، اٜ ٻٜ نغٛودِ کٛعٜ شَاتُطٜ؞ ¹⁹ٻٜ شٜمْتَتَا، ٻٜ نغَطِي کٛعٜ مَٻّٜ دٛوْ وَطُکِ کٛ ٻَلِّ مَٻّٜ نغِطِ، اٜ ٻٜ نغَطَ کٛو اِرِ طُمٜ نغِکُّ نٜفْنِيطُمْ کٜىٰرٛلْ وَلَا؞ ²⁰نَاع اِرِ طُمْ طٛنْ نغِکُّ اٜکِّتِيطٛنْ ندٜ اَنْدُطٛنْ اَلْمَسِيحُ!‏ ²¹مِ تَبِّتِنِي اٛنْ نَنِي حَبَرُ يٜىٰسُ؞ طُمْ اٜکِّتِنِيعٛنْ غٛونغَ نغٛنْکَ ندٜرْ مَاکٛ؞ ²²اَلٜىٰ نغِکُّ طُمْ وٛوطَا طُمْ نغَطَيْنٛوطٛنْ ندٜنّٛ، طُمْ سُونٛ دُونِيَارُ وٛنِّ، مَجِّنِ؞ ²³اٜ حَانِ ݧُمٛ مٛوطٛنْ اٜ نغِکُّ مٛوطٛنْ وَرْتِرٜىٰ کٜسُمْ؞ ²⁴ڤُطّٜىٰ نغِکُّ کٜسُمْ اِرِ طُمْ اَللَّه ندٜرْ اَادِلَاکُ اٜ شٜنَاکِ؞

²⁵نغَمْ مَاجُمْ اَلٜىٰ فٜوْرٜ!‏ کٛو مٛيٜ مٛوطٛنْ دٛولٜ وِعَ بَنْدِرَاوٛ مُوطُمْ غٛونغَ، نغَمْ اٜنْ فُو اٜنْ نغَرْتِي بٛ ٻَنْدُ غٛعٛ ندٜرْ تٛکُّکِ يٜىٰسُ؞ ²⁶تَا مٛنِّي، تَاع جَٻُ مٛنّٜرٜ ندٜنْ وَطُمَا نغَطَا کٛ وٛوطَا؞ تَاع اَلُ نَانغٜ يَنَ اَ مٛنِّ؞ ²⁷ندٜنْ تَاع اَلُ شٜيْطَنْ يَارُمَا تٛ نغَطَتَا کٛ وٛوطَا؞ ²⁸کٛو مٛيٜ غُجّٛ دٛولٜ اَلَ نغُيْکَ؞ اَمَّا اٛ حُوتِرَ جُوطٜ مَاکٛ اٛ حُوَ کُوغَلْ بٛنْغَلْ، نغَمْ اٛ حٜٻَ غٛطُّمْ طُمْ اٛ حٛکّٛرْتَ ٻٜ نغَلَنَا؞ ²⁹تٛع اٛنْ اَلُ وٛکَّ حَالَ کَلُّکَ وُرْتٛو ندٜرْ کٛنْدُطٜ مٛوطٛنْ، اَمَّا سٜيْ نِ حَالَ نجَمَ مبَلَّيْکَ يِمْٻٜ نَنَيْٻٜعٛنْ شٜمْبِطِنَ ٻٜرْطٜ مَٻّٜ؞ ³⁰ڤَامٜىٰ، تٛع مٜتِّنَنٛنْ رُوحُ اَللَّه ٻٜرْندٜ، نغَمْ اَللَّه حٛکِّيعٛنْطُمْ نغَمْ حٛلَّ اٛنٛنْ طُمْ ٻٜ مَاکٛ، ندٜنْ ݧَلْندٜ جَانغٛ اٛ رِمْطِنَيْعٛنْ؞ ³¹اَلٜىٰ کٛو اِرِ ندٜيٜ مٛنّٜرٜ، اٜ مٜتِّنْکِ ٻٜرْندٜ، اٜ مٛنَّنْکِ وٛٻّٜ، اٜ حَوْرٜ، اٜ حُطْحُطْتِرْکِ، اٜ وَطُکِ کٛو اِرِ ندٜيٜ حَلّٜىٰندٜ؞ ³²نغِطِندِرٜىٰ، نجُرْمِنِندِرٜىٰ حَکُّندٜ مٛوطٛنْ، نجَافٛوتِرٜىٰ نٛنْ نٛ اَللَّه يَافٛرَنِيعٛنْ بَرْکَ اَلْمَسِيحُ؞

نٛ حَانِ نجٛوطٛرٛوطٜنْ

¹ندٜ اٛنٛنْ نغٛنِ ٻِٻّٜ ٻٜ اَللَّه يِطِ، اٜکِّتٜىٰ اِرِ نغِکُّ مَاکٛ ندٜرْ جٛنْدٜ مٛوطٛنْ؞ ²نغَطٜىٰ جٛنْدٜ يِدّٜ، نٛنْ نٛ اَلْمَسِيحُ يِطِرِعٜنْ حٛکِّ يٛنْکِ مُوطُمْ نغَمْ مٜىٰطٜنْ؞ اٛ وَرْتِي شَکِّرِ ندِ اَللَّه نَنِ بٜلْطُمْ مَيْرِ بٛ اُرْدٜ وٜلْندٜ؞

³ندٜ اٛنٛنْ اٛنْ يِمْٻٜ اَللَّه، حَانَا طُمْ اِنَّ غٛطُّمْ نغِکُّ کَلُّطُمْ ندٜرْ مٛوطٛنْ بٛ نجٜىٰنُ، کٛو سُونٛ فِي طُمْ اٛنْ نجٜيَايِ؞ ⁴نٛنْ مَا، تٛع طُمْ تَوَ حَالَ کَلُّکَ کٛو بٛلِيطٜ طٜ حَانَا اٜ شِيَ حَکِّيلٛ حَکُّندٜ مٛوطٛنْ، نغَمْ طُمْ حَانَا، اَمَّا اِغَّ نغَطٛنْ کَ يٜتُّکِ اَللَّه؞ ⁵تَبِّتِنٜىٰ طُعُمْ، غَطٛووٛ کُوطٜ کَلُّطٜ بٛ نجٜىٰنُ، کٛو غٛودُطٛ سُونٛ فِي طُمْ اٛ جٜيَايِ وَلَا غٜطَلْ ندٜرْ لَامُ اَلْمَسِيحُ اٜ لَامُ اَللَّه؞ غٛودُطٛ سُونٛ اٛ مَوْنِنٛووٛ فِي دُونِيَارُ؞

⁶تٛع غٛطّٛ پٛيْرَعٛنْ اٜ بٛلِيطٜ مٜىٰرٜ، نغَمْ اِرِ کُوطٜ طٜعٜ وَطِي مٛنّٜرٜ اَللَّه وَرٛيْتَ دٛوْ يِمْٻٜ غَݧُٻٜ نغَطَ کٛ اٛ وِعِ؞ ⁷نغَمْ نٛنْ تٛع اٛنْ کَوْتُ کٛعٜ اٜ مَٻّٜ؞ ⁸نغَمْ ندٜنّٛ ندٜرْ ݧِوْرٜ نغٛنْطٛنْ، اَمَّا جٛونِ ندٜ اٛنْ نغَرْتِي يِمْٻٜ جٛومِرَاوٛ، اٛنْ ندٜرْ جَيْنغٛلْ؞ نغَمْ مَاجُمْ سٜيْ نغَطٛنْ جٛنْدٜ اِرِ ندٜ يِمْٻٜ غٛنْٻٜ ندٜرْ جَيْنغٛلْ؞ ⁹مِ وِعُ نٛنْ نغَمْ جَيْنغٛلْ اٜ وَطَ يِمْٻٜ نغَطَ کٛ وٛوطِ، اٜ کٛ اَللَّه يِطِ، اٜ غٛونغَ؞ ¹⁰نغَطٜىٰ کٛ مبَاوٛتٛنْ اٜکِّتٛوطٛنْ کٛ وٜلْنَنْتَ جٛومِرَاوٛ ٻٜرْندٜ؞ ¹¹نغٛطِّتٜىٰ کُوطٜ مٜىٰرٜ طٜ ݧِوْرٜ طٜ يِمْٻٜ نغَطَتَ، اَمَّا کٛلّٜىٰ کٛ ٻٜ نغَطَتَ طُمْ وٛوطَا؞ ¹²نغَمْ اٜ طُمْ سٜمْتِنِي طُمْ مٜتَ دٛوْ کٛ ٻٜ نغَطَتَ اٜ سُوطٜ؞ ¹³اَمَّا تٛ طُمْ وَدِّي کٛو طُمٜ تٛ جَيْنغٛلْ، طُمْ اَنْدَيْ نٛ طُمْ وٛنْتِندِرِ، ¹⁴نغَمْ جَيْنغٛلْ اٜ حٛلَّ کٛو طُمٜ؞ کَنْجُمْ وَطِ طُمْ وِعِ،

‏«‏اُمَّ، اَنْ طَانِيطٛ،

اُمَّ دَغَ ندٜرْ مَيْٻٜ،

ندٜنْ اَلْمَسِيحُ يٜيْنَنْتٜ؞»‏

¹⁵نغَمْ نٛنْ ڤَامٜىٰ نٛ نجٛوطٛرِيطٛنْ؞ تٛع اٛنْ نغَطُ جٛنْدٜ بٛ حَاݝَاٻٜ، اَمَّا نغَطٜىٰ جٛنْدٜ بٛ يِمْٻٜ ٻٜ اَنْدَلْ؞ ¹⁶فُو شَرٜلْ نغٜلْ کٜٻْطٛنْ نغَمْ وَطُکِ بٛطُّمْ، نغَطٜىٰطُمْ، نغَمْ بَلْطٜ طٜ نغٛنْطٜنْ طٜ کَلُّطٜ؞ ¹⁷نغَمْ مَاجُمْ، تٛع اٛنْ نغَرْتُ حَاݝَاٻٜ، اَمَّا طَٻِّتٜىٰ اَنْدٛنْ کٛ جٛومِرَاوٛ يِطِ نغَطٛنْ؞

¹⁸تٛع اٛنْ نَتِّنْ کٛعٜ مٛوطٛنْ نجَرُ، نغَمْ طُمْ لَاوٛلْ لَلّٜرٜ؞ اَمَّا اَلٜىٰ رُوحُ اَللَّه حٜىٰوَعٛنْ؞ ¹⁹شٜمْبِطِنٜىٰ کٛو مٛيٜ ندٜرْ مٛوطٛنْ اٜ غِمِ جَبُورَ، اٜ غِمِ مَنْتُکِ جٛومِرَاوٛ، اٜ غِمِ طِ اَللَّه حٛکِّعٛنْ ندٜرْ ٻٜرْطٜ؞ نغِمٜىٰ غِمِ مَنْتٛنْ اَللَّه اٜ ٻٜرْطٜ مٛوطٛنْ فُو؞ ²⁰کٛو ندٜيٜ نغٜتّٜىٰ اَللَّه ݧَاکٛ مٜىٰطٜنْ مٛ دٛوْ نغَمْ کٛو طُمٜ ندٜرْ اِنْدٜ جٛومِرَاوٛ مٜىٰطٜنْ يٜىٰسُ اَلْمَسِيحُ؞

رٜوْٻٜ اٜ وٛرْٻٜ

²¹کٛکِّندِرٜىٰ مَنْغُ نغَمْ مَوْنِنْکِ اَلْمَسِيحُ؞

²²اٛنٛنْ رٜوْٻٜ تٜىٰغَلْ، کٛکّٜىٰ وٛرْٻٜ مٛوطٛنْ مَنْغُ نٛنْ نٛ مَوْنِنِرْتٛنْ جٛومِرَاوٛ؞ ²³نغَمْ غٛرْکٛ وٛنِ اَرْدِيطٛ دٜبّٛ مُوطُمْ نٛنْ نٛ اَلْمَسِيحُ وٛنِ اَرْدِيطٛ تٛکُّٻٜمٛ؞ کَنْکٛ اٜ حٛورٜ مَاکٛ وٛنِ کِسْنٛووٛٻٜ؞ ²⁴نٛنْ نٛ کَوْتَلْ تٛکُّٻٜ يٜىٰسُ مَوْنِنِرْتَمٛ، نٛنْ مَا رٜوْٻٜ غٛودُٻٜ تٜىٰغَلْ مَوْنِنَ وٛرْٻٜ مَٻّٜ ندٜرْ کٛو طُمٜ؞

²⁵اٛنٛنْ وٛرْٻٜ، نغِطٜىٰ رٜوْٻٜ مٛوطٛنْ نٛ اَلْمَسِيحُ يِطِرِ کَوْتَلْ تٛکُّٻٜمٛ حٛکِّ يٛنْکِ مُوطُمْ نغَمْ مَٻّٜ؞ ²⁶اٛ وَطُ نٛنْ نغَمْ اٛ وَرْتِرَ تٛکُّٻٜمٛ شٜنِيٻٜ بَرْکَ بَوْطٜ وٛلْدٜ مَاکٛ، اٛ لٛوتِرِيٻٜ ندِيَمْ نغَمْ اٛ وَرْتِرَٻٜ لَاٻُٻٜ؞ ²⁷اَلْمَسِيحُ وَطِي طُعُمْ نغَمْ اٛ حٛشَّنَ حٛورٜ مَاکٛ تٛکُّٻٜمٛ ٻٜ نغَرْتَ لَٻّٜ، ٻٜ نغَلَا کٛو غٛطُّمْ نٜفْنِيطُمْ، کٛو غٛطُّمْ طُمْ وٛوطَا يِيکِ؞ کَدِنْ ٻٜ نغَرْتَ شٜنِيٻٜ ٻٜ نغَلَا غٛطُّمْ طُمْ وٛوطَا؞ ²⁸نٛنْ حَانِ وٛرْٻٜ نغِطِرَ رٜوْٻٜ مَٻّٜ بٛ ٻَلِّ مَٻّٜ؞ غِطّٛ دٜبّٛ مُوطُمْ فُو يِطِي حٛورٜ مُوطُمْ؞ ²⁹نغَمْ وَلَا نٜطّٛ مٜىٰطُطٛ وَݧَ ٻَنْدُ مُوطُمْ؞ سٜيْ نِ اٛ فَامَنَنْدُ، اٛ يِطَندُ نٛ يٜىٰسُ اَلْمَسِيحُ وَطَنْتَ کَوْتَلْ تٛکُّٻٜمٛ؞ ³⁰نغَمْ اٜنٜنْ تٛکُّٻٜمٛ نغٛنِ بٛ ٻَنْدُ مَاکٛ؞ ³¹نٛ اَايَارٜ وِعِ، ‏«‏نغَمْ مَاجُمْ سٜيْ نٜطّٛ اَلَ ݧَاکٛ مُوطُمْ اٜ مَدُوجٛ مُوطُمْ تَکَّنٛو دٜبّٛ مُوطُمْ، ٻٜ فُو طِطٛ ٻٜ نغَرْتَ ٻَنْدُ غٛعٛ؞»‏ ³²اٜ وٛودِ سِرُّ لُغُّطُمْ مَوْطُمْ ندٜرْ اَايَارٜ ندٜعٜ؞ مِ فَامِي اٜ طُمْ مٜتَ دٛوْ اَلْمَسِيحُ اٜ کَوْتَلْ تٛکُّٻٜمٛ؞ ³³فُو اٜ نٛنْ، کٛو مٛيٜ ندٜرْ مٛوطٛنْ يِطَ دٜبّٛ مُوطُمْ نٛ يِطِرِ حٛورٜ مُوطُمْ، ندٜنْ کٛو مٛيٜ دٜبّٛ حٛکَّ غٛرْکٛ مُوطُمْ مَنْغُ؞

سُکَاٻٜ اٜ دَݧٛوٻٜ

¹اٛنٛنْ سُکَاٻٜ، ندٜ اٛنْ تٛکُّٻٜ يٜىٰسُ، کٛکّٜىٰ دَݧٛوٻٜ مٛوطٛنْ مَنْغُ، نغَمْ نٛنْ اٜ وٛوطِ؞ ²‏«‏حٛکُّ ݧَاکٛ مَاطَ اٜ مَدُوجٛ مَاطَ مَنْغُ؞»‏ ندٜرْ کٛ اَللَّه وِعِ طُمْ وَطَ، کَنْجُمْ وٛنِ اَرَنْدٜجُمْ غٛودُطُمْ اَلْکَوَلْ؞ ³اَلْکَوَلْ نغَلْ وٛنِ، ‏«‏اَ جٛوطٛتٛ جَمْ، نٜىٰٻَا اٜ دُونِيَارُ؞»‏

⁴اٛنٛنْ دَݧٛوٻٜ، تٛع اٛنْ نغَطُ ٻِٻّٜ مٛوطٛنْ مٛنَّ، اَمَّا اٜکِّتِنٜىٰٻٜ نغِکُّ بٛطُّمْ ٻٜ مَوْنَ ندٜرْ لَاوٛلْ جٛومِرَاوٛ؞

مَشُّٻٜ اٜ جٜيْٻٜٻٜ

⁵اٛنٛنْ مَشُّٻٜ، نغَطَنٜىٰ جٜيْٻٜعٛنْ غٛنْٻٜ ندٜرْ دُونِيَارُ ندُعُ کٛ ٻٜ مبِعِعٛنْ ندٜرْ مَنْغُ؞ نغَطٜىٰطُمْ اٜ ٻٜرْندٜ غٛعٛ بٛ اَلْمَسِيحُ نغَطَنْتٛنْ؞ ⁶نغَطَنٜىٰٻٜ نٛنْ نَاع اٜ شَرٜلْ نغٜلْ ٻٜ نغِعَتَعٛنْ تَنْ، کٛو بٛو نغَمْ ٻٜ ٻٜيْدَ يِطُکِعٛنْ؞ اَمَّا اٜ ٻٜرْندٜ غٛعٛ نغَطٜىٰ کٛ اَللَّه يِطِ بٛ مَشُّٻٜ اَلْمَسِيحُ؞ ⁷کُوَنٜىٰ جٜيْٻٜعٛنْ ندٜرْ ٻٜرْندٜ بٜلْندٜ بٛ جٛومِرَاوٛ کُوَنْتٛنْ، نَاع يِمْٻٜ؞ ⁸اٛنْ اَنْدِ جٛومِرَاوٛ وَاتَنَيْ کٛو مٛيٜ کٛو طُمٜ فِي بٛطُّمْ طُمْ وَطِ، کٛو اٛ مَشُّطٛ، کٛو نَاع اٛ مَشُّطٛ؞

⁹اٛنٛنْ مَا جٜيْٻٜ مَشُّٻٜ ٻٜنْ، دٛولٜ نغَطَنٛنْٻٜ کٛ حَانِ؞ تٛع اٛنْ مبِعُ اٛنْ ڤِيَيْٻٜ، نغَمْ اٛنْ اَنْدِ اٛنٛنْ اٜ مَشُّٻٜ مٛوطٛنْ اٛنْ نغٛودِ مَوْطٛ غٛعٛتٛ غٛنْطٛ دٛوْ، اٛ وَلَا يِدّٜ حٛورٜ؞

حٛنُکِ شٜيْطَنْ

¹⁰کٛ مبِعَيْمِ شَکِتِيطُمْ وٛنِ اَلٜىٰ بَوْطٜ مَوْطٜ طٜ جٛومِرَاوٛ مٜىٰطٜنْ سٜمْبِطِنَعٛنْ؞ ¹¹ٻٛرْنٜىٰ فُو کٛلْتٜ کٛنُ طٜ اَللَّه حٛکِّعٛنْ نغَمْ مبَاوٛنْ دَرَاکِ، نغَݧٛنْ پٛيْرٜ شٜيْطَنْ؞ ¹²نغَمْ نَاع يِمْٻٜ کٛنْدٜتٜنْ، اَمَّا اٜنْ کٛنْدَ اٜ غِنِّ غٛنْطِ دٛوْ، لَامٛتٛوطِ، اٜ غٛودُطِ بَوْطٜ، اٜ جٛغِيطِ لَامُ دُونِيَارُ ندُعُ ندُ جَامَنُ ݧِوْرٜ؞ ¹³نغَمْ نٛنْ، ٻٛرْنٜىٰ فُو کٛلْتٜ کٛنُ طٜ اَللَّه، نغَمْ تٛ ݧَلْندٜ کَلُّندٜ وَرِي، مبَاوٛنْ دَرَاکِ نغَݧٛنْ پٛيْرٜ شٜيْطَنْ؞ غَطَ اٛنْ نجٛتِّنِي کٛو طُمٜ، طُمْ تَوَ اٛنْ ندَرِي؞

¹⁴نغَمْ نٛنْ، ندَرٜىٰ اٛنْ شِرْيِي؞ غٛونغَ وَرْتَ تَادٛرْدٜ مٛوطٛنْ، اَادِلَاکُ وَرْتَ تٛغّٛورٜ نجَمْندِ مٛوطٛنْ ندٜ کٛنُ؞ ¹⁵سِرْيَاکِ يَارُکِ حَبَرُ بٜلْطُمْ دٛوْ يٜىٰسُ اَلْمَسِيحُ طُمْ جَمْ وَرْتَ بٛ ڤَطٜ تٛ کٛيْطٜ مٛوطٛنْ؞ ¹⁶غَطَ مَاجُمْ مَا، حٛولَاکِ يٜىٰسُ وَرْتَ کٛ نجٛغٛتٛوطٛنْ تَٻّٛو ݧِفَ حِيتٜ ڤِطِلّٜ طٜ غَݧٛ کَلُّطٛ اٛنْ طٛنْ فِطٛيِ؞ ¹⁷کُمْنٜىٰ حُمْنٜىٰرٜ نجَمْندِ ندٜ کٛنُ، وَاتٛ کِسْندَمْ؞ کٛشّٜىٰ کَافَحِ رُوحُ اَللَّه، وَاتٛ وٛلْدٜ مَاکٛ؞ ¹⁸کٛو ندٜيٜ نغَطٜىٰ کَ وَطُکِ دٛعَارٜ نٛ رُوحُ اَللَّه حٛلِّرِعٛنْ ندٜرْ کٛو طُمٜ طُمْ نغَطٛتٛنْ؞ کَدِنْ نغَطٛنْ کَ تٛرَاکِ اَللَّه وَلَّعٛنْ؞ نغَمْ فِي طُعُمْ، ڤَامٜىٰ، تٛع اٛنْ نجَٻُ شٛمٛنْ، کٛو ندٜيٜ نغَطٜىٰ کَ وَطَنْکِ يِمْٻٜ اَللَّه فُو دٛعَارٜ؞ ¹⁹مِنْ مَا، نغَطَنٜىٰيَمْ دٛعَارٜ اَللَّه حٛکَّيَمْ بٛلِيطٜ طٜ مبِعَيْمِ، مِ اَنْدِنَ يِمْٻٜ سِرُّ حَبَرُ بٜلْطُمْ دٛوْ يٜىٰسُ اَلْمَسِيحُ کُلٛلْ وَلَا؞ ²⁰نغَمْ حٛکُّکِ حَبَرُ طُمْ نغَرْتُمِ لِلَاطٛ يٜىٰسُ، کٛو ندٜ جٛونِ اٜ مِ ندٜرْ سُودُ شُرَلْ؞ نغَطٜىٰ دٛعَارٜ نغَمْ مِ وَطَ کَ حٛکُّکِ حَبَرُ طُمْ نٛ حَانِ کُلٛلْ وَلَا؞

کٛوْنٛلْ شَکِتِينغٛلْ

²¹تِيکِکُسْ، بَنْدِرَاوٛ مٜىٰطٜنْ مٛ نغِطّٜنْ، مَشُّطٛ مٛ غٛونغَ ندٜرْ کُوغَلْ جٛومِرَاوٛ، اٛ حٛکَّيْعٛنْ فُو حَبَرُ نجَمُ اَمْ اٜ نٛ نغٛنْتِندِرْمِ؞ ²²کَنْجُمْ وَطِ لِلٛيْمٛومِ تٛ مٛوطٛنْ، نغَمْ اٛ وِعَعٛنْ نٛ کٛو مٛيٜ اَمِنْ وٛنْتِندِرِ اٛ سٜمْبِطِنَ ٻٜرْطٜ مٛوطٛنْ؞

²³اَللَّه ݧَاکٛ مٜىٰطٜنْ مٛ دٛوْ اٜ جٛومِرَاوٛ مٜىٰطٜنْ يٜىٰسُ اَلْمَسِيحُ حٛکَّ فُو تٛکُّٻٜ يٜىٰسُ جَمْ اٜ يِدّٜ اٜ حٛولَارٜ؞ ²⁴اَللَّه بَرْکِطِنَ کٛو مٛيٜ غِطّٛ جٛومِرَاوٛ مٜىٰطٜنْ يٜىٰسُ اَلْمَسِيحُ يِدّٜ ندٜ رٜعَتَا؞